𑁧𑁧. 𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁫𑁭. 𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀻𑀢𑀺 𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀚𑁆𑀚𑀦𑀁. ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁯𑁫) 𑀳𑀺 𑀦𑀬𑁂𑀦 𑀧𑀭𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀦𑁆𑀢𑁄 𑀓𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀦𑁆𑀢𑁄 𑀯𑀺𑀓𑁆𑀓𑀬𑀁. 𑀅𑀬𑀁 𑀧𑀦 𑀓𑀬𑀯𑀺𑀓𑁆𑀓𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑁂𑀳𑀺 𑀕𑀺𑀳𑀺𑀧𑀩𑁆𑀩𑀚𑀺𑀢𑁂𑀳𑀺 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀤𑁆𑀥𑀺𑀁 𑀦 𑀯𑀝𑁆𑀝𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀯𑀢𑁆𑀣𑁂𑀦 𑀯𑀸 𑀯𑀢𑁆𑀣𑀁 𑀳𑁄𑀢𑀼, 𑀪𑀢𑁆𑀢𑁂𑀦 𑀯𑀸 𑀪𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀁 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑀺, 𑀤𑀼𑀓𑁆𑀓𑀝𑀁. 𑀏𑀯𑀁 𑀯𑀢𑁆𑀯𑀸 𑀫𑀸𑀢𑀼𑀬𑀸𑀧𑀺 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀤𑁂𑀢𑀺, 𑀤𑀼𑀓𑁆𑀓𑀝𑀁, ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁄 𑀯𑀸 ‘‘𑀇𑀫𑀁 𑀤𑁂𑀳𑀺, 𑀇𑀫𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀢𑀁 𑀯𑀢𑁆𑀯𑀸 𑀯𑀸 𑀫𑀸𑀢𑀼𑀬𑀸𑀧𑀺 𑀪𑀡𑁆𑀟𑀁 𑀅𑀢𑁆𑀢𑀦𑀸 𑀕𑀡𑁆𑀳𑀸𑀢𑀺, 𑀤𑀼𑀓𑁆𑀓𑀝𑀁, 𑀅𑀢𑁆𑀢𑀦𑁄 𑀪𑀡𑁆𑀟𑁂 𑀧𑀭𑀳𑀢𑁆𑀣𑀁, 𑀧𑀭𑀪𑀡𑁆𑀟𑁂 𑀘 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀲𑀫𑁆𑀧𑀢𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀸𑀢𑀭𑀁 𑀯𑀸 𑀧𑀦 𑀧𑀺𑀢𑀭𑀁 𑀯𑀸 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀤𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀦 𑀳𑁄𑀢𑀺. 𑀅𑀜𑁆𑀜𑀸𑀢𑀓𑀁 ‘‘𑀇𑀫𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀯𑀺𑀜𑁆𑀜𑀢𑁆𑀢𑀺, ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀤𑀤𑀢𑁄 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁, ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀓𑀬𑀯𑀺𑀓𑁆𑀓𑀬𑀁 𑀆𑀧𑀚𑁆𑀚𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀢𑀲𑁆𑀫𑀸 𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑀦𑁆𑀢𑁂𑀦 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑀁, 𑀅𑀜𑁆𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀫𑁄𑀘𑁂𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀧𑀭𑀺𑀯𑀢𑁆𑀢𑀦𑀯𑀺𑀥𑀺 𑁋 𑀪𑀺𑀓𑁆𑀔𑀼𑀲𑁆𑀲 𑀧𑀸𑀣𑁂𑀬𑁆𑀬𑀢𑀡𑁆𑀟𑀼𑀮𑀸 𑀳𑁄𑀦𑁆𑀢𑀺, 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀪𑀢𑁆𑀢𑀳𑀢𑁆𑀣𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀢𑀡𑁆𑀟𑀼𑀮𑀸 𑀅𑀢𑁆𑀣𑀺, 𑀦 𑀘 𑀦𑁄 𑀇𑀫𑁂𑀳𑀺 𑀅𑀢𑁆𑀣𑁄, 𑀪𑀢𑁆𑀢𑁂𑀦 𑀧𑀦 𑀅𑀢𑁆𑀣𑁄’’𑀢𑀺 𑀯𑀤𑀢𑀺, 𑀧𑀼𑀭𑀺𑀲𑁄 𑀢𑀡𑁆𑀟𑀼𑀮𑁂 𑀕𑀳𑁂𑀢𑁆𑀯𑀸 𑀪𑀢𑁆𑀢𑀁 𑀤𑁂𑀢𑀺, 𑀯𑀝𑁆𑀝𑀢𑀺. 𑀢𑀺𑀲𑁆𑀲𑁄𑀧𑀺 𑀆𑀧𑀢𑁆𑀢𑀺𑀬𑁄 𑀦 𑀳𑁄𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀦𑀺𑀫𑀺𑀢𑁆𑀢𑀓𑀫𑁆𑀫𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀓𑀲𑁆𑀫𑀸? 𑀫𑀽𑀮𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀬𑁄 𑀧𑀦 𑀏𑀯𑀁 𑀅𑀓𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’’𑀢𑀺 𑀧𑀭𑀺𑀯𑀢𑁆𑀢𑁂𑀢𑀺, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀯𑀺𑀖𑀸𑀲𑀸𑀤𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀑𑀤𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀚𑀦𑀁 𑀯𑀸 𑀤𑀸𑀭𑀽𑀦𑀺 𑀯𑀸 𑀆𑀳𑀭𑀸’’𑀢𑀺 𑀯𑀤𑀢𑀺, 𑀭𑀚𑀦𑀙𑀮𑁆𑀮𑀺𑀕𑀡𑀦𑀸𑀬 𑀤𑀸𑀭𑀼𑀕𑀡𑀦𑀸𑀬 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺. ‘‘𑀇𑀫𑀁 𑀑𑀤𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀫𑀁 𑀦𑀸𑀫 𑀓𑀭𑁄𑀣𑀸’’𑀢𑀺 𑀤𑀦𑁆𑀢𑀓𑀸𑀭𑀸𑀤𑀻𑀳𑀺 𑀲𑀺𑀧𑁆𑀧𑀺𑀓𑁂𑀳𑀺 𑀥𑀫𑁆𑀫𑀓𑀭𑀡𑀸𑀤𑀻𑀲𑀼 𑀢𑀁 𑀢𑀁 𑀧𑀭𑀺𑀓𑁆𑀔𑀸𑀭𑀁 𑀓𑀸𑀭𑁂𑀢𑀺, 𑀭𑀚𑀓𑁂𑀳𑀺 𑀯𑀸 𑀯𑀢𑁆𑀣𑀁 𑀥𑁄𑀯𑀸𑀧𑁂𑀢𑀺, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀦𑀳𑀸𑀧𑀺𑀢𑁂𑀦 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑀺, 𑀓𑀫𑁆𑀫𑀓𑀸𑀭𑁂𑀳𑀺 𑀦𑀯𑀓𑀫𑁆𑀫𑀁 𑀓𑀸𑀭𑁂𑀢𑀺, 𑀬𑀣𑀸𑀯𑀢𑁆𑀣𑀼𑀓𑀫𑁂𑀯. 𑀲𑀘𑁂 𑀧𑀦 ‘‘𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀇𑀤𑀁 𑀓𑀭𑁄𑀣𑀸’’𑀢𑀺 𑀦 𑀯𑀤𑀢𑀺, ‘‘𑀇𑀤𑀁 𑀪𑀢𑁆𑀢𑀁 𑀪𑀼𑀜𑁆𑀚, 𑀪𑀼𑀢𑁆𑀢𑁄𑀲𑀺, 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀦𑀸𑀫 𑀓𑀭𑁄𑀳𑀻’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀯𑀢𑁆𑀣𑀥𑁄𑀯𑀦𑁂 𑀯𑀸 𑀓𑁂𑀲𑀘𑁆𑀙𑁂𑀤𑀦𑁂 𑀯𑀸 𑀪𑀽𑀫𑀺𑀲𑁄𑀥𑀦𑀸𑀤𑀺𑀦𑀯𑀓𑀫𑁆𑀫𑁂 𑀯𑀸 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀏𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁, 𑀢𑀲𑁆𑀫𑀸 𑀬𑀣𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀫𑁆𑀳𑀺 𑀧𑀭𑀺𑀪𑀼𑀢𑁆𑀢𑁂 𑀯𑀸 𑀦𑀝𑁆𑀞𑁂 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀺, 𑀏𑀯𑀫𑀺𑀥𑀸𑀧𑀺 𑀤𑁂𑀲𑁂𑀢𑀩𑁆𑀩𑀁.

𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀅𑀕𑁆𑀖𑀁 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀢𑀯 𑀧𑀢𑁆𑀢𑁄 𑀓𑀺𑀁 𑀅𑀕𑁆𑀖𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀇𑀤𑀁 𑀦𑀸𑀫𑀸’’𑀢𑀺 𑀯𑀤𑀢𑀺, 𑀲𑀘𑁂 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀏𑀯𑀜𑁆𑀘 𑀦𑀁 𑀧𑀝𑀺𑀯𑀤𑀢𑀺 ‘‘𑀉𑀧𑀸𑀲𑀓 𑀫𑀫 𑀇𑀤𑀁 𑀯𑀢𑁆𑀣𑀼 𑀫𑀳𑀕𑁆𑀖𑀁, 𑀢𑀯 𑀧𑀢𑁆𑀢𑀁 𑀅𑀜𑁆𑀜𑀲𑁆𑀲 𑀤𑁂𑀳𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 ‘‘𑀅𑀜𑁆𑀜𑀁 𑀣𑀸𑀮𑀓𑀫𑁆𑀧𑀺 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑁄 𑀧𑀢𑁆𑀢𑁄 𑀫𑀳𑀕𑁆𑀖𑁄, 𑀪𑀺𑀓𑁆𑀔𑀼𑀦𑁄 𑀯𑀢𑁆𑀣𑀼 𑀅𑀧𑁆𑀧𑀕𑁆𑀖𑀁, 𑀧𑀢𑁆𑀢𑀲𑀸𑀫𑀺𑀓𑁄 𑀘𑀲𑁆𑀲 𑀅𑀧𑁆𑀧𑀕𑁆𑀖𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀧𑀢𑁆𑀢𑁄 𑀦 𑀕𑀳𑁂𑀢𑀩𑁆𑀩𑁄, ‘‘𑀫𑀫 𑀯𑀢𑁆𑀣𑀼 𑀅𑀧𑁆𑀧𑀕𑁆𑀖’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀫𑀳𑀕𑁆𑀖𑀪𑀸𑀯𑀁 𑀜𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄𑀧𑀺 𑀳𑀺 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀢𑁆𑀢𑀲𑀸𑀫𑀺𑀓𑁄 ‘‘𑀳𑁄𑀢𑀼, 𑀪𑀦𑁆𑀢𑁂, 𑀲𑁂𑀲𑀁 𑀫𑀫 𑀧𑀼𑀜𑁆𑀜𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺. 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀧𑀦 ‘‘𑀇𑀫𑀺𑀦𑀸 𑀇𑀫𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀘𑀺𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑀁 𑀕𑀡𑁆𑀳𑀸𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀦𑁆𑀢𑀫𑀲𑁄 𑀢𑀲𑁆𑀲 𑀧𑀼𑀢𑁆𑀢𑀪𑀸𑀢𑀺𑀓𑀫𑁆𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑀁 𑀓𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀘𑀺𑀓𑁆𑀔𑀢𑀺, 𑀲𑁄 𑀘𑁂 𑀙𑁂𑀓𑁄 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀅𑀧𑀦𑁂𑀢𑁆𑀯𑀸 𑀯𑀺𑀯𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁. 𑀦𑁄 𑀘𑁂 𑀙𑁂𑀓𑁄 𑀳𑁄𑀢𑀺, 𑀦 𑀚𑀸𑀦𑀸𑀢𑀺 𑀕𑀳𑁂𑀢𑀼𑀁, 𑀯𑀸𑀡𑀺𑀚𑀓𑁄 𑀘 𑀢𑀁 𑀯𑀜𑁆𑀘𑁂𑀢𑀺, ‘‘𑀫𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄.

‘‘𑀇𑀤𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑁂𑀮𑀁 𑀯𑀸 𑀲𑀧𑁆𑀧𑀺 𑀯𑀸 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀜𑁆𑀘 𑀅𑀜𑁆𑀜𑁂𑀦 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑁂𑀦 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀘𑁂 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀤𑁂𑀢𑀺, 𑀧𑀞𑀫𑀁 𑀅𑀢𑁆𑀢𑀦𑁄 𑀢𑁂𑀮𑀁 𑀦 𑀫𑀺𑀦𑀸𑀧𑁂𑀢𑀩𑁆𑀩𑀁. 𑀓𑀲𑁆𑀫𑀸? 𑀦𑀸𑀴𑀺𑀬𑀜𑁆𑀳𑀺 𑀅𑀯𑀲𑀺𑀝𑁆𑀞𑀢𑁂𑀮𑀁 𑀳𑁄𑀢𑀺, 𑀢𑀁 𑀧𑀘𑁆𑀙𑀸 𑀫𑀺𑀦𑀦𑁆𑀢𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀁 𑀤𑀽𑀲𑁂𑀬𑁆𑀬. 𑀅𑀬𑀜𑁆𑀘 𑀓𑀬𑀯𑀺𑀓𑁆𑀓𑀬𑁄 𑀦𑀸𑀫 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦 𑀯𑀼𑀢𑁆𑀢𑁄. 𑀓𑀧𑁆𑀧𑀺𑀬𑁂𑀦 𑀳𑀺 𑀓𑀧𑁆𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀁, 𑀅𑀓𑀧𑁆𑀧𑀺𑀬𑁂𑀦 𑀧𑀦 𑀅𑀓𑀧𑁆𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲, 𑀓𑀧𑁆𑀧𑀺𑀬𑁂𑀦 𑀯𑀸 𑀅𑀓𑀧𑁆𑀧𑀺𑀬𑀁 𑀅𑀓𑀧𑁆𑀧𑀺𑀬𑁂𑀦 𑀯𑀸 𑀓𑀧𑁆𑀧𑀺𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀲𑁆𑀫𑀸 𑀉𑀪𑁄𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸 𑀅𑀓𑀧𑁆𑀧𑀺𑀬𑁂 𑀲𑀢𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀦𑀸𑀫 𑀳𑁄𑀢𑀺.

𑁫𑁮. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑁆𑀲 𑀘 𑀕𑀭𑀼𑀪𑀸𑀯𑀤𑀻𑀧𑀦𑀢𑁆𑀣𑀁 𑀇𑀤𑀁 𑀧𑀢𑁆𑀢𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀅𑀬𑀩𑀻𑀚𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀢𑁂𑀦 𑀮𑁄𑀳𑁂𑀦 𑀧𑀢𑁆𑀢𑀁 𑀓𑀸𑀭𑁂𑀢𑀺, 𑀅𑀬𑀁 𑀧𑀢𑁆𑀢𑁄 𑀫𑀳𑀸𑀅𑀓𑀧𑁆𑀧𑀺𑀬𑁄 𑀦𑀸𑀫, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁. 𑀲𑀘𑁂𑀧𑀺 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀣𑀸𑀮𑀓𑀁 𑀓𑀸𑀭𑁂𑀢𑀺, 𑀢𑀫𑁆𑀧𑀺 𑀅𑀓𑀧𑁆𑀧𑀺𑀬𑀁. 𑀯𑀸𑀲𑀺𑀁 𑀓𑀸𑀭𑁂𑀢𑀺, 𑀢𑀸𑀬 𑀙𑀺𑀦𑁆𑀦𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀅𑀓𑀧𑁆𑀧𑀺𑀬𑀁. 𑀩𑀴𑀺𑀲𑀁 𑀓𑀸𑀭𑁂𑀢𑀺, 𑀢𑁂𑀦 𑀫𑀸𑀭𑀺𑀢𑀸 𑀫𑀘𑁆𑀙𑀸𑀧𑀺 𑀅𑀓𑀧𑁆𑀧𑀺𑀬𑀸. 𑀯𑀸𑀲𑀺𑀁 𑀢𑀸𑀧𑁂𑀢𑁆𑀯𑀸 𑀉𑀤𑀓𑀁 𑀯𑀸 𑀔𑀻𑀭𑀁 𑀯𑀸 𑀉𑀡𑁆𑀳𑀸𑀧𑁂𑀢𑀺, 𑀢𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯.

𑀬𑁄 𑀧𑀦 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀧𑀢𑁆𑀢𑀁 𑀓𑀺𑀡𑀸𑀢𑀺, 𑀅𑀬𑀫𑁆𑀧𑀺 𑀧𑀢𑁆𑀢𑁄 𑀅𑀓𑀧𑁆𑀧𑀺𑀬𑁄. ‘‘𑀧𑀜𑁆𑀘𑀦𑁆𑀦𑀫𑁆𑀧𑀺 𑀲𑀳𑀥𑀫𑁆𑀫𑀺𑀓𑀸𑀦𑀁 𑀦 𑀓𑀧𑁆𑀧𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀓𑁆𑀓𑀸 𑀧𑀦 𑀓𑀧𑁆𑀧𑀺𑀬𑁄 𑀓𑀸𑀢𑀼𑀁. 𑀲𑁄 𑀳𑀺 𑀫𑀽𑀮𑁂 𑀫𑀽𑀮𑀲𑀸𑀫𑀺𑀓𑀸𑀦𑀁, 𑀧𑀢𑁆𑀢𑁂 𑀘 𑀧𑀢𑁆𑀢𑀲𑀸𑀫𑀺𑀓𑀸𑀦𑀁 𑀤𑀺𑀦𑁆𑀦𑁂 𑀓𑀧𑁆𑀧𑀺𑀬𑁄 𑀳𑁄𑀢𑀺, 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀬𑁄𑀧𑀺 𑀭𑀽𑀧𑀺𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀤𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀢𑀁 𑀭𑀽𑀧𑀺𑀬𑀁 𑀤𑀢𑁆𑀯𑀸 𑀓𑀫𑁆𑀫𑀸𑀭𑀁 𑀲𑀜𑁆𑀜𑀸𑀧𑁂𑀢𑀺, 𑀅𑀬𑀫𑁆𑀧𑀺 𑀧𑀢𑁆𑀢𑁄 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀕𑀳𑀺𑀢𑁄𑀧𑀺 𑀤𑀼𑀢𑀺𑀬𑀧𑀢𑁆𑀢𑀲𑀤𑀺𑀲𑁄𑀬𑁂𑀯, 𑀫𑀽𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀅𑀓𑀧𑁆𑀧𑀺𑀬𑁄. 𑀓𑀲𑁆𑀫𑀸 𑀲𑁂𑀲𑀸𑀦𑀁 𑀦 𑀓𑀧𑁆𑀧𑀢𑀻𑀢𑀺? 𑀫𑀽𑀮𑀲𑁆𑀲 𑀅𑀦𑀺𑀲𑁆𑀲𑀝𑁆𑀞𑀢𑁆𑀢𑀸.

𑀬𑁄 𑀧𑀦 𑀭𑀽𑀧𑀺𑀬𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀧𑀳𑀺𑀢𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀻’’𑀢𑀺 𑀓𑀳𑀸𑀧𑀡𑁂 𑀤𑀸𑀧𑁂𑀢𑁆𑀯𑀸 𑀕𑀳𑀺𑀢𑁄, 𑀅𑀬𑀁 𑀧𑀢𑁆𑀢𑁄 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸, 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺 𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸. 𑀫𑀳𑀸𑀲𑀼𑀫𑀢𑁆𑀣𑁂𑀭𑀲𑁆𑀲 𑀓𑀺𑀭 𑀉𑀧𑀚𑁆𑀛𑀸𑀬𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀅𑀢𑁆𑀢𑀦𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀲𑀧𑁆𑀧𑀺𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀺. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀏𑀯𑀭𑀽𑀧𑁄 𑀧𑀢𑁆𑀢𑁄 𑀅𑀳𑁄𑀲𑀺. 𑀢𑀁 𑀣𑁂𑀭𑁄𑀧𑀺 𑀲𑀧𑁆𑀧𑀺𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀻𑀢𑀺. 𑀇𑀤𑀁 𑀅𑀓𑀧𑁆𑀧𑀺𑀬𑀧𑀢𑁆𑀢𑀘𑀢𑀼𑀓𑁆𑀓𑀁.

𑀲𑀘𑁂 𑀧𑀦 𑀭𑀽𑀧𑀺𑀬𑀁 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀧𑀢𑁆𑀢𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀧𑀳𑀺𑀢𑀓𑀧𑁆𑀧𑀺𑀬𑀓𑀸𑀭𑀓𑁂𑀦 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀓𑀼𑀮𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀸 ‘‘𑀇𑀫𑀸𑀳𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀢𑀁 𑀭𑀽𑀧𑀺𑀬𑀁 𑀤𑀢𑁆𑀯𑀸 𑀓𑀫𑁆𑀫𑀸𑀭𑀁 𑀲𑀜𑁆𑀜𑀸𑀧𑁂𑀢𑀺, 𑀅𑀬𑀁 𑀧𑀢𑁆𑀢𑁄 𑀲𑀩𑁆𑀩𑀓𑀧𑁆𑀧𑀺𑀬𑁄 𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀭𑀺𑀪𑁄𑀕𑀸𑀭𑀳𑁄. 𑀇𑀫𑀁 𑀧𑀦 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀓𑀭𑁄𑀦𑁆𑀢𑁂𑀦 ‘‘𑀇𑀫𑀺𑀦𑀸 𑀇𑀫𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑀫𑁆𑀧𑀺 𑀆𑀘𑀺𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀓𑀬𑀯𑀺𑀓𑁆𑀓𑀬𑀲𑀫𑀸𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.