𑁨. 𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀅𑀦𑁆𑀢𑀭𑀝𑁆𑀞𑀸𑀦𑀸𑀦𑀻𑀢𑀺 𑀅𑀦𑁆𑀢𑀭𑀺𑀓𑀝𑁆𑀞𑀸𑀦𑀸𑀦𑀺. 𑀦𑀺𑀯𑀸𑀭𑀓𑀝𑁆𑀞𑀸𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀘 𑀆𑀓𑀸𑀲𑁂𑀦 𑀘 𑀕𑀫𑀦𑀢𑁄. 𑀬𑀤𑀺 𑀲𑁄 𑀪𑀯𑀸𑀦𑀁 𑀅𑀦𑁆𑀢𑀭𑀸 𑀦 𑀲𑀺𑀬𑀸𑀢𑀺 𑀲𑁄 𑀅𑀦𑁆𑀢𑀭𑀸𑀪𑀯𑁄 𑀓𑀸𑀫𑀪𑀯𑀸𑀤𑀻𑀦𑀁 𑀪𑀯𑀸𑀦𑀁 𑀅𑀦𑁆𑀢𑀭𑁂 𑀬𑀤𑀺 𑀦 𑀪𑀯𑁂𑀬𑁆𑀬. 𑀦 𑀦𑀸𑀫 𑀅𑀦𑁆𑀢𑀭𑀸𑀪𑀯𑁄𑀢𑀺 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀢𑁆𑀣𑀺 𑀦𑀸𑀫 𑀅𑀦𑁆𑀢𑀭𑀸𑀪𑀯𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀲𑀓𑀯𑀸𑀤𑀺𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 𑀓𑀸𑀭𑀡𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀣 𑀔𑁄 𑀢𑀣𑀸 𑀅𑀦𑀺𑀘𑁆𑀙𑀦𑁆𑀢𑁄 𑀓𑁂𑀯𑀮𑀁 𑀮𑀤𑁆𑀥𑀺𑀬𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀅𑀢𑁆𑀣𑁄.

𑁫𑁦𑁬. 𑀚𑀸𑀢𑀻𑀢𑀺 𑀦 𑀇𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁦𑁭. 𑀏𑀯𑀁 𑀢𑀁 𑀢𑀢𑁆𑀣 𑀦 𑀇𑀘𑁆𑀙𑀢𑀻𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀯𑀺𑀬 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀁 𑀢𑀢𑁆𑀣 𑀅𑀦𑁆𑀢𑀭𑀸𑀪𑀯𑀸𑀯𑀢𑁆𑀣𑀸𑀬 𑀦 𑀇𑀘𑁆𑀙𑀢𑀺. 𑀲𑁄 𑀳𑀺 𑀢𑀲𑁆𑀲 𑀪𑀸𑀯𑀺𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀢𑁄 𑀏𑀯 𑀧𑀯𑀢𑁆𑀢𑀺𑀁 𑀇𑀘𑁆𑀙𑀢𑀺, 𑀢𑀲𑁆𑀫𑀸 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀅𑀦𑀺𑀘𑁆𑀘𑀢𑁄 𑀓𑀼𑀢𑁄 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸. 𑀅𑀬𑀜𑁆𑀘 𑀯𑀸𑀤𑁄 𑀅𑀦𑁆𑀢𑀭𑀸𑀪𑀯𑀯𑀸𑀤𑀻𑀦𑀁 𑀏𑀓𑀘𑁆𑀘𑀸𑀦𑀁 𑀯𑀼𑀢𑁆𑀢𑁄. 𑀬𑁂 ‘‘𑀅𑀧𑁆𑀧𑀓𑁂𑀦 𑀓𑀸𑀮𑁂𑀦 𑀲𑀢𑁆𑀢𑀸𑀳𑁂𑀦𑁂𑀯 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀤𑀦𑁆𑀢𑀺, 𑀬𑁂 𑀧𑀦 ‘‘𑀢𑀢𑁆𑀣𑁂𑀯 𑀘𑀯𑀺𑀢𑁆𑀯𑀸 𑀆𑀬𑀸𑀢𑀻𑀢𑀺 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑀸𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸𑀢𑀺 𑀢𑁂 𑀅𑀥𑀼𑀦𑀸𑀢𑀦𑀸 𑀤𑀝𑁆𑀞𑀩𑁆𑀩𑀸 𑀧𑀸𑀴𑀺𑀬𑀁 ‘‘𑀅𑀦𑁆𑀢𑀭𑀸𑀪𑀯𑁂 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺 𑀚𑀻𑀬𑀦𑁆𑀢𑀺 𑀫𑀻𑀬𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻𑀢𑀺? 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂’’𑀢𑀺 𑀆𑀕𑀢𑀢𑁆𑀢𑀸. 𑀬𑀣𑀸 𑀘𑁂𑀢𑀁, 𑀏𑀯𑀁 𑀦𑀺𑀭𑀬𑀽𑀧𑀕𑀸𑀤𑀺𑀪𑀸𑀯𑀫𑁆𑀧𑀺𑀲𑁆𑀲 𑀅𑀥𑀼𑀦𑀸𑀢𑀦𑀸 𑀧𑀝𑀺𑀚𑀸𑀦𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀯𑀤𑀦𑁆𑀢𑀺 ‘‘𑀉𑀤𑁆𑀥𑀁𑀧𑀸𑀤𑁄 𑀢𑀼 𑀦𑀸𑀭𑀓𑁄’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀦𑀺𑀲𑁆𑀲𑀸𑀬 𑀧𑀭𑀯𑀸𑀤𑀻 𑀅𑀦𑁆𑀢𑀭𑀸𑀪𑀯𑀁 𑀦𑀸𑀫 𑀧𑀭𑀺𑀓𑀧𑁆𑀧𑁂𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀳𑀺 ‘‘𑀅𑀯𑀺𑀳𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀯𑀲𑁂𑀲𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀲𑀼𑀢𑁆𑀢𑀧𑀤𑀲𑁆𑀲 𑀅𑀬𑀫𑀢𑁆𑀣𑁄, 𑀦 𑀅𑀦𑁆𑀢𑀭𑀸𑀪𑀯𑀪𑀽𑀢𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀼𑀢𑁆𑀢𑀧𑀤𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸’’𑀢𑀺.

𑀬𑁂 𑀧𑀦 ‘‘𑀲𑀫𑁆𑀪𑀯𑁂𑀲𑀻𑀢𑀺 𑀯𑀘𑀦𑀢𑁄 𑀅𑀢𑁆𑀣𑁂𑀯 𑀅𑀦𑁆𑀢𑀭𑀸𑀪𑀯𑁄. 𑀲𑁄 𑀳𑀺 𑀲𑀫𑁆𑀪𑀯𑀁 𑀉𑀧𑀧𑀢𑁆𑀢𑀺𑀁 𑀏𑀲𑀢𑀻𑀢𑀺 𑀲𑀫𑁆𑀪𑀯𑁂𑀲𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀧𑀺 𑀬𑁂 𑀪𑀽𑀢𑀸𑀯 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀔𑀻𑀡𑀸𑀲𑀯𑀸 ‘‘𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸’’𑀢𑀺 𑀏𑀢𑁆𑀣 ‘‘𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀸. 𑀢𑀩𑁆𑀩𑀺𑀥𑀼𑀭𑀢𑀸𑀬 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄, 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀲𑁂𑀓𑁆𑀔𑀸 𑀧𑀼𑀣𑀼𑀚𑁆𑀚𑀦𑀸. 𑀘𑀢𑀽𑀲𑀼 𑀯𑀸 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀅𑀡𑁆𑀟𑀓𑁄𑀲𑀢𑁄 𑀯𑀢𑁆𑀣𑀺𑀓𑁄𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀻 𑀦𑀸𑀫, 𑀢𑀢𑁄 𑀧𑀭𑀁 𑀪𑀽𑀢𑀸 𑀦𑀸𑀫𑀸𑀢𑀺 𑀏𑀯𑀁 𑀉𑀚𑀼𑀓𑁂 𑀧𑀸𑀴𑀺𑀅𑀦𑀼𑀕𑀢𑁂 𑀅𑀢𑁆𑀣𑁂 𑀲𑀢𑀺 𑀓𑀺𑀁 𑀅𑀦𑀺𑀤𑁆𑀥𑀸𑀭𑀺𑀢𑀲𑁆𑀲 𑀧𑀢𑁆𑀣𑀺𑀬𑁂𑀦 𑀅𑀦𑁆𑀢𑀭𑀸𑀪𑀯𑁂𑀦 𑀅𑀢𑁆𑀢𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑁂𑀦 𑀧𑀬𑁄𑀚𑀦𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸.

𑀬𑀁 𑀧𑀦𑁂𑀓𑁂 ‘‘𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂𑀲𑀼 𑀧𑀸𑀢𑀼𑀪𑀸𑀯𑁄 𑀤𑀺𑀝𑁆𑀞𑁄. 𑀬𑀣𑀸 𑀢𑀁 𑀯𑀻𑀳𑀺𑀆𑀤𑀺𑀅𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂, 𑀏𑀯𑀁 𑀲𑀯𑀺𑀜𑁆𑀜𑀸𑀡𑀓𑀲𑀦𑁆𑀢𑀸𑀦𑁂𑀧𑀺 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂 𑀧𑀸𑀢𑀼𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀘 𑀦𑀬𑁄 𑀲𑀢𑀺 𑀅𑀦𑁆𑀢𑀭𑀸𑀪𑀯𑁂 𑀬𑀼𑀚𑁆𑀚𑀢𑀺, 𑀦𑀸𑀜𑁆𑀜𑀣𑀸’’𑀢𑀺 𑀬𑀼𑀢𑁆𑀢𑀺𑀁 𑀯𑀤𑀦𑁆𑀢𑀺, 𑀢𑁂𑀳𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀔𑀡𑁂𑀦 𑀩𑁆𑀭𑀳𑁆𑀫𑀮𑁄𑀓𑀢𑁄 𑀇𑀥𑀽𑀧𑀲𑀗𑁆𑀓𑀫𑀦𑁂 𑀇𑀢𑁄 𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀦𑁂 𑀬𑀼𑀢𑁆𑀢𑀺 𑀯𑀢𑁆𑀢𑀩𑁆𑀩𑀸. 𑀬𑀤𑀺 𑀲𑀩𑁆𑀩𑀢𑁆𑀣𑁂𑀯 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀦 𑀇𑀘𑁆𑀙𑀺𑀢𑀸, 𑀬𑀤𑀺𑀧𑀺 𑀲𑀺𑀬𑀸 ‘‘𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺, 𑀢𑀁 𑀇𑀥𑀸𑀧𑀺 𑀲𑀫𑀸𑀦𑀁 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺 𑀯𑀘𑀦𑀢𑁄, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀅𑀘𑀺𑀦𑁆𑀢𑁂𑀬𑁆𑀬𑀲𑀪𑀸𑀯𑀸 𑀳𑀺 𑀲𑀪𑀸𑀯𑀥𑀫𑁆𑀫𑀸, 𑀢𑁂 𑀓𑀢𑁆𑀣𑀘𑀺 𑀧𑀘𑁆𑀘𑀬𑀯𑀲𑁂𑀦 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀓𑀢𑁆𑀣𑀘𑀺 𑀅𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀘. 𑀢𑀣𑀸 𑀳𑀺 𑀫𑀼𑀔𑀖𑁄𑀲𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀲𑁆𑀫𑀺𑀁 𑀤𑁂𑀲𑁂 𑀆𑀤𑀸𑀲𑀧𑀩𑁆𑀩𑀢𑀧𑀤𑁂𑀲𑀸𑀤𑀺𑀓𑁂 𑀧𑀝𑀺𑀩𑀺𑀫𑁆𑀩𑀧𑀝𑀺𑀖𑁄𑀲𑀸𑀤𑀺𑀓𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀝𑁆𑀞𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀧𑀝𑀺𑀩𑀺𑀫𑁆𑀩𑀁 𑀢𑀸𑀯 𑀅𑀲𑀺𑀤𑁆𑀥𑀢𑁆𑀢𑀸 𑀅𑀲𑀤𑀺𑀲𑀢𑁆𑀢𑀸 𑀘 𑀦 𑀦𑀺𑀤𑀲𑁆𑀲𑀦𑀁. 𑀧𑀝𑀺𑀩𑀺𑀫𑁆𑀩𑀜𑁆𑀳𑀺 𑀦𑀸𑀫 𑀅𑀜𑁆𑀜𑀤𑁂𑀯 𑀭𑀽𑀧𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀺𑀤𑁆𑀥𑀫𑁂𑀢𑀁. 𑀲𑀺𑀤𑁆𑀥𑀺𑀬𑀫𑁆𑀧𑀺 𑀅𑀲𑀤𑀺𑀲𑀢𑁆𑀢𑀸 𑀦 𑀦𑀺𑀤𑀲𑁆𑀲𑀦𑀁 𑀲𑀺𑀬𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀺𑀦𑁆𑀦𑀁 𑀲𑀳𑀞𑀸𑀦𑀸𑀪𑀸𑀯𑀢𑁄. 𑀬𑀢𑁆𑀣𑁂𑀯 𑀳𑀺 𑀆𑀤𑀸𑀲𑀭𑀽𑀧𑀁 𑀧𑀝𑀺𑀩𑀺𑀫𑁆𑀩𑀭𑀽𑀧𑀜𑁆𑀘 𑀤𑀺𑀲𑁆𑀲𑀢𑀺, 𑀦 𑀘 𑀏𑀓𑀲𑁆𑀫𑀺𑀁 𑀤𑁂𑀲𑁂 𑀭𑀽𑀧𑀤𑁆𑀯𑀬𑀲𑁆𑀲 𑀲𑀳𑀪𑀸𑀯𑁄 𑀬𑀼𑀢𑁆𑀢𑁄 𑀦𑀺𑀲𑁆𑀲𑀬𑀪𑀽𑀢𑀤𑁂𑀲𑀢𑁄, 𑀅𑀲𑀤𑀺𑀲𑀜𑁆𑀘𑁂𑀢𑀁 𑀲𑀦𑁆𑀥𑀸𑀦𑀢𑁄. 𑀦 𑀳𑀺 𑀫𑀼𑀔𑀲𑁆𑀲 𑀧𑀝𑀺𑀩𑀺𑀫𑁆𑀩𑀲𑀦𑁆𑀥𑀸𑀦𑀪𑀽𑀢𑀁 𑀆𑀤𑀸𑀲𑀲𑀦𑁆𑀥𑀸𑀦𑀲𑀫𑁆𑀩𑀦𑁆𑀥𑀢𑁆𑀢𑀸 𑀲𑀦𑁆𑀥𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀤𑁂𑀲𑀦𑁆𑀢𑀭𑁂 𑀧𑀸𑀢𑀼𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀦 𑀅𑀲𑀦𑁆𑀢𑀸𑀦𑀦𑁆𑀢𑀺 𑀅𑀲𑀫𑀸𑀦𑀫𑁂𑀯 𑀢𑀦𑁆𑀢𑀺.

𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀧𑀝𑀺𑀩𑀺𑀫𑁆𑀩𑀁 𑀦𑀸𑀫 𑀅𑀜𑁆𑀜𑀤𑁂𑀯 𑀭𑀽𑀧𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀲𑀺𑀤𑁆𑀥𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀺𑀦𑁆𑀦𑀁 𑀲𑀳𑀞𑀸𑀦𑀪𑀸𑀯𑀢𑁄’’𑀢𑀺, 𑀢𑀬𑀺𑀤𑀁 𑀅𑀲𑀦𑁆𑀢𑀸𑀦𑀫𑁂𑀯 𑀲𑀳𑀞𑀸𑀦𑀁 𑀘𑁄𑀤𑀺𑀢𑀁 𑀪𑀺𑀦𑁆𑀦𑀦𑀺𑀲𑁆𑀲𑀬𑀢𑁆𑀢𑀸. 𑀦 𑀳𑀺 𑀪𑀺𑀦𑁆𑀦𑀦𑀺𑀲𑁆𑀲𑀬𑀸𑀦𑀁 𑀲𑀳𑀞𑀸𑀦𑀁 𑀅𑀢𑁆𑀣𑀺. 𑀬𑀣𑀸 𑀅𑀦𑁂𑀓𑁂𑀲𑀁 𑀫𑀡𑀺𑀤𑀻𑀧𑀸𑀤𑀻𑀦𑀁 𑀧𑀪𑀸𑀭𑀽𑀧𑀁 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀧𑀯𑀢𑁆𑀢𑀫𑀸𑀦𑀁 𑀅𑀘𑁆𑀙𑀺𑀢𑀫𑀸𑀦𑀢𑀸𑀬 𑀦𑀺𑀭𑀦𑁆𑀢𑀭𑀢𑀸𑀬 𑀘 𑀅𑀪𑀺𑀦𑁆𑀦𑀝𑁆𑀞𑀸𑀦𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀪𑀺𑀦𑁆𑀦𑀦𑀺𑀲𑁆𑀲𑀬𑀢𑁆𑀢𑀸 𑀧𑀦 𑀪𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀢𑀁, 𑀕𑀳𑀡𑀯𑀺𑀲𑁂𑀲𑁂𑀦 𑀢𑀣𑀸𑀅𑀪𑀺𑀦𑁆𑀦𑀝𑁆𑀞𑀸𑀦𑀫𑀢𑁆𑀢𑀁, 𑀏𑀯𑀁 𑀆𑀤𑀸𑀲𑀭𑀽𑀧𑀧𑀝𑀺𑀩𑀺𑀫𑁆𑀩𑀭𑀽𑀧𑁂𑀲𑀼𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀤𑀺𑀲𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀳𑀺 𑀢𑀢𑁆𑀣 𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀕𑀘𑁆𑀙𑀢𑀺 𑀘, 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀽𑀧𑀕𑀫𑀦𑀢𑁄. 𑀅𑀜𑁆𑀜𑀣𑀸 𑀆𑀮𑁄𑀓𑁂𑀦 𑀯𑀺𑀦𑀸𑀧𑀺 𑀧𑀜𑁆𑀜𑀸𑀬𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀦 𑀕𑁄𑀘𑀭𑁄 𑀯𑀺𑀬 𑀲𑀺𑀬𑀸. 𑀢𑀲𑁆𑀲 𑀧𑀦 𑀲𑀸𑀫𑀕𑁆𑀕𑀺𑀬𑀸 𑀲𑁄 𑀆𑀦𑀼𑀪𑀸𑀯𑁄, 𑀬𑀁 𑀢𑀣𑀸 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀥𑀫𑁆𑀫𑀸𑀦𑀁 𑀲𑀸𑀫𑀢𑁆𑀣𑀺𑀬𑀪𑁂𑀤𑁄𑀢𑀺 𑀯𑀤𑀦𑁆𑀢𑁂𑀦𑀧𑀺 𑀅𑀬𑀫𑁂𑀯𑀢𑁆𑀣𑁄 𑀲𑀸𑀥𑀺𑀢𑁄 𑀪𑀺𑀦𑁆𑀦𑀦𑀺𑀲𑁆𑀲𑀬𑀲𑁆𑀲𑀧𑀺 𑀅𑀪𑀺𑀦𑁆𑀦𑀝𑁆𑀞𑀸𑀦𑀲𑁆𑀲 𑀯𑀺𑀬 𑀉𑀧𑀝𑁆𑀞𑀸𑀦𑀢𑁄. 𑀏𑀢𑁂𑀦𑁂𑀯 𑀉𑀤𑀓𑀸𑀤𑀻𑀲𑀼 𑀧𑀝𑀺𑀩𑀺𑀫𑁆𑀩𑀭𑀽𑀧𑀸𑀪𑀸𑀯𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑀺𑀤𑁆𑀥𑁂 𑀘 𑀧𑀝𑀺𑀩𑀺𑀫𑁆𑀩𑀭𑀽𑀧𑁂 𑀢𑀲𑁆𑀲 𑀦𑀺𑀤𑀲𑁆𑀲𑀦𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺 𑀳𑁂𑀢𑀼𑀨𑀮𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀢𑀸𑀯𑀺𑀪𑀸𑀯𑀦𑀢𑁄. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀲𑀤𑀺𑀲𑀢𑁆𑀢𑀸 𑀦 𑀦𑀺𑀤𑀲𑁆𑀲𑀦’’𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀦 𑀳𑀺 𑀦𑀺𑀤𑀲𑁆𑀲𑀦𑀁 𑀦𑀸𑀫 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀦 𑀲𑀩𑁆𑀩𑀤𑀸 𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀘𑀼𑀢𑀺𑀓𑁆𑀔𑀦𑁆𑀥𑀸𑀥𑀸𑀦𑀢𑁄 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑀫𑀼𑀔𑀭𑀽𑀧𑀢𑁄 𑀯𑀺𑀘𑁆𑀙𑀺𑀦𑁆𑀦𑁂 𑀞𑀸𑀦𑁂 𑀢𑀲𑁆𑀲 𑀨𑀮𑀪𑀽𑀢𑀁 𑀧𑀝𑀺𑀩𑀺𑀫𑁆𑀩𑀭𑀽𑀧𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀏𑀢𑁆𑀣 𑀢𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀢𑁂𑀦 𑀅𑀲𑀦𑁆𑀢𑀸𑀦𑀘𑁄𑀤𑀦𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀯𑀸 𑀫𑀼𑀔𑀧𑀝𑀺𑀩𑀺𑀫𑁆𑀩𑀭𑀽𑀧𑀸𑀦𑀁 𑀳𑁂𑀢𑀼𑀨𑀮𑀪𑀸𑀯𑁄 𑀲𑀺𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀲𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺. 𑀳𑁂𑀢𑀼𑀨𑀮𑀪𑀸𑀯𑀲𑀫𑁆𑀩𑀦𑁆𑀥𑁂𑀲𑀼 𑀳𑀺 𑀲𑀦𑁆𑀢𑀸𑀦𑀯𑁄𑀳𑀸𑀭𑁄. 𑀬𑀣𑀸𑀯𑀼𑀢𑁆𑀢𑀤𑁆𑀯𑀻𑀳𑀺𑀓𑀸𑀭𑀡𑁂𑀳𑀺 𑀧𑀝𑀺𑀩𑀺𑀫𑁆𑀩𑀁 𑀉𑀧𑁆𑀧𑀚𑁆𑀚𑀢𑀺 𑀩𑀺𑀫𑁆𑀩𑀢𑁄 𑀆𑀤𑀸𑀲𑀢𑁄 𑀘, 𑀦 𑀘𑁂𑀯𑀁 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀼𑀧𑁆𑀧𑀢𑁆𑀢𑀺. 𑀬𑀣𑀸 𑀘𑁂𑀢𑁆𑀣 𑀧𑀝𑀺𑀩𑀺𑀫𑁆𑀩𑀭𑀽𑀧𑀁 𑀦𑀺𑀤𑀲𑁆𑀲𑀺𑀢𑀁, 𑀏𑀯𑀁 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀬𑁄𑀧𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀬𑁄 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀅𑀕𑀦𑁆𑀢𑁆𑀯𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀇𑀤𑀁 𑀘𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘𑀸𑀬𑀁 𑀅𑀦𑁆𑀢𑀭𑀸𑀪𑀯𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀬𑀤𑀺 ‘‘𑀥𑀫𑁆𑀫𑀸𑀦𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀼𑀧𑁆𑀧𑀢𑁆𑀢𑀺 𑀦 𑀬𑀼𑀢𑁆𑀢𑀸’’𑀢𑀺 𑀅𑀦𑁆𑀢𑀭𑀸𑀪𑀯𑁄 𑀧𑀭𑀺𑀓𑀧𑁆𑀧𑀺𑀢𑁄, 𑀭𑀸𑀳𑀼𑀆𑀤𑀻𑀦𑀁 𑀲𑀭𑀻𑀭𑁂 𑀓𑀣𑀫𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑀺𑀓𑁂𑀲𑀼 𑀧𑀸𑀤𑀝𑁆𑀞𑀸𑀦𑀳𑀤𑀬𑀝𑁆𑀞𑀸𑀦𑁂𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀫𑀦𑁄𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀬𑀼𑀢𑁆𑀢𑀸. 𑀬𑀤𑀺 𑀏𑀓𑀲𑀦𑁆𑀢𑀸𑀦𑀪𑀸𑀯𑀢𑁄, 𑀇𑀥𑀸𑀧𑀺 𑀢𑀁𑀲𑀫𑀸𑀦𑀁. 𑀦 𑀘𑁂𑀢𑁆𑀣 𑀅𑀭𑀽𑀧𑀥𑀫𑁆𑀫𑀪𑀸𑀯𑀢𑁄 𑀅𑀮𑀁 𑀧𑀭𑀺𑀳𑀸𑀭𑀸𑀬 𑀧𑀜𑁆𑀘𑀯𑁄𑀓𑀸𑀭𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀢𑁆𑀢𑀸. 𑀯𑀢𑁆𑀢𑀫𑀸𑀦𑁂𑀳𑀺 𑀢𑀸𑀯 𑀧𑀘𑁆𑀘𑀬𑁂𑀳𑀺 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑁂 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀲𑀺𑀤𑁆𑀥𑀸, 𑀓𑀺𑀫𑀗𑁆𑀕𑀁 𑀧𑀦 𑀅𑀢𑀻𑀢𑁂𑀳𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀳𑀺. 𑀬𑀢𑁆𑀣 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀢𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀲𑀳𑀪𑀸𑀯𑀻𑀦𑀜𑁆𑀘 𑀔𑀦𑁆𑀥𑀸𑀦𑀁 𑀲𑀫𑁆𑀪𑀯𑁄𑀢𑀺 𑀮𑀤𑁆𑀥𑁄𑀓𑀸𑀲𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀲𑁆𑀲 𑀅𑀯𑀲𑁂𑀲𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑀲𑁆𑀲 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀁 𑀦𑀸𑀮𑀁 𑀯𑀺𑀘𑁆𑀙𑀺𑀦𑁆𑀦𑀤𑁂𑀲𑀢𑀸 𑀯𑀺𑀩𑀦𑁆𑀥𑀸𑀬. 𑀬𑀣𑀸 𑀘 𑀅𑀦𑁂𑀓𑀓𑀧𑁆𑀧𑀲𑀳𑀲𑁆𑀲𑀦𑁆𑀢𑀭𑀺𑀓𑀸𑀧𑀺 𑀘𑀼𑀢𑀺𑀓𑁆𑀔𑀦𑁆𑀥𑀸 𑀉𑀧𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀦 𑀓𑀸𑀮𑀤𑀽𑀭𑀢𑀸, 𑀏𑀯𑀁 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑀺𑀓𑀸𑀧𑀺 𑀢𑁂 𑀢𑁂𑀲𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀦 𑀤𑁂𑀲𑀤𑀽𑀭𑀢𑀸. 𑀏𑀯𑀁 𑀘𑀼𑀢𑀺𑀓𑁆𑀔𑀦𑁆𑀥𑀦𑀺𑀭𑁄𑀥𑀸𑀦𑀦𑁆𑀢𑀭𑀁 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀦𑀢𑁆𑀣𑁂𑀯 𑀅𑀦𑁆𑀢𑀭𑀸𑀪𑀯𑁄. 𑀅𑀲𑀢𑀺 𑀘 𑀢𑀲𑁆𑀫𑀺𑀁 𑀬𑀁 𑀢𑀲𑁆𑀲 𑀓𑁂𑀘𑀺 ‘‘𑀪𑀸𑀯𑀺𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀼𑀦𑁄 𑀢𑀢𑁄 𑀏𑀯 𑀪𑀸𑀯𑀺𑀧𑀼𑀭𑀺𑀫𑀓𑀸𑀮𑀪𑀯𑀸𑀓𑀸𑀭𑁄 𑀲𑀚𑀸𑀢𑀺𑀲𑀼𑀤𑁆𑀥𑀤𑀺𑀩𑁆𑀩𑀘𑀓𑁆𑀔𑀼𑀕𑁄𑀘𑀭𑁄 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀕𑀫𑀦𑁄 𑀕𑀦𑁆𑀥𑀸𑀳𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀸𑀓𑀸𑀭𑀸𑀤𑀺𑀁 𑀯𑀡𑁆𑀡𑁂𑀦𑁆𑀢𑀺, 𑀢𑀁 𑀯𑀜𑁆𑀛𑀸𑀢𑀦𑀬𑀲𑁆𑀲 𑀭𑀲𑁆𑀲𑀤𑀻𑀖𑀲𑀸𑀫𑀢𑀸𑀤𑀺𑀯𑀺𑀯𑀸𑀤𑀲𑀤𑀺𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑁆𑀢𑀭𑀸𑀪𑀯𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.