𑁨𑁩. 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁫𑁧. 𑀦𑀺𑀲𑁆𑀲𑀬𑁄𑀢𑀺 𑀏𑀢𑁆𑀣 𑀧𑀦 𑀅𑀬𑀁 𑀦𑀺𑀲𑁆𑀲𑀬𑁄 𑀦𑀸𑀫 𑀓𑁂𑀦 𑀤𑀸𑀢𑀩𑁆𑀩𑁄, 𑀓𑁂𑀦 𑀦 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀤𑀸𑀢𑀩𑁆𑀩𑁄, 𑀓𑀣𑀁 𑀕𑀳𑀺𑀢𑁄 𑀳𑁄𑀢𑀺, 𑀓𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀦𑀺𑀲𑁆𑀲𑀸𑀬 𑀓𑁂𑀦 𑀯𑀲𑀺𑀢𑀩𑁆𑀩𑀁, 𑀓𑁂𑀦 𑀘 𑀦 𑀯𑀲𑀺𑀢𑀩𑁆𑀩𑀦𑁆𑀢𑀺? 𑀢𑀢𑁆𑀣 𑀓𑁂𑀦 𑀤𑀸𑀢𑀩𑁆𑀩𑁄, 𑀓𑁂𑀦 𑀦 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀢𑀸𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼𑀁, 𑀦𑀺𑀲𑁆𑀲𑀬𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁭𑁬, 𑁮𑁨) 𑀘 𑀯𑀘𑀦𑀢𑁄 𑀬𑁄 𑀩𑁆𑀬𑀢𑁆𑀢𑁄 𑀳𑁄𑀢𑀺 𑀧𑀝𑀺𑀩𑀮𑁄 𑀉𑀧𑀲𑀫𑁆𑀧𑀤𑀸𑀬 𑀤𑀲𑀯𑀲𑁆𑀲𑁄 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸, 𑀢𑁂𑀦 𑀤𑀸𑀢𑀩𑁆𑀩𑁄, 𑀇𑀢𑀭𑁂𑀦 𑀦 𑀤𑀸𑀢𑀩𑁆𑀩𑁄. 𑀲𑀘𑁂 𑀤𑁂𑀢𑀺, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁧𑁪𑁫-𑁧𑁪𑁭) 𑀘 ‘‘𑀩𑁆𑀬𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑀩𑀳𑀼𑀲𑁆𑀲𑀼𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁂𑀦 𑀳𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀲𑀁 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁 𑀤𑁆𑀯𑁂 𑀯𑀺𑀪𑀗𑁆𑀕𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀢𑀻𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀢𑁆𑀢𑀦𑀓𑁆𑀔𑀫𑀸 𑀓𑀸𑀢𑀩𑁆𑀩𑀸, 𑀓𑀫𑁆𑀫𑀸𑀓𑀫𑁆𑀫𑀜𑁆𑀘 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀉𑀕𑁆𑀕𑀳𑁂𑀢𑀩𑁆𑀩𑀁, 𑀧𑀭𑀺𑀲𑀸𑀬 𑀧𑀦 𑀅𑀪𑀺𑀥𑀫𑁆𑀫𑁂 𑀯𑀺𑀦𑀬𑀦𑀢𑁆𑀣𑀁 𑀲𑀘𑁂 𑀫𑀚𑁆𑀛𑀺𑀫𑀪𑀸𑀡𑀓𑁄 𑀳𑁄𑀢𑀺, 𑀫𑀽𑀮𑀧𑀡𑁆𑀡𑀸𑀲𑀓𑁄 𑀉𑀕𑁆𑀕𑀳𑁂𑀢𑀩𑁆𑀩𑁄, 𑀤𑀻𑀖𑀪𑀸𑀡𑀓𑁂𑀦 𑀫𑀳𑀸𑀯𑀕𑁆𑀕𑁄, 𑀲𑀁𑀬𑀼𑀢𑁆𑀢𑀪𑀸𑀡𑀓𑁂𑀦 𑀳𑁂𑀝𑁆𑀞𑀺𑀫𑀸 𑀯𑀸 𑀢𑀬𑁄 𑀯𑀕𑁆𑀕𑀸 𑀫𑀳𑀸𑀯𑀕𑁆𑀕𑁄 𑀯𑀸, 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑁂𑀦 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀉𑀧𑀟𑁆𑀠𑀦𑀺𑀓𑀸𑀬𑁄 𑀉𑀕𑁆𑀕𑀳𑁂𑀢𑀩𑁆𑀩𑁄, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀢𑀺𑀓𑀦𑀺𑀧𑀸𑀢𑀢𑁄 𑀧𑀝𑁆𑀞𑀸𑀬 𑀉𑀕𑁆𑀕𑀳𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀏𑀓𑀁 𑀕𑀡𑁆𑀳𑀦𑁆𑀢𑁂𑀦 𑀘𑀢𑀼𑀓𑁆𑀓𑀦𑀺𑀧𑀸𑀢𑀁 𑀯𑀸 𑀧𑀜𑁆𑀘𑀓𑀦𑀺𑀧𑀸𑀢𑀁 𑀯𑀸 𑀉𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀓𑀪𑀸𑀡𑀓𑁂𑀦 𑀲𑀸𑀝𑁆𑀞𑀓𑀣𑀁 𑀚𑀸𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. ‘‘𑀥𑀫𑁆𑀫𑀧𑀤𑀫𑁆𑀧𑀺 𑀲𑀳 𑀯𑀢𑁆𑀣𑀼𑀦𑀸 𑀉𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁄 𑀢𑀢𑁄 𑀲𑀫𑀼𑀘𑁆𑀘𑀬𑀁 𑀓𑀢𑁆𑀯𑀸 𑀫𑀽𑀮𑀧𑀡𑁆𑀡𑀸𑀲𑀓𑀫𑀢𑁆𑀢𑀁 𑀯𑀝𑁆𑀝𑀢𑀺, ‘‘𑀦 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀇𑀢𑀭𑀸𑀲𑀼 𑀯𑀺𑀘𑀸𑀭𑀡𑀸𑀬𑁂𑀯 𑀦𑀢𑁆𑀣𑀺. 𑀅𑀪𑀺𑀥𑀫𑁆𑀫𑁂 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀦 𑀲𑀸𑀝𑁆𑀞𑀓𑀣𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀜𑁆𑀘 𑀧𑀕𑀼𑀡𑀁, 𑀲𑀼𑀢𑁆𑀢𑀦𑁆𑀢𑁂 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀕𑀦𑁆𑀣𑁄 𑀦𑀢𑁆𑀣𑀺, 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁂𑀦 𑀧𑀦 𑀲𑀼𑀢𑁆𑀢𑀦𑁆𑀢𑀢𑁄 𑀘 𑀯𑀺𑀦𑀬𑀢𑁄 𑀘 𑀯𑀼𑀢𑁆𑀢𑀧𑁆𑀧𑀫𑀸𑀡𑁄 𑀕𑀦𑁆𑀣𑁄 𑀉𑀕𑁆𑀕𑀳𑀺𑀢𑁄, 𑀅𑀬𑀁 𑀧𑀭𑀺𑀲𑀼𑀧𑀝𑁆𑀞𑀸𑀓𑁄 𑀩𑀳𑀼𑀲𑁆𑀲𑀼𑀢𑁄𑀯 𑀳𑁄𑀢𑀺, 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀬𑁂𑀦𑀓𑀸𑀫𑀁𑀕𑀫𑁄 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀢𑀼𑀁 𑀮𑀪𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀩𑁆𑀬𑀢𑁆𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀬𑁄 𑀧𑀦 𑀅𑀦𑁆𑀢𑁂𑀯𑀸𑀲𑀺𑀦𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀸 𑀕𑀺𑀮𑀸𑀦𑀲𑁆𑀲 𑀲𑀓𑁆𑀓𑁄𑀢𑀺 𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀓𑀸𑀢𑀼𑀁, 𑀅𑀬𑀁 𑀇𑀥 ‘‘𑀧𑀝𑀺𑀩𑀮𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀁 𑀧𑀦 𑀯𑀼𑀢𑁆𑀢𑀁 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸, 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁, 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁, 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀤𑀲𑀯𑀲𑁆𑀲𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺 (𑀫𑀳𑀸𑀯. 𑁮𑁪). 𑀢𑀫𑁆𑀧𑀺 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼𑀁, 𑀦𑀺𑀲𑁆𑀲𑀬𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁭𑁬, 𑁮𑁨) 𑀘 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑁆𑀲𑁂𑀯 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀮𑀓𑁆𑀔𑀡𑀲𑁆𑀲 𑀯𑀺𑀢𑁆𑀣𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁮𑁪) 𑀓𑀺𑀜𑁆𑀘𑀺 𑀅𑀬𑀼𑀢𑁆𑀢𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀓𑀺𑀜𑁆𑀘𑀺 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦. 𑀢𑀣𑀸 𑀳𑀺 ‘‘𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀘 ‘‘𑀅𑀢𑁆𑀢𑀦𑀸 𑀦 𑀅𑀲𑁂𑀓𑁆𑀔𑁂𑀦𑀸’’𑀢𑀺 𑀘 ‘‘𑀅𑀲𑁆𑀲𑀤𑁆𑀥𑁄’’𑀢𑀺 𑀘 𑀆𑀤𑀻𑀲𑀼 𑀢𑀻𑀲𑀼 𑀧𑀜𑁆𑀘𑀓𑁂𑀲𑀼 𑀅𑀬𑀼𑀢𑁆𑀢𑀯𑀲𑁂𑀦 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀦 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦. 𑀬𑁄 𑀳𑀺 𑀅𑀲𑁂𑀓𑁆𑀔𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀅𑀲𑀫𑀦𑁆𑀦𑀸𑀕𑀢𑁄 𑀧𑀭𑁂 𑀘 𑀢𑀢𑁆𑀣 𑀲𑀫𑀸𑀤𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀤𑁄𑀲𑀬𑀼𑀢𑁆𑀢𑁄𑀯 𑀳𑀼𑀢𑁆𑀯𑀸 𑀧𑀭𑀺𑀲𑀁 𑀧𑀭𑀺𑀳𑀭𑀢𑀺, 𑀢𑀲𑁆𑀲 𑀧𑀭𑀺𑀲𑀸 𑀲𑀻𑀮𑀸𑀤𑀻𑀳𑀺 𑀧𑀭𑀺𑀬𑀸𑀬𑀢𑀺𑀬𑁂𑀯 𑀦 𑀯𑀟𑁆𑀠𑀢𑀺, 𑀢𑀲𑁆𑀫𑀸 ‘‘𑀢𑁂𑀦 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀅𑀬𑀼𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦. 𑀦 𑀳𑀺 𑀔𑀻𑀡𑀸𑀲𑀯𑀲𑁆𑀲𑁂𑀯 𑀉𑀧𑀚𑁆𑀛𑀸𑀘𑀭𑀺𑀬𑀪𑀸𑀯𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄, 𑀬𑀤𑀺 𑀢𑀲𑁆𑀲𑁂𑀯 𑀅𑀦𑀼𑀜𑁆𑀜𑀸𑀢𑁄 𑀅𑀪𑀯𑀺𑀲𑁆𑀲, ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀁 𑀦 𑀯𑀤𑁂𑀬𑁆𑀬, 𑀬𑀲𑁆𑀫𑀸 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀲𑀸 𑀲𑀻𑀮𑀸𑀤𑀻𑀳𑀺 𑀦 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄𑀢𑀺𑀆𑀤𑀻𑀲𑀼 𑀧𑀸𑀭𑀸𑀚𑀺𑀓𑀜𑁆𑀘 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘 𑀆𑀧𑀦𑁆𑀦𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀦𑀸𑀫. 𑀇𑀢𑀭𑁂 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀧𑀦𑁆𑀦𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀦𑀸𑀫. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀳𑀸𑀬 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀦𑀸𑀫. 𑀬𑀢𑁆𑀢𑀓𑀁 𑀲𑀼𑀢𑀁 𑀧𑀭𑀺𑀲𑀁 𑀧𑀭𑀺𑀳𑀭𑀦𑁆𑀢𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀁, 𑀢𑁂𑀦 𑀯𑀺𑀭𑀳𑀺𑀢𑀢𑁆𑀢𑀸 𑀅𑀧𑁆𑀧𑀲𑁆𑀲𑀼𑀢𑁄. 𑀬𑀁 𑀢𑁂𑀦 𑀚𑀸𑀦𑀺𑀢𑀩𑁆𑀩𑀁 𑀆𑀧𑀢𑁆𑀢𑀸𑀤𑀺, 𑀢𑀲𑁆𑀲 𑀅𑀚𑀸𑀦𑀦𑀢𑁄 𑀤𑀼𑀧𑁆𑀧𑀜𑁆𑀜𑁄. 𑀇𑀫𑀲𑁆𑀫𑀺𑀁 𑀧𑀜𑁆𑀘𑀓𑁂 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀅𑀬𑀼𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦.

𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀦𑀸𑀫 𑀫𑀬𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀅𑀬𑀁 𑀆𑀧𑀦𑁆𑀦𑁄’’𑀢𑀺 𑀦 𑀚𑀸𑀦𑀸𑀢𑀺. 𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀸 𑀤𑁂𑀲𑀦𑀸𑀕𑀸𑀫𑀺𑀦𑀺𑀢𑁄 𑀯𑀸 𑀆𑀧𑀢𑁆𑀢𑀺𑀢𑁄 𑀏𑀯𑀁 𑀦𑀸𑀫 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀜𑁆𑀘𑀓𑁂 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀅𑀬𑀼𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀺 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦.

𑀆𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬𑀸𑀢𑀺 𑀔𑀦𑁆𑀥𑀓𑀯𑀢𑁆𑀢𑁂 𑀯𑀺𑀦𑁂𑀢𑀼𑀁 𑀦 𑀧𑀝𑀺𑀩𑀮𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸𑀬𑀸𑀢𑀺 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬𑀁 𑀯𑀺𑀦𑁂𑀢𑀼𑀁 𑀦 𑀧𑀝𑀺𑀩𑀮𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀥𑀫𑁆𑀫𑁂𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀯𑀺𑀦𑁂𑀢𑀼𑀁 𑀦 𑀧𑀝𑀺𑀩𑀮𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀯𑀺𑀦𑀬𑁂𑀢𑀺 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀯𑀺𑀦𑁂𑀢𑀼𑀁 𑀦 𑀧𑀝𑀺𑀩𑀮𑁄𑀢𑀺 𑀅𑀢𑁆𑀣𑁄. 𑀯𑀺𑀦𑁂𑀢𑀼𑀁 𑀦 𑀧𑀝𑀺𑀩𑀮𑁄𑀢𑀺 𑀘 𑀲𑀩𑁆𑀩𑀢𑁆𑀣 𑀲𑀺𑀓𑁆𑀔𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀦𑁆𑀢𑀺 𑀥𑀫𑁆𑀫𑁂𑀦 𑀓𑀸𑀭𑀡𑁂𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁. 𑀇𑀫𑀲𑁆𑀫𑀺𑀁 𑀧𑀜𑁆𑀘𑀓𑁂 𑀲𑀩𑁆𑀩𑀧𑀤𑁂𑀲𑀼 𑀆𑀧𑀢𑁆𑀢𑀺.

‘‘𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀧𑀜𑁆𑀘𑀓𑀲𑁆𑀫𑀺𑀁 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑁂𑀦 𑀲𑀤𑁆𑀥𑀺𑀁. 𑀦 𑀲𑁆𑀯𑀸𑀕𑀢𑀸𑀦𑀻𑀢𑀺 𑀦 𑀲𑀼𑀝𑁆𑀞𑀼 𑀆𑀕𑀢𑀸𑀦𑀺. 𑀲𑀼𑀯𑀺𑀪𑀢𑁆𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸𑀦𑀺 𑀧𑀤𑀧𑀘𑁆𑀘𑀸𑀪𑀝𑁆𑀞𑀲𑀗𑁆𑀓𑀭𑀤𑁄𑀲𑀭𑀅𑀢𑀸𑀦𑀺. 𑀲𑀼𑀧𑁆𑀧𑀯𑀢𑁆𑀢𑀻𑀦𑀻𑀢𑀺 𑀧𑀕𑀼𑀡𑀸𑀦𑀺 𑀯𑀸𑀘𑀼𑀕𑁆𑀕𑀢𑀸𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺. 𑀲𑀼𑀢𑁆𑀢𑀲𑁄𑀢𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀢𑁄 𑀆𑀳𑀭𑀺𑀢𑀩𑁆𑀩𑀲𑀼𑀢𑁆𑀢𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀢𑀸𑀦𑀺. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀅𑀓𑁆𑀔𑀭𑀧𑀤𑀧𑀸𑀭𑀺𑀧𑀽𑀭𑀺𑀬𑀸 𑀘 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀯𑀺𑀧𑀭𑀻𑀢𑀓𑁆𑀔𑀭𑀸𑀦𑀺. 𑀏𑀢𑁂𑀦 𑀅𑀝𑁆𑀞𑀓𑀣𑀸 𑀤𑀻𑀧𑀺𑀢𑀸. 𑀅𑀝𑁆𑀞𑀓𑀣𑀸𑀢𑁄 𑀳𑀺 𑀏𑀲 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀧𑀜𑁆𑀘𑀓𑁂𑀧𑀺 𑀲𑀩𑁆𑀩𑀧𑀤𑁂𑀲𑀼 𑀆𑀧𑀢𑁆𑀢𑀺. 𑀊𑀦𑀤𑀲𑀯𑀲𑁆𑀲𑀧𑀭𑀺𑀬𑁄𑀲𑀸𑀦𑀧𑀜𑁆𑀘𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀆𑀤𑀺𑀢𑁄 𑀢𑀬𑁄 𑀧𑀜𑁆𑀘𑀓𑀸, 𑀘𑀢𑀼𑀢𑁆𑀣𑁂 𑀢𑀻𑀡𑀺 𑀧𑀤𑀸𑀦𑀺, 𑀧𑀜𑁆𑀘𑀫𑁂 𑀤𑁆𑀯𑁂 𑀧𑀤𑀸𑀦𑀻𑀢𑀺 𑀲𑀩𑁆𑀩𑁂𑀧𑀺 𑀘𑀢𑁆𑀢𑀸𑀭𑁄 𑀧𑀜𑁆𑀘𑀓𑀸 𑀅𑀬𑀼𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀸, 𑀘𑀢𑀼𑀢𑁆𑀣𑁂 𑀧𑀜𑁆𑀘𑀓𑁂 𑀤𑁆𑀯𑁂 𑀧𑀤𑀸𑀦𑀺, 𑀧𑀜𑁆𑀘𑀫𑁂 𑀢𑀻𑀡𑀺, 𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀸 𑀢𑀬𑁄 𑀧𑀜𑁆𑀘𑀓𑀸𑀢𑀺 𑀲𑀩𑁆𑀩𑁂𑀧𑀺 𑀘𑀢𑁆𑀢𑀸𑀭𑁄 𑀧𑀜𑁆𑀘𑀓𑀸 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀸.

𑀲𑀼𑀓𑁆𑀓𑀧𑀓𑁆𑀔𑁂 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁮𑁪) 𑀅𑀝𑁆𑀞 𑀧𑀜𑁆𑀘𑀓𑀸 𑀆𑀕𑀢𑀸𑀬𑁂𑀯. 𑀢𑀢𑁆𑀣 𑀲𑀩𑁆𑀩𑀢𑁆𑀣𑁂𑀯 𑀅𑀦𑀸𑀧𑀢𑁆𑀢𑀺.

𑁧𑁫𑁨. 𑀓𑀲𑁆𑀲 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀧𑀦 𑀬𑁄 𑀮𑀚𑁆𑀚𑀻 𑀳𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑁄. 𑀇𑀢𑀭𑀲𑁆𑀲 𑀦 𑀤𑀸𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁨𑁦) 𑀯𑀘𑀦𑀢𑁄. 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁂𑀦𑀧𑀺 𑀅𑀮𑀚𑁆𑀚𑀻 𑀦𑀺𑀲𑁆𑀲𑀸𑀬 𑀦 𑀯𑀲𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩𑀁, 𑀬𑁄 𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁨𑁦). 𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁨𑁦) 𑀘 𑀅𑀮𑀚𑁆𑀚𑀻𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀦𑀯𑀁 𑀞𑀸𑀦𑀁 𑀕𑀢𑁂𑀦 ‘‘𑀏𑀳𑀺, 𑀪𑀺𑀓𑁆𑀔𑀼, 𑀦𑀺𑀲𑁆𑀲𑀬𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀦𑀧𑀺 𑀘𑀢𑀽𑀳𑀧𑀜𑁆𑀘𑀸𑀳𑀁 𑀦𑀺𑀲𑁆𑀲𑀬𑀤𑀸𑀬𑀓𑀲𑁆𑀲 𑀮𑀚𑁆𑀚𑀺𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀧𑀜𑁆𑀘𑀸𑀳𑀁 𑀆𑀕𑀫𑁂𑀢𑀼𑀁 𑀬𑀸𑀯 𑀪𑀺𑀓𑁆𑀔𑀼𑀲𑀪𑀸𑀕𑀢𑀁 𑀚𑀸𑀦𑀸𑀫𑀻’’𑀢𑀺 (𑀫𑀳𑀸𑀯. 𑁧𑁨𑁦) 𑀳𑀺 𑀯𑀼𑀢𑁆𑀢𑀁. 𑀲𑀘𑁂 ‘‘𑀣𑁂𑀭𑁄 𑀮𑀚𑁆𑀚𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑁆𑀯𑀸 𑀆𑀕𑀢𑀤𑀺𑀯𑀲𑁂𑀬𑁂𑀯 𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀣𑁂𑀭𑁄 𑀧𑀦 ‘‘𑀆𑀕𑀫𑁂𑀳𑀺 𑀢𑀸𑀯, 𑀯𑀲𑀦𑁆𑀢𑁄 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀓𑀢𑀺𑀧𑀸𑀳𑀁 𑀆𑀘𑀸𑀭𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀯𑀝𑁆𑀝𑀢𑀺, 𑀧𑀓𑀢𑀺𑀬𑀸 𑀦𑀺𑀲𑁆𑀲𑀬𑀕𑀳𑀡𑀝𑁆𑀞𑀸𑀦𑀁 𑀕𑀢𑁂𑀦 𑀧𑀦 𑀢𑀤𑀳𑁂𑀯 𑀕𑀳𑁂𑀢𑀩𑁆𑀩𑁄, 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀲𑀘𑁂 𑀧𑀞𑀫𑀬𑀸𑀫𑁂 𑀆𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀦𑀢𑁆𑀣𑀺, 𑀑𑀓𑀸𑀲𑀁 𑀅𑀮𑀪𑀦𑁆𑀢𑁄 ‘‘𑀧𑀘𑁆𑀘𑀽𑀲𑀲𑀫𑀬𑁂 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀬𑀢𑀺, 𑀅𑀭𑀼𑀡𑀁 𑀉𑀕𑁆𑀕𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀧𑀦 ‘‘𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀲𑀬𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑀼𑀓𑁆𑀓𑀝𑀁. 𑀅𑀕𑀢𑀧𑀼𑀩𑁆𑀩𑀁 𑀞𑀸𑀦𑀁 𑀕𑀢𑁂𑀦 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀲𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀲𑀺𑀢𑀩𑁆𑀩𑀁. ‘‘𑀲𑀢𑁆𑀢𑀸𑀳𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀁 𑀓𑀭𑁄𑀦𑁆𑀢𑁂𑀦 𑀧𑀦 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀣𑁂𑀭𑁄 ‘‘𑀓𑀺𑀁 𑀲𑀢𑁆𑀢𑀸𑀳𑀁 𑀯𑀲𑀦𑁆𑀢𑀲𑁆𑀲 𑀦𑀺𑀲𑁆𑀲𑀬𑁂𑀦𑀸’’𑀢𑀺 𑀯𑀤𑀢𑀺, 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀧𑀭𑀺𑀳𑀸𑀭𑁄 𑀳𑁄𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼’’𑀦𑁆𑀢𑀺 𑀯𑀘𑀦𑀢𑁄 𑀧𑀦 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀲𑀘𑁂 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀦𑀺𑀲𑁆𑀲𑀬𑀤𑀸𑀬𑀓𑀁 𑀦 𑀮𑀪𑀢𑀺, 𑀏𑀯𑀁 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀩𑀳𑀽𑀦𑀺𑀧𑀺 𑀤𑀺𑀯𑀲𑀸𑀦𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀼𑀩𑁆𑀩𑁂 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀣𑀧𑀼𑀩𑁆𑀩𑀁 𑀓𑀺𑀜𑁆𑀘𑀺 𑀆𑀯𑀸𑀲𑀁 𑀧𑀯𑀺𑀲𑀢𑀺, 𑀏𑀓𑀭𑀢𑁆𑀢𑀁 𑀯𑀲𑀦𑁆𑀢𑁂𑀦𑀧𑀺 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀲𑁆𑀲𑀫𑀦𑁆𑀢𑁄 𑀯𑀸 𑀲𑀢𑁆𑀣𑀁 𑀯𑀸 𑀧𑀭𑀺𑀬𑁂𑀲𑀦𑁆𑀢𑁄 𑀓𑀢𑀺𑀧𑀸𑀳𑀁 𑀯𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺𑀢𑀩𑁆𑀩𑀁, 𑀦𑀺𑀲𑁆𑀲𑀬𑁄 𑀘 𑀕𑀳𑁂𑀢𑀩𑁆𑀩𑁄. 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀧𑀦 𑀯𑀲𑁆𑀲𑀸𑀦𑁂 𑀆𑀕𑀢𑁂𑀧𑀺 𑀦𑀺𑀲𑁆𑀲𑀬𑀁 𑀅𑀮𑀪𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀮𑀸𑀦𑁄 𑀳𑁄𑀢𑀺, 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺.

𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄𑀧𑀺 𑀕𑀺𑀮𑀸𑀦𑁂𑀦 𑀬𑀸𑀘𑀺𑀬𑀫𑀸𑀦𑁄 𑀅𑀦𑀺𑀲𑁆𑀲𑀺𑀢𑁄 𑀏𑀯 𑀯𑀲𑀺𑀢𑀼𑀁 𑀮𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀬𑀸𑀘𑀺𑀬𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁧). 𑀲𑀘𑁂 𑀧𑀦 ‘‘𑀬𑀸𑀘𑀸𑀳𑀺 𑀫’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀕𑀺𑀮𑀸𑀦𑁄 𑀫𑀸𑀦𑁂𑀦 𑀦 𑀬𑀸𑀘𑀢𑀺, 𑀕𑀦𑁆𑀢𑀩𑁆𑀩𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀭𑀜𑁆𑀜𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀨𑀸𑀲𑀼𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 ‘𑀬𑀤𑀸 𑀧𑀢𑀺𑀭𑀽𑀧𑁄 𑀦𑀺𑀲𑁆𑀲𑀬𑀤𑀸𑀬𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀢𑀤𑀸 𑀢𑀲𑁆𑀲 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’’’𑀢𑀺 𑀯𑀘𑀦𑀢𑁄 𑀧𑀦 𑀬𑀢𑁆𑀣 𑀯𑀲𑀦𑁆𑀢𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀧𑀝𑀺𑀮𑀸𑀪𑀯𑀲𑁂𑀦 𑀨𑀸𑀲𑀼 𑀳𑁄𑀢𑀺, 𑀢𑀸𑀤𑀺𑀲𑀁 𑀨𑀸𑀲𑀼𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀇𑀫𑀜𑁆𑀘 𑀧𑀦 𑀧𑀭𑀺𑀳𑀸𑀭𑀁 𑀦𑁂𑀯 𑀲𑁄𑀢𑀸𑀧𑀦𑁆𑀦𑁄, 𑀦 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑁄 𑀮𑀪𑀦𑁆𑀢𑀺, 𑀦 𑀣𑀸𑀫𑀕𑀢𑀲𑁆𑀲 𑀲𑀫𑀸𑀥𑀺𑀦𑁄 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀮𑀸𑀪𑀻, 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁂 𑀧𑀦 𑀩𑀸𑀮𑀧𑀼𑀣𑀼𑀚𑁆𑀚𑀦𑁂 𑀓𑀣𑀸𑀯 𑀦𑀢𑁆𑀣𑀺. 𑀬𑀲𑁆𑀲 𑀔𑁄 𑀧𑀦 𑀲𑀫𑀣𑁄 𑀯𑀸 𑀯𑀺𑀧𑀲𑁆𑀲𑀦𑀸 𑀯𑀸 𑀢𑀭𑀼𑀡𑀸 𑀳𑁄𑀢𑀺, 𑀅𑀬𑀁 𑀇𑀫𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀧𑀯𑀸𑀭𑀡𑀸𑀲𑀗𑁆𑀕𑀳𑁄𑀧𑀺 𑀏𑀢𑀲𑁆𑀲𑁂𑀯 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀆𑀘𑀭𑀺𑀬𑁂 𑀧𑀯𑀸𑀭𑁂𑀢𑁆𑀯𑀸 𑀕𑀢𑁂𑀧𑀺 ‘‘𑀬𑀤𑀸 𑀧𑀢𑀺𑀭𑀽𑀧𑁄𑀦𑀺𑀲𑁆𑀲𑀬𑀤𑀸𑀬𑀓𑁄 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀧𑀼𑀦 𑀬𑀸𑀯 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸, 𑀢𑀸𑀯 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀆𑀲𑀸𑀴𑁆𑀳𑀻𑀫𑀸𑀲𑁂 𑀆𑀘𑀭𑀺𑀬𑁄 𑀦𑀸𑀕𑀘𑁆𑀙𑀢𑀺, 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁.

𑁧𑁫𑁩. 𑀓𑀣𑀁 𑀕𑀳𑀺𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑁂 𑀢𑀸𑀯 𑀉𑀧𑀚𑁆𑀛𑀁 𑀕𑀡𑁆𑀳𑀦𑁆𑀢𑁂𑀦 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀼𑀢𑁆𑀢𑁂 𑀲𑀘𑁂 𑀉𑀧𑀚𑁆𑀛𑀸𑀬𑁄 ‘‘𑀲𑀸𑀳𑀽’’𑀢𑀺 𑀯𑀸 ‘‘𑀮𑀳𑀽’’𑀢𑀺 𑀯𑀸 ‘‘𑀑𑀧𑀸𑀬𑀺𑀓’’𑀦𑁆𑀢𑀺 𑀯𑀸 ‘‘𑀧𑀢𑀺𑀭𑀽𑀧’’𑀦𑁆𑀢𑀺 𑀯𑀸 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄. 𑀇𑀤𑀫𑁂𑀯 𑀳𑁂𑀢𑁆𑀣 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀁, 𑀬𑀤𑀺𑀤𑀁 𑀉𑀧𑀚𑁆𑀛𑀸𑀬𑀲𑁆𑀲 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀤𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀤𑀲𑁆𑀲 𑀯𑀸𑀘𑀸𑀬 𑀲𑀸𑀯𑀦𑀁 𑀓𑀸𑀬𑁂𑀦 𑀯𑀸 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺, 𑀦 𑀢𑀁 𑀧𑀫𑀸𑀡𑀁. 𑀆𑀬𑀸𑀘𑀦𑀤𑀸𑀦𑀫𑀢𑁆𑀢𑁂𑀦 𑀳𑀺 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄, 𑀦 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀁 𑀅𑀗𑁆𑀕𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀧𑀺 𑀦 𑀓𑁂𑀯𑀮𑀁 ‘‘𑀇𑀫𑀺𑀦𑀸 𑀫𑁂 𑀧𑀤𑁂𑀦 𑀉𑀧𑀚𑁆𑀛𑀸𑀬𑁄 𑀕𑀳𑀺𑀢𑁄’’𑀢𑀺 𑀜𑀸𑀢𑀼𑀁 𑀯𑀝𑁆𑀝𑀢𑀺, ‘‘𑀅𑀚𑁆𑀚𑀢𑀕𑁆𑀕𑁂 𑀤𑀸𑀦𑀺 𑀣𑁂𑀭𑁄 𑀫𑀬𑁆𑀳𑀁 𑀪𑀸𑀭𑁄, 𑀅𑀳𑀫𑁆𑀧𑀺 𑀣𑁂𑀭𑀲𑁆𑀲 𑀪𑀸𑀭𑁄’’𑀢𑀺 𑀇𑀤𑀫𑁆𑀧𑀺 𑀜𑀸𑀢𑀼𑀁 𑀯𑀝𑁆𑀝𑀢𑀺 (𑀫𑀳𑀸𑀯. 𑀅𑀝𑁆𑀞. 𑁬𑁪). 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀉𑀧𑀚𑁆𑀛𑀸𑀬𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀧𑀼𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀫𑁆𑀳𑀺 𑀧𑀺𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺, 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 (𑀫𑀳𑀸𑀯. 𑁬𑁫).

𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀕𑁆𑀕𑀳𑀡𑁂𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀡𑁆𑀳𑀦𑁆𑀢𑁂𑀦 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 (𑀫𑀳𑀸𑀯. 𑁭𑁭) 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁫𑁪. 𑀓𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀏𑀢𑁆𑀣 𑀢𑀸𑀯 𑀉𑀧𑀚𑁆𑀛𑀸𑀬𑀫𑁆𑀳𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀆𑀘𑀭𑀺𑀬𑀫𑁆𑀳𑀸 𑀙𑀳𑀺 𑀆𑀓𑀸𑀭𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸. 𑀉𑀧𑀚𑁆𑀛𑀸𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑁄 𑀯𑀸, 𑀓𑀸𑀮𑀓𑀢𑁄 𑀯𑀸, 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸, 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸.

𑀙𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸. 𑀆𑀘𑀭𑀺𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑁄 𑀯𑀸, 𑀓𑀸𑀮𑀓𑀢𑁄 𑀯𑀸, 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸, 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻, 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀲𑀫𑁄𑀥𑀸𑀦𑀕𑀢𑁄 𑀳𑁄𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀙 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸’’𑀢𑀺 (𑀫𑀳𑀸𑀯. 𑁮𑁩).

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀫𑀳𑀸𑀯. 𑀅𑀝𑁆𑀞. 𑁮𑁩) 𑁋 𑀧𑀓𑁆𑀓𑀦𑁆𑀢𑁄𑀢𑀺 𑀤𑀺𑀲𑀁 𑀕𑀢𑁄. 𑀏𑀯𑀁 𑀕𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀲𑀘𑁂 𑀯𑀺𑀳𑀸𑀭𑁂 𑀦𑀺𑀲𑁆𑀲𑀬𑀤𑀸𑀬𑀓𑁄 𑀅𑀢𑁆𑀣𑀺, 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑀤𑀸𑀧𑀺 𑀦𑀺𑀲𑁆𑀲𑀬𑁄 𑀯𑀸 𑀕𑀳𑀺𑀢𑀧𑀼𑀩𑁆𑀩𑁄 𑀳𑁄𑀢𑀺, 𑀬𑁄 𑀯𑀸 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄, 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀲𑀘𑁂 𑀢𑀸𑀤𑀺𑀲𑁄 𑀦𑀢𑁆𑀣𑀺, 𑀅𑀜𑁆𑀜𑁄 𑀮𑀚𑁆𑀚𑀻 𑀧𑁂𑀲𑀮𑁄 𑀅𑀢𑁆𑀣𑀺, 𑀢𑀲𑁆𑀲 𑀧𑁂𑀲𑀮𑀪𑀸𑀯𑀁 𑀚𑀸𑀦𑀦𑁆𑀢𑁂𑀦 𑀢𑀤𑀳𑁂𑀯 𑀦𑀺𑀲𑁆𑀲𑀬𑁄 𑀬𑀸𑀘𑀺𑀢𑀩𑁆𑀩𑁄. 𑀲𑀘𑁂 𑀤𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀣 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀮𑀳𑀼𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀢𑀺, 𑀉𑀧𑀚𑁆𑀛𑀸𑀬𑁂𑀦 𑀘𑁂 𑀢𑀣𑀸 𑀯𑀼𑀢𑁆𑀢𑀁, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺 ‘‘𑀢𑁂𑀦 𑀳𑀺 𑀉𑀧𑀚𑁆𑀛𑀸𑀬𑀲𑁆𑀲 𑀆𑀕𑀫𑀦𑀁 𑀆𑀕𑀫𑁂𑀣𑀸’’𑀢𑀺, 𑀯𑀝𑁆𑀝𑀢𑀺. 𑀅𑀣 𑀧𑀦𑀲𑁆𑀲 𑀧𑀓𑀢𑀺𑀬𑀸 𑀧𑁂𑀲𑀮𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀺𑀯𑀲𑀸𑀦𑀺 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀪𑀸𑀕𑀢𑀁 𑀑𑀮𑁄𑀓𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀯𑀺𑀳𑀸𑀭𑁂 𑀦𑀺𑀲𑁆𑀲𑀬𑀤𑀸𑀬𑀓𑁄 𑀦𑀢𑁆𑀣𑀺, 𑀉𑀧𑀚𑁆𑀛𑀸𑀬𑁄 𑀘 ‘‘𑀅𑀳𑀁 𑀓𑀢𑀺𑀧𑀸𑀳𑁂𑀦 𑀆𑀕𑀫𑀺𑀲𑁆𑀲𑀸𑀫𑀺, 𑀫𑀸 𑀉𑀓𑁆𑀓𑀡𑁆𑀞𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑁄, 𑀬𑀸𑀯 𑀆𑀕𑀫𑀦𑀸 𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺, 𑀅𑀣𑀸𑀧𑀺 𑀦𑀁 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀉𑀢𑁆𑀢𑀭𑀺𑀧𑀺 𑀧𑀜𑁆𑀘 𑀯𑀸 𑀤𑀲 𑀯𑀸 𑀤𑀺𑀯𑀲𑀸𑀦𑀺 𑀯𑀸𑀲𑁂𑀦𑁆𑀢𑀺𑀬𑁂𑀯, 𑀢𑁂𑀦 𑀯𑀺𑀳𑀸𑀭𑀁 𑀧𑀯𑀢𑁆𑀢𑀺 𑀧𑁂𑀲𑁂𑀢𑀩𑁆𑀩𑀸 ‘‘𑀤𑀳𑀭𑀸 𑀫𑀸 𑀉𑀓𑁆𑀓𑀡𑁆𑀞𑀦𑁆𑀢𑀼, 𑀅𑀳𑀁 𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀫𑁆𑀧𑀺 𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺. 𑀅𑀣 𑀆𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀻𑀧𑀽𑀭𑁂𑀦 𑀯𑀸 𑀘𑁄𑀭𑀸𑀤𑀻𑀳𑀺 𑀯𑀸 𑀉𑀧𑀤𑁆𑀤𑀯𑁄 𑀳𑁄𑀢𑀺, 𑀣𑁂𑀭𑁄 𑀉𑀤𑀓𑁄𑀲𑀓𑁆𑀓𑀦𑀁 𑀯𑀸 𑀆𑀕𑀫𑁂𑀢𑀺, 𑀲𑀳𑀸𑀬𑁂 𑀯𑀸 𑀧𑀭𑀺𑀬𑁂𑀲𑀢𑀺, 𑀢𑀁 𑀘𑁂 𑀧𑀯𑀢𑁆𑀢𑀺𑀁 𑀤𑀳𑀭𑀸 𑀲𑀼𑀡𑀦𑁆𑀢𑀺, 𑀬𑀸𑀯 𑀆𑀕𑀫𑀦𑀸 𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀺. 𑀲𑀘𑁂 𑀧𑀦 𑀲𑁄 ‘‘𑀇𑀥𑁂𑀯𑀸𑀳𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀺𑀡𑀢𑀺, 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀯𑀺𑀩𑁆𑀪𑀦𑁆𑀢𑁂 𑀧𑀦 𑀓𑀸𑀮𑀓𑀢𑁂 𑀧𑀓𑁆𑀔𑀲𑀗𑁆𑀓𑀦𑁆𑀢𑁂 𑀯𑀸 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺, 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀆𑀡𑀢𑁆𑀢𑀻𑀢𑀺 𑀧𑀦 𑀦𑀺𑀲𑁆𑀲𑀬𑀧𑀡𑀸𑀫𑀦𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀧𑀡𑀸𑀫𑁂𑀫𑀺 𑀢’’𑀦𑁆𑀢𑀺 𑀯𑀸 ‘‘𑀫𑀸 𑀇𑀥 𑀧𑀝𑀺𑀓𑁆𑀓𑀫𑀻’’𑀢𑀺 𑀯𑀸 ‘‘𑀦𑀻𑀳𑀭 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀯𑀸 ‘‘𑀦𑀸𑀳𑀁 𑀢𑀬𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀸𑀢𑀺 𑀇𑀫𑀺𑀦𑀸 𑀧𑀸𑀴𑀺𑀦𑀬𑁂𑀦 ‘‘𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁂𑀦 𑀯𑀸 𑀬𑁄 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀬 𑀧𑀡𑀸𑀫𑀺𑀢𑁄 𑀳𑁄𑀢𑀺, 𑀢𑁂𑀦 𑀉𑀧𑀚𑁆𑀛𑀸𑀬𑁄 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀆𑀤𑀺𑀢𑁄𑀯 𑀦 𑀔𑀫𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀢𑀸𑀯 𑀲𑀬𑀫𑁂𑀯 𑀔𑀫𑀸𑀧𑁂𑀢𑀩𑁆𑀩𑁄. 𑀦𑁄 𑀘𑁂 𑀔𑀫𑀢𑀺, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀳𑀸𑀣𑁂𑀭𑁂 𑀕𑀳𑁂𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄. 𑀦𑁄 𑀘𑁂 𑀔𑀫𑀢𑀺, 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀔𑀫𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀏𑀯𑀫𑁆𑀧𑀺 𑀦 𑀔𑀫𑀢𑀺, 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀲𑀪𑀸𑀕𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀩𑁆𑀩𑀁 ‘‘𑀅𑀧𑁆𑀧𑁂𑀯 𑀦𑀸𑀫 ‘𑀲𑀪𑀸𑀕𑀸𑀦𑀁 𑀫𑁂 𑀲𑀦𑁆𑀢𑀺𑀓𑁂 𑀯𑀲𑀢𑀻’𑀢𑀺 𑀜𑀢𑁆𑀯𑀸𑀧𑀺 𑀔𑀫𑁂𑀬𑁆𑀬𑀸’’𑀢𑀺. 𑀲𑀘𑁂 𑀏𑀯𑀫𑁆𑀧𑀺 𑀦 𑀔𑀫𑀢𑀺, 𑀢𑀢𑁆𑀭𑁂𑀯 𑀯𑀲𑀺𑀢𑀩𑁆𑀩𑀁. 𑀢𑀢𑁆𑀭 𑀘𑁂 𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀤𑁄𑀲𑁂𑀦 𑀦 𑀲𑀓𑁆𑀓𑀸 𑀳𑁄𑀢𑀺 𑀯𑀲𑀺𑀢𑀼𑀁, 𑀢𑀁𑀬𑁂𑀯 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀬𑀫𑀸𑀡𑀢𑁆𑀢𑀺𑀬𑀁 𑀯𑀺𑀦𑀺𑀘𑁆𑀙𑀬𑁄.

𑀆𑀘𑀭𑀺𑀬𑀫𑁆𑀳𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀲𑀼 𑀆𑀘𑀭𑀺𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀘𑀺 𑀆𑀘𑀭𑀺𑀬𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀓𑁄𑀘𑀺 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 𑀏𑀯𑀫𑁂𑀯. 𑀢𑀢𑁆𑀭 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀢𑀺 ‘‘𑀅𑀲𑀼𑀓𑀁 𑀦𑀸𑀫, 𑀪𑀦𑁆𑀢𑁂, 𑀞𑀸𑀦𑀁 𑀕𑀦𑁆𑀢𑀼𑀁 𑀇𑀘𑁆𑀙𑀸𑀫𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸’’𑀢𑀺, 𑀆𑀘𑀭𑀺𑀬𑁂𑀦 𑀘 ‘‘𑀓𑀤𑀸 𑀕𑀫𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀁 𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀆𑀘𑀭𑀺𑀬𑁄𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀁 𑀔𑀡𑀁𑀬𑁂𑀯 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 ‘‘𑀪𑀦𑁆𑀢𑁂, 𑀅𑀲𑀼𑀓𑀁 𑀦𑀸𑀫 𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀯𑀤𑀢𑀺, 𑀲𑁄 𑀘 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀢𑁄 𑀘𑁂 𑀕𑀢𑁄 𑀲𑀼𑀕𑀢𑁄. 𑀲𑀘𑁂 𑀧𑀦 𑀦 𑀕𑀘𑁆𑀙𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀣𑀸𑀧𑀺 ‘‘𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑁂𑀦 ‘‘𑀫𑀸 𑀢𑀸𑀯 𑀕𑀘𑁆𑀙, 𑀭𑀢𑁆𑀢𑀺𑀁 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁄 𑀫𑀦𑁆𑀢𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀼𑀕𑀢𑁄. 𑀦𑁄 𑀘𑁂 𑀕𑀘𑁆𑀙𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀦𑁆𑀢𑀲𑁆𑀲 𑀧𑀦 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀢𑁄 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀧𑀦 𑀆𑀘𑀭𑀺𑀬𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀧𑀼𑀘𑁆𑀙𑀢𑀺 ‘‘𑀆𑀯𑀼𑀲𑁄, 𑀅𑀲𑀼𑀓𑀁 𑀦𑀸𑀫 𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀘 ‘‘𑀓𑀤𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀪𑀸𑀕𑁂 𑀯𑀸’’𑀢𑀺 𑀯𑀤𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀁 𑀔𑀡𑀁𑀬𑁂𑀯 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑀘𑁂 𑀧𑀦 𑀆𑀘𑀭𑀺𑀬𑁄 ‘‘𑀲𑁆𑀯𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 𑀘 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀏𑀓𑀤𑀺𑀯𑀲𑀁 𑀢𑀸𑀯 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀼𑀦𑀤𑀺𑀯𑀲𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺. ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀺 𑀫𑀫 𑀕𑀫𑀦𑀁 𑀯𑀸 𑀅𑀕𑀫𑀦𑀁 𑀯𑀸’’𑀢𑀺 𑀯𑀢𑁆𑀯𑀸 𑀧𑀦 𑀲𑀘𑁂 𑀦 𑀕𑀘𑁆𑀙𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀣𑀸𑀧𑀺 ‘‘𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 ‘‘𑀫𑀸 𑀢𑀸𑀯 𑀕𑀘𑁆𑀙𑀣, 𑀭𑀢𑁆𑀢𑀺𑀁 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑁄 𑀫𑀦𑁆𑀢𑁂𑀢𑁆𑀯𑀸𑀧𑀺 𑀦 𑀕𑀘𑁆𑀙𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀉𑀪𑁄𑀧𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀩𑀳𑀺𑀲𑀻𑀫𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁄 𑀘𑁂 𑀆𑀘𑀭𑀺𑀬𑁄 𑀕𑀫𑀺𑀬𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀅𑀦𑀸𑀧𑀼𑀘𑁆𑀙𑀸𑀯 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄𑀬𑁂𑀯 𑀦𑀺𑀯𑀢𑁆𑀢𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀺, 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀘𑀭𑀺𑀬𑁂 𑀯𑀺𑀩𑁆𑀪𑀦𑁆𑀢𑁂 𑀓𑀸𑀮𑀓𑀢𑁂 𑀧𑀓𑁆𑀔𑀲𑀗𑁆𑀓𑀦𑁆𑀢𑁂 𑀘 𑀢𑀁 𑀔𑀡𑀁𑀬𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺.

𑀆𑀡𑀢𑁆𑀢𑀺𑀬𑀁 𑀧𑀦 𑀆𑀘𑀭𑀺𑀬𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀬 𑀧𑀡𑀸𑀫𑁂𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘 ‘‘𑀓𑀺𑀜𑁆𑀘𑀸𑀧𑀺 𑀫𑀁 𑀆𑀘𑀭𑀺𑀬𑁄 𑀧𑀡𑀸𑀫𑁂𑀢𑀺, 𑀅𑀣 𑀔𑁄 𑀳𑀤𑀬𑁂𑀦 𑀫𑀼𑀤𑀼𑀓𑁄’’𑀢𑀺 𑀲𑀸𑀮𑀬𑁄 𑀳𑁄𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂𑀧𑀺 𑀆𑀭𑀺𑀬𑁄 𑀲𑀸𑀮𑀬𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀺𑀭𑀸𑀮𑀬𑁄 ‘‘𑀦 𑀤𑀸𑀦𑀺 𑀇𑀫𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀫𑁆𑀧𑀺 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀉𑀪𑀺𑀦𑁆𑀦𑀁 𑀲𑀸𑀮𑀬𑀪𑀸𑀯𑁂 𑀧𑀦 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺𑀬𑁂𑀯, 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀧𑀡𑀸𑀫𑀺𑀢𑁂𑀦 𑀤𑀡𑁆𑀟𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀔𑀫𑀸𑀧𑁂𑀢𑀩𑁆𑀩𑁄. 𑀦𑁄 𑀘𑁂 𑀔𑀫𑀢𑀺, 𑀉𑀧𑀚𑁆𑀛𑀸𑀬𑁂 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀧𑀭𑀺𑀧𑀽𑀭𑁂𑀦𑁆𑀢𑀁 𑀅𑀥𑀺𑀫𑀢𑁆𑀢𑀧𑁂𑀫𑀸𑀤𑀺𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀯𑀸 𑀧𑀡𑀸𑀫𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀇𑀢𑀭𑀁 𑀅𑀧𑀡𑀸𑀫𑁂𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀧𑀡𑀸𑀫𑁂𑀢𑀩𑁆𑀩𑁄, 𑀬𑁄 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄, 𑀬𑁄 𑀦 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 (𑀫𑀳𑀸𑀯. 𑁮𑁦).

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀆𑀘𑀭𑀺𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀧𑀡𑀸𑀫𑁂𑀦𑁆𑀢𑁄 𑀆𑀘𑀭𑀺𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺 (𑀫𑀳𑀸𑀯. 𑁮𑁧).

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀧𑀲𑀸𑀤𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀳𑀺𑀭𑀻 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑁄 𑀕𑀸𑀭𑀯𑁄 𑀳𑁄𑀢𑀺, 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀧𑀡𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄 𑀲𑀸𑀢𑀺𑀲𑀸𑀭𑁄 𑀳𑁄𑀢𑀺, 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺𑀆𑀤𑀺 (𑀫𑀳𑀸𑀯. 𑁬𑁮).

𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁬𑁮) 𑀦𑀸𑀥𑀺𑀫𑀢𑁆𑀢𑀁 𑀧𑁂𑀫𑀁 𑀳𑁄𑀢𑀻𑀢𑀺 𑀉𑀧𑀚𑁆𑀛𑀸𑀬𑀫𑁆𑀳𑀺 𑀅𑀥𑀺𑀫𑀢𑁆𑀢𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀁 𑀦 𑀳𑁄𑀢𑀺. 𑀦𑀸𑀥𑀺𑀫𑀢𑁆𑀢𑀸 𑀪𑀸𑀯𑀦𑀸 𑀳𑁄𑀢𑀻𑀢𑀺 𑀅𑀥𑀺𑀫𑀢𑁆𑀢𑀸 𑀫𑁂𑀢𑁆𑀢𑀸𑀪𑀸𑀯𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀉𑀧𑀚𑁆𑀛𑀸𑀬𑁂𑀦 𑀯𑀸 𑀲𑀫𑁄𑀥𑀸𑀦𑀕𑀢𑁄𑀢𑀺 𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁮𑁩) 𑀤𑀲𑁆𑀲𑀦𑀲𑀯𑀦𑀯𑀲𑁂𑀦 𑀲𑀫𑁄𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀏𑀓𑀯𑀺𑀳𑀸𑀭𑁂 𑀘𑁂𑀢𑀺𑀬𑀁 𑀯𑀸 𑀯𑀦𑁆𑀤𑀦𑁆𑀢𑀁, 𑀏𑀓𑀕𑀸𑀫𑁂 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀢𑀺, 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀉𑀧𑀚𑁆𑀛𑀸𑀬𑁄 𑀧𑀲𑁆𑀲𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦 𑀧𑀲𑁆𑀲𑀢𑀺, 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀯𑀸 𑀆𑀓𑀸𑀲𑁂𑀦 𑀯𑀸 𑀕𑀘𑁆𑀙𑀦𑁆𑀢𑀁 𑀉𑀧𑀚𑁆𑀛𑀸𑀬𑀁 𑀤𑀺𑀲𑁆𑀯𑀸 𑀤𑀽𑀭𑀢𑁆𑀢𑀸 ‘‘𑀪𑀺𑀓𑁆𑀔𑀽’’𑀢𑀺 𑀚𑀸𑀦𑀸𑀢𑀺, ‘‘𑀉𑀧𑀚𑁆𑀛𑀸𑀬𑁄’’𑀢𑀺 𑀦 𑀚𑀸𑀦𑀸𑀢𑀺, 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀘𑁂 𑀚𑀸𑀦𑀸𑀢𑀺, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀉𑀧𑀭𑀺𑀧𑀸𑀲𑀸𑀤𑁂 𑀉𑀧𑀚𑁆𑀛𑀸𑀬𑁄 𑀯𑀲𑀢𑀺, 𑀳𑁂𑀝𑁆𑀞𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀢𑀁 𑀅𑀤𑀺𑀲𑁆𑀯𑀸𑀯 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀢𑀺, 𑀆𑀲𑀦𑀲𑀸𑀮𑀸𑀬 𑀯𑀸 𑀦𑀺𑀲𑀺𑀦𑁆𑀦𑀁 𑀅𑀤𑀺𑀲𑁆𑀯𑀸𑀯 𑀏𑀓𑀫𑀦𑁆𑀢𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀥𑀫𑁆𑀫𑀲𑁆𑀲𑀯𑀦𑀫𑀡𑁆𑀟𑀧𑁂 𑀯𑀸 𑀦𑀺𑀲𑀺𑀦𑁆𑀦𑀫𑁆𑀧𑀺 𑀢𑀁 𑀅𑀤𑀺𑀲𑁆𑀯𑀸𑀯 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀏𑀯𑀁 𑀢𑀸𑀯 𑀤𑀲𑁆𑀲𑀦𑀯𑀲𑁂𑀦 𑀲𑀫𑁄𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀯𑀦𑀯𑀲𑁂𑀦 𑀧𑀦 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀯𑀺𑀳𑀸𑀭𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀥𑀫𑁆𑀫𑀁 𑀯𑀸 𑀓𑀣𑁂𑀦𑁆𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑀲𑁆𑀲 𑀫𑁂 𑀲𑀤𑁆𑀤𑁄’’𑀢𑀺 𑀲𑀜𑁆𑀚𑀸𑀦𑀸𑀢𑀺, 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀅𑀲𑀜𑁆𑀚𑀸𑀦𑀦𑁆𑀢𑀲𑁆𑀲 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀬𑀁 𑀲𑀫𑁄𑀥𑀸𑀦𑁂 𑀯𑀺𑀦𑀺𑀘𑁆𑀙𑀬𑁄.

𑁧𑁫𑁫. 𑀦𑀺𑀲𑁆𑀲𑀸𑀬 𑀓𑁂𑀦 𑀯𑀲𑀺𑀢𑀩𑁆𑀩𑀁, 𑀓𑁂𑀦 𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁, 𑀅𑀩𑁆𑀬𑀢𑁆𑀢𑁂𑀦 𑀬𑀸𑀯𑀚𑀻𑀯’’𑀦𑁆𑀢𑀺 (𑀫𑀳𑀸𑀯. 𑁧𑁦𑁩) 𑀯𑀘𑀦𑀢𑁄 𑀬𑁄 𑀅𑀩𑁆𑀬𑀢𑁆𑀢𑁄 𑀳𑁄𑀢𑀺, 𑀢𑁂𑀦 𑀬𑀸𑀯𑀚𑀻𑀯𑀁 𑀦𑀺𑀲𑁆𑀲𑀸𑀬𑁂𑀯 𑀯𑀲𑀺𑀢𑀩𑁆𑀩𑀁. 𑀲𑀘𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁦𑁩) 𑀯𑀼𑀟𑁆𑀠𑀢𑀭𑀁 𑀆𑀘𑀭𑀺𑀬𑀁 𑀦 𑀮𑀪𑀢𑀺, 𑀉𑀧𑀲𑀫𑁆𑀧𑀤𑀸𑀬 𑀲𑀝𑁆𑀞𑀺𑀯𑀲𑁆𑀲𑁄 𑀯𑀸 𑀲𑀢𑁆𑀢𑀢𑀺𑀯𑀲𑁆𑀲𑁄 𑀯𑀸 𑀳𑁄𑀢𑀺, 𑀦𑀯𑀓𑀢𑀭𑀲𑁆𑀲𑀧𑀺 𑀩𑁆𑀬𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂, 𑀆𑀯𑀼𑀲𑁄, 𑀳𑁄𑀢𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄𑀯. 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀦𑁆𑀢𑁂𑀦𑀧𑀺 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀺 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑀩𑁆𑀩𑀆𑀧𑀼𑀘𑁆𑀙𑀦𑁂𑀲𑀼.

𑀬𑁄 𑀧𑀦 𑀩𑁆𑀬𑀢𑁆𑀢𑁄 𑀳𑁄𑀢𑀺 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑁄, 𑀢𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁂𑀦 (𑀧𑀸𑀘𑀺. 𑀅𑀝𑁆𑀞. 𑁧𑁪𑁫-𑁧𑁪𑁭) 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑁂𑀦 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀢𑁆𑀢𑀩𑁆𑀩𑀸, 𑀧𑀓𑁆𑀔𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀲𑀼𑀢𑁆𑀢𑀦𑁆𑀢𑀢𑁄 𑀘𑀢𑁆𑀢𑀸𑀭𑁄 𑀪𑀸𑀡𑀯𑀸𑀭𑀸, 𑀲𑀫𑁆𑀧𑀢𑁆𑀢𑀸𑀦𑀁 𑀧𑀭𑀺𑀲𑀸𑀦𑀁 𑀧𑀭𑀺𑀓𑀣𑀦𑀢𑁆𑀣𑀸𑀬 𑀅𑀦𑁆𑀥𑀓𑀯𑀺𑀦𑁆𑀤(𑀅. 𑀦𑀺. 𑁫.𑁧𑁧𑁪) 𑀫𑀳𑀸𑀭𑀸𑀳𑀼𑀮𑁄𑀯𑀸𑀤(𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀅𑀫𑁆𑀩𑀝𑁆𑀞(𑀤𑀈. 𑀦𑀺. 𑁧.𑁨𑁫𑁪 𑀆𑀤𑀬𑁄) 𑀲𑀤𑀺𑀲𑁄 𑀏𑀓𑁄 𑀓𑀣𑀸𑀫𑀕𑁆𑀕𑁄, 𑀲𑀗𑁆𑀖𑀪𑀢𑁆𑀢𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀢𑀺𑀲𑁆𑀲𑁄 𑀅𑀦𑀼𑀫𑁄𑀤𑀦𑀸, 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀚𑀸𑀦𑀦𑀢𑁆𑀣𑀁 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁄, 𑀲𑀫𑀡𑀥𑀫𑁆𑀫𑀓𑀭𑀡𑀢𑁆𑀣𑀁 𑀲𑀫𑀸𑀥𑀺𑀯𑀲𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀸 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀫𑁂𑀓𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀳𑀺 𑀅𑀬𑀁 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀘𑀸𑀢𑀼𑀤𑁆𑀤𑀺𑀲𑁄, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑁂𑀦 𑀯𑀲𑀺𑀢𑀼𑀁 𑀮𑀪𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀦 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀦 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦… 𑀦 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀦 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁦𑁩). 𑀏𑀢𑁆𑀣𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀬𑀼𑀢𑁆𑀢𑀯𑀲𑁂𑀦 𑀆𑀧𑀢𑁆𑀢𑀺𑀅𑀗𑁆𑀕𑀯𑀲𑁂𑀦 𑀘 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀩𑀸𑀮𑀸𑀦𑀁 𑀧𑀦 𑀅𑀩𑁆𑀬𑀢𑁆𑀢𑀸𑀦𑀁 𑀤𑀺𑀲𑀁𑀕𑀫𑀺𑀓𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀅𑀦𑀼𑀜𑁆𑀜𑀸 𑀦 𑀤𑀸𑀢𑀩𑁆𑀩𑀸. 𑀲𑀘𑁂 𑀤𑁂𑀦𑁆𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀼𑀓𑁆𑀓𑀝𑀁. 𑀢𑁂 𑀘𑁂 𑀅𑀦𑀦𑀼𑀜𑁆𑀜𑀸𑀢𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀤𑀺𑀲𑀁𑀕𑀫𑀺𑀓𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀆𑀧𑀼𑀘𑁆𑀙𑀦𑁆𑀢𑀺. 𑀢𑁂, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀸 ‘‘𑀓𑀳𑀁 𑀕𑀫𑀺𑀲𑁆𑀲𑀣, 𑀓𑁂𑀦 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀣𑀸’’𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀜𑁆𑀜𑁂 𑀩𑀸𑀮𑁂 𑀅𑀩𑁆𑀬𑀢𑁆𑀢𑁂 𑀅𑀧𑀤𑀺𑀲𑁂𑀬𑁆𑀬𑀼𑀁. 𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀸, 𑀅𑀦𑀼𑀚𑀸𑀦𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀦𑀦𑀼𑀜𑁆𑀜𑀸𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀕𑀘𑁆𑀙𑁂𑀬𑁆𑀬𑀼𑀁 𑀘𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁬𑁩).

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.