𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀅𑀦𑀼𑀝𑀻𑀓𑀸

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. ‘‘𑀥𑀸𑀢𑀼𑀓𑀣𑀁 𑀤𑁂𑀲𑀬𑀺𑀢𑁆𑀯𑀸 𑀅𑀦𑀦𑁆𑀢𑀭𑀁 𑀢𑀲𑁆𑀲 𑀆𑀳 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀓𑀸𑀭𑀡𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀥𑀫𑁆𑀫𑀲𑀗𑁆𑀕𑀳𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀺𑀧𑀺 𑀥𑀫𑁆𑀫𑀲𑀗𑁆𑀕𑀳𑁂 𑀨𑀲𑁆𑀲𑀸𑀤𑀻𑀦𑀁 𑀧𑀣𑀯𑀻𑀆𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑁄 𑀅𑀦𑀼𑀧𑀤𑀯𑀺𑀪𑀸𑀕𑁄𑀧𑀺 𑀓𑀢𑁄, 𑀦 𑀲𑀗𑁆𑀕𑀳𑁄 𑀏𑀯, 𑀲𑁄 𑀧𑀦 𑀢𑁂𑀲𑀁 𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀳𑁂𑀢𑀼𑀤𑀼𑀓𑀸𑀤𑀺𑀢𑀺𑀓𑀤𑀼𑀓𑁂𑀳𑀺 𑀲𑀗𑁆𑀕𑀳𑀲𑀦𑁆𑀤𑀲𑁆𑀲𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀲𑀗𑁆𑀕𑀳𑁂 𑀢𑀺𑀓𑀤𑀼𑀓𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀢𑀁 𑀧𑀓𑀭𑀡𑀁 ‘‘𑀥𑀫𑁆𑀫𑀲𑀗𑁆𑀕𑀳𑁄’’𑀢𑀺 𑀲𑀫𑀜𑁆𑀜𑀁 𑀮𑀪𑀺. 𑀓𑀸𑀫𑀜𑁆𑀘 𑀥𑀫𑁆𑀫𑀲𑀗𑁆𑀕𑀳𑁂𑀧𑀺 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁫𑁮) 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄, 𑀲𑁄 𑀧𑀦 𑀦 𑀢𑀣𑀸 𑀲𑀸𑀢𑀺𑀲𑀬𑁄, 𑀬𑀣𑀸 𑀯𑀺𑀪𑀗𑁆𑀕𑀧𑀓𑀭𑀡𑁂𑀢𑀺 𑀲𑀸𑀢𑀺𑀲𑀬𑀁 𑀢𑀁 𑀕𑀳𑁂𑀢𑁆𑀯𑀸 𑀆𑀳 ‘‘𑀯𑀺𑀪𑀗𑁆𑀕𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀬𑀢𑁄 𑀢𑀁 ‘‘𑀯𑀺𑀪𑀗𑁆𑀕𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀥𑀸𑀢𑀼𑀓𑀣𑀸𑀬𑀸𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀢𑀣𑀸 ‘‘𑀥𑀫𑁆𑀫𑀲𑀗𑁆𑀕𑀳𑁂 𑀯𑀺𑀪𑀗𑁆𑀕𑁂’’𑀢𑀺 𑀏𑀢𑁆𑀣𑀸𑀧𑀺. 𑀆𑀥𑀸𑀭𑁄 𑀳𑀺 𑀲𑀗𑁆𑀕𑀳𑀡𑀯𑀺𑀪𑀚𑀦𑀧𑁆𑀧𑀪𑁂𑀤𑀯𑀘𑀦𑀲𑀗𑁆𑀔𑀸𑀢𑀸𑀦𑀁 𑀅𑀯𑀬𑀯𑀓𑀺𑀭𑀺𑀬𑀸𑀦𑀁 𑀢𑀁𑀲𑀫𑀼𑀤𑀸𑀬𑀪𑀽𑀢𑀸𑀦𑀺 𑀧𑀓𑀭𑀡𑀸𑀦𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀓𑀭𑀡𑀯𑀘𑀦𑀁 𑀯𑀸 𑀏𑀢𑀁, 𑀥𑀸𑀢𑀼𑀓𑀣𑀸𑀬 𑀓𑀭𑀡𑀪𑀽𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁄 𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀢𑀺𑀓𑀤𑀼𑀓𑀯𑀲𑁂𑀦 𑀢𑀸𑀯 𑀦𑁂𑀲𑀁 𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀲𑀗𑁆𑀕𑀡𑀺𑀁 𑀤𑁂𑀲𑁂𑀢𑁆𑀯𑀸 𑀲𑀗𑁆𑀕𑀳𑀧𑀼𑀩𑁆𑀩𑀓𑀢𑁆𑀢𑀸 𑀯𑀺𑀪𑀸𑀕𑀲𑁆𑀲 𑀢𑀤𑀦𑀦𑁆𑀢𑀭𑀁 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀪𑀗𑁆𑀕𑀁 𑀤𑁂𑀲𑁂𑀲𑀺. 𑀧𑀼𑀦 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀲𑀗𑁆𑀕𑀳𑀬𑀼𑀢𑁆𑀢𑁂 𑀥𑀫𑁆𑀫𑁂 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀦𑀬𑀧𑁆𑀧𑀪𑁂𑀤𑀢𑁄 𑀤𑀲𑁆𑀲𑁂𑀦𑁆𑀢𑁄 𑀥𑀸𑀢𑀼𑀓𑀣𑀁 𑀤𑁂𑀲𑁂𑀲𑀺 𑀢𑀲𑁆𑀲𑀸 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀲𑀭𑀻𑀭𑀓𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀸 𑀔𑀦𑁆𑀥𑀸𑀤𑀺𑀓𑁂 𑀓𑀼𑀲𑀮𑀸𑀤𑀺𑀓𑁂 𑀘 𑀯𑀺𑀦𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀦𑀬𑀁 𑀦𑁂𑀢𑀼𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀣𑀸𑀲𑀗𑁆𑀕𑀳𑀺𑀢𑀯𑀺𑀪𑀢𑁆𑀢𑀸𑀦’’𑀦𑁆𑀢𑀺. 𑀏𑀯𑀁 𑀲𑀗𑁆𑀕𑀳𑀢𑁄 𑀯𑀺𑀪𑀸𑀕𑀢𑁄 𑀧𑀪𑁂𑀤𑀢𑁄 𑀘 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸 𑀬𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀯𑀲𑁂𑀦 𑀳𑁄𑀢𑀺, 𑀬𑁄 𑀘𑀸𑀬𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀼𑀧𑀸𑀤𑀸𑀦𑁄 𑀧𑀼𑀕𑁆𑀕𑀮𑀯𑁄𑀳𑀸𑀭𑁄, 𑀢𑀲𑁆𑀲 𑀘 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁄, 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀤𑁂𑀲𑀺𑀢𑀸𑀢𑀺 𑀇𑀤𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀧𑀓𑀭𑀡𑀸𑀦𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀢𑁂𑀲𑀦𑁆𑀢𑀺 𑀥𑀫𑁆𑀫𑀸𑀦𑀁. 𑀲𑀪𑀸𑀯𑀢𑁄𑀢𑀺 ‘‘𑀨𑀲𑁆𑀲𑁄 𑀯𑁂𑀤𑀦𑀸’’𑀢𑀺𑀆𑀤𑀺𑀲𑀪𑀸𑀯𑀢𑁄. 𑀉𑀧𑀸𑀤𑀸𑀬𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄 𑀧𑁄𑀲𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑁂 𑀉𑀧𑀸𑀤𑀸𑀬. 𑀧𑀜𑁆𑀜𑀸𑀧𑀦𑀁 𑀬𑀸𑀬 𑀢𑀚𑁆𑀚𑀸𑀉𑀧𑀸𑀤𑀸𑀤𑀺𑀪𑁂𑀤𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀳𑁄𑀢𑀺, 𑀢𑀁 𑀧𑀜𑁆𑀜𑀢𑁆𑀢𑀺𑀁. 𑀧𑀪𑁂𑀤𑀢𑁄𑀢𑀺 𑀔𑀦𑁆𑀥𑀸𑀤𑀺𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀺𑀪𑀸𑀕𑀢𑁄. 𑀬𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀲𑀪𑀸𑀯𑀢𑁄 𑀉𑀧𑀸𑀤𑀸𑀬 𑀘 𑀧𑀜𑁆𑀜𑀸𑀧𑀦𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀣 𑀬𑁂 𑀥𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀫𑀽𑀮𑀪𑀽𑀢𑀁 𑀉𑀧𑀸𑀤𑀸𑀦𑀁 𑀲𑀪𑀸𑀯𑀥𑀫𑁆𑀫𑁄 𑀏𑀯, 𑀓𑁂𑀯𑀮𑀁 𑀧𑀦 𑀢𑁂𑀲𑀁 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑀲𑀦𑁆𑀦𑀺𑀲𑁆𑀲𑀬𑀢𑁄 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀥𑀫𑁆𑀫𑁂…𑀧𑁂… 𑀳𑁄𑀢𑀻’’𑀢𑀺 𑀆𑀳. 𑀢𑀢𑁆𑀣 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂𑀢𑀺 𑀇𑀫𑀺𑀦𑀸 𑀧𑀩𑀦𑁆𑀥𑀲𑀦𑁆𑀦𑀺𑀲𑁆𑀲𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺𑀁 𑀯𑀤𑀢𑀺, 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦𑀸𑀢𑀺 𑀇𑀫𑀺𑀦𑀸 𑀲𑁂𑀲𑀧𑀜𑁆𑀜𑀢𑁆𑀢𑀺𑀁. 𑀢𑀺𑀲𑁆𑀲𑁄 𑀳𑀺 𑀧𑀜𑁆𑀜𑀢𑁆𑀢𑀺𑀬𑁄 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺 𑀲𑀫𑀽𑀳𑀧𑀜𑁆𑀜𑀢𑁆𑀢𑀺 𑀅𑀯𑀢𑁆𑀣𑀸𑀯𑀺𑀲𑁂𑀲𑀧𑀜𑁆𑀜𑀢𑁆𑀢𑀻𑀢𑀺. 𑀢𑀢𑁆𑀣 𑀧𑀩𑀦𑁆𑀥𑁄 𑀲𑀦𑁆𑀢𑀸𑀦𑁄. 𑀲𑀫𑀼𑀤𑀸𑀬𑁄 𑀲𑀫𑀽𑀳𑁄. 𑀉𑀧𑁆𑀧𑀸𑀤𑀸𑀤𑀺𑀓𑁄 𑀤𑀳𑀭𑀪𑀸𑀯𑀸𑀤𑀺𑀓𑁄 𑀘 𑀅𑀯𑀢𑁆𑀣𑀸𑀯𑀺𑀲𑁂𑀲𑁄. 𑀢𑁂𑀲𑀼 𑀅𑀲𑀪𑀸𑀯𑀕𑁆𑀕𑀳𑀡𑁂𑀦 𑀯𑀺𑀦𑀸 𑀧𑀩𑀦𑁆𑀥𑀲𑀫𑀽𑀳𑀸𑀦𑀁 𑀅𑀲𑀪𑀸𑀯𑀢𑁆𑀢𑁂 𑀲𑀺𑀤𑁆𑀥𑁂 𑀅𑀲𑀪𑀸𑀯𑀲𑀫𑀽𑀳𑀯𑀲𑁂𑀦𑀸𑀢𑀺 𑀅𑀲𑀪𑀸𑀯𑀕𑁆𑀕𑀳𑀡𑀁 𑀧𑀩𑀦𑁆𑀥𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀦𑁆𑀢𑀺 𑀧𑀼𑀩𑁆𑀩𑁂 𑀬𑀁-𑀲𑀤𑁆𑀤𑁂𑀦 𑀧𑀭𑀸𑀫𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀥𑀫𑁆𑀫𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀅𑀜𑁆𑀜𑁂𑀲𑀜𑁆𑀘 𑀩𑀸𑀳𑀺𑀭𑀭𑀽𑀧𑀦𑀺𑀩𑁆𑀩𑀸𑀦𑀸𑀦’’𑀦𑁆𑀢𑀺. 𑀲𑀲𑀪𑀸𑀯𑀲𑀫𑀽𑀳𑀲𑀲𑀪𑀸𑀯𑀧𑁆𑀧𑀪𑁂𑀤𑀯𑀲𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀲𑀪𑀸𑀯𑀲𑀫𑀽𑀳𑀯𑀲𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀺𑀲𑀲𑀪𑀸𑀯𑀯𑀺𑀲𑁂𑀲𑀯𑀲𑁂𑀦 𑀘. ‘‘𑀲𑀲𑀪𑀸𑀯𑀲𑀫𑀽𑀳𑀲𑀪𑀸𑀯𑀪𑁂𑀤𑀯𑀲𑁂𑀦𑀸’’𑀢𑀺 𑀘 𑀧𑀸𑀞𑁄. 𑀢𑀢𑁆𑀣 𑀲𑀫𑀽𑀳𑀲𑀪𑀸𑀯𑁄𑀢𑀺 𑀲𑀪𑀸𑀯𑀲𑀦𑁆𑀢𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀺𑀥𑀼𑀭𑀁 𑀲𑀫𑀽𑀳𑀯𑀲𑁂𑀦 𑀮𑀓𑁆𑀔𑀡𑀫𑁂𑀯𑀸𑀳. 𑀢𑀣𑀸 𑀳𑀺 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀢𑀸 𑀯𑀼𑀢𑁆𑀢𑀸. 𑀢𑀸𑀬𑀸𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀆𑀤𑀺𑀧𑁆𑀧𑀪𑁂𑀤𑀸𑀬 𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸. 𑀯𑀺𑀪𑀢𑁆𑀢𑀸 𑀲𑀪𑀸𑀯𑀧𑀜𑁆𑀜𑀢𑁆𑀢𑀻𑀢𑀺 ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁨) 𑀯𑀺𑀪𑀢𑁆𑀢𑀸 𑀨𑀲𑁆𑀲𑀸𑀤𑀺𑀲𑀪𑀸𑀯𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀸𑀫𑀜𑁆𑀜𑀯𑀲𑁂𑀦 𑀧𑀯𑀢𑁆𑀢𑀁 𑀓𑀼𑀲𑀮𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀫𑀸𑀦𑁄 𑀅𑀯𑀢𑁆𑀣𑀸𑀯𑀺𑀲𑁂𑀲𑀲𑀳𑀺𑀢𑁄 𑀏𑀓𑀢𑁆𑀢𑀕𑁆𑀕𑀳𑀡𑀦𑀺𑀩𑀦𑁆𑀥𑀦𑁄 𑀲𑀢𑁆𑀢𑁄𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀲𑁄 𑀲𑀪𑀸𑀯𑀥𑀫𑁆𑀫𑁄 𑀦𑀸𑀫 𑀧𑀦 𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀦 𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀸𑀬𑀸𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸. 𑀬𑀲𑁆𑀫𑀸 𑀧𑀦 𑀥𑀫𑁆𑀫𑀸𑀦𑀁 𑀧𑀩𑀦𑁆𑀥𑁄 𑀲𑀫𑀽𑀳𑁄 𑀘 𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑀲𑁆𑀫𑀸 ‘‘𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀲𑀪𑀸𑀯𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀧𑀦 ‘‘𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 ‘‘𑀅𑀲𑀪𑀸𑀯𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄. 𑀬𑀤𑀺 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺𑀬𑁄 𑀇𑀥 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀓𑀣𑀁 ‘‘𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀦𑀸𑀫𑀁 𑀚𑀸𑀢𑀦𑁆𑀢𑀺 𑀆𑀳 ‘‘𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀻𑀲𑀽’’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼. 𑀬𑁂 𑀥𑀫𑁆𑀫𑁂𑀢𑀺 𑀬𑁂 𑀔𑀦𑁆𑀥𑀸𑀤𑀺𑀥𑀫𑁆𑀫𑁂. 𑀧𑀜𑁆𑀜𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀸𑀯𑁂𑀦𑀸𑀢𑀺 𑀧𑀜𑁆𑀜𑀸𑀧𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦. 𑀅𑀥𑀺𑀝𑁆𑀞𑀸𑀦𑀜𑁆𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀥𑀫𑁆𑀫𑀸 𑀧𑀜𑁆𑀜𑀸𑀧𑀦𑀲𑁆𑀲. 𑀏𑀯𑀜𑁆𑀘 𑀓𑀢𑁆𑀯𑀸 𑀔𑀦𑁆𑀥𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑁄 𑀕𑀳𑀺𑀢𑁄. 𑀬𑁂 𑀥𑀫𑁆𑀫𑁂𑀢𑀺 𑀯𑀸 𑀬𑁂 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂. 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑁄𑀢𑀺 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄 𑀯𑀢𑁆𑀣𑀼𑀪𑁂𑀤𑀢𑁄 𑀅𑀲𑀗𑁆𑀓𑀭𑀢𑁄 𑀞𑀧𑁂𑀢𑀼𑀓𑀸𑀫𑁄. 𑀧𑀜𑁆𑀜𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀘 𑀯𑀢𑁆𑀣𑀼𑀪𑁂𑀤𑀪𑀺𑀦𑁆𑀦𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁 𑀧𑀭𑀺𑀘𑁆𑀙𑁂𑀤𑀁. 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀲𑀸𑀫𑀜𑁆𑀜𑀧𑁆𑀧𑀪𑁂𑀤𑀧𑀜𑁆𑀜𑀸𑀧𑀦𑀸𑀢𑀺 𑀲𑀸𑀫𑀜𑁆𑀜𑀪𑀽𑀢𑀸𑀦𑀁 𑀯𑀺𑀲𑁂𑀲𑀪𑀽𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀧𑀜𑁆𑀜𑀸𑀧𑀦𑀸. 𑀢𑁂𑀲𑀦𑁆𑀢𑀺 𑀅𑀢𑁆𑀣-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀢𑀢𑁆𑀣𑀸𑀢𑀺 𑀧𑀜𑁆𑀜𑀸𑀧𑀦𑀸𑀬 𑀅𑀢𑁆𑀣𑀤𑀲𑁆𑀲𑀦𑀪𑀽𑀢𑁂𑀲𑀼 𑀤𑀲𑁆𑀲𑀦𑀸𑀤𑀻𑀲𑀼. 𑀇𑀤𑀫𑁂𑀯𑀁𑀦𑀸𑀫𑀓𑀦𑁆𑀢𑀺 𑀇𑀤𑀁 𑀭𑀼𑀧𑁆𑀧𑀦𑀸𑀤𑀺𑀅𑀢𑁆𑀣𑀚𑀸𑀢𑀁 𑀇𑀢𑁆𑀣𑀦𑁆𑀦𑀸𑀫𑀓𑀁 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀲𑀫𑀜𑁆𑀜𑀁. 𑀢𑀁𑀢𑀁𑀓𑁄𑀝𑁆𑀞𑀸𑀲𑀺𑀓𑀓𑀭𑀡𑀦𑁆𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀢𑀁𑀢𑀁𑀅𑀢𑁆𑀣𑀯𑀺𑀪𑀸𑀕𑀧𑀭𑀺𑀬𑀸𑀧𑀦𑁆𑀦𑀢𑀸𑀧𑀸𑀤𑀦𑀁. 𑀢𑀣𑀸 𑀲𑀜𑁆𑀜𑀼𑀧𑁆𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀩𑁄𑀥𑀦𑀫𑁂𑀯 𑀦𑀺𑀓𑁆𑀔𑀺𑀧𑀦𑀸’’𑀢𑀺. 𑀩𑁄𑀥𑀦𑀜𑁆𑀳𑀺 𑀩𑁄𑀥𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀩𑁄𑀥𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀞𑀧𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀦𑀺𑀓𑁆𑀔𑀺𑀧𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀜𑁆𑀜𑀸𑀧𑀦𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀲𑀸𑀥𑀦𑁂𑀦 𑀯𑀢𑁆𑀯𑀸 𑀲𑀸𑀥𑀦𑀦𑁆𑀢𑀭𑀸𑀫𑀲𑀦𑁂𑀦 𑀅𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀸𑀲𑀗𑁆𑀓𑀸 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀬𑁄 𑀧𑀦𑀸𑀬𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑀁𑀢𑀁𑀧𑀜𑁆𑀜𑀸𑀧𑁂𑀢𑀩𑁆𑀩𑀥𑀫𑁆𑀫𑀸𑀦𑀁. 𑀤𑀲𑁆𑀲𑀦𑀪𑀽𑀢𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀤𑀺𑀝𑁆𑀞𑀢𑀸𑀬, 𑀞𑀧𑀦𑀪𑀽𑀢𑀸𑀬 𑀞𑀧𑀺𑀢𑀢𑀸𑀬. 𑀢𑀁𑀦𑀺𑀫𑀺𑀢𑁆𑀢𑀢𑀦𑁆𑀢𑀺 𑀢𑀲𑁆𑀲 𑀤𑀲𑁆𑀲𑀦𑀲𑁆𑀲 𑀞𑀧𑀦𑀲𑁆𑀲 𑀘 𑀦𑀺𑀫𑀺𑀢𑁆𑀢𑀓𑀸𑀭𑀡𑀢𑀁. 𑀦𑀺𑀫𑀺𑀢𑁆𑀢𑀜𑁆𑀳𑀺 𑀓𑀢𑁆𑀢𑀼𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀪𑀺𑀓𑁆𑀔𑀸 𑀯𑀸𑀲𑁂𑀢𑀻’’𑀢𑀺, ‘‘𑀅𑀭𑀺𑀬𑀪𑀸𑀯𑀓𑀭𑀸𑀦𑀺 𑀲𑀘𑁆𑀘𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀘.

𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀢𑀸𑀤𑀺𑀯𑀺𑀲𑁂𑀲𑀯𑀘𑀦𑁂𑀦 𑀲𑀳 𑀧𑀸𑀞𑀸𑀦𑀸𑀭𑀼𑀴𑁆𑀳𑀢𑀁. 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀸𑀦𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀚𑁆𑀚𑀫𑀸𑀦𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀢𑀣𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑁆𑀲. 𑀢𑀁 𑀧𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑀁 𑀢𑀣𑀸-𑀲𑀤𑁆𑀤𑁂𑀦 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀻𑀧𑀺𑀢𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀣𑀸 𑀓𑀼𑀲𑀮𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀦𑀺𑀯𑀢𑁆𑀢𑀲𑀪𑀸𑀯𑀸𑀦𑀻𑀢𑀺 𑀯𑀺𑀪𑀢𑁆𑀢𑀲𑀪𑀸𑀯𑀸𑀦𑀺. 𑀉𑀧𑀮𑀤𑁆𑀥𑀻𑀢𑀺 𑀕𑀳𑀡𑀁. 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀢𑁂𑀦 𑀭𑀽𑀧𑀯𑁂𑀤𑀦𑀸𑀤𑀺𑀆𑀓𑀸𑀭𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲. 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀢𑀺 𑀢𑀢𑁄 𑀭𑀽𑀧𑀯𑁂𑀤𑀦𑀸𑀤𑀺𑀢𑁄 𑀅𑀜𑁆𑀜𑁂𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁂𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀧𑀜𑁆𑀜𑀸𑀧𑀦𑀸𑀓𑀸𑀭𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲. 𑀧𑀜𑁆𑀜𑀢𑁆𑀢𑀺𑀤𑀼𑀓𑁂 𑀯𑀼𑀢𑁆𑀢𑀫𑁂𑀯 ‘‘𑀅𑀬𑀜𑁆𑀘 𑀯𑀸𑀤𑁄 𑀲𑁂𑀯𑀢𑁆𑀣𑀺𑀓𑀣𑀸𑀬 𑀧𑀝𑀺𑀲𑀺𑀤𑁆𑀥𑁄’’𑀢𑀺𑀆𑀤𑀺𑀦𑀸. 𑀮𑁄𑀓𑀦𑀺𑀭𑀼𑀢𑁆𑀢𑀺𑀫𑀢𑁆𑀢𑀲𑀺𑀤𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀫𑀢𑁆𑀢𑀕𑁆𑀕𑀳𑀡𑀁 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼𑀲𑁆𑀲 𑀦 𑀓𑁂𑀯𑀮𑀁 𑀯𑀺𑀚𑁆𑀚𑀫𑀸𑀦𑀲𑀪𑀸𑀯𑀢𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑁂𑀯, 𑀅𑀣 𑀔𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑀦𑀺𑀯𑀢𑁆𑀢𑀦𑀢𑁆𑀣𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀪𑀺𑀦𑀺𑀯𑁂𑀲𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺 𑀆𑀳. 𑀘𑀢𑀼𑀲𑀘𑁆𑀘𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀲𑀘𑁆𑀘𑀦𑁆𑀢𑀭𑀔𑀦𑁆𑀥𑀦𑁆𑀢𑀭𑀸𑀤𑀺𑀓𑀁 𑀧𑀜𑁆𑀘𑀫𑀲𑀘𑁆𑀘𑀸𑀤𑀺𑀓𑀁. 𑀲𑀘𑁂 𑀢𑀁 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀧𑀝𑀺𑀚𑀸𑀦𑁂𑀬𑁆𑀬, 𑀅𑀬𑀸𑀣𑀸𑀯𑀕𑀳𑀺𑀢𑀲𑁆𑀲 𑀢𑀁 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀯𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀪𑀺𑀦𑀺𑀯𑁂𑀲𑁂𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀉𑀤𑁆𑀤𑁂𑀲𑁂 𑀦𑀺𑀤𑁆𑀤𑁂𑀲𑁂 𑀘 𑀲𑀢𑁆𑀢𑀯𑀦𑁆𑀢𑀁 𑀧𑀥𑀸𑀦𑀪𑀸𑀯𑁂𑀦 𑀆𑀕𑀫𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀭𑀽𑀧𑀢𑁄 𑀢𑀺𑀲𑁆𑀲𑀦𑁆𑀦𑀁 𑀆𑀕𑀢𑀢’’𑀦𑁆𑀢𑀺. 𑀕𑀼𑀡𑀪𑀸𑀯𑁂𑀦 𑀧𑀦 𑀉𑀤𑁆𑀥𑀁𑀲𑁄𑀢𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀧𑀸𑀲𑀸𑀡𑀮𑁂𑀔𑀸𑀤𑀺𑀕𑁆𑀕𑀳𑀡𑁂𑀲𑀼 𑀇𑀢𑀭𑀸𑀧𑀺 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀆𑀕𑀢𑀸 𑀏𑀯.

𑀬𑀣𑀸𑀯𑀼𑀢𑁆𑀢𑀲𑁆𑀲…𑀧𑁂… 𑀅𑀯𑀺𑀭𑁄𑀥𑁂𑀦𑀸𑀢𑀺 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀅𑀯𑀺𑀮𑁄𑀫𑀦𑁂𑀦. 𑀆𑀘𑀭𑀺𑀬𑀯𑀸𑀤𑀸𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀅𑀜𑁆𑀜𑀢𑁆𑀣 𑀧𑀦 𑀅𑀝𑁆𑀞𑀓𑀣𑀸 𑀘. 𑀬𑀣𑀸 𑀘 𑀅𑀯𑀺𑀭𑁄𑀥𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀫𑀢𑁆𑀢𑀢𑁆𑀣𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁂𑀦 ‘‘𑀅𑀯𑀺𑀚𑁆𑀚𑀫𑀸𑀦𑀸 𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀁 𑀲𑀫𑀸𑀲𑀯𑀺𑀓𑀧𑁆𑀧𑀫𑀸𑀳. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀳𑀺 𑀤𑁆𑀯𑁂 𑀲𑀫𑀸𑀲𑀸 𑀅𑀯𑀺𑀚𑁆𑀚𑀫𑀸𑀦𑀲𑁆𑀲, 𑀅𑀯𑀺𑀚𑁆𑀚𑀫𑀸𑀦𑀸 𑀯𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑁂𑀲𑀼 𑀧𑀼𑀭𑀺𑀫𑁂𑀦 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸, 𑀤𑀼𑀢𑀺𑀬𑁂𑀦 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀸 𑀇𑀢𑀭𑀸𑀧𑀺. 𑀲𑀲𑀪𑀸𑀯𑀁 𑀯𑁂𑀤𑀦𑀸𑀤𑀺𑀓𑀁. 𑀢𑀚𑁆𑀚𑀧𑀭𑀫𑀢𑁆𑀣𑀦𑀸𑀫𑀮𑀸𑀪𑀢𑁄𑀢𑀺 𑀢𑀚𑁆𑀚𑀲𑁆𑀲 𑀢𑀤𑀦𑀼𑀭𑀽𑀧𑀲𑁆𑀲 𑀧𑀭𑀫𑀢𑁆𑀣𑀲𑁆𑀲 𑀅𑀦𑁆𑀯𑀢𑁆𑀣𑀲𑁆𑀲 𑀦𑀸𑀫𑀲𑁆𑀲 𑀮𑀪𑀦𑀢𑁄, 𑀅𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀧𑀭𑀫𑀢𑁆𑀣𑀺𑀓𑀲𑁆𑀲 𑀯𑁂𑀤𑀦𑀸𑀤𑀺𑀦𑀸𑀫𑀲𑁆𑀲 𑀮𑀪𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀫𑀢𑁆𑀢-𑀲𑀤𑁆𑀤𑁄, 𑀢𑁂𑀦 𑀘𑀸𑀬𑀁 𑀯𑀺𑀲𑁂𑀲𑁄 𑀦𑀺𑀯𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀢𑁄 𑀮𑀪𑀺𑀢𑀩𑁆𑀩𑀦𑁆𑀢𑀺 𑀧𑀭𑀁 𑀉𑀧𑀸𑀤𑀸𑀬 𑀮𑀤𑁆𑀥𑀩𑁆𑀩𑀁 𑀬𑀣𑀸 𑀭𑀽𑀧𑀸𑀤𑀺𑀓𑁂 𑀉𑀧𑀸𑀤𑀸𑀬 𑀲𑀢𑁆𑀢𑁄𑀢𑀺 𑀦𑀺𑀲𑁆𑀲𑀪𑀸𑀯𑀲𑀫𑀽𑀳𑀲𑀦𑁆𑀢𑀸𑀦𑀸𑀤𑀺 𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼. 𑀏𑀓𑀢𑁆𑀢𑁂𑀦𑀸𑀢𑀺 𑀅𑀦𑀜𑁆𑀜𑀢𑁆𑀢𑁂𑀦. 𑀅𑀦𑀼𑀧𑀮𑀩𑁆𑀪𑀲𑀪𑀸𑀯𑀢𑀸 𑀜𑀸𑀡𑁂𑀦 𑀅𑀕𑁆𑀕𑀳𑁂𑀢𑀩𑁆𑀩𑀲𑀪𑀸𑀯𑀢𑀸, 𑀬𑀢𑁄 𑀢𑁂 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀲𑀲𑀽𑀓𑀲𑀸𑀮𑀺𑀭𑀸𑀲𑀺𑀆𑀤𑀺𑀆𑀓𑀸𑀭𑁂𑀦 𑀲𑀁𑀓𑀼𑀘𑀺𑀢𑀕𑁆𑀕𑁄 𑀯𑀸𑀲𑀯𑀯𑀸𑀲𑀼𑀤𑁂𑀯𑀸𑀤𑀻𑀦𑀁 𑀯𑀺𑀬 𑀫𑁄𑀮𑀺𑀯𑀺𑀲𑁂𑀲𑁄 𑀓𑀺𑀭𑀻𑀝𑀁, 𑀲𑁄 𑀧𑀦 𑀫𑀓𑀼𑀝𑀯𑀺𑀲𑁂𑀲𑁄𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀓𑀺𑀭𑀻𑀝𑀁 𑀫𑀓𑀼𑀝’’𑀦𑁆𑀢𑀺. 𑀲𑀩𑁆𑀩𑀲𑀫𑁄𑀭𑁄𑀥𑁄𑀢𑀺 𑀲𑀩𑁆𑀩𑀸𑀲𑀁 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀙𑀦𑁆𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀅𑀦𑁆𑀢𑁄𑀓𑀭𑀡𑀁. 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸𑀢𑀺 𑀇𑀤𑀁 𑀮𑀓𑁆𑀔𑀡𑀯𑀘𑀦𑀁. 𑀦 𑀳𑀺 𑀲𑀩𑁆𑀩𑀸𑀧𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀯𑀲𑁂𑀦 𑀧𑀯𑀢𑁆𑀢𑀸, 𑀦𑀸𑀧𑀺 𑀲𑀩𑁆𑀩𑀸 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀸. 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺𑀆𑀤𑀺𑀓𑀁 𑀧𑀦 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀬𑀸, 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀺𑀓𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀏𑀓𑀤𑁂𑀲𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀘 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀢𑀸𑀬𑀸𑀳 ‘‘𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑁆𑀢𑀸’’𑀢𑀺. 𑀧𑀽𑀭𑀡𑀢𑁆𑀣𑁄 𑀳𑀺 𑀲𑀤𑁆𑀤𑁄 𑀢𑀤𑀢𑁆𑀣𑀤𑀻𑀧𑀦𑀫𑀼𑀔𑁂𑀦 𑀧𑀽𑀭𑁂𑀢𑀩𑁆𑀩𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀲𑁄 𑀘 𑀲𑀗𑁆𑀔𑀸𑀯𑀺𑀲𑀬𑁄 𑀧𑀥𑀸𑀦𑁄𑀯𑀸𑀢𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀗𑁆𑀔𑀸𑀢𑀩𑁆𑀩𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀬𑀸𑀯 𑀳𑀺 𑀤𑀲𑀲𑀗𑁆𑀔𑀸 𑀲𑀗𑁆𑀔𑁆𑀬𑁂𑀬𑁆𑀬𑀧𑁆𑀧𑀥𑀸𑀦𑀸𑀢𑀺. 𑀢𑀣𑀸 𑀤𑁆𑀯𑁂 𑀢𑀻𑀡𑀻𑀢𑀺𑀆𑀤𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀻𑀦𑀁. 𑀲𑀗𑁆𑀔𑀸𑀢𑀩𑁆𑀩𑁄 𑀧𑀦 𑀅𑀢𑁆𑀣𑁄 𑀓𑁄𑀘𑀺 𑀯𑀺𑀚𑁆𑀚𑀫𑀸𑀦𑁄, 𑀓𑁄𑀘𑀺 𑀅𑀯𑀺𑀚𑁆𑀚𑀫𑀸𑀦𑁄, 𑀓𑁄𑀘𑀺 𑀲𑀳 𑀯𑀺𑀲𑀼𑀜𑁆𑀘 𑀢𑀤𑀼𑀪𑀬𑀁 𑀫𑀺𑀲𑁆𑀲𑁄𑀢𑀺 𑀙𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀪𑀚𑀢𑀻𑀢𑀺.

𑀇𑀢𑀭𑀸𑀢𑀺 𑀉𑀧𑀸𑀤𑀸𑀲𑀫𑁄𑀥𑀸𑀦𑀢𑀚𑁆𑀚𑀸𑀲𑀦𑁆𑀢𑀢𑀺𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀢𑁆𑀢𑀸𑀯𑀲𑁂𑀲𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑁄 𑀘. 𑀲𑀢𑁆𑀢𑀭𑀣𑀸𑀤𑀺𑀪𑁂𑀤𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀤𑀻𑀖𑀭𑀲𑁆𑀲𑀸𑀤𑀺𑀪𑁂𑀤𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀳𑀢𑁆𑀣𑀕𑀢𑀸𑀤𑀺𑀯𑀺𑀲𑀺𑀝𑁆𑀞𑀸 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺, 𑀲𑀫𑁄𑀥𑀸𑀦𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀢𑀣𑁂𑀯 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑀺𑀆𑀤𑀺𑀓𑀸 𑀯𑀺𑀚𑁆𑀚𑀫𑀸𑀦𑀕𑀩𑁆𑀪𑀸 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀁 𑀪𑀚𑀦𑁆𑀢𑀻𑀢𑀺 𑀆𑀳 ‘‘𑀬𑀣𑀸𑀬𑁄𑀕𑀁 𑀢𑀁 𑀢𑀁 𑀧𑀜𑁆𑀜𑀢𑁆𑀢𑀺’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑀁 𑀢𑀢𑀺𑀬𑀁…𑀧𑁂… 𑀪𑀚𑀦𑁆𑀢𑀻’’𑀢𑀺. 𑀬𑀜𑁆𑀳𑀻𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀉𑀧𑀦𑀺𑀥𑀸𑀉𑀧𑀦𑀺𑀓𑁆𑀔𑀺𑀢𑁆𑀢𑀧𑀜𑁆𑀜𑀢𑁆𑀢𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀲𑀫𑀢𑁆𑀣𑀦𑀁. 𑀢𑀢𑁆𑀣 𑀢𑀜𑁆𑀘 𑀲𑀗𑁆𑀔𑀸𑀦𑀦𑁆𑀢𑀺 𑀬𑀁 ‘‘𑀧𑀞𑀫𑀁 𑀏𑀓’’𑀦𑁆𑀢𑀺𑀆𑀤𑀺𑀓𑀁 𑀲𑀗𑁆𑀔𑀸𑀦𑀁, 𑀢𑀜𑁆𑀘 𑀲𑀗𑁆𑀔𑀸𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀭𑀽𑀧𑀁. 𑀘-𑀲𑀤𑁆𑀤𑁂𑀦 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀫𑁆𑀧𑀺 𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀧𑀜𑁆𑀜𑀢𑁆𑀢𑀻𑀢𑀺. 𑀢𑀲𑁆𑀲𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯. 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀧𑀭𑀫𑀢𑁆𑀣𑀢𑁄 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑀣𑀸𑀢𑀺 𑀇𑀫𑀺𑀦𑀸 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀦𑁆𑀢𑀺 𑀏𑀢𑀁 𑀆𑀓𑀟𑁆𑀠𑀢𑀺. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀯𑀺𑀚𑁆𑀚𑀫𑀸𑀦𑁄’’𑀢𑀺.

𑀑𑀓𑀸𑀲𑁂𑀢𑀺 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀤𑁂𑀲𑁂. 𑀲𑁄 𑀳𑀺 𑀓𑀸𑀫𑀸𑀥𑀺𑀝𑁆𑀞𑀸𑀦𑀢𑁄 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑁂𑀲𑀽𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀓𑀸𑀫𑀪𑀯𑀁 ‘‘𑀓𑀸𑀫𑁄’’𑀢𑀺 𑀯𑀤𑀢𑀺. 𑀪𑀡𑀦𑀁 𑀲𑀤𑁆𑀤𑁄 𑀘𑁂𑀢𑀦𑀸 𑀯𑀸, 𑀢𑀁𑀲𑀫𑀗𑁆𑀕𑀺𑀢𑀸𑀬 𑀢𑀩𑁆𑀩𑀺𑀲𑀺𑀝𑁆𑀞𑁂 𑀧𑀼𑀕𑁆𑀕𑀮𑁂 𑀪𑀸𑀡𑀓𑁄𑀢𑀺 𑀧𑀜𑁆𑀜𑀢𑁆𑀢𑀻𑀢𑀺 𑀆𑀳 ‘‘𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀧𑀓𑁆𑀔𑀁 𑀪𑀚𑀢𑀻’’𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀭𑀽𑀧𑀸𑀬𑀢𑀦𑀕𑁆𑀕𑀳𑀡𑀫𑀼𑀔𑁂𑀦 𑀭𑀽𑀧𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑀁 𑀕𑀬𑁆𑀳𑀢𑀻𑀢𑀺 𑀢𑀲𑁆𑀲 𑀢𑁂𑀦 𑀅𑀪𑁂𑀤𑁄𑀧𑀘𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀬𑀢𑀦𑀲𑀗𑁆𑀔𑀸𑀢𑁂𑀦 𑀲𑀡𑁆𑀞𑀸𑀦𑁂𑀦𑀸’’𑀢𑀺. 𑀬𑀁 𑀅𑀪𑁂𑀤𑁄𑀧𑀘𑀸𑀭𑀁 𑀪𑀺𑀦𑁆𑀤𑀺𑀢𑀼𑀁 𑀅𑀚𑀸𑀦𑀦𑁆𑀢𑀸 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀭𑀽𑀧𑀸𑀬𑀢𑀦𑀁 𑀲𑀡𑁆𑀞𑀸𑀦𑀲𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀺. ‘‘𑀓𑀺𑀲𑁄 𑀧𑀼𑀕𑁆𑀕𑀮𑁄, 𑀣𑀽𑀮𑁄 𑀧𑀼𑀕𑁆𑀕𑀮𑁄, 𑀓𑀺𑀲𑁄 𑀤𑀡𑁆𑀟𑁄, 𑀣𑀽𑀮𑁄 𑀤𑀡𑁆𑀟𑁄’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀸 𑀢𑀣𑀸𑀢𑀣𑀸𑀲𑀦𑁆𑀦𑀺𑀯𑀺𑀝𑁆𑀞𑁂 𑀭𑀽𑀧𑀲𑀗𑁆𑀔𑀸𑀢𑁂 𑀓𑀺𑀲𑀸𑀤𑀺𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺, 𑀦 𑀭𑀽𑀧𑀸𑀬𑀢𑀦𑀫𑀢𑁆𑀢𑁂𑀢𑀺 𑀆𑀳 ‘‘𑀲𑀡𑁆𑀞𑀸𑀦𑀦𑁆𑀢𑀺 𑀯𑀸 𑀭𑀽𑀧𑀸𑀬𑀢𑀦𑁂 𑀅𑀕𑁆𑀕𑀳𑀺𑀢𑁂’’𑀢𑀺. 𑀧𑀘𑁆𑀘𑀢𑁆𑀢𑀥𑀫𑁆𑀫𑀦𑀸𑀫𑀯𑀲𑁂𑀦𑀸𑀢𑀺 ‘‘𑀧𑀣𑀯𑀻 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀸𑀦𑀁 𑀢𑀁𑀢𑀁𑀦𑀸𑀫𑀯𑀲𑁂𑀦. 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀺𑀪𑀸𑀕𑁂𑀦 𑀧𑀯𑀢𑁆𑀢𑁄 𑀅𑀬𑀫𑁆𑀧𑀺 𑀆𑀘𑀭𑀺𑀬𑀯𑀸𑀤𑁄 ‘‘𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀏𑀓𑀘𑁆𑀘𑀸 𑀪𑀽𑀫𑀺𑀧𑀜𑁆𑀜𑀢𑁆𑀢𑀺 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺 𑀅𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺 𑀘 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺 𑀏𑀓𑀘𑁆𑀘𑀸 𑀧𑀘𑁆𑀘𑀢𑁆𑀢𑀧𑀜𑁆𑀜𑀢𑁆𑀢𑀺 𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀏𑀓𑀘𑁆𑀘𑀸 𑀪𑀽𑀫𑀺𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦 𑀯𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀥𑀫𑁆𑀫𑀓𑀣𑀸 𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺𑀆𑀤𑀻𑀦𑀁 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄, 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀘 𑀤𑀲𑁆𑀲𑀺𑀢𑀦𑀬𑁄𑀢𑀺 𑀆𑀳 ‘‘𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑀸𑀯𑁄 𑀘𑁂𑀢𑁆𑀣 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑀸𑀯𑁄 𑀘 𑀢𑀸𑀲𑀁 𑀬𑀣𑀸𑀭𑀳𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

𑁨. 𑀲𑀗𑁆𑀔𑁂𑀧𑀧𑁆𑀧𑀪𑁂𑀤𑀯𑀲𑁂𑀦𑀸𑀢𑀺 ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀲𑀩𑁆𑀩𑁂𑀧𑀺 𑀔𑀦𑁆𑀥𑁂 𑀔𑀦𑁆𑀥𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀁𑀔𑀺𑀧𑀦𑀯𑀲𑁂𑀦, ‘‘𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀦𑀁 𑀢𑀢𑁄 𑀲𑀸𑀫𑀜𑁆𑀜𑀢𑁄 𑀧𑀓𑀸𑀭𑁂𑀳𑀺 𑀪𑀺𑀦𑁆𑀤𑀦𑀯𑀲𑁂𑀦 𑀘. 𑀅𑀬𑀁 𑀅𑀢𑁆𑀣𑁄𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀢𑁄 𑀯𑀸 𑀳𑀺 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀧𑀦𑀁 𑀳𑁄𑀢𑀺 𑀯𑀺𑀲𑁂𑀲𑀢𑁄 𑀯𑀸. 𑀯𑀺𑀲𑁂𑀲𑁄 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀲𑀸𑀫𑀜𑁆𑀜𑀸𑀧𑁂𑀓𑁆𑀔𑀸𑀬 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀧𑀦 𑀲𑁄𑀧𑀺 𑀲𑀸𑀫𑀜𑁆𑀜𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 ‘‘𑀓𑀺𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀲𑀗𑁆𑀔𑁂𑀧𑀢𑁄 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣𑀸𑀧𑀺 ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀸𑀯𑀢𑀸…𑀧𑁂… 𑀧𑀜𑁆𑀜𑀢𑁆𑀢𑀻’’𑀢𑀺. ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺. 𑀬𑀸𑀯𑀢𑀸 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀏𑀢𑁆𑀢𑀸𑀯𑀢𑀸 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀯𑀫𑁂𑀢𑁆𑀣 𑀧𑀸𑀴𑀺𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀗𑁆𑀔𑁂𑀧𑀢𑁄 𑀧𑀪𑁂𑀤𑀢𑁄 𑀘 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀸 𑀳𑁄𑀢𑀺. 𑀢𑀣𑀸 𑀳𑀺 𑀇𑀫𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀢𑀓𑁂𑀦…𑀧𑁂… 𑀆𑀤𑀺𑀓𑁂𑀦𑀸’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀢𑁆𑀣𑀯𑀘𑀦𑁂, 𑀢𑀲𑁆𑀫𑀺𑀁 𑀯𑀸 𑀯𑀺𑀲𑁆𑀲𑀚𑁆𑀚𑀦𑀧𑀸𑀞𑁂 𑀢𑀤𑀢𑁆𑀣𑀯𑀘𑀦𑁂 𑀘. 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀧𑀪𑁂𑀤𑀲𑁆𑀲 𑀉𑀤𑀸𑀳𑀭𑀡𑀫𑀢𑁆𑀢𑀁. 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀪𑀽𑀢𑀼𑀧𑀸𑀤𑀺𑀓𑁄, 𑀲𑀼𑀔𑀸𑀤𑀺𑀓𑁄 𑀘 𑀧𑀪𑁂𑀤𑁄. 𑀢𑀁 𑀧𑀦 𑀪𑀽𑀫𑀺𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀬𑀁 𑀯𑀸𑀢𑀺 𑀯𑀼𑀘𑁆𑀘𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀯𑀺𑀲𑁆𑀲𑀚𑁆𑀚𑀦𑁂. 𑀇𑀤𑀦𑁆𑀢𑀺 𑀇𑀤𑀁 𑀧𑀤𑀁. 𑀬𑀢𑁆𑀢𑀓𑁄…𑀧𑁂… 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄𑀢𑀺 𑀇𑀫𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀔𑀦𑁆𑀥𑀸𑀦𑀁 𑀧𑀪𑁂𑀤𑀁 𑀧𑀢𑀺 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀪𑁂𑀤𑁂𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀧𑀓𑀭𑀡𑀦𑁆𑀢𑀭𑁂𑀢𑀺 𑀯𑀺𑀪𑀗𑁆𑀕𑀧𑀓𑀭𑀡𑁂. 𑀢𑀢𑁆𑀣 𑀳𑀺 𑀲𑀸𑀢𑀺𑀲𑀬𑀁 𑀔𑀦𑁆𑀥𑀸𑀦𑀁 𑀯𑀺𑀪𑀸𑀕𑀧𑀜𑁆𑀜𑀢𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺…𑀧𑁂… 𑀓𑀣𑀺𑀢𑀸’’𑀢𑀺. 𑀏𑀢𑁆𑀣 𑀘 𑀧𑀞𑀫𑀦𑀬𑁂 𑀲𑀫𑀼𑀔𑁂𑀦, 𑀤𑀼𑀢𑀺𑀬𑁂 𑀯𑀢𑁆𑀣𑀼𑀫𑀼𑀔𑁂𑀦 𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀪𑀸𑀕𑀸 𑀤𑀲𑁆𑀲𑀺𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀔𑀦𑁆𑀥𑀧𑀜𑁆𑀜𑀢𑁆𑀢𑀺𑀬𑀸 𑀯𑀼𑀢𑁆𑀢𑀫𑀢𑁆𑀣𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸𑀤𑀻𑀲𑀼 𑀅𑀢𑀺𑀤𑀺𑀲𑀢𑀺. 𑀢𑀢𑁆𑀣 ‘‘𑀬𑀸𑀯𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺, ‘‘𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀤𑀁 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀆𑀤𑀺𑀧𑀭𑀺𑀬𑁄𑀲𑀸𑀦𑀕𑁆𑀕𑀳𑀡𑀫𑀼𑀔𑁂𑀦 𑀤𑀲𑁆𑀲𑀦𑀁. ‘‘𑀬𑀸𑀯𑀢𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺, ‘‘𑀆𑀬𑀢𑀦𑀸𑀦𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 ‘‘𑀬𑀢𑁆𑀢𑀓𑁂𑀦 𑀧𑀜𑁆𑀜𑀸𑀧𑀦𑁂𑀦 𑀲𑀗𑁆𑀔𑁂𑀧𑀢𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻’’𑀢𑀺 𑀏𑀢𑁂𑀦 𑀤𑀲𑁆𑀲𑀺𑀢𑁄, ‘‘𑀬𑀸𑀯𑀢𑀸 𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀧𑀦 ‘‘𑀧𑀪𑁂𑀤𑀢𑁄 𑀘𑀓𑁆𑀔𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑁂𑀦𑀸𑀢𑀺. 𑀢𑀢𑁆𑀣 ‘‘𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺 𑀧𑀪𑁂𑀤𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀏𑀢𑁂𑀦 𑀅𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺 ‘‘𑀢𑀢𑁆𑀭𑀸𑀧𑀺 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀯𑀸 𑀏𑀢𑁆𑀣 𑀧𑀸𑀴𑀺𑀬𑀸 𑀅𑀢𑁆𑀣𑀬𑁄𑀚𑀦𑀸 𑁋 ‘‘𑀬𑀸𑀯𑀢𑀸’’𑀢𑀺 𑀇𑀤𑀁 𑀲𑀩𑁆𑀩𑁂𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 ‘‘𑀬𑀢𑁆𑀢𑀓𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺…𑀧𑁂… 𑀬𑀢𑁆𑀢𑀓𑁄 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁, 𑀢𑀧𑁆𑀧𑀪𑁂𑀤𑀸𑀦𑀜𑁆𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀧𑀪𑁂𑀤𑁄, 𑀢𑀢𑁆𑀢𑀓𑁄 𑀆𑀬𑀢𑀦𑀸𑀦𑀁 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑁄’’𑀢𑀺 𑀧𑀓𑀭𑀡𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 𑀯𑀢𑁆𑀣𑀼𑀧𑀪𑁂𑀤𑁂𑀦 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸 𑀧𑀪𑁂𑀤𑀁 𑀤𑀲𑁆𑀲𑁂𑀢𑀻𑀢𑀺𑀆𑀤𑀺𑀦𑀸 𑀇𑀢𑀭𑀧𑀜𑁆𑀜𑀢𑁆𑀢𑀻𑀲𑀼𑀧𑀺 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑁭. ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄…𑀧𑁂… 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻’’𑀢𑀺 𑀇𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀢𑁆𑀢𑀸𑀯𑀢𑀸…𑀧𑁂… 𑀏𑀢𑁆𑀢𑀸𑀯𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀻’’𑀢𑀺 𑀅𑀬𑀁 𑀧𑀸𑀴𑀺𑀧𑀤𑁂𑀲𑁄 𑀦𑀺𑀤𑁆𑀤𑁂𑀲𑁄𑀧𑀺 𑀲𑀫𑀸𑀦𑁄 𑀧𑀓𑀭𑀡𑀦𑁆𑀢𑀭𑁂 𑀯𑀢𑁆𑀣𑀼𑀪𑁂𑀤𑁂𑀦 𑀯𑀼𑀢𑁆𑀢𑀁 𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺𑀧𑁆𑀧𑀪𑁂𑀤𑀁 𑀉𑀧𑀸𑀤𑀸𑀬 𑀉𑀤𑁆𑀤𑁂𑀲𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀤𑁆𑀤𑁂𑀲𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀛𑀸𑀧𑀦𑀝𑁆𑀞𑁂𑀦 𑀛𑀸𑀦𑀁, 𑀢𑀢𑁄 𑀲𑀼𑀝𑁆𑀞𑀼 𑀯𑀺𑀫𑀼𑀘𑁆𑀘𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀛𑀸𑀦𑀗𑁆𑀕𑀸𑀦𑁂𑀯 𑀯𑀺𑀫𑁄𑀓𑁆𑀔𑁄𑀢𑀺 𑀅𑀝𑁆𑀞𑀓𑀣𑀸𑀅𑀥𑀺𑀧𑁆𑀧𑀸𑀬𑁄. 𑀝𑀻𑀓𑀸𑀓𑀸𑀭𑁂𑀦 𑀧𑀦 ‘‘𑀅𑀪𑀺𑀪𑀸𑀬𑀢𑀦𑀁 𑀯𑀺𑀬 𑀲𑀲𑀫𑁆𑀧𑀬𑀼𑀢𑁆𑀢𑀁 𑀛𑀸𑀦𑀁 𑀯𑀺𑀫𑁄𑀓𑁆𑀔𑁄’’𑀢𑀺 𑀫𑀜𑁆𑀜𑀫𑀸𑀦𑁂𑀦 ‘‘𑀅𑀥𑀺𑀧𑁆𑀧𑀸𑀬𑁂𑀦𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀥𑀫𑁆𑀫𑀸 𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀦 𑀯𑀺𑀦𑀸, 𑀢𑀣𑀸 𑀅𑀪𑀺𑀭𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀦𑀺𑀭𑀸𑀲𑀗𑁆𑀓𑀧𑁆𑀧𑀯𑀢𑁆𑀢𑀺𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀯𑀸 𑀛𑀸𑀦𑀗𑁆𑀕𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑀢𑁄 𑀲𑀯𑀺𑀲𑁂𑀲𑁄 𑀛𑀸𑀦𑀧𑀭𑀺𑀬𑀸𑀬𑁄, 𑀏𑀯𑀁 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀬𑁄𑀕𑀢𑁄 𑀢𑁂𑀲𑀁 𑀲𑀯𑀺𑀲𑁂𑀲𑁄 𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄, 𑀢𑀤𑀼𑀧𑀘𑀸𑀭𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀁 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀦𑁆𑀢𑀺 𑀧𑀝𑀺𑀮𑀸𑀪𑀁 𑀲𑀦𑁆𑀥𑀸𑀬𑀸𑀳. ‘‘𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀇𑀭𑀺𑀬𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁂𑀦 𑀳𑀺 𑀲𑀤𑁆𑀥𑀺𑀁…𑀧𑁂… 𑀧𑀝𑀺𑀮𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀢𑁂𑀳𑀺 𑀲𑀸𑀥𑁂𑀢𑀩𑁆𑀩𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀮𑀸𑀪𑁄𑀬𑁂𑀯𑁂𑀢𑁆𑀣 𑀧𑀝𑀺𑀮𑀸𑀪𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀨𑀲𑁆𑀲𑁄 𑀬𑀢𑁆𑀣 𑀉𑀧𑁆𑀧𑀦𑁆𑀦𑁄, 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀧𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀺 𑀆𑀳 ‘‘𑀲𑀫𑁆𑀨𑀲𑁆𑀲𑁂𑀦 𑀨𑀼𑀲𑀦𑀢𑁆𑀣’’𑀦𑁆𑀢𑀺. 𑀢𑀲𑁆𑀲 ‘‘𑀯𑀺𑀯𑀭𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀳𑀻𑀢𑀺 𑀉𑀧𑀘𑀸𑀭𑀫𑁆𑀧𑀻𑀢𑀺𑀆𑀤𑀺𑀦𑀸 𑀉𑀧𑀘𑀸𑀭𑀧𑀼𑀭𑀺𑀫𑀧𑁆𑀧𑀦𑀸𑀧𑀭𑀧𑁆𑀧𑀦𑀸𑀦𑀁 𑀧𑀝𑀺𑀮𑀸𑀪𑀓𑀸𑀭𑀡𑀦𑁆𑀢𑀺 𑀯𑀘𑀦𑁂𑀳𑀺. 𑀇𑀢𑀭𑁂 𑀓𑀸𑀭𑀡𑀢𑁆𑀣𑁂𑀢𑀺 ‘‘𑀉𑀧𑀘𑀸𑀭𑁂𑀦…𑀧𑁂… 𑀨𑀼𑀲𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀓𑀸𑀭𑀡𑀢𑁆𑀣𑀤𑀻𑀧𑀓𑁂 𑀅𑀢𑁆𑀣𑁂. 𑀨𑀼𑀲𑀢𑀺 𑀨𑀮𑀁 𑀅𑀥𑀺𑀕𑀘𑁆𑀙𑀢𑀺 𑀏𑀢𑀸𑀬𑀸𑀢𑀺 𑀓𑀸𑀭𑀡𑀪𑀸𑀯𑀲𑁆𑀲 𑀨𑀼𑀲𑀦𑀸𑀧𑀭𑀺𑀬𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀞𑀫𑀢𑁆𑀣𑀫𑁂𑀯𑀸𑀢𑀺 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀫𑁂𑀯. 𑀢𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 𑀇𑀫𑀺𑀦𑀸 𑀛𑀸𑀦𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀬𑁂𑀯 𑀕𑀳𑀺𑀢𑀸, 𑀦 𑀨𑀲𑁆𑀲𑀧𑀜𑁆𑀘𑀫𑀓𑀇𑀦𑁆𑀤𑁆𑀭𑀺𑀬𑀝𑁆𑀞𑀓𑀸𑀤𑀺𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀸…𑀧𑁂… 𑀲𑀗𑁆𑀕𑀳𑀺𑀢𑀸𑀦𑀻’’𑀢𑀺. 𑀏𑀯𑀁 𑀲𑀢𑀻𑀢𑀺 𑀲𑀼𑀔𑀲𑀗𑁆𑀔𑀸𑀢𑀛𑀸𑀦𑀗𑁆𑀕𑀢𑁄 𑀯𑁂𑀤𑀦𑀸𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑁂𑀲𑀺𑀢𑀩𑁆𑀩𑀪𑀸𑀯𑁂 𑀲𑀢𑀺. 𑀏𑀯𑀜𑁆𑀳𑀺 𑀦𑁂𑀲𑀁 𑀨𑀲𑁆𑀲𑀓𑀢𑀸 𑀇𑀢𑀭𑀲𑁆𑀲 𑀨𑀲𑁆𑀲𑀺𑀢𑀩𑁆𑀩𑀢𑀸𑀯 𑀲𑀺𑀬𑀸. 𑀢𑁂𑀦𑀸𑀳 ‘‘𑀲𑀼𑀔𑀲𑁆𑀲 𑀨𑀼𑀲𑀺𑀢𑀩𑁆𑀩𑀢𑁆𑀢𑀸’’𑀢𑀺. 𑀯𑁂𑀤𑀬𑀺𑀢𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀳𑀻𑀢𑀺 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀲𑀗𑁆𑀔𑀸𑀢𑁂𑀦 𑀯𑁂𑀤𑀬𑀺𑀢𑀲𑀪𑀸𑀯𑁂𑀦, 𑀢𑀲𑁆𑀲𑁂𑀯 𑀲𑀸𑀢𑀯𑀺𑀲𑁂𑀲𑀲𑀗𑁆𑀔𑀸𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁂𑀦 𑀘. 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑁄𑀧𑀺 𑀬𑀣𑀸𑀯𑀼𑀢𑁆𑀢𑀯𑁂𑀤𑀬𑀺𑀢𑀸𑀥𑀺𑀧𑀢𑁂𑀬𑁆𑀬𑀝𑁆𑀞𑀯𑀺𑀲𑀺𑀝𑁆𑀞𑁄 𑀑𑀴𑀸𑀭𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀦𑀺𑀚𑁆𑀛𑀸𑀬𑀦𑀪𑀸𑀯𑁄. 𑀅𑀪𑀺𑀦𑁆𑀦𑀲𑀪𑀸𑀯𑁄𑀧𑀺 𑀳𑀺 𑀥𑀫𑁆𑀫𑁄 𑀧𑀼𑀭𑀺𑀫𑀯𑀺𑀲𑀺𑀝𑁆𑀞𑀧𑀘𑁆𑀘𑀬𑀯𑀺𑀲𑁂𑀲𑀲𑀫𑁆𑀪𑀯𑁂𑀦 𑀯𑀺𑀲𑁂𑀲𑁂𑀦 𑀪𑀺𑀦𑁆𑀦𑀸𑀓𑀸𑀭𑁄 𑀳𑀼𑀢𑁆𑀯𑀸 𑀯𑀺𑀲𑀺𑀝𑁆𑀞𑀨𑀮𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀬𑀣𑁂𑀓𑀁𑀬𑁂𑀯 𑀓𑀫𑁆𑀫𑀁 𑀘𑀓𑁆𑀔𑀸𑀤𑀺𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑁂𑀤𑀬𑀺𑀢𑀸…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀅𑀗𑁆𑀕𑀸𑀦𑀻𑀢𑀺 𑀦𑀸𑀬𑀁 𑀢𑀧𑁆𑀧𑀭𑀪𑀸𑀯𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀅𑀦𑀦𑁆𑀢𑀪𑀸𑀯𑀢𑁄, 𑀓𑁂𑀯𑀮𑀜𑁆𑀘 𑀅𑀗𑁆𑀕𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁, 𑀢𑁂𑀦 𑀓𑀺𑀁 𑀲𑀺𑀤𑁆𑀥𑀁? 𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑁂𑀓𑀫𑁆𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺. 𑀬𑀤𑀺 ‘‘𑀲𑀼𑀔𑀁 𑀞𑀧𑁂𑀢𑁆𑀯𑀸’’𑀢𑀺 𑀬𑁄𑀚𑀦𑀸𑀬𑀁 𑀲𑁂𑀲𑀸 𑀢𑀬𑁄 𑀔𑀦𑁆𑀥𑀸 𑀳𑁄𑀦𑁆𑀢𑀺, 𑀲𑁂𑀲𑀸 𑀢𑀬𑁄, 𑀘𑀢𑁆𑀢𑀸𑀭𑁄 𑀘 𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦, 𑀘𑀢𑀽𑀲𑀼 𑀢𑀺𑀡𑁆𑀡𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀩𑁆𑀩𑀬𑁄𑀚𑀦𑀸…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑁨. 𑀅𑀲𑀫𑀬𑀯𑀺𑀫𑁄𑀓𑁆𑀔𑁂𑀦𑀸𑀢𑀺 𑀳𑁂𑀝𑁆𑀞𑀸𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦. 𑀲𑁄 𑀳𑀺 𑀮𑁄𑀓𑀺𑀬𑀯𑀺𑀫𑁄𑀓𑁆𑀔𑁄 𑀯𑀺𑀬 𑀅𑀥𑀺𑀕𑀫𑀯𑀴𑀜𑁆𑀚𑀦𑀢𑁆𑀣𑀁 𑀧𑀓𑀧𑁆𑀧𑁂𑀢𑀩𑁆𑀩𑀲𑀫𑀬𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑁄. 𑀅𑀕𑁆𑀕𑀫𑀕𑁆𑀕𑀯𑀺𑀫𑁄𑀓𑁆𑀔𑁄 𑀧𑀦 𑀏𑀓𑀘𑁆𑀘𑀸𑀲𑀯𑀯𑀺𑀫𑀼𑀢𑁆𑀢𑀺𑀯𑀘𑀦𑀢𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺. 𑀏𑀓𑀘𑁆𑀘𑁂𑀳𑀺 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀤𑀺𑀝𑁆𑀞𑀸𑀲𑀯𑀸𑀤𑀻𑀳𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄. 𑀅𑀲𑀫𑀬…𑀧𑁂… 𑀮𑀸𑀪𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀅𑀲𑀫𑀬𑀯𑀺𑀫𑁄𑀓𑁆𑀔𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀅𑀥𑀺𑀕𑀫𑁂𑀦. 𑀢𑀢𑁄 𑀏𑀯 𑀲𑀸𑀢𑀺𑀲𑀬𑁂𑀦, 𑀏𑀓𑀘𑁆𑀘𑁂𑀳𑀺 𑀓𑀸𑀫𑀸𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀏𑀯 𑀏𑀓𑀘𑁆𑀘𑀲𑀫𑀬𑀯𑀺𑀫𑁄𑀓𑁆𑀔𑀮𑀸𑀪𑀻 𑀬𑀣𑀸𑀯𑀼𑀢𑁆𑀢𑁄 𑀲𑀫𑀬𑀯𑀺𑀫𑀼𑀢𑁆𑀢𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀲𑁆𑀲 𑀯𑀲𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑀧𑀜𑁆𑀜𑀢𑁆𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁄𑀢𑀺 𑀅𑀲𑀫𑀬𑀯𑀺𑀫𑁄𑀓𑁆𑀔𑀽𑀧𑀦𑀺𑀲𑁆𑀲𑀬𑀲𑀫𑀬𑀯𑀺𑀫𑁄𑀓𑁆𑀔𑀮𑀸𑀪𑀻. 𑀢𑁂𑀦 𑀲𑀸𑀢𑀺𑀲𑀬𑁂𑀦 𑀲𑀫𑀬𑀯𑀺𑀫𑁄𑀓𑁆𑀔𑁂𑀦. 𑀢𑀣𑀸𑀯𑀺𑀫𑀼𑀢𑁆𑀢𑁄𑀯 𑀳𑁄𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀢𑀣𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑀬𑀯𑀺𑀫𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀮𑀤𑁆𑀥𑀼𑀁 𑀅𑀭𑀳𑀢𑀻𑀢𑀺 𑀧𑀭𑀺𑀜𑁆𑀜𑀸𑀢𑀢𑁆𑀣𑀁 𑀳𑁂𑀢𑀼𑀦𑀸 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦𑀧𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀧𑀼𑀣𑀼𑀚𑁆𑀚𑀦𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀼𑀤𑀸𑀘𑀸𑀭𑀪𑀸𑀯𑀢𑁄𑀢𑀺 𑀲𑀫𑀼𑀤𑀸𑀘𑀸𑀭𑀲𑁆𑀲 𑀲𑀫𑁆𑀪𑀯𑀢𑁄. 𑀲𑁄𑀢𑀺 𑀛𑀸𑀦𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑁄.

𑀬𑀤𑀺 𑀧𑀼𑀦𑀭𑀸𑀯𑀢𑁆𑀢𑀓𑀥𑀫𑁆𑀫𑀢𑀸𑀬 𑀧𑀼𑀣𑀼𑀚𑁆𑀚𑀦𑁄 𑀲𑀫𑀬𑀯𑀺𑀫𑀼𑀢𑁆𑀢𑁄𑀢𑀺 𑀦 𑀯𑀼𑀢𑁆𑀢𑁄, 𑀢𑀤𑀪𑀸𑀯𑀢𑁄 𑀓𑀲𑁆𑀫𑀸 𑀅𑀭𑀳𑀸 𑀢𑀣𑀸 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀭𑀳𑀢𑁄 𑀧𑀦𑀸’’𑀢𑀺𑀆𑀤𑀺. 𑀢𑀤𑀓𑀸𑀭𑀡𑀪𑀸𑀯𑀦𑁆𑀢𑀺 𑀢𑁂𑀲𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀢𑀲𑁆𑀲 𑀯𑀸 𑀲𑀫𑀬𑀯𑀺𑀫𑀼𑀢𑁆𑀢𑀺𑀪𑀸𑀯𑀲𑁆𑀲 𑀅𑀓𑀸𑀭𑀡𑀪𑀸𑀯𑀁. 𑀲𑀩𑁆𑀩𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀧𑀺 𑀲𑀫𑀣𑀬𑀸𑀦𑀺𑀓𑁄𑀧𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻𑀧𑀺. 𑀩𑀳𑀺𑀅𑀩𑁆𑀪𑀦𑁆𑀢𑀭𑀪𑀸𑀯𑀸 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀸, 𑀯𑀢𑁆𑀢𑀼 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀭𑀽𑀧𑀸 𑀘𑀸𑀢𑀺 𑀆𑀳 ‘‘𑀩𑀸𑀳𑀺𑀭𑀸𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀢𑁄 𑀩𑀳𑀺𑀪𑀽𑀢𑀸𑀦’’𑀦𑁆𑀢𑀺.

𑁩. 𑀭𑀽𑀧𑀢𑁄 𑀅𑀜𑁆𑀜𑀁 𑀦 𑀭𑀽𑀧𑀦𑁆𑀢𑀺 𑀢𑀢𑁆𑀣 𑀭𑀽𑀧𑀧𑀝𑀺𑀪𑀸𑀕𑀁 𑀓𑀲𑀺𑀡𑀭𑀽𑀧𑀸𑀤𑀺 𑀭𑀽𑀧-𑀲𑀤𑁆𑀤𑁂𑀦 𑀕𑀳𑀺𑀢𑀦𑁆𑀢𑀺 𑀢𑀤𑀜𑁆𑀜𑀁 𑀧𑀞𑀫𑀢𑀢𑀺𑀬𑀸𑀭𑀼𑀧𑁆𑀧𑀯𑀺𑀲𑀬𑀫𑀢𑁆𑀢𑀁 𑀅𑀭𑀽𑀧𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀯𑀺𑀦𑀺𑀫𑀼𑀢𑁆𑀢𑀁 𑀅𑀭𑀽𑀧-𑀲𑀤𑁆𑀤𑁂𑀦 𑀕𑀳𑀺𑀢𑀁 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀧𑀓𑁆𑀔𑀪𑀽𑀢𑁂𑀳𑀺 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀫𑀽𑀲𑀺𑀢𑀩𑁆𑀩𑀁 𑀛𑀸𑀦𑀫𑁂𑀯 𑀘𑀺𑀢𑁆𑀢𑀫𑀜𑁆𑀚𑀽𑀲𑀁. 𑀲𑀫𑀸𑀥𑀺𑀦𑁆𑀢𑀺 𑀯𑀸 𑀲𑀫𑀸𑀥𑀺𑀲𑀻𑀲𑁂𑀦 𑀛𑀸𑀦𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀫𑀸𑀤𑁂𑀦𑀸𑀢𑀺 𑀏𑀢𑁆𑀣 𑀅𑀦𑀸𑀕𑀸𑀫𑀺𑀦𑁄 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀓𑁆𑀓𑀘𑁆𑀘𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀤𑀺𑀦𑀸. 𑀔𑀻𑀡𑀸𑀲𑀯𑀲𑁆𑀲 𑀧𑀦 𑀢𑀸𑀤𑀺𑀲𑁂𑀦 𑀧𑀫𑀸𑀤𑀧𑀢𑀺𑀭𑀽𑀧𑀓𑁂𑀦, 𑀢𑀸𑀤𑀺𑀲𑀸𑀬 𑀯𑀸 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬. 𑀲𑀸 𑀘𑀲𑁆𑀲 𑀉𑀲𑁆𑀲𑀼𑀓𑁆𑀓𑀸𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀸 𑀳𑀺 𑀢𑁂 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀲𑀫𑀬𑁂𑀦 𑀲𑀫𑀬𑀦𑁆𑀢𑀺 𑀲𑀫𑀬𑁂 𑀲𑀫𑀬𑁂. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀓𑀭𑀡𑀯𑀘𑀦𑀁 𑀉𑀧𑀬𑁄𑀕𑀯𑀘𑀦𑀜𑁆𑀘. 𑀅𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀅𑀲𑁆𑀲𑀸𑀢𑀺 ‘‘𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲. 𑀢𑁂𑀦𑀸𑀢𑀺 𑀬𑀣𑀸𑀪𑀢𑁂𑀦 𑀲𑀼𑀢𑁆𑀢𑁂𑀦.

𑁫. 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀥𑀫𑁆𑀫𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀇𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑀸𑀢𑀺 ‘‘𑀧𑀭𑀺𑀳𑀸𑀦𑀥𑀫𑁆𑀫𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂. 𑀢𑀢𑁆𑀣𑀸𑀢𑀺 ‘‘𑀓𑀼𑀧𑁆𑀧𑀥𑀫𑁆𑀫𑁄 𑀅𑀓𑀼𑀧𑁆𑀧𑀥𑀫𑁆𑀫𑁄’’𑀢𑀺 𑀧𑀤𑀤𑁆𑀯𑀬𑁂. 𑀲𑀢𑀺 𑀯𑀘𑀦𑀦𑀸𑀦𑀢𑁆𑀢𑁂 𑀅𑀢𑁆𑀣𑁂𑀯 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀫𑀢𑁆𑀢𑁂𑀦 𑀯𑀸’’𑀢𑀺. 𑀯𑀘𑀦𑀢𑁆𑀣𑀕𑁆𑀕𑀳𑀡𑀫𑀼𑀔𑁂𑀦 𑀕𑀳𑁂𑀢𑀩𑁆𑀩𑀲𑁆𑀲 𑀧𑀦 𑀯𑀺𑀪𑀸𑀯𑀦𑀢𑁆𑀣𑀲𑁆𑀲 𑀦𑀢𑁆𑀣𑁂𑀢𑁆𑀣 𑀦𑀸𑀦𑀢𑁆𑀢𑀁, 𑀬𑀢𑁄 𑀢𑁂𑀲𑀁 𑀧𑀭𑀺𑀬𑀸𑀬𑀦𑁆𑀢𑀭𑀢𑀸𑀲𑀺𑀤𑁆𑀥𑀺.

𑁭-𑁮. 𑀲𑀫𑀸𑀧𑀢𑁆𑀢𑀺𑀘𑁂𑀢𑀦𑀸𑀢𑀺 𑀬𑀸𑀬 𑀘𑁂𑀢𑀦𑀸𑀬 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀺 𑀲𑀫𑀸𑀧𑀚𑁆𑀚𑀢𑀺 𑀘. 𑀢𑁂𑀦𑀸𑀳 ‘‘𑀢𑀤𑀸𑀬𑀽𑀳𑀦𑀸’’𑀢𑀺. 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀲𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀅𑀦𑀼𑀭𑀓𑁆𑀔𑀡𑀸…𑀧𑁂… 𑀲𑀢𑀻’’𑀢𑀺. 𑀢𑁂𑀦𑀸𑀳 ‘‘𑀏𑀓𑀸𑀭𑀓𑁆𑀔𑁄 𑀲𑀢𑀸𑀭𑀓𑁆𑀔𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺. 𑀢𑀣𑀸 𑀳𑀺 𑀲𑀸 ‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀢𑀻’’𑀢𑀺 𑀯𑀼𑀢𑁆𑀢𑀸.

𑁧𑁧. 𑀅𑀕𑁆𑀕𑀫𑀕𑁆𑀕𑀝𑁆𑀞𑁄𑀧𑀺 𑀇𑀢𑀭𑀫𑀕𑁆𑀕𑀝𑁆𑀞𑀸 𑀯𑀺𑀬 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀬𑀢𑁆𑀢𑀸 𑀪𑀬𑀽𑀧𑀭𑀢𑀯𑁄𑀳𑀸𑀭𑀁 𑀮𑀪𑀢𑀻𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀘…𑀧𑁂… 𑀪𑀬𑀽𑀧𑀭𑀢𑁄’’𑀢𑀺.

𑁧𑁨. 𑀓𑁂𑀘𑀻𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁂 𑀫𑀦𑁆𑀤𑀩𑀼𑀤𑁆𑀥𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀧𑁆𑀧𑀜𑁆𑀜𑀸𑀢𑀺 𑀇𑀫𑀺𑀦𑀸 𑀕𑀬𑁆𑀳𑀦𑁆𑀢𑀻’’𑀢𑀺. 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀬𑁂𑀲𑀁 𑀢𑁂 𑀤𑀼𑀧𑁆𑀧𑀜𑁆𑀜𑀸𑀢𑀺.

𑁧𑁪. 𑀅𑀦𑀺𑀬𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀲𑁆𑀲𑁂𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀦𑀺𑀬𑀢𑀥𑀫𑁆𑀫𑀧𑀝𑀺𑀮𑀸𑀪𑁄𑀢𑀺 𑀆𑀳 ‘‘𑀬𑀢𑁆𑀣…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀢𑀤𑀪𑀸𑀯𑀸𑀢𑀺 𑀦𑀺𑀬𑀢𑀸𑀦𑀺𑀬𑀢𑀯𑁄𑀫𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀸.

𑁧𑁬. 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀻𑀢𑀺 𑀧𑀭𑀺𑀬𑀸𑀤𑀓𑁂𑀦 𑀫𑀕𑁆𑀕𑁂𑀦 𑀔𑁂𑀧𑁂𑀢𑀩𑁆𑀩𑀸𑀦𑀺. 𑀢𑀡𑁆𑀳𑀸𑀤𑀻𑀦𑀁 𑀧𑀮𑀺𑀩𑀼𑀥𑀦𑀸𑀤𑀺𑀓𑀺𑀭𑀺𑀬𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀲𑀻𑀲𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀯𑀺𑀲𑀗𑁆𑀔𑀸𑀭𑀪𑀸𑀯𑀢𑁄 𑀲𑀗𑁆𑀔𑀸𑀭𑀲𑀻𑀲𑀢𑀸. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄’’𑀢𑀺. 𑀓𑁂𑀘𑀺 𑀧𑀦 ‘‘𑀲𑀗𑁆𑀔𑀸𑀭𑀲𑀻𑀲𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀲𑁆𑀲 𑀲𑀻𑀲𑀪𑀸𑀯𑀸𑀦𑀼𑀧𑀧𑀢𑁆𑀢𑀺𑀢𑁄 𑀢𑀤𑀼𑀤𑁆𑀥𑀜𑁆𑀘 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀲𑀳 𑀯𑀺𑀬𑀸𑀢𑀺 𑀏𑀓𑀚𑁆𑀛𑀁 𑀯𑀺𑀬. 𑀏𑀢𑁂𑀦 𑀲𑀫-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀲𑀳𑀢𑁆𑀣𑁄 𑀳𑁂𑀲 𑀲𑀫-𑀲𑀤𑁆𑀤𑁄. 𑀲𑀁𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦𑀸𑀢𑀺 𑀲𑀁𑀲𑀺𑀤𑁆𑀥𑀺𑀬𑀸 𑀦𑀺𑀝𑁆𑀞𑀸𑀦𑀲𑁆𑀲 𑀉𑀧𑀭𑀫𑀲𑁆𑀲 𑀤𑀲𑁆𑀲𑀦𑁂𑀦.

𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀸𑀴𑀺𑀬𑀸, 𑀇𑀫𑀺𑀲𑁆𑀲𑀸 𑀯𑀸 𑀢𑀤𑀝𑁆𑀞𑀓𑀣𑀸𑀬. 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀦𑁆𑀢𑀺 𑀓𑀺𑀮𑁂𑀲𑀲𑀻𑀲𑀧𑀯𑀢𑁆𑀢𑀲𑀻𑀲𑀸𑀦𑀁. 𑀢𑁂𑀲𑀼 𑀳𑀺 𑀕𑀳𑀺𑀢𑁂𑀲𑀼 𑀇𑀢𑀭𑀫𑁆𑀧𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀁 𑀓𑀺𑀮𑁂𑀲𑀪𑀸𑀯𑁂𑀦 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑁂𑀦 𑀘 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀓𑀺𑀮𑁂𑀲𑀯𑀝𑁆𑀝𑀧𑀭𑀺𑀬𑀸𑀤𑀸𑀦𑁂𑀦 𑀫𑀕𑁆𑀕𑀲𑁆𑀲 𑀇𑀢𑀭𑀯𑀝𑁆𑀝𑀸𑀦𑀫𑁆𑀧𑀺 𑀧𑀭𑀺𑀬𑀸𑀤𑀺𑀬𑀦𑀁. 𑀯𑀝𑁆𑀝𑀼𑀧𑀘𑁆𑀙𑁂𑀤𑀓𑁂𑀦 𑀫𑀕𑁆𑀕𑁂𑀦𑁂𑀯 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀅𑀦𑀯𑀲𑁂𑀲𑀢𑁄 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀯𑀢𑁆𑀢𑀲𑀻𑀲𑀁 𑀯𑀺𑀲𑀼𑀁 𑀕𑀳𑀺𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀯𑀢𑁆𑀢𑀲𑀻𑀲𑀫𑁆𑀧𑀻’’𑀢𑀺𑀆𑀤𑀺. 𑀑𑀥𑀺𑀲𑁄 𑀘 𑀅𑀦𑁄𑀥𑀺𑀲𑁄 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂 𑀲𑀢𑀺 𑀲𑀺𑀚𑁆𑀛𑀫𑀸𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀢𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀆𑀕𑀫𑁂𑀦 𑀲𑀸𑀥𑁂𑀦𑁆𑀢𑁄 ‘‘𑀯𑀺𑀫𑀼𑀢𑁆𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀻𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑀫𑀸𑀧𑀦𑀪𑀽𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀲𑁆𑀲 𑀘𑀼𑀢𑀺𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑀼𑀢𑀺𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑁂𑀤𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁭. 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀦 𑀉𑀧𑀕𑀘𑁆𑀙𑁂𑀬𑁆𑀬. 𑀞𑀸𑀦𑀜𑁆𑀳𑀺 𑀕𑀢𑀺𑀦𑀺𑀯𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀸’’𑀢𑀺.

𑁧𑁮. 𑀧𑀬𑀺𑀭𑀼𑀧𑀸𑀲𑀦𑀸𑀬 𑀩𑀳𑀽𑀧𑀓𑀸𑀭𑀢𑁆𑀢𑀸 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁆𑀢𑀸.

𑁨𑁦. 𑀅𑀕𑁆𑀕𑀯𑀺𑀚𑁆𑀚𑀸 𑀬𑀲𑁆𑀲 𑀅𑀦𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀳𑁄𑀢𑀺, 𑀲𑁄 𑀘𑁂 𑀧𑀘𑁆𑀙𑀸 𑀯𑀺𑀚𑁆𑀚𑀸𑀤𑁆𑀯𑀬𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀲𑁆𑀲 𑀧𑀞𑀫𑀁 𑀅𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀯𑀺𑀬 𑀅𑀢𑁂𑀯𑀺𑀚𑁆𑀚𑀢𑀸𑀪𑀸𑀯𑀸 𑀬𑀤𑀺𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑀸 𑀢𑁂𑀯𑀺𑀚𑁆𑀚𑀢𑀸, 𑀧𑀞𑀫𑀁 𑀅𑀥𑀺𑀕𑀢𑀯𑀺𑀚𑁆𑀚𑀸𑀤𑁆𑀯𑀬𑀲𑁆𑀲 𑀧𑀦 𑀲𑀸 𑀲𑀯𑀺𑀲𑁂𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀬 𑀓𑀢𑀓𑀺𑀘𑁆𑀘𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀯𑀺𑀚𑁆𑀚𑀸𑀢𑀺 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀫𑁂𑀯 𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀘 𑀢𑁂𑀯𑀺𑀚𑁆𑀚𑀢𑀸𑀢𑀺 𑀬𑁄𑀚𑀦𑀸.

𑁨𑁨. 𑀢𑀢𑁆𑀣𑁂𑀯𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁂 𑀏𑀯.

𑁨𑁪. 𑀢𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀢𑀸𑀯𑀘𑀦𑀁. 𑀯𑀼𑀢𑁆𑀢𑀮𑀓𑁆𑀔𑀡𑀽𑀧𑀧𑀢𑁆𑀢𑀺𑀓𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀲𑀫𑀦𑁆𑀦𑀸𑀕𑀢𑁄. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀦𑀺𑀭𑁄𑀥𑀢𑁄 𑀘 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀯𑀼𑀢𑁆𑀢𑀸, 𑀢𑀣𑀸 𑀲𑁂𑀓𑁆𑀔𑀪𑀸𑀯𑀁 𑀧𑀢𑁆𑀢𑀸𑀦𑀁 𑀯𑀲𑁂𑀦 𑀧𑀜𑁆𑀘 𑀓𑀸𑀬𑀲𑀓𑁆𑀔𑀺𑀦𑁄 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀤𑀲𑁆𑀲𑀦𑀓𑀸𑀭𑀡𑀸𑀢𑀺 𑀇𑀫𑀺𑀦𑀸 ‘‘𑀤𑀺𑀲𑁆𑀯𑀸’’𑀢𑀺 𑀏𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼. 𑀤𑀲𑁆𑀲𑀦𑁂 𑀲𑀢𑀺 𑀧𑀭𑀺𑀓𑁆𑀔𑀬𑁄, 𑀦𑀸𑀲𑀢𑀻𑀢𑀺 𑀆𑀳 ‘‘𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸’’𑀢𑀺. 𑀧𑀼𑀭𑀺𑀫𑀓𑀺𑀭𑀺𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀺𑀭𑀺𑀬𑀸. 𑀲𑀫𑀸𑀦𑀓𑀸𑀮𑀢𑁆𑀢𑁂𑀧𑀺 𑀳𑀺 𑀓𑀸𑀭𑀡𑀓𑀺𑀭𑀺𑀬𑀸 𑀨𑀮𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀲𑀺𑀤𑁆𑀥𑀸 𑀯𑀺𑀬 𑀯𑁄𑀳𑀭𑀻𑀬𑀢𑀺. 𑀢𑀢𑁄 𑀦𑀸𑀫𑀓𑀸𑀬𑀢𑁄 𑀫𑀼𑀘𑁆𑀘𑀦𑀢𑁄. 𑀬𑀢𑁄 𑀳𑀺 𑀬𑁂𑀦 𑀫𑀼𑀘𑁆𑀘𑀺𑀢𑀩𑁆𑀩𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀸𑀫𑀦𑀺𑀲𑁆𑀲𑀺𑀢𑀓𑁄’’𑀢𑀺. 𑀢𑀲𑁆𑀲𑀸𑀢𑀺 𑀓𑀸𑀬𑀤𑁆𑀯𑀬𑀯𑀺𑀫𑀼𑀢𑁆𑀢𑀺𑀬𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀪𑀸𑀯𑀲𑁆𑀲. 𑀅𑀭𑀽𑀧𑀮𑁄𑀓𑁂 𑀳𑀺 𑀞𑀺𑀢𑀸𑀭𑀳𑀦𑁆𑀢𑀯𑀲𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀼𑀢𑁆𑀢𑁂 𑀳𑀻’’𑀢𑀺𑀆𑀤𑀺.

𑀤𑁆𑀯𑀻𑀳𑀺 𑀪𑀸𑀕𑁂𑀳𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀪𑀸𑀕𑁂𑀳𑀺. 𑀤𑁆𑀯𑁂 𑀯𑀸𑀭𑁂𑀢𑀺 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀇𑀤𑀁 𑀧𑀞𑀫𑀢𑀢𑀺𑀬𑀯𑀸𑀤𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀤𑀼𑀢𑀺𑀬𑀯𑀸𑀤𑀲𑁆𑀲. 𑀅𑀭𑀽𑀧𑀚𑁆𑀛𑀸𑀦𑀁 𑀬𑀤𑀺𑀧𑀺 𑀭𑀽𑀧𑀲𑀜𑁆𑀜𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀁 𑀢𑀁𑀲𑀫𑀢𑀺𑀓𑁆𑀓𑀫𑀸𑀤𑀺𑀦𑀸 𑀧𑀢𑁆𑀢𑀩𑁆𑀩𑀢𑁆𑀢𑀸, 𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑁂𑀳𑀺 𑀧𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺𑀬𑁂𑀯𑀲𑁆𑀲 𑀯𑀺𑀫𑀼𑀢𑁆𑀢𑀺 𑀲𑀸𑀢𑀺𑀲𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀆𑀳. 𑀬𑀜𑁆𑀘𑀸𑀧𑀺 𑀅𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀮𑁄𑀓𑁂 𑀯𑀺𑀯𑁂𑀓𑀝𑁆𑀞𑀢𑀸𑀯𑀲𑁂𑀦𑀧𑀺 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑀁, 𑀢𑀁 𑀧𑀦 𑀭𑀽𑀧𑀧𑀝𑀺𑀩𑀦𑁆𑀥𑀙𑀦𑁆𑀤𑀭𑀸𑀕𑀯𑀺𑀓𑁆𑀔𑀫𑁆𑀪𑀦𑁂𑀦𑁂𑀯 𑀳𑁄𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀧𑀥𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀢𑀡𑁆𑀳𑀸𑀯𑀺𑀓𑁆𑀔𑀫𑁆𑀪𑀦𑁂𑀦 𑀭𑀽𑀧𑀓𑀸𑀬𑀢𑁄 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸’’𑀢𑀺. 𑀏𑀓𑀤𑁂𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀬𑀸 𑀅𑀪𑀸𑀯𑀸.

𑁨𑁫. ‘‘𑀲𑀢𑁆𑀢𑀺𑀲𑀬𑁄’’𑀢𑀺 𑀯𑀺𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦…𑀧𑁂… 𑀯𑀼𑀘𑁆𑀘𑀢𑀻’’𑀢𑀺.

𑁨𑁬. 𑀨𑀼𑀝𑁆𑀞𑀸𑀦𑀦𑁆𑀢𑀺 𑀨𑀲𑁆𑀲𑀺𑀢𑀸𑀦𑀁, 𑀅𑀥𑀺𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀢𑀺 𑀅𑀦𑁆𑀢𑀲𑀤𑀺𑀲𑁄 𑀨𑀲𑁆𑀲𑀦𑀸𑀬 𑀧𑀭𑀓𑀸𑀮𑁄. 𑀢𑀤𑀦𑀦𑁆𑀢𑀭𑁄 𑀳𑀺 𑀢𑀧𑁆𑀧𑀭𑀺𑀬𑁄𑀲𑀸𑀦𑁄 𑀯𑀺𑀬 𑀳𑁄𑀢𑀻𑀢𑀺. 𑀓𑀸𑀮𑀯𑀺𑀲𑀬𑁄 𑀘𑀸𑀬𑀁 𑀅𑀦𑁆𑀢-𑀲𑀤𑁆𑀤𑁄, 𑀦 𑀧𑀦 𑀓𑀸𑀮𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄𑀢𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄. 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺 𑀯𑀺𑀩𑀦𑁆𑀥𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀮𑁄𑀘𑀦𑁂 𑀧𑀓𑀸𑀲𑀦𑁂 𑀲𑀫𑀢𑁆𑀣𑀲𑁆𑀲 𑀜𑀸𑀡𑀘𑀓𑁆𑀔𑀼𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑀼𑀧𑁆𑀧𑀸𑀤𑀦𑀢𑁄. 𑀦 𑀢𑀼 𑀯𑀺𑀫𑀼𑀢𑁆𑀢𑁄𑀢𑀺 𑀯𑀺𑀫𑀼𑀢𑁆𑀢𑁄𑀢𑀺 𑀦 𑀯𑀼𑀘𑁆𑀘𑀢𑁂𑀯.

𑁨𑁮. 𑀇𑀫𑀁 𑀧𑀦 𑀦𑀬𑀦𑁆𑀢𑀺 ‘‘𑀅𑀧𑀺𑀘 𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀯𑀺𑀥𑀺𑀁. 𑀬𑁂𑀦 𑀯𑀺𑀲𑁂𑀲𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑀯𑀺𑀲𑁂𑀲𑁂𑀦. 𑀲𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑁄 𑀧𑀜𑁆𑀜𑀸𑀬 𑀯𑀺𑀲𑁂𑀲𑁄. 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀓𑀸𑀭𑀡𑀲𑁆𑀲 𑀅𑀯𑀺𑀪𑀸𑀯𑀺𑀢𑀢𑁆𑀢𑀸. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀺𑀬, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀯𑀺𑀬 𑀯𑀸 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲 𑀲𑀸𑀯𑀲𑁂𑀲𑀯𑀺𑀫𑀼𑀢𑁆𑀢𑀺𑀬𑀫𑁆𑀧𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀯𑀺𑀬 𑀧𑀜𑁆𑀜𑀸𑀬 𑀲𑀸𑀢𑀺𑀲𑀬𑀸𑀬 𑀅𑀪𑀸𑀯𑀢𑁄 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀇𑀤𑀁 𑀆𑀕𑀫𑀦𑀯𑀲𑁂𑀦 𑀲𑀤𑁆𑀥𑀸𑀬 𑀅𑀥𑀺𑀓𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀕𑁆𑀕𑀸𑀥𑀺𑀕𑀫𑀢𑁄 𑀧𑀦𑀲𑁆𑀲 𑀧𑀘𑁆𑀘𑀓𑁆𑀔𑀫𑁂𑀯 𑀜𑀸𑀡𑀤𑀲𑁆𑀲𑀦𑀁.

𑁩𑁧. ‘‘𑀲𑁄𑀢𑁄𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀸𑀫’’𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀁𑀲𑀫𑀗𑁆𑀕𑀻 𑀲𑁄𑀢𑀸𑀧𑀦𑁆𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑀓𑁄 ‘‘𑀅𑀧𑀺-𑀲𑀤𑁆𑀤𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄’’𑀢𑀺 𑀘𑁄𑀤𑀦𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀇𑀢𑀭𑁄 ‘‘𑀦𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀦𑀸𑀫 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸. 𑀇𑀢𑀭𑁂𑀳𑀻𑀢𑀺 𑀤𑀼𑀢𑀺𑀬𑀫𑀕𑁆𑀕𑀝𑁆𑀞𑀸𑀤𑀻𑀳𑀺. 𑀲𑁄 𑀏𑀯𑀸𑀢𑀺 𑀧𑀞𑀫𑀨𑀮𑀝𑁆𑀞𑁄 𑀏𑀯. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀦𑀺𑀤𑁆𑀤𑁂𑀲𑁂. 𑀲𑁄𑀢𑀁 𑀯𑀸 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀧𑀦𑁆𑀦𑁄 𑀅𑀥𑀺𑀕𑀢𑁄𑀢𑀺 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀫𑀸𑀦𑁂 𑀤𑀼𑀢𑀺𑀬𑀫𑀕𑁆𑀕𑀝𑁆𑀞𑀸𑀤𑀻𑀦𑀁 𑀦𑀢𑁆𑀣𑁂𑀯 𑀲𑁄𑀢𑀸𑀧𑀦𑁆𑀦𑀪𑀸𑀯𑀸𑀧𑀢𑁆𑀢𑀺. 𑀲𑀼𑀢𑁆𑀢𑁂 𑀧𑀦 𑀲𑁄𑀢𑀁 𑀅𑀭𑀺𑀬𑀫𑀕𑁆𑀕𑀁 𑀆𑀤𑀺𑀢𑁄 𑀫𑀭𑀺𑀬𑀸𑀤𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀧𑀦𑁆𑀦𑁄 𑀧𑀝𑀺𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀫𑀕𑁆𑀕𑀲𑀫𑀗𑁆𑀕𑀻 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀬𑀸𑀬𑁂𑀦 𑀇𑀢𑀭𑁄𑀧𑀺 𑀢𑀲𑁆𑀲 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀲𑀫𑀼𑀤𑀬𑀲𑀘𑁆𑀘𑀁 𑀯𑀺𑀬 𑀤𑀼𑀓𑁆𑀔𑀲𑀘𑁆𑀘𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀁 𑀳𑁄𑀢𑀺 𑀲𑀘𑁆𑀘𑀤𑁆𑀯𑀬𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀺𑀮𑁂𑀲𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀉𑀧𑀭𑀺𑀫𑀕𑁆𑀕𑀨𑀮𑀥𑀫𑁆𑀫𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁨. 𑀫𑀳𑀸𑀓𑀼𑀮𑀫𑁂𑀯𑀸𑀢𑀺 𑀉𑀴𑀸𑀭𑀓𑀼𑀮𑀫𑁂𑀯 𑀯𑀼𑀘𑁆𑀘𑀢𑀺 ‘‘𑀓𑀼𑀮𑀻𑀦𑁄 𑀓𑀼𑀮𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑁩𑁩. 𑀲𑀚𑁆𑀛𑀸𑀦𑀓𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀓𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑀼𑀢𑁆𑀯𑀸 𑀯𑀝𑁆𑀝𑀚𑁆𑀛𑀸𑀲𑀬𑁄 𑀘𑁂, 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀻𑀢𑀺 𑀆𑀳 ‘‘𑀅𑀦𑀸𑀕𑀸𑀫𑀺𑀲𑀪𑀸𑀕𑁄’’𑀢𑀺. 𑀬𑀢𑁄 𑀲𑁄 𑀛𑀸𑀦𑀸𑀦𑀸𑀕𑀸𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄’’𑀢𑀺.

𑁩𑁬. 𑀧𑀭𑀬𑁄𑀕𑁂 𑀢𑁆𑀯𑀸-𑀲𑀤𑁆𑀤𑁄 𑀢𑀤𑀦𑁆𑀢𑁄 𑀳𑀼𑀢𑁆𑀯𑀸 ‘‘𑀧𑀭𑀲𑀤𑁆𑀤𑀬𑁄𑀕𑁂’’𑀢𑀺 𑀯𑀼𑀢𑁆𑀢𑁄, 𑀅𑀧𑁆𑀧𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀅𑀧𑁆𑀧𑀢𑁆𑀢𑀁 𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀢𑀺.

𑁩𑁭. 𑀢𑁂𑀦𑀸𑀢𑀺 ‘‘𑀉𑀧𑀳𑀘𑁆𑀘𑀸’’𑀢𑀺 𑀧𑀤𑁂𑀦. 𑀦𑀦𑀼 𑀘 𑀯𑁂𑀫𑀚𑁆𑀛𑀸𑀢𑀺𑀓𑁆𑀓𑀫𑁄 ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑁂𑀫𑀚𑁆𑀛’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦. 𑀢𑀡𑁆𑀳𑀸𑀯𑀝𑁆𑀝𑀲𑁄𑀢𑀸 𑀢𑀡𑁆𑀳𑀸𑀯𑀝𑁆𑀝𑀩𑀦𑁆𑀥𑀸. 𑀢𑀲𑁆𑀲𑀸𑀢𑀺 𑀲𑁄𑀢𑀲𑁆𑀲. 𑀲𑀫𑁆𑀩𑀦𑁆𑀥𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀉𑀤𑁆𑀥𑀁𑀲𑁄𑀢𑀲𑁆𑀲 𑀉𑀧𑀭𑀺𑀪𑀯𑀽𑀧𑀕𑀢𑀸 𑀏𑀓𑀁𑀲𑀺𑀓𑀸𑀢𑀺 𑀆𑀳 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀕𑀦𑁆𑀢𑁆𑀯𑀸’’𑀢𑀺. 𑀢𑀲𑁆𑀲𑀸𑀢𑀺 𑀉𑀤𑁆𑀥𑀁𑀲𑁄𑀢𑀲𑁆𑀲. 𑀢𑀢𑁆𑀣𑀸𑀢𑀺 𑀅𑀯𑀺𑀳𑁂𑀲𑀼. 𑀮𑀳𑀼𑀲𑀸𑀮𑀳𑀼𑀲𑀕𑀢𑀺𑀓𑀸𑀢𑀺 𑀮𑀳𑀼𑀓𑀸𑀮𑀳𑀼𑀓𑀸𑀬𑀼𑀕𑀢𑀺𑀓𑀸, 𑀮𑀳𑀼𑀓𑀸𑀮𑀳𑀼𑀓𑀜𑀸𑀡𑀕𑀢𑀺𑀓𑀸 𑀯𑀸. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀩𑁆𑀩𑀸𑀬𑀦𑀓𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀆𑀓𑀸𑀲𑀁 𑀮𑀗𑁆𑀖𑀺𑀢𑁆𑀯𑀸 𑀦𑀺𑀩𑁆𑀩𑀸𑀬𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀢𑀺𑀲𑁆𑀲𑁄 𑀉𑀧𑀫𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑀭𑀸𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻𑀳𑀺 𑀅𑀥𑀺𑀫𑀢𑁆𑀢𑀢𑀸, 𑀉𑀤𑁆𑀥𑀁𑀲𑁄𑀢𑀢𑁄 𑀅𑀦𑀥𑀺𑀫𑀢𑁆𑀢𑀢𑀸 𑀘 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑁂 𑀏𑀯𑀸𑀢𑀺 𑀅𑀦𑁆𑀢𑀭𑀸𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀉𑀤𑁆𑀥𑀁𑀲𑁄𑀢𑀸 𑀏𑀯. 𑀬𑀤𑀺 𑀏𑀯𑀁 𑀅𑀲𑀗𑁆𑀔𑀸𑀭𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀦𑀁 𑀉𑀧𑀫𑀸𑀯𑀘𑀦𑁂𑀦 𑀢𑀢𑁄 𑀫𑀳𑀦𑁆𑀢𑀢𑀭𑁂𑀳𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁄 𑀫𑀳𑀦𑁆𑀢…𑀧𑁂… 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺.

𑀢𑁂𑀦𑀸𑀢𑀺 ‘‘𑀦𑁄 𑀘𑀲𑁆𑀲, 𑀦𑁄 𑀘 𑀫𑁂 𑀲𑀺𑀬𑀸’’𑀢𑀺 𑀯𑀘𑀦𑁂𑀦. 𑀢𑁂𑀦𑀸𑀢𑀺 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀢𑀲𑁆𑀲 𑀅𑀢𑁆𑀣𑀯𑀘𑀦𑁂𑀦. 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲𑀸𑀢𑀺 𑀇𑀫𑀲𑁆𑀲 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀲𑁆𑀲 𑀯𑀺𑀜𑁆𑀜𑀸𑀡𑀸𑀤𑀺𑀤𑀼𑀓𑁆𑀔𑀲𑁆𑀲. 𑀉𑀤𑀬𑀤𑀲𑁆𑀲𑀦𑀁 𑀜𑀸𑀡𑀁. 𑀘𑀢𑀽𑀳𑀺𑀧𑀻𑀢𑀺 ‘‘𑀦𑁄 𑀘𑀲𑁆𑀲𑀸’’𑀢𑀺 𑀘𑀢𑀽𑀳𑀺 𑀧𑀤𑁂𑀳𑀺. 𑀬𑀁 𑀅𑀢𑁆𑀣𑀻𑀢𑀺 𑀬𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀪𑀽𑀢𑀦𑁆𑀢𑀺 𑀲𑀲𑀪𑀸𑀯’’𑀦𑁆𑀢𑀺, 𑀪𑀽𑀢𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀧𑀲𑁆𑀲𑀣𑀸’’𑀢𑀺. 𑀯𑀺𑀯𑀝𑁆𑀝𑀫𑀸𑀦𑀲𑁄 𑀯𑀺𑀯𑀺𑀘𑁆𑀘𑀫𑀸𑀦𑀳𑀤𑀬𑁄 𑀢𑀡𑁆𑀳𑀸𑀤𑀺𑀲𑁄𑀢𑀢𑁄 𑀦𑀺𑀯𑀢𑁆𑀢𑀚𑁆𑀛𑀸𑀲𑀬𑁄. 𑀉𑀧𑁂𑀓𑁆𑀔𑀓𑁄 𑀳𑁄𑀢𑀻𑀢𑀺 𑀘𑀢𑁆𑀢𑀪𑀭𑀺𑀬𑁄 𑀯𑀺𑀬 𑀧𑀼𑀭𑀺𑀲𑁄 𑀪𑀬𑀁 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬 𑀉𑀤𑀸𑀲𑀺𑀦𑁄 𑀳𑁄𑀢𑀺.

𑀅𑀯𑀺𑀲𑀺𑀝𑁆𑀞𑁂𑀢𑀺 𑀳𑀻𑀦𑁂. 𑀯𑀺𑀲𑀺𑀝𑁆𑀞𑁂𑀢𑀺 𑀉𑀢𑁆𑀢𑀫𑁂. ‘‘𑀪𑀯𑁂’’𑀢𑀺 𑀯𑀢𑁆𑀯𑀸 ‘‘𑀲𑀫𑁆𑀪𑀯𑁂’’𑀢𑀺 𑀯𑀼𑀘𑁆𑀘𑀫𑀸𑀦𑀁 𑀅𑀯𑀼𑀢𑁆𑀢𑀯𑀸𑀘𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀫𑀸𑀳. 𑀪𑀽𑀢𑀫𑁂𑀯 𑀯𑀼𑀘𑁆𑀘𑀢𑀻𑀢𑀺 𑀬𑀁 𑀪𑀽𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀪𑀯𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀪𑀯𑀢𑀺 𑀅𑀳𑁄𑀲𑀻𑀢𑀺 𑀯𑀸. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄. 𑀢𑀤𑀸𑀳𑀸𑀭𑁄 𑀢𑀲𑁆𑀲 𑀪𑀯𑀲𑁆𑀲 𑀧𑀘𑁆𑀘𑀬𑁄. 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 𑀮𑀤𑁆𑀥𑀸𑀬 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀢𑁂𑀦𑀸𑀢𑀺 𑀲𑁂𑀓𑁆𑀔𑁂𑀦.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁬𑁩. 𑀓𑀲𑁆𑀲𑀘𑀻𑀢𑀺 𑀓𑀲𑁆𑀲𑀘𑀺𑀧𑀺. 𑀓𑀣𑀜𑁆𑀘𑀻𑀢𑀺 𑀓𑁂𑀦𑀘𑀺 𑀧𑀓𑀸𑀭𑁂𑀦, 𑀯𑀺𑀓𑁆𑀔𑀫𑁆𑀪𑀦𑀫𑀢𑁆𑀢𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀕𑁆𑀕𑀸𑀳𑀲𑁆𑀲.

𑁮𑁩. 𑀧𑀼𑀭𑀺𑀫𑀕𑁆𑀕𑀳𑀺𑀢𑀦𑁆𑀢𑀺 ‘‘𑀓𑀭𑀺𑀲𑁆𑀲𑀢𑀺 𑀫𑁂’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀧𑀞𑀫𑀁 𑀕𑀳𑀺𑀢𑀁. 𑀢𑀁 𑀓𑀢𑀦𑁆𑀢𑀺 𑀢𑀁 𑀢𑀸𑀤𑀺𑀲𑀁 𑀉𑀧𑀓𑀸𑀭𑀁. 𑀧𑀼𑀜𑁆𑀜𑀨𑀮𑀁 𑀉𑀧𑀚𑀻𑀯𑀦𑁆𑀢𑁄 𑀓𑀢𑀜𑁆𑀜𑀼𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀨𑀮𑀁 𑀅𑀦𑀼𑀧𑀚𑀻𑀯𑀦𑁆𑀢𑁄’’𑀢𑀺.

𑁯𑁦. 𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀧𑀭𑀺𑀧𑀼𑀡𑁆𑀡𑁄 𑀬𑀸𑀯𑀤𑀢𑁆𑀣𑁄 𑀇𑀥 𑀢𑀺𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀦𑀺𑀭𑀼𑀲𑁆𑀲𑀼𑀓𑁆𑀓𑁄’’𑀢𑀺.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁧. 𑀲𑁂𑀲𑀲𑀁𑀯𑀭𑀪𑁂𑀤𑁂𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀢𑁄 𑀲𑁂𑀲𑁂𑀦 𑀲𑀁𑀯𑀭𑀯𑀺𑀦𑀸𑀲𑁂𑀦. 𑀲𑁄 𑀧𑀦 𑀤𑁆𑀯𑀸𑀭𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀫𑀦𑁄𑀤𑁆𑀯𑀸𑀭𑀺𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀫𑀦𑁄𑀲𑀁𑀯𑀭𑀪𑁂𑀤𑁂𑀦𑀸’’𑀢𑀺. 𑀇𑀤𑀸𑀦𑀺 𑀢𑀁 𑀧𑀓𑀸𑀭𑀪𑁂𑀤𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑀺𑀲𑀁𑀯𑀭𑀸𑀤𑀺𑀪𑁂𑀤𑁂𑀦 𑀯𑀸’’𑀢𑀺 𑀆𑀳, 𑀫𑀼𑀝𑁆𑀞𑀲𑀘𑁆𑀘𑀸𑀤𑀺𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀲𑀪𑀸𑀯𑀪𑀽𑀢𑀁 𑀘𑀭𑀺𑀢𑀫𑁆𑀧𑀺 ‘‘𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀓𑀼𑀲𑀮𑀲𑁆𑀲𑀧𑀺 𑀲𑀻𑀮𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄.

𑁯𑁪. 𑀲𑀫𑀸𑀦𑀯𑀺𑀲𑀬𑀸𑀦𑀦𑁆𑀢𑀺 𑀧𑀞𑀫𑀨𑀮𑀸𑀤𑀺𑀓𑁄 𑀲𑀫𑀸𑀦𑁄 𑀏𑀯𑀭𑀽𑀧𑁄 𑀯𑀺𑀲𑀬𑁄 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀯𑀺𑀲𑀬𑀸, 𑀢𑁂𑀲𑀁.

𑁧𑁦𑁭. 𑀢𑀤𑀢𑁆𑀣𑁄 𑀢𑀧𑁆𑀧𑀬𑁄𑀚𑀦𑁄 𑀮𑁄𑀓𑀼𑀢𑁆𑀢𑀭𑀲𑀸𑀥𑀓𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀧𑀭𑀫𑀢𑁆𑀣𑀲𑀸𑀲𑀦𑀲𑁆𑀲. 𑀫𑀽𑀮𑁂𑀓𑀤𑁂𑀲𑀢𑁆𑀢𑀸𑀢𑀺 𑀫𑀽𑀮𑀪𑀸𑀯𑁂𑀦 𑀏𑀓𑀤𑁂𑀲𑀢𑁆𑀢𑀸.

𑁧𑁧𑁮. 𑀉𑀦𑁆𑀦𑀴𑁄 𑀉𑀕𑁆𑀕𑀢𑀢𑀼𑀘𑁆𑀙𑀫𑀸𑀦𑁄.

𑁧𑁨𑁩. 𑀲𑀻𑀮𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀁 𑀅𑀧𑀭𑀺𑀲𑀼𑀤𑁆𑀥𑀺𑀬𑀁 𑀲𑁄𑀥𑀦𑀁 𑀅𑀧𑀸𑀭𑀺𑀧𑀽𑀭𑀺𑀬𑀁 𑀧𑀽𑀭𑀡𑀜𑁆𑀘𑀸𑀢𑀺 𑀆𑀳 ‘‘𑀲𑁄𑀥𑁂𑀢𑀩𑁆𑀩𑁂 𑀘 𑀯𑀟𑁆𑀠𑁂𑀢𑀩𑁆𑀩𑁂 𑀘𑀸’’𑀢𑀺. 𑀅𑀥𑀺𑀲𑀻𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀅𑀥𑀺𑀲𑀻𑀮𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀜𑁆𑀜𑀸𑀬.

𑁧𑁨𑁪. 𑀕𑀽𑀣𑀲𑀤𑀺𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀕𑀽𑀣𑀓𑀽𑀧𑀲𑀤𑀺𑀲𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀽𑀣𑀯𑀲𑁂𑀦𑁂𑀯 𑀳𑀺 𑀓𑀽𑀧𑀲𑁆𑀲𑀧𑀺 𑀚𑀺𑀕𑀼𑀘𑁆𑀙𑀦𑀻𑀬𑀢𑀸𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀕𑀽𑀣𑀭𑀸𑀲𑀺𑀬𑁂𑀯 𑀕𑀽𑀣𑀓𑀽𑀧𑁄𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀦𑀯𑀢𑁆𑀢𑀩𑁆𑀩𑁄 𑀲𑀺𑀬𑀸.

𑁧𑁩𑁦. 𑀲𑀭𑀪𑀗𑁆𑀕𑀲𑀢𑁆𑀣𑀸𑀭𑀸𑀤𑀬𑁄 𑀭𑀽𑀧𑀪𑀯𑀸𑀤𑀺𑀓𑀸𑀫𑀸𑀤𑀺𑀧𑀭𑀺𑀜𑁆𑀜𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑁄 𑀮𑁄𑀓𑀺𑀬𑀁 𑀧𑀭𑀺𑀜𑁆𑀜𑀁 𑀲𑀫𑁆𑀫𑀤𑁂𑀯 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀅𑀲𑀫𑀢𑁆𑀣𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀦𑁄 𑀘 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁩𑁩. 𑀧𑀭𑁂𑀦𑀸𑀢𑀺 𑀅𑀜𑁆𑀜𑁂𑀦, 𑀆𑀡𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀡𑀢𑁆𑀢𑀺𑀬𑀸 𑀅𑀢𑁆𑀢𑀦𑀸 𑀘𑀸𑀢𑀺 𑀆𑀡𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸, 𑀅𑀢𑁆𑀢𑀦𑀸 𑀘 𑀆𑀡𑀢𑁆𑀢𑁂𑀦 𑀓𑀢𑀁 𑀢𑀜𑁆𑀘 𑀢𑀲𑁆𑀲 𑀆𑀡𑀸𑀧𑀓𑀲𑁆𑀲 𑀬𑀁 𑀯𑀘𑀻𑀧𑀬𑁄𑀕𑁂𑀦 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀆𑀡𑀢𑁆𑀢𑀺𑀬𑀸 𑀧𑀸𑀧𑀲𑁆𑀲𑀸𑀢𑀺 𑀆𑀡𑀸𑀧𑀦𑀯𑀲𑁂𑀦 𑀧𑀲𑀼𑀢𑀧𑀸𑀧𑀲𑁆𑀲.

𑁧𑁪𑁮. 𑀤𑁂𑀲𑀦𑀸𑀬 𑀓𑀭𑀡𑀪𑀽𑀢𑀸𑀬. 𑀥𑀫𑁆𑀫𑀸𑀦𑀦𑁆𑀢𑀺 𑀤𑁂𑀲𑀦𑀸𑀬 𑀬𑀣𑀸𑀩𑁄𑀥𑁂𑀢𑀩𑁆𑀩𑀸𑀦𑀁 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁.

𑁧𑁫𑁨. 𑀅𑀦𑀦𑁆𑀢𑀭𑀦𑁆𑀢𑀺 𑀜𑀸𑀡𑀲𑁆𑀲 𑀉𑀧𑀝𑁆𑀞𑀺𑀢𑀦𑁆𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀯𑀘𑀦’’𑀦𑁆𑀢𑀺. 𑀮𑀼𑀚𑁆𑀚𑀢𑀻𑀢𑀺 𑀇𑀤𑀁 𑀬𑁂𑀦 𑀓𑀸𑀭𑀡𑁂𑀦 𑀮𑁄𑀓-𑀲𑀤𑁆𑀤𑁄 𑀢𑀤𑀢𑁆𑀣𑁂 𑀧𑀯𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀓𑀸𑀭𑀡𑀬𑀼𑀢𑁆𑀢’’𑀦𑁆𑀢𑀺.

𑁧𑁫𑁬. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 𑀓𑀼𑀲𑀮𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀯𑀘𑀦𑀁 𑀪𑀼𑀫𑁆𑀫𑀢𑁆𑀣𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳𑀺𑀢𑀸𑀲𑀳𑀺𑀢𑁂𑀢𑀺 𑀅𑀢𑁆𑀣𑁄’’𑀢𑀺. 𑀲𑀳𑀺𑀢𑀪𑀸𑀲𑀦𑁂𑀦 𑀤𑁂𑀲𑀓𑀲𑀫𑁆𑀧𑀢𑁆𑀢𑀺, 𑀲𑀳𑀺𑀢𑀸𑀲𑀳𑀺𑀢𑀓𑁄𑀲𑀮𑁆𑀮𑁂𑀦 𑀲𑀸𑀯𑀓𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀧𑀺 𑀜𑀸𑀡𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀝𑀺𑀪𑀸𑀦𑀲𑀫𑁆𑀧𑀤𑀸𑀬 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀬𑀸 𑀩𑁄𑀥𑁂𑀢𑀼𑀁 𑀲𑀫𑀢𑁆𑀣𑀢𑀸𑀬𑀸’’𑀢𑀺.

𑁧𑁫𑁭. 𑀓𑀼𑀲𑀮𑀥𑀫𑁆𑀫𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀳𑀺. 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑁄, 𑀬𑁄 𑀦𑁂𑀯 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑀺, 𑀦 𑀤𑀸𑀦𑀁 𑀤𑁂𑀢𑀺.

𑁧𑁬𑁬. 𑀬𑀫𑀺𑀤𑀁 ‘‘𑀓𑀸𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀬𑁄 𑀢𑀢𑁆𑀣 𑀅𑀯𑀡𑁆𑀡𑁄, 𑀢𑀫𑁆𑀧𑀺 𑀪𑀡𑀢𑀺 𑀓𑀸𑀮𑁂𑀦. 𑀬𑁄𑀧𑀺 𑀢𑀢𑁆𑀣 𑀯𑀡𑁆𑀡𑁄, 𑀢𑀫𑁆𑀧𑀺 𑀪𑀡𑀢𑀺 𑀓𑀸𑀮𑁂𑀦𑀸’’𑀢𑀺 𑀬𑀁 𑀇𑀤𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀭 𑀢𑀲𑁆𑀫𑀺𑀁 𑀯𑀘𑀦𑁂 𑀯𑀸𑀓𑁆𑀬𑁂 𑀬𑁄 𑀧𑀼𑀕𑁆𑀕𑀮𑁄 ‘‘𑀓𑀸𑀮𑁂𑀦 𑀪𑀡𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀻𑀤𑀺𑀲𑁄𑀢𑀺 𑀯𑀺𑀘𑀸𑀭𑀡𑀸𑀬 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀮𑀜𑁆𑀜𑀽 𑀳𑁄𑀢𑀻’’𑀢𑀺𑀆𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀗𑁆𑀕𑀳𑁂 𑀆𑀳𑀸𑀢𑀺 𑀬𑁄𑀚𑀦𑀸.

𑁧𑁬𑁮. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀢𑁂𑀲𑀁 𑀯𑀺𑀧𑀢𑁆𑀢𑀺 𑀧𑀯𑀢𑁆𑀢𑀧𑁆𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁭𑁩. 𑀢𑁂𑀲𑀦𑁆𑀢𑀺 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁. 𑀯𑀺𑀫𑀼𑀢𑁆𑀢𑀺𑀤𑀲𑁆𑀲𑀦𑀫𑁂𑀯 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀅𑀢𑁆𑀣𑀢𑁆𑀢𑀸 𑀢𑀁𑀤𑀲𑁆𑀲𑀦𑀲𑁆𑀲.

𑁧𑁭𑁪. 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁.

𑁧𑁭𑁮. 𑀦𑀸𑀫𑀓𑀸𑀬𑁄𑀢𑀺 𑀦𑀸𑀫𑀲𑀫𑀽𑀳𑁄. 𑀇𑀤𑀫𑁂𑀯 𑀘 𑀤𑁆𑀯𑀬𑀦𑁆𑀢𑀺 𑀲𑀻𑀮𑀲𑀁𑀯𑀭𑀧𑀽𑀭𑀡𑀁, 𑀲𑀸𑀚𑀻𑀯𑀸𑀯𑀻𑀢𑀺𑀓𑁆𑀓𑀫𑀦𑀜𑁆𑀘𑀸𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁. 𑀢𑀢𑁄𑀢𑀺 𑀲𑀸𑀚𑀻𑀯𑀸𑀯𑀻𑀢𑀺𑀓𑁆𑀓𑀫𑀦𑀢𑁄. 𑀓𑀣𑀸𑀬 𑀳𑀮𑀺𑀤𑁆𑀤𑀭𑀸𑀕𑀸𑀤𑀺𑀲𑀤𑀺𑀲𑀢𑀸𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀦 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺.

𑁧𑁭𑁯. 𑀇𑀢𑀺-𑀲𑀤𑁆𑀤𑁂𑀦𑀸𑀢𑀺 ‘‘𑀤𑀸𑀭𑀼𑀫𑀸𑀲𑀓𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀇𑀢𑀺-𑀲𑀤𑁆𑀤𑁂𑀦. 𑀏𑀯𑀁𑀧𑀓𑀸𑀭𑁂𑀢𑀺 𑀇𑀫𑀺𑀦𑀸𑀧𑀺 𑀲𑀮𑀸𑀓𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁮𑁧. 𑀅𑀯𑀺𑀲𑀝𑀲𑀼𑀔𑀦𑁆𑀢𑀺 𑀅𑀯𑀺𑀓𑁆𑀔𑁂𑀧𑀲𑀼𑀔𑀁.

𑁧𑁮𑁭. 𑀔𑀦𑁆𑀥𑀥𑀫𑁆𑀫𑁂𑀲𑀽𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼. 𑀢𑀤𑀮𑀸𑀪𑁂𑀦𑀸𑀢𑀺 𑀫𑀕𑁆𑀕𑀨𑀮𑀸𑀮𑀸𑀪𑁂𑀦. 𑀅𑀢𑁆𑀣𑁂𑀦𑀸𑀢𑀺 𑀲𑀻𑀮𑀸𑀤𑀺𑀅𑀢𑁆𑀣𑁂𑀦.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁯𑁧. 𑀬𑀣𑀸 𑀢𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀧𑀼𑀕𑁆𑀕𑀮𑁂𑀲𑀼 𑀬𑀣𑀸𑀭𑀳𑀁 𑀉𑀧𑀫𑁂𑀬𑁆𑀬𑁄𑀧𑀫𑀸𑀤𑀲𑁆𑀲𑀦𑀫𑀼𑀔𑁂𑀦 𑀳𑀺𑀢𑀽𑀧𑀤𑁂𑀲𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸 𑀅𑀜𑁆𑀜𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀭𑀺𑀬𑀸𑀯𑀸𑀘𑀻 𑀆𑀭𑀫𑁆𑀪-𑀲𑀤𑁆𑀤𑁄 𑀅𑀥𑀺𑀧𑁆𑀧𑁂𑀢𑁄, 𑀦 ‘‘𑀆𑀭𑀫𑁆𑀪𑀓𑀢𑁆𑀢𑀼𑀲𑁆𑀲 𑀓𑀲𑀸𑀯𑀧𑀼𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀥𑀫𑁆𑀫𑀯𑀸𑀘𑀻𑀢𑀺 𑀆𑀳 ‘‘𑀆𑀭𑀫𑁆𑀪𑀓𑀺𑀭𑀺𑀬𑀸𑀯𑀸𑀘𑀓𑁄 𑀲𑀤𑁆𑀤𑁄’’𑀢𑀺. ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀕𑁆𑀕𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑁧𑁯𑁨. 𑀕𑀳𑀡𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁.

𑁧𑁯𑁯. 𑀦 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀅𑀲𑀫𑀸𑀦𑀚𑀸𑀢𑀺𑀓𑀢𑁆𑀢𑀸.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁨. 𑀇𑀤𑀁 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀸𑀤𑀺𑀓𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺 𑀨𑀮𑀲𑁆𑀲 𑀳𑁂𑀢𑀼𑀦𑀸 𑀅𑀯𑀺𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀸𑀫’’𑀦𑁆𑀢𑀺𑀆𑀤𑀺. 𑀅𑀦𑀸𑀘𑀭𑀺𑀬𑀓𑁂𑀦 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦𑀸𑀢𑀺 𑀇𑀤𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀯𑀺𑀚𑁆𑀚𑀫𑀸𑀦𑀕𑀼𑀡𑀓𑀣𑀦𑀁, 𑀦 𑀢𑀩𑁆𑀩𑀺𑀥𑀼𑀭𑀥𑀫𑁆𑀫𑀦𑁆𑀢𑀭𑀦𑀺𑀯𑀢𑁆𑀢𑀦𑀁 𑀢𑀣𑀸𑀭𑀽𑀧𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀲𑁆𑀲 𑀲𑀸𑀘𑀭𑀺𑀬𑀓𑀢𑀸, 𑀧𑀭𑀢𑁄 𑀘 𑀉𑀧𑁆𑀧𑀢𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀸𑀘𑀭𑀺𑀬𑀓𑀢𑁆𑀢𑀁 𑀧𑀭𑀽𑀧𑀤𑁂𑀲𑀳𑁂𑀢𑀼𑀓𑀢𑀸, 𑀧𑀭𑀢𑁄 𑀉𑀧𑁆𑀧𑀢𑁆𑀢𑀺 𑀉𑀧𑀤𑁂𑀲𑁂𑀦 𑀯𑀺𑀦𑀸𑀧𑀺 𑀲𑀦𑁆𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁩. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑁆𑀢𑁄𑀕𑀥𑀸’’𑀢𑀺 𑀆𑀳. 𑀇𑀤𑀸𑀦𑀺 𑀯𑀺𑀲𑀬𑀮𑀓𑁆𑀔𑀡𑀁 𑀏𑀢𑀁 𑀪𑀼𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀤𑀼𑀧𑀓𑀸𑀭𑀢𑀸𑀬𑀸’’𑀢𑀺 𑀇𑀤𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀥𑁂𑀢𑀩𑁆𑀩𑁂𑀲𑀽𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀫𑁆𑀫𑀼𑀚𑁆𑀚𑀦𑀧𑀜𑁆𑀜𑀸𑀬𑀸𑀢𑀺 𑀉𑀫𑁆𑀫𑀼𑀚𑁆𑀚𑀸𑀧𑀦𑀧𑀜𑁆𑀜𑀸𑀬, 𑀉𑀫𑁆𑀫𑀼𑀚𑁆𑀚𑀦𑀸𑀓𑀸𑀭𑁂𑀦 𑀯𑀸 𑀧𑀯𑀢𑁆𑀢𑀧𑀜𑁆𑀜𑀸𑀬. 𑀢𑁂𑀦𑁂𑀯𑀸𑀢𑀺 𑀉𑀫𑁆𑀫𑀼𑀚𑁆𑀚𑀦𑀫𑀢𑁆𑀢𑀢𑁆𑀢𑀸 𑀏𑀯. 𑀬𑀣𑀸 𑀳𑀺 𑀜𑀸𑀡𑀼𑀧𑁆𑀧𑀸𑀤𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀉𑀫𑁆𑀫𑀼𑀚𑁆𑀚𑀦𑀁, 𑀏𑀯𑀁 𑀲𑀤𑁆𑀥𑀼𑀧𑁆𑀧𑀸𑀤𑁄𑀧𑀻𑀢𑀺 𑀆𑀳 ‘‘𑀲𑀤𑁆𑀥𑀸𑀲𑀗𑁆𑀔𑀸𑀢𑀫𑁂𑀯 𑀉𑀫𑁆𑀫𑀼𑀚𑁆𑀚𑀦’’𑀦𑁆𑀢𑀺. 𑀘𑀺𑀢𑁆𑀢𑀯𑀸𑀭𑁄𑀢𑀺 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑀯𑀸𑀭𑁄. 𑀧𑀘𑁆𑀘𑁂𑀓𑀁 𑀞𑀸𑀦𑀯𑀺𑀧𑀲𑁆𑀲𑀦𑀸𑀧𑀢𑀭𑀡𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑀺𑀦𑀺𑀝𑁆𑀞𑀢𑁆𑀢𑀸 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 ‘‘𑀅𑀦𑁂𑀓𑁂 𑀧𑀼𑀕𑁆𑀕𑀮𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀭𑀳𑀢𑁆𑀢𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀢𑀢𑀺𑀬𑀧𑀼𑀕𑁆𑀕𑀮𑀸𑀤𑀺𑀪𑀸𑀯𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀸𑀤𑀺𑀪𑀸𑀯𑀁.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁦𑁯. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀢𑀺 𑀯𑀼𑀢𑁆𑀢𑀯𑀺𑀲𑁂𑀲𑀬𑀼𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀛𑀸𑀦𑀸𑀦𑀸𑀕𑀸𑀫𑀺𑀦𑁄. 𑀅𑀲𑀸…𑀧𑁂… 𑀧𑀦𑀸𑀢𑀺 𑀏𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑁄. 𑀢𑁂𑀦 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸’’𑀢𑀺 𑀇𑀤𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.