𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀲𑀗𑁆𑀕𑀻𑀢𑀺𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁩𑁭. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁩𑁧) 𑀧𑀸𑀯𑀸𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀼𑀲𑀺𑀦𑀸𑀭𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄. 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀢𑀺 𑀫𑀳𑀸𑀘𑀸𑀝𑀺𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀁 𑀆𑀕𑀦𑁆𑀢𑀼𑀓𑀤𑀡𑁆𑀟𑀓𑁂 𑀞𑀧𑁂𑀢𑁆𑀯𑀸 𑀙𑀢𑁆𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸. 𑀅𑀤𑁆𑀤𑀲𑀁 𑀔𑁄𑀢𑀺 𑀆𑀕𑀘𑁆𑀙𑀦𑁆𑀢𑀁 𑀤𑀽𑀭𑀢𑁄𑀯 𑀅𑀤𑁆𑀤𑀲𑀁. 𑀤𑀺𑀲𑁆𑀯𑀸 𑀘 𑀧𑀦 ‘‘𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀘𑁂 𑀔𑁄 𑀧𑀦 𑀦𑀺𑀲𑀺𑀦𑁆𑀦𑀓𑁄𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀓𑁆𑀓𑀫𑁆𑀫 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀫𑀡𑀺𑀘𑀫𑁆𑀫𑀁 𑀯𑀺𑀬 𑀤𑀲𑀩𑀮𑀤𑀢𑁆𑀢𑀺𑀬𑀁 𑀫𑁂𑀖𑀯𑀡𑁆𑀡𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀓𑀢𑁂𑀦 𑀕𑀸𑀭𑀯𑁂𑀦 𑀆𑀚𑀻𑀯𑀓𑀲𑁆𑀲 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 ‘‘𑀅𑀧𑀸𑀯𑀼𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’’𑀢𑀺 𑀆𑀳. 𑀓𑀺𑀁 𑀧𑀦 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀺 𑀅𑀚𑀸𑀦𑀦𑁆𑀢𑁄𑀢𑀺? 𑀆𑀯𑀚𑁆𑀚𑀦𑀧𑁆𑀧𑀝𑀺𑀩𑀤𑁆𑀥𑀁 𑀔𑀻𑀡𑀸𑀲𑀯𑀸𑀦𑀁 𑀚𑀸𑀦𑀦𑀁. 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀧𑀦𑁂𑀲 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀻𑀢𑀺 𑀏𑀓𑁂. 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀮𑁂𑀡𑀫𑀡𑁆𑀟𑀧𑀸𑀤𑀻𑀲𑀼 𑀦𑀺𑀘𑁆𑀘𑀁 𑀲𑀫𑀸𑀧𑀢𑁆𑀢𑀺𑀨𑀮𑁂𑀦𑁂𑀯 𑀬𑀸𑀧𑁂𑀢𑀺. 𑀓𑀼𑀮𑀲𑀦𑁆𑀢𑀓𑀫𑁆𑀧𑀺 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄𑀯 𑀪𑀺𑀓𑁆𑀔𑀁 𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀓𑀺𑀭 ‘‘𑀇𑀫𑀺𑀦𑀸 𑀫𑁂 𑀧𑀘𑁆𑀙𑀺𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀬𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀯𑀸 𑀤𑁂𑀦𑁆𑀢𑀺, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺 𑀏𑀯𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀢𑀸𑀬 𑀦 𑀚𑀸𑀦𑀺. 𑀇𑀢𑀺 𑀅𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑁂𑀢𑁆𑀣 𑀅𑀚𑀸𑀦𑀦𑀓𑀸𑀭𑀡𑀁 𑀅𑀢𑁆𑀣𑀺. 𑀅𑀪𑀺𑀮𑀓𑁆𑀔𑀺𑀢𑀁 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀸𑀤𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺. 𑀣𑁂𑀭𑀲𑁆𑀲 𑀧𑀦 𑀧𑀭𑀺𑀲𑀸𑀬 𑀓𑁂𑀳𑀺𑀘𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀸 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑁂𑀳𑀺𑀘𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀢𑀢𑁆𑀣 𑀬𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑀸𑀯. 𑀬𑁂𑀳𑀺𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑀸𑀯. 𑀢𑀢𑁆𑀣 𑀬𑁂𑀳𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂 𑀅𑀪𑀺𑀤𑀲𑁆𑀲𑀦𑀓𑀸𑀫𑀢𑀸𑀬 𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀪𑀕𑀯𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀸 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀘𑀻𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀏𑀓𑀯𑀢𑁆𑀣𑀸 𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀯𑀸 𑀉𑀭𑀸𑀦𑀺 𑀧𑀝𑀺𑀧𑀺𑀲𑀦𑁆𑀢𑀸 𑀧𑀭𑁄𑀤𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀆𑀕𑀢𑀧𑀁𑀲𑀼𑀓𑀽𑀮𑀺𑀓𑀸 𑀲𑀬𑀫𑁆𑀧𑀺 𑀇𑀢𑁆𑀣𑀺𑀬𑁄 𑀯𑀺𑀬 𑀧𑀭𑁄𑀤𑀦𑁆𑀢𑀺, 𑀢𑁂 𑀓𑀺𑀁 𑀅𑀫𑁆𑀳𑁂 𑀲𑀫𑀲𑁆𑀲𑀸𑀲𑁂𑀦𑁆𑀢𑀻’’𑀢𑀺 𑀫𑀬𑁆𑀳𑀁 𑀤𑁄𑀲𑀁 𑀤𑀲𑁆𑀲𑀦𑁆𑀢𑀺. 𑀇𑀤𑀁 𑀧𑀦 𑀲𑀼𑀜𑁆𑀜𑀁 𑀫𑀳𑀸𑀭𑀜𑁆𑀜𑀁, 𑀇𑀥 𑀬𑀣𑀸 𑀢𑀣𑀸 𑀭𑁄𑀤𑀦𑁆𑀢𑁂𑀲𑀼 𑀤𑁄𑀲𑁄 𑀦𑀢𑁆𑀣𑀺. 𑀧𑀼𑀭𑀺𑀫𑀢𑀭𑀁 𑀲𑀼𑀢𑁆𑀯𑀸 𑀦𑀸𑀫 𑀲𑁄𑀓𑁄𑀧𑀺 𑀢𑀦𑀼𑀓𑁄 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀲𑀢𑀼𑀧𑁆𑀧𑀸𑀤𑀮𑀸𑀪𑀢𑁆𑀣𑀁 𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀺.

𑀅𑀚𑁆𑀚 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀚𑁆𑀚 𑀤𑀺𑀯𑀲𑀢𑁄 𑀧𑀝𑀺𑀮𑁄𑀫𑀢𑁄 𑀲𑀢𑁆𑀢𑀫𑁂 𑀅𑀳𑀦𑀺 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀢𑁄 𑀫𑁂 𑀇𑀤𑀦𑁆𑀢𑀺 𑀢𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑀢𑁄. 𑀅𑀯𑀻𑀢𑀭𑀸𑀕𑀸𑀢𑀺 𑀧𑀼𑀣𑀼𑀚𑁆𑀚𑀦𑀸 𑀘𑁂𑀯 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀘. 𑀢𑁂𑀲𑀜𑁆𑀳𑀺 𑀤𑁄𑀫𑀦𑀲𑁆𑀲𑀁 𑀅𑀧𑁆𑀧𑀳𑀻𑀦𑀁, 𑀢𑀲𑁆𑀫𑀸 𑀢𑁂𑀧𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀉𑀪𑁄 𑀳𑀢𑁆𑀣𑁂 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀭𑁄𑀤𑀦𑁆𑀢𑀺. 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀻𑀢𑀺 𑀙𑀺𑀦𑁆𑀦𑀸𑀦𑀁 𑀧𑀸𑀢𑁄 𑀯𑀺𑀬 𑀙𑀺𑀦𑁆𑀦𑀧𑀸𑀢𑁄, 𑀢𑀁 𑀙𑀺𑀦𑁆𑀦𑀧𑀸𑀢𑀁, 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄𑀬𑀁, 𑀫𑀚𑁆𑀛𑁂 𑀙𑀺𑀦𑁆𑀦𑀸 𑀯𑀺𑀬 𑀳𑀼𑀢𑁆𑀯𑀸 𑀬𑀢𑁄 𑀯𑀸 𑀢𑀢𑁄 𑀯𑀸 𑀧𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀯𑀝𑁆𑀝𑀦𑁆𑀢𑀻𑀢𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀯𑀝𑁆𑀝𑀦𑁆𑀢𑀺. 𑀬𑀢𑁆𑀣 𑀧𑀢𑀺𑀢𑀸, 𑀢𑀢𑁄 𑀓𑀢𑀺𑀧𑀬𑀭𑀢𑀦𑀝𑁆𑀞𑀸𑀦𑀁 𑀯𑀝𑁆𑀝𑀦𑀯𑀲𑁂𑀦𑁂𑀯 𑀕𑀦𑁆𑀢𑁆𑀯𑀸 𑀧𑀼𑀦 𑀬𑀣𑀸𑀧𑀢𑀺𑀢𑀫𑁂𑀯 𑀞𑀸𑀦𑀁 𑀯𑀝𑁆𑀝𑀦𑀯𑀲𑁂𑀦 𑀆𑀕𑀘𑁆𑀙𑀦𑁆𑀢𑀺. 𑀯𑀺𑀯𑀝𑁆𑀝𑀦𑁆𑀢𑀻𑀢𑀺 𑀬𑀢𑁆𑀣 𑀧𑀢𑀺𑀢𑀸, 𑀢𑀢𑁄 𑀦𑀺𑀯𑀝𑁆𑀝𑀦𑁆𑀢𑀺, 𑀧𑀢𑀺𑀢𑀝𑁆𑀞𑀸𑀦𑀢𑁄 𑀧𑀭𑀪𑀸𑀕𑀁 𑀯𑀝𑁆𑀝𑀫𑀸𑀦𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀧𑀼𑀭𑀢𑁄 𑀯𑀝𑁆𑀝𑀦𑀁 𑀆𑀯𑀝𑁆𑀝𑀦𑀁, 𑀧𑀲𑁆𑀲𑀢𑁄 𑀧𑀘𑁆𑀙𑀢𑁄 𑀘 𑀯𑀝𑁆𑀝𑀦𑀁 𑀯𑀺𑀯𑀝𑁆𑀝𑀦𑀁. 𑀢𑀲𑁆𑀫𑀸 𑀤𑁆𑀯𑁂 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀲𑀓𑀺𑀁 𑀧𑀼𑀭𑀢𑁄 𑀲𑀓𑀺𑀁 𑀧𑀘𑁆𑀙𑀢𑁄 𑀲𑀓𑀺𑀁 𑀯𑀸𑀫𑀢𑁄 𑀲𑀓𑀺𑀁 𑀤𑀓𑁆𑀔𑀺𑀡𑀢𑁄 𑀲𑀫𑁆𑀧𑀭𑀺𑀯𑀝𑁆𑀝𑀫𑀸𑀦𑀸𑀧𑀺 𑀆𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀻𑀢𑀭𑀸𑀕𑀸𑀢𑀺 𑀧𑀳𑀻𑀦𑀤𑁄𑀫𑀦𑀲𑁆𑀲𑀸 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀲𑀺𑀮𑀸𑀣𑀫𑁆𑀪𑀲𑀤𑀺𑀲𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸. 𑀓𑀸𑀫𑀜𑁆𑀳𑀺 𑀤𑁄𑀫𑀦𑀲𑁆𑀲𑁂 𑀅𑀲𑀢𑀺𑀧𑀺 𑀏𑀓𑀘𑁆𑀘𑁄 𑀭𑀸𑀕𑁄 𑀳𑁄𑀢𑀺𑀬𑁂𑀯, 𑀭𑀸𑀕𑁂 𑀧𑀦 𑀅𑀲𑀢𑀺 𑀤𑁄𑀫𑀦𑀲𑁆𑀲𑀲𑁆𑀲 𑀅𑀲𑀫𑁆𑀪𑀯𑁄𑀬𑁂𑀯. 𑀢𑀤𑁂𑀓𑀝𑁆𑀞𑀪𑀸𑀯𑀢𑁄 𑀳𑀺 𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑀤𑁄𑀫𑀦𑀲𑁆𑀲𑀸 𑀯𑀼𑀢𑁆𑀢𑀸, 𑀦 𑀔𑀻𑀡𑀸𑀲𑀯𑀸 𑀏𑀯.

𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀻𑀢𑀺𑀆𑀤𑀻𑀲𑀼 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑁂𑀳𑀺 𑀫𑀦𑀯𑀟𑁆𑀠𑀦𑀢𑁄 𑀫𑀦𑀸𑀧𑁂𑀳𑀺 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀻𑀆𑀤𑀺𑀓𑁂𑀳𑀺. 𑀦𑀸𑀦𑀸𑀪𑀸𑀯𑁄𑀢𑀺 𑀚𑀸𑀢𑀺𑀬𑀸 𑀦𑀸𑀦𑀸𑀪𑀸𑀯𑁄, 𑀚𑀸𑀢𑀺𑀅𑀦𑀼𑀭𑀽𑀧𑀕𑀫𑀦𑁂𑀦 𑀯𑀺𑀲𑀼𑀁 𑀪𑀸𑀯𑁄, 𑀅𑀲𑀫𑁆𑀩𑀤𑁆𑀥𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀺𑀦𑀸𑀪𑀸𑀯𑁄𑀢𑀺 𑀫𑀭𑀡𑁂𑀦 𑀯𑀺𑀦𑀸𑀪𑀸𑀯𑁄, 𑀘𑀼𑀢𑀺𑀬𑀸 𑀢𑁂𑀦𑀢𑁆𑀢𑀪𑀸𑀯𑁂𑀦 𑀅𑀧𑀼𑀦𑀧𑀯𑀢𑁆𑀢𑀦𑀢𑁄 𑀯𑀺𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀪𑀯𑁂𑀦 𑀅𑀜𑁆𑀜𑀣𑀸𑀪𑀸𑀯𑁄, 𑀪𑀯𑀦𑁆𑀢𑀭𑀕𑁆𑀕𑀳𑀡𑁂𑀦 ‘‘𑀓𑀸𑀫𑀸𑀯𑀘𑀭𑀲𑀢𑁆𑀢𑁄 𑀭𑀽𑀧𑀸𑀯𑀘𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣𑀸𑀧𑀺 ‘‘𑀫𑀦𑀼𑀲𑁆𑀲𑁄 𑀤𑁂𑀯𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘 𑀧𑀼𑀭𑀺𑀫𑀸𑀓𑀸𑀭𑀢𑁄 𑀅𑀜𑁆𑀜𑀸𑀓𑀸𑀭𑀢𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀢𑀲𑁆𑀫𑀸. 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀓𑀼𑀢𑁄 𑀓𑀼𑀳𑀺𑀁 𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀔𑀦𑁆𑀥𑀧𑁆𑀧𑀯𑀢𑁆𑀢𑁂 𑀬𑀁 𑀢𑀁 𑀚𑀸𑀢𑀁…𑀧𑁂… 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀮𑀤𑁆𑀥𑀼𑀁 𑀲𑀓𑁆𑀓𑀸, 𑀦 𑀲𑀓𑁆𑀓𑀸 𑀏𑀯 𑀢𑀸𑀤𑀺𑀲𑀲𑁆𑀲 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄, 𑀢𑀲𑁆𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸𑀧𑀺 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸𑀧𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸𑀧𑀺 𑀤𑁂𑀯𑁄𑀭𑁄𑀳𑀡𑀁 𑀓𑀢𑁆𑀯𑀸𑀧𑀺 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀜𑁆𑀘 𑀢𑀣𑀸𑀕𑀢𑀲𑁆𑀲𑀧𑀺 𑀲𑀭𑀻𑀭𑀁 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀭𑁄𑀤𑀦𑁆𑀢𑁂𑀦𑀧𑀺 𑀓𑀦𑁆𑀤𑀦𑁆𑀢𑁂𑀦𑀧𑀺 𑀦 𑀲𑀓𑁆𑀓𑀸 𑀢𑀁 𑀓𑀸𑀭𑀡𑀁 𑀮𑀤𑁆𑀥𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦𑀸𑀯𑀼𑀲𑁄, 𑀲𑀫𑀬𑁂𑀦 𑀲𑀼𑀪𑀤𑁆𑀤𑁄 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀗𑁆𑀕𑀻𑀢𑀺𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸

𑁪𑁪𑁧. 𑀲𑀫𑀽𑀳𑀦𑁂𑀬𑁆𑀬𑀸𑀢𑀺 𑀆𑀓𑀗𑁆𑀔𑀫𑀸𑀦𑁄 𑀲𑀫𑀽𑀳𑀦𑀢𑀼, 𑀬𑀤𑀺 𑀇𑀘𑁆𑀙𑀢𑀺, 𑀲𑀫𑀽𑀳𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 ‘‘𑀲𑀫𑀽𑀳𑀦𑀣𑀸’’𑀢𑀺 𑀏𑀓𑀁𑀲𑁂𑀦𑁂𑀯 𑀅𑀯𑀢𑁆𑀯𑀸 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 𑀯𑀺𑀓𑀧𑁆𑀧𑀯𑀘𑀦𑁂𑀦𑁂𑀯 𑀪𑀕𑀯𑀸 𑀞𑀧𑁂𑀲𑀻𑀢𑀺? 𑀫𑀳𑀸𑀓𑀲𑁆𑀲𑀧𑀲𑁆𑀲 𑀜𑀸𑀡𑀩𑀮𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ‘‘𑀲𑀫𑀽𑀳𑀦𑀣𑀸𑀢𑀺 𑀯𑀼𑀢𑁆𑀢𑁂𑀧𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀓𑀲𑁆𑀲𑀧𑁄 𑀦 𑀲𑀫𑀽𑀳𑀦𑀺𑀲𑁆𑀲𑀢𑀻’’𑀢𑀺, 𑀢𑀲𑁆𑀫𑀸 𑀯𑀺𑀓𑀧𑁆𑀧𑁂𑀦𑁂𑀯 𑀞𑀧𑁂𑀲𑀺. 𑀬𑀤𑀺 𑀅𑀲𑀫𑀽𑀳𑀦𑀦𑀁 𑀤𑀺𑀝𑁆𑀞𑀁, 𑀢𑀤𑁂𑀯 𑀘 𑀇𑀘𑁆𑀙𑀺𑀢𑀁, 𑀅𑀣 𑀓𑀲𑁆𑀫𑀸 𑀪𑀕𑀯𑀸 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀫𑀽𑀳𑀦𑀢𑀽’’𑀢𑀺 𑀅𑀯𑁄𑀘𑀸𑀢𑀺? 𑀢𑀣𑀸𑀭𑀽𑀧𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦. 𑀲𑀦𑁆𑀢𑀺 𑀳𑀺 𑀓𑁂𑀘𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀸, 𑀢𑁂𑀲𑀁 𑀢𑀣𑀸 𑀅𑀯𑀼𑀘𑁆𑀘𑀫𑀸𑀦𑁂 𑀪𑀕𑀯𑀢𑀺 𑀯𑀺𑀖𑀸𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀢𑀣𑀸 𑀧𑀦 𑀯𑀼𑀢𑁆𑀢𑁂 𑀢𑁂𑀲𑀁 𑀯𑀺𑀖𑀸𑀢𑁄 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀫𑁆𑀳𑀸𑀓𑀫𑁂𑀯𑀸𑀬𑀁 𑀤𑁄𑀲𑁄, 𑀬𑀢𑁄 𑀅𑀫𑁆𑀳𑁂𑀲𑀼𑀬𑁂𑀯 𑀓𑁂𑀘𑀺 𑀲𑀫𑀽𑀳𑀦𑀦𑀁 𑀦 𑀇𑀘𑁆𑀙𑀦𑁆𑀢𑀻𑀢𑀺. 𑀓𑁂𑀘𑀺 ‘‘𑀲𑀓𑀮𑀲𑁆𑀲 𑀧𑀦 𑀲𑀸𑀲𑀦𑀲𑁆𑀲 𑀲𑀗𑁆𑀖𑀸𑀬𑀢𑁆𑀢𑀪𑀸𑀯𑀓𑀭𑀡𑀢𑁆𑀣𑀁 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀲𑀢𑁆𑀣𑀸𑀭𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀚𑀻𑀯𑀺𑀢𑀁 𑀯𑀺𑀬 𑀭𑀓𑁆𑀔𑀦𑁆𑀢𑀺. 𑀢𑀣𑀸 𑀳𑀺 𑀢𑁂 ‘‘𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀲𑀫𑀽𑀳𑀦𑀢𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀲𑀫𑀽𑀳𑀦𑀺𑀁𑀲𑀼. 𑀅𑀜𑁆𑀜𑀤𑀢𑁆𑀣𑀼 𑀧𑀼𑀭𑀢𑁄 𑀯𑀺𑀬 𑀢𑀲𑁆𑀲 𑀅𑀘𑁆𑀘𑀬𑁂𑀧𑀺 𑀭𑀓𑁆𑀔𑀺𑀁𑀲𑀼𑀬𑁂𑀯𑀸𑀢𑀺 𑀲𑀢𑁆𑀣𑀼 𑀲𑀸𑀲𑀦𑀲𑁆𑀲 𑀲𑀗𑁆𑀖𑀲𑁆𑀲 𑀘 𑀫𑀳𑀦𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀜𑁆𑀜𑁂𑀧𑀺 𑀯𑀸 𑀪𑀺𑀓𑁆𑀔𑀽 ‘‘𑀓𑀢𑀫𑀁 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀓𑀁, 𑀓𑀢𑀫𑀁 𑀅𑀦𑀼𑀔𑀼𑀤𑁆𑀤𑀓’’𑀦𑁆𑀢𑀺 𑀦 𑀧𑀼𑀘𑁆𑀙𑀺𑀁𑀲𑀼 𑀲𑀫𑀽𑀳𑀦𑀚𑁆𑀛𑀸𑀲𑀬𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀢𑁂𑀦𑁂𑀯 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀏𑀯𑀜𑁆𑀳𑀺 𑀯𑀤𑀦𑁆𑀢𑁂𑀳𑀺 ‘‘𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀇𑀫𑁂 𑀦𑀸𑀫𑀸’’𑀢𑀺 𑀅𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀩𑁆𑀩𑁂𑀲𑀁 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑁪𑁪𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀻𑀢𑀺 𑀏𑀢𑁆𑀣 𑀧𑀦 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀫𑀁 𑀔𑀼𑀤𑁆𑀤𑀓𑀁, 𑀓𑀢𑀫𑀁 𑀅𑀦𑀼𑀔𑀼𑀤𑁆𑀤𑀓𑀦𑁆𑀢𑀺 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑁂 ‘𑀤𑀼𑀓𑁆𑀓𑀝𑀁 𑀫𑀳𑀸𑀭𑀸𑀚, 𑀔𑀼𑀤𑁆𑀤𑀓𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀦𑀼𑀔𑀼𑀤𑁆𑀤𑀓’𑀦𑁆𑀢𑀺 (𑀫𑀺. 𑀧. 𑁪.𑁨.𑁧) 𑀯𑀼𑀢𑁆𑀢𑀢𑁆𑀢𑀸 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀁 𑀚𑀸𑀦𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀦 𑀢𑀁 𑀅𑀚𑀸𑀦𑀦𑁆𑀢𑁄 ‘𑀲𑀼𑀡𑀸𑀢𑀼 𑀫𑁂 𑀆𑀯𑀼𑀲𑁄’𑀢𑀺𑀆𑀤𑀺𑀦𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀲𑀻’’𑀢𑀺, 𑀦 𑀢𑀁 𑀏𑀯𑀁 𑀕𑀳𑁂𑀢𑀩𑁆𑀩𑀁. 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑀳𑀺 𑀧𑀭𑁂𑀲𑀁 𑀯𑀸𑀤𑀧𑀣𑁄𑀧𑀘𑁆𑀙𑁂𑀤𑀦𑀢𑁆𑀣𑀁 𑀲𑀗𑁆𑀕𑀻𑀢𑀺𑀓𑀸𑀮𑁂 𑀥𑀫𑁆𑀫𑀲𑀗𑁆𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀕𑀳𑀺𑀢𑀓𑁄𑀝𑁆𑀞𑀸𑀲𑁂𑀲𑀼 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑀫𑁂𑀯 𑀕𑀳𑁂𑀢𑁆𑀯𑀸 𑀫𑀺𑀮𑀺𑀦𑁆𑀤𑀭𑀸𑀚𑀸𑀦𑀁 𑀲𑀜𑁆𑀜𑀸𑀧𑁂𑀲𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀦 𑀏𑀓𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀅𑀲𑀫𑀽𑀳𑀦𑀺𑀢𑀼𑀓𑀸𑀫𑀢𑀸𑀬 𑀢𑀣𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀲𑀺.

𑀢𑀢𑁆𑀣 𑀕𑀺𑀳𑀺𑀕𑀢𑀸𑀦𑀻𑀢𑀺 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀕𑀺𑀳𑀻𑀲𑀼 𑀕𑀢𑀸𑀦𑀺, 𑀢𑁂𑀳𑀺 𑀜𑀸𑀢𑀸𑀦𑀺 𑀕𑀺𑀳𑀺𑀕𑀢𑀸𑀦𑀻𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀽𑀫𑀓𑀸𑀮𑁄 𑀏𑀢𑀲𑁆𑀲𑀸𑀢𑀺 𑀥𑀽𑀫𑀓𑀸𑀮𑀺𑀓𑀁 𑀘𑀺𑀢𑀓𑀥𑀽𑀫𑀯𑀽𑀧𑀲𑀫𑀢𑁄 𑀧𑀭𑀁 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀅𑀧𑁆𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁩𑁬; 𑀅. 𑀦𑀺. 𑀅𑀝𑁆𑀞. 𑁩.𑁭.𑁨𑁩) 𑀦𑀯𑀁 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀩𑀦𑁆𑀥𑀦𑁆𑀢𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑀺 𑀦𑀸𑀫 𑀧𑀼𑀭𑀸𑀡𑀲𑀦𑁆𑀣𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀽 𑀯𑀺𑀬. 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀦𑀸𑀫 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀧𑀦 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑀸 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀦 𑀯𑀢𑁆𑀢𑀦𑁆𑀢𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀯𑀺𑀬. 𑀦𑀯𑀁 𑀧𑀦 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀅𑀩𑀦𑁆𑀥𑀦𑁆𑀢𑀸, 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀫𑁆𑀧𑀺 𑀘 𑀲𑀺𑀓𑁆𑀔𑀸𑀧𑀤𑀁 𑀅𑀲𑀫𑀽𑀳𑀦𑀦𑁆𑀢𑀸 𑀅𑀧𑁆𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀲𑁂𑀦𑁄 𑀯𑀺𑀬 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀺𑀬 𑀘.

𑁪𑁪𑁩. 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂𑀢𑀺 𑀯𑁂𑀲𑀸𑀮𑀺𑀁 𑀦𑀺𑀲𑁆𑀲𑀸𑀬 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀯𑀺𑀳𑀭𑀦𑁆𑀢𑁂𑀦 𑀪𑀕𑀯𑀢𑀸 𑁋

‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄 𑀧𑀦, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺 (𑀤𑀻. 𑀦𑀺. 𑁨.𑁧𑁬𑁬) 𑁋

𑀏𑀯𑀁 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂.

𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀫𑀸𑀭𑁂𑀦 𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄. 𑀫𑀸𑀭𑁄 𑀳𑀺 𑀬𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀣𑁂𑀭𑀲𑁆𑀲 𑀘 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑁂𑀦𑀲𑁆𑀲 𑀫𑀸𑀭𑁄 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀲𑀺. 𑀲𑁄 𑀧𑀦 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀪𑁂𑀭𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀲𑀸𑀯𑁂𑀢𑀺, 𑀢𑀢𑁄 𑀲𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑀫𑀼𑀔𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀁 𑀫𑀤𑁆𑀤𑀢𑀺, 𑀢𑀢𑁄 𑀯𑀺𑀲𑀜𑁆𑀜𑀸𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦𑁂𑀲 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀦 𑀤𑀲𑁆𑀲𑁂𑀲𑀺, 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀦 𑀧𑀝𑀺𑀯𑀺𑀚𑁆𑀛𑀺.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀤𑀡𑁆𑀟𑀓𑀣𑀸𑀯𑀡𑁆𑀡𑀦𑀸

𑁪𑁪𑁫. 𑀉𑀚𑁆𑀚𑀯𑀦𑀺𑀓𑀸𑀬𑀸𑀢𑀺 𑀧𑀝𑀺𑀲𑁄𑀢𑀕𑀸𑀫𑀺𑀦𑀺𑀬𑀸. 𑀭𑀚𑁄𑀳𑀭𑀡𑀦𑁆𑀢𑀺 𑀭𑀚𑁄𑀧𑀼𑀜𑁆𑀙𑀦𑀻. 𑀦 𑀓𑀼𑀮𑀯𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀢𑁆𑀣𑀓𑀯𑀺𑀦𑀸𑀲𑀦𑀁 𑀦 𑀕𑀫𑁂𑀦𑁆𑀢𑀺. 𑀓𑀼𑀘𑁆𑀙𑀺𑀢𑁄 𑀮𑀯𑁄 𑀓𑀼𑀮𑀯𑁄, 𑀅𑀦𑀬𑀯𑀺𑀦𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀗𑁆𑀕𑀻𑀢𑀺𑀬𑀸 𑀯𑀺𑀦𑀬𑀧𑁆𑀧𑀥𑀸𑀦𑀢𑁆𑀢𑀸 ‘‘𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑀧𑁆𑀧𑀥𑀸𑀦𑀸 𑀲𑀗𑁆𑀕𑀻𑀢𑀺 𑀯𑀺𑀦𑀬𑀲𑀗𑁆𑀕𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.