𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀁

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸𑀯𑀡𑁆𑀡𑀦𑀸

𑁪𑁫𑁧. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀲𑀘𑁂 𑀳𑁄𑀢𑀺, 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀼𑀩𑁆𑀩𑀘𑀢𑀸𑀬 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀘 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺. 𑀦𑀢𑁆𑀣𑀺 𑀆𑀧𑀢𑁆𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀧𑀓𑁆𑀔𑁄𑀧𑀺 𑀏𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳. 𑀲𑀸 𑀧𑀦𑀸𑀧𑀢𑁆𑀢𑀺 𑀏𑀯. 𑀢𑁂𑀦𑀸𑀳 ‘‘𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀻’’𑀢𑀺.

𑁪𑁫𑁩-𑁪𑁫𑁪. 𑀲𑀫𑁆𑀪𑀫𑀅𑀢𑁆𑀣𑀯𑀲𑁂𑀦𑀸𑀢𑀺 𑀢𑀼𑀭𑀺𑀢𑀢𑁆𑀣𑀯𑀲𑁂𑀦. ‘‘𑀅𑀓𑀸𑀭𑀡𑁂 𑀢𑀼𑀫𑁆𑀳𑁂𑀳𑀺 𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄’’𑀢𑀺 𑀯𑀤𑁂𑀬𑁆𑀬𑀸𑀢𑀺 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀯𑀺𑀦𑀬𑀥𑀭𑀲𑁆𑀲 𑀯𑀘𑀦𑁂𑀦 ‘‘𑀲𑀘𑁂 𑀆𑀧𑀢𑁆𑀢𑀺 𑀳𑁄𑀢𑀺, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁂𑀦 𑀧𑀝𑀺𑀜𑁆𑀜𑀸𑀢𑀁, 𑀇𑀤𑀸𑀦𑀺𑀧𑀺 𑀢𑀲𑁆𑀲𑁂𑀯 𑀯𑀘𑀦𑁂𑀦 ‘‘𑀅𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀢𑀺𑀬𑀸 𑀓𑀢𑀢𑁆𑀢𑀸 𑀦𑀢𑁆𑀣𑁂𑀢𑁆𑀣 𑀆𑀧𑀢𑁆𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻, 𑀢𑀲𑁆𑀫𑀸 ‘‘𑀅𑀓𑀸𑀭𑀡𑁂 𑀢𑀼𑀫𑁆𑀳𑁂𑀳𑀺 𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄’’𑀢𑀺 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀬𑀤𑀺 𑀯𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀯𑀸 ‘‘𑀢𑀼𑀫𑁆𑀳𑁂 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺 𑀯𑀤𑁂𑀬𑁆𑀬𑀸𑀢𑀺 𑀬𑀲𑁆𑀫𑀸 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑁂𑀦𑀸𑀬𑀁 𑀲𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺, 𑀅𑀬𑀜𑁆𑀘 𑀉𑀤𑀓𑀸𑀯𑀲𑁂𑀲𑁂 𑀉𑀤𑀓𑀸𑀯𑀲𑁂𑀲𑀲𑀜𑁆𑀜𑀻, 𑀢𑀲𑁆𑀫𑀸 𑀲𑀸𑀧𑀢𑁆𑀢𑀺𑀓𑀲𑁆𑀲𑁂𑀯 ‘‘𑀢𑀼𑀫𑁆𑀳𑁂 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀣𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀼𑀫𑁆𑀳𑁂 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀯𑀤𑁂𑀬𑁆𑀬.

𑁪𑁫𑁫-𑁪𑁫𑁬. 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 ‘‘𑀦𑀸𑀦𑀸𑀲𑀁𑀯𑀸𑀲𑀓𑀘𑀢𑀼𑀢𑁆𑀣𑁄 𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁩𑁮𑁯) 𑀲𑀘𑁂 𑀲𑀗𑁆𑀖𑁄 𑀢𑀁 𑀕𑀡𑀧𑀽𑀭𑀓𑀁 𑀓𑀢𑁆𑀯𑀸 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀬𑀁 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄𑀧𑀺 𑀢𑀁 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀉𑀧𑀘𑀸𑀭𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀳𑀢𑁆𑀣𑁂𑀦 𑀧𑀸𑀧𑀼𑀡𑀦𑀝𑁆𑀞𑀸𑀦𑀁.

𑁪𑁫𑁭. 𑀪𑀡𑁆𑀟𑀦𑀚𑀸𑀢𑀸𑀢𑀺𑀆𑀤𑀻𑀲𑀼 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀪𑀡𑁆𑀟𑀦𑀁 𑀦𑀸𑀫, 𑀢𑀁 𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀪𑀡𑁆𑀟𑀦𑀚𑀸𑀢𑀸, 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀓𑀮𑀳𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀓𑀮𑀳𑀚𑀸𑀢𑀸, 𑀯𑀺𑀭𑀼𑀤𑁆𑀥𑀯𑀸𑀤𑀪𑀽𑀢𑀁 𑀯𑀸𑀤𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸. 𑀫𑀼𑀔𑀲𑀢𑁆𑀢𑀻𑀳𑀻𑀢𑀺 𑀯𑀸𑀘𑀸𑀲𑀢𑁆𑀢𑀻𑀳𑀺. 𑀯𑀺𑀢𑀼𑀤𑀦𑁆𑀢𑀸𑀢𑀺 𑀯𑀺𑀚𑁆𑀛𑀦𑁆𑀢𑀸. 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 ‘‘𑀇𑀥, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘, 𑀢𑀜𑁆𑀘 𑀔𑁄 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬, 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦, 𑀅𑀣 𑀔𑁄 𑀅𑀢𑁆𑀣𑀓𑀸𑀫𑀢𑀸𑀬 𑀳𑀺𑀢𑀓𑀸𑀫𑀢𑀸𑀬. 𑀲𑀸𑀫𑀕𑁆𑀕𑀻𑀓𑀸𑀭𑀓𑁄 𑀓𑀺𑀭𑁂𑀲 𑀪𑀺𑀓𑁆𑀔𑀼, 𑀢𑀲𑁆𑀫𑀸𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀬𑀣𑀸 𑀇𑀫𑁂 𑀪𑀺𑀓𑁆𑀔𑀽 𑀯𑀺𑀯𑀸𑀤𑀁 𑀆𑀭𑀤𑁆𑀥𑀸, 𑀦 𑀲𑀓𑁆𑀓𑀸 𑀫𑀬𑀸, 𑀦𑀸𑀧𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑀕𑁆𑀕𑁂 𑀓𑀸𑀢𑀼𑀁, 𑀅𑀧𑁆𑀧𑁂𑀯 𑀦𑀸𑀫 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀪𑀕𑀯𑀸 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀸𑀭𑀡𑀻𑀬𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀁 𑀓𑀭𑁂𑀬𑁆𑀬𑀸’’𑀢𑀺 𑀅𑀢𑁆𑀣𑀓𑀸𑀫𑀢𑀸𑀬 𑀳𑀺𑀢𑀓𑀸𑀫𑀢𑀸𑀬 𑀕𑀦𑁆𑀢𑁆𑀯𑀸 𑀅𑀯𑁄𑀘. 𑀢𑀲𑁆𑀫𑀸 𑀏𑀯𑀫𑀸𑀳𑀸𑀢𑀺 𑀅𑀢𑁆𑀣𑀓𑀸𑀫𑀢𑁆𑀢𑀸 𑀏𑀯𑀫𑀸𑀳, 𑀦 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄. 𑀬𑁂 𑀧𑀦 𑀢𑀤𑀸 𑀲𑀢𑁆𑀣𑀼 𑀯𑀘𑀦𑀁 𑀦 𑀕𑀡𑁆𑀳𑀺𑀁𑀲𑀼, 𑀢𑁂 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀸 𑀫𑀗𑁆𑀓𑀼𑀪𑀽𑀢𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀸 𑀉𑀪𑀬𑁂𑀲𑀫𑁆𑀧𑀺 𑀲𑀢𑁆𑀣𑀭𑀺 𑀅𑀕𑀸𑀭𑀯𑀧𑀝𑀺𑀧𑀢𑁆𑀢𑀺 𑀦𑀸𑀳𑁄𑀲𑀺.

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀻𑀖𑀸𑀯𑀼𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁫𑁮. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺𑀆𑀤𑀻𑀲𑀼 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀧𑀣𑀯𑀻𑀕𑀢𑀁 𑀦𑀺𑀥𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀼𑀭𑀢𑁄 𑀭𑀸𑀲𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀪𑀯𑀧𑀝𑀺𑀘𑁆𑀙𑀦𑁆𑀦𑀁 𑀧𑀼𑀭𑀸𑀯𑀼𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄. 𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀺, 𑀅𑀬𑀁 𑀧𑀦 𑀦 𑀓𑁂𑀯𑀮𑀁 𑀅𑀟𑁆𑀠𑁄𑀬𑁂𑀯, 𑀫𑀳𑀤𑁆𑀥𑀦𑁄 𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀆𑀳 ‘‘𑀫𑀳𑀤𑁆𑀥𑀦𑁄’’𑀢𑀺. 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑀢𑁄 𑀓𑀸𑀫𑀸 𑀪𑁄𑀕𑀸 𑀦𑀸𑀫, 𑀢𑀲𑁆𑀫𑀸 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀫𑀳𑀦𑁆𑀢𑀸 𑀉𑀴𑀸𑀭𑀸 𑀪𑁄𑀕𑀸 𑀅𑀲𑁆𑀲𑀸𑀢𑀺 𑀫𑀳𑀸𑀪𑁄𑀕𑁄. 𑀫𑀳𑀦𑁆𑀢𑀁 𑀲𑁂𑀦𑀸𑀩𑀮𑀜𑁆𑀘𑁂𑀯 𑀣𑀸𑀫𑀩𑀮𑀜𑁆𑀘 𑀏𑀢𑀲𑁆𑀲𑀸𑀢𑀺 𑀫𑀳𑀩𑁆𑀩𑀮𑁄. 𑀫𑀳𑀦𑁆𑀢𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀸𑀳𑀦𑁄 𑀏𑀢𑀲𑁆𑀲𑀸𑀢𑀺 𑀫𑀳𑀸𑀯𑀸𑀳𑀦𑁄. 𑀫𑀳𑀦𑁆𑀢𑀁 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀯𑀺𑀚𑀺𑀢𑁄. 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀓𑁄𑀲𑁄 𑀯𑀼𑀘𑁆𑀘𑀢𑀺 𑀪𑀡𑁆𑀟𑀸𑀕𑀸𑀭𑀲𑀸𑀭𑀕𑀩𑁆𑀪𑁄, 𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀲𑁆𑀲 𑀆𑀞𑀧𑀦𑀝𑁆𑀞𑀸𑀦𑀁, 𑀓𑁄𑀝𑁆𑀞𑀪𑀽𑀢𑀁 𑀅𑀕𑀸𑀭𑀁 𑀓𑁄𑀝𑁆𑀞𑀸𑀕𑀸𑀭𑀁, 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑁂𑀦 𑀥𑀦𑁂𑀦 𑀧𑀭𑀺𑀧𑀼𑀡𑁆𑀡𑀓𑁄𑀲𑁄 𑀥𑀜𑁆𑀜𑀸𑀦𑀜𑁆𑀘 𑀧𑀭𑀺𑀧𑀼𑀡𑁆𑀡𑀓𑁄𑀝𑁆𑀞𑀸𑀕𑀸𑀭𑁄𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻𑀢𑀺. 𑀬𑀣𑀸 𑀳𑀺 𑀅𑀲𑀺𑀦𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀧𑀸𑀮𑀓𑁄 𑀧𑀭𑀺𑀘𑁆𑀙𑀤𑁄 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀭𑀜𑁆𑀜𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀧𑀸𑀮𑀓𑀢𑁆𑀢𑀸 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭𑀁 𑀥𑀦𑀓𑁄𑀝𑁆𑀞𑀸𑀕𑀸𑀭𑀁 𑀥𑀜𑁆𑀜𑀓𑁄𑀝𑁆𑀞𑀸𑀕𑀸𑀭𑀁 𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀁. 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀘𑀫𑁆𑀫𑀧𑀝𑀺𑀫𑀼𑀜𑁆𑀘𑀦𑀸𑀤𑀻𑀳𑀺 𑀲𑀦𑁆𑀦𑀸𑀳𑀁 𑀓𑀸𑀭𑁂𑀢𑁆𑀯𑀸. 𑀅𑀩𑁆𑀪𑀼𑀬𑁆𑀬𑀸𑀲𑀻𑀢𑀺 𑀅𑀪𑀺𑀉𑀬𑁆𑀬𑀸𑀲𑀺, 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀻𑀢𑀺 𑀅𑀢𑁆𑀣𑁄. 𑀏𑀓𑀲𑀗𑁆𑀖𑀸𑀢𑀫𑁆𑀧𑀻𑀢𑀺 𑀏𑀓𑀧𑁆𑀧𑀳𑀸𑀭𑀫𑁆𑀧𑀺. 𑀥𑁄𑀯𑀦𑀦𑁆𑀢𑀺 𑀥𑁄𑀯𑀦𑀼𑀤𑀓𑀁. 𑀧𑀭𑀺𑀦𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. ‘‘𑀅𑀦𑀢𑁆𑀣𑀤𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀦𑀢𑁆𑀣𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺.

𑁪𑁬𑁪. 𑀯𑀕𑁆𑀕𑀪𑀸𑀯𑁂𑀦 𑀯𑀸 𑀧𑀼𑀣𑀼 𑀦𑀸𑀦𑀸 𑀲𑀤𑁆𑀤𑁄 𑀅𑀲𑁆𑀲𑀸𑀢𑀺 𑀧𑀼𑀣𑀼𑀲𑀤𑁆𑀤𑁄. 𑀲𑀫𑀚𑀦𑁄𑀢𑀺 𑀪𑀡𑁆𑀟𑀦𑁂 𑀲𑀫𑀚𑁆𑀛𑀸𑀲𑀬𑁄 𑀚𑀦𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀚𑀦𑀓𑀸𑀬𑁂. 𑀅𑀳𑀁 𑀩𑀸𑀮𑁄𑀢𑀺 𑀦 𑀫𑀜𑁆𑀜𑀺𑀢𑁆𑀣𑀸𑀢𑀺 𑀩𑀸𑀮𑀮𑀓𑁆𑀔𑀡𑁂 𑀞𑀺𑀢𑁄𑀧𑀺 ‘‘𑀅𑀳𑀁 𑀩𑀸𑀮𑁄’’𑀢𑀺 𑀦 𑀫𑀜𑁆𑀜𑀺. 𑀪𑀺𑀬𑁆𑀬𑁄 𑀘𑀸𑀢𑀺 𑀅𑀢𑁆𑀢𑀦𑁄 𑀩𑀸𑀮𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑁄 𑀪𑀺𑀬𑁆𑀬𑁄 𑀘 𑀪𑀡𑁆𑀟𑀦𑀲𑁆𑀲 𑀉𑀧𑀭𑀺𑀨𑁄𑀝𑁄 𑀯𑀺𑀬 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀡𑀪𑀸𑀯𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀫𑀜𑁆𑀜𑀺𑀢𑁆𑀣 𑀦𑀸𑀜𑁆𑀜𑀸𑀲𑀺.

𑀓𑀮𑀳𑀯𑀲𑁂𑀦 𑀧𑀯𑀢𑁆𑀢𑀯𑀸𑀘𑀸𑀬𑁂𑀯 𑀕𑁄𑀘𑀭𑀸 𑀏𑀢𑁂𑀲𑀦𑁆𑀢𑀺 𑀯𑀸𑀘𑀸𑀕𑁄𑀘𑀭𑀸. 𑀫𑀼𑀔𑀸𑀬𑀸𑀫𑀦𑁆𑀢𑀺 𑀯𑀺𑀯𑀤𑀦𑀯𑀲𑁂𑀦 𑀫𑀼𑀔𑀁 𑀆𑀬𑀸𑀫𑁂𑀢𑁆𑀯𑀸 𑀪𑀸𑀡𑀺𑀦𑁄. 𑀦 𑀢𑀁 𑀚𑀸𑀦𑀦𑁆𑀢𑀻𑀢𑀺 𑀢𑀁 𑀓𑀮𑀳𑀁 𑀦 𑀚𑀸𑀦𑀦𑁆𑀢𑀺. 𑀓𑀮𑀳𑀁 𑀓𑀭𑁄𑀦𑁆𑀢𑁄 𑀘 𑀢𑀁 𑀦 𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀦 𑀚𑀸𑀦𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀏𑀯𑀁 𑀲𑀸𑀤𑀻𑀦𑀯𑁄 𑀅𑀬’’𑀦𑁆𑀢𑀺, 𑀅𑀬𑀁 𑀓𑀮𑀳𑁄 𑀦𑀸𑀫 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀳𑀸𑀧𑀦𑀢𑁄 𑀅𑀦𑀢𑁆𑀣𑀼𑀧𑁆𑀧𑀸𑀤𑀦𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀫𑁆𑀧𑀭𑀸𑀬𑁂 𑀘 𑀲𑀸𑀤𑀻𑀦𑀯𑁄 𑀲𑀤𑁄𑀲𑁄𑀢𑀺 𑀅𑀢𑁆𑀣𑁄. 𑀢𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀢𑀁 𑀓𑀮𑀳𑀁 𑀦 𑀚𑀸𑀦𑀦𑁆𑀢𑀺. 𑀓𑀣𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀁 𑀲𑀸𑀤𑀻𑀦𑀯𑁄 𑀅𑀬’’𑀦𑁆𑀢𑀺, ‘‘𑀏𑀯𑀁 𑀲𑀸𑀤𑀻𑀦𑀯𑁄 𑀅𑀬𑀁 𑀓𑀮𑀳𑁄’’𑀢𑀺 𑀏𑀯𑀁 𑀢𑀁 𑀓𑀮𑀳𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀓𑁆𑀓𑁄𑀘𑁆𑀙𑀺 𑀫𑀦𑁆𑀢𑀺𑀆𑀤𑀻𑀲𑀼 𑀅𑀓𑁆𑀓𑁄𑀘𑁆𑀙𑀻𑀢𑀺 𑀅𑀓𑁆𑀓𑁄𑀲𑀺. 𑀅𑀯𑀥𑀻𑀢𑀺 𑀧𑀳𑀭𑀺. 𑀅𑀚𑀺𑀦𑀻𑀢𑀺 𑀓𑀽𑀝𑀲𑀓𑁆𑀔𑀺𑀑𑀢𑀸𑀭𑀡𑁂𑀦 𑀯𑀸 𑀯𑀸𑀤𑀧𑀝𑀺𑀯𑀸𑀤𑁂𑀦 𑀯𑀸 𑀓𑀭𑀡𑀼𑀢𑁆𑀢𑀭𑀺𑀬𑀓𑀭𑀡𑁂𑀦 𑀯𑀸 𑀅𑀚𑁂𑀲𑀺. 𑀅𑀳𑀸𑀲𑀻𑀢𑀺 𑀫𑀫 𑀲𑀦𑁆𑀢𑀓𑀁 𑀧𑀢𑁆𑀢𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀅𑀯𑀳𑀭𑀺. 𑀬𑁂 𑀘 𑀢𑀦𑁆𑀢𑀺 𑀬𑁂 𑀓𑁂𑀘𑀺 𑀤𑁂𑀯𑀸 𑀯𑀸 𑀫𑀦𑀼𑀲𑁆𑀲𑀸 𑀯𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸 𑀢𑀁 ‘‘𑀅𑀓𑁆𑀓𑁄𑀘𑁆𑀙𑀺 𑀫’’𑀦𑁆𑀢𑀺𑀆𑀤𑀺𑀯𑀢𑁆𑀣𑀼𑀓𑀁 𑀓𑁄𑀥𑀁 𑀲𑀓𑀝𑀥𑀼𑀭𑀁 𑀯𑀺𑀬 𑀦𑀤𑁆𑀥𑀺𑀦𑀸 𑀧𑀽𑀢𑀺𑀫𑀘𑁆𑀙𑀸𑀤𑀻𑀦𑀺 𑀯𑀺𑀬 𑀘 𑀓𑀼𑀲𑀸𑀤𑀻𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑁂𑀞𑁂𑀦𑁆𑀢𑀸 𑀉𑀧𑀦𑀬𑁆𑀳𑀦𑁆𑀢𑀺 𑀉𑀧𑀦𑀸𑀳𑀯𑀲𑁂𑀦 𑀅𑀦𑀼𑀩𑀦𑁆𑀥𑀦𑁆𑀢𑀺, 𑀢𑁂𑀲𑀁 𑀲𑀓𑀺𑀁 𑀉𑀧𑁆𑀧𑀦𑁆𑀦𑀁 𑀯𑁂𑀭𑀁 𑀦 𑀲𑀫𑁆𑀫𑀢𑀻𑀢𑀺 𑀅𑀢𑁆𑀣𑁄.

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀻𑀢𑀺 𑀅𑀲𑁆𑀲𑀢𑀺𑀬𑀸 𑀅𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀓𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀯𑀲𑁂𑀦 𑀯𑀸 𑀬𑁂 𑀢𑀁 𑀅𑀓𑁆𑀓𑁄𑀲𑀸𑀤𑀺𑀯𑀢𑁆𑀣𑀼𑀓𑀁 𑀓𑁄𑀥𑀁 ‘‘𑀢𑀬𑀸𑀧𑀺 𑀓𑁄𑀘𑀺 𑀦𑀺𑀤𑁆𑀤𑁄𑀲𑁄 𑀧𑀼𑀭𑀺𑀫𑀪𑀯𑁂 𑀅𑀓𑁆𑀓𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀺, 𑀧𑀳𑀝𑁄 𑀪𑀯𑀺𑀲𑁆𑀲𑀢𑀺, 𑀓𑀽𑀝𑀲𑀓𑁆𑀔𑀺𑀁 𑀑𑀢𑀸𑀭𑁂𑀢𑁆𑀯𑀸 𑀚𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀲𑀘𑀺 𑀢𑁂 𑀧𑀲𑀬𑁆𑀳 𑀓𑀺𑀜𑁆𑀘𑀺 𑀅𑀘𑁆𑀙𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦𑀺𑀤𑁆𑀤𑁄𑀲𑁄 𑀳𑀼𑀢𑁆𑀯𑀸𑀧𑀺 𑀅𑀓𑁆𑀓𑁄𑀲𑀸𑀤𑀻𑀦𑀺 𑀧𑀸𑀧𑀼𑀡𑀸𑀲𑀻’’𑀢𑀺 𑀏𑀯𑀁 𑀦 𑀉𑀧𑀦𑀬𑁆𑀳𑀦𑁆𑀢𑀺, 𑀢𑁂𑀲𑀼 𑀧𑀫𑀸𑀤𑁂𑀦 𑀉𑀧𑁆𑀧𑀦𑁆𑀦𑀫𑁆𑀧𑀺 𑀯𑁂𑀭𑀁 𑀇𑀫𑀺𑀦𑀸 𑀅𑀦𑀼𑀧𑀦𑀬𑁆𑀳𑀦𑁂𑀦 𑀦𑀺𑀭𑀺𑀦𑁆𑀥𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀉𑀧𑀲𑀫𑁆𑀫𑀢𑀺.

𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀻𑀢𑀺 𑀬𑀣𑀸 𑀳𑀺 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀅𑀲𑀼𑀘𑀺𑀫𑀓𑁆𑀔𑀺𑀢𑀁 𑀞𑀸𑀦𑀁 𑀢𑁂𑀳𑁂𑀯 𑀅𑀲𑀼𑀘𑀻𑀳𑀺 𑀥𑁄𑀯𑀦𑁆𑀢𑁄 𑀲𑀼𑀤𑁆𑀥𑀁 𑀦𑀺𑀕𑁆𑀕𑀦𑁆𑀥𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀢𑀁 𑀞𑀸𑀦𑀁 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀅𑀲𑀼𑀤𑁆𑀥𑀢𑀭𑀜𑁆𑀘 𑀤𑀼𑀕𑁆𑀕𑀦𑁆𑀥𑀢𑀭𑀜𑁆𑀘 𑀳𑁄𑀢𑀺, 𑀏𑀯𑀫𑁂𑀯 𑀅𑀓𑁆𑀓𑁄𑀲𑀦𑁆𑀢𑀁 𑀧𑀘𑁆𑀘𑀓𑁆𑀓𑁄𑀲𑀦𑁆𑀢𑁄 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀦𑁆𑀢𑁄 𑀯𑁂𑀭𑁂𑀦 𑀯𑁂𑀭𑀁 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀪𑀺𑀬𑁆𑀬𑁄 𑀯𑁂𑀭𑀫𑁂𑀯 𑀓𑀭𑁄𑀢𑀺. 𑀇𑀢𑀺 𑀯𑁂𑀭𑀸𑀦𑀺 𑀦𑀸𑀫 𑀯𑁂𑀭𑁂𑀦 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀓𑀸𑀮𑁂 𑀦 𑀲𑀫𑁆𑀫𑀦𑁆𑀢𑀺, 𑀅𑀣 𑀔𑁄 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀻𑀢𑀺 𑀬𑀣𑀸 𑀧𑀦 𑀢𑀸𑀦𑀺 𑀔𑁂𑀴𑀸𑀤𑀻𑀦𑀺 𑀅𑀲𑀼𑀘𑀻𑀦𑀺 𑀯𑀺𑀧𑁆𑀧𑀲𑀦𑁆𑀦𑁂𑀦 𑀉𑀤𑀓𑁂𑀦 𑀥𑁄𑀯𑀺𑀬𑀫𑀸𑀦𑀸𑀦𑀺 𑀦𑀲𑁆𑀲𑀦𑁆𑀢𑀺, 𑀢𑀁 𑀞𑀸𑀦𑀁 𑀲𑀼𑀤𑁆𑀥𑀁 𑀳𑁄𑀢𑀺 𑀦𑀺𑀕𑁆𑀕𑀦𑁆𑀥𑀁, 𑀏𑀯𑀫𑁂𑀯 𑀅𑀯𑁂𑀭𑁂𑀦 𑀔𑀦𑁆𑀢𑀺𑀫𑁂𑀢𑁆𑀢𑁄𑀤𑀓𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀲𑀗𑁆𑀔𑀸𑀦𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑁂𑀭𑀸𑀦𑀺 𑀯𑀽𑀧𑀲𑀫𑁆𑀫𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀏𑀲 𑀅𑀯𑁂𑀭𑁂𑀦 𑀯𑁂𑀭𑀽𑀧𑀲𑀫𑀦𑀲𑀗𑁆𑀔𑀸𑀢𑁄 𑀧𑁄𑀭𑀸𑀡𑀓𑁄 𑀥𑀫𑁆𑀫𑁄 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸𑀦𑀁 𑀕𑀢𑀫𑀕𑁆𑀕𑁄.

𑀦 𑀚𑀸𑀦𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀦 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀢𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀫𑁂𑀥𑀕𑀸 𑀓𑀮𑀳𑀸 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑀁 𑀕𑀘𑁆𑀙𑀦𑁆𑀢𑀺. 𑀓𑀣𑀁 𑀢𑁂 𑀲𑀫𑁆𑀫𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸𑀢𑀺 𑀢𑁂 𑀧𑀡𑁆𑀟𑀺𑀢𑀸 ‘‘𑀫𑀬𑀁 𑀫𑀘𑁆𑀘𑀼𑀲𑀫𑀻𑀧𑀁 𑀕𑀘𑁆𑀙𑀸𑀫𑀸’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑁂𑀥𑀕𑀸𑀦𑀁 𑀓𑀮𑀳𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀣 𑀦𑁂𑀲𑀁 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑁂 𑀫𑁂𑀥𑀕𑀸 𑀲𑀫𑁆𑀫𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀻𑀢𑀺 𑀬𑁂 𑀫𑀸𑀢𑀸𑀧𑀺𑀢𑀽𑀦𑀁 𑀅𑀝𑁆𑀞𑀻𑀦𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀡𑁂 𑀳𑀭𑀦𑁆𑀢𑀺, 𑀕𑀯𑀸𑀤𑀻𑀦𑀺 𑀘 𑀧𑀲𑀬𑁆𑀳 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁 𑀢𑁂𑀲𑀫𑁆𑀧𑀺 𑀲𑀗𑁆𑀕𑀢𑀺 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀡𑁆𑀡𑀸𑀯𑀡𑁆𑀡𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 ‘‘𑀩𑀸𑀮𑀲𑀳𑀸𑀬𑀢𑀸𑀬 𑀇𑀫𑁂 𑀪𑀺𑀓𑁆𑀔𑀽 𑀓𑀮𑀳𑀧𑀲𑀼𑀢𑀸, 𑀧𑀡𑁆𑀟𑀺𑀢𑀲𑀳𑀸𑀬𑀸𑀦𑀁 𑀧𑀦 𑀇𑀤𑀁 𑀦 𑀲𑀺𑀬𑀸’’𑀢𑀺 𑀧𑀡𑁆𑀟𑀺𑀢𑀲𑀳𑀸𑀬𑀲𑁆𑀲 𑀩𑀸𑀮𑀲𑀳𑀸𑀬𑀲𑁆𑀲 𑀘 𑀯𑀡𑁆𑀡𑀸𑀯𑀡𑁆𑀡𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀦𑀺𑀧𑀓𑀦𑁆𑀢𑀺 𑀦𑁂𑀧𑀓𑁆𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀦𑁆𑀢𑀺 𑀪𑀤𑁆𑀤𑀓𑀯𑀺𑀳𑀸𑀭𑀺𑀁 𑀧𑀡𑁆𑀟𑀺𑀢𑀁. 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀭𑀸𑀕𑀪𑀬𑀤𑁄𑀲𑀪𑀬𑀸𑀤𑀬𑁄 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘𑀸𑀢𑀺 𑀲𑀩𑁆𑀩𑁂𑀯 𑀧𑀭𑀺𑀲𑁆𑀲𑀬𑁂 𑀅𑀪𑀺𑀪𑀯𑀺𑀢𑁆𑀯𑀸.

𑀏𑀓𑀓𑀸 𑀘𑀭𑀺𑀁𑀲𑀽𑀢𑀺 ‘‘𑀇𑀤𑀁 𑀭𑀚𑁆𑀚𑀁 𑀦𑀸𑀫 𑀫𑀳𑀦𑁆𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀓𑀺𑀁 𑀅𑀫𑁆𑀳𑀸𑀓𑀁 𑀭𑀚𑁆𑀚𑁂𑀦 𑀓𑀸𑀭𑀺𑀢𑁂𑀦𑀸’’𑀢𑀺 𑀭𑀝𑁆𑀞𑀁 𑀧𑀳𑀸𑀬 𑀢𑀢𑁄 𑀫𑀳𑀸𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑀸 𑀘𑀭𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀻𑀪𑀸𑀯𑀸𑀪𑀺𑀭𑀢𑀲𑁆𑀲 𑀏𑀓𑀓𑀲𑁆𑀲𑁂𑀯 𑀘𑀭𑀺𑀢𑀁 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸𑀢𑀺 𑀘𑀽𑀴𑀲𑀻𑀮𑀁 𑀫𑀚𑁆𑀛𑀺𑀫𑀲𑀻𑀮𑀁 𑀫𑀳𑀸𑀲𑀻𑀮𑀁 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀢𑁂𑀭𑀲 𑀥𑀼𑀢𑀕𑀼𑀡𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀬𑀁 𑀲𑀳𑀸𑀬𑀢𑀸 𑀦𑀸𑀫, 𑀲𑀸 𑀩𑀸𑀮𑀁 𑀦𑀺𑀲𑁆𑀲𑀸𑀬 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸. 𑀫𑀸𑀢𑀗𑁆𑀕𑁄 𑀅𑀭𑀜𑁆𑀜𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀢𑀺 𑀲𑀭𑀮𑁄𑀧𑁂𑀦 𑀲𑀦𑁆𑀥𑀺. ‘‘𑀫𑀸𑀢𑀗𑁆𑀕𑀭𑀜𑁆𑀜𑁄’’𑀢𑀺𑀧𑀺 𑀧𑀸𑀞𑁄, 𑀅𑀭𑀜𑁆𑀜𑀓𑁄 𑀫𑀸𑀢𑀗𑁆𑀕𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀗𑁆𑀕-𑀲𑀤𑁆𑀤𑁂𑀦𑁂𑀯 𑀳𑀢𑁆𑀣𑀺𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦𑀸𑀕𑀯𑀘𑀦𑀁 𑀢𑀲𑁆𑀲 𑀫𑀳𑀢𑁆𑀢𑀯𑀺𑀪𑀸𑀯𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀦𑀸𑀕𑁄𑀢𑀺 𑀫𑀳𑀦𑁆𑀢𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄 𑀳𑀺 𑀦𑀸𑀕-𑀲𑀤𑁆𑀤𑁄 𑀳𑁄𑀢𑀺 ‘‘𑀏𑀢𑀁 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁩𑁫).

𑀤𑀻𑀖𑀸𑀯𑀼𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁬𑁫. 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄𑀢𑀺 𑀉𑀧𑀸𑀮𑀺𑀕𑀳𑀧𑀢𑀺𑀲𑁆𑀲 𑀏𑀯𑀁𑀦𑀸𑀫𑀓𑁄 𑀪𑁄𑀕𑀕𑀸𑀫𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀲𑀼 𑀯𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂𑀲𑀼 𑀯𑀸 𑀅𑀦𑁆𑀢𑀫𑀲𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑀫𑁆𑀧𑀺 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀻𑀓𑀦𑀺𑀲𑁆𑀲𑀝𑁄 𑀳𑀢𑁆𑀣𑀻 𑀯𑀺𑀬 𑀬𑀽𑀣𑀦𑀺𑀲𑁆𑀲𑀝𑁄 𑀓𑀸𑀴𑀲𑀻𑀳𑁄 𑀯𑀺𑀬 𑀯𑀸𑀢𑀘𑁆𑀙𑀺𑀦𑁆𑀦𑁄 𑀯𑀮𑀸𑀳𑀓𑁄 𑀯𑀺𑀬 𑀘 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺. 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀕𑀡𑁂 𑀓𑀺𑀭𑀲𑁆𑀲 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀓𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑀼𑀓𑀸𑀫𑀢𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀲𑀻𑀢𑀸𑀤𑀺𑀧𑀻𑀴𑀺𑀢𑁄 𑀉𑀡𑁆𑀳𑀸𑀤𑀺𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀬 𑀉𑀧𑀲𑀗𑁆𑀓𑀫𑀺. 𑀅𑀣 𑀯𑀸 𑀪𑀕𑀯𑀢𑀸 𑀲𑁄 𑀆𑀤𑀻𑀦𑀯𑁄 𑀧𑀕𑁂𑀯 𑀧𑀭𑀺𑀜𑁆𑀜𑀸𑀢𑁄, 𑀦 𑀢𑁂𑀦 𑀲𑀢𑁆𑀣𑀸 𑀦𑀺𑀩𑁆𑀩𑀺𑀦𑁆𑀦𑁄, 𑀢𑀲𑁆𑀫𑀺𑀁 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀓𑁂𑀘𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀦𑀸𑀳𑁂𑀲𑀼𑀁, 𑀢𑁂𑀦 𑀅𑀜𑁆𑀜𑀢𑁆𑀣 𑀕𑀫𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀫𑀦𑀼𑀧𑀸𑀬𑁄𑀢𑀺 𑀧𑀸𑀮𑀺𑀮𑁂𑀬𑁆𑀬𑀓𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑁄 𑀏𑀓𑀯𑀺𑀳𑀸𑀭𑀺𑀁 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀲𑀫𑁆𑀧𑀳𑀁𑀲𑁂𑀢𑀼𑀁 𑀢𑀢𑁆𑀣 𑀕𑀢𑁄. 𑀏𑀯𑀁 𑀕𑀢𑁂 𑀘 𑀲𑀢𑁆𑀣𑀭𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀳𑀁𑀲𑀼 ‘‘𑀆𑀯𑀼𑀲𑁄 𑀆𑀦𑀦𑁆𑀤 𑀲𑀢𑁆𑀣𑀸 𑀏𑀓𑀓𑁄𑀯 𑀕𑀢𑁄, 𑀫𑀬𑀁 𑀅𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺. ‘‘𑀆𑀯𑀼𑀲𑁄, 𑀬𑀤𑀸 𑀪𑀕𑀯𑀸 𑀲𑀸𑀫𑀁 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀺, 𑀢𑀤𑀸 𑀏𑀓𑀘𑀸𑀭𑀺𑀓𑀁 𑀘𑀭𑀺𑀢𑀼𑀁 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄, 𑀲𑀸𑀯𑀓𑁂𑀦 𑀦𑀸𑀫 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀦 𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀪𑀕𑀯𑀸 𑀅𑀦𑀼𑀕𑀦𑁆𑀢𑀩𑁆𑀩𑁄’’𑀢𑀺 𑀦𑀺𑀯𑀸𑀭𑁂𑀲𑀺, 𑀲𑀬𑀫𑁆𑀧𑀺 𑀦𑀸𑀦𑀼𑀕𑀜𑁆𑀙𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀏𑀓𑀻𑀪𑀸𑀯𑁂 𑀆𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀓𑀣𑀸𑀬.

𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀘𑀻𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁬𑁬. 𑀬𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁄𑀢𑀺 𑀢𑀢𑁆𑀣 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀬𑀣𑀸 𑀦𑀸𑀫 𑀚𑀺𑀖𑀘𑁆𑀙𑀺𑀢𑀲𑁆𑀲 𑀪𑁄𑀚𑀦𑁂, 𑀧𑀺𑀧𑀸𑀲𑀺𑀢𑀲𑁆𑀲 𑀧𑀸𑀦𑀻𑀬𑁂, 𑀲𑀻𑀢𑁂𑀦 𑀨𑀼𑀝𑁆𑀞𑀲𑁆𑀲 𑀉𑀡𑁆𑀳𑁂, 𑀉𑀡𑁆𑀳𑁂𑀦 𑀨𑀼𑀝𑁆𑀞𑀲𑁆𑀲 𑀲𑀻𑀢𑁂, 𑀤𑀼𑀓𑁆𑀔𑀺𑀢𑀲𑁆𑀲 𑀲𑀼𑀔𑁂 𑀅𑀪𑀺𑀭𑀼𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀪𑀕𑀯𑀢𑁄 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀸𑀧𑀦𑁆𑀦𑁂 𑀅𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑁂, 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀇𑀫𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀆𑀧𑀸𑀣𑀫𑀸𑀕𑀫𑀺𑀁𑀲𑀼, 𑀅𑀣 𑀦𑁂𑀲𑀁 𑀧𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀺 ‘‘𑀏𑀯𑀸𑀬𑀁 𑀧𑀝𑀺𑀧𑀢𑁆𑀢𑀺𑀅𑀦𑀼𑀓𑁆𑀓𑀫𑁂𑀦 𑀓𑁄𑀲𑀫𑁆𑀩𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀦𑀽𑀧𑀸𑀬𑁄 𑀳𑁄𑀢𑀻’’𑀢𑀺. 𑀯𑀺𑀳𑀭𑀦𑁆𑀢𑀻𑀢𑀺 𑀲𑀸𑀫𑀕𑁆𑀕𑀺𑀭𑀲𑀁 𑀅𑀦𑀼𑀪𑀯𑀫𑀸𑀦𑀸 𑀯𑀺𑀳𑀭𑀦𑁆𑀢𑀺.

𑀤𑀸𑀬𑀧𑀸𑀮𑁄𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁩𑁨𑁫) 𑀅𑀭𑀜𑁆𑀜𑀧𑀸𑀮𑁄. 𑀲𑁄 𑀅𑀭𑀜𑁆𑀜𑀁 𑀬𑀣𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀤𑁂𑀲𑁂𑀦 𑀫𑀦𑀼𑀲𑁆𑀲𑀸 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀦𑀺𑀬𑁆𑀬𑀸𑀲𑀁 𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁 𑀯𑀸 𑀦 𑀳𑀭𑀦𑁆𑀢𑀺, 𑀏𑀯𑀁 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀅𑀭𑀜𑁆𑀜𑀲𑁆𑀲 𑀬𑁄𑀚𑀺𑀢𑁂 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀭𑀜𑁆𑀜𑀁 𑀭𑀓𑁆𑀔𑀢𑀺, 𑀢𑀲𑁆𑀫𑀸 ‘‘𑀤𑀸𑀬𑀧𑀸𑀮𑁄’’𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀳𑀺𑀢𑀁 𑀓𑀸𑀫𑀬𑀫𑀸𑀦𑀲𑀪𑀸𑀯𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀬𑁄 𑀳𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀧𑀳𑀺𑀡𑀕𑀫𑀦𑀸𑀤𑀻𑀦𑀁 𑀯𑀲𑁂𑀦 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀸𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀦 𑀅𑀢𑁆𑀢𑀓𑀸𑀫𑀭𑀽𑀧𑁄 𑀦𑀸𑀫. 𑀬𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀁 𑀧𑀳𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀧𑁆𑀧𑀸𑀬𑀥𑀼𑀢𑀗𑁆𑀕𑀁 𑀅𑀥𑀺𑀝𑁆𑀞𑀸𑀬 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑁆𑀢𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑁄 𑀯𑀺𑀘𑀭𑀢𑀺, 𑀅𑀬𑀁 𑀅𑀢𑁆𑀢𑀓𑀸𑀫𑁄 𑀦𑀸𑀫. 𑀢𑁂𑀧𑀺 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀻’’𑀢𑀺.

𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻𑀢𑀺 𑀢𑁂𑀲𑀁 𑀅𑀨𑀸𑀲𑀼𑀓𑀁 𑀫𑀸 𑀅𑀓𑀸𑀲𑀻𑀢𑀺 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀲𑀫𑀕𑁆𑀕𑀸 𑀯𑀺𑀳𑀭𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀘 𑀕𑀢𑀝𑁆𑀞𑀸𑀦𑁂 𑀪𑀡𑁆𑀟𑀦𑀓𑀮𑀳𑀯𑀺𑀯𑀸𑀤𑀸 𑀯𑀢𑁆𑀢𑀦𑁆𑀢𑀺, 𑀢𑀺𑀔𑀺𑀡𑀲𑀺𑀗𑁆𑀕𑁄 𑀘𑀡𑁆𑀟𑀕𑁄𑀡𑁄 𑀯𑀺𑀬 𑀑𑀯𑀺𑀚𑁆𑀛𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀣𑁂𑀓𑀫𑀕𑁆𑀕𑁂𑀦 𑀤𑁆𑀯𑀺𑀦𑁆𑀦𑀁 𑀕𑀫𑀦𑀁 𑀦 𑀳𑁄𑀢𑀺, 𑀓𑀤𑀸𑀘𑀺 𑀅𑀬𑀫𑁆𑀧𑀺 𑀏𑀯𑀁 𑀓𑀭𑁄𑀦𑁆𑀢𑁄 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑀕𑁆𑀕𑀯𑀸𑀲𑀁 𑀪𑀺𑀦𑁆𑀤𑁂𑀬𑁆𑀬, 𑀧𑀸𑀲𑀸𑀤𑀺𑀓𑁄 𑀘 𑀧𑀦𑁂𑀲 𑀲𑀼𑀯𑀡𑁆𑀡𑀯𑀡𑁆𑀡𑁄 𑀭𑀲𑀕𑀺𑀤𑁆𑀥𑁄 𑀫𑀜𑁆𑀜𑁂, 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀡𑀻𑀢𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀯𑀡𑁆𑀡𑀓𑀣𑀦𑀸𑀤𑀻𑀳𑀺 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀁 𑀪𑀺𑀦𑁆𑀤𑁂𑀬𑁆𑀬, 𑀯𑀲𑀦𑀝𑁆𑀞𑀸𑀦𑀸𑀦𑀺 𑀘𑀸𑀧𑀺 𑀏𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀦𑀺𑀩𑀤𑁆𑀥𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀢𑀺𑀲𑁆𑀲𑁄𑀯 𑀧𑀡𑁆𑀡𑀲𑀸𑀮𑀸 𑀢𑀬𑁄 𑀘𑀗𑁆𑀓𑀫𑀸 𑀢𑀻𑀡𑀺 𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀢𑀻𑀡𑀺 𑀫𑀜𑁆𑀘𑀧𑀻𑀞𑀸𑀦𑀺, 𑀅𑀬𑀁 𑀧𑀦 𑀲𑀫𑀡𑁄 𑀫𑀳𑀸𑀓𑀸𑀬𑁄 𑀯𑀼𑀟𑁆𑀠𑀢𑀭𑁄 𑀫𑀜𑁆𑀜𑁂 𑀪𑀯𑀺𑀲𑁆𑀲𑀢𑀺, 𑀲𑁄 𑀅𑀓𑀸𑀮𑁂 𑀇𑀫𑁂 𑀓𑀼𑀮𑀧𑀼𑀢𑁆𑀢𑁂 𑀲𑁂𑀦𑀸𑀲𑀦𑀸 𑀯𑀼𑀝𑁆𑀞𑀧𑁂𑀲𑁆𑀲𑀢𑀺, 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀏𑀢𑁂𑀲𑀁 𑀅𑀨𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻’’𑀢𑀺 𑀪𑀕𑀯𑀦𑁆𑀢𑀁 𑀯𑀸𑀭𑁂𑀢𑀺.

𑀓𑀺𑀁 𑀧𑀦𑁂𑀲 𑀚𑀸𑀦𑀦𑁆𑀢𑁄 𑀯𑀸𑀭𑁂𑀲𑀺 𑀅𑀚𑀸𑀦𑀦𑁆𑀢𑁄𑀢𑀺? 𑀅𑀚𑀸𑀦𑀦𑁆𑀢𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 𑀦𑀸𑀫 𑀬𑀤𑀸 𑀅𑀦𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀩𑁆𑀬𑀸𑀫𑀧𑁆𑀧𑀪𑀸𑀬 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀘 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀤𑀸 ‘‘𑀓𑁄 𑀏𑀲𑁄’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀸𑀦𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀤𑀸 𑀧𑀦 𑀪𑀕𑀯𑀸 ‘‘𑀫𑀸𑀲𑁆𑀲𑀼 𑀓𑁄𑀘𑀺 𑀫𑀫 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀜𑁆𑀜𑀸𑀲𑀻’’𑀢𑀺 𑀢𑀣𑀸𑀭𑀽𑀧𑁂𑀦 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀦 𑀲𑀩𑁆𑀩𑀫𑁆𑀧𑀺 𑀢𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀘𑀻𑀯𑀭𑀕𑀩𑁆𑀪𑁂𑀦 𑀯𑀺𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀮𑀸𑀳𑀓𑀕𑀩𑁆𑀪𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀅𑀕𑀫𑀸𑀲𑀺. 𑀇𑀢𑀺 𑀢𑀁 𑀅𑀚𑀸𑀦𑀦𑁆𑀢𑁄𑀯 𑀤𑀸𑀬𑀧𑀸𑀮𑁄 𑀯𑀸𑀭𑁂𑀲𑀺.

𑀏𑀢𑀤𑀯𑁄𑀘𑀸𑀢𑀺 𑀣𑁂𑀭𑁄 𑀓𑀺𑀭 ‘‘𑀫𑀸 𑀲𑀫𑀡𑀸’’𑀢𑀺 𑀤𑀸𑀬𑀧𑀸𑀮𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀁 𑀢𑀬𑁄 𑀚𑀦𑀸 𑀇𑀥 𑀯𑀺𑀳𑀭𑀸𑀫, 𑀅𑀜𑁆𑀜𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀜𑁆𑀘 𑀤𑀸𑀬𑀧𑀸𑀮𑁄 𑀧𑀩𑁆𑀩𑀚𑀺𑀢𑁂𑀦 𑀯𑀺𑀬 𑀲𑀤𑁆𑀥𑀺𑀁 𑀓𑀣𑁂𑀢𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀯𑀸𑀝𑁆𑀞𑀸𑀦𑀢𑁄 𑀉𑀝𑁆𑀞𑀸𑀬 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀪𑀕𑀯𑀸𑀧𑀺 𑀣𑁂𑀭𑀲𑁆𑀲 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀲𑀭𑀻𑀭𑁄𑀪𑀸𑀲𑀁 𑀫𑀼𑀜𑁆𑀘𑀺, 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀯𑀺𑀭𑀸𑀚𑀺𑀢𑀸 𑀩𑁆𑀬𑀸𑀫𑀧𑁆𑀧𑀪𑀸 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀣𑁂𑀭𑁄 ‘‘𑀅𑀬𑀁 𑀤𑀸𑀬𑀧𑀸𑀮𑁄 𑀨𑀡𑀓𑀢𑀆𑀲𑀻𑀯𑀺𑀲𑀁 𑀕𑀻𑀯𑀸𑀬 𑀕𑀳𑁂𑀢𑀼𑀁 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀯𑀺𑀬 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄𑀯 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀦𑀸 𑀯𑀺𑀬 𑀲𑀤𑁆𑀥𑀺𑀁 𑀓𑀣𑁂𑀢𑀻’’𑀢𑀺 𑀦𑀺𑀯𑀸𑀭𑁂𑀦𑁆𑀢𑁄 𑀏𑀢𑀁 ‘‘𑀫𑀸𑀯𑀼𑀲𑁄, 𑀤𑀸𑀬𑀧𑀸𑀮𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀢𑁆𑀯𑀸𑀯 𑀉𑀧𑀲𑀗𑁆𑀓𑀫𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀫𑀬𑀁 𑀢𑀬𑁄 𑀚𑀦𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀸𑀫, 𑀲𑀘𑀸𑀳𑀁 𑀏𑀓𑀓𑁄𑀯 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀫𑀕𑁆𑀕𑀯𑀸𑀲𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀧𑀺𑀬𑀫𑀺𑀢𑁆𑀢𑁂 𑀕𑀳𑁂𑀢𑁆𑀯𑀸𑀯 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀬𑀣𑀸 𑀘 𑀪𑀕𑀯𑀸 𑀫𑀬𑁆𑀳𑀁 𑀧𑀺𑀬𑁄, 𑀏𑀯𑀁 𑀲𑀳𑀸𑀬𑀸𑀦𑀫𑁆𑀧𑀺 𑀫𑁂 𑀧𑀺𑀬𑁄’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀼𑀓𑀸𑀫𑁄 𑀲𑀬𑀁 𑀅𑀓𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀓𑁂𑀘𑀺 𑀧𑀦 ‘‘𑀢𑁂𑀲𑀁 𑀣𑁂𑀭𑀸𑀦𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀘𑀗𑁆𑀓𑀫𑀦𑀓𑁄𑀝𑀺𑀬𑀸 𑀪𑀕𑀯𑀢𑁄 𑀆𑀕𑀫𑀦𑀫𑀕𑁆𑀕𑁄 𑀳𑁄𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀢𑁂𑀲𑀁 𑀲𑀜𑁆𑀜𑀁 𑀤𑀤𑀫𑀸𑀦𑁄𑀯 𑀕𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀪𑀺𑀓𑁆𑀓𑀫𑀣𑀸𑀢𑀺 𑀇𑀢𑁄 𑀆𑀕𑀘𑁆𑀙𑀣. 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀻𑀢𑀺 𑀯𑀺𑀓𑀲𑀺𑀢𑀧𑀤𑀼𑀫𑀲𑀦𑁆𑀦𑀺𑀪𑁂𑀳𑀺 𑀚𑀸𑀮𑀳𑀢𑁆𑀣𑁂𑀳𑀺 𑀫𑀡𑀺𑀯𑀡𑁆𑀡𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑁂𑀲𑀼 𑀧𑀺𑀝𑁆𑀞𑀺𑀧𑀸𑀤𑁂𑀲𑀼 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀤𑁂𑀦 𑀧𑀸𑀤𑀁 𑀖𑀁𑀲𑁂𑀦𑁆𑀢𑁄 𑀧𑀓𑁆𑀔𑀸𑀮𑁂𑀲𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀦𑀸𑀫 𑀦 𑀉𑀧𑀮𑀺𑀫𑁆𑀧𑀢𑀺, 𑀓𑀲𑁆𑀫𑀸 𑀧𑀓𑁆𑀔𑀸𑀮𑁂𑀲𑀻𑀢𑀺? 𑀲𑀭𑀻𑀭𑀲𑁆𑀲 𑀉𑀢𑀼𑀕𑁆𑀕𑀳𑀡𑀢𑁆𑀣𑀁 𑀢𑁂𑀲𑀜𑁆𑀘 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁. 𑀅𑀫𑁆𑀳𑁂𑀳𑀺 𑀅𑀪𑀺𑀳𑀝𑁂𑀦 𑀉𑀤𑀓𑁂𑀦 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺, 𑀧𑀭𑀺𑀪𑁄𑀕𑀁 𑀅𑀓𑀸𑀲𑀻𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀮𑀯𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀻𑀡𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀓𑁆𑀔𑀸𑀮𑁂𑀲𑀺.

𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀲𑁄 𑀓𑀺𑀭 𑀢𑁂𑀲𑀁 𑀯𑀼𑀟𑁆𑀠𑀢𑀭𑁄, 𑀢𑀲𑁆𑀲 𑀲𑀗𑁆𑀕𑀳𑁂 𑀓𑀢𑁂 𑀲𑁂𑀲𑀸𑀦𑀁 𑀓𑀢𑁄𑀯 𑀳𑁄𑀢𑀻𑀢𑀺 𑀣𑁂𑀭𑀜𑁆𑀜𑁂𑀯 𑀏𑀢𑀁 ‘‘𑀓𑀘𑁆𑀘𑀺 𑀯𑁄 𑀅𑀦𑀼𑀭𑀼𑀤𑁆𑀥𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀅𑀦𑀼𑀭𑀼𑀤𑁆𑀥𑀸𑀢𑀺 𑀯𑀸 𑀏𑀓𑀲𑁂𑀲𑀦𑀬𑁂𑀦 𑀯𑀼𑀢𑁆𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀲𑁆𑀲𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀘 𑀲𑀫𑀢𑁆𑀣𑀺𑀢𑁄 𑀳𑁄𑀢𑀺. 𑀓𑀘𑁆𑀘𑀻𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀯𑁄𑀢𑀺 𑀲𑀸𑀫𑀺𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀘𑁆𑀘𑀺 𑀅𑀦𑀼𑀭𑀼𑀤𑁆𑀥𑀸 𑀢𑀼𑀫𑁆𑀳𑀸𑀓𑀁 𑀔𑀫𑀦𑀻𑀬𑀁, 𑀇𑀭𑀺𑀬𑀸𑀧𑀣𑁄 𑀯𑁄 𑀔𑀫𑀢𑀺, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀯𑁄 𑀚𑀻𑀯𑀺𑀢𑀁 𑀬𑀸𑀧𑁂𑀢𑀺 𑀖𑀝𑀺𑀬𑀢𑀺, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣, 𑀓𑀘𑁆𑀘𑀺 𑀢𑀼𑀫𑁆𑀳𑀸𑀓𑀁 𑀲𑀼𑀮𑀪𑀧𑀺𑀡𑁆𑀟𑀁, 𑀲𑀫𑁆𑀧𑀢𑁆𑀢𑁂 𑀯𑁄 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀉𑀴𑀼𑀗𑁆𑀓𑀬𑀸𑀕𑀼𑀁 𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀯𑀸 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀘𑁆𑀘𑀬𑁂𑀦 𑀅𑀓𑀺𑀮𑀫𑀦𑁆𑀢𑁂𑀦 𑀲𑀓𑁆𑀓𑀸 𑀲𑀫𑀡𑀥𑀫𑁆𑀫𑁄 𑀓𑀸𑀢𑀼𑀁, 𑀯𑀢𑁆𑀢𑀫𑁂𑀯 𑀯𑀸 𑀏𑀢𑀁 𑀧𑀩𑁆𑀩𑀚𑀺𑀢𑀸𑀦𑀁.

𑀅𑀣 𑀢𑁂𑀦 𑀧𑀝𑀺𑀯𑀘𑀦𑁂 𑀤𑀺𑀦𑁆𑀦𑁂 ‘‘𑀅𑀦𑀼𑀭𑀼𑀤𑁆𑀥𑀸 𑀢𑀼𑀫𑁆𑀳𑁂 𑀭𑀸𑀚𑀧𑀩𑁆𑀩𑀚𑀺𑀢𑀸 𑀫𑀳𑀸𑀧𑀼𑀜𑁆𑀜𑀸, 𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀦𑀁 𑀅𑀤𑀢𑁆𑀯𑀸 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀦 𑀏𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀓𑀺𑀁 𑀦𑀼 𑀔𑁄 𑀫𑀺𑀕𑀧𑁄𑀢𑀓𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀦𑁆𑀢𑀸 𑀯𑀺𑀳𑀭𑀣, 𑀉𑀤𑀸𑀳𑀼 𑀲𑀸𑀫𑀕𑁆𑀕𑀺𑀪𑀸𑀯𑁄 𑀯𑁄 𑀅𑀢𑁆𑀣𑀻’’𑀢𑀺 𑀲𑀸𑀫𑀕𑁆𑀕𑀺𑀭𑀲𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀬𑀣𑀸 𑀔𑀻𑀭𑀜𑁆𑀘 𑀉𑀤𑀓𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀢𑀺, 𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀓𑀢𑁆𑀢𑀁 𑀯𑀺𑀬 𑀉𑀧𑁂𑀢𑀺, 𑀓𑀘𑁆𑀘𑀺 𑀏𑀯𑀁 𑀲𑀸𑀫𑀕𑁆𑀕𑀺𑀯𑀲𑁂𑀦 𑀏𑀓𑀢𑁆𑀢𑀼𑀧𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀳𑀭𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀧𑀺𑀬𑀘𑀓𑁆𑀔𑀽𑀳𑀻𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀑𑀮𑁄𑀓𑀦𑀢𑁄 𑀧𑀺𑀬𑀪𑀸𑀯𑀤𑀻𑀧𑀓𑀸𑀦𑀺 𑀘𑀓𑁆𑀔𑀽𑀦𑀺 𑀧𑀺𑀬𑀘𑀓𑁆𑀔𑀽𑀦𑀺 𑀦𑀸𑀫, ‘‘𑀓𑀘𑁆𑀘𑀺 𑀢𑀣𑀸𑀭𑀽𑀧𑁂𑀳𑀺 𑀘𑀓𑁆𑀔𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺 𑀧𑀼𑀘𑁆𑀙𑀢𑀺. 𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀓𑀁𑀲𑁂𑀦 𑀫𑀬𑀁 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀓𑀣𑀁 𑀧𑀦𑀸𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀣𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸, 𑀓𑀣𑀁 𑀧𑀦 𑀢𑀼𑀫𑁆𑀳𑁂 𑀏𑀯𑀁 𑀯𑀺𑀳𑀭𑀣, 𑀓𑁂𑀦 𑀓𑀸𑀭𑀡𑁂𑀦 𑀯𑀺𑀳𑀭𑀣, 𑀢𑀁 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘𑁂𑀯 𑀧𑀭𑀫𑁆𑀫𑀼𑀔𑀸 𑀘. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀲𑀫𑁆𑀫𑀼𑀔𑀸 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀳𑀯𑀸𑀲𑁂 𑀮𑀩𑁆𑀪𑀦𑁆𑀢𑀺, 𑀇𑀢𑀭𑀸𑀦𑀺 𑀯𑀺𑀧𑁆𑀧𑀯𑀸𑀲𑁂, 𑀫𑀦𑁄𑀓𑀫𑁆𑀫𑀁 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺. 𑀬𑀜𑁆𑀳𑀺 𑀲𑀳𑁂𑀯 𑀯𑀲𑀦𑁆𑀢𑁂𑀲𑀼 𑀏𑀓𑁂𑀦 𑀫𑀜𑁆𑀘𑀧𑀻𑀞𑀁 𑀯𑀸 𑀤𑀸𑀭𑀼𑀪𑀡𑁆𑀟𑀁 𑀯𑀸 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑀯𑀸 𑀩𑀳𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀁 𑀤𑀺𑀲𑁆𑀯𑀸 ‘‘𑀓𑁂𑀦𑀺𑀤𑀁 𑀯𑀴𑀜𑁆𑀚𑀺𑀢’’𑀦𑁆𑀢𑀺 𑀅𑀯𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀬𑀼𑀢𑁆𑀢𑀁 𑀯𑀸 𑀧𑀦 𑀞𑀸𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀢𑁂𑀦 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀁 𑀢𑀣𑁂𑀯 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀬𑀼𑀢𑁆𑀢𑀁 𑀯𑀸 𑀧𑀦 𑀞𑀸𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀲𑀳𑀯𑀲𑀦𑁆𑀢𑀲𑁆𑀲 𑀧𑀦 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀫𑀥𑀼𑀭𑀁 𑀲𑀫𑁆𑀫𑁄𑀤𑀦𑀻𑀬𑀓𑀣𑀁 𑀧𑀝𑀺𑀲𑀦𑁆𑀣𑀸𑀭𑀓𑀣𑀁 𑀲𑀸𑀭𑀡𑀻𑀬𑀓𑀣𑀁 𑀥𑀫𑁆𑀫𑀓𑀣𑀁 𑀲𑀭𑀪𑀜𑁆𑀜𑀁 𑀲𑀸𑀓𑀘𑁆𑀙𑀁 𑀧𑀜𑁆𑀳𑀧𑀼𑀘𑁆𑀙𑀦𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀭𑀡𑁂 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀣𑁂𑀭𑁂𑀲𑀼 𑀧𑀦 𑀧𑀓𑁆𑀓𑀦𑁆𑀢𑁂𑀲𑀼 ‘‘𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑁄 𑀦𑀦𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀫𑀺𑀮𑀢𑁆𑀣𑁂𑀭𑁄 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀏𑀯𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀕𑀼𑀡𑀓𑀣𑀦𑁂 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. ‘‘𑀫𑀬𑁆𑀳𑀁 𑀧𑀺𑀬𑀫𑀺𑀢𑁆𑀢𑁄 𑀦𑀦𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀫𑀺𑀮𑀢𑁆𑀣𑁂𑀭𑁄 𑀅𑀯𑁂𑀭𑁄 𑀳𑁄𑀢𑀼 𑀅𑀩𑁆𑀬𑀸𑀧𑀚𑁆𑀚𑁄 𑀲𑀼𑀔𑀻’’𑀢𑀺 𑀏𑀯𑀁 𑀲𑀫𑀦𑁆𑀦𑀸𑀳𑀭𑀢𑁄 𑀧𑀦 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺𑀬𑁂𑀯.

𑀦𑀸𑀦𑀸 𑀳𑀺 𑀔𑁄 𑀦𑁄 𑀪𑀦𑁆𑀢𑁂 𑀓𑀸𑀬𑀸𑀢𑀺 𑀅𑀬𑀜𑁆𑀳𑀺 𑀓𑀸𑀬𑁄 𑀧𑀺𑀝𑁆𑀞𑀁 𑀯𑀺𑀬 𑀫𑀢𑁆𑀢𑀺𑀓𑀸 𑀯𑀺𑀬 𑀘 𑀑𑀫𑀤𑁆𑀤𑀺𑀢𑁆𑀯𑀸 𑀏𑀓𑀢𑁄 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀧𑀦 𑀦𑁄 𑀅𑀢𑁆𑀢𑀦𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀪𑀸𑀯𑁂𑀦 𑀅𑀯𑀺𑀭𑁄𑀥𑀪𑀸𑀯𑁂𑀦 𑀪𑁂𑀤𑀸𑀪𑀸𑀯𑁂𑀦 𑀲𑀫𑀕𑁆𑀕𑀪𑀸𑀯𑁂𑀦 𑀏𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁 𑀧𑀦𑁂𑀢𑁂 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀭𑁂𑀲𑀁 𑀘𑀺𑀢𑁆𑀢𑀯𑀲𑁂𑀦 𑀯𑀢𑁆𑀢𑀺𑀁𑀲𑀽𑀢𑀺? 𑀏𑀓𑀲𑁆𑀲 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀳𑀢𑀺, 𑀏𑀓𑀲𑁆𑀲 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀭𑀺𑀪𑀡𑁆𑀟𑀓𑀫𑁆𑀫𑀁 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀺𑀢𑀁, 𑀢𑁂𑀦 ‘‘𑀫𑀫𑀸𑀯𑀼𑀲𑁄 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀺𑀢𑀁, 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁂 ‘‘𑀫𑀬𑁆𑀳𑀁 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀥𑁄𑀯𑀺𑀢𑀩𑁆𑀩𑀁, 𑀫𑀬𑁆𑀳𑀁 𑀧𑀭𑀺𑀪𑀡𑁆𑀟𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀯𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀓𑀝𑀸𑀳𑁂 𑀩𑀳𑀮𑀢𑀦𑀼𑀫𑀢𑁆𑀢𑀺𑀓𑀸𑀳𑀺 𑀮𑁂𑀧𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀧𑀘𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀺, 𑀧𑀭𑀺𑀪𑀡𑁆𑀟𑀁 𑀯𑀸 𑀓𑀭𑁄𑀦𑁆𑀢𑀺. ‘‘𑀫𑀫𑀸𑀯𑀼𑀲𑁄 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁, 𑀥𑁄𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 ‘‘𑀫𑀫 𑀧𑀡𑁆𑀡𑀲𑀸𑀮𑀸 𑀉𑀓𑁆𑀮𑀸𑀧𑀸, 𑀧𑀭𑀺𑀪𑀡𑁆𑀟𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀞𑀫𑀢𑀭𑀁 𑀆𑀭𑁄𑀘𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀢𑁂𑀲𑀁 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀸, 𑀓𑀘𑁆𑀘𑀺 𑀢𑀼𑀫𑁆𑀳𑁂𑀢𑀺 𑀅𑀢𑁆𑀣𑁄. 𑀅𑀫𑁆𑀳𑀸𑀓𑀦𑁆𑀢𑀺 𑀅𑀫𑁆𑀳𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼. 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀻𑀢𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀯𑀓𑁆𑀓𑀸𑀭𑀧𑀸𑀢𑀺𑀦𑁆𑀢𑀺 𑀅𑀢𑀺𑀭𑁂𑀓𑀧𑀺𑀡𑁆𑀟𑀧𑀸𑀢𑀁 𑀅𑀧𑀦𑁂𑀢𑁆𑀯𑀸 𑀞𑀧𑀦𑀢𑁆𑀣𑀸𑀬 𑀏𑀓𑀁 𑀲𑀫𑀼𑀕𑁆𑀕𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀞𑀧𑁂𑀢𑀺. 𑀬𑁄 𑀧𑀘𑁆𑀙𑀸𑀢𑀺 𑀢𑁂 𑀓𑀺𑀭 𑀣𑁂𑀭𑀸 𑀦 𑀏𑀓𑀢𑁄𑀯 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀸 𑀳𑁂𑀢𑁂 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑁂𑀲𑀼 𑀬𑁄 𑀧𑀞𑀫𑀢𑀭𑀁 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀞𑀫𑀢𑀭𑀁 𑀉𑀝𑁆𑀞𑀸𑀢𑀺, 𑀲𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀚𑀸𑀦𑀸𑀢𑀺 ‘‘𑀤𑁆𑀯𑁂 𑀪𑀺𑀓𑁆𑀔𑀽 𑀧𑀘𑁆𑀙𑀢𑁄, 𑀅𑀳𑀁 𑀧𑀞𑀫𑀢𑀭𑀁 𑀆𑀕𑀢𑁄’’𑀢𑀺. 𑀅𑀣 𑀧𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸 𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀻𑀦𑀺 𑀓𑀢𑁆𑀯𑀸 𑀬𑀤𑀺 𑀧𑀢𑁆𑀢𑁂 𑀧𑀝𑀺𑀯𑀻𑀲𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀬𑀤𑀺 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀢𑀺𑀁 𑀧𑀺𑀥𑀸𑀬 𑀪𑀼𑀜𑁆𑀚𑀢𑀺, 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀑𑀲𑀸𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺.

𑀤𑀼𑀢𑀺𑀬𑁄𑀧𑀺 𑀆𑀕𑀦𑁆𑀢𑁆𑀯𑀸𑀯 𑀚𑀸𑀦𑀸𑀢𑀺 ‘‘𑀏𑀓𑁄 𑀧𑀞𑀫𑀁 𑀆𑀕𑀢𑁄, 𑀏𑀓𑁄 𑀧𑀘𑁆𑀙𑀢𑁄’’𑀢𑀺. 𑀲𑁄 𑀲𑀘𑁂 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀫𑀸𑀡𑀫𑁂𑀯 𑀳𑁄𑀢𑀺, 𑀪𑀼𑀜𑁆𑀚𑀢𑀺. 𑀲𑀘𑁂 𑀫𑀦𑁆𑀤𑀁, 𑀅𑀯𑀓𑁆𑀓𑀸𑀭𑀧𑀸𑀢𑀺𑀢𑁄 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀲𑀘𑁂 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀫𑀸𑀡𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀢𑁆𑀣𑁂𑀭𑁄 𑀯𑀺𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀢𑀢𑀺𑀬𑁄𑀧𑀺 𑀆𑀕𑀦𑁆𑀢𑁆𑀯𑀸𑀯 𑀚𑀸𑀦𑀸𑀢𑀺 ‘‘𑀤𑁆𑀯𑁂 𑀧𑀞𑀫𑀁 𑀆𑀕𑀢𑀸, 𑀅𑀳𑀁 𑀧𑀘𑁆𑀙𑀺𑀫𑁄’’𑀢𑀺. 𑀲𑁄𑀧𑀺 𑀤𑀼𑀢𑀺𑀬𑀢𑁆𑀣𑁂𑀭𑁄 𑀯𑀺𑀬 𑀪𑀼𑀜𑁆𑀚𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀑𑀲𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀖𑀝𑁂 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑁂 𑀯𑀸 𑀅𑀯𑀲𑁂𑀲𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀖𑀝𑁂 𑀦𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀲𑀘𑁂 𑀅𑀯𑀲𑁂𑀲𑀪𑀢𑁆𑀢𑀁 𑀳𑁄𑀢𑀺, 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀚𑀳𑀺𑀢𑁆𑀯𑀸 𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺, 𑀲𑁄 𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀦𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀘𑀺𑀓𑀸𑀳𑀺 𑀫𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀇𑀤𑀁 𑀣𑁂𑀭𑀸𑀦𑀁 𑀩𑀳𑀺𑀯𑀺𑀳𑀸𑀭𑁂 𑀅𑀭𑀜𑁆𑀜𑁂 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀝𑁆𑀞𑀸𑀦𑁂 𑀪𑁄𑀚𑀦𑀲𑀸𑀮𑀸𑀬 𑀯𑀢𑁆𑀢𑀁. 𑀇𑀤𑀁 𑀲𑀦𑁆𑀥𑀸𑀬 ‘‘𑀬𑁄 𑀧𑀘𑁆𑀙𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑁄 𑀧𑀲𑁆𑀲𑀢𑀻𑀢𑀺𑀆𑀤𑀺 𑀧𑀦 𑀦𑁂𑀲𑀁 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀘𑁆𑀘𑀖𑀝𑀦𑁆𑀢𑀺 𑀆𑀘𑀫𑀦𑀓𑀼𑀫𑁆𑀪𑀺𑀁. 𑀭𑀺𑀢𑁆𑀢𑀦𑁆𑀢𑀺 𑀭𑀺𑀢𑁆𑀢𑀓𑀁. 𑀢𑀼𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀯𑀺𑀲𑀬𑁆𑀳𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀢𑀺𑀪𑀸𑀭𑀺𑀬𑀁. 𑀳𑀢𑁆𑀣𑀯𑀺𑀓𑀸𑀭𑁂𑀦𑀸𑀢𑀺 𑀳𑀢𑁆𑀣𑀲𑀜𑁆𑀜𑀸𑀬. 𑀢𑁂 𑀓𑀺𑀭 𑀧𑀸𑀦𑀻𑀬𑀖𑀝𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀢𑀼𑀘𑁆𑀙𑀓𑀁 𑀕𑀳𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀥𑁄𑀯𑀺𑀢𑁆𑀯𑀸 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀳𑀢𑁆𑀣𑀯𑀺𑀓𑀸𑀭𑁂𑀦 𑀆𑀫𑀦𑁆𑀢𑁂𑀦𑁆𑀢𑀺, 𑀑𑀤𑀺𑀲𑁆𑀲 𑀯𑀸 𑀅𑀦𑁄𑀤𑀺𑀲𑁆𑀲 𑀯𑀸 𑀲𑀤𑁆𑀤𑀁 𑀦 𑀓𑀭𑁄𑀦𑁆𑀢𑀺. 𑀓𑀲𑁆𑀫𑀸 𑀑𑀤𑀺𑀲𑁆𑀲 𑀦 𑀓𑀭𑁄𑀦𑁆𑀢𑀺? 𑀢𑀜𑁆𑀳𑀺 𑀪𑀺𑀓𑁆𑀔𑀼𑀁 𑀲𑀤𑁆𑀤𑁄 𑀩𑀸𑀥𑁂𑀬𑁆𑀬𑀸𑀢𑀺. 𑀓𑀲𑁆𑀫𑀸 𑀅𑀦𑁄𑀤𑀺𑀲𑁆𑀲 𑀦 𑀓𑀭𑁄𑀦𑁆𑀢𑀺? 𑀅𑀦𑁄𑀤𑀺𑀲𑁆𑀲 𑀲𑀤𑁆𑀤𑁂 𑀤𑀺𑀦𑁆𑀦𑁂 ‘‘𑀅𑀳𑀁 𑀧𑀼𑀭𑁂, 𑀅𑀳𑀁 𑀧𑀼𑀭𑁂’’𑀢𑀺 𑀤𑁆𑀯𑁂𑀧𑀺 𑀦𑀺𑀓𑁆𑀔𑀫𑁂𑀬𑁆𑀬𑀼𑀁. 𑀢𑀢𑁄 𑀤𑁆𑀯𑀻𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂 𑀢𑀢𑀺𑀬𑀲𑁆𑀲 𑀓𑀫𑁆𑀫𑀘𑁆𑀙𑁂𑀤𑁄 𑀪𑀯𑁂𑀬𑁆𑀬. 𑀲𑀁𑀬𑀢𑀧𑀤𑀲𑀤𑁆𑀤𑁄 𑀧𑀦 𑀳𑀼𑀢𑁆𑀯𑀸 𑀅𑀧𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀯𑀸𑀝𑁆𑀞𑀸𑀦𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀳𑀢𑁆𑀣𑀲𑀜𑁆𑀜𑀁 𑀓𑀭𑁄𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀇𑀢𑀭𑁄 𑀆𑀕𑀘𑁆𑀙𑀢𑀺, 𑀢𑀢𑁄 𑀤𑁆𑀯𑁂 𑀚𑀦𑀸 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀲𑀁𑀲𑀺𑀩𑁆𑀩𑀦𑁆𑀢𑀸 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀞𑀧𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀫𑀸’’𑀢𑀺.

𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦𑀸𑀢𑀺 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀦𑁆𑀢𑀺 𑀇𑀤𑀁 𑀢𑀸𑀯 𑀧𑀓𑀢𑀺𑀥𑀫𑁆𑀫𑀲𑁆𑀲𑀯𑀦𑀫𑁂𑀯, 𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀧𑀜𑁆𑀘𑀫𑁂 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀤𑁆𑀯𑁂 𑀣𑁂𑀭𑀸 𑀦𑀸𑀢𑀺𑀯𑀺𑀓𑀸𑀮𑁂 𑀦𑀳𑀸𑀬𑀺𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀣𑁂𑀭𑁂𑀦 𑀪𑀕𑀯𑀢𑀸 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀧𑀼𑀘𑁆𑀙𑀺𑀢𑁂𑀦 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀸𑀘𑀸𑀭𑀧𑀯𑀺𑀲𑀦𑀓𑀸𑀮𑁄 𑀦𑀺𑀓𑁆𑀔𑀫𑀦𑀓𑀸𑀮𑁄 𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀁 𑀘𑀻𑀯𑀭𑀧𑀸𑀭𑀼𑀧𑀦𑀁 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀥𑀫𑁆𑀫𑀓𑀣𑀦𑀁 𑀅𑀦𑀼𑀫𑁄𑀤𑀦𑀁 𑀅𑀦𑁆𑀢𑁄𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀁 𑀧𑀢𑁆𑀢𑀥𑁄𑀯𑀦𑀁 𑀧𑀢𑁆𑀢𑀑𑀲𑀸𑀧𑀦𑀁 𑀧𑀢𑁆𑀢𑀘𑀻𑀯𑀭𑀧𑀝𑀺𑀲𑀸𑀫𑀦𑀦𑁆𑀢𑀺 𑀧𑀧𑀜𑁆𑀘𑀓𑀭𑀡𑀝𑁆𑀞𑀸𑀦𑀸𑀦𑀺 𑀏𑀢𑀸𑀦𑀺. 𑀢𑀲𑁆𑀫𑀸 𑀣𑁂𑀭𑁄 ‘‘𑀅𑀫𑁆𑀳𑀸𑀓𑀁 𑀏𑀢𑁆𑀢𑀓𑀁 𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀓𑀣𑀸𑀧𑀯𑀢𑁆𑀢𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀧𑀫𑀚𑁆𑀚𑀦𑀝𑁆𑀞𑀸𑀦𑀸𑀦𑀺, 𑀢𑀢𑁆𑀣𑀸𑀧𑀺 𑀫𑀬𑀁, 𑀪𑀦𑁆𑀢𑁂, 𑀓𑀫𑁆𑀫𑀝𑁆𑀞𑀸𑀦𑀯𑀺𑀭𑀼𑀤𑁆𑀥𑀁 𑀦 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺 𑀅𑀜𑁆𑀜𑁂𑀲𑀁 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯 𑀲𑀺𑀔𑀸𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀫𑀺𑀦𑀸𑀯 𑀏𑀢𑀸𑀦𑀺 𑀞𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀅𑀯𑀴𑀜𑁆𑀚𑀦𑀯𑀲𑁂𑀦 𑀧𑀫𑀸𑀤𑀓𑀸𑀮𑁄 𑀦𑀸𑀫 𑀅𑀫𑁆𑀳𑀸𑀓𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑀧𑀸𑀘𑀻𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑁪𑁬𑁭. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀲𑀫𑀕𑁆𑀕𑀯𑀸𑀲𑁂 𑀆𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀓𑀣𑀸𑀬. 𑀅𑀦𑀼𑀧𑀼𑀩𑁆𑀩𑁂𑀦 (𑀉𑀤𑀸. 𑀅𑀝𑁆𑀞. 𑁩𑁫) 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀢𑀤𑀯𑀲𑀭𑀻𑀢𑀺 𑀏𑀓𑀓𑁄𑀯 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀕𑀸𑀫𑁄, 𑀢𑀁 𑀅𑀯𑀲𑀭𑀺. 𑀧𑀸𑀮𑀺𑀮𑁂𑀬𑁆𑀬𑀓𑀕𑀸𑀫𑀯𑀸𑀲𑀺𑀦𑁄𑀧𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀪𑀕𑀯𑀢𑁄 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 ‘‘𑀏𑀢𑁆𑀣 𑀪𑀕𑀯𑀸 𑀯𑀲𑀢𑀽’’𑀢𑀺 𑀬𑀸𑀘𑀺𑀢𑁆𑀯𑀸 𑀯𑀸𑀲𑀬𑀺𑀁𑀲𑀼. 𑀪𑀤𑁆𑀤𑀲𑀸𑀮𑁄𑀢𑀺 𑀧𑀦 𑀢𑀢𑁆𑀣𑁂𑀓𑁄 𑀫𑀦𑀸𑀧𑁄 𑀮𑀝𑁆𑀞𑀺𑀓𑁄 𑀲𑀸𑀮𑀭𑀼𑀓𑁆𑀔𑁄. 𑀪𑀕𑀯𑀸 𑀢𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀦𑀲𑀡𑁆𑀟𑁂 𑀧𑀡𑁆𑀡𑀲𑀸𑀮𑀸𑀬 𑀲𑀫𑀻𑀧𑁂 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂’’𑀢𑀺.

𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲𑀸𑀢𑀺𑀆𑀤𑀺 𑀪𑀕𑀯𑀢𑁄 𑀯𑀺𑀯𑁂𑀓𑀲𑀼𑀔𑀧𑀘𑁆𑀘𑀯𑁂𑀓𑁆𑀔𑀡𑀤𑀲𑁆𑀲𑀦𑀁. 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀦𑁆𑀢𑀺 𑀲𑀫𑁆𑀩𑀸𑀥𑀧𑁆𑀧𑀢𑁆𑀢𑁄 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺𑀁. 𑀓𑀺𑀁 𑀧𑀦 𑀪𑀕𑀯𑀢𑁄 𑀲𑀫𑁆𑀩𑀸𑀥𑁄 𑀅𑀢𑁆𑀣𑀺 𑀲𑀁𑀲𑀕𑁆𑀕𑁄 𑀯𑀸𑀢𑀺? 𑀦𑀢𑁆𑀣𑀺. 𑀦 𑀳𑀺 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀅𑀦𑀺𑀘𑁆𑀙𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀤𑀼𑀭𑀸𑀲𑀤𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀩𑁆𑀩𑀢𑁆𑀣 𑀘 𑀅𑀦𑀼𑀧𑀮𑀺𑀢𑁆𑀢𑀸, 𑀳𑀺𑀢𑁂𑀲𑀺𑀢𑀸𑀬 𑀧𑀦 𑀲𑀢𑁆𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀁 𑀅𑀝𑁆𑀞𑀦𑁆𑀦𑀁 𑀧𑀭𑀺𑀲𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁 𑀅𑀥𑀺𑀯𑀸𑀲𑁂𑀢𑀺, 𑀲𑀬𑀜𑁆𑀘 𑀫𑀳𑀸𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑁄 𑀓𑀸𑀮𑀜𑁆𑀜𑀽 𑀳𑀼𑀢𑁆𑀯𑀸 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀇𑀤𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁. 𑀦𑀸𑀬𑀫𑀺𑀥 𑀆𑀓𑀺𑀡𑁆𑀡𑀯𑀺𑀳𑀸𑀭𑁄 𑀅𑀥𑀺𑀧𑁆𑀧𑁂𑀢𑁄, 𑀇𑀥 𑀧𑀦 𑀢𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀓𑁄𑀲𑀫𑁆𑀩𑀓𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀸𑀲𑀁 𑀯𑀺𑀳𑀸𑀲𑀺, 𑀢𑀤𑀸 𑀯𑀺𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺’’𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑁂𑀳𑀺 𑀓𑁄𑀲𑀫𑁆𑀩𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀻’’𑀢𑀺𑀆𑀤𑀺.

𑀤𑀳𑀭𑀧𑁄𑀢𑀓𑁂𑀳𑀻𑀢𑀺 𑀤𑀳𑀭𑁂𑀳𑀺 𑀳𑀢𑁆𑀣𑀺𑀧𑁄𑀢𑀓𑁂𑀳𑀺, 𑀬𑁂 𑀪𑀺𑀗𑁆𑀓𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀻𑀢𑀺 𑀳𑀢𑁆𑀣𑀺𑀆𑀤𑀻𑀳𑀺. 𑀓𑀤𑁆𑀤𑀫𑁄𑀤𑀓𑀸𑀦𑀻𑀢𑀺 𑀓𑀤𑁆𑀤𑀫𑀫𑀺𑀲𑁆𑀲𑀸𑀦𑀺 𑀉𑀤𑀓𑀸𑀦𑀺. 𑀑𑀕𑀸𑀳𑀸𑀢𑀺 𑀏𑀢𑁆𑀣 ‘‘𑀑𑀕𑀸𑀳’’𑀦𑁆𑀢𑀺𑀧𑀺 𑀧𑀸𑀴𑀺. 𑀅𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲. 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄𑀢𑀺 𑀖𑀝𑁆𑀝𑁂𑀦𑁆𑀢𑀺𑀬𑁄. 𑀉𑀧𑀦𑀺𑀖𑀁𑀲𑀺𑀬𑀫𑀸𑀦𑁄𑀧𑀺 𑀅𑀢𑁆𑀢𑀦𑁄 𑀉𑀴𑀸𑀭𑀪𑀸𑀯𑁂𑀦 𑀦 𑀓𑀼𑀚𑁆𑀛𑀢𑀺, 𑀢𑁂𑀦 𑀢𑀸 𑀖𑀁𑀲𑀦𑁆𑀢𑀺𑀬𑁂𑀯. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀽𑀧𑀓𑀝𑁆𑀞𑁄 𑀤𑀽𑀭𑀻𑀪𑀽𑀢𑁄.

𑀬𑀽𑀣𑀸𑀢𑀺 𑀳𑀢𑁆𑀣𑀺𑀖𑀝𑀸𑀬. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀯𑀸𑀲𑁂 𑀉𑀓𑁆𑀓𑀡𑁆𑀞𑀺𑀢𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀝𑁆𑀞𑁄. 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀖𑀝𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀸𑀧𑀺𑀢𑀲𑀦𑁆𑀢𑀸𑀧𑁄 𑀯𑀺𑀬 𑀦𑀺𑀩𑁆𑀩𑀼𑀢𑁄 𑀳𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀪𑀤𑁆𑀤𑀲𑀸𑀮𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀘 𑀲𑀫𑀦𑁆𑀢𑀢𑁄 𑀅𑀧𑁆𑀧𑀳𑀭𑀺𑀢𑀁 𑀓𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑁂𑀦 𑀲𑀫𑁆𑀫𑀚𑁆𑀚𑀢𑀺, 𑀪𑀕𑀯𑀢𑁄 𑀫𑀼𑀔𑀥𑁄𑀯𑀦𑀁 𑀤𑁂𑀢𑀺, 𑀦𑀳𑀸𑀦𑁄𑀤𑀓𑀁 𑀆𑀳𑀭𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀤𑁂𑀢𑀺, 𑀅𑀭𑀜𑁆𑀜𑀢𑁄 𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼 𑀉𑀧𑀦𑁂𑀢𑀺. 𑀲𑀢𑁆𑀣𑀸 𑀢𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺𑀆𑀤𑀺. 𑀲𑁄 𑀓𑀺𑀭 𑀲𑁄𑀡𑁆𑀟𑀸𑀬 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀖𑀁𑀲𑀺𑀢𑁆𑀯𑀸 𑀅𑀕𑁆𑀕𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀭𑀽𑀦𑀺 𑀚𑀸𑀮𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀸𑀲𑀸𑀡𑀔𑀡𑁆𑀟𑀸𑀦𑀺 𑀢𑀸𑀧𑁂𑀢𑁆𑀯𑀸 𑀢𑀸𑀦𑀺 𑀤𑀡𑁆𑀟𑀓𑁂𑀳𑀺 𑀯𑀝𑁆𑀝𑁂𑀢𑁆𑀯𑀸 𑀲𑁄𑀡𑁆𑀟𑀺𑀬𑀁 𑀔𑀺𑀧𑀺𑀢𑁆𑀯𑀸 𑀉𑀤𑀓𑀲𑁆𑀲 𑀢𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀪𑀕𑀯𑀸 ‘‘𑀳𑀢𑁆𑀣𑀺𑀦𑀸𑀕𑁄 𑀫𑀫 𑀦𑀳𑀸𑀦𑀁 𑀇𑀘𑁆𑀙𑀢𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀦𑀳𑀸𑀦𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀧𑀸𑀦𑀻𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀁 𑀧𑀦 𑀲𑀻𑀢𑀮𑁂 𑀚𑀸𑀢𑁂 𑀉𑀧𑀲𑀗𑁆𑀓𑀫𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀻’’𑀢𑀺.

𑀅𑀢𑁆𑀢𑀦𑁄 𑀘 𑀧𑀯𑀺𑀯𑁂𑀓𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑁂𑀳𑀺𑀘𑀺 𑀅𑀦𑀸𑀓𑀺𑀡𑁆𑀡𑀪𑀸𑀯𑀮𑀤𑁆𑀥𑀁 𑀓𑀸𑀬𑀯𑀺𑀯𑁂𑀓𑀁 𑀚𑀸𑀦𑀺𑀢𑁆𑀯𑀸. 𑀇𑀢𑀭𑁂 𑀧𑀦 𑀯𑀺𑀯𑁂𑀓𑀸 𑀪𑀕𑀯𑀢𑁄 𑀲𑀩𑁆𑀩𑀓𑀸𑀮𑀁 𑀯𑀺𑀚𑁆𑀚𑀦𑁆𑀢𑀺𑀬𑁂𑀯. 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀇𑀫𑀁 𑀅𑀢𑁆𑀢𑀦𑁄 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘 𑀯𑀺𑀯𑁂𑀓𑀸𑀪𑀺𑀭𑀢𑀺𑀬𑀸 𑀲𑀫𑀸𑀦𑀚𑁆𑀛𑀸𑀲𑀬𑀪𑀸𑀯𑀤𑀻𑀧𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀕𑀸𑀣𑀸𑀬 𑀧𑀦 𑀏𑀯𑀫𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 (𑀉𑀤𑀸. 𑀅𑀝𑁆𑀞. 𑁩𑁫) 𑁋 𑀏𑀢𑀁 𑀈𑀲𑀸𑀤𑀦𑁆𑀢𑀲𑁆𑀲 𑀭𑀣𑀈𑀲𑀸𑀲𑀤𑀺𑀲𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘𑀺𑀢𑁆𑀢𑀁 𑀦𑀸𑀕𑁂𑀦 𑀩𑀼𑀤𑁆𑀥𑀦𑀸𑀕𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑁂𑀢𑀺 𑀲𑀁𑀲𑀦𑁆𑀤𑀢𑀺. 𑀓𑀣𑀁 𑀲𑀫𑁂𑀢𑀺 𑀘𑁂? 𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂, 𑀬𑀲𑁆𑀫𑀸 𑀩𑀼𑀤𑁆𑀥𑀦𑀸𑀕𑁄 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀯𑀺𑀳𑀸𑀲𑀺’’𑀦𑁆𑀢𑀺 𑀧𑀼𑀭𑀺𑀫𑀁 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀯𑀺𑀯𑁂𑀓𑀁 𑀉𑀧𑀩𑁆𑀭𑀽𑀳𑀬𑀫𑀸𑀦𑁄 𑀇𑀤𑀸𑀦𑀺 𑀬𑀣𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀯𑀦𑁂 𑀅𑀭𑀜𑁆𑀜𑁂 𑀭𑀫𑀢𑀺 𑀅𑀪𑀺𑀭𑀫𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀳𑀢𑁆𑀣𑀺𑀦𑀸𑀕𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀳𑀢𑁆𑀣𑀺𑀆𑀤𑀻𑀳𑀺 𑀆𑀓𑀺𑀡𑁆𑀡𑀯𑀺𑀳𑀸𑀭𑀁 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀇𑀤𑀸𑀦𑀺 𑀏𑀓𑁄 𑀅𑀲𑀳𑀸𑀬𑁄 𑀯𑀦𑁂 𑀏𑀓𑀯𑀺𑀳𑀸𑀭𑀁 𑀭𑀫𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀲𑁆𑀫𑀸𑀲𑁆𑀲 𑀘𑀺𑀢𑁆𑀢𑀁 𑀦𑀸𑀕𑁂𑀦 𑀲𑀫𑁂𑀢𑀺, 𑀢𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑁂𑀢𑀻𑀢𑀺 𑀓𑀢𑁆𑀯𑀸 𑀏𑀓𑀻𑀪𑀸𑀯𑀭𑀢𑀺𑀬𑀸 𑀏𑀓𑀲𑀤𑀺𑀲𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁭𑁩. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀬𑁄 𑀲𑁂𑀦𑀸𑀲𑀦𑀸𑀭𑀳𑀲𑁆𑀲 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀢𑀺, 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀓𑀮𑀳𑀓𑀸𑀭𑀓𑀸𑀤𑀻𑀦𑀁 𑀧𑀦𑁂𑀢𑁆𑀣 ‘‘𑀑𑀓𑀸𑀲𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀓𑀁 𑀲𑀗𑁆𑀖𑀲𑁆𑀲 𑀓𑀢𑀺𑀓𑀁 𑀆𑀭𑁄𑀘𑁂𑀢𑁆𑀯𑀸 𑀦 𑀧𑀜𑁆𑀜𑀧𑁂𑀦𑁆𑀢𑀲𑁆𑀲 ‘‘𑀅𑀳𑀁 𑀯𑀼𑀟𑁆𑀠𑁄’’𑀢𑀺 𑀧𑀲𑀬𑁆𑀳 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀧𑀜𑁆𑀜𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀁 ‘‘𑀬𑀼𑀢𑁆𑀢𑀺𑀬𑀸 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀯𑀸𑀭𑁂𑀦𑁆𑀢𑀲𑁆𑀲 𑀘 𑀦𑀢𑁆𑀣𑀺 𑀆𑀧𑀢𑁆𑀢𑀺. ‘‘𑀪𑀡𑁆𑀟𑀦𑀓𑀸𑀭𑀓𑀁 𑀦𑀺𑀓𑁆𑀓𑀟𑁆𑀠𑀢𑀻𑀢𑀺 𑀯𑀘𑀦𑀢𑁄 𑀓𑀼𑀮𑀤𑀽𑀲𑀓𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀦𑀼𑀜𑁆𑀜𑀸𑀬 𑀘 𑀇𑀥 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀆𑀕𑀢𑀸𑀦𑀁 𑀓𑁄𑀲𑀫𑁆𑀩𑀓𑀸𑀦𑀫𑁆𑀧𑀺 ‘𑀬𑀣𑀸𑀯𑀼𑀟𑁆𑀠’𑀦𑁆𑀢𑀺 𑀅𑀯𑀢𑁆𑀯𑀸 ‘𑀯𑀺𑀯𑀺𑀢𑁆𑀢𑁂 𑀅𑀲𑀢𑀺 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀦𑁆𑀢𑀁 𑀧𑀝𑀺𑀩𑀸𑀳𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁.

𑀉𑀧𑀸𑀮𑀺𑀲𑀗𑁆𑀖𑀲𑀸𑀫𑀕𑁆𑀕𑀻𑀧𑀼𑀘𑁆𑀙𑀸𑀯𑀡𑁆𑀡𑀦𑀸

𑁪𑁭𑁬. 𑀦 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸𑀢𑀺 𑀫𑀽𑀮𑀢𑁄 𑀫𑀽𑀮𑀁 𑀅𑀕𑀦𑁆𑀢𑁆𑀯𑀸. 𑀅𑀢𑁆𑀣𑀢𑁄 𑀅𑀧𑀕𑀢𑀸𑀢𑀺 𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀅𑀢𑁆𑀣𑀢𑁄 𑀅𑀧𑀕𑀢𑀸.

𑁪𑁭𑁭. 𑀬𑁂𑀦 𑀦𑀁 𑀧𑀘𑁆𑀘𑀢𑁆𑀣𑀺𑀓𑀸 𑀯𑀤𑁂𑀬𑁆𑀬𑀼𑀁, 𑀢𑀁 𑀦 𑀳𑀺 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀧𑀕𑀢𑀦𑁆𑀢𑀺 𑀓𑀸𑀭𑀡𑀢𑁄 𑀅𑀦𑀧𑁂𑀢𑀁, 𑀲𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀲𑀽𑀬𑀸𑀬𑀸𑀢𑀺 𑀇𑀫𑀺𑀦𑀸 𑀤𑁄𑀲𑀸𑀕𑀢𑀺𑀕𑀫𑀦𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀅𑀕𑀢𑀺𑀕𑀫𑀦𑁂𑀦𑀸’’𑀢𑀺 𑀅𑀯𑀲𑁂𑀲𑀅𑀕𑀢𑀺𑀕𑀫𑀦𑀁 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀳𑀺 𑀤𑀽𑀢𑀗𑁆𑀕𑁂𑀳𑀻𑀢𑀺 ‘‘𑀲𑁄𑀢𑀸 𑀘 𑀳𑁄𑀢𑀺 𑀲𑀸𑀯𑁂𑀢𑀸 𑀘 𑀉𑀕𑁆𑀕𑀳𑁂𑀢𑀸 𑀘 𑀥𑀸𑀭𑁂𑀢𑀸 𑀘 𑀯𑀺𑀜𑁆𑀜𑀸𑀧𑁂𑀢𑀸 𑀘 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀤𑀲𑁆𑀲𑀦𑁄 𑀘 𑀅𑀓𑀮𑀳𑀓𑀸𑀭𑀓𑁄 𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀤𑀽𑀢𑀗𑁆𑀕𑁂𑀳𑀺. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀘𑀽𑀴𑀯𑀕𑁆𑀕-𑀝𑀻𑀓𑀸