𑁪. 𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀫𑀕𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀏𑀓𑀤𑁂𑀲𑁂𑀦 𑀯𑀺𑀫𑀼𑀢𑁆𑀢𑀁 𑀏𑀓𑀤𑁂𑀲𑁂𑀦 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀬𑀁 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀤𑁄𑀲𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀏𑀓𑀤𑁂𑀲𑀁 𑀯𑀺𑀫𑀼𑀢𑁆𑀢𑀁, 𑀏𑀓𑀤𑁂𑀲𑀁 𑀅𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀜𑁆𑀳𑀺 𑀢𑀤𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁂𑀓𑀤𑁂𑀲𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺𑀲𑁆𑀲 𑀮𑀤𑁆𑀥𑀻’’𑀢𑀺 𑀤𑀲𑁆𑀲𑀺𑀢𑁄𑀯𑀸𑀬𑀫𑀢𑁆𑀣𑁄. 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁂𑀢𑀺 𑀯𑀺𑀫𑀼𑀘𑁆𑀘𑀦𑀓𑀺𑀭𑀺𑀬𑀸𑀬 𑀅𑀧𑀭𑀺𑀬𑁄𑀲𑀺𑀢𑀢𑀸𑀦𑀺𑀤𑁆𑀤𑁂𑀲𑁂. 𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀫𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀦𑁆𑀢𑀺 𑀯𑀺𑀧𑁆𑀧𑀓𑀢𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦𑀸𑀢𑀺 𑀧𑀭𑀯𑀸𑀤𑀺𑀦𑀸. 𑀯𑀺𑀫𑀼𑀘𑁆𑀘…𑀧𑁂… 𑀯𑀼𑀢𑁆𑀢𑀁 𑀯𑀺𑀫𑀼𑀘𑁆𑀘𑀫𑀸𑀦𑀲𑁆𑀲 𑀯𑀺𑀫𑀼𑀢𑁆𑀢𑀪𑀸𑀯𑀸𑀪𑀸𑀯𑀢𑁄, 𑀯𑀺𑀫𑀼𑀢𑁆𑀢𑀪𑁂𑀤𑁂𑀦 𑀧𑀦 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺 𑀘 𑀤𑁄𑀲𑁂 𑀯𑀺𑀧𑁆𑀧𑀓𑀢𑀦𑀺𑀤𑁆𑀤𑁂𑀲𑁂𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀤𑁂𑀲𑁄 𑀯𑀺𑀲𑁂𑀲𑀦𑀁 𑀳𑁄𑀢𑀺 𑀦𑀺𑀧𑁆𑀧𑀤𑁂𑀲𑀯𑀺𑀫𑀼𑀢𑁆𑀢𑀺𑀬𑀸 𑀅𑀯𑀺𑀘𑁆𑀙𑀺𑀦𑁆𑀦𑀢𑁄. 𑀨𑀮𑀘𑀺𑀢𑁆𑀢𑁂𑀦𑀸𑀢𑀺 𑀧𑀞𑀫𑀨𑀮𑀘𑀺𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑁂𑀦.

𑀯𑀺𑀫𑀼𑀘𑁆𑀘𑀫𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.