𑀉𑀧𑁄𑀲𑀣𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸

𑁩𑁩𑁨. ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀻𑀢𑀺𑀆𑀤𑀺 𑀧𑀯𑀸𑀭𑀡𑀸𑀓𑀣𑀸 𑀦𑀸𑀫𑀸’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀅𑀢𑁆𑀣𑀯𑀲𑀧𑀓𑀭𑀡𑀯𑀡𑁆𑀡𑀦𑀸

𑁩𑁩𑁪. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀸𑀬 𑀧𑀤𑀲𑀢𑀁 𑀯𑀼𑀢𑁆𑀢𑀦𑁆𑀢𑀺 𑀏𑀓𑀫𑀽𑀮𑀓𑀦𑀬𑁂 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀸𑀬 𑀓𑀢𑀸𑀬 𑀲𑀗𑁆𑀔𑀮𑀺𑀓𑀦𑀬𑁂 𑀯𑀼𑀢𑁆𑀢𑀧𑀤𑁂𑀳𑀺 𑀲𑀤𑁆𑀥𑀺𑀁 𑀧𑀤𑀲𑀢𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀏𑀓𑀫𑀽𑀮𑀓𑁂 𑀏𑀯 𑀦𑀬𑁂 𑀦 𑀲𑀓𑁆𑀓𑀸 𑀧𑀤𑀲𑀢𑀁 𑀮𑀤𑁆𑀥𑀼𑀁. 𑀏𑀓𑀫𑀽𑀮𑀓𑀦𑀬𑁂𑀳𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀦𑀯 𑀦𑀯 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀸𑀬 𑀦𑀯𑀼𑀢𑀺 𑀧𑀤𑀸𑀦𑀺𑀬𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀦𑀯𑀼𑀢𑀺 𑀧𑀤𑀸𑀦𑀺 𑀲𑀗𑁆𑀔𑀮𑀺𑀓𑀦𑀬𑁂 𑀩𑀤𑁆𑀥𑀘𑀓𑁆𑀓𑀯𑀲𑁂𑀦 𑀬𑁄𑀚𑀺𑀢𑁂 𑀤𑀲 𑀧𑀤𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀤𑀲𑀢𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀇𑀢𑁄 𑀅𑀜𑁆𑀜𑀣𑀸 𑀧𑀦 𑀉𑀪𑁄𑀲𑀼𑀧𑀺 𑀦𑀬𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀜𑁆𑀘 𑀬𑀣𑀸 𑀮𑀩𑁆𑀪𑀢𑀺, 𑀢𑀣𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬𑀫𑁂𑀯 𑀅𑀫𑁆𑀳𑁂𑀳𑀺 𑀤𑀲𑁆𑀲𑀺𑀢𑀁, 𑀢𑀁 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 ‘‘𑀧𑀤𑀲𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀢𑁆𑀣 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀧𑀤𑀲𑁆𑀲 𑀯𑀲𑁂𑀦 𑀅𑀢𑁆𑀣𑀲𑀢𑀁, 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀯𑀲𑁂𑀦 𑀥𑀫𑁆𑀫𑀲𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀧𑀤𑀲𑀢𑁂 ‘‘𑀲𑀗𑁆𑀖𑀲𑀼𑀝𑁆𑀞𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀼𑀭𑀺𑀫𑀧𑀤𑀸𑀦𑀁 𑀯𑀲𑁂𑀦 𑀥𑀫𑁆𑀫𑀲𑀢𑀁, ‘‘𑀲𑀗𑁆𑀖𑀨𑀸𑀲𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑀘𑁆𑀙𑀺𑀫𑀧𑀤𑀸𑀦𑀁 𑀯𑀲𑁂𑀦 𑀅𑀢𑁆𑀣𑀲𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.