𑁩𑁪. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑁧. 𑀇𑀤𑀸𑀦𑀺 𑀧𑀓𑀺𑀡𑁆𑀡𑀓𑀓𑀣𑀸 𑀘 𑀯𑁂𑀤𑀺𑀢𑀩𑁆𑀩𑀸. ‘‘𑀕𑀡𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁧𑁭) 𑀯𑀼𑀢𑁆𑀢𑀁 𑀕𑀡𑀪𑁄𑀚𑀦𑀁 (𑀧𑀸𑀘𑀺. 𑀅𑀝𑁆𑀞. 𑁨𑁧𑁭-𑁨𑁧𑁮) 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀧𑀲𑀯𑀢𑀺 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸 𑀦𑀺𑀫𑀦𑁆𑀢𑀦𑀢𑁄 𑀯𑀸. 𑀓𑀣𑀁 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀢𑀺? 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀏𑀓𑀢𑁄 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀉𑀧𑀸𑀲𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀳𑀻’’𑀢𑀺 𑀯𑀸 𑀯𑀺𑀜𑁆𑀜𑀸𑀧𑁂𑀬𑁆𑀬𑀼𑀁, 𑀧𑀸𑀝𑁂𑀓𑁆𑀓𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀤𑁂𑀳𑀺, 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀏𑀯𑀁 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀏𑀓𑀢𑁄 𑀯𑀸 𑀕𑀘𑁆𑀙𑀦𑁆𑀢𑀼 𑀦𑀸𑀦𑀸𑀢𑁄 𑀯𑀸, 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸𑀧𑀺 𑀏𑀓𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀼 𑀦𑀸𑀦𑀸𑀢𑁄 𑀯𑀸. 𑀲𑀘𑁂 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁂𑀢𑁆𑀣 𑀧𑀫𑀸𑀡𑀁. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀢𑀺.

𑀓𑀣𑀁 𑀦𑀺𑀫𑀦𑁆𑀢𑀦𑀢𑁄 𑀧𑀲𑀯𑀢𑀺? 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀫𑀺, 𑀑𑀤𑀦𑀁 𑀫𑁂 𑀕𑀡𑁆𑀳𑀣 𑀆𑀓𑀗𑁆𑀔𑀣 𑀑𑀮𑁄𑀓𑁂𑀣 𑀅𑀥𑀺𑀯𑀸𑀲𑁂𑀣 𑀧𑀝𑀺𑀫𑀸𑀦𑁂𑀣𑀸’’𑀢𑀺 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦 𑀯𑀸 𑀪𑀸𑀲𑀦𑁆𑀢𑀭𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀏𑀯𑀁 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 𑀯𑀸 𑀏𑀓𑀢𑁄 𑀕𑀘𑁆𑀙𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀦𑀸𑀦𑀸𑀢𑁄 𑀕𑀡𑁆𑀳𑀦𑁆𑀢𑀺, 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀘𑀢𑁆𑀢𑀸𑀭𑀺 𑀧𑀭𑀺𑀯𑁂𑀡𑀸𑀦𑀺 𑀯𑀸 𑀯𑀺𑀳𑀸𑀭𑁂 𑀯𑀸 𑀕𑀦𑁆𑀢𑁆𑀯𑀸 𑀦𑀸𑀦𑀸𑀢𑁄 𑀦𑀺𑀫𑀦𑁆𑀢𑀺𑀢𑀸, 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀲𑀼𑀬𑁂𑀯 𑀯𑀸 𑀏𑀓𑁄 𑀧𑀼𑀢𑁆𑀢𑁂𑀦 𑀏𑀓𑁄 𑀧𑀺𑀢𑀭𑀸𑀢𑀺 𑀏𑀯𑀫𑁆𑀧𑀺 𑀦𑀸𑀦𑀸𑀢𑁄 𑀦𑀺𑀫𑀦𑁆𑀢𑀺𑀢𑀸 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀕𑀘𑁆𑀙𑀦𑁆𑀢𑀼, 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀪𑀼𑀜𑁆𑀚𑀦𑁆𑀢𑀼, 𑀲𑀘𑁂 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺. 𑀏𑀯𑀁 𑀢𑀸𑀯 𑀦𑀺𑀫𑀦𑁆𑀢𑀦𑀢𑁄 𑀧𑀲𑀯𑀢𑀺.

𑀢𑀲𑁆𑀫𑀸 𑀲𑀘𑁂 𑀓𑁄𑀘𑀺 𑀲𑀗𑁆𑀖𑀪𑀢𑁆𑀢𑀁 𑀓𑀢𑁆𑀢𑀼𑀓𑀸𑀫𑁂𑀦 𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀧𑁂𑀲𑀺𑀢𑁄 𑀯𑀺𑀳𑀸𑀭𑀁 𑀆𑀕𑀫𑁆𑀫 ‘‘𑀪𑀦𑁆𑀢𑁂, 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀸 ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀸 ‘‘𑀲𑀗𑁆𑀖𑁄 𑀪𑀢𑁆𑀢𑀁 𑀕𑀡𑁆𑀳𑀢𑀽’’𑀢𑀺 𑀯𑀸 𑀯𑀤𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀦𑀺𑀫𑀦𑁆𑀢𑀦𑀺𑀓𑀸 𑀕𑀡𑀪𑁄𑀚𑀦𑀢𑁄, 𑀧𑀺𑀡𑁆𑀟𑀧𑀸𑀢𑀺𑀓𑀸 𑀘 𑀥𑀼𑀢𑀗𑁆𑀕𑀪𑁂𑀤𑀢𑁄 𑀫𑁄𑀘𑁂𑀢𑀩𑁆𑀩𑀸. 𑀓𑀣𑀁? 𑀏𑀯𑀁 𑀢𑀸𑀯 𑀯𑀢𑁆𑀢𑀩𑁆𑀩𑀁 ‘‘𑀲𑁆𑀯𑁂 𑀦 𑀲𑀓𑁆𑀓𑀸 𑀉𑀧𑀸𑀲𑀓𑀸’’𑀢𑀺. 𑀧𑀼𑀦𑀤𑀺𑀯𑀲𑁂, 𑀪𑀦𑁆𑀢𑁂𑀢𑀺. 𑀧𑀼𑀦𑀤𑀺𑀯𑀲𑁂𑀧𑀺 𑀦 𑀲𑀓𑁆𑀓𑀸𑀢𑀺. 𑀏𑀯𑀁 𑀬𑀸𑀯 𑀅𑀟𑁆𑀠𑀫𑀸𑀲𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀼𑀦 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀁 𑀢𑁆𑀯𑀁 𑀅𑀯𑀘𑀸’’𑀢𑀺. 𑀲𑀘𑁂 𑀧𑀼𑀦𑀧𑀺 ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀇𑀫𑀁 𑀢𑀸𑀯 𑀉𑀧𑀸𑀲𑀓 𑀧𑀼𑀧𑁆𑀨𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀢𑀺𑀡’’𑀦𑁆𑀢𑀺 𑀏𑀯𑀁 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦 ‘‘𑀢𑁆𑀯𑀁 𑀓𑀺𑀁 𑀓𑀣𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀧𑀼𑀦𑀧𑀺 𑀢𑀣𑁂𑀯 𑀯𑀤𑀢𑀺, ‘‘𑀆𑀯𑀼𑀲𑁄, 𑀢𑁆𑀯𑀁 𑀧𑀺𑀡𑁆𑀟𑀧𑀸𑀢𑀺𑀓𑁂 𑀯𑀸 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀯𑀸 𑀦 𑀮𑀘𑁆𑀙𑀲𑀺, 𑀲𑀸𑀫𑀡𑁂𑀭𑁂 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀦𑀼, 𑀪𑀦𑁆𑀢𑁂, 𑀅𑀲𑀼𑀓𑀲𑁆𑀫𑀺𑀁 𑀅𑀲𑀼𑀓𑀲𑁆𑀫𑀺𑀜𑁆𑀘 𑀕𑀸𑀫𑁂 𑀪𑀤𑀦𑁆𑀢𑁂 𑀪𑁄𑀚𑁂𑀲𑀼𑀁, 𑀅𑀳𑀁 𑀓𑀲𑁆𑀫𑀸 𑀦 𑀮𑀪𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 𑀢𑁂 𑀦𑀺𑀫𑀦𑁆𑀢𑀺𑀢𑀼𑀁 𑀚𑀸𑀦𑀦𑁆𑀢𑀺, 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺. 𑀢𑁂 𑀓𑀣𑀁 𑀦𑀺𑀫𑀦𑁆𑀢𑁂𑀲𑀼𑀁, 𑀪𑀦𑁆𑀢𑁂𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀘𑁂 𑀲𑁄𑀧𑀺 𑀢𑀣𑁂𑀯 𑀯𑀤𑀢𑀺, 𑀯𑀝𑁆𑀝𑀢𑀺.

𑀅𑀣 𑀧𑀼𑀦𑀧𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, ‘‘𑀦 𑀤𑀸𑀦𑀺 𑀢𑁆𑀯𑀁, 𑀆𑀯𑀼𑀲𑁄, 𑀩𑀳𑀽 𑀪𑀺𑀓𑁆𑀔𑀽 𑀮𑀘𑁆𑀙𑀲𑀺, 𑀢𑀬𑁄 𑀏𑀯, 𑀆𑀯𑀼𑀲𑁄, 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀦𑀦𑀼, 𑀪𑀦𑁆𑀢𑁂, 𑀅𑀫𑀼𑀓𑀲𑁆𑀫𑀺𑀜𑁆𑀘 𑀅𑀫𑀼𑀓𑀲𑁆𑀫𑀺𑀜𑁆𑀘 𑀕𑀸𑀫𑁂 𑀲𑀓𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑁄𑀚𑁂𑀲𑀼𑀁, 𑀅𑀳𑀁 𑀓𑀲𑁆𑀫𑀸 𑀦 𑀮𑀪𑀸𑀫𑀻’’𑀢𑀺. ‘‘𑀢𑁆𑀯𑀁 𑀦𑀺𑀫𑀦𑁆𑀢𑀺𑀢𑀼𑀁 𑀦 𑀚𑀸𑀦𑀸𑀲𑀻’’𑀢𑀺. 𑀢𑁂 𑀓𑀣𑀁 𑀦𑀺𑀫𑀦𑁆𑀢𑁂𑀲𑀼𑀁, 𑀪𑀦𑁆𑀢𑁂𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀘𑁂 𑀲𑁄𑀧𑀺 𑀢𑀣𑁂𑀯 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣 𑀧𑀼𑀦𑀧𑀺 ‘‘𑀪𑀢𑁆𑀢𑀫𑁂𑀯𑀸’’𑀢𑀺 𑀯𑀤𑀢𑀺, 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀕𑀘𑁆𑀙 𑀢𑁆𑀯𑀁, 𑀦𑀢𑁆𑀣𑀫𑁆𑀳𑀸𑀓𑀁 𑀢𑀯 𑀪𑀢𑁆𑀢𑁂𑀦𑀢𑁆𑀣𑁄, 𑀦𑀺𑀩𑀤𑁆𑀥𑀕𑁄𑀘𑀭𑁄 𑀏𑀲 𑀅𑀫𑁆𑀳𑀸𑀓𑀁, 𑀫𑀬𑀫𑁂𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀁 ‘‘𑀘𑀭𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀆𑀕𑀢𑀁 𑀧𑀼𑀘𑁆𑀙𑀦𑁆𑀢𑀺 ‘‘𑀓𑀺𑀁 𑀪𑁄 𑀮𑀤𑁆𑀥𑀸 𑀪𑀺𑀓𑁆𑀔𑀽’’𑀢𑀺? 𑀓𑀺𑀁 𑀏𑀢𑁂𑀦, 𑀩𑀳𑀼 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀣𑁂𑀭𑀸 ‘‘𑀲𑁆𑀯𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼, 𑀫𑀸 𑀤𑀸𑀦𑀺 𑀢𑀼𑀫𑁆𑀳𑁂 𑀧𑀫𑀚𑁆𑀚𑀺𑀢𑁆𑀣𑀸𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀘𑁂𑀢𑀺𑀬𑀯𑀢𑁆𑀢𑀁 𑀓𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀽 𑀲𑀗𑁆𑀖𑀢𑁆𑀣𑁂𑀭𑁂𑀦 𑀯𑀢𑁆𑀢𑀩𑁆𑀩𑀸 ‘‘𑀆𑀯𑀼𑀲𑁄, 𑀥𑀼𑀭𑀕𑀸𑀫𑁂 𑀲𑀗𑁆𑀖𑀪𑀢𑁆𑀢𑀁, 𑀅𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄 𑀧𑀦 𑀅𑀕𑀫𑀸𑀲𑀺, 𑀕𑀘𑁆𑀙𑀸𑀫, 𑀥𑀼𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀪𑀺𑀓𑁆𑀔𑀽𑀳𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀓𑀸𑀢𑀩𑁆𑀩𑀁, 𑀦 𑀤𑀼𑀩𑁆𑀩𑀘𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀕𑀸𑀫𑀤𑁆𑀯𑀸𑀭𑁂 𑀅𑀝𑁆𑀞𑀢𑁆𑀯𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀢𑁂𑀲𑀼 𑀧𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑁂𑀲𑀼 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀲𑀘𑁂 𑀆𑀲𑀦𑀲𑀸𑀮𑀸𑀬 𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀭𑀣𑀺𑀓𑀸𑀲𑀼 𑀆𑀳𑀺𑀡𑁆𑀟𑀦𑁆𑀢𑀸 𑀆𑀭𑁄𑀘𑁂𑀦𑁆𑀢𑀺 ‘‘𑀆𑀲𑀦𑀲𑀸𑀮𑀸𑀬𑀁, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺, 𑀦 𑀯𑀝𑁆𑀝𑀢𑀺. 𑀅𑀣 𑀧𑀦 ‘‘𑀪𑀢𑁆𑀢𑀁 𑀆𑀤𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀯𑀸 𑀯𑀺𑀳𑀸𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀤𑁂𑀦𑁆𑀢𑀺, 𑀅𑀬𑀁 𑀅𑀪𑀺𑀳𑀝𑀪𑀺𑀓𑁆𑀔𑀸 𑀦𑀸𑀫 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀪𑀢𑁆𑀢𑀲𑀸𑀮𑀸𑀬 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀢𑀁 𑀢𑀁 𑀧𑀭𑀺𑀯𑁂𑀡𑀁 𑀧𑀳𑀺𑀡𑀦𑁆𑀢𑀺 ‘‘𑀪𑀢𑁆𑀢𑀲𑀸𑀮𑀸𑀬 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺, 𑀯𑀝𑁆𑀝𑀢𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀸 𑀧𑀺𑀡𑁆𑀟𑀘𑀸𑀭𑀺𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀆𑀲𑀦𑀲𑀸𑀮𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺, 𑀦 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀬𑁂 𑀧𑀦 𑀕𑀸𑀫𑁂 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸, 𑀦 𑀦𑀺𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, ‘‘𑀦𑀺𑀯𑀢𑁆𑀢𑀣𑀸’’𑀢𑀺 𑀯𑀼𑀢𑁆𑀢𑀧𑀤𑁂 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂, 𑀖𑀭𑁂 𑀪𑀢𑁆𑀢𑀁 𑀓𑀢𑀁, 𑀕𑀸𑀫𑁂 𑀪𑀢𑁆𑀢𑀁 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀕𑁂𑀳𑁂 𑀘 𑀕𑀸𑀫𑁂 𑀘 𑀪𑀢𑁆𑀢𑀁 𑀦𑀸𑀫 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁄𑀢𑀺, 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀦𑀺𑀯𑀢𑁆𑀢𑀣 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀲𑀦𑀲𑀸𑀮𑀸𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀦𑀺𑀓𑁆𑀔𑀫𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀅𑀜𑁆𑀜𑀢𑁆𑀭 𑀲𑀫𑀬𑀸’’𑀢𑀺 𑀯𑀘𑀦𑀢𑁄 𑀕𑀺𑀮𑀸𑀦𑀲𑀫𑀬𑁄 𑀘𑀻𑀯𑀭𑀤𑀸𑀦𑀲𑀫𑀬𑁄 𑀘𑀻𑀯𑀭𑀓𑀸𑀭𑀲𑀫𑀬𑁄 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁄 𑀦𑀸𑀯𑀸𑀪𑀺𑀭𑀼𑀳𑀦𑀲𑀫𑀬𑁄 𑀫𑀳𑀸𑀲𑀫𑀬𑁄 𑀲𑀫𑀡𑀪𑀢𑁆𑀢𑀲𑀫𑀬𑁄𑀢𑀺 𑀏𑀢𑁂𑀲𑀼 𑀲𑀢𑁆𑀢𑀲𑀼 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀫𑀳𑀸𑀘𑀫𑁆𑀫𑀲𑁆𑀲 𑀧𑀭𑀢𑁄 𑀫𑀁𑀲𑀁 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀦𑁆𑀢𑀫𑀲𑁄 𑀧𑀸𑀤𑀸𑀧𑀺 𑀨𑀸𑀮𑀺𑀢𑀸 𑀳𑁄𑀦𑁆𑀢𑀺, 𑀯𑀸𑀮𑀺𑀓𑀸𑀬 𑀯𑀸 𑀲𑀓𑁆𑀔𑀭𑀸𑀬 𑀯𑀸 𑀧𑀳𑀝𑀫𑀢𑁆𑀢𑁂 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀦 𑀲𑀓𑁆𑀓𑀸 𑀘 𑀳𑁄𑀢𑀺 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀈𑀤𑀺𑀲𑁂 𑀕𑁂𑀮𑀜𑁆𑀜𑁂 𑀕𑀺𑀮𑀸𑀦𑀲𑀫𑀬𑁄𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀮𑁂𑀲𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁.

𑀘𑀻𑀯𑀭𑀤𑀸𑀦𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘𑀫𑀸𑀲𑀸. 𑀏𑀢𑁆𑀣𑀦𑁆𑀢𑀭𑁂 ‘‘𑀘𑀻𑀯𑀭𑀤𑀸𑀦𑀲𑀫𑀬𑁄’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂 𑀘𑀻𑀯𑀭𑀓𑀸𑀭𑀲𑀫𑀬𑁄𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀤𑀸 𑀳𑀺 𑀲𑀸𑀝𑀓𑀜𑁆𑀘 𑀲𑀼𑀢𑁆𑀢𑀜𑁆𑀘 𑀮𑀪𑀺𑀢𑁆𑀯𑀸 𑀘𑀻𑀯𑀭𑀁 𑀓𑀭𑁄𑀦𑁆𑀢𑀺, 𑀅𑀬𑀁 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑀸𑀫, 𑀯𑀺𑀲𑀼𑀁 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑁄 𑀢𑀢𑁆𑀣 𑀘𑀻𑀯𑀭𑁂 𑀓𑀢𑁆𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀳𑀺 ‘‘𑀅𑀦𑁆𑀢𑀫𑀲𑁄 𑀲𑀽𑀘𑀺𑀯𑁂𑀥𑀓𑁄’’𑀢𑀺𑀧𑀺 𑀯𑀼𑀢𑁆𑀢𑀁. 𑀢𑁂𑀦 ‘‘𑀘𑀻𑀯𑀭𑀓𑀸𑀭𑀲𑀫𑀬𑁄’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀬𑁄 𑀘𑀻𑀯𑀭𑀁 𑀯𑀺𑀘𑀸𑀭𑁂𑀢𑀺 𑀙𑀺𑀦𑁆𑀤𑀢𑀺, 𑀫𑁄𑀖𑀲𑀼𑀢𑁆𑀢𑀓𑀁 𑀞𑀧𑁂𑀢𑀺, 𑀆𑀕𑀦𑁆𑀢𑀼𑀓𑀧𑀢𑁆𑀢𑀁 𑀞𑀧𑁂𑀢𑀺, 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑁂𑀢𑀺, 𑀆𑀕𑀦𑁆𑀢𑀼𑀓𑀧𑀢𑁆𑀢𑀁 𑀩𑀦𑁆𑀥𑀢𑀺, 𑀅𑀦𑀼𑀯𑀸𑀢𑀁 𑀙𑀺𑀦𑁆𑀤𑀢𑀺 𑀖𑀝𑁂𑀢𑀺 𑀆𑀭𑁄𑀧𑁂𑀢𑀺, 𑀢𑀢𑁆𑀣 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑁂𑀢𑀺, 𑀲𑀼𑀢𑁆𑀢𑀁 𑀓𑀭𑁄𑀢𑀺 𑀯𑀮𑁂𑀢𑀺, 𑀧𑀺𑀧𑁆𑀨𑀮𑀺𑀓𑀁 𑀦𑀺𑀲𑁂𑀢𑀺, 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺, 𑀲𑀩𑁆𑀩𑁄𑀧𑀺 𑀘𑀻𑀯𑀭𑀁 𑀓𑀭𑁄𑀢𑀺𑀬𑁂𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀧𑀦 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 𑀚𑀸𑀢𑀓𑀁 𑀯𑀸 𑀥𑀫𑁆𑀫𑀧𑀤𑀁 𑀯𑀸 𑀓𑀣𑁂𑀢𑀺, 𑀅𑀬𑀁 𑀦 𑀘𑀻𑀯𑀭𑀓𑀸𑀭𑀓𑁄, 𑀏𑀢𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀁 𑀕𑀡𑀪𑁄𑀚𑀦𑁂 𑀅𑀦𑀸𑀧𑀢𑁆𑀢𑀻’’𑀢𑀺.

𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁂 𑀅𑀦𑁆𑀢𑀫𑀲𑁄 𑀅𑀟𑁆𑀠𑀬𑁄𑀚𑀦𑀁 𑀕𑀦𑁆𑀢𑀼𑀓𑀸𑀫𑁂𑀦𑀧𑀺 ‘‘𑀅𑀟𑁆𑀠𑀬𑁄𑀚𑀦𑀁 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀕𑀘𑁆𑀙𑀦𑁆𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀕𑀢𑁂𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀦𑀸𑀯𑀸𑀪𑀺𑀭𑀼𑀳𑀦𑀲𑀫𑀬𑁂 ‘‘𑀦𑀸𑀯𑀁 𑀅𑀪𑀺𑀭𑀼𑀳𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀆𑀭𑀼𑀴𑁆𑀳𑁂𑀦 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸𑀧𑀺 𑀬𑀸𑀯 𑀦 𑀑𑀭𑁄𑀳𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀑𑀭𑀼𑀴𑁆𑀳𑁂𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀫𑀳𑀸𑀲𑀫𑀬𑁄 𑀦𑀸𑀫 𑀬𑀢𑁆𑀣 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀧𑁂𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀘𑀢𑀼𑀢𑁆𑀣𑁂𑀧𑀺 𑀆𑀕𑀢𑁂 𑀦 𑀬𑀸𑀧𑁂𑀦𑁆𑀢𑀺, 𑀅𑀬𑀁 𑀫𑀳𑀸𑀲𑀫𑀬𑁄. 𑀬𑀢𑁆𑀣 𑀧𑀦 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀸𑀤𑀺𑀲𑁂 𑀓𑀸𑀮𑁂 ‘‘𑀫𑀳𑀸𑀲𑀫𑀬𑁄’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀲𑀫𑀡𑀪𑀢𑁆𑀢𑀲𑀫𑀬𑁄 𑀦𑀸𑀫 𑀬𑁄 𑀓𑁄𑀘𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄 𑀪𑀢𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀲𑀫𑀡𑀪𑀢𑁆𑀢𑀲𑀫𑀬𑁄𑀯. 𑀢𑀲𑁆𑀫𑀸 𑀲𑀳𑀥𑀫𑁆𑀫𑀺𑀓𑁂𑀲𑀼 𑀯𑀸 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀅𑀜𑁆𑀜𑀢𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀓𑀢𑁂 𑀪𑀢𑁆𑀢𑁂 ‘‘𑀲𑀫𑀡𑀪𑀢𑁆𑀢𑀲𑀫𑀬𑁄’’𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀅𑀦𑀸𑀧𑀢𑁆𑀢𑀺 𑀲𑀫𑀬𑁂, 𑀤𑁆𑀯𑁂 𑀢𑀬𑁄 𑀏𑀓𑀢𑁄 𑀪𑀼𑀜𑁆𑀚𑀦𑁆𑀢𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀦𑀺𑀘𑁆𑀘𑀪𑀢𑁆𑀢𑀁, 𑀲𑀮𑀸𑀓𑀪𑀢𑁆𑀢𑀁, 𑀧𑀓𑁆𑀔𑀺𑀓𑀁, 𑀉𑀧𑁄𑀲𑀣𑀺𑀓𑀁, 𑀧𑀸𑀝𑀺𑀧𑀤𑀺𑀓𑀁, 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑁨𑁨𑁦) 𑀯𑀘𑀦𑀢𑁄 𑀬𑁂𑀧𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺.

𑀢𑀢𑁆𑀣 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁 𑀧𑀺𑀡𑁆𑀟𑀧𑀸𑀢𑀺𑀓𑀘𑀢𑀼𑀢𑁆𑀣𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀘𑀢𑀼𑀢𑁆𑀣𑀁 𑀧𑀢𑁆𑀢𑀘𑀢𑀼𑀢𑁆𑀣𑀁 𑀕𑀺𑀮𑀸𑀦𑀘𑀢𑀼𑀢𑁆𑀣𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀘𑀢𑀼𑀢𑁆𑀣𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀇𑀥𑁂𑀓𑀘𑁆𑀘𑁄 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑀺. 𑀢𑁂𑀲𑀼 𑀢𑀬𑁄 𑀕𑀢𑀸, 𑀏𑀓𑁄 𑀦 𑀕𑀢𑁄. 𑀉𑀧𑀸𑀲𑀓𑁄 ‘‘𑀏𑀓𑁄, 𑀪𑀦𑁆𑀢𑁂, 𑀣𑁂𑀭𑁄 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀦𑀸𑀕𑀢𑁄 𑀉𑀧𑀸𑀲𑀓𑀸𑀢𑀺. 𑀲𑁄 𑀅𑀜𑁆𑀜𑀁 𑀢𑀁𑀔𑀡𑀧𑁆𑀧𑀢𑁆𑀢𑀁 𑀓𑀜𑁆𑀘𑀺 ‘‘𑀏𑀳𑀺, 𑀪𑀦𑁆𑀢𑁂’’𑀢𑀺 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀢𑀺, 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀓𑀲𑁆𑀫𑀸? 𑀕𑀡𑀧𑀽𑀭𑀓𑀲𑁆𑀲 𑀅𑀦𑀺𑀫𑀦𑁆𑀢𑀺𑀢𑀢𑁆𑀢𑀸. 𑀢𑀬𑁄 𑀏𑀯 𑀳𑀺 𑀢𑀢𑁆𑀣 𑀦𑀺𑀫𑀦𑁆𑀢𑀺𑀢𑀸 𑀕𑀡𑁆𑀳𑀺𑀁𑀲𑀼, 𑀢𑁂𑀳𑀺 𑀕𑀡𑁄 𑀦 𑀧𑀽𑀭𑀢𑀺, 𑀕𑀡𑀧𑀽𑀭𑀓𑁄 𑀘 𑀅𑀦𑀺𑀫𑀦𑁆𑀢𑀺𑀢𑁄, 𑀢𑁂𑀦 𑀕𑀡𑁄 𑀪𑀺𑀚𑁆𑀚𑀢𑀻𑀢𑀺. 𑀏𑀢𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁.

𑀧𑀺𑀡𑁆𑀟𑀧𑀸𑀢𑀺𑀓𑀘𑀢𑀼𑀢𑁆𑀣𑁂 𑀦𑀺𑀫𑀦𑁆𑀢𑀦𑀓𑀸𑀮𑁂 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺, 𑀲𑁄 𑀦𑀸𑀥𑀺𑀯𑀸𑀲𑁂𑀢𑀺, 𑀕𑀫𑀦𑀯𑁂𑀮𑀸𑀬𑀁 𑀧𑀦 ‘‘𑀏𑀳𑀺 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀅𑀦𑀥𑀺𑀯𑀸𑀲𑀺𑀢𑀢𑁆𑀢𑀸 𑀅𑀦𑀸𑀕𑀘𑁆𑀙𑀦𑁆𑀢𑀫𑁆𑀧𑀺 ‘‘𑀏𑀣 𑀪𑀺𑀓𑁆𑀔𑀁 𑀮𑀘𑁆𑀙𑀣𑀸’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑁄 𑀢𑀁 𑀕𑀡𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺.

𑀅𑀦𑀼𑀧𑀲𑀫𑁆𑀧𑀦𑁆𑀦𑀘𑀢𑀼𑀢𑁆𑀣𑁂 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺, 𑀲𑁄𑀧𑀺 𑀕𑀡𑀁 𑀪𑀺𑀦𑁆𑀤𑀢𑀺.

𑀧𑀢𑁆𑀢𑀘𑀢𑀼𑀢𑁆𑀣𑁂 𑀏𑀓𑁄 𑀲𑀬𑀁 𑀆𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀧𑁂𑀲𑁂𑀢𑀺, 𑀏𑀯𑀫𑁆𑀧𑀺 𑀕𑀡𑁄 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺.

𑀕𑀺𑀮𑀸𑀦𑀘𑀢𑀼𑀢𑁆𑀣𑁂 𑀕𑀺𑀮𑀸𑀦𑁂𑀦 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀕𑀺𑀮𑀸𑀦𑀲𑁆𑀲𑁂𑀯 𑀅𑀦𑀸𑀧𑀢𑁆𑀢𑀺, 𑀇𑀢𑀭𑁂𑀲𑀁 𑀧𑀦 𑀕𑀡𑀧𑀽𑀭𑀓𑁄 𑀳𑁄𑀢𑀺. 𑀦 𑀳𑀺 𑀕𑀺𑀮𑀸𑀦𑁂𑀦 𑀕𑀡𑁄 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀆𑀧𑀢𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀬𑀮𑀤𑁆𑀥𑀓𑁄 𑀲𑀬𑀫𑁂𑀯 𑀫𑀼𑀘𑁆𑀘𑀢𑀺, 𑀲𑁂𑀲𑀸𑀦𑀁 𑀕𑀡𑀧𑀽𑀭𑀓𑀢𑁆𑀢𑀸 𑀆𑀧𑀢𑁆𑀢𑀺𑀓𑀭𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀸 𑀘𑀻𑀯𑀭𑀤𑀸𑀦𑀲𑀫𑀬𑀮𑀤𑁆𑀥𑀓𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀘𑁂 𑀧𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀕𑀢𑁂𑀲𑀼𑀧𑀺 𑀘𑀢𑀽𑀲𑀼 𑀚𑀦𑁂𑀲𑀼 𑀏𑀓𑁄 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀕𑀡𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀣𑀸’’𑀢𑀺 𑀯𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀯𑀲𑀸𑀦𑁂 𑀪𑀢𑁆𑀢𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀸𑀦𑀁 𑀅𑀤𑀢𑁆𑀯𑀸 ‘‘𑀇𑀫𑁂 𑀢𑀸𑀯 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀣, 𑀅𑀳𑀁 𑀧𑀘𑁆𑀙𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑁄, 𑀢𑁂𑀲𑀼 𑀪𑀼𑀢𑁆𑀯𑀸 𑀕𑀢𑁂𑀲𑀼 ‘‘𑀤𑁂𑀣, 𑀪𑀦𑁆𑀢𑁂, 𑀧𑀢𑁆𑀢’’𑀦𑁆𑀢𑀺 𑀉𑀧𑀸𑀲𑀓𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑀢𑁆𑀢𑁂 𑀤𑀺𑀦𑁆𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀪𑁄𑀚𑀦𑀸𑀦𑀁𑀬𑁂𑀯 𑀯𑀲𑁂𑀦 𑀕𑀡𑀪𑁄𑀚𑀦𑁂 𑀯𑀺𑀲𑀗𑁆𑀓𑁂𑀢𑀁 𑀦𑀢𑁆𑀣𑀺, 𑀑𑀤𑀦𑁂𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀓𑀼𑀫𑁆𑀫𑀸𑀲𑀁 𑀕𑀡𑁆𑀳𑀦𑁆𑀢𑀸𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀘 𑀢𑁂𑀳𑀺 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀺, 𑀬𑀸𑀕𑀼𑀆𑀤𑀻𑀳𑀺 𑀧𑀦 𑀯𑀺𑀲𑀗𑁆𑀓𑁂𑀢𑀁 𑀳𑁄𑀢𑀺, 𑀢𑀸𑀦𑀺 𑀢𑁂𑀳𑀺 𑀏𑀓𑀢𑁄 𑀕𑀳𑀺𑀢𑀸𑀦𑀻𑀢𑀺 𑀏𑀯𑀁 𑀏𑀓𑁄 𑀧𑀡𑁆𑀟𑀺𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀦𑀺𑀘𑁆𑀘𑀪𑀢𑁆𑀢𑀦𑁆𑀢𑀺 𑀥𑀼𑀯𑀪𑀢𑁆𑀢𑀁 𑀯𑀼𑀘𑁆𑀘𑀢𑀺, ‘‘𑀦𑀺𑀘𑁆𑀘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑀺, 𑀩𑀳𑀽𑀦𑀁 𑀏𑀓𑀢𑁄 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨. ‘‘𑀧𑀭𑀫𑁆𑀧𑀭𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁨𑁨-𑁨𑁨𑁩, 𑁨𑁨𑁫) 𑀯𑀼𑀢𑁆𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀁 𑀧𑀦 𑀦𑀺𑀫𑀦𑁆𑀢𑀦𑀢𑁄𑀬𑁂𑀯 𑀧𑀲𑀯𑀢𑀺. 𑀬𑁄 𑀳𑀺 ‘‘𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀦𑀺𑀫𑀦𑁆𑀢𑀺𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀢𑀲𑁆𑀲𑁂𑀢𑀁 𑀪𑁄𑀚𑀦𑀁 ‘‘𑀧𑀭𑀫𑁆𑀧𑀭𑀪𑁄𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀞𑀧𑁂𑀢𑁆𑀯𑀸 𑀕𑀺𑀮𑀸𑀦𑀲𑀫𑀬𑀁 𑀘𑀻𑀯𑀭𑀤𑀸𑀦𑀲𑀫𑀬𑀁 𑀘𑀻𑀯𑀭𑀓𑀸𑀭𑀲𑀫𑀬𑀜𑁆𑀘 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀫𑀦𑁆𑀢𑀦𑀧𑀝𑀺𑀧𑀸𑀝𑀺𑀬𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀭𑀫𑁆𑀧𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀧𑀸𑀘𑀺. 𑁨𑁨𑁬) 𑀯𑀘𑀦𑀢𑁄 𑀧𑀞𑀫𑀦𑀺𑀫𑀦𑁆𑀢𑀦𑀁 𑀅𑀜𑁆𑀜𑀲𑁆𑀲 𑀯𑀺𑀓𑀧𑁆𑀧𑁂𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀬𑀁 (𑀧𑀸𑀘𑀺. 𑀅𑀝𑁆𑀞. 𑁨𑁨𑁬 𑀆𑀤𑀬𑁄) 𑀯𑀺𑀓𑀧𑁆𑀧𑀦𑀸 𑀦𑀸𑀫 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀯𑀝𑁆𑀝𑀢𑀺. 𑀲𑀫𑁆𑀫𑀼𑀔𑀸 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 ‘‘𑀤𑀫𑁆𑀫𑀻’’𑀢𑀺 𑀯𑀸 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀅𑀤𑀺𑀲𑁆𑀯𑀸 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀸 ‘‘𑀤𑀫𑁆𑀫𑀻’’𑀢𑀺 𑀯𑀸 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀤𑁆𑀯𑁂 𑀢𑀻𑀡𑀺 𑀦𑀺𑀫𑀦𑁆𑀢𑀦𑀸𑀦𑀺 𑀧𑀦 𑀏𑀓𑀲𑁆𑀫𑀺𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀏𑀓𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀸𑀧𑀢𑁆𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂 𑀏𑀓𑀢𑁄 𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀘𑀺. 𑁨𑁨𑁯) 𑀳𑀺 𑀯𑀼𑀢𑁆𑀢𑀁. 𑀲𑀘𑁂 𑀤𑁆𑀯𑁂 𑀢𑀻𑀡𑀺 𑀓𑀼𑀮𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑀁 𑀆𑀓𑀺𑀭𑀦𑁆𑀢𑀺, 𑀲𑀽𑀧𑀩𑁆𑀬𑀜𑁆𑀚𑀦𑀁 𑀆𑀓𑀺𑀭𑀦𑁆𑀢𑀺, 𑀏𑀓𑀫𑀺𑀲𑁆𑀲𑀓𑀁 𑀳𑁄𑀢𑀺, 𑀏𑀢𑁆𑀣𑀸𑀧𑀺 𑀅𑀦𑀸𑀧𑀢𑁆𑀢𑀺.

𑀲𑀘𑁂 𑀧𑀦 𑀫𑀽𑀮𑀦𑀺𑀫𑀦𑁆𑀢𑀦𑀁 𑀳𑁂𑀝𑁆𑀞𑀸 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑀭𑀺, 𑀢𑀁 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀳𑀢𑁆𑀣𑀁 𑀧𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀞𑀫𑀦𑀺𑀫𑀦𑁆𑀢𑀦𑀢𑁄 𑀏𑀓𑀫𑁆𑀧𑀺 𑀓𑀩𑀴𑀁 𑀉𑀤𑁆𑀥𑀭𑀺𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑀣𑀸 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. ‘‘𑀲𑀘𑁂𑀧𑀺 𑀢𑀢𑁆𑀣 𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀆𑀓𑀺𑀭𑀦𑁆𑀢𑀺, 𑀬𑁂𑀦 𑀅𑀚𑁆𑀛𑁄𑀢𑁆𑀣𑀢𑀁 𑀪𑀢𑁆𑀢𑀁 𑀏𑀓𑀭𑀲𑀁 𑀳𑁄𑀢𑀺, 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀔𑀻𑀭𑀪𑀢𑁆𑀢𑀁 𑀯𑀸 𑀭𑀲𑀪𑀢𑁆𑀢𑀁 𑀯𑀸 𑀮𑀪𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀢𑀢𑁆𑀣𑁂𑀯 𑀅𑀜𑁆𑀜𑁂𑀧𑀺 𑀔𑀻𑀭𑀪𑀢𑁆𑀢𑀁 𑀯𑀸 𑀭𑀲𑀪𑀢𑁆𑀢𑀁 𑀯𑀸 𑀆𑀓𑀺𑀭𑀦𑁆𑀢𑀺, 𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀧𑀺𑀯𑀢𑁄 𑀅𑀦𑀸𑀧𑀢𑁆𑀢𑀺, 𑀪𑀼𑀜𑁆𑀚𑀦𑁆𑀢𑁂𑀦 𑀧𑀞𑀫𑀁 𑀮𑀤𑁆𑀥𑀫𑀁𑀲𑀔𑀡𑁆𑀟𑀁 𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀧𑁆𑀧𑀺𑀧𑀸𑀬𑀸𑀲𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑀫𑀳𑀸𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀢𑀺, 𑀢𑀲𑁆𑀲 𑀓𑀼𑀮𑀁 𑀉𑀧𑀕𑀢𑀲𑁆𑀲 𑀉𑀧𑀸𑀲𑀓𑁄𑀧𑀺 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀪𑀸𑀢𑀼𑀪𑀕𑀺𑀦𑀺𑀆𑀤𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀆𑀳𑀭𑀺𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀦𑁆𑀢𑀺, ‘‘𑀉𑀧𑀸𑀲𑀓𑁂𑀦 𑀧𑀞𑀫𑀁 𑀤𑀺𑀦𑁆𑀦𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 ‘‘𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀲𑀘𑁂 𑀧𑀸𑀝𑁂𑀓𑁆𑀓𑀁 𑀧𑀘𑀦𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀓𑁆𑀓𑀪𑀢𑁆𑀢𑀢𑁄 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀢𑁆𑀣 𑀧𑀘𑁆𑀙𑀸 𑀆𑀳𑀝𑀁 𑀧𑀞𑀫𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀤𑀺 𑀧𑀦 𑀲𑀩𑁆𑀩𑁂𑀲𑀁 𑀏𑀓𑁄𑀯 𑀧𑀸𑀓𑁄 𑀳𑁄𑀢𑀺, 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀉𑀧𑀸𑀲𑀓𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑀺, 𑀅𑀜𑁆𑀜𑁄 𑀫𑀦𑀼𑀲𑁆𑀲𑁄 𑀧𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀤𑀸𑀢𑀩𑁆𑀩𑀁. 𑀓𑀺𑀁, 𑀪𑀦𑁆𑀢𑁂, 𑀦 𑀤𑁂𑀣𑀸𑀢𑀺. 𑀦𑀦𑀼 𑀉𑀧𑀸𑀲𑀓 𑀢𑀬𑀸 𑀦𑀺𑀫𑀦𑁆𑀢𑀺𑀢𑀫𑁆𑀳𑀸𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂, 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀣𑀸’’𑀢𑀺 𑀯𑀤𑀢𑀺, 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀜𑁆𑀜𑁂𑀦 𑀆𑀳𑀭𑀺𑀢𑁆𑀯𑀸 𑀪𑀢𑁆𑀢𑁂 𑀤𑀺𑀦𑁆𑀦𑁂 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 ‘‘𑀲𑁆𑀯𑁂𑀧𑀺, 𑀪𑀦𑁆𑀢𑁂, 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀲𑀩𑁆𑀩𑁂 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀳𑀺 𑀦𑀺𑀫𑀦𑁆𑀢𑀺𑀢𑀢𑁆𑀢𑀸. 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀪𑀢𑁆𑀢𑀁 𑀮𑀪𑀢𑀺, 𑀢𑀫𑀜𑁆𑀜𑁄 𑀉𑀧𑀸𑀲𑀓𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀖𑀭𑁂 𑀦𑀺𑀲𑀻𑀤𑀸𑀧𑁂𑀢𑀺, 𑀦 𑀘 𑀢𑀸𑀯 𑀪𑀢𑁆𑀢𑀁 𑀲𑀫𑁆𑀧𑀚𑁆𑀚𑀢𑀺, 𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺. 𑀅𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 ‘‘𑀓𑀺𑀁, 𑀪𑀦𑁆𑀢𑁂, 𑀦 𑀪𑀼𑀜𑁆𑀚𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀬𑀸 𑀦𑀺𑀫𑀦𑁆𑀢𑀺𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 ‘‘𑀮𑀤𑁆𑀥𑀁 𑀮𑀤𑁆𑀥𑀁 𑀪𑀼𑀜𑁆𑀚𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀓𑀮𑁂𑀦 𑀕𑀸𑀫𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀫𑀦𑁆𑀢𑀺𑀢𑀲𑁆𑀲 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀧𑀽𑀕𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀅𑀦𑀸𑀧𑀢𑁆𑀢𑀺 𑀲𑀓𑀮𑁂𑀦 𑀕𑀸𑀫𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀲𑁆𑀫𑀺𑀁 𑀕𑀸𑀫𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀢𑀺, 𑀲𑀓𑀮𑁂𑀦 𑀧𑀽𑀕𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀲𑁆𑀫𑀺𑀁 𑀧𑀽𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀢𑀺, 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 ‘𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻’𑀢𑀺 𑀪𑀡𑀢𑀺, 𑀦𑀺𑀘𑁆𑀘𑀪𑀢𑁆𑀢𑁂 𑀲𑀮𑀸𑀓𑀪𑀢𑁆𑀢𑁂 𑀧𑀓𑁆𑀔𑀺𑀓𑁂 𑀉𑀧𑁄𑀲𑀣𑀺𑀓𑁂 𑀧𑀸𑀝𑀺𑀧𑀤𑀺𑀓𑁂 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑁨𑁨𑁯) 𑀯𑀼𑀢𑁆𑀢𑀁.

𑀢𑀢𑁆𑀣 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀪𑀺𑀓𑁆𑀔𑀁 𑀕𑀳𑁂𑀲𑁆𑀲𑀸𑀫𑀻𑀢𑀺 𑀪𑀡𑀢𑀻𑀢𑀺 𑀏𑀢𑁆𑀣 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 ‘‘𑀦 𑀫𑀬𑁆𑀳𑀁 𑀢𑀯 𑀪𑀢𑁆𑀢𑁂𑀦𑀢𑁆𑀣𑁄, 𑀪𑀺𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳 ‘‘𑀏𑀯𑀁 𑀯𑀤𑀦𑁆𑀢𑁄 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀅𑀦𑀺𑀫𑀦𑁆𑀢𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀦 𑀑𑀓𑀸𑀲𑁄 𑀓𑀢𑁄 𑀳𑁄𑀢𑀻𑀢𑀺 𑀦𑁂𑀯 𑀕𑀡𑀪𑁄𑀚𑀦𑀢𑁄, 𑀦 𑀘𑀸𑀭𑀺𑀢𑁆𑀢𑀢𑁄 𑀫𑀼𑀘𑁆𑀘𑀢𑀻’’𑀢𑀺. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳 ‘‘𑀬𑀤𑀕𑁆𑀕𑁂𑀦 𑀅𑀦𑀺𑀫𑀦𑁆𑀢𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀤𑀕𑁆𑀕𑁂𑀦 𑀦𑁂𑀯 𑀕𑀡𑀪𑁄𑀚𑀦𑀁, 𑀦 𑀘𑀸𑀭𑀺𑀢𑁆𑀢𑀁 𑀳𑁄𑀢𑀻’’𑀢𑀺.

𑀢𑀢𑁆𑀣 𑀘𑀸𑀭𑀺𑀢𑁆𑀢𑀦𑁆𑀢𑀺 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄 𑀘𑀻𑀯𑀭𑀤𑀸𑀦𑀲𑀫𑀬𑁄 𑀘𑀻𑀯𑀭𑀓𑀸𑀭𑀲𑀫𑀬𑁄. 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺 (𑀧𑀸𑀘𑀺. 𑁨𑁯𑁯) 𑁋

𑀏𑀯𑀫𑀸𑀕𑀢𑀁 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀳𑀺 𑀲𑀺𑀓𑁆𑀔𑀸𑀧𑀤𑁂𑀦 𑀬𑁄 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑁂𑀦𑁂𑀯 𑀦𑀺𑀫𑀦𑁆𑀢𑀦𑀪𑀢𑁆𑀢𑁂𑀦 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 ‘‘𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀖𑀭𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀸 ‘‘𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀸𑀫𑀻’’𑀢𑀺 𑀯𑀸 𑀈𑀤𑀺𑀲𑁂𑀦 𑀯𑀘𑀦𑁂𑀦 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀬𑁂𑀦 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑀁 𑀪𑀼𑀢𑁆𑀯𑀸 𑀯𑀸 𑀅𑀪𑀼𑀢𑁆𑀯𑀸 𑀯𑀸 𑀅𑀯𑀻𑀢𑀺𑀯𑀢𑁆𑀢𑁂𑀬𑁂𑀯 𑀫𑀚𑁆𑀛𑀦𑁆𑀳𑀺𑀓𑁂 𑀬𑀲𑁆𑀫𑀺𑀁 𑀓𑀼𑀮𑁂 𑀦𑀺𑀫𑀦𑁆𑀢𑀺𑀢𑁄, 𑀢𑀢𑁄 𑀅𑀜𑁆𑀜𑀸𑀦𑀺 𑀓𑀼𑀮𑀸𑀦𑀺 𑀧𑀯𑀺𑀲𑁂𑀬𑁆𑀬, 𑀢𑀲𑁆𑀲 𑀯𑀼𑀢𑁆𑀢𑀮𑀓𑁆𑀔𑀡𑀁 𑀤𑀼𑀯𑀺𑀥𑀫𑁆𑀧𑀺 𑀲𑀫𑀬𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑀺𑀬𑀫𑀸𑀦𑁄 𑀲𑀘𑁂 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀇𑀫𑀺𑀦𑀸𑀧𑀺 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺.

𑁩. 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁨𑁯𑁮) 𑀧𑀦 𑀓𑀺𑀢𑁆𑀢𑀸𑀯𑀢𑀸 𑀲𑀦𑁆𑀢𑁄 𑀳𑁄𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀅𑀲𑀦𑁆𑀢𑁄? 𑀅𑀦𑁆𑀢𑁄𑀯𑀺𑀳𑀸𑀭𑁂 𑀬𑀢𑁆𑀣 𑀞𑀺𑀢𑀲𑁆𑀲 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀦𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁄 𑀧𑀝𑁆𑀞𑀸𑀬 𑀬𑀁 𑀧𑀲𑁆𑀲𑁂 𑀯𑀸 𑀅𑀪𑀺𑀫𑀼𑀔𑁂 𑀯𑀸 𑀧𑀲𑁆𑀲𑀢𑀺, 𑀬𑀲𑁆𑀲 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀯𑀘𑀦𑁂𑀦 𑀆𑀭𑁄𑀘𑁂𑀢𑀼𑀁, 𑀅𑀬𑀁 𑀲𑀦𑁆𑀢𑁄 𑀦𑀸𑀫, 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑀦𑀓𑀺𑀘𑁆𑀘𑀁 𑀧𑀦 𑀦𑀢𑁆𑀣𑀺. 𑀬𑁄 𑀳𑀺 𑀏𑀯𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀲𑁄 𑀅𑀲𑀦𑁆𑀢𑁄𑀬𑁂𑀯. 𑀅𑀧𑀺𑀘 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀆𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑀺. 𑀢𑀢𑁆𑀣 𑀬𑀁 𑀧𑀲𑁆𑀲𑀢𑀺, 𑀲𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀦𑁄 𑀘𑁂 𑀧𑀲𑁆𑀲𑀢𑀺, 𑀅𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑁂𑀧𑀺 𑀅𑀬𑀫𑁂𑀯 𑀦𑀬𑁄.

𑀲𑀘𑁂 (𑀧𑀸𑀘𑀺. 𑀅𑀝𑁆𑀞. 𑁫𑁧𑁨) 𑀧𑀦 𑀲𑀫𑁆𑀩𑀳𑀼𑀮𑀸 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, ‘‘𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀲𑀩𑁆𑀩𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀕𑀸𑀫𑁂 𑀢𑀁 𑀓𑀫𑁆𑀫𑀁 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑀺, 𑀕𑀸𑀫𑀲𑀢𑀫𑁆𑀧𑀺 𑀳𑁄𑀢𑀼, 𑀧𑀼𑀦 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀘𑁂 𑀧𑀦 𑀉𑀲𑁆𑀲𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸 𑀅𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀧𑀼𑀦 𑀆𑀧𑀼𑀘𑁆𑀙𑀺𑀢𑀩𑁆𑀩𑀫𑁂𑀯. 𑀓𑀼𑀮𑀖𑀭𑁂 𑀯𑀸 𑀆𑀲𑀦𑀲𑀸𑀮𑀸𑀬 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑁂𑀮𑀪𑀺𑀓𑁆𑀔𑀸𑀬 𑀯𑀸 𑀲𑀧𑁆𑀧𑀺𑀪𑀺𑀓𑁆𑀔𑀸𑀬 𑀯𑀸 𑀘𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀘𑁂 𑀧𑀲𑁆𑀲𑁂 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀲𑀦𑁆𑀢𑁂 𑀪𑀺𑀓𑁆𑀔𑀼𑀫𑁆𑀳𑀺 ‘‘𑀦𑀢𑁆𑀣𑀻’’𑀢𑀺 𑀕𑀦𑁆𑀢𑀩𑁆𑀩𑀁, 𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀘𑀭𑀺𑀢𑀩𑁆𑀩𑀫𑁂𑀯. 𑀕𑀸𑀫𑀫𑀚𑁆𑀛𑁂𑀦 𑀫𑀕𑁆𑀕𑁄 𑀳𑁄𑀢𑀺, 𑀢𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 ‘‘𑀢𑁂𑀮𑀸𑀤𑀺𑀪𑀺𑀓𑁆𑀔𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀧𑀲𑁆𑀲𑁂 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀭𑀺𑀢𑀩𑁆𑀩𑀁. 𑀫𑀕𑁆𑀕𑀸 𑀅𑀦𑁄𑀓𑁆𑀓𑀫𑁆𑀫 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀲𑁆𑀲 𑀧𑀦 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀘𑁂 𑀲𑀻𑀳𑁄 𑀯𑀸 𑀩𑁆𑀬𑀕𑁆𑀖𑁄 𑀯𑀸 𑀆𑀕𑀘𑁆𑀙𑀢𑀺, 𑀫𑁂𑀖𑁄 𑀯𑀸 𑀉𑀝𑁆𑀞𑁂𑀢𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀉𑀧𑀤𑁆𑀤𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀭𑀽𑀧𑀸𑀲𑀼 𑀆𑀧𑀤𑀸𑀲𑀼 𑀅𑀦𑀸𑀧𑀼𑀘𑁆𑀙𑀸𑀧𑀺 𑀩𑀳𑀺𑀕𑀸𑀫𑀢𑁄 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺.

𑁪. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀪𑀺𑀦𑁆𑀦𑁂 𑀲𑀭𑀻𑀭𑁂 𑀧𑀁𑀲𑀼𑀓𑀽𑀮𑀁 𑀕𑀳𑁂𑀢𑀩𑁆𑀩𑀁, 𑀬𑁄 𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁩𑁭) 𑀯𑀘𑀦𑀢𑁄 𑀅𑀩𑁆𑀪𑀼𑀡𑁆𑀳𑁂 𑀅𑀮𑁆𑀮𑀲𑀭𑀻𑀭𑁂 𑀧𑀁𑀲𑀼𑀓𑀽𑀮𑀁 𑀦 𑀕𑀳𑁂𑀢𑀩𑁆𑀩𑀁, 𑀕𑀡𑁆𑀳𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀉𑀧𑀤𑁆𑀤𑀯𑀸 𑀘 𑀢𑀲𑁆𑀲 𑀳𑁄𑀦𑁆𑀢𑀺, 𑀪𑀺𑀦𑁆𑀦𑁂 𑀧𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀓𑀺𑀢𑁆𑀢𑀸𑀯𑀢𑀸 𑀧𑀦 𑀪𑀺𑀦𑁆𑀦𑀁 𑀳𑁄𑀢𑀺? 𑀓𑀸𑀓𑀓𑀼𑀮𑀮𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀤𑀸𑀞𑀸𑀬 𑀯𑀸 𑀈𑀲𑀓𑀁 𑀨𑀸𑀮𑀺𑀢𑀫𑀢𑁆𑀢𑁂𑀦𑀧𑀺. 𑀬𑀲𑁆𑀲 𑀧𑀦 𑀧𑀢𑀢𑁄 𑀖𑀁𑀲𑀦𑁂𑀦 𑀙𑀯𑀺𑀫𑀢𑁆𑀢𑀁 𑀙𑀺𑀦𑁆𑀦𑀁 𑀳𑁄𑀢𑀺, 𑀘𑀫𑁆𑀫𑀁 𑀅𑀘𑁆𑀙𑀺𑀦𑁆𑀦𑀁, 𑀏𑀢𑀁 𑀅𑀪𑀺𑀦𑁆𑀦𑀫𑁂𑀯, 𑀘𑀫𑁆𑀫𑁂 𑀧𑀦 𑀙𑀺𑀦𑁆𑀦𑁂 𑀪𑀺𑀦𑁆𑀦𑀁. 𑀬𑀲𑁆𑀲𑀧𑀺 𑀲𑀚𑀻𑀯𑀓𑀸𑀮𑁂𑀬𑁂𑀯 𑀧𑀪𑀺𑀦𑁆𑀦𑀸 𑀕𑀡𑁆𑀟𑀓𑀼𑀝𑁆𑀞𑀧𑀻𑀴𑀓𑀸 𑀯𑀸 𑀯𑀡𑁄 𑀯𑀸 𑀳𑁄𑀢𑀺, 𑀇𑀤𑀫𑁆𑀧𑀺 𑀪𑀺𑀦𑁆𑀦𑀁, 𑀢𑀢𑀺𑀬𑀤𑀺𑀯𑀲𑀢𑁄 𑀧𑀪𑀼𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑁂𑀦 𑀓𑀼𑀡𑀧𑀪𑀸𑀯𑀁 𑀉𑀧𑀕𑀢𑀫𑁆𑀧𑀺 𑀪𑀺𑀦𑁆𑀦𑀫𑁂𑀯. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀅𑀪𑀺𑀦𑁆𑀦𑁂𑀧𑀺 𑀲𑀼𑀲𑀸𑀦𑀕𑁄𑀧𑀓𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀫𑀦𑀼𑀲𑁆𑀲𑁂𑀳𑀺 𑀕𑀸𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀦𑁄 𑀘𑁂 𑀅𑀜𑁆𑀜𑀁 𑀮𑀪𑀢𑀺, 𑀲𑀢𑁆𑀣𑀓𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀺𑀲𑀪𑀸𑀕𑀲𑀭𑀻𑀭𑁂 𑀧𑀦 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑀡𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀻𑀲𑁂 𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀬𑀁 𑀯𑀸 𑀯𑀡𑀁 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑁫. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀯𑀸 𑀦𑀝𑁆𑀞𑀘𑀻𑀯𑀭𑀲𑁆𑀲 𑀯𑀸 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀸𑀦𑀺𑀁 𑀯𑀸 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁. 𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀢𑀺, 𑀲𑀘𑁂 𑀢𑀢𑁆𑀣 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀘𑀻𑀯𑀭𑀁 𑀯𑀸 𑀉𑀢𑁆𑀢𑀭𑀢𑁆𑀣𑀭𑀡𑀁 𑀯𑀸 𑀪𑀽𑀫𑀢𑁆𑀣𑀭𑀡𑀁 𑀯𑀸 𑀪𑀺𑀲𑀺𑀘𑁆𑀙𑀯𑀺 𑀯𑀸, 𑀢𑀁 𑀕𑀳𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 ‘𑀮𑀪𑀺𑀢𑁆𑀯𑀸 𑀑𑀤𑀳𑀺𑀲𑁆𑀲𑀸𑀫𑀻’𑀢𑀺. 𑀦𑁄 𑀘𑁂 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀘𑀻𑀯𑀭𑀁 𑀯𑀸 𑀉𑀢𑁆𑀢𑀭𑀢𑁆𑀣𑀭𑀡𑀁 𑀯𑀸 𑀪𑀽𑀫𑀢𑁆𑀣𑀭𑀡𑀁 𑀯𑀸 𑀪𑀺𑀲𑀺𑀘𑁆𑀙𑀯𑀺 𑀯𑀸, 𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭) 𑀯𑀘𑀦𑀢𑁄 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀓𑀣𑀸 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁧𑁭). 𑀲𑀘𑁂 𑀳𑀺 𑀘𑁄𑀭𑁂 𑀧𑀲𑁆𑀲𑀺𑀢𑁆𑀯𑀸 𑀤𑀳𑀭𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀧𑀮𑀸𑀢𑀸, 𑀘𑁄𑀭𑀸 𑀣𑁂𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑀢𑁆𑀢𑀁𑀬𑁂𑀯 𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀣𑁂𑀭𑁂𑀳𑀺 𑀦𑁂𑀯 𑀢𑀸𑀯 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀦 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀩𑁆𑀩𑀁. 𑀅𑀣 𑀤𑀳𑀭𑀸 𑀲𑀩𑁆𑀩𑀁 𑀪𑀡𑁆𑀟𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸, 𑀘𑁄𑀭𑀸 𑀣𑁂𑀭𑀸𑀦𑀜𑁆𑀘 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀢𑀜𑁆𑀘 𑀪𑀡𑁆𑀟𑀓𑀁 𑀳𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑀳𑀭𑁂𑀳𑀺 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀦 𑀢𑀸𑀯 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀺. 𑀦 𑀳𑀺 𑀢𑁂 𑀅𑀦𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀼𑀁 𑀮𑀪𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀧𑀦 𑀅𑀢𑁆𑀣𑀸𑀬 𑀮𑀪𑀦𑁆𑀢𑀺. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀯 𑀅𑀢𑁆𑀢𑀦𑁄𑀧𑀺 𑀧𑀭𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀣𑁂𑀭𑁂𑀳𑀺 𑀯𑀸 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑁆𑀯𑀸 𑀯𑀸𑀓𑀸𑀤𑀻𑀳𑀺 𑀕𑀦𑁆𑀣𑁂𑀢𑁆𑀯𑀸 𑀤𑀳𑀭𑀸𑀦𑀁 𑀤𑀸𑀢𑀩𑁆𑀩𑀁, 𑀤𑀳𑀭𑁂𑀳𑀺 𑀯𑀸 𑀣𑁂𑀭𑀸𑀦𑀁 𑀅𑀢𑁆𑀣𑀸𑀬 𑀪𑀜𑁆𑀚𑀺𑀢𑁆𑀯𑀸 𑀕𑀦𑁆𑀣𑁂𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀤𑀢𑁆𑀯𑀸 𑀯𑀸 𑀅𑀤𑀢𑁆𑀯𑀸 𑀯𑀸 𑀅𑀢𑁆𑀢𑀦𑀸 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀺, 𑀦𑁂𑀯 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀺, 𑀦 𑀢𑁂𑀲𑀁 𑀥𑀸𑀭𑀡𑁂 𑀤𑀼𑀓𑁆𑀓𑀝𑀁.

𑀲𑀘𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀚𑀓𑀢𑁆𑀣𑀭𑀡𑀁 𑀯𑀸 𑀳𑁄𑀢𑀺, 𑀅𑀜𑁆𑀜𑁂 𑀯𑀸 𑀢𑀸𑀤𑀺𑀲𑁂 𑀫𑀦𑀼𑀲𑁆𑀲𑁂 𑀧𑀲𑁆𑀲𑀦𑁆𑀢𑀺, 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀬𑀸𑀦𑀺 𑀘 𑀦𑁂𑀲𑀁 𑀢𑁂 𑀯𑀸 𑀯𑀺𑀜𑁆𑀜𑀢𑁆𑀢𑀫𑀦𑀼𑀲𑁆𑀲𑀸 𑀅𑀜𑁆𑀜𑁂 𑀯𑀸 𑀲𑀸𑀔𑀸𑀧𑀮𑀸𑀲𑀦𑀺𑀯𑀸𑀲𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑀢𑁆𑀣𑀸𑀦𑀺 𑀤𑁂𑀦𑁆𑀢𑀺, 𑀢𑀸𑀦𑀺 𑀲𑀤𑀲𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀅𑀤𑀲𑀸𑀦𑀺 𑀯𑀸 𑀦𑀻𑀮𑀸𑀤𑀺𑀦𑀸𑀦𑀸𑀯𑀡𑁆𑀡𑀸𑀦𑀺 𑀯𑀸, 𑀓𑀧𑁆𑀧𑀺𑀬𑀸𑀦𑀺𑀧𑀺 𑀅𑀓𑀧𑁆𑀧𑀺𑀬𑀸𑀦𑀺𑀧𑀺 𑀲𑀩𑁆𑀩𑀸𑀦𑀺𑀧𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀢𑁂𑀲𑀁 𑀦𑀺𑀯𑀸𑀲𑁂𑀢𑀼𑀜𑁆𑀘 𑀧𑀸𑀭𑀼𑀧𑀺𑀢𑀼𑀜𑁆𑀘 𑀯𑀝𑁆𑀝𑀦𑁆𑀢𑀺.

𑀯𑀼𑀢𑁆𑀢𑀫𑁆𑀧𑀺𑀳𑁂𑀢𑀁 𑀧𑀭𑀺𑀯𑀸𑀭𑁂 𑁋

‘‘𑀅𑀓𑀧𑁆𑀧𑀓𑀢𑀁 𑀦𑀸𑀧𑀺 𑀭𑀚𑀦𑀸𑀬 𑀭𑀢𑁆𑀢𑀁,

𑀢𑁂𑀦 𑀦𑀺𑀯𑀢𑁆𑀣𑁄 𑀬𑁂𑀦𑀓𑀸𑀫𑀁 𑀯𑀚𑁂𑀬𑁆𑀬;

𑀦 𑀘𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺,

𑀲𑁄 𑀘 𑀥𑀫𑁆𑀫𑁄 𑀲𑀼𑀕𑀢𑁂𑀦 𑀤𑁂𑀲𑀺𑀢𑁄;

𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁮𑁧);

𑀅𑀬𑀜𑁆𑀳𑀺 𑀧𑀜𑁆𑀳𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀅𑀣 𑀧𑀦 𑀢𑀺𑀢𑁆𑀣𑀺𑀬𑁂𑀳𑀺 𑀲𑀫𑀸𑀕𑀘𑁆𑀙𑀦𑁆𑀢𑀺, 𑀢𑁂 𑀘 𑀦𑁂𑀲𑀁 𑀓𑀼𑀲𑀘𑀻𑀭𑀯𑀸𑀓𑀘𑀻𑀭𑀨𑀮𑀓𑀘𑀻𑀭𑀸𑀦𑀺 𑀤𑁂𑀦𑁆𑀢𑀺, 𑀢𑀸𑀦𑀺𑀧𑀺 𑀮𑀤𑁆𑀥𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀦𑁆𑀢𑀺, 𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀮𑀤𑁆𑀥𑀺 𑀦 𑀕𑀳𑁂𑀢𑀩𑁆𑀩𑀸.

𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀯𑀺𑀳𑀸𑀭𑀘𑀻𑀯𑀭𑀸𑀤𑀻𑀲𑀼 𑀬𑀁 𑀅𑀢𑁆𑀣𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀸𑀧𑀺 𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀮𑀪𑀢𑀺. 𑀢𑀜𑁆𑀘 𑀔𑁄 ‘‘𑀮𑀪𑀺𑀢𑁆𑀯𑀸 𑀑𑀤𑀳𑀺𑀲𑁆𑀲𑀸𑀫𑀺, 𑀧𑀼𑀦 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, 𑀦 𑀫𑀽𑀮𑀘𑁆𑀙𑁂𑀚𑁆𑀚𑀸𑀬. 𑀮𑀪𑀺𑀢𑁆𑀯𑀸 𑀘 𑀧𑀦 𑀜𑀸𑀢𑀺𑀢𑁄 𑀯𑀸 𑀉𑀧𑀝𑁆𑀞𑀸𑀓𑀢𑁄 𑀯𑀸 𑀅𑀜𑁆𑀜𑀢𑁄 𑀯𑀸 𑀓𑀼𑀢𑁄𑀘𑀺 𑀧𑀸𑀓𑀢𑀺𑀓𑀫𑁂𑀯 𑀓𑀸𑀢𑀩𑁆𑀩𑀁. 𑀯𑀺𑀤𑁂𑀲𑀕𑀢𑁂𑀦 𑀧𑀦 𑀏𑀓𑀲𑁆𑀫𑀺𑀁 𑀲𑀗𑁆𑀖𑀺𑀓𑁂 𑀆𑀯𑀸𑀲𑁂 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑀁. 𑀲𑀘𑀲𑁆𑀲 𑀧𑀭𑀺𑀪𑁄𑀕𑁂𑀦𑁂𑀯 𑀢𑀁 𑀚𑀻𑀭𑀢𑀺 𑀯𑀸 𑀦𑀲𑁆𑀲𑀢𑀺 𑀯𑀸, 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀏𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀕𑀺𑀳𑀺𑀯𑀢𑁆𑀣𑀸𑀤𑀻𑀦𑀁 𑀪𑀺𑀲𑀺𑀘𑁆𑀙𑀯𑀺𑀧𑀭𑀺𑀬𑀦𑁆𑀢𑀸𑀦𑀁 𑀓𑀺𑀜𑁆𑀘𑀺 𑀦 𑀮𑀪𑀢𑀺, 𑀢𑁂𑀦 𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀦𑁆𑀢𑀺.

𑁬. ‘‘𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑀩𑁆𑀩𑀁 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁, 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁯𑁯) 𑀯𑀘𑀦𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀁 𑀓𑀸𑀢𑀼𑀁 𑀯𑀸 𑀓𑀸𑀭𑀸𑀧𑁂𑀢𑀼𑀁 𑀯𑀸 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀁 (𑀘𑀽𑀴𑀯. 𑀅𑀝𑁆𑀞. 𑁨𑁯𑁯) 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑁂𑀯, 𑀢𑀺𑀭𑀘𑁆𑀙𑀸𑀦𑀭𑀽𑀧𑀫𑁆𑀧𑀺 𑀅𑀦𑁆𑀢𑀫𑀲𑁄 𑀕𑀡𑁆𑀟𑀼𑀧𑁆𑀧𑀸𑀤𑀭𑀽𑀧𑀁 𑀪𑀺𑀓𑁆𑀔𑀼𑀦𑁄 𑀲𑀬𑀁 𑀓𑀸𑀢𑀼𑀁 𑀯𑀸 ‘‘𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺, ‘‘𑀉𑀧𑀸𑀲𑀓 𑀤𑁆𑀯𑀸𑀭𑀧𑀸𑀮𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀮𑀪𑀢𑀺. 𑀚𑀸𑀢𑀓𑀧𑀓𑀭𑀡𑀅𑀲𑀤𑀺𑀲𑀤𑀸𑀦𑀸𑀤𑀻𑀦𑀺 𑀧𑀦 𑀧𑀲𑀸𑀤𑀦𑀻𑀬𑀸𑀦𑀺 𑀦𑀺𑀩𑁆𑀩𑀺𑀤𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀯𑀸 𑀯𑀢𑁆𑀣𑀽𑀦𑀺 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀁 𑀮𑀪𑀢𑀺, 𑀫𑀸𑀮𑀸𑀓𑀫𑁆𑀫𑀸𑀤𑀻𑀦𑀺 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀮𑀪𑀢𑀺.

𑁭. ‘‘𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑁆𑀧𑀓𑀢𑀪𑁄𑀚𑀦𑁄 𑀪𑀺𑀓𑁆𑀔𑀼 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄, 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁬) 𑀯𑀘𑀦𑀢𑁄 𑀅𑀦𑁆𑀢𑀭𑀖𑀭𑁂 (𑀘𑀽𑀴𑀯. 𑀅𑀝𑁆𑀞. 𑁩𑁧𑁬) 𑀯𑀸 𑀯𑀺𑀳𑀸𑀭𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀼𑀜𑁆𑀚𑀫𑀸𑀦𑁄 𑀪𑀺𑀓𑁆𑀔𑀼 𑀅𑀦𑀺𑀝𑁆𑀞𑀺𑀢𑁂 𑀪𑁄𑀚𑀦𑁂 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄, 𑀅𑀦𑁆𑀢𑀭𑀖𑀭𑁂 𑀧𑀘𑁆𑀙𑀸 𑀆𑀕𑀢𑁂𑀦 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀯𑀸 𑀪𑀺𑀓𑁆𑀔𑀽 𑀯𑀸 ‘‘𑀧𑀯𑀺𑀲𑀣𑀸’’𑀢𑀺 𑀯𑀤𑀦𑁆𑀢𑀺, ‘‘𑀫𑀬𑀺 𑀧𑀯𑀺𑀲𑀦𑁆𑀢𑁂 𑀪𑀺𑀓𑁆𑀔𑀽 𑀉𑀝𑁆𑀞𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀏𑀣, 𑀪𑀦𑁆𑀢𑁂, 𑀆𑀲𑀦𑀁 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀘𑀺 𑀓𑀺𑀜𑁆𑀘𑀺 𑀦 𑀯𑀤𑀢𑀺, 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀅𑀢𑀺𑀲𑀫𑀻𑀧𑀁 𑀅𑀕𑀦𑁆𑀢𑁆𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀞𑀸𑀢𑀩𑁆𑀩𑀁. 𑀑𑀓𑀸𑀲𑁂 𑀓𑀢𑁂 ‘‘𑀧𑀯𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂𑀦 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀬𑀁 𑀆𑀲𑀦𑀁 𑀢𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀅𑀪𑀼𑀜𑁆𑀚𑀦𑁆𑀢𑁄 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀁 𑀉𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀲𑀼 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀺𑀯𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀯𑀸 𑀬𑀸𑀯 𑀅𑀜𑁆𑀜𑁄 𑀆𑀕𑀘𑁆𑀙𑀢𑀺, 𑀢𑀸𑀯 𑀦𑀺𑀲𑀺𑀦𑁆𑀦𑀁 𑀭𑀺𑀢𑁆𑀢𑀳𑀢𑁆𑀣𑀫𑁆𑀧𑀺 𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀧𑁆𑀧𑀓𑀢𑀪𑁄𑀚𑀦𑁄𑀬𑁂𑀯 𑀳𑀺 𑀲𑁄 𑀳𑁄𑀢𑀺.

𑀲𑀘𑁂 𑀧𑀦 𑀆𑀧𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀯𑀼𑀝𑁆𑀞𑀸𑀧𑁂𑀢𑀺𑀬𑁂𑀯, 𑀬𑀁 𑀲𑁄 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀢𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀕𑀘𑁆𑀙 𑀉𑀤𑀓𑀁 𑀆𑀳𑀭𑀸𑀳𑀻’’𑀢𑀺. 𑀯𑀼𑀟𑁆𑀠𑀢𑀭𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀁 𑀇𑀤𑀫𑁂𑀯 𑀏𑀓𑀝𑁆𑀞𑀸𑀦𑀁. 𑀲𑀘𑁂 𑀲𑁄 𑀉𑀤𑀓𑀫𑁆𑀧𑀺 𑀦 𑀆𑀳𑀭𑀢𑀺, 𑀲𑀸𑀥𑀼𑀓𑀁 𑀲𑀺𑀢𑁆𑀣𑀸𑀦𑀺 𑀕𑀺𑀮𑀺𑀢𑁆𑀯𑀸 𑀯𑀼𑀟𑁆𑀠𑀲𑁆𑀲 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀘𑁂 𑀯𑀼𑀝𑁆𑀞𑀸𑀧𑁂𑀢𑀺, 𑀧𑀯𑀸𑀭𑀺𑀢𑁄 𑀘 𑀳𑁄𑀢𑀺, ‘𑀕𑀘𑁆𑀙 𑀉𑀤𑀓𑀁 𑀆𑀳𑀭𑀸’𑀢𑀺 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀲𑀸𑀥𑀼𑀓𑀁 𑀲𑀺𑀢𑁆𑀣𑀸𑀦𑀺 𑀕𑀺𑀮𑀺𑀢𑁆𑀯𑀸 𑀯𑀼𑀟𑁆𑀠𑀲𑁆𑀲 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀦𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, ‘𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩’𑀦𑁆𑀢𑀺 𑀯𑀤𑀸𑀫𑀺, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁬).

𑁮. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀦𑁆𑀢𑁂𑀦 𑀲𑀫𑀓𑁂 𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀉𑀘𑁆𑀘𑀢𑀭𑁂 𑀯𑀸 𑀥𑀫𑁆𑀫𑀕𑀸𑀭𑀯𑁂𑀦, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦 𑀲𑀫𑀓𑁂 𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀦𑀻𑀘𑀢𑀭𑁂 𑀯𑀸 𑀥𑀫𑁆𑀫𑀕𑀸𑀭𑀯𑁂𑀦𑀸’’𑀢𑀺 (𑀘𑀽𑀴𑀯. 𑁩𑁨𑁦) 𑀯𑀘𑀦𑀢𑁄 𑀦𑀯𑀓𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀦𑁆𑀢𑁂𑀦 𑀉𑀘𑁆𑀘𑀢𑀭𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁, 𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦 𑀦𑀻𑀘𑀢𑀭𑁂𑀧𑀺 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺.

𑁯. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀯𑀲𑁆𑀲𑀦𑁆𑀢𑀭𑁂𑀦 𑀲𑀳 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀯𑀘𑀦𑀢𑁄 𑀢𑀺𑀯𑀲𑁆𑀲𑀦𑁆𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀺𑀯𑀲𑁆𑀲𑀦𑁆𑀢𑀭𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦) 𑀦𑀸𑀫 𑀬𑁄 𑀤𑁆𑀯𑀻𑀳𑀺 𑀯𑀲𑁆𑀲𑁂𑀳𑀺 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸 𑀳𑁄𑀢𑀺, 𑀬𑁄 𑀧𑀦 𑀏𑀓𑁂𑀦 𑀯𑀲𑁆𑀲𑁂𑀦 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸, 𑀬𑁄 𑀯𑀸 𑀲𑀫𑀸𑀦𑀯𑀲𑁆𑀲𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀇𑀫𑁂 𑀲𑀩𑁆𑀩𑁂 𑀏𑀓𑀲𑁆𑀫𑀺𑀁 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀤𑁆𑀯𑁂 𑀤𑁆𑀯𑁂 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀮𑀪𑀦𑁆𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀼𑀯𑀕𑁆𑀕𑀲𑁆𑀲 𑀫𑀜𑁆𑀘𑀁 𑀤𑀼𑀯𑀕𑁆𑀕𑀲𑁆𑀲 𑀧𑀻𑀞’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀳𑀺 𑀯𑀼𑀢𑁆𑀢𑀁.

𑁧𑁦. 𑀬𑀁 𑀧𑀦 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀢𑀁 𑀲𑀁𑀳𑀸𑀭𑀺𑀫𑀁 𑀯𑀸 𑀳𑁄𑀢𑀼 𑀅𑀲𑀁𑀳𑀸𑀭𑀺𑀫𑀁 𑀯𑀸, 𑀢𑀣𑀸𑀭𑀽𑀧𑁂 𑀅𑀧𑀺 𑀨𑀮𑀓𑀔𑀡𑁆𑀟𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀧𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀏𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀤𑀻𑀖𑀸𑀲𑀦’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀳𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀧𑀡𑁆𑀟𑀓𑀁 𑀫𑀸𑀢𑀼𑀕𑀸𑀫𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀅𑀲𑀫𑀸𑀦𑀸𑀲𑀦𑀺𑀓𑁂𑀳𑀺 𑀲𑀳 𑀤𑀻𑀖𑀸𑀲𑀦𑁂 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀯𑀘𑀦𑀢𑁄 𑀧𑀦 𑀤𑀻𑀖𑀸𑀲𑀦𑁂𑀧𑀺 𑀧𑀡𑁆𑀟𑀓𑀸𑀤𑀻𑀳𑀺 𑀲𑀳 𑀦𑀺𑀲𑀻𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑁧𑁧. 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁂𑀦 ‘‘𑀦𑀢𑁆𑀣𑀺 𑀯𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀬𑁂 𑀯𑁄 𑀉𑀧𑀝𑁆𑀞𑀳𑁂𑀬𑁆𑀬𑀼𑀁, 𑀢𑀼𑀫𑁆𑀳𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀫𑀜𑁆𑀜𑀁 𑀦 𑀉𑀧𑀝𑁆𑀞𑀳𑀺𑀲𑁆𑀲𑀣, 𑀅𑀣 𑀓𑁄 𑀘𑀭𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀢𑀺. 𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁬𑁫) 𑀇𑀫𑀁 𑀪𑀕𑀯𑀢𑁄 𑀅𑀦𑀼𑀲𑀸𑀲𑀦𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀩𑁆𑀩𑁄.

𑀲𑀘𑁂 𑀉𑀧𑀚𑁆𑀛𑀸𑀬𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀭𑀺𑀬𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀲𑀫𑀸𑀦𑀸𑀘𑀭𑀺𑀬𑀓𑁄 𑀳𑁄𑀢𑀺, 𑀲𑀫𑀸𑀦𑀸𑀘𑀭𑀺𑀬𑀓𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀲𑀘𑁂 𑀦 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁄 𑀯𑀸, 𑀲𑀗𑁆𑀖𑁂𑀦 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀦𑁄 𑀘𑁂 𑀉𑀧𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁫) 𑁋

𑀯𑀘𑀦𑀢𑁄 𑀬𑀲𑁆𑀲 (𑀫𑀳𑀸𑀯. 𑀅𑀝𑁆𑀞. 𑁩𑁬𑁫) 𑀢𑁂 𑀉𑀧𑀚𑁆𑀛𑀸𑀬𑀸𑀤𑀬𑁄 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀢𑁆𑀣𑀺, 𑀆𑀕𑀦𑁆𑀢𑀼𑀓𑁄 𑀳𑁄𑀢𑀺 𑀏𑀓𑀘𑀸𑀭𑀺𑀓𑀪𑀺𑀓𑁆𑀔𑀼, 𑀲𑀗𑁆𑀖𑀲𑁆𑀲 𑀪𑀸𑀭𑁄, 𑀢𑀲𑁆𑀫𑀸 𑀲𑀗𑁆𑀖𑁂𑀦 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀦𑁄 𑀘𑁂 𑀉𑀧𑀝𑁆𑀞𑀳𑁂𑀬𑁆𑀬, 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀆𑀧𑀢𑁆𑀢𑀺. 𑀯𑀸𑀭𑀁 𑀞𑀧𑁂𑀢𑁆𑀯𑀸 𑀚𑀕𑁆𑀕𑀦𑁆𑀢𑁂𑀲𑀼 𑀧𑀦 𑀬𑁄 𑀅𑀢𑁆𑀢𑀦𑁄 𑀯𑀸𑀭𑁂 𑀦 𑀚𑀕𑁆𑀕𑀢𑀺, 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺, 𑀲𑀗𑁆𑀖𑀢𑁆𑀣𑁂𑀭𑁄𑀧𑀺 𑀯𑀸𑀭𑀢𑁄 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀲𑀓𑀮𑁄 𑀲𑀗𑁆𑀖𑁄 𑀏𑀓𑀲𑁆𑀲 𑀪𑀸𑀭𑀁 𑀓𑀭𑁄𑀢𑀺, 𑀏𑀓𑁄 𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 ‘‘𑀅𑀳𑀫𑁂𑀯 𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀚𑀕𑁆𑀕𑀢𑀺, 𑀲𑀗𑁆𑀖𑁄 𑀆𑀧𑀢𑁆𑀢𑀺𑀢𑁄 𑀫𑀼𑀘𑁆𑀘𑀢𑀺.

𑀕𑀺𑀮𑀸𑀦𑁂𑀦 𑀧𑀦 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀤𑀽𑀧𑀝𑁆𑀞𑁄 𑀳𑁄𑀢𑀺. 𑀅𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀦 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀦𑀸𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁩𑁬𑁬) 𑁋

𑀏𑀯𑀁 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀅𑀬𑀼𑀢𑁆𑀢𑀗𑁆𑀕𑀸𑀦𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑁄 𑀲𑀽𑀧𑀝𑁆𑀞𑁄 𑀳𑁄𑀢𑀺. 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀲𑀧𑁆𑀧𑀸𑀬𑁂 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀪𑁂𑀲𑀚𑁆𑀚𑀁 𑀧𑀝𑀺𑀲𑁂𑀯𑀺𑀢𑀸 𑀳𑁄𑀢𑀺, 𑀅𑀢𑁆𑀣𑀓𑀸𑀫𑀲𑁆𑀲 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀬𑀣𑀸𑀪𑀽𑀢𑀁 𑀆𑀩𑀸𑀥𑀁 𑀆𑀯𑀺𑀓𑀢𑁆𑀢𑀸 𑀳𑁄𑀢𑀺 ‘𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸 𑀅𑀪𑀺𑀓𑁆𑀓𑀫𑀢𑀻𑀢𑀺, 𑀧𑀝𑀺𑀓𑁆𑀓𑀫𑀦𑁆𑀢𑀁 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺, 𑀞𑀺𑀢𑀁 𑀯𑀸 𑀞𑀺𑀢𑁄’𑀢𑀺, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁩𑁬𑁬) 𑁋

𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁.

𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀘 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀦 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀆𑀫𑀺𑀲𑀦𑁆𑀢𑀭𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺, 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁬) 𑁋

𑀏𑀯𑀁 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀅𑀬𑀼𑀢𑁆𑀢𑀗𑁆𑀕𑀸𑀦𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀅𑀮𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁. 𑀧𑀝𑀺𑀩𑀮𑁄 𑀳𑁄𑀢𑀺 𑀪𑁂𑀲𑀚𑁆𑀚𑀁 𑀲𑀁𑀯𑀺𑀥𑀸𑀢𑀼𑀁, 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀚𑀸𑀦𑀸𑀢𑀺, 𑀅𑀲𑀧𑁆𑀧𑀸𑀬𑀁 𑀅𑀧𑀦𑀸𑀫𑁂𑀢𑀺, 𑀲𑀧𑁆𑀧𑀸𑀬𑀁 𑀉𑀧𑀦𑀸𑀫𑁂𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀺, 𑀦𑁄 𑀆𑀫𑀺𑀲𑀦𑁆𑀢𑀭𑁄, 𑀅𑀚𑁂𑀕𑀼𑀘𑁆𑀙𑀻 𑀳𑁄𑀢𑀺 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀯𑀦𑁆𑀢𑀁 𑀯𑀸 𑀦𑀻𑀳𑀸𑀢𑀼𑀁, 𑀧𑀝𑀺𑀩𑀮𑁄 𑀳𑁄𑀢𑀺 𑀕𑀺𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀼𑀁 𑀲𑀫𑀸𑀤𑀧𑁂𑀢𑀼𑀁 𑀲𑀫𑀼𑀢𑁆𑀢𑁂𑀚𑁂𑀢𑀼𑀁 𑀲𑀫𑁆𑀧𑀳𑀁𑀲𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁬) 𑁋

𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁.

𑁧𑁨. 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀦𑁆𑀢𑁂𑀦 (𑀫𑀳𑀸𑀯. 𑀅𑀝𑁆𑀞. 𑁨.𑁧𑁮𑁦) 𑀘 ‘‘𑀲𑀻𑀮𑀯𑀸 𑀳𑀺 𑀢𑁆𑀯𑀁 𑀓𑀢𑀓𑀼𑀲𑀮𑁄, 𑀓𑀲𑁆𑀫𑀸 𑀫𑀻𑀬𑀫𑀸𑀦𑁄 𑀪𑀸𑀬𑀲𑀺, 𑀦𑀦𑀼 𑀲𑀻𑀮𑀯𑀢𑁄 𑀲𑀕𑁆𑀕𑁄 𑀦𑀸𑀫 𑀫𑀭𑀡𑀫𑀢𑁆𑀢𑀧𑀝𑀺𑀩𑀤𑁆𑀥𑁄𑀬𑁂𑀯𑀸’’𑀢𑀺 𑀏𑀯𑀁 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀭𑀡𑀯𑀡𑁆𑀡𑁄 𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑁄. 𑀲𑀘𑁂 𑀳𑀺 𑀢𑀲𑁆𑀲 𑀲𑀁𑀯𑀡𑁆𑀡𑀦𑀁 𑀲𑀼𑀢𑁆𑀯𑀸 𑀆𑀳𑀸𑀭𑀼𑀧𑀘𑁆𑀙𑁂𑀤𑀸𑀤𑀺𑀦𑀸 𑀉𑀧𑀓𑁆𑀓𑀫𑁂𑀦 𑀏𑀓𑀚𑀯𑀦𑀯𑀸𑀭𑀸𑀯𑀲𑁂𑀲𑁂𑀧𑀺 𑀆𑀬𑀼𑀲𑁆𑀫𑀺𑀁 𑀅𑀦𑁆𑀢𑀭𑀸 𑀓𑀸𑀮𑀁 𑀓𑀭𑁄𑀢𑀺, 𑀇𑀫𑀺𑀦𑀸𑀯 𑀫𑀸𑀭𑀺𑀢𑁄 𑀳𑁄𑀢𑀺. 𑀧𑀡𑁆𑀟𑀺𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀇𑀫𑀺𑀦𑀸 𑀦𑀬𑁂𑀦 𑀅𑀦𑀼𑀲𑀺𑀝𑁆𑀞𑀺 𑀤𑀸𑀢𑀩𑁆𑀩𑀸 ‘‘𑀲𑀻𑀮𑀯𑀢𑁄 𑀦𑀸𑀫 𑀅𑀦𑀘𑁆𑀙𑀭𑀺𑀬𑀸 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀯𑀺𑀳𑀸𑀭𑀸𑀤𑀻𑀲𑀼 𑀆𑀲𑀢𑁆𑀢𑀺𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑀕𑀢𑀁 𑀥𑀫𑁆𑀫𑀕𑀢𑀁 𑀲𑀗𑁆𑀖𑀕𑀢𑀁 𑀓𑀸𑀬𑀕𑀢𑀜𑁆𑀘 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑁂 𑀅𑀧𑁆𑀧𑀫𑀸𑀤𑁄 𑀓𑀸𑀢𑀩𑁆𑀩𑁄’’𑀢𑀺. 𑀫𑀭𑀡𑀯𑀡𑁆𑀡𑁂𑀧𑀺 𑀲𑀁𑀯𑀡𑁆𑀡𑀺𑀢𑁂 𑀲𑁄 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀓𑀜𑁆𑀘𑀺 𑀉𑀧𑀓𑁆𑀓𑀫𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀬𑀣𑀸𑀬𑀼𑀦𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀫𑀭𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀲𑀁𑀯𑀡𑁆𑀡𑀓𑁄 𑀆𑀧𑀢𑁆𑀢𑀺𑀬𑀸 𑀦 𑀓𑀸𑀭𑁂𑀢𑀩𑁆𑀩𑁄.

𑁧𑁩. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁩) 𑀯𑀘𑀦𑀢𑁄 𑀕𑀺𑀮𑀸𑀦𑁂𑀦 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁮𑁨-𑁧𑁮𑁩) 𑀪𑀺𑀓𑁆𑀔𑀼𑀦𑀸𑀧𑀺 𑀬𑁂𑀦 𑀓𑁂𑀦𑀘𑀺 𑀉𑀧𑀓𑁆𑀓𑀫𑁂𑀦 𑀅𑀦𑁆𑀢𑀫𑀲𑁄 𑀆𑀳𑀸𑀭𑀼𑀧𑀘𑁆𑀙𑁂𑀤𑀦𑁂𑀦𑀧𑀺 𑀅𑀢𑁆𑀢𑀸 𑀦 𑀫𑀸𑀭𑁂𑀢𑀩𑁆𑀩𑁄. 𑀬𑁄𑀧𑀺 𑀕𑀺𑀮𑀸𑀦𑁄 𑀯𑀺𑀚𑁆𑀚𑀫𑀸𑀦𑁂 𑀪𑁂𑀲𑀚𑁆𑀚𑁂 𑀘 𑀉𑀧𑀝𑁆𑀞𑀸𑀓𑁂𑀲𑀼 𑀘 𑀫𑀭𑀺𑀢𑀼𑀓𑀸𑀫𑁄 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀬𑀲𑁆𑀲 𑀧𑀦 𑀫𑀳𑀸𑀆𑀩𑀸𑀥𑁄 𑀘𑀺𑀭𑀸𑀦𑀼𑀩𑀦𑁆𑀥𑁄, 𑀪𑀺𑀓𑁆𑀔𑀽 𑀉𑀧𑀝𑁆𑀞𑀳𑀦𑁆𑀢𑀸 𑀓𑀺𑀮𑀫𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺, ‘‘𑀓𑀤𑀸 𑀦𑀼 𑀔𑁄 𑀕𑀺𑀮𑀸𑀦𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀅𑀝𑁆𑀝𑀻𑀬𑀦𑁆𑀢𑀺. 𑀲𑀘𑁂 𑀲𑁄 ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄 𑀧𑀝𑀺𑀚𑀕𑁆𑀕𑀺𑀬𑀫𑀸𑀦𑁄𑀧𑀺 𑀦 𑀢𑀺𑀝𑁆𑀞𑀢𑀺, 𑀪𑀺𑀓𑁆𑀔𑀽 𑀘 𑀓𑀺𑀮𑀫𑀦𑁆𑀢𑀻’’𑀢𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀪𑁂𑀲𑀚𑁆𑀚𑀁 𑀦 𑀲𑁂𑀯𑀢𑀺, 𑀯𑀝𑁆𑀝𑀢𑀺. 𑀬𑁄 𑀧𑀦 ‘‘𑀅𑀬𑀁 𑀭𑁄𑀕𑁄 𑀔𑀭𑁄, 𑀆𑀬𑀼𑀲𑀗𑁆𑀔𑀸𑀭𑀸 𑀦 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀜𑁆𑀘 𑀫𑁂 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀅𑀕𑀺𑀮𑀸𑀦𑀲𑁆𑀲𑀧𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀲𑁆𑀲 ‘‘𑀆𑀳𑀸𑀭𑀧𑀭𑀺𑀬𑁂𑀲𑀦𑀁 𑀦𑀸𑀫 𑀧𑀧𑀜𑁆𑀘𑁄, 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀅𑀦𑀼𑀬𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀝𑁆𑀝𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀺. 𑀲𑀪𑀸𑀕𑀸𑀦𑀜𑁆𑀳𑀺 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁧𑁪. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀬𑁄 𑀦𑀺𑀲𑀻𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁦) 𑀯𑀘𑀦𑀢𑁄 𑀆𑀲𑀦𑀁 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀓𑀻𑀤𑀺𑀲𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁮𑁦) 𑀧𑀦 𑀆𑀲𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀓𑀻𑀤𑀺𑀲𑀁 𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁? 𑀬𑀁 𑀲𑀼𑀤𑁆𑀥𑀁 𑀆𑀲𑀦𑀫𑁂𑀯 𑀳𑁄𑀢𑀺 𑀅𑀧𑀘𑁆𑀘𑀢𑁆𑀣𑀭𑀡𑀓𑀁, 𑀬𑀜𑁆𑀘 𑀆𑀕𑀦𑁆𑀢𑁆𑀯𑀸 𑀞𑀺𑀢𑀸𑀦𑀁 𑀧𑀲𑁆𑀲𑀢𑀁𑀬𑁂𑀯 𑀅𑀢𑁆𑀣𑀭𑀻𑀬𑀢𑀺, 𑀢𑀁 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁, 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀦𑀼𑀲𑁆𑀲𑀸 𑀲𑀬𑀁 𑀳𑀢𑁆𑀣𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 ‘‘𑀇𑀥 𑀪𑀦𑁆𑀢𑁂 𑀦𑀺𑀲𑀻𑀤𑀣𑀸’’𑀢𑀺 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀧𑀞𑀫𑀫𑁂𑀯 𑀆𑀕𑀦𑁆𑀢𑁆𑀯𑀸𑀧𑀺 𑀦𑀺𑀲𑀺𑀦𑁆𑀦𑀸 𑀧𑀘𑁆𑀙𑀸 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀲𑀗𑁆𑀓𑀫𑀦𑁆𑀢𑀺, 𑀧𑀝𑀺𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀫𑁆𑀧𑀺 𑀢𑀦𑀼𑀓𑁂𑀦 𑀯𑀢𑁆𑀣𑁂𑀦 𑀬𑀣𑀸 𑀢𑀮𑀁 𑀤𑀺𑀲𑁆𑀲𑀢𑀺, 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀧𑀝𑀺𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑀁 𑀧𑀦 𑀧𑀝𑀺𑀓𑀘𑁆𑀘𑁂𑀯 𑀧𑀸𑀯𑀸𑀭𑀓𑁄𑀚𑀯𑀸𑀤𑀻𑀳𑀺 𑀅𑀢𑁆𑀣𑀢𑀁 𑀳𑁄𑀢𑀺, 𑀢𑀁 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀖𑀦𑀲𑀸𑀝𑀓𑁂𑀦𑀧𑀺 𑀅𑀢𑁆𑀣𑀢𑁂 𑀬𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀺, 𑀢𑀁 𑀦 𑀧𑀝𑀺𑀯𑁂𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁫. ‘‘𑀦, 𑀪𑀺𑀓𑁆𑀔𑀯𑁂, 𑀤𑀯𑀸𑀬 𑀲𑀺𑀮𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸, 𑀬𑁄 𑀧𑀝𑀺𑀯𑀺𑀚𑁆𑀛𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁧𑁮𑁩) 𑀯𑀘𑀦𑀢𑁄 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀧𑀸𑀲𑀸𑀡𑁄 𑀦 𑀧𑀯𑀝𑁆𑀝𑁂𑀢𑀩𑁆𑀩𑁄. 𑀦 𑀓𑁂𑀯𑀮𑀜𑁆𑀘 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁮𑁨-𑁧𑁮𑁩) 𑀧𑀸𑀲𑀸𑀡𑁄, 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀤𑀸𑀭𑀼𑀔𑀡𑁆𑀟𑀁 𑀯𑀸 𑀇𑀝𑁆𑀞𑀓𑀔𑀡𑁆𑀟𑀁 𑀯𑀸 𑀳𑀢𑁆𑀣𑁂𑀦 𑀯𑀸 𑀬𑀦𑁆𑀢𑁂𑀦 𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀸𑀲𑀸𑀡𑀸𑀤𑀬𑁄 𑀳𑀲𑀦𑁆𑀢𑀸 𑀳𑀲𑀦𑁆𑀢𑀸 𑀧𑀯𑀝𑁆𑀝𑁂𑀦𑁆𑀢𑀺𑀧𑀺 𑀔𑀺𑀧𑀦𑁆𑀢𑀺𑀧𑀺 𑀉𑀓𑁆𑀔𑀺𑀧𑀦𑁆𑀢𑀺𑀧𑀺, ‘‘𑀓𑀫𑁆𑀫𑀲𑀫𑀬𑁄’’𑀢𑀺 𑀯𑀝𑁆𑀝𑀢𑀺, 𑀅𑀜𑁆𑀜𑀫𑁆𑀧𑀺 𑀈𑀤𑀺𑀲𑀁 𑀦𑀯𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀸 𑀪𑀡𑁆𑀟𑀓𑀁 𑀯𑀸 𑀥𑁄𑀯𑀦𑁆𑀢𑀸 𑀭𑀼𑀓𑁆𑀔𑀁 𑀯𑀸 𑀥𑁄𑀯𑀦𑀤𑀡𑁆𑀟𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀯𑀝𑁆𑀝𑀢𑀺, 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀓𑀸𑀮𑀸𑀤𑀻𑀲𑀼 𑀓𑀸𑀓𑁂 𑀯𑀸 𑀲𑁄𑀡𑁂 𑀯𑀸 𑀓𑀝𑁆𑀞𑀁 𑀯𑀸 𑀓𑀣𑀮𑀁 𑀯𑀸 𑀔𑀺𑀧𑀺𑀢𑁆𑀯𑀸 𑀧𑀮𑀸𑀧𑁂𑀦𑁆𑀢𑀺, 𑀯𑀝𑁆𑀝𑀢𑀺.

𑁧𑁬. ‘‘𑀦, 𑀪𑀺𑀓𑁆𑀔𑀯𑁂, 𑀤𑀸𑀬𑁄 𑀆𑀮𑀺𑀫𑁆𑀧𑀺𑀢𑀩𑁆𑀩𑁄, 𑀬𑁄 𑀆𑀮𑀺𑀫𑁆𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁩) 𑀯𑀘𑀦𑀢𑁄 𑀯𑀦𑁂 𑀅𑀕𑁆𑀕𑀺 𑀦 𑀤𑀸𑀢𑀩𑁆𑀩𑁄. 𑀲𑀘𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁦) 𑀧𑀦 ‘‘𑀏𑀢𑁆𑀣𑀦𑁆𑀢𑀭𑁂 𑀬𑁄 𑀓𑁄𑀘𑀺 𑀲𑀢𑁆𑀢𑁄 𑀫𑀭𑀢𑀽’’𑀢𑀺 𑀅𑀕𑁆𑀕𑀺𑀁 𑀤𑁂𑀢𑀺, 𑀧𑀸𑀭𑀸𑀚𑀺𑀓𑀸𑀦𑀦𑁆𑀢𑀭𑀺𑀬𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀽𑀦𑀁 𑀅𑀦𑀼𑀭𑀽𑀧𑀢𑁄 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀅𑀓𑀼𑀲𑀮𑀭𑀸𑀲𑀺 𑀘 𑀳𑁄𑀢𑀺. ‘‘𑀅𑀮𑁆𑀮𑀢𑀺𑀡𑀯𑀦𑀧𑁆𑀧𑀢𑀬𑁄 𑀟𑀬𑁆𑀳𑀦𑁆𑀢𑀽’’𑀢𑀺 𑀅𑀕𑁆𑀕𑀺𑀁 𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, ‘‘𑀤𑀩𑁆𑀩𑀽𑀧𑀓𑀭𑀡𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀅𑀕𑁆𑀕𑀺𑀁 𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. ‘‘𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀬𑀁 𑀓𑀺𑀜𑁆𑀘𑀺 𑀅𑀮𑁆𑀮𑀲𑀼𑀓𑁆𑀔𑀁 𑀲𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀁 𑀟𑀬𑁆𑀳𑀢𑀽’’𑀢𑀺 𑀅𑀕𑁆𑀕𑀺𑀁 𑀤𑁂𑀦𑁆𑀢𑀲𑁆𑀲 𑀯𑀢𑁆𑀣𑀼𑀯𑀲𑁂𑀦 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀝𑀕𑁆𑀕𑀺𑀤𑀸𑀦𑀁 𑀧𑀦 𑀧𑀭𑀺𑀢𑁆𑀢𑀓𑀭𑀡𑀜𑁆𑀘 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀅𑀭𑀜𑁆𑀜𑁂 𑀯𑀦𑀓𑀫𑁆𑀫𑀺𑀓𑁂𑀳𑀺 𑀯𑀸 𑀤𑀺𑀦𑁆𑀦𑀁 𑀲𑀬𑀁 𑀯𑀸 𑀉𑀝𑁆𑀞𑀺𑀢𑀁 𑀅𑀕𑁆𑀕𑀺𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀢𑀺𑀡𑀓𑀼𑀝𑀺𑀬𑁄 𑀫𑀸 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀢𑀲𑁆𑀲 𑀅𑀕𑁆𑀕𑀺𑀦𑁄 𑀧𑀝𑀺𑀅𑀕𑁆𑀕𑀺𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀬𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑁄 𑀅𑀕𑁆𑀕𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀦𑀺𑀭𑀼𑀧𑀸𑀤𑀸𑀦𑁄 𑀦𑀺𑀩𑁆𑀩𑀸𑀢𑀺. ‘‘𑀧𑀭𑀺𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀺𑀡𑀓𑀼𑀝𑀺𑀓𑀸𑀦𑀁 𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦𑀁 𑀧𑀭𑀺𑀔𑀸𑀔𑀡𑀦𑀁 𑀯𑀸, 𑀬𑀣𑀸 𑀆𑀕𑀢𑁄 𑀅𑀕𑁆𑀕𑀺 𑀉𑀧𑀸𑀤𑀸𑀦𑀁 𑀅𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑀸𑀢𑀺, 𑀏𑀢𑀜𑁆𑀘 𑀲𑀩𑁆𑀩𑀁 𑀉𑀝𑁆𑀞𑀺𑀢𑁂𑀬𑁂𑀯 𑀅𑀕𑁆𑀕𑀺𑀲𑁆𑀫𑀺𑀁 𑀅𑀲𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀼𑀝𑁆𑀞𑀺𑀢𑁂 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑀁, 𑀉𑀤𑀓𑁂𑀦 𑀧𑀦 𑀦𑀺𑀩𑁆𑀩𑀸𑀧𑁂𑀦𑁆𑀢𑁂𑀳𑀺 𑀅𑀧𑁆𑀧𑀸𑀡𑀓𑀫𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

𑁧𑁭. 𑀅𑀲𑁆𑀲𑀤𑁆𑀥𑁂𑀲𑀼 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁮𑁧) 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂𑀲𑀼 𑀲𑀓𑁆𑀓𑀘𑁆𑀘𑀁 𑀧𑀡𑀻𑀢𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀭𑁂𑀲𑀁 𑀤𑀸𑀢𑀩𑁆𑀩𑀁. 𑀯𑀺𑀲𑀫𑀺𑀲𑁆𑀲𑀫𑁆𑀧𑀺 𑀳𑀺 𑀢𑀸𑀦𑀺 𑀓𑀼𑀮𑀸𑀦𑀺 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺. 𑀬𑀫𑁆𑀧𑀺 𑀆𑀪𑀺𑀤𑁄𑀲𑀺𑀓𑀁 𑀪𑀢𑁆𑀢𑀁 𑀯𑀸 𑀔𑀚𑁆𑀚𑀓𑀁 𑀯𑀸 𑀢𑀢𑁄 𑀮𑀪𑀢𑀺, 𑀢𑀫𑁆𑀧𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀧𑀺𑀳𑀺𑀢𑀯𑀢𑁆𑀣𑀼𑀫𑁆𑀧𑀺 𑀳𑀺 𑀲𑀧𑁆𑀧𑀯𑀺𑀘𑁆𑀙𑀺𑀓𑀸𑀤𑀻𑀳𑀺 𑀅𑀥𑀺𑀲𑀬𑀺𑀢𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀢𑀸𑀦𑀺 𑀓𑀼𑀮𑀸𑀦𑀺 𑀤𑁂𑀦𑁆𑀢𑀺. 𑀕𑀦𑁆𑀥𑀳𑀮𑀺𑀤𑁆𑀤𑀸𑀤𑀺𑀫𑀓𑁆𑀔𑀺𑀢𑁄𑀧𑀺 𑀢𑀢𑁄 𑀧𑀺𑀡𑁆𑀟𑀧𑀸𑀢𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑀭𑀻𑀭𑁂 𑀭𑁄𑀕𑀝𑁆𑀞𑀸𑀦𑀸𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀞𑀧𑀺𑀢𑀪𑀢𑁆𑀢𑀫𑁆𑀧𑀺 𑀳𑀺 𑀢𑀸𑀦𑀺 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺.

𑁧𑁮. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀕𑁄𑀧𑀓𑀲𑁆𑀲 𑀤𑀸𑀦𑁂’’𑀢𑀺 (𑀧𑀸𑀭𑀸. 𑁧𑁫𑁬) 𑀯𑀼𑀢𑁆𑀢𑀁. 𑀢𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁫𑁬) 𑀓𑀢𑀭𑀁 𑀕𑁄𑀧𑀓𑀤𑀸𑀦𑀁 𑀯𑀝𑁆𑀝𑀢𑀺, 𑀓𑀢𑀭𑀁 𑀦 𑀯𑀝𑁆𑀝𑀢𑀺? 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀆𑀳 ‘‘𑀬𑀁 𑀕𑁄𑀧𑀓𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺 ‘𑀏𑀢𑁆𑀢𑀓𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀕𑀡𑁆𑀳𑀸’𑀢𑀺, 𑀢𑀤𑁂𑀯 𑀯𑀝𑁆𑀝𑀢𑀺, 𑀢𑀢𑁄 𑀉𑀢𑁆𑀢𑀭𑀺 𑀦 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀓𑀺𑀁 𑀕𑁄𑀧𑀓𑀸𑀦𑀁 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀯𑀸 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀅𑀢𑁆𑀣𑀺, 𑀏𑀢𑁂𑀲𑀁 𑀳𑀢𑁆𑀣𑁂 𑀯𑀺𑀲𑁆𑀲𑀝𑁆𑀞𑀓𑀲𑁆𑀲 𑀏𑀢𑁂 𑀇𑀲𑁆𑀲𑀭𑀸, 𑀢𑀲𑁆𑀫𑀸 𑀬𑀁 𑀤𑁂𑀦𑁆𑀢𑀺, 𑀢𑀁 𑀩𑀳𑀼𑀓𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑀸𑀦𑀁 𑀆𑀭𑀸𑀫𑀁 𑀯𑀸 𑀅𑀜𑁆𑀜𑀁 𑀯𑀸 𑀨𑀮𑀸𑀨𑀮𑀁 𑀤𑀸𑀭𑀓𑀸 𑀭𑀓𑁆𑀔𑀦𑁆𑀢𑀺, 𑀢𑁂𑀳𑀺 𑀤𑀺𑀦𑁆𑀦𑀁 𑀯𑀝𑁆𑀝𑀢𑀺, 𑀆𑀳𑀭𑀸𑀧𑁂𑀢𑁆𑀯𑀸 𑀧𑀦 𑀦 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀺𑀓𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀦𑁆𑀢𑀓𑁂 𑀘 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀲𑁆𑀲𑁂𑀯 𑀤𑀸𑀦𑀁 𑀯𑀝𑁆𑀝𑀢𑀺, 𑀯𑁂𑀢𑀦𑁂𑀦 𑀭𑀓𑁆𑀔𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀪𑀸𑀕𑀫𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀬𑀁 𑀕𑀺𑀳𑀻𑀦𑀁 𑀆𑀭𑀸𑀫𑀭𑀓𑁆𑀔𑀓𑀸 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺, 𑀏𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑀕𑁄𑀧𑀓𑀸 𑀬𑀁 𑀅𑀢𑁆𑀢𑀦𑁄 𑀪𑀢𑀺𑀬𑀸 𑀔𑀡𑁆𑀟𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀢𑀁 𑀯𑀝𑁆𑀝𑀢𑀺. 𑀬𑁄𑀧𑀺 𑀉𑀧𑀟𑁆𑀠𑀸𑀭𑀸𑀫𑀁 𑀯𑀸 𑀓𑁂𑀘𑀺𑀤𑁂𑀯 𑀭𑀼𑀓𑁆𑀔𑁂 𑀯𑀸 𑀪𑀢𑀺𑀁 𑀮𑀪𑀺𑀢𑁆𑀯𑀸 𑀭𑀓𑁆𑀔𑀢𑀺, 𑀢𑀲𑁆𑀲𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀭𑀼𑀓𑁆𑀔𑀢𑁄𑀬𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀲𑁆𑀲 𑀧𑀦 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑀁 𑀧𑀦 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁, 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀢𑀲𑁆𑀫𑀸 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀧𑀺𑀘𑁂𑀢𑁆𑀣 𑀅𑀬𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁫𑁬) 𑁋 𑀬𑀢𑁆𑀣 𑀆𑀯𑀸𑀲𑀺𑀓𑀸 𑀆𑀕𑀦𑁆𑀢𑀼𑀓𑀸𑀦𑀁 𑀦 𑀤𑁂𑀦𑁆𑀢𑀺, 𑀨𑀮𑀯𑀸𑀭𑁂 𑀘 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀘𑁄𑀭𑀺𑀓𑀸𑀬 𑀅𑀢𑁆𑀢𑀦𑀸𑀯 𑀔𑀸𑀤𑀦𑁆𑀢𑀺, 𑀢𑀢𑁆𑀣 𑀆𑀕𑀦𑁆𑀢𑀼𑀓𑁂𑀳𑀺 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀢𑁆𑀣 𑀧𑀦 𑀆𑀯𑀸𑀲𑀺𑀓𑀸 𑀭𑀼𑀓𑁆𑀔𑁂 𑀭𑀓𑁆𑀔𑀺𑀢𑁆𑀯𑀸 𑀨𑀮𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀺, 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺, 𑀅𑀦𑀺𑀲𑁆𑀲𑀭𑀸 𑀢𑀢𑁆𑀣 𑀆𑀕𑀦𑁆𑀢𑀼𑀓𑀸. 𑀬𑁂𑀧𑀺 𑀭𑀼𑀓𑁆𑀔𑀸 𑀘𑀻𑀯𑀭𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸, 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 𑀅𑀦𑀺𑀲𑁆𑀲𑀭𑀸. 𑀏𑀲 𑀦𑀬𑁄 𑀲𑁂𑀲𑀧𑀘𑁆𑀘𑀬𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑁂𑀧𑀺. 𑀬𑁂 𑀧𑀦 𑀢𑀣𑀸 𑀅𑀦𑀺𑀬𑀫𑁂𑀢𑁆𑀯𑀸 𑀆𑀯𑀸𑀲𑀺𑀓𑀸 𑀘 𑀢𑁂 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀘𑁄𑀭𑀺𑀓𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀦 𑀢𑁂𑀲𑀼 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀁. 𑀬𑁂 𑀨𑀮𑀧𑀭𑀺𑀪𑁄𑀕𑀢𑁆𑀣𑀸𑀬 𑀤𑀺𑀦𑁆𑀦𑀸, 𑀆𑀯𑀸𑀲𑀺𑀓𑀸 𑀘 𑀦𑁂 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺, 𑀢𑁂𑀲𑀼𑀬𑁂𑀯 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀡𑁆𑀟𑀤𑁂𑀬𑁆𑀬𑀁. 𑀬𑀁 𑀧𑀦𑁂𑀢𑁆𑀣 𑀲𑁂𑀦𑀸𑀲𑀦𑀢𑁆𑀣𑀸𑀬 𑀦𑀺𑀬𑀫𑀺𑀢𑀁, 𑀢𑀁 𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀪𑀡𑁆𑀟𑀤𑁂𑀬𑁆𑀬𑀜𑁆𑀘𑀸’’𑀢𑀺.

𑀑𑀤𑀺𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀘𑀻𑀯𑀭𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀓𑀺𑀮𑀫𑀦𑁆𑀢𑀺, 𑀘𑀻𑀯𑀭𑀁 𑀧𑀦 𑀲𑀼𑀮𑀪𑀁, 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑁂𑀦 𑀯𑀸 𑀓𑀺𑀮𑀫𑀦𑁆𑀢𑁂𑀲𑀼 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀢𑀤𑀢𑁆𑀣𑀸𑀬𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀑𑀤𑀺𑀲𑁆𑀲 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀘 𑀕𑀺𑀮𑀸𑀦𑀧𑀘𑁆𑀘𑀬𑀢𑁆𑀣𑀸𑀬 𑀘 𑀤𑀺𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀑𑀤𑀺𑀲𑁆𑀲 𑀲𑁂𑀦𑀸𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀁 𑀧𑀦 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀢𑀁 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀢𑀤𑀢𑁆𑀣𑀫𑁂𑀯 𑀉𑀧𑀦𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑁂𑀦 𑀦 𑀬𑀸𑀧𑁂𑀦𑁆𑀢𑀺, 𑀏𑀢𑁆𑀣 𑀭𑀸𑀚𑀭𑁄𑀕𑀘𑁄𑀭𑀪𑀬𑀸𑀤𑀻𑀳𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀸𑀦𑀁 𑀯𑀺𑀳𑀸𑀭𑀸 𑀧𑀮𑀼𑀚𑁆𑀚𑀦𑁆𑀢𑀺, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀓𑁂 𑀯𑀺𑀦𑀸𑀲𑁂𑀦𑁆𑀢𑀺, 𑀲𑁂𑀦𑀸𑀲𑀦𑀧𑀘𑁆𑀘𑀬𑀁 𑀧𑀦 𑀦𑀺𑀲𑁆𑀲𑀸𑀬 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀧𑀺 𑀲𑁂𑀦𑀸𑀲𑀦𑀚𑀕𑁆𑀕𑀦𑀢𑁆𑀣𑀸𑀬 𑀧𑀭𑀺𑀪𑁄𑀕𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 𑀇𑀢𑀭𑀸𑀦𑀺 𑀮𑀸𑀫𑀓𑀓𑁄𑀝𑀺𑀬𑀸 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀦𑁆𑀢𑀺, 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩𑀁.

𑀬𑁄 𑀧𑀦 𑀆𑀭𑀸𑀫𑁄 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑁄, 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑁂𑀦 𑀧𑀘𑁆𑀘𑀬𑁂𑀦 𑀧𑀦 𑀊𑀦𑀁, 𑀢𑀤𑀢𑁆𑀣𑀁 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀆𑀭𑀸𑀫𑁄 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄, 𑀯𑁂𑀢𑀦𑀁 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁂 𑀧𑀦 𑀯𑁂𑀢𑀦𑀁 𑀮𑀪𑀺𑀢𑁆𑀯𑀸 𑀆𑀭𑀸𑀫𑁂𑀬𑁂𑀯 𑀕𑁂𑀳𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸 𑀭𑀓𑁆𑀔𑀦𑁆𑀢𑀺, 𑀢𑁂 𑀘𑁂 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀸𑀴𑀺𑀓𑁂𑀭𑀁 𑀯𑀸 𑀢𑀸𑀮𑀧𑀓𑁆𑀓𑀁 𑀯𑀸 𑀤𑁂𑀦𑁆𑀢𑀺, 𑀬𑀁 𑀢𑁂𑀲𑀁 𑀲𑀗𑁆𑀖𑁂𑀦 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀏𑀢𑁆𑀢𑀓𑀁 𑀦𑀸𑀫 𑀔𑀸𑀤𑀣𑀸’’𑀢𑀺, 𑀢𑀤𑁂𑀯 𑀢𑁂 𑀤𑀸𑀢𑀼𑀁 𑀮𑀪𑀦𑁆𑀢𑀺, 𑀢𑀢𑁄 𑀉𑀢𑁆𑀢𑀭𑀺 𑀢𑁂𑀲𑀁 𑀤𑁂𑀦𑁆𑀢𑀸𑀦𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀬𑁄 𑀧𑀦 𑀆𑀭𑀸𑀫𑀁 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑁂𑀢𑀺, 𑀅𑀬𑀁 𑀩𑀳𑀼𑀓𑀫𑁆𑀧𑀺 𑀤𑀸𑀢𑀼𑀁 𑀮𑀪𑀢𑀺. 𑀘𑁂𑀢𑀺𑀬𑀲𑁆𑀲 𑀧𑀤𑀻𑀧𑀢𑁆𑀣𑀸𑀬 𑀯𑀸 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀯𑀸 𑀤𑀺𑀦𑁆𑀦𑀆𑀭𑀸𑀫𑁄𑀧𑀺 𑀚𑀕𑁆𑀕𑀺𑀢𑀩𑁆𑀩𑁄, 𑀯𑁂𑀢𑀦𑀁 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀯𑁂𑀢𑀦𑀜𑁆𑀘 𑀧𑀦𑁂𑀢𑁆𑀣 𑀘𑁂𑀢𑀺𑀬𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀖𑀲𑀦𑁆𑀢𑀓𑀫𑁆𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀢𑀫𑁆𑀧𑀺 𑀆𑀭𑀸𑀫𑀁 𑀯𑁂𑀢𑀦𑁂𑀦 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑀸𑀦𑀜𑁆𑀘 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑀤𑀸𑀬𑀓𑀸𑀦𑀜𑁆𑀘 𑀢𑀢𑁆𑀣𑀚𑀸𑀢𑀓𑀨𑀮𑀤𑀸𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁯. 𑀥𑀫𑁆𑀫𑀺𑀓𑀭𑀓𑁆𑀔𑀁 (𑀧𑀸𑀘𑀺. 𑀅𑀝𑁆𑀞. 𑁬𑁭𑁯) 𑀬𑀸𑀘𑀦𑁆𑀢𑁂𑀦 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀯𑀸 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀢𑀻𑀢𑀜𑁆𑀳𑀺 𑀆𑀭𑀩𑁆𑀪 𑀅𑀢𑁆𑀣𑀺 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸, 𑀅𑀢𑁆𑀣𑀺 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸, 𑀅𑀦𑀸𑀕𑀢𑀁 𑀆𑀭𑀩𑁆𑀪𑀧𑀺 𑀅𑀢𑁆𑀣𑀺 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸, 𑀅𑀢𑁆𑀣𑀺 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸. 𑀓𑀣𑀁 𑀅𑀢𑀻𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺? 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑁂 𑀕𑀸𑀫𑀤𑀸𑀭𑀓𑀸 𑀯𑀸 𑀥𑀼𑀢𑁆𑀢𑀸𑀤𑀬𑁄 𑀯𑀸 𑀬𑁂 𑀓𑁂𑀘𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺, 𑀭𑀼𑀓𑁆𑀔𑀁 𑀯𑀸 𑀙𑀺𑀦𑁆𑀤𑀦𑁆𑀢𑀺, 𑀨𑀮𑀸𑀨𑀮𑀁 𑀯𑀸 𑀳𑀭𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑁂 𑀯𑀸 𑀅𑀘𑁆𑀙𑀺𑀦𑁆𑀤𑀦𑁆𑀢𑀺, 𑀪𑀺𑀓𑁆𑀔𑀼 𑀯𑁄𑀳𑀸𑀭𑀺𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀯𑀤𑀢𑀺. ‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘𑀸’’𑀢𑀺 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀅𑀢𑀻𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸 𑀦 𑀯𑀝𑁆𑀝𑀢𑀺. 𑀢𑀜𑁆𑀘𑁂 𑀲𑀼𑀢𑁆𑀯𑀸 𑀢𑁂 𑀯𑁄𑀳𑀸𑀭𑀺𑀓𑀸 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑁆𑀲 𑀕𑀻𑀯𑀸 𑀳𑁄𑀢𑀺, ‘‘𑀤𑀡𑁆𑀟𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀧𑀺 𑀲𑀢𑀺 𑀕𑀻𑀯𑀸𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀦 ‘‘𑀢𑀲𑁆𑀲 𑀤𑀡𑁆𑀟𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀧𑀜𑁆𑀘𑀫𑀸𑀲𑀓𑀫𑀢𑁆𑀢𑁂 𑀕𑀳𑀺𑀢𑁂 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. ‘‘𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀅𑀲𑀼𑀓𑁂𑀦𑀸𑀢𑀺 𑀯𑀢𑁆𑀢𑀼𑀁 𑀅𑀫𑁆𑀳𑀸𑀓𑀁 𑀦 𑀯𑀝𑁆𑀝𑀢𑀺, 𑀢𑀼𑀫𑁆𑀳𑁂𑀬𑁂𑀯 𑀚𑀸𑀦𑀺𑀲𑁆𑀲𑀣. 𑀓𑁂𑀯𑀮𑀜𑁆𑀳𑀺 𑀫𑀬𑀁 𑀭𑀓𑁆𑀔𑀁 𑀬𑀸𑀘𑀸𑀫, 𑀢𑀁 𑀦𑁄 𑀤𑁂𑀣, 𑀅𑀯𑀳𑀝𑀪𑀡𑁆𑀟𑀜𑁆𑀘 𑀆𑀳𑀭𑀸𑀧𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸 𑀯𑀝𑁆𑀝𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀢𑁂 𑀯𑁄𑀳𑀸𑀭𑀺𑀓𑀸 𑀓𑀸𑀭𑀓𑁂 𑀕𑀯𑁂𑀲𑀺𑀢𑁆𑀯𑀸 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑁂𑀧𑀺 𑀕𑀳𑀺𑀢𑁂 𑀪𑀺𑀓𑁆𑀔𑀼𑀦𑁄 𑀦𑁂𑀯 𑀕𑀻𑀯𑀸, 𑀦 𑀆𑀧𑀢𑁆𑀢𑀺. 𑀧𑀭𑀺𑀓𑁆𑀔𑀸𑀭𑀁 𑀳𑀭𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀦𑀢𑁆𑀣𑀓𑀸𑀫𑀢𑀸𑀬 ‘‘𑀘𑁄𑀭𑁄 𑀘𑁄𑀭𑁄’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀳𑀺 𑀬𑀁 𑀢𑁂𑀲𑀁 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀁 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸 𑀳𑁄𑀢𑀺. 𑀅𑀢𑁆𑀢𑀦𑁄 𑀯𑀘𑀦𑀓𑀭𑀁 𑀧𑀦 ‘‘𑀇𑀫𑀺𑀦𑀸 𑀫𑁂 𑀧𑀭𑀺𑀓𑁆𑀔𑀸𑀭𑁄 𑀕𑀳𑀺𑀢𑁄, 𑀢𑀁 𑀆𑀳𑀭𑀸𑀧𑁂𑀳𑀺, 𑀫𑀸 𑀘𑀲𑁆𑀲 𑀤𑀡𑁆𑀟𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀲𑀤𑀸𑀲𑀻𑀯𑀸𑀧𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀅𑀟𑁆𑀟𑀁 𑀓𑀭𑁄𑀦𑁆𑀢𑀺 𑀅𑀬𑀁 𑀅𑀓𑀧𑁆𑀧𑀺𑀬𑀅𑀟𑁆𑀟𑁄 𑀦𑀸𑀫, 𑀦 𑀯𑀝𑁆𑀝𑀢𑀺.

𑀓𑀣𑀁 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺? 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑁂𑀳𑀺 𑀅𑀦𑀸𑀘𑀸𑀭𑀸𑀤𑀻𑀲𑀼 𑀓𑀢𑁂𑀲𑀼 𑀪𑀺𑀓𑁆𑀔𑀼 𑀯𑁄𑀳𑀸𑀭𑀺𑀓𑁂 𑀏𑀯𑀁 𑀯𑀤𑀢𑀺 ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀁 𑀦𑁄 𑀤𑁂𑀣 𑀆𑀬𑀢𑀺𑀁 𑀅𑀓𑀭𑀡𑀢𑁆𑀣𑀸𑀬𑀸’’𑀢𑀺. ‘‘𑀓𑁂𑀦 𑀏𑀯𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀘 ‘‘𑀅𑀲𑀼𑀓𑁂𑀦 𑀘 𑀅𑀲𑀼𑀓𑁂𑀦 𑀘𑀸’’𑀢𑀺 𑀆𑀘𑀺𑀓𑁆𑀔𑀢𑀺. 𑀏𑀯𑀁 𑀅𑀦𑀸𑀕𑀢𑀁 𑀆𑀭𑀩𑁆𑀪 𑀑𑀤𑀺𑀲𑁆𑀲 𑀆𑀘𑀺𑀓𑁆𑀔𑀦𑀸 𑀳𑁄𑀢𑀺, 𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀢𑁂𑀲𑀜𑁆𑀳𑀺 𑀤𑀡𑁆𑀟𑁂 𑀓𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑁆𑀲 𑀕𑀻𑀯𑀸, 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀲𑀘𑁂 𑀯𑁄𑀳𑀸𑀭𑀺𑀓𑀸 ‘‘𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀸𑀦𑀁 𑀇𑀫𑀁 𑀦𑀸𑀫 𑀤𑀡𑁆𑀟𑀁 𑀓𑀭𑁄𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀆𑀡𑀸𑀬 𑀅𑀢𑀺𑀝𑁆𑀞𑀫𑀸𑀦𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀡𑁆𑀟𑀁 𑀓𑀭𑁄𑀦𑁆𑀢𑀺, 𑀪𑀺𑀓𑁆𑀔𑀼𑀦𑁄 𑀦𑁂𑀯 𑀕𑀻𑀯𑀸, 𑀦 𑀆𑀧𑀢𑁆𑀢𑀺. 𑀯𑀺𑀳𑀸𑀭𑀲𑀻𑀫𑀸𑀬 𑀭𑀼𑀓𑁆𑀔𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀸𑀦𑀁 𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀸𑀲𑀸𑀡𑁂𑀳𑀺 𑀓𑁄𑀝𑁆𑀝𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀲𑀘𑁂 𑀥𑀸𑀭𑀸 𑀪𑀺𑀚𑁆𑀚𑀢𑀺, 𑀓𑀸𑀭𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀉𑀧𑀥𑀸𑀯𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀓𑁆𑀔𑀸𑀭𑁂 𑀕𑀡𑁆𑀳𑀦𑁆𑀢𑀺, 𑀢𑀫𑁆𑀧𑀺 𑀦 𑀓𑀸𑀢𑀩𑁆𑀩𑀁. 𑀮𑀳𑀼𑀧𑀭𑀺𑀯𑀢𑁆𑀢𑀜𑁆𑀳𑀺 𑀘𑀺𑀢𑁆𑀢𑀁, 𑀣𑁂𑀬𑁆𑀬𑀘𑁂𑀢𑀦𑀸𑀬 𑀉𑀧𑁆𑀧𑀦𑁆𑀦𑀸𑀬 𑀫𑀽𑀮𑀘𑁆𑀙𑁂𑀚𑁆𑀚𑀫𑁆𑀧𑀺 𑀕𑀘𑁆𑀙𑁂𑀬𑁆𑀬.

𑁨𑁦. 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀢𑀼𑀁 𑀯𑀸 𑀙𑀟𑁆𑀟𑀸𑀧𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀘𑀢𑁆𑀢𑀸𑀭𑀺𑀧𑀺 (𑀧𑀸𑀘𑀺. 𑀅𑀝𑁆𑀞. 𑁮𑁨𑁬) 𑀯𑀢𑁆𑀣𑀽𑀦𑀺 𑀏𑀓𑀧𑀬𑁄𑀕𑁂𑀦 𑀙𑀟𑁆𑀟𑁂𑀦𑁆𑀢𑀲𑁆𑀲 𑀏𑀓𑀫𑁂𑀯 𑀤𑀼𑀓𑁆𑀓𑀝𑀁, 𑀧𑀸𑀝𑁂𑀓𑁆𑀓𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀆𑀡𑀢𑁆𑀢𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀤𑀦𑁆𑀢𑀓𑀝𑁆𑀞𑀙𑀟𑁆𑀟𑀦𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀑𑀮𑁄𑀓𑁂𑀢𑁆𑀯𑀸 𑀯𑀸 𑀅𑀯𑀮𑀜𑁆𑀚𑁂 𑀯𑀸 𑀉𑀘𑁆𑀘𑀸𑀭𑀸𑀤𑀻𑀦𑀺 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀬𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑁄𑀧𑀺𑀫𑀁 𑀔𑁂𑀢𑁆𑀢𑀁 𑀳𑁄𑀢𑀼 𑀦𑀸𑀴𑀺𑀓𑁂𑀭𑀸𑀤𑀺𑀆𑀭𑀸𑀫𑁄 𑀯𑀸, 𑀢𑀢𑁆𑀣𑀸𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀭𑁄𑀧𑀺𑀫𑀳𑀭𑀺𑀢𑀝𑁆𑀞𑀸𑀦𑁂 𑀏𑀢𑀸𑀦𑀺 𑀯𑀢𑁆𑀣𑀽𑀦𑀺 𑀙𑀟𑁆𑀟𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀙𑀟𑁆𑀟𑁂𑀦𑁆𑀢𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀔𑁂𑀢𑁆𑀢𑁂 𑀯𑀸 𑀆𑀭𑀸𑀫𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑁄 𑀉𑀘𑁆𑀙𑀼𑀆𑀤𑀻𑀦𑀺 𑀯𑀸 𑀔𑀸𑀤𑀫𑀸𑀦𑁄 𑀕𑀘𑁆𑀙𑀦𑁆𑀢𑁄 𑀉𑀘𑁆𑀙𑀺𑀝𑁆𑀞𑁄𑀤𑀓𑀘𑀮𑀓𑀸𑀤𑀻𑀦𑀺 𑀳𑀭𑀺𑀢𑀝𑁆𑀞𑀸𑀦𑁂 𑀙𑀟𑁆𑀟𑁂𑀢𑀺, 𑀅𑀦𑁆𑀢𑀫𑀲𑁄 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀤𑀼𑀓𑁆𑀓𑀝𑀁. 𑀓𑀲𑀺𑀢𑀝𑁆𑀞𑀸𑀦𑁂 𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂 𑀅𑀗𑁆𑀓𑀼𑀭𑁂 𑀉𑀝𑁆𑀞𑀺𑀢𑁂𑀧𑀺 𑀅𑀯𑀼𑀝𑁆𑀞𑀺𑀢𑁂𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀅𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂𑀲𑀼 𑀧𑀦 𑀔𑁂𑀢𑁆𑀢𑀓𑁄𑀡𑀸𑀤𑀻𑀲𑀼 𑀯𑀸 𑀅𑀲𑀜𑁆𑀚𑀸𑀢𑀭𑁄𑀧𑀺𑀫𑁂𑀲𑀼 𑀔𑁂𑀢𑁆𑀢𑀫𑀭𑀺𑀬𑀸𑀤𑀸𑀤𑀻𑀲𑀼 𑀯𑀸 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀓𑀘𑀯𑀭𑀙𑀟𑁆𑀟𑀦𑀝𑁆𑀞𑀸𑀦𑁂𑀧𑀺 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀲𑀲𑁆𑀲𑀁 𑀉𑀤𑁆𑀥𑀭𑀺𑀢𑁆𑀯𑀸 𑀕𑀢𑁂𑀲𑀼 𑀙𑀟𑁆𑀟𑀺𑀢𑀔𑁂𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀯𑀝𑁆𑀝𑀢𑀺. 𑀬𑀢𑁆𑀣 𑀧𑀦 ‘‘𑀮𑀸𑀬𑀺𑀢𑀫𑁆𑀧𑀺 𑀧𑀼𑀩𑁆𑀩𑀡𑁆𑀡𑀸𑀤𑀺 𑀧𑀼𑀦 𑀉𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀭𑀓𑁆𑀔𑀦𑁆𑀢𑀺, 𑀢𑀢𑁆𑀣 𑀦 𑀯𑀝𑁆𑀝𑀢𑀺.

𑁨𑁧. ‘‘𑀦, 𑀪𑀺𑀓𑁆𑀔𑀯𑁂, 𑀦𑀳𑀸𑀬𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀭𑀼𑀓𑁆𑀔𑁂 𑀓𑀸𑀬𑁄 𑀉𑀕𑁆𑀖𑀁𑀲𑁂𑀢𑀩𑁆𑀩𑁄, 𑀬𑁄 𑀉𑀕𑁆𑀖𑀁𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁩) 𑀯𑀘𑀦𑀢𑁄 𑀦𑀳𑀸𑀬𑀦𑁆𑀢𑁂𑀦 (𑀘𑀽𑀴𑀯. 𑀅𑀝𑁆𑀞. 𑁨𑁪𑁩 𑀆𑀤𑀬𑁄) 𑀭𑀼𑀓𑁆𑀔𑁂 𑀯𑀸 𑀦𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀦𑀺𑀢𑁆𑀯𑀸 𑀞𑀧𑀺𑀢𑀢𑁆𑀣𑀫𑁆𑀪𑁂 𑀯𑀸 𑀇𑀝𑁆𑀞𑀓𑀲𑀺𑀮𑀸𑀤𑀸𑀭𑀼𑀓𑀼𑀝𑁆𑀝𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀝𑁆𑀝𑁂 𑀯𑀸 𑀓𑀸𑀬𑁄 𑀦 𑀖𑀁𑀲𑁂𑀢𑀩𑁆𑀩𑁄.

‘‘𑀦, 𑀪𑀺𑀓𑁆𑀔𑀯𑁂, 𑀅𑀝𑁆𑀝𑀸𑀦𑁂 𑀦𑀳𑀸𑀬𑀺𑀢𑀩𑁆𑀩𑀁, 𑀬𑁄 𑀦𑀳𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁩) 𑀯𑀘𑀦𑀢𑁄 𑀅𑀝𑁆𑀝𑀸𑀦𑁂𑀧𑀺 𑀦𑀳𑀸𑀬𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀝𑁆𑀝𑀸𑀦𑀁 𑀦𑀸𑀫 𑀭𑀼𑀓𑁆𑀔𑀁 𑀨𑀮𑀓𑀁 𑀯𑀺𑀬 𑀢𑀘𑁆𑀙𑁂𑀢𑁆𑀯𑀸 𑀅𑀝𑁆𑀞𑀧𑀤𑀸𑀓𑀸𑀭𑁂𑀦 𑀭𑀸𑀚𑀺𑀬𑁄 𑀙𑀺𑀦𑁆𑀤𑀺𑀢𑁆𑀯𑀸 𑀦𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀦𑀦𑁆𑀢𑀺, 𑀢𑀢𑁆𑀣 𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 𑀓𑀸𑀬𑀁 𑀖𑀁𑀲𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀕𑀦𑁆𑀥𑀩𑁆𑀩𑀳𑀢𑁆𑀣𑀓𑁂𑀦 𑀦𑀳𑀸𑀬𑀺𑀢𑀩𑁆𑀩𑀁, 𑀬𑁄 𑀦𑀳𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑁆𑀯. 𑁨𑁪𑁩) 𑀯𑀘𑀦𑀢𑁄 𑀦𑀳𑀸𑀦𑀢𑀺𑀢𑁆𑀣𑁂 𑀞𑀧𑀺𑀢𑁂𑀦 𑀤𑀸𑀭𑀼𑀫𑀬𑀳𑀢𑁆𑀣𑁂𑀦 𑀘𑀼𑀡𑁆𑀡𑀸𑀦𑀺 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺, 𑀢𑁂𑀦 𑀦𑀳𑀸𑀬𑀺𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸 𑀦𑀳𑀸𑀬𑀺𑀢𑀩𑁆𑀩𑀁, 𑀬𑁄 𑀦𑀳𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁩) 𑀯𑀘𑀦𑀢𑁄 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺𑀬𑀸𑀧𑀺 𑀦𑀳𑀸𑀬𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀼𑀭𑀼𑀯𑀺𑀦𑁆𑀤𑀓𑀲𑀼𑀢𑁆𑀢𑀺 𑀦𑀸𑀫 𑀓𑀼𑀭𑀼𑀯𑀺𑀦𑁆𑀤𑀓𑀧𑀸𑀲𑀸𑀡𑀘𑀼𑀡𑁆𑀡𑀸𑀦𑀺 𑀮𑀸𑀔𑀸𑀬 𑀩𑀦𑁆𑀥𑀺𑀢𑁆𑀯𑀸 𑀓𑀢𑀕𑀼𑀴𑀺𑀓𑀓𑀮𑀸𑀧𑀓𑁄 𑀯𑀼𑀘𑁆𑀘𑀢𑀺, 𑀬𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀕𑀳𑁂𑀢𑁆𑀯𑀸 𑀲𑀭𑀻𑀭𑀁 𑀖𑀁𑀲𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀯𑀺𑀕𑁆𑀕𑀬𑁆𑀳 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁, 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁩) 𑀯𑀘𑀦𑀢𑁄 𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑁂𑀦 𑀖𑀁𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀓𑁂𑀦 𑀦𑀳𑀸𑀬𑀺𑀢𑀩𑁆𑀩𑀁, 𑀬𑁄 𑀦𑀳𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀅𑀓𑀢𑀫𑀮𑁆𑀮𑀓’’𑀦𑁆𑀢𑀺 (𑀘𑀽𑀴𑀯. 𑁨𑁪𑁩-𑁨𑁪𑁪) 𑀯𑀘𑀦𑀢𑁄 𑀫𑀓𑀭𑀤𑀡𑁆𑀟𑀓𑁂 𑀙𑀺𑀦𑁆𑀤𑀺𑀢𑁆𑀯𑀸 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦 𑀓𑀢𑀁 ‘‘𑀫𑀮𑁆𑀮𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀁 𑀕𑀺𑀮𑀸𑀦𑀲𑁆𑀲𑀧𑀺 𑀦 𑀯𑀝𑁆𑀝𑀢𑀺. 𑀅𑀓𑀢𑀫𑀮𑁆𑀮𑀓𑀁 𑀦𑀸𑀫 𑀤𑀦𑁆𑀢𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀁, 𑀇𑀤𑀁 𑀅𑀕𑀺𑀮𑀸𑀦𑀲𑁆𑀲 𑀦 𑀯𑀝𑁆𑀝𑀢𑀺, 𑀇𑀝𑁆𑀞𑀓𑀔𑀡𑁆𑀟𑀁 𑀧𑀦 𑀓𑀧𑀸𑀮𑀔𑀡𑁆𑀟𑀁 𑀯𑀸 𑀯𑀝𑁆𑀝𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀓𑁆𑀓𑀸𑀲𑀺𑀓𑀁 𑀧𑀼𑀣𑀼𑀧𑀸𑀡𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁪𑁪) 𑀯𑀘𑀦𑀢𑁄 𑀉𑀓𑁆𑀓𑀸𑀲𑀺𑀓𑀁 𑀧𑀼𑀣𑀼𑀧𑀸𑀡𑀺𑀓𑀜𑁆𑀘 𑀯𑀝𑁆𑀝𑀢𑀺. 𑀉𑀓𑁆𑀓𑀸𑀲𑀺𑀓𑀁 𑀦𑀸𑀫 𑀯𑀢𑁆𑀣𑀯𑀝𑁆𑀝𑀺, 𑀢𑀲𑁆𑀫𑀸 𑀦𑀳𑀸𑀬𑀦𑁆𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀳𑀸𑀦𑀲𑀸𑀝𑀓𑀯𑀝𑁆𑀝𑀺𑀬𑀸 𑀧𑀺𑀝𑁆𑀞𑀺𑀁 𑀖𑀁𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀣𑀼𑀧𑀸𑀡𑀺𑀓𑀦𑁆𑀢𑀺 𑀳𑀢𑁆𑀣𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀳𑀢𑁆𑀣𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀤𑀁 𑀧𑀦𑁂𑀢𑁆𑀣 𑀦𑀳𑀸𑀦𑀯𑀢𑁆𑀢𑀁 𑁋 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀞𑀺𑀢𑀓𑁂𑀦𑁂𑀯 𑀦 𑀑𑀢𑀭𑀺𑀢𑀩𑁆𑀩𑀁, 𑀲𑀩𑁆𑀩𑀤𑀺𑀲𑀸 𑀧𑀦 𑀑𑀮𑁄𑀓𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀔𑀸𑀡𑀼𑀕𑀼𑀫𑁆𑀩𑀮𑀢𑀸𑀤𑀻𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀯𑀓𑀼𑀚𑁆𑀚 𑀞𑀺𑀢𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑀸𑀭𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀘𑀻𑀯𑀭𑀧𑀺𑀝𑁆𑀞𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀉𑀤𑀓𑀲𑀸𑀝𑀺𑀓𑀸 𑀦𑀢𑁆𑀣𑀺, 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀫𑁄𑀘𑁂𑀢𑁆𑀯𑀸 𑀲𑀘𑁂 𑀦𑀺𑀦𑁆𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀆𑀢𑀧𑁂 𑀧𑀲𑀸𑀭𑁂𑀢𑀩𑁆𑀩𑀁. 𑀦𑁄 𑀘𑁂 𑀅𑀢𑁆𑀣𑀺, 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑁂𑀦 𑀲𑀡𑀺𑀓𑀁 𑀦𑀸𑀪𑀺𑀧𑁆𑀧𑀫𑀸𑀡𑀫𑀢𑁆𑀢𑀁 𑀑𑀢𑀭𑀺𑀢𑁆𑀯𑀸 𑀯𑀻𑀘𑀺𑀁 𑀅𑀦𑀼𑀝𑁆𑀞𑀧𑁂𑀦𑁆𑀢𑁂𑀦 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀦𑀺𑀫𑀼𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀘𑀻𑀯𑀭𑀁 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀉𑀫𑁆𑀫𑀼𑀚𑁆𑀚𑀦𑁆𑀢𑁂𑀦𑀧𑀺 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀲𑀡𑀺𑀓𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀼𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸𑀯 𑀞𑀸𑀢𑀩𑁆𑀩𑀁.

𑁨𑁨. ‘‘𑀦, 𑀪𑀺𑀓𑁆𑀔𑀯𑁂, 𑀯𑀮𑁆𑀮𑀺𑀓𑀸 𑀥𑀸𑀭𑁂𑀢𑀩𑁆𑀩𑀸… 𑀦 𑀧𑀸𑀫𑀗𑁆𑀕𑁄 𑀥𑀸𑀭𑁂𑀢𑀩𑁆𑀩𑁄… 𑀦 𑀓𑀡𑁆𑀞𑀲𑀼𑀢𑁆𑀢𑀓𑀁 𑀥𑀸𑀭𑁂𑀢𑀩𑁆𑀩𑀁… 𑀦 𑀓𑀝𑀺𑀲𑀼𑀢𑁆𑀢𑀓𑀁 𑀥𑀸𑀭𑁂𑀢𑀩𑁆𑀩𑀁… 𑀦 𑀑𑀯𑀝𑁆𑀝𑀺𑀓𑀁 𑀥𑀸𑀭𑁂𑀢𑀩𑁆𑀩𑀁… 𑀦 𑀓𑀸𑀬𑀽𑀭𑀁 𑀥𑀸𑀭𑁂𑀢𑀩𑁆𑀩𑀁… 𑀦 𑀳𑀢𑁆𑀣𑀸𑀪𑀭𑀡𑀁 𑀥𑀸𑀭𑁂𑀢𑀩𑁆𑀩𑀁… 𑀦 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁫) 𑀯𑀘𑀦𑀢𑁄 𑀓𑀡𑁆𑀡𑀧𑀺𑀴𑀦𑁆𑀥𑀦𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀆𑀪𑀭𑀡𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣 (𑀘𑀽𑀴𑀯. 𑀅𑀝𑁆𑀞. 𑁨𑁪𑁫) 𑀯𑀮𑁆𑀮𑀺𑀓𑀸𑀢𑀺 𑀓𑀡𑁆𑀡𑀢𑁄 𑀦𑀺𑀓𑁆𑀔𑀦𑁆𑀢𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀦 𑀓𑁂𑀯𑀮𑀜𑁆𑀘 𑀯𑀮𑁆𑀮𑀺𑀓𑀸 𑀏𑀯, 𑀬𑀁 𑀓𑀺𑀜𑁆𑀘𑀺 𑀓𑀡𑁆𑀡𑀧𑀺𑀴𑀦𑁆𑀥𑀦𑀁 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀫𑀗𑁆𑀕𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀮𑀫𑁆𑀩𑀓𑀲𑀼𑀢𑁆𑀢𑀁. 𑀓𑀡𑁆𑀞𑀲𑀼𑀢𑁆𑀢𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀕𑀻𑀯𑀽𑀧𑀕𑀁 𑀆𑀪𑀭𑀡𑀁. 𑀓𑀝𑀺𑀲𑀼𑀢𑁆𑀢𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀝𑀺𑀧𑀺𑀴𑀦𑁆𑀥𑀦𑀁, 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀢𑀦𑁆𑀢𑀼𑀫𑀢𑁆𑀢𑀫𑁆𑀧𑀺. 𑀑𑀯𑀝𑁆𑀝𑀺𑀓𑀦𑁆𑀢𑀺 𑀯𑀮𑀬𑀁. 𑀓𑀸𑀬𑀽𑀭𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯.

𑁨𑁩. ‘‘𑀦, 𑀪𑀺𑀓𑁆𑀔𑀯𑁂, 𑀤𑀻𑀖𑀸 𑀓𑁂𑀲𑀸 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂𑀫𑀸𑀲𑀺𑀓𑀁 𑀯𑀸 𑀤𑀼𑀯𑀗𑁆𑀕𑀼𑀮𑀁 𑀯𑀸’’𑀢𑀺 (𑀘𑀽𑀴𑀯. 𑁨𑁪𑁬) 𑀯𑀘𑀦𑀢𑁄 𑀲𑀘𑁂 𑀓𑁂𑀲𑀸 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂 𑀤𑁆𑀯𑀗𑁆𑀕𑀼𑀮𑀁 𑀧𑀸𑀧𑀼𑀡𑀦𑁆𑀢𑀺, 𑀅𑀦𑁆𑀢𑁄𑀤𑁆𑀯𑁂𑀫𑀸𑀲𑁂𑀬𑁂𑀯 𑀙𑀺𑀦𑁆𑀤𑀺𑀢𑀩𑁆𑀩𑀸, 𑀤𑁆𑀯𑀗𑁆𑀕𑀼𑀮𑁂𑀳𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀤𑀻𑀖𑀸, 𑀤𑁆𑀯𑁂𑀫𑀸𑀲𑀢𑁄 𑀏𑀓𑀤𑀺𑀯𑀲𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀮𑀪𑀢𑀺𑀬𑁂𑀯. 𑀉𑀪𑀬𑀣𑀸𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀯 𑀯𑀼𑀢𑁆𑀢𑁄, 𑀢𑀢𑁄 𑀑𑀭𑀁 𑀧𑀦 𑀦 𑀯𑀝𑁆𑀝𑀦𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺.

‘‘𑀦, 𑀪𑀺𑀓𑁆𑀔𑀯𑁂, 𑀓𑀢𑁆𑀢𑀭𑀺𑀓𑀸𑀬 𑀓𑁂𑀲𑀸 𑀙𑁂𑀤𑀸𑀧𑁂𑀢𑀩𑁆𑀩𑀸, 𑀬𑁄 𑀙𑁂𑀤𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀓𑀢𑁆𑀢𑀭𑀺𑀓𑀸𑀬 𑀓𑁂𑀲𑁂 𑀙𑁂𑀤𑀸𑀧𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁫) 𑀯𑀘𑀦𑀢𑁄 𑀆𑀩𑀸𑀥𑀁 𑀯𑀺𑀦𑀸 𑀓𑀢𑁆𑀢𑀭𑀺𑀓𑀸𑀬 𑀓𑁂𑀲𑁂 𑀙𑁂𑀤𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀓𑁄𑀘𑁆𑀙𑁂𑀦 𑀓𑁂𑀲𑀸 𑀑𑀲𑀡𑁆𑀞𑁂𑀢𑀩𑁆𑀩𑀸… 𑀦 𑀨𑀡𑀓𑁂𑀦 𑀓𑁂𑀲𑀸 𑀑𑀲𑀡𑁆𑀞𑁂𑀢𑀩𑁆𑀩𑀸… 𑀦 𑀳𑀢𑁆𑀣𑀨𑀡𑀓𑁂𑀦 𑀓𑁂𑀲𑀸 𑀑𑀲𑀡𑁆𑀞𑁂𑀢𑀩𑁆𑀩𑀸… 𑀦 𑀲𑀺𑀢𑁆𑀣𑀢𑁂𑀮𑀓𑁂𑀦 𑀓𑁂𑀲𑀸 𑀑𑀲𑀡𑁆𑀞𑁂𑀢𑀩𑁆𑀩𑀸… 𑀦 𑀉𑀤𑀓𑀢𑁂𑀮𑀓𑁂𑀦 𑀓𑁂𑀲𑀸 𑀑𑀲𑀡𑁆𑀞𑁂𑀢𑀩𑁆𑀩𑀸, 𑀬𑁄 𑀑𑀲𑀡𑁆𑀞𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁬) 𑀯𑀘𑀦𑀢𑁄 𑀫𑀡𑁆𑀟𑀦𑀢𑁆𑀣𑀸𑀬 𑀓𑁄𑀘𑁆𑀙𑀸𑀤𑀻𑀳𑀺 𑀓𑁂𑀲𑀸 𑀦 𑀑𑀲𑀡𑁆𑀞𑁂𑀢𑀩𑁆𑀩𑀸, 𑀉𑀤𑁆𑀥𑀮𑁄𑀫𑁂𑀦 𑀧𑀦 𑀅𑀦𑀼𑀮𑁄𑀫𑀦𑀺𑀧𑀸𑀢𑀦𑀢𑁆𑀣𑀁 𑀳𑀢𑁆𑀣𑀁 𑀢𑁂𑀫𑁂𑀢𑁆𑀯𑀸 𑀲𑀻𑀲𑀁 𑀧𑀼𑀜𑁆𑀙𑀺𑀢𑀩𑁆𑀩𑀁, 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑀲𑀺𑀭𑀸𑀦𑀫𑁆𑀧𑀺 𑀅𑀮𑁆𑀮𑀳𑀢𑁆𑀣𑁂𑀦 𑀧𑀼𑀜𑁆𑀙𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁪. ‘‘𑀦, 𑀪𑀺𑀓𑁆𑀔𑀯𑁂, 𑀆𑀤𑀸𑀲𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀢𑀩𑁆𑀩𑀁, 𑀬𑁄 𑀑𑀮𑁄𑀓𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀆𑀤𑀸𑀲𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁪𑁭) 𑀯𑀘𑀦𑀢𑁄 𑀆𑀩𑀸𑀥𑀁 𑀯𑀺𑀦𑀸 𑀆𑀤𑀸𑀲𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀯𑀸 𑀫𑀼𑀔𑀁 𑀦 𑀑𑀮𑁄𑀓𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀓𑀁𑀲𑀧𑀢𑁆𑀢𑀸𑀤𑀻𑀦𑀺𑀧𑀺 𑀬𑁂𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀸𑀦𑀺 𑀆𑀤𑀸𑀲𑀲𑀗𑁆𑀔𑀫𑁂𑀯 𑀕𑀘𑁆𑀙𑀦𑁆𑀢𑀺, 𑀓𑀜𑁆𑀚𑀺𑀬𑀸𑀤𑀻𑀦𑀺𑀧𑀺 𑀘 𑀉𑀤𑀓𑀧𑀢𑁆𑀢𑀲𑀗𑁆𑀔𑀫𑁂𑀯. 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀆𑀩𑀸𑀥𑀧𑀘𑁆𑀘𑀬𑀸 𑀧𑀦 ‘‘𑀲𑀜𑁆𑀙𑀯𑀺 𑀦𑀼 𑀔𑁄 𑀫𑁂 𑀯𑀡𑁄, 𑀉𑀤𑀸𑀳𑀼 𑀦 𑀢𑀸𑀯𑀸’’𑀢𑀺 𑀚𑀸𑀦𑀦𑀢𑁆𑀣𑀁 𑀯𑀝𑁆𑀝𑀢𑀺, ‘‘𑀚𑀺𑀡𑁆𑀡𑁄 𑀦𑀼 𑀔𑁄𑀫𑁆𑀳𑀺, 𑀦𑁄’’𑀢𑀺 𑀏𑀯𑀁 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑀦𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁.

‘‘𑀦, 𑀪𑀺𑀓𑁆𑀔𑀯𑁂, 𑀫𑀼𑀔𑀁 𑀆𑀮𑀺𑀫𑁆𑀧𑀺𑀢𑀩𑁆𑀩𑀁… 𑀦 𑀫𑀼𑀔𑀁 𑀉𑀫𑁆𑀫𑀤𑁆𑀤𑀺𑀢𑀩𑁆𑀩𑀁… 𑀦 𑀫𑀼𑀔𑀁 𑀘𑀼𑀡𑁆𑀡𑁂𑀢𑀩𑁆𑀩𑀁… 𑀦 𑀫𑀦𑁄𑀲𑀺𑀮𑀺𑀓𑀸𑀬 𑀫𑀼𑀔𑀁 𑀮𑀜𑁆𑀙𑁂𑀢𑀩𑁆𑀩𑀁… 𑀦 𑀅𑀗𑁆𑀕𑀭𑀸𑀕𑁄 𑀓𑀸𑀢𑀩𑁆𑀩𑁄… 𑀦 𑀫𑀼𑀔𑀭𑀸𑀕𑁄 𑀓𑀸𑀢𑀩𑁆𑀩𑁄… 𑀦 𑀅𑀗𑁆𑀕𑀭𑀸𑀕𑀫𑀼𑀔𑀭𑀸𑀕𑁄 𑀓𑀸𑀢𑀩𑁆𑀩𑁄, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀫𑀼𑀔𑀁 𑀆𑀮𑀺𑀫𑁆𑀧𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁪𑁭) 𑀯𑀘𑀦𑀢𑁄 𑀆𑀩𑀸𑀥𑀁 𑀯𑀺𑀦𑀸 𑀫𑀼𑀔𑀯𑀺𑀮𑀺𑀫𑁆𑀧𑀦𑀸𑀤𑀺 𑀦 𑀓𑀸𑀢𑀩𑁆𑀩𑀁.

𑁨𑁫. ‘‘𑀦, 𑀪𑀺𑀓𑁆𑀔𑀯𑁂, 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀦𑁆𑀢𑀩𑁆𑀩𑀁, 𑀬𑁄 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁮) 𑀯𑀘𑀦𑀢𑁄 𑀦𑀘𑁆𑀘𑀸𑀤𑀺𑀁 𑀤𑀲𑁆𑀲𑀦𑀸𑀬 𑀦 𑀕𑀦𑁆𑀢𑀩𑁆𑀩𑀁. 𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁮𑁩𑁫) 𑀘 𑀦𑀘𑁆𑀘𑀦𑁆𑀢𑀺 𑀦𑀝𑀸𑀤𑀬𑁄 𑀯𑀸 𑀦𑀘𑁆𑀘𑀦𑁆𑀢𑀼 𑀲𑁄𑀡𑁆𑀟𑀸 𑀯𑀸 𑀅𑀦𑁆𑀢𑀫𑀲𑁄 𑀫𑁄𑀭𑀲𑀽𑀯𑀫𑀓𑁆𑀓𑀝𑀸𑀤𑀬𑁄𑀧𑀺, 𑀲𑀩𑁆𑀩𑀫𑁂𑀢𑀁 𑀦𑀘𑁆𑀘𑀫𑁂𑀯, 𑀢𑀲𑁆𑀫𑀸 𑀅𑀦𑁆𑀢𑀫𑀲𑁄 𑀫𑁄𑀭𑀦𑀘𑁆𑀘𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀬𑀫𑁆𑀧𑀺 𑀦𑀘𑁆𑀘𑀦𑁆𑀢𑀲𑁆𑀲 𑀯𑀸 𑀦𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀫𑁂𑀯. 𑀕𑀻𑀢𑀦𑁆𑀢𑀺 𑀦𑀝𑀸𑀤𑀻𑀦𑀁 𑀯𑀸 𑀕𑀻𑀢𑀁 𑀳𑁄𑀢𑀼 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀜𑁆𑀳𑀺𑀢𑀁 𑀲𑀸𑀥𑀼𑀓𑀻𑀴𑀺𑀢𑀕𑀻𑀢𑀁 𑀯𑀸 𑀅𑀲𑀜𑁆𑀜𑀢𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀤𑀦𑁆𑀢𑀕𑀻𑀢𑀫𑁆𑀧𑀺, ‘‘𑀬𑀁 𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀑𑀓𑀽𑀚𑀦𑁆𑀢𑀸 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀕𑀻𑀢𑀫𑁂𑀯, 𑀲𑀬𑀁 𑀕𑀸𑀬𑀦𑁆𑀢𑀲𑁆𑀲𑀧𑀺 𑀕𑀸𑀬𑀸𑀧𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀸 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑀁 𑀕𑀸𑀬𑀦𑁆𑀢𑀲𑁆𑀲. 𑀅𑀢𑁆𑀢𑀦𑀸𑀧𑀺 𑀢𑀲𑁆𑀫𑀺𑀁 𑀲𑀭𑁂 𑀲𑀸𑀭𑀚𑁆𑀚𑀢𑀺, 𑀧𑀭𑁂𑀧𑀺 𑀢𑀲𑁆𑀫𑀺𑀁 𑀲𑀭𑁂 𑀲𑀸𑀭𑀚𑁆𑀚𑀦𑁆𑀢𑀺, 𑀕𑀳𑀧𑀢𑀺𑀓𑀸𑀧𑀺 𑀉𑀚𑁆𑀛𑀸𑀬𑀦𑁆𑀢𑀺, 𑀲𑀭𑀓𑀼𑀢𑁆𑀢𑀺𑀫𑁆𑀧𑀺 𑀦𑀺𑀓𑀸𑀫𑀬𑀫𑀸𑀦𑀲𑁆𑀲 𑀲𑀫𑀸𑀥𑀺𑀲𑁆𑀲 𑀪𑀗𑁆𑀕𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀆𑀤𑀻𑀦𑀯𑀸 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑀁 𑀕𑀸𑀬𑀦𑁆𑀢𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑁄 𑀕𑀸𑀬𑀺𑀢𑀩𑁆𑀩𑁄, 𑀬𑁄 𑀕𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁯) 𑁋

𑀯𑀘𑀦𑀢𑁄 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑁄𑀧𑀺 𑀦 𑀕𑀸𑀬𑀺𑀢𑀩𑁆𑀩𑁄.

𑀆𑀬𑀢𑀓𑁄 (𑀘𑀽𑀴𑀯. 𑀅𑀝𑁆𑀞. 𑁨𑁪𑁯) 𑀦𑀸𑀫 𑀕𑀻𑀢𑀲𑁆𑀲𑀭𑁄 𑀢𑀁 𑀢𑀁 𑀯𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀯𑀺𑀦𑀸𑀲𑁂𑀢𑁆𑀯𑀸 𑀧𑀯𑀢𑁆𑀢𑁄. 𑀥𑀫𑁆𑀫𑁂 𑀧𑀦 𑀲𑀼𑀢𑁆𑀢𑀦𑁆𑀢𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀚𑀸𑀢𑀓𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀕𑀸𑀣𑀸𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑀺𑀤𑀻𑀖𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀭𑀪𑀜𑁆𑀜’’𑀦𑁆𑀢𑀺 (𑀘𑀽𑀴𑀯. 𑁨𑁪𑁯) 𑀯𑀘𑀦𑀢𑁄 𑀧𑀦 𑀲𑀭𑁂𑀦 𑀥𑀫𑁆𑀫𑀁 𑀪𑀡𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀭𑀪𑀜𑁆𑀜𑁂 𑀓𑀺𑀭 𑀢𑀭𑀗𑁆𑀕𑀯𑀢𑁆𑀢𑀥𑁄𑀢𑀓𑀯𑀢𑁆𑀢𑀕𑀮𑀺𑀢𑀯𑀢𑁆𑀢𑀸𑀤𑀻𑀦𑀺 𑀤𑁆𑀯𑀢𑁆𑀢𑀺𑀁𑀲 𑀯𑀢𑁆𑀢𑀸𑀦𑀺 𑀅𑀢𑁆𑀣𑀺, 𑀢𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀸𑀢𑀼𑀁 𑀮𑀪𑀢𑀺. 𑀲𑀩𑁆𑀩𑁂𑀲𑀁 𑀧𑀤𑀩𑁆𑀬𑀜𑁆𑀚𑀦𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀯𑀺𑀓𑀸𑀭𑀁 𑀅𑀓𑀢𑁆𑀯𑀸 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀘𑀢𑀼𑀭𑀲𑁆𑀲𑁂𑀦 𑀦𑀬𑁂𑀦 𑀧𑀯𑀢𑁆𑀢𑀦𑀁𑀬𑁂𑀯 𑀮𑀓𑁆𑀔𑀡𑀁.

𑀯𑀸𑀤𑀺𑀢𑀁 𑀦𑀸𑀫 𑀢𑀦𑁆𑀢𑀺𑀩𑀤𑁆𑀥𑀸𑀤𑀺𑀯𑀸𑀤𑀦𑀻𑀬𑀪𑀡𑁆𑀟𑀁 𑀯𑀸𑀤𑀺𑀢𑀁 𑀯𑀸 𑀳𑁄𑀢𑀼 𑀓𑀼𑀝𑀪𑁂𑀭𑀺𑀯𑀸𑀤𑀺𑀢𑀁 𑀯𑀸 𑀅𑀦𑁆𑀢𑀫𑀲𑁄 𑀉𑀤𑀓𑀪𑁂𑀭𑀺𑀯𑀸𑀤𑀺𑀢𑀫𑁆𑀧𑀺, 𑀲𑀩𑁆𑀩𑀫𑁂𑀢𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀦𑀺𑀝𑁆𑀞𑀼𑀪𑀦𑁆𑀢𑁄 𑀯𑀸 𑀲𑀸𑀲𑀗𑁆𑀓𑁂 𑀯𑀸 𑀞𑀺𑀢𑁄 𑀅𑀘𑁆𑀙𑀭𑀺𑀓𑀁 𑀯𑀸 𑀨𑁄𑀝𑁂𑀢𑀺, 𑀧𑀸𑀡𑀺𑀁 𑀯𑀸 𑀧𑀳𑀭𑀢𑀺, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺, 𑀲𑀩𑁆𑀩𑀁 𑀅𑀦𑁆𑀢𑀭𑀸𑀭𑀸𑀫𑁂 𑀞𑀺𑀢𑀲𑁆𑀲 𑀧𑀲𑁆𑀲𑀢𑁄 𑀅𑀦𑀸𑀧𑀢𑁆𑀢𑀺, 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀯𑀺𑀳𑀸𑀭𑀢𑁄 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀺𑀦𑁆𑀦𑁄 𑀧𑀲𑁆𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀢𑁄 𑀆𑀧𑀢𑁆𑀢𑀺, 𑀯𑀻𑀣𑀺𑀬𑀁 𑀞𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀲𑁆𑀲𑀢𑁄𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺. 𑀆𑀧𑀤𑀸𑀲𑀼 𑀢𑀸𑀤𑀺𑀲𑁂𑀦 𑀉𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑁄 𑀲𑀫𑀚𑁆𑀚𑀝𑁆𑀞𑀸𑀦𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲 𑀲𑀼𑀡𑀦𑁆𑀢𑀲𑁆𑀲 𑀯𑀸 𑀅𑀦𑀸𑀧𑀢𑁆𑀢𑀺. ‘‘𑀘𑁂𑀢𑀺𑀬𑀲𑁆𑀲 𑀉𑀧𑀳𑀸𑀭𑀁 𑀤𑁂𑀣 𑀉𑀧𑀸𑀲𑀓𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺, ‘‘𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀉𑀧𑀳𑀸𑀭𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀉𑀧𑀝𑁆𑀞𑀸𑀦𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀉𑀧𑀝𑁆𑀞𑀸𑀦𑀓𑀭𑀡𑀁 𑀦𑀸𑀫 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁨𑁬. ‘‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀙𑁂𑀢𑀩𑁆𑀩𑀁, 𑀬𑁄 𑀙𑀺𑀦𑁆𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁧) 𑀯𑀘𑀦𑀢𑁄 𑀅𑀗𑁆𑀕𑀚𑀸𑀢𑀁 (𑀘𑀽𑀴𑀯. 𑁨𑁫𑁧) 𑀙𑀺𑀦𑁆𑀤𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀜𑁆𑀜𑀁 𑀧𑀦 𑀓𑀡𑁆𑀡𑀦𑀸𑀲𑀸𑀅𑀗𑁆𑀕𑀼𑀮𑀺𑀆𑀤𑀺𑀁 𑀬𑀁 𑀓𑀺𑀜𑁆𑀘𑀺 𑀙𑀺𑀦𑁆𑀤𑀦𑁆𑀢𑀲𑁆𑀲 𑀢𑀸𑀤𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀳𑀺𑀓𑀻𑀝𑀤𑀝𑁆𑀞𑀸𑀤𑀻𑀲𑀼 𑀧𑀦 𑀅𑀜𑁆𑀜𑀸𑀩𑀸𑀥𑀧𑀘𑁆𑀘𑀬𑀸 𑀯𑀸 𑀮𑁄𑀳𑀺𑀢𑀁 𑀯𑀸 𑀫𑁄𑀘𑁂𑀦𑁆𑀢𑀲𑁆𑀲 𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀦𑀸𑀧𑀢𑁆𑀢𑀺.

𑁨𑁭. ‘‘𑀦, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀩𑁆𑀩𑀁, 𑀬𑁄 𑀤𑀲𑁆𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁨) 𑀯𑀘𑀦𑀢𑁄 𑀕𑀺𑀳𑀻𑀦𑀁 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺 𑀧𑀦 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸.

𑁨𑁮. ‘‘𑀦, 𑀪𑀺𑀓𑁆𑀔𑀯𑁂, 𑀲𑁄𑀯𑀡𑁆𑀡𑀫𑀬𑁄 𑀧𑀢𑁆𑀢𑁄 𑀥𑀸𑀭𑁂𑀢𑀩𑁆𑀩𑁄…𑀧𑁂… 𑀦 𑀭𑀽𑀧𑀺𑀬𑀫𑀬𑁄…𑀧𑁂… 𑀦 𑀫𑀡𑀺𑀫𑀬𑁄…𑀧𑁂… 𑀦 𑀯𑁂𑀴𑀼𑀭𑀺𑀬𑀫𑀬𑁄…𑀧𑁂… 𑀦 𑀨𑀮𑀺𑀓𑀫𑀬𑁄…𑀧𑁂… 𑀦 𑀓𑀁𑀲𑀫𑀬𑁄…𑀧𑁂… 𑀦 𑀓𑀸𑀘𑀫𑀬𑁄…𑀧𑁂… 𑀦 𑀢𑀺𑀧𑀼𑀫𑀬𑁄 …𑀧𑁂… 𑀦 𑀲𑀻𑀲𑀫𑀬𑁄…𑀧𑁂… 𑀦 𑀢𑀫𑁆𑀩𑀮𑁄𑀳𑀫𑀬𑁄 𑀧𑀢𑁆𑀢𑁄 𑀥𑀸𑀭𑁂𑀢𑀩𑁆𑀩𑁄, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁨) 𑀯𑀘𑀦𑀢𑁄 𑀲𑀼𑀯𑀡𑁆𑀡𑀫𑀬𑀸𑀤𑀺𑀧𑀢𑁆𑀢𑁄 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀕𑀺𑀳𑀻 𑀪𑀢𑁆𑀢𑀕𑁆𑀕𑁂 𑀲𑀼𑀯𑀡𑁆𑀡𑀢𑀝𑁆𑀝𑀺𑀓𑀸𑀤𑀻𑀲𑀼 𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀉𑀧𑀦𑀸𑀫𑁂𑀦𑁆𑀢𑀺, 𑀆𑀫𑀲𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀨𑀮𑀺𑀓𑀫𑀬𑀓𑀸𑀘𑀫𑀬𑀓𑀁𑀲𑀫𑀬𑀸𑀦𑀺 𑀧𑀦 𑀢𑀝𑁆𑀝𑀺𑀓𑀸𑀤𑀻𑀦𑀺 𑀪𑀸𑀚𑀦𑀸𑀦𑀺 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦𑁂𑀯 𑀦 𑀯𑀝𑁆𑀝𑀦𑁆𑀢𑀺, 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸 𑀯𑀝𑁆𑀝𑀦𑁆𑀢𑀺. 𑀢𑀫𑁆𑀩𑀮𑁄𑀳𑀫𑀬𑁄𑀧𑀺 𑀧𑀢𑁆𑀢𑁄𑀬𑁂𑀯 𑀦 𑀯𑀝𑁆𑀝𑀢𑀺, 𑀣𑀸𑀮𑀓𑀁 𑀧𑀦 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀧𑀢𑁆𑀢𑁂 𑀅𑀬𑁄𑀧𑀢𑁆𑀢𑀁 𑀫𑀢𑁆𑀢𑀺𑀓𑀸𑀧𑀢𑁆𑀢’’𑀦𑁆𑀢𑀺 (𑀘𑀽𑀴𑀯. 𑁨𑁫𑁨) 𑀤𑁆𑀯𑁂𑀬𑁂𑀯 𑀘 𑀧𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑀸.

‘‘𑀦, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀩𑀓𑀝𑀸𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀬𑁄 𑀘𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁫) 𑀯𑀘𑀦𑀢𑁄 𑀮𑀸𑀩𑀼𑀓𑀝𑀸𑀳𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀁 𑀮𑀪𑀺𑀢𑁆𑀯𑀸 𑀧𑀦 𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀖𑀝𑀺𑀓𑀝𑀸𑀳𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀦, 𑀪𑀺𑀓𑁆𑀔𑀯𑁂, 𑀙𑀯𑀲𑀻𑀲𑀧𑀢𑁆𑀢𑁄 𑀥𑀸𑀭𑁂𑀢𑀩𑁆𑀩𑁄, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁫) 𑀯𑀘𑀦𑀢𑁄 𑀙𑀯𑀲𑀻𑀲𑀫𑀬𑁄𑀧𑀺 𑀧𑀢𑁆𑀢𑁄 𑀦 𑀯𑀝𑁆𑀝𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀢𑁆𑀢𑀸𑀥𑀸𑀭𑀓’’𑀦𑁆𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀪𑀽𑀫𑀺𑀤𑀸𑀭𑀼𑀤𑀡𑁆𑀟𑀯𑀅𑀮𑀯𑁂𑀢𑁆𑀢𑀸𑀤𑀻𑀳𑀺 𑀓𑀢𑁂 𑀪𑀽𑀫𑀺𑀆𑀥𑀸𑀭𑀓𑁂 𑀤𑀸𑀭𑀼𑀤𑀡𑁆𑀟𑀆𑀥𑀸𑀭𑀓𑁂 𑀘 𑀧𑀢𑁆𑀢𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 ‘‘𑀪𑀽𑀫𑀺𑀆𑀥𑀸𑀭𑀓𑁂 𑀢𑀬𑁄 𑀤𑀡𑁆𑀟𑀸𑀥𑀸𑀭𑀓𑁂 𑀤𑁆𑀯𑁂 𑀧𑀢𑁆𑀢𑁂 𑀉𑀧𑀭𑀽𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀪𑀽𑀫𑀺𑀆𑀥𑀸𑀭𑀓𑁂 𑀢𑀺𑀡𑁆𑀡𑀁 𑀧𑀢𑁆𑀢𑀸𑀦𑀁 𑀅𑀦𑁄𑀓𑀸𑀲𑁄, 𑀤𑁆𑀯𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀭𑀼𑀆𑀥𑀸𑀭𑀓𑀤𑀡𑁆𑀟𑀸𑀥𑀸𑀭𑀓𑁂𑀲𑀼𑀧𑀺 𑀲𑀼𑀲𑀚𑁆𑀚𑀺𑀢𑁂𑀲𑀼 𑀏𑀲𑁂𑀯 𑀦𑀬𑁄. 𑀪𑀫𑀓𑁄𑀝𑀺𑀲𑀤𑀺𑀲𑁄 𑀧𑀦 𑀤𑀸𑀭𑀼𑀆𑀥𑀸𑀭𑀓𑁄 𑀢𑀻𑀳𑀺 𑀤𑀡𑁆𑀟𑀓𑁂𑀳𑀺 𑀩𑀤𑁆𑀥𑁄, 𑀤𑀡𑁆𑀟𑀸𑀥𑀸𑀭𑀓𑁄 𑀘 𑀏𑀓𑀲𑁆𑀲𑀧𑀺 𑀧𑀢𑁆𑀢𑀲𑁆𑀲 𑀅𑀦𑁄𑀓𑀸𑀲𑁄, 𑀢𑀢𑁆𑀣 𑀞𑀧𑁂𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀪𑀽𑀫𑀺𑀬𑀁 𑀧𑀦 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀏𑀓𑀫𑁂𑀯 𑀞𑀧𑁂𑀢𑀩𑁆𑀩’’𑀦𑁆𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀺𑀟𑁆𑀠𑀦𑁆𑀢𑁂 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄, 𑀬𑁄 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀆𑀮𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀁 𑀅𑀦𑁆𑀢𑁂 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀭𑀽𑀧𑀸𑀬 𑀯𑀺𑀢𑁆𑀣𑀺𑀡𑁆𑀡𑀸𑀬 𑀫𑀺𑀟𑁆𑀠𑀺𑀓𑀸𑀬 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀪𑀡𑁆𑀟𑀦𑁆𑀢𑁂 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄, 𑀬𑁄 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀩𑀸𑀳𑀺𑀭𑀧𑀲𑁆𑀲𑁂 𑀓𑀢𑀸𑀬 𑀢𑀦𑀼𑀓𑀫𑀺𑀟𑁆𑀠𑀺𑀓𑀸𑀬 𑀅𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑁄𑀴𑀓’’𑀦𑁆𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀘𑁄𑀴𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀢𑁆𑀣 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀁 𑀧𑀦 𑀅𑀲𑀢𑀺 𑀓𑀝𑀲𑀸𑀭𑀓𑁂 𑀯𑀸 𑀢𑀝𑁆𑀝𑀺𑀓𑀸𑀬 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀧𑀭𑀺𑀪𑀡𑁆𑀟𑀓𑀢𑀸𑀬 𑀪𑀽𑀫𑀺𑀬𑀸 𑀬𑀢𑁆𑀣 𑀦 𑀤𑀼𑀲𑁆𑀲𑀢𑀺, 𑀢𑀣𑀸𑀭𑀽𑀧𑀸𑀬 𑀯𑀸𑀮𑀺𑀓𑀸𑀬 𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀁𑀲𑀼𑀭𑀚𑀸𑀤𑀻𑀲𑀼 𑀧𑀦 𑀔𑀭𑀪𑀽𑀫𑀺𑀬𑀁 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

‘‘𑀦, 𑀪𑀺𑀓𑁆𑀔𑀯𑁂, 𑀧𑀢𑁆𑀢𑁄 𑀮𑀕𑁆𑀕𑁂𑀢𑀩𑁆𑀩𑁄, 𑀬𑁄 𑀮𑀕𑁆𑀕𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀦𑀸𑀕𑀤𑀦𑁆𑀢𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀕𑁆𑀕𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀘𑀻𑀯𑀭𑀯𑀁𑀲𑁂𑀧𑀺 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀫𑀜𑁆𑀘𑁂 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄, 𑀬𑁄 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁪) 𑀯𑀘𑀦𑀢𑁄 𑀪𑀡𑁆𑀟𑀓𑀝𑁆𑀞𑀧𑀦𑀢𑁆𑀣𑀫𑁂𑀯 𑀯𑀸 𑀓𑀢𑀁 𑀳𑁄𑀢𑀼 𑀦𑀺𑀲𑀻𑀤𑀦𑀲𑀬𑀦𑀢𑁆𑀣𑀁 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀞𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀅𑀜𑁆𑀜𑁂𑀦 𑀧𑀦 𑀪𑀡𑁆𑀟𑀓𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀢𑀼𑀁, 𑀅𑀝𑀦𑀺𑀬𑀁 𑀩𑀦𑁆𑀥𑀺𑀢𑁆𑀯𑀸 𑀑𑀮𑀫𑁆𑀩𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀩𑀦𑁆𑀥𑀺𑀢𑁆𑀯𑀸𑀧𑀺 𑀉𑀧𑀭𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑀸𑀤𑀻𑀲𑀼 𑀅𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀞𑀧𑀺𑀢𑀁 𑀳𑁄𑀢𑀺, 𑀢𑀢𑁆𑀣 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀁𑀲𑀯𑀝𑁆𑀝𑀦𑀓𑁂𑀦 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀅𑀗𑁆𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀙𑀢𑁆𑀢𑁂 𑀪𑀢𑁆𑀢𑀧𑀽𑀭𑁄𑀧𑀺 𑀅𑀁𑀲𑀓𑀽𑀝𑁂 𑀮𑀕𑁆𑀕𑀺𑀢𑀧𑀢𑁆𑀢𑁄𑀧𑀺 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀪𑀡𑁆𑀟𑀓𑁂𑀦 𑀧𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀝𑁆𑀝𑀓𑀁 𑀓𑀢𑁆𑀯𑀸 𑀯𑀸 𑀞𑀧𑀺𑀢𑁂 𑀬𑁄 𑀓𑁄𑀘𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀧𑀢𑁆𑀢𑀳𑀢𑁆𑀣𑁂𑀦 𑀓𑀯𑀸𑀝𑀁 𑀧𑀡𑀸𑀫𑁂𑀢𑀩𑁆𑀩𑀁, 𑀬𑁄 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁫) 𑀯𑀘𑀦𑀢𑁄 𑀧𑀢𑁆𑀢𑀳𑀢𑁆𑀣𑁂𑀦 𑀓𑀯𑀸𑀝𑀁 𑀦 𑀧𑀡𑀸𑀫𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀦 𑀓𑁂𑀯𑀮𑀁 𑀬𑀲𑁆𑀲 𑀧𑀢𑁆𑀢𑁄 𑀳𑀢𑁆𑀣𑁂, 𑀲𑁄 𑀏𑀯 𑀧𑀢𑁆𑀢𑀳𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀓𑀯𑀸𑀝𑀫𑁂𑀯 𑀧𑀡𑀸𑀫𑁂𑀢𑀼𑀁 𑀦 𑀮𑀪𑀢𑀺, 𑀅𑀧𑀺𑀘 𑀔𑁄 𑀧𑀦 𑀳𑀢𑁆𑀣𑁂 𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀯𑀸 𑀬𑀢𑁆𑀣 𑀬𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂 𑀧𑀢𑁆𑀢𑀲𑁆𑀫𑀺𑀁 𑀲𑀢𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀲𑀻𑀲𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀭𑀻𑀭𑀸𑀯𑀬𑀯𑁂𑀦 𑀓𑀯𑀸𑀝𑀁 𑀯𑀸 𑀧𑀡𑀸𑀫𑁂𑀢𑀼𑀁 𑀖𑀝𑀺𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑀼𑀁 𑀲𑀽𑀘𑀺𑀁 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀅𑀯𑀸𑀧𑀼𑀭𑀺𑀢𑀼𑀁 𑀦 𑀮𑀪𑀢𑀺, 𑀅𑀁𑀲𑀓𑀽𑀝𑁂 𑀧𑀦 𑀧𑀢𑁆𑀢𑀁 𑀮𑀕𑁆𑀕𑁂𑀢𑁆𑀯𑀸 𑀬𑀣𑀸𑀲𑀼𑀔𑀁 𑀅𑀯𑀸𑀧𑀼𑀭𑀺𑀢𑀼𑀁 𑀮𑀪𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀘𑀮𑀓𑀸𑀦𑀺 𑀯𑀸 𑀅𑀝𑁆𑀞𑀺𑀓𑀸𑀦𑀺 𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀁 𑀯𑀸 𑀧𑀢𑁆𑀢𑁂𑀦 𑀦𑀻𑀳𑀭𑀺𑀢𑀩𑁆𑀩𑀁, 𑀬𑁄 𑀦𑀻𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁫) 𑀯𑀘𑀦𑀢𑁄 𑀘𑀮𑀓𑀸𑀤𑀻𑀦𑀺 𑀧𑀢𑁆𑀢𑁂𑀦 𑀦𑀻𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀘𑀮𑀓𑀸𑀦𑀻𑀢𑀺 𑀘𑀩𑁆𑀩𑁂𑀢𑁆𑀯𑀸 𑀅𑀧𑀯𑀺𑀤𑁆𑀥𑀸𑀫𑀺𑀲𑀸𑀦𑀺. 𑀅𑀝𑁆𑀞𑀺𑀓𑀸𑀦𑀻𑀢𑀺 𑀫𑀘𑁆𑀙𑀫𑀁𑀲𑀅𑀅𑀓𑀸𑀦𑀺. 𑀉𑀘𑁆𑀙𑀺𑀝𑁆𑀞𑁄𑀤𑀓𑀦𑁆𑀢𑀺 𑀫𑀼𑀔𑀯𑀺𑀓𑁆𑀔𑀸𑀮𑀺𑀢𑁄𑀤𑀓𑀁. 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀢𑁆𑀢𑁂𑀦 𑀦𑀻𑀳𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑀁 𑀓𑀢𑁆𑀯𑀸 𑀳𑀢𑁆𑀣𑀁 𑀥𑁄𑀯𑀺𑀢𑀼𑀫𑁆𑀧𑀺 𑀦 𑀮𑀪𑀢𑀺. 𑀳𑀢𑁆𑀣𑀥𑁄𑀢𑀧𑀸𑀤𑀥𑁄𑀢𑀉𑀤𑀓𑀫𑁆𑀧𑀺 𑀧𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀦𑀼𑀘𑁆𑀙𑀺𑀝𑁆𑀞𑀁 𑀲𑀼𑀤𑁆𑀥𑀧𑀢𑁆𑀢𑀁 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀸𑀫𑀳𑀢𑁆𑀣𑁂𑀦 𑀧𑀦𑁂𑀢𑁆𑀣 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀏𑀓𑀁 𑀉𑀤𑀓𑀕𑀡𑁆𑀟𑀼𑀲𑀁 𑀕𑀳𑁂𑀢𑁆𑀯𑀸 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀳𑀺 𑀲𑁄 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑁄 𑀳𑁄𑀢𑀺, 𑀳𑀢𑁆𑀣𑀁 𑀧𑀦 𑀩𑀳𑀺𑀉𑀤𑀓𑁂𑀦 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀘𑁆𑀙𑀫𑀁𑀲𑀨𑀮𑀸𑀨𑀮𑀸𑀤𑀻𑀦𑀺 𑀘 𑀔𑀸𑀤𑀦𑁆𑀢𑁄 𑀬𑀁 𑀢𑀢𑁆𑀣 𑀅𑀝𑁆𑀞𑀺𑀁 𑀯𑀸 𑀘𑀮𑀓𑀁 𑀯𑀸 𑀙𑀟𑁆𑀟𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑀁 𑀧𑀦 𑀧𑀝𑀺𑀔𑀸𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀮𑀪𑀢𑀺. 𑀅𑀝𑁆𑀞𑀺𑀓𑀓𑀡𑁆𑀝𑀓𑀸𑀤𑀻𑀦𑀺 𑀢𑀢𑁆𑀣𑁂𑀯 𑀓𑀢𑁆𑀯𑀸 𑀳𑀢𑁆𑀣𑁂𑀦 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀔𑀢𑁄 𑀦𑀻𑀳𑀝𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀼𑀦 𑀔𑀸𑀤𑀺𑀢𑀼𑀓𑀸𑀫𑁄 𑀧𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀮𑀪𑀢𑀺, 𑀲𑀺𑀗𑁆𑀕𑀺𑀯𑁂𑀭𑀦𑀸𑀴𑀺𑀓𑁂𑀭𑀔𑀡𑁆𑀟𑀸𑀤𑀻𑀦𑀺 𑀟𑀁𑀲𑀺𑀢𑁆𑀯𑀸 𑀧𑀼𑀦 𑀞𑀧𑁂𑀢𑀼𑀁 𑀮𑀪𑀢𑀺.

𑁨𑁯. ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀬𑁄 𑀪𑀯𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁫) 𑀯𑀘𑀦𑀢𑁄 𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀘𑀻𑀯𑀭𑀜𑁆𑀘 𑀫𑀜𑁆𑀘𑀧𑀻𑀞𑀜𑁆𑀘 𑀧𑀁𑀲𑀼𑀓𑀽𑀮𑀁 𑀯𑀝𑁆𑀝𑀢𑀺, 𑀅𑀚𑁆𑀛𑁄𑀳𑀭𑀡𑀻𑀬𑀁 𑀧𑀦 𑀤𑀺𑀦𑁆𑀦𑀫𑁂𑀯 𑀕𑀳𑁂𑀢𑀩𑁆𑀩𑀁.

𑁩𑁦. ‘‘𑀦, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀺𑀲𑁆𑀲𑀸𑀯𑀦𑀁 𑀬𑀸𑀘𑀺𑀬𑀫𑀸𑀦𑁂𑀦 𑀦 𑀤𑀸𑀢𑀩𑁆𑀩𑀁, 𑀬𑁄 𑀦 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁯) 𑀯𑀘𑀦𑀢𑁄 𑀅𑀧𑀭𑀺𑀲𑁆𑀲𑀸𑀯𑀦𑀓𑀲𑁆𑀲 (𑀘𑀽𑀴𑀯. 𑀅𑀝𑁆𑀞. 𑁨𑁫𑁯) 𑀬𑀸𑀘𑀫𑀸𑀦𑀲𑁆𑀲 𑀧𑀭𑀺𑀲𑁆𑀲𑀸𑀯𑀦𑀁 𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀧𑀭𑀺𑀲𑁆𑀲𑀸𑀯𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀬𑀸𑀘𑀢𑀺, 𑀢𑀲𑁆𑀲 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑀁.

‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀲𑁆𑀲𑀸𑀯𑀦𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀤𑁆𑀥𑀸𑀦𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀬𑁄 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁫𑁯) 𑀯𑀘𑀦𑀢𑁄 𑀅𑀧𑀭𑀺𑀲𑁆𑀲𑀸𑀯𑀦𑀓𑁂𑀦 𑀫𑀕𑁆𑀕𑁄 𑀦 𑀕𑀦𑁆𑀢𑀩𑁆𑀩𑁄. 𑀲𑀘𑁂𑀧𑀺 𑀦 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑀁 𑀯𑀸 𑀥𑀫𑁆𑀫𑀓𑀭𑀡𑀁 𑀯𑀸, 𑀲𑀗𑁆𑀖𑀸𑀝𑀺𑀓𑀡𑁆𑀡𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄 ‘‘𑀇𑀫𑀺𑀦𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀡𑁆𑀟𑀧𑀭𑀺𑀲𑁆𑀲𑀸𑀯𑀦’’𑀦𑁆𑀢𑀺 (𑀘𑀽𑀴𑀯. 𑁨𑁫𑁯) 𑀯𑀘𑀦𑀢𑁄 𑀤𑀡𑁆𑀟𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀤𑀡𑁆𑀟𑀧𑀭𑀺𑀲𑁆𑀲𑀸𑀯𑀦𑀁 𑀦𑀸𑀫 𑀬𑀢𑁆𑀣 𑀭𑀚𑀓𑀸𑀦𑀁 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀁 𑀯𑀺𑀬 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀩𑀤𑁆𑀥𑀦𑀺𑀲𑁆𑀲𑁂𑀡𑀺𑀓𑀸𑀬 𑀲𑀸𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂 𑀤𑀡𑁆𑀟𑀓𑁂 𑀉𑀤𑀓𑀁 𑀆𑀲𑀺𑀜𑁆𑀘𑀦𑁆𑀢𑀺, 𑀢𑀁 𑀉𑀪𑁄𑀧𑀺 𑀓𑁄𑀝𑁆𑀞𑀸𑀲𑁂 𑀧𑀽𑀭𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀢𑁆𑀣𑀭𑀓’’𑀦𑁆𑀢𑀺 (𑀘𑀽𑀴𑀯. 𑁨𑁫𑁯) 𑀯𑀘𑀦𑀢𑁄 𑀑𑀢𑁆𑀣𑀭𑀓𑀁 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀑𑀢𑁆𑀣𑀭𑀓𑀁 𑀦𑀸𑀫 𑀬𑀁 𑀉𑀤𑀓𑁂 𑀑𑀢𑁆𑀣𑀭𑀺𑀢𑁆𑀯𑀸 𑀖𑀝𑀓𑁂𑀦 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺, 𑀢𑀜𑁆𑀳𑀺 𑀘𑀢𑀽𑀲𑀼 𑀤𑀡𑁆𑀟𑀓𑁂𑀲𑀼 𑀯𑀢𑁆𑀣𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀘𑀢𑁆𑀢𑀸𑀭𑁄 𑀔𑀸𑀡𑀼𑀓𑁂 𑀦𑀺𑀔𑀦𑀺𑀢𑁆𑀯𑀸 𑀢𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑀧𑀭𑀺𑀬𑀦𑁆𑀢𑁂 𑀉𑀤𑀓𑀢𑁄 𑀫𑁄𑀘𑁂𑀢𑁆𑀯𑀸 𑀫𑀚𑁆𑀛𑁂 𑀑𑀢𑁆𑀣𑀭𑀺𑀢𑁆𑀯𑀸 𑀖𑀝𑁂𑀦 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺.

𑁩𑁧. ‘‘𑀦, 𑀪𑀺𑀓𑁆𑀔𑀯𑁂, 𑀦𑀕𑁆𑀕𑁂𑀦 𑀦𑀕𑁆𑀕𑁄 𑀅𑀪𑀺𑀯𑀸𑀤𑁂𑀢𑀩𑁆𑀩𑁄, 𑀬𑁄 𑀅𑀪𑀺𑀯𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀘𑀽𑀴𑀯. 𑁨𑁬𑁧) 𑀦 𑀦𑀕𑁆𑀕𑁂𑀦 𑀦𑀕𑁆𑀕𑁄 𑀅𑀪𑀺𑀯𑀸𑀤𑁂𑀢𑀩𑁆𑀩𑁄, 𑀦 𑀦𑀕𑁆𑀕𑁂𑀦 𑀅𑀪𑀺𑀯𑀸𑀤𑁂𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀦𑀕𑁆𑀕𑁄 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄, 𑀦 𑀦𑀕𑁆𑀕𑁂𑀦 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀦𑀕𑁆𑀕𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀦𑀕𑁆𑀕𑀲𑁆𑀲 𑀤𑀸𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀔𑀸𑀤𑀺𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀲𑀸𑀬𑀺𑀢𑀩𑁆𑀩𑀁, 𑀦 𑀦𑀕𑁆𑀕𑁂𑀦 𑀧𑀸𑀢𑀩𑁆𑀩𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺𑀁 𑀉𑀤𑀓𑀧𑀝𑀺𑀘𑁆𑀙𑀸𑀤𑀺𑀁 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺’’𑀦𑁆𑀢𑀺 (𑀘𑀽𑀴𑀯. 𑁨𑁬𑁧) 𑀯𑀘𑀦𑀢𑁄 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑀯𑀝𑁆𑀝𑀦𑁆𑀢𑀺. 𑀏𑀢𑁆𑀣 𑀘 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺 𑀉𑀤𑀓𑀧𑀝𑀺𑀘𑁆𑀙𑀸𑀤𑀺 𑀘 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀯𑀝𑁆𑀝𑀢𑀺, 𑀲𑁂𑀲𑁂𑀲𑀼 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀦 𑀯𑀝𑁆𑀝𑀢𑀺. 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀧𑀦 𑀲𑀩𑁆𑀩𑀓𑀫𑁆𑀫𑁂𑀲𑀼 𑀯𑀝𑁆𑀝𑀢𑀺.

𑁩𑁨. ‘‘𑀦, 𑀪𑀺𑀓𑁆𑀔𑀯𑁂, 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑁂𑀲𑀼 𑀲𑀬𑀦𑁂𑀲𑀼 𑀲𑀬𑀺𑀢𑀩𑁆𑀩𑀁, 𑀬𑁄 𑀲𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁪) 𑀯𑀘𑀦𑀢𑁄 𑀧𑀼𑀧𑁆𑀨𑁂𑀳𑀺 𑀲𑀦𑁆𑀣𑀢𑁂𑀲𑀼 𑀲𑀬𑀦𑁂𑀲𑀼 𑀦 𑀲𑀬𑀺𑀢𑀩𑁆𑀩𑀁, 𑀕𑀦𑁆𑀥𑀕𑀦𑁆𑀥𑀁 𑀧𑀦 𑀕𑀳𑁂𑀢𑁆𑀯𑀸 𑀓𑀯𑀸𑀝𑁂 𑀧𑀜𑁆𑀘𑀗𑁆𑀕𑀼𑀮𑀺𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼𑀁.

𑁩𑁩. ‘‘𑀦, 𑀪𑀺𑀓𑁆𑀔𑀯𑁂, 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀬𑁄 𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁪) 𑀯𑀘𑀦𑀢𑁄 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑁂 𑀞𑀧𑁂𑀢𑁆𑀯𑀸 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀆𑀲𑀺𑀢𑁆𑀢𑀓𑀽𑀧𑀥𑀸𑀦𑀦𑁆𑀢𑀺 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀭𑀚𑀢𑁂𑀦 𑀯𑀸 𑀓𑀢𑀸𑀬 𑀧𑁂𑀴𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁, 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀦 𑀤𑀸𑀭𑀼𑀫𑀬𑀸𑀧𑀺 𑀦 𑀯𑀝𑁆𑀝𑀢𑀺.

𑁩𑁪. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀴𑁄𑀭𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁬𑁪) 𑀯𑀘𑀦𑀢𑁄 𑀫𑀴𑁄𑀭𑀺𑀓𑀸𑀬 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀴𑁄𑀭𑀺𑀓𑀸𑀢𑀺 𑀤𑀡𑁆𑀟𑀸𑀥𑀸𑀭𑀓𑁄 𑀯𑀼𑀘𑁆𑀘𑀢𑀺. 𑀬𑀝𑁆𑀞𑀺𑀆𑀥𑀸𑀭𑀓𑀧𑀡𑁆𑀡𑀸𑀥𑀸𑀭𑀓𑀧𑀘𑁆𑀙𑀺𑀓𑀧𑀻𑀞𑀸𑀤𑀻𑀦𑀺𑀧𑀺 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀸𑀦𑀺. 𑀆𑀥𑀸𑀭𑀓𑀲𑀗𑁆𑀔𑁂𑀧𑀕𑀫𑀦𑀢𑁄 𑀳𑀺 𑀧𑀝𑁆𑀞𑀸𑀬 𑀙𑀺𑀤𑁆𑀤𑀁 𑀯𑀺𑀤𑁆𑀥𑀫𑁆𑀧𑀺 𑀅𑀯𑀺𑀤𑁆𑀥𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁩𑁫. ‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑀪𑀸𑀚𑀦𑁂 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀬𑁄 𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺(𑀘𑀽𑀴𑀯. 𑁨𑁬𑁪) 𑀆𑀤𑀺𑀯𑀘𑀦𑀢𑁄 𑀦 𑀏𑀓𑀪𑀸𑀚𑀦𑁂 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀏𑀓𑀣𑀸𑀮𑀓𑁂 𑀧𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀏𑀓𑁄 𑀪𑀺𑀓𑁆𑀔𑀼 𑀪𑀸𑀚𑀦𑀢𑁄 𑀨𑀮𑀁 𑀯𑀸 𑀧𑀽𑀧𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀧𑀕𑀢𑁂 𑀇𑀢𑀭𑀲𑁆𑀲 𑀲𑁂𑀲𑀓𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀢𑀭𑀲𑁆𑀲𑀧𑀺 𑀢𑀲𑁆𑀫𑀺𑀁 𑀔𑀻𑀡𑁂 𑀧𑀼𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑀺𑀢𑀩𑁆𑀩𑀁, 𑀬𑁄 𑀢𑀼𑀯𑀝𑁆𑀝𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺(𑀘𑀽𑀴𑀯. 𑁨𑁬𑁪) 𑀆𑀤𑀺𑀯𑀘𑀦𑀢𑁄 𑀦 𑀏𑀓𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑀩𑁆𑀩𑀁, 𑀦 𑀏𑀓𑀢𑁆𑀣𑀭𑀡𑁂 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀯𑀯𑀢𑁆𑀣𑀸𑀦𑀁 𑀧𑀦 𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑁂 𑀓𑀸𑀲𑀸𑀯𑀁 𑀯𑀸 𑀓𑀢𑁆𑀢𑀭𑀬𑀝𑁆𑀞𑀺𑀁 𑀯𑀸 𑀅𑀦𑁆𑀢𑀫𑀲𑁄 𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀸𑀦𑀁 𑀅𑀦𑀸𑀧𑀢𑁆𑀢𑀺. 𑀏𑀓𑀧𑀸𑀯𑀼𑀭𑀡𑁂𑀳𑀺 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑁂𑀳𑀺 𑀘 𑀦 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀏𑀓𑀁 𑀅𑀢𑁆𑀣𑀭𑀡𑀜𑁆𑀘𑁂𑀯 𑀧𑀸𑀯𑀼𑀭𑀡𑀜𑁆𑀘 𑀏𑀢𑁂𑀲𑀦𑁆𑀢𑀺 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸. 𑀲𑀁𑀳𑀸𑀭𑀺𑀫𑀸𑀦𑀁 𑀧𑀸𑀯𑀸𑀭𑀢𑁆𑀣𑀭𑀡𑀓𑀝𑀲𑀸𑀭𑀓𑀸𑀤𑀻𑀦𑀁 𑀏𑀓𑀁 𑀅𑀦𑁆𑀢𑀁 𑀅𑀢𑁆𑀣𑀭𑀺𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

𑁩𑁬. ‘‘𑀦, 𑀪𑀺𑀓𑁆𑀔𑀯𑁂, 𑀘𑁂𑀮𑀧𑁆𑀧𑀝𑀺𑀓𑀸 𑀅𑀓𑁆𑀓𑀫𑀺𑀢𑀩𑁆𑀩𑀸, 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁮) 𑀯𑀘𑀦𑀢𑁄 𑀦 𑀘𑁂𑀮𑀲𑀦𑁆𑀣𑀸𑀭𑁄 𑀅𑀓𑁆𑀓𑀫𑀺𑀢𑀩𑁆𑀩𑁄, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀫𑀗𑁆𑀕𑀮𑀢𑁆𑀣𑀸𑀬 𑀬𑀸𑀘𑀺𑀬𑀫𑀸𑀦𑁂𑀦 𑀘𑁂𑀮𑀧𑁆𑀧𑀝𑀺𑀓𑀁 𑀅𑀓𑁆𑀓𑀫𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁬𑁮) 𑀯𑀘𑀦𑀢𑁄 𑀧𑀦 𑀓𑀸𑀘𑀺 𑀇𑀢𑁆𑀣𑀻 (𑀘𑀽𑀴𑀯. 𑀅𑀝𑁆𑀞. 𑁨𑁬𑁮) 𑀅𑀧𑀕𑀢𑀕𑀩𑁆𑀪𑀸 𑀯𑀸 𑀳𑁄𑀢𑀺 𑀕𑀭𑀼𑀕𑀩𑁆𑀪𑀸 𑀯𑀸, 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀫𑀗𑁆𑀕𑀮𑀢𑁆𑀣𑀸𑀬 𑀬𑀸𑀘𑀺𑀬𑀫𑀸𑀦𑁂𑀦 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀥𑁄𑀢𑀧𑀸𑀤𑀓𑀁 𑀅𑀓𑁆𑀓𑀫𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁬𑁮) 𑀯𑀘𑀦𑀢𑁄 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑁂 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑀢𑁆𑀣𑀸𑀬 𑀅𑀢𑁆𑀣𑀢𑀧𑀘𑁆𑀘𑀢𑁆𑀣𑀭𑀡𑀁 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺.

𑁩𑁭. ‘‘𑀦, 𑀪𑀺𑀓𑁆𑀔𑀯𑁂, 𑀓𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁯) 𑀯𑀘𑀦𑀢𑁄 𑀓𑀢𑀓𑀁 𑀦 𑀯𑀝𑁆𑀝𑀢𑀺. 𑀓𑀢𑀓𑀁 𑀦𑀸𑀫 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑀁 𑀧𑀸𑀤𑀖𑀁𑀲𑀦𑀢𑁆𑀣𑀁 𑀓𑀡𑁆𑀝𑀓𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀁. 𑀢𑀁 𑀯𑀝𑁆𑀝𑀁 𑀯𑀸 𑀳𑁄𑀢𑀼 𑀘𑀢𑀼𑀭𑀲𑁆𑀲𑀸𑀤𑀺𑀪𑁂𑀤𑀁 𑀯𑀸, 𑀩𑀸𑀳𑀼𑀮𑀺𑀓𑀸𑀦𑀼𑀬𑁄𑀕𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯, 𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀼𑀁, 𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀸𑀤𑀖𑀁𑀲𑀦𑀺𑀬𑁄 𑀲𑀓𑁆𑀔𑀭𑀁 𑀓𑀣𑀮𑀁 𑀲𑀫𑀼𑀤𑁆𑀤𑀨𑁂𑀡𑀓’’𑀦𑁆𑀢𑀺 (𑀘𑀽𑀴𑀯. 𑁨𑁬𑁯) 𑀯𑀘𑀦𑀢𑁄 𑀲𑀓𑁆𑀔𑀭𑀸𑀤𑀻𑀳𑀺 𑀧𑀸𑀤𑀖𑀁𑀲𑀦𑀁 𑀯𑀝𑁆𑀝𑀢𑀺. 𑀲𑀓𑁆𑀔𑀭𑀸𑀢𑀺 𑀧𑀸𑀲𑀸𑀡𑁄 𑀯𑀼𑀘𑁆𑀘𑀢𑀺, 𑀧𑀸𑀲𑀸𑀡𑀨𑁂𑀡𑀓𑁄𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁩𑁮. ‘‘𑀦, 𑀪𑀺𑀓𑁆𑀔𑀯𑁂, 𑀘𑀸𑀫𑀭𑀺𑀩𑀻𑀚𑀦𑀻 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁬𑁯) 𑀯𑀘𑀦𑀢𑁄 𑀘𑀸𑀫𑀭𑀺𑀯𑀸𑀮𑁂𑀳𑀺 𑀓𑀢𑀩𑀻𑀚𑀦𑀻 𑀦 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀓𑀲𑀩𑀻𑀚𑀦𑀺𑀁. 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀢𑀺𑀲𑁆𑀲𑁄 𑀩𑀻𑀚𑀦𑀺𑀬𑁄 𑀯𑀸𑀓𑀫𑀬𑀁 𑀉𑀲𑀻𑀭𑀫𑀬𑀁 𑀫𑁄𑀭𑀧𑀺𑀜𑁆𑀙𑀫𑀬𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀥𑀽𑀧𑀦𑀜𑁆𑀘 𑀢𑀸𑀮𑀯𑀡𑁆𑀝𑀜𑁆𑀘𑀸’’𑀢𑀺 (𑀘𑀽𑀴𑀯. 𑁨𑁬𑁯) 𑀯𑀘𑀦𑀢𑁄 𑀫𑀓𑀲𑀩𑀻𑀚𑀦𑀻𑀆𑀤𑀺 𑀯𑀝𑁆𑀝𑀢𑀺. 𑀢𑀢𑁆𑀣 𑀯𑀺𑀥𑀽𑀧𑀦𑀦𑁆𑀢𑀺 𑀩𑀻𑀚𑀦𑀻 𑀯𑀼𑀘𑁆𑀘𑀢𑀺. 𑀢𑀸𑀮𑀯𑀡𑁆𑀝𑀁 𑀧𑀦 𑀢𑀸𑀮𑀧𑀡𑁆𑀡𑁂𑀳𑀺 𑀯𑀸 𑀓𑀢𑀁 𑀳𑁄𑀢𑀼 𑀯𑁂𑀴𑀼𑀤𑀦𑁆𑀢𑀯𑀺𑀮𑀻𑀯𑁂𑀳𑀺 𑀯𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀯𑀸 𑀘𑀫𑁆𑀫𑀯𑀺𑀓𑀢𑀻𑀳𑀺 𑀯𑀸, 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀫𑀓𑀲𑀩𑀻𑀚𑀦𑀻 𑀤𑀦𑁆𑀢𑀫𑀬𑀯𑀺𑀲𑀸𑀡𑀫𑀬𑀤𑀡𑁆𑀟𑀓𑀸𑀧𑀺 𑀯𑀝𑁆𑀝𑀢𑀺. 𑀯𑀸𑀓𑀫𑀬𑀩𑀻𑀚𑀦𑀺𑀬𑀸 𑀓𑁂𑀢𑀓𑀧𑀸𑀭𑁄𑀳𑀓𑀼𑀦𑁆𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀸𑀧𑀺 𑀲𑀗𑁆𑀕𑀳𑀺𑀢𑀸.

𑁩𑁯. ‘‘𑀦, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀁 𑀥𑀸𑀭𑁂𑀢𑀩𑁆𑀩𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀙𑀢𑁆𑀢’’𑀦𑁆𑀢𑀺 (𑀘𑀽𑀴𑀯. 𑁨𑁭𑁦) 𑀯𑀘𑀦𑀢𑁄 𑀅𑀕𑀺𑀮𑀸𑀦𑁂𑀦 𑀙𑀢𑁆𑀢𑀁 𑀦 𑀥𑀸𑀭𑁂𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀓𑀸𑀬𑀟𑀸𑀳𑁄 𑀯𑀸 𑀧𑀺𑀢𑁆𑀢𑀓𑁄𑀧𑁄 𑀯𑀸 𑀳𑁄𑀢𑀺 𑀘𑀓𑁆𑀔𑀼 𑀯𑀸 𑀤𑀼𑀩𑁆𑀩𑀮𑀁, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀆𑀩𑀸𑀥𑁄 𑀯𑀺𑀦𑀸 𑀙𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀙𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀲𑁆𑀲𑁂 𑀧𑀦 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀫𑁆𑀧𑀺 𑀯𑀸𑀴𑀫𑀺𑀕𑀘𑁄𑀭𑀪𑀬𑁂𑀲𑀼 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀫𑁆𑀧𑀺 𑀯𑀝𑁆𑀝𑀢𑀺, 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁 𑀧𑀦 𑀲𑀩𑁆𑀩𑀢𑁆𑀣𑁂𑀯 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀕𑀺𑀮𑀸𑀦𑁂𑀦𑀧𑀺 𑀆𑀭𑀸𑀫𑁂 𑀆𑀭𑀸𑀫𑀽𑀧𑀘𑀸𑀭𑁂 𑀙𑀢𑁆𑀢𑀁 𑀥𑀸𑀭𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁦) 𑀯𑀘𑀦𑀢𑁄 𑀧𑀦 𑀅𑀕𑀺𑀮𑀸𑀦𑀲𑁆𑀲𑀧𑀺 𑀆𑀭𑀸𑀫𑀆𑀭𑀸𑀫𑀽𑀧𑀘𑀸𑀭𑁂𑀲𑀼 𑀙𑀢𑁆𑀢𑀁 𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀺.

𑁪𑁦. ‘‘𑀦, 𑀪𑀺𑀓𑁆𑀔𑀯𑁂, 𑀤𑀻𑀖𑀸 𑀦𑀔𑀸 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀁𑀲𑀧𑁆𑀧𑀫𑀸𑀡𑁂𑀦 𑀦𑀔𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁪) 𑀯𑀘𑀦𑀢𑁄 𑀤𑀻𑀖𑀸 𑀦𑀔𑀸 𑀙𑀺𑀦𑁆𑀤𑀺𑀢𑀩𑁆𑀩𑀸. ‘‘𑀦, 𑀪𑀺𑀓𑁆𑀔𑀯𑁂, 𑀯𑀻𑀲𑀢𑀺𑀫𑀝𑁆𑀞𑀁 𑀓𑀸𑀭𑀸𑀧𑁂𑀢𑀩𑁆𑀩𑀁, 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀮𑀫𑀢𑁆𑀢𑀁 𑀅𑀧𑀓𑀟𑁆𑀠𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁪) 𑀯𑀘𑀦𑀢𑁄 𑀯𑀻𑀲𑀢𑀺𑀧𑀺 𑀦𑀔𑁂 𑀮𑀺𑀔𑀺𑀢𑀫𑀝𑁆𑀞𑁂 𑀓𑀸𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀦𑀔𑀢𑁄 𑀫𑀮𑀫𑀢𑁆𑀢𑀁 𑀧𑀦 𑀅𑀧𑀓𑀟𑁆𑀠𑀺𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀩𑁆𑀩𑀁, 𑀬𑁄 𑀲𑀁𑀳𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁭𑁫) 𑀯𑀘𑀦𑀢𑁄 𑀕𑀡𑁆𑀟𑀯𑀡𑀸𑀤𑀺𑀆𑀩𑀸𑀥𑀁 𑀯𑀺𑀦𑀸 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀤𑀻𑀖𑀁 𑀦𑀸𑀲𑀺𑀓𑀸𑀮𑁄𑀫𑀁 𑀥𑀸𑀭𑁂𑀢𑀩𑁆𑀩𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁭𑁫) 𑀯𑀘𑀦𑀢𑁄 𑀲𑀡𑁆𑀟𑀸𑀲𑁂𑀦 𑀦𑀸𑀲𑀺𑀓𑀸𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀓𑁆𑀔𑀭𑀸𑀤𑀻𑀳𑀺 𑀦𑀸𑀲𑀺𑀓𑀸𑀮𑁄𑀫𑀁 𑀕𑀸𑀳𑀸𑀧𑀦𑁂𑀧𑀺 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀡𑁆𑀟𑀸𑀲’’𑀦𑁆𑀢𑀺 (𑀘𑀽𑀴𑀯. 𑁨𑁭𑁫) 𑀲𑀡𑁆𑀟𑀸𑀲𑁄 𑀅𑀦𑀼𑀜𑁆𑀜𑀸𑀢𑁄. ‘‘𑀦, 𑀪𑀺𑀓𑁆𑀔𑀯𑁂, 𑀧𑀮𑀺𑀢𑀁 𑀕𑀸𑀳𑀸𑀧𑁂𑀢𑀩𑁆𑀩𑀁, 𑀬𑁄 𑀕𑀸𑀳𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁭𑁫) 𑀯𑀘𑀦𑀢𑁄 𑀧𑀮𑀺𑀢𑀁 𑀕𑀸𑀳𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦 𑀪𑀫𑀼𑀓𑀸𑀬 𑀯𑀸 𑀦𑀮𑀸𑀝𑁂 𑀯𑀸 𑀤𑀸𑀞𑀺𑀓𑀸𑀬 𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀩𑀻𑀪𑀘𑁆𑀙𑀁 𑀳𑀼𑀢𑁆𑀯𑀸 𑀞𑀺𑀢𑀁, 𑀢𑀸𑀤𑀺𑀲𑀁 𑀮𑁄𑀫𑀁 𑀧𑀮𑀺𑀢𑀁 𑀯𑀸 𑀅𑀧𑀮𑀺𑀢𑀁 𑀯𑀸 𑀕𑀸𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑁪𑁧. ‘‘𑀦, 𑀪𑀺𑀓𑁆𑀔𑀯𑁂, 𑀅𑀓𑀸𑀬𑀩𑀦𑁆𑀥𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁭𑁮) 𑀯𑀘𑀦𑀢𑁄 𑀅𑀓𑀸𑀬𑀩𑀦𑁆𑀥𑀦𑁂𑀦 𑀕𑀸𑀫𑁄 𑀦 𑀧𑀯𑀺𑀲𑀺𑀢𑀩𑁆𑀩𑁄, 𑀅𑀩𑀦𑁆𑀥𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀬𑀢𑁆𑀣 𑀲𑀭𑀢𑀺, 𑀢𑀢𑁆𑀣 𑀩𑀦𑁆𑀥𑀺𑀢𑀩𑁆𑀩𑀁. ‘‘𑀆𑀲𑀦𑀲𑀸𑀮𑀸𑀬 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀲𑀭𑀺𑀢𑁆𑀯𑀸 𑀬𑀸𑀯 𑀦 𑀩𑀦𑁆𑀥𑀢𑀺, 𑀦 𑀢𑀸𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁.

𑁪𑁨. ‘‘𑀦, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀦𑀺𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀬𑁄 𑀦𑀺𑀯𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺(𑀘𑀽𑀴𑀯. 𑁨𑁮𑁦) 𑀆𑀤𑀺𑀯𑀘𑀦𑀢𑁄 𑀳𑀢𑁆𑀣𑀺𑀲𑁄𑀡𑁆𑀟𑀸𑀤𑀺𑀯𑀲𑁂𑀦 𑀕𑀺𑀳𑀺𑀦𑀺𑀯𑀢𑁆𑀣𑀁 𑀦 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀲𑁂𑀢𑀧𑀝𑀧𑀸𑀭𑀼𑀢𑀸𑀤𑀺𑀯𑀲𑁂𑀦 𑀦 𑀕𑀺𑀳𑀺𑀧𑀸𑀭𑀼𑀢𑀁 𑀧𑀸𑀭𑀼𑀧𑀺𑀢𑀩𑁆𑀩𑀁, 𑀫𑀮𑁆𑀮𑀓𑀫𑁆𑀫𑀓𑀭𑀸𑀤𑀬𑁄 𑀯𑀺𑀬 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀦 𑀦𑀺𑀯𑀸𑀲𑁂𑀢𑀩𑁆𑀩𑀁. 𑀏𑀯𑀁 𑀦𑀺𑀯𑀸𑀲𑁂𑀢𑀼𑀁 𑀕𑀺𑀮𑀸𑀦𑀲𑁆𑀲𑀧𑀺 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀧𑀺 𑀦 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁄𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀏𑀓𑀁 𑀓𑀸𑀲𑀸𑀯𑀁 𑀢𑀣𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀺 𑀅𑀧𑀭𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺. 𑀕𑀺𑀮𑀸𑀦𑁄 𑀧𑀦 𑀅𑀦𑁆𑀢𑁄𑀓𑀸𑀲𑀸𑀯𑀲𑁆𑀲 𑀑𑀯𑀝𑁆𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀭𑀁 𑀉𑀧𑀭𑀺 𑀦𑀺𑀯𑀸𑀲𑁂𑀢𑀼𑀁 𑀮𑀪𑀢𑀺, 𑀅𑀕𑀺𑀮𑀸𑀦𑁂𑀦 𑀤𑁆𑀯𑁂 𑀦𑀺𑀯𑀸𑀲𑁂𑀦𑁆𑀢𑁂𑀦 𑀲𑀕𑀼𑀡𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀸𑀦𑀺.

𑁪𑁩. ‘‘𑀦, 𑀪𑀺𑀓𑁆𑀔𑀯𑁂, 𑀉𑀪𑀢𑁄𑀓𑀸𑀚𑀁 𑀳𑀭𑀺𑀢𑀩𑁆𑀩𑀁, 𑀬𑁄 𑀳𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁧) 𑀯𑀘𑀦𑀢𑁄 𑀉𑀪𑀢𑁄𑀓𑀸𑀚𑀁 𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀢𑁄𑀓𑀸𑀚𑀁 𑀅𑀦𑁆𑀢𑀭𑀸𑀓𑀸𑀚𑀁 𑀲𑀻𑀲𑀪𑀸𑀭𑀁 𑀔𑀦𑁆𑀥𑀪𑀸𑀭𑀁 𑀓𑀝𑀺𑀪𑀸𑀭𑀁 𑀑𑀮𑀫𑁆𑀩𑀓’’𑀦𑁆𑀢𑀺 𑀯𑀘𑀦𑀢𑁄 𑀏𑀓𑀢𑁄𑀓𑀸𑀚𑀸𑀤𑀺𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺.

𑁪𑁪. ‘‘𑀦, 𑀪𑀺𑀓𑁆𑀔𑀯𑁂, 𑀤𑀻𑀖𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑀩𑁆𑀩𑀁, 𑀬𑁄 𑀔𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁮𑁨) 𑀯𑀘𑀦𑀢𑁄 𑀦 𑀤𑀻𑀖𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑀩𑁆𑀩𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀤𑀦𑁆𑀢𑀓𑀝𑁆𑀞𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀭𑀗𑁆𑀕𑀼𑀮𑀧𑀘𑁆𑀙𑀺𑀫𑀁 𑀤𑀦𑁆𑀢𑀓𑀝𑁆𑀞’’𑀦𑁆𑀢𑀺 (𑀘𑀽𑀴𑀯. 𑁨𑁮𑁨) 𑀯𑀘𑀦𑀢𑁄 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀡𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀘𑀢𑀼𑀭𑀗𑁆𑀕𑀼𑀮𑀧𑀘𑁆𑀙𑀺𑀫𑀜𑁆𑀘 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑀩𑁆𑀩𑀁.

𑁪𑁫. ‘‘𑀦, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑁄 𑀅𑀪𑀺𑀭𑀼𑀳𑀺𑀢𑀩𑁆𑀩𑁄, 𑀬𑁄 𑀅𑀪𑀺𑀭𑀼𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀓𑀭𑀡𑀻𑀬𑁂 𑀧𑁄𑀭𑀺𑀲𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀼𑀁 𑀆𑀧𑀤𑀸𑀲𑀼 𑀬𑀸𑀯𑀤𑀢𑁆𑀣’’𑀦𑁆𑀢𑀺 (𑀘𑀽𑀴𑀯. 𑁨𑁮𑁪) 𑀯𑀘𑀦𑀢𑁄 𑀦 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀩𑁆𑀩𑀁, 𑀲𑀼𑀓𑁆𑀔𑀓𑀝𑁆𑀞𑀕𑀳𑀡𑀸𑀤𑀺𑀓𑀺𑀘𑁆𑀘𑁂 𑀧𑀦 𑀲𑀢𑀺 𑀧𑀼𑀭𑀺𑀲𑀧𑁆𑀧𑀫𑀸𑀡𑀁 𑀅𑀪𑀺𑀭𑀼𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀆𑀧𑀤𑀸𑀲𑀽𑀢𑀺 𑀯𑀸𑀴𑀫𑀺𑀕𑀸𑀤𑀬𑁄 𑀯𑀸 𑀤𑀺𑀲𑁆𑀯𑀸 𑀫𑀕𑁆𑀕𑀫𑀽𑀴𑁆𑀳𑁄 𑀯𑀸 𑀤𑀺𑀲𑀸 𑀑𑀮𑁄𑀓𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀤𑀯𑀟𑀸𑀳𑀁 𑀯𑀸 𑀉𑀤𑀓𑁄𑀖𑀁 𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀅𑀢𑀺𑀉𑀘𑁆𑀘𑀫𑁆𑀧𑀺 𑀭𑀼𑀓𑁆𑀔𑀁 𑀆𑀭𑁄𑀳𑀺𑀢𑀼𑀁 𑀯𑀝𑁆𑀝𑀢𑀺.

𑁪𑁬. ‘‘𑀦, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀯𑀘𑀦𑀁 𑀙𑀦𑁆𑀤𑀲𑁄 𑀆𑀭𑁄𑀧𑁂𑀢𑀩𑁆𑀩𑀁, 𑀬𑁄 𑀆𑀭𑁄𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀓𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁫) 𑀯𑀘𑀦𑀢𑁄 𑀯𑁂𑀤𑀁 𑀯𑀺𑀬 𑀩𑀼𑀤𑁆𑀥𑀯𑀘𑀦𑀁 𑀲𑀓𑁆𑀓𑀝𑀪𑀸𑀲𑀸𑀬 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀓𑀸𑀬 𑀧𑀦 𑀫𑀸𑀕𑀥𑀺𑀓𑀸𑀬 𑀦𑀺𑀭𑀼𑀢𑁆𑀢𑀺𑀬𑀸 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁.

𑁪𑁭. ‘‘𑀦, 𑀪𑀺𑀓𑁆𑀔𑀯𑁂, 𑀮𑁄𑀓𑀸𑀬𑀢𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁, 𑀬𑁄 𑀧𑀭𑀺𑀬𑀸𑀧𑀼𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺(𑀘𑀊𑀴𑀯. 𑁨𑁮𑁬) 𑀆𑀤𑀺𑀯𑀘𑀦𑀢𑁄 𑀮𑁄𑀓𑀸𑀬𑀢𑀲𑀗𑁆𑀔𑀸𑀢𑀁 ‘‘𑀲𑀩𑁆𑀩𑀁 𑀉𑀘𑁆𑀙𑀺𑀝𑁆𑀞𑀁, 𑀲𑀩𑁆𑀩𑀁 𑀅𑀦𑀼𑀘𑁆𑀙𑀺𑀝𑁆𑀞𑀁, 𑀲𑁂𑀢𑁄 𑀓𑀸𑀓𑁄, 𑀓𑀸𑀴𑁄 𑀩𑀓𑁄 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀓𑀸𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀲𑀢𑁆𑀣𑀁 𑀦𑁂𑀯 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁, 𑀦 𑀧𑀭𑀲𑁆𑀲 𑀯𑀸𑀘𑁂𑀢𑀩𑁆𑀩𑀁. 𑀦 𑀘 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸, 𑀦 𑀧𑀭𑀲𑁆𑀲 𑀯𑀸𑀘𑁂𑀢𑀩𑁆𑀩𑀸.

𑁪𑁮. ‘‘𑀦, 𑀪𑀺𑀓𑁆𑀔𑀯𑁂, 𑀔𑀺𑀧𑀺𑀢𑁂 ‘𑀚𑀻𑀯𑀸’𑀢𑀺 𑀯𑀢𑁆𑀢𑀩𑁆𑀩𑁄, 𑀬𑁄 𑀯𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 ‘𑀚𑀻𑀯𑀣 𑀪𑀦𑁆𑀢𑁂’𑀢𑀺 𑀯𑀼𑀘𑁆𑀘𑀫𑀸𑀦𑁂𑀦 ‘𑀘𑀺𑀭𑀁 𑀚𑀻𑀯𑀸’𑀢𑀺 𑀯𑀢𑁆𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁮) 𑀯𑀘𑀦𑀢𑁄 𑀔𑀺𑀧𑀺𑀢𑁂 ‘‘𑀚𑀻𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀕𑀺𑀳𑀺𑀦𑀸 𑀧𑀦 ‘‘𑀚𑀻𑀯𑀣𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀦 ‘‘𑀘𑀺𑀭𑀁 𑀚𑀻𑀯𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁪𑁯. ‘‘𑀦, 𑀪𑀺𑀓𑁆𑀔𑀯𑁂, 𑀮𑀲𑀼𑀡𑀁 𑀔𑀸𑀤𑀺𑀢𑀩𑁆𑀩𑀁, 𑀬𑁄 𑀔𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀩𑀸𑀥𑀧𑀘𑁆𑀘𑀬𑀸 𑀮𑀲𑀼𑀡𑀁 𑀔𑀸𑀤𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁮𑁯) 𑀯𑀘𑀦𑀢𑁄 𑀆𑀩𑀸𑀥𑀁 𑀯𑀺𑀦𑀸 𑀮𑀲𑀼𑀡𑀁 𑀔𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀽𑀧𑀲𑀫𑁆𑀧𑀸𑀓𑀸𑀤𑀻𑀲𑀼 (𑀧𑀸𑀘𑀺. 𑀅𑀝𑁆𑀞. 𑁭𑁯𑁭) 𑀧𑀓𑁆𑀔𑀺𑀢𑁆𑀢𑀁 𑀧𑀦 𑀯𑀝𑁆𑀝𑀢𑀺. 𑀢𑀜𑁆𑀳𑀺 𑀧𑀘𑁆𑀘𑀫𑀸𑀦𑁂𑀲𑀼 𑀫𑀼𑀕𑁆𑀕𑀲𑀽𑀧𑀸𑀤𑀻𑀲𑀼 𑀯𑀸 𑀫𑀘𑁆𑀙𑀫𑀁𑀲𑀯𑀺𑀓𑀢𑀺𑀬𑀸 𑀯𑀸 𑀢𑁂𑀮𑁂 𑀯𑀸 𑀩𑀤𑀭𑀲𑀸𑀴𑀯𑀸𑀤𑀻𑀲𑀼 𑀯𑀸 𑀅𑀫𑁆𑀩𑀺𑀮𑀲𑀸𑀓𑀸𑀤𑀻𑀲𑀼 𑀯𑀸 𑀉𑀢𑁆𑀢𑀭𑀺𑀪𑀗𑁆𑀕𑁂𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀬𑀸𑀕𑀼𑀪𑀢𑁆𑀢𑁂𑀧𑀺 𑀧𑀓𑁆𑀔𑀺𑀢𑁆𑀢𑀁 𑀯𑀝𑁆𑀝𑀢𑀺.

𑁫𑁦. ‘‘𑀦, 𑀪𑀺𑀓𑁆𑀔𑀯𑁂, 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁, 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀦𑀸𑀲𑀦𑀁 𑀧𑀭𑀺𑀓𑀫𑁆𑀫𑀓𑀢𑀸 𑀯𑀸 𑀪𑀽𑀫𑀺 𑀦 𑀅𑀓𑁆𑀓𑀫𑀺𑀢𑀩𑁆𑀩𑀸. ‘‘𑀦, 𑀪𑀺𑀓𑁆𑀔𑀯𑁂, 𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁, 𑀬𑁄 𑀅𑀓𑁆𑀓𑀫𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀬𑁂𑀳𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁪) 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀭𑀽𑀧𑁂𑀳𑀺 𑀅𑀮𑁆𑀮𑀧𑀸𑀤𑁂𑀳𑀺 𑀧𑀭𑀺𑀪𑀡𑁆𑀟𑀓𑀢𑀸 𑀪𑀽𑀫𑀺 𑀯𑀸 𑀲𑁂𑀦𑀸𑀲𑀦𑀁 𑀯𑀸 𑀦 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀤𑀓𑀲𑀺𑀦𑁂𑀳𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀉𑀤𑀓𑀁, 𑀯𑀝𑁆𑀝𑀢𑀺. 𑀧𑀸𑀤𑀧𑀼𑀜𑁆𑀙𑀦𑀺𑀁 𑀧𑀦 𑀅𑀮𑁆𑀮𑀧𑀸𑀤𑁂𑀳𑀺𑀧𑀺 𑀅𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. ‘‘𑀦, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀳𑀦𑁂𑀦 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁, 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀲𑀉𑀧𑀸𑀳𑀦𑁂𑀦 𑀅𑀓𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀝𑁆𑀞𑀼𑀪𑀺𑀢𑀩𑁆𑀩𑀁, 𑀬𑁄 𑀦𑀺𑀝𑁆𑀞𑀼𑀪𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦 𑀦𑀺𑀝𑁆𑀞𑀼𑀪𑀺𑀢𑀩𑁆𑀩𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑁂𑀴𑀫𑀮𑁆𑀮𑀓’’𑀦𑁆𑀢𑀺 (𑀘𑀽𑀴𑀯. 𑁩𑁨𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑁂 𑀔𑁂𑀴𑀫𑀮𑁆𑀮𑀓𑁂 𑀦𑀺𑀝𑁆𑀞𑀼𑀪𑀺𑀢𑀩𑁆𑀩𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑁄𑀴𑀓𑁂𑀦 𑀧𑀮𑀺𑀯𑁂𑀞𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀲𑀼𑀥𑀸𑀪𑀽𑀫𑀺𑀬𑀸 𑀯𑀸 𑀧𑀭𑀺𑀪𑀡𑁆𑀟𑀪𑀽𑀫𑀺𑀬𑀸 𑀯𑀸 𑀫𑀜𑁆𑀘𑀧𑀻𑀞𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀲𑀘𑁂 𑀢𑀝𑁆𑀝𑀺𑀓𑀸 𑀯𑀸 𑀓𑀝𑀲𑀸𑀭𑀓𑁄 𑀯𑀸 𑀦𑀢𑁆𑀣𑀺, 𑀘𑁄𑀴𑀓𑁂𑀦 𑀫𑀜𑁆𑀘𑀧𑀻𑀞𑀸𑀦𑀁 𑀧𑀸𑀤𑀸 𑀯𑁂𑀞𑁂𑀢𑀩𑁆𑀩𑀸, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀡𑁆𑀡𑀫𑁆𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀜𑁆𑀘𑀺 𑀅𑀦𑀢𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲 𑀧𑀦 𑀤𑀼𑀓𑁆𑀓𑀝𑀁. 𑀬𑀤𑀺 𑀧𑀦 𑀢𑀢𑁆𑀣 𑀦𑁂𑀯𑀸𑀲𑀺𑀓𑀸 𑀅𑀦𑀢𑁆𑀣𑀢𑀸𑀬 𑀪𑀽𑀫𑀺𑀬𑀸𑀧𑀺 𑀞𑀧𑁂𑀦𑁆𑀢𑀺, 𑀅𑀥𑁄𑀢𑀧𑀸𑀤𑁂𑀳𑀺𑀧𑀺 𑀯𑀴𑀜𑁆𑀚𑁂𑀦𑁆𑀢𑀺, 𑀢𑀣𑁂𑀯 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀅𑀧𑀲𑁆𑀲𑁂𑀢𑀩𑁆𑀩𑀸, 𑀬𑁄 𑀅𑀧𑀲𑁆𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁨𑁪) 𑀯𑀘𑀦𑀢𑁄 𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀲𑁂𑀢𑀪𑀺𑀢𑁆𑀢𑀺 𑀯𑀸 𑀳𑁄𑀢𑀼 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀯𑀸, 𑀦 𑀅𑀧𑀲𑁆𑀲𑁂𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀪𑀺𑀢𑁆𑀢𑀺𑀫𑁂𑀯, 𑀤𑁆𑀯𑀸𑀭𑀫𑁆𑀧𑀺 𑀯𑀸𑀢𑀧𑀸𑀦𑀫𑁆𑀧𑀺 𑀅𑀧𑀲𑁆𑀲𑁂𑀦𑀨𑀮𑀓𑀫𑁆𑀧𑀺 𑀧𑀸𑀲𑀸𑀡𑀢𑁆𑀣𑀫𑁆𑀪𑀫𑁆𑀧𑀺 𑀭𑀼𑀓𑁆𑀔𑀢𑁆𑀣𑀫𑁆𑀪𑀫𑁆𑀧𑀺 𑀘𑀻𑀯𑀭𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀧𑀲𑁆𑀲𑀺𑀢𑀼𑀁 𑀦 𑀮𑀪𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁫) 𑀯𑀘𑀦𑀢𑁄 𑀧𑀦 𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀁, 𑀧𑀭𑀺𑀪𑀡𑁆𑀟𑀓𑀢𑀁 𑀪𑀽𑀫𑀺𑀁 𑀯𑀸 𑀪𑀽𑀫𑀢𑁆𑀣𑀭𑀡𑀁 𑀲𑁂𑀦𑀸𑀲𑀦𑀁 𑀯𑀸 𑀲𑀗𑁆𑀖𑀺𑀓𑀫𑀜𑁆𑀘𑀧𑀻𑀞𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀘𑁆𑀘𑀢𑁆𑀣𑀭𑀡𑁂𑀦 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀦𑀺𑀤𑁆𑀤𑀸𑀬𑀢𑁄𑀧𑀺 𑀧𑀘𑁆𑀘𑀢𑁆𑀣𑀭𑀡𑁂 𑀲𑀗𑁆𑀓𑀼𑀝𑀺𑀢𑁂 𑀓𑁄𑀘𑀺 𑀲𑀭𑀻𑀭𑀸𑀯𑀬𑀯𑁄 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀨𑀼𑀲𑀢𑀺, 𑀆𑀧𑀢𑁆𑀢𑀺𑀬𑁂𑀯, 𑀮𑁄𑀫𑁂𑀲𑀼 𑀧𑀦 𑀨𑀼𑀲𑀦𑁆𑀢𑁂𑀲𑀼 𑀮𑁄𑀫𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀧𑀲𑁆𑀲𑀬𑀦𑁆𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑀢𑀮𑀧𑀸𑀤𑀢𑀮𑁂𑀳𑀺 𑀧𑀦 𑀨𑀼𑀲𑀺𑀢𑀼𑀁 𑀅𑀓𑁆𑀓𑀫𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀳𑀭𑀦𑁆𑀢𑀲𑁆𑀲 𑀓𑀸𑀬𑁂 𑀧𑀝𑀺𑀳𑀜𑁆𑀜𑀢𑀺, 𑀅𑀦𑀸𑀧𑀢𑁆𑀢𑀺.

𑁫𑁧. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀯𑀦𑁆𑀤𑀺𑀬𑀸. 𑀧𑀼𑀭𑁂𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀘𑁆𑀙𑀼𑀧𑀲𑀫𑁆𑀧𑀦𑁆𑀦𑁄 𑀅𑀯𑀦𑁆𑀤𑀺𑀬𑁄, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀯𑀦𑁆𑀤𑀺𑀬𑁄, 𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀅𑀥𑀫𑁆𑀫𑀯𑀸𑀤𑀻 𑀅𑀯𑀦𑁆𑀤𑀺𑀬𑁄, 𑀫𑀸𑀢𑀼𑀕𑀸𑀫𑁄 𑀅𑀯𑀦𑁆𑀤𑀺𑀬𑁄, 𑀧𑀡𑁆𑀟𑀓𑁄 𑀅𑀯𑀦𑁆𑀤𑀺𑀬𑁄, 𑀧𑀸𑀭𑀺𑀯𑀸𑀲𑀺𑀓𑁄 𑀅𑀯𑀦𑁆𑀤𑀺𑀬𑁄, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀅𑀯𑀦𑁆𑀤𑀺𑀬𑁄, 𑀫𑀸𑀦𑀢𑁆𑀢𑀸𑀭𑀳𑁄 𑀅𑀯𑀦𑁆𑀤𑀺𑀬𑁄, 𑀫𑀸𑀦𑀢𑁆𑀢𑀘𑀸𑀭𑀺𑀓𑁄 𑀅𑀯𑀦𑁆𑀤𑀺𑀬𑁄, 𑀅𑀩𑁆𑀪𑀸𑀦𑀸𑀭𑀳𑁄 𑀅𑀯𑀦𑁆𑀤𑀺𑀬𑁄’’𑀢𑀺 (𑀘𑀽𑀴𑀯. 𑁩𑁧𑁨) 𑀯𑀘𑀦𑀢𑁄 𑀇𑀫𑁂 𑀤𑀲 𑀅𑀯𑀦𑁆𑀤𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀧𑀘𑁆𑀙𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑁂𑀉𑀧𑀲𑀫𑁆𑀧𑀦𑁆𑀦𑁄 𑀯𑀦𑁆𑀤𑀺𑀬𑁄, 𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀥𑀫𑁆𑀫𑀯𑀸𑀤𑀻 𑀯𑀦𑁆𑀤𑀺𑀬𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀦𑁆𑀤𑀺𑀬𑁄’’𑀢𑀺 (𑀘𑀽𑀴𑀯. 𑁩𑁧𑁨) 𑁋 𑀯𑀘𑀦𑀢𑁄 𑀇𑀫𑁂 𑀢𑀬𑁄 𑀯𑀦𑁆𑀤𑀺𑀢𑀩𑁆𑀩𑀸.

𑁫𑁨. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀢𑀽𑀮𑀸𑀦𑀺 𑀭𑀼𑀓𑁆𑀔𑀢𑀽𑀮𑀁 𑀮𑀢𑀸𑀢𑀽𑀮𑀁 𑀧𑁄𑀝𑀓𑀻𑀢𑀽𑀮’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀇𑀫𑀸𑀦𑀺 𑀢𑀻𑀡𑀺 𑀢𑀽𑀮𑀸𑀦𑀺 𑀓𑀧𑁆𑀧𑀺𑀬𑀸𑀦𑀺. 𑀢𑀢𑁆𑀣 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭) 𑀭𑀼𑀓𑁆𑀔𑀢𑀽𑀮𑀦𑁆𑀢𑀺 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀭𑀼𑀓𑁆𑀔𑀸𑀦𑀁 𑀢𑀽𑀮𑀁. 𑀮𑀢𑀸𑀢𑀽𑀮𑀦𑁆𑀢𑀺 𑀔𑀻𑀭𑀯𑀮𑁆𑀮𑀺𑀆𑀤𑀻𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀯𑀮𑁆𑀮𑀻𑀦𑀁 𑀢𑀽𑀮𑀁. 𑀧𑁄𑀝𑀓𑀻𑀢𑀽𑀮𑀦𑁆𑀢𑀺 𑀧𑁄𑀝𑀓𑀻𑀢𑀺𑀡𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦𑀁 𑀅𑀦𑁆𑀢𑀫𑀲𑁄 𑀉𑀘𑁆𑀙𑀼𑀦𑀴𑀸𑀤𑀻𑀦𑀫𑁆𑀧𑀺 𑀢𑀽𑀮𑀁. 𑀏𑀢𑁂𑀳𑀺 𑀢𑀻𑀳𑀺 𑀲𑀩𑁆𑀩𑀪𑀽𑀢𑀕𑀸𑀫𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀭𑀼𑀓𑁆𑀔𑀯𑀮𑁆𑀮𑀺𑀢𑀺𑀡𑀚𑀸𑀢𑀺𑀬𑁄 𑀳𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀪𑀽𑀢𑀕𑀸𑀫𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀽𑀢𑀕𑀸𑀫𑀲𑁆𑀲 𑀢𑀽𑀮𑀁 𑀩𑀺𑀫𑁆𑀩𑁄𑀳𑀦𑁂 𑀯𑀝𑁆𑀝𑀢𑀺. 𑀪𑀺𑀲𑀺𑀁 𑀧𑀦 𑀧𑀸𑀧𑀼𑀡𑀺𑀢𑁆𑀯𑀸 𑀲𑀩𑁆𑀩𑀫𑁂𑀢𑀁 𑀅𑀓𑀧𑁆𑀧𑀺𑀬𑀢𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀓𑁂𑀯𑀮𑀜𑁆𑀘 𑀩𑀺𑀫𑁆𑀩𑁄𑀳𑀦𑁂 𑀏𑀢𑀁 𑀢𑀽𑀮𑀫𑁂𑀯, 𑀳𑀁𑀲𑀫𑁄𑀭𑀸𑀤𑀻𑀦𑀁 𑀲𑀩𑁆𑀩𑀲𑀓𑀼𑀡𑀸𑀦𑀁 𑀲𑀻𑀳𑀸𑀤𑀻𑀦𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀜𑁆𑀘 𑀮𑁄𑀫𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀺𑀬𑀗𑁆𑀕𑀼𑀧𑀼𑀧𑁆𑀨𑀩𑀓𑀼𑀮𑀧𑀼𑀧𑁆𑀨𑀸𑀤𑀻𑀦𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀦 𑀯𑀝𑁆𑀝𑀢𑀺. 𑀢𑀫𑀸𑀮𑀧𑀢𑁆𑀢𑀁 𑀲𑀼𑀤𑁆𑀥𑀫𑁂𑀯 𑀦 𑀯𑀝𑁆𑀝𑀢𑀺, 𑀫𑀺𑀲𑁆𑀲𑀓𑀁 𑀧𑀦 𑀯𑀝𑁆𑀝𑀢𑀺, 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀯𑀺𑀥𑀁 𑀉𑀡𑁆𑀡𑀸𑀤𑀺𑀢𑀽𑀮𑀫𑁆𑀧𑀺 𑀯𑀝𑁆𑀝𑀢𑀺.

𑁫𑁩. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀪𑀺𑀲𑀺𑀬𑁄 𑀉𑀡𑁆𑀡𑀪𑀺𑀲𑀺𑀁 𑀘𑁄𑀴𑀪𑀺𑀲𑀺𑀁 𑀯𑀸𑀓𑀪𑀺𑀲𑀺𑀁 𑀢𑀺𑀡𑀪𑀺𑀲𑀺𑀁 𑀧𑀡𑁆𑀡𑀪𑀺𑀲𑀺’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀧𑀜𑁆𑀘𑀳𑀺 𑀉𑀡𑁆𑀡𑀸𑀤𑀻𑀳𑀺 𑀧𑀽𑀭𑀺𑀢𑀸 𑀧𑀜𑁆𑀘 𑀪𑀺𑀲𑀺𑀬𑁄 𑀅𑀦𑀼𑀜𑁆𑀜𑀸𑀢𑀸. 𑀢𑀽𑀮𑀕𑀡𑀦𑀸𑀬 𑀳𑀺 𑀏𑀢𑀸𑀲𑀁 𑀕𑀡𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀉𑀡𑁆𑀡𑀕𑁆𑀕𑀳𑀡𑁂𑀦 𑀦 𑀓𑁂𑀯𑀮𑀁 𑀏𑀴𑀓𑀮𑁄𑀫𑀫𑁂𑀯 𑀕𑀳𑀺𑀢𑀁, 𑀞𑀧𑁂𑀢𑁆𑀯𑀸 𑀧𑀦 𑀫𑀦𑀼𑀲𑁆𑀲𑀮𑁄𑀫𑀁 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀚𑀸𑀢𑀻𑀦𑀁 𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁 𑀮𑁄𑀫𑀁 𑀲𑀩𑁆𑀩𑀁 𑀇𑀥 𑀉𑀡𑁆𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁. 𑀢𑀲𑁆𑀫𑀸 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀙𑀦𑁆𑀦𑀁 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀜𑁆𑀘 𑀅𑀜𑁆𑀜𑀢𑀭𑁂𑀦 𑀪𑀺𑀲𑀺𑀘𑁆𑀙𑀯𑀺𑀁 𑀓𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀲𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀴𑀓𑀮𑁄𑀫𑀸𑀦𑀺 𑀧𑀦 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀫𑁆𑀩𑀮𑀫𑁂𑀯 𑀘𑀢𑀼𑀕𑁆𑀕𑀼𑀡𑀁 𑀧𑀜𑁆𑀘𑀕𑀼𑀡𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸𑀧𑀺 𑀉𑀡𑁆𑀡𑀪𑀺𑀲𑀺𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.

𑀘𑁄𑀴𑀪𑀺𑀲𑀺𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀦𑀯𑀘𑁄𑀴𑀁 𑀯𑀸 𑀧𑀼𑀭𑀸𑀡𑀘𑁄𑀴𑀁 𑀯𑀸 𑀲𑀁𑀳𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀓𑀢𑀸 𑀘𑁄𑀴𑀪𑀺𑀲𑀺. 𑀬𑀁 𑀓𑀺𑀜𑁆𑀘𑀺 𑀯𑀸𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀯𑀸𑀓𑀪𑀺𑀲𑀺. 𑀬𑀁 𑀓𑀺𑀜𑁆𑀘𑀺 𑀢𑀺𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀢𑀺𑀡𑀪𑀺𑀲𑀺. 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀢𑀫𑀸𑀮𑀧𑀢𑁆𑀢𑀸 𑀬𑀁 𑀓𑀺𑀜𑁆𑀘𑀺 𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀧𑀡𑁆𑀡𑀪𑀺𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀫𑀸𑀮𑀧𑀢𑁆𑀢𑀁 𑀧𑀦 𑀅𑀜𑁆𑀜𑁂𑀦 𑀫𑀺𑀲𑁆𑀲𑀫𑁂𑀯 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀬𑀁 𑀧𑀦𑁂𑀢𑀁 𑀉𑀡𑁆𑀡𑀸𑀤𑀺𑀧𑀜𑁆𑀘𑀯𑀺𑀥𑀁 𑀢𑀽𑀮𑀁 𑀪𑀺𑀲𑀺𑀬𑀁 𑀯𑀝𑁆𑀝𑀢𑀺, 𑀢𑀁 𑀫𑀲𑀽𑀭𑀓𑁂𑀧𑀺 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀫𑀲𑀽𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀪𑀺𑀲𑀺𑀬𑀸 𑀧𑀫𑀸𑀡𑀦𑀺𑀬𑀫𑁄 𑀦𑀢𑁆𑀣𑀺, 𑀫𑀜𑁆𑀘𑀪𑀺𑀲𑀺 𑀧𑀻𑀞𑀪𑀺𑀲𑀺 𑀪𑀽𑀫𑀢𑁆𑀣𑀭𑀡𑀪𑀺𑀲𑀺 𑀘𑀗𑁆𑀓𑀫𑀦𑀪𑀺𑀲𑀺 𑀧𑀸𑀤𑀧𑀼𑀜𑁆𑀙𑀦𑀪𑀺𑀲𑀻𑀢𑀺 𑀏𑀢𑀸𑀲𑀁 𑀅𑀦𑀼𑀭𑀽𑀧𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁. 𑀩𑀺𑀫𑁆𑀩𑁄𑀳𑀦𑀁 𑀧𑀦 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀯𑀝𑁆𑀝𑀢𑀺.

𑁫𑁪. ‘‘𑀦, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀸𑀬𑀺𑀓𑀸𑀦𑀺 𑀩𑀺𑀫𑁆𑀩𑁄𑀳𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁯𑁭) 𑀬𑁂𑀲𑀼 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀧𑀤𑀳𑀦𑁆𑀢𑀺, 𑀢𑀸𑀤𑀺𑀲𑀸𑀦𑀺 𑀉𑀧𑀟𑁆𑀠𑀓𑀸𑀬𑀧𑁆𑀧𑀫𑀸𑀡𑀸𑀦𑀺 𑀩𑀺𑀫𑁆𑀩𑁄𑀳𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀲𑀧𑁆𑀧𑀫𑀸𑀡𑀁 𑀩𑀺𑀫𑁆𑀩𑁄𑀳𑀦’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀲𑀻𑀲𑀧𑁆𑀧𑀫𑀸𑀡𑀁 𑀅𑀦𑀼𑀜𑁆𑀜𑀸𑀢𑀁. 𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀺𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺. ‘‘𑀤𑀻𑀖𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀯𑀸 𑀤𑁆𑀯𑀺𑀭𑀢𑀦𑀁 𑀯𑀸’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀲𑀻𑀲𑀧𑁆𑀧𑀫𑀸𑀡𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀇𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀯𑀝𑁆𑀝𑀢𑀺. 𑀅𑀕𑀺𑀮𑀸𑀦𑀲𑁆𑀲 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀤𑁆𑀯𑀬𑀫𑁂𑀯 𑀯𑀝𑁆𑀝𑀢𑀺, 𑀕𑀺𑀮𑀸𑀦𑀲𑁆𑀲 𑀩𑀺𑀫𑁆𑀩𑁄𑀳𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀬𑀸𑀦𑀺 𑀧𑀦 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀬𑀢𑀽𑀮𑀸𑀦𑀺, 𑀢𑁂𑀳𑀺 𑀩𑀺𑀫𑁆𑀩𑁄𑀳𑀦𑀁 𑀫𑀳𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀆𑀳. 𑀯𑀺𑀦𑀬𑀥𑀭𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀩𑀺𑀫𑁆𑀩𑁄𑀳𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀓𑀧𑁆𑀧𑀺𑀬𑀢𑀽𑀮𑀁 𑀯𑀸 𑀅𑀓𑀧𑁆𑀧𑀺𑀬𑀢𑀽𑀮𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀆𑀳.

𑁫𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀲𑀦𑁆𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀘𑀢𑀼𑀭𑀲𑁆𑀲𑀧𑀻𑀞𑀲𑀗𑁆𑀔𑀸𑀢𑁄 𑀆𑀲𑀦𑁆𑀤𑀺𑀓𑁄 𑀯𑀝𑁆𑀝𑀢𑀺, 𑀲𑁄 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀅𑀝𑁆𑀞𑀗𑁆𑀕𑀼𑀮𑀢𑁄 𑀉𑀘𑁆𑀘𑀧𑀸𑀤𑀓𑁄𑀧𑀺 𑀯𑀝𑁆𑀝𑀢𑀺. 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀫𑁂𑀯 𑀳𑀺 𑀅𑀝𑁆𑀞𑀗𑁆𑀕𑀼𑀮𑀢𑁄 𑀉𑀘𑁆𑀘𑀧𑀸𑀤𑀓𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀘𑀢𑀼𑀭𑀲𑁆𑀲𑀧𑀻𑀞𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀗𑁆𑀕’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀓𑀢𑀫𑀜𑁆𑀘𑁄𑀧𑀺 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀓𑀫𑁆𑀧𑀺 𑀲𑀢𑁆𑀢𑀗𑁆𑀕’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀅𑀬𑀫𑁆𑀧𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄 𑀘 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀧𑀻𑀞’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁯𑁭) 𑀧𑀸𑀴𑀺𑀬𑀁 𑀅𑀦𑀼𑀜𑁆𑀜𑀸𑀢𑀁 𑀯𑁂𑀢𑁆𑀢𑀫𑀬𑀧𑀻𑀞𑀁 𑀧𑀺𑀮𑁄𑀢𑀺𑀓𑀸𑀩𑀤𑁆𑀥𑀧𑀻𑀞𑀁 𑀤𑀸𑀭𑀼𑀧𑀝𑁆𑀝𑀺𑀓𑀸𑀬 𑀉𑀧𑀭𑀺 𑀧𑀸𑀤𑁂 𑀞𑀧𑁂𑀢𑁆𑀯𑀸 𑀪𑁄𑀚𑀦𑀨𑀮𑀓𑀁 𑀯𑀺𑀬 𑀓𑀢𑀁 𑀏𑀴𑀓𑀧𑀸𑀤𑀧𑀻𑀞𑀁 𑀆𑀫𑀮𑀓𑀸𑀓𑀸𑀭𑁂𑀦 𑀬𑁄𑀚𑀺𑀢𑀁 𑀩𑀳𑀼𑀧𑀸𑀤𑀓𑀁 𑀆𑀫𑀡𑁆𑀟𑀓𑀯𑀝𑁆𑀝𑀺𑀓𑀧𑀻𑀞𑀁 𑀧𑀮𑀸𑀮𑀧𑀻𑀞𑀁 𑀨𑀮𑀓𑀧𑀻𑀞𑀜𑁆𑀘 𑀧𑀸𑀴𑀺𑀬𑀁 𑀅𑀦𑀸𑀕𑀢𑀜𑁆𑀘 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀤𑀸𑀭𑀼𑀫𑀬𑀧𑀻𑀞𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑁂 𑀫𑀜𑁆𑀘𑁂 𑀲𑀬𑀺𑀢𑀩𑁆𑀩𑀁, 𑀬𑁄 𑀲𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀧𑀫𑀡𑀸𑀢𑀺𑀓𑁆𑀓𑀦𑁆𑀢𑁂 𑀫𑀜𑁆𑀘𑁂 𑀲𑀬𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀁 𑀧𑀦 𑀓𑀭𑁄𑀦𑁆𑀢𑀲𑁆𑀲 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀘 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀦 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀽𑀫𑀺𑀬𑀁 𑀦𑀺𑀔𑀦𑀺𑀢𑁆𑀯𑀸 𑀧𑀫𑀸𑀡𑀁 𑀉𑀧𑀭𑀺 𑀤𑀲𑁆𑀲𑁂𑀢𑀺, 𑀉𑀢𑁆𑀢𑀸𑀦𑀓𑀁 𑀯𑀸 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀼𑀮𑀸𑀲𑀗𑁆𑀖𑀸𑀝𑁂 𑀞𑀧𑁂𑀢𑁆𑀯𑀸 𑀅𑀝𑁆𑀝𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀯𑀝𑁆𑀝𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀥𑀸𑀭𑁂𑀢𑀩𑁆𑀩𑀸, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀫𑀜𑁆𑀘𑀧𑀝𑀺𑀧𑀸𑀤𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀡𑀗𑁆𑀕𑀼𑀮𑁂𑀦 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑁄𑀯 𑀫𑀜𑁆𑀘𑀧𑀝𑀺𑀧𑀸𑀤𑀓𑁄 𑀯𑀝𑁆𑀝𑀢𑀺, 𑀢𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺.

𑁫𑁬. ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁, 𑀆𑀲𑀦𑁆𑀤𑀺 𑀧𑀮𑁆𑀮𑀗𑁆𑀓𑁄 𑀕𑁄𑀦𑀓𑁄 𑀘𑀺𑀢𑁆𑀢𑀓𑁄 𑀧𑀝𑀺𑀓𑀸 𑀧𑀝𑀮𑀺𑀓𑀸 𑀢𑀽𑀮𑀺𑀓𑀸 𑀯𑀺𑀓𑀢𑀺𑀓𑀸 𑀉𑀤𑁆𑀤𑀮𑁄𑀫𑀺 𑀏𑀓𑀦𑁆𑀢𑀮𑁄𑀫𑀺 𑀓𑀝𑁆𑀝𑀺𑀲𑁆𑀲𑀁 𑀓𑁄𑀲𑁂𑀬𑁆𑀬𑀁 𑀓𑀼𑀢𑁆𑀢𑀓𑀁 𑀳𑀢𑁆𑀣𑀢𑁆𑀣𑀭𑀁 𑀅𑀲𑁆𑀲𑀢𑁆𑀣𑀭𑀁 𑀭𑀣𑀢𑁆𑀣𑀭𑀁 𑀅𑀚𑀺𑀦𑀧𑀯𑁂𑀡𑀻 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 𑀲𑀉𑀢𑁆𑀢𑀭𑀘𑁆𑀙𑀤𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁, 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁫𑁪) 𑀯𑀘𑀦𑀢𑁄 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁨𑁫𑁪) 𑀉𑀘𑁆𑀘𑀸𑀲𑀬𑀦𑀁 𑀦𑀸𑀫 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀫𑀜𑁆𑀘𑀁. 𑀫𑀳𑀸𑀲𑀬𑀦𑀁 𑀦𑀸𑀫 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑀁. 𑀆𑀲𑀦𑁆𑀤𑀺𑀆𑀤𑀻𑀲𑀼 𑀆𑀲𑀦𑁆𑀤𑀻𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀲𑀦𑀁. 𑀧𑀮𑁆𑀮𑀗𑁆𑀓𑁄𑀢𑀺 𑀧𑀸𑀤𑁂𑀲𑀼 𑀯𑀸𑀴𑀭𑀽𑀧𑀸𑀦𑀺 𑀞𑀧𑁂𑀢𑁆𑀯𑀸 𑀓𑀢𑁄. 𑀕𑁄𑀦𑀓𑁄𑀢𑀺 𑀤𑀻𑀖𑀮𑁄𑀫𑀓𑁄 𑀫𑀳𑀸𑀓𑁄𑀚𑀯𑁄. 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀓𑀺𑀭 𑀢𑀲𑁆𑀲 𑀮𑁄𑀫𑀸𑀦𑀺. 𑀘𑀺𑀢𑁆𑀢𑀓𑁄𑀢𑀺 𑀭𑀢𑀦𑀘𑀺𑀢𑁆𑀭𑀉𑀡𑁆𑀡𑀸𑀫𑀬𑀢𑁆𑀣𑀭𑀓𑁄. 𑀧𑀝𑀺𑀓𑀸𑀢𑀺 𑀉𑀡𑁆𑀡𑀸𑀫𑀬𑁄 𑀲𑁂𑀢𑀢𑁆𑀣𑀭𑀓𑁄. 𑀧𑀝𑀮𑀺𑀓𑀸𑀢𑀺 𑀖𑀦𑀧𑀼𑀧𑁆𑀨𑀓𑁄 𑀉𑀡𑁆𑀡𑀸𑀫𑀬𑀮𑁄𑀫𑀢𑁆𑀣𑀭𑀓𑁄, 𑀬𑁄 ‘‘𑀆𑀫𑀮𑀓𑀧𑀝𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀽𑀮𑀺𑀓𑀸𑀢𑀺 𑀧𑀓𑀢𑀺𑀢𑀽𑀮𑀺𑀓𑀸𑀬𑁂𑀯. 𑀯𑀺𑀓𑀢𑀺𑀓𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑀯𑀺𑀘𑀺𑀢𑁆𑀭𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀓𑁄. 𑀉𑀤𑁆𑀤𑀮𑁄𑀫𑀻𑀢𑀺 𑀏𑀓𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀉𑀪𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁. 𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀁 𑀓𑁄𑀲𑀺𑀬𑀲𑀼𑀢𑁆𑀢𑀫𑀬𑀁 𑀧𑀘𑁆𑀘𑀢𑁆𑀣𑀭𑀡𑀁, 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀁 𑀧𑀦 𑀯𑀝𑁆𑀝𑀢𑀺.

𑀓𑀼𑀢𑁆𑀢𑀓𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀦𑀸𑀝𑀓𑀺𑀢𑁆𑀣𑀻𑀦𑀁 𑀞𑀢𑁆𑀯𑀸 𑀦𑀘𑁆𑀘𑀦𑀬𑁄𑀕𑁆𑀕𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀳𑀢𑁆𑀣𑀢𑁆𑀣𑀭𑀅𑀲𑁆𑀲𑀢𑁆𑀣𑀭𑀸 𑀳𑀢𑁆𑀣𑀺𑀅𑀲𑁆𑀲𑀧𑀺𑀝𑁆𑀞𑀻𑀲𑀼 𑀅𑀢𑁆𑀣𑀭𑀡𑀓𑀅𑀢𑁆𑀣𑀭𑀡𑀸 𑀏𑀯. 𑀭𑀣𑀢𑁆𑀣𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀚𑀺𑀦𑀧𑀯𑁂𑀡𑀻𑀢𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀫𑀜𑁆𑀘𑀧𑁆𑀧𑀫𑀸𑀡𑁂𑀦 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀸 𑀧𑀯𑁂𑀡𑀻. 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀦𑀸𑀫 𑀅𑀢𑁆𑀣𑀺, 𑀢𑁂𑀦 𑀓𑀢𑀁 𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀭 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀧𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀲𑀉𑀢𑁆𑀢𑀭𑀘𑁆𑀙𑀤𑀦𑁆𑀢𑀺 𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦, 𑀉𑀧𑀭𑀺𑀩𑀤𑁆𑀥𑁂𑀦 𑀭𑀢𑁆𑀢𑀯𑀺𑀢𑀸𑀦𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀢𑀯𑀺𑀢𑀸𑀦𑀫𑁆𑀧𑀺 𑀳𑁂𑀝𑁆𑀞𑀸 𑀅𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺 𑀦 𑀯𑀝𑁆𑀝𑀢𑀺, 𑀅𑀲𑀢𑀺 𑀧𑀦 𑀯𑀝𑁆𑀝𑀢𑀺. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀦𑁆𑀢𑀺 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀫𑀜𑁆𑀘𑀲𑁆𑀲 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁, 𑀏𑀢𑀁 𑀦 𑀓𑀧𑁆𑀧𑀢𑀺. 𑀬𑀁 𑀧𑀦 𑀏𑀓𑀫𑁂𑀯 𑀉𑀧𑀥𑀸𑀦𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀢𑁆𑀢𑀁 𑀯𑀸 𑀳𑁄𑀢𑀼 𑀧𑀤𑀼𑀫𑀯𑀡𑁆𑀡𑀁 𑀯𑀸 𑀯𑀺𑀘𑀺𑀢𑁆𑀭𑀁 𑀯𑀸, 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀁, 𑀯𑀝𑁆𑀝𑀢𑀺, 𑀫𑀳𑀸𑀉𑀧𑀥𑀸𑀦𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀕𑁄𑀦𑀓𑀸𑀤𑀻𑀦𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦) 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸 𑀫𑀜𑁆𑀘𑀧𑀻𑀞𑀓𑁂𑀲𑀼 𑀅𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀥𑀫𑁆𑀫𑀸𑀲𑀦𑁂 𑀧𑀦 𑀕𑀺𑀳𑀺𑀯𑀺𑀓𑀢𑀦𑀻𑀳𑀸𑀭𑁂𑀦 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀢𑀽𑀮𑀺𑀓𑀁 𑀕𑀺𑀳𑀺𑀯𑀺𑀓𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦 𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁪) 𑁋 𑀯𑀘𑀦𑀢𑁄 𑀆𑀲𑀦𑁆𑀤𑀸𑀤𑀺𑀢𑁆𑀢𑀬𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁂𑀲𑀼 𑀕𑁄𑀦𑀓𑀸𑀤𑀻𑀲𑀼 𑀕𑀺𑀳𑀺𑀯𑀺𑀓𑀢𑁂𑀲𑀼 𑀥𑀫𑁆𑀫𑀸𑀲𑀦𑁂 𑀯𑀸 𑀪𑀢𑁆𑀢𑀕𑁆𑀕𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀽𑀮𑁄𑀦𑀤𑁆𑀥𑀁 𑀧𑀦 𑀫𑀜𑁆𑀘𑀧𑀻𑀞𑀁 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂𑀬𑁂𑀯 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣𑀸𑀧𑀺 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀽𑀮𑁄𑀦𑀤𑁆𑀥𑀁 𑀧𑀦 𑀫𑀜𑁆𑀘𑀧𑀻𑀞𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀧𑀺 𑀉𑀤𑁆𑀤𑀸𑀮𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀦𑀤𑁆𑀥𑀫𑀜𑁆𑀘𑀁 𑀑𑀦𑀤𑁆𑀥𑀧𑀻𑀞’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄 𑀧𑀦 𑀘𑀫𑁆𑀫𑀸𑀤𑀻𑀳𑀺 𑀑𑀦𑀤𑁆𑀥𑀁 𑀫𑀜𑁆𑀘𑀧𑀻𑀞𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀯𑀸𑀭𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀲𑁂𑀬𑁆𑀬𑀧𑀸𑀯𑀸𑀭𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀚𑀯𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀫𑁆𑀩𑀮’’𑀦𑁆𑀢𑀺 (𑀫𑀳𑀸𑀯. 𑁩𑁩𑁭-𑁩𑁩𑁮) 𑁋 𑀯𑀘𑀦𑀢𑁄 𑀧𑀸𑀯𑀸𑀭𑀸𑀤𑀻𑀦𑀺 𑀲𑀗𑁆𑀖𑀺𑀓𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀧𑀼𑀕𑁆𑀕𑀮𑀺𑀓𑀸𑀦𑀺 𑀯𑀸, 𑀬𑀣𑀸𑀲𑀼𑀔𑀁 𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀓𑁄𑀚𑀯𑀁 𑀧𑀦𑁂𑀢𑁆𑀣 𑀧𑀓𑀢𑀺𑀓𑁄𑀚𑀯𑀫𑁂𑀯 𑀯𑀝𑁆𑀝𑀢𑀺, 𑀫𑀳𑀸𑀧𑀺𑀝𑁆𑀞𑀺𑀬𑀓𑁄𑀚𑀯𑀁 𑀦 𑀯𑀝𑁆𑀝𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺 (𑀘𑀽𑀴𑀯. 𑁩𑁨𑁦) 𑀯𑀘𑀦𑀢𑁄 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦) 𑀓𑀯𑀸𑀝𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀢𑀸𑀮𑀯𑀡𑁆𑀝𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀬𑁄𑀦𑀺 𑀧𑀸𑀦𑀻𑀬𑀖𑀝𑀧𑀸𑀦𑀻𑀬𑀲𑀭𑀸𑀯𑀸𑀦𑀺, 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀁, 𑀲𑀩𑁆𑀩𑀁 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺. ‘‘𑀧𑀸𑀲𑀸𑀤𑀲𑁆𑀲 𑀤𑀸𑀲𑀺𑀤𑀸𑀲𑀁 𑀔𑁂𑀢𑁆𑀢𑀯𑀢𑁆𑀣𑀼𑀁 𑀕𑁄𑀫𑀳𑀺𑀁𑀲𑀁 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀲𑀸𑀤𑁂 𑀧𑀝𑀺𑀕𑁆𑀕𑀳𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺.