𑁧𑁦. 𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁩. 𑀪𑀡𑁆𑀟𑀲𑁆𑀲 𑀧𑀝𑀺𑀲𑀸𑀫𑀦𑀦𑁆𑀢𑀺 𑀧𑀭𑁂𑀲𑀁 𑀪𑀡𑁆𑀟𑀲𑁆𑀲 𑀕𑁄𑀧𑀦𑀁. 𑀧𑀭𑁂𑀲𑀜𑁆𑀳𑀺 (𑀧𑀸𑀘𑀺. 𑀅𑀝𑁆𑀞. 𑁫𑁦𑁬) 𑀓𑀧𑁆𑀧𑀺𑀬𑀯𑀢𑁆𑀣𑀼 𑀯𑀸 𑀳𑁄𑀢𑀼 𑀅𑀓𑀧𑁆𑀧𑀺𑀬𑀯𑀢𑁆𑀣𑀼 𑀯𑀸, 𑀅𑀦𑁆𑀢𑀫𑀲𑁄 𑀫𑀸𑀢𑀼 𑀓𑀡𑁆𑀡𑀧𑀺𑀴𑀦𑁆𑀥𑀦𑀁 𑀓𑀸𑀮𑀧𑀡𑁆𑀡𑀫𑁆𑀧𑀺 𑀕𑀺𑀳𑀺𑀲𑀦𑁆𑀢𑀓𑀁 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀅𑀯𑀲𑁆𑀲𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀳𑁄𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. ‘‘𑀇𑀤𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀧𑀦 𑀯𑀼𑀢𑁆𑀢𑁂 ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 ‘‘𑀧𑀝𑀺𑀲𑀸𑀫𑁂𑀳𑀻’’𑀢𑀺 𑀧𑀸𑀢𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀧𑀮𑀺𑀩𑁄𑀥𑁄 𑀦𑀸𑀫 𑀳𑁄𑀢𑀺, 𑀧𑀝𑀺𑀲𑀸𑀫𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀳𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀟𑁆𑀠𑀓𑀻𑀆𑀤𑀬𑁄 𑀯𑀸 𑀭𑀸𑀚𑀯𑀮𑁆𑀮𑀪𑀸 𑀯𑀸 ‘‘𑀅𑀢𑁆𑀢𑀦𑁄 𑀉𑀧𑀓𑀭𑀡𑀪𑀡𑁆𑀟𑀁 𑀯𑀸 𑀲𑀬𑀦𑀪𑀡𑁆𑀟𑀁 𑀯𑀸 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀙𑀦𑁆𑀤𑁂𑀦𑀧𑀺 𑀪𑀬𑁂𑀦𑀧𑀺 𑀦 𑀓𑀸𑀢𑀩𑁆𑀩𑀫𑁂𑀯, 𑀕𑀼𑀢𑁆𑀢𑀝𑁆𑀞𑀸𑀦𑀁 𑀧𑀦 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀩𑀮𑀓𑁆𑀓𑀸𑀭𑁂𑀦 𑀧𑀸𑀢𑁂𑀢𑁆𑀯𑀸 𑀕𑀢𑁂𑀲𑀼 𑀘 𑀧𑀝𑀺𑀲𑀸𑀫𑁂𑀢𑀼𑀁.

𑀲𑀘𑁂 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧𑁧) 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀝𑀺𑀲𑀸𑀫𑀦𑀢𑁆𑀣𑀸𑀬 𑀞𑀧𑀺𑀢𑀁 𑀪𑀡𑁆𑀟𑀁 𑀲𑀸𑀫𑀺𑀓𑁂𑀦 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀬𑀸𑀘𑀺𑀢𑁄 𑀅𑀤𑀸𑀢𑀼𑀓𑀸𑀫𑁄 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀢𑀺, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀁. ‘‘𑀓𑀺𑀁 𑀢𑀼𑀫𑁆𑀳𑁂 𑀪𑀡𑀣, 𑀦𑁂𑀯𑀺𑀤𑀁 𑀫𑀬𑁆𑀳𑀁 𑀅𑀦𑀼𑀭𑀽𑀧𑀁, 𑀦 𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯. ‘‘𑀭𑀳𑁄 𑀫𑀬𑀸 𑀏𑀢𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀁, 𑀦 𑀅𑀜𑁆𑀜𑁄 𑀓𑁄𑀘𑀺 𑀚𑀸𑀦𑀸𑀢𑀺, 𑀤𑀲𑁆𑀲𑀢𑀺 𑀦𑀼 𑀔𑁄 𑀫𑁂, 𑀦𑁄’’𑀢𑀺 𑀲𑀸𑀫𑀺𑀓𑁄 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀲𑁆𑀲 𑀨𑀭𑀼𑀲𑀸𑀤𑀺𑀪𑀸𑀯𑀁 𑀤𑀺𑀲𑁆𑀯𑀸 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀢𑀢𑁆𑀭 𑀲𑀘𑀸𑀬𑀁 𑀪𑀺𑀓𑁆𑀔𑀼 ‘‘𑀓𑀺𑀮𑀫𑁂𑀢𑁆𑀯𑀸 𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑀸𑀦𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺 𑀢𑀸𑀯. 𑀲𑀘𑁂𑀧𑀺 𑀲𑁄 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄, 𑀪𑀡𑁆𑀟𑀲𑀸𑀫𑀺𑀓𑁄 𑀧𑀦 𑀕𑀳𑀡𑁂 𑀲𑀉𑀲𑁆𑀲𑀸𑀳𑁄, 𑀭𑀓𑁆𑀔𑀢𑀺𑀬𑁂𑀯. 𑀬𑀤𑀺 𑀧𑀦 𑀢𑀲𑁆𑀫𑀺𑀁 𑀤𑀸𑀦𑁂 𑀦𑀺𑀭𑀼𑀲𑁆𑀲𑀸𑀳𑁄 𑀪𑀡𑁆𑀟𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀁 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀺𑀓𑁆𑀔𑀼𑀦𑁄 𑀧𑀸𑀭𑀸𑀚𑀺𑀓𑀁. 𑀬𑀤𑀺𑀧𑀺 𑀫𑀼𑀔𑁂𑀦 ‘‘𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀘𑀺𑀢𑁆𑀢𑁂𑀦 𑀧𑀦 𑀅𑀤𑀸𑀢𑀼𑀓𑀸𑀫𑁄, 𑀏𑀯𑀫𑁆𑀧𑀺 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀢𑀁 𑀧𑀦 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑁂𑀳𑀺 𑀞𑀧𑀺𑀢𑀁 𑀪𑀡𑁆𑀟𑀁 𑀅𑀕𑀼𑀢𑁆𑀢𑀤𑁂𑀲𑀢𑁄 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑀦𑀢𑁆𑀣𑀸𑀬 𑀳𑀭𑀢𑁄 𑀅𑀦𑀸𑀧𑀢𑁆𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑀧𑀺 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀪𑀡𑁆𑀟𑀤𑁂𑀬𑁆𑀬𑀁 𑀧𑀦 𑀳𑁄𑀢𑀺. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀢𑁄𑀧𑀺 𑀏𑀲𑁂𑀯 𑀦𑀬𑁄.

𑁫𑁪. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀦𑁆𑀢𑀓𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑀸𑀫𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑀫𑀻𑀧𑁂 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 ‘‘𑀏𑀢𑁂 𑀲𑀗𑁆𑀕𑁄𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀦𑀳𑀸𑀬𑀺𑀢𑀼𑀁 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀕𑀘𑁆𑀙𑀢𑀺, 𑀲𑀘𑁂 𑀢𑀁 𑀆𑀯𑀸𑀲𑀺𑀓𑀸 𑀲𑀗𑁆𑀕𑁄𑀧𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀦𑀝𑁆𑀞𑁂 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂𑀧𑀺 𑀲𑁄 ‘‘𑀇𑀤𑀁, 𑀪𑀦𑁆𑀢𑁂, 𑀞𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺, 𑀇𑀢𑀭𑁂 𑀘 𑀓𑀺𑀘𑁆𑀘𑀧𑀲𑀼𑀢𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀏𑀲𑁂𑀯 𑀦𑀬𑁄. 𑀅𑀣𑀸𑀧𑀺 𑀢𑁂 ‘‘𑀇𑀤𑀁, 𑀪𑀦𑁆𑀢𑁂, 𑀞𑀧𑁂𑀣𑀸’’𑀢𑀺 𑀯𑀼𑀢𑁆𑀢𑀸 ‘‘𑀫𑀬𑀁 𑀩𑁆𑀬𑀸𑀯𑀝𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀺, 𑀇𑀢𑀭𑁄 𑀘 ‘‘𑀅𑀯𑀲𑁆𑀲𑀁 𑀞𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀢𑁂 𑀢𑁂𑀦 𑀬𑀸𑀘𑀺𑀢𑀸 𑀯𑀸 𑀅𑀬𑀸𑀘𑀺𑀢𑀸 𑀯𑀸 ‘‘𑀫𑀬𑀁 𑀞𑀧𑁂𑀲𑁆𑀲𑀸𑀫, 𑀢𑁆𑀯𑀁 𑀕𑀘𑁆𑀙𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀲𑀗𑁆𑀕𑁄𑀧𑀺𑀢𑀩𑁆𑀩𑀁. 𑀦𑁄 𑀘𑁂 𑀲𑀗𑁆𑀕𑁄𑀧𑁂𑀦𑁆𑀢𑀺, 𑀦𑀝𑁆𑀞𑁂 𑀕𑀻𑀯𑀸. 𑀓𑀲𑁆𑀫𑀸? 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸.

𑀬𑁄 𑀪𑀺𑀓𑁆𑀔𑀼 𑀪𑀡𑁆𑀟𑀸𑀕𑀸𑀭𑀺𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀏𑀯 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀺 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀅𑀧𑀺𑀤𑀳𑀺𑀢𑁆𑀯𑀸 𑀢𑁂𑀲𑀫𑁆𑀧𑀺 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀤𑀽𑀭𑁂 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺, 𑀢𑀸𑀦𑀺 𑀘𑁂 𑀘𑁄𑀭𑀸 𑀳𑀭𑀦𑁆𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. 𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 ‘‘𑀑𑀭𑁄𑀧𑁂𑀣, 𑀪𑀦𑁆𑀢𑁂, 𑀧𑀢𑁆𑀢𑀘𑀻𑀯𑀭𑀸𑀦𑀺, 𑀓𑀸𑀮𑁄 𑀲𑀮𑀸𑀓𑀕𑁆𑀕𑀳𑀡𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁄 ‘‘𑀲𑀫𑀸𑀕𑀢𑀸𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫 𑀲𑀫𑀸𑀕𑀢𑀸𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀧𑀢𑁆𑀢𑀘𑀻𑀯𑀭𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀤𑁆𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀤𑁆𑀯𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀢𑁆𑀭 𑀘𑁂𑀓𑁄 𑀅𑀮𑀲𑀚𑀸𑀢𑀺𑀓𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀲𑀼 𑀕𑀢𑁂𑀲𑀼 𑀧𑀘𑁆𑀙𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀦𑁆𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀤𑀓𑀝𑁆𑀞𑀸𑀦𑀁 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀘𑁆𑀙𑀢𑀺, 𑀢𑀁 𑀔𑀡𑀁 𑀤𑀺𑀲𑁆𑀯𑀸 𑀘𑁄𑀭𑀸 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀳𑀭𑀦𑁆𑀢𑀺, 𑀲𑀼𑀳𑀝𑀁, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺.

𑀲𑀘𑁂𑀧𑀺 𑀓𑁄𑀘𑀺 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀪𑀡𑁆𑀟𑀸𑀕𑀸𑀭𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀦𑀝𑁆𑀞𑁂 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀅𑀝𑁆𑀞𑀸𑀦𑁂 𑀞𑀧𑀺𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀞𑀧𑁂𑀢𑀺, 𑀦𑀝𑁆𑀞𑁂 𑀢𑀲𑁆𑀲𑁂𑀯 𑀕𑀻𑀯𑀸. 𑀲𑀘𑁂𑀧𑀺 𑀞𑀧𑀺𑀢𑀪𑀺𑀓𑁆𑀔𑀼𑀦𑀸 ‘‘𑀫𑀬𑀸, 𑀪𑀦𑁆𑀢𑁂, 𑀈𑀤𑀺𑀲𑁄 𑀦𑀸𑀫 𑀧𑀭𑀺𑀓𑁆𑀔𑀸𑀭𑁄 𑀞𑀧𑀺𑀢𑁄, 𑀉𑀧𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀼𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑀺, 𑀦𑀝𑁆𑀞𑁂 𑀢𑀲𑁆𑀲𑁂𑀯 𑀕𑀻𑀯𑀸. ‘‘𑀦𑀸𑀳𑀁 𑀚𑀸𑀦𑀸𑀫𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀦 𑀦𑀢𑁆𑀣𑀺 𑀕𑀻𑀯𑀸. 𑀬𑁄𑀧𑀺 𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀞𑀧𑁂𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀜𑁆𑀘 𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀺, 𑀦𑀝𑁆𑀞𑀁 𑀲𑀼𑀦𑀝𑁆𑀞𑀫𑁂𑀯. 𑀲𑀘𑁂 𑀧𑀦 𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀜𑁆𑀜𑀢𑁆𑀭 𑀞𑀧𑁂𑀢𑀺, 𑀦𑀝𑁆𑀞𑁂 𑀕𑀻𑀯𑀸. 𑀲𑀘𑁂 𑀪𑀡𑁆𑀟𑀸𑀕𑀸𑀭𑀁 𑀲𑀼𑀕𑀼𑀢𑁆𑀢𑀁, 𑀲𑀩𑁆𑀩𑁄 𑀲𑀗𑁆𑀖𑀲𑁆𑀲 𑀘𑁂𑀢𑀺𑀬𑀲𑁆𑀲 𑀘 𑀧𑀭𑀺𑀓𑁆𑀔𑀸𑀭𑁄 𑀢𑀢𑁆𑀣𑁂𑀯 𑀞𑀧𑀻𑀬𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀘 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀥𑀫𑁆𑀫𑀓𑀣𑀁 𑀯𑀸 𑀲𑁄𑀢𑀼𑀁 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀓𑀢𑁆𑀣𑀘𑀺 𑀕𑀘𑁆𑀙𑀢𑀺, 𑀢𑀁 𑀔𑀡𑀁 𑀤𑀺𑀲𑁆𑀯𑀸 𑀬𑀢𑁆𑀢𑀓𑀁 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸. 𑀪𑀡𑁆𑀟𑀸𑀕𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀘𑀗𑁆𑀓𑀫𑀦𑁆𑀢𑀲𑁆𑀲 𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀲𑀫𑀡𑀥𑀫𑁆𑀫𑀸𑀦𑀼𑀬𑁄𑀕𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀩𑁆𑀬𑀸𑀯𑀝𑀲𑁆𑀲 𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀧𑀻𑀴𑀺𑀢𑀲𑁆𑀲𑀧𑀺 𑀲𑀢𑁄 𑀢𑀢𑁆𑀣𑁂𑀯 𑀉𑀧𑀘𑀸𑀭𑁂 𑀯𑀺𑀚𑁆𑀚𑀫𑀸𑀦𑁂 𑀩𑀳𑀺 𑀕𑀘𑁆𑀙𑀢𑁄 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀧𑀫𑀢𑁆𑀢𑀲𑁆𑀲 𑀲𑀢𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀯𑀺𑀯𑀝𑀫𑁂𑀯 𑀧𑀯𑀺𑀲𑀺𑀢𑁆𑀯𑀸 𑀯𑀸 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀢𑁆𑀢𑀓𑀁 𑀢𑀲𑁆𑀲 𑀧𑀫𑀸𑀤𑀧𑀘𑁆𑀘𑀬𑀸 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀕𑀻𑀯𑀸. ‘‘𑀉𑀡𑁆𑀳𑀲𑀫𑀬𑁂 𑀧𑀦 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀉𑀘𑁆𑀘𑀸𑀭𑀧𑀻𑀴𑀺𑀢𑀲𑁆𑀲 𑀧𑀦 𑀢𑀲𑁆𑀫𑀺𑀁 𑀉𑀧𑀘𑀸𑀭𑁂 𑀅𑀲𑀢𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲 𑀕𑀺𑀮𑀸𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀅𑀯𑀺𑀲𑀬𑁄, 𑀢𑀲𑁆𑀫𑀸 𑀕𑀻𑀯𑀸 𑀦 𑀳𑁄𑀢𑀺.

𑁫𑁫. 𑀬𑁄 𑀧𑀦 𑀅𑀦𑁆𑀢𑁄 𑀉𑀡𑁆𑀳𑀧𑀻𑀴𑀺𑀢𑁄 𑀤𑁆𑀯𑀸𑀭𑀁 𑀲𑀼𑀕𑀼𑀢𑁆𑀢𑀁 𑀓𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀘𑁄𑀭𑀸 𑀢𑀁 𑀕𑀳𑁂𑀢𑁆𑀯𑀸 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀯𑀤𑀦𑁆𑀢𑀺, 𑀬𑀸𑀯𑀢𑀢𑀺𑀬𑀁 𑀦 𑀯𑀺𑀯𑀭𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀢𑁂 𑀘𑁄𑀭𑀸 ‘‘𑀲𑀘𑁂 𑀦 𑀯𑀺𑀯𑀭𑀲𑀺, 𑀢𑀜𑁆𑀘 𑀫𑀸𑀭𑁂𑀲𑁆𑀲𑀸𑀫, 𑀤𑁆𑀯𑀸𑀭𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀨𑀭𑀲𑀼𑀆𑀤𑀻𑀦𑀺 𑀉𑀓𑁆𑀔𑀺𑀧𑀦𑁆𑀢𑀺, ‘‘𑀫𑀬𑀺 𑀘 𑀫𑀢𑁂 𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑁂 𑀯𑀺𑀦𑀝𑁆𑀞𑁂 𑀕𑀼𑀡𑁄 𑀦𑀢𑁆𑀣𑀻’’𑀢𑀺 𑀯𑀺𑀯𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀥𑀸𑀧𑀺 ‘‘𑀅𑀯𑀺𑀲𑀬𑀢𑁆𑀢𑀸 𑀕𑀻𑀯𑀸 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺. 𑀲𑀘𑁂 𑀓𑁄𑀘𑀺 𑀆𑀕𑀦𑁆𑀢𑀼𑀓𑁄 𑀓𑀼𑀜𑁆𑀘𑀺𑀓𑀁 𑀯𑀸 𑀤𑁂𑀢𑀺, 𑀤𑁆𑀯𑀸𑀭𑀁 𑀯𑀸 𑀯𑀺𑀯𑀭𑀢𑀺, 𑀬𑀢𑁆𑀢𑀓𑀁 𑀘𑁄𑀭𑀸 𑀳𑀭𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸. 𑀲𑀗𑁆𑀖𑁂𑀦 𑀪𑀡𑁆𑀟𑀸𑀕𑀸𑀭𑀁 𑀕𑀼𑀢𑁆𑀢𑀢𑁆𑀣𑀸𑀬 𑀲𑀽𑀘𑀺𑀬𑀦𑁆𑀢𑀓𑀜𑁆𑀘 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀸 𑀘 𑀬𑁄𑀚𑁂𑀢𑁆𑀯𑀸 𑀤𑀺𑀦𑁆𑀦𑀸 𑀳𑁄𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀖𑀝𑀺𑀓𑀫𑀢𑁆𑀢𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀘𑁄𑀭𑀸 𑀯𑀺𑀯𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. 𑀲𑀽𑀘𑀺𑀬𑀦𑁆𑀢𑀓𑀜𑁆𑀘 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀜𑁆𑀘 𑀬𑁄𑀚𑁂𑀢𑁆𑀯𑀸 𑀦𑀺𑀧𑀦𑁆𑀦𑀁 𑀧𑀦𑁂𑀢𑀁 𑀲𑀘𑁂 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀸𑀳𑀻’’𑀢𑀺 𑀯𑀤𑀦𑁆𑀢𑀺, 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀏𑀯𑀁 𑀲𑀼𑀕𑀼𑀢𑁆𑀢𑀁 𑀓𑀢𑁆𑀯𑀸 𑀦𑀺𑀧𑀦𑁆𑀦𑁂 𑀧𑀦 𑀲𑀘𑁂 𑀪𑀺𑀢𑁆𑀢𑀺𑀁 𑀯𑀸 𑀙𑀤𑀦𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀳𑀭𑀦𑁆𑀢𑀺, 𑀦 𑀢𑀲𑁆𑀲 𑀕𑀻𑀯𑀸.

𑀲𑀘𑁂 𑀪𑀡𑁆𑀟𑀸𑀕𑀸𑀭𑁂 𑀅𑀜𑁆𑀜𑁂𑀧𑀺 𑀣𑁂𑀭𑀸 𑀯𑀲𑀦𑁆𑀢𑀺, 𑀯𑀺𑀯𑀝𑁂 𑀤𑁆𑀯𑀸𑀭𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀢𑁂𑀲𑀼 𑀕𑀢𑁂𑀲𑀼 𑀤𑁆𑀯𑀸𑀭𑀁 𑀦 𑀚𑀕𑁆𑀕𑀢𑀺, 𑀲𑀘𑁂 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀯𑀳𑀭𑀻𑀬𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀇𑀲𑁆𑀲𑀭𑀯𑀢𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀕𑀻𑀯𑀸, 𑀣𑁂𑀭𑁂𑀳𑀺 𑀧𑀦 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀲𑀸𑀫𑀻𑀘𑀺. 𑀬𑀤𑀺 𑀪𑀡𑁆𑀟𑀸𑀕𑀸𑀭𑀺𑀓𑁄 ‘‘𑀢𑀼𑀫𑁆𑀳𑁂 𑀩𑀳𑀺 𑀞𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀓𑁆𑀔𑀸𑀭𑀁 𑀕𑀡𑁆𑀳𑀣, 𑀫𑀸 𑀧𑀯𑀺𑀲𑀺𑀢𑁆𑀣𑀸’’𑀢𑀺 𑀯𑀤𑀢𑀺, 𑀢𑁂𑀲𑀜𑁆𑀘 𑀏𑀓𑁄 𑀮𑁄𑀮𑀫𑀳𑀸𑀣𑁂𑀭𑁄 𑀲𑀸𑀫𑀡𑁂𑀭𑁂𑀳𑀺 𑀘𑁂𑀯 𑀉𑀧𑀝𑁆𑀞𑀸𑀓𑁂𑀳𑀺 𑀘 𑀲𑀤𑁆𑀥𑀺𑀁 𑀪𑀡𑁆𑀟𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀢𑀺 𑀘𑁂𑀯 𑀦𑀺𑀧𑀚𑁆𑀚𑀢𑀺 𑀘, 𑀬𑀢𑁆𑀢𑀓𑀁 𑀪𑀡𑁆𑀟𑀁 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀲𑁆𑀲 𑀕𑀻𑀯𑀸, 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀦 𑀅𑀯𑀲𑁂𑀲𑀣𑁂𑀭𑁂𑀳𑀺 𑀘 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀅𑀣 𑀪𑀡𑁆𑀟𑀸𑀕𑀸𑀭𑀺𑀓𑁄𑀯 𑀮𑁄𑀮𑀲𑀸𑀫𑀡𑁂𑀭𑁂 𑀘 𑀉𑀧𑀝𑁆𑀞𑀸𑀓𑁂 𑀘 𑀕𑀳𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑁂 𑀦𑀺𑀲𑀻𑀤𑀢𑀺 𑀘𑁂𑀯 𑀦𑀺𑀧𑀚𑁆𑀚𑀢𑀺 𑀘, 𑀬𑀢𑁆𑀢𑀓𑀁 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀕𑀻𑀯𑀸. 𑀢𑀲𑁆𑀫𑀸 𑀪𑀡𑁆𑀟𑀸𑀕𑀸𑀭𑀺𑀓𑁂𑀦𑁂𑀯 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁, 𑀅𑀯𑀲𑁂𑀲𑁂𑀳𑀺 𑀅𑀧𑁆𑀧𑁂𑀯 𑀭𑀼𑀓𑁆𑀔𑀫𑀽𑀮𑁂 𑀯𑀲𑀺𑀢𑀩𑁆𑀩𑀁, 𑀦 𑀘 𑀪𑀡𑁆𑀟𑀸𑀕𑀸𑀭𑁂𑀢𑀺.

𑁫𑁬. 𑀬𑁂 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀯𑀲𑀦𑀕𑀩𑁆𑀪𑁂𑀲𑀼 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑁂 𑀦𑀝𑁆𑀞𑁂 𑀬𑁂𑀳𑀺 𑀞𑀧𑀺𑀢𑁄, 𑀢𑁂𑀲𑀁𑀬𑁂𑀯 𑀕𑀻𑀯𑀸, 𑀇𑀢𑀭𑁂𑀳𑀺 𑀧𑀦 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀲𑀗𑁆𑀖𑁄 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀳𑀸𑀭𑁂𑀬𑁂𑀯 𑀬𑀸𑀕𑀼𑀪𑀢𑁆𑀢𑀁 𑀤𑀸𑀧𑁂𑀢𑀺, 𑀲𑁄 𑀘 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀕𑀸𑀫𑀁 𑀕𑀘𑁆𑀙𑀢𑀺, 𑀦𑀝𑁆𑀞𑀁 𑀢𑀲𑁆𑀲𑁂𑀯 𑀕𑀻𑀯𑀸. 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑁂𑀳𑀺 𑀅𑀢𑀺𑀭𑁂𑀓𑀘𑀻𑀯𑀭𑀁 𑀭𑀓𑁆𑀔𑀡𑀢𑁆𑀣𑀸𑀬 𑀞𑀧𑀺𑀢𑀯𑀺𑀳𑀸𑀭𑀯𑀸𑀭𑀺𑀓𑀲𑁆𑀲𑀧𑀺 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑀁 𑀯𑀸 𑀮𑀪𑀫𑀸𑀦𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑁄 𑀬𑀁 𑀢𑀢𑁆𑀣 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀬 𑀬𑀁 𑀢𑀲𑁆𑀲 𑀧𑀫𑀸𑀤𑀧𑀘𑁆𑀘𑀬𑀸 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸.

𑀲𑀘𑁂 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀅𑀜𑁆𑀜𑀁 𑀧𑀤𑁂𑀲𑀁 𑀭𑀓𑁆𑀔𑀺𑀢𑀼𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀓𑁆𑀔𑀺𑀢𑁆𑀢𑀁 𑀳𑀭𑀦𑁆𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀕𑀻𑀯𑀸 𑀦 𑀳𑁄𑀢𑀺. 𑀈𑀤𑀺𑀲𑁂 𑀧𑀦 𑀯𑀺𑀳𑀸𑀭𑁂 𑀯𑁂𑀫𑀚𑁆𑀛𑁂 𑀲𑀩𑁆𑀩𑁂𑀲𑀁 𑀑𑀲𑀭𑀡𑀝𑁆𑀞𑀸𑀦𑁂 𑀧𑀭𑀺𑀓𑁆𑀔𑀸𑀭𑁂 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀯𑀺𑀳𑀸𑀭𑀯𑀸𑀭𑀺𑀓𑀸 𑀯𑀸 𑀤𑁆𑀯𑁂 𑀢𑀬𑁄 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀢𑁂𑀲𑀫𑁆𑀧𑀺 𑀅𑀧𑁆𑀧𑀫𑀢𑁆𑀢𑀸𑀦𑀁 𑀇𑀢𑁄 𑀘𑀺𑀢𑁄 𑀘 𑀭𑀓𑁆𑀔𑀢𑀁𑀬𑁂𑀯 𑀓𑀺𑀜𑁆𑀘𑀺 𑀦𑀲𑁆𑀲𑀢𑀺, 𑀕𑀻𑀯𑀸 𑀦 𑀳𑁄𑀢𑀺. 𑀯𑀺𑀳𑀸𑀭𑀯𑀸𑀭𑀺𑀓𑁂 𑀩𑀦𑁆𑀥𑀺𑀢𑁆𑀯𑀸 𑀳𑀭𑀺𑀢𑀪𑀡𑁆𑀟𑀫𑁆𑀧𑀺 𑀘𑁄𑀭𑀸𑀦𑀁 𑀧𑀝𑀺𑀧𑀣𑀁 𑀕𑀢𑁂𑀲𑀼 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀳𑀭𑀺𑀢𑀪𑀡𑁆𑀟𑀫𑁆𑀧𑀺 𑀦 𑀢𑁂𑀲𑀁 𑀕𑀻𑀯𑀸. 𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁 𑀯𑀺𑀳𑀸𑀭𑁂 𑀤𑀸𑀢𑀩𑁆𑀩𑀁 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑁄 𑀯𑀸 𑀦 𑀳𑁄𑀢𑀺, 𑀢𑁂𑀳𑀺 𑀧𑀢𑁆𑀢𑀩𑁆𑀩𑀮𑀸𑀪𑀢𑁄 𑀅𑀢𑀺𑀭𑁂𑀓𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸 𑀢𑁂𑀲𑀁 𑀧𑀳𑁄𑀦𑀓𑀪𑀢𑁆𑀢𑀲𑀮𑀸𑀓𑀸 𑀘 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸 𑀧𑀦 𑀦 𑀞𑀧𑁂𑀢𑀩𑁆𑀩𑀸. 𑀫𑀦𑀼𑀲𑁆𑀲𑀸 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺 ‘‘𑀯𑀺𑀳𑀸𑀭𑀯𑀸𑀭𑀺𑀓𑀸𑀬𑁂𑀯 𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀢𑁂𑀲𑀁 𑀲𑀪𑀸𑀕𑀸 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀤𑁂𑀦𑁆𑀢𑀺, 𑀯𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑁄 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸 𑀘 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀦𑀺 𑀘 𑀮𑀪𑀫𑀸𑀦𑁄 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀺𑀬 𑀲𑀩𑁆𑀩𑀁 𑀦𑀝𑁆𑀞𑀁 𑀕𑀻𑀯𑀸 𑀳𑁄𑀢𑀺. 𑀲𑀘𑁂 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀧𑀸𑀮𑀸𑀦𑀁 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀯𑀸 𑀦𑀺𑀯𑀸𑀧𑁄 𑀯𑀸 𑀦𑀢𑁆𑀣𑀺, 𑀪𑀺𑀓𑁆𑀔𑀽 𑀯𑀺𑀳𑀸𑀭𑀯𑀸𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀯𑀺𑀳𑀸𑀭𑀁 𑀚𑀕𑁆𑀕𑀸𑀧𑁂𑀦𑁆𑀢𑀺, 𑀲𑀫𑁆𑀧𑀢𑁆𑀢𑀯𑀸𑀭𑀁 𑀅𑀕𑁆𑀕𑀳𑁂𑀢𑀼𑀁 𑀦 𑀮𑀪𑀢𑀺. 𑀬𑀣𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀓𑀭𑁄𑀦𑁆𑀢𑀺, 𑀢𑀣𑁂𑀯 𑀓𑀸𑀢𑀩𑁆𑀩𑀁. 𑀪𑀺𑀓𑁆𑀔𑀽𑀳𑀺 𑀧𑀦 𑀅𑀲𑀳𑀸𑀬𑀲𑁆𑀲 𑀯𑀸 𑀅𑀤𑀼𑀢𑀺𑀬𑀲𑁆𑀲 𑀯𑀸 𑀬𑀲𑁆𑀲 𑀲𑀪𑀸𑀕𑁄 𑀪𑀺𑀓𑁆𑀔𑀼 𑀪𑀢𑁆𑀢𑀁 𑀆𑀦𑁂𑀢𑁆𑀯𑀸 𑀤𑀸𑀢𑀸 𑀦𑀢𑁆𑀣𑀺, 𑀏𑀯𑀭𑀽𑀧𑀲𑁆𑀲 𑀯𑀸𑀭𑁄 𑀦 𑀧𑀸𑀧𑁂𑀢𑀩𑁆𑀩𑁄.

𑀬𑀫𑁆𑀧𑀺 𑀧𑀸𑀓𑀯𑀝𑁆𑀝𑀢𑁆𑀣𑀸𑀬 𑀯𑀺𑀳𑀸𑀭𑁂 𑀞𑀧𑁂𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑀻𑀯𑀦𑁆𑀢𑁂𑀦 𑀞𑀸𑀢𑀩𑁆𑀩𑀁. 𑀬𑁄 𑀢𑀁 𑀦 𑀉𑀧𑀚𑀻𑀯𑀢𑀺, 𑀲𑁄 𑀯𑀸𑀭𑀁 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀨𑀮𑀸𑀨𑀮𑀢𑁆𑀣𑀸𑀬𑀧𑀺 𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀁 𑀞𑀧𑁂𑀦𑁆𑀢𑀺, 𑀚𑀕𑁆𑀕𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀨𑀮𑀯𑀸𑀭𑁂𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀬𑁄 𑀢𑀸𑀦𑀺 𑀔𑀸𑀤𑀢𑀺, 𑀢𑁂𑀦 𑀞𑀸𑀢𑀩𑁆𑀩𑀁, 𑀅𑀦𑀼𑀧𑀚𑀻𑀯𑀦𑁆𑀢𑁄 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀫𑀜𑁆𑀘𑀧𑀻𑀞𑀧𑀘𑁆𑀘𑀢𑁆𑀣𑀭𑀡𑀭𑀓𑁆𑀔𑀡𑀢𑁆𑀣𑀸𑀬𑀧𑀺 𑀞𑀧𑁂𑀦𑁆𑀢𑀺, 𑀆𑀯𑀸𑀲𑁂 𑀯𑀲𑀦𑁆𑀢𑁂𑀦 𑀞𑀸𑀢𑀩𑁆𑀩𑀁, 𑀅𑀩𑁆𑀪𑁄𑀓𑀸𑀲𑀺𑀓𑁄 𑀧𑀦 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀏𑀓𑁄 𑀦𑀯𑀓𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀧𑀦 𑀩𑀳𑀽𑀦𑀁 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀢𑀺, 𑀧𑀸𑀴𑀺𑀁 𑀯𑀡𑁆𑀡𑁂𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀲𑀗𑁆𑀖𑀲𑁆𑀲 𑀪𑀸𑀭𑀁 𑀦𑀺𑀢𑁆𑀣𑀭𑀢𑀺, 𑀅𑀬𑀁 𑀮𑀸𑀪𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀧𑀺 𑀆𑀯𑀸𑀲𑁂 𑀯𑀲𑀦𑁆𑀢𑁄𑀧𑀺 𑀯𑀸𑀭𑀁 𑀦 𑀕𑀸𑀳𑀸𑀧𑁂𑀢𑀩𑁆𑀩𑁄. ‘‘𑀧𑀼𑀭𑀺𑀲𑀯𑀺𑀲𑁂𑀲𑁄 𑀦𑀸𑀫 𑀜𑀸𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀉𑀧𑁄𑀲𑀣𑀸𑀕𑀸𑀭𑀧𑀝𑀺𑀫𑀸𑀖𑀭𑀚𑀕𑁆𑀕𑀦𑀓𑀲𑁆𑀲 𑀧𑀦 𑀤𑀺𑀕𑀼𑀡𑀁 𑀬𑀸𑀕𑀼𑀪𑀢𑁆𑀢𑀁, 𑀤𑁂𑀯𑀲𑀺𑀓𑀁 𑀢𑀡𑁆𑀟𑀼𑀮𑀦𑀸𑀴𑀺, 𑀲𑀁𑀯𑀘𑁆𑀙𑀭𑁂 𑀢𑀺𑀘𑀻𑀯𑀭𑀁 𑀤𑀲𑀯𑀻𑀲𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀜𑁆𑀘 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀲𑁆𑀲 𑀢𑀁 𑀮𑀪𑀫𑀸𑀦𑀲𑁆𑀲𑁂𑀯 𑀧𑀫𑀸𑀤𑁂𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀦𑀲𑁆𑀲𑀢𑀺, 𑀲𑀩𑁆𑀩𑀁 𑀕𑀻𑀯𑀸. 𑀩𑀦𑁆𑀥𑀺𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦 𑀅𑀘𑁆𑀙𑀺𑀦𑁆𑀦𑀁, 𑀦 𑀕𑀻𑀯𑀸. 𑀢𑀢𑁆𑀣 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀲𑀦𑁆𑀢𑀓𑁂𑀦 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂𑀦 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀭𑀓𑁆𑀔𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀞𑀧𑀺𑀢𑀁 𑀳𑁄𑀢𑀺, 𑀢𑀁 𑀘𑁂𑀢𑀺𑀬𑀲𑀦𑁆𑀢𑀓𑁂 𑀭𑀓𑁆𑀔𑀸𑀧𑀺𑀢𑁂 𑀭𑀓𑁆𑀔𑀺𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀯𑀝𑁆𑀝𑀢𑀺. 𑀧𑀓𑁆𑀔𑀯𑀸𑀭𑁂𑀦 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀦𑀺 𑀭𑀓𑁆𑀔𑀢𑁄𑀧𑀺 𑀧𑀫𑀸𑀤𑀯𑀲𑁂𑀦 𑀦𑀝𑁆𑀞𑀁 𑀕𑀻𑀯𑀸𑀬𑁂𑀯𑀸𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀪𑀡𑁆𑀟𑀧𑀝𑀺𑀲𑀸𑀫𑀦𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.