𑁧𑁦. 𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁯. 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀓𑁆𑀔𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀅𑀧𑁆𑀧𑀝𑀺𑀯𑀺𑀭𑀢𑀸’’𑀢𑀺 (𑀤𑀻. 𑀦𑀺. 𑁩.𑁨𑁭𑁬, 𑁨𑁮𑁬) 𑀆𑀕𑀢𑀢𑁆𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀁𑀯𑀭𑀸𑀲𑀁𑀯𑀭𑀲𑀩𑁆𑀪𑀸𑀯𑁄 𑀅𑀯𑀺𑀯𑀸𑀤𑀲𑀺𑀤𑁆𑀥𑁄. 𑀬𑀢𑁆𑀣 𑀧𑀦 𑀯𑀺𑀯𑀸𑀤𑁄, 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀢𑀸𑀯𑀢𑀺𑀁𑀲𑀸𑀤𑀬𑁄 𑀕𑀳𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀢𑀸𑀯𑀢𑀺𑀁𑀲𑁂𑀲𑀼 𑀲𑀁𑀯𑀭𑀸𑀲𑀁𑀯𑀭𑁄 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂. 𑀲𑀼𑀭𑀸𑀧𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀼𑀬𑁆𑀬𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀓𑀣𑀁 𑀲𑀼𑀬𑁆𑀬𑀢𑀻𑀢𑀺? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀼𑀫𑁆𑀪𑀚𑀸𑀢𑀓𑁂 𑁋

‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀧𑀼𑀩𑁆𑀩𑀤𑁂𑀯𑀸 𑀧𑀫𑀢𑁆𑀢𑀸,

𑀢𑀺𑀤𑀺𑀯𑀸 𑀘𑀼𑀢𑀸 𑀲𑀲𑁆𑀲𑀢𑀺𑀬𑀸 𑀲𑀫𑀸𑀬𑀸;

𑀢𑀁 𑀢𑀸𑀤𑀺𑀲𑀁 𑀫𑀚𑁆𑀚𑀫𑀺𑀫𑀁 𑀦𑀺𑀭𑀢𑁆𑀣𑀁,

𑀚𑀸𑀦𑀁 𑀫𑀳𑀸𑀭𑀸𑀚 𑀓𑀣𑀁 𑀧𑀺𑀯𑁂𑀬𑁆𑀬𑀸’’𑀢𑀺. (𑀚𑀸. 𑁧.𑁧𑁬.𑁫𑁮);

𑀢𑀢𑁆𑀣 𑀧𑀼𑀩𑁆𑀩𑀤𑁂𑀯𑀸 𑀦𑀸𑀫 𑀅𑀲𑀼𑀭𑀸. 𑀢𑁂 𑀳𑀺 𑀢𑀸𑀯𑀢𑀺𑀁𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑀤𑁂𑀯𑀸𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀧𑀫𑀢𑁆𑀢𑀸𑀢𑀺 𑀲𑀼𑀭𑀸𑀧𑀸𑀦𑁂𑀦 𑀧𑀫𑀸𑀤𑀁 𑀆𑀧𑀦𑁆𑀦𑀸. 𑀢𑀺𑀤𑀺𑀯𑀸𑀢𑀺 𑀫𑀦𑀼𑀲𑁆𑀲𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀮𑁄𑀓𑁂 𑀉𑀧𑀸𑀤𑀸𑀬 𑀢𑀢𑀺𑀬𑀮𑁄𑀓𑀪𑀽𑀢𑀸 𑀤𑁂𑀯𑀝𑁆𑀞𑀸𑀦𑀸, 𑀦𑀸𑀫𑀫𑁂𑀯 𑀯𑀸 𑀏𑀢𑀁 𑀢𑀲𑁆𑀲 𑀤𑁂𑀯𑀝𑁆𑀞𑀸𑀦𑀲𑁆𑀲. 𑀲𑀲𑁆𑀲𑀢𑀺𑀬𑀸𑀢𑀺 𑀓𑁂𑀯𑀮𑀁 𑀤𑀻𑀖𑀸𑀬𑀼𑀓𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑀸𑀬𑀸 𑀲𑀳 𑀅𑀢𑁆𑀢𑀦𑁄 𑀅𑀲𑀼𑀭𑀫𑀸𑀬𑀸𑀬, 𑀅𑀲𑀼𑀭𑀫𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀼𑀢𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸𑀢𑀺 𑀦𑁂𑀯𑀸𑀲𑀺𑀓𑀸 𑀕𑀦𑁆𑀥𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀲𑀓𑀧𑀭𑀺𑀲𑀸𑀬 𑀲𑀜𑁆𑀜𑀫𑀤𑀸𑀲𑀻’’𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀲𑀼𑀭𑀸𑀧𑀸𑀦𑀁 𑀅𑀲𑀁𑀯𑀭𑁄 𑀦 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻’’𑀢𑀺. 𑀏𑀢𑁆𑀣 𑀘 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀼𑀭𑀸𑀧𑀸𑀦𑀫𑁆𑀧𑀺 𑀢𑀢𑁆𑀣 𑀦𑀸𑀳𑁄𑀲𑀺, 𑀧𑀕𑁂𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄𑀢𑀺 𑀯𑀺𑀭𑀫𑀺𑀢𑀩𑁆𑀩𑀸𑀪𑀸𑀯𑀢𑁄 𑀏𑀯 𑀢𑀸𑀯𑀢𑀺𑀁𑀲𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺 𑀤𑁂𑀯𑀮𑁄𑀓𑁂𑀲𑀼 𑀲𑀫𑀸𑀤𑀸𑀦𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦 𑀧𑀼𑀭𑁂𑀢𑀩𑁆𑀩𑀸 𑀲𑀁𑀯𑀭𑀸 𑀦 𑀲𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀲𑀦𑁆𑀢𑀺𑀬𑁂𑀯. 𑀢𑀣𑀸 𑀢𑁂𑀳𑀺 𑀧𑀳𑀸𑀢𑀩𑁆𑀩𑀸 𑀅𑀲𑀁𑀯𑀭𑀸. 𑀦 𑀳𑀺 𑀅𑀧𑁆𑀧𑀳𑀻𑀦𑀸𑀦𑀼𑀲𑀬𑀸𑀦𑀁 𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀻𑀢𑀺.

𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.