𑁭. 𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁫𑁯𑁦-𑁫𑁯𑁪. 𑀞𑀺𑀢𑁂𑀦 𑀅𑀯𑀺𑀦𑀝𑁆𑀞𑁂𑀦. 𑀉𑀧𑀘𑀬𑁂𑀦𑀸𑀢𑀺 𑀲𑀻𑀮𑀪𑀽𑀢𑁂𑀦 𑀓𑀫𑁆𑀫𑀽𑀧𑀘𑀬𑁂𑀦. ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀬𑀣𑀸 ‘‘𑀦 𑀯𑀢𑁆𑀢𑀩𑁆𑀩𑀁 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦𑀦𑁆𑀢𑀺? 𑀆𑀫𑀦𑁆𑀢𑀸. 𑀤𑀸𑀦𑀁 𑀅𑀦𑀺𑀝𑁆𑀞𑀨𑀮𑀦𑁆𑀢𑀺…𑀧𑁂… 𑀢𑁂𑀦 𑀳𑀺 𑀘𑁂𑀢𑀲𑀺𑀓𑁄 𑀥𑀫𑁆𑀫𑁄 𑀤𑀸𑀦’’𑀦𑁆𑀢𑀺 𑀧𑀸𑀴𑀺 𑀧𑀯𑀢𑁆𑀢𑀸, 𑀏𑀯𑀁 𑀢𑀤𑀦𑀼𑀲𑀸𑀭𑁂𑀦 ‘‘𑀦 𑀯𑀢𑁆𑀢𑀩𑁆𑀩𑀁 𑀘𑁂𑀢𑀲𑀺𑀓𑀁 𑀲𑀻𑀮𑀦𑁆𑀢𑀺? 𑀆𑀫𑀦𑁆𑀢𑀸. 𑀲𑀻𑀮𑀁 𑀅𑀦𑀺𑀝𑁆𑀞𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀻𑀮𑀲𑁆𑀲 𑀘𑁂𑀢𑀲𑀺𑀓𑀪𑀸𑀯𑀲𑀸𑀥𑀓𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀘 𑀆𑀦𑁂𑀢𑁆𑀯𑀸 𑀢𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀅𑀘𑁂𑀢𑀲𑀺𑀓𑁄 𑀭𑀽𑀧𑀸𑀤𑀺𑀥𑀫𑁆𑀫𑁄 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀬𑀤𑀺 𑀲𑁄 𑀲𑀻𑀮𑀁 𑀪𑀯𑁂𑀬𑁆𑀬, 𑀯𑀺𑀦𑀸 𑀲𑀁𑀯𑀭𑀲𑀫𑀸𑀤𑀸𑀦𑁂𑀦 𑀯𑀺𑀦𑀸 𑀯𑀺𑀭𑀢𑀺𑀬𑀸 𑀲𑀻𑀮𑀯𑀸 𑀦𑀸𑀫 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀲𑀫𑀸𑀤𑀸𑀦𑀘𑁂𑀢𑀦𑀸 𑀯𑀺𑀭𑀢𑀺 𑀲𑀁𑀯𑀭𑁄 𑀲𑀻𑀮𑀁, 𑀢𑀲𑁆𑀫𑀸 ‘‘𑀲𑀻𑀮𑀁 𑀇𑀝𑁆𑀞𑀨𑀮𑀁 𑀓𑀦𑁆𑀢𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺, 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 𑀬𑀣𑀸 ‘‘𑀲𑀻𑀮𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀓𑀣𑀸 𑀆𑀕𑀢𑀸, 𑀢𑀣𑀸 ‘‘𑀤𑀸𑀦𑀁 𑀅𑀘𑁂𑀢𑀲𑀺𑀓’’𑀦𑁆𑀢𑀺 𑀯𑀺𑀲𑀼𑀁 𑀆𑀕𑀢𑀸 𑀓𑀣𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀲𑀸 𑀧𑀦 𑀓𑀣𑀸 𑀫𑀕𑁆𑀕𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀲𑀻𑀮𑀁𑀅𑀘𑁂𑀢𑀲𑀺𑀓𑀦𑁆𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.