𑁭. 𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸

𑁪𑁯𑁨. 𑀅𑀢𑁆𑀢𑀯𑀚𑁆𑀚𑁂𑀳𑀻𑀢𑀺 𑀨𑀲𑁆𑀲𑀯𑀚𑁆𑀚𑁂𑀳𑀺. 𑀦 𑀳𑀺 𑀲𑁄 𑀏𑀯 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀳𑁄𑀢𑀺. 𑀲𑁄𑀢𑀺 𑀨𑀲𑁆𑀲𑀫𑁂𑀯 𑀧𑀘𑁆𑀘𑀸𑀫𑀲𑀢𑀺. 𑀲𑀸𑀯𑀚𑁆𑀚𑀦𑁂𑀢𑀺 𑀆𑀯𑀚𑁆𑀚𑀦𑀲𑀳𑀺𑀢𑁂, 𑀆𑀯𑀚𑁆𑀚𑀦𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀏𑀯 𑀧𑀯𑀢𑁆𑀢𑀦𑀓𑁂𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀪𑀽𑀢𑀫𑁂𑀯𑀸𑀢𑀺 𑀬𑁂𑀦 𑀓𑀫𑁆𑀫𑀼𑀦𑀸 𑀬𑀣𑀸𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀦𑀺𑀩𑁆𑀩𑀢𑁆𑀢𑀺𑀢𑀸, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀫𑁂𑀯. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀓𑀤𑀼𑀓𑁆𑀔𑀲𑁆𑀲. ‘‘𑀫𑀽𑀮𑀢𑀡𑁆𑀳𑀸’’𑀢𑀺 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸, 𑀢𑀣𑀸 ‘‘𑀉𑀧𑀦𑀺𑀲𑁆𑀲𑀬𑀪𑀽𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀓𑀫𑁆𑀫𑀸𑀬𑀽𑀳𑀦𑀲𑁆𑀲 𑀓𑀸𑀭𑀡𑀪𑀽𑀢𑀸 𑀧𑀼𑀭𑀺𑀫𑀲𑀺𑀤𑁆𑀥𑀸 𑀢𑀡𑁆𑀳𑀸 𑀓𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑁄, 𑀓𑀢𑀽𑀧𑀘𑀺𑀢𑁂 𑀓𑀫𑁆𑀫𑁂 𑀪𑀯𑀸𑀤𑀻𑀲𑀼 𑀦𑀫𑀦𑀯𑀲𑁂𑀦 𑀧𑀯𑀢𑁆𑀢𑀸 𑀳𑀺 𑀯𑀺𑀧𑀸𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑁄.

𑁪𑁯𑁩. 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀅𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀪𑀸𑀯𑁄 𑀲𑀓𑀲𑀫𑀬𑀯𑀲𑁂𑀦 𑀘𑁄𑀤𑀦𑀸𑀬 𑀬𑀼𑀚𑁆𑀚𑀫𑀸𑀦𑀢𑀸.

𑁪𑁯𑁪. 𑀓𑀫𑁆𑀫𑁂 𑀲𑀢𑀻𑀢𑀺 𑀇𑀫𑀺𑀦𑀸 𑀓𑀫𑁆𑀫𑀲𑁆𑀲 𑀧𑀣𑀯𑀻𑀆𑀤𑀻𑀦𑀁 𑀧𑀘𑁆𑀘𑀬𑀢𑀸𑀫𑀢𑁆𑀢𑀫𑀸𑀳, 𑀦 𑀚𑀦𑀓𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀁𑀲𑀁𑀯𑀢𑁆𑀢𑀦𑀺𑀓𑀁 𑀦𑀸𑀫 𑀳𑁄𑀢𑀻’’𑀢𑀺.

𑀧𑀣𑀯𑀻𑀓𑀫𑁆𑀫𑀯𑀺𑀧𑀸𑀓𑁄𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.