𑁫. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀁

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁪𑁩. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 𑀅𑀝𑁆𑀞𑀧𑀤𑀸𑀓𑀸𑀭𑁂𑀦𑀸𑀢𑀺 𑀅𑀝𑁆𑀞𑀧𑀤𑀨𑀮𑀓𑀸𑀓𑀸𑀭𑁂𑀦, 𑀚𑀽𑀢𑀨𑀮𑀓𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦𑀸𑀢𑀺 𑀔𑁂𑀴𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦.

𑁨𑁪𑁫. 𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀡𑁆𑀟𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑀫𑁆𑀩𑀓𑀲𑀼𑀢𑁆𑀢𑀦𑁆𑀢𑀺 𑀬𑀜𑁆𑀜𑁄𑀧𑀘𑀺𑀢𑀸𑀓𑀸𑀭𑁂𑀦 𑀑𑀮𑀫𑁆𑀩𑀓𑀲𑀼𑀢𑁆𑀢𑀁.

𑁨𑁪𑁬. 𑀘𑀺𑀓𑁆𑀓𑀮𑁂𑀦𑀸𑀢𑀺 𑀲𑀺𑀮𑁂𑀲𑁂𑀦.

𑁨𑁪𑁮. 𑀲𑀸𑀥𑀼𑀕𑀻𑀢𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀕𑀻𑀢𑀁.

𑁨𑁪𑁯. 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑁂𑀦 𑀉𑀘𑁆𑀘𑀸𑀭𑀡𑀯𑀢𑁆𑀢𑁂𑀦. 𑀢𑀭𑀗𑁆𑀕𑀯𑀢𑁆𑀢𑀸𑀤𑀻𑀦𑀁 𑀉𑀘𑁆𑀘𑀸𑀭𑀡𑀯𑀺𑀥𑀸𑀦𑀸𑀦𑀺 𑀦𑀝𑁆𑀞𑀧𑁆𑀧𑀬𑁄𑀕𑀸𑀦𑀺. 𑀩𑀸𑀳𑀺𑀭𑀮𑁄𑀫𑀺𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀬𑀣𑀸 𑀢𑀲𑁆𑀲 𑀉𑀡𑁆𑀡𑀧𑀸𑀯𑀸𑀭𑀲𑁆𑀲 𑀩𑀳𑀺𑀤𑁆𑀥𑀸 𑀮𑁄𑀫𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁫𑁧. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀳𑀺𑀭𑀸𑀚𑀓𑀼𑀮𑀸𑀦𑀻𑀢𑀺 (𑀅. 𑀦𑀺. 𑀅𑀝𑁆𑀞. 𑁨.𑁪.𑁬𑁭) 𑀇𑀤𑀁 𑀤𑀝𑁆𑀞𑀯𑀺𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀳𑀺 𑀓𑁂𑀘𑀺 𑀤𑀝𑁆𑀞𑀯𑀺𑀲𑀸, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀳𑀺𑀭𑀸𑀚𑀓𑀼𑀮𑀸𑀦𑀁 𑀅𑀩𑁆𑀪𑀦𑁆𑀢𑀭𑀕𑀢𑀸𑀯 𑀳𑁄𑀦𑁆𑀢𑀺. 𑀅𑀢𑁆𑀢𑀕𑀼𑀢𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀕𑀼𑀢𑁆𑀢𑀢𑁆𑀣𑀸𑀬. 𑀅𑀢𑁆𑀢𑀭𑀓𑁆𑀔𑀸𑀬𑀸𑀢𑀺 𑀅𑀢𑁆𑀢𑀦𑁄 𑀭𑀓𑁆𑀔𑀡𑀢𑁆𑀣𑀸𑀬. 𑀅𑀢𑁆𑀢𑀧𑀭𑀺𑀢𑁆𑀢𑀁𑀓𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀸𑀡𑀢𑁆𑀣𑀸𑀬 𑀅𑀢𑁆𑀢𑀧𑀭𑀺𑀢𑁆𑀢𑀁 𑀦𑀸𑀫 𑀓𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀢𑀁 𑀧𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 (𑀚𑀸. 𑀅𑀝𑁆𑀞. 𑁨.𑁨.𑁧𑁦𑁫) 𑀯𑀺𑀭𑀽𑀧𑀓𑁆𑀔𑁂𑀳𑀻𑀢𑀺 𑀯𑀺𑀭𑀽𑀧𑀓𑁆𑀔𑀦𑀸𑀕𑀓𑀼𑀮𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀳𑀬𑁄𑀕𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁, 𑀏𑀢𑁂𑀳𑀺 𑀲𑀳 𑀫𑀬𑁆𑀳𑀁 𑀫𑀺𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀅𑀧𑀸𑀤𑀓𑁂𑀳𑀻𑀢𑀺 𑀅𑀧𑀸𑀤𑀓𑀲𑀢𑁆𑀢𑁂𑀳𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀑𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁄𑀤𑀺𑀲𑁆𑀲𑀓𑀫𑁂𑀢𑁆𑀢𑀁 𑀓𑀣𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁. 𑀢𑀢𑁆𑀣 𑀲𑀢𑁆𑀢𑀸 𑀧𑀸𑀡𑀸 𑀪𑀽𑀢𑀸𑀢𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀧𑀼𑀕𑁆𑀕𑀮𑀯𑁂𑀯𑀘𑀦𑀸𑀦𑁂𑀯. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀽𑀢𑀺 𑀪𑀤𑁆𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀧𑀲𑁆𑀲𑀦𑁆𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸𑀢𑀺 𑀓𑀜𑁆𑀘𑀺 𑀲𑀢𑁆𑀢𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀫𑀸 𑀆𑀕𑀘𑁆𑀙𑀢𑀼.

𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸, 𑀢𑁂 𑀳𑀺 𑀅𑀧𑁆𑀧𑀫𑀸𑀡𑀸 𑀦𑀸𑀫. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀧𑀫𑀸𑀡𑀯𑀦𑁆𑀢𑀸𑀦𑀻𑀢𑀺 𑀕𑀼𑀡𑀧𑁆𑀧𑀫𑀸𑀡𑁂𑀦 𑀬𑀼𑀢𑁆𑀢𑀸𑀦𑀺. 𑀉𑀡𑁆𑀡𑀦𑀸𑀪𑀻𑀢𑀺 𑀮𑁄𑀫𑀲𑀦𑀸𑀪𑀺𑀓𑁄 𑀫𑀓𑁆𑀓𑀝𑀓𑁄. 𑀲𑀭𑀩𑀽𑀢𑀺 𑀖𑀭𑀕𑁄𑀴𑀺𑀓𑀸. 𑀓𑀢𑀸 𑀫𑁂 𑀭𑀓𑁆𑀔𑀸 𑀓𑀢𑀁 𑀫𑁂 𑀧𑀭𑀺𑀢𑁆𑀢𑀦𑁆𑀢𑀺 𑀫𑀬𑀸 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀭𑀓𑁆𑀔𑀸 𑀘 𑀧𑀭𑀺𑀢𑁆𑀢𑀸𑀡𑀜𑁆𑀘 𑀓𑀢𑀁. 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀫𑁂 𑀓𑀢𑀧𑀭𑀺𑀢𑁆𑀢𑀸𑀡𑀸 𑀲𑀢𑁆𑀢𑀸 𑀅𑀧𑀕𑀘𑁆𑀙𑀦𑁆𑀢𑀼, 𑀫𑀸 𑀫𑀁 𑀯𑀺𑀳𑁂𑀞𑀬𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀲𑁄𑀳𑀦𑁆𑀢𑀺 𑀬𑀲𑁆𑀲 𑀫𑀫 𑀏𑀢𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀫𑁂𑀢𑁆𑀢𑀁, 𑀲𑁄 𑀅𑀳𑀁 𑀪𑀕𑀯𑀢𑁄 𑀦𑀫𑁄 𑀓𑀭𑁄𑀫𑀺, 𑀯𑀺𑀧𑀲𑁆𑀲𑀻𑀆𑀤𑀻𑀦𑀜𑁆𑀘 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀦𑀫𑁄 𑀓𑀭𑁄𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀜𑁆𑀜𑀫𑁆𑀳𑀺 𑀙𑁂𑀢𑀩𑁆𑀩𑀫𑁆𑀳𑀻𑀢𑀺 𑀭𑀸𑀕𑀸𑀦𑀼𑀲𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀸𑀤𑀺𑀲𑀁 𑀯𑀸 𑀤𑀼𑀓𑁆𑀔𑀦𑁆𑀢𑀺 𑀫𑀼𑀝𑁆𑀞𑀺𑀆𑀤𑀻𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲.

𑁨𑁫𑁨. 𑀚𑀸𑀮𑀸𑀦𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸𑀢𑀺 𑀧𑀭𑀺𑀲𑁆𑀲𑀬𑀫𑁄𑀘𑀦𑀢𑁆𑀣𑀜𑁆𑀘𑁂𑀯 𑀧𑀫𑀸𑀤𑁂𑀦 𑀕𑀴𑀺𑀢𑀸𑀦𑀁 𑀆𑀪𑀭𑀡𑀸𑀤𑀻𑀦𑀁 𑀭𑀓𑁆𑀔𑀡𑀢𑁆𑀣𑀜𑁆𑀘 𑀚𑀸𑀮𑀸𑀦𑀺 𑀓𑀭𑀡𑁆𑀟𑀓𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀘𑀦𑁆𑀤𑀦𑀕𑀡𑁆𑀞𑀺 𑀆𑀕𑀦𑁆𑀢𑁆𑀯𑀸 𑀚𑀸𑀮𑁂 𑀮𑀕𑁆𑀕𑀸𑀢𑀺 𑀏𑀓𑁄 𑀓𑀺𑀭 𑀭𑀢𑁆𑀢𑀘𑀦𑁆𑀤𑀦𑀭𑀼𑀓𑁆𑀔𑁄 𑀕𑀗𑁆𑀕𑀸𑀬 𑀉𑀧𑀭𑀺𑀢𑀻𑀭𑁂 𑀚𑀸𑀢𑁄 𑀕𑀗𑁆𑀕𑁄𑀤𑀓𑁂𑀦 𑀥𑁄𑀢𑀫𑀽𑀮𑁄 𑀧𑀢𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀸𑀲𑀸𑀡𑁂𑀲𑀼 𑀲𑀫𑁆𑀪𑀺𑀚𑁆𑀚𑀫𑀸𑀦𑁄 𑀯𑀺𑀧𑁆𑀧𑀓𑀺𑀭𑀺. 𑀢𑀢𑁄 𑀏𑀓𑀸 𑀖𑀝𑀧𑁆𑀧𑀫𑀸𑀡𑀸 𑀖𑀝𑀺𑀓𑀸 𑀧𑀸𑀲𑀸𑀡𑁂𑀲𑀼 𑀖𑀁𑀲𑀺𑀬𑀫𑀸𑀦𑀸 𑀉𑀤𑀓𑀊𑀫𑀻𑀳𑀺 𑀧𑁄𑀣𑀺𑀬𑀫𑀸𑀦𑀸 𑀫𑀝𑁆𑀞𑀸 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀬𑁆𑀳𑀫𑀸𑀦𑀸 𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀚𑀸𑀮𑁂 𑀮𑀕𑁆𑀕𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀮𑁂𑀔𑀦𑁆𑀢𑀺 𑀮𑀺𑀔𑀺𑀢𑀕𑀳𑀺𑀢𑀁 𑀘𑀼𑀡𑁆𑀡𑀁. 𑀉𑀟𑁆𑀟𑀺𑀢𑁆𑀯𑀸𑀢𑀺 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀉𑀤𑁆𑀥𑀁 𑀧𑀸𑀧𑁂𑀢𑁆𑀯𑀸, 𑀉𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀳𑀭𑀢𑀽𑀢𑀺 𑀇𑀤𑁆𑀥𑀺𑀬𑀸 𑀑𑀢𑀸𑀭𑁂𑀢𑁆𑀯𑀸 𑀕𑀡𑁆𑀳𑀢𑀼.

𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄. 𑀢𑀢𑁆𑀣 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫𑁧-𑁧𑁫𑁨; 𑀫. 𑀦𑀺. 𑀅𑀝𑁆𑀞. 𑁧.𑁩𑁧𑁨) 𑀧𑀽𑀭𑀡𑁄𑀢𑀺 𑀢𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀲𑁆𑀲 𑀦𑀸𑀫𑀁. 𑀓𑀲𑁆𑀲𑀧𑁄𑀢𑀺 𑀕𑁄𑀢𑁆𑀢𑀁. 𑀲𑁄 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀏𑀓𑀽𑀦𑀤𑀸𑀲𑀲𑀢𑀁 𑀧𑀽𑀭𑀬𑀫𑀸𑀦𑁄 𑀚𑀸𑀢𑁄. 𑀢𑁂𑀦𑀲𑁆𑀲 ‘‘𑀧𑀽𑀭𑀡𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀫𑀗𑁆𑀕𑀮𑀤𑀸𑀲𑀢𑁆𑀢𑀸 𑀘𑀲𑁆𑀲 𑀓𑀢𑀁 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀢𑁆𑀢𑀸 𑀦𑀢𑁆𑀣𑀺, 𑀅𑀓𑀢𑀁 𑀯𑀸 ‘‘𑀦 𑀓𑀢’’𑀦𑁆𑀢𑀺. 𑀲𑁄 ‘‘𑀓𑀺𑀫𑀳𑀁 𑀏𑀢𑁆𑀣 𑀯𑀲𑀸𑀫𑀻’’𑀢𑀺 𑀧𑀮𑀸𑀬𑀺. 𑀅𑀣𑀲𑁆𑀲 𑀘𑁄𑀭𑀸 𑀯𑀢𑁆𑀣𑀸𑀦𑀺 𑀅𑀘𑁆𑀙𑀺𑀦𑁆𑀤𑀺𑀁𑀲𑀼. 𑀲𑁄 𑀧𑀡𑁆𑀡𑁂𑀦 𑀯𑀸 𑀢𑀺𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀼𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀚𑀸𑀢𑀭𑀽𑀧𑁂𑀦𑁂𑀯 𑀏𑀓𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀅𑀭𑀳𑀸 𑀅𑀧𑁆𑀧𑀺𑀘𑁆𑀙𑁄, 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑀺𑀲𑁄’’𑀢𑀺 𑀧𑀽𑀯𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑁄 ‘‘𑀫𑀬𑁆𑀳𑀁 𑀲𑀸𑀝𑀓𑀁 𑀅𑀦𑀺𑀯𑀢𑁆𑀣𑀪𑀸𑀯𑁂𑀦 𑀇𑀤𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸𑀧𑀺 𑀦 𑀦𑀺𑀯𑀸𑀲𑁂𑀲𑀺, 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑁂𑀧𑀺 𑀅𑀜𑁆𑀜𑁂𑀧𑀻𑀢𑀺 𑀧𑀜𑁆𑀘𑀲𑀢𑀸 𑀫𑀦𑀼𑀲𑁆𑀲𑀸 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀫𑀬𑀁 𑀕𑀡𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 ‘‘𑀲𑀢𑁆𑀣𑀸’’𑀢𑀺 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀺.

𑀫𑀓𑁆𑀔𑀮𑀻𑀢𑀺 𑀢𑀲𑁆𑀲 𑀦𑀸𑀫𑀁. 𑀕𑁄𑀲𑀸𑀮𑀸𑀬 𑀚𑀸𑀢𑀢𑁆𑀢𑀸 𑀕𑁄𑀲𑀸𑀮𑁄𑀢𑀺 𑀤𑀼𑀢𑀺𑀬𑀦𑀸𑀫𑀁. 𑀢𑀁 𑀓𑀺𑀭 𑀲𑀓𑀤𑁆𑀤𑀫𑀸𑀬 𑀪𑀽𑀫𑀺𑀬𑀸 𑀢𑁂𑀮𑀖𑀝𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 ‘‘𑀢𑀸𑀢 𑀫𑀸 𑀔𑀮𑀻’’𑀢𑀺 𑀲𑀸𑀫𑀺𑀓𑁄 𑀆𑀳. 𑀲𑁄 𑀧𑀫𑀸𑀤𑁂𑀦 𑀔𑀮𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀪𑀬𑁂𑀦 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀲𑀸𑀫𑀺𑀓𑁄 𑀉𑀧𑀥𑀸𑀯𑀺𑀢𑁆𑀯𑀸 𑀲𑀸𑀝𑀓𑀓𑀡𑁆𑀡𑁂 𑀅𑀕𑁆𑀕𑀳𑁂𑀲𑀺, 𑀲𑁄 𑀲𑀸𑀝𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀘𑁂𑀮𑀓𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺. 𑀲𑁂𑀲𑀁 𑀧𑀽𑀭𑀡𑀲𑀤𑀺𑀲𑀫𑁂𑀯.

𑀅𑀚𑀺𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑁂𑀲𑀓𑀫𑁆𑀩𑀮𑀁 𑀥𑀸𑀭𑁂𑀢𑀻𑀢𑀺 𑀓𑁂𑀲𑀓𑀫𑁆𑀩𑀮𑁄. 𑀇𑀢𑀺 𑀦𑀸𑀫𑀤𑁆𑀯𑀬𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑁂𑀲𑀓𑀫𑁆𑀩𑀮𑁄 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑁄. 𑀢𑀢𑁄 𑀧𑀝𑀺𑀓𑀺𑀝𑁆𑀞𑀢𑀭𑀁 𑀯𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁, 𑀓𑁂𑀲𑀓𑀫𑁆𑀩𑀮𑁄 𑀢𑁂𑀲𑀁 𑀧𑀝𑀺𑀓𑀺𑀝𑁆𑀞𑁄 𑀅𑀓𑁆𑀔𑀸𑀬𑀢𑀺. 𑀓𑁂𑀲𑀓𑀫𑁆𑀩𑀮𑁄, 𑀪𑀺𑀓𑁆𑀔𑀯𑁂, 𑀲𑀻𑀢𑁂 𑀲𑀻𑀢𑁄 𑀉𑀡𑁆𑀳𑁂 𑀉𑀡𑁆𑀳𑁄 𑀤𑀼𑀩𑁆𑀩𑀡𑁆𑀡𑁄 𑀤𑀼𑀕𑁆𑀕𑀦𑁆𑀥𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄’’𑀢𑀺 (𑀅. 𑀦𑀺. 𑁩.𑁧𑁩𑁮).

𑀧𑀓𑀼𑀥𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀘𑁆𑀘𑀸𑀬𑀦𑁄𑀢𑀺 𑀕𑁄𑀢𑁆𑀢𑀁. 𑀇𑀢𑀺 𑀦𑀸𑀫𑀕𑁄𑀢𑁆𑀢𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀢𑀽𑀤𑀓𑀧𑀝𑀺𑀓𑁆𑀔𑀺𑀢𑁆𑀢𑀓𑁄 𑀏𑀲, 𑀯𑀘𑁆𑀘𑀁 𑀓𑀢𑁆𑀯𑀸𑀧𑀺 𑀉𑀤𑀓𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀉𑀡𑁆𑀳𑁄𑀤𑀓𑀁 𑀯𑀸 𑀓𑀜𑁆𑀚𑀺𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀓𑀭𑁄𑀢𑀺, 𑀦𑀤𑀺𑀁 𑀯𑀸 𑀫𑀕𑁆𑀕𑁄𑀤𑀓𑀁 𑀯𑀸 𑀅𑀢𑀺𑀓𑁆𑀓𑀫𑁆𑀫 ‘‘𑀲𑀻𑀮𑀁 𑀫𑁂 𑀪𑀺𑀦𑁆𑀦’’𑀦𑁆𑀢𑀺 𑀯𑀸𑀮𑀺𑀓𑀣𑀽𑀧𑀁 𑀓𑀢𑁆𑀯𑀸 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬 𑀕𑀘𑁆𑀙𑀢𑀺. 𑀏𑀯𑀭𑀽𑀧𑀦𑀺𑀲𑁆𑀲𑀺𑀭𑀺𑀓𑀮𑀤𑁆𑀥𑀺𑀓𑁄 𑀏𑀲.

𑀲𑀜𑁆𑀘𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀩𑁂𑀮𑀝𑁆𑀞𑀲𑁆𑀲 𑀧𑀼𑀢𑁆𑀢𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄. ‘‘𑀅𑀫𑁆𑀳𑀸𑀓𑀁 𑀕𑀡𑁆𑀞𑀦𑀓𑀺𑀮𑁂𑀲𑁄 𑀧𑀮𑀺𑀩𑀼𑀦𑁆𑀥𑀦𑀓𑀺𑀮𑁂𑀲𑁄 𑀦𑀢𑁆𑀣𑀺, 𑀓𑀺𑀮𑁂𑀲𑀕𑀡𑁆𑀞𑀺𑀭𑀳𑀺𑀢𑀸 𑀫𑀬’’𑀦𑁆𑀢𑀺 𑀏𑀯𑀁𑀯𑀸𑀤𑀺𑀢𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀦𑀺𑀕𑀡𑁆𑀞𑁄. 𑀦𑀸𑀝𑀲𑁆𑀲 𑀧𑀼𑀢𑁆𑀢𑁄𑀢𑀺 𑀦𑀸𑀝𑀧𑀼𑀢𑁆𑀢𑁄.

𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄𑀢𑀺 (𑀉𑀤𑀸. 𑀅𑀝𑁆𑀞. 𑁩𑁬) 𑀧𑀺𑀡𑁆𑀟𑀁 𑀉𑀮𑀫𑀸𑀦𑁄 𑀧𑀭𑀺𑀬𑁂𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁄𑀢𑀺 𑀧𑀺𑀡𑁆𑀟𑁄𑀮𑁄. 𑀲𑁄 𑀓𑀺𑀭 𑀧𑀭𑀺𑀚𑀺𑀡𑁆𑀡𑀪𑁄𑀕𑁄 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀲𑁄 𑀫𑀳𑀦𑁆𑀢𑀁 𑀓𑀧𑀮𑁆𑀮𑀧𑀢𑁆𑀢𑀁 ‘‘𑀧𑀢𑁆𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀘𑀭𑀢𑀺, 𑀓𑀧𑀮𑁆𑀮𑀧𑀽𑀭𑀁 𑀬𑀸𑀕𑀼𑀁 𑀧𑀺𑀯𑀢𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀧𑀽𑀯𑀔𑀚𑁆𑀚𑀓𑀜𑁆𑀘 𑀔𑀸𑀤𑀢𑀺. 𑀅𑀣𑀲𑁆𑀲 𑀫𑀳𑀕𑁆𑀖𑀲𑀪𑀸𑀯𑀁 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀲𑁆𑀲 𑀧𑀢𑁆𑀢𑀢𑁆𑀣𑀯𑀺𑀓𑀁 𑀦𑀸𑀦𑀼𑀚𑀸𑀦𑀺. 𑀣𑁂𑀭𑁄 𑀳𑁂𑀝𑁆𑀞𑀸𑀫𑀜𑁆𑀘𑁂 𑀧𑀢𑁆𑀢𑀁 𑀦𑀺𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑁂𑀢𑀺. 𑀲𑁄 𑀞𑀧𑁂𑀦𑁆𑀢𑁄𑀧𑀺 𑀖𑀁𑀲𑁂𑀦𑁆𑀢𑁄𑀯 𑀧𑀡𑀸𑀫𑁂𑀢𑁆𑀯𑀸 𑀞𑀧𑁂𑀢𑀺, 𑀕𑀡𑁆𑀳𑀦𑁆𑀢𑁄𑀧𑀺 𑀖𑀁𑀲𑁂𑀦𑁆𑀢𑁄𑀯 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀁 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀖𑀁𑀲𑀦𑁂𑀦 𑀧𑀭𑀺𑀓𑁆𑀔𑀻𑀡𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀲𑁆𑀲𑁂𑀯 𑀕𑀡𑁆𑀳𑀦𑀓𑀁 𑀚𑀸𑀢𑀁. 𑀢𑀢𑁄 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀢𑁆𑀢𑀢𑁆𑀣𑀯𑀺𑀓𑀁 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀇𑀢𑀺 𑀲𑁄 𑀧𑀼𑀩𑁆𑀩𑁂 𑀲𑀯𑀺𑀲𑁂𑀲𑀁 𑀧𑀺𑀡𑁆𑀟𑀢𑁆𑀣𑀸𑀬 𑀉𑀮𑀢𑀻𑀢𑀺 𑀧𑀺𑀡𑁆𑀟𑁄𑀮𑁄. 𑀕𑁄𑀢𑁆𑀢𑁂𑀦 𑀧𑀦 𑀪𑀸𑀭𑀤𑁆𑀯𑀸𑀚𑁄𑀢𑀺 𑀉𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄…𑀧𑁂… 𑀏𑀢𑀤𑀯𑁄𑀘𑀸’’𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳𑀁𑀲𑀼? 𑀲𑁄 𑀓𑀺𑀭 (𑀥. 𑀧. 𑀅𑀝𑁆𑀞. 𑁨.𑁧𑁮𑁦 𑀤𑁂𑀯𑁄𑀭𑁄𑀳𑀡𑀯𑀢𑁆𑀣𑀼) 𑀲𑁂𑀝𑁆𑀞𑀺 𑀦𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀚𑁆𑀛𑀢𑁆𑀢𑀥𑀸𑀢𑀼𑀓𑁄. 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀫𑀬𑁆𑀳𑀁 𑀕𑁂𑀳𑁂 𑀘𑀦𑁆𑀤𑀦𑀁 𑀩𑀳𑀼, 𑀓𑀺𑀁 𑀦𑀼 𑀔𑁄 𑀇𑀫𑀺𑀦𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑀲𑁆𑀫𑀺𑀁 𑀮𑁄𑀓𑁂 ‘𑀫𑀬𑀁 𑀅𑀭𑀳𑀦𑁆𑀢𑁄, 𑀫𑀬𑀁 𑀅𑀭𑀳𑀦𑁆𑀢𑁄’𑀢𑀺 𑀯𑀢𑁆𑀢𑀸𑀭𑁄 𑀩𑀳𑀽, 𑀅𑀳𑀁 𑀏𑀓𑀁 𑀅𑀭𑀳𑀦𑁆𑀢𑀫𑁆𑀧𑀺 𑀦 𑀚𑀸𑀦𑀸𑀫𑀺, 𑀕𑁂𑀳𑁂 𑀪𑀫𑀁 𑀬𑁄𑀚𑁂𑀢𑁆𑀯𑀸 𑀧𑀢𑁆𑀢𑀁 𑀮𑀺𑀔𑀸𑀧𑁂𑀢𑁆𑀯𑀸 𑀲𑀺𑀓𑁆𑀓𑀸𑀬 𑀞𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁂 𑀆𑀓𑀸𑀲𑁂 𑀑𑀮𑀫𑁆𑀩𑀸𑀧𑁂𑀢𑁆𑀯𑀸 ‘𑀲𑀘𑁂 𑀅𑀭𑀳𑀸 𑀅𑀢𑁆𑀣𑀺, 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀽’𑀢𑀺 𑀯𑀓𑁆𑀔𑀸𑀫𑀺. 𑀬𑁄 𑀢𑀁 𑀕𑀳𑁂𑀲𑁆𑀲𑀢𑀺, 𑀢𑀲𑁆𑀲 𑀲𑀧𑀼𑀢𑁆𑀢𑀤𑀸𑀭𑁄 𑀲𑀭𑀡𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀘𑀺𑀦𑁆𑀢𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀢𑁆𑀢𑀁 𑀮𑀺𑀔𑀸𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀉𑀲𑁆𑀲𑀸𑀧𑁂𑀢𑁆𑀯𑀸 ‘‘𑀬𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀅𑀭𑀳𑀸, 𑀲𑁄 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀧𑀢𑁆𑀢𑀁 𑀕𑀡𑁆𑀳𑀸𑀢𑀽’’𑀢𑀺 𑀆𑀳.

𑀢𑀤𑀸 𑀙 𑀲𑀢𑁆𑀣𑀸𑀭𑁄 ‘‘𑀅𑀫𑁆𑀳𑀸𑀓𑀁 𑀏𑀲 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀫𑁆𑀳𑀸𑀓𑀫𑁂𑀯 𑀦𑀁 𑀤𑁂𑀳𑀻’’𑀢𑀺 𑀯𑀤𑀺𑀁𑀲𑀼. 𑀲𑁄 ‘‘𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀆𑀳. 𑀙𑀝𑁆𑀞𑁂 𑀤𑀺𑀯𑀲𑁂 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑁂𑀲𑁂𑀲𑀺 ‘‘𑀕𑀘𑁆𑀙𑀣 𑀲𑁂𑀝𑁆𑀞𑀺𑀁 𑀏𑀯𑀁 𑀯𑀤𑁂𑀣 ‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲𑁂𑀯 𑀅𑀦𑀼𑀘𑁆𑀙𑀯𑀺𑀓𑁄, 𑀫𑀸 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀓𑀸𑀭𑀡𑀸 𑀆𑀓𑀸𑀲𑁂𑀦 𑀆𑀕𑀫𑀦𑀁 𑀓𑀭𑀺, 𑀤𑁂𑀳𑀺 𑀓𑀺𑀭 𑀢𑁂 𑀧𑀢𑁆𑀢’𑀦𑁆𑀢𑀺’’. 𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀢𑀣𑀸 𑀯𑀤𑀺𑀁𑀲𑀼. 𑀲𑁂𑀝𑁆𑀞𑀺 ‘‘𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄𑀯 𑀕𑀡𑁆𑀳𑀸𑀢𑀽’’𑀢𑀺 𑀆𑀳. 𑀦𑀸𑀝𑀧𑀼𑀢𑁆𑀢𑁄 𑀲𑀬𑀁 𑀕𑀦𑁆𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺 ‘‘𑀅𑀳𑀁 𑀏𑀓𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑀼𑀓𑀸𑀫𑁄 𑀯𑀺𑀬 𑀪𑀯𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀁 ‘𑀆𑀘𑀭𑀺𑀬 𑀓𑀺𑀁 𑀓𑀭𑁄𑀣, 𑀤𑀸𑀭𑀼𑀫𑀬𑀧𑀢𑁆𑀢𑀲𑁆𑀲 𑀓𑀸𑀭𑀡𑀸 𑀧𑀝𑀺𑀘𑁆𑀙𑀦𑁆𑀦𑀁 𑀅𑀭𑀳𑀢𑁆𑀢𑀕𑀼𑀡𑀁 𑀫𑀳𑀸𑀚𑀦𑀲𑁆𑀲 𑀫𑀸 𑀤𑀲𑁆𑀲𑀬𑀺𑀢𑁆𑀣𑀸’𑀢𑀺 𑀯𑀢𑁆𑀯𑀸 𑀫𑀁 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 𑀪𑀽𑀫𑀺𑀬𑀁 𑀧𑀸𑀢𑁂𑀬𑁆𑀬𑀸𑀣𑀸’’𑀢𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀁 𑀆𑀳 ‘‘𑀫𑀳𑀸𑀲𑁂𑀝𑁆𑀞𑀺 𑀅𑀬𑀁 𑀧𑀢𑁆𑀢𑁄 𑀅𑀜𑁆𑀜𑁂𑀲𑀁 𑀦𑀸𑀦𑀼𑀘𑁆𑀙𑀯𑀺𑀓𑁄, 𑀫𑀸 𑀢𑁂 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀓𑀸𑀭𑀡𑀸 𑀫𑀫 𑀆𑀓𑀸𑀲𑁂 𑀉𑀧𑁆𑀧𑀢𑀦𑀁 𑀭𑀼𑀘𑁆𑀘𑀺, 𑀤𑁂𑀳𑀺 𑀫𑁂 𑀧𑀢𑁆𑀢’’𑀦𑁆𑀢𑀺. 𑀪𑀦𑁆𑀢𑁂, 𑀆𑀓𑀸𑀲𑁂𑀦 𑀉𑀧𑁆𑀧𑀢𑀺𑀢𑁆𑀯𑀸𑀯 𑀕𑀡𑁆𑀳𑀣𑀸𑀢𑀺. 𑀢𑀢𑁄 𑀦𑀸𑀝𑀧𑀼𑀢𑁆𑀢𑁄 ‘‘𑀢𑁂𑀦 𑀳𑀺 𑀅𑀧𑁂𑀣 𑀅𑀧𑁂𑀣𑀸’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀅𑀧𑀦𑁂𑀢𑁆𑀯𑀸 ‘‘𑀆𑀓𑀸𑀲𑁂 𑀉𑀧𑁆𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀳𑀢𑁆𑀣𑀜𑁆𑀘 𑀧𑀸𑀤𑀜𑁆𑀘 𑀉𑀓𑁆𑀔𑀺𑀧𑀺. 𑀅𑀣 𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 ‘‘𑀆𑀘𑀭𑀺𑀬, 𑀓𑀺𑀁 𑀦𑀸𑀫𑁂𑀢𑀁 𑀓𑀭𑁄𑀣, 𑀙𑀯𑀲𑁆𑀲 𑀤𑀸𑀭𑀼𑀫𑀬𑀧𑀢𑁆𑀢𑀲𑁆𑀲 𑀓𑀸𑀭𑀡𑀸 𑀧𑀝𑀺𑀘𑁆𑀙𑀦𑁆𑀦𑀕𑀼𑀡𑁂𑀦 𑀢𑀼𑀫𑁆𑀳𑁂𑀳𑀺 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑀺𑀢𑁂𑀦 𑀓𑁄 𑀅𑀢𑁆𑀣𑁄’’𑀢𑀺 𑀢𑀁 𑀳𑀢𑁆𑀣𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀼𑀁. 𑀲𑁄 𑀲𑁂𑀝𑁆𑀞𑀺𑀁 𑀆𑀳 ‘‘𑀫𑀳𑀸𑀲𑁂𑀝𑁆𑀞𑀺, 𑀇𑀫𑁂 𑀫𑁂 𑀉𑀧𑁆𑀧𑀢𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀤𑁂𑀳𑀺 𑀫𑁂 𑀧𑀢𑁆𑀢’’𑀦𑁆𑀢𑀺. 𑀉𑀧𑁆𑀧𑀢𑀺𑀢𑁆𑀯𑀸𑀯 𑀕𑀡𑁆𑀳𑀣 𑀪𑀦𑁆𑀢𑁂𑀢𑀺. 𑀏𑀯𑀁 𑀢𑀺𑀢𑁆𑀣𑀺𑀬𑀸 𑀙 𑀤𑀺𑀯𑀲𑀸𑀦𑀺 𑀯𑀸𑀬𑀫𑀺𑀢𑁆𑀯𑀸𑀧𑀺 𑀧𑀢𑁆𑀢𑀁 𑀦 𑀮𑀪𑀺𑀁𑀲𑀼𑀬𑁂𑀯.

𑀅𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀬𑀲𑁆𑀫𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀆𑀬𑀲𑁆𑀫𑀢𑁄 𑀘 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀲𑁆𑀲 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀞𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀦𑀓𑀸𑀮𑁂 𑀥𑀼𑀢𑁆𑀢𑀓𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀳𑀫𑁆𑀪𑁄 𑀧𑀼𑀩𑁆𑀩𑁂 𑀙 𑀲𑀢𑁆𑀣𑀸𑀭𑁄 ‘𑀫𑀬𑀁 𑀅𑀭𑀳𑀦𑁆𑀢𑀸𑀫𑁆𑀳𑀸’𑀢𑀺 𑀯𑀺𑀘𑀭𑀺𑀁𑀲𑀼, 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀧𑀦 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀧𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑀬𑀢𑁄 ‘𑀲𑀘𑁂 𑀅𑀭𑀳𑀸 𑀅𑀢𑁆𑀣𑀺, 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀢𑀽’𑀢𑀺 𑀯𑀤𑀦𑁆𑀢𑀲𑁆𑀲, 𑀏𑀓𑁄𑀧𑀺 ‘𑀅𑀳𑀁 𑀅𑀭𑀳𑀸’𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀦𑁆𑀢𑁄 𑀦𑀢𑁆𑀣𑀺, 𑀅𑀚𑁆𑀚 𑀦𑁄 𑀮𑁄𑀓𑁂 𑀅𑀭𑀳𑀦𑁆𑀢𑀸𑀦𑀁 𑀦𑀢𑁆𑀣𑀺𑀪𑀸𑀯𑁄 𑀜𑀸𑀢𑁄’’𑀢𑀺. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀁 𑀆𑀳 ‘‘𑀲𑀼𑀢𑀁 𑀢𑁂, 𑀆𑀯𑀼𑀲𑁄 𑀪𑀸𑀭𑀤𑁆𑀯𑀸𑀚, 𑀇𑀫𑁂𑀲𑀁 𑀯𑀘𑀦𑀁, 𑀇𑀫𑁂 𑀩𑀼𑀤𑁆𑀥𑀲𑀸𑀲𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸 𑀯𑀺𑀬 𑀯𑀤𑀦𑁆𑀢𑀺, 𑀢𑁆𑀯𑀜𑁆𑀘 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀕𑀘𑁆𑀙𑁂𑀢𑀁 𑀧𑀢𑁆𑀢𑀁 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. ‘‘𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁆𑀯𑀁 ‘𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄’𑀢𑀺 𑀧𑀸𑀓𑀝𑁄, 𑀢𑁆𑀯𑀁 𑀏𑀢𑀁 𑀕𑀡𑁆𑀳, 𑀢𑀬𑀺 𑀧𑀦 𑀅𑀕𑁆𑀕𑀡𑁆𑀳𑀦𑁆𑀢𑁂 𑀅𑀳𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀕𑀡𑁆𑀳𑀸𑀯𑀼𑀲𑁄’’𑀢𑀺 𑀆𑀳. 𑀇𑀢𑀺 𑀢𑁂 𑀮𑁄𑀓𑀲𑁆𑀲 𑀅𑀭𑀳𑀦𑁆𑀢𑁂𑀳𑀺 𑀅𑀲𑀼𑀜𑁆𑀜𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀯𑀫𑀸𑀳𑀁𑀲𑀼.

𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀕𑀳𑀁 𑀅𑀦𑀼𑀧𑀭𑀺𑀬𑀸𑀬𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀭𑀸𑀚𑀕𑀳𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀭𑀺𑀩𑁆𑀪𑀫𑀺. ‘‘𑀲𑀢𑁆𑀢𑀓𑁆𑀔𑀢𑁆𑀢𑀼’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀣𑁂𑀭𑁄 𑀓𑀺𑀭 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀢𑀺𑀕𑀸𑀯𑀼𑀢𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀅𑀦𑁆𑀢𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀢𑀽𑀮𑀧𑀺𑀘𑀼 𑀯𑀺𑀬 𑀆𑀓𑀸𑀲𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀦𑀕𑀭𑀲𑁆𑀲 𑀉𑀧𑀭𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀬𑀸𑀬𑀺. 𑀲𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀲𑁆𑀲 𑀦𑀕𑀭𑀲𑁆𑀲 𑀅𑀧𑀺𑀥𑀸𑀦𑀁 𑀯𑀺𑀬 𑀧𑀜𑁆𑀜𑀸𑀬𑀺. 𑀦𑀕𑀭𑀯𑀸𑀲𑀺𑀦𑁄 ‘‘𑀧𑀸𑀲𑀸𑀡𑁄 𑀦𑁄 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀻’’𑀢𑀺 𑀪𑀻𑀢𑀸 𑀲𑀼𑀧𑁆𑀧𑀸𑀤𑀻𑀦𑀺 𑀫𑀢𑁆𑀣𑀓𑁂 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀮𑀻𑀬𑀺𑀁𑀲𑀼. 𑀲𑀢𑁆𑀢𑀫𑁂 𑀯𑀸𑀭𑁂 𑀣𑁂𑀭𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀚𑀦𑁄 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚, 𑀢𑀯 𑀧𑀸𑀲𑀸𑀡𑀁 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀳, 𑀫𑀸 𑀦𑁄 𑀲𑀩𑁆𑀩𑁂 𑀦𑀸𑀲𑀬𑀻’’𑀢𑀺 𑀆𑀳. 𑀣𑁂𑀭𑁄 𑀧𑀸𑀲𑀸𑀡𑀁 𑀧𑀸𑀤𑀦𑁆𑀢𑁂𑀦 𑀔𑀺𑀧𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀣𑁂𑀭𑁄 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑁂𑀝𑁆𑀞𑀺 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀑𑀢𑀭 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀺𑀡𑁆𑀡𑀁 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑀢𑀼𑀫𑀥𑀼𑀭𑀧𑀼𑀡𑁆𑀡𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀣𑁂𑀭𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀬𑁂 𑀅𑀭𑀜𑁆𑀜𑀕𑀢𑀸 𑀧𑀸𑀝𑀺𑀳𑀸𑀭𑀺𑀬𑀁 𑀦𑀸𑀤𑁆𑀤𑀲𑀁𑀲𑀼, 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀫𑁆𑀧𑀺 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀳𑀻’’𑀢𑀺 𑀣𑁂𑀭𑀁 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑁄 𑀢𑁂𑀲𑀁 𑀢𑁂𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀦𑁆𑀦𑀸𑀤𑁂𑀦𑁆𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀆𑀦𑀦𑁆𑀤, 𑀓𑀲𑁆𑀲𑁂𑀲𑁄 𑀲𑀤𑁆𑀤𑁄’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸…𑀧𑁂… 𑀓𑀺𑀁 𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑁄 𑀫𑀳𑀸𑀲𑀤𑁆𑀤𑁄’’𑀢𑀺.

𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀬𑀸 𑀧𑀸𑀝𑀺𑀳𑀸𑀭𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀦𑀸𑀫 ‘‘𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺 𑀦𑀸𑀕𑀯𑀡𑁆𑀡𑀁 𑀯𑀸, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻’’𑀢𑀺 (𑀧𑀝𑀺. 𑀫. 𑁩.𑁧𑁩) 𑀏𑀯𑀫𑀸𑀕𑀢𑀸 𑀧𑀓𑀢𑀺𑀯𑀡𑁆𑀡𑀯𑀺𑀚𑀳𑀦𑀯𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀸 𑀇𑀤𑁆𑀥𑀺. 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀧𑀦 ‘‘𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸, 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 ‘𑀩𑀳𑀼𑀓𑁄 𑀳𑁄𑀫𑀻’’’𑀢𑀺 (𑀧𑀝𑀺. 𑀫. 𑁩.𑁧𑁦 𑀤𑀲𑀇𑀤𑁆𑀥𑀺𑀦𑀺𑀤𑁆𑀤𑁂𑀲) 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀸 𑀇𑀤𑁆𑀥𑀺.

𑁨𑁫𑁩-𑁨𑁫𑁪. 𑀦 𑀅𑀘𑁆𑀙𑀼𑀧𑀺𑀬𑀦𑁆𑀢𑀻𑀢𑀺 𑀦 𑀲𑀼𑀨𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀻𑀢𑀺 𑀇𑀢𑁆𑀣𑀺𑀭𑀽𑀧𑀸𑀤𑀻𑀳𑀺 𑀆𑀓𑀺𑀡𑁆𑀡𑀸𑀦𑀺. 𑀪𑀽𑀫𑀺𑀆𑀥𑀸𑀭𑀓𑁂𑀢𑀺 𑀯𑀮𑀬𑀸𑀥𑀸𑀭𑀓𑁂. 𑀤𑀸𑀭𑀼𑀆𑀥𑀸𑀭𑀓𑀤𑀡𑁆𑀟𑀸𑀥𑀸𑀭𑀓𑁂𑀲𑀽𑀢𑀺 𑀏𑀓𑀤𑀸𑀭𑀼𑀦𑀸 𑀓𑀢𑀆𑀥𑀸𑀭𑀓𑁂 𑀩𑀳𑀽𑀳𑀺 𑀤𑀡𑁆𑀟𑀓𑁂𑀳𑀺 𑀓𑀢𑀆𑀥𑀸𑀭𑀓𑁂 𑀯𑀸𑀢𑀺 𑀅𑀢𑁆𑀣𑁄, 𑀢𑀻𑀳𑀺 𑀤𑀡𑁆𑀟𑁂𑀳𑀺 𑀓𑀢𑁄 𑀧𑀦 𑀦 𑀯𑀝𑁆𑀝𑀢𑀺. 𑀪𑀽𑀫𑀺𑀬𑀁 𑀧𑀦 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀏𑀓𑀫𑁂𑀯 𑀞𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀤𑁆𑀯𑁂 𑀞𑀧𑁂𑀦𑁆𑀢𑁂𑀦 𑀉𑀧𑀭𑀺 𑀞𑀧𑀺𑀢𑀧𑀢𑁆𑀢𑀁 𑀏𑀓𑁂𑀦 𑀧𑀲𑁆𑀲𑁂𑀦 𑀪𑀽𑀫𑀺𑀬𑀁 𑀨𑀼𑀲𑀸𑀧𑁂𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀆𑀮𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀦𑁆𑀢𑀺 𑀧𑀫𑀼𑀔𑀫𑀺𑀟𑁆𑀠𑀺𑀓𑀸𑀦𑀁. 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀢𑀻𑀢𑀺 𑀏𑀢𑁆𑀣 ‘‘𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀢𑀢𑁆𑀣𑁂𑀯 𑀫𑀺𑀟𑁆𑀠𑀺𑀬𑀸 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀧𑀭𑀺𑀪𑀡𑁆𑀟𑀁 𑀦𑀸𑀫 𑀕𑁂𑀳𑀲𑁆𑀲 𑀩𑀳𑀺 𑀓𑀼𑀝𑁆𑀝𑀧𑀸𑀤𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑀸 𑀢𑀦𑀼𑀓𑀫𑀺𑀟𑁆𑀠𑀺𑀓𑀸 𑀯𑀼𑀘𑁆𑀘𑀢𑀺. 𑀢𑀦𑀼𑀓𑀫𑀺𑀟𑁆𑀠𑀺𑀓𑀸𑀬𑀸𑀢𑀺 𑀔𑀼𑀤𑁆𑀤𑀓𑀫𑀺𑀟𑁆𑀠𑀺𑀓𑀸𑀬. 𑀫𑀺𑀟𑁆𑀠𑀦𑁆𑀢𑁂𑀧𑀺 𑀆𑀥𑀸𑀭𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀥𑀸𑀭𑀓’’𑀦𑁆𑀢𑀺 𑀳𑀺 𑀯𑀘𑀦𑀢𑁄 𑀫𑀺𑀟𑁆𑀠𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀥𑀸𑀭𑀓𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀧𑀢𑁆𑀢𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 𑀆𑀥𑀸𑀭𑀓𑁂 𑀞𑀧𑀦𑁄𑀓𑀸𑀲𑀲𑁆𑀲 𑀅𑀦𑀺𑀬𑀫𑀺𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. ‘‘𑀧𑀢𑁆𑀢𑀫𑀸𑀴𑁄 𑀦𑀸𑀫 𑀯𑀝𑁆𑀝𑁂𑀢𑁆𑀯𑀸 𑀧𑀢𑁆𑀢𑀸𑀦𑀁 𑀅𑀕𑀫𑀦𑀢𑁆𑀣𑀁 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀇𑀝𑁆𑀞𑀓𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑁄’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑁨𑁫𑁫. 𑀖𑀝𑀺𑀓𑀦𑁆𑀢𑀺 𑀉𑀧𑀭𑀺 𑀬𑁄𑀚𑀺𑀢𑀁 𑀅𑀕𑁆𑀕𑀴𑀁. 𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀓𑀺𑀤𑁂𑀯 𑀕𑀳𑁂𑀢𑁆𑀯𑀸 𑀢𑁂𑀦 𑀆𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀖𑀝𑀺𑀓𑀝𑀸𑀳𑁂𑀢𑀺 𑀪𑀸𑀚𑀦𑀓𑀧𑀸𑀮𑁂. 𑀅𑀪𑀼𑀁 𑀫𑁂𑀢𑀺 𑀏𑀢𑁆𑀣 𑀪𑀯𑀢𑀻𑀢𑀺 𑀪𑀽, 𑀯𑀟𑁆𑀠𑀺. 𑀦 𑀪𑀽𑀢𑀺 𑀅𑀪𑀽, 𑀅𑀯𑀟𑁆𑀠𑀺. 𑀪𑀬𑀯𑀲𑁂𑀦 𑀧𑀦 𑀲𑀸 𑀇𑀢𑁆𑀣𑀻 ‘‘𑀅𑀪𑀼’’𑀦𑁆𑀢𑀺 𑀆𑀳, 𑀯𑀺𑀦𑀸𑀲𑁄 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀙𑀯𑀲𑀻𑀲𑀲𑁆𑀲 𑀧𑀢𑁆𑀢𑀦𑁆𑀢𑀺 𑀙𑀯𑀲𑀻𑀲𑀫𑀬𑀁 𑀧𑀢𑁆𑀢𑀁. 𑀧𑀓𑀢𑀺𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀅𑀪𑁂𑀤𑁂𑀧𑀺 𑀯𑀸 𑀪𑁂𑀤𑀽𑀧𑀘𑀸𑀭𑁂𑀦𑀸𑀬𑀁 𑀯𑁄𑀳𑀸𑀭𑁄 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬.

𑀘𑀩𑁆𑀩𑁂𑀢𑁆𑀯𑀸𑀢𑀺 𑀔𑀸𑀤𑀺𑀢𑁆𑀯𑀸. 𑀏𑀓𑀁 𑀉𑀤𑀓𑀕𑀡𑁆𑀟𑀼𑀲𑀁 𑀕𑀳𑁂𑀢𑁆𑀯𑀸𑀢𑀺 𑀯𑀸𑀫𑀳𑀢𑁆𑀣𑁂𑀦𑁂𑀯 𑀧𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑁂𑀦 𑀕𑀡𑁆𑀟𑀼𑀲𑀁 𑀕𑀳𑁂𑀢𑁆𑀯𑀸. 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦𑀸𑀢𑀺 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀓𑀕𑀡𑁆𑀟𑀼𑀲𑀕𑀳𑀡𑀫𑀢𑁆𑀢𑁂𑀦. 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀢𑀢𑁄 𑀫𑀁𑀲𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀏𑀢𑁂𑀲𑀼 𑀲𑀩𑁆𑀩𑁂𑀲𑀼 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀸𑀢𑀼 𑀯𑀸 𑀫𑀸 𑀯𑀸, 𑀆𑀧𑀢𑁆𑀢𑀺𑀬𑁂𑀯.

𑁨𑁫𑁬. 𑀓𑀺𑀡𑁆𑀡𑀘𑀼𑀡𑁆𑀡𑁂𑀦𑀸𑀢𑀺 𑀲𑀼𑀭𑀸𑀓𑀺𑀡𑁆𑀡𑀘𑀼𑀡𑁆𑀡𑁂𑀦. ‘‘𑀅𑀦𑀼𑀯𑀸𑀢𑀁 𑀧𑀭𑀺𑀪𑀡𑁆𑀟𑀦𑁆𑀢𑀺 𑀓𑀺𑀮𑀜𑁆𑀚𑀸𑀤𑀻𑀲𑀼 𑀓𑀭𑁄𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀩𑀺𑀤𑀮𑀓𑀦𑁆𑀢𑀺 𑀤𑀼𑀕𑀼𑀡𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀅𑀥𑀺𑀯𑀘𑀦𑀁. 𑀓𑀲𑁆𑀲 𑀤𑀼𑀕𑀼𑀡𑀓𑀭𑀡𑀁? 𑀬𑁂𑀦 𑀓𑀺𑀮𑀜𑁆𑀚𑀸𑀤𑀺𑀦𑀸 𑀫𑀳𑀦𑁆𑀢𑀁 𑀓𑀣𑀺𑀦𑀁 𑀅𑀢𑁆𑀣𑀢𑀁, 𑀢𑀲𑁆𑀲. 𑀢𑀜𑁆𑀳𑀺 𑀤𑀡𑁆𑀟𑀓𑀣𑀺𑀦𑀧𑁆𑀧𑀫𑀸𑀡𑁂𑀦 𑀧𑀭𑀺𑀬𑀦𑁆𑀢𑁂 𑀲𑀁𑀳𑀭𑀺𑀢𑁆𑀯𑀸 𑀤𑀼𑀕𑀼𑀡𑀁 𑀓𑀸𑀢𑀩𑁆𑀩𑀁. 𑀧𑀝𑀺𑀕𑁆𑀕𑀳𑀦𑁆𑀢𑀺 𑀅𑀗𑁆𑀕𑀼𑀮𑀺𑀓𑀜𑁆𑀘𑀼𑀓𑀁.

𑁨𑁫𑁭-𑁨𑁫𑁯. 𑀧𑀸𑀢𑀺 𑀦𑀸𑀫 𑀧𑀝𑀺𑀕𑁆𑀕𑀳𑀡𑀲𑀡𑁆𑀞𑀸𑀦𑁂𑀦 𑀓𑀢𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀦 𑀲𑀫𑁆𑀫𑀢𑀻𑀢𑀺 𑀦𑀧𑁆𑀧𑀳𑁄𑀢𑀺.

𑁨𑁬𑁦-𑁨𑁬𑁨. 𑀦𑀻𑀘𑀯𑀢𑁆𑀣𑀼𑀓𑀁 𑀘𑀺𑀦𑀺𑀢𑀼𑀦𑁆𑀢𑀺 𑀩𑀳𑀺𑀓𑀼𑀝𑁆𑀝𑀲𑁆𑀲 𑀲𑀫𑀦𑁆𑀢𑀢𑁄 𑀦𑀻𑀘𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀘𑀺𑀦𑀺𑀢𑀼𑀁. 𑀅𑀭𑀳𑀝𑀖𑀝𑀺𑀬𑀦𑁆𑀢𑀁 𑀦𑀸𑀫 𑀲𑀓𑀝𑀘𑀓𑁆𑀓𑀲𑀡𑁆𑀞𑀸𑀦𑀁 𑀅𑀭𑁂 𑀅𑀭𑁂 𑀖𑀝𑀺𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀧𑀭𑀺𑀩𑁆𑀪𑀫𑀺𑀬𑀫𑀸𑀦𑀁 𑀬𑀦𑁆𑀢𑀁.

𑁨𑁬𑁩. 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀓𑀦𑁆𑀢𑀺 𑀓𑀡𑁆𑀡𑀺𑀓𑀫𑀡𑁆𑀟𑀮𑀲𑁆𑀲 𑀲𑀫𑀦𑁆𑀢𑀸 𑀞𑀧𑀺𑀢𑀧𑀓𑁆𑀔𑀧𑀸𑀲𑀓𑀁. 𑀫𑀡𑁆𑀟𑀮𑁂𑀢𑀺 𑀓𑀡𑁆𑀡𑀺𑀓𑀫𑀡𑁆𑀟𑀮𑁂. 𑀧𑀓𑁆𑀔𑀧𑀸𑀲𑀓𑁂 𑀞𑀧𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀸 𑀧𑀓𑁆𑀔𑀧𑀸𑀲𑀓𑀨𑀮𑀓𑀸𑀦𑀺 𑀞𑀧𑁂𑀢𑁆𑀯𑀸.

𑁨𑁬𑁪. ‘‘𑀦𑀫𑀢𑀓𑀁 𑀲𑀦𑁆𑀣𑀢𑀲𑀤𑀺𑀲’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀘𑀫𑁆𑀫𑀔𑀡𑁆𑀟𑀧𑀭𑀺𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀸𑀦𑀻𑀢𑀺 𑀫𑀴𑁄𑀭𑀺𑀓𑀸𑀬 𑀏𑀯 𑀅𑀦𑁆𑀢𑁄𑀕𑀥𑀸𑀦𑀺. 𑀧𑀼𑀩𑁆𑀩𑁂 𑀧𑀢𑁆𑀢𑀲𑀗𑁆𑀕𑁄𑀧𑀦𑀢𑁆𑀣𑀁 𑀆𑀥𑀸𑀭𑀓𑁄 𑀅𑀦𑀼𑀜𑁆𑀜𑀸𑀢𑁄, 𑀇𑀤𑀸𑀦𑀺 𑀪𑀼𑀜𑁆𑀚𑀦𑀢𑁆𑀣𑀁.

𑁨𑁬𑁫. 𑀦𑀺𑀓𑁆𑀓𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀢𑁂𑀦 𑀤𑀺𑀦𑁆𑀦𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀡𑀢𑁆𑀣𑀁 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀓𑀫𑁆𑀫𑀯𑀸𑀘𑀸𑀬 𑀦𑀺𑀓𑁆𑀓𑀼𑀚𑁆𑀚𑀺𑀢𑀩𑁆𑀩𑁄, 𑀦 𑀅𑀥𑁄𑀫𑀼𑀔𑀞𑀧𑀦𑁂𑀦. 𑀢𑁂𑀦𑁂𑀯𑀸𑀳 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀩𑁆𑀩𑁄’’𑀢𑀺𑀆𑀤𑀺. 𑀅𑀮𑀸𑀪𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀢𑁆𑀣𑀸𑀬. 𑀅𑀦𑀢𑁆𑀣𑀸𑀬𑀸𑀢𑀺 𑀉𑀧𑀤𑁆𑀤𑀯𑀸𑀬 𑀅𑀯𑀟𑁆𑀠𑀺𑀬𑀸.

𑁨𑁬𑁬. 𑀧𑀲𑀸𑀤𑁂𑀲𑁆𑀲𑀸𑀫𑀸𑀢𑀺 𑀆𑀬𑀸𑀘𑀺𑀲𑁆𑀲𑀸𑀫. 𑀏𑀢𑀤𑀯𑁄𑀘𑀸𑀢𑀺 ‘‘𑀅𑀧𑁆𑀧𑀢𑀺𑀭𑀽𑀧𑀁 𑀫𑀬𑀸 𑀓𑀢𑀁, 𑀪𑀕𑀯𑀸 𑀧𑀦 𑀫𑀳𑀦𑁆𑀢𑁂𑀧𑀺 𑀅𑀕𑀼𑀡𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀫𑀬𑁆𑀳𑀁 𑀅𑀘𑁆𑀘𑀬𑀁 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀢𑀁 ‘‘𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀜𑀸𑀬𑀧𑀝𑀺𑀧𑀢𑁆𑀢𑀺𑀁 𑀅𑀢𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀘𑁆𑀘𑀬𑁄, 𑀅𑀧𑀭𑀸𑀥𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀧𑀼𑀭𑀺𑀲𑁂𑀦 𑀫𑀤𑁆𑀤𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁄𑀧𑀺 𑀳𑀺 𑀅𑀧𑀭𑀸𑀥𑁄 𑀅𑀢𑁆𑀣𑀢𑁄 𑀧𑀼𑀭𑀺𑀲𑀁 𑀅𑀢𑀺𑀘𑁆𑀘 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀔𑀫𑀢𑀼. 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀲𑀁𑀯𑀭𑀡𑀢𑁆𑀣𑀸𑀬 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀅𑀧𑀭𑀸𑀥𑀲𑁆𑀲 𑀤𑁄𑀲𑀲𑁆𑀲 𑀔𑀮𑀺𑀢𑀲𑁆𑀲 𑀅𑀓𑀭𑀡𑀢𑁆𑀣𑀸𑀬. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦. 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀻𑀢𑀺 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄, 𑀢𑀣𑁂𑀯 𑀓𑀭𑁄𑀲𑀺, 𑀔𑀫𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀢𑀁 𑀢𑀯 𑀅𑀧𑀭𑀸𑀥𑀁 𑀫𑀬𑀁 𑀔𑀫𑀸𑀫. 𑀯𑀼𑀟𑁆𑀠𑀺 𑀳𑁂𑀲𑀸, 𑀆𑀯𑀼𑀲𑁄 𑀯𑀟𑁆𑀠, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂𑀢𑀺 𑀏𑀲𑀸, 𑀆𑀯𑀼𑀲𑁄 𑀯𑀟𑁆𑀠, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀼𑀟𑁆𑀠𑀺 𑀦𑀸𑀫. 𑀓𑀢𑀫𑀸? 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀸𑀧𑀚𑁆𑀚𑀦𑀸. 𑀤𑁂𑀲𑀦𑀁 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 ‘‘𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀆𑀳.

𑁨𑁬𑁮. 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀯𑀢𑁆𑀣𑀼𑀫𑁆𑀳𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁨𑁪 𑀆𑀤𑀬𑁄) 𑀓𑁄𑀓𑀦𑀤𑁄𑀢𑀺 𑀓𑁄𑀓𑀦𑀤𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁, 𑀲𑁄 𑀘 𑀫𑀗𑁆𑀕𑀮𑀧𑀸𑀲𑀸𑀤𑁄 𑀑𑀮𑁄𑀓𑀦𑀧𑀤𑀼𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄, 𑀢𑀲𑁆𑀫𑀸 ‘‘𑀓𑁄𑀓𑀦𑀤𑁄’’𑀢𑀺 𑀲𑀗𑁆𑀔𑀁 𑀮𑀪𑀺. 𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀏𑀢𑁆𑀣 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀦𑁆𑀢𑀺 𑀧𑀞𑀫𑀲𑁄𑀧𑀸𑀦𑀨𑀮𑀓𑀁 𑀯𑀼𑀢𑁆𑀢𑀁 𑀢𑀲𑁆𑀲 𑀲𑀩𑁆𑀩𑀧𑀘𑁆𑀙𑀸 𑀤𑀼𑀲𑁆𑀲𑁂𑀦 𑀲𑀦𑁆𑀣𑀢𑀢𑁆𑀢𑀸. 𑀉𑀧𑀭𑀺𑀫𑀲𑁄𑀧𑀸𑀦𑀨𑀮𑀓𑀢𑁄 𑀧𑀝𑁆𑀞𑀸𑀬 𑀳𑀺 𑀲𑁄𑀧𑀸𑀦𑀁 𑀲𑀦𑁆𑀣𑀢𑀁. 𑀅𑀤𑁆𑀤𑀲𑀸 𑀔𑁄𑀢𑀺 𑀑𑀮𑁄𑀓𑀦𑀢𑁆𑀣𑀁𑀬𑁂𑀯 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄 𑀅𑀤𑁆𑀤𑀲.

𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 ‘‘𑀓𑀺𑀲𑁆𑀲 𑀦𑀼 𑀔𑁄 𑀅𑀢𑁆𑀣𑀸𑀬 𑀭𑀸𑀚𑀓𑀼𑀫𑀸𑀭𑁂𑀦 𑀅𑀬𑀁 𑀫𑀳𑀸𑀲𑀓𑁆𑀓𑀸𑀭𑁄 𑀓𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀼𑀢𑁆𑀢𑀧𑀢𑁆𑀣𑀦𑀸𑀬 𑀓𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑁄 𑀳𑀺 𑀭𑀸𑀚𑀧𑀼𑀢𑁆𑀢𑁄 𑀅𑀧𑀼𑀢𑁆𑀢𑀓𑁄. 𑀲𑀼𑀢𑀜𑁆𑀘𑀸𑀦𑁂𑀦 𑀅𑀳𑁄𑀲𑀺 ‘‘𑀩𑀼𑀤𑁆𑀥𑀸𑀦𑀁 𑀓𑀺𑀭 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀫𑀦𑀲𑀸 𑀇𑀘𑁆𑀙𑀺𑀢𑀁 𑀮𑀪𑀦𑁆𑀢𑀻’’𑀢𑀺. 𑀲𑁄 ‘‘𑀲𑀘𑀸𑀳𑀁 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀁 𑀘𑁂𑀮𑀧𑀝𑀺𑀓𑀁 𑀅𑀓𑁆𑀓𑀫𑀺𑀲𑁆𑀲𑀢𑀺. 𑀦𑁄 𑀘𑁂 𑀮𑀪𑀺𑀲𑁆𑀲𑀸𑀫𑀺, 𑀦 𑀅𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀦𑁆𑀣𑀭𑀸𑀧𑁂𑀲𑀺. 𑀅𑀣 𑀪𑀕𑀯𑀸 ‘‘𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀧𑀼𑀩𑁆𑀩𑁂 𑀓𑀺𑀭 𑀲𑁄 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀯𑀲𑀫𑀸𑀦𑁄 𑀲𑀫𑀸𑀦𑀘𑁆𑀙𑀦𑁆𑀤𑁂𑀦 𑀲𑀓𑀼𑀡𑀧𑁄𑀢𑀓𑁂 𑀔𑀸𑀤𑀺. 𑀲𑀘𑀲𑁆𑀲 𑀫𑀸𑀢𑀼𑀕𑀸𑀫𑁄 𑀧𑀼𑀜𑁆𑀜𑀯𑀸 𑀪𑀯𑁂𑀬𑁆𑀬, 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬. 𑀉𑀪𑁄𑀳𑀺 𑀧𑀦 𑀲𑀫𑀸𑀦𑀘𑁆𑀙𑀦𑁆𑀤𑁂𑀳𑀺 𑀳𑀼𑀢𑁆𑀯𑀸 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑁂𑀦𑀲𑁆𑀲 𑀧𑀼𑀢𑁆𑀢𑁄 𑀦 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑀸𑀲𑀺. 𑀤𑀼𑀲𑁆𑀲𑁂 𑀧𑀦 𑀅𑀓𑁆𑀓𑀦𑁆𑀢𑁂 ‘‘𑀩𑀼𑀤𑁆𑀥𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀺𑀢𑀁 𑀮𑀪𑀦𑁆𑀢𑀻𑀢𑀺 𑀮𑁄𑀓𑁂 𑀅𑀦𑀼𑀲𑁆𑀲𑀯𑁄, 𑀫𑀬𑀸 𑀘 𑀫𑀳𑀸𑀅𑀥𑀺𑀓𑀸𑀭𑁄 𑀓𑀢𑁄, 𑀦 𑀘 𑀧𑀼𑀢𑁆𑀢𑀁 𑀮𑀪𑀸𑀫𑀺, 𑀢𑀼𑀘𑁆𑀙𑀁 𑀇𑀤𑀁 𑀯𑀘𑀦’’𑀦𑁆𑀢𑀺 𑀫𑀺𑀘𑁆𑀙𑀸𑀕𑀳𑀡𑀁 𑀕𑀡𑁆𑀳𑁂𑀬𑁆𑀬. 𑀢𑀺𑀢𑁆𑀣𑀺𑀬𑀸𑀧𑀺 ‘‘𑀦𑀢𑁆𑀣𑀺 𑀲𑀫𑀡𑀸𑀦𑀁 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫, 𑀘𑁂𑀮𑀧𑀝𑀺𑀓𑀁 𑀫𑀤𑁆𑀤𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀻’’𑀢𑀺 𑀉𑀚𑁆𑀛𑀸𑀬𑁂𑀬𑁆𑀬𑀼𑀁. 𑀏𑀢𑀭𑀳𑀺 𑀘 𑀅𑀓𑁆𑀓𑀫𑀦𑁆𑀢𑁂𑀲𑀼 𑀩𑀳𑀽 𑀪𑀺𑀓𑁆𑀔𑀽 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄, 𑀢𑁂 𑀪𑀩𑁆𑀩𑀢𑀁 𑀚𑀸𑀦𑀺𑀢𑁆𑀯𑀸 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀅𑀪𑀩𑁆𑀩𑀢𑀁 𑀚𑀸𑀦𑀺𑀢𑁆𑀯𑀸 𑀦 𑀅𑀓𑁆𑀓𑀫𑀺𑀲𑁆𑀲𑀦𑁆𑀢𑀺. 𑀅𑀦𑀸𑀕𑀢𑁂 𑀧𑀦 𑀉𑀧𑀦𑀺𑀲𑁆𑀲𑀬𑁄 𑀫𑀦𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑀁 𑀦 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀅𑀓𑁆𑀓𑀫𑀦𑁆𑀢𑁂𑀲𑀼 𑀲𑀘𑁂 𑀧𑀢𑁆𑀣𑀺𑀢𑀁 𑀇𑀚𑁆𑀛𑀺𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀇𑀚𑁆𑀛𑀺𑀲𑁆𑀲𑀢𑀺, ‘‘𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀮𑀪𑀦𑁆𑀢𑀺, 𑀇𑀤𑀸𑀦𑀺 𑀦 𑀮𑀪𑀦𑁆𑀢𑀺, 𑀢𑁂𑀬𑁂𑀯 𑀫𑀜𑁆𑀜𑁂 𑀪𑀺𑀓𑁆𑀔𑀽 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸 𑀅𑀳𑁂𑀲𑀼𑀁, 𑀇𑀫𑁂 𑀧𑀦 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀅𑀓𑁆𑀓𑀫𑀺𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀢𑀣𑀸𑀕𑀢𑁄 𑀅𑀦𑀼𑀓𑀫𑁆𑀧𑀢𑀻𑀢𑀺 𑀇𑀤𑀁 𑀧𑀦 𑀣𑁂𑀭𑁄 𑀯𑀼𑀢𑁆𑀢𑁂𑀲𑀼 𑀓𑀸𑀭𑀡𑁂𑀲𑀼 𑀢𑀢𑀺𑀬𑀁 𑀓𑀸𑀭𑀡𑀁 𑀲𑀦𑁆𑀥𑀸𑀬𑀸𑀳. 𑀫𑀗𑁆𑀕𑀮𑀁 𑀇𑀘𑁆𑀙𑀦𑁆𑀢𑀻𑀢𑀺 𑀫𑀗𑁆𑀕𑀮𑀺𑀓𑀸.

𑁨𑁬𑁯. 𑀩𑀻𑀚𑀦𑀺𑀦𑁆𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀺𑀁. 𑀢𑀸𑀮𑀯𑀡𑁆𑀝𑀦𑁆𑀢𑀺 𑀢𑀸𑀮𑀧𑀢𑁆𑀢𑀸𑀤𑀻𑀳𑀺 𑀓𑀢𑀁 𑀫𑀡𑁆𑀟𑀮𑀺𑀓𑀩𑀻𑀚𑀦𑀺𑀁.

𑁨𑁭𑁦-𑁨𑁭𑁫. ‘‘𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀦𑀸𑀫 𑀢𑀸𑀮𑀧𑀢𑁆𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑀫𑁆𑀫𑀲𑀢𑁂𑀦𑀸𑀢𑀺 𑀏𑀢𑁆𑀣 𑀲𑀢-𑀲𑀤𑁆𑀤𑁄 𑀅𑀦𑁂𑀓𑀧𑀭𑀺𑀬𑀸𑀬𑁄, 𑀅𑀦𑁂𑀓𑁂𑀦 𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄, 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀼𑀥𑀻𑀢𑀺 𑀔𑀼𑀤𑁆𑀤𑀓𑀯𑀡𑀁.

𑁨𑁭𑁮. ‘‘𑀅𑀓𑀸𑀬𑀩𑀦𑁆𑀥𑀦𑁂𑀦 𑀲𑀜𑁆𑀘𑀺𑀘𑁆𑀘 𑀅𑀲𑀜𑁆𑀘𑀺𑀘𑁆𑀘 𑀯𑀸 𑀕𑀸𑀫𑀧𑁆𑀧𑀯𑁂𑀲𑀦𑁂 𑀆𑀧𑀢𑁆𑀢𑀺. 𑀲𑀭𑀺𑀢𑀝𑁆𑀞𑀸𑀦𑀢𑁄 𑀩𑀦𑁆𑀥𑀺𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀁 𑀯𑀸’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦𑀁 𑀯𑁂𑀞𑁂𑀢𑁆𑀯𑀸 𑀓𑀢𑀦𑁆𑀢𑀺 𑀩𑀳𑀽 𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀯𑁂𑀞𑁂𑀢𑁆𑀯𑀸 𑀫𑀼𑀭𑀚𑀯𑀝𑁆𑀝𑀺𑀲𑀤𑀺𑀲𑀁 𑀓𑀢𑀁. 𑀢𑁂𑀦𑁂𑀯 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁫 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬) 𑀯𑀼𑀢𑁆𑀢𑀁 ‘‘𑀩𑀳𑀽 𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 𑀲𑀚𑁆𑀚𑀺𑀢𑀁. 𑀧𑀸𑀫𑀗𑁆𑀕𑀤𑀲𑀸 𑀘𑀢𑀼𑀭𑀲𑁆𑀲𑀸. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁂𑀦𑀸𑀢𑀺 𑀯𑀭𑀓𑀲𑀻𑀲𑀸𑀓𑀸𑀭𑁂𑀦. 𑀧𑀸𑀲𑀦𑁆𑀢𑁄𑀢𑀺 𑀤𑀲𑀸𑀫𑀽𑀮𑀁.

𑁨𑁮𑁦-𑁨𑁮𑁨. 𑀫𑀼𑀡𑁆𑀟𑀯𑀝𑁆𑀝𑀻𑀢𑀺 𑀫𑀮𑁆𑀮𑀓𑀫𑁆𑀫𑀓𑀭𑀸𑀤𑀬𑁄. 𑀧𑀫𑀸𑀡𑀗𑁆𑀕𑀼𑀮𑁂𑀦𑀸𑀢𑀺 𑀯𑀟𑁆𑀠𑀓𑀻𑀅𑀗𑁆𑀕𑀼𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.