𑁧𑁬. 𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁯. 𑀤𑀼𑀯𑀺𑀥𑀁 𑀲𑀳𑀲𑁂𑀬𑁆𑀬𑀓𑀦𑁆𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁪𑁯). 𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁫𑁬) 𑀏𑀯𑀁 𑀯𑀼𑀢𑁆𑀢𑀁 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀧𑀸𑀘𑀺. 𑀅𑀝𑁆𑀞. 𑁫𑁦-𑁫𑁧) 𑁋 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀭𑀢𑁆𑀢𑀻𑀦𑀁 𑀉𑀧𑀭𑀺 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀲𑀩𑁆𑀩𑀘𑁆𑀙𑀦𑁆𑀦𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑀘𑁆𑀙𑀦𑁆𑀦𑀬𑁂𑀪𑀼𑀬𑁆𑀬𑀧𑀭𑀺𑀘𑁆𑀙𑀦𑁆𑀦𑁂 𑀯𑀸 𑀲𑁂𑀦𑀸𑀲𑀦𑁂 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀯𑀸 𑀏𑀓𑀓𑁆𑀔𑀡𑁂 𑀯𑀸 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀘𑁆𑀙𑀦𑁆𑀦𑀫𑁆𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀫𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑁂𑀦𑀸𑀲𑀦𑀁 𑀉𑀧𑀭𑀺 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀲𑀩𑁆𑀩𑀫𑁂𑀯 𑀧𑀭𑀺𑀘𑁆𑀙𑀦𑁆𑀦𑀁, 𑀇𑀤𑀁 𑀲𑀩𑁆𑀩𑀘𑁆𑀙𑀦𑁆𑀦𑀁 𑀦𑀸𑀫 𑀲𑁂𑀦𑀸𑀲𑀦𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀧𑀸𑀓𑀝𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀯𑀸𑀘𑀼𑀕𑁆𑀕𑀢𑀯𑀲𑁂𑀦 ‘‘𑀲𑀩𑁆𑀩𑀘𑁆𑀙𑀦𑁆𑀦𑀁 𑀦𑀸𑀫 𑀧𑀜𑁆𑀘𑀳𑀺 𑀙𑀤𑀦𑁂𑀳𑀺 𑀙𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀤𑀼𑀲𑁆𑀲𑀓𑀼𑀝𑀺𑀬𑀁 𑀲𑀬𑀦𑁆𑀢𑀲𑁆𑀲𑀧𑀺 𑀦 𑀲𑀓𑁆𑀓𑀸 𑀅𑀦𑀸𑀧𑀢𑁆𑀢𑀺 𑀓𑀸𑀢𑀼𑀁, 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀧𑀝𑀺𑀘𑁆𑀙𑀸𑀤𑀦𑀲𑀫𑀢𑁆𑀣𑀁 𑀇𑀥 𑀙𑀤𑀦𑀜𑁆𑀘 𑀧𑀭𑀺𑀘𑁆𑀙𑀦𑁆𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀯𑀺𑀥𑀘𑁆𑀙𑀤𑀦𑁂𑀬𑁂𑀯 𑀳𑀺 𑀕𑀬𑁆𑀳𑀫𑀸𑀦𑁂 𑀧𑀤𑀭𑀘𑁆𑀙𑀦𑁆𑀦𑁂𑀧𑀺 𑀲𑀳𑀲𑁂𑀬𑁆𑀬𑀸 𑀦 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀬𑀁 𑀲𑁂𑀦𑀸𑀲𑀦𑀁 𑀪𑀽𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯𑀙𑀤𑀦𑀁 𑀆𑀳𑀘𑁆𑀘 𑀧𑀸𑀓𑀸𑀭𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀅𑀦𑁆𑀢𑀫𑀲𑁄 𑀯𑀢𑁆𑀣𑁂𑀦𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀇𑀤𑀁 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫 𑀲𑁂𑀦𑀸𑀲𑀦𑀁. 𑀙𑀤𑀦𑀁 𑀅𑀦𑀸𑀳𑀘𑁆𑀘 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀫𑁂𑀯. 𑀬𑀲𑁆𑀲 𑀧𑀦 𑀉𑀧𑀭𑀺 𑀩𑀳𑀼𑀢𑀭𑀁 𑀞𑀸𑀦𑀁 𑀙𑀦𑁆𑀦𑀁, 𑀅𑀧𑁆𑀧𑀁 𑀅𑀘𑁆𑀙𑀦𑁆𑀦𑀁, 𑀲𑀫𑀦𑁆𑀢𑀢𑁄 𑀯𑀸 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀅𑀧𑁆𑀧𑀁 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑀁 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑀁 𑀦𑀸𑀫.

𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂𑀧𑀺 𑀲𑀢𑁆𑀢𑀪𑀽𑀫𑀺𑀓𑁄 𑀧𑀸𑀲𑀸𑀤𑁄 𑀏𑀓𑀽𑀧𑀘𑀸𑀭𑁄 𑀳𑁄𑀢𑀺, 𑀲𑀢𑀕𑀩𑁆𑀪𑀁 𑀯𑀸 𑀘𑀢𑀼𑀲𑀸𑀮𑀁, 𑀏𑀓𑀁 𑀲𑁂𑀦𑀸𑀲𑀦𑀫𑀺𑀘𑁆𑀘𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀭𑀽𑀧𑁂 𑀲𑁂𑀦𑀸𑀲𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀲𑀫𑁆𑀩𑀳𑀼𑀮𑀸 𑀲𑀸𑀫𑀡𑁂𑀭𑀸, 𑀏𑀓𑁄 𑀪𑀺𑀓𑁆𑀔𑀼, 𑀲𑀸𑀫𑀡𑁂𑀭𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸. 𑀢𑁂 𑀘𑁂 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀧𑀬𑁄𑀕𑁂 𑀧𑀬𑁄𑀕𑁂 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁂 𑀧𑀦 𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀬𑁄𑀕𑁂𑀦 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺. 𑀲𑀘𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽, 𑀏𑀓𑁄 𑀲𑀸𑀫𑀡𑁂𑀭𑁄, 𑀏𑀓𑁄𑀧𑀺 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀢𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀦𑀺𑀧𑀚𑁆𑀚𑀦𑁂𑀦𑀧𑀺 𑀪𑀺𑀓𑁆𑀔𑀽𑀦𑀁 𑀆𑀧𑀢𑁆𑀢𑀺𑀬𑁂𑀯. 𑀉𑀪𑀬𑁂𑀲𑀁 𑀲𑀫𑁆𑀩𑀳𑀼𑀮𑀪𑀸𑀯𑁂𑀧𑀺 𑀏𑀲𑁂𑀯 𑀦𑀬𑁄.

𑁮𑁦. 𑀅𑀧𑀺𑀘𑁂𑀢𑁆𑀣 𑀏𑀓𑀸𑀯𑀸𑀲𑀸𑀤𑀺𑀓𑀫𑁆𑀧𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀳𑀺 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀏𑀓𑁂𑀦𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀸 𑀆𑀧𑀢𑁆𑀢𑀺. 𑀬𑁄𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀯𑀸𑀲𑁂 𑀦𑀸𑀦𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺. 𑀬𑁄𑀧𑀺 𑀦𑀸𑀦𑀸𑀆𑀯𑀸𑀲𑁂𑀲𑀼 𑀏𑀓𑁂𑀦𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺. 𑀬𑁄𑀧𑀺 𑀦𑀸𑀦𑀸𑀆𑀯𑀸𑀲𑁂𑀲𑀼 𑀦𑀸𑀦𑀸𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑀦𑀲𑀢𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀧𑀺 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀸 𑀆𑀧𑀢𑁆𑀢𑀺.

𑀅𑀬𑀜𑁆𑀘 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀦𑀸𑀫 ‘‘𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫𑀸’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑀫𑀲𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺 𑀲𑀤𑁆𑀥𑀺𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀘𑁂𑀧𑀺 𑀕𑁄𑀥𑀸𑀩𑀺𑀴𑀸𑀮𑀫𑀗𑁆𑀕𑀼𑀲𑀸𑀤𑀻𑀲𑀼 𑀓𑁄𑀘𑀺 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑁄 𑀯𑀲𑀦𑀲𑁂𑀦𑀸𑀲𑀦𑁂 𑀏𑀓𑀽𑀧𑀘𑀸𑀭𑀝𑁆𑀞𑀸𑀦𑁂 𑀲𑀬𑀢𑀺, 𑀲𑀳𑀲𑁂𑀬𑁆𑀬𑀸𑀯 𑀳𑁄𑀢𑀺. 𑀬𑀤𑀺 𑀧𑀦 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂𑀦 𑀲𑀤𑁆𑀥𑀺𑀁 𑀅𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑀲𑁆𑀲 𑀪𑀺𑀢𑁆𑀢𑀺𑀬𑀸 𑀉𑀧𑀭𑀺𑀞𑀺𑀢𑀲𑀼𑀲𑀺𑀭𑀢𑀼𑀮𑀸𑀲𑀻𑀲𑀲𑁆𑀲 𑀲𑀼𑀲𑀺𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀢𑀼𑀮𑀸𑀬 𑀅𑀩𑁆𑀪𑀦𑁆𑀢𑀭𑁂 𑀲𑀬𑀺𑀢𑁆𑀯𑀸 𑀢𑁂𑀦𑁂𑀯 𑀲𑀼𑀲𑀺𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀲𑀬𑀺𑀢𑀪𑀺𑀓𑁆𑀔𑀼𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀙𑀤𑀦𑁂 𑀙𑀺𑀤𑁆𑀤𑀁 𑀳𑁄𑀢𑀺, 𑀢𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀙𑀤𑀦𑁂 𑀯𑀲𑀺𑀢𑁆𑀯𑀸 𑀢𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀦𑀸𑀦𑀽𑀧𑀘𑀸𑀭𑁂 𑀉𑀧𑀭𑀺𑀫𑀢𑀮𑁂 𑀙𑀤𑀦𑀩𑁆𑀪𑀦𑁆𑀢𑀭𑁂 𑀲𑀬𑀺𑀢𑀲𑁆𑀲 𑀆𑀧𑀢𑁆𑀢𑀺, 𑀳𑁂𑀝𑁆𑀞𑀺𑀫𑀢𑀮𑁂 𑀲𑀬𑀺𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀅𑀦𑁆𑀢𑁄𑀧𑀸𑀲𑀸𑀤𑁂𑀦𑁂𑀯 𑀆𑀭𑁄𑀳𑀺𑀢𑁆𑀯𑀸 𑀲𑀩𑁆𑀩𑀢𑀮𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀓𑀽𑀧𑀘𑀸𑀭𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀬𑀺𑀢𑀲𑁆𑀲 𑀆𑀧𑀢𑁆𑀢𑀺, 𑀲𑀪𑀸𑀲𑀗𑁆𑀔𑁂𑀧𑁂𑀦 𑀓𑀢𑁂 𑀅𑀟𑁆𑀠𑀓𑀼𑀝𑁆𑀝𑀓𑁂 𑀲𑁂𑀦𑀸𑀲𑀦𑁂 𑀲𑀬𑀺𑀢𑀲𑁆𑀲 𑀢𑀼𑀮𑀸𑀯𑀸𑀴𑀲𑀖𑀸𑀝𑀸𑀤𑀻𑀲𑀼 𑀓𑀧𑁄𑀢𑀸𑀤𑀬𑁄 𑀲𑀬𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺𑀕𑀢𑁂 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂 𑀲𑀬𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀫𑀡𑁆𑀟𑀮𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀏𑀓𑀘𑁆𑀙𑀤𑀦𑀸𑀬 𑀕𑀩𑁆𑀪𑀫𑀸𑀮𑀸𑀬 𑀲𑀢𑀕𑀩𑁆𑀪𑀁 𑀘𑁂𑀧𑀺 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀢𑁆𑀭 𑀘𑁂 𑀏𑀓𑁂𑀦 𑀲𑀸𑀥𑀸𑀭𑀡𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀯𑀺𑀲𑀼𑀁 𑀧𑀸𑀓𑀸𑀭𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑁂 𑀲𑀩𑁆𑀩𑀕𑀩𑁆𑀪𑁂𑀧𑀺 𑀧𑀯𑀺𑀲𑀦𑁆𑀢𑀺, 𑀏𑀓𑀕𑀩𑁆𑀪𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀦𑀺𑀧𑀦𑁆𑀦𑁂 𑀲𑀩𑁆𑀩𑀕𑀩𑁆𑀪𑁂𑀲𑀼 𑀦𑀺𑀧𑀦𑁆𑀦𑀸𑀦𑀁 𑀆𑀧𑀢𑁆𑀢𑀺. 𑀲𑀘𑁂 𑀲𑀧𑀫𑀼𑀔𑀸 𑀕𑀩𑁆𑀪𑀸 𑀳𑁄𑀦𑁆𑀢𑀺, 𑀧𑀫𑀼𑀔𑀜𑁆𑀘 𑀉𑀧𑀭𑀺 𑀅𑀘𑁆𑀙𑀦𑁆𑀦𑀁, 𑀧𑀫𑀼𑀔𑁂 𑀲𑀬𑀺𑀢𑁄 𑀕𑀩𑁆𑀪𑁂 𑀲𑀬𑀺𑀢𑀸𑀦𑀁 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺. 𑀲𑀘𑁂 𑀧𑀦 𑀕𑀩𑁆𑀪𑀘𑁆𑀙𑀤𑀦𑁂𑀦𑁂𑀯 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀙𑀤𑀦𑀁, 𑀢𑀢𑁆𑀭 𑀲𑀬𑀺𑀢𑁄 𑀲𑀩𑁆𑀩𑁂𑀲𑀁 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑀘𑁆𑀙𑀦𑁆𑀦𑀢𑁆𑀢𑀸 𑀘 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀢𑁆𑀢𑀸 𑀘. 𑀕𑀩𑁆𑀪𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀳𑀺𑀲𑁆𑀲 𑀧𑀭𑀺𑀓𑁆𑀔𑁂𑀧𑁄.

𑁮𑁧. 𑀬𑁂𑀧𑀺 𑀏𑀓𑀲𑀸𑀮𑀤𑁆𑀯𑀺𑀲𑀸𑀮𑀢𑀺𑀲𑀸𑀮𑀘𑀢𑀼𑀲𑀸𑀮𑀲𑀦𑁆𑀦𑀺𑀯𑁂𑀲𑀸 𑀫𑀳𑀸𑀧𑀸𑀲𑀸𑀤𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀝𑁆𑀞𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀲𑀩𑁆𑀩𑀢𑁆𑀣 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀢𑁂𑀲𑀼𑀧𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑀸 𑀦 𑀫𑀼𑀘𑁆𑀘𑀢𑀺. 𑀲𑀘𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀉𑀧𑀘𑀸𑀭𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸 𑀳𑁄𑀦𑁆𑀢𑀺, 𑀏𑀓𑀽𑀧𑀘𑀸𑀭𑀝𑁆𑀞𑀸𑀦𑁂𑀬𑁂𑀯 𑀆𑀧𑀢𑁆𑀢𑀺. 𑀤𑁆𑀯𑀻𑀳𑀺 𑀤𑁆𑀯𑀸𑀭𑁂𑀳𑀺 𑀬𑀼𑀢𑁆𑀢𑀲𑁆𑀲 𑀲𑀼𑀥𑀸𑀙𑀤𑀦𑀫𑀡𑁆𑀟𑀧𑀲𑁆𑀲 𑀫𑀚𑁆𑀛𑁂 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀭𑀺𑀘𑁆𑀙𑁂𑀤𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀲𑀬𑀢𑀺, 𑀏𑀓𑀲𑁆𑀫𑀺𑀁 𑀪𑀺𑀓𑁆𑀔𑀼, 𑀅𑀦𑀸𑀧𑀢𑁆𑀢𑀺. 𑀧𑀸𑀓𑀸𑀭𑁂 𑀕𑁄𑀥𑀸𑀤𑀻𑀦𑀁 𑀧𑀯𑀺𑀲𑀦𑀫𑀢𑁆𑀢𑀁 𑀙𑀺𑀤𑁆𑀤𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀜𑁆𑀘 𑀧𑀭𑀺𑀘𑁆𑀙𑁂𑀤𑁂 𑀕𑁄𑀥𑀸 𑀲𑀬𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀙𑀺𑀤𑁆𑀤𑁂𑀦 𑀕𑁂𑀳𑀁 𑀏𑀓𑀽𑀧𑀘𑀸𑀭𑀁 𑀦𑀸𑀫 𑀳𑁄𑀢𑀺. 𑀲𑀘𑁂 𑀧𑀸𑀓𑀸𑀭𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀦𑁆𑀢𑀺, 𑀏𑀓𑀽𑀧𑀘𑀸𑀭𑀢𑀸𑀬 𑀆𑀧𑀢𑁆𑀢𑀺. 𑀢𑀁 𑀤𑁆𑀯𑀸𑀭𑀁 𑀓𑀯𑀸𑀝𑁂𑀦 𑀧𑀺𑀤𑀳𑀺𑀢𑁆𑀯𑀸 𑀲𑀬𑀦𑁆𑀢𑀺, 𑀆𑀧𑀢𑁆𑀢𑀺𑀬𑁂𑀯. 𑀦 𑀳𑀺 𑀤𑁆𑀯𑀸𑀭𑀧𑀺𑀤𑀳𑀦𑁂𑀦 𑀕𑁂𑀳𑀁 𑀦𑀸𑀦𑀽𑀧𑀘𑀸𑀭𑀁 𑀦𑀸𑀫 𑀳𑁄𑀢𑀺, 𑀤𑁆𑀯𑀸𑀭𑀁 𑀯𑀸 𑀅𑀤𑁆𑀯𑀸𑀭𑀁. 𑀓𑀯𑀸𑀝𑀜𑁆𑀳𑀺 𑀲𑀁𑀯𑀭𑀡𑀯𑀺𑀯𑀭𑀡𑁂𑀳𑀺 𑀬𑀣𑀸𑀲𑀼𑀔𑀁 𑀯𑀴𑀜𑁆𑀚𑀦𑀢𑁆𑀣𑀸𑀬 𑀓𑀢𑀁, 𑀦 𑀯𑀴𑀜𑁆𑀚𑀼𑀧𑀘𑁆𑀙𑁂𑀤𑀦𑀢𑁆𑀣𑀸𑀬. 𑀲𑀘𑁂 𑀢𑀁 𑀤𑁆𑀯𑀸𑀭𑀁 𑀧𑀼𑀦 𑀇𑀝𑁆𑀞𑀓𑀸𑀳𑀺 𑀧𑀺𑀤𑀳𑀦𑁆𑀢𑀺, 𑀅𑀤𑁆𑀯𑀸𑀭𑀁 𑀳𑁄𑀢𑀺, 𑀧𑀼𑀭𑀺𑀫𑁂 𑀦𑀸𑀦𑀽𑀧𑀘𑀸𑀭𑀪𑀸𑀯𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀤𑀻𑀖𑀧𑀫𑀼𑀔𑀁 𑀘𑁂𑀢𑀺𑀬𑀖𑀭𑀁 𑀳𑁄𑀢𑀺, 𑀏𑀓𑀁 𑀓𑀯𑀸𑀝𑀁 𑀅𑀦𑁆𑀢𑁄, 𑀏𑀓𑀁 𑀩𑀳𑀺, 𑀤𑁆𑀯𑀺𑀦𑁆𑀦𑀁 𑀓𑀯𑀸𑀝𑀸𑀦𑀁 𑀅𑀦𑁆𑀢𑀭𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀦𑁆𑀢𑁄𑀘𑁂𑀢𑀺𑀬𑀖𑀭𑁂 𑀲𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀓𑀭𑁄𑀢𑀺 𑀏𑀓𑀽𑀧𑀘𑀸𑀭𑀢𑁆𑀢𑀸.

𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀲𑁂𑀦𑀸𑀲𑀦𑀁 𑀔𑀼𑀤𑁆𑀤𑀓𑀁 𑀯𑀸 𑀳𑁄𑀢𑀼 𑀫𑀳𑀦𑁆𑀢𑀁 𑀯𑀸, 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀁 𑀯𑀸 𑀅𑀲𑀫𑁆𑀩𑀦𑁆𑀥𑀁 𑀯𑀸, 𑀤𑀻𑀖𑀁 𑀯𑀸 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸, 𑀏𑀓𑀪𑀽𑀫𑀺𑀓𑀁 𑀯𑀸 𑀅𑀦𑁂𑀓𑀪𑀽𑀫𑀺𑀓𑀁 𑀯𑀸, 𑀬𑀁 𑀬𑀁 𑀏𑀓𑀽𑀧𑀘𑀸𑀭𑀁, 𑀲𑀩𑁆𑀩𑀢𑁆𑀣 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀏𑀢𑁆𑀣 𑀘 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀤𑀦𑁂𑀦 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀝𑁆𑀞 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀁, 𑀬𑁂𑀪𑀼𑀬𑁆𑀬𑁂𑀦𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀤𑀼𑀓𑁆𑀓𑀝𑀦𑁆𑀢𑀺 𑀧𑀜𑁆𑀘 𑀤𑀼𑀓𑁆𑀓𑀝𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀧𑀭𑀺𑀘𑁆𑀙𑀦𑁆𑀦𑁂, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀘𑁆𑀙𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦𑀅𑀘𑁆𑀙𑀦𑁆𑀦𑁂 𑀬𑁂𑀪𑀼𑀬𑁆𑀬𑁂𑀦𑀅𑀧𑀭𑀺𑀘𑁆𑀙𑀦𑁆𑀦𑁂, 𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂, 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂 𑀘𑀽𑀴𑀓𑀘𑁆𑀙𑀦𑁆𑀦𑁂 𑀘𑀽𑀴𑀓𑀧𑀭𑀺𑀘𑁆𑀙𑀦𑁆𑀦𑁂 𑀘 𑀅𑀦𑀸𑀧𑀢𑁆𑀢𑀺. 𑀫𑀸𑀢𑀼𑀕𑀸𑀫𑁂𑀦 𑀲𑀳 𑀦𑀺𑀧𑀚𑁆𑀚𑀦𑁆𑀢𑀲𑁆𑀲𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀅𑀬𑀜𑁆𑀳𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀦𑀺𑀧𑀚𑁆𑀚𑀦𑁆𑀢𑀲𑁆𑀲 𑀘𑀢𑀼𑀢𑁆𑀣𑀤𑀺𑀯𑀲𑁂 𑀆𑀧𑀢𑁆𑀢𑀺, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀧𑀞𑀫𑀤𑀺𑀯𑀲𑁂𑀢𑀺. 𑀬𑀓𑁆𑀔𑀺𑀧𑁂𑀢𑀻𑀳𑀺 𑀧𑀦 𑀤𑀺𑀲𑁆𑀲𑀫𑀸𑀦𑀓𑀭𑀽𑀧𑀸𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀘 𑀫𑁂𑀣𑀼𑀦𑀥𑀫𑁆𑀫𑀯𑀢𑁆𑀣𑀼𑀪𑀽𑀢𑀸𑀬 𑀏𑀯 𑀤𑀼𑀓𑁆𑀓𑀝𑀁, 𑀲𑁂𑀲𑀸𑀳𑀺 𑀅𑀦𑀸𑀧𑀢𑁆𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀲𑀳𑀲𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.