𑁯. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀁

𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁮𑁦. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀘𑀫𑁆𑀧𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀳𑀺 𑀦𑀕𑀭𑀲𑁆𑀲 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀘𑀫𑁆𑀧𑀓𑀭𑀼𑀓𑁆𑀔𑀸𑀯 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 ‘‘𑀘𑀫𑁆𑀧𑀸’’𑀢𑀺 𑀲𑀗𑁆𑀔𑀁 𑀅𑀕𑀫𑀸𑀲𑀺. 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂𑀢𑀺 𑀢𑀲𑁆𑀲 𑀘𑀫𑁆𑀧𑀸𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀕𑁆𑀕𑀭𑀸𑀬 𑀦𑀸𑀫 𑀭𑀸𑀚𑀫𑀳𑁂𑀲𑀺𑀬𑀸 𑀔𑀡𑀺𑀢𑀢𑁆𑀢𑀸 ‘‘𑀕𑀕𑁆𑀕𑀭𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑁂 𑀲𑀫𑀦𑁆𑀢𑀢𑁄 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀦𑁆𑀢𑀁 𑀘𑀫𑁆𑀧𑀓𑀯𑀦𑀁, 𑀢𑀲𑁆𑀫𑀺𑀁 𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂’’𑀢𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺𑀩𑀤𑁆𑀥𑁄𑀢𑀺 𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀭𑁄, 𑀢𑀢𑁆𑀣 𑀩𑀤𑁆𑀥𑁄 𑀧𑀲𑀼𑀢𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀅𑀓𑀢𑀁 𑀲𑁂𑀦𑀸𑀲𑀦𑀁 𑀓𑀭𑁄𑀢𑀺, 𑀚𑀺𑀡𑁆𑀡𑀁 𑀧𑀝𑀺𑀲𑀗𑁆𑀔𑀭𑁄𑀢𑀺, 𑀓𑀢𑁂 𑀇𑀲𑁆𑀲𑀭𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀆𑀯𑀸𑀲𑁂 𑀓𑀢𑁆𑀢𑀩𑁆𑀩𑀢𑁆𑀢𑀸 𑀢𑀦𑁆𑀢𑀺𑀧𑀝𑀺𑀩𑀤𑁆𑀥𑁄’’𑀢𑀺, 𑀓𑀢𑁆𑀢𑀩𑁆𑀩𑀓𑀫𑁆𑀫𑁂 𑀉𑀲𑁆𑀲𑀸𑀳𑀫𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄.

𑀜𑀢𑁆𑀢𑀺𑀯𑀺𑀧𑀦𑁆𑀦𑀓𑀫𑁆𑀫𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁮𑁫-𑁩𑁮𑁭. 𑀧𑀝𑀺𑀓𑁆𑀓𑁄𑀲𑀦𑁆𑀢𑁂𑀲𑀽𑀢𑀺 𑀦𑀺𑀯𑀸𑀭𑁂𑀦𑁆𑀢𑁂𑀲𑀼. 𑀳𑀸𑀧𑀦𑀁 𑀯𑀸 𑀅𑀜𑁆𑀜𑀣𑀸 𑀓𑀭𑀡𑀁 𑀯𑀸 𑀦𑀢𑁆𑀣𑀻𑀢𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀏𑀓𑀸𑀬 𑀏𑀯 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀢𑁆𑀢𑀸 𑀢𑀢𑁄 𑀳𑀸𑀧𑀦𑀁 𑀦 𑀲𑀫𑁆𑀪𑀯𑀢𑀺, 𑀅𑀦𑀼𑀲𑁆𑀲𑀸𑀯𑀦𑀸𑀬 𑀅𑀪𑀸𑀯𑀢𑁄 𑀧𑀘𑁆𑀙𑀸 𑀜𑀢𑁆𑀢𑀺𑀞𑀧𑀦𑀯𑀲𑁂𑀦 𑀤𑁆𑀯𑀻𑀳𑀺 𑀜𑀢𑁆𑀢𑀻𑀳𑀺 𑀓𑀭𑀡𑀯𑀲𑁂𑀦 𑀘 𑀅𑀜𑁆𑀜𑀣𑀸 𑀓𑀭𑀡𑀁 𑀦𑀢𑁆𑀣𑀺.

𑀘𑀢𑀼𑀯𑀕𑁆𑀕𑀓𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁮𑁯. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁄 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄.

𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁯𑁫. 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀸𑀭𑀡𑀓𑀫𑁆𑀫𑀁 𑀦𑀸𑀫 𑀓𑀼𑀮𑀤𑀽𑀲𑀓𑀸𑀦𑀜𑁆𑀜𑁂𑀯 𑀅𑀦𑀼𑀜𑁆𑀜𑀸𑀢𑀁, 𑀅𑀬𑀜𑁆𑀘 ‘‘𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑁄 𑀓𑀼𑀮𑀤𑀽𑀲𑀓𑁄 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀬𑀤𑀺 𑀏𑀯𑀁 𑀓𑀣𑀁 𑀲𑀼𑀦𑀺𑀲𑁆𑀲𑀸𑀭𑀺𑀢𑁄 𑀳𑁄𑀢𑀻𑀢𑀺? 𑀩𑀸𑀮𑀅𑀩𑁆𑀬𑀢𑁆𑀢𑀢𑀸𑀤𑀺𑀬𑀼𑀢𑁆𑀢𑀲𑁆𑀲𑀧𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁨𑁭) 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀢𑀜𑁆𑀘𑁂𑀲…𑀧𑁂… 𑀢𑀲𑁆𑀫𑀸 𑀲𑀼𑀦𑀺𑀲𑁆𑀲𑀸𑀭𑀺𑀢𑁄 𑀳𑁄𑀢𑀻’’𑀢𑀺. 𑀢𑀢𑁆𑀣 𑀢𑀦𑁆𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁. 𑀏𑀲𑁄𑀢𑀺 ‘‘𑀩𑀸𑀮𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀆𑀯𑁂𑀡𑀺𑀓𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀲𑁆𑀲 𑀆𑀯𑁂𑀡𑀺𑀓𑀪𑀽𑀢𑁂𑀦 𑀓𑀼𑀮𑀤𑀽𑀲𑀓𑀪𑀸𑀯𑀮𑀓𑁆𑀔𑀡𑁂𑀦.

𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺, 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀤𑀺 ‘‘𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀻’’𑀢𑀺 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀯𑀲𑁂𑀦 𑀦𑀺𑀲𑁆𑀲𑀸𑀭𑀡𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀤𑀸 𑀦𑀺𑀲𑁆𑀲𑀸𑀭𑀡𑀁 𑀲𑀫𑁆𑀧𑀢𑁆𑀢𑁄𑀬𑁂𑀯 𑀢𑀚𑁆𑀚𑀦𑀻𑀬𑀸𑀤𑀺𑀯𑀲𑁂𑀦 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀢𑀜𑁆𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀻’’𑀢𑀺 𑀉𑀮𑁆𑀮𑀺𑀗𑁆𑀕𑁂𑀢𑁆𑀯𑀸 𑀅𑀢𑁆𑀣𑁄 𑀓𑀣𑀺𑀢𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀧𑀤𑀸𑀦𑀁 𑀅𑀯𑀔𑀡𑁆𑀟𑀦𑀁 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁄𑀢𑀺 𑀅𑀦𑀧𑀤𑀸𑀦𑁄. 𑀏𑀓𑁂𑀓𑁂𑀦𑀧𑀺 𑀅𑀗𑁆𑀕𑁂𑀦 𑀦𑀺𑀲𑁆𑀲𑀸𑀭𑀡𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀅𑀦𑀼𑀜𑁆𑀜𑀸𑀢𑀸. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.