𑁩𑁩. 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁪𑁯. 𑀏𑀯𑀁 𑀕𑀭𑀼𑀓𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑀓𑀣𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀁 𑀓𑀣𑁂𑀢𑀼𑀁 ‘‘𑀓𑀫𑁆𑀫𑀸𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀭𑀻𑀬𑀢𑁂 𑀢𑀦𑁆𑀢𑀺 𑀓𑀫𑁆𑀫𑀁, 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀫𑁆𑀫𑀁. 𑀇𑀢𑀭𑀲𑁆𑀫𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀅-𑀓𑀸𑀭𑁄 𑀯𑀼𑀤𑁆𑀥𑀺𑀅𑀢𑁆𑀣𑁄, 𑀦 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀓𑀫𑁆𑀫𑀁 𑀅𑀓𑀫𑁆𑀫𑀁. 𑀓𑀫𑁆𑀫𑀜𑁆𑀘 𑀅𑀓𑀫𑁆𑀫𑀜𑁆𑀘 𑀓𑀫𑁆𑀫𑀸𑀓𑀫𑁆𑀫𑀁 𑀯𑀚𑁆𑀚𑀸𑀯𑀚𑁆𑀚𑀁 𑀯𑀺𑀬, 𑀨𑀮𑀸𑀨𑀮𑀁 𑀯𑀺𑀬 𑀘. 𑀢𑀢𑁆𑀣 𑀘 𑀓𑀫𑁆𑀫𑀦𑁆𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀜𑀢𑁆𑀢𑀺𑀓𑀫𑁆𑀫𑀤𑁆𑀯𑀬𑀁. 𑀅𑀓𑀫𑁆𑀫𑀦𑁆𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀜𑀢𑁆𑀢𑀺𑀘𑀢𑀉𑀢𑁆𑀣𑀓𑀫𑁆𑀫𑀤𑁆𑀯𑀬𑀁. 𑀅𑀣 𑀯𑀸 𑀓𑀫𑁆𑀫𑀦𑁆𑀢𑀺 𑀘𑀢𑀽𑀲𑀼𑀧𑀺 𑀏𑀢𑁂𑀲𑀼 𑀮𑀳𑀼𑀓𑀓𑀫𑁆𑀫𑀁. 𑀅𑀓𑀫𑁆𑀫𑀦𑁆𑀢𑀺 𑀕𑀭𑀼𑀓𑀓𑀫𑁆𑀫𑀁. 𑀓𑀫𑁆𑀫𑀸𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀦𑀸𑀢𑀺 𑀧𑀓𑁆𑀔𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀕𑀭𑀼𑀓𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑀓𑁆𑀔𑀢𑁄 𑀅𑀜𑁆𑀜𑁄 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀸 𑀫𑀬𑀸 𑀯𑀼𑀘𑁆𑀘𑀢𑁂𑀢𑀺 𑀯𑀸 𑀅𑀢𑁆𑀣𑁄.

𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑀻𑀢𑀺 𑀧𑀭𑀺𑀘𑁆𑀙𑁂𑀤𑀦𑀺𑀤𑀲𑁆𑀲𑀦𑀁. 𑀢𑁂𑀦 𑀯𑀺𑀦𑀬𑀓𑀫𑁆𑀫𑀸𑀦𑀺 𑀦𑀸𑀫 𑀘𑀢𑁆𑀢𑀸𑀭𑀺 𑀏𑀯 𑀳𑁄𑀦𑁆𑀢𑀺, 𑀦 𑀇𑀢𑁄 𑀊𑀦𑀸𑀥𑀺𑀓𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑁆𑀫𑀦𑀺𑀤𑀲𑁆𑀲𑀦𑀁. 𑀅𑀧𑀮𑁄𑀓𑀦𑀓𑀫𑁆𑀫𑀦𑁆𑀢𑀺𑀆𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑁆𑀫𑀸𑀦𑀁 𑀉𑀤𑁆𑀤𑁂𑀲𑀓𑀣𑀦𑀁. 𑀢𑀢𑁆𑀣 𑀅𑀧𑀮𑁄𑀓𑀻𑀬𑀢𑁂 𑀆𑀬𑀸𑀘𑀻𑀬𑀢𑁂 𑀅𑀧𑀮𑁄𑀓𑀦𑀁, 𑀅𑀧𑀧𑀼𑀩𑁆𑀩𑀮𑁄𑀓𑀥𑀸𑀢𑀼 𑀆𑀬𑀸𑀘𑀦𑀢𑁆𑀣𑁂, 𑀬𑀼𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑀯𑀸𑀘𑀓𑁄. 𑀅𑀧𑀮𑁄𑀓𑀦𑀯𑀲𑁂𑀦 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀸𑀦𑀼𑀫𑀢𑀺𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀸𑀧𑀦𑀸 𑀜𑀢𑁆𑀢𑀺, 𑀲𑀗𑁆𑀖𑀲𑁆𑀲 𑀚𑀸𑀦𑀸𑀧𑀦𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁, 𑀅𑀦𑀼𑀲𑁆𑀲𑀸𑀯𑀦𑀁 𑀅𑀓𑀢𑁆𑀯𑀸 𑀲𑀼𑀤𑁆𑀥𑀜𑀢𑁆𑀢𑀺𑀬𑀸𑀬𑁂𑀯 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀻 𑀤𑀼𑀢𑀺𑀬𑀸, 𑀜𑀢𑁆𑀢𑀺 𑀤𑀼𑀢𑀺𑀬𑀸 𑀏𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀁, 𑀜𑀢𑁆𑀢𑀺𑀤𑀼𑀢𑀺𑀬𑀜𑁆𑀘 𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀏𑀓𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀘𑀢𑀼𑀦𑁆𑀦𑀁 𑀧𑀽𑀭𑀡𑀻 𑀘𑀢𑀼𑀢𑁆𑀣𑀻, 𑀜𑀢𑁆𑀢𑀺 𑀘𑀢𑀼𑀢𑁆𑀣𑀻 𑀏𑀢𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀜𑁆𑀘 𑀢𑀁 𑀓𑀫𑁆𑀫𑀜𑁆𑀘𑀸𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁, 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀁. 𑀢𑁂𑀦 𑀯𑀓𑁆𑀔𑀢𑀺 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸’’𑀢𑀺𑀆𑀤𑀺.

𑀏𑀯𑀁 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁮𑁨 𑀆𑀤𑀬𑁄) 𑀓𑀫𑁆𑀫𑀯𑀕𑁆𑀕𑁂 𑀆𑀕𑀢𑀦𑀬𑁂𑀦𑁂𑀯 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀢𑁆𑀣𑀼𑀢𑁄𑀢𑀺 𑀯𑀺𑀦𑀬𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀽𑀢𑀯𑀢𑁆𑀣𑀼𑀢𑁄. 𑀜𑀢𑁆𑀢𑀺𑀢𑁄 𑀅𑀦𑀼𑀲𑁆𑀲𑀸𑀯𑀦𑀢𑁄𑀢𑀺 𑀤𑁆𑀯𑁂𑀧𑀺 𑀓𑀫𑁆𑀫𑀯𑀸𑀘𑀸𑀬𑀫𑁂𑀯. 𑀲𑀻𑀫𑀢𑁄𑀢𑀺 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀪𑀽𑀢𑀩𑀤𑁆𑀥𑀲𑀻𑀫𑀢𑁄. 𑀧𑀭𑀺𑀲𑀢𑁄𑀢𑀺 𑀓𑀫𑁆𑀫𑀧𑁆𑀧𑀢𑁆𑀢𑀙𑀦𑁆𑀤𑀸𑀭𑀳𑀪𑀽𑀢𑀓𑀸𑀭𑀓𑀲𑀗𑁆𑀖𑀢𑁄. 𑀢𑀸𑀦𑀺𑀬𑁂𑀯 𑀳𑀺 𑀧𑀜𑁆𑀘 𑀲𑀩𑁆𑀩𑁂𑀲𑀁 𑀯𑀺𑀦𑀬𑀓𑀫𑁆𑀫𑀸𑀦𑀁 𑀯𑀺𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀳𑁄𑀦𑁆𑀢𑀺.

𑀢𑀢𑁄 𑀢𑀁 𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀁 𑀯𑀢𑁆𑀣𑀼𑀁 𑀧𑀸𑀴𑀺𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀧𑀝𑀺𑀜𑁆𑀜𑀸𑀬𑀓𑀭𑀡𑀻𑀬𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀅𑀢𑀣𑀸𑀓𑀭𑀡𑁂𑀦, 𑀲𑀢𑀺𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀺𑀬𑀲𑀓𑀫𑁆𑀫𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀭𑀺𑀯𑀸𑀲𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀫𑀸𑀦𑀢𑁆𑀢𑀁 𑀅𑀩𑁆𑀪𑀸𑀦𑀁 𑀉𑀧𑀲𑀫𑁆𑀧𑀤𑀦𑁆𑀢𑀺 𑀇𑀫𑁂𑀲𑀁 𑀢𑁂𑀭𑀲𑀓𑀫𑁆𑀫𑀸𑀦𑀁 𑀅𑀜𑁆𑀜𑀓𑀫𑁆𑀫𑀸𑀭𑀳𑀲𑁆𑀲 𑀅𑀜𑁆𑀜𑀓𑀫𑁆𑀫𑀓𑀭𑀡𑁂𑀦, 𑀉𑀧𑁄𑀲𑀣𑁄 𑀧𑀯𑀸𑀭𑀡𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀤𑀺𑀯𑀲𑁂 𑀓𑀭𑀡𑁂𑀦, 𑀧𑀡𑁆𑀟𑀓𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀫𑀸𑀢𑀼𑀖𑀸𑀢𑀓𑁄 𑀧𑀺𑀢𑀼𑀖𑀸𑀢𑀓𑁄 𑀅𑀭𑀳𑀦𑁆𑀢𑀖𑀸𑀢𑀓𑁄 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀲𑀗𑁆𑀖𑀪𑁂𑀤𑀓𑁄 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄𑀢𑀺 𑀇𑀫𑁂𑀲𑀁 𑀢𑁂𑀭𑀲𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀓𑀭𑀡𑁂𑀦 𑀇𑀢𑀺 𑀇𑀫𑀸𑀦𑀺 𑀏𑀓𑀢𑀺𑀁𑀲 𑀓𑀫𑁆𑀫𑀸𑀦𑀺 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺. 𑀜𑀢𑁆𑀢𑀺𑀢𑁄 𑀧𑀜𑁆𑀘, 𑀅𑀦𑀼𑀲𑁆𑀲𑀸𑀯𑀦𑀢𑁄 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀤𑀲 𑀓𑀸𑀭𑀡𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬𑀫𑁂𑀯 𑀮𑀪𑀦𑁆𑀢𑀺, 𑀲𑀻𑀫𑀢𑁄 𑀏𑀓𑀸𑀤𑀲 𑀓𑀸𑀭𑀡𑀸𑀦𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀯𑀲𑁂𑀦 𑀮𑀪𑀦𑁆𑀢𑀺, 𑀧𑀭𑀺𑀲𑀢𑁄 𑀤𑁆𑀯𑀸𑀤𑀲 𑀓𑀸𑀭𑀡𑀸𑀦𑀺 𑀘𑀢𑀼𑀯𑀕𑁆𑀕𑀧𑀜𑁆𑀘𑀯𑀕𑁆𑀕𑀤𑀲𑀯𑀕𑁆𑀕𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀲𑀗𑁆𑀖𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀓𑀫𑁆𑀫𑀧𑀢𑁆𑀢𑀙𑀦𑁆𑀤𑀸𑀭𑀳𑀲𑀫𑁆𑀫𑀼𑀔𑀻𑀪𑀽𑀢𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀲𑀗𑁆𑀖𑀸𑀦𑀁 𑀯𑀲𑁂𑀦 𑀮𑀪𑀦𑁆𑀢𑀻𑀢𑀺.

𑀏𑀯𑀁 𑀓𑀫𑁆𑀫𑀯𑀺𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀘𑀢𑀼𑀯𑀕𑁆𑀕𑀲𑀗𑁆𑀖𑀸𑀤𑀻𑀲𑀼 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀲𑁂𑀲𑀦𑀸𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁨𑁫𑁦. 𑀢𑀢𑁄 𑀧𑀭𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀞𑀸𑀦𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀫𑁆𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁨𑁫𑁧. 𑀢𑀢𑁄 𑀢𑀸𑀦𑀺𑀬𑁂𑀯 𑀓𑀫𑁆𑀫𑀸𑀦𑀺 𑀢𑁂𑀲𑀼 𑀞𑀸𑀦𑁂𑀲𑀼 𑀧𑀯𑀢𑁆𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀅𑀬𑀁 𑀢𑀸𑀯 𑀧𑀸𑀴𑀺𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀦𑀺𑀘𑁆𑀙𑀬𑀓𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲𑀁 𑀯𑀺𑀦𑀺𑀘𑁆𑀙𑀬𑀓𑀣𑀸𑀬𑀁 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀓𑀢𑀫𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫𑀸𑀢𑀺 𑀧𑀼𑀘𑁆𑀙𑀸𑀬𑀁 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀗𑁆𑀔𑀸𑀢𑀫𑀳𑀸𑀲𑀻𑀫𑀝𑁆𑀞𑀓𑀁 𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸. 𑀦 𑀳𑀺 𑀔𑀡𑁆𑀟𑀲𑀻𑀫𑀸𑀬 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀲𑁄𑀥𑁂𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀗𑁆𑀔𑀸𑀢𑀸𑀬 𑀫𑀳𑀸𑀲𑀻𑀫𑀸𑀬 𑀧𑀦 𑀯𑀺𑀢𑁆𑀣𑀸𑀭𑀢𑁆𑀢𑀸 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀲𑀫𑀕𑁆𑀕𑀪𑀸𑀯𑀢𑁆𑀣𑀁 𑀲𑁄𑀥𑁂𑀢𑀩𑁆𑀩𑀁 𑀳𑁄𑀢𑀺. 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸𑀢𑀺 𑀢𑀺𑀲𑁆𑀲𑀁 𑀲𑀻𑀫𑀸𑀬𑀁 𑀘𑀢𑀼𑀯𑀕𑁆𑀕𑀸𑀤𑀺𑀕𑀡𑀁 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑁂𑀲𑀁 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀸𑀦𑀁 𑀧𑀓𑀢𑀢𑁆𑀢𑀪𑀺𑀓𑁆𑀔𑀽𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸’’𑀢𑀺 (𑀧𑀭𑀺. 𑁪𑁯𑁭). 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸𑀢𑀺 𑀙𑀦𑁆𑀤𑀲𑁆𑀲 𑀆𑀳𑀭𑀺𑀢𑀢𑁆𑀢𑀸 𑀳𑀢𑁆𑀣𑀧𑀸𑀲𑀁 𑀆𑀕𑀢𑀸𑀧𑀺 𑀅𑀦𑀸𑀕𑀢𑀸𑀧𑀺 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸𑀬𑁂𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸. 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀯𑀸𑀘𑀁 𑀅𑀪𑀡𑀺𑀢𑁆𑀯𑀸 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲. 𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀇𑀫𑀺𑀦𑀸 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸’’𑀢𑀺 𑀇𑀤𑀁 𑀤𑁆𑀯𑀬𑀁 𑀅𑀢𑀺𑀤𑀺𑀲𑀢𑀺. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀢𑁂𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀓𑀺𑀁 𑀅𑀜𑁆𑀜𑀓𑀫𑁆𑀫𑀁 𑀇𑀢𑀭𑀓𑀫𑁆𑀫𑀯𑀲𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀭’’𑀇𑀘𑁆𑀘𑀸𑀤𑀺. 𑀏𑀯𑀁 𑀳𑁄𑀢𑀼, 𑀏𑀯𑀁 𑀲𑀦𑁆𑀢𑁂 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀓𑀫𑁆𑀫𑀁 𑀅𑀜𑁆𑀜𑀯𑀲𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀧𑀦 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯. 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑀲𑀫𑁆𑀩𑀦𑁆𑀥𑁄. 𑀬𑀤𑀺 𑀏𑀯𑀁 𑀅𑀓𑁆𑀔𑀭𑀧𑀭𑀺𑀳𑀻𑀦𑀸𑀤𑀻𑀲𑀼 𑀲𑀦𑁆𑀢𑁂𑀲𑀼 𑀓𑀫𑁆𑀫𑀓𑁄𑀧𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀓𑁆𑀔𑀭𑀧𑀭𑀺𑀳𑀻𑀦𑀦𑁆𑀢𑀺 ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀻𑀲𑀼 𑀲𑀼-𑀓𑀸𑀭 𑀡𑀸-𑀓𑀸𑀭 𑀢𑀼-𑀓𑀸𑀭𑀸𑀤𑀻𑀦𑀁 𑀪𑀲𑁆𑀲𑀦𑀁. 𑀧𑀤𑀧𑀭𑀺𑀳𑀻𑀦𑀦𑁆𑀢𑀺 𑀲𑀼𑀡𑀸𑀢𑀽𑀢𑀺𑀆𑀤𑀻𑀦𑀁 𑀯𑀺𑀪𑀢𑁆𑀬𑀦𑁆𑀢𑀧𑀤𑀸𑀦𑀁 𑀪𑀲𑁆𑀲𑀦𑀁. 𑀤𑀼𑀭𑀼𑀢𑁆𑀢𑀧𑀤𑀁 𑀧𑀦 𑀉𑀧𑀭𑀺 𑀯𑀓𑁆𑀔𑀢𑀺.

𑀇𑀤𑀸𑀦𑀺 𑀧𑀼𑀦𑀧𑁆𑀧𑀼𑀦𑀯𑀘𑀦𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀅𑀓𑀼𑀧𑁆𑀧𑀓𑀫𑁆𑀫𑁂 𑀤𑀴𑁆𑀳𑀺𑀓𑀫𑁆𑀫𑀁 𑀳𑁄𑀢𑀺, 𑀓𑀼𑀧𑁆𑀧𑀓𑀫𑁆𑀫𑁂 𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺 𑀆𑀳. 𑀢𑀢𑁆𑀣 𑀇𑀤𑀦𑁆𑀢𑀺 𑀇𑀤𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀓𑀫𑁆𑀫𑀁. 𑀅𑀓𑀼𑀧𑁆𑀧𑀓𑀫𑁆𑀫𑁂𑀢𑀺 𑀅𑀓𑀼𑀧𑁆𑀧𑁂 𑀞𑀸𑀦𑀸𑀭𑀳𑁂 𑀧𑀼𑀭𑁂𑀓𑀢𑀓𑀫𑁆𑀫𑁂. 𑀤𑀴𑁆𑀳𑀺𑀓𑀫𑁆𑀫𑀁 𑀳𑁄𑀢𑀻𑀢𑀺 𑀣𑀺𑀭𑀢𑀭𑀓𑀫𑁆𑀫𑀁 𑀳𑁄𑀢𑀺 𑀏𑀓𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑀩𑁆𑀩𑀪𑀸𑀭𑁂 𑀤𑀼𑀢𑀺𑀬𑀢𑀢𑀺𑀬𑀸𑀤𑀺𑀭𑀚𑁆𑀚𑀽𑀳𑀺 𑀩𑀦𑁆𑀥𑀦𑀁 𑀯𑀺𑀬. 𑀓𑀼𑀧𑁆𑀧𑀓𑀫𑁆𑀫𑁂𑀢𑀺 𑀅𑀓𑁆𑀔𑀭𑀧𑀭𑀺𑀳𑀻𑀦𑀸𑀤𑀺𑀯𑀲𑁂𑀦 𑀓𑀼𑀧𑁆𑀧𑁂 𑀅𑀝𑁆𑀞𑀸𑀦𑀸𑀭𑀳𑁂 𑀧𑀼𑀭𑁂𑀓𑀢𑀓𑀫𑁆𑀫𑁂. 𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑁂 𑀲𑀢𑀺 𑀢𑁂𑀲𑀁 𑀅𑀓𑁆𑀔𑀭𑀧𑀭𑀺𑀳𑀻𑀦𑀸𑀤𑀻𑀦𑀁 𑀲𑁄𑀥𑀺𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀓𑀼𑀧𑁆𑀧𑀓𑀫𑁆𑀫𑁂 𑀓𑀼𑀧𑁆𑀧𑀓𑀫𑁆𑀫𑁂𑀢𑀺 𑀯𑀸 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀧𑀼𑀭𑁂𑀢𑀭𑀁 𑀓𑀢𑀓𑀫𑁆𑀫𑀲𑁆𑀫𑀺𑀁 𑀅𑀓𑀼𑀧𑁆𑀧𑀓𑀫𑁆𑀫𑁂 𑀲𑀢𑀺 𑀧𑀘𑁆𑀙𑀸 𑀇𑀤𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀓𑀫𑁆𑀫𑀁 𑀤𑀴𑁆𑀳𑀺𑀓𑀫𑁆𑀫𑀁 𑀳𑁄𑀢𑀺, 𑀧𑀼𑀭𑁂𑀓𑀢𑀓𑀫𑁆𑀫𑀲𑁆𑀫𑀺𑀁 𑀓𑀼𑀧𑁆𑀧𑀓𑀫𑁆𑀫𑁂 𑀲𑀢𑀺 𑀇𑀤𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀓𑀫𑁆𑀫𑀁 𑀅𑀓𑀼𑀧𑁆𑀧𑀁 𑀞𑀸𑀦𑀸𑀭𑀳𑀁 𑀧𑀭𑀺𑀲𑀼𑀤𑁆𑀥𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀇𑀫𑀁 𑀧𑀸𑀞𑀁 𑀦𑀺𑀲𑁆𑀲𑀸𑀬 𑀆𑀘𑀭𑀺𑀬𑀯𑀭𑀸 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀢𑁂 𑀪𑀺𑀓𑁆𑀔𑀽 𑀮𑀚𑁆𑀚𑀻𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀽𑀢𑀸𑀦𑀁 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀻𑀢𑀺? 𑀦 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑀸 𑀮𑀤𑁆𑀥𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀅𑀜𑁆𑀜𑀁 𑀕𑀡𑁆𑀳𑀦𑁆𑀢𑀺, 𑀅𑀣 𑀔𑁄 𑀢𑀸𑀬 𑀏𑀯 𑀲𑀤𑁆𑀥𑀺𑀁 𑀤𑀺𑀕𑀼𑀡𑀢𑀺𑀕𑀼𑀡𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀅𑀲𑀤𑁆𑀤𑀳𑀦𑁆𑀢𑀸𑀬𑁂𑀯 𑀓𑀭𑁂𑀬𑁆𑀬𑀼𑀁, 𑀦𑁄 𑀲𑀤𑁆𑀤𑀳𑀦𑁆𑀢𑀸𑀢𑀺? 𑀦𑁄 𑀅𑀲𑀤𑁆𑀤𑀳𑀦𑁆𑀢𑀸, 𑀲𑀤𑁆𑀤𑀳𑀦𑁆𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀧𑀼𑀦𑀧𑁆𑀧𑀼𑀦𑀓𑀭𑀡𑁂 𑀬𑀼𑀢𑁆𑀢𑀺𑀢𑁄𑀧𑀺 𑀆𑀕𑀫𑀢𑁄𑀧𑀺 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀆𑀦𑀺𑀲𑀁𑀲𑀫𑁂𑀯 𑀧𑀲𑁆𑀲𑀦𑁆𑀢𑀸 𑀓𑀭𑁄𑀦𑁆𑀢𑀻𑀢𑀺.

𑀓𑀣𑀁 𑀬𑀼𑀢𑁆𑀢𑀺𑀢𑁄 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀺? 𑀬𑀣𑀸 𑀳𑀺 𑀮𑁄𑀓𑁂 𑀅𑀪𑀺𑀲𑀺𑀢𑁆𑀢𑀫𑁆𑀧𑀺 𑀭𑀸𑀚𑀸𑀦𑀁 𑀧𑀼𑀦𑀧𑁆𑀧𑀼𑀦𑀸𑀪𑀺𑀲𑀺𑀜𑁆𑀘𑀦𑁂 𑀆𑀤𑀻𑀦𑀯𑀁 𑀦 𑀧𑀲𑁆𑀲𑀦𑁆𑀢𑀺, 𑀅𑀣 𑀔𑁄 𑀅𑀪𑀺𑀲𑁂𑀓𑀸𑀦𑀼𑀪𑀸𑀯𑁂𑀦 𑀭𑀸𑀚𑀺𑀤𑁆𑀥𑀺𑀧𑁆𑀧𑀢𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀆𑀦𑀺𑀲𑀁𑀲𑀫𑁂𑀯 𑀧𑀲𑁆𑀲𑀦𑁆𑀢𑀺, 𑀬𑀣𑀸 𑀘 𑀲𑀸𑀲𑀦𑁂 𑀘𑁂𑀢𑀺𑀬𑀁 𑀯𑀸 𑀧𑀝𑀺𑀫𑀁 𑀯𑀸 𑀦𑀺𑀝𑁆𑀞𑀺𑀢𑀲𑀩𑁆𑀩𑀓𑀺𑀘𑁆𑀘𑀁 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺𑀆𑀤𑀻𑀳𑀺 𑀪𑀕𑀯𑀢𑁄 𑀯𑀘𑀦𑁂𑀳𑀺 𑀅𑀪𑀺𑀲𑁂𑀓𑀫𑀗𑁆𑀕𑀮𑀁 𑀓𑀭𑁄𑀦𑁆𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀓𑀭𑀡𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀅𑀢𑀺𑀭𑁂𑀓𑀢𑀭𑀁 𑀫𑀳𑀺𑀤𑁆𑀥𑀺𑀓𑀢𑀸𑀫𑀳𑀸𑀦𑀼𑀪𑀸𑀯𑀢𑀸𑀤𑀺𑀆𑀦𑀺𑀲𑀁𑀲𑀫𑁂𑀯 𑀧𑀲𑁆𑀲𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺𑀬𑁂𑀯, 𑀏𑀯𑀫𑁂𑀯 𑀓𑀢𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀪𑀺𑀓𑁆𑀔𑀼𑀁 𑀧𑀼𑀦𑀤𑁂𑀯 𑀓𑀫𑁆𑀫𑀯𑀸𑀘𑀸𑀪𑀡𑀦𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀫𑀺𑀁 𑀯𑀢𑁆𑀣𑀼𑀆𑀤𑀻𑀲𑀼 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀅𑀗𑁆𑀕𑁂 𑀅𑀧𑀭𑀺𑀧𑀼𑀡𑁆𑀡𑁂 𑀲𑀢𑀺 𑀓𑀫𑁆𑀫𑀓𑁄𑀧𑀲𑀫𑁆𑀪𑀯𑀢𑁄 𑀇𑀤𑀸𑀦𑀺 𑀓𑀢𑀓𑀫𑁆𑀫𑁂𑀦 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑁂 𑀲𑀢𑀺 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀜𑁆𑀘 𑀧𑀼𑀩𑁆𑀩𑁂𑀯 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑁂𑀧𑀺 𑀤𑀴𑁆𑀳𑀺𑀓𑀫𑁆𑀫𑀣𑀺𑀭𑀢𑀭𑀲𑀫𑁆𑀪𑀯𑀜𑁆𑀘 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀸 𑀓𑀭𑁄𑀦𑁆𑀢𑀺. 𑀓𑀣𑀁 𑀆𑀕𑀫𑀢𑁄 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀺? 𑀬𑀣𑀸𑀯𑀼𑀢𑁆𑀢𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀧𑀸𑀞𑀯𑀺𑀦𑀬𑀲𑀗𑁆𑀕𑀳𑀧𑀸𑀞𑁂𑀲𑀼 𑀤𑀼𑀭𑀼𑀢𑁆𑀢𑀧𑀤𑀲𑁆𑀲 𑀲𑁄𑀥𑀦𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀩𑁆𑀩𑀪𑀸𑀯𑀲𑁆𑀲 𑀉𑀧𑀮𑀓𑁆𑀔𑀡𑀦𑀬𑁂𑀦 𑀯𑀘𑀦𑀢𑁄. 𑀲𑁂𑀲𑀜𑀢𑁆𑀢𑀺𑀤𑁄𑀲𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑀸𑀦𑀜𑁆𑀘 𑀯𑀢𑁆𑀣𑀼𑀯𑀺𑀧𑀢𑁆𑀢𑀺𑀲𑀻𑀫𑀯𑀺𑀧𑀢𑁆𑀢𑀺𑀧𑀭𑀺𑀲𑀯𑀺𑀧𑀢𑁆𑀢𑀺𑀤𑁄𑀲𑀸𑀦𑀜𑁆𑀘 𑀲𑁄𑀥𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀅𑀬𑀫𑁆𑀧𑀺 𑀧𑀘𑁆𑀙𑀺𑀫𑀧𑀸𑀞𑁄 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀇𑀢𑀺 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀓𑁄𑀧𑀲𑀫𑁆𑀪𑀯𑁂𑀧𑀺 𑀇𑀤𑀸𑀦𑀺 𑀓𑀢𑀓𑀫𑁆𑀫𑁂𑀦 𑀲𑀫𑁆𑀧𑀚𑁆𑀚𑀦𑀲𑀗𑁆𑀔𑀸𑀢𑀁 𑀆𑀦𑀺𑀲𑀁𑀲𑀁 𑀆𑀕𑀫𑀢𑁄 𑀧𑀲𑁆𑀲𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 𑀆𑀘𑀭𑀺𑀬𑀸 𑀇𑀫𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀸𑀞𑀁 𑀢𑀲𑁆𑀫𑀺𑀁𑀬𑁂𑀯 𑀧𑀞𑀫𑀓𑀫𑁆𑀫𑀓𑀭𑀡𑀓𑀸𑀮𑁂 𑀤𑀼𑀭𑀼𑀢𑁆𑀢𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀘𑀺𑀭𑀓𑀸𑀮𑁂’’𑀢𑀺 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀯𑀘𑀦𑀁 𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁, 𑀦 𑀝𑀻𑀓𑀸𑀤𑀻𑀲𑀼 𑀯𑀺𑀦𑀺𑀘𑁆𑀙𑀺𑀢𑀁, 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀢𑀲𑁆𑀫𑀺𑀁 𑀔𑀡𑁂 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀢𑁄𑀧𑀺 𑀅𑀧𑀭𑀪𑀸𑀕𑁂 𑀯𑀘𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑁂 𑀜𑀢𑁆𑀢𑀺𑀤𑁄𑀲𑀅𑀦𑀼𑀲𑁆𑀲𑀸𑀯𑀦𑀤𑁄𑀲𑀸𑀦𑀺 𑀧𑀘𑁆𑀙𑀺𑀫𑀪𑀡𑀦𑁂 𑀲𑀼𑀝𑁆𑀞𑀼 𑀪𑀡𑀦𑁆𑀢𑁄 𑀲𑁄𑀥𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬, 𑀦 𑀯𑀢𑁆𑀣𑀼𑀯𑀺𑀧𑀢𑁆𑀢𑀺𑀲𑀻𑀫𑀯𑀺𑀧𑀢𑁆𑀢𑀺𑀧𑀭𑀺𑀲𑀯𑀺𑀧𑀢𑁆𑀢𑀺𑀤𑁄𑀲𑀸𑀦𑀺. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀢𑀫𑁂𑀯 𑀯𑀢𑁆𑀣𑀼, 𑀲𑀸 𑀏𑀯 𑀲𑀻𑀫𑀸, 𑀲𑀸 𑀏𑀯 𑀧𑀭𑀺𑀲𑀸, 𑀢𑀲𑁆𑀫𑀸 𑀢𑀸𑀦𑀺 𑀧𑀼𑀦𑀧𑁆𑀧𑀼𑀦𑀯𑀘𑀦𑁂𑀦 𑀲𑁄𑀥𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺 𑀳𑁄𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀓𑀭𑁄𑀦𑁆𑀢𑁄 𑀧𑀦 𑀧𑀼𑀩𑁆𑀩𑁂 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀪𑀸𑀯𑁂𑀦 𑀯𑀢𑁆𑀣𑀼𑀯𑀺𑀧𑀢𑁆𑀢𑀺𑀪𑀽𑀢𑁂𑀧𑀺 𑀇𑀤𑀸𑀦𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑁆𑀢𑀸 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀧𑀼𑀩𑁆𑀩𑁂 𑀲𑀻𑀫𑀲𑀗𑁆𑀓𑀭𑀸𑀤𑀺𑀪𑀸𑀯𑁂𑀦 𑀲𑀻𑀫𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑁂𑀧𑀺 𑀇𑀤𑀸𑀦𑀺 𑀢𑀤𑀪𑀸𑀯𑀢𑁆𑀣𑀸𑀬 𑀲𑀼𑀝𑁆𑀞𑀼 𑀲𑁄𑀥𑀺𑀢𑀢𑁆𑀢𑀸 𑀲𑀻𑀫𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀧𑀼𑀩𑁆𑀩𑁂 𑀯𑀕𑁆𑀕𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀭𑀺𑀲𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑁂𑀧𑀺 𑀇𑀤𑀸𑀦𑀺 𑀢𑀤𑀪𑀸𑀯𑀢𑁆𑀣𑀸𑀬 𑀲𑀼𑀝𑁆𑀞𑀼 𑀲𑁄𑀥𑀺𑀢𑀢𑁆𑀢𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀏𑀯𑀁 𑀧𑀜𑁆𑀘 𑀯𑀺𑀧𑀢𑁆𑀢𑀺𑀬𑁄 𑀲𑁄𑀥𑁂𑀢𑁆𑀯𑀸 𑀧𑀜𑁆𑀘 𑀲𑀫𑁆𑀧𑀢𑁆𑀢𑀺𑀬𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀧𑀞𑀫𑀓𑀸𑀮𑁂 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑀢𑁄𑀧𑀺 𑀅𑀧𑀭𑀪𑀸𑀕𑁂 𑀪𑀡𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 𑀏𑀯𑀁 𑀉𑀧𑀲𑀫𑁆𑀧𑀤𑀲𑀺𑀓𑁆𑀔𑀸𑀬 𑀤𑀳𑀭𑁄 𑀪𑀯𑁂𑀬𑁆𑀬𑀸𑀢𑀺? 𑀦 𑀪𑀯𑁂𑀬𑁆𑀬. 𑀓𑀲𑁆𑀫𑀸? 𑀧𑁄𑀭𑀸𑀡𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀺𑀢𑁆𑀯𑀸 𑀢𑀸𑀬 𑀏𑀯 𑀧𑀢𑀺𑀝𑁆𑀞𑀺𑀢𑀢𑁆𑀢𑀸𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑁂𑀓𑀢𑀓𑀫𑁆𑀫𑀲𑁆𑀲 𑀲𑀫𑁆𑀧𑀚𑁆𑀚𑀦𑀪𑀸𑀯𑁂𑀦 𑀢𑀺𑀝𑁆𑀞𑀦𑁆𑀢𑁂 𑀲𑀢𑀺 𑀢𑀸𑀬 𑀞𑀺𑀢𑀢𑁆𑀢𑀸 𑀅𑀤𑀳𑀭𑁄 𑀲𑀺𑀬𑀸. 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀅𑀲𑀫𑁆𑀧𑀚𑁆𑀚𑀦𑀪𑀸𑀯𑁂𑀦 𑀇𑀤𑀸𑀦𑀺 𑀓𑀢𑀓𑀫𑁆𑀫𑁂𑀬𑁂𑀯 𑀉𑀧𑀲𑀫𑁆𑀧𑀤𑀪𑀸𑀯𑁂𑀦 𑀢𑀺𑀝𑁆𑀞𑀦𑁆𑀢𑁂 𑀲𑀢𑀺 𑀓𑀲𑁆𑀫𑀸 𑀤𑀳𑀭𑁄 𑀦 𑀪𑀯𑁂𑀬𑁆𑀬𑀸𑀢𑀺? 𑀏𑀯𑀁 𑀲𑀦𑁆𑀢𑁂 𑀤𑀳𑀭𑁄 𑀪𑀯𑁂𑀬𑁆𑀬. 𑀏𑀯𑀁 𑀤𑀳𑀭𑁄 𑀲𑀫𑀸𑀦𑁄 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀯𑀲𑁆𑀲𑀁 𑀕𑀡𑁂𑀢𑁆𑀯𑀸 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀸𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄 𑀪𑀯𑁂𑀬𑁆𑀬𑀸𑀢𑀺? 𑀏𑀯𑀁 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀅𑀝𑁆𑀞𑀺𑀢𑀪𑀸𑀯𑀁 𑀧𑀘𑁆𑀙𑀺𑀫𑀲𑀺𑀓𑁆𑀔𑀸𑀬 𑀏𑀯 𑀮𑀤𑁆𑀥𑀼𑀧𑀲𑀫𑁆𑀧𑀤𑀪𑀸𑀯𑀁 𑀢𑀣𑀢𑁄 𑀚𑀸𑀦𑀦𑁆𑀢𑁄 𑀏𑀯𑀁 𑀓𑀭𑁄𑀦𑁆𑀢𑁄 𑀲𑀸𑀯𑀚𑁆𑀚𑁄 𑀳𑁄𑀢𑀺, 𑀏𑀯𑀁 𑀧𑀦 𑀅𑀚𑀸𑀦𑀦𑁆𑀢𑁄 ‘‘𑀧𑀼𑀭𑀺𑀫𑀲𑀺𑀓𑁆𑀔𑀸𑀬𑀫𑁂𑀯 𑀞𑀺𑀢𑁄’’𑀢𑀺 𑀫𑀜𑁆𑀜𑀺𑀢𑁆𑀯𑀸 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀦𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀦𑀸𑀧𑀢𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀧𑀼𑀕𑁆𑀕𑀮𑁄 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀁 𑀘𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁄 𑀧𑀽𑀭𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑁄𑀧𑀺 𑀘 𑀬𑀸𑀯 𑀦 𑀚𑀸𑀦𑀸𑀢𑀺, 𑀢𑀸𑀯𑀲𑁆𑀲 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑁄, 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑁄. 𑀜𑀢𑁆𑀯𑀸 𑀧𑀦 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁪𑁦𑁬) 𑀆𑀕𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑁆𑀢𑀸 𑀓𑀫𑁆𑀫𑀓𑁄𑀧𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑀚𑁆𑀛𑀸𑀬𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑀪𑀽𑀢𑀪𑀸𑀯𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀇𑀫𑀺𑀦𑀸 𑀦𑀬𑁂𑀦 𑀲𑀻𑀫𑀯𑀺𑀧𑀦𑁆𑀦𑀧𑀅𑀲𑀯𑀺𑀧𑀦𑁆𑀦𑀜𑀢𑁆𑀢𑀺𑀯𑀺𑀧𑀦𑁆𑀦𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀦𑁆𑀦𑀪𑀽𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑀢𑁄 𑀧𑀼𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀽𑀢𑀁 𑀧𑀼𑀕𑁆𑀕𑀮𑀫𑁆𑀧𑀺 𑀅𑀧𑀭𑀪𑀸𑀕𑁂 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀺𑀓𑀸𑀮𑁂𑀧𑀺 𑀧𑀜𑁆𑀘 𑀯𑀺𑀧𑀢𑁆𑀢𑀺𑀤𑁄𑀲𑀸𑀦𑀺 𑀲𑁄𑀥𑁂𑀢𑁆𑀯𑀸 𑀧𑀼𑀦 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀓𑀭𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁄𑀧𑀺 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑀓𑀫𑁆𑀫𑀓𑀸𑀮𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀧𑀺 𑀅𑀧𑀭𑀓𑀫𑁆𑀫𑀓𑀸𑀮𑁂 𑀉𑀧𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀓𑀘𑁆𑀘𑁂 𑀧𑀦 𑀪𑀺𑀓𑁆𑀔𑀽 𑀧𑁄𑀭𑀸𑀡𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀦𑀯𑀲𑀺𑀓𑁆𑀔𑀫𑁂𑀯 𑀕𑀡𑁆𑀳𑀺𑀁𑀲𑀼, 𑀢𑁂 𑀧𑀦 𑀪𑀺𑀓𑁆𑀔𑀽 𑀦𑀯𑀲𑀺𑀓𑁆𑀔𑀸𑀯𑀲𑁂𑀦 𑀤𑀳𑀭𑀸𑀯 𑀪𑀯𑀦𑁆𑀢𑀺, 𑀏𑀯𑀁 𑀓𑀭𑀡𑀜𑁆𑀘 𑀅𑀢𑀺𑀯𑀺𑀬 𑀕𑀼𑀡𑀯𑀺𑀲𑀺𑀝𑁆𑀞𑀁 𑀅𑀢𑁆𑀢𑀦𑁄 𑀦𑀯𑀓𑀢𑀭𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀧𑀬𑀺𑀭𑀼𑀧𑀸𑀲𑀺𑀢𑀼𑀓𑀸𑀫𑁄 𑀢𑀁 𑀧𑀼𑀕𑁆𑀕𑀮𑀁 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑀁 𑀓𑀸𑀢𑀼𑀓𑀸𑀫𑁄 𑀅𑀢𑁆𑀢𑀸𑀦𑀁 𑀤𑀳𑀭𑀁 𑀓𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀥𑀫𑁆𑀫𑀕𑀸𑀭𑀯𑁂𑀦 𑀓𑀭𑁄𑀦𑁆𑀢𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀅𑀣 𑀧𑀦 𑀲𑀺𑀓𑁆𑀔𑀸𑀲𑀫𑁆𑀧𑀦𑁆𑀦𑀁 𑀓𑀢𑁆𑀢𑀼𑀓𑀸𑀫𑁄 𑀏𑀯𑀁 𑀓𑀭𑁂𑀬𑁆𑀬, 𑀲𑀺𑀓𑁆𑀔𑀸 𑀦𑀸𑀫 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀲𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑁂𑀯 𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑀤𑀺 𑀧𑀼𑀭𑀺𑀫𑀲𑀺𑀓𑁆𑀔𑀸 𑀅𑀝𑁆𑀞𑀺𑀢𑀸 𑀪𑀯𑁂𑀬𑁆𑀬, 𑀧𑀘𑁆𑀘𑀓𑁆𑀔𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀬𑀫𑁂𑀯 𑀧𑀢𑀺𑀢𑀸 𑀳𑁄𑀢𑀺. 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀞𑀺𑀢𑀸𑀬 𑀲𑀢𑀺 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑁄𑀬𑁂𑀯 𑀧𑀘𑁆𑀘𑀓𑁆𑀔𑀸𑀦𑀁 𑀓𑀭𑁂𑀬𑁆𑀬, 𑀦 𑀪𑀺𑀓𑁆𑀔𑀼𑀪𑀯𑀺𑀢𑀼𑀓𑀸𑀫𑁄, 𑀲𑁄 𑀧𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁂𑀯 𑀧𑀭𑀺𑀲𑀼𑀤𑁆𑀥𑀁 𑀓𑀭𑁂𑀬𑁆𑀬, 𑀢𑀲𑁆𑀫𑀸 𑀧𑁄𑀭𑀸𑀡𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀦𑀁 𑀅𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀢𑀢𑁄 𑀧𑁄𑀭𑀸𑀡𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀦𑀯𑀲𑀺𑀓𑁆𑀔𑀸𑀕𑀳𑀡𑀢𑁄 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁𑀬𑁂𑀯 𑀬𑀼𑀢𑁆𑀢𑀢𑀭𑀁 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀧𑁄𑀭𑀸𑀡𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀦𑀯𑀲𑀺𑀓𑁆𑀔𑀸𑀕𑀳𑀡𑁂 𑀧𑀼𑀭𑀺𑀫𑀓𑀫𑁆𑀫𑀁 𑀅𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀺𑀫𑀓𑀫𑁆𑀫𑀲𑀫𑁆𑀧𑀚𑁆𑀚𑀦𑁂 𑀲𑀢𑀺 𑀓𑀺𑀜𑁆𑀘𑀸𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸 𑀦𑀢𑁆𑀣𑀺, 𑀬𑀸 𑀧𑀘𑁆𑀘𑀓𑁆𑀔𑀸𑀢𑀩𑁆𑀩𑀸, 𑀢𑀣𑀸𑀧𑀺 𑀦𑀯𑀲𑀺𑀓𑁆𑀔𑀸𑀬 𑀲𑀫𑁆𑀧𑀚𑁆𑀚𑀺𑀢𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀺, 𑀤𑀳𑀭𑀪𑀸𑀯𑀁 𑀧𑀢𑁆𑀢𑁄𑀧𑀺 𑀬𑀼𑀢𑁆𑀢𑀭𑀽𑀧𑁄𑀬𑁂𑀯.

𑀬𑀤𑀺 𑀧𑀼𑀭𑀺𑀫𑀓𑀫𑁆𑀫𑀫𑁆𑀧𑀺 𑀧𑀘𑁆𑀙𑀺𑀫𑀓𑀫𑁆𑀫𑀫𑁆𑀧𑀺 𑀲𑀫𑁆𑀧𑀚𑁆𑀚𑀢𑀺𑀬𑁂𑀯, 𑀏𑀯𑀁 𑀲𑀢𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀧𑀘𑁆𑀘𑀓𑁆𑀔𑀸𑀦𑀁 𑀦𑀺𑀭𑀢𑁆𑀣𑀓𑀁. 𑀧𑀘𑁆𑀙𑀺𑀫𑀲𑀺𑀓𑁆𑀔𑀸𑀬 𑀞𑀺𑀢𑁄𑀧𑀺 𑀤𑀳𑀭𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀅𑀬𑀼𑀢𑁆𑀢𑀭𑀽𑀧𑁄. 𑀬𑀤𑀺 𑀧𑀦 𑀧𑀼𑀭𑀺𑀫𑀓𑀫𑁆𑀫𑀫𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀦 𑀧𑀘𑁆𑀙𑀺𑀫𑀓𑀫𑁆𑀫𑀁, 𑀏𑀯𑀁 𑀲𑀢𑀺 𑀧𑀼𑀩𑁆𑀩𑁂 𑀞𑀺𑀢𑀧𑁄𑀭𑀸𑀡𑀲𑀺𑀓𑁆𑀔𑀸𑀧𑀺 𑀧𑀘𑁆𑀘𑀓𑁆𑀔𑀸𑀦𑁂𑀦 𑀧𑀢𑀺𑀢𑀸. 𑀧𑀘𑁆𑀙𑀺𑀫𑀲𑀺𑀓𑁆𑀔𑀸𑀧𑀺 𑀧𑀘𑁆𑀙𑀺𑀫𑀓𑀫𑁆𑀫𑀲𑁆𑀲 𑀧𑀜𑁆𑀘𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑁂𑀦 𑀬𑁄𑀕𑀢𑁄 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀘 𑀧𑀢𑀺𑀢𑀢𑁆𑀢𑀸 𑀧𑀘𑁆𑀙𑀺𑀫𑀲𑀺𑀓𑁆𑀔𑀸𑀬 𑀘 𑀅𑀮𑀤𑁆𑀥𑀢𑁆𑀢𑀸 𑀉𑀪𑀢𑁄 𑀪𑀝𑁆𑀞𑀢𑁆𑀢𑀸 𑀅𑀬𑀼𑀢𑁆𑀢𑁄𑀯 𑀳𑁄𑀢𑀺. 𑀧𑁄𑀭𑀸𑀡𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀦𑀯𑀲𑀺𑀓𑁆𑀔𑀸𑀕𑀳𑀡𑁂 𑀧𑀦 𑀲𑀢𑀺 𑀧𑀼𑀭𑀺𑀫𑀓𑀫𑁆𑀫𑀁 𑀲𑀫𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀧𑀘𑁆𑀙𑀺𑀫𑀓𑀫𑁆𑀫𑀁 𑀅𑀲𑀫𑁆𑀧𑀦𑁆𑀦𑀁 𑀳𑁄𑀦𑁆𑀢𑀫𑁆𑀧𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀺𑀢𑁄𑀬𑁂𑀯, 𑀧𑀼𑀭𑀺𑀫𑀁 𑀅𑀲𑀫𑁆𑀧𑀦𑁆𑀦𑀁 𑀳𑀼𑀢𑁆𑀯𑀸 𑀧𑀘𑁆𑀙𑀺𑀫𑀁 𑀲𑀫𑁆𑀧𑀦𑁆𑀦𑀫𑁆𑀧𑀺 𑀧𑀘𑁆𑀙𑀺𑀫𑀲𑀺𑀓𑁆𑀔𑀸𑀬 𑀞𑀺𑀢𑁄 𑀏𑀯. 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀫𑁆𑀫𑀤𑁆𑀯𑀬𑀫𑁆𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀫𑁆𑀧𑀺 𑀤𑀴𑁆𑀳𑀺𑀓𑀫𑁆𑀫𑀣𑀺𑀭𑀢𑀭𑀪𑀽𑀢𑀸𑀬 𑀧𑀼𑀭𑀺𑀫𑀲𑀺𑀓𑁆𑀔𑀸𑀬 𑀞𑀺𑀢𑁄𑀬𑁂𑀯 𑀲𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀦𑀯𑀲𑀺𑀓𑁆𑀔𑀸𑀕𑀳𑀡𑀢𑁄 𑀧𑀼𑀭𑀺𑀫𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀯𑀲𑀺𑀓𑁆𑀔𑀸𑀕𑀳𑀡𑀁 𑀬𑀼𑀢𑁆𑀢𑀢𑀭𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀁 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀸𑀤𑀁 𑀅𑀫𑀦𑀲𑀺𑀓𑀭𑁄𑀦𑁆𑀢𑀸 𑀅𑀜𑁆𑀜𑁂 𑀆𑀘𑀭𑀺𑀬𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀅𑀦𑀺𑀘𑁆𑀙𑀺𑀢𑀓𑀣𑀁 𑀓𑀣𑁂𑀦𑁆𑀢𑀺. 𑀓𑀣𑀁? 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀺𑀁 𑀇𑀫𑁂 𑀪𑀺𑀓𑁆𑀔𑀽 𑀏𑀯𑀁 𑀓𑀭𑁄𑀦𑁆𑀢𑀸 𑀧𑀸𑀭𑀸𑀚𑀺𑀓𑀧𑁆𑀧𑀢𑁆𑀢𑀁 𑀪𑀺𑀓𑁆𑀔𑀼𑀁 𑀧𑀼𑀦 𑀲𑀺𑀓𑁆𑀔𑀸𑀬 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀸𑀢𑀺 𑀫𑀜𑁆𑀜𑀦𑁆𑀢𑀻’’𑀢𑀺. 𑀢𑁂 𑀣𑁂𑀭𑀸 𑀧𑀼𑀦𑀧𑁆𑀧𑀼𑀦𑀁 𑀓𑀫𑁆𑀫𑀯𑀸𑀘𑀁 𑀪𑀡𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀯𑀁 𑀓𑀭𑁄𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀏𑀓𑀘𑁆𑀘𑁂 𑀧𑀦 𑀣𑁂𑀭𑀸 ‘‘𑀓𑀲𑁆𑀫𑀸 𑀇𑀫𑁂 𑀪𑀺𑀓𑁆𑀔𑀽 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺, 𑀬𑀣𑀸 𑀦𑀸𑀫 𑀅𑀲𑀦𑀺 𑀏𑀓𑀯𑀸𑀭𑀫𑁂𑀯 𑀧𑀢𑀦𑁆𑀢𑀻 𑀲𑀢𑁆𑀢𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀢𑀺, 𑀏𑀯𑀫𑁂𑀯 𑀪𑀕𑀯𑀢𑁄 𑀆𑀡𑀸𑀪𑀽𑀢𑀸 𑀓𑀫𑁆𑀫𑀯𑀸𑀘𑀸 𑀏𑀓𑀯𑀸𑀭𑀁 𑀪𑀡𑀫𑀸𑀦𑀸 𑀓𑀫𑁆𑀫𑀁 𑀲𑀺𑀚𑁆𑀛𑀸𑀧𑁂𑀢𑀺, 𑀦 𑀅𑀦𑁂𑀓𑀯𑀸𑀭’’𑀦𑁆𑀢𑀺, 𑀢𑁂𑀧𑀺 ‘‘𑀓𑀫𑁆𑀫𑀲𑀺𑀚𑁆𑀛𑀦𑀢𑁆𑀣𑀸𑀬 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀩𑀳𑀯𑁄 𑀧𑀦 𑀪𑀺𑀓𑁆𑀔𑀽 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀇𑀫𑁂 𑀪𑀺𑀓𑁆𑀔𑀽 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀤𑀺𑀦𑁆𑀦𑀲𑀺𑀓𑁆𑀔𑀁 𑀅𑀲𑀤𑁆𑀤𑀳𑀦𑁆𑀢𑀸 𑀏𑀯𑀁 𑀓𑀭𑁄𑀦𑁆𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀕𑀼𑀡𑀸𑀧𑀭𑀸𑀥𑀓𑀸 𑀏𑀢𑁂 𑀲𑀫𑀡𑀸’’𑀢𑀺. 𑀢𑁂 ‘‘𑀧𑀼𑀩𑁆𑀩𑀲𑀺𑀓𑁆𑀔𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑀅𑀧𑀭𑁂 𑀧𑀦 𑀣𑁂𑀭𑀸 ‘‘𑀧𑀞𑀫𑀁 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀪𑀡𑀦𑀓𑀸𑀮𑁂𑀬𑁂𑀯 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀩𑁆𑀩𑀁, 𑀦 𑀅𑀧𑀭𑀪𑀸𑀕𑁂’’𑀢𑀺, 𑀢𑀢𑁆𑀣 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂, 𑀅𑀣 𑀘 𑀧𑀦𑀺𑀫𑁂 𑀪𑀺𑀓𑁆𑀔𑀽 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀪𑀽𑀢𑀸𑀬 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀬 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀺, 𑀏𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀻’’𑀢𑀺, 𑀢𑀁 𑀦𑀻𑀢𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 𑀯𑀤𑀺𑀁𑀲𑀼. 𑀦𑁂𑀬𑁆𑀬𑀢𑁆𑀣𑀢𑁄 𑀧𑀦 𑀇𑀫𑀺𑀦𑀸 𑀦𑀬𑁂𑀦 𑀘𑀢𑀽𑀲𑀼𑀧𑀺 𑀓𑀫𑁆𑀫𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀲𑀗𑁆𑀓𑀭𑀫𑁂𑀯 𑀳𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀯𑀺𑀲𑁂𑀲𑀢𑁄 𑀯𑀤𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀩𑁆𑀩𑀪𑀸𑀯𑁄 𑀧𑀦 𑀲𑀩𑁆𑀩𑁂𑀲𑀽𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯 𑀳𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀧𑀼𑀩𑁆𑀩𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀘𑁆𑀙𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺.

𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀸𑀤𑀻𑀲𑀼𑀧𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀧𑀝𑀺𑀁𑀜𑁆𑀜𑀸𑀬 𑀓𑀭𑀡𑀻𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀧𑀝𑀺𑀧𑀼𑀘𑁆𑀙𑀸𑀬 𑀓𑀭𑀡𑀻𑀬𑀁 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀓𑀭𑁄𑀢𑀺. 𑀧𑀝𑀺𑀜𑁆𑀜𑀸𑀬 𑀓𑀭𑀡𑀻𑀬𑀁 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀻𑀢𑀺 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀤𑀺𑀦𑁆𑀦𑀸𑀬 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀁 𑀅𑀧𑀝𑀺𑀜𑁆𑀜𑀸𑀬 𑀧𑀝𑀺𑀜𑁆𑀜𑀁 𑀅𑀓𑀭𑁄𑀦𑁆𑀢𑀲𑁆𑀲 𑀯𑀺𑀮𑀧𑀦𑁆𑀢𑀲𑁆𑀲 𑀩𑀮𑀓𑁆𑀓𑀸𑀭𑁂𑀦 𑀓𑀭𑁄𑀢𑀺. 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲𑀸𑀢𑀺 𑀤𑀩𑁆𑀩𑀫𑀮𑁆𑀮𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀲𑁆𑀲. 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲𑀸𑀢𑀺 𑀕𑀕𑁆𑀕𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀉𑀧𑀯𑀸𑀴𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀉𑀲𑁆𑀲𑀦𑁆𑀦𑀧𑀸𑀧𑀲𑁆𑀲. 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀧𑀡𑁆𑀟𑀓𑀮𑁄𑀳𑀺𑀢𑀓𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀪𑀡𑁆𑀟𑀦𑀓𑀸𑀭𑀓𑀲𑁆𑀲. 𑀦𑀺𑀬𑀲𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀲𑁂𑀬𑁆𑀬𑀲𑀓𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀲𑁆𑀲. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀓𑀼𑀮𑀤𑀽𑀲𑀓𑀲𑁆𑀲. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀲𑀼𑀥𑀫𑁆𑀫𑀪𑀺𑀓𑁆𑀔𑀼𑀲𑀅𑀲𑀲𑁆𑀲 𑀉𑀧𑀸𑀲𑀓𑁂 𑀚𑀸𑀢𑀺𑀆𑀤𑀻𑀳𑀺 𑀤𑀽𑀲𑁂𑀦𑁆𑀢𑀲𑁆𑀲. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀙𑀦𑁆𑀦𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀆𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀁 𑀅𑀤𑁂𑀲𑁂𑀦𑁆𑀢𑀲𑁆𑀲 𑀅𑀭𑀺𑀝𑁆𑀞𑀪𑀺𑀓𑁆𑀔𑀼𑀲𑀤𑀺𑀲𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲. 𑀧𑀭𑀺𑀯𑀸𑀲𑀸𑀭𑀳𑀲𑁆𑀲𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑀲𑁆𑀲. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲𑀸𑀢𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲. 𑀫𑀸𑀦𑀢𑁆𑀢𑀸𑀭𑀳𑀦𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑀁. 𑀅𑀩𑁆𑀪𑀸𑀦𑀸𑀭𑀳𑀦𑁆𑀢𑀺 𑀘𑀺𑀡𑁆𑀡𑀫𑀸𑀦𑀢𑁆𑀢𑀁 𑀪𑀺𑀓𑁆𑀔𑀼𑀁. 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀓𑀭𑁄𑀢𑀺.

𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀻𑀢𑀺 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀉𑀧𑁄𑀲𑀣𑀁 𑀓𑀭𑁄𑀢𑀺. 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲𑀁 𑀅𑀯𑀲𑁂𑀲𑁂𑀲𑀼 𑀏𑀓𑀸𑀤𑀲𑀲𑀼 𑀫𑀸𑀲𑁂𑀲𑀼 𑀪𑀺𑀦𑁆𑀦𑀲𑁆𑀲 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀺𑀯𑀲𑁄 𑀘 𑀬𑀣𑀸𑀯𑀼𑀢𑁆𑀢𑀸 𑀘𑀸𑀢𑀼𑀤𑁆𑀤𑀲𑀧𑀦𑁆𑀦𑀭𑀲𑀸 𑀘, 𑀏𑀢𑀁 𑀢𑀺𑀧𑁆𑀧𑀓𑀸𑀭𑀫𑁆𑀧𑀺 𑀉𑀧𑁄𑀲𑀣𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀺 𑀦𑀸𑀫. 𑀬𑀢𑁆𑀭 𑀳𑀺 𑀧𑀢𑁆𑀢𑀘𑀻𑀯𑀭𑀸𑀤𑀺𑀅𑀢𑁆𑀣𑀸𑀬 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀯𑀺𑀯𑀤𑀦𑁆𑀢𑀸 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀫𑀕𑁆𑀕𑀸 𑀚𑀸𑀢𑀫𑁆𑀳𑀸’’𑀢𑀺 𑀅𑀦𑁆𑀢𑀭𑀸 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺, 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀢𑁄 𑀦𑀸𑀫 𑀳𑁄𑀢𑀺.

𑀅𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀻𑀢𑀺 𑀅𑀧𑁆𑀧𑀯𑀸𑀭𑀡𑀤𑀺𑀯𑀲𑁂 𑀧𑀯𑀸𑀭𑁂𑀢𑀺. 𑀧𑀯𑀸𑀭𑀡𑀤𑀺𑀯𑀲𑁄 𑀦𑀸𑀫 𑀏𑀓𑀲𑁆𑀫𑀺𑀁 𑀓𑀢𑁆𑀢𑀺𑀓𑀫𑀸𑀲𑁂 𑀪𑀺𑀦𑁆𑀦𑀲𑁆𑀲 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀺𑀯𑀲𑁄 𑀘 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄 𑀘 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄, 𑀏𑀢𑀁 𑀘𑀢𑀼𑀩𑁆𑀩𑀺𑀥𑀁 𑀧𑀯𑀸𑀭𑀡𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀧𑀯𑀸𑀭𑁂𑀦𑁆𑀢𑁄 𑀅𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀺 𑀦𑀸𑀫. 𑀇𑀥𑀸𑀧𑀺 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀯𑀺𑀯𑀸𑀤𑀲𑁆𑀲 𑀯𑀽𑀧𑀲𑀫𑁂 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺. 𑀓𑀭𑁄𑀦𑁆𑀢𑁂𑀳𑀺 𑀅𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀓𑀢𑀸 𑀳𑁄𑀢𑀻𑀢𑀺 𑀅𑀬𑀁 𑀅𑀝𑁆𑀞𑀓𑀣𑀸𑀧𑀸𑀞𑁄 (𑀧𑀭𑀺. 𑀅𑀝𑁆𑀞. 𑁪𑁮𑁩).

‘‘𑀉𑀫𑁆𑀫𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺 𑀉𑀫𑁆𑀫𑀢𑁆𑀢𑀓𑁂𑀦 𑀬𑀸𑀘𑀺𑀢𑁆𑀯𑀸 𑀓𑀢𑁂 𑀅𑀲𑀫𑁆𑀫𑀼𑀔𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀧𑀺 𑀦 𑀓𑀼𑀧𑁆𑀧𑀢𑀺 𑀦𑀺𑀬𑀫𑀸𑀪𑀸𑀯𑀢𑁄. 𑀅𑀲𑀫𑁆𑀫𑀼𑀔𑀸 𑀓𑀢𑁂 𑀧𑀦 𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀅𑀲𑀫𑁆𑀫𑀼𑀔𑀸 𑀓𑀢𑀁 𑀲𑀼𑀓𑀢𑀁 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁. 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀧𑀦 𑀲𑀫𑁆𑀫𑀼𑀔𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀓𑀫𑁆𑀫𑀯𑀸𑀘𑀸𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄. 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀸𑀤𑀬𑁄 𑀳𑀢𑁆𑀣𑀧𑀸𑀲𑀢𑁄 𑀅𑀧𑀦𑀻𑀢𑀫𑀢𑁆𑀢𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀢𑀺𑀆𑀤𑀻𑀲𑀼 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀢𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀅𑀬𑀁 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀅𑀬𑀁 𑀥𑀫𑁆𑀫𑀲𑀫𑁆𑀫𑀼𑀔𑀢𑀸 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀁 𑀦𑀸𑀫 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀸𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀯𑀸𑀭𑀡𑀫𑀸𑀲𑀢𑁆𑀢𑀸 ‘𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄 𑀘𑀸𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀺𑀁 𑀧𑀦𑁆𑀦𑀭𑀲𑀺𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀼𑀡𑁆𑀡𑀫𑀸𑀲𑀺𑀬𑁄𑀢𑀺 𑀧𑀞𑀫𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁪𑁮𑁩) 𑀆𑀕𑀢𑀁.

‘‘𑀞𑀧𑀺𑀢𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀓𑀢𑁆𑀢𑀺𑀓𑀫𑀸𑀲𑁂 𑀲𑀸𑀫𑀕𑁆𑀕𑀺𑀬𑀸 𑀓𑀢𑀸𑀬 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲’𑀦𑁆𑀢𑀺. 𑀲𑀘𑁂 𑀧𑀦 𑀢𑁂𑀲𑀁 𑀦𑀸𑀦𑀸𑀲𑀻𑀫𑀸𑀲𑀼 𑀫𑀳𑀸𑀧𑀯𑀸𑀭𑀡𑀸𑀬 𑀯𑀺𑀲𑀼𑀁 𑀧𑀯𑀸𑀭𑀺𑀢𑀸𑀦𑀁 𑀓𑀢𑁆𑀢𑀺𑀓𑀫𑀸𑀲𑀩𑁆𑀪𑀦𑁆𑀢𑀭𑁂 𑀲𑀸𑀫𑀕𑁆𑀕𑀻 𑀳𑁄𑀢𑀺, 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀏𑀯 𑀢𑁂𑀳𑀺 𑀓𑀸𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀏𑀓𑀲𑁆𑀫𑀺𑀁 𑀯𑀲𑁆𑀲𑁂 𑀓𑀢𑀧𑀯𑀸𑀭𑀡𑀸𑀦𑀁 𑀧𑀼𑀦 𑀧𑀯𑀸𑀭𑀡𑀸𑀬 𑀅𑀯𑀺𑀳𑀺𑀢𑀢𑁆𑀢𑀸. 𑀲𑀸𑀫𑀕𑁆𑀕𑀻𑀤𑀺𑀯𑀲𑁄 𑀳𑁄𑀢𑀻𑀢𑀺 𑀅𑀦𑀼𑀧𑁄𑀲𑀣𑀤𑀺𑀯𑀲𑁂 𑀲𑀸𑀫𑀕𑁆𑀕𑀻𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀦𑁆𑀦𑀭𑀲𑀺𑀬𑀁 𑀯𑀸 𑀲𑀗𑁆𑀖𑁄 𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀢𑀤𑀸 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑀤𑀺𑀯𑀲𑁄 𑀦 𑀳𑁄𑀢𑀺, 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀉𑀧𑁄𑀲𑀣𑁄𑀯 𑀳𑁄𑀢𑀺. 𑀉𑀧𑀭𑀺 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑁄 𑀘𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀉𑀧𑀤𑁆𑀤𑀼𑀢𑀸 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀯𑀸𑀭𑀡𑀲𑀗𑁆𑀕𑀳𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑁄 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁄 𑀘. 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄𑀢𑀺 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀘𑀸𑀢𑀺 𑀤𑁆𑀯𑁂 𑀧𑀼𑀡𑁆𑀡𑀫𑀸𑀲𑀺𑀬𑁄. 𑀏𑀢𑀁 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀧𑀼𑀡𑁆𑀡𑀫𑀸𑀲𑀺𑀤𑁆𑀯𑀬𑁂𑀦 𑀲𑀤𑁆𑀥𑀺𑀁 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀁 𑀘𑀸𑀢𑀼𑀤𑁆𑀤𑀲𑀻𑀧𑀯𑀸𑀭𑀡𑀜𑁆𑀘 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸, 𑀇𑀤𑀜𑁆𑀘 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀧𑀦 𑀲𑀢𑀺 𑀉𑀪𑀺𑀦𑁆𑀦𑀁 𑀧𑀼𑀡𑁆𑀡𑀫𑀸𑀲𑀻𑀦𑀁 𑀧𑀼𑀭𑀺𑀫𑀸 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀬𑁄, 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀬𑀸 𑀅𑀦𑀦𑁆𑀢𑀭𑀸 𑀧𑀦𑁆𑀦𑀭𑀲𑀻𑀧𑀻𑀢𑀺 𑀇𑀫𑁂𑀧𑀺 𑀢𑀬𑁄 𑀤𑀺𑀯𑀲𑀸 𑀧𑀯𑀸𑀭𑀡𑀸𑀤𑀺𑀯𑀲𑀸 𑀏𑀯𑀸𑀢𑀺 𑀇𑀫𑀁 𑀲𑀢𑁆𑀢𑀯𑀺𑀥𑀫𑁆𑀧𑀺 𑀧𑀯𑀸𑀭𑀡𑀸𑀤𑀺𑀯𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀧𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀭𑀺𑀯𑀸𑀭 𑁨.𑁪𑁮𑁩) 𑀆𑀕𑀢𑀁.

𑀏𑀯𑀁 𑀯𑀢𑁆𑀣𑀼𑀯𑀺𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀜𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀁 𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀜𑀢𑁆𑀢𑀺𑀢𑁄 𑀯𑀺𑀧𑀢𑁆𑀢𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀫𑀜𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑀁 ‘‘𑀧𑀘𑁆𑀙𑀸 𑀯𑀸 𑀜𑀢𑁆𑀢𑀺𑀁 𑀞𑀧𑁂𑀢𑀻’’𑀢𑀺 𑀏𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀁 𑀅𑀦𑀼𑀲𑁆𑀲𑀸𑀯𑀦𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀧𑀞𑀫𑀁 𑀅𑀦𑀼𑀲𑁆𑀲𑀸𑀯𑀦𑀁 𑀲𑀸𑀯𑁂𑀢𑁆𑀯𑀸 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀅𑀦𑀼𑀲𑁆𑀲𑀸𑀯𑀦𑀸𑀦𑀦𑁆𑀢𑀭𑀫𑁂𑀯 𑀲𑀓𑀮𑀁 𑀜𑀢𑁆𑀢𑀺𑀁 𑀯𑀢𑁆𑀯𑀸, 𑀧𑀭𑀺𑀬𑁄𑀲𑀸𑀦𑁂 ‘‘𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁫𑁨. 𑀘𑀢𑀼𑀢𑁆𑀣𑀅𑀦𑀼𑀲𑁆𑀲𑀸𑀯𑀦𑀯𑀺𑀧𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬𑀁 ‘‘𑀬𑁆𑀯𑀸𑀬𑀦𑁆𑀢𑀺 𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀢𑁆𑀣 𑀤𑀲𑀥𑀸 𑀤𑀲𑀯𑀺𑀥𑁂𑀦 𑀩𑁆𑀬𑀜𑁆𑀚𑀦𑀸𑀦𑀁 𑀧𑀪𑁂𑀤𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑁂𑀦𑀸𑀬𑀁 𑀧𑀪𑁂𑀤𑁄𑀢𑀺 𑀆𑀳 ‘𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸’𑀢𑀺. 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑀸𑀦𑀁 𑀅𑀓𑁆𑀔𑀭𑀸𑀦𑀁 𑀚𑀦𑀺𑀓𑀸 𑀩𑀼𑀤𑁆𑀥𑀺 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺, 𑀢𑀸𑀬 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸, 𑀅𑀓𑁆𑀔𑀭𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀪𑁂𑀤𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀁 𑀯𑀸 𑀲𑀁𑀬𑁄𑀕𑀧𑀭𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀇𑀤𑀫𑁆𑀧𑀺 𑀕𑀭𑀼𑀓𑀦𑁆𑀢𑀺 𑀬𑁄𑀚𑀦𑀸’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁪𑁮𑁫) 𑀧𑀦 ‘‘𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀫𑀓𑁆𑀔𑀭𑀁 𑀲𑀺𑀣𑀺𑀮𑀁, 𑀢𑀸𑀦𑀺𑀬𑁂𑀯 𑀥𑀦𑀺𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀫𑀓𑁆𑀔𑀭𑀁 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁, 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁. 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀤𑀲𑀧𑁆𑀧𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘. 𑀲𑀁𑀬𑁄𑀕𑁄 𑀧𑀭𑁄 𑀏𑀢𑀲𑁆𑀫𑀸𑀢𑀺 𑀲𑀁𑀬𑁄𑀕𑀧𑀭𑁄. 𑀦 𑀲𑀁𑀬𑁄𑀕𑀧𑀭𑁄 𑀅𑀲𑀁𑀬𑁄𑀕𑀧𑀭𑁄 ‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀣𑁂𑀭𑀲𑁆𑀲 𑀬𑀲𑁆𑀲 𑀦 𑀔𑀫𑀢𑀻’𑀢𑀺 𑀏𑀢𑁆𑀣 𑀢-𑀓𑀸𑀭 𑀦-𑀓𑀸𑀭𑀲𑀳𑀺𑀢𑀸𑀭𑁄 𑀅𑀲𑀁𑀬𑁄𑀕𑀧𑀭𑁄. 𑀓𑀭𑀡𑀸𑀦𑀻𑀢𑀺 𑀓𑀡𑁆𑀞𑀸𑀤𑀻𑀦𑀺’’ 𑀇𑀢𑀺 𑀏𑀢𑁆𑀢𑀓𑀁 𑀯𑀼𑀢𑁆𑀢𑀁.

𑀧𑀼𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀭𑀺𑀯𑀸𑀭 𑁨.𑁪𑁮𑁫) ‘‘𑀢𑀢𑁆𑀣 𑀆𑀬𑀲𑁆𑀫𑀢𑁄𑀢𑀺𑀆𑀤𑀻𑀲𑀼 𑀲𑀭𑀸𑀦𑀦𑁆𑀢𑀭𑀺𑀢𑀸𑀦𑀺 𑀲-𑀓𑀸𑀭 𑀫-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀸𑀦𑀺 ‘𑀲𑀁𑀬𑁄𑀕𑁄’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁄 𑀲𑀁𑀬𑁄𑀕𑁄 𑀧𑀭𑁄 𑀬𑀲𑁆𑀲 𑀅-𑀓𑀸𑀭𑀸𑀤𑀺𑀦𑁄, 𑀲𑁄 𑀲𑀁𑀬𑁄𑀕𑀧𑀭𑁄 𑀦𑀸𑀫. 𑀭𑀲𑁆𑀲𑀦𑁆𑀢𑀺 𑀅-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀭𑀳𑀺𑀢𑀁 𑀧𑀤𑀁. 𑀅𑀲𑀁𑀬𑁄𑀕𑀧𑀭𑀦𑁆𑀢𑀺 ‘𑀬𑀲𑁆𑀲 𑀦 𑀔𑀫𑀢𑀻’𑀢𑀺𑀆𑀤𑀻𑀲𑀼 𑀲-𑀓𑀸𑀭 𑀦-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑀲𑀳𑀺𑀢𑀁 𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀅𑀓𑀢𑁆𑀯𑀸 ‘𑀲𑀼𑀡𑀸𑀢𑀼 𑀫𑁂’𑀢𑀺𑀆𑀤𑀺𑀁 𑀅𑀯𑀢𑁆𑀯𑀸 𑀯𑀕𑁆𑀕𑀦𑁆𑀢𑀭𑁂 𑀲𑀺𑀣𑀺𑀮𑀫𑁂𑀯 𑀓𑀢𑁆𑀯𑀸 ‘𑀲𑀼𑀡𑀸𑀝𑀼 𑀫𑁂’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄𑀧𑀺 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺𑀬𑁂𑀯 𑀞𑀧𑁂𑀢𑁆𑀯𑀸 𑀅𑀦𑀼𑀭𑀽𑀧𑀁 𑀆𑀤𑁂𑀲𑀁. 𑀬𑀜𑁆𑀳𑀺 ‘𑀲𑀘𑁆𑀘𑀺𑀓𑀢𑁆𑀣𑀧𑀭𑀫𑀢𑁆𑀣𑁂𑀦𑀸’𑀢𑀺 𑀯𑀢𑁆𑀢𑀩𑁆𑀩𑁂 ‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀝𑁆𑀞𑁂𑀦𑀸’𑀢𑀺 𑀘 ‘𑀅𑀢𑁆𑀣𑀓𑀣𑀸’𑀢𑀺 𑀘 𑀯𑀢𑁆𑀢𑀩𑁆𑀩𑁂 ‘𑀅𑀝𑁆𑀞𑀓𑀣𑀸’𑀢𑀺 𑀘 𑀢𑀢𑁆𑀣 𑀢𑀢𑁆𑀣 𑀯𑀼𑀘𑁆𑀘𑀢𑀺, 𑀢𑀸𑀤𑀺𑀲𑀁 𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀲𑀼 𑀤𑀺𑀝𑁆𑀞𑀧𑀬𑁄𑀕𑀁 𑀢𑀤𑀦𑀼𑀭𑀽𑀧𑀜𑁆𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁄 𑀅𑀜𑁆𑀜𑀁 𑀦 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀦𑁆𑀢𑁂𑀦𑀸’𑀢𑀺𑀆𑀤𑀺. ‘𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲’𑀦𑁆𑀢𑀺𑀆𑀤𑀻𑀲𑀼 ‘𑀪𑀺𑀓𑁆𑀔𑀽𑀦’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘𑀪𑀺𑀓𑁆𑀔𑀼𑀦’𑀦𑁆𑀢𑀺 𑀯𑀸 ‘𑀩𑀳𑀽𑀲𑀽’𑀢𑀺 𑀯𑀢𑁆𑀢𑀩𑁆𑀩𑁂 ‘𑀩𑀳𑀼𑀲𑀽’𑀢𑀺 𑀯𑀸 ‘𑀦𑀓𑁆𑀔𑀫𑀢𑀻’𑀢𑀺 𑀯𑀢𑁆𑀢𑀩𑁆𑀩𑁂 ‘𑀦 𑀔𑀫𑀢𑀻’𑀢𑀺 𑀯𑀸 ‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’𑀢𑀺 𑀯𑀢𑁆𑀢𑀩𑁆𑀩𑁂 ‘𑀉𑀧𑀲𑀫𑁆𑀧𑀤𑀸𑀧𑁂𑀔𑁄’𑀢𑀺 𑀯𑀸 𑀏𑀯𑀁 𑀅𑀦𑀼𑀭𑀽𑀧𑀝𑁆𑀞𑀸𑀦𑁂𑀲𑀼 𑀏𑀯 𑀤𑀻𑀖𑀭𑀲𑁆𑀲𑀸𑀤𑀺𑀭𑀲𑁆𑀲𑀤𑀻𑀖𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀦 ‘𑀦𑀸𑀕𑁄’𑀢𑀺 𑀯𑀢𑁆𑀢𑀩𑁆𑀩𑁂 ‘𑀦𑀕𑁄’𑀢𑀺 𑀯𑀸 ‘𑀲𑀗𑁆𑀖𑁄’𑀢𑀺 𑀯𑀢𑁆𑀢𑀩𑁆𑀩𑁂 ‘𑀲𑀖𑁄’𑀢𑀺 𑀯𑀸 ‘𑀢𑀺𑀲𑁆𑀲𑁄’𑀢𑀺 𑀯𑀢𑁆𑀢𑀩𑁆𑀩𑁂 ‘𑀢𑀺𑀲𑁄’𑀢𑀺 𑀯𑀸 ‘𑀬𑀸𑀘𑀢𑀻’𑀢𑀺 𑀯𑀢𑁆𑀢𑀩𑁆𑀩𑁂 ‘𑀬𑀸𑀘𑀦𑁆𑀢𑀻’𑀢𑀺 𑀯𑀸 𑀏𑀯𑀁 𑀅𑀦𑀦𑀼𑀭𑀽𑀧𑀝𑁆𑀞𑀸𑀦𑁂𑀲𑀼 𑀯𑀢𑁆𑀢𑀼𑀁. 𑀲𑀫𑁆𑀩𑀦𑁆𑀥𑀁 𑀧𑀦 𑀯𑀯𑀢𑁆𑀣𑀸𑀦𑀜𑁆𑀘 𑀲𑀩𑁆𑀩𑀣𑀸𑀧𑀺 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀆𑀕𑀢𑀁. 𑀲𑁂𑀲𑀸𑀦𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺.

𑁨𑁫𑁩. 𑀲𑀻𑀫𑀯𑀺𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀧𑀦 𑀳𑁂𑀝𑁆𑀞𑀸 𑀲𑀻𑀫𑀓𑀣𑀸𑀬𑀁 𑀲𑀩𑁆𑀩𑁂𑀦 𑀓𑀣𑀺𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑁄.

𑀧𑀭𑀺𑀲𑀯𑀺𑀧𑀢𑁆𑀢𑀺𑀓𑀣𑀸𑀬 𑀘𑀢𑀼𑀯𑀕𑁆𑀕𑀓𑀭𑀡𑁂𑀢𑀺 𑀘𑀢𑀼𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑁂. 𑀅𑀦𑀺𑀲𑁆𑀲𑀸𑀭𑀺𑀢𑀸𑀢𑀺 𑀉𑀧𑁄𑀲𑀣𑀝𑁆𑀞𑀧𑀦𑀸𑀤𑀺𑀦𑀸 𑀯𑀸 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑁂𑀦 𑀯𑀸 𑀦 𑀩𑀳𑀺𑀓𑀢𑀸. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀅𑀧𑀓𑀢𑀢𑁆𑀢𑀲𑁆𑀲𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀯𑀸 𑀬𑀲𑁆𑀲 𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀧𑀺𑀢𑀸 𑀳𑁄𑀦𑁆𑀢𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀞𑀧𑀺𑀢𑀉𑀧𑁄𑀲𑀣𑀧𑀯𑀸𑀭𑀡𑁄 𑀪𑀺𑀓𑁆𑀔𑀼 𑀅𑀧𑀓𑀢𑀢𑁆𑀢𑁄 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑁂𑀲𑀼 𑀧𑀦 𑀕𑀭𑀼𑀓𑀝𑁆𑀞𑀸𑀧𑀺 𑀅𑀧𑀓𑀢𑀢𑁆𑀢𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀯𑀲𑁂𑀲𑀸…𑀧𑁂… 𑀙𑀦𑁆𑀤𑀸𑀭𑀳𑀸𑀯 𑀳𑁄𑀦𑁆𑀢𑀻𑀢𑀺 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸 𑀧𑀦 𑀙𑀦𑁆𑀤𑀸𑀭𑀳𑀸 𑀦 𑀳𑁄𑀦𑁆𑀢𑀺, 𑀢𑁂𑀧𑀺 𑀘𑀢𑀼𑀯𑀕𑁆𑀕𑀸𑀤𑀺𑀢𑁄 𑀅𑀥𑀺𑀓𑀸 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸𑀯 𑀙𑀦𑁆𑀤𑀸𑀭𑀳𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂𑀦𑁂𑀯 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀤𑀸𑀢𑀩𑁆𑀩𑀸.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁪𑁮𑁮) 𑀧𑀦 ‘‘𑀅𑀦𑀼𑀓𑁆𑀔𑀺𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀘 𑀧𑀓𑀢𑀢𑁆𑀢𑀸𑀢𑀺 𑀆𑀳 ‘𑀧𑀓𑀢𑀢𑁆𑀢𑀸 𑀅𑀦𑀼𑀓𑁆𑀔𑀺𑀢𑁆𑀢𑀸’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀺𑀲𑁆𑀲𑀸𑀭𑀺𑀢𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸. 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀻𑀢𑀺 𑀢𑀻𑀲𑀼 𑀤𑁆𑀯𑀻𑀲𑀼 𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀳𑀝𑀸𑀧𑀺 𑀅𑀦𑀸𑀳𑀝𑀸𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀕𑀢𑁄. 𑀏𑀯𑀁 𑀧𑀸𑀴𑀺𑀬𑀜𑁆𑀘 𑀅𑀝𑁆𑀞𑀓𑀣𑀸𑀬 𑀘 𑀘𑀢𑀼𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀲𑀫𑁆𑀧𑀢𑁆𑀢𑀺 𑀘 𑀯𑀺𑀧𑀢𑁆𑀢𑀺 𑀘 𑀆𑀕𑀢𑀸, 𑀝𑀻𑀓𑀸𑀘𑀭𑀺𑀬𑁂𑀳𑀺 𑀘 𑀯𑀺𑀦𑀺𑀘𑁆𑀙𑀺𑀢𑀸, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀓𑀢𑁆𑀢𑀩𑁆𑀩𑀸𑀦𑀺, 𑀦 𑀅𑀯𑀼𑀢𑁆𑀢𑀦𑀬𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑁨.𑁪𑁩𑁧) 𑁋

‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄;

𑀬𑁄 𑀢𑀲𑁆𑀲 𑀧𑀼𑀢𑁆𑀢𑁂𑀳𑀺 𑀢𑀣𑁂𑀯 𑀜𑀸𑀢𑁄;

𑀲𑁄 𑀬𑁂𑀳𑀺 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸;

𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼.

‘‘𑀢𑀲𑁆𑀫𑀸 𑀳𑀺 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁;

𑀢𑀁 𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔𑀁;

𑀲𑀩𑁆𑀩𑀫𑁆𑀧𑀺 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁;

𑀬𑀲𑁆𑀫𑀸 𑀧𑀫𑀸𑀡𑀁 𑀇𑀥 𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺.

𑀇𑀫𑀲𑁆𑀫𑀺𑀜𑁆𑀳𑀺 𑀓𑀫𑁆𑀫𑀯𑀕𑁆𑀕𑁂 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀭𑀡𑀝𑁆𑀞𑀸𑀦𑀁 𑀏𑀓𑀸𑀤𑀲𑀯𑀺𑀧𑀢𑁆𑀢𑀺𑀲𑀻𑀫𑀯𑀺𑀫𑀼𑀢𑁆𑀢𑀁 𑀩𑀤𑁆𑀥𑀲𑀻𑀫𑀪𑀽𑀢𑀁𑀬𑁂𑀯 𑀯𑀼𑀢𑁆𑀢𑀁, ‘‘𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺 (𑀧𑀭𑀺. 𑁪𑁮𑁬) 𑀯𑀘𑀦𑀢𑁄 𑀦 𑀅𑀩𑀤𑁆𑀥𑀉𑀧𑀘𑀸𑀭𑀲𑀻𑀫𑀪𑀽𑀢𑀁. 𑀦 𑀳𑀺 𑀢𑀢𑁆𑀣 𑀏𑀓𑀸𑀤𑀲𑀯𑀺𑀧𑀢𑁆𑀢𑀺 𑀅𑀢𑁆𑀣𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀧𑀭𑀺. 𑀅𑀝𑁆𑀞. 𑁪𑁮𑁨) ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲𑀸𑀧𑀺 𑀩𑀤𑁆𑀥𑀲𑀻𑀫𑀸𑀬𑀫𑁂𑀯 𑀓𑀢𑁆𑀢𑀩𑁆𑀩𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀉𑀧𑀘𑀸𑀭𑀲𑀻𑀫𑀸𑀬𑀁. 𑀦 𑀳𑀺 𑀢𑀢𑁆𑀣 𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁄𑀥𑀦𑀜𑁆𑀘 𑀙𑀦𑁆𑀤𑀸𑀭𑀳𑀸𑀦𑀜𑁆𑀘 𑀅𑀢𑁆𑀣𑀺, 𑀅𑀦𑁆𑀢𑁄𑀲𑀻𑀫𑀁 𑀧𑀯𑀺𑀝𑁆𑀞𑀧𑀯𑀺𑀝𑁆𑀞𑀸𑀦𑀁 𑀲𑀗𑁆𑀖𑀮𑀸𑀪𑁄 𑀤𑀸𑀢𑀩𑁆𑀩𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀜𑀢𑁆𑀢𑀺𑀓𑀫𑁆𑀫𑀪𑀽𑀢𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀓𑀫𑁆𑀫𑀁 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂𑀧𑀺 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀸𑀤𑁄𑀧𑀺 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀪𑀽𑀢𑀁 𑀓𑀣𑀺𑀦𑀤𑀸𑀦𑀓𑀫𑁆𑀫𑀁 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀯𑀸𑀤𑁄𑀧𑀺 𑀧𑀸𑀴𑀺𑀯𑀺𑀭𑁄𑀥𑁄 𑀅𑀝𑁆𑀞𑀓𑀣𑀸𑀯𑀺𑀭𑁄𑀥𑁄 𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀉𑀧𑁄𑀲𑀣𑀧𑀯𑀸𑀭𑀡𑀓𑀣𑀸𑀯𑀡𑁆𑀡𑀦𑀸𑀬𑀜𑁆𑀘 𑀓𑀣𑀺𑀦𑀓𑀣𑀸𑀯𑀡𑁆𑀡𑀦𑀸𑀬𑀜𑁆𑀘 𑀯𑀼𑀢𑁆𑀢𑀁, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁆𑀣 𑀲𑀼𑀝𑁆𑀞𑀼 𑀑𑀮𑁄𑀓𑁂𑀢𑁆𑀯𑀸 𑀲𑀁𑀲𑀬𑁄 𑀯𑀺𑀦𑁄𑀤𑁂𑀢𑀩𑁆𑀩𑁄.

𑀇𑀤𑀸𑀦𑀺 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀮𑁂𑀔𑀓𑀸𑀭𑁂𑀳𑀺 𑀧𑀭𑀺𑀘𑀬𑀯𑀲𑁂𑀦 𑀲𑀩𑁆𑀩𑀕𑀦𑁆𑀣𑀸𑀦𑀁 𑀆𑀤𑀺𑀫𑁆𑀳𑀺 𑀮𑀺𑀔𑀺𑀢𑀁 𑀫𑀳𑀸𑀦𑀫𑀓𑁆𑀓𑀸𑀭𑀧𑀸𑀞𑀁 𑀲𑀭𑀡𑀕𑀫𑀦𑀲𑁆𑀲, 𑀓𑀫𑁆𑀫𑀯𑀸𑀘𑀸𑀬 𑀘 𑀆𑀭𑀫𑁆𑀪𑀓𑀸𑀮𑁂 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀪𑀡𑀦𑁆𑀢𑀺, 𑀲𑁄 𑀧𑀦 𑀧𑀸𑀞𑁄 𑀦𑁂𑀯 𑀲𑀭𑀡𑀕𑀫𑀦𑀧𑀭𑀺𑀬𑀸𑀧𑀦𑁆𑀦𑁄, 𑀦 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑀸𑀧𑀦𑁆𑀦𑁄, 𑀦𑀸𑀧𑀺 𑀓𑀫𑁆𑀫𑀯𑀸𑀘𑀸𑀬 𑀧𑀼𑀩𑁆𑀩𑀓𑀭𑀡𑀧𑀭𑀺𑀬𑀸𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀅𑀪𑀡𑀺𑀢𑁂𑀧𑀺 𑀦 𑀲𑀭𑀡𑀕𑀫𑀦𑀲𑁆𑀲 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀳𑀸𑀦𑀺 𑀅𑀢𑁆𑀣𑀺, 𑀦 𑀪𑀡𑀺𑀢𑁂 𑀯𑀟𑁆𑀠𑀺, 𑀢𑀲𑁆𑀫𑀸 𑀧𑀓𑀭𑀡𑀸𑀘𑀭𑀺𑀬𑀸 𑀲𑀭𑀡𑀕𑀫𑀦𑀸𑀭𑀫𑁆𑀪𑁂𑀧𑀺 𑀓𑀫𑁆𑀫𑀯𑀸𑀘𑀸𑀭𑀫𑁆𑀪𑁂𑀧𑀺 𑀢𑀲𑁆𑀲 𑀫𑀳𑀸𑀦𑀫𑀓𑁆𑀓𑀸𑀭𑀧𑀸𑀞𑀲𑁆𑀲 𑀯𑀡𑁆𑀡𑀦𑀁 𑀦 𑀯𑀤𑀦𑁆𑀢𑀺, 𑀯𑀤𑀦𑁆𑀢𑁄 𑀧𑀦 ‘‘𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲’’ 𑀇𑀢𑀺 𑀧𑀤𑀸𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀲𑀸𑀭𑀢𑁆𑀣𑀤𑀻𑀧𑀦𑀻𑀆𑀤𑀺𑀧𑁆𑀧𑀓𑀭𑀡𑁂𑀲𑀼 ‘‘𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’ 𑀇𑀢𑀺𑀧𑀤𑀸𑀦𑀁 𑀅𑀢𑁆𑀣𑁄 𑀯𑀺𑀬 𑀯𑀺𑀢𑁆𑀣𑀸𑀭𑁂𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀢𑁄 𑀬𑀣𑀸𑀪𑀽𑀢𑀕𑀼𑀡𑀤𑀻𑀧𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀆𑀘𑀭𑀺𑀬𑀸 𑀲𑀩𑁆𑀩𑁂𑀲𑀼 𑀕𑀦𑁆𑀣𑀸𑀭𑀫𑁆𑀪𑁂𑀲𑀼 𑀢𑀺𑀓𑁆𑀔𑀢𑁆𑀢𑀼𑀁 𑀫𑀗𑁆𑀕𑀮𑀢𑁆𑀣𑀁 𑀪𑀡𑀦𑁆𑀢𑀺. 𑀪𑀡𑀦𑁆𑀢𑁂𑀳𑀺 𑀘 𑀧𑀦 𑀦-𑀓𑀸𑀭 𑀫𑁄-𑀓𑀸𑀭𑀸𑀤𑀻𑀦𑀁 𑀞𑀸𑀦𑀓𑀭𑀡𑀸𑀤𑀺𑀲𑀫𑁆𑀧𑀤𑀁 𑀅𑀳𑀸𑀧𑁂𑀦𑁆𑀢𑁂𑀦 𑀲𑀺𑀣𑀺𑀮𑀥𑀦𑀺𑀢𑀤𑀻𑀖𑀭𑀲𑁆𑀲𑀸𑀤𑀺𑀯𑀺𑀲𑁂𑀲𑀁 𑀫𑀦𑀲𑀺 𑀓𑀭𑁄𑀦𑁆𑀢𑁂𑀦 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀧𑀭𑀺𑀫𑀡𑁆𑀟𑀮𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦 𑀪𑀡𑀺𑀢𑀩𑁆𑀩𑁄 𑀳𑁄𑀢𑀺, 𑀦 𑀅𑀢𑀺𑀆𑀬𑀢𑀓𑁂𑀦 𑀕𑀻𑀢𑀲𑀤𑁆𑀤𑀲𑀤𑀺𑀲𑁂𑀦 𑀲𑀤𑁆𑀤𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑁄 𑀕𑀸𑀬𑀺𑀢𑀩𑁆𑀩𑁄, 𑀬𑁄 𑀕𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁪𑁯).

‘‘𑀏𑀓𑀫𑀢𑁆𑀢𑁄 𑀪𑀯𑁂 𑀭𑀲𑁆𑀲𑁄, 𑀤𑁆𑀯𑀺𑀫𑀢𑁆𑀢𑁄 𑀤𑀻𑀖𑀫𑀼𑀘𑁆𑀘𑀢𑁂;

𑀢𑀺𑀫𑀢𑁆𑀢𑁄 𑀢𑀼 𑀧𑁆𑀮𑀼𑀢𑁄 𑀜𑁂𑀬𑁆𑀬𑁄, 𑀩𑁆𑀬𑀜𑁆𑀚𑀦𑀜𑁆𑀘𑀟𑁆𑀠𑀫𑀢𑁆𑀢𑀺𑀓’’𑀦𑁆𑀢𑀺. 𑁋

𑀲𑀤𑁆𑀤𑀧𑁆𑀧𑀓𑀭𑀡𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁 𑀲𑀤𑁆𑀤𑀮𑀓𑁆𑀔𑀡𑀁 𑀦𑀺𑀲𑁆𑀲𑀸𑀬 𑀦-𑀓𑀸𑀭𑀸𑀤𑀻𑀲𑀼 𑀭𑀲𑁆𑀲𑀪𑀽𑀢𑁂 𑀅𑀲𑀭𑁂 𑀏𑀓𑀫𑀢𑁆𑀢𑀁, 𑀦-𑀩𑁆𑀬𑀜𑁆𑀚𑀦𑁂 𑀅𑀟𑁆𑀠𑀫𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀺𑀬𑀟𑁆𑀠𑀫𑀢𑁆𑀢𑀓𑀸𑀮𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑀻𑀬𑀢𑁂. 𑀫𑁄-𑀓𑀸𑀭𑀸𑀤𑀻𑀲𑀼 𑀤𑀻𑀖𑀪𑀽𑀢𑁂 𑀑-𑀓𑀸𑀭𑀸𑀤𑀺𑀲𑀭𑁂 𑀤𑁆𑀯𑀺𑀫𑀢𑁆𑀢𑀁, 𑀫-𑀓𑀸𑀭𑀸𑀤𑀺𑀩𑁆𑀬𑀜𑁆𑀚𑀦𑁂 𑀅𑀟𑁆𑀠𑀫𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀟𑁆𑀠𑀢𑁂𑀬𑁆𑀬𑀫𑀢𑁆𑀢𑀸𑀓𑀸𑀮𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑀻𑀬𑀢𑁂, 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺. 𑀦𑀦𑀼 ‘‘𑀧𑁆𑀮𑀼𑀢𑁄 𑀢𑀺𑀫𑀢𑁆𑀢𑁄 𑀜𑁂𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀲𑀸 𑀧𑀦 𑀤𑀽𑀭𑀢𑁄 𑀅𑀯𑁆𑀳𑀸𑀬𑀦𑀸𑀤𑀻𑀲𑀼𑀬𑁂𑀯 𑀮𑀩𑁆𑀪𑀢𑀺, 𑀦𑀸𑀜𑁆𑀜𑀢𑁆𑀣. 𑀯𑀼𑀢𑁆𑀢𑀜𑁆𑀳𑀺 𑀓𑀸𑀭𑀺𑀓𑀸𑀬𑀁 𑁋

‘‘𑀤𑀽𑀭𑀢𑁄 𑀅𑀯𑁆𑀳𑀸𑀦𑁂 𑀕𑀻𑀢𑁂, 𑀢𑀣𑁂𑀯 𑀭𑁄𑀤𑀦𑁂𑀧𑀺 𑀘;

𑀧𑁆𑀮𑀼𑀢𑀸 𑀢𑀺𑀫𑀢𑁆𑀢𑀺𑀓𑀸 𑀯𑀼𑀢𑁆𑀢𑀸, 𑀲𑀩𑁆𑀩𑁂𑀢𑁂 𑀦𑁂𑀢𑁆𑀣 𑀕𑀬𑁆𑀳𑀭𑁂’’𑀢𑀺. 𑁋

𑀓𑀺𑀢𑁆𑀢𑀓𑁂𑀦 𑀧𑀦 𑀓𑀸𑀮𑁂𑀦 𑀏𑀓𑀫𑀢𑁆𑀢𑀸 𑀯𑀺𑀜𑁆𑀜𑁂𑀬𑁆𑀬𑀸𑀢𑀺? 𑀅𑀓𑁆𑀔𑀺𑀦𑀺𑀫𑀺𑀲𑀉𑀫𑁆𑀫𑀺𑀲𑀫𑀢𑁆𑀢𑀓𑀸𑀮𑁂𑀦𑀸𑀢𑀺 𑀆𑀘𑀭𑀺𑀬𑀸. 𑀏𑀓𑁂 𑀧𑀦 𑀆𑀘𑀭𑀺𑀬𑀸 ‘‘𑀅𑀗𑁆𑀕𑀼𑀮𑀺𑀨𑁄𑀝𑀦𑀓𑀸𑀮𑀧𑁆𑀧𑀫𑀸𑀡𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀆𑀘𑀭𑀺𑀬𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑁂𑀦 𑁋

‘‘𑀧𑀫𑀸𑀡𑀁 𑀏𑀓𑀫𑀢𑁆𑀢𑀲𑁆𑀲, 𑀦𑀺𑀫𑀺𑀲𑀼𑀫𑁆𑀫𑀺𑀲𑀢𑁄𑀩𑁆𑀭𑀯𑀼𑀁;

𑀅𑀗𑁆𑀕𑀼𑀮𑀺𑀨𑁄𑀝𑀓𑀸𑀮𑀲𑁆𑀲, 𑀧𑀫𑀸𑀡𑁂𑀦𑀸𑀧𑀺 𑀅𑀩𑁆𑀭𑀯𑀼’’𑀦𑁆𑀢𑀺.

𑀏𑀯𑀁 𑀲𑀤𑁆𑀤𑀲𑀢𑁆𑀣𑀸𑀘𑀭𑀺𑀬𑁂𑀳𑀺 𑀯𑀘𑀦𑀢𑁄 𑀲𑀼𑀤𑁆𑀥𑀭𑀲𑁆𑀲𑀲𑀭𑀝𑁆𑀞𑀸𑀦𑁂 𑀏𑀓𑀫𑀢𑁆𑀢𑀸𑀧𑀫𑀸𑀡𑀁, 𑀲𑀩𑁆𑀬𑀜𑁆𑀚𑀦𑀭𑀲𑁆𑀲𑀲𑀭𑀝𑁆𑀞𑀸𑀦𑁂 𑀤𑀺𑀬𑀟𑁆𑀠𑀫𑀢𑁆𑀢𑀸𑀧𑀫𑀸𑀡𑀁, 𑀲𑀼𑀤𑁆𑀥𑀤𑀻𑀖𑀲𑀭𑀝𑁆𑀞𑀸𑀦𑁂 𑀤𑁆𑀯𑀺𑀫𑀢𑁆𑀢𑀸𑀧𑀫𑀸𑀡𑀁, 𑀲𑀩𑁆𑀬𑀜𑁆𑀚𑀦𑀤𑀻𑀖𑀲𑀭𑀝𑁆𑀞𑀸𑀦𑁂 𑀅𑀟𑁆𑀠𑀢𑁂𑀬𑁆𑀬𑀫𑀢𑁆𑀢𑀸𑀧𑀫𑀸𑀡𑀁 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀘𑁆𑀘𑀸𑀭𑀻𑀬𑀢𑁂.

𑀇𑀤𑀸𑀦𑀺 𑀧𑀦 𑀪𑀺𑀓𑁆𑀔𑀽 𑀫𑀳𑀸𑀦𑀫𑀓𑁆𑀓𑀸𑀭𑀪𑀡𑀦𑁂 𑀩𑀮𑀯𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀪𑀡𑀦𑁆𑀢𑀸 𑀭𑀲𑁆𑀲𑀝𑁆𑀞𑀸𑀦𑁂𑀲𑀼 𑀤𑁆𑀯𑀺𑀢𑀺𑀫𑀢𑁆𑀢𑀸𑀓𑀸𑀮𑀁 𑀤𑀻𑀖𑀝𑁆𑀞𑀸𑀦𑁂𑀲𑀼 𑀘𑀢𑀼𑀧𑀜𑁆𑀘𑀫𑀢𑁆𑀢𑀸𑀓𑀸𑀮𑀁 𑀲𑀭𑀁 𑀧𑀞𑀧𑁂𑀢𑁆𑀯𑀸 𑀪𑀡𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀧𑀭𑁂 𑀧𑀞𑀫𑀯𑀸𑀭𑁂 𑀪𑀡𑀺𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀧𑀤𑀁 𑀧𑀢𑁆𑀯𑀸𑀧𑀺 𑀢𑀢𑁆𑀣 𑀅𑀝𑁆𑀞𑀧𑁂𑀢𑁆𑀯𑀸 𑀧𑀼𑀦 ‘‘𑀦𑀫𑁄 𑀢𑀲𑁆𑀲𑀸’’𑀢𑀺 𑀪𑀡𑀺𑀢𑁆𑀯𑀸 𑀲-𑀓𑀸𑀭𑁂 𑀞𑀧𑁂𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀤𑀼𑀢𑀺𑀬𑀯𑀸𑀭𑁂 ‘‘𑀪𑀕𑀯𑀢𑁄’’𑀢𑀺 𑀇𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑀭𑀺𑀬𑁄𑀲𑀸𑀦𑀁 𑀪𑀡𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀢𑀢𑀺𑀬𑀯𑀸𑀭𑁂 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀦𑁆𑀢𑀺. 𑀏𑀯𑀁 𑀪𑀡𑀦𑁆𑀢𑀜𑁆𑀘 𑀩𑀳𑀽 𑀧𑀲𑀁𑀲𑀦𑁆𑀢𑀺, 𑀏𑀯𑀁 𑀧𑀦 𑀓𑀸𑀢𑀩𑁆𑀩𑀦𑁆𑀢𑀺 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀯𑀺𑀚𑁆𑀚𑀢𑀺. 𑀬𑀣𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀢𑀻𑀡𑀺 𑀅𑀦𑀼𑀲𑁆𑀲𑀸𑀯𑀦𑀸𑀦𑀺 𑀲𑀤𑁆𑀤𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀪𑀺𑀦𑁆𑀦𑀸𑀦𑀺 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑀯𑀺𑀭𑀳𑀺𑀢𑀸𑀦𑀺 𑀓𑀢𑁆𑀯𑀸 𑀪𑀡𑀺𑀢𑀩𑁆𑀩𑀸𑀦𑀺, 𑀏𑀯𑀁 𑀫𑀳𑀸𑀦𑀫𑀓𑁆𑀓𑀸𑀭𑀧𑀸𑀞𑁂 𑀢𑀺𑀓𑁆𑀔𑀢𑁆𑀢𑀼𑀁 𑀪𑀜𑁆𑀜𑀫𑀸𑀦𑁂 𑀢𑀬𑁄 𑀯𑀸𑀭𑀸 𑀲𑀤𑁆𑀤𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀪𑀺𑀦𑁆𑀦𑁂 𑀓𑀢𑁆𑀯𑀸 𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀓𑀢𑁆𑀯𑀸 𑀆𑀤𑀺𑀢𑁄 𑀆𑀭𑀪𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀞𑀧𑁂𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺.

𑀢𑀢𑁆𑀭𑀸𑀬𑀫𑁂𑀓𑁂𑀏𑀯𑀁 𑀯𑀤𑀦𑁆𑀢𑀺 𑁋 𑀬𑀣𑀸 𑀦𑀸𑀫 𑀚𑀯𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀞𑀸𑀢𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀯𑀸𑀧𑀺 𑀲𑀳𑀲𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀓𑀧𑀸𑀤𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀆𑀤𑀺𑀢𑁄 𑀪𑀡𑀦𑁆𑀢𑀲𑁆𑀲 𑀩𑀮𑀯𑀉𑀲𑁆𑀲𑀸𑀳𑀢𑁆𑀢𑀸 𑀧𑀭𑀺𑀬𑁄𑀲𑀸𑀦𑁂 𑀧𑀢𑁆𑀢𑁂𑀧𑀺 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, ‘‘𑀦𑀫𑁄 𑀢𑀲𑁆𑀲𑀸’’𑀢𑀺 𑀤𑁆𑀯𑀺𑀧𑀤𑀫𑀢𑁆𑀢𑀁 𑀪𑀡𑀺𑀢𑁆𑀯𑀸 𑀲𑀓𑁆𑀓𑁄𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑁂𑀲𑀼 𑀓𑀲𑁆𑀫𑀸 𑀲𑀓𑁆𑀓𑁄𑀢𑀻𑀢𑀺? 𑀢𑀤𑀸 𑀧𑀦 𑀤𑀼𑀢𑀺𑀬𑀯𑀸𑀭𑁂 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑀢𑁆𑀢𑀸 𑀮𑀤𑁆𑀥𑀲𑁆𑀲𑀸𑀲𑁄 𑀳𑀼𑀢𑁆𑀯𑀸 𑀲𑀓𑁆𑀓𑁄𑀢𑀻𑀢𑀺. 𑀏𑀯𑀁 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀯𑀺𑀖𑀸𑀢𑀁 𑀧𑀸𑀧𑁂𑀦𑁆𑀢𑀺. 𑀦 𑀳𑀺 ‘‘𑀫𑀳𑀸𑀦𑀫𑀓𑁆𑀓𑀸𑀭𑀁 𑀪𑀡𑀦𑁆𑀢𑁂𑀦 𑀧𑀞𑀫𑀯𑀸𑀭𑁂 𑀩𑀮𑀯𑀉𑀲𑁆𑀲𑀸𑀳𑁂𑀦 𑀪𑀡𑀺𑀢𑀩𑁆𑀩𑁄’’𑀢𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑁄, 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀯𑀸 𑀞𑀧𑀺𑀢𑁄 𑀅𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂 𑀬𑀣𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑁂𑀦 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀦𑁆𑀢𑀺, 𑀢𑁂𑀲𑀁 𑀲𑀯𑀦𑀧𑁆𑀧𑀫𑀸𑀡𑁂𑀦 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀉𑀤𑁆𑀤𑀺𑀲𑀺𑀢𑀼𑀁 𑀅𑀢𑁆𑀢𑀦𑁄 𑀲𑀭𑀧𑁆𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑁄 𑀉𑀤𑁆𑀤𑀺𑀲𑀺𑀢𑀩𑁆𑀩𑁄, 𑀏𑀯𑀁 𑀓𑀫𑁆𑀫𑀯𑀸𑀘𑀁 𑀪𑀡𑀦𑁆𑀢𑁂𑀦𑀧𑀺 𑀲𑀻𑀫𑀫𑀡𑁆𑀟𑀮𑁂 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀽𑀦𑀁 𑀲𑀯𑀦𑀧𑁆𑀧𑀫𑀸𑀡𑁂𑀦 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀅𑀢𑁆𑀢𑀦𑁄 𑀲𑀭𑀧𑁆𑀧𑀫𑀸𑀡𑀁 𑀕𑀳𑁂𑀢𑁆𑀯𑀸 𑀪𑀡𑀺𑀢𑀩𑁆𑀩𑀸𑀢𑀺.

𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 𑀫𑁄-𑀓𑀸𑀭𑀸𑀤𑀻𑀲𑀼 𑀑-𑀓𑀸𑀭𑀦𑁆𑀢𑀧𑀤𑁂𑀲𑀼 𑀅𑀜𑁆𑀜𑁂𑀲𑀁 𑀧𑀤𑀸𑀦𑀁 𑀅𑀢𑀺𑀭𑁂𑀓𑁂𑀦 𑀲𑀭𑁂𑀦 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀓𑀭𑀡𑀲𑀤𑁆𑀤𑀁 𑀅𑀦𑀼𑀩𑀦𑁆𑀥𑀸𑀧𑀬𑀫𑀸𑀦𑀸 𑀪𑀡𑀦𑁆𑀢𑀺, 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀢𑀸𑀤𑀺𑀲𑀁 𑀪𑀡𑀦𑀁 𑀲𑀼𑀢𑁆𑀯𑀸 𑀧𑀭𑀺𑀘𑀬𑀧𑁆𑀧𑀢𑁆𑀢𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀯𑀸 𑀕𑀳𑀝𑁆𑀞𑀸 𑀯𑀸 𑀅𑀜𑁆𑀜𑁂𑀲𑀁 𑀆𑀘𑀭𑀺𑀬𑀸𑀦𑀁 𑀓𑀫𑁆𑀫𑀯𑀸𑀘𑀁 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀢𑀸𑀬 𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀤𑀸 𑀅𑀮𑀪𑀺𑀢𑀩𑁆𑀩𑀸 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀢𑀸𑀤𑀺𑀲𑀁 𑀧𑀦 𑀪𑀡𑀦𑀁 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀸 𑀏𑀯 𑀢𑀣𑀸 𑀪𑀡𑀦𑁆𑀢𑀺, 𑀦 𑀅𑀜𑁆𑀜𑁂 𑀆𑀘𑀭𑀺𑀬𑀸. 𑀢𑁂 𑀧𑀦 𑀧𑁄𑀭𑀸𑀡𑀸𑀘𑀭𑀺𑀬𑀸𑀦𑀁 𑀲𑀭𑀲𑀫𑁆𑀧𑀦𑁆𑀦𑀸𑀦𑀁 𑀅𑀦𑀼𑀓𑀭𑀡𑀲𑀤𑁆𑀤𑀭𑀳𑀺𑀢𑀫𑁆𑀧𑀺 𑀲𑀳𑀺𑀢𑀁 𑀯𑀺𑀬 𑀔𑀸𑀬𑀫𑀸𑀦𑀁 𑀲𑀼𑀡𑀦𑁆𑀢𑀸𑀦𑀁 𑀅𑀢𑀺𑀫𑀦𑁄𑀭𑀣𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀏𑀯𑀁 𑀓𑀭𑁄𑀦𑁆𑀢𑀺 𑀫𑀜𑁆𑀜𑁂. 𑀦 𑀳𑀺 𑀯𑀺𑀦𑀬𑁂 𑀯𑀸 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀸 𑀢𑀣𑀸 𑀪𑀡𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀦𑁆𑀢𑀺.

𑀩𑀳𑀽 𑀧𑀦 𑀪𑀺𑀓𑁆𑀔𑀽 ‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀦𑀬𑁂 𑀓𑀣𑀺𑀢𑀯𑀺𑀦𑀺𑀘𑁆𑀙𑀬𑀜𑁆𑀘 ‘‘𑀏𑀢𑁆𑀣 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀽’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀲𑀢𑁆𑀣𑁂𑀲𑀼 𑀓𑀢𑀯𑀺𑀦𑀺𑀘𑁆𑀙𑀬𑀜𑁆𑀘 𑀅𑀚𑀸𑀦𑀦𑁆𑀢𑀸 𑀧𑀺𑀝𑀓𑀢𑁆𑀢𑀬𑀓𑁄𑀯𑀺𑀤𑀸𑀦𑀁 𑀯𑀺𑀦𑀬𑀥𑀭𑀩𑀳𑀼𑀲𑁆𑀲𑀼𑀢𑀢𑁆𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀸 𑀅𑀮𑀤𑁆𑀥𑁄𑀧𑀤𑁂𑀲𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀉𑀧𑀲𑀫𑁆𑀧𑀤𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀘𑀦𑀫𑁂𑀯 𑀕𑀳𑁂𑀢𑁆𑀯𑀸 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀁 𑀅𑀚𑀸𑀦𑀦𑁆𑀢𑀸 𑀧𑀼𑀩𑁆𑀩𑁂 𑀧𑀭𑀤𑁂𑀲𑀢𑁄 𑀆𑀕𑀢𑀸𑀦𑀁 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀲𑀭𑀲𑀫𑁆𑀧𑀦𑁆𑀦𑀸𑀦𑀁 𑀫𑀳𑀸𑀣𑁂𑀭𑀸𑀦𑀁 𑀅𑀦𑁄𑀲𑀭𑁂𑀦 𑀪𑀡𑀫𑀸𑀦𑀸𑀦𑀁 𑀲𑀭𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀣𑁂𑀭𑀯𑀭𑀸𑀦𑀁 𑀫𑀢𑀺𑀁 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀬𑀣𑀸𑀤𑀺𑀝𑁆𑀞𑀁 𑀬𑀣𑀸𑀲𑀼𑀢𑀁 𑀮𑀺𑀔𑀺𑀢𑁆𑀯𑀸 𑀞𑀧𑁂𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀧𑀡𑁆𑀟𑀺𑀢𑁂𑀳𑀺 𑀳𑀲𑀺𑀢𑀩𑁆𑀩𑀁 𑀅𑀬𑀼𑀢𑁆𑀢𑀁 𑀓𑀣𑀁 𑀤𑀻𑀧𑁂𑀦𑁆𑀢𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀩𑁆𑀬𑀕𑁆𑀖𑀺𑀬𑀸 𑀲𑀤𑁆𑀤𑀲𑀤𑀺𑀲𑀁 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀓𑀼𑀡𑀺𑀬𑀸 𑀲𑀤𑁆𑀤𑀲𑀤𑀺𑀲𑀁 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀫𑁆𑀩𑀼𑀮𑀓𑀲𑀝𑀧𑀸𑀢𑀁 𑀓𑀭𑁄𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑀓𑁆𑀔𑀺𑀡𑀢𑁄 𑀦𑀫𑀦𑁆𑀢𑀸 𑀪𑀡𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀸𑀫𑀢𑁄 𑀦𑀫𑀦𑁆𑀢𑀸 𑀪𑀡𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀮𑀸𑀲𑀁 𑀓𑀼𑀭𑀼𑀫𑀸𑀦𑀸 𑀪𑀡𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀢𑀤𑁂𑀯 𑀲𑀤𑁆𑀤𑀳𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀉𑀫𑀗𑁆𑀕𑀮𑁂𑀡𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀢𑀫𑁂𑀯 𑀯𑀘𑀦𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑀸 𑀢𑀤𑀦𑀼𑀭𑀽𑀧𑀁 𑀓𑀫𑁆𑀫𑀯𑀸𑀘𑀁 𑀪𑀡𑀦𑁆𑀢𑀸 ‘‘𑀅𑀳𑀁 𑀓𑀫𑁆𑀫𑀯𑀸𑀘𑀸𑀓𑀼𑀲𑀮𑁄’’𑀢𑀺 𑀯𑀢𑁆𑀯𑀸 𑀩𑀸𑀮𑀚𑀦𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀁 𑀓𑀫𑁆𑀫𑀯𑀸𑀘𑀁 𑀪𑀡𑀦𑁆𑀢𑀺, 𑀇𑀫𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀡𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺, 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀣𑀸𑀧𑀭𑁂𑀧𑀺 𑀪𑀺𑀓𑁆𑀔𑀽 𑀕𑀸𑀫𑀓𑀸𑀯𑀸𑀲𑀸𑀤𑀻𑀲𑀼 𑀯𑀲𑀦𑁆𑀢𑀸 𑀧𑀡𑁆𑀟𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀅𑀧𑀬𑀺𑀭𑀼𑀧𑀸𑀲𑀫𑀸𑀦𑀸 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀫𑁆𑀧𑀺 𑀯𑀢𑁆𑀣𑀼𑀯𑀺𑀧𑀢𑁆𑀢𑀺𑀫𑁆𑀧𑀺 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀲𑀻𑀫𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀫𑁆𑀧𑀺 𑀯𑀺𑀧𑀢𑁆𑀢𑀺𑀫𑁆𑀧𑀺 𑀢𑀣𑀢𑁄 𑀅𑀚𑀸𑀦𑀦𑁆𑀢𑀸 𑀩𑀳𑀯𑁄 𑀲𑀺𑀲𑁆𑀲𑁂 𑀞𑀧𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀓𑀭𑁄𑀦𑁆𑀢𑀸 𑀧𑀭𑀺𑀲𑀁 𑀯𑀟𑁆𑀠𑀸𑀧𑁂𑀦𑁆𑀢𑀺, 𑀢𑁂𑀧𑀺 𑀪𑀕𑀯𑀢𑁄 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀆𑀡𑀁 𑀓𑀭𑁄𑀦𑁆𑀢𑁂𑀳𑀺 𑀮𑀚𑁆𑀚𑀻𑀧𑁂𑀲𑀮𑁂𑀳𑀺 𑀩𑀳𑀼𑀲𑁆𑀲𑀼𑀢𑁂𑀳𑀺 𑀲𑀺𑀓𑁆𑀔𑀸𑀓𑀸𑀫𑁂𑀳𑀺 𑀲𑀧𑁆𑀧𑀼𑀭𑀺𑀲𑀪𑀺𑀓𑁆𑀔𑀽𑀳𑀺 𑀏𑀯𑀭𑀽𑀧𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀳𑀸𑀬𑀓𑁂𑀳𑀺 𑀉𑀧𑀢𑁆𑀣𑀫𑁆𑀪𑀓𑁂𑀳𑀺 𑀏𑀓𑀲𑀫𑁆𑀪𑁄𑀕𑀲𑀁𑀯𑀸𑀲𑀓𑀭𑁂𑀳𑀺 𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀸𑀦𑀺 𑀪𑀺𑀓𑁆𑀔𑀽 𑁋

‘‘𑀘-𑀓𑀸𑀭𑀦𑁆𑀢𑀁 𑀲-𑀓𑀸𑀭𑀦𑁆𑀢𑀁, 𑀢-𑀓𑀸𑀭𑀦𑁆𑀢𑀲𑀫𑀁 𑀯𑀤𑁂;

𑀜-𑀓𑀸𑀭𑀦𑁆𑀢𑀁 𑀮-𑀓𑀸𑀭𑀦𑁆𑀢𑀁, 𑀦-𑀓𑀸𑀭𑀦𑁆𑀢𑀲𑀫𑀁 𑀯𑀤𑁂’’𑀢𑀺. 𑁋

𑀇𑀫𑀁 𑀲𑀺𑀮𑁄𑀓𑀁 𑀉𑀧𑀦𑀺𑀲𑁆𑀲𑀸𑀬 𑀲𑀭𑀡𑀕𑀫𑀦𑁂𑀧𑀺 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀧𑀸𑀞𑀁 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀧𑀞𑀦𑁆𑀢𑀺. 𑀓𑀫𑁆𑀫𑀯𑀸𑀘𑀸𑀬𑀫𑁆𑀧𑀺 ‘‘𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺𑀧𑀸𑀞𑀁 ‘‘𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀞𑀦𑁆𑀢𑀺. 𑀏𑀢𑁆𑀣 𑀬𑀼𑀢𑁆𑀢𑀺𑀢𑁄𑀧𑀺 𑀆𑀕𑀫𑀢𑁄𑀧𑀺 𑀓𑀸𑀭𑀡𑀁 𑀘𑀺𑀦𑁆𑀢𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀬𑀼𑀢𑁆𑀢𑀺𑀘𑀺𑀦𑁆𑀢𑀸 𑁋 ‘‘𑀘-𑀓𑀸𑀭𑀦𑁆𑀢𑀁 𑀲-𑀓𑀸𑀭𑀦𑁆𑀢𑀁, 𑀢-𑀓𑀸𑀭𑀦𑁆𑀢𑀲𑀫𑀁 𑀯𑀤𑁂’’𑀢𑀺 𑀏𑀢𑁆𑀣 𑀘-𑀓𑀸𑀭𑁄 𑀢𑀸𑀮𑀼𑀚𑁄, 𑀢-𑀓𑀸𑀭𑁄 𑀤𑀦𑁆𑀢𑀚𑁄, 𑀏𑀯𑀫𑁂𑀢𑁂 𑀅𑀓𑁆𑀔𑀭𑀸 𑀞𑀸𑀦𑀢𑁄𑀧𑀺 𑀅𑀲𑀫𑀸𑀦𑀸. 𑀘-𑀓𑀸𑀭𑁄 𑀚𑀺𑀯𑁆𑀳𑀸𑀫𑀚𑁆𑀛𑀓𑀭𑀡𑁄, 𑀢-𑀓𑀸𑀭𑁄 𑀚𑀺𑀯𑁆𑀳𑀕𑁆𑀕𑀓𑀭𑀡𑁄, 𑀏𑀯𑀁 𑀓𑀭𑀡𑀢𑁄𑀧𑀺 𑀅𑀲𑀫𑀸𑀦𑀸. 𑀘-𑀓𑀸𑀭𑁄 𑀤𑀼𑀢𑀺𑀬𑀯𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁄, 𑀢-𑀓𑀸𑀭𑁄 𑀘𑀢𑀼𑀢𑁆𑀣𑀯𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁄, 𑀏𑀯𑀁 𑀯𑀕𑁆𑀕𑀢𑁄𑀧𑀺 𑀅𑀲𑀫𑀸𑀦𑀸. 𑀲𑀁𑀬𑁄𑀕𑀓𑁆𑀔𑀭𑀯𑀲𑁂𑀦 𑀦 𑀧𑀼𑀩𑁆𑀩𑀓𑁆𑀔𑀭𑀸 𑀲𑀼𑀢𑀺𑀁 𑀮𑀪𑀦𑁆𑀢𑀸 𑀲𑀭𑀯𑀺𑀲𑁂𑀲𑀁 𑀧𑀸𑀧𑀼𑀡𑀦𑁆𑀢𑀺, 𑀢𑁂𑀦𑁂𑀯 𑀘-𑀓𑀸𑀭𑁂𑀦 𑀲𑀤𑁆𑀤𑀲𑀢𑁆𑀣𑀓𑀸𑀭𑀸𑀘𑀭𑀺𑀬𑀸 ‘‘𑀲𑀁𑀬𑁄𑀕𑁂 𑀧𑀭𑁂 𑀭𑀲𑁆𑀲𑀢𑁆𑀢’’𑀦𑁆𑀢𑀺 𑀘 ‘‘𑀲𑀁𑀬𑁄𑀕𑀧𑀼𑀩𑁆𑀩𑀸 𑀏-𑀓𑀸𑀭𑁄-𑀓𑀸𑀭𑀸 𑀭𑀲𑁆𑀲𑀸𑀇𑀯 𑀯𑀢𑁆𑀢𑀩𑁆𑀩𑀸’’𑀢𑀺 𑀘 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀣𑀁 𑀅𑀲𑀫𑀸𑀦𑀝𑁆𑀞𑀸𑀦𑀺𑀓𑁂𑀦 𑀅𑀲𑀫𑀸𑀦𑀓𑀭𑀡𑁂𑀦 𑀅𑀲𑀫𑀸𑀦𑀯𑀕𑁆𑀕𑁂𑀦 𑀲𑀁𑀬𑁄𑀕𑀓𑁆𑀔𑀭𑁂𑀦 𑀮𑀤𑁆𑀥𑀲𑀼𑀢𑀺𑀓𑀸 𑀅𑀓𑁆𑀔𑀭𑀸 𑀢𑀢𑁄 𑀅𑀜𑁆𑀜𑁂𑀦 𑀅𑀲𑀫𑀸𑀦𑀝𑁆𑀞𑀸𑀦𑀺𑀓𑁂𑀦 𑀅𑀲𑀫𑀸𑀦𑀓𑀭𑀡𑁂𑀦 𑀅𑀲𑀫𑀸𑀦𑀯𑀕𑁆𑀕𑁂𑀦 𑀲𑀁𑀬𑁄𑀕𑀓𑁆𑀔𑀭𑁂𑀦 𑀮𑀤𑁆𑀥𑀲𑀫𑀸𑀦𑀲𑀼𑀢𑀺𑀓𑀸 𑀪𑀯𑁂𑀬𑁆𑀬𑀼𑀁. 𑀦 𑀓𑁂𑀯𑀮𑀜𑁆𑀘 𑀏𑀢𑁂 𑀅𑀓𑁆𑀔𑀭𑀸 𑀅𑀲𑀫𑀸𑀦𑀝𑁆𑀞𑀸𑀦𑀺𑀓𑀸 𑀅𑀲𑀫𑀸𑀦𑀓𑀭𑀡𑀸 𑀅𑀲𑀫𑀸𑀦𑀯𑀕𑁆𑀕𑀸𑀯 𑀳𑁄𑀦𑁆𑀢𑀺, 𑀅𑀣 𑀔𑁄 𑀅𑀦𑀸𑀲𑀦𑁆𑀦𑀝𑁆𑀞𑀸𑀦𑀺𑀓𑀸 𑀅𑀦𑀸𑀲𑀦𑁆𑀦𑀓𑀭𑀡𑀸 𑀅𑀦𑀸𑀲𑀦𑁆𑀦𑀯𑀕𑁆𑀕𑀸 𑀘 𑀳𑁄𑀦𑁆𑀢𑀺. 𑀬𑀣𑀸 𑀘 𑀯𑀻𑀡𑀁 𑀯𑀸𑀤𑁂𑀦𑁆𑀢𑀸𑀦𑀁 𑀤𑀽𑀭𑁂 𑀢𑀦𑁆𑀢𑀺𑀲𑁆𑀲𑀭𑁂𑀦 𑀢𑀢𑁄 𑀤𑀽𑀭𑁂 𑀢𑀦𑁆𑀢𑀺𑀲𑁆𑀲𑀭𑁄 𑀅𑀲𑀫𑀸𑀦𑁄 𑀳𑁄𑀢𑀺, 𑀏𑀯𑀁 𑀤𑀽𑀭𑀝𑁆𑀞𑀸𑀦𑀺𑀓𑁂𑀦 𑀅𑀓𑁆𑀔𑀭𑁂𑀦 𑀤𑀽𑀭𑀓𑀭𑀡𑁂𑀦 𑀢𑀢𑁄 𑀤𑀽𑀭𑀝𑁆𑀞𑀸𑀦𑀺𑀓𑁄 𑀤𑀽𑀭𑀓𑀭𑀡𑁄 𑀲𑀫𑀸𑀦𑀲𑀼𑀢𑀺𑀓𑁄 𑀓𑀣𑀁 𑀪𑀯𑁂𑀬𑁆𑀬, 𑀯𑀕𑁆𑀕𑀓𑁆𑀔𑀭𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀯𑀲𑁂𑀦 𑀅𑀲𑀫𑀸𑀦𑀲𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 ‘‘𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂’’𑀢𑀺 𑀲𑀼𑀢𑁆𑀢𑁂 𑀦𑀺𑀕𑁆𑀕𑀳𑀺𑀢𑀲𑁆𑀲 𑀯𑀕𑁆𑀕𑀦𑁆𑀢𑀓𑀭𑀡𑁂 𑀲𑀢𑀺 𑀅𑀜𑁆𑀜𑀯𑀕𑁆𑀕𑀲𑁆𑀫𑀺𑀁 𑀧𑀭𑁂 𑀅𑀜𑁆𑀜𑀯𑀕𑁆𑀕𑀦𑁆𑀢𑀁 𑀦 𑀧𑀸𑀧𑀼𑀡𑀸𑀢𑀺, ‘‘𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀢𑀢𑀺𑀬𑀧𑀞𑀫𑀸’’𑀢𑀺 𑀲𑀼𑀢𑁆𑀢𑁂𑀦 𑀘 𑀅𑀲𑀤𑀺𑀲𑀤𑁆𑀯𑁂𑀪𑀸𑀯𑀓𑀭𑀡𑁂 𑀅𑀜𑁆𑀜𑀯𑀕𑁆𑀕𑁂 𑀅𑀜𑁆𑀜𑀯𑀕𑁆𑀕𑀤𑁆𑀯𑁂𑀪𑀸𑀯𑁄 𑀦 𑀳𑁄𑀢𑀺.

𑀬𑀤𑀺 𑀘 𑀘-𑀓𑀸𑀭𑀦𑁆𑀢𑀓𑁆𑀔𑀭𑁄 𑀢-𑀓𑀸𑀭𑀦𑁆𑀢𑀓𑁆𑀔𑀭𑁂𑀦 𑀲𑀫𑀸𑀦𑀲𑀼𑀢𑀺𑀓𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀓𑀺𑀁 𑀘-𑀓𑀸𑀭𑀦𑁆𑀢𑀓𑁆𑀔𑀭𑀮𑁂𑀔𑀦𑁂𑀦 𑀲𑀩𑁆𑀩𑀢𑁆𑀣 𑀢-𑀓𑀸𑀭𑀦𑁆𑀢𑀫𑁂𑀯 𑀮𑀺𑀔𑁂𑀬𑁆𑀬, 𑀢𑀣𑀸 𑀧𑀦 𑀅𑀮𑀺𑀔𑀺𑀢𑁆𑀯𑀸 𑀧𑀬𑁄𑀕𑀸𑀦𑀼𑀭𑀽𑀧𑀁 𑀧𑀞𑀫𑀓𑁆𑀔𑀭𑀲𑁆𑀲 𑀲𑀤𑀺𑀲𑀤𑁆𑀯𑁂𑀪𑀸𑀯𑀝𑁆𑀞𑀸𑀦𑁂 ‘‘𑀓𑀘𑁆𑀘𑁄 𑀓𑀘𑁆𑀘𑀸𑀬𑀦𑁄’’𑀢𑀺, 𑀅𑀲𑀤𑀺𑀲𑀤𑁆𑀯𑁂𑀪𑀸𑀯𑀝𑁆𑀞𑀸𑀦𑁂 ‘‘𑀯𑀘𑁆𑀙𑁄 𑀯𑀘𑁆𑀙𑀸𑀬𑀦𑁄’’𑀢𑀺 𑀢𑀢𑀺𑀬𑀓𑁆𑀔𑀭𑀲𑁆𑀲 𑀲𑀤𑀺𑀲𑀤𑁆𑀯𑁂𑀪𑀸𑀯𑀝𑁆𑀞𑀸𑀦𑁂 ‘‘𑀫𑀚𑁆𑀚𑀁 𑀲𑀫𑁆𑀫𑀚𑁆𑀚’’𑀦𑁆𑀢𑀺, 𑀅𑀲𑀤𑀺𑀲𑀤𑁆𑀯𑁂𑀪𑀸𑀯𑀝𑁆𑀞𑀸𑀦𑁂 ‘‘𑀉𑀧𑀚𑁆𑀛𑀸 𑀉𑀧𑀚𑁆𑀛𑀸𑀬𑁄’’𑀢𑀺 𑀲𑀫𑀸𑀦𑀝𑁆𑀞𑀸𑀦𑀲𑀫𑀸𑀦𑀓𑀭𑀡𑀲𑀫𑀸𑀦𑀯𑀕𑁆𑀕𑀓𑁆𑀔𑀭𑀸𑀦𑀫𑁂𑀯 𑀤𑁆𑀯𑁂𑀪𑀸𑀯𑁄 𑀮𑀺𑀔𑀻𑀬𑀢𑀺, 𑀦𑁄 𑀇𑀢𑀭𑁂𑀲𑀁, 𑀢𑀲𑁆𑀫𑀸 𑀧𑀬𑁄𑀕𑀸𑀦𑀼𑀭𑀽𑀧𑀁 𑀘-𑀓𑀸𑀭𑀦𑁆𑀢 𑀚-𑀓𑀸𑀭𑀦𑁆𑀢𑀝𑁆𑀞𑀸𑀦𑁂𑀲𑀼 𑀲𑀓𑀯𑀕𑁆𑀕𑀲𑀼𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀅𑀜𑁆𑀜𑀯𑀕𑁆𑀕𑀲𑀼𑀢𑀺𑀯𑀲𑁂𑀦. 𑀲-𑀓𑀸𑀭𑀦𑁆𑀢𑁂 𑀧𑀦 𑀲-𑀓𑀸𑀭𑀲𑁆𑀲 𑀢-𑀓𑀸𑀭𑁂𑀦 𑀲𑀫𑀸𑀦𑀝𑁆𑀞𑀸𑀦𑀺𑀓𑀢𑁆𑀢𑀸 𑀲𑀫𑀸𑀦𑀓𑀭𑀡𑀢𑁆𑀢𑀸 𑀘 𑀯𑀕𑁆𑀕𑀅𑀯𑀕𑁆𑀕𑀯𑀲𑁂𑀦 𑀪𑀺𑀦𑁆𑀦𑁂𑀧𑀺 𑀅𑀯𑀕𑁆𑀕𑀓𑁆𑀔𑀭𑀸𑀦𑀁 𑀯𑀕𑁆𑀕𑀓𑁆𑀔𑀭𑁂𑀳𑀺 𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀯𑀕𑁆𑀕𑀓𑁆𑀔𑀭𑀸𑀦𑀁 𑀯𑀕𑁆𑀕𑀓𑁆𑀔𑀭𑀸𑀦𑀁 𑀯𑀺𑀬 𑀯𑀺𑀲𑀼𑀁 𑀲𑀼𑀢𑀺𑀬𑀸 𑀅𑀪𑀸𑀯𑀢𑁄 𑀘 𑀲-𑀓𑀸𑀭𑀦𑁆𑀢𑀲𑁆𑀲 𑀢-𑀓𑀸𑀭𑀦𑁆𑀢𑀪𑀡𑀦𑀁 𑀬𑀼𑀢𑁆𑀢𑀁 𑀲𑀺𑀬𑀸. 𑀲-𑀓𑀸𑀭𑁄𑀧𑀺 𑀳𑀺 𑀤𑀦𑁆𑀢𑀚𑁄, 𑀢-𑀓𑀸𑀭𑁄𑀧𑀺, 𑀲-𑀓𑀸𑀭𑁄𑀧𑀺 𑀚𑀺𑀯𑁆𑀳𑀕𑁆𑀕𑀓𑀭𑀡𑁄, 𑀢-𑀓𑀸𑀭𑁄𑀧𑀺, 𑀢𑀲𑁆𑀫𑀸 𑀲𑀫𑀸𑀦𑀝𑁆𑀞𑀸𑀦𑀺𑀓𑀸𑀦𑀁 𑀲𑀫𑀸𑀦𑀓𑀭𑀡𑀸𑀦𑀁 𑀅𑀓𑁆𑀔𑀭𑀸𑀦𑀁 𑀲𑀫𑀸𑀦𑀲𑀼𑀢𑀺𑀪𑀸𑀯𑁄 𑀬𑀼𑀢𑁆𑀢𑁄. 𑀜-𑀓𑀸𑀭𑀦𑁆𑀢 𑀮-𑀓𑀸𑀭𑀦𑁆𑀢𑀸𑀦𑀁 𑀦-𑀓𑀸𑀭𑀦𑁆𑀢𑀪𑀡𑀦𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀜-𑀓𑀸𑀭𑀦𑁆𑀢 𑀦-𑀓𑀸𑀭𑀦𑁆𑀢𑀸𑀦𑀁 𑀅𑀲𑀫𑀸𑀦𑀲𑀼𑀢𑀺𑀪𑀸𑀯𑁄 𑀮-𑀓𑀸𑀭𑀦𑁆𑀢 𑀦-𑀓𑀸𑀭𑀦𑁆𑀢𑀸𑀦𑀁 𑀲𑀫𑀸𑀦𑀲𑀼𑀢𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄𑀢𑀺. 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀺𑀘𑀺𑀦𑁆𑀢𑀸.

𑀆𑀕𑀫𑀘𑀺𑀦𑁆𑀢𑀸 𑀧𑀦 𑀏𑀯𑀁 𑀓𑀸𑀢𑀩𑁆𑀩𑀸 𑁋

‘‘𑀘-𑀓𑀸𑀭𑀦𑁆𑀢𑀁 𑀲-𑀓𑀸𑀭𑀦𑁆𑀢𑀁, 𑀢-𑀓𑀸𑀭𑀦𑁆𑀢𑀲𑀫𑀁 𑀯𑀤𑁂;

𑀜-𑀓𑀸𑀭𑀦𑁆𑀢𑀁 𑀮-𑀓𑀸𑀭𑀦𑁆𑀢𑀁, 𑀦-𑀓𑀸𑀭𑀦𑁆𑀢𑀲𑀫𑀁 𑀯𑀤𑁂’’𑀢𑀺. 𑁋

𑀅𑀬𑀁 𑀲𑀺𑀮𑁄𑀓𑁄 𑀓𑀼𑀢𑁄 𑀧𑀪𑀯𑁄, 𑀓𑀢𑁆𑀣 𑀆𑀕𑀢𑁄, 𑀓𑁂𑀦 𑀓𑀸𑀭𑀺𑀢𑁄𑀢𑀺? 𑀢𑀢𑁆𑀣 𑀓𑀼𑀢𑁄 𑀧𑀪𑀯𑁄𑀢𑀺 𑀪𑀕𑀯𑀦𑁆𑀢𑀲𑁆𑀫𑀸 𑀯𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀸 𑀧𑀪𑀯𑁄. 𑀓𑀢𑁆𑀣 𑀆𑀕𑀢𑁄𑀢𑀺 𑀯𑀺𑀦𑀬𑁂 𑀯𑀸 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬 𑀯𑀸 𑀝𑀻𑀓𑀸𑀤𑀻𑀲𑀼 𑀯𑀸 𑀆𑀕𑀢𑁄. 𑀓𑁂𑀦 𑀓𑀸𑀭𑀺𑀢𑁄𑀢𑀺 𑀦𑁂𑀢𑁆𑀢𑀺𑀦𑀺𑀭𑀼𑀢𑁆𑀢𑀺𑀧𑁂𑀝𑀓𑁄𑀧𑀤𑁂𑀲𑀓𑀘𑁆𑀘𑀸𑀬𑀦𑀧𑁆𑀧𑀓𑀭𑀡𑀓𑀸𑀭𑀓𑁂𑀦 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁂𑀦 𑀯𑀸 𑀫𑀼𑀔𑀫𑀢𑁆𑀢𑀤𑀻𑀧𑀦𑀺𑀓𑀸𑀭𑀓𑁂𑀦 𑀯𑀚𑀺𑀭𑀩𑀼𑀤𑁆𑀥𑀸𑀘𑀭𑀺𑀬𑁂𑀦 𑀯𑀸 𑀧𑀤𑀭𑀽𑀧𑀲𑀺𑀤𑁆𑀥𑀺𑀓𑀸𑀭𑀓𑁂𑀦 𑀩𑀼𑀤𑁆𑀥𑀧𑀺𑀬𑀸𑀘𑀭𑀺𑀬𑁂𑀦 𑀯𑀸 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑀓𑀸𑀭𑀓𑁂𑀦 𑀅𑀕𑁆𑀕𑀯𑀁𑀲𑀸𑀘𑀭𑀺𑀬𑁂𑀦 𑀯𑀸 𑀢𑀤𑀜𑁆𑀜𑀲𑀢𑁆𑀣𑀓𑀸𑀭𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀯𑀸 𑀓𑀸𑀭𑀺𑀢𑁄𑀢𑀺 𑀏𑀯𑀁 𑀆𑀕𑀫𑀘𑀺𑀦𑁆𑀢𑀸𑀬𑀁 𑀲𑀢𑀺 𑀅𑀬𑀁 𑀲𑀺𑀮𑁄𑀓𑁄 𑀪𑀕𑀯𑀦𑁆𑀢𑀲𑁆𑀫𑀸 𑀧𑀪𑀯𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀸𑀢𑀺 𑀦 𑀧𑀜𑁆𑀜𑀸𑀬𑀢𑀺. ‘‘𑀯𑀺𑀦𑀬𑁂 𑀯𑀸 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬 𑀯𑀸 𑀝𑀻𑀓𑀸𑀲𑀼 𑀯𑀸 𑀆𑀕𑀢𑁄’’𑀢𑀺 𑀳𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑀸𑀤𑀻𑀳𑀺 𑀲𑀤𑁆𑀤𑀲𑀢𑁆𑀣𑀓𑀸𑀭𑀓𑁂𑀳𑀺 𑀆𑀘𑀭𑀺𑀬𑁂𑀳𑀺 𑀓𑀢𑁄𑀢𑀺𑀧𑀺 𑀦 𑀤𑀺𑀲𑁆𑀲𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀇𑀤𑀁 𑀯𑀘𑀦𑀁 𑀆𑀧𑀚𑁆𑀚𑀢𑀺.

𑀏𑀯𑀁 𑀧𑀦 𑀫𑀬𑀁 𑀘𑀺𑀦𑁆𑀢𑀬𑀺𑀫𑁆𑀳𑀸 𑁋 𑀭𑀸𑀫𑀜𑁆𑀜𑀤𑁂𑀲𑁂 𑀓𑀺𑀭 𑀲𑀓𑀪𑀸𑀲𑀸𑀬𑀁 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀸 𑀦 𑀲𑀦𑁆𑀢𑀺, 𑀢𑁂𑀦𑁂𑀯 𑀭𑀸𑀫𑀜𑁆𑀜𑀤𑁂𑀲𑀺𑀬𑀸 𑀪𑀺𑀓𑁆𑀔𑀽 ‘‘𑀲𑀘𑁆𑀘’’𑀇𑀢𑀺 𑀇𑀫𑀁 𑀧𑀸𑀞𑀁 𑀯𑀤𑀦𑁆𑀢𑀸 ‘‘𑀲𑀢𑁆𑀘’’𑀇𑀢𑀺 𑀯𑀤𑀦𑁆𑀢𑀺, ‘‘𑀧𑀜𑁆𑀘𑀗𑁆𑀕’’𑀇𑀢𑀺 𑀧𑀸𑀞𑀁 𑀯𑀤𑀦𑁆𑀢𑀸 ‘‘𑀧𑀦𑁆𑀘𑀗𑁆𑀕’’𑀇𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀅𑀯𑀺𑀚𑁆𑀚𑀫𑀸𑀦𑀁 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀁 𑀬𑀣𑀸𑀧𑀸𑀞𑀁 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀅𑀬𑀁 𑀲𑀺𑀮𑁄𑀓𑁄 𑀓𑀸𑀭𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀭𑀫𑁆𑀫𑀪𑀸𑀲𑀸𑀬 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀧𑀤𑀸𑀦𑀁 𑀲𑀼𑀢𑀺𑀯𑀺𑀲𑁂𑀲𑀯𑀲𑁂𑀦 𑀯𑀺𑀲𑀼𑀁 𑀧𑀜𑁆𑀜𑀸𑀬𑀦𑀢𑁄 𑀫𑀭𑀫𑁆𑀫𑀤𑁂𑀲𑀺𑀬𑀸 𑀪𑀺𑀓𑁆𑀔𑀽 𑀢𑀁 𑀲𑀺𑀮𑁄𑀓𑀁 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀸 ‘‘𑀧𑀞𑀫𑀁 𑀉𑀧𑀢𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀸 ‘‘𑀳𑁂𑀢𑀼𑀧𑀢𑁆𑀘𑀬𑁄 𑀆𑀭𑀫𑁆𑀫𑀡𑀧𑀢𑁆𑀘𑀬𑁄’’𑀢𑀺 𑀯𑀸 𑀯𑀢𑁆𑀢𑀼𑀁 𑀦 𑀅𑀭𑀳𑀦𑁆𑀢𑀺. 𑀭𑀸𑀫𑀜𑁆𑀜𑀤𑁂𑀲𑀺𑀬𑀸𑀧𑀺 𑀲𑀓𑀪𑀸𑀲𑀸𑀬 𑀯𑀺𑀲𑀼𑀁 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀧𑀤𑀁 𑀲𑀓𑀪𑀸𑀲𑀸𑀓𑀣𑀦𑀓𑀸𑀮𑁂𑀬𑁂𑀯 𑀪𑀸𑀲𑀸𑀦𑀼𑀭𑀽𑀧𑀁 𑀢-𑀓𑀸𑀭𑀦𑁆𑀢 𑀦-𑀓𑀸𑀭𑀦𑁆𑀢𑀪𑀸𑀯𑁂𑀦 𑀓𑀣𑁂𑀢𑀩𑁆𑀩𑀁, 𑀫𑀸𑀕𑀥𑀪𑀸𑀲𑀸𑀓𑀣𑀦𑀓𑀸𑀮𑁂 𑀧𑀦 𑀫𑀸𑀕𑀥𑀪𑀸𑀲𑀸𑀬 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀺𑀲𑀼𑀁 𑀧𑀬𑁄𑀕𑀤𑀲𑁆𑀲𑀦𑀢𑁄 𑀫𑀸𑀕𑀥𑀪𑀸𑀲𑀸𑀦𑀼𑀭𑀽𑀧𑀁 𑀘-𑀓𑀸𑀭𑀦𑁆𑀢 𑀜-𑀓𑀸𑀭𑀦𑁆𑀢𑀧𑀤𑀸𑀦𑀁 𑀯𑀺𑀲𑀼𑀁 𑀲𑀼𑀢𑀺𑀯𑀲𑁂𑀦 𑀬𑀣𑀸𑀧𑀸𑀞𑀫𑁂𑀯 𑀓𑀣𑁂𑀢𑀩𑁆𑀩𑀸𑀦𑀻𑀢𑀺 𑀦𑁄 𑀫𑀢𑀺. 𑀅𑀬𑀫𑁂𑀢𑁆𑀣 𑀆𑀕𑀫𑀘𑀺𑀦𑁆𑀢𑀸.

𑀚𑀺𑀦𑀲𑀸𑀲𑀦𑀫𑀸𑀭𑀩𑁆𑀪, 𑀓𑀣𑀸𑀬𑀁 𑀓𑀣𑀺𑀢𑀸 𑀫𑀬𑀸;

𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀘𑀺𑀦𑁆𑀢𑀬𑀦𑁆𑀢𑀼, 𑀧𑀡𑁆𑀟𑀺𑀢𑀸 𑀚𑀺𑀦𑀲𑀸𑀯𑀓𑀸.

𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀘𑀺𑀦𑁆𑀢𑀬𑀺𑀢𑁆𑀯𑀸, 𑀬𑀼𑀢𑁆𑀢𑀜𑁆𑀘𑁂 𑀥𑀸𑀭𑀬𑀦𑁆𑀢𑀼 𑀢𑀁;

𑀅𑀬𑀼𑀢𑁆𑀢𑀜𑁆𑀘𑁂 𑀧𑀚𑀳𑀦𑁆𑀢𑀼, 𑀫𑀸𑀦𑀤𑁄𑀲𑀯𑀺𑀯𑀚𑁆𑀚𑀺𑀢𑀸𑀢𑀺.

𑁨𑁫𑁪. 𑀏𑀯𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀞𑀸𑀦𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. ‘‘𑀏𑀢𑀭𑀳𑀺 𑀲𑀘𑁂𑀧𑀺 𑀲𑀸𑀫𑀡𑁂𑀭𑁄’’𑀢𑀺𑀆𑀤𑀻𑀲𑀼 𑀩𑀼𑀤𑁆𑀥𑀸𑀤𑀻𑀦𑀁 𑀅𑀯𑀡𑁆𑀡𑀪𑀸𑀲𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀸𑀤𑀺𑀁 𑀓𑀧𑁆𑀧𑀺𑀬𑀸𑀤𑀺𑀪𑀸𑀯𑁂𑀦 𑀤𑀻𑀧𑀦𑀫𑁆𑀧𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀁𑀬𑁂𑀯 𑀧𑀯𑀺𑀲𑀢𑀺, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩𑁄’’𑀢𑀺. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀩𑀼𑀤𑁆𑀥𑀯𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀻𑀢𑀢𑁄 𑀕𑀡𑁆𑀳𑀦𑁆𑀢𑁄, 𑀲𑁄 𑀏𑀯 ‘‘𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀁 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑀸𑀳𑀲𑁆𑀲 𑀲𑀸𑀫𑀡𑁂𑀭𑀸𑀦𑀁 𑀮𑀺𑀗𑁆𑀕𑀦𑀸𑀲𑀦𑀸𑀬 𑀓𑀸𑀭𑀡𑀢𑁆𑀢𑁂𑀦 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀬 𑀏𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀻𑀢𑀺 𑀲𑀳𑀲𑁂𑀬𑁆𑀬𑀧𑀝𑀺𑀕𑁆𑀕𑀳𑀡𑀸𑀤𑀺. 𑀲𑁄𑀭𑀢𑁄𑀢𑀺 𑀲𑀼𑀪𑁂 𑀭𑀢𑁄, 𑀲𑀼𑀝𑁆𑀞𑀼 𑀑𑀭𑀢𑁄𑀢𑀺 𑀯𑀸 𑀲𑁄𑀭𑀢𑁄. 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀦𑀻𑀘𑀯𑀼𑀢𑁆𑀢𑀺.

𑀢𑀲𑁆𑀲𑀸𑀧𑀺 𑀤𑀸𑀢𑀩𑁆𑀩𑁄𑀢𑀺 𑀯𑀺𑀚𑁆𑀚𑀫𑀸𑀦𑀁 𑀫𑀼𑀔𑀭𑀸𑀤𑀺𑀪𑀸𑀯𑀁 𑀦𑀺𑀲𑁆𑀲𑀸𑀬 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀧𑀺 𑀤𑁂𑀲𑀺𑀢𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀔𑀼𑀁𑀲𑀦𑀸𑀤𑀺𑀢𑁄 𑀅𑀦𑁄𑀭𑀫𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑁄𑀯. 𑀑𑀭𑀫𑀦𑁆𑀢𑀲𑁆𑀲 𑀧𑀦 𑀔𑀫𑀸𑀧𑁂𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑁄. 𑀩𑁆𑀭𑀳𑁆𑀫𑀤𑀡𑁆𑀟𑀲𑁆𑀲 𑀤𑀸𑀦𑀦𑁆𑀢𑀺 𑀔𑀭𑀤𑀡𑁆𑀟𑀲𑁆𑀲 𑀉𑀓𑁆𑀓𑀝𑁆𑀞𑀤𑀡𑁆𑀟𑀲𑁆𑀲 𑀤𑀸𑀦𑀁. 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑁂 𑀳𑀺 𑀓𑀢𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺, 𑀤𑀺𑀦𑁆𑀦𑀩𑁆𑀭𑀳𑁆𑀫𑀤𑀡𑁆𑀟𑁂 𑀧𑀦 𑀢𑀲𑁆𑀫𑀺𑀁 𑀲𑀤𑁆𑀥𑀺𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀓𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀦𑁂𑀯 𑀯𑀢𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀆𑀮𑀸𑀧𑀲𑀮𑁆𑀮𑀸𑀧𑀫𑀢𑁆𑀢𑀲𑁆𑀲𑀧𑀺 𑀦-𑀓𑀸𑀭𑁂𑀦 𑀧𑀝𑀺𑀓𑁆𑀔𑀺𑀢𑀢𑁆𑀢𑀸. 𑀢𑀜𑁆𑀳𑀺 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺, 𑀏𑀯𑀁 𑀯𑀺𑀯𑀚𑁆𑀚𑁂𑀢𑀩𑁆𑀩𑀁 𑀦𑀺𑀫𑁆𑀫𑀤𑀦𑀓𑀭𑀡𑀢𑁆𑀣𑀫𑁂𑀯 𑀢𑀲𑁆𑀲 𑀤𑀡𑁆𑀟𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑁂𑀦𑁂𑀯 𑀙𑀦𑁆𑀦𑀢𑁆𑀣𑁂𑀭𑁄𑀧𑀺 𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁄𑀧𑀺 𑀅𑀪𑀸𑀬𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀡𑁆𑀟𑁂 𑀤𑀺𑀦𑁆𑀦𑁂 ‘‘𑀲𑀗𑁆𑀖𑁂𑀦𑀸𑀳𑀁 𑀲𑀩𑁆𑀩𑀣𑀸 𑀯𑀺𑀯𑀚𑁆𑀚𑀺𑀢𑁄’’𑀢𑀺 𑀫𑀼𑀘𑁆𑀙𑀺𑀢𑁄 𑀧𑀧𑀢𑀺. 𑀬𑁄 𑀧𑀦 𑀩𑁆𑀭𑀳𑁆𑀫𑀤𑀡𑁆𑀟𑀓𑀢𑁂𑀦 𑀲𑀤𑁆𑀥𑀺𑀁 𑀜𑀢𑁆𑀯𑀸 𑀲𑀁𑀲𑀝𑁆𑀞𑁄 𑀅𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀩𑁆𑀭𑀳𑁆𑀫𑀤𑀡𑁆𑀟𑀯𑀺𑀥𑀸𑀦𑀲𑁆𑀲 𑀦𑀺𑀭𑀢𑁆𑀣𑀓𑀢𑀸𑀧𑀲𑀗𑁆𑀕𑀢𑁄. 𑀢𑁂𑀦𑀸𑀢𑀺 𑀩𑁆𑀭𑀳𑁆𑀫𑀤𑀡𑁆𑀟𑀓𑀢𑁂𑀦. 𑀬𑀣𑀸 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁂𑀳𑀺, 𑀏𑀯𑀫𑁂𑀯 𑀢𑀢𑁄 𑀅𑀥𑀺𑀓𑀫𑁆𑀧𑀺 𑀲𑀗𑁆𑀖𑀁 𑀆𑀭𑀸𑀥𑁂𑀦𑁆𑀢𑁂𑀦 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀢𑀜𑁆𑀘 ‘‘𑀲𑁄𑀭𑀢𑁄 𑀦𑀺𑀯𑀸𑀢𑀯𑀼𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀫𑁂𑀯. 𑀢𑁂𑀦𑀸𑀳 ‘‘𑀲𑀫𑁆𑀫𑀸 𑀯𑀢𑁆𑀢𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑁄’’𑀢𑀺. 𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀬, 𑀜𑀸𑀡𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸.

𑀬𑀁 𑀢𑀁 𑀪𑀕𑀯𑀢𑀸 𑀅𑀯𑀦𑁆𑀤𑀺𑀬𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀡𑁆𑀟𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀺𑀲𑁂𑀲𑀢𑁄 𑀅𑀦𑀼𑀜𑁆𑀜𑀸𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄’’𑀢𑀺𑀆𑀤𑀺 𑀧𑀸𑀴𑀺𑀉𑀤𑁆𑀥𑀝𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀻𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀲𑀸𑀫𑀜𑁆𑀜𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀳𑁄𑀢𑀺. 𑀯𑀺𑀲𑁂𑀲𑀩𑁆𑀬𑀢𑀺𑀭𑁂𑀓𑁂𑀦 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑀤𑀜𑁆𑀜𑀢𑁆𑀣 𑀅𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀺𑀲𑁂𑀲𑀦𑀺𑀲𑁆𑀲𑀺𑀢𑀁 𑀯𑀺𑀬 𑀯𑁄𑀳𑀭𑀻𑀬𑀢𑀺. ‘‘𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡’’𑀦𑁆𑀢𑀺 𑀇𑀫𑀺𑀦𑀸 𑀑𑀲𑀸𑀭𑀡𑀸𑀤𑀺𑀯𑀲𑁂𑀦 𑀕𑀳𑀺𑀢𑀸𑀯𑀲𑁂𑀲𑀸𑀦𑀁 𑀲𑀩𑁆𑀩𑁂𑀲𑀁 𑀅𑀧𑀮𑁄𑀓𑀦𑀓𑀫𑁆𑀫𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺, 𑀇𑀤𑀜𑁆𑀘 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀓𑀫𑁆𑀫𑀸𑀦𑀁 𑀦𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀻𑀦𑀺 𑀯𑀺𑀬 𑀯𑀼𑀢𑁆𑀢𑀸𑀯𑀲𑁂𑀲𑀔𑀦𑁆𑀥𑀸𑀬𑀢𑀦𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑁄𑀧𑀺 𑀓𑀫𑁆𑀫𑀮𑀓𑁆𑀔𑀡𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺 𑀜𑀢𑁆𑀢𑀺𑀓𑀫𑁆𑀫𑀸𑀤𑀻𑀲𑀼𑀧𑀺 𑀓𑀫𑁆𑀫𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁪𑁯𑁫-𑁪𑁯𑁬) 𑀧𑀦 ‘‘𑀓𑀫𑁆𑀫𑀫𑁂𑀯 𑀮𑀓𑁆𑀔𑀡𑀦𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁. 𑀑𑀲𑀸𑀭𑀡𑀦𑀺𑀲𑁆𑀲𑀸𑀭𑀡𑀪𑀡𑁆𑀟𑀼𑀓𑀫𑁆𑀫𑀸𑀤𑀬𑁄 𑀯𑀺𑀬 𑀓𑀫𑁆𑀫𑀜𑁆𑀘 𑀳𑀼𑀢𑁆𑀯𑀸 𑀅𑀜𑁆𑀜𑀜𑁆𑀘 𑀦𑀸𑀫𑀁 𑀦 𑀮𑀪𑀢𑀺, 𑀓𑀫𑁆𑀫𑀫𑁂𑀯 𑀳𑀼𑀢𑁆𑀯𑀸 𑀉𑀧𑀮𑀓𑁆𑀔𑀻𑀬𑀢𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀭𑀺𑀯𑀸𑀭 𑁪𑁯𑁫-𑁪𑁯𑁬) 𑀧𑀦 ‘‘𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡𑀦𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁. 𑀑𑀲𑀸𑀭𑀡𑀦𑀺𑀲𑁆𑀲𑀸𑀭𑀡𑀪𑀡𑁆𑀟𑀼𑀓𑀫𑁆𑀫𑀸𑀤𑀬𑁄 𑀯𑀺𑀬 𑀓𑀫𑁆𑀫𑀜𑁆𑀘 𑀳𑀼𑀢𑁆𑀯𑀸 𑀅𑀜𑁆𑀜𑀜𑁆𑀘 𑀦𑀸𑀫𑀁 𑀦 𑀮𑀪𑀢𑀺, 𑀓𑀫𑁆𑀫𑀫𑁂𑀯 𑀳𑀼𑀢𑁆𑀯𑀸 𑀉𑀧𑀮𑀓𑁆𑀔𑀻𑀬𑀢𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑀁 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬. 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀮𑀓𑁆𑀔𑀡𑀯𑀺𑀫𑀼𑀢𑁆𑀢𑁄 𑀳𑀺 𑀲𑀩𑁆𑀩𑁄 𑀧𑀘𑁆𑀘𑀬𑀯𑀺𑀲𑁂𑀲𑁄 𑀢𑀢𑁆𑀣 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀓𑀭𑀡𑀦𑁆𑀢𑀺 𑀅𑀯𑀦𑁆𑀤𑀺𑀬𑀓𑀫𑁆𑀫𑀲𑁆𑀲 𑀓𑀭𑀡𑀯𑀺𑀥𑀸𑀦𑀁. 𑀦 𑀯𑀦𑁆𑀤𑀺𑀢𑀩𑁆𑀩𑁄𑀢𑀺, 𑀇𑀫𑀺𑀦𑀸 𑀯𑀦𑁆𑀤𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀖𑁂𑀦 𑀓𑀢𑀁 𑀓𑀢𑀺𑀓𑀁 𑀜𑀢𑁆𑀯𑀸 𑀫𑀤𑁆𑀤𑀦𑀁 𑀯𑀺𑀬 𑀳𑀺 𑀲𑀗𑁆𑀖𑀲𑀫𑁆𑀫𑀼𑀢𑀺𑀁 𑀅𑀦𑀸𑀤𑀭𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯 𑀳𑁄𑀢𑀺.

𑁨𑁫𑁫. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺 𑀧𑀦𑁂𑀢𑀁 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀅𑀯𑀦𑁆𑀤𑀺𑀬𑀓𑀫𑁆𑀫𑀲𑁆𑀲 𑀉𑀧𑀮𑀓𑁆𑀔𑀡𑀫𑀢𑁆𑀢𑁂𑀦 𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺 𑀓𑀫𑁆𑀫𑀮𑀓𑁆𑀔𑀡𑀁 𑀮𑀩𑁆𑀪𑀢𑀺 𑀏𑀯. 𑀲𑀮𑀸𑀓𑀤𑀸𑀦𑀝𑁆𑀞𑀸𑀦𑀁 𑀲𑀮𑀸𑀓𑀕𑁆𑀕𑀁 𑀦𑀸𑀫, 𑀬𑀸𑀕𑀼𑀪𑀢𑁆𑀢𑀸𑀦𑀁 𑀪𑀸𑀚𑀦𑀝𑁆𑀞𑀸𑀦𑀸𑀦𑀺 𑀬𑀸𑀕𑀕𑁆𑀕𑀪𑀢𑁆𑀢𑀕𑁆𑀕𑀸𑀦𑀺 𑀦𑀸𑀫. 𑀏𑀢𑁂𑀲𑀼𑀧𑀺 𑀳𑀺 𑀞𑀸𑀦𑁂𑀲𑀼 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀧𑁄𑀲𑀣𑁂 𑀯𑀺𑀬 𑀲𑀦𑁆𑀦𑀺𑀧𑀢𑀺𑀢𑁄, 𑀓𑀫𑁆𑀫𑀜𑁆𑀘 𑀯𑀕𑁆𑀕𑀓𑀫𑁆𑀫𑀁 𑀦 𑀳𑁄𑀢𑀺, ‘‘𑀫𑀬𑀫𑁂𑀢𑀁 𑀦 𑀚𑀸𑀦𑀺𑀫𑁆𑀳𑀸’’𑀢𑀺 𑀧𑀘𑁆𑀙𑀸 𑀔𑀻𑀬𑀦𑁆𑀢𑀸𑀧𑀺 𑀦 𑀳𑁄𑀦𑁆𑀢𑀺, 𑀔𑀡𑁆𑀟𑀲𑀻𑀫𑀸𑀬 𑀧𑀦 𑀓𑀢𑁂 𑀔𑀻𑀬𑀦𑁆𑀢𑀺. 𑀲𑀗𑁆𑀖𑀺𑀓𑀧𑀘𑁆𑀘𑀬𑀜𑁆𑀳𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀤𑀻𑀦𑀁 𑀤𑀸𑀢𑀼𑀁 𑀅𑀧𑀮𑁄𑀓𑁂𑀦𑁆𑀢𑁂𑀳𑀺 𑀉𑀧𑀘𑀸𑀭𑀲𑀻𑀫𑀝𑁆𑀞𑀸𑀦𑀁 𑀲𑀩𑁆𑀩𑁂𑀲𑀁 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀬𑁄 𑀧𑀦 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀥𑀫𑁆𑀫𑀺𑀓𑀁 𑀅𑀧𑀮𑁄𑀓𑀦𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀉𑀧𑀸𑀬𑁂𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀕𑀢𑀁 𑀯𑀸 𑀓𑀢𑁆𑀯𑀸 𑀔𑀡𑁆𑀟𑀲𑀻𑀫𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀲𑀦𑁆𑀥𑀸𑀬 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀢𑀺, 𑀢𑀁 𑀅𑀧𑀮𑁄𑀓𑀦𑀓𑀫𑁆𑀫𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀁’’𑀇𑀘𑁆𑀘𑀸𑀤𑀺. 𑀬𑀤𑀺 𑀅𑀧𑀮𑁄𑀓𑁂𑀢𑁆𑀯𑀸𑀯 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀓𑀺𑀁 𑀧𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀫𑁆𑀫𑀼𑀢𑀺𑀬𑀸𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦 𑀧𑀦𑀸’’𑀢𑀺𑀆𑀤𑀺. 𑀦𑀸𑀴𑀺 𑀯𑀸 𑀉𑀧𑀟𑁆𑀠𑀦𑀸𑀴𑀺 𑀯𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀲𑁆𑀲 𑀧𑀫𑀸𑀡𑀤𑀲𑁆𑀲𑀦𑀁. 𑀢𑁂𑀦 𑀬𑀸𑀧𑀦𑀫𑀢𑁆𑀢𑀫𑁂𑀯 𑀅𑀧𑀮𑁄𑀓𑁂𑀢𑀩𑁆𑀩𑀁, 𑀦 𑀅𑀥𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀤𑀺𑀯𑀲𑀁𑀬𑁂𑀯 𑀯𑀸𑀢𑀺𑀆𑀤𑀺 𑀤𑀲𑀯𑀻𑀲𑀢𑀺𑀤𑀺𑀯𑀲𑀸𑀦𑀁 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂𑀬𑁂𑀯 𑀤𑀸𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀢𑁂𑀦 ‘‘𑀬𑀸𑀯𑀚𑀻𑀯’’𑀦𑁆𑀢𑀺 𑀯𑀸 ‘‘𑀬𑀸𑀯𑀭𑁄𑀕𑀸 𑀯𑀼𑀝𑁆𑀞𑀳𑀢𑀻’’𑀢𑀺 𑀯𑀸 𑀏𑀯𑀁 𑀅𑀧𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀡𑀧𑀮𑀺𑀩𑁄𑀥𑀦𑁆𑀢𑀺 𑀇𑀡𑀯𑀢𑁆𑀣𑀼𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀜𑁆𑀘 𑀇𑀡𑀸𑀬𑀺𑀓𑁂𑀳𑀺 𑀧𑀮𑀺𑀩𑀼𑀤𑁆𑀥𑀲𑁆𑀲 𑀮𑀚𑁆𑀚𑀻𑀧𑁂𑀲𑀮𑀲𑁆𑀲 𑀲𑀸𑀲𑀦𑀼𑀧𑀓𑀸𑀭𑀓𑀲𑁆𑀲 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀓𑀧𑁆𑀧𑀺𑀬𑀪𑀡𑁆𑀟𑀁 𑀦𑀺𑀬𑀫𑁂𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀦 𑀧𑀦 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀫𑀳𑀸𑀇𑀡𑀁. 𑀢𑀸𑀤𑀺𑀲𑀜𑁆𑀳𑀺 𑀪𑀺𑀓𑁆𑀔𑀸𑀘𑀭𑀺𑀬𑀯𑀢𑁆𑀢𑁂𑀦 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀸𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀁.

‘‘𑀙𑀢𑁆𑀢𑀁 𑀯𑀸 𑀯𑁂𑀤𑀺𑀓𑀁 𑀯𑀸𑀢𑀺 𑀏𑀢𑁆𑀣 𑀯𑁂𑀤𑀺𑀓𑀸𑀢𑀺 𑀘𑁂𑀢𑀺𑀬𑀲𑁆𑀲 𑀉𑀧𑀭𑀺 𑀘𑀢𑀼𑀭𑀲𑁆𑀲𑀘𑀬𑁄 𑀯𑀼𑀘𑁆𑀘𑀢𑀺. 𑀙𑀢𑁆𑀢𑀦𑁆𑀢𑀺 𑀢𑀢𑁄 𑀉𑀤𑁆𑀥𑀁 𑀯𑀮𑀬𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀅𑀕𑁆𑀕𑀘𑀬𑁄 𑀯𑀼𑀘𑁆𑀘𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀭𑀺𑀯𑀸𑀭 𑁩.𑁪𑁯𑁫-𑁪𑁯𑁬) 𑀯𑀼𑀢𑁆𑀢𑀁. 𑀘𑁂𑀢𑀺𑀬𑀲𑁆𑀲 𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀘𑁂𑀢𑀺𑀬𑀲𑁆𑀲 𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬 𑀯𑀟𑁆𑀠𑀺𑀬𑀸 𑀧𑀬𑁄𑀚𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀺 𑀞𑀧𑀺𑀢𑀯𑀢𑁆𑀣𑀼𑀢𑁄. 𑀲𑀗𑁆𑀖𑀺𑀓𑁂𑀦𑀧𑀻𑀢𑀺 𑀦 𑀓𑁂𑀯𑀮𑀜𑁆𑀘 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀧𑀘𑁆𑀘𑀬𑀤𑀸𑀬𑀓𑁂𑀳𑀺 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀼𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀳𑀸𑀤𑀸𑀦𑀁 𑀤𑀤𑀦𑁆𑀢𑁂𑀳𑀺𑀧𑀺 𑀓𑀭𑀺𑀬𑀫𑀸𑀦𑀁 𑀲𑀗𑁆𑀖𑀪𑀢𑁆𑀢𑀁 𑀯𑀺𑀬 𑀓𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀧𑀳𑁄𑀦𑀓𑀁 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀕𑀳𑁂𑀢𑀩𑁆𑀩𑀁, 𑀅𑀥𑀺𑀓𑀁 𑀧𑀦 𑀕𑀳𑁂𑀢𑀼𑀁 𑀦 𑀮𑀪𑀢𑀺.

𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀤𑀺𑀯𑀲𑁂𑀧𑀺 𑀓𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀓𑀭𑁄𑀦𑁆𑀢𑁂𑀦 ‘‘𑀬𑀁 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁄𑀲𑀻𑀫𑀸𑀬 𑀲𑀗𑁆𑀖𑀲𑀦𑁆𑀢𑀓𑀁…𑀧𑁂… 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸. 𑀢𑀣𑀸 𑀤𑁆𑀯𑀻𑀳𑀺 𑀢𑀻𑀳𑀺𑀧𑀺 ‘‘𑀆𑀬𑀲𑁆𑀫𑀦𑁆𑀢𑀸𑀦𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀲𑀫𑁆𑀧𑀻𑀢𑀺 𑀭𑀼𑀓𑁆𑀔𑀸𑀦𑀁. 𑀲𑀸 𑀏𑀯 𑀓𑀢𑀺𑀓𑀸𑀢𑀺 𑀯𑀺𑀲𑀼𑀁 𑀓𑀢𑀺𑀓𑀸 𑀦 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀢𑁂𑀲𑀦𑁆𑀢𑀺 𑀭𑀼𑀓𑁆𑀔𑀸𑀦𑀁, 𑀲𑀗𑁆𑀖𑁄 𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀯𑀺𑀳𑀸𑀭𑁂𑀢𑀺 𑀧𑀼𑀭𑀺𑀫𑁂 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀢𑀓𑀢𑀺𑀓𑁂 𑀯𑀺𑀳𑀸𑀭𑁂. 𑀧𑀭𑀺𑀯𑁂𑀡𑀸𑀦𑀺 𑀓𑀢𑁆𑀯𑀸 𑀚𑀕𑁆𑀕𑀦𑁆𑀢𑀻𑀢𑀺 𑀬𑀢𑁆𑀣 𑀅𑀭𑀓𑁆𑀔𑀺𑀬𑀫𑀸𑀦𑁂 𑀨𑀮𑀸𑀨𑀮𑀸𑀦𑀺 𑀭𑀼𑀓𑁆𑀔𑀸 𑀘 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀸𑀤𑀺𑀲𑀁 𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀓𑀢𑀺𑀓𑀸 𑀦 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀳𑀺 𑀧𑀦 𑀭𑀼𑀓𑁆𑀔𑀩𑀻𑀚𑀸𑀦𑀺 𑀭𑁄𑀧𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀚𑀕𑁆𑀕𑀺𑀢𑀸, 𑀢𑁂𑀧𑀺 𑀤𑀲𑀫𑀪𑀸𑀕𑀁 𑀤𑀢𑁆𑀯𑀸 𑀭𑁄𑀧𑀓𑁂𑀳𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀢𑁂𑀳𑀻𑀢𑀺 𑀚𑀕𑁆𑀕𑀺𑀢𑁂𑀳𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀫𑀽𑀮𑁂𑀢𑀺𑀆𑀤𑀺𑀓𑀸𑀮𑁂, 𑀧𑀼𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀤𑀻𑀖𑀸 𑀓𑀢𑀺𑀓𑀸𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀓𑀢𑀺𑀓𑀸. 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 ‘‘𑀅𑀪𑀸𑀚𑀺𑀢𑀫𑀺𑀤’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀔𑀻𑀬𑀦𑀫𑀢𑁆𑀢𑀫𑁂𑀯 𑀢𑀦𑁆𑀢𑀺 𑀢𑁂𑀦 𑀔𑀻𑀬𑀦𑁂𑀦 𑀩𑀳𑀼𑀁 𑀔𑀸𑀤𑀦𑁆𑀢𑀸𑀦𑀁 𑀤𑁄𑀲𑁄 𑀦𑀢𑁆𑀣𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀧𑁆𑀧𑀫𑀸𑀡𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸, 𑀔𑀻𑀬𑀦𑁆𑀢𑁂𑀧𑀺 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀡𑁆𑀳𑀣𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀢𑀣𑀸 𑀯𑀼𑀢𑁆𑀢𑁂 𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀤𑀺𑀦𑁆𑀦𑀁 𑀯𑀺𑀬 𑀫𑀜𑁆𑀜𑁂𑀬𑁆𑀬𑀼𑀁. 𑀢𑀁 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀚𑀻𑀯𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀦𑀼𑀯𑀺𑀘𑀭𑀺𑀢𑁆𑀯𑀸’’𑀢𑀺𑀆𑀤𑀺. 𑀉𑀧𑀟𑁆𑀠𑀪𑀸𑀕𑁄𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀯𑀻𑀲𑀢𑁄 𑀉𑀧𑀟𑁆𑀠𑀪𑀸𑀕𑁄, 𑀤𑁂𑀦𑁆𑀢𑁂𑀦 𑀘 ‘‘𑀏𑀢𑁆𑀢𑀓𑀁 𑀤𑀸𑀢𑀼𑀁 𑀲𑀗𑁆𑀖𑁄 𑀅𑀦𑀼𑀜𑁆𑀜𑀸𑀲𑀻’’𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑁆𑀯𑀸 𑀬𑀣𑀸 𑀢𑁂 𑀲𑀗𑁆𑀖𑁂 𑀏𑀯 𑀧𑀲𑀻𑀤𑀦𑁆𑀢𑀺, 𑀏𑀯𑀁 𑀯𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀕𑀺𑀮𑀸𑀦𑀕𑀫𑀺𑀓𑀺𑀲𑁆𑀲𑀭𑀸𑀤𑀻𑀦𑀁 𑀅𑀦𑀼𑀜𑁆𑀜𑀸𑀢𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑁂𑀦𑁆𑀢𑁂𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑁂𑀯 𑀤𑀸𑀢𑀩𑁆𑀩𑀁. 𑀅𑀦𑀦𑀼𑀜𑁆𑀜𑀸𑀢𑀧𑀼𑀕𑁆𑀕𑀮𑀸𑀦𑀁 𑀧𑀦 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀧𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺. 𑀲𑀗𑁆𑀖𑀺𑀓𑀫𑁂𑀯 𑀬𑀣𑀸𑀓𑀢𑀺𑀓𑀸𑀬 𑀤𑀸𑀧𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀧𑀘𑁆𑀘𑀬𑀤𑀸𑀬𑀓𑀸𑀤𑀬𑁄 𑀲𑀬𑀫𑁂𑀯 𑀯𑀺𑀲𑁆𑀲𑀸𑀲𑁂𑀦 𑀕𑀡𑁆𑀳𑀦𑁆𑀢𑀺, 𑀦 𑀯𑀸𑀭𑁂𑀢𑀩𑁆𑀩𑀸, ‘‘𑀮𑀤𑁆𑀥𑀓𑀧𑁆𑀧𑀺𑀬’’𑀦𑁆𑀢𑀺 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀓𑀼𑀤𑁆𑀥𑁄 𑀳𑀺 𑀲𑁄 𑀭𑀼𑀓𑁆𑀔𑁂𑀧𑀺 𑀙𑀺𑀦𑁆𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀢𑀼𑀡𑁆𑀳𑀻𑀪𑀸𑀯𑁂 𑀓𑀸𑀭𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯, 𑀢𑁂𑀳𑀺 𑀓𑀢𑀅𑀦𑀢𑁆𑀣𑀸𑀪𑀸𑀯𑁂𑀧𑀺 𑀓𑀸𑀭𑀼𑀜𑁆𑀜𑁂𑀦 𑀢𑀼𑀡𑁆𑀳𑀻 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀕𑀡𑁆𑀳𑀣𑀸’’𑀢𑀺𑀆𑀤𑀺 𑀧𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺.

𑀕𑀭𑀼𑀪𑀡𑁆𑀟𑀢𑁆𑀢𑀸…𑀧𑁂… 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀚𑀻𑀯𑀭𑀼𑀓𑁆𑀔𑀸𑀦𑀁 𑀆𑀭𑀸𑀫𑀝𑁆𑀞𑀸𑀦𑀺𑀬𑀢𑁆𑀢𑀸 𑀤𑀸𑀭𑀽𑀦𑀜𑁆𑀘 𑀕𑁂𑀳𑀲𑀫𑁆𑀪𑀸𑀭𑀸𑀦𑀼𑀧𑀕𑀢𑀢𑁆𑀢𑀸 ‘‘𑀲𑀩𑁆𑀩𑀁 𑀢𑁆𑀯𑀫𑁂𑀯 𑀕𑀡𑁆𑀳𑀸𑀢𑀺 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀓𑀢𑀸𑀯𑀸𑀲𑀁 𑀯𑀸 𑀓𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀁 𑀲𑁂𑀦𑀸𑀲𑀦𑀁 𑀓𑀢𑁆𑀯𑀸. 𑀚𑀕𑁆𑀕𑀺𑀢𑀓𑀸𑀮𑁂𑀢𑀺 𑀨𑀮𑀯𑀸𑀭𑁂 𑀲𑀫𑁆𑀧𑀢𑁆𑀢𑁂. 𑀚𑀕𑁆𑀕𑀦𑀓𑀸𑀮𑁂𑀢𑀺 𑀚𑀕𑁆𑀕𑀺𑀢𑀼𑀁 𑀆𑀭𑀤𑁆𑀥𑀓𑀸𑀮𑁂.

𑁨𑁫𑁬. 𑀜𑀢𑁆𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂𑀢𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀞𑀸𑀦𑀪𑁂𑀤𑁂.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀢𑁂𑀢𑁆𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.