𑁪. 𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸

𑁬𑁬𑁩-𑁬𑁬𑁪. 𑀅𑀧𑁆𑀧𑀢𑁆𑀢𑀦𑀺𑀬𑀸𑀫𑀸𑀦𑀦𑁆𑀢𑀺 𑀬𑁂 𑀅𑀦𑀼𑀧𑁆𑀧𑀦𑁆𑀦𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀸 𑀧𑀼𑀕𑁆𑀕𑀮𑀸, 𑀢𑁂𑀲𑀁 𑀥𑀫𑁆𑀫𑁂. 𑀓𑁂 𑀧𑀦 𑀢𑁂? 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸. 𑀢𑁂 𑀳𑀺 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀬 ‘‘𑀢𑁂𑀪𑀽𑀫𑀓𑀸’’𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦 𑀧𑀢𑁆𑀢𑀦𑀺𑀬𑀸𑀫𑀸𑀦𑀁 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸 𑀅𑀦𑀺𑀬𑀢𑀥𑀫𑁆𑀫𑀸, 𑀦 𑀢𑁂𑀲𑀫𑁂𑀢𑁆𑀣 𑀲𑀗𑁆𑀕𑀳𑁄 𑀓𑀢𑁄. 𑀦 𑀳𑀺 𑀢𑁂𑀳𑀺 𑀲𑀫𑀦𑁆𑀦𑀸𑀕𑀫𑁂𑀦 𑀅𑀦𑀺𑀬𑀢𑀢𑀸 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀳 ‘‘𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀧𑀺 𑀅𑀦𑀺𑀬𑀢𑁄𑀬𑁂𑀯𑀸’’𑀢𑀺. 𑀇𑀫𑀁 𑀯𑁄𑀳𑀸𑀭𑀫𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀸𑀫𑁄 𑀦𑀸𑀫 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺, 𑀉𑀧𑀘𑀺𑀢𑀲𑀫𑁆𑀪𑀸𑀭𑀢𑀸𑀬 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑀼𑀁 𑀪𑀩𑁆𑀩𑀢𑀸𑀯 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀬𑀢𑁄𑀢𑀺 𑀯𑀘𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀉𑀪𑀬𑀲𑁆𑀲𑀧𑀻𑀢𑀺 𑀦𑀺𑀬𑀢𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻𑀢𑀺 𑀯𑀘𑀦𑀤𑁆𑀯𑀬𑀲𑁆𑀲.

𑀦𑀺𑀬𑀢𑀲𑁆𑀲𑀦𑀺𑀬𑀸𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.