𑁧𑁫. 𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁫. 𑀪𑀽𑀢𑀕𑀸𑀫𑁄𑀢𑀺 𑀧𑀜𑁆𑀘𑀳𑀺 𑀩𑀻𑀚𑁂𑀳𑀺 𑀚𑀸𑀢𑀸𑀦𑀁 𑀭𑀼𑀓𑁆𑀔𑀮𑀢𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀢𑁆𑀭𑀺𑀫𑀸𑀦𑀺 𑀧𑀜𑁆𑀘 𑀩𑀻𑀚𑀸𑀦𑀺 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀦𑁆𑀢𑀺. 𑀢𑀢𑁆𑀣 𑀫𑀽𑀮𑀩𑀻𑀚𑀁 𑀦𑀸𑀫 𑀳𑀮𑀺𑀤𑁆𑀤𑀺 𑀲𑀺𑀗𑁆𑀕𑀺𑀯𑁂𑀭𑀁 𑀯𑀘𑀸 𑀯𑀘𑀢𑁆𑀢𑀁 𑀅𑀢𑀺𑀯𑀺𑀲𑀁 𑀓𑀝𑀼𑀓𑀭𑁄𑀳𑀺𑀡𑀻 𑀉𑀲𑀻𑀭𑀁 𑀪𑀤𑁆𑀤𑀫𑀼𑀢𑁆𑀢𑀓𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫. 𑀔𑀦𑁆𑀥𑀩𑀻𑀚𑀁 𑀦𑀸𑀫 𑀅𑀲𑁆𑀲𑀢𑁆𑀣𑁄 𑀦𑀺𑀕𑁆𑀭𑁄𑀥𑁄 𑀧𑀺𑀮𑀓𑁆𑀔𑁄 𑀉𑀤𑀼𑀫𑁆𑀩𑀭𑁄 𑀓𑀘𑁆𑀙𑀓𑁄 𑀓𑀧𑀺𑀢𑁆𑀣𑀦𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀔𑀦𑁆𑀥𑁂 𑀚𑀸𑀬𑀦𑁆𑀢𑀺 𑀔𑀦𑁆𑀥𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀔𑀦𑁆𑀥𑀩𑀻𑀚𑀁 𑀦𑀸𑀫. 𑀨𑀴𑀼𑀩𑀻𑀚𑀁 𑀦𑀸𑀫 𑀉𑀘𑁆𑀙𑀼 𑀯𑁂𑀴𑀼 𑀦𑀴𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀧𑀩𑁆𑀩𑁂 𑀚𑀸𑀬𑀦𑁆𑀢𑀺 𑀧𑀩𑁆𑀩𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀨𑀴𑀼𑀩𑀻𑀚𑀁 𑀦𑀸𑀫. 𑀅𑀕𑁆𑀕𑀩𑀻𑀚𑀁 𑀦𑀸𑀫 𑀅𑀚𑁆𑀚𑀼𑀓𑀁 𑀨𑀡𑀺𑀚𑁆𑀚𑀓𑀁 𑀳𑀺𑀭𑀺𑀯𑁂𑀭𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀅𑀕𑁆𑀕𑁂 𑀚𑀸𑀬𑀦𑁆𑀢𑀺 𑀅𑀕𑁆𑀕𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀅𑀕𑁆𑀕𑀩𑀻𑀚𑀁 𑀦𑀸𑀫. 𑀩𑀻𑀚𑀩𑀻𑀚𑀁 𑀦𑀸𑀫 𑀧𑀼𑀩𑁆𑀩𑀡𑁆𑀡𑀁 𑀅𑀧𑀭𑀡𑁆𑀡𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀻𑀚𑁂 𑀚𑀸𑀬𑀦𑁆𑀢𑀺 𑀩𑀻𑀚𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀩𑀻𑀚𑀩𑀻𑀚𑀁 𑀦𑀸𑀫 (𑀧𑀸𑀘𑀺. 𑁯𑁧). 𑀢𑀢𑁆𑀣 𑀪𑀽𑀢𑀕𑀸𑀫𑁂 𑀪𑀽𑀢𑀕𑀸𑀫𑀲𑀜𑁆𑀜𑀻 𑀙𑀺𑀦𑁆𑀤𑀢𑀺 𑀯𑀸 𑀙𑀺𑀦𑁆𑀤𑀸𑀧𑁂𑀢𑀺 𑀯𑀸 𑀪𑀺𑀦𑁆𑀤𑀢𑀺 𑀯𑀸 𑀪𑀺𑀦𑁆𑀤𑀸𑀧𑁂𑀢𑀺 𑀯𑀸 𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀪𑀽𑀢𑀕𑀸𑀫𑀜𑁆𑀳𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀺𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀩𑀻𑀚𑀕𑀸𑀫𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁.

𑁭𑁬. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄 (𑀧𑀸𑀘𑀺. 𑀅𑀝𑁆𑀞. 𑁯𑁨𑁨) 𑀦𑀸𑀫𑁂𑀲 𑀅𑀢𑁆𑀣𑀺 𑀉𑀤𑀓𑀝𑁆𑀞𑁄, 𑀅𑀢𑁆𑀣𑀺 𑀣𑀮𑀝𑁆𑀞𑁄. 𑀢𑀢𑁆𑀣 𑀉𑀤𑀓𑀝𑁆𑀞𑁄 𑀲𑀸𑀲𑀧𑀫𑀢𑁆𑀢𑀺𑀓𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑀸 𑀲𑀧𑀡𑁆𑀡𑀺𑀓𑀸 𑀘 𑀅𑀧𑀡𑁆𑀡𑀺𑀓𑀸 𑀘 𑀲𑀩𑁆𑀩𑀸 𑀲𑁂𑀯𑀸𑀮𑀚𑀸𑀢𑀺, 𑀅𑀦𑁆𑀢𑀫𑀲𑁄 𑀉𑀤𑀓𑀧𑀧𑁆𑀧𑀝𑀓𑀁 𑀉𑀧𑀸𑀤𑀸𑀬 ‘‘𑀪𑀽𑀢𑀕𑀸𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀉𑀧𑀭𑀺 𑀣𑀤𑁆𑀥𑁄 𑀨𑀭𑀼𑀲𑀯𑀡𑁆𑀡𑁄 𑀳𑁂𑀝𑁆𑀞𑀸 𑀫𑀼𑀤𑀼 𑀦𑀻𑀮𑀯𑀡𑁆𑀡𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀲𑁂𑀯𑀸𑀮𑀲𑁆𑀲 𑀫𑀽𑀮𑀁 𑀑𑀭𑀼𑀳𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀲 𑀧𑀣𑀯𑀻 𑀞𑀸𑀦𑀁. 𑀬𑁄 𑀉𑀤𑀓𑁂 𑀲𑀜𑁆𑀘𑀭𑀢𑀺, 𑀢𑀲𑁆𑀲 𑀉𑀤𑀓𑀁. 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲, 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀉𑀤𑀓𑁂 𑀲𑀜𑁆𑀘𑀭𑀦𑁆𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀳𑀢𑁆𑀣𑁂𑀳𑀺 𑀧𑀦 𑀇𑀢𑁄 𑀘𑀺𑀢𑁄 𑀘𑀯𑀺𑀬𑀽𑀳𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀓𑀮𑀜𑁆𑀳𑀺 𑀉𑀤𑀓𑀁 𑀢𑀲𑁆𑀲 𑀞𑀸𑀦𑀁, 𑀢𑀲𑁆𑀫𑀸 𑀦 𑀲𑁄 𑀏𑀢𑁆𑀢𑀸𑀯𑀢𑀸 𑀞𑀸𑀦𑀦𑁆𑀢𑀭𑀁 𑀲𑀗𑁆𑀓𑀸𑀫𑀺𑀢𑁄 𑀳𑁄𑀢𑀺. 𑀉𑀤𑀓𑀢𑁄 𑀧𑀦 𑀉𑀤𑀓𑁂𑀦 𑀯𑀺𑀦𑀸 𑀲𑀜𑁆𑀘𑀺𑀘𑁆𑀘 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀧𑁆𑀧𑀮𑀺𑀦𑀺𑀧𑀤𑀼𑀫𑀺𑀦𑀺𑀆𑀤𑀻𑀦𑀺 𑀚𑀮𑀚𑀯𑀮𑁆𑀮𑀺𑀢𑀺𑀡𑀸𑀦𑀺 𑀉𑀤𑀓𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀢𑀢𑁆𑀣𑁂𑀯 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀭𑁂𑀳𑀺 𑀉𑀧𑁆𑀧𑀸𑀝𑀺𑀢𑀸𑀦𑀺 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀢𑀸𑀦𑀺 𑀳𑀺 𑀩𑀻𑀚𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀺𑀮𑀩𑀻𑀚𑀓𑀲𑀸𑀲𑀧𑀫𑀢𑁆𑀢𑀺𑀓𑀲𑁂𑀯𑀸𑀮𑁄𑀧𑀺 𑀉𑀤𑀓𑀢𑁄 𑀉𑀤𑁆𑀥𑀝𑁄 𑀅𑀫𑀺𑀮𑀸𑀢𑁄 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 ‘‘𑀅𑀦𑀦𑁆𑀢𑀓𑀢𑀺𑀮𑀩𑀻𑀚𑀓𑀉𑀤𑀓𑀧𑀧𑁆𑀧𑀝𑀓𑀸𑀤𑀻𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀲𑀫𑁂𑀢𑀺. 𑀪𑀽𑀢𑀕𑀸𑀫𑁂 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁 𑀩𑀻𑀚𑀕𑀸𑀫𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦𑀸𑀫 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑁄, 𑀅𑀣𑁂𑀢𑀁 𑀩𑀻𑀚𑀕𑀸𑀫𑀲𑀗𑁆𑀕𑀳𑀁 𑀕𑀫𑀺𑀲𑁆𑀲𑀢𑀻𑀢𑀺, 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀁 𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀩𑀻𑀚𑀕𑀸𑀫𑀲𑁆𑀲𑀸𑀢𑀺. 𑀅𑀧𑀺𑀘 ‘‘𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀏𑀢𑀁 𑀯𑀺𑀦𑀬𑀮𑀓𑁆𑀔𑀡𑀁.

𑀣𑀮𑀝𑁆𑀞𑁂 𑀙𑀺𑀦𑁆𑀦𑀭𑀼𑀓𑁆𑀔𑀸𑀦𑀁 𑀅𑀯𑀲𑀺𑀝𑁆𑀞𑁄 𑀳𑀭𑀺𑀢𑀔𑀸𑀡𑀼 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀓𑀓𑀼𑀥𑀓𑀭𑀜𑁆𑀚𑀧𑀺𑀬𑀗𑁆𑀕𑀼𑀧𑀦𑀲𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀯𑀟𑁆𑀠𑀢𑀺, 𑀲𑁄 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀔𑀸𑀡𑀼 𑀉𑀤𑁆𑀥𑀁 𑀦 𑀯𑀟𑁆𑀠𑀢𑀺, 𑀲𑁄 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄. 𑀓𑀤𑀮𑀺𑀬𑀸 𑀧𑀦 𑀅𑀨𑀮𑀺𑀢𑀸𑀬 𑀔𑀸𑀡𑀼 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄, 𑀨𑀮𑀺𑀢𑀸𑀬 𑀩𑀻𑀚𑀕𑀸𑀫𑁂𑀦. 𑀓𑀤𑀮𑀻 𑀧𑀦 𑀨𑀮𑀺𑀢𑀸 𑀬𑀸𑀯 𑀦𑀻𑀮𑀧𑀡𑁆𑀡𑀸, 𑀢𑀸𑀯 𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀸, 𑀢𑀣𑀸 𑀨𑀮𑀺𑀢𑁄 𑀯𑁂𑀴𑀼. 𑀬𑀤𑀸 𑀧𑀦 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀼𑀲𑁆𑀲𑀢𑀺, 𑀢𑀤𑀸 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀓𑀢𑀭𑀩𑀻𑀚𑀕𑀸𑀫𑁂𑀦? 𑀨𑀴𑀼𑀩𑀻𑀚𑀕𑀸𑀫𑁂𑀦. 𑀓𑀺𑀁 𑀢𑀢𑁄 𑀦𑀺𑀩𑁆𑀩𑀢𑁆𑀢𑀢𑀺? 𑀦 𑀓𑀺𑀜𑁆𑀘𑀺. 𑀬𑀤𑀺 𑀳𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀪𑀽𑀢𑀕𑀸𑀫𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑁂𑀬𑁆𑀬. 𑀇𑀦𑁆𑀤𑀲𑀸𑀮𑀸𑀤𑀺𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀭𑀸𑀲𑀺𑀓𑀢𑀤𑀡𑁆𑀟𑀓𑁂𑀳𑀺 𑀭𑀢𑀦𑀧𑁆𑀧𑀫𑀸𑀡𑀸𑀧𑀺 𑀲𑀸𑀔𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀩𑀻𑀚𑀕𑀸𑀫𑁂𑀦𑁂𑀯 𑀧𑀦 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀫𑀡𑁆𑀟𑀧𑀢𑁆𑀣𑀸𑀬 𑀯𑀸 𑀯𑀢𑀺𑀅𑀢𑁆𑀣𑀸𑀬 𑀯𑀸 𑀯𑀮𑁆𑀮𑀺𑀆𑀭𑁄𑀧𑀦𑀢𑁆𑀣𑀸𑀬 𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀦𑁆𑀢𑀺, 𑀫𑀽𑀮𑁂𑀲𑀼 𑀘𑁂𑀯 𑀧𑀡𑁆𑀡𑁂𑀲𑀼 𑀘 𑀦𑀺𑀕𑁆𑀕𑀢𑁂𑀲𑀼 𑀧𑀼𑀦 𑀪𑀽𑀢𑀕𑀸𑀫𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀫𑀽𑀮𑀫𑀢𑁆𑀢𑁂𑀲𑀼 𑀧𑀦 𑀧𑀡𑁆𑀡𑀫𑀢𑁆𑀢𑁂𑀲𑀼 𑀯𑀸 𑀦𑀺𑀕𑁆𑀕𑀢𑁂𑀲𑀼𑀧𑀺 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑀸 𑀏𑀯.

𑀬𑀸𑀦𑀺 𑀓𑀸𑀦𑀺𑀘𑀺 𑀩𑀻𑀚𑀸𑀦𑀺 𑀧𑀣𑀯𑀺𑀬𑀁 𑀯𑀸 𑀉𑀤𑀓𑁂𑀦 𑀲𑀺𑀜𑁆𑀘𑀺𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀓𑀧𑀸𑀮𑀸𑀤𑀻𑀲𑀼 𑀯𑀸 𑀅𑀮𑁆𑀮𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀫𑀽𑀮𑀫𑀢𑁆𑀢𑁂 𑀯𑀸 𑀧𑀡𑁆𑀡𑀫𑀢𑁆𑀢𑁂 𑀯𑀸 𑀦𑀺𑀕𑁆𑀕𑀢𑁂𑀧𑀺 𑀩𑀻𑀚𑀸𑀦𑀺𑀬𑁂𑀯. 𑀲𑀘𑁂𑀧𑀺 𑀫𑀽𑀮𑀸𑀦𑀺 𑀘 𑀉𑀧𑀭𑀺 𑀅𑀗𑁆𑀓𑀼𑀭𑁄 𑀘 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀅𑀗𑁆𑀓𑀼𑀭𑁄 𑀳𑀭𑀺𑀢𑁄 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀸𑀦𑀺𑀬𑁂𑀯. 𑀫𑀼𑀕𑁆𑀕𑀸𑀤𑀻𑀦𑀁 𑀧𑀦 𑀧𑀡𑁆𑀡𑁂𑀲𑀼 𑀉𑀝𑁆𑀞𑀺𑀢𑁂𑀲𑀼, 𑀯𑀻𑀳𑀺𑀆𑀤𑀻𑀦𑀁 𑀯𑀸 𑀅𑀗𑁆𑀓𑀼𑀭𑁂 𑀳𑀭𑀺𑀢𑁂 𑀦𑀻𑀮𑀯𑀡𑁆𑀡𑁂 𑀚𑀸𑀢𑁂 𑀪𑀽𑀢𑀕𑀸𑀫𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀸𑀮𑀝𑁆𑀞𑀻𑀦𑀁 𑀧𑀞𑀫𑀁 𑀲𑀽𑀓𑀭𑀤𑀸𑀞𑀸 𑀯𑀺𑀬 𑀫𑀽𑀮𑀁 𑀦𑀺𑀕𑁆𑀕𑀘𑁆𑀙𑀢𑀺, 𑀦𑀺𑀕𑁆𑀕𑀢𑁂𑀧𑀺 𑀬𑀸𑀯 𑀉𑀧𑀭𑀺 𑀧𑀢𑁆𑀢𑀯𑀝𑁆𑀝𑀺 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄 𑀦𑀸𑀫𑀬𑁂𑀯. 𑀦𑀸𑀴𑀺𑀓𑁂𑀭𑀲𑁆𑀲 𑀢𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀦𑁆𑀢𑀲𑀽𑀘𑀺 𑀯𑀺𑀬 𑀅𑀗𑁆𑀓𑀼𑀭𑁄 𑀦𑀺𑀕𑁆𑀕𑀘𑁆𑀙𑀢𑀺, 𑀬𑀸𑀯 𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀸 𑀦𑀻𑀮𑀧𑀢𑁆𑀢𑀯𑀝𑁆𑀝𑀺 𑀦 𑀳𑁄𑀢𑀺, 𑀢𑀸𑀯 𑀩𑀻𑀚𑀕𑀸𑀫𑁄𑀬𑁂𑀯. 𑀫𑀽𑀮𑁂 𑀅𑀦𑀺𑀕𑁆𑀕𑀢𑁂𑀧𑀺 𑀢𑀸𑀤𑀺𑀲𑀸𑀬 𑀧𑀢𑁆𑀢𑀯𑀝𑁆𑀝𑀺𑀬𑀸 𑀚𑀸𑀢𑀸𑀬 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺.

𑀅𑀫𑁆𑀩𑀝𑁆𑀞𑀺𑀆𑀤𑀻𑀦𑀺 𑀯𑀻𑀳𑀺𑀆𑀤𑀻𑀳𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀸𑀦𑀺. 𑀯𑀦𑁆𑀤𑀸𑀓𑀸 𑀯𑀸 𑀅𑀜𑁆𑀜𑀸 𑀯𑀸 𑀬𑀸 𑀓𑀸𑀘𑀺 𑀭𑀼𑀓𑁆𑀔𑁂 𑀚𑀸𑀬𑀺𑀢𑁆𑀯𑀸 𑀭𑀼𑀓𑁆𑀔𑀁 𑀑𑀢𑁆𑀣𑀭𑀢𑀺, 𑀭𑀼𑀓𑁆𑀔𑁄𑀯 𑀢𑀲𑁆𑀲𑀸 𑀞𑀸𑀦𑀁, 𑀢𑀁 𑀯𑀺𑀓𑁄𑀧𑁂𑀦𑁆𑀢𑀲𑁆𑀲 𑀯𑀸 𑀢𑀢𑁄 𑀉𑀤𑁆𑀥𑀭𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀏𑀓𑀸 𑀅𑀫𑀽𑀮𑀺𑀓𑀸 𑀮𑀢𑀸 𑀳𑁄𑀢𑀺, 𑀅𑀗𑁆𑀕𑀼𑀮𑀺𑀯𑁂𑀞𑀓𑁄 𑀯𑀺𑀬 𑀯𑀦𑀧𑁆𑀧𑀕𑀼𑀫𑁆𑀩𑀤𑀡𑁆𑀟𑀓𑁂 𑀯𑁂𑀞𑁂𑀢𑀺, 𑀢𑀲𑁆𑀲𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀕𑁂𑀳𑀧𑀫𑀼𑀔𑀧𑀸𑀓𑀸𑀭𑀯𑁂𑀤𑀺𑀓𑀸 𑀘𑁂𑀢𑀺𑀬𑀸𑀤𑀻𑀲𑀼 𑀦𑀻𑀮𑀯𑀡𑁆𑀡𑁄 𑀲𑁂𑀯𑀸𑀮𑁄 𑀳𑁄𑀢𑀺, 𑀬𑀸𑀯 𑀤𑁆𑀯𑁂 𑀢𑀻𑀡𑀺 𑀧𑀢𑁆𑀢𑀸𑀦𑀺 𑀦 𑀲𑀜𑁆𑀚𑀸𑀬𑀦𑁆𑀢𑀺, 𑀢𑀸𑀯 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀧𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼, 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀼𑀥𑀸𑀮𑁂𑀧𑀫𑁆𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀮𑀺𑀢𑁆𑀢𑀲𑁆𑀲 𑀉𑀧𑀭𑀺 𑀲𑀺𑀦𑁂𑀳𑀮𑁂𑀧𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀦𑀺𑀤𑀸𑀖𑀲𑀫𑀬𑁂 𑀲𑀼𑀓𑁆𑀔𑀲𑁂𑀯𑀸𑀮𑁄 𑀢𑀺𑀝𑁆𑀞𑀢𑀺, 𑀢𑀁 𑀲𑀫𑁆𑀫𑀼𑀜𑁆𑀚𑀦𑀻𑀆𑀤𑀻𑀳𑀺 𑀖𑀁𑀲𑀺𑀢𑁆𑀯𑀸 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀸𑀦𑀻𑀬𑀖𑀝𑀸𑀤𑀻𑀦𑀁 𑀩𑀳𑀺 𑀲𑁂𑀯𑀸𑀮𑁄 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀅𑀦𑁆𑀢𑁄 𑀅𑀩𑁆𑀩𑁄𑀳𑀸𑀭𑀺𑀓𑁄, 𑀤𑀦𑁆𑀢𑀓𑀝𑁆𑀞𑀧𑀽𑀯𑀸𑀤𑀻𑀲𑀼 𑀓𑀡𑁆𑀡𑀓𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁬𑁬).

𑁭𑁭. 𑀧𑀸𑀲𑀸𑀡𑀚𑀸𑀢𑀺 𑀧𑀸𑀲𑀸𑀡𑀤𑀤𑁆𑀤𑀼𑀲𑁂𑀯𑀸𑀮𑀲𑁂𑀮𑁂𑀬𑁆𑀬𑀓𑀸𑀤𑀻𑀦𑀺 𑀅𑀳𑀭𑀺𑀢𑀯𑀡𑁆𑀡𑀸𑀦𑀺 𑀅𑀧𑀢𑁆𑀢𑀓𑀸𑀦𑀺 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀦𑀺. 𑀅𑀳𑀺𑀘𑁆𑀙𑀢𑁆𑀢𑀓𑀁 𑀬𑀸𑀯 𑀫𑀓𑀼𑀝𑀁 𑀳𑁄𑀢𑀺, 𑀢𑀸𑀯 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀧𑀼𑀧𑁆𑀨𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀅𑀮𑁆𑀮𑀭𑀼𑀓𑁆𑀔𑀢𑁄 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀁 𑀕𑀡𑁆𑀳𑀦𑁆𑀢𑁄 𑀭𑀼𑀓𑁆𑀔𑀢𑀘𑀁 𑀯𑀺𑀓𑁄𑀧𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀼𑀓𑁆𑀔𑀧𑀧𑀝𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀬𑀸 𑀧𑀦 𑀇𑀦𑁆𑀤𑀲𑀸𑀮𑀓𑀓𑀼𑀥𑀸𑀤𑀻𑀦𑀁 𑀧𑀧𑀝𑀺𑀓𑀸 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦𑀺𑀬𑁆𑀬𑀸𑀲𑀫𑁆𑀧𑀺 𑀭𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀞𑀺𑀢𑀁 𑀲𑀼𑀓𑁆𑀔𑀭𑀼𑀓𑁆𑀔𑁂 𑀯𑀸 𑀮𑀕𑁆𑀕𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀮𑁆𑀮𑀭𑀼𑀓𑁆𑀔𑀢𑁄 𑀦 𑀯𑀝𑁆𑀝𑀢𑀺. 𑀮𑀸𑀔𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀭𑀼𑀓𑁆𑀔𑀁 𑀘𑀸𑀮𑁂𑀢𑁆𑀯𑀸 𑀧𑀡𑁆𑀟𑀼𑀧𑀮𑀸𑀲𑀁 𑀯𑀸 𑀧𑀭𑀺𑀡𑀢𑀓𑀡𑀺𑀓𑀸𑀭𑀸𑀤𑀺𑀧𑀼𑀧𑁆𑀨𑀁 𑀯𑀸 𑀧𑀸𑀢𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦 𑀫𑀼𑀤𑀼𑀓𑁂𑀲𑀼 𑀇𑀦𑁆𑀤𑀲𑀸𑀮𑀦𑀼𑀳𑀻𑀔𑀦𑁆𑀥𑀸𑀤𑀻𑀲𑀼 𑀯𑀸 𑀢𑀢𑁆𑀣𑀚𑀸𑀢𑀓𑀢𑀸𑀮𑀧𑀡𑁆𑀡𑀸𑀤𑀻𑀲𑀼 𑀯𑀸 𑀅𑀓𑁆𑀔𑀭𑀁 𑀙𑀺𑀦𑁆𑀤𑀦𑁆𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀫𑀡𑁂𑀭𑀸𑀦𑀁 𑀧𑀼𑀧𑁆𑀨𑀁 𑀑𑀘𑀺𑀦𑀦𑁆𑀢𑀸𑀦𑀁 𑀲𑀸𑀔𑀁 𑀑𑀦𑀸𑀫𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀳𑀺 𑀧𑀦 𑀧𑀼𑀧𑁆𑀨𑁂𑀳𑀺 𑀧𑀸𑀦𑀻𑀬𑀁 𑀦 𑀯𑀸𑀲𑁂𑀢𑀩𑁆𑀩𑀁, 𑀧𑀸𑀦𑀻𑀬𑀯𑀸𑀲𑀢𑁆𑀣𑀺𑀓𑁂𑀦 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀘𑀺𑀦𑀸𑀧𑁂𑀢𑀩𑁆𑀩𑀸𑀦𑀺. 𑀨𑀮𑀲𑀸𑀔𑀸𑀧𑀺 𑀅𑀢𑁆𑀢𑀦𑀸 𑀔𑀸𑀤𑀺𑀢𑀼𑀓𑀸𑀫𑁂𑀦 𑀦 𑀑𑀦𑀸𑀫𑁂𑀢𑀩𑁆𑀩𑀸, 𑀲𑀸𑀫𑀡𑁂𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀨𑀮𑀁 𑀕𑀸𑀳𑀸𑀧𑁂𑀢𑀩𑁆𑀩𑀁. 𑀓𑀺𑀜𑁆𑀘𑀺 𑀕𑀘𑁆𑀙𑀁 𑀯𑀸𑀮𑀢𑀁 𑀯𑀸 𑀉𑀧𑁆𑀧𑀸𑀝𑁂𑀦𑁆𑀢𑁂𑀳𑀺 𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁂𑀲𑀁 𑀧𑀦 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀅𑀦𑀸𑀓𑀟𑁆𑀠𑀦𑁆𑀢𑁂𑀦 𑀓𑀟𑁆𑀠𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀺𑀬 𑀅𑀕𑁆𑀕𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀺, 𑀢𑁂𑀲𑀁 𑀲𑀸𑀔𑀁 𑀫𑀓𑁆𑀔𑀺𑀓𑀩𑀻𑀚𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀕𑀳𑀺𑀢𑀁, 𑀢𑀘𑁂 𑀯𑀸 𑀧𑀢𑁆𑀢𑁂 𑀯𑀸 𑀅𑀦𑁆𑀢𑀫𑀲𑁄 𑀦𑀔𑁂𑀦𑀧𑀺 𑀯𑀺𑀮𑁂𑀔𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀅𑀮𑁆𑀮𑀲𑀺𑀗𑁆𑀕𑀺𑀯𑁂𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀻𑀢𑀮𑁂 𑀧𑀤𑁂𑀲𑁂 𑀞𑀧𑀺𑀢𑀲𑁆𑀲 𑀫𑀽𑀮𑀁 𑀲𑀜𑁆𑀚𑀸𑀬𑀢𑀺, 𑀉𑀧𑀭𑀺𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀗𑁆𑀓𑀼𑀭𑁄 𑀚𑀸𑀬𑀢𑀺, 𑀳𑁂𑀝𑁆𑀞𑀸𑀪𑀸𑀕𑁂 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀽𑀮𑁂 𑀘 𑀅𑀗𑁆𑀓𑀼𑀭𑁂 𑀘 𑀚𑀸𑀢𑁂 𑀦 𑀯𑀝𑁆𑀝𑀢𑀺.

‘‘𑀲𑀫𑁆𑀫𑀼𑀜𑁆𑀚𑀦𑀻𑀲𑀮𑀸𑀓𑀸𑀬𑀧𑀺 𑀢𑀺𑀡𑀸𑀦𑀺 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀪𑀽𑀫𑀺𑀬𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺, 𑀦 𑀯𑀝𑁆𑀝𑀢𑀺. 𑀘𑀗𑁆𑀓𑀫𑀦𑁆𑀢𑁄𑀧𑀺 ‘‘𑀙𑀺𑀚𑁆𑀚𑀦𑀓𑀁 𑀙𑀺𑀚𑁆𑀚𑀢𑀼, 𑀪𑀺𑀚𑁆𑀚𑀦𑀓𑀁 𑀪𑀺𑀚𑁆𑀚𑀢𑀼, 𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀘𑀺𑀘𑁆𑀘 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑁄 𑀢𑀺𑀡𑀯𑀮𑁆𑀮𑀺𑀆𑀤𑀻𑀦𑀺 𑀲𑀬𑀁 𑀯𑀸 𑀙𑀺𑀦𑁆𑀤𑀢𑀺, 𑀅𑀜𑁆𑀜𑁂𑀦 𑀯𑀸 𑀙𑁂𑀤𑀸𑀧𑁂𑀢𑀺, 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀳𑀺 𑀢𑀺𑀡𑀁 𑀯𑀸 𑀮𑀢𑀁 𑀯𑀸 𑀕𑀦𑁆𑀣𑀺𑀁 𑀓𑀭𑁄𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀕𑀦𑁆𑀣𑀺𑀫𑁆𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀸𑀮𑀭𑀼𑀓𑁆𑀔𑀸𑀤𑀻𑀲𑀼 𑀧𑀦 𑀘𑁄𑀭𑀸𑀦𑀁 𑀅𑀦𑀸𑀭𑀼𑀳𑀡𑀢𑁆𑀣𑀸𑀬 𑀤𑀸𑀭𑀼𑀫𑀓𑁆𑀓𑀝𑀓𑀁 𑀆𑀓𑁄𑀝𑁂𑀦𑁆𑀢𑀺, 𑀓𑀡𑁆𑀝𑀓𑁂 𑀩𑀦𑁆𑀥𑀦𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀤𑀸𑀭𑀼𑀫𑀓𑁆𑀓𑀝𑀓𑁄 𑀭𑀼𑀓𑁆𑀔𑁂 𑀅𑀮𑁆𑀮𑀻𑀦𑀫𑀢𑁆𑀢𑁄𑀯 𑀳𑁄𑀢𑀺, 𑀭𑀼𑀓𑁆𑀔𑀁 𑀦 𑀧𑀻𑀴𑁂𑀢𑀺, 𑀯𑀝𑁆𑀝𑀢𑀺. ‘‘𑀭𑀼𑀓𑁆𑀔𑀁 𑀙𑀺𑀦𑁆𑀤, 𑀮𑀢𑀁 𑀙𑀺𑀦𑁆𑀤, 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀉𑀧𑁆𑀧𑀸𑀝𑁂𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀅𑀦𑀺𑀬𑀫𑀺𑀢𑀢𑁆𑀢𑀸. 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀇𑀫𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀫𑀁 𑀕𑀳𑁂𑀢𑁆𑀯𑀸𑀧𑀺 ‘‘𑀅𑀫𑁆𑀩𑀭𑀼𑀓𑁆𑀔𑀁 𑀘𑀢𑀼𑀭𑀁𑀲𑀯𑀮𑁆𑀮𑀺𑀁 𑀆𑀮𑀼𑀯𑀓𑀦𑁆𑀤𑀁 𑀫𑀼𑀜𑁆𑀚𑀢𑀺𑀡𑀁 𑀅𑀲𑀼𑀓𑀭𑀼𑀓𑁆𑀔𑀘𑁆𑀙𑀮𑁆𑀮𑀺𑀁 𑀙𑀺𑀦𑁆𑀤 𑀪𑀺𑀦𑁆𑀤 𑀉𑀧𑁆𑀧𑀸𑀝𑁂𑀳𑀻’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀅𑀦𑀺𑀬𑀫𑀺𑀢𑀫𑁂𑀯 𑀳𑁄𑀢𑀺. ‘‘𑀇𑀫𑀁 𑀅𑀫𑁆𑀩𑀭𑀼𑀓𑁆𑀔’’𑀦𑁆𑀢𑀺𑀆𑀤𑀺𑀯𑀘𑀦𑀫𑁂𑀯 𑀳𑀺 𑀦𑀺𑀬𑀫𑀺𑀢𑀁 𑀦𑀸𑀫, 𑀢𑀁 𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀫𑁆𑀧𑀺 𑀧𑀘𑀺𑀢𑀼𑀓𑀸𑀫𑁄 𑀢𑀺𑀡𑀸𑀤𑀻𑀦𑀁 𑀉𑀧𑀭𑀺 𑀲𑀜𑁆𑀘𑀺𑀘𑁆𑀘 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑁄 𑀲𑀬𑀁 𑀯𑀸 𑀧𑀘𑀢𑀺, 𑀅𑀜𑁆𑀜𑁂𑀦 𑀯𑀸 𑀧𑀘𑀸𑀧𑁂𑀢𑀺, 𑀦 𑀯𑀝𑁆𑀝𑀢𑀺. 𑀅𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀫𑀼𑀕𑁆𑀕𑁂 𑀧𑀘, 𑀫𑀸𑀲𑁂 𑀧𑀘𑀸’’𑀢𑀺𑀆𑀤𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, ‘‘𑀇𑀫𑁂 𑀫𑀼𑀕𑁆𑀕𑁂 𑀧𑀘𑀸’’𑀢𑀺 𑀏𑀯𑀁 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀇𑀫𑀁 𑀫𑀽𑀮𑀪𑁂𑀲𑀚𑁆𑀚𑀁 𑀚𑀸𑀦, 𑀇𑀫𑀁 𑀫𑀽𑀮𑀁 𑀯𑀸 𑀧𑀡𑁆𑀡𑀁 𑀯𑀸 𑀤𑁂𑀳𑀺, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀆𑀳𑀭, 𑀇𑀫𑀺𑀦𑀸 𑀧𑀼𑀧𑁆𑀨𑁂𑀦 𑀨𑀮𑁂𑀦 𑀯𑀸 𑀅𑀢𑁆𑀣𑁄, 𑀇𑀫𑀁 𑀭𑀼𑀓𑁆𑀔𑀁 𑀯𑀸 𑀮𑀢𑀁 𑀯𑀸 𑀨𑀮𑀁 𑀯𑀸 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀁 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀢𑀸𑀯𑀢𑀸 𑀪𑀽𑀢𑀕𑀸𑀫𑀧𑀭𑀺𑀫𑁄𑀘𑀺𑀢𑀁 𑀓𑀢𑀁 𑀳𑁄𑀢𑀺.

𑁭𑁮. 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀦 𑀧𑀦 𑀩𑀻𑀚𑀕𑀸𑀫𑀧𑀭𑀺𑀫𑁄𑀘𑀦𑀢𑁆𑀣𑀁 𑀧𑀼𑀦 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀓𑀧𑁆𑀧𑀺𑀬𑀓𑀭𑀡𑀜𑁆𑀘𑁂𑀢𑁆𑀣 𑀇𑀫𑀺𑀦𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀲𑀢𑁆𑀣𑀧𑀭𑀺𑀚𑀺𑀢𑀁 𑀦𑀔𑀧𑀭𑀺𑀚𑀺𑀢𑀁 𑀅𑀩𑀻𑀚𑀁 𑀦𑀺𑀩𑁆𑀩𑀝𑁆𑀝𑀩𑀻𑀚𑀜𑁆𑀜𑁂𑀯 𑀧𑀜𑁆𑀘𑀫’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦).

𑀢𑀢𑁆𑀣 𑀅𑀕𑁆𑀕𑀺𑀧𑀭𑀺𑀚𑀺𑀢𑀦𑁆𑀢𑀺 𑀅𑀕𑁆𑀕𑀺𑀦𑀸 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀤𑀟𑁆𑀠𑀁 𑀨𑀼𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀧𑀭𑀺𑀚𑀺𑀢𑀦𑁆𑀢𑀺 𑀲𑀢𑁆𑀣𑁂𑀦 𑀧𑀭𑀺𑀚𑀺𑀢𑀁 𑀅𑀥𑀺𑀪𑀽𑀢𑀁 𑀙𑀺𑀦𑁆𑀦𑀁 𑀯𑀺𑀤𑁆𑀥𑀁 𑀯𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀦𑀔𑀧𑀭𑀺𑀚𑀺𑀢𑁂. 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺 𑀲𑀬𑀫𑁂𑀯 𑀓𑀧𑁆𑀧𑀺𑀬𑀸𑀦𑀺. 𑀅𑀕𑁆𑀕𑀺𑀦𑀸 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀓𑀝𑁆𑀞𑀕𑁆𑀕𑀺𑀕𑁄𑀫𑀬𑀕𑁆𑀕𑀺𑀆𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀮𑁄𑀳𑀔𑀡𑁆𑀟𑁂𑀦𑀧𑀺 𑀆𑀤𑀺𑀢𑁆𑀢𑁂𑀦 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀏𑀓𑀤𑁂𑀲𑁂 𑀨𑀼𑀲𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀲𑀢𑁆𑀣𑁂𑀦 𑀓𑀭𑁄𑀦𑁆𑀢𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀮𑁄𑀳𑀫𑀬𑀲𑀢𑁆𑀣𑀲𑁆𑀲 𑀅𑀦𑁆𑀢𑀫𑀲𑁄 𑀲𑀽𑀘𑀺𑀦𑀔𑀘𑁆𑀙𑁂𑀤𑀦𑀸𑀦𑀫𑁆𑀧𑀺 𑀢𑀼𑀡𑁆𑀟𑁂𑀦 𑀯𑀸 𑀥𑀸𑀭𑀸𑀬 𑀯𑀸 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀦𑀔𑁂𑀦 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦 𑀧𑀽𑀢𑀺𑀦𑀔𑁂𑀦 𑀦 𑀓𑀸𑀢𑀩𑁆𑀩𑀁, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀫𑀓𑁆𑀓𑀝𑀸𑀦𑀁 𑀲𑀓𑀼𑀦𑁆𑀢𑀸𑀦𑀜𑁆𑀘 𑀦𑀔𑀸 𑀢𑀺𑀔𑀺𑀡𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀓𑀸𑀢𑀩𑁆𑀩𑀁. 𑀅𑀲𑁆𑀲𑀫𑀳𑀺𑀁𑀲𑀲𑀽𑀓𑀭𑀫𑀺𑀕𑀕𑁄𑀭𑀽𑀧𑀸𑀤𑀻𑀦𑀁 𑀔𑀼𑀭𑀸 𑀅𑀢𑀺𑀔𑀺𑀡𑀸, 𑀢𑁂𑀳𑀺 𑀦 𑀓𑀸𑀢𑀩𑁆𑀩𑀁, 𑀓𑀢𑀫𑁆𑀧𑀺 𑀅𑀓𑀢𑀁 𑀳𑁄𑀢𑀺. 𑀳𑀢𑁆𑀣𑀺𑀦𑀔𑀸 𑀧𑀦 𑀔𑀼𑀭𑀸 𑀦 𑀳𑁄𑀦𑁆𑀢𑀺, 𑀢𑁂𑀳𑀺 𑀘 𑀯𑀝𑁆𑀝𑀢𑀺. 𑀬𑁂𑀳𑀺 𑀧𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀳𑀺 𑀢𑀢𑁆𑀣𑀚𑀸𑀢𑀓𑁂𑀳𑀺𑀧𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀓𑁂𑀧𑀺 𑀙𑁂𑀤𑀁 𑀯𑀸 𑀯𑁂𑀥𑀁 𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀓𑀸𑀢𑀩𑁆𑀩𑀁.

𑀢𑀢𑁆𑀣 𑀲𑀘𑁂𑀧𑀺 𑀩𑀻𑀚𑀸𑀦𑀁 𑀧𑀩𑁆𑀩𑀢𑀫𑀢𑁆𑀢𑁄 𑀭𑀸𑀲𑀺, 𑀭𑀼𑀓𑁆𑀔𑀲𑀳𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀉𑀘𑁆𑀙𑀽𑀦𑀁 𑀯𑀸 𑀫𑀳𑀸𑀪𑀸𑀭𑁄 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀩𑀻𑀚𑁂 𑀯𑀸 𑀭𑀼𑀓𑁆𑀔𑀲𑀸𑀔𑀸𑀬 𑀯𑀸 𑀉𑀘𑁆𑀙𑀼𑀫𑁆𑀳𑀺 𑀯𑀸 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀁 𑀳𑁄𑀢𑀺. 𑀉𑀘𑁆𑀙𑀽 𑀘 𑀤𑀸𑀭𑀽𑀦𑀺 𑀘 𑀏𑀓𑀢𑁄 𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, ‘‘𑀉𑀘𑁆𑀙𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀸𑀭𑀼𑀁 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀲𑀘𑁂 𑀧𑀦 𑀬𑀸𑀬 𑀭𑀚𑁆𑀚𑀼𑀬𑀸 𑀯𑀸 𑀯𑀮𑁆𑀮𑀺𑀬𑀸 𑀯𑀸 𑀩𑀤𑁆𑀥𑀸𑀦𑀺, 𑀢𑀁 𑀯𑀺𑀚𑁆𑀛𑀢𑀺, 𑀦 𑀯𑀝𑁆𑀝𑀢𑀺. 𑀉𑀘𑁆𑀙𑀼𑀔𑀡𑁆𑀟𑀸𑀦𑀁 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀔𑀡𑁆𑀟𑁂 𑀓𑀧𑁆𑀧𑀺𑀬𑁂 𑀓𑀢𑁂 𑀲𑀩𑁆𑀩𑀁 𑀓𑀢𑀫𑁂𑀯. 𑀫𑀭𑀻𑀘𑀧𑀓𑁆𑀓𑀸𑀤𑀻𑀳𑀺 𑀘 𑀫𑀺𑀲𑁆𑀲𑁂𑀢𑁆𑀯𑀸 𑀪𑀢𑁆𑀢𑀁 𑀆𑀳𑀭𑀦𑁆𑀢𑀺, ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂𑀧𑀺 𑀪𑀢𑁆𑀢𑀲𑀺𑀢𑁆𑀣𑁂 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺𑀬𑁂𑀯. 𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀕𑀼𑀬𑀸 𑀧𑀓𑁆𑀔𑀺𑀢𑁆𑀢𑀸𑀦𑀺 𑀧𑀦 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑀺, 𑀢𑀢𑁆𑀣 𑀏𑀓𑀫𑁂𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀫𑁂𑀯. 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀁 𑀅𑀦𑁆𑀢𑁄 𑀫𑀺𑀜𑁆𑀚𑀁 𑀓𑀝𑀸𑀳𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀜𑁆𑀘𑀭𑀢𑀺, 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑀩𑁆𑀩𑀁, 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀓𑀝𑀸𑀳𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀪𑀽𑀢𑀕𑀸𑀫𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.