𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀁

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁩. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 𑀢𑀤𑀳𑀽𑀢𑀺 (𑀉𑀤𑀸. 𑀅𑀝𑁆𑀞. 𑁪𑁫) 𑀢𑀲𑁆𑀫𑀺𑀁 𑀅𑀳𑀦𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀉𑀧𑁄𑀲𑀣𑁂𑀢𑀺 𑀏𑀢𑁆𑀣 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀉𑀧𑀯𑀲𑀦𑁆𑀢𑀻𑀢𑀺 𑀲𑀻𑀮𑁂𑀦 𑀯𑀸 𑀅𑀦𑀲𑀦𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀉𑀧𑁄𑀲𑀣-𑀲𑀤𑁆𑀤𑁄 ‘‘𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀉𑀧𑁄𑀲𑀣𑀁 𑀉𑀧𑀯𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁭𑁧; 𑁧𑁦.𑁪𑁬) 𑀲𑀻𑀮𑁂 𑀆𑀕𑀢𑁄. ‘‘𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁫𑁫) 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀦𑀬𑀓𑀫𑁆𑀫𑁂. ‘‘𑀕𑁄𑀧𑀸𑀮𑀓𑀽𑀧𑁄𑀲𑀣𑁄 𑀦𑀺𑀕𑀡𑁆𑀞𑀽𑀧𑁄𑀲𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁭𑁧) 𑀉𑀧𑀯𑀸𑀲𑁂. ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬; 𑀫. 𑀦𑀺. 𑁩.𑁨𑁫𑁮) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀅𑀚𑁆𑀚𑀼𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁬𑁮) 𑀤𑀺𑀯𑀲𑁂. 𑀇𑀥𑀸𑀧𑀺 𑀤𑀺𑀯𑀲𑁂𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀢𑀤𑀳𑀼𑀧𑁄𑀲𑀣𑁂𑀢𑀺 𑀢𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑀪𑀽𑀢𑁂 𑀅𑀳𑀦𑀻𑀢𑀺 𑀅𑀢𑁆𑀣𑁄. 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀉𑀧𑀸𑀲𑀺𑀓𑀸𑀬 𑀭𑀢𑀦𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀦𑀺𑀲𑀚𑁆𑀚 𑀧𑀦 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 ‘‘𑀲𑀘𑀸𑀳𑀁 𑀇𑀫𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀇𑀥 𑀦𑀺𑀲𑀺𑀦𑁆𑀦𑁂𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀲𑀢𑁆𑀢𑀥𑀸𑀯𑀲𑁆𑀲 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀧𑀭𑀺𑀓𑁆𑀔𑀻𑀡𑀸. 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂𑀢𑀺 𑀉𑀕𑁆𑀕𑀢𑁂 𑀅𑀭𑀼𑀡𑀲𑀻𑀲𑁂. 𑀦𑀦𑁆𑀤𑀺𑀫𑀼𑀔𑀺𑀬𑀸𑀢𑀺 𑀢𑀼𑀝𑁆𑀞𑀺𑀫𑀼𑀔𑀺𑀬𑀸. 𑀉𑀤𑁆𑀥𑀲𑁆𑀢𑀁 𑀅𑀭𑀼𑀡𑀦𑁆𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀁 𑀧𑀢𑁆𑀯𑀸𑀧𑀺 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀬𑀸𑀘𑀺 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁮𑁩) 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀧𑀜𑁆𑀜𑀢𑁆𑀢𑀢𑁆𑀢𑀸. 𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀣𑁂𑀭𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀬𑀸𑀘𑀺𑀢𑀢𑁆𑀢𑀸 𑀅𑀦𑀼𑀤𑁆𑀤𑁂𑀲𑀲𑁆𑀲 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 ‘‘𑀅𑀲𑀼𑀓𑀧𑀼𑀕𑁆𑀕𑀮𑁄 𑀅𑀧𑀭𑀺𑀲𑀼𑀤𑁆𑀥𑁄’’𑀢𑀺 𑀅𑀯𑀢𑁆𑀯𑀸 ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺 𑀆𑀳. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀺𑀬𑀸𑀫𑀭𑀢𑁆𑀢𑀺𑀁 𑀢𑀣𑀸 𑀯𑀻𑀢𑀺𑀦𑀸𑀫𑁂𑀲𑀺? 𑀢𑀢𑁄 𑀧𑀝𑁆𑀞𑀸𑀬 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀅𑀦𑀼𑀤𑁆𑀤𑀺𑀲𑀺𑀢𑀼𑀓𑀸𑀫𑁄 𑀢𑀲𑁆𑀲 𑀯𑀢𑁆𑀣𑀼𑀁 𑀧𑀸𑀓𑀝𑀁 𑀓𑀸𑀢𑀼𑀁.

𑀅𑀤𑁆𑀤𑀲𑀸𑀢𑀺 𑀓𑀣𑀁 𑀅𑀤𑁆𑀤𑀲. 𑀅𑀢𑁆𑀢𑀦𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀦𑀺 𑀧𑀭𑀺𑀚𑀸𑀦𑀦𑁆𑀢𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀘𑀺𑀢𑁆𑀢𑀁 𑀧𑀲𑁆𑀲𑀺. 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑁂 𑀤𑀺𑀝𑁆𑀞𑁂 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀲𑁆𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑁂𑀯 𑀳𑀺 𑀅𑀦𑀸𑀕𑀢𑁂 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀧𑀯𑀢𑁆𑀢𑀁 𑀧𑀭𑁂𑀲𑀁 𑀘𑀺𑀢𑁆𑀢𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀧𑀚𑀸𑀦𑀸𑀢𑀺, 𑀏𑀯𑀁 𑀅𑀢𑀻𑀢𑁂𑀧𑀻𑀢𑀺. 𑀤𑀼𑀲𑁆𑀲𑀻𑀮𑀦𑁆𑀢𑀺 𑀦𑀺𑀲𑁆𑀲𑀻𑀮𑀁, 𑀲𑀻𑀮𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀧𑀥𑀫𑁆𑀫𑀦𑁆𑀢𑀺 𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀮𑀸𑀫𑀓𑀲𑀪𑀸𑀯𑀁. 𑀅𑀲𑀼𑀘𑀺𑀦𑁆𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦 𑀲𑀼𑀘𑀺𑀁. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀦𑁆𑀢𑀺 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀭𑁂𑀲𑀁 𑀆𑀲𑀗𑁆𑀓𑀦𑀻𑀬𑀢𑀸𑀬 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀁. 𑀅𑀣 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀫𑁂 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀁. 𑀮𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀲𑁆𑀲 𑀓𑀭𑀡𑀢𑁄 𑀧𑀝𑀺𑀘𑁆𑀙𑀦𑁆𑀦𑀁 𑀓𑀫𑁆𑀫𑀦𑁆𑀢𑀁 𑀏𑀢𑀲𑁆𑀲𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀁. 𑀓𑀼𑀘𑁆𑀙𑀺𑀢𑀲𑀫𑀡𑀯𑁂𑀲𑀥𑀸𑀭𑀺𑀢𑀸𑀬 𑀦 𑀲𑀫𑀡𑀦𑁆𑀢𑀺 𑀅𑀲𑁆𑀲𑀫𑀡𑀁. 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀓𑀺𑀢𑁆𑀢𑀓𑀸 𑀲𑀫𑀡𑀸’’𑀢𑀺 𑀕𑀡𑀦𑀸𑀬 ‘‘𑀅𑀳𑀫𑁆𑀧𑀺 𑀲𑀫𑀡𑁄𑀫𑁆𑀳𑀻’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀲𑀫𑀡𑀧𑀝𑀺𑀜𑁆𑀜𑀁. 𑀅𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀅𑀩𑁆𑀭𑀳𑁆𑀫𑀘𑀸𑀭𑀺𑀁. 𑀅𑀜𑁆𑀜𑁂 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀼𑀦𑀺𑀯𑀢𑁆𑀣𑁂 𑀲𑀼𑀧𑀸𑀭𑀼𑀢𑁂 𑀓𑀼𑀲𑀼𑀫𑁆𑀪𑀓𑀧𑀝𑀥𑀭𑁂 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 𑀅𑀩𑁆𑀭𑀳𑁆𑀫𑀘𑀸𑀭𑀻 𑀲𑀫𑀸𑀦𑁄 𑀲𑀬𑀫𑁆𑀧𑀺 𑀢𑀸𑀤𑀺𑀲𑁂𑀦 𑀆𑀓𑀸𑀭𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀉𑀧𑁄𑀲𑀣𑀸𑀤𑀻𑀲𑀼 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑁄 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀧𑀝𑀺𑀜𑁆𑀜𑀁 𑀤𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀁. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺𑀁. 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀯𑀲𑁆𑀲𑀯𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑀁. 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀘 𑀓𑀲𑀫𑁆𑀩𑀼𑀚𑀸𑀢𑀁. 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀦𑁆𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑀁.

𑀤𑀺𑀝𑁆𑀞𑁄𑀲𑀻𑀢𑀺 ‘‘𑀅𑀬𑀁 𑀦 𑀧𑀓𑀢𑀢𑁆𑀢𑁄’’𑀢𑀺 𑀪𑀕𑀯𑀢𑀸 𑀤𑀺𑀝𑁆𑀞𑁄 𑀅𑀲𑀺. 𑀬𑀲𑁆𑀫𑀸 𑀘 𑀏𑀯𑀁 𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀦𑀢𑁆𑀣𑀺 𑀢𑁂 𑀢𑀯 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀓𑀫𑁆𑀫𑀸𑀤𑀺𑀲𑀁𑀯𑀸𑀲𑁄. 𑀬𑀲𑁆𑀫𑀸 𑀧𑀦 𑀲𑁄 𑀲𑀁𑀯𑀸𑀲𑁄 𑀢𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀝𑁆𑀞𑁂𑀳𑀺 𑀆𑀯𑀼𑀲𑁄𑀢𑀺 𑀏𑀯𑀫𑁂𑀢𑁆𑀣 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀅𑀦𑁂𑀓𑀯𑀸𑀭𑀁 𑀯𑀢𑁆𑀯𑀸𑀧𑀺 ‘‘𑀣𑁂𑀭𑁄 𑀲𑀬𑀫𑁂𑀯 𑀦𑀺𑀩𑁆𑀩𑀺𑀦𑁆𑀦𑁄 𑀑𑀭𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀇𑀫𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁂𑀦 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀪𑀕𑀯𑀢𑀸 𑀫𑀬𑀸 𑀘 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑁄, 𑀬𑀸𑀯𑀢𑀢𑀺𑀬𑀁 ‘𑀉𑀝𑁆𑀞𑁂𑀳𑀻’𑀢𑀺 𑀘 𑀯𑀼𑀢𑁆𑀢𑁄 𑀦 𑀉𑀝𑁆𑀞𑀸𑀢𑀺, 𑀇𑀤𑀸𑀦𑀺𑀲𑁆𑀲 𑀦𑀺𑀓𑁆𑀓𑀟𑁆𑀠𑀦𑀓𑀸𑀮𑁄, 𑀫𑀸 𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑀦𑁆𑀢𑀭𑀸𑀬𑁄 𑀅𑀳𑁄𑀲𑀻’’𑀢𑀺 𑀩𑀸𑀳𑀸𑀬𑀁 𑀅𑀕𑁆𑀕𑀳𑁂𑀲𑀺. 𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀤𑁆𑀯𑀸𑀭𑀲𑀸𑀮𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸, 𑀩𑀳𑀻𑀢𑀺 𑀧𑀦 𑀦𑀺𑀓𑁆𑀔𑀸𑀫𑀺𑀢𑀝𑁆𑀞𑀸𑀦𑀤𑀲𑁆𑀲𑀦𑀁. 𑀅𑀣 𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀢𑀺 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄𑀧𑀺 𑀦𑀺𑀓𑁆𑀔𑀸𑀫𑁂𑀢𑁆𑀯𑀸, 𑀦 𑀅𑀦𑁆𑀢𑁄𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀏𑀯. 𑀉𑀪𑀬𑀣𑀸𑀧𑀺 𑀯𑀺𑀳𑀸𑀭𑀢𑁄 𑀩𑀳𑀺𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸𑀢𑀺 𑀅𑀕𑁆𑀕𑀴𑀲𑀽𑀘𑀺𑀜𑁆𑀘 𑀉𑀧𑀭𑀺𑀖𑀝𑀺𑀓𑀜𑁆𑀘 𑀆𑀤𑀳𑀺𑀢𑁆𑀯𑀸, 𑀲𑀼𑀝𑁆𑀞𑀼 𑀓𑀯𑀸𑀝𑀁 𑀣𑀓𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫𑀸𑀢𑀺 ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀯 𑀳𑀺 𑀢𑁂𑀦 𑀧𑀓𑁆𑀓𑀫𑀺𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀅𑀧𑀓𑁆𑀓𑀫𑀺𑀢𑁆𑀯𑀸 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑀺𑀲𑁆𑀲𑀢𑀺, 𑀅𑀘𑁆𑀙𑀭𑀺𑀬𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀕𑀭𑀳𑀡𑀘𑁆𑀙𑀭𑀺𑀬𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀸𑀲𑀫𑀼𑀤𑁆𑀤𑁂 𑀅𑀝𑁆𑀞𑀘𑁆𑀙𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁮𑁪. 𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂𑀢𑀺 (𑀉𑀤𑀸. 𑀅𑀝𑁆𑀞. 𑁪𑁫) 𑀓𑁄 𑀅𑀦𑀼𑀲𑀦𑁆𑀥𑀺? 𑀬𑁆𑀯𑀸𑀬𑀁 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀅𑀦𑀼𑀤𑁆𑀤𑁂𑀲𑁄, 𑀲𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄𑀢𑀺 𑀢𑀁 𑀅𑀧𑀭𑁂𑀳𑀺 𑀲𑀢𑁆𑀢𑀳𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀢𑁂𑀲𑀁 𑀉𑀧𑀫𑀸𑀪𑀸𑀯𑁂𑀦 𑀫𑀳𑀸𑀲𑀫𑀼𑀤𑁆𑀤𑁂 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂’’𑀢𑀺𑀆𑀤𑀺𑀫𑀸𑀳. 𑀅𑀲𑀼𑀭𑀸𑀢𑀺 𑀤𑁂𑀯𑀸 𑀯𑀺𑀬 𑀦 𑀲𑀼𑀭𑀦𑁆𑀢𑀺 𑀦 𑀈𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀻𑀢𑀺 𑀅𑀲𑀼𑀭𑀸. 𑀲𑀼𑀭𑀸 𑀦𑀸𑀫 𑀤𑁂𑀯𑀸, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀢𑀺 𑀯𑀸 𑀅𑀲𑀼𑀭𑀸, 𑀯𑁂𑀧𑀘𑀺𑀢𑁆𑀢𑀺𑀧𑀳𑀸𑀭𑀸𑀤𑀸𑀤𑀬𑁄. 𑀢𑁂𑀲𑀁 𑀪𑀯𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂, 𑀢𑁂 𑀢𑀢𑁆𑀣 𑀧𑀯𑀺𑀲𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀸 𑀲𑀺𑀦𑁂𑀭𑀼𑀧𑀸𑀤𑁂 𑀫𑀡𑁆𑀟𑀧𑀸𑀤𑀻𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀻𑀴𑀦𑁆𑀢𑀸𑀯 𑀅𑀪𑀺𑀭𑀫𑀦𑁆𑀢𑀺. 𑀲𑀸 𑀢𑀢𑁆𑀣 𑀢𑁂𑀲𑀁 𑀅𑀪𑀺𑀭𑀢𑀺 𑀇𑀫𑁂 𑀕𑀼𑀡𑁂 𑀤𑀺𑀲𑁆𑀯𑀸𑀢𑀺 𑀆𑀳 ‘‘𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀻’’𑀢𑀺. 𑀢𑀢𑁆𑀣 𑀅𑀪𑀺𑀭𑀫𑀦𑁆𑀢𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺, 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀦𑀺𑀦𑁆𑀦𑀪𑀸𑀯𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄𑀢𑀺 𑀦𑀘𑁆𑀙𑀺𑀦𑁆𑀦𑀢𑀝𑀫𑀳𑀸𑀲𑁄𑀩𑁆𑀪𑁄 𑀯𑀺𑀬 𑀆𑀤𑀺𑀢𑁄 𑀏𑀯 𑀧𑀧𑀸𑀢𑁄. 𑀲𑁄 𑀳𑀺 𑀢𑀻𑀭𑀤𑁂𑀲𑀢𑁄 𑀧𑀝𑁆𑀞𑀸𑀬 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀯𑀺𑀤𑀢𑁆𑀣𑀺𑀭𑀢𑀦𑀬𑀝𑁆𑀞𑀺𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀸𑀤𑀺𑀯𑀲𑁂𑀦 𑀕𑀫𑁆𑀪𑀻𑀭𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑁂 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀳𑀼𑀢𑁆𑀯𑀸 𑀞𑀺𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀞𑀺𑀢𑀥𑀫𑁆𑀫𑁄𑀢𑀺 𑀞𑀺𑀢𑀲𑀪𑀸𑀯𑁄 𑀅𑀯𑀝𑁆𑀞𑀺𑀢𑀲𑀪𑀸𑀯𑁄. 𑀓𑀼𑀡𑀧𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑀴𑁂𑀯𑀭𑁂𑀦. 𑀯𑀸𑀳𑁂𑀢𑀻𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀯𑀻𑀘𑀺𑀧𑁆𑀧𑀳𑀸𑀭𑁂𑀦𑁂𑀯 𑀣𑀮𑁂 𑀔𑀺𑀧𑀢𑀺. 𑀕𑀗𑁆𑀕𑀸 𑀬𑀫𑀼𑀦𑀸𑀢𑀺 𑀅𑀦𑁄𑀢𑀢𑁆𑀢𑀤𑀳𑀲𑁆𑀲 𑀤𑀓𑁆𑀔𑀺𑀡𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀝𑁆𑀞𑀸𑀦𑁂 𑀕𑀗𑁆𑀕𑀸𑀢𑀺𑀆𑀤𑀺𑀦𑀸 𑀧𑀜𑁆𑀘𑀥𑀸 𑀲𑀗𑁆𑀔𑀁 𑀕𑀢𑀸. 𑀢𑀢𑁆𑀣 𑀦𑀤𑀻 𑀦𑀺𑀦𑁆𑀦𑀕𑀸𑀢𑀺𑀆𑀤𑀺𑀓𑀁 𑀕𑁄𑀢𑁆𑀢𑀁, 𑀕𑀗𑁆𑀕𑀸 𑀬𑀫𑀼𑀦𑀸𑀢𑀺𑀆𑀤𑀺𑀓𑀁 𑀦𑀸𑀫𑀁. 𑀲𑀯𑀦𑁆𑀢𑀺𑀬𑁄𑀢𑀺 𑀬𑀸 𑀓𑀸𑀘𑀺 𑀲𑀯𑀫𑀸𑀦𑀸 𑀲𑀦𑁆𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺𑀬𑁄 𑀫𑀳𑀸𑀦𑀤𑀺𑀬𑁄 𑀯𑀸 𑀓𑀼𑀦𑁆𑀦𑀤𑀺𑀬𑁄 𑀯𑀸. 𑀅𑀧𑁆𑀧𑁂𑀦𑁆𑀢𑀻𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀑𑀲𑀭𑀦𑁆𑀢𑀺. 𑀥𑀸𑀭𑀸𑀢𑀺 𑀯𑀼𑀝𑁆𑀞𑀺𑀥𑀸𑀭𑀸. 𑀧𑀽𑀭𑀢𑁆𑀢𑀦𑁆𑀢𑀺 𑀧𑀼𑀡𑁆𑀡𑀪𑀸𑀯𑁄. 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀳𑀺 𑀅𑀬𑀁 𑀥𑀫𑁆𑀫𑀢𑀸 𑁋 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀤𑁂𑀯𑁄 𑀫𑀦𑁆𑀤𑁄 𑀚𑀸𑀢𑁄, 𑀚𑀸𑀮𑀓𑁆𑀔𑀺𑀧𑀸𑀤𑀻𑀦𑀺 𑀆𑀤𑀸𑀬 𑀫𑀘𑁆𑀙𑀓𑀘𑁆𑀙𑀧𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀅𑀢𑀺𑀫𑀳𑀦𑁆𑀢𑀸 𑀯𑀼𑀝𑁆𑀞𑀺, 𑀮𑀪𑀺𑀲𑁆𑀲𑀸𑀫 𑀦𑀼 𑀔𑁄 𑀧𑀺𑀝𑁆𑀞𑀺𑀧𑀲𑀸𑀭𑀡𑀝𑁆𑀞𑀸𑀦’’𑀦𑁆𑀢𑀺 𑀯𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀢𑀻𑀭𑀁 𑀪𑀲𑁆𑀲𑀺𑀢𑁆𑀯𑀸 𑀲𑀺𑀦𑁂𑀭𑀼𑀫𑁂𑀔𑀮𑀁 𑀆𑀳𑀘𑁆𑀘 𑀉𑀤𑀓𑀁 𑀞𑀺𑀢𑀁, 𑀢𑀢𑁄 𑀏𑀓𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦𑁂𑀯 𑀳𑁂𑀝𑁆𑀞𑀸 𑀑𑀢𑀭𑀢𑀺, 𑀦 𑀉𑀤𑁆𑀥𑀁 𑀉𑀢𑁆𑀢𑀭𑀢𑀺. 𑀏𑀓𑀭𑀲𑁄𑀢𑀺 𑀅𑀲𑀫𑁆𑀪𑀺𑀦𑁆𑀦𑀭𑀲𑁄.

𑀫𑀼𑀢𑁆𑀢𑀸𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀯𑀝𑁆𑀝𑀤𑀻𑀖𑀸𑀤𑀺𑀪𑁂𑀤𑀸 𑀅𑀦𑁂𑀓𑀯𑀺𑀥𑀫𑀼𑀢𑁆𑀢𑀸. 𑀫𑀡𑀻𑀢𑀺 𑀭𑀢𑁆𑀢𑀦𑀻𑀮𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄 𑀫𑀡𑀺. 𑀯𑁂𑀴𑀼𑀭𑀺𑀬𑁄𑀢𑀺 𑀯𑀁𑀲𑀯𑀡𑁆𑀡𑀲𑀺𑀭𑀻𑀲𑀧𑀼𑀧𑁆𑀨𑀯𑀡𑁆𑀡𑀸𑀤𑀺𑀲𑀡𑁆𑀞𑀸𑀦𑀢𑁄 𑀅𑀦𑁂𑀓𑀯𑀺𑀥𑁄. 𑀲𑀗𑁆𑀔𑁄𑀢𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀓𑀢𑀼𑀫𑁆𑀩𑀓𑀼𑀘𑁆𑀙𑀺𑀥𑀫𑀦𑀲𑀗𑁆𑀔𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄. 𑀲𑀺𑀮𑀸𑀢𑀺 𑀲𑁂𑀢𑀓𑀸𑀴𑀫𑀼𑀕𑁆𑀕𑀯𑀡𑁆𑀡𑀸𑀤𑀺𑀪𑁂𑀤𑀸 𑀅𑀦𑁂𑀓𑀯𑀺𑀥𑀸. 𑀧𑀯𑀸𑀴𑀫𑁆𑀧𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀭𑀢𑁆𑀢𑀖𑀦𑀭𑀢𑁆𑀢𑀸𑀤𑀺𑀪𑁂𑀤𑀁 𑀅𑀦𑁂𑀓𑀯𑀺𑀥𑀁. 𑀮𑁄𑀳𑀺𑀢𑀓𑁄 𑀧𑀤𑀼𑀫𑀭𑀸𑀕𑀸𑀤𑀺𑀪𑁂𑀤𑁄 𑀅𑀦𑁂𑀓𑀯𑀺𑀥𑁄. 𑀫𑀲𑀸𑀭𑀕𑀮𑁆𑀮𑀁 𑀓𑀩𑀭𑀫𑀡𑀺. 𑀘𑀺𑀢𑁆𑀢𑀨𑀮𑀺𑀓𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀳𑀢𑀁 𑀪𑀽𑀢𑀸𑀦𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁. 𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄𑀢𑀺 𑀢𑀺𑀲𑁆𑀲𑁄 𑀫𑀘𑁆𑀙𑀚𑀸𑀢𑀺𑀬𑁄. 𑀢𑀺𑀫𑀺𑀁 𑀕𑀺𑀮𑀦𑀲𑀫𑀢𑁆𑀣𑁄 𑀢𑀺𑀫𑀺𑀗𑁆𑀕𑀮𑁄, 𑀢𑀺𑀫𑀺𑀜𑁆𑀘 𑀢𑀺𑀫𑀺𑀗𑁆𑀕𑀮𑀜𑁆𑀘 𑀕𑀺𑀮𑀦𑀲𑀫𑀢𑁆𑀣𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄𑀢𑀺 𑀯𑀤𑀦𑁆𑀢𑀺. 𑀦𑀸𑀕𑀸𑀢𑀺 𑀊𑀫𑀺𑀧𑀺𑀝𑁆𑀞𑀺𑀯𑀸𑀲𑀺𑀦𑁄𑀧𑀺 𑀯𑀺𑀫𑀸𑀦𑀝𑁆𑀞𑀓𑀦𑀸𑀕𑀸𑀧𑀺.

𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞𑀘𑁆𑀙𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁩𑁮𑁫. 𑀏𑀯𑀫𑁂𑀯 𑀔𑁄𑀢𑀺 𑀓𑀺𑀜𑁆𑀘𑀸𑀧𑀺 𑀲𑀢𑁆𑀣𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑁄𑀴𑀲𑀧𑀺 𑀩𑀸𑀢𑁆𑀢𑀺𑀁𑀲𑀧𑀺 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀉𑀧𑀫𑀸𑀪𑀸𑀯𑁂𑀦 𑀧𑀦 𑀕𑀳𑀺𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀦𑀼𑀭𑀽𑀧𑀯𑀲𑁂𑀦 𑀅𑀝𑁆𑀞𑁂𑀯 𑀢𑁂 𑀉𑀧𑀫𑁂𑀢𑀩𑁆𑀩𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑁆𑀢𑁄 ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸’’𑀢𑀺 𑀆𑀳. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀬 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀕𑀳𑀺𑀢𑀸, 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸𑀬 𑀢𑁂𑀭𑀲 𑀥𑀼𑀢𑀥𑀫𑁆𑀫𑀸, 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸𑀬 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀧𑀲𑁆𑀲𑀦𑀸 𑀅𑀝𑁆𑀞𑀢𑀺𑀁𑀲 𑀆𑀭𑀫𑁆𑀫𑀡𑀯𑀺𑀪𑀢𑁆𑀢𑀺𑀬𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀘 𑀕𑀳𑀺𑀢𑀸. 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄𑀢𑀺 𑀫𑀡𑁆𑀟𑀽𑀓𑀲𑁆𑀲 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀤𑀺𑀢𑁄𑀯 𑀲𑀻𑀮𑀧𑀽𑀭𑀡𑀸𑀤𑀻𑀦𑀺 𑀅𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑀝𑀺𑀯𑁂𑀥𑁄 𑀦𑀸𑀫 𑀦𑀢𑁆𑀣𑀺, 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀧𑀽𑀭𑁂𑀢𑁆𑀯𑀸𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀫𑀫 𑀲𑀸𑀯𑀓𑀸𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑁂 𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀲𑀁𑀯𑀲𑀢𑀻𑀢𑀺 𑀉𑀧𑁄𑀲𑀣𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀁𑀯𑀸𑀲𑀁 𑀦 𑀓𑀭𑁄𑀢𑀺. 𑀉𑀓𑁆𑀔𑀺𑀧𑀢𑀻𑀢𑀺 𑀅𑀧𑀦𑁂𑀢𑀺. 𑀆𑀭𑀓𑀸𑀯𑀸𑀢𑀺 𑀤𑀽𑀭𑁂 𑀏𑀯. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂𑀢𑀺 𑀢𑀣𑀸𑀕𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑁂𑀲𑀼 𑀤𑁂𑀲𑀺𑀢𑁂 𑀅𑀓𑁆𑀔𑀸𑀢𑁂 𑀧𑀓𑀸𑀲𑀺𑀢𑁂. 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀧𑀺 𑀫𑀳𑀸𑀓𑀧𑁆𑀧𑁂 𑀩𑀼𑀤𑁆𑀥𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀏𑀓𑀲𑀢𑁆𑀢𑁄𑀧𑀺 𑀧𑀭𑀺𑀦𑀺𑀩𑁆𑀩𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀤𑀸𑀧𑀺 ‘‘𑀢𑀼𑀘𑁆𑀙𑀸 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀩𑀼𑀤𑁆𑀥𑀓𑀸𑀮𑁂 𑀧𑀦 𑀏𑀓𑁂𑀓𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑀺 𑀲𑀢𑁆𑀢𑀸 𑀅𑀫𑀢𑀁 𑀆𑀭𑀸𑀥𑁂𑀦𑁆𑀢𑀺, 𑀢𑀤𑀸𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀧𑀽𑀭𑀸 𑀦𑀺𑀩𑁆𑀩𑀸𑀦𑀥𑀸𑀢𑀽’’𑀢𑀺. 𑀯𑀺𑀫𑀼𑀢𑁆𑀢𑀺𑀭𑀲𑁄𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀭𑀲𑁄. 𑀲𑀩𑁆𑀩𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀭𑀢𑀦𑀸𑀦𑀻𑀢𑀺 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀸𑀦𑀺. 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀳𑀺 𑀪𑀸𑀯𑀺𑀬𑀫𑀸𑀦𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀅𑀦𑁂𑀓𑀯𑀺𑀥𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀧𑀕𑁂𑀯 𑀅𑀧𑀭𑀪𑀸𑀕𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀮𑁄𑀓𑀺𑀬𑀭𑀢𑀦𑀦𑀺𑀫𑀺𑀢𑁆𑀢𑀁 𑀧𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀦 𑀢𑀲𑁆𑀲 𑀓𑀮𑀪𑀸𑀕𑀫𑁆𑀧𑀺 𑀅𑀕𑁆𑀖𑀢𑀺. 𑀅𑀧𑀺𑀘 𑁋

𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩);

𑀬𑀤𑀺 𑀘 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁂𑀦 𑀭𑀢𑀦𑀁 𑀦𑀸𑀫 𑀳𑁄𑀢𑀺, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀜𑁆𑀜𑁂𑀯 𑀪𑀽𑀢𑁄 𑀭𑀢𑀦𑀪𑀸𑀯𑁄. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀜𑁆𑀳𑀺 𑀲𑁄 𑀆𑀦𑀼𑀪𑀸𑀯𑁄, 𑀬𑀁 𑀲𑀸𑀯𑀓𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀘𑁆𑀙𑀦𑁆𑀢𑀺 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸. 𑀧𑀭𑀫𑁆𑀧𑀭𑀓𑀸𑀭𑀡𑀜𑁆𑀳𑀺 𑀤𑀸𑀦𑀸𑀤𑀺𑀉𑀧𑀦𑀺𑀲𑁆𑀲𑀬𑁄𑀢𑀺 𑀏𑀯𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑁂𑀦 𑀘 𑀭𑀢𑀦𑀪𑀸𑀯𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀲𑀸𑀢𑀺𑀲𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀆𑀭𑀫𑁆𑀫𑀡𑁂 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁, 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑀲𑁆𑀲 𑀧𑀦 𑀓𑀸𑀬𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀢𑀣𑀸 𑀳𑀺 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀲𑀜𑁆𑀜𑀸𑀦𑀁 𑀧𑀳𑀸𑀦𑀢𑁄 𑀅𑀲𑀼𑀪𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑀪𑀸𑀯𑀕𑁆𑀕𑀳𑀡𑀢𑁄 𑀘 𑀦𑁂𑀲𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄.

𑀲𑀫𑁆𑀫𑀸 𑀧𑀤𑀳𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀲𑀫𑁆𑀫𑀸 𑀧𑀤𑀳𑀢𑀺, 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀁 𑀯𑀸 𑀧𑀤𑀳𑀦𑀦𑁆𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀫𑁆𑀫𑀤𑁂𑀯 𑀧𑀥𑀸𑀦𑀪𑀸𑀯𑀓𑀭𑀡𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀫𑁆𑀧𑀺 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀧𑀳𑀸𑀦𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀦𑀞𑀸𑀧𑀦𑀯𑀲𑁂𑀦 𑀘 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺.

𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀢𑀸𑀬 𑀯𑀸 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺. 𑀧𑀞𑀫𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦 𑀅𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀧𑀢𑀺𑀝𑁆𑀞𑀸 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀢𑁂𑀦 𑀳𑀺 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺. 𑀲𑁆𑀯𑀸𑀬𑀁 𑀇𑀤𑁆𑀥𑀺𑀧𑀸𑀤𑁄 𑀬𑀲𑁆𑀫𑀸 𑀙𑀦𑁆𑀤𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀺𑀥𑀫𑁆𑀫𑁂 𑀥𑀼𑀭𑁂 𑀚𑁂𑀝𑁆𑀞𑀓𑁂 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑀢𑁆𑀣 𑀅𑀲𑁆𑀲𑀤𑁆𑀥𑀺𑀬𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀁. 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀕𑁆𑀕𑀳𑀮𑀓𑁆𑀔𑀡𑁂, 𑀧𑀫𑀸𑀤𑀁 𑀅𑀪𑀺𑀪𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁂, 𑀯𑀺𑀓𑁆𑀔𑁂𑀧𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂, 𑀅𑀜𑁆𑀜𑀸𑀡𑀁 𑀅𑀪𑀺𑀪𑀯𑀺𑀢𑁆𑀯𑀸 𑀤𑀲𑁆𑀲𑀦𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀧𑀜𑁆𑀜𑀸 𑀇𑀦𑁆𑀤𑁆𑀭𑀺𑀬𑀁.

𑀢𑀸𑀦𑀺𑀬𑁂𑀯 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀘 𑀩𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀩𑁄𑀥𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀬𑀸 𑀳𑀺 𑀏𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻, 𑀬𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀺 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬. 𑀬𑁄𑀧𑁂𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 ‘‘𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁮𑁨; 𑀯𑀺𑀪. 𑀅𑀝𑁆𑀞. 𑁪𑁬𑁬; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁨𑁫), ‘‘𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁧𑁭) 𑀦𑀬𑁂𑀦𑀧𑀺 𑀩𑁄𑀚𑁆𑀛𑀗𑁆𑀕𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀅𑀭𑀺𑀬𑀨𑀮𑀧𑀝𑀺𑀮𑀸𑀪𑀓𑀭𑀢𑁆𑀢𑀸 𑀘 𑀅𑀭𑀺𑀬𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲 𑀅𑀢𑁆𑀣𑀺, 𑀅𑀝𑁆𑀞𑀗𑁆𑀕𑀸𑀦𑀺𑀬𑁂𑀯 𑀯𑀸 𑀅𑀝𑁆𑀞𑀗𑁆𑀕𑀺𑀓𑁄. 𑀫𑀸𑀭𑁂𑀦𑁆𑀢𑁄 𑀓𑀺𑀮𑁂𑀲𑁂 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀸 𑀫𑀕𑁆𑀕𑀻𑀬𑀢𑀺, 𑀲𑀬𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀻𑀢𑀺 𑀫𑀕𑁆𑀕𑁄𑀢𑀺 𑀏𑀯𑀫𑁂𑀢𑁂𑀲𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀅𑀢𑁆𑀣𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁄𑀢𑀸𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑁄𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀞𑀺𑀢𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀞𑀫𑀫𑀕𑁆𑀕𑀝𑁆𑀞𑁄, 𑀬𑁄 𑀅𑀝𑁆𑀞𑀫𑀓𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀓𑀤𑀸𑀕𑀸𑀫𑀻𑀢𑀺 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀆𑀕𑀫𑀦𑀲𑀻𑀮𑁄 𑀤𑀼𑀢𑀺𑀬𑀨𑀮𑀝𑁆𑀞𑁄. 𑀅𑀦𑀸𑀕𑀸𑀫𑀻𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀓𑀸𑀫𑀮𑁄𑀓𑀁 𑀅𑀦𑀸𑀕𑀫𑀦𑀲𑀻𑀮𑁄 𑀢𑀢𑀺𑀬𑀨𑀮𑀝𑁆𑀞𑁄. 𑀬𑁄 𑀧𑀦 𑀲𑀤𑁆𑀥𑀸𑀦𑀼𑀲𑀸𑀭𑀻 𑀥𑀫𑁆𑀫𑀸𑀦𑀼𑀲𑀸𑀭𑀻 𑀏𑀓𑀩𑀻𑀚𑀻𑀢𑀺 𑀏𑀯𑀫𑀸𑀤𑀺𑀓𑁄 𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑁄, 𑀲𑁄 𑀢𑁂𑀲𑀁𑀬𑁂𑀯 𑀪𑁂𑀤𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀢𑁆𑀢𑀦𑁄 𑀥𑀫𑁆𑀫𑀯𑀺𑀦𑀬𑁂 𑀫𑀢𑀓𑀼𑀡𑀧𑀲𑀤𑀺𑀲𑁂𑀦 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀸𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀅𑀲𑀁𑀯𑀸𑀲𑀸𑀭𑀳𑀲𑀁𑀯𑀸𑀲𑀸𑀭𑀳𑀪𑀸𑀯𑀸𑀦𑀁 𑀓𑀸𑀭𑀡𑀧𑀭𑀺𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺𑀁

𑀆𑀧𑀚𑁆𑀚𑀢𑀺, 𑀢𑀢𑁄 𑀅𑀧𑀭𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀯𑀲𑁆𑀲𑀁 𑀓𑀺𑀮𑁂𑀲𑀯𑀲𑁆𑀲𑀁 𑀅𑀢𑀺𑀯𑀺𑀬 𑀯𑀲𑁆𑀲𑀢𑀺. 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀢𑀁 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀯𑀭𑀦𑁆𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀓𑀸𑀲𑁂𑀦𑁆𑀢𑁄 𑀬𑀣𑀸𑀥𑀫𑁆𑀫𑀁 𑀬𑀣𑀸𑀯𑀺𑀦𑀬𑀁 𑀧𑀝𑀺𑀓𑀭𑁄𑀦𑁆𑀢𑁄 𑀤𑁂𑀲𑁂𑀦𑁆𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀅𑀜𑁆𑀜𑀁 𑀦𑀯𑀁 𑀆𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀢𑁂𑀦𑀲𑁆𑀲 𑀢𑀁 𑀯𑀺𑀯𑀝𑀁 𑀧𑀼𑀦 𑀆𑀧𑀢𑁆𑀢𑀺𑀯𑀲𑁆𑀲𑀁 𑀓𑀺𑀮𑁂𑀲𑀯𑀲𑁆𑀲𑀁 𑀦 𑀯𑀲𑁆𑀲𑀢𑀺. 𑀬𑀲𑁆𑀫𑀸 𑀘 𑀏𑀢𑀤𑁂𑀯, 𑀢𑀲𑁆𑀫𑀸 𑀙𑀦𑁆𑀦𑀁 𑀙𑀸𑀤𑀺𑀢𑀁 𑀆𑀧𑀢𑁆𑀢𑀺𑀁 𑀯𑀺𑀯𑀭𑁂𑀣. 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻𑀢𑀺 𑀏𑀯𑀁 𑀲𑀦𑁆𑀢𑁂 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀢𑀪𑀸𑀯𑀁 𑀅𑀢𑀺𑀯𑀺𑀚𑁆𑀛𑀺𑀢𑁆𑀯𑀸 𑀓𑀺𑀮𑁂𑀲𑀯𑀲𑁆𑀲𑀦𑁂𑀦 𑀦 𑀯𑀲𑁆𑀲𑀢𑀺 𑀦 𑀢𑁂𑀫𑁂𑀢𑀺, 𑀏𑀯𑀁 𑀲𑁄 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑁆𑀲𑀼𑀢𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞𑀘𑁆𑀙𑀭𑀺𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸𑀯𑀡𑁆𑀡𑀦𑀸

𑁩𑁮𑁬. 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀩𑁆𑀩𑀼𑀤𑁄 𑀚𑀸𑀢𑁄, 𑀅𑀧𑀭𑀺𑀲𑀼𑀤𑁆𑀥𑀸 𑀧𑀼𑀕𑁆𑀕𑀮𑀸 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀦 𑀘 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀉𑀤𑁆𑀤𑀺𑀲𑀢𑀺, 𑀅𑀦𑀼𑀤𑁆𑀤𑀺𑀲𑀦𑁆𑀢𑁂 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑁄𑀲𑀣𑁄 𑀧𑀘𑁆𑀙𑀺𑀚𑁆𑀚𑀢𑀺, 𑀬𑀦𑁆𑀦𑀽𑀦𑀸𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺, 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸…𑀧𑁂… 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺. 𑀢𑀢𑁆𑀣 𑀦𑀤𑀸𑀦𑀸𑀳𑀦𑁆𑀢𑀺 𑀦 𑀇𑀤𑀸𑀦𑀺 𑀅𑀳𑀁. 𑀉𑀧𑁄𑀲𑀣𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑁂𑀓𑀁 𑀦-𑀓𑀸𑀭𑁂𑀦 𑀲𑀫𑁆𑀩𑀦𑁆𑀥𑁄. 𑀤𑀼𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺. 𑀢𑁂𑀲𑀼 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂’’𑀢𑀺𑀆𑀤𑀺𑀓𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁, 𑀢𑀁 𑀲𑀸𑀯𑀓𑀸𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸, 𑀬𑀁 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀤𑁆𑀤𑀺𑀲𑀻𑀬𑀢𑀺. ‘‘𑀔𑀦𑁆𑀢𑀻 𑀧𑀭𑀫𑀁…𑀧𑁂… 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁…𑀧𑁂… 𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄…𑀧𑁂… 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫) 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀕𑀸𑀣𑀸 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫, 𑀢𑀁 𑀩𑀼𑀤𑁆𑀥𑀸𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀲𑀸𑀯𑀓𑀸. 𑀙𑀦𑁆𑀦𑀫𑁆𑀧𑀺 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀤𑁆𑀤𑀺𑀲𑀦𑁆𑀢𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀭𑀫𑀸𑀦𑀓𑀸𑀮𑁂 𑀅𑀬𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄, 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀦 𑀧𑀞𑀫𑀩𑁄𑀥𑀺𑀬𑀁𑀬𑁂𑀯, 𑀢𑀢𑁄 𑀧𑀭𑀁 𑀇𑀢𑀭𑁄, 𑀢𑀜𑁆𑀘 𑀔𑁄 𑀪𑀺𑀓𑁆𑀔𑀽 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸. 𑀢𑀲𑁆𑀫𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀯𑀻𑀲𑀢𑀺𑀯𑀲𑁆𑀲𑀫𑀢𑁆𑀢𑀁 𑀇𑀫𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀇𑀫𑀁 𑀅𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀭𑀁 𑀦 𑀉𑀤𑁆𑀤𑀺𑀲𑀺.

𑀅𑀝𑁆𑀞𑀸𑀦𑀦𑁆𑀢𑀺 𑀅𑀓𑀸𑀭𑀡𑀁. 𑀅𑀦𑀯𑀓𑀸𑀲𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀸𑀭𑀡𑀜𑁆𑀳𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ‘‘𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀅𑀯𑀓𑀸𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀦𑁆𑀢𑀺𑀆𑀤𑀺 𑀧𑀤𑀢𑁆𑀣𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀯𑀺𑀦𑀺𑀘𑁆𑀙𑀬𑀢𑁄 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀜𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸.

𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁭. 𑀓𑀢𑀜𑁆𑀘 𑀅𑀓𑀢𑀜𑁆𑀘 𑀉𑀪𑀬𑀁 𑀕𑀳𑁂𑀢𑁆𑀯𑀸𑀢𑀺 𑀬𑀲𑁆𑀲 𑀏𑀓𑀦𑁆𑀢𑁂𑀦 𑀓𑀢𑀸𑀧𑀺 𑀅𑀢𑁆𑀣𑀺, 𑀅𑀓𑀢𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀲 𑀢𑀤𑀼𑀪𑀬𑀁 𑀕𑀳𑁂𑀢𑁆𑀯𑀸.

𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁯. 𑀧𑀭𑀺𑀲𑀸 𑀯𑀼𑀝𑁆𑀞𑀸𑀢𑀻𑀢𑀺 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑀺𑀢𑀁, 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀯𑀼𑀝𑁆𑀞𑀸𑀢𑀺.

𑁩𑁯𑁩. 𑀧𑀘𑁆𑀘𑀸𑀤𑀺𑀬𑀢𑀻𑀢𑀺 𑀧𑀢𑀺 𑀆𑀤𑀺𑀬𑀢𑀺, ‘‘𑀅𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀦 𑀆𑀭𑀪𑀢𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁯𑁮. 𑀧𑀭𑀁 𑀘𑁄𑀤𑁂𑀢𑀼𑀁 𑀅𑀢𑁆𑀢𑀦𑀸 𑀆𑀤𑀸𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀁 𑀅𑀥𑀺𑀓𑀭𑀡𑀁 𑀅𑀢𑁆𑀢𑀸𑀤𑀸𑀦𑀁. 𑀢𑁂𑀦𑀸𑀳 ‘‘𑀲𑀸𑀲𑀦𑀁 𑀲𑁄𑀥𑁂𑀢𑀼𑀓𑀸𑀫𑁄’’𑀢𑀺𑀆𑀤𑀺. 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀯𑀲𑁆𑀲𑀓𑀸𑀮𑁄.

𑀘𑁄𑀤𑀓𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁩𑁯𑁯. 𑀧𑀝𑀺𑀫𑀸𑀲𑀺𑀢𑀼𑀦𑁆𑀢𑀺 𑀧𑀭𑀸𑀫𑀲𑀺𑀢𑀼𑀁. 𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸…𑀧𑁂… 𑀅𑀥𑀺𑀕𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀸𑀪𑀸𑀯𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀸𑀖𑀸𑀢’’𑀦𑁆𑀢𑀺.

𑀘𑁄𑀤𑀓𑁂𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀥𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁪𑁦𑁦. 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑀏𑀢𑁆𑀣 𑀘𑀺𑀢𑁆𑀢𑀧𑀭𑀺𑀬𑀸𑀬𑁄 𑀅𑀦𑁆𑀢𑀭-𑀲𑀤𑁆𑀤𑁄𑀢𑀺 𑀆𑀳 ‘‘𑀦 𑀤𑀼𑀝𑁆𑀞𑀘𑀺𑀢𑁆𑀢𑁄 𑀳𑀼𑀢𑁆𑀯𑀸’’𑀢𑀺.

𑀘𑁄𑀤𑀓𑀘𑀼𑀤𑀺𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁪𑁦𑁧. 𑀓𑀭𑀼𑀡𑀦𑁆𑀢𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀓𑀭𑀼𑀡𑀚𑁆𑀛𑀸𑀦𑀁. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀦𑁆𑀢𑀺 𑀧𑀭𑀺𑀓𑀫𑁆𑀫𑀼𑀧𑀘𑀸𑀭𑀯𑀲𑀧𑁆𑀧𑀯𑀢𑁆𑀢𑀁 𑀓𑀭𑀼𑀡𑀁. 𑀫𑁂𑀢𑁆𑀢𑀜𑁆𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.