𑁧𑁩. 𑀤𑀸𑀦𑀮𑀓𑁆𑀔𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁬𑁯. 𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀳𑀺 𑀮𑀸𑀪𑀲𑁆𑀲 𑀧𑀭𑀺𑀡𑀸𑀫𑀦𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀤𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀦𑀁. 𑀢𑀢𑁆𑀭𑀺𑀤𑀁 𑀤𑀸𑀦𑀮𑀓𑁆𑀔𑀡𑀁 𑁋 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑁂𑀫𑀺 𑀤𑀤𑀸𑀫𑀺 𑀤𑀚𑁆𑀚𑀸𑀫𑀺 𑀑𑀡𑁄𑀚𑁂𑀫𑀺 𑀧𑀭𑀺𑀘𑁆𑀘𑀚𑀸𑀫𑀺 𑀯𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀫𑀺…𑀧𑁂… 𑀯𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀸 𑀯𑀤𑀢𑀺, 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀤𑀺𑀦𑁆𑀦𑀁𑀬𑁂𑀯 𑀳𑁄𑀢𑀺. ‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀼𑀤𑀺𑀦𑁆𑀦𑀁 𑀲𑀼𑀕𑁆𑀕𑀳𑀺𑀢𑀜𑁆𑀘. ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀺, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀼, 𑀢𑀯 𑀲𑀦𑁆𑀢𑀓𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀲𑀦𑁆𑀢𑀓𑀁 𑀓𑀭𑁄𑀫𑀺, 𑀫𑀫 𑀲𑀦𑁆𑀢𑀓𑀁 𑀳𑁄𑀢𑀼, 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀤𑀼𑀤𑀺𑀦𑁆𑀦𑀁 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀦𑁂𑀯 𑀤𑀸𑀢𑀸 𑀤𑀸𑀢𑀼𑀁 𑀚𑀸𑀦𑀸𑀢𑀺, 𑀦 𑀇𑀢𑀭𑁄 𑀕𑀳𑁂𑀢𑀼𑀁, 𑀲𑀘𑁂 𑀧𑀦 ‘‘𑀢𑀯 𑀲𑀦𑁆𑀢𑀓𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀲𑀘𑁂 𑀧𑀦 𑀏𑀓𑁄 ‘‘𑀇𑀤𑀁 𑀘𑀻𑀯𑀭𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 ‘‘𑀦 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀧𑀼𑀦 𑀲𑁄 ‘‘𑀤𑀺𑀦𑁆𑀦𑀁 𑀫𑀬𑀸 𑀢𑀼𑀬𑁆𑀳𑀁, 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀢𑀺, 𑀇𑀢𑀭𑁄𑀧𑀺 ‘‘𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺 𑀯𑀤𑀢𑀺, 𑀢𑀢𑁄 𑀧𑀼𑀭𑀺𑀫𑁄𑀧𑀺 ‘‘𑀫𑀬𑀸 𑀤𑀺𑀦𑁆𑀦’’𑀦𑁆𑀢𑀺 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀘𑁆𑀙𑀺𑀫𑁄𑀧𑀺 ‘‘𑀫𑀬𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺, 𑀓𑀲𑁆𑀲 𑀆𑀧𑀢𑁆𑀢𑀻𑀢𑀺? 𑀦 𑀓𑀲𑁆𑀲𑀘𑀺. 𑀬𑀲𑁆𑀲 𑀧𑀦 𑀭𑀼𑀘𑁆𑀘𑀢𑀺, 𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺 𑀤𑀺𑀦𑁆𑀦𑀁 𑀬𑀸𑀯 𑀧𑀭𑀲𑁆𑀲 𑀳𑀢𑁆𑀣𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲𑁂𑀯 𑀲𑀦𑁆𑀢𑀓𑀁, ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁. 𑀢𑀲𑁆𑀫𑀸 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀤𑀼𑀕𑁆𑀕𑀳𑀺𑀢𑀁.

𑀪𑀺𑀓𑁆𑀔𑀼 (𑀫𑀳𑀸𑀯. 𑁩𑁭𑁮-𑁩𑁭𑁯) 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀬𑁄 𑀧𑀳𑀺𑀡𑀢𑀺, 𑀲𑁄 𑀓𑀸𑀮𑀓𑀢𑁄’’𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀤𑀼𑀕𑁆𑀕𑀳𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀬𑀲𑁆𑀲 𑀧𑀳𑀻𑀬𑀢𑀺, 𑀲𑁄 𑀓𑀸𑀮𑀓𑀢𑁄’’𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀉𑀪𑁄 𑀓𑀸𑀮𑀓𑀢𑀸’’𑀢𑀺, 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀤𑀼𑀕𑁆𑀕𑀳𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀬𑁄 𑀧𑀳𑀺𑀡𑀢𑀺, 𑀲𑁄 𑀓𑀸𑀮𑀓𑀢𑁄’’𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀬𑀲𑁆𑀲 𑀧𑀳𑀻𑀬𑀢𑀺, 𑀲𑁄 𑀓𑀸𑀮𑀓𑀢𑁄’’𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀕𑀡𑁆𑀳𑀸𑀢𑀺, 𑀤𑀼𑀕𑁆𑀕𑀳𑀺𑀢𑀁. 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀘𑀻𑀯𑀭𑀁 𑀧𑀳𑀺𑀡𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀼𑀡𑀸𑀢𑀺 ‘‘𑀉𑀪𑁄 𑀓𑀸𑀮𑀓𑀢𑀸’’𑀢𑀺. 𑀬𑁄 𑀧𑀳𑀺𑀡𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑀸𑀥𑀺𑀝𑁆𑀞𑀺𑀢𑀁. 𑀬𑀲𑁆𑀲 𑀧𑀳𑀻𑀬𑀢𑀺, 𑀢𑀲𑁆𑀲 𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀼𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄 𑀆𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀅𑀢𑁆𑀢𑀦𑀸 𑀤𑀺𑀦𑁆𑀦𑀫𑁆𑀧𑀺 𑀳𑀺 𑀘𑀻𑀯𑀭𑀁 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀤𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀢𑀫𑀲𑁄 𑀲𑀽𑀘𑀺𑀫𑁆𑀧𑀺 𑀅𑀘𑁆𑀙𑀺𑀦𑁆𑀤𑀢𑁄 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀲𑀬𑀫𑁂𑀯 𑀤𑁂𑀢𑀺, 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀧𑀦 ‘‘𑀆𑀯𑀼𑀲𑁄, 𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀢𑀻’𑀢𑀺 𑀘𑀻𑀯𑀭𑀁 𑀅𑀤𑀫𑁆𑀳𑀸, 𑀲𑁄 𑀤𑀸𑀦𑀺 𑀢𑁆𑀯𑀁 𑀦 𑀯𑀢𑁆𑀢𑀁 𑀓𑀭𑁄𑀲𑀺, 𑀦 𑀉𑀧𑀚𑁆𑀛𑀁 𑀕𑀡𑁆𑀳𑀸𑀲𑀺, 𑀦 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀯𑀼𑀢𑁆𑀢𑁄 ‘‘𑀪𑀦𑁆𑀢𑁂, 𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀪𑀡𑀣, 𑀇𑀤𑀁 𑀯𑁄 𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀤𑀺𑀲𑀸𑀧𑀓𑁆𑀓𑀫𑀦𑁆𑀢𑀁 𑀯𑀸 𑀧𑀦 𑀤𑀳𑀭𑀁 ‘‘𑀦𑀺𑀯𑀢𑁆𑀢𑁂𑀣 𑀦’’𑀦𑁆𑀢𑀺 𑀪𑀡𑀢𑀺, 𑀲𑁄 𑀦 𑀦𑀺𑀯𑀢𑁆𑀢𑀢𑀺, 𑀘𑀻𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀭𑀼𑀦𑁆𑀥𑀣𑀸𑀢𑀺, 𑀏𑀯𑀜𑁆𑀘𑁂 𑀦𑀺𑀯𑀢𑁆𑀢𑀢𑀺, 𑀲𑀸𑀥𑀼. 𑀲𑀘𑁂 ‘‘𑀧𑀢𑁆𑀢𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀢𑀼𑀫𑁆𑀳𑁂 𑀪𑀡𑀣, 𑀕𑀡𑁆𑀳𑀣 𑀦’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. 𑀯𑀺𑀩𑁆𑀪𑀫𑀦𑁆𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀅𑀤𑀫𑁆𑀳𑀸, 𑀲𑁄 𑀤𑀸𑀦𑀺 𑀢𑁆𑀯𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀘𑀭𑀲𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 ‘‘𑀕𑀡𑁆𑀳𑀣 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀫𑀫 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀜𑁆𑀜𑀢𑁆𑀣 𑀕𑀡𑁆𑀳𑀦𑁆𑀢𑀲𑁆𑀲 𑀦 𑀤𑁂𑀫𑀺, 𑀯𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀓𑀭𑁄𑀦𑁆𑀢𑀲𑁆𑀲 𑀦 𑀤𑁂𑀫𑀺, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲 𑀦 𑀤𑁂𑀫𑀺, 𑀅𑀯𑀺𑀩𑁆𑀪𑀫𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀯𑀺𑀩𑁆𑀪𑀫𑀦𑁆𑀢𑀲𑁆𑀲 𑀦 𑀤𑁂𑀫𑀻’’𑀢𑀺 𑀏𑀯𑀁 𑀧𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀤𑀢𑁄 𑀤𑀼𑀓𑁆𑀓𑀝𑀁, 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀺𑀦𑁆𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑁄.

𑁭𑁦. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀮𑀓𑁆𑀔𑀡𑀁 𑀧𑀦 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑀁 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀕𑀳𑁂𑀢𑀼𑀁 𑀲𑀦𑁆𑀤𑀺𑀝𑁆𑀞𑁄 𑀘 𑀳𑁄𑀢𑀺, 𑀲𑀫𑁆𑀪𑀢𑁆𑀢𑁄 𑀘, 𑀆𑀮𑀧𑀺𑀢𑁄 𑀘, 𑀚𑀻𑀯𑀢𑀺 𑀘, 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁩𑁫𑁬).

𑀢𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁩𑁧) 𑀲𑀦𑁆𑀤𑀺𑀝𑁆𑀞𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀓𑀫𑀺𑀢𑁆𑀢𑁄. 𑀲𑀫𑁆𑀪𑀢𑁆𑀢𑁄𑀢𑀺 𑀤𑀴𑁆𑀳𑀫𑀺𑀢𑁆𑀢𑁄. 𑀆𑀮𑀧𑀺𑀢𑁄𑀢𑀺 ‘‘𑀫𑀫 𑀲𑀦𑁆𑀢𑀓𑀁 𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑁂𑀬𑁆𑀬𑀸𑀲𑀺, 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁄. 𑀚𑀻𑀯𑀢𑀻𑀢𑀺 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀲𑀬𑀺𑀢𑁄𑀧𑀺 𑀬𑀸𑀯𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺. 𑀕𑀳𑀺𑀢𑁂 𑀘 𑀅𑀢𑁆𑀢𑀫𑀦𑁄𑀢𑀺 𑀕𑀳𑀺𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑁄 𑀳𑁄𑀢𑀺. ‘‘𑀏𑀯𑀭𑀽𑀧𑀲𑁆𑀲 𑀲𑀦𑁆𑀢𑀓𑀁 𑀕𑀳𑀺𑀢𑁂 𑀫𑁂 𑀅𑀢𑁆𑀢𑀫𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘𑁂𑀢𑀸𑀦𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁄 𑀧𑀦 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀭𑀼𑀳𑀢𑀺 𑀲𑀦𑁆𑀤𑀺𑀝𑁆𑀞𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀲𑀫𑁆𑀪𑀢𑁆𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄, 𑀆𑀮𑀧𑀺𑀢𑁄, 𑀚𑀻𑀯𑀢𑀺, 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄𑀢𑀺. 𑀬𑁄 𑀧𑀦 𑀦 𑀚𑀻𑀯𑀢𑀺, 𑀦 𑀘 𑀕𑀳𑀺𑀢𑁂 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦 𑀕𑀳𑀺𑀢𑀫𑁆𑀧𑀺 𑀧𑀼𑀦 𑀤𑀸𑀢𑀩𑁆𑀩𑀁. 𑀤𑀤𑀫𑀸𑀦𑁂𑀦 𑀘 𑀫𑀢𑀓𑀥𑀦𑀁 𑀢𑀸𑀯 𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩𑀁. 𑀅𑀦𑀢𑁆𑀢𑀫𑀦𑀲𑁆𑀲 𑀲𑀦𑁆𑀢𑀓𑀁 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀁, 𑀬𑁄 𑀧𑀦 𑀧𑀞𑀫𑀁𑀬𑁂𑀯 ‘‘𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸 𑀫𑀫 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑁂𑀦𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀧𑀘𑁆𑀙𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄, 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺, 𑀬𑁄𑀧𑀺 𑀅𑀤𑀸𑀢𑀼𑀓𑀸𑀫𑁄, 𑀘𑀺𑀢𑁆𑀢𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺, 𑀦 𑀓𑀺𑀜𑁆𑀘𑀺 𑀯𑀤𑀢𑀺, 𑀲𑁄𑀧𑀺 𑀧𑀼𑀦 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀬𑁄 𑀧𑀦 ‘‘𑀫𑀬𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀕𑀳𑀺𑀢𑀁 𑀯𑀸 𑀧𑀭𑀺𑀪𑀼𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀕𑀳𑀺𑀢𑀁 𑀯𑀸 𑀳𑁄𑀢𑀼 𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀫𑀬𑀸 𑀧𑀦 𑀢𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀞𑀧𑀺𑀢𑀁, 𑀢𑀁 𑀧𑀸𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀢𑀺, 𑀅𑀬𑀁 𑀧𑀘𑁆𑀘𑀸𑀳𑀭𑀸𑀧𑁂𑀢𑀼𑀁 𑀮𑀪𑀢𑀺. 𑀅𑀬𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂 𑀯𑀺𑀦𑀺𑀘𑁆𑀙𑀬𑁄.

𑁭𑁧. 𑀮𑀸𑀪𑀲𑁆𑀲 𑀧𑀭𑀺𑀡𑀸𑀫𑀦𑀦𑁆𑀢𑀺 𑀇𑀤𑀁 𑀧𑀦 𑀅𑀜𑁆𑀜𑁂𑀲𑀁 𑀅𑀢𑁆𑀣𑀸𑀬 𑀧𑀭𑀺𑀡𑀢𑀮𑀸𑀪𑀲𑁆𑀲 𑀅𑀢𑁆𑀢𑀦𑁄 𑀅𑀜𑁆𑀜𑀲𑁆𑀲 𑀯𑀸 𑀧𑀭𑀺𑀡𑀸𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁫𑁯-𑁬𑁬𑁦) 𑁋 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀯𑀸 𑀕𑀺𑀳𑀻𑀦𑀁 𑀯𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀲𑀦𑁆𑀢𑀓𑀫𑁆𑀧𑀺 ‘‘𑀇𑀤𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀏𑀯𑀁 𑀅𑀜𑁆𑀜𑀲𑁆𑀲 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀢𑀲𑁆𑀫𑀸 𑀬𑁄𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀫𑀬𑁂 𑀫𑀸𑀢𑀼𑀖𑀭𑁂𑀧𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀭𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀲𑀼𑀤𑁆𑀥𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀫𑀦𑀼𑀲𑁆𑀲𑀸 ‘‘𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀕𑀺𑀮𑀸𑀦𑁄 𑀘𑁂𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀓𑀺𑀜𑁆𑀘𑀺 𑀬𑀸𑀘𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀲𑀘𑁂 𑀧𑀦 𑀲𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀧𑁆𑀧𑀺𑀆𑀤𑀻𑀦𑀺 𑀆𑀪𑀢𑀸𑀦𑀺 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀣𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣𑀸𑀧𑀺 𑀦𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀁 𑀉𑀧𑀸𑀲𑀓𑀸 𑀯𑀤𑀦𑁆𑀢𑀺 ‘‘𑀲𑀗𑁆𑀖𑁄𑀧𑀺 𑀅𑀫𑁆𑀳𑁂𑀳𑀺 𑀤𑀺𑀦𑁆𑀦𑀫𑁂𑀯 𑀮𑀪𑀢𑀺, 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀺.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀤𑁂𑀣𑀸’’𑀢𑀺 𑀧𑀭𑀺𑀡𑀸𑀫𑁂𑀢𑀺, ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀤𑀸𑀦𑁂𑀦, 𑀘𑁂𑀢𑀺𑀬𑀲𑁆𑀲 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀏𑀯𑀁 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀤𑀼𑀓𑁆𑀓𑀝𑀁. 𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀦𑀺𑀬𑀫𑁂𑀢𑁆𑀯𑀸 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀅𑀢𑁆𑀣𑀸𑀬 𑀭𑁄𑀧𑀺𑀢𑀫𑀸𑀮𑀸𑀯𑀘𑁆𑀙𑀢𑁄 𑀅𑀜𑁆𑀜𑀘𑁂𑀢𑀺𑀬𑀫𑁆𑀳𑀺 𑀧𑀼𑀧𑁆𑀨𑀫𑁆𑀧𑀺 𑀆𑀭𑁄𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀓𑀲𑁆𑀲 𑀘𑁂𑀢𑀺𑀬𑀲𑁆𑀲 𑀧𑀦 𑀙𑀢𑁆𑀢𑀁 𑀯𑀸 𑀧𑀝𑀸𑀓𑀁 𑀯𑀸 𑀆𑀭𑁄𑀧𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀲𑁂𑀲𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀤𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁆𑀢𑀫𑀲𑁄 𑀲𑀼𑀦𑀔𑀲𑁆𑀲𑀧𑀺 𑀧𑀭𑀺𑀡𑀢𑀁 ‘‘𑀇𑀫𑀲𑁆𑀲 𑀲𑀼𑀦𑀔𑀲𑁆𑀲 𑀫𑀸 𑀤𑁂𑀳𑀺, 𑀏𑀢𑀲𑁆𑀲 𑀤𑁂𑀳𑀻’’𑀢𑀺 𑀏𑀯𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀸𑀫𑁂𑀢𑀺, 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀤𑀸𑀬𑀓𑀸 ‘‘𑀫𑀬𑀁 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀓𑀸𑀫𑀸, 𑀘𑁂𑀢𑀺𑀬𑀧𑀽𑀚𑀁 𑀓𑀸𑀢𑀼𑀓𑀸𑀫𑀸, 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀓𑁆𑀔𑀸𑀭𑀁 𑀤𑀸𑀢𑀼𑀓𑀸𑀫𑀸, 𑀢𑀼𑀫𑁆𑀳𑀸𑀓𑀁 𑀭𑀼𑀘𑀺𑀬𑀸 𑀤𑀲𑁆𑀲𑀸𑀫, 𑀪𑀡𑀣 𑀓𑀢𑁆𑀣 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀯𑀼𑀢𑁆𑀢𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀦 𑀓𑁂𑀯𑀮𑀁 ‘‘𑀓𑀢𑁆𑀣 𑀤𑁂𑀫𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺, ‘‘𑀬𑀢𑁆𑀣 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑁄 𑀧𑀭𑀺𑀪𑁄𑀕𑀁 𑀯𑀸 𑀮𑀪𑁂𑀬𑁆𑀬, 𑀧𑀝𑀺𑀲𑀗𑁆𑀔𑀸𑀭𑀁 𑀯𑀸 𑀮𑀪𑁂𑀬𑁆𑀬, 𑀘𑀺𑀭𑀝𑁆𑀞𑀺𑀢𑀺𑀓𑁄 𑀯𑀸 𑀅𑀲𑁆𑀲, 𑀬𑀢𑁆𑀣 𑀯𑀸 𑀧𑀦 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀤𑀸𑀦𑀮𑀓𑁆𑀔𑀡𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.