𑁧. 𑀅𑀢𑀻𑀢𑀸𑀤𑀺𑀏𑀓𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀬𑁂 𑀓𑀢𑀽𑀧𑀘𑀺𑀢𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀯𑀺𑀧𑀸𑀓𑀤𑀸𑀦𑀸𑀬 𑀅𑀓𑀢𑁄𑀓𑀸𑀲𑀸, 𑀓𑀢𑁄𑀓𑀸𑀲𑀸 𑀘 𑀬𑁂 ‘‘𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁂 𑀘 𑀯𑀺𑀧𑁆𑀧𑀓𑀢𑀯𑀺𑀧𑀸𑀓𑀸, 𑀢𑁂 𑀲𑀩𑁆𑀩𑁂𑀧𑀺 ‘‘𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀯𑀺𑀧𑀸𑀓𑀤𑀸𑀦𑀲𑀸𑀫𑀢𑁆𑀣𑀺𑀬𑀁 𑀅𑀦𑀧𑀕𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀭𑀯𑀸𑀤𑀻 𑀅𑀢𑁆𑀣𑀺𑀢𑀁 𑀇𑀘𑁆𑀙𑀢𑀺. 𑀬𑁂 𑀧𑀦 𑀧𑀭𑀯𑀸𑀤𑀻 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀅𑀧𑀕𑀢𑀦𑁆𑀢𑀺 𑀦𑀢𑁆𑀣𑀺𑀢𑀁 𑀇𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀣𑀻𑀢𑀺 𑀏𑀓𑀘𑁆𑀘𑀁 𑀅𑀢𑁆𑀣𑀺 𑀏𑀓𑀘𑁆𑀘𑀁 𑀦𑀢𑁆𑀣𑀻’’𑀢𑀺𑀆𑀤𑀺. 𑀏𑀯𑀁 𑀇𑀘𑁆𑀙𑀦𑁆𑀢𑀲𑁆𑀲 𑀧𑀦 𑀧𑀭𑀯𑀸𑀤𑀺𑀦𑁄 𑀬𑀣𑀸 𑀅𑀯𑀺𑀧𑀸𑀓𑁂𑀲𑀼𑀧𑀺 𑀏𑀓𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀯𑀺𑀧𑀓𑁆𑀓𑀯𑀺𑀧𑀸𑀓𑁂𑀲𑀼 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑁂𑀲𑀼 𑀘 𑀆𑀧𑀚𑁆𑀚𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀥𑀫𑁆𑀫𑀸 𑀏𑀓𑀘𑁆𑀘𑁂’’𑀢𑀺𑀆𑀤𑀺𑀦𑀸 𑀧𑀸𑀴𑀺 𑀧𑀯𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀯𑀲𑁂𑀦𑀸’’𑀢𑀺𑀆𑀤𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀨𑀮𑀲𑁆𑀲 𑀅𑀦𑀼𑀧𑀭𑀫𑀯𑁄𑀳𑀸𑀭𑀯𑀲𑁂𑀦, 𑀳𑁂𑀢𑀼𑀓𑀺𑀘𑁆𑀘𑀁 𑀧𑀦 𑀅𑀦𑀼𑀧𑀭𑀢𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀁 𑀅𑀢𑁆𑀣𑀻𑀢𑀺 𑀮𑀤𑁆𑀥𑀺𑀬𑀁 𑀞𑀺𑀢𑀢𑁆𑀢𑀸 𑀘𑁄𑀤𑁂𑀢𑀩𑁆𑀩𑁄𑀯. 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀜𑁆𑀳𑀺 𑀨𑀮𑀲𑁆𑀲 𑀧𑀩𑀦𑁆𑀥𑀯𑁄𑀳𑀸𑀭𑀁 𑀧𑀭𑀯𑀸𑀤𑀻 𑀯𑁄𑀳𑀸𑀭𑀢𑁄 𑀅𑀢𑁆𑀣𑀻𑀢𑀺 𑀇𑀘𑁆𑀙𑀢𑀺, 𑀳𑁂𑀢𑀼 𑀧𑀦𑀲𑁆𑀲 𑀓𑀫𑁆𑀫𑀁 𑀧𑀭𑀫𑀢𑁆𑀣𑀢𑁄 𑀘 𑀓𑀫𑁆𑀫𑀽𑀧𑀘𑀬𑀯𑀸𑀤𑀺𑀪𑀸𑀯𑀢𑁄 𑀧𑀢𑁆𑀢𑀺𑀅𑀧𑁆𑀧𑀢𑁆𑀢𑀺𑀲𑀪𑀸𑀯𑀢𑀸𑀤𑀬𑁄 𑀯𑀺𑀬 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀓𑀫𑁆𑀫𑀽𑀧𑀘𑀬𑁄 𑀦𑀸𑀫 𑀏𑀓𑁄 𑀲𑀗𑁆𑀔𑀸𑀭𑀥𑀫𑁆𑀫𑁄 𑀅𑀯𑀺𑀧𑀦𑁆𑀦𑁄, 𑀲𑁄𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 𑀧𑀭𑀯𑀸𑀤𑀻. 𑀬𑀁 𑀲𑀦𑁆𑀥𑀸𑀬𑀸𑀳 𑁋

‘‘𑀦𑀧𑁆𑀧𑀘𑀬𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀅𑀧𑀺 𑀓𑀧𑁆𑀧𑀲𑀳𑀲𑁆𑀲𑀢𑁄;

𑀧𑀢𑁆𑀯𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁, 𑀓𑀸𑀮𑁂 𑀧𑀘𑁆𑀘𑀦𑁆𑀢𑀺 𑀧𑀸𑀡𑀺𑀦’’𑀦𑁆𑀢𑀺.

𑀬𑀜𑁆𑀘 𑀲𑀦𑁆𑀥𑀸𑀬 𑀧𑀭𑀢𑁄 𑀧𑀭𑀺𑀪𑁄𑀕𑀫𑀬𑀧𑀼𑀜𑁆𑀜𑀓𑀣𑀸𑀬 ‘‘𑀧𑀭𑀺𑀪𑁄𑀕𑀫𑀬𑀁 𑀧𑀦 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀯𑀓𑁆𑀔𑀢𑀺.

𑀏𑀓𑀘𑁆𑀘𑀁𑀅𑀢𑁆𑀣𑀻𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.