𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑀁

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁫𑁬-𑁩𑁫𑁭. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀉𑀧𑀭𑀺𑀧𑀺𑀝𑁆𑀞𑀺𑀢𑁄𑀢𑀺 𑀧𑀺𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲 𑀉𑀧𑀭𑀺𑀪𑀸𑀕𑀢𑁄, 𑀤𑁆𑀯𑀸𑀭𑀩𑀸𑀳𑀲𑁆𑀲 𑀉𑀧𑀭𑀺𑀧𑀤𑁂𑀲𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀲𑀼𑀓𑁆𑀔𑀸𑀧𑀦𑀢𑁆𑀣𑀁 𑀆𑀢𑀧𑁂 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄𑀢𑀺 𑀢𑀲𑁆𑀲 𑀯𑀲𑁆𑀲𑁂 𑀧𑀼𑀘𑁆𑀙𑀺𑀢𑁂 𑀬𑀤𑀺 𑀤𑀳𑀭𑁄 𑀳𑁄𑀢𑀺, 𑀲𑀬𑀫𑁂𑀯 𑀯𑀦𑁆𑀤𑀺𑀲𑁆𑀲𑀢𑀺, 𑀢𑀤𑀸 𑀇𑀫𑀺𑀦𑀸𑀯 𑀯𑀦𑁆𑀤𑀸𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄𑀢𑀺 𑀑𑀮𑁄𑀓𑁂𑀢𑀩𑁆𑀩𑁄. 𑀬𑀣𑀸𑀪𑀸𑀕𑀦𑁆𑀢𑀺 𑀧𑀼𑀩𑁆𑀩𑁂 𑀧𑀜𑁆𑀜𑀢𑁆𑀢𑀁 𑀧𑀤𑁂𑀲𑀪𑀸𑀕𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀦𑁆𑀢𑀸𑀦𑀓𑀦𑁆𑀢𑀺 𑀉𑀡𑁆𑀡𑀦𑀸𑀪𑀺𑀲𑀼𑀢𑁆𑀢𑀁. 𑀉𑀮𑁆𑀮𑁄𑀓𑀸𑀢𑀺 𑀕𑁂𑀳𑀲𑁆𑀲 𑀉𑀧𑀭𑀺𑀪𑀸𑀕𑀢𑁄 𑀧𑀝𑁆𑀞𑀸𑀬, 𑀧𑀞𑀫𑀁 𑀉𑀧𑀭𑀺𑀪𑀸𑀕𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁫𑁯. 𑀫𑀳𑀸𑀆𑀯𑀸𑀲𑁂𑀢𑀺 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑁂 𑀫𑀳𑀸𑀆𑀯𑀸𑀲𑁂.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁨. 𑀧𑀜𑁆𑀘𑀫𑁂 𑀦𑀺𑀲𑀺𑀦𑁆𑀦𑁂𑀢𑀺 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂. 𑀉𑀧𑀦𑀺𑀲𑀺𑀦𑁆𑀦𑀓𑀣𑀸 𑀦𑀸𑀫 𑀩𑀳𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀭𑀺𑀓𑀣𑀸𑀓𑀣𑀦𑀁.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁪. 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀲𑀧𑀼𑀢𑁆𑀢𑀤𑀸𑀭𑀸 𑀆𑀯𑀲𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬𑀸𑀢𑀺 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑁄𑀚𑀦𑀸𑀯𑀲𑀸𑀦𑁂 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀢𑀭𑀸 𑀧𑀺𑀧𑀸𑀲𑀺𑀢𑁂𑀦 𑀧𑀦…𑀧𑁂… 𑀳𑀢𑁆𑀣𑀸 𑀦 𑀥𑁄𑀯𑀺𑀢𑀩𑁆𑀩𑀸’’𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀸 𑀦 𑀥𑁄𑀯𑀺𑀢𑀩𑁆𑀩𑀸’’𑀢𑀺 𑀮𑀺𑀔𑀦𑁆𑀢𑀺, ‘‘𑀳𑀢𑁆𑀣𑀸 𑀥𑁄𑀯𑀺𑀢𑀩𑁆𑀩𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀅𑀜𑁆𑀜𑀣𑀸 ‘‘𑀦 𑀢𑀸𑀯 𑀉𑀤𑀓𑀦𑁆𑀢𑀺 𑀇𑀤𑀁 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀦𑁆𑀢𑀭𑀸 𑀧𑀺𑀧𑀸𑀲𑀺𑀢𑁂𑀦 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀲𑁂𑀲𑁄 𑀦 𑀉𑀧𑀮𑀩𑁆𑀪𑀢𑀺. 𑀅𑀣 𑀫𑀢𑀁 ‘‘𑀦 𑀢𑀸𑀯 𑀣𑁂𑀭𑁂𑀦 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀓𑀺𑀁 𑀧𑀸𑀦𑀻𑀬𑀧𑀝𑀺𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀤𑀸𑀳𑀼 𑀳𑀢𑁆𑀣𑀥𑁄𑀯𑀦𑀉𑀤𑀓𑀕𑁆𑀕𑀳𑀡𑀁 𑀲𑀦𑁆𑀥𑀸𑀬𑀸𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘𑀇𑀤𑀁 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’𑀦𑁆𑀢𑀺𑀆𑀤𑀺 𑀓𑀣𑀺𑀢’’𑀦𑁆𑀢𑀺, 𑀢𑀜𑁆𑀘 𑀦, 𑀢𑀢𑁆𑀣 𑀆𑀲𑀗𑁆𑀓𑀸𑀬 𑀏𑀯 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀪𑀕𑀯𑀸 ‘‘𑀬𑀸𑀯 𑀅𑀜𑁆𑀜𑁂 𑀦 𑀪𑀼𑀢𑁆𑀢𑀸𑀯𑀺𑀦𑁄 𑀳𑁄𑀦𑁆𑀢𑀺, 𑀢𑀸𑀯 𑀧𑀸𑀦𑀻𑀬𑀁 𑀦 𑀧𑀸𑀢𑀩𑁆𑀩’’𑀦𑁆𑀢𑀺 𑀯𑀓𑁆𑀔𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀬𑀤𑀺 𑀘𑁂𑀢𑀁 𑀧𑀸𑀦𑀻𑀬𑀧𑀝𑀺𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀦 𑀢𑀸𑀯 𑀣𑁂𑀭𑁂𑀦 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀉𑀤𑀓𑀲𑀤𑁆𑀤𑀧𑁆𑀧𑀬𑁄𑀕𑁄 𑀘 𑀦 𑀓𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀇𑀤𑀁 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑀺𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀅𑀦𑁆𑀢𑀭𑀸 𑀧𑀺𑀧𑀸𑀲𑀺𑀢𑁂𑀦 𑀧𑀦 𑀕𑀮𑁂 𑀯𑀺𑀮𑀕𑁆𑀕𑀸𑀫𑀺𑀲𑁂𑀦 𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, ‘‘𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀳𑀢𑁆𑀣𑀸 𑀦 𑀥𑁄𑀯𑀺𑀢𑀩𑁆𑀩𑀸’’𑀢𑀺 𑀏𑀯𑀁 𑀧𑀦 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀥𑀼𑀭𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀤𑁆𑀯𑀸𑀭𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁬. 𑀧𑀭𑀸𑀫𑀲𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀞𑀧𑁂𑀢𑀺 𑀯𑀸𑀢𑀺 ‘‘𑀢𑀺𑀝𑁆𑀞𑀣, 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀻 𑀞𑀧𑁂𑀢𑀺 𑀦𑀸𑀫.

𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁭. 𑀓𑁂𑀦𑀚𑁆𑀚, 𑀪𑀦𑁆𑀢𑁂, 𑀬𑀼𑀢𑁆𑀢𑀦𑁆𑀢𑀺 𑀓𑁂𑀦 𑀦𑀓𑁆𑀔𑀢𑁆𑀢𑁂𑀦 𑀅𑀚𑁆𑀚 𑀘𑀦𑁆𑀤𑁄 𑀬𑀼𑀢𑁆𑀢𑁄𑀢𑀺 𑀏𑀯𑀁 𑀯𑀤𑀦𑁆𑀢𑁂𑀦 𑀦𑀓𑁆𑀔𑀢𑁆𑀢𑀁 𑀧𑀼𑀘𑁆𑀙𑀺𑀢𑀁 𑀳𑁄𑀢𑀺.

𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁯-𑁩𑁭𑁦. 𑀅𑀗𑁆𑀕𑀡𑁂𑀢𑀺 𑀅𑀩𑁆𑀪𑁄𑀓𑀸𑀲𑁂. 𑀦 𑀯𑀼𑀟𑁆𑀠𑀁 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀑𑀯𑀭𑀓𑁂 𑀢𑀤𑀼𑀧𑀘𑀸𑀭𑁂 𑀘 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀪𑁄𑀚𑀦𑀲𑀸𑀮𑀸𑀤𑀻𑀲𑀼𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀤𑀻𑀲𑀼𑀧𑀺 𑀉𑀤𑁆𑀤𑁂𑀲𑀤𑀸𑀦𑀸𑀤𑀺 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁭𑁩-𑁩𑁭𑁪. 𑀇𑀤𑀁 𑀅𑀢𑀺𑀯𑀺𑀯𑀝𑀦𑁆𑀢𑀺 𑀇𑀤𑀁 𑀞𑀸𑀦𑀁 𑀕𑀼𑀫𑁆𑀩𑀸𑀤𑀻𑀳𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀅𑀢𑀺𑀯𑀺𑀬 𑀧𑀓𑀸𑀲𑀦𑀁. 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬. 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀫𑀲𑁆𑀫𑀺𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀆𑀕𑀢𑀸𑀦𑀺 𑀆𑀕𑀦𑁆𑀢𑀼𑀓𑀸𑀯𑀸𑀲𑀺𑀓𑀕𑀫𑀺𑀬𑀸𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀸𑀭𑀜𑁆𑀜𑀺𑀓 𑀲𑁂𑀦𑀸𑀲𑀦 𑀚𑀦𑁆𑀢𑀸𑀖𑀭 𑀯𑀘𑁆𑀘𑀓𑀼𑀝𑀺 𑀉𑀧𑀚𑁆𑀛𑀸𑀘𑀭𑀺𑀬 𑀲𑀤𑁆𑀥𑀺𑀯𑀺𑀳𑀸𑀭𑀺𑀓 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀦𑀸𑀫, 𑀇𑀢𑁄 𑀅𑀜𑁆𑀜𑀸𑀦𑀺 𑀧𑀦 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂𑀬𑁂𑀯 𑀘𑀭𑀺𑀢𑀩𑁆𑀩𑀸𑀦𑀺 𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀇𑀫𑀸𑀦𑀺𑀬𑁂𑀯 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀕𑀳𑀺𑀬𑀫𑀸𑀦𑀸𑀦𑀺 𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀆𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.