𑁯. 𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀳𑁂𑀯𑀢𑁆𑀣𑀺𑀓𑀣𑀸𑀬𑀁 ‘‘𑀲𑀩𑁆𑀩𑁄 𑀥𑀫𑁆𑀫𑁄 𑀲𑀓𑀪𑀸𑀯𑁂𑀦 𑀅𑀢𑁆𑀣𑀺 𑀧𑀭𑀪𑀸𑀯𑁂𑀦 𑀦𑀢𑁆𑀣𑀻’’𑀢𑀺 𑀧𑀯𑀢𑁆𑀢𑁄 𑀧𑀭𑀯𑀸𑀤𑀻𑀯𑀸𑀤𑁄 𑀬𑀣𑀸 𑀯𑀺𑀪𑀚𑁆𑀚 𑀧𑀝𑀺𑀧𑀼𑀘𑁆𑀙𑀸 𑀯𑀸 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄, 𑀏𑀯𑀁 𑀏𑀓𑀁𑀲𑀢𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄 𑀯𑀺𑀲𑁂𑀲𑀸𑀪𑀸𑀯𑀢𑁄, 𑀓𑁂𑀯𑀮𑀁 𑀞𑀧𑀦𑀻𑀬𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑁂𑀦𑀸’’𑀢𑀺. 𑀬𑀣𑀸 𑀳𑀺 𑀲𑀩𑁆𑀩𑁂 𑀯𑀸𑀤𑀸 𑀲𑀧𑁆𑀧𑀝𑀺𑀯𑀸𑀤𑀸𑀯𑀸𑀢𑀺 𑀧𑀝𑀺𑀜𑁆𑀜𑀸 𑀪𑀽𑀢𑀓𑀣𑀦𑀢𑁆𑀢𑀸 𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑀸 𑀉𑀧𑁂𑀓𑁆𑀔𑀺𑀢𑀩𑁆𑀩𑀸, 𑀏𑀯𑀫𑀬𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀉𑀧𑁂𑀓𑁆𑀔𑀺𑀢𑀩𑁆𑀩𑁂𑀦𑀸’’𑀢𑀺. 𑀅𑀣 𑀯𑀸 𑀅𑀯𑀢𑁆𑀢𑀩𑁆𑀩𑀁 𑀉𑀢𑁆𑀢𑀭𑀁 𑀅𑀯𑀢𑁆𑀢𑀩𑁆𑀩𑀼𑀢𑁆𑀢𑀭𑀁. 𑀬𑀣𑀸 𑀅𑀦𑀺𑀘𑁆𑀘𑀯𑀸𑀤𑀺𑀦𑀁 𑀧𑀢𑀺 𑀅𑀦𑀺𑀘𑁆𑀘𑁄 𑀲𑀤𑁆𑀤𑁄 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑁄𑀢𑀺, 𑀉𑀢𑁆𑀢𑀭𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀤𑁆𑀥𑀲𑀸𑀥𑀦𑀪𑀸𑀯𑀢𑁄, 𑀏𑀯𑀁 𑀇𑀥𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀺𑀤𑁆𑀥𑀲𑀸𑀥𑀦𑀜𑁆𑀳𑀺 𑀤𑀟𑁆𑀠𑀲𑁆𑀲 𑀟𑀳𑀦𑀲𑀤𑀺𑀲𑀢𑁆𑀢𑀸 𑀦𑀺𑀭𑀢𑁆𑀣𑀓𑀫𑁂𑀯 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀧𑀭𑀯𑀸𑀤𑀺𑀦𑀸 𑀬𑁂𑀦 𑀲𑀪𑀸𑀯𑁂𑀦 𑀬𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑁄 𑀯𑀺𑀦𑀸 𑀓𑀸𑀮𑀪𑁂𑀤𑀸𑀤𑀺𑀧𑀭𑀸𑀫𑀲𑀦𑁂𑀦 𑀦𑀢𑁆𑀣𑀻𑀢𑀺 𑀧𑀢𑀺𑀝𑁆𑀞𑀸𑀧𑀻𑀬𑀢𑀺, 𑀢𑀲𑁆𑀫𑀸 ‘‘𑀅𑀬𑁄𑀦𑀺𑀲𑁄 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀳𑁂𑀯𑀢𑁆𑀣𑀺, 𑀳𑁂𑀯𑀁 𑀦𑀢𑁆𑀣𑀻’’𑀢𑀺 𑀧𑀝𑀺𑀚𑀸𑀦𑀦𑁆𑀢𑁂𑀦 𑀧𑀭𑀯𑀸𑀤𑀺𑀦𑀸 𑀬𑀣𑀸 𑀲𑀧𑀭𑀪𑀸𑀯𑁂𑀳𑀺 𑀭𑀽𑀧𑀸𑀤𑀻𑀦𑀁 𑀅𑀢𑁆𑀣𑀺𑀢𑀸 𑀧𑀝𑀺𑀜𑁆𑀜𑀸𑀢𑀸, 𑀏𑀯𑀁 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑁂𑀳𑀺𑀧𑀺 𑀲𑀸 𑀧𑀝𑀺𑀜𑁆𑀜𑀸𑀢𑀸 𑀏𑀯. 𑀢𑁂𑀦𑁂𑀯𑀸𑀳 ‘‘𑀅𑀢𑀻𑀢𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦, 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀯𑀸 𑀅𑀢𑀻𑀢𑀸𑀤𑀺𑀯𑀲𑁂𑀦 𑀦𑀢𑁆𑀣𑀻’’𑀢𑀺. 𑀏𑀯𑀁 𑀲𑀢𑀺 𑀦𑀺𑀕𑀡𑁆𑀞𑀸𑀘𑁂𑀮𑀓𑀯𑀸𑀤𑁄 𑀧𑀭𑀺𑀤𑀻𑀧𑀺𑀢𑁄 𑀲𑀺𑀬𑀸. 𑀢𑁂 𑀳𑀺 ‘‘𑀲𑀺𑀬𑀸 𑀅𑀢𑁆𑀣𑀺, 𑀲𑀺𑀬𑀸 𑀦𑀢𑁆𑀣𑀺, 𑀲𑀺𑀬𑀸 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑀢𑁆𑀣𑁂𑀲𑀼 𑀧𑀢𑁆𑀢𑀪𑀸𑀕𑁂 𑀧𑀝𑀺𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀬𑀤𑀺 𑀯𑀢𑁆𑀣𑀼𑀦𑁄 𑀲𑀪𑀸𑀯𑁂𑀦𑁂𑀯, 𑀤𑁂𑀲𑀓𑀸𑀮𑀲𑀦𑁆𑀢𑀸𑀦𑀯𑀲𑁂𑀦 𑀯𑀸 𑀦𑀢𑁆𑀣𑀺𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀁 𑀲𑀺𑀤𑁆𑀥𑀲𑀸𑀥𑀦𑀁 𑀲𑀓𑀯𑀸𑀤𑀺𑀦𑁄𑀧𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀬𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀬𑁄 𑀲𑀪𑀸𑀯𑁄, 𑀦 𑀲𑁄 𑀢𑀢𑁄 𑀅𑀜𑁆𑀜𑀣𑀸 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀉𑀧𑀮𑀩𑁆𑀪𑁂𑀬𑁆𑀬, 𑀅𑀜𑁆𑀜𑁄 𑀏𑀯 𑀲𑁄 𑀲𑀺𑀬𑀸. 𑀦 𑀘𑁂𑀢𑁆𑀣 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀁 𑀲𑀮𑀓𑁆𑀔𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀲𑁆𑀲 𑀦𑀢𑁆𑀣𑀺𑀪𑀸𑀯𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀘 𑀧𑀭𑀪𑀸𑀯𑁂𑀦 𑀦𑀢𑁆𑀣𑀺𑀢𑀸𑀬 𑀦 𑀯𑀺𑀯𑀸𑀤𑁄, 𑀏𑀯𑀁 𑀤𑁂𑀲𑀓𑀸𑀮𑀦𑁆𑀢𑀭𑁂𑀲𑀼𑀧𑀺 𑀇𑀢𑁆𑀢𑀭𑀓𑀸𑀮𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀁. 𑀦 𑀳𑀺 𑀲𑀗𑁆𑀔𑀸𑀭𑀸 𑀤𑁂𑀲𑀦𑁆𑀢𑀭𑀁, 𑀓𑀸𑀮𑀦𑁆𑀢𑀭𑀁 𑀯𑀸 𑀲𑀗𑁆𑀓𑀫𑀦𑁆𑀢𑀺 𑀔𑀡𑀺𑀓𑀪𑀸𑀯𑀢𑁄. 𑀏𑀢𑁂𑀦𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀦𑀢𑁆𑀣𑀺𑀢𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀘 𑀅𑀢𑁆𑀣𑀺𑀢𑀸, 𑀦𑀢𑁆𑀣𑀺𑀢𑀸 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀢𑁆𑀢𑀸, 𑀏𑀯𑀁 𑀲𑀩𑁆𑀩𑀤𑀸𑀧𑀺 𑀦𑀺𑀘𑁆𑀘𑀢𑁆𑀢𑀸.

𑀬𑀁 𑀧𑀦 𑀢𑁂 𑀯𑀤𑀦𑁆𑀢𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀁 𑀓𑀝𑀓𑀸𑀤𑀺𑀭𑀽𑀧𑁂𑀦 𑀞𑀺𑀢𑀁 𑀭𑀼𑀘𑀓𑀸𑀤𑀺𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑀁. 𑀢𑀜𑁆𑀳𑀺 𑀲𑀼𑀯𑀡𑁆𑀡𑀪𑀸𑀯𑀸𑀯𑀺𑀚𑀳𑀦𑀢𑁄 𑀦𑀺𑀘𑁆𑀘𑀁 𑀓𑀝𑀓𑀸𑀤𑀺𑀪𑀸𑀯𑀳𑀸𑀦𑀺𑀢𑁄 𑀅𑀦𑀺𑀘𑁆𑀘𑀁, 𑀏𑀯𑀁 𑀲𑀩𑁆𑀩𑀥𑀫𑁆𑀫𑀸’’𑀢𑀺. 𑀢𑁂 𑀇𑀤𑀁 𑀯𑀢𑁆𑀢𑀩𑁆𑀩𑀸 ‘‘𑀓𑀺𑀁 𑀓𑀝𑀓𑀪𑀸𑀯𑁄 𑀓𑀝𑀓𑀲𑁆𑀲, 𑀉𑀤𑀸𑀳𑀼 𑀲𑀼𑀯𑀡𑁆𑀡𑀲𑁆𑀲𑀸’’𑀢𑀺. 𑀬𑀤𑀺 𑀓𑀝𑀓𑀲𑁆𑀲, 𑀲𑀼𑀯𑀡𑁆𑀡𑀦𑀺𑀭𑀧𑁂𑀓𑁆𑀔𑁄 𑀲𑀺𑀬𑀸 𑀢𑀤𑀜𑁆𑀜𑀪𑀸𑀯𑁄 𑀯𑀺𑀬. 𑀅𑀣 𑀲𑀼𑀯𑀡𑁆𑀡𑀲𑁆𑀲, 𑀦𑀺𑀘𑁆𑀘𑀓𑀸𑀮𑀁 𑀢𑀢𑁆𑀣 𑀉𑀧𑀮𑀩𑁆𑀪𑁂𑀬𑁆𑀬 𑀲𑀼𑀯𑀡𑁆𑀡𑀪𑀸𑀯𑁄 𑀯𑀺𑀬. 𑀦 𑀘 𑀲𑀓𑁆𑀓𑀸 𑀉𑀪𑀺𑀦𑁆𑀦𑀁 𑀏𑀓𑀪𑀸𑀯𑁄𑀢𑀺 𑀯𑀢𑁆𑀢𑀼𑀁 𑀓𑀝𑀓𑀯𑀺𑀦𑀸𑀲𑁂𑀧𑀺 𑀲𑀼𑀯𑀡𑁆𑀡𑀸𑀯𑀺𑀦𑀸𑀲𑀢𑁄. 𑀅𑀣 𑀫𑀢𑀁, 𑀲𑀼𑀯𑀡𑁆𑀡𑀓𑀝𑀓𑀸𑀤𑀻𑀦𑀁 𑀧𑀭𑀺𑀬𑀸𑀬𑀻𑀧𑀭𑀺𑀬𑀸𑀬𑀪𑀸𑀯𑀢𑁄 𑀦𑀸𑀬𑀁 𑀤𑁄𑀲𑁄𑀢𑀺. 𑀬𑀣𑀸 𑀳𑀺 𑀓𑀝𑀓𑀧𑀭𑀺𑀬𑀸𑀬𑀦𑀺𑀭𑁄𑀥𑁂𑀦 𑀭𑀼𑀘𑀓𑀧𑀭𑀺𑀬𑀸𑀬𑀼𑀧𑁆𑀧𑀸𑀤𑁂𑀧𑀺 𑀧𑀭𑀺𑀬𑀸𑀬𑀻 𑀢𑀣𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀁 𑀫𑀦𑀼𑀲𑁆𑀲𑀧𑀭𑀺𑀬𑀸𑀬𑀦𑀺𑀭𑁄𑀥𑁂 𑀤𑁂𑀯𑀧𑀭𑀺𑀬𑀸𑀬𑀼𑀧𑁆𑀧𑀸𑀤𑁂𑀧𑀺 𑀧𑀭𑀺𑀬𑀸𑀬𑀻 𑀚𑀻𑀯𑀤𑁆𑀭𑀩𑁆𑀬𑀁 𑀢𑀺𑀝𑁆𑀞𑀢𑀻𑀢𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑀁, 𑀢𑀣𑀸 𑀲𑀩𑁆𑀩𑀤𑁆𑀭𑀩𑁆𑀬𑀸𑀦𑀻𑀢𑀺. 𑀢𑀬𑀺𑀤𑀁 𑀅𑀫𑁆𑀩𑀁 𑀧𑀼𑀝𑁆𑀞𑀲𑁆𑀲 𑀮𑀩𑀼𑀚𑀩𑁆𑀬𑀸𑀓𑀭𑀡𑀁. 𑀬𑀁 𑀲𑁆𑀯𑁂𑀯 𑀦𑀺𑀘𑁆𑀘𑁄 𑀅𑀦𑀺𑀘𑁆𑀘𑁄𑀢𑀺 𑀯𑀸 𑀯𑀤𑀦𑁆𑀢𑁄 𑀅𑀜𑁆𑀜𑀢𑁆𑀣 𑀦𑀺𑀘𑁆𑀘𑀢𑀁 𑀅𑀜𑁆𑀜𑀢𑁆𑀣 𑀅𑀦𑀺𑀘𑁆𑀘𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀅𑀣 𑀧𑀭𑀺𑀬𑀸𑀬𑀧𑀭𑀺𑀬𑀸𑀬𑀻𑀦𑀁 𑀅𑀦𑀜𑁆𑀜𑀢𑀸 𑀇𑀘𑁆𑀙𑀺𑀢𑀸, 𑀏𑀯𑀁 𑀲𑀢𑀺 𑀧𑀭𑀺𑀬𑀸𑀬𑁄𑀧𑀺 𑀦𑀺𑀘𑁆𑀘𑁄 𑀲𑀺𑀬𑀸 𑀧𑀭𑀺𑀬𑀸𑀬𑀺𑀦𑁄 𑀅𑀦𑀜𑁆𑀜𑀢𑁆𑀢𑀸 𑀧𑀭𑀺𑀬𑀸𑀬𑀲𑀭𑀽𑀧𑀁 𑀯𑀺𑀬, 𑀧𑀭𑀺𑀬𑀸𑀬𑀻 𑀯𑀸 𑀅𑀦𑀺𑀘𑁆𑀘𑁄 𑀧𑀭𑀺𑀬𑀸𑀬𑀢𑁄 𑀅𑀦𑀜𑁆𑀜𑀢𑁆𑀢𑀸 𑀧𑀭𑀺𑀬𑀸𑀬𑀲𑀭𑀽𑀧𑀁 𑀯𑀺𑀬𑀸𑀢𑀺. 𑀅𑀣 𑀦𑁂𑀲𑀁 𑀅𑀜𑁆𑀜𑀸 𑀅𑀦𑀜𑁆𑀜𑀢𑀸, 𑀏𑀯𑀜𑁆𑀘 𑀲𑀢𑀺 𑀯𑀼𑀢𑁆𑀢𑀤𑁄𑀲𑀤𑁆𑀯𑀬𑀸𑀦𑀢𑀺𑀯𑀢𑁆𑀢𑀺. 𑀅𑀧𑀺𑀘 𑀓𑁄𑀬𑀁 𑀧𑀭𑀺𑀬𑀸𑀬𑁄 𑀦𑀸𑀫, 𑀬𑀤𑀺 𑀲𑀡𑁆𑀞𑀸𑀦𑀁, 𑀲𑀼𑀯𑀡𑁆𑀡𑁄 𑀢𑀸𑀯 𑀳𑁄𑀢𑀼, 𑀓𑀣𑀁 𑀚𑀻𑀯𑀤𑁆𑀭𑀩𑁆𑀬𑁂 𑀅𑀭𑀽𑀧𑀺𑀪𑀸𑀯𑀢𑁄. 𑀬𑀤𑀺 𑀢𑀲𑁆𑀲𑀧𑀺 𑀲𑀡𑁆𑀞𑀸𑀦𑀯𑀦𑁆𑀢𑀁 𑀇𑀘𑁆𑀙𑀺𑀢𑀁, 𑀢𑀣𑀸 𑀲𑀢𑀺𑀲𑁆𑀲 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀩𑀳𑀼𑀢𑀸 𑀆𑀧𑀚𑁆𑀚𑀢𑀺 𑀲𑀭𑀽𑀧𑀢𑀸 𑀘 𑀲𑀡𑁆𑀞𑀸𑀦𑀯𑀦𑁆𑀢𑁂𑀲𑀼𑀧𑀺 𑀧𑀻𑀴𑀓𑀸𑀤𑀻𑀲𑀼 𑀢𑀣𑀸𑀤𑀲𑁆𑀲𑀦𑀢𑁄. 𑀅𑀣 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀏𑀯𑀫𑁆𑀧𑀺 𑀩𑀳𑀼𑀢𑀸 𑀔𑀡𑀺𑀓𑀢𑀸 𑀘 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀭𑀺𑀬𑀸𑀬𑀲𑀭𑀽𑀧𑀫𑁂𑀯 𑀢𑀸𑀯 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀁.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀼𑀯𑀡𑁆𑀡𑀁 𑀓𑀝𑀓𑀸𑀤𑀺𑀭𑀽𑀧𑁂𑀦 𑀞𑀺𑀢’’𑀦𑁆𑀢𑀺, 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀬𑁄𑀕𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑁂𑀲𑀼 𑀯𑀺𑀲𑀺𑀝𑁆𑀞𑁂𑀲𑀼 𑀭𑀽𑀧𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑁂𑀲𑀼 𑀓𑀺𑀁 𑀏𑀓𑀁, 𑀉𑀤𑀸𑀳𑀼 𑀢𑁂𑀲𑀁 𑀲𑀫𑀼𑀤𑀸𑀬𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀯𑀸 𑀥𑀫𑁆𑀫𑀦𑁆𑀢𑀭𑀁 𑀲𑀼𑀯𑀡𑁆𑀡𑀦𑁆𑀢𑀺? 𑀢𑀢𑁆𑀣 𑀦 𑀢𑀸𑀯 𑀭𑀽𑀧𑀸𑀤𑀻𑀲𑀼 𑀏𑀓𑁂𑀓𑀁 𑀲𑀼𑀯𑀡𑁆𑀡𑀁 𑀢𑁂𑀦 𑀲𑀼𑀯𑀡𑁆𑀡𑀓𑀺𑀘𑁆𑀘𑀸𑀲𑀺𑀤𑁆𑀥𑀺𑀢𑁄, 𑀦𑀸𑀧𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀥𑀫𑁆𑀫𑀦𑁆𑀢𑀭𑀁 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀢𑁄. 𑀅𑀣 𑀲𑀫𑀼𑀤𑀸𑀬𑁄, 𑀢𑀁 𑀧𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀦 𑀢𑀲𑁆𑀲 𑀦𑀺𑀘𑁆𑀘𑀢𑀸, 𑀦𑀸𑀧𑀺 𑀅𑀦𑀺𑀘𑁆𑀘𑀢𑀸 𑀲𑀫𑁆𑀪𑀯𑀢𑀺. 𑀬𑀣𑀸 𑀘 𑀲𑀼𑀯𑀡𑁆𑀡𑀲𑁆𑀲, 𑀏𑀯𑀁 𑀓𑀝𑀓𑀲𑁆𑀲𑀧𑀺 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀢𑁆𑀢𑀸𑀢𑀺. 𑀢𑀬𑀺𑀤𑀁 𑀦𑀺𑀤𑀲𑁆𑀲𑀦𑀁 𑀧𑀭𑀯𑀸𑀤𑀺𑀦𑁄 𑀚𑀻𑀯𑀤𑁆𑀭𑀩𑁆𑀬𑀲𑁆𑀲𑀧𑀺 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀢𑀲𑁆𑀲𑁂𑀯 𑀲𑀸𑀥𑁂𑀢𑀻𑀢𑀺 𑀓𑀼𑀢𑁄 𑀢𑀲𑁆𑀲 𑀦𑀺𑀘𑁆𑀘𑀸𑀦𑀺𑀘𑁆𑀘𑀢𑀸𑀢𑀺 𑀅𑀮𑀫𑀢𑀺𑀧𑁆𑀧𑀧𑀜𑁆𑀘𑁂𑀦.

𑀳𑁂𑀯𑀢𑁆𑀣𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.