𑁭. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀁

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁩𑁩𑁦. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀅𑀦𑀼𑀧𑀺𑀬𑀸𑀬𑀦𑁆𑀢𑀺𑀆𑀤𑀻𑀲𑀼 ‘‘𑀅𑀦𑀼𑀧𑀺𑀬𑀸 𑀦𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀅𑀦𑀼𑀦𑀸𑀲𑀺𑀓𑀲𑁆𑀲 𑀘 𑀆𑀕𑀫𑀁 𑀓𑀢𑁆𑀯𑀸 ‘‘𑀅𑀦𑀼𑀧𑀺𑀬𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀫𑀮𑁆𑀮𑀸𑀦𑀦𑁆𑀢𑀺 𑀫𑀮𑁆𑀮𑀭𑀸𑀚𑀽𑀦𑀁. 𑀦 𑀳𑁂𑀝𑁆𑀞𑀸 𑀧𑀸𑀲𑀸𑀤𑀸 𑀑𑀭𑁄𑀳𑀢𑀻𑀢𑀺 𑀉𑀧𑀭𑀺𑀧𑀸𑀲𑀸𑀤𑀢𑁄 𑀳𑁂𑀝𑁆𑀞𑀺𑀫𑀢𑀮𑀁 𑀦 𑀑𑀭𑁄𑀳𑀢𑀺, ‘‘𑀳𑁂𑀝𑁆𑀞𑀸𑀧𑀸𑀲𑀸𑀤’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀦𑀼𑀭𑀼𑀤𑁆𑀥𑁄 𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀖𑀭𑀸𑀯𑀸𑀲𑀢𑁆𑀣𑀦𑁆𑀢𑀺 𑀖𑀭𑀸𑀯𑀸𑀲𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁. 𑀉𑀤𑀓𑀁 𑀅𑀪𑀺𑀦𑁂𑀢𑀩𑁆𑀩𑀦𑁆𑀢𑀺 𑀉𑀤𑀓𑀁 𑀆𑀳𑀭𑀺𑀢𑀩𑁆𑀩𑀁. 𑀦𑀺𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀆𑀪𑀢𑀫𑀼𑀤𑀓𑀁 𑀧𑀼𑀦 𑀦𑀻𑀳𑀭𑀺𑀢𑀩𑁆𑀩𑀁. 𑀦𑀺𑀤𑁆𑀥𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀉𑀝𑁆𑀞𑀺𑀢𑀢𑀺𑀡𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀅𑀧𑀦𑁂𑀢𑀩𑁆𑀩𑀁. 𑀮𑀯𑀸𑀧𑁂𑀢𑀩𑁆𑀩𑀦𑁆𑀢𑀺 𑀧𑀭𑀺𑀧𑀓𑁆𑀓𑀓𑀸𑀮𑁂 𑀮𑀯𑀸𑀧𑁂𑀢𑀩𑁆𑀩𑀁. 𑀉𑀩𑁆𑀩𑀸𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀔𑀮𑀫𑀡𑁆𑀟𑀮𑀁 𑀳𑀭𑀸𑀧𑁂𑀢𑀩𑁆𑀩𑀁. 𑀉𑀚𑀼𑀁 𑀓𑀸𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀧𑀮𑀸𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀢𑀩𑁆𑀩𑀸𑀦𑀻𑀢𑀺 𑀧𑀮𑀸𑀮𑀸𑀦𑀺 𑀅𑀧𑀦𑁂𑀢𑀩𑁆𑀩𑀸𑀦𑀺. 𑀪𑀼𑀲𑀺𑀓𑀸 𑀉𑀤𑁆𑀥𑀭𑀸𑀧𑁂𑀢𑀩𑁆𑀩𑀸𑀢𑀺 𑀕𑀼𑀦𑁆𑀦𑀁 𑀔𑀼𑀭𑀕𑁆𑀕𑁂𑀳𑀺 𑀲𑀜𑁆𑀙𑀺𑀦𑁆𑀦𑀸 𑀪𑀼𑀲𑀲𑀗𑁆𑀔𑀸𑀢𑀸 𑀦𑀸𑀴𑀤𑀡𑁆𑀟𑀸 𑀅𑀧𑀦𑁂𑀢𑀩𑁆𑀩𑀸. 𑀑𑀧𑀼𑀦𑀸𑀧𑁂𑀢𑀩𑁆𑀩𑀦𑁆𑀢𑀺 𑀯𑀸𑀢𑀫𑀼𑀔𑁂 𑀑𑀧𑀼𑀦𑀸𑀧𑁂𑀢𑁆𑀯𑀸 𑀧𑀮𑀸𑀮𑀁 𑀅𑀧𑀦𑁂𑀢𑀩𑁆𑀩𑀁. 𑀅𑀢𑀺𑀳𑀭𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀦𑁆𑀢𑁄𑀓𑁄𑀝𑁆𑀞𑀸𑀕𑀸𑀭𑀁 𑀉𑀧𑀦𑁂𑀢𑀩𑁆𑀩𑀁. 𑀦 𑀓𑀫𑁆𑀫𑀸𑀢𑀺 𑀦 𑀓𑀫𑁆𑀫𑀸𑀦𑀺. 𑀖𑀭𑀸𑀯𑀸𑀲𑀢𑁆𑀣𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀉𑀧𑀚𑀸𑀦𑀸𑀳𑀻𑀢𑀺 𑀘 𑀉𑀧𑀲𑀕𑁆𑀕𑀫𑀢𑁆𑀢𑁄 𑀉𑀧-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀖𑀭𑀸𑀯𑀸𑀲𑀢𑁆𑀣𑀁 𑀚𑀸𑀦𑀸𑀳𑀻’’𑀢𑀺. 𑀚𑀸𑀦𑀸𑀳𑀻𑀢𑀺 𑀘𑁂𑀢𑁆𑀣 𑀧𑀝𑀺𑀧𑀚𑁆𑀚𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀸𑀫𑀓𑀸𑀢𑀺 𑀅𑀦𑀺𑀘𑁆𑀙𑀫𑀸𑀦𑀸.

𑁩𑁩𑁧-𑁩𑁩𑁨. 𑀬𑀁 𑀦 𑀦𑀺𑀯𑀢𑁆𑀢𑁄𑀢𑀺 𑀬𑀲𑁆𑀫𑀸 𑀦 𑀦𑀺𑀯𑀢𑁆𑀢𑁄. 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀢𑀺 (𑀉𑀤𑀸. 𑀅𑀝𑁆𑀞. 𑁨𑁦) ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀅𑀯𑀲𑁂𑀲𑀁 𑀅𑀭𑀜𑁆𑀜’’𑀦𑁆𑀢𑀺 (𑀧𑀸𑀭𑀸.𑁯𑁨) 𑀯𑀼𑀢𑁆𑀢𑀁 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀜𑁆𑀘 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀺 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀚𑀦𑀲𑀫𑁆𑀩𑀸𑀥𑀸𑀪𑀸𑀯𑀢𑁄 𑀇𑀥 ‘‘𑀲𑀼𑀜𑁆𑀜𑀸𑀕𑀸𑀭’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀅𑀣 𑀯𑀸 𑀛𑀸𑀦𑀓𑀡𑁆𑀝𑀓𑀸𑀦𑀁 𑀲𑀤𑁆𑀤𑀸𑀦𑀁 𑀅𑀪𑀸𑀯𑀢𑁄 𑀯𑀺𑀯𑀺𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀅𑀕𑀸𑀭𑀫𑁆𑀧𑀺 ‘‘𑀲𑀼𑀜𑁆𑀜𑀸𑀕𑀸𑀭’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀼𑀜𑁆𑀜𑀸𑀕𑀸𑀭𑀁 𑀉𑀧𑀕𑀢𑁄. 𑀅𑀪𑀺𑀓𑁆𑀔𑀡𑀦𑁆𑀢𑀺 𑀩𑀳𑀼𑀮𑀁. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀲𑁄 𑀳𑀺 𑀆𑀬𑀲𑁆𑀫𑀸 𑀅𑀭𑀜𑁆𑀜𑁂 𑀤𑀺𑀯𑀸𑀯𑀺𑀳𑀸𑀭𑀁 𑀉𑀧𑀕𑀢𑁄𑀧𑀺 𑀭𑀢𑁆𑀢𑀺𑀯𑀸𑀲𑀽𑀧𑀕𑀢𑁄𑀧𑀺 𑀬𑁂𑀪𑀼𑀬𑁆𑀬𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀘 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀲𑁆𑀫𑀸 𑀢𑀁 𑀲𑀼𑀔𑀁 𑀲𑀦𑁆𑀥𑀸𑀬 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀁 𑀲𑀪𑀬𑀁 𑀲𑀧𑀭𑀺𑀴𑀸𑀳𑀁 𑀭𑀚𑁆𑀚𑀲𑀼𑀔𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀺𑀢𑀜𑀸𑀡𑀲𑀫𑀼𑀝𑁆𑀞𑀸𑀦𑀁 𑀧𑀻𑀢𑀺𑀲𑀫𑀼𑀕𑁆𑀕𑀸𑀭𑀁 𑀲𑀫𑀼𑀕𑁆𑀕𑀺𑀭𑀢𑀺. 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀦𑁆𑀢𑀺 𑀢𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑀸 𑀢𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀸𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁, 𑀦 𑀉𑀚𑁆𑀛𑀸𑀦𑀯𑀲𑁂𑀦. 𑀦𑀺𑀲𑁆𑀲𑀁𑀲𑀬𑀦𑁆𑀢𑀺 𑀅𑀲𑀦𑁆𑀤𑁂𑀳𑁂𑀦, 𑀏𑀓𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀧𑀼𑀣𑀼𑀚𑁆𑀚𑀦𑀸 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀯𑀺𑀯𑁂𑀓𑀲𑀼𑀔𑀁 𑀲𑀦𑁆𑀥𑀸𑀬 𑀉𑀤𑀸𑀦𑀁 𑀅𑀚𑀸𑀦𑀦𑁆𑀢𑀸 𑀏𑀯𑀫𑀸𑀳𑀁𑀲𑀼. 𑀲𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄.

𑀅𑀜𑁆𑀜𑀢𑀭𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁 𑀏𑀓𑀁 𑀪𑀺𑀓𑁆𑀔𑀼𑀁. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀡𑀸𑀧𑁂𑀲𑀺 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀓𑀸𑀫𑁄. 𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂, 𑀲𑀸𑀥𑀽𑀢𑀺 𑀅𑀢𑁆𑀣𑁄. 𑀏𑀯𑀁 𑀪𑀦𑁆𑀢𑁂𑀢𑀺 𑀏𑀢𑁆𑀣 𑀧𑀦 𑀏𑀯𑀁-𑀲𑀤𑁆𑀤𑁄 𑀧𑀝𑀺𑀜𑁆𑀜𑀸𑀬𑀁. ‘‘𑀅𑀪𑀺𑀓𑁆𑀔𑀡𑀁 ‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’𑀦𑁆𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀬𑀣𑀸 𑀢𑁂 𑀪𑀺𑀓𑁆𑀔𑀽 𑀯𑀤𑀦𑁆𑀢𑀺, 𑀢𑀁 𑀏𑀯𑀁 𑀢𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀉𑀤𑀸𑀦𑀁 𑀧𑀝𑀺𑀚𑀸𑀦𑀸𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀪𑀤𑁆𑀤𑀺𑀬𑀸’’𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀧𑀼𑀘𑁆𑀙𑀢𑀺, 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺? 𑀦𑁄 𑀦 𑀚𑀸𑀦𑀸𑀢𑀺, 𑀢𑁂𑀦𑁂𑀯 𑀧𑀦 𑀢𑀫𑀢𑁆𑀣𑀁 𑀯𑀤𑀸𑀧𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁 𑀧𑀼𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑁧𑁬, 𑁧𑁯𑁪). 𑀅𑀢𑁆𑀣𑀯𑀲𑀦𑁆𑀢𑀺 𑀓𑀸𑀭𑀡𑀁.

𑀅𑀦𑁆𑀢𑁄𑀧𑀺 𑀅𑀦𑁆𑀢𑁂𑀧𑀼𑀭𑁂𑀢𑀺 𑀇𑀢𑁆𑀣𑀸𑀕𑀸𑀭𑀲𑁆𑀲 𑀲𑀜𑁆𑀘𑀭𑀡𑀝𑁆𑀞𑀸𑀦𑀪𑀽𑀢𑁂 𑀭𑀸𑀚𑀕𑁂𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑁂, 𑀬𑀢𑁆𑀣 𑀭𑀸𑀚𑀸 𑀦𑀳𑀸𑀦𑀪𑁄𑀚𑀦𑀲𑀬𑀦𑀸𑀤𑀺𑀁 𑀓𑀧𑁆𑀧𑁂𑀢𑀺. 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸𑀢𑀺 𑀆𑀭𑀓𑁆𑀔𑀸𑀤𑀺𑀓𑀢𑀧𑀼𑀭𑀺𑀲𑁂𑀳𑀺 𑀕𑀼𑀢𑁆𑀢𑀺 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀯𑀺𑀳𑀺𑀢𑀸. 𑀩𑀳𑀺𑀧𑀺 𑀅𑀦𑁆𑀢𑁂𑀧𑀼𑀭𑁂𑀢𑀺 𑀅𑀝𑁆𑀝𑀓𑀭𑀡𑀝𑁆𑀞𑀸𑀦𑀸𑀤𑀺𑀓𑁂 𑀅𑀦𑁆𑀢𑁂𑀧𑀼𑀭𑀢𑁄 𑀩𑀳𑀺𑀪𑀽𑀢𑁂 𑀭𑀸𑀚𑀕𑁂𑀳𑁂. 𑀏𑀯𑀁 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀲𑀦𑁆𑀢𑁄𑀢𑀺 𑀏𑀯𑀁 𑀭𑀸𑀚𑀕𑁂𑀳𑀭𑀸𑀚𑀥𑀸𑀦𑀻𑀭𑀚𑁆𑀚𑀤𑁂𑀲𑁂𑀲𑀼 𑀅𑀦𑁆𑀢𑁄 𑀩𑀳𑀺 𑀘 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀅𑀦𑁂𑀓𑀲𑀢𑁂𑀳𑀺 𑀲𑀼𑀲𑀁𑀯𑀺𑀳𑀺𑀢𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀫𑀫𑁂𑀯 𑀦𑀺𑀩𑁆𑀪𑀬𑀢𑁆𑀣𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀲𑀫𑀸𑀦𑁄. 𑀪𑀻𑀢𑁄𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀪𑀻𑀢𑁄𑀢𑀺 𑀧𑀭𑀭𑀸𑀚𑀽𑀳𑀺 𑀪𑀸𑀬𑀫𑀸𑀦𑁄. 𑀉𑀩𑁆𑀩𑀺𑀕𑁆𑀕𑁄𑀢𑀺 𑀲𑀓𑀭𑀚𑁆𑀚𑁂𑀧𑀺 𑀧𑀓𑀢𑀺𑀓𑁆𑀔𑁄𑀪𑀢𑁄 𑀉𑀧𑁆𑀧𑀚𑁆𑀚𑀦𑀓𑀪𑀬𑀼𑀩𑁆𑀩𑁂𑀕𑁂𑀦 𑀉𑀩𑁆𑀩𑀺𑀕𑁆𑀕𑁄 𑀘𑀮𑀺𑀢𑁄. 𑀉𑀲𑁆𑀲𑀗𑁆𑀓𑀻𑀢𑀺 ‘‘𑀭𑀜𑁆𑀜𑀸 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀅𑀯𑀺𑀲𑁆𑀲𑀢𑁆𑀣𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀲𑀩𑁆𑀩𑀢𑁆𑀣 𑀅𑀯𑀺𑀲𑁆𑀲𑀸𑀲𑀦𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀁 𑀅𑀘𑁆𑀘𑀬𑀢𑁄 𑀉𑀧𑁆𑀧𑀚𑁆𑀚𑀦𑀓𑀧𑀭𑀺𑀲𑀗𑁆𑀓𑀸𑀬 𑀘 𑀉𑀤𑁆𑀥𑀫𑀼𑀤𑁆𑀥𑀁 𑀲𑀗𑁆𑀓𑀫𑀸𑀦𑁄. 𑀉𑀢𑁆𑀭𑀸𑀲𑀻𑀢𑀺 ‘‘𑀲𑀦𑁆𑀢𑀺𑀓𑀸𑀯𑀘𑀭𑁂𑀳𑀺𑀧𑀺 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀫𑁂 𑀓𑀤𑀸𑀘𑀺 𑀅𑀦𑀢𑁆𑀣𑁄 𑀪𑀯𑁂𑀬𑁆𑀬𑀸’’𑀢𑀺 𑀉𑀧𑁆𑀧𑀦𑁆𑀦𑁂𑀦 𑀲𑀭𑀻𑀭𑀓𑀫𑁆𑀧𑀫𑁆𑀧𑀺 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑁂𑀦 𑀢𑀸𑀲𑁂𑀦 𑀉𑀢𑁆𑀭𑀸𑀲𑀺. ‘‘𑀉𑀢𑁆𑀭𑀲𑁆𑀢𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀯𑀺𑀳𑀭𑀸𑀫𑀻𑀢𑀺 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀸𑀫𑀺.

𑀏𑀢𑀭𑀳𑀻𑀢𑀺 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀏𑀓𑁄𑀢𑀺 𑀅𑀲𑀳𑀸𑀬𑁄. 𑀢𑁂𑀦 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀁 𑀤𑀲𑁆𑀲𑁂𑀢𑀺. 𑀅𑀪𑀻𑀢𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀬𑀸𑀤𑀺𑀦𑀺𑀫𑀺𑀢𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀲𑁆𑀲 𑀢𑀁𑀦𑀺𑀫𑀺𑀢𑁆𑀢𑀲𑁆𑀲 𑀘 𑀓𑀺𑀮𑁂𑀲𑀕𑀳𑀦𑀲𑁆𑀲 𑀅𑀪𑀸𑀯𑁂𑀦𑁂𑀯𑀲𑁆𑀲 𑀅𑀪𑀻𑀢𑀸𑀤𑀺𑀢𑀸𑀢𑀺 𑀏𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀲𑀭𑀻𑀭𑀕𑀼𑀢𑁆𑀢𑀺𑀬𑀁 𑀦𑀺𑀭𑀼𑀲𑁆𑀲𑀼𑀓𑁆𑀓𑁄. 𑀧𑀦𑁆𑀦𑀮𑁄𑀫𑁄𑀢𑀺 𑀮𑁄𑀫𑀳𑀁𑀲𑀼𑀧𑁆𑀧𑀸𑀤𑀓𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀲𑁆𑀲 𑀅𑀪𑀸𑀯𑁂𑀦 𑀅𑀦𑀼𑀕𑁆𑀕𑀢𑀮𑁄𑀫𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀲𑁂𑀭𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀧𑀭𑀤𑀢𑁆𑀢𑀯𑀼𑀢𑁆𑀢𑁄𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑁂𑀦 𑀘𑀻𑀯𑀭𑀸𑀤𑀺𑀦𑀸 𑀯𑀢𑁆𑀢𑀫𑀸𑀦𑁄. 𑀏𑀢𑁂𑀦 𑀲𑀩𑁆𑀩𑀲𑁄 𑀲𑀗𑁆𑀕𑀸𑀪𑀸𑀯𑀤𑀻𑀧𑀦𑀫𑀼𑀔𑁂𑀦 𑀅𑀦𑀯𑀲𑁂𑀲𑀪𑀬𑀳𑁂𑀢𑀼𑀯𑀺𑀭𑀳𑀁 𑀤𑀲𑁆𑀲𑁂𑀢𑀺. 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸𑀢𑀺 𑀯𑀺𑀲𑁆𑀲𑀢𑁆𑀣𑀯𑀺𑀳𑀸𑀭𑀺𑀢𑀸𑀬 𑀫𑀺𑀕𑀲𑁆𑀲 𑀯𑀺𑀬 𑀚𑀸𑀢𑁂𑀦 𑀘𑀺𑀢𑁆𑀢𑁂𑀦. 𑀫𑀺𑀕𑁄 𑀳𑀺 𑀅𑀫𑀦𑀼𑀲𑁆𑀲𑀧𑀣𑁂 𑀅𑀭𑀜𑁆𑀜𑁂 𑀯𑀲𑀫𑀸𑀦𑁄 𑀯𑀺𑀲𑁆𑀲𑀢𑁆𑀣𑁄 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺 𑀦𑀺𑀧𑀚𑁆𑀚𑀢𑀺 𑀬𑁂𑀦𑀓𑀸𑀫𑀜𑁆𑀘 𑀧𑀓𑁆𑀓𑀫𑀢𑀺 𑀅𑀧𑁆𑀧𑀝𑀺𑀳𑀢𑀘𑀸𑀭𑁄, 𑀏𑀯𑀁 𑀅𑀳𑀫𑁆𑀧𑀺 𑀯𑀺𑀳𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀦 𑁋

‘‘𑀫𑀺𑀕𑁄 𑀅𑀭𑀜𑁆𑀜𑀫𑁆𑀳𑀺 𑀬𑀣𑀸 𑀅𑀩𑀤𑁆𑀥𑁄;

𑀬𑁂𑀦𑀺𑀘𑁆𑀙𑀓𑀁 𑀕𑀘𑁆𑀙𑀢𑀺 𑀕𑁄𑀘𑀭𑀸𑀬;

𑀯𑀺𑀜𑁆𑀜𑀽 𑀦𑀭𑁄 𑀲𑁂𑀭𑀺𑀢 𑀧𑁂𑀓𑁆𑀔𑀫𑀸𑀦𑁄;

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁩𑁯; 𑀅𑀧. 𑀣𑁂𑀭 𑁧.𑁧.𑁯𑁫);

𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀦𑁆𑀢𑀺 𑀪𑀕𑀯𑀸 𑀬𑀤𑀺𑀤𑀁 𑀫𑀫 𑀏𑀢𑀭𑀳𑀺 𑀧𑀭𑀫𑀁 𑀯𑀺𑀯𑁂𑀓𑀲𑀼𑀔𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁, 𑀇𑀤𑀫𑁂𑀯 𑀓𑀸𑀭𑀡𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑁂𑀫𑀺. 𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀪𑀤𑁆𑀤𑀺𑀬𑀢𑁆𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀯𑀺𑀲𑀬𑀸𑀢𑀻𑀢𑀁 𑀯𑀺𑀯𑁂𑀓𑀲𑀼𑀔𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀇𑀫𑀁 𑀲𑀳𑁂𑀢𑀼𑀓𑀪𑀬𑀲𑁄𑀓𑀯𑀺𑀕𑀫𑀸𑀦𑀼𑀪𑀸𑀯𑀤𑀻𑀧𑀓𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀬𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑀭𑀢𑁄 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀓𑀭𑀡𑀢𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀸 𑀭𑀸𑀕𑀸𑀤𑀬𑁄 𑀆𑀖𑀸𑀢𑀯𑀢𑁆𑀣𑀼𑀆𑀤𑀺𑀓𑀸𑀭𑀡𑀪𑁂𑀤𑀢𑁄 𑀅𑀦𑁂𑀓𑀪𑁂𑀤𑀸 𑀤𑁄𑀲𑀓𑁄𑀧𑀸 𑀏𑀯 𑀯𑀸 𑀦 𑀲𑀦𑁆𑀢𑀺, 𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸 𑀦 𑀯𑀺𑀚𑁆𑀚𑀦𑁆𑀢𑀺. 𑀅𑀬𑀜𑁆𑀳𑀺 𑀅𑀦𑁆𑀢𑀭-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 ‘‘𑀫𑀜𑁆𑀘 𑀢𑁆𑀯𑀜𑁆𑀘 𑀓𑀺𑀫𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁨𑁮) 𑀓𑀸𑀭𑀡𑁂 𑀤𑀺𑀲𑁆𑀲𑀢𑀺, ‘‘𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑀲𑀫𑀬𑁂’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁩𑁪𑁬) 𑀯𑁂𑀫𑀚𑁆𑀛𑁂, ‘‘𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁩, 𑁪𑁪) 𑀯𑀺𑀯𑀭𑁂, ‘‘𑀪𑀬𑀫𑀦𑁆𑀢𑀭𑀢𑁄 𑀚𑀸𑀢’’𑀦𑁆𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁮𑁮; 𑀫𑀳𑀸𑀦𑀺. 𑁫) 𑀘𑀺𑀢𑁆𑀢𑁂, 𑀇𑀥𑀸𑀧𑀺 𑀘𑀺𑀢𑁆𑀢𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀬𑀲𑁆𑀲 𑀘𑀺𑀢𑁆𑀢𑁂 𑀓𑁄𑀧𑀸 𑀦 𑀲𑀦𑁆𑀢𑀻’’𑀢𑀺.

𑀅𑀪𑀯-𑀲𑀤𑁆𑀤𑀲𑁆𑀲 𑀯𑀺𑀪𑀯-𑀲𑀤𑁆𑀤𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑁂 𑀓𑀸𑀭𑀡𑀫𑀸𑀳 ‘‘𑀯𑀺𑀪𑀯𑁄𑀢𑀺 𑀘 𑀅𑀪𑀯𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺. 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀯𑀘𑀦𑁄𑀢𑀺 𑀆𑀳 ‘‘𑀇𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸 𑀪𑀯𑀸𑀪𑀯𑀢𑀸’’𑀢𑀺. 𑀯𑀻𑀢𑀺𑀯𑀢𑁆𑀢𑁄𑀢𑀺 𑀅𑀢𑀺𑀓𑁆𑀓𑀦𑁆𑀢𑁄. 𑀏𑀢𑁆𑀣 𑀘 ‘‘𑀬𑀲𑁆𑀲𑀸’’𑀢𑀺 𑀇𑀤𑀁 𑀬𑁄 𑀯𑀻𑀢𑀺𑀯𑀢𑁆𑀢𑁄𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀢𑀁 𑀯𑀺𑀕𑀢𑀪𑀬𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀔𑀻𑀡𑀸𑀲𑀯𑀁 𑀘𑀺𑀢𑁆𑀢𑀓𑁄𑀧𑀸𑀪𑀸𑀯𑀢𑁄 𑀇𑀢𑀺𑀪𑀯𑀸𑀪𑀯𑀲𑀫𑀢𑀺𑀓𑁆𑀓𑀫𑀦𑀢𑁄 𑀘 𑀪𑀬𑀳𑁂𑀢𑀼𑀯𑀺𑀕𑀫𑁂𑀦 𑀯𑀺𑀕𑀢𑀪𑀬𑀁. 𑀯𑀺𑀯𑁂𑀓𑀲𑀼𑀔𑁂𑀦 𑀅𑀕𑁆𑀕𑀨𑀮𑀲𑀼𑀔𑁂𑀦 𑀘 𑀲𑀼𑀔𑀺𑀁, 𑀯𑀺𑀕𑀢𑀪𑀬𑀢𑁆𑀢𑀸 𑀏𑀯 𑀅𑀲𑁄𑀓𑀁. 𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸𑀢𑀺 𑀅𑀥𑀺𑀕𑀢𑀫𑀕𑁆𑀕𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀸𑀬𑀫𑀦𑁆𑀢𑀸𑀧𑀺 𑀘𑀺𑀢𑁆𑀢𑀘𑀸𑀭𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀦𑀸𑀬 𑀤𑀝𑁆𑀞𑀼𑀁 𑀦𑀸𑀦𑀼𑀪𑀯𑀦𑁆𑀢𑀺 𑀦 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀕𑁂𑀯 𑀫𑀦𑀼𑀲𑁆𑀲𑀸. 𑀲𑁂𑀓𑁆𑀔𑀸𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀯𑀺𑀬 𑀅𑀭𑀳𑀢𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺. 𑀢𑀲𑁆𑀲 𑀤𑀲𑁆𑀲𑀦𑀁 𑀤𑁂𑀯𑀸𑀦𑀫𑁆𑀧𑀺 𑀤𑀼𑀮𑁆𑀮𑀪𑀦𑁆𑀢𑀺 𑀏𑀢𑁆𑀣𑀸𑀧𑀺 𑀘𑀺𑀢𑁆𑀢𑀘𑀸𑀭𑀤𑀲𑁆𑀲𑀦𑀯𑀲𑁂𑀦 𑀢𑀲𑁆𑀲 𑀤𑀲𑁆𑀲𑀦𑀁 𑀤𑁂𑀯𑀸𑀦𑀫𑁆𑀧𑀺 𑀤𑀼𑀮𑁆𑀮𑀪𑀁 𑀅𑀮𑀩𑁆𑀪𑀦𑀻𑀬𑀁, 𑀤𑁂𑀯𑁂𑀳𑀺𑀧𑀺 𑀢𑀁 𑀤𑀲𑁆𑀲𑀦𑀁 𑀦 𑀲𑀓𑁆𑀓𑀸 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀪𑀸𑀯𑀢𑁆𑀣𑁄 𑀳𑁂𑀢𑁆𑀣 𑀤𑀼-𑀲𑀤𑁆𑀤𑁄 ‘‘𑀤𑀼𑀧𑁆𑀧𑀜𑁆𑀜𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑁩𑁩𑁩. 𑀪𑀢𑁆𑀢𑀸𑀪𑀺𑀳𑀸𑀭𑁄𑀢𑀺 𑀅𑀪𑀺𑀳𑀭𑀺𑀢𑀩𑁆𑀩𑀪𑀢𑁆𑀢𑀁. 𑀢𑀲𑁆𑀲 𑀧𑀦 𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑁄 𑀣𑀸𑀮𑀺𑀧𑀸𑀓𑁄 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀪𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦𑀸𑀢𑀺 𑀏𑀢𑁆𑀣 𑀮𑀸𑀪𑁄 𑀦𑀸𑀫 𑀘𑀢𑀼𑀧𑀘𑁆𑀘𑀬𑀮𑀸𑀪𑁄. 𑀲𑀓𑁆𑀓𑀸𑀭𑁄𑀢𑀺 𑀢𑁂𑀲𑀁𑀬𑁂𑀯 𑀲𑀼𑀓𑀢𑀸𑀦𑀁 𑀲𑀼𑀲𑀗𑁆𑀔𑀢𑀸𑀦𑀁 𑀮𑀸𑀪𑁄. 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀖𑁄𑀲𑁄. 𑀫𑀦𑁄𑀫𑀬𑀁 𑀓𑀸𑀬𑀦𑁆𑀢𑀺 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀩𑁆𑀭𑀳𑁆𑀫𑀓𑀸𑀬𑀁. 𑀉𑀧𑀧𑀦𑁆𑀦𑁄𑀢𑀺 𑀉𑀧𑀕𑀢𑁄. 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁄𑀢𑀺 𑀲𑀭𑀻𑀭𑀧𑀝𑀺𑀮𑀸𑀪𑁄. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀔𑁂𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀫𑀸𑀕𑀥𑀓𑀁 𑀕𑀸𑀫𑀔𑁂𑀢𑁆𑀢𑀁 𑀅𑀢𑁆𑀣𑀺 𑀔𑀼𑀤𑁆𑀤𑀓𑀁, 𑀅𑀢𑁆𑀣𑀺 𑀫𑀚𑁆𑀛𑀺𑀫𑀁, 𑀅𑀢𑁆𑀣𑀺 𑀫𑀳𑀦𑁆𑀢𑀁. 𑀔𑀼𑀤𑁆𑀤𑀓𑀁 𑀕𑀸𑀫𑀔𑁂𑀢𑁆𑀢𑀁 𑀇𑀢𑁄 𑀘𑀢𑁆𑀢𑀸𑀮𑀻𑀲 𑀉𑀲𑀪𑀸𑀦𑀺, 𑀏𑀢𑁆𑀢𑁄 𑀘𑀢𑁆𑀢𑀸𑀮𑀻𑀲 𑀉𑀲𑀪𑀸𑀦𑀻𑀢𑀺 𑀕𑀸𑀯𑀼𑀢𑀁 𑀳𑁄𑀢𑀺. 𑀫𑀚𑁆𑀛𑀺𑀫𑀁 𑀇𑀢𑁄 𑀕𑀸𑀯𑀼𑀢𑀁, 𑀏𑀢𑁆𑀢𑁄 𑀕𑀸𑀯𑀼𑀢𑀦𑁆𑀢𑀺 𑀅𑀟𑁆𑀠𑀬𑁄𑀚𑀦𑀁 𑀳𑁄𑀢𑀺. 𑀫𑀳𑀦𑁆𑀢𑀁 𑀇𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀁, 𑀏𑀢𑁆𑀢𑁄 𑀤𑀺𑀬𑀟𑁆𑀠𑀕𑀸𑀯𑀼𑀢𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀳𑁄𑀢𑀺. 𑀢𑁂𑀲𑀼 𑀔𑀼𑀤𑁆𑀤𑀓𑁂𑀦 𑀕𑀸𑀫𑀔𑁂𑀢𑁆𑀢𑁂𑀦 𑀢𑀻𑀡𑀺, 𑀔𑀼𑀤𑁆𑀤𑀓𑁂𑀦 𑀘 𑀫𑀚𑁆𑀛𑀺𑀫𑁂𑀦 𑀘 𑀤𑁆𑀯𑁂 𑀕𑀸𑀫𑀔𑁂𑀢𑁆𑀢𑀸𑀦𑀺 𑀢𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀢𑀺𑀕𑀸𑀯𑀼𑀢𑀜𑁆𑀳𑀺𑀲𑁆𑀲 𑀲𑀭𑀻𑀭𑀁. 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀕𑁄𑀧𑀬𑀺𑀲𑁆𑀲𑀸𑀫𑀺. 𑀭𑀓𑁆𑀔𑀲𑁆𑀲𑁂𑀢𑀦𑁆𑀢𑀺 𑀭𑀓𑁆𑀔𑀲𑁆𑀲𑀼 𑀏𑀢𑀁.

𑀧𑀜𑁆𑀘𑀲𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁩𑁪. 𑀲𑀢𑁆𑀣𑀸𑀭𑁄𑀢𑀺 𑀕𑀡𑀲𑀢𑁆𑀣𑀸𑀭𑁄. 𑀦𑀸𑀲𑁆𑀲𑀲𑁆𑀲𑀸𑀢𑀺 𑀦 𑀏𑀢𑀲𑁆𑀲 𑀪𑀯𑁂𑀬𑁆𑀬. 𑀢𑀦𑁆𑀢𑀺 𑀢𑀁 𑀲𑀢𑁆𑀣𑀸𑀭𑀁. 𑀢𑁂𑀦𑀸𑀢𑀺 𑀅𑀫𑀦𑀸𑀧𑁂𑀦. 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫𑀸𑀢𑀺 𑀓𑀣𑁂𑀬𑁆𑀬𑀸𑀫. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸𑀦𑁂𑀢𑀻’’𑀢𑀺, 𑀲𑀫𑁆𑀫𑀦𑁆𑀦𑀢𑀻𑀢𑀺 𑀯𑀸 𑀧𑀭𑁂𑀳𑀺 𑀲𑀫𑁆𑀫𑀸𑀦𑀻𑀬𑀢𑀻𑀢𑀺 𑀅𑀢𑁆𑀣𑁄.

𑁩𑁩𑁫. 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀼𑀦𑁆𑀢𑀺 𑀅𑀘𑁆𑀙𑀧𑀺𑀢𑁆𑀢𑀁 𑀯𑀸 𑀫𑀘𑁆𑀙𑀧𑀺𑀢𑁆𑀢𑀁 𑀯𑀸 𑀦𑀸𑀲𑀸𑀧𑀼𑀝𑁂 𑀧𑀓𑁆𑀔𑀺𑀧𑁂𑀬𑁆𑀬𑀼𑀁. 𑀧𑀭𑀸𑀪𑀯𑀸𑀬𑀸𑀢𑀺 𑀅𑀯𑀟𑁆𑀠𑀺𑀬𑀸 𑀯𑀺𑀦𑀸𑀲𑀸𑀬. 𑀅𑀲𑁆𑀲𑀢𑀭𑀻𑀢𑀺 𑀯𑀴𑀯𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀤𑁆𑀭𑀪𑀲𑁆𑀲𑀚𑀸𑀢𑀸, 𑀢𑀁 𑀅𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀺, 𑀲𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀺𑀚𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀸𑀤𑁂𑀳𑀺 𑀪𑀽𑀫𑀺𑀁 𑀧𑀳𑀭𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀧𑁄𑀢𑀓𑀁 𑀦𑀻𑀳𑀭𑀦𑁆𑀢𑀺, 𑀲𑀸 𑀢𑀢𑁆𑀣𑁂𑀯 𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀻’’𑀢𑀺.

𑁩𑁩𑁯. 𑀧𑁄𑀢𑁆𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, 𑀬𑀁 𑀔𑀭𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀦𑀸𑀴𑀸𑀕𑀺𑀭𑀺𑀧𑁂𑀲𑀦𑀓𑀣𑀸𑀯𑀡𑁆𑀡𑀦𑀸

𑁩𑁪𑁨. 𑀫𑀸 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄𑀢𑀺 𑀪𑁄, 𑀓𑀼𑀜𑁆𑀚𑀭, 𑀩𑀼𑀤𑁆𑀥𑀦𑀸𑀕𑀁 𑀯𑀥𑀓𑀘𑀺𑀢𑁆𑀢𑁂𑀦 𑀫𑀸 𑀉𑀧𑀕𑀘𑁆𑀙. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀁. 𑀓𑀣𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀆𑀳 ‘‘𑀦 𑀳𑀺 𑀦𑀸𑀕𑀳𑀢𑀲𑁆𑀲𑀸’’𑀢𑀺𑀆𑀤𑀺. 𑀦𑀸𑀕𑀳𑀢𑀲𑁆𑀲 𑀲𑀼𑀕𑀢𑀺𑀧𑀝𑀺𑀓𑁆𑀔𑁂𑀧𑁂𑀦 𑀩𑀼𑀤𑁆𑀥𑀦𑀸𑀕𑀲𑁆𑀲 𑀖𑀸𑀢𑁄 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀢𑁄𑀢𑀺 𑀇𑀢𑁄 𑀚𑀸𑀢𑀺𑀢𑁄. 𑀬𑀢𑁄𑀢𑀺 𑀬𑀲𑁆𑀫𑀸. 𑀇𑀢𑁄 𑀧𑀭𑀁 𑀬𑀢𑁄𑀢𑀺 𑀇𑀢𑁄 𑀧𑀭𑀁 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄. 𑀫𑀤𑁄𑀢𑀺 𑀫𑀸𑀦𑀫𑀤𑁄. 𑀧𑀫𑀸𑀤𑁄𑀢𑀺 𑀧𑀫𑀢𑁆𑀢𑀪𑀸𑀯𑁄. 𑀧𑀝𑀺𑀓𑀼𑀝𑀺𑀢𑁄𑀢𑀺 𑀲𑀗𑁆𑀓𑀼𑀝𑀺𑀢𑁄. 𑀅𑀮𑀓𑁆𑀔𑀺𑀓𑁄𑀢𑀺 𑀅𑀳𑀺𑀭𑀺𑀓𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫.

𑀧𑀜𑁆𑀘𑀯𑀢𑁆𑀣𑀼𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁪𑁩. 𑀢𑀺𑀓𑀪𑁄𑀚𑀦𑀦𑁆𑀢𑀺 𑀢𑀻𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀚𑀦𑀁, 𑀢𑀺𑀡𑁆𑀡𑀁 𑀏𑀓𑀢𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀓𑁄𑀓𑀸𑀮𑀺𑀓𑁄𑀢𑀺𑀆𑀤𑀻𑀦𑀺 𑀘𑀢𑀼𑀦𑁆𑀦𑀁 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑀸𑀦𑀁 𑀕𑀡𑀧𑀸𑀫𑁄𑀓𑁆𑀔𑀸𑀦𑀁 𑀦𑀸𑀫𑀸𑀦𑀺. 𑀆𑀬𑀼𑀓𑀧𑁆𑀧𑀦𑁆𑀢𑀺 𑀏𑀓𑀁 𑀫𑀳𑀸𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑀁 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀅𑀦𑁆𑀢𑀭𑀓𑀧𑁆𑀧𑀲𑀜𑁆𑀜𑀺𑀢𑀁 𑀓𑀸𑀮𑀁.

𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀸𑀢𑀺 (𑀉𑀤𑀸. 𑀅𑀝𑁆𑀞. 𑁪𑁮) 𑀤𑁂𑀯𑀤𑀢𑁆𑀢𑁄 𑀲𑀩𑁆𑀩𑀁 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 ‘‘𑀏𑀓𑀁𑀲𑁂𑀦𑁂𑀯 𑀅𑀚𑁆𑀚 𑀆𑀯𑁂𑀡𑀺𑀓𑀁 𑀉𑀧𑁄𑀲𑀣𑀁 𑀲𑀗𑁆𑀖𑀓𑀫𑁆𑀫𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀅𑀚𑁆𑀚𑀢𑀕𑁆𑀕𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀅𑀜𑁆𑀜𑀢𑁆𑀭𑁂𑀯 𑀪𑀕𑀯𑀢𑀸𑀢𑀺 𑀯𑀺𑀦𑀸 𑀏𑀯 𑀪𑀕𑀯𑀦𑁆𑀢𑀁, 𑀢𑀁 𑀲𑀢𑁆𑀣𑀸𑀭𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀗𑁆𑀖𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘𑀸𑀢𑀺 𑀪𑀕𑀯𑀢𑁄 𑀑𑀯𑀸𑀤𑀓𑀸𑀭𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀦𑀸 𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀆𑀯𑁂𑀡𑀺𑀓𑀁 𑀉𑀧𑁄𑀲𑀣𑀁 𑀲𑀗𑁆𑀖𑀓𑀫𑁆𑀫𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫𑀺. 𑀅𑀚𑁆𑀚𑀢𑀕𑁆𑀕𑁂, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀪𑁂𑀤𑀓𑀸𑀭𑀓𑀸𑀦𑀁 𑀲𑀩𑁆𑀩𑁂𑀲𑀁 𑀤𑁂𑀯𑀤𑀢𑁆𑀢𑁂𑀦 𑀲𑀚𑁆𑀚𑀺𑀢𑀢𑁆𑀢𑀸 ‘‘𑀏𑀓𑀁𑀲𑁂𑀦𑁂𑀯 𑀤𑁂𑀯𑀤𑀢𑁆𑀢𑁄 𑀅𑀚𑁆𑀚 𑀲𑀗𑁆𑀖𑀁 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳. 𑀪𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀤𑁆𑀯𑀺𑀥𑀸 𑀓𑀭𑀺𑀲𑁆𑀲𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀼𑀧𑁆𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀬𑀁 𑀓𑀧𑁆𑀧𑀝𑁆𑀞𑀺𑀬𑀁 𑀅𑀢𑁂𑀓𑀺𑀘𑁆𑀙𑀁 𑀤𑁂𑀯𑀤𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀁 𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀤𑀺𑀢𑁆𑀯𑀸. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀬𑀣𑀸𑀓𑁆𑀓𑀫𑀁 𑀲𑀧𑁆𑀧𑀼𑀭𑀺𑀲𑀸𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀼𑀓𑀭𑀸 𑀧𑀝𑀺𑀧𑀢𑁆𑀢𑀺, 𑀦 𑀧𑀦 𑀦𑁂𑀲𑀁 𑀅𑀓𑀼𑀲𑀮𑀓𑀼𑀲𑀮𑁂𑀲𑀽𑀢𑀺 𑀇𑀤𑀫𑀢𑁆𑀣𑀯𑀺𑀪𑀸𑀯𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀼𑀓𑀭𑀁 𑀲𑀸𑀥𑀼𑀦𑀸 𑀲𑀸𑀥𑀽𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀲𑀸𑀥𑀼𑀦𑀸 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀦𑀸 𑀲𑀸𑀯𑀓𑁂𑀦 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀜𑁆𑀜𑁂𑀦 𑀯𑀸 𑀮𑁄𑀓𑀺𑀬𑀲𑀸𑀥𑀼𑀦𑀸 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀲𑀼𑀔𑀸𑀯𑀳𑀁 𑀲𑀼𑀓𑀭𑀁 𑀲𑀼𑀔𑁂𑀦 𑀓𑀸𑀢𑀼𑀁 𑀲𑀓𑁆𑀓𑀸. 𑀲𑀸𑀥𑀼 𑀧𑀸𑀧𑁂𑀦 𑀤𑀼𑀓𑁆𑀓𑀭𑀦𑁆𑀢𑀺 𑀢𑀤𑁂𑀯 𑀧𑀦 𑀯𑀼𑀢𑁆𑀢𑀮𑀓𑁆𑀔𑀡𑀁 𑀲𑀸𑀥𑀼 𑀧𑀸𑀧𑁂𑀦 𑀤𑁂𑀯𑀤𑀢𑁆𑀢𑀸𑀤𑀺𑀦𑀸 𑀧𑀸𑀧𑀧𑀼𑀕𑁆𑀕𑀮𑁂𑀦 𑀤𑀼𑀓𑁆𑀓𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀦 𑀲𑁄 𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭𑀦𑁆𑀢𑀺 𑀧𑀸𑀧𑀁 𑀅𑀲𑀼𑀦𑁆𑀤𑀭𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀢𑁆𑀣𑀸𑀯𑀳𑀁 𑀧𑀸𑀧𑁂𑀦 𑀬𑀣𑀸𑀯𑀼𑀢𑁆𑀢𑀧𑀸𑀧𑀧𑀼𑀕𑁆𑀕𑀮𑁂𑀦 𑀲𑀼𑀓𑀭𑀁 𑀲𑀼𑀔𑁂𑀦 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀧𑀸𑀧𑀫𑀭𑀺𑀬𑁂𑀳𑀺 𑀤𑀼𑀓𑁆𑀓𑀭𑀦𑁆𑀢𑀺 𑀅𑀭𑀺𑀬𑁂𑀳𑀺 𑀧𑀦 𑀩𑀼𑀤𑁆𑀥𑀸𑀤𑀻𑀳𑀺 𑀢𑀁 𑀧𑀸𑀧𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀁. 𑀲𑁂𑀢𑀼𑀖𑀸𑀢𑁄𑀬𑁂𑀯 𑀳𑀺 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀤𑀻𑀧𑁂𑀢𑀺.

𑀲𑀗𑁆𑀖𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑁩𑁪𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸𑀢𑀺𑀆𑀤𑀻𑀲𑀼 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀓𑀣𑀦𑀁 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀲𑀸𑀯𑀓𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀜𑁆𑀘 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀯𑀺𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁. 𑀢𑀢𑁆𑀣 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀲𑀤𑁆𑀥𑀺𑀁 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀆𑀘𑀺𑀡𑁆𑀡𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦 𑀲𑀤𑁆𑀥𑀺𑀁 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀻’’𑀢𑀺𑀆𑀤𑀺. 𑀢𑀤𑀸 𑀳𑀺 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀘𑀸𑀭𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀧𑀸𑀴𑀺𑀬𑀜𑁆𑀘𑁂𑀢𑁆𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀣𑁂𑀭𑀸𑀦𑀁 𑀤𑁂𑀲𑀦𑀸𑀬 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑁄𑀯 𑀤𑀲𑁆𑀲𑀺𑀢𑁄. 𑀤𑀻𑀖𑀪𑀸𑀡𑀓𑀸 𑀧𑀦 𑀏𑀯𑀁 𑀯𑀤𑀦𑁆𑀢𑀺 ‘‘𑀪𑀕𑀯𑀢𑀸 𑀧𑁂𑀲𑀺𑀢𑁂𑀲𑀼 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑁂𑀲𑀁 𑀘𑀺𑀢𑁆𑀢𑀘𑀸𑀭𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸𑀧𑀺 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀦𑁂𑀲𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽’’𑀢𑀺. 𑀤𑁂𑀯𑀤𑀢𑁆𑀢𑀁 𑀉𑀝𑁆𑀞𑀸𑀧𑁂𑀲𑀻𑀢𑀺 𑀚𑀡𑁆𑀡𑀼𑀓𑁂𑀦 𑀳𑀤𑀬𑀫𑀚𑁆𑀛𑁂 𑀧𑀳𑀭𑀺𑀢𑁆𑀯𑀸 𑀉𑀝𑁆𑀞𑀸𑀧𑁂𑀲𑀺.

𑁩𑁪𑁬. 𑀲𑀭𑀲𑀻𑀢𑀺 𑀲𑀭𑁄. 𑀲𑀼𑀯𑀺𑀓𑁆𑀔𑀸𑀮𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀺𑀓𑁆𑀔𑀸𑀮𑀺𑀢𑀁, 𑀲𑀼𑀯𑀺𑀲𑁄𑀥𑀺𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀁𑀔𑀸𑀤𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀔𑀸𑀤𑀺𑀢𑁆𑀯𑀸. 𑀫𑀳𑀺𑀁 𑀯𑀺𑀓𑀼𑀩𑁆𑀩𑀢𑁄𑀢𑀺 𑀫𑀳𑀺𑀁 𑀤𑀦𑁆𑀢𑁂𑀳𑀺 𑀯𑀺𑀮𑀺𑀔𑀦𑁆𑀢𑀲𑁆𑀲. 𑀦𑀤𑀻𑀲𑀼 𑀪𑀺𑀲𑀁 𑀖𑀲𑀸𑀦𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀤𑀻𑀢𑀺 𑀘𑁂𑀢𑁆𑀣 𑀫𑀳𑀸𑀲𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀚𑀕𑁆𑀕𑀢𑁄𑀢𑀺 𑀳𑀢𑁆𑀣𑀺𑀬𑀽𑀣𑀁 𑀧𑀸𑀮𑁂𑀦𑁆𑀢𑀲𑁆𑀲. 𑀪𑀺𑀗𑁆𑀓𑁄𑀯𑀸𑀢𑀺 𑀳𑀢𑁆𑀣𑀺𑀧𑁄𑀢𑀓𑁄 𑀯𑀺𑀬. 𑀫𑀫𑀸𑀦𑀼𑀓𑀼𑀩𑁆𑀩𑀦𑁆𑀢𑀺 𑀫𑀁 𑀅𑀦𑀼𑀓𑀭𑁄𑀦𑁆𑀢𑁄.

𑁩𑁪𑁭. 𑀤𑀽𑀢𑁂𑀬𑁆𑀬𑀦𑁆𑀢𑀺 𑀤𑀽𑀢𑀓𑀫𑁆𑀫𑀁. 𑀕𑀦𑁆𑀢𑀼𑀫𑀭𑀳𑀢𑀻𑀢𑀺 𑀤𑀽𑀢𑁂𑀬𑁆𑀬𑀲𑀗𑁆𑀔𑀸𑀢𑀁 𑀲𑀸𑀲𑀦𑀁 𑀳𑀭𑀺𑀢𑀼𑀁 𑀥𑀸𑀭𑁂𑀢𑁆𑀯𑀸 𑀳𑀭𑀺𑀢𑀼𑀁 𑀅𑀭𑀳𑀢𑀺. 𑀲𑁄𑀢𑀸𑀢𑀺 𑀬𑀁 𑀅𑀲𑁆𑀲 𑀲𑀸𑀲𑀦𑀁 𑀤𑁂𑀦𑁆𑀢𑀺, 𑀢𑀲𑁆𑀲 𑀲𑁄𑀢𑀸. 𑀲𑀸𑀯𑁂𑀢𑀸𑀢𑀺 𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀧𑀝𑀺𑀲𑀸𑀯𑁂𑀢𑀸. 𑀉𑀕𑁆𑀕𑀳𑁂𑀢𑀸𑀢𑀺 𑀲𑀼𑀉𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀉𑀕𑁆𑀕𑀳𑁂𑀢𑀸. 𑀥𑀸𑀭𑁂𑀢𑀸𑀢𑀺 𑀲𑀼𑀥𑀸𑀭𑀺𑀢𑀁 𑀓𑀢𑁆𑀯𑀸 𑀥𑀸𑀭𑁂𑀢𑀸. 𑀯𑀺𑀜𑁆𑀜𑀸𑀢𑀸𑀢𑀺 𑀅𑀢𑁆𑀢𑀦𑀸 𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀺𑀢𑀸. 𑀯𑀺𑀜𑁆𑀜𑀸𑀧𑁂𑀢𑀸𑀢𑀺 𑀧𑀭𑀁 𑀯𑀺𑀚𑀸𑀦𑀸𑀧𑁂𑀢𑀸. 𑀲𑀳𑀺𑀢𑀸𑀲𑀳𑀺𑀢𑀲𑁆𑀲𑀸𑀢𑀺 ‘‘𑀇𑀤𑀁 𑀲𑀳𑀺𑀢𑀁, 𑀇𑀤𑀁 𑀅𑀲𑀳𑀺𑀢’’𑀦𑁆𑀢𑀺 𑀏𑀯𑀁 𑀲𑀳𑀺𑀢𑀸𑀲𑀳𑀺𑀢𑀲𑁆𑀲 𑀓𑀼𑀲𑀮𑁄 𑀉𑀧𑀕𑀢𑀸𑀦𑀼𑀧𑀕𑀢𑁂𑀲𑀼 𑀙𑁂𑀓𑁄 𑀲𑀸𑀲𑀦𑀁 𑀆𑀭𑁄𑀘𑁂𑀦𑁆𑀢𑁄 𑀲𑀳𑀺𑀢𑀸𑀲𑀳𑀺𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀦 𑀩𑁆𑀬𑀣𑀢𑀻𑀢𑀺 𑀦 𑀯𑁂𑀥𑀢𑀺 𑀦 𑀙𑀫𑁆𑀪𑀢𑀺. 𑀉𑀕𑁆𑀕𑀯𑀸𑀤𑀺𑀦𑀺𑀦𑁆𑀢𑀺 𑀨𑀭𑀼𑀲𑀯𑀘𑀦𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀧𑀼𑀘𑁆𑀙𑀺𑀢𑁄𑀢𑀺 𑀧𑀝𑀺𑀜𑁆𑀜𑀢𑁆𑀣𑀸𑀬 𑀧𑀼𑀘𑁆𑀙𑀺𑀢𑁄.

𑁩𑁪𑁮. 𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀻𑀢𑀺𑀆𑀤𑀻𑀲𑀼 𑀅𑀲𑀤𑁆𑀥𑀫𑁆𑀫𑁂𑀳𑀻𑀢𑀺 (𑀇𑀢𑀺𑀯𑀼. 𑀅𑀝𑁆𑀞. 𑁮𑁯) 𑀅𑀲𑀢𑀁 𑀥𑀫𑁆𑀫𑁂𑀳𑀺, 𑀅𑀲𑀦𑁆𑀢𑁂𑀳𑀺 𑀯𑀸 𑀅𑀲𑁄𑀪𑀦𑁂𑀳𑀺 𑀯𑀸 𑀥𑀫𑁆𑀫𑁂𑀳𑀺. 𑀅𑀪𑀺𑀪𑀽𑀢𑁄𑀢𑀺 𑀅𑀚𑁆𑀛𑁄𑀢𑁆𑀣𑀝𑁄. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄𑀢𑀺 𑀔𑁂𑀧𑀺𑀢𑀘𑀺𑀢𑁆𑀢𑁄 𑀮𑀸𑀪𑀸𑀤𑀺𑀳𑁂𑀢𑀼𑀓𑁂𑀦 𑀇𑀘𑁆𑀙𑀸𑀘𑀸𑀭𑁂𑀦 𑀫𑀸𑀦𑀫𑀤𑀸𑀤𑀺𑀦𑀸 𑀘 𑀔𑀬𑀁 𑀧𑀸𑀧𑀺𑀢𑀓𑀼𑀲𑀮𑀘𑀺𑀢𑁆𑀢𑁄. 𑀅𑀣 𑀯𑀸 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄𑀢𑀺 𑀧𑀭𑀺𑀢𑁄 𑀆𑀤𑀺𑀦𑁆𑀦𑀘𑀺𑀢𑁆𑀢𑁄, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀓𑀼𑀲𑀮𑀓𑁄𑀝𑁆𑀞𑀸𑀲𑁂𑀦 𑀬𑀣𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑀸𑀭𑁄 𑀦 𑀳𑁄𑀢𑀺, 𑀏𑀯𑀁 𑀲𑀫𑀦𑁆𑀢𑀢𑁄 𑀕𑀳𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁄𑀢𑀺 𑀅𑀢𑁆𑀣𑁄. 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀢𑀸𑀬 𑀆𑀧𑀸𑀬𑀺𑀓𑁄. 𑀢𑀢𑁆𑀣𑀧𑀺 𑀅𑀯𑀻𑀘𑀺𑀲𑀗𑁆𑀔𑀸𑀢𑁂 𑀫𑀳𑀸𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑁂𑀭𑀬𑀺𑀓𑁄. 𑀏𑀓𑀁 𑀅𑀦𑁆𑀢𑀭𑀓𑀧𑁆𑀧𑀁 𑀧𑀭𑀺𑀧𑀼𑀡𑁆𑀡𑀫𑁂𑀯 𑀓𑀢𑁆𑀯𑀸 𑀢𑀢𑁆𑀣 𑀢𑀺𑀝𑁆𑀞𑀢𑀻𑀢𑀺 𑀓𑀧𑁆𑀧𑀝𑁆𑀞𑁄. 𑀅𑀢𑁂𑀓𑀺𑀘𑁆𑀙𑁄𑀢𑀺 𑀩𑀼𑀤𑁆𑀥𑁂𑀳𑀺𑀧𑀺 𑀅𑀦𑀺𑀯𑀢𑁆𑀢𑀦𑀻𑀬𑀢𑁆𑀢𑀸 𑀅𑀯𑀻𑀘𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀢𑀺𑀓𑀺𑀘𑁆𑀙𑀸𑀪𑀸𑀯𑀢𑁄 𑀅𑀢𑁂𑀓𑀺𑀘𑁆𑀙𑁄, 𑀅𑀢𑀺𑀓𑀺𑀘𑁆𑀙𑀦𑀻𑀬𑁄𑀢𑀺 𑀅𑀢𑁆𑀣𑁄. 𑀮𑀸𑀪𑁂𑀦𑀸𑀢𑀺 𑀮𑀸𑀪𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀅𑀣 𑀯𑀸 𑀮𑀸𑀪𑀳𑁂𑀢𑀼𑀓𑁂𑀦 𑀫𑀸𑀦𑀸𑀤𑀺𑀦𑀸. 𑀮𑀸𑀪𑀜𑁆𑀳𑀺 𑀦𑀺𑀲𑁆𑀲𑀸𑀬 𑀇𑀥𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑀸 𑀧𑀸𑀧𑀺𑀘𑁆𑀙𑀸 𑀇𑀘𑁆𑀙𑀸𑀧𑀓𑀢𑀸 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 ‘‘𑀮𑀸𑀪𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀸’’𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀧𑀭𑁂 𑀬𑀣𑀸𑀮𑀸𑀪𑀁 𑀮𑀪𑀺𑀢𑁆𑀯𑀸 𑀢𑀁𑀦𑀺𑀫𑀺𑀢𑁆𑀢𑀁 𑀫𑀸𑀦𑀸𑀢𑀺𑀫𑀸𑀦𑀫𑀤𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀬𑀜𑁆𑀘 𑀢𑀸𑀤𑀺𑀲𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑁂𑀦, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄’’𑀢𑀺𑀆𑀤𑀺. 𑀅𑀲𑀓𑁆𑀓𑀸𑀭𑁂𑀦𑀸𑀢𑀺 𑀳𑀻𑀴𑁂𑀢𑁆𑀯𑀸 𑀧𑀭𑀺𑀪𑀯𑀺𑀢𑁆𑀯𑀸 𑀧𑀭𑁂𑀳𑀺 𑀅𑀢𑁆𑀢𑀦𑀺 𑀧𑀯𑀢𑁆𑀢𑀺𑀢𑁂𑀦 𑀅𑀲𑀓𑁆𑀓𑀸𑀭𑁂𑀦, 𑀅𑀲𑀓𑁆𑀓𑀸𑀭𑀳𑁂𑀢𑀼𑀓𑁂𑀦 𑀯𑀸 𑀫𑀸𑀦𑀸𑀤𑀺𑀦𑀸. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀯𑀢𑁆𑀢𑀸 𑀧𑀸𑀧𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸, 𑀢𑀸𑀬. ‘‘𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀢𑀲𑁆𑀲 𑀇𑀘𑁆𑀙𑀸 𑀉𑀧𑁆𑀧𑀦𑁆𑀦𑀸. 𑀓𑁄𑀓𑀸𑀮𑀺𑀓𑀸𑀤𑀬𑁄 𑀧𑀸𑀧𑀸 𑀮𑀸𑀫𑀓𑀸 𑀫𑀺𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸, 𑀢𑀸𑀬.

𑁩𑁪𑁯. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸.

𑁩𑁫𑁦. 𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀸𑀤𑀻𑀢𑀺 𑀏𑀢𑁆𑀣 𑀧𑀦 𑀅𑀬𑀫𑀢𑁆𑀣𑁄. 𑀑𑀭𑀫𑀢𑁆𑀢𑀓𑁂𑀦𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀦 𑀛𑀸𑀦𑀸𑀪𑀺𑀜𑁆𑀜𑀸𑀫𑀢𑁆𑀢𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁂𑀦𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑁂𑀦. 𑀅𑀦𑁆𑀢𑀭𑀸𑀢𑀺 𑀯𑁂𑀫𑀚𑁆𑀛𑁂. 𑀯𑁄𑀲𑀸𑀦𑀁 𑀆𑀧𑀸𑀤𑀻𑀢𑀺 𑀅𑀓𑀢𑀓𑀺𑀘𑁆𑀘𑁄𑀯 𑀲𑀫𑀸𑀦𑁄 ‘‘𑀓𑀢𑀓𑀺𑀘𑁆𑀘𑁄𑀫𑁆𑀳𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀫𑀡𑀥𑀫𑁆𑀫𑀢𑁄 𑀯𑀺𑀕𑀫𑀁 𑀆𑀧𑀚𑁆𑀚𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑁂 𑀅𑀥𑀺𑀕𑀦𑁆𑀢𑀩𑁆𑀩𑁂 𑀫𑀕𑁆𑀕𑀨𑀮𑁂 𑀅𑀦𑀥𑀺𑀕𑀢𑁂 𑀲𑀢𑀺𑀬𑁂𑀯 𑀢𑀁 𑀅𑀦𑀥𑀺𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀢𑁄 𑀯𑀺𑀕𑀫𑀁 𑀆𑀧𑀚𑁆𑀚𑀻𑀢𑀺. 𑀇𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀯𑀺𑀲𑁂𑀲𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑀺 ‘‘𑀪𑀸𑀭𑀺𑀬𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀛𑀸𑀦𑀸𑀪𑀺𑀜𑁆𑀜𑀸𑀧𑀭𑀺𑀬𑁄𑀲𑀸𑀦𑀸 𑀲𑀫𑁆𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀅𑀦𑁂𑀓𑀸𑀦𑀢𑁆𑀣𑀸𑀯𑀳𑀁 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀳𑁂𑀢𑀼𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀁 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑀁 𑀆𑀮𑀲𑀺𑀬𑀸𑀦𑀼𑀬𑁄𑀕𑀜𑁆𑀘 𑀅𑀯𑀺𑀚𑀳𑀦𑁆𑀢𑁄 𑀅𑀯𑀻𑀘𑀺𑀲𑀁𑀯𑀢𑁆𑀢𑀦𑀺𑀓𑀁 𑀓𑀧𑁆𑀧𑀝𑁆𑀞𑀺𑀬𑀁 𑀅𑀢𑁂𑀓𑀺𑀘𑁆𑀙𑀁 𑀓𑀺𑀩𑁆𑀩𑀺𑀲𑀁 𑀧𑀲𑀯𑀢𑀻’’𑀢𑀺.

𑀕𑀸𑀣𑀸𑀲𑀼 𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀚𑀸𑀢𑀽𑀢𑀺 𑀏𑀓𑀁𑀲𑁂𑀦. 𑀓𑁄𑀘𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀏𑀓𑀁𑀲𑁂𑀦 𑀧𑀸𑀧𑀺𑀘𑁆𑀙𑁄 𑀫𑀸 𑀳𑁄𑀢𑀽𑀢𑀺. 𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀧𑀸𑀧𑀺𑀘𑁆𑀙𑀸𑀦𑀁 𑀬𑀣𑀸 𑀕𑀢𑀻𑀢𑀺 𑀧𑀸𑀧𑀺𑀘𑁆𑀙𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑀣𑀸𑀕𑀢𑀺 𑀬𑀸𑀤𑀺𑀲𑀻 𑀦𑀺𑀩𑁆𑀩𑀢𑁆𑀢𑀺 𑀬𑀸𑀤𑀺𑀲𑁄 𑀅𑀪𑀺𑀲𑀫𑁆𑀧𑀭𑀸𑀬𑁄𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀸𑀣𑀸𑀢𑀺 𑀤𑁂𑀯𑀤𑀢𑁆𑀢𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀧𑀡𑁆𑀟𑀺𑀢𑁄𑀢𑀺 𑀜𑀸𑀢𑁄. 𑀪𑀸𑀯𑀺𑀢𑀢𑁆𑀢𑁄𑀢𑀺 𑀲𑀫𑁆𑀫𑀢𑁄𑀢𑀺 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀪𑀸𑀯𑀺𑀢𑀘𑀺𑀢𑁆𑀢𑁄𑀢𑀺 𑀲𑀫𑁆𑀪𑀸𑀯𑀺𑀢𑁄. 𑀢𑀣𑀸 𑀳𑀺 𑀲𑁄 ‘‘𑀫𑀳𑀺𑀤𑁆𑀥𑀺𑀓𑁄 𑀕𑁄𑀥𑀺𑀧𑀼𑀢𑁆𑀢𑁄, 𑀫𑀳𑀸𑀦𑀼𑀪𑀸𑀯𑁄 𑀕𑁄𑀥𑀺𑀧𑀼𑀢𑁆𑀢𑁄’’𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑀧𑀲𑀁𑀲𑀺𑀢𑁄 𑀅𑀳𑁄𑀲𑀺. 𑀚𑀮𑀁𑀯 𑀬𑀲𑀲𑀸 𑀅𑀝𑁆𑀞𑀸, 𑀤𑁂𑀯𑀤𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 𑀅𑀢𑁆𑀢𑀦𑁄 𑀓𑀺𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑁂𑀦 𑀘 𑀚𑀮𑀦𑁆𑀢𑁄 𑀯𑀺𑀬 𑀑𑀪𑀸𑀲𑀦𑁆𑀢𑁄 𑀯𑀺𑀬 𑀞𑀺𑀢𑁄 𑀤𑁂𑀯𑀤𑀢𑁆𑀢𑁄𑀢𑀺 𑀏𑀯𑀁 𑀯𑀺𑀲𑁆𑀲𑀼𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. ‘‘𑀫𑁂 𑀲𑀼𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀫𑀬𑀸 𑀲𑀼𑀢𑀁 𑀲𑀼𑀢𑀫𑀢𑁆𑀢𑀁, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀢𑀣𑀸𑀪𑀽𑀢𑀢𑁆𑀢𑀸 𑀢𑀲𑁆𑀲 𑀢𑀁 𑀧𑀡𑁆𑀟𑀺𑀘𑁆𑀘𑀸𑀤𑀺𑀲𑀯𑀦𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀧𑀫𑀸𑀤𑀁 𑀅𑀦𑀼𑀘𑀺𑀡𑁆𑀡𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀦𑁆𑀢𑀺 𑀲𑁄 𑀏𑀯𑀁𑀪𑀽𑀢𑁄 𑀤𑁂𑀯𑀤𑀢𑁆𑀢𑁄 ‘‘𑀩𑀼𑀤𑁆𑀥𑁄𑀧𑀺 𑀲𑀸𑀓𑀺𑀬𑀧𑀼𑀢𑁆𑀢𑁄, 𑀅𑀳𑀫𑁆𑀧𑀺 𑀲𑀸𑀓𑀺𑀬𑀧𑀼𑀢𑁆𑀢𑁄, 𑀩𑀼𑀤𑁆𑀥𑁄𑀧𑀺 𑀲𑀫𑀡𑁄, 𑀅𑀳𑀫𑁆𑀧𑀺 𑀲𑀫𑀡𑁄, 𑀩𑀼𑀤𑁆𑀥𑁄𑀧𑀺 𑀇𑀤𑁆𑀥𑀺𑀫𑀸, 𑀅𑀳𑀫𑁆𑀧𑀺 𑀇𑀤𑁆𑀥𑀺𑀫𑀸, 𑀩𑀼𑀤𑁆𑀥𑁄𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀤𑀺𑀩𑁆𑀩𑀲𑁄𑀢𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻, 𑀩𑀼𑀤𑁆𑀥𑁄𑀧𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀥𑀫𑁆𑀫𑁂 𑀚𑀸𑀦𑀸𑀢𑀺, 𑀅𑀳𑀫𑁆𑀧𑀺 𑀢𑁂 𑀚𑀸𑀦𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦 𑀧𑀫𑀸𑀤𑀁 𑀆𑀧𑀚𑁆𑀚𑀦𑁆𑀢𑁄 ‘‘𑀇𑀤𑀸𑀦𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀫𑀸𑀭𑀧𑀬𑁄𑀚𑀦𑀸𑀤𑀺𑀦𑀸 𑀢𑀣𑀸𑀕𑀢𑀁 𑀆𑀲𑀚𑁆𑀚 𑀆𑀲𑀸𑀤𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸. ‘‘𑀧𑀫𑀸𑀤𑀫𑀦𑀼𑀚𑀺𑀡𑁆𑀡𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀫𑀸𑀤𑀁 𑀯𑀼𑀢𑁆𑀢𑀦𑀬𑁂𑀦 𑀧𑀫𑀚𑁆𑀚𑀦𑁆𑀢𑁄 𑀧𑀫𑀸𑀤𑀁 𑀦𑀺𑀲𑁆𑀲𑀸𑀬 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀳𑁂𑀯 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀅𑀦𑀼𑀚𑀺𑀡𑁆𑀡𑁄 𑀧𑀭𑀺𑀳𑀻𑀦𑁄𑀢𑀺. 𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄, 𑀘𑀢𑀼𑀤𑁆𑀯𑀸𑀭𑀁 𑀪𑀬𑀸𑀦𑀓𑀦𑁆𑀢𑀺 𑀚𑀸𑀮𑀸𑀦𑀁 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑀢𑁆𑀢𑀸𑀦𑀁 𑀯𑀸 𑀦𑀺𑀭𑀦𑁆𑀢𑀭𑀢𑀸𑀬 ‘‘𑀅𑀯𑀻𑀘𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀘𑀢𑀼𑀫𑀳𑀸𑀤𑁆𑀯𑀸𑀭𑀬𑁄𑀕𑁂𑀦 𑀘𑀢𑀼𑀤𑁆𑀯𑀸𑀭𑀁 𑀅𑀢𑀺𑀪𑀬𑀸𑀦𑀓𑀁 𑀫𑀳𑀸𑀦𑀺𑀭𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀧𑀢𑁆𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’𑀢𑀺. (𑀫. 𑀦𑀺. 𑁩.𑁨𑁫𑁦, 𑁨𑁬𑁭; 𑀅. 𑀦𑀺. 𑁩.𑁩𑁬);

𑀅𑀤𑀼𑀝𑁆𑀞𑀲𑁆𑀲𑀸𑀢𑀺 𑀅𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲. 𑀤𑀼𑀩𑁆𑀪𑁂𑀢𑀺 𑀤𑀼𑀲𑁆𑀲𑁂𑀬𑁆𑀬. 𑀢𑀫𑁂𑀯 𑀧𑀸𑀧𑀁 𑀨𑀼𑀲𑀢𑀻𑀢𑀺 𑀢𑀫𑁂𑀯 𑀅𑀤𑀼𑀝𑁆𑀞𑀤𑀼𑀩𑁆𑀪𑀺𑀁 𑀧𑀸𑀧𑀧𑀼𑀕𑁆𑀕𑀮𑀁 𑀧𑀸𑀧𑀁 𑀦𑀺𑀳𑀻𑀦𑀁 𑀧𑀸𑀧𑀨𑀮𑀁 𑀨𑀼𑀲𑀢𑀺 𑀧𑀸𑀧𑀼𑀡𑀸𑀢𑀺 𑀅𑀪𑀺𑀪𑀯𑀢𑀺. 𑀪𑁂𑀲𑁆𑀫𑀸𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀕𑀫𑁆𑀪𑀻𑀭𑀪𑀸𑀯𑁂𑀦 𑀘 𑀪𑀺𑀁𑀲𑀸𑀧𑀦𑁄, 𑀪𑀺𑀁𑀲𑀸𑀧𑁂𑀦𑁆𑀢𑁄 𑀯𑀺𑀬 𑀯𑀺𑀧𑀼𑀮𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄. 𑀯𑀸𑀤𑁂𑀦𑀸𑀢𑀺 𑀤𑁄𑀲𑁂𑀦. 𑀉𑀧𑀳𑀺𑀁𑀲𑀢𑀻𑀢𑀺 𑀩𑀸𑀥𑀢𑀺 𑀆𑀲𑀸𑀤𑁂𑀢𑀺. 𑀯𑀸𑀤𑁄 𑀢𑀫𑁆𑀳𑀺 𑀦 𑀭𑀽𑀳𑀢𑀻𑀢𑀺 𑀢𑀲𑁆𑀫𑀺𑀁 𑀢𑀣𑀸𑀕𑀢𑁂 𑀧𑀭𑁂𑀦 𑀆𑀭𑁄𑀧𑀺𑀬𑀫𑀸𑀦𑁄 𑀤𑁄𑀲𑁄 𑀦 𑀭𑀼𑀳𑀢𑀺 𑀦 𑀢𑀺𑀝𑁆𑀞𑀢𑀺, 𑀯𑀺𑀲𑀓𑀼𑀫𑁆𑀪𑁄 𑀯𑀺𑀬 𑀲𑀫𑀼𑀤𑁆𑀤𑀲𑁆𑀲 𑀦 𑀢𑀲𑁆𑀲 𑀯𑀺𑀓𑀸𑀭𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀙𑀳𑀺 𑀕𑀸𑀣𑀸𑀳𑀺 𑀧𑀸𑀧𑀺𑀘𑁆𑀙𑀢𑀸𑀤𑀺𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑀺𑀭𑀬𑀽𑀧𑀕𑀪𑀸𑀯𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑀢𑁄 𑀅𑀧𑀭𑀺𑀫𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀲𑁆𑀲 𑀤𑀼𑀓𑁆𑀔𑀓𑁆𑀔𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀤𑀺𑀲𑀁 𑀫𑀺𑀢𑁆𑀢’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀲𑁆𑀲 𑀫𑀕𑁆𑀕𑀸𑀦𑀼𑀕𑁄 𑀧𑀝𑀺𑀧𑀢𑁆𑀢𑀺𑀫𑀕𑁆𑀕𑀁 𑀅𑀦𑀼𑀕𑀢𑁄 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀫𑁂𑀦 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑀬𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑁂𑀬𑁆𑀬, 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁 𑀩𑀼𑀤𑁆𑀥𑀲𑀸𑀯𑀓𑀁 𑀯𑀸 𑀧𑀡𑁆𑀟𑀺𑀢𑁄 𑀲𑀧𑁆𑀧𑀜𑁆𑀜𑁄 𑀅𑀢𑁆𑀢𑀦𑁄 𑀫𑀺𑀢𑁆𑀢𑀁 𑀓𑀼𑀩𑁆𑀩𑁂𑀣 𑀢𑁂𑀦 𑀫𑁂𑀢𑁆𑀢𑀺𑀁 𑀓𑀭𑁂𑀬𑁆𑀬, 𑀢𑀜𑁆𑀘 𑀲𑁂𑀯𑁂𑀣 𑀢𑀫𑁂𑀯 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀢𑀺.

𑀓𑀺𑀁 𑀧𑀦𑁂𑀢𑀁 𑀲𑀼𑀢𑁆𑀢𑀁 𑀤𑁂𑀯𑀤𑀢𑁆𑀢𑀲𑁆𑀲 𑀦𑀺𑀭𑀬𑀽𑀧𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀪𑀸𑀲𑀺𑀢𑀁, 𑀉𑀤𑀸𑀳𑀼 𑀧𑀘𑁆𑀙𑀸𑀢𑀺? 𑀇𑀢𑀺𑀯𑀼𑀢𑁆𑀢𑀓𑀝𑁆𑀞𑀓𑀣𑀸𑀬𑀁 (𑀇𑀢𑀺𑀯𑀼. 𑀅𑀝𑁆𑀞. 𑁮𑁯) 𑀢𑀸𑀯 𑁋

‘‘𑀤𑁂𑀯𑀤𑀢𑁆𑀢𑁂 𑀳𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀧𑀯𑀺𑀝𑁆𑀞𑁂 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 ‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀅𑀪𑀺𑀲𑀧𑀺𑀢𑁄 𑀤𑁂𑀯𑀤𑀢𑁆𑀢𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’𑀢𑀺 𑀅𑀩𑁆𑀪𑀸𑀘𑀺𑀓𑁆𑀔𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀅𑀦𑀪𑀺𑀧𑁆𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 ‘𑀲𑀺𑀬𑀸 𑀦𑀼 𑀔𑁄 𑀏𑀢𑀤𑁂𑀯𑀁, 𑀬𑀣𑀸 𑀇𑀫𑁂 𑀪𑀡𑀦𑁆𑀢𑀻’𑀢𑀺 𑀆𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 ‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀸 𑀓𑀲𑁆𑀲𑀘𑀺 𑀅𑀪𑀺𑀲𑀧𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀦 𑀤𑁂𑀯𑀤𑀢𑁆𑀢𑁄 𑀫𑀬𑀸 𑀅𑀪𑀺𑀲𑀧𑀺𑀢𑁄, 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀦𑀺𑀭𑀬𑀁 𑀧𑀯𑀺𑀝𑁆𑀞𑁄’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀇𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀻’’𑀢𑀺 𑁋

𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀢𑀲𑁆𑀲 𑀦𑀺𑀭𑀬𑀽𑀧𑀧𑀢𑁆𑀢𑀺𑀢𑁄 𑀧𑀘𑁆𑀙𑀸𑀧𑀺 𑀪𑀕𑀯𑀸 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀢𑀲𑁆𑀲 𑀦𑀺𑀭𑀬𑀽𑀧𑀧𑀢𑁆𑀢𑀺𑀢𑁄 𑀧𑀞𑀫𑀫𑁂𑀯 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀪𑀸𑀲𑀺𑀢𑀁 𑀧𑀸𑀴𑀺𑀆𑀭𑀼𑀴𑁆𑀳𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄’’𑀢𑀺 𑀇𑀤𑀁 𑀧𑀦 𑀆𑀲𑀁𑀲𑀸𑀬𑀁 𑀅𑀢𑀻𑀢𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀆𑀲𑀁𑀲𑀸𑀢𑀺 𑀘𑁂𑀢𑁆𑀣 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀻 𑀅𑀢𑁆𑀣𑀲𑀺𑀤𑁆𑀥𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀺𑀜𑁆𑀳𑀺 𑀅𑀢𑁆𑀣𑀲𑀺𑀤𑁆𑀥𑀺𑀫𑀧𑁂𑀓𑁆𑀔𑀺𑀢𑁆𑀯𑀸 𑀅𑀦𑀸𑀕𑀢𑀫𑁆𑀧𑀺 𑀪𑀽𑀢𑀁 𑀯𑀺𑀬 𑀯𑁄𑀳𑀭𑀦𑁆𑀢𑀺, 𑀢𑀜𑁆𑀘 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀲𑀗𑁆𑀖𑀪𑁂𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀮𑀺𑀧𑀜𑁆𑀳𑀓𑀣𑀸𑀯𑀡𑁆𑀡𑀦𑀸

𑁩𑁫𑁧. 𑀉𑀧𑀸𑀮𑀺𑀧𑀜𑁆𑀳𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀫𑁂𑀯. 𑀢𑀢𑁆𑀣 𑀅𑀦𑀼𑀦𑀬𑀦𑁆𑀢𑁄𑀢𑀺 𑀅𑀦𑀼𑀚𑀸𑀦𑀸𑀧𑁂𑀦𑁆𑀢𑁄, 𑀪𑁂𑀤𑀲𑁆𑀲 𑀅𑀦𑀼𑀭𑀽𑀧𑀁 𑀯𑀸 𑀩𑁄𑀥𑁂𑀦𑁆𑀢𑁄, 𑀬𑀣𑀸 𑀪𑁂𑀤𑁄 𑀳𑁄𑀢𑀺, 𑀏𑀯𑀁 𑀪𑀺𑀦𑁆𑀤𑀺𑀢𑀩𑁆𑀩𑁂 𑀪𑀺𑀓𑁆𑀔𑀽 𑀯𑀺𑀜𑁆𑀜𑀸𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺.

𑁩𑁫𑁨. 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀼𑀫𑁆𑀳𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀲𑀁𑀓𑀺𑀮𑀺𑀝𑁆𑀞𑀥𑀫𑁆𑀫𑀢𑀸𑀬 𑀯𑁄𑀤𑀸𑀦𑀥𑀫𑁆𑀫𑀧𑀅𑀧𑀓𑁆𑀔𑀢𑁆𑀢𑀸 ‘‘𑀅𑀥𑀫𑁆𑀫𑁄’’𑀢𑀺 𑀤𑀲𑁆𑀲𑀺𑀢𑀸, 𑀢𑀣𑀸 𑀉𑀧𑀸𑀤𑀸𑀦𑀸𑀤𑀬𑁄, 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑀸𑀦𑀯𑀚𑁆𑀚𑀪𑀸𑀯𑀢𑁄 𑀦𑀢𑁆𑀣𑀺 𑀅𑀥𑀫𑁆𑀫𑀪𑀸𑀯𑁄, 𑀪𑀕𑀯𑀢𑀸 𑀧𑀦 𑀤𑁂𑀲𑀺𑀢𑀸𑀓𑀸𑀭𑁂𑀦 𑀳𑀸𑀧𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀯𑀸 𑀓𑀣𑀦𑀁 𑀬𑀣𑀸𑀥𑀫𑁆𑀫𑀁 𑀅𑀓𑀣𑀦𑀦𑁆𑀢𑀺 𑀓𑀢𑁆𑀯𑀸 𑀅𑀥𑀫𑁆𑀫𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺. 𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀲𑀧𑀸𑀝𑀺𑀳𑀻𑀭𑀁 𑀅𑀧𑁆𑀧𑀝𑀺𑀳𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀏𑀯𑀁 𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀆𑀓𑀟𑁆𑀠𑀢𑀺. 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀥𑀫𑁆𑀫𑁄 𑀦𑀸𑀫𑀸𑀢𑀺 𑀬𑀣𑀸𑀥𑀫𑁆𑀫𑀁 𑀓𑀭𑀡𑀢𑁄 𑀥𑀫𑁆𑀫𑁄 𑀦𑀸𑀫, 𑀇𑀢𑀭𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀅𑀥𑀫𑁆𑀫𑁄 𑀦𑀸𑀫.

𑀭𑀸𑀕𑀯𑀺𑀦𑀬𑁄…𑀧𑁂… 𑀅𑀬𑀁 𑀯𑀺𑀦𑀬𑁄 𑀦𑀸𑀫𑀸𑀢𑀺 𑀭𑀸𑀕𑀸𑀤𑀻𑀦𑀁 𑀯𑀺𑀦𑀬𑀦𑀢𑁄 𑀲𑀁𑀯𑀭𑀡𑀢𑁄 𑀧𑀚𑀳𑀦𑀢𑁄 𑀧𑀝𑀺𑀲𑀗𑁆𑀔𑀸𑀦𑀢𑁄 𑀘 𑀯𑀺𑀦𑀬𑁄 𑀦𑀸𑀫, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑁄 𑀅𑀯𑀺𑀦𑀬𑁄. 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀲𑁂𑀦 𑀲𑀩𑁆𑀩𑁂𑀲𑀁 𑀯𑀺𑀦𑀬𑀓𑀫𑁆𑀫𑀸𑀦𑀁 𑀅𑀓𑀼𑀧𑁆𑀧𑀢𑀸𑀢𑀺 𑀆𑀳 ‘‘𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺…𑀧𑁂… 𑀅𑀬𑀁 𑀯𑀺𑀦𑀬𑁄 𑀦𑀸𑀫𑀸’’𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀯𑀺𑀧𑀢𑁆𑀢𑀻’’𑀢𑀺𑀆𑀤𑀺. 𑀬𑀸𑀲𑀁 𑀆𑀧𑀦𑁆𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀲𑀸𑀯𑀲𑁂𑀲𑀸, 𑀢𑀸 𑀆𑀧𑀢𑁆𑀢𑀺𑀬𑁄 𑀲𑀸𑀯𑀲𑁂𑀲𑀸.

𑁩𑁫𑁪. 𑀆𑀧𑀸𑀬𑀺𑀓𑁄𑀢𑀺𑀆𑀤𑀺𑀕𑀸𑀣𑀸𑀲𑀼 (𑀇𑀢𑀺𑀯𑀼. 𑀅𑀝𑁆𑀞. 𑁧𑁮) 𑀲𑀗𑁆𑀖𑀲𑁆𑀲 𑀪𑁂𑀤𑀲𑀗𑁆𑀔𑀸𑀢𑁂 𑀯𑀕𑁆𑀕𑁂 𑀭𑀢𑁄𑀢𑀺 𑀯𑀕𑁆𑀕𑀭𑀢𑁄. 𑀅𑀥𑀫𑁆𑀫𑀺𑀓𑀢𑀸𑀬 𑀅𑀥𑀫𑁆𑀫𑁂 𑀪𑁂𑀤𑀓𑀭𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀖𑀪𑁂𑀤𑀲𑀗𑁆𑀔𑀸𑀢𑁂 𑀏𑀯 𑀘 𑀅𑀥𑀫𑁆𑀫𑁂 𑀞𑀺𑀢𑁄𑀢𑀺 𑀅𑀥𑀫𑁆𑀫𑀝𑁆𑀞𑁄. 𑀬𑁄𑀕𑀓𑁆𑀔𑁂𑀫𑀸 𑀧𑀥𑀁𑀲𑀢𑀻𑀢𑀺 𑀳𑀺𑀢𑀢𑁄 𑀧𑀭𑀺𑀳𑀸𑀬𑀢𑀺, 𑀘𑀢𑀽𑀳𑀺𑀧𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀬𑁄𑀕𑀓𑁆𑀔𑁂𑀫𑀁 𑀦𑀸𑀫 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘, 𑀢𑀢𑁄 𑀧𑀦𑀲𑁆𑀲 𑀥𑀁𑀲𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀢𑁄 𑀲𑀗𑁆𑀖𑀢𑀝𑁆𑀞𑁂𑀦 𑀲𑀗𑁆𑀖𑀁, 𑀢𑀢𑁄 𑀏𑀯 𑀏𑀓𑀓𑀫𑁆𑀫𑀸𑀤𑀺𑀯𑀺𑀥𑀸𑀦𑀬𑁄𑀕𑁂𑀦 𑀲𑀫𑀕𑁆𑀕𑀁 𑀲𑀳𑀺𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀲𑀗𑁆𑀖𑀪𑁂𑀤𑁂𑀦 𑀪𑀺𑀦𑁆𑀤𑀺𑀢𑁆𑀯𑀸. 𑀓𑀧𑁆𑀧𑀦𑁆𑀢𑀺 𑀅𑀦𑁆𑀢𑀭𑀓𑀧𑁆𑀧𑀲𑀗𑁆𑀔𑀸𑀢𑀁 𑀆𑀬𑀼𑀓𑀧𑁆𑀧𑀁. 𑀦𑀺𑀭𑀬𑀫𑁆𑀳𑀻𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁆𑀳𑀺.

𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻𑀢𑀺 (𑀇𑀢𑀺𑀯𑀼. 𑀅𑀝𑁆𑀝. 𑁧𑁯) 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀲𑀸𑀫𑀕𑁆𑀕𑀻 ‘‘𑀲𑀼𑀔𑀸’’𑀢𑀺 𑀯𑀼𑀢𑁆𑀢𑀸 𑀬𑀣𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀫𑀼𑀧𑁆𑀧𑀸𑀤𑁄’’𑀢𑀺 (𑀥. 𑀧. 𑁧𑁯𑁪). 𑀲𑀫𑀕𑁆𑀕𑀸𑀦𑀜𑁆𑀘𑀦𑀼𑀕𑁆𑀕𑀳𑁄𑀢𑀺 𑀲𑀫𑀕𑁆𑀕𑀸𑀦𑀁 𑀲𑀸𑀫𑀕𑁆𑀕𑀺𑀅𑀦𑀼𑀫𑁄𑀤𑀦𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑀁 𑀲𑀸𑀫𑀕𑁆𑀕𑀺𑀅𑀦𑀼𑀭𑀽𑀧𑀁 𑀯𑀸, 𑀬𑀣𑀸 𑀢𑁂 𑀲𑀸𑀫𑀕𑁆𑀕𑀺𑀁 𑀦 𑀯𑀺𑀚𑀳𑀦𑁆𑀢𑀺, 𑀢𑀣𑀸 𑀕𑀳𑀡𑀁 𑀞𑀧𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑀁 𑀓𑀢𑁆𑀯𑀸𑀦𑀸𑀢𑀺 𑀪𑀺𑀦𑁆𑀦𑀁 𑀲𑀗𑁆𑀖𑀁 𑀲𑀗𑁆𑀖𑀭𑀸𑀚𑀺𑀧𑁆𑀧𑀢𑁆𑀢𑀁 𑀯𑀸 𑀲𑀫𑀕𑁆𑀕𑀁 𑀲𑀳𑀺𑀢𑀁 𑀓𑀢𑁆𑀯𑀸. 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀫𑁂𑀯. 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻𑀢𑀺 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀇𑀘𑁆𑀙𑀺𑀢𑀦𑀺𑀩𑁆𑀩𑀢𑁆𑀢𑀺𑀬𑀸 𑀘 𑀫𑁄𑀤𑀢𑀺 𑀧𑀫𑁄𑀤𑀢𑀺 𑀮𑀴𑀢𑀺 𑀓𑀻𑀴𑀢𑀺.

𑁩𑁫𑁫. 𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑀪𑁂𑀤𑀓𑁄𑀢𑀺𑀆𑀤𑀺 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀜𑁆𑀘𑀳𑀺, 𑀉𑀧𑀸𑀮𑀺, 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 𑀏𑀯𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁫𑁮) 𑀆𑀕𑀢𑀫𑁆𑀧𑀺 𑀲𑀗𑁆𑀖𑀪𑁂𑀤𑀮𑀓𑁆𑀔𑀡𑀁 𑀇𑀥 𑀯𑀼𑀢𑁆𑀢𑁂𑀦 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀲𑀻𑀫𑀝𑁆𑀞𑀓𑀲𑀗𑁆𑀖𑁂 𑀅𑀲𑀦𑁆𑀦𑀺𑀧𑀢𑀺𑀢𑁂 𑀯𑀺𑀲𑀼𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀓𑀢𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀲𑁆𑀲 𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀉𑀤𑁆𑀤𑁂𑀲𑀁 𑀯𑀸 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀪𑁂𑀤𑁄 𑀘 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀧𑀦 ‘‘𑀯𑀝𑁆𑀝𑀢𑀻’’𑀢𑀺 𑀲𑀜𑁆𑀜𑀸𑀬 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀪𑁂𑀤𑁄𑀯 𑀳𑁄𑀢𑀺, 𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁. 𑀢𑀢𑁄 𑀊𑀦𑀧𑀭𑀺𑀲𑀸𑀬 𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀲𑀗𑁆𑀖𑀪𑁂𑀤𑁄 𑀦 𑀆𑀦𑀦𑁆𑀢𑀭𑀺𑀬𑀁. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀳𑀺 𑀧𑀭𑀺𑀘𑁆𑀙𑁂𑀤𑁂𑀦 𑀦𑀯𑀦𑁆𑀦𑀁 𑀚𑀦𑀸𑀦𑀁 𑀬𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺, 𑀅𑀦𑀼𑀯𑀢𑁆𑀢𑀓𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀁 𑀓𑀫𑁆𑀫𑀁, 𑀥𑀫𑁆𑀫𑀯𑀸𑀤𑀺𑀦𑁄 𑀅𑀦𑀯𑀚𑁆𑀚𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀧𑀸𑀮𑀺𑀧𑀜𑁆𑀳𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.