𑁧𑁮. 𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑁮𑁯. 𑀓𑀸𑀮𑀺𑀓𑀸𑀦𑀺𑀧𑀺 𑀘𑀢𑁆𑀢𑀸𑀭𑀻𑀢𑀺 𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁨𑁫𑁫-𑁨𑁫𑁬) 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀸𑀮𑀺𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀲𑀗𑁆𑀔𑀢𑁄 𑀓𑀸𑀮𑁄, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀓𑀸𑀮𑀺𑀓𑀁. 𑀲𑀤𑁆𑀥𑀺𑀁 𑀅𑀦𑀼𑀮𑁄𑀫𑀧𑀸𑀦𑁂𑀳𑀺 𑀅𑀝𑁆𑀞𑀯𑀺𑀥𑀁 𑀧𑀸𑀦𑀁 𑀬𑀸𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀬𑀸𑀫𑀲𑀗𑁆𑀔𑀸𑀢𑁄 𑀬𑀸𑀫𑁄, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀫𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀲𑀧𑁆𑀧𑀺𑀆𑀤𑀺 𑀧𑀜𑁆𑀘𑀯𑀺𑀥𑀁 𑀪𑁂𑀲𑀚𑁆𑀚𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀥𑁂𑀢𑀩𑁆𑀩𑀢𑁄 𑀲𑀢𑁆𑀢𑀸𑀳𑁄 𑀓𑀸𑀮𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀞𑀧𑁂𑀢𑁆𑀯𑀸 𑀉𑀤𑀓𑀁 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁦. 𑀢𑀢𑁆𑀣 𑀬𑀸𑀯𑀓𑀸𑀮𑀺𑀓𑁂𑀲𑀼 𑀪𑁄𑀚𑀦𑀻𑀬𑀁 𑀦𑀸𑀫 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀦𑁆𑀢𑀺. 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫. 𑀏𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁨𑁪𑁮-𑁯) 𑀧𑀦 𑀬𑀁 𑀢𑀸𑀯 𑀲𑀓𑁆𑀔𑀮𑀺𑀫𑁄𑀤𑀓𑀸𑀤𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀫𑀬𑀁 𑀔𑀸𑀤𑀦𑀻𑀬𑀁, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀫𑁆𑀧𑀺 𑀯𑀦𑀫𑀽𑀮𑀸𑀤𑀺𑀧𑁆𑀧𑀪𑁂𑀤𑀁 𑀆𑀫𑀺𑀲𑀕𑀢𑀺𑀓𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀔𑀸𑀤𑀦𑀻𑀬𑀁 𑀓𑀦𑁆𑀤𑀔𑀸𑀤𑀦𑀻𑀬𑀁 𑀫𑀼𑀴𑀸𑀮𑀔𑀸𑀤𑀦𑀻𑀬𑀁 𑀫𑀢𑁆𑀣𑀓𑀔𑀸𑀤𑀦𑀻𑀬𑀁 𑀔𑀦𑁆𑀥𑀔𑀸𑀤𑀦𑀻𑀬𑀁 𑀢𑀘𑀔𑀸𑀤𑀦𑀻𑀬𑀁 𑀧𑀢𑁆𑀢𑀔𑀸𑀤𑀦𑀻𑀬𑀁 𑀧𑀼𑀧𑁆𑀨𑀔𑀸𑀤𑀦𑀻𑀬𑀁 𑀨𑀮𑀔𑀸𑀤𑀦𑀻𑀬𑀁 𑀅𑀝𑁆𑀞𑀺𑀔𑀸𑀤𑀦𑀻𑀬𑀁 𑀧𑀺𑀝𑁆𑀞𑀔𑀸𑀤𑀦𑀻𑀬𑀁 𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑀦𑁆𑀢𑀺, 𑀇𑀤𑀫𑁆𑀧𑀺 𑀔𑀸𑀤𑀦𑀻𑀬𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺.

𑀢𑀢𑁆𑀣 𑀧𑀦 𑀆𑀫𑀺𑀲𑀕𑀢𑀺𑀓𑀲𑀮𑁆𑀮𑀓𑁆𑀔𑀡𑀢𑁆𑀣𑀁 𑀇𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀫𑀽𑀮𑀔𑀸𑀤𑀦𑀻𑀬𑁂 𑀢𑀸𑀯 𑀫𑀽𑀮𑀓𑀫𑀽𑀮𑀁 𑀔𑀸𑀭𑀓𑀫𑀽𑀮𑀁 𑀘𑀘𑁆𑀘𑀼𑀫𑀽𑀮𑀁 𑀢𑀫𑁆𑀩𑀓𑀫𑀽𑀮𑀁 𑀢𑀡𑁆𑀟𑀼𑀮𑁂𑀬𑁆𑀬𑀓𑀫𑀽𑀮𑀁 𑀯𑀢𑁆𑀣𑀼𑀮𑁂𑀬𑁆𑀬𑀓𑀫𑀽𑀮𑀁 𑀯𑀚𑀓𑀮𑀺𑀫𑀽𑀮𑀁 𑀚𑀚𑁆𑀛𑀭𑀺𑀫𑀽𑀮𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀫𑀽𑀮𑀸𑀦𑀺 𑀆𑀫𑀺𑀲𑀕𑀢𑀺𑀓𑀸𑀦𑀺. 𑀏𑀢𑁆𑀣 𑀘 𑀯𑀚𑀓𑀮𑀺𑀫𑀽𑀮𑁂 𑀚𑀭𑀝𑁆𑀞𑀁 𑀙𑀺𑀦𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁 𑀳𑁄𑀢𑀺. 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀏𑀢𑁂𑀦𑁂𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀓𑀔𑀸𑀭𑀓𑀚𑀚𑁆𑀛𑀭𑀺𑀫𑀽𑀮𑀸𑀦𑀁 𑀧𑀦 𑀚𑀭𑀝𑁆𑀞𑀸𑀦𑀺𑀧𑀺 𑀆𑀫𑀺𑀲𑀕𑀢𑀺𑀓𑀸𑀦𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀬𑀸𑀦𑀺 𑀧𑀦 𑀧𑀸𑀴𑀺𑀬𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀳𑀮𑀺𑀤𑁆𑀤𑀺𑀁 𑀲𑀺𑀗𑁆𑀕𑀺𑀯𑁂𑀭𑀁 𑀯𑀘𑀁 𑀯𑀘𑀢𑁆𑀢𑀁 𑀅𑀢𑀺𑀯𑀺𑀲𑀁 𑀓𑀝𑀼𑀓𑀭𑁄𑀳𑀺𑀡𑀺𑀁 𑀉𑀲𑀻𑀭𑀁 𑀪𑀤𑁆𑀤𑀫𑀼𑀢𑁆𑀢𑀓𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋

𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀘𑀽𑀴𑀧𑀜𑁆𑀘𑀫𑀽𑀮𑀁 𑀫𑀳𑀸𑀧𑀜𑁆𑀘𑀫𑀽𑀮𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀡𑀺𑀬𑀫𑀸𑀦𑀸𑀦𑀁 𑀕𑀡𑀦𑀸𑀬 𑀅𑀦𑁆𑀢𑁄 𑀦𑀢𑁆𑀣𑀺, 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀅𑀨𑀭𑀡𑀪𑀸𑀯𑁄𑀬𑁂𑀯 𑀧𑀦𑁂𑀢𑁂𑀲𑀁 𑀮𑀓𑁆𑀔𑀡𑀁. 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀫𑀽𑀮𑀁 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀢𑀺, 𑀢𑀁 𑀬𑀸𑀯𑀓𑀸𑀮𑀺𑀓𑀁, 𑀇𑀢𑀭𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀩𑀳𑀼𑀁 𑀯𑀢𑁆𑀯𑀸𑀧𑀺 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀮𑀓𑁆𑀔𑀡𑁂 𑀞𑀸𑀢𑀩𑁆𑀩𑀁. 𑀦𑀸𑀫𑀲𑀜𑁆𑀜𑀸𑀲𑀼 𑀧𑀦 𑀯𑀼𑀘𑁆𑀘𑀫𑀸𑀦𑀸𑀲𑀼 𑀢𑀁 𑀢𑀁 𑀦𑀸𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀫𑁆𑀫𑁄𑀳𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀲𑀜𑁆𑀜𑀸𑀬 𑀆𑀤𑀭𑀁 𑀅𑀓𑀢𑁆𑀯𑀸 𑀮𑀓𑁆𑀔𑀡𑀫𑁂𑀯 𑀤𑀲𑁆𑀲𑀺𑀢𑀁. 𑀬𑀣𑀸 𑀘 𑀫𑀽𑀮𑁂, 𑀏𑀯𑀁 𑀓𑀦𑁆𑀤𑀸𑀤𑀻𑀲𑀼𑀧𑀺 𑀮𑀓𑁆𑀔𑀡𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀢𑀲𑁆𑀲𑁂𑀯 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀜𑁆𑀘 𑀢𑀁 𑀧𑀸𑀴𑀺𑀬𑀁 𑀳𑀮𑀺𑀤𑁆𑀤𑀸𑀤𑀺 𑀅𑀝𑁆𑀞𑀯𑀺𑀥𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀔𑀦𑁆𑀥𑀢𑀘𑀧𑀼𑀧𑁆𑀨𑀨𑀮𑀸𑀤𑀺 𑀲𑀩𑁆𑀩𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀦𑁆𑀤𑀔𑀸𑀤𑀦𑀻𑀬𑁂 𑀤𑀼𑀯𑀺𑀥𑁄 𑀓𑀦𑁆𑀤𑁄 𑀤𑀻𑀖𑁄 𑀘 𑀪𑀺𑀲𑀓𑀺𑀁𑀲𑀼𑀓𑀓𑀦𑁆𑀤𑀸𑀤𑀺, 𑀯𑀝𑁆𑀝𑁄 𑀘 𑀉𑀧𑁆𑀧𑀮𑀓𑀲𑁂𑀭𑀼𑀓𑀓𑀦𑁆𑀤𑀸𑀤𑀺, 𑀬𑀁 𑀕𑀡𑁆𑀞𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀁 𑀓𑀦𑁆𑀤𑀸𑀦𑀁 𑀚𑀺𑀡𑁆𑀡𑀚𑀭𑀝𑁆𑀞𑀝𑁆𑀞𑀸𑀦𑀜𑁆𑀘 𑀙𑀮𑁆𑀮𑀺 𑀘 𑀲𑀼𑀔𑀼𑀫𑀫𑀽𑀮𑀸𑀦𑀺 𑀘 𑀬𑀸𑀯𑀚𑀻𑀯𑀺𑀓𑀸𑀦𑀺, 𑀢𑀭𑀼𑀡𑁄 𑀧𑀦 𑀲𑀼𑀔𑀔𑀸𑀤𑀦𑀻𑀬𑁄 𑀲𑀸𑀮𑀓𑀮𑁆𑀬𑀸𑀡𑀺𑀧𑁄𑀢𑀓𑀓𑀦𑁆𑀤𑁄 𑀓𑀺𑀁𑀲𑀼𑀓𑀧𑁄𑀢𑀓𑀓𑀦𑁆𑀤𑁄 𑀅𑀫𑁆𑀩𑀸𑀝𑀓𑀓𑀦𑁆𑀤𑁄 𑀓𑁂𑀢𑀓𑀓𑀦𑁆𑀤𑁄 𑀫𑀸𑀮𑀼𑀯𑀓𑀦𑁆𑀤𑁄 𑀪𑀺𑀲𑀲𑀗𑁆𑀔𑀸𑀢𑁄 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀓𑀦𑁆𑀤𑁄 𑀧𑀺𑀡𑁆𑀟𑀸𑀮𑀼𑀫𑀲𑀸𑀮𑀼𑀆𑀤𑀬𑁄 𑀘 𑀔𑀻𑀭𑀯𑀮𑁆𑀮𑀺𑀓𑀦𑁆𑀤𑁄 𑀆𑀮𑀼𑀯𑀓𑀦𑁆𑀤𑁄 𑀲𑀺𑀕𑁆𑀕𑀼𑀓𑀦𑁆𑀤𑁄 𑀢𑀸𑀮𑀓𑀦𑁆𑀤𑁄 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀓𑀼𑀫𑀼𑀤𑀲𑁄𑀕𑀦𑁆𑀥𑀺𑀓𑀸𑀦𑀁 𑀓𑀦𑁆𑀤𑀸 𑀓𑀤𑀮𑀺𑀓𑀦𑁆𑀤𑁄 𑀯𑁂𑀴𑀼𑀓𑀦𑁆𑀤𑁄 𑀓𑀲𑁂𑀭𑀼𑀓𑀓𑀦𑁆𑀤𑁄𑀢𑀺 𑀏𑀯𑀫𑀸𑀤𑀬𑁄 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀓𑀦𑁆𑀤𑀸 𑀬𑀸𑀯𑀓𑀸𑀮𑀺𑀓𑀸. 𑀔𑀻𑀭𑀯𑀮𑁆𑀮𑀺𑀓𑀦𑁆𑀤𑁄 𑀅𑀥𑁄𑀢𑁄 𑀬𑀸𑀯𑀚𑀻𑀯𑀺𑀓𑁄, 𑀥𑁄𑀢𑁄 𑀬𑀸𑀯𑀓𑀸𑀮𑀺𑀓𑁄. 𑀔𑀻𑀭𑀓𑀸𑀓𑁄𑀮𑀺𑀚𑀻𑀯𑀺𑀓𑀉𑀲𑀪𑀓𑀮𑀲𑀼𑀡𑀸𑀤𑀺𑀓𑀦𑁆𑀤𑀸 𑀧𑀦 𑀬𑀸𑀯𑀚𑀻𑀯𑀺𑀓𑀸. 𑀢𑁂 𑀧𑀸𑀴𑀺𑀬𑀁 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 𑀏𑀯𑀁 (𑀫𑀳𑀸𑀯. 𑁨𑁬𑁩) 𑀫𑀽𑀮𑀪𑁂𑀲𑀚𑁆𑀚𑀲𑀗𑁆𑀕𑀳𑁂𑀦𑁂𑀯 𑀲𑀗𑁆𑀕𑀳𑀺𑀢𑀸.

𑀫𑀼𑀴𑀸𑀮𑀔𑀸𑀤𑀦𑀻𑀬𑁂 𑀧𑀤𑀼𑀫𑀫𑀼𑀴𑀸𑀮𑀁 𑀧𑀼𑀡𑁆𑀟𑀭𑀻𑀓𑀫𑀼𑀴𑀸𑀮𑀁 𑀫𑀽𑀮𑀲𑀤𑀺𑀲𑀁𑀬𑁂𑀯. 𑀏𑀭𑀓𑀫𑀼𑀴𑀸𑀮𑀁 𑀓𑀦𑁆𑀤𑀼𑀮𑀫𑀼𑀴𑀸𑀮𑀦𑁆𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀫𑀼𑀴𑀸𑀮𑀁 𑀬𑀸𑀯𑀓𑀸𑀮𑀺𑀓𑀁, 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀫𑀓𑀘𑀺𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀓𑁂𑀢𑀓𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀦𑀸𑀴𑀺𑀓𑁂𑀭𑀧𑀽𑀕𑀭𑀼𑀓𑁆𑀔𑀸𑀤𑀺𑀫𑀼𑀴𑀸𑀮𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁. 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀸𑀴𑀺𑀬𑀁 ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 𑀏𑀯𑀁 𑀫𑀽𑀮𑀪𑁂𑀲𑀚𑁆𑀚𑀲𑀗𑁆𑀕𑀳𑁂𑀦𑁂𑀯 𑀲𑀗𑁆𑀕𑀳𑀺𑀢𑀁.

𑀫𑀢𑁆𑀣𑀓𑀔𑀸𑀤𑀦𑀻𑀬𑁂 𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀓𑁂𑀢𑀓𑀦𑀸𑀴𑀺𑀓𑁂𑀭𑀧𑀽𑀕𑀭𑀼𑀓𑁆𑀔𑀔𑀚𑁆𑀚𑀽𑀭𑀺𑀯𑁂𑀢𑁆𑀢𑀏𑀭𑀓𑀓𑀤𑀮𑀻𑀦𑀁 𑀓𑀴𑀻𑀭𑀲𑀗𑁆𑀔𑀸𑀢𑀸 𑀫𑀢𑁆𑀣𑀓𑀸, 𑀯𑁂𑀡𑀼𑀓𑀴𑀻𑀭𑁄 𑀦𑀴𑀓𑀴𑀻𑀭𑁄 𑀉𑀘𑁆𑀙𑀼𑀓𑀴𑀻𑀭𑁄 𑀫𑀽𑀮𑀓𑀓𑀴𑀻𑀭𑁄 𑀲𑀸𑀲𑀧𑀓𑀴𑀻𑀭𑁄 𑀲𑀢𑀸𑀯𑀭𑀺𑀓𑀴𑀻𑀭𑁄 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀓𑀴𑀻𑀭𑀸𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑁄 𑀭𑀼𑀓𑁆𑀔𑀯𑀮𑁆𑀮𑀺𑀆𑀤𑀻𑀦𑀁 𑀫𑀢𑁆𑀣𑀓𑁄 𑀬𑀸𑀯𑀓𑀸𑀮𑀺𑀓𑁄, 𑀳𑀮𑀺𑀤𑁆𑀤𑀺𑀲𑀺𑀗𑁆𑀕𑀺𑀯𑁂𑀭𑀯𑀘𑀫𑀓𑀘𑀺𑀮𑀲𑀼𑀡𑀸𑀦𑀁 𑀓𑀴𑀻𑀭𑀸, 𑀢𑀸𑀮𑀳𑀺𑀦𑁆𑀢𑀸𑀮𑀓𑀼𑀦𑁆𑀢𑀸𑀮𑀦𑀸𑀴𑀺𑀓𑁂𑀭𑀓𑀴𑀻𑀭𑀸𑀦𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀢𑁄 𑀚𑀭𑀝𑁆𑀞𑀩𑀼𑀦𑁆𑀤𑁄 𑀬𑀸𑀯𑀚𑀻𑀯𑀺𑀓𑁄.

𑀔𑀦𑁆𑀥𑀔𑀸𑀤𑀦𑀻𑀬𑁂 𑀅𑀦𑁆𑀢𑁄𑀧𑀣𑀯𑀻𑀕𑀢𑁄 𑀲𑀸𑀮𑀓𑀮𑁆𑀬𑀸𑀡𑀻𑀔𑀦𑁆𑀥𑁄 𑀉𑀘𑁆𑀙𑀼𑀔𑀦𑁆𑀥𑁄 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀓𑀼𑀫𑀼𑀤𑀲𑁄𑀕𑀦𑁆𑀥𑀺𑀓𑀸𑀦𑀁 𑀤𑀡𑁆𑀟𑀓𑀔𑀦𑁆𑀥𑀸𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑁄 𑀔𑀦𑁆𑀥𑁄 𑀬𑀸𑀯𑀓𑀸𑀮𑀺𑀓𑁄, 𑀉𑀧𑁆𑀧𑀮𑀚𑀸𑀢𑀻𑀦𑀁 𑀧𑀡𑁆𑀡𑀤𑀡𑁆𑀟𑀓𑁄 𑀧𑀤𑀼𑀫𑀚𑀸𑀢𑀻𑀦𑀁 𑀲𑀩𑁆𑀩𑁄𑀧𑀺 𑀤𑀡𑁆𑀟𑀓𑁄 𑀓𑀭𑀯𑀺𑀦𑁆𑀤𑀤𑀡𑁆𑀟𑀸𑀤𑀬𑁄 𑀘 𑀅𑀯𑀲𑁂𑀲𑀲𑀩𑁆𑀩𑀔𑀦𑁆𑀥𑀸 𑀬𑀸𑀯𑀚𑀻𑀯𑀺𑀓𑀸.

𑀢𑀘𑀔𑀸𑀤𑀦𑀻𑀬𑁂 𑀉𑀘𑁆𑀙𑀼𑀢𑀘𑁄𑀯 𑀏𑀓𑁄 𑀬𑀸𑀯𑀓𑀸𑀮𑀺𑀓𑁄, 𑀲𑁄𑀧𑀺 𑀲𑀭𑀲𑁄, 𑀲𑁂𑀲𑁄 𑀲𑀩𑁆𑀩𑁄 𑀬𑀸𑀯𑀚𑀻𑀯𑀺𑀓𑁄. 𑀢𑁂𑀲𑀁 𑀧𑀦 𑀫𑀢𑁆𑀣𑀓𑀔𑀦𑁆𑀥𑀢𑀘𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀧𑀸𑀴𑀺𑀬𑀁 𑀓𑀲𑀸𑀯𑀪𑁂𑀲𑀚𑁆𑀚𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀲𑀸𑀯𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑀺𑀫𑁆𑀩𑀓𑀲𑀸𑀯𑀁 𑀓𑀼𑀝𑀚𑀓𑀲𑀸𑀯𑀁 𑀧𑀝𑁄𑀮𑀓𑀲𑀸𑀯𑀁 𑀨𑀕𑁆𑀕𑀯𑀓𑀲𑀸𑀯𑀁 𑀦𑀢𑁆𑀢𑀫𑀸𑀮𑀓𑀲𑀸𑀯𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀓𑀲𑀸𑀯𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩).

𑀏𑀢𑁆𑀣 𑀳𑀺 𑀏𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀚𑁆𑀛𑀢𑀺. 𑀯𑀼𑀢𑁆𑀢𑀓𑀲𑀸𑀯𑀸𑀦𑀺 𑀘 𑀲𑀩𑁆𑀩𑀓𑀧𑁆𑀧𑀺𑀬𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀧𑀢𑁆𑀢𑀔𑀸𑀤𑀦𑀻𑀬𑁂 𑀫𑀽𑀮𑀓𑀁 𑀔𑀸𑀭𑀓𑁄 𑀘𑀘𑁆𑀘𑀼 𑀢𑀫𑁆𑀩𑀓𑁄 𑀢𑀡𑁆𑀟𑀼𑀮𑁂𑀬𑁆𑀬𑀓𑁄 𑀧𑀧𑀼𑀦𑁆𑀦𑀸𑀕𑁄 𑀯𑀢𑁆𑀣𑀼𑀮𑁂𑀬𑁆𑀬𑀓𑁄 𑀯𑀚𑀓𑀮𑀺 𑀚𑀚𑁆𑀛𑀭𑀺 𑀲𑁂𑀮𑁆𑀮𑀼 𑀲𑀺𑀕𑁆𑀕𑀼 𑀓𑀸𑀲𑀫𑀤𑁆𑀤𑀓𑁄 𑀉𑀫𑁆𑀫𑀸𑀘𑀻𑀦𑀫𑀼𑀕𑁆𑀕𑁄 𑀫𑀸𑀲𑁄 𑀭𑀸𑀚𑀫𑀸𑀲𑁄 𑀞𑀧𑁂𑀢𑁆𑀯𑀸 𑀫𑀳𑀸𑀦𑀺𑀧𑁆𑀨𑀸𑀯𑀁 𑀅𑀯𑀲𑁂𑀲𑀦𑀺𑀧𑁆𑀨𑀸𑀯𑁄 𑀅𑀕𑁆𑀕𑀺𑀫𑀦𑁆𑀣𑁄 𑀲𑀼𑀦𑀺𑀲𑀦𑁆𑀦𑀓𑁄 𑀲𑁂𑀢𑀯𑀭𑀡𑁄 𑀦𑀸𑀴𑀺𑀓𑀸 𑀪𑀽𑀫𑀺𑀬𑀁 𑀚𑀸𑀢𑀮𑁄𑀡𑀻𑀢𑀺 𑀏𑀢𑁂𑀲𑀁 𑀧𑀢𑁆𑀢𑀸𑀦𑀺, 𑀅𑀜𑁆𑀜𑀸𑀦𑀺 𑀘 𑀏𑀯𑀭𑀽𑀧𑀸𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀜𑁆𑀘 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀧𑀢𑁆𑀢𑀸𑀦𑀺 𑀏𑀓𑀁𑀲𑁂𑀦 𑀬𑀸𑀯𑀓𑀸𑀮𑀺𑀓𑀸𑀦𑀺, 𑀬𑀸 𑀧𑀦𑀜𑁆𑀜𑀸 𑀫𑀳𑀸𑀦𑀔𑀧𑀺𑀝𑁆𑀞𑀺𑀫𑀢𑁆𑀢𑀧𑀡𑁆𑀡𑀸 𑀮𑁄𑀡𑀺𑀭𑀼𑀓𑁆𑀔𑁂 𑀘 𑀕𑀘𑁆𑀙𑁂 𑀘 𑀆𑀭𑁄𑀳𑀢𑀺, 𑀢𑀲𑁆𑀲𑀸 𑀧𑀢𑁆𑀢𑀁 𑀬𑀸𑀯𑀚𑀻𑀯𑀺𑀓𑀁. 𑀩𑁆𑀭𑀳𑁆𑀫𑀺𑀧𑀢𑁆𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀤𑀻𑀧𑀯𑀸𑀲𑀺𑀦𑁄 𑀯𑀤𑀦𑁆𑀢𑀺. 𑀅𑀫𑁆𑀩𑀧𑀮𑁆𑀮𑀯𑀁 𑀬𑀸𑀯𑀓𑀸𑀮𑀺𑀓𑀁, 𑀅𑀲𑁄𑀓𑀧𑀮𑁆𑀮𑀯𑀁 𑀧𑀦 𑀬𑀸𑀯𑀚𑀻𑀯𑀺𑀓𑀁. 𑀬𑀸𑀦𑀺 𑀘𑀜𑁆𑀜𑀸𑀦𑀺 𑀧𑀸𑀴𑀺𑀬𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑀺𑀫𑁆𑀩𑀧𑀡𑁆𑀡𑀁 𑀓𑀼𑀝𑀚𑀧𑀡𑁆𑀡𑀁 𑀧𑀝𑁄𑀮𑀧𑀡𑁆𑀡𑀁 𑀲𑀼𑀮𑀲𑀺𑀧𑀡𑁆𑀡𑀁 𑀓𑀧𑁆𑀧𑀸𑀲𑀧𑀡𑁆𑀡𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀧𑀡𑁆𑀡𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋

𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀧𑀡𑁆𑀡𑀸𑀦𑀺, 𑀢𑁂𑀲𑀁 𑀧𑀼𑀧𑁆𑀨𑀨𑀮𑀸𑀦𑀺𑀧𑀺. 𑀬𑀸𑀯𑀚𑀻𑀯𑀺𑀓𑀧𑀡𑁆𑀡𑀸𑀦𑀁 𑀧𑀦 𑀨𑀕𑁆𑀕𑀯𑀧𑀡𑁆𑀡𑀁 𑀅𑀚𑁆𑀚𑀼𑀓𑀧𑀡𑁆𑀡𑀁 𑀨𑀡𑀺𑀚𑁆𑀚𑀓𑀧𑀡𑁆𑀡𑀁 𑀢𑀫𑁆𑀩𑀽𑀮𑀧𑀡𑁆𑀡𑀁 𑀧𑀤𑀼𑀫𑀺𑀦𑀺𑀧𑀡𑁆𑀡𑀦𑁆𑀢𑀺 𑀏𑀯𑀁 𑀕𑀡𑀦𑀯𑀲𑁂𑀦 𑀅𑀦𑁆𑀢𑁄 𑀦𑀢𑁆𑀣𑀺.

𑀧𑀼𑀧𑁆𑀨𑀔𑀸𑀤𑀦𑀻𑀬𑁂 𑀫𑀽𑀮𑀓𑀧𑀼𑀧𑁆𑀨𑀁 𑀔𑀸𑀭𑀓𑀧𑀼𑀧𑁆𑀨𑀁 𑀘𑀘𑁆𑀘𑀼𑀧𑀼𑀧𑁆𑀨𑀁 𑀢𑀫𑁆𑀩𑀓𑀧𑀼𑀧𑁆𑀨𑀁 𑀯𑀚𑀓𑀮𑀺𑀧𑀼𑀧𑁆𑀨𑀁 𑀚𑀚𑁆𑀛𑀭𑀺𑀧𑀼𑀧𑁆𑀨𑀁 𑀘𑀽𑀴𑀦𑀺𑀧𑁆𑀨𑀸𑀯𑀧𑀼𑀧𑁆𑀨𑀁 𑀫𑀳𑀸𑀦𑀺𑀧𑁆𑀨𑀸𑀯𑀧𑀼𑀧𑁆𑀨𑀁 𑀓𑀲𑁂𑀭𑀼𑀓𑀧𑀼𑀧𑁆𑀨𑀁 𑀦𑀸𑀴𑀺𑀓𑁂𑀭𑀢𑀸𑀮𑀓𑁂𑀢𑀓𑀸𑀦𑀁 𑀢𑀭𑀼𑀡𑀧𑀼𑀧𑁆𑀨𑀸𑀦𑀺 𑀲𑁂𑀢𑀯𑀭𑀡𑀧𑀼𑀧𑁆𑀨𑀁 𑀲𑀺𑀕𑁆𑀕𑀼𑀧𑀼𑀧𑁆𑀨𑀁 𑀉𑀧𑁆𑀧𑀮𑀧𑀤𑀼𑀫𑀚𑀸𑀢𑀺𑀓𑀸𑀦𑀁 𑀧𑀼𑀧𑁆𑀨𑀸𑀦𑀁 𑀓𑀡𑁆𑀡𑀺𑀓𑀸𑀫𑀢𑁆𑀢𑀁 𑀅𑀕𑀦𑁆𑀥𑀺𑀧𑀼𑀧𑁆𑀨𑀁 𑀓𑀭𑀻𑀭𑀧𑀼𑀧𑁆𑀨𑀁 𑀚𑀻𑀯𑀦𑁆𑀢𑀻 𑀧𑀼𑀧𑁆𑀨𑀦𑁆𑀢𑀺 𑀏𑀯𑀫𑀸𑀤𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀧𑀼𑀧𑁆𑀨𑀁 𑀬𑀸𑀯𑀓𑀸𑀮𑀺𑀓𑀁, 𑀅𑀲𑁄𑀓𑀩𑀓𑀼𑀮𑀓𑀼𑀬𑁆𑀬𑀓𑀧𑀼𑀦𑁆𑀦𑀸𑀕𑀘𑀫𑁆𑀧𑀓𑀚𑀸𑀢𑀺𑀓𑀭𑀯𑀻𑀭𑀓𑀡𑀺𑀓𑀸𑀭𑀓𑀼𑀦𑁆𑀤𑀦𑀯𑀫𑀸𑀮𑀺𑀓𑀫𑀮𑁆𑀮𑀺𑀓𑀸𑀤𑀻𑀦𑀁 𑀧𑀦 𑀧𑀼𑀧𑁆𑀨𑀁 𑀬𑀸𑀯𑀚𑀻𑀯𑀺𑀓𑀁, 𑀢𑀲𑁆𑀲 𑀕𑀡𑀦𑀸𑀬 𑀅𑀦𑁆𑀢𑁄 𑀦𑀢𑁆𑀣𑀺. 𑀧𑀸𑀴𑀺𑀬𑀁 𑀧𑀦𑀲𑁆𑀲 𑀓𑀲𑀸𑀯𑀪𑁂𑀲𑀚𑁆𑀚𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀨𑀮𑀔𑀸𑀤𑀦𑀻𑀬𑁂 𑀧𑀦𑀲𑀮𑀩𑀼𑀚𑀢𑀸𑀮𑀦𑀸𑀴𑀺𑀓𑁂𑀭𑀅𑀫𑁆𑀩𑀚𑀫𑁆𑀩𑀼𑀅𑀫𑁆𑀩𑀸𑀝𑀓𑀢𑀺𑀦𑁆𑀢𑀺𑀡𑀺𑀓𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀢𑁆𑀣𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀢𑀺𑀫𑁆𑀩𑀭𑀽𑀲𑀓𑀢𑀺𑀧𑀼𑀲𑀯𑀸𑀢𑀺𑀗𑁆𑀕𑀡𑀘𑁄𑀘𑀫𑁄𑀘𑀫𑀥𑀼𑀓𑀸𑀤𑀻𑀦𑀁 𑀨𑀮𑀸𑀦𑀺, 𑀬𑀸𑀦𑀺 𑀮𑁄𑀓𑁂 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺, 𑀦𑀸𑀫𑀕𑀡𑀦𑀯𑀲𑁂𑀦 𑀢𑁂𑀲𑀁 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁. 𑀬𑀸𑀦𑀺 𑀧𑀦 𑀧𑀸𑀴𑀺𑀬𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀩𑀺𑀮𑀗𑁆𑀕𑀁 𑀧𑀺𑀧𑁆𑀧𑀮𑀺𑀁 𑀫𑀭𑀻𑀘𑀁 𑀳𑀭𑀻𑀢𑀓𑀁 𑀯𑀺𑀪𑀻𑀢𑀓𑀁 𑀆𑀫𑀮𑀓𑀁 𑀕𑁄𑀝𑁆𑀞𑀨𑀮𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀨𑀮𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀦𑁂𑀯 𑀔𑀸𑀤𑀦𑀻𑀬𑁂 𑀔𑀸𑀤𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀺, 𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋

𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀫𑁆𑀧𑀺 𑀅𑀧𑀭𑀺𑀧𑀓𑁆𑀓𑀸𑀦𑀺 𑀅𑀘𑁆𑀙𑀺𑀯𑀩𑀺𑀫𑁆𑀩𑀯𑀭𑀡𑀓𑁂𑀢𑀓𑀓𑀸𑀲𑁆𑀫𑀭𑀻𑀆𑀤𑀻𑀦𑀁 𑀨𑀮𑀸𑀦𑀺 𑀚𑀸𑀢𑀺𑀨𑀮𑀁 𑀓𑀝𑀼𑀓𑀨𑀮𑀁 𑀏𑀴𑀸 𑀢𑀓𑁆𑀓𑁄𑀮𑀦𑁆𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁.

𑀅𑀝𑁆𑀞𑀺𑀔𑀸𑀤𑀦𑀻𑀬𑁂 𑀮𑀩𑀼𑀚𑀝𑁆𑀞𑀺 𑀧𑀦𑀲𑀝𑁆𑀞𑀺 𑀅𑀫𑁆𑀩𑀸𑀝𑀓𑀝𑁆𑀞𑀺 𑀲𑀸𑀮𑀝𑁆𑀞𑀺 𑀔𑀚𑁆𑀚𑀽𑀭𑀻𑀓𑁂𑀢𑀓𑀢𑀺𑀫𑁆𑀩𑀭𑀽𑀲𑀓𑀸𑀦𑀁 𑀢𑀭𑀼𑀡𑀨𑀮𑀝𑁆𑀞𑀺 𑀢𑀺𑀦𑁆𑀢𑀺𑀡𑀺𑀓𑀝𑁆𑀞𑀺 𑀩𑀺𑀫𑁆𑀩𑀨𑀮𑀝𑁆𑀞𑀺 𑀉𑀧𑁆𑀧𑀮𑀧𑀤𑀼𑀫𑀚𑀸𑀢𑀻𑀦𑀁 𑀧𑁄𑀓𑁆𑀔𑀭𑀝𑁆𑀞𑀻𑀢𑀺 𑀏𑀯𑀫𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀅𑀝𑁆𑀞𑀻𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺, 𑀫𑀥𑀼𑀓𑀝𑁆𑀞𑀺 𑀧𑀼𑀦𑁆𑀦𑀸𑀕𑀝𑁆𑀞𑀺 𑀳𑀭𑀻𑀢𑀓𑀸𑀤𑀻𑀦𑀁 𑀅𑀝𑁆𑀞𑀻𑀦𑀺 𑀲𑀺𑀤𑁆𑀥𑀢𑁆𑀣𑀓𑀝𑁆𑀞𑀺 𑀭𑀸𑀚𑀺𑀓𑀝𑁆𑀞𑀻𑀢𑀺 𑀏𑀯𑀫𑀸𑀤𑀻𑀦𑀺 𑀅𑀝𑁆𑀞𑀻𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀧𑀸𑀴𑀺𑀬𑀁 𑀨𑀮𑀪𑁂𑀲𑀚𑁆𑀚𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀺𑀝𑁆𑀞𑀔𑀸𑀤𑀦𑀻𑀬𑁂 𑀲𑀢𑁆𑀢𑀦𑁆𑀦𑀁 𑀢𑀸𑀯 𑀥𑀜𑁆𑀜𑀸𑀦𑀁 𑀥𑀜𑁆𑀜𑀸𑀦𑀼𑀮𑁄𑀫𑀸𑀦𑀁 𑀅𑀧𑀭𑀡𑁆𑀡𑀸𑀦𑀜𑁆𑀘 𑀧𑀺𑀝𑁆𑀞𑀁 𑀧𑀦𑀲𑀧𑀺𑀝𑁆𑀞𑀁 𑀮𑀩𑀼𑀚𑀧𑀺𑀝𑁆𑀞𑀁 𑀅𑀫𑁆𑀩𑀸𑀝𑀓𑀧𑀺𑀝𑁆𑀞𑀁 𑀲𑀸𑀮𑀧𑀺𑀝𑁆𑀞𑀁 𑀥𑁄𑀢𑀓𑀢𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀜𑁆𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀧𑀓𑀢𑀺𑀆𑀳𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀔𑀸𑀤𑀦𑀻𑀬𑀢𑁆𑀣𑀁 𑀪𑁄𑀚𑀦𑀻𑀬𑀢𑁆𑀣𑀜𑁆𑀘 𑀨𑀭𑀡𑀓𑀸𑀦𑀺 𑀧𑀺𑀝𑁆𑀞𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺, 𑀅𑀥𑁄𑀢𑀓𑀁 𑀢𑀸𑀮𑀧𑀺𑀝𑁆𑀞𑀁 𑀔𑀻𑀭𑀯𑀮𑁆𑀮𑀺𑀧𑀺𑀝𑁆𑀞𑀁 𑀅𑀲𑁆𑀲𑀕𑀦𑁆𑀥𑀸𑀤𑀺𑀧𑀺𑀝𑁆𑀞𑀸𑀦𑀺 𑀘 𑀬𑀸𑀯𑀚𑀻𑀯𑀺𑀓𑀸𑀦𑀺. 𑀢𑁂𑀲𑀁 𑀧𑀸𑀴𑀺𑀬𑀁 𑀓𑀲𑀸𑀯𑁂𑀳𑀺 𑀫𑀽𑀮𑀨𑀮𑁂𑀳𑀺 𑀘 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑁂 𑁋 𑀏𑀓𑁄 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑁄𑀯 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀲𑁂𑀲𑀸 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀺 𑀳𑀺𑀗𑁆𑀕𑀼𑀁 𑀳𑀺𑀗𑁆𑀕𑀼𑀚𑀢𑀼𑀁 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀁 𑀢𑀓𑀁 𑀢𑀓𑀧𑀢𑁆𑀢𑀺𑀁 𑀢𑀓𑀧𑀡𑁆𑀡𑀺𑀁 𑀲𑀚𑁆𑀚𑀼𑀮𑀲𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀚𑀢𑀽𑀦𑀺 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁩) 𑁋

𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸 𑀦𑀺𑀬𑁆𑀬𑀸𑀲𑀸 𑀬𑀸𑀯𑀚𑀻𑀯𑀺𑀓𑀸. 𑀢𑀢𑁆𑀣 𑀬𑁂𑀯𑀸𑀧𑀦𑀓𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀅𑀫𑁆𑀩𑀦𑀺𑀬𑁆𑀬𑀸𑀲𑁄 𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑁄𑀢𑀺 𑀏𑀯𑀁 𑀦𑀸𑀫𑀯𑀲𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀬𑀦𑁆𑀢𑀁 𑀤𑀲𑁆𑀲𑁂𑀢𑀼𑀁. 𑀏𑀯𑀁 𑀇𑀫𑁂𑀲𑀼 𑀫𑀽𑀮𑀔𑀸𑀤𑀦𑀻𑀬𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁, 𑀲𑀩𑁆𑀩𑀫𑁆𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫𑀸𑀢𑀺 𑀲𑀗𑁆𑀕𑀳𑀺𑀢𑀁.

𑁯𑁧. 𑀬𑀸𑀫𑀓𑀸𑀮𑀺𑀓𑁂𑀲𑀼 𑀧𑀦 𑀅𑀝𑁆𑀞 𑀧𑀸𑀦𑀸𑀦𑀺 𑀦𑀸𑀫 𑀅𑀫𑁆𑀩𑀧𑀸𑀦𑀁 𑀚𑀫𑁆𑀩𑀼𑀧𑀸𑀦𑀁 𑀘𑁄𑀘𑀧𑀸𑀦𑀁 𑀫𑁄𑀘𑀧𑀸𑀦𑀁 𑀫𑀥𑀼𑀓𑀧𑀸𑀦𑀁 𑀫𑀼𑀤𑁆𑀤𑀺𑀓𑀧𑀸𑀦𑀁 𑀲𑀸𑀮𑀽𑀓𑀧𑀸𑀦𑀁 𑀨𑀸𑀭𑀼𑀲𑀓𑀧𑀸𑀦𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀧𑀸𑀦𑀸𑀦𑀺. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀅𑀫𑁆𑀩𑀧𑀸𑀦𑀦𑁆𑀢𑀺 𑀆𑀫𑁂𑀳𑀺 𑀯𑀸 𑀧𑀓𑁆𑀓𑁂𑀳𑀺 𑀯𑀸 𑀅𑀫𑁆𑀩𑁂𑀳𑀺 𑀓𑀢𑀧𑀸𑀦𑀁. 𑀢𑀢𑁆𑀣 𑀆𑀫𑁂𑀳𑀺 𑀓𑀭𑁄𑀦𑁆𑀢𑁂𑀦 𑀅𑀫𑁆𑀩𑀢𑀭𑀼𑀡𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀢𑀧𑁂 𑀆𑀤𑀺𑀘𑁆𑀘𑀧𑀸𑀓𑁂𑀦 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀓𑁂𑀳𑀺 𑀫𑀥𑀼𑀲𑀓𑁆𑀓𑀸𑀭𑀓𑀧𑁆𑀧𑀽𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀓𑀸𑀢𑀩𑁆𑀩𑀁, 𑀏𑀯𑀁 𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀸𑀦𑁂𑀲𑀼. 𑀚𑀫𑁆𑀩𑀼𑀧𑀸𑀦𑀦𑁆𑀢𑀺 𑀚𑀫𑁆𑀩𑀼𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀘𑁄𑀘𑀧𑀸𑀦𑀦𑁆𑀢𑀺 𑀅𑀝𑁆𑀞𑀺𑀓𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑁄𑀘𑀧𑀸𑀦𑀦𑁆𑀢𑀺 𑀅𑀦𑀝𑁆𑀞𑀺𑀓𑁂𑀳𑀺 𑀓𑀤𑀮𑀺𑀨𑀮𑁂𑀳𑀺 𑀓𑀢𑀧𑀸𑀦𑀁. 𑀫𑀥𑀼𑀓𑀧𑀸𑀦𑀦𑁆𑀢𑀺 𑀫𑀥𑀼𑀓𑀸𑀦𑀁 𑀚𑀸𑀢𑀺𑀭𑀲𑁂𑀦 𑀓𑀢𑀧𑀸𑀦𑀁. 𑀢𑀁 𑀧𑀦 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀫𑀼𑀤𑁆𑀤𑀺𑀓𑀧𑀸𑀦𑀦𑁆𑀢𑀺 𑀫𑀼𑀤𑁆𑀤𑀺𑀓𑀸 𑀉𑀤𑀓𑁂 𑀫𑀤𑁆𑀤𑀺𑀢𑁆𑀯𑀸 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀲𑀸𑀮𑀽𑀓𑀧𑀸𑀦𑀦𑁆𑀢𑀺 𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀸𑀤𑀻𑀦𑀁 𑀲𑀸𑀮𑀽𑀓𑁂 𑀫𑀤𑁆𑀤𑀺𑀢𑁆𑀯𑀸 𑀓𑀢𑀧𑀸𑀦𑀁. 𑀨𑀸𑀭𑀼𑀲𑀓𑀧𑀸𑀦𑀦𑁆𑀢𑀺 𑀨𑀸𑀭𑀼𑀲𑀓𑀨𑀮𑁂𑀳𑀺 𑀅𑀫𑁆𑀩𑀧𑀸𑀦𑀁 𑀯𑀺𑀬 𑀓𑀢𑀧𑀸𑀦𑀁. 𑀇𑀫𑀸𑀦𑀺 𑀅𑀝𑁆𑀞 𑀧𑀸𑀦𑀸𑀦𑀺 𑀲𑀻𑀢𑀸𑀦𑀺𑀧𑀺 𑀆𑀤𑀺𑀘𑁆𑀘𑀧𑀸𑀓𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀅𑀕𑁆𑀕𑀺𑀧𑀸𑀓𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺.

𑀅𑀯𑀲𑁂𑀲𑀸𑀦𑀺 𑀯𑁂𑀢𑁆𑀢𑀢𑀺𑀦𑁆𑀢𑀺𑀡𑀺𑀓𑀫𑀸𑀢𑀼𑀮𑀼𑀗𑁆𑀕𑀓𑀧𑀺𑀢𑁆𑀣𑀓𑁄𑀲𑀫𑁆𑀩𑀓𑀭𑀫𑀦𑁆𑀤𑀸𑀤𑀺𑀔𑀼𑀤𑁆𑀤𑀓𑀨𑀮𑀧𑀸𑀦𑀸𑀦𑀺 𑀅𑀝𑁆𑀞𑀧𑀸𑀦𑀕𑀅𑀓𑀸𑀦𑁂𑀯. 𑀢𑀸𑀦𑀺 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀸𑀦𑀺, 𑀅𑀣 𑀔𑁄 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀦𑁆𑀢𑀺, 𑀢𑀲𑁆𑀫𑀸 𑀓𑀧𑁆𑀧𑀦𑁆𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 𑀞𑀧𑁂𑀢𑁆𑀯𑀸 𑀥𑀜𑁆𑀜𑀨𑀮𑀭𑀲’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁦) 𑀯𑀼𑀢𑁆𑀢𑀢𑁆𑀢𑀸 𑀞𑀧𑁂𑀢𑁆𑀯𑀸 𑀲𑀸𑀦𑀼𑀮𑁄𑀫𑀥𑀜𑁆𑀜𑀨𑀮𑀭𑀲𑀁 𑀅𑀜𑁆𑀜𑀁 𑀨𑀮𑀧𑀸𑀦𑀁 𑀦𑀸𑀫 𑀅𑀓𑀧𑁆𑀧𑀺𑀬𑀁 𑀦𑀢𑁆𑀣𑀺, 𑀲𑀩𑁆𑀩𑀁 𑀬𑀸𑀫𑀓𑀸𑀮𑀺𑀓𑀫𑁂𑀯. 𑀢𑀢𑁆𑀣 𑀲𑀸𑀦𑀼𑀮𑁄𑀫𑀥𑀜𑁆𑀜𑀨𑀮𑀭𑀲𑁄 𑀦𑀸𑀫 𑀲𑀢𑁆𑀢𑀦𑁆𑀦𑀜𑁆𑀘𑁂𑀯 𑀥𑀜𑁆𑀜𑀸𑀦𑀁 𑀢𑀸𑀮𑀦𑀸𑀴𑀺𑀓𑁂𑀭𑀧𑀦𑀲𑀮𑀩𑀼𑀚𑀅𑀮𑀸𑀩𑀼𑀓𑀼𑀫𑁆𑀪𑀡𑁆𑀟𑀧𑀼𑀲𑁆𑀲𑀨𑀮𑀢𑀺𑀧𑀼𑀲𑀏𑀴𑀸𑀮𑀼𑀓𑀸𑀢𑀺 𑀦𑀯𑀦𑁆𑀦𑀜𑁆𑀘 𑀫𑀳𑀸𑀨𑀮𑀸𑀦𑀁 𑀲𑀩𑁆𑀩𑁂𑀲𑀜𑁆𑀘 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀁 𑀅𑀦𑀼𑀮𑁄𑀫𑀥𑀜𑁆𑀜𑀸𑀦𑀁 𑀭𑀲𑁄 𑀬𑀸𑀯𑀓𑀸𑀮𑀺𑀓𑁄, 𑀢𑀲𑁆𑀫𑀸 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀢𑁆𑀢𑀭𑀲𑀁 𑀞𑀧𑁂𑀢𑁆𑀯𑀸 𑀟𑀸𑀓𑀭𑀲’’𑀦𑁆𑀢𑀺 (𑀫𑀳𑀸𑀯. 𑁩𑁦𑁦) 𑀯𑀼𑀢𑁆𑀢𑀢𑁆𑀢𑀸 𑀧𑀓𑁆𑀓𑀟𑀸𑀓𑀭𑀲𑀁 𑀞𑀧𑁂𑀢𑁆𑀯𑀸 𑀬𑀸𑀯𑀓𑀸𑀮𑀺𑀓𑀧𑀢𑁆𑀢𑀸𑀦𑀫𑁆𑀧𑀺 𑀲𑀻𑀢𑁄𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀓𑀢𑀭𑀲𑁄 𑀯𑀸 𑀆𑀤𑀺𑀘𑁆𑀘𑀧𑀸𑀓𑁄 𑀯𑀸 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀼𑀧𑁆𑀨𑀭𑀲𑀁 𑀞𑀧𑁂𑀢𑁆𑀯𑀸 𑀫𑀥𑀼𑀓𑀧𑀼𑀧𑁆𑀨𑀭𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀥𑀼𑀓𑀧𑀼𑀧𑁆𑀨𑀭𑀲𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄𑀧𑀺 𑀧𑀼𑀧𑁆𑀨𑀭𑀲𑁄 𑀯𑀝𑁆𑀝𑀢𑀺.

𑁯𑁨. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀦𑀸𑀫 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀺. 𑀢𑀢𑁆𑀣 𑀲𑀧𑁆𑀧𑀺 𑀦𑀸𑀫 𑀕𑁄𑀲𑀧𑁆𑀧𑀺 𑀯𑀸 𑀅𑀚𑀺𑀓𑀸𑀲𑀧𑁆𑀧𑀺 𑀯𑀸 𑀫𑀳𑀺𑀁𑀲𑀲𑀧𑁆𑀧𑀺 𑀯𑀸 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺. 𑀦𑀯𑀦𑀻𑀢𑀁 𑀦𑀸𑀫 𑀢𑁂𑀲𑀁𑀬𑁂𑀯 𑀦𑀯𑀦𑀻𑀢𑀁. 𑀢𑁂𑀮𑀁 𑀦𑀸𑀫 𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀢𑁂𑀮𑀁 𑀯𑀲𑀸𑀢𑁂𑀮𑀁. 𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀼. 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀁 (𑀧𑀘𑀺. 𑁨𑁬𑁦). 𑀬𑀸𑀯𑀚𑀻𑀯𑀺𑀓𑀁 𑀧𑀦 𑀳𑁂𑀝𑁆𑀞𑀸 𑀬𑀸𑀯𑀓𑀸𑀮𑀺𑀓𑁂 𑀫𑀽𑀮𑀔𑀸𑀤𑀦𑀻𑀬𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁯𑁩. 𑀢𑀢𑁆𑀣 (𑀧𑀸𑀘𑀺. 𑀅𑀝𑁆𑀞. 𑁨𑁫𑁬) 𑀅𑀭𑀼𑀡𑁄𑀤𑀬𑁂 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀓𑀸𑀮𑀺𑀓𑀁 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀦𑀺𑀤𑀳𑀺𑀢𑁆𑀯𑀸 𑀬𑀸𑀯 𑀓𑀸𑀮𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀬𑀸𑀫𑀓𑀸𑀮𑀺𑀓𑀁 𑀏𑀓𑀁 𑀅𑀳𑁄𑀭𑀢𑁆𑀢𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀭𑀢𑁆𑀢𑀁, 𑀇𑀢𑀭𑀁 𑀲𑀢𑀺 𑀧𑀘𑁆𑀘𑀬𑁂 𑀬𑀸𑀯𑀚𑀻𑀯𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀁 𑀯𑀻𑀢𑀺𑀦𑀸𑀫𑀺𑀢𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀬𑀸𑀯𑀓𑀸𑀮𑀺𑀓𑀁 𑀯𑀸 𑀬𑀸𑀫𑀓𑀸𑀮𑀺𑀓𑀁 𑀯𑀸 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀢𑀸𑀯 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀭𑀢𑁄 𑀧𑀦 𑀏𑀓𑀫𑁂𑀓𑀲𑁆𑀫𑀺𑀁 𑀅𑀚𑁆𑀛𑁄𑀳𑀸𑀭𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂𑀧𑀺 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺, 𑀬𑀁 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀕𑀡𑁆𑀞𑀺𑀓𑀧𑀢𑁆𑀢𑀲𑁆𑀲 𑀯𑀸 𑀕𑀡𑁆𑀞𑀺𑀓𑀦𑁆𑀢𑀭𑁂 𑀲𑁆𑀦𑁂𑀳𑁄 𑀧𑀯𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀉𑀡𑁆𑀳𑁂 𑀑𑀢𑀸𑀧𑁂𑀦𑁆𑀢𑀲𑁆𑀲 𑀧𑀕𑁆𑀖𑀭𑀢𑀺, 𑀉𑀡𑁆𑀳𑀬𑀸𑀕𑀼𑀬𑀸 𑀯𑀸 𑀕𑀳𑀺𑀢𑀸𑀬 𑀲𑀦𑁆𑀤𑀺𑀲𑁆𑀲𑀢𑀺, 𑀢𑀸𑀤𑀺𑀲𑁂 𑀧𑀢𑁆𑀢𑁂𑀧𑀺 𑀧𑀼𑀦𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀲𑁆𑀫𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀅𑀘𑁆𑀙𑁄𑀤𑀓𑀁 𑀯𑀸 𑀆𑀲𑀺𑀜𑁆𑀘𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀖𑀁𑀲𑀺𑀢𑁆𑀯𑀸 𑀦𑀺𑀲𑁆𑀦𑁂𑀳𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄. 𑀲𑀘𑁂 𑀳𑀺 𑀉𑀤𑀓𑁂 𑀯𑀸 𑀲𑁆𑀦𑁂𑀳𑀪𑀸𑀯𑁄, 𑀧𑀢𑁆𑀢𑁂 𑀯𑀸 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺, 𑀢𑁂𑀮𑀯𑀡𑁆𑀡𑀧𑀢𑁆𑀢𑁂 𑀧𑀦 𑀅𑀗𑁆𑀕𑀼𑀮𑀺𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸. 𑀬𑀫𑁆𑀧𑀺 𑀪𑀺𑀓𑁆𑀔𑀽 𑀦𑀺𑀭𑀧𑁂𑀓𑁆𑀔𑀸 𑀲𑀸𑀫𑀡𑁂𑀭𑀸𑀦𑀁 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀜𑁆𑀘𑁂 𑀲𑀸𑀫𑀡𑁂𑀭𑀸 𑀦𑀺𑀤𑀳𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀲𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑀺 𑀤𑀼𑀢𑀺𑀬𑀤𑀺𑀯𑀲𑁂 𑀦 𑀯𑀝𑁆𑀝𑀢𑀺. 𑀢𑀢𑁄 𑀳𑀺 𑀏𑀓𑀲𑀺𑀢𑁆𑀣𑀫𑁆𑀧𑀺 𑀅𑀚𑁆𑀛𑁄𑀳𑀭𑀢𑁄 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀼 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀲𑁂𑀲𑁂𑀲𑀼 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁.

𑀬𑀸𑀫𑀓𑀸𑀮𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀅𑀚𑁆𑀛𑁄𑀳𑀭𑀢𑁄 𑀧𑀸𑀘𑀺𑀢𑁆𑀢𑀺𑀬𑀁, 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀯𑀸𑀭𑀺𑀢𑁄 𑀳𑀼𑀢𑁆𑀯𑀸 𑀅𑀦𑀢𑀺𑀭𑀺𑀢𑁆𑀢𑀓𑀢𑀁 𑀅𑀚𑁆𑀛𑁄𑀳𑀭𑀢𑀺, 𑀧𑀓𑀢𑀺𑀆𑀫𑀺𑀲𑁂 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂, 𑀲𑁂𑀲𑀅𑀓𑀧𑁆𑀧𑀺𑀬𑀫𑀁𑀲𑁂 𑀤𑀼𑀓𑁆𑀓𑀝𑁂𑀦 𑀲𑀤𑁆𑀥𑀺𑀁. 𑀬𑀸𑀫𑀓𑀸𑀮𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀲𑀸𑀫𑀺𑀲𑁂𑀦 𑀫𑀼𑀔𑁂𑀦 𑀅𑀚𑁆𑀛𑁄𑀳𑀭𑀢𑁄 𑀤𑁆𑀯𑁂, 𑀦𑀺𑀭𑀸𑀫𑀺𑀲𑁂𑀦 𑀏𑀓𑀫𑁂𑀯. 𑀆𑀳𑀸𑀭𑀢𑁆𑀣𑀸𑀬 𑀅𑀚𑁆𑀛𑁄𑀳𑀭𑀢𑁄 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀤𑀼𑀓𑁆𑀓𑀝𑀁 𑀯𑀟𑁆𑀠𑀢𑀺. 𑀲𑀘𑁂 𑀯𑀺𑀓𑀸𑀮𑁂 𑀅𑀚𑁆𑀛𑁄𑀳𑀭𑀢𑀺, 𑀧𑀓𑀢𑀺𑀪𑁄𑀚𑀦𑁂 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀘 𑀯𑀺𑀓𑀸𑀮𑀪𑁄𑀚𑀦𑀧𑀘𑁆𑀘𑀬𑀸 𑀘 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀅𑀓𑀧𑁆𑀧𑀺𑀬𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀁 𑀤𑀼𑀓𑁆𑀓𑀝𑀜𑁆𑀘 𑀯𑀟𑁆𑀠𑀢𑀺. 𑀬𑀸𑀫𑀓𑀸𑀮𑀺𑀓𑁂 𑀯𑀺𑀓𑀸𑀮𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺. 𑀅𑀦𑀢𑀺𑀭𑀺𑀢𑁆𑀢𑀧𑀘𑁆𑀘𑀬𑀸 𑀧𑀦 𑀯𑀺𑀓𑀸𑀮𑁂 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀼 𑀅𑀦𑀸𑀧𑀢𑁆𑀢𑀺.

𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦 𑀬𑀸𑀯𑀚𑀻𑀯𑀺𑀓𑀜𑁆𑀘 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑀧𑀘𑁆𑀘𑀬𑀸 𑀢𑀸𑀯 𑀤𑀼𑀓𑁆𑀓𑀝𑀁, 𑀅𑀚𑁆𑀛𑁄𑀳𑀭𑀢𑁄 𑀧𑀦 𑀲𑀘𑁂 𑀦𑀺𑀭𑀸𑀫𑀺𑀲𑀁 𑀳𑁄𑀢𑀺, 𑀅𑀚𑁆𑀛𑁄𑀳𑀸𑀭𑁂 𑀤𑀼𑀓𑁆𑀓𑀝𑀁. 𑀅𑀣 𑀆𑀫𑀺𑀲𑀲𑀁𑀲𑀝𑁆𑀞𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺, 𑀬𑀣𑀸𑀯𑀢𑁆𑀣𑀼𑀓𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑁯𑁪. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀲𑀼 𑀧𑀦 𑀲𑀧𑁆𑀧𑀺𑀆𑀤𑀻𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁨𑁨) 𑁋 𑀲𑀧𑁆𑀧𑀺 𑀢𑀸𑀯 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀲𑀘𑁂 𑀏𑀓𑀪𑀸𑀚𑀦𑁂 𑀞𑀧𑀺𑀢𑀁, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀲𑀘𑁂 𑀩𑀳𑀽𑀲𑀼, 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀉𑀕𑁆𑀕𑀳𑀺𑀢𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀢𑀁 𑀆𑀧𑀦𑁆𑀦𑀢𑁆𑀢𑀸. 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑁂𑀦 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀤𑁂𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀘𑁂 𑀲𑀬𑀁 𑀓𑀭𑁄𑀢𑀺, 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀦𑀯𑀦𑀻𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀓𑀢𑀲𑀧𑁆𑀧𑀺 𑀲𑀢𑁆𑀢𑀸𑀳𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀉𑀕𑁆𑀕𑀳𑀺𑀢𑀓𑁂𑀦 𑀓𑀢𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀼𑀤𑁆𑀥𑀲𑀧𑁆𑀧𑀺𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑁂𑀦 𑀯𑀸 𑀤𑀥𑀺𑀦𑀸 𑀯𑀸 𑀓𑀢𑀲𑀧𑁆𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁 𑀲𑀸𑀫𑀺𑀲𑀫𑁆𑀧𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀯𑀝𑁆𑀝𑀢𑀺, 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺.

𑁯𑁫. 𑀦𑀯𑀦𑀻𑀢𑀁 𑀢𑀸𑀧𑁂𑀦𑁆𑀢𑀲𑁆𑀲 𑀳𑀺 𑀲𑀸𑀫𑀁𑀧𑀸𑀓𑁄 𑀦 𑀳𑁄𑀢𑀺, 𑀲𑀸𑀫𑀁𑀧𑀓𑁆𑀓𑁂𑀦 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀆𑀫𑀺𑀲𑀁 𑀦 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀘 𑀦 𑀯𑀝𑁆𑀝𑀢𑀺𑀬𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺 𑀲𑀯𑀢𑁆𑀣𑀼𑀓𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀧𑀦 𑀅𑀩𑁆𑀪𑀜𑁆𑀚𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀘 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁, 𑀉𑀪𑀬𑁂𑀲𑀫𑁆𑀧𑀺 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺. 𑀏𑀲 𑀦𑀬𑁄 𑀅𑀓𑀧𑁆𑀧𑀺𑀬𑀫𑀁𑀲𑀲𑀧𑁆𑀧𑀺𑀫𑁆𑀳𑀺. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑀲𑀧𑁆𑀧𑀺𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀢𑁆𑀣 𑀇𑀫𑀺𑀦𑀸 𑀤𑀼𑀓𑁆𑀓𑀝𑀁. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸 𑀫𑀦𑀼𑀲𑁆𑀲𑀲𑀧𑁆𑀧𑀺 𑀘 𑀦𑀯𑀦𑀻𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀤𑀼𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀧𑀭𑀢𑁄 𑀘𑀲𑁆𑀲 𑀯𑀺𑀦𑀺𑀘𑁆𑀙𑀬𑁄𑀧𑀺 𑀆𑀕𑀘𑁆𑀙𑀺𑀲𑁆𑀲𑀢𑀺. 𑀧𑀸𑀴𑀺𑀬𑀁 𑀆𑀕𑀢𑀦𑀯𑀦𑀻𑀢𑀫𑁆𑀧𑀺 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀸𑀦𑀸𑀪𑀸𑀚𑀦𑁂𑀲𑀼 𑀞𑀧𑀺𑀢𑁂 𑀪𑀸𑀚𑀦𑀕𑀡𑀦𑀸𑀬, 𑀏𑀓𑀪𑀸𑀚𑀦𑁂𑀧𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦 𑀞𑀧𑀺𑀢𑁂 𑀧𑀺𑀡𑁆𑀟𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀧𑁆𑀧𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀤𑀥𑀺𑀕𑀼𑀴𑀺𑀓𑀸𑀬𑁄𑀧𑀺 𑀢𑀓𑁆𑀓𑀩𑀺𑀦𑁆𑀤𑀽𑀦𑀺𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀥𑁄𑀢𑀁 𑀯𑀝𑁆𑀝𑀢𑀻𑀢𑀺 𑀉𑀧𑀟𑁆𑀠𑀢𑁆𑀣𑁂𑀭𑀸 𑀆𑀳𑀁𑀲𑀼. 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀧𑀦 ‘‘𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀓𑁆𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀔𑀸𑀤𑀺𑀁𑀲𑀽’’𑀢𑀺 𑀆𑀳. 𑀢𑀲𑁆𑀫𑀸 𑀦𑀯𑀦𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀤𑀥𑀺𑀢𑀓𑁆𑀓𑀫𑀓𑁆𑀔𑀺𑀓𑀸𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀘𑀺𑀢𑁆𑀯𑀸 𑀲𑀧𑁆𑀧𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁂𑀦 𑀅𑀥𑁄𑀢𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀢𑀢𑁆𑀣 𑀤𑀥𑀺𑀕𑀢𑀁 𑀯𑀸 𑀢𑀓𑁆𑀓𑀕𑀢𑀁 𑀯𑀸, 𑀢𑀁 𑀔𑀬𑀁 𑀕𑀫𑀺𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀳𑀺 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀫𑀺𑀲𑁂𑀦 𑀲𑀤𑁆𑀥𑀺𑀁 𑀧𑀓𑁆𑀓𑀢𑁆𑀢𑀸 𑀧𑀦 𑀢𑀲𑁆𑀫𑀺𑀫𑁆𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀓𑀸. 𑀇𑀤𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀦𑀯𑀦𑀻𑀢𑁂 𑀘 𑀧𑀼𑀭𑁂𑀪𑀢𑁆𑀢𑀁 𑀔𑀻𑀭𑀤𑀥𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀦𑀯𑀦𑀻𑀢𑁂 𑀘 𑀧𑀘𑁆𑀙𑀸𑀪𑀢𑁆𑀢𑀁 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀦𑀯𑀦𑀻𑀢𑁂 𑀘 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀦𑀯𑀦𑀻𑀢𑁂 𑀘 𑀅𑀓𑀧𑁆𑀧𑀺𑀬𑀫𑀁𑀲𑀦𑀯𑀦𑀻𑀢𑁂 𑀘 𑀲𑀩𑁆𑀩𑁄 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀧𑀭𑀺𑀪𑁄𑀕𑀸𑀧𑀭𑀺𑀪𑁄𑀕𑀦𑀬𑁄 𑀲𑀧𑁆𑀧𑀺𑀫𑁆𑀳𑀺 𑀯𑀼𑀢𑁆𑀢𑀓𑁆𑀓𑀫𑁂𑀦𑁂𑀯 𑀕𑀳𑁂𑀢𑀩𑁆𑀩𑁄. 𑀢𑁂𑀮𑀪𑀺𑀓𑁆𑀔𑀸𑀬 𑀧𑀯𑀺𑀝𑁆𑀞𑀸𑀦𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀢𑀢𑁆𑀣𑁂𑀯 𑀲𑀧𑁆𑀧𑀺𑀫𑁆𑀧𑀺 𑀦𑀯𑀦𑀻𑀢𑀫𑁆𑀧𑀺 𑀧𑀓𑁆𑀓𑀢𑁂𑀮𑀫𑁆𑀧𑀺 𑀅𑀧𑀓𑁆𑀓𑀢𑁂𑀮𑀫𑁆𑀧𑀺 𑀆𑀓𑀺𑀭𑀦𑁆𑀢𑀺. 𑀢𑀢𑁆𑀣 𑀢𑀓𑁆𑀓𑀤𑀥𑀺𑀩𑀺𑀦𑁆𑀤𑀽𑀦𑀺𑀧𑀺 𑀪𑀢𑁆𑀢𑀲𑀺𑀢𑁆𑀣𑀸𑀦𑀺𑀧𑀺 𑀢𑀡𑁆𑀟𑀼𑀮𑀓𑀡𑀸𑀧𑀺 𑀫𑀓𑁆𑀔𑀺𑀓𑀸𑀤𑀬𑁄𑀧𑀺 𑀳𑁄𑀦𑁆𑀢𑀺, 𑀆𑀤𑀺𑀘𑁆𑀘𑀧𑀸𑀓𑀁 𑀓𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀕𑀳𑀺𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀳𑁄𑀢𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘 𑀞𑀧𑀺𑀢𑀪𑁂𑀲𑀚𑁆𑀚𑁂𑀳𑀺 𑀲𑀤𑁆𑀥𑀺𑀁 𑀧𑀘𑀺𑀢𑁆𑀯𑀸 𑀦𑀢𑁆𑀣𑀼𑀧𑀸𑀦𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀯𑀤𑁆𑀤𑀮𑀺𑀲𑀫𑀬𑁂 𑀮𑀚𑁆𑀚𑀻 𑀲𑀸𑀫𑀡𑁂𑀭𑁄 𑀬𑀣𑀸 𑀢𑀢𑁆𑀣 𑀧𑀢𑀺𑀢𑀢𑀡𑁆𑀟𑀼𑀮𑀓𑀡𑀸𑀤𑀬𑁄 𑀦 𑀧𑀘𑁆𑀘𑀦𑁆𑀢𑀺, 𑀏𑀯𑀁 𑀅𑀕𑁆𑀕𑀺𑀫𑁆𑀳𑀺 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀼𑀦 𑀧𑀘𑀺𑀢𑁆𑀯𑀸 𑀤𑁂𑀢𑀺, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀺.

𑁯𑁬. 𑀢𑁂𑀮𑁂𑀲𑀼 𑀢𑀺𑀮𑀢𑁂𑀮𑀁 𑀢𑀸𑀯 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀢𑀲𑁆𑀲 𑀪𑀸𑀚𑀦𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀉𑀕𑁆𑀕𑀳𑀺𑀢𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀼𑀭𑁂𑀪𑀢𑁆𑀢𑀁 𑀢𑀺𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀚𑁆𑀛𑁄𑀳𑀭𑀡𑀻𑀬𑀁 𑀳𑁄𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀢𑀺𑀮𑁂 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀫𑁂𑀯 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀉𑀕𑁆𑀕𑀳𑀺𑀢𑀓𑀢𑀺𑀮𑁂𑀳𑀺 𑀓𑀢𑀢𑁂𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀢𑀺𑀮𑁂 𑀪𑀚𑁆𑀚𑀺𑀢𑁆𑀯𑀸 𑀯𑀸 𑀢𑀺𑀮𑀧𑀺𑀝𑁆𑀞𑀁 𑀯𑀸 𑀲𑁂𑀤𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀯𑀸 𑀢𑁂𑀫𑁂𑀢𑁆𑀯𑀸 𑀓𑀢𑀢𑁂𑀮𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀢𑁆𑀢𑀦𑀸 𑀓𑀢𑀁 𑀦𑀺𑀩𑁆𑀩𑀝𑁆𑀝𑀺𑀢𑀢𑁆𑀢𑀸 𑀧𑀼𑀭𑁂𑀪𑀢𑁆𑀢𑀁 𑀦𑀺𑀭𑀸𑀫𑀺𑀲𑀁 𑀯𑀝𑁆𑀝𑀢𑀺, 𑀲𑀸𑀫𑀁𑀧𑀓𑁆𑀓𑀢𑁆𑀢𑀸 𑀲𑀸𑀫𑀺𑀲𑀁 𑀦 𑀯𑀝𑁆𑀝𑀢𑀺. 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀧𑀦 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀉𑀪𑀬𑀫𑁆𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀲𑀻𑀲𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀬𑀤𑀺 𑀧𑀦 𑀅𑀧𑁆𑀧𑀁 𑀉𑀡𑁆𑀳𑁄𑀤𑀓𑀁 𑀳𑁄𑀢𑀺 𑀅𑀩𑁆𑀪𑀼𑀓𑁆𑀓𑀺𑀭𑀡𑀫𑀢𑁆𑀢𑀁, 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀺 𑀲𑀸𑀫𑀁𑀧𑀸𑀓𑀕𑀡𑀦𑀁 𑀦 𑀕𑀘𑁆𑀙𑀢𑀺. 𑀲𑀸𑀲𑀧𑀢𑁂𑀮𑀸𑀤𑀻𑀲𑀼𑀧𑀺 𑀅𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑁂𑀲𑀼 𑀅𑀯𑀢𑁆𑀣𑀼𑀓𑀢𑀺𑀮𑀢𑁂𑀮𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 𑀧𑀦 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀦𑀁 𑀲𑀸𑀲𑀧𑀸𑀤𑀻𑀦𑀁 𑀘𑀼𑀡𑁆𑀡𑁂𑀳𑀺 𑀆𑀤𑀺𑀘𑁆𑀘𑀧𑀸𑀓𑁂𑀦 𑀲𑀓𑁆𑀓𑀸 𑀢𑁂𑀮𑀁 𑀓𑀸𑀢𑀼𑀁, 𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀬𑀲𑁆𑀫𑀸 𑀧𑀦 𑀲𑀸𑀲𑀧𑀫𑀥𑀼𑀓𑀘𑀼𑀡𑁆𑀡𑀸𑀦𑀺 𑀲𑁂𑀤𑁂𑀢𑁆𑀯𑀸 𑀏𑀭𑀡𑁆𑀟𑀓𑀝𑁆𑀞𑀻𑀦𑀺 𑀘 𑀪𑀚𑁆𑀚𑀺𑀢𑁆𑀯𑀸 𑀏𑀯 𑀢𑁂𑀮𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂𑀲𑀁 𑀢𑁂𑀮𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀯𑀢𑁆𑀣𑀽𑀦𑀁 𑀬𑀸𑀯𑀚𑀻𑀯𑀺𑀓𑀢𑁆𑀢𑀸 𑀧𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺. 𑀅𑀢𑁆𑀢𑀦𑀸 𑀓𑀢𑀁 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑀓𑁂𑀳𑀺 𑀓𑀢𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀩𑀸𑀳𑀺𑀭𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀢𑁂𑀮𑀓𑀭𑀡𑀢𑁆𑀣𑀸𑀬 𑀲𑀸𑀲𑀧𑀫𑀥𑀼𑀓𑀏𑀭𑀡𑁆𑀟𑀓𑀝𑁆𑀞𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀢𑁂𑀮𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀁 𑀙𑀸𑀳𑀁 𑀯𑀝𑁆𑀝𑀢𑀺, 𑀢𑀢𑀺𑀬𑀤𑀺𑀯𑀲𑁂 𑀓𑀢𑀁 𑀧𑀜𑁆𑀘𑀸𑀳𑀁 𑀯𑀝𑁆𑀝𑀢𑀺, 𑀘𑀢𑀼𑀢𑁆𑀣, 𑀧𑀜𑁆𑀘𑀫, 𑀙𑀝𑁆𑀞, 𑀲𑀢𑁆𑀢𑀫𑀤𑀺𑀯𑀲𑁂 𑀓𑀢𑀁 𑀢𑀤𑀳𑁂𑀯 𑀯𑀝𑁆𑀝𑀢𑀺. 𑀲𑀘𑁂 𑀬𑀸𑀯 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀸 𑀢𑀺𑀝𑁆𑀞𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀅𑀝𑁆𑀞𑀫𑀤𑀺𑀯𑀲𑁂 𑀓𑀢𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀧𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀓𑀭𑁄𑀢𑀺, 𑀢𑁂𑀮𑀢𑁆𑀣𑀸𑀬 𑀕𑀳𑀺𑀢𑀲𑀸𑀲𑀧𑀸𑀤𑀻𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀫𑁂𑀯. 𑀧𑀸𑀴𑀺𑀬𑀁 𑀧𑀦 𑀅𑀦𑀸𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀦𑀸𑀴𑀺𑀓𑁂𑀭𑀦𑀺𑀫𑁆𑀩𑀓𑁄𑀲𑀫𑁆𑀩𑀓𑀭𑀫𑀦𑁆𑀤𑀸𑀤𑀻𑀦𑀁 𑀢𑁂𑀮𑀸𑀦𑀺 𑀅𑀢𑁆𑀣𑀺, 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀅𑀬𑀫𑁂𑀢𑁂𑀲𑀼 𑀯𑀺𑀲𑁂𑀲𑁄 𑁋 𑀲𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀁 𑀬𑀸𑀯𑀚𑀻𑀯𑀺𑀓𑀯𑀢𑁆𑀣𑀼𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀫𑀁𑀧𑀸𑀓𑀲𑀯𑀢𑁆𑀣𑀼𑀓𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀝𑀺𑀕𑁆𑀕𑀳𑀺𑀢𑀉𑀕𑁆𑀕𑀳𑀺𑀢𑀯𑀢𑁆𑀣𑀼𑀯𑀺𑀥𑀸𑀦𑀁 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀲𑀸𑀢𑁂𑀮𑀁 𑀦𑀸𑀫 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀲𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀯𑀲𑀸𑀦𑀁 𑀢𑁂𑀮𑀁. 𑀏𑀢𑁆𑀣 𑀘 ‘‘𑀅𑀘𑁆𑀙𑀯𑀲’’𑀦𑁆𑀢𑀺 𑀯𑀘𑀦𑁂𑀦 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸. 𑀫𑀘𑁆𑀙𑀕𑁆𑀕𑀳𑀡𑁂𑀦 𑀘 𑀲𑀼𑀲𑀼𑀓𑀸𑀧𑀺 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀯𑀸𑀴𑀫𑀘𑁆𑀙𑀢𑁆𑀢𑀸 𑀧𑀦 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀫𑀘𑁆𑀙𑀸𑀤𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑀩𑁆𑀩𑁂𑀲𑀫𑁆𑀧𑀺 𑀓𑀧𑁆𑀧𑀺𑀬𑀫𑀁𑀲𑀸𑀦𑀁 𑀯𑀲𑀸 𑀅𑀦𑀼𑀜𑁆𑀜𑀸𑀢𑀸. 𑀫𑀁𑀲𑁂𑀲𑀼 𑀳𑀺 𑀤𑀲 𑀫𑀦𑀼𑀲𑁆𑀲𑀳𑀢𑁆𑀣𑀺𑀅𑀲𑁆𑀲𑀲𑀼𑀦𑀔𑀅𑀳𑀺𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀅𑀘𑁆𑀙𑀢𑀭𑀘𑁆𑀙𑀸𑀦𑀁 𑀫𑀁𑀲𑀸𑀦𑀺 𑀅𑀓𑀧𑁆𑀧𑀺𑀬𑀸𑀦𑀺, 𑀯𑀲𑀸𑀲𑀼 𑀏𑀓𑀸 𑀫𑀦𑀼𑀲𑁆𑀲𑀯𑀲𑀸. 𑀔𑀻𑀭𑀸𑀤𑀻𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀓𑀢𑀁 𑀦𑀺𑀩𑁆𑀩𑀝𑁆𑀝𑀺𑀢𑀁 𑀯𑀲𑀸𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺. 𑀬𑀁 𑀧𑀦 𑀢𑀢𑁆𑀣 𑀲𑀼𑀔𑀼𑀫𑀭𑀚𑀲𑀤𑀺𑀲𑀁 𑀫𑀁𑀲𑀁 𑀯𑀸 𑀦𑁆𑀳𑀸𑀭𑀼 𑀯𑀸 𑀅𑀝𑁆𑀞𑀺 𑀯𑀸 𑀮𑁄𑀳𑀺𑀢𑀁 𑀯𑀸 𑀳𑁄𑀢𑀺, 𑀢𑀁 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀘𑁂 𑀧𑀦 𑀯𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀁 𑀓𑀭𑁄𑀢𑀺, 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑀜𑁆𑀳𑀺 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨). 𑀢𑀢𑁆𑀭𑀸𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀁 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀦 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀸 𑀓𑀸𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑀺𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀯𑀺𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀓𑀸𑀮𑁂 𑀘𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑁆𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁, 𑀢𑀁 𑀘𑁂 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁨𑁬𑁨).

𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀁 𑀧𑀦 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 ‘‘𑀪𑀦𑁆𑀢𑁂, 𑀲𑀧𑁆𑀧𑀺𑀦𑀯𑀦𑀻𑀢𑀯𑀲𑀸𑀦𑀺 𑀏𑀓𑀢𑁄 𑀧𑀘𑀺𑀢𑁆𑀯𑀸 𑀦𑀺𑀩𑁆𑀩𑀝𑁆𑀝𑀺𑀢𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀦 𑀯𑀝𑁆𑀝𑀦𑁆𑀢𑀻’’𑀢𑀺? ‘‘𑀦 𑀯𑀝𑁆𑀝𑀦𑁆𑀢𑀺, 𑀆𑀯𑀼𑀲𑁄’’𑀢𑀺. 𑀣𑁂𑀭𑁄 𑀓𑀺𑀭𑁂𑀢𑁆𑀣 𑀧𑀓𑁆𑀓𑀢𑁂𑀮𑀓𑀲𑀝𑁂 𑀯𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀢𑀢𑁄 𑀦𑀁 𑀉𑀢𑁆𑀢𑀭𑀺 𑀧𑀼𑀘𑁆𑀙𑀺𑀁𑀲𑀼 ‘‘𑀪𑀦𑁆𑀢𑁂, 𑀦𑀯𑀦𑀻𑀢𑁂 𑀤𑀥𑀺𑀕𑀼𑀴𑀺𑀓𑀸 𑀯𑀸 𑀢𑀓𑁆𑀓𑀩𑀺𑀦𑁆𑀤𑀼 𑀯𑀸 𑀳𑁄𑀢𑀺, 𑀏𑀢𑀁 𑀯𑀝𑁆𑀝𑀢𑀻’’𑀢𑀺? ‘‘𑀏𑀢𑀫𑁆𑀧𑀺, 𑀆𑀯𑀼𑀲𑁄, 𑀦 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 ‘‘𑀪𑀦𑁆𑀢𑁂, 𑀏𑀓𑀢𑁄 𑀧𑀘𑀺𑀢𑁆𑀯𑀸 𑀏𑀓𑀢𑁄 𑀲𑀁𑀲𑀝𑁆𑀞𑀸𑀦𑀺 𑀢𑁂𑀚𑀯𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀭𑁄𑀕𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺. ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀣𑁂𑀭𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀓𑀧𑁆𑀧𑀺𑀬𑀫𑀁𑀲𑀯𑀲𑀸𑀯 𑀲𑀸𑀫𑀺𑀲𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀺, 𑀇𑀢𑀭𑀸 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂 𑀯𑀝𑁆𑀝𑀢𑀻’’𑀢𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀇𑀤𑀁 𑀓𑀺’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀦𑀼 𑀯𑀸𑀢𑀸𑀩𑀸𑀥𑀺𑀓𑀸 𑀪𑀺𑀓𑁆𑀔𑀽 𑀧𑀜𑁆𑀘𑀫𑀽𑀮𑀓𑀲𑀸𑀯𑀬𑀸𑀕𑀼𑀬𑀁 𑀅𑀘𑁆𑀙𑀲𑀽𑀓𑀭𑀢𑁂𑀮𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀦𑁆𑀢𑀺, 𑀲𑀸 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀭𑁄𑀕𑀁 𑀦𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 𑀆𑀳.

𑁯𑁭. 𑀫𑀥𑀼 𑀦𑀸𑀫 𑀫𑀥𑀼𑀓𑀭𑀻𑀳𑀺 𑀫𑀥𑀼𑀫𑀓𑁆𑀔𑀺𑀓𑀸𑀳𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀪𑀫𑀭𑀫𑀓𑁆𑀔𑀺𑀓𑀸𑀳𑀺 𑀘 𑀓𑀢𑀁 𑀫𑀥𑀼. 𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑀫𑁂𑀯 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀲𑀘𑁂 𑀲𑀺𑀮𑁂𑀲𑀲𑀤𑀺𑀲𑀁 𑀫𑀳𑀸𑀫𑀥𑀼𑀁 𑀔𑀡𑁆𑀟𑀁 𑀓𑀢𑁆𑀯𑀸 𑀞𑀧𑀺𑀢𑀁, 𑀇𑀢𑀭𑀁 𑀯𑀸 𑀦𑀸𑀦𑀸𑀪𑀸𑀚𑀦𑁂𑀲𑀼, 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀲𑀘𑁂 𑀏𑀓𑀫𑁂𑀯 𑀔𑀡𑁆𑀟𑀁, 𑀏𑀓𑀪𑀸𑀚𑀦𑁂 𑀯𑀸 𑀇𑀢𑀭𑀁, 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀕𑁆𑀕𑀳𑀺𑀢𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀭𑀼𑀫𑀓𑁆𑀔𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀫𑀥𑀼𑀧𑀝𑀮𑀁 𑀯𑀸 𑀫𑀥𑀼𑀲𑀺𑀢𑁆𑀣𑀓𑀁 𑀯𑀸 𑀲𑀘𑁂 𑀫𑀥𑀼𑀦𑀸 𑀅𑀫𑀓𑁆𑀔𑀺𑀢𑀁 𑀧𑀭𑀺𑀲𑀼𑀤𑁆𑀥𑀁, 𑀬𑀸𑀯𑀚𑀻𑀯𑀺𑀓𑀁, 𑀫𑀥𑀼𑀫𑀓𑁆𑀔𑀺𑀢𑀁 𑀧𑀦 𑀫𑀥𑀼𑀕𑀢𑀺𑀓𑀫𑁂𑀯. 𑀘𑀻𑀭𑀺𑀓𑀸 𑀦𑀸𑀫 𑀲𑀧𑀓𑁆𑀔𑀸 𑀤𑀻𑀖𑀫𑀓𑁆𑀔𑀺𑀓𑀸 𑀢𑀼𑀫𑁆𑀩𑀴𑀦𑀸𑀫𑀺𑀓𑀸 𑀘 𑀅𑀝𑁆𑀞𑀺𑀧𑀓𑁆𑀔𑀺𑀓𑀸 𑀓𑀸𑀴𑀫𑀳𑀸𑀪𑀫𑀭𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀆𑀲𑀬𑁂𑀲𑀼 𑀦𑀺𑀬𑁆𑀬𑀸𑀲𑀲𑀤𑀺𑀲𑀁 𑀫𑀥𑀼 𑀳𑁄𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁.

𑁯𑁮. 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀅𑀧𑀓𑁆𑀓𑀸 𑀯𑀸 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀅𑀯𑀢𑁆𑀣𑀼𑀓𑀸 𑀉𑀘𑁆𑀙𑀼𑀯𑀺𑀓𑀢𑀺. 𑀢𑀁 𑀨𑀸𑀡𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀩𑀳𑀽 𑀧𑀺𑀡𑁆𑀟𑀸 𑀘𑀼𑀡𑁆𑀡𑁂 𑀓𑀢𑁆𑀯𑀸 𑀏𑀓𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺 𑀖𑀦𑀲𑀦𑁆𑀦𑀺𑀯𑁂𑀲𑀸, 𑀏𑀓𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀕𑁆𑀕𑀳𑀺𑀢𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀖𑀭𑀥𑀽𑀧𑀦𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀁. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦 𑀓𑀢𑀨𑀸𑀡𑀺𑀢𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁, 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀧𑀘𑁆𑀙𑀸𑀪𑀢𑁆𑀢𑀁 𑀅𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑁂𑀦 𑀓𑀢𑀫𑁆𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀫𑁂𑀯, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀏𑀲 𑀦𑀬𑁄 𑀉𑀘𑁆𑀙𑀼𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀨𑀸𑀡𑀺𑀢𑁂𑀧𑀺. 𑀧𑀼𑀭𑁂𑀪𑀢𑁆𑀢𑀁 𑀧𑀦 𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑁂𑀦 𑀓𑀢𑀁 𑀲𑀘𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀓𑀢𑀁, 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯. 𑀲𑀬𑀁𑀓𑀢𑀁 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀦𑀺𑀭𑀸𑀫𑀺𑀲𑀫𑁂𑀯, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀭𑀺𑀲𑁆𑀲𑀸𑀯𑀺𑀢𑀧𑀝𑀺𑀕𑁆𑀕𑀳𑀺𑀢𑁂𑀦 𑀓𑀢𑀁 𑀧𑀦 𑀦𑀺𑀭𑀸𑀫𑀺𑀲𑀫𑁂𑀯 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀺. 𑀉𑀕𑁆𑀕𑀳𑀺𑀢𑀓𑀢𑀁 𑀯𑀼𑀢𑁆𑀢𑀦𑀬𑀫𑁂𑀯. ‘‘𑀛𑀸𑀫𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀁 𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀏𑀢𑀁 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀯𑀝𑁆𑀝𑀢𑀺, 𑀦𑁄 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘‘𑀉𑀘𑁆𑀙𑀼𑀨𑀸𑀡𑀺𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦𑁄 𑀯𑀝𑁆𑀝𑀦𑀓𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁. 𑀲𑀻𑀢𑁄𑀤𑀓𑁂𑀦 𑀓𑀢𑀁 𑀫𑀥𑀼𑀓𑀧𑀼𑀧𑁆𑀨𑀨𑀸𑀡𑀺𑀢𑀁 𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀁, 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀫𑀥𑀼𑀓𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀁. 𑀔𑀡𑁆𑀟𑀲𑀓𑁆𑀔𑀭𑀁 𑀧𑀦 𑀔𑀻𑀭𑀚𑀮𑁆𑀮𑀺𑀓𑀁 𑀅𑀧𑀦𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀺.

𑁯𑁯. 𑀫𑀥𑀼𑀓𑀧𑀼𑀧𑁆𑀨𑀁 𑀧𑀦 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀅𑀮𑁆𑀮𑀁 𑀯𑀝𑁆𑀝𑀢𑀺. 𑀪𑀚𑁆𑀚𑀺𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀪𑀚𑁆𑀚𑀺𑀢𑁆𑀯𑀸 𑀢𑀺𑀮𑀸𑀤𑀻𑀳𑀺 𑀫𑀺𑀲𑁆𑀲𑀁 𑀯𑀸 𑀅𑀫𑀺𑀲𑁆𑀲𑀁 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀁 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀢𑀁 𑀕𑀳𑁂𑀢𑁆𑀯𑀸 𑀫𑁂𑀭𑀬𑀢𑁆𑀣𑀸𑀬 𑀬𑁄𑀚𑁂𑀦𑁆𑀢𑀺, 𑀬𑁄𑀚𑀺𑀢𑀁 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀦 𑀯𑀝𑁆𑀝𑀢𑀺. 𑀓𑀤𑀮𑀻𑀔𑀚𑁆𑀚𑀽𑀭𑀻𑀅𑀫𑁆𑀩𑀮𑀩𑀼𑀚𑀧𑀦𑀲𑀘𑀺𑀜𑁆𑀘𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀬𑀸𑀯𑀓𑀸𑀮𑀺𑀓𑀨𑀮𑀸𑀦𑀁 𑀨𑀸𑀡𑀺𑀢𑀁 𑀬𑀸𑀯𑀓𑀸𑀮𑀺𑀓𑀫𑁂𑀯. 𑀫𑀭𑀺𑀘𑀧𑀓𑁆𑀓𑁂𑀳𑀺 𑀨𑀸𑀡𑀺𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀁. 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀧𑀜𑁆𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀪𑁂𑀲𑀚𑁆𑀚𑀸𑀦𑀻’’𑀢𑀺 (𑀫𑀳𑀸𑀯. 𑁨𑁬𑁦) 𑀪𑁂𑀲𑀚𑁆𑀚𑀦𑀸𑀫𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀆𑀳𑀸𑀭𑀢𑁆𑀣𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀸𑀦𑀺𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀬𑀣𑀸𑀲𑀼𑀔𑀁, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀲𑀢𑀺 𑀧𑀘𑁆𑀘𑀬𑁂 𑀯𑀼𑀢𑁆𑀢𑀦𑀬𑁂𑀦 𑀲𑀢𑁆𑀢𑀸𑀳𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀧𑀦 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂𑀧𑀺 𑀲𑀸𑀲𑀧𑀫𑀢𑁆𑀢𑀁 𑀳𑁄𑀢𑀺, 𑀲𑀓𑀺𑀁 𑀯𑀸 𑀅𑀗𑁆𑀕𑀼𑀮𑀺𑀬𑀸 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀸𑀬𑀦𑀫𑀢𑁆𑀢𑀁, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀤𑁂𑀲𑁂𑀢𑀩𑁆𑀩𑀁. 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁, 𑀦 𑀓𑀸𑀬𑀺𑀓𑁂𑀦 𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀓𑀸𑀬𑁄 𑀯𑀸 𑀓𑀸𑀬𑁂 𑀅𑀭𑀼 𑀯𑀸 𑀦 𑀫𑀓𑁆𑀔𑁂𑀢𑀩𑁆𑀩𑀁. 𑀢𑁂𑀳𑀺 𑀫𑀓𑁆𑀔𑀺𑀢𑀸𑀦𑀺 𑀓𑀸𑀲𑀸𑀯𑀓𑀢𑁆𑀢𑀭𑀬𑀝𑁆𑀞𑀺𑀉𑀧𑀸𑀳𑀦𑀧𑀸𑀤𑀓𑀞𑀮𑀺𑀓𑀫𑀜𑁆𑀘𑀧𑀻𑀞𑀸𑀤𑀻𑀦𑀺𑀧𑀺 𑀅𑀧𑀭𑀺𑀪𑁄𑀕𑀸𑀦𑀺. ‘‘𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑁂𑀲𑀼𑀧𑀺 𑀳𑀢𑁆𑀣𑁂𑀦 𑀕𑀳𑀡𑀝𑁆𑀞𑀸𑀦𑀁 𑀦 𑀫𑀓𑁆𑀔𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀓𑀲𑀸𑀯𑁂 𑀧𑀦 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺 𑀫𑀓𑁆𑀔𑁂𑀢𑀩𑁆𑀩𑀸𑀦𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀤𑀻𑀧𑁂 𑀯𑀸 𑀓𑀸𑀴𑀯𑀡𑁆𑀡𑁂 𑀯𑀸 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀓𑀸𑀬𑀺𑀓𑁂𑀦 𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁. ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑀁 𑀅𑀥𑀺𑀝𑁆𑀞𑁂𑀢𑀻’’𑀢𑀺 (𑀧𑀸𑀭𑀸. 𑁬𑁨𑁫) 𑀯𑀘𑀦𑀢𑁄 𑀧𑀦 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀲𑀧𑁆𑀧𑀺𑀜𑁆𑀘 𑀢𑁂𑀮𑀜𑁆𑀘 𑀯𑀲𑀜𑁆𑀘 𑀫𑀼𑀤𑁆𑀥𑀦𑀺 𑀢𑁂𑀮𑀁 𑀯𑀸 𑀅𑀩𑁆𑀪𑀜𑁆𑀚𑀦𑀁 𑀯𑀸 𑀫𑀥𑀼𑀁 𑀅𑀭𑀼𑀫𑀓𑁆𑀔𑀦𑀁 𑀨𑀸𑀡𑀺𑀢𑀁 𑀖𑀭𑀥𑀽𑀧𑀦𑀁 𑀅𑀥𑀺𑀝𑁆𑀞𑁂𑀢𑀺 𑀅𑀦𑀸𑀧𑀢𑁆𑀢𑀺, 𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀲𑀘𑁂 𑀅𑀥𑀺𑀝𑁆𑀞𑀺𑀢𑀢𑁂𑀮𑀁 𑀅𑀦𑀥𑀺𑀝𑁆𑀞𑀺𑀢𑀢𑁂𑀮𑀪𑀸𑀚𑀦𑁂 𑀆𑀓𑀺𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀸𑀚𑀦𑁂 𑀘𑁂 𑀲𑀼𑀔𑀼𑀫𑀁 𑀙𑀺𑀤𑁆𑀤𑀁, 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀢𑁂𑀮𑀁 𑀧𑀼𑀭𑀸𑀡𑀢𑁂𑀮𑁂𑀦 𑀅𑀚𑁆𑀛𑁄𑀢𑁆𑀣𑀭𑀻𑀬𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀣 𑀫𑀳𑀸𑀫𑀼𑀔𑀁 𑀳𑁄𑀢𑀺, 𑀲𑀳𑀲𑀸𑀯 𑀩𑀳𑀼 𑀢𑁂𑀮𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀸𑀡𑀢𑁂𑀮𑀁 𑀅𑀚𑁆𑀛𑁄𑀢𑁆𑀣𑀭𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀥𑀺𑀝𑁆𑀞𑀺𑀢𑀕𑀢𑀺𑀓𑀫𑁂𑀯 𑀳𑀺 𑀢𑀁 𑀳𑁄𑀢𑀺. 𑀏𑀢𑁂𑀦 𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑀢𑁂𑀮𑀪𑀸𑀚𑀦𑁂 𑀅𑀦𑀥𑀺𑀝𑁆𑀞𑀺𑀢𑀢𑁂𑀮𑀆𑀓𑀺𑀭𑀡𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀘𑁂 𑀧𑀦 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑁂𑀢𑀺, 𑀧𑀼𑀦 𑀢𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀳𑀺 𑀲𑁄 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀅𑀦𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀢𑁆𑀣𑀼𑀓𑀫𑁆𑀫𑀢𑁆𑀣𑀁 𑀤𑀤𑁂𑀬𑁆𑀬, 𑀕𑀳𑁂𑀢𑁆𑀯𑀸 𑀦𑀢𑁆𑀣𑀼𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀩𑀸𑀮𑁄 𑀳𑁄𑀢𑀺, 𑀤𑀸𑀢𑀼𑀁 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 ‘‘𑀅𑀢𑁆𑀣𑀺 𑀢𑁂 𑀲𑀸𑀫𑀡𑁂𑀭 𑀢𑁂𑀮’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀻’’𑀢𑀺. 𑀆𑀳𑀭 𑀣𑁂𑀭𑀲𑁆𑀲 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. 𑀲𑀘𑁂 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀲𑁄 𑀇𑀢𑀭𑀁 𑀪𑀡𑀢𑀺 ‘‘𑀆𑀯𑀼𑀲𑁄, 𑀇𑀫𑀁 𑀢𑁂𑀮𑀁 𑀲𑀢𑁆𑀢𑀸𑀳𑀫𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺, 𑀲𑁄 𑀘 𑀧𑀭𑀺𑀪𑁄𑀕𑀁 𑀦 𑀓𑀭𑁄𑀢𑀺, 𑀓𑀲𑁆𑀲 𑀆𑀧𑀢𑁆𑀢𑀺? 𑀦 𑀓𑀲𑁆𑀲𑀘𑀺. 𑀓𑀲𑁆𑀫𑀸? 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸, 𑀇𑀢𑀭𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸.

𑁧𑁦𑁦. 𑀇𑀫𑁂𑀲𑀼 (𑀫𑀳𑀸𑀯. 𑀅𑀝𑁆𑀞. 𑁩𑁦𑁫) 𑀧𑀦 𑀘𑀢𑀽𑀲𑀼 𑀓𑀸𑀮𑀺𑀓𑁂𑀲𑀼 𑀬𑀸𑀯𑀓𑀸𑀮𑀺𑀓𑀁 𑀬𑀸𑀫𑀓𑀸𑀮𑀺𑀓𑀦𑁆𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀅𑀦𑁆𑀢𑁄𑀯𑀼𑀢𑁆𑀣𑀓𑀜𑁆𑀘𑁂𑀯 𑀲𑀦𑁆𑀦𑀺𑀥𑀺𑀓𑀸𑀭𑀓𑀜𑁆𑀘 𑀳𑁄𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀜𑁆𑀘 𑀬𑀸𑀯𑀚𑀻𑀯𑀺𑀓𑀜𑁆𑀘 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀦𑁆𑀦𑀺𑀥𑀺𑀫𑁆𑀧𑀺 𑀦 𑀚𑀦𑁂𑀢𑀺. 𑀬𑀸𑀯𑀓𑀸𑀮𑀺𑀓𑀁 𑀧𑀦 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀫𑁆𑀪𑀺𑀦𑁆𑀦𑀭𑀲𑀸𑀦𑀺 𑀢𑀻𑀡𑀺𑀧𑀺 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀉𑀧𑀦𑁂𑀢𑀺. 𑀬𑀸𑀫𑀓𑀸𑀮𑀺𑀓𑀁 𑀤𑁆𑀯𑁂𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀤𑀻𑀦𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀉𑀧𑀦𑁂𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑁆𑀧𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀁 𑀬𑀸𑀯𑀚𑀻𑀯𑀺𑀓𑀁 𑀅𑀢𑁆𑀢𑀦𑁄 𑀲𑀪𑀸𑀯𑀜𑁆𑀜𑁂𑀯 𑀉𑀧𑀦𑁂𑀢𑀺, 𑀢𑀲𑁆𑀫𑀸 𑀬𑀸𑀯𑀓𑀸𑀮𑀺𑀓𑁂𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀁 𑀲𑀫𑁆𑀪𑀺𑀦𑁆𑀦𑀭𑀲𑀁 𑀲𑁂𑀲𑀓𑀸𑀮𑀺𑀓𑀢𑁆𑀢𑀬𑀁 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺. 𑀬𑀸𑀫𑀓𑀸𑀮𑀺𑀓𑁂𑀦 𑀲𑀁𑀲𑀝𑁆𑀞𑀁 𑀧𑀦 𑀇𑀢𑀭𑀤𑁆𑀯𑀬𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀯𑀝𑁆𑀝𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀧𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀯𑀸 𑀬𑀸𑀯𑀚𑀻𑀯𑀺𑀓𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀺. 𑀤𑁆𑀯𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀙𑀸𑀳𑀁. 𑀢𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀧𑀜𑁆𑀘𑀸𑀳𑀁…𑀧𑁂… 𑀲𑀢𑁆𑀢𑀸𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀢𑀤𑀳𑁂𑀯 𑀓𑀧𑁆𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀮𑀬𑀸𑀫𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀲𑀼 𑀘𑁂𑀢𑁆𑀣 𑀯𑀺𑀓𑀸𑀮𑀪𑁄𑀚𑀦𑀲𑀦𑁆𑀦𑀺𑀥𑀺𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀲𑀘𑁂 𑀧𑀦 𑀏𑀓𑀢𑁄 𑀧𑀝𑀺𑀕𑁆𑀕𑀳𑀺𑀢𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀓𑀸𑀮𑀺𑀓𑀸𑀦𑀺 𑀲𑀫𑁆𑀪𑀺𑀦𑁆𑀦𑀭𑀲𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀓𑀸𑀮𑀲𑁆𑀲 𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀲𑀘𑁂 𑀳𑀺 𑀙𑀮𑁆𑀮𑀺𑀫𑁆𑀧𑀺 𑀅𑀦𑀧𑀦𑁂𑀢𑁆𑀯𑀸 𑀲𑀓𑀮𑁂𑀦𑁂𑀯 𑀦𑀸𑀴𑀺𑀓𑁂𑀭𑀨𑀮𑁂𑀦 𑀲𑀤𑁆𑀥𑀺𑀁 𑀅𑀫𑁆𑀩𑀧𑀸𑀦𑀸𑀤𑀺𑀧𑀸𑀦𑀓𑀁 𑀧𑀝𑀺𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀦𑀸𑀴𑀺𑀓𑁂𑀭𑀁 𑀅𑀧𑀦𑁂𑀢𑁆𑀯𑀸 𑀢𑀁 𑀯𑀺𑀓𑀸𑀮𑁂𑀧𑀺 𑀓𑀧𑁆𑀧𑀢𑀺. 𑀉𑀧𑀭𑀺 𑀲𑀧𑁆𑀧𑀺𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸 𑀲𑀻𑀢𑀮𑀧𑀸𑀬𑀸𑀲𑀁 𑀤𑁂𑀦𑁆𑀢𑀺, 𑀬𑀁 𑀧𑀸𑀬𑀸𑀲𑁂𑀦 𑀅𑀲𑀁𑀲𑀝𑁆𑀞𑀁 𑀲𑀧𑁆𑀧𑀺, 𑀢𑀁 𑀅𑀧𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀣𑀤𑁆𑀥𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀓𑁆𑀓𑁄𑀮𑀚𑀸𑀢𑀺𑀨𑀮𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺, 𑀢𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀬𑀸𑀕𑀼𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀦𑁆𑀦𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀲𑀼𑀧𑀺 𑀢𑁂𑀮𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀦𑁆𑀦𑀮𑀝𑁆𑀞𑀺𑀫𑀥𑀼𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀬𑀁 𑀬𑀁 𑀅𑀲𑀫𑁆𑀪𑀺𑀦𑁆𑀦𑀭𑀲𑀁 𑀳𑁄𑀢𑀺, 𑀢𑀁 𑀢𑀁 𑀏𑀓𑀢𑁄 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀬𑀣𑀸 𑀲𑀼𑀤𑁆𑀥𑀁 𑀳𑁄𑀢𑀺, 𑀢𑀣𑀸 𑀥𑁄𑀯𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀢𑀲𑁆𑀲 𑀓𑀸𑀮𑀲𑁆𑀲 𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑀫𑁆𑀪𑀺𑀦𑁆𑀦𑀭𑀲𑀁 𑀳𑁄𑀢𑀺 𑀲𑀁𑀲𑀝𑁆𑀞𑀁, 𑀦 𑀯𑀝𑁆𑀝𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀓𑀸𑀮𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.