𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀁

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦𑁨. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀻𑀢𑀺 𑀧𑀞𑀫𑀕𑀫𑀦𑁂𑀦 𑀕𑀦𑁆𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻𑀢𑀺 𑀏𑀢𑁆𑀣 𑀕𑁄𑀢𑀫𑀻𑀢𑀺 𑀕𑁄𑀢𑁆𑀢𑀁. 𑀦𑀸𑀫𑀓𑀭𑀡𑀤𑀺𑀯𑀲𑁂 𑀧𑀦𑀲𑁆𑀲𑀸 𑀮𑀤𑁆𑀥𑀲𑀓𑁆𑀓𑀸𑀭𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀬𑀁 𑀥𑀻𑀢𑀭𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀻𑀢𑀺 𑀉𑀪𑀬𑀣𑀸𑀧𑀺 𑀫𑀳𑀢𑀻𑀬𑁂𑀯𑀲𑁆𑀲𑀸 𑀧𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼, 𑀢𑀲𑁆𑀫𑀸 𑀧𑀼𑀢𑁆𑀢𑀧𑀚𑀸𑀬 𑀘𑁂𑀯 𑀥𑀻𑀢𑀼𑀧𑀚𑀸𑀬 𑀘 𑀫𑀳𑀦𑁆𑀢𑀢𑀸𑀬 ‘‘𑀫𑀳𑀸𑀧𑀚𑀸𑀧𑀢𑀻’’𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀇𑀥 𑀧𑀦 𑀕𑁄𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀕𑀯𑀸 𑀓𑀧𑀺𑀮𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀫𑁂𑀯 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀳𑀼𑀮𑀓𑀼𑀫𑀸𑀭𑀁. 𑀘𑀼𑀫𑁆𑀩𑀝𑀓𑀓𑀮𑀳𑁂 𑀧𑀦 𑀉𑀪𑀬𑀦𑀕𑀭𑀯𑀸𑀲𑀺𑀓𑁂𑀲𑀼 𑀬𑀼𑀤𑁆𑀥𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁂𑀲𑀼 𑀲𑀢𑁆𑀣𑀸 𑀕𑀦𑁆𑀢𑁆𑀯𑀸 𑀢𑁂 𑀭𑀸𑀚𑀸𑀦𑁄 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀓𑀣𑁂𑀲𑀺. 𑀭𑀸𑀚𑀸𑀦𑁄 𑀧𑀲𑀻𑀤𑀺𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀅𑀟𑁆𑀠𑀢𑁂𑀬𑁆𑀬𑀲𑀢𑁂 𑀤𑀸𑀭𑀓𑁂 𑀅𑀤𑀁𑀲𑀼. 𑀢𑀸𑀦𑀺 𑀧𑀜𑁆𑀘 𑀓𑀼𑀫𑀸𑀭𑀲𑀢𑀸𑀦𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀅𑀣 𑀦𑁂𑀲𑀁 𑀧𑀚𑀸𑀧𑀢𑀺𑀬𑁄 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑀬𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀦𑀪𑀺𑀭𑀢𑀺𑀬𑀸 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀢𑁂 𑀧𑀜𑁆𑀘𑀲𑀢𑁂 𑀤𑀳𑀭𑀪𑀺𑀓𑁆𑀔𑀽 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀡𑀸𑀮𑀓𑀸𑀮𑁂 𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑁂 𑀧𑀸𑀲𑀸𑀡𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀓𑀣𑀸𑀬 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀢𑁂𑀲𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀧𑀼𑀦 𑀫𑀳𑀸𑀯𑀦𑀁 𑀆𑀦𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂. 𑀢𑁂𑀲𑀁 𑀘𑀺𑀢𑁆𑀢𑀚𑀸𑀦𑀦𑀢𑁆𑀣𑀁 𑀧𑀼𑀦𑀧𑀺 𑀧𑀚𑀸𑀧𑀢𑀺𑀬𑁄 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀢𑁂 ‘‘𑀅𑀪𑀩𑁆𑀩𑀸 𑀫𑀬𑀁 𑀖𑀭𑀸𑀯𑀸𑀲𑀲𑁆𑀲𑀸’’𑀢𑀺 𑀧𑀝𑀺𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀢𑀸 ‘‘𑀦 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀧𑀭𑀖𑀭𑀁 𑀕𑀦𑁆𑀢𑀼𑀁 𑀬𑀼𑀢𑁆𑀢𑀁, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘𑀲𑀢𑀸𑀧𑀺 𑀫𑀳𑀸𑀧𑀚𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀬𑁆𑀬𑁂, 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀣𑀸’’𑀢𑀺 𑀆𑀳𑀁𑀲𑀼. 𑀫𑀳𑀸𑀧𑀚𑀸𑀧𑀢𑀺 𑀘 𑀢𑀸 𑀇𑀢𑁆𑀣𑀺𑀬𑁄 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀜𑁆𑀜𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀉𑀧𑀲𑀗𑁆𑀓𑀫𑀻𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀧𑀓𑁆𑀓𑀸𑀫𑀻𑀢𑀺 𑀧𑀼𑀦 𑀓𑀧𑀺𑀮𑀧𑀼𑀭𑀫𑁂𑀯 𑀧𑀸𑀯𑀺𑀲𑀺.

𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸𑀢𑀺 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀬𑀣𑀸𑀚𑁆𑀛𑀸𑀲𑀬𑁂𑀦 𑀯𑀺𑀳𑀭𑀺𑀢𑁆𑀯𑀸. 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀫𑀳𑀸𑀚𑀦𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀅𑀦𑁄𑀧𑀫𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀦𑁆𑀢𑁄𑀦𑀺𑀯𑁂𑀲𑀦𑀲𑁆𑀫𑀺𑀁𑀬𑁂𑀯 𑀤𑀲𑀩𑀮𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀕𑀳𑁂𑀢𑁆𑀯𑀸 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀧𑀩𑁆𑀩𑀚𑁆𑀚𑀸𑀯𑁂𑀲𑀁𑀬𑁂𑀯 𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀳𑀺𑀧𑀺 𑀢𑀸𑀳𑀺 𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀁. 𑀧𑀓𑁆𑀓𑀸𑀫𑀻𑀢𑀺 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺. 𑀕𑀫𑀦𑀸𑀪𑀺𑀦𑀻𑀳𑀭𑀡𑀓𑀸𑀮𑁂 𑀧𑀦𑀲𑁆𑀲𑀸 ‘‘𑀲𑀼𑀓𑀼𑀫𑀸𑀭𑀸 𑀭𑀸𑀚𑀺𑀢𑁆𑀣𑀺𑀬𑁄 𑀧𑀤𑀲𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀸𑀓𑀺𑀬𑀓𑁄𑀮𑀺𑀬𑀭𑀸𑀚𑀸𑀦𑁄 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬𑁄 𑀉𑀧𑀝𑁆𑀞𑀸𑀧𑀬𑀺𑀁𑀲𑀼, 𑀢𑀸 𑀧𑀦 ‘‘𑀬𑀸𑀦𑁂 𑀆𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀻𑀳𑀺 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀓𑀢𑁄 𑀳𑁄𑀢𑀻’’𑀢𑀺 𑀏𑀓𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀧𑀤𑀲𑀸𑀯 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀭𑀸𑀚𑀸𑀦𑁄𑀧𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀸𑀧𑁂𑀢𑁆𑀯𑀸 𑀢𑀡𑁆𑀟𑀼𑀮𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀲𑀓𑀝𑀸𑀦𑀺 𑀧𑀽𑀭𑁂𑀢𑁆𑀯𑀸 ‘‘𑀕𑀢𑀕𑀢𑀝𑁆𑀞𑀸𑀦𑁂 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺 𑀧𑀼𑀭𑀺𑀲𑁂 𑀧𑁂𑀲𑀬𑀺𑀁𑀲𑀼. 𑀲𑀽𑀦𑁂𑀳𑀺 𑀧𑀸𑀤𑁂𑀳𑀻𑀢𑀺 𑀢𑀸𑀲𑀜𑁆𑀳𑀺 𑀲𑀼𑀔𑀼𑀫𑀸𑀮𑀢𑁆𑀢𑀸 𑀧𑀸𑀤𑁂𑀲𑀼 𑀏𑀓𑁄 𑀨𑁄𑀝𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀪𑀺𑀚𑁆𑀚𑀢𑀺, 𑀉𑀪𑁄 𑀧𑀸𑀤𑀸 𑀓𑀝𑀓𑀝𑁆𑀞𑀺𑀲𑀫𑁆𑀧𑀭𑀺𑀓𑀺𑀡𑁆𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀽𑀦𑁂𑀳𑀺 𑀧𑀸𑀤𑁂𑀳𑀻’’𑀢𑀺. 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀩𑀳𑀺. 𑀓𑀲𑁆𑀫𑀸 𑀧𑀦𑁂𑀯𑀁 𑀞𑀺𑀢𑀸𑀢𑀺? 𑀏𑀯𑀁 𑀓𑀺𑀭𑀲𑁆𑀲𑀸 𑀅𑀳𑁄𑀲𑀺 ‘‘𑀅𑀳𑀁 𑀢𑀣𑀸𑀕𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀲𑀬𑀫𑁂𑀯 𑀧𑀩𑁆𑀩𑀚𑁆𑀚𑀸𑀯𑁂𑀲𑀁 𑀅𑀕𑁆𑀕𑀳𑁂𑀲𑀺𑀁, 𑀏𑀯𑀁 𑀕𑀳𑀺𑀢𑀪𑀸𑀯𑁄 𑀘 𑀧𑀦 𑀫𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀚𑀸𑀢𑁄, 𑀲𑀘𑁂 𑀲𑀢𑁆𑀣𑀸 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀺𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀲𑀘𑁂 𑀦𑀸𑀦𑀼𑀚𑀸𑀦𑀺𑀲𑁆𑀲𑀢𑀺, 𑀫𑀳𑀢𑀻 𑀕𑀭𑀳𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀓𑀺𑀁 𑀦𑀼 𑀢𑁆𑀯𑀁 𑀕𑁄𑀢𑀫𑀻𑀢𑀺 𑀓𑀺𑀁 𑀦𑀼 𑀭𑀸𑀚𑀓𑀼𑀮𑀸𑀦𑀁 𑀯𑀺𑀧𑀢𑁆𑀢𑀺 𑀉𑀧𑁆𑀧𑀦𑁆𑀦𑀸, 𑀓𑁂𑀦 𑀦𑀼 𑀢𑁆𑀯𑀁 𑀓𑀸𑀭𑀡𑁂𑀦 𑀏𑀯𑀁 𑀯𑀺𑀯𑀡𑁆𑀡𑀪𑀸𑀯𑀁 𑀧𑀢𑁆𑀢𑀸 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺…𑀧𑁂… 𑀞𑀺𑀢𑀸𑀢𑀺.

𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦. 𑀆𑀧𑀸𑀤𑀺𑀓𑀸𑀢𑀺 𑀲𑀁𑀯𑀟𑁆𑀠𑀺𑀓𑀸, 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀧𑀸𑀤𑁂𑀲𑀼 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑁂𑀲𑀼 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀯𑀟𑁆𑀠𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀓𑀸𑀢𑀺 𑀅𑀢𑁆𑀣𑁄. 𑀧𑁄𑀲𑀺𑀓𑀸𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀦𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀸𑀬𑁂𑀢𑁆𑀯𑀸 𑀢𑀼𑀫𑁆𑀳𑁂 𑀧𑁄𑀲𑁂𑀲𑀺. 𑀣𑀜𑁆𑀜𑀁 𑀧𑀸𑀬𑁂𑀲𑀻𑀢𑀺 𑀦𑀦𑁆𑀤𑀓𑀼𑀫𑀸𑀭𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀢𑁄 𑀓𑀢𑀺𑀧𑀸𑀳𑁂𑀦𑁂𑀯 𑀤𑀳𑀭𑀢𑀭𑁄. 𑀢𑀲𑁆𑀫𑀺𑀁 𑀚𑀸𑀢𑁂 𑀫𑀳𑀸𑀧𑀚𑀸𑀧𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀲𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀸𑀢𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀢𑁆𑀢𑀦𑁄 𑀣𑀜𑁆𑀜𑀁 𑀧𑀸𑀬𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀏𑀯𑀫𑀸𑀳. 𑀲𑀸𑀥𑀼 𑀪𑀦𑁆𑀢𑁂𑀢𑀺 ‘‘𑀩𑀳𑀼𑀓𑀸𑀭𑀸’’𑀢𑀺𑀆𑀤𑀻𑀳𑀺 𑀢𑀲𑁆𑀲𑀸 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄 𑀏𑀯𑀫𑀸𑀳.

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀕𑀭𑀼𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁪𑁦𑁩. 𑀲𑀢𑁆𑀣𑀸𑀧𑀺 ‘‘𑀇𑀢𑁆𑀣𑀺𑀬𑁄 𑀦𑀸𑀫 𑀧𑀭𑀺𑀢𑁆𑀢𑀲𑀤𑁆𑀥𑀸, 𑀏𑀓𑀸𑀬𑀸𑀘𑀺𑀢𑀫𑀢𑁆𑀢𑁂𑀬𑁂𑀯 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀜𑁆𑀜𑀸𑀢𑀸𑀬 𑀦 𑀫𑀫 𑀲𑀸𑀲𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀕𑀭𑀼𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑀼𑀓𑀸𑀫𑀢𑀸𑀬 ‘‘𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯𑀲𑁆𑀲𑀸 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀯𑀲𑁆𑀲𑀸𑀢𑀺 𑀲𑀸 𑀏𑀯 𑀅𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀧𑀺 𑀉𑀧𑀲𑀫𑁆𑀧𑀤𑀸𑀧𑀺 𑀳𑁄𑀢𑀼.

𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀢𑀁 𑀤𑀺𑀯𑀲𑀫𑁆𑀧𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲. 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀫𑀸𑀦𑀸𑀢𑀺𑀫𑀸𑀦𑀁 𑀅𑀓𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀅𑀪𑀺𑀯𑀸𑀤𑀦𑀁, 𑀆𑀲𑀦𑀸 𑀉𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀯𑀲𑁂𑀦 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀤𑀲𑀦𑀔𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀆𑀲𑀦𑀧𑀜𑁆𑀜𑀸𑀧𑀦𑀩𑀻𑀚𑀦𑀸𑀤𑀺𑀓𑀁 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀫𑀻𑀘𑀺𑀓𑀫𑁆𑀫𑀜𑁆𑀘 𑀓𑀢𑁆𑀢𑀩𑁆𑀩𑀁. 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂𑀢𑀺 𑀬𑀢𑁆𑀣 𑀯𑀲𑀦𑁆𑀢𑀺𑀬𑀸 𑀅𑀦𑀦𑁆𑀢𑀭𑀸𑀬𑁂𑀦 𑀑𑀯𑀸𑀤𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀸𑀭𑀳𑁂 𑀞𑀸𑀦𑁂 𑀑𑀯𑀸𑀤𑀤𑀸𑀬𑀓𑁄 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀅𑀬𑀁 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀦𑀸𑀫, 𑀏𑀯𑀭𑀽𑀧𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀦 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀅𑀦𑀼𑀧𑁄𑀲𑀣𑀺𑀓𑀁. 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀦𑁆𑀢𑀺 𑀑𑀯𑀸𑀤𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀁. 𑀤𑀺𑀝𑁆𑀞𑁂𑀦𑀸𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂𑀦. 𑀲𑀼𑀢𑁂𑀦𑀸𑀢𑀺 𑀲𑁄𑀢𑁂𑀦 𑀲𑀼𑀢𑁂𑀦. 𑀧𑀭𑀺𑀲𑀗𑁆𑀓𑀸𑀬𑀸𑀢𑀺 𑀤𑀺𑀝𑁆𑀞𑀲𑀼𑀢𑀯𑀲𑁂𑀦 𑀧𑀭𑀺𑀲𑀗𑁆𑀓𑀺𑀢𑁂𑀦. 𑀕𑀭𑀼𑀥𑀫𑁆𑀫𑀦𑁆𑀢𑀺 𑀕𑀭𑀼𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁. 𑀧𑀓𑁆𑀔𑀫𑀸𑀦𑀢𑁆𑀢𑀦𑁆𑀢𑀺 𑀅𑀦𑀽𑀦𑀸𑀦𑀺 𑀧𑀦𑁆𑀦𑀭𑀲 𑀤𑀺𑀯𑀲𑀸𑀦𑀺 𑀫𑀸𑀦𑀢𑁆𑀢𑀁. 𑀙𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀺𑀓𑀸𑀮𑀪𑁄𑀚𑀦𑀘𑁆𑀙𑀝𑁆𑀞𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬𑀸𑀢𑀺 𑀏𑀓𑀲𑀺𑀓𑁆𑀔𑀫𑁆𑀧𑀺 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀧𑀽𑀭𑀺𑀢𑀲𑀺𑀓𑁆𑀔𑀸𑀬.

𑀦 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀦 𑀧𑀭𑀺𑀪𑀸𑀲𑀺𑀢𑀩𑁆𑀩𑁄𑀢𑀺 𑀤𑀲𑀦𑁆𑀦𑀁 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀁 𑀅𑀜𑁆𑀜𑀢𑀭𑁂𑀦 𑀅𑀓𑁆𑀓𑁄𑀲𑀯𑀢𑁆𑀣𑀼𑀦𑀸 𑀦 𑀅𑀓𑁆𑀓𑁄𑀲𑀺𑀢𑀩𑁆𑀩𑁄, 𑀪𑀬𑀼𑀧𑀤𑀁𑀲𑀦𑀸𑀬 𑀓𑀸𑀬𑀘𑀺 𑀧𑀭𑀺𑀪𑀸𑀲𑀸𑀬 𑀦 𑀧𑀭𑀺𑀪𑀸𑀲𑀺𑀢𑀩𑁆𑀩𑁄. 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀥𑀫𑁆𑀫𑀓𑀣𑀸𑀲𑀗𑁆𑀔𑀸𑀢𑁄 𑀯𑀘𑀦𑀧𑀣𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀑𑀯𑀝𑁄 𑀧𑀺𑀳𑀺𑀢𑁄, 𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀑𑀯𑀤𑀺𑀢𑀩𑁆𑀩𑁄 𑀯𑀸 𑀅𑀦𑀼𑀲𑀸𑀲𑀺𑀢𑀩𑁆𑀩𑁄 𑀯𑀸, ‘‘𑀪𑀦𑁆𑀢𑁂 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀇𑀤𑀜𑁆𑀘𑀺𑀤𑀜𑁆𑀘 𑀯𑀢𑁆𑀢𑀁 𑀧𑀽𑀭𑀬𑀺𑀁𑀲𑀽’’𑀢𑀺 𑀏𑀯𑀁 𑀧𑀦 𑀧𑀯𑁂𑀡𑀺𑀯𑀲𑁂𑀦 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀽𑀢𑀺 𑀪𑀺𑀓𑁆𑀔𑀽𑀦𑀁 𑀧𑀦 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄 𑀅𑀦𑀺𑀯𑀸𑀭𑀺𑀢𑁄, 𑀬𑀣𑀸𑀭𑀼𑀘𑀺𑀬𑀸 𑀑𑀯𑀤𑀦𑁆𑀢𑀼 𑀅𑀦𑀼𑀲𑀸𑀲𑀦𑁆𑀢𑀼 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀽𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 𑀕𑀭𑀼𑀥𑀫𑁆𑀫𑀓𑀣𑀸 𑀫𑀳𑀸𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂 𑀧𑀦 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀆𑀭𑁄𑀘𑀺𑀬𑀫𑀸𑀦𑁂 𑀲𑀼𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀢𑀸𑀯𑀫𑀳𑀦𑁆𑀢𑀁 𑀤𑁄𑀫𑀦𑀲𑁆𑀲𑀁 𑀔𑀡𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀅𑀦𑁄𑀢𑀢𑁆𑀢𑀤𑀳𑀢𑁄 𑀆𑀳𑀝𑁂𑀦 𑀲𑀻𑀢𑀼𑀤𑀓𑀲𑁆𑀲 𑀖𑀝𑀲𑀢𑁂𑀦 𑀫𑀢𑁆𑀣𑀓𑁂 𑀧𑀭𑀺𑀲𑀺𑀢𑁆𑀢𑀸 𑀯𑀺𑀬 𑀯𑀺𑀕𑀢𑀧𑀭𑀺𑀴𑀸𑀳𑀸 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀆𑀯𑀺 𑀓𑀭𑁄𑀦𑁆𑀢𑀻 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂’’𑀢𑀺𑀆𑀤𑀺𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀢𑀢𑁆𑀣 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀜𑁆𑀜𑀪𑀸𑀯𑁂 𑀞𑀺𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀅𑀮𑀗𑁆𑀓𑀸𑀭𑀲𑀪𑀸𑀯𑁄. 𑀢𑀢𑁆𑀣 𑀓𑁄𑀘𑀺 𑀢𑀭𑀼𑀡𑁄𑀧𑀺 𑀬𑀼𑀯𑀸 𑀦 𑀳𑁄𑀢𑀺 𑀬𑀣𑀸 𑀅𑀢𑀺𑀢𑀭𑀼𑀡𑁄. 𑀓𑁄𑀘𑀺 𑀬𑀼𑀯𑀸𑀧𑀺 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀦 𑀳𑁄𑀢𑀺 𑀬𑀣𑀸 𑀉𑀧𑀲𑀦𑁆𑀢𑀲𑀪𑀸𑀯𑁄 𑀆𑀮𑀲𑀺𑀬𑀩𑁆𑀬𑀲𑀦𑀸𑀤𑀻𑀳𑀺 𑀯𑀸 𑀅𑀪𑀺𑀪𑀽𑀢𑁄, 𑀇𑀥 𑀧𑀦 𑀤𑀳𑀭𑁄 𑀘𑁂𑀯 𑀬𑀼𑀯𑀸 𑀘 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀧𑁆𑀧𑀮𑀸𑀤𑀻𑀦𑀺 𑀮𑁄𑀓𑀲𑀫𑁆𑀫𑀢𑀢𑁆𑀢𑀸 𑀯𑀼𑀢𑁆𑀢𑀸𑀦𑀺. 𑀇𑀢𑁄 𑀧𑀭𑀁 𑀬𑀁 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀫𑁂𑀯.

𑀢𑀢𑁆𑀣 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸𑀢𑀺 𑀇𑀤𑀁 𑀧𑀜𑁆𑀘𑀯𑀲𑁆𑀲𑀲𑀢𑀢𑁄 𑀉𑀤𑁆𑀥𑀁 𑀅𑀝𑁆𑀞𑀢𑁆𑀯𑀸 𑀧𑀜𑁆𑀘𑀲𑀼𑀬𑁂𑀯 𑀯𑀲𑁆𑀲𑀲𑀢𑁂𑀲𑀼 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀓𑀸𑀭𑀡𑀦𑀺𑀤𑀲𑁆𑀲𑀦𑀁. 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀔𑀻𑀡𑀸𑀲𑀯𑀕𑁆𑀕𑀳𑀡𑁂𑀦 𑀛𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀳𑀺 𑀦𑀺𑀚𑁆𑀛𑀸𑀦𑀓𑀸𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑀲𑀫𑁆𑀧𑀢𑁆𑀢𑀺 𑀇𑀚𑁆𑀛𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀘 𑀬𑀁 𑀯𑀼𑀢𑁆𑀢𑀁. 𑀢𑀁 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁧) 𑀧𑀦 𑀏𑀯𑀁 𑀯𑀼𑀢𑁆𑀢𑀁 𑁋

‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀢𑁂𑀯𑀺𑀚𑁆𑀚𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀧𑀸𑀢𑀺𑀫𑁄𑀓𑁆𑀔𑁂𑀦 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀻’’𑀢𑀺.

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀫𑁆𑀧𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦) 𑁋

‘‘𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸, 𑀢𑀢𑁄 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀸𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀸𑀕𑀸𑀫𑀺𑀦𑁄 𑀲𑀓𑀤𑀸𑀕𑀸𑀫𑀺𑀦𑁄 𑀲𑁄𑀢𑀸𑀧𑀦𑁆𑀦𑀸’’𑀢𑀺 𑁋

𑀯𑀼𑀢𑁆𑀢𑀁.

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 (𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁧𑁫𑁬) 𑁋

‘‘𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀪𑀺𑀓𑁆𑀔𑀽 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀙𑀴𑀪𑀺𑀜𑁆𑀜𑀸 𑀅𑀳𑁂𑀲𑀼𑀁, 𑀢𑀢𑁄 𑀙 𑀅𑀪𑀺𑀜𑁆𑀜𑀸 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀁𑀲𑀼. 𑀇𑀤𑀸𑀦𑀺 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀲𑀯𑀓𑁆𑀔𑀬𑀫𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀧𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑁋

𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀘𑁂𑀢𑀁 𑀲𑀩𑁆𑀩𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀯𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀪𑀸𑀡𑀓𑀸𑀦𑀁 𑀫𑀢𑀫𑁂𑀯 𑀆𑀘𑀭𑀺𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀳𑀺 𑀆𑀘𑀭𑀺𑀬𑀲𑁆𑀲𑁂𑀯 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺.

𑀢𑀸𑀦𑀺𑀬𑁂𑀯𑀸𑀢𑀺 𑀢𑀸𑀦𑀺𑀬𑁂𑀯 𑀧𑀜𑁆𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺. 𑀧𑀭𑀺𑀬𑀢𑁆𑀢𑀺𑀫𑀽𑀮𑀓𑀁 𑀲𑀸𑀲𑀦𑀦𑁆𑀢𑀺 𑀆𑀳 ‘‘𑀦 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀻’’𑀢𑀺𑀆𑀤𑀺. 𑀧𑀭𑀺𑀬𑀢𑁆𑀢𑀺𑀬𑀸 𑀳𑀺 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀅𑀥𑀺𑀕𑀫𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀓𑀺𑀁𑀓𑀸𑀭𑀡𑀸? 𑀅𑀬𑀜𑁆𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀝𑀺𑀧𑀢𑁆𑀢𑀺 𑀅𑀥𑀺𑀕𑀫𑀲𑁆𑀲, 𑀇𑀢𑀺 𑀧𑀝𑀺𑀧𑀢𑁆𑀢𑀺𑀢𑁄𑀧𑀺 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀝𑀺𑀯𑁂𑀥𑀓𑀭𑀸 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, ‘‘𑀏𑀲 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀅𑀗𑁆𑀕𑀼𑀮𑀺𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀏𑀓𑀯𑀸𑀭𑀁 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 𑀦𑀸𑀫 𑀦𑀸𑀳𑁄𑀲𑀺. 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸𑀧𑀺 𑀓𑀤𑀸𑀘𑀺 𑀩𑀳𑀽 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀅𑀧𑁆𑀧𑀸, 𑀇𑀢𑀺 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀦 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁. 𑀧𑀡𑁆𑀟𑀺𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀬𑀣𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀲𑀢𑁆𑀢 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 ‘‘𑀦 𑀚𑀸𑀦𑀸𑀫𑀻’’𑀢𑀺 𑀆𑀳, 𑀢𑀢𑁄 𑀉𑀤𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 𑀆𑀘𑀺𑀓𑁆𑀔𑀺, 𑀢𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀫𑁆𑀧𑀸𑀤𑁂𑀲𑀺, 𑀏𑀯𑀫𑁂𑀯 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺, 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺. 𑀬𑀣𑀸𑀧𑀺 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀸𑀴𑀺𑀬𑀸 𑀣𑀺𑀭𑀸𑀬 𑀉𑀤𑀓𑀁 𑀦 𑀞𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀉𑀤𑀓𑁂 𑀲𑀢𑀺 𑀧𑀤𑀼𑀫𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀫𑁂𑀯 𑀫𑀳𑀸𑀢𑀴𑀸𑀓𑀲𑁆𑀲 𑀣𑀺𑀭𑀧𑀸𑀴𑀺𑀲𑀤𑀺𑀲𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑀢𑀺 𑀫𑀳𑀸𑀢𑀴𑀸𑀓𑁂 𑀉𑀤𑀓𑀲𑀤𑀺𑀲𑀸 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸 𑀓𑀼𑀮𑀧𑀼𑀢𑁆𑀢𑀸 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑁂𑀲𑀼 𑀲𑀢𑀺 𑀫𑀳𑀸𑀢𑀴𑀸𑀓𑁂 𑀧𑀤𑀼𑀫𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑀸 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀏𑀓𑀦𑁆𑀢𑀢𑁄 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁.

𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀧𑀭𑀺𑀬𑀢𑁆𑀢𑀻𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦) 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀸𑀝𑁆𑀞𑀓𑀣𑀸 𑀧𑀸𑀴𑀺. 𑀬𑀸𑀯 𑀲𑀸 𑀢𑀺𑀝𑁆𑀞𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀸 𑀦𑀸𑀫 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀓𑀮𑀺𑀬𑀼𑀕𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀢𑁂𑀲𑀫𑁆𑀧𑀺 𑀅𑀫𑀘𑁆𑀘𑀸𑀤𑀬𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀢𑁄 𑀭𑀝𑁆𑀞𑀚𑀦𑀧𑀤𑀯𑀸𑀲𑀺𑀦𑁄𑀢𑀺 𑀢𑁂𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀦 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺, 𑀢𑀢𑁄 𑀲𑀲𑁆𑀲𑀸𑀦𑀺 𑀦 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀼 𑀅𑀲𑀫𑁆𑀧𑀚𑁆𑀚𑀦𑁆𑀢𑁂𑀲𑀼 𑀧𑀘𑁆𑀘𑀬𑀤𑀸𑀬𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀘𑁆𑀘𑀬𑁂 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀗𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀭𑀺𑀬𑀢𑁆𑀢𑀺 𑀧𑀭𑀺𑀳𑀸𑀬𑀢𑀺, 𑀅𑀢𑁆𑀣𑀯𑀲𑁂𑀦 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀸𑀴𑀺𑀯𑀲𑁂𑀦𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀢𑁄 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀸𑀴𑀺𑀫𑁆𑀧𑀺 𑀲𑀓𑀮𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺, 𑀧𑀭𑀺𑀳𑀸𑀬𑀫𑀸𑀦𑀁 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀫𑁂𑀯 𑀳𑀺 𑀫𑀳𑀸𑀧𑀓𑀭𑀡𑀁 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀺𑀁 𑀧𑀭𑀺𑀳𑀻𑀦𑁂 𑀬𑀫𑀓𑀁, 𑀓𑀣𑀸𑀯𑀢𑁆𑀣𑀼, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺, 𑀥𑀸𑀢𑀼𑀓𑀣𑀸, 𑀯𑀺𑀪𑀗𑁆𑀕𑁄, 𑀥𑀫𑁆𑀫𑀲𑀗𑁆𑀕𑀳𑁄𑀢𑀺.

𑀏𑀯𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀞𑀫𑀁 𑀏𑀓𑀸𑀤𑀲𑀓𑀦𑀺𑀧𑀸𑀢𑁄…𑀧𑁂… 𑀢𑀢𑁄 𑀏𑀓𑀓𑀦𑀺𑀧𑀸𑀢𑁄𑀢𑀺. 𑀏𑀯𑀁 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀫𑀳𑀸𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀲𑀴𑀸𑀬𑀢𑀦𑀯𑀕𑁆𑀕𑁄, 𑀔𑀦𑁆𑀥𑀓𑀯𑀕𑁆𑀕𑁄, 𑀦𑀺𑀤𑀸𑀦𑀯𑀕𑁆𑀕𑁄, 𑀲𑀕𑀸𑀣𑀸𑀯𑀕𑁆𑀕𑁄𑀢𑀺. 𑀏𑀯𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀉𑀧𑀭𑀺𑀧𑀡𑁆𑀡𑀸𑀲𑀓𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄, 𑀢𑀢𑁄 𑀫𑀽𑀮𑀧𑀡𑁆𑀡𑀸𑀲𑀓𑁄𑀢𑀺. 𑀏𑀯𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀤𑀻𑀖𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀧𑀸𑀣𑀺𑀓𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀫𑀳𑀸𑀯𑀕𑁆𑀕𑁄, 𑀢𑀢𑁄 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄𑀢𑀺. 𑀏𑀯𑀁 𑀤𑀻𑀖𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀻𑀦𑀁 𑀦𑀸𑀫 𑀳𑁄𑀢𑀺. 𑀯𑀺𑀦𑀬𑀧𑀺𑀝𑀓𑁂𑀦 𑀲𑀤𑁆𑀥𑀺𑀁 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀯𑀺𑀦𑀬𑀧𑀺𑀝𑀓𑀜𑁆𑀳𑀺 𑀮𑀚𑁆𑀚𑀺𑀦𑁄 𑀥𑀸𑀭𑁂𑀦𑁆𑀢𑀺, 𑀮𑀸𑀪𑀓𑀸𑀫𑀸 𑀧𑀦 ‘‘𑀲𑀼𑀢𑁆𑀢𑀦𑁆𑀢𑁂 𑀓𑀣𑀺𑀢𑁂𑀧𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀦𑀢𑁆𑀣𑀻’’𑀢𑀺 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀚𑀸𑀢𑀓𑀫𑁆𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀞𑀫𑀁 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀧𑀼𑀡𑁆𑀡𑀓𑀚𑀸𑀢𑀓𑀁, 𑀫𑀳𑀸𑀦𑀸𑀭𑀤𑀚𑀸𑀢𑀓𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑁂 𑀅𑀧𑀡𑁆𑀡𑀓𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺, 𑀯𑀺𑀦𑀬𑀧𑀺𑀝𑀓𑀫𑁂𑀯 𑀥𑀸𑀭𑁂𑀦𑁆𑀢𑀺.

𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀫𑁆𑀧𑀺 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀧𑀭𑀺𑀯𑀸𑀭𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀔𑀦𑁆𑀥𑀓𑁄, 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄, 𑀫𑀳𑀸𑀯𑀺𑀪𑀗𑁆𑀕𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀫𑀢𑁆𑀢𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀤𑀸𑀧𑀺 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺. 𑀬𑀸𑀯 𑀧𑀦 𑀫𑀦𑀼𑀲𑁆𑀲𑁂𑀲𑀼 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀺 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺. 𑀬𑀤𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀫𑁆𑀳𑀺 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑁂𑀳𑀺 𑀓𑀣𑀺𑀢𑀁 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀚𑀸𑀦𑀦𑁆𑀢𑁄 𑀇𑀫𑀁 𑀲𑀳𑀲𑁆𑀲𑀁 𑀕𑀡𑁆𑀳𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑀓𑀁 𑀅𑀮𑀪𑀺𑀢𑁆𑀯𑀸 ‘‘𑀏𑀓𑀯𑀸𑀭𑀁 𑀘𑀭𑀸𑀧𑀺𑀢𑁂 𑀦𑀸𑀫𑀁 𑀲𑀼𑀡𑀦𑁆𑀢𑀸𑀧𑀺 𑀳𑁄𑀦𑁆𑀢𑀺 𑀅𑀲𑀼𑀡𑀦𑁆𑀢𑀸𑀧𑀻’’𑀢𑀺 𑀬𑀸𑀯𑀢𑀢𑀺𑀬𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑀓𑀁 𑀅𑀮𑀪𑀺𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀧𑀼𑀦 𑀭𑀸𑀚𑀓𑀼𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀤𑀸 𑀧𑀭𑀺𑀬𑀢𑁆𑀢𑀺 𑀅𑀦𑁆𑀢𑀭𑀳𑀺𑀢𑀸 𑀦𑀸𑀫 𑀳𑁄𑀢𑀺.

𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬𑀧𑀺 𑀮𑀺𑀗𑁆𑀕𑀫𑀢𑁆𑀢𑀁 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀓𑀣𑀁? 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀳𑀺 𑀓𑀸𑀮𑁂 𑀘𑀻𑀯𑀭𑀕𑁆𑀕𑀳𑀡𑀁 𑀧𑀢𑁆𑀢𑀕𑁆𑀕𑀳𑀡𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀦 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺, 𑀦𑀺𑀕𑀡𑁆𑀞𑀲𑀫𑀡𑀸 𑀯𑀺𑀬 𑀅𑀮𑀸𑀩𑀼𑀧𑀢𑁆𑀢𑀁 𑀪𑀺𑀓𑁆𑀔𑀽 𑀧𑀢𑁆𑀢𑀁 𑀅𑀕𑁆𑀕𑀩𑀸𑀳𑀸𑀬 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀤𑀸𑀬 𑀯𑀺𑀘𑀭𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺 𑀮𑀺𑀗𑁆𑀕𑀁 𑀅𑀦𑀦𑁆𑀢𑀭𑀳𑀺𑀢𑀫𑁂𑀯 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀧𑀦 𑀓𑀸𑀮𑁂 𑀅𑀕𑁆𑀕𑀩𑀸𑀳𑀢𑁄 𑀑𑀢𑀸𑀭𑁂𑀢𑁆𑀯𑀸 𑀳𑀢𑁆𑀣𑁂𑀦 𑀯𑀸 𑀲𑀺𑀓𑁆𑀓𑀸𑀬 𑀯𑀸 𑀑𑀮𑀫𑁆𑀩𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀘𑀻𑀯𑀭𑀫𑁆𑀧𑀺 𑀭𑀚𑀦𑀲𑀸𑀭𑀼𑀧𑁆𑀧𑀁 𑀅𑀓𑀢𑁆𑀯𑀸 𑀑𑀝𑁆𑀞𑀝𑁆𑀞𑀺𑀯𑀡𑁆𑀡𑀁 𑀓𑀢𑁆𑀯𑀸 𑀭𑀚𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀭𑀚𑀦𑀫𑁆𑀧𑀺 𑀦 𑀳𑁄𑀢𑀺, 𑀤𑀲𑀘𑁆𑀙𑀺𑀦𑁆𑀤𑀦𑀁 𑀑𑀯𑀝𑁆𑀝𑀺𑀓𑀸𑀯𑀺𑀚𑁆𑀛𑀦𑀁 𑀓𑀧𑁆𑀧𑀫𑀢𑁆𑀢𑀜𑁆𑀘 𑀓𑀢𑁆𑀯𑀸 𑀯𑀴𑀜𑁆𑀚𑀦𑁆𑀢𑀺, 𑀧𑀼𑀦 𑀑𑀯𑀝𑁆𑀝𑀺𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀧𑁆𑀧𑀁 𑀦 𑀓𑀭𑁄𑀦𑁆𑀢𑀺. 𑀢𑀢𑁄 𑀉𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀤𑀲𑀸 𑀙𑁂𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑀸 𑀯𑀺𑀬 𑀘𑀭𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 ‘‘𑀓𑁄 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑁄’’𑀢𑀺 𑀔𑀼𑀤𑁆𑀤𑀓𑀁 𑀓𑀸𑀲𑀸𑀯𑀔𑀡𑁆𑀟𑀁 𑀳𑀢𑁆𑀣𑁂 𑀯𑀸 𑀕𑀻𑀯𑀸𑀬𑀁 𑀯𑀸 𑀩𑀦𑁆𑀥𑀦𑁆𑀢𑀺, 𑀓𑁂𑀲𑁂𑀲𑀼 𑀯𑀸 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀺, 𑀤𑀸𑀭𑀪𑀭𑀡𑀁 𑀓𑀭𑁄𑀦𑁆𑀢𑀸 𑀓𑀲𑀺𑀢𑁆𑀯𑀸 𑀯𑀧𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑀤𑀸 𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁄 𑀚𑀦𑁄 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀢𑁂𑀲𑀫𑁆𑀧𑀺 𑀤𑁂𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸, 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀢𑀤𑀸𑀧𑀸𑀳𑀁, 𑀆𑀦𑀦𑁆𑀤, 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁩.𑁩𑁮𑁦). 𑀢𑀢𑁄 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀦𑀸𑀦𑀸𑀯𑀺𑀥𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 ‘‘𑀧𑀧𑀜𑁆𑀘𑁄 𑀏𑀲, 𑀓𑀺𑀁 𑀇𑀫𑀺𑀦𑀸 𑀅𑀫𑁆𑀳𑀸𑀓’’𑀦𑁆𑀢𑀺 𑀓𑀸𑀲𑀸𑀯𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑁂 𑀔𑀺𑀧𑀦𑁆𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀮𑀺𑀗𑁆𑀕𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀺𑀭 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑁄𑀦𑀓𑀸𑀦𑀁 𑀲𑁂𑀢𑀯𑀢𑁆𑀣𑀸𑀦𑀺 𑀧𑀸𑀭𑀼𑀧𑀺𑀢𑁆𑀯𑀸 𑀘𑀭𑀡𑀘𑀸𑀭𑀺𑀢𑁆𑀢𑀁 𑀚𑀸𑀢𑀁. 𑀏𑀯𑀁 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬𑀧𑀺 𑀮𑀺𑀗𑁆𑀕𑀫𑀢𑁆𑀢𑀁 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀕𑀭𑀼𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁪𑁦𑁪-𑁪𑁦𑁫. 𑀬𑀤𑀕𑁆𑀕𑁂𑀦𑀸𑀢𑀺 𑀬𑀁 𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸. 𑀢𑀤𑁂𑀯𑀸𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀤𑀺𑀯𑀲𑁂. 𑀅𑀦𑀼𑀜𑁆𑀜𑀢𑁆𑀢𑀺𑀬𑀸𑀢𑀺 𑀅𑀦𑀼𑀜𑁆𑀜𑀸𑀬. 𑀏𑀓𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀻𑀢𑀺 ‘‘𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁂’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀇𑀤𑀸𑀦𑀺 𑀓𑀲𑁆𑀫𑀸 𑀯𑀭𑀁 𑀬𑀸𑀘𑀢𑀻𑀢𑀺 𑀘𑁂? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁. 𑀏𑀯𑀜𑁆𑀳𑀺 𑀓𑁂𑀘𑀺 𑀯𑀤𑁂𑀬𑁆𑀬𑀼𑀁 ‘‘𑀫𑀳𑀸𑀧𑀚𑀸𑀧𑀢𑀺𑀬𑀸 𑀧𑀞𑀫𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀦𑀸𑀳𑁄𑀲𑀺, 𑀲𑀸 𑀘𑁂 𑀯𑀭𑀁 𑀬𑀸𑀘𑁂𑀬𑁆𑀬, 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺.

𑁪𑁦𑁬. 𑀲𑀭𑀸𑀕𑀸𑀬𑀸𑀢𑀺 𑀲𑀭𑀸𑀕𑀪𑀸𑀯𑀸𑀬 𑀓𑀸𑀫𑀭𑀸𑀕𑀪𑀯𑀭𑀸𑀕𑀧𑀭𑀺𑀩𑁆𑀭𑀽𑀳𑀦𑀸𑀬. 𑀲𑀜𑁆𑀜𑁄𑀕𑀸𑀬𑀸𑀢𑀺 𑀯𑀝𑁆𑀝𑁂 𑀲𑀁𑀬𑁄𑀚𑀦𑀢𑁆𑀣𑀸𑀬. 𑀆𑀘𑀬𑀸𑀬𑀸𑀢𑀺 𑀯𑀝𑁆𑀝𑀲𑁆𑀲 𑀯𑀟𑁆𑀠𑀦𑀢𑁆𑀣𑀸𑀬. 𑀫𑀳𑀺𑀘𑁆𑀙𑀢𑀸𑀬𑀸𑀢𑀺 𑀫𑀳𑀺𑀘𑁆𑀙𑀪𑀸𑀯𑀸𑀬. 𑀅𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑀸𑀬. 𑀲𑀗𑁆𑀕𑀡𑀺𑀓𑀸𑀬𑀸𑀢𑀺 𑀓𑀺𑀮𑁂𑀲𑀲𑀗𑁆𑀕𑀡𑀕𑀡𑀲𑀗𑁆𑀕𑀡𑀯𑀺𑀳𑀸𑀭𑀸𑀬. 𑀓𑁄𑀲𑀚𑁆𑀚𑀸𑀬𑀸𑀢𑀺 𑀓𑀼𑀲𑀻𑀢𑀪𑀸𑀯𑀸𑀬. 𑀤𑀼𑀩𑁆𑀪𑀭𑀢𑀸𑀬𑀸𑀢𑀺 𑀤𑀼𑀧𑁆𑀧𑁄𑀲𑀢𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀲𑀓𑀮𑀯𑀝𑁆𑀝𑀢𑁄 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀯𑀺𑀲𑀜𑁆𑀜𑁄𑀕𑀸𑀬𑀸𑀢𑀺 𑀓𑀸𑀫𑀭𑀸𑀕𑀸𑀤𑀻𑀳𑀺 𑀯𑀺𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀅𑀧𑀘𑀬𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀯𑀝𑁆𑀝𑀲𑁆𑀲 𑀅𑀧𑀘𑀬𑀢𑁆𑀣𑀸𑀬, 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀺𑀘𑁆𑀙𑀢𑀸𑀬𑀸𑀢𑀺 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀲𑁄 𑀇𑀘𑁆𑀙𑀸𑀧𑀕𑀫𑀸𑀬. 𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑀸𑀬. 𑀧𑀯𑀺𑀯𑁂𑀓𑀸𑀬𑀸𑀢𑀺 𑀧𑀯𑀺𑀯𑀺𑀢𑁆𑀢𑀪𑀸𑀯𑀸𑀬 𑀓𑀸𑀬𑀯𑀺𑀯𑁂𑀓𑀸𑀤𑀺𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀺𑀯𑀺𑀯𑁂𑀓𑀲𑀺𑀤𑁆𑀥𑀺𑀬𑀸. 𑀯𑀻𑀭𑀺𑀬𑀸𑀭𑀫𑁆𑀪𑀸𑀬𑀸𑀢𑀺 𑀓𑀸𑀬𑀺𑀓𑀲𑁆𑀲 𑀘𑁂𑀯 𑀘𑁂𑀢𑀲𑀺𑀓𑀲𑁆𑀲 𑀘 𑀯𑀻𑀭𑀺𑀬𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑁆𑀣𑀸𑀬. 𑀲𑀼𑀪𑀭𑀢𑀸𑀬𑀸𑀢𑀺 𑀲𑀼𑀔𑀧𑁄𑀲𑀦𑀢𑁆𑀣𑀸𑀬. 𑀏𑀯𑀁 𑀬𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀉𑀕𑁆𑀕𑀳𑀡𑀥𑀸𑀭𑀡𑀧𑀭𑀺𑀧𑀼𑀘𑁆𑀙𑀸𑀫𑀦𑀲𑀺𑀓𑀸𑀭𑀯𑀲𑁂𑀦 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀲𑀭𑀸𑀕𑀸𑀤𑀺𑀪𑀸𑀯𑀧𑀭𑀺𑀯𑀚𑁆𑀚𑀦𑀲𑁆𑀲 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀯𑀺𑀭𑀸𑀕𑀸𑀤𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀏𑀓𑀁𑀲𑀢𑁄 𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄 𑀲𑀫𑁆𑀫𑀤𑁂𑀯 𑀅𑀧𑀸𑀬𑀸𑀤𑀻𑀲𑀼 𑀅𑀧𑀢𑀦𑀯𑀲𑁂𑀦 𑀥𑀸𑀭𑀡𑀢𑁄 𑀓𑀺𑀮𑁂𑀲𑀸𑀦𑀁 𑀯𑀺𑀦𑀬𑀦𑀢𑁄, 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀯𑀸𑀤𑀸𑀦𑀼𑀲𑀺𑀝𑁆𑀞𑀺𑀪𑀸𑀯𑀢𑁄 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀥𑀸𑀭𑁂𑀬𑁆𑀬𑀸𑀲𑀺 𑀚𑀸𑀦𑁂𑀬𑁆𑀬𑀸𑀲𑀺, 𑀅𑀯𑀩𑀼𑀚𑁆𑀛𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀞𑀫𑀯𑀸𑀭𑁂𑀦 𑀯𑀝𑁆𑀝𑀁, 𑀤𑀼𑀢𑀺𑀬𑀯𑀸𑀭𑁂𑀦 𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁪𑁦𑁯-𑁪𑁧𑁦. 𑀯𑀺𑀫𑀸𑀦𑁂𑀢𑁆𑀯𑀸𑀢𑀺 𑀅𑀧𑀭𑀚𑁆𑀛𑀺𑀢𑁆𑀯𑀸. 𑀓𑀫𑁆𑀫𑀧𑁆𑀧𑀢𑁆𑀢𑀸𑀬𑁄𑀧𑀻𑀢𑀺 𑀓𑀫𑁆𑀫𑀸𑀭𑀳𑀸𑀧𑀺. 𑀆𑀧𑀢𑁆𑀢𑀺𑀕𑀸𑀫𑀺𑀦𑀺𑀬𑁄𑀧𑀻𑀢𑀺 𑀆𑀧𑀢𑁆𑀢𑀺𑀆𑀧𑀦𑁆𑀦𑀸𑀬𑁄𑀧𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑀣𑀸𑀓𑀭𑀡𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑁂𑀦 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀺.

𑁪𑁧𑁩-𑁫. 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀪𑀺𑀓𑁆𑀔𑀼𑀦𑀻𑀳𑀺. 𑀦 𑀆𑀭𑁄𑀘𑁂𑀦𑁆𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀦 𑀆𑀭𑁄𑀘𑁂𑀦𑁆𑀢𑀺. 𑀦 𑀧𑀘𑁆𑀘𑀸𑀳𑀭𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦 𑀧𑀘𑁆𑀘𑀸𑀳𑀭𑀦𑁆𑀢𑀺. 𑀯𑀺𑀲𑁂𑀲𑀓𑀦𑁆𑀢𑀺 𑀯𑀢𑁆𑀢𑀪𑀗𑁆𑀕𑀁.

𑁪𑁨𑁦. 𑀢𑁂𑀦 𑀘 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑁂𑀢𑀩𑁆𑀩𑁄𑀢𑀺 𑀲𑀸𑀫𑀻𑀘𑀺𑀤𑀲𑁆𑀲𑀦𑀫𑁂𑀢𑀁, 𑀦 𑀧𑀦 𑀅𑀦𑀺𑀫𑀦𑁆𑀢𑀺𑀬𑀸 𑀆𑀧𑀢𑁆𑀢𑀺.

𑁪𑁨𑁫. 𑀢𑀬𑁄 𑀦𑀺𑀲𑁆𑀲𑀬𑁂𑀢𑀺 𑀲𑁂𑀦𑀸𑀲𑀦𑀦𑀺𑀲𑁆𑀲𑀬𑀁 𑀅𑀧𑀦𑁂𑀢𑁆𑀯𑀸 𑀅𑀧𑀭𑁂 𑀢𑀬𑁄 𑀦𑀺𑀲𑁆𑀲𑀬𑁂. 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀜𑁆𑀳𑀺 𑀲𑀸 𑀦 𑀮𑀪𑀢𑀺.

𑁪𑁨𑁮. 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀦𑁆𑀢𑀻𑀢𑀺 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀦𑁆𑀢𑀺.

𑁪𑁩𑁦. 𑀪𑀺𑀓𑁆𑀔𑀼𑀤𑀽𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀬𑁂𑀯 𑀤𑀽𑀢𑁄 𑀪𑀺𑀓𑁆𑀔𑀼𑀤𑀽𑀢𑁄, 𑀢𑁂𑀦 𑀪𑀺𑀓𑁆𑀔𑀼𑀤𑀽𑀢𑁂𑀦, 𑀪𑀺𑀓𑁆𑀔𑀼𑀤𑀽𑀢𑀁 𑀓𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪𑁩𑁧. 𑀦 𑀲𑀫𑁆𑀫𑀢𑀻𑀢𑀺 𑀦𑀧𑁆𑀧𑀳𑁄𑀢𑀺. 𑀦𑀯𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀯𑀲𑀢𑀽’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀺𑀓𑀪𑀽𑀫𑀺𑀤𑀸𑀦𑀁.

𑁪𑁩𑁨. 𑀲𑀦𑁆𑀦𑀺𑀲𑀺𑀦𑁆𑀦𑀕𑀩𑁆𑀪𑀸𑀢𑀺 𑀧𑀢𑀺𑀝𑁆𑀞𑀺𑀢𑀕𑀩𑁆𑀪𑀸.

𑁪𑁩𑁪. 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀻𑀢𑀺 𑀢𑀺𑀢𑁆𑀣𑀸𑀬𑀢𑀦𑀲𑀗𑁆𑀓𑀦𑁆𑀢𑀸𑀬 𑀅𑀪𑀩𑁆𑀩𑀪𑀸𑀯𑀽𑀧𑀕𑀫𑀦𑀢𑁄 𑀦 𑀮𑀪𑀢𑀺. 𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀯𑀝𑁆𑀝𑀢𑀻𑀢𑀺 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀅𑀯𑀲𑁆𑀲𑀯𑁂 𑀲𑀢𑀺𑀧𑀺 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.