𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸

𑁩𑁪𑁦. 𑀬𑀲𑁆𑀫𑀸 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀲𑀫𑀣𑀧𑁆𑀧𑀢𑁆𑀢𑀫𑁂𑀯 𑀉𑀓𑁆𑀓𑁄𑀝𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁪𑁧. 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯𑀸𑀢𑀺 𑀯𑀺𑀦𑀬𑀮𑀓𑁆𑀔𑀡𑀁 𑀯𑀺𑀦𑀸 𑀓𑁂𑀯𑀮𑀁 𑀥𑀫𑁆𑀫𑀤𑁂𑀲𑀦𑀸𑀫𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀧𑀺 𑀯𑀺𑀦𑀺𑀘𑁆𑀙𑀬𑁂𑀦𑀸𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀔𑀦𑁆𑀥𑀓𑀢𑁄 𑀘 𑀧𑀭𑀺𑀯𑀸𑀭𑀢𑁄 𑀘 𑀲𑀼𑀢𑁆𑀢𑁂𑀦𑀸𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀢𑁄 𑀆𑀦𑀻𑀢𑀲𑀼𑀢𑁆𑀢𑁂𑀦. 𑀦𑀺𑀚𑁆𑀛𑀸𑀧𑁂𑀦𑁆𑀢𑀻𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀺.

𑁩𑁪𑁨. 𑀓𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀁. 𑀓𑀻𑀤𑀺𑀲𑀸𑀦𑀁? 𑀬𑀸𑀯𑀢𑀢𑀺𑀬𑀲𑀫𑀦𑀼𑀪𑀸𑀲𑀦𑀸𑀤𑀻𑀦𑀁.

𑁩𑁪𑁩. 𑀢𑀁 𑀳𑀻𑀢𑀺 𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

𑁩𑁪𑁪. 𑀅𑀥𑀺𑀓𑀭𑀡𑁂𑀲𑀼 𑀬𑁂𑀦 𑀅𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀬𑀤𑀸 𑀅𑀥𑀺𑀓𑀭𑀡𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑀤𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑁂𑀯 𑀲𑀫𑁆𑀫𑀦𑁆𑀢𑀺, 𑀦 𑀅𑀜𑁆𑀜𑁂𑀳𑀺 𑀅𑀥𑀺𑀓𑀭𑀡𑁂𑀳𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁩. ‘‘𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀫𑁂 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀧𑀺 ‘‘𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸 𑀓𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀯𑀺𑀪𑀚𑀺𑀢𑁆𑀯𑀸𑀯 𑀲𑀢𑀺𑀯𑀺𑀦𑀬𑀸𑀤𑀻𑀦𑀁 𑀙𑀦𑁆𑀦𑀜𑁆𑀜𑁂𑀯 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀢𑀁 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀺 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦’’𑀦𑁆𑀢𑀺𑀆𑀤𑀺. 𑀲𑀢𑀺𑀯𑀺𑀦𑀬𑀸𑀤𑀻𑀦𑀁 𑀯𑀺𑀬 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀻𑀦𑀁 𑀓𑀺𑀘𑁆𑀘𑀬𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀓𑀫𑁆𑀫𑀲𑀗𑁆𑀕𑀳𑀸𑀪𑀸𑀯𑁂𑀦𑀸’’𑀢𑀺.