𑀥𑀸𑀢𑀼𑀓𑀣𑀸𑀧𑀓𑀭𑀡-𑀅𑀦𑀼𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀥𑀸𑀢𑀼𑀓𑀣𑀸𑀧𑀓𑀭𑀡𑀤𑁂𑀲𑀦𑀸𑀬 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀏𑀯𑀸𑀢𑀺 𑀓𑀸𑀮𑀸𑀧𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀸𑀢𑀼𑀓𑀣𑀸𑀧𑀓𑀭𑀡𑀁 𑀤𑁂𑀲𑁂𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. ‘‘𑀢𑀲𑁆𑀲𑁂𑀯 𑀅𑀦𑀦𑁆𑀢𑀭𑀁 𑀅𑀤𑁂𑀲𑀬𑀻’’𑀢𑀺 𑀳𑀺 𑀇𑀫𑀺𑀦𑀸 𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀥𑀸𑀢𑀼𑀓𑀣𑀸 𑀤𑁂𑀲𑀺𑀢𑀸𑀢𑀺 𑀢𑀲𑁆𑀲𑀸 𑀤𑁂𑀲𑀦𑀸𑀓𑀸𑀮𑁄 𑀅𑀧𑀤𑀺𑀝𑁆𑀞𑁄 𑀳𑁄𑀢𑀺. 𑀬𑁂 𑀧𑀦 ‘‘𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀁 𑀤𑁂𑀲𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀯𑀺𑀪𑀗𑁆𑀕𑀸𑀦𑀦𑁆𑀢𑀭𑀁…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀆𑀳.

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑀦𑀦𑁆𑀤𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁭) 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀩𑀮𑀯𑀺𑀥𑀫𑀦𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, ‘‘𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦’’𑀦𑁆𑀢𑀺 𑀧𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀔𑀦𑁆𑀢𑀺𑀩𑀮𑀲𑀤𑁆𑀥𑀸𑀩𑀮𑀸𑀤𑀺𑀆𑀦𑀼𑀪𑀸𑀯𑁂𑀦 𑀉𑀲𑁆𑀲𑀸𑀳𑀧𑀭𑀺𑀲𑀸𑀩𑀮𑀪𑀜𑁆𑀚𑀦𑀫𑁂𑀯 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀩𑀮𑀯𑀺𑀤𑁆𑀥𑀁𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀁 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑁄. 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦𑀸𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀁 𑀯𑀲𑁂𑀦. 𑀦𑀦𑀼 𑀘𑁂𑀢𑀁 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀪𑀜𑁆𑀚𑀦𑀁 𑀲𑀸𑀯𑀓𑁂𑀲𑀼𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀭𑀽𑀧𑀦𑀺𑀲𑁆𑀲𑀬𑀭𑀳𑀺𑀢’’𑀦𑁆𑀢𑀺𑀆𑀤𑀺. 𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀫𑀳𑀸𑀯𑀻𑀭𑀺𑀬𑁄𑀢𑀺 𑀫𑀳𑀸𑀯𑀻𑀭𑁄’’𑀢𑀺. 𑀫𑀳𑀸𑀯𑀻𑀭𑀺𑀬𑀢𑀸 𑀘 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀧𑀸𑀭𑀫𑀺𑀢𑀸𑀬 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 𑀏𑀯 𑀳𑀺𑀲𑁆𑀲 𑀯𑀻𑀭𑀺𑀬𑀸𑀳𑀸𑀦𑀺𑀲𑀺𑀤𑁆𑀥𑀺𑀧𑀻𑀢𑀺.

𑀔𑀦𑁆𑀥𑀸𑀤𑀺𑀓𑁂 𑀥𑀫𑁆𑀫𑁂 𑀅𑀥𑀺𑀝𑁆𑀞𑀸𑀬 𑀦𑀺𑀲𑁆𑀲𑀸𑀬 𑀯𑀺𑀲𑀬𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀓𑀣𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀅𑀪𑀺𑀥𑀫𑁆𑀫𑀓𑀣𑀸𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀸’’𑀢𑀺. 𑀢𑁂𑀲𑀁 𑀓𑀣𑀦𑀢𑁄𑀢𑀺 𑀢𑁂𑀲𑀁 𑀔𑀦𑁆𑀥𑀸𑀤𑀻𑀦𑀁 𑀓𑀣𑀸𑀪𑀸𑀯𑀢𑁄. 𑀏𑀢𑁂𑀦 𑀅𑀢𑁆𑀣𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑁄 𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁄 𑀧𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀥𑀸𑀢𑀼𑀬𑁄 𑀓𑀣𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀥𑀸𑀢𑀼𑀓𑀣𑀸, 𑀢𑀣𑀸𑀧𑀯𑀢𑁆𑀢𑁄 𑀩𑁆𑀬𑀜𑁆𑀚𑀦𑀢𑁆𑀣𑀲𑀫𑀼𑀤𑀸𑀬𑁄. 𑀬𑀤𑀺 𑀏𑀯𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀓𑀭𑀡𑀸𑀦𑀁 𑀥𑀸𑀢𑀼𑀓𑀣𑀸𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀤𑀺𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀢𑀺𑀲𑀬𑀦𑁆𑀢𑀺 𑀲𑀯𑀺𑀲𑁂𑀲𑀁 𑀯𑀺𑀘𑀺𑀢𑁆𑀢𑀸𑀢𑀺𑀭𑁂𑀓𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀘 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 (𑀥𑀸𑀢𑀼. 𑁫). 𑀢𑁂𑀦𑁂𑀯𑀸𑀳 ‘‘𑀏𑀓𑀤𑁂𑀲𑀓𑀣𑀦𑀫𑁂𑀯 𑀳𑀺 𑀅𑀜𑁆𑀜𑀢𑁆𑀣 𑀓𑀢’’𑀦𑁆𑀢𑀺.

𑀇𑀤𑀸𑀦𑀺 𑀲𑀸𑀲𑀦𑁂 𑀬𑁂𑀲𑀼 𑀥𑀸𑀢𑀼-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄, 𑀢𑁂𑀲𑀁 𑀯𑀲𑁂𑀦 𑀅𑀜𑁆𑀜𑁂𑀳𑀺𑀧𑀺 𑀅𑀲𑀸𑀥𑀸𑀭𑀡𑀁 𑀇𑀫𑀲𑁆𑀲 𑀧𑀓𑀭𑀡𑀲𑁆𑀲 𑀥𑀸𑀢𑀼𑀓𑀣𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼. 𑀫𑀳𑀦𑁆𑀢𑁄 𑀧𑀪𑁂𑀤𑀸𑀦𑀼𑀕𑀢𑁄 𑀯𑀺𑀲𑀬𑁄 𑀏𑀢𑀸𑀲𑀦𑁆𑀢𑀺 𑀫𑀳𑀸𑀯𑀺𑀲𑀬𑀸, 𑀥𑀸𑀢𑀼𑀬𑁄, 𑀦 𑀔𑀦𑁆𑀥𑀸𑀬𑀢𑀦𑀸𑀦𑀺 𑀅𑀧𑁆𑀧𑀢𑀭𑀧𑀤𑀢𑁆𑀢𑀸. 𑀬𑁂𑀦 𑀯𑀸 𑀲𑀪𑀸𑀯𑁂𑀦 𑀥𑀫𑁆𑀫𑀸 𑀲𑀗𑁆𑀕𑀳𑀸𑀲𑀗𑁆𑀕𑀳𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑁂𑀳𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂 𑀮𑀪𑀦𑁆𑀢𑀺, 𑀲𑁄 𑀲𑀪𑀸𑀯𑁄 𑀥𑀸𑀢𑀼. 𑀲𑀸 𑀥𑀸𑀢𑀼 𑀇𑀥 𑀲𑀸𑀢𑀺𑀲𑀬𑀁 𑀤𑁂𑀲𑀺𑀢𑀸𑀢𑀺 𑀲𑀯𑀺𑀲𑁂𑀲𑀁 𑀥𑀸𑀢𑀼𑀬𑀸 𑀓𑀣𑀦𑀢𑁄 𑀇𑀤𑀁 𑀧𑀓𑀭𑀡𑀁 ‘‘𑀥𑀸𑀢𑀼𑀓𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀢𑁆𑀣𑁄 𑀳𑀺 𑀅𑀬𑀁 𑀥𑀸𑀢𑀼-𑀲𑀤𑁆𑀤𑁄 ‘‘𑀥𑀸𑀢𑀼𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁯𑁮) 𑀯𑀺𑀬. 𑀥𑀸𑀢𑀼𑀪𑁂𑀤𑀦𑁆𑀢𑀺 𑀥𑀸𑀢𑀼𑀯𑀺𑀪𑀸𑀕𑀁. 𑀧𑀓𑀭𑀡𑀦𑁆𑀢𑀺 𑀯𑀘𑀦𑀲𑁂𑀲𑁄. 𑀓𑀼𑀢𑁄 𑀧𑀓𑀭𑀡-𑀲𑀤𑁆𑀤𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀓𑀫𑁂𑀦 𑀯𑀡𑁆𑀡𑀦𑀸𑀬 𑀧𑀯𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸𑀢𑀺 𑀢𑁂𑀦 𑀧𑀓𑀭𑀡-𑀲𑀤𑁆𑀤𑁂𑀦 ‘‘𑀥𑀸𑀢𑀼𑀓𑀣𑀸𑀯 𑀧𑀓𑀭𑀡𑀁 𑀥𑀸𑀢𑀼𑀓𑀣𑀸𑀧𑀓𑀭𑀡’’𑀦𑁆𑀢𑀺 𑀬𑁄𑀚𑀦𑀁 𑀓𑀢𑁆𑀯𑀸. 𑀢𑀁 𑀤𑀻𑀧𑀦𑀦𑁆𑀢𑀺 𑀢𑀁 𑀥𑀸𑀢𑀼𑀓𑀣𑀸𑀧𑀓𑀭𑀡𑀲𑁆𑀲 𑀅𑀢𑁆𑀣𑀤𑀻𑀧𑀦𑀁, 𑀅𑀢𑁆𑀣𑀤𑀻𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀯𑀡𑁆𑀡𑀦𑀁. ‘‘𑀅𑀢𑁆𑀣𑀁 𑀤𑀻𑀧𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀢𑀁 𑀲𑀼𑀡𑀸𑀣𑀸’’𑀢𑀺 𑀯𑀤𑀦𑁆𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀢𑀢𑁆𑀣 𑀉𑀧𑀥𑀸𑀭𑀡𑁂 𑀦𑀺𑀬𑁄𑀚𑁂𑀢𑀻𑀢𑀺 𑀆𑀳 ‘‘𑀢𑀁𑀤𑀻𑀧𑀦𑀯𑀘𑀦𑀲𑀯𑀦𑁂𑀦 𑀉𑀧𑀥𑀸𑀭𑁂𑀣𑀸𑀢𑀺 𑀅𑀢𑁆𑀣𑁄’’𑀢𑀺.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀦𑀬𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁧. 𑀘𑀼𑀤𑁆𑀤𑀲𑀯𑀺𑀥𑁂𑀦𑀸𑀢𑀺 𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑁂𑀦, 𑀘𑀼𑀤𑁆𑀤𑀲𑀳𑀺 𑀧𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀇𑀤𑀫𑁂𑀓𑀁 𑀧𑀤𑀁, 𑀢𑀣𑀸 ‘‘𑀲𑀫𑁆𑀧𑀬𑁄𑀕𑁄 𑀯𑀺𑀧𑁆𑀧𑀬𑁄𑀕𑁄’’𑀢𑀺. ‘‘𑀲𑀗𑁆𑀕𑀳𑀺𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀧𑀦 𑀢𑀻𑀡𑀺 𑀢𑀻𑀡𑀺 𑀧𑀤𑀸𑀦𑀺 𑀏𑀓𑁂𑀓𑀁 𑀧𑀤𑀁. 𑀇𑀢𑀭𑁂𑀲𑀼 𑀧𑀤𑀯𑀺𑀪𑀸𑀕𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀏𑀢𑁂𑀳𑀻𑀢𑀺 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑁂𑀳𑀺. 𑀦𑀬𑀦𑀁 𑀧𑀸𑀧𑀦𑀁, 𑀢𑀁 𑀧𑀦 𑀧𑀯𑀢𑁆𑀢𑀦𑀁 𑀜𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 ‘‘𑀧𑀯𑀢𑁆𑀢𑀻𑀬𑀢𑀺 𑀜𑀸𑀬𑀦𑁆𑀢𑀻’’𑀢𑀺 𑀘 𑀤𑁆𑀯𑀺𑀥𑀸𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀬𑀸 𑀏𑀯 𑀉𑀤𑁆𑀤𑀺𑀲𑀺𑀬𑀫𑀸𑀦𑀸 𑀫𑀸𑀢𑀺𑀓𑀸. 𑀅𑀢𑁆𑀣𑀤𑁆𑀯𑀬𑁂𑀧𑀺 𑀧𑀯𑀢𑁆𑀢𑀦𑀜𑀸𑀡𑀓𑀺𑀭𑀺𑀬𑀸𑀦𑀁 𑀓𑀭𑀡𑀪𑀸𑀯𑁂𑀦 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑀸 𑀦𑀬𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀫𑀺𑀦𑀸 𑀲𑀗𑁆𑀕𑀳𑀸𑀤𑀺𑀓𑁂𑀦 𑀦𑀬𑁂𑀦𑀸’’𑀢𑀺 (𑀥𑀸𑀢𑀼. 𑀅𑀝𑁆𑀞. 𑁧). 𑀧𑀤𑀸𑀦𑀦𑁆𑀢𑀺 𑀅𑀢𑁆𑀣𑀤𑀻𑀧𑀓𑀸𑀦𑀁 𑀯𑀘𑀦𑀸𑀦𑀁. 𑀧𑀚𑁆𑀚𑀢𑀺 𑀏𑀢𑁂𑀦 𑀅𑀢𑁆𑀣𑁄𑀢𑀺 𑀳𑀺 𑀧𑀤𑀁. 𑀧𑀤𑀸𑀦𑀦𑁆𑀢𑀺 𑀘 𑀲𑀁𑀲𑀸𑀫𑀺𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, 𑀧𑀓𑀭𑀡𑀲𑁆𑀲𑀸𑀢𑀺 𑀧𑀦 𑀅𑀯𑀬𑀯𑀸𑀯𑀬𑀯𑀻𑀲𑀫𑁆𑀩𑀦𑁆𑀥𑁂.

𑁨. 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁨. 𑀢𑀤𑀢𑁆𑀣𑀸𑀦𑀻𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁆𑀣𑀸𑀦𑀺. 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀲𑀗𑁆𑀔𑀸𑀭𑀸𑀤𑀺𑀓𑀁 𑀏𑀢𑀲𑁆𑀫𑀸𑀢𑀺 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀧𑀘𑁆𑀘𑁂𑀓𑀁 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀥𑀫𑁆𑀫𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸, 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺. 𑀢𑁂𑀲𑀦𑁆𑀢𑀺 𑀔𑀦𑁆𑀥𑀸𑀤𑀻𑀦𑀁. 𑀢𑀣𑀸𑀤𑀲𑁆𑀲𑀺𑀢𑀸𑀦𑀦𑁆𑀢𑀺 𑀕𑀡𑀦𑀼𑀤𑁆𑀤𑁂𑀲𑀯𑀺𑀪𑀸𑀕𑀫𑀢𑁆𑀢𑁂𑀦 𑀤𑀲𑁆𑀲𑀺𑀢𑀸𑀦𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑁆𑀯𑀸𑀤𑀲𑀪𑀸𑀯𑁂𑀦𑁂𑀯 𑀕𑀳𑀺𑀢𑁄, 𑀦𑀦𑀼 𑀢𑀢𑁆𑀣 𑀪𑀯𑁄 𑀓𑀫𑁆𑀫𑀪𑀯𑀸𑀤𑀺𑀪𑁂𑀤𑁂𑀦, 𑀲𑁄𑀓𑀸𑀤𑀬𑁄 𑀘 𑀲𑀭𑀽𑀧𑀢𑁄𑀬𑁂𑀯 𑀇𑀥 𑀧𑀸𑀴𑀺𑀬𑀁 𑀕𑀳𑀺𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀧𑀜𑁆𑀘𑀯𑀻𑀲𑀸𑀥𑀺𑀓𑁂𑀦 𑀧𑀤𑀲𑀢𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀯𑀘𑀦𑁂. 𑀓𑀫𑁆𑀫𑀪𑀯𑀲𑁆𑀲 𑀪𑀸𑀯𑀦𑀪𑀸𑀯𑁂𑀦, 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀪𑀯𑀦𑀪𑀸𑀯𑁂𑀦. 𑀧𑀤𑀢𑁆𑀣𑀢𑁄 𑀧𑀦 𑀓𑀫𑁆𑀫𑀪𑀯𑁄 𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀪𑀯𑁄, 𑀇𑀢𑀭𑁄 𑀪𑀯𑀢𑀺, 𑀪𑀯𑀦𑀁 𑀯𑀸𑀢𑀺. 𑀢𑀦𑁆𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦𑀸𑀢𑀺 𑀚𑀭𑀸𑀫𑀭𑀡𑀦𑀺𑀤𑀸𑀦𑀤𑀼𑀓𑁆𑀔𑀪𑀸𑀯𑁂𑀦.

‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 𑀇𑀤𑀫𑁆𑀧𑀺 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀓𑀺𑀢𑁆𑀢𑀦𑀫𑁂𑀯𑀸𑀢𑀺 ‘‘𑀲𑀩𑁆𑀩𑀸𑀧𑀺…𑀧𑁂… 𑀫𑀸𑀢𑀺𑀓𑀸𑀢𑀺 𑀅𑀬𑀁 𑀥𑀸𑀢𑀼𑀓𑀣𑀸𑀫𑀸𑀢𑀺𑀓𑀸𑀢𑁄 𑀩𑀳𑀺𑀤𑁆𑀥𑀸 𑀯𑀼𑀢𑁆𑀢𑀸’’𑀢𑀺 𑀯𑀘𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀓𑀭𑀡𑀦𑁆𑀢𑀭𑀕𑀢𑀸 𑀯𑀼𑀢𑁆𑀢𑀸 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀫𑀸𑀢𑀺𑀓𑀸𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀧𑀓𑀭𑀡𑀦𑁆𑀢𑀭𑀕𑀢𑀢𑁆𑀢𑀸 𑀧𑀦 𑀅𑀜𑁆𑀜𑀢𑁄 𑀕𑀳𑁂𑀢𑀩𑁆𑀩𑀭𑀽𑀧𑀸 𑀇𑀢𑁄 𑀩𑀳𑀺𑀪𑀽𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑀭𑀽𑀧𑀢𑁄 𑀕𑀳𑀺𑀢𑀸𑀯 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺𑀆𑀤𑀺𑀓𑀸 𑀅𑀩𑁆𑀪𑀦𑁆𑀢𑀭𑀸. 𑀢𑁂𑀦𑀸𑀳 ‘‘𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀞𑀧𑀺𑀢𑀢𑁆𑀢𑀸’’𑀢𑀺. 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺 𑀫𑀸𑀢𑀺𑀓𑀸𑀬 𑀲𑀭𑀽𑀧𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀫𑀸𑀢𑀺𑀓𑀸𑀬 𑀅𑀲𑀗𑁆𑀕𑀳𑀺𑀢𑁄 𑀓𑁄𑀘𑀺 𑀧𑀤𑀢𑁆𑀣𑁄 𑀅𑀢𑁆𑀣𑀺. 𑀯𑀺𑀓𑀺𑀡𑁆𑀡𑀪𑀸𑀯𑁂𑀦𑀸𑀢𑀺 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀺𑀡𑁆𑀡𑀪𑀸𑀯𑁂𑀦 𑀯𑀺𑀲𑀝𑀪𑀸𑀯𑁂𑀦.

𑁩. 𑀦𑀬𑀫𑀼𑀔𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁩. 𑀦𑀬𑀸𑀦𑀁 𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀦𑀁 𑀧𑀯𑀢𑁆𑀢𑀺 𑀤𑁂𑀲𑀦𑀸, 𑀢𑀲𑁆𑀲𑀸 𑀯𑀺𑀦𑀺𑀕𑁆𑀕𑀫𑀝𑁆𑀞𑀸𑀦𑀢𑀸𑀬 𑀤𑁆𑀯𑀸𑀭𑀁. 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸 𑀬𑀣𑀸𑀭𑀳𑀁 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀅𑀭𑀽𑀧𑀺𑀦𑁄 𑀘 𑀔𑀦𑁆𑀥𑀸𑀢𑀺 𑀢𑁂𑀲𑀁 𑀉𑀤𑁆𑀤𑁂𑀲𑁄 𑀦𑀬𑀫𑀼𑀔𑀫𑀸𑀢𑀺𑀓𑀸. 𑀢𑁂𑀦𑀸𑀳 ‘‘𑀦𑀬𑀸𑀦’’𑀦𑁆𑀢𑀺𑀆𑀤𑀺. 𑀯𑀺𑀬𑀼𑀚𑁆𑀚𑀦𑀲𑀻𑀮𑀸, 𑀯𑀺𑀬𑁄𑀕𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀺𑀬𑁄𑀕𑀺𑀦𑁄, 𑀢𑀣𑀸 𑀲𑀳𑀬𑁄𑀕𑀺𑀦𑁄, 𑀲𑀗𑁆𑀕𑀳𑀸𑀲𑀗𑁆𑀕𑀳𑀥𑀫𑁆𑀫𑀸 𑀘 𑀯𑀺𑀬𑁄𑀕𑀻𑀲𑀳𑀬𑁄𑀕𑀻𑀥𑀫𑁆𑀫𑀸 𑀘 𑀲𑀗𑁆𑀕𑀳𑀸…𑀧𑁂… 𑀥𑀫𑁆𑀫𑀸, 𑀲𑀗𑁆𑀕𑀡𑁆𑀳𑀦𑀸𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀯𑀺𑀬𑀼𑀚𑁆𑀚𑀦𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀓𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀘𑀼𑀤𑁆𑀤𑀲𑀧𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀬𑁂𑀳𑀻𑀢𑀺 𑀬𑁂𑀳𑀺 𑀔𑀦𑁆𑀥𑀸𑀤𑀻𑀳𑀺 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺 𑀘. 𑀢𑁂 𑀘𑀢𑁆𑀢𑀸𑀭𑁄𑀢𑀺 𑀢𑁂 𑀲𑀗𑁆𑀕𑀳𑀸𑀤𑀬𑁄 𑀘𑀢𑁆𑀢𑀸𑀭𑁄. 𑀲𑀘𑁆𑀘𑀸𑀤𑀻𑀳𑀺𑀧𑀻𑀢𑀺 𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀳𑀺𑀧𑀺 𑀲𑀳. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀸𑀦𑀼𑀭𑀽𑀧𑀁, 𑀬𑀁 𑀬𑀁 𑀧𑀤𑀁 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄𑀢𑀺 𑀘 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀁 𑀢𑀦𑁆𑀢𑀺 𑀅𑀢𑁆𑀣𑁄.

𑀲𑁄 𑀧𑀦𑀸𑀢𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄. 𑀲𑀗𑁆𑀕𑀸𑀳𑀓𑀪𑀽𑀢𑁂𑀳𑀻𑀢𑀺 𑀲𑀗𑁆𑀕𑀳𑀡𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑁂𑀳𑀺. 𑀢𑁂𑀳𑀻𑀢𑀺 𑀲𑀘𑁆𑀘𑀸𑀤𑀻𑀳𑀺. 𑀦 𑀲𑀗𑁆𑀕𑀳𑀪𑀽𑀢𑁂𑀳𑀻𑀢𑀺 𑀲𑀗𑁆𑀕𑀳𑀡𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑁂𑀳𑀺 𑀲𑀘𑁆𑀘𑀸𑀤𑀻𑀳𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀦 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀧𑀺 𑀳𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀏𑀯 𑀓𑀭𑀡𑀪𑀽𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀔𑀦𑁆𑀥𑀸𑀤𑀻𑀳𑁂𑀯 𑀲𑀗𑁆𑀕𑀳𑁂𑀳𑀻𑀢𑀺 𑀔𑀦𑁆𑀥𑀸𑀤𑀻𑀳𑀺𑀬𑁂𑀯 𑀲𑀗𑁆𑀕𑀡𑁆𑀳𑀦𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑁂𑀳𑀺, ‘‘𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺, 𑀤𑁆𑀯𑀻𑀳𑀸𑀬𑀢𑀦𑁂𑀳𑀺, 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀗𑁆𑀕𑀳𑀸𑀲𑀗𑁆𑀕𑀳𑁄 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀘𑁆𑀘𑀸𑀤𑀻𑀦𑀺 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀦 𑀲𑀗𑁆𑀕𑀳𑀪𑀸𑀯𑁂𑀦, 𑀔𑀦𑁆𑀥𑀸𑀤𑀻𑀦𑀺𑀬𑁂𑀯 𑀘 𑀲𑀗𑁆𑀕𑀳𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀘𑁆𑀘𑀸𑀤𑀬𑁄 𑀲𑀗𑁆𑀕𑀳𑀯𑀲𑁂𑀦 𑀦 𑀯𑀼𑀢𑁆𑀢𑀸𑀢𑀺? 𑀢𑀣𑀸𑀤𑁂𑀲𑀦𑀸𑀬 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀲𑀓𑁆𑀓𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺, 𑀲𑀜𑁆𑀜𑀸𑀤𑀻𑀦𑀁 𑀯𑀸 𑀇𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀲𑀗𑁆𑀕𑀳𑀦𑀬𑁂𑀦 𑀧𑀼𑀘𑁆𑀙𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀸𑀢𑀺. 𑀢𑀣𑀸 𑀅𑀭𑀺𑀬𑀨𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀯𑁂𑀤𑀦𑀸𑀤𑀻𑀦𑀁 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀢𑀸𑀬 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 ‘‘𑀏𑀓𑁂𑀦 𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀬𑀫𑁂𑀢𑁆𑀯𑀸 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀬𑁂𑀳𑀺 𑀲𑀫𑁆𑀧𑀬𑁄𑀕𑁄, 𑀬𑁂𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄, 𑀢𑀤𑀦𑀼𑀭𑀽𑀧𑀁.

𑀭𑀽𑀧𑀁 𑀭𑀽𑀧𑁂𑀦 𑀦𑀺𑀩𑁆𑀩𑀸𑀦𑁂𑀦 𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀁 𑀦 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀁 𑀯𑀸 𑀭𑀽𑀧𑁂𑀦. 𑀓𑀲𑁆𑀫𑀸? 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀦𑀸𑀲𑀗𑁆𑀓𑀦𑀻𑀬𑀲𑀪𑀸𑀯𑀢𑁆𑀢𑀸. 𑀘𑀢𑀼𑀦𑁆𑀦𑀜𑁆𑀳𑀺 𑀔𑀦𑁆𑀥𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀬𑁄𑀕𑀻𑀪𑀸𑀯𑀢𑁄 ‘‘𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺𑀧𑀺 𑀲𑁄 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀲𑀺𑀬𑀸 𑀆𑀲𑀗𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁 𑀇𑀢𑀭𑁂𑀳𑀺, 𑀇𑀢𑀭𑁂𑀲𑀜𑁆𑀘 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀘𑁆𑀘𑀢𑀺, 𑀦 𑀧𑀦 𑀭𑀽𑀧𑀲𑁆𑀲 𑀭𑀽𑀧𑁂𑀦, 𑀦𑀺𑀩𑁆𑀩𑀸𑀦𑁂𑀦 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀭𑀽𑀧𑁂𑀦 𑀓𑀢𑁆𑀣𑀘𑀺 𑀲𑀫𑁆𑀧𑀬𑁄𑀕𑁄 𑀅𑀢𑁆𑀣𑀻𑀢𑀺 𑀢𑀤𑀸𑀲𑀗𑁆𑀓𑀸𑀪𑀸𑀯𑀢𑁄 𑀯𑀺𑀧𑁆𑀧𑀬𑁄𑀕𑁄𑀧𑀺 𑀭𑀽𑀧𑀲𑁆𑀲 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺, 𑀦𑀺𑀩𑁆𑀩𑀸𑀦𑀲𑁆𑀲 𑀯𑀸 𑀢𑁂𑀦 𑀦 𑀯𑀼𑀘𑁆𑀘𑀢𑀺, 𑀅𑀭𑀽𑀧𑀓𑁆𑀔𑀦𑁆𑀥𑁂𑀳𑀺𑀬𑁂𑀯 𑀧𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀘𑀢𑀽𑀳𑁂𑀯𑀸’’𑀢𑀺𑀆𑀤𑀺. 𑀅𑀦𑀸𑀭𑀫𑁆𑀫𑀡𑀲𑁆𑀲 𑀘𑀓𑁆𑀔𑀸𑀬𑀢𑀦𑀸𑀤𑀺𑀓𑀲𑁆𑀲. 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀻𑀢𑀺 𑀅𑀦𑀸𑀭𑀫𑁆𑀫𑀡𑁂𑀦 𑀲𑁄𑀢𑀸𑀬𑀢𑀦𑀸𑀤𑀺𑀦𑀸 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀦 𑀘 𑀥𑀫𑁆𑀫𑀸𑀬𑀢𑀦𑀸𑀤𑀺𑀦𑀸. 𑀫𑀺𑀲𑁆𑀲𑀓𑀲𑁆𑀲 𑀥𑀫𑁆𑀫𑀸𑀬𑀢𑀦𑀸𑀤𑀺𑀓𑀲𑁆𑀲. 𑀅𑀦𑀸𑀭𑀫𑁆𑀫𑀡𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀳𑀺 𑀦 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑁂𑀲𑀁 𑀧𑀦 𑀬𑁂𑀳𑀺 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀸𑀭𑀫𑁆𑀫𑀡𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀲𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀭𑀫𑁆𑀫𑀡𑁂𑀦 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂𑀦 𑀘 𑀯𑀺𑀧𑁆𑀧𑀬𑁄𑀕𑁄 𑀳𑁄𑀢𑀺, 𑀏𑀯𑀁 𑀲𑀸𑀭𑀫𑁆𑀫𑀡𑁂𑀦𑀧𑀺 𑀲𑁄 𑀳𑁄𑀢𑀺𑀬𑁂𑀯. 𑀢𑁂𑀦 𑀯𑀺𑀬 𑀅𑀦𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑁆𑀲 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁪. 𑀮𑀓𑁆𑀔𑀡𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁪. 𑀯𑀺𑀲𑀼𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀬𑁄 𑀢𑀻𑀳𑀺 𑀲𑀗𑁆𑀕𑀳𑁄 𑀘𑀢𑀽𑀳𑀺 𑀘 𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁 𑀲𑀪𑀸𑀕𑁄 𑀪𑀸𑀯𑁄 𑀧𑀬𑁄𑀚𑁂𑀢𑀺, 𑀬𑁄 𑀘 𑀢𑀻𑀳𑀺 𑀅𑀲𑀗𑁆𑀕𑀳𑁄 𑀘𑀢𑀽𑀳𑀺 𑀘 𑀯𑀺𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁 𑀯𑀺𑀲𑀪𑀸𑀕𑁄 𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀕𑀳𑁄…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀬𑀲𑁆𑀲 𑀲𑀗𑁆𑀕𑀳𑁄, 𑀲𑁄 𑀥𑀫𑁆𑀫𑁄 𑀔𑀦𑁆𑀥𑀸𑀤𑀺𑀓𑁄 𑀲𑀪𑀸𑀕𑁄. 𑀬𑀲𑁆𑀲 𑀅𑀲𑀗𑁆𑀕𑀳𑁄, 𑀲𑁄 𑀯𑀺𑀲𑀪𑀸𑀕𑁄. 𑀢𑀣𑀸 𑀲𑀫𑁆𑀧𑀬𑁄𑀕𑁂𑀲𑀼𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀁 𑀲𑀪𑀸𑀕𑀢𑀁 𑀲𑀭𑀽𑀧𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀸𑀦𑀪𑀸𑀯𑁄 𑀲𑀗𑁆𑀕𑀳𑁂 𑀲𑀪𑀸𑀕𑀢𑀸, 𑀏𑀓𑀼𑀧𑁆𑀧𑀸𑀤𑀸𑀤𑀺𑀓𑁄 𑀲𑀫𑁆𑀧𑀬𑁄𑀕𑁂𑀢𑀺 𑀇𑀫𑀺𑀦𑀸 𑀭𑀼𑀧𑁆𑀧𑀦𑀸𑀤𑀺𑀯𑀺𑀥𑀼𑀭𑁄 𑀅𑀲𑀫𑀸𑀦𑀲𑀪𑀸𑀯𑁄 𑀅𑀲𑀗𑁆𑀕𑀳𑁂 𑀯𑀺𑀲𑀪𑀸𑀕𑀢𑀸, 𑀦𑀸𑀦𑀼𑀧𑁆𑀧𑀸𑀤𑀸𑀤𑀺𑀓𑁄 𑀯𑀺𑀧𑁆𑀧𑀬𑁄𑀕𑁂𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀲𑀺𑀤𑁆𑀥𑁄𑀢𑀺 𑀦 𑀯𑀼𑀢𑁆𑀢𑁄𑀢𑀺.

𑁫. 𑀩𑀸𑀳𑀺𑀭𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫. 𑀏𑀢𑁂𑀦 𑀞𑀧𑀦𑀸𑀓𑀸𑀭𑁂𑀦𑀸𑀢𑀺 𑀲𑀭𑀽𑀧𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀭𑀡𑀦𑁆𑀢𑀭𑀫𑀸𑀢𑀺𑀓𑀸𑀬 𑀇𑀥 𑀫𑀸𑀢𑀺𑀓𑀸𑀪𑀸𑀯𑀓𑀺𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀞𑀧𑀦𑀸𑀓𑀸𑀭𑁂𑀦. 𑀧𑀓𑀭𑀡𑀦𑁆𑀢𑀭𑀞𑀧𑀺𑀢𑀸𑀬 𑀫𑀸𑀢𑀺𑀓𑀸𑀬 𑀅𑀯𑀺𑀪𑀸𑀕𑁂𑀦 𑀧𑀘𑁆𑀙𑀢𑁄 𑀕𑀳𑀡𑀁 𑀩𑀳𑀺 𑀞𑀧𑀦𑀦𑁆𑀢𑀺 𑀆𑀳 ‘‘𑀩𑀳𑀺 𑀧𑀺𑀝𑁆𑀞𑀺𑀢𑁄 𑀞𑀧𑀺𑀢𑀢𑁆𑀢𑀸’’𑀢𑀺. 𑀇𑀥 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀇𑀫𑀺𑀲𑁆𑀲𑀸 𑀥𑀸𑀢𑀼𑀓𑀣𑀸𑀬 𑀲𑀭𑀽𑀧𑁂𑀦 𑀅𑀯𑀢𑁆𑀯𑀸. 𑀢𑀣𑀸 𑀧𑀓𑀸𑀲𑀺𑀢𑀢𑁆𑀢𑀸𑀢𑀺 𑀫𑀸𑀢𑀺𑀓𑀸𑀪𑀸𑀯𑁂𑀦 𑀚𑁄𑀢𑀺𑀢𑀢𑁆𑀢𑀸. 𑀥𑀫𑁆𑀫𑀲𑀗𑁆𑀕𑀡𑀻𑀲𑀻𑀲𑁂𑀦 𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀆𑀕𑀢𑀫𑀸𑀢𑀺𑀓𑀸𑀯 𑀕𑀳𑀺𑀢𑀸𑀢𑀺. 𑀬𑁂𑀳𑀺 𑀦𑀬𑁂𑀳𑀺 𑀥𑀸𑀢𑀼𑀓𑀣𑀸𑀬 𑀦𑀺𑀤𑁆𑀤𑁂𑀲𑁄, 𑀢𑁂𑀲𑀼 𑀦𑀬𑁂𑀲𑀼, 𑀢𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀻𑀲𑀼, 𑀢𑁂𑀲𑀁 𑀦𑀬𑀸𑀦𑀁 𑀧𑀯𑀢𑁆𑀢𑀺𑀤𑁆𑀯𑀸𑀭𑀮𑀓𑁆𑀔𑀡𑁂𑀲𑀼 𑀘 𑀉𑀤𑁆𑀤𑀺𑀝𑁆𑀞𑁂𑀲𑀼 𑀥𑀸𑀢𑀼𑀓𑀣𑀸𑀬 𑀉𑀤𑁆𑀤𑁂𑀲𑀯𑀲𑁂𑀦 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀬𑀁 𑀉𑀤𑁆𑀤𑁂𑀲𑀯𑀲𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀢𑁆𑀯𑀸 𑀧𑀼𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀻 𑀥𑀸𑀢𑀼𑀓𑀣𑀸𑀬 𑀫𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀫𑀸𑀢𑀺𑀓𑀸𑀬 𑀦𑀺𑀓𑁆𑀔𑁂𑀧𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀕𑀸𑀯𑀻𑀢𑀺 𑀅𑀬𑀫𑀸𑀳𑀸’’𑀢𑀺 𑀏𑀢𑁆𑀣 𑀕𑀸𑀯𑀻-𑀲𑀤𑁆𑀤𑁄 𑀯𑀺𑀬 ‘‘𑀲𑀗𑁆𑀕𑀳𑁄 𑀅𑀲𑀗𑁆𑀕𑀳𑁄’’𑀢𑀺 𑀏𑀢𑁆𑀣 𑀧𑀤𑀢𑁆𑀣𑀯𑀺𑀧𑀮𑁆𑀮𑀸𑀲𑀓𑀸𑀭𑀺𑀦𑀸 𑀇𑀢𑀺-𑀲𑀤𑁆𑀤𑁂𑀦 𑀅𑀢𑁆𑀣𑀧𑀤𑀢𑁆𑀣𑀓𑁄 𑀲𑀗𑁆𑀕𑀳𑀸𑀲𑀗𑁆𑀕𑀳-𑀲𑀤𑁆𑀤𑁄 𑀲𑀤𑁆𑀤𑀧𑀤𑀢𑁆𑀣𑀓𑁄 𑀚𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀢𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀢𑁄 𑀲𑀗𑁆𑀕𑀳𑀲𑀤𑁆𑀤𑀁 𑀲𑀁𑀯𑀡𑁆𑀡𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄𑀢𑀺 𑀅𑀲𑀗𑁆𑀕𑀳𑀺𑀢𑀚𑀸𑀢𑀺𑀲𑀜𑁆𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑁄. 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀦𑁆𑀢𑀺 𑀲𑀗𑁆𑀕𑀳𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀲𑀸𑀫𑀜𑁆𑀜𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑁄 𑀯𑀼𑀘𑁆𑀘𑀫𑀸𑀦𑁄 𑀯𑀸. 𑀦 𑀘𑁂𑀢𑁆𑀣 𑀲𑀸𑀫𑀜𑁆𑀜𑀜𑁆𑀘 𑀏𑀓𑀭𑀽𑀧𑀫𑁂𑀯𑀸𑀢𑀺 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸 𑀪𑁂𑀤𑀸𑀧𑁂𑀓𑁆𑀔𑀢𑁆𑀢𑀸 𑀢𑀲𑁆𑀲. 𑀬𑀢𑁆𑀢𑀓𑀸 𑀳𑀺 𑀢𑀲𑁆𑀲 𑀯𑀺𑀲𑁂𑀲𑀸, 𑀢𑀤𑀧𑁂𑀓𑁆𑀔𑀫𑁂𑀯 𑀢𑀦𑁆𑀢𑀺. ‘‘𑀅𑀢𑁆𑀢𑀦𑁄 𑀚𑀸𑀢𑀺𑀬𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀫𑀢𑁆𑀢𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀫𑀸𑀢𑀼 𑀳𑀺𑀢𑀸𑀢𑀺.

𑀥𑀫𑁆𑀫𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀤𑀺𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸. 𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀯𑀺𑀲𑁂𑀲𑁂𑀦. 𑀥𑀫𑁆𑀫𑀸𑀦𑀦𑁆𑀢𑀺 𑀔𑀦𑁆𑀥𑀸𑀤𑀺𑀥𑀫𑁆𑀫𑀸𑀦𑀁. 𑀅𑀯𑀲𑁂𑀲𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀺𑀓𑀸 𑀅𑀯𑀲𑁂𑀲𑀸 𑀤𑁆𑀯𑀸𑀤𑀲𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀉𑀤𑁆𑀤𑁂𑀲𑀸𑀢𑀺 𑀬𑁄𑀚𑀦𑀸. 𑀦𑀦𑀼 𑀘 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀬𑁄𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀁 𑀅𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀥𑀫𑁆𑀫𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀼𑀤𑁆𑀤𑁂𑀲𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺𑀆𑀤𑀺. 𑀬𑀲𑁆𑀲 𑀅𑀢𑁆𑀣𑁄 𑀜𑀸𑀬𑀢𑀺, 𑀲𑀤𑁆𑀤𑁄 𑀘 𑀦 𑀧𑀬𑀼𑀚𑁆𑀚𑀢𑀺, 𑀲𑁄 𑀮𑁄𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀆𑀯𑀼𑀢𑁆𑀢𑀺𑀆𑀤𑀺𑀯𑀲𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁂𑀦 𑀅𑀲𑀗𑁆𑀕𑀳𑀺𑀢-𑀲𑀤𑁆𑀤𑁂𑀦. 𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄𑀢𑀺 𑀘𑀓𑁆𑀔𑀸𑀬𑀢𑀦𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄, 𑀢𑁂𑀦 𑀲𑁄𑀢𑀸𑀬𑀢𑀦𑀸𑀤𑀺𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑁄 𑀲𑁄𑀢𑀧𑀲𑀸𑀤𑀸𑀤𑀺𑀓𑁄 𑀬𑁄 𑀭𑀼𑀧𑁆𑀧𑀦𑀲𑀪𑀸𑀯𑁄 𑀥𑀫𑁆𑀫𑀯𑀺𑀲𑁂𑀲𑁄. 𑀢𑀦𑁆𑀦𑀺𑀲𑁆𑀲𑀺𑀢𑁄 𑀢𑀁 𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀲𑁆𑀲𑀸𑀬 𑀮𑀩𑁆𑀪𑀫𑀸𑀦𑁄. ‘‘𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁄 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑀬𑁄 𑀧𑀭𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁄 𑀇𑀥 𑀉𑀤𑁆𑀤𑀺𑀝𑁆𑀞𑁄 𑀳𑁄𑀢𑀺. 𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀏𑀯𑀫𑁂𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀦𑀬𑀼𑀤𑁆𑀤𑁂𑀲𑀸 𑀧𑀯𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 𑀘 ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀦 𑀮𑀩𑁆𑀪𑀢𑀺 𑀢𑀲𑁆𑀲 𑀥𑀫𑁆𑀫𑀫𑀢𑁆𑀢𑀤𑀻𑀧𑀦𑀢𑁄. 𑀦𑀬𑀼𑀤𑁆𑀤𑁂𑀲𑁄 𑀳𑁂𑀲𑁄, 𑀦 𑀥𑀫𑁆𑀫𑀼𑀤𑁆𑀤𑁂𑀲𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀦𑀺𑀤𑁆𑀤𑁂𑀲𑁂 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦…𑀧𑁂… 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀢𑁆𑀯𑀸 ‘‘𑀢𑁂 𑀥𑀫𑁆𑀫𑀸 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺…𑀧𑁂… 𑀅𑀲𑀗𑁆𑀕𑀳𑀺𑀢𑀸’’𑀢𑀺 (𑀥𑀸𑀢𑀼. 𑁧𑁭𑁧) 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑁂 𑀥𑀫𑁆𑀫𑀸 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀤𑀼𑀢𑀺𑀬𑀁 𑀅𑀲𑀗𑁆𑀕𑀳𑀺𑀢𑀧𑀤𑀁 𑀕𑀳𑀺𑀢𑀁. 𑀅𑀜𑁆𑀜𑀣𑀸 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀢𑁂 𑀥𑀫𑁆𑀫𑀸 𑀆𑀬𑀢𑀦𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸. 𑀢𑁂 𑀓𑀢𑀫𑁂’’𑀇𑀘𑁆𑀘𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀲𑀺𑀬𑀸.

𑀏𑀲 𑀦𑀬𑁄𑀢𑀺 𑀅𑀢𑀺𑀤𑁂𑀲𑁂𑀦 𑀤𑀲𑁆𑀲𑀺𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀢𑁂𑀲𑀼𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑀺𑀬𑀧𑀤𑁂𑀦𑀸𑀢𑀺 𑀮𑀼𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀧𑀤𑀁 𑀲𑀦𑁆𑀥𑀸𑀬𑀸𑀳. 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑁂𑀳𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀢𑀢𑁆𑀣 𑀧𑀸𑀴𑀺𑀬𑀁 ‘‘𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺 𑀥𑀫𑁆𑀫𑀫𑀼𑀔𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀧𑀦 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑀯𑀺𑀲𑁂𑀲𑀦𑀤𑁆𑀯𑀸𑀭𑁂𑀦 𑀥𑀫𑁆𑀫𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 ‘‘𑀯𑀺𑀲𑁂𑀲𑀦𑁂 𑀓𑀭𑀡𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀢𑁆𑀣 𑀳𑀺…𑀧𑁂… 𑀥𑀫𑁆𑀫𑀦𑁆𑀢𑀭𑀲𑁆𑀲𑀸’’𑀢𑀺. 𑀢𑀢𑁆𑀣 𑀲𑀪𑀸𑀯𑀦𑁆𑀢𑀭𑁂𑀦𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑀦𑁆𑀢𑀭𑁂𑀦 𑀧𑀓𑀸𑀭𑀦𑁆𑀢𑀭𑁂𑀦. 𑀲𑀪𑀸𑀯𑀦𑁆𑀢𑀭𑀲𑁆𑀲𑀸𑀢𑀺 𑀅𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀕𑀳𑀺𑀢𑀢𑀸𑀲𑀗𑁆𑀔𑀸𑀢𑀲𑁆𑀲 𑀲𑀪𑀸𑀯𑀦𑁆𑀢𑀭𑀲𑁆𑀲. 𑀏𑀢𑁂𑀲𑀽𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼. 𑀥𑀫𑁆𑀫𑀦𑁆𑀢𑀭𑁂𑀦𑀸𑀢𑀺 𑀅𑀜𑁆𑀜𑀥𑀫𑁆𑀫𑁂𑀦. 𑀥𑀫𑁆𑀫𑀦𑁆𑀢𑀭𑀲𑁆𑀲𑀸𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀦𑀁 𑀓𑀢𑀁. 𑀢𑀢𑁆𑀣 𑀳𑀺 𑀅𑀦𑁆𑀢𑀭𑁂𑀦 𑀧𑀓𑀸𑀭𑀯𑀺𑀲𑁂𑀲𑀸𑀫𑀲𑀦𑀁 𑀥𑀫𑁆𑀫𑁂𑀦𑁂𑀯 𑀥𑀫𑁆𑀫𑁄 𑀯𑀺𑀲𑁂𑀲𑀺𑀢𑁄𑀢𑀺. 𑀆𑀤𑀺𑀧𑀤𑁂𑀦𑁂𑀯𑀸𑀢𑀺 ‘‘𑀲𑀗𑁆𑀕𑀳𑀺𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀞𑀫𑀧𑀤𑁂𑀦𑁂𑀯. 𑀇𑀢𑀭𑁂𑀳𑀻𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀳𑀺 𑀤𑀼𑀢𑀺𑀬𑀢𑀢𑀺𑀬𑀧𑀤𑁂𑀳𑀺. 𑀏𑀢𑁆𑀣𑀸𑀢𑀺 𑀏𑀓𑀸𑀤𑀲𑀫𑀸𑀤𑀻𑀲𑀼 𑀘𑀢𑀽𑀲𑀼. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀺𑀬 𑀯𑀺𑀲𑁂𑀲𑀦𑁂 𑀏𑀯 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀯𑀺𑀬 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺.

𑀯𑀺𑀯𑀺𑀥𑀓𑀧𑁆𑀧𑀦𑀢𑁄𑀢𑀺 𑀯𑀺𑀯𑀺𑀥𑀁 𑀩𑀳𑀼𑀥𑀸 𑀓𑀧𑁆𑀧𑀦𑀢𑁄, 𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀦𑀁 𑀯𑀺𑀲𑀼𑀁 𑀲𑀳 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀓𑀧𑁆𑀧𑀦𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀯𑀺𑀓𑀧𑁆𑀧𑀦𑀁 𑀯𑀼𑀢𑁆𑀢𑀸𑀓𑀸𑀭𑁂𑀦 𑀯𑀺𑀪𑀚𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀪𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁂𑀦 𑀅𑀥𑀺𑀫𑁄𑀓𑁆𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀆𑀭𑀫𑁆𑀫𑀡𑁂 𑀦𑀺𑀘𑁆𑀙𑀬𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀥𑀫𑁆𑀫𑀸. 𑀢𑁂 𑀘 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀤𑀯𑀲𑀺𑀝𑁆𑀞𑁂 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀥𑀫𑁆𑀫𑁂 𑀘 𑀲𑀗𑁆𑀕𑀳𑁂𑀢𑁆𑀯𑀸 𑀆𑀳 ‘‘𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀸 𑀘 𑀲𑀩𑁆𑀩𑁂 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺. 𑀇𑀢𑀭𑁂𑀢𑀺 𑀨𑀲𑁆𑀲𑀸𑀤𑀬𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀏𑀓𑀽𑀦𑀦𑀯𑀼𑀢𑀺𑀬𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀸. 𑀫𑀳𑀸𑀯𑀺𑀲𑀬𑁂𑀦 𑀅𑀥𑀺𑀫𑁄𑀓𑁆𑀔𑁂𑀦. 𑀅𑀜𑁆𑀜𑁂𑀲𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀁. 𑀯𑀘𑀦𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄, 𑀲𑁄 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄’’𑀢𑀺 𑀥𑀫𑁆𑀫𑀲𑀗𑁆𑀕𑀳𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸) ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀅𑀥𑀺𑀫𑁄𑀓𑁆𑀔𑁄, 𑀅𑀥𑀺𑀫𑁄𑀓𑁆𑀔𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀘 𑀆𑀕𑀢𑀁 𑀯𑀘𑀦𑀁 𑀲𑀦𑁆𑀥𑀸𑀬. 𑀅𑀢𑁆𑀣𑁂 𑀲𑀢𑀻𑀢𑀺 ‘‘𑀲𑀦𑁆𑀦𑀺𑀝𑁆𑀞𑀸𑀦…𑀧𑁂… 𑀲𑀸𑀥𑀸𑀭𑀡𑀢𑁄’’𑀢𑀺 𑀏𑀯𑀫𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂. 𑀯𑀢𑁆𑀢𑀩𑁆𑀩𑁂𑀲𑀽𑀢𑀺 𑀲𑀗𑁆𑀕𑀳𑀸𑀤𑀺𑀧𑀭𑀺𑀕𑁆𑀕𑀳𑀢𑁆𑀣𑀁 𑀯𑀢𑁆𑀢𑀩𑁆𑀩𑁂𑀲𑀼. 𑀯𑀼𑀢𑁆𑀢𑀸 𑀨𑀲𑁆𑀲𑀸𑀤𑀬𑁄 𑀫𑀦𑀲𑀺𑀓𑀸𑀭𑀧𑀭𑀺𑀬𑁄𑀲𑀸𑀦𑀸. 𑀢𑀸𑀤𑀺𑀲𑀲𑁆𑀲𑀸𑀢𑀺 𑀨𑀲𑁆𑀲𑀸𑀤𑀺𑀲𑀤𑀺𑀲𑀲𑁆𑀲 𑀲𑀸𑀥𑀸𑀭𑀡𑀲𑁆𑀲 𑀅𑀥𑀺𑀫𑁄𑀓𑁆𑀔𑀲𑀤𑀺𑀲𑀲𑁆𑀲 𑀅𑀲𑀸𑀥𑀸𑀭𑀡𑀲𑁆𑀲 𑀅𑀜𑁆𑀜𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀸.

𑀦𑀦𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀘𑀺𑀢𑁆𑀢𑀝𑁆𑀞𑀺𑀢𑀺𑀬𑁄𑀧𑀺 𑀲𑀸𑀥𑀸𑀭𑀡𑀸𑀢𑀺? 𑀲𑀘𑁆𑀘𑀁 𑀲𑀸𑀥𑀸𑀭𑀡𑀸, 𑀅𑀢𑁆𑀣𑀺 𑀧𑀦 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀦𑀸’’𑀢𑀺𑀆𑀤𑀺. 𑀅𑀲𑀫𑀸𑀥𑀺𑀲𑀪𑀸𑀯𑀸 𑀩𑀮𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀲𑀸𑀫𑀜𑁆𑀜𑀲𑀤𑁆𑀤𑁂𑀦𑁂𑀯 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀘𑀸𑀢𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑀺 𑀯𑀢𑁆𑀢𑀩𑁆𑀩𑀸 𑀘 𑀲𑀫𑀸𑀥𑀺𑀲𑀪𑀸𑀯𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀯𑀺𑀲𑁂𑀲𑀲𑀤𑁆𑀤𑀯𑀘𑀦𑀻𑀬𑀁 𑀅𑀜𑁆𑀜𑀦𑁆𑀢𑀺 𑀩𑀮𑀧𑁆𑀧𑀢𑁆𑀢𑀲𑀫𑀸𑀥𑀺𑀢𑁄 𑀅𑀜𑁆𑀜𑀁 𑀲𑀸𑀫𑀜𑁆𑀜𑀲𑀤𑁆𑀤𑁂𑀦 𑀩𑁆𑀬𑀸𑀧𑁂𑀢𑀩𑁆𑀩𑀁, 𑀯𑀺𑀲𑁂𑀲𑀲𑀤𑁆𑀤𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀁 𑀦𑀢𑁆𑀣𑀺 𑀲𑀫𑀸𑀥𑀺𑀲𑀪𑀸𑀯𑀸𑀬 𑀏𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀕𑀳𑀺𑀢𑀢𑁆𑀢𑀸. 𑀦 𑀅𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑁄 𑀲𑀸𑀫𑀜𑁆𑀜𑀯𑀺𑀲𑁂𑀲𑁄 𑀅𑀦𑀜𑁆𑀜…𑀧𑁂… 𑀯𑀺𑀲𑁂𑀲𑁄, 𑀢𑀲𑁆𑀲 𑀤𑀻𑀧𑀦𑀢𑁄. 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀩𑀮𑀧𑁆𑀧𑀢𑁆𑀢𑀲𑀫𑀸𑀥𑀺𑀥𑀫𑁆𑀫𑀲𑁆𑀲. 𑀪𑁂𑀤𑀤𑀻𑀧𑀓𑁂𑀳𑀻𑀢𑀺 𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀲𑀫𑀸𑀥𑀺𑀩𑀮𑀸𑀤𑀺𑀯𑀘𑀦𑁂𑀳𑀺 𑀯𑀢𑁆𑀢𑀩𑁆𑀩𑀸. 𑀯𑀼𑀢𑁆𑀢𑀮𑀓𑁆𑀔𑀡𑀸 𑀅𑀦𑀜𑁆𑀜𑀩𑁆𑀬𑀸𑀧𑀓𑀦𑀺𑀯𑀢𑁆𑀢𑀓𑀲𑀸𑀫𑀜𑁆𑀜𑀯𑀺𑀲𑁂𑀲𑀤𑀻𑀧𑀦𑀸 𑀲𑀤𑁆𑀤𑀸. 𑀢𑀢𑁄 𑀯𑀺𑀧𑀭𑀻𑀢𑁂𑀳𑀺 𑀅𑀜𑁆𑀜𑀁 𑀩𑁆𑀬𑀸𑀧𑁂𑀢𑀩𑁆𑀩𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀜𑁆𑀘 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀲𑀤𑁆𑀤𑁂𑀳𑁂𑀯 𑀦 𑀲𑀼𑀔𑀸𑀤𑀺𑀲𑀪𑀸𑀯𑀸 𑀯𑁂𑀤𑀦𑀸 𑀯𑀺𑀬 𑀯𑀢𑁆𑀢𑀩𑁆𑀩𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀲𑀫𑀸𑀥𑀺𑀲𑀪𑀸𑀯𑀸 𑀲𑀫𑀸𑀥𑀺𑀲𑀪𑀸𑀯𑀸𑀢𑀺 𑀤𑁆𑀯𑁂𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀢𑀲𑁆𑀫𑀸. 𑀅𑀲𑀫𑀸𑀥𑀺𑀲𑀪𑀸𑀯𑀫𑁂𑀯 𑀧𑀓𑀸𑀲𑁂𑀬𑁆𑀬 𑀯𑀺𑀲𑁂𑀲𑀲𑀤𑁆𑀤𑀦𑀺𑀭𑀧𑁂𑀓𑁆𑀔𑀁 𑀧𑀯𑀢𑁆𑀢𑀫𑀸𑀦𑀢𑁆𑀢𑀸. 𑀇𑀢𑀭𑁄𑀢𑀺 𑀲𑀫𑀸𑀥𑀺𑀩𑀮𑀸𑀤𑀺𑀓𑁄 𑀯𑀺𑀲𑁂𑀲𑀲𑀤𑁆𑀤𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀩𑁆𑀪𑀦𑁆𑀢𑀭𑀫𑀸𑀢𑀺𑀓𑀼𑀤𑁆𑀤𑁂𑀲𑁂, 𑀲𑀸𑀥𑀸𑀭𑀡𑁂 𑀨𑀲𑁆𑀲𑀸𑀤𑀺𑀓𑁂, 𑀫𑀳𑀸𑀯𑀺𑀲𑀬𑁂 𑀯𑀸 𑀅𑀥𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑀺𑀬𑀫𑀸𑀦𑁂. 𑀦𑀦𑀼 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑁂𑀤𑀦𑀸 𑀯𑀺𑀬 𑀲𑀸𑀥𑀸𑀭𑀡𑀸 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀪𑀺𑀦𑁆𑀦𑀸𑀧𑀺 𑀯𑀸’’𑀢𑀺𑀆𑀤𑀺. ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀅𑀯𑀺𑀲𑀸𑀳𑀝𑀫𑀸𑀦𑀲𑀢𑀸 (𑀥. 𑀲. 𑁧𑁧, 𑁧𑁫). 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀻’’𑀢𑀺 (𑀥. 𑀲. 𑁧𑁯) 𑀯𑀘𑀦𑀢𑁄 𑀲𑀫𑀸𑀥𑀺𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀯𑀢𑁆𑀢𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀅𑀭𑀳𑀢𑀻𑀢𑀺 𑀇𑀥 𑀉𑀤𑁆𑀤𑁂𑀲𑀁 𑀦 𑀅𑀭𑀳𑀢𑀺 𑀲𑀫𑀼𑀔𑁂𑀦𑁂𑀯 𑀯𑀢𑁆𑀢𑀩𑁆𑀩𑁂𑀲𑀼 𑀨𑀲𑁆𑀲𑀸𑀤𑀻𑀲𑀼 𑀉𑀤𑁆𑀤𑀺𑀲𑀺𑀬𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀬𑁄 𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀧𑀤𑀯𑀡𑁆𑀡𑀦𑀸

𑁬. ‘‘𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀪𑀸𑀯𑁂𑀦 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸, ‘‘𑀭𑀽𑀧𑀓𑁆𑀔𑀦𑁆𑀥𑁄 𑀅𑀪𑀺𑀜𑁆𑀜𑁂𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀘 𑀅𑀪𑀺𑀜𑁆𑀜𑀸𑀢𑀮𑀓𑁆𑀔𑀡𑀯𑀺𑀲𑀬𑀸𑀢𑀺 𑀆𑀳 ‘‘𑀲𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀢𑀸𑀦’’𑀦𑁆𑀢𑀺. 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀳𑀸𑀢𑀩𑁆𑀩𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀢𑀸 𑀲𑀗𑁆𑀕𑀬𑁆𑀳𑀢𑀺. 𑀅𑀥𑀺𑀧𑀢𑀺𑀬𑀸𑀤𑀻𑀢𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀉𑀧𑀝𑁆𑀞𑀸𑀦𑀧𑀤𑀳𑀦𑀸𑀤𑀻𑀦𑀺. 𑀲𑀘𑁆𑀘𑀸𑀤𑀺𑀯𑀺𑀲𑁂𑀲𑁄 𑀯𑀺𑀬𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀭𑀺𑀬𑀸𑀬𑁄 𑀅𑀪𑀺𑀜𑁆𑀜𑁂𑀬𑁆𑀬𑀧𑀻𑀴𑀦𑀝𑁆𑀞𑀸𑀤𑀺𑀯𑀺𑀲𑁂𑀲𑁄 𑀯𑀺𑀬. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀦𑀬𑀫𑀼𑀔𑀫𑀸𑀢𑀺𑀓𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀲𑁆𑀲𑀬𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀏𑀯. 𑀢𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀦𑁆𑀥𑀪𑀸𑀯𑁂𑀦 𑀯𑀺𑀬 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀢𑀸 𑀳𑁄𑀢𑀺, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁂𑀦𑀸𑀢𑀺 𑀲𑀗𑁆𑀕𑀳𑀮𑀓𑁆𑀔𑀡𑀫𑀸𑀳. 𑀇𑀢𑀻𑀢𑀺 𑀢𑀲𑁆𑀫𑀸, 𑀬𑀲𑁆𑀫𑀸 𑀭𑀽𑀧𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀪𑀸𑀕𑀸, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑀲𑀗𑁆𑀔𑀸𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁂𑀦 𑀅𑀢𑁆𑀣𑀫𑀼𑀔𑁂𑀦𑁂𑀯 𑀕𑀳𑀡𑁂. 𑀲𑀤𑁆𑀤𑀤𑁆𑀯𑀸𑀭𑁂𑀦 𑀧𑀦 𑀕𑀳𑀡𑁂 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀲𑀗𑁆𑀔𑀸𑀢𑁂𑀦 𑀯𑀸 𑀭𑀽𑀧𑀓𑁆𑀔𑀦𑁆𑀥𑀯𑀘𑀦𑀯𑀘𑀦𑀻𑀬𑀢𑀸𑀲𑀗𑁆𑀔𑀸𑀢𑁂𑀦. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀲𑀜𑁆𑀜𑀸𑀓𑁆𑀔𑀦𑁆𑀥𑀫𑀽𑀮𑀓𑀸𑀢𑀺𑀆𑀤𑀻𑀲𑀼 ‘‘𑀧𑀼𑀭𑀺𑀫𑁂𑀦 𑀬𑁄𑀚𑀺𑀬𑀫𑀸𑀦𑁂’’𑀢𑀺𑀆𑀤𑀺𑀁 𑀆𑀦𑁂𑀢𑁆𑀯𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀔𑀦𑁆𑀥𑀧𑀤𑀦𑀺𑀤𑁆𑀤𑁂𑀲𑁂 𑀲𑀩𑁆𑀩𑀧𑀘𑁆𑀙𑀺𑀫𑀫𑁂𑀯𑀸𑀢𑀺 𑀆𑀳 ‘‘𑀪𑁂𑀤𑀢𑁄 𑀧𑀜𑁆𑀘𑀓𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀦𑁆𑀢𑀭’’𑀦𑁆𑀢𑀺.

𑀆𑀬𑀢𑀦𑀧𑀤𑀸𑀤𑀺𑀯𑀡𑁆𑀡𑀦𑀸

𑁪𑁦. 𑀬𑀤𑀺𑀧𑀺 𑀏𑀓𑀓𑁂𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀁 ‘‘𑀲𑀫𑀼𑀤𑀬𑀲𑀘𑁆𑀘𑀁 𑀏𑀓𑁂𑀦 𑀔𑀦𑁆𑀥𑁂𑀦…𑀧𑁂… 𑀫𑀕𑁆𑀕𑀲𑀘𑁆𑀘𑀁 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀁, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁪𑁧) 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀧𑀤𑀦𑀺𑀤𑁆𑀤𑁂𑀲𑁂. 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀤𑀼𑀓𑀁 𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀦𑁆𑀢𑀺 𑀏𑀢𑁂𑀲𑀁 𑀤𑀼𑀓𑀸𑀦𑀁. 𑀘𑀓𑁆𑀔𑀼𑀲𑁄𑀢𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀳𑀺 ‘‘𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀲𑀗𑁆𑀕𑀳𑀺𑀢𑀁, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀺 𑀆𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀓𑀓𑁂 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀤𑀼𑀓𑀲𑁆𑀲 𑀧𑀦 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀲𑁄𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀏𑀓𑁂𑀦 𑀔𑀦𑁆𑀥𑁂𑀦 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺, ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀻𑀳𑀸𑀬𑀢𑀦𑁂𑀳𑀺 𑀤𑁆𑀯𑀻𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑀲𑁆𑀲 𑀘 𑀅𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀦𑀸𑀧𑀺 𑀤𑀼𑀓𑁂𑀳𑀺 𑀢𑀺𑀓𑀲𑁆𑀲𑀸𑀢𑀺 𑀘𑀓𑁆𑀔𑀼𑀲𑁄𑀢𑀘𑀓𑁆𑀔𑀼𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀤𑀼𑀓𑁂𑀳𑀺 𑀘𑀓𑁆𑀔𑀼𑀲𑁄𑀢𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀢𑀺𑀓𑀲𑁆𑀲 𑀦𑀸𑀧𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀇𑀥𑀸𑀢𑀺 𑀲𑀘𑁆𑀘𑀧𑀤𑀦𑀺𑀤𑁆𑀤𑁂𑀲𑁂. 𑀢𑀺𑀓𑁂𑀦 𑀘𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀫𑀕𑁆𑀕𑀸𑀤𑀺𑀢𑀺𑀓𑁂𑀦 𑀘. ‘‘𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀤𑁆𑀯𑀸𑀤𑀲𑀳𑀸𑀬𑀢𑀦𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑀸, 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺 𑀦 𑀓𑀸𑀳𑀺𑀘𑀺 𑀥𑀸𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁.

𑁬. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁬𑁧. 𑀅𑀯𑀺𑀚𑁆𑀚𑀸𑀯𑀘𑀦𑁂𑀦𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦. 𑀯𑀺𑀲𑁂𑀲𑀦𑀁 𑀦 𑀓𑀢𑁆𑀢𑀩𑁆𑀩𑀁, ‘‘𑀲𑀩𑁆𑀩𑀫𑁆𑀧𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀓𑀼𑀲𑀮𑀸𑀤𑀻𑀦𑀫𑁆𑀧𑀻’’𑀢𑀺𑀆𑀤𑀺𑀦𑀸. 𑀯𑀺𑀲𑁆𑀲𑀚𑁆𑀚𑀦𑀸𑀲𑀤𑀺𑀲𑁂𑀦 𑀲𑀩𑁆𑀩𑀯𑀺𑀜𑁆𑀜𑀸𑀡𑀸𑀤𑀺𑀲𑀗𑁆𑀕𑀳𑀡𑀢𑁄. 𑀢𑁂𑀲𑀦𑁆𑀢𑀺 𑀯𑀺𑀜𑁆𑀜𑀸𑀡𑀸𑀤𑀺𑀧𑀤𑀸𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀦𑀬𑁂. 𑀅𑀓𑀫𑁆𑀫𑀚𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑀸 𑀯𑀺𑀜𑁆𑀜𑀸𑀬𑀢𑀺 𑀲𑀤𑁆𑀤𑀸𑀬𑀢𑀦𑀲𑁆𑀲𑀧𑀺 𑀕𑀳𑀺𑀢𑀢𑁆𑀢𑀸.

𑁭𑁧. 𑀚𑀸𑀬𑀫𑀸𑀦…𑀧𑁂… 𑀫𑀸𑀦𑀸𑀦𑀦𑁆𑀢𑀺 𑀚𑀸𑀬𑀫𑀸𑀦𑀸𑀤𑀺𑀅𑀯𑀢𑁆𑀣𑀸𑀦𑀁 𑀥𑀫𑁆𑀫𑀸𑀦𑀁. 𑀚𑀸𑀬𑀫𑀸𑀦𑀸𑀤𑀺𑀪𑀸𑀯𑀫𑀢𑁆𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀅𑀯𑀢𑁆𑀣𑀸𑀫𑀢𑁆𑀢𑀪𑀸𑀯𑀢𑁄. 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸𑀢𑀺 𑀅𑀯𑀢𑁆𑀣𑀸𑀪𑀸𑀯𑀢𑁄 𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀺, 𑀲𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀻𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀸𑀪𑀸𑀯𑀫𑀢𑁆𑀢𑀪𑀽𑀢𑀸𑀦𑀺. 𑀅𑀧𑀭𑀫𑀢𑁆𑀣𑀲𑀪𑀸𑀯𑀸𑀦𑀺𑀧𑀺 𑀭𑀽𑀧𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑀢𑁄 𑀭𑀼𑀧𑁆𑀧𑀦𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀺. 𑀢𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀪𑀸𑀕𑀸𑀦𑀺, 𑀅𑀭𑀽𑀧𑀸𑀦𑀁 𑀧𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀻’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀓𑁂𑀓𑀪𑀽𑀢𑀸𑀦𑀻𑀢𑀺 𑀬𑀣𑀸 𑀏𑀓𑀲𑁆𑀫𑀺𑀁 𑀭𑀽𑀧𑀓𑀮𑀸𑀧𑁂 𑀚𑀸𑀢𑀺𑀆𑀤𑀻𑀦𑀺 𑀏𑀓𑁂𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀏𑀯𑀁 𑀏𑀓𑀲𑁆𑀫𑀺𑀁 𑀅𑀭𑀽𑀧𑀓𑀮𑀸𑀧𑁂𑀧𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀭𑀽𑀧𑀓𑀮𑀸𑀧𑀚𑀸𑀢𑀺𑀆𑀤𑀻𑀦𑀺 𑀯𑀺𑀬𑀸’’𑀢𑀺𑀆𑀤𑀺. 𑀅𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀯𑀺𑀚𑀸𑀦𑀦𑀓𑀺𑀘𑁆𑀘𑀸𑀦𑀁 𑀯𑁂𑀤𑀦𑀸𑀤𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀽𑀢𑀸𑀦𑀺𑀧𑀺 𑀚𑀸𑀢𑀺𑀆𑀤𑀻𑀦𑀺 𑀢𑀣𑀸 𑀦 𑀕𑀬𑁆𑀳𑀦𑁆𑀢𑀻𑀢𑀺 𑀆𑀳 ‘‘𑀯𑁂𑀤𑀺𑀬𑀦…𑀧𑁂… 𑀅𑀕𑀬𑁆𑀳𑀫𑀸𑀦𑀸𑀦𑀻’’𑀢𑀺. 𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀚𑀸𑀢𑀺𑀆𑀤𑀻𑀦𑀁 𑀲𑀗𑁆𑀕𑀳𑀸𑀪𑀸𑀯𑀫𑀸𑀳. ‘‘𑀚𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀚𑀸𑀢𑀺𑀆𑀤𑀻𑀦𑀫𑁆𑀧𑀺 𑀲𑀗𑁆𑀔𑀢𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀢𑀸…𑀧𑁂… 𑀲𑀪𑀸𑀕𑀸𑀦𑀻’’𑀢𑀺. 𑀢𑁂𑀦𑁂𑀯 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀅𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀓𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀤𑀼𑀯𑀺𑀥𑀸𑀦𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀆𑀤𑀺𑀪𑀸𑀯𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀺. 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀪𑀸𑀕𑀢𑁆𑀣𑁂𑀦. 𑀢𑁂𑀳𑀺 𑀔𑀦𑁆𑀥𑀸𑀤𑀻𑀳𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺.

𑀧𑀞𑀫𑀦𑀬𑀲𑀗𑁆𑀕𑀳𑀸𑀲𑀗𑁆𑀕𑀳𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁧. ‘‘𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀲𑀤𑁆𑀤𑀸 𑀪𑀺𑀦𑁆𑀦𑀸𑀥𑀺𑀓𑀭𑀡𑀸 𑀦 𑀕𑀳𑁂𑀢𑀩𑁆𑀩𑀸 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀬 𑀇𑀘𑁆𑀙𑀺𑀢𑀢𑁆𑀢𑀸. 𑀬𑁄 𑀳𑀺 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁄 𑀅𑀲𑀗𑁆𑀕𑀳𑀺𑀢𑁄 𑀳𑁂𑀝𑁆𑀞𑀸 𑀉𑀤𑁆𑀤𑀺𑀝𑁆𑀞𑁄, 𑀲𑁆𑀯𑁂𑀯 𑀇𑀥 𑀅𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀻𑀬𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀢𑀁…𑀧𑁂… 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀆𑀳. 𑀬𑁂 𑀳𑀺 𑀥𑀫𑁆𑀫𑀸 𑀘𑀓𑁆𑀔𑀸𑀬𑀢𑀦𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀘 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀲𑀁𑀬𑁂𑀯 𑀧𑀼𑀦 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀆𑀳𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀦𑀬𑁂𑀲𑀼 𑀯𑀸𑀭𑁂𑀲𑀼 𑀘. 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀲𑀸𑀫𑀜𑁆𑀜𑀸𑀦𑀦𑁆𑀢𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀦𑀁 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑀸𑀦𑀁. ‘‘𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻’’𑀢𑀺 𑀆𑀳 ‘‘𑀦𑀺𑀘𑁆𑀘𑀁 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑁆𑀢𑀸’’𑀢𑀺. 𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁆𑀣𑀸𑀦𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀪𑁂𑀤𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦’’𑀦𑁆𑀢𑀺. 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸𑀢𑀺 ‘‘𑀔𑀦𑁆𑀥𑀲𑀗𑁆𑀕𑀳𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀸𑀧𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀯𑀺𑀲𑁂𑀲𑀸𑀯 𑀔𑀦𑁆𑀥𑀸𑀤𑀺𑀕𑀡𑀦𑀸, 𑀔𑀦𑁆𑀥𑀸𑀤𑀺𑀦𑀸 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀸𑀢𑀺 𑀓𑁂𑀯𑀮𑀸 𑀅𑀦𑀯𑀲𑁂𑀲𑀸, 𑀲𑀸𑀫𑀜𑁆𑀜𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣𑀸𑀢𑀺 𑀬𑀣𑀸𑀥𑀺𑀓𑀢𑁂 𑀤𑀼𑀢𑀺𑀬𑀦𑀬𑁂. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀆𑀳 ‘‘𑀲𑀗𑁆𑀕𑀳𑀺…𑀧𑁂… 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸’’𑀢𑀺. 𑀢𑀻𑀲𑀼 𑀲𑀗𑁆𑀕𑀳𑁂𑀲𑀽𑀢𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀼 𑀢𑀻𑀲𑀼. 𑀅𑀜𑁆𑀜𑁂𑀳𑀻𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑁂𑀳𑀺 𑀤𑁆𑀯𑀻𑀳𑀺 𑀏𑀓𑁂𑀦 𑀯𑀸. 𑀏𑀢𑁆𑀢𑀓𑁂𑀦𑁂𑀯 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁 𑀢𑀸𑀯𑀢𑀸𑀧𑀺 𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑀪𑀸𑀯𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀯𑀼𑀢𑁆𑀢𑀥𑀫𑁆𑀫𑀸𑀦𑀁. 𑀏𑀯𑀁𑀯𑀺𑀥𑀸𑀦𑀦𑁆𑀢𑀺 ‘‘𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑀸𑀦𑀁. 𑀅𑀲𑀫𑁆𑀪𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀁 𑀅𑀲𑀫𑁆𑀪𑀯𑀸. 𑀲𑀗𑁆𑀕𑀳𑀸𑀤𑀺𑀦𑀬𑀤𑀲𑁆𑀲𑀦𑀫𑀢𑁆𑀢𑀁 𑀦𑀬𑀫𑀸𑀢𑀺𑀓𑀸𑀬 𑀩𑁆𑀬𑀸𑀧𑀸𑀭𑁄, 𑀬𑀢𑁆𑀣 𑀧𑀦 𑀲𑀗𑁆𑀕𑀳𑀸𑀤𑀬𑁄, 𑀢𑁂 𑀔𑀦𑁆𑀥𑀸𑀤𑀬𑁄 𑀓𑀼𑀲𑀮𑀸𑀤𑀬𑁄 𑀘 𑀢𑁂𑀲𑀁 𑀯𑀺𑀲𑀬𑀪𑀽𑀢𑀸𑀢𑀺 𑀢𑁂𑀳𑀺 𑀯𑀺𑀦𑀸 𑀲𑀗𑁆𑀕𑀳𑀸𑀤𑀻𑀦𑀁 𑀧𑀯𑀢𑁆𑀢𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀦𑀬𑀫𑀸𑀢𑀺𑀓𑀸𑀬 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀧𑁂𑀓𑁆𑀔𑀢𑁆𑀢𑀸’’𑀢𑀺. 𑀲𑀗𑁆𑀕𑀸𑀳𑀓𑀁 𑀅𑀲𑀗𑁆𑀕𑀸𑀳𑀓𑀜𑁆𑀘𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀬𑁄 𑀳𑀺 𑀇𑀥 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦𑀧𑀺 𑀯𑀼𑀢𑁆𑀢𑁄𑀬𑁂𑀯𑀸𑀢𑀺.

‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺, ‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀘 𑀬𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀧𑀞𑀫𑀦𑀬𑁂 𑀙𑀝𑁆𑀞𑀦𑀬𑁂 𑀘 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄? 𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺 (𑀥𑀸𑀢𑀼. 𑁬), ‘‘𑀭𑀽𑀧𑀓𑁆𑀔𑀦𑁆𑀥𑁄 𑀓𑀢𑀺𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺? 𑀦𑀢𑁆𑀣𑀺. 𑀘𑀢𑀽𑀳𑀺 𑀔𑀦𑁆𑀥𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁨𑁮) 𑀘 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁂𑀦. 𑀇𑀢𑀭𑁂𑀲𑀽𑀢𑀺 𑀤𑀼𑀢𑀺𑀬𑀸𑀤𑀺𑀦𑀬𑁂𑀲𑀼. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀜𑁆𑀘 ‘‘𑀬𑁂 𑀥𑀫𑁆𑀫𑀸’’𑀢𑀺 𑀅𑀦𑀺𑀬𑀫𑀺𑀢𑀭𑀽𑀧𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀢𑀲𑁆𑀲 𑀢𑀲𑁆𑀲 ‘‘𑀢𑁂 𑀥𑀫𑁆𑀫𑀸’’𑀢𑀺 𑀦𑀺𑀬𑀸𑀫𑀓𑀪𑀸𑀯𑁂𑀦.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂. 𑀬𑁂𑀦 𑀬𑁂𑀦 𑀘𑀓𑁆𑀔𑀸𑀬𑀢𑀦𑀸𑀤𑀺𑀦𑀸 𑀲𑀗𑁆𑀕𑀸𑀳𑀓𑁂𑀦. 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀲𑀽𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀲𑀼. 𑀢𑁂𑀦 𑀢𑁂𑀦𑀸𑀢𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦. 𑀅𑀜𑁆𑀜𑀦𑁆𑀢𑀺 𑀢𑀢𑁄 𑀢𑀢𑁄 𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀁. 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀲𑀗𑁆𑀕𑀳𑁂𑀢𑀩𑁆𑀩𑀸𑀲𑀗𑁆𑀕𑀳𑁂𑀢𑀩𑁆𑀩𑀁 𑀬𑀁 𑀥𑀫𑁆𑀫𑀚𑀸𑀢𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀉𑀤𑁆𑀥𑀝𑀁. 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀢𑁆𑀣𑀺 𑀢𑀲𑁆𑀲 𑀲𑀪𑀸𑀕𑀪𑀸𑀯𑁂𑀦 𑀲𑀗𑁆𑀕𑀸𑀳𑀓𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀲𑀺𑀬𑀸 𑀧𑀦𑁂𑀢𑀁 𑀲𑀪𑀸𑀕𑁂𑀦 𑀏𑀓𑀤𑁂𑀲𑁂𑀦 𑀲𑀗𑁆𑀕𑀳𑁄𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦 𑀘 𑀲𑁄…𑀧𑁂… 𑀳𑁄𑀢𑀻’’𑀢𑀺. 𑀬𑀜𑁆𑀘𑀸𑀢𑀺𑀆𑀤𑀺𑀦𑀸 𑀯𑀘𑀦𑀦𑁆𑀢𑀭𑀁 𑀧𑀭𑀺𑀳𑀭𑀢𑀺.

𑀬𑀤𑀺 𑀘𑀸𑀢𑀺𑀆𑀤𑀺𑀦𑀸𑀧𑀺 𑀢𑀲𑁆𑀲𑁂𑀯 𑀢𑁂𑀦 𑀲𑀗𑁆𑀕𑀳𑀸𑀪𑀸𑀯𑀁 𑀧𑀸𑀞𑀸𑀪𑀸𑀯𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀲𑁄 𑀏𑀯𑀸𑀢𑀺 𑀬𑁄 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑁄 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀲𑁄 𑀏𑀯 𑀢𑁂𑀦 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀬𑁆𑀳𑁂𑀬𑁆𑀬 𑀲𑀗𑁆𑀕𑀳𑁂𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀸𑀪𑀸𑀯𑁂 𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄 𑀯𑀺𑀲𑀪𑀸𑀕𑁄 𑀘𑀸’’𑀢𑀺. 𑀏𑀓𑀤𑁂𑀲𑀸 𑀯𑀺𑀬 𑀘𑀓𑁆𑀔𑀸𑀬𑀢𑀦𑀸𑀤𑀬𑁄 𑀲𑀫𑀼𑀤𑀸𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲. 𑀭𑀽𑀧𑀓𑁆𑀔𑀦𑁆𑀥𑁄 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀦 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀲𑀪𑀸𑀕𑀯𑀺𑀲𑀪𑀸𑀕𑀪𑀸𑀯𑀸𑀪𑀸𑀯𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀬𑁂𑀦𑀸𑀢𑀺 𑀯𑀺𑀪𑀸𑀕𑁂𑀦. 𑀢𑁂𑀢𑀺 𑀏𑀓𑀤𑁂𑀲𑀸. 𑀢𑁂𑀲𑀦𑁆𑀢𑀺 𑀏𑀓𑀤𑁂𑀲𑀸𑀦𑀁. 𑀏𑀢𑁆𑀣 𑀢𑀤𑀦𑁆𑀢𑁄𑀕𑀥𑀢𑀸𑀬 𑀯𑀺𑀪𑀸𑀕𑀸𑀪𑀸𑀯𑁄, 𑀯𑀺𑀪𑀸𑀕𑀸𑀪𑀸𑀯𑁂𑀦 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀪𑀸𑀯𑁄, 𑀢𑁂𑀦 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀢𑀸𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀪𑀸𑀕𑀯𑀺𑀲𑀪𑀸𑀕𑀸𑀪𑀸𑀯𑁂𑀦 𑀏𑀓𑀤𑁂𑀲𑀸𑀦𑀁 𑀲𑀫𑀼𑀤𑀸𑀬𑁄 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀦 𑀳𑁄𑀢𑀺, 𑀏𑀯𑀁 𑀏𑀓𑀤𑁂𑀲𑀲𑀪𑀸𑀕𑀯𑀺𑀲𑀪𑀸𑀕𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀢𑀺𑀆𑀤𑀺 𑀉𑀤𑀸𑀳𑀭𑀡𑀤𑀲𑁆𑀲𑀦𑁂𑀦 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀸𑀳𑀓𑀁 𑀅𑀲𑀗𑁆𑀕𑀸𑀳𑀓𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀢𑀣𑀸 𑀲𑁂𑀲𑁂𑀲𑀼𑀧𑀺. 𑀦 𑀳𑀺 𑀏𑀓𑀤𑁂𑀲…𑀧𑁂… 𑀯𑀺𑀲𑀪𑀸𑀕𑀁 𑀬𑁂𑀦 𑀲𑀫𑀼𑀤𑀸𑀬𑁄 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀢𑀸𑀯 𑀫𑀸 𑀳𑁄𑀢𑀼, 𑀅𑀲𑀗𑁆𑀕𑀸𑀳𑀓𑀢𑁆𑀢𑀁 𑀧𑀦 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀭𑀸𑀫𑀲𑀢𑀺. 𑀅𑀢𑁆𑀢𑀢𑁄 𑀅𑀜𑁆𑀜𑀲𑁆𑀲, 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑀢𑁄 𑀅𑀜𑁆𑀜𑀲𑁆𑀲, 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑀢𑁄 𑀅𑀜𑁆𑀜𑀲𑁆𑀲 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀢𑀁 𑀧𑀦𑁂𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑁄 𑀘 𑀦 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀢𑀬𑁄 𑀧𑀓𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀗𑁆𑀕𑀸𑀳𑀓𑀢𑁆𑀢𑀫𑁂𑀯 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺 𑀏𑀢𑁂𑀲𑀁 𑀅𑀢𑁆𑀢𑀸, 𑀅𑀢𑁆𑀢𑀦𑀺 𑀅𑀦𑁆𑀢𑁄𑀕𑀥𑁄, 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄 𑀘𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀗𑁆𑀕𑀸𑀳𑀓𑀪𑀸𑀯𑁄 𑀏𑀯 𑀦𑀢𑁆𑀣𑀺 𑀲𑀪𑀸𑀕𑀸𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀳𑀺 𑀲𑁄 𑀏𑀯 𑀢𑀲𑁆𑀲 𑀲𑀪𑀸𑀕𑁄’’𑀢𑀺𑀆𑀤𑀺. 𑀬𑁂𑀦𑀸𑀢𑀺 𑀲𑀗𑁆𑀕𑀸𑀳𑀓𑀢𑁆𑀢𑁂𑀦. 𑀏𑀯𑀭𑀽𑀧𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑀺𑀧𑁆𑀧𑀓𑀸𑀭𑀸𑀦𑀁 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁 𑀲𑀢𑀺𑀧𑀺 𑀯𑀺𑀲𑀪𑀸𑀕𑀪𑀸𑀯𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀦𑀸𑀢𑀺 ‘‘𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀘𑀦𑁂𑀦. 𑀏𑀓𑀤𑁂𑀲𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀥𑀫𑁆𑀫𑀸𑀬𑀢𑀦𑀲𑁆𑀲 𑀲𑀗𑁆𑀕𑀸𑀳𑀓𑀢𑁆𑀢𑀁 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀲𑁆𑀲 𑀲𑀗𑁆𑀕𑀳𑀺𑀢𑀪𑀸𑀯𑀦𑁆𑀢𑀺 𑀅𑀢𑁆𑀣𑁄, 𑀲𑀫𑀼𑀤𑀸𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀏𑀓𑀤𑁂𑀲𑀲𑁆𑀲 𑀘𑀓𑁆𑀔𑀸𑀬𑀢𑀦𑀲𑁆𑀲 𑀲𑁄𑀢𑀸𑀬𑀢𑀦𑀲𑁆𑀲 𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀲𑀫𑀼𑀤𑀸𑀬𑁂𑀦 𑀏𑀓𑀤𑁂𑀲𑀲𑁆𑀲 𑀲𑀗𑁆𑀕𑀳𑀺𑀢𑀪𑀸𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 𑀦 𑀤𑀲𑁆𑀲𑁂𑀢𑀺, 𑀅𑀣 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀪𑁂𑀤𑁂𑀳𑀻𑀢𑀺 𑀭𑀽𑀧𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑀕𑀡𑀦𑀯𑀺𑀪𑀸𑀕𑁂𑀳𑀺. 𑀧𑀜𑁆𑀘𑀥𑀸𑀢𑀺 𑀭𑀽𑀧𑀸𑀤𑀺𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀳𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑀗𑁆𑀕𑀳𑁄𑀢𑀺 𑀏𑀯𑀁 𑀧𑀜𑁆𑀘𑀧𑁆𑀧𑀓𑀸𑀭𑁂𑀦 𑀪𑀺𑀦𑁆𑀦𑀢𑀁. 𑀢𑁂𑀦𑀸𑀳 ‘‘𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀪𑀸𑀯𑁂𑀦𑀸’’𑀢𑀺. ‘‘𑀏𑀓𑁂𑀦 𑀔𑀦𑁆𑀥𑁂𑀦𑀸’’𑀢𑀺𑀆𑀤𑀻𑀲𑀼 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀦 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀸𑀦’’𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀓𑀭𑀡𑀫𑀢𑁆𑀢𑀲𑀩𑁆𑀪𑀸𑀯𑀸’’𑀢𑀺. 𑀤𑀼𑀢𑀺𑀬𑀸𑀤𑀬𑁄 𑀧𑀦 𑀦𑀬𑀸. 𑀅𑀕𑀡𑀦𑀸𑀤𑀺𑀤𑀲𑁆𑀲𑀦𑀸𑀦𑀻𑀢𑀺 𑀅𑀕𑀡𑀦𑀕𑀡𑀦𑀤𑀲𑁆𑀲𑀦𑀸𑀦𑀺. 𑀦𑀦𑀼 𑀘 𑀤𑀼𑀢𑀺𑀬𑀸𑀤𑀻𑀲𑀼 𑀕𑀡𑀦𑀸𑀤𑀻𑀦𑀺𑀧𑀺 𑀯𑀺𑀚𑁆𑀚𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀧𑀦 𑀯𑀺𑀲𑁂𑀲𑀦𑀪𑀽𑀢𑀸𑀦𑀺 𑀅𑀧𑁆𑀧𑀥𑀸𑀦𑀸𑀦𑀻𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀪𑀽𑀢𑀸𑀦𑀁 𑀧𑀥𑀸𑀦𑀸𑀦𑀁 𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁. ‘‘𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀓𑀢𑁆𑀢𑀼𑀆𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀆𑀳 ‘‘𑀓𑀢𑁆𑀢𑀼𑀓𑀭𑀡𑀓𑀫𑁆𑀫𑀢𑁆𑀢𑀬𑀲𑀩𑁆𑀪𑀸𑀯𑀸’’𑀢𑀺.

𑀢𑀣𑀸 𑀢𑀣𑀸𑀢𑀺 𑀢𑁂𑀦 𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀓𑀸𑀭𑁂𑀦. 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀢𑀺 𑀭𑀽𑀧𑀥𑀫𑁆𑀫𑀸𑀤𑀻𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀲𑀪𑀸𑀕𑀢𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀅𑀪𑀸𑀯𑁄 𑀯𑀺𑀲𑀪𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑁂𑀢𑀺 ‘‘𑀬𑁂 𑀥𑀫𑁆𑀫𑀸, 𑀢𑁂 𑀥𑀫𑁆𑀫𑀸’’𑀢𑀺 𑀦𑀺𑀤𑁆𑀥𑀸𑀭𑀺𑀢𑀧𑁆𑀧𑀓𑀸𑀭𑀥𑀫𑁆𑀫𑀦𑀺𑀭𑀽𑀧𑀦𑁂. 𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑁂𑀢𑀩𑁆𑀩𑀸𑀦𑀦𑁆𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀺𑀓𑀲𑁆𑀲 𑀲𑀗𑁆𑀕𑀸𑀳𑀓𑀲𑁆𑀲 𑀲𑁄𑀢𑀸𑀬𑀢𑀦𑀸𑀤𑀺𑀓𑀲𑁆𑀲 𑀘 𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲. 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄𑀢𑀺 𑀏𑀓𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄, 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀤𑀪𑀸𑀯𑁄𑀢𑀺 𑀢𑀲𑁆𑀲 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀲𑁆𑀲 𑀅𑀪𑀸𑀯𑁄 𑀅𑀜𑁆𑀜𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄. 𑀅𑀬𑀦𑁆𑀢𑀺 𑀬𑁆𑀯𑀸𑀬𑀁 𑀧𑀞𑀫𑀦𑀬𑁂 𑀢𑀣𑀸 𑀢𑀣𑀸 𑀕𑀡𑁂𑀢𑀩𑁆𑀩𑀸𑀕𑀡𑁂𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑁄 𑀤𑀼𑀢𑀺𑀬𑀸𑀤𑀺𑀦𑀬𑁂𑀲𑀼 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀫𑀸𑀦𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑀲𑀗𑁆𑀔𑀸𑀢𑁄 𑀢𑀁𑀢𑀁𑀔𑀦𑁆𑀥𑀸𑀤𑀺𑀪𑀸𑀯𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀅𑀬𑀫𑁂𑀢𑁂𑀲𑀁 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀁 𑀦𑀬𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀢𑀸𑀲𑀼 𑀯𑀺𑀲𑁂𑀲𑁄.

𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀕𑁆𑀕𑀲𑀘𑁆𑀘𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀺 𑀲𑀗𑁆𑀕𑀬𑁆𑀳𑀢𑀺. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀲𑁆𑀲 𑀅𑀲𑀗𑁆𑀕𑀸𑀳𑀓𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀦 𑀳𑀺 𑀲𑀓𑁆𑀓𑀸 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁. 𑀤𑀼𑀓𑁆𑀔𑀲𑀘𑁆𑀘𑀲𑀤𑀺𑀲𑀸𑀦𑀺 𑀅𑀩𑁆𑀬𑀸𑀓𑀢𑀧𑀤𑀸𑀤𑀻𑀦𑀺. 𑀇𑀢𑀭𑁂𑀳𑀻𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀸𑀳𑀓𑀢𑁆𑀢𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀦 𑀲𑀩𑁆𑀩𑁄 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑁄𑀢𑀺 𑀅𑀢𑁆𑀣𑁄.

‘‘𑀔𑀦𑁆𑀥𑀧𑀤𑁂𑀦𑀸’’𑀢𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀦 𑀓𑀢𑁆𑀢𑀼𑀅𑀢𑁆𑀣𑁂𑀢𑀺 𑀆𑀳 ‘‘𑀔𑀦𑁆𑀥𑀧𑀤𑀲𑀗𑁆𑀕𑀳𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑁂𑀦𑁂𑀯𑀲𑁆𑀲 𑀓𑀢𑁆𑀢𑀼𑀅𑀢𑁆𑀣𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 ‘‘𑀦 𑀲𑀗𑁆𑀕𑀸𑀳𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀭𑀡𑀁 𑀧𑀦 𑀓𑀢𑁆𑀢𑀼𑀭𑀳𑀺𑀢𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀓𑁂𑀦𑀘𑀺 𑀲𑀗𑁆𑀕𑀸𑀳𑀓𑁂𑀦𑀸𑀢𑀺 𑀇𑀤𑀁 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀲𑀗𑁆𑀕𑀸𑀳𑀓𑁂𑀲𑀼 𑀦 𑀬𑀼𑀚𑁆𑀚𑀢𑀺 𑀦 𑀲𑀗𑁆𑀕𑀳𑁂𑀢𑀩𑁆𑀩𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸 𑀳𑀺 ‘‘𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀸𑀢𑀺. 𑀲𑀫𑀼𑀤𑀸𑀬𑁂 𑀯𑀼𑀢𑁆𑀢𑀯𑀺𑀥𑀺 𑀢𑀤𑀯𑀬𑀯𑁂𑀧𑀺 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 ‘‘𑀏𑀢𑁂𑀦 𑀦𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀁 𑀏𑀯-𑀲𑀤𑁆𑀤𑁂𑀦 𑀓𑀭𑀻𑀬𑀢𑀻𑀢𑀺 𑀆𑀳 ‘‘𑀦 𑀳𑀺 𑀅𑀜𑁆𑀜𑀫𑀢𑁆𑀢𑀦𑀺𑀯𑀸𑀭𑀡𑀁 𑀏𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀕𑀸𑀳𑀓𑀢𑁄 𑀅𑀜𑁆𑀜𑀦𑀺𑀯𑀸𑀭𑀡𑀁 𑀏𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄’’𑀢𑀺. 𑀲𑁄 𑀘…𑀧𑁂… 𑀧𑁂𑀓𑁆𑀔𑀦𑁆𑀢𑀺 𑀇𑀫𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀲𑀗𑁆𑀕𑀸𑀳𑀓𑀸𑀧𑁂𑀓𑁆𑀔𑀢𑁆𑀢𑁂 𑀳𑀺 ‘‘𑀲𑁄 𑀘𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀯 𑀲𑀗𑁆𑀕𑀳𑀺𑀢𑁄’’𑀢𑀺 𑀏𑀢𑁆𑀣 𑀘𑀓𑁆𑀔𑀸𑀬𑀢𑀦𑀁 𑀲𑀗𑁆𑀕𑀸𑀳𑀓𑀦𑁆𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀇𑀤𑀸𑀦𑀺 𑀢𑀁 𑀅𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣𑀸𑀢𑀺 ‘‘𑀅𑀟𑁆𑀠𑁂𑀓𑀸𑀤𑀲𑀳𑀺 𑀆𑀬𑀢𑀦𑀥𑀸𑀢𑀽𑀳𑀻’’𑀢𑀺 𑀏𑀢𑁆𑀣. ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀆𑀬𑀢𑀦𑀥𑀸𑀢𑀼𑀯𑀺𑀲𑁂𑀲𑀦𑀢𑁆𑀣𑀁. 𑀦 𑀲𑁄 𑀏𑀯 𑀢𑀲𑁆𑀲, 𑀲𑀫𑀼𑀤𑀸𑀬𑁄 𑀯𑀸 𑀢𑀤𑁂𑀓𑀤𑁂𑀲𑀸𑀦𑀁 𑀲𑀗𑁆𑀕𑀸𑀳𑀓𑁄 𑀅𑀲𑀗𑁆𑀕𑀸𑀳𑀓𑁄 𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀦 𑀳𑁄𑀢𑀻’’𑀢𑀺. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀬𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀗𑁆𑀕𑀸𑀳𑀓𑀢𑁆𑀢𑀁 𑀦𑀢𑁆𑀣𑀺 ‘‘𑀬𑁂𑀦 𑀲𑀗𑁆𑀕𑀳𑀺𑀢𑀲𑁆𑀲 𑀅𑀲𑀗𑁆𑀕𑀸𑀳𑀓𑀁 𑀲𑀺𑀬𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄 𑀅𑀝𑁆𑀞𑀓𑀣𑀸𑀬𑀁 (𑀥𑀸𑀢𑀼. 𑀅𑀝𑁆𑀞. 𑁧𑁭𑁧) ‘‘𑀲𑁄 𑀘…𑀧𑁂… 𑀦𑀢𑁆𑀣𑀻’’𑀢𑀺. 𑀲𑀗𑁆𑀕𑀳𑀺𑀢𑀢𑀸𑀬𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑀸𑀬 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀲𑀸 𑀲𑀗𑁆𑀕𑀳𑀺𑀢𑀢𑀸𑀢𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑁄, 𑀅𑀢𑁆𑀢𑁂𑀓𑀤𑁂𑀲𑀸𑀦𑀁 𑀯𑀸 𑀲𑀗𑁆𑀕𑀳𑀺𑀢𑀢𑀸. 𑀢𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀢𑁂𑀲𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀢𑀤𑁂𑀓𑀤𑁂𑀲𑀸𑀦𑀁. 𑀅𑀢𑁆𑀣𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀯𑀺𑀬𑀸𑀢𑀺 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀁. 𑀏𑀢𑁂𑀳𑀺 𑀭𑀽𑀧𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀅𑀜𑁆𑀜𑁂𑀳𑀺 𑀘 𑀏𑀯𑀭𑀽𑀧𑁂𑀳𑀺. 𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀦𑁂𑀯 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀸𑀭𑁂. 𑀅𑀕𑁆𑀕𑀳𑀡𑁂𑀢𑀺 𑀅𑀓𑀣𑀦𑁂, 𑀅𑀤𑁂𑀲𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀽𑀢𑀺 𑀲𑀫𑀼𑀤𑀬𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀬𑀼𑀚𑁆𑀚𑁂𑀬𑁆𑀬 𑀢𑀁 𑀓𑀸𑀭𑀡𑀁. 𑀓𑀲𑁆𑀫𑀸? 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑁂 𑀥𑀫𑁆𑀫𑀚𑀸𑀢𑁂 𑀲𑀢𑀺 𑀢𑀲𑁆𑀲 𑀆𑀬𑀢𑀦𑀲𑀗𑁆𑀕𑀳𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺. 𑀲𑀗𑁆𑀕𑀳𑀺𑀢𑀫𑁂𑀯 𑀦𑀢𑁆𑀣𑀺, 𑀓𑀲𑁆𑀫𑀸? ‘‘𑀲𑁄 𑀏𑀯 𑀢𑀲𑁆𑀲 𑀲𑀗𑁆𑀕𑀸𑀳𑀓𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀅𑀢𑁆𑀢𑀦𑁄…𑀧𑁂… 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀲 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀓𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀉𑀪𑀬𑀸𑀪𑀸𑀯𑁄𑀢𑀺 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑁄. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀸𑀭𑁂. 𑀥𑀫𑁆𑀫𑀸𑀬𑀢𑀦𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀦𑁆𑀢𑀺 𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀁 𑀔𑀦𑁆𑀥𑀘𑀢𑀼𑀓𑁆𑀓𑀲𑀗𑁆𑀕𑀸𑀳𑀓𑀢𑁆𑀢𑁂, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀔𑀦𑁆𑀥𑀤𑀼𑀓𑀲𑀗𑁆𑀕𑀸𑀳𑀓𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀢𑁆𑀢𑀸 ‘‘𑀲𑀢𑀻’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑀞𑀫𑁂𑀦 𑀥𑀫𑁆𑀫𑀥𑀸𑀢𑀼𑀲𑀴𑀸𑀬𑀢𑀦𑀸𑀤𑀻𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀏𑀓𑀓𑁆𑀔𑀦𑁆𑀥𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲𑁂𑀯 𑀲𑀗𑁆𑀕𑀸𑀳𑀓𑀁. 𑀢𑁂𑀲𑀦𑁆𑀢𑀺 𑀔𑀦𑁆𑀥𑀘𑀢𑀼𑀓𑁆𑀓𑀔𑀦𑁆𑀥𑀤𑀼𑀓𑀸𑀤𑀻𑀦𑀁 𑀅𑀲𑀗𑁆𑀕𑀳𑀺𑀢𑀢𑀸 𑀦 𑀦𑀢𑁆𑀣𑀺 𑀅𑀢𑁆𑀣𑁂𑀯𑀸𑀢𑀺 𑀢𑀲𑁆𑀲𑀸 𑀅𑀪𑀸𑀯𑁄 𑀅𑀦𑁂𑀓𑀦𑁆𑀢𑀺𑀓𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀧𑀤𑁂. 𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀧𑀘𑁆𑀘𑀸𑀫𑀲𑀦𑁆𑀢𑁄. 𑀢𑀤𑀯𑀢𑁆𑀢𑀩𑁆𑀩𑀢𑀸𑀢𑀺 𑀢𑁂𑀲𑀁 𑀲𑀗𑁆𑀕𑀸𑀳𑀓𑀸𑀲𑀗𑁆𑀕𑀸𑀳𑀓𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀸𑀦𑀁 𑀅𑀯𑀢𑁆𑀢𑀩𑁆𑀩𑀢𑀸. 𑀅𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯…𑀧𑁂… 𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄𑀢𑀺 𑀬𑀲𑁆𑀫𑀸 𑀦𑁂𑀲𑀁 𑀅𑀲𑀗𑁆𑀕𑀸𑀳𑀓𑀢𑁆𑀢𑀁 𑀯𑀺𑀬 𑀲𑀗𑁆𑀕𑀸𑀳𑀓𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀢𑀢𑁄 𑀏𑀯 𑀲𑀗𑁆𑀕𑀳𑀺𑀢𑀢𑁆𑀢𑀸𑀲𑀗𑁆𑀕𑀳𑀺𑀢𑀢𑁆𑀢𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺.

𑀤𑀼𑀢𑀺𑀬𑀦𑀬𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁭𑁯. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀤𑁂𑀲𑀲𑀪𑀸𑀕𑀢𑀸 𑀲𑀫𑀼𑀤𑀸𑀬𑀲𑀪𑀸𑀕𑀢𑀸 𑀦 𑀳𑁄𑀢𑀺, 𑀢𑀲𑁆𑀫𑀸. 𑀢𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦. 𑀢𑀸𑀦𑀻𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀦𑀺𑀩𑁆𑀩𑀸𑀦𑀸𑀦𑀺. 𑀬𑀣𑀸 𑀘 𑀏𑀓𑀤𑁂𑀲𑀯𑀺𑀲𑀪𑀸𑀕𑀢𑀸𑀬 𑀦 𑀲𑀗𑁆𑀕𑀳𑀺𑀢𑀢𑀸, 𑀏𑀯𑀁 𑀏𑀓𑀤𑁂𑀲𑀲𑀪𑀸𑀕𑀢𑀸𑀬 𑀅𑀲𑀗𑁆𑀕𑀳𑀺𑀢𑀢𑀸𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀗𑁆𑀕𑀳𑀺𑀢𑀸𑀦𑁂𑀯 𑀦 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀦𑀺𑀩𑁆𑀩𑀸𑀦𑀲𑀼𑀔𑀼𑀫𑀭𑀽𑀧𑀥𑀫𑁆𑀫𑀸. 𑀢𑁂𑀳𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺. 𑀦 𑀓𑀣𑀜𑁆𑀘𑀺 𑀲𑀫𑁆𑀫𑀺𑀲𑁆𑀲𑀸𑀢𑀺 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀦 𑀲𑀫𑁆𑀫𑀺𑀲𑁆𑀲𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀁 𑀲𑀸𑀥𑁂𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀬…𑀧𑁂… 𑀦 𑀳𑁄𑀢𑀻𑀢𑀺 𑀬𑀣𑀸 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀪𑀸𑀕𑀢𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀁 𑀦 𑀓𑁂𑀦𑀘𑀺𑀧𑀺 𑀲𑀗𑁆𑀕𑀳𑀡𑁂𑀦 𑀲𑀗𑁆𑀕𑀳𑀺𑀢𑀁, 𑀏𑀯𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀳𑀺 𑀢𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁 𑀦 𑀳𑁄𑀢𑀻𑀢𑀺 𑀔𑀦𑁆𑀥𑀲𑀗𑁆𑀕𑀳𑀸𑀪𑀸𑀯𑁄 𑀧𑀸𑀓𑀝𑁄 𑀯𑀼𑀢𑁆𑀢𑁄𑀯𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁.

𑀏𑀯𑀭𑀽𑀧𑀸𑀦𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁. 𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀦 𑀘𑀓𑁆𑀔𑀸𑀬𑀢𑀦𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀢𑁄 𑀏𑀯𑀸’’𑀢𑀺. 𑀢𑀣𑀸 ‘‘𑀅𑀩𑁆𑀬𑀸𑀓𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸, 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺𑀆𑀤𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀸𑀤𑀺𑀲𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀲𑀦𑀺𑀩𑁆𑀩𑀸𑀦…𑀧𑁂… 𑀪𑀸𑀯𑀢𑁄𑀯𑀸’’𑀢𑀺. 𑀅𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀥𑀫𑁆𑀫𑀚𑀸𑀢𑀁. 𑀢𑁂𑀢𑀺 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀬𑁄. 𑀅𑀢𑁆𑀢𑀦𑁄𑀢𑀺 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀏𑀓𑀤𑁂𑀲𑁄𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺. 𑀅𑀢𑁆𑀢𑁂𑀓𑀤𑁂𑀲𑀲𑀪𑀸𑀕𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀤𑁂𑀓𑀤𑁂𑀲𑀲𑀪𑀸𑀕𑁄. 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀔𑀦𑁆𑀥𑀲𑀗𑁆𑀕𑀳𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀦 𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀯𑀺𑀲𑀪𑀸𑀕𑀓𑁆𑀔𑀦𑁆𑀥𑀦𑀺𑀩𑁆𑀩𑀸𑀦𑀲𑀫𑀼𑀤𑀸𑀬𑀢𑁆𑀢𑀸 𑀔𑀦𑁆𑀥𑀲𑀗𑁆𑀕𑀳𑁂𑀦 𑀥𑀫𑁆𑀫𑀸𑀬𑀢𑀦𑁂𑀦 𑀦 𑀓𑁄𑀘𑀺 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀲𑀸𑀢𑀺 ‘‘𑀥𑀫𑁆𑀫𑀸𑀬𑀢𑀦𑁂𑀦 𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀥𑀫𑁆𑀫𑀸𑀬𑀢𑀦𑀕𑀡𑀦𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀑𑀴𑀸𑀭𑀺𑀓𑀭𑀽𑀧𑀲𑀫𑁆𑀫𑀺𑀲𑁆𑀲𑀁 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁.

𑀢𑀢𑀺𑀬𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁧. 𑀢𑀺𑀡𑁆𑀡𑀁 𑀲𑀗𑁆𑀕𑀳𑀸𑀦𑀦𑁆𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑀸𑀦𑀁. 𑀲𑀗𑁆𑀕𑀳𑀡𑀧𑀼𑀩𑁆𑀩𑀁 𑀅𑀲𑀗𑁆𑀕𑀳𑀡𑀁, 𑀅𑀲𑀗𑁆𑀕𑀳𑀡𑀧𑀼𑀩𑁆𑀩𑀁 𑀲𑀗𑁆𑀕𑀳𑀡𑀜𑁆𑀘 𑀯𑀼𑀘𑁆𑀘𑀫𑀸𑀦𑀁 𑀲𑀗𑁆𑀕𑀳𑀡𑀸𑀲𑀗𑁆𑀕𑀳𑀡𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀕𑀳𑀡𑀸…𑀧𑁂… 𑀉𑀤𑁆𑀤𑀺𑀝𑁆𑀞𑀸’’𑀢𑀺. 𑀲𑀗𑁆𑀕𑀳𑀸𑀪𑀸𑀯𑀓𑀢𑁄 𑀅𑀲𑀗𑁆𑀕𑀳𑁄 𑀲𑀗𑁆𑀕𑀳𑀳𑁂𑀢𑀼𑀓𑁄 𑀲𑀗𑁆𑀕𑀳𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀕𑀳𑀡𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑁂’’𑀢𑀺. 𑀓𑁂𑀦𑀘𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀢𑀣𑁂𑀯 𑀲𑀗𑁆𑀕𑀳𑀺𑀢𑁄 𑀲𑁄 𑀏𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀓𑁄 𑀥𑀫𑁆𑀫𑀯𑀺𑀲𑁂𑀲𑁄 𑀲𑀗𑁆𑀕𑀳𑀺𑀢𑁂𑀦 𑀲𑀗𑁆𑀕𑀳𑀺𑀢𑁄. 𑀲𑀗𑁆𑀕𑀸𑀳𑀓𑀢𑁆𑀢𑀸𑀪𑀸𑀯𑀲𑀩𑁆𑀪𑀸𑀯𑀸 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀦 𑀉𑀤𑁆𑀥𑀝𑀸, 𑀦 𑀅𑀲𑀗𑁆𑀕𑀸𑀳𑀓𑀢𑁆𑀢𑀸 𑀏𑀯. 𑀬𑀣𑀸 𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀸𑀳𑀓𑀸, 𑀏𑀯𑀁 𑀤𑁆𑀯𑀻𑀳𑀺, 𑀏𑀓𑁂𑀦𑀧𑀺 𑀲𑀗𑁆𑀕𑀳𑁂𑀦 𑀦 𑀲𑀗𑁆𑀕𑀸𑀳𑀓𑀸 𑀇𑀥 𑀦 𑀉𑀤𑁆𑀥𑀝𑀸. 𑀢𑁂𑀳𑀺 𑀲𑀗𑁆𑀕𑀳𑀺𑀢𑀸𑀢𑀺 𑀢𑁂𑀳𑀺 𑀢𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸. 𑀬𑀲𑁆𑀲𑀸𑀢𑀺 𑀬𑀲𑁆𑀲 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀲𑁆𑀲.

𑀲𑀓𑀮𑀯𑀸𑀘𑀓𑁂𑀦𑀸𑀢𑀺 𑀅𑀦𑀯𑀲𑁂𑀲𑀁 𑀔𑀦𑁆𑀥𑀸𑀤𑀺𑀅𑀢𑁆𑀣𑀁 𑀯𑀤𑀦𑁆𑀢𑁂𑀦. 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 ‘‘𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦𑀸𑀢𑀺 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀧𑀦 𑀅𑀬𑁄𑀚𑁂𑀢𑁆𑀯𑀸 ‘‘𑀬𑀁 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬, 𑀢𑀁 𑀅𑀜𑁆𑀜𑀁 𑀲𑀗𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸𑀢𑀺 𑀘𑁂? 𑀦 𑀳𑀺 𑀬𑁂𑀦 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀁 𑀥𑀫𑁆𑀫𑀚𑀸𑀢𑀁 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀳𑀺𑀢𑀁, 𑀢𑁂𑀦𑁂𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀦𑀸 𑀢𑀲𑁆𑀲 𑀢𑀤𑀯𑀲𑀺𑀝𑁆𑀞𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀲𑁆𑀲, 𑀦 𑀘 𑀢𑀲𑁆𑀲𑁂𑀯 𑀓𑁂𑀯𑀮𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀓𑀲𑁆𑀲 𑀲𑀗𑁆𑀕𑀳𑁄 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺 𑀬𑁄𑀚𑀦𑀸, 𑀅𑀣 𑀔𑁄 𑀢𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑁂𑀦 𑀨𑀲𑁆𑀲𑀸𑀤𑀺𑀦𑀸. 𑀲𑀗𑁆𑀕𑀳𑀺𑀢𑀲𑁆𑀲𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀗𑁆𑀕𑀸𑀳𑀓𑀁 𑀲𑀓𑀮𑀓𑁆𑀔𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦 𑀢𑁂𑀦 𑀔𑀦𑁆𑀥𑀸𑀤𑀺𑀧𑀤𑁂𑀦 𑀬𑀁 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬, 𑀢𑀁 𑀢𑀸𑀤𑀺𑀲𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀦𑀸 𑀲𑀤𑁆𑀤𑁄 𑀘 𑀔𑀦𑁆𑀥𑁄 𑀆𑀬𑀢𑀦𑀜𑁆𑀘𑀸𑀢𑀺 𑀯𑁂𑀤𑀦𑀸 𑀯𑀺𑀲𑀼𑀁 𑀔𑀦𑁆𑀥𑁄, 𑀲𑀤𑁆𑀤𑁄 𑀘 𑀯𑀺𑀲𑀼𑀁 𑀆𑀬𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦 𑀔𑀦𑁆𑀥𑀦𑁆𑀢𑀭𑀸𑀤𑀺𑀦𑀸. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀩𑁆𑀬𑀸𑀓𑀢𑀤𑀼𑀓𑁆𑀔𑀲𑀘𑁆𑀘𑀸𑀤𑀺 𑀯𑀺𑀬 𑀅𑀫𑀺𑀲𑁆𑀲𑀺𑀢𑀁. 𑀦 𑀳𑀺…𑀧𑁂… 𑀏𑀢𑁆𑀣𑀸𑀢𑀺 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑁂𑀦 𑀥𑀫𑁆𑀫𑁂𑀦 𑀬𑁄 𑀥𑀫𑁆𑀫𑁄 𑀲𑀗𑁆𑀕𑀳𑀺𑀢𑁄, 𑀢𑀲𑁆𑀲 𑀲𑀗𑁆𑀕𑀳𑀺𑀢𑀢𑀸𑀯𑀺𑀲𑀺𑀝𑁆𑀞𑁄𑀬𑁂𑀯 𑀬𑁄 𑀲𑀗𑁆𑀕𑀳𑁄, 𑀲𑁄 𑀦 𑀏𑀢𑁆𑀣 𑀯𑀸𑀭𑁂 𑀧𑀼𑀘𑁆𑀙𑀺𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀘. 𑀲𑀗𑁆𑀕𑀳𑁄𑀯𑀸𑀢𑀺 𑀓𑁂𑀯𑀮𑁄 𑀲𑀗𑁆𑀕𑀳𑁄, 𑀦 𑀓𑀢𑁆𑀢𑀸𑀧𑁂𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀦 𑀲𑀗𑁆𑀕𑀸𑀳𑀓𑁂𑀦𑀸𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀦𑀺𑀯𑀢𑁆𑀢𑀺𑀢𑀲𑁆𑀲 𑀤𑀲𑁆𑀲𑀦𑀁. 𑀦 𑀳𑀻𑀢𑀺𑀆𑀤𑀺 𑀢𑀁𑀲𑀫𑀢𑁆𑀣𑀦𑀁.

𑀘𑀢𑀼𑀢𑁆𑀣𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁧𑁯𑁩. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀬𑀲𑁆𑀫𑀸 𑀲𑀗𑁆𑀕𑀳𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀺𑀭𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑀥𑀫𑁆𑀫𑀯𑀺𑀲𑁂𑀲𑀦𑀺𑀲𑁆𑀲𑀺𑀢𑁄 𑀧𑀜𑁆𑀘𑀫𑀦𑀬𑁄, 𑀢𑀲𑁆𑀫𑀸 𑀬𑁄 𑀏𑀢𑁆𑀣 𑀓𑁂𑀦𑀘𑀺 𑀅𑀲𑀗𑁆𑀕𑀳𑀺𑀢𑁂𑀦 𑀥𑀫𑁆𑀫𑀯𑀺𑀲𑁂𑀲𑁂𑀦 𑀧𑀼𑀦 𑀅𑀲𑀗𑁆𑀕𑀳𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄 𑀅𑀲𑀗𑁆𑀕𑀳𑀺𑀢𑁂𑀦 𑀅𑀲𑀗𑁆𑀕𑀳𑀺𑀢𑁄 𑀅𑀲𑀗𑁆𑀕𑀳𑀺𑀢𑀢𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄 𑀘. 𑀢𑀫𑁂𑀯 𑀢𑀸𑀯 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀅𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀔𑀦𑁆𑀥…𑀧𑁂… 𑀅𑀲𑀗𑁆𑀕𑀳𑀺𑀢𑀸𑀢𑀺 𑀆𑀳𑀸’’𑀢𑀺 𑀘𑀢𑀼𑀢𑁆𑀣𑀦𑀬𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦. 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀤𑀲𑁆𑀲𑀦𑀦𑁆𑀢𑀺 𑀧𑀸𑀴𑀺𑀬𑀁 𑀦𑀺𑀤𑁆𑀥𑀸𑀭𑀺𑀢𑀧𑁆𑀧𑀓𑀸𑀭𑀥𑀫𑁆𑀫𑀤𑀲𑁆𑀲𑀦𑀁. 𑀲𑀳 𑀲𑀼𑀔𑀼𑀫𑀭𑀽𑀧𑁂𑀦𑀸𑀢𑀺 𑀲𑀲𑀼𑀔𑀼𑀫𑀭𑀽𑀧𑀁, 𑀢𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀲𑀤𑁆𑀥𑀺𑀁 𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀁, 𑀢𑁂𑀦 𑀲𑀳𑀺𑀢𑀥𑀫𑁆𑀫𑀲𑀫𑀼𑀤𑀸𑀬𑀸 𑀲𑀲𑀼𑀔𑀼𑀫…𑀧𑁂… 𑀤𑀸𑀬𑀸. 𑀓𑁂 𑀧𑀦 𑀢𑁂𑀢𑀺 𑀆𑀳 ‘‘𑀤𑀼𑀓𑁆𑀔𑀲𑀘𑁆𑀘𑀸’’𑀢𑀺𑀆𑀤𑀺. 𑀓𑁂𑀲𑀜𑁆𑀘𑀻𑀢𑀺 𑀦𑀺𑀩𑁆𑀩𑀸𑀦𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁. 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺. 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑁂𑀳𑀺 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀸𑀳𑀓𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀸. 𑀅𑀩𑁆𑀬𑀸𑀓𑀢𑀥𑀫𑁆𑀫𑀲𑀤𑀺𑀲𑀸 𑀦𑁂𑀯𑀤𑀲𑁆𑀲𑀦𑁂𑀦𑀦𑀪𑀸𑀯𑀦𑀸𑀬𑀧𑀳𑀸𑀢𑀩𑁆𑀩𑀦𑁂𑀯𑀲𑁂𑀓𑁆𑀔𑀸𑀦𑀸𑀲𑁂𑀓𑁆𑀔𑀸𑀤𑀬𑁄. 𑀇𑀢𑀭𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦, 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀬 𑀧𑀭𑀺𑀧𑀼𑀡𑁆𑀡𑀲𑀗𑁆𑀕𑀳𑀸𑀲𑀗𑁆𑀕𑀸𑀳𑀓𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀅𑀲𑀗𑁆𑀕𑀸𑀳𑀓𑁂𑀲𑀼 𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄𑀕𑀥𑀁, 𑀢𑀲𑁆𑀫𑀸 𑀢𑀁 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑁂𑀳𑀺 𑀅𑀲𑀗𑁆𑀕𑀳𑁂𑀢𑀩𑁆𑀩𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀘 𑀢𑀤𑁂𑀯 𑀢𑀲𑁆𑀲 𑀅𑀲𑀗𑁆𑀕𑀸𑀳𑀓’’𑀦𑁆𑀢𑀺. ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀬𑁄 𑀦𑀯 𑀧𑀜𑁆𑀳𑀸 𑀤𑀼𑀢𑀺𑀬𑀧𑀜𑁆𑀳𑀸𑀤𑀬𑁄, 𑀢𑁂 𑀧𑀞𑀫𑀧𑀜𑁆𑀳𑁂𑀦 𑀲𑀤𑁆𑀥𑀺𑀁 𑀤𑀲, 𑀦𑀸𑀫𑀭𑀽𑀧𑀧𑀜𑁆𑀳𑀸𑀤𑀬𑁄 𑀧𑀦 𑀘𑀢𑀼𑀯𑀻𑀲𑀢𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀧𑀺 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻’’𑀢𑀺. 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀓𑀧𑀤𑀦𑁆𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀲𑀗𑁆𑀕𑀸𑀳𑀓𑀢𑁆𑀢𑁂𑀦 𑀯𑀺𑀲𑁂𑀲𑀓𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀁. 𑀧𑀼𑀘𑁆𑀙𑀸𑀬𑀸𑀢𑀺 𑀘 𑀧𑀼𑀘𑁆𑀙𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀭𑀽𑀧𑀓𑁆𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺 𑀲𑀩𑁆𑀩𑀫𑁆𑀧𑀺 𑀯𑀸 𑀯𑀺𑀜𑁆𑀜𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑀪𑀸𑀯𑁂𑀦 𑀯𑀘𑀦𑀁 𑀧𑀜𑁆𑀳𑀪𑀸𑀯𑀢𑁄 𑀧𑀼𑀘𑁆𑀙𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀜𑁆𑀳𑀸 𑀧𑀦𑁂𑀢𑁆𑀣…𑀧𑁂… 𑀘𑀢𑀼𑀢𑁆𑀢𑀺𑀁𑀲 𑀳𑁄𑀦𑁆𑀢𑀻’’𑀢𑀺. 𑀢𑁂 𑀳𑀺 𑀮𑀓𑁆𑀔𑀡𑀢𑁄 𑀤𑀲𑁆𑀲𑀺𑀢𑀸𑀢𑀺 𑀢𑁂 𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑀸 𑀢𑁂𑀦𑁂𑀯 𑀅𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀢𑀸𑀬 𑀦𑀺𑀤𑁆𑀥𑀸𑀭𑀡𑀲𑀗𑁆𑀔𑀸𑀢𑁂𑀦 𑀮𑀓𑁆𑀔𑀡𑁂𑀦 𑀤𑀲𑁆𑀲𑀺𑀢𑀸.

𑀢𑀤𑁂𑀯𑀸𑀢𑀺 𑀏𑀯-𑀲𑀤𑁆𑀤𑁂𑀦𑀸𑀢𑀺 ‘‘𑀢𑀤𑁂𑀯𑀸’’𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦. ‘‘𑀬𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁 𑀧𑀤𑀁, 𑀢𑀁 𑀔𑀦𑁆𑀥𑀸𑀤𑀻𑀳𑀺 𑀅𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀏𑀢𑁆𑀣 ‘‘𑀔𑀦𑁆𑀥𑀸𑀤𑀻𑀳𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀦𑀺𑀧𑁆𑀧𑀬𑁄𑀚𑀦𑀁 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. ‘‘𑀢𑀻𑀳𑀺 𑀅𑀲𑀗𑁆𑀕𑀳𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀲𑀗𑁆𑀕𑀳𑀺𑀢𑀫𑁂𑀯𑀸’’𑀢𑀺 𑀲𑀗𑁆𑀕𑀳𑀺𑀢𑀢𑀸𑀦𑀺𑀯𑀢𑁆𑀢𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀤𑁂𑀯𑀸𑀢𑀺 𑀧𑀦 𑀇𑀘𑁆𑀙𑀺𑀢𑀁 𑀉𑀤𑁆𑀥𑀝𑀲𑁆𑀲𑁂𑀯 𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀪𑀸𑀯𑀲𑁆𑀲 𑀅𑀯𑀥𑀸𑀭𑁂𑀢𑀩𑁆𑀩𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑀤𑀸𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑀼𑀤𑁆𑀥𑀝𑀲𑁆𑀲. 𑀅𑀦𑀺𑀬𑀢𑀢𑀁 𑀤𑀲𑁆𑀲𑁂𑀢𑀻𑀢𑀺 𑀇𑀤𑀁 𑀅𑀯𑀥𑀸𑀭𑀡𑀨𑀮𑀤𑀲𑁆𑀲𑀦𑀁. 𑀦𑀺𑀬𑀫𑀢𑁄𑀢𑀺 𑀲𑀓𑁆𑀓𑀸 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀼𑀦𑁆𑀢𑀺 𑀇𑀤𑀫𑁆𑀧𑀺 𑀏𑀯-𑀓𑀸𑀭𑁂𑀦 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 𑀯𑀼𑀢𑁆𑀢𑀁. 𑀬𑀢𑁄 𑀳𑀺 𑀏𑀯-𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁆𑀣 𑀦𑀺𑀬𑀫𑁄𑀢𑀺. 𑀏𑀯𑀁𑀧𑀓𑀸𑀭𑀫𑁂𑀯𑀸𑀢𑀺 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀧𑁆𑀧𑀓𑀸𑀭𑀫𑁂𑀯, 𑀬𑀁 𑀧𑀓𑀸𑀭𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀁, 𑀢𑀁𑀧𑀓𑀸𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀅𑀲𑀗𑁆𑀕𑀳𑀺𑀢𑀲𑁆𑀲. 𑀅𑀜𑁆𑀜𑀲𑁆𑀲𑀸𑀢𑀺 𑀧𑀼𑀘𑁆𑀙𑀸𑀬 𑀅𑀦𑀼𑀤𑁆𑀥𑀝𑀧𑁆𑀧𑀓𑀸𑀭𑀲𑁆𑀲. 𑀏𑀢𑁂𑀦 𑀬𑁄 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑁄 𑀢𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀲𑀗𑁆𑀕𑀳𑀺𑀢𑁄, 𑀢𑀲𑁆𑀲𑁂𑀯 𑀇𑀥 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀪𑀸𑀯𑁄, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀜𑁆𑀳𑀻’’𑀢𑀺𑀆𑀤𑀺. 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑀯𑀲𑁂𑀦 𑀘𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀜𑁆𑀜𑀲𑀳𑀺𑀢𑀢𑀸, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀲𑀳𑀺𑀢𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀲𑁂𑀲𑀸 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀦𑀺𑀩𑁆𑀩𑀸𑀦𑀜𑁆𑀘 𑀲𑀓𑀮𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀢𑁂𑀲𑀁 𑀲𑀗𑁆𑀕𑀳𑁄 𑀦𑀢𑁆𑀣𑀻𑀢𑀺 ‘‘𑀲𑀗𑁆𑀕𑀳𑀺𑀢𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀏𑀓𑀤𑁂𑀲𑁂𑀦 𑀧𑀦 𑀲𑀗𑁆𑀕𑀳𑁄 𑀅𑀢𑁆𑀣𑀻𑀢𑀺 ‘‘𑀅𑀲𑀗𑁆𑀕𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. ‘‘𑀭𑀽𑀧𑀥𑀫𑁆𑀫𑀸𑀯𑀸’’𑀢𑀺 𑀦𑀺𑀬𑀫𑀦𑀁 𑀧𑀼𑀘𑁆𑀙𑀸𑀬 𑀉𑀤𑁆𑀥𑀝𑀪𑀸𑀯𑀸𑀧𑁂𑀓𑁆𑀔𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀘𑁆𑀙𑀸𑀬…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀤𑁆𑀥𑀝𑀸 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀅𑀲𑀗𑁆𑀕𑀳𑀺𑀢𑀸 𑀏𑀯𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀘𑀫𑀦𑀬𑀦𑀺𑀤𑁆𑀤𑁂𑀲𑁂. 𑀧𑀞𑀫𑁂 𑀦𑀬𑁂𑀢𑀺 𑀧𑀞𑀫𑁂 𑀅𑀢𑁆𑀣𑀯𑀺𑀓𑀧𑁆𑀧𑁂. 𑀢𑀣𑀸 𑀤𑀼𑀢𑀺𑀬𑁂𑀢𑀺 𑀏𑀢𑁆𑀣𑀸𑀧𑀺. 𑀭𑀽𑀧𑀯𑀺𑀜𑁆𑀜𑀸𑀡𑁂𑀳𑀻𑀢𑀺 𑀅𑀲𑀼𑀔𑀼𑀫𑀭𑀽𑀧𑀥𑀫𑁆𑀫𑁂𑀳𑀺 𑀯𑀺𑀜𑁆𑀜𑀸𑀡𑁂𑀦 𑀘𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀴𑀸𑀭𑀺𑀓…𑀧𑁂… 𑀅𑀢𑁆𑀣𑁄’’𑀢𑀺 𑀆𑀳. 𑀓𑀣𑀁 𑀧𑀦 𑀭𑀽𑀧𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑁂 𑀑𑀴𑀸𑀭𑀺𑀓𑀭𑀽𑀧𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 𑀆𑀳 ‘‘𑀭𑀽𑀧𑁂𑀓𑀤𑁂𑀲𑁄 𑀳𑀺 𑀏𑀢𑁆𑀣 𑀭𑀽𑀧𑀕𑁆𑀕𑀳𑀡𑁂𑀦 𑀕𑀳𑀺𑀢𑁄’’𑀢𑀺.

𑁧𑁯𑁬. 𑀅𑀲𑀗𑁆𑀕𑀸𑀳𑀓𑀦𑁆𑀢𑀺 ‘‘𑀘𑀓𑁆𑀔𑀸𑀬𑀢𑀦𑁂𑀦…𑀧𑁂… 𑀅𑀲𑀗𑁆𑀕𑀳𑀺𑀢𑀸’’𑀢𑀺 𑀏𑀯𑀁 𑀅𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀫𑁆𑀧𑀺 𑀓𑀸𑀫𑀁 𑀯𑁂𑀤𑀦𑀸𑀤𑀻𑀳𑁂𑀯 𑀘𑀢𑀽𑀳𑀺 𑀅𑀲𑀗𑁆𑀕𑀳𑀺𑀢𑀁, 𑀢𑀁 𑀧𑀦 𑀦 𑀘𑀓𑁆𑀔𑀸𑀬𑀢𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀔𑀦𑁆𑀥𑀸𑀤𑀻𑀲𑀼 𑀬𑁂𑀳𑀺. 𑀲𑀩𑁆𑀩𑀁 𑀥𑀫𑁆𑀫𑀚𑀸𑀢𑀁 𑀢𑁂𑀯 𑀭𑀽𑀧𑀸𑀤𑀺𑀓𑁂 𑀥𑀫𑁆𑀫𑁂 𑀉𑀤𑀸𑀦𑁂𑀢𑀺 𑀧𑀸𑀴𑀺𑀬𑀁. 𑀓𑀲𑁆𑀫𑀸 𑀧𑀦𑁂𑀢𑀁 𑀉𑀤𑀸𑀦𑁂𑀢𑀻𑀢𑀺 𑀆𑀳 ‘‘𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸’’𑀢𑀺𑀆𑀤𑀺. 𑀧𑀞𑀫𑁂𑀦 𑀉𑀤𑀸𑀦𑁂𑀦. 𑀤𑁆𑀯𑁂𑀢𑀺 ‘‘𑀩𑀸𑀳𑀺𑀭𑀸 𑀉𑀧𑀸𑀤𑀸 𑀤𑁆𑀯𑁂’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀤𑁆𑀯𑁂-𑀲𑀤𑁆𑀤𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲 𑀅𑀲𑀗𑁆𑀕𑀳𑀺𑀢𑀲𑁆𑀲. 𑀬𑀣𑀸𑀤𑀲𑁆𑀲𑀺𑀢𑀲𑁆𑀲𑀸𑀢𑀺 ‘‘𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀲𑁆𑀲. 𑀥𑀫𑁆𑀫𑀦𑁆𑀯𑀬𑀜𑀸𑀡𑀼𑀧𑁆𑀧𑀸𑀤𑀦𑀁 𑀦𑀬𑀤𑀸𑀦𑀁. ‘‘𑀭𑀽𑀧𑀁 𑀥𑀫𑁆𑀫𑀸𑀬𑀢𑀦’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀤𑁆𑀯𑁂𑀯𑀻𑀲𑀧𑀤𑀺𑀓𑁄 𑀏𑀲 𑀦𑀬𑁄.

𑀧𑀜𑁆𑀘𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀅𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀦𑀬𑁄 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸

𑁨𑁨𑁮. ‘‘𑀢𑀢𑁆𑀣𑀸’’𑀢𑀺 𑀇𑀫𑀺𑀦𑀸 ‘‘𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀁 𑀪𑀸𑀚𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀁 𑀪𑀸𑀚𑀺𑀢𑀁, 𑀲𑀁𑀯𑀡𑁆𑀡𑁂𑀢𑀩𑁆𑀩𑀢𑀸𑀬 𑀘 𑀧𑀥𑀸𑀦𑀪𑀽𑀢𑀁 𑀧𑀘𑁆𑀘𑀸𑀫𑀝𑁆𑀞𑀁, 𑀦 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀮𑀩𑁆𑀪𑀢𑀺…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀢𑀢𑁆𑀣 𑀦 𑀮𑀩𑁆𑀪𑀢𑀻𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀸 𑀕𑀳𑁂𑀢𑀼𑀁 𑀦 𑀮𑀩𑁆𑀪𑀢𑀺, 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀧𑀼𑀘𑁆𑀙𑀸𑀬 𑀕𑀳𑀺𑀢𑀁 𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀧𑀝𑀺𑀓𑁆𑀔𑁂𑀧𑁄𑀧𑀺 𑀳𑀺 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀫𑁂𑀯. 𑀢𑀣𑀸 𑀳𑀺 𑀬𑀫𑀓𑁂 (𑀬𑀫. 𑁧.𑀔𑀦𑁆𑀥𑀬𑀫𑀓.𑁫𑁯-𑁬𑁧) ‘‘𑀬𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣, 𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀁. 𑀢𑁂𑀦 𑀧𑀦𑁂𑀢𑁆𑀣 𑀭𑀽𑀧𑀥𑀫𑁆𑀫𑁂𑀲𑀼 𑀲𑀫𑁆𑀧𑀬𑁄𑀕𑀝𑁆𑀞𑁄 𑀦 𑀮𑀩𑁆𑀪𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀲𑀫𑁆𑀧𑀬𑁄𑀕𑀧𑀤𑀁 𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀏𑀢𑁂𑀲𑀦𑁆𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁. 𑀯𑀺𑀲𑀪𑀸𑀕𑀢𑀸𑀢𑀺 𑀅𑀢𑀁𑀲𑀪𑀸𑀕𑀢𑀸. 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑁄 𑀳𑀺 𑀲𑀫𑁆𑀧𑀬𑁄𑀕𑁂 𑀲𑀪𑀸𑀕𑀢𑀸, 𑀦 𑀲𑀗𑁆𑀕𑀳𑁂 𑀯𑀺𑀬 𑀲𑀫𑀸𑀦𑀲𑀪𑀸𑀕𑀢𑀸, 𑀢𑀲𑁆𑀫𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀪𑀸𑀯𑀭𑀳𑀺𑀢𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀁 𑀲𑀸 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸 𑀯𑀺𑀲𑀪𑀸𑀕𑀢𑀸 𑀯𑀼𑀢𑁆𑀢𑀸. 𑀢𑀤𑀪𑀸𑀯𑀢𑁄𑀢𑀺 𑀢𑀲𑁆𑀲𑀸 𑀯𑀺𑀲𑀪𑀸𑀕𑀢𑀸𑀬 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀅𑀪𑀸𑀯𑀢𑁄. 𑀯𑀺𑀧𑁆𑀧𑀬𑁄𑀕𑁄𑀧𑀺 𑀦𑀺𑀯𑀸𑀭𑀺𑀢𑁄 𑀏𑀯 𑀳𑁄𑀢𑀺, 𑀯𑀺𑀲𑀪𑀸𑀕𑁄 𑀪𑀸𑀯𑁄 𑀯𑀺𑀧𑁆𑀧𑀬𑁄𑀕𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺. ‘‘𑀘𑀢𑀽𑀲𑀼 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀢𑁂𑀲𑀁 𑀢𑁂𑀳𑀻𑀢𑀺 𑀘 𑀅𑀭𑀽𑀧𑀓𑁆𑀔𑀦𑁆𑀥𑁂 𑀏𑀯 𑀧𑀭𑀸𑀫𑀲𑀢𑀺. 𑀯𑀺𑀲𑀪𑀸𑀕𑀢𑀸 𑀘 𑀳𑁄𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀲𑀼 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀘 𑀭𑀽𑀧𑁂𑀓𑀤𑁂𑀲𑀲𑁆𑀲𑀸’’𑀢𑀺𑀆𑀤𑀺. 𑀢𑁂𑀦𑁂𑀯𑀸𑀢𑀺 𑀘𑀢𑀼𑀓𑁆𑀔𑀦𑁆𑀥𑀲𑀪𑀸𑀕𑀢𑁆𑀢𑀸 𑀏𑀯.

𑀢𑀻𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀻𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁂 𑀭𑀽𑀧𑀥𑀫𑁆𑀫𑀫𑀺𑀲𑁆𑀲𑀓𑁂 𑀥𑀫𑁆𑀫𑁂 𑀤𑀻𑀧𑁂𑀢𑀺 𑀭𑀽𑀧𑀪𑀯𑁄𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀳𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀏𑀓𑀸𑀬 𑀫𑀦𑁄𑀥𑀸𑀢𑀼𑀬𑀸. 𑀦 𑀲𑀫𑁆𑀧𑀬𑀼𑀢𑁆𑀢𑁂𑀢𑀺 𑀦 𑀲𑀫𑁆𑀧𑀬𑀼𑀢𑁆𑀢𑁂 𑀏𑀯. 𑀢𑀣𑀸 𑀳𑀺 ‘‘𑀯𑀺𑀧𑁆𑀧𑀬𑀼𑀢𑁆𑀢𑁂 𑀅𑀳𑁄𑀦𑁆𑀢𑁂 𑀲𑀢𑁆𑀢𑀳𑀺𑀧𑀺 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀧𑀺 𑀯𑀸 𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀧𑀝𑀺𑀓𑁆𑀔𑁂𑀧𑁂𑀦. 𑀢𑀸𑀳𑀻𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺. 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑁂 𑀤𑀻𑀧𑁂𑀦𑁆𑀢𑀺𑀬𑁂𑀯, 𑀦 𑀲𑀫𑁆𑀧𑀬𑀼𑀢𑁆𑀢𑁂 𑀏𑀯𑀸𑀢𑀺 𑀏𑀯𑀫𑀯𑀥𑀸𑀭𑀡𑀁 𑀕𑀳𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑁆𑀧𑀬𑀼𑀢𑁆𑀢𑁂 𑀯𑁂𑀤𑀦𑀸𑀤𑀺𑀓𑁂. 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀳𑀺 𑀦𑀯𑀢𑁆𑀢𑀩𑁆𑀩𑀁, 𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀢𑁆𑀢𑀓𑀁. 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀦𑀯𑀢𑁆𑀢𑀩𑁆𑀩𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀦𑀯𑀢𑁆𑀢𑀩𑁆𑀩𑀸𑀦𑀺, 𑀪𑀺𑀦𑁆𑀦𑀲𑀦𑁆𑀢𑀸𑀦𑀺𑀓𑀸𑀦𑀺, 𑀦𑀸𑀦𑀸𑀓𑁆𑀔𑀡𑀺𑀓𑀸𑀦𑀺 𑀘 𑀅𑀭𑀽𑀧𑀸𑀦𑀺𑀧𑀺 𑀥𑀫𑁆𑀫𑀚𑀸𑀢𑀸𑀦𑀺. 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀬𑀢𑀦𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸, 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀅𑀘𑁂𑀢𑀲𑀺𑀓𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸, 𑀢𑀤𑀼𑀪𑀬𑀲𑀫𑀼𑀤𑀸𑀬𑀸 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀧𑀤𑁂𑀳𑀺 𑀤𑀻𑀧𑁂𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀺. 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑁄𑀪𑀬𑀥𑀫𑁆𑀫𑀸𑀢𑀺 𑀭𑀽𑀧𑀦𑀺𑀩𑁆𑀩𑀸𑀦𑀲𑀳𑀺𑀢𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀔𑀦𑁆𑀥𑀸𑀤𑀻𑀳𑁂𑀯𑀸𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀳𑀺 𑀏𑀯, 𑀦 𑀅𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑁂𑀦. 𑀅𑀭𑀽𑀧𑀓𑁆𑀔𑀦𑁆𑀥𑁂𑀬𑁂𑀯 𑀧𑀦 𑀲𑀦𑁆𑀥𑀸𑀬 ‘‘𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀸𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀤𑁂𑀓𑀤𑁂𑀲𑀸𑀢𑀺 ‘‘𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀸. 𑀢𑀤𑁂𑀓𑀤𑁂𑀲𑀜𑁆𑀜𑀲𑀫𑀼𑀤𑀸𑀬𑀸𑀢𑀺 𑀢𑀲𑁆𑀲𑁂𑀯 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀯𑀬𑀯𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀫𑀼𑀤𑀸𑀬𑀪𑀽𑀢𑀸. 𑀯𑀺𑀪𑀸𑀕𑀸𑀪𑀸𑀯𑀢𑁄𑀢𑀺 𑀪𑁂𑀤𑀸𑀪𑀸𑀯𑀢𑁄. 𑀪𑁂𑀤𑁄𑀢𑀺 𑀘𑁂𑀢𑁆𑀣 𑀅𑀘𑁆𑀘𑀦𑁆𑀢𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀳𑀺 𑀲𑀫𑀼𑀤𑀸𑀬𑀸𑀯𑀬𑀯𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀸𑀦𑀁 𑀯𑀺𑀬 𑀅𑀘𑁆𑀘𑀦𑁆𑀢𑀪𑁂𑀤𑁄 𑀅𑀢𑁆𑀣𑀺 𑀪𑁂𑀤𑀸𑀪𑁂𑀤𑀬𑀼𑀢𑁆𑀢𑀢𑁆𑀢𑀸. 𑀢𑁂𑀲𑀁 𑀅𑀘𑁆𑀘𑀦𑁆𑀢𑀪𑁂𑀤𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀸𑀦𑀁 𑀏𑀓𑀤𑁂𑀲𑀸𑀦𑀁 𑀦 𑀯𑀺𑀪𑀸𑀕𑁄 𑀅𑀢𑁆𑀣𑀻’’𑀢𑀺 𑀲𑀗𑁆𑀕𑀳𑁂𑀧𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀅𑀯𑀺𑀪𑀸𑀕𑀲𑀩𑁆𑀪𑀸𑀯𑀢𑁄 𑀲𑀪𑀸𑀕𑀯𑀺𑀲𑀪𑀸𑀕𑀢𑁆𑀢𑀸𑀪𑀸𑀯𑁂𑀦. 𑀢𑁂𑀲𑀦𑁆𑀢𑀺 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀲𑀩𑁆𑀩𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁. 𑀢𑁂 𑀘 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀪𑀢𑁆𑀢𑀲𑀪𑀸𑀯𑀸𑀦𑀁 𑀦 𑀢𑁂𑀲𑀁 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀤𑀺𑀪𑀸𑀯𑁄, 𑀢𑀲𑁆𑀫𑀸. 𑀬𑀲𑁆𑀫𑀸 𑀧𑀦 𑀓𑀼𑀲𑀮𑀸𑀤𑀬𑁄 𑀏𑀯 𑀔𑀦𑁆𑀥𑀸𑀤𑀬𑁄𑀢𑀺 𑀔𑀦𑁆𑀥𑀸𑀤𑀺𑀆𑀫𑀲𑀦𑁂𑀦 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀤𑀺𑀪𑀸𑀯𑁄 𑀆𑀧𑀦𑁆𑀦𑁄 𑀏𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀔𑀦𑁆𑀥𑀸𑀤𑀻𑀦𑀺 𑀅𑀦𑀸𑀫𑀲𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀤𑀻𑀦𑀁. 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸 ‘‘𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸. 𑀲𑀩𑁆𑀩𑁂𑀲𑀽𑀢𑀺 𑀤𑀼𑀢𑀺𑀬𑀸𑀤𑀺𑀲𑀩𑁆𑀩𑀧𑀜𑁆𑀳𑁂𑀲𑀼.

𑀙𑀢𑁆𑀢𑀺𑀁𑀲𑀸𑀬 𑀧𑀺𑀝𑁆𑀞𑀺𑀤𑀼𑀓𑀧𑀤𑁂𑀲𑀼 𑀯𑀻𑀲𑀢𑀺 𑀤𑀼𑀓𑀧𑀤𑀸𑀦𑀺 𑀇𑀫𑀲𑁆𑀫𑀺𑀁 𑀦𑀬𑁂 𑀮𑀩𑁆𑀪𑀦𑁆𑀢𑀺, 𑀅𑀯𑀲𑀺𑀝𑁆𑀞𑀸𑀦𑀺 𑀲𑁄𑀴𑀲𑁂𑀯𑀸𑀢𑀺 𑀆𑀳 ‘‘𑀲𑁄𑀴𑀲𑀸𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀢𑁄 𑀏𑀯 ‘‘𑀢𑁂𑀯𑀻𑀲𑀧𑀤𑀲𑀢’’𑀦𑁆𑀢𑀺 𑀏𑀢𑁆𑀣 ‘‘𑀢𑁂𑀯𑀻𑀲’’𑀦𑁆𑀢𑀺 𑀇𑀤𑀜𑁆𑀘 ‘‘𑀏𑀓𑀯𑀻𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀧𑀜𑁆𑀳𑁂𑀲𑀼. 𑀏𑀓𑀓𑀸𑀮𑁂𑀓𑀲𑀦𑁆𑀢𑀸𑀦𑀸𑀦𑀁 𑀪𑀺𑀦𑁆𑀦𑀓𑀸𑀮𑀪𑀺𑀦𑁆𑀦𑀲𑀦𑁆𑀢𑀸𑀦𑀸𑀦𑀜𑁆𑀘 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀬𑁄𑀢𑀺 𑀆𑀳 ‘‘𑀓𑀸𑀮𑀲𑀦𑁆𑀢𑀸𑀦…𑀧𑁂… 𑀥𑀸𑀢𑀽𑀦’’𑀦𑁆𑀢𑀺. 𑀏𑀓𑀤𑁂𑀲𑀲𑀫𑁆𑀫𑀺𑀲𑁆𑀲𑀸𑀢𑀺 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑀸𑀤𑀺𑀦𑀸 𑀅𑀢𑁆𑀢𑀦𑁄 𑀏𑀓𑀤𑁂𑀲𑁂𑀦𑁂𑀯 𑀔𑀦𑁆𑀥𑀦𑁆𑀢𑀭𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀸 𑀇𑀤𑁆𑀥𑀺𑀧𑀸𑀤𑀸𑀤𑀬𑁄, 𑀅𑀦𑀸𑀭𑀫𑁆𑀫𑀡𑁂𑀳𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀘 𑀅𑀲𑀫𑁆𑀫𑀺𑀲𑁆𑀲𑀸. 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀻𑀢𑀺 𑀏𑀓𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀓𑀸𑀮𑀲𑀦𑁆𑀢𑀸𑀦𑀪𑁂𑀤𑀭𑀳𑀺𑀢𑁂𑀳𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀦𑁆𑀢𑀭𑁂𑀳𑀺, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑀯𑀺𑀲𑁂𑀲𑀪𑀽𑀢𑁂𑀳𑀺 𑀲𑀢𑀺𑀧𑀝𑁆𑀞𑀸𑀦𑀲𑀫𑁆𑀫𑀧𑁆𑀧𑀥𑀸𑀦𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀪𑀢𑁆𑀢𑀸 𑀏𑀯 𑀲𑀫𑀼𑀤𑀬𑀲𑀘𑁆𑀘𑀸𑀤𑀬𑁄 𑀲𑀫𑁆𑀧𑀬𑁄𑀕𑀻𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦, 𑀭𑀽𑀧𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀬𑁄𑀚𑀦𑀸. 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺. 𑀢𑁂 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀬𑁄. 𑀓𑁂𑀳𑀺𑀘𑀺 𑀲𑀳𑀼𑀧𑁆𑀧𑀚𑁆𑀚𑀦𑀸𑀭𑀳𑁂𑀳𑀺 𑀏𑀓𑀤𑁂𑀲𑀦𑁆𑀢𑀭𑁂𑀳𑀺 𑀯𑀺𑀪𑀢𑁆𑀢𑁂𑀳𑀺. 𑀦 𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂𑀧𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀬𑁄 𑀫𑀕𑁆𑀕𑀲𑀘𑁆𑀘𑀸𑀤𑀻𑀳𑀺 𑀲𑀫𑁆𑀧𑀬𑁄𑀕𑀁 𑀮𑀪𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀦𑀁. 𑀏𑀓𑀼𑀧𑁆𑀧𑀸𑀤𑀸…𑀧𑁂… 𑀯𑀺𑀲𑀪𑀸𑀕𑀢𑀸 𑀘𑀸𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀲𑀗𑁆𑀔𑀸𑀢𑀸 𑀬𑀣𑀸𑀭𑀳𑀁 𑀲𑀪𑀸𑀕𑀢𑀸 𑀯𑀺𑀲𑀪𑀸𑀕𑀢𑀸 𑀘. 𑀢𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀫𑁆𑀧𑀬𑁄𑀕𑀲𑁆𑀲 𑀯𑀺𑀧𑁆𑀧𑀬𑁄𑀕𑀲𑁆𑀲 𑀘 𑀮𑀪𑀦𑀢𑁄.

𑀪𑀺𑀦𑁆𑀦𑀓𑀸𑀮𑀸𑀦𑀁 𑀲𑀫𑀼𑀤𑀸𑀬𑀻𑀦𑀁 𑀲𑀫𑀼𑀤𑀸𑀬𑀸 𑀪𑀺𑀦𑁆𑀦𑀓𑀸𑀮𑀲𑀫𑀼𑀤𑀸𑀬𑀸. 𑀯𑀢𑁆𑀢𑀫𑀸𑀦𑀸 𑀘 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀏𑀓𑁂𑀓𑀥𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸. 𑀢𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀏𑀓𑀤𑁂𑀲𑀪𑀽𑀢𑀲𑁆𑀲 𑀅𑀪𑀸𑀯𑀢𑁄. 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀽𑀢𑀸𑀦𑀺𑀧𑀺. 𑀢𑁂𑀦 𑀯𑀺𑀪𑀸𑀕𑀸𑀓𑀭𑀡𑁂𑀦. 𑀬𑀤𑀺 𑀲𑀫𑀸𑀦𑀓𑀸𑀮𑀲𑁆𑀲 𑀯𑀺𑀪𑀚𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀬𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀯𑀺𑀪𑀸𑀕𑀁 𑀦 𑀓𑀭𑁄𑀦𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀔𑀦𑁆𑀥𑀸𑀬𑀢𑀦…𑀧𑁂… 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀥𑀸𑀢𑀼𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲, 𑀏𑀯𑀫𑁂𑀯𑀁.

𑁨𑁩𑁫. 𑀢𑀁𑀲𑀫𑁆𑀧𑀬𑁄𑀕𑀻𑀪𑀸𑀯𑀦𑁆𑀢𑀺 𑀢𑁂𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑀻𑀪𑀸𑀯𑀁. 𑀬𑀣𑀸 𑀳𑀺 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀢𑀸, 𑀏𑀯𑀁 𑀪𑀺𑀦𑁆𑀦𑀲𑀦𑁆𑀢𑀸𑀦𑁂𑀳𑀺 𑀪𑀺𑀦𑁆𑀦𑀓𑀸𑀮𑁂𑀳𑀺 𑀘 𑀢𑁂𑀳𑀺 𑀢𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺 𑀆𑀳 ‘‘𑀏𑀯𑀁 𑀢𑀁𑀯𑀺𑀧𑁆𑀧𑀬𑁄𑀕𑀻𑀪𑀸𑀯𑀁…𑀧𑁂… 𑀦 𑀯𑀼𑀢𑁆𑀢’’𑀦𑁆𑀢𑀺. 𑀯𑀺𑀲𑀪𑀸𑀕𑀢𑀸𑀦𑀺𑀩𑀦𑁆𑀥𑀲𑁆𑀲 𑀯𑀺𑀪𑀸𑀕𑀲𑁆𑀲 𑀅𑀪𑀸𑀯𑁂𑀦 𑀅𑀯𑀺𑀪𑀸𑀕𑁂𑀳𑀺 𑀢𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺. 𑀯𑀺𑀪𑀸𑀕𑁂 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀯𑀺𑀪𑀸𑀕𑀭𑀳𑀺𑀢𑁂𑀳𑀻𑀢𑀺 𑀲𑀫𑀸𑀦𑀓𑀸𑀮𑀲𑀦𑁆𑀢𑀸𑀦𑁂𑀳𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀢𑁆𑀢𑀸 𑀅𑀯𑀺𑀪𑀢𑁆𑀢𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀦 𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀢𑁆𑀢𑀼𑀁. 𑀢𑁂𑀦𑀸𑀳 ‘‘𑀯𑀺𑀚𑁆𑀚𑀫𑀸𑀦𑁂𑀳𑀺…𑀧𑁂… 𑀪𑀸𑀯𑀢𑁄’’𑀢𑀺. 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀫𑀸𑀦𑀲𑁆𑀲 𑀲𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀯𑀺𑀚𑁆𑀚𑀫𑀸𑀦𑀁 𑀭𑀽𑀧𑀸𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀺𑀲𑀪𑀸𑀕𑀁 𑀦 𑀳𑁄𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀯𑀺𑀬𑀸𑀢𑀺 𑀇𑀤𑀁 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀤𑀲𑁆𑀲𑀦𑀁. 𑀬𑀣𑀸 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀅𑀦𑀸𑀕𑀢𑀓𑀸𑀮𑀁 𑀯𑀼𑀘𑁆𑀘𑀢𑀻𑀢𑀺 𑀆𑀫𑀝𑁆𑀞𑀓𑀸𑀮𑀪𑁂𑀤𑀁, 𑀏𑀯𑀁 𑀬𑀁 𑀆𑀫𑀝𑁆𑀞𑀓𑀸𑀮𑀪𑁂𑀤𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀭𑀺𑀢𑀩𑁆𑀩𑀁 𑀤𑁂𑀲𑀦𑀸𑀬 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄, 𑀲𑀫𑁆𑀧𑀬𑁄𑀕𑀸𑀭𑀳𑀲𑁆𑀲𑁂𑀯 𑀘 𑀯𑀺𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑀺𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸 𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀢𑀸𑀢𑀺 𑀆𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀦𑀺𑀲𑁆𑀲𑀸𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺𑀆𑀤𑀺. 𑀢𑀜𑁆𑀘𑀸𑀢𑀺 𑀉𑀤𑁆𑀥𑀭𑀡𑀁.

𑀯𑀺𑀪𑀸𑀕𑀭𑀳𑀺𑀢𑁂𑀳𑀻𑀢𑀺 𑀯𑀺𑀲𑀪𑀸𑀕𑀢𑀸𑀪𑀸𑀯𑀢𑁄 𑀅𑀯𑀺𑀪𑀸𑀕𑁂𑀳𑀺. 𑀅𑀦𑀸𑀫𑀝𑁆𑀞𑀓𑀸𑀮𑀪𑁂𑀤𑁂𑀢𑀺 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁂. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲…𑀧𑁂… 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀧𑀸𑀭𑀺𑀲𑁂𑀲𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑁂𑀦 𑀲𑀫𑁆𑀧𑀬𑁄𑀕𑁄 𑀤𑀲𑁆𑀲𑀺𑀢𑁄. 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀪𑁂𑀤𑁂 𑀕𑀳𑀺𑀢𑁂𑀢𑀺 𑀬𑀣𑀸𑀕𑀳𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑁂𑀳𑀺 𑀯𑀺𑀧𑁆𑀧𑀬𑁄𑀕𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀤𑀻𑀧𑀓𑁂 𑀢𑁂𑀲𑀁𑀬𑁂𑀯 𑀯𑀺𑀲𑁂𑀲𑁂 ‘‘𑀅𑀭𑀽𑀧𑀪𑀯𑁄 𑀏𑀓𑁂𑀦 𑀔𑀦𑁆𑀥𑁂𑀦 𑀤𑀲𑀳𑀸𑀬𑀢𑀦𑁂𑀳𑀺 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀥𑀸𑀢𑀼. 𑁨𑁪𑁬) 𑀕𑀳𑀺𑀢𑁂 𑀢𑁂𑀦𑁂𑀯 𑀭𑀼𑀧𑁆𑀧𑀦𑀸𑀤𑀺𑀦𑀸 𑀪𑁂𑀤𑁂𑀦 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀢𑀸𑀧𑀺 𑀕𑀳𑀺𑀢𑀸 𑀏𑀯𑀸𑀢𑀺 𑀯𑀺𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀪𑁂𑀤𑁂 𑀧𑀦 𑀅𑀕𑁆𑀕𑀳𑀺𑀢𑁂 𑀢𑁂𑀦 𑀢𑁂𑀦 𑀕𑀳𑀡𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀯𑀺𑀚𑁆𑀚𑀫𑀸𑀦𑀢𑀸𑀤𑀻𑀧𑀓𑁂 𑀯𑀺𑀲𑁂𑀲𑁂, 𑀯𑀺𑀲𑀪𑀸𑀕𑁂 𑀯𑀸 𑀅𑀕𑁆𑀕𑀳𑀺𑀢𑁂 ‘‘𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀲𑀢𑁆𑀢𑀳𑀺 𑀥𑀸𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀢𑁂𑀦 𑀢𑁂𑀦 𑀕𑀳𑀡𑁂𑀦 𑀲𑀪𑀸𑀕𑀢𑀸𑀤𑀻𑀧𑀦𑁂𑀦 𑀯𑀺𑀲𑀪𑀸𑀕𑀢𑀸𑀬 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀪𑀸𑀕𑀢𑀸𑀯 𑀳𑁄𑀢𑀺. 𑀢𑀣𑀸 𑀘 𑀲𑀢𑀺 𑀲𑀪𑀸𑀕𑀢𑁆𑀢𑁂 𑀓𑀸 𑀧𑀦𑁂𑀢𑁆𑀣 𑀲𑀪𑀸𑀕𑀢𑀸𑀢𑀺 𑀆𑀳 ‘‘𑀯𑀺𑀚𑁆𑀚𑀫𑀸𑀦𑀢𑀸𑀬…𑀧𑁂… 𑀳𑁄𑀢𑀻’’𑀢𑀺. 𑀢𑀲𑁆𑀲𑀸𑀢𑀺 𑀲𑀪𑀸𑀕𑀢𑀸𑀬. 𑀢𑀲𑁆𑀫𑀸𑀢𑀺 𑀯𑀺𑀲𑀪𑀸𑀕𑀢𑀸𑀬 𑀅𑀮𑀩𑁆𑀪𑀫𑀸𑀦𑀢𑁆𑀢𑀸, 𑀲𑀪𑀸𑀕𑀢𑀸𑀬 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸.

𑁨𑁬𑁨. 𑀯𑀺𑀢𑀓𑁆𑀓𑁄 𑀯𑀺𑀬𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑁄 𑀯𑀺𑀬. 𑀲𑁄 𑀳𑀺 𑀯𑀺𑀢𑀓𑁆𑀓𑀭𑀳𑀺𑀢𑀢𑁆𑀢𑀸 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀘. 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀦𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀮𑀻𑀦𑀸’’𑀢𑀺. 𑀢𑀢𑁄 𑀏𑀯 𑀲𑁄 𑀅𑀧𑁆𑀧𑀥𑀸𑀦𑁄, 𑀤𑀼𑀢𑀺𑀬𑀛𑀸𑀦𑀥𑀫𑁆𑀫𑀸 𑀏𑀯𑁂𑀢𑁆𑀣 𑀧𑀥𑀸𑀦𑀸𑀢𑀺 𑀆𑀳 ‘‘𑀬𑁂 𑀧𑀥𑀸𑀦𑀸’’𑀢𑀺. 𑀢𑁂𑀦𑁂𑀯𑀸𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑀲𑁆𑀲 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀕𑁆𑀕𑀳𑀡𑁂𑀦 𑀇𑀥 𑀅𑀕𑁆𑀕𑀳𑀺𑀢𑀢𑁆𑀢𑀸, 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀤𑀼𑀢𑀺𑀬𑀭𑀸𑀲𑀺𑀬𑁂𑀯 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀦𑀦𑁆𑀢𑀭𑀦𑀬𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀦𑀺𑀤𑁆𑀤𑁂𑀲𑁂. 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸 𑀲𑀤𑀺𑀲𑀧𑁆𑀧𑀯𑀢𑁆𑀢𑀺𑀓𑀸. 𑀇𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀢𑁂 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 𑀦 𑀕𑀳𑀺𑀢𑀸, 𑀲𑀫𑀼𑀤𑀬𑀲𑀘𑁆𑀘𑀁 𑀯𑀺𑀬 𑀦 𑀤𑁂𑀲𑀦𑀸𑀭𑀼𑀴𑁆𑀳𑀸. 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀬𑀤𑀺 𑀳𑀺 𑀢𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸 𑀲𑀺𑀬𑀼𑀁, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑀸 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺, 𑀦 𑀓𑁂𑀳𑀺𑀘𑀺 𑀆𑀬𑀢𑀦𑁂𑀳𑀺, 𑀏𑀓𑀸𑀬 𑀥𑀸𑀢𑀼𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁. 𑀬𑀲𑁆𑀫𑀸 𑀧𑀦 𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑀸𑀦𑀕𑀢𑀺𑀓𑀸. 𑀬𑀣𑀸 𑀳𑀺 𑀬𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀲𑀁 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑁄𑀕𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀢𑁂𑀳𑀺𑀧𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀦𑀻’’𑀢𑀺𑀆𑀤𑀺. 𑀤𑀲𑀫𑁄…𑀧𑁂… 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀤𑀲𑀫𑀦𑀬𑁂 𑀢𑁂𑀳𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀲𑁄𑀴𑀲𑀳𑀺 𑀥𑀸𑀢𑀽𑀳𑀺 𑀯𑀺𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀑𑀲𑀸𑀦𑀦𑀬𑁂 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑁄 𑀘 𑀯𑀼𑀢𑁆𑀢𑁄𑀢𑀺 𑀢𑀲𑁆𑀫𑀸 𑀦 𑀢𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀳𑀺 𑀲𑀫𑀸𑀦𑀕𑀢𑀺𑀓𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀢𑀓𑁆𑀓𑀲𑀳𑀺𑀢𑁂𑀲𑀽𑀢𑀺 𑀲𑀳𑀯𑀺𑀢𑀓𑁆𑀓𑁂𑀲𑀼. 𑀢𑁂𑀲𑀽𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀲𑀳 𑀯𑀺𑀢𑀓𑁆𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑁂𑀲𑀼, ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸’’𑀢𑀺 𑀕𑀳𑀺𑀢𑁂𑀲𑀼 𑀯𑀼𑀢𑁆𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀧𑀺 𑀢𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑀸 𑀯𑀺𑀢𑀓𑁆𑀓𑁄 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀥𑀫𑁆𑀫𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀦𑀺𑀤𑁆𑀤𑁂𑀲𑁂 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 𑀏𑀓𑁂𑀦 𑀔𑀦𑁆𑀥𑁂𑀦 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑁂𑀦 𑀔𑀦𑁆𑀥𑁂𑀦𑀸𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦. 𑀲𑁄 𑀳𑀺 𑀲𑀫𑀼𑀤𑀸𑀬𑁄𑀢𑀺 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁄. 𑀦𑀦𑀼 𑀯𑀺𑀢𑀓𑁆𑀓𑁄𑀧𑁂𑀢𑁆𑀣 𑀥𑀫𑁆𑀫𑀲𑀗𑁆𑀕𑀳𑀁 𑀕𑀢𑁄, 𑀲𑁄 𑀘 𑀯𑀺𑀘𑀸𑀭𑀢𑁄 𑀅𑀜𑁆𑀜𑁂𑀦𑀧𑀺 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀳𑀺 𑀢𑀤𑁂𑀓𑀤𑁂𑀲𑀲𑁆𑀲…𑀧𑁂… 𑀳𑁄𑀢𑀻’’𑀢𑀺. 𑀬𑀣𑀸𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀇𑀤𑁆𑀥𑀺𑀧𑀸𑀤𑀦𑀺𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀇𑀤𑁆𑀥𑀺𑀧𑀸𑀤𑀲𑀫𑀼𑀤𑀸𑀬𑀲𑁆𑀲 𑀏𑀓𑀤𑁂𑀲𑀪𑀽𑀢𑀸𑀦𑀁 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀸𑀤𑀻𑀦𑀁 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀢𑀁𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀺, 𑀏𑀯𑀁 𑀇𑀥𑀸𑀧𑀺 𑀯𑀺𑀢𑀓𑁆𑀓𑀲𑁆𑀲 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀦 𑀳𑁄𑀢𑀻𑀢𑀺.

𑀬𑀤𑀺 𑀏𑀯𑀁 ‘‘𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦𑁄 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀲𑀽𑀢𑀺 𑀇𑀤𑁆𑀥𑀺𑀧𑀸𑀤𑁂𑀲𑀼. 𑀲𑀫𑀼𑀤𑀸𑀬𑀲𑁆𑀲𑀸𑀢𑀺 𑀇𑀤𑁆𑀥𑀺𑀧𑀸𑀤𑀲𑀫𑀼𑀤𑀸𑀬𑀲𑁆𑀲. 𑀢𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸 ‘‘𑀇𑀤𑁆𑀥𑀺𑀧𑀸𑀤𑁄 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑀸𑀢𑀺 𑀯𑀺𑀘𑀸𑀭𑁂𑀦. 𑀦 𑀳𑀻𑀢𑀺𑀆𑀤𑀺𑀦𑀸 𑀬𑀣𑀸𑀥𑀺𑀕𑀢𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀦𑀯𑀢𑁆𑀢𑀩𑁆𑀩𑀸𑀪𑀸𑀯𑀁 𑀉𑀤𑀸𑀳𑀭𑀡𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀸𑀯𑁂𑀢𑀺. 𑀓𑁂𑀘𑀺 𑀯𑀺𑀘𑀺𑀓𑀺𑀘𑁆𑀙𑀸 𑀢𑀁𑀲𑀳𑀕𑀢𑀸 𑀘 𑀫𑁄𑀳𑀯𑀚𑁆𑀚𑀸 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑀸, 𑀓𑁂𑀘𑀺 𑀅𑀲𑀫𑁆𑀧𑀬𑀼𑀢𑁆𑀢𑀸. 𑀫𑁄𑀳𑁂𑀦𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀫𑁄𑀳𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀲𑀫𑀼𑀤𑀸𑀬𑁄 𑀢𑁂𑀦 𑀫𑁄𑀳𑁂𑀦 𑀲𑀫𑁆𑀧𑀬𑀼𑀢𑁆𑀢𑁄. 𑀅𑀜𑁆𑀜𑁄 𑀓𑁄𑀘𑀺 𑀥𑀫𑁆𑀫𑁄 𑀳𑁂𑀢𑀼𑀪𑀸𑀯𑁄 𑀦𑀸𑀧𑀺 𑀅𑀢𑁆𑀣𑀺, 𑀬𑁂𑀦 𑀳𑁂𑀢𑀼𑀦𑀸 𑀲𑁄 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑁄𑀢𑀺 𑀯𑀼𑀢𑁆𑀢𑁄 𑀲𑀫𑀼𑀤𑀸𑀬𑁄. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 ‘‘𑀪𑀸𑀯𑀦𑀸…𑀧𑁂… 𑀬𑁄𑀧𑀺 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀦𑀯𑀢𑁆𑀢𑀩𑁆𑀩𑀢𑀸𑀬 𑀦𑀺𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀬𑀣𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀲𑀫𑀼𑀤𑀸𑀬𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀢𑀸 𑀦 𑀯𑀢𑁆𑀢𑀩𑁆𑀩𑀸, 𑀏𑀯𑀁 𑀬𑁂𑀦 𑀥𑀫𑁆𑀫𑁂𑀦 𑀅𑀯𑀺𑀢𑀓𑁆𑀓…𑀧𑁂… 𑀲𑀺𑀬𑀸, 𑀢𑀁 𑀦 𑀦𑀢𑁆𑀣𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁂𑀲𑀼 𑀓𑁄𑀘𑀺𑀧𑀺 𑀯𑀺𑀘𑀸𑀭𑁂𑀦 𑀅𑀲𑀫𑁆𑀧𑀬𑀼𑀢𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀢𑁂𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸. 𑀏𑀓𑀥𑀫𑁆𑀫𑁂𑀧𑀺…𑀧𑁂… 𑀓𑀢𑁄 𑀬𑀣𑀸 ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸’’𑀢𑀺.

𑀙𑀝𑁆𑀞𑀦𑀬𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁦𑁬. 𑀢𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀳𑀺 𑀔𑀦𑁆𑀥𑀢𑁆𑀢𑀬𑀔𑀦𑁆𑀥𑁂𑀓𑀤𑁂𑀲𑀸𑀤𑀺𑀓𑁂 𑀲𑀫𑁆𑀧𑀬𑀼𑀢𑁆𑀢𑁂 𑀲𑀢𑀺𑀧𑀺, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀘 𑀯𑀺𑀧𑁆𑀧𑀬𑀼𑀢𑁆𑀢𑁂 𑀭𑀽𑀧𑀦𑀺𑀩𑁆𑀩𑀸𑀦𑀸𑀤𑀺𑀓𑁂 𑀢𑀤𑀜𑁆𑀜𑀥𑀫𑁆𑀫𑁂 𑀲𑀢𑀺𑀧𑀺 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀅𑀜𑁆𑀜𑀥𑀫𑁆𑀫𑀸𑀦𑀁 𑀅𑀯𑀲𑀺𑀝𑁆𑀞𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀦 𑀳𑀺 𑀅𑀢𑁆𑀣𑀺 𑀔𑀦𑁆𑀥𑀧𑀜𑁆𑀘𑀓𑀸𑀤𑀻𑀦𑀁 𑀲𑀗𑁆𑀕𑀡𑁆𑀳𑀦𑀢𑁄 𑀢𑁂𑀲𑀁. 𑀢𑁂 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀢𑁂 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀏𑀯. 𑀢𑀤𑀜𑁆𑀜𑀥𑀫𑁆𑀫𑀸𑀦𑀦𑁆𑀢𑀺 𑀢𑀤𑀜𑁆𑀜𑀥𑀫𑁆𑀫𑀸𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸𑀢𑀺 𑀇𑀫𑀺𑀦𑀸 𑀦 𑀘 𑀢𑁂 𑀏𑀯 𑀥𑀫𑁆𑀫𑀸 𑀅𑀟𑁆𑀠𑀤𑀼𑀢𑀺𑀬𑀸𑀬𑀢𑀦𑀥𑀸𑀢𑀼𑀬𑁄, 𑀅𑀣 𑀔𑁄 𑀢𑁂 𑀘 𑀢𑀢𑁄 𑀅𑀜𑁆𑀜𑁂 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺.

𑀦𑀦𑀼 𑀢𑀤𑀜𑁆𑀜𑀪𑀸𑀯𑀢𑁄 𑀏𑀯 𑀢𑁂𑀳𑀺 𑀇𑀢𑀭𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀦 𑀘𑀸’’𑀢𑀺𑀆𑀤𑀺. 𑀢𑀤𑀜𑁆𑀜𑀲𑀫𑀼𑀤𑀸𑀬𑁂𑀳𑀻𑀢𑀺 𑀢𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀅𑀜𑁆𑀜𑀲𑀫𑀼𑀤𑀸𑀬𑁂𑀳𑀺 𑀅𑀜𑁆𑀜𑁂 𑀮𑁄𑀪𑀲𑀳𑀕𑀢𑀸 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀲𑀫𑀼𑀤𑀸𑀬𑁂…𑀧𑁂… 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀢𑀲𑁆𑀲𑀢𑁆𑀣𑁄 𑁋 𑀲𑀫𑀼𑀤𑀸𑀬𑁂𑀦 𑀮𑁄𑀪𑀲𑀳𑀕𑀢𑀢𑀤𑀜𑁆𑀜𑀥𑀫𑁆𑀫𑀭𑀸𑀲𑀺𑀦𑀸 𑀏𑀓𑀤𑁂𑀲𑀸𑀦𑀁 𑀮𑁄𑀪𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄, 𑀢𑀣𑀸 𑀬𑁂 𑀏𑀓𑀤𑁂𑀲𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀯𑀬𑀯𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑀸, 𑀢𑁂𑀲𑀜𑁆𑀘 𑀲𑀫𑀼𑀤𑀸𑀬𑁂𑀦 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺. 𑀅𑀦𑁂𑀦 𑀲𑀫𑀼𑀤𑀸𑀬𑁂𑀦 𑀅𑀯𑀬𑀯𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑁂𑀦 𑀘 𑀢𑀲𑁆𑀲 𑀦 𑀯𑀺𑀧𑁆𑀧𑀬𑁄𑀕𑁄, 𑀅𑀯𑀬𑀯𑀲𑁆𑀲𑁂𑀯 𑀧𑀦 𑀅𑀯𑀬𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀲𑀫𑀼𑀤𑀬𑀲𑀘𑁆𑀘𑁂 𑀯𑀼𑀢𑁆𑀢𑁄 𑀯𑀺𑀥𑀺, 𑀏𑀲𑁂𑀯 𑀫𑀕𑁆𑀕𑀲𑀘𑁆𑀘𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀅𑀭𑀽𑀧𑀓𑁆𑀔𑀦𑁆𑀥𑁂𑀓𑀤𑁂𑀲𑀢𑁆𑀢𑀸 𑀢𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀭𑀯𑀲𑁂𑀲𑁂𑀲𑀽𑀢𑀺 𑀅𑀩𑀳𑀺𑀓𑀢𑀯𑀺𑀢𑀓𑁆𑀓𑁂𑀲𑀼. 𑀯𑀺𑀢𑀓𑁆𑀓𑁄 𑀳𑀺 𑀲𑀫𑀼𑀤𑀸𑀬𑀢𑁄 𑀅𑀩𑀳𑀺𑀓𑀢𑁄. ‘‘𑀲𑁄 𑀳𑀺 𑀲𑀫𑀼𑀤𑀸𑀬𑁄’’𑀢𑀺𑀆𑀤𑀺𑀓𑁄 𑀯𑀼𑀢𑁆𑀢𑀦𑀬𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀻’’𑀢𑀺.

𑀅𑀜𑁆𑀜𑁂𑀲𑀼𑀧𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀲𑀼 𑀯𑀺𑀲𑁆𑀲𑀚𑁆𑀚𑀦𑀲𑁆𑀲…𑀧𑁂… 𑀤𑀝𑁆𑀞𑀩𑁆𑀩𑀁, 𑀬𑀢𑁄 𑀲𑀫𑀼𑀤𑀬𑀲𑀘𑁆𑀘𑀸𑀤𑀺 𑀇𑀥 𑀦 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀧𑀬𑀼𑀢𑁆𑀢𑀸𑀥𑀺𑀓𑀸𑀭𑀢𑁄 ‘‘𑀅𑀜𑁆𑀜𑁂𑀦𑀸’’𑀢𑀺 𑀧𑀤𑀁 𑀲𑀫𑁆𑀧𑀬𑀼𑀢𑁆𑀢𑀢𑁄 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀆𑀳 ‘‘𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑁂𑀦𑀧𑀺 𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸…𑀧𑁂… 𑀕𑀳𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 ‘‘𑀅𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀲𑀫𑁆𑀫𑀺𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦. 𑀘𑀺𑀢𑁆𑀢𑀦𑁆𑀢𑀺 ‘‘𑀘𑀺𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺 𑀧𑀜𑁆𑀳𑀁 𑀉𑀧𑀮𑀓𑁆𑀔𑁂𑀢𑀺. 𑀲𑀳𑀬𑀼𑀢𑁆𑀢𑀧𑀤𑁂𑀳𑀺 𑀲𑀢𑁆𑀢𑀸𑀢𑀺 ‘‘𑀘𑁂𑀢𑀲𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀲𑀳𑀬𑀼𑀢𑁆𑀢𑁂 𑀥𑀫𑁆𑀫𑁂 𑀤𑀻𑀧𑁂𑀦𑁆𑀢𑁂𑀳𑀺 𑀧𑀤𑁂𑀳𑀺 𑀆𑀕𑀢𑀸 𑀲𑀢𑁆𑀢 𑀧𑀜𑁆𑀳𑀸. 𑀢𑀺𑀡𑁆𑀡𑀁 𑀢𑀺𑀓𑀧𑀤𑀸𑀦𑀫𑀕𑁆𑀕𑀳𑀡𑁂𑀦 𑀊𑀦𑁄𑀢𑀺 𑀓𑀢𑁆𑀯𑀸. 𑀬𑁂 𑀲𑀦𑁆𑀥𑀸𑀬 ‘‘𑀢𑀺𑀓𑁂 𑀢𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀯𑁂𑀤𑀦𑀸𑀧𑀻𑀢𑀺𑀢𑁆𑀢𑀺𑀓𑁂𑀲𑀼 𑀧𑀘𑁆𑀙𑀺𑀫𑀁, 𑀯𑀺𑀢𑀓𑁆𑀓𑀢𑁆𑀢𑀺𑀓𑁂 𑀧𑀞𑀫𑀦𑁆𑀢𑀺 𑀧𑀤𑀢𑁆𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑁩𑁦𑁯. 𑀉𑀤𑁆𑀥𑀝𑀧𑀤𑁂𑀦 𑀧𑀓𑀸𑀲𑀺𑀬𑀫𑀸𑀦𑀸 𑀅𑀢𑁆𑀣𑀸 𑀅𑀪𑁂𑀤𑁄𑀧𑀘𑀸𑀭𑁂𑀦 ‘‘𑀉𑀤𑁆𑀥𑀝𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀉𑀤𑁆𑀥𑀝𑀧𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀳𑀻’’𑀢𑀺. 𑀢𑁂𑀦 𑀘 𑀬𑀣𑀸𑀯𑀼𑀢𑁆𑀢𑁂𑀦 𑀉𑀤𑁆𑀥𑀝𑀧𑀤𑁂𑀦. 𑀫𑀦𑁂𑀦 𑀬𑀼𑀢𑁆𑀢𑀸𑀢𑀺 𑀏𑀢𑁆𑀣 𑀫𑀦𑀦𑀫𑀢𑁆𑀢𑀢𑁆𑀢𑀸 𑀫𑀦𑁄𑀥𑀸𑀢𑀼 ‘‘𑀫𑀦𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀫𑀦𑁄𑀥𑀸𑀢𑀼𑀬𑀸 𑀏𑀓𑀦𑁆𑀢𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺.

𑀲𑀢𑁆𑀢𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁭. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀺 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑁄𑀕𑀺𑀦𑁄 𑀅𑀪𑀸𑀯𑀢𑁄. 𑀲𑀫𑀼𑀤𑀸𑀬𑀲𑁆𑀲 𑀘 𑀏𑀓𑀤𑁂𑀲𑁂𑀦 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁 𑀭𑀽𑀧𑀁 𑀦𑀺𑀩𑁆𑀩𑀸𑀦𑀜𑁆𑀘, 𑀢𑀲𑁆𑀲 𑀓𑁂𑀦𑀘𑀺 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀳𑀺…𑀧𑁂… 𑀦𑀢𑁆𑀣𑀻’’𑀢𑀺. 𑀢𑁂𑀦𑀸𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦.

𑀅𑀝𑁆𑀞𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁧𑁯. ‘‘𑀲𑀫𑀸𑀲𑀧𑀤𑀁 𑀇𑀤’’𑀦𑁆𑀢𑀺 𑀯𑀢𑁆𑀯𑀸 𑀅𑀬𑀁 𑀦𑀸𑀫 𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀲 𑀔𑀦𑁆𑀥𑀸𑀤𑀺𑀦𑁄’’𑀢𑀺𑀆𑀤𑀺𑀫𑀸𑀳, 𑀬𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀬𑀁 𑀇𑀥 𑀲𑀫𑁆𑀧𑀬𑀼𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀦𑀯𑀫𑀦𑀬𑁂 𑀬𑀁 𑀥𑀫𑁆𑀫𑀚𑀸𑀢𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀭𑀡𑀦𑁆𑀢𑁂𑀲𑀼 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀫𑀸𑀢𑀺𑀓𑀸𑀥𑀫𑁆𑀫𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀜𑁆𑀳𑀺 𑀥𑀫𑁆𑀫𑀚𑀸𑀢𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀦𑀸 𑀲𑀬𑀁 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀦𑀺𑀤𑁆𑀥𑀸𑀭𑀺𑀢𑀁. 𑀅𑀬𑁄𑀕𑁄𑀢𑀺 𑀅𑀲𑀫𑁆𑀧𑀬𑁄𑀕𑁄. 𑀯𑀓𑁆𑀔𑀢𑀺 𑀤𑀲𑀫𑀦𑀬𑁂. 𑀢𑀢𑁆𑀣 𑀳𑀺 ‘‘𑀭𑀽𑀧𑀓𑁆𑀔𑀦𑁆𑀥𑁂𑀦 𑀯𑁂𑀤𑀦𑀸𑀤𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑁄 𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀓𑀣𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀩𑁆𑀩𑀸𑀦𑀁 𑀧𑀦 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀫𑀦𑀸𑀬𑀢𑀦𑀁 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀓𑁂𑀳𑀺𑀘𑀺 𑀯𑀺𑀧𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀳𑀺 𑀬𑀣𑀸 𑀲𑀼𑀔𑀼𑀫𑀭𑀽𑀧𑀁 𑀯𑀺𑀬 𑀲𑀭𑀽𑀧𑀢𑁄 𑀅𑀦𑀼𑀤𑁆𑀥𑀝𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀓𑁂𑀳𑀺𑀘𑀻𑀢𑀺𑀧𑀤𑁂𑀦 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀸𑀦𑀁 𑀲𑀼𑀔𑀼𑀫𑀭𑀽𑀧𑀕𑀢𑀺𑀓𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀭𑀽𑀧𑀫𑀺𑀲𑁆𑀲𑀓𑁂𑀳𑀺 𑀯𑀸’’𑀢𑀺 𑀏𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸𑀤𑀻𑀳𑀺 𑀦𑀺𑀩𑁆𑀩𑀸𑀦𑀫𑀺𑀲𑁆𑀲𑀓𑁂𑀳𑀺𑀧𑀺 𑀅𑀲𑀫𑁆𑀧𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀓𑀮𑀘𑀢𑀼𑀓𑁆𑀔𑀦𑁆𑀥𑀲𑀗𑁆𑀕𑀸𑀳𑀓𑁂𑀳𑀺 𑀧𑀤𑁂𑀳𑀺 𑀲𑀳𑀯𑀢𑁆𑀢𑀺𑀦𑁄 𑀅𑀜𑁆𑀜𑀲𑁆𑀲 𑀲𑀫𑁆𑀧𑀬𑁄𑀕𑀺𑀦𑁄 𑀅𑀪𑀸𑀯𑀢𑁄 𑀅𑀢𑀻𑀢𑀸𑀦𑀸𑀕𑀢𑁂𑀳𑀺 𑀘 𑀲𑀫𑁆𑀧𑀬𑁄𑀕𑁄 𑀦𑀢𑁆𑀣𑁂𑀯𑀸𑀢𑀺 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀫𑀸𑀦𑀸𑀦𑀫𑁂𑀯…𑀧𑁂… 𑀅𑀭𑀽𑀧𑀪𑀯𑀸𑀤𑀻𑀳𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀇𑀢𑀭𑁂𑀢𑀺 𑀬𑁂 𑀲𑀫𑁆𑀧𑀬𑁄𑀕𑀁 𑀮𑀪𑀦𑁆𑀢𑀺, 𑀓𑁂 𑀧𑀦 𑀢𑁂 𑀭𑀽𑀧𑁂𑀦 𑀅𑀲𑀫𑁆𑀫𑀺𑀲𑁆𑀲𑀸 𑀅𑀭𑀽𑀧𑁂𑀓𑀤𑁂𑀲𑀪𑀽𑀢𑀸. 𑀢𑁂𑀦𑀸𑀳 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄’’𑀢𑀺.

𑀦𑀯𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁩𑁫𑁩. 𑀬𑁂 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀧𑀸𑀴𑀺𑀬𑀁 𑀅𑀕𑁆𑀕𑀳𑀺𑀢𑀸, 𑀢𑁂𑀲𑀼 𑀓𑁂𑀘𑀺 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄 𑀓𑁂𑀘𑀺 𑀔𑀦𑁆𑀥𑀸𑀤𑀻𑀳𑀺 𑀯𑀺𑀧𑁆𑀧𑀬𑁄𑀕𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀸𑀬𑀢𑀦𑀸𑀤𑀺𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀕𑀢𑀥𑀫𑁆𑀫𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀪𑀺𑀦𑁆𑀦𑀓𑀸𑀮𑀢𑀸𑀤𑀺𑀯𑀺𑀲𑁂𑀲𑀯𑀢𑁄 𑀅𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀅𑀪𑀸𑀯𑀫𑀸𑀳, 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀧𑀦 𑀲𑀩𑁆𑀩𑀲𑁆𑀲𑀧𑀺. 𑀓𑀸𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄 𑀲𑀜𑁆𑀜𑀻𑀪𑀯𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀯𑀸. 𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄𑀢𑀺 𑀯𑀺𑀧𑁆𑀧𑀬𑁄𑀕𑀸𑀲𑀫𑁆𑀪𑀯𑀢𑁄. 𑀦 𑀳𑀺 𑀬𑁂 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸, 𑀢𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀢𑁂𑀲𑀁𑀬𑁂𑀯 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀔𑀦𑁆𑀥𑀸𑀤𑀻𑀲𑀼 𑀓𑁂𑀦𑀘𑀺 𑀯𑀺𑀧𑁆𑀧𑀬𑁄𑀕𑁄 𑀲𑀫𑁆𑀪𑀯𑀢𑀺.

𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀫𑀦𑀬𑁄 𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁦𑁯. 𑀢𑁂𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸. 𑀲𑁂𑀲𑁂𑀳𑀻𑀢𑀺 𑀅𑀯𑀲𑀺𑀝𑁆𑀞𑁂𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺. ‘‘𑀏𑀢𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄’’𑀢𑀺 𑀇𑀫𑀺𑀦𑀸 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀫𑀼𑀔𑁂𑀦 ‘‘𑀲𑀫𑀼𑀤𑀬𑀲𑀘𑁆𑀘𑁂𑀦 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀯𑀭𑀡𑀁 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀓𑁂𑀳𑀺𑀘𑀻𑀢𑀺𑀧𑀤𑀲𑁆𑀲𑀢𑁆𑀣𑀁 𑀓𑀸𑀢𑀼𑀁 ‘‘𑀓𑁂𑀳𑀺𑀘𑀻𑀢𑀺 𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀡𑁆𑀳𑀸𑀯𑀚𑁆𑀚𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑀸𑀓𑀺𑀢𑁆𑀢𑀦𑀁 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀬𑀢𑁄 𑀢𑁂 𑀲𑀫𑀼𑀤𑀬𑀲𑀘𑁆𑀘𑁂𑀦 𑀔𑀦𑁆𑀥𑀸𑀤𑀺𑀲𑀗𑁆𑀕𑀳𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸. 𑀲𑀬𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀯𑀚𑁆𑀚𑁂𑀳𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀁 𑀦 𑀯𑀢𑁆𑀢𑀩𑁆𑀩𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺𑀧𑀺, 𑀘𑀺𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀧𑀻’’𑀢𑀺. 𑀲𑀫𑁆𑀧𑀬𑁄𑀕𑀸𑀭𑀳𑁂𑀳𑀻𑀢𑀺 𑀯𑀺𑀲𑁂𑀲𑀦𑀁 𑀲𑀼𑀔𑀼𑀫𑀭𑀽𑀧𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑁆𑀯𑁂 𑀲𑀦𑁆𑀥𑀸𑀬 𑀓𑀢𑀁, 𑀦 𑀢𑀡𑁆𑀳𑀸𑀤𑀺𑀓𑁂.

𑀏𑀓𑀸𑀤𑀲𑀫𑀦𑀬𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑁆𑀯𑀸𑀤𑀲𑀫𑀦𑀬𑁄 𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁧𑁭. 𑀦𑀯𑀫𑀦𑀬𑁂 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀉𑀤𑁆𑀥𑀝𑀸, 𑀤𑁆𑀯𑀸𑀤𑀲𑀫𑀦𑀬𑁂 𑀘 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀸𑀢𑀺 𑀉𑀪𑀬𑀢𑁆𑀣𑀸𑀧𑀺 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀸𑀯 𑀕𑀳𑀺𑀢𑀸𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀫…𑀧𑁂… 𑀮𑀩𑁆𑀪𑀦𑁆𑀢𑀻’’𑀢𑀺.

𑀤𑁆𑀯𑀸𑀤𑀲𑀫𑀦𑀬𑀲𑀫𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀢𑁂𑀭𑀲𑀫𑀦𑀬𑁄 𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸

𑁪𑁪𑁮. 𑀬𑁂𑀳𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀻𑀳𑀺. 𑀢𑀻𑀳𑀺𑀧𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀲𑀗𑁆𑀕𑀳𑁂𑀳𑀺. 𑀧𑀼𑀦 𑀬𑁂𑀳𑀻𑀢𑀺 𑀅𑀭𑀽𑀧𑀪𑀯𑀸𑀤𑀻𑀳𑀺. 𑀑𑀴𑀸𑀭𑀺𑀓𑀸𑀬𑀢𑀦𑀸𑀦𑁂𑀯 𑀳𑁄𑀦𑁆𑀢𑀺 𑀆𑀬𑀢𑀦𑀥𑀸𑀢𑀼𑀲𑀗𑁆𑀕𑀳𑁂𑀳𑀺𑀧𑀺 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑁂𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑀸𑀤𑀬𑁄. 𑀯𑀼𑀢𑁆𑀢𑀸𑀯𑀲𑁂𑀲𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀻𑀳𑀺 𑀅𑀯𑀲𑀺𑀝𑁆𑀞𑀸. 𑀲𑀢𑀺𑀧𑀺 𑀅𑀲𑀗𑁆𑀕𑀸𑀳𑀓𑀢𑁆𑀢𑁂 𑀢𑁂𑀳𑀺 𑀅𑀲𑀗𑁆𑀕𑀳𑀺𑀢𑀸𑀦𑀁 𑀲𑀫𑁆𑀧𑀬𑁄𑀕𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀇𑀥 𑀢𑁂𑀭𑀲𑀫𑀦𑀬𑁂 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀭𑀼𑀳𑀦𑁆𑀢𑀺 𑀦𑀸𑀭𑁄𑀳𑀦𑁆𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀳𑀺 𑀔𑀦𑁆𑀥𑀸𑀤𑀺𑀯𑀲𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀜𑁆𑀘 𑀲𑀫𑁆𑀧𑀬𑁄𑀕𑁄 𑀦𑀸𑀫 𑀦𑀢𑁆𑀣𑀻’’𑀢𑀺 (𑀥𑀸𑀢𑀼. 𑁪𑁪𑁮) 𑀅𑀲𑀗𑁆𑀕𑀸𑀳𑀓𑀸 𑀏𑀯 𑀦 𑀳𑁄𑀦𑁆𑀢𑀺 𑀅𑀯𑀺𑀓𑀮𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀪𑀸𑀯𑀢𑁄.

𑀢𑁂𑀢𑀺 ‘‘𑀤𑀼𑀓𑁆𑀔𑀲𑀘𑁆𑀘𑀸𑀤𑀻’’𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀥𑀫𑁆𑀫𑀸. 𑀅𑀲𑀩𑁆𑀩…𑀧𑁂… 𑀲𑀺𑀬𑀼𑀁 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸𑀤𑀺𑀥𑀫𑁆𑀫𑀸 𑀯𑀺𑀬. 𑀦 𑀢𑁂𑀲𑀁 𑀯𑀺𑀧𑁆𑀧𑀬𑁄𑀕𑁄 𑀦𑀢𑁆𑀣𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀲𑀫𑁆𑀪𑀯𑀢𑁄. 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀁 𑀅𑀦𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑀢𑁆𑀢𑀸 𑀦 ‘‘𑀯𑀺𑀧𑁆𑀧𑀬𑁄𑀕𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀸𑀳 ‘‘𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀲𑀗𑁆𑀕𑀳𑀺𑀢𑀸’’𑀢𑀺. 𑀉𑀪𑀬𑀸𑀪𑀸𑀯𑀢𑁄𑀢𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀸𑀪𑀸𑀯𑀢𑁄. 𑀅𑀦𑀸𑀭𑀫𑁆𑀫𑀡𑀲𑀳𑀺𑀢𑀲𑀩𑁆𑀩𑀯𑀺𑀜𑁆𑀜𑀸𑀡𑀢𑀁𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀢𑀤𑀼𑀪𑀬𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀘𑁂𑀢𑀲𑀺𑀓𑀮𑁄𑀓𑀺𑀬𑀧𑀤𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀭𑀲𑀫𑀦𑀬𑀅𑀲𑀗𑁆𑀕𑀳𑀺𑀢𑁂𑀦𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀘𑀼𑀤𑁆𑀤𑀲𑀫𑀦𑀬𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸

𑁪𑁫𑁬. 𑀥𑀫𑁆𑀫𑀲𑀪𑀸𑀯𑀫𑀢𑁆𑀢𑀢𑁆𑀢𑀸𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑁆𑀢𑀸 𑀅𑀯𑀢𑁆𑀣𑀸𑀯𑀺𑀲𑁂𑀲𑀫𑀢𑁆𑀢𑀢𑁆𑀢𑀸.

𑀲𑀫𑀼𑀘𑁆𑀙𑀺𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑁄. 𑀲𑀗𑁆𑀕𑀳𑀸𑀤𑀺𑀯𑀺𑀘𑀸𑀭𑀧𑀭𑀺𑀦𑀺𑀝𑁆𑀞𑀸𑀦𑀪𑀽𑀢𑁄 𑀘𑀼𑀤𑁆𑀤𑀲𑀫𑀦𑀬𑁄. 𑀢𑁂𑀦𑀸𑀳 ‘‘𑀧𑀭𑀺𑀬𑁄𑀲𑀸𑀦𑁂 𑀦𑀬𑁂’’𑀢𑀺. 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀯𑀺𑀯𑀺𑀢𑁆𑀢𑀸 𑀧𑀼𑀘𑁆𑀙𑀸 𑀫𑁄𑀖𑀧𑀼𑀘𑁆𑀙𑀸, 𑀲𑀸 𑀢𑀣𑀸𑀪𑀽𑀢𑀸𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀥𑀫𑁆𑀫𑀸𑀪𑀸𑀯𑀲𑁆𑀲 𑀜𑀸𑀧𑀺𑀓𑀸 𑀳𑁄𑀢𑀻𑀢𑀺 𑀆𑀳 ‘‘𑀢𑁂𑀲𑀁 𑀧𑀼𑀘𑁆𑀙𑀸𑀬 𑀫𑁄𑀖𑀢𑁆𑀢𑀸 𑀢𑁂 𑀦 𑀮𑀩𑁆𑀪𑀦𑁆𑀢𑀻’’𑀢𑀺. 𑀫𑁄𑀖𑀸 𑀧𑀼𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀫𑁄𑀖𑀧𑀼𑀘𑁆𑀙𑀓𑁄. 𑀅𑀝𑁆𑀞𑀫𑁄 𑀦𑀬𑁄 𑀢𑀢𑁆𑀣 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 𑀫𑁄𑀖𑀢𑁆𑀢𑀸. 𑀢𑁂𑀦 𑀘 𑀲𑀳𑀸𑀢𑀺 𑀢𑁂𑀦 𑀅𑀝𑁆𑀞𑀫𑀦𑀬𑁂𑀦 𑀲𑀤𑁆𑀥𑀺𑀁 𑀇𑀫𑀲𑁆𑀫𑀺𑀁 𑀑𑀲𑀸𑀦𑀦𑀬𑁂 𑀅𑀝𑁆𑀞𑀫𑀦𑀬𑁂 𑀘 𑀑𑀲𑀸𑀦𑀦𑀬𑁂 𑀘 𑀏𑀢𑁂 𑀥𑀫𑁆𑀫𑀸𑀬𑀢𑀦𑀸𑀤𑀬𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀦 𑀮𑀩𑁆𑀪𑀦𑁆𑀢𑀺. 𑀯𑀺𑀧𑁆𑀧𑀬𑁄𑀕𑀲𑁆𑀲𑀧𑀺 𑀅𑀪𑀸𑀯𑀸𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳.

𑀘𑀼𑀤𑁆𑀤𑀲𑀫𑀦𑀬𑀯𑀺𑀧𑁆𑀧𑀬𑀼𑀢𑁆𑀢𑁂𑀦𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀸𑀢𑀼𑀓𑀣𑀸𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.