𑁧𑁪. 𑀧𑀣𑀯𑀻𑀔𑀡𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑁭𑁨. 𑀧𑀣𑀯𑀻𑀢𑀺 𑀤𑁆𑀯𑁂 𑀧𑀣𑀯𑀻 𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻𑀢𑀺. 𑀢𑀢𑁆𑀣 𑀚𑀸𑀢𑀸 𑀦𑀸𑀫 𑀧𑀣𑀯𑀻 𑀲𑀼𑀤𑁆𑀥𑀧𑀁𑀲𑀼𑀓𑀸 𑀲𑀼𑀤𑁆𑀥𑀫𑀢𑁆𑀢𑀺𑀓𑀸 𑀅𑀧𑁆𑀧𑀧𑀸𑀲𑀸𑀡𑀸 𑀅𑀧𑁆𑀧𑀲𑀓𑁆𑀔𑀭𑀸 𑀅𑀧𑁆𑀧𑀓𑀞𑀮𑀸 𑀅𑀧𑁆𑀧𑀫𑀭𑀼𑀫𑁆𑀩𑀸 𑀅𑀧𑁆𑀧𑀯𑀸𑀮𑀼𑀓𑀸 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸 𑀬𑁂𑀪𑀼𑀬𑁆𑀬𑁂𑀦𑀫𑀢𑁆𑀢𑀺𑀓𑀸, 𑀅𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 ‘‘𑀚𑀸𑀢𑀸 𑀧𑀣𑀯𑀻’’𑀢𑀺. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀲𑁄𑀧𑀺 𑀯𑀼𑀘𑁆𑀘𑀢𑀺 ‘‘𑀚𑀸𑀢𑀸 𑀧𑀣𑀯𑀻’’𑀢𑀺. 𑀅𑀚𑀸𑀢𑀸 𑀦𑀸𑀫 𑀧𑀣𑀯𑀻 𑀲𑀼𑀤𑁆𑀥𑀧𑀸𑀲𑀸𑀡𑀸 𑀲𑀼𑀤𑁆𑀥𑀲𑀓𑁆𑀔𑀭𑀸 𑀲𑀼𑀤𑁆𑀥𑀓𑀞𑀮𑀸 𑀲𑀼𑀤𑁆𑀥𑀫𑀭𑀼𑀫𑁆𑀩𑀸 𑀲𑀼𑀤𑁆𑀥𑀯𑀸𑀮𑀼𑀓𑀸 𑀅𑀧𑁆𑀧𑀧𑀁𑀲𑀼𑀓𑀸 𑀅𑀧𑁆𑀧𑀫𑀢𑁆𑀢𑀺𑀓𑀸 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀸 𑀬𑁂𑀪𑀼𑀬𑁆𑀬𑁂𑀦𑀓𑀞𑀮𑀸 𑀬𑁂𑀪𑀼𑀬𑁆𑀬𑁂𑀦𑀫𑀭𑀼𑀫𑁆𑀩𑀸 𑀬𑁂𑀪𑀼𑀬𑁆𑀬𑁂𑀦𑀯𑀸𑀮𑀼𑀓𑀸, 𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 ‘‘𑀅𑀚𑀸𑀢𑀸 𑀧𑀣𑀯𑀻’’𑀢𑀺. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀲𑁄𑀧𑀺 𑀯𑀼𑀘𑁆𑀘𑀢𑀺 ‘‘𑀅𑀚𑀸𑀢𑀸 𑀧𑀣𑀯𑀻’’𑀢𑀺 (𑀧𑀸𑀘𑀺. 𑁮𑁪-𑁮𑁬).

𑀢𑀢𑁆𑀣 𑀚𑀸𑀢𑀧𑀣𑀯𑀺𑀁 𑀔𑀡𑀦𑁆𑀢𑀲𑁆𑀲 𑀔𑀡𑀸𑀧𑁂𑀦𑁆𑀢𑀲𑁆𑀲 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀧𑀸𑀘𑀺. 𑀅𑀝𑁆𑀞. 𑁮𑁬) 𑁋 𑀲𑀘𑁂 𑀲𑀬𑀁 𑀔𑀡𑀢𑀺, 𑀧𑀳𑀸𑀭𑁂 𑀧𑀳𑀸𑀭𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀲𑀓𑀺𑀁 𑀆𑀡𑀢𑁆𑀢𑁄 𑀲𑀘𑁂𑀧𑀺 𑀲𑀓𑀮𑀤𑀺𑀯𑀲𑀁 𑀔𑀡𑀢𑀺, 𑀆𑀡𑀸𑀧𑀓𑀲𑁆𑀲 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀓𑀼𑀲𑀻𑀢𑁄 𑀳𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀡𑀸𑀧𑁂𑀢𑀩𑁆𑀩𑁄, 𑀢𑀁 𑀆𑀡𑀸𑀧𑁂𑀢𑁆𑀯𑀸 𑀔𑀡𑀸𑀧𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 ‘‘𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀳𑀻’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀔𑀢𑀸𑀬𑁂𑀯 𑀳𑀺 𑀧𑁄𑀓𑁆𑀔𑀭𑀡𑀻 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁄. 𑀏𑀲 𑀦𑀬𑁄 ‘‘𑀯𑀸𑀧𑀺𑀁 𑀢𑀴𑀸𑀓𑀁 𑀆𑀯𑀸𑀝𑀁 𑀔𑀡𑀸’’𑀢𑀺𑀆𑀤𑀻𑀲𑀼𑀧𑀺. ‘‘𑀇𑀫𑀁 𑀑𑀓𑀸𑀲𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸’’𑀢𑀺 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. ‘‘𑀓𑀦𑁆𑀤𑀁 𑀔𑀡, 𑀫𑀽𑀮𑀁 𑀔𑀡𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, ‘‘𑀇𑀫𑀁 𑀯𑀮𑁆𑀮𑀺𑀁 𑀔𑀡, 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀓𑀦𑁆𑀤𑀁 𑀯𑀸 𑀫𑀽𑀮𑀁 𑀯𑀸 𑀔𑀡𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑁭𑁩. 𑀧𑁄𑀓𑁆𑀔𑀭𑀡𑀺𑀁 𑀲𑁄𑀥𑁂𑀦𑁆𑀢𑁂𑀳𑀺 𑀬𑁄 𑀓𑀼𑀝𑁂𑀳𑀺 𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺 𑀢𑀦𑀼𑀓𑀓𑀤𑁆𑀤𑀫𑁄, 𑀢𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺, 𑀩𑀳𑀮𑁄 𑀦 𑀯𑀝𑁆𑀝𑀢𑀺. 𑀆𑀢𑀧𑁂𑀦 𑀲𑀼𑀓𑁆𑀔𑀓𑀤𑁆𑀤𑀫𑁄 𑀨𑀮𑀢𑀺, 𑀢𑀢𑁆𑀭 𑀬𑁄 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀅𑀲𑀫𑁆𑀩𑀦𑁆𑀥𑁄, 𑀢𑀫𑁂𑀯 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑁂𑀦 𑀕𑀢𑀝𑁆𑀞𑀸𑀦𑁂 𑀉𑀤𑀓𑀧𑀧𑁆𑀧𑀝𑀓𑁄 𑀦𑀸𑀫 𑀳𑁄𑀢𑀺, 𑀯𑀸𑀢𑀧𑀳𑀸𑀭𑁂𑀦 𑀘𑀮𑀢𑀺, 𑀢𑀁 𑀅𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀢𑀝𑀁 𑀪𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑀲𑀸𑀫𑀦𑁆𑀢𑀸 𑀧𑀢𑀢𑀺. 𑀲𑀘𑁂 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑀁, 𑀙𑀺𑀦𑁆𑀤𑀺𑀢𑀼𑀁 𑀪𑀺𑀦𑁆𑀤𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀘𑀸𑀢𑀼𑀫𑀸𑀲𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀉𑀤𑀓𑁂𑀬𑁂𑀯 𑀧𑀢𑀢𑀺, 𑀤𑁂𑀯𑁂𑀦 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁂𑀧𑀺 𑀉𑀤𑀓𑁂𑀬𑁂𑀯 𑀉𑀤𑀓𑀲𑁆𑀲 𑀧𑀢𑀺𑀢𑀢𑁆𑀢𑀸 𑀯𑀝𑁆𑀝𑀢𑀺.

𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀲𑁄𑀡𑁆𑀟𑀺𑀁 𑀔𑀡𑀦𑁆𑀢𑀺, 𑀲𑀘𑁂 𑀢𑀢𑁆𑀣 𑀧𑀞𑀫𑀫𑁂𑀯 𑀲𑀼𑀔𑀼𑀫𑀭𑀚𑀁 𑀧𑀢𑀢𑀺, 𑀢𑀁 𑀤𑁂𑀯𑁂𑀦 𑀑𑀯𑀝𑁆𑀞𑀁 𑀳𑁄𑀢𑀺, 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀅𑀓𑀧𑁆𑀧𑀺𑀬𑀧𑀣𑀯𑀻𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀉𑀤𑀓𑁂 𑀧𑀭𑀺𑀬𑀸𑀤𑀺𑀦𑁆𑀦𑁂 𑀲𑁄𑀡𑁆𑀟𑀺𑀁 𑀲𑁄𑀥𑁂𑀦𑁆𑀢𑁂𑀳𑀺 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀞𑀫𑀫𑁂𑀯 𑀉𑀤𑀓𑁂𑀦 𑀧𑀽𑀭𑀢𑀺, 𑀧𑀘𑁆𑀙𑀸 𑀭𑀚𑀁 𑀧𑀢𑀢𑀺, 𑀢𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀉𑀤𑀓𑁂𑀬𑁂𑀯 𑀉𑀤𑀓𑀁 𑀧𑀢𑀢𑀺. 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀼𑀔𑀼𑀫𑀭𑀚𑀁 𑀳𑁄𑀢𑀺, 𑀤𑁂𑀯𑁂 𑀨𑀼𑀲𑀸𑀬𑀦𑁆𑀢𑁂 𑀅𑀮𑁆𑀮𑀻𑀬𑀢𑀺, 𑀢𑀫𑁆𑀧𑀺 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀯𑀺𑀓𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀓𑀢𑀧𑀩𑁆𑀪𑀸𑀭𑁂 𑀯𑀫𑁆𑀫𑀺𑀓𑁄 𑀉𑀝𑁆𑀞𑀺𑀢𑁄 𑀳𑁄𑀢𑀺, 𑀬𑀣𑀸𑀲𑀼𑀔𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀅𑀩𑁆𑀪𑁄𑀓𑀸𑀲𑁂 𑀉𑀝𑁆𑀞𑀳𑀢𑀺, 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄𑀬𑁂𑀯 𑀯𑀝𑁆𑀝𑀢𑀺. 𑀭𑀼𑀓𑁆𑀔𑀸𑀤𑀻𑀲𑀼 𑀆𑀭𑀼𑀴𑁆𑀳𑀉𑀧𑀘𑀺𑀓𑀫𑀢𑁆𑀢𑀺𑀓𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀕𑀡𑁆𑀟𑀼𑀧𑁆𑀧𑀸𑀤𑀕𑀽𑀣𑀫𑀽𑀲𑀺𑀓𑀼𑀓𑁆𑀓𑀭𑀕𑁄𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑁄𑀓𑀡𑁆𑀝𑀓𑁄 𑀦𑀸𑀫 𑀕𑀸𑀯𑀻𑀦𑀁 𑀔𑀼𑀭𑀘𑁆𑀙𑀺𑀦𑁆𑀦𑀓𑀤𑁆𑀤𑀫𑁄 𑀯𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀳𑁂𑀝𑁆𑀞𑀺𑀫𑀢𑀮𑁂𑀦 𑀪𑀽𑀫𑀺𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀓𑀲𑀺𑀢𑀝𑁆𑀞𑀸𑀦𑁂 𑀦𑀗𑁆𑀕𑀮𑀘𑁆𑀙𑀺𑀦𑁆𑀦𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀕𑀡𑁆𑀳𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄.

𑀧𑀼𑀭𑀸𑀡𑀲𑁂𑀦𑀸𑀲𑀦𑀁 𑀳𑁄𑀢𑀺 𑀅𑀘𑁆𑀙𑀤𑀦𑀁 𑀯𑀸 𑀯𑀺𑀦𑀝𑁆𑀞𑀘𑁆𑀙𑀤𑀦𑀁 𑀯𑀸 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑀁 𑀚𑀸𑀢𑀧𑀣𑀯𑀻𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀢𑀢𑁄 𑀅𑀯𑀲𑁂𑀲𑀁 𑀙𑀤𑀦𑀺𑀝𑁆𑀞𑀓𑀁 𑀯𑀸 𑀕𑁄𑀧𑀸𑀦𑀲𑀻𑀆𑀤𑀺𑀓𑀁 𑀉𑀧𑀓𑀭𑀡𑀁 𑀯𑀸 ‘‘𑀇𑀝𑁆𑀞𑀓𑀁 𑀕𑀡𑁆𑀳𑀸𑀫𑀺, 𑀕𑁄𑀧𑀸𑀦𑀲𑀺𑀁 𑀪𑀺𑀢𑁆𑀢𑀺𑀧𑀸𑀤𑀁 𑀧𑀤𑀭𑀢𑁆𑀣𑀭𑀡𑀁 𑀧𑀸𑀲𑀸𑀤𑀢𑁆𑀣𑀫𑁆𑀪𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀫𑀢𑁆𑀢𑀺𑀓𑀸 𑀧𑀢𑀢𑀺, 𑀅𑀦𑀸𑀧𑀢𑁆𑀢𑀺, 𑀪𑀺𑀢𑁆𑀢𑀺𑀫𑀢𑁆𑀢𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺. 𑀲𑀘𑁂 𑀬𑀸 𑀬𑀸 𑀅𑀢𑀺𑀦𑁆𑀢𑀸, 𑀢𑀁 𑀢𑀁 𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀦𑁆𑀢𑁄𑀕𑁂𑀳𑁂 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀏𑀓𑀤𑀺𑀯𑀲𑀁 𑀑𑀯𑀝𑁆𑀞𑁂 𑀕𑁂𑀳𑀁 𑀙𑀸𑀤𑁂𑀦𑁆𑀢𑀺. 𑀲𑀘𑁂 𑀲𑀩𑁆𑀩𑁄 𑀢𑀺𑀦𑁆𑀢𑁄, 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀚𑀸𑀢𑀧𑀣𑀯𑀻𑀬𑁂𑀯. 𑀅𑀣𑀲𑁆𑀲 𑀉𑀧𑀭𑀺𑀪𑀸𑀕𑁄𑀬𑁂𑀯 𑀢𑀺𑀦𑁆𑀢𑁄, 𑀅𑀦𑁆𑀢𑁄 𑀅𑀢𑀺𑀦𑁆𑀢𑁄, 𑀬𑀢𑁆𑀢𑀓𑀁 𑀢𑀺𑀦𑁆𑀢𑀁, 𑀢𑀁 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀅𑀧𑀦𑀸𑀫𑁂𑀢𑁆𑀯𑀸 𑀲𑁂𑀲𑀁 𑀬𑀣𑀸𑀲𑀼𑀔𑀁 𑀯𑀴𑀜𑁆𑀚𑁂𑀢𑀼𑀁 𑀯𑀝𑁆𑀝𑀢𑀺 𑀉𑀤𑀓𑁂𑀦 𑀢𑁂𑀫𑀺𑀢𑀢𑁆𑀢𑀸. 𑀏𑀓𑀸𑀩𑀤𑁆𑀥𑀸𑀬𑁂𑀯 𑀳𑀺 𑀚𑀸𑀢𑀧𑀣𑀯𑀻 𑀳𑁄𑀢𑀺, 𑀦 𑀇𑀢𑀭𑀸𑀢𑀺. 𑀅𑀩𑁆𑀪𑁄𑀓𑀸𑀲𑁂 𑀫𑀢𑁆𑀢𑀺𑀓𑀸𑀧𑀸𑀓𑀸𑀭𑁄 𑀳𑁄𑀢𑀺, 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄 𑀚𑀸𑀢𑀧𑀣𑀯𑀻𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀮𑀕𑁆𑀕𑀧𑀁𑀲𑀼𑀁 𑀧𑀦 𑀅𑀮𑁆𑀮𑀳𑀢𑁆𑀣𑁂𑀦 𑀙𑀼𑀧𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀇𑀝𑁆𑀞𑀓𑀧𑀸𑀓𑀸𑀭𑁄 𑀳𑁄𑀢𑀺, 𑀬𑁂𑀪𑀼𑀬𑁆𑀬𑁂𑀦𑀓𑀞𑀮𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀬𑀣𑀸𑀲𑀼𑀔𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑀫𑀡𑁆𑀟𑀧𑀢𑁆𑀣𑀫𑁆𑀪𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀸𑀮𑁂𑀢𑁆𑀯𑀸 𑀧𑀣𑀯𑀺𑀁 𑀯𑀺𑀓𑁄𑀧𑁂𑀦𑁆𑀢𑁂𑀦 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀚𑀼𑀓𑀫𑁂𑀯 𑀉𑀤𑁆𑀥𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀫𑁆𑀧𑀺 𑀲𑀼𑀓𑁆𑀔𑀭𑀼𑀓𑁆𑀔𑀁 𑀲𑀼𑀓𑁆𑀔𑀔𑀸𑀡𑀼𑀓𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀏𑀲𑁂𑀯 𑀦𑀬𑁄.

𑁭𑁪. 𑀦𑀯𑀓𑀫𑁆𑀫𑀢𑁆𑀣𑀁 𑀣𑀫𑁆𑀪𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀤𑀡𑁆𑀟𑀓𑁂𑀳𑀺 𑀉𑀘𑁆𑀘𑀸𑀮𑁂𑀢𑁆𑀯𑀸 𑀧𑀯𑀝𑁆𑀝𑁂𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀚𑀸𑀢𑀧𑀣𑀯𑀻 𑀪𑀺𑀚𑁆𑀚𑀢𑀺, 𑀲𑀘𑁂 𑀲𑀼𑀤𑁆𑀥𑀘𑀺𑀢𑁆𑀢𑀸 𑀧𑀯𑀝𑁆𑀝𑁂𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀣 𑀧𑀦 𑀢𑁂𑀦 𑀅𑀧𑀤𑁂𑀲𑁂𑀦 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑀼𑀓𑀸𑀫𑀸𑀬𑁂𑀯 𑀳𑁄𑀦𑁆𑀢𑀺, 𑀆𑀧𑀢𑁆𑀢𑀺. 𑀲𑀸𑀔𑀸𑀤𑀻𑀦𑀺 𑀓𑀟𑁆𑀠𑀦𑁆𑀢𑀸𑀦𑀫𑁆𑀧𑀺 𑀧𑀣𑀯𑀺𑀬𑀁 𑀤𑀸𑀭𑀽𑀦𑀺 𑀨𑀸𑀮𑁂𑀦𑁆𑀢𑀸𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀧𑀣𑀯𑀺𑀬𑀁 𑀅𑀝𑁆𑀞𑀺𑀲𑀽𑀘𑀺𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺 𑀆𑀓𑁄𑀝𑁂𑀢𑀼𑀁 𑀯𑀸 𑀧𑀯𑁂𑀲𑁂𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺, ‘‘𑀧𑀲𑁆𑀲𑀸𑀯𑀥𑀸𑀭𑀸𑀬 𑀯𑁂𑀕𑁂𑀦 𑀧𑀣𑀯𑀺𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀲𑁆𑀲𑀸𑀯𑀫𑁆𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀭𑁄𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀆𑀧𑀢𑁆𑀢𑀺, ‘‘𑀯𑀺𑀲𑀫𑀪𑀽𑀫𑀺𑀁 𑀲𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀫𑀚𑁆𑀚𑀦𑀺𑀬𑀸 𑀖𑀁𑀲𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀯𑀢𑁆𑀢𑀲𑀻𑀲𑁂𑀦𑁂𑀯 𑀳𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀓𑁂𑀘𑀺 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀪𑀽𑀫𑀺𑀁 𑀓𑁄𑀝𑁆𑀝𑁂𑀦𑁆𑀢𑀺, 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀯𑀺𑀮𑀺𑀔𑀦𑁆𑀢𑀺, ‘‘𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀽𑀫𑀺𑀁 𑀪𑀺𑀦𑁆𑀤𑀦𑁆𑀢𑀸 𑀘𑀗𑁆𑀓𑀫𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀯𑀻𑀭𑀺𑀬𑀲𑀫𑁆𑀧𑀕𑁆𑀕𑀳𑀢𑁆𑀣𑀁 𑀧𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀘𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀳𑀢𑁆𑀣𑀁 𑀔𑁄𑀯𑀺𑀲𑁆𑀲𑀸𑀫𑀸’’𑀢𑀺 𑀧𑀣𑀯𑀺𑀬𑀁 𑀖𑀁𑀲𑀦𑁆𑀢𑀺, 𑀦 𑀯𑀝𑁆𑀝𑀢𑀺, 𑀅𑀖𑀁𑀲𑀦𑁆𑀢𑁂𑀦 𑀧𑀦 𑀅𑀮𑁆𑀮𑀳𑀢𑁆𑀣𑀁 𑀧𑀣𑀯𑀺𑀬𑀁 𑀞𑀧𑁂𑀢𑁆𑀯𑀸 𑀭𑀚𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀓𑁂𑀘𑀺 𑀓𑀡𑁆𑀟𑀼𑀓𑀘𑁆𑀙𑀼𑀆𑀤𑀻𑀳𑀺 𑀆𑀩𑀸𑀥𑀺𑀓𑀸 𑀙𑀺𑀦𑁆𑀦𑀢𑀝𑀸𑀤𑀻𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀖𑀁𑀲𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀚𑀸𑀢𑀧𑀣𑀯𑀺𑀁 𑀤𑀳𑀢𑀺 𑀯𑀸 𑀤𑀳𑀸𑀧𑁂𑀢𑀺 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀦𑁆𑀢𑀫𑀲𑁄 𑀧𑀢𑁆𑀢𑀫𑁆𑀧𑀺 𑀧𑀘𑀦𑁆𑀢𑁄 𑀬𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀺𑀁 𑀤𑁂𑀢𑀺 𑀯𑀸 𑀤𑀸𑀧𑁂𑀢𑀺 𑀯𑀸, 𑀢𑀢𑁆𑀢𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀢𑀲𑁆𑀫𑀸 𑀧𑀢𑁆𑀢𑀁 𑀧𑀘𑀦𑁆𑀢𑁂𑀦𑀧𑀺 𑀧𑀼𑀩𑁆𑀩𑁂 𑀧𑀓𑁆𑀓𑀝𑁆𑀞𑀸𑀦𑁂𑀬𑁂𑀯 𑀧𑀘𑀺𑀢𑀩𑁆𑀩𑁄. 𑀅𑀤𑀟𑁆𑀠𑀸𑀬 𑀧𑀣𑀯𑀺𑀬𑀸 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀢𑁆𑀢𑀧𑀘𑀦𑀓𑀧𑀸𑀮𑀲𑁆𑀲 𑀧𑀦 𑀉𑀧𑀭𑀺 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀸𑀭𑀽𑀦𑀁 𑀉𑀧𑀭𑀺 𑀞𑀧𑁂𑀢𑀺, 𑀲𑁄 𑀅𑀕𑁆𑀕𑀺 𑀢𑀸𑀦𑀺 𑀤𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀧𑀣𑀯𑀺𑀁 𑀤𑀳𑀢𑀺, 𑀦 𑀯𑀝𑁆𑀝𑀢𑀺. 𑀇𑀝𑁆𑀞𑀓𑀓𑀧𑀸𑀮𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀭𑀸𑀧𑀺 𑀳𑀺 𑀇𑀝𑁆𑀞𑀓𑀸𑀤𑀻𑀦𑀁𑀬𑁂𑀯 𑀉𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀢𑁂𑀲𑀁 𑀅𑀦𑀼𑀧𑀸𑀤𑀸𑀦𑀢𑁆𑀢𑀸. 𑀦 𑀳𑀺 𑀢𑀸𑀦𑀺 𑀅𑀕𑁆𑀕𑀺𑀲𑁆𑀲 𑀉𑀧𑀸𑀤𑀸𑀦𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀲𑀼𑀓𑁆𑀔𑀔𑀸𑀡𑀼𑀲𑀼𑀓𑁆𑀔𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 ‘‘𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑁂𑀢𑀺, 𑀯𑀝𑁆𑀝𑀢𑀺. 𑀧𑀘𑁆𑀙𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀲𑀬𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀢𑀺𑀡𑀼𑀓𑁆𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀳𑀢𑁆𑀣𑁂 𑀟𑀬𑁆𑀳𑀫𑀸𑀦𑁂 𑀪𑀽𑀫𑀺𑀬𑀁 𑀧𑀸𑀢𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀉𑀧𑀸𑀤𑀸𑀦𑀁 𑀤𑀢𑁆𑀯𑀸 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀤𑀟𑁆𑀠𑀧𑀣𑀯𑀺𑀬𑀸 𑀘 𑀬𑀢𑁆𑀢𑀓𑀁 𑀞𑀸𑀦𑀁 𑀉𑀲𑀼𑀫𑀸𑀬 𑀅𑀦𑀼𑀕𑀢𑀁, 𑀲𑀩𑁆𑀩𑀁 𑀯𑀺𑀓𑁄𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀬𑁄 𑀧𑀦 𑀅𑀚𑀸𑀦𑀦𑀓𑁄 𑀪𑀺𑀓𑁆𑀔𑀼 𑀅𑀭𑀡𑀺𑀲𑀳𑀺𑀢𑁂𑀦 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀫𑀻’’𑀢𑀺 𑀯𑀤𑀢𑀺, ‘‘𑀚𑀸𑀮𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀳𑀢𑁆𑀣𑁄 𑀟𑀬𑁆𑀳𑀢𑀻’’𑀢𑀺 𑀯𑀤𑀢𑀺, ‘‘𑀬𑀣𑀸 𑀦 𑀟𑀬𑁆𑀳𑀢𑀺, 𑀢𑀣𑀸 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀪𑀽𑀫𑀺𑀬𑀁 𑀧𑀸𑀢𑁂𑀳𑀻’’𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀳𑀢𑁆𑀣𑁂 𑀟𑀬𑁆𑀳𑀫𑀸𑀦𑁂 𑀧𑀸𑀢𑁂𑀢𑀺, ‘‘𑀧𑀣𑀯𑀺𑀁 𑀤𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀸𑀢𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺, 𑀧𑀢𑀺𑀢𑀝𑁆𑀞𑀸𑀦𑁂 𑀧𑀦 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. ‘‘𑀇𑀫𑀲𑁆𑀲 𑀣𑀫𑁆𑀪𑀲𑁆𑀲 𑀆𑀯𑀸𑀝𑀁 𑀚𑀸𑀦, 𑀫𑀳𑀸𑀫𑀢𑁆𑀢𑀺𑀓𑀁 𑀚𑀸𑀦, 𑀣𑀼𑀲𑀫𑀢𑁆𑀢𑀺𑀓𑀁 𑀚𑀸𑀦, 𑀫𑀳𑀸𑀫𑀢𑁆𑀢𑀺𑀓𑀁 𑀤𑁂𑀳𑀺, 𑀣𑀼𑀲𑀫𑀢𑁆𑀢𑀺𑀓𑀁 𑀤𑁂𑀳𑀺, 𑀫𑀢𑁆𑀢𑀺𑀓𑀁 𑀆𑀳𑀭, 𑀧𑀁𑀲𑀼𑀁 𑀆𑀳𑀭, 𑀫𑀢𑁆𑀢𑀺𑀓𑀸𑀬 𑀅𑀢𑁆𑀣𑁄, 𑀧𑀁𑀲𑀼𑀦𑀸 𑀅𑀢𑁆𑀣𑁄, 𑀇𑀫𑀲𑁆𑀲 𑀣𑀫𑁆𑀪𑀲𑁆𑀲 𑀆𑀯𑀸𑀝𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀫𑀢𑁆𑀢𑀺𑀓𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀺, 𑀇𑀫𑀁 𑀧𑀁𑀲𑀼𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀏𑀯𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀯𑀺𑀳𑀺𑀢𑁄 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀓𑀣𑁂𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀧𑀣𑀯𑀺𑀁 𑀯𑀺𑀮𑀺𑀔𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀲𑀢𑀺𑀬𑀸 𑀯𑀺𑀮𑀺𑀔𑀦𑁆𑀢𑀲𑁆𑀲 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀅𑀦𑀸𑀧𑀢𑁆𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀧𑀣𑀯𑀻𑀔𑀡𑀦𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.