𑁨𑁨. 𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁨𑁩. 𑀧𑀩𑁆𑀩𑀚𑁆𑀚𑀸𑀢𑀺 𑀏𑀢𑁆𑀣 𑀧𑀦 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀓𑀼𑀮𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀬𑁂 𑀧𑀸𑀴𑀺𑀬𑀁 ‘‘𑀦 𑀪𑀺𑀓𑁆𑀔𑀯𑁂 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁮𑁯) 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀼𑀕𑁆𑀕𑀮𑀸, 𑀢𑁂 𑀯𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀤𑁄𑀲𑀯𑀺𑀭𑀳𑀺𑀢𑁄 𑀧𑀼𑀕𑁆𑀕𑀮𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀫𑀳𑀸𑀯. 𑀅𑀝𑁆𑀞. 𑁮𑁮) 𑁋 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀧𑀩𑁆𑀩𑀸𑀚𑁂𑀦𑁆𑀢𑁄 𑀧𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 ‘‘𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀓𑀼𑀝𑁆𑀞𑀦𑁆𑀢𑀺 𑀭𑀢𑁆𑀢𑀓𑀼𑀝𑁆𑀞𑀁 𑀯𑀸 𑀳𑁄𑀢𑀼 𑀓𑀸𑀴𑀓𑀼𑀝𑁆𑀞𑀁 𑀯𑀸, 𑀬𑀁 𑀓𑀺𑀜𑁆𑀘𑀺 𑀓𑀺𑀝𑀺𑀪𑀤𑀤𑁆𑀤𑀉𑀓𑀘𑁆𑀙𑀼𑀆𑀤𑀺𑀧𑁆𑀧𑀪𑁂𑀤𑀫𑁆𑀧𑀺 𑀲𑀩𑁆𑀩𑀁 𑀓𑀼𑀝𑁆𑀞𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀘𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀺 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁂𑀳𑀺 𑀧𑀓𑀢𑀺𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀺. ‘‘𑀫𑀼𑀔𑁂 𑀧𑀦 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀻𑀲𑀼 𑀯𑀸 𑀲𑀘𑁂𑀧𑀺 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁, 𑀦𑀔𑀧𑀺𑀝𑁆𑀞𑀺𑀢𑁄 𑀘 𑀔𑀼𑀤𑁆𑀤𑀓𑀢𑀭𑀫𑁆𑀧𑀺 𑀦 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁂𑀦𑀧𑀺 𑀧𑀓𑀢𑀺𑀯𑀡𑁆𑀡𑁂 𑀚𑀸𑀢𑁂𑀬𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀕𑁄𑀥𑀸𑀧𑀺𑀝𑁆𑀞𑀺𑀲𑀤𑀺𑀲𑀘𑀼𑀡𑁆𑀡𑀑𑀓𑀺𑀭𑀡𑀲𑀭𑀻𑀭𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀕𑀡𑁆𑀟𑁄𑀢𑀺 𑀫𑁂𑀤𑀕𑀡𑁆𑀟𑁄 𑀯𑀸 𑀳𑁄𑀢𑀼 𑀅𑀜𑁆𑀜𑁄 𑀯𑀸, 𑀬𑁄 𑀓𑁄𑀘𑀺 𑀓𑁄𑀮𑀝𑁆𑀞𑀺𑀫𑀢𑁆𑀢𑀓𑁄𑀧𑀺 𑀘𑁂 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁄 𑀕𑀡𑁆𑀟𑁄 𑀳𑁄𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀧𑀦 𑀓𑁄𑀮𑀝𑁆𑀞𑀺𑀫𑀢𑁆𑀢𑁂 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁂 𑀯𑀝𑁆𑀝𑀢𑀺, 𑀫𑀼𑀔𑀸𑀤𑀺𑀓𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁂𑀧𑀺 𑀦 𑀯𑀝𑁆𑀝𑀢𑀺. 𑀢𑀺𑀓𑀺𑀘𑁆𑀙𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁂𑀦𑀧𑀺 𑀲𑀭𑀻𑀭𑀁 𑀲𑀘𑁆𑀙𑀯𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀉𑀡𑁆𑀡𑀺𑀕𑀡𑁆𑀟𑀸 𑀦𑀸𑀫 𑀳𑁄𑀦𑁆𑀢𑀺 𑀕𑁄𑀣𑀦𑀓𑀸 𑀯𑀺𑀬 𑀅𑀗𑁆𑀕𑀼𑀮𑀺𑀓𑀸 𑀯𑀺𑀬 𑀘 𑀢𑀢𑁆𑀣 𑀢𑀢𑁆𑀣 𑀮𑀫𑁆𑀩𑀦𑁆𑀢𑀺, 𑀏𑀢𑁂𑀧𑀺 𑀕𑀡𑁆𑀟𑀸𑀬𑁂𑀯, 𑀢𑁂𑀲𑀼 𑀲𑀢𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀳𑀭𑀓𑀸𑀮𑁂 𑀔𑀻𑀭𑀧𑀻𑀴𑀓𑀸 𑀬𑁄𑀩𑁆𑀩𑀦𑁆𑀦𑀓𑀸𑀮𑁂 𑀘 𑀫𑀼𑀔𑁂 𑀔𑀭𑀧𑀻𑀴𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀦𑀲𑁆𑀲𑀦𑁆𑀢𑀺, 𑀦 𑀢𑀸 𑀕𑀡𑁆𑀟𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀢𑀸𑀲𑀼 𑀲𑀢𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀸 𑀧𑀦 𑀲𑀭𑀻𑀭𑁂 𑀔𑀭𑀧𑀻𑀴𑀓𑀸 𑀦𑀸𑀫, 𑀅𑀧𑀭𑀸 𑀧𑀤𑀼𑀫𑀓𑀡𑁆𑀡𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀜𑁆𑀜𑀸 𑀲𑀸𑀲𑀧𑀩𑀻𑀚𑀓𑀸 𑀦𑀸𑀫 𑀲𑀸𑀲𑀧𑀫𑀢𑁆𑀢𑀸𑀬𑁂𑀯 𑀲𑀓𑀮𑀲𑀭𑀻𑀭𑀁 𑀨𑀭𑀦𑁆𑀢𑀺, 𑀲𑀩𑁆𑀩𑀸 𑀓𑀼𑀝𑁆𑀞𑀚𑀸𑀢𑀺𑀓𑀸𑀯, 𑀢𑀸𑀲𑀼 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀓𑀺𑀮𑀸𑀲𑁄𑀢𑀺 𑀦 𑀪𑀺𑀚𑁆𑀚𑀦𑀓𑀁 𑀦 𑀧𑀕𑁆𑀖𑀭𑀡𑀓𑀁 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀧𑀢𑁆𑀢𑀯𑀡𑁆𑀡𑀁 𑀓𑀼𑀝𑁆𑀞𑀁. 𑀬𑁂𑀦 𑀕𑀼𑀦𑁆𑀦𑀁 𑀯𑀺𑀬 𑀲𑀩𑀮𑀁 𑀲𑀭𑀻𑀭𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀼𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄𑀲𑁄𑀢𑀺 𑀲𑁄𑀲𑀩𑁆𑀬𑀸𑀥𑀺. 𑀢𑀲𑁆𑀫𑀺𑀁 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀧𑀫𑀸𑀭𑁄𑀢𑀺 𑀧𑀺𑀢𑁆𑀢𑀼𑀫𑁆𑀫𑀸𑀤𑁄 𑀯𑀸 𑀬𑀓𑁆𑀔𑀼𑀫𑁆𑀫𑀸𑀤𑁄 𑀯𑀸. 𑀢𑀢𑁆𑀣 𑀧𑀼𑀩𑁆𑀩𑀯𑁂𑀭𑀺𑀓𑁂𑀦 𑀅𑀫𑀦𑀼𑀲𑁆𑀲𑁂𑀦 𑀕𑀳𑀺𑀢𑁄 𑀤𑀼𑀢𑁆𑀢𑀺𑀓𑀺𑀘𑁆𑀙𑁄 𑀳𑁄𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀧𑀦 𑀅𑀧𑀫𑀸𑀭𑁂 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁨𑁪. ‘‘𑀦, 𑀪𑀺𑀓𑁆𑀔𑀯𑁂, 𑀭𑀸𑀚𑀪𑀝𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁦) 𑀯𑀘𑀦𑀢𑁄 𑀭𑀸𑀚𑀪𑀝𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀫𑀘𑁆𑀘𑁄 𑀯𑀸 𑀳𑁄𑀢𑀼 𑀫𑀳𑀸𑀫𑀢𑁆𑀢𑁄 𑀯𑀸 𑀲𑁂𑀯𑀓𑁄 𑀯𑀸 𑀓𑀺𑀜𑁆𑀘𑀺 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀸 𑀅𑀧𑁆𑀧𑀢𑁆𑀢𑁄 𑀯𑀸, 𑀬𑁄 𑀓𑁄𑀘𑀺 𑀭𑀜𑁆𑀜𑁄 𑀪𑀢𑁆𑀢𑀯𑁂𑀢𑀦𑀪𑀝𑁄, 𑀲𑀩𑁆𑀩𑁄 𑀭𑀸𑀚𑀪𑀝𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀲𑁆𑀲 𑀧𑀦 𑀧𑀼𑀢𑁆𑀢𑀦𑀢𑁆𑀢𑀪𑀸𑀢𑀼𑀓𑀸 𑀬𑁂 𑀭𑀸𑀚𑀢𑁄 𑀪𑀢𑁆𑀢𑀯𑁂𑀢𑀦𑀁 𑀦 𑀕𑀡𑁆𑀳𑀦𑁆𑀢𑀺, 𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀧𑀦 𑀭𑀸𑀚𑀢𑁄 𑀮𑀤𑁆𑀥𑀁 𑀦𑀺𑀩𑀤𑁆𑀥𑀪𑁄𑀕𑀁 𑀯𑀸 𑀫𑀸𑀲𑀲𑀁𑀯𑀘𑁆𑀙𑀭𑀧𑀭𑀺𑀩𑁆𑀩𑀬𑀁 𑀯𑀸 𑀭𑀜𑁆𑀜𑁄𑀬𑁂𑀯 𑀦𑀺𑀬𑁆𑀬𑀸𑀤𑁂𑀢𑀺, 𑀧𑀼𑀢𑁆𑀢𑀪𑀸𑀢𑀼𑀓𑁂 𑀯𑀸 𑀢𑀁 𑀞𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 ‘‘𑀦 𑀤𑀸𑀦𑀸𑀳𑀁 𑀤𑁂𑀯𑀲𑁆𑀲 𑀪𑀝𑁄’’𑀢𑀺 𑀆𑀧𑀼𑀘𑁆𑀙𑀢𑀺, 𑀬𑁂𑀦 𑀯𑀸 𑀬𑀁𑀓𑀸𑀭𑀡𑀸 𑀯𑁂𑀢𑀦𑀁 𑀕𑀳𑀺𑀢𑀁, 𑀢𑀁 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀬𑁄 𑀯𑀸 ‘‘𑀧𑀩𑁆𑀩𑀚𑀲𑁆𑀲𑀽’’𑀢𑀺 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀺, 𑀢𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑁧𑁨𑁫. 𑀘𑁄𑀭𑁄𑀧𑀺 𑀥𑀚𑀩𑀦𑁆𑀥𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀥𑀚𑀩𑀦𑁆𑀥𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁧) 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀥𑀚𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀯𑀺𑀘𑀭𑀢𑀻𑀢𑀺 𑀥𑀚𑀩𑀦𑁆𑀥𑁄, 𑀫𑀽𑀮𑀤𑁂𑀯𑀸𑀤𑀬𑁄 𑀯𑀺𑀬 𑀮𑁄𑀓𑁂 𑀧𑀸𑀓𑀝𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑁄 𑀕𑀸𑀫𑀖𑀸𑀢𑀁 𑀯𑀸 𑀧𑀦𑁆𑀣𑀤𑀼𑀳𑀦𑀁 𑀯𑀸 𑀦𑀕𑀭𑁂 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀧𑀜𑁆𑀜𑀸𑀬𑀢𑀺 𑀘 ‘‘𑀅𑀲𑀼𑀓𑁄 𑀦𑀸𑀫 𑀇𑀤𑀁 𑀇𑀤𑀁 𑀓𑀭𑁄𑀢𑀻’’𑀢𑀺, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀦 𑀭𑀸𑀚𑀧𑀼𑀢𑁆𑀢𑁄 𑀭𑀚𑁆𑀚𑀁 𑀧𑀢𑁆𑀣𑁂𑀦𑁆𑀢𑁄 𑀕𑀸𑀫𑀖𑀸𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀭𑀸𑀚𑀸𑀦𑁄 𑀳𑀺 𑀢𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂 𑀢𑀼𑀲𑁆𑀲𑀦𑁆𑀢𑀺, 𑀲𑀘𑁂 𑀧𑀦 𑀦 𑀢𑀼𑀲𑁆𑀲𑀦𑁆𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀼𑀩𑁆𑀩𑁂 𑀫𑀳𑀸𑀚𑀦𑁂 𑀧𑀸𑀓𑀝𑁄 𑀘𑁄𑀭𑁄 𑀧𑀘𑁆𑀙𑀸 𑀘𑁄𑀭𑀓𑀫𑁆𑀫𑀁 𑀧𑀳𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀜𑁆𑀘𑁂 𑀫𑀦𑀼𑀲𑁆𑀲𑀸 𑀏𑀯𑀁 𑀚𑀸𑀦𑀦𑁆𑀢𑀺, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁂 𑀧𑀦 𑀅𑀫𑁆𑀩𑀮𑀩𑀼𑀚𑀸𑀤𑀺𑀘𑁄𑀭𑀓𑀸 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀘𑁄𑀭𑀸 𑀏𑀯 𑀯𑀸 𑀅𑀤𑀺𑀲𑁆𑀲𑀫𑀸𑀦𑀸 𑀣𑁂𑀬𑁆𑀬𑀁 𑀓𑀭𑁄𑀦𑁆𑀢𑀺, 𑀧𑀘𑁆𑀙𑀸𑀧𑀺 ‘‘𑀇𑀫𑀺𑀦𑀸 𑀦𑀸𑀫 𑀇𑀤𑀁 𑀓𑀢’’𑀦𑁆𑀢𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀢𑁂𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑁧𑁨𑁬. 𑀓𑀸𑀭𑀪𑁂𑀤𑀓𑁄 𑀧𑀦 𑀘𑁄𑀭𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀓𑀸𑀭𑀪𑁂𑀤𑀓𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁨) 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀓𑀸𑀭𑁄 𑀯𑀼𑀘𑁆𑀘𑀢𑀺 𑀩𑀦𑁆𑀥𑀦𑀸𑀕𑀸𑀭𑀁. 𑀇𑀥 𑀧𑀦 𑀅𑀦𑁆𑀤𑀼𑀩𑀦𑁆𑀥𑀦𑀁 𑀯𑀸 𑀳𑁄𑀢𑀼 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑀁 𑀯𑀸 𑀕𑀸𑀫𑀩𑀦𑁆𑀥𑀦𑀁 𑀯𑀸 𑀦𑀺𑀕𑀫𑀩𑀦𑁆𑀥𑀦𑀁 𑀯𑀸 𑀦𑀕𑀭𑀩𑀦𑁆𑀥𑀦𑀁 𑀯𑀸 𑀧𑀼𑀭𑀺𑀲𑀕𑀼𑀢𑁆𑀢𑀺 𑀯𑀸 𑀚𑀦𑀧𑀤𑀩𑀦𑁆𑀥𑀦𑀁 𑀯𑀸 𑀤𑀻𑀧𑀩𑀦𑁆𑀥𑀦𑀁 𑀯𑀸, 𑀬𑁄 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀫𑀼𑀜𑁆𑀘𑀺𑀢𑁆𑀯𑀸 𑀯𑀸 𑀯𑀺𑀯𑀭𑀺𑀢𑁆𑀯𑀸 𑀯𑀸 𑀅𑀧𑀲𑁆𑀲𑀫𑀸𑀦𑀸𑀦𑀁 𑀯𑀸 𑀧𑀮𑀸𑀬𑀢𑀺, 𑀲𑁄 𑀓𑀸𑀭𑀪𑁂𑀤𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀈𑀤𑀺𑀲𑁄 𑀓𑀸𑀭𑀪𑁂𑀤𑀓𑁄 𑀘𑁄𑀭𑁄 𑀤𑀻𑀧𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀻𑀧𑀦𑁆𑀢𑀭𑀁 𑀕𑀢𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀦 𑀦 𑀘𑁄𑀭𑁄, 𑀓𑁂𑀯𑀮𑀁 𑀳𑀢𑁆𑀣𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄 ‘‘𑀏𑀯𑀁 𑀦𑁄 𑀅𑀧𑀮𑀸𑀬𑀦𑁆𑀢𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀭𑀸𑀚𑀬𑀼𑀢𑁆𑀢𑀸𑀤𑀻𑀳𑀺 𑀩𑀤𑁆𑀥𑁄, 𑀲𑁄 𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀢𑁄𑀧𑀺 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀦 𑀕𑀸𑀫𑀦𑀺𑀕𑀫𑀧𑀝𑁆𑀝𑀦𑀸𑀤𑀻𑀦𑀺 𑀓𑁂𑀡𑀺𑀬𑀸 𑀕𑀳𑁂𑀢𑁆𑀯𑀸 𑀢𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀺𑀢𑁄 𑀳𑁄𑀢𑀺, 𑀲𑁄𑀧𑀺 𑀧𑀮𑀸𑀬𑀺𑀢𑁆𑀯𑀸 𑀆𑀕𑀢𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄𑀧𑀺 𑀓𑀲𑀺𑀓𑀫𑁆𑀫𑀸𑀤𑀻𑀳𑀺 𑀥𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀚𑀻𑀯𑀦𑁆𑀢𑁄 ‘‘𑀦𑀺𑀥𑀸𑀦𑀁 𑀇𑀫𑀺𑀦𑀸 𑀮𑀤𑁆𑀥’’𑀦𑁆𑀢𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀓𑁂𑀦𑀘𑀺 𑀩𑀦𑁆𑀥𑀸𑀧𑀺𑀢𑁄 𑀳𑁄𑀢𑀺, 𑀢𑀁 𑀢𑀢𑁆𑀣𑁂𑀯 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀮𑀸𑀬𑀺𑀢𑁆𑀯𑀸 𑀕𑀢𑀁 𑀧𑀦 𑀕𑀢𑀝𑁆𑀞𑀸𑀦𑁂 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑁧𑁨𑁭. ‘‘𑀦, 𑀪𑀺𑀓𑁆𑀔𑀯𑁂, 𑀮𑀺𑀔𑀺𑀢𑀓𑁄 𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁩) 𑀯𑀘𑀦𑀢𑁄 𑀧𑀦 𑀮𑀺𑀔𑀺𑀢𑀓𑁄 𑀘𑁄𑀭𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀮𑀺𑀔𑀺𑀢𑀓𑁄 𑀦𑀸𑀫 𑀬𑁄 𑀓𑁄𑀘𑀺 𑀘𑁄𑀭𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀕𑀭𑀼𑀁 𑀭𑀸𑀚𑀸𑀧𑀭𑀸𑀥𑀁 𑀓𑀢𑁆𑀯𑀸 𑀧𑀮𑀸𑀢𑁄, 𑀭𑀸𑀚𑀸 𑀘 𑀦𑀁 𑀧𑀡𑁆𑀡𑁂 𑀯𑀸 𑀧𑁄𑀢𑁆𑀣𑀓𑁂 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀬𑀢𑁆𑀣 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀳𑁂𑀢𑁆𑀯𑀸 𑀫𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀸 ‘‘𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀅𑀲𑁆𑀲 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀸 ‘‘𑀏𑀢𑁆𑀢𑀓𑀁 𑀦𑀸𑀫 𑀤𑀡𑁆𑀟𑀁 𑀆𑀳𑀭𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀸 𑀮𑀺𑀔𑀸𑀧𑁂𑀢𑀺, 𑀅𑀬𑀁 𑀮𑀺𑀔𑀺𑀢𑀓𑁄 𑀦𑀸𑀫, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁨𑁮. 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁪) 𑀯𑀘𑀦𑀢𑁄. 𑀏𑀢𑁆𑀣 𑀧𑀦 𑀬𑁄 𑀯𑀘𑀦𑀧𑁂𑀲𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀳𑀜𑁆𑀜𑀢𑀺, 𑀦 𑀲𑁄 𑀓𑀢𑀤𑀡𑁆𑀟𑀓𑀫𑁆𑀫𑁄. 𑀬𑁄 𑀧𑀦 𑀓𑁂𑀡𑀺𑀬𑀸 𑀯𑀸 𑀅𑀜𑁆𑀜𑀣𑀸 𑀯𑀸 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀬𑀫𑁂𑀯 𑀢𑁂 𑀤𑀡𑁆𑀟𑁄 𑀳𑁄𑀢𑀽’’𑀢𑀺 𑀓𑀲𑀸𑀳𑀺 𑀳𑀜𑁆𑀜𑀢𑀺, 𑀅𑀬𑀫𑁂𑀯 𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄. 𑀲𑁄 𑀘 𑀓𑀲𑀸𑀳𑀺 𑀯𑀸 𑀳𑀢𑁄 𑀳𑁄𑀢𑀼 𑀅𑀟𑁆𑀠𑀤𑀡𑁆𑀟𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀬𑀸𑀯 𑀅𑀮𑁆𑀮𑀯𑀡𑁄 𑀳𑁄𑀢𑀺, 𑀦 𑀢𑀸𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀯𑀡𑁂 𑀧𑀦 𑀧𑀸𑀓𑀢𑀺𑀓𑁂 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀚𑀸𑀡𑀽𑀳𑀺 𑀯𑀸 𑀓𑀧𑁆𑀧𑀭𑁂𑀳𑀺 𑀯𑀸 𑀦𑀸𑀴𑀺𑀓𑁂𑀭𑀧𑀸𑀲𑀸𑀡𑀸𑀤𑀻𑀳𑀺 𑀯𑀸 𑀖𑀸𑀢𑁂𑀢𑁆𑀯𑀸 𑀫𑀼𑀢𑁆𑀢𑁄 𑀳𑁄𑀢𑀺, 𑀲𑀭𑀻𑀭𑁂 𑀘𑀲𑁆𑀲 𑀕𑀡𑁆𑀞𑀺𑀬𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀏𑀯 𑀕𑀡𑁆𑀞𑀻𑀲𑀼 𑀲𑀦𑁆𑀦𑀺𑀲𑀺𑀦𑁆𑀦𑀸𑀲𑀼 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁨𑁯. 𑀮𑀓𑁆𑀔𑀡𑀸𑀳𑀢𑁄 𑀧𑀦 𑀓𑀢𑀤𑀡𑁆𑀟𑀓𑀫𑁆𑀫𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀮𑀓𑁆𑀔𑀡𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁫) 𑀯𑀘𑀦𑀢𑁄. 𑀏𑀢𑁆𑀣𑀧𑀺 𑀓𑀢𑀤𑀡𑁆𑀟𑀓𑀫𑁆𑀫𑀪𑀸𑀯𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀦𑀮𑀸𑀝𑁂 𑀯𑀸 𑀊𑀭𑀼𑀆𑀤𑀻𑀲𑀼 𑀯𑀸 𑀢𑀢𑁆𑀢𑁂𑀦 𑀮𑁄𑀳𑁂𑀦 𑀮𑀓𑁆𑀔𑀡𑀁 𑀆𑀳𑀢𑀁 𑀳𑁄𑀢𑀺, 𑀲𑁄 𑀲𑀘𑁂 𑀪𑀼𑀚𑀺𑀲𑁆𑀲𑁄, 𑀬𑀸𑀯 𑀅𑀮𑁆𑀮𑀯𑀡𑁄 𑀳𑁄𑀢𑀺, 𑀢𑀸𑀯 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂𑀧𑀺𑀲𑁆𑀲 𑀯𑀡𑀸 𑀭𑀼𑀴𑁆𑀳𑀸 𑀳𑁄𑀦𑁆𑀢𑀺 𑀙𑀯𑀺𑀬𑀸 𑀲𑀫𑀧𑀭𑀺𑀘𑁆𑀙𑁂𑀤𑀸, 𑀮𑀓𑁆𑀔𑀡𑀁 𑀦 𑀧𑀜𑁆𑀜𑀸𑀬𑀢𑀺, 𑀢𑀺𑀫𑀡𑁆𑀟𑀮𑀁 𑀦𑀺𑀯𑀢𑁆𑀣𑀲𑁆𑀲 𑀉𑀢𑁆𑀢𑀭𑀸𑀲𑀗𑁆𑀕𑁂 𑀓𑀢𑁂 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀘𑁂 𑀳𑁄𑀢𑀺, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂 𑀘𑁂, 𑀦 𑀯𑀝𑁆𑀝𑀢𑀺.

𑁧𑁩𑁦. ‘‘𑀦, 𑀪𑀺𑀓𑁆𑀔𑀯𑁂, 𑀇𑀡𑀸𑀬𑀺𑀓𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁬) 𑀯𑀘𑀦𑀢𑁄 𑀇𑀡𑀸𑀬𑀺𑀓𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀇𑀡𑀸𑀬𑀺𑀓𑁄 𑀦𑀸𑀫 𑀬𑀲𑁆𑀲 𑀧𑀺𑀢𑀺𑀧𑀺𑀢𑀸𑀫𑀳𑁂𑀳𑀺 𑀯𑀸 𑀇𑀡𑀁 𑀕𑀳𑀺𑀢𑀁 𑀳𑁄𑀢𑀺, 𑀲𑀬𑀁 𑀯𑀸 𑀇𑀡𑀁 𑀕𑀳𑀺𑀢𑀁 𑀳𑁄𑀢𑀺, 𑀬𑀁 𑀯𑀸 𑀆𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀳𑀺 𑀓𑀺𑀜𑁆𑀘𑀺 𑀕𑀳𑀺𑀢𑀁 𑀳𑁄𑀢𑀺, 𑀲𑁄 𑀢𑀁 𑀇𑀡𑀁 𑀧𑀭𑁂𑀲𑀁 𑀥𑀸𑀭𑁂𑀢𑀻𑀢𑀺 𑀇𑀡𑀸𑀬𑀺𑀓𑁄. 𑀬𑀁 𑀧𑀦 𑀅𑀜𑁆𑀜𑁂 𑀜𑀸𑀢𑀓𑀸 𑀆𑀞𑀧𑁂𑀢𑁆𑀯𑀸 𑀓𑀺𑀜𑁆𑀘𑀺 𑀕𑀡𑁆𑀳𑀦𑁆𑀢𑀺, 𑀲𑁄 𑀦 𑀇𑀡𑀸𑀬𑀺𑀓𑁄. 𑀦 𑀳𑀺 𑀢𑁂 𑀢𑀁 𑀆𑀞𑀧𑁂𑀢𑀼𑀁 𑀇𑀲𑁆𑀲𑀭𑀸, 𑀢𑀲𑁆𑀫𑀸 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺, 𑀇𑀢𑀭𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑀲𑁆𑀲 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 ‘‘𑀫𑀬𑀁 𑀤𑀲𑁆𑀲𑀸𑀫, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺 𑀇𑀡𑀁 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀢𑀲𑁆𑀲 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀦𑀁, 𑀅𑀳𑀁 𑀇𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀲𑀼 𑀅𑀲𑀢𑀺 𑀪𑀺𑀓𑁆𑀔𑀼𑀦𑀸 𑀢𑀣𑀸𑀭𑀽𑀧𑀲𑁆𑀲 𑀉𑀧𑀝𑁆𑀞𑀸𑀓𑀲𑁆𑀲𑀧𑀺 𑀆𑀭𑁄𑀘𑁂𑀢𑀩𑁆𑀩𑀁 ‘‘𑀲𑀳𑁂𑀢𑀼𑀓𑁄 𑀲𑀢𑁆𑀢𑁄 𑀇𑀡𑀧𑀮𑀺𑀩𑁄𑀥𑁂𑀦 𑀦 𑀧𑀩𑁆𑀩𑀚𑀢𑀻’’𑀢𑀺. 𑀲𑀘𑁂 𑀲𑁄 𑀧𑀝𑀺𑀧𑀚𑁆𑀚𑀢𑀺, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂𑀧𑀺 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀅𑀢𑁆𑀣𑀺, ‘‘𑀏𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀦𑁂𑀯 𑀜𑀸𑀢𑀓𑀸𑀤𑀬𑁄 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀦 𑀅𑀢𑁆𑀢𑀦𑁄 𑀥𑀦𑀁 𑀅𑀢𑁆𑀣𑀺, ‘‘𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀩𑁆𑀩𑀸𑀚𑁂𑀢𑀺, 𑀤𑀼𑀓𑁆𑀓𑀝𑀁. 𑀧𑀮𑀸𑀢𑁄𑀧𑀺 𑀆𑀦𑁂𑀢𑁆𑀯𑀸 𑀤𑀸𑀢𑀩𑁆𑀩𑁄. 𑀦𑁄 𑀘𑁂 𑀤𑁂𑀢𑀺, 𑀲𑀩𑁆𑀩𑀁 𑀇𑀡𑀁 𑀕𑀻𑀯𑀸 𑀳𑁄𑀢𑀺. 𑀅𑀚𑀸𑀦𑀺𑀢𑁆𑀯𑀸 𑀧𑀩𑁆𑀩𑀸𑀚𑀬𑀢𑁄 𑀅𑀦𑀸𑀧𑀢𑁆𑀢𑀺, 𑀧𑀲𑁆𑀲𑀦𑁆𑀢𑁂𑀦 𑀧𑀦 𑀆𑀦𑁂𑀢𑁆𑀯𑀸 𑀇𑀡𑀲𑀸𑀫𑀺𑀓𑀸𑀦𑀁 𑀤𑀲𑁆𑀲𑁂𑀢𑀩𑁆𑀩𑁄, 𑀅𑀧𑀲𑁆𑀲𑀦𑁆𑀢𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺.

𑀲𑀘𑁂 𑀇𑀡𑀸𑀬𑀺𑀓𑁄 𑀅𑀜𑁆𑀜𑀁 𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄𑀧𑀺 ‘‘𑀦𑀸𑀳𑀁 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀥𑀸𑀭𑁂𑀫𑀻’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀚𑀢𑀺, 𑀇𑀡𑀲𑀸𑀫𑀺𑀓𑁄 𑀘 𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀢𑀢𑁆𑀣 𑀕𑀘𑁆𑀙𑀢𑀺, 𑀤𑀳𑀭𑁄 𑀢𑀁 𑀤𑀺𑀲𑁆𑀯𑀸 𑀧𑀮𑀸𑀬𑀢𑀺, 𑀲𑁄 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀓𑁂𑀦 𑀧𑀩𑁆𑀩𑀸𑀚𑀺𑀢𑁄, 𑀫𑀫 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀕𑀳𑁂𑀢𑁆𑀯𑀸 𑀧𑀮𑀸𑀢𑁄’’𑀢𑀺 𑀯𑀤𑀢𑀺, 𑀣𑁂𑀭𑁂𑀦 𑀯𑀢𑁆𑀢𑀩𑁆𑀩𑀁 ‘‘𑀫𑀬𑀸, 𑀉𑀧𑀸𑀲𑀓, ‘𑀅𑀡𑀡𑁄 𑀅𑀳’𑀦𑁆𑀢𑀺 𑀯𑀤𑀦𑁆𑀢𑁄 𑀧𑀩𑁆𑀩𑀸𑀚𑀺𑀢𑁄, 𑀓𑀺𑀁 𑀤𑀸𑀦𑀺 𑀓𑀭𑁄𑀫𑀺, 𑀧𑀲𑁆𑀲 𑀫𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺. 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺. 𑀧𑀮𑀸𑀢𑁂 𑀧𑀦 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀦𑀁 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸𑀯 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀫 𑀇𑀡𑀸𑀬𑀺𑀓𑁄’’𑀢𑀺 𑀯𑀤𑀢𑀺, ‘‘𑀢𑀯 𑀇𑀡𑀸𑀬𑀺𑀓𑀁 𑀢𑁆𑀯𑀫𑁂𑀯 𑀚𑀸𑀦𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁆𑀧𑀺 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂𑀧𑀺 𑀲𑁄 ‘‘𑀧𑀩𑁆𑀩𑀚𑀺𑀢𑁄 𑀅𑀬𑀁 𑀤𑀸𑀦𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀤𑀢𑀺, 𑀣𑁂𑀭𑁂𑀦 ‘‘𑀢𑁆𑀯𑀁𑀬𑁂𑀯 𑀚𑀸𑀦𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀏𑀯𑀫𑁆𑀧𑀺𑀲𑁆𑀲 𑀧𑀮𑀸𑀢𑁂 𑀕𑀻𑀯𑀸 𑀦 𑀳𑁄𑀢𑀺. 𑀲𑀘𑁂 𑀧𑀦 𑀣𑁂𑀭𑁄 ‘‘𑀓𑀼𑀳𑀺𑀁 𑀤𑀸𑀦𑀺 𑀅𑀬𑀁 𑀕𑀫𑀺𑀲𑁆𑀲𑀢𑀺, 𑀇𑀥𑁂𑀯 𑀅𑀘𑁆𑀙𑀢𑀽’’𑀢𑀺 𑀯𑀤𑀢𑀺, 𑀲𑁄 𑀘𑁂 𑀧𑀮𑀸𑀬𑀢𑀺, 𑀕𑀻𑀯𑀸 𑀳𑁄𑀢𑀺. 𑀲𑀘𑁂 𑀲𑁄 𑀲𑀳𑁂𑀢𑀼𑀓𑁄 𑀲𑀢𑁆𑀢𑁄 𑀳𑁄𑀢𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀣𑁂𑀭𑁂𑀦 ‘‘𑀈𑀤𑀺𑀲𑁄 𑀅𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀡𑀲𑀸𑀫𑀺𑀓𑁄 𑀘𑁂 ‘‘𑀲𑀸𑀥𑀽’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, ‘‘𑀉𑀧𑀟𑁆𑀠𑀼𑀧𑀟𑁆𑀠𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀤𑀸𑀢𑀩𑁆𑀩𑀁. 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀢𑀺𑀆𑀭𑀸𑀥𑀓𑁄 𑀳𑁄𑀢𑀺, ‘‘𑀲𑀩𑁆𑀩𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀤𑀸𑀢𑀩𑁆𑀩𑀫𑁂𑀯. 𑀲𑀘𑁂 𑀧𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀲𑀼 𑀓𑀼𑀲𑀮𑁄 𑀳𑁄𑀢𑀺 𑀩𑀳𑀽𑀧𑀓𑀸𑀭𑁄 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀇𑀡𑀁 𑀤𑀸𑀢𑀩𑁆𑀩𑀫𑁂𑀯.

𑁧𑁩𑁧. 𑀤𑀸𑀲𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄 ‘‘𑀦, 𑀪𑀺𑀓𑁆𑀔𑀯𑁂, 𑀤𑀸𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁯𑁭) 𑀯𑀘𑀦𑀢𑁄. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀤𑀸𑀲𑀸 𑀅𑀦𑁆𑀢𑁄𑀚𑀸𑀢𑁄 𑀥𑀦𑀓𑁆𑀓𑀻𑀢𑁄 𑀓𑀭𑀫𑀭𑀸𑀦𑀻𑀢𑁄 𑀲𑀸𑀫𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄𑀢𑀺. 𑀢𑀢𑁆𑀣 𑀅𑀦𑁆𑀢𑁄𑀚𑀸𑀢𑁄 𑀦𑀸𑀫 𑀚𑀸𑀢𑀺𑀬𑀸 𑀤𑀸𑀲𑁄 𑀖𑀭𑀤𑀸𑀲𑀺𑀬𑀸 𑀧𑀼𑀢𑁆𑀢𑁄. 𑀥𑀦𑀓𑁆𑀓𑀻𑀢𑁄 𑀦𑀸𑀫 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀸 𑀧𑀼𑀢𑁆𑀢𑁄 𑀯𑀸 𑀲𑀸𑀫𑀺𑀓𑀸𑀦𑀁 𑀲𑀦𑁆𑀢𑀺𑀓𑀸 𑀤𑀸𑀲𑁄 𑀯𑀸 𑀥𑀦𑀁 𑀤𑀢𑁆𑀯𑀸 𑀤𑀸𑀲𑀘𑀸𑀭𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀓𑀻𑀢𑁄. 𑀏𑀢𑁂 𑀤𑁆𑀯𑁂𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀘𑀸𑀭𑀺𑀢𑁆𑀢𑀯𑀲𑁂𑀦 𑀅𑀤𑀸𑀲𑁂 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀓𑀭𑀫𑀭𑀸𑀦𑀻𑀢𑁄 𑀦𑀸𑀫 𑀢𑀺𑀭𑁄𑀭𑀝𑁆𑀞𑀁 𑀯𑀺𑀮𑁄𑀧𑀁 𑀯𑀸 𑀓𑀢𑁆𑀯𑀸 𑀉𑀧𑀮𑀸𑀧𑁂𑀢𑁆𑀯𑀸 𑀯𑀸 𑀢𑀺𑀭𑁄𑀭𑀝𑁆𑀞𑀢𑁄 𑀪𑀼𑀚𑀺𑀲𑁆𑀲𑀫𑀸𑀦𑀼𑀲𑀓𑀸𑀦𑀺 𑀆𑀳𑀭𑀦𑁆𑀢𑀺, 𑀅𑀦𑁆𑀢𑁄𑀭𑀝𑁆𑀞𑁂𑀬𑁂𑀯 𑀯𑀸 𑀓𑀢𑀸𑀧𑀭𑀸𑀥𑀁 𑀓𑀺𑀜𑁆𑀘𑀺 𑀕𑀸𑀫𑀁 𑀭𑀸𑀚𑀸 ‘‘𑀯𑀺𑀮𑀼𑀫𑁆𑀧𑀣𑀸’’𑀢𑀺 𑀘 𑀆𑀡𑀸𑀧𑁂𑀢𑀺, 𑀢𑀢𑁄 𑀫𑀸𑀦𑀼𑀲𑀓𑀸𑀦𑀺𑀧𑀺 𑀆𑀳𑀭𑀦𑁆𑀢𑀺, 𑀢𑀢𑁆𑀣 𑀲𑀩𑁆𑀩𑁂 𑀧𑀼𑀭𑀺𑀲𑀸 𑀤𑀸𑀲𑀸, 𑀇𑀢𑁆𑀣𑀺𑀬𑁄 𑀤𑀸𑀲𑀺𑀬𑁄. 𑀏𑀯𑀭𑀽𑀧𑁄 𑀓𑀭𑀫𑀭𑀸𑀦𑀻𑀢𑁄 𑀤𑀸𑀲𑁄 𑀬𑁂𑀳𑀺 𑀆𑀦𑀻𑀢𑁄, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀯𑀸 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀯𑀸 𑀧𑀼𑀭𑀺𑀲𑁂𑀳𑀺 𑀭𑀓𑁆𑀔𑀺𑀬𑀫𑀸𑀦𑁄 𑀯𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀧𑀮𑀸𑀬𑀺𑀢𑁆𑀯𑀸 𑀧𑀦 𑀕𑀢𑁄 𑀕𑀢𑀝𑁆𑀞𑀸𑀦𑁂 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀭𑀜𑁆𑀜𑀸 𑀢𑀼𑀝𑁆𑀞𑁂𑀦 ‘‘𑀓𑀭𑀫𑀭𑀸𑀦𑀻𑀢𑀓𑁂 𑀫𑀼𑀜𑁆𑀘𑀣𑀸’’𑀢𑀺 𑀯𑀢𑁆𑀯𑀸 𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑁂𑀦 𑀯𑀸 𑀦𑀬𑁂𑀦 𑀩𑀦𑁆𑀥𑀦𑀫𑁄𑀓𑁆𑀔𑁂 𑀓𑀢𑁂 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀯.

𑀲𑀸𑀫𑀁 𑀤𑀸𑀲𑀩𑁆𑀬𑀁 𑀉𑀧𑀕𑀢𑁄 𑀦𑀸𑀫 𑀚𑀻𑀯𑀺𑀢𑀳𑁂𑀢𑀼 𑀯𑀸 𑀆𑀭𑀓𑁆𑀔𑀳𑁂𑀢𑀼 𑀯𑀸 ‘‘𑀅𑀳𑀁 𑀢𑁂 𑀤𑀸𑀲𑁄’’𑀢𑀺 𑀲𑀬𑀫𑁂𑀯 𑀤𑀸𑀲𑀪𑀸𑀯𑀁 𑀉𑀧𑀕𑀢𑁄 𑀭𑀸𑀚𑀽𑀦𑀁 𑀳𑀢𑁆𑀣𑀺𑀅𑀲𑁆𑀲𑀕𑁄𑀫𑀳𑀺𑀁𑀲𑀕𑁄𑀧𑀓𑀸𑀤𑀬𑁄 𑀯𑀺𑀬. 𑀢𑀸𑀤𑀺𑀲𑁄 𑀤𑀸𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀭𑀜𑁆𑀜𑁄 𑀯𑀡𑁆𑀡𑀤𑀸𑀲𑀻𑀦𑀁 𑀧𑀼𑀢𑁆𑀢𑀸 𑀳𑁄𑀦𑁆𑀢𑀺 𑀅𑀫𑀘𑁆𑀘𑀧𑀼𑀢𑁆𑀢𑀲𑀤𑀺𑀲𑀸, 𑀢𑁂𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀪𑀼𑀚𑀺𑀲𑁆𑀲𑀺𑀢𑁆𑀣𑀺𑀬𑁄 𑀅𑀲𑀜𑁆𑀜𑀢𑀸 𑀯𑀡𑁆𑀡𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑀺, 𑀢𑀸𑀲𑀁 𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑀬𑀫𑁂𑀯 𑀧𑀡𑁆𑀡𑀁 𑀆𑀭𑁄𑀧𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀪𑀝𑀺𑀧𑀼𑀢𑁆𑀢𑀕𑀡𑀸𑀤𑀻𑀦𑀁 𑀤𑀸𑀲𑀸𑀧𑀺 𑀢𑁂𑀳𑀺 𑀅𑀤𑀺𑀦𑁆𑀦𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀯𑀺𑀳𑀸𑀭𑁂𑀲𑀼 𑀭𑀸𑀚𑀽𑀳𑀺 𑀆𑀭𑀸𑀫𑀺𑀓𑀤𑀸𑀲𑀸 𑀦𑀸𑀫 𑀤𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀪𑀼𑀚𑀺𑀲𑁆𑀲𑁂 𑀓𑀢𑁆𑀯𑀸 𑀧𑀦 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀅𑀦𑁆𑀢𑁄𑀚𑀸𑀢𑀥𑀦𑀓𑁆𑀓𑀻𑀢𑀓𑁂 𑀆𑀦𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 ‘𑀆𑀭𑀸𑀫𑀺𑀓𑁂 𑀤𑁂𑀫𑀸’𑀢𑀺 𑀤𑁂𑀦𑁆𑀢𑀺, 𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀢𑁆𑀢𑀓𑀲𑀤𑀺𑀲𑀸𑀯 𑀳𑁄𑀦𑁆𑀢𑀺, 𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀆𑀭𑀸𑀫𑀺𑀓𑀁 𑀤𑁂𑀫𑀸𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑁂𑀦𑁆𑀢𑀺, 𑀬𑁂𑀦 𑀓𑁂𑀦𑀘𑀺 𑀯𑁄𑀳𑀸𑀭𑁂𑀦 𑀤𑀺𑀦𑁆𑀦𑁄 𑀳𑁄𑀢𑀼, 𑀦𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 ‘‘𑀲𑀗𑁆𑀖𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑁂 𑀓𑀧𑁆𑀧𑀺𑀬𑀓𑀸𑀭𑀓𑀸 𑀳𑁄𑀦𑁆𑀢𑀺, 𑀏𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀤𑀸𑀲𑀸, 𑀫𑀸𑀢𑀸 𑀏𑀯 𑀯𑀸 𑀤𑀸𑀲𑀻, 𑀧𑀺𑀢𑀸 𑀅𑀤𑀸𑀲𑁄, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀲𑁆𑀲 𑀧𑀦 𑀫𑀸𑀢𑀸 𑀅𑀤𑀸𑀲𑀻, 𑀧𑀺𑀢𑀸 𑀤𑀸𑀲𑁄, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀜𑀸𑀢𑀓𑀸 𑀯𑀸 𑀉𑀧𑀝𑁆𑀞𑀸𑀓𑀸 𑀯𑀸 𑀤𑀸𑀲𑀁 𑀤𑁂𑀦𑁆𑀢𑀺 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀣, 𑀢𑀼𑀫𑁆𑀳𑀸𑀓𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀢𑀻’’𑀢𑀺, 𑀅𑀢𑁆𑀢𑀦𑁄 𑀯𑀸𑀲𑁆𑀲 𑀤𑀸𑀲𑁄 𑀅𑀢𑁆𑀣𑀺, 𑀪𑀼𑀚𑀺𑀲𑁆𑀲𑁄 𑀓𑀢𑁄𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀸𑀫𑀺𑀓𑀸 𑀤𑀸𑀲𑀁 𑀤𑁂𑀦𑁆𑀢𑀺 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀣, 𑀲𑀘𑁂 𑀅𑀪𑀺𑀭𑀫𑀺𑀲𑁆𑀲𑀢𑀺, 𑀅𑀤𑀸𑀲𑁄. 𑀯𑀺𑀩𑁆𑀪𑀫𑀺𑀲𑁆𑀲𑀢𑀺 𑀘𑁂, 𑀅𑀫𑁆𑀳𑀸𑀓𑀁 𑀤𑀸𑀲𑁄𑀯 𑀪𑀯𑀺𑀲𑁆𑀲𑀢𑀻’’𑀢𑀺, 𑀅𑀬𑀁 𑀢𑀸𑀯𑀓𑀸𑀮𑀺𑀓𑁄 𑀦𑀸𑀫, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀸𑀫𑀺𑀓𑀤𑀸𑀲𑁄 𑀳𑁄𑀢𑀺, 𑀲𑁄𑀧𑀺 𑀪𑀼𑀚𑀺𑀲𑁆𑀲𑁄 𑀓𑀢𑁄𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀚𑀸𑀦𑀦𑁆𑀢𑁄 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀸 𑀧𑀘𑁆𑀙𑀸 𑀚𑀸𑀦𑀦𑁆𑀢𑀺, 𑀪𑀼𑀚𑀺𑀲𑁆𑀲𑀁 𑀓𑀸𑀢𑀼𑀫𑁂𑀯 𑀯𑀝𑁆𑀝𑀢𑀺.

𑀇𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼𑀁 𑀯𑀤𑀦𑁆𑀢𑀺 𑁋 𑀏𑀓𑀸 𑀓𑀺𑀭 𑀓𑀼𑀮𑀤𑀸𑀲𑀻 𑀏𑀓𑁂𑀦 𑀲𑀤𑁆𑀥𑀺𑀁 𑀅𑀦𑀼𑀭𑀸𑀥𑀧𑀼𑀭𑀸 𑀧𑀮𑀸𑀬𑀺𑀢𑁆𑀯𑀸 𑀭𑁄𑀳𑀡𑁂 𑀯𑀲𑀫𑀸𑀦𑀸 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺, 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀫𑀸𑀢𑀭𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀉𑀧𑀸𑀲𑀺𑀓𑁂 𑀢𑀼𑀫𑁆𑀳𑀸𑀓𑀁 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀦𑀢𑁆𑀣𑀺, 𑀦 𑀓𑀺𑀜𑁆𑀘𑀺 𑀜𑀸𑀢𑀓𑀁 𑀧𑀲𑁆𑀲𑀸𑀫𑀻’’𑀢𑀺. 𑀢𑀸𑀢, 𑀅𑀳𑀁 𑀅𑀦𑀼𑀭𑀸𑀥𑀧𑀼𑀭𑁂 𑀓𑀼𑀮𑀤𑀸𑀲𑀻, 𑀢𑀯 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀧𑀮𑀸𑀬𑀺𑀢𑁆𑀯𑀸 𑀇𑀥 𑀯𑀲𑀸𑀫𑀻𑀢𑀺. 𑀲𑀻𑀮𑀯𑀸 𑀪𑀺𑀓𑁆𑀔𑀼 ‘‘𑀅𑀲𑀼𑀤𑁆𑀥𑀸 𑀓𑀺𑀭 𑀫𑁂 𑀧𑀩𑁆𑀩𑀚𑁆𑀚𑀸’’𑀢𑀺 𑀲𑀁𑀯𑁂𑀕𑀁 𑀮𑀪𑀺𑀢𑁆𑀯𑀸 𑀫𑀸𑀢𑀭𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀦𑀸𑀫𑀕𑁄𑀢𑁆𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀁 𑀆𑀕𑀫𑁆𑀫 𑀢𑀲𑁆𑀲 𑀓𑀼𑀮𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺, ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂𑀧𑀺 𑀦𑀸𑀢𑀺𑀓𑁆𑀓𑀫𑀺. 𑀢𑁂 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀢𑀼𑀫𑁆𑀳𑀸𑀓𑀁 𑀇𑀢𑁆𑀣𑀦𑁆𑀦𑀸𑀫𑀸 𑀤𑀸𑀲𑀻 𑀧𑀮𑀸𑀢𑀸 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’. 𑀅𑀳𑀁 𑀢𑀲𑁆𑀲𑀸 𑀧𑀼𑀢𑁆𑀢𑁄, 𑀲𑀘𑁂 𑀫𑀁 𑀢𑀼𑀫𑁆𑀳𑁂 𑀅𑀦𑀼𑀚𑀸𑀦𑀸𑀣, 𑀧𑀩𑁆𑀩𑀚𑁆𑀚𑀁 𑀮𑀪𑀸𑀫𑀺, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀲𑀸𑀫𑀺𑀓𑀸𑀢𑀺. 𑀢𑁂 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀲𑀼𑀤𑁆𑀥𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀢𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑁂 𑀯𑀲𑀸𑀧𑁂𑀲𑀼𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑀸. 𑀣𑁂𑀭𑁄 𑀢𑀁 𑀓𑀼𑀮𑀁 𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑁄𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑁧𑁩𑁨. ‘‘𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀦 𑀧𑀸𑀤𑀘𑁆𑀙𑀺𑀦𑁆𑀦𑁄, 𑀦 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄, 𑀦 𑀓𑀡𑁆𑀡𑀘𑁆𑀙𑀺𑀦𑁆𑀦𑁄, 𑀦 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄, 𑀦 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄, 𑀦 𑀅𑀴𑀘𑁆𑀙𑀺𑀦𑁆𑀦𑁄, 𑀦 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄, 𑀦 𑀨𑀡𑀳𑀢𑁆𑀣𑀓𑁄, 𑀦 𑀔𑀼𑀚𑁆𑀚𑁄, 𑀦 𑀯𑀸𑀫𑀦𑁄 𑀦 𑀕𑀮𑀕𑀡𑁆𑀟𑀻, 𑀦 𑀮𑀓𑁆𑀔𑀡𑀸𑀳𑀢𑁄, 𑀦 𑀓𑀲𑀸𑀳𑀢𑁄, 𑀦 𑀮𑀺𑀔𑀺𑀢𑀓𑁄, 𑀦 𑀲𑀻𑀧𑀤𑀻, 𑀦 𑀧𑀸𑀧𑀭𑁄𑀕𑀻, 𑀦 𑀧𑀭𑀺𑀲𑀤𑀽𑀲𑀓𑁄, 𑀦 𑀓𑀸𑀡𑁄, 𑀦 𑀓𑀼𑀡𑀻, 𑀦 𑀔𑀜𑁆𑀚𑁄, 𑀦 𑀧𑀓𑁆𑀔𑀳𑀢𑁄, 𑀦 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄, 𑀦 𑀚𑀭𑀸𑀤𑀼𑀩𑁆𑀩𑀮𑁄, 𑀦 𑀅𑀦𑁆𑀥𑁄, 𑀦 𑀫𑀽𑀕𑁄, 𑀦 𑀩𑀥𑀺𑀭𑁄, 𑀦 𑀅𑀦𑁆𑀥𑀫𑀽𑀕𑁄, 𑀦 𑀅𑀦𑁆𑀥𑀩𑀥𑀺𑀭𑁄, 𑀦 𑀫𑀽𑀕𑀩𑀥𑀺𑀭𑁄, 𑀦 𑀅𑀦𑁆𑀥𑀫𑀽𑀕𑀩𑀥𑀺𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁧𑁯) 𑀯𑀘𑀦𑀢𑁄 𑀧𑀦 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸.

𑀢𑀢𑁆𑀣 𑀳𑀢𑁆𑀣𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀳𑀢𑁆𑀣𑀢𑀮𑁂 𑀯𑀸 𑀫𑀡𑀺𑀩𑀦𑁆𑀥𑁂 𑀯𑀸 𑀓𑀧𑁆𑀧𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀳𑀢𑁆𑀣𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀧𑀸𑀤𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀅𑀕𑁆𑀕𑀧𑀸𑀤𑁂 𑀯𑀸 𑀕𑁄𑀧𑁆𑀨𑀓𑁂𑀲𑀼 𑀯𑀸 𑀚𑀗𑁆𑀖𑀸𑀬 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀸𑀤𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀘𑀢𑀽𑀲𑀼 𑀳𑀢𑁆𑀣𑀧𑀸𑀤𑁂𑀲𑀼 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀲𑀩𑁆𑀩𑁂 𑀯𑀸 𑀳𑀢𑁆𑀣𑀧𑀸𑀤𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀓𑀡𑁆𑀡𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀓𑀡𑁆𑀡𑀫𑀽𑀮𑁂 𑀯𑀸 𑀓𑀡𑁆𑀡𑀲𑀓𑁆𑀔𑀮𑀺𑀓𑀸𑀬 𑀯𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀓𑀡𑁆𑀡𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦 𑀓𑀡𑁆𑀡𑀸𑀯𑀝𑁆𑀝𑁂 𑀙𑀺𑀚𑁆𑀚𑀦𑁆𑀢𑀺, 𑀲𑀓𑁆𑀓𑀸 𑀘 𑀳𑁄𑀢𑀺 𑀲𑀗𑁆𑀖𑀸𑀝𑁂𑀢𑀼𑀁, 𑀲𑁄 𑀓𑀡𑁆𑀡𑀁 𑀲𑀗𑁆𑀖𑀸𑀝𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀦𑀸𑀲𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀅𑀚𑀧𑀤𑀓𑁂 𑀯𑀸 𑀅𑀕𑁆𑀕𑁂 𑀯𑀸 𑀏𑀓𑀧𑀼𑀝𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀸𑀲𑀸 𑀙𑀺𑀦𑁆𑀦𑀸 𑀳𑁄𑀢𑀺. 𑀬𑀲𑁆𑀲 𑀧𑀦 𑀦𑀸𑀲𑀺𑀓𑀸 𑀲𑀓𑁆𑀓𑀸 𑀳𑁄𑀢𑀺 𑀲𑀦𑁆𑀥𑁂𑀢𑀼𑀁, 𑀲𑁄 𑀢𑀁 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑁄 𑀉𑀪𑀬𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀗𑁆𑀕𑀼𑀮𑀺𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀦𑀔𑀲𑁂𑀲𑀁 𑀅𑀤𑀲𑁆𑀲𑁂𑀢𑁆𑀯𑀸 𑀏𑀓𑀸 𑀯𑀸 𑀩𑀳𑀽 𑀯𑀸 𑀅𑀗𑁆𑀕𑀼𑀮𑀺𑀬𑁄 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀬𑀲𑁆𑀲 𑀧𑀦 𑀲𑀼𑀢𑁆𑀢𑀢𑀦𑁆𑀢𑀼𑀫𑀢𑁆𑀢𑀫𑁆𑀧𑀺 𑀦𑀔𑀲𑁂𑀲𑀁 𑀧𑀜𑁆𑀜𑀸𑀬𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀴𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀘𑀢𑀽𑀲𑀼 𑀅𑀗𑁆𑀕𑀼𑀝𑁆𑀞𑀓𑁂𑀲𑀼 𑀅𑀗𑁆𑀕𑀼𑀮𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀓𑁄 𑀯𑀸 𑀩𑀳𑀽 𑀯𑀸 𑀅𑀗𑁆𑀕𑀼𑀝𑁆𑀞𑀓𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀓𑀡𑁆𑀟𑀭𑀘𑁆𑀙𑀺𑀦𑁆𑀦𑁄𑀢𑀺 𑀬𑀲𑁆𑀲 𑀓𑀡𑁆𑀟𑀭𑀦𑀸𑀫𑀓𑀸 𑀫𑀳𑀸𑀦𑁆𑀳𑀸𑀭𑀽 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀬𑁂𑀲𑀼 𑀏𑀓𑀲𑁆𑀲𑀧𑀺 𑀙𑀺𑀦𑁆𑀦𑀢𑁆𑀢𑀸 𑀅𑀕𑁆𑀕𑀧𑀸𑀤𑁂𑀦 𑀯𑀸 𑀘𑀗𑁆𑀓𑀫𑀢𑀺, 𑀫𑀽𑀮𑁂𑀦 𑀯𑀸 𑀘𑀗𑁆𑀓𑀫𑀢𑀺, 𑀦 𑀧𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺.

𑀨𑀡𑀳𑀢𑁆𑀣𑀓𑁄𑀢𑀺 𑀬𑀲𑁆𑀲 𑀯𑀕𑁆𑀕𑀼𑀮𑀺𑀧𑀓𑁆𑀔𑀓𑀸 𑀯𑀺𑀬 𑀅𑀗𑁆𑀕𑀼𑀮𑀺𑀬𑁄 𑀲𑀫𑁆𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀏𑀢𑀁 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁂𑀦 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀬𑁄 𑀨𑀸𑀮𑁂𑀢𑁆𑀯𑀸 𑀲𑀩𑁆𑀩𑀁 𑀅𑀦𑁆𑀢𑀭𑀘𑀫𑁆𑀫𑀁 𑀅𑀧𑀦𑁂𑀢𑁆𑀯𑀸 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑀲𑁆𑀲𑀧𑀺 𑀙 𑀅𑀗𑁆𑀕𑀼𑀮𑀺𑀬𑁄 𑀳𑁄𑀦𑁆𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁂𑀦 𑀅𑀥𑀺𑀓𑀁 𑀅𑀗𑁆𑀕𑀼𑀮𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀨𑀸𑀲𑀼𑀓𑀁 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀔𑀼𑀚𑁆𑀚𑁄𑀢𑀺 𑀬𑁄 𑀉𑀭𑀲𑁆𑀲 𑀯𑀸 𑀧𑀺𑀝𑁆𑀞𑀺𑀬𑀸 𑀯𑀸 𑀧𑀲𑁆𑀲𑀲𑁆𑀲 𑀯𑀸 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀔𑀼𑀚𑁆𑀚𑀲𑀭𑀻𑀭𑁄. 𑀬𑀲𑁆𑀲 𑀧𑀦 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀈𑀲𑀓𑀁 𑀯𑀗𑁆𑀓𑀁, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀏𑀯 𑀳𑀺 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀅𑀯𑀲𑁂𑀲𑁄 𑀲𑀢𑁆𑀢𑁄 𑀅𑀔𑀼𑀚𑁆𑀚𑁄 𑀦𑀸𑀫 𑀦𑀢𑁆𑀣𑀺. 𑀯𑀸𑀫𑀦𑁄𑀢𑀺 𑀚𑀗𑁆𑀖𑀯𑀸𑀫𑀦𑁄 𑀯𑀸 𑀓𑀝𑀺𑀯𑀸𑀫𑀦𑁄 𑀯𑀸 𑀉𑀪𑀬𑀯𑀸𑀫𑀦𑁄 𑀯𑀸. 𑀚𑀗𑁆𑀖𑀯𑀸𑀫𑀦𑀲𑁆𑀲 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀓𑀸𑀬𑁄 𑀭𑀲𑁆𑀲𑁄 𑀳𑁄𑀢𑀺, 𑀉𑀧𑀭𑀺𑀫𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀓𑀝𑀺𑀯𑀸𑀫𑀦𑀲𑁆𑀲 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀭𑀲𑁆𑀲𑁄 𑀳𑁄𑀢𑀺, 𑀳𑁂𑀝𑁆𑀞𑀺𑀫𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀉𑀪𑀬𑀯𑀸𑀫𑀦𑀲𑁆𑀲 𑀉𑀪𑁄𑀧𑀺 𑀓𑀸𑀬𑀸 𑀭𑀲𑁆𑀲𑀸 𑀳𑁄𑀦𑁆𑀢𑀺, 𑀬𑁂𑀲𑀁 𑀭𑀲𑁆𑀲𑀢𑁆𑀢𑀸 𑀪𑀽𑀢𑀸𑀦𑀁 𑀯𑀺𑀬 𑀧𑀭𑀺𑀯𑀝𑀼𑀫𑁄 𑀫𑀳𑀸𑀓𑀼𑀘𑁆𑀙𑀺𑀖𑀝𑀲𑀤𑀺𑀲𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀕𑀮𑀕𑀡𑁆𑀟𑀻𑀢𑀺 𑀬𑀲𑁆𑀲 𑀓𑀼𑀫𑁆𑀪𑀡𑁆𑀟𑀁 𑀯𑀺𑀬 𑀕𑀮𑁂 𑀕𑀡𑁆𑀟𑁄 𑀳𑁄𑀢𑀺. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁, 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀧𑀦 𑀧𑀤𑁂𑀲𑁂 𑀕𑀡𑁆𑀟𑁂 𑀲𑀢𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 ‘‘𑀦, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀆𑀩𑀸𑀥𑁂𑀳𑀺 𑀨𑀼𑀝𑁆𑀞𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁮𑁯) 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑀸𑀳𑀢𑀓𑀲𑀸𑀳𑀢𑀮𑀺𑀔𑀺𑀢𑀓𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀲𑀻𑀧𑀤𑀻𑀢𑀺 𑀪𑀸𑀭𑀧𑀸𑀤𑁄 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀸𑀤𑁄 𑀣𑀽𑀮𑁄 𑀳𑁄𑀢𑀺 𑀲𑀜𑁆𑀚𑀸𑀢𑀧𑀻𑀴𑀓𑁄 𑀔𑀭𑁄, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀦 𑀢𑀸𑀯 𑀔𑀭𑀪𑀸𑀯𑀁 𑀕𑀡𑁆𑀳𑀸𑀢𑀺, 𑀲𑀓𑁆𑀓𑀸 𑀳𑁄𑀢𑀺 𑀉𑀧𑀦𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑀆𑀯𑀸𑀝𑁂 𑀧𑀯𑁂𑀲𑁂𑀢𑁆𑀯𑀸 𑀉𑀤𑀓𑀯𑀸𑀮𑀺𑀓𑀸𑀬 𑀧𑀽𑀭𑁂𑀢𑁆𑀯𑀸 𑀬𑀣𑀸 𑀲𑀺𑀭𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀚𑀗𑁆𑀖𑀸 𑀘 𑀢𑁂𑀮𑀦𑀸𑀴𑀺𑀓𑀸 𑀯𑀺𑀬 𑀳𑁄𑀢𑀺, 𑀏𑀯𑀁 𑀫𑀺𑀮𑀸𑀧𑁂𑀢𑀼𑀁, 𑀢𑀲𑁆𑀲 𑀧𑀸𑀤𑀁 𑀈𑀤𑀺𑀲𑀁 𑀓𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀼𑀦 𑀯𑀟𑁆𑀠𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂𑀦𑀧𑀺 𑀢𑀣𑀸 𑀓𑀢𑁆𑀯𑀸𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀧𑀸𑀧𑀭𑁄𑀕𑀻𑀢𑀺 𑀅𑀭𑀺𑀲𑀪𑀕𑀦𑁆𑀤𑀭𑀧𑀺𑀢𑁆𑀢𑀲𑁂𑀫𑁆𑀳𑀓𑀸𑀲𑀲𑁄𑀲𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀭𑁄𑀕𑁂𑀦 𑀦𑀺𑀘𑁆𑀘𑀸𑀢𑀼𑀭𑁄 𑀅𑀢𑁂𑀓𑀺𑀘𑁆𑀙𑀭𑁄𑀕𑁄 𑀚𑁂𑀕𑀼𑀘𑁆𑀙𑁄 𑀅𑀫𑀦𑀸𑀧𑁄, 𑀅𑀬𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁩𑁩. 𑀧𑀭𑀺𑀲𑀤𑀽𑀲𑀓𑁄𑀢𑀺 𑀬𑁄 𑀅𑀢𑁆𑀢𑀦𑁄 𑀯𑀺𑀭𑀽𑀧𑀢𑀸𑀬 𑀧𑀭𑀺𑀲𑀁 𑀤𑀽𑀲𑁂𑀢𑀺, 𑀅𑀢𑀺𑀤𑀻𑀖𑁄 𑀯𑀸 𑀳𑁄𑀢𑀺 𑀅𑀜𑁆𑀜𑁂𑀲𑀁 𑀲𑀻𑀲𑀧𑁆𑀧𑀫𑀸𑀡𑀦𑀸𑀪𑀺𑀧𑁆𑀧𑀤𑁂𑀲𑁄, 𑀅𑀢𑀺𑀭𑀲𑁆𑀲𑁄 𑀯𑀸 𑀉𑀪𑀬𑀯𑀸𑀫𑀦𑀪𑀽𑀢𑀭𑀽𑀧𑀁 𑀯𑀺𑀬, 𑀅𑀢𑀺𑀓𑀸𑀴𑁄 𑀯𑀸 𑀛𑀸𑀧𑀺𑀢𑀓𑁆𑀔𑁂𑀢𑁆𑀢𑁂 𑀔𑀸𑀡𑀼𑀓𑁄 𑀯𑀺𑀬, 𑀅𑀘𑁆𑀘𑁄𑀤𑀸𑀢𑁄 𑀯𑀸 𑀤𑀥𑀺𑀢𑀓𑁆𑀓𑀸𑀤𑀻𑀳𑀺 𑀧𑀫𑀚𑁆𑀚𑀺𑀢𑀢𑀫𑁆𑀩𑀮𑁄𑀳𑀯𑀡𑁆𑀡𑁄, 𑀅𑀢𑀺𑀓𑀺𑀲𑁄 𑀯𑀸 𑀫𑀦𑁆𑀤𑀫𑀁𑀲𑀮𑁄𑀳𑀺𑀢𑁄 𑀅𑀝𑁆𑀞𑀺𑀲𑀺𑀭𑀸𑀘𑀫𑁆𑀫𑀲𑀭𑀻𑀭𑁄 𑀯𑀺𑀬, 𑀅𑀢𑀺𑀣𑀽𑀮𑁄 𑀯𑀸 𑀪𑀸𑀭𑀺𑀬𑀫𑀁𑀲𑁄 𑀫𑀳𑁄𑀤𑀭𑁄 𑀫𑀳𑀸𑀪𑀽𑀢𑀲𑀤𑀺𑀲𑁄, 𑀅𑀪𑀺𑀫𑀳𑀦𑁆𑀢𑀲𑀻𑀲𑁄 𑀯𑀸 𑀧𑀘𑁆𑀙𑀺𑀁 𑀲𑀻𑀲𑁂 𑀓𑀢𑁆𑀯𑀸 𑀞𑀺𑀢𑁄 𑀯𑀺𑀬, 𑀅𑀢𑀺𑀔𑀼𑀤𑁆𑀤𑀓𑀲𑀻𑀲𑁄 𑀯𑀸 𑀲𑀭𑀻𑀭𑀲𑁆𑀲 𑀅𑀦𑀦𑀼𑀭𑀽𑀧𑁂𑀦 𑀅𑀢𑀺𑀔𑀼𑀤𑁆𑀤𑀓𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀽𑀝𑀓𑀽𑀝𑀲𑀻𑀲𑁄 𑀯𑀸 𑀢𑀸𑀮𑀨𑀮𑀧𑀺𑀡𑁆𑀟𑀺𑀲𑀤𑀺𑀲𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀺𑀔𑀭𑀲𑀻𑀲𑁄 𑀯𑀸 𑀉𑀤𑁆𑀥𑀁 𑀅𑀦𑀼𑀧𑀼𑀩𑁆𑀩𑀢𑀦𑀼𑀓𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀦𑀸𑀴𑀺𑀲𑀻𑀲𑁄 𑀯𑀸 𑀫𑀳𑀸𑀯𑁂𑀡𑀼𑀧𑀩𑁆𑀩𑀲𑀤𑀺𑀲𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀓𑀧𑁆𑀧𑀲𑀻𑀲𑁄 𑀯𑀸 𑀧𑀩𑁆𑀪𑀸𑀭𑀲𑀻𑀲𑁄 𑀯𑀸 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀲𑁆𑀲𑁂𑀦 𑀑𑀦𑀢𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀯𑀡𑀲𑀻𑀲𑁄 𑀯𑀸 𑀧𑀽𑀢𑀺𑀲𑀻𑀲𑁄 𑀯𑀸 𑀓𑀡𑁆𑀡𑀺𑀓𑀓𑁂𑀲𑁄 𑀯𑀸 𑀧𑀸𑀡𑀓𑁂𑀳𑀺 𑀔𑀸𑀬𑀺𑀢𑀓𑁂𑀤𑀸𑀭𑁂 𑀲𑀲𑁆𑀲𑀲𑀤𑀺𑀲𑁂𑀳𑀺 𑀢𑀳𑀺𑀁 𑀢𑀳𑀺𑀁 𑀉𑀝𑁆𑀞𑀺𑀢𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀦𑀺𑀮𑁆𑀮𑁄𑀫𑀲𑀻𑀲𑁄 𑀯𑀸 𑀣𑀽𑀮𑀣𑀤𑁆𑀥𑀓𑁂𑀲𑁄 𑀯𑀸 𑀢𑀸𑀮𑀳𑀻𑀭𑀲𑀤𑀺𑀲𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀚𑀸𑀢𑀺𑀧𑀮𑀺𑀢𑁂𑀳𑀺 𑀧𑀡𑁆𑀟𑀭𑀓𑁂𑀲𑁄 𑀯𑀸 𑀧𑀓𑀢𑀺𑀢𑀫𑁆𑀩𑀓𑁂𑀲𑁄 𑀯𑀸 𑀆𑀤𑀺𑀢𑁆𑀢𑁂𑀳𑀺 𑀯𑀺𑀬 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀆𑀯𑀝𑁆𑀝𑀲𑀻𑀲𑁄 𑀯𑀸 𑀕𑀼𑀦𑁆𑀦𑀁 𑀲𑀭𑀻𑀭𑁂 𑀆𑀯𑀝𑁆𑀝𑀲𑀤𑀺𑀲𑁂𑀳𑀺 𑀉𑀤𑁆𑀥𑀕𑁆𑀕𑁂𑀳𑀺 𑀓𑁂𑀲𑀸𑀯𑀝𑁆𑀝𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀻𑀲𑀮𑁄𑀫𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀪𑀫𑀼𑀓𑀮𑁄𑀫𑁄 𑀯𑀸 𑀚𑀸𑀮𑀩𑀤𑁆𑀥𑁂𑀦 𑀯𑀺𑀬 𑀦𑀮𑀸𑀝𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀲𑀫𑁆𑀩𑀤𑁆𑀥𑀪𑀫𑀼𑀓𑁄 𑀯𑀸 𑀦𑀺𑀮𑁆𑀮𑁄𑀫𑀪𑀫𑀼𑀓𑁄 𑀯𑀸 𑀫𑀓𑁆𑀓𑀝𑀪𑀫𑀼𑀓𑁄 𑀯𑀸 𑀅𑀢𑀺𑀫𑀳𑀦𑁆𑀢𑀓𑁆𑀔𑀺 𑀯𑀸 𑀅𑀢𑀺𑀔𑀼𑀤𑁆𑀤𑀓𑀓𑁆𑀔𑀺 𑀯𑀸 𑀫𑀳𑀺𑀁𑀲𑀘𑀫𑁆𑀫𑁂 𑀯𑀸𑀲𑀺𑀓𑁄𑀡𑁂𑀦 𑀧𑀳𑀭𑀺𑀢𑁆𑀯𑀸 𑀓𑀢𑀙𑀺𑀤𑁆𑀤𑀲𑀤𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀲𑀫𑀓𑁆𑀔𑀺 𑀯𑀸 𑀏𑀓𑁂𑀦 𑀫𑀳𑀦𑁆𑀢𑁂𑀦, 𑀏𑀓𑁂𑀦 𑀔𑀼𑀤𑁆𑀤𑀓𑁂𑀦 𑀅𑀓𑁆𑀔𑀺𑀦𑀸 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀲𑀫𑀘𑀓𑁆𑀓𑀮𑁄 𑀯𑀸 𑀏𑀓𑁂𑀦 𑀉𑀤𑁆𑀥𑀁, 𑀏𑀓𑁂𑀦 𑀅𑀥𑁄𑀢𑀺 𑀏𑀯𑀁 𑀯𑀺𑀲𑀫𑀚𑀸𑀢𑁂𑀳𑀺 𑀅𑀓𑁆𑀔𑀺𑀘𑀓𑁆𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀓𑁂𑀓𑀭𑁄 𑀯𑀸 𑀕𑀫𑁆𑀪𑀻𑀭𑀓𑁆𑀔𑀺 𑀯𑀸 𑀬𑀲𑁆𑀲 𑀕𑀫𑁆𑀪𑀻𑀭𑁂 𑀉𑀤𑀧𑀸𑀦𑁂 𑀉𑀤𑀓𑀢𑀸𑀭𑀓𑀸 𑀯𑀺𑀬 𑀅𑀓𑁆𑀔𑀺𑀢𑀸𑀭𑀓𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀦𑀺𑀓𑁆𑀔𑀦𑁆𑀢𑀓𑁆𑀔𑀺 𑀯𑀸 𑀬𑀲𑁆𑀲 𑀓𑀓𑁆𑀓𑀝𑀲𑁆𑀲𑁂𑀯 𑀅𑀓𑁆𑀔𑀺𑀢𑀸𑀭𑀓𑀸 𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀓𑀡𑁆𑀡𑁄 𑀯𑀸 𑀫𑀳𑀦𑁆𑀢𑀸𑀳𑀺 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀽𑀲𑀺𑀓𑀓𑀡𑁆𑀡𑁄 𑀯𑀸 𑀚𑀢𑀼𑀓𑀓𑀡𑁆𑀡𑁄 𑀯𑀸 𑀔𑀼𑀤𑁆𑀤𑀓𑀸𑀳𑀺 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀙𑀺𑀤𑁆𑀤𑀫𑀢𑁆𑀢𑀓𑀡𑁆𑀡𑁄 𑀯𑀸 𑀬𑀲𑁆𑀲 𑀯𑀺𑀦𑀸 𑀓𑀡𑁆𑀡𑀲𑀓𑁆𑀔𑀮𑀻𑀳𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀯𑀺𑀤𑁆𑀥𑀓𑀡𑁆𑀡𑁄 𑀯𑀸, 𑀬𑁄𑀦𑀓𑀚𑀸𑀢𑀺𑀓𑁄 𑀧𑀦 𑀧𑀭𑀺𑀲𑀤𑀽𑀲𑀓𑁄 𑀦 𑀳𑁄𑀢𑀺, 𑀲𑀪𑀸𑀯𑁄𑀬𑁂𑀯 𑀳𑀺 𑀲𑁄 𑀢𑀲𑁆𑀲. 𑀓𑀡𑁆𑀡𑀪𑀕𑀦𑁆𑀤𑀭𑀺𑀓𑁄 𑀯𑀸 𑀦𑀺𑀘𑁆𑀘𑀧𑀽𑀢𑀺𑀦𑀸 𑀓𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀕𑀡𑁆𑀟𑀓𑀡𑁆𑀡𑁄 𑀯𑀸 𑀲𑀤𑀸 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑁂𑀦 𑀓𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀝𑀗𑁆𑀓𑀺𑀢𑀓𑀡𑁆𑀡𑁄 𑀯𑀸 𑀕𑁄𑀪𑀢𑁆𑀢𑀦𑀸𑀴𑀺𑀓𑀸𑀬 𑀅𑀕𑁆𑀕𑀲𑀤𑀺𑀲𑁂𑀳𑀺 𑀓𑀡𑁆𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀢𑀺𑀧𑀺𑀗𑁆𑀕𑀮𑀓𑁆𑀔𑀺 𑀯𑀸, 𑀫𑀥𑀼𑀧𑀺𑀗𑁆𑀕𑀮𑀁 𑀧𑀦 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀧𑁆𑀧𑀔𑀼𑀫𑀓𑁆𑀔𑀺 𑀯𑀸 𑀅𑀲𑁆𑀲𑀼𑀧𑀕𑁆𑀖𑀭𑀡𑀓𑁆𑀔𑀺 𑀯𑀸 𑀧𑀼𑀧𑁆𑀨𑀺𑀢𑀓𑁆𑀔𑀺 𑀯𑀸 𑀅𑀓𑁆𑀔𑀺𑀧𑀸𑀓𑁂𑀦 𑀲𑀫𑀦𑁆𑀦𑀸𑀕𑀢𑀓𑁆𑀔𑀺 𑀯𑀸.

𑀅𑀢𑀺𑀫𑀳𑀦𑁆𑀢𑀦𑀸𑀲𑀺𑀓𑁄 𑀯𑀸 𑀅𑀢𑀺𑀔𑀼𑀤𑁆𑀤𑀓𑀦𑀸𑀲𑀺𑀓𑁄 𑀯𑀸 𑀘𑀺𑀧𑀺𑀝𑀦𑀸𑀲𑀺𑀓𑁄 𑀯𑀸 𑀫𑀚𑁆𑀛𑁂 𑀅𑀧𑁆𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀏𑀓𑀧𑀲𑁆𑀲𑁂 𑀞𑀺𑀢𑀯𑀗𑁆𑀓𑀦𑀸𑀲𑀺𑀓𑁄 𑀯𑀸 𑀤𑀻𑀖𑀦𑀸𑀲𑀺𑀓𑁄 𑀯𑀸 𑀲𑀼𑀓𑀢𑀼𑀡𑁆𑀟𑀲𑀤𑀺𑀲𑀸𑀬 𑀚𑀺𑀯𑁆𑀳𑀸𑀬 𑀮𑁂𑀳𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀬 𑀦𑀸𑀲𑀺𑀓𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀦𑀺𑀘𑁆𑀘𑀁 𑀧𑀕𑁆𑀖𑀭𑀺𑀢𑀲𑀺𑀗𑁆𑀖𑀸𑀡𑀺𑀓𑀦𑀸𑀲𑁄 𑀯𑀸, 𑀫𑀳𑀸𑀫𑀼𑀔𑁄 𑀯𑀸 𑀬𑀲𑁆𑀲 𑀧𑀝𑀗𑁆𑀕𑀫𑀡𑁆𑀟𑀽𑀓𑀲𑁆𑀲𑁂𑀯 𑀫𑀼𑀔𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀳𑀦𑁆𑀢𑀁 𑀳𑁄𑀢𑀺, 𑀫𑀼𑀔𑀁 𑀧𑀦 𑀮𑀸𑀩𑀼𑀲𑀤𑀺𑀲𑀁 𑀅𑀢𑀺𑀔𑀼𑀤𑁆𑀤𑀓𑀁, 𑀪𑀺𑀦𑁆𑀦𑀫𑀼𑀔𑁄 𑀯𑀸 𑀯𑀗𑁆𑀓𑀫𑀼𑀔𑁄 𑀯𑀸 𑀫𑀳𑀸𑀑𑀝𑁆𑀞𑁄 𑀯𑀸 𑀉𑀓𑁆𑀔𑀮𑀺𑀫𑀼𑀔𑀯𑀝𑁆𑀝𑀺𑀲𑀤𑀺𑀲𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑀦𑀼𑀓𑀑𑀝𑁆𑀞𑁄 𑀯𑀸 𑀪𑁂𑀭𑀺𑀘𑀫𑁆𑀫𑀲𑀤𑀺𑀲𑁂𑀳𑀺 𑀤𑀦𑁆𑀢𑁂 𑀧𑀺𑀤𑀳𑀺𑀢𑀼𑀁 𑀅𑀲𑀫𑀢𑁆𑀣𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀳𑀸𑀥𑀭𑁄𑀝𑁆𑀞𑁄 𑀯𑀸 𑀢𑀦𑀼𑀓𑀉𑀢𑁆𑀢𑀭𑁄𑀝𑁆𑀞𑁄 𑀯𑀸 𑀢𑀦𑀼𑀓𑀅𑀥𑀭𑁄𑀝𑁆𑀞𑁄 𑀯𑀸 𑀫𑀳𑀸𑀉𑀢𑁆𑀢𑀭𑁄𑀝𑁆𑀞𑁄 𑀯𑀸 𑀑𑀝𑁆𑀞𑀙𑀺𑀦𑁆𑀦𑀓𑁄 𑀯𑀸 𑀏𑀴𑀫𑀼𑀔𑁄 𑀯𑀸 𑀉𑀧𑁆𑀧𑀓𑁆𑀓𑀫𑀼𑀔𑁄 𑀯𑀸 𑀲𑀗𑁆𑀔𑀢𑀼𑀡𑁆𑀟𑀓𑁄 𑀯𑀸 𑀩𑀳𑀺 𑀲𑁂𑀢𑁂𑀳𑀺 𑀅𑀦𑁆𑀢𑁄 𑀅𑀢𑀺𑀭𑀢𑁆𑀢𑁂𑀳𑀺 𑀑𑀝𑁆𑀞𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀤𑀼𑀕𑁆𑀕𑀦𑁆𑀥𑀓𑀼𑀡𑀧𑀫𑀼𑀔𑁄 𑀯𑀸, 𑀫𑀳𑀸𑀤𑀦𑁆𑀢𑁄 𑀯𑀸 𑀅𑀝𑁆𑀞𑀓𑀤𑀦𑁆𑀢𑀲𑀤𑀺𑀲𑁂𑀳𑀺 𑀤𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀲𑀼𑀭𑀤𑀦𑁆𑀢𑁄 𑀯𑀸 𑀳𑁂𑀝𑁆𑀞𑀸 𑀯𑀸 𑀉𑀧𑀭𑀺 𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑁄, 𑀬𑀲𑁆𑀲 𑀧𑀦 𑀲𑀓𑁆𑀓𑀸 𑀳𑁄𑀢𑀺 𑀑𑀝𑁆𑀞𑁂𑀳𑀺 𑀧𑀺𑀤𑀳𑀺𑀢𑀼𑀁, 𑀓𑀣𑁂𑀦𑁆𑀢𑀲𑁆𑀲𑁂𑀯 𑀧𑀜𑁆𑀜𑀸𑀬𑀢𑀺, 𑀦𑁄 𑀅𑀓𑀣𑁂𑀦𑁆𑀢𑀲𑁆𑀲, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀽𑀢𑀺𑀤𑀦𑁆𑀢𑁄 𑀯𑀸 𑀦𑀺𑀤𑁆𑀤𑀦𑁆𑀢𑁄 𑀯𑀸 𑀅𑀢𑀺𑀔𑀼𑀤𑁆𑀤𑀓𑀤𑀦𑁆𑀢𑁄 𑀯𑀸 𑀬𑀲𑁆𑀲 𑀧𑀦 𑀤𑀦𑁆𑀢𑀦𑁆𑀢𑀭𑁂 𑀓𑀮𑀦𑁆𑀤𑀓𑀤𑀦𑁆𑀢𑁄 𑀯𑀺𑀬 𑀲𑀼𑀔𑀼𑀫𑀤𑀦𑁆𑀢𑁄 𑀳𑁄𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑀫𑀳𑀸𑀳𑀦𑀼𑀓𑁄 𑀯𑀸 𑀕𑁄𑀳𑀦𑀼𑀲𑀤𑀺𑀲𑁂𑀦 𑀳𑀦𑀼𑀦𑀸 𑀲𑀫𑀦𑁆𑀦𑀸𑀕𑀢𑁄, 𑀤𑀻𑀖𑀳𑀦𑀼𑀓𑁄 𑀯𑀸 𑀘𑀺𑀧𑀺𑀝𑀳𑀦𑀼𑀓𑁄 𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀯𑀺𑀬 𑀅𑀢𑀺𑀭𑀲𑁆𑀲𑁂𑀦 𑀳𑀦𑀼𑀓𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀪𑀺𑀦𑁆𑀦𑀳𑀦𑀼𑀓𑁄 𑀯𑀸 𑀯𑀗𑁆𑀓𑀳𑀦𑀼𑀓𑁄 𑀯𑀸 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑁄 𑀯𑀸 𑀪𑀺𑀓𑁆𑀔𑀼𑀦𑀻𑀲𑀤𑀺𑀲𑀫𑀼𑀔𑁄, 𑀤𑀻𑀖𑀕𑀮𑁄 𑀯𑀸 𑀩𑀓𑀕𑀮𑀲𑀤𑀺𑀲𑁂𑀦 𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀭𑀲𑁆𑀲𑀕𑀮𑁄 𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁂𑀦 𑀯𑀺𑀬 𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀪𑀺𑀦𑁆𑀦𑀕𑀮𑁄 𑀯𑀸 𑀪𑀝𑁆𑀞𑀅𑀁𑀲𑀓𑀽𑀝𑁄 𑀯𑀸 𑀅𑀳𑀢𑁆𑀣𑁄 𑀯𑀸 𑀏𑀓𑀳𑀢𑁆𑀣𑁄 𑀯𑀸 𑀅𑀢𑀺𑀭𑀲𑁆𑀲𑀳𑀢𑁆𑀣𑁄 𑀯𑀸 𑀅𑀢𑀺𑀤𑀻𑀖𑀳𑀢𑁆𑀣𑁄 𑀯𑀸 𑀪𑀺𑀦𑁆𑀦𑀉𑀭𑁄 𑀯𑀸 𑀪𑀺𑀦𑁆𑀦𑀧𑀺𑀝𑁆𑀞𑀺 𑀯𑀸 𑀓𑀘𑁆𑀙𑀼𑀕𑀢𑁆𑀢𑁄 𑀯𑀸 𑀓𑀡𑁆𑀟𑀼𑀕𑀢𑁆𑀢𑁄 𑀯𑀸 𑀤𑀤𑁆𑀤𑀼𑀕𑀢𑁆𑀢𑁄 𑀯𑀸 𑀕𑁄𑀥𑀸𑀕𑀢𑁆𑀢𑁄 𑀯𑀸 𑀬𑀲𑁆𑀲 𑀕𑁄𑀥𑀸𑀬 𑀯𑀺𑀬 𑀕𑀢𑁆𑀢𑀢𑁄 𑀘𑀼𑀡𑁆𑀡𑀸𑀦𑀺 𑀧𑀢𑀦𑁆𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀯𑀺𑀭𑀽𑀧𑀓𑀭𑀡𑀁 𑀲𑀦𑁆𑀥𑀸𑀬 𑀯𑀺𑀢𑁆𑀣𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀯𑀺𑀦𑀺𑀘𑁆𑀙𑀬𑁄 𑀧𑀦𑁂𑀢𑁆𑀣 𑀧𑀜𑁆𑀘𑀸𑀩𑀸𑀥𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀪𑀝𑁆𑀞𑀓𑀝𑀺𑀓𑁄 𑀯𑀸 𑀫𑀳𑀸𑀆𑀦𑀺𑀲𑀤𑁄 𑀯𑀸 𑀉𑀤𑁆𑀥𑀦𑀓𑀽𑀝𑀲𑀤𑀺𑀲𑁂𑀳𑀺 𑀆𑀦𑀺𑀲𑀤𑀫𑀁𑀲𑁂𑀳𑀺 𑀅𑀘𑁆𑀘𑀼𑀕𑁆𑀕𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀳𑀸𑀊𑀭𑀼𑀓𑁄 𑀯𑀸 𑀯𑀸𑀢𑀡𑁆𑀟𑀺𑀓𑁄 𑀯𑀸 𑀫𑀳𑀸𑀚𑀸𑀡𑀼𑀓𑁄 𑀯𑀸 𑀲𑀗𑁆𑀖𑀝𑁆𑀝𑀦𑀚𑀸𑀡𑀼𑀓𑁄 𑀯𑀸 𑀤𑀻𑀖𑀚𑀗𑁆𑀖𑁄 𑀯𑀸 𑀬𑀝𑁆𑀞𑀺𑀲𑀤𑀺𑀲𑀚𑀗𑁆𑀖𑁄, 𑀯𑀺𑀓𑀝𑁄 𑀯𑀸 𑀲𑀗𑁆𑀖𑀝𑁆𑀝𑁄 𑀯𑀸 𑀉𑀩𑁆𑀩𑀤𑁆𑀥𑀧𑀺𑀡𑁆𑀟𑀺𑀓𑁄 𑀯𑀸, 𑀲𑁄 𑀤𑀼𑀯𑀺𑀥𑁄 𑀳𑁂𑀝𑁆𑀞𑀸 𑀑𑀭𑀼𑀴𑁆𑀳𑀸𑀳𑀺 𑀯𑀸 𑀉𑀧𑀭𑀺 𑀆𑀭𑀼𑀴𑁆𑀳𑀸𑀳𑀺 𑀯𑀸 𑀫𑀳𑀢𑀻𑀳𑀺 𑀚𑀗𑁆𑀖𑀧𑀺𑀡𑁆𑀟𑀺𑀓𑀸𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀳𑀸𑀚𑀗𑁆𑀖𑁄 𑀯𑀸 𑀣𑀽𑀮𑀚𑀗𑁆𑀖𑀧𑀺𑀡𑁆𑀟𑀺𑀓𑁄 𑀯𑀸 𑀫𑀳𑀸𑀧𑀸𑀤𑁄 𑀯𑀸 𑀫𑀳𑀸𑀧𑀡𑁆𑀳𑀺 𑀯𑀸 𑀧𑀺𑀝𑁆𑀞𑀺𑀓𑀧𑀸𑀤𑁄 𑀯𑀸 𑀧𑀸𑀤𑀯𑁂𑀫𑀚𑁆𑀛𑀢𑁄 𑀉𑀝𑁆𑀞𑀺𑀢𑀚𑀗𑁆𑀖𑁄, 𑀯𑀗𑁆𑀓𑀧𑀸𑀤𑁄 𑀯𑀸, 𑀲𑁄 𑀤𑀼𑀯𑀺𑀥𑁄 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀭𑀺𑀯𑀢𑁆𑀢𑀧𑀸𑀤𑁄, 𑀕𑀡𑁆𑀞𑀺𑀓𑀗𑁆𑀕𑀼𑀮𑀺 𑀯𑀸 𑀲𑀺𑀗𑁆𑀕𑀺𑀯𑁂𑀭𑀨𑀡𑀲𑀤𑀺𑀲𑀸𑀳𑀺 𑀅𑀗𑁆𑀕𑀼𑀮𑀻𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀦𑁆𑀥𑀦𑀔𑁄 𑀯𑀸 𑀓𑀸𑀴𑀯𑀡𑁆𑀡𑁂𑀳𑀺 𑀧𑀽𑀢𑀺𑀦𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀩𑁆𑀩𑁄𑀧𑀺 𑀏𑀲 𑀧𑀭𑀺𑀲𑀤𑀽𑀲𑀓𑁄. 𑀏𑀯𑀭𑀽𑀧𑁄 𑀧𑀭𑀺𑀲𑀤𑀽𑀲𑀓𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁩𑁪. 𑀓𑀸𑀡𑁄𑀢𑀺 𑀧𑀲𑀦𑁆𑀦𑀦𑁆𑀥𑁄 𑀯𑀸 𑀳𑁄𑀢𑀼 𑀧𑀼𑀧𑁆𑀨𑀸𑀤𑀻𑀳𑀺 𑀯𑀸 𑀉𑀧𑀳𑀢𑀧𑀲𑀸𑀤𑁄, 𑀤𑁆𑀯𑀻𑀳𑀺 𑀯𑀸 𑀏𑀓𑁂𑀦 𑀯𑀸 𑀅𑀓𑁆𑀔𑀺𑀦𑀸 𑀦 𑀧𑀲𑁆𑀲𑀢𑀺, 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀏𑀓𑀓𑁆𑀔𑀺𑀓𑀸𑀡𑁄 ‘‘𑀓𑀸𑀡𑁄’’𑀢𑀺 𑀯𑀼𑀢𑁆𑀢𑁄, 𑀤𑁆𑀯𑀺𑀅𑀓𑁆𑀔𑀺𑀓𑀸𑀡𑁄 𑀅𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀚𑀘𑁆𑀘𑀦𑁆𑀥𑁄 ‘‘𑀅𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀉𑀪𑀬𑀫𑁆𑀧𑀺 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺. 𑀓𑀼𑀡𑀻𑀢𑀺 𑀳𑀢𑁆𑀣𑀓𑀼𑀡𑀻 𑀯𑀸 𑀧𑀸𑀤𑀓𑀼𑀡𑀻 𑀯𑀸 𑀅𑀗𑁆𑀕𑀼𑀮𑀺𑀓𑀼𑀡𑀻 𑀯𑀸, 𑀬𑀲𑁆𑀲 𑀏𑀢𑁂𑀲𑀼 𑀳𑀢𑁆𑀣𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀯𑀗𑁆𑀓𑀁 𑀧𑀜𑁆𑀜𑀸𑀬𑀢𑀺. 𑀔𑀜𑁆𑀚𑁄𑀢𑀺 𑀦𑀢𑀚𑀸𑀡𑀼𑀓𑁄 𑀯𑀸 𑀪𑀺𑀦𑁆𑀦𑀚𑀗𑁆𑀖𑁄 𑀯𑀸 𑀫𑀚𑁆𑀛𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸 𑀓𑀼𑀡𑁆𑀞𑀧𑀸𑀤𑀓𑁄 𑀯𑀸 𑀧𑀺𑀝𑁆𑀞𑀺𑀧𑀸𑀤𑀫𑀚𑁆𑀛𑁂𑀦 𑀘𑀗𑁆𑀓𑀫𑀦𑁆𑀢𑁄, 𑀅𑀕𑁆𑀕𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸 𑀓𑀼𑀡𑁆𑀞𑀧𑀸𑀤𑀓𑁄 𑀯𑀸 𑀧𑀺𑀝𑁆𑀞𑀺𑀧𑀸𑀤𑀕𑁆𑀕𑁂𑀦 𑀘𑀗𑁆𑀓𑀫𑀦𑁆𑀢𑁄, 𑀅𑀕𑁆𑀕𑀧𑀸𑀤𑁂𑀦𑁂𑀯 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀡𑁆𑀳𑀺𑀓𑀸𑀬 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀸𑀤𑀲𑁆𑀲 𑀩𑀸𑀳𑀺𑀭𑀦𑁆𑀢𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀧𑀸𑀤𑀲𑁆𑀲 𑀅𑀩𑁆𑀪𑀦𑁆𑀢𑀭𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸 𑀕𑁄𑀧𑁆𑀨𑀓𑀸𑀦𑀁 𑀉𑀧𑀭𑀺 𑀪𑀕𑁆𑀕𑀢𑁆𑀢𑀸 𑀲𑀓𑀮𑁂𑀦 𑀧𑀺𑀝𑁆𑀞𑀺𑀧𑀸𑀤𑁂𑀦 𑀘𑀗𑁆𑀓𑀫𑀦𑀔𑀜𑁆𑀚𑁄 𑀯𑀸. 𑀲𑀩𑁆𑀩𑁄𑀧𑁂𑀲 𑀔𑀜𑁆𑀚𑁄𑀬𑁂𑀯, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀧𑀓𑁆𑀔𑀳𑀢𑁄𑀢𑀺 𑀬𑀲𑁆𑀲 𑀏𑀓𑁄 𑀳𑀢𑁆𑀣𑁄 𑀯𑀸 𑀧𑀸𑀤𑁄 𑀯𑀸 𑀅𑀤𑁆𑀥𑀲𑀭𑀻𑀭𑀁 𑀯𑀸 𑀲𑀼𑀔𑀁 𑀦 𑀯𑀳𑀢𑀺. 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄𑀢𑀺 𑀧𑀻𑀞𑀲𑀧𑁆𑀧𑀻 𑀯𑀼𑀘𑁆𑀘𑀢𑀺. 𑀚𑀭𑀸𑀤𑀼𑀩𑁆𑀩𑀮𑁄𑀢𑀺 𑀚𑀺𑀡𑁆𑀡𑀪𑀸𑀯𑁂𑀦 𑀤𑀼𑀩𑁆𑀩𑀮𑁄 𑀅𑀢𑁆𑀢𑀦𑁄 𑀘𑀻𑀯𑀭𑀭𑀚𑀦𑀸𑀤𑀺𑀓𑀫𑁆𑀫𑀫𑁆𑀧𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄. 𑀬𑁄 𑀧𑀦 𑀫𑀳𑀮𑁆𑀮𑀓𑁄𑀧𑀺 𑀩𑀮𑀯𑀸 𑀳𑁄𑀢𑀺, 𑀅𑀢𑁆𑀢𑀸𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀦𑁆𑀥𑁄𑀢𑀺 𑀚𑀘𑁆𑀘𑀦𑁆𑀥𑁄 𑀯𑀼𑀘𑁆𑀘𑀢𑀺. 𑀫𑀽𑀕𑁄𑀢𑀺 𑀬𑀲𑁆𑀲 𑀯𑀘𑀻𑀪𑁂𑀤𑁄 𑀦 𑀧𑀯𑀢𑁆𑀢𑀢𑀺, 𑀬𑀲𑁆𑀲𑀧𑀺 𑀧𑀯𑀢𑁆𑀢𑀢𑀺, 𑀲𑀭𑀡𑀕𑀫𑀦𑀁 𑀧𑀦 𑀧𑀭𑀺𑀧𑀼𑀡𑁆𑀡𑀁 𑀪𑀸𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑀁 𑀫𑀫𑁆𑀫𑀦𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑁄 𑀧𑀦 𑀲𑀭𑀡𑀕𑀫𑀦𑀫𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁 𑀪𑀸𑀲𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀩𑀥𑀺𑀭𑁄𑀢𑀺 𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀲𑀼𑀡𑀸𑀢𑀺. 𑀬𑁄 𑀧𑀦 𑀫𑀳𑀸𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁆𑀥𑀫𑀽𑀕𑀸𑀤𑀬𑁄 𑀉𑀪𑀬𑀤𑁄𑀲𑀯𑀲𑁂𑀦 𑀯𑀼𑀢𑁆𑀢𑀸. 𑀬𑁂𑀲𑀜𑁆𑀘 𑀧𑀩𑁆𑀩𑀚𑁆𑀚𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀉𑀧𑀲𑀫𑁆𑀧𑀤𑀸𑀧𑀺 𑀢𑁂𑀲𑀁 𑀧𑀝𑀺𑀓𑁆𑀔𑀺𑀢𑁆𑀢𑀸𑀯. 𑀲𑀘𑁂 𑀧𑀦 𑀦𑁂 𑀲𑀗𑁆𑀖𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀲𑀩𑁆𑀩𑁂𑀧𑀺 𑀲𑀽𑀧𑀲𑀫𑁆𑀧𑀦𑁆𑀦𑀸, 𑀓𑀸𑀭𑀓𑀲𑀗𑁆𑀖𑁄 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀆𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺.

𑁧𑁩𑁫. 𑀧𑀡𑁆𑀟𑀓𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑀸𑀢𑀼𑀖𑀸𑀢𑀓𑁄 𑀧𑀺𑀢𑀼𑀖𑀸𑀢𑀓𑁄 𑀅𑀭𑀳𑀦𑁆𑀢𑀖𑀸𑀢𑀓𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀲𑀗𑁆𑀖𑀪𑁂𑀤𑀓𑁄 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀢𑀺 𑀇𑀫𑁂 𑀧𑀦 𑀏𑀓𑀸𑀤𑀲 𑀧𑀼𑀕𑁆𑀕𑀮𑀸 ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁦𑁯) 𑀆𑀤𑀺𑀯𑀘𑀦𑀢𑁄 𑀅𑀪𑀩𑁆𑀩𑀸, 𑀦𑁂𑀯 𑀦𑁂𑀲𑀁 𑀧𑀩𑁆𑀩𑀚𑁆𑀚𑀸, 𑀦 𑀉𑀧𑀲𑀫𑁆𑀧𑀤𑀸 𑀘 𑀭𑀼𑀳𑀢𑀺, 𑀢𑀲𑁆𑀫𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀚𑀸𑀦𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁄 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀅𑀚𑀸𑀦𑀺𑀢𑁆𑀯𑀸𑀧𑀺 𑀧𑀩𑁆𑀩𑀸𑀚𑀺𑀢𑀸 𑀉𑀧𑀲𑀫𑁆𑀧𑀸𑀤𑀺𑀢𑀸 𑀘 𑀚𑀸𑀦𑀺𑀢𑁆𑀯𑀸 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑀸.

𑀢𑀢𑁆𑀣 𑀧𑀡𑁆𑀟𑀓𑁄𑀢𑀺 𑀆𑀲𑀺𑀢𑁆𑀢𑀧𑀡𑁆𑀟𑀓𑁄 𑀉𑀲𑀽𑀬𑀧𑀡𑁆𑀟𑀓𑁄 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄 𑀧𑀓𑁆𑀔𑀧𑀡𑁆𑀟𑀓𑁄 𑀦𑀧𑀼𑀁𑀲𑀓𑀧𑀡𑁆𑀟𑀓𑁄𑀢𑀺 𑀧𑀜𑁆𑀘 𑀧𑀡𑁆𑀟𑀓𑀸. 𑀢𑁂𑀲𑀼 𑀬𑀲𑁆𑀲 𑀧𑀭𑁂𑀲𑀁 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀅𑀲𑀼𑀘𑀺𑀦𑀸 𑀆𑀲𑀺𑀢𑁆𑀢𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀆𑀲𑀺𑀢𑁆𑀢𑀧𑀡𑁆𑀟𑀓𑁄. 𑀬𑀲𑁆𑀲 𑀧𑀭𑁂𑀲𑀁 𑀅𑀚𑁆𑀛𑀸𑀘𑀸𑀭𑀁 𑀧𑀲𑁆𑀲𑀢𑁄 𑀉𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀉𑀲𑀽𑀬𑀧𑀡𑁆𑀟𑀓𑁄. 𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀺, 𑀅𑀬𑀁 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄. 𑀏𑀓𑀘𑁆𑀘𑁄 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀸𑀯𑁂𑀦 𑀓𑀸𑀴𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀦𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄. 𑀬𑁄 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀅𑀪𑀸𑀯𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀦 𑀧𑀼𑀁𑀲𑀓𑀧𑀡𑁆𑀟𑀓𑁄. 𑀢𑁂𑀲𑀼 𑀆𑀲𑀺𑀢𑁆𑀢𑀧𑀡𑁆𑀟𑀓𑀲𑁆𑀲 𑀘 𑀉𑀲𑀽𑀬𑀧𑀡𑁆𑀟𑀓𑀲𑁆𑀲 𑀘 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀯𑀸𑀭𑀺𑀢𑀸. ‘‘𑀢𑁂𑀲𑀼𑀧𑀺 𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑁧𑁩𑁬. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁬) 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘 𑀉𑀪𑀢𑁄𑀩𑁆𑀬𑀜𑁆𑀚𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄. 𑀲𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺. 𑀢𑀢𑁆𑀣 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀻𑀲𑀼 𑀧𑀼𑀭𑀺𑀲𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀜𑁆𑀘 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀜𑁆𑀘 𑀕𑀡𑁆𑀳𑀸𑀧𑁂𑀢𑀺, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀲𑀬𑀁 𑀦 𑀕𑀡𑁆𑀳𑀸𑀢𑀺, 𑀧𑀭𑀁 𑀧𑀦 𑀕𑀡𑁆𑀳𑀸𑀧𑁂𑀢𑀻𑀢𑀺 𑀇𑀤𑀫𑁂𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀇𑀫𑀲𑁆𑀲 𑀧𑀦 𑀤𑀼𑀯𑀺𑀥𑀲𑁆𑀲𑀧𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀦𑁂𑀯 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀺, 𑀦 𑀉𑀧𑀲𑀫𑁆𑀧𑀤𑀸.

𑁧𑁩𑁭. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀢𑀺 𑀢𑀬𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀉𑀪𑀬𑀢𑁆𑀣𑁂𑀦𑀓𑁄𑀢𑀺. 𑀢𑀢𑁆𑀣 𑀬𑁄 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀦 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀦 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀮𑀺𑀗𑁆𑀕𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀺𑀢𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦𑀸𑀫. 𑀬𑁄 𑀧𑀦 𑀪𑀺𑀓𑁆𑀔𑀽𑀳𑀺 𑀧𑀩𑁆𑀩𑀸𑀚𑀺𑀢𑁄 𑀲𑀸𑀫𑀡𑁂𑀭𑁄 𑀲𑀫𑀸𑀦𑁄 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀁 𑀤𑀲𑀯𑀲𑁆𑀲𑁄 𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀯𑀸’’𑀢𑀺 𑀫𑀼𑀲𑀸 𑀯𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀉𑀧𑁄𑀲𑀣𑀧𑀯𑀆𑀭𑀡𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀲𑀁𑀯𑀸𑀲𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀺𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦𑀸𑀫. 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀓𑀺𑀭𑀺𑀬𑀪𑁂𑀤𑁄 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀲𑀁𑀯𑀸𑀲𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 ‘‘𑀦 𑀫𑀁 𑀓𑁄𑀘𑀺 𑀚𑀸𑀦𑀸𑀢𑀻’’𑀢𑀺 𑀧𑀼𑀦 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀧𑀦 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺, 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀢𑀺, 𑀅𑀬𑀁 𑀮𑀺𑀗𑁆𑀕𑀲𑁆𑀲 𑀘𑁂𑀯 𑀲𑀁𑀯𑀸𑀲𑀲𑁆𑀲 𑀘 𑀣𑁂𑀦𑀺𑀢𑀢𑁆𑀢𑀸 𑀉𑀪𑀬𑀢𑁆𑀣𑁂𑀦𑀓𑁄 𑀦𑀸𑀫. 𑀅𑀬𑀁 𑀢𑀺𑀯𑀺𑀥𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄, 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁩𑁮. 𑀏𑀢𑁆𑀣 𑀘 𑀅𑀲𑀫𑁆𑀫𑁄𑀳𑀢𑁆𑀣𑀁 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀭𑀸𑀚𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭, 𑀭𑁄𑀕𑀯𑁂𑀭𑀺𑀪𑀬𑁂𑀦 𑀯𑀸;

𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀯𑀸, 𑀮𑀺𑀗𑁆𑀕𑀁 𑀆𑀤𑀺𑀬𑀢𑀻𑀥 𑀬𑁄.

‘‘𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄;

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫, 𑀢𑀸𑀯 𑀏𑀲 𑀦 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁧𑁦);

𑀢𑀢𑁆𑀭𑀸𑀬𑀁 𑀯𑀺𑀢𑁆𑀣𑀸𑀭𑀦𑀬𑁄 𑁋 𑀇𑀥𑁂𑀓𑀘𑁆𑀘𑀲𑁆𑀲 𑀭𑀸𑀚𑀸 𑀓𑀼𑀤𑁆𑀥𑁄 𑀳𑁄𑀢𑀺, 𑀲𑁄 ‘‘𑀏𑀯𑀁 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺, 𑀭𑀸𑀚𑀸 ‘‘𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀦 𑀢𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁 𑀓𑁄𑀥𑀁 𑀧𑀝𑀺𑀯𑀺𑀦𑁂𑀢𑀺. 𑀲𑁄 ‘‘𑀯𑀽𑀧𑀲𑀦𑁆𑀢𑀁 𑀫𑁂 𑀭𑀸𑀚𑀪𑀬’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀣𑀸𑀧𑀺 ‘‘𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀫𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀳𑀦𑁆𑀤 𑀤𑀸𑀦𑀺 𑀅𑀳𑀁 𑀧𑀩𑁆𑀩𑀚𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀢𑁂𑀦𑁂𑀯 𑀮𑀺𑀗𑁆𑀕𑁂𑀦 𑀆𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀦 𑀲𑀸𑀤𑀺𑀬𑀢𑀺, 𑀪𑀺𑀓𑁆𑀔𑀽𑀳𑀺 𑀧𑀼𑀝𑁆𑀞𑁄 𑀯𑀸 𑀅𑀧𑀼𑀝𑁆𑀞𑁄 𑀯𑀸 𑀬𑀣𑀸𑀪𑀽𑀢𑀫𑀢𑁆𑀢𑀸𑀦𑀁 𑀆𑀯𑀺𑀓𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺, 𑀮𑀺𑀗𑁆𑀕𑀁 𑀅𑀧𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑁄 𑀯𑀢𑁆𑀢𑀁 𑀲𑀸𑀤𑀺𑀬𑀢𑀺, 𑀧𑀩𑁆𑀩𑀚𑀺𑀢𑀸𑀮𑀬𑀁 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀬𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀇𑀥 𑀧𑀦𑁂𑀓𑀘𑁆𑀘𑁄 𑀤𑀼𑀩𑁆𑀪𑀺𑀓𑁆𑀔𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀤𑀼𑀩𑁆𑀪𑀺𑀓𑁆𑀔𑁂 𑀯𑀻𑀢𑀺𑀯𑀢𑁆𑀢𑁂 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀫𑀳𑀸𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀢𑁆𑀣𑀯𑀸𑀳𑁄 𑀘 𑀧𑀩𑁆𑀩𑀚𑀺𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀲𑁄 ‘‘𑀏𑀯𑀁 𑀫𑀁 𑀲𑀢𑁆𑀣𑀯𑀸𑀳𑁄 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀔𑁂𑀫𑀦𑁆𑀢𑀁 𑀧𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀭𑁄𑀕𑀪𑀬𑁂 𑀉𑀧𑁆𑀧𑀦𑁆𑀦𑁂 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄 𑀭𑁄𑀕𑀪𑀬𑁂 𑀯𑀽𑀧𑀲𑀦𑁆𑀢𑁂 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑀲𑁆𑀲 𑀏𑀓𑁄 𑀯𑁂𑀭𑀺𑀓𑁄 𑀓𑀼𑀤𑁆𑀥𑁄 𑀳𑁄𑀢𑀺, 𑀖𑀸𑀢𑁂𑀢𑀼𑀓𑀸𑀫𑁄 𑀦𑀁 𑀯𑀺𑀘𑀭𑀢𑀺. 𑀲𑁄 ‘‘𑀏𑀯𑀁 𑀫𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀬𑀫𑁂𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀢𑀺. 𑀯𑁂𑀭𑀺𑀓𑁄 ‘‘𑀓𑀼𑀳𑀺𑀁 𑀲𑁄’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸 𑀧𑀮𑀸𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀘𑁂 𑀧𑀩𑁆𑀩𑀚𑀺𑀢𑁄, 𑀦 𑀢𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁 𑀓𑁄𑀥𑀁 𑀧𑀝𑀺𑀯𑀺𑀦𑁂𑀢𑀺. 𑀲𑁄 ‘‘𑀯𑀽𑀧𑀲𑀦𑁆𑀢𑀁 𑀫𑁂 𑀯𑁂𑀭𑀺𑀪𑀬’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀅𑀦𑁄𑀲𑀭𑀺𑀢𑁆𑀯𑀸𑀯 𑀕𑀺𑀳𑀺𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀅𑀧𑀭𑁄 𑀜𑀸𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀻 𑀳𑀼𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀇𑀥 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀘𑁂𑀧𑀺 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀫𑀺𑀲𑁆𑀲𑀸𑀫𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀁 ‘𑀘𑁄𑀭𑁄’𑀢𑀺 𑀕𑀳𑁂𑀲𑁆𑀲𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀓𑀸𑀬𑀧𑀭𑀺𑀳𑀸𑀭𑀺𑀬𑀸𑀦𑀺 𑀓𑀢𑁆𑀯𑀸 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀘𑀻𑀯𑀭𑀸𑀳𑀭𑀡𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀸 𑀘 𑀤𑀳𑀭𑀸 𑀘 𑀅𑀩𑁆𑀪𑀼𑀕𑁆𑀕𑀘𑁆𑀙𑀦𑁆𑀢𑀺, 𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑀺. 𑀲𑁄 𑀦 𑀲𑀸𑀤𑀺𑀬𑀢𑀺, 𑀬𑀣𑀸𑀪𑀽𑀢𑀫𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺. 𑀲𑀘𑁂 𑀪𑀺𑀓𑁆𑀔𑀽 ‘‘𑀦 𑀤𑀸𑀦𑀺 𑀫𑀬𑀁 𑀢𑀁 𑀫𑀼𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀩𑀮𑀓𑁆𑀓𑀸𑀭𑁂𑀦 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀦𑀬𑀺𑀫𑁂 𑀫𑀁 𑀳𑀻𑀦𑀸𑀬𑀸𑀯𑀢𑁆𑀢𑀪𑀸𑀯𑀁 𑀚𑀸𑀦𑀦𑁆𑀢𑀻’’𑀢𑀺 𑀢𑀁𑀬𑁂𑀯 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀬𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑀅𑀧𑀭𑁄 𑀫𑀳𑀸𑀲𑀸𑀫𑀡𑁂𑀭𑁄 𑀜𑀸𑀢𑀺𑀓𑀼𑀮𑀁 𑀕𑀦𑁆𑀢𑁆𑀯𑀸 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦𑁂𑀦 𑀉𑀩𑁆𑀩𑀸𑀴𑁆𑀳𑁄 𑀧𑀼𑀦 ‘‘𑀤𑀸𑀦𑀺 𑀅𑀳𑀁 𑀲𑀸𑀫𑀡𑁂𑀭𑁄 𑀪𑀯𑀺𑀲𑁆𑀲𑀸𑀫𑀺, 𑀣𑁂𑀭𑁄𑀧𑀺 𑀫𑁂 𑀉𑀧𑁆𑀧𑀩𑁆𑀩𑀚𑀺𑀢𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺 𑀢𑀤𑁂𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺, 𑀢𑀫𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀦 𑀆𑀭𑁄𑀘𑁂𑀢𑀺, 𑀲𑀸𑀫𑀡𑁂𑀭𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀅𑀬𑀁 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀬𑁂𑀯, 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀢𑀺. 𑀲𑀘𑁂𑀧𑀺𑀲𑁆𑀲 𑀮𑀺𑀗𑁆𑀕𑀕𑁆𑀕𑀳𑀡𑀓𑀸𑀮𑁂 𑀏𑀯𑀁 𑀳𑁄𑀢𑀺 ‘‘𑀦𑀸𑀳𑀁 𑀓𑀲𑁆𑀲𑀘𑀺 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺, 𑀯𑀺𑀳𑀸𑀭𑀜𑁆𑀘 𑀕𑀢𑁄 𑀆𑀭𑁄𑀘𑁂𑀢𑀺, 𑀕𑀳𑀡𑁂𑀦𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄. 𑀅𑀣𑀸𑀧𑀺𑀲𑁆𑀲 𑀕𑀳𑀡𑀓𑀸𑀮𑁂 ‘‘𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀯𑀺𑀳𑀸𑀭𑀜𑁆𑀘 𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀕𑀢𑁄’’𑀢𑀺 𑀯𑀼𑀢𑁆𑀢𑁄 ‘‘𑀦 𑀤𑀸𑀦𑀺 𑀫𑀁 𑀇𑀫𑁂 𑀚𑀸𑀦𑀦𑁆𑀢𑀻’’𑀢𑀺 𑀯𑀜𑁆𑀘𑁂𑀢𑁆𑀯𑀸 𑀦𑀸𑀘𑀺𑀓𑁆𑀔𑀢𑀺, ‘‘𑀦𑀸𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀲𑀳 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀅𑀬𑀫𑁆𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀯. 𑀲𑀘𑁂 𑀧𑀦𑀲𑁆𑀲 𑀕𑀳𑀡𑀓𑀸𑀮𑁂𑀧𑀺 ‘‘𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀳𑁄𑀢𑀺, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸𑀧𑀺 𑀆𑀘𑀺𑀓𑁆𑀔𑀢𑀺, 𑀅𑀬𑀁 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺.

𑀅𑀧𑀭𑁄 𑀤𑀳𑀭𑀲𑀸𑀫𑀡𑁂𑀭𑁄 𑀫𑀳𑀦𑁆𑀢𑁄 𑀯𑀸 𑀧𑀦 𑀅𑀩𑁆𑀬𑀢𑁆𑀢𑁄. 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀖𑀭𑁂 𑀯𑀘𑁆𑀙𑀓𑀕𑁄𑀭𑀓𑁆𑀔𑀡𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀦 𑀇𑀘𑁆𑀙𑀢𑀺. 𑀢𑀫𑁂𑀦𑀁 𑀜𑀸𑀢𑀓𑀸 𑀢𑀸𑀦𑀺𑀬𑁂𑀯 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀣𑀸𑀮𑀓𑀁 𑀯𑀸 𑀧𑀢𑁆𑀢𑀁 𑀯𑀸 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀕𑀘𑁆𑀙, 𑀲𑀫𑀡𑁄𑀯 𑀳𑁄𑀳𑀻’’𑀢𑀺 𑀖𑀭𑀸 𑀦𑀻𑀳𑀭𑀦𑁆𑀢𑀺. 𑀲𑁄 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺, 𑀦𑁂𑀯 𑀦𑀁 𑀪𑀺𑀓𑁆𑀔𑀽 𑀚𑀸𑀦𑀦𑁆𑀢𑀺 ‘‘𑀅𑀬𑀁 𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀦 𑀲𑀬𑀫𑁂𑀯 𑀧𑀩𑁆𑀩𑀚𑀺𑀢𑁄’’𑀢𑀺, 𑀦𑀸𑀧𑀺 𑀲𑀬𑀁 𑀚𑀸𑀦𑀸𑀢𑀺 ‘‘𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻’’𑀢𑀺. 𑀲𑀘𑁂 𑀧𑀦 𑀢𑀁 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑀘𑁂 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀯𑀢𑁆𑀢𑀫𑀸𑀦𑁂 𑀲𑀼𑀡𑀸𑀢𑀺 ‘‘𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻’’𑀢𑀺, 𑀢𑁂𑀦 ‘‘𑀫𑀬𑀸 𑀏𑀯𑀁 𑀓𑀢’’𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀏𑀯𑀁 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀲𑀘𑁂 𑀧𑀦 ‘‘𑀤𑀸𑀦𑀺 𑀦 𑀫𑀁 𑀓𑁄𑀘𑀺 𑀚𑀸𑀦𑀸𑀢𑀻’’𑀢𑀺 𑀦𑀸𑀭𑁄𑀘𑁂𑀢𑀺, 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂𑀬𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄.

𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀮𑀺𑀗𑁆𑀕𑀁 𑀅𑀦𑀧𑀦𑁂𑀢𑁆𑀯𑀸 𑀤𑀼𑀲𑁆𑀲𑀻𑀮𑀓𑀫𑁆𑀫𑀁 𑀓𑀢𑁆𑀯𑀸 𑀯𑀸 𑀅𑀓𑀢𑁆𑀯𑀸 𑀯𑀸 𑀧𑀼𑀦 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀲𑀮𑀺𑀗𑁆𑀕𑁂 𑀞𑀺𑀢𑁄 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀆𑀧𑀚𑁆𑀚𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀁 𑀮𑀪𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀏𑀓𑁄 𑀪𑀺𑀓𑁆𑀔𑀼 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑁄𑀯 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀼𑀦 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀆𑀧𑀚𑁆𑀚𑀢𑀺, 𑀅𑀬𑀫𑁆𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀁 𑀮𑀪𑀢𑀺. 𑀲𑀘𑁂 𑀧𑀦 𑀓𑀸𑀲𑀸𑀬𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀼𑀦 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀯𑀲𑁆𑀲𑀕𑀡𑀦𑀸𑀤𑀺𑀪𑁂𑀤𑀁 𑀯𑀺𑀥𑀺𑀁 𑀆𑀧𑀚𑁆𑀚𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀲𑀸𑀫𑀡𑁂𑀭𑁄 𑀲𑀮𑀺𑀗𑁆𑀕𑁂 𑀞𑀺𑀢𑁄 𑀫𑁂𑀣𑀼𑀦𑀸𑀤𑀺𑀅𑀲𑁆𑀲𑀫𑀡𑀓𑀭𑀡𑀥𑀫𑁆𑀫𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀲𑀘𑁂𑀧𑀺 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑁄𑀯 𑀓𑀸𑀲𑀸𑀬𑀸𑀦𑀺 𑀅𑀧𑀦𑁂𑀢𑁆𑀯𑀸 𑀫𑁂𑀣𑀼𑀦𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀼𑀦 𑀓𑀸𑀲𑀸𑀬𑀸𑀦𑀺 𑀦𑀺𑀯𑀸𑀲𑁂𑀢𑀺, 𑀦𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀲𑀘𑁂 𑀧𑀦 𑀓𑀸𑀲𑀸𑀬𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑁆𑀕𑁄 𑀯𑀸 𑀑𑀤𑀸𑀢𑀯𑀢𑁆𑀣𑁄 𑀯𑀸 𑀫𑁂𑀣𑀼𑀦𑀲𑁂𑀯𑀦𑀸𑀤𑀻𑀳𑀺 𑀅𑀲𑁆𑀲𑀫𑀡𑁄 𑀳𑀼𑀢𑁆𑀯𑀸 𑀓𑀸𑀲𑀸𑀬𑀁 𑀦𑀺𑀯𑀸𑀲𑁂𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺.

𑀲𑀘𑁂 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀓𑀸𑀲𑀸𑀬𑀁 𑀑𑀯𑀝𑁆𑀝𑀺𑀓𑀁 𑀓𑀢𑁆𑀯𑀸 𑀅𑀜𑁆𑀜𑁂𑀦 𑀯𑀸 𑀆𑀓𑀸𑀭𑁂𑀦 𑀕𑀺𑀳𑀺𑀦𑀺𑀯𑀸𑀲𑀦𑁂𑀦 𑀦𑀺𑀯𑀸𑀲𑁂𑀢𑀺 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀕𑀺𑀳𑀺𑀮𑀺𑀗𑁆𑀕𑀁, 𑀦 𑀲𑁄𑀪𑀢𑀻’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀁, 𑀭𑀓𑁆𑀔𑀢𑀺 𑀢𑀸𑀯. ‘‘𑀲𑁄𑀪𑀢𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀦 𑀧𑀼𑀦 𑀮𑀺𑀗𑁆𑀕𑀁 𑀲𑀸𑀤𑀺𑀬𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀦𑀺𑀯𑀢𑁆𑀣𑀓𑀸𑀲𑀸𑀯𑀲𑁆𑀲 𑀉𑀧𑀭𑀺 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀢𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺 𑀯𑀸, 𑀭𑀓𑁆𑀔𑀢𑀺𑀬𑁂𑀯. 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀧𑀺 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀸 𑀲𑀘𑁂 𑀓𑀸𑀲𑀸𑀬𑀁 𑀕𑀺𑀳𑀺𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑀺 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀕𑀺𑀳𑀺𑀮𑀺𑀗𑁆𑀕𑀁, 𑀦 𑀲𑁄𑀪𑀢𑀻’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀁, 𑀭𑀓𑁆𑀔𑀢𑀺𑀬𑁂𑀯. 𑀲𑀘𑁂 ‘‘𑀲𑁄𑀪𑀢𑀻’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦 𑀭𑀓𑁆𑀔𑀢𑀺. 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀦𑀲𑀫𑁆𑀧𑀝𑀺𑀘𑁆𑀙𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀯𑀢𑁆𑀣𑀓𑀸𑀲𑀸𑀬𑀲𑁆𑀲 𑀧𑀦 𑀉𑀧𑀭𑀺 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀻𑀫𑀁𑀲𑀢𑀼 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀼 𑀯𑀸, 𑀭𑀓𑁆𑀔𑀢𑀺𑀬𑁂𑀯.

𑀲𑀘𑁂 𑀓𑁄𑀘𑀺 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀯𑀲𑁆𑀲𑀸𑀦𑀺 𑀅𑀕𑀡𑁂𑀢𑁆𑀯𑀸 𑀧𑀸𑀴𑀺𑀬𑀫𑁆𑀧𑀺 𑀅𑀝𑁆𑀞𑀢𑁆𑀯𑀸 𑀏𑀓𑀧𑀲𑁆𑀲𑁂𑀦 𑀕𑀦𑁆𑀢𑁆𑀯𑀸 𑀫𑀳𑀸𑀧𑁂𑀴𑀸𑀤𑀻𑀲𑀼 𑀓𑀝𑀘𑁆𑀙𑀼𑀦𑀸 𑀉𑀓𑁆𑀔𑀺𑀢𑁆𑀢𑁂 𑀪𑀢𑁆𑀢𑀧𑀺𑀡𑁆𑀟𑁂 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀲𑁂𑀦𑁄 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀧𑀦 𑀕𑀡𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀲𑀬𑀁 𑀲𑀸𑀫𑀡𑁂𑀭𑁄𑀯 𑀲𑀸𑀫𑀡𑁂𑀭𑀧𑀝𑀺𑀧𑀸𑀝𑀺𑀬𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀧𑀝𑀺𑀧𑀸𑀝𑀺𑀬𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

𑁧𑁩𑁯. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄𑀢𑀺 𑀢𑀺𑀢𑁆𑀣𑀺𑀬𑁂𑀲𑀼 𑀧𑀓𑁆𑀓𑀦𑁆𑀢𑁄 𑀧𑀯𑀺𑀝𑁆𑀞𑁄𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀲𑁄𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀮𑀺𑀗𑁆𑀕𑁂𑀦𑁂𑀯 𑀢𑁂𑀲𑀁 𑀉𑀧𑀲𑁆𑀲𑀬𑀁 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁, 𑀢𑁂𑀲𑀁 𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺. 𑀬𑁄𑀧𑀺 𑀲𑀬𑀫𑁂𑀯 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺𑀬𑁂𑀯. 𑀬𑁄 𑀧𑀦 𑀦𑀕𑁆𑀕𑁄 𑀦𑀳𑀸𑀬𑀦𑁆𑀢𑁄 𑀅𑀢𑁆𑀢𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑁄𑀪𑀢𑀺 𑀫𑁂 𑀆𑀚𑀻𑀯𑀓𑀪𑀸𑀯𑁄, 𑀆𑀚𑀻𑀯𑀓𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀓𑀸𑀲𑀸𑀬𑀸𑀦𑀺 𑀅𑀦𑀸𑀤𑀸𑀬 𑀦𑀕𑁆𑀕𑁄 𑀆𑀚𑀻𑀯𑀓𑀸𑀦𑀁 𑀉𑀧𑀲𑁆𑀲𑀬𑀁 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀓𑀝𑀸𑀦𑀺 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀢𑁂𑀲𑀁 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸𑀧𑀺 𑀢𑁂𑀳𑀺 𑀯𑀸 𑀑𑀯𑀤𑀺𑀢𑁄 𑀅𑀢𑁆𑀢𑀦𑀸 𑀯𑀸 ‘‘𑀇𑀫𑁂𑀲𑀁 𑀧𑀩𑁆𑀩𑀚𑁆𑀚𑀸 𑀅𑀢𑀺𑀤𑀼𑀓𑁆𑀔𑀸’’𑀢𑀺 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄𑀧𑀺 𑀫𑀼𑀘𑁆𑀘𑀢𑀺𑀬𑁂𑀯. 𑀲𑀘𑁂 𑀧𑀦 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬 𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑁂𑀲𑀫𑀲𑁆𑀲𑀼𑀮𑀼𑀜𑁆𑀘𑀦𑀸𑀤𑀻𑀦𑀻’’𑀢𑀺 𑀯𑀼𑀢𑁆𑀢𑁄 𑀏𑀓𑀓𑁂𑀲𑀫𑁆𑀧𑀺 𑀮𑀼𑀜𑁆𑀘𑀸𑀧𑁂𑀢𑀺, 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀦𑀺 𑀯𑀸 𑀯𑀢𑁆𑀢𑀸𑀦𑀺 𑀆𑀤𑀺𑀬𑀢𑀺, 𑀫𑁄𑀭𑀧𑀺𑀜𑁆𑀙𑀸𑀤𑀻𑀦𑀺 𑀯𑀸 𑀦𑀺𑀯𑀸𑀲𑁂𑀢𑀺, 𑀢𑁂𑀲𑀁 𑀮𑀺𑀗𑁆𑀕𑀁 𑀕𑀡𑁆𑀳𑀸𑀢𑀺, ‘‘𑀅𑀬𑀁 𑀧𑀩𑁆𑀩𑀚𑁆𑀚𑀸 𑀲𑁂𑀝𑁆𑀞𑀸’’𑀢𑀺 𑀲𑁂𑀝𑁆𑀞𑀪𑀸𑀯𑀁 𑀯𑀸 𑀉𑀧𑀕𑀘𑁆𑀙𑀢𑀺, 𑀦 𑀫𑀼𑀘𑁆𑀘𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺. 𑀲𑀘𑁂 𑀧𑀦 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀢𑀺𑀢𑁆𑀣𑀺𑀬𑀧𑀩𑁆𑀩𑀚𑁆𑀚𑀸, 𑀦𑀦𑀼 𑀔𑁄 𑀲𑁄𑀪𑀢𑀻’’𑀢𑀺 𑀯𑀻𑀫𑀁𑀲𑀦𑀢𑁆𑀣𑀁 𑀓𑀼𑀲𑀘𑀻𑀭𑀸𑀤𑀻𑀦𑀺 𑀯𑀸 𑀦𑀺𑀯𑀸𑀲𑁂𑀢𑀺, 𑀚𑀝𑀁 𑀯𑀸 𑀩𑀦𑁆𑀥𑀢𑀺, 𑀔𑀸𑀭𑀺𑀓𑀸𑀚𑀁 𑀯𑀸 𑀆𑀤𑀺𑀬𑀢𑀺, 𑀬𑀸𑀯 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺 𑀮𑀤𑁆𑀥𑀺𑀁, 𑀢𑀸𑀯 𑀭𑀓𑁆𑀔𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀧𑀦 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀦𑁆𑀢𑁄 𑀭𑀸𑀚𑀪𑀬𑀸𑀤𑀻𑀳𑀺 𑀯𑀸 𑀢𑀺𑀢𑁆𑀣𑀺𑀬𑀮𑀺𑀗𑁆𑀕𑀁 𑀕𑀡𑁆𑀳𑀦𑁆𑀢𑁄 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀦𑁂𑀯 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺. ‘‘𑀅𑀬𑀜𑁆𑀘 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦𑀸𑀫 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸 𑀓𑀣𑀺𑀢𑁄, 𑀢𑀲𑁆𑀫𑀸 𑀲𑀸𑀫𑀡𑁂𑀭𑁄 𑀲𑀮𑀺𑀗𑁆𑀕𑁂𑀦 𑀢𑀺𑀢𑁆𑀣𑀺𑀬𑀸𑀬𑀢𑀦𑀁 𑀕𑀢𑁄𑀧𑀺 𑀧𑀼𑀦 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀢𑀻’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑁄 𑀧𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀣𑀺𑀢𑁄, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀦𑁆𑀦𑁄 𑀓𑀽𑀝𑀯𑀲𑁆𑀲𑀁 𑀕𑀡𑁂𑀦𑁆𑀢𑁄𑀧𑀺 𑀅𑀲𑁆𑀲𑀫𑀡𑁄 𑀦 𑀳𑁄𑀢𑀺. 𑀮𑀺𑀗𑁆𑀕𑁂 𑀲𑀉𑀲𑁆𑀲𑀸𑀳𑁄 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺.

𑁧𑁪𑁦. 𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀦𑀸𑀕𑁄 𑀯𑀸 𑀳𑁄𑀢𑀼 𑀲𑀼𑀧𑀡𑁆𑀡𑀫𑀸𑀡𑀯𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄 𑀅𑀦𑁆𑀢𑀫𑀲𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀬𑁄, 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀦𑁂𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄𑀧𑀺 𑀦𑀸𑀲𑁂𑀢𑀩𑁆𑀩𑁄.

𑁧𑁪𑁧. 𑀫𑀸𑀢𑀼𑀖𑀸𑀢𑀓𑀸𑀤𑀻𑀲𑀼 𑀧𑀦 𑀬𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀚𑀦𑀺𑀓𑀸 𑀫𑀸𑀢𑀸 𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯 𑀲𑀪𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸, 𑀅𑀬𑀁 𑀆𑀦𑀦𑁆𑀢𑀭𑀺𑀬𑁂𑀦 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑁂𑀦 𑀫𑀸𑀢𑀼𑀖𑀸𑀢𑀓𑁄. 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀬𑁂𑀦 𑀧𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸𑀧𑀺 𑀅𑀚𑀦𑀺𑀓𑀸 𑀧𑁄𑀲𑀸𑀯𑀦𑀺𑀓𑀸 𑀫𑀸𑀢𑀸 𑀯𑀸 𑀘𑀽𑀴𑀫𑀸𑀢𑀸 𑀯𑀸 𑀚𑀦𑀺𑀓𑀸𑀧𑀺 𑀯𑀸 𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀦 𑀘 𑀆𑀦𑀦𑁆𑀢𑀭𑀺𑀓𑁄 𑀳𑁄𑀢𑀺. 𑀬𑁂𑀦 𑀲𑀬𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀲𑁄𑀧𑀺 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂𑀧𑀺 𑀳𑀺 𑀯𑁂𑀲𑀺𑀬𑀸 𑀧𑀼𑀢𑁆𑀢𑁄 𑀳𑁄𑀢𑀺, ‘‘𑀅𑀬𑀁 𑀫𑁂 𑀧𑀺𑀢𑀸’’𑀢𑀺 𑀦 𑀚𑀸𑀦𑀸𑀢𑀺, 𑀬𑀲𑁆𑀲 𑀲𑀫𑁆𑀪𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀲𑁄 𑀘𑁂 𑀅𑀦𑁂𑀦 𑀖𑀸𑀢𑀺𑀢𑁄, 𑀧𑀺𑀢𑀼𑀖𑀸𑀢𑀓𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺.

𑀅𑀭𑀳𑀦𑁆𑀢𑀖𑀸𑀢𑀓𑁄𑀧𑀺 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀚𑀸𑀢𑀺𑀬𑀜𑁆𑀳𑀺 𑀅𑀦𑁆𑀢𑀫𑀲𑁄 𑀅𑀧𑀩𑁆𑀩𑀚𑀺𑀢𑀫𑁆𑀧𑀺 𑀔𑀻𑀡𑀸𑀲𑀯𑀁 𑀤𑀸𑀭𑀓𑀁 𑀯𑀸 𑀤𑀸𑀭𑀺𑀓𑀁 𑀯𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀅𑀭𑀳𑀦𑁆𑀢𑀖𑀸𑀢𑀓𑁄𑀯 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀜𑁆𑀘 𑀨𑀼𑀲𑀢𑀺, 𑀧𑀩𑁆𑀩𑀚𑁆𑀚𑀸 𑀘𑀲𑁆𑀲 𑀯𑀸𑀭𑀺𑀢𑀸. 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀧𑀦 𑀅𑀭𑀳𑀦𑁆𑀢𑀁 𑀫𑀦𑀼𑀲𑁆𑀲𑀚𑀸𑀢𑀺𑀓𑀁 𑀯𑀸 𑀅𑀯𑀲𑁂𑀲𑀁 𑀅𑀭𑀺𑀬𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀧𑀺𑀲𑁆𑀲 𑀦 𑀯𑀸𑀭𑀺𑀢𑀸, 𑀓𑀫𑁆𑀫𑀁 𑀧𑀦 𑀩𑀮𑀯𑀁 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑁄 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑀬𑁄 𑀧𑀦 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀯𑀥𑀓𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀬𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦𑀸𑀫. 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸. 𑀬𑁄 𑀧𑀦 𑀭𑁄𑀕𑀯𑀽𑀧𑀲𑀫𑀢𑁆𑀣𑀁 𑀚𑀻𑀯𑀓𑁄 𑀯𑀺𑀬 𑀲𑀢𑁆𑀣𑁂𑀦 𑀨𑀸𑀮𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀮𑁄𑀳𑀺𑀢𑀁 𑀳𑀭𑀺𑀢𑁆𑀯𑀸 𑀨𑀸𑀲𑀼𑀓𑀁 𑀓𑀭𑁄𑀢𑀺, 𑀩𑀳𑀼𑀁 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀻𑀢𑀺.

𑀬𑁄 𑀤𑁂𑀯𑀤𑀢𑁆𑀢𑁄 𑀯𑀺𑀬 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀢𑁆𑀯𑀸 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀅𑀬𑀁 𑀲𑀗𑁆𑀖𑀪𑁂𑀤𑀓𑁄 𑀦𑀸𑀫. 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸.

𑀬𑁄 𑀧𑀦 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑀽𑀲𑁂𑀢𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀦𑀸𑀫. 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀯𑀸𑀭𑀺𑀢𑀸. 𑀬𑁄 𑀧𑀦 𑀓𑀸𑀬𑀲𑀁𑀲𑀕𑁆𑀕𑁂𑀦 𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑀺, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀯𑀸𑀭𑀺𑀢𑀸. 𑀩𑀮𑀓𑁆𑀓𑀸𑀭𑁂𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀓𑀢𑁆𑀯𑀸 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀤𑀽𑀲𑁂𑀦𑁆𑀢𑁄𑀧𑀺 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄𑀬𑁂𑀯, 𑀩𑀮𑀓𑁆𑀓𑀸𑀭𑁂𑀦 𑀧𑀦 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀓𑀢𑁆𑀯𑀸 𑀇𑀘𑁆𑀙𑀫𑀸𑀦𑀁 𑀤𑀽𑀲𑁂𑀦𑁆𑀢𑁄 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀺𑀳𑀺𑀪𑀸𑀯𑁂 𑀲𑀫𑁆𑀧𑀝𑀺𑀘𑁆𑀙𑀺 𑀢𑀫𑀢𑁆𑀢𑁂𑀬𑁂𑀯 𑀲𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀺. 𑀲𑀓𑀺𑀁𑀲𑀻𑀮𑀯𑀺𑀧𑀦𑁆𑀦𑀁 𑀧𑀘𑁆𑀙𑀸 𑀤𑀽𑀲𑁂𑀦𑁆𑀢𑁄 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀲𑀼 𑀘 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄 𑀦𑁂𑀯 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀉𑀧𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀺. 𑀇𑀢𑀺 𑀇𑀫𑁂 𑀏𑀓𑀸𑀤𑀲 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁨. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑁆𑀲 𑀧𑀦 𑀉𑀧𑀲𑀫𑁆𑀧𑀤𑀸𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀦 𑀧𑀩𑁆𑀩𑀚𑁆𑀚𑀸, 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀕𑀩𑁆𑀪𑀯𑀻𑀲𑁄𑀧𑀺 𑀳𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀬𑀣𑀸𑀳 𑀪𑀕𑀯𑀸 𑁋

‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀢𑀤𑀼𑀧𑀸𑀤𑀸𑀬 𑀲𑀸𑀯𑀲𑁆𑀲 𑀚𑀸𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀩𑁆𑀪𑀯𑀻𑀲𑀁 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁪).

𑀢𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁪𑁦𑁪) 𑀬𑁄 𑀤𑁆𑀯𑀸𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀚𑀸𑀢𑁄, 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀽𑀦𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀫𑀳𑀸𑀧𑀯𑀸𑀭𑀡𑀸, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀸𑀝𑀺𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀳𑀸𑀬𑀦𑀯𑀟𑁆𑀠𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁 𑀲𑀸𑀫𑀡𑁂𑀭𑀁 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀓𑀲𑁆𑀫𑀸? 𑀏𑀓𑀲𑁆𑀫𑀺𑀁 𑀯𑀲𑁆𑀲𑁂 𑀙 𑀘𑀸𑀢𑀼𑀤𑁆𑀤𑀲𑀺𑀓𑀉𑀧𑁄𑀲𑀣𑀸 𑀳𑁄𑀦𑁆𑀢𑀺, 𑀇𑀢𑀺 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀭𑀸𑀚𑀸𑀦𑁄 𑀢𑀢𑀺𑀬𑁂 𑀢𑀢𑀺𑀬𑁂 𑀕𑀲𑁆𑀲𑁂 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀦𑁆𑀢𑀺, 𑀇𑀢𑀺 𑀅𑀝𑁆𑀞𑀸𑀭𑀲𑀯𑀲𑁆𑀲𑁂𑀲𑀼 𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀺, 𑀢𑀢𑁄 𑀉𑀧𑁄𑀲𑀣𑀯𑀲𑁂𑀦 𑀧𑀭𑀺𑀳𑀻𑀦𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀧𑀦𑁂𑀢𑁆𑀯𑀸 𑀤𑁆𑀯𑁂 𑀫𑀸𑀲𑀸 𑀅𑀯𑀲𑁂𑀲𑀸 𑀳𑁄𑀦𑁆𑀢𑀺, 𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺.

𑀏𑀢𑁆𑀣 𑀧𑀦 𑀬𑁄 𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀤𑁆𑀯𑀸𑀤𑀲 𑀫𑀸𑀲𑁂 𑀯𑀲𑀺, 𑀲𑁄 𑀏𑀓𑀯𑀻𑀲𑀢𑀺𑀯𑀲𑁆𑀲𑁄 𑀳𑁄𑀢𑀺. 𑀬𑁄 𑀲𑀢𑁆𑀢 𑀫𑀸𑀲𑁂 𑀯𑀲𑀺, 𑀲𑁄 𑀲𑀢𑁆𑀢𑀫𑀸𑀲𑀸𑀥𑀺𑀓𑀯𑀻𑀲𑀢𑀺𑀯𑀲𑁆𑀲𑁄. 𑀙𑀫𑀸𑀲𑀚𑀸𑀢𑁄 𑀧𑀦 𑀦 𑀚𑀻𑀯𑀢𑀺, 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀦 ‘‘𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄’’𑀢𑀺 𑀲𑀜𑁆𑀜𑀸𑀬 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀧𑀼𑀕𑁆𑀕𑀮𑁄 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀜𑁆𑀘𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁄 𑀧𑀽𑀭𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑁄𑀧𑀺 𑀘 𑀬𑀸𑀯 𑀦 𑀚𑀸𑀦𑀸𑀢𑀺, 𑀢𑀸𑀯𑀲𑁆𑀲 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑁄 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑁄, 𑀜𑀢𑁆𑀯𑀸 𑀧𑀦 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩𑀁.

𑁧𑁪𑁩. 𑀇𑀢𑀺 𑀇𑀫𑁂𑀳𑀺 𑀧𑀩𑁆𑀩𑀚𑁆𑀚𑀸𑀤𑁄𑀲𑁂𑀳𑀺 𑀯𑀺𑀭𑀳𑀺𑀢𑁄𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀜𑁆𑀜𑀸𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁦𑁫) 𑀯𑀘𑀦𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁦𑁫) 𑀫𑀸𑀢𑀸𑀧𑀺𑀢𑀽𑀳𑀻𑀢𑀺 𑀚𑀦𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀤𑁆𑀯𑁂𑀧𑀺 𑀅𑀢𑁆𑀣𑀺, 𑀤𑁆𑀯𑁂𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀸. 𑀲𑀘𑁂 𑀧𑀺𑀢𑀸 𑀫𑀢𑁄 𑀳𑁄𑀢𑀺 𑀫𑀸𑀢𑀸 𑀯𑀸, 𑀬𑁄 𑀚𑀻𑀯𑀢𑀺, 𑀲𑁄 𑀆𑀧𑀼𑀘𑁆𑀙𑀺 𑀢𑀩𑁆𑀩𑁄, 𑀧𑀩𑁆𑀩𑀚𑀺𑀢𑀸𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀸𑀯. 𑀆𑀧𑀼𑀘𑁆𑀙𑀦𑁆𑀢𑁂𑀦 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑁄 𑀯𑀸 𑀧𑁂𑀲𑁂𑀢𑀩𑁆𑀩𑁄. 𑀲𑁄 𑀏𑀯 𑀯𑀸 𑀧𑁂𑀲𑁂𑀢𑀩𑁆𑀩𑁄 ‘‘𑀕𑀘𑁆𑀙 𑀫𑀸𑀢𑀸𑀧𑀺𑀢𑀭𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀏𑀳𑀻’’𑀢𑀺. 𑀲𑀘𑁂 ‘‘𑀅𑀦𑀼𑀜𑁆𑀜𑀸𑀢𑁄𑀫𑁆𑀳𑀻’’𑀢𑀺 𑀯𑀤𑀢𑀺, 𑀲𑀤𑁆𑀤𑀳𑀦𑁆𑀢𑁂𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀧𑀺𑀢𑀸 𑀲𑀬𑀁 𑀧𑀩𑁆𑀩𑀚𑀺𑀢𑁄 𑀧𑀼𑀢𑁆𑀢𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀫𑀸𑀢𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼. 𑀫𑀸𑀢𑀸 𑀯𑀸 𑀥𑀻𑀢𑀭𑀁 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑀸 𑀧𑀺𑀢𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀢𑀼. 𑀧𑀺𑀢𑀸 𑀧𑀼𑀢𑁆𑀢𑀤𑀸𑀭𑁂𑀦 𑀅𑀦𑀢𑁆𑀣𑀺𑀓𑁄 𑀧𑀮𑀸𑀬𑀺, 𑀫𑀸𑀢𑀸 ‘‘𑀇𑀫𑀁 𑀧𑀩𑁆𑀩𑀚𑁂𑀣𑀸’’𑀢𑀺 𑀧𑀼𑀢𑁆𑀢𑀁 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺, ‘‘𑀧𑀺𑀢𑀸𑀲𑁆𑀲 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀘𑀺𑀢𑁆𑀢𑀓𑁂𑀴𑀺𑀁 𑀓𑀻𑀴𑀺𑀢𑀼𑀁 𑀧𑀮𑀸𑀢𑁄’’𑀢𑀺 𑀯𑀤𑀢𑀺, 𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀸𑀢𑀸 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀧𑀮𑀸𑀢𑀸 𑀳𑁄𑀢𑀺, 𑀧𑀺𑀢𑀸 𑀧𑀦 ‘‘𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀯𑀤𑀢𑀺, 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀺𑀢𑀸 𑀯𑀺𑀧𑁆𑀧𑀯𑀼𑀢𑁆𑀣𑁄 𑀳𑁄𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁 ‘‘𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀅𑀦𑀼𑀚𑀸𑀦𑀸𑀢𑀺, ‘‘𑀧𑀺𑀢𑀸𑀲𑁆𑀲 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀧𑀺𑀢𑀭𑀸, 𑀅𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁.

𑀫𑀸𑀢𑀸𑀧𑀺𑀢𑀭𑁄 𑀫𑀢𑀸, 𑀤𑀸𑀭𑀓𑁄 𑀘𑀽𑀴𑀫𑀸𑀢𑀸𑀤𑀻𑀦𑀁 𑀲𑀦𑁆𑀢𑀺𑀓𑁂 𑀲𑀁𑀯𑀤𑁆𑀥𑁄, 𑀢𑀲𑁆𑀫𑀺𑀁 𑀧𑀩𑁆𑀩𑀸𑀚𑀺𑀬𑀫𑀸𑀦𑁂 𑀜𑀸𑀢𑀓𑀸 𑀓𑀮𑀳𑀁 𑀯𑀸 𑀓𑀭𑁄𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀸, 𑀢𑀲𑁆𑀫𑀸 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀤𑀳𑀭𑀓𑀸𑀮𑁂 𑀕𑀳𑁂𑀢𑁆𑀯𑀸 𑀧𑁄𑀲𑀓𑀸 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀢𑁆𑀢𑁄 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀢𑀺, 𑀦 𑀫𑀸𑀢𑀸𑀧𑀺𑀢𑀭𑁄. 𑀲𑀘𑁂𑀧𑀺 𑀭𑀸𑀚𑀸 𑀳𑁄𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀼𑀜𑁆𑀜𑀸𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀼𑀦 𑀯𑀺𑀩𑁆𑀪𑀫𑀢𑀺, 𑀲𑀘𑁂𑀧𑀺 𑀲𑀢𑀓𑁆𑀔𑀢𑁆𑀢𑀼𑀁 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀩𑁆𑀪𑀫𑀢𑀺, 𑀆𑀕𑀢𑀸𑀕𑀢𑀓𑀸𑀮𑁂 𑀧𑀼𑀦𑀧𑁆𑀧𑀼𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂𑀧𑀺 𑀏𑀯𑀁 𑀯𑀤𑀦𑁆𑀢𑀺 ‘‘𑀅𑀬𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑁂𑀳𑀁 𑀆𑀕𑀢𑁄, 𑀅𑀫𑁆𑀳𑀸𑀓𑀁 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀢𑁆𑀢𑀁 𑀦 𑀧𑀽𑀭𑁂𑀢𑀺, 𑀦𑀢𑁆𑀣𑀺 𑀇𑀫𑀲𑁆𑀲 𑀆𑀧𑀼𑀘𑁆𑀙𑀦𑀓𑀺𑀘𑁆𑀘𑀁, 𑀆𑀕𑀢𑀸𑀕𑀢𑀁 𑀦𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀣𑀸’’𑀢𑀺, 𑀏𑀯𑀁 𑀦𑀺𑀲𑁆𑀲𑀝𑁆𑀞𑀁 𑀧𑀼𑀦 𑀅𑀦𑀸𑀧𑀼𑀘𑁆𑀙𑀸𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑀬𑁄𑀧𑀺 𑀤𑀳𑀭𑀓𑀸𑀮𑁂𑀬𑁂𑀯 ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁 𑀤𑀺𑀦𑁆𑀦𑁄, 𑀬𑀤𑀸 𑀇𑀘𑁆𑀙𑀣, 𑀢𑀤𑀸 𑀧𑀩𑁆𑀩𑀸𑀚𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀤𑀺𑀦𑁆𑀦𑁄 𑀳𑁄𑀢𑀺, 𑀲𑁄𑀧𑀺 𑀆𑀕𑀢𑀸𑀕𑀢𑁄 𑀧𑀼𑀦 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑀁 𑀧𑀦 𑀤𑀳𑀭𑀓𑀸𑀮𑁂𑀬𑁂𑀯 ‘‘𑀇𑀫𑀁, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀬𑁆𑀬𑀸𑀣𑀸’’𑀢𑀺 𑀅𑀦𑀼𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀓𑀸𑀮𑁂 𑀦𑀸𑀦𑀼𑀚𑀸𑀦𑀦𑁆𑀢𑀺, 𑀅𑀬𑀁 𑀦 𑀅𑀦𑀸𑀧𑀼𑀘𑁆𑀙𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀏𑀓𑁄 𑀫𑀸𑀢𑀸𑀧𑀺𑀢𑀽𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫’’𑀦𑁆𑀢𑀺 𑀆𑀕𑀘𑁆𑀙𑀢𑀺, ‘‘𑀆𑀧𑀼𑀘𑁆𑀙𑀺𑀢𑁆𑀯𑀸 𑀏𑀳𑀻’’𑀢𑀺 𑀘 𑀯𑀼𑀢𑁆𑀢𑁄 ‘‘𑀦𑀸𑀳𑀁 𑀕𑀘𑁆𑀙𑀸𑀫𑀺, 𑀲𑀘𑁂 𑀫𑀁 𑀦 𑀧𑀩𑁆𑀩𑀸𑀚𑁂𑀣, 𑀯𑀺𑀳𑀸𑀭𑀁 𑀯𑀸 𑀛𑀸𑀧𑁂𑀫𑀺, 𑀲𑀢𑁆𑀣𑁂𑀦 𑀯𑀸 𑀢𑀼𑀫𑁆𑀳𑁂 𑀧𑀳𑀭𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀜𑀸𑀢𑀓𑀸𑀦𑀁 𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀯𑀸 𑀆𑀭𑀸𑀫𑀘𑁆𑀙𑁂𑀤𑀦𑀸𑀤𑀻𑀳𑀺 𑀅𑀦𑀢𑁆𑀣𑀁 𑀉𑀧𑁆𑀧𑀸𑀤𑁂𑀫𑀺, 𑀭𑀼𑀓𑁆𑀔𑀸 𑀯𑀸 𑀧𑀢𑀺𑀢𑁆𑀯𑀸 𑀫𑀭𑀸𑀫𑀺, 𑀘𑁄𑀭𑀫𑀚𑁆𑀛𑀁 𑀯𑀸 𑀧𑀯𑀺𑀲𑀸𑀫𑀺, 𑀤𑁂𑀲𑀦𑁆𑀢𑀭𑀁 𑀯𑀸 𑀕𑀘𑁆𑀙𑀸𑀫𑀻’’𑀢𑀺 𑀯𑀤𑀢𑀺, 𑀢𑀁 𑀢𑀲𑁆𑀲𑁂𑀯 𑀭𑀓𑁆𑀔𑀡𑀢𑁆𑀣𑀸𑀬 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀲𑁆𑀫𑀸 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑀬𑀺𑀢𑁆𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀭𑀓𑁆𑀔𑀡𑀢𑁆𑀣𑀸𑀬 𑀦𑀁 𑀧𑀩𑁆𑀩𑀸𑀚𑀬𑀺𑀫𑁆𑀳, 𑀧𑀜𑁆𑀜𑀸𑀬𑀣 𑀢𑀼𑀫𑁆𑀳𑁂 𑀧𑀼𑀢𑁆𑀢𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀸. ‘‘𑀭𑀼𑀓𑁆𑀔𑀸 𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀦 𑀳𑀢𑁆𑀣𑀧𑀸𑀤𑁂 𑀫𑀼𑀜𑁆𑀘𑀦𑁆𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀏𑀓𑁄 𑀯𑀺𑀤𑁂𑀲𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀢𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑁂 𑀕𑀢𑁄, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀦𑁄 𑀘𑁂, 𑀤𑀳𑀭𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀢𑀺𑀤𑀽𑀭𑀜𑁆𑀘𑁂 𑀳𑁄𑀢𑀺, 𑀧𑀩𑁆𑀩𑀸𑀚𑁂𑀢𑁆𑀯𑀸𑀧𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀘𑁂 𑀤𑀽𑀭𑀁 𑀳𑁄𑀢𑀺, 𑀫𑀕𑁆𑀕𑁄 𑀘 𑀫𑀳𑀸𑀓𑀦𑁆𑀢𑀸𑀭𑁄, ‘𑀕𑀦𑁆𑀢𑁆𑀯𑀸 𑀆𑀧𑀼𑀘𑁆𑀙𑀺𑀲𑁆𑀲𑀸𑀫𑀻’𑀢𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀘𑁂 𑀧𑀦 𑀫𑀸𑀢𑀸𑀧𑀺𑀢𑀽𑀦𑀁 𑀩𑀳𑀽 𑀧𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀏𑀯𑀜𑁆𑀘 𑀯𑀤𑀦𑁆𑀢𑀺 ‘‘𑀪𑀦𑁆𑀢𑁂, 𑀏𑀢𑁂𑀲𑀁 𑀤𑀸𑀭𑀓𑀸𑀦𑀁 𑀬𑀁 𑀇𑀘𑁆𑀙𑀣, 𑀢𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀣𑀸’’𑀢𑀺, 𑀤𑀸𑀭𑀓𑁂 𑀯𑀻𑀫𑀁𑀲𑀺𑀢𑁆𑀯𑀸 𑀬𑀁 𑀇𑀘𑁆𑀙𑀢𑀺, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂𑀧𑀺 𑀲𑀓𑀮𑁂𑀦 𑀓𑀼𑀮𑁂𑀦 𑀯𑀸 𑀕𑀸𑀫𑁂𑀦 𑀯𑀸 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀺 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀯𑀸 𑀕𑀸𑀫𑁂 𑀯𑀸 𑀬𑀁 𑀇𑀘𑁆𑀙𑀣, 𑀢𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀣𑀸’’𑀢𑀺, 𑀬𑀁 𑀇𑀘𑁆𑀙𑀢𑀺, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺.

𑁧𑁪𑁪. 𑀏𑀯𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪) 𑀧𑀩𑁆𑀩𑀚𑁆𑀚𑀸𑀤𑁄𑀲𑀯𑀺𑀭𑀳𑀺𑀢𑀁 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀼𑀜𑁆𑀜𑀸𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑁂𑀦𑀧𑀺 𑀘 𑀲𑀘𑁂 𑀅𑀘𑁆𑀙𑀺𑀦𑁆𑀦𑀓𑁂𑀲𑁄 𑀳𑁄𑀢𑀺, 𑀏𑀓𑀲𑀻𑀫𑀸𑀬𑀜𑁆𑀘 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀓𑁂𑀲𑀘𑁆𑀙𑁂𑀤𑀦𑀢𑁆𑀣𑀸𑀬 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀆𑀧𑀼𑀘𑁆𑀙𑀦𑀯𑀺𑀥𑀺 (𑀫𑀳𑀸𑀯. 𑀅𑀝𑁆𑀞. 𑁯𑁮) 𑁋 𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀢𑀢𑁆𑀣 𑀦𑁂𑀢𑁆𑀯𑀸 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀲𑀓𑀺𑀁 𑀯𑀸 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀣 𑀘 ‘‘𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺𑀧𑀺 ‘‘𑀇𑀫𑀲𑁆𑀲 𑀲𑀫𑀡𑀓𑀭𑀡𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺𑀧𑀺 ‘‘𑀅𑀬𑀁 𑀲𑀫𑀡𑁄 𑀳𑁄𑀢𑀼𑀓𑀸𑀫𑁄’’𑀢𑀺𑀧𑀺 ‘‘𑀅𑀬𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀲𑀪𑀸𑀕𑀝𑁆𑀞𑀸𑀦𑀁 𑀳𑁄𑀢𑀺, 𑀤𑀲 𑀯𑀸 𑀯𑀻𑀲𑀢𑀺 𑀯𑀸 𑀢𑀺𑀁𑀲𑀁 𑀯𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀢𑁂𑀲𑀁 𑀞𑀺𑀢𑁄𑀓𑀸𑀲𑀁 𑀯𑀸 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀯𑀸 𑀕𑀦𑁆𑀢𑁆𑀯𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀯𑀺𑀦𑀸𑀯 𑀤𑀳𑀭𑀪𑀺𑀓𑁆𑀔𑀽 𑀯𑀸 𑀲𑀸𑀫𑀡𑁂𑀭𑁂 𑀯𑀸 𑀧𑁂𑀲𑁂𑀢𑁆𑀯𑀸𑀧𑀺 ‘‘𑀏𑀓𑁄, 𑀪𑀦𑁆𑀢𑁂, 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀅𑀢𑁆𑀣𑀺, 𑀢𑀲𑁆𑀲 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀧𑀼𑀘𑁆𑀙𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀓𑁂𑀘𑀺 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀯𑀸 𑀕𑀼𑀫𑁆𑀩𑀸𑀤𑀻𑀦𑀺 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀺 𑀯𑀸 𑀲𑀫𑀡𑀥𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀺, 𑀆𑀧𑀼𑀘𑁆𑀙𑀓𑀸 𑀘 𑀧𑀭𑀺𑀬𑁂𑀲𑀦𑁆𑀢𑀸𑀧𑀺 𑀅𑀤𑀺𑀲𑁆𑀯𑀸 ‘‘𑀲𑀩𑁆𑀩𑁂 𑀆𑀧𑀼𑀘𑁆𑀙𑀺𑀢𑀸 𑀅𑀫𑁆𑀳𑁂𑀳𑀻’’𑀢𑀺 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀮𑀳𑀼𑀓𑀓𑀫𑁆𑀫𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀲𑀼𑀧𑀩𑁆𑀩𑀚𑀺𑀢𑁄, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺.

𑀲𑀘𑁂 𑀧𑀦 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺 𑀅𑀦𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀯𑀸𑀲𑁄, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑀼𑀫𑁆𑀧𑀺 𑀤𑀼𑀓𑁆𑀓𑀭𑀁, 𑀧𑀕𑁂𑀯 𑀧𑀝𑀺𑀧𑀸𑀝𑀺𑀬𑀸 𑀆𑀧𑀼𑀘𑁆𑀙𑀺𑀢𑀼𑀁, 𑀔𑀡𑁆𑀟𑀲𑀻𑀫𑀸𑀬 𑀯𑀸 𑀞𑀢𑁆𑀯𑀸 𑀦𑀤𑀻𑀲𑀫𑀼𑀤𑁆𑀤𑀸𑀤𑀻𑀦𑀺 𑀯𑀸 𑀕𑀦𑁆𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀬𑁄 𑀧𑀦 𑀦𑀯𑀫𑀼𑀡𑁆𑀟𑁄 𑀯𑀸 𑀳𑁄𑀢𑀺 𑀯𑀺𑀩𑁆𑀪𑀦𑁆𑀢𑀓𑁄 𑀯𑀸 𑀦𑀺𑀕𑀡𑁆𑀞𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀯𑀸 𑀤𑁆𑀯𑀗𑁆𑀕𑀼𑀮𑀓𑁂𑀲𑁄 𑀯𑀸 𑀊𑀦𑀤𑁆𑀯𑀗𑁆𑀕𑀼𑀮𑀓𑁂𑀲𑁄 𑀯𑀸, 𑀢𑀲𑁆𑀲 𑀓𑁂𑀲𑀘𑁆𑀙𑁂𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑀡𑁆𑀟𑀼𑀓𑀫𑁆𑀫𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑀸𑀤𑀺𑀲𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀤𑁆𑀯𑀗𑁆𑀕𑀼𑀮𑀸𑀢𑀺𑀭𑀺𑀢𑁆𑀢𑀓𑁂𑀲𑁄 𑀧𑀦 𑀬𑁄 𑀳𑁄𑀢𑀺 𑀅𑀦𑁆𑀢𑀫𑀲𑁄 𑀏𑀓𑀲𑀺𑀔𑀸𑀫𑀢𑁆𑀢𑀥𑀭𑁄𑀧𑀺, 𑀲𑁄 𑀪𑀡𑁆𑀟𑀼𑀓𑀫𑁆𑀫𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄.

𑁧𑁪𑁫. 𑀏𑀯𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀘 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀢𑀲𑁆𑀲 𑀦𑀢𑁆𑀣𑀺, 𑀬𑀸𑀘𑀺𑀢𑀓𑁂𑀦𑀧𑀺 𑀧𑀢𑁆𑀢𑀘𑀻𑀯𑀭𑁂𑀦 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀪𑀸𑀕𑀝𑁆𑀞𑀸𑀦𑁂 𑀯𑀺𑀲𑁆𑀲𑀸𑀲𑁂𑀦 𑀕𑀳𑁂𑀢𑁆𑀯𑀸𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 (𑀫𑀳𑀸𑀯. 𑀅𑀝𑁆𑀞. 𑁧𑁧𑁮) 𑀧𑀦 𑀅𑀧𑀓𑁆𑀓𑀁 𑀧𑀢𑁆𑀢𑀁 𑀘𑀻𑀯𑀭𑀽𑀧𑀕𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀳𑁄𑀢𑀺, 𑀬𑀸𑀯 𑀧𑀢𑁆𑀢𑁄 𑀧𑀘𑁆𑀘𑀢𑀺, 𑀘𑀻𑀯𑀭𑀸𑀦𑀺 𑀘 𑀓𑀭𑀻𑀬𑀦𑁆𑀢𑀺, 𑀢𑀸𑀯 𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀣𑀸𑀮𑀓𑁂𑀲𑀼 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀡𑁂𑀭𑀪𑀸𑀕𑀲𑀫𑀓𑁄 𑀆𑀫𑀺𑀲𑀪𑀸𑀕𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀦 𑀲𑀮𑀸𑀓𑀪𑀢𑁆𑀢𑀉𑀤𑁆𑀤𑁂𑀲𑀪𑀢𑁆𑀢𑀦𑀺𑀫𑀦𑁆𑀢𑀦𑀸𑀤𑀻𑀦𑀺 𑀘 𑀦 𑀯𑀝𑁆𑀝𑀦𑁆𑀢𑀺. 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀲𑀸𑀫𑀡𑁂𑀭𑀪𑀸𑀕𑀲𑀫𑁄 𑀢𑁂𑀮𑀢𑀡𑁆𑀟𑀼𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀪𑁂𑀲𑀚𑁆𑀚𑀪𑀸𑀕𑁄 𑀯𑀝𑁆𑀝𑀢𑀺. 𑀲𑀘𑁂 𑀕𑀺𑀮𑀸𑀦𑁄 𑀳𑁄𑀢𑀺, 𑀪𑁂𑀲𑀚𑁆𑀚𑀫𑀲𑁆𑀲 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀲𑀸𑀫𑀡𑁂𑀭𑀲𑁆𑀲 𑀯𑀺𑀬 𑀲𑀩𑁆𑀩𑀁 𑀧𑀝𑀺𑀚𑀕𑁆𑀕𑀦𑀓𑀫𑁆𑀫𑀁. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀁 𑀧𑀦 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀬𑀸𑀘𑀺𑀢𑀓𑁂𑀦 𑀧𑀢𑁆𑀢𑀘𑀻𑀯𑀭𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁧𑁮) 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑁄 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄𑀬𑁂𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀘𑁂 𑀢𑀲𑁆𑀲 𑀦𑀢𑁆𑀣𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘𑀲𑁆𑀲 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀪𑀺𑀓𑁆𑀔𑀽 𑀦𑀺𑀭𑀧𑁂𑀓𑁆𑀔𑁂𑀳𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢𑀘𑀻𑀯𑀭𑀁 𑀤𑀸𑀢𑀩𑁆𑀩𑀁. 𑀬𑀸𑀘𑀺𑀢𑀓𑁂𑀦 𑀧𑀦 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀺.

𑁧𑁪𑁬. 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪) 𑀧𑀩𑁆𑀩𑀸𑀚𑁂𑀦𑁆𑀢𑁂𑀦𑀧𑀺 𑀲𑀘𑁂 𑀑𑀓𑀸𑀲𑁄 𑀳𑁄𑀢𑀺, 𑀲𑀬𑀁 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀲𑀘𑁂 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀩𑁆𑀬𑀸𑀯𑀝𑁄 𑀳𑁄𑀢𑀺, 𑀑𑀓𑀸𑀲𑀁 𑀦 𑀮𑀪𑀢𑀺, 𑀏𑀓𑁄 𑀤𑀳𑀭𑀪𑀺𑀓𑁆𑀔𑀼 𑀯𑀢𑁆𑀢𑀩𑁆𑀩𑁄 ‘‘𑀏𑀢𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. 𑀅𑀯𑀼𑀢𑁆𑀢𑁄𑀧𑀺 𑀘𑁂 𑀤𑀳𑀭𑀪𑀺𑀓𑁆𑀔𑀼 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀤𑀳𑀭𑀪𑀺𑀓𑁆𑀔𑀼 𑀦𑀢𑁆𑀣𑀺, 𑀲𑀸𑀫𑀡𑁂𑀭𑁄𑀧𑀺 𑀯𑀢𑁆𑀢𑀩𑁆𑀩𑁄 ‘‘𑀏𑀢𑀁 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀏𑀳𑀻’’𑀢𑀺. 𑀲𑀭𑀡𑀸𑀦𑀺 𑀧𑀦 𑀲𑀬𑀁 𑀤𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀪𑀺𑀓𑁆𑀔𑀼𑀦𑀸𑀯 𑀧𑀩𑁆𑀩𑀸𑀚𑀺𑀢𑁄 𑀳𑁄𑀢𑀺. 𑀧𑀼𑀭𑀺𑀲𑀜𑁆𑀳𑀺 𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁄 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀮𑀪𑀢𑀺, 𑀫𑀸𑀢𑀼𑀕𑀸𑀫𑀁 𑀪𑀺𑀓𑁆𑀔𑀼𑀦𑀻𑀢𑁄 𑀅𑀜𑁆𑀜𑁄, 𑀲𑀸𑀫𑀡𑁂𑀭𑁄 𑀧𑀦 𑀲𑀸𑀫𑀡𑁂𑀭𑀻 𑀯𑀸 𑀆𑀡𑀢𑁆𑀢𑀺𑀬𑀸 𑀓𑀸𑀲𑀸𑀬𑀸𑀦𑀺 𑀤𑀸𑀢𑀼𑀁 𑀮𑀪𑀦𑁆𑀢𑀺, 𑀓𑁂𑀲𑁄𑀭𑁄𑀧𑀦𑀁 𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀲𑀼𑀓𑀢𑀁.

𑀲𑀘𑁂 𑀧𑀦 𑀪𑀩𑁆𑀩𑀭𑀽𑀧𑁄 𑀳𑁄𑀢𑀺 𑀲𑀳𑁂𑀢𑀼𑀓𑁄 𑀜𑀸𑀢𑁄 𑀬𑀲𑀲𑁆𑀲𑀻 𑀓𑀼𑀮𑀧𑀼𑀢𑁆𑀢𑁄, 𑀑𑀓𑀸𑀲𑀁 𑀓𑀢𑁆𑀯𑀸𑀧𑀺 𑀲𑀬𑀫𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, ‘‘𑀫𑀢𑁆𑀢𑀺𑀓𑀸𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀆𑀕𑀘𑁆𑀙𑀸𑀳𑀻’’𑀢𑀺 𑀘 𑀦 𑀧𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄. 𑀧𑀩𑁆𑀩𑀚𑀺𑀢𑀼𑀓𑀸𑀫𑀸𑀦𑀜𑁆𑀳𑀺 𑀧𑀞𑀫𑀁 𑀩𑀮𑀯𑀉𑀲𑁆𑀲𑀸𑀳𑁄 𑀳𑁄𑀢𑀺, 𑀧𑀘𑁆𑀙𑀸 𑀧𑀦 𑀓𑀸𑀲𑀸𑀬𑀸𑀦𑀺 𑀘 𑀓𑁂𑀲𑀳𑀭𑀡𑀲𑀢𑁆𑀣𑀓𑀜𑁆𑀘 𑀤𑀺𑀲𑁆𑀯𑀸 𑀉𑀢𑁆𑀭𑀲𑀦𑁆𑀢𑀺, 𑀏𑀢𑁆𑀢𑁄𑀬𑁂𑀯 𑀧𑀮𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀲𑀬𑀫𑁂𑀯 𑀦𑀳𑀸𑀦𑀢𑀺𑀢𑁆𑀣𑀁 𑀦𑁂𑀢𑁆𑀯𑀸 𑀲𑀘𑁂 𑀦𑀸𑀢𑀺𑀤𑀳𑀭𑁄, ‘‘𑀦𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀓𑁂𑀲𑀸 𑀧𑀦𑀲𑁆𑀲 𑀲𑀬𑀫𑁂𑀯 𑀫𑀢𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀥𑁄𑀯𑀺𑀢𑀩𑁆𑀩𑀸. 𑀤𑀳𑀭𑀓𑀼𑀫𑀸𑀭𑀓𑁄 𑀧𑀦 𑀲𑀬𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀕𑁄𑀫𑀬𑀫𑀢𑁆𑀢𑀺𑀓𑀸𑀳𑀺 𑀖𑀁𑀲𑀺𑀢𑁆𑀯𑀸 𑀦𑀳𑀸𑀧𑁂𑀢𑀩𑁆𑀩𑁄. 𑀲𑀘𑁂𑀧𑀺𑀲𑁆𑀲 𑀓𑀘𑁆𑀙𑀼 𑀯𑀸 𑀧𑀺𑀴𑀓𑀸 𑀯𑀸 𑀳𑁄𑀦𑁆𑀢𑀺, 𑀬𑀣𑀸 𑀫𑀸𑀢𑀸 𑀧𑀼𑀢𑁆𑀢𑀁 𑀦 𑀚𑀺𑀕𑀼𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀅𑀚𑀺𑀕𑀼𑀘𑁆𑀙𑀦𑁆𑀢𑁂𑀦 𑀲𑀸𑀥𑀼𑀓𑀁 𑀳𑀢𑁆𑀣𑀧𑀸𑀤𑀢𑁄 𑀘 𑀲𑀻𑀲𑀢𑁄 𑀘 𑀧𑀝𑁆𑀞𑀸𑀬 𑀖𑀁𑀲𑀺𑀢𑁆𑀯𑀸 𑀖𑀁𑀲𑀺𑀢𑁆𑀯𑀸 𑀦𑀳𑀸𑀧𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀢𑁆𑀢𑀓𑁂𑀦 𑀳𑀺 𑀉𑀧𑀓𑀸𑀭𑁂𑀦 𑀓𑀼𑀮𑀧𑀼𑀢𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀘 𑀲𑀸𑀲𑀦𑁂 𑀘 𑀩𑀮𑀯𑀲𑀺𑀦𑁂𑀳𑀸 𑀢𑀺𑀩𑁆𑀩𑀕𑀸𑀭𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀸 𑀳𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑁆𑀯𑀸 𑀣𑁂𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺, 𑀓𑀢𑀜𑁆𑀜𑀼𑀓𑀢𑀯𑁂𑀤𑀺𑀦𑁄 𑀳𑁄𑀦𑁆𑀢𑀺.

𑀏𑀯𑀁 𑀦𑀳𑀸𑀧𑀦𑀓𑀸𑀮𑁂 𑀧𑀦 𑀓𑁂𑀲𑀫𑀲𑁆𑀲𑀼𑀁 𑀑𑀭𑁄𑀧𑀦𑀓𑀸𑀮𑁂 𑀯𑀸 ‘‘𑀢𑁆𑀯𑀁 𑀜𑀸𑀢𑁄 𑀬𑀲𑀲𑁆𑀲𑀻, 𑀇𑀤𑀸𑀦𑀺 𑀫𑀬𑀁 𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀸𑀫𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀅𑀜𑁆𑀜𑀸𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀸 𑀦 𑀯𑀢𑁆𑀢𑀩𑁆𑀩𑀸, 𑀅𑀣 𑀔𑁆𑀯𑀲𑁆𑀲 ‘‘𑀆𑀯𑀼𑀲𑁄, 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀳𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀘𑀺𑀓𑁆𑀔𑀦𑁆𑀢𑁂𑀦 𑀘 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀅𑀲𑀼𑀘𑀺𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀁 𑀯𑀸 𑀧𑀸𑀓𑀝𑀁 𑀓𑀭𑁄𑀦𑁆𑀢𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀲𑁄 𑀧𑀼𑀩𑁆𑀩𑁂 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄 𑀳𑁄𑀢𑀺 𑀪𑀸𑀯𑀺𑀢𑀪𑀸𑀯𑀦𑁄 𑀓𑀡𑁆𑀝𑀓𑀯𑁂𑀥𑀸𑀧𑁂𑀓𑁆𑀔𑁄 𑀯𑀺𑀬 𑀧𑀭𑀺𑀧𑀓𑁆𑀓𑀕𑀡𑁆𑀟𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀸𑀧𑁂𑀓𑁆𑀔𑀁 𑀯𑀺𑀬 𑀘 𑀧𑀭𑀺𑀡𑀢𑀧𑀤𑀼𑀫𑀁, 𑀅𑀣𑀲𑁆𑀲 𑀆𑀭𑀤𑁆𑀥𑀫𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀭𑁂 𑀇𑀦𑁆𑀤𑀸𑀲𑀦𑀺 𑀯𑀺𑀬 𑀧𑀩𑁆𑀩𑀢𑁂 𑀓𑀺𑀮𑁂𑀲𑀧𑀩𑁆𑀩𑀢𑁂 𑀘𑀼𑀡𑁆𑀡𑀬𑀫𑀸𑀦𑀁𑀬𑁂𑀯 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀬𑁂 𑀳𑀺 𑀓𑁂𑀘𑀺 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀲𑀩𑁆𑀩𑁂 𑀢𑁂 𑀏𑀯𑀭𑀽𑀧𑀁 𑀲𑀯𑀦𑀁 𑀮𑀪𑀺𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀆𑀘𑀭𑀺𑀬𑁂𑀦 𑀤𑀺𑀦𑁆𑀦𑀦𑀬𑀁 𑀦𑀺𑀲𑁆𑀲𑀸𑀬, 𑀦𑁄 𑀅𑀦𑀺𑀲𑁆𑀲𑀸𑀬. 𑀢𑀲𑁆𑀫𑀸𑀲𑁆𑀲 𑀆𑀤𑀺𑀢𑁄𑀯 𑀏𑀯𑀭𑀽𑀧𑀻 𑀓𑀣𑀸 𑀓𑀣𑁂𑀢𑀩𑁆𑀩𑀸𑀢𑀺.

𑀓𑁂𑀲𑁂𑀲𑀼 𑀧𑀦 𑀑𑀭𑁄𑀧𑀺𑀢𑁂𑀲𑀼 𑀳𑀮𑀺𑀤𑁆𑀤𑀺𑀘𑀼𑀡𑁆𑀡𑁂𑀦 𑀯𑀸 𑀕𑀦𑁆𑀥𑀘𑀼𑀡𑁆𑀡𑁂𑀦 𑀯𑀸 𑀲𑀻𑀲𑀜𑁆𑀘 𑀲𑀭𑀻𑀭𑀜𑁆𑀘 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀕𑀺𑀳𑀺𑀕𑀦𑁆𑀥𑀁 𑀅𑀧𑀦𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀲𑀓𑀺𑀁 𑀯𑀸 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑀩𑁆𑀩𑁄. 𑀅𑀣𑀸𑀧𑀺𑀲𑁆𑀲 𑀳𑀢𑁆𑀣𑁂 𑀅𑀤𑀢𑁆𑀯𑀸 𑀆𑀘𑀭𑀺𑀬𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀲𑀬𑀫𑁂𑀯 𑀅𑀘𑁆𑀙𑀸𑀤𑁂𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀅𑀜𑁆𑀜𑀁 𑀤𑀳𑀭𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀉𑀧𑀸𑀲𑀓𑀁 𑀯𑀸 𑀆𑀡𑀸𑀧𑁂𑀢𑀺 ‘‘𑀆𑀯𑀼𑀲𑁄, 𑀏𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀕𑀳𑁂𑀢𑁆𑀯𑀸 𑀏𑀢𑀁 𑀅𑀘𑁆𑀙𑀸𑀤𑁂𑀳𑀻’’𑀢𑀺, 𑀢𑀜𑁆𑀜𑁂𑀯 𑀯𑀸 𑀆𑀡𑀸𑀧𑁂𑀢𑀺 ‘‘𑀏𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁆𑀙𑀸𑀤𑁂𑀳𑀻’’𑀢𑀺, 𑀲𑀩𑁆𑀩𑀁 𑀢𑀁 𑀯𑀝𑁆𑀝𑀢𑀺, 𑀲𑀩𑁆𑀩𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸𑀯 𑀤𑀺𑀦𑁆𑀦𑀁 𑀳𑁄𑀢𑀺. 𑀬𑀁 𑀧𑀦 𑀦𑀺𑀯𑀸𑀲𑀦𑀁 𑀯𑀸 𑀧𑀸𑀭𑀼𑀧𑀦𑀁 𑀯𑀸 𑀅𑀦𑀸𑀡𑀢𑁆𑀢𑀺𑀬𑀸 𑀦𑀺𑀯𑀸𑀲𑁂𑀢𑀺 𑀯𑀸 𑀧𑀸𑀭𑀼𑀧𑀢𑀺 𑀯𑀸, 𑀢𑀁 𑀅𑀧𑀦𑁂𑀢𑁆𑀯𑀸 𑀧𑀼𑀦 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀸 𑀳𑀺 𑀲𑀳𑀢𑁆𑀣𑁂𑀦 𑀯𑀸 𑀆𑀡𑀢𑁆𑀢𑀺𑀬𑀸 𑀯𑀸 𑀤𑀺𑀦𑁆𑀦𑀫𑁂𑀯 𑀓𑀸𑀲𑀸𑀬𑀁 𑀯𑀝𑁆𑀝𑀢𑀺, 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀉𑀧𑀚𑁆𑀛𑀸𑀬𑀫𑀽𑀮𑀓𑁂.

𑁧𑁪𑁭. 𑀏𑀯𑀁 𑀧𑀦 𑀤𑀺𑀦𑁆𑀦𑀸𑀦𑀺 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀬𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽, 𑀢𑁂𑀲𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀅𑀣 𑀲𑀭𑀡𑀕𑀳𑀡𑀢𑁆𑀣𑀁 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, ‘‘𑀬𑀫𑀳𑀁 𑀯𑀤𑀸𑀫𑀺, 𑀢𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣𑀲𑁆𑀲 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀆𑀘𑀭𑀺𑀬𑁂𑀦 𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀭𑀡𑀸𑀦𑀺 𑀤𑀸𑀢𑀩𑁆𑀩𑀸𑀦𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸𑀯, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀲𑀘𑁂 𑀳𑀺 𑀏𑀓𑀧𑀤𑀫𑁆𑀧𑀺 𑀏𑀓𑀓𑁆𑀔𑀭𑀫𑁆𑀧𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀤𑁂𑀢𑀺, 𑀩𑀼𑀤𑁆𑀥𑀁 𑀲𑀭𑀡𑀁𑀬𑁂𑀯 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀤𑀢𑁆𑀯𑀸 𑀧𑀼𑀦 𑀇𑀢𑀭𑁂𑀲𑀼 𑀏𑀓𑁂𑀓𑀁 𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀢𑀺, 𑀅𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑀲𑀭𑀡𑀸𑀦𑀺.

𑀇𑀫𑀜𑁆𑀘 𑀧𑀦 𑀲𑀭𑀡𑀕𑀫𑀦𑀼𑀧𑀲𑀫𑁆𑀧𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸 𑀏𑀓𑀢𑁄𑀲𑀼𑀤𑁆𑀥𑀺𑀬𑀸 𑀯𑀝𑁆𑀝𑀢𑀺, 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀧𑀦 𑀉𑀪𑀢𑁄𑀲𑀼𑀤𑁆𑀥𑀺𑀬𑀸𑀯 𑀯𑀝𑁆𑀝𑀢𑀺, 𑀦𑁄 𑀏𑀓𑀢𑁄𑀲𑀼𑀤𑁆𑀥𑀺𑀬𑀸. 𑀢𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀬 𑀲𑀘𑁂 𑀆𑀘𑀭𑀺𑀬𑁄 𑀜𑀢𑁆𑀢𑀺𑀤𑁄𑀲𑀜𑁆𑀘𑁂𑀯 𑀓𑀫𑁆𑀫𑀯𑀸𑀘𑀸𑀤𑁄𑀲𑀜𑁆𑀘 𑀯𑀚𑁆𑀚𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀼𑀓𑀢𑀁 𑀳𑁄𑀢𑀺. 𑀧𑀩𑁆𑀩𑀚𑁆𑀚𑀸𑀬 𑀧𑀦 𑀇𑀫𑀸𑀦𑀺 𑀢𑀻𑀡𑀺 𑀲𑀭𑀡𑀸𑀦𑀺 𑀩𑀼-𑀓𑀸𑀭 𑀥-𑀓𑀸𑀭𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀅𑀳𑀸𑀧𑁂𑀦𑁆𑀢𑁂𑀦 𑀆𑀘𑀭𑀺𑀬𑁂𑀦𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦𑀧𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀲𑀘𑁂 𑀆𑀘𑀭𑀺𑀬𑁄 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦 𑀲𑀓𑁆𑀓𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀸 𑀲𑀓𑁆𑀓𑁄𑀢𑀺, 𑀆𑀘𑀭𑀺𑀬𑁄 𑀦 𑀲𑀓𑁆𑀓𑁄𑀢𑀺, 𑀉𑀪𑁄𑀧𑀺 𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀉𑀪𑁄𑀧𑀺 𑀲𑀓𑁆𑀓𑁄𑀦𑁆𑀢𑀺, 𑀯𑀝𑁆𑀝𑀢𑀺. 𑀇𑀫𑀸𑀦𑀺 𑀘 𑀧𑀦 𑀤𑀤𑀫𑀸𑀦𑁂𑀦 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀏𑀓𑀲𑀫𑁆𑀩𑀦𑁆𑀥𑀸𑀦𑀺 𑀅𑀦𑀼𑀦𑀸𑀲𑀺𑀓𑀦𑁆𑀢𑀸𑀦𑀺 𑀯𑀸 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺, ‘‘𑀩𑀼𑀤𑁆𑀥𑀫 𑀲𑀭𑀡𑀫 𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀓𑀸𑀭𑀦𑁆𑀢𑀸𑀦𑀺 𑀯𑀸 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀦𑀸𑀫𑀁 𑀲𑀸𑀯𑁂𑀢𑁆𑀯𑀸 ‘𑀅𑀳𑀁, 𑀪𑀦𑁆𑀢𑁂, 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀬𑀸𑀯𑀚𑀻𑀯𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀏𑀓𑀝𑁆𑀞𑀓𑀣𑀸𑀬𑀫𑁆𑀧𑀺 𑀦𑀢𑁆𑀣𑀺, 𑀧𑀸𑀴𑀺𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁, 𑀢𑁂𑀲𑀁 𑀭𑀼𑀘𑀺𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀢𑀣𑀸 𑀅𑀯𑀤𑀦𑁆𑀢𑀲𑁆𑀲 𑀲𑀭𑀡𑀁 𑀓𑀼𑀧𑁆𑀧𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺.

𑁧𑁪𑁮. 𑀲𑀘𑁂 𑀧𑀦𑁂𑀲 𑀕𑀢𑀺𑀫𑀸 𑀳𑁄𑀢𑀺 𑀧𑀡𑁆𑀟𑀺𑀢𑀚𑀸𑀢𑀺𑀓𑁄, 𑀅𑀣𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀓𑀣𑀁? 𑀬𑀣𑀸 𑀪𑀕𑀯𑀢𑀸 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀲𑀺𑀓𑁆𑀔𑀺𑀢𑀼𑀁. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺, 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑁂𑀭𑀫𑀡𑀺, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀺, 𑀦𑀘𑁆𑀘𑀕𑀻𑀢𑀯𑀸𑀤𑀺𑀢 𑀯𑀺𑀲𑀽𑀓𑀤𑀲𑁆𑀲𑀦𑀸 𑀯𑁂𑀭𑀫𑀡𑀺, 𑀫𑀸𑀮𑀸𑀕𑀦𑁆𑀥 𑀯𑀺𑀮𑁂𑀧𑀦 𑀥𑀸𑀭𑀡 𑀫𑀡𑁆𑀟𑀦 𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀯𑁂𑀭𑀫𑀡𑀺, 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀯𑁂𑀭𑀫𑀡𑀺, 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀯𑁂𑀭𑀫𑀡𑀻’’𑀢𑀺 (𑀫𑀳𑀸𑀯. 𑁧𑁦𑁬).

𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀬𑀸𑀯𑀚𑀻𑀯𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀁 𑀲𑀭𑀡𑀤𑀸𑀦𑀁 𑀯𑀺𑀬 𑀲𑀺𑀓𑁆𑀔𑀸𑀧𑀤𑀤𑀸𑀦𑀫𑁆𑀧𑀺 𑀯𑀼𑀢𑁆𑀢𑀁, 𑀢𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀲𑀼 𑀅𑀢𑁆𑀣𑀺, 𑀢𑀲𑁆𑀫𑀸 𑀬𑀣𑀸𑀧𑀸𑀴𑀺𑀬𑀸𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀧𑀩𑁆𑀩𑀚𑁆𑀚𑀸 𑀳𑀺 𑀲𑀭𑀡𑀕𑀫𑀦𑁂𑀳𑁂𑀯 𑀲𑀺𑀤𑁆𑀥𑀸, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀓𑁂𑀯𑀮𑀁 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀢𑁆𑀣𑀁 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀆𑀕𑀢𑀦𑀬𑁂𑀦𑁂𑀯 𑀉𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀅𑀢𑁆𑀣𑀯𑀲𑁂𑀦𑀧𑀺 𑀆𑀘𑀺𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀸𑀯 𑀧𑀦 𑀅𑀢𑁆𑀢𑀦𑀸 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀦 𑀚𑀸𑀦𑀸𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀸𑀦𑀪𑁄𑀚𑀦𑀸𑀤𑀺𑀯𑀺𑀥𑀺𑀫𑁆𑀳𑀺 𑀘 𑀦 𑀓𑀼𑀲𑀮𑁄 𑀳𑁄𑀢𑀺, 𑀢𑀸𑀯 𑀪𑁄𑀚𑀦𑀲𑀸𑀮𑀁 𑀯𑀸 𑀲𑀮𑀸𑀓𑀪𑀸𑀚𑀦𑀝𑁆𑀞𑀸𑀦𑀁 𑀯𑀸 𑀅𑀜𑁆𑀜𑀁 𑀯𑀸 𑀢𑀣𑀸𑀭𑀽𑀧𑀝𑁆𑀞𑀸𑀦𑀁 𑀦 𑀧𑁂𑀲𑁂𑀢𑀩𑁆𑀩𑁄, 𑀲𑀦𑁆𑀢𑀺𑀓𑀸𑀯𑀘𑀭𑁄𑀬𑁂𑀯 𑀓𑀸𑀢𑀩𑁆𑀩𑁄, 𑀩𑀸𑀮𑀤𑀸𑀭𑀓𑁄 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀲𑀩𑁆𑀩𑀫𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀻𑀲𑀼 𑀅𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄. 𑀢𑁂𑀦𑀧𑀺 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑀸𑀫𑀡𑁂𑀭𑀁 𑀦𑀸𑀲𑁂𑀢𑀼𑀁. 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀬𑀻 𑀳𑁄𑀢𑀺, 𑀅𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀻 𑀳𑁄𑀢𑀺, 𑀫𑀚𑁆𑀚𑀧𑀸𑀬𑀻 𑀳𑁄𑀢𑀺, 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁦𑁮) 𑁋

𑀏𑀯𑀁 𑀯𑀼𑀢𑁆𑀢𑀸𑀦𑀺 𑀤𑀲 𑀦𑀸𑀲𑀦𑀗𑁆𑀕𑀸𑀦𑀺 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀧𑀭𑀺𑀧𑀽𑀭𑁂𑀦𑁆𑀢𑁂𑀦 𑀤𑀲𑀯𑀺𑀥𑁂 𑀲𑀻𑀮𑁂 𑀲𑀸𑀥𑀼𑀓𑀁 𑀲𑀺𑀓𑁆𑀔𑀺𑀢𑀩𑁆𑀩𑀁.

𑁧𑁪𑁯. 𑀬𑁄 𑀧𑀦 (𑀫𑀳𑀸𑀯. 𑀅𑀝𑁆𑀞. 𑁧𑁦𑁮) 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀤𑀲𑀲𑀼 𑀦𑀸𑀲𑀦𑀗𑁆𑀕𑁂𑀲𑀼 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄. 𑀢𑀻𑀲𑀼 𑀳𑀺 𑀦𑀸𑀲𑀦𑀸𑀲𑀼 𑀮𑀺𑀗𑁆𑀕𑀦𑀸𑀲𑀦𑀸𑀬𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀬𑀣𑀸 𑀘 𑀪𑀺𑀓𑁆𑀔𑀽𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀢𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺, 𑀦 𑀢𑀣𑀸 𑀲𑀸𑀫𑀡𑁂𑀭𑀸𑀦𑀁. 𑀲𑀸𑀫𑀡𑁂𑀭𑁄 𑀳𑀺 𑀓𑀼𑀦𑁆𑀣 𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀫𑀸𑀭𑁂𑀢𑁆𑀯𑀸 𑀫𑀗𑁆𑀕𑀼𑀮𑀡𑁆𑀟𑀓𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀦𑀸𑀲𑁂𑀢𑀩𑁆𑀩𑀢𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀭𑀡𑀕𑀫𑀦𑀸𑀦𑀺 𑀘 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀜𑁆𑀘 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀲𑀗𑁆𑀖𑀮𑀸𑀪𑀁 𑀦 𑀮𑀪𑀢𑀺, 𑀮𑀺𑀗𑁆𑀕𑀫𑀢𑁆𑀢𑀫𑁂𑀯 𑀏𑀓𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺. 𑀲𑁄 𑀲𑀘𑁂 𑀆𑀓𑀺𑀡𑁆𑀡𑀤𑁄𑀲𑁄𑀯 𑀳𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑁂 𑀦 𑀢𑀺𑀝𑁆𑀞𑀢𑀺, 𑀦𑀺𑀓𑁆𑀓𑀟𑁆𑀠𑀺𑀢𑀩𑁆𑀩𑁄. 𑀅𑀣 𑀲𑀳𑀲𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 ‘‘𑀤𑀼𑀝𑁆𑀞𑀼 𑀫𑀬𑀸 𑀓𑀢’’𑀦𑁆𑀢𑀺 𑀧𑀼𑀦 𑀲𑀁𑀯𑀭𑁂 𑀞𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀮𑀺𑀗𑁆𑀕𑀦𑀸𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑀲𑁆𑀲𑁂𑀯 𑀲𑀭𑀡𑀸𑀦𑀺 𑀤𑀸𑀢𑀩𑁆𑀩𑀸𑀦𑀺, 𑀉𑀧𑀚𑁆𑀛𑀸𑀬𑁄 𑀤𑀸𑀢𑀩𑁆𑀩𑁄. 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀲𑀭𑀡𑀕𑀫𑀦𑁂𑀦𑁂𑀯 𑀇𑀚𑁆𑀛𑀦𑁆𑀢𑀺. 𑀲𑀸𑀫𑀡𑁂𑀭𑀸𑀦𑀜𑁆𑀳𑀺 𑀲𑀭𑀡𑀕𑀫𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀲𑀤𑀺𑀲𑀁, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀁 𑀯𑀺𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀇𑀫𑀺𑀦𑀸𑀧𑀺 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀆𑀬𑀢𑀺𑀁 𑀲𑀁𑀯𑀭𑁂 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀦 𑀤𑀸𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀧𑀼𑀦 𑀲𑀭𑀡𑀸𑀦𑀺 𑀕𑀳𑀺𑀢𑀸𑀦𑀺, 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀘𑁆𑀙𑀢𑀺. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀕𑀳𑀺𑀢𑀸𑀦𑀺, 𑀲𑀗𑁆𑀖𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀮𑀸𑀪𑁄 𑀤𑀸𑀢𑀩𑁆𑀩𑁄. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀢𑀺𑀡𑀲𑀮𑀸𑀓𑀫𑀢𑁆𑀢𑁂𑀦𑀧𑀺 𑀯𑀢𑁆𑀣𑀼𑀦𑀸, 𑀅𑀩𑁆𑀭𑀳𑁆𑀫𑀘𑀭𑀺𑀬𑁂 𑀢𑀻𑀲𑀼 𑀫𑀕𑁆𑀕𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸, 𑀫𑀼𑀲𑀸𑀯𑀸𑀤𑁂 𑀳𑀲𑀸𑀥𑀺𑀧𑁆𑀧𑀸𑀬𑀢𑀸𑀬𑀧𑀺 𑀫𑀼𑀲𑀸 𑀪𑀡𑀺𑀢𑁂 𑀅𑀲𑁆𑀲𑀫𑀡𑁄 𑀳𑁄𑀢𑀺, 𑀦𑀸𑀲𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀫𑀚𑁆𑀚𑀧𑀸𑀦𑁂 𑀧𑀦 𑀪𑀺𑀓𑁆𑀔𑀼𑀦𑁄 𑀅𑀚𑀸𑀦𑀺𑀢𑁆𑀯𑀸𑀧𑀺 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀧𑀺𑀯𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀸𑀫𑀡𑁂𑀭𑁄 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁆𑀢𑁄𑀯 𑀲𑀻𑀮𑀪𑁂𑀤𑀁 𑀆𑀧𑀚𑁆𑀚𑀢𑀺, 𑀦 𑀅𑀚𑀸𑀦𑀺𑀢𑁆𑀯𑀸. 𑀬𑀸𑀦𑀺 𑀧𑀦𑀲𑁆𑀲 𑀇𑀢𑀭𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀏𑀢𑁂𑀲𑀼 𑀪𑀺𑀦𑁆𑀦𑁂𑀲𑀼 𑀦 𑀦𑀸𑀲𑁂𑀢𑀩𑁆𑀩𑁄, 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀺𑀓𑁆𑀔𑀸𑀧𑀤𑁂 𑀧𑀦 𑀧𑀼𑀦 𑀤𑀺𑀦𑁆𑀦𑁂𑀧𑀺 𑀅𑀤𑀺𑀦𑁆𑀦𑁂𑀧𑀺 𑀯𑀝𑁆𑀝𑀢𑀺, 𑀤𑀡𑁆𑀟𑀓𑀫𑁆𑀫𑁂𑀦 𑀧𑀦 𑀧𑀻𑀴𑁂𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑁂 𑀞𑀧𑀦𑀢𑁆𑀣𑀸𑀬 𑀤𑀸𑀢𑀩𑁆𑀩𑀫𑁂𑀯.

𑀅𑀯𑀡𑁆𑀡𑀪𑀸𑀲𑀦𑁂 𑀧𑀦 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀻𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀩𑀼𑀤𑁆𑀥𑀲𑁆𑀲 𑀯𑀸 ‘‘𑀲𑁆𑀯𑀸𑀓𑁆𑀔𑀸𑀢𑁄’’𑀢𑀺𑀆𑀤𑀻𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀥𑀫𑁆𑀫𑀲𑁆𑀲 𑀯𑀸 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑀦𑁆𑀢𑁄 𑀭𑀢𑀦𑀢𑁆𑀢𑀬𑀁 𑀦𑀺𑀦𑁆𑀤𑀦𑁆𑀢𑁄 𑀕𑀭𑀳𑀦𑁆𑀢𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀳𑀺 ‘‘𑀫𑀸 𑀏𑀯𑀁 𑀅𑀯𑀘𑀸’’𑀢𑀺 𑀅𑀯𑀡𑁆𑀡𑀪𑀸𑀲𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀢𑀩𑁆𑀩𑁄. ‘‘𑀲𑀘𑁂 𑀬𑀸𑀯𑀢𑀢𑀺𑀬𑀁 𑀯𑀼𑀘𑁆𑀘𑀫𑀸𑀦𑁄 𑀦 𑀑𑀭𑀫𑀢𑀺, 𑀓𑀡𑁆𑀝𑀓𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀘𑁂 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄 𑀢𑀁 𑀮𑀤𑁆𑀥𑀺𑀁 𑀦𑀺𑀲𑁆𑀲𑀚𑁆𑀚𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀦 𑀦𑀺𑀲𑁆𑀲𑀚𑁆𑀚𑀢𑀺, 𑀢𑀣𑁂𑀯 𑀆𑀤𑀸𑀬 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺, 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁. 𑀅𑀬𑀫𑁂𑀯 𑀳𑀺 𑀦𑀸𑀲𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀓𑁄 𑀲𑀘𑁂 𑀆𑀘𑀭𑀺𑀬𑀸𑀤𑀻𑀳𑀺 𑀑𑀯𑀤𑀺𑀬𑀫𑀸𑀦𑁄 𑀦𑀺𑀲𑁆𑀲𑀚𑁆𑀚𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄, 𑀅𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀯 𑀦𑀸𑀲𑁂𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀘𑁂𑀢𑁆𑀣 𑀓𑀸𑀫𑀁 𑀅𑀩𑁆𑀭𑀳𑁆𑀫𑀘𑀸𑀭𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀯, 𑀅𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀦 𑀆𑀬𑀢𑀺𑀁 𑀲𑀁𑀯𑀭𑁂 𑀞𑀸𑀢𑀼𑀓𑀸𑀫𑀁 𑀲𑀭𑀡𑀸𑀦𑀺 𑀤𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀆𑀬𑀢𑀺𑀁 𑀲𑀁𑀯𑀭𑁂 𑀞𑀸𑀢𑀼𑀓𑀸𑀫𑁄𑀧𑀺 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺, 𑀧𑀕𑁂𑀯 𑀉𑀧𑀲𑀫𑁆𑀧𑀤𑀦𑁆𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄’’𑀢𑀺 𑀇𑀤𑀁 𑀯𑀺𑀲𑀼𑀁 𑀤𑀲𑀫𑀁 𑀅𑀗𑁆𑀕𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁫𑁦. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼𑀁. 𑀪𑀺𑀓𑁆𑀔𑀽𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽𑀦𑀁 𑀅𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺, 𑀧𑀭𑀺𑀪𑀸𑀲𑀢𑀺, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀳𑀺 𑀪𑁂𑀤𑁂𑀢𑀻’’𑀢𑀺 (𑀫𑀳𑀸𑀯. 𑁧𑁦𑁭) ‘‘𑀯𑀘𑀦𑀢𑁄 𑀧𑀦 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺, 𑀲𑀺𑀓𑁆𑀔𑀸𑀧𑀤𑁂𑀲𑀼 𑀘 𑀧𑀘𑁆𑀙𑀺𑀫𑀸𑀦𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀻𑀦𑀺 𑀧𑀜𑁆𑀘𑀸𑀢𑀺 𑀤𑀲 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀽𑀦𑀺. 𑀓𑀺𑀁𑀧𑀦𑁂𑀢𑁆𑀣 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀣 𑀯𑀸 𑀯𑀲𑀢𑀺, 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀆𑀯𑀭𑀡𑀁 𑀓𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁦𑁭) 𑀯𑀘𑀦𑀢𑁄 𑀬𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁦𑁭) 𑀯𑀲𑀢𑀺 𑀯𑀸 𑀧𑀯𑀺𑀲𑀢𑀺 𑀯𑀸, 𑀢𑀢𑁆𑀣 𑀆𑀯𑀭𑀡𑀁 𑀓𑀸𑀢𑀩𑁆𑀩𑀁 ‘‘𑀫𑀸 𑀇𑀥 𑀧𑀯𑀺𑀲𑀸’’𑀢𑀺. 𑀉𑀪𑀬𑁂𑀦𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀜𑁆𑀘 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀜𑁆𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀦 𑀲𑀩𑁆𑀩𑁄 𑀲𑀗𑁆𑀖𑀸𑀭𑀸𑀫𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄, 𑀓𑀭𑁄𑀦𑁆𑀢𑁄 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁄 𑀲𑀗𑁆𑀖𑀸𑀭𑀸𑀫𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀦 𑀘 𑀫𑀼𑀔𑀤𑁆𑀯𑀸𑀭𑀺𑀓𑁄 𑀆𑀳𑀸𑀭𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄, 𑀓𑀭𑁄𑀦𑁆𑀢𑁄 𑀘 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀫𑀼𑀔𑀤𑁆𑀯𑀸𑀭𑀺𑀓𑁄 𑀆𑀳𑀸𑀭𑁄 𑀆𑀯𑀭𑀡𑀁 𑀓𑀸𑀢𑀩𑁆𑀩𑁄, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 ‘‘𑀅𑀚𑁆𑀚 𑀫𑀸 𑀔𑀸𑀤 𑀫𑀸 𑀪𑀼𑀜𑁆𑀚𑀸’’𑀢𑀺 𑀯𑀤𑀢𑁄𑀧𑀺 ‘‘𑀆𑀳𑀸𑀭𑀫𑁆𑀧𑀺 𑀦𑀺𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀅𑀦𑁆𑀢𑁄 𑀦𑀺𑀓𑁆𑀔𑀺𑀧𑀢𑁄𑀧𑀺 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. 𑀅𑀦𑀸𑀘𑀸𑀭𑀲𑁆𑀲 𑀧𑀦 𑀤𑀼𑀩𑁆𑀩𑀘𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑁆𑀢𑀓𑁂 𑀦𑀸𑀫 𑀤𑀡𑁆𑀟𑀓𑀫𑁆𑀫𑁂 𑀆𑀳𑀝𑁂 𑀇𑀤𑀁 𑀮𑀘𑁆𑀙𑀲𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀪𑀕𑀯𑀢𑀸 𑀳𑀺 𑀆𑀯𑀭𑀡𑀫𑁂𑀯 𑀤𑀡𑁆𑀟𑀓𑀫𑁆𑀫𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀦 ‘‘𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀉𑀤𑀓𑀤𑀸𑀭𑀼𑀯𑀸𑀮𑀺𑀓𑀸𑀤𑀻𑀦𑀁 𑀆𑀳𑀭𑀸𑀧𑀦𑀫𑁆𑀧𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀓𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 ‘‘𑀑𑀭𑀫𑀺𑀲𑁆𑀲𑀢𑀺 𑀯𑀺𑀭𑀫𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀓𑀫𑁆𑀧𑀸𑀬, 𑀦 ‘‘𑀦𑀲𑁆𑀲𑀺𑀲𑁆𑀲𑀢𑀺 𑀯𑀺𑀩𑁆𑀪𑀫𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀸𑀧𑀚𑁆𑀛𑀸𑀲𑀬𑁂𑀦. ‘‘𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀘 𑀉𑀡𑁆𑀳𑀧𑀸𑀲𑀸𑀡𑁂 𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑀼𑀁 𑀧𑀸𑀲𑀸𑀡𑀺𑀝𑁆𑀞𑀓𑀸𑀤𑀻𑀦𑀺 𑀯𑀸 𑀲𑀻𑀲𑁂 𑀦𑀺𑀓𑁆𑀔𑀺𑀧𑀸𑀧𑁂𑀢𑀼𑀁 𑀉𑀤𑀓𑀁 𑀯𑀸 𑀧𑀯𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸𑀧𑀺 𑀤𑀡𑁆𑀟𑀓𑀫𑁆𑀫𑀁 𑀦 𑀓𑀸𑀭𑁂𑀢𑀩𑁆𑀩𑀁 ‘‘𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀆𑀯𑀭𑀡𑀁 𑀓𑀸𑀢𑀩𑁆𑀩𑀁, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁦𑁮) 𑀯𑀘𑀦𑀢𑁄. 𑀏𑀢𑁆𑀣 𑀧𑀦 ‘‘𑀢𑀼𑀫𑁆𑀳𑀸𑀓𑀁 𑀲𑀸𑀫𑀡𑁂𑀭𑀲𑁆𑀲 𑀅𑀬𑀁 𑀦𑀸𑀫 𑀅𑀧𑀭𑀸𑀥𑁄, 𑀤𑀡𑁆𑀟𑀓𑀫𑁆𑀫𑀫𑀲𑁆𑀲 𑀓𑀭𑁄𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀲𑀘𑁂 𑀲𑁄 𑀉𑀧𑀚𑁆𑀛𑀸𑀬𑁄 𑀤𑀡𑁆𑀟𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀲𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀆𑀤𑀺𑀢𑁄 𑀉𑀧𑀚𑁆𑀛𑀸𑀬𑁄 𑀯𑀤𑀢𑀺 ‘‘𑀫𑀬𑁆𑀳𑀁 𑀲𑀸𑀫𑀡𑁂𑀭𑀸𑀦𑀁 𑀤𑁄𑀲𑁂 𑀲𑀢𑀺 𑀢𑀼𑀫𑁆𑀳𑁂 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺, 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀬𑀣𑀸 𑀘 𑀲𑀸𑀫𑀡𑁂𑀭𑀸𑀦𑀁, 𑀏𑀯𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑀸𑀦𑀫𑁆𑀧𑀺 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀜𑁆𑀜𑁂𑀲𑀁 𑀧𑀦 𑀧𑀭𑀺𑀲𑀸 𑀦 𑀅𑀧𑀮𑀸𑀴𑁂𑀢𑀩𑁆𑀩𑀸, 𑀅𑀧𑀮𑀸𑀴𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀲𑁆𑀲 𑀧𑀭𑀺𑀲𑀸 𑀅𑀧𑀮𑀸𑀴𑁂𑀢𑀩𑁆𑀩𑀸, 𑀬𑁄 𑀅𑀧𑀮𑀸𑀴𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁦𑁮) 𑀯𑀘𑀦𑀢𑁄. 𑀢𑀲𑁆𑀫𑀸 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀤𑁂𑀫, 𑀘𑀻𑀯𑀭𑀁 𑀤𑁂𑀫𑀸’’𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀓𑀭𑀡𑀢𑁆𑀣𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀲𑀸𑀫𑀡𑁂𑀭𑀸 𑀯𑀸 𑀳𑁄𑀦𑁆𑀢𑀼 𑀉𑀧𑀲𑀫𑁆𑀧𑀦𑁆𑀦𑀸 𑀯𑀸, 𑀅𑀦𑁆𑀢𑀫𑀲𑁄 𑀤𑀼𑀲𑁆𑀲𑀻𑀮𑀪𑀺𑀓𑁆𑀔𑀼𑀲𑁆𑀲𑀧𑀺 𑀧𑀭𑀲𑁆𑀲 𑀧𑀭𑀺𑀲𑀪𑀽𑀢𑁂 𑀪𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀤𑀻𑀦𑀯𑀁 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 ‘‘𑀢𑀬𑀸 𑀦𑀳𑀸𑀬𑀺𑀢𑀼𑀁 𑀆𑀕𑀢𑁂𑀦 𑀕𑀽𑀣𑀫𑀓𑁆𑀔𑀦𑀁 𑀯𑀺𑀬 𑀓𑀢𑀁 𑀤𑀼𑀲𑁆𑀲𑀻𑀮𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂𑀦𑀸’’𑀢𑀺. 𑀲𑀘𑁂 𑀲𑁄 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀉𑀧𑀚𑁆𑀛𑀁 𑀯𑀸 𑀦𑀺𑀲𑁆𑀲𑀬𑀁 𑀯𑀸 𑀬𑀸𑀘𑀢𑀺, 𑀤𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.