𑀅𑀦𑀺𑀬𑀢𑀓𑀣𑀸

𑁫𑁪𑁨. 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁;

𑀕𑀦𑁆𑀢𑀼𑀓𑀸𑀫𑁄 𑀦𑀺𑀯𑀸𑀲𑁂𑀢𑀺, 𑀅𑀓𑁆𑀔𑀺𑀁 𑀅𑀜𑁆𑀚𑁂𑀢𑀺 𑀪𑀼𑀜𑁆𑀚𑀢𑀺.

𑁫𑁪𑁩. 𑀧𑀬𑁄𑀕𑁂 𑀘 𑀧𑀬𑁄𑀕𑁂 𑀘, 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁;

𑀕𑀘𑁆𑀙𑀢𑁄 𑀧𑀤𑀯𑀸𑀭𑁂𑀦, 𑀕𑀦𑁆𑀢𑁆𑀯𑀸 𑀘𑀲𑁆𑀲 𑀦𑀺𑀲𑀻𑀤𑀢𑁄.

𑁫𑁪𑁪. 𑀦𑀺𑀲𑀚𑁆𑀚𑀸𑀬 𑀉𑀪𑀺𑀦𑁆𑀦𑀫𑁆𑀧𑀺, 𑀧𑀬𑁄𑀕𑀕𑀡𑀦𑀸𑀬 𑀘;

𑀳𑁄𑀢𑀺 𑀧𑀸𑀘𑀺𑀢𑁆𑀢𑀺𑀬𑀁 𑀢𑀲𑁆𑀲, 𑀩𑀳𑀼𑀓𑀸𑀦𑀺 𑀩𑀳𑀽𑀲𑁆𑀯𑀧𑀺.

𑁫𑁪𑁫. 𑀲𑀫𑀻𑀧𑁂𑀧𑀺 𑀞𑀺𑀢𑁄 𑀅𑀦𑁆𑀥𑁄, 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀓𑁂;

𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀁, 𑀇𑀢𑁆𑀣𑀻𑀦𑀁 𑀢𑀼 𑀲𑀢𑀫𑁆𑀧𑀺 𑀘.

𑁫𑁪𑁬. 𑀘𑀓𑁆𑀔𑀼𑀫𑀸𑀧𑀺 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀓𑁂𑀯𑀮𑀁;

𑀤𑁆𑀯𑀸𑀭𑁂 𑀧𑀺𑀳𑀺𑀢𑀕𑀩𑁆𑀪𑀲𑁆𑀲, 𑀦𑀺𑀲𑀺𑀦𑁆𑀦𑁄𑀧𑀺 𑀦 𑀭𑀓𑁆𑀔𑀢𑀺.

𑁫𑁪𑁭. 𑀅𑀦𑀦𑁆𑀥𑁂 𑀲𑀢𑀺 𑀯𑀺𑀜𑁆𑀜𑀼𑀲𑁆𑀫𑀺𑀁, 𑀞𑀺𑀢𑀲𑁆𑀲𑀸𑀭𑀳𑀲𑀜𑁆𑀜𑀺𑀦𑁄;

𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀤𑁄𑀲𑁄, 𑀦𑀢𑁆𑀣𑀺 𑀯𑀺𑀓𑁆𑀔𑀺𑀢𑁆𑀢𑀘𑁂𑀢𑀲𑁄.

𑁫𑁪𑁮. 𑀦 𑀤𑁄𑀲𑀼𑀫𑁆𑀫𑀢𑁆𑀢𑀓𑀸𑀤𑀻𑀦𑀁, 𑀆𑀧𑀢𑁆𑀢𑀻𑀳𑀺𑀧𑀺 𑀢𑀻𑀳𑀺𑀧𑀺;

𑀲𑀫𑀼𑀝𑁆𑀞𑀸𑀦𑀸𑀤𑀬𑁄 𑀢𑀼𑀮𑁆𑀬𑀸, 𑀧𑀞𑀫𑀦𑁆𑀢𑀺𑀫𑀯𑀢𑁆𑀣𑀼𑀦𑀸.

𑀧𑀞𑀫𑀸𑀦𑀺𑀬𑀢𑀓𑀣𑀸.

𑁫𑁪𑁯. 𑀅𑀦𑀦𑁆𑀥𑀸𑀩𑀥𑀺𑀭𑁄 𑀯𑀺𑀜𑁆𑀜𑀽, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄𑀧𑀺 𑀯𑀸;

𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑁄, 𑀅𑀦𑀸𑀧𑀢𑁆𑀢𑀺𑀓𑀭𑁄 𑀲𑀺𑀬𑀸.

𑁫𑁫𑁦. 𑀅𑀦𑁆𑀥𑁄 𑀅𑀩𑀥𑀺𑀭𑁄 𑀯𑀸𑀧𑀺, 𑀩𑀥𑀺𑀭𑁄 𑀯𑀸𑀧𑀺 𑀘𑀓𑁆𑀔𑀼𑀫𑀸;

𑀦 𑀓𑀭𑁄𑀢𑀺 𑀅𑀦𑀸𑀧𑀢𑁆𑀢𑀺𑀁, 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀺𑀤𑀁.

𑀤𑀼𑀢𑀺𑀬𑀸𑀦𑀺𑀬𑀢𑀓𑀣𑀸.

𑀇𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀅𑀦𑀺𑀬𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.