𑁩𑁪. 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑀏𑀯𑀁 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑀓𑀣𑀁 𑀓𑀣𑁂𑀢𑀼𑀁 ‘‘𑀇𑀤𑀸𑀦𑀺 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀓𑀸𑀭𑁂𑀦 𑀓𑀺𑀡𑁆𑀡𑀸𑀢𑀺 𑀧𑀓𑀺𑀡𑁆𑀡𑀸, 𑀤𑀺𑀯𑀸𑀲𑁂𑀬𑁆𑀬𑀸𑀢𑀺 𑀓𑀣𑀸 𑀯𑀺𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑁂 𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀕𑀡𑀪𑁄𑀚𑀦𑀓𑀣𑀸𑀤𑀬𑁄. 𑀧𑀓𑀺𑀡𑁆𑀡𑀓𑀸 𑀲𑀓𑀢𑁆𑀣𑁂 𑀓-𑀧𑀘𑁆𑀘𑀬𑀯𑀲𑁂𑀦.

𑀢𑀢𑁆𑀭𑀸𑀬𑀁 𑀧𑀓𑀺𑀡𑁆𑀡𑀓𑀫𑀸𑀢𑀺𑀓𑀸 𑁋

𑀕𑀡𑀪𑁄𑀚𑀦𑀓𑀣𑀸 𑀘, 𑀧𑀭𑀫𑁆𑀧𑀭𑀸 𑀘 𑀪𑁄𑀚𑀦𑀸;

𑀅𑀦𑀸𑀧𑀼𑀘𑁆𑀙𑀸 𑀧𑀁𑀲𑀼𑀓𑀽𑀮𑀁, 𑀢𑀢𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀁.

𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀯𑀺𑀧𑁆𑀧-𑀓𑀢𑀪𑁄𑀚𑀦𑀫𑁂𑀯 𑀘;

𑀉𑀤𑁆𑀤𑀺𑀲𑀦𑁆𑀢𑀼𑀤𑁆𑀤𑀺𑀲𑀸𑀧𑁂𑀦𑁆𑀢𑀸, 𑀢𑀺𑀯𑀲𑁆𑀲𑀦𑁆𑀢𑀭𑀺𑀓𑀸 𑀢𑀣𑀸.

𑀤𑀻𑀖𑀸𑀲𑀦𑀁 𑀕𑀺𑀮𑀸𑀦𑀼𑀧-𑀝𑁆𑀞𑀸𑀦𑀁 𑀫𑀭𑀡𑀯𑀡𑁆𑀡𑀓𑀁;

𑀅𑀢𑁆𑀢𑀧𑀸𑀢𑀦𑀫𑀧𑁆𑀧𑀘𑁆𑀘-𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀢𑀣𑀸.

𑀤𑀯𑀸𑀬 𑀲𑀺𑀮𑀸𑀯𑀺𑀚𑁆𑀛𑀦𑀁, 𑀤𑀸𑀬𑀸𑀴𑀺𑀫𑁆𑀧𑀦𑀓𑀁 𑀢𑀣𑀸;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀸𑀪𑀢𑀁, 𑀕𑁄𑀧𑀓𑀤𑀸𑀦𑀫𑁂𑀯 𑀘.

𑀥𑀫𑁆𑀫𑀺𑀓𑀸𑀬𑀸𑀘𑀦𑀸 𑀘𑁂𑀯, 𑀉𑀘𑁆𑀘𑀸𑀭𑀸𑀤𑀻𑀦 𑀙𑀟𑁆𑀟𑀦𑀁;

𑀦𑁆𑀳𑀸𑀦𑁂 𑀭𑀼𑀓𑁆𑀔𑀖𑀁𑀲𑀦𑀸𑀦𑀺, 𑀯𑀮𑀺𑀓𑀸𑀤𑀻𑀦 𑀥𑀸𑀭𑀡𑀁.

𑀤𑀻𑀖𑀓𑁂𑀲𑀸 𑀆𑀤𑀸𑀲𑀸𑀤𑀺, 𑀦𑀘𑁆𑀘𑀸𑀤𑁆𑀬𑀗𑁆𑀕𑀘𑁆𑀙𑁂𑀤𑀸𑀤𑀺 𑀘;

𑀧𑀢𑁆𑀢𑁄 𑀲𑀩𑁆𑀩𑀧𑀁𑀲𑀼𑀓𑀽𑀮𑀁, 𑀧𑀭𑀺𑀲𑁆𑀲𑀯𑀦 𑀦𑀕𑁆𑀕𑀺𑀬𑀁.

𑀕𑀦𑁆𑀥𑀧𑀼𑀧𑁆𑀨𑀁 𑀆𑀲𑀺𑀢𑁆𑀢𑀓𑀁, 𑀫𑀴𑁄𑀭𑀺𑀓𑁂𑀓𑀪𑀸𑀚𑀦𑀁;

𑀘𑁂𑀮𑀧𑀢𑀺 𑀧𑀸𑀤𑀖𑀁𑀲𑀻, 𑀩𑀻𑀚𑀦𑀻 𑀙𑀢𑁆𑀢𑀫𑁂𑀯 𑀘.

𑀦𑀔𑀸𑀮𑁄𑀫𑀸 𑀓𑀸𑀬𑀩𑀦𑁆𑀥𑀸, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸;

𑀓𑀸𑀚 𑀤𑀦𑁆𑀢𑀓𑀝𑁆𑀞𑀜𑁆𑀘𑁂𑀯, 𑀭𑀼𑀓𑁆𑀔𑀸𑀭𑁄𑀳𑀦𑀓𑀫𑁆𑀧𑀺 𑀘.

𑀙𑀦𑁆𑀤𑀸𑀭𑁄𑀧𑀸 𑀮𑁄𑀓𑀸𑀬𑀢𑀸, 𑀔𑀺𑀧𑀺𑀢𑀁 𑀮𑀲𑀼𑀡𑀁 𑀢𑀣𑀸;

𑀦 𑀅𑀓𑁆𑀓𑀫𑀺𑀢𑀩𑁆𑀩𑀸𑀤𑀻𑀦𑀺, 𑀅𑀯𑀦𑁆𑀤𑀺𑀬𑀸 𑀘 𑀯𑀦𑁆𑀤𑀺𑀬𑀸.

𑀯𑀦𑁆𑀤𑀦𑀸𑀓𑀸𑀭𑀓𑀣𑀸 𑀘, 𑀆𑀲𑀦𑁆𑀤𑀸𑀤𑀺𑀓𑀣𑀸𑀧𑀺 𑀘;

𑀉𑀘𑁆𑀘𑀸𑀲𑀦𑀫𑀳𑀸𑀲𑀦𑀁, 𑀧𑀸𑀲𑀸𑀤𑀧𑀭𑀺𑀪𑁄𑀕𑀓𑀁.

𑀉𑀧𑀸𑀳𑀦𑀁 𑀬𑀸𑀦𑀜𑁆𑀘𑁂𑀯, 𑀘𑀻𑀯𑀭𑀁 𑀙𑀺𑀦𑁆𑀦𑀘𑀻𑀯𑀭𑀁;

𑀅𑀓𑀧𑁆𑀧𑀺𑀬𑀘𑀻𑀯𑀭𑀜𑁆𑀘, 𑀘𑀻𑀯𑀭𑀲𑁆𑀲 𑀯𑀺𑀘𑀸𑀭𑀡𑀸.

𑀤𑀡𑁆𑀟𑀓𑀣𑀺𑀦𑀓𑀜𑁆𑀘𑁂𑀯, 𑀕𑀳𑀧𑀢𑀺𑀘𑀻𑀯𑀭𑀁 𑀢𑀣𑀸;

𑀙𑀘𑀻𑀯𑀭𑀁 𑀭𑀚𑀦𑀸𑀤𑀺, 𑀅𑀢𑀺𑀭𑁂𑀓𑀜𑁆𑀘 𑀘𑀻𑀯𑀭𑀁.

𑀅𑀝𑁆𑀞𑀯𑀭𑀁 𑀦𑀺𑀲𑀻𑀤𑀦𑀁, 𑀅𑀥𑀫𑁆𑀫𑀓𑀫𑁆𑀫𑀫𑁂𑀯 𑀘;

𑀑𑀓𑀸𑀲𑁄 𑀲𑀤𑁆𑀥𑀸𑀤𑁂𑀬𑁆𑀬𑁄 𑀘, 𑀲𑀦𑁆𑀢𑀭𑀼𑀢𑁆𑀢𑀭𑀓𑁄𑀧𑀺 𑀘.

𑀘𑀻𑀯𑀭𑀦𑀺𑀓𑁆𑀔𑁂𑀧𑁄 𑀘𑁂𑀯, 𑀲𑀢𑁆𑀣𑀯𑀢𑁆𑀣𑀺𑀓𑀫𑁆𑀫𑀁 𑀢𑀣𑀸;

𑀦𑀳𑀸𑀧𑀺𑀢𑁄 𑀤𑀲𑀪𑀸𑀕𑁄, 𑀧𑀸𑀣𑁂𑀬𑁆𑀬𑀁 𑀧𑀤𑁂𑀲𑁄𑀧𑀺 𑀘.

𑀲𑀁𑀲𑀝𑁆𑀞𑀁 𑀧𑀜𑁆𑀘𑀪𑁂𑀲𑀚𑁆𑀚𑀁, 𑀤𑀼𑀢𑀺𑀬𑀁 𑀯𑀲𑀸 𑀫𑀽𑀮𑀓𑀁;

𑀧𑀺𑀝𑁆𑀞𑀁 𑀓𑀲𑀸𑀯 𑀧𑀡𑁆𑀡𑀜𑁆𑀘, 𑀨𑀮𑀜𑁆𑀘 𑀚𑀢𑀼 𑀮𑁄𑀡𑀓𑀁.

𑀘𑀼𑀡𑁆𑀡𑀁 𑀅𑀫𑀦𑀼𑀲𑁆𑀲𑀸𑀩𑀸𑀥𑀁, 𑀅𑀜𑁆𑀚𑀦𑀁 𑀦𑀢𑁆𑀣𑀼𑀫𑁂𑀯 𑀘;

𑀥𑀽𑀫𑀦𑁂𑀢𑁆𑀢𑀁 𑀢𑁂𑀮𑀧𑀸𑀓𑀁, 𑀲𑁂𑀤𑀁 𑀮𑁄𑀳𑀺𑀢𑀫𑁄𑀘𑀦𑀁.

𑀧𑀸𑀤𑀩𑁆𑀪𑀜𑁆𑀚𑀁 𑀕𑀡𑁆𑀟𑀸𑀩𑀸𑀥𑁄, 𑀯𑀺𑀲𑀜𑁆𑀘 𑀖𑀭𑀤𑀺𑀦𑁆𑀦𑀓𑁄;

𑀤𑀼𑀝𑁆𑀞𑀕𑀳𑀡𑀺𑀓𑁄 𑀧𑀡𑁆𑀟𑀼-𑀭𑁄𑀕𑁄 𑀙𑀯𑀺𑀤𑁄𑀲𑁄𑀧𑀺 𑀘.

𑀅𑀪𑀺𑀲𑀦𑁆𑀦𑀤𑁄𑀲𑀓𑀸𑀬𑁄, 𑀮𑁄𑀡𑀲𑀼𑀯𑀻𑀭𑀓𑁄 𑀢𑀣𑀸;

𑀅𑀦𑁆𑀢𑁄𑀯𑀼𑀢𑁆𑀣𑀸𑀤𑀺𑀓𑀣𑀸 𑀘, 𑀉𑀕𑁆𑀕𑀳𑀺𑀢𑀧𑀝𑀺𑀕𑁆𑀕𑀳𑁄.

𑀢𑀢𑁄 𑀦𑀺𑀳𑀢𑀓𑀣𑀸 𑀘, 𑀧𑀼𑀭𑁂𑀪𑀢𑁆𑀢𑀧𑀝𑀺𑀕𑁆𑀕𑀳𑁄;

𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀜𑁆𑀘, 𑀢𑀣𑀸 𑀅𑀓𑀢𑀓𑀧𑁆𑀧𑀢𑀁.

𑀬𑀸𑀕𑀼𑀓𑀣𑀸 𑀕𑀼𑀴𑀓𑀣𑀸, 𑀫𑀳𑀸𑀧𑀤𑁂𑀲𑀫𑁂𑀯 𑀘;

𑀆𑀦𑀺𑀲𑀁𑀲𑀓𑀣𑀸 𑀘𑁂𑀢𑀺, 𑀧𑀓𑀺𑀡𑁆𑀡𑀓𑀫𑁆𑀳𑀺 𑀆𑀕𑀢𑀸.

𑀕𑀡𑀪𑁄𑀚𑀦𑀓𑀣𑀸

𑁧. 𑀢𑀢𑁆𑀣 𑀕𑀡𑀺𑀢𑀩𑁆𑀩𑁄 𑀲𑀗𑁆𑀔𑁆𑀬𑀸𑀢𑀩𑁆𑀩𑁄𑀢𑀺 𑀕𑀡𑁄, 𑀬𑁄 𑀓𑁄𑀘𑀺 𑀲𑀫𑀽𑀳𑁄, 𑀇𑀥 𑀧𑀦 𑀘𑀢𑀼𑀯𑀕𑁆𑀕𑀸𑀤𑀺𑀕𑀡𑁄 𑀅𑀥𑀺𑀧𑁆𑀧𑁂𑀢𑁄. 𑀪𑀼𑀜𑁆𑀚𑀢𑁂 𑀪𑁄𑀚𑀦𑀁, 𑀩𑁆𑀬𑀯𑀳𑀭𑀡𑀪𑀸𑀯𑀲𑀗𑁆𑀔𑀸𑀢𑀸 𑀪𑁄𑀚𑀦𑀓𑀺𑀭𑀺𑀬𑀸, 𑀕𑀡𑀲𑁆𑀲 𑀪𑁄𑀚𑀦𑀁 𑀕𑀡𑀪𑁄𑀚𑀦𑀁, 𑀢𑀲𑁆𑀫𑀺𑀁. 𑀕𑀡𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀚𑀦𑀓𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀕𑀺𑀮𑀸𑀦𑀸𑀤𑀺𑀲𑀢𑁆𑀢𑀯𑀺𑀥𑀁 𑀲𑀫𑀬𑀁 𑀞𑀧𑁂𑀢𑁆𑀯𑀸. 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺𑀢𑁄 𑀕𑀡𑀪𑁄𑀚𑀦𑀁 𑀯𑀢𑁆𑀣𑀼𑀯𑀲𑁂𑀦𑁂𑀯 𑀧𑀸𑀓𑀝𑀦𑁆𑀢𑀺 𑀢𑀁 𑀅𑀯𑀢𑁆𑀯𑀸 ‘‘𑀕𑀡𑀪𑁄𑀚𑀦𑀁 𑀦𑀸𑀫 𑀬𑀢𑁆𑀣…𑀧𑁂… 𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀦𑀺𑀫𑀦𑁆𑀢𑀦𑀯𑀲𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑀕𑀡𑀪𑁄𑀚𑀦𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀺 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀯𑀢𑁆𑀣𑀼𑀅𑀦𑀼𑀭𑀽𑀧𑀫𑁆𑀧𑀺 𑀲𑀺𑀬𑀸𑀢𑀺 ‘‘𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀡𑀪𑁄𑀚𑀦𑀁 𑀳𑁄𑀢𑀻’’𑀢𑀺 𑀓𑁂𑀲𑀜𑁆𑀘𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀕𑀡𑀪𑁄𑀚𑀦𑀁 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀧𑀲𑀯𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀓𑀢𑁄 𑀕𑀡𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑁆𑀯𑀸𑀤𑀲𑀳𑀢𑁆𑀣𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀞𑀺𑀢𑀸 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀅𑀫𑁆𑀳𑀸𑀓𑀁 𑀘𑀢𑀼𑀦𑁆𑀦𑀫𑁆𑀧𑀺 𑀪𑀢𑁆𑀢𑀁 𑀤𑁂𑀳𑀻’𑀢𑀺 𑀯𑀸 𑀯𑀺𑀜𑁆𑀜𑀸𑀧𑁂𑀬𑁆𑀬𑀼’’𑀦𑁆𑀢𑀺 𑀯𑀘𑀦𑀢𑁄, 𑀳𑁂𑀝𑁆𑀞𑀸 ‘‘𑀢𑁆𑀯𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑀁 𑀤𑁂𑀳𑀺, 𑀢𑁆𑀯𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀏𑀯𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀺𑀜𑁆𑀜𑀢𑁆𑀢𑀫𑁆𑀧𑀺 𑀲𑀸𑀤𑀺𑀬𑀦𑁆𑀢𑀲𑁆𑀲 𑀕𑀡𑀪𑁄𑀚𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀢𑀻𑀢𑀺 𑀏𑀢𑁆𑀣 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀕𑀡𑀦𑁆𑀢𑀲𑁆𑀲 𑀏𑀓𑀢𑁄 𑀳𑀼𑀢𑁆𑀯𑀸 𑀕𑀳𑀡𑁂 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺, 𑀯𑀺𑀲𑀼𑀁 𑀕𑀳𑀡𑁂 𑀧𑀡𑀻𑀢𑀪𑁄𑀚𑀦𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀻𑀳𑀺 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀪𑁄𑀚𑀦𑀁 𑀕𑀡𑁆𑀳𑀣𑀸𑀢𑀺 𑀯𑀼𑀢𑁆𑀢𑁂𑀧𑀺 𑀕𑀡𑀪𑁄𑀚𑀦𑀁 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. ‘‘𑀳𑁂𑀝𑁆𑀞𑀸 𑀅𑀤𑁆𑀥𑀸𑀦𑀕𑀫𑀦𑀯𑀢𑁆𑀣𑀼𑀲𑁆𑀫𑀺𑀁, 𑀦𑀸𑀯𑀸𑀪𑀺𑀭𑀼𑀳𑀦𑀯𑀢𑁆𑀣𑀼𑀲𑁆𑀫𑀺𑀜𑁆𑀘 ‘𑀇𑀥𑁂𑀯, 𑀪𑀦𑁆𑀢𑁂, 𑀪𑀼𑀜𑁆𑀚𑀣𑀸’𑀢𑀺 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑀲𑁆𑀫𑀸 ‘𑀪𑀼𑀜𑁆𑀚𑀣𑀸’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀡𑀪𑁄𑀚𑀦𑀁 𑀳𑁄𑀢𑀺𑀬𑁂𑀯𑀸’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 ‘‘𑀑𑀤𑀦𑀁 𑀪𑀼𑀜𑁆𑀚𑀣𑀸’’𑀢𑀺 𑀯𑀸 ‘‘𑀪𑀢𑁆𑀢𑀁 𑀪𑀼𑀜𑁆𑀚𑀣𑀸’’𑀢𑀺 𑀯𑀸 𑀪𑁄𑀚𑀦𑀦𑀸𑀫𑀁 𑀕𑀳𑁂𑀢𑁆𑀯𑀸𑀯 𑀯𑀼𑀢𑁆𑀢𑁂 𑀕𑀡𑀪𑁄𑀚𑀦𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸. ‘‘𑀇𑀥𑁂𑀯, 𑀪𑀦𑁆𑀢𑁂, 𑀪𑀼𑀜𑁆𑀚𑀣𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀑𑀤𑀦’’𑀦𑁆𑀢𑀺 𑀯𑀸 ‘‘𑀪𑀢𑁆𑀢’’𑀦𑁆𑀢𑀺 𑀯𑀸 𑀯𑀢𑁆𑀯𑀸𑀯 𑀢𑁂 𑀏𑀯𑀁 𑀦𑀺𑀫𑀦𑁆𑀢𑁂𑀲𑀼𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀕𑀡𑀯𑀲𑁂𑀦 𑀯𑀸 𑀦𑀺𑀫𑀦𑁆𑀢𑀺𑀢𑀢𑁆𑀢𑀸 𑀢𑁂 𑀪𑀺𑀓𑁆𑀔𑀽 𑀅𑀧𑀓𑀢𑀜𑁆𑀜𑀼𑀢𑀸𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁧𑁭-𑁨𑁧𑁮) 𑀧𑀦 ‘‘𑀬𑁂𑀦 𑀓𑁂𑀦𑀘𑀺 𑀯𑁂𑀯𑀘𑀦𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 ‘𑀪𑁄𑀚𑀦𑀁 𑀕𑀡𑁆𑀳𑀣𑀸’𑀢𑀺𑀆𑀤𑀺𑀲𑀸𑀫𑀜𑁆𑀜𑀦𑀸𑀫𑁂𑀦𑀧𑀺 𑀕𑀡𑀪𑁄𑀚𑀦𑀁 𑀳𑁄𑀢𑀺. 𑀬𑀁 𑀧𑀦 𑀧𑀸𑀴𑀺𑀬𑀁 𑀅𑀤𑁆𑀥𑀸𑀦𑀕𑀫𑀦𑀸𑀤𑀺𑀯𑀢𑁆𑀣𑀽𑀲𑀼 ‘𑀇𑀥𑁂𑀯 𑀪𑀼𑀜𑁆𑀚𑀣𑀸’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑀁, 𑀢𑀫𑁆𑀧𑀺 𑀑𑀤𑀦𑀸𑀤𑀺𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀓𑀼𑀭𑀼𑀦𑁆𑀤𑀻𑀯𑀘𑀦𑁂 𑀯𑀺𑀘𑀸𑀭𑁂𑀢𑀻𑀢𑀺 𑀧𑀜𑁆𑀘𑀔𑀡𑁆𑀟𑀸𑀤𑀺𑀯𑀲𑁂𑀦 𑀲𑀁𑀯𑀺𑀤𑀳𑀢𑀺. 𑀖𑀝𑁆𑀝𑁂𑀢𑀻𑀢𑀺 𑀅𑀦𑀼𑀯𑀸𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑁂𑀦, 𑀤𑀡𑁆𑀟𑀓𑁂𑀦 𑀯𑀸 𑀖𑀝𑁆𑀝𑁂𑀢𑀺. 𑀲𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀲𑀼𑀢𑁆𑀢𑀁 𑀯𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀤𑀡𑁆𑀟𑀓𑁂 𑀯𑀸 𑀳𑀢𑁆𑀣𑁂 𑀯𑀸 𑀆𑀯𑀝𑁆𑀝𑁂𑀢𑀺. ‘‘𑀅𑀪𑀺𑀦𑀯𑀲𑁆𑀲𑁂𑀯 𑀘𑀻𑀯𑀭𑀲𑁆𑀲 𑀓𑀭𑀡𑀁 𑀇𑀥 𑀘𑀻𑀯𑀭𑀓𑀫𑁆𑀫𑀁 𑀦𑀸𑀫, 𑀧𑀼𑀭𑀸𑀡𑀘𑀻𑀯𑀭𑁂 𑀲𑀽𑀘𑀺𑀓𑀫𑁆𑀫𑀁 𑀘𑀻𑀯𑀭𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁧𑁭-𑁨𑁧𑁮) 𑀧𑀦 ‘‘𑀆𑀕𑀦𑁆𑀢𑀼𑀓𑀧𑀝𑁆𑀝𑀦𑁆𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀯𑀸𑀥𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀭𑀡𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀞𑀧𑁂𑀢𑀻𑀢𑀺 𑀏𑀓𑀁 𑀅𑀦𑁆𑀢𑀁 𑀘𑀻𑀯𑀭𑁂 𑀩𑀦𑁆𑀥𑀦𑀯𑀲𑁂𑀦 𑀞𑀧𑁂𑀢𑀺. 𑀧𑀘𑁆𑀘𑀸𑀕𑀢𑀁 𑀲𑀺𑀩𑁆𑀩𑀢𑀻𑀢𑀺 𑀢𑀲𑁆𑀲𑁂𑀯 𑀤𑀼𑀢𑀺𑀬𑀅𑀦𑁆𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀆𑀳𑀢𑀁 𑀲𑀺𑀩𑁆𑀩𑀢𑀺. 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀩𑀦𑁆𑀥𑀢𑀻𑀢𑀺 𑀘𑀻𑀯𑀭𑁂𑀦 𑀮𑀕𑁆𑀕𑀁 𑀓𑀭𑁄𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂𑀦 𑀩𑀦𑁆𑀥𑀢𑀺. 𑀖𑀝𑁆𑀝𑁂𑀢𑀻𑀢𑀺 𑀧𑀫𑀸𑀡𑁂𑀦 𑀕𑀳𑁂𑀢𑁆𑀯𑀸 𑀤𑀡𑁆𑀟𑀸𑀤𑀻𑀳𑀺 𑀖𑀝𑁆𑀝𑁂𑀢𑀺. 𑀲𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀲𑀼𑀢𑁆𑀢𑀁 𑀢𑀺𑀕𑀼𑀡𑀸𑀤𑀺𑀪𑀸𑀯𑁂𑀦 𑀯𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀅𑀦𑁂𑀓𑀕𑀼𑀡𑀲𑀼𑀢𑁆𑀢𑀁 𑀳𑀢𑁆𑀣𑁂𑀦 𑀯𑀸 𑀘𑀓𑁆𑀓𑀤𑀡𑁆𑀟𑁂𑀦 𑀯𑀸 𑀯𑀝𑁆𑀝𑁂𑀢𑀺 𑀏𑀓𑀢𑁆𑀢𑀁 𑀓𑀭𑁄𑀢𑀺. 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀻𑀢𑀺 𑀧𑀭𑀺𑀯𑀢𑁆𑀢𑀦𑀤𑀡𑁆𑀟𑀬𑀦𑁆𑀢𑀓𑀁 𑀓𑀭𑁄𑀢𑀺. 𑀬𑀲𑁆𑀫𑀺𑀁 𑀲𑀼𑀢𑁆𑀢𑀕𑀼𑀴𑀁 𑀧𑀯𑁂𑀲𑁂𑀢𑁆𑀯𑀸 𑀯𑁂𑀴𑀼𑀦𑀸𑀴𑀺𑀓𑀸𑀤𑀻𑀲𑀼 𑀞𑀧𑁂𑀢𑁆𑀯𑀸 𑀧𑀭𑀺𑀩𑁆𑀪𑀫𑀸𑀧𑁂𑀢𑁆𑀯𑀸 𑀲𑀼𑀢𑁆𑀢𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀆𑀓𑀟𑁆𑀠𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨𑁦𑁯-𑁨𑁧𑁮) 𑀦 ‘‘𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀫𑁄𑀖𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀢𑀢𑁆𑀣 𑀅𑀦𑀼𑀯𑀸𑀢𑁂 𑀬𑀣𑀸 𑀏𑀓𑀢𑀮𑀁 𑀳𑁄𑀢𑀺, 𑀢𑀣𑀸 𑀳𑀢𑁆𑀣𑁂𑀳𑀺 𑀖𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀆𑀯𑀝𑁆𑀝𑁂𑀢𑀺. 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀲𑀼𑀢𑁆𑀢𑀁 𑀕𑀡𑁆𑀳𑀦𑁆𑀢𑀸𑀦𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀼𑀢𑁆𑀢𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺, 𑀧𑀝𑁆𑀝𑀁 𑀲𑀺𑀩𑁆𑀩𑀦𑁆𑀢𑀸𑀦𑀁 𑀲𑀼𑀔𑀲𑀺𑀩𑁆𑀩𑀦𑀢𑁆𑀣𑀁 𑀧𑀝𑁆𑀝𑀧𑀭𑀺𑀯𑀢𑁆𑀢𑀦𑀜𑁆𑀘, 𑀦𑀯𑀘𑀻𑀯𑀭𑀓𑀸𑀭𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦 𑀇𑀢𑀭𑁄’’𑀢𑀺 𑀯𑀼𑀢𑁆𑀢𑀁.

𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀦𑁆𑀢𑀺 𑀅𑀦𑀺𑀫𑀦𑁆𑀢𑀺𑀢𑁄 𑀘𑀢𑀼𑀢𑁆𑀣𑁄 𑀬𑀲𑁆𑀲 𑀪𑀺𑀓𑁆𑀔𑀼𑀘𑀢𑀼𑀓𑁆𑀓𑀲𑁆𑀲, 𑀢𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀧𑀜𑁆𑀘𑀦𑁆𑀦𑀁 𑀘𑀢𑀼𑀓𑁆𑀓𑀸𑀦’’𑀦𑁆𑀢𑀺, ‘‘𑀘𑀢𑀼𑀢𑁆𑀣𑁂 𑀆𑀕𑀢𑁂 𑀦 𑀬𑀸𑀧𑁂𑀦𑁆𑀢𑀻𑀢𑀺 𑀯𑀘𑀦𑀢𑁄 𑀲𑀘𑁂 𑀅𑀜𑁆𑀜𑁄 𑀓𑁄𑀘𑀺 𑀆𑀕𑀘𑁆𑀙𑀦𑁆𑀢𑁄 𑀦𑀢𑁆𑀣𑀺, 𑀘𑀢𑁆𑀢𑀸𑀭𑁄𑀬𑁂𑀯 𑀘 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸 𑀬𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀕𑀡𑀪𑁄𑀚𑀦𑀸𑀧𑀢𑁆𑀢𑀺𑀚𑀦𑀓𑀦𑀺𑀫𑀦𑁆𑀢𑀦𑀪𑀸𑀯𑀢𑁄 ‘‘𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀯𑁂𑀲𑁂𑀢𑁆𑀯𑀸𑀢𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸. 𑀕𑀡𑁄 𑀪𑀺𑀚𑁆𑀚𑀢𑀻𑀢𑀺 𑀕𑀡𑁄 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁨𑁦) 𑀧𑀦 ‘‘𑀲𑀫𑁆𑀧𑀯𑁂𑀲𑁂𑀢𑁆𑀯𑀸𑀢𑀺 𑀢𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀕𑀡𑁄 𑀪𑀺𑀚𑁆𑀚𑀢𑀻𑀢𑀺 𑀦𑀺𑀫𑀦𑁆𑀢𑀺𑀢𑀲𑀗𑁆𑀖𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

‘‘𑀬𑀢𑁆𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽…𑀧𑁂… 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 ‘‘𑀇𑀢𑀭𑁂𑀲𑀁 𑀧𑀦 𑀕𑀡𑀧𑀽𑀭𑀓𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀕𑀺𑀮𑀸𑀦𑁄 𑀯𑀸 𑀘𑀻𑀯𑀭𑀓𑀸𑀭𑀓𑁄 𑀯𑀸’’𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀲𑀸𑀥𑀸𑀭𑀡𑀯𑀘𑀦𑁂𑀦. 𑀢𑀲𑁆𑀫𑀸𑀢𑀺 𑀅𑀯𑀺𑀲𑁂𑀲𑀺𑀢𑀢𑁆𑀢𑀸.

𑀅𑀥𑀺𑀯𑀸𑀲𑁂𑀢𑁆𑀯𑀸 𑀕𑀢𑁂𑀲𑀽𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀸𑀥𑀺𑀯𑀸𑀲𑀦𑀓𑁆𑀔𑀡𑁂 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀫𑁆𑀧𑀺 𑀦𑀢𑁆𑀣𑀺, 𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀦𑁂 𑀧𑀦 𑀯𑀺𑀜𑁆𑀜𑀢𑁆𑀢𑀺𑀓𑁆𑀔𑀡𑁂 𑀇𑀢𑀭𑀲𑀺𑀓𑁆𑀔𑀸𑀧𑀤𑁂𑀳𑀺 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀪𑀼𑀢𑁆𑀯𑀸 𑀕𑀢𑁂𑀲𑀽𑀢𑀺 𑀏𑀢𑁆𑀣 𑀆𑀕𑀢𑁂𑀲𑀼𑀧𑀺 𑀪𑁄𑀚𑀦𑀓𑀺𑀘𑁆𑀘𑁂 𑀦𑀺𑀝𑁆𑀞𑀺𑀢𑁂 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀸𑀦𑀺 𑀘 𑀢𑁂𑀳𑀺 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀻𑀢𑀺 𑀬𑁂𑀳𑀺 𑀪𑁄𑀚𑀦𑁂𑀳𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀢𑀸𑀦𑀺 𑀪𑁄𑀚𑀦𑀸𑀦𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀺 𑀏𑀓𑁂𑀦 𑀧𑀘𑁆𑀙𑀸 𑀕𑀳𑀺𑀢𑀢𑁆𑀢𑀸. 𑀫𑀳𑀸𑀣𑁂𑀭𑁂𑀢𑀺 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀣𑀸𑀢𑀺 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀧𑀝𑀺𑀕𑁆𑀕𑀡𑁆𑀳𑀣. 𑀬𑀸𑀦𑀻𑀢𑀺 𑀓𑀼𑀫𑁆𑀫𑀸𑀲𑀸𑀤𑀻𑀦𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑁂𑀦 𑀧𑀘𑁆𑀙𑀸 𑀕𑀳𑀺𑀢𑀢𑁆𑀢𑀸 𑀏𑀓𑀢𑁄 𑀦 𑀕𑀳𑀺𑀢𑀸𑀦𑀺. 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁…𑀧𑁂… 𑀫𑁄𑀘𑁂𑀢𑀩𑁆𑀩𑀸𑀢𑀺 𑀏𑀢𑁂𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂 𑀲𑀸𑀤𑀺𑀢𑁂 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀤𑀺𑀢𑀁 𑀳𑁄𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀸𑀦𑀁 𑀕𑀡𑀪𑁄𑀚𑀦𑀸𑀧𑀢𑁆𑀢𑀺 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀽𑀢𑀲𑁆𑀲 𑀤𑁆𑀯𑀸𑀭𑁂 𑀆𑀕𑀦𑁆𑀢𑁆𑀯𑀸 𑀧𑀼𑀦 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀘𑀦𑀪𑀬𑁂𑀦 ‘‘𑀕𑀸𑀫𑀤𑁆𑀯𑀸𑀭𑁂 𑀅𑀝𑁆𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸𑀢𑀺 𑀅𑀦𑁆𑀢𑀭𑀯𑀻𑀣𑀺𑀆𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸. 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀖𑀭𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀤𑀻𑀬𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀯𑀢𑁆𑀢𑀣𑀸𑀢𑀺 𑀯𑀼𑀢𑁆𑀢𑁂 𑀧𑀦 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀦𑀺𑀯𑀢𑁆𑀢𑀣𑀸’’𑀢𑀺 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺.

𑀧𑀭𑀫𑁆𑀧𑀭𑀪𑁄𑀚𑀦𑀓𑀣𑀸

𑁨. 𑀧𑀭𑀫𑁆𑀧𑀭𑀪𑁄𑀚𑀦𑀓𑀣𑀸𑀬𑀁 𑀧𑀦 𑀧𑀭𑀲𑁆𑀲 𑀧𑀭𑀲𑁆𑀲 𑀪𑁄𑀚𑀦𑀁 𑀧𑀭𑀫𑁆𑀧𑀭𑀪𑁄𑀚𑀦𑀁. 𑀓𑀺𑀁 𑀢𑀁? 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑁄𑀚𑀦𑀓𑀺𑀭𑀺𑀬𑀸. 𑀧𑀭𑀫𑁆𑀧𑀭𑀪𑁄𑀚𑀦𑀁 𑀕𑀡𑀪𑁄𑀚𑀦𑀁 𑀯𑀺𑀬 𑀯𑀺𑀜𑁆𑀜𑀢𑁆𑀢𑀺𑀢𑁄 𑀘 𑀦𑀺𑀫𑀦𑁆𑀢𑀦𑀢𑁄 𑀘 𑀦 𑀧𑀲𑀯𑀢𑀻𑀢𑀺 𑀆𑀳 ‘‘𑀧𑀭𑀫𑁆𑀧𑀭𑀪𑁄𑀚𑀦𑀁 𑀧𑀦𑀸’’𑀢𑀺𑀆𑀤𑀺. 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀯𑀺𑀓𑀧𑁆𑀧𑀦𑀸𑀯𑀲𑁂𑀦𑁂𑀯 𑀢𑀁 𑀪𑀢𑁆𑀢𑀁 𑀅𑀲𑀦𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀯𑀺𑀓𑀧𑁆𑀧𑀦𑀁 𑀅𑀝𑁆𑀞𑀧𑁂𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀫𑁂𑀯 𑀞𑀧𑀺𑀢𑀁. 𑀧𑀭𑀺𑀯𑀸𑀭𑁂 (𑀧𑀭𑀺. 𑁮𑁬) 𑀧𑀦 𑀯𑀺𑀓𑀧𑁆𑀧𑀦𑀸𑀬𑀁 𑀅𑀦𑀼𑀚𑀸𑀦𑀦𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 ‘‘𑀘𑀢𑀲𑁆𑀲𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁, 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀁 𑀧𑀘𑁆𑀙𑀸 𑀯𑀤𑀦𑁆𑀢𑁄 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀫𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀓𑁂𑀘𑀺 𑀧𑀦 ‘‘𑀢𑀤𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀣𑁂𑀭𑁄 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀁 𑀦𑀸𑀓𑀸𑀲𑀺, 𑀪𑀕𑀯𑀢𑀸 𑀘 𑀯𑀺𑀲𑀼𑀁 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸 𑀧𑀞𑀫𑀦𑀺𑀫𑀦𑁆𑀢𑀦𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀘𑁆𑀙𑀸 𑀦𑀺𑀫𑀦𑁆𑀢𑀺𑀢𑀓𑀼𑀮𑁂 𑀮𑀤𑁆𑀥𑀪𑀺𑀓𑁆𑀔𑀢𑁄 𑀏𑀓𑀲𑀺𑀢𑁆𑀣𑀫𑁆𑀧𑀺 𑀅𑀚𑁆𑀛𑁄𑀳𑀭𑀢𑀺, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀳𑀺 𑀪𑁄𑀚𑀦𑁂𑀳𑀺 𑀦𑀺𑀫𑀦𑁆𑀢𑀺𑀢𑀲𑁆𑀲 𑀬𑁂𑀦 𑀬𑁂𑀦 𑀧𑀞𑀫𑀁 𑀦𑀺𑀫𑀦𑁆𑀢𑀺𑀢𑁄, 𑀢𑀲𑁆𑀲 𑀢𑀲𑁆𑀲 𑀪𑁄𑀚𑀦𑀢𑁄 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀭𑀲𑁆𑀲 𑀧𑀭𑀲𑁆𑀲 𑀪𑁄𑀚𑀦𑀁 𑀧𑀭𑀫𑁆𑀧𑀭𑀪𑁄𑀚𑀦𑀦𑁆𑀢𑀺 𑀆𑀳 ‘‘𑀲𑀘𑁂 𑀧𑀦 𑀫𑀽𑀮𑀦𑀺𑀫𑀦𑁆𑀢𑀦𑀁 𑀳𑁂𑀝𑁆𑀞𑀸 𑀳𑁄𑀢𑀺, 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀉𑀧𑀭𑀺, 𑀢𑀁 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀻’’𑀢𑀺. 𑀳𑀢𑁆𑀣𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀲𑀩𑁆𑀩𑀳𑁂𑀝𑁆𑀞𑀺𑀫𑀁 𑀕𑀡𑁆𑀳𑀦𑁆𑀢𑀲𑁆𑀲 𑀫𑀚𑁆𑀛𑁂 𑀞𑀺𑀢𑀫𑁆𑀧𑀺 𑀅𑀦𑁆𑀢𑁄𑀳𑀢𑁆𑀣𑀕𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀳𑀢𑁆𑀣𑀁 𑀧𑀦…𑀧𑁂… 𑀬𑀣𑀸 𑀬𑀣𑀸 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺. 𑀔𑀻𑀭𑀲𑁆𑀲 𑀭𑀲𑀲𑁆𑀲 𑀘 𑀪𑀢𑁆𑀢𑁂𑀦 𑀅𑀫𑀺𑀲𑁆𑀲𑀁 𑀳𑀼𑀢𑁆𑀯𑀸 𑀉𑀧𑀭𑀺 𑀞𑀺𑀢𑀢𑁆𑀢𑀸 ‘‘𑀔𑀻𑀭𑀁 𑀯𑀸 𑀭𑀲𑀁 𑀯𑀸 𑀧𑀺𑀯𑀢𑁄 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

‘‘𑀫𑀳𑀸𑀉𑀧𑀸𑀲𑀓𑁄𑀢𑀺 𑀕𑁂𑀳𑀲𑁆𑀲𑀸𑀫𑀺𑀓𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘𑀆𑀧𑀢𑁆𑀢𑀻’𑀢𑀺 𑀯𑀘𑀦𑁂𑀦 𑀓𑀼𑀭𑀼𑀦𑁆𑀤𑀺𑀬𑀁 ‘𑀯𑀝𑁆𑀝𑀢𑀻’𑀢𑀺 𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀺𑀪𑀸𑀯𑀺𑀢𑁄’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀲𑀩𑁆𑀩𑁂 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀯𑀲𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑀺. ‘‘𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀏𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀢𑀺𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑀞𑀫𑀁 𑀮𑀤𑁆𑀥𑀪𑀸𑀯𑁂 ‘‘𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁨𑁨𑁯) 𑀧𑀦 ‘‘𑀔𑀻𑀭𑀁 𑀯𑀸 𑀭𑀲𑀁 𑀯𑀸𑀢𑀺 𑀧𑀜𑁆𑀘𑀪𑁄𑀚𑀦𑀸𑀫𑀺𑀲𑁆𑀲𑀁 𑀪𑀢𑁆𑀢𑀢𑁄 𑀉𑀧𑀭𑀺 𑀞𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀅𑀪𑁄𑀚𑀦𑀢𑁆𑀢𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀺𑀯𑀢𑁄𑀧𑀺 𑀅𑀦𑀸𑀧𑀢𑁆𑀢𑀺. 𑀢𑁂𑀦𑀸𑀳 ‘𑀪𑀼𑀜𑁆𑀚𑀦𑁆𑀢𑁂𑀦𑀸’𑀢𑀺𑀆𑀤𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨𑁨𑁯) 𑀧𑀦 ‘‘𑀏𑀢𑁆𑀣 ‘𑀫𑀳𑀸𑀉𑀧𑀸𑀲𑀓𑁄 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀺…𑀧𑁂… 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀻’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀘𑀦𑀢𑁄, ‘𑀓𑀸𑀮𑀲𑁆𑀲𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀺𑀫𑁆𑀳𑀸’𑀢𑀺 𑀧𑀸𑀴𑀺𑀢𑁄, 𑀔𑀦𑁆𑀥𑀓𑁂 ‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀦𑀺𑀫𑀦𑁆𑀢𑀦𑁂 𑀅𑀜𑁆𑀜𑀲𑁆𑀲 𑀪𑁄𑀚𑁆𑀚𑀬𑀸𑀕𑀼 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀬𑁄 𑀪𑀼𑀜𑁆𑀚𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’𑀢𑀺 𑀯𑀘𑀦𑀢𑁄 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀸 𑀧𑀯𑁂𑀤𑁂𑀢𑀼 𑀅𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀸, 𑀧𑀞𑀫𑀕𑀳𑀺𑀢𑀦𑀺𑀫𑀦𑁆𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀞𑀫𑀦𑀺𑀫𑀦𑁆𑀢𑀦𑀪𑁄𑀚𑀦𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀲𑀦𑁆𑀢𑀓𑀁 𑀪𑁄𑀚𑀦𑀁 𑀧𑀭𑀫𑁆𑀧𑀭𑀪𑁄𑀚𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀲𑀗𑁆𑀖𑀕𑀡𑀢𑁄 𑀮𑀤𑁆𑀥𑀁 𑀯𑀸 𑀅𑀕𑀳𑀝𑁆𑀞𑀲𑀦𑁆𑀢𑀓𑀁 𑀯𑀝𑁆𑀝𑀢𑀺, 𑀦𑀺𑀫𑀦𑁆𑀢𑀦𑀢𑁄 𑀧𑀞𑀫𑀁 𑀦𑀺𑀩𑀤𑁆𑀥𑀢𑁆𑀢𑀸 𑀧𑀦 𑀦𑀺𑀘𑁆𑀘𑀪𑀢𑁆𑀢𑀸𑀤𑀺𑀧𑀭𑀲𑀦𑁆𑀢𑀓𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑀸𑀧𑀼𑀘𑁆𑀙𑀸𑀓𑀣𑀸

𑁩. 𑀅𑀦𑀸𑀧𑀼𑀘𑁆𑀙𑀸𑀓𑀣𑀸𑀬𑀁 ‘‘𑀧𑀓𑀢𑀺𑀯𑀘𑀦𑁂𑀦𑀸𑀢𑀺 𑀏𑀢𑁆𑀣 𑀬𑀁 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀺𑀢𑁂𑀦 𑀲𑁄𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀢𑀁 𑀧𑀓𑀢𑀺𑀯𑀘𑀦𑀁 𑀦𑀸𑀫. 𑀆𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 ‘𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀖𑀭𑀁 𑀕𑀘𑁆𑀙𑀸𑀫𑀻’𑀢𑀺 𑀯𑀸 ‘𑀘𑀸𑀭𑀺𑀢𑁆𑀢𑀓𑀁 𑀆𑀧𑀚𑁆𑀚𑀸𑀫𑀻’𑀢𑀺 𑀯𑀸 𑀈𑀤𑀺𑀲𑁂𑀦 𑀯𑀘𑀦𑁂𑀦 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀫𑀦𑁆𑀢𑀦𑀲𑀸𑀤𑀺𑀬𑀦𑀁, 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸, 𑀪𑀢𑁆𑀢𑀺𑀬𑀖𑀭𑀢𑁄 𑀅𑀜𑁆𑀜𑀖𑀭𑀧𑁆𑀧𑀯𑁂𑀲𑀦𑀁, 𑀫𑀚𑁆𑀛𑀦𑁆𑀳𑀺𑀓𑀸𑀦𑀢𑀺𑀓𑁆𑀓𑀫𑁄, 𑀲𑀫𑀬𑀲𑁆𑀲 𑀯𑀸 𑀆𑀧𑀤𑀸𑀦𑀁 𑀯𑀸 𑀅𑀪𑀸𑀯𑁄𑀢𑀺 𑀇𑀫𑀸𑀦𑀺 𑀧𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁨𑁯𑁮) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀘𑀺𑀢𑁆𑀢𑀺𑀬 𑁨.𑁨𑁯𑁮) 𑀧𑀦 ‘‘𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀅𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀺𑀲𑁆𑀲𑀢𑀺, 𑀲𑁄 𑀲𑀘𑁂𑀧𑀺 𑀧𑀓𑀢𑀺𑀯𑀘𑀦𑀲𑁆𑀲 𑀲𑀯𑀦𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘𑀅𑀧𑀺𑀘…𑀧𑁂… 𑀬𑀁 𑀧𑀲𑁆𑀲𑀢𑀺, 𑀲𑁄 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’𑀢𑀺𑀆𑀤𑀺. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀘𑁂𑀢𑁆𑀣 𑀅𑀦𑁆𑀢𑀭𑀸𑀭𑀸𑀫𑀸𑀤𑀻𑀦𑀜𑁆𑀜𑁂𑀯 𑀯𑀼𑀢𑁆𑀢𑀢𑁆𑀢𑀸 𑀯𑀺𑀳𑀸𑀭𑀢𑁄 𑀕𑀸𑀫𑀯𑀻𑀣𑀺𑀁 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀁 𑀯𑀺𑀦𑀸 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀳𑁄𑀢𑀺, 𑀦 𑀧𑀦 𑀖𑀭𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯. 𑀬𑀁 𑀧𑀦 𑀧𑀸𑀴𑀺𑀬𑀁 ‘𑀅𑀜𑁆𑀜𑀲𑁆𑀲 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲…𑀧𑁂… 𑀧𑀞𑀫𑀧𑀸𑀤𑀁 𑀉𑀫𑁆𑀫𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀕𑀸𑀫𑁂 𑀧𑀯𑀺𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀜𑁆𑀜𑀲𑁆𑀲 𑀖𑀭𑀽𑀧𑀘𑀸𑀭𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀯𑀻𑀣𑀺𑀫𑀚𑁆𑀛𑁂𑀦𑁂𑀯 𑀕𑀦𑁆𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀖𑀭𑀤𑁆𑀯𑀸𑀭𑀸𑀪𑀺𑀫𑀼𑀔𑁂 𑀞𑀢𑁆𑀯𑀸 𑀫𑀦𑀼𑀲𑁆𑀲𑁂 𑀑𑀮𑁄𑀓𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀧𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑀢𑁆𑀣 𑀓𑁂𑀘𑀺 ‘𑀯𑀻𑀣𑀺𑀬𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀖𑀭𑀽𑀧𑀘𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘𑀬𑀸𑀦𑀺 𑀓𑀼𑀮𑀸𑀦𑀺 𑀉𑀤𑁆𑀤𑀺𑀲𑁆𑀲 𑀕𑀢𑁄, 𑀢𑁂𑀲𑀁 𑀕𑀡𑀦𑀸𑀬𑀸’𑀢𑀺. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀦𑀺𑀫𑀦𑁆𑀢𑀦𑀲𑀸𑀤𑀺𑀬𑀦𑀁, 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀦𑀸, 𑀪𑀢𑁆𑀢𑀺𑀬𑀖𑀭𑀢𑁄 𑀅𑀜𑁆𑀜𑀖𑀭𑀽𑀧𑀲𑀗𑁆𑀓𑀫𑀦𑀁, 𑀫𑀚𑁆𑀛𑀦𑁆𑀳𑀺𑀓𑀸𑀦𑀢𑀺𑀓𑁆𑀓𑀫𑁄, 𑀲𑀫𑀬𑀸𑀧𑀤𑀸𑀦𑀁 𑀅𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀻’’𑀢𑀺. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑁂𑀧𑀺 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑁄 𑀇𑀥 𑀉𑀧𑀘𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀦𑀸, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀦𑁆𑀢𑀺 𑀇𑀫𑀸𑀦𑀺 𑀧𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺.

𑀧𑀁𑀲𑀼𑀓𑀽𑀮𑀓𑀣𑀸

𑁪. 𑀧𑀁𑀲𑀼𑀓𑀽𑀮𑀓𑀣𑀸𑀬𑀁 𑀅𑀪𑀺𑀦𑁆𑀦𑁂 𑀲𑀭𑀻𑀭𑁂𑀢𑀺 𑀅𑀩𑁆𑀪𑀼𑀡𑁆𑀳𑁂 𑀅𑀮𑁆𑀮𑀲𑀭𑀻𑀭𑁂. ‘‘𑀅𑀩𑁆𑀪𑀼𑀡𑁆𑀳𑁂’’𑀢𑀺 𑀇𑀫𑀺𑀦𑀸𑀧𑀺 𑀯𑀼𑀢𑁆𑀢𑀫𑁂𑀯 𑀧𑀭𑀺𑀬𑀸𑀬𑀪𑁂𑀤𑀫𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀮𑁆𑀮𑀲𑀭𑀻𑀭𑁂’’𑀢𑀺 𑀯𑀼𑀢𑁆𑀢𑀁.

𑀯𑀺𑀲𑀪𑀸𑀕𑀲𑀭𑀻𑀭𑁂𑀢𑀺 𑀇𑀢𑁆𑀣𑀺𑀲𑀭𑀻𑀭𑁂. 𑀯𑀺𑀲𑀪𑀸𑀕𑀲𑀭𑀻𑀭𑀢𑁆𑀢𑀸 𑀅𑀘𑁆𑀘𑀸𑀲𑀦𑁆𑀦𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀲𑁂 𑀯𑀸’’𑀢𑀺𑀆𑀤𑀺. 𑀯𑀝𑁆𑀝𑀢𑀻𑀢𑀺 𑀯𑀺𑀲𑀪𑀸𑀕𑀲𑀭𑀻𑀭𑁂𑀧𑀺 𑀅𑀢𑁆𑀢𑀦𑀸𑀯 𑀯𑀼𑀢𑁆𑀢𑀯𑀺𑀥𑀺𑀁 𑀓𑀸𑀢𑀼𑀁 𑀲𑀸𑀝𑀓𑀜𑁆𑀘 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀓𑁂𑀘𑀺 𑀧𑀦 ‘‘𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀇𑀢𑁆𑀣𑀺𑀭𑀽𑀧𑀁 𑀧𑀦 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺 𑀢𑀢𑁄 𑀧𑁂𑀢𑀢𑁆𑀢𑀪𑀸𑀯𑀢𑁄 𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀩𑁆𑀪𑀼𑀡𑁆𑀳𑁂𑀢𑀺 𑀆𑀲𑀦𑁆𑀦𑀫𑀭𑀡𑀢𑀸𑀬 𑀲𑀭𑀻𑀭𑀲𑁆𑀲 𑀉𑀡𑁆𑀳𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯𑀸𑀳 ‘𑀅𑀮𑁆𑀮𑀲𑀭𑀻𑀭𑁂’𑀢𑀺. 𑀓𑀼𑀡𑀧𑀲𑀪𑀸𑀯𑀁 𑀉𑀧𑀕𑀢𑀫𑁆𑀧𑀺 𑀪𑀺𑀦𑁆𑀦𑀫𑁂𑀯 𑀅𑀮𑁆𑀮𑀪𑀸𑀯𑀢𑁄 𑀪𑀺𑀦𑁆𑀦𑀢𑁆𑀢𑀸. 𑀯𑀺𑀲𑀪𑀸𑀕𑀲𑀭𑀻𑀭𑁂𑀢𑀺 𑀇𑀢𑁆𑀣𑀺𑀲𑀭𑀻𑀭𑁂. ‘𑀲𑀻𑀲𑁂 𑀯𑀸’𑀢𑀺𑀆𑀤𑀺 𑀅𑀥𑀓𑁆𑀔𑀓𑁂 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂 𑀧𑀤𑁂𑀲𑁂 𑀘𑀺𑀢𑁆𑀢𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑀸𑀫𑀲𑀦𑁆𑀢𑁂𑀦 𑀓𑀢𑀁 𑀲𑀼𑀓𑀢𑀫𑁂𑀯. 𑀫𑀢𑀲𑀭𑀻𑀭𑀫𑁆𑀧𑀺 𑀳𑀺 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀜𑁆𑀘𑀺𑀘𑁆𑀘 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀫𑁂𑀯. 𑀦 𑀳𑀺 𑀅𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀓𑁂𑀧𑀺 𑀘𑀺𑀢𑁆𑀢𑀸𑀤𑀺𑀇𑀢𑁆𑀣𑀺𑀭𑀽𑀧𑁂 𑀪𑀯𑀦𑁆𑀢𑀁 𑀤𑀼𑀓𑁆𑀓𑀝𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁂 𑀫𑀢𑀺𑀢𑁆𑀣𑀺𑀲𑀭𑀻𑀭𑁂 𑀦𑀺𑀯𑀢𑁆𑀢𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁩𑁫) 𑀯𑀼𑀢𑁆𑀢.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀘𑀭𑀺𑀬𑁂𑀦 𑀅𑀯𑀼𑀢𑁆𑀢𑀸𑀧𑀺 𑀧𑀁𑀲𑀼𑀓𑀽𑀮𑀓𑀣𑀸 𑀧𑀁𑀲𑀼𑀓𑀽𑀮𑀲𑀸𑀫𑀜𑁆𑀜𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁪𑁦) 𑀏𑀯𑀁 𑀆𑀕𑀢𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀬𑁂 𑀢𑁂 𑀪𑀺𑀓𑁆𑀔𑀽 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀦𑁆𑀢𑀺, 𑀢𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀧𑀁𑀲𑀼𑀓𑀽𑀮𑀁 𑀦 𑀲𑀸𑀤𑀺𑀬𑀦𑁆𑀢𑀺 ‘𑀏𑀓𑀁𑀬𑁂𑀯 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀤𑁆𑀯𑁂’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀦𑁆𑀢𑁂𑀦 𑀧𑀁𑀲𑀼𑀓𑀽𑀮𑀫𑁆𑀧𑀺 𑀲𑀸𑀤𑀺𑀬𑀺𑀢𑀼𑀁, 𑀢𑀤𑀼𑀪𑀬𑁂𑀦𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁 𑀯𑀡𑁆𑀡𑁂𑀫𑀻’’𑀢𑀺. 𑀢𑀢𑁆𑀣 ‘‘𑀏𑀓𑀁𑀬𑁂𑀯 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀤𑁆𑀯𑁂𑀢𑀺 𑀢𑁂 ‘𑀓𑀺𑀭 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦𑀸’𑀢𑀺 𑀏𑀢𑀲𑁆𑀲 ‘𑀕𑀳𑀧𑀢𑀺𑀓𑁂𑀦 𑀯𑀸 𑀧𑀁𑀲𑀼𑀓𑀽𑀮𑁂𑀦 𑀯𑀸’𑀢𑀺 𑀏𑀯𑀁 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑀺𑀁𑀲𑀼. 𑀢𑀢𑁆𑀣 𑀧𑀦 𑀇𑀢𑀭𑀻𑀢𑀭𑁂𑀦𑀧𑀻𑀢𑀺 𑀅𑀧𑁆𑀧𑀕𑁆𑀖𑁂𑀦𑀧𑀺 𑀫𑀳𑀕𑁆𑀖𑁂𑀦𑀧𑀺 𑀬𑁂𑀦 𑀓𑁂𑀦𑀘𑀻𑀢𑀺 𑀅𑀢𑁆𑀣𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀥𑀼𑀢𑀗𑁆𑀕𑀁 𑀅𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀺𑀦𑀬𑀧𑀁𑀲𑀼𑀓𑀽𑀮𑀫𑀢𑁆𑀢𑀲𑀸𑀤𑀺𑀬𑀓𑁂𑀦 𑀪𑀺𑀓𑁆𑀔𑀼𑀦𑀸 𑀕𑀳𑀧𑀢𑀺𑀘𑀻𑀯𑀭𑀫𑁆𑀧𑀺 𑀲𑀸𑀤𑀺𑀢𑀩𑁆𑀩𑀁 𑀳𑁄𑀢𑀺, 𑀧𑀁𑀲𑀼𑀓𑀽𑀮𑀥𑀼𑀢𑀗𑁆𑀕𑀥𑀭𑀲𑁆𑀲 𑀧𑀦 𑀕𑀳𑀧𑀢𑀺𑀘𑀻𑀯𑀭𑀁 𑀦 𑀯𑀝𑁆𑀝𑀢𑀺 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀲𑀫𑀸𑀤𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦𑀸𑀕𑀫𑁂𑀲𑀼𑀁, 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦𑀸𑀕𑀫𑀺𑀢𑁆𑀣𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀕𑀫𑁂𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺. 𑀢𑀢𑁆𑀣 𑀦𑀸𑀕𑀫𑁂𑀲𑀼𑀦𑁆𑀢𑀺 𑀬𑀸𑀯 𑀢𑁂 𑀲𑀼𑀲𑀸𑀦𑀢𑁄 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀢𑁂 𑀦 𑀅𑀘𑁆𑀙𑀺𑀁𑀲𑀼, 𑀧𑀓𑁆𑀓𑀫𑀺𑀁𑀲𑀼𑀬𑁂𑀯. 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺 𑀦 𑀅𑀦𑀺𑀘𑁆𑀙𑀸𑀬 𑀤𑀸𑀢𑀼𑀁. 𑀬𑀤𑀺 𑀧𑀦 𑀇𑀘𑁆𑀙𑀦𑁆𑀢𑀺, 𑀤𑀸𑀢𑀩𑁆𑀩𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀆𑀕𑀫𑁂𑀲𑀼𑀁, 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑀸,𑀏 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀕𑀫𑁂𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬, 𑀢𑁂 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸 𑀑𑀓𑁆𑀓𑀫𑀺𑀁𑀲𑀼, 𑀢𑁂 𑀦 𑀮𑀪𑀺𑀁𑀲𑀼. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀑𑀓𑁆𑀓𑀫𑀺𑀢𑁆𑀣𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸𑀦𑀁 𑀦𑀸𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀤𑀺𑀲𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼, 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀤𑀺𑀲𑀸𑀦𑀁 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺.

𑀢𑀢𑁆𑀣 𑀆𑀕𑀫𑁂𑀲𑀼𑀦𑁆𑀢𑀺 𑀉𑀧𑀘𑀸𑀭𑁂 𑀅𑀘𑁆𑀙𑀺𑀁𑀲𑀼. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀕𑀫𑁂𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺. 𑀉𑀧𑀘𑀸𑀭𑁂𑀢𑀺 𑀲𑀼𑀲𑀸𑀦𑀲𑁆𑀲 𑀆𑀲𑀦𑁆𑀦𑀧𑁆𑀧𑀤𑁂𑀲𑁂. 𑀬𑀤𑀺 𑀧𑀦 𑀫𑀦𑀼𑀲𑁆𑀲𑀸 ‘‘𑀇𑀥𑀸𑀕𑀢𑀸 𑀏𑀯 𑀕𑀡𑁆𑀳𑀦𑁆𑀢𑀽’’𑀢𑀺 𑀤𑁂𑀦𑁆𑀢𑀺, 𑀲𑀜𑁆𑀜𑀸𑀡𑀁 𑀯𑀸 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 ‘‘𑀲𑀫𑁆𑀧𑀢𑁆𑀢𑀸 𑀕𑀡𑁆𑀳𑀦𑁆𑀢𑀽’’𑀢𑀺. 𑀲𑀫𑁆𑀧𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸, 𑀬𑁂𑀦 𑀕𑀳𑀺𑀢𑀁, 𑀲𑁄 𑀏𑀯 𑀲𑀸𑀫𑀻. 𑀲𑀤𑀺𑀲𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀽𑀢𑀺 𑀲𑀩𑁆𑀩𑁂 𑀲𑀫𑀁 𑀑𑀓𑁆𑀓𑀫𑀺𑀁𑀲𑀼, 𑀏𑀓𑀤𑀺𑀲𑀸𑀬 𑀯𑀸 𑀑𑀓𑁆𑀓𑀫𑀺𑀁𑀲𑀽𑀢𑀺𑀧𑀺 𑀅𑀢𑁆𑀣𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀓𑀢𑀺𑀓𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀑𑀓𑁆𑀓𑀫𑀺𑀁𑀲𑀼 𑀧𑀁𑀲𑀼𑀓𑀽𑀮𑀸𑀬. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀸𑀦𑀺 𑀮𑀪𑀺𑀁𑀲𑀼, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀦 𑀮𑀪𑀺𑀁𑀲𑀼, 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀅𑀫𑁆𑀳𑀸𑀓𑀫𑁆𑀧𑀺, 𑀆𑀯𑀼𑀲𑁄, 𑀪𑀸𑀕𑀁 𑀤𑁂𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀪𑀸𑀕𑀁 𑀤𑀲𑁆𑀲𑀸𑀫, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀦 𑀮𑀪𑀺𑀢𑁆𑀣𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀢𑀺𑀓𑀁 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼𑀦𑁆𑀢𑀺. 𑀢𑀢𑁆𑀣 𑀢𑁂 𑀓𑀢𑀺𑀓𑀁 𑀓𑀢𑁆𑀯𑀸𑀢𑀺 ‘‘𑀮𑀤𑁆𑀥𑀁 𑀧𑀁𑀲𑀼𑀓𑀽𑀮𑀁 𑀲𑀩𑁆𑀩𑁂 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀺𑀫𑁂𑀯 𑀓𑀢𑀺𑀓𑀁 𑀓𑀢𑁆𑀯𑀸. 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸𑀢𑀺 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸. 𑀏𑀢𑁂𑀦 ‘‘𑀪𑀺𑀓𑁆𑀔𑀽 𑀕𑀡𑁆𑀳𑀦𑁆𑀢𑀽’’𑀢𑀺 𑀙𑀟𑁆𑀟𑀺𑀢𑁂 𑀏𑀯 𑀅𑀓𑀸𑀫𑀸 𑀪𑀸𑀕𑀤𑀸𑀦𑀁 𑀯𑀺𑀳𑀺𑀢𑀁, 𑀓𑁂𑀯𑀮𑀁 𑀙𑀟𑁆𑀟𑀺𑀢𑁂 𑀧𑀦 𑀓𑀢𑀺𑀓𑀸𑀬 𑀅𑀲𑀢𑀺 𑀏𑀓𑀢𑁄 𑀩𑀳𑀽𑀲𑀼 𑀧𑀯𑀺𑀝𑁆𑀞𑁂𑀲𑀼 𑀬𑁂𑀦 𑀕𑀳𑀺𑀢𑀁, 𑀢𑁂𑀦 𑀅𑀓𑀸𑀫𑀸 𑀪𑀸𑀕𑁄 𑀦 𑀤𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀦𑀸 𑀤𑀺𑀲𑀸 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀏𑀢𑁂𑀲𑀦𑁆𑀢𑀺 𑀲𑀤𑀺𑀲𑀸𑀢𑀺 𑀆𑀳 ‘‘𑀏𑀓𑀤𑀺𑀲𑀸𑀬 𑀯𑀸 𑀑𑀓𑁆𑀓𑀫𑀺𑀁𑀲𑀽’’𑀢𑀺.

𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀣𑀸

𑁫. 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀣𑀸𑀬𑀁 𑀅𑀦𑀼𑀧𑀼𑀩𑁆𑀩𑀓𑀣𑀸𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀲𑁂𑀲𑀧𑀭𑀺𑀓𑁆𑀔𑀸𑀭𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀳𑀺 𑀕𑀳𑀺𑀢𑀢𑁆𑀢𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑁂𑀯 𑀅𑀯𑀲𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑀢𑁆𑀢𑀁𑀬𑁂𑀯 𑀳𑀭𑀺𑀢𑁆𑀯𑀸’’𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀢𑀸𑀯 𑀆𑀕𑀫𑀦𑀲𑁆𑀲 𑀯𑀸 𑀅𑀦𑀸𑀕𑀫𑀦𑀲𑁆𑀲 𑀯𑀸 𑀅𑀚𑀸𑀦𑀦𑀢𑀸𑀬 𑀯𑀼𑀢𑁆𑀢𑀁 ‘‘𑀣𑁂𑀭𑁂𑀳𑀺 𑀦𑁂𑀯 𑀢𑀸𑀯…𑀧𑁂… 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀧𑀭𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀮𑀪𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀤𑀤𑀫𑀸𑀦𑀸 𑀲𑀬𑀁 𑀲𑀸𑀔𑀸𑀪𑀗𑁆𑀕𑁂𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀢𑁂𑀲𑀁 𑀅𑀢𑁆𑀣𑀸𑀬𑀧𑀺 𑀪𑀜𑁆𑀚𑀺𑀢𑀼𑀁 𑀮𑀪𑀦𑁆𑀢𑀺. ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀈𑀤𑀺𑀲𑁂𑀲𑀼 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀧𑀺 𑀅𑀦𑀼𑀜𑁆𑀜𑀸𑀢𑀸𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀦𑁂𑀯 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻’’𑀢𑀺. 𑀦 𑀢𑁂𑀲𑀁 𑀥𑀸𑀭𑀡𑁂 𑀤𑀼𑀓𑁆𑀓𑀝𑀦𑁆𑀢𑀺 𑀢𑁂𑀲𑀁 𑀢𑀺𑀢𑁆𑀣𑀺𑀬𑀥𑀚𑀸𑀦𑀁 𑀥𑀸𑀭𑀡𑁂𑀧𑀺 𑀤𑀼𑀓𑁆𑀓𑀝𑀁 𑀦𑀢𑁆𑀣𑀺.

𑀬𑀸𑀦𑀺 𑀘 𑀦𑁂𑀲𑀁 𑀯𑀢𑁆𑀣𑀸𑀦𑀺 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑀸𑀦𑀁 𑀲𑀬𑀫𑁂𑀯 𑀤𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸’’𑀢𑀺. 𑀬𑀤𑀺 𑀮𑀤𑁆𑀥𑀺𑀁 𑀕𑀡𑁆𑀳𑀸𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀮𑀤𑁆𑀥𑀺𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺. ‘‘𑀦𑁄 𑀘𑁂 𑀳𑁄𑀢𑀺, 𑀲𑀗𑁆𑀖𑀲𑁆𑀲 𑀯𑀺𑀳𑀸𑀭𑀘𑀻𑀯𑀭𑀁 𑀯𑀸…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀯𑀺𑀝𑁆𑀞𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀘 ‘‘𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀞𑀺𑀢𑀯𑀺𑀳𑀸𑀭𑀫𑁆𑀧𑀺 𑀲𑀘𑁂 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀢𑀢𑁆𑀣 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀦𑁄𑀓𑀸𑀲𑀢𑁆𑀢𑀸. 𑀢𑀢𑁆𑀣 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀯𑀸…𑀧𑁂… 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦 𑀲𑀗𑁆𑀖𑀺𑀓𑀫𑁆𑀧𑀺 𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑀼𑀁 𑀧𑀸𑀭𑀼𑀧𑀺𑀢𑀼𑀜𑁆𑀘 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀬𑀁 𑀆𑀯𑀸𑀲𑀁 𑀧𑀞𑀫𑀁…𑀧𑁂… 𑀕𑀳𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑀼’’𑀦𑁆𑀢𑀺 𑀆𑀳, 𑀢𑀲𑁆𑀫𑀸 𑀢𑀢𑁆𑀣 𑀅𑀦𑁄𑀓𑀸𑀲𑀢𑁆𑀢𑀸 𑀤𑀼𑀓𑁆𑀓𑀝𑀁 𑀦 𑀯𑀼𑀢𑁆𑀢𑀁.

𑀯𑀺𑀳𑀸𑀭𑀘𑀻𑀯𑀭𑀦𑁆𑀢𑀺 𑀲𑁂𑀦𑀸𑀲𑀦𑀘𑀻𑀯𑀭𑀁. 𑀘𑀺𑀫𑀺𑀮𑀺𑀓𑀸𑀳𑀻𑀢𑀺 𑀧𑀝𑀧𑀺𑀮𑁄𑀢𑀺𑀓𑀸𑀳𑀺. 𑀢𑀲𑁆𑀲 𑀉𑀧𑀭𑀻𑀢𑀺 𑀪𑀽𑀫𑀢𑁆𑀣𑀭𑀡𑀲𑁆𑀲 𑀉𑀧𑀭𑀺. 𑀯𑀺𑀤𑁂𑀲𑀕𑀢𑁂𑀦𑀸𑀢𑀺 𑀅𑀜𑁆𑀜𑀁 𑀘𑀻𑀯𑀭𑀁 𑀅𑀮𑀪𑀺𑀢𑁆𑀯𑀸 𑀯𑀺𑀤𑁂𑀲𑀕𑀢𑁂𑀦. 𑀏𑀓𑀲𑁆𑀫𑀺𑀁…𑀧𑁂… 𑀞𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀲𑁂𑀲𑁂𑀦 𑀕𑀳𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀞𑀧𑁂𑀦𑁆𑀢𑁂𑀦 𑀘 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑀯𑀲𑁂𑀦𑁂𑀯 𑀞𑀧𑀺𑀢𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀦𑀺𑀬𑀫𑀺𑀢𑀫𑁆𑀧𑀺 𑀅𑀜𑁆𑀜𑀢𑁆𑀣 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀪𑁄𑀕𑁂𑀦𑁂𑀯𑀸𑀢𑀺 𑀅𑀜𑁆𑀜𑀁 𑀘𑀻𑀯𑀭𑀁 𑀅𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁂𑀦.

𑀧𑀭𑀺𑀪𑁄𑀕𑀚𑀺𑀡𑁆𑀡𑀦𑁆𑀢𑀺 𑀬𑀣𑀸 𑀢𑁂𑀦 𑀘𑀻𑀯𑀭𑁂𑀦 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀚𑀺𑀡𑁆𑀡𑀁. 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀸𑀢𑀺 𑀓𑀬𑀯𑀺𑀓𑁆𑀓𑀬𑀸𑀧𑀢𑁆𑀢𑀺𑀢𑁄 𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀲𑁆𑀲𑁂𑀯 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀘𑁂𑀢𑀸𑀧𑁂𑀦𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀸𑀧𑁂𑀦𑁆𑀢𑀲𑁆𑀲𑀸’’𑀢𑀺. 𑀅𑀢𑁆𑀢𑀦𑁄 𑀥𑀦𑁂𑀦 𑀳𑀺 𑀯𑀺𑀜𑁆𑀜𑀸𑀧𑀦𑀁 𑀦𑀸𑀫 𑀧𑀭𑀺𑀯𑀢𑁆𑀢𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑀸𑀦𑀁 𑀯𑀺𑀜𑁆𑀜𑀸𑀧𑀦𑁂 𑀯𑀢𑁆𑀢𑀁 𑀤𑀲𑁆𑀲𑁂𑀢𑀺 ‘‘𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺. 𑀲𑀗𑁆𑀖𑀯𑀲𑁂𑀦 𑀳𑀺 𑀧𑀯𑀸𑀭𑀺𑀢𑁂 𑀲𑀩𑁆𑀩𑁂𑀲𑀁 𑀲𑀸𑀥𑀸𑀭𑀡𑀢𑁆𑀢𑀸 𑀅𑀥𑀺𑀓𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀬𑀁 𑀧𑀯𑀸𑀭𑁂𑀢𑀻𑀢𑀺 𑀬𑀁 𑀬𑀁 𑀘𑀻𑀯𑀭𑀸𑀤𑀺𑀁 𑀤𑀲𑁆𑀲𑀸𑀫𑀻𑀢𑀺 𑀧𑀯𑀸𑀭𑁂𑀢𑀺. 𑀯𑀺𑀜𑁆𑀜𑀸𑀧𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀤𑀻𑀬𑀫𑀸𑀦𑀢𑁆𑀢𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣𑀧𑀺 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀤𑀁 𑀅𑀦𑀼𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂’’𑀢𑀺𑀆𑀤𑀺. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁧𑁫) 𑀧𑀦 𑀧𑀸𑀴𑀺𑀬𑀁 𑀥𑀫𑁆𑀫𑀦𑀺𑀫𑀦𑁆𑀢𑀦𑀸𑀢𑀺 𑀲𑀫𑀡𑁂𑀲𑀼 𑀯𑀢𑁆𑀢𑀩𑁆𑀩𑀸𑀘𑀸𑀭𑀥𑀫𑁆𑀫𑀫𑀢𑁆𑀢𑀯𑀲𑁂𑀦 𑀦𑀺𑀫𑀦𑁆𑀢𑀦𑀸, 𑀤𑀸𑀢𑀼𑀓𑀸𑀫𑀢𑀸𑀬 𑀓𑀢𑀦𑀺𑀫𑀦𑁆𑀢𑀦𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 ‘‘𑀯𑀺𑀜𑁆𑀜𑀸𑀧𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀢𑁄 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀳𑁄𑀢𑀺.

‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀆𑀳 ‘‘𑀦𑁂𑀯𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬𑀸’’𑀢𑀺𑀆𑀤𑀺. 𑀧𑀞𑀫𑀁 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀏𑀯𑀸𑀢𑀺 𑀆𑀳 ‘‘𑀦𑀺𑀯𑀸𑀲𑁂𑀢𑁆𑀯𑀸𑀧𑀺 𑀮𑀤𑁆𑀥𑀺 𑀦 𑀕𑀳𑁂𑀢𑀩𑁆𑀩𑀸’’𑀢𑀺.

𑀬𑀁 𑀆𑀯𑀸𑀲𑀁 𑀧𑀞𑀫𑀁 𑀉𑀧𑀕𑀘𑁆𑀙𑀢𑀻𑀢𑀺 𑀏𑀢𑁆𑀣𑀧𑀺 𑀯𑀺𑀳𑀸𑀭𑀘𑀻𑀯𑀭𑀸𑀤𑀺𑀅𑀢𑁆𑀣𑀸𑀬 𑀧𑀯𑀺𑀲𑀦𑁆𑀢𑁂𑀦𑀧𑀺 𑀢𑀺𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀯 𑀕𑀦𑁆𑀢𑀩𑁆𑀩𑀁, ‘‘𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀘𑀺𑀫𑀺𑀮𑀺𑀓𑀸𑀳𑀻𑀢𑀺 𑀧𑀝𑀧𑀺𑀮𑁄𑀢𑀺𑀓𑀸𑀳𑀺. 𑀧𑀭𑀺𑀪𑁄𑀕𑁂𑀦𑁂𑀯𑀸𑀢𑀺 𑀅𑀜𑁆𑀜𑀁 𑀘𑀻𑀯𑀭𑀁 𑀅𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁂𑀦. 𑀧𑀭𑀺𑀪𑁄𑀕𑀚𑀺𑀡𑁆𑀡𑀦𑁆𑀢𑀺 𑀬𑀣𑀸 𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁 𑀑𑀪𑀕𑁆𑀕𑀯𑀺𑀪𑀕𑁆𑀕𑀢𑀸𑀬 𑀅𑀲𑀸𑀭𑀼𑀧𑁆𑀧𑀁 𑀳𑁄𑀢𑀺, 𑀏𑀯𑀁 𑀚𑀺𑀡𑁆𑀡𑀁.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀏𑀢𑁆𑀣𑀧𑀺 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀤𑀁 𑀅𑀦𑀼𑀯𑀢𑁆𑀢𑀢𑁂𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀜𑀸𑀢𑀓𑀧𑀯𑀸𑀭𑀺𑀢𑁂’’𑀢𑀺𑀆𑀤𑀺. 𑀇𑀥 𑀧𑀦 𑀅𑀜𑁆𑀜𑀲𑁆𑀲 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀘𑀻𑀯𑀭𑀲𑁆𑀲 𑀅𑀢𑁆𑀣𑀸𑀬 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀇𑀢𑀭𑀣𑀸 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑁄 𑀦 𑀪𑀯𑁂𑀬𑁆𑀬, 𑀢𑁂𑀦𑁂𑀯 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀓𑁆𑀔𑀢𑀺 ‘‘𑀅𑀝𑁆𑀞𑀓𑀣𑀸𑀲𑀼 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁬) 𑀧𑀦 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂…𑀧𑁂… 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻’’𑀢𑀺 𑀘 ‘‘𑀬𑀲𑁆𑀫𑀸 𑀧𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀘. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

‘‘𑀢𑀜𑁆𑀘𑁂 𑀅𑀜𑁆𑀜𑀸𑀢𑀓𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸 𑀩𑀳𑀽𑀳𑀺 𑀘𑀻𑀯𑀭𑁂𑀳𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀢𑀤𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁫𑁨𑁩) 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄, 𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄, 𑀕𑀡𑁆𑀳𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀸𑀭𑁂𑀬𑁆𑀬𑀸𑀢𑀺 𑀇𑀘𑁆𑀙𑀸𑀧𑁂𑀬𑁆𑀬, 𑀇𑀘𑁆𑀙𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀬𑁆𑀬 𑀯𑀤𑁂𑀬𑁆𑀬 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑁂𑀦 𑀧𑀦 𑀬𑀣𑀸 𑀯𑀢𑁆𑀢𑀩𑁆𑀩𑀁. 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀯𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀸𑀯𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀣𑀸 ‘‘𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺 𑀏𑀢𑁆𑀣 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄, 𑀏𑀯𑀫𑀺𑀥𑀧𑀺 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀬𑀸𑀪𑀺𑀳𑀸𑀭𑁄 𑀯𑀸𑀘𑀸𑀪𑀺𑀳𑀸𑀭𑁄𑀢𑀺 𑀤𑀼𑀯𑀺𑀥𑁄 𑀅𑀪𑀺𑀳𑀸𑀭𑁄. 𑀓𑀸𑀬𑁂𑀦 𑀯𑀸 𑀳𑀺 𑀯𑀢𑁆𑀣𑀸𑀤𑀻𑀦𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀬𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀦𑁆𑀢𑁄 𑀧𑀯𑀸𑀭𑁂𑀬𑁆𑀬, 𑀯𑀸𑀘𑀸𑀬 𑀯𑀸 ‘‘𑀅𑀫𑁆𑀳𑀸𑀓𑀁 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀁 𑀧𑀭𑀺𑀧𑀼𑀡𑁆𑀡𑀁, 𑀬𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀤𑀦𑁆𑀢𑁄 𑀧𑀯𑀸𑀭𑁂𑀬𑁆𑀬, 𑀢𑀤𑀼𑀪𑀬𑀫𑁆𑀧𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀦𑁆𑀢𑀺 𑀲𑀅𑀦𑁆𑀢𑀭𑀁 𑀉𑀢𑁆𑀢𑀭𑀁 𑀧𑀭𑀫𑀁 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁, 𑀦𑀺𑀯𑀸𑀲𑀦𑁂𑀦 𑀲𑀤𑁆𑀥𑀺𑀁 𑀧𑀸𑀭𑀼𑀧𑀦𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀢𑀢𑁄 𑀅𑀪𑀺𑀳𑀝𑀘𑀻𑀯𑀭𑀢𑁄 𑀏𑀢𑁆𑀢𑀓𑀁 𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑁄 𑀧𑀭𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦 𑀢𑁂𑀘𑀻𑀯𑀭𑀺𑀓𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀜𑁆𑀜𑁂𑀦 𑀅𑀜𑁆𑀜𑀣𑀸𑀧𑀺, 𑀢𑀲𑁆𑀫𑀸 𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀢𑀻𑀡𑀺 𑀦𑀝𑁆𑀞𑀸𑀦𑀺 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀬𑀲𑁆𑀲 𑀢𑀻𑀡𑀺 𑀦𑀝𑁆𑀞𑀸𑀦𑀺, 𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀜𑁆𑀜𑀁 𑀲𑀪𑀸𑀕𑀝𑁆𑀞𑀸𑀦𑀢𑁄 𑀧𑀭𑀺𑀬𑁂𑀲𑀺𑀲𑁆𑀲𑀢𑀺. 𑀬𑀲𑁆𑀲 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀢𑁂𑀦 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀓𑀢𑀺𑀬𑀸𑀯 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀯𑀁 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀲 𑀢𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀦 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀺, 𑀢𑀜𑁆𑀘 𑀦𑀝𑁆𑀞𑀁, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀧𑀜𑁆𑀘𑀲𑀼𑀧𑀺 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀘𑀢𑀽𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩𑀁, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸. 𑀬𑁂𑀦 𑀓𑁂𑀦𑀘𑀺 𑀳𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀸𑀬 𑀞𑀸𑀢𑀩𑁆𑀩𑀁, 𑀢𑀢𑁄 𑀉𑀢𑁆𑀢𑀭𑀺 𑀦 𑀮𑀩𑁆𑀪𑀢𑀻𑀢𑀺 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁.

𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀲𑁂𑀲𑀁 𑀧𑀼𑀦 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀦 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸𑀢𑀺 𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑀯𑀲𑁂𑀦 𑀤𑁂𑀦𑁆𑀢𑀺. 𑀜𑀸𑀢𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀜𑀸𑀢𑀓𑀸𑀦𑀁 𑀤𑁂𑀦𑁆𑀢𑀸𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲, 𑀧𑀯𑀸𑀭𑀺𑀢𑀸𑀦𑀁 𑀤𑁂𑀦𑁆𑀢𑀸𑀦𑀁 𑀲𑀸𑀤𑀺𑀬𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀲𑀸𑀤𑀺𑀬𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀓𑀢𑀺𑀬𑀸 𑀩𑀳𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀬𑀲𑁆𑀫𑀸 𑀧𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀯𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀇𑀤𑀫𑁆𑀧𑀺 𑀙𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀲𑀢𑁆𑀢𑀫𑁂 𑀧𑀸𑀴𑀺𑀬𑀁 𑀧𑀕𑁆𑀕𑀸𑀳𑀺𑀓𑀲𑀸𑀮𑀦𑁆𑀢𑀺 𑀤𑀼𑀲𑁆𑀲𑀯𑀸𑀡𑀺𑀚𑀓𑀸𑀦𑀁 𑀆𑀧𑀡𑀁, ‘‘𑀧𑀕𑁆𑀕𑀸𑀳𑀺𑀢𑀲𑀸𑀮’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄𑀢𑀺 𑀢𑀲𑁆𑀲 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀯𑀭𑀲𑀤𑁆𑀤𑀲𑁆𑀲 𑀇𑀘𑁆𑀙𑀸𑀬𑀁 𑀯𑀢𑁆𑀢𑀫𑀸𑀦𑀢𑁆𑀢𑀸 𑀆𑀳 ‘‘𑀇𑀘𑁆𑀙𑀸𑀧𑁂𑀬𑁆𑀬𑀸’’𑀢𑀺. 𑀤𑀝𑁆𑀞𑀼 𑀔𑁂𑀫𑀢𑁄𑀢𑀺 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀲𑀅𑀦𑁆𑀢𑀭𑀦𑁆𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑀳𑀺𑀢𑀁. 𑀉𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁. 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀸𑀤𑀺𑀢𑀩𑁆𑀩𑀘𑀻𑀯𑀭𑀲𑁆𑀲. 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦𑀸𑀢𑀺 𑀅𑀘𑁆𑀙𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀅𑀲𑁆𑀲𑀸𑀢𑀺 𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁄, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀳𑀺 𑀅𑀘𑁆𑀙𑀺𑀦𑁆𑀤𑀦𑀲𑀫𑀬𑁂 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀲𑀦𑁆𑀦𑀺𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀅𑀘𑁆𑀙𑀺𑀦𑁆𑀦𑀸𑀦𑀻𑀢𑀺 𑀲𑁄 ‘‘𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 ‘‘𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦 𑀢𑁂𑀘𑀻𑀯𑀭𑀺𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀘𑀻𑀯𑀭𑀺𑀓𑁂𑀦𑀸𑀢𑀺 𑀳𑀺 𑀅𑀘𑁆𑀙𑀺𑀦𑁆𑀤𑀦𑀲𑀫𑀬𑁂 𑀢𑀺𑀘𑀻𑀯𑀭𑀲𑁆𑀲 𑀲𑀦𑁆𑀦𑀺𑀳𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀯𑀺𑀦𑀬𑁂 𑀢𑁂𑀘𑀻𑀯𑀭𑀺𑀓𑀸𑀪𑀸𑀯𑀁, 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬. 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀜𑁆𑀜𑁂𑀦𑀸𑀢𑀺 𑀅𑀘𑁆𑀙𑀺𑀦𑁆𑀦𑀅𑀲𑀩𑁆𑀩𑀘𑀻𑀯𑀭𑁂𑀦. 𑀬𑀲𑁆𑀲 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀘𑀻𑀯𑀭𑀸𑀦𑀺 𑀅𑀘𑁆𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀧𑀻𑀢𑀺 ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫’’𑀦𑁆𑀢𑀺 𑀯𑀼𑀢𑁆𑀢𑀯𑀺𑀥𑀸𑀦𑀢𑁄 𑀅𑀜𑁆𑀜𑀣𑀸𑀧𑀺. 𑀬𑀲𑁆𑀲 𑀳𑀺 𑀢𑀻𑀲𑀼 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀅𑀘𑁆𑀙𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀏𑀓𑀲𑁆𑀫𑀺𑀁 𑀅𑀘𑁆𑀙𑀺𑀦𑁆𑀦𑁂 𑀦 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀦 𑀢𑀲𑁆𑀲 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀲𑀸𑀤𑀺𑀬𑀦𑀁 𑀲𑀫𑁆𑀪𑀯𑀢𑀺. 𑀅𑀬𑀫𑁂𑀯 𑀘 𑀅𑀢𑁆𑀣𑁄 𑀧𑀤𑀪𑀸𑀚𑀦𑁂𑀦 𑀯𑀺𑀪𑀸𑀯𑀺𑀢𑁄. 𑀢𑁂𑀦𑀸𑀳 ‘‘𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀓𑁂𑀘𑀺 𑀧𑀦 ‘‘𑀢𑁂𑀘𑀻𑀯𑀭𑀺𑀓𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀢𑀲𑁆𑀫𑀺𑀁 𑀦𑀝𑁆𑀞𑁂 𑀩𑀳𑀽𑀦𑀺𑀧𑀺 𑀕𑀳𑁂𑀢𑀼𑀁 𑀮𑀪𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀤𑀪𑀸𑀚𑀦𑀲𑁆𑀲 𑀳𑀺 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁂𑀦 𑀬𑀲𑁆𑀫𑀸 𑀧𑀦 ‘‘𑀅𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑀻𑀯𑀭𑁂𑀦…𑀧𑁂… 𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀤𑀪𑀸𑀚𑀦𑁂 𑀘 𑀦 𑀢𑀸𑀤𑀺𑀲𑁄 𑀅𑀢𑁆𑀣𑁄 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯. 𑀬𑀫𑁆𑀧𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀬𑀲𑁆𑀲 𑀅𑀥𑀺𑀝𑁆𑀞𑀺𑀢𑀢𑀺𑀘𑀻𑀯𑀭𑀲𑁆𑀲 𑀢𑀻𑀡𑀺 𑀦𑀝𑁆𑀞𑀸𑀦𑀻’’𑀢𑀺, 𑀢𑀢𑁆𑀣𑀧𑀺 𑀅𑀥𑀺𑀝𑁆𑀞𑀺𑀢𑀕𑁆𑀕𑀳𑀡𑀁 𑀲𑀭𑀽𑀧𑀓𑀣𑀦𑀫𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀧𑀦 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲𑁂𑀯𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀢𑀣𑀸 𑀅𑀢𑁆𑀣𑀲𑁆𑀲𑀸𑀲𑀫𑁆𑀪𑀯𑀢𑁄. 𑀦 𑀳𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲𑁂𑀯 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀳𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀫𑀸𑀡𑀢𑁄 𑀲𑀸𑀤𑀺𑀬𑀦𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀓𑀲𑁆𑀲 𑀩𑀳𑀼𑀫𑁆𑀧𑀺 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑁆𑀣𑁄 𑀦𑁂𑀯 𑀧𑀸𑀴𑀺𑀬𑀸 𑀲𑀫𑁂𑀢𑀺, 𑀦 𑀘 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀅𑀦𑀼𑀮𑁄𑀫𑁂𑀢𑀺.

𑀬𑀲𑁆𑀲 𑀢𑀻𑀡𑀺 𑀦𑀝𑁆𑀞𑀸𑀦𑀺, 𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀻𑀢𑀺 𑀏𑀢𑁆𑀣 𑀬𑀲𑁆𑀲 𑀢𑀺𑀘𑀻𑀯𑀭𑀢𑁄 𑀅𑀥𑀺𑀓𑀫𑁆𑀧𑀺 𑀘𑀻𑀯𑀭𑀁 𑀅𑀜𑁆𑀜𑀢𑁆𑀣 𑀞𑀺𑀢𑀁 𑀅𑀢𑁆𑀣𑀺, 𑀢𑀤𑀸 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀮𑀩𑁆𑀪𑀦𑀻𑀬𑀪𑀸𑀯𑀢𑁄 𑀢𑁂𑀦𑀧𑀺 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀓𑀢𑀺𑀬𑀸𑀯 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀻𑀢𑀺 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀢𑀢𑀺𑀬𑀲𑁆𑀲 𑀅𑀮𑀸𑀪𑁂𑀦 𑀯𑀸 𑀘𑀭𑀢𑀺. ‘‘𑀤𑁆𑀯𑁂 𑀦𑀝𑁆𑀞𑀸𑀦𑀻’’𑀢𑀺 𑀅𑀥𑀺𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀻’’𑀢𑀺. 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀤𑁆𑀯𑀻𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦 𑀲𑀫𑁄 𑀪𑀯𑀺𑀲𑁆𑀲𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀸𑀬 𑀅𑀯𑀝𑁆𑀞𑀸𑀦𑀢𑁄. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀻𑀢𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀯𑀺𑀦𑀝𑁆𑀞𑀲𑁂𑀲𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀲𑁂𑀲𑀓𑀁 𑀢𑀼𑀫𑁆𑀳𑁂𑀯 𑀳𑁄𑀢𑀽𑀢𑀺 𑀤𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀫𑀸𑀡𑀬𑀼𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫, 𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀫𑀦𑀲𑀫𑀬𑁂𑀧𑀺 ‘‘𑀲𑁂𑀲𑀓𑀫𑁆𑀧𑀺 𑀢𑀼𑀫𑁆𑀳𑀸𑀓𑀁𑀬𑁂𑀯 𑀳𑁄𑀢𑀽’’𑀢𑀺 𑀯𑀤𑀦𑁆𑀢𑀺, 𑀮𑀤𑁆𑀥𑀓𑀧𑁆𑀧𑀺𑀬𑀫𑁂𑀯. 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀅𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀧𑀼𑀩𑁆𑀩𑁂𑀬𑁂𑀯 𑀧𑀯𑀸𑀭𑀺𑀢𑀸𑀦𑀁. 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑁄 𑀉𑀢𑁆𑀢𑀭𑀺 𑀲𑀸𑀤𑀺𑀬𑀦𑁂 𑀅𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀫𑁂𑀢𑀺. 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀲𑀸𑀤𑀺𑀬𑀦𑁆𑀢𑀲𑁆𑀲 𑀳𑀺 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄𑀬𑁂𑀯 𑀦𑀢𑁆𑀣𑀺, 𑀲𑀢𑀺 𑀘 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀅𑀦𑀸𑀧𑀢𑁆𑀢𑀺 𑀬𑀼𑀢𑁆𑀢𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀲𑀮𑁆𑀮𑁂𑀔𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀬𑀲𑁆𑀫𑀸 𑀧𑀦𑀺𑀤𑀁…𑀧𑁂… 𑀦 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀅𑀜𑁆𑀜𑁂𑀲𑀁 𑀅𑀢𑁆𑀣𑀸𑀬 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀜𑁆𑀘 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀢𑁆𑀣𑀼𑀦𑀸 𑀲𑀁𑀲𑀦𑁆𑀤𑀺𑀬𑀫𑀸𑀦𑀁 𑀦 𑀲𑀫𑁂𑀢𑀺. 𑀦 𑀳𑀺 𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀺𑀁𑀬𑁂𑀯 𑀅𑀦𑀸𑀧𑀢𑁆𑀢𑀺𑀯𑀘𑀦𑀁 𑀬𑀼𑀢𑁆𑀢𑀦𑁆𑀢𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 𑀢𑀻𑀲𑀼𑀧𑀺 ‘‘𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀢𑀦𑁄 𑀲𑀸𑀤𑀺𑀬𑀦𑀧𑀝𑀺𑀩𑀤𑁆𑀥𑀢𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’𑀢𑀺 𑀯𑀢𑁆𑀢𑀼𑀁 𑀑𑀓𑀸𑀲𑁄𑀬𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀼𑀢𑁆𑀢’’𑀦𑁆𑀢𑀺 𑀓𑀣𑀺𑀢𑀁. 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀲𑀁 𑀅𑀢𑁆𑀣𑀸𑀬 𑀜𑀸𑀢𑀓𑀧𑀯𑀸𑀭𑀺𑀢𑁂𑀲𑀼 𑀅𑀥𑀺𑀓𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀘𑁂? 𑀦, 𑀢𑀢𑁆𑀣 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄. 𑀢𑀢𑀼𑀢𑁆𑀢𑀭𑀺𑀢𑀸, 𑀅𑀘𑁆𑀙𑀺𑀦𑁆𑀦𑀸𑀤𑀺𑀓𑀸𑀭𑀡𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁫𑁨𑁨-𑁫𑁨𑁪) 𑀧𑀦 ‘‘𑀧𑀸𑀴𑀺𑀬𑀁 𑀧𑀕𑁆𑀕𑀸𑀳𑀺𑀓𑀲𑀸𑀮𑀦𑁆𑀢𑀺 𑀤𑀼𑀲𑁆𑀲𑀸𑀧𑀡𑀁. 𑀢𑀜𑁆𑀳𑀺 𑀯𑀸𑀡𑀺𑀚𑀓𑁂𑀳𑀺 𑀤𑀼𑀲𑁆𑀲𑀸𑀦𑀺 𑀧𑀕𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀝𑁆𑀞𑀸𑀦𑀢𑀸𑀬 ‘𑀧𑀕𑁆𑀕𑀸𑀳𑀺𑀓𑀲𑀸𑀮𑀸’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀸𑀤𑀺𑀢𑀩𑁆𑀩𑀘𑀻𑀯𑀭𑀲𑁆𑀲. 𑀢𑁂𑀘𑀻𑀯𑀭𑀺𑀓𑁂𑀦𑀸𑀢𑀺 𑀇𑀫𑀺𑀦𑀸 𑀅𑀘𑁆𑀙𑀺𑀦𑁆𑀦𑀢𑀺𑀘𑀻𑀯𑀭𑀢𑁄 𑀅𑀜𑁆𑀜𑀲𑁆𑀲 𑀯𑀺𑀳𑀸𑀭𑀸𑀤𑀻𑀲𑀼 𑀦𑀺𑀳𑀺𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀪𑀯𑁂𑀬𑁆𑀬, 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑁂𑀬𑁆𑀬, 𑀢𑀸𑀯𑀓𑀸𑀮𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁. 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀅𑀮𑀪𑀦𑁆𑀢𑀲𑁆𑀲 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁 𑀓𑀢𑁆𑀯𑀸 𑀢𑀺𑀡𑀧𑀡𑁆𑀡𑁂𑀳𑀺 𑀙𑀤𑀦𑀁 𑀯𑀺𑀬 𑀯𑀺𑀜𑁆𑀜𑀸𑀧𑀦𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯. 𑀅𑀜𑁆𑀜𑁂𑀦𑀸𑀢𑀺 𑀅𑀘𑁆𑀙𑀺𑀦𑁆𑀦𑀅𑀲𑀩𑁆𑀩𑀘𑀻𑀯𑀭𑁂𑀦. ‘𑀤𑁆𑀯𑁂 𑀦𑀝𑁆𑀞𑀸𑀦𑀻’𑀢𑀺 𑀅𑀥𑀺𑀓𑀸𑀭𑀢𑁄 𑀯𑀼𑀢𑁆𑀢𑀁 ‘𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀻’𑀢𑀺. 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 ‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’𑀦𑁆𑀢𑀺 (𑀧𑀸𑀭𑀸. 𑁫𑁨𑁬) 𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀦𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀏𑀯 𑀯𑀼𑀢𑁆𑀢𑀢𑁆𑀢𑀸. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑀁 𑀬𑁂𑀲𑀁 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀢𑁂𑀲𑀁 𑀯𑀸 𑀲𑀺𑀬𑀸 𑀯𑀺𑀜𑁆𑀜𑀸𑀧𑀓𑀲𑁆𑀲𑁂𑀯 𑀯𑀸, 𑀦 𑀢𑀸𑀯 𑀢𑁂𑀲𑀁, 𑀢𑁂𑀳𑀺 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸, 𑀦𑀸𑀧𑀺 𑀯𑀺𑀜𑁆𑀜𑀸𑀧𑀓𑀲𑁆𑀲, 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀅𑀯𑀺𑀜𑁆𑀜𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀁 𑀧𑀦 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀢𑀦𑁄 𑀲𑀸𑀤𑀺𑀬𑀦𑀧𑀝𑀺𑀩𑀤𑁆𑀥𑀢𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀜𑁆𑀘 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀢𑀼𑀢𑁆𑀢𑀭𑀺𑀘𑀻𑀯𑀭𑀢𑀸, 𑀅𑀘𑁆𑀙𑀺𑀦𑁆𑀦𑀸𑀤𑀺𑀓𑀸𑀭𑀡𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀻’’𑀢𑀺.

𑀇𑀤𑀁 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀘𑁆𑀙𑀬𑀁 𑀆𑀘𑀭𑀺𑀬𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀥𑀺𑀓𑀸𑀭𑁂𑀬𑁂𑀯 𑀧𑀯𑀢𑁆𑀢𑀢𑁆𑀢𑀸 𑀅𑀫𑁆𑀳𑁂𑀳𑀺 𑀕𑀳𑀺𑀢𑀁, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑀫𑀬𑁂𑀲𑀼 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀓𑀸𑀮𑁂 𑀅𑀜𑁆𑀜𑀸𑀢𑀓𑀸𑀦𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀪𑀸𑀯𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀢𑁂𑀳𑀺 𑀤𑀺𑀦𑁆𑀦𑀘𑀻𑀯𑀭𑀲𑁆𑀲 𑀫𑀢𑁆𑀢𑀲𑁄 𑀕𑀳𑀺𑀢𑀪𑀸𑀯𑁄 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀅𑀥𑀺𑀓𑀸𑀭𑁄𑀬𑁂𑀯 𑀳𑁄𑀢𑀻𑀢𑀺.

𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑀇𑀢𑁄 𑀧𑀭𑀁 𑀅𑀘𑁆𑀙𑀺𑀦𑁆𑀤𑀦𑀲𑀸𑀫𑀜𑁆𑀜𑁂𑀦 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀯𑀺𑀦𑀺𑀘𑁆𑀙𑀬𑀁 𑀯𑀓𑁆𑀔𑀸𑀫 𑁋 𑀢𑀢𑁆𑀣 𑀬𑀫𑁆𑀧𑀺 𑀢𑁆𑀬𑀸𑀳𑀦𑁆𑀢𑀺 𑀬𑀫𑁆𑀧𑀺 𑀢𑁂 𑀅𑀳𑀁. 𑀲𑁄 𑀓𑀺𑀭 ‘‘𑀫𑀫 𑀧𑀢𑁆𑀢𑀘𑀻𑀯𑀭𑀉𑀧𑀸𑀳𑀦𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀯𑀳𑀦𑁆𑀢𑁄 𑀫𑀬𑀸 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀅𑀤𑀸𑀲𑀺. 𑀢𑁂𑀦𑁂𑀯𑀫𑀸𑀳 ‘‘𑀫𑀬𑀸 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺. 𑀅𑀘𑁆𑀙𑀺𑀦𑁆𑀤𑀻𑀢𑀺 𑀩𑀮𑀓𑁆𑀓𑀸𑀭𑁂𑀦 𑀅𑀕𑁆𑀕𑀳𑁂𑀲𑀺, 𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀧𑀦𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀺, 𑀓𑀺𑀮𑀫𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀆𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸.

𑀲𑀬𑀁 𑀅𑀘𑁆𑀙𑀺𑀦𑁆𑀤𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀓𑀁 𑀘𑀻𑀯𑀭𑀁 𑀏𑀓𑀸𑀩𑀤𑁆𑀥𑀸𑀦𑀺 𑀘 𑀩𑀳𑀽𑀦𑀺 𑀅𑀘𑁆𑀙𑀺𑀦𑁆𑀤𑀢𑁄 𑀏𑀓𑀸 𑀆𑀧𑀢𑁆𑀢𑀺, 𑀏𑀓𑀢𑁄 𑀅𑀩𑀤𑁆𑀥𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀺𑀢𑀸𑀦𑀺 𑀩𑀳𑀽𑀦𑀺 𑀅𑀘𑁆𑀙𑀺𑀦𑁆𑀤𑀢𑁄, ‘‘𑀲𑀗𑁆𑀖𑀸𑀝𑀺𑀁 𑀆𑀳𑀭, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀆𑀳𑀭𑀸’’𑀢𑀺 𑀏𑀯𑀁 𑀆𑀳𑀭𑀸𑀧𑀬𑀢𑁄 𑀘 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. ‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀆𑀳𑀭𑀸’’𑀢𑀺 𑀯𑀤𑀢𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄.

𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 ‘‘𑀘𑀻𑀯𑀭𑀁 𑀕𑀡𑁆𑀳𑀸’’𑀢𑀺 𑀆𑀡𑀸𑀧𑁂𑀢𑀺, 𑀏𑀓𑀁 𑀤𑀼𑀓𑁆𑀓𑀝𑀁. 𑀆𑀡𑀢𑁆𑀢𑁄 𑀩𑀳𑀽𑀦𑀺 𑀕𑀡𑁆𑀳𑀸𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. ‘‘𑀲𑀗𑁆𑀖𑀸𑀝𑀺𑀁 𑀕𑀡𑁆𑀳, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. ‘‘𑀫𑀬𑀸 𑀤𑀺𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄.

𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀲𑀽𑀘𑀺𑀫𑁆𑀧𑀺. 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀲𑀽𑀘𑀻𑀲𑀼𑀧𑀺 𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀲𑀺𑀣𑀺𑀮𑀯𑁂𑀞𑀺𑀢𑀸𑀲𑀼 𑀏𑀯𑀁. 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀩𑀤𑁆𑀥𑀸𑀲𑀼 𑀧𑀦 𑀏𑀓𑀫𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀲𑀽𑀘𑀺𑀖𑀭𑁂 𑀧𑀓𑁆𑀔𑀺𑀢𑁆𑀢𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀺𑀣𑀺𑀮𑀩𑀤𑁆𑀥𑀕𑀸𑀴𑁆𑀳𑀩𑀤𑁆𑀥𑁂𑀲𑀼 𑀢𑀺𑀓𑀝𑀼𑀓𑀸𑀤𑀻𑀲𑀼 𑀪𑁂𑀲𑀚𑁆𑀚𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑁄 𑀯𑀸 𑀤𑁂𑀢𑀻𑀢𑀺 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁𑀬𑁂𑀯 𑀇𑀤𑀁 𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀏𑀯𑀁 𑀯𑀸 𑀤𑁂𑀢𑀺. 𑀅𑀣 𑀯𑀸 𑀧𑀦 ‘‘𑀆𑀯𑀼𑀲𑁄, 𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀺, 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀢𑀻’𑀢𑀺 𑀘𑀻𑀯𑀭𑀁 𑀅𑀤𑀫𑁆𑀳𑀸, 𑀲𑁄𑀤𑀸𑀦𑀺 𑀢𑁆𑀯𑀁 𑀦 𑀯𑀢𑁆𑀢𑀁 𑀓𑀭𑁄𑀲𑀺, 𑀦 𑀉𑀧𑀚𑁆𑀛𑀁 𑀕𑀡𑁆𑀳𑀸𑀲𑀺, 𑀦 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀳𑀺 𑀯𑀼𑀢𑁆𑀢𑁄 ‘‘𑀪𑀦𑁆𑀢𑁂, 𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀪𑀡𑀣, 𑀇𑀤𑀁 𑀯𑁄 𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑁄 𑀯𑀸 𑀤𑁂𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀁 𑀯𑀸 𑀧𑀦 𑀤𑀳𑀭𑀁 ‘‘𑀦𑀺𑀯𑀢𑁆𑀢𑁂𑀣 𑀦’’𑀦𑁆𑀢𑀺 𑀪𑀡𑀢𑀺, 𑀲𑁄 𑀦 𑀦𑀺𑀯𑀢𑁆𑀢𑀢𑀺. ‘‘𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀭𑀼𑀦𑁆𑀥𑀣𑀸’’𑀢𑀺 𑀏𑀯𑀁 𑀘𑁂 𑀦𑀺𑀯𑀢𑁆𑀢𑀢𑀺, 𑀲𑀸𑀥𑀼. 𑀲𑀘𑁂 ‘‘𑀧𑀢𑁆𑀢𑀘𑀻𑀯𑀭𑀢𑁆𑀣𑀸𑀬 𑀫𑀜𑁆𑀜𑁂 𑀢𑀼𑀫𑁆𑀳𑁂 𑀪𑀡𑀣, 𑀕𑀡𑁆𑀳𑀣 𑀦’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑁄𑀬𑁂𑀯 𑀤𑁂𑀢𑀺. 𑀯𑀺𑀩𑁆𑀪𑀦𑁆𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀫𑀬𑀁 𑀢𑀼𑀬𑁆𑀳𑀁 ‘𑀯𑀢𑁆𑀢𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀅𑀤𑀫𑁆𑀳𑀸, 𑀲𑁄𑀤𑀸𑀦𑀺 𑀢𑁆𑀯𑀁 𑀯𑀺𑀩𑁆𑀪𑀫𑀺𑀢𑁆𑀯𑀸 𑀘𑀭𑀲𑀻’’𑀢𑀺 𑀯𑀤𑀢𑀺, 𑀇𑀢𑀭𑁄 ‘‘𑀕𑀡𑁆𑀳𑀣 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑁄 𑀯𑀸 𑀤𑁂𑀢𑀺. ‘‘𑀫𑀫 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀢𑁂 𑀤𑁂𑀫𑀺, 𑀅𑀜𑁆𑀜𑀢𑁆𑀣 𑀕𑀡𑁆𑀳𑀦𑁆𑀢𑀲𑁆𑀲 𑀦 𑀤𑁂𑀫𑀺. 𑀯𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀓𑀭𑁄𑀦𑁆𑀢𑀲𑁆𑀲 𑀦 𑀤𑁂𑀫𑀺. 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀅𑀧𑀭𑀺𑀬𑀸𑀧𑀼𑀡𑀦𑁆𑀢𑀲𑁆𑀲 𑀦 𑀤𑁂𑀫𑀺. 𑀅𑀯𑀺𑀩𑁆𑀪𑀫𑀦𑁆𑀢𑀲𑁆𑀲𑁂𑀯 𑀤𑁂𑀫𑀺, 𑀯𑀺𑀩𑁆𑀪𑀫𑀦𑁆𑀢𑀲𑁆𑀲 𑀦 𑀤𑁂𑀫𑀻’’𑀢𑀺 𑀏𑀯𑀁 𑀧𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀤𑀢𑁄 𑀤𑀼𑀓𑁆𑀓𑀝𑀁, 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀺. 𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁄 𑀉𑀤𑁆𑀥𑀝𑀯𑀺𑀦𑀺𑀘𑁆𑀙𑀬𑁄.

𑀬𑀫𑁆𑀧𑀺 𑀢𑁆𑀬𑀸𑀳𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀓𑀸𑀭𑀡𑀯𑀘𑀦𑀁, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀫𑀬𑀸 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀬𑀁 𑀓𑀸𑀭𑀡𑀁 𑀦𑀺𑀲𑁆𑀲𑀸𑀬 𑀅𑀳𑀁 𑀢𑁂, 𑀆𑀯𑀼𑀲𑁄, 𑀘𑀻𑀯𑀭𑀁 𑀅𑀤𑀸𑀲𑀺𑀁, 𑀢𑀁 𑀦 𑀓𑀭𑁄𑀲𑀻’’𑀢𑀺 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀘𑁆𑀙𑀺𑀦𑁆𑀤𑀻𑀢𑀺. 𑀬𑀦𑁆𑀢𑀺 𑀯𑀸 𑀘𑀻𑀯𑀭𑀁 𑀧𑀭𑀸𑀫𑀲𑀢𑀺. 𑀢𑀢𑁆𑀣 ‘‘𑀫𑀬𑀸 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀬𑀫𑁆𑀧𑀺 𑀢𑁂 𑀅𑀳𑀁 𑀘𑀻𑀯𑀭𑀁 𑀅𑀤𑀸𑀲𑀺𑀁, 𑀢𑀁 𑀘𑀻𑀯𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀘𑁆𑀙𑀺𑀦𑁆𑀤𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀆𑀡𑀢𑁆𑀢𑁄 𑀩𑀳𑀽𑀦𑀺 𑀕𑀡𑁆𑀳𑀸𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 ‘‘𑀘𑀻𑀯𑀭𑀁 𑀕𑀡𑁆𑀳𑀸’’𑀢𑀺 𑀆𑀡𑀢𑁆𑀢𑀺𑀬𑀸 𑀏𑀓𑀘𑀻𑀯𑀭𑀯𑀺𑀲𑀬𑀢𑁆𑀢𑀸 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀅𑀘𑁆𑀙𑀺𑀦𑁆𑀦𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄𑀢𑀺 𑀇𑀤𑀁 𑀅𑀘𑁆𑀙𑀺𑀦𑁆𑀦𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀁 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀆𑀡𑀢𑁆𑀢𑀺𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀁 𑀧𑀦 𑀤𑀼𑀓𑁆𑀓𑀝𑀁 𑀏𑀓𑀫𑁂𑀯.

𑀏𑀯𑀦𑁆𑀢𑀺 𑀇𑀫𑀺𑀦𑀸 ‘‘𑀯𑀢𑁆𑀣𑀼𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀻’’𑀢𑀺 𑀇𑀤𑀁 𑀧𑀭𑀸𑀫𑀲𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀲𑀺𑀣𑀺𑀮𑀁 𑀕𑀸𑀴𑁆𑀳𑀜𑁆𑀘 𑀧𑀓𑁆𑀔𑀺𑀢𑁆𑀢𑀸𑀲𑀼 𑀆𑀧𑀢𑁆𑀢𑀺𑀬𑀸 𑀩𑀳𑀼𑀢𑁆𑀢𑀁 𑀏𑀓𑀢𑁆𑀢𑀜𑁆𑀘 𑀅𑀢𑀺𑀤𑀺𑀲𑀢𑀺.

𑀆𑀯𑀼𑀲𑁄 𑀫𑀬𑀦𑁆𑀢𑀺𑀆𑀤𑀻𑀲𑀼 𑀕𑀡𑁆𑀳𑀺𑀢𑀼𑀓𑀸𑀫𑀢𑀸𑀬 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀢𑁂𑀦𑁂𑀯 𑀤𑀺𑀦𑁆𑀦𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀇𑀤𑀁 𑀲𑀸𑀫𑀡𑁂𑀭𑀲𑁆𑀲𑀧𑀺 𑀤𑀸𑀦𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘‘𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀤𑀢𑁆𑀯𑀸𑀧𑀺 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀘𑁆𑀙𑀺𑀦𑁆𑀤𑀦𑀲𑀫𑀬𑁂 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑁄𑀬𑁂𑀯 𑀳𑁂𑀢𑁆𑀣 𑀧𑀫𑀸𑀡𑀁. 𑀤𑁂𑀢𑀻𑀢𑀺 𑀢𑀼𑀝𑁆𑀞𑁄 𑀯𑀸 𑀓𑀼𑀧𑀺𑀢𑁄 𑀯𑀸 𑀤𑁂𑀢𑀺. 𑀭𑀼𑀤𑁆𑀥𑀣𑀸𑀢𑀺 𑀦𑀺𑀯𑀸𑀭𑁂𑀣. 𑀏𑀯𑀁 𑀧𑀦 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀏𑀯𑀁 𑀤𑀺𑀦𑁆𑀦𑀁 𑀦 𑀢𑀸𑀯 ‘‘𑀢𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀤𑀺𑀦𑁆𑀦𑀁 𑀪𑀢𑀺𑀲𑀤𑀺𑀲𑀢𑁆𑀢𑀸 𑀆𑀳𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀤𑀢𑁆𑀯𑀸 𑀅𑀦𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁. 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀲𑀓𑀲𑀜𑁆𑀜𑀸𑀬 𑀯𑀺𑀦𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀢𑀸, 𑀲𑀸𑀫𑀁 𑀤𑀺𑀦𑁆𑀦𑀢𑀸, 𑀲𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀓𑁄𑀥𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀅𑀬𑀁 𑀲𑀸𑀭𑀢𑁆𑀣𑀤𑀻𑀧𑀦𑀻𑀧𑀸𑀞𑁄 (𑀲𑀸𑀭𑀢𑁆𑀣. 𑀝𑀻. 𑁨.𑁬𑁩𑁫).

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁬𑁩𑁧) 𑀧𑀦 ‘‘𑀬𑀫𑁆𑀧𑀺…𑀧𑁂… 𑀅𑀘𑁆𑀙𑀺𑀦𑁆𑀤𑀻𑀢𑀺 𑀏𑀢𑁆𑀣 𑀬𑀁 𑀢𑁂 𑀅𑀳𑀁 𑀘𑀻𑀯𑀭𑀁 𑀅𑀤𑀸𑀲𑀺𑀁, 𑀢𑀁 ‘𑀫𑀬𑀸 𑀲𑀤𑁆𑀥𑀺𑀁 𑀧𑀓𑁆𑀓𑀫𑀺𑀲𑁆𑀲𑀢𑀻’𑀢𑀺 𑀲𑀜𑁆𑀜𑀸𑀬 𑀅𑀤𑀸𑀲𑀺𑀁, 𑀦 𑀅𑀜𑁆𑀜𑀣𑀸𑀢𑀺 𑀓𑀼𑀧𑀺𑀢𑁄 𑀅𑀘𑁆𑀙𑀺𑀦𑁆𑀤𑀻𑀢𑀺 𑀏𑀯𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀓𑀁 𑀤𑀼𑀓𑁆𑀓𑀝𑀦𑁆𑀢𑀺 𑀬𑀤𑀺 𑀆𑀡𑀢𑁆𑀢𑁄 𑀅𑀯𑀲𑁆𑀲𑀁 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀯 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀤𑀺 𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀢𑀤𑀸 𑀏𑀯 𑀤𑀼𑀓𑁆𑀓𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸𑀧𑀢𑁆𑀢𑀺𑀬𑁄𑀢𑀺 𑀬𑀤𑀺 𑀆𑀡𑀢𑁆𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀯𑀢𑁆𑀣𑀼𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄 𑀧𑀬𑁄𑀕𑀓𑀭𑀡𑀓𑁆𑀔𑀡𑁂𑀬𑁂𑀯 𑀆𑀧𑀢𑁆𑀢𑀺𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀢𑁄, 𑀘𑀻𑀯𑀭𑀁 𑀧𑀦 𑀅𑀘𑁆𑀙𑀺𑀦𑁆𑀦𑁂𑀬𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀬𑀤𑀺 𑀲𑁄 𑀦 𑀅𑀘𑁆𑀙𑀺𑀦𑁆𑀤𑀢𑀺, 𑀆𑀡𑀢𑁆𑀢𑀺𑀓𑁆𑀔𑀡𑁂 𑀏𑀓𑀫𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀜𑁆𑀜𑀢𑁆𑀣𑀧𑀺 𑀈𑀤𑀺𑀲𑁂𑀲𑀼 𑀦𑀬𑁄 𑀜𑀸𑀢𑀩𑁆𑀩𑁄. 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀲𑀸𑀫𑀡𑁂𑀭𑀲𑁆𑀲 𑀤𑀸𑀦𑀁 𑀤𑀻𑀧𑁂𑀢𑀺, 𑀢𑁂𑀦 𑀘 𑀲𑀸𑀫𑀡𑁂𑀭𑀓𑀸𑀮𑁂 𑀤𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀁 𑀤𑀻𑀧𑁂𑀢𑀺. ‘‘𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀳𑀭𑀸𑀧𑁂𑀢𑀼𑀁 𑀧𑀦 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑁂 𑀅𑀓𑀢𑁂 𑀪𑀢𑀺𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀢𑀸, 𑀲𑀸𑀫𑀁 𑀤𑀺𑀦𑁆𑀦𑀢𑀸, 𑀲𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀓𑁄𑀥𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀣𑀸

𑁬. 𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀣𑀸𑀬𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁯𑁯) 𑀧𑀦 ‘‘𑀓𑀭𑁄𑀳𑀻𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀡𑀢𑁆𑀢𑀺𑀬𑀸 𑀏𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀤𑁆𑀯𑀸𑀭𑀧𑀸𑀮𑀁 ‘𑀓𑀺𑀁 𑀦 𑀓𑀭𑁄𑀲𑀻’𑀢𑀺𑀆𑀤𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀚𑀸𑀢𑀓𑀧𑀓𑀭𑀡𑀦𑁆𑀢𑀺 𑀚𑀸𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀥𑀺𑀧𑁆𑀧𑁂𑀢𑀁. ‘𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀭𑀽𑀧𑀫𑁆𑀧𑀺 𑀲𑀬𑀁 𑀓𑀸𑀢𑀼𑀁 𑀦 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀺𑀧𑁆𑀧𑀓𑀢𑀪𑁄𑀚𑀦𑀓𑀣𑀸

𑁭. 𑀯𑀺𑀧𑁆𑀧𑀓𑀢𑀪𑁄𑀚𑀦𑀓𑀣𑀸𑀬𑀫𑁆𑀧𑀺 𑀲𑀸𑀭𑀢𑁆𑀣𑀤𑀻𑀧𑀦𑀻 𑀯𑀺𑀫𑀢𑀺𑀯𑀺𑀦𑁄𑀤𑀦𑀻 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀲𑀼 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁. 𑀧𑀞𑀫𑀁 𑀓𑀢𑀁 𑀧𑀓𑀢𑀁, 𑀯𑀺 𑀅𑀦𑀺𑀝𑁆𑀞𑀺𑀢𑀁 𑀧𑀓𑀢𑀁 𑀯𑀺𑀧𑁆𑀧𑀓𑀢𑀁, 𑀯𑀺𑀧𑁆𑀧𑀓𑀢𑀁 𑀪𑁄𑀚𑀦𑀁 𑀬𑁂𑀦 𑀲𑁄 𑀯𑀺𑀧𑁆𑀧𑀓𑀢𑀪𑁄𑀚𑀦𑁄, 𑀧𑀞𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀺𑀝𑁆𑀞𑀺𑀢𑀪𑁄𑀚𑀦𑀓𑀺𑀘𑁆𑀘𑁄 𑀪𑀺𑀓𑁆𑀔𑀼. 𑀯𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀺𑀢𑁆𑀢𑀳𑀢𑁆𑀣𑀫𑁆𑀧𑀺 𑀉𑀝𑁆𑀞𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑀺𑀧𑁆𑀧𑀓𑀢𑀪𑁄𑀚𑀦𑁄𑀬𑁂𑀯 𑀳𑀺 𑀲𑁄 𑀳𑁄𑀢𑀻’’𑀢𑀺, 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀲𑀼𑀧𑀺 𑀧𑀻𑀢𑁂𑀲𑀼 𑀔𑀸𑀤𑀺𑀢𑁂𑀲𑀼𑀧𑀺 𑀪𑀢𑁆𑀢𑀲𑁆𑀲 𑀅𑀪𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀺𑀢𑀪𑁄𑀚𑀦𑀓𑀺𑀘𑁆𑀘𑁄 𑀳𑁄𑀢𑀺. 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀢𑁂𑀦 𑀯𑀢𑁆𑀢𑀩𑁆𑀩𑁄𑀢𑀺 𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀪𑀼𑀜𑁆𑀚𑀺𑀢𑀼𑀁 𑀅𑀮𑀪𑀫𑀸𑀦𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀉𑀤𑀓𑁂 𑀅𑀲𑀦𑁆𑀢𑁂 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀉𑀤𑁆𑀤𑀺𑀲𑀦𑁆𑀢𑀉𑀤𑁆𑀤𑀺𑀲𑀸𑀧𑀦𑀓𑀣𑀸

𑁮. 𑀉𑀤𑁆𑀤𑀺𑀲𑀦𑁆𑀢𑀉𑀤𑁆𑀤𑀺𑀲𑀸𑀧𑀦𑀓𑀣𑀸𑀬𑀁 𑀉𑀤𑁆𑀤𑀺𑀲𑀦𑁆𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁂𑀦, 𑀧𑀸𑀴𑀺𑀁 𑀯𑀸𑀘𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑁂𑀦, 𑀧𑀸𑀴𑀺𑀁 𑀯𑀸𑀘𑀸𑀧𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀘𑁆𑀘𑀢𑀭𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀫𑀸𑀦𑀸𑀲𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀦𑀻𑀘𑀢𑀭𑁂𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑀺𑀯𑀲𑁆𑀲𑀦𑁆𑀢𑀭𑀺𑀓𑀓𑀣𑀸

𑁯. 𑀢𑀺𑀯𑀲𑁆𑀲𑀦𑁆𑀢𑀭𑀺𑀓𑀓𑀣𑀸𑀬𑀁 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀢𑀺𑀯𑀲𑁆𑀲𑀁, 𑀢𑀻𑀡𑀺 𑀯𑀸 𑀯𑀲𑁆𑀲𑀸𑀦𑀺 𑀢𑀺𑀯𑀲𑁆𑀲𑀸𑀦𑀺, 𑀢𑀺𑀯𑀲𑁆𑀲𑀸𑀦𑀁 𑀅𑀦𑁆𑀢𑀭𑀁 𑀢𑀺𑀯𑀲𑁆𑀲𑀦𑁆𑀢𑀭𑀁, 𑀢𑀺𑀯𑀲𑁆𑀲𑀦𑁆𑀢𑀭𑁂 𑀞𑀺𑀢𑁄𑀢𑀺 𑀢𑀺𑀯𑀲𑁆𑀲𑀦𑁆𑀢𑀭𑁄, 𑀢𑁂𑀦 𑀢𑀺𑀯𑀲𑁆𑀲𑀦𑁆𑀢𑀭𑁂𑀦, 𑀅𑀦𑁆𑀢𑀭-𑀲𑀤𑁆𑀤𑁄 𑀫𑀚𑁆𑀛𑀢𑁆𑀣𑀯𑀸𑀘𑀓𑁄, 𑀡-𑀧𑀘𑁆𑀘𑀬𑁄 𑀞𑀺𑀢𑀢𑁆𑀣𑁂. 𑀢𑁂𑀦𑀸𑀳 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁩𑁨𑁦) ‘‘𑀢𑀺𑀯𑀲𑁆𑀲𑀦𑁆𑀢𑀭𑁂𑀦𑀸𑀢𑀺 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂𑀦𑀸’’𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁦) 𑀧𑀦 𑀲𑀭𑀽𑀧𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀯𑀲𑁆𑀲𑀦𑁆𑀢𑀭𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑁂 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀢𑀺𑀯𑀺𑀥𑀸 𑀇𑀫𑁂 𑀲𑀫𑀸𑀦𑀸𑀲𑀦𑀺𑀓𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀻𑀖𑀸𑀲𑀦𑀓𑀣𑀸

𑁧𑁦. 𑀤𑀻𑀖𑀸𑀲𑀦𑀓𑀣𑀸𑀬𑀁 𑀲𑀁𑀳𑀸𑀭𑀺𑀫𑀁 𑀯𑀸𑀢𑀺 𑀲𑀁𑀳𑀭𑀺𑀢𑀼𑀁 𑀬𑀼𑀢𑁆𑀢𑀁 𑀓𑀝𑀲𑀸𑀭𑀓𑀸𑀤𑀺. 𑀅𑀲𑀁𑀳𑀸𑀭𑀺𑀫𑀁 𑀯𑀸𑀢𑀺 𑀲𑀁𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀧𑀸𑀲𑀸𑀡𑀸𑀤𑀺 𑀆𑀲𑀦𑀁. 𑀢𑁂𑀦𑀸𑀳 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁦) ‘‘𑀤𑀻𑀖𑀸𑀲𑀦𑀁 𑀦𑀸𑀫 𑀫𑀜𑁆𑀘𑀧𑀻𑀞𑀯𑀺𑀦𑀺𑀫𑀼𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀢𑀺𑀡𑁆𑀡𑀦𑁆𑀦𑀁 𑀏𑀓𑀢𑁄 𑀲𑀼𑀔𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀻’’𑀢𑀺. 𑀓𑀲𑁆𑀫𑀸 𑀧𑀦 ‘‘𑀢𑀺𑀡𑁆𑀡𑀦𑁆𑀦𑀁 𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀤𑁆𑀯𑀺𑀦𑁆𑀦𑀁 𑀧𑀳𑁄𑀦𑀓𑀸𑀲𑀦𑀫𑁆𑀧𑀺 𑀤𑀻𑀖𑀫𑁂𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀏𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀤𑀻𑀖𑀸𑀲𑀦𑀦𑁆𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀳𑁄𑀦𑀓𑁂 𑀳𑀺 𑀅𑀤𑀻𑀖𑀸𑀲𑀦𑁂 𑀲𑀫𑀸𑀦𑀸𑀲𑀦𑀺𑀓𑁂𑀳𑁂𑀯 𑀲𑀳 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀺𑀡𑁆𑀡𑀦𑁆𑀦𑀁 𑀧𑀳𑁄𑀦𑀓𑀢𑁄 𑀧𑀝𑁆𑀞𑀸𑀬 𑀕𑀳𑀺𑀢𑁂 𑀤𑀻𑀖𑀸𑀲𑀦𑁂 𑀧𑀦 𑀅𑀲𑀫𑀸𑀦𑀸𑀲𑀦𑀺𑀓𑁂𑀳𑀺𑀧𑀺 𑀲𑀳 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀏𑀯𑀁 𑀧𑀡𑁆𑀟𑀓𑀸𑀤𑀻𑀳𑀺𑀧𑀺 𑀲𑀳 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀧𑀡𑁆𑀟𑀓’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯.

𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀓𑀣𑀸

𑁧𑁧. 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀓𑀣𑀸𑀬𑀁 𑀧𑀮𑀺𑀧𑀦𑁆𑀦𑁄𑀢𑀺 𑀦𑀺𑀫𑀼𑀕𑁆𑀕𑁄, 𑀫𑀓𑁆𑀔𑀺𑀢𑁄𑀢𑀺 𑀅𑀢𑁆𑀣𑁄. 𑀉𑀘𑁆𑀘𑀸𑀭𑁂𑀢𑁆𑀯𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀲𑀫𑀸𑀦𑀸𑀘𑀭𑀺𑀬𑀓𑁄𑀢𑀺 𑀏𑀢𑁆𑀣 ‘‘𑀲𑀘𑁂𑀧𑀺 𑀏𑀓𑀲𑁆𑀲 𑀆𑀘𑀭𑀺𑀬𑀲𑁆𑀲 𑀏𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑁄𑀢𑀺, 𑀏𑀓𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀏𑀢𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀸𑀘𑀭𑀺𑀬𑀓𑀸 𑀏𑀯𑀸’’𑀢𑀺 𑀯𑀤𑀦𑁆𑀢𑀺. 𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀯𑁂𑀚𑁆𑀚𑁂𑀦 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀪𑁂𑀲𑀚𑁆𑀚𑀁 𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀣𑀸 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀦𑀻𑀳𑀸𑀢𑀼𑀦𑁆𑀢𑀺 𑀦𑀻𑀳𑀭𑀺𑀢𑀼𑀁, 𑀙𑀟𑁆𑀟𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁬𑁫-𑁩𑁬𑁬) 𑀧𑀦 ‘‘𑀪𑀽𑀫𑀺𑀬𑀁 𑀧𑀭𑀺𑀪𑀡𑁆𑀟𑀁 𑀅𑀓𑀸𑀲𑀻𑀢𑀺 𑀕𑀺𑀮𑀸𑀦𑁂𑀦 𑀦𑀺𑀧𑀦𑁆𑀦𑀪𑀽𑀫𑀺𑀬𑀁 𑀓𑀺𑀮𑀺𑀝𑁆𑀞𑀝𑁆𑀞𑀸𑀦𑀁 𑀥𑁄𑀯𑀺𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀁 𑀓𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀯𑀺𑀥𑀺𑀫𑁆𑀧𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀫𑀭𑀡𑀯𑀡𑁆𑀡𑀓𑀣𑀸

𑁧𑁨. 𑀫𑀭𑀡𑀯𑀡𑁆𑀡𑀓𑀣𑀸𑀬𑀁 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑁂𑀦 𑀲𑀕𑁆𑀕𑀧𑀸𑀧𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀢𑁆𑀣𑀢𑁄 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸. 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸𑀢𑀺 ‘‘𑀏𑀯𑀁 𑀅𑀥𑀺𑀧𑁆𑀧𑀸𑀬𑀺𑀦𑁄 𑀫𑀭𑀡𑀢𑁆𑀣𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸. 𑀦 𑀳𑀺 𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑁄𑀳𑀸𑀭𑀯𑀲𑁂𑀦, 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂 𑀓𑀭𑀼𑀡𑀸𑀬 𑀅𑀪𑀸𑀯𑀢𑁄 𑀓𑀸𑀭𑀼𑀜𑁆𑀜𑁂𑀦 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀣𑀸𑀬𑀼𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢𑀁, 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀬𑀣𑀸𑀬𑀼𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀬𑀣𑀸𑀦𑀼𑀧𑁆𑀧𑀩𑀦𑁆𑀥𑁂𑀦, 𑀬𑀸𑀯 𑀢𑀲𑁆𑀫𑀺𑀁 𑀪𑀯𑁂 𑀲𑀦𑁆𑀢𑀸𑀦𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑁄 𑀅𑀯𑀺𑀘𑁆𑀙𑀺𑀦𑁆𑀦𑀧𑀯𑀢𑁆𑀢𑀺 𑀳𑁄𑀢𑀺, 𑀢𑀸𑀯 𑀞𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁦) ‘‘𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑁄𑀳𑀸𑀭𑀯𑀲𑁂𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂 𑀓𑀭𑀼𑀡𑀸𑀬 𑀅𑀪𑀸𑀯𑀢𑁄, 𑀓𑀸𑀭𑀼𑀜𑁆𑀜𑁂𑀦 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘𑀬𑀣𑀸𑀬𑀼𑀦𑀸’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁦) 𑀧𑀦 ‘‘𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑁂𑀦 𑀲𑀕𑁆𑀕𑀧𑀸𑀧𑀦𑀸𑀥𑀺𑀧𑁆𑀧𑀸𑀬𑀢𑁆𑀢𑀸 𑀅𑀢𑁆𑀣𑀢𑁄 𑀫𑀭𑀡𑀢𑁆𑀣𑀺𑀓𑀸𑀯 𑀳𑀼𑀢𑁆𑀯𑀸. ‘‘𑀏𑀯𑀁𑀅𑀥𑀺𑀧𑁆𑀧𑀸𑀬𑀺𑀦𑁄 𑀫𑀭𑀡𑀢𑁆𑀣𑀺𑀓𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀫𑀭𑀡𑀢𑁆𑀣𑀺𑀓𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓𑀁. 𑀦 𑀳𑀺 𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑁄𑀳𑀸𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑁄𑀳𑀸𑀭𑀯𑀲𑁂𑀦, 𑀲𑀦𑁆𑀦𑀺𑀝𑁆𑀞𑀸𑀦𑁂 𑀧𑀦𑁂𑀢𑀁 𑀦𑀢𑁆𑀣𑀺, 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑀫𑁄𑀘𑀦𑁂 𑀯𑀺𑀬 𑀦 𑀳𑁄𑀢𑀺. 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀅𑀦𑁆𑀢𑀭𑀸 𑀅𑀫𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀅𑀢𑁆𑀢𑀧𑀸𑀢𑀦𑀓𑀣𑀸

𑁧𑁩. 𑀅𑀢𑁆𑀢𑀧𑀸𑀢𑀦𑀓𑀣𑀸𑀬𑀁 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦𑀸𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁄𑀢𑀺 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸 𑀘. 𑀅𑀢𑀺𑀯𑀺𑀬 𑀧𑀸𑀓𑀝𑀢𑁆𑀢𑀸 ‘‘𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀺𑀓𑁆𑀔𑁂𑀧𑁄 𑀫𑀸 𑀳𑁄𑀢𑀽𑀢𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀝𑀺𑀮𑀸𑀪𑀁. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀆𑀭𑁄𑀘𑁂𑀢𑁆𑀯𑀸. 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀬𑀲𑁆𑀫𑀸 𑀲𑀪𑀸𑀕𑀸𑀦𑀁 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 𑀆𑀭𑁄𑀘𑁂𑀦𑁆𑀢𑀺, 𑀢𑁂 𑀘 𑀪𑀺𑀓𑁆𑀔𑀽 𑀅𑀧𑁆𑀧𑀢𑀺𑀭𑀽𑀧𑀸𑀬 𑀅𑀦𑁂𑀲𑀦𑀸𑀬 𑀧𑀘𑁆𑀘𑀬𑀁 𑀦 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀳𑀺 𑀧𑀭𑀺𑀬𑁂𑀲𑀺𑀢𑀧𑀘𑁆𑀘𑀬𑁂 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀸𑀦𑀜𑁆𑀳𑀺 𑀩𑁆𑀬𑀸𑀓𑀢𑀢𑁆𑀢𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀮𑀪𑀢𑀺. 𑀢𑁂 𑀳𑀺 𑀓𑀧𑁆𑀧𑀺𑀬𑀔𑁂𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑀺. 𑀢𑁂𑀦𑁂𑀯 ‘‘𑀲𑀪𑀸𑀕𑀸𑀦𑀜𑁆𑀳𑀺 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 ‘𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻’𑀢𑀺 𑀇𑀫𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀇𑀤𑀁 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀥𑀺𑀕𑀫𑀦𑁆𑀢𑀭𑀸𑀬𑀁 𑀆𑀲𑀗𑁆𑀓𑀦𑁆𑀢𑁂𑀦𑁂𑀯 𑀘 𑀆𑀳𑀸𑀭𑀼𑀧𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀅𑀥𑀺𑀕𑀢𑁂𑀦 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀅𑀜𑁆𑀜𑁂𑀲𑀁 𑀆𑀭𑁄𑀘𑁂𑀦𑁆𑀢𑀻𑀢𑀺 𑀇𑀫𑀺𑀲𑁆𑀲𑀸 𑀘𑁄𑀤𑀦𑀸𑀬 ‘‘𑀲𑀪𑀸𑀕𑀸𑀦𑀜𑁆𑀳𑀺 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀢𑀭𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀕𑀡𑁆𑀞𑀺𑀧𑀤𑁂𑀧𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁧𑁮𑁨-𑁧𑁮𑁩) ‘‘𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦𑀸𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁄𑀢𑀺 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸 𑀘. 𑀯𑀺𑀲𑁂𑀲𑀸𑀥𑀺𑀕𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀝𑀺𑀮𑀸𑀪𑀁. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀆𑀭𑁄𑀘𑁂𑀢𑁆𑀯𑀸, 𑀇𑀤𑀜𑁆𑀘 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀥𑀺𑀕𑀢𑀯𑀺𑀲𑁂𑀲𑀸 𑀳𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁 𑀮𑀚𑁆𑀚𑀻𑀪𑀺𑀓𑁆𑀔𑀽𑀦𑀁 𑀅𑀯𑀲𑁆𑀲𑀁 𑀅𑀥𑀺𑀕𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀅𑀥𑀺𑀕𑀢𑀯𑀺𑀲𑁂𑀲𑁂𑀦 𑀧𑀦 𑀅𑀩𑁆𑀬𑀸𑀓𑀭𑀺𑀢𑁆𑀯𑀸𑀧𑀺 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀥𑀺𑀕𑀫𑀦𑁆𑀢𑀭𑀸𑀬𑀯𑀺𑀦𑁄𑀤𑀦𑀢𑁆𑀣𑀫𑁂𑀯 𑀆𑀳𑀸𑀭𑀼𑀧𑀘𑁆𑀙𑁂𑀤𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀤𑀥𑀺𑀕𑀫𑁂 𑀲𑁄 𑀦 𑀓𑀸𑀢𑀩𑁆𑀩𑁄𑀯. 𑀓𑀺𑀁 𑀧𑀦𑀸𑀥𑀺𑀕𑀫𑀁 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 𑀲𑀪𑀸𑀕𑀸𑀦𑀜𑁆𑀳𑀻𑀢𑀺𑀆𑀤𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁧-𑁧𑁮𑁩) ‘‘𑀳𑀢𑁆𑀣𑀧𑁆𑀧𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺, ‘𑀢𑀲𑁆𑀲 𑀯𑀺𑀓𑁆𑀔𑁂𑀧𑁄 𑀫𑀸 𑀳𑁄𑀢𑀽’𑀢𑀺 𑀉𑀧𑀘𑁆𑀙𑀺𑀦𑁆𑀤𑀢𑀺, 𑀯𑀺𑀲𑁂𑀲𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀢𑀧𑁆𑀧𑀪𑀯𑀁 𑀲𑀓𑁆𑀓𑀸𑀭𑀁 𑀮𑀚𑁆𑀚𑀸𑀬𑀦𑁆𑀢𑁄 𑀆𑀳𑀸𑀭𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀲𑀪𑀸𑀕𑀸𑀦𑀁 𑀩𑁆𑀬𑀸𑀓𑀢𑀢𑁆𑀢𑀸. 𑀢𑁂 𑀳𑀺 𑀓𑀧𑁆𑀧𑀺𑀬𑀔𑁂𑀢𑁆𑀢𑀁 𑀆𑀭𑁄𑀘𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀦𑀺𑀲𑀺𑀦𑁆𑀦𑀓𑀣𑀸

𑁧𑁪. 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀣𑀸𑀬𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀲𑀗𑁆𑀓𑀫𑀦𑁆𑀢𑀻𑀢𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀑𑀓𑀸𑀲𑀤𑀸𑀦𑀢𑁆𑀣𑀁 𑀦𑀺𑀲𑀺𑀦𑁆𑀦𑀧𑀸𑀴𑀺𑀬𑀸 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸 𑀕𑀘𑁆𑀙𑀦𑁆𑀢𑀺. 𑀧𑀝𑀺𑀯𑁂𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀉𑀧𑀧𑀭𑀺𑀓𑁆𑀔𑀡𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀳𑁂𑀝𑁆𑀞𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀲𑀸𑀝𑀓𑀁 𑀯𑀮𑀺𑀁 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀧𑀝𑀺𑀯𑁂𑀓𑁆𑀔𑀡𑀜𑁆𑀘𑁂𑀢𑀁 𑀕𑀺𑀳𑀻𑀦𑀁 𑀲𑀦𑁆𑀢𑀓𑁂𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁧𑁮𑁦) ‘‘𑀳𑁂𑀝𑁆𑀞𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀲𑀸𑀝𑀓𑀁 𑀯𑀮𑀺𑀁 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘𑀬𑀲𑁆𑀫𑀺𑀁 𑀯𑀮𑀺 𑀦 𑀧𑀜𑁆𑀜𑀸𑀬𑀢𑀻’𑀢𑀺. 𑀧𑀝𑀺𑀯𑁂𑀓𑁆𑀔𑀡𑀜𑁆𑀘𑁂𑀢𑀁 𑀕𑀺𑀳𑀻𑀦𑀁 𑀲𑀦𑁆𑀢𑀓𑁂 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀫𑁆𑀧𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁮𑁦) ‘‘𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀯𑀺𑀘𑀸𑀭𑁂𑀢𑁆𑀯𑀸. 𑀳𑁂𑀝𑁆𑀞𑀺𑀫𑀪𑀸𑀕𑁂 𑀳𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑁂 𑀯𑀮𑀺 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯.

𑀤𑀯𑀸𑀬𑀲𑀺𑀮𑀸𑀯𑀺𑀚𑁆𑀛𑀦𑀓𑀣𑀸

𑁧𑁫. 𑀤𑀯𑀸𑀬𑀲𑀺𑀮𑀸𑀯𑀺𑀚𑁆𑀛𑀦𑀓𑀣𑀸𑀬𑀁 𑀤𑀯𑀸𑀲𑀤𑁆𑀤𑁄 𑀳𑀲𑀸𑀥𑀺𑀧𑁆𑀧𑀸𑀬𑀯𑀸𑀘𑀓𑁄. 𑀧𑀝𑀺𑀧𑀼𑀩𑁆𑀩𑀯𑀺𑀥-𑀥𑀸𑀢𑀼 𑀧𑀯𑀝𑁆𑀝𑀦𑀢𑁆𑀣𑁄𑀢𑀺 𑀆𑀳 ‘‘𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀧𑀸𑀲𑀸𑀡𑁄 𑀦 𑀧𑀯𑀝𑁆𑀝𑁂𑀢𑀩𑁆𑀩𑁄’’𑀢𑀺. 𑀲𑀺𑀮𑀸𑀲𑀤𑁆𑀤𑀲𑁆𑀲 𑀧𑀸𑀲𑀸𑀡𑀯𑀸𑀘𑀓𑀢𑁆𑀢𑀸 𑀲𑁄 𑀏𑀯 𑀦 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀦 𑀯𑀝𑁆𑀝𑁂𑀬𑁆𑀬𑀸𑀢𑀺 𑀆𑀳 ‘‘𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀥𑁄𑀯𑀦𑀤𑀡𑁆𑀟𑀓𑀦𑁆𑀢𑀺 𑀪𑀡𑁆𑀟𑀥𑁄𑀯𑀦𑀤𑀡𑁆𑀟𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁮𑁨-𑁧𑁮𑁩) 𑀧𑀦 ‘‘𑀪𑀡𑁆𑀟𑀓𑀁 𑀯𑀸 𑀥𑁄𑀯𑀦𑁆𑀢𑀸𑀢𑀺 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀸. 𑀥𑁄𑀯𑀦𑀤𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀥𑁄𑀯𑀦𑀤𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀸𑀬𑀸𑀮𑀺𑀫𑁆𑀧𑀦𑀓𑀣𑀸

𑁧𑁬. 𑀤𑀸𑀬𑀸𑀮𑀺𑀫𑁆𑀧𑀦𑀓𑀣𑀸𑀬𑀁 𑀅𑀮𑁆𑀮…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀼𑀓𑁆𑀔𑀝𑁆𑀞𑀸𑀦𑁂𑀧𑀺 𑀅𑀕𑁆𑀕𑀺𑀁 𑀧𑀸𑀢𑁂𑀢𑁆𑀯𑀸 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀆𑀮𑀺𑀫𑁆𑀧𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀤𑀼𑀓𑁆𑀓𑀝𑀦𑁆𑀢𑀺 𑀲𑀼𑀓𑁆𑀔𑀝𑁆𑀞𑀸𑀦𑁂 𑀯𑀸 𑀲𑀼𑀓𑁆𑀔𑀁 ‘‘𑀅𑀲𑀼𑀓𑁆𑀔’’𑀦𑁆𑀢𑀺 𑀅𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀸 𑀅𑀕𑁆𑀕𑀺𑀁 𑀧𑀸𑀢𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀧𑀺 𑀏𑀲𑁂𑀯 𑀦𑀬𑁄, 𑀓𑀻𑀴𑀸𑀥𑀺𑀧𑁆𑀧𑀸𑀬𑁄 𑀘 𑀧𑀝𑀧𑀝𑀸𑀬𑀫𑀸𑀦𑀲𑀤𑁆𑀤𑀲𑁆𑀲𑀸𑀤𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀕𑁆𑀕𑀺 𑀧𑀝𑀕𑁆𑀕𑀺. 𑀧𑀭𑀺𑀢𑁆𑀢𑀓𑀭𑀡𑀦𑁆𑀢𑀺 𑀆𑀭𑀓𑁆𑀔𑀓𑀭𑀡𑀁. 𑀲𑀬𑀁 𑀯𑀸 𑀉𑀝𑁆𑀞𑀺𑀢𑀦𑁆𑀢𑀺 𑀯𑀸𑀢𑁂𑀭𑀺𑀢𑀸𑀦𑀁 𑀯𑁂𑀴𑀼𑀆𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑁂𑀦 𑀲𑀫𑀼𑀝𑁆𑀞𑀺𑀢𑀁. 𑀦𑀺𑀭𑀼𑀧𑀸𑀤𑀸𑀦𑁄𑀢𑀺 𑀇𑀦𑁆𑀥𑀦𑀭𑀳𑀺𑀢𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑁧.𑁧𑁯𑁦) 𑀧𑀦 ‘‘𑀔𑀺𑀟𑁆𑀟𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀼𑀓𑁆𑀔𑀢𑀺𑀡𑀸𑀤𑀻𑀲𑀼 𑀅𑀕𑁆𑀕𑀺𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀮𑁆𑀮𑁂𑀲𑀼 𑀧𑀦 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀓𑀭𑁄𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀧𑀝𑀺𑀧𑀓𑁆𑀔𑀪𑀽𑀢𑁄, 𑀧𑀝𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑁄 𑀯𑀸 𑀅𑀕𑁆𑀕𑀺 𑀧𑀝𑀕𑁆𑀕𑀺, 𑀢𑀲𑁆𑀲 𑀅𑀮𑁆𑀮𑀢𑀺𑀡𑀸𑀤𑀻𑀲𑀼𑀧𑀺 𑀤𑀸𑀦𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀁 𑀤𑁂𑀦𑁆𑀢𑁂𑀦 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀸𑀯𑀕𑁆𑀕𑀺𑀁 𑀤𑀺𑀲𑁆𑀯𑀸 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀏𑀓𑀓𑁆𑀔𑀡𑁂 𑀅𑀓𑀢𑁆𑀯𑀸 𑀏𑀓𑀤𑁂𑀲𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀲𑀡𑀺𑀓𑀁 𑀛𑀸𑀧𑁂𑀢𑁆𑀯𑀸 𑀬𑀣𑀸 𑀫𑀳𑀦𑁆𑀢𑁄𑀧𑀺 𑀅𑀕𑁆𑀕𑀺 𑀯𑀺𑀳𑀸𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀸 𑀅𑀩𑁆𑀪𑁄𑀓𑀸𑀲𑀁 𑀓𑀢𑁆𑀯𑀸 𑀧𑀝𑀕𑁆𑀕𑀺 𑀤𑀸𑀢𑀩𑁆𑀩𑁄. 𑀲𑁄 𑀟𑀸𑀯𑀕𑁆𑀕𑀺𑀦𑁄 𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀢𑁂𑀦 𑀲𑀳 𑀦𑀺𑀩𑁆𑀩𑀸𑀢𑀺. 𑀧𑀭𑀺𑀢𑁆𑀢𑀓𑀭𑀡𑀦𑁆𑀢𑀺 𑀲𑀫𑀦𑁆𑀢𑀸 𑀭𑀼𑀓𑁆𑀔𑀢𑀺𑀡𑀸𑀤𑀺𑀘𑁆𑀙𑁂𑀤𑀦𑀧𑀭𑀺𑀔𑀸𑀔𑀡𑀦𑀸𑀤𑀺𑀆𑀭𑀓𑁆𑀔𑀓𑀭𑀡𑀁. 𑀢𑁂𑀦𑀸𑀳 ‘𑀢𑀺𑀡𑀓𑀼𑀝𑀺𑀓𑀸𑀦𑀁 𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦’𑀦𑁆𑀢𑀺𑀆𑀤𑀻’’𑀢𑀺, 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁯𑁦) 𑀧𑀦 ‘‘𑀧𑀭𑀺𑀢𑁆𑀢𑀦𑁆𑀢𑀺 𑀭𑀓𑁆𑀔𑀡𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘𑀲𑀫𑀦𑁆𑀢𑀸 𑀪𑀽𑀫𑀺𑀢𑀘𑁆𑀙𑀦’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀸𑀪𑀢𑀓𑀣𑀸

𑁧𑁭. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀸𑀪𑀢𑀓𑀣𑀸𑀬𑀁 𑀦𑀢𑁆𑀣𑀺 𑀲𑀤𑁆𑀥𑀸 𑀏𑀢𑁂𑀲𑀽𑀢𑀺 𑀅𑀲𑁆𑀲𑀤𑁆𑀥𑀸, 𑀫𑀘𑁆𑀙𑀭𑀺𑀦𑁄, 𑀢𑁂𑀲𑀼 𑀅𑀲𑁆𑀲𑀤𑁆𑀥𑁂𑀲𑀼. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀬𑀼𑀢𑁆𑀢𑀸𑀦𑀺 𑀓𑀼𑀮𑀸𑀦𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑀸𑀦𑀺, 𑀫𑀚𑁆𑀛𑁂𑀮𑁄𑀧𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄, ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀬𑀼𑀢𑁆𑀢𑀓𑀼𑀮𑀸𑀦𑀺, 𑀢𑁂𑀲𑀼. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀼𑀮𑁂𑀲𑀼 𑀮𑀪𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀓𑁆𑀓𑀘𑁆𑀘𑀓𑀸𑀭𑀻𑀦𑀁 𑀢𑁂𑀲𑀁 𑀲𑀓𑁆𑀓𑀘𑁆𑀘𑀓𑀭𑀡𑁂𑀦, 𑀅𑀧𑁆𑀧𑀡𑀻𑀢𑀤𑀸𑀬𑀻𑀦𑀁 𑀢𑁂𑀲𑀁 𑀧𑀡𑀻𑀢𑀤𑀸𑀦𑁂𑀦 𑀪𑀯𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑁂𑀦𑀸𑀢𑀺 𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀯 𑀪𑀼𑀜𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑁂𑀯 𑀅𑀢𑁆𑀢𑀦𑀸 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀭𑁂𑀲𑀁 𑀤𑀸𑀢𑀩𑁆𑀩’’𑀦𑁆𑀢𑀺. 𑀬𑁂𑀦 𑀓𑀸𑀭𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑀫𑀺𑀲𑁆𑀲𑀫𑁆𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 𑀧𑀺𑀡𑁆𑀟𑀧𑀸𑀢𑀫𑁂𑀯𑀸𑀢𑀺 𑀆𑀳 ‘‘𑀬𑀫𑁆𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀧𑀺𑀳𑀺𑀢𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀳𑀻’’𑀢𑀺𑀆𑀤𑀺. 𑀢𑀢𑁄 𑀅𑀜𑁆𑀜𑀫𑁆𑀧𑀺 𑀤𑀲𑁆𑀲𑁂𑀢𑀺 𑀕𑀦𑁆𑀥𑀳𑀮𑀺𑀤𑁆𑀤𑀸𑀤𑀺𑀫𑀓𑁆𑀔𑀺𑀢𑁄𑀢𑀺𑀆𑀤𑀺𑀦𑀸. 𑀢𑀢𑁆𑀣𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀭𑀻𑀭𑁂 𑀭𑁄𑀕𑀝𑁆𑀞𑀸𑀦𑀸𑀦𑀻’’𑀢𑀺𑀆𑀤𑀺.

𑀕𑁄𑀧𑀓𑀤𑀸𑀦𑀓𑀣𑀸

𑁧𑁮. 𑀕𑁄𑀧𑀓𑀤𑀸𑀦𑀓𑀣𑀸𑀬𑀁 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀕𑁄𑀧𑁂𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀧𑀓𑁄, 𑀢𑀲𑁆𑀲 𑀤𑀸𑀦𑀁 𑀕𑁄𑀧𑀓𑀤𑀸𑀦𑀁, 𑀉𑀬𑁆𑀬𑀸𑀦𑀧𑀸𑀮𑀓𑀸𑀤𑀻𑀳𑀺 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀤𑀸𑀦𑀁. 𑀢𑀢𑁆𑀣 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑁂𑀳𑁂𑀯 𑀭𑀼𑀓𑁆𑀔𑁂𑀳𑀺 𑀏𑀢𑁆𑀢𑀓𑀫𑁂𑀯 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸, 𑀮𑀺𑀔𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸. 𑀤𑀸𑀭𑀓𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄 𑀤𑀸𑀭𑀓𑀸. 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀕𑁄𑀧𑀓𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣𑀧𑀺 𑀕𑀺𑀳𑀻𑀦𑀁 𑀕𑁄𑀧𑀓𑀤𑀸𑀦𑁂 𑀬𑀢𑁆𑀢𑀓𑀁 𑀕𑁄𑀧𑀓𑀸 𑀤𑁂𑀦𑁆𑀢𑀺, 𑀢𑀢𑁆𑀢𑀓𑀁 𑀕𑀳𑁂𑀢𑀩𑁆𑀩𑀁. 𑀲𑀗𑁆𑀖𑀺𑀓𑁂 𑀧𑀦 𑀬𑀣𑀸𑀧𑀭𑀺𑀘𑁆𑀙𑁂𑀤𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑀺𑀢𑀢𑁆𑀢𑀸 ‘‘𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑁧.𑁧𑁫𑁬) ‘‘𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘𑀏𑀢𑁆𑀢𑀓𑁂 𑀭𑀼𑀓𑁆𑀔𑁂 𑀭𑀓𑁆𑀔𑀺𑀢𑁆𑀯𑀸 𑀢𑀢𑁄 𑀏𑀢𑁆𑀢𑀓𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀧𑀡𑁆𑀡𑀁 𑀆𑀭𑁄𑀧𑁂𑀢𑁆𑀯𑀸. 𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸. 𑀤𑀸𑀭𑀓𑀸𑀢𑀺 𑀢𑁂𑀲𑀁 𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄 𑀬𑁂 𑀓𑁂𑀘𑀺 𑀕𑁄𑀧𑁂𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀇𑀥 ‘𑀤𑀸𑀭𑀓𑀸’𑀢𑀺 𑀯𑀼𑀢𑁆𑀢𑀸’’𑀢𑀺, 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁫𑁬) 𑀧𑀦 ‘‘𑀆𑀭𑀸𑀫𑀭𑀓𑁆𑀔𑀓𑀸𑀢𑀺 𑀯𑀺𑀲𑁆𑀲𑀢𑁆𑀣𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸𑀢𑀺 𑀏𑀢𑁆𑀣 𑀬𑀲𑁆𑀲 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀁 𑀪𑀺𑀓𑁆𑀔𑀼𑀁, 𑀪𑀸𑀕𑀁 𑀯𑀸 𑀲𑀸𑀫𑀺𑀓𑀸 𑀦 𑀭𑀓𑁆𑀔𑀦𑁆𑀢𑀺 𑀦 𑀤𑀡𑁆𑀟𑁂𑀦𑁆𑀢𑀺, 𑀢𑀲𑁆𑀲 𑀤𑀸𑀦𑀁 𑀅𑀧𑁆𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀥 𑀲𑀦𑁆𑀦𑀺𑀝𑁆𑀞𑀸𑀦𑀁, 𑀢𑀫𑁆𑀧𑀺 ‘𑀦 𑀯𑀝𑁆𑀝𑀢𑀺 𑀲𑀗𑁆𑀖𑀺𑀓𑁂’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂. 𑀅𑀜𑁆𑀜𑁂𑀲𑀁 𑀅𑀪𑀸𑀯𑀦𑁆𑀢𑀺 𑀅𑀜𑁆𑀜𑁂𑀲𑀁 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀅𑀪𑀸𑀯𑀁. 𑀢𑀢𑁆𑀣𑀸𑀢𑀺 𑀢𑀸𑀤𑀺𑀲𑁂 𑀆𑀯𑀸𑀲𑁂. 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀫𑁆𑀧𑀺 𑀲𑀫𑁆𑀧𑀢𑁆𑀢𑀸𑀦𑀁 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀻𑀢𑀺 𑀅𑀫𑁆𑀩𑀨𑀮𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀘𑀻𑀯𑀭𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀺. 𑀘𑀻𑀯𑀭𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸𑀢𑀺 ‘‘𑀇𑀫𑁂𑀲𑀁 𑀭𑀼𑀓𑁆𑀔𑀸𑀦𑀁 𑀨𑀮𑀸𑀦𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀘𑀻𑀯𑀭𑁂𑀲𑀼𑀬𑁂𑀯 𑀉𑀧𑀦𑁂𑀢𑀩𑁆𑀩𑀸𑀦𑀺, 𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀏𑀯𑀁 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀸. 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 𑀅𑀦𑀺𑀲𑁆𑀲𑀭𑀸𑀢𑀺 𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀅𑀦𑀺𑀲𑁆𑀲𑀭𑀸. 𑀦 𑀢𑁂𑀲𑀼…𑀧𑁂… 𑀞𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀆𑀕𑀦𑁆𑀢𑀼𑀓𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀦𑁆𑀢𑀺 ‘‘𑀪𑀸𑀚𑁂𑀢𑁆𑀯𑀸 𑀦 𑀔𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀸 ‘‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀺 𑀨𑀮𑀸𑀦𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀏𑀢𑁆𑀢𑀓𑀸𑀦𑀁 𑀤𑀺𑀯𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀦 𑀓𑀺𑀜𑁆𑀘𑀺 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀸 𑀏𑀯𑀁 𑀓𑀢𑀸𑀬 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀆𑀕𑀦𑁆𑀢𑀼𑀓𑁂𑀳𑀺 𑀞𑀸𑀢𑀩𑁆𑀩𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀺𑀲𑁆𑀲𑀭𑀸’’𑀢𑀺 𑀯𑀘𑀦𑁂𑀦 𑀤𑀻𑀧𑀺𑀢𑁄𑀬𑁂𑀯 𑀅𑀢𑁆𑀣𑁄 𑀫𑀳𑀸𑀧𑀘𑁆𑀘𑀭𑀺𑀬𑀁 ‘‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀧𑀭𑀺𑀪𑁄𑀕𑀯𑀲𑁂𑀦𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀢𑀫𑁂𑀯 𑀪𑀸𑀚𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀺𑀳𑀸𑀭𑁂, 𑀭𑀝𑁆𑀞𑁂𑀯𑀸.

𑀲𑁂𑀦𑀸𑀲𑀦𑀧𑀘𑁆𑀘𑀬𑀦𑁆𑀢𑀺 𑀲𑁂𑀦𑀸𑀲𑀦𑀜𑁆𑀘 𑀢𑀤𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀜𑁆𑀘. 𑀮𑀸𑀫𑀓𑀓𑁄𑀝𑀺𑀬𑀸𑀢𑀺 𑀮𑀸𑀫𑀓𑀁 𑀆𑀤𑀺𑀁 𑀓𑀢𑁆𑀯𑀸, 𑀮𑀸𑀫𑀓𑀲𑁂𑀦𑀸𑀲𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀦𑀸𑀲𑀦𑁂𑀧𑀺 𑀢𑀺𑀡𑀸𑀤𑀻𑀦𑀺 𑀮𑀸𑀫𑀓𑀓𑁄𑀝𑀺𑀬𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺, 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀧𑀺 𑀮𑀸𑀫𑀓𑀓𑁄𑀝𑀺𑀬𑀸𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸. 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀢𑀸𑀯 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀮𑀸𑀫𑀓𑀓𑁄𑀝𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑁆𑀢𑁂𑀳𑀺𑀧𑀺 𑀲𑁂𑀦𑀸𑀲𑀦𑀪𑀽𑀫𑀺𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀦𑁄 𑀔𑀦𑁆𑀢𑀺. 𑀯𑀻𑀫𑀁𑀲𑀺𑀢𑁆𑀯𑀸 𑀬𑀁 𑀭𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁.

𑀥𑀫𑁆𑀫𑀲𑀦𑁆𑀢𑀓𑁂𑀦 𑀩𑀼𑀤𑁆𑀥𑀧𑀽𑀚𑀁 𑀓𑀸𑀢𑀼𑀁, 𑀩𑀼𑀤𑁆𑀥𑀲𑀦𑁆𑀢𑀓𑁂𑀦 𑀯𑀸 𑀥𑀫𑁆𑀫𑀧𑀽𑀚𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀦 𑀯𑀝𑁆𑀝𑀢𑀻𑀢𑀺? ‘‘𑀢𑀣𑀸𑀕𑀢𑀲𑁆𑀲 𑀔𑁄 𑀏𑀢𑀁, 𑀯𑀸𑀲𑁂𑀝𑁆𑀞, 𑀅𑀥𑀺𑀯𑀘𑀦𑀁 𑀥𑀫𑁆𑀫𑀓𑀸𑀬𑁄 𑀇𑀢𑀺𑀧𑀻’’𑀢𑀺 𑀘 ‘‘𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀘 𑀯𑀘𑀦𑀢𑁄 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀏𑀯𑀁 𑀲𑀦𑁆𑀢𑁂 ‘𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’𑀢𑀺 (𑀫𑀳𑀸𑀯. 𑁩𑁬𑁫) 𑀯𑀘𑀦𑀢𑁄 𑀩𑀼𑀤𑁆𑀥𑀲𑀦𑁆𑀢𑀓𑁂𑀦 𑀕𑀺𑀮𑀸𑀦𑀲𑁆𑀲𑀧𑀺 𑀪𑁂𑀲𑀚𑁆𑀚𑀁 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁. 𑀦 𑀳𑀺 ‘‘𑀬𑁄, 𑀪𑀺𑀓𑁆𑀔𑀯𑁂, 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁬𑁫) 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀘 𑀕𑀺𑀮𑀸𑀦𑀲𑁆𑀲 𑀘 𑀏𑀓𑀲𑀤𑀺𑀲𑀢𑀸, 𑀢𑀤𑀼𑀧𑀝𑁆𑀞𑀸𑀦𑀲𑁆𑀲 𑀯𑀸 𑀲𑀫𑀨𑀮𑀢𑀸 𑀯𑀼𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀬𑁄 𑀫𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀓𑀭𑀡𑁂𑀦 𑀉𑀧𑀝𑁆𑀞𑀳𑁂𑀬𑁆𑀬, 𑀲𑁄 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑁂𑀬𑁆𑀬, 𑀫𑀫 𑀑𑀯𑀸𑀤𑀓𑀸𑀭𑀓𑁂𑀦 𑀕𑀺𑀮𑀸𑀦𑁄 𑀉𑀧𑀝𑁆𑀞𑀸𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁫). 𑀪𑀕𑀯𑀢𑁄 𑀘 𑀕𑀺𑀮𑀸𑀦𑀲𑁆𑀲 𑀘 𑀉𑀧𑀝𑁆𑀞𑀸𑀦𑀁 𑀏𑀓𑀲𑀤𑀺𑀲𑀦𑁆𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀯𑀘𑀦𑀢𑁄 ‘‘𑀅𑀳𑀜𑁆𑀘 𑀔𑁄 𑀧𑀦𑀺𑀤𑀸𑀦𑀺 𑀏𑀓𑀓𑁄𑀯 𑀑𑀯𑀤𑀸𑀫𑀺 𑀅𑀦𑀼𑀲𑀸𑀲𑀸𑀫𑀺, 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀢𑀼𑀫𑁆𑀳𑁂 𑀑𑀯𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑀸𑀲𑀺𑀲𑁆𑀲𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁧𑁬) 𑀯𑀼𑀢𑁆𑀢𑀢𑁆𑀢𑀸 𑀘 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀧𑀲𑀁𑀲𑀦𑁆𑀢𑁂𑀦 𑀘 ‘‘𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀦 𑀲𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀦𑀸𑀫, 𑀩𑀼𑀤𑁆𑀥𑁄 𑀦𑀸𑀫 𑀏𑀲 𑀘𑀼𑀦𑁆𑀤𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑀕𑀭𑀼𑀓𑀢𑁆𑀢𑀸 𑀘 𑀢𑀣𑀸𑀕𑀢𑀲𑁆𑀲 𑀧𑀼𑀩𑁆𑀩𑀦𑀬𑁄 𑀏𑀯 𑀧𑀲𑀢𑁆𑀣𑀢𑀭𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 ‘‘𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁. 𑀢𑁂𑀲𑀼𑀧𑀺 𑀆𑀕𑀦𑁆𑀢𑀼𑀓𑀸 𑀅𑀦𑀺𑀲𑁆𑀲𑀭𑀸𑀢𑀺 𑀲𑁂𑀦𑀸𑀲𑀦𑁂 𑀦𑀺𑀭𑀦𑁆𑀢𑀭𑀁 𑀯𑀲𑀦𑁆𑀢𑀸𑀦𑀁 𑀘𑀻𑀯𑀭𑀢𑁆𑀣𑀸𑀬 𑀤𑀸𑀬𑀓𑁂𑀳𑀺, 𑀪𑀺𑀓𑁆𑀔𑀽𑀳𑀺 𑀯𑀸 𑀦𑀺𑀬𑀫𑁂𑀢𑁆𑀯𑀸 𑀤𑀺𑀦𑁆𑀦𑀢𑁆𑀢𑀸 𑀪𑀸𑀚𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀅𑀦𑀺𑀲𑁆𑀲𑀭𑀸. 𑀆𑀕𑀦𑁆𑀢𑀼𑀓𑁂𑀳𑀺𑀧𑀺 𑀇𑀘𑁆𑀙𑀦𑁆𑀢𑁂𑀳𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑁆𑀲𑀸𑀦𑀸𑀤𑀻𑀲𑀼 𑀧𑀯𑀺𑀲𑀺𑀢𑁆𑀯𑀸 𑀘𑀻𑀯𑀭𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀁. 𑀢𑁂𑀲𑀁 𑀓𑀢𑀺𑀓𑀸𑀬 𑀞𑀸𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀸𑀦𑀺 𑀨𑀮𑀸𑀨𑀮𑀸𑀦𑀺 𑀅𑀪𑀸𑀚𑁂𑀢𑁆𑀯𑀸 ‘𑀏𑀢𑁆𑀢𑀓𑁂𑀲𑀼 𑀭𑀼𑀓𑁆𑀔𑁂𑀲𑀼 𑀨𑀮𑀸𑀦𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫, 𑀅𑀜𑁆𑀜𑁂𑀲𑀼 𑀨𑀮𑀸𑀨𑀮𑁂𑀳𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’𑀢𑀺 𑀯𑀸 ‘𑀧𑀺𑀡𑁆𑀟𑀧𑀸𑀢𑀸𑀤𑀺𑀧𑀘𑁆𑀘𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀸’𑀢𑀺 𑀯𑀸 ‘𑀓𑀺𑀜𑁆𑀘𑀺𑀧𑀺 𑀅𑀪𑀸𑀚𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑀢𑁆𑀣𑀸𑀬𑁂𑀯 𑀉𑀧𑀦𑁂𑀫𑀸’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀸 𑀉𑀧𑀦𑁂𑀦𑁆𑀢𑀸𑀦𑀁 𑀆𑀯𑀸𑀲𑀺𑀓𑀸𑀦𑀁 𑀓𑀢𑀺𑀓𑀸𑀬 𑀆𑀕𑀦𑁆𑀢𑀼𑀓𑁂𑀳𑀺 𑀞𑀸𑀢𑀩𑁆𑀩𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘𑀅𑀦𑀺𑀲𑁆𑀲𑀭𑀸’𑀢𑀺 𑀯𑀘𑀦𑁂𑀦 𑀤𑀻𑀧𑀺𑀢𑁄 𑀏𑀯 𑀅𑀢𑁆𑀣𑁄, 𑀫𑀳𑀸𑀧𑀘𑁆𑀘𑀭𑀺𑀬𑀁 ‘𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦’𑀦𑁆𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀧𑀭𑀺𑀪𑁄𑀕𑀯𑀲𑁂𑀦𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀢𑀫𑁂𑀯 𑀪𑀸𑀚𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀺𑀳𑀸𑀭𑁂, 𑀭𑀝𑁆𑀞𑁂 𑀯𑀸. 𑀲𑁂𑀦𑀸𑀲𑀦𑀧𑀘𑁆𑀘𑀬𑀦𑁆𑀢𑀺 𑀲𑁂𑀦𑀸𑀲𑀦𑀜𑁆𑀘 𑀢𑀤𑀢𑁆𑀣𑀸𑀬 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀜𑁆𑀘. ‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀼𑀦 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦 𑀉𑀧𑀦𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀯𑀢𑁆𑀣𑀼𑀦𑁄 𑀫𑀽𑀮𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦𑁂𑀢𑁆𑀣 ‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀭𑀲𑁂𑀦𑀸𑀲𑀦𑀸𑀦𑀺 𑀞𑀧𑁂𑀢𑁆𑀯𑀸 𑀮𑀸𑀫𑀓𑀢𑁄 𑀧𑀝𑁆𑀞𑀸𑀬 𑀯𑀺𑀲𑁆𑀲𑀚𑁆𑀚𑀦𑁆𑀢𑁂𑀳𑀺𑀧𑀺 𑀲𑁂𑀦𑀸𑀲𑀦𑀪𑀽𑀫𑀺𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄’𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀬𑀼𑀢𑁆𑀢𑀫𑁂𑀯 𑀇𑀫𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀢𑁄, 𑀇𑀢𑀭𑀣𑀸 𑀓𑁂𑀘𑀺 𑀲𑀳 𑀯𑀢𑁆𑀣𑀼𑀦𑀸𑀧𑀺 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼’’𑀦𑁆𑀢𑀺.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁧𑁫𑁩) ‘‘𑀏𑀢𑁆𑀣 𑀏𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀭𑀘𑀓𑁆𑀓𑀸𑀤𑀺𑀪𑀬𑀁 𑀆𑀕𑀢𑀁. 𑀫𑀽𑀮𑀯𑀢𑁆𑀣𑀼𑀘𑁆𑀙𑁂𑀤𑀦𑁆𑀢𑀺 ‘𑀲𑀩𑁆𑀩𑀲𑁂𑀦𑀸𑀲𑀦𑀸𑀦𑀁 𑀏𑀢𑁂 𑀇𑀲𑁆𑀲𑀭𑀸’𑀢𑀺 𑀯𑀘𑀦𑀢𑁄 𑀇𑀢𑀭𑁂 𑀅𑀦𑀺𑀲𑁆𑀲𑀭𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀬𑀫𑁂𑀯 𑀪𑀺𑀓𑁆𑀔𑀼 𑀇𑀲𑁆𑀲𑀭𑁄𑀢𑀺 𑀬𑀢𑁆𑀣 𑀲𑁄 𑀇𑀘𑁆𑀙𑀢𑀺, 𑀢𑀢𑁆𑀣 𑀅𑀢𑁆𑀢𑀜𑀸𑀢𑀳𑁂𑀢𑀼𑀁 𑀮𑀪𑀢𑀻𑀢𑀺 𑀓𑀺𑀭 𑀅𑀢𑁆𑀣𑁄, 𑀅𑀧𑀺 𑀘 ‘𑀤𑀳𑀭𑁄’𑀢𑀺 𑀯𑀤𑀦𑁆𑀢𑀺. 𑀲𑀯𑀢𑁆𑀣𑀼𑀓𑀦𑁆𑀢𑀺 𑀲𑀳 𑀪𑀽𑀫𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

𑀥𑀫𑁆𑀫𑀺𑀓𑀸𑀭𑀓𑁆𑀔𑀬𑀸𑀘𑀦𑀓𑀣𑀸

𑁧𑁯. 𑀥𑀫𑁆𑀫𑀺𑀓𑀸𑀭𑀓𑁆𑀔𑀬𑀸𑀘𑀦𑀓𑀣𑀸𑀬𑀁 ‘‘𑀕𑀻𑀯𑀸𑀬𑁂𑀯𑀸𑀢𑀺 𑀆𑀡𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀲𑀁 𑀅𑀦𑀢𑁆𑀣𑀓𑀸𑀫𑀢𑀸𑀬𑀸𑀢𑀺 ‘𑀘𑁄𑀭𑁄’𑀢𑀺 𑀯𑀼𑀢𑁆𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁂𑀘𑀺 𑀤𑀡𑁆𑀟𑀺𑀲𑁆𑀲𑀦𑁆𑀢𑀺, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀲𑀜𑁆𑀜𑀸𑀬. 𑀏𑀢𑁂𑀦 𑀓𑁂𑀯𑀮𑀁 𑀪𑀬𑁂𑀦 𑀯𑀸 𑀧𑀭𑀺𑀓𑁆𑀔𑀸𑀭𑀕𑁆𑀕𑀳𑀡𑀢𑁆𑀣𑀁 𑀯𑀸 𑀲𑀳𑀲𑀸 ‘𑀘𑁄𑀭𑁄’𑀢𑀺 𑀯𑀼𑀢𑁆𑀢𑁂 𑀤𑀡𑁆𑀟𑀺𑀢𑁂𑀧𑀺 𑀦 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀧𑀼𑀭𑀺𑀲𑀸𑀦𑀜𑁆𑀳𑀺 ‘𑀘𑁄𑀭𑁄 𑀅𑀬’𑀦𑁆𑀢𑀺 𑀉𑀤𑁆𑀤𑀺𑀲𑁆𑀲𑀓𑀣𑀦𑁂 𑀏𑀯 𑀕𑀻𑀯𑀸. 𑀪𑀺𑀓𑁆𑀔𑀽𑀦𑀁, 𑀧𑀦 𑀆𑀭𑀸𑀫𑀺𑀓𑀸𑀤𑀻𑀦𑀁 𑀯𑀸 𑀲𑀫𑁆𑀫𑀼𑀔𑀸 ‘𑀅𑀲𑀼𑀓𑁄 𑀘𑁄𑀭𑁄 𑀏𑀯𑀫𑀓𑀸𑀲𑀻’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑀯𑀘𑀦𑀁 𑀦𑀺𑀲𑁆𑀲𑀸𑀬 𑀆𑀭𑀸𑀫𑀺𑀓𑀸𑀤𑀻𑀲𑀼 𑀭𑀸𑀚𑀧𑀼𑀭𑀺𑀲𑀸𑀦𑀁 𑀯𑀢𑁆𑀯𑀸 𑀤𑀡𑁆𑀟𑀸𑀧𑁂𑀦𑁆𑀢𑁂𑀲𑀼𑀧𑀺 𑀪𑀺𑀓𑁆𑀔𑀼𑀲𑁆𑀲 𑀦 𑀕𑀻𑀯𑀸 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀯𑀼𑀢𑁆𑀢𑀢𑁆𑀢𑀸, 𑀬𑁂𑀲𑀜𑁆𑀘 𑀯𑀼𑀢𑁆𑀢𑀁, 𑀢𑁂𑀳𑀺 𑀲𑀬𑀁 𑀘𑁄𑀭𑀲𑁆𑀲 𑀅𑀤𑀡𑁆𑀟𑀺𑀢𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. ‘𑀢𑁆𑀯𑀁 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀅𑀘𑁆𑀙𑀺𑀦𑁆𑀤𑀸’𑀢𑀺 𑀆𑀡𑀢𑁆𑀢𑁄𑀧𑀺 𑀳𑀺 𑀲𑀘𑁂 𑀅𑀜𑁆𑀜𑁂𑀦 𑀅𑀘𑁆𑀙𑀺𑀦𑁆𑀤𑀸𑀧𑁂𑀢𑀺, 𑀆𑀡𑀸𑀧𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀺𑀲𑀗𑁆𑀓𑁂𑀢𑀢𑁆𑀢𑀸. 𑀅𑀢𑁆𑀢𑀦𑁄 𑀯𑀘𑀦𑀓𑀭𑀦𑁆𑀢𑀺 𑀇𑀤𑀁 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀘𑀦𑀁 𑀅𑀓𑀭𑁄𑀦𑁆𑀢𑀸𑀦𑀁 𑀭𑀸𑀚𑀧𑀼𑀭𑀺𑀲𑀸𑀦𑀫𑁆𑀧𑀺 ‘𑀇𑀫𑀺𑀦𑀸 𑀕𑀳𑀺𑀢𑀧𑀭𑀺𑀓𑁆𑀔𑀸𑀭𑀁 𑀆𑀳𑀭𑀸𑀧𑁂𑀳𑀺, 𑀫𑀸 𑀘𑀲𑁆𑀲 𑀤𑀡𑁆𑀟𑀁 𑀓𑀭𑁄𑀳𑀻’𑀢𑀺 𑀉𑀤𑁆𑀤𑀺𑀲𑁆𑀲 𑀯𑀤𑀦𑁆𑀢𑀲𑁆𑀲𑀧𑀺 𑀤𑀡𑁆𑀟𑁂 𑀕𑀳𑀺𑀢𑁂𑀧𑀺 𑀦 𑀕𑀻𑀯𑀸 𑀏𑀯 𑀤𑀡𑁆𑀟𑀕𑁆𑀕𑀳𑀡𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘𑀅𑀲𑀼𑀓𑀪𑀡𑁆𑀟𑀁 𑀅𑀯𑀳𑀭𑀸’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀧𑀝𑀺𑀓𑁆𑀔𑀺𑀧𑀦𑁂 (𑀧𑀸𑀭𑀸. 𑁧𑁨𑁧) 𑀯𑀺𑀬. 𑀤𑀸𑀲𑀸𑀤𑀻𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀺𑀬 𑀢𑀤𑀢𑁆𑀣𑀸𑀬 𑀅𑀟𑁆𑀟𑀓𑀭𑀡𑁂 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀆𑀳 ‘𑀓𑀧𑁆𑀧𑀺𑀬𑀅𑀟𑁆𑀟𑁄 𑀦𑀸𑀫, 𑀦 𑀯𑀝𑁆𑀝𑀢𑀻’𑀢𑀺. 𑀓𑁂𑀦𑀘𑀺 𑀧𑀦 𑀪𑀺𑀓𑁆𑀔𑀼𑀦𑀸 𑀔𑁂𑀢𑁆𑀢𑀸𑀤𑀺𑀅𑀢𑁆𑀣𑀸𑀬 𑀯𑁄𑀳𑀸𑀭𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀟𑁆𑀟𑁂 𑀓𑀢𑁂𑀧𑀺 𑀢𑀁 𑀔𑁂𑀢𑁆𑀢𑀸𑀤𑀺𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀺𑀬 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁 𑀦 𑀳𑁄𑀢𑀺 𑀧𑀼𑀩𑁆𑀩𑁂 𑀏𑀯 𑀲𑀗𑁆𑀖𑀲𑀦𑁆𑀢𑀓𑀢𑁆𑀢𑀸. 𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀦 𑀧𑀬𑁄𑀕𑀯𑀲𑁂𑀦 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀤𑀸𑀲𑀸𑀤𑀻𑀦𑀫𑁆𑀧𑀺 𑀧𑀦 𑀅𑀢𑁆𑀣𑀸𑀬 𑀭𑀓𑁆𑀔𑀁 𑀬𑀸𑀘𑀺𑀢𑀼𑀁 𑀯𑁄𑀳𑀸𑀭𑀺𑀓𑁂𑀦 𑀧𑀼𑀝𑁆𑀞𑁂𑀦 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀁 𑀓𑀧𑁆𑀧𑀺𑀬𑀓𑁆𑀓𑀫𑀁 𑀯𑀢𑁆𑀢𑀼𑀁 𑀆𑀭𑀸𑀫𑀺𑀓𑀸𑀤𑀻𑀳𑀺 𑀘 𑀅𑀟𑁆𑀟𑀁 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀯𑀺𑀳𑀸𑀭𑀯𑀢𑁆𑀣𑀸𑀤𑀺𑀓𑀧𑁆𑀧𑀺𑀬𑀅𑀟𑁆𑀟𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀲𑀬𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁬𑁭𑁯) 𑀆𑀕𑀢𑁄.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁬𑁮𑁧) ‘‘𑀕𑀻𑀯𑀸𑀢𑀺 𑀓𑁂𑀯𑀮𑀁 𑀕𑀻𑀯𑀸 𑀏𑀯 𑀳𑁄𑀢𑀺, 𑀦 𑀧𑀸𑀭𑀸𑀚𑀺𑀓𑀁. 𑀓𑀸𑀭𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀲𑀘𑁂 𑀆𑀯𑀼𑀥𑀪𑀡𑁆𑀟𑀁 𑀳𑁄𑀢𑀺, 𑀢𑀲𑁆𑀲 𑀥𑀸𑀭𑀸 𑀦 𑀓𑀸𑀭𑀸𑀧𑁂𑀢𑀩𑁆𑀩𑀸, 𑀅𑀜𑁆𑀜𑁂𑀦 𑀧𑀦 𑀆𑀓𑀸𑀭𑁂𑀦 𑀲𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀉𑀘𑁆𑀘𑀸𑀭𑀸𑀤𑀺𑀙𑀟𑁆𑀟𑀦𑀓𑀣𑀸

𑁨𑁦. 𑀉𑀘𑁆𑀘𑀸𑀭𑀸𑀤𑀺𑀙𑀟𑁆𑀟𑀦𑀓𑀣𑀸𑀬𑀁 𑀅𑀝𑁆𑀞𑀫𑁂 𑀉𑀘𑁆𑀘𑀸𑀭𑀸𑀤𑀺𑀙𑀟𑁆𑀟𑀦𑁂 ‘‘𑀉𑀘𑁆𑀘𑀸𑀭𑀸𑀤𑀺𑀪𑀸𑀯𑁄, 𑀅𑀦𑀧𑀮𑁄𑀓𑀦𑀁, 𑀯𑀴𑀜𑁆𑀚𑀦𑀝𑁆𑀞𑀸𑀦𑀁, 𑀢𑀺𑀭𑁄𑀓𑀼𑀝𑁆𑀝𑀧𑀸𑀓𑀸𑀭𑀢𑀸, 𑀙𑀟𑁆𑀟𑀦𑀁 𑀯𑀸 𑀙𑀟𑁆𑀟𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑀺 𑀧𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺, 𑀦𑀯𑀫𑁂 𑀳𑀭𑀺𑀢𑀽𑀧𑀭𑀺 𑀙𑀟𑁆𑀟𑀦𑁂 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀘. 𑀇𑀥 𑀔𑁂𑀢𑁆𑀢𑀧𑀸𑀮𑀓𑀸 𑀆𑀭𑀸𑀫𑀸𑀤𑀺𑀕𑁄𑀧𑀓𑀸 𑀘 𑀲𑀸𑀫𑀺𑀓𑀸 𑀏𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁮𑁩𑁦) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁮𑁩𑁦) 𑀧𑀦 ‘‘𑀅𑀝𑁆𑀞𑀫𑁂 𑀯𑀴𑀜𑁆𑀚𑀺𑀬𑀫𑀸𑀦𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀢𑀸, 𑀅𑀦𑀧𑀮𑁄𑀓𑁂𑀢𑁆𑀯𑀸 𑀉𑀘𑁆𑀘𑀸𑀭𑀸𑀤𑀻𑀦𑀁 𑀙𑀟𑁆𑀟𑀦𑀸𑀤𑀻𑀢𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀦𑀯𑀫𑁂 ‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀦𑀸𑀴𑀺𑀓𑁂𑀭𑀫𑁆𑀧𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑀭𑀺𑀢𑀽𑀧𑀭𑀺 𑀙𑀟𑁆𑀟𑀦𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑁂𑀦𑀸𑀳 ‘𑀅𑀦𑀺𑀓𑁆𑀔𑀺𑀢𑁆𑀢𑀩𑀻𑀚𑁂𑀲𑀽’𑀢𑀺𑀆𑀤𑀺. 𑀬𑀢𑁆𑀣 𑀘 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀢𑁆𑀣 𑀳𑀭𑀺𑀢𑁂 𑀯𑀘𑁆𑀘𑀸𑀤𑀺𑀁 𑀓𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯. 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁮𑁩𑁨) 𑀧𑀦 ‘‘𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸𑀯 𑀙𑀟𑁆𑀟𑁂𑀢𑀻𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺, 𑀓𑀢𑁆𑀣𑀘𑀺 𑀅𑀢𑁆𑀣𑀺, 𑀅𑀢𑁆𑀣𑀺𑀪𑀸𑀯𑁄𑀯 𑀲𑁂𑀬𑁆𑀬𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀇𑀥 𑀔𑁂𑀢𑁆𑀢𑀧𑀸𑀮𑀓𑀸 𑀆𑀭𑀸𑀫𑀸𑀤𑀺𑀕𑁄𑀧𑀓𑀸 𑀘 𑀲𑀸𑀫𑀺𑀓𑀸 𑀏𑀯. ‘𑀲𑀗𑁆𑀖𑀲𑁆𑀲 𑀔𑁂𑀢𑁆𑀢𑁂 𑀆𑀭𑀸𑀫𑁂 𑀘 𑀢𑀢𑁆𑀣 𑀓𑀘𑀯𑀭𑀁 𑀦 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀓𑀢𑀺𑀓𑀸 𑀘𑁂 𑀦𑀢𑁆𑀣𑀺, 𑀪𑀺𑀓𑁆𑀔𑀼𑀲𑁆𑀲 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀪𑀺𑀓𑁆𑀔𑀼𑀦𑀻𑀦𑀁. 𑀢𑀸𑀲𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑀦𑁆𑀢𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀝𑁆𑀝𑀢𑀺, 𑀦 𑀢𑀢𑁆𑀣 𑀪𑀺𑀓𑁆𑀔𑀼𑀲𑁆𑀲. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸𑀭𑀼𑀧𑁆𑀧𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀧𑀦 𑀲𑁂𑀔𑀺𑀬𑀯𑀡𑁆𑀡𑀦𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁫𑁧) ‘‘𑀅𑀲𑀜𑁆𑀘𑀺𑀘𑁆𑀘𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀳𑀲𑀸 𑀉𑀘𑁆𑀘𑀸𑀭𑁄 𑀯𑀸 𑀧𑀲𑁆𑀲𑀸𑀯𑁄 𑀯𑀸 𑀦𑀺𑀓𑁆𑀔𑀫𑀢𑀺, 𑀅𑀲𑀜𑁆𑀘𑀺𑀘𑁆𑀘𑀓𑀢𑁄 𑀦𑀸𑀫, 𑀅𑀦𑀸𑀧𑀢𑁆𑀢𑀺. 𑀦 𑀳𑀭𑀺𑀢𑁂𑀢𑀺 𑀏𑀢𑁆𑀣 𑀬𑀫𑁆𑀧𑀺 𑀚𑀻𑀯𑀭𑀼𑀓𑁆𑀔𑀲𑁆𑀲 𑀫𑀽𑀮𑀁 𑀧𑀣𑀯𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀸𑀔𑀸 𑀯𑀸 𑀪𑀽𑀫𑀺𑀮𑀕𑁆𑀕𑀸 𑀕𑀘𑁆𑀙𑀢𑀺, 𑀲𑀩𑁆𑀩𑀁 𑀳𑀭𑀺𑀢𑀲𑀗𑁆𑀔𑀸𑀢𑀫𑁂𑀯, 𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑁂 𑀧𑀸𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀲𑀳𑀲𑀸 𑀦𑀺𑀓𑁆𑀔𑀫𑀢𑀺, 𑀕𑀺𑀮𑀸𑀦𑀝𑁆𑀞𑀸𑀦𑁂 𑀞𑀺𑀢𑁄 𑀳𑁄𑀢𑀺, 𑀯𑀝𑁆𑀝𑀢𑀺. 𑀅𑀧𑁆𑀧𑀳𑀭𑀺𑀢𑁂 𑀓𑀢𑁄𑀢𑀺 𑀅𑀧𑁆𑀧𑀳𑀭𑀺𑀢𑀁 𑀅𑀮𑀪𑀦𑁆𑀢𑁂𑀦 𑀢𑀺𑀡𑀡𑁆𑀟𑀼𑀧𑀓𑀁 𑀯𑀸 𑀧𑀮𑀸𑀮𑀡𑁆𑀟𑀼𑀧𑀓𑀁 𑀯𑀸 𑀞𑀧𑁂𑀢𑁆𑀯𑀸 𑀓𑀢𑁄𑀧𑀺 𑀧𑀘𑁆𑀙𑀸 𑀳𑀭𑀺𑀢𑀁 𑀑𑀢𑁆𑀣𑀭𑀢𑀺, 𑀯𑀝𑁆𑀝𑀢𑀺𑀬𑁂𑀯. ‘𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀦 𑀉𑀤𑀓𑁂𑀢𑀺 𑀏𑀢𑀁 𑀧𑀭𑀺𑀪𑁄𑀕𑀉𑀤𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀘𑁆𑀘𑀓𑀼𑀝𑀺𑀲𑀫𑀉𑀤𑁆𑀤𑀸𑀤𑀺𑀉𑀤𑀓𑁂𑀲𑀼 𑀧𑀦 𑀅𑀧𑀭𑀺𑀪𑁄𑀕𑁂𑀲𑀼 𑀅𑀦𑀸𑀧𑀢𑁆𑀢𑀺. 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀫𑀦𑁆𑀢𑀢𑁄 𑀉𑀤𑀓𑁄𑀖𑁄 𑀳𑁄𑀢𑀺, 𑀅𑀦𑀼𑀤𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀺𑀓𑁆𑀔𑀫𑀢𑀺, 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁 𑀏𑀢𑀸𑀤𑀺𑀲𑁂 𑀓𑀸𑀮𑁂 𑀅𑀦𑀼𑀤𑀓𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀁 𑀯𑀡𑁆𑀡𑀦𑀸𑀬𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁬𑁫𑁨) ‘‘𑀔𑁂𑀴𑁂𑀦 𑀘𑁂𑀢𑁆𑀣 𑀲𑀺𑀗𑁆𑀖𑀸𑀡𑀺𑀓𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀏𑀢𑁆𑀣 𑀉𑀤𑀓𑀕𑀡𑁆𑀟𑀼𑀲𑀓𑀁 𑀓𑀢𑁆𑀯𑀸 𑀉𑀘𑁆𑀙𑀼𑀓𑀘𑀯𑀭𑀸𑀤𑀺𑀜𑁆𑀘 𑀫𑀼𑀔𑁂𑀦𑁂𑀯 𑀳𑀭𑀺𑀢𑀼𑀁 𑀉𑀤𑀓𑁂𑀲𑀼 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀡𑁆𑀟𑀺𑀢𑁂𑀳𑀺 𑀯𑀺𑀘𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀺 𑁋 ‘‘𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀼 𑀧𑀦 𑀅𑀧𑀭𑀺𑀪𑁄𑀕𑁂𑀲𑀼 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀏𑀯𑀁 𑀲𑀦𑁆𑀢𑁂 𑀦𑀤𑀻𑀚𑀸𑀢𑀲𑁆𑀲𑀭𑀸𑀤𑀻𑀲𑀼 𑀆𑀧𑀢𑁆𑀢𑀺 𑀯𑀸 𑀅𑀦𑀸𑀧𑀢𑁆𑀢𑀺 𑀯𑀸𑀢𑀺. 𑀢𑀢𑁆𑀣 𑀲𑀫𑀼𑀤𑁆𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀤𑀻𑀚𑀸𑀢𑀲𑁆𑀲𑀭𑀸𑀧𑀺 𑀲𑀗𑁆𑀕𑀳𑀺𑀢𑀸𑀯, 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂? 𑀦 𑀘𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀲𑀫𑀼𑀤𑁆𑀤𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀤𑀻𑀚𑀸𑀢𑀲𑁆𑀲𑀭𑀸𑀧𑀺 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀲𑀢𑀺 𑀝𑀻𑀓𑀸𑀘𑀭𑀺𑀬𑀸 𑀯𑀤𑁂𑀬𑁆𑀬𑀼𑀁, 𑀦 𑀧𑀦 𑀯𑀤𑀦𑁆𑀢𑀺, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀽’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀤𑁂𑀬𑁆𑀬, 𑀢𑀣𑀸 𑀧𑀦 𑀅𑀯𑀢𑁆𑀯𑀸 ‘‘𑀅𑀧𑀭𑀺𑀪𑁄𑀕𑁂𑀲𑀽’’𑀢𑀺 𑀳𑁂𑀢𑀼𑀫𑀦𑁆𑀢𑀯𑀺𑀲𑁂𑀲𑀦𑀧𑀤𑀫𑁆𑀧𑀺 𑀕𑀳𑀺𑀢𑀁. 𑀢𑁂𑀦 𑀜𑀸𑀬𑀢𑀺 ‘‘𑀆𑀤𑀺𑀲𑀤𑁆𑀤𑁂𑀦 𑀅𑀧𑀭𑀺𑀪𑁄𑀕𑀸𑀦𑀺 𑀘𑀦𑁆𑀤𑀦𑀺𑀓𑀸𑀤𑀺𑀉𑀤𑀓𑀸𑀦𑀺 𑀏𑀯 𑀕𑀳𑀺𑀢𑀸𑀦𑀺, 𑀦 𑀧𑀭𑀺𑀪𑁄𑀕𑀸𑀦𑀺 𑀦𑀤𑀻𑀚𑀸𑀢𑀲𑁆𑀲𑀭𑀸𑀤𑀺𑀉𑀤𑀓𑀸𑀦𑀻’’𑀢𑀺. 𑀢𑁂𑀦 𑀘 𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑀸𑀦𑀺 𑀅𑀧𑀭𑀺𑀪𑁄𑀕𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀓𑀭𑀸𑀦𑀺 𑀳𑁄𑀦𑁆𑀢𑀺, 𑀦𑀤𑀻𑀚𑀸𑀢𑀲𑁆𑀲𑀭𑀸𑀤𑀺𑀉𑀤𑀓𑀸𑀦𑀺 𑀧𑀦 𑀧𑀭𑀺𑀪𑁄𑀕𑀢𑁆𑀢𑀸 𑀆𑀧𑀢𑁆𑀢𑀺𑀓𑀭𑀸𑀦𑀻𑀢𑀺. 𑀓𑀣𑀁 𑀧𑀦 ‘‘𑀅𑀧𑀭𑀺𑀪𑁄𑀕𑁂𑀲𑀽’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀳𑁂𑀢𑀼𑀫𑀦𑁆𑀢𑀧𑀤𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀬𑀼𑀢𑁆𑀢𑀺𑀢𑁄 𑀆𑀕𑀫𑀢𑁄 𑀘. 𑀓𑀣𑀁 𑀬𑀼𑀢𑁆𑀢𑀺𑀢𑁄? ‘‘𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑀸𑀦𑀺 𑀧𑀭𑀺𑀪𑁄𑀕𑀸𑀦𑀺𑀧𑀺 𑀲𑀦𑁆𑀢𑀺, 𑀅𑀧𑀭𑀺𑀪𑁄𑀕𑀸𑀦𑀺𑀧𑀻’’𑀢𑀺 𑀅𑀩𑁆𑀬𑀪𑀺𑀘𑀸𑀭𑀺𑀬𑀪𑀸𑀯𑀢𑁄. 𑀩𑁆𑀬𑀪𑀺𑀘𑀸𑀭𑁂 𑀳𑀺 𑀲𑀫𑁆𑀪𑀯𑁂 𑀏𑀯 𑀲𑀢𑀺 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸. 𑀓𑀣𑀁 𑀆𑀕𑀫𑀢𑁄? 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 (𑀯𑀺. 𑀯𑀺. 𑁧𑁯𑁫𑁪) ‘‘𑀢𑁂𑀲𑀁 𑀅𑀧𑀭𑀺𑀪𑁄𑀕𑀢𑁆𑀢𑀸’’𑀢𑀺. 𑀢𑀲𑁆𑀫𑀸 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀭𑀺𑀪𑁄𑀕𑀸𑀦𑀺𑀬𑁂𑀯 𑀉𑀤𑀓𑀸𑀦𑀺 𑀕𑀳𑀺𑀢𑀸𑀦𑀺, 𑀦 𑀧𑀭𑀺𑀪𑁄𑀕𑀸𑀦𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀬𑀁 ‘‘𑀯𑀘𑁆𑀘𑀓𑀼𑀝𑀺𑀲𑀫𑀼𑀤𑁆𑀤𑀸𑀤𑀺𑀉𑀤𑀓𑁂𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀩𑁆𑀩𑀁 𑀅𑀧𑀭𑀺𑀪𑁄𑀕𑀚𑀮𑀁 𑀲𑀗𑁆𑀕𑀬𑁆𑀳𑀢𑀺, 𑀢𑁂𑀦𑁂𑀯 𑀢𑁂𑀲𑀁 𑀅𑀧𑀭𑀺𑀪𑁄𑀕𑀢𑁆𑀢𑀫𑁂𑀯 𑀓𑀸𑀭𑀡𑀫𑀸𑀳𑀸’’𑀢𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀪𑁄𑀕𑁂𑀲𑀼 𑀦𑀤𑀻𑀚𑀸𑀢𑀲𑁆𑀲𑀭𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀬𑀸𑀤𑀺𑀉𑀤𑀓𑁂𑀲𑀼 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀓𑀭𑀡𑀁 𑀦 𑀯𑀝𑁆𑀝𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀢𑀁. ‘‘𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀲𑀫𑀦𑁆𑀢𑀢𑁄 𑀉𑀤𑀓𑁄𑀖𑁄 𑀳𑁄𑀢𑀺, 𑀅𑀦𑀼𑀤𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀺𑀓𑁆𑀔𑀫𑀢𑀺, 𑀯𑀝𑁆𑀝𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁 𑀏𑀢𑀸𑀤𑀺𑀲𑁂 𑀓𑀸𑀮𑁂 𑀅𑀦𑀼𑀤𑀓𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁂𑀦 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀢𑁆𑀢𑀸 𑀫𑀳𑀦𑁆𑀢𑁂𑀲𑀼 𑀦𑀤𑀻𑀚𑀸𑀢𑀲𑁆𑀲𑀭𑀸𑀤𑀻𑀲𑀼 𑀦𑀸𑀯𑀸𑀤𑀻𑀳𑀺 𑀕𑀢𑀓𑀸𑀮𑁂 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 ‘‘𑀢𑀻𑀭𑀁 𑀉𑀧𑀦𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀉𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑁂 𑀉𑀤𑀓𑁂𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀦𑀼𑀮𑁄𑀫𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀦𑀳𑀸𑀦𑁂𑀭𑀼𑀓𑁆𑀔𑀸𑀤𑀺𑀖𑀁𑀲𑀦𑀓𑀣𑀸

𑁨𑁧. 𑀦𑀳𑀸𑀦𑁂 𑀭𑀼𑀓𑁆𑀔𑀸𑀤𑀺𑀖𑀁𑀲𑀦𑀦𑁆𑀢𑀺 𑀏𑀢𑁆𑀣 𑀅𑀝𑁆𑀞𑀧𑀤𑀸𑀓𑀸𑀭𑁂𑀦𑀸𑀢𑀺 𑀅𑀝𑁆𑀞𑀧𑀤𑀨𑀮𑀓𑀸𑀓𑀸𑀭𑁂𑀦, 𑀚𑀽𑀢𑀨𑀮𑀓𑀲𑀤𑀺𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀮𑁆𑀮𑀓𑀫𑀽𑀮𑀓𑀲𑀡𑁆𑀞𑀸𑀦𑁂𑀦𑀸𑀢𑀺 𑀔𑁂𑀴𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁪𑁩) 𑀧𑀦 ‘‘𑀅𑀝𑁆𑀞𑀧𑀤𑀸𑀓𑀸𑀭𑁂𑀦𑀸𑀢𑀺 𑀚𑀽𑀢𑀨𑀮𑀓𑁂 𑀅𑀝𑁆𑀞𑀕𑀩𑁆𑀪𑀭𑀸𑀚𑀺𑀆𑀓𑀸𑀭𑁂𑀦. 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦𑀸𑀢𑀺 𑀔𑁂𑀴𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦. 𑀇𑀤𑀜𑁆𑀘 𑀯𑀝𑁆𑀝𑀸𑀥𑀸𑀭𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀡𑁆𑀝𑀓𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀯𑀝𑁆𑀝𑀓𑀧𑀸𑀮𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀣𑀼𑀧𑀸𑀡𑀺𑀓𑀦𑁆𑀢𑀺 𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀯𑀺𑀓𑀲𑀺𑀢𑀳𑀢𑁆𑀣𑀢𑀮𑁂𑀳𑀺 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀏𑀢𑀫𑁂𑀯 𑀲𑀦𑁆𑀥𑀸𑀬 𑀳𑀢𑁆𑀣𑀧𑀭𑀺𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁨𑁪𑁪) 𑀧𑀦 ‘‘𑀧𑀼𑀣𑀼𑀧𑀸𑀡𑀺𑀦𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀧𑀼𑀣𑀼𑀧𑀸𑀡𑀺𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦𑁂𑀯 𑀦𑀳𑀸𑀦𑁂 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀳𑀸𑀦𑀢𑀺𑀢𑁆𑀣𑁂 𑀦𑀳𑀸𑀬𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀳𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀁 𑀧𑀦𑁂𑀢𑁆𑀣 𑀦𑀳𑀸𑀦𑀯𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀲𑁆𑀲𑀦𑁆𑀢𑀸𑀦𑀁 𑀅𑀧𑁆𑀧𑀲𑀸𑀤𑀸𑀯𑀳𑀦𑀢𑁄, 𑀕𑀺𑀳𑀺𑀧𑀼𑀭𑀺𑀲𑀸𑀦𑀁 𑀓𑀫𑁆𑀫𑀁 𑀯𑀺𑀬𑀸𑀢𑀺 𑀕𑀭𑀳𑀺𑀢𑀩𑁆𑀩𑀪𑀸𑀯𑀢𑁄 𑀘 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸…𑀧𑁂… 𑀦 𑀑𑀢𑀭𑀺𑀢𑀩𑁆𑀩’’𑀦𑁆𑀢𑀺. 𑀅𑀜𑁆𑀜𑁂𑀲𑀼 𑀲𑀫𑁆𑀫𑀼𑀔𑀻𑀪𑀽𑀢𑁂𑀲𑀼 𑀅𑀦𑀼𑀤𑀓𑀲𑀸𑀝𑀓𑁂𑀦 𑀦𑀳𑀸𑀬𑀺𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸 ‘‘𑀲𑀩𑁆𑀩𑀤𑀺𑀲𑀸 𑀧𑀦 𑀑𑀮𑁄𑀓𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀔𑀸𑀡𑀼𑀕𑀼𑀫𑁆𑀩𑀮𑀢𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀸𑀧𑀺 𑀳𑀼𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬𑀼𑀦𑁆𑀢𑀺 𑀆𑀳 ‘‘𑀔𑀸𑀡𑀼…𑀧𑁂… 𑀉𑀓𑁆𑀓𑀸𑀲𑀺𑀢𑁆𑀯𑀸’’𑀢𑀺. 𑀉𑀤𑁆𑀥𑀁𑀫𑀼𑀔𑁂𑀦 𑀘𑀻𑀯𑀭𑀸𑀧𑀦𑀬𑀦𑀁 𑀳𑀭𑀸𑀬𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀓𑀼𑀚𑁆𑀚…𑀧𑁂… 𑀅𑀧𑀦𑁂𑀢𑁆𑀯𑀸’’𑀢𑀺. 𑀢𑀢𑁄 𑀓𑀸𑀬𑀩𑀦𑁆𑀥𑀦𑀝𑁆𑀞𑀧𑀦𑀯𑀢𑁆𑀢𑀫𑀸𑀳 ‘‘𑀓𑀸𑀬𑀩𑀦𑁆𑀥𑀦’’𑀦𑁆𑀢𑁆𑀬𑀸𑀤𑀺𑀦𑀸. 𑀢𑀢𑁄 𑀉𑀤𑀓𑀲𑀸𑀝𑀺𑀓𑀸𑀬 𑀲𑀢𑀺 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀑𑀢𑀭𑀺𑀢𑀩𑁆𑀩𑀁 𑀲𑀺𑀬𑀸, 𑀢𑀸𑀬 𑀅𑀲𑀢𑀺𑀬𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀩𑁆𑀩𑁂 ‘‘𑀞𑀺𑀢𑀓𑁂𑀦𑁂𑀯 𑀦 𑀑𑀢𑀭𑀺𑀢𑀩𑁆𑀩’’𑀦𑁆𑀢𑀺 𑀅𑀳𑀺𑀭𑀺𑀓𑀸𑀓𑀸𑀭𑀲𑁆𑀲 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀇𑀥 𑀳𑀺𑀭𑀺𑀫𑀦𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀺 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀫𑁄𑀘𑁂𑀢𑁆𑀯𑀸𑀢𑀺. 𑀉𑀡𑁆𑀡𑀝𑁆𑀞𑀸𑀦𑁂, 𑀲𑀫𑀝𑁆𑀞𑀸𑀦𑁂 𑀯𑀸 𑀧𑀲𑀸𑀭𑀺𑀢𑁂 𑀲𑀢𑀺 𑀯𑀸 𑀢𑁂𑀦 𑀅𑀜𑁆𑀜𑀢𑁆𑀣 𑀕𑀘𑁆𑀙𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀘𑁂 𑀦𑀺𑀦𑁆𑀦𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺.

𑀑𑀢𑀭𑀦𑁆𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀁 𑀲𑀦𑁆𑀥𑀸𑀬 ‘‘𑀑𑀢𑀭𑀦𑁆𑀢𑁂𑀦 𑀲𑀡𑀺𑀓’’𑀦𑁆𑀢𑁆𑀬𑀸𑀤𑀺. 𑀢𑀢𑁆𑀣 𑀧𑀼𑀩𑁆𑀩𑁂 ‘‘𑀯𑁂𑀕𑁂𑀦 𑀦 𑀑𑀢𑀭𑀺𑀢𑀩𑁆𑀩’’𑀦𑁆𑀢𑀺 𑀧𑀝𑀺𑀲𑀺𑀤𑁆𑀥𑀸𑀦𑀼𑀭𑀽𑀧𑀫𑀸𑀳 ‘‘𑀲𑀡𑀺𑀓’’𑀦𑁆𑀢𑀺. 𑀅𑀢𑀺𑀕𑀫𑁆𑀪𑀻𑀭𑀁 𑀕𑀘𑁆𑀙𑀦𑁆𑀢𑁄 𑀉𑀤𑀓𑁄𑀖𑀢𑀭𑀗𑁆𑀕𑀯𑀸𑀢𑀸𑀤𑀻𑀳𑀺 𑀧𑀳𑀭𑀦𑁆𑀢𑁄 𑀘𑀮𑀺𑀢𑀓𑀸𑀬𑁄 𑀲𑀺𑀬𑀸, 𑀅𑀢𑀺𑀉𑀢𑁆𑀢𑀸𑀦𑁂 𑀦𑀺𑀲𑀻𑀤𑀦𑁆𑀢𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀓𑀸𑀬𑁄 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀸𑀪𑀺𑀧𑁆𑀧𑀫𑀸𑀡𑀫𑀢𑁆𑀢𑀁 𑀑𑀢𑀭𑀺𑀢𑁆𑀯𑀸’’𑀢𑀺. 𑀅𑀢𑁆𑀢𑀦𑁄 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀯𑀻𑀘𑀺𑀁 𑀉𑀝𑁆𑀞𑀸𑀧𑁂𑀦𑁆𑀢𑁄, 𑀲𑀤𑁆𑀤𑀜𑁆𑀘 𑀓𑀭𑁄𑀦𑁆𑀢𑁄 𑀉𑀤𑁆𑀥𑀝𑀘𑀧𑀮𑀪𑀸𑀯𑁄 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀘𑀺𑀁 𑀅𑀦𑀼𑀝𑁆𑀞𑀧𑁂𑀦𑁆𑀢𑁂𑀦 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸’’𑀢𑀺. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 𑀆𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀦𑀺𑀫𑀼𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺, 𑀅𑀪𑀺𑀫𑀼𑀔𑁂𑀦 𑀳𑀼𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. 𑀇𑀤𑀸𑀦𑀺 𑀢𑀧𑁆𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑁂𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸𑀬𑀫𑀸𑀳 ‘‘𑀉𑀫𑁆𑀫𑀼𑀚𑁆𑀚𑀦𑁆𑀢𑁂𑀦𑀧𑀻’’𑀢𑀺𑀆𑀤𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸𑀯 𑀞𑀸𑀢𑀩𑁆𑀩𑀁, 𑀓𑀲𑁆𑀫𑀸𑀢𑀺 𑀘𑁂? 𑀦 𑀢𑀸𑀯 𑀓𑀸𑀬𑀢𑁄 𑀉𑀤𑀓𑀁 𑀑𑀢𑀭𑀢𑀺, 𑀢𑀲𑁆𑀫𑀸 𑀣𑁄𑀓𑀁 𑀓𑀸𑀮𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀘𑀻𑀯𑀭𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀅𑀦𑁆𑀢𑁂 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀞𑀸𑀢𑀩𑁆𑀩𑀁. 𑀢𑀢𑁄 𑀓𑀸𑀬𑀲𑁆𑀲 𑀲𑀼𑀓𑁆𑀔𑀪𑀸𑀯𑀁 𑀜𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀯𑀮𑀺𑀓𑀸𑀤𑀺𑀓𑀣𑀸

𑁨𑁨. 𑀯𑀮𑀺𑀓𑀸𑀤𑀺𑀓𑀣𑀸𑀬𑀁 ‘‘𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀡𑁆𑀟𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑀫𑁆𑀩𑀓𑀲𑀼𑀢𑁆𑀢𑀦𑁆𑀢𑀺 𑀬𑀜𑁆𑀜𑁄𑀧𑀘𑀺𑀢𑀸𑀓𑀸𑀭𑁂𑀦 𑀑𑀮𑀫𑁆𑀩𑀓𑀲𑀼𑀢𑁆𑀢’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁪𑁫). 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁪𑁫) 𑀧𑀦 ‘‘𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀼𑀡𑁆𑀟𑀮𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑀫𑁆𑀩𑀓𑀲𑀼𑀢𑁆𑀢𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀜𑁆𑀜𑁄𑀧𑀘𑀺𑀢𑀲𑀼𑀢𑁆𑀢𑀸𑀤𑀺𑀆𑀓𑀸𑀭𑀁 𑀯𑀼𑀘𑁆𑀘𑀢𑀺. 𑀯𑀮𑀬𑀦𑁆𑀢𑀺 𑀳𑀢𑁆𑀣𑀧𑀸𑀤𑀯𑀮𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁨𑁪𑁫) 𑀧𑀦 ‘‘𑀓𑀡𑁆𑀡𑀢𑁄 𑀦𑀺𑀓𑁆𑀔𑀦𑁆𑀢𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀁 𑀓𑀼𑀡𑁆𑀟𑀮𑀸𑀤𑀻𑀦𑀦𑁆𑀢𑀺 𑀮𑀺𑀔𑀺𑀢𑀁. ‘𑀓𑀸𑀬𑀽𑀭’𑀦𑁆𑀢𑀺 𑀧𑀸𑀴𑀺𑀧𑀸𑀞𑁄. ‘𑀓𑁂𑀬𑀽𑀭𑀸𑀤𑀻𑀦𑀻’𑀢𑀺 𑀆𑀘𑀭𑀺𑀬𑁂𑀦𑀼𑀤𑁆𑀥𑀝’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀻𑀖𑀓𑁂𑀲𑀓𑀣𑀸

𑁨𑁩. 𑀤𑀻𑀖𑀓𑁂𑀲𑀓𑀣𑀸𑀬𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁪𑁬) 𑀧𑀦 ‘‘𑀤𑁆𑀯𑀗𑁆𑀕𑀼𑀮𑁂𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁, 𑀤𑁆𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀅𑀢𑀺𑀓𑁆𑀓𑀸𑀫𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀤𑀼𑀫𑀸𑀲𑀲𑁆𑀲 𑀯𑀸 𑀤𑁆𑀯𑀗𑁆𑀕𑀼𑀮𑀲𑁆𑀲 𑀯𑀸 𑀅𑀢𑀺𑀓𑁆𑀓𑀦𑁆𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀓𑁂𑀲𑀫𑀲𑁆𑀲𑀼𑀕𑀡𑀦𑀸𑀬 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁄𑀘𑁆𑀙𑁂𑀦𑀸𑀢𑀺 𑀉𑀲𑀻𑀭𑀳𑀻𑀭𑀸𑀤𑀻𑀦𑀺 𑀩𑀦𑁆𑀥𑀺𑀢𑁆𑀯𑀸 𑀲𑀫𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀓𑁄𑀘𑁆𑀙𑁂𑀦. 𑀘𑀺𑀓𑁆𑀓𑀮𑁂𑀦𑀸𑀢𑀺 𑀲𑀺𑀮𑁂𑀲𑀬𑀼𑀢𑁆𑀢𑀢𑁂𑀮𑁂𑀦. 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑀲𑀺𑀭𑀸𑀦𑀫𑁆𑀧𑀻𑀢𑀺 𑀉𑀡𑁆𑀳𑀸𑀪𑀺𑀢𑀢𑁆𑀢𑀸𑀦𑀁 𑀭𑀚𑁄𑀓𑀺𑀡𑁆𑀡𑀲𑀺𑀭𑀸𑀦𑀁. 𑀅𑀤𑁆𑀤𑀳𑀢𑁆𑀣𑁂𑀦𑀸𑀢𑀺 𑀅𑀮𑁆𑀮𑀳𑀢𑁆𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀉𑀧𑀭𑀺 𑀧𑀦 𑀧𑀸𑀴𑀺𑀬𑀁 (𑀘𑀽𑀴𑀯. 𑁨𑁭𑁫) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀲𑁆𑀲𑀼𑀁 𑀓𑀧𑁆𑀧𑀸𑀧𑁂𑀦𑁆𑀢𑀺. 𑀫𑀲𑁆𑀲𑀼𑀁 𑀯𑀟𑁆𑀠𑀸𑀧𑁂𑀦𑁆𑀢𑀺. 𑀕𑁄𑀮𑁄𑀫𑀺𑀓𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀘𑀢𑀼𑀭𑀲𑁆𑀲𑀓𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀧𑀭𑀺𑀫𑀼𑀔𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀅𑀟𑁆𑀠𑀤𑀼𑀓𑀁 𑀓𑀸𑀭𑀸𑀧𑁂𑀦𑁆𑀢𑀺. 𑀤𑀸𑀞𑀺𑀓𑀁 𑀞𑀧𑁂𑀦𑁆𑀢𑀺. 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀻𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀦, 𑀪𑀺𑀓𑁆𑀔𑀯𑁂, 𑀫𑀲𑁆𑀲𑀼 𑀓𑀧𑁆𑀧𑀸𑀧𑁂𑀢𑀩𑁆𑀩𑀁. 𑀦 𑀫𑀲𑁆𑀲𑀼 𑀯𑀟𑁆𑀠𑀸𑀧𑁂𑀢𑀩𑁆𑀩𑀁. 𑀦 𑀕𑁄𑀮𑁄𑀫𑀺𑀓𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀦 𑀘𑀢𑀼𑀭𑀲𑁆𑀲𑀓𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀦 𑀧𑀭𑀺𑀫𑀼𑀔𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀦 𑀅𑀟𑁆𑀠𑀤𑀼𑀓𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀦 𑀤𑀸𑀞𑀺𑀓𑀸 𑀞𑀧𑁂𑀢𑀩𑁆𑀩𑀸. 𑀦 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀩𑁆𑀩𑀁, 𑀬𑁄 𑀲𑀁𑀳𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀆𑀕𑀢𑀁. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀘𑀽𑀴𑀯. 𑀅𑀝𑁆𑀞. 𑁨𑁭𑁫) ‘‘𑀫𑀲𑁆𑀲𑀼𑀁 𑀓𑀧𑁆𑀧𑀸𑀧𑁂𑀦𑁆𑀢𑀻𑀢𑀺 𑀓𑀢𑁆𑀢𑀭𑀺𑀬𑀸 𑀫𑀲𑁆𑀲𑀼𑀁 𑀙𑁂𑀤𑀸𑀧𑁂𑀦𑁆𑀢𑀺. 𑀫𑀲𑁆𑀲𑀼𑀁 𑀯𑀟𑁆𑀠𑀸𑀧𑁂𑀦𑁆𑀢𑀻𑀢𑀺 𑀫𑀲𑁆𑀲𑀼𑀁 𑀤𑀻𑀖𑀁 𑀓𑀸𑀭𑁂𑀦𑁆𑀢𑀺. 𑀕𑁄𑀮𑁄𑀫𑀺𑀓𑀦𑁆𑀢𑀺 𑀳𑀦𑀼𑀓𑀫𑁆𑀳𑀺 𑀤𑀻𑀖𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀏𑀴𑀓𑀫𑀲𑁆𑀲𑀼 𑀯𑀼𑀘𑁆𑀘𑀢𑀺. 𑀘𑀢𑀼𑀭𑀲𑁆𑀲𑀓𑀦𑁆𑀢𑀺 𑀘𑀢𑀼𑀓𑁄𑀡𑀁. 𑀧𑀭𑀺𑀫𑀼𑀔𑀦𑁆𑀢𑀺 𑀉𑀤𑀭𑁂 𑀮𑁄𑀫𑀲𑀁𑀳𑀭𑀡𑀁. 𑀅𑀟𑁆𑀠𑀤𑀼𑀓𑀦𑁆𑀢𑀺 𑀉𑀤𑀭𑁂 𑀮𑁄𑀫𑀭𑀸𑀚𑀺𑀝𑁆𑀞𑀧𑀦𑀁. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀫𑀲𑁆𑀲𑀼𑀓𑀧𑁆𑀧𑀸𑀧𑀦𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀧𑀼𑀦 𑀧𑀸𑀴𑀺𑀬𑀁 (𑀘𑀽𑀴𑀯. 𑁨𑁭𑁫) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀓𑁆𑀔𑀭𑀺𑀓𑀸𑀬𑀧𑀺 𑀫𑀥𑀼𑀲𑀺𑀢𑁆𑀣𑀓𑁂𑀦𑀧𑀺 𑀦𑀸𑀲𑀺𑀓𑀸𑀮𑁄𑀫𑀁 𑀕𑀸𑀳𑀸𑀧𑁂𑀦𑁆𑀢𑀺, 𑀦𑀸𑀲𑀺𑀓𑀸 𑀤𑀼𑀓𑁆𑀔𑀸 𑀳𑁄𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀡𑁆𑀟𑀸𑀲𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀮𑀺𑀢𑀁 𑀕𑀸𑀳𑀸𑀧𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀻𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ‘𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀦, 𑀪𑀺𑀓𑁆𑀔𑀯𑁂, 𑀧𑀮𑀺𑀢𑀁 𑀕𑀸𑀳𑀸𑀧𑁂𑀢𑀩𑁆𑀩𑀁, 𑀬𑁄 𑀕𑀸𑀳𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀆𑀕𑀢𑀁. ‘‘𑀲𑀓𑁆𑀔𑀭𑀸𑀤𑀻𑀳𑀺 𑀦𑀸𑀲𑀺𑀓𑀸𑀮𑁄𑀫𑀕𑁆𑀕𑀸𑀳𑀸𑀧𑀦𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀦 𑀲𑀡𑁆𑀟𑀸𑀲𑁄 𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀦, 𑀪𑀺𑀓𑁆𑀔𑀯𑁂, 𑀧𑀮𑀺𑀢𑀁 𑀕𑀸𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀪𑀫𑀼𑀓𑀸𑀬 𑀯𑀸 𑀦𑀮𑀸𑀝𑁂 𑀯𑀸 𑀤𑀸𑀞𑀺𑀓𑀸𑀬 𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀩𑀻𑀪𑀘𑁆𑀙𑀁 𑀞𑀺𑀢𑀁, 𑀢𑀸𑀤𑀺𑀲𑀁 𑀮𑁄𑀫𑀁 𑀧𑀮𑀺𑀢𑀁 𑀯𑀸 𑀅𑀧𑀮𑀺𑀢𑀁 𑀯𑀸 𑀕𑀸𑀳𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘 𑀯𑀼𑀢𑁆𑀢𑀁.

𑀆𑀤𑀸𑀲𑀸𑀤𑀺𑀓𑀣𑀸

𑁨𑁪. 𑀆𑀤𑀸𑀲𑀸𑀤𑀺𑀓𑀣𑀸𑀬𑀁 𑀆𑀤𑀸𑀲𑁄 𑀦𑀸𑀫 𑀫𑀡𑁆𑀟𑀦𑀧𑀓𑀢𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀢𑀦𑁄 𑀫𑀼𑀔𑀘𑁆𑀙𑀸𑀬𑀸𑀤𑀲𑁆𑀲𑀦𑀢𑁆𑀣𑀁 𑀓𑀁𑀲𑀮𑁄𑀳𑀸𑀤𑀻𑀳𑀺 𑀓𑀢𑁄 𑀪𑀡𑁆𑀟𑀯𑀺𑀲𑁂𑀲𑁄. 𑀉𑀤𑀓𑀧𑀢𑁆𑀢𑁄 𑀦𑀸𑀫 𑀉𑀤𑀓𑀝𑁆𑀞𑀧𑀦𑀓𑁄 𑀧𑀸𑀢𑀺𑀲𑀭𑀸𑀯𑀸𑀤𑀺𑀓𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀓𑀁𑀲𑀧𑀢𑁆𑀢𑀸𑀤𑀻𑀦𑀻𑀢𑀺 𑀆𑀤𑀸𑀲𑀪𑀸𑀯𑁂𑀦 𑀅𑀓𑀢𑀸𑀦𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀆𑀮𑁄𑀓𑀓𑀭𑀸𑀦𑀺 𑀯𑀢𑁆𑀣𑀽𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀯𑀡𑁆𑀡𑀭𑀚𑀢𑀚𑀸𑀢𑀺𑀨𑀮𑀺𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺, 𑀓𑀜𑁆𑀚𑀺𑀬𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀤𑁆𑀭𑀯𑀚𑀸𑀢𑀺𑀓𑀸𑀦𑀺 𑀢𑁂𑀮𑀫𑀥𑀼𑀔𑀻𑀭𑀸𑀤𑀻𑀦𑀺. 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀅𑀢𑁆𑀢𑀦𑁄 𑀫𑀼𑀔𑁂 𑀉𑀧𑁆𑀧𑀦𑁆𑀦𑀯𑀡𑀧𑀘𑁆𑀘𑀬𑀸. 𑀢𑁂𑀦𑀸𑀳 ‘‘𑀲𑀜𑁆𑀙𑀯𑀺 𑀦𑀼 𑀔𑁄 𑀫𑁂 𑀯𑀡𑁄’’𑀢𑀺𑀆𑀤𑀺. 𑀆𑀬𑀼𑀁 𑀲𑀗𑁆𑀔𑀭𑁄𑀢𑀻𑀢𑀺 𑀆𑀬𑀼𑀲𑀗𑁆𑀔𑀸𑀭𑁄. 𑀓𑁄 𑀲𑁄? 𑀅𑀢𑁆𑀢𑀪𑀸𑀯𑁄, 𑀢𑀁 𑀆𑀬𑀼𑀲𑀗𑁆𑀔𑀸𑀭𑀁, 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀓𑁂𑀦𑀸𑀓𑀸𑀭𑁂𑀦 𑀑𑀮𑁄𑀓𑁂𑀬𑁆𑀬𑀸𑀢𑀺 𑀧𑀼𑀘𑁆𑀙𑀸𑀬𑀫𑀸𑀳 ‘‘𑀚𑀺𑀡𑁆𑀡𑁄 𑀦𑀼 𑀔𑁄𑀫𑁆𑀳𑀺 𑀦𑁄𑀢𑀺 𑀏𑀯’’𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀫𑀫 𑀅𑀢𑁆𑀢𑀪𑀸𑀯𑁄 𑀚𑀺𑀡𑁆𑀡𑁄 𑀦𑀼 𑀔𑁄 𑀯𑀸, 𑀦𑁄 𑀚𑀺𑀡𑁆𑀡𑁄 𑀦𑀼 𑀔𑁄 𑀯𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀅𑀢𑁆𑀢𑀪𑀸𑀯𑁄, 𑀦𑁄 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀅𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀑𑀮𑁄𑀓𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺.