𑁪. 𑀲𑀫𑀣𑀓𑁆𑀔𑀦𑁆𑀥𑀓𑀁

𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁧𑁮𑁭. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀲𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀲𑀁-𑀲𑀤𑁆𑀤𑀽𑀧𑀧𑀤𑁄 𑀜𑀸-𑀲𑀤𑁆𑀤𑁄 𑀢𑁄𑀲𑀦𑀯𑀺𑀲𑀺𑀝𑁆𑀞𑁂 𑀅𑀯𑀩𑁄𑀥𑀦𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀧𑀭𑀺𑀢𑁄𑀲𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑀻’’𑀢𑀺.

𑀲𑀢𑀺𑀯𑀺𑀦𑀬𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁯𑁫-𑁨𑁦𑁦. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 ‘‘𑀧𑀜𑁆𑀘𑀺𑀫𑀸𑀦𑀻’’𑀢𑀺 𑀏𑀢𑀁 𑀤𑁂𑀲𑀦𑀸𑀫𑀢𑁆𑀢𑀁. 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄. 𑀅𑀫𑀽𑀴𑁆𑀳𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄. 𑀧𑀝𑀺𑀜𑁆𑀜𑀸𑀢𑁂𑀦 𑀓𑀭𑀡𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

𑁨𑁧𑁨. 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸𑀢𑀺 𑀢𑀁𑀲𑀤𑀺𑀲𑀢𑀸𑀬 𑀢𑀩𑁆𑀩𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀏𑀲 𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺.

𑀅𑀥𑀺𑀓𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁧𑁬. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀫𑀽𑀮𑀦𑁆𑀢𑀺𑀆𑀤𑀻𑀲𑀼 𑀯𑀺𑀯𑀸𑀤𑀫𑀽𑀮𑀸𑀦𑀻𑀢𑀺 𑀯𑀺𑀯𑀸𑀤𑀲𑁆𑀲 𑀫𑀽𑀮𑀸𑀦𑀺. 𑀓𑁄𑀥𑀦𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑀦𑀸𑀳𑀻𑀢𑀺 𑀯𑁂𑀭𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀉𑀧𑀦𑀸𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀕𑀸𑀭𑀯𑁄𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁨𑁩; 𑀫. 𑀦𑀺. 𑀅𑀝𑁆𑀞. 𑁩.𑁪𑁪) 𑀕𑀸𑀭𑀯𑀯𑀺𑀭𑀳𑀺𑀢𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑀬𑁄 𑀅𑀦𑀻𑀘𑀯𑀼𑀢𑁆𑀢𑀺. 𑀏𑀢𑁆𑀣 𑀧𑀦 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂 𑀢𑀻𑀲𑀼 𑀓𑀸𑀮𑁂𑀲𑀼 𑀉𑀧𑀝𑁆𑀞𑀸𑀦𑀁 𑀦 𑀬𑀸𑀢𑀺, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀦𑁆𑀢𑁂 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺, 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑀢𑀺, 𑀳𑁂𑀝𑁆𑀞𑀸 𑀯𑀲𑀦𑁆𑀢𑁂 𑀉𑀧𑀭𑀺 𑀯𑀲𑀢𑀺, 𑀲𑀢𑁆𑀣𑀼 𑀤𑀲𑁆𑀲𑀦𑀝𑁆𑀞𑀸𑀦𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀦𑀳𑀸𑀬𑀢𑀺, 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀯𑀸 𑀧𑀦 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑀼𑀁 𑀦 𑀕𑀘𑁆𑀙𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂 𑀲𑀢𑁆𑀣𑀼𑀤𑀲𑁆𑀲𑀦𑀝𑁆𑀞𑀸𑀦𑁂 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀓𑀭𑁄𑀢𑀺, 𑀅𑀜𑁆𑀜𑁂𑀳𑀺 𑀘 𑀪𑀺𑀓𑁆𑀔𑀽𑀳𑀺 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺, 𑀦 𑀇𑀤𑀁 𑀯𑀝𑁆𑀝𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀦𑀸𑀫 𑀮𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀡𑁆𑀳𑀻 𑀳𑁄𑀳𑀺, 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀯𑀤𑀲𑀺, 𑀓𑀺𑀁 𑀩𑀼𑀤𑁆𑀥𑁄 𑀦𑀸𑀫𑀸’’𑀢𑀺 𑀪𑀡𑀢𑀺, 𑀅𑀬𑀁 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀦𑀸𑀫.

𑀬𑁄 𑀧𑀦 𑀥𑀫𑁆𑀫𑀲𑀯𑀦𑁂 𑀲𑀗𑁆𑀖𑀼𑀝𑁆𑀞𑁂 𑀲𑀓𑁆𑀓𑀘𑁆𑀘𑀁 𑀦 𑀕𑀘𑁆𑀙𑀢𑀺, 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺, 𑀦𑀺𑀤𑁆𑀤𑀸𑀬𑀢𑀺 𑀯𑀸 𑀲𑀮𑁆𑀮𑀧𑀦𑁆𑀢𑁄 𑀯𑀸 𑀦𑀺𑀲𑀻𑀤𑀢𑀺, 𑀲𑀓𑁆𑀓𑀘𑁆𑀘𑀁 𑀦 𑀕𑀡𑁆𑀳𑀸𑀢𑀺 𑀦 𑀯𑀸𑀘𑁂𑀢𑀺, ‘‘𑀓𑀺𑀁 𑀥𑀫𑁆𑀫𑁂 𑀅𑀕𑀸𑀭𑀯𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀡𑁆𑀳𑀻 𑀳𑁄𑀳𑀺, 𑀥𑀫𑁆𑀫𑁄 𑀥𑀫𑁆𑀫𑁄𑀢𑀺 𑀯𑀤𑀲𑀺, 𑀓𑀺𑀁 𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀦𑀸𑀫. 𑀬𑁄 𑀧𑀦 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀚𑁆𑀛𑀺𑀝𑁆𑀞𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀜𑁆𑀳𑀁 𑀓𑀣𑁂𑀢𑀺, 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀖𑀝𑁆𑀝𑁂𑀦𑁆𑀢𑁄 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺, 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀓𑀭𑁄𑀢𑀺, 𑀲𑀗𑁆𑀖𑀫𑀚𑁆𑀛𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀢𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀢𑀼𑀡𑁆𑀳𑀻 𑀳𑁄𑀳𑀺, 𑀲𑀗𑁆𑀖𑁄 𑀲𑀗𑁆𑀖𑁄𑀢𑀺 𑀯𑀤𑀲𑀺, 𑀓𑀺𑀁 𑀲𑀗𑁆𑀖𑁄, 𑀫𑀺𑀕𑀲𑀗𑁆𑀖𑁄 𑀅𑀚𑀲𑀗𑁆𑀖𑁄’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀅𑀬𑀁 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀦𑀸𑀫. 𑀏𑀓𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀳𑀺 𑀅𑀕𑀸𑀭𑀯𑁂 𑀓𑀢𑁂 𑀲𑀗𑁆𑀖𑁂 𑀓𑀢𑁄𑀬𑁂𑀯 𑀳𑁄𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀦 𑀅𑀧𑀽𑀭𑀬𑀫𑀸𑀦𑁄 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫.

𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁨𑁫; 𑀫. 𑀦𑀺. 𑀅𑀝𑁆𑀞. 𑁩.𑁪𑁨; 𑀅. 𑀦𑀺. 𑀅𑀝𑁆𑀞. 𑁩.𑁬.𑁩𑁬) 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑁄 𑀓𑀣𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺? 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀺𑀬 𑀳𑀺 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀯𑀸𑀤𑀁 𑀆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀯𑀤𑀦𑁆𑀢𑀺, 𑀢𑁂𑀲𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀺𑀯𑀤𑀢𑀺, 𑀢𑀢𑁄 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸 𑀯𑀺𑀯𑀤𑀦𑁆𑀢𑀺, 𑀅𑀣 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀥𑀫𑁆𑀫𑀯𑀸𑀤𑀻𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀥𑀫𑁆𑀫𑀯𑀸𑀤𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀅𑀥𑀫𑁆𑀫𑀯𑀸𑀤𑀻𑀦𑀁 𑀅𑀥𑀫𑁆𑀫𑀯𑀸𑀤𑀺𑀦𑀺𑀬𑁄. 𑀢𑀢𑁄 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀪𑀼𑀫𑁆𑀫𑀤𑁂𑀯𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀳𑀺 𑀧𑀦 𑀅𑀥𑀫𑁆𑀫𑀯𑀸𑀤𑀺𑀦𑁄𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺. 𑀢𑀢𑁄 ‘‘𑀬𑀁 𑀩𑀳𑀼𑀓𑁂𑀳𑀺 𑀕𑀳𑀺𑀢𑀁, 𑀢𑀁 𑀢𑀘𑁆𑀙’’𑀦𑁆𑀢𑀺 𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀼𑀢𑀭𑀸 𑀅𑀥𑀫𑁆𑀫𑀁 𑀕𑀡𑁆𑀳𑀦𑁆𑀢𑀺. 𑀢𑁂 𑀅𑀥𑀫𑁆𑀫𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀏𑀯𑀁 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 𑀩𑀳𑀽𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀅𑀢𑁆𑀢𑀦𑀺 𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀯𑀸. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑀲𑁆𑀫𑀺𑀁 𑀯𑀸 𑀧𑀭𑀲𑁆𑀲 𑀧𑀭𑀺𑀲𑀸𑀬 𑀯𑀸. 𑀆𑀬𑀢𑀺𑀁 𑀅𑀦𑀯𑀲𑁆𑀲𑀯𑀸𑀬𑀸𑀢𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀸𑀬.

𑀫𑀓𑁆𑀔𑀻𑀢𑀺 𑀧𑀭𑁂𑀲𑀁 𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀴𑀸𑀲𑀻𑀢𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀲𑁆𑀲𑀼𑀓𑀻𑀢𑀺 𑀧𑀭𑀲𑀓𑁆𑀓𑀸𑀭𑀸𑀤𑀻𑀦𑀁 𑀇𑀲𑁆𑀲𑀸𑀬𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀘𑁆𑀙𑀭𑀻𑀢𑀺 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄. 𑀫𑀸𑀬𑀸𑀯𑀻𑀢𑀺 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀓𑁄. 𑀧𑀸𑀧𑀺𑀘𑁆𑀙𑁄𑀢𑀺 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀺𑀘𑁆𑀙𑀓𑁄 𑀤𑀼𑀲𑁆𑀲𑀻𑀮𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺𑀓𑀯𑀸𑀤𑀻 𑀅𑀳𑁂𑀢𑀼𑀓𑀯𑀸𑀤𑀻 𑀅𑀓𑀺𑀭𑀺𑀬𑀯𑀸𑀤𑀻. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺 𑀲𑀬𑀁 𑀤𑀺𑀝𑁆𑀞𑀫𑁂𑀯 𑀧𑀭𑀸𑀫𑀲𑀢𑀺 𑀕𑀡𑁆𑀳𑀸𑀢𑀺. 𑀆𑀥𑀸𑀦𑀕𑁆𑀕𑀸𑀳𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀻. 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀳𑀺𑀢𑀁 𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁. 𑀏𑀢𑁆𑀣 𑀘 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀓𑁄𑀥𑀽𑀧𑀦𑀸𑀳𑀸𑀤𑀬𑁄 𑀅𑀓𑀼𑀲𑀮𑀥𑀫𑁆𑀫𑀸 𑀯𑀺𑀯𑀸𑀤𑀫𑀽𑀮𑀸𑀦𑀻𑀢𑀺 𑀤𑀲𑁆𑀲𑀺𑀢𑀸𑀦𑀺, 𑀢𑀣𑀸 𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀻𑀢𑀺𑀆𑀤𑀺𑀦𑀸 𑀮𑁄𑀪𑀤𑁄𑀲𑀫𑁄𑀳𑀸. 𑀅𑀤𑀼𑀝𑁆𑀞𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀻𑀢𑀺𑀆𑀤𑀺𑀦𑀸 𑀘 𑀅𑀮𑁄𑀪𑀸𑀤𑀬𑁄 𑀯𑀺𑀯𑀸𑀤𑀫𑀽𑀮𑀸𑀦𑀻𑀢𑀺 𑀤𑀲𑁆𑀲𑀺𑀢𑀸𑀦𑀺.

𑁨𑁧𑁭. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀤𑀼𑀤𑁆𑀤𑀲𑁆𑀲𑀺𑀓𑁄𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀤𑀲𑁆𑀲𑀦𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄. 𑀓𑀸𑀡𑁄𑀢𑀺 𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀔𑀜𑁆𑀚𑁄𑀢𑀺 𑀏𑀓𑀧𑀸𑀤𑀔𑀜𑁆𑀚𑁄 𑀯𑀸 𑀉𑀪𑀬𑀧𑀸𑀤𑀔𑀜𑁆𑀚𑁄 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀳𑀢𑀧𑀓𑁆𑀔𑁄 𑀧𑀻𑀞𑀲𑀧𑁆𑀧𑀻.

𑁨𑁨𑁦. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀉𑀤𑀸𑀳𑀼 𑀅𑀩𑁆𑀬𑀸𑀓𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀦𑁆𑀢𑀺𑀆𑀤𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀯𑀺𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀯𑀸𑀤𑁄𑀢𑀺 𑀆𑀳 ‘‘𑀬𑁂𑀦 𑀯𑀺𑀯𑀤𑀦𑁆𑀢𑀺, 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀯𑀸𑀤𑁄’’𑀢𑀺. 𑀓𑀣𑀁 𑀧𑀦 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀥𑀺𑀓𑀭𑀡𑀁 𑀦𑀸𑀫𑀸𑀢𑀺 𑀆𑀳 ‘‘𑀲𑀫𑀣𑁂𑀳𑀺 𑀘 𑀅𑀥𑀺𑀓𑀭𑀡𑀻𑀬𑀢𑀸𑀬 𑀅𑀥𑀺𑀓𑀭𑀡’’𑀦𑁆𑀢𑀺, 𑀲𑀫𑀣𑁂𑀳𑀺 𑀲𑀫𑁂𑀢𑀩𑁆𑀩𑀢𑀸𑀬 𑀅𑀥𑀺𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀯𑀸𑀤𑀳𑁂𑀢𑀼𑀪𑀽𑀢𑀲𑁆𑀲 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀽𑀧𑀲𑀫𑁂𑀦 𑀢𑀧𑁆𑀧𑀪𑀯𑀲𑁆𑀲 𑀲𑀤𑁆𑀤𑀲𑁆𑀲𑀧𑀺 𑀯𑀽𑀧𑀲𑀫𑁄 𑀳𑁄𑀢𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸 𑀧𑀭𑀺𑀬𑀸𑀬𑁄 𑀲𑀫𑁆𑀪𑀯𑀢𑀺.

𑁨𑁨𑁨. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀦𑁆𑀢𑀺 𑀅𑀬𑀁 𑀯𑀺𑀓𑀧𑁆𑀧𑁄 𑀧𑀜𑁆𑀜𑀢𑁆𑀢𑀺𑀯𑀚𑁆𑀚𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀦 𑀮𑁄𑀓𑀯𑀚𑁆𑀚𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀧𑀣𑀯𑀻𑀔𑀡𑀦𑀸𑀤𑀺𑀓𑁂𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀤𑀺𑀧𑀜𑁆𑀜𑀢𑁆𑀢𑀺𑀯𑀚𑁆𑀚𑀁 𑀲𑀺𑀓𑁆𑀔𑀸𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀢𑀸𑀬 𑀯𑀢𑁆𑀢𑀲𑀻𑀲𑁂𑀦 𑀲𑀫𑁆𑀫𑀼𑀜𑁆𑀚𑀦𑀺𑀆𑀤𑀺𑀦𑀸 𑀧𑀣𑀯𑀻𑀔𑀡𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀢𑀤𑀸 𑀢𑀲𑁆𑀲𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀻’’𑀢𑀺. 𑀅𑀗𑁆𑀕𑀁 𑀳𑁄𑀢𑀻𑀢𑀺 𑀘 𑀯𑀢𑁆𑀢𑀲𑀻𑀲𑁂𑀦 𑀓𑀭𑁄𑀦𑁆𑀢𑀲𑁆𑀲𑀧𑀺 ‘‘𑀇𑀫𑀁 𑀧𑀣𑀯𑀺𑀁 𑀔𑀡𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀻𑀢𑀺𑀓𑁆𑀓𑀫𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀯𑀻𑀢𑀺𑀓𑁆𑀓𑀫𑀁 𑀅𑀚𑀸𑀦𑀦𑁆𑀢𑀲𑁆𑀲 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺. 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀓𑀼𑀲𑀮𑀘𑀺𑀢𑁆𑀢𑁂 𑀆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀼𑀲𑀮𑀘𑀺𑀢𑁆𑀢𑁂 𑀆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑁂 𑀲𑀢𑀺 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸. 𑀦𑀬𑀺𑀤𑀁 𑀅𑀗𑁆𑀕𑀧𑁆𑀧𑀳𑁄𑀦𑀓𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀇𑀤𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑁂𑀦 𑀅𑀗𑁆𑀕𑀧𑁆𑀧𑀳𑁄𑀦𑀓𑀁 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀫𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀕𑀢𑀘𑀺𑀢𑁆𑀢𑁂𑀦 𑀦𑀺𑀧𑀦𑁆𑀦𑁂 𑀦𑀺𑀤𑁆𑀤𑀸𑀬𑀦𑁆𑀢𑁂 𑀯𑀸 𑀫𑀸𑀢𑀼𑀕𑀸𑀫𑁄 𑀘𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀬𑁆𑀬𑀸𑀓𑀸𑀭𑁂𑀦 𑀯𑀢𑁆𑀢𑀫𑀸𑀦𑀭𑀽𑀧𑀫𑁂𑀯 𑀆𑀧𑀢𑁆𑀢𑀺, 𑀦 𑀓𑀼𑀲𑀮𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀢𑁄 (𑀧𑀭𑀺. 𑁩𑁨𑁩 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀩𑁆𑀬𑀸𑀓𑀢𑀁 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀉𑀝𑁆𑀞𑀸𑀢𑀩𑁆𑀩𑁂 𑀚𑀸𑀢𑁂 𑀅𑀦𑀼𑀝𑁆𑀞𑀸𑀦𑀢𑁄 𑀢𑀤𑀸𑀓𑀸𑀭𑀧𑀯𑀢𑁆𑀢𑁄 𑀭𑀽𑀧𑀓𑁆𑀔𑀦𑁆𑀥𑁄𑀯 𑀆𑀧𑀢𑁆𑀢𑀺.

‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀆𑀧𑀚𑁆𑀚𑀢𑀺 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸’’𑀢𑀺 𑀯𑀘𑀦𑀢𑁄 𑀓𑀼𑀲𑀮𑀫𑁆𑀧𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸𑀢𑀺 𑀘𑁂? 𑀦. 𑀬𑁄 𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀢𑀻𑀲𑀼 𑀘𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀘𑀺𑀢𑁆𑀢𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀼𑀲𑀮𑀘𑀺𑀢𑁆𑀢𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀓𑀼𑀲𑀮𑀘𑀺𑀢𑁆𑀢𑀓𑁆𑀔𑀡𑁂 𑀯𑀻𑀢𑀺𑀓𑁆𑀓𑀫𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀭𑀽𑀧𑀲𑀫𑁆𑀪𑀯𑀢𑁄 𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀢𑀣𑀸𑀧𑀯𑀢𑁆𑀢𑀭𑀽𑀧𑀲𑀗𑁆𑀔𑀸𑀢𑀁 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀣𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸 𑀅𑀩𑁆𑀬𑀸𑀓𑀢𑀭𑀽𑀧𑀲𑀗𑁆𑀔𑀸𑀢𑀁 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀅𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀅𑀓𑀼𑀲𑀮𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀭𑀽𑀧𑀁 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀼𑀧𑀺𑀦𑀦𑁆𑀢𑁂 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀦𑁆𑀢𑁄 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑁄 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺.

𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀴𑀓𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀧𑀜𑁆𑀜𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀘 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑀸 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀦 𑀘 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀺, 𑀲𑀬𑀁 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀦𑁆𑀢𑀺 𑀘𑀮𑀺𑀢𑀸𑀦𑀁 𑀧𑀯𑀢𑁆𑀢𑀸𑀦𑀜𑁆𑀘. 𑀘𑀮𑀺𑀢𑁄 𑀓𑀸𑀬𑁄, 𑀧𑀯𑀢𑁆𑀢𑀸 𑀯𑀸𑀘𑀸. 𑀅𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀦𑁆𑀢𑀺 𑀓𑀸𑀬𑀯𑀸𑀘𑀸𑀦𑀁 𑀅𑀜𑁆𑀜𑀢𑀭𑀫𑁂𑀯 𑀆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀩𑁆𑀬𑀸𑀓𑀢𑀦𑁆𑀢𑀺 𑀇𑀫𑀺𑀦𑀸 𑀅𑀩𑁆𑀬𑀸𑀓𑀢𑀫𑀸𑀧𑀢𑁆𑀢𑀸𑀥𑀺𑀓𑀭𑀡𑀁, 𑀦𑀸𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀤𑀺 𑀏𑀯𑀁 ‘‘𑀲𑀸𑀧𑀢𑁆𑀢𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀁 𑀯𑀸 𑀯𑀤𑀸𑀫𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 𑀯𑀘𑀦𑀢𑁄 𑀅𑀩𑁆𑀬𑀸𑀓𑀢𑀲𑁆𑀲𑀧𑀺 𑀯𑀺𑀧𑀸𑀓𑀥𑀫𑁆𑀫𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀦𑀸𑀧𑀚𑁆𑀚𑁂𑀬𑁆𑀬. 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸 𑀳𑀺 𑀆𑀧𑀢𑁆𑀢𑀺𑀬𑁄 𑀬𑀸𑀯 𑀲𑁄 𑀦 𑀚𑀸𑀦𑀸𑀢𑀺, 𑀢𑀸𑀯 𑀅𑀦𑀦𑁆𑀢𑀭𑀸𑀬𑀓𑀭𑀸, 𑀚𑀸𑀦𑀺𑀢𑁆𑀯𑀸 𑀙𑀸𑀤𑁂𑀦𑁆𑀢𑁄 𑀧𑀦 𑀙𑀸𑀤𑀦𑀧𑁆𑀧𑀘𑁆𑀘𑀬𑀸 𑀅𑀜𑁆𑀜𑀁 𑀤𑀼𑀓𑁆𑀓𑀝𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀫𑀸𑀧𑀢𑁆𑀢𑀸𑀥𑀺𑀓𑀭𑀡𑀫𑀸𑀧𑀚𑁆𑀚𑀢𑀺, 𑀢𑀜𑁆𑀘 𑀅𑀓𑀼𑀲𑀮𑀲𑀪𑀸𑀯𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀡𑀦𑁆𑀢𑀺 𑀲𑀸𑀧𑀢𑁆𑀢𑀺𑀓𑀲𑁆𑀲 𑀅𑀧𑀸𑀬𑀕𑀸𑀫𑀺𑀢𑀸 𑀯𑀼𑀢𑁆𑀢𑀸. 𑀅𑀩𑁆𑀬𑀸𑀓𑀢𑀁 𑀧𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀯𑀺𑀧𑀸𑀓𑀥𑀫𑁆𑀫𑀫𑁂𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀲𑀼𑀧𑀺 ‘‘𑀧𑀼𑀣𑀼𑀚𑁆𑀚𑀦𑁄 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀲𑁂𑀓𑁆𑀔𑁄 𑀅𑀭𑀳𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀅𑀭𑀳𑀢𑁄 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀫𑁂𑀯, 𑀢𑀣𑀸 𑀲𑁂𑀓𑁆𑀔𑀸𑀦𑀁, 𑀢𑀣𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀅𑀩𑁆𑀬𑀸𑀓𑀢𑀫𑁂𑀯. 𑀇𑀢𑀭𑀲𑁆𑀲 𑀅𑀓𑀼𑀲𑀮𑀫𑁆𑀧𑀺 𑀳𑁄𑀢𑀺 𑀅𑀩𑁆𑀬𑀸𑀓𑀢𑀫𑁆𑀧𑀺. 𑀬𑀲𑁆𑀫𑀸 𑀘𑀲𑁆𑀲 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀏𑀯𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀯𑀺𑀧𑀸𑀓𑀸𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. 𑀬𑀜𑁆𑀘 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀁, 𑀢𑀫𑁆𑀧𑀺 𑀤𑁂𑀲𑀺𑀢𑀁 𑀯𑀼𑀝𑁆𑀞𑀺𑀢𑀁 𑀯𑀸 𑀅𑀦𑀦𑁆𑀢𑀭𑀸𑀬𑀓𑀭𑀁. 𑀬𑀣𑀸 𑀳𑀺 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀁 𑀅𑀓𑀼𑀲𑀮𑀫𑁆𑀧𑀺 𑀲𑀫𑀸𑀦𑀁 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀔𑀫𑀸𑀧𑀦𑁂𑀦 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀦𑁆𑀦𑀁 𑀅𑀳𑁄𑀲𑀺𑀓𑀫𑁆𑀫𑀁 𑀳𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀤𑁂𑀲𑀺𑀢𑀁 𑀯𑀼𑀝𑁆𑀞𑀺𑀢𑀁 𑀯𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀸𑀬 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑁂𑀦 𑀅𑀦𑀦𑁆𑀢𑀭𑀸𑀬𑀓𑀭𑀁 𑀚𑀸𑀢𑀁. 𑀢𑁂𑀦𑁂𑀯 ‘‘𑀲𑀸𑀧𑀢𑁆𑀢𑀺𑀓𑀲𑁆𑀲, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀁 𑀯𑀸 𑀯𑀤𑀸𑀫𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’𑀢𑀺 𑀲𑀸𑀧𑀢𑁆𑀢𑀺𑀓𑀲𑁆𑀲𑁂𑀯 𑀅𑀧𑀸𑀬𑀕𑀸𑀫𑀺𑀢𑀸 𑀯𑀼𑀢𑁆𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸𑀯𑀡𑁆𑀡𑀦𑀸

𑁨𑁨𑁮. 𑀯𑀺𑀯𑀸𑀤𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸.

𑁨𑁨𑁯. 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀪𑀸𑀯𑁂.

𑁨𑁩𑁦. 𑀅𑀦𑁆𑀢𑀭𑁂𑀦𑀸𑀢𑀺 𑀓𑀸𑀭𑀡𑁂𑀦.

𑁨𑁩𑁧. 𑀉𑀩𑁆𑀩𑀸𑀳𑀺𑀓𑀸𑀬 𑀔𑀻𑀬𑀦𑀓𑁂 𑀧𑀸𑀘𑀺𑀢𑁆𑀢𑀺 𑀦 𑀯𑀼𑀢𑁆𑀢𑀸 𑀢𑀢𑁆𑀣 𑀙𑀦𑁆𑀤𑀤𑀸𑀦𑀲𑁆𑀲 𑀦𑀢𑁆𑀣𑀺𑀢𑀸𑀬.

𑁨𑁩𑁬. 𑀢𑀲𑁆𑀲 𑀔𑁄 𑀢𑀦𑁆𑀢𑀺 𑀏𑀢𑁆𑀣 𑀔𑁄 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁨𑁩𑁮. ‘‘𑀓𑀸 𑀘 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬𑀸’’𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺. ‘‘𑀓𑀸 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸’’𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁪𑁨. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 ‘‘𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀸𑀥𑀺𑀓𑀭𑀡’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁮𑁬) 𑀯𑀘𑀦𑀢𑁄 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀺 𑀯𑀺𑀬 𑀲𑀫𑀣𑁂𑀳𑀺 𑀲𑀫𑁂𑀢𑀩𑁆𑀩𑀁 𑀦 𑀳𑁄𑀢𑀺, 𑀓𑀺𑀦𑁆𑀢𑀼 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀢𑀻𑀢𑀺 𑀏𑀢𑁆𑀣 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.