𑁩. 𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸

𑁮𑁬𑁬-𑁮𑁬𑁮. 𑀦𑁂𑀭𑀬𑀺𑀓𑁂 𑀦𑀺𑀭𑀬𑁂 𑀧𑀸𑀮𑁂𑀦𑁆𑀢𑀺, 𑀢𑀢𑁄 𑀦𑀺𑀕𑁆𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀭𑀬𑀧𑀸𑀮𑀸. 𑀦𑀺𑀭𑀬𑀧𑀸𑀮𑀢𑀸𑀬 𑀯𑀸 𑀦𑁂𑀭𑀬𑀺𑀓𑀸𑀦𑀁 𑀦𑀭𑀓𑀤𑀼𑀓𑁆𑀔𑁂𑀦 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀦𑀺𑀭𑀬𑀧𑀸𑀮𑀸. 𑀓𑀺𑀁 𑀧𑀦𑁂𑀢𑁂 𑀦𑀺𑀭𑀬𑀧𑀸𑀮𑀸 𑀦𑁂𑀭𑀬𑀺𑀓𑀸, 𑀉𑀤𑀸𑀳𑀼 𑀅𑀦𑁂𑀭𑀬𑀺𑀓𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀦𑁂𑀭𑀬𑀺𑀓𑀸, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀬𑀫𑁆𑀧𑀺 𑀦𑀺𑀭𑀬𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀯𑁂𑀬𑁆𑀬𑀼𑀁, 𑀢𑀣𑀸 𑀲𑀢𑀺 𑀅𑀜𑁆𑀜𑁂𑀲𑀁 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀦𑀸𑀬 𑀅𑀲𑀫𑀢𑁆𑀣𑀸 𑀲𑀺𑀬𑀼𑀁, ‘‘𑀇𑀫𑁂 𑀦𑁂𑀭𑀬𑀺𑀓𑀸, 𑀇𑀫𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀯𑀢𑁆𑀣𑀸𑀦𑀜𑁆𑀘 𑀦 𑀲𑀺𑀬𑀸. 𑀬𑁂 𑀘 𑀬𑁂 𑀬𑀸𑀢𑁂𑀦𑁆𑀢𑀺, 𑀢𑁂𑀳𑀺 𑀲𑀫𑀸𑀦𑀭𑀽𑀧𑀩𑀮𑀧𑁆𑀧𑀫𑀸𑀡𑁂𑀳𑀺 𑀇𑀢𑀭𑁂𑀲𑀁 𑀪𑀬𑀲𑀦𑁆𑀢𑀸𑀲𑀸 𑀦 𑀲𑀺𑀬𑀼𑀁. 𑀅𑀣 𑀅𑀦𑁂𑀭𑀬𑀺𑀓𑀸, 𑀢𑁂𑀲𑀁 𑀢𑀢𑁆𑀣 𑀓𑀣𑀁 𑀲𑀫𑁆𑀪𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸 𑀅𑀦𑀺𑀭𑀬𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸. 𑀦𑀺𑀭𑀬𑀽𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀢𑁄 𑀳𑀺 𑀅𑀜𑁆𑀜𑁂𑀦𑁂𑀯 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀭𑀓𑁆𑀔𑀲𑀚𑀸𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀓𑁄𑀥𑀦𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀧𑀸𑀧𑀸𑀪𑀺𑀭𑀼𑀘𑀺𑀦𑁄 𑀢𑀣𑀸;

𑀤𑀼𑀓𑁆𑀔𑀺𑀢𑁂𑀲𑀼 𑀘 𑀦𑀦𑁆𑀤𑀦𑁆𑀢𑀺, 𑀚𑀸𑀬𑀦𑁆𑀢𑀺 𑀬𑀫𑀭𑀓𑁆𑀔𑀲𑀸’’𑀢𑀺.

𑀢𑀢𑁆𑀣 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀬𑀸𑀢𑀦𑀸𑀤𑀼𑀓𑁆𑀔𑀲𑁆𑀲 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑀢𑁄, 𑀅𑀜𑁆𑀜𑀣𑀸 𑀧𑀼𑀦 𑀅𑀜𑁆𑀜𑀫𑀜𑁆𑀜𑀁 𑀬𑀸𑀢𑁂𑀬𑁆𑀬𑀼’’𑀦𑁆𑀢𑀺 𑀘 𑀏𑀯𑀫𑀸𑀤𑀺, 𑀢𑀬𑀺𑀤𑀁 𑀆𑀓𑀸𑀲𑀭𑁄𑀫𑀝𑁆𑀞𑀦𑀁 𑀦𑀺𑀭𑀬𑀧𑀸𑀮𑀸𑀦𑀁 𑀦𑁂𑀭𑀬𑀺𑀓𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑁂 𑀧𑀦 𑀯𑀤𑁂𑀬𑁆𑀬𑀼𑀁 𑁋 𑀬𑀤𑀺𑀧𑀺 𑀅𑀦𑁂𑀭𑀬𑀺𑀓𑀸 𑀦𑀺𑀭𑀬𑀧𑀸𑀮𑀸, 𑀅𑀬𑁄𑀫𑀬𑀸𑀬 𑀧𑀦 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀦𑀺𑀭𑀬𑀪𑀽𑀫𑀺𑀬𑀸 𑀧𑀭𑀺𑀯𑀢𑁆𑀢𑀫𑀸𑀦𑀸 𑀓𑀣𑀁 𑀦𑀸𑀫 𑀤𑀼𑀓𑁆𑀔𑀁 𑀦𑀸𑀦𑀼𑀪𑀯𑀦𑁆𑀢𑀻𑀢𑀺? 𑀓𑀫𑁆𑀫𑀸𑀦𑀼𑀪𑀸𑀯𑀢𑁄. 𑀬𑀣𑀸 𑀳𑀺 𑀇𑀤𑁆𑀥𑀺𑀫𑀦𑁆𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀦𑁂𑀭𑀬𑀺𑀓𑁂 𑀅𑀦𑀼𑀓𑀫𑁆𑀧𑀦𑁆𑀢𑀸 𑀇𑀤𑁆𑀥𑀺𑀩𑀮𑁂𑀦 𑀦𑀺𑀭𑀬𑀪𑀽𑀫𑀺𑀁 𑀉𑀧𑀕𑀢𑀸 𑀢𑀢𑁆𑀣 𑀤𑀸𑀳𑀤𑀼𑀓𑁆𑀔𑁂𑀦 𑀦 𑀩𑀸𑀥𑀻𑀬𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀢𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀇𑀤𑀫𑁆𑀧𑀺 𑀢𑀁𑀲𑀫𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀢𑀣𑀸𑀭𑀽𑀧𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑁂 𑀦𑀺𑀩𑁆𑀩𑀢𑁆𑀢𑀸 𑀬𑀣𑀸 𑀦𑀺𑀭𑀬𑀤𑀼𑀓𑁆𑀔𑁂𑀦 𑀅𑀩𑀸𑀥𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀦𑁂𑀭𑀬𑀺𑀓𑁂 𑀬𑀸𑀢𑁂𑀦𑁆𑀢𑀺, 𑀦 𑀘𑁂𑀢𑁆𑀢𑀓𑁂𑀦 𑀩𑀸𑀳𑀺𑀭𑀯𑀺𑀲𑀬𑀸𑀪𑀸𑀯𑁄 𑀯𑀺𑀚𑁆𑀚𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸𑀬 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀧𑀼𑀭𑀺𑀲𑁂𑀲𑀼 𑀯𑀺𑀪𑀢𑁆𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀏𑀓𑀘𑁆𑀘𑀲𑁆𑀲 𑀤𑁆𑀯𑀸𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀁, 𑀏𑀓𑀘𑁆𑀘𑀲𑁆𑀲 𑀘 𑀅𑀦𑀺𑀝𑁆𑀞𑀁 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀤𑁂𑀓𑁂 𑀯𑀤𑀦𑁆𑀢𑀺 ‘‘𑀦𑀢𑁆𑀣𑀺 𑀓𑀫𑁆𑀫𑀯𑀲𑁂𑀦 𑀢𑁂𑀚𑀲𑀸 𑀧𑀭𑀽𑀧𑀢𑀸𑀧𑀦’’𑀦𑁆𑀢𑀺𑀆𑀤𑀺, 𑀢𑀤𑀧𑀸𑀳𑀢𑀁 𑀳𑁄𑀢𑀺. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀅𑀦𑁂𑀭𑀬𑀺𑀓𑀸𑀦𑀁 𑀢𑁂𑀲𑀁 𑀓𑀣𑀁 𑀢𑀢𑁆𑀣 𑀲𑀫𑁆𑀪𑀯𑁄’’𑀢𑀺 𑀦𑁂𑀭𑀬𑀺𑀓𑀸𑀦𑀁 𑀬𑀸𑀢𑀓𑀪𑀸𑀯𑀢𑁄. 𑀦𑁂𑀭𑀬𑀺𑀓𑀲𑀢𑁆𑀢𑀬𑀸𑀢𑀦𑀸𑀬𑁄𑀕𑁆𑀕𑀜𑁆𑀳𑀺 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀁 𑀓𑀫𑁆𑀫𑀁 𑀢𑀸𑀤𑀺𑀲𑀦𑀺𑀓𑀦𑁆𑀢𑀺𑀯𑀺𑀦𑀸𑀫𑀺𑀢𑀁 𑀦𑀺𑀭𑀬𑀝𑁆𑀞𑀸𑀦𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂 𑀘 𑀦𑁂𑀭𑀬𑀺𑀓𑁂𑀳𑀺 𑀅𑀥𑀺𑀓𑀢𑀭𑀩𑀮𑀸𑀭𑁄𑀳𑀧𑀭𑀺𑀡𑀸𑀳𑀸 𑀅𑀢𑀺𑀯𑀺𑀬 𑀪𑀬𑀸𑀦𑀓𑀲𑀦𑁆𑀢𑀸𑀲𑀓𑀼𑀭𑀽𑀭𑀢𑀭𑀧𑀬𑁄𑀕𑀸 𑀘 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀢𑀢𑁆𑀣 𑀓𑀸𑀓𑀲𑀼𑀦𑀔𑀸𑀤𑀻𑀦𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀣𑀫𑀜𑁆𑀜𑀕𑀢𑀺𑀓𑁂𑀳𑀺 𑀅𑀜𑁆𑀜𑀕𑀢𑀺𑀓𑀩𑀸𑀥𑀦𑀦𑁆𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁 𑀅𑀜𑁆𑀜𑀢𑁆𑀣𑀸𑀧𑀺 𑀢𑀣𑀸 𑀤𑀲𑁆𑀲𑀦𑀢𑁄. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀅𑀲𑀢𑁆𑀢𑀲𑀪𑀸𑀯𑀸 𑀦𑀺𑀭𑀬𑀧𑀸𑀮𑀸 𑀦𑀺𑀭𑀬𑀲𑀼𑀦𑀔𑀸𑀤𑀬𑁄 𑀘𑀸’’𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀅𑀜𑁆𑀜𑀢𑁆𑀣 𑀢𑀣𑀸 𑀅𑀤𑀲𑁆𑀲𑀦𑀢𑁄. 𑀦 𑀳𑀺 𑀓𑀸𑀘𑀺 𑀅𑀢𑁆𑀣𑀺 𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀯𑀢𑁆𑀢𑀺, 𑀬𑀸 𑀅𑀲𑀢𑁆𑀢𑀲𑀪𑀸𑀯𑀸, 𑀲𑀫𑁆𑀧𑀢𑀺𑀲𑀢𑁆𑀢𑁂𑀳𑀺 𑀅𑀧𑁆𑀧𑀬𑁄𑀚𑀺𑀢𑀸 𑀘 𑀅𑀢𑁆𑀣𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀤𑀺𑀝𑁆𑀞𑀧𑀼𑀩𑁆𑀩𑀸. 𑀧𑁂𑀢𑀸𑀦𑀁 𑀧𑀸𑀦𑀻𑀬𑀦𑀺𑀯𑀸𑀭𑀓𑀸𑀦𑀁 𑀤𑀡𑁆𑀟𑀸𑀤𑀺𑀳𑀢𑁆𑀣𑀧𑀼𑀭𑀺𑀲𑀸𑀦𑀫𑁆𑀧𑀺 𑀅𑀲𑀢𑁆𑀢𑀪𑀸𑀯𑁂 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺. 𑀲𑀼𑀧𑀺𑀦𑀽𑀧𑀖𑀸𑀢𑁄𑀧𑀺 𑀅𑀢𑁆𑀣𑀓𑀺𑀘𑁆𑀘𑀲𑀫𑀢𑁆𑀣𑀢𑀸𑀬 𑀅𑀧𑁆𑀧𑀫𑀸𑀡𑀁 𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑁂𑀦𑀧𑀺 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀢𑀣𑀸 𑀳𑀺 𑀲𑀼𑀧𑀺𑀦𑁂 𑀆𑀳𑀸𑀭𑀽𑀧𑀪𑁄𑀕𑀸𑀤𑀺𑀦𑀸 𑀦 𑀅𑀢𑁆𑀣𑀲𑀺𑀤𑁆𑀥𑀺 𑀅𑀢𑁆𑀣𑀺, 𑀦𑀺𑀫𑁆𑀫𑀸𑀦𑀭𑀽𑀧𑀁 𑀧𑀦𑁂𑀢𑁆𑀣 𑀮𑀤𑁆𑀥𑀧𑀭𑀺𑀳𑀸𑀭𑀁 𑀇𑀤𑁆𑀥𑀺𑀯𑀺𑀲𑀬𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄. 𑀇𑀥𑀸𑀧𑀺 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀢𑁄𑀢𑀺 𑀘𑁂? 𑀢𑀁 𑀦, 𑀅𑀲𑀺𑀤𑁆𑀥𑀢𑁆𑀢𑀸. 𑀦𑁂𑀭𑀬𑀺𑀓𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑁄 𑀦𑀺𑀭𑀬𑀧𑀸𑀮𑀸𑀢𑀺 𑀅𑀲𑀺𑀤𑁆𑀥𑀫𑁂𑀢𑀁, 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀦𑁂𑀲𑀁 𑀲𑀢𑁆𑀢𑀪𑀸𑀯𑁄 𑀏𑀯 𑀲𑀺𑀤𑁆𑀥𑁄. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀲𑀢𑁆𑀢𑀲𑀗𑁆𑀔𑀸𑀢𑀸 𑀦𑀺𑀭𑀬𑀧𑀸𑀮𑀲𑀜𑁆𑀜𑀺𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀲𑀸𑀪𑀺𑀲𑀦𑁆𑀥𑀺𑀓𑀸 𑀧𑀭𑀽𑀧𑀖𑀸𑀢𑀺 𑀅𑀢𑁆𑀣𑀓𑀺𑀘𑁆𑀘𑀲𑀩𑁆𑀪𑀸𑀯𑀢𑁄 𑀑𑀚𑀸𑀳𑀸𑀭𑀸𑀤𑀺𑀭𑀓𑁆𑀔𑀲𑀲𑀦𑁆𑀢𑀢𑀺 𑀯𑀺𑀬𑀸𑀢𑀺. 𑀅𑀪𑀺𑀲𑀦𑁆𑀥𑀺𑀧𑀼𑀩𑁆𑀩𑀓𑀢𑀸 𑀘𑁂𑀢𑁆𑀣 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀢𑀣𑀸 𑀢𑀣𑀸 𑀅𑀪𑀺𑀲𑀦𑁆𑀥𑀺𑀬𑀸 𑀬𑀸𑀢𑀦𑀢𑁄, 𑀢𑀢𑁄 𑀏𑀯 𑀦 𑀲𑀗𑁆𑀖𑀸𑀝𑀧𑀩𑁆𑀩𑀢𑀸𑀤𑀻𑀳𑀺 𑀅𑀦𑁂𑀓𑀦𑁆𑀢𑀺𑀓𑀢𑀸. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀪𑀽𑀢𑀯𑀺𑀲𑁂𑀲𑀸 𑀏𑀯 𑀢𑁂 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄 𑀪𑁂𑀭𑀯𑀸𑀓𑀸𑀭𑀸 𑀦𑀭𑀓𑀧𑀸𑀮𑀸𑀢𑀺 𑀲𑀫𑀜𑁆𑀜𑀁 𑀮𑀪𑀦𑁆𑀢𑀻’’𑀢𑀺, 𑀢𑀤𑀲𑀺𑀤𑁆𑀥𑀁. 𑀉𑀚𑀼𑀓𑀫𑁂𑀯 𑀧𑀸𑀴𑀺𑀬𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸.

𑀅𑀧𑀺𑀘 𑀬𑀣𑀸 𑀅𑀭𑀺𑀬𑀯𑀺𑀦𑀬𑁂 𑀦𑀭𑀓𑀧𑀸𑀮𑀸𑀦𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸, 𑀢𑀣𑀸 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀯𑀸𑀤𑀺𑀦𑁄𑀧𑀺 𑀢𑁂𑀲𑀁 𑀪𑀽𑀢𑀫𑀢𑁆𑀢𑀢𑀸 𑀅𑀲𑀺𑀤𑁆𑀥𑀸𑀯. 𑀦 𑀳𑀺 𑀢𑀲𑁆𑀲 𑀪𑀽𑀢𑀸𑀦𑀺 𑀦𑀸𑀫 𑀲𑀦𑁆𑀢𑀺. 𑀬𑀤𑀺 𑀧𑀭𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀅𑀣 𑀓𑀲𑁆𑀫𑀸 𑀯𑁂𑀤𑀦𑀸𑀤𑀺𑀓𑁂 𑀏𑀯 𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀢𑀺𑀝𑁆𑀞𑀢𑁂𑀲𑀸 𑀅𑀦𑀯𑀝𑁆𑀞𑀺𑀢𑀢𑀓𑁆𑀓𑀸𑀦𑀁 𑀅𑀧𑁆𑀧𑀳𑀻𑀦𑀲𑀫𑁆𑀫𑁄𑀳𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀸𑀤𑀯𑀻𑀫𑀁𑀲𑀸, 𑀏𑀯𑀁 𑀅𑀢𑁆𑀣𑁂𑀯 𑀦𑀺𑀭𑀬𑀧𑀸𑀮𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀲𑀢𑀺 𑀘 𑀦𑁂𑀲𑀁 𑀲𑀩𑁆𑀪𑀸𑀯𑁂, 𑀅𑀲𑀢𑀺𑀧𑀺 𑀩𑀸𑀳𑀺𑀭𑁂 𑀯𑀺𑀲𑀬𑁂 𑀦𑀭𑀓𑁂 𑀯𑀺𑀬 𑀤𑁂𑀲𑀸𑀤𑀺𑀦𑀺𑀬𑀫𑁄 𑀳𑁄𑀢𑀻𑀢𑀺 𑀯𑀸𑀤𑁄 𑀦 𑀲𑀺𑀚𑁆𑀛𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀭𑀬𑀧𑀸𑀮𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.