𑁧. 𑀦𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁭. ‘‘𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀅𑀬𑀁 𑀓𑀸𑀮𑀯𑀺𑀪𑀸𑀕𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑁄𑀳𑀸𑀭𑁄 𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄. 𑀥𑀫𑁆𑀫𑁄 𑀳𑀺 𑀲𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀢𑀢𑁄 𑀧𑀼𑀩𑁆𑀩𑁂 𑀅𑀦𑀸𑀕𑀢𑁄, 𑀧𑀘𑁆𑀙𑀸 𑀅𑀢𑀻𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀢𑁆𑀣 𑀬𑀤𑀺𑀧𑀺 𑀥𑀫𑁆𑀫𑀸 𑀅𑀦𑀺𑀘𑁆𑀘𑀢𑀸𑀬 𑀅𑀦𑀯𑀝𑁆𑀞𑀺𑀢𑀸, 𑀅𑀯𑀢𑁆𑀣𑀸 𑀧𑀦 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸 𑀯𑀯𑀢𑁆𑀣𑀺𑀢𑀸𑀢𑀺 𑀢𑀤𑀼𑀧𑀸𑀤𑀸𑀦𑀸 𑀓𑀸𑀮𑀧𑀜𑁆𑀜𑀢𑁆𑀢𑀺𑀧𑀺 𑀯𑀯𑀢𑁆𑀣𑀺𑀢𑀸 𑀏𑀯. 𑀦 𑀳𑀺 𑀅𑀢𑀻𑀢𑀸𑀤𑀺 𑀅𑀦𑀸𑀕𑀢𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺, 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺 𑀧𑀦 𑀅𑀦𑀧𑁂𑀓𑁆𑀔𑀺𑀢𑀓𑀸𑀮𑀯𑀺𑀲𑁂𑀲𑀸. 𑀢𑀻𑀲𑀼𑀧𑀺 𑀳𑀺 𑀓𑀸𑀮𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁄𑀯, 𑀢𑀣𑀸 𑀲𑁂𑀲𑀸 𑀔𑀦𑁆𑀥𑀸 𑀆𑀬𑀢𑀦𑀥𑀸𑀢𑀼𑀬𑁄 𑀘. 𑀏𑀯𑀫𑀯𑀝𑁆𑀞𑀺𑀢𑁂 𑀬𑀲𑁆𑀫𑀸 𑀧𑀭𑀯𑀸𑀤𑀻 ‘‘𑀅𑀢𑁆𑀣𑀻’’𑀢𑀺 𑀇𑀫𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀬𑀢𑀁 𑀯𑁄𑀳𑀸𑀭𑀁 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀺 𑀆𑀭𑁄𑀧𑁂𑀢𑀺, 𑀢𑀲𑁆𑀫𑀸 𑀲𑁄 𑀅𑀤𑁆𑀥𑀲𑀗𑁆𑀓𑀭𑀁 𑀓𑀭𑁄𑀢𑀺. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀯𑀺𑀚𑁆𑀚𑀫𑀸𑀦𑁂 𑀓𑀢𑁆𑀯𑀸 𑀯𑁄𑀳𑀭𑀢𑀻𑀢𑀺 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 ‘‘𑀅𑀢𑀻𑀢𑀁 𑀔𑀦𑁆𑀥𑀸’’𑀢𑀺𑀆𑀤𑀺𑀓𑀸 𑀅𑀬𑀁 𑀓𑀣𑀸 𑀆𑀭𑀤𑁆𑀥𑀸.

𑀬𑀲𑁆𑀫𑀸 𑀧𑀦 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑁂 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀥𑀫𑁆𑀫𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀭𑀸𑀲𑀝𑁆𑀞𑀁 𑀉𑀧𑀸𑀤𑀸𑀬 𑀔𑀦𑁆𑀥𑀧𑀜𑁆𑀜𑀢𑁆𑀢𑀺, 𑀘𑀓𑁆𑀔𑀼𑀭𑀽𑀧𑀸𑀤𑀻𑀲𑀼 𑀓𑀸𑀭𑀡𑀸𑀤𑀺𑀅𑀢𑁆𑀣𑀁 𑀲𑀼𑀜𑁆𑀜𑀢𑀝𑁆𑀞𑀜𑁆𑀘 𑀉𑀧𑀸𑀤𑀸𑀬 𑀆𑀬𑀢𑀦𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀧𑀜𑁆𑀜𑀢𑁆𑀢𑀺 𑀘, 𑀢𑀲𑁆𑀫𑀸 𑀲𑀸 𑀅𑀤𑁆𑀥𑀢𑁆𑀢𑀬𑀲𑀸𑀥𑀸𑀭𑀡𑀸, 𑀦 𑀅𑀢𑀻𑀢𑀸𑀤𑀺𑀧𑀜𑁆𑀜𑀢𑁆𑀢𑀺 𑀯𑀺𑀬 𑀅𑀤𑁆𑀥𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀸𑀢𑀺 𑀆𑀳 ‘‘𑀔𑀦𑁆𑀥𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀢𑁄 𑀅𑀢𑀻𑀢𑀸𑀦𑀸𑀕𑀢𑀸𑀦’’𑀦𑁆𑀢𑀺. 𑀢𑁂 𑀧𑀦𑁂𑀢𑁂 𑀅𑀢𑀻𑀢𑀸𑀤𑀺𑀓𑁂 𑀔𑀦𑁆𑀥𑀸𑀤𑀺𑀓𑁂 𑀯𑀺𑀬 𑀲𑀪𑀸𑀯𑀥𑀫𑁆𑀫𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀧𑀭𑀯𑀸𑀤𑀻 ‘‘𑀅𑀢𑁆𑀣𑀻’’𑀢𑀺 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀦𑀺𑀭𑀼𑀢𑁆𑀢𑀺𑀧𑀣𑀸’’𑀢𑀺 𑀲𑀼𑀢𑁆𑀢𑀁 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀅𑀢𑁆𑀣𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀅𑀢𑀻𑀢𑀸𑀦𑀸𑀕𑀢𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺𑀢𑀸𑀬 𑀯𑀸𑀭𑀺𑀢𑀢𑁆𑀢𑀸’’𑀢𑀺. 𑀬𑀤𑀺 𑀏𑀯𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀢𑀁 𑀲𑀩𑁆𑀩𑀤𑀸 𑀉𑀧𑀮𑀤𑁆𑀥𑀺𑀢𑁄 𑀯𑀼𑀢𑁆𑀢𑀁 𑀦𑀺𑀘𑁆𑀘𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀅𑀲𑀗𑁆𑀔𑀢𑀥𑀫𑁆𑀫𑀲𑁆𑀲, 𑀇𑀥 𑀧𑀦 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀸𑀬 𑀅𑀢𑁆𑀣𑀺𑀪𑀸𑀯𑁄 𑀦 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀘𑀸𑀢𑀺 𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁…𑀧𑁂… 𑀦 𑀢𑀲𑁆𑀲 𑀲𑀗𑁆𑀔𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 ‘‘𑀅𑀢𑁆𑀣𑀻’’𑀢𑀺 𑀲𑀫𑀜𑁆𑀜𑀸𑀬 𑀅𑀦𑀼𑀧𑀸𑀤𑀸𑀦𑀢𑁄 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀫𑀺𑀦𑀸𑀯𑀽𑀧𑀸𑀬𑁂𑀦𑀸𑀢𑀺 ‘‘𑀔𑀦𑁆𑀥𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀢𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀳𑁂𑀢𑀼𑀦𑀸. 𑀉𑀧𑀧𑀢𑁆𑀢𑀺𑀲𑀸𑀥𑀦𑀬𑀼𑀢𑁆𑀢𑀺 𑀳𑀺 𑀇𑀥 ‘‘𑀉𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀸.

𑀦𑀲𑀼𑀢𑁆𑀢𑀲𑀸𑀥𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.