𑁧𑁯. 𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁦𑁧. 𑀓𑀧𑁆𑀧𑀺𑀬𑀸𑀘𑀢𑀼𑀪𑀽𑀫𑀺𑀬𑁄𑀢𑀺 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀁 𑀕𑁄𑀦𑀺𑀲𑀸𑀤𑀺𑀓𑀁 𑀕𑀳𑀧𑀢𑀺𑀁 𑀲𑀫𑁆𑀫𑀼𑀢𑀺’’𑀦𑁆𑀢𑀺 (𑀫𑀳𑀸𑀯. 𑁨𑁯𑁫) 𑀯𑀘𑀦𑀢𑁄 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀕𑁄𑀦𑀺𑀲𑀸𑀤𑀺𑀓𑀸 𑀕𑀳𑀧𑀢𑀺 𑀲𑀫𑁆𑀫𑀼𑀢𑀻𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀢𑀸𑀯 𑀏𑀯𑀁 𑀓𑀸𑀢𑀩𑁆𑀩𑀸 𑁋 𑀬𑁄 𑀣𑀫𑁆𑀪𑀸𑀦𑀁 𑀯𑀸 𑀉𑀧𑀭𑀺 𑀪𑀺𑀢𑁆𑀢𑀺𑀧𑀸𑀤𑁂 𑀯𑀸 𑀦𑀺𑀔𑀦𑀺𑀢𑁆𑀯𑀸 𑀯𑀺𑀳𑀸𑀭𑁄 𑀓𑀭𑀻𑀬𑀢𑀺, 𑀢𑀲𑁆𑀲 𑀳𑁂𑀝𑁆𑀞𑀸 𑀣𑀫𑁆𑀪𑀧𑀝𑀺𑀘𑁆𑀙𑀓𑀸 𑀧𑀸𑀲𑀸𑀡𑀸 𑀪𑀽𑀫𑀺𑀕𑀢𑀺𑀓𑀸 𑀏𑀯. 𑀧𑀞𑀫𑀢𑁆𑀣𑀫𑁆𑀪𑀁 𑀧𑀦 𑀧𑀞𑀫𑀪𑀺𑀢𑁆𑀢𑀺𑀧𑀸𑀤𑀁 𑀯𑀸 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀳𑀺 𑀩𑀳𑀽𑀳𑀺 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫, 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁂𑀳𑀺 𑀫𑀦𑀼𑀲𑁆𑀲𑁂𑀲𑀼 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀲𑀼 𑀆𑀫𑀲𑀺𑀢𑁆𑀯𑀸 𑀯𑀸 𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀣𑀫𑁆𑀪𑁄 𑀯𑀸 𑀪𑀺𑀢𑁆𑀢𑀺𑀧𑀸𑀤𑁄 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑁄. 𑀓𑀼𑀭𑀼𑀦𑁆𑀤𑀺𑀫𑀳𑀸𑀧𑀘𑁆𑀘𑀭𑀻𑀲𑀼 𑀧𑀦 ‘‘𑀓𑀧𑁆𑀧𑀺𑀬𑀓𑀼𑀝𑀺 𑀓𑀧𑁆𑀧𑀺𑀬𑀓𑀼𑀝𑀻𑀢𑀺 𑀯𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀗𑁆𑀖𑀲𑁆𑀲 𑀓𑀧𑁆𑀧𑀺𑀬𑀓𑀼𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀅𑀯𑀢𑁆𑀯𑀸𑀧𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀼𑀢𑁆𑀢𑁂 𑀤𑁄𑀲𑁄 𑀦𑀢𑁆𑀣𑀺. 𑀇𑀤𑀁 𑀧𑀦𑁂𑀢𑁆𑀣 𑀲𑀸𑀥𑀸𑀭𑀡𑀮𑀓𑁆𑀔𑀡𑀁 ‘‘𑀣𑀫𑁆𑀪𑀧𑀢𑀺𑀝𑁆𑀞𑀸𑀧𑀦𑀜𑁆𑀘 𑀯𑀘𑀦𑀧𑀭𑀺𑀬𑁄𑀲𑀸𑀦𑀜𑁆𑀘 𑀲𑀫𑀓𑀸𑀮𑀁 𑀯𑀝𑁆𑀝𑀢𑀻’’𑀢𑀺. 𑀲𑀘𑁂 𑀳𑀺 𑀅𑀦𑀺𑀝𑁆𑀞𑀺𑀢𑁂 𑀯𑀘𑀦𑁂 𑀣𑀫𑁆𑀪𑁄 𑀧𑀢𑀺𑀝𑁆𑀞𑀸𑀢𑀺, 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀯𑀸 𑀢𑀲𑁆𑀫𑀺𑀁 𑀯𑀘𑀦𑀁 𑀦𑀺𑀝𑁆𑀞𑀸𑀢𑀺, 𑀅𑀓𑀢𑀸 𑀳𑁄𑀢𑀺 𑀓𑀧𑁆𑀧𑀺𑀬𑀓𑀼𑀝𑀺. 𑀢𑁂𑀦𑁂𑀯 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁 ‘‘𑀩𑀳𑀽𑀳𑀺 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀅𑀯𑀲𑁆𑀲𑀜𑁆𑀳𑀺 𑀏𑀢𑁆𑀣 𑀏𑀓𑀲𑁆𑀲𑀧𑀺 𑀯𑀘𑀦𑀦𑀺𑀝𑁆𑀞𑀸𑀦𑀜𑁆𑀘 𑀣𑀫𑁆𑀪𑀧𑀢𑀺𑀝𑁆𑀞𑀸𑀦𑀜𑁆𑀘 𑀏𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀇𑀝𑁆𑀞𑀓𑀸𑀲𑀺𑀮𑀸𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑀓𑀸𑀲𑀼 𑀧𑀦 𑀓𑀼𑀝𑀻𑀲𑀼 𑀳𑁂𑀝𑁆𑀞𑀸 𑀘𑀬𑀁 𑀩𑀦𑁆𑀥𑀺𑀢𑁆𑀯𑀸 𑀯𑀸 𑀅𑀩𑀦𑁆𑀥𑀺𑀢𑁆𑀯𑀸 𑀯𑀸 𑀓𑀭𑁄𑀦𑁆𑀢𑀼, 𑀬𑀢𑁄 𑀧𑀝𑁆𑀞𑀸𑀬 𑀪𑀺𑀢𑁆𑀢𑀺𑀁 𑀉𑀝𑁆𑀞𑀸𑀧𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀧𑀞𑀫𑀁 𑀇𑀝𑁆𑀞𑀓𑀁 𑀯𑀸 𑀲𑀺𑀮𑀁 𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀯𑀸 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀧𑁆𑀧𑀺𑀬𑀓𑀼𑀝𑀺 𑀓𑀸𑀢𑀩𑁆𑀩𑀸, 𑀇𑀝𑁆𑀞𑀓𑀸𑀤𑀬𑁄 𑀪𑀺𑀢𑁆𑀢𑀺𑀬𑀁 𑀧𑀞𑀫𑀺𑀝𑁆𑀞𑀓𑀸𑀤𑀻𑀦𑀁 𑀳𑁂𑀝𑁆𑀞𑀸 𑀦 𑀯𑀝𑁆𑀝𑀦𑁆𑀢𑀺, 𑀣𑀫𑁆𑀪𑀸 𑀧𑀦 𑀉𑀧𑀭𑀺 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀦𑁆𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀣𑀫𑁆𑀪𑁂𑀳𑀺 𑀓𑀭𑀺𑀬𑀫𑀸𑀦𑁂 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀘𑀢𑁆𑀢𑀸𑀭𑁄 𑀣𑀫𑁆𑀪𑀸, 𑀇𑀝𑁆𑀞𑀓𑀸𑀤𑀺𑀓𑀼𑀝𑁆𑀝𑁂 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀤𑁆𑀯𑁂 𑀢𑀺𑀲𑁆𑀲𑁄 𑀇𑀝𑁆𑀞𑀓𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀧𑀦 𑀅𑀓𑀢𑀸𑀬𑀧𑀺 𑀤𑁄𑀲𑁄 𑀦𑀢𑁆𑀣𑀺, 𑀅𑀝𑁆𑀞𑀓𑀣𑀸𑀲𑀼 𑀳𑀺 𑀯𑀼𑀢𑁆𑀢𑀫𑁂𑀯 𑀧𑀫𑀸𑀡𑀁.

𑀕𑁄𑀦𑀺𑀲𑀸𑀤𑀺𑀓𑀸 𑀤𑀼𑀯𑀺𑀥𑀸 𑀆𑀭𑀸𑀫𑀕𑁄𑀦𑀺𑀲𑀸𑀤𑀺𑀓𑀸 𑀯𑀺𑀳𑀸𑀭𑀕𑁄𑀦𑀺𑀲𑀸𑀤𑀺𑀓𑀸𑀢𑀺. 𑀢𑀸𑀲𑀼 𑀬𑀢𑁆𑀣 𑀦𑁂𑀯 𑀆𑀭𑀸𑀫𑁄, 𑀦 𑀲𑁂𑀦𑀸𑀲𑀦𑀸𑀦𑀺 𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀬𑀁 𑀆𑀭𑀸𑀫𑀕𑁄𑀦𑀺𑀲𑀸𑀤𑀺𑀓𑀸 𑀦𑀸𑀫. 𑀬𑀢𑁆𑀣 𑀲𑁂𑀦𑀸𑀲𑀦𑀸𑀦𑀺 𑀲𑀩𑁆𑀩𑀸𑀦𑀺 𑀯𑀸 𑀏𑀓𑀘𑁆𑀘𑀸𑀦𑀺 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺, 𑀆𑀭𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄, 𑀅𑀬𑀁 𑀯𑀺𑀳𑀸𑀭𑀕𑁄𑀦𑀺𑀲𑀸𑀤𑀺𑀓𑀸 𑀦𑀸𑀫. 𑀇𑀢𑀺 𑀉𑀪𑀬𑀢𑁆𑀭𑀸𑀧𑀺 𑀆𑀭𑀸𑀫𑀲𑁆𑀲 𑀅𑀧𑀭𑀺𑀓𑁆𑀔𑀺𑀢𑁆𑀢𑀪𑀸𑀯𑁄𑀬𑁂𑀯 𑀧𑀫𑀸𑀡𑀁. ‘‘𑀆𑀭𑀸𑀫𑁄 𑀧𑀦 𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫𑀸’’𑀢𑀺 𑀓𑀼𑀭𑀼𑀦𑁆𑀤𑀺𑀫𑀳𑀸𑀧𑀘𑁆𑀘𑀭𑀻𑀲𑀼 𑀯𑀼𑀢𑁆𑀢𑀁, 𑀏𑀢𑁆𑀣 𑀓𑀧𑁆𑀧𑀺𑀬𑀓𑀼𑀝𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺.

𑀕𑀳𑀧𑀢𑀻𑀢𑀺 𑀫𑀦𑀼𑀲𑁆𑀲𑀸 𑀆𑀯𑀸𑀲𑀁 𑀓𑀢𑁆𑀯𑀸 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀤𑁂𑀫, 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀤𑀦𑁆𑀢𑀺, 𑀏𑀲𑀸 𑀕𑀳𑀧𑀢𑀺 𑀦𑀸𑀫, ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀸𑀢𑀼𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑀲𑁆𑀫𑀸 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀲𑁂𑀲𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀩𑁆𑀩𑁂𑀲𑀜𑁆𑀘 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀳𑁄 𑀘 𑀲𑀦𑁆𑀦𑀺𑀥𑀺 𑀘 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘 𑀢𑁂𑀲𑀁 𑀲𑀦𑁆𑀢𑀓𑀁 𑀪𑀺𑀓𑁆𑀔𑀼𑀲𑁆𑀲 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀕𑁂𑀳𑀸𑀦𑀺 𑀯𑀸 𑀢𑁂𑀳𑀺 𑀤𑀺𑀦𑁆𑀦𑀓𑀧𑁆𑀧𑀺𑀬𑀓𑀼𑀝𑀺 𑀯𑀸 𑀕𑀳𑀧𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄 𑀯𑀸 𑀆𑀭𑀸𑀫𑀺𑀓𑀸𑀦𑀁 𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀦𑀸𑀕𑀸𑀦𑀁 𑀯𑀸 𑀅𑀧𑀺 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀁 𑀓𑀧𑁆𑀧𑀺𑀬𑀓𑀼𑀝𑀺 𑀳𑁄𑀢𑀻’’𑀢𑀺, 𑀢𑀁 𑀲𑀼𑀯𑀼𑀢𑁆𑀢𑀁. 𑀲𑀗𑁆𑀖𑀲𑀦𑁆𑀢𑀓𑀫𑁂𑀯 𑀳𑀺 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀯𑀸 𑀕𑁂𑀳𑀁 𑀕𑀳𑀧𑀢𑀺𑀓𑀼𑀝𑀺𑀓𑀸 𑀦 𑀳𑁄𑀢𑀺.

𑀲𑀫𑁆𑀫𑀼𑀢𑀺 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑁂𑀢𑁆𑀯𑀸 𑀲𑀫𑁆𑀫𑀢𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀓𑀧𑁆𑀧𑀺𑀬𑀪𑀽𑀫𑀺𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀧𑁆𑀧𑀺𑀬𑀪𑀽𑀫𑀺𑀬𑀸 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀯𑀺𑀳𑀸𑀭𑁄 𑀓𑀧𑁆𑀧𑀺𑀬𑀪𑀽𑀫𑀺 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁨𑁯𑁫).

𑀓𑀫𑁆𑀫𑀯𑀸𑀘𑀁 𑀅𑀯𑀢𑁆𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦 𑀲𑀸𑀯𑁂𑀢𑁆𑀯𑀸 𑀓𑀢𑀸𑀧𑀺 𑀲𑀫𑁆𑀫𑀢𑀸 𑀏𑀯.

𑁧𑁦𑁨. 𑀬𑀁 (𑀫𑀳𑀸𑀯. 𑀅𑀝𑁆𑀞. 𑁨𑁯𑁫) 𑀇𑀫𑀸𑀲𑀼 𑀘𑀢𑀽𑀲𑀼 𑀓𑀧𑁆𑀧𑀺𑀬𑀪𑀽𑀫𑀻𑀲𑀼 𑀯𑀼𑀢𑁆𑀢𑀁 𑀆𑀫𑀺𑀲𑀁, 𑀢𑀁 𑀲𑀩𑁆𑀩𑀁 𑀅𑀦𑁆𑀢𑁄𑀯𑀼𑀢𑁆𑀣𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀫𑁄𑀘𑀦𑀢𑁆𑀣𑀜𑁆𑀳𑀺 𑀓𑀧𑁆𑀧𑀺𑀬𑀓𑀼𑀝𑀺𑀬𑁄 𑀅𑀦𑀼𑀜𑁆𑀜𑀸𑀢𑀸. 𑀬𑀁 𑀧𑀦 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑁂 𑀕𑁂𑀳𑁂 𑀯𑀼𑀢𑁆𑀢𑀁 𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀦𑁆𑀢𑀓𑀁 𑀏𑀓𑀭𑀢𑁆𑀢𑀫𑁆𑀧𑀺 𑀞𑀧𑀺𑀢𑀁, 𑀢𑀁 𑀅𑀦𑁆𑀢𑁄𑀯𑀼𑀢𑁆𑀣𑀁, 𑀢𑀢𑁆𑀣 𑀧𑀓𑁆𑀓𑀜𑁆𑀘 𑀅𑀦𑁆𑀢𑁄𑀧𑀓𑁆𑀓𑀁 𑀦𑀸𑀫 𑀳𑁄𑀢𑀺, 𑀏𑀢𑀁 𑀦 𑀓𑀧𑁆𑀧𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦 𑀬𑀸𑀯𑀚𑀻𑀯𑀺𑀓𑀜𑁆𑀘 𑀯𑀝𑁆𑀝𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀸𑀫𑀡𑁂𑀭𑁄 𑀪𑀺𑀓𑁆𑀔𑀼𑀲𑁆𑀲 𑀢𑀡𑁆𑀟𑀼𑀮𑀸𑀤𑀺𑀓𑀁 𑀆𑀫𑀺𑀲𑀁 𑀆𑀳𑀭𑀺𑀢𑁆𑀯𑀸 𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀘𑀺𑀢𑁆𑀯𑀸 𑀤𑁂𑀢𑀺, 𑀅𑀦𑁆𑀢𑁄𑀯𑀼𑀢𑁆𑀣𑀁 𑀦 𑀳𑁄𑀢𑀺. 𑀢𑀢𑁆𑀣 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀲𑀧𑁆𑀧𑀺𑀆𑀤𑀻𑀲𑀼 𑀓𑀺𑀜𑁆𑀘𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀺. 𑀫𑀼𑀔𑀲𑀦𑁆𑀦𑀺𑀥𑀺 𑀦𑀸𑀫 𑀳𑁄𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀅𑀦𑁆𑀢𑁄𑀯𑀼𑀢𑁆𑀣𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀫𑀢𑁆𑀢𑀫𑁂𑀯 𑀦𑀸𑀦𑀸𑀓𑀭𑀡𑀁, 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀁 𑀞𑀧𑀺𑀢𑀲𑀧𑁆𑀧𑀺𑀜𑁆𑀘 𑀬𑀸𑀯𑀚𑀻𑀯𑀺𑀓𑀧𑀡𑁆𑀡𑀜𑁆𑀘 𑀏𑀓𑀢𑁄 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀁 𑀯𑀝𑁆𑀝𑀢𑀺. 𑀲𑀘𑁂 𑀆𑀫𑀺𑀲𑀲𑀁𑀲𑀝𑁆𑀞𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑁆𑀢𑁄𑀯𑀼𑀢𑁆𑀣𑀜𑁆𑀘𑁂𑀯 𑀲𑀸𑀫𑀁𑀧𑀓𑁆𑀓𑀜𑁆𑀘 𑀳𑁄𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀲𑀁𑀲𑀕𑁆𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀪𑀺𑀓𑁆𑀔𑀼𑀦𑁄 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺𑀲𑁆𑀲 𑀉𑀡𑁆𑀳𑀬𑀸𑀕𑀼𑀬𑀸 𑀲𑀼𑀮𑀲𑀺𑀧𑀡𑁆𑀡𑀸𑀦𑀺 𑀯𑀸 𑀲𑀺𑀗𑁆𑀕𑀺𑀯𑁂𑀭𑀁 𑀯𑀸 𑀮𑁄𑀡𑀁 𑀯𑀸 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀬𑀸𑀕𑀼𑀁 𑀦𑀺𑀩𑁆𑀩𑀸𑀧𑁂𑀫𑀻’’𑀢𑀺 𑀧𑀦 𑀘𑀸𑀮𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀧𑀺𑀤𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸 𑀧𑀺𑀤𑀳𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. ‘‘𑀪𑀢𑁆𑀢𑀁 𑀫𑀸 𑀦𑀺𑀩𑁆𑀩𑀸𑀬𑀢𑀽’’𑀢𑀺 𑀧𑀺𑀤𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀔𑀻𑀭𑀢𑀓𑁆𑀓𑀸𑀤𑀻𑀲𑀼 𑀧𑀦 𑀲𑀓𑀺𑀁 𑀓𑀼𑀣𑀺𑀢𑁂𑀲𑀼 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀧𑀼𑀦𑀧𑀸𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸.

𑀇𑀫𑀸 𑀧𑀦 𑀓𑀧𑁆𑀧𑀺𑀬𑀓𑀼𑀝𑀺𑀬𑁄 𑀓𑀤𑀸 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀺? 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀢𑀸𑀯 𑀬𑀸 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀪𑀺𑀢𑁆𑀢𑀺𑀧𑀸𑀤𑁂 𑀯𑀸 𑀦𑀺𑀔𑀦𑀺𑀢𑁆𑀯𑀸 𑀓𑀢𑀸, 𑀲𑀸 𑀲𑀩𑁆𑀩𑁂𑀲𑀼 𑀣𑀫𑁆𑀪𑁂𑀲𑀼 𑀘 𑀪𑀺𑀢𑁆𑀢𑀺𑀧𑀸𑀤𑁂𑀲𑀼 𑀘 𑀅𑀧𑀦𑀻𑀢𑁂𑀲𑀼 𑀚𑀳𑀺𑀢𑀯𑀢𑁆𑀣𑀼𑀓𑀸 𑀳𑁄𑀢𑀺. 𑀲𑀘𑁂 𑀧𑀦 𑀣𑀫𑁆𑀪𑁂 𑀯𑀸 𑀪𑀺𑀢𑁆𑀢𑀺𑀧𑀸𑀤𑁂 𑀯𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀬𑁄 𑀬𑁄 𑀞𑀺𑀢𑁄, 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀺, 𑀲𑀩𑁆𑀩𑁂𑀲𑀼𑀧𑀺 𑀧𑀭𑀺𑀯𑀢𑁆𑀢𑀺𑀢𑁂𑀲𑀼 𑀅𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀢𑀺. 𑀇𑀝𑁆𑀞𑀓𑀸𑀤𑀻𑀳𑀺 𑀓𑀢𑀸 𑀘𑀬𑀲𑁆𑀲 𑀉𑀧𑀭𑀺 𑀪𑀺𑀢𑁆𑀢𑀺𑀅𑀢𑁆𑀣𑀸𑀬 𑀞𑀧𑀺𑀢𑀁 𑀇𑀝𑁆𑀞𑀓𑀁 𑀯𑀸 𑀲𑀺𑀮𑀁 𑀯𑀸 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀯𑀸 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀦𑀸𑀲𑀺𑀢𑀓𑀸𑀮𑁂 𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀢𑀺. 𑀬𑁂𑀳𑀺 𑀧𑀦 𑀇𑀝𑁆𑀞𑀓𑀸𑀤𑀻𑀳𑀺 𑀅𑀥𑀺𑀝𑁆𑀞𑀺𑀢𑀸, 𑀢𑁂𑀲𑀼 𑀅𑀧𑀦𑀻𑀢𑁂𑀲𑀼𑀧𑀺 𑀢𑀤𑀜𑁆𑀜𑁂𑀲𑀼 𑀧𑀢𑀺𑀝𑁆𑀞𑀸𑀢𑀻𑀢𑀺 𑀅𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀢𑀺. 𑀕𑁄𑀦𑀺𑀲𑀸𑀤𑀺𑀓𑀸 𑀧𑀸𑀓𑀸𑀭𑀸𑀤𑀻𑀳𑀺 𑀧𑀭𑀺𑀓𑁆𑀔𑁂𑀧𑁂 𑀓𑀢𑁂 𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀢𑀺. 𑀧𑀼𑀦 𑀢𑀲𑁆𑀫𑀺𑀁 𑀆𑀭𑀸𑀫𑁂 𑀓𑀧𑁆𑀧𑀺𑀬𑀓𑀼𑀝𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀧𑀼𑀦𑀧𑀺 𑀧𑀸𑀓𑀸𑀭𑀸𑀤𑀬𑁄 𑀢𑀢𑁆𑀣 𑀢𑀢𑁆𑀣 𑀔𑀡𑁆𑀟𑀸 𑀳𑁄𑀦𑁆𑀢𑀺, 𑀢𑀢𑁄 𑀢𑀢𑁄 𑀕𑀸𑀯𑁄 𑀧𑀯𑀺𑀲𑀦𑁆𑀢𑀺, 𑀧𑀼𑀦 𑀓𑀧𑁆𑀧𑀺𑀬𑀓𑀼𑀝𑀺 𑀳𑁄𑀢𑀺. 𑀇𑀢𑀭𑀸 𑀧𑀦 𑀤𑁆𑀯𑁂 𑀕𑁄𑀧𑀸𑀦𑀲𑀻𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀙𑀤𑀦𑁂 𑀯𑀺𑀦𑀝𑁆𑀞𑁂 𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀦𑁆𑀢𑀺. 𑀲𑀘𑁂 𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀏𑀓𑀫𑁆𑀧𑀺 𑀧𑀓𑁆𑀔𑀧𑀸𑀲𑀓𑀫𑀡𑁆𑀟𑀮𑀁 𑀅𑀢𑁆𑀣𑀺, 𑀭𑀓𑁆𑀔𑀢𑀺.

𑁧𑁦𑁩. 𑀬𑀢𑁆𑀭 𑀧𑀦𑀺𑀫𑀸 𑀘𑀢𑀲𑁆𑀲𑁄𑀧𑀺 𑀓𑀧𑁆𑀧𑀺𑀬𑀪𑀽𑀫𑀺𑀬𑁄 𑀦𑀢𑁆𑀣𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀓𑀭𑀯𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀯𑀺𑀦𑀬𑀥𑀭𑀧𑀸𑀫𑁄𑀓𑁆𑀔𑁄 𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀤𑀻𑀧𑀸𑀮𑁄𑀓𑁂𑀦 𑀲𑀧𑁆𑀧𑀺𑀓𑀼𑀫𑁆𑀪𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀆𑀯𑀼𑀲𑁄, 𑀕𑀸𑀫𑀢𑁄 𑀲𑀧𑁆𑀧𑀺𑀓𑀼𑀫𑁆𑀪𑁄 𑀆𑀪𑀢𑁄 𑀮𑀽𑀔𑀤𑀺𑀯𑀲𑁂 𑀲𑀧𑁆𑀧𑀺𑀦𑀸 𑀪𑀼𑀜𑁆𑀚𑀦𑀢𑁆𑀣𑀸𑀬𑀸’’𑀢𑀺 𑀆𑀳. 𑀢𑀢𑁄 𑀦𑀁 𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀦 𑀯𑀝𑁆𑀝𑀢𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀧𑀫𑀼𑀔𑁂 𑀦𑀺𑀓𑁆𑀔𑀺𑀧𑀸𑀧𑁂𑀲𑀺. 𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀆𑀕𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀲𑀳𑀲𑁂𑀬𑁆𑀬𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀩𑀳𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀸𑀧𑁂𑀲𑀺, 𑀢𑀁 𑀘𑁄𑀭𑀸 𑀳𑀭𑀺𑀁𑀲𑀼. 𑀲𑁄 𑀧𑀼𑀦 𑀏𑀓𑀤𑀺𑀯𑀲𑀁 𑀆𑀕𑀢𑀁 𑀢𑀺𑀲𑁆𑀲𑀢𑁆𑀣𑁂𑀭𑀫𑀸𑀳 ‘‘𑀆𑀯𑀼𑀲𑁄, 𑀢𑀬𑀸 ‘𑀦 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢𑁂 𑀲𑁄 𑀓𑀼𑀫𑁆𑀪𑁄 𑀩𑀳𑀺 𑀦𑀺𑀓𑁆𑀔𑀺𑀢𑁆𑀢𑁄 𑀘𑁄𑀭𑁂𑀳𑀺 𑀳𑀝𑁄’’𑀢𑀺. 𑀢𑀢𑁄 𑀦𑀁 𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳 ‘‘𑀦𑀦𑀼, 𑀪𑀦𑁆𑀢𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀸𑀢𑀩𑁆𑀩𑁄 𑀅𑀲𑁆𑀲, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀺 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀓𑀧𑁆𑀧𑀺𑀬𑀪𑀽𑀫𑀺𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.