𑁯. 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁧. 𑀘𑀻𑀯𑀭𑁂𑀦𑀯𑀺𑀦𑀸𑀯𑀸𑀲𑁄𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀸𑀦𑀁 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀺𑀧𑁆𑀧𑀯𑀸𑀲𑁄. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂𑀲𑀼 𑀳𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀏𑀓𑁂𑀦𑀧𑀺 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀲𑀦𑁆𑀢𑀲𑁆𑀲 𑀲𑀳 𑀅𑀭𑀼𑀡𑀼𑀕𑁆𑀕𑀫𑀦𑀸 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀘𑀻𑀯𑀭𑀁 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑁂 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀕𑀸𑀫𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀅𑀟𑁆𑀟𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑀯𑀺𑀳𑀸𑀭𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑁂𑀲𑀼 𑀧𑀦 𑀅𑀬𑀁 𑀯𑀺𑀲𑁂𑀲𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁭-𑁮) 𑁋 𑀲𑀘𑁂 𑀏𑀓𑀲𑁆𑀲 𑀭𑀜𑁆𑀜𑁄 𑀕𑀸𑀫𑀪𑁄𑀚𑀓𑀲𑁆𑀲 𑀯𑀸 𑀲𑀦𑁆𑀢𑀓𑁄 𑀕𑀸𑀫𑁄 𑀳𑁄𑀢𑀺, 𑀬𑁂𑀦 𑀓𑁂𑀦𑀘𑀺 𑀧𑀸𑀓𑀸𑀭𑁂𑀦 𑀯𑀸 𑀯𑀢𑀺𑀬𑀸 𑀯𑀸 𑀧𑀭𑀺𑀔𑀸𑀬 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀸𑀫𑀩𑁆𑀪𑀦𑁆𑀢𑀭𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀁, 𑀢𑀲𑁆𑀲 𑀯𑀸 𑀖𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀫𑀦𑁆𑀢𑀸 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀩𑁆𑀪𑀦𑁆𑀢𑀭𑁂 𑀯𑀲𑀺𑀢𑀩𑁆𑀩𑀁. 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀘𑁂𑀧𑀺 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀆𑀓𑀸𑀲𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀺, 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺.

𑀲𑀘𑁂 𑀦𑀸𑀦𑀸𑀭𑀸𑀚𑀽𑀦𑀁 𑀯𑀸 𑀪𑁄𑀚𑀓𑀸𑀦𑀁 𑀯𑀸 𑀕𑀸𑀫𑁄 𑀳𑁄𑀢𑀺 𑀯𑁂𑀲𑀸𑀮𑀻𑀓𑀼𑀲𑀺𑀦𑀸𑀭𑀸𑀤𑀺𑀲𑀤𑀺𑀲𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀏𑀯𑀭𑀽𑀧𑁂 𑀕𑀸𑀫𑁂 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀸 𑀯𑀢𑁆𑀣𑀩𑁆𑀩𑀁, 𑀢𑀢𑁆𑀣 𑀲𑀤𑁆𑀤𑀲𑀗𑁆𑀖𑀝𑁆𑀝𑀦𑁂𑀦 𑀯𑀸 𑀚𑀦𑀲𑀫𑁆𑀩𑀸𑀥𑁂𑀦 𑀯𑀸 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀁 𑀦𑀕𑀭𑀤𑁆𑀯𑀸𑀭𑀫𑀽𑀮𑁂 𑀯𑀸. 𑀢𑀢𑁆𑀭𑀸𑀧𑀺 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀅𑀦𑁆𑀢𑁄𑀅𑀭𑀼𑀡𑁂 𑀆𑀕𑀫𑁆𑀫 𑀢𑁂𑀲𑀁𑀬𑁂𑀯 𑀲𑀪𑀸𑀬𑀦𑀕𑀭𑀤𑁆𑀯𑀸𑀭𑀫𑀽𑀮𑀸𑀦𑀁 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀖𑀭𑀲𑁆𑀲 𑀧𑀦 𑀘𑀻𑀯𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀲𑀘𑁂 𑀖𑀭𑁂 𑀅𑀝𑁆𑀞𑀧𑁂𑀢𑁆𑀯𑀸 ‘‘𑀲𑀪𑀸𑀬𑁂 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀪𑀸𑀬𑀁 𑀕𑀘𑁆𑀙𑀦𑁆𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀳𑀦𑁆𑀤𑀺𑀫𑀁 𑀘𑀻𑀯𑀭𑀁 𑀞𑀧𑁂𑀳𑀻’’𑀢𑀺 𑀏𑀯𑀁 𑀦𑀺𑀓𑁆𑀔𑁂𑀧𑀲𑀼𑀔𑁂 𑀳𑀢𑁆𑀣𑀧𑀸𑀲𑀕𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀆𑀧𑀡𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀁, 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁 𑀳𑀢𑁆𑀣𑀧𑀸𑀲𑁂 𑀯𑀸 𑀯𑀲𑀺𑀢𑀩𑁆𑀩𑀁.

𑀲𑀘𑁂 𑀦𑀕𑀭𑀲𑁆𑀲 𑀩𑀳𑀽𑀦𑀺𑀧𑀺 𑀤𑁆𑀯𑀸𑀭𑀸𑀦𑀺 𑀳𑁄𑀦𑁆𑀢𑀺 𑀩𑀳𑀽𑀦𑀺 𑀘 𑀲𑀪𑀸𑀬𑀸𑀦𑀺, 𑀲𑀩𑁆𑀩𑀢𑁆𑀣 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀲𑁆𑀲𑀸 𑀧𑀦 𑀯𑀻𑀣𑀺𑀬𑀸 𑀘𑀻𑀯𑀭𑀁 𑀞𑀧𑀺𑀢𑀁, 𑀬𑀁 𑀢𑀲𑁆𑀲𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀲𑀪𑀸𑀬𑀜𑁆𑀘 𑀤𑁆𑀯𑀸𑀭𑀜𑁆𑀘, 𑀢𑀲𑁆𑀲 𑀲𑀪𑀸𑀬𑀲𑁆𑀲 𑀘 𑀤𑁆𑀯𑀸𑀭𑀲𑁆𑀲 𑀘 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀓𑁆𑀓𑀸 𑀘𑀻𑀯𑀭𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀢𑀼𑀁. 𑀲𑀪𑀸𑀬𑀁 𑀧𑀦 𑀕𑀘𑁆𑀙𑀦𑁆𑀢𑁂𑀦 𑀬𑀲𑁆𑀲 𑀆𑀧𑀡𑀺𑀓𑀲𑁆𑀲 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀲𑀘𑁂 𑀲𑁄 𑀢𑀁 𑀘𑀻𑀯𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀖𑀭𑁂 𑀦𑀺𑀓𑁆𑀔𑀺𑀧𑀢𑀺, 𑀯𑀻𑀣𑀺𑀳𑀢𑁆𑀣𑀧𑀸𑀲𑁄 𑀦 𑀭𑀓𑁆𑀔𑀢𑀺, 𑀖𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀫𑀳𑀦𑁆𑀢𑀁 𑀖𑀭𑀁 𑀳𑁄𑀢𑀺 𑀤𑁆𑀯𑁂 𑀯𑀻𑀣𑀺𑀬𑁄 𑀨𑀭𑀺𑀢𑁆𑀯𑀸 𑀞𑀺𑀢𑀁, 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀳𑀢𑁆𑀣𑀧𑀸𑀲𑁂𑀬𑁂𑀯 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀪𑀸𑀬𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀦 𑀲𑀪𑀸𑀬𑁂 𑀯𑀸 𑀢𑀲𑁆𑀲 𑀲𑀫𑁆𑀫𑀼𑀔𑁂 𑀦𑀕𑀭𑀤𑁆𑀯𑀸𑀭𑀫𑀽𑀮𑁂 𑀯𑀸 𑀢𑁂𑀲𑀁𑀬𑁂𑀯 𑀳𑀢𑁆𑀣𑀧𑀸𑀲𑁂 𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀕𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀖𑀭𑁂 𑀢𑀲𑁆𑀲 𑀖𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂 𑀯𑀢𑁆𑀣𑀩𑁆𑀩𑀁.

𑀲𑀘𑁂 (𑀧𑀸𑀭𑀸. 𑁪𑁮𑁦) 𑀏𑀓𑀓𑀼𑀮𑀲𑁆𑀲 𑀲𑀦𑁆𑀢𑀓𑀁 𑀦𑀺𑀯𑁂𑀲𑀦𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘 𑀦𑀸𑀦𑀸𑀕𑀩𑁆𑀪𑀁 𑀦𑀸𑀦𑀸𑀑𑀯𑀭𑀓𑀁, 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁 𑀕𑀩𑁆𑀪𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘 𑀦𑀸𑀦𑀸𑀕𑀩𑁆𑀪𑀁 𑀦𑀸𑀦𑀸𑀑𑀯𑀭𑀓𑀁, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁, 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑁂 𑀖𑀭𑀤𑁆𑀯𑀸𑀭𑀫𑀽𑀮𑁂 𑀯𑀸 𑀕𑀩𑁆𑀪𑀲𑁆𑀲 𑀯𑀸 𑀖𑀭𑀤𑁆𑀯𑀸𑀭𑀫𑀽𑀮𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀬𑀲𑁆𑀫𑀺𑀁 𑀕𑀩𑁆𑀪𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀢𑁆𑀣𑀩𑁆𑀩𑀁 𑀕𑀩𑁆𑀪𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂. 𑀉𑀤𑁄𑀲𑀺𑀢𑀅𑀟𑁆𑀟𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑁂𑀲𑀼𑀧𑀺 𑀦𑀺𑀯𑁂𑀲𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀦𑀸𑀯𑀸 𑀳𑁄𑀢𑀺, 𑀅𑀦𑁆𑀢𑁄𑀦𑀸𑀯𑀸𑀬𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀦𑀸𑀯𑀸𑀬𑀁 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀦𑀸𑀯𑀸 𑀳𑁄𑀢𑀺 𑀦𑀸𑀦𑀸𑀕𑀩𑁆𑀪𑀸 𑀦𑀸𑀦𑀸𑀑𑀯𑀭𑀓𑀸, 𑀬𑀲𑁆𑀫𑀺𑀁 𑀑𑀯𑀭𑀓𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀑𑀯𑀭𑀓𑁂 𑀯𑀢𑁆𑀣𑀩𑁆𑀩𑀁 𑀑𑀯𑀭𑀓𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀦 𑀯𑀺𑀚𑀳𑀺𑀢𑀩𑁆𑀩𑀸, 𑀧𑀲𑁆𑀲𑀢𑁄 𑀅𑀩𑁆𑀪𑀦𑁆𑀢𑀭𑀁 𑀦 𑀯𑀺𑀚𑀳𑀺𑀢𑀩𑁆𑀩𑀁. 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀁 𑀳𑁄𑀢𑀺. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀲𑀢𑁆𑀣𑁄 𑀳𑁄𑀢𑀺, 𑀲𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀲𑀢𑁆𑀣𑁄 𑀕𑀘𑁆𑀙𑀦𑁆𑀢𑁄 𑀕𑀸𑀫𑀁 𑀯𑀸 𑀦𑀤𑀺𑀁 𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁄 𑀳𑀼𑀢𑁆𑀯𑀸 𑀑𑀭𑀜𑁆𑀘 𑀧𑀸𑀭𑀜𑁆𑀘 𑀨𑀭𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺, 𑀲𑀢𑁆𑀣𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺. 𑀅𑀣 𑀕𑀸𑀫𑁂 𑀯𑀸 𑀦𑀤𑀺𑀬𑀸 𑀯𑀸 𑀧𑀭𑀺𑀬𑀸𑀧𑀦𑁆𑀦𑁄 𑀳𑁄𑀢𑀺, 𑀕𑀸𑀫𑀧𑀭𑀺𑀳𑀸𑀭𑁄 𑀘𑁂𑀯 𑀦𑀤𑀻𑀧𑀭𑀺𑀳𑀸𑀭𑁄 𑀘 𑀮𑀩𑁆𑀪𑀢𑀺. 𑀲𑀘𑁂 𑀯𑀺𑀳𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀘𑀻𑀯𑀭𑀁 𑀳𑁄𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀲𑀻𑀫𑀸𑀬 𑀘𑀻𑀯𑀭𑀁 𑀳𑁄𑀢𑀺, 𑀲𑀢𑁆𑀣𑀲𑀫𑀻𑀧𑁂𑀬𑁂𑀯 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑁄 𑀲𑀓𑀝𑁂 𑀯𑀸 𑀪𑀕𑁆𑀕𑁂 𑀕𑁄𑀡𑁂 𑀯𑀸 𑀦𑀝𑁆𑀞𑁂 𑀅𑀦𑁆𑀢𑀭𑀸 𑀙𑀺𑀚𑁆𑀚𑀢𑀺, 𑀬𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀔𑁂𑀢𑁆𑀢𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀔𑁂𑀢𑁆𑀢𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀔𑁂𑀢𑁆𑀢𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀔𑁂𑀢𑁆𑀢𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀔𑁂𑀢𑁆𑀢𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀢𑁆𑀣𑀩𑁆𑀩𑀁 𑀤𑁆𑀯𑀸𑀭𑀫𑀽𑀮𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀸. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀥𑀜𑁆𑀜𑀓𑀭𑀡𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀥𑀜𑁆𑀜𑀓𑀭𑀡𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀥𑀜𑁆𑀜𑀓𑀭𑀡𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀥𑀜𑁆𑀜𑀓𑀭𑀡𑀁 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀜𑁆𑀘, 𑀅𑀦𑁆𑀢𑁄𑀥𑀜𑁆𑀜𑀓𑀭𑀡𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀫𑀽𑀮𑁂 𑀯𑀸 𑀯𑀢𑁆𑀣𑀩𑁆𑀩𑀁 𑀤𑁆𑀯𑀸𑀭𑀫𑀽𑀮𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁. 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑁂𑀲𑀼𑀧𑀺 𑀔𑁂𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀯𑀺𑀳𑀸𑀭𑁄 𑀳𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘, 𑀅𑀦𑁆𑀢𑁄𑀯𑀺𑀳𑀸𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀢𑁆𑀣𑀩𑁆𑀩𑀁. 𑀲𑀘𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀁 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀲𑁂.

𑀲𑀘𑁂 𑀏𑀓𑀓𑀼𑀮𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀳𑁄𑀢𑀺, 𑀬𑀁 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀅𑀦𑁆𑀢𑁄𑀙𑀸𑀬𑀸𑀬 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀙𑀸𑀬𑀸𑀬 𑀯𑀢𑁆𑀣𑀩𑁆𑀩𑀁. 𑀯𑀺𑀭𑀴𑀲𑀸𑀔𑀲𑁆𑀲 𑀧𑀦 𑀭𑀼𑀓𑁆𑀔𑀲𑁆𑀲 𑀆𑀢𑀧𑁂𑀦 𑀨𑀼𑀝𑁆𑀞𑁄𑀓𑀸𑀲𑁂 𑀞𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀘𑁆𑀙𑀸𑀬𑀸𑀬 𑀯𑀸 𑀔𑀦𑁆𑀥𑀘𑁆𑀙𑀸𑀬𑀸𑀬 𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀲𑀸𑀔𑀸𑀬 𑀯𑀸 𑀯𑀺𑀝𑀧𑁂 𑀯𑀸 𑀞𑀧𑁂𑀢𑀺, 𑀉𑀧𑀭𑀺 𑀅𑀜𑁆𑀜𑀲𑀸𑀔𑀘𑁆𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀔𑀼𑀚𑁆𑀚𑀭𑀼𑀓𑁆𑀔𑀲𑁆𑀲 𑀙𑀸𑀬𑀸 𑀤𑀽𑀭𑀁 𑀕𑀘𑁆𑀙𑀢𑀺, 𑀙𑀸𑀬𑀸𑀬 𑀕𑀢𑀝𑁆𑀞𑀸𑀦𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀦𑀸𑀦𑀸𑀓𑀼𑀮𑀲𑁆𑀲 𑀭𑀼𑀓𑁆𑀔𑀫𑀽𑀮𑀁 𑀳𑁄𑀢𑀺, 𑀘𑀻𑀯𑀭𑀲𑁆𑀲 𑀳𑀢𑁆𑀣𑀧𑀸𑀲𑁂 𑀯𑀲𑀺𑀢𑀩𑁆𑀩𑀁.

𑀅𑀚𑁆𑀛𑁄𑀓𑀸𑀲𑁂 𑀧𑀦 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂 𑀯𑀲𑀺𑀢𑀩𑁆𑀩𑀁. 𑀅𑀕𑀸𑀫𑀓𑀁 𑀦𑀸𑀫 𑀅𑀭𑀜𑁆𑀜𑀁 𑀯𑀺𑀜𑁆𑀛𑀸𑀝𑀯𑀻𑀆𑀤𑀻𑀲𑀼 𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀯𑀸 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂 𑀤𑀻𑀧𑀓𑁂𑀲𑀼 𑀮𑀩𑁆𑀪𑀢𑀺. 𑀢𑀸𑀤𑀺𑀲𑁂 𑀅𑀭𑀜𑁆𑀜𑁂 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄, 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀯𑀸 𑀧𑀘𑁆𑀙𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀧𑀭𑀺𑀬𑀦𑁆𑀢𑁂 𑀞𑀧𑀺𑀢𑀘𑀻𑀯𑀭𑀁 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀅𑀭𑀼𑀡𑀼𑀕𑁆𑀕𑀫𑀦𑀲𑀫𑀬𑁂 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀁. 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀦 𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑁫𑁨. 𑀲𑀘𑁂 𑀧𑀥𑀸𑀦𑀺𑀓𑁄 𑀪𑀺𑀓𑁆𑀔𑀼 𑀲𑀩𑁆𑀩𑀭𑀢𑁆𑀢𑀺𑀁 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 ‘‘𑀦𑀳𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀑𑀢𑀭𑀢𑀺, 𑀦𑀳𑀸𑀬𑀦𑁆𑀢𑀲𑁆𑀲𑁂𑀯 𑀘𑀲𑁆𑀲 𑀅𑀭𑀼𑀡𑀁 𑀉𑀝𑁆𑀞𑀳𑀢𑀺, 𑀓𑀺𑀁 𑀓𑀸𑀢𑀩𑁆𑀩𑀁? 𑀲𑁄 𑀳𑀺 𑀬𑀤𑀺 𑀉𑀢𑁆𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀘𑀻𑀯𑀭𑀁, 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀅𑀣 𑀦𑀕𑁆𑀕𑁄 𑀕𑀘𑁆𑀙𑀢𑀺, 𑀏𑀯𑀫𑁆𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀲𑁄 𑀳𑀺 𑀬𑀸𑀯 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀢𑀸𑀯 𑀢𑁂𑀲𑀁 𑀘𑀻𑀯𑀭𑀸𑀦𑀁 𑀅𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸 𑀦𑀝𑁆𑀞𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺, 𑀦𑀝𑁆𑀞𑀘𑀻𑀯𑀭𑀲𑁆𑀲 𑀘 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑁆𑀯𑁂 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀤𑀽𑀭𑁂 𑀯𑀺𑀳𑀸𑀭𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑀼𑀲𑁆𑀲𑀸 𑀲𑀜𑁆𑀘𑀭𑀦𑁆𑀢𑀺, 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑀓𑀽𑀝𑁂 𑀞𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀪𑀸𑀕𑀁 𑀪𑀺𑀓𑁆𑀔𑀼𑀁 𑀦 𑀧𑀲𑁆𑀲𑀢𑀺, 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑀸 𑀳𑁄𑀦𑁆𑀢𑀺, 𑀲𑀗𑁆𑀖𑀸𑀝𑀺𑀁 𑀩𑀳𑀺𑀕𑀸𑀫𑁂 𑀞𑀧𑁂𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀩𑀳𑀺𑀕𑀸𑀫𑁂 𑀘𑁄𑀭𑀪𑀬𑀁 𑀳𑁄𑀢𑀺, 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀲𑀦𑀲𑀸𑀮𑀸 𑀲𑀫𑁆𑀩𑀸𑀥𑀸 𑀳𑁄𑀢𑀺, 𑀚𑀦𑀸𑀓𑀺𑀡𑁆𑀡𑀸 𑀦 𑀲𑀓𑁆𑀓𑀸 𑀏𑀓𑀫𑀦𑁆𑀢𑁂 𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀸𑀢𑀼𑀁, 𑀏𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀩𑀳𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀘𑀻𑀯𑀭𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺.

𑀲𑀘𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀤𑀳𑀭𑀸𑀦𑀁 𑀳𑀢𑁆𑀣𑁂 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀧𑀘𑁆𑀙𑀺𑀫𑀬𑀸𑀫𑁂 𑀲𑀬𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸𑀯 𑀲𑀬𑀺𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑀦𑁆𑀢𑀸𑀦𑀁𑀬𑁂𑀯 𑀅𑀲𑀫𑁆𑀧𑀢𑁆𑀢𑁂𑀲𑀼 𑀤𑀳𑀭𑁂𑀲𑀼 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀤𑀳𑀭𑀸𑀦𑀫𑁆𑀧𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸𑀦𑀁 𑀣𑁂𑀭𑁂𑀲𑀼 𑀅𑀲𑀫𑁆𑀧𑀢𑁆𑀢𑁂𑀲𑀼 𑀏𑀲𑁂𑀯 𑀦𑀬𑁄. 𑀫𑀕𑁆𑀕𑀁 𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀭𑀜𑁆𑀜𑁂 𑀅𑀜𑁆𑀜𑀫𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀤𑀳𑀭𑀸 ‘‘𑀫𑀬𑀁, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀲𑀬𑀺𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀢𑀼𑀫𑁆𑀳𑁂 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀬𑀦𑁆𑀢𑀺, 𑀘𑀻𑀯𑀭𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀤𑀳𑀭𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀣𑁂𑀭𑁂𑀲𑀼 𑀲𑀬𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑁂𑀥𑀸𑀧𑀣𑀁 𑀤𑀺𑀲𑁆𑀯𑀸 𑀣𑁂𑀭𑀸 ‘‘𑀅𑀬𑀁 𑀫𑀕𑁆𑀕𑁄’’, 𑀤𑀳𑀭𑀸 ‘‘𑀅𑀬𑀁 𑀫𑀕𑁆𑀕𑁄’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀕𑀢𑀸, 𑀲𑀳 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀸 𑀘𑀻𑀯𑀭𑀸𑀦𑀺 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀤𑀳𑀭𑀸 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀪𑁂𑀲𑀚𑁆𑀚𑀢𑁆𑀣𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀅𑀲𑀫𑁆𑀧𑀢𑁆𑀢𑀸𑀦𑀁𑀬𑁂𑀯 𑀘 𑀦𑁂𑀲𑀁 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 𑀥𑁂𑀦𑀼𑀪𑀬𑁂𑀦 𑀯𑀸 𑀲𑀼𑀦𑀔𑀪𑀬𑁂𑀦 𑀯𑀸 𑀫𑀼𑀳𑀼𑀢𑁆𑀢𑀁 𑀞𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀞𑀢𑁆𑀯𑀸 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀘𑀻𑀯𑀭𑀸𑀦𑀺 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺.

𑀲𑀘𑁂 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀅𑀦𑁆𑀢𑁄𑀲𑀻𑀫𑀸𑀬𑀁 𑀕𑀸𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑀭𑀸 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀦𑁂𑀯 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 ‘‘𑀯𑀺𑀪𑀸𑀬𑀢𑀼 𑀢𑀸𑀯𑀸’’𑀢𑀺 𑀦𑀺𑀲𑀻𑀤𑀦𑁆𑀢𑀺, 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀦 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀬𑁂𑀧𑀺 ‘‘𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀲𑀉𑀲𑁆𑀲𑀸𑀳𑀸 𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀘 𑀦𑁂𑀲𑀁 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺, 𑀘𑀻𑀯𑀭𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀥𑀫𑁆𑀫𑀕𑀸𑀭𑀯𑁂𑀦 ‘‘𑀬𑀸𑀯𑀧𑀭𑀺𑀬𑁄𑀲𑀸𑀦𑀁 𑀲𑀼𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀻𑀤𑀦𑁆𑀢𑀺, 𑀲𑀳 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀸 𑀘𑀻𑀯𑀭𑀸𑀦𑀺𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀣𑁂𑀭𑁂𑀦 𑀤𑀳𑀭𑀁 𑀘𑀻𑀯𑀭𑀥𑁄𑀯𑀦𑀢𑁆𑀣𑀸𑀬 𑀕𑀸𑀫𑀓𑀁 𑀧𑁂𑀲𑁂𑀦𑁆𑀢𑁂𑀦 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀁, 𑀤𑀳𑀭𑀲𑁆𑀲𑀧𑀺 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀸𑀧𑁂𑀢𑁆𑀯𑀸𑀯 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀅𑀲𑀢𑀺𑀬𑀸 𑀕𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀤𑀳𑀭𑀲𑁆𑀲 𑀘𑀻𑀯𑀭𑀁 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀣𑁂𑀭𑁄 𑀦 𑀲𑀭𑀢𑀺, 𑀤𑀳𑀭𑁄𑀯 𑀲𑀭𑀢𑀺, 𑀤𑀳𑀭𑁂𑀦 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀘𑀻𑀯𑀭𑀁 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺. 𑀅𑀢𑁆𑀢𑀦𑁄𑀧𑀺 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀏𑀯𑀁 𑀏𑀓𑀲𑁆𑀲 𑀲𑀢𑀺𑀬𑀸𑀧𑀺 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀳𑁄𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.