𑁨𑁪. 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁫𑁬. 𑀲𑀻𑀫𑀸𑀢𑀺 𑀏𑀢𑁆𑀣 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀲𑀻𑀫𑀸 𑀦𑀸𑀫𑁂𑀲𑀸 𑀩𑀤𑁆𑀥𑀲𑀻𑀫𑀸 𑀅𑀩𑀤𑁆𑀥𑀲𑀻𑀫𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀩𑀤𑁆𑀥𑀲𑀻𑀫𑀸 𑀦𑀸𑀫. 𑀅𑀢𑀺𑀔𑀼𑀤𑁆𑀤𑀓𑀸, 𑀅𑀢𑀺𑀫𑀳𑀢𑀻, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸, 𑀙𑀸𑀬𑀸𑀦𑀺𑀫𑀺𑀢𑁆𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸, 𑀦𑀤𑀺𑀬𑀸 𑀲𑀫𑁆𑀫𑀢𑀸, 𑀲𑀫𑀼𑀤𑁆𑀤𑁂 𑀲𑀫𑁆𑀫𑀢𑀸, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸𑀢𑀺 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻𑀢𑀺 𑀯𑀘𑀦𑀢𑁄 𑀏𑀢𑀸 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀦𑀸𑀫.

𑀢𑀢𑁆𑀣 𑀅𑀢𑀺𑀔𑀼𑀤𑁆𑀤𑀓𑀸 𑀦𑀸𑀫 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀢𑀺𑀫𑀳𑀢𑀻 𑀦𑀸𑀫 𑀬𑀸 𑀓𑁂𑀲𑀕𑁆𑀕𑀫𑀢𑁆𑀢𑁂𑀦𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑀢𑀸. 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀅𑀖𑀝𑀺𑀢𑀦𑀺𑀫𑀺𑀢𑁆𑀢𑀸 𑀯𑀼𑀘𑁆𑀘𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀬 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀼𑀩𑁆𑀩𑀓𑀺𑀢𑁆𑀢𑀺𑀢𑀁 𑀧𑀝𑀺𑀓𑀺𑀢𑁆𑀢𑁂𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀅𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀲𑀘𑁂 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀆𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀳𑁄𑀢𑀺. 𑀅𑀧𑀭𑀸𑀧𑀺 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀁 𑀢𑀘𑀲𑀸𑀭𑀭𑀼𑀓𑁆𑀔𑀁 𑀯𑀸 𑀔𑀸𑀡𑀼𑀓𑀁 𑀯𑀸 𑀧𑀁𑀲𑀼𑀧𑀼𑀜𑁆𑀚𑀁 𑀯𑀸 𑀯𑀸𑀮𑀼𑀓𑀧𑀼𑀜𑁆𑀚𑀁 𑀯𑀸 𑀅𑀜𑁆𑀜𑀢𑀭𑀁 𑀅𑀦𑁆𑀢𑀭𑀸 𑀏𑀓𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸. 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀦𑀸𑀫 𑀧𑀩𑁆𑀩𑀢𑀙𑀸𑀬𑀸𑀤𑀻𑀦𑀁 𑀬𑀁 𑀓𑀺𑀜𑁆𑀘𑀺 𑀙𑀸𑀬𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸. 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀺𑀫𑀺𑀢𑁆𑀢𑀸𑀦𑀺 𑀅𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸. 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸 𑀦𑀸𑀫 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀺𑀢𑁂𑀦 𑀲𑀫𑁆𑀫𑀢𑀸. 𑀦𑀤𑀺𑀬𑀸, 𑀲𑀫𑀼𑀤𑁆𑀤𑁂, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸 𑀦𑀸𑀫 𑀏𑀢𑁂𑀲𑀼 𑀦𑀤𑀺𑀆𑀤𑀻𑀲𑀼 𑀲𑀫𑁆𑀫𑀢𑀸. 𑀲𑀸 𑀳𑀺 𑀏𑀯𑀁 𑀲𑀫𑁆𑀫𑀢𑀸𑀧𑀺 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁭) 𑀯𑀘𑀦𑀢𑁄 𑀅𑀲𑀫𑁆𑀫𑀢𑀸𑀯 𑀳𑁄𑀢𑀺. 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸 (𑀫𑀳𑀸𑀯. 𑀅𑀝𑁆𑀞. 𑁧𑁪𑁮) 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑁄𑀭𑀸𑀡𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀅𑀫𑁆𑀩𑁄 𑀘𑁂𑀯 𑀚𑀫𑁆𑀩𑀼 𑀘𑀸𑀢𑀺 𑀤𑁆𑀯𑁂 𑀭𑀼𑀓𑁆𑀔𑀸 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀯𑀺𑀝𑀧𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀫𑁆𑀩𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀚𑀫𑁆𑀩𑀼, 𑀯𑀺𑀳𑀸𑀭𑀲𑀻𑀫𑀸 𑀘 𑀚𑀫𑁆𑀩𑀼𑀁 𑀅𑀦𑁆𑀢𑁄𑀓𑀢𑁆𑀯𑀸 𑀅𑀫𑁆𑀩𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀤𑁆𑀥𑀸 𑀳𑁄𑀢𑀺. 𑀅𑀣 𑀧𑀘𑁆𑀙𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀯𑀺𑀳𑀸𑀭𑁂 𑀓𑀢𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸 𑀪𑀺𑀓𑁆𑀔𑀽 𑀢𑀁 𑀅𑀫𑁆𑀩𑀁 𑀅𑀦𑁆𑀢𑁄𑀓𑀢𑁆𑀯𑀸 𑀚𑀫𑁆𑀩𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀦𑁆𑀥𑀦𑁆𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀦𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑀘𑁂 𑀧𑀞𑀫𑀢𑀭𑀁 𑀓𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀻𑀫𑀸 𑀅𑀲𑀫𑁆𑀫𑀢𑀸 𑀳𑁄𑀢𑀺, 𑀲𑀻𑀫𑀸𑀬 𑀉𑀧𑀘𑀸𑀭𑁄 𑀞𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀫𑁆𑀫𑀢𑀸 𑀳𑁄𑀢𑀺, 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀳𑀢𑁆𑀣𑀫𑀢𑁆𑀢𑀸 𑀲𑀻𑀫𑀦𑁆𑀢𑀭𑀺𑀓𑀸 𑀞𑀧𑁂𑀢𑀩𑁆𑀩𑀸. 𑀓𑀼𑀭𑀼𑀦𑁆𑀤𑀺𑀬𑀁 ‘‘𑀯𑀺𑀤𑀢𑁆𑀣𑀺𑀫𑀢𑁆𑀢𑀫𑁆𑀧𑀺’’, 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀭𑀼𑀓𑁆𑀔𑁄𑀧𑀺 𑀘 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺. 𑀲𑁄 𑀧𑀦 𑀯𑀟𑁆𑀠𑀦𑁆𑀢𑁄 𑀲𑀻𑀫𑀲𑀗𑁆𑀓𑀭𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑁄. 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑀭𑁂𑀲𑀁 𑀩𑀤𑁆𑀥𑀲𑀻𑀫𑀁 𑀲𑀓𑀮𑀁 𑀯𑀸 𑀢𑀲𑁆𑀲𑀸 𑀧𑀤𑁂𑀲𑀁 𑀯𑀸 𑀅𑀦𑁆𑀢𑁄𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀸 𑀦𑀸𑀫 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑁄𑀧𑀺 𑀪𑀺𑀓𑁆𑀔𑀽𑀦𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀲𑀻𑀫𑀸𑀬 𑀏𑀲𑁂𑀯 𑀦𑀬𑁄. 𑀦 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀓𑀫𑁆𑀫𑁂 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀦 𑀓𑀫𑁆𑀫𑀯𑀸𑀘𑀁 𑀯𑀕𑁆𑀕𑀁 𑀓𑀭𑁄𑀦𑁆𑀢𑀺. 𑀇𑀢𑀺 𑀇𑀫𑀸 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸.

𑁧𑁫𑁭. 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀬𑀼𑀢𑁆𑀢𑀸. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀸 𑀦𑀸𑀫 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁 𑀯𑀦𑀦𑀺𑀫𑀺𑀢𑁆𑀢𑀁 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀫𑀕𑁆𑀕𑀦𑀺𑀫𑀺𑀢𑁆𑀢𑀁 𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑀁 𑀦𑀤𑀻𑀦𑀺𑀫𑀺𑀢𑁆𑀢𑀁 𑀉𑀤𑀓𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀬𑀣𑀸𑀮𑀤𑁆𑀥𑀸𑀦𑀺 𑀦𑀺𑀫𑀺𑀢𑁆𑀢𑀼𑀧𑀕𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁. 𑀧𑀩𑁆𑀩𑀢𑁄, 𑀪𑀦𑁆𑀢𑁂. 𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑀸 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑁋 𑀯𑀺𑀦𑀬𑀥𑀭𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺? ‘‘𑀧𑀩𑁆𑀩𑀢𑁄, 𑀪𑀦𑁆𑀢𑁂’’𑀢𑀺. 𑀇𑀤𑀁 𑀧𑀦 𑀉𑀧𑀲𑀫𑁆𑀧𑀦𑁆𑀦𑁄 𑀯𑀸 𑀆𑀘𑀺𑀓𑁆𑀔𑀢𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀯𑀸, 𑀯𑀝𑁆𑀝𑀢𑀺𑀬𑁂𑀯. 𑀧𑀼𑀦 𑀯𑀺𑀦𑀬𑀥𑀭𑁂𑀦 ‘‘𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁, ‘‘𑀏𑀢𑀁 𑀧𑀩𑁆𑀩𑀢𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀫, 𑀓𑀭𑀺𑀲𑁆𑀲𑀸𑀫, 𑀦𑀺𑀫𑀺𑀢𑁆𑀢𑀁 𑀓𑀢𑁄, 𑀦𑀺𑀫𑀺𑀢𑁆𑀢𑀁 𑀳𑁄𑀢𑀼, 𑀳𑁄𑀢𑀺, 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀦 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀸𑀲𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬, 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀉𑀤𑀓𑀁, 𑀪𑀦𑁆𑀢𑁂. 𑀏𑀢𑀁 𑀉𑀤𑀓𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀅𑀝𑁆𑀞𑀧𑁂𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀩𑁆𑀩𑀢𑁄, 𑀪𑀦𑁆𑀢𑁂. 𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸𑀯 𑀞𑀧𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀖𑀝𑀺𑀢𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀸𑀦𑀺 𑀲𑀓𑀺𑀁 𑀓𑀺𑀢𑁆𑀢𑀺𑀢𑀸𑀦𑀺𑀧𑀺 𑀓𑀺𑀢𑁆𑀢𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀫𑀫𑀡𑁆𑀟𑀮𑀁 𑀩𑀦𑁆𑀥𑀦𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁫𑁮. 𑀇𑀤𑀸𑀦𑀺 𑀦𑀺𑀫𑀺𑀢𑁆𑀢𑀼𑀧𑀕𑀸𑀦𑀺 𑀧𑀩𑁆𑀩𑀢𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋 𑀢𑀺𑀯𑀺𑀥𑁄 𑀧𑀩𑁆𑀩𑀢𑁄 𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑁄 𑀲𑀼𑀤𑁆𑀥𑀧𑀸𑀲𑀸𑀡𑀧𑀩𑁆𑀩𑀢𑁄 𑀉𑀪𑀬𑀫𑀺𑀲𑁆𑀲𑀓𑁄𑀢𑀺. 𑀲𑁄 𑀢𑀺𑀯𑀺𑀥𑁄𑀧𑀺 𑀯𑀝𑁆𑀝𑀢𑀺, 𑀯𑀸𑀮𑀺𑀓𑀭𑀸𑀲𑀺 𑀧𑀦 𑀦 𑀯𑀝𑁆𑀝𑀢𑀺. 𑀇𑀢𑀭𑁄𑀧𑀺 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀑𑀫𑀓𑀢𑀭𑁄 𑀦 𑀯𑀝𑁆𑀝𑀢𑀺, 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁄𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑁄 𑀢𑀻𑀲𑀼 𑀯𑀸 𑀢𑀬𑁄 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀘𑀢𑀽𑀳𑀺 𑀯𑀸 𑀢𑀻𑀳𑀺 𑀯𑀸 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀤𑁆𑀯𑀻𑀳𑀺 𑀧𑀦 𑀦𑀺𑀫𑀺𑀢𑁆𑀢𑁂𑀳𑀺 𑀏𑀓𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀢𑁄 𑀧𑀭𑁂𑀲𑀼 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀸 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 ‘‘𑀏𑀓𑀸𑀩𑀤𑁆𑀥𑁄, 𑀦 𑀏𑀓𑀸𑀩𑀤𑁆𑀥𑁄’’𑀢𑀺. 𑀲𑀘𑁂 𑀏𑀓𑀸𑀩𑀤𑁆𑀥𑁄 𑀳𑁄𑀢𑀺, 𑀦 𑀓𑀸𑀢𑀩𑁆𑀩𑁄. 𑀢𑀜𑁆𑀳𑀺 𑀘𑀢𑀽𑀲𑀼 𑀯𑀸 𑀅𑀝𑁆𑀞𑀲𑀼 𑀯𑀸 𑀤𑀺𑀲𑀸𑀲𑀼 𑀓𑀺𑀢𑁆𑀢𑁂𑀦𑁆𑀢𑁂𑀦𑀧𑀺 𑀏𑀓𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑁄 𑀏𑀯𑀁 𑀘𑀓𑁆𑀓𑀲𑀡𑁆𑀞𑀸𑀦𑁂𑀦 𑀯𑀺𑀳𑀸𑀭𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀧𑀩𑁆𑀩𑀢𑁄, 𑀢𑀁 𑀏𑀓𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀸𑀲𑀼 𑀤𑀺𑀲𑀸𑀲𑀼 𑀢𑀁 𑀩𑀳𑀺𑀤𑁆𑀥𑀸 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀜𑁆𑀜𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀩𑁆𑀩𑀢𑀲𑁆𑀲 𑀢𑀢𑀺𑀬𑀪𑀸𑀕𑀁 𑀯𑀸 𑀉𑀧𑀟𑁆𑀠𑀁 𑀯𑀸 𑀅𑀦𑁆𑀢𑁄𑀲𑀻𑀫𑀸𑀬 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀢𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀅𑀦𑁆𑀢𑁄 𑀓𑀢𑁆𑀢𑀼𑀓𑀸𑀫𑀸, 𑀢𑀲𑁆𑀲 𑀧𑀭𑀢𑁄 𑀢𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀢𑁂 𑀚𑀸𑀢𑀭𑀼𑀓𑁆𑀔𑀯𑀫𑁆𑀫𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀲𑀘𑁂 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀲𑀩𑁆𑀩𑀁 𑀧𑀩𑁆𑀩𑀢𑀁 𑀅𑀦𑁆𑀢𑁄 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀧𑀩𑁆𑀩𑀢𑀲𑁆𑀲 𑀧𑀭𑀢𑁄 𑀪𑀽𑀫𑀺𑀬𑀁 𑀚𑀸𑀢𑀭𑀼𑀓𑁆𑀔𑀯𑀫𑁆𑀫𑀺𑀓𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺.

𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑁂 𑀅𑀬𑀕𑀼𑀴𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀬𑁄 𑀓𑁄𑀘𑀺 𑀧𑀸𑀲𑀸𑀡𑁄 𑀯𑀝𑁆𑀝𑀢𑀺. 𑀧𑀫𑀸𑀡𑀢𑁄 𑀧𑀦 𑀳𑀢𑁆𑀣𑀺𑀧𑁆𑀧𑀫𑀸𑀡𑁄 𑀧𑀩𑁆𑀩𑀢𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀲𑁆𑀫𑀸 𑀲𑁄 𑀦 𑀯𑀝𑁆𑀝𑀢𑀺, 𑀫𑀳𑀸𑀕𑁄𑀡𑀫𑀳𑀸𑀫𑀳𑀺𑀁𑀲𑀧𑁆𑀧𑀫𑀸𑀡𑁄 𑀧𑀦 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑁄 𑀯𑀝𑁆𑀝𑀢𑀺, 𑀢𑀢𑁄 𑀔𑀼𑀤𑁆𑀤𑀓𑀢𑀭𑁄 𑀇𑀝𑁆𑀞𑀓𑀸 𑀯𑀸 𑀫𑀳𑀦𑁆𑀢𑀻𑀧𑀺 𑀦 𑀯𑀝𑁆𑀝𑀢𑀺, 𑀅𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑀸𑀦𑀁 𑀭𑀸𑀲𑀺𑀧𑀺 𑀦 𑀯𑀝𑁆𑀝𑀢𑀺, 𑀧𑀕𑁂𑀯 𑀧𑀁𑀲𑀼𑀯𑀸𑀮𑀼𑀓𑀭𑀸𑀲𑀺. 𑀪𑀽𑀫𑀺𑀲𑀫𑁄 𑀔𑀮𑀫𑀡𑁆𑀟𑀮𑀲𑀤𑀺𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀯𑀸 𑀪𑀽𑀫𑀺𑀢𑁄 𑀔𑀸𑀡𑀼𑀓𑁄 𑀯𑀺𑀬 𑀉𑀝𑁆𑀞𑀺𑀢𑀧𑀸𑀲𑀸𑀡𑁄 𑀯𑀸 𑀳𑁄𑀢𑀺, 𑀲𑁄𑀧𑀺 𑀧𑀫𑀸𑀡𑀼𑀧𑀕𑁄 𑀘𑁂, 𑀯𑀝𑁆𑀝𑀢𑀺. 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑀺𑀫𑀳𑀦𑁆𑀢𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀘𑁂 𑀫𑀳𑀢𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀏𑀓𑀧𑁆𑀧𑀤𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀅𑀜𑁆𑀜𑁄 𑀧𑀸𑀲𑀸𑀡𑁄 𑀓𑀺𑀢𑁆𑀢𑁂𑀢𑀩𑁆𑀩𑁄. 𑀲𑀘𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑀼𑀧𑀭𑀺 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂𑀦 𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀭𑀽𑀧𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀦 𑀯𑀝𑁆𑀝𑀢𑀺. 𑀲𑀘𑁂 𑀳𑀺 𑀢𑀁 𑀓𑀺𑀢𑁆𑀢𑁂𑀦𑁆𑀢𑀺, 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀜𑁆𑀘 𑀦𑀸𑀫 𑀩𑀳𑀺𑀲𑀻𑀫𑀸𑀬 𑀳𑁄𑀢𑀺, 𑀯𑀺𑀳𑀸𑀭𑁄𑀧𑀺 𑀩𑀳𑀺𑀲𑀻𑀫𑀸𑀬𑀁 𑀆𑀧𑀚𑁆𑀚𑀢𑀺. 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀓𑀺𑀢𑁆𑀢𑁂𑀢𑀩𑁆𑀩𑁄.

𑀯𑀦𑀦𑀺𑀫𑀺𑀢𑁆𑀢𑁂 𑀢𑀺𑀡𑀯𑀦𑀁 𑀯𑀸 𑀢𑀘𑀲𑀸𑀭𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀭𑀼𑀓𑁆𑀔𑀯𑀦𑀁 𑀯𑀸 𑀦 𑀯𑀝𑁆𑀝𑀢𑀺, 𑀅𑀦𑁆𑀢𑁄𑀲𑀸𑀭𑀸𑀦𑀁 𑀧𑀦 𑀲𑀸𑀓𑀲𑀸𑀮𑀸𑀤𑀻𑀦𑀁 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑀸𑀦𑀁 𑀯𑀸 𑀭𑀼𑀓𑁆𑀔𑀸𑀦𑀁 𑀯𑀦𑀁 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀫𑁆𑀧𑀺, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺, 𑀧𑀭𑀁 𑀬𑁄𑀚𑀦𑀲𑀢𑀺𑀓𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀓𑀤𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬 𑀓𑀸𑀢𑀼𑀓𑀸𑀫𑁂𑀳𑀺𑀧𑀺 𑀯𑀦𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁆𑀣 𑀭𑀼𑀓𑁆𑀔𑀧𑀸𑀲𑀸𑀡𑀸𑀤𑀬𑁄 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀯𑀦𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀓𑀺𑀢𑁆𑀢𑁂𑀢𑀩𑁆𑀩𑀁.

𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑁂 𑀢𑀘𑀲𑀸𑀭𑁄 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀭𑀼𑀓𑁆𑀔𑁄 𑀦 𑀯𑀝𑁆𑀝𑀢𑀺, 𑀅𑀦𑁆𑀢𑁄𑀲𑀸𑀭𑁄 𑀚𑀻𑀯𑀫𑀸𑀦𑀓𑁄 𑀅𑀦𑁆𑀢𑀫𑀲𑁄 𑀉𑀩𑁆𑀩𑁂𑀥𑀢𑁄 𑀅𑀝𑁆𑀞𑀗𑁆𑀕𑀼𑀮𑁄 𑀧𑀭𑀺𑀡𑀸𑀳𑀢𑁄 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄𑀧𑀺 𑀯𑀝𑁆𑀝𑀢𑀺. 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺, 𑀧𑀭𑀁 𑀤𑁆𑀯𑀸𑀤𑀲𑀬𑁄𑀚𑀦𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑁄𑀧𑀺 𑀯𑀝𑁆𑀝𑀢𑀺. 𑀯𑀁𑀲𑀦𑀴𑀓𑀲𑀭𑀸𑀯𑀸𑀤𑀻𑀲𑀼 𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀯𑀟𑁆𑀠𑀸𑀧𑀺𑀢𑁄 𑀧𑀫𑀸𑀡𑀼𑀧𑀕𑁄𑀧𑀺 𑀦 𑀯𑀝𑁆𑀝𑀢𑀺, 𑀢𑀢𑁄 𑀅𑀧𑀦𑁂𑀢𑁆𑀯𑀸 𑀧𑀦 𑀢𑀁 𑀔𑀡𑀫𑁆𑀧𑀺 𑀪𑀽𑀫𑀺𑀬𑀁 𑀭𑁄𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑀁 𑀓𑀢𑁆𑀯𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀯𑀫𑀽𑀮𑀲𑀸𑀔𑀸𑀦𑀺𑀕𑁆𑀕𑀫𑀦𑀁 𑀅𑀓𑀸𑀭𑀡𑀁, 𑀔𑀦𑁆𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑁄𑀧𑀺𑀢𑁂 𑀧𑀦 𑀏𑀢𑀁 𑀬𑀼𑀚𑁆𑀚𑀢𑀺. 𑀓𑀺𑀢𑁆𑀢𑁂𑀦𑁆𑀢𑁂𑀦 𑀘 ‘‘𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 ‘‘𑀲𑀸𑀓𑀭𑀼𑀓𑁆𑀔𑁄’’𑀢𑀺𑀧𑀺 ‘‘𑀲𑀸𑀮𑀭𑀼𑀓𑁆𑀔𑁄’’𑀢𑀺𑀧𑀺. 𑀏𑀓𑀸𑀩𑀤𑁆𑀥𑀁 𑀧𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀺𑀕𑁆𑀭𑁄𑀥𑀲𑀤𑀺𑀲𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀫𑀕𑁆𑀕𑀦𑀺𑀫𑀺𑀢𑁆𑀢𑁂 𑀅𑀭𑀜𑁆𑀜𑀔𑁂𑀢𑁆𑀢𑀦𑀤𑀻𑀢𑀴𑀸𑀓𑀫𑀕𑁆𑀕𑀸𑀤𑀬𑁄 𑀦 𑀯𑀝𑁆𑀝𑀦𑁆𑀢𑀺, 𑀚𑀗𑁆𑀖𑀫𑀕𑁆𑀕𑁄 𑀯𑀸 𑀲𑀓𑀝𑀫𑀕𑁆𑀕𑁄 𑀯𑀸 𑀯𑀝𑁆𑀝𑀢𑀺. 𑀬𑁄 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀕𑀸𑀫𑀦𑁆𑀢𑀭𑀸𑀦𑀺 𑀕𑀘𑁆𑀙𑀢𑀺, 𑀬𑁄 𑀧𑀦 𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀢𑁄 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀲𑀓𑀝𑀫𑀕𑁆𑀕𑀫𑁂𑀯 𑀑𑀢𑀭𑀢𑀺, 𑀬𑁂 𑀯𑀸 𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀸 𑀅𑀯𑀴𑀜𑁆𑀚𑀸, 𑀢𑁂 𑀦 𑀯𑀝𑁆𑀝𑀦𑁆𑀢𑀺, 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑁂𑀳𑀺 𑀯𑀴𑀜𑁆𑀚𑀺𑀬𑀫𑀸𑀦𑀸𑀬𑁂𑀯 𑀯𑀝𑁆𑀝𑀦𑁆𑀢𑀺. 𑀲𑀘𑁂 𑀤𑁆𑀯𑁂 𑀫𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀙𑀸 𑀲𑀓𑀝𑀥𑀼𑀭𑀫𑀺𑀯 𑀏𑀓𑀻𑀪𑀯𑀦𑁆𑀢𑀺, 𑀤𑁆𑀯𑁂𑀥𑀸 𑀪𑀺𑀦𑁆𑀦𑀝𑁆𑀞𑀸𑀦𑁂 𑀯𑀸 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑁂 𑀯𑀸 𑀲𑀓𑀺𑀁 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀦 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀏𑀓𑀸𑀩𑀤𑁆𑀥𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑀁 𑀳𑁄𑀢𑀺. 𑀲𑀘𑁂 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀺, 𑀫𑀚𑁆𑀛𑁂 𑀏𑀓𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀧𑀭𑀁 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀓𑀸𑀩𑀤𑁆𑀥𑀦𑀺𑀫𑀺𑀢𑁆𑀢𑀜𑁆𑀳𑁂𑀢𑀁. 𑀓𑁄𑀡𑀁 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑀁 𑀧𑀦 𑀧𑀭𑀪𑀸𑀕𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀫𑀚𑁆𑀛𑁂𑀦 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑀫𑀕𑁆𑀕𑁄 𑀧𑀦 𑀦 𑀓𑀺𑀢𑁆𑀢𑁂𑀢𑀩𑁆𑀩𑁄, 𑀓𑀺𑀢𑁆𑀢𑀺𑀢𑁂 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀺. 𑀲𑀘𑁂 𑀲𑀓𑀝𑀫𑀕𑁆𑀕𑀲𑁆𑀲 𑀅𑀦𑁆𑀢𑀺𑀫𑀘𑀓𑁆𑀓𑀫𑀕𑁆𑀕𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀫𑀕𑁆𑀕𑁄 𑀩𑀳𑀺𑀲𑀻𑀫𑀸𑀬 𑀳𑁄𑀢𑀺, 𑀲𑀘𑁂 𑀩𑀸𑀳𑀺𑀭𑀘𑀓𑁆𑀓𑀫𑀕𑁆𑀕𑀁 𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀩𑀸𑀳𑀺𑀭𑀘𑀓𑁆𑀓𑀫𑀕𑁆𑀕𑁄 𑀩𑀳𑀺𑀲𑀻𑀫𑀸𑀬 𑀳𑁄𑀢𑀺, 𑀲𑁂𑀲𑀁 𑀅𑀦𑁆𑀢𑁄𑀲𑀻𑀫𑀁 𑀪𑀚𑀢𑀺. 𑀫𑀕𑁆𑀕𑀁 𑀓𑀺𑀢𑁆𑀢𑁂𑀦𑁆𑀢𑁂𑀦 ‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄’’𑀢𑀺𑀆𑀤𑀻𑀲𑀼 𑀤𑀲𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀘 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀔𑀸𑀲𑀡𑁆𑀞𑀸𑀦𑁂𑀦 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀫𑀕𑁆𑀕𑁄 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑁂 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀢𑀁 𑀤𑀺𑀯𑀲𑀁 𑀚𑀸𑀢𑁄 𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑁄 𑀕𑁄𑀯𑀺𑀲𑀸𑀡𑀧𑁆𑀧𑀫𑀸𑀡𑁄𑀧𑀺 𑀯𑀫𑁆𑀫𑀺𑀓𑁄 𑀯𑀝𑁆𑀝𑀢𑀺, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. 𑀧𑀭𑀁 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀲𑀤𑀺𑀲𑁄𑀧𑀺 𑀯𑀝𑁆𑀝𑀢𑀺, 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀁 𑀧𑀦 𑀏𑀓𑀸𑀩𑀤𑁆𑀥𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀦𑀤𑀻𑀦𑀺𑀫𑀺𑀢𑁆𑀢𑁂 𑀬𑀲𑁆𑀲𑀸 𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁 𑀓𑀸𑀮𑁂 𑀅𑀦𑁆𑀯𑀟𑁆𑀠𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀅𑀦𑀼𑀧𑀜𑁆𑀘𑀸𑀳𑀦𑁆𑀢𑀺 𑀏𑀯𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀮𑀸𑀳𑀓𑁂𑀲𑀼 𑀯𑀺𑀕𑀢𑀫𑀢𑁆𑀢𑁂𑀲𑀼 𑀲𑁄𑀢𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀅𑀬𑀁 𑀦𑀤𑀻𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀬𑀲𑁆𑀲𑀸 𑀧𑀦 𑀈𑀤𑀺𑀲𑁂 𑀲𑀼𑀯𑀼𑀝𑁆𑀞𑀺𑀓𑀸𑀮𑁂 𑀯𑀲𑁆𑀲𑀸𑀦𑀲𑁆𑀲 𑀘𑀸𑀢𑀼𑀫𑀸𑀲𑁂 𑀲𑁄𑀢𑀁 𑀦 𑀧𑀘𑁆𑀙𑀺𑀚𑁆𑀚𑀢𑀺, 𑀬𑀢𑁆𑀣 𑀢𑀺𑀢𑁆𑀣𑁂𑀦 𑀯𑀸 𑀅𑀢𑀺𑀢𑁆𑀣𑁂𑀦 𑀯𑀸 𑀲𑀺𑀓𑁆𑀔𑀸𑀓𑀭𑀡𑀻𑀬𑁂 𑀆𑀕𑀢𑀮𑀓𑁆𑀔𑀡𑁂𑀦 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀺, 𑀅𑀬𑀁 𑀦𑀤𑀻 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀦𑀤𑀻𑀧𑀸𑀭𑀕𑀫𑀦𑁂𑀧𑀺 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀓𑀭𑀡𑁂𑀧𑀺 𑀦𑀤𑀻𑀧𑀸𑀭𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑁂𑀧𑀺 𑀅𑀬𑀫𑁂𑀯 𑀦𑀤𑀻. 𑀬𑀸 𑀧𑀦 𑀫𑀕𑁆𑀕𑁄 𑀯𑀺𑀬 𑀲𑀓𑀝𑀥𑀼𑀭𑀲𑀡𑁆𑀞𑀸𑀦𑁂𑀦 𑀯𑀸 𑀧𑀭𑀺𑀔𑀸𑀲𑀡𑁆𑀞𑀸𑀦𑁂𑀦 𑀯𑀸 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀸, 𑀢𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑁂 𑀦𑀤𑀻𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀫𑁆𑀫𑀺𑀲𑁆𑀲𑀸 𑀦𑀤𑀺𑀬𑁄 𑀧𑀦 𑀘𑀢𑀲𑁆𑀲𑁄𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀯𑀢𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀭𑀼𑀓𑁆𑀔𑀧𑀸𑀤𑁂 𑀦𑀺𑀔𑀡𑀺𑀢𑁆𑀯𑀸 𑀯𑀮𑁆𑀮𑀺𑀧𑀮𑀸𑀮𑀸𑀤𑀻𑀳𑀺 𑀦𑀤𑀻𑀲𑁄𑀢𑀁 𑀭𑀼𑀦𑁆𑀥𑀦𑁆𑀢𑀺, 𑀉𑀤𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀯𑀭𑀡𑀁 𑀧𑀯𑀢𑁆𑀢𑀢𑀺𑀬𑁂𑀯, 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀧𑀦 𑀉𑀤𑀓𑀁 𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑁂𑀢𑀼𑀫𑁆𑀳𑀺 𑀓𑀢𑁂 𑀅𑀧𑀯𑀢𑁆𑀢𑀫𑀸𑀦𑀸 𑀦𑀤𑀻𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦𑀤𑀻𑀦𑀺𑀫𑀺𑀢𑁆𑀢𑀁, 𑀅𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀉𑀤𑀓𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀦𑀺𑀭𑀼𑀤𑀓𑀪𑀸𑀯𑁂𑀦 𑀦 𑀧𑀯𑀢𑁆𑀢𑀢𑀺, 𑀲𑀸 𑀯𑀝𑁆𑀝𑀢𑀺. 𑀫𑀳𑀸𑀦𑀤𑀺𑀢𑁄 𑀉𑀤𑀓𑀫𑀸𑀢𑀺𑀓𑀁 𑀦𑀻𑀳𑀭𑀦𑁆𑀢𑀺, 𑀲𑀸 𑀓𑀼𑀦𑁆𑀦𑀤𑀻𑀲𑀤𑀺𑀲𑀸 𑀳𑀼𑀢𑁆𑀯𑀸 𑀢𑀻𑀡𑀺 𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀻 𑀦𑀺𑀘𑁆𑀘𑀁 𑀧𑀯𑀢𑁆𑀢𑀢𑀺, 𑀓𑀺𑀜𑁆𑀘𑀸𑀧𑀺 𑀧𑀯𑀢𑁆𑀢𑀢𑀺, 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀸 𑀧𑀦 𑀫𑀽𑀮𑁂 𑀫𑀳𑀸𑀦𑀤𑀺𑀢𑁄 𑀦𑀻𑀳𑀢𑀸𑀧𑀺 𑀓𑀸𑀮𑀦𑁆𑀢𑀭𑁂𑀦 𑀢𑁂𑀦𑁂𑀯 𑀦𑀻𑀳𑀢𑀫𑀕𑁆𑀕𑁂𑀦 𑀦𑀤𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀬𑀁 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑀻 𑀧𑀭𑀢𑁄 𑀲𑀼𑀲𑀼𑀫𑀸𑀭𑀸𑀤𑀺𑀲𑀫𑀸𑀓𑀺𑀡𑁆𑀡𑀸 𑀦𑀸𑀯𑀸𑀤𑀻𑀳𑀺 𑀲𑀜𑁆𑀘𑀭𑀺𑀢𑀩𑁆𑀩𑀸 𑀦𑀤𑀻 𑀳𑁄𑀢𑀺, 𑀢𑀁 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀉𑀤𑀓𑀦𑀺𑀫𑀺𑀢𑁆𑀢𑁂 𑀦𑀺𑀭𑀼𑀤𑀓𑀝𑁆𑀞𑀸𑀦𑁂 𑀦𑀸𑀯𑀸𑀬 𑀯𑀸 𑀘𑀸𑀝𑀺𑀆𑀤𑀻𑀲𑀼 𑀯𑀸 𑀉𑀤𑀓𑀁 𑀧𑀽𑀭𑁂𑀢𑁆𑀯𑀸 𑀉𑀤𑀓𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀪𑀽𑀫𑀺𑀕𑀢𑀫𑁂𑀯 𑀯𑀝𑁆𑀝𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀯𑀢𑁆𑀢𑀦𑀉𑀤𑀓𑀁 𑀆𑀯𑀸𑀝𑀧𑁄𑀓𑁆𑀔𑀭𑀡𑀻𑀢𑀴𑀆𑀓𑀚𑀸𑀢𑀲𑁆𑀲𑀭𑀮𑁄𑀡𑀺𑀲𑀫𑀼𑀤𑁆𑀤𑀸𑀤𑀻𑀲𑀼 𑀞𑀺𑀢𑀁, 𑀅𑀝𑁆𑀞𑀺𑀢𑀁 𑀧𑀦 𑀑𑀖𑀦𑀤𑀻𑀉𑀤𑀓𑀯𑀸𑀳𑀓𑀫𑀸𑀢𑀺𑀓𑀸𑀤𑀻𑀲𑀼 𑀉𑀤𑀓𑀁 𑀦 𑀯𑀝𑁆𑀝𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀕𑀫𑁆𑀪𑀻𑀭𑁂𑀲𑀼 𑀆𑀯𑀸𑀝𑀸𑀤𑀻𑀲𑀼 𑀉𑀓𑁆𑀔𑁂𑀧𑀺𑀫𑀁 𑀉𑀤𑀓𑀁 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀼𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄𑀫𑀢𑀺𑀫𑀢𑁆𑀢𑀫𑁂𑀯. 𑀞𑀺𑀢𑀁 𑀧𑀦 𑀅𑀦𑁆𑀢𑀫𑀲𑁄 𑀲𑀽𑀓𑀭𑀔𑀢𑀸𑀬𑀧𑀺 𑀕𑀸𑀫𑀤𑀸𑀭𑀓𑀸𑀦𑀁 𑀓𑀻𑀴𑀦𑀯𑀸𑀧𑀺𑀬𑀫𑁆𑀧𑀺 𑀢𑀁 𑀔𑀡𑀜𑁆𑀜𑁂𑀯 𑀧𑀣𑀯𑀺𑀬𑀁 𑀆𑀯𑀸𑀝𑀁 𑀓𑀢𑁆𑀯𑀸 𑀓𑀼𑀝𑁂𑀳𑀺 𑀆𑀳𑀭𑀺𑀢𑁆𑀯𑀸 𑀧𑀽𑀭𑀺𑀢𑀉𑀤𑀓𑀫𑁆𑀧𑀺 𑀲𑀘𑁂 𑀬𑀸𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀸 𑀢𑀺𑀝𑁆𑀞𑀢𑀺, 𑀅𑀧𑁆𑀧𑀁 𑀯𑀸 𑀳𑁄𑀢𑀼 𑀩𑀳𑀼𑀁 𑀯𑀸, 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀫𑀺𑀢𑁆𑀢𑀲𑀜𑁆𑀜𑀸𑀓𑀭𑀡𑀢𑁆𑀣𑀁 𑀧𑀸𑀲𑀸𑀡𑀯𑀸𑀮𑀺𑀓𑀸𑀧𑀁𑀲𑀼𑀆𑀤𑀺𑀭𑀸𑀲𑀺 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁄 𑀯𑀸 𑀤𑀸𑀭𑀼𑀢𑁆𑀣𑀫𑁆𑀪𑁄 𑀯𑀸 𑀓𑀸𑀢𑀩𑁆𑀩𑁄. 𑀢𑀁 𑀓𑀸𑀢𑀼𑀁 𑀓𑀸𑀭𑁂𑀢𑀼𑀜𑁆𑀘 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀺, 𑀮𑀸𑀪𑀲𑀻𑀫𑀸𑀬𑀁 𑀧𑀦 𑀦 𑀯𑀝𑁆𑀝𑀢𑀺. 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀓𑀲𑁆𑀲𑀘𑀺 𑀧𑀻𑀴𑀦𑀁 𑀦 𑀓𑀭𑁄𑀢𑀺, 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀓𑀫𑁆𑀫𑀫𑁂𑀯 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀏𑀢𑁆𑀣 𑀯𑀝𑁆𑀝𑀢𑀺.

𑀇𑀫𑁂𑀳𑀺 𑀘 𑀅𑀝𑁆𑀞𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑀺𑀲𑁆𑀲𑁂𑀳𑀺𑀧𑀺 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀸 𑀏𑀯𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀩𑀚𑁆𑀛𑀫𑀸𑀦𑀸 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀦𑀺𑀫𑀺𑀢𑁆𑀢𑁂𑀳𑀺 𑀅𑀩𑀤𑁆𑀥𑀸 𑀳𑁄𑀢𑀺, 𑀢𑀻𑀡𑀺 𑀧𑀦 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀲𑀢𑁂𑀦𑀧𑀺 𑀩𑀤𑁆𑀥𑀸 𑀳𑁄𑀢𑀺. 𑀲𑀸 𑀢𑀻𑀳𑀺 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸 𑀳𑁄𑀢𑀺, 𑀘𑀢𑀽𑀳𑀺 𑀘𑀢𑀼𑀭𑀲𑁆𑀲𑀸 𑀯𑀸 𑀲𑀺𑀗𑁆𑀖𑀸𑀝𑀓𑀅𑀟𑁆𑀠𑀘𑀦𑁆𑀤𑀫𑀼𑀤𑀺𑀗𑁆𑀕𑀸𑀤𑀺𑀲𑀡𑁆𑀞𑀸𑀦𑀸 𑀯𑀸, 𑀢𑀢𑁄 𑀅𑀥𑀺𑀓𑁂𑀳𑀺 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 ‘‘𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁫𑁯. 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀬𑀸𑀯𑀢𑀺𑀓𑀸 𑀢𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀩𑀤𑁆𑀥𑀲𑀻𑀫𑀁 𑀯𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀯𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀢𑁆𑀯𑀸 𑀙𑀦𑁆𑀤𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀲𑀫𑁆𑀫𑀢𑀸.

𑁧𑁬𑁦. 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀸𑀬 𑀲𑀫𑁆𑀫𑀼𑀢𑀺 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀽𑀧𑁄𑀲𑀣𑀸𑀬, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁩𑁯) 𑁋

𑀏𑀯𑀁 𑀯𑀼𑀢𑁆𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀢𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀲𑀻𑀫𑀸 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀸𑀦𑀺 𑀲𑀻𑀫𑀢𑁄 𑀩𑀳𑀺 𑀳𑁄𑀦𑁆𑀢𑀺.

𑁧𑁬𑁧. 𑀏𑀯𑀁 𑀩𑀤𑁆𑀥𑀸𑀬 𑀘 𑀲𑀻𑀫𑀸𑀬 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀜𑁆𑀘 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀓𑀸𑀢𑀩𑁆𑀩𑀸. 𑀲𑀸 𑀧𑀦 𑀏𑀯𑀁 𑀓𑀢𑁆𑀢𑀩𑁆𑀩𑀸 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀺 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸𑀬 𑀲𑀫𑁆𑀫𑀼𑀢𑀺 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁪𑁩).

𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑀘 𑀦𑀺𑀕𑀫𑀦𑀕𑀭𑀸𑀦𑀫𑁆𑀧𑀺 𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀸𑀫𑀽𑀧𑀘𑀸𑀭𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄. 𑀇𑀫𑁂𑀲𑀼 𑀧𑀦 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀺. 𑀅𑀬𑀜𑁆𑀳𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀦 𑀑𑀢𑁆𑀣𑀭𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀯 𑀑𑀢𑁆𑀣𑀭𑀢𑀺. 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀕𑀘𑁆𑀙𑀢𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀧𑀦 𑀬𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸, 𑀢𑀢𑁆𑀣𑁂𑀯 𑀕𑀘𑁆𑀙𑀢𑀺. 𑀦 𑀳𑀺 𑀢𑀲𑁆𑀲𑀸 𑀯𑀺𑀲𑀼𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀲𑀘𑁂 𑀅𑀯𑀺𑀧𑁆𑀧𑀯𑀸𑀲𑀸𑀬 𑀲𑀫𑁆𑀫𑀼𑀢𑀺𑀓𑀸𑀮𑁂 𑀕𑀸𑀫𑁄 𑀅𑀢𑁆𑀣𑀺, 𑀢𑀁 𑀲𑀸 𑀦 𑀑𑀢𑁆𑀣𑀭𑀢𑀺. 𑀲𑀘𑁂 𑀧𑀦 𑀲𑀫𑁆𑀫𑀢𑀸𑀬 𑀲𑀻𑀫𑀸𑀬 𑀧𑀘𑁆𑀙𑀸 𑀕𑀸𑀫𑁄 𑀦𑀺𑀯𑀺𑀲𑀢𑀺, 𑀲𑁄𑀧𑀺 𑀲𑀻𑀫𑀲𑀗𑁆𑀔𑁆𑀬𑀁𑀬𑁂𑀯 𑀕𑀘𑁆𑀙𑀢𑀺. 𑀬𑀣𑀸 𑀘 𑀧𑀘𑁆𑀙𑀸 𑀦𑀺𑀯𑀺𑀝𑁆𑀞𑁄, 𑀏𑀯𑀁 𑀧𑀞𑀫𑀁 𑀦𑀺𑀯𑀺𑀝𑁆𑀞𑀲𑁆𑀲 𑀧𑀘𑁆𑀙𑀸 𑀯𑀟𑁆𑀠𑀺𑀢𑀧𑁆𑀧𑀤𑁂𑀲𑁄𑀧𑀺 𑀲𑀻𑀫𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀕𑁂𑀳𑀸𑀦𑀺 𑀓𑀢𑀸𑀦𑀺, ‘‘𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀮𑀬𑁄𑀧𑀺 𑀅𑀢𑁆𑀣𑀺, 𑀫𑀦𑀼𑀲𑁆𑀲𑀸 𑀧𑀦 𑀅𑀧𑁆𑀧𑀯𑀺𑀝𑁆𑀞𑀸, 𑀧𑁄𑀭𑀸𑀡𑀓𑀕𑀸𑀫𑀁 𑀯𑀸 𑀲𑀘𑁂 𑀕𑁂𑀳𑀫𑁂𑀯 𑀙𑀟𑁆𑀟𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀢𑀸, 𑀅𑀕𑀸𑀫𑁄𑀬𑁂𑀯 𑀏𑀲, 𑀲𑀻𑀫𑀸 𑀑𑀢𑁆𑀣𑀭𑀢𑀺. 𑀲𑀘𑁂 𑀧𑀦 𑀏𑀓𑀫𑁆𑀧𑀺 𑀓𑀼𑀮𑀁 𑀧𑀯𑀺𑀝𑁆𑀞𑀁 𑀯𑀸 𑀅𑀕𑀢𑀁 𑀯𑀸 𑀅𑀢𑁆𑀣𑀺, 𑀕𑀸𑀫𑁄𑀬𑁂𑀯, 𑀲𑀻𑀫𑀸 𑀦 𑀑𑀢𑁆𑀣𑀭𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑁧𑁬𑁨. 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀦 𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽 𑀢𑀲𑁆𑀲 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀢𑁆𑀯𑀸 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀁, 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸 𑀤𑀺𑀲𑀸𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀦𑀺𑀲𑁆𑀲𑀜𑁆𑀘𑀸𑀭𑀲𑀫𑀬𑁂 𑀲𑀘𑁂 𑀏𑀓𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀬𑁂 𑀢𑀢𑁆𑀣 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽𑀦𑀁 ‘‘𑀫𑀬𑀁 𑀅𑀚𑁆𑀚 𑀲𑀻𑀫𑀁 𑀩𑀦𑁆𑀥𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀲𑀓𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀢𑁄 𑀫𑀸 𑀦𑀺𑀓𑁆𑀔𑀫𑀺𑀢𑁆𑀣𑀸’’𑀢𑀺 𑀧𑁂𑀲𑁂𑀢𑀩𑁆𑀩𑀁. 𑀬𑁂 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀸𑀢𑁂𑀢𑀩𑁆𑀩𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀭𑀸𑀧𑁂𑀢𑀩𑁆𑀩𑁄. ‘‘𑀲𑀘𑁂 𑀅𑀜𑁆𑀜𑀸𑀦𑀺𑀧𑀺 𑀕𑀸𑀫𑀔𑁂𑀢𑁆𑀢𑀸𑀦𑀺 𑀅𑀦𑁆𑀢𑁄𑀓𑀸𑀢𑀼𑀓𑀸𑀫𑀸, 𑀢𑁂𑀲𑀼 𑀕𑀸𑀫𑁂𑀲𑀼 𑀬𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀳𑀺𑀧𑀺 𑀆𑀕𑀦𑁆𑀢𑀩𑁆𑀩𑀁, 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀦𑀸𑀦𑀸𑀕𑀸𑀫𑀔𑁂𑀢𑁆𑀢𑀸𑀦𑀺 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀩𑀤𑁆𑀥𑀲𑀻𑀫𑀲𑀤𑀺𑀲𑀸𑀦𑀺, 𑀦 𑀢𑀢𑁄 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀕𑀘𑁆𑀙𑀢𑀺, 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀆𑀳 ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀆𑀕𑀫𑀦𑀫𑁆𑀧𑀺 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀧𑀦 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀆𑀕𑀦𑁆𑀢𑀩𑁆𑀩𑀁, 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄’’𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁂 𑀆𑀳𑀝𑁂 𑀢𑁂𑀲𑀼 𑀢𑁂𑀲𑀼 𑀫𑀕𑁆𑀕𑁂𑀲𑀼 𑀦𑀤𑀻𑀢𑀺𑀢𑁆𑀣𑀕𑀸𑀫𑀤𑁆𑀯𑀸𑀭𑀸𑀤𑀻𑀲𑀼 𑀘 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀲𑀻𑀖𑀁 𑀲𑀻𑀖𑀁 𑀳𑀢𑁆𑀣𑀧𑀸𑀲𑀦𑀬𑀦𑀢𑁆𑀣𑀜𑁆𑀘𑁂𑀯 𑀩𑀳𑀺𑀲𑀻𑀫𑀓𑀭𑀡𑀢𑁆𑀣𑀜𑁆𑀘 𑀆𑀭𑀸𑀫𑀺𑀓𑁂 𑀘𑁂𑀯 𑀲𑀫𑀡𑀼𑀤𑁆𑀤𑁂𑀲𑁂 𑀘 𑀞𑀧𑁂𑀢𑁆𑀯𑀸 𑀪𑁂𑀭𑀺𑀲𑀜𑁆𑀜𑀁 𑀯𑀸 𑀲𑀗𑁆𑀔𑀲𑀜𑁆𑀜𑀁 𑀯𑀸 𑀓𑀢𑁆𑀯𑀸 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀬 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺𑀆𑀤𑀺𑀓𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀦𑀺𑀫𑀺𑀢𑁆𑀢𑀸𑀦𑀺 𑀩𑀳𑀺𑀓𑀢𑁆𑀯𑀸 𑀳𑁂𑀝𑁆𑀞𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀻𑀫𑀸 𑀕𑀢𑀸 𑀳𑁄𑀢𑀺.

𑁧𑁬𑁩. 𑀇𑀫𑀁 𑀧𑀦 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀳𑀺 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀻𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀲𑀼𑀔𑀓𑀭𑀡𑀢𑁆𑀣𑀁 𑀧𑀞𑀫𑀁 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀢𑀁 𑀧𑀦 𑀩𑀦𑁆𑀥𑀦𑁆𑀢𑁂𑀳𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀩𑁄𑀥𑀺𑀘𑁂𑀢𑀺𑀬𑀪𑀢𑁆𑀢𑀲𑀸𑀮𑀸𑀤𑀻𑀦𑀺 𑀲𑀩𑁆𑀩𑀯𑀢𑁆𑀣𑀽𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂 𑀩𑀳𑀽𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀅𑀩𑀦𑁆𑀥𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀩𑀦𑁆𑀥𑀺𑀢𑀩𑁆𑀩𑀸. 𑀅𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑁂𑀳𑀺 𑀩𑁄𑀥𑀺𑀘𑁂𑀢𑀺𑀬𑀸𑀤𑀻𑀦𑀁 𑀲𑀩𑁆𑀩𑀯𑀢𑁆𑀣𑀽𑀦𑀁 𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀣𑀸 𑀧𑀢𑀺𑀝𑁆𑀞𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀳𑁄𑀢𑀺, 𑀏𑀯𑀁 𑀩𑀦𑁆𑀥𑀺𑀢𑀩𑁆𑀩𑀸. 𑀲𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀘𑁂 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺, 𑀧𑀭𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀕𑀡𑁆𑀳𑀦𑁆𑀢𑀻𑀧𑀺 𑀯𑀝𑁆𑀝𑀢𑀺. 𑀢𑀁 𑀩𑀦𑁆𑀥𑀦𑁆𑀢𑁂𑀳𑀺 𑀲𑀻𑀫𑀫𑀸𑀴𑀓𑀲𑁆𑀲 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂𑀳𑀺 𑀫𑀳𑀸𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀦 𑀫𑀳𑀸𑀲𑀻𑀫𑀸𑀬 𑀞𑀺𑀢𑁂𑀳𑀺 𑀔𑀡𑁆𑀟𑀲𑀻𑀫𑀸, 𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀧𑀦 𑀞𑀢𑁆𑀯𑀸 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀩𑀦𑁆𑀥𑀦𑀯𑀺𑀥𑀺 𑁋 𑀲𑀫𑀦𑁆𑀢𑀸 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀅𑀣 𑀢𑀲𑁆𑀲𑀸 𑀏𑀯 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀩𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸. 𑀲𑀻𑀫𑀦𑁆𑀢𑀭𑀺𑀓𑀸 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀏𑀓𑀭𑀢𑀦𑀧𑁆𑀧𑀫𑀸𑀡𑀸 𑀯𑀝𑁆𑀝𑀢𑀺. ‘‘𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀸𑀧𑀺 𑀯𑀝𑁆𑀝𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁, ‘‘𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀧𑀺 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀤𑁆𑀯𑁂𑀧𑀺 𑀢𑀺𑀲𑁆𑀲𑁄𑀧𑀺 𑀢𑀢𑀼𑀢𑁆𑀢𑀭𑀺𑀫𑁆𑀧𑀺 𑀔𑀡𑁆𑀟𑀲𑀻𑀫𑀸𑀬𑁄 𑀩𑀦𑁆𑀥𑀺𑀢𑀩𑁆𑀩𑀸.

𑀏𑀯𑀁 𑀔𑀡𑁆𑀟𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀫𑀳𑀸𑀲𑀻𑀫𑀲𑀫𑁆𑀫𑀼𑀢𑀺𑀓𑀸𑀮𑁂 𑀔𑀡𑁆𑀟𑀲𑀻𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀬𑀁 𑀞𑀢𑁆𑀯𑀸 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀢𑀢𑁄 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀦𑁆𑀢𑁂𑀳𑀺 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑀲𑁆𑀲𑀸 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀧𑀺 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀫𑀳𑀸𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀬𑀁 𑀲𑀻𑀫𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀧𑀞𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀔𑀡𑁆𑀟𑀲𑀻𑀫𑀢𑁄𑀯 𑀧𑀝𑁆𑀞𑀸𑀬 𑀩𑀦𑁆𑀥𑀺𑀢𑀩𑁆𑀩𑀸. 𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀦 𑀓𑁄𑀧𑁂𑀦𑁆𑀢𑀺, 𑀫𑀳𑀸𑀲𑀻𑀫𑀸𑀬 𑀯𑀸 𑀞𑀺𑀢𑀸 𑀔𑀡𑁆𑀟𑀲𑀻𑀫𑀸𑀬 𑀓𑀭𑁄𑀦𑁆𑀢𑀸𑀦𑀁, 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀦 𑀞𑀺𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑁂𑀦𑁆𑀢𑀺. 𑀕𑀸𑀫𑀔𑁂𑀢𑁆𑀢𑁂 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀧𑀦 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀸 𑀓𑁄𑀧𑁂𑀦𑁆𑀢𑀺. 𑀲𑀻𑀫𑀦𑁆𑀢𑀭𑀺𑀓𑀸 𑀳𑀺 𑀕𑀸𑀫𑀔𑁂𑀢𑁆𑀢𑀁 𑀪𑀚𑀢𑀺.

𑀲𑀻𑀫𑀸 𑀘 𑀦𑀸𑀫𑁂𑀲𑀸 𑀦 𑀓𑁂𑀯𑀮𑀸 𑀧𑀣𑀯𑀻𑀢𑀮𑁂𑀬𑁂𑀯 𑀩𑀤𑁆𑀥𑀸 𑀩𑀤𑁆𑀥𑀸 𑀦𑀸𑀫 𑀳𑁄𑀢𑀺, 𑀅𑀣 𑀔𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁂𑀧𑀺 𑀓𑀼𑀝𑀺𑀕𑁂𑀳𑁂𑀧𑀺 𑀮𑁂𑀡𑁂𑀧𑀺 𑀧𑀸𑀲𑀸𑀤𑁂𑀧𑀺 𑀧𑀩𑁆𑀩𑀢𑀫𑀢𑁆𑀣𑀓𑁂𑀧𑀺 𑀩𑀤𑁆𑀥𑀸 𑀩𑀤𑁆𑀥𑀸𑀬𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀩𑀦𑁆𑀥𑀦𑁆𑀢𑁂𑀳𑀺 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀭𑀸𑀚𑀺𑀁 𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀉𑀤𑀼𑀓𑁆𑀔𑀮𑀁 𑀯𑀸 𑀔𑀡𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁, 𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀲𑀻𑀫𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀑𑀢𑀭𑀢𑀺. 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸 𑀬𑀣𑀸𑀞𑀸𑀦𑁂 𑀦 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄 𑀭𑀸𑀚𑀺 𑀯𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸, 𑀘𑀢𑀽𑀲𑀼 𑀯𑀸 𑀓𑁄𑀡𑁂𑀲𑀼 𑀧𑀸𑀲𑀸𑀡𑀸 𑀯𑀺𑀚𑁆𑀛𑀺𑀢𑀩𑁆𑀩𑀸, ‘‘𑀅𑀬𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀯𑀢𑁆𑀯𑀸 𑀅𑀓𑁆𑀔𑀭𑀸𑀦𑀺 𑀯𑀸 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺. 𑀓𑁂𑀘𑀺 𑀉𑀲𑀽𑀬𑀓𑀸 ‘‘𑀲𑀻𑀫𑀁 𑀛𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀅𑀕𑁆𑀕𑀺𑀁 𑀤𑁂𑀦𑁆𑀢𑀺, 𑀧𑀸𑀲𑀸𑀡𑀸𑀯 𑀛𑀸𑀬𑀦𑁆𑀢𑀺, 𑀦 𑀲𑀻𑀫𑀸.

𑀓𑀼𑀝𑀺𑀕𑁂𑀳𑁂𑀧𑀺 𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀝𑁆𑀞𑀸𑀦𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀅𑀦𑁆𑀢𑁄𑀓𑀼𑀝𑁆𑀝𑀫𑁂𑀯 𑀲𑀻𑀫𑀸 𑀳𑁄𑀢𑀺. 𑀲𑀘𑁂 𑀅𑀦𑁆𑀢𑁄𑀓𑀼𑀝𑁆𑀝𑁂 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁄 𑀦𑀢𑁆𑀣𑀺, 𑀧𑀫𑀼𑀔𑁂 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀲𑀘𑁂 𑀏𑀯𑀫𑁆𑀧𑀺 𑀦𑀧𑁆𑀧𑀳𑁄𑀢𑀺, 𑀩𑀳𑀺 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂𑀧𑀺 𑀦𑀺𑀫𑀺𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀫𑀢𑀸𑀬 𑀧𑀦 𑀲𑀩𑁆𑀩𑀁 𑀓𑀼𑀝𑀺𑀕𑁂𑀳𑀁 𑀲𑀻𑀫𑀝𑁆𑀞𑀫𑁂𑀯 𑀳𑁄𑀢𑀺.

𑀘𑀢𑀼𑀪𑀺𑀢𑁆𑀢𑀺𑀬𑀮𑁂𑀡𑁂𑀧𑀺 𑀩𑀦𑁆𑀥𑀦𑁆𑀢𑁂𑀳𑀺 𑀓𑀼𑀝𑁆𑀝𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀧𑀸𑀲𑀸𑀡𑀸𑀯 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀅𑀦𑁆𑀢𑁄 𑀑𑀓𑀸𑀲𑁂 𑀅𑀲𑀢𑀺 𑀧𑀫𑀼𑀔𑁂𑀧𑀺 𑀦𑀺𑀫𑀺𑀢𑁆𑀢𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺, 𑀏𑀯𑀁 𑀮𑁂𑀡𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀻𑀫𑀸 𑀳𑁄𑀢𑀺.

𑀉𑀧𑀭𑀺𑀧𑀸𑀲𑀸𑀤𑁂𑀧𑀺 𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀲𑀘𑁂 𑀦𑀧𑁆𑀧𑀳𑁄𑀢𑀺, 𑀧𑀫𑀼𑀔𑁂𑀧𑀺 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀁 𑀲𑀫𑁆𑀫𑀢𑀸 𑀉𑀧𑀭𑀺𑀧𑀸𑀲𑀸𑀤𑁂𑀬𑁂𑀯 𑀳𑁄𑀢𑀺, 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀲𑀘𑁂 𑀧𑀦 𑀩𑀳𑀽𑀲𑀼 𑀣𑀫𑁆𑀪𑁂𑀲𑀼 𑀢𑀼𑀮𑀸𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀓𑀼𑀝𑁆𑀝𑁄 𑀬𑀣𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀳𑁄𑀢𑀺, 𑀏𑀯𑀁 𑀉𑀝𑁆𑀞𑀳𑀺𑀢𑁆𑀯𑀸 𑀢𑀼𑀮𑀸𑀭𑀼𑀓𑁆𑀔𑁂𑀳𑀺 𑀏𑀓𑀲𑀫𑁆𑀩𑀦𑁆𑀥𑁄 𑀞𑀺𑀢𑁄, 𑀳𑁂𑀝𑁆𑀞𑀸𑀧𑀺 𑀑𑀢𑀭𑀢𑀺, 𑀏𑀓𑀣𑀫𑁆𑀪𑀧𑀸𑀲𑀸𑀤𑀲𑁆𑀲 𑀧𑀦 𑀉𑀧𑀭𑀺𑀢𑀮𑁂 𑀩𑀤𑁆𑀥𑀸 𑀲𑀻𑀫𑀸. 𑀲𑀘𑁂 𑀣𑀫𑁆𑀪𑀫𑀢𑁆𑀣𑀓𑁂 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁄 𑀳𑁄𑀢𑀺, 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀲𑀘𑁂 𑀧𑀸𑀲𑀸𑀤𑀪𑀺𑀢𑁆𑀢𑀺𑀢𑁄 𑀦𑀺𑀕𑁆𑀕𑀢𑁂𑀲𑀼 𑀦𑀺𑀬𑁆𑀬𑀽𑀳𑀓𑀸𑀤𑀻𑀲𑀼 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀻𑀫𑀁 𑀩𑀦𑁆𑀥𑀦𑁆𑀢𑀺, 𑀧𑀸𑀲𑀸𑀤𑀪𑀺𑀢𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀳𑁄𑀢𑀺. 𑀳𑁂𑀝𑁆𑀞𑀸 𑀧𑀦𑀲𑁆𑀲𑀸 𑀑𑀢𑀭𑀡𑀸𑀦𑁄𑀢𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀓𑀺𑀢𑁆𑀢𑁂𑀦𑁆𑀢𑁂𑀳𑀺𑀧𑀺 𑀪𑀺𑀢𑁆𑀢𑀺 𑀘 𑀭𑀼𑀓𑁆𑀔𑀢𑁆𑀣𑀫𑁆𑀪𑀸 𑀘 𑀦 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀪𑀺𑀢𑁆𑀢𑀺𑀮𑀕𑁆𑀕𑁂 𑀧𑀦 𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀓𑀺𑀢𑁆𑀢𑀺𑀢𑀸 𑀲𑀻𑀫𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀲𑁆𑀲 𑀧𑀭𑀺𑀬𑀦𑁆𑀢𑀣𑀫𑁆𑀪𑀸𑀦𑀁 𑀅𑀦𑁆𑀢𑁄𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀲𑁆𑀲 𑀓𑀼𑀝𑁆𑀝𑁄 𑀉𑀧𑀭𑀺𑀫𑀢𑀮𑁂𑀦 𑀲𑀫𑁆𑀩𑀤𑁆𑀥𑁄 𑀳𑁄𑀢𑀺, 𑀉𑀧𑀭𑀺𑀧𑀸𑀲𑀸𑀤𑀫𑁆𑀧𑀺 𑀅𑀪𑀺𑀭𑀼𑀳𑀢𑀺. 𑀲𑀘𑁂 𑀧𑀸𑀲𑀸𑀤𑀲𑁆𑀲 𑀩𑀳𑀺 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂 𑀦𑀺𑀫𑀺𑀢𑁆𑀢𑀸𑀦𑀺 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁄 𑀧𑀸𑀲𑀸𑀤𑁄 𑀲𑀻𑀫𑀝𑁆𑀞𑁄 𑀳𑁄𑀢𑀺.

𑀧𑀩𑁆𑀩𑀢𑀫𑀢𑁆𑀣𑀓𑁂 𑀢𑀮𑀁 𑀳𑁄𑀢𑀺 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀸𑀭𑀳𑀁, 𑀢𑀢𑁆𑀣 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀯𑀺𑀬 𑀲𑀻𑀫𑀁 𑀩𑀦𑁆𑀥𑀦𑁆𑀢𑀺, 𑀳𑁂𑀝𑁆𑀞𑀸𑀧𑀩𑁆𑀩𑀢𑁂𑀧𑀺 𑀢𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁂𑀦 𑀲𑀻𑀫𑀸 𑀑𑀢𑀭𑀢𑀺. 𑀢𑀸𑀮𑀫𑀽𑀮𑀓𑀧𑀩𑁆𑀩𑀢𑁂𑀧𑀺 𑀉𑀧𑀭𑀺 𑀲𑀻𑀫𑀸 𑀩𑀤𑁆𑀥𑀸 𑀳𑁂𑀝𑁆𑀞𑀸 𑀑𑀢𑀭𑀢𑁂𑀯. 𑀬𑁄 𑀧𑀦 𑀯𑀺𑀢𑀸𑀦𑀲𑀡𑁆𑀞𑀸𑀦𑁄 𑀳𑁄𑀢𑀺, 𑀉𑀧𑀭𑀺 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁄 𑀅𑀢𑁆𑀣𑀺, 𑀳𑁂𑀝𑁆𑀞𑀸 𑀦𑀢𑁆𑀣𑀺, 𑀢𑀲𑁆𑀲𑀼𑀧𑀭𑀺 𑀩𑀤𑁆𑀥𑀸 𑀲𑀻𑀫𑀸 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀏𑀯𑀁 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁄 𑀯𑀸 𑀳𑁄𑀢𑀼 𑀧𑀡𑀯𑀲𑀡𑁆𑀞𑀸𑀦𑁄 𑀯𑀸, 𑀬𑀲𑁆𑀲 𑀳𑁂𑀝𑁆𑀞𑀸 𑀯𑀸 𑀫𑀚𑁆𑀛𑁂 𑀯𑀸 𑀲𑀻𑀫𑀧𑁆𑀧𑀫𑀸𑀡𑀁 𑀦𑀢𑁆𑀣𑀺, 𑀢𑀲𑁆𑀲 𑀉𑀧𑀭𑀺 𑀩𑀤𑁆𑀥𑀸 𑀲𑀻𑀫𑀸 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑁂 𑀓𑀽𑀝𑀸𑀦𑀺 𑀆𑀲𑀦𑁆𑀦𑁂 𑀞𑀺𑀢𑀸𑀦𑀺, 𑀏𑀓𑀲𑁆𑀲𑀧𑀺 𑀉𑀧𑀭𑀺 𑀲𑀻𑀫𑀧𑁆𑀧𑀫𑀸𑀡𑀁 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀲 𑀓𑀽𑀝𑀦𑁆𑀢𑀭𑀁 𑀘𑀺𑀦𑀺𑀢𑁆𑀯𑀸 𑀯𑀸 𑀧𑀽𑀭𑁂𑀢𑁆𑀯𑀸 𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀉𑀧𑀭𑀺 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀓𑁄 𑀲𑀧𑁆𑀧𑀨𑀡𑀲𑀤𑀺𑀲𑁄 𑀧𑀩𑁆𑀩𑀢𑁄, 𑀢𑀲𑁆𑀲 𑀉𑀧𑀭𑀺 𑀲𑀻𑀫𑀧𑁆𑀧𑀫𑀸𑀡𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑀻𑀫𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀲 𑀘𑁂 𑀳𑁂𑀝𑁆𑀞𑀸 𑀆𑀓𑀸𑀲𑀧𑀩𑁆𑀪𑀸𑀭𑀁 𑀳𑁄𑀢𑀺, 𑀲𑀻𑀫𑀸 𑀦 𑀑𑀢𑀭𑀢𑀺. 𑀲𑀘𑁂 𑀧𑀦𑀲𑁆𑀲 𑀯𑁂𑀫𑀚𑁆𑀛𑁂 𑀲𑀻𑀫𑀧𑁆𑀧𑀫𑀸𑀡𑁄 𑀲𑀼𑀲𑀺𑀭𑀧𑀸𑀲𑀸𑀡𑁄 𑀳𑁄𑀢𑀺, 𑀑𑀢𑀭𑀢𑀺, 𑀲𑁄 𑀘 𑀧𑀸𑀲𑀸𑀡𑁄 𑀲𑀻𑀫𑀝𑁆𑀞𑁄𑀬𑁂𑀯 𑀳𑁄𑀢𑀺. 𑀅𑀣𑀸𑀧𑀺𑀲𑁆𑀲 𑀳𑁂𑀝𑁆𑀞𑀸𑀮𑁂𑀡𑀲𑁆𑀲 𑀓𑀼𑀝𑁆𑀝𑁄 𑀅𑀕𑁆𑀕𑀓𑁄𑀝𑀺𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀑𑀢𑀭𑀢𑀺, 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀲𑀻𑀫𑀸𑀬𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀳𑁂𑀝𑁆𑀞𑀸 𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀸𑀭𑀢𑁄 𑀅𑀦𑁆𑀢𑁄𑀮𑁂𑀡𑀁 𑀳𑁄𑀢𑀺, 𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺. 𑀅𑀣𑀸𑀧𑀺 𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀢𑁄 𑀩𑀳𑀺 𑀮𑁂𑀡𑀁 𑀳𑁄𑀢𑀺, 𑀅𑀦𑁆𑀢𑁄 𑀲𑀻𑀫𑀸 𑀦 𑀑𑀢𑀭𑀢𑀺. 𑀅𑀣𑀸𑀧𑀺 𑀉𑀧𑀭𑀺 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁄 𑀔𑀼𑀤𑁆𑀤𑀓𑁄, 𑀳𑁂𑀝𑁆𑀞𑀸 𑀮𑁂𑀡𑀁 𑀫𑀳𑀦𑁆𑀢𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀁, 𑀲𑀻𑀫𑀸 𑀉𑀧𑀭𑀺𑀬𑁂𑀯 𑀳𑁄𑀢𑀺, 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀬𑀤𑀺 𑀧𑀦 𑀮𑁂𑀡𑀁 𑀔𑀼𑀤𑁆𑀤𑀓𑀁 𑀲𑀩𑁆𑀩𑀧𑀘𑁆𑀙𑀺𑀫𑀲𑀻𑀫𑀸𑀧𑀭𑀺𑀫𑀸𑀡𑀁, 𑀉𑀧𑀭𑀺 𑀲𑀻𑀫𑀸 𑀫𑀳𑀢𑀻 𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑀸, 𑀲𑀻𑀫𑀸 𑀑𑀢𑀭𑀢𑀺. 𑀅𑀣 𑀮𑁂𑀡𑀁 𑀅𑀢𑀺𑀔𑀼𑀤𑁆𑀤𑀓𑀁 𑀲𑀻𑀫𑀧𑁆𑀧𑀫𑀸𑀡𑀁 𑀦 𑀳𑁄𑀢𑀺, 𑀲𑀻𑀫𑀸 𑀉𑀧𑀭𑀺𑀬𑁂𑀯 𑀳𑁄𑀢𑀺, 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀲𑀘𑁂 𑀢𑀢𑁄 𑀉𑀧𑀟𑁆𑀠𑀁 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺, 𑀲𑀻𑀫𑀧𑁆𑀧𑀫𑀸𑀡𑀁 𑀘𑁂𑀧𑀺 𑀳𑁄𑀢𑀺, 𑀩𑀳𑀺 𑀧𑀢𑀺𑀢𑀁 𑀅𑀲𑀻𑀫𑀸. 𑀅𑀧𑀢𑀺𑀢𑀁 𑀧𑀦 𑀬𑀤𑀺 𑀲𑀻𑀫𑀧𑁆𑀧𑀫𑀸𑀡𑀁, 𑀲𑀻𑀫𑀸 𑀳𑁄𑀢𑀺𑀬𑁂𑀯.

𑀔𑀡𑁆𑀟𑀲𑀻𑀫𑀸 𑀘 𑀦𑀻𑀘𑀯𑀢𑁆𑀣𑀼𑀓𑀸 𑀳𑁄𑀢𑀺, 𑀢𑀁 𑀧𑀽𑀭𑁂𑀢𑁆𑀯𑀸 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀭𑁄𑀦𑁆𑀢𑀺, 𑀲𑀻𑀫𑀸𑀬𑁂𑀯. 𑀲𑀻𑀫𑀸𑀬 𑀕𑁂𑀳𑀁 𑀓𑀭𑁄𑀦𑁆𑀢𑀺, 𑀲𑀻𑀫𑀝𑁆𑀞𑀓𑀫𑁂𑀯 𑀳𑁄𑀢𑀺. 𑀲𑀻𑀫𑀸𑀬 𑀧𑁄𑀓𑁆𑀔𑀭𑀡𑀺𑀁 𑀔𑀡𑀦𑁆𑀢𑀺, 𑀲𑀻𑀫𑀸𑀬𑁂𑀯. 𑀑𑀖𑁄 𑀲𑀻𑀫𑀸𑀫𑀡𑁆𑀟𑀮𑀁 𑀑𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀻𑀫𑀸𑀫𑀸𑀴𑀓𑁂 𑀅𑀝𑁆𑀝𑀁 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀻𑀫𑀸𑀬 𑀳𑁂𑀝𑁆𑀞𑀸 𑀉𑀫𑀗𑁆𑀕𑀦𑀤𑀻 𑀳𑁄𑀢𑀺, 𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀢𑀢𑁆𑀣 𑀦𑀺𑀲𑀻𑀤𑀢𑀺. 𑀲𑀘𑁂 𑀲𑀸 𑀦𑀤𑀻 𑀧𑀞𑀫𑀁 𑀕𑀢𑀸, 𑀲𑀻𑀫𑀸 𑀧𑀘𑁆𑀙𑀸 𑀩𑀤𑁆𑀥𑀸, 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺. 𑀅𑀣 𑀧𑀞𑀫𑀁 𑀲𑀻𑀫𑀸 𑀩𑀤𑁆𑀥𑀸, 𑀧𑀘𑁆𑀙𑀸 𑀦𑀤𑀻 𑀕𑀢𑀸, 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀳𑁂𑀝𑁆𑀞𑀸𑀧𑀣𑀯𑀻𑀢𑀮𑁂 𑀞𑀺𑀢𑁄 𑀧𑀦 𑀓𑁄𑀧𑁂𑀢𑀺𑀬𑁂𑀯.

𑀲𑀻𑀫𑀸𑀫𑀸𑀴𑀓𑁂 𑀯𑀝𑀭𑀼𑀓𑁆𑀔𑁄 𑀳𑁄𑀢𑀺, 𑀢𑀲𑁆𑀲 𑀲𑀸𑀔𑀸 𑀯𑀸 𑀢𑀢𑁄 𑀦𑀺𑀕𑁆𑀕𑀢𑀧𑀸𑀭𑁄𑀳𑁄 𑀯𑀸 𑀫𑀳𑀸𑀲𑀻𑀫𑀸𑀬 𑀧𑀣𑀯𑀻𑀢𑀮𑀁 𑀯𑀸 𑀢𑀢𑁆𑀣𑀚𑀸𑀢𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀫𑀳𑀸𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑁂 𑀯𑀸 𑀲𑀸𑀔𑀸𑀧𑀸𑀭𑁄𑀳𑀸 𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀺𑀝𑁆𑀞𑀓𑀸 𑀓𑀸𑀢𑀩𑁆𑀩𑀸. 𑀅𑀦𑀸𑀳𑀘𑁆𑀘 𑀞𑀺𑀢𑀲𑀸𑀔𑀸𑀤𑀻𑀲𑀼 𑀆𑀭𑀼𑀴𑁆𑀳𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀁 𑀆𑀦𑁂𑀢𑀩𑁆𑀩𑀸. 𑀏𑀯𑀁 𑀫𑀳𑀸𑀲𑀻𑀫𑀸𑀬 𑀚𑀸𑀢𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸 𑀧𑀸𑀭𑁄𑀳𑁄 𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀻𑀫𑀸𑀫𑀸𑀴𑀓𑁂 𑀧𑀢𑀺𑀝𑁆𑀞𑀸𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑁂 𑀯𑀸 𑀲𑀸𑀔𑀸𑀧𑀸𑀭𑁄𑀳𑀸 𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀺𑀝𑁆𑀞𑀓𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀫𑀸𑀴𑀓𑁂 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀫𑀸𑀴𑀓𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀯𑁂𑀳𑀸𑀲𑀁 𑀞𑀺𑀢𑀲𑀸𑀔𑀸𑀬 𑀦𑀺𑀲𑀻𑀤𑀢𑀺, 𑀧𑀸𑀤𑀸 𑀯𑀸𑀲𑁆𑀲 𑀪𑀽𑀫𑀺𑀕𑀢𑀸 𑀳𑁄𑀦𑁆𑀢𑀺, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀯𑀸 𑀪𑀽𑀫𑀺𑀁 𑀨𑀼𑀲𑀢𑀺, 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀸𑀤𑁂 𑀧𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀜𑁆𑀘 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀓𑀫𑁆𑀫𑀁 𑀯𑀝𑁆𑀝𑀢𑀺, 𑀇𑀤𑀜𑁆𑀘 𑀮𑀓𑁆𑀔𑀡𑀁 𑀧𑀼𑀭𑀺𑀫𑀦𑀬𑁂𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀭 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀳𑀢𑁆𑀣𑀧𑀸𑀲𑀫𑁂𑀯 𑀆𑀦𑁂𑀢𑀩𑁆𑀩𑁄. 𑀲𑀘𑁂 𑀅𑀦𑁆𑀢𑁄𑀲𑀻𑀫𑀢𑁄 𑀧𑀩𑁆𑀩𑀢𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀢𑀢𑁆𑀭𑀝𑁆𑀞𑁄 𑀪𑀺𑀓𑁆𑀔𑀼 𑀳𑀢𑁆𑀣𑀧𑀸𑀲𑀁 𑀆𑀦𑁂𑀢𑀩𑁆𑀩𑁄. 𑀇𑀤𑁆𑀥𑀺𑀬𑀸 𑀅𑀦𑁆𑀢𑁄𑀧𑀩𑁆𑀩𑀢𑀁 𑀧𑀯𑀺𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀩𑀚𑁆𑀛𑀫𑀸𑀦𑀸 𑀏𑀯 𑀳𑀺 𑀲𑀻𑀫𑀸 𑀧𑀫𑀸𑀡𑀭𑀳𑀺𑀢𑀁 𑀧𑀤𑁂𑀲𑀁 𑀦 𑀑𑀢𑀭𑀢𑀺, 𑀩𑀤𑁆𑀥𑀸𑀬 𑀲𑀻𑀫𑀸𑀬 𑀚𑀸𑀢𑀁 𑀬𑀁 𑀓𑀺𑀜𑁆𑀘𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑀲𑀫𑁆𑀩𑀦𑁆𑀥𑁂𑀦 𑀕𑀢𑀁 𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺.

𑀢𑀺𑀬𑁄𑀚𑀦𑀧𑀭𑀫𑀁 𑀧𑀦 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀫𑀚𑁆𑀛𑁂 𑀞𑀢𑁆𑀯𑀸 𑀬𑀣𑀸 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀤𑀺𑀬𑀟𑁆𑀠𑀤𑀺𑀬𑀟𑁆𑀠𑀬𑁄𑀚𑀦𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀲𑀘𑁂 𑀧𑀦 𑀫𑀚𑁆𑀛𑁂 𑀞𑀢𑁆𑀯𑀸 𑀏𑀓𑁂𑀓𑀤𑀺𑀲𑀢𑁄 𑀢𑀺𑀬𑁄𑀚𑀦𑀁 𑀓𑀭𑁄𑀦𑁆𑀢𑀺, 𑀙𑀬𑁄𑀚𑀦𑀁 𑀳𑁄𑀢𑀻𑀢𑀺 𑀦 𑀯𑀝𑁆𑀝𑀢𑀺. 𑀘𑀢𑀼𑀭𑀲𑁆𑀲𑀁 𑀯𑀸 𑀢𑀺𑀓𑁄𑀡𑀁 𑀯𑀸 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀬𑀣𑀸 𑀓𑁄𑀡𑀢𑁄 𑀓𑁄𑀡𑀁 𑀢𑀺𑀬𑁄𑀚𑀦𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀲𑀘𑁂 𑀳𑀺 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀦𑁆𑀢𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺𑀜𑁆𑀘 𑀆𑀧𑀚𑁆𑀚𑀢𑀺, 𑀲𑀻𑀫𑀸 𑀘 𑀅𑀲𑀻𑀫𑀸 𑀳𑁄𑀢𑀺.

𑁧𑁬𑁪. ‘‘𑀦, 𑀪𑀺𑀓𑁆𑀔𑀯𑁂, 𑀦𑀤𑀻𑀧𑀸𑀭𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁪𑁦) 𑀯𑀘𑀦𑀢𑁄 𑀦𑀤𑀻𑀧𑀸𑀭𑀲𑀻𑀫𑀸 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀬𑀢𑁆𑀭 𑀧𑀦 𑀥𑀼𑀯𑀦𑀸𑀯𑀸 𑀯𑀸 𑀥𑀼𑀯𑀲𑁂𑀢𑀼 𑀯𑀸 𑀅𑀪𑀺𑀫𑀼𑀔𑀢𑀺𑀢𑁆𑀣𑁂𑀬𑁂𑀯 𑀅𑀢𑁆𑀣𑀺, 𑀏𑀯𑀭𑀽𑀧𑀁 𑀦𑀤𑀻𑀧𑀸𑀭𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣𑀲𑁆𑀲 𑀥𑀼𑀯𑀦𑀸𑀯𑀸 𑀯𑀸 𑀥𑀼𑀯𑀲𑁂𑀢𑀼 𑀯𑀸, 𑀏𑀯𑀭𑀽𑀧𑀁 𑀦𑀤𑀻𑀧𑀸𑀭𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀘𑁂 𑀥𑀼𑀯𑀦𑀸𑀯𑀸 𑀯𑀸 𑀥𑀼𑀯𑀲𑁂𑀢𑀼 𑀯𑀸 𑀅𑀪𑀺𑀫𑀼𑀔𑀢𑀺𑀢𑁆𑀣𑁂 𑀦𑀢𑁆𑀣𑀺, 𑀈𑀲𑀓𑀁 𑀉𑀤𑁆𑀥𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀥𑁄 𑀯𑀸 𑀑𑀭𑁄𑀳𑀺𑀢𑁆𑀯𑀸 𑀅𑀢𑁆𑀣𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀓𑀭𑀯𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀕𑀸𑀯𑀼𑀢𑀫𑀢𑁆𑀢𑀩𑁆𑀪𑀦𑁆𑀢𑀭𑁂𑀧𑀺 𑀯𑀝𑁆𑀝𑀢𑀻’’𑀢𑀺 𑀆𑀳.

𑀇𑀫𑀜𑁆𑀘 𑀧𑀦 𑀦𑀤𑀻𑀧𑀸𑀭𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀏𑀓𑀲𑁆𑀫𑀺𑀜𑁆𑀘 𑀢𑀻𑀭𑁂 𑀞𑀢𑁆𑀯𑀸 𑀉𑀧𑀭𑀺𑀲𑁄𑀢𑁂 𑀦𑀤𑀻𑀢𑀻𑀭𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀸𑀦𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀬𑀢𑁆𑀢𑀓𑀁 𑀧𑀭𑀺𑀘𑁆𑀙𑁂𑀤𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀅𑀥𑁄𑀲𑁄𑀢𑁂𑀧𑀺 𑀦𑀤𑀻𑀢𑀻𑀭𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀧𑀭𑀢𑀻𑀭𑁂 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀦𑀤𑀻𑀢𑀻𑀭𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀢𑀢𑁄 𑀧𑀝𑁆𑀞𑀸𑀬 𑀬𑀢𑁆𑀢𑀓𑀁 𑀧𑀭𑀺𑀘𑁆𑀙𑁂𑀤𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀯𑀲𑁂𑀦 𑀬𑀸𑀯 𑀉𑀧𑀭𑀺𑀲𑁄𑀢𑁂 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸 𑀦𑀤𑀻𑀢𑀻𑀭𑁂 𑀦𑀺𑀫𑀺𑀢𑁆𑀢𑀁, 𑀢𑀸𑀯 𑀓𑀺𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀧𑀞𑀫𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀖𑀝𑁂𑀢𑀩𑁆𑀩𑀁. 𑀅𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀦𑀤𑀺𑀬𑀸 𑀞𑀺𑀢𑀸 𑀅𑀦𑀸𑀕𑀢𑀸𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺, 𑀲𑀫𑁆𑀫𑀼𑀢𑀺𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀧𑀭𑀢𑀻𑀭𑁂 𑀘 𑀑𑀭𑀺𑀫𑀢𑀻𑀭𑁂 𑀘 𑀏𑀓𑀲𑀻𑀫𑀸 𑀳𑁄𑀢𑀺, 𑀦𑀤𑀻 𑀧𑀦 𑀩𑀤𑁆𑀥𑀲𑀻𑀫𑀸𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀯𑀺𑀲𑀼𑀁 𑀦𑀤𑀻𑀲𑀻𑀫𑀸 𑀏𑀯 𑀳𑀺 𑀲𑀸.

𑀲𑀘𑁂 𑀅𑀦𑁆𑀢𑁄𑀦𑀤𑀺𑀬𑀁 𑀤𑀻𑀧𑀓𑁄 𑀳𑁄𑀢𑀺, 𑀢𑀁 𑀅𑀦𑁆𑀢𑁄𑀲𑀻𑀫𑀸𑀬 𑀓𑀸𑀢𑀼𑀓𑀸𑀫𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑁆𑀢𑀦𑀸 𑀞𑀺𑀢𑀢𑀻𑀭𑁂 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀤𑀻𑀧𑀓𑀲𑁆𑀲 𑀑𑀭𑀺𑀫𑀦𑁆𑀢𑁂 𑀘 𑀧𑀸𑀭𑀺𑀫𑀦𑁆𑀢𑁂 𑀘 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀅𑀣 𑀧𑀭𑀢𑀻𑀭𑁂 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑀸𑀯 𑀉𑀧𑀭𑀺𑀲𑁄𑀢𑁂 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸 𑀦𑀺𑀫𑀺𑀢𑁆𑀢𑀁, 𑀢𑀸𑀯 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀅𑀣 𑀤𑀻𑀧𑀓𑀲𑁆𑀲 𑀧𑀸𑀭𑀺𑀫𑀦𑁆𑀢𑁂 𑀘 𑀑𑀭𑀺𑀫𑀦𑁆𑀢𑁂 𑀘 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀖𑀝𑁂𑀢𑀩𑁆𑀩𑀁. 𑀅𑀣 𑀤𑁆𑀯𑀻𑀲𑀼 𑀢𑀻𑀭𑁂𑀲𑀼 𑀤𑀻𑀧𑀓𑁂𑀲𑀼 𑀘 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀦𑀤𑀺𑀬𑀁 𑀞𑀺𑀢𑀸 𑀅𑀦𑀸𑀕𑀘𑁆𑀙𑀦𑁆𑀢𑀸𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺, 𑀲𑀫𑁆𑀫𑀼𑀢𑀺𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑁆𑀯𑀸 𑀦𑀤𑀺𑀁 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀢𑀻𑀭𑀤𑁆𑀯𑀬𑀜𑁆𑀘 𑀤𑀻𑀧𑀓𑁄 𑀘 𑀏𑀓𑀲𑀻𑀫𑀸 𑀳𑁄𑀢𑀺, 𑀦𑀤𑀻 𑀧𑀦 𑀦𑀤𑀻𑀲𑀻𑀫𑀸𑀬𑁂𑀯.

𑀲𑀘𑁂 𑀧𑀦 𑀤𑀻𑀧𑀓𑁄 𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀅𑀥𑀺𑀓𑀢𑀭𑁄 𑀳𑁄𑀢𑀺, 𑀅𑀣 𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀲𑁆𑀲 𑀉𑀚𑀼𑀓𑀫𑁂𑀯 𑀲𑀫𑁆𑀫𑀼𑀔𑀻𑀪𑀽𑀢𑁂 𑀤𑀻𑀧𑀓𑀲𑁆𑀲 𑀑𑀭𑀺𑀫𑀦𑁆𑀢𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀻𑀧𑀓𑀲𑀺𑀔𑀭𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦 𑀧𑀼𑀦 𑀤𑀻𑀧𑀓𑀲𑁆𑀲 𑀑𑀭𑀺𑀫𑀦𑁆𑀢𑁂 𑀦𑀺𑀫𑀺𑀢𑁆𑀢𑀲𑀫𑁆𑀫𑀼𑀔𑁂 𑀧𑀸𑀭𑀺𑀫𑀦𑁆𑀢𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀭𑀢𑀻𑀭𑁂 𑀲𑀫𑁆𑀫𑀼𑀔𑀦𑀺𑀫𑀺𑀢𑁆𑀢𑀫𑀸𑀤𑀺𑀁 𑀓𑀢𑁆𑀯𑀸 𑀧𑀭𑀢𑀻𑀭𑁂 𑀦𑀺𑀫𑀺𑀢𑁆𑀢𑀸𑀦𑀺 𑀘 𑀤𑀻𑀧𑀓𑀲𑁆𑀲 𑀧𑀸𑀭𑀺𑀫𑀦𑁆𑀢𑀑𑀭𑀺𑀫𑀦𑁆𑀢𑁂 𑀦𑀺𑀫𑀺𑀢𑁆𑀢𑀸𑀦𑀺 𑀘 𑀓𑀺𑀢𑁆𑀢𑁂𑀢𑁆𑀯𑀸 𑀧𑀞𑀫𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀖𑀝𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀧𑀩𑁆𑀩𑀢𑀲𑀡𑁆𑀞𑀸𑀦𑀸 𑀳𑁄𑀢𑀺. 𑀲𑀘𑁂 𑀧𑀦 𑀤𑀻𑀧𑀓𑁄 𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀉𑀤𑁆𑀥𑀫𑁆𑀧𑀺 𑀅𑀥𑁄𑀧𑀺 𑀅𑀥𑀺𑀓𑀢𑀭𑁄 𑀳𑁄𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀤𑀻𑀧𑀓𑀲𑁆𑀲 𑀉𑀪𑁄𑀧𑀺 𑀲𑀺𑀔𑀭𑀸𑀦𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀦𑁆𑀢𑁂𑀦 𑀦𑀺𑀫𑀺𑀢𑁆𑀢𑀖𑀝𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀸 𑀳𑁄𑀢𑀺. 𑀲𑀘𑁂 𑀤𑀻𑀧𑀓𑁄 𑀯𑀺𑀳𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑁄 𑀔𑀼𑀤𑁆𑀤𑀓𑁄 𑀳𑁄𑀢𑀺, 𑀲𑀩𑁆𑀩𑀧𑀞𑀫𑁂𑀦 𑀦𑀬𑁂𑀦 𑀤𑀻𑀧𑀓𑁂 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀏𑀯𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀧𑀡𑀯𑀲𑀡𑁆𑀞𑀸𑀦𑀸 𑀳𑁄𑀢𑀺. 𑀏𑀯𑀁 𑀢𑀸𑀯 𑀲𑀻𑀫𑀸𑀩𑀦𑁆𑀥𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁬𑁫. 𑀏𑀯𑀁 𑀩𑀤𑁆𑀥𑀸 𑀧𑀦 𑀲𑀻𑀫𑀸 𑀓𑀤𑀸 𑀅𑀲𑀻𑀫𑀸 𑀳𑁄𑀢𑀻𑀢𑀺? 𑀬𑀤𑀸 𑀲𑀗𑁆𑀖𑁄 𑀲𑀻𑀫𑀁 𑀲𑀫𑀽𑀳𑀦𑀢𑀺, 𑀢𑀤𑀸 𑀅𑀲𑀻𑀫𑀸 𑀳𑁄𑀢𑀺. 𑀓𑀣𑀁 𑀧𑀦𑁂𑀲𑀸 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺? ‘‘𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀧𑀞𑀫𑀁 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑀽𑀳𑀦𑀦𑁆𑀢𑁂𑀦 𑀧𑀞𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑁆𑀢𑀩𑁆𑀩𑁄, 𑀧𑀘𑁆𑀙𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀲𑀫𑀽𑀳𑀦𑁆𑀢𑀩𑁆𑀩𑀸’’𑀢𑀺 𑀯𑀘𑀦𑀢𑁄 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑀺𑀢𑀩𑁆𑀩𑁄, 𑀧𑀘𑁆𑀙𑀸 𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺. 𑀓𑀣𑀁? 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀢𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑀽𑀳𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀢𑁄, 𑀲𑀗𑁆𑀖𑁄 𑀢𑀁 𑀢𑀺𑀘𑀻𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑀽𑀳𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀲𑁆𑀲 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑁆𑀲 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑀽𑀳𑀢𑁄 𑀲𑁄 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁪𑁫) 𑁋

𑀏𑀯𑀁 𑀢𑀸𑀯 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑀺𑀢𑀩𑁆𑀩𑁄.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀲𑀫𑀽𑀳𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀲𑀫𑀽𑀳𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀽𑀧𑁄𑀲𑀣𑀸𑀬 𑀲𑀫𑀼𑀕𑁆𑀖𑀸𑀢𑁄, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑀽𑀳𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁪𑁬) 𑁋

𑀏𑀯𑀁 𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸.

𑀲𑀫𑀽𑀳𑀦𑀦𑁆𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑁋 𑀔𑀡𑁆𑀟𑀲𑀻𑀫𑀸𑀬 𑀞𑀢𑁆𑀯𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦 𑀲𑀫𑀽𑀳𑀦𑁆𑀢𑀩𑁆𑀩𑀸, 𑀢𑀣𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀞𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀧𑀺. 𑀔𑀡𑁆𑀟𑀲𑀻𑀫𑀸𑀬 𑀧𑀦 𑀞𑀺𑀢𑁂𑀦 𑀔𑀡𑁆𑀟𑀲𑀻𑀫𑀸𑀯 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀢𑀣𑀸 𑀇𑀢𑀭𑀸𑀬 𑀞𑀺𑀢𑁂𑀦 𑀇𑀢𑀭𑀸. 𑀲𑀻𑀫𑀁 𑀦𑀸𑀫 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀫𑀽𑀳𑀦𑀦𑁆𑀢𑀺 𑀧𑀓𑀢𑀺𑀬𑀸 𑀔𑀼𑀤𑁆𑀤𑀓𑀁 𑀧𑀼𑀦 𑀆𑀯𑀸𑀲𑀯𑀟𑁆𑀠𑀦𑀢𑁆𑀣𑀸𑀬 𑀫𑀳𑀢𑀺𑀁 𑀯𑀸 𑀓𑀸𑀢𑀼𑀁, 𑀧𑀓𑀢𑀺𑀬𑀸 𑀫𑀳𑀢𑀺𑀁 𑀧𑀼𑀦 𑀅𑀜𑁆𑀜𑁂𑀲𑀁 𑀯𑀺𑀳𑀸𑀭𑁄𑀓𑀸𑀲𑀤𑀸𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀁 𑀯𑀸 𑀓𑀸𑀢𑀼𑀁. 𑀢𑀢𑁆𑀣 𑀲𑀘𑁂 𑀔𑀡𑁆𑀟𑀲𑀻𑀫𑀜𑁆𑀘 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀜𑁆𑀘 𑀚𑀸𑀦𑀦𑁆𑀢𑀺, 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀔𑀡𑁆𑀟𑀲𑀻𑀫𑀁 𑀅𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁𑀬𑁂𑀯 𑀚𑀸𑀦𑀦𑁆𑀢𑀸 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀉𑀧𑀑𑀲𑀣𑀸𑀕𑀸𑀭𑀸𑀤𑀻𑀲𑀼 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼 𑀞𑀢𑁆𑀯𑀸 𑀅𑀧𑁆𑀧𑁂𑀯 𑀦𑀸𑀫 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀧𑀝𑀺𑀩𑀦𑁆𑀥𑀺𑀢𑀼𑀁 𑀧𑀦 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯. 𑀲𑀘𑁂 𑀩𑀦𑁆𑀥𑁂𑀬𑁆𑀬𑀼𑀁, 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀅𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀬𑁂 𑀧𑀦 𑀉𑀪𑁄𑀧𑀺 𑀦 𑀚𑀸𑀦𑀦𑁆𑀢𑀺, 𑀢𑁂 𑀦𑁂𑀯 𑀲𑀫𑀽𑀳𑀦𑀺𑀢𑀼𑀁, 𑀦 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀅𑀬𑀜𑁆𑀳𑀺 𑀲𑀻𑀫𑀸 𑀦𑀸𑀫 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀲𑀻𑀫𑀸 𑀳𑁄𑀢𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀯𑀸, 𑀦 𑀘 𑀲𑀓𑁆𑀓𑀸 𑀲𑀻𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀓𑀫𑁆𑀫𑀯𑀸𑀘𑀸 𑀓𑀸𑀢𑀼𑀁, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀲𑀸𑀥𑀼𑀓𑀁 𑀧𑀦 𑀜𑀢𑁆𑀯𑀸𑀬𑁂𑀯 𑀲𑀫𑀽𑀳𑀦𑀺𑀢𑀩𑁆𑀩𑀸 𑀘𑁂𑀯 𑀩𑀦𑁆𑀥𑀺𑀢𑀩𑁆𑀩𑀸 𑀘𑀸𑀢𑀺. 𑀅𑀬𑀁 𑀢𑀸𑀯 𑀩𑀤𑁆𑀥𑀲𑀻𑀫𑀸𑀬 𑀯𑀺𑀦𑀺𑀘𑁆𑀙𑀬𑁄.

𑁧𑁬𑁬. 𑀅𑀩𑀤𑁆𑀥𑀲𑀻𑀫𑀸 𑀧𑀦 𑀕𑀸𑀫𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺 𑀢𑀺𑀯𑀺𑀥𑀸. 𑀢𑀢𑁆𑀣 𑀬𑀸𑀯𑀢𑀸 𑀏𑀓𑀁 𑀕𑀸𑀫𑀔𑁂𑀢𑁆𑀢𑀁, 𑀅𑀬𑀁 𑀕𑀸𑀫𑀲𑀻𑀫𑀸 𑀦𑀸𑀫, 𑀕𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀦𑀕𑀭𑀫𑁆𑀧𑀺 𑀦𑀺𑀕𑀫𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀢𑀲𑁆𑀲 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀪𑁄𑀚𑀓𑀸 𑀩𑀮𑀺𑀁 𑀮𑀪𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀅𑀧𑁆𑀧𑁄 𑀯𑀸 𑀳𑁄𑀢𑀼 𑀫𑀳𑀦𑁆𑀢𑁄 𑀯𑀸, 𑀕𑀸𑀫𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀦𑀕𑀭𑀦𑀺𑀕𑀫𑀲𑀻𑀫𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁 ‘‘𑀅𑀬𑀁 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀸 𑀘 𑀇𑀢𑀭𑀸 𑀘 𑀧𑀓𑀢𑀺𑀕𑀸𑀫𑀦𑀕𑀭𑀦𑀺𑀕𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀬𑁂𑀯 𑀳𑁄𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀁 𑀦 𑀮𑀪𑀦𑁆𑀢𑀺.

𑀅𑀕𑀸𑀫𑀓𑁂 𑀧𑀦 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦𑀸𑀫. 𑀢𑀢𑁆𑀣 𑀅𑀕𑀸𑀫𑀓𑀁 𑀦𑀸𑀫 𑀅𑀭𑀜𑁆𑀜𑀁 𑀯𑀺𑀜𑁆𑀛𑀸𑀝𑀯𑀻𑀆𑀤𑀻𑀲𑀼 𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀯𑀸 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂 𑀤𑀻𑀧𑀓𑁂𑀲𑀼 𑀮𑀩𑁆𑀪𑀢𑀺. 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀫𑀚𑁆𑀛𑁂 𑀞𑀺𑀢𑀸𑀦𑀁 𑀲𑀩𑁆𑀩𑀤𑀺𑀲𑀸𑀲𑀼 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀳𑁄𑀦𑁆𑀢𑀺. 𑀢𑀢𑁆𑀣 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀅𑀬𑀜𑁆𑀘 𑀲𑀻𑀫𑀸 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀢𑀺, 𑀢𑀲𑁆𑀫𑀸 𑀲𑀫𑀦𑁆𑀢𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀤𑁆𑀯𑁂 𑀲𑀗𑁆𑀖𑀸 𑀯𑀺𑀲𑀼𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀦𑀁 𑀅𑀦𑁆𑀢𑀭𑁂 𑀅𑀜𑁆𑀜𑀫𑁂𑀓𑀁 𑀅𑀩𑁆𑀪𑀦𑁆𑀢𑀭𑀁 𑀉𑀧𑀘𑀸𑀭𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑀁.

𑁧𑁬𑁭. 𑀬𑀸 𑀧𑀦𑁂𑀲𑀸 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁭) 𑀏𑀯𑀁 𑀦𑀤𑀻𑀆𑀤𑀻𑀦𑀁 𑀩𑀤𑁆𑀥𑀲𑀻𑀫𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 ‘‘𑀦𑀤𑀺𑀬𑀸 𑀯𑀸, 𑀪𑀺𑀓𑁆𑀔𑀯𑁂, 𑀲𑀫𑀼𑀤𑁆𑀤𑁂 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 (𑀫𑀳𑀸𑀯. 𑁧𑁪𑁭) 𑀯𑀼𑀢𑁆𑀢𑀸, 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀸𑀫. 𑀢𑀢𑁆𑀣 𑀦𑀤𑀻 𑀦𑀤𑀻𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀮𑀓𑁆𑀔𑀡𑀸𑀯, 𑀲𑀫𑀼𑀤𑁆𑀤𑁄𑀧𑀺 𑀧𑀸𑀓𑀝𑁄𑀬𑁂𑀯. 𑀬𑁄 𑀧𑀦 𑀬𑁂𑀦 𑀓𑁂𑀦𑀘𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄 𑀲𑀬𑀁𑀚𑀸𑀢𑁄 𑀲𑁄𑀩𑁆𑀪𑁄 𑀲𑀫𑀦𑁆𑀢𑀢𑁄 𑀆𑀕𑀢𑁂𑀦 𑀉𑀤𑀓𑁂𑀦 𑀧𑀽𑀭𑀺𑀢𑁄 𑀢𑀺𑀝𑁆𑀞𑀢𑀺, 𑀬𑀢𑁆𑀣 𑀦𑀤𑀺𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀬𑀁 𑀚𑀸𑀢𑀲𑁆𑀲𑀭𑁄 𑀦𑀸𑀫. 𑀬𑁄𑀧𑀺 𑀦𑀤𑀺𑀁 𑀯𑀸 𑀲𑀫𑀼𑀤𑁆𑀤𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑁂𑀦 𑀔𑀢𑁄 𑀲𑁄𑀩𑁆𑀪𑁄 𑀏𑀢𑀁 𑀮𑀓𑁆𑀔𑀡𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀚𑀸𑀢𑀲𑁆𑀲𑀭𑁄𑀬𑁂𑀯. 𑀏𑀢𑁂𑀲𑀼 𑀦𑀤𑀻𑀆𑀤𑀻𑀲𑀼 𑀬𑀁 𑀞𑀸𑀦𑀁 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀸𑀫.

𑀓𑀣𑀁 𑀧𑀦 𑀉𑀤𑀓𑀼𑀓𑁆𑀔𑁂𑀧𑁄 𑀓𑀸𑀢𑀩𑁆𑀩𑁄𑀢𑀺? 𑀬𑀣𑀸 𑀅𑀓𑁆𑀔𑀥𑀼𑀢𑁆𑀢𑀸 𑀤𑀸𑀭𑀼𑀕𑀼𑀴𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀉𑀤𑀓𑀁 𑀯𑀸 𑀯𑀸𑀮𑀼𑀓𑀁 𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀺𑀢𑀩𑁆𑀩𑀁. 𑀬𑀢𑁆𑀣 𑀏𑀯𑀁 𑀔𑀺𑀢𑁆𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀼𑀓𑀸 𑀯𑀸 𑀧𑀢𑀢𑀺, 𑀅𑀬𑀫𑁂𑀓𑁄 𑀉𑀤𑀓𑀼𑀓𑁆𑀔𑁂𑀧𑁄, 𑀢𑀲𑁆𑀲 𑀅𑀦𑁆𑀢𑁄𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀬𑀸𑀯 𑀧𑀭𑀺𑀲𑀸 𑀯𑀟𑁆𑀠𑀢𑀺, 𑀢𑀸𑀯 𑀲𑀻𑀫𑀸𑀧𑀺 𑀯𑀟𑁆𑀠𑀢𑀺, 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁄𑀬𑁂𑀯 𑀧𑀫𑀸𑀡𑀁, 𑀅𑀬𑀁 𑀧𑀦 𑀏𑀢𑁂𑀲𑀁 𑀦𑀤𑀻𑀆𑀤𑀻𑀦𑀁 𑀅𑀦𑁆𑀢𑁄𑀬𑁂𑀯 𑀮𑀩𑁆𑀪𑀢𑀺, 𑀦 𑀩𑀳𑀺. 𑀢𑀲𑁆𑀫𑀸 𑀦𑀤𑀺𑀬𑀸 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀧𑀓𑀢𑀺𑀯𑀲𑁆𑀲𑀓𑀸𑀮𑁂 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀉𑀤𑀓𑀁 𑀑𑀢𑁆𑀣𑀭𑀢𑀺, 𑀲𑀫𑀼𑀤𑁆𑀤𑁂 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀧𑀓𑀢𑀺𑀯𑀻𑀘𑀺𑀬𑁄 𑀑𑀲𑀭𑀺𑀢𑁆𑀯𑀸 𑀲𑀡𑁆𑀞𑀳𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀺𑀬𑀪𑀽𑀫𑀺, 𑀢𑀢𑁆𑀣 𑀞𑀢𑁆𑀯𑀸 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀦𑀤𑀻𑀚𑀸𑀢𑀲𑁆𑀲𑀭𑁂𑀲𑀼 𑀲𑀼𑀓𑁆𑀔𑁂𑀲𑀼𑀧𑀺 𑀲𑀸 𑀏𑀯 𑀓𑀧𑁆𑀧𑀺𑀬𑀪𑀽𑀫𑀺. 𑀲𑀘𑁂 𑀧𑀦 𑀲𑀼𑀓𑁆𑀔𑁂 𑀚𑀸𑀢𑀲𑁆𑀲𑀭𑁂 𑀯𑀸𑀧𑀺𑀁 𑀯𑀸 𑀔𑀡𑀦𑁆𑀢𑀺, 𑀯𑀧𑁆𑀧𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀞𑀸𑀦𑀁 𑀕𑀸𑀫𑀔𑁂𑀢𑁆𑀢𑀁 𑀳𑁄𑀢𑀺. 𑀬𑀸 𑀧𑀦𑁂𑀲𑀸 ‘‘𑀓𑀧𑁆𑀧𑀺𑀬𑀪𑀽𑀫𑀻’’𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀩𑀳𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦 𑀕𑀘𑁆𑀙𑀢𑀺, 𑀅𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀦𑁆𑀢𑁄 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄, 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄 𑁋 𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀓𑀫𑁆𑀫𑀁 𑀦𑀢𑁆𑀣𑀺, 𑀲𑀓𑀮𑀸𑀧𑀺 𑀦𑀤𑀻 𑀏𑀢𑁂𑀲𑀁𑀬𑁂𑀯 𑀪𑀺𑀓𑁆𑀔𑀽𑀦𑀁 𑀧𑀳𑁄𑀢𑀺. 𑀬𑀁 𑀧𑀦 𑀫𑀳𑀸𑀲𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀬𑁄𑀚𑀦𑀁 𑀧𑀯𑀢𑁆𑀢𑀫𑀸𑀦𑀸𑀬𑁂𑀯 𑀦𑀤𑀻, 𑀢𑀢𑁆𑀭𑀸𑀧𑀺 𑀉𑀧𑀭𑀺 𑀅𑀟𑁆𑀠𑀬𑁄𑀚𑀦𑀁 𑀧𑀳𑀸𑀬 𑀳𑁂𑀝𑁆𑀞𑀸 𑀅𑀟𑁆𑀠𑀬𑁄𑀚𑀦𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺, 𑀢𑀁 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀪𑀕𑀯𑀢𑀸 𑀳𑀺 ‘‘𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀻’’𑀢𑀺 (𑀧𑀸𑀘𑀺. 𑁬𑁯𑁨) 𑀇𑀤𑀁 𑀦𑀤𑀺𑀬𑀸 𑀧𑀫𑀸𑀡𑀁 𑀯𑀼𑀢𑁆𑀢𑀁, 𑀦 𑀬𑁄𑀚𑀦𑀁 𑀯𑀸 𑀅𑀟𑁆𑀠𑀬𑁄𑀚𑀦𑀁 𑀯𑀸, 𑀢𑀲𑁆𑀫𑀸 𑀬𑀸 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑀸 𑀦𑀤𑀻, 𑀢𑀲𑁆𑀲𑀸 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁂𑀢𑁆𑀣 𑀩𑀳𑀽 𑀪𑀺𑀓𑁆𑀔𑀽 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁂𑀳𑀺 𑀅𑀢𑁆𑀢𑀦𑁄 𑀘 𑀅𑀜𑁆𑀜𑁂𑀲𑀜𑁆𑀘 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄, 𑀢𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺𑀬𑁂𑀯, 𑀊𑀦𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀚𑀸𑀢𑀲𑁆𑀲𑀭𑀲𑀫𑀼𑀤𑁆𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀦𑀤𑀺𑀬𑀸 𑀧𑀦 ‘‘𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀕𑀢𑁂𑀳𑀺 𑀲𑀘𑁂 𑀦𑀤𑀻 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺 𑀲𑀫𑀢𑀺𑀢𑁆𑀢𑀺𑀓𑀸, 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀦 𑀲𑀓𑁆𑀓𑁄𑀦𑁆𑀢𑀺, 𑀦𑀸𑀯𑀸𑀬𑀧𑀺 𑀞𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦 𑀦𑀸𑀯𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀉𑀤𑀓𑀼𑀓𑁆𑀔𑁂𑀧𑀫𑀢𑁆𑀢𑀫𑁂𑀯 𑀳𑀺 𑀲𑀻𑀫𑀸. 𑀢𑀁 𑀦𑀸𑀯𑀸 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀫𑀢𑀺, 𑀏𑀯𑀁 𑀲𑀢𑀺 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑀸𑀯𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀯𑀁 𑀅𑀭𑀺𑀢𑁆𑀢𑁂𑀦 𑀯𑀸 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑁂 𑀯𑀸 𑀮𑀫𑁆𑀩𑁂𑀢𑁆𑀯𑀸 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀦𑀤𑀺𑀬𑀁 𑀩𑀤𑁆𑀥𑀅𑀝𑁆𑀝𑀓𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂𑀧𑀺 𑀞𑀺𑀢𑁂𑀳𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑀧𑀸𑀭𑁄𑀳𑁄 𑀯𑀸 𑀩𑀳𑀺𑀦𑀤𑀻𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄, 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸 𑀲𑀸𑀔𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀩𑀳𑀺𑀦𑀤𑀻𑀢𑀻𑀭𑁂 𑀚𑀸𑀢𑀭𑀼𑀓𑁆𑀔𑀲𑁆𑀲 𑀅𑀦𑁆𑀢𑁄𑀦𑀤𑀺𑀬𑀁 𑀧𑀯𑀺𑀝𑁆𑀞𑀲𑀸𑀔𑀸𑀬 𑀯𑀸 𑀧𑀸𑀭𑁄𑀳𑁂 𑀯𑀸 𑀦𑀸𑀯𑀁 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀭𑁄𑀦𑁆𑀢𑁂𑀳𑀺 𑀲𑀻𑀫𑀸 𑀯𑀸 𑀲𑁄𑀥𑁂𑀢𑀩𑁆𑀩𑀸, 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀲𑁆𑀲 𑀩𑀳𑀺𑀧𑀢𑀺𑀝𑁆𑀞𑀺𑀢𑀪𑀸𑀯𑁄 𑀦𑀸𑀲𑁂𑀢𑀩𑁆𑀩𑁄. 𑀦𑀤𑀻𑀢𑀻𑀭𑁂 𑀧𑀦 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀩𑀤𑁆𑀥𑀦𑀸𑀯𑀸𑀬 𑀦 𑀯𑀝𑁆𑀝𑀢𑀺𑀬𑁂𑀯. 𑀦𑀤𑀺𑀬𑀁 𑀲𑁂𑀢𑀼𑀁 𑀓𑀭𑁄𑀦𑁆𑀢𑀺, 𑀲𑀘𑁂 𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯 𑀲𑁂𑀢𑀼 𑀘 𑀲𑁂𑀢𑀼𑀧𑀸𑀤𑀸 𑀘 𑀳𑁄𑀦𑁆𑀢𑀺, 𑀲𑁂𑀢𑀼𑀫𑁆𑀳𑀺 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸, 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀅𑀣 𑀲𑁂𑀢𑀼𑀧𑀸𑀤𑀸 𑀅𑀦𑁆𑀢𑁄, 𑀲𑁂𑀢𑀼 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 𑀢𑀻𑀭𑀸𑀦𑀁 𑀉𑀧𑀭𑀺𑀆𑀓𑀸𑀲𑁂 𑀞𑀺𑀢𑁄, 𑀯𑀝𑁆𑀝𑀢𑀺.

𑀅𑀦𑁆𑀢𑁄𑀦𑀤𑀺𑀬𑀁 𑀧𑀸𑀲𑀸𑀡𑁄 𑀯𑀸 𑀤𑀻𑀧𑀓𑁄 𑀯𑀸 𑀳𑁄𑀢𑀺, 𑀢𑀢𑁆𑀣 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀓𑀢𑀺𑀯𑀲𑁆𑀲𑀓𑀸𑀮𑁂 𑀯𑀲𑁆𑀲𑀸𑀦𑀲𑁆𑀲 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀉𑀤𑀓𑀁 𑀑𑀢𑁆𑀣𑀭𑀢𑀺, 𑀲𑁄 𑀦𑀤𑀻𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀅𑀢𑀺𑀯𑀼𑀝𑁆𑀞𑀺𑀓𑀸𑀮𑁂 𑀑𑀖𑁂𑀦 𑀑𑀢𑁆𑀣𑀢𑁄𑀓𑀸𑀲𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀦𑀤𑀺𑀢𑁄 𑀫𑀸𑀢𑀺𑀓𑀁 𑀦𑀻𑀳𑀭𑀦𑁆𑀢𑀸 𑀦𑀤𑀺𑀬𑀁 𑀆𑀯𑀭𑀡𑀁 𑀓𑀭𑁄𑀦𑁆𑀢𑀺, 𑀢𑀁 𑀘𑁂 𑀑𑀢𑁆𑀣𑀭𑀺𑀢𑁆𑀯𑀸 𑀯𑀸 𑀯𑀺𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀯𑀸 𑀉𑀤𑀓𑀁 𑀕𑀘𑁆𑀙𑀢𑀺, 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀆𑀯𑀭𑀡𑁂𑀦 𑀯𑀸 𑀓𑁄𑀝𑁆𑀝𑀓𑀩𑀦𑁆𑀥𑀦𑁂𑀦 𑀯𑀸 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀢𑀺, 𑀉𑀤𑀓𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀯𑀭𑀡𑀫𑀢𑁆𑀢𑀓𑁂𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀓𑁄𑀘𑀺 𑀆𑀯𑀭𑀡𑀧𑁆𑀧𑀤𑁂𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀸𑀲𑀸𑀡𑀤𑀻𑀧𑀓𑀧𑁆𑀧𑀤𑁂𑀲𑁄 𑀯𑀺𑀬 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀻𑀬𑀢𑀺, 𑀢𑀢𑁆𑀣 𑀯𑀝𑁆𑀝𑀢𑀺. 𑀲𑁄 𑀳𑀺 𑀦𑀤𑀻𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀦𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀁 𑀓𑀭𑁄𑀦𑁆𑀢𑀺, 𑀳𑁂𑀝𑁆𑀞𑀸 𑀧𑀸𑀴𑀺𑀩𑀤𑁆𑀥𑀸 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀴𑀸𑀓𑀁 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀧𑀭𑀺 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀳𑁂𑀝𑁆𑀞𑀸 𑀘 𑀙𑀟𑁆𑀟𑀺𑀢𑁄𑀤𑀓𑀁 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼 𑀯𑀸 𑀲𑀼𑀓𑁆𑀔𑀦𑀤𑀺𑀬𑀸𑀧𑀺 𑀯𑀝𑁆𑀝𑀢𑀺, 𑀦𑀤𑀺𑀢𑁄 𑀦𑀻𑀳𑀝𑀫𑀸𑀢𑀺𑀓𑀸𑀬 𑀦 𑀯𑀝𑁆𑀝𑀢𑀺. 𑀲𑀘𑁂 𑀲𑀸 𑀓𑀸𑀮𑀦𑁆𑀢𑀭𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀦𑀤𑀻 𑀳𑁄𑀢𑀺, 𑀯𑀝𑁆𑀝𑀢𑀺. 𑀓𑀸𑀘𑀺 𑀦𑀤𑀻 𑀉𑀧𑁆𑀧𑀢𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀲𑀻𑀫𑀁 𑀑𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦𑀤𑀻𑀬𑁂𑀯 𑀳𑁄𑀢𑀺, 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀺𑀳𑀸𑀭𑀲𑀻𑀫𑀁 𑀑𑀢𑁆𑀣𑀭𑀢𑀺, 𑀯𑀺𑀳𑀸𑀭𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

𑀲𑀫𑀼𑀤𑁆𑀤𑁂𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀬𑀁 𑀧𑀤𑁂𑀲𑀁 𑀉𑀤𑁆𑀥𑀁 𑀯𑀟𑁆𑀠𑀦𑀉𑀤𑀓𑀁 𑀯𑀸 𑀧𑀓𑀢𑀺𑀯𑀻𑀘𑀺 𑀯𑀸 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 𑀑𑀢𑁆𑀣𑀭𑀢𑀺, 𑀢𑀢𑁆𑀣 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀧𑀓𑀢𑀺𑀯𑀻𑀘𑀺𑀬𑁄 𑀑𑀲𑀭𑀺𑀢𑁆𑀯𑀸 𑀲𑀡𑁆𑀞𑀳𑀦𑁆𑀢𑀺, 𑀲𑁄 𑀉𑀤𑀓𑀦𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄 𑀲𑀫𑀼𑀤𑁆𑀤𑁄 𑀦𑀸𑀫, 𑀢𑀢𑁆𑀣 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀊𑀫𑀺𑀯𑁂𑀕𑁄 𑀩𑀸𑀥𑀢𑀺, 𑀦𑀸𑀯𑀸𑀬 𑀯𑀸 𑀅𑀝𑁆𑀝𑀓𑁂 𑀯𑀸 𑀞𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀦𑀤𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀼𑀤𑁆𑀤𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀳𑁄𑀢𑀺, 𑀢𑀁 𑀓𑀤𑀸𑀘𑀺 𑀊𑀫𑀺𑀬𑁄 𑀆𑀕𑀦𑁆𑀢𑁆𑀯𑀸 𑀑𑀢𑁆𑀣𑀭𑀦𑁆𑀢𑀺, 𑀓𑀤𑀸𑀘𑀺 𑀦 𑀑𑀢𑁆𑀣𑀭𑀦𑁆𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑁄 𑀳𑀺 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀧𑀦 𑀯𑀻𑀘𑀻𑀲𑀼 𑀆𑀕𑀢𑀸𑀲𑀼𑀧𑀺 𑀅𑀦𑀸𑀕𑀢𑀸𑀲𑀼𑀧𑀺 𑀧𑀓𑀢𑀺𑀉𑀤𑀓𑁂𑀦𑁂𑀯 𑀑𑀢𑁆𑀣𑀭𑀻𑀬𑀢𑀺, 𑀯𑀝𑁆𑀝𑀢𑀺. 𑀤𑀻𑀧𑀓𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀳𑁄𑀢𑀺, 𑀲𑁄 𑀘𑁂 𑀤𑀽𑀭𑁂 𑀳𑁄𑀢𑀺 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁂, 𑀅𑀭𑀜𑁆𑀜𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀢𑁂𑀲𑀁 𑀕𑀫𑀦𑀧𑀭𑀺𑀬𑀦𑁆𑀢𑀲𑁆𑀲 𑀑𑀭𑀢𑁄 𑀧𑀦 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀕𑀸𑀫𑀲𑀻𑀫𑀁 𑀅𑀲𑁄𑀥𑁂𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀫𑀼𑀤𑁆𑀤𑁄 𑀕𑀸𑀫𑀲𑀻𑀫𑀁 𑀯𑀸 𑀦𑀺𑀕𑀫𑀲𑀻𑀫𑀁 𑀯𑀸 𑀑𑀢𑁆𑀣𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀫𑀼𑀤𑁆𑀤𑁄𑀯 𑀳𑁄𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀺𑀳𑀸𑀭𑀲𑀻𑀫𑀁 𑀑𑀢𑁆𑀣𑀭𑀢𑀺, 𑀯𑀺𑀳𑀸𑀭𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

𑀚𑀸𑀢𑀲𑁆𑀲𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀬𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀯𑀲𑁆𑀲𑁂 𑀧𑀘𑁆𑀙𑀺𑀦𑁆𑀦𑀫𑀢𑁆𑀢𑁂 𑀧𑀺𑀯𑀺𑀢𑀼𑀁 𑀯𑀸 𑀳𑀢𑁆𑀣𑀧𑀸𑀤𑁂 𑀯𑀸 𑀥𑁄𑀯𑀺𑀢𑀼𑀁 𑀉𑀤𑀓𑀁 𑀦 𑀳𑁄𑀢𑀺, 𑀲𑀼𑀓𑁆𑀔𑀢𑀺, 𑀅𑀬𑀁 𑀦 𑀚𑀸𑀢𑀲𑁆𑀲𑀭𑁄, 𑀕𑀸𑀫𑀔𑁂𑀢𑁆𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀬𑀫𑁂𑀯 𑀚𑀸𑀢𑀲𑁆𑀲𑀭𑁄. 𑀢𑀲𑁆𑀲 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑁂 𑀉𑀤𑀓𑀁 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀕𑀫𑁆𑀪𑀻𑀭𑀁 𑀉𑀤𑀓𑀁, 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑁂𑀳𑀺𑀧𑀺 𑀚𑀸𑀢𑀲𑁆𑀲𑀭𑀲𑁆𑀲 𑀅𑀦𑁆𑀢𑁄𑀚𑀸𑀢𑀭𑀼𑀓𑁆𑀔𑀫𑁆𑀳𑀺 𑀩𑀤𑁆𑀥𑀅𑀝𑁆𑀝𑀓𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀧𑀺𑀝𑁆𑀞𑀺𑀧𑀸𑀲𑀸𑀡𑀤𑀻𑀧𑀓𑁂𑀲𑀼 𑀧𑀦𑁂𑀢𑁆𑀣 𑀦𑀤𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀲𑀫𑀯𑀲𑁆𑀲𑀤𑁂𑀯𑀓𑀸𑀮𑁂 𑀧𑀳𑁄𑀦𑀓𑀚𑀸𑀢𑀲𑁆𑀲𑀭𑁄 𑀧𑀦 𑀘𑁂𑀧𑀺 𑀤𑀼𑀩𑁆𑀩𑀼𑀝𑁆𑀞𑀺𑀓𑀓𑀸𑀮𑁂 𑀯𑀸 𑀕𑀺𑀫𑁆𑀳𑀳𑁂𑀫𑀦𑁆𑀢𑁂𑀲𑀼 𑀯𑀸 𑀲𑀼𑀓𑁆𑀔𑀢𑀺, 𑀦𑀺𑀭𑀼𑀤𑀓𑁄 𑀳𑁄𑀢𑀺, 𑀢𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀲𑀼𑀓𑁆𑀔𑁄 𑀅𑀦𑁄𑀤𑀓𑁄 𑀕𑀸𑀫𑀔𑁂𑀢𑁆𑀢𑀁𑀬𑁂𑀯 𑀪𑀚𑀢𑀻’’𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦𑁂𑀢𑁆𑀣 𑀉𑀤𑀓𑀢𑁆𑀣𑀸𑀬 𑀆𑀯𑀸𑀝𑀁 𑀯𑀸 𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀺 𑀯𑀸 𑀔𑀡𑀦𑁆𑀢𑀺, 𑀢𑀁 𑀞𑀸𑀦𑀁 𑀅𑀚𑀸𑀢𑀲𑁆𑀲𑀭𑁄 𑀳𑁄𑀢𑀺, 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀮𑀸𑀩𑀼𑀢𑀺𑀧𑀼𑀲𑀓𑀸𑀤𑀺𑀯𑀧𑁆𑀧𑁂 𑀓𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀦𑀁 𑀧𑀽𑀭𑁂𑀢𑁆𑀯𑀸 𑀣𑀮𑀁 𑀯𑀸 𑀓𑀭𑁄𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀸𑀴𑀺𑀁 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑀫𑁂𑀯 𑀦𑀁 𑀫𑀳𑀸𑀢𑀴𑀸𑀓𑀁 𑀯𑀸 𑀓𑀭𑁄𑀦𑁆𑀢𑀺, 𑀲𑀩𑁆𑀩𑁄𑀧𑀺 𑀅𑀚𑀸𑀢𑀲𑁆𑀲𑀭𑁄 𑀳𑁄𑀢𑀺, 𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀮𑁄𑀡𑀻𑀧𑀺 𑀚𑀸𑀢𑀲𑁆𑀲𑀭𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀉𑀤𑀓𑀝𑁆𑀞𑀸𑀦𑁄𑀓𑀸𑀲𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀅𑀬𑀁 𑀅𑀩𑀤𑁆𑀥𑀲𑀻𑀫𑀸𑀬 𑀯𑀺𑀦𑀺𑀘𑁆𑀙𑀬𑁄.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.