𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀁

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁪. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀲𑁂𑀦𑀸𑀲𑀦𑀁 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀩𑁆𑀩𑀺𑀥𑀜𑁆𑀳𑀺 (𑀫. 𑀦𑀺. 𑀅𑀝𑁆𑀝. 𑁧.𑁨𑁯𑁬) 𑀲𑁂𑀦𑀸𑀲𑀦𑀁 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁 𑀲𑀦𑁆𑀣𑀢𑀲𑁂𑀦𑀸𑀲𑀦𑀁 𑀑𑀓𑀸𑀲𑀲𑁂𑀦𑀸𑀲𑀦𑀦𑁆𑀢𑀺. 𑀢𑀢𑁆𑀣 ‘‘𑀫𑀜𑁆𑀘𑁄𑀧𑀺 𑀲𑁂𑀦𑀸𑀲𑀦𑀁, 𑀧𑀻𑀞𑀫𑁆𑀧𑀺 𑀪𑀺𑀲𑀺𑀧𑀺 𑀩𑀺𑀫𑁆𑀩𑁄𑀳𑀦𑀫𑁆𑀧𑀺 𑀯𑀺𑀳𑀸𑀭𑁄𑀧𑀺 𑀅𑀟𑁆𑀠𑀬𑁄𑀕𑁄𑀧𑀺 𑀧𑀸𑀲𑀸𑀤𑁄𑀧𑀺 𑀳𑀫𑁆𑀫𑀺𑀬𑀫𑁆𑀧𑀺 𑀕𑀼𑀳𑀸𑀧𑀺 𑀅𑀝𑁆𑀝𑁄𑀧𑀺 𑀫𑀸𑀴𑁄𑀧𑀺 𑀮𑁂𑀡𑀫𑁆𑀧𑀺 𑀯𑁂𑀴𑀼𑀕𑀼𑀫𑁆𑀩𑁄𑀧𑀺 𑀭𑀼𑀓𑁆𑀔𑀫𑀽𑀮𑀫𑁆𑀧𑀺 𑀫𑀡𑁆𑀟𑀧𑁄𑀧𑀺 𑀲𑁂𑀦𑀸𑀲𑀦𑀁. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺 (𑀯𑀺𑀪. 𑁫𑁨𑁭) 𑀯𑀘𑀦𑀢𑁄 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑀇𑀤𑀁 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀦𑀸𑀫. 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦𑀦𑁆𑀢𑀺 𑀇𑀤𑀁 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁 𑀦𑀸𑀫. 𑀘𑀺𑀫𑀺𑀮𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺 𑀇𑀤𑀁 𑀲𑀦𑁆𑀣𑀢𑀲𑁂𑀦𑀸𑀲𑀦𑀁 𑀦𑀸𑀫. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀇𑀤𑀁 𑀑𑀓𑀸𑀲𑀲𑁂𑀦𑀸𑀲𑀦𑀁 𑀦𑀸𑀫.

𑀭𑀼𑀓𑁆𑀔𑀫𑀽𑀮𑁂𑀢𑀺𑀆𑀤𑀻𑀲𑀼 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀲𑀦𑁆𑀤𑀘𑁆𑀙𑀸𑀬𑀁 𑀯𑀺𑀯𑀺𑀢𑁆𑀢𑀁 𑀭𑀼𑀓𑁆𑀔𑀫𑀽𑀮𑀁. 𑀧𑀩𑁆𑀩𑀢𑁄 𑀦𑀸𑀫 𑀲𑁂𑀮𑁄. 𑀢𑀢𑁆𑀣 𑀳𑀺 𑀉𑀤𑀓𑀲𑁄𑀡𑁆𑀟𑀻𑀲𑀼 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀻𑀢𑀸𑀬 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑀸 𑀦𑀸𑀦𑀸𑀤𑀺𑀲𑀸𑀲𑀼 𑀔𑀸𑀬𑀫𑀸𑀦𑀸𑀲𑀼 𑀲𑀻𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀓𑀦𑁆𑀤𑀭𑁂𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑁄 𑀉𑀤𑀓𑁂𑀦 𑀪𑀺𑀦𑁆𑀦𑁄 𑀧𑀩𑁆𑀩𑀢𑀧𑁆𑀧𑀤𑁂𑀲𑁄 𑀓𑀦𑁆𑀤𑀭𑀁. 𑀬𑀁 ‘‘𑀦𑀺𑀢𑀫𑁆𑀩’’𑀦𑁆𑀢𑀺𑀧𑀺 ‘‘𑀦𑀤𑀻𑀓𑀼𑀜𑁆𑀚’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀸 𑀯𑀸𑀮𑀺𑀓𑀸 𑀳𑁄𑀢𑀺, 𑀫𑀢𑁆𑀣𑀓𑁂 𑀫𑀡𑀺𑀯𑀺𑀢𑀸𑀦𑀁 𑀯𑀺𑀬 𑀯𑀦𑀕𑀳𑀦𑀁, 𑀫𑀡𑀺𑀓𑁆𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀁 𑀲𑀦𑁆𑀤𑀢𑀺, 𑀏𑀯𑀭𑀽𑀧𑀁 𑀓𑀦𑁆𑀤𑀭𑀁 𑀑𑀭𑀼𑀬𑁆𑀳 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀢𑁆𑀢𑀸𑀦𑀺 𑀲𑀻𑀢𑀁 𑀓𑀢𑁆𑀯𑀸 𑀯𑀸𑀮𑀺𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸 𑀢𑁂 𑀪𑀺𑀓𑁆𑀔𑀽 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀕𑀺𑀭𑀺𑀕𑀼𑀳𑀸 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀸, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀉𑀫𑀗𑁆𑀕𑀲𑀤𑀺𑀲𑀁 𑀫𑀳𑀸𑀯𑀺𑀯𑀭𑀁.

‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁫𑁩𑁧) 𑀬𑀢𑁆𑀣 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺, 𑀢𑀸𑀤𑀺𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀘𑀸𑀭𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀁 𑀅𑀭𑀜𑁆𑀜𑀓𑀲𑁂𑀦𑀸𑀲𑀦𑀁 ‘‘𑀯𑀦𑀧𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁆𑀛𑁄𑀓𑀸𑀲𑁄 𑀦𑀸𑀫 𑀓𑁂𑀦𑀘𑀺 𑀅𑀘𑁆𑀙𑀦𑁆𑀦𑁄 𑀧𑀤𑁂𑀲𑁄. 𑀆𑀓𑀗𑁆𑀔𑀫𑀸𑀦𑀸 𑀧𑀦𑁂𑀢𑁆𑀣 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀦𑁆𑀢𑀺. 𑀧𑀮𑀸𑀮𑀧𑀼𑀜𑁆𑀚𑁂𑀢𑀺 𑀧𑀮𑀸𑀮𑀭𑀸𑀲𑀺𑀫𑁆𑀳𑀺. 𑀫𑀳𑀸𑀧𑀮𑀸𑀮𑀧𑀼𑀜𑁆𑀚𑀢𑁄 𑀳𑀺 𑀧𑀮𑀸𑀮𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀮𑀸𑀮𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀜𑁆𑀘 𑀮𑁂𑀡𑀸𑀦𑀻𑀢𑀺 𑀧𑀜𑁆𑀘 𑀮𑀻𑀬𑀦𑀝𑁆𑀞𑀸𑀦𑀸𑀦𑀺. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀢𑀺 𑀮𑁂𑀡𑀸𑀦𑀺, 𑀯𑀺𑀳𑀸𑀭𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀼𑀧𑀡𑁆𑀡𑀯𑀗𑁆𑀓𑀕𑁂𑀳𑀦𑁆𑀢𑀺 𑀕𑀭𑀼𑀴𑀧𑀓𑁆𑀔𑀲𑀡𑁆𑀞𑀸𑀦𑁂𑀦 𑀓𑀢𑀕𑁂𑀳𑀁.

𑁨𑁯𑁫. 𑀅𑀦𑀼𑀫𑁄𑀤𑀦𑀕𑀸𑀣𑀸𑀲𑀼 𑀲𑀻𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑀏𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁, 𑀢𑀲𑁆𑀲 𑀯𑀦𑀤𑀸𑀳𑀸𑀤𑀻𑀲𑀼 𑀯𑀸 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀩𑀸𑀥𑀢𑀺. 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀩𑀸𑀥𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀟𑀁𑀲𑀸𑀤𑀻𑀦𑀫𑁆𑀧𑀺 𑀏𑀢𑁂𑀦𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀺𑀲𑀺𑀭𑀓𑀸𑀮𑀯𑀲𑁂𑀦 𑀲𑀢𑁆𑀢𑀸𑀳𑀯𑀤𑁆𑀥𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀫𑁆𑀫𑀽𑀮𑀪𑀜𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘 𑀧𑀝𑀺𑀳𑀜𑁆𑀜𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 𑀧𑀢𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂 𑀦𑀺𑀯𑀸𑀲𑀲𑀼𑀔𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂𑀲𑀼 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬. 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀨𑀮𑀸𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀼𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀢𑁂 𑀩𑀳𑀼𑀲𑁆𑀲𑀼𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀸𑀧𑀦𑀽𑀤𑀦𑀁 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀻𑀢𑀺 𑀆𑀯𑀸𑀲𑀤𑀸𑀦𑀲𑁆𑀫𑀺𑀁 𑀤𑀺𑀦𑁆𑀦𑁂 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁪𑁨) 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀧𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀧𑀢𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀺𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀢𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬’’𑀦𑁆𑀢𑀺.

𑁨𑁯𑁬. 𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀦𑁆𑀢𑀺 𑀬𑀢𑁆𑀣 𑀅𑀗𑁆𑀕𑀼𑀮𑀺𑀁 𑀧𑀯𑁂𑀲𑁂𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑀟𑁆𑀠𑀦𑁆𑀢𑀸 𑀤𑁆𑀯𑀸𑀭𑀩𑀸𑀳𑀁 𑀨𑀼𑀲𑀸𑀧𑁂𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀦𑁆𑀢𑀺 𑀓𑀯𑀸𑀝𑁂𑀬𑁂𑀯 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀢𑀢𑁆𑀣 𑀧𑀯𑁂𑀲𑁂𑀢𑁆𑀯𑀸 𑀬𑁂𑀦 𑀭𑀚𑁆𑀚𑀼𑀓𑁂𑀦 𑀓𑀟𑁆𑀠𑀦𑁆𑀢𑀸 𑀤𑁆𑀯𑀸𑀭𑀁 𑀨𑀼𑀲𑀸𑀧𑁂𑀦𑁆𑀢𑀺, 𑀢𑀁 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀓𑀁. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀘𑁂𑀧𑀺 𑀤𑀻𑀧𑀺𑀦𑀗𑁆𑀕𑀼𑀝𑁆𑀞𑁂𑀦 𑀓𑀢𑀸 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀘𑁂𑀢𑀺𑀬𑁂 𑀯𑁂𑀤𑀺𑀓𑀸𑀲𑀤𑀺𑀲𑀦𑁆𑀢𑀺 𑀯𑀸𑀢𑀧𑀸𑀦𑀩𑀸𑀳𑀸𑀲𑀼 𑀘𑁂𑀢𑀺𑀬𑁂 𑀯𑁂𑀤𑀺𑀓𑀸𑀬 𑀯𑀺𑀬 𑀧𑀝𑁆𑀝𑀺𑀓𑀸𑀤𑀻𑀳𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁. 𑀣𑀫𑁆𑀪𑀓𑀯𑀸𑀢𑀧𑀸𑀦𑀁 𑀦𑀸𑀫 𑀢𑀺𑀭𑀺𑀬𑀁 𑀤𑀸𑀭𑀽𑀦𑀺 𑀅𑀤𑀢𑁆𑀯𑀸 𑀉𑀚𑀼𑀓𑀁 𑀞𑀺𑀢𑁂𑀳𑀺 𑀏𑀯 𑀯𑁂𑀡𑀼𑀲𑀮𑀸𑀓𑀸𑀤𑀻𑀳𑀺 𑀓𑀢𑀁.

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀜𑁆𑀘𑀧𑀻𑀞𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁭. 𑀧𑁄𑀝𑀓𑀺𑀢𑀽𑀮𑀦𑁆𑀢𑀺 𑀏𑀭𑀓𑀢𑀺𑀡𑀢𑀽𑀮𑀁. 𑀧𑁄𑀝𑀓𑀺𑀕𑀳𑀡𑀜𑁆𑀘𑁂𑀢𑁆𑀣 𑀢𑀺𑀡𑀚𑀸𑀢𑀻𑀦𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦’’𑀦𑁆𑀢𑀺. 𑀧𑀜𑁆𑀘𑀯𑀺𑀥𑀁 𑀉𑀡𑁆𑀡𑀸𑀤𑀺𑀢𑀽𑀮𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀩𑀺𑀫𑁆𑀩𑁄𑀳𑀦𑁂’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀢𑀽𑀮𑀧𑀽𑀭𑀺𑀢𑀁 𑀪𑀺𑀲𑀺𑀁 𑀅𑀧𑀲𑁆𑀲𑀬𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀅𑀧𑀭𑁂. 𑀉𑀧𑀤𑀳𑀦𑁆𑀢𑀻𑀢𑀺 𑀞𑀧𑁂𑀦𑁆𑀢𑀺. 𑀲𑀻𑀲𑀧𑁆𑀧𑀫𑀸𑀡𑀦𑁆𑀢𑀺 𑀬𑀢𑁆𑀣 𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀻𑀲𑀁 𑀉𑀧𑀤𑀳𑀦𑁆𑀢𑀺, 𑀢𑀁 𑀲𑀻𑀲𑀧𑁆𑀧𑀫𑀸𑀡𑀁. 𑀢𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀩𑀺𑀫𑁆𑀩𑁄𑀳𑀦𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀁 𑀢𑀺𑀭𑀺𑀬𑀢𑁄 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀫𑀲𑀽𑀭𑀓𑁂𑀢𑀺 𑀘𑀫𑁆𑀫𑀫𑀬𑀪𑀺𑀲𑀺𑀬𑀁. 𑀨𑀼𑀲𑀺𑀢𑀸𑀦𑀺 𑀤𑀸𑀢𑀼𑀦𑁆𑀢𑀺 𑀲𑀜𑁆𑀜𑀸𑀓𑀭𑀡𑀢𑁆𑀣𑀁 𑀩𑀺𑀦𑁆𑀤𑀽𑀦𑀺 𑀤𑀸𑀢𑀼𑀁.

𑁨𑁯𑁮. 𑀦 𑀦𑀺𑀩𑀦𑁆𑀥𑀢𑀻𑀢𑀺 𑀅𑀦𑀺𑀩𑀦𑁆𑀥𑀦𑀻𑀬𑁄, 𑀦 𑀅𑀮𑁆𑀮𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀸𑀳𑁂𑀢𑁆𑀯𑀸𑀢𑀺 𑀫𑀝𑁆𑀞𑀁 𑀓𑀢𑁆𑀯𑀸.

𑀇𑀝𑁆𑀞𑀓𑀸𑀘𑀬𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀭𑀼𑀓𑁆𑀔𑀁 𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀭𑀼𑀓𑁆𑀔𑀤𑀸𑀭𑀼𑀁 𑀯𑀺𑀚𑁆𑀛𑀺𑀢𑁆𑀯𑀸. 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸𑀢𑀺 𑀤𑁆𑀯𑁂 𑀤𑁆𑀯𑁂 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸. 𑀢𑀁 𑀆𑀳𑀭𑀺𑀫𑀁 𑀪𑀺𑀢𑁆𑀢𑀺𑀧𑀸𑀤𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 𑀓𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀫𑀽𑀮𑁂𑀦 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀢𑁆𑀢𑀺𑀧𑀸𑀤𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀉𑀲𑁆𑀲𑀸𑀧𑁂𑀢𑁆𑀯𑀸 𑀔𑀸𑀡𑀼𑀓𑁂𑀳𑀺 𑀪𑀺𑀢𑁆𑀢𑀺𑀧𑀸𑀤𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑀢𑁄 𑀓𑀼𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀓𑀢𑀧𑀤𑁂𑀲𑀲𑁆𑀲𑀸𑀢𑀺 𑀬𑀣𑀸 𑀅𑀦𑁆𑀢𑁄𑀤𑁆𑀯𑀸𑀭𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁂𑀳𑀺 𑀉𑀚𑀼𑀓𑀁 𑀩𑀳𑀺 𑀑𑀮𑁄𑀓𑁂𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀓𑀼𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀅𑀪𑀺𑀫𑀼𑀔𑁂 𑀪𑀺𑀢𑁆𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀓𑀢𑀧𑀤𑁂𑀲𑀲𑁆𑀲. 𑀲𑀫𑀦𑁆𑀢𑀸 𑀧𑀭𑀺𑀬𑀸𑀕𑀸𑀭𑁄𑀢𑀺 𑀲𑀫𑀦𑁆𑀢𑀢𑁄 𑀆𑀯𑀺𑀤𑁆𑀥𑀧𑀫𑀼𑀔𑀁. 𑀉𑀕𑁆𑀖𑀸𑀝𑀦𑀓𑀺𑀝𑀺𑀓𑀦𑁆𑀢𑀺 𑀤𑀡𑁆𑀟𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀦𑀓𑀧𑀤𑀭𑀓𑀺𑀝𑀺𑀓𑀁.

𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀯𑀢𑁆𑀣𑀼𑀫𑁆𑀳𑀺 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁪𑁨) 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀯𑀸𑀡𑀺𑀚𑁆𑀚𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀓𑀺𑀭 𑀭𑀸𑀚𑀕𑀳𑀲𑁂𑀝𑁆𑀞𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀪𑀕𑀺𑀦𑀺𑀧𑀢𑀺𑀓𑀸 𑀳𑁄𑀦𑁆𑀢𑀺. 𑀬𑀤𑀸 𑀭𑀸𑀚𑀕𑀳𑁂 𑀉𑀝𑁆𑀞𑀸𑀦𑀓𑀪𑀡𑁆𑀟𑀁 𑀲𑀫𑀕𑁆𑀖𑀁 𑀳𑁄𑀢𑀺, 𑀢𑀤𑀸 𑀭𑀸𑀚𑀕𑀳𑀲𑁂𑀝𑁆𑀞𑀺 𑀢𑀁 𑀕𑀳𑁂𑀢𑁆𑀯𑀸 𑀲𑀓𑀝𑀲𑀢𑁂𑀳𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀬𑁄𑀚𑀦𑀫𑀢𑁆𑀢𑁂 𑀞𑀺𑀢𑁄 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀏𑀓𑀁 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀢𑀺. 𑀲𑁄 𑀲𑀘𑁂 𑀪𑀡𑁆𑀟𑀁 𑀮𑀳𑀼𑀓𑀁 𑀯𑀺𑀓𑁆𑀓𑀻𑀬𑀢𑀺, 𑀯𑀺𑀓𑁆𑀓𑀺𑀡𑀸𑀢𑀺. 𑀦𑁄 𑀘𑁂, 𑀪𑀕𑀺𑀦𑀺𑀖𑀭𑁂 𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀢𑀣𑁂𑀯 𑀓𑀭𑁄𑀢𑀺. 𑀲𑁆𑀯𑀸𑀬𑀁 𑀢𑀤𑀸𑀧𑀺 𑀢𑁂𑀦𑁂𑀯 𑀓𑀭𑀡𑀻𑀬𑁂𑀦 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀢𑀁 𑀤𑀺𑀯𑀲𑀁 𑀧𑀦 𑀭𑀸𑀚𑀕𑀳𑀲𑁂𑀝𑁆𑀞𑀺 𑀬𑁄𑀚𑀦𑀫𑀢𑁆𑀢𑁂 𑀞𑀺𑀢𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀆𑀕𑀢𑀪𑀸𑀯𑀚𑀸𑀦𑀦𑀢𑁆𑀣𑀁 𑀧𑁂𑀲𑀺𑀢𑀁 𑀧𑀡𑁆𑀡𑀁 𑀦 𑀲𑀼𑀡𑀺, 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 𑀉𑀤𑁆𑀥𑀦𑀔𑀡𑀸𑀧𑀦𑀤𑀸𑀭𑀼𑀨𑀸𑀮𑀦𑀸𑀤𑀻𑀦𑀺 𑀓𑀸𑀭𑁂𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 ‘‘𑀇𑀤𑀸𑀦𑀺 𑀫𑀬𑁆𑀳𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀖𑀭𑀤𑁆𑀯𑀸𑀭𑁂𑀧𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀮𑀪𑀺𑀢𑁆𑀯𑀸 𑀅𑀦𑁆𑀢𑁄𑀖𑀭𑀁 𑀧𑀯𑀺𑀝𑁆𑀞𑁄 𑀧𑀝𑀺𑀲𑀦𑁆𑀣𑀸𑀭𑀫𑁆𑀧𑀺 𑀦 𑀩𑀳𑀼𑀁 𑀅𑀮𑀢𑁆𑀣. ‘‘𑀓𑀺𑀁 𑀫𑀳𑀸𑀲𑁂𑀝𑁆𑀞𑀺 𑀓𑀼𑀲𑀮𑀁 𑀤𑀸𑀭𑀓𑀭𑀽𑀧𑀸𑀦𑀁, 𑀦𑀲𑀺 𑀫𑀕𑁆𑀕𑁂 𑀓𑀺𑀮𑀦𑁆𑀢𑁄’’𑀢𑀺 𑀏𑀢𑁆𑀢𑀓𑁄𑀯 𑀧𑀝𑀺𑀲𑀦𑁆𑀣𑀸𑀭𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀻’’𑀢𑀺𑀆𑀤𑀺.

𑀩𑀼𑀤𑁆𑀥𑁄𑀢𑀺 𑀢𑁆𑀯𑀁 𑀕𑀳𑀧𑀢𑀺 𑀯𑀤𑁂𑀲𑀻𑀢𑀺 𑀢𑀲𑁆𑀲 𑀓𑀺𑀭 𑀫𑀼𑀔𑀢𑁄 𑀩𑀼𑀤𑁆𑀥𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀧𑀜𑁆𑀘𑀯𑀡𑁆𑀡𑀁 𑀧𑀻𑀢𑀺𑀁 𑀧𑀝𑀺𑀮𑀪𑀢𑀺, 𑀲𑀸 𑀢𑀲𑁆𑀲 𑀲𑀻𑀲𑁂 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀬𑀸, 𑀧𑀸𑀤𑀧𑀺𑀝𑁆𑀞𑀺𑀬𑀸 𑀉𑀝𑁆𑀞𑀸𑀬 𑀬𑀸𑀯 𑀲𑀻𑀲𑀸 𑀕𑀘𑁆𑀙𑀢𑀺, 𑀉𑀪𑀢𑁄 𑀉𑀝𑁆𑀞𑀸𑀬 𑀫𑀚𑁆𑀛𑁂 𑀑𑀲𑀭𑀢𑀺, 𑀫𑀚𑁆𑀛𑁂 𑀉𑀝𑁆𑀞𑀸𑀬 𑀉𑀪𑀢𑁄 𑀕𑀘𑁆𑀙𑀢𑀺. 𑀲𑁄 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀨𑀼𑀝𑁄 ‘‘𑀩𑀼𑀤𑁆𑀥𑁄𑀢𑀺 𑀢𑁆𑀯𑀁 𑀕𑀳𑀧𑀢𑀺 𑀯𑀤𑁂𑀲𑀻’’𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺. 𑀅𑀓𑀸𑀮𑁄 𑀔𑁄, 𑀕𑀳𑀧𑀢𑀺, 𑀇𑀫𑀁 𑀓𑀸𑀮𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀦𑁆𑀢𑀺 ‘‘𑀩𑀼𑀤𑁆𑀥𑀸 𑀦𑀸𑀫 𑀤𑀼𑀭𑀸𑀲𑀤𑀸 𑀆𑀲𑀻𑀯𑀺𑀲𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀲𑀢𑁆𑀣𑀸 𑀘 𑀲𑀺𑀯𑀣𑀺𑀓𑀸𑀬 𑀲𑀫𑀻𑀧𑁂 𑀯𑀲𑀢𑀺, 𑀦 𑀲𑀓𑁆𑀓𑀸 𑀢𑀢𑁆𑀣 𑀇𑀫𑀸𑀬 𑀯𑁂𑀮𑀸𑀬 𑀇𑀫𑀺𑀦𑀸 𑀕𑀦𑁆𑀢𑀼’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳. 𑀩𑀼𑀤𑁆𑀥𑀕𑀢𑀸𑀬 𑀲𑀢𑀺𑀬𑀸 𑀦𑀺𑀧𑀚𑁆𑀚𑀻𑀢𑀺 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀕𑀢𑀸𑀬 𑀏𑀯 𑀲𑀢𑀺𑀬𑀸 𑀦𑀺𑀧𑀚𑁆𑀚𑀺. 𑀢𑀁 𑀤𑀺𑀯𑀲𑀁 𑀓𑀺𑀭𑀲𑁆𑀲 𑀪𑀡𑁆𑀟𑀲𑀓𑀝𑁂𑀲𑀼 𑀯𑀸 𑀉𑀧𑀝𑁆𑀞𑀸𑀓𑁂𑀲𑀼 𑀯𑀸 𑀘𑀺𑀢𑁆𑀢𑀫𑁆𑀧𑀺 𑀦𑀼𑀧𑁆𑀧𑀚𑁆𑀚𑀺, 𑀲𑀸𑀬𑀫𑀸𑀲𑀫𑁆𑀧𑀺 𑀦 𑀅𑀓𑀸𑀲𑀺. 𑀲𑀢𑁆𑀢𑀪𑀽𑀫𑀺𑀓𑀁 𑀧𑀦 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀼𑀧𑀜𑁆𑀜𑀢𑁆𑀢𑀸𑀮𑀗𑁆𑀓𑀢𑀯𑀭𑀲𑀬𑀦𑁂 ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄’’𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀝𑁆𑀞𑀸𑀲𑀺 𑀧𑀪𑀸𑀢𑀁 𑀫𑀜𑁆𑀜𑀫𑀸𑀦𑁄𑀢𑀺 𑀧𑀞𑀫𑀬𑀸𑀫𑁂 𑀢𑀸𑀯 𑀯𑀻𑀢𑀺𑀯𑀢𑁆𑀢𑁂 𑀉𑀝𑁆𑀞𑀸𑀬 𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀺, 𑀅𑀣𑀲𑁆𑀲 𑀩𑀮𑀯𑀧𑁆𑀧𑀲𑀸𑀤𑁄 𑀉𑀤𑀧𑀸𑀤𑀺, 𑀧𑀻𑀢𑀺𑀆𑀮𑁄𑀓𑁄 𑀅𑀳𑁄𑀲𑀺, 𑀲𑀩𑁆𑀩𑀢𑀫𑀁 𑀯𑀺𑀕𑀘𑁆𑀙𑀺, 𑀤𑀻𑀧𑀲𑀳𑀲𑁆𑀲𑀼𑀚𑁆𑀚𑀮𑀦𑀁 𑀯𑀺𑀬 𑀘𑀦𑁆𑀤𑀼𑀝𑁆𑀞𑀸𑀦𑀲𑀽𑀭𑀺𑀬𑀼𑀝𑁆𑀞𑀸𑀦𑀁 𑀯𑀺𑀬 𑀘 𑀚𑀸𑀢𑀁. 𑀲𑁄 ‘‘𑀧𑀫𑀸𑀤𑀁 𑀆𑀧𑀦𑁆𑀦𑁄𑀫𑁆𑀳𑀺, 𑀯𑀜𑁆𑀘𑀺𑀢𑁄𑀫𑁆𑀳𑀺, 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄’’𑀢𑀺 𑀉𑀝𑁆𑀞𑀸𑀬 𑀆𑀓𑀸𑀲𑀢𑀮𑁂 𑀞𑀢𑁆𑀯𑀸 𑀘𑀦𑁆𑀤𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀏𑀓𑁄𑀯 𑀬𑀸𑀫𑁄 𑀕𑀢𑁄, 𑀅𑀜𑁆𑀜𑁂 𑀤𑁆𑀯𑁂 𑀅𑀢𑁆𑀣𑀻’’𑀢𑀺 𑀧𑀼𑀦 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀫𑀚𑁆𑀛𑀺𑀫𑀬𑀸𑀫𑀸𑀯𑀲𑀸𑀦𑁂𑀧𑀺 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀉𑀝𑁆𑀞𑀸𑀲𑀺. 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀧𑀦 𑀩𑀮𑀯𑀧𑀘𑁆𑀘𑀽𑀲𑁂𑀬𑁂𑀯 𑀉𑀝𑁆𑀞𑀸𑀬 𑀆𑀓𑀸𑀲𑀢𑀮𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀅𑀳𑁄𑀲𑀺, 𑀲𑀢𑁆𑀢𑀪𑀽𑀫𑀺𑀓𑀤𑁆𑀯𑀸𑀭𑀁 𑀲𑀬𑀫𑁂𑀯 𑀯𑀺𑀯𑀝𑀁 𑀅𑀳𑁄𑀲𑀺, 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺.

𑁩𑁦𑁫. 𑀅𑀫𑀦𑀼𑀲𑁆𑀲𑀸𑀢𑀺 𑀅𑀥𑀺𑀕𑀢𑀯𑀺𑀲𑁂𑀲𑀸 𑀤𑁂𑀯𑀢𑀸. 𑀢𑀣𑀸 𑀳𑀺 𑀢𑀸 𑀲𑁂𑀝𑁆𑀞𑀺𑀲𑁆𑀲 𑀪𑀸𑀯𑀺𑀦𑀺𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀓𑁆𑀔𑀢𑁄 𑀲𑀫𑁆𑀧𑀲𑁆𑀲𑀫𑀸𑀦𑀸 ‘‘𑀅𑀬𑀁 𑀫𑀳𑀸𑀲𑁂𑀝𑁆𑀞𑀺 ‘𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀅𑀕𑁆𑀕𑀼𑀧𑀝𑁆𑀞𑀸𑀓𑁄 𑀳𑀼𑀢𑁆𑀯𑀸 𑀅𑀲𑀤𑀺𑀲𑀁 𑀲𑀗𑁆𑀖𑀸𑀭𑀸𑀫𑀁 𑀓𑀢𑁆𑀯𑀸 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀦𑀸𑀯𑀝𑀤𑁆𑀯𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀦 𑀬𑀼𑀢𑁆𑀢𑀫𑀲𑁆𑀲 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼. 𑀅𑀦𑁆𑀢𑀭𑀥𑀸𑀬𑀻𑀢𑀺 𑀭𑀸𑀚𑀕𑀳𑀁 𑀓𑀺𑀭 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁, 𑀅𑀦𑁆𑀢𑁄𑀦𑀕𑀭𑁂 𑀦𑀯 𑀓𑁄𑀝𑀺𑀬𑁄 𑀩𑀳𑀺𑀦𑀕𑀭𑁂 𑀦𑀯𑀸𑀢𑀺 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀭𑀲 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀯𑀲𑀦𑁆𑀢𑀺. 𑀅𑀯𑁂𑀮𑀸𑀬 𑀫𑀢𑀫𑀦𑀼𑀲𑁆𑀲𑁂 𑀩𑀳𑀺 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀝𑁆𑀝𑀸𑀮𑀓𑁂 𑀞𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑁂 𑀔𑀺𑀧𑀦𑁆𑀢𑀺. 𑀫𑀳𑀸𑀲𑁂𑀝𑁆𑀞𑀺 𑀦𑀕𑀭𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄𑀯 𑀅𑀮𑁆𑀮𑀲𑀭𑀻𑀭𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺, 𑀅𑀧𑀭𑀫𑁆𑀧𑀺 𑀧𑀺𑀝𑁆𑀞𑀺𑀧𑀸𑀤𑁂𑀦 𑀧𑀳𑀭𑀺, 𑀫𑀓𑁆𑀔𑀺𑀓𑀸 𑀉𑀧𑁆𑀧𑀢𑀺𑀢𑁆𑀯𑀸 𑀧𑀓𑀺𑀭𑀺𑀁𑀲𑀼, 𑀤𑀼𑀕𑁆𑀕𑀦𑁆𑀥𑁄 𑀦𑀸𑀲𑀸𑀧𑀼𑀝𑀁 𑀅𑀪𑀺𑀳𑀦𑀺, 𑀩𑀼𑀤𑁆𑀥𑀧𑁆𑀧𑀲𑀸𑀤𑁄 𑀢𑀦𑀼𑀢𑁆𑀢𑀁 𑀕𑀢𑁄. 𑀢𑁂𑀦𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺 𑀧𑀻𑀢𑀺𑀯𑁂𑀕𑀲𑁆𑀲 𑀢𑀦𑀼𑀪𑀸𑀯𑁂 𑀢𑀁𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀁 𑀧𑀭𑀺𑀤𑀼𑀩𑁆𑀩𑀮𑀪𑀸𑀯𑀢𑁄. 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀻𑀢𑀺 ‘‘𑀲𑁂𑀝𑁆𑀞𑀺𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀁 𑀖𑀝𑁆𑀝𑁂𑀦𑁆𑀢𑁄 𑀯𑀺𑀬 𑀫𑀥𑀼𑀭𑀲𑁆𑀲𑀭𑁂𑀦 𑀲𑀤𑁆𑀤𑀁 𑀅𑀦𑀼𑀲𑁆𑀲𑀸𑀯𑁂𑀲𑀺.

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀻𑀢𑀺 𑀧𑀼𑀭𑀺𑀫𑀧𑀤𑀸𑀦𑀺𑀧𑀺 𑀇𑀫𑀺𑀦𑀸𑀯 𑀲𑀳𑀲𑁆𑀲-𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀸𑀦𑀺. 𑀬𑀣𑁂𑀯 𑀳𑀺 𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀏𑀯𑀁 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀳𑀢𑁆𑀣𑀻, 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀅𑀲𑁆𑀲𑀸, 𑀲𑀢𑀁 𑀲𑀳𑀲𑁆𑀲𑀸𑀦𑀺 𑀭𑀣𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄, 𑀇𑀢𑀺 𑀏𑀓𑁂𑀓𑀁 𑀲𑀢𑀲𑀳𑀲𑁆𑀲𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀧𑀤𑀯𑀻𑀢𑀺𑀳𑀸𑀭𑀲𑁆𑀲𑀸𑀢𑀺 𑀧𑀤𑀁 𑀯𑀻𑀢𑀺𑀳𑀭𑀢𑀺 𑀏𑀢𑁆𑀣𑀸𑀢𑀺 𑀧𑀤𑀯𑀻𑀢𑀺𑀳𑀸𑀭𑁄. 𑀲𑁄 𑀤𑀼𑀢𑀯𑀺𑀮𑀫𑁆𑀩𑀺𑀢𑀁 𑀅𑀓𑀢𑁆𑀯𑀸 𑀲𑀫𑀕𑀫𑀦𑁂 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀦𑁆𑀢𑀭𑁂 𑀫𑀼𑀝𑁆𑀞𑀺𑀭𑀢𑀦𑀫𑀢𑁆𑀢𑀁. 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀦𑁆𑀢𑀺 𑀢𑀁 𑀏𑀓𑀁 𑀧𑀤𑀯𑀻𑀢𑀺𑀳𑀸𑀭𑀁 𑀲𑁄𑀴𑀲 𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀧𑀼𑀦 𑀲𑁄𑀴𑀲𑀥𑀸, 𑀢𑀢𑁄 𑀏𑀓𑁄 𑀲𑁄𑀴𑀲𑀥𑀸𑀢𑀺 𑀏𑀯𑀁 𑀲𑁄𑀴𑀲 𑀯𑀸𑀭𑁂 𑀲𑁄𑀴𑀲𑀥𑀸 𑀪𑀺𑀦𑁆𑀦𑀲𑁆𑀲 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀲𑁄𑀴𑀲𑀻 𑀓𑀮𑀸 𑀦𑀸𑀫, 𑀢𑀁 𑀲𑁄𑀴𑀲𑀺𑀁 𑀓𑀮𑀁 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀦 𑀅𑀕𑁆𑀖𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀢𑀁 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀢𑀁 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀢𑀁 𑀭𑀣𑀲𑀳𑀲𑁆𑀲𑀸𑀦𑀺 𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀢𑀸 𑀘 𑀔𑁄 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀭𑀸𑀚𑀥𑀻𑀢𑀭𑁄𑀯𑀸𑀢𑀺 𑀇𑀫𑀲𑁆𑀫𑀸 𑀏𑀢𑁆𑀢𑀓𑀸 𑀮𑀸𑀪𑀸 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑁄𑀴𑀲𑀺𑀓𑀮𑀸𑀲𑀗𑁆𑀔𑀸𑀢𑁂 𑀧𑀤𑁂𑀲𑁂 𑀮𑀗𑁆𑀖𑀦𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀘𑁂𑀢𑀦𑀸𑀯 𑀉𑀢𑁆𑀢𑀭𑀺𑀢𑀭𑀸𑀢𑀺. 𑀧𑀤𑀁 𑀯𑀸 𑀯𑀻𑀢𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀧𑀤𑀯𑀻𑀢𑀺𑀳𑀸𑀭𑁄, 𑀢𑀣𑀸𑀧𑀯𑀢𑁆𑀢𑀸 𑀓𑀼𑀲𑀮𑀘𑁂𑀢𑀦𑀸, 𑀢𑀲𑁆𑀲𑀸 𑀨𑀮𑀁 𑀲𑁄𑀴𑀲𑀥𑀸 𑀓𑀢𑁆𑀯𑀸𑀢𑀺 𑀘 𑀯𑀤𑀦𑁆𑀢𑀺. 𑀇𑀤𑀁 𑀧𑀦 𑀯𑀺𑀳𑀸𑀭𑀕𑀫𑀦𑀁 𑀓𑀲𑁆𑀲 𑀯𑀲𑁂𑀦 𑀕𑀳𑀺𑀢𑀦𑁆𑀢𑀺? 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑀦𑁆𑀢𑀭𑀸𑀬𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀲𑁆𑀲 𑀯𑀲𑁂𑀦 𑀕𑀳𑀺𑀢𑀁. ‘‘𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀺, 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀺, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀺, 𑀤𑀻𑀧𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑀸 𑀲𑀭𑀡𑁂𑀲𑀼 𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑁄𑀧𑀺 𑀯𑀲𑁂𑀦 𑀯𑀝𑁆𑀝𑀢𑀺𑀬𑁂𑀯.

𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀻𑀢𑀺 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀏𑀓𑀓𑁄𑀢𑀺 𑀲𑀜𑁆𑀜𑀁 𑀓𑀭𑁄𑀫𑀺, 𑀅𑀫𑀦𑀼𑀲𑁆𑀲𑀸 𑀘 𑀫𑁂 𑀅𑀦𑀼𑀕𑀸𑀫𑀺𑀦𑁄 𑀲𑀳𑀸𑀬𑀸 𑀅𑀢𑁆𑀣𑀺, 𑀓𑀲𑁆𑀫𑀸 𑀪𑀸𑀬𑀸𑀫𑀻’’𑀢𑀺 𑀲𑀽𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀩𑀮𑀯𑀸 𑀩𑀼𑀤𑁆𑀥𑀧𑁆𑀧𑀲𑀸𑀤𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀘𑀺𑀭𑀓𑀸𑀮𑀧𑀭𑀺𑀘𑀬𑀲𑀫𑁆𑀪𑀽𑀢𑀲𑁆𑀲 𑀩𑀮𑀯𑀢𑁄 𑀧𑀲𑀸𑀤𑀲𑁆𑀲 𑀯𑀲𑁂𑀦 𑀉𑀧𑁆𑀧𑀦𑁆𑀦𑀸𑀬 𑀉𑀴𑀸𑀭𑀸𑀬 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀺𑀧𑀲𑁆𑀲𑀦𑁄𑀪𑀸𑀲𑀲𑀤𑀺𑀲𑁄 𑀲𑀸𑀢𑀺𑀲𑀬𑁄 𑀘𑀺𑀢𑁆𑀢𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺. 𑀤𑁂𑀯𑀢𑀸𑀳𑀺 𑀓𑀢𑁄𑀢𑀺𑀧𑀺 𑀯𑀤𑀦𑁆𑀢𑀺, 𑀧𑀼𑀭𑀺𑀫𑁄𑀬𑁂𑀯𑁂𑀢𑁆𑀣 𑀬𑀼𑀢𑁆𑀢𑀢𑀭𑁄. 𑀏𑀳𑀺 𑀲𑀼𑀤𑀢𑁆𑀢𑀸𑀢𑀺 𑀲𑁄 𑀓𑀺𑀭 𑀲𑁂𑀝𑁆𑀞𑀺 𑀕𑀘𑁆𑀙𑀫𑀸𑀦𑁄𑀯 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 𑀩𑀳𑀽 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀢𑀺𑀢𑁆𑀣𑀺𑀬𑀸 ‘𑀫𑀬𑀁 𑀩𑀼𑀤𑁆𑀥𑀸, 𑀫𑀬𑀁 𑀩𑀼𑀤𑁆𑀥𑀸’𑀢𑀺 𑀯𑀤𑀦𑁆𑀢𑀺, 𑀓𑀣𑀁 𑀦𑀼 𑀔𑁄 𑀅𑀳𑀁 𑀲𑀢𑁆𑀣𑀼 𑀩𑀼𑀤𑁆𑀥𑀪𑀸𑀯𑀁 𑀚𑀸𑀦𑁂𑀬𑁆𑀬’’𑀦𑁆𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀫𑀬𑁆𑀳𑀁 𑀕𑀼𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀦𑀸𑀫𑀁 𑀫𑀳𑀸𑀚𑀦𑁄 𑀚𑀸𑀦𑀸𑀢𑀺, 𑀓𑀼𑀮𑀤𑀢𑁆𑀢𑀺𑀬𑀁 𑀧𑀦 𑀫𑁂 𑀦𑀸𑀫𑀁 𑀅𑀜𑁆𑀜𑀢𑁆𑀭 𑀫𑀬𑀸 𑀦 𑀓𑁄𑀘𑀺 𑀚𑀸𑀦𑀸𑀢𑀺, 𑀲𑀘𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀓𑀼𑀮𑀤𑀢𑁆𑀢𑀺𑀓𑀦𑀸𑀫𑁂𑀦 𑀫𑀁 𑀆𑀮𑀧𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀏𑀯𑀫𑀸𑀳.

𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀆𑀲𑀢𑁆𑀢𑀺𑀬𑁄𑀢𑀺 𑀭𑀽𑀧𑀸𑀤𑀻𑀲𑀼 𑀆𑀲𑀜𑁆𑀚𑀦𑀝𑁆𑀞𑁂𑀦 𑀆𑀲𑀢𑁆𑀢𑀺𑀬𑁄, 𑀢𑀡𑁆𑀳𑀸𑀬𑁄. 𑀲𑀦𑁆𑀢𑀺𑀦𑁆𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀁. 𑀧𑀧𑁆𑀧𑀼𑀬𑁆𑀬𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀧𑀢𑁆𑀯𑀸. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀜𑁆𑀘𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀫𑀢𑁆𑀣𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁩𑁦𑁬. 𑀯𑀬𑀫𑁂𑀯 𑀯𑁂𑀬𑁆𑀬𑀸𑀬𑀺𑀓𑀦𑁆𑀢𑀺 𑀆𑀳 ‘‘𑀯𑁂𑀬𑁆𑀬𑀸𑀬𑀺𑀓𑀦𑁆𑀢𑀺 𑀯𑀬𑀓𑀭𑀡𑀁 𑀯𑀼𑀘𑁆𑀘𑀢𑀻’’𑀢𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀕𑁆𑀕𑀸𑀲𑀦𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁧𑁦-𑁩𑁧𑁧. 𑀤𑀓𑁆𑀔𑀺𑀡𑁄𑀤𑀓𑀦𑁆𑀢𑀺 𑀅𑀕𑁆𑀕𑀢𑁄 𑀉𑀧𑀦𑀻𑀬𑀫𑀸𑀦𑀁 𑀤𑀓𑁆𑀔𑀺𑀡𑁄𑀤𑀓𑀁. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 (𑀚𑀸. 𑀅𑀝𑁆𑀞. 𑁧.𑁧.𑁩𑁬 𑀢𑀺𑀢𑁆𑀢𑀺𑀭𑀚𑀸𑀢𑀓𑀯𑀡𑁆𑀡𑀦𑀸) 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀅𑀕𑁆𑀕𑀸𑀲𑀦𑀸𑀤𑀺𑀭𑀳𑀸𑀦𑀁 𑀓𑀣𑀺𑀢𑀓𑀸𑀮𑁂 ‘‘𑀦, 𑀪𑀺𑀓𑁆𑀔𑀯𑁂, 𑀫𑀬𑁆𑀳𑀁 𑀲𑀸𑀲𑀦𑁂 𑀅𑀕𑁆𑀕𑀸𑀲𑀦𑀸𑀤𑀻𑀦𑀺 𑀧𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀧𑀫𑀸𑀡𑀁, 𑀦 𑀩𑁆𑀭𑀸𑀳𑁆𑀫𑀡𑀓𑀼𑀮𑀸, 𑀦 𑀕𑀳𑀧𑀢𑀺𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀦 𑀯𑀺𑀦𑀬𑀥𑀭𑁄, 𑀦 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀦 𑀆𑀪𑀺𑀥𑀫𑁆𑀫𑀺𑀓𑁄, 𑀦 𑀧𑀞𑀫𑀚𑁆𑀛𑀸𑀦𑀸𑀤𑀺𑀮𑀸𑀪𑀺𑀦𑁄, 𑀦 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀧𑀫𑀸𑀡𑀁, 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁, 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑁄 𑀮𑀤𑁆𑀥𑀩𑁆𑀩𑁄, 𑀇𑀤𑀫𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀏𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑁄. 𑀇𑀤𑀸𑀦𑀺 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀫𑀬𑁆𑀳𑀁 𑀅𑀕𑁆𑀕𑀲𑀸𑀯𑀓𑁄 𑀅𑀦𑀼𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀓𑁄 𑀫𑀫𑀸𑀦𑀦𑁆𑀢𑀭𑀲𑁂𑀦𑀸𑀲𑀦𑀁 𑀮𑀤𑁆𑀥𑀼𑀁 𑀅𑀭𑀳𑀢𑀺. 𑀲𑁄 𑀇𑀫𑀁 𑀭𑀢𑁆𑀢𑀺𑀁 𑀲𑁂𑀦𑀸𑀲𑀦𑀁 𑀅𑀮𑀪𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑁂 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀼𑀫𑁆𑀳𑁂 𑀇𑀤𑀸𑀦𑁂𑀯 𑀏𑀯𑀁 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀅𑀣 𑀦𑁂𑀲𑀁 𑀑𑀯𑀸𑀤𑀤𑀸𑀦𑀢𑁆𑀣𑀸𑀬 ‘‘𑀧𑀼𑀩𑁆𑀩𑁂, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 ‘𑀦 𑀔𑁄 𑀧𑀦𑁂𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑁂𑀬𑁆𑀬𑀸𑀫, 𑀅𑀫𑁆𑀳𑁂𑀲𑀼 𑀫𑀳𑀮𑁆𑀮𑀓𑀢𑀭𑀁 𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀲𑀸𑀥𑀼𑀓𑀁 𑀯𑀻𑀫𑀁𑀲𑀺𑀢𑁆𑀯𑀸 ‘𑀅𑀬𑀁 𑀫𑀳𑀮𑁆𑀮𑀓𑁄’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀢𑁆𑀯𑀸 𑀤𑁂𑀯𑀧𑀣𑀁 𑀧𑀽𑀭𑀬𑀫𑀸𑀦𑀸 𑀕𑀢𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀻𑀢𑀺 𑀚𑀸𑀢𑀺𑀯𑀼𑀟𑁆𑀠𑁄 𑀯𑀬𑁄𑀯𑀼𑀟𑁆𑀠𑁄 𑀕𑀼𑀡𑀯𑀼𑀟𑁆𑀠𑁄𑀢𑀺 𑀢𑀬𑁄 𑀯𑀼𑀟𑁆𑀠𑀸. 𑀢𑁂𑀲𑀼 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀚𑀸𑀢𑀺𑀯𑀼𑀟𑁆𑀠𑁄 𑀦𑀸𑀫, 𑀯𑀬𑁂 𑀞𑀺𑀢𑁄 𑀯𑀬𑁄𑀯𑀼𑀟𑁆𑀠𑁄 𑀦𑀸𑀫, 𑀕𑀼𑀡𑀲𑀫𑁆𑀧𑀦𑁆𑀦𑁄 𑀕𑀼𑀡𑀯𑀼𑀟𑁆𑀠𑁄 𑀦𑀸𑀫. 𑀢𑁂𑀲𑀼 𑀕𑀼𑀡𑀲𑀫𑁆𑀧𑀦𑁆𑀦𑁄 𑀯𑀬𑁄𑀯𑀼𑀟𑁆𑀠𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀼𑀟𑁆𑀠𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀧𑀘𑀸𑀬𑀦𑁆𑀢𑀻𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀓𑀫𑁆𑀫𑁂𑀦 𑀧𑀽𑀚𑁂𑀦𑁆𑀢𑀺. 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸𑀢𑀺 𑀚𑁂𑀝𑁆𑀞𑀸𑀧𑀘𑀸𑀬𑀦𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 𑀓𑀼𑀲𑀮𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀸𑀭𑀳𑀸. 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻𑀢𑀺 𑀲𑀫𑁆𑀧𑀭𑁂𑀢𑀩𑁆𑀩𑁂 𑀇𑀫𑀁 𑀮𑁄𑀓𑀁 𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑁂 𑀧𑀭𑀮𑁄𑀓𑁂𑀧𑀺 𑀢𑁂𑀲𑀁 𑀲𑀼𑀕𑀢𑀺𑀬𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀔𑀢𑁆𑀢𑀺𑀬𑀸 𑀯𑀸 𑀳𑁄𑀦𑁆𑀢𑀼 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀯𑁂𑀲𑁆𑀲𑀸 𑀯𑀸 𑀲𑀼𑀤𑁆𑀤𑀸 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸 𑀯𑀸, 𑀬𑁂 𑀓𑁂𑀘𑀺 𑀲𑀢𑁆𑀢𑀸 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀫𑁆𑀫𑁂 𑀙𑁂𑀓𑀸 𑀓𑀼𑀲𑀮𑀸 𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀯𑀬𑁄𑀯𑀼𑀟𑁆𑀠𑀸𑀦𑀁 𑀅𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂 𑀚𑁂𑀝𑁆𑀞𑀸𑀧𑀘𑀺𑀢𑀺𑀓𑀸𑀭𑀓𑀸𑀢𑀺 𑀧𑀲𑀁𑀲𑀁 𑀯𑀡𑁆𑀡𑀦𑀁 𑀣𑁄𑀫𑀦𑀁 𑀮𑀪𑀦𑁆𑀢𑀺, 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺.

𑀅𑀕𑁆𑀕𑀸𑀲𑀦𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁧𑁩-𑁪. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 𑀕𑀺𑀳𑀻𑀳𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁. 𑀕𑀺𑀳𑀺𑀯𑀺𑀓𑀢𑀦𑁆𑀢𑀺 𑀕𑀺𑀳𑀻𑀳𑀺 𑀓𑀢𑀁 𑀧𑀜𑁆𑀜𑀢𑁆𑀢𑀁, 𑀕𑀺𑀳𑀺𑀲𑀦𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑀺𑀲𑀫𑀻𑀧𑀁 𑀅𑀕𑀦𑁆𑀢𑁆𑀯𑀸𑀢𑀺 𑀪𑀺𑀓𑁆𑀔𑀽𑀦𑀁 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀅𑀕𑀦𑁆𑀢𑁆𑀯𑀸.

𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁧𑁮. 𑀧𑀘𑁆𑀘𑀬𑁂𑀦𑁂𑀯 𑀳𑀺 𑀢𑀁 𑀧𑀝𑀺𑀚𑀕𑁆𑀕𑀦𑀁 𑀮𑀪𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀫𑀳𑀸𑀣𑁂𑀭𑀸 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀓𑀸𑀭𑀡𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀸𑀬𑁂𑀯 𑀦𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀩𑁆𑀪𑀡𑁆𑀟𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀉𑀓𑁆𑀔𑀺𑀢𑁆𑀢𑀪𑀡𑁆𑀟𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀻𑀖𑀲𑀸𑀮𑀸𑀢𑀺 𑀘𑀗𑁆𑀓𑀫𑀦𑀲𑀸𑀮𑀸. 𑀫𑀡𑁆𑀟𑀮𑀫𑀸𑀴𑁄 𑀉𑀧𑀝𑁆𑀞𑀸𑀦𑀲𑀸𑀮𑀸. 𑀅𑀦𑀼𑀤𑀳𑀢𑀻𑀢𑀺 𑀧𑀻𑀴𑁂𑀢𑀺. 𑀚𑀫𑁆𑀩𑀼𑀤𑀻𑀧𑁂 𑀧𑀦𑀸𑀢𑀺 𑀅𑀭𑀺𑀬𑀤𑁂𑀲𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀓𑀺𑀭 𑀢𑀣𑀸 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀦 𑀕𑁄𑀘𑀭𑀕𑀸𑀫𑁄 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸. 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑁂𑀢𑁆𑀯𑀸 𑀧𑀘𑁆𑀘𑀬𑁂 𑀤𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀢𑁂𑀲𑀼 𑀘𑁂 𑀏𑀓𑁄𑀢𑀺 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄. 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀓𑀪𑀡𑁆𑀟𑀁, 𑀲𑀭𑀻𑀭𑀧𑀝𑀺𑀘𑁆𑀙𑀸𑀤𑀦𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀫𑀚𑁆𑀚𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀺. 𑀫𑀼𑀡𑁆𑀟𑀯𑁂𑀤𑀺𑀓𑀸𑀬𑀸𑀢𑀺 𑀘𑁂𑀢𑀺𑀬𑀲𑁆𑀲 𑀳𑀫𑁆𑀫𑀺𑀬𑀯𑁂𑀤𑀺𑀓𑀸𑀬. 𑀳𑀫𑁆𑀫𑀺𑀬𑀯𑁂𑀤𑀺𑀓𑀸𑀢𑀺 𑀘 𑀘𑁂𑀢𑀺𑀬𑀲𑁆𑀲 𑀉𑀧𑀭𑀺 𑀘𑀢𑀼𑀭𑀲𑁆𑀲𑀯𑁂𑀤𑀺𑀬𑁄 𑀯𑀼𑀘𑁆𑀘𑀢𑀺. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀯𑀺𑀳𑀸𑀭𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀉𑀧𑀦𑀺𑀓𑁆𑀔𑁂𑀧𑀦𑁆𑀢𑀺 𑀔𑁂𑀢𑁆𑀢𑀁 𑀯𑀸 𑀦𑀸𑀴𑀺𑀓𑁂𑀭𑀸𑀤𑀺𑀆𑀭𑀸𑀫𑀁 𑀯𑀸 𑀓𑀳𑀸𑀧𑀡𑀸𑀤𑀻𑀦𑀺 𑀯𑀸 𑀆𑀭𑀸𑀫𑀺𑀓𑀸𑀤𑀻𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 ‘‘𑀇𑀢𑁄 𑀉𑀧𑁆𑀧𑀦𑁆𑀦𑀸 𑀯𑀟𑁆𑀠𑀺 𑀯𑀲𑁆𑀲𑀸𑀯𑀸𑀲𑀺𑀓𑀢𑁆𑀣𑀸𑀬 𑀳𑁄𑀢𑀽’’𑀢𑀺 𑀤𑀺𑀦𑁆𑀦𑀁. 𑀯𑀢𑁆𑀢𑀁 𑀓𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀓𑀢𑁆𑀯𑀸.

𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀧𑀭𑀢𑁄 𑀯𑀓𑁆𑀔𑀫𑀸𑀦𑀦𑀬𑁂𑀦 ‘‘𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀭𑀸𑀫𑀸𑀲𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀁, ‘‘𑀲𑀗𑁆𑀖𑁄 𑀘𑀻𑀯𑀭𑁂𑀦 𑀓𑀺𑀮𑀫𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀗𑁆𑀖𑀧𑀭𑀸𑀫𑀸𑀲𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀘𑀻𑀯𑀭𑀧𑀘𑁆𑀘𑀬𑀦𑁆𑀢𑀺 𑀘𑀻𑀯𑀭𑀲𑀗𑁆𑀔𑀸𑀢𑀁 𑀧𑀘𑁆𑀘𑀬𑀁. 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀜𑁆𑀳𑀺 𑀦𑀯𑀓𑁄 𑀯𑀼𑀟𑁆𑀠𑀢𑀭𑀲𑁆𑀲, 𑀯𑀼𑀟𑁆𑀠𑁄 𑀘 𑀦𑀯𑀓𑀲𑁆𑀲 𑀕𑀸𑀳𑁂𑀲𑁆𑀲𑀢𑀻’’𑀢𑀺, 𑀬𑀲𑁆𑀫𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀲𑀫𑁆𑀫𑀢𑁂𑀲𑀼 𑀦𑀯𑀓𑁄 𑀯𑀼𑀟𑁆𑀠𑀢𑀭𑀲𑁆𑀲, 𑀯𑀼𑀟𑁆𑀠𑁄 𑀘 𑀦𑀯𑀓𑀲𑁆𑀲𑀸𑀢𑀺 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀕𑀸𑀳𑁂𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀫𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑁂𑀦 𑀕𑀸𑀳𑀺𑀢𑁂𑀧𑀺 𑀕𑀸𑀳𑁄 𑀭𑀼𑀳𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀺𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺, 𑀉𑀤𑀸𑀳𑀼 𑀏𑀓𑀢𑁄𑀢𑀺? 𑀏𑀓𑀢𑁄𑀧𑀺 𑀯𑀝𑁆𑀝𑀢𑀺. 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀦 𑀓𑀭𑁄𑀢𑀺, 𑀲𑀫𑁆𑀫𑀼𑀢𑀺𑀤𑀸𑀦𑀁 𑀧𑀦 𑀩𑀳𑀽𑀦𑀫𑁆𑀧𑀺 𑀏𑀓𑀢𑁄 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀦𑁂𑀯 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀉𑀩𑁆𑀩𑀸𑀳𑀺𑀓𑀲𑀫𑁆𑀫𑀼𑀢𑀺𑀬𑀁 𑀅𑀝𑁆𑀞𑀧𑀺 𑀚𑀦𑀸 𑀏𑀓𑀢𑁄 𑀲𑀫𑁆𑀫𑀢𑀸𑀢𑀺.

𑀫𑀕𑁆𑀕𑁄𑀢𑀺 𑀫𑀕𑁆𑀕𑁂 𑀓𑀢𑀤𑀻𑀖𑀲𑀸𑀮𑀸. 𑀧𑁄𑀓𑁆𑀔𑀭𑀡𑀻𑀢𑀺 𑀦𑀳𑀸𑀬𑀦𑁆𑀢𑀸𑀦𑀁 𑀧𑁄𑀓𑁆𑀔𑀭𑀡𑀺𑀬𑀁 𑀓𑀢𑀲𑀸𑀮𑀸. 𑀭𑀼𑀓𑁆𑀔𑀫𑀽𑀮𑀸𑀤𑀬𑁄 𑀙𑀦𑁆𑀦𑀸 𑀓𑀯𑀸𑀝𑀩𑀤𑁆𑀥𑀸𑀯 𑀲𑁂𑀦𑀸𑀲𑀦𑀁. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀯𑀺𑀬𑁄𑀚𑁂𑀢𑁆𑀯𑀸, 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀯𑀸𑀲𑁂𑀲𑀽𑀢𑀺 𑀲𑁂𑀦𑀸𑀲𑀦𑁂𑀲𑀼. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀓𑁆𑀔𑀺𑀧𑀦𑀁 𑀦𑀸𑀫 𑀢𑁂𑀲𑀼 𑀯𑀲𑀦𑁆𑀢𑀸𑀦𑀁 𑀇𑀢𑁄 𑀉𑀧𑁆𑀧𑀦𑁆𑀦𑀯𑀲𑁆𑀲𑀸𑀯𑀸𑀲𑀺𑀓𑀤𑀸𑀦𑀁. 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀫𑀳𑀸𑀮𑀸𑀪𑁂 𑀧𑀭𑀺𑀯𑁂𑀡𑁂 𑀯𑀲𑀺𑀢𑁆𑀯𑀸 𑀘𑁂𑀢𑀺𑀬𑁂 𑀯𑀢𑁆𑀢𑀁 𑀓𑀢𑁆𑀯𑀸𑀯 𑀮𑀸𑀪𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀘𑀻𑀯𑀭𑀧𑀘𑁆𑀘𑀬𑀁 𑀦𑀸𑀥𑀺𑀯𑀸𑀲𑁂𑀢𑀺. 𑀅𑀬𑀫𑁆𑀧𑀻𑀢𑀺 𑀢𑁂𑀦 𑀯𑀺𑀲𑁆𑀲𑀝𑁆𑀞𑀧𑀘𑁆𑀘𑀬𑁄𑀧𑀺. 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀯𑀸 𑀫𑀡𑁆𑀟𑀧𑁂 𑀯𑀸 𑀯𑀲𑀺𑀢𑁆𑀯𑀸 𑀘𑁂𑀢𑀺𑀬𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. ‘‘𑀓𑀢𑁆𑀣 𑀦𑀼 𑀔𑁄 𑀯𑀲𑀺𑀲𑁆𑀲𑀸𑀫𑀺, 𑀓𑀢𑁆𑀣 𑀯𑀲𑀦𑁆𑀢𑀲𑁆𑀲 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀓𑀢𑁆𑀣 𑀯𑀸 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑁂𑀦 𑀯𑀺𑀢𑀓𑁆𑀓𑁂𑀦 𑀘𑀭𑀢𑀻𑀢𑀺 𑀯𑀺𑀢𑀓𑁆𑀓𑀘𑀸𑀭𑀺𑀓𑁄. 𑀅𑀭𑀜𑁆𑀜𑀯𑀺𑀳𑀸𑀭𑁂𑀲𑀼 𑀧𑀭𑀺𑀲𑁆𑀲𑀬𑀯𑀺𑀚𑀸𑀦𑀦𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀧𑀜𑁆𑀘 𑀧𑀜𑁆𑀘 𑀉𑀓𑁆𑀓𑀸 𑀓𑁄𑀝𑁆𑀝𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀯𑀢𑁆𑀢𑀦𑁆𑀢𑀺 𑀓𑀢𑀺𑀓𑀯𑀢𑁆𑀢𑀁. 𑀢𑀺𑀯𑀺𑀥𑀫𑁆𑀧𑀻𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺. 𑀲𑁄𑀥𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀣𑀸𑀢𑀺 𑀪𑀩𑁆𑀩𑁂 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀣. 𑀤𑀲𑀯𑀢𑁆𑀣𑀼𑀓𑀓𑀣𑀸 𑀦𑀸𑀫 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸.

𑀯𑀺𑀕𑁆𑀕𑀳𑀲𑀁𑀯𑀢𑁆𑀢𑀦𑀺𑀓𑀯𑀘𑀦𑀁 𑀯𑀺𑀕𑁆𑀕𑀸𑀳𑀺𑀓𑀁. 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀫𑁂𑀢𑁆𑀢𑀸 𑀅𑀲𑀼𑀪𑀁 𑀫𑀭𑀡𑀲𑁆𑀲𑀢𑀻𑀢𑀺 𑀇𑀫𑀁 𑀘𑀢𑀼𑀭𑀸𑀭𑀓𑁆𑀔𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑀸. 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑀬𑁄 𑀤𑁂𑀯𑀲𑀺𑀓𑀁 𑀲𑀗𑁆𑀖𑀫𑀚𑁆𑀛𑁂 𑀑𑀲𑀭𑀢𑀺, 𑀢𑁂𑀦 𑀲𑀸𑀫𑀡𑁂𑀭𑀸𑀤𑀻𑀳𑀺 𑀆𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑀸𑀬 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀦𑀺𑀓𑁆𑀔𑀺𑀢𑁆𑀢𑁂𑀲𑀼 𑀤𑀦𑁆𑀢𑀓𑀝𑁆𑀞𑁂𑀲𑀼 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀫𑁂𑀯 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀤𑁂𑀯𑀲𑀺𑀓𑀁 𑀦 𑀑𑀲𑀭𑀢𑀺, 𑀧𑀥𑀸𑀦𑀖𑀭𑁂 𑀯𑀲𑀺𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑁂 𑀯𑀸 𑀉𑀧𑁄𑀲𑀣𑀕𑁆𑀕𑁂 𑀯𑀸 𑀤𑀺𑀲𑁆𑀲𑀢𑀺, 𑀢𑁂𑀦 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀦𑁆𑀢𑀓𑀝𑁆𑀞𑀸𑀦𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀔𑀻𑀡𑁂𑀲𑀼 𑀲𑀘𑁂 𑀧𑀼𑀦𑀧𑀺 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀩𑀳𑀽𑀦𑀺 𑀳𑁄𑀦𑁆𑀢𑀺𑀬𑁂𑀯, 𑀧𑀼𑀦𑀧𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀬𑀤𑀺 𑀧𑀦 𑀧𑀫𑀸𑀡𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀳𑀭𑀢𑀺, 𑀢𑁂𑀲𑀼 𑀅𑀔𑀻𑀡𑁂𑀲𑀼𑀬𑁂𑀯 𑀫𑀸𑀴𑀓𑁂 𑀔𑀻𑀬𑀢𑀺, 𑀢𑀢𑁄 𑀓𑁂𑀘𑀺 𑀣𑁂𑀭𑀸 ‘‘𑀬𑁂𑀳𑀺 𑀕𑀳𑀺𑀢𑀸𑀦𑀺, 𑀢𑁂 𑀧𑀝𑀺𑀳𑀭𑀦𑁆𑀢𑀽’’𑀢𑀺 𑀯𑀤𑁂𑀬𑁆𑀬𑀼𑀁, 𑀓𑁂𑀘𑀺 ‘‘𑀔𑀸𑀤𑀦𑁆𑀢𑀼, 𑀧𑀼𑀦 𑀲𑀸𑀫𑀡𑁂𑀭𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀯𑀺𑀯𑀸𑀤𑀧𑀭𑀺𑀳𑀸𑀭𑀢𑁆𑀣𑀁 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀕𑀳𑀡𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺, 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦𑀧𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀧𑀢𑁆𑀢𑀝𑁆𑀞𑀸𑀦𑁂𑀢𑀺 𑀯𑀲𑁆𑀲𑀕𑁆𑀕𑁂𑀦 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀝𑁆𑀞𑀸𑀦𑁂. 𑀢𑁂𑀲𑀁 𑀙𑀺𑀦𑁆𑀦𑀯𑀲𑁆𑀲𑀢𑁆𑀢𑀸 ‘‘𑀲𑀸𑀤𑀺𑀬𑀦𑁆𑀢𑀸𑀧𑀺 𑀳𑀺 𑀢𑁂 𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄’’𑀢𑀺 𑀯𑀼𑀢𑁆𑀢𑀁, 𑀧𑀞𑀫𑀁𑀬𑁂𑀯 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 𑀔𑀻𑀬𑀦𑁆𑀢𑀸𑀧𑀺 𑀘 𑀆𑀯𑀸𑀲𑀺𑀓𑀸 𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀪𑀢𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀪𑀢𑀺𑀁 𑀓𑀢𑁆𑀯𑀸 𑀯𑀺𑀬 𑀦𑀺𑀯𑀺𑀝𑁆𑀞𑀁 𑀧𑀭𑀺𑀬𑀺𑀝𑁆𑀞𑀁. 𑀲𑀗𑁆𑀖𑀺𑀓𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀦𑁆𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀦𑁆𑀢𑀺 𑀤𑀸𑀬𑀓𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀇𑀥, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑁄 𑀪𑀺𑀓𑁆𑀔𑀼 𑀯𑀺𑀩𑁆𑀪𑀫𑀢𑀺, 𑀲𑀗𑁆𑀖𑀲𑁆𑀲𑁂𑀯𑁂𑀢’’𑀦𑁆𑀢𑀺 (𑀫𑀳𑀸𑀯. 𑁩𑁭𑁪-𑁩𑁭𑁫) 𑀯𑀘𑀦𑀢𑁄 ‘‘𑀕𑀢𑀝𑁆𑀞𑀸𑀦𑁂…𑀧𑁂… 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑁂𑀢𑀺 𑀤𑀸𑀬𑀓𑀫𑀦𑀼𑀲𑁆𑀲𑁂. 𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀧𑀞𑀫𑀪𑀸𑀕𑀲𑁆𑀲 𑀕𑀸𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁧𑁯. 𑀬𑀁 𑀢𑀬𑀸 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀕𑀳𑀺𑀢𑀁…𑀧𑁂… 𑀇𑀥 𑀫𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑀁 𑀢𑀬𑀸 𑀢𑀢𑁆𑀣 𑀕𑀸𑀫𑀓𑀸𑀯𑀸𑀲𑁂 𑀧𑀘𑁆𑀙𑀸 𑀲𑁂𑀦𑀸𑀲𑀦𑀁 𑀕𑀳𑀺𑀢𑀁, 𑀢𑀁 𑀢𑁂 𑀕𑀡𑁆𑀳𑀦𑁆𑀢𑁂𑀦𑁂𑀯 𑀇𑀥 𑀲𑀸𑀯𑀢𑁆𑀣𑀺𑀬𑀁 𑀧𑀞𑀫𑀕𑀳𑀺𑀢𑀲𑁂𑀦𑀸𑀲𑀦𑀁 𑀫𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀤𑀸𑀦𑀸𑀳𑀁 …𑀧𑁂… 𑀢𑀢𑁆𑀭𑀸𑀧𑀺 𑀫𑀼𑀢𑁆𑀢𑀦𑁆𑀢𑀺 ‘‘𑀇𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀕𑀳𑀺𑀢𑀲𑁂𑀦𑀸𑀲𑀦𑀁 𑀫𑀼𑀜𑁆𑀘𑀸𑀫𑀻’’𑀢𑀺 𑀯𑀤𑀦𑁆𑀢𑁂𑀦 𑀢𑀢𑁆𑀭𑀸𑀧𑀺 𑀕𑀸𑀫𑀓𑀸𑀯𑀸𑀲𑁂 𑀕𑀳𑀺𑀢𑀲𑁂𑀦𑀸𑀲𑀦𑀁 𑀫𑀼𑀢𑁆𑀢𑀁.

𑁩𑁨𑁦. 𑀤𑀻𑀖𑀸𑀲𑀦𑀁 𑀦𑀸𑀫 𑀫𑀜𑁆𑀘𑀧𑀻𑀞𑀯𑀺𑀦𑀺𑀫𑀼𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀏𑀓𑀢𑁄 𑀲𑀼𑀔𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀺. 𑀳𑀢𑁆𑀣𑀺𑀫𑁆𑀳𑀺 𑀦𑀔𑁄 𑀅𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀔𑁄. ‘‘𑀧𑀸𑀲𑀸𑀤𑀲𑁆𑀲 𑀦𑀔𑁄 𑀦𑀸𑀫 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄, 𑀲𑁄 𑀘 𑀳𑀢𑁆𑀣𑀺𑀓𑀼𑀫𑁆𑀪𑁂 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀮𑀩𑁆𑀪𑀦𑁆𑀢𑀻𑀢𑀺 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀩𑁆𑀪𑀦𑁆𑀢𑀺, 𑀢𑁂𑀳𑀺 𑀅𑀢𑁆𑀣𑀭𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑁂𑀯 𑀦𑀺𑀲𑀻𑀤𑀺𑀢𑀼𑀁 𑀮𑀩𑁆𑀪𑀦𑁆𑀢𑀺, 𑀦 𑀲𑀬𑀁 𑀅𑀢𑁆𑀣𑀢𑀸𑀦𑀺 𑀅𑀢𑁆𑀣𑀭𑀸𑀧𑀺𑀢𑀸𑀦𑀺 𑀯𑀸.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁨𑁧. 𑀅𑀭𑀜𑁆𑀚𑀭𑁄𑀢𑀺 𑀩𑀳𑀼𑀉𑀤𑀓𑀕𑀡𑁆𑀳𑀦𑀓𑀸 𑀫𑀳𑀸𑀘𑀸𑀝𑀺. 𑀚𑀮𑀁 𑀕𑀡𑁆𑀳𑀺𑀢𑀼𑀁 𑀅𑀮𑀦𑁆𑀢𑀺 𑀅𑀭𑀜𑁆𑀚𑀭𑁄. ‘‘𑀯𑀝𑁆𑀝𑀘𑀸𑀝𑀺 𑀯𑀺𑀬 𑀳𑀼𑀢𑁆𑀯𑀸 𑀣𑁄𑀓𑀁 𑀤𑀻𑀖𑀫𑀼𑀔𑁄 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄𑀢𑀺 𑀫𑀁𑀲𑀤𑀺𑀩𑁆𑀩𑀥𑀫𑁆𑀫𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀼𑀯𑀲𑁂𑀦 𑀧𑀜𑁆𑀘𑀮𑁄𑀘𑀦𑁄.

𑀣𑀸𑀯𑀭𑁂𑀦 𑀘 𑀣𑀸𑀯𑀭𑀁 𑀕𑀭𑀼𑀪𑀡𑁆𑀟𑁂𑀦 𑀘 𑀕𑀭𑀼𑀪𑀡𑁆𑀟𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀼𑀭𑀺𑀫𑀤𑁆𑀯𑀬𑀁 𑀣𑀸𑀯𑀭𑀁, 𑀧𑀘𑁆𑀙𑀺𑀫𑀢𑁆𑀢𑀬𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀚𑀸𑀦𑀸𑀧𑁂𑀢𑁆𑀯𑀸. 𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸𑀢𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀼𑀯𑀡𑁆𑀡𑀭𑀚𑀢𑀫𑀬𑀸𑀤𑀺𑀅𑀓𑀧𑁆𑀧𑀺𑀬𑀫𑀜𑁆𑀘𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀁…𑀧𑁂… 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀣𑀸𑀯𑀭𑁂𑀦 𑀣𑀸𑀯𑀭𑀫𑁆𑀧𑀺 𑀅𑀣𑀸𑀯𑀭𑀫𑁆𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀣𑀸𑀯𑀭𑁂𑀦 𑀅𑀣𑀸𑀯𑀭𑀫𑁂𑀯 𑀳𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀓𑀧𑁆𑀧𑀺𑀬𑀁 𑀯𑀸 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀲𑀼𑀯𑀡𑁆𑀡𑀫𑀬𑀫𑀜𑁆𑀘𑀸𑀤𑀺 𑀅𑀓𑀧𑁆𑀧𑀺𑀬𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺 𑀘. 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀦𑀸𑀫 𑀤𑀦𑁆𑀢𑀫𑀬𑀫𑀜𑁆𑀘𑀸𑀤𑀺 𑀧𑀸𑀯𑀸𑀭𑀸𑀤𑀺𑀓𑀧𑁆𑀧𑀺𑀬𑀅𑀢𑁆𑀣𑀭𑀡𑀸𑀤𑀻𑀦𑀺 𑀘.

𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀘𑁂 𑀆𑀭𑀸𑀫𑀺𑀓𑀸𑀤𑀬𑁄 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀝𑀺𑀤𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀡𑁆𑀡𑀲𑀽𑀘𑀺 𑀦𑀸𑀫 𑀮𑁂𑀔𑀦𑀻’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

‘‘𑀅𑀟𑁆𑀠𑀩𑀸𑀳𑀽𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀟𑁆𑀠𑀩𑀸𑀳𑀼 𑀦𑀸𑀫 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣𑀚𑀸𑀢𑀓𑀸𑀢𑀺 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀚𑀸𑀢𑀸. 𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀢𑀺 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄 𑀧𑀭𑀺𑀡𑀸𑀳𑀢𑁄 𑀧𑀡𑁆𑀡𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄. 𑀫𑀼𑀜𑁆𑀚𑀧𑀩𑁆𑀩𑀚𑀸𑀦𑀁𑀬𑁂𑀯 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀆𑀕𑀢𑀢𑁆𑀢𑀸 ‘‘𑀫𑀼𑀜𑁆𑀚𑀁 𑀧𑀩𑁆𑀩𑀚𑀜𑁆𑀘 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀢𑀺 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄. 𑀖𑀝𑁆𑀝𑀦𑀨𑀮𑀓𑀁 𑀦𑀸𑀫 𑀬𑀢𑁆𑀣 𑀞𑀧𑁂𑀢𑁆𑀯𑀸 𑀭𑀚𑀺𑀢𑀘𑀻𑀯𑀭𑀁 𑀳𑀢𑁆𑀣𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀖𑀝𑁆𑀝𑀦𑀫𑀼𑀕𑁆𑀕𑀭𑁄 𑀦𑀸𑀫 𑀅𑀦𑀼𑀯𑀸𑀢𑀸𑀤𑀺𑀖𑀝𑁆𑀝𑀦𑀢𑁆𑀣𑀁 𑀓𑀢𑁄𑀢𑀺 𑀯𑀤𑀦𑁆𑀢𑀺. 𑀅𑀫𑁆𑀩𑀡𑀦𑁆𑀢𑀺 𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀻𑀲𑀤𑀺𑀲𑀁 𑀓𑀢𑀧𑀸𑀦𑀻𑀬𑀪𑀸𑀚𑀦𑀁. 𑀭𑀚𑀦𑀤𑁄𑀡𑀻𑀢𑀺 𑀬𑀢𑁆𑀣 𑀧𑀓𑁆𑀓𑀭𑀚𑀦𑀁 𑀆𑀓𑀺𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑁂𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀕𑀭𑀼𑀪𑀡𑁆𑀟𑀦𑁆𑀢𑀺 𑀏𑀓𑁂, 𑀦𑁄𑀢𑀺 𑀅𑀧𑀭𑁂, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀢𑀸𑀮𑀧𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁨𑁩. 𑀓𑀺𑀜𑁆𑀘𑀺𑀤𑁂𑀯 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀲𑁆𑀲𑀢𑀻𑀢𑀺 𑀲𑀸𑀫𑀺𑀓𑁄𑀬𑁂𑀯 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀲𑁆𑀲𑀢𑀺. 𑀉𑀢𑀼𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼 𑀅𑀜𑁆𑀜𑁂 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀺. 𑀢𑀺𑀪𑀸𑀕𑀦𑁆𑀢𑀺 𑀢𑀢𑀺𑀬𑀪𑀸𑀕𑀁. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀘𑁂 𑀲𑁄 𑀲𑀗𑁆𑀖𑀲𑁆𑀲 𑀪𑀡𑁆𑀟𑀓𑀞𑀧𑀦𑀝𑁆𑀞𑀸𑀦𑀁 𑀯𑀸 𑀦𑀯𑀓𑀸𑀦𑀁 𑀯𑀸 𑀯𑀲𑀦𑀝𑁆𑀞𑀸𑀦𑀁 𑀤𑀸𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀜𑁆𑀜𑁂𑀯 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀜𑁆𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀁 𑀮𑀪𑀢𑀻𑀢𑀺 𑀏𑀢𑀁 𑀢𑀢𑀺𑀬𑀪𑀸𑀕𑀁 𑀉𑀧𑀟𑁆𑀠𑀪𑀸𑀕𑀁 𑀯𑀸 𑀤𑀸𑀢𑀼𑀁 𑀮𑀪𑀢𑀺. 𑀅𑀓𑀢𑀝𑁆𑀞𑀸𑀦𑁂𑀢𑀺 𑀲𑁂𑀦𑀸𑀲𑀦𑀢𑁄 𑀩𑀳𑀺 𑀘𑀬𑀸𑀤𑀻𑀦𑀁 𑀅𑀓𑀢𑀝𑁆𑀞𑀸𑀦𑁂. 𑀩𑀳𑀺𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀢𑁄 𑀩𑀳𑀺.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁨𑁪. 𑀘𑀓𑁆𑀓𑀮𑀺𑀓𑀦𑁆𑀢𑀺 𑀓𑀫𑁆𑀩𑀮𑀸𑀤𑀻𑀳𑀺 𑀯𑁂𑀞𑁂𑀢𑁆𑀯𑀸 𑀘𑀓𑁆𑀓𑀲𑀡𑁆𑀞𑀸𑀦𑁂𑀦 𑀧𑀸𑀤𑀧𑀼𑀜𑁆𑀙𑀦𑀬𑁄𑀕𑁆𑀕𑀁 𑀓𑀢𑀁. 𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀺 𑀦𑀸𑀫 𑀲𑀡𑁆𑀳𑀫𑀢𑁆𑀢𑀺𑀓𑀸𑀳𑀺 𑀓𑀢𑀸 𑀓𑀸𑀴𑀯𑀡𑁆𑀡𑀸𑀤𑀺𑀪𑀽𑀫𑀺. 𑀲𑁂𑀦𑀸𑀲𑀦𑀁 𑀫𑀜𑁆𑀘𑀧𑀻𑀞𑀸𑀤𑀺. 𑀢𑀣𑁂𑀯 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀜𑁆𑀜𑁂𑀳𑀺 𑀆𑀯𑀸𑀲𑀺𑀓𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀢𑁆𑀢𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀦𑁂𑀯𑀸𑀲𑀺𑀓𑀸 𑀧𑀓𑀢𑀺𑀬𑀸 𑀅𑀦𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀞𑀧𑁂𑀦𑁆𑀢𑀺 𑀘𑁂, 𑀢𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀤𑁆𑀯𑀸𑀭𑀫𑁆𑀧𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀬𑁄 𑀅𑀧𑀭𑀺𑀓𑀫𑁆𑀫𑀓𑀢𑀸𑀧𑀺 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸. 𑀮𑁄𑀫𑁂𑀲𑀽𑀢𑀺 𑀮𑁄𑀫𑁂𑀲𑀼 𑀨𑀼𑀲𑀦𑁆𑀢𑁂𑀲𑀼.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁩𑁨𑁫. 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀦𑁆𑀢𑀺 𑀇𑀫𑀁 𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, ‘‘𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦’’𑀦𑁆𑀢𑀺𑀆𑀤𑀺𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀢𑁆𑀯𑀸𑀢𑀺 𑀆𑀬𑀢𑀺𑀁 𑀪𑀺𑀓𑁆𑀔𑀽𑀦𑀁 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀸𑀬 𑀢𑀫𑁆𑀧𑀺 𑀲𑀗𑁆𑀖𑀪𑀢𑁆𑀢𑀁 𑀅𑀦𑁆𑀢𑁄 𑀓𑀢𑁆𑀯𑀸.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂𑀢𑀺 𑀯𑀺𑀳𑀸𑀭𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑁄𑀚𑀦𑀲𑀸𑀮𑀸𑀬𑀸𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀪𑀽𑀢𑀸𑀬 𑀪𑁄𑀚𑀦𑀲𑀸𑀮𑀸𑀬. ‘‘𑀤𑀺𑀦𑁆𑀦𑀁 𑀧𑀦𑀸’’𑀢𑀺 𑀯𑀢𑁆𑀯𑀸 𑀬𑀣𑀸 𑀲𑁄 𑀤𑀸𑀬𑀓𑁄 𑀤𑁂𑀢𑀺, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀢𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀖𑀭𑁂𑀢𑀺 𑀅𑀦𑁆𑀢𑁄𑀕𑁂𑀳𑁂. 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀦𑁆𑀢𑀺 𑀏𑀢𑁆𑀣 𑀕𑀸𑀫𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑁂𑀲𑀼 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑀁 𑀅𑀦𑁆𑀢𑁄𑀉𑀧𑀘𑀸𑀭𑁄 𑀦𑀸𑀫. 𑀅𑀦𑁆𑀢𑀭𑀖𑀭𑀲𑁆𑀲 𑀉𑀧𑀘𑀸𑀭𑁂 𑀧𑀦 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀖𑀭𑀽𑀧𑀘𑀸𑀭𑁄 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀯𑀴𑀜𑁆𑀚𑀦𑁆𑀢𑀺 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀁. 𑀦𑀸𑀦𑀸𑀦𑀺𑀯𑁂𑀲𑀦𑁂𑀲𑀽𑀢𑀺 𑀦𑀸𑀦𑀸𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑁂𑀲𑀼. 𑀮𑀚𑁆𑀚𑀻 𑀧𑁂𑀲𑀮𑁄 𑀅𑀕𑀢𑀺𑀕𑀫𑀦𑀁 𑀯𑀚𑁆𑀚𑁂𑀢𑁆𑀯𑀸 𑀫𑁂𑀥𑀸𑀯𑀻 𑀘 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀉𑀤𑁆𑀤𑀺𑀲𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀧𑁂𑀲𑀮𑁄 𑀮𑀚𑁆𑀚𑀻 𑀫𑁂𑀥𑀸𑀯𑀻 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀻𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀦𑁆𑀢𑀺 𑀏𑀢𑁆𑀣 ‘‘𑀉𑀤𑀓𑀧𑀢𑁆𑀢𑀮𑀸𑀪𑀻 𑀯𑀺𑀬 𑀅𑀜𑁆𑀜𑁄𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀯𑀢𑁆𑀣𑀸𑀤𑀺𑀫𑀦𑁂𑀓𑀧𑁆𑀧𑀓𑀸𑀭𑀓𑀁 𑀮𑀪𑀢𑀺 𑀘𑁂, 𑀢𑀲𑁆𑀲𑁂𑀯 𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀆𑀳𑀭𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀦𑀸𑀫. 𑀬𑀁 𑀇𑀘𑁆𑀙𑀢𑀻𑀢𑀺 ‘‘𑀉𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀬𑀁 𑀇𑀘𑁆𑀙𑀢𑀺. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑀸𑀢𑀺 𑀧𑀼𑀘𑁆𑀙𑀸𑀲𑀤𑀺𑀲𑁂𑀦.

‘‘𑀏𑀓𑀸 𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀞𑀺𑀢𑀺𑀓𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀭𑀜𑁆𑀜𑁄 𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀜𑁆𑀜𑁂𑀳𑀺 𑀉𑀤𑁆𑀤𑁂𑀲𑀪𑀢𑁆𑀢𑁂𑀳𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀯𑀺𑀲𑀼𑀁𑀬𑁂𑀯 𑀞𑀺𑀢𑀺𑀓𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀻𑀢𑀺 𑀧𑀢𑁆𑀢𑀳𑀸𑀭𑀓𑀸 𑀳𑀭𑀦𑁆𑀢𑀺. 𑀕𑀻𑀯𑀸 𑀳𑁄𑀢𑀻𑀢𑀺 𑀆𑀡𑀸𑀧𑀓𑀲𑁆𑀲 𑀕𑀻𑀯𑀸 𑀳𑁄𑀢𑀺. ‘‘𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀅𑀓𑀢𑀪𑀸𑀕𑁄 𑀦𑀸𑀫𑀸𑀢𑀺 𑀆𑀕𑀦𑁆𑀢𑀼𑀓𑀪𑀸𑀕𑁄 𑀦𑀸𑀫. ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀯𑀼𑀢𑁆𑀢𑁂𑀢𑀺 𑀏𑀢𑁆𑀣 ‘‘𑀧𑀞𑀫𑀫𑁂𑀯 ‘𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀧𑀢𑁆𑀢𑀁 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 ‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀪𑀸𑀚𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀁 𑀦𑀺𑀫𑀦𑁆𑀢𑀦𑀁 𑀦𑀸𑀫. 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀪𑀺𑀓𑁆𑀔𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀮𑀤𑁆𑀥𑀧𑀝𑀺𑀧𑀸𑀝𑀺𑀬𑀸. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀤𑀁 𑀅𑀯𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀪𑀢𑁆𑀢𑀦𑁆𑀢𑀺 𑀅𑀯𑀤𑀦𑁆𑀢𑁂𑀦𑀸’’𑀢𑀺. 𑀆𑀮𑁄𑀧𑀲𑀗𑁆𑀔𑁂𑀧𑁂𑀦𑀸𑀢𑀺 𑀏𑀓𑁂𑀓𑀧𑀺𑀡𑁆𑀟𑀯𑀲𑁂𑀦. 𑀅𑀬𑀜𑁆𑀘 𑀦𑀬𑁄 𑀦𑀺𑀫𑀦𑁆𑀢𑀦𑁂𑀬𑁂𑀯, 𑀦 𑀉𑀤𑁆𑀤𑁂𑀲𑀪𑀢𑁆𑀢𑁂. 𑀢𑀢𑁆𑀣 𑀳𑀺 𑀏𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑀁𑀬𑁂𑀯 𑀪𑀸𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀤𑁆𑀤𑁂𑀲𑀪𑀢𑁆𑀢𑁂 𑀆𑀮𑁄𑀧𑀝𑁆𑀞𑀺𑀢𑀺𑀓𑀸 𑀦𑀸𑀫 𑀦𑀢𑁆𑀣𑀺. 𑀅𑀘𑁆𑀙𑀢𑀻𑀢𑀺 𑀢𑀺𑀝𑁆𑀞𑀢𑀺. ‘‘𑀏𑀓𑀯𑀸𑀭𑀦𑁆𑀢𑀺 𑀬𑀸𑀯 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺 𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀮𑀪𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀏𑀓𑀯𑀸𑀭𑀦𑁆𑀢𑀺 𑀦 𑀏𑀓𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀢𑁆𑀢𑀓𑀸 𑀧𑀦 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂. 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀕𑀳𑀺𑀢𑀪𑀺𑀓𑁆𑀔𑀽 𑀅𑀜𑁆𑀜𑀤𑀸 𑀅𑀕𑁆𑀕𑀳𑁂𑀢𑁆𑀯𑀸 𑀬𑀸𑀯 𑀏𑀓𑀯𑀸𑀭𑀁 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀪𑁄𑀚𑀺𑀢𑀸 𑀳𑁄𑀦𑁆𑀢𑀺, 𑀢𑀸𑀯 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀮𑀺𑀔𑀺𑀢𑁆𑀯𑀸. 𑀦𑀺𑀕𑁆𑀕𑀳𑁂𑀦 𑀤𑀢𑁆𑀯𑀸𑀢𑀺 𑀅𑀦𑀺𑀘𑁆𑀙𑀦𑁆𑀢𑀫𑁆𑀧𑀺 𑀦𑀺𑀕𑁆𑀕𑀳𑁂𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸. 𑀏𑀓𑀕𑁂𑀳𑀯𑀲𑁂𑀦𑀸𑀢𑀺 𑀏𑀓𑀸𑀬 𑀖𑀭𑀧𑀸𑀴𑀺𑀬𑀸 𑀯𑀲𑁂𑀦. 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 ‘‘𑀢𑀼𑀬𑁆𑀳𑀜𑁆𑀘 𑀢𑀼𑀬𑁆𑀳𑀜𑁆𑀘 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸. 𑀤𑀽𑀭𑀢𑁆𑀢𑀸 𑀦𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀯𑀸𑀭𑁂𑀦 𑀕𑀸𑀳𑁂𑀢𑀩𑁆𑀩𑀕𑀸𑀫𑁄 𑀯𑀸𑀭𑀕𑀸𑀫𑁄. 𑀯𑀺𑀳𑀸𑀭𑀯𑀸𑀭𑁂 𑀦𑀺𑀬𑀼𑀢𑁆𑀢𑀸 𑀯𑀺𑀳𑀸𑀭𑀯𑀸𑀭𑀺𑀓𑀸, 𑀯𑀸𑀭𑁂𑀦 𑀯𑀺𑀳𑀸𑀭𑀭𑀓𑁆𑀔𑀡𑀓𑀸. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀁. 𑀨𑀸𑀢𑀺𑀓𑀫𑁆𑀫𑀫𑁂𑀯 𑀪𑀯𑀦𑁆𑀢𑀻𑀢𑀺 𑀯𑀺𑀳𑀸𑀭𑀭𑀓𑁆𑀔𑀡𑀢𑁆𑀣𑀸𑀬 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑀅𑀢𑀺𑀭𑁂𑀓𑀮𑀸𑀪𑀸 𑀳𑁄𑀦𑁆𑀢𑀺. 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑁂𑀓𑀲𑁆𑀲 𑀧𑀸𑀧𑀺𑀢𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀝𑁆𑀞𑀸𑀦𑁂 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂. 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀧𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦 𑀘𑁂 𑀪𑀺𑀓𑁆𑀔𑀽 𑀩𑀳𑀺𑀲𑀻𑀫𑀕𑀢𑀸 𑀳𑁄𑀦𑁆𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀸𑀧𑁂𑀢𑀩𑁆𑀩𑀁 𑀲𑀪𑀸𑀕𑀢𑁆𑀢𑀸 𑀏𑀓𑁂𑀦 𑀮𑀤𑁆𑀥𑀁 𑀲𑀩𑁆𑀩𑁂𑀲𑀁 𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀭𑀲𑀲𑀮𑀸𑀓𑀦𑁆𑀢𑀺 𑀉𑀘𑁆𑀙𑀼𑀭𑀲𑀲𑀮𑀸𑀓𑀁.

‘‘𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸𑀧𑀺 𑀯𑀺𑀳𑀸𑀭𑁂 𑀧𑀓𑁆𑀓𑀪𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁬) 𑀯𑀼𑀢𑁆𑀢𑀢𑁆𑀢𑀸 ‘‘𑀏𑀯𑀁 𑀕𑀸𑀳𑀺𑀢𑁂 𑀲𑀸𑀤𑀺𑀢𑀩𑁆𑀩𑀁, 𑀏𑀯𑀁 𑀦 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀘 𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸𑀬𑁄 𑀘𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀦𑁆𑀢𑀺, 𑀲𑀮𑀸𑀓𑀯𑀲𑁂𑀦 𑀕𑀸𑀳𑀺𑀢𑀢𑁆𑀢𑀸 𑀧𑀦 𑀦 𑀲𑀸𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀬𑀤𑀺 𑀳𑀺 𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸 𑀲𑀮𑀸𑀓𑀯𑀲𑁂𑀦 𑀕𑀸𑀳𑀺𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸 𑀲𑀺𑀬𑀸, 𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀦 𑀯𑀤𑁂𑀬𑁆𑀬, ‘‘𑀅𑀢𑀺𑀭𑁂𑀓𑀮𑀸𑀪𑁄 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁨𑁮) ‘‘𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀲𑀮𑀸𑀓𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁 𑀪𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀦 𑀪𑁂𑀲𑀚𑁆𑀚𑀁. 𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀺 𑀳𑀺 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺𑀬𑁂𑀯 𑀢𑁂𑀦 𑀦 𑀲𑀸𑀤𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀯𑀸 𑀫𑀢𑁂𑀦 𑀇𑀥 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀕𑁆𑀕𑀢𑁄 𑀤𑀸𑀢𑀩𑁆𑀩𑀪𑀺𑀓𑁆𑀔𑀸 𑀅𑀕𑁆𑀕𑀪𑀺𑀓𑁆𑀔𑀸. 𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸𑀢𑀺 𑀮𑀪𑀺𑀢𑁆𑀯𑀸 𑀯𑀸 𑀅𑀮𑀪𑀺𑀢𑁆𑀯𑀸 𑀯𑀸. 𑀦𑀺𑀩𑀤𑁆𑀥𑀸𑀬 𑀅𑀕𑁆𑀕𑀪𑀺𑀓𑁆𑀔𑀸𑀬 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀏𑀯 𑀲𑀫𑁆𑀪𑀯𑀢𑁄 𑀮𑀪𑀺𑀢𑁆𑀯𑀸𑀧𑀺 𑀧𑀼𑀦𑀤𑀺𑀯𑀲𑁂 𑀕𑀡𑁆𑀳𑀺𑀢𑀼𑀁 𑀯𑀼𑀢𑁆𑀢𑀁. 𑀅𑀕𑁆𑀕𑀪𑀺𑀓𑁆𑀔𑀸𑀫𑀢𑁆𑀢𑀦𑁆𑀢𑀺 𑀳𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀩𑀳𑀼𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀺.

𑀲𑀮𑀸𑀓𑀪𑀢𑁆𑀢𑀁 𑀦𑀸𑀫 𑀯𑀺𑀳𑀸𑀭𑁂𑀬𑁂𑀯 𑀉𑀤𑁆𑀤𑀺𑀲𑀻𑀬𑀢𑀺 𑀯𑀺𑀳𑀸𑀭𑀫𑁂𑀯 𑀲𑀦𑁆𑀥𑀸𑀬 𑀤𑀺𑀬𑁆𑀬𑀫𑀸𑀦𑀢𑁆𑀢𑀸𑀢𑀺 𑀆𑀳 ‘‘𑀯𑀺𑀳𑀸𑀭𑁂 𑀅𑀧𑀸𑀧𑀺𑀢𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀭 𑀆𑀲𑀦𑀲𑀸𑀮𑀸𑀬𑀸𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂 𑀆𑀲𑀦𑀲𑀸𑀮𑀸𑀬. 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀢𑀣𑀸 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀤𑀺𑀦𑁆𑀦𑀪𑀢𑁆𑀢𑀁 𑀯𑀺𑀳𑀸𑀭𑀫𑁂𑀯 𑀆𑀦𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀢𑀁 𑀯𑀸𑀭𑀕𑀸𑀫𑀲𑀮𑀸𑀓𑀁 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀸𑀭𑀕𑀸𑀫𑀲𑀮𑀸𑀓𑀁 𑀤𑀺𑀲𑀁𑀕𑀫𑀺𑀓𑀲𑁆𑀲 𑀅𑀤𑀸𑀲𑀺, 𑀢𑁂𑀦. 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀲𑁆𑀫𑀺𑀁 𑀢𑀲𑁆𑀲 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸𑀢𑀺 𑀬𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀝𑁆𑀞𑀲𑁆𑀲𑁂𑀯 𑀲𑀮𑀸𑀓𑀸 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀤𑀺𑀲𑀁𑀕𑀫𑀺𑀓𑁂 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀲𑁆𑀲 𑀤𑀺𑀲𑀁𑀕𑀫𑀺𑀓𑀲𑁆𑀲 𑀧𑀢𑁆𑀢𑀲𑀮𑀸𑀓𑀸 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸.

𑀅𑀦𑀸𑀕𑀢𑀤𑀺𑀯𑀲𑁂𑀢𑀺 𑀏𑀢𑁆𑀣 𑀓𑀣𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀬𑀲𑁆𑀫𑀸 𑀢𑀢𑁄 𑀢𑀢𑁄 𑀆𑀕𑀢𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀕𑀸𑀫𑁂 𑀆𑀲𑀦𑀲𑀸𑀮𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀅𑀫𑁆𑀳𑀸𑀓𑀁 𑀕𑁄𑀘𑀭𑀕𑀸𑀫𑁂𑀢𑀺 𑀲𑀮𑀸𑀓𑀪𑀢𑁆𑀢𑀤𑀸𑀬𑀓𑀸𑀦𑀁 𑀕𑀸𑀫𑁂. 𑀪𑀼𑀜𑁆𑀚𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 ‘‘𑀫𑀳𑀸𑀣𑁂𑀭𑁄 𑀏𑀓𑀓𑁄𑀯 𑀯𑀺𑀳𑀸𑀭𑁂 𑀑𑀳𑀻𑀦𑁄 𑀅𑀯𑀲𑁆𑀲𑀁 𑀲𑀩𑁆𑀩𑀲𑀮𑀸𑀓𑀸 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀕𑀘𑁆𑀙𑀦𑁆𑀢𑀺.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀘𑀢𑀽𑀲𑀼 𑀧𑀓𑁆𑀔𑀤𑀺𑀯𑀲𑁂𑀲𑀼 𑀤𑀸𑀢𑀩𑁆𑀩𑀪𑀢𑁆𑀢𑀁 𑀧𑀓𑁆𑀔𑀺𑀓𑀁. 𑀅𑀪𑀺𑀮𑀓𑁆𑀔𑀺𑀢𑁂𑀲𑀽𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀁, 𑀮𑀓𑁆𑀔𑀡𑀻𑀬𑁂𑀲𑀼 𑀇𑀘𑁆𑀘𑁂𑀯 𑀅𑀢𑁆𑀣𑁄, 𑀉𑀧𑁄𑀲𑀣𑀲𑀫𑀸𑀤𑀸𑀦𑀥𑀫𑁆𑀫𑀲𑁆𑀲𑀯𑀦𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀺𑀓𑀭𑀡𑀢𑁆𑀣𑀁 𑀮𑀓𑁆𑀔𑀺𑀢𑀩𑁆𑀩𑁂𑀲𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁂𑀲𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑁂 𑀧𑀓𑁆𑀔𑁄𑀢𑀺 ‘‘𑀅𑀚𑁆𑀚 𑀧𑀓𑁆𑀔𑀺𑀓𑀁 𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀓𑁆𑀔𑀺𑀓𑀲𑁆𑀲 𑀅𑀦𑀺𑀬𑀫𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀖𑀭𑁂 𑀮𑀽𑀔𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, ‘‘𑀧𑀓𑁆𑀔𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀁. 𑀦𑀺𑀩𑀦𑁆𑀥𑀸𑀧𑀺𑀢𑀦𑁆𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑀲𑁆𑀲𑀸’’𑀢𑀺 𑀦𑀺𑀬𑀫𑀺𑀢𑀁. 𑀕𑀸𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁂𑀳𑀺 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀡𑁆𑀟𑀼𑀮𑀸𑀤𑀻𑀦𑀺𑀧𑁂𑀲𑁂𑀦𑁆𑀢𑀺…𑀧𑁂… 𑀯𑀝𑁆𑀝𑀢𑀻𑀢𑀺 𑀅𑀪𑀺𑀳𑀝𑀪𑀺𑀓𑁆𑀔𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀪𑀺𑀓𑁆𑀔𑀸𑀦𑀸𑀫𑁂𑀦 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀣𑀓𑁂𑀢𑁆𑀯𑀸 𑀤𑀺𑀦𑁆𑀦𑀦𑁆𑀢𑀺 ‘‘𑀕𑀼𑀴𑀓𑀪𑀢𑁆𑀢𑀁 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁. 𑀕𑀼𑀴𑀧𑀺𑀡𑁆𑀟𑁂𑀧𑀺…𑀧𑁂… 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀕𑀼𑀴𑀧𑀺𑀡𑁆𑀟𑀁 𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.