𑁧. 𑀩𑀮𑀓𑀣𑀸𑀯𑀡𑁆𑀡𑀦𑀸

𑁩𑁫𑁪. 𑀦𑀺𑀤𑁆𑀤𑁂𑀲𑀢𑁄𑀢𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀧𑁆𑀧𑀓𑀸𑀭𑀢𑁄. 𑀲𑁄 𑀧𑀦 𑀬𑀲𑁆𑀫𑀸 𑀯𑀺𑀢𑁆𑀣𑀸𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀺𑀢𑁆𑀣𑀸𑀭𑀢𑁄’’𑀢𑀺. 𑀲𑀩𑁆𑀩𑀁 𑀓𑀺𑀮𑁂𑀲𑀸𑀯𑀭𑀡𑀸𑀤𑀺𑀁, 𑀢𑀫𑁂𑀯 𑀧𑀘𑁆𑀘𑁂𑀓𑀁 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄 𑀲𑀩𑁆𑀩𑀸𑀓𑀸𑀭𑀁. ‘‘𑀲𑀩𑁆𑀩’’𑀦𑁆𑀢𑀺 𑀳𑀺 𑀇𑀤𑀁 𑀲𑀭𑀽𑀧𑀢𑁄 𑀕𑀳𑀡𑀁, ‘‘𑀲𑀩𑁆𑀩𑀸𑀓𑀸𑀭𑀢𑁄’’𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀢𑁄. 𑀪𑀕𑀯𑀸 𑀳𑀺 𑀥𑀫𑁆𑀫𑁂 𑀚𑀸𑀦𑀦𑁆𑀢𑁄 𑀢𑁂𑀲𑀁 𑀆𑀓𑀸𑀭𑀪𑁂𑀤𑁂 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀚𑀸𑀦𑀸𑀢𑀺. 𑀬𑀣𑀸𑀳 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫). 𑀉𑀤𑁆𑀤𑁂𑀲𑀢𑁄𑀢𑀺 𑀏𑀓𑀤𑁂𑀲𑀢𑁄. 𑀏𑀓𑀤𑁂𑀲𑁄 𑀘 𑀯𑀺𑀢𑁆𑀣𑀸𑀭𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁄’’𑀢𑀺. 𑀬𑀣𑀸 𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀧𑀻𑀢𑀺 𑀤𑀺𑀝𑁆𑀞𑀺𑀕𑀢𑀬𑀣𑀸𑀪𑀽𑀢𑀜𑀸𑀡𑀸𑀤𑀺𑀧𑁆𑀧𑀪𑁂𑀤𑀸𑀦𑀁 𑀆𑀲𑀬𑀸𑀤𑀻𑀦𑀁 𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑀧𑀺. 𑀢𑁂𑀦𑀸𑀳 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀚𑀸𑀦𑀦𑀫𑀢𑁆𑀢𑀁 𑀲𑀦𑁆𑀥𑀸𑀬𑀸’’𑀢𑀺. 𑀣𑁂𑀭𑁂𑀦𑀸𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦. 𑀏𑀯𑀫𑁂𑀯𑀸𑀢𑀺 𑀉𑀤𑁆𑀤𑁂𑀲𑀢𑁄 𑀞𑀸𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀸𑀓𑀸𑀭𑁂𑀦𑁂𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀓𑀯𑀸𑀤𑀺𑀦𑀸𑀧𑀺 𑀇𑀘𑁆𑀙𑀺𑀢𑁄𑀬𑁂𑀯𑀸𑀢𑀺 𑀆𑀳 ‘‘𑀓𑀣𑀫𑀬𑀁 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸’’𑀢𑀺.

𑁩𑁫𑁬. 𑀲𑁂𑀲𑁂𑀲𑀽𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀢𑁄 𑀲𑁂𑀲𑁂𑀲𑀼. 𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀲𑀸𑀥𑀸𑀭𑀡𑀢𑀸𑀧𑀝𑀺𑀓𑁆𑀔𑁂𑀧𑁄. 𑀦𑀦𑀼 𑀘 𑀲𑁂𑀲𑀸𑀦𑀁 𑀅𑀲𑀸𑀥𑀸𑀭𑀡𑀢𑀸𑀧𑀺 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀞𑀸𑀦𑀸…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺.

𑀩𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.