𑁨𑁯. 𑀓𑀣𑀺𑀦𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁨𑁬. 𑀏𑀯𑀁 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀓𑀣𑀺𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀫𑀸𑀳 ‘‘𑀓𑀣𑀺𑀦𑀦𑁆𑀢𑀺 𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀣𑀺𑀦𑀦𑁆𑀢𑀺 𑀓𑀢𑀫𑀁 𑀓𑀣𑀺𑀦𑀁? 𑀲𑀫𑀽𑀳𑀧𑀜𑁆𑀜𑀢𑁆𑀢𑀺. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀓𑀣𑀺𑀦𑀁 𑀦𑀸𑀫 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀺, 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸 𑀪𑀺𑀓𑁆𑀔𑀽, 𑀅𑀦𑀽𑀦𑀧𑀜𑁆𑀘𑀯𑀕𑁆𑀕𑀲𑀗𑁆𑀖𑁄, 𑀘𑀻𑀯𑀭𑀫𑀸𑀲𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀧𑁆𑀧𑀦𑁆𑀦𑀘𑀻𑀯𑀭𑀦𑁆𑀢𑀺𑀆𑀤𑀻𑀲𑀼 𑀬𑁂𑀲𑀼 𑀦𑀸𑀫𑀭𑀽𑀧𑁂𑀲𑀼 𑀲𑀫𑀼𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀢𑁂𑀲𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀽𑀳𑀲𑀫𑀯𑀸𑀬𑀲𑀗𑁆𑀔𑀸𑀢𑀁 𑀲𑀫𑀽𑀳𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯 𑀓𑀣𑀺𑀦𑀁. 𑀅𑀬𑀫𑀢𑁆𑀣𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? ‘‘𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀲𑀫𑀯𑀸𑀬𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄, 𑀬𑀤𑀺𑀤𑀁 𑀓𑀣𑀺𑀦’’𑀦𑁆𑀢𑀺 𑀧𑀭𑀺𑀯𑀸𑀭𑀧𑀸𑀴𑀺𑀬𑀁 (𑀧𑀭𑀺. 𑁪𑁧𑁨) 𑀆𑀕𑀢𑀢𑁆𑀢𑀸 𑀘, ‘‘𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀼 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀼 𑀲𑀢𑀺 𑀓𑀣𑀺𑀦𑀁 𑀦𑀸𑀫 𑀳𑁄𑀢𑀺, 𑀢𑁂𑀲𑀁 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄. 𑀦𑀸𑀫𑀁 𑀦𑀸𑀫𑀓𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀧𑀦 ‘𑀓𑀣𑀺𑀦’𑀦𑁆𑀢𑀺 𑀇𑀤𑀁 𑀩𑀳𑀽𑀲𑀼 𑀥𑀫𑁆𑀫𑁂𑀲𑀼 𑀦𑀸𑀫𑀫𑀢𑁆𑀢𑀁, 𑀦 𑀧𑀭𑀫𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁪𑁧𑁨) 𑀆𑀕𑀢𑀢𑁆𑀢𑀸 𑀘, ‘‘𑀬𑁂𑀲𑀼 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀽𑀢𑀺 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸 𑀪𑀺𑀓𑁆𑀔𑀽, 𑀧𑀜𑁆𑀘𑀳𑀺 𑀅𑀦𑀽𑀦𑁄 𑀲𑀗𑁆𑀖𑁄, 𑀘𑀻𑀯𑀭𑀫𑀸𑀲𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀲𑀫𑀼𑀧𑁆𑀧𑀦𑁆𑀦𑀁 𑀘𑀻𑀯𑀭𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀬𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼. 𑀲𑀢𑀻𑀢𑀺 𑀲𑀦𑁆𑀢𑁂𑀲𑀼. 𑀫𑀺𑀲𑁆𑀲𑀻𑀪𑀸𑀯𑁄𑀢𑀺 𑀲𑀁𑀲𑀕𑁆𑀕𑀢𑀸 𑀲𑀫𑀽𑀳𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. 𑀢𑁂𑀦𑀸𑀳 𑀦 𑀧𑀭𑀫𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀭𑀺𑀯𑀸𑀭 𑁨.𑁪𑁧𑁨) 𑀆𑀕𑀢𑀢𑁆𑀢𑀸 𑀘 𑀚𑀸𑀦𑀺𑀢𑀩𑁆𑀩𑁄𑀢𑀺.

𑀓𑁂𑀦𑀝𑁆𑀞𑁂𑀦 𑀓𑀣𑀺𑀦𑀦𑁆𑀢𑀺? 𑀣𑀺𑀭𑀝𑁆𑀞𑁂𑀦. 𑀓𑀲𑁆𑀫𑀸 𑀣𑀺𑀭𑀦𑁆𑀢𑀺? 𑀅𑀦𑀸𑀫𑀦𑁆𑀢𑀘𑀸𑀭𑀅𑀲𑀫𑀸𑀤𑀸𑀦𑀘𑀸𑀭𑀕𑀡𑀪𑁄𑀚𑀦𑀬𑀸𑀯𑀤𑀢𑁆𑀣𑀘𑀻𑀯𑀭𑀬𑁄𑀘𑀢𑀢𑁆𑀣𑀘𑀻𑀯𑀭𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑁂 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬. 𑀯𑀼𑀢𑁆𑀢𑀜𑁆𑀳𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁦𑁬) ‘‘𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺, 𑀢𑀣𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁦𑁬) 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀜𑁆𑀘 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬). 𑀅𑀣 𑀯𑀸 𑀓𑁂𑀦𑀝𑁆𑀞𑁂𑀦 𑀓𑀣𑀺𑀦𑀦𑁆𑀢𑀺? 𑀲𑀗𑁆𑀕𑀡𑁆𑀳𑀦𑀝𑁆𑀞𑁂𑀦. 𑀓𑀣𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺? 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑀝𑁆𑀞𑁂𑀦 𑀓𑀣𑀺𑀦’’𑀦𑁆𑀢𑀺.

𑀓𑀣𑀺𑀦-𑀲𑀤𑁆𑀤𑁄 𑀓𑀸𑀬 𑀥𑀸𑀢𑀼𑀬𑀸 𑀓𑁂𑀦 𑀧𑀘𑁆𑀘𑀬𑁂𑀦 𑀲𑀺𑀚𑁆𑀛𑀢𑀻𑀢𑀺? 𑀝𑀻𑀓𑀸𑀘𑀭𑀺𑀬𑀸 𑀥𑀸𑀢𑀼𑀧𑀘𑁆𑀘𑀬𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀯𑀲𑁂𑀦𑁂𑀯 𑀯𑀡𑁆𑀡𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀤𑁆𑀤𑁄 𑀭𑀼𑀴𑁆𑀳𑀻𑀲𑀼𑀤𑁆𑀥𑀦𑀸𑀫𑀪𑀽𑀢𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀲𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀢𑀻𑀲𑀼𑀧𑀺 𑀯𑀺𑀦𑀬𑀝𑀻𑀓𑀸𑀲𑀼 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁦𑁬; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁦𑁬; 𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬; 𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’ 𑀇𑀘𑁆𑀘𑁂𑀯 𑀯𑀡𑁆𑀡𑀺𑀢𑀢𑁆𑀢𑀸. 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬𑀸𑀢𑀺 𑀧𑀦 𑀣𑀺𑀭𑀢𑀸 𑀘𑀲𑁆𑀲 𑀳𑁂𑀢𑀼𑀧𑀤𑀫𑁂𑀯. 𑀅𑀣 𑀯𑀸 𑀓𑀣𑀺𑀦-𑀲𑀤𑁆𑀤𑁄 𑀓𑀣𑀥𑀸𑀢𑀼𑀬𑀸 𑀇𑀦𑀧𑀘𑁆𑀘𑀬𑁂𑀦 𑀲𑀺𑀚𑁆𑀛𑀢𑀺. 𑀓𑀣𑀁? 𑀓𑀣 𑀲𑀗𑁆𑀕𑀳𑀡𑁂𑀢𑀺𑀫𑀲𑁆𑀲 𑀮𑀤𑁆𑀥𑀥𑀸𑀢𑀼𑀲𑀜𑁆𑀜𑀸𑀤𑀺𑀲𑁆𑀲 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁂 ‘‘𑀇𑀦 𑀲𑀩𑁆𑀩𑀢𑁆𑀣𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀯𑀸 ‘‘𑀲𑀼𑀧𑀢𑁄 𑀘𑀸’’𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁂𑀦 𑀯𑀸 𑀇𑀦𑀧𑀘𑁆𑀘𑀬𑀁 𑀓𑀢𑁆𑀯𑀸 𑀧𑀭𑀓𑁆𑀔𑀭𑀁 𑀦𑁂𑀢𑁆𑀯𑀸 𑀓𑀣𑀺𑀦𑀲𑀤𑁆𑀤𑀢𑁄 𑀲𑁆𑀬𑀼𑀧𑁆𑀧𑀢𑁆𑀢𑀸𑀤𑀺𑀫𑁆𑀳𑀺 𑀓𑀢𑁂 𑀭𑀽𑀧𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀗𑁆𑀕𑀡𑁆𑀳𑀦𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀻𑀝𑀻𑀓𑀸𑀧𑀸𑀞𑀁 𑀦𑀺𑀲𑁆𑀲𑀸𑀬 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 𑀓𑀞 𑀓𑀺𑀘𑁆𑀙𑀚𑀻𑀯𑀦𑁂𑀢𑀺 𑀥𑀸𑀢𑀼𑀢𑁄 𑀇𑀦𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀺𑀚𑁆𑀛𑀢𑀺. 𑀅𑀬𑀫𑀢𑁆𑀣𑁄 ‘‘𑀓𑀞 𑀓𑀺𑀘𑁆𑀙𑀚𑀻𑀯𑀦𑁂, 𑀫𑀼𑀤𑁆𑀥𑀚𑀤𑀼𑀢𑀺𑀬𑀦𑁆𑀢𑁄 𑀥𑀸𑀢𑀼, 𑀇𑀦𑁄’’𑀢𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺.

𑀩𑀳𑀽 𑀧𑀦 𑀧𑀡𑁆𑀟𑀺𑀢𑀸 𑀇𑀫𑀁 𑀧𑀸𑀞𑀁𑀬𑁂𑀯 𑀕𑀳𑁂𑀢𑁆𑀯𑀸 ‘‘𑀓𑀣𑀺𑀦-𑀲𑀤𑁆𑀤𑁄 𑀫𑀼𑀤𑁆𑀥𑀚𑀤𑀼𑀢𑀺𑀬𑀦𑁆𑀢𑁄𑀬𑁂𑀯 𑀳𑁄𑀢𑀺, 𑀦 𑀤𑀦𑁆𑀢𑀚𑁄’’𑀢𑀺 𑀯𑀤𑀦𑁆𑀢𑀺 𑀘𑁂𑀯 𑀮𑀺𑀔𑀦𑁆𑀢𑀺 𑀘, 𑀦 𑀧𑀦𑁂𑀯𑀁 𑀏𑀓𑀦𑁆𑀢𑀢𑁄 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀓𑀓𑁆𑀔𑀴𑀧𑀭𑀺𑀬𑀸𑀬𑀁 𑀕𑀼𑀡𑀲𑀤𑁆𑀤𑀪𑀽𑀢𑀁 𑀓𑀞𑀺𑀦𑀲𑀤𑁆𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀸𑀲𑀦𑀯𑁄𑀳𑀸𑀭𑀢𑁄 𑀦𑀸𑀫𑀲𑀤𑁆𑀤𑀪𑀽𑀢𑀁. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀘𑀓𑀁 𑀓𑀓𑁆𑀔𑀴𑁂’’𑀢𑀺. 𑀅𑀦𑁂𑀓𑁂𑀲𑀼 𑀧𑀦 𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀺𑀧𑁄𑀢𑁆𑀣𑀓𑁂𑀲𑀼 𑀚𑀺𑀦𑀲𑀸𑀲𑀦𑀯𑁄𑀳𑀸𑀭𑀢𑁄 𑀦𑀸𑀫𑀲𑀤𑁆𑀤𑀪𑀽𑀢𑁄 𑀓𑀣𑀺𑀦-𑀲𑀤𑁆𑀤𑁄 𑀤𑀦𑁆𑀢𑀚𑁄𑀬𑁂𑀯 𑀬𑁂𑀪𑀼𑀬𑁆𑀬𑁂𑀦 𑀧𑀜𑁆𑀜𑀸𑀬𑀢𑀺, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀫𑁆𑀧𑀺 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁂 𑀓𑀣𑀺𑀦𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀓𑀢𑁆𑀣 𑀲𑀺𑀮𑀸𑀖𑀸𑀬𑀦𑁆𑀢𑀺 𑀥𑀸𑀢𑀼𑀢𑁄 𑀇𑀦𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀲𑀁𑀬𑁄𑀕𑀢𑁆𑀣𑀓𑀸𑀭𑀁 𑀦𑀺𑀲𑀁𑀬𑁄𑀕𑀁 𑀓𑀢𑁆𑀯𑀸 𑀲𑀺𑀚𑁆𑀛𑀢𑀺. 𑀅𑀬𑀫𑀢𑁆𑀣𑁄 𑀲𑀺𑀮𑀸𑀖𑀸𑀤𑀺𑀲𑀼𑀢𑁆𑀢𑀲𑁆𑀲 𑀯𑀼𑀢𑁆𑀢𑀺𑀬𑀁 ‘‘𑀲𑀺𑀮𑀸𑀖 𑀓𑀢𑁆𑀣𑀦𑁂’’𑀢𑀺 𑀯𑀘𑀦𑀢𑁄, 𑀲𑀤𑁆𑀤𑀦𑀻𑀢𑀺𑀬𑀜𑁆𑀘 ‘‘𑀓𑀢𑁆𑀣𑀦𑀁 𑀧𑀲𑀁𑀲𑀦’’𑀦𑁆𑀢𑀺 𑀯𑀡𑁆𑀡𑀺𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺. 𑀇𑀤𑀜𑁆𑀘 𑀯𑀘𑀦𑀁 ‘‘𑀇𑀤𑀜𑁆𑀳𑀺 𑀓𑀣𑀺𑀦𑀯𑀢𑁆𑀢𑀁 𑀦𑀸𑀫 𑀩𑀼𑀤𑁆𑀥𑀧𑁆𑀧𑀲𑀢𑁆𑀣’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀲𑀫𑁂𑀢𑀺. 𑀆𑀘𑀭𑀺𑀬𑀸 𑀧𑀦 ‘‘𑀓𑀞𑀥𑀸𑀢𑀼 𑀇𑀦𑀧𑀘𑁆𑀘𑀬𑁄’’𑀢𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 ‘‘𑀓𑀞 𑀲𑀫𑀢𑁆𑀣𑀦𑁂’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀝𑀻𑀓𑀸𑀲𑀼 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁦𑁬; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁦𑁬; 𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬; 𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀘𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 ‘‘𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬𑀸’’𑀢𑀺 𑀳𑁂𑀢𑀼𑀫𑁂𑀯 𑀅𑀢𑁆𑀣𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀲𑀺𑀬𑀸, 𑀢𑀁 𑀧𑀦 𑀣𑀺𑀭𑀪𑀸𑀯𑀲𑁆𑀲 𑀳𑁂𑀢𑀼𑀬𑁂𑀯.

𑀓𑀣𑀁 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺? 𑀅𑀬𑀁 𑀓𑀣𑀺𑀦-𑀲𑀤𑁆𑀤𑁄 𑀘𑀢𑀽𑀲𑀼 𑀧𑀤𑁂𑀲𑀼 𑀦𑀸𑀫𑀧𑀤𑀁, 𑀧𑀜𑁆𑀘𑀲𑀼 𑀦𑀸𑀫𑁂𑀲𑀼 𑀲𑀼𑀤𑁆𑀥𑀦𑀸𑀫𑀁, 𑀘𑀢𑀽𑀲𑀼 𑀲𑀼𑀤𑁆𑀥𑀦𑀸𑀫𑁂𑀲𑀼 𑀭𑀼𑀴𑁆𑀳𑀻𑀲𑀼𑀤𑁆𑀥𑀦𑀸𑀫𑀁, 𑀤𑁆𑀯𑀻𑀲𑀼 𑀧𑀸𑀝𑀺𑀧𑀤𑀺𑀓𑀲𑀤𑁆𑀤𑁂𑀲𑀼 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀲𑀤𑁆𑀤𑁄, 𑀢𑀲𑁆𑀫𑀸 𑀯𑀺𑀕𑁆𑀕𑀳𑁄 𑀦 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀭𑀼𑀴𑁆𑀳𑀻𑀔𑁆𑀬𑀸𑀢𑀁 𑀦𑀺𑀧𑀸𑀢𑀜𑁆𑀘𑀼-𑀧𑀲𑀕𑁆𑀕𑀸𑀮𑀧𑀦𑀁 𑀢𑀣𑀸;

𑀲𑀩𑁆𑀩𑀦𑀸𑀫𑀺𑀓𑀫𑁂𑀢𑁂𑀲𑀼, 𑀦 𑀓𑀢𑁄 𑀯𑀺𑀕𑁆𑀕𑀳𑁄 𑀙𑀲𑀽’’𑀢𑀺.

𑀅𑀬𑀫𑀢𑁆𑀣𑁄 ‘‘𑀓𑀣𑀺𑀦𑀦𑁆𑀢𑀺…𑀧𑁂… 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀝𑀻𑀓𑀸𑀲𑀼 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁦𑁬; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁦𑁬; 𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬; 𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀓𑀣𑀢𑀺 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀓𑀣𑀺𑀦𑀁, 𑀅𑀬𑀁 𑀯𑀘𑀦𑀢𑁆𑀣𑁄 𑀬𑀣𑀸𑀯𑀼𑀢𑁆𑀢𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀧𑀸𑀞𑀯𑀲𑁂𑀦 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 𑀓𑀞𑀢𑀺 𑀓𑀺𑀘𑁆𑀙𑁂𑀦 𑀚𑀻𑀯𑀢𑀻𑀢𑀺 𑀓𑀣𑀺𑀦𑁄, 𑀭𑀼𑀓𑁆𑀔𑁄, 𑀢𑀲𑁆𑀲 𑀏𑀲𑁄𑀢𑀺 𑀓𑀣𑀺𑀦𑁄, 𑀣𑀺𑀭𑀪𑀸𑀯𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀺𑀦𑀁, 𑀧𑀜𑁆𑀜𑀢𑁆𑀢𑀺𑀚𑀸𑀢𑀁 𑀞-𑀓𑀸𑀭𑀲𑁆𑀲 𑀣-𑀓𑀸𑀭𑀁 𑀓𑀢𑁆𑀯𑀸 𑀓𑀣𑀺𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀦𑀬𑁄 ‘‘𑀓𑀞 𑀓𑀺𑀘𑁆𑀙𑀚𑀻𑀯𑀦𑁂’’𑀢𑀺 𑀥𑀸𑀢𑁆𑀯𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀘 ‘‘𑀧𑀜𑁆𑀘𑀸𑀦𑀺𑀲𑀁𑀲𑁂 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀢𑀸𑀬 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀝𑀻𑀓𑀸𑀯𑀘𑀦𑁂𑀦 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁦𑁬; 𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁦𑁬; 𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬; 𑀓𑀗𑁆𑀔𑀸. 𑀅𑀪𑀺. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀘 𑀲𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀓𑀣𑀻𑀬𑀢𑁂 𑀲𑀺𑀮𑀸𑀖𑀢𑁂 𑀧𑀲𑀁𑀲𑀻𑀬𑀢𑁂 𑀩𑀼𑀤𑁆𑀥𑀸𑀤𑀻𑀳𑀻𑀢𑀺 𑀓𑀣𑀺𑀦𑀁, 𑀅𑀬𑀁 𑀦𑀬𑁄 ‘‘𑀓𑀢𑁆𑀣 𑀲𑀺𑀮𑀸𑀖𑀸𑀬’’𑀦𑁆𑀢𑀺 𑀥𑀸𑀢𑁆𑀯𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀘 ‘‘𑀇𑀤𑀜𑁆𑀳𑀺 𑀓𑀣𑀺𑀦𑀯𑀢𑁆𑀢𑀁 𑀦𑀸𑀫 𑀩𑀼𑀤𑁆𑀥𑀧𑁆𑀧𑀲𑀢𑁆𑀣’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀘 𑀲𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣 𑀧𑀦 𑀲𑀗𑁆𑀔𑁂𑀧𑀭𑀼𑀘𑀺𑀢𑁆𑀢𑀸 𑀆𑀘𑀭𑀺𑀬𑀲𑁆𑀲 𑀲𑀤𑁆𑀤𑀮𑀓𑁆𑀔𑀡𑀁 𑀅𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀣𑀫𑁂𑀯 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀓𑁂 𑀮𑀪𑀦𑁆𑀢𑀺, 𑀓𑁂 𑀦 𑀮𑀪𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁂 𑀮𑀪𑀦𑁆𑀢𑀻𑀢𑀺 𑀓𑁂 𑀲𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀚𑀦𑀸 𑀮𑀪𑀦𑁆𑀢𑀻𑀢𑀺 𑀧𑀜𑁆𑀘 𑀚𑀦𑀸 𑀲𑀸𑀥𑁂𑀦𑁆𑀢𑀺. 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀳𑀺 𑀤𑀸𑀬𑀓𑀸 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀘𑀢𑀼𑀯𑀕𑁆𑀕𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀉𑀧𑀲𑀫𑁆𑀧𑀤𑀁 𑀧𑀯𑀸𑀭𑀡𑀁 𑀅𑀩𑁆𑀪𑀸𑀦’’𑀦𑁆𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁮𑁮) 𑀯𑀼𑀢𑁆𑀢𑀢𑁆𑀢𑀸 𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀞𑀫𑀧𑁆𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀢𑀺 𑀇𑀤𑀁 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀲𑁆𑀲𑀁𑀯𑀼𑀢𑁆𑀣𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 𑀅𑀦𑁆𑀢𑀭𑀸𑀬𑁂𑀦 𑀅𑀧𑀯𑀸𑀭𑀺𑀢𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀓𑀣𑀺𑀦𑀢𑁆𑀣𑀸𑀭𑀲𑀫𑁆𑀪𑀯𑀢𑁄. 𑀢𑁂𑀦𑁂𑀯 ‘‘𑀅𑀧𑁆𑀧𑀯𑀸𑀭𑀺𑀢𑀸 𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀙𑀺𑀦𑁆𑀦𑀯𑀲𑁆𑀲𑀸 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀯𑀸 𑀦 𑀮𑀪𑀦𑁆𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦𑀮𑀪𑀦𑁆𑀢𑀻𑀢𑀺 𑀦𑀸𑀦𑀸𑀲𑀻𑀫𑀸𑀬 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀣𑀺𑀦𑀢𑁆𑀣𑀸𑀭𑀁 𑀦 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀢𑀺 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄, 𑀅𑀦𑀼𑀧𑀕𑀢𑀸𑀧𑀺 𑀢𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸. 𑀆𑀦𑀺𑀲𑀁𑀲𑀦𑁆𑀢𑀺 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀁. 𑀏𑀓𑀁 𑀅𑀢𑁆𑀣𑀢𑀘𑀻𑀯𑀭𑀁𑀬𑁂𑀯 𑀳𑀺 𑀓𑀣𑀺𑀦𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺, 𑀅𑀯𑀲𑁂𑀲𑀸𑀦𑀺 𑀘𑀻𑀯𑀭𑀸𑀦𑀺 𑀯𑀸 𑀲𑀸𑀝𑀓𑀸 𑀯𑀸 𑀓𑀣𑀺𑀦𑀸𑀦𑀺𑀲𑀁𑀲𑀸𑀬𑁂𑀯 𑀦𑀸𑀫. 𑀯𑀓𑁆𑀔𑀢𑀺 𑀳𑀺 ‘‘𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀻’’𑀢𑀺. (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁬) 𑀇𑀢𑀭𑁂𑀲𑀦𑁆𑀢𑀺 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸𑀦𑀁.

𑀲𑁄 𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀕𑀡𑀧𑀽𑀭𑀓𑁄 𑀘𑁂𑀯 𑀳𑁄𑀢𑀺, 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀻𑀢𑀺 𑀇𑀫𑀺𑀦𑀸 𑀲𑀸𑀫𑀡𑁂𑀭𑀸𑀦𑀁 𑀯𑀲𑁆𑀲𑀽𑀧𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀲𑁄 𑀳𑀺 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀢𑁆𑀢𑀸 𑀆𑀦𑀺𑀲𑀁𑀲𑀁 𑀮𑀪𑀢𑀺, 𑀧𑀘𑁆𑀙𑀺𑀫𑀺𑀓𑀸𑀬 𑀧𑀦 𑀉𑀧𑀲𑀫𑁆𑀧𑀚𑁆𑀚𑀺𑀢𑀢𑁆𑀢𑀸 𑀕𑀡𑀧𑀽𑀭𑀓𑁄 𑀳𑁄𑀢𑀻𑀢𑀺. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀓𑀣𑀺𑀦𑀢𑁆𑀣𑀸𑀭𑀓𑀼𑀲𑀮𑀸 𑀦 𑀳𑁄𑀦𑁆𑀢𑀻𑀢𑀺𑀆𑀤𑀺𑀦𑀸 ‘‘𑀅𑀝𑁆𑀞𑀥𑀫𑁆𑀫𑀓𑁄𑀯𑀺𑀤𑁄 𑀪𑀺𑀓𑁆𑀔𑀼, 𑀓𑀣𑀺𑀦𑀢𑁆𑀣𑀸𑀭𑀫𑀭𑀳𑀢𑀻’’𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 (𑀯𑀺. 𑀯𑀺. 𑁨𑁭𑁦𑁪) 𑀆𑀕𑀢𑀢𑁆𑀢𑀸 𑀲𑀬𑀁 𑀘𑁂 𑀅𑀝𑁆𑀞𑀥𑀫𑁆𑀫𑀓𑀼𑀲𑀮𑁄, 𑀲𑀬𑀫𑁂𑀯 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀦𑁄 𑀘𑁂, 𑀅𑀜𑁆𑀜𑁂 𑀅𑀝𑁆𑀞𑀥𑀫𑁆𑀫𑀓𑀼𑀲𑀮𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁂𑀢𑀩𑁆𑀩𑀸, 𑀏𑀯𑀁 𑀅𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸𑀢𑀺 𑀲𑀓𑀸𑀭𑀺𑀢𑀯𑀘𑀦𑁂𑀦 𑀢𑁂𑀳𑀺 𑀩𑀸𑀳𑀺𑀭𑀢𑁄 𑀆𑀕𑀢𑀢𑁆𑀣𑁂𑀭𑁂𑀳𑀺 𑀲𑀬𑀁 𑀓𑀣𑀺𑀦𑀁 𑀦 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀲𑀩𑁆𑀩𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀺𑀓𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀢𑁂 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸 𑀅𑀦𑁆𑀢𑁄𑀲𑀻𑀫𑀝𑁆𑀞𑀪𑀺𑀓𑁆𑀔𑀽𑀬𑁂𑀯 𑀅𑀢𑁆𑀣𑀭𑀸𑀧𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀅𑀜𑁆𑀜𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀅𑀜𑁆𑀜𑁄 𑀆𑀦𑀺𑀲𑀁𑀲𑀁 𑀮𑀪𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀦 𑀧𑀦𑁂𑀯𑀁 𑀬𑀼𑀚𑁆𑀚𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀆𑀦𑀺𑀲𑀁𑀲𑁄 𑀧𑀦 𑀇𑀢𑀭𑁂𑀲𑀁𑀬𑁂𑀯 𑀳𑁄𑀢𑀻’’𑀢𑀺. 𑀤𑀸𑀦𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀪𑀽𑀢𑀁 𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀦𑀁 𑀪𑀼𑀜𑁆𑀚𑀺𑀢𑁆𑀯𑀸. 𑀦 𑀳𑀺 𑀢𑁂 𑀯𑀢𑁆𑀣𑀼𑀤𑀸𑀦𑀁 𑀮𑀪𑀦𑁆𑀢𑀺.

𑀓𑀣𑀺𑀦𑀘𑀻𑀯𑀭𑀁 𑀤𑁂𑀫𑀸𑀢𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀲𑀗𑁆𑀖𑀲𑁆𑀲 𑀓𑀣𑀺𑀦𑀘𑀻𑀯𑀭𑀁 𑀤𑁂𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 (𑀫𑀳𑀸𑀯. 𑁩𑁦𑁭) 𑀓𑀫𑁆𑀫𑀯𑀸𑀘𑀸𑀬 𑀲𑀫𑁂𑀢𑀺. 𑀅𑀣 𑀘 𑀧𑀦 𑀧𑀼𑀩𑁆𑀩𑁂 𑀓𑀢𑀧𑀭𑀺𑀘𑀬𑀢𑁆𑀢𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀲𑀫𑁆𑀧𑀤𑀸𑀦𑀁 𑀧𑀸𑀓𑀝𑀦𑁆𑀢𑀺 𑀓𑀢𑁆𑀯𑀸 𑀅𑀯𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀏𑀢𑁆𑀣𑁂𑀓𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺 ‘‘𑀲𑀗𑁆𑀖𑀲𑁆𑀲𑀸𑀢𑀺 𑀅𑀯𑀼𑀢𑁆𑀢𑁂𑀧𑀺 𑀓𑀸𑀮𑁂 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺, 𑀢𑀢𑁆𑀭𑁂𑀯𑀁 𑀯𑀢𑁆𑀢𑀩𑁆𑀩𑀁 ‘‘𑀦 𑀓𑀸𑀮𑁂 𑀤𑀺𑀦𑁆𑀦𑀁 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀬𑀜𑁆𑀘 𑀓𑀸𑀮𑁂𑀧𑀺 𑀲𑀗𑁆𑀖𑀲𑁆𑀲 𑀯𑀸 𑀇𑀤𑀁 𑀅𑀓𑀸𑀮𑀘𑀻𑀯𑀭𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀅𑀓𑀸𑀮𑀘𑀺𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀧𑀭𑀫𑁆𑀫𑀼𑀔𑀸𑀧𑀺 𑀦𑀸𑀫𑀁 𑀯𑀢𑁆𑀯𑀸 𑀲𑀫𑁆𑀫𑀼𑀔𑀸𑀧𑀺 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀳𑁄𑀢𑀺, 𑀦 𑀲𑀗𑁆𑀖𑀺𑀓𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻𑀢𑀺 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸, 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘𑀇𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀻’’𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀺𑀓𑁂 𑀲𑀢𑀺 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀪𑀸𑀚𑁂𑀢𑀩𑁆𑀩𑀁 𑀳𑁄𑀢𑀺 𑀯𑀸 𑀦 𑀳𑁄𑀢𑀺 𑀯𑀸𑀢𑀺? 𑀲𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀪𑀽𑀢𑀲𑁆𑀲 𑀲𑀗𑁆𑀖𑀲𑁆𑀲 𑀯𑀸 𑀅𑀜𑁆𑀜𑀲𑁆𑀲 𑀲𑀳𑀥𑀫𑁆𑀫𑀺𑀓𑀲𑀗𑁆𑀖𑀲𑁆𑀲 𑀯𑀸 𑀪𑀸𑀚𑁂𑀢𑀼𑀓𑀸𑀫𑁄 𑀪𑀸𑀚𑁂𑀬𑁆𑀬, 𑀅𑀪𑀸𑀚𑁂𑀢𑀼𑀓𑀸𑀫𑁄 ‘‘𑀪𑀸𑀚𑁂𑀢𑀽’’𑀢𑀺 𑀦 𑀓𑁂𑀦𑀘𑀺 𑀯𑀘𑀦𑀻𑀬𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀓𑁂𑀦𑀘𑀺 𑀪𑀸𑀚𑀦𑀻𑀬𑀁 𑀳𑁄𑀢𑀻’’𑀢𑀺 𑀝𑀻𑀓𑀸𑀲𑀼 𑀆𑀕𑀫𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀣𑁂𑀓𑁂 𑀆𑀘𑀭𑀺𑀬𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀣𑀺𑀦𑀲𑁆𑀲 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄𑀢𑀺 (𑀧𑀭𑀺. 𑁪𑁦𑁮) 𑀯𑀼𑀢𑁆𑀢𑀢𑁆𑀢𑀸 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀸𑀬𑀢𑁆𑀢𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀬𑀣𑀸 𑀓𑀺𑀁 ‘𑀲𑀻𑀫𑀸𑀬 𑀤𑀫𑁆𑀫𑀺, 𑀲𑁂𑀦𑀸𑀲𑀦𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀁 𑀤𑀸𑀦𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀬𑀣𑀸 𑀘 ‘𑀓𑀣𑀺𑀦𑀘𑀻𑀯𑀭𑀁 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺.

𑀢𑀢𑁆𑀭𑁂𑀯𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 ‘‘𑀓𑀣𑀺𑀦𑀲𑁆𑀲 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄’’𑀢𑀺 𑀯𑀘𑀦𑀁 (𑀧𑀭𑀺. 𑁪𑁦𑁮) 𑀓𑀣𑀺𑀦𑀲𑁆𑀲 𑀫𑀽𑀮𑀁 𑀓𑀣𑀺𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀫𑀽𑀮𑁂 𑀯𑀺𑀚𑁆𑀚𑀫𑀸𑀦𑁂 𑀭𑀼𑀓𑁆𑀔𑁄 𑀢𑀺𑀝𑁆𑀞𑀢𑀺, 𑀅𑀯𑀺𑀚𑁆𑀚𑀫𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀫𑀽𑀮𑀁 𑀭𑀼𑀓𑁆𑀔𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀧𑀢𑀺𑀝𑁆𑀞𑀁 𑀳𑁄𑀢𑀺, 𑀏𑀯𑀁 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂 𑀓𑀣𑀺𑀦𑀁 𑀳𑁄𑀢𑀺, 𑀦𑁄 𑀅𑀯𑀺𑀚𑁆𑀚𑀫𑀸𑀦𑁂, 𑀢𑀲𑁆𑀫𑀸 𑀲𑀗𑁆𑀖𑁄 𑀓𑀣𑀺𑀦𑀲𑁆𑀲 𑀫𑀽𑀮𑀁 𑀓𑀣𑀺𑀦𑀲𑁆𑀲 𑀓𑀸𑀭𑀡𑀁 𑀦𑀸𑀫 𑀳𑁄𑀢𑀺. 𑀓𑀣𑀁 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂 𑀓𑀣𑀺𑀦𑀁 𑀳𑁄𑀢𑀺? 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀯𑀕𑁆𑀕𑀪𑀽𑀢𑁂𑀦 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀸𑀭𑀳𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀘𑀻𑀯𑀭𑁂 𑀤𑀺𑀦𑁆𑀦𑁂𑀬𑁂𑀯 𑀢𑁂𑀦 𑀘𑀻𑀯𑀭𑁂𑀦 𑀅𑀢𑁆𑀣𑀢𑀁 𑀓𑀣𑀺𑀦𑀁 𑀦𑀸𑀫 𑀳𑁄𑀢𑀺, 𑀦𑁄 𑀅𑀤𑀺𑀦𑁆𑀦𑁂, 𑀢𑀲𑁆𑀫𑀸 𑀘𑀢𑀼𑀯𑀕𑁆𑀕𑀲𑀗𑁆𑀖𑁂 𑀅𑀮𑀩𑁆𑀪𑀫𑀸𑀦𑁂 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 ‘‘𑀓𑀣𑀺𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀓𑀣𑀺𑀦𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀺𑀳𑀸𑀭𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀢𑀢𑁆𑀣 𑀓𑀣𑀺𑀦𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑀢𑁄 𑀧𑀭𑀺𑀬𑁂𑀲𑀺𑀢𑁆𑀯𑀸 𑀘𑀢𑀼𑀯𑀕𑁆𑀕𑀲𑀗𑁆𑀖𑁄 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀽𑀭𑀡𑁂 𑀲𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀮𑀪𑀢𑀺, 𑀦𑀸𑀲𑀢𑀺, 𑀏𑀯𑀁 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀓𑀣𑀺𑀦𑀁 𑀦𑀸𑀫 𑀳𑁄𑀢𑀺, 𑀦𑁄 𑀅𑀯𑀺𑀚𑁆𑀚𑀫𑀸𑀦𑁂, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀓𑀣𑀺𑀦𑀲𑁆𑀲 𑀫𑀽𑀮𑀪𑀽𑀢𑀢𑀁 𑀓𑀸𑀭𑀡𑀪𑀽𑀢𑀢𑀁 𑀲𑀦𑁆𑀥𑀸𑀬 ‘‘𑀓𑀣𑀺𑀦𑀲𑁆𑀲 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄’’𑀢𑀺 𑀯𑀼𑀢𑁆𑀢𑀁. ‘‘𑀓𑀣𑀺𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁𑀬𑁂𑀯 𑀳𑁄𑀢𑀺, 𑀦𑁄 𑀧𑀼𑀕𑁆𑀕𑀮𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀏𑀢𑀲𑁆𑀫𑀺𑀁 𑀧𑀸𑀞𑁂 𑀦 𑀮𑀩𑁆𑀪𑀢𑀺. 𑀬𑀣𑀸 𑀓𑀺𑀁 ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄’’𑀢𑀺 (𑀘𑀽𑀴𑀯. 𑁨𑁧𑁯) 𑀏𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀜𑀢𑁆𑀢𑀺𑀓𑀫𑁆𑀫𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀲𑀗𑁆𑀔𑀸𑀢𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀘𑀢𑀼𑀯𑀕𑁆𑀕𑀸𑀤𑀺𑀓𑁂 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀳𑁄𑀢𑀺, 𑀦𑁄 𑀅𑀯𑀺𑀚𑁆𑀚𑀫𑀸𑀦𑁂, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀫𑀽𑀮𑀪𑀽𑀢𑀢𑀁 𑀓𑀸𑀭𑀡𑀪𑀽𑀢𑀢𑀁 𑀲𑀦𑁆𑀥𑀸𑀬 ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁 𑀫𑀽𑀮𑀁 𑀲𑀗𑁆𑀖𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀬𑀤𑀺𑀧𑀺 𑀯𑀼𑀢𑁆𑀢𑀁 ‘‘𑀬𑀣𑀸 ‘𑀲𑀻𑀫𑀸𑀬 𑀤𑀫𑁆𑀫𑀺, 𑀲𑁂𑀦𑀸𑀲𑀦𑀲𑁆𑀲 𑀤𑀫𑁆𑀫𑀻’𑀢𑀺𑀆𑀤𑀻𑀲𑀼 𑀢𑀁 𑀤𑀸𑀦𑀁 𑀲𑀗𑁆𑀖𑀸𑀬𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀣𑀸 ‘𑀓𑀣𑀺𑀦 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀸𑀬𑀢𑁆𑀢𑀫𑁂𑀯 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀻’’𑀢𑀺, 𑀢𑀣𑀸𑀧𑀺 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 ‘‘𑀲𑀻𑀫𑀸𑀬 𑀤𑀫𑁆𑀫𑀺, 𑀲𑁂𑀦𑀸𑀲𑀦𑀲𑁆𑀲 𑀤𑀫𑁆𑀫𑀻’’𑀢𑀺𑀆𑀤𑀻𑀲𑀼 𑀲𑀻𑀫𑀸 𑀘 𑀲𑁂𑀦𑀸𑀲𑀦𑀜𑁆𑀘 𑀤𑀸𑀦𑀧𑀝𑀺𑀕𑁆𑀕𑀸𑀳𑀓𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀻𑀫𑀝𑁆𑀞𑀲𑁆𑀲 𑀘 𑀲𑁂𑀦𑀸𑀲𑀦𑀝𑁆𑀞𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀆𑀬𑀢𑁆𑀢𑀁 𑀳𑁄𑀢𑀺, 𑀧𑀼𑀕𑁆𑀕𑀮𑁄 𑀧𑀦 𑀤𑀸𑀦𑀧𑀝𑀺𑀕𑁆𑀕𑀸𑀳𑀓𑁄𑀯, 𑀢𑀲𑁆𑀫𑀸 ‘‘𑀇𑀫𑀁 𑀓𑀣𑀺𑀦𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀫𑁆𑀫𑀻’’𑀢𑀺 𑀧𑀭𑀫𑁆𑀫𑀼𑀔𑀸 𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀫𑁆𑀫𑀼𑀔𑀸 𑀯𑀸 𑀤𑀺𑀦𑁆𑀦𑀁 𑀓𑀣𑀁 𑀲𑀗𑁆𑀖𑀸𑀬𑀢𑁆𑀢𑀁 𑀲𑀗𑁆𑀖𑀲𑀦𑁆𑀢𑀓𑀁 𑀪𑀯𑁂𑀬𑁆𑀬, 𑀏𑀯𑀁 𑀲𑀗𑁆𑀖𑀲𑁆𑀲 𑀅𑀧𑀭𑀺𑀡𑀢𑀁 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑁂𑀬𑁆𑀬, 𑀦𑀯𑀲𑀼 𑀅𑀥𑀫𑁆𑀫𑀺𑀓𑀤𑀸𑀦𑁂𑀲𑀼 𑀏𑀓𑀁 𑀪𑀯𑁂𑀬𑁆𑀬, 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀧𑀝𑀺𑀕𑁆𑀕𑀳𑁄𑀧𑀺 𑀦𑀯𑀲𑀼 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑁂𑀲𑀼 𑀏𑀓𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀘𑀻𑀯𑀭𑀲𑁆𑀲 𑀧𑀭𑀺𑀪𑁄𑀕𑁄𑀧𑀺 𑀦𑀯𑀲𑀼 𑀅𑀥𑀫𑁆𑀫𑀺𑀓𑀧𑀭𑀺𑀪𑁄𑀕𑁂𑀲𑀼 𑀏𑀓𑁄 𑀪𑀯𑁂𑀬𑁆𑀬. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, ‘‘𑀦𑀯 𑀅𑀥𑀫𑁆𑀫𑀺𑀓𑀸 𑀧𑀭𑀺𑀪𑁄𑀕𑀸’’𑀢𑀺 𑀆𑀕𑀢𑀁 𑀧𑀭𑀺𑀯𑀸𑀭𑀧𑀸𑀴𑀺𑀜𑁆𑀘 (𑀧𑀭𑀺. 𑁩𑁨𑁯) ‘‘𑀦𑀯 𑀧𑀝𑀺𑀕𑁆𑀕𑀳𑀧𑀭𑀺𑀪𑁄𑀕𑀸𑀢𑀺 𑀏𑀢𑁂𑀲𑀁𑀬𑁂𑀯 𑀤𑀸𑀦𑀸𑀦𑀁 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘𑀸’’𑀢𑀺 𑀆𑀕𑀢𑀁 𑀅𑀝𑁆𑀞𑀓𑀣𑀜𑁆𑀘 (𑀧𑀭𑀺. 𑀅𑀝𑁆𑀞. 𑁩𑁨𑁯) 𑀑𑀮𑁄𑀓𑁂𑀢𑁆𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀅𑀣𑀸𑀧𑀺 𑀏𑀯𑀁 𑀯𑀤𑀦𑁆𑀢𑀺 𑁋 𑀤𑀸𑀬𑀓𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑀲𑁆𑀲 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀯𑀸 𑀧𑀳𑀺𑀡𑀢𑀺 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀕𑁆𑀕𑀳𑀡𑀢𑁆𑀣𑀸𑀬 𑀅𑀝𑁆𑀞 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺, 𑀲𑀘𑁂𑀧𑀺 𑀜𑀸𑀢𑀺𑀉𑀧𑀝𑁆𑀞𑀸𑀓𑁂𑀳𑀺 𑀧𑁂𑀲𑀺𑀢𑀁 𑀳𑁄𑀢𑀺, 𑀇𑀫𑁂 𑀢𑀬𑁄 𑀚𑀦𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀦𑁆𑀢𑀺. 𑀆𑀭𑀼𑀴𑁆𑀳𑀸𑀬𑁂𑀯 𑀫𑀸𑀢𑀺𑀓𑀁, 𑀲𑀗𑁆𑀖𑀢𑁄 𑀅𑀝𑁆𑀞 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀯𑀫𑁂𑀳𑀺 𑀕𑀦𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀺 𑀏𑀢𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀕𑀦𑁆𑀣𑀥𑀼𑀢𑀗𑁆𑀕𑀸𑀤𑀻𑀳𑀺 𑀧𑀦 𑀅𑀦𑀪𑀺𑀜𑁆𑀜𑀸𑀢𑁄 𑀆𑀯𑀸𑀲𑀺𑀓𑀪𑀺𑀓𑁆𑀔𑀼 𑀧𑀼𑀘𑁆𑀙𑀺𑀢𑀼𑀁 𑀮𑀪𑀢𑀺, 𑀢𑀲𑁆𑀫𑀸 𑀢𑁂𑀦 ‘‘𑀓𑀺𑀁 𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀺, 𑀉𑀤𑀸𑀳𑀼 𑀬𑁂 𑀚𑀸𑀦𑀸𑀫𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫), 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 ‘‘𑀲𑀗𑁆𑀖𑀲𑁆𑀲 𑀮𑀸𑀪𑁄 𑀧𑀼𑀕𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀉𑀧𑀦𑀺𑀥𑀸𑀬 ‘‘𑀲𑀗𑁆𑀖𑀲𑁆𑀲 𑀮𑀸𑀪𑁄 𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀮𑀸𑀪𑁄 𑀲𑀗𑁆𑀖𑀁 𑀆𑀫𑀲𑀺𑀢𑁆𑀯𑀸 𑀤𑁂𑀦𑁆𑀢𑁄 𑀲𑀗𑁆𑀖𑀸𑀬𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀇𑀫𑀲𑁆𑀫𑀺𑀫𑁆𑀧𑀺 𑀯𑀘𑀦𑁂 𑀏𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 𑀢𑀲𑁆𑀫𑀺𑀁 𑀢𑀼 𑀦𑀺𑀫𑀦𑁆𑀢𑀦𑁂 𑀦 𑀧𑀼𑀕𑁆𑀕𑀮𑀁𑀬𑁂𑀯 𑀦𑀺𑀫𑀦𑁆𑀢𑁂𑀢𑀺, 𑀅𑀣 𑀔𑁄 𑀲𑀲𑀗𑁆𑀖𑀁 𑀧𑀼𑀕𑁆𑀕𑀮𑀁 𑀦𑀺𑀫𑀦𑁆𑀢𑁂𑀢𑀺. 𑀢𑀢𑁆𑀣 𑀢𑀼 ‘‘𑀲𑀗𑁆𑀖’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀺𑀁 𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀺, 𑀉𑀤𑀸𑀳𑀼 𑀬𑁂 𑀚𑀸𑀦𑀸𑀫𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀅𑀦𑀪𑀺𑀜𑁆𑀜𑀸𑀢𑁄 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑀼𑀁 𑀮𑀪𑀢𑀺. 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀦 𑀲𑀗𑁆𑀖𑀁 𑀧𑀭𑀺𑀳𑀭𑀺𑀢𑁆𑀯𑀸 𑀯𑀲𑀺𑀢𑀢𑁆𑀢𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀕𑀳𑀡𑀓𑀸𑀭𑀡𑀁 𑀦𑀢𑁆𑀣𑀺, 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑀧𑀼𑀕𑁆𑀕𑀮𑁄𑀧𑀺 𑀲𑀗𑁆𑀖𑀲𑁆𑀲 𑀧𑀼𑀜𑁆𑀜𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀢𑁄𑀬𑁂𑀯 𑀕𑀡𑁆𑀳𑀸𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲𑀧𑀺 𑀤𑁂𑀯𑀲𑀺𑀓𑀁 𑀲𑀗𑁆𑀖𑀲𑁆𑀲𑁂𑀯 𑀪𑀢𑁆𑀢𑀯𑀺𑀘𑀸𑀭𑀡𑀢𑁆𑀢𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀕𑀳𑀡𑀓𑀸𑀭𑀡𑀁 𑀦𑀢𑁆𑀣𑀺. 𑀏𑀯𑀁 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀲𑀳 𑀲𑀗𑁆𑀖𑁂𑀦 𑀦𑀺𑀫𑀦𑁆𑀢𑀺𑀢𑀢𑁆𑀢𑀸 ‘‘𑀇𑀫𑁂 𑀢𑀬𑁄 𑀚𑀦𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀢𑁆𑀯𑀁 𑀆𑀕𑀘𑁆𑀙𑀸𑀳𑀻’’𑀢𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀦𑀺𑀫𑀦𑁆𑀢𑀦𑁂 𑀲𑀢𑀺𑀧𑀺 𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀢𑁄𑀢𑀺. 𑀏𑀯𑀁 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀲𑀲𑀗𑁆𑀖𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀦𑀺𑀫𑀦𑁆𑀢𑀺𑀢𑀢𑁆𑀢𑀸 𑀲𑀗𑁆𑀖𑁄 𑀕𑀳𑁂𑀢𑀩𑁆𑀩𑁄 𑀳𑁄𑀢𑀺, 𑀦 ‘‘𑀢𑀼𑀫𑁆𑀳𑁂 𑀆𑀕𑀘𑁆𑀙𑀣𑀸’’𑀢𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀦𑀺𑀫𑀦𑁆𑀢𑀺𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀧𑀼𑀕𑁆𑀕𑀮𑀲𑁆𑀲 𑀮𑀸𑀪𑁄 𑀲𑀗𑁆𑀖𑀸𑀬𑀢𑁆𑀢𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀝𑁆𑀞𑀓𑀣𑀸𑀤𑀻𑀲𑀼 𑀧𑀓𑀭𑀡𑁂𑀲𑀼𑀧𑀺 ‘‘𑀧𑀼𑀕𑁆𑀕𑀮𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑁄, 𑀦 ‘‘𑀧𑀼𑀕𑁆𑀕𑀮𑀲𑁆𑀲 𑀮𑀸𑀪𑁄 𑀲𑀗𑁆𑀖𑀸𑀬𑀢𑁆𑀢𑁄’’𑀢𑀺. 𑀘𑀻𑀯𑀭𑀮𑀸𑀪𑀔𑁂𑀢𑁆𑀢𑀪𑀽𑀢𑀸𑀲𑀼 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼 𑀘 ‘‘𑀲𑀗𑁆𑀖𑀲𑁆𑀲 𑀤𑁂𑀢𑀻’’𑀢𑀺 𑀘 𑀯𑀺𑀲𑀼𑀁, ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻’’𑀢𑀺 𑀘 𑀯𑀺𑀲𑀼𑀁 𑀆𑀕𑀢𑀁. 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸, 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀇𑀫𑀁 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀻𑀢𑀺.

𑀇𑀤𑀸𑀦𑀺 𑀧𑀦 𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑀸 𑀉𑀧𑀸𑀲𑀓𑀸 𑀯𑀸 𑀉𑀧𑀸𑀲𑀺𑀓𑀸𑀬𑁄 𑀯𑀸 𑀲𑀬𑀁 𑀅𑀦𑀸𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀤𑀸𑀲𑀸𑀤𑀬𑁄 𑀆𑀡𑀸𑀧𑁂𑀦𑁆𑀢𑀸𑀧𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀣𑁂𑀭𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑀸𑀧𑁂𑀦𑁆𑀢𑀺, 𑀲𑀸𑀫𑀁 𑀕𑀦𑁆𑀢𑁆𑀯𑀸 𑀤𑀤𑀦𑁆𑀢𑀸𑀧𑀺 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀸 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀯𑀸 𑀳𑀢𑁆𑀣𑁂𑀦 𑀨𑀼𑀲𑀸𑀧𑁂𑀢𑁆𑀯𑀸 𑀯𑀸 𑀤𑀤𑀦𑁆𑀢𑀺 ‘‘𑀇𑀫𑀁, 𑀪𑀦𑁆𑀢𑁂, 𑀘𑀻𑀯𑀭𑀁 𑀢𑀼𑀫𑁆𑀳𑁂 𑀉𑀤𑁆𑀤𑀺𑀲𑁆𑀲 𑀏𑀢𑁆𑀢𑀓𑀁 𑀥𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀢𑀁, 𑀏𑀯𑀜𑁆𑀘 𑀏𑀯𑀜𑁆𑀘 𑀳𑀢𑁆𑀣𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑀺𑀢𑀁, 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀦𑀺𑀯𑀸𑀲𑀣 𑀧𑀸𑀭𑀼𑀧𑀣 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀪𑁄𑀕𑀓𑀭𑀡𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀦 𑀲𑀗𑁆𑀖𑀲𑁆𑀲 𑀤𑀸𑀦𑀁. 𑀓𑁂𑀘𑀺 𑀅𑀢𑀼𑀝𑁆𑀞𑀓𑀣𑀫𑁆𑀧𑀺 𑀓𑀣𑁂𑀦𑁆𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀫𑁂𑀯 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀘𑀻𑀯𑀭𑀲𑁆𑀲 𑀲𑀗𑁆𑀖𑁂𑀦 𑀆𑀬𑀢𑁆𑀢𑀓𑀸𑀭𑀡𑀁 𑀦𑀢𑁆𑀣𑀺. ‘‘𑀲𑀘𑁂 𑀧𑀦 ‘𑀇𑀤𑀁 𑀢𑀼𑀫𑁆𑀳𑀸𑀓𑀜𑁆𑀘 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀤𑀫𑁆𑀫𑀻’𑀢𑀺 𑀏𑀯𑀁 𑀯𑀤𑀢𑀺, 𑀣𑁂𑀭𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀆𑀕𑀫𑀦𑀢𑁄 𑀏𑀯𑀁 𑀯𑀢𑁆𑀯𑀸 𑀤𑁂𑀦𑁆𑀢𑁂 𑀧𑀦 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀦𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀦 𑀦 𑀧𑀸𑀧𑀼𑀡𑀸𑀢𑀺. ‘‘𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀲𑀧𑀺 𑀧𑀸𑀧𑀼𑀡𑀸𑀢𑀻’’𑀢𑀺 𑀆𑀕𑀫𑀦𑀢𑁄 𑀩𑀳𑀺𑀲𑀻𑀫𑀝𑁆𑀞𑀲𑁆𑀲 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀲𑁆𑀲𑀧𑀺 𑀧𑀸𑀧𑀼𑀡𑀸𑀢𑀺. ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀤𑀫𑁆𑀫𑀻𑀢𑀺 𑀯𑀼𑀢𑁆𑀢𑁂 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀆𑀕𑀫𑀦𑀢𑁄 𑀏𑀯𑀁 𑀯𑀢𑁆𑀯𑀸 𑀤𑁂𑀦𑁆𑀢𑁂 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀓𑀸𑀭𑀓𑀸𑀦𑀜𑁆𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀁 𑀤𑀸𑀬𑀓𑀸𑀦𑀁 𑀯𑀘𑀦𑀸𑀦𑀼𑀭𑀽𑀧𑀫𑁂𑀯 𑀤𑀸𑀦𑀲𑁆𑀲 𑀧𑀯𑀢𑁆𑀢𑀦𑀢𑁄 ‘‘𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫) 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺.

𑀏𑀯𑀁 𑀇𑀤𑀸𑀦𑀺 𑀤𑀸𑀬𑀓𑀸 𑀬𑁂𑀪𑀼𑀬𑁆𑀬𑁂𑀦 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀲𑀢𑁂𑀲𑀼 𑀲𑀳𑀲𑁆𑀲𑁂𑀲𑀼 𑀏𑀓𑁄𑀬𑁂𑀯 𑀧𑀡𑁆𑀟𑀺𑀢𑁄 𑀩𑀳𑀼𑀲𑁆𑀲𑀼𑀢𑁄 𑀤𑀸𑀬𑀓𑁄 𑀲𑀗𑁆𑀖𑀲𑁆𑀲 𑀤𑀤𑁂𑀬𑁆𑀬, 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑀜𑁆𑀘 𑀲𑀗𑁆𑀖𑀺𑀓𑀪𑀯𑀦𑀢𑁆𑀣𑀸𑀬 𑀅𑀓𑀭𑀺𑀬𑀫𑀸𑀦𑀁 𑀦 𑀜𑀢𑁆𑀢𑀺𑀬𑀸 𑀓𑀫𑁆𑀫𑀯𑀸𑀘𑀸𑀬 𑀘 𑀅𑀭𑀳𑀁 𑀳𑁄𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀯𑀺𑀭𑁄𑀥𑀢𑁄. 𑀓𑀣𑀁 𑀯𑀺𑀭𑁄𑀥𑁄𑀢𑀺 𑀘𑁂? 𑀜𑀢𑁆𑀢𑀺𑀬𑀸 𑀓𑀫𑁆𑀫𑀯𑀸𑀘𑀸𑀬 𑀘 ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀓𑀣𑀺𑀦𑀘𑀻𑀯𑀭𑀲𑁆𑀲 𑀲𑀗𑁆𑀖𑀺𑀓𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀤𑀸𑀦𑀺 𑀧𑀦 𑀢𑀁 𑀘𑀻𑀯𑀭𑀁 ‘‘𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀁 𑀧𑀼𑀕𑁆𑀕𑀮𑀺𑀓’’𑀦𑁆𑀢𑀺 𑀯𑀘𑀦𑀢𑁆𑀣𑀸𑀦𑀼𑀭𑀽𑀧𑀢𑁄 𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀺, 𑀏𑀯𑀫𑁆𑀧𑀺 𑀯𑀺𑀭𑁄𑀥𑁄. ‘‘𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀏𑀢𑁆𑀣 𑀘 𑀲𑀗𑁆𑀖𑁄𑀢𑀺 𑀥𑀸𑀢𑀼𑀬𑀸 𑀓𑀢𑁆𑀢𑀸 𑀳𑁄𑀢𑀺, 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀧𑀤𑀸𑀦𑀁, 𑀇𑀥 𑀧𑀦 𑀲𑀗𑁆𑀖𑀲𑁆𑀲 𑀢𑀲𑁆𑀫𑀺𑀁 𑀓𑀣𑀺𑀦𑀘𑀻𑀯𑀭𑁂 𑀅𑀦𑀺𑀲𑁆𑀲𑀭𑀪𑀸𑀯𑀢𑁄 𑀲𑀗𑁆𑀖𑁄 𑀓𑀢𑁆𑀢𑀸 𑀦 𑀳𑁄𑀢𑀺, 𑀪𑀺𑀓𑁆𑀔𑀼 𑀧𑀝𑀺𑀕𑁆𑀕𑀸𑀳𑀮𑀓𑁆𑀔𑀡𑀸𑀪𑀸𑀯𑀢𑁄 𑀲𑀫𑁆𑀧𑀤𑀸𑀦𑀁 𑀦 𑀳𑁄𑀢𑀺, 𑀏𑀯𑀫𑁆𑀧𑀺 𑀯𑀺𑀭𑁄𑀥𑁄. 𑀤𑀸𑀬𑀓𑁂𑀦 𑀧𑀦 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀪𑀽𑀢𑀁 𑀓𑀣𑀺𑀦𑀘𑀻𑀯𑀭𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀇𑀤𑀸𑀦𑀺 𑀫𑀦𑀼𑀲𑁆𑀲𑀸 ‘‘𑀜𑀢𑁆𑀢𑀻’’𑀢𑀺 𑀯𑁄𑀳𑀭𑀦𑁆𑀢𑀺, 𑀢𑀜𑁆𑀘 𑀘𑀻𑀯𑀭𑀁 ‘‘𑀜𑀢𑁆𑀢𑀺𑀮𑀤𑁆𑀥𑀘𑀻𑀯𑀭’’𑀦𑁆𑀢𑀺, 𑀢𑀁 𑀘𑀻𑀯𑀭𑀤𑀸𑀬𑀓𑀜𑁆𑀘 ‘‘𑀜𑀢𑁆𑀢𑀺𑀮𑀤𑁆𑀥𑀤𑀸𑀬𑀓𑁄’’𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀺𑀓𑀘𑀻𑀯𑀭𑀫𑁂𑀯 𑀜𑀢𑁆𑀢𑀺𑀮𑀤𑁆𑀥𑀁 𑀳𑁄𑀢𑀺, 𑀦𑁄 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑀁. 𑀜𑀢𑁆𑀢𑀺𑀮𑀤𑁆𑀥𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀢𑀁 𑀘𑀻𑀯𑀭𑀁 𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀺. 𑀓𑀲𑁆𑀫𑀸? 𑀅𑀢𑁆𑀣𑀸𑀭𑀓𑀧𑀼𑀕𑁆𑀕𑀮𑀲𑁆𑀲 𑀘𑀻𑀯𑀭𑀪𑀸𑀯𑀢𑁄𑀢𑀺.

𑀅𑀣𑀸𑀧𑀺 𑀯𑀤𑀦𑁆𑀢𑀺 ‘‘𑀤𑀺𑀦𑁆𑀦𑀦𑁆𑀢𑀺 𑀧𑀸𑀞𑀜𑁆𑀘 ‘𑀲𑀸𑀥𑁂𑀦𑁆𑀢𑀻’𑀢𑀺 𑀧𑀸𑀞𑀜𑁆𑀘 ‘𑀆𑀦𑀺𑀲𑀁𑀲𑀁 𑀮𑀪𑀦𑁆𑀢𑀻’𑀢𑀺 𑀧𑀸𑀞𑀜𑁆𑀘 𑀉𑀧𑀦𑀺𑀥𑀸𑀬 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻’’𑀢𑀺, 𑀢𑀢𑁆𑀣𑀸𑀬𑀫𑀸𑀘𑀭𑀺𑀬𑀸𑀦𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦𑀸’’𑀢𑀺 𑀏𑀢𑁆𑀣 𑀤𑀸-𑀥𑀸𑀢𑀼𑀬𑀸 𑀲𑀗𑁆𑀖𑁂𑀦𑀸𑀢𑀺 𑀓𑀢𑁆𑀢𑀸, 𑀇𑀤𑀦𑁆𑀢𑀺 𑀓𑀫𑁆𑀫𑀁, 𑀇𑀫𑀲𑁆𑀲 𑀓𑀣𑀺𑀦𑀘𑀻𑀯𑀭𑀲𑁆𑀲 𑀲𑀗𑁆𑀖𑀺𑀓𑀢𑁆𑀢𑀸 𑀲𑀗𑁆𑀖𑁂𑀦 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀓𑀣𑀺𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁 𑀳𑁄𑀢𑀻𑀢𑀺. ‘‘𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀻𑀢𑀺 𑀏𑀢𑁆𑀣 𑀓𑁂 𑀮𑀪𑀦𑁆𑀢𑀻𑀢𑀺 𑀓𑁂 𑀲𑀸𑀥𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀚𑀦𑀸 𑀲𑀸𑀥𑁂𑀦𑁆𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀜𑁆𑀘 𑀚𑀦𑀸𑀢𑀺 𑀲𑀗𑁆𑀖𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀓𑀣𑀺𑀦𑀦𑁆𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺. 𑀆𑀦𑀺𑀲𑀁𑀲𑀁 𑀮𑀪𑀦𑁆𑀢𑀻𑀢𑀺 𑀏𑀢𑁆𑀣 𑀘 𑀲𑀗𑁆𑀖𑀺𑀓𑀢𑁆𑀢𑀸 𑀲𑀩𑁆𑀩𑁂 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀽 𑀆𑀦𑀺𑀲𑀁𑀲𑀁 𑀮𑀪𑀦𑁆𑀢𑀺, 𑀇𑀫𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀓𑀣𑀺𑀦𑀦𑁆𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺.

𑀢𑀢𑁆𑀭𑀸𑀧𑁆𑀬𑁂𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 𑀧𑀼𑀩𑁆𑀩𑁂𑀤𑀸𑀬𑀓𑀸 𑀘𑀢𑁆𑀢𑀸𑀭𑁄𑀧𑀺 𑀧𑀘𑁆𑀘𑀬𑁂 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀖𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀓𑀣𑀸 𑀅𑀢𑀺𑀯𑀺𑀢𑁆𑀣𑀸𑀭𑀸 𑀳𑁄𑀢𑀺. 𑀅𑀧𑁆𑀧𑀓𑀢𑁄 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀓𑀣𑀺𑀦𑀘𑀻𑀯𑀭𑀁 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀸𑀥𑁂𑀦𑁆𑀢𑀻𑀢𑀺 𑀘 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸 𑀘𑀢𑁆𑀢𑀸𑀭𑁄, 𑀧𑀝𑀺𑀕𑁆𑀕𑀸𑀳𑀓𑁄 𑀏𑀓𑁄𑀢𑀺 𑀧𑀜𑁆𑀘 𑀚𑀦𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀁 𑀲𑀸𑀥𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀆𑀦𑀺𑀲𑀁𑀲𑀁 𑀮𑀪𑀦𑁆𑀢𑀻𑀢𑀺 𑀇𑀤𑀜𑁆𑀘 𑀅𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀼𑀫𑁄𑀤𑀦𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀆𑀦𑀺𑀲𑀁𑀲𑀮𑀸𑀪𑀫𑁂𑀯 𑀯𑀼𑀢𑁆𑀢𑀁, 𑀦 𑀏𑀢𑁂𑀳𑀺 𑀧𑀸𑀞𑁂𑀳𑀺 ‘‘𑀓𑀣𑀺𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀺𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀓𑀲𑁆𑀲 𑀤𑀺𑀦𑁆𑀦𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀧𑀸𑀞𑀜𑁆𑀘 (𑀫𑀳𑀸𑀯. 𑁩𑁦𑁭) ‘‘𑀲𑀗𑁆𑀖𑁄 𑀅𑀚𑁆𑀚 𑀓𑀣𑀺𑀦𑀤𑀼𑀲𑁆𑀲𑀁 𑀮𑀪𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑁂𑀢𑀺, 𑀅𑀬𑀁 𑀦𑀺𑀘𑀬𑀲𑀦𑁆𑀦𑀺𑀥𑀻’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀧𑀸𑀞𑀜𑁆𑀘 𑀤𑀺𑀲𑁆𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀲𑀗𑁆𑀖𑀲𑀦𑁆𑀢𑀓𑀪𑀽𑀢𑀁 𑀘𑀻𑀯𑀭𑀫𑁂𑀯 𑀤𑀸𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀁, 𑀲𑀗𑁆𑀖𑁄 𑀓𑀢𑁆𑀢𑀸, 𑀧𑀼𑀕𑁆𑀕𑀮𑁄 𑀲𑀫𑁆𑀧𑀤𑀸𑀦𑀁 𑀪𑀯𑀺𑀢𑀼𑀁 𑀅𑀭𑀳𑀪𑀸𑀯𑁄 𑀘 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀧𑀸𑀞𑀫𑁂𑀯 𑀉𑀧𑀦𑀺𑀥𑀸𑀬 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀏𑀯𑀁 𑀲𑀦𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀁 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀓𑀸𑀢𑀼𑀁 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀲𑀘𑁂 𑀲𑁄 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁄 𑀤𑀸𑀬𑀓𑀸𑀦𑀁 𑀏𑀯𑀁 𑀯𑀤𑀢𑀺 ‘‘𑀉𑀧𑀸𑀲𑀓 𑀤𑀸𑀦𑀁 𑀦𑀸𑀫 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀢𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀤𑁂𑀳𑀺, 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀸𑀭𑀳𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀯𑀸𑀘𑀸𑀬 𑀤𑀢𑁆𑀯𑀸 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀬𑀣𑀸𑀯𑀺𑀦𑀬𑀁 𑀅𑀢𑁆𑀣𑀢𑁂𑀬𑁂𑀯 𑀓𑀣𑀺𑀦𑀁 𑀦𑀸𑀫 𑀳𑁄𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀤𑀢𑁆𑀯𑀸 𑀧𑀼𑀕𑁆𑀕𑀮𑁂𑀦 𑀲𑀸𑀫𑀁𑀬𑁂𑀯 𑀅𑀢𑁆𑀣𑀢𑁂, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀤𑁂𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀧𑀺𑀢𑁂𑀧𑀺 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀁. 𑀬𑀤𑀺 𑀧𑀦 𑀤𑀸𑀬𑀓𑁄 𑀅𑀧𑁆𑀧𑀲𑁆𑀲𑀼𑀢𑀢𑀸𑀬 ‘‘𑀦𑀸𑀳𑀁, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀚𑀸𑀦𑀸𑀫𑀺, 𑀇𑀫𑀁 𑀘𑀻𑀯𑀭𑀁 𑀢𑀼𑀫𑁆𑀳𑀸𑀓𑀫𑁂𑀯 𑀤𑀫𑁆𑀫𑀻’’𑀢𑀺 𑀯𑀓𑁆𑀔𑀢𑀺, 𑀏𑀯𑀁 𑀲𑀢𑀺 𑀧𑀼𑀕𑁆𑀕𑀮𑀺𑀓𑀯𑀲𑁂𑀦𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁆𑀧𑀺 𑀲𑀗𑁆𑀖𑀺𑀓𑀁 𑀳𑁄𑀢𑀺.

𑀬𑀤𑀺 𑀏𑀯𑀁 𑀲𑀫𑀡𑁂𑀦𑁂𑀯 𑀲𑀫𑀡𑀲𑁆𑀲 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀓𑀣𑀁 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀁 𑀪𑀯𑁂𑀬𑁆𑀬𑀸𑀢𑀺? 𑀦𑁄 𑀦 𑀪𑀯𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) ‘‘𑀓𑀣𑀺𑀦𑀁 𑀓𑁂𑀦 𑀤𑀺𑀦𑁆𑀦𑀁 𑀯𑀝𑁆𑀝𑀢𑀺? 𑀬𑁂𑀦 𑀓𑁂𑀦𑀘𑀺 𑀤𑁂𑀯𑁂𑀦 𑀯𑀸 𑀫𑀦𑀼𑀲𑁆𑀲𑁂𑀦 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑁂𑀦 𑀤𑀺𑀦𑁆𑀦𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀓𑀲𑁆𑀫𑀸 𑀧𑀭𑀫𑁆𑀧𑀭𑀪𑀽𑀢𑁂𑀳𑀺 𑀆𑀘𑀭𑀺𑀬𑁂𑀳𑀺 𑀜𑀢𑁆𑀢𑀺𑀮𑀤𑁆𑀥𑀘𑀻𑀯𑀭𑀢𑁄 𑀅𑀯𑀲𑁂𑀲𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀪𑀸𑀚𑁂𑀢𑁆𑀯𑀸 𑀏𑀯 𑀧𑀭𑀺𑀪𑀼𑀜𑁆𑀚𑀺𑀢𑀸𑀦𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀕𑀢𑀅𑀦𑀉𑀲𑀸𑀭𑁂𑀦𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀓𑁂𑀘𑀺 𑀩𑀳𑀽𑀦𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀩𑀳𑀼𑀲𑁆𑀲𑀼𑀢𑀸𑀧𑀺 𑀓𑁂𑀘𑀺 𑀣𑁂𑀭𑀸 𑀅𑀭𑀼𑀘𑁆𑀘𑀦𑁆𑀢𑀸𑀧𑀺 𑀧𑀯𑁂𑀡𑀺𑀪𑁂𑀤𑀪𑀬𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀧𑀭𑁂 𑀭𑀼𑀘𑀺𑀯𑀲𑁂𑀦 𑀅𑀢𑁆𑀣𑀜𑁆𑀘 𑀅𑀥𑀺𑀧𑁆𑀧𑀸𑀬𑀜𑁆𑀘 𑀧𑀭𑀺𑀡𑀸𑀫𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀧𑀓𑀭𑀡𑀫𑁂𑀯𑀸𑀦𑀼𑀕𑀢𑀪𑀺𑀓𑁆𑀔𑀽 𑀧𑀦 𑀬𑀣𑀸𑀧𑀓𑀭𑀡𑀸𑀕𑀢𑀫𑁂𑀯 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀜𑁆𑀘 𑀧𑀼𑀕𑁆𑀕𑀮𑀺𑀓𑀜𑁆𑀘 𑀅𑀫𑀺𑀲𑁆𑀲𑀁 𑀓𑀢𑁆𑀯𑀸, 𑀓𑀸𑀮𑀘𑀻𑀯𑀭𑀜𑁆𑀘 𑀅𑀓𑀸𑀮𑀘𑀻𑀯𑀭𑀜𑁆𑀘 𑀅𑀫𑀺𑀲𑁆𑀲𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁭𑁩𑁮) ‘‘𑀣𑀽𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀓𑀸𑀮𑀘𑀻𑀯𑀭𑀁 ‘𑀓𑀸𑀮𑀘𑀻𑀯𑀭’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑀸𑀧𑁂𑀲𑁆𑀲𑀢𑀺, 𑀅𑀣 𑀪𑀕𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀁 𑀧𑀜𑁆𑀜𑀧𑁂𑀲𑀻’’𑀢𑀺 𑀆𑀕𑀢𑀁, 𑀢𑀲𑁆𑀫𑀸 𑀮𑀚𑁆𑀚𑀻𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑁂𑀓-𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀬𑁄 𑀧𑀓𑀭𑀡𑁂 𑀑𑀮𑁄𑀓𑁂𑀢𑁆𑀯𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀓𑀭𑀡𑀫𑁂𑀯𑀸𑀦𑀼𑀕𑀦𑁆𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁 𑀓𑀺𑀭𑀺𑀬𑀁 𑀲𑀤𑁆𑀤𑀳𑀺𑀢𑀩𑁆𑀩𑀁, 𑀦 𑀘 𑀅𑀦𑀼𑀕𑀦𑁆𑀢𑀩𑁆𑀩𑀁. 𑀪𑀕𑀯𑀢𑁄 𑀳𑀺 𑀥𑀭𑀫𑀸𑀦𑀓𑀸𑀮𑁂 𑀯𑀸 𑀢𑀢𑁄 𑀧𑀘𑁆𑀙𑀸 𑀯𑀸 𑀧𑀼𑀩𑁆𑀩𑁂 𑀤𑀸𑀬𑀓𑀸 𑀬𑁂𑀪𑀼𑀬𑁆𑀬𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀗𑁆𑀖𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀲𑁆𑀲 𑀲𑀗𑁆𑀖𑀺𑀓𑀘𑀻𑀯𑀭𑀲𑁆𑀲 𑀘 𑀩𑀸𑀳𑀼𑀮𑁆𑀮𑀢𑁄 𑀧𑀼𑀩𑁆𑀩𑀸𑀘𑀭𑀺𑀬𑀸 𑀲𑀗𑁆𑀖𑀲𑁆𑀲 𑀪𑀸𑀚𑁂𑀢𑁆𑀯𑀸 𑀏𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀼.

𑀇𑀤𑀸𑀦𑀺 𑀧𑀦 𑀤𑀸𑀬𑀓𑀸 𑀬𑁂𑀪𑀼𑀬𑁆𑀬𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁂𑀦𑀸𑀲𑀦𑀫𑁆𑀧𑀺 𑀅𑀪𑀺𑀦𑀯𑀪𑀽𑀢𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀩𑀳𑀼𑀮𑀁 𑀳𑁄𑀢𑀺, 𑀘𑀻𑀯𑀭𑀫𑁆𑀧𑀺 𑀧𑀼𑀕𑁆𑀕𑀮𑀺𑀓𑀫𑁂𑀯 𑀩𑀳𑀼𑀮𑀁. 𑀤𑀮𑀺𑀤𑁆𑀤𑀸𑀧𑀺 𑀲𑀼𑀢𑁆𑀢𑀓𑀦𑁆𑀢𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀇𑀫𑀁 𑀘𑀻𑀯𑀭𑀁 𑀓𑀣𑀺𑀦𑀓𑀸𑀮𑁂 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀢𑀣𑁂𑀯 𑀯𑀢𑁆𑀯𑀸 𑀘 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺, 𑀫𑀳𑀤𑁆𑀥𑀦𑀸 𑀘 𑀲𑀸𑀝𑀓𑀲𑁆𑀲 𑀓𑀻𑀡𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀓𑀣𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀤𑀸𑀦𑀓𑀸𑀮𑁂 𑀘 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑁂𑀳𑀻’’𑀢𑀺 𑀧𑀼𑀢𑁆𑀢𑀤𑀸𑀲𑀸𑀤𑀬𑁄 𑀯𑀸 𑀧𑁂𑀲𑁂𑀦𑁆𑀢𑀺, 𑀲𑀸𑀫𑀁 𑀯𑀸 𑀕𑀦𑁆𑀢𑁆𑀯𑀸 𑀘𑀻𑀯𑀭𑀁 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀸𑀤𑀫𑀽𑀮𑁂 𑀯𑀸 𑀳𑀢𑁆𑀣𑁂 𑀯𑀸 𑀞𑀧𑁂𑀢𑁆𑀯𑀸 ‘‘𑀇𑀫𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 𑀤𑁂𑀦𑁆𑀢𑀺, 𑀲𑀢𑁂𑀲𑀼 𑀯𑀸 𑀲𑀳𑀲𑁆𑀲𑁂𑀲𑀼 𑀯𑀸 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 ‘‘𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀤𑀸𑀦𑀢𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀜𑀢𑁆𑀯𑀸 ‘‘𑀇𑀫𑀁 𑀓𑀣𑀺𑀦𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 𑀤𑁂𑀢𑀺, 𑀢𑀲𑁆𑀲 𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀳𑁄𑀢𑀺. 𑀲𑀘𑁂 𑀧𑀦 𑀤𑀸𑀬𑀓𑁄 𑀧𑀼𑀕𑁆𑀕𑀮𑀲𑁆𑀲 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀼𑀕𑁆𑀕𑀮𑁄 𑀧𑀦 𑀢𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀫𑀺𑀘𑁆𑀙𑀦𑁆𑀢𑁄 𑀤𑀓𑁆𑀔𑀺𑀡𑀸-𑀯𑀺𑀪𑀗𑁆𑀕𑀲𑀼𑀢𑁆𑀢𑀸𑀤𑀺𑀥𑀫𑁆𑀫𑀤𑁂𑀲𑀦𑀸𑀬 (𑀫. 𑀦𑀺. 𑁩.𑁩𑁭𑁬 𑀆𑀤𑀬𑁄) 𑀧𑀼𑀕𑁆𑀕𑀮𑀺𑀓𑀤𑀸𑀦𑀢𑁄 𑀲𑀗𑁆𑀖𑀺𑀓𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀢𑀯 𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀤𑁂𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀤𑀸𑀬𑀓𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀇𑀫𑀁 𑀓𑀣𑀺𑀦𑀘𑀻𑀯𑀭𑀁 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸 𑀤𑁂𑀢𑀺, 𑀏𑀯𑀫𑁆𑀧𑀺 𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀳𑁄𑀢𑀺.

𑀬𑀤𑀺 𑀧𑀦 𑀪𑀺𑀓𑁆𑀔𑀼𑀦𑀸 𑀉𑀬𑁆𑀬𑁄𑀚𑀺𑀢𑁄𑀧𑀺 𑀤𑀼𑀧𑁆𑀧𑀜𑁆𑀜𑁄 𑀤𑀸𑀬𑀓𑁄 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀢𑀺, 𑀢𑀲𑁆𑀲 𑀲𑀸 𑀤𑀓𑁆𑀔𑀺𑀡𑀸 𑀧𑀼𑀕𑁆𑀕𑀮𑀕𑀢𑀸 𑀳𑁄𑀢𑀺. 𑀅𑀣 𑀧𑀦 𑀲𑁄 𑀧𑀼𑀕𑁆𑀕𑀮𑁄 𑀲𑀬𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀚𑀢𑀺, 𑀏𑀯𑀫𑁆𑀧𑀺 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀢𑀁 𑀲𑀗𑁆𑀖𑀺𑀓𑀯𑀲𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀬𑀤𑀺 𑀧𑀦 𑀤𑀸𑀬𑀓𑁄𑀧𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀢𑀺, 𑀧𑀼𑀕𑁆𑀕𑀮𑁄𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦 𑀧𑀭𑀺𑀘𑁆𑀘𑀚𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀁 𑀘𑀻𑀯𑀭𑀁 𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀺, 𑀦 𑀓𑀣𑀺𑀦𑀓𑀸𑀮𑀫𑀢𑁆𑀢𑁂𑀦 𑀯𑀸 𑀓𑀣𑀺𑀦𑀯𑀘𑀦𑀫𑀢𑁆𑀢𑁂𑀦 𑀯𑀸 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀇𑀤𑀸𑀦𑀺 𑀧𑀦 𑀇𑀫𑀺𑀦𑀸 𑀦𑀬𑁂𑀦 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑀁𑀬𑁂𑀯 𑀩𑀳𑀼𑀮𑀁 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀧𑀯𑁂𑀡𑀺𑀁 𑀅𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀲𑀗𑁆𑀖𑀺𑀓𑀁 𑀯𑀺𑀬 𑀓𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀬𑀤𑀺 𑀫𑀼𑀔𑁆𑀬𑀢𑁄 𑀲𑀗𑁆𑀖𑀺𑀓𑀁 𑀲𑀺𑀬𑀸, 𑀲𑀗𑁆𑀖𑁂𑀦 𑀤𑀺𑀦𑁆𑀦𑀢𑁄 𑀧𑀭𑀁 𑀏𑀓𑀲𑀽𑀘𑀺𑀫𑀢𑁆𑀢𑀫𑁆𑀧𑀺 𑀧𑀼𑀕𑁆𑀕𑀮𑁄 𑀅𑀥𑀺𑀓𑀁 𑀕𑀡𑁆𑀳𑀺𑀢𑀼𑀁 𑀦 𑀮𑀪𑁂𑀬𑁆𑀬.

𑀏𑀓𑀘𑁆𑀘𑁂 𑀣𑁂𑀭𑀸 𑀲𑀗𑁆𑀖𑀺𑀓𑀦𑁆𑀢𑀺 𑀧𑀦 𑀯𑀤𑀦𑁆𑀢𑀺, 𑀪𑀸𑀚𑀦𑀓𑀸𑀮𑁂 𑀧𑀦 𑀇𑀲𑁆𑀲𑀭𑀯𑀢𑀸𑀬 𑀬𑀣𑀸𑀭𑀼𑀘𑀺 𑀯𑀺𑀘𑀸𑀭𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀫𑀼𑀔𑁆𑀬𑀲𑀗𑁆𑀖𑀺𑀓𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀅𑀪𑀸𑀚𑁂𑀢𑀼𑀓𑀸𑀫𑀫𑁆𑀧𑀺 𑀧𑀼𑀕𑁆𑀕𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀪𑀸𑀚𑀸𑀧𑁂𑀦𑁆𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀸𑀢𑀸 𑀧𑀺𑀢𑀸 𑀜𑀸𑀢𑀓𑀸 𑀉𑀧𑀸𑀲𑀓𑀸𑀤𑀬𑁄 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀤𑁂𑀫, 𑀅𑀫𑁆𑀳𑀸𑀓𑀁 𑀜𑀸𑀢𑀓𑀪𑀺𑀓𑁆𑀔𑀼𑀲𑁆𑀲 𑀤𑁂𑀫, 𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀲𑁆𑀲 𑀤𑁂𑀫𑀸’’𑀢𑀺, 𑀅𑀜𑁆𑀜𑁂𑀧𑀺 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀤𑀸𑀬𑀓𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑁂𑀫𑀸’’𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀧𑀭𑀫𑁆𑀫𑀼𑀔𑀸𑀧𑀺 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀲𑀫𑁆𑀫𑀼𑀔𑀸𑀧𑀺 𑀧𑀸𑀤𑀫𑀽𑀮𑁂 𑀯𑀸 𑀳𑀢𑁆𑀣𑁂 𑀯𑀸 𑀞𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀺, 𑀲𑀗𑁆𑀖𑀁 𑀆𑀫𑀲𑀺𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀸𑀬𑀢𑁆𑀢𑀁 𑀦 𑀳𑁄𑀢𑀺, ‘‘𑀓𑀣𑀺𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀓𑀣𑀺𑀦𑀁 𑀤𑀸𑀢𑀼𑀁 𑀕𑀢𑁄’’𑀢𑀺 𑀯𑀸 ‘‘𑀓𑀣𑀺𑀦𑀘𑀻𑀯𑀭’’𑀦𑁆𑀢𑀺 𑀯𑀸 𑀧𑀼𑀩𑁆𑀩𑀸𑀧𑀭𑀓𑀸𑀮𑁂𑀲𑀼 𑀯𑀘𑀦𑀁 𑀧𑀦 𑀫𑀼𑀔𑁆𑀬𑀓𑀣𑀺𑀦𑀪𑀽𑀢𑀲𑁆𑀲 𑀲𑀗𑁆𑀖𑀺𑀓𑀘𑀻𑀯𑀭𑀲𑁆𑀲 𑀓𑀸𑀮𑁂 𑀤𑀺𑀦𑁆𑀦𑀢𑁆𑀢𑀸 𑀢𑀤𑀼𑀧𑀘𑀸𑀭𑀢𑁄 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀓𑀺𑀁? ‘‘𑀉𑀧𑁄𑀲𑀣𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁 𑀪𑀢𑁆𑀢𑀁 𑀘𑀼𑀤𑁆𑀤𑀲𑀲𑀼 𑀲𑀗𑁆𑀖𑀺𑀓𑀪𑀢𑁆𑀢𑁂𑀲𑀼 𑀅𑀦𑁆𑀢𑁄𑀕𑀥𑀁 𑀫𑀼𑀔𑁆𑀬𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀸 𑀤𑀸𑀬𑀓𑀸 𑀲𑀸𑀬𑀁 𑀪𑀼𑀜𑁆𑀚𑀺𑀢𑀩𑁆𑀩𑀪𑀢𑁆𑀢𑀪𑀸𑀕𑀁 𑀲𑀗𑁆𑀖𑀲𑁆𑀲 𑀤𑁂𑀦𑁆𑀢𑀺, 𑀢𑀁 𑀲𑀗𑁆𑀖𑁄 𑀲𑀮𑀸𑀓𑀪𑀢𑁆𑀢𑀁 𑀯𑀺𑀬 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀇𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀇𑀤𑀸𑀦𑀺 𑀧𑀦 𑀤𑀸𑀬𑀓𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀲𑁆𑀲 𑀯𑀸 𑀜𑀸𑀢𑀺𑀪𑀺𑀓𑁆𑀔𑀼𑀲𑁆𑀲 𑀯𑀸 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀪𑀢𑁆𑀢𑀁 𑀤𑁂𑀦𑁆𑀢𑀺, 𑀢𑀁 𑀲𑀗𑁆𑀖𑀲𑁆𑀲 𑀅𑀤𑀺𑀦𑁆𑀦𑀢𑁆𑀢𑀸 𑀲𑀗𑁆𑀖𑀺𑀓𑀁 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀉𑀧𑁄𑀲𑀣𑀤𑀺𑀯𑀲𑁂 𑀤𑀺𑀦𑁆𑀦𑀢𑁆𑀢𑀸 𑀫𑀼𑀔𑁆𑀬𑀯𑀲𑁂𑀦 𑀧𑀯𑀢𑁆𑀢𑀉𑀧𑁄𑀲𑀣𑀪𑀢𑁆𑀢𑀁 𑀯𑀺𑀬 𑀢𑀤𑀼𑀧𑀘𑀸𑀭𑁂𑀦 ‘‘𑀉𑀧𑁄𑀲𑀣𑀪𑀢𑁆𑀢’’𑀦𑁆𑀢𑀺 𑀯𑁄𑀳𑀭𑀻𑀬𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀬𑁂𑀪𑀼𑀬𑁆𑀬𑁂𑀦 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑀺𑀦𑁆𑀦𑀢𑁆𑀢𑀸 𑀧𑀼𑀕𑁆𑀕𑀮𑀺𑀓𑀪𑀽𑀢𑀁 𑀘𑀻𑀯𑀭𑀁 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀭𑀳𑀁 𑀦 𑀳𑁄𑀢𑀺, 𑀲𑀗𑁆𑀖𑀺𑀓𑀫𑁂𑀯 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀭𑀳𑀁 𑀳𑁄𑀢𑀺, 𑀢𑀤𑁂𑀯 𑀘 𑀧𑀜𑁆𑀘𑀸𑀦𑀺𑀲𑀁𑀲𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀡𑁆𑀟𑀺𑀢𑁂𑀦 𑀧𑀼𑀕𑁆𑀕𑀮𑁂𑀦 ‘‘𑀉𑀧𑀸𑀲𑀓𑀸 𑀲𑀗𑁆𑀖𑁂 𑀤𑁂𑀣, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀬𑁄𑀚𑁂𑀢𑁆𑀯𑀸 𑀤𑀸𑀧𑁂𑀢𑀩𑁆𑀩𑀁, 𑀲𑀬𑀁 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀏𑀯𑀁 𑀧𑀭𑀺𑀘𑁆𑀘𑀚𑀺𑀢𑀢𑁆𑀢𑀸 𑀲𑀗𑁆𑀖𑀺𑀓𑀪𑀽𑀢𑀁 𑀘𑀻𑀯𑀭𑀁 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀭𑀳𑀜𑁆𑀘 𑀳𑁄𑀢𑀺 𑀧𑀜𑁆𑀘𑀸𑀦𑀺𑀲𑀁𑀲𑀦𑀺𑀧𑁆𑀨𑀸𑀤𑀓𑀜𑁆𑀘. 𑀏𑀯𑀁 𑀦𑀺𑀬𑁄𑀚𑀦𑀜𑁆𑀘 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 (𑀫. 𑀦𑀺. 𑁩.𑁩𑁭𑁬) 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑀁 𑀅𑀦𑀼𑀕𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀕𑀼𑀪𑀢𑁆𑀢𑀜𑁆𑀘 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀧𑀼𑀘𑁆𑀙𑀺𑀢𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀧𑀼𑀘𑁆𑀙𑀺𑀢𑁂 𑀧𑀦 𑀏𑀯𑀁 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀔𑀮𑀺𑀫𑀓𑁆𑀔𑀺𑀢𑀲𑀸𑀝𑀓𑁄𑀢𑀺 𑀅𑀳𑀢𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀝𑁆𑀞𑀼 𑀥𑁄𑀯𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀲𑀧𑀼𑀩𑁆𑀩𑀓𑀭𑀡𑀁 𑀅𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑀺. 𑀥𑁄𑀯𑀦𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀓𑀭𑀡𑁂𑀦 𑀳𑀺 𑀯𑀺𑀘𑀸𑀭𑀡𑀙𑁂𑀤𑀦𑀩𑀦𑁆𑀥𑀦𑀸𑀦𑀺𑀧𑀺 𑀤𑀲𑁆𑀲𑀺𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀅𑀢𑁆𑀣𑀸𑀭𑀤𑀲𑁆𑀲𑀦𑁂𑀦 𑀧𑀘𑁆𑀘𑀼𑀤𑁆𑀥𑀸𑀭𑀅𑀥𑀺𑀝𑁆𑀞𑀸𑀦𑀸𑀦𑀺𑀧𑀺 𑀤𑀲𑁆𑀲𑁂𑀢𑀺. 𑀲𑀽𑀘𑀺𑀆𑀤𑀻𑀦𑀺 𑀘𑀻𑀯𑀭𑀓𑀫𑁆𑀫𑀼𑀧𑀓𑀭𑀡𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀩𑀳𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀦𑁆𑀢𑀺 𑀇𑀤𑀁 𑀧𑀦 𑀲𑀺𑀩𑁆𑀩𑀦𑀲𑁆𑀲 𑀉𑀧𑀓𑀭𑀡𑀦𑀺𑀤𑀲𑁆𑀲𑀦𑀁. 𑀢𑀤𑀳𑁂𑀯𑀸𑀢𑀺 𑀇𑀤𑀁 𑀧𑀦 𑀓𑀭𑀡𑀲𑀦𑁆𑀦𑀺𑀥𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀤𑀸𑀬𑀓𑀲𑁆𑀲 𑀳𑀢𑁆𑀣𑀢𑁄 𑀲𑀸𑀝𑀓𑀁 𑀮𑀤𑁆𑀥𑀤𑀺𑀯𑀲𑁂𑀬𑁂𑀯 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀩𑁆𑀩𑀁, 𑀏𑀯𑀁 𑀅𑀤𑁂𑀦𑁆𑀢𑁂 𑀦𑀺𑀘𑀬𑀲𑀦𑁆𑀦𑀺𑀥𑀺 𑀳𑁄𑀢𑀺. 𑀅𑀢𑁆𑀣𑀸𑀭𑀓𑁂𑀦𑀧𑀺 𑀲𑀗𑁆𑀖𑀢𑁄 𑀮𑀤𑁆𑀥𑀤𑀺𑀯𑀲𑁂𑀬𑁂𑀯 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀏𑀯𑀁 𑀅𑀓𑀭𑁄𑀦𑁆𑀢𑁂 𑀓𑀭𑀡𑀲𑀦𑁆𑀦𑀺𑀥𑀺 𑀳𑁄𑀢𑀺.

𑀅𑀜𑁆𑀜𑀸𑀦𑀺 𑀘 𑀩𑀳𑀽𑀦𑀺 𑀆𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀤𑁂𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑀭𑀺𑀢𑀩𑁆𑀩𑀲𑀸𑀝𑀓𑁄𑀬𑁂𑀯 𑀓𑀣𑀺𑀦𑀲𑀸𑀝𑀓𑁄 𑀦𑀸𑀫, 𑀢𑀢𑁄 𑀅𑀜𑁆𑀜𑁂 𑀲𑀸𑀝𑀓𑀸 𑀩𑀳𑀯𑁄𑀧𑀺 𑀓𑀣𑀺𑀦𑀸𑀦𑀺𑀲𑀁𑀲𑀸𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀘 ‘‘𑀓𑀣𑀺𑀦𑀸𑀦𑀺𑀲𑀁𑀲𑁄’’𑀢𑀺 𑀯𑀢𑁆𑀣𑀸𑀦𑀺𑀬𑁂𑀯 𑀯𑀼𑀢𑁆𑀢𑀸𑀦𑀺 𑀦 𑀅𑀕𑁆𑀖𑁄𑀢𑀺 𑀤𑀻𑀧𑁂𑀢𑀺. 𑀬𑀤𑀺 𑀅𑀕𑁆𑀖𑁄 𑀯𑀼𑀢𑁆𑀢𑁄 𑀲𑀺𑀬𑀸, 𑀏𑀯𑀁 𑀲𑀢𑀺 ‘‘𑀩𑀳𑁆𑀯𑀸𑀦𑀺𑀲𑀁𑀲𑀸𑀦𑀺 𑀓𑀣𑀺𑀦𑀯𑀢𑁆𑀣𑀸𑀦𑀺 𑀤𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀧𑀦 𑀅𑀯𑀢𑁆𑀯𑀸 ‘‘𑀩𑀳𑀽𑀦𑀺 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀜𑀸𑀬𑀢𑀺 ‘‘𑀦 𑀅𑀕𑁆𑀖𑁄 𑀯𑀼𑀢𑁆𑀢𑁄’’𑀢𑀺, 𑀢𑀲𑁆𑀫𑀸 𑀩𑀳𑁆𑀯𑀸𑀦𑀺𑀲𑀁𑀲𑀪𑀸𑀯𑁄 𑀅𑀕𑁆𑀖𑀯𑀲𑁂𑀦 𑀦 𑀕𑀳𑁂𑀢𑀩𑁆𑀩𑁄, 𑀅𑀣 𑀔𑁄 𑀯𑀢𑁆𑀣𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑁄𑀢𑀺. 𑀇𑀢𑀭𑁄𑀢𑀺 𑀅𑀜𑁆𑀜𑁄 𑀤𑀸𑀬𑀓𑁄. 𑀢𑀣𑀸 𑀢𑀣𑀸 𑀑𑀯𑀤𑀺𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄𑀢𑀺 ‘‘𑀉𑀧𑀸𑀲𑀓 𑀤𑀸𑀦𑀁 𑀦𑀸𑀫 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁, 𑀅𑀢𑁆𑀣𑀸𑀭𑁄 𑀧𑀦 𑀪𑀺𑀓𑁆𑀔𑀽𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄, 𑀢𑀲𑁆𑀫𑀸 𑀜𑀢𑁆𑀢𑀺𑀮𑀤𑁆𑀥𑀫𑁆𑀧𑀺 𑀅𑀮𑀤𑁆𑀥𑀫𑁆𑀧𑀺 𑀫𑀳𑀧𑁆𑀨𑀮𑀫𑁂𑀯𑀸’’𑀢𑀺 𑀯𑀸 ‘‘𑀉𑀧𑀸𑀲𑀓 𑀅𑀬𑀫𑁆𑀧𑀺 𑀤𑀸𑀬𑀓𑁄 𑀲𑀗𑁆𑀖𑀲𑁆𑀲𑁂𑀯 𑀤𑁂𑀢𑀺, 𑀢𑁆𑀯𑀫𑁆𑀧𑀺 𑀲𑀗𑁆𑀖𑀲𑁆𑀲𑁂𑀯 𑀤𑁂𑀲𑀺, 𑀪𑀕𑀯𑀢𑀸 𑀘 𑁋

‘𑀬𑁄 𑀲𑀻𑀮𑀯𑀸 𑀲𑀻𑀮𑀯𑀦𑁆𑀢𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁;

𑀥𑀫𑁆𑀫𑁂𑀦 𑀮𑀤𑁆𑀥𑀁 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁;

𑀢𑀁 𑀯𑁂 𑀤𑀸𑀦𑀁 𑀯𑀺𑀧𑀼𑀮𑀨𑀮𑀦𑁆𑀢𑀺 𑀩𑁆𑀭𑀽𑀫𑀻’𑀢𑀺. (𑀫. 𑀦𑀺. 𑁩.𑁩𑁮𑁨) 𑁋

𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀧𑁆𑀨𑀮𑀫𑁂𑀯𑀸’’𑀢𑀺 𑀯𑀸 𑀇𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀜𑁆𑀜𑀸𑀧𑁂𑀢𑀩𑁆𑀩𑁄.

𑀬𑀲𑁆𑀲 𑀲𑀗𑁆𑀖𑁄 𑀓𑀣𑀺𑀦𑀘𑀻𑀯𑀭𑀁 𑀤𑁂𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀬𑁄 𑀚𑀺𑀡𑁆𑀡𑀘𑀻𑀯𑀭𑁄 𑀳𑁄𑀢𑀺 𑀪𑀺𑀓𑁆𑀔𑀼, 𑀢𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑀺 𑀪𑀺𑀓𑁆𑀔𑀽 𑁋

‘‘𑀧𑀝𑀺𑀕𑁆𑀕𑀳𑀡𑀜𑁆𑀘 𑀲𑀧𑁆𑀧𑀸𑀬𑀁, 𑀜𑀢𑁆𑀢𑀺 𑀘 𑀅𑀦𑀼𑀲𑀸𑀯𑀦𑀁;

𑀓𑀧𑁆𑀧𑀩𑀺𑀦𑁆𑀤𑀼 𑀧𑀘𑁆𑀘𑀼𑀤𑁆𑀥𑀸𑀭𑁄, 𑀅𑀥𑀺𑀝𑁆𑀞𑀸𑀦𑀢𑁆𑀣𑀭𑀸𑀦𑀺 𑀘;

𑀦𑀺𑀬𑁄𑀚𑀦𑀸𑀦𑀼𑀫𑁄𑀤𑀸 𑀘, 𑀇𑀘𑁆𑀘𑀬𑀁 𑀓𑀣𑀺𑀦𑁂 𑀯𑀺𑀥𑀻’’𑀢𑀺. 𑁋

𑀇𑀫𑀁 𑀕𑀸𑀣𑀁 𑀆𑀳𑀭𑀺𑀢𑁆𑀯𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀬 𑀧𑀞𑀫𑀁 𑀓𑀣𑀺𑀦𑀘𑀻𑀯𑀭𑀲𑁆𑀲 𑀧𑀝𑀺𑀕𑁆𑀕𑀳𑀡𑀜𑁆𑀘 𑀲𑀧𑁆𑀧𑀸𑀬𑀧𑀼𑀘𑁆𑀙𑀦𑀜𑁆𑀘 𑀓𑀭𑁄𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘‘𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁…𑀧𑁂… 𑀧𑀼𑀩𑁆𑀩𑀓𑀭𑀡𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀅𑀢𑁆𑀣𑀸𑀭𑀁 𑀚𑀸𑀦𑀸𑀢𑀺, 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀧𑀮𑀺𑀩𑁄𑀥𑀁 𑀚𑀸𑀦𑀸𑀢𑀺, 𑀉𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀆𑀦𑀺𑀲𑀁𑀲𑀁 𑀚𑀸𑀦𑀸𑀢𑀻’’𑀢𑀺 𑀧𑀭𑀺𑀯𑀸𑀭𑀧𑀸𑀴𑀺𑀬𑀜𑁆𑀘 (𑀧𑀭𑀺. 𑁪𑁦𑁯),

‘‘𑀅𑀝𑁆𑀞𑀥𑀫𑁆𑀫𑀯𑀺𑀤𑁄 𑀪𑀺𑀓𑁆𑀔𑀼, 𑀓𑀣𑀺𑀦𑀢𑁆𑀣𑀸𑀭𑀫𑀭𑀳𑀢𑀺;

𑀧𑀼𑀩𑁆𑀩𑀧𑀘𑁆𑀘𑀼𑀤𑁆𑀥𑀸𑀭𑀸𑀥𑀺𑀝𑁆𑀞𑀸-𑀦𑀢𑁆𑀣𑀸𑀭𑁄 𑀫𑀸𑀢𑀺𑀓𑀸𑀢𑀺 𑀘;

𑀧𑀮𑀺𑀩𑁄𑀥𑁄 𑀘 𑀉𑀤𑁆𑀥𑀸𑀭𑁄, 𑀆𑀦𑀺𑀲𑀁𑀲𑀸 𑀧𑀦𑀝𑁆𑀞𑀺𑀫𑁂’’𑀢𑀺. (𑀯𑀺. 𑀯𑀺. 𑁨𑁭𑁦𑁪, 𑁨𑁭𑁦𑁬) 𑁋

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂 𑀘 𑀆𑀕𑀢𑁂𑀲𑀼 𑀅𑀝𑁆𑀞𑀲𑀼 𑀅𑀗𑁆𑀕𑁂𑀲𑀼 𑀅𑀦𑀸𑀕𑀢𑀢𑁆𑀢𑀸 𑀘 ‘‘𑀧𑀼𑀩𑁆𑀩𑀓𑀭𑀡𑀁 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁 𑀥𑁄𑀯𑀦𑁂𑀦 𑀯𑀺𑀘𑀸𑀭𑀡𑁂𑀦 𑀙𑁂𑀤𑀦𑁂𑀦 𑀩𑀦𑁆𑀥𑀦𑁂𑀦 𑀲𑀺𑀩𑁆𑀩𑀦𑁂𑀦 𑀭𑀚𑀦𑁂𑀦 𑀓𑀧𑁆𑀧𑀓𑀭𑀡𑁂𑀦𑀸’’𑀢𑀺 𑀧𑀭𑀺𑀯𑀸𑀭𑀧𑀸𑀴𑀺𑀬𑀜𑁆𑀘 (𑀧𑀭𑀺. 𑁪𑁦𑁮),

‘‘𑀥𑁄𑀯𑀦𑀜𑁆𑀘 𑀯𑀺𑀘𑀸𑀭𑁄 𑀘, 𑀙𑁂𑀤𑀦𑀁 𑀩𑀦𑁆𑀥𑀦𑀫𑁆𑀧𑀺 𑀘;

𑀲𑀺𑀩𑁆𑀩𑀦𑀁 𑀭𑀚𑀦𑀁 𑀓𑀧𑁆𑀧𑀁, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀯𑀺. 𑀯𑀺. 𑁨𑁭𑁦𑁭) 𑁋

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂 𑀘 𑀯𑀼𑀢𑁆𑀢𑁂𑀲𑀼 𑀲𑀢𑁆𑀢𑀲𑀼 𑀧𑀼𑀩𑁆𑀩𑀓𑀭𑀡𑁂𑀲𑀼 𑀅𑀦𑀸𑀕𑀢𑀢𑁆𑀢𑀸 𑀘.

𑀦 𑀓𑁂𑀯𑀮𑀜𑁆𑀘 𑀧𑀓𑀭𑀡𑁂𑀲𑀼 𑀅𑀦𑀸𑀕𑀢𑀫𑁂𑀯, 𑀅𑀣 𑀔𑁄 𑀬𑀼𑀢𑁆𑀢𑀺𑀧𑀺 𑀦 𑀤𑀺𑀲𑁆𑀲𑀢𑀺. 𑀓𑀣𑀁? 𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀫𑀼𑀔𑀤𑁆𑀯𑀸𑀭𑀁 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬 𑀅𑀜𑁆𑀜𑀢𑁆𑀭 𑀉𑀤𑀓𑀤𑀦𑁆𑀢𑀧𑁄𑀦𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁬𑁫) 𑀬𑀸𑀯𑀓𑀸𑀮𑀺𑀓𑀸𑀤𑀻𑀲𑀼 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑁂𑀲𑀼 𑀘𑀢𑀽𑀲𑀼 𑀓𑀸𑀮𑀺𑀓𑀯𑀢𑁆𑀣𑀽𑀲𑀼 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀦 𑀘𑀻𑀯𑀭𑁂, 𑀢𑀁 𑀧𑀦 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀧𑀭𑀫𑁆𑀫𑀼𑀔𑀸 𑀤𑀺𑀦𑁆𑀦𑀫𑁆𑀧𑀺 𑀮𑀩𑁆𑀪𑀢𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘𑀇𑀫𑀁 𑀢𑀼𑀫𑁆𑀳𑀸𑀓’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀻’’𑀢𑀺, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀤𑀸𑀬𑀓𑁂𑀦 𑀘𑀻𑀯𑀭𑁂 𑀤𑀺𑀦𑁆𑀦𑁂 𑀲𑀗𑁆𑀖𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑀫𑁂𑀯 𑀧𑀫𑀸𑀡𑀁 𑀳𑁄𑀢𑀺.

𑀲𑀧𑁆𑀧𑀸𑀬𑀧𑀼𑀘𑁆𑀙𑀦𑀜𑁆𑀘 𑀏𑀯𑀁 𑀓𑀭𑁄𑀦𑁆𑀢𑀺 𑁋 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀪𑁄𑀦𑁆𑀢𑁄 𑀲𑀗𑁆𑀖𑀸 𑀲𑀗𑁆𑀖𑀲𑁆𑀲 𑀓𑀣𑀺𑀦𑁂 𑀲𑀫𑁆𑀧𑀢𑁆𑀢𑁂 𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀧𑁆𑀧𑀸𑀬𑀸𑀭𑀳𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀏𑀓𑁄 𑀪𑀺𑀓𑁆𑀔𑀼 𑀦𑀸𑀫𑀁 𑀯𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀣𑁂𑀭𑀲𑁆𑀲 𑀲𑀧𑁆𑀧𑀸𑀬𑀸𑀭𑀳𑀁 𑀳𑁄𑀢𑀻’’𑀢𑀺 𑀯𑀤𑀢𑀺, 𑀲𑀧𑁆𑀧𑀸𑀬𑀇𑀢𑀺 𑀘 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀲𑀤𑁆𑀤𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸 𑀳𑁄𑀢𑀺. 𑀓𑀣𑀁? 𑀲𑀤𑁆𑀤𑀢𑁄 𑀯𑀕𑁆𑀕𑀪𑁂𑀤𑁂 𑀲𑀢𑀺𑀬𑁂𑀯 𑀩𑀳𑀼𑀯𑀘𑀦𑀁 𑀓𑀢𑁆𑀢𑀩𑁆𑀩𑀁, 𑀦 𑀅𑀪𑁂𑀤𑁂, 𑀏𑀯𑀁 𑀲𑀤𑁆𑀤𑀢𑁄. 𑀲𑀧𑁆𑀧𑀸𑀬𑀇𑀢𑀺𑀯𑀘𑀦𑀜𑁆𑀘 𑀅𑀦𑀼𑀭𑀽𑀧𑀢𑁆𑀣𑁂𑀬𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑁂, 𑀏𑀯𑀁 𑀅𑀢𑁆𑀣𑀢𑁄. 𑀇𑀤𑀜𑁆𑀘 𑀘𑀻𑀯𑀭𑀁 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺, 𑀦 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀢𑁆𑀣𑀁. 𑀯𑀼𑀢𑁆𑀢𑀜𑁆𑀳𑀺 𑀧𑀸𑀴𑀺𑀬𑀁 (𑀫𑀳𑀸𑀯. 𑁩𑁦𑁭) ‘‘𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺, 𑀢𑀲𑁆𑀫𑀸 𑀬𑀼𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸 𑀳𑁄𑀢𑀺. ‘‘𑀧𑀝𑀺𑀕𑁆𑀕𑀳𑀡𑀜𑁆𑀘 𑀲𑀧𑁆𑀧𑀸𑀬’’𑀦𑁆𑀢𑀺𑀆𑀤𑀺𑀕𑀸𑀣𑀸𑀧𑀺 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀝𑀻𑀓𑀸𑀤𑀻𑀲𑀼 𑀘 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀲𑀘𑁂 𑀩𑀳𑀽 𑀚𑀺𑀡𑁆𑀡𑀘𑀻𑀯𑀭𑀸, 𑀯𑀼𑀟𑁆𑀠𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀇𑀤𑀁 𑀓𑀣𑀺𑀦𑀘𑀻𑀯𑀭𑀲𑁆𑀲 𑀲𑀗𑁆𑀖𑀺𑀓𑀢𑁆𑀢𑀸 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀺𑀓𑀁 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀦𑀬𑁂𑀦 (𑀘𑀽𑀴𑀯. 𑁩𑁧𑁧) 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑀩𑁆𑀩𑁂𑀲𑀼 𑀩𑀮𑀯𑀘𑀻𑀯𑀭𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀯𑀼𑀟𑁆𑀠𑀲𑁆𑀲𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁. 𑀯𑀼𑀟𑁆𑀠𑁂𑀲𑀼…𑀧𑁂… 𑀤𑀸𑀢𑀩𑁆𑀩𑀦𑁆𑀢𑀺 𑀓𑀭𑀡𑀲𑀦𑁆𑀦𑀺𑀥𑀺𑀫𑁄𑀘𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀘𑁂 𑀯𑀼𑀟𑁆𑀠𑁄’’𑀢𑁆𑀬𑀸𑀤𑀺. 𑀦𑀯𑀓𑀢𑀭𑁂𑀦𑀧𑀺 𑀳𑀺 𑀓𑀭𑀡𑀲𑀦𑁆𑀦𑀺𑀥𑀺𑀁 𑀫𑁄𑀘𑁂𑀢𑁆𑀯𑀸 𑀓𑀣𑀺𑀦𑁂 𑀅𑀢𑁆𑀣𑀢𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀗𑁆𑀖𑀲𑁆𑀲 𑀧𑀜𑁆𑀘𑀸𑀦𑀺𑀲𑀁𑀲𑀮𑀸𑀪𑁄 𑀳𑁄𑀢𑀻𑀢𑀺. 𑀅𑀧𑀺𑀘𑀸𑀢𑀺𑀆𑀤𑀺𑀦𑀸 𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀯𑀘𑀦𑀓𑁆𑀓𑀫𑁄 𑀧𑀦 𑀏𑀯𑀁 𑀓𑀸𑀢𑀩𑁆𑀩𑁄 𑁋 𑀓𑀣𑀺𑀦𑀤𑀼𑀲𑁆𑀲𑀁 𑀮𑀪𑀺𑀢𑁆𑀯𑀸 𑀲𑀗𑁆𑀖𑁂 𑀲𑀻𑀫𑀸𑀬 𑀲𑀦𑁆𑀦𑀺𑀧𑀢𑀺𑀢𑁂 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀇𑀤𑀁 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀓𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 ‘‘𑀬𑁄 𑀚𑀺𑀡𑁆𑀡𑀘𑀻𑀯𑀭𑁄, 𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀢𑁄 𑀧𑀼𑀭𑀺𑀫𑁂𑀦 ‘‘𑀩𑀳𑀽 𑀚𑀺𑀡𑁆𑀡𑀘𑀻𑀯𑀭𑀸’’𑀢𑀺 𑀯𑀸 ‘‘𑀦𑀢𑁆𑀣𑀺 𑀇𑀥 𑀚𑀺𑀡𑁆𑀡𑀘𑀻𑀯𑀭𑀸’’𑀢𑀺 𑀯𑀸 𑀯𑀼𑀢𑁆𑀢𑁂 𑀅𑀧𑀭𑁂𑀦 ‘‘𑀢𑁂𑀦 𑀳𑀺 𑀯𑀼𑀟𑁆𑀠𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀼𑀦 𑀧𑀼𑀭𑀺𑀫𑁂𑀦 ‘‘𑀓𑁄 𑀏𑀢𑁆𑀣 𑀯𑀼𑀟𑁆𑀠𑁄’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀼𑀦 𑀧𑀼𑀭𑀺𑀫𑁂𑀦 ‘‘𑀲𑁄 𑀪𑀺𑀓𑁆𑀔𑀼 𑀢𑀤𑀳𑁂𑀯 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀢𑁆𑀣𑀭𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁂𑀦 ‘‘𑀲𑁄 𑀲𑀓𑁆𑀓𑁄𑀢𑀻’’𑀢𑀺 𑀯𑀸 ‘‘𑀲𑀗𑁆𑀖𑁄 𑀫𑀳𑀸𑀣𑁂𑀭𑀲𑁆𑀲 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁, 𑀧𑀼𑀦 𑀧𑀼𑀭𑀺𑀫𑁂𑀦 ‘‘𑀲𑁄 𑀫𑀳𑀸𑀣𑁂𑀭𑁄 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑁂 𑀇𑀢𑀭𑁂𑀦 ‘‘𑀆𑀫 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀢𑁄 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀢𑀩𑁆𑀩𑁄.

𑀏𑀢𑁆𑀣 𑀘 ‘‘𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀁 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀇𑀫𑀸𑀬 𑀜𑀢𑁆𑀢𑀺𑀧𑀸𑀴𑀺𑀬𑀸 𑀲𑀫𑁂𑀢𑀺. ‘‘𑀬𑁄 𑀚𑀺𑀡𑁆𑀡𑀘𑀻𑀯𑀭𑁄, 𑀢𑀲𑁆𑀲𑀸’’𑀢𑀺𑀆𑀤𑀺 ‘‘𑀲𑀗𑁆𑀖𑁂𑀦 𑀓𑀲𑁆𑀲𑀸’’𑀢𑀺𑀆𑀤𑀺 ‘‘𑀲𑀗𑁆𑀖𑁂𑀦 𑀓𑀲𑁆𑀲 𑀤𑀸𑀢𑀩𑁆𑀩𑀁, 𑀬𑁄 𑀚𑀺𑀡𑁆𑀡𑀘𑀻𑀯𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀲𑀫𑁂𑀢𑀺. ‘‘𑀲𑁄 𑀫𑀳𑀸𑀣𑁂𑀭𑁄 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀺 ‘‘𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼’’𑀦𑁆𑀢𑀺𑀆𑀤𑀺𑀓𑀸𑀬 𑀧𑀭𑀺𑀯𑀸𑀭𑀧𑀸𑀴𑀺𑀬𑀸 (𑀧𑀭𑀺. 𑁪𑁦𑁯) 𑀲𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀲 𑀧𑀦 𑀤𑀻𑀬𑀢𑀺, 𑀢𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀇𑀫𑀲𑁆𑀲 𑀓𑀣𑀺𑀦𑀤𑀸𑀦𑀓𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀦 𑀅𑀧𑀮𑁄𑀓𑀦𑀫𑀢𑁆𑀢𑁂𑀦 𑀤𑀸𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀺. 𑀕𑀭𑀼𑀓𑀮𑀳𑀼𑀓𑀸𑀦𑀁 𑀪𑁂𑀤𑁄 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀏𑀯𑀁 𑀤𑀺𑀦𑁆𑀦𑁂 𑀧𑀦 𑀓𑀣𑀺𑀦𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀢𑀁 𑀓𑀣𑀺𑀦𑀤𑀼𑀲𑁆𑀲𑀁 𑀦𑀺𑀝𑁆𑀞𑀺𑀢𑀧𑀭𑀺𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀓𑀣𑀺𑀦𑀤𑀼𑀲𑁆𑀲𑀁 𑀦𑀸𑀫 𑀦 𑀓𑁂𑀯𑀮𑀁 𑀧𑀓𑀢𑀺𑀲𑀸𑀝𑀓𑀫𑁂𑀯 𑀳𑁄𑀢𑀺, 𑀅𑀣 𑀔𑁄 𑀧𑀭𑀺𑀦𑀺𑀝𑁆𑀞𑀺𑀢𑀲𑀢𑁆𑀢𑀯𑀺𑀥𑀧𑀼𑀩𑁆𑀩𑀓𑀺𑀘𑁆𑀘𑀘𑀻𑀯𑀭𑀫𑁆𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀤𑀺𑀦𑁆𑀦𑁂 𑀲𑀢𑁆𑀢𑀯𑀺𑀥𑀧𑀼𑀩𑁆𑀩𑀓𑀺𑀘𑁆𑀘𑀓𑀭𑀡𑁂𑀦 𑀅𑀢𑁆𑀣𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀘𑁆𑀘𑀼𑀤𑁆𑀥𑀭𑀡𑀸𑀤𑀻𑀦𑀺𑀬𑁂𑀯 𑀓𑀸𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀦 𑀓𑀺𑀜𑁆𑀘𑀺 𑀅𑀧𑀭𑀺𑀦𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀅𑀦𑁆𑀢𑀫𑀲𑁄 𑀓𑀧𑁆𑀧𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺, 𑀢𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀬𑁂𑀯 𑀧𑀘𑁆𑀘𑀼𑀤𑁆𑀥𑀭𑀡𑀸𑀤𑀻𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀕𑀡𑁆𑀞𑀺𑀓𑀧𑀝𑁆𑀝𑀧𑀸𑀲𑀓𑀧𑀝𑁆𑀝𑀸𑀦𑀺 𑀧𑀦 𑀲𑀺𑀩𑁆𑀩𑀦𑀦𑁆𑀢𑁄𑀕𑀥𑀸𑀦𑀺, 𑀢𑀸𑀦𑀺𑀧𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀬𑁂𑀯 𑀓𑀸𑀢𑀩𑁆𑀩𑀸𑀦𑀺. 𑀅𑀦𑀺𑀝𑁆𑀞𑀸𑀧𑁂𑀦𑁆𑀢𑁄 𑀅𑀦𑀺𑀝𑁆𑀞𑀺𑀢𑀲𑀺𑀩𑁆𑀩𑀦𑀓𑀺𑀘𑁆𑀘𑀫𑁂𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁨-𑁪𑁬𑁩) ‘‘𑀢𑀢𑁆𑀣 𑀓𑀢𑀦𑁆𑀢𑀺 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀦 𑀓𑀢𑀁, 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀲𑀽𑀘𑀺𑀬𑀸 𑀓𑀢𑁆𑀢𑀩𑁆𑀩𑀁. 𑀧𑀸𑀲𑀓𑀧𑀝𑁆𑀝𑀕𑀡𑁆𑀞𑀺𑀓𑀧𑀝𑁆𑀝𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸 𑀲𑀽𑀘𑀺𑀬𑀸 𑀧𑀝𑀺𑀲𑀸𑀫𑀦’’𑀦𑁆𑀢𑀺. 𑀇𑀤𑀜𑁆𑀳𑀺 𑀓𑀣𑀺𑀦𑀯𑀢𑁆𑀢𑀁 𑀦𑀸𑀫 𑀩𑀼𑀤𑁆𑀥𑀧𑁆𑀧𑀲𑀢𑁆𑀣𑀦𑁆𑀢𑀺 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄 𑀪𑀺𑀓𑁆𑀔𑀯𑁂 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀲𑀢𑁆𑀣𑀁.

𑀓𑀢𑀧𑀭𑀺𑀬𑁄𑀲𑀺𑀢𑀁 𑀧𑀦 𑀓𑀣𑀺𑀦𑀁 𑀕𑀳𑁂𑀢𑁆𑀯𑀸𑀢𑀺 𑁋

‘‘𑀥𑁄𑀯𑀦𑀜𑁆𑀘 𑀯𑀺𑀘𑀸𑀭𑁄 𑀘, 𑀙𑁂𑀤𑀦𑀁 𑀩𑀦𑁆𑀥𑀦𑀫𑁆𑀧𑀺 𑀘;

𑀲𑀺𑀩𑁆𑀩𑀦𑀁 𑀭𑀚𑀦𑀁 𑀓𑀧𑁆𑀧𑀁, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀯𑀺. 𑀯𑀺. 𑁨𑁭𑁦𑁭) 𑁋

𑀯𑀼𑀢𑁆𑀢𑀸𑀦𑀺 𑀲𑀢𑁆𑀢𑀯𑀺𑀥𑀧𑀼𑀩𑁆𑀩𑀓𑀭𑀡𑀸𑀦𑀺 𑀓𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑀺𑀢𑀁 𑀓𑀣𑀺𑀦𑀘𑀻𑀯𑀭𑀁 𑀕𑀳𑁂𑀢𑁆𑀯𑀸. 𑀅𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀁 𑀧𑁄𑀭𑀸𑀡𑀺𑀓𑀁 𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀢𑀢𑁄 𑀅𑀦𑀥𑀺𑀝𑁆𑀞𑀺𑀢𑀁 𑀦𑀯𑀁 𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀅𑀢𑁆𑀣𑀭𑀡𑀓𑀸𑀮𑁂 𑀢𑀫𑁂𑀯 𑀅𑀥𑀺𑀝𑁆𑀞𑀺𑀢𑀲𑀗𑁆𑀖𑀸𑀝𑀺𑀁 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀇𑀢𑀭𑁂𑀲𑀼. 𑀏𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀡𑀁 𑀦𑀸𑀫 𑀯𑀘𑀻𑀪𑁂𑀤𑀓𑀭𑀡𑀫𑁂𑀯 𑀳𑁄𑀢𑀺, 𑀦 𑀓𑀺𑀜𑁆𑀘𑀺 𑀓𑀸𑀬𑀯𑀺𑀓𑀸𑀭𑀓𑀭𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀢𑀣𑀸𑀯𑀘𑀻𑀪𑁂𑀤𑀓𑀭𑀡𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀢𑀢𑁆𑀣 𑀧𑀘𑁆𑀘𑀼𑀤𑁆𑀥𑀸𑀭𑁄 𑀢𑀺𑀯𑀺𑀥𑁄 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀲𑀗𑁆𑀖𑀸𑀝𑀺𑀬𑀸 𑀧𑀘𑁆𑀘𑀼𑀤𑁆𑀥𑀸𑀭𑁄, ‘‘𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀧𑀘𑁆𑀘𑀼𑀤𑁆𑀥𑀸𑀭𑁄, ‘‘𑀇𑀫𑀁 𑀅𑀦𑁆𑀢𑀭𑀯𑀸𑀲𑀓𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀧𑀘𑁆𑀘𑀼𑀤𑁆𑀥𑀸𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁮) ‘‘𑀧𑀘𑁆𑀘𑀼𑀤𑁆𑀥𑀸𑀭𑁄 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦𑀸’’𑀢𑀺. 𑀅𑀥𑀺𑀝𑁆𑀞𑀸𑀦𑀁 𑀢𑀺𑀯𑀺𑀥𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀲𑀗𑁆𑀖𑀸𑀝𑀺𑀬𑀸 𑀅𑀥𑀺𑀝𑁆𑀞𑀸𑀦𑀁, ‘‘𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀅𑀥𑀺𑀝𑁆𑀞𑀸𑀦𑀁, ‘‘𑀇𑀫𑀁 𑀅𑀦𑁆𑀢𑀭𑀯𑀸𑀲𑀓𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀅𑀥𑀺𑀝𑁆𑀞𑀸𑀦𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁮) ‘‘𑀅𑀥𑀺𑀝𑁆𑀞𑀸𑀦𑀁 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀁 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦𑀸’’𑀢𑀺.

𑀅𑀣 𑀯𑀸 𑀅𑀥𑀺𑀝𑁆𑀞𑀸𑀦𑀁 𑀤𑀼𑀯𑀺𑀥𑀁 𑀓𑀸𑀬𑁂𑀦 𑀅𑀥𑀺𑀝𑁆𑀞𑀸𑀦𑀁, 𑀯𑀸𑀘𑀸𑀬 𑀅𑀥𑀺𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀧𑁄𑀭𑀸𑀡𑀺𑀓𑀁 𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀲𑀗𑁆𑀖𑀸𑀝𑀺𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀓𑀭𑀡𑁂𑀦 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯; 𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀢𑁆𑀣 𑀬𑀲𑁆𑀫𑀸 𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸𑀦𑀺 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸…𑀧𑁂… 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺. 𑀅𑀣 𑀯𑀸 𑀅𑀥𑀺𑀝𑁆𑀞𑀸𑀦𑀁 𑀤𑀼𑀯𑀺𑀥𑀁 𑀲𑀫𑁆𑀫𑀼𑀔𑀸𑀥𑀺𑀝𑁆𑀞𑀸𑀦𑀧𑀭𑀫𑁆𑀫𑀼𑀔𑀸𑀥𑀺𑀝𑁆𑀞𑀸𑀦𑀯𑀲𑁂𑀦. 𑀢𑀢𑁆𑀣 𑀬𑀤𑀺 𑀘𑀻𑀯𑀭𑀁 𑀳𑀢𑁆𑀣𑀧𑀸𑀲𑁂 𑀞𑀺𑀢𑀁 𑀳𑁄𑀢𑀺, ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀅𑀣 𑀅𑀦𑁆𑀢𑁄𑀕𑀩𑁆𑀪𑁂 𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸 𑀳𑁄𑀢𑀺, 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯; 𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀢𑁆𑀭 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀳𑁄𑀢𑀻’’𑀢𑀺𑀆𑀤𑀺, 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀜𑁆𑀘 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀤𑀼𑀯𑀺𑀥𑀦𑁆𑀢𑀺 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀪𑁂𑀤𑁂𑀦 𑀤𑀼𑀯𑀺𑀥’’𑀦𑁆𑀢𑀺.

𑀅𑀢𑁆𑀣𑀸𑀭𑁄 𑀓𑀢𑀺𑀯𑀺𑀥𑁄? 𑀅𑀢𑁆𑀣𑀸𑀭𑁄 𑀏𑀓𑀯𑀺𑀥𑁄. 𑀯𑀘𑀻𑀪𑁂𑀤𑀓𑀭𑀡𑁂𑀦𑁂𑀯 𑀳𑀺 𑀅𑀢𑁆𑀣𑀸𑀭𑁄 𑀲𑀫𑁆𑀧𑀚𑁆𑀚𑀢𑀺, 𑀦 𑀓𑀸𑀬𑀯𑀺𑀓𑀸𑀭𑀓𑀭𑀡𑁂𑀦. 𑀅𑀬𑀫𑀢𑁆𑀣𑁄 𑀬𑀣𑀸𑀯𑀼𑀢𑁆𑀢-𑀧𑀭𑀺𑀯𑀸𑀭𑀧𑀸𑀴𑀺𑀬𑀸 𑀘 ‘‘𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀢𑀣𑀸𑀯𑀘𑀻𑀪𑁂𑀤𑀓𑀭𑀡𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀯𑀘𑀦𑁂𑀦 𑀘 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀯𑀸 𑀅𑀢𑁆𑀣𑀸𑀭𑁄 𑀢𑀺𑀯𑀺𑀥𑁄 𑀯𑀢𑁆𑀣𑀼𑀧𑁆𑀧𑀪𑁂𑀤𑁂𑀦. 𑀢𑀢𑁆𑀣 𑀬𑀤𑀺 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀺𑀓𑀸 𑀲𑀗𑁆𑀖𑀸𑀝𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀦𑀯𑀸 𑀲𑀗𑁆𑀖𑀸𑀝𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀅𑀣 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀓𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑁄, 𑀦𑀯𑁄 𑀉𑀢𑁆𑀢𑀭𑀸𑀲𑀗𑁆𑀕𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, ‘‘𑀇𑀫𑀺𑀦𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀅𑀣 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀓𑁄 𑀅𑀦𑁆𑀢𑀭𑀯𑀸𑀲𑀓𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑁄, 𑀦𑀯𑁄 𑀅𑀦𑁆𑀢𑀭𑀯𑀸𑀲𑀓𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, ‘‘𑀇𑀫𑀺𑀦𑀸 𑀅𑀦𑁆𑀢𑀭𑀯𑀸𑀲𑀓𑁂𑀦 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁧𑁩) ‘‘𑀲𑀘𑁂 𑀲𑀗𑁆𑀖𑀸𑀝𑀺𑀬𑀸’’𑀢𑀺𑀆𑀤𑀺.

𑀏𑀢𑁆𑀣 𑀲𑀺𑀬𑀸 𑁋 𑀓𑀺𑀁 𑀧𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀺𑀲𑁂𑀲𑀁 𑀓𑀢𑁆𑀯𑀸𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀉𑀤𑀸𑀳𑀼 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀲𑀸𑀫𑀜𑁆𑀜𑀢𑁄𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸𑀢𑀺? 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀁 𑀘𑀻𑀯𑀭𑀁 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀦 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀯𑀺𑀲𑁂𑀲𑀢𑁄 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀅𑀮𑀤𑁆𑀥𑀦𑀸𑀫𑀢𑁆𑀢𑀸. 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀁 𑀧𑀦 𑀘𑀻𑀯𑀭𑀁 𑀯𑀺𑀲𑁂𑀲𑀢𑁄𑀬𑁂𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀦 𑀲𑀸𑀫𑀜𑁆𑀜𑀢𑁄. 𑀓𑀲𑁆𑀫𑀸? 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀦𑀸𑀫𑀢𑁆𑀢𑀸. 𑀇𑀥 𑀧𑀦 𑀓𑀣𑀺𑀦𑀸𑀥𑀺𑀓𑀸𑀭𑁂 𑀧𑀼𑀩𑁆𑀩𑁂𑀯 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀯𑀺𑀲𑁂𑀲𑀢𑁄𑀬𑁂𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁮) 𑀓𑀣𑀺𑀦𑀸𑀥𑀺𑀓𑀸𑀭𑁂 ‘‘𑀧𑀘𑁆𑀘𑀼𑀤𑁆𑀥𑀸𑀭𑁄 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄 𑀲𑀗𑁆𑀖𑀸𑀝𑀺𑀬𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀦𑁆𑀢𑀭𑀯𑀸𑀲𑀓𑁂𑀦𑀸’’𑀢𑀺. 𑀓𑀺𑀁 𑀧𑀦 𑀦𑀺𑀘𑁆𑀘𑀢𑁂𑀘𑀻𑀯𑀭𑀺𑀓𑁄𑀬𑁂𑀯 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀮𑀪𑀢𑀺, 𑀉𑀤𑀸𑀳𑀼 𑀅𑀯𑀢𑁆𑀣𑀸𑀢𑁂𑀘𑀻𑀯𑀭𑀺𑀓𑁄𑀧𑀻𑀢𑀺? 𑀢𑁂𑀘𑀻𑀯𑀭𑀺𑀓𑁄 𑀤𑀼𑀯𑀺𑀥𑁄 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑀯𑀲𑁂𑀦. 𑀢𑀢𑁆𑀣 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑁄 ‘‘𑀅𑀢𑀺𑀭𑁂𑀓𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑀡𑀢𑁄 𑀲𑀩𑁆𑀩𑀓𑀸𑀮𑀫𑁂𑀯 𑀥𑀸𑀭𑁂𑀢𑀺. 𑀯𑀺𑀦𑀬𑀢𑁂𑀘𑀻𑀯𑀭𑀺𑀓𑁄 𑀧𑀦 𑀬𑀤𑀸 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀢𑀣𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑁂𑀢𑀺. 𑀬𑀤𑀸 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀢𑀣𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑁂𑀢𑀺, 𑀢𑀲𑁆𑀫𑀸 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀲𑁆𑀲 𑀤𑀼𑀧𑁆𑀧𑀭𑀺𑀳𑀸𑀭𑀢𑁆𑀢𑀸 𑀲𑀩𑁆𑀩𑀤𑀸 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀼𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀥𑀸𑀭𑁂𑀦𑁆𑀢𑁄𑀧𑀺 𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀆𑀲𑀦𑁆𑀦𑁂 𑀓𑀸𑀮𑁂 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀳𑀦𑁆𑀢𑁄𑀧𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀮𑀪𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀘𑁆𑀘𑀺 𑀦𑀼 𑀪𑁄 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸𑀬𑀫𑁂𑀯 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀉𑀤𑀸𑀳𑀼 𑀅𑀜𑁆𑀜𑀲𑀻𑀫𑀸𑀬𑀸𑀢𑀺? 𑀬𑀤𑀺 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀪𑀡𑀦𑀩𑀤𑁆𑀥𑀲𑀻𑀫𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑁆𑀢𑁄 𑀞𑀺𑀢𑀸, 𑀏𑀯𑀁 𑀲𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀧𑀭𑀺𑀦𑀺𑀝𑁆𑀞𑀺𑀢𑀧𑀼𑀩𑁆𑀩𑀓𑀭𑀡𑀫𑁂𑀯 𑀘𑁂 𑀤𑀸𑀬𑀓𑁄 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀩𑁆𑀩𑀁. 𑀢𑁂𑀦 𑀘 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸 𑀲𑀗𑁆𑀖𑁄 𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁮) 𑀆𑀕𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀬𑀤𑀺 𑀏𑀯𑀁 ‘‘𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂’’𑀇𑀘𑁆𑀘𑁂𑀯 𑀝𑀻𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀲𑀻𑀫𑀫𑀡𑁆𑀟𑀮𑁂 𑀓𑀫𑁆𑀫𑀯𑀸𑀘𑀁 𑀪𑀡𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀦 ‘‘𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀪𑀡𑀦𑀩𑀤𑁆𑀥𑀲𑀻𑀫𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑁆𑀢𑁄 𑀞𑀺𑀢𑀸’’𑀢𑀺 𑀯𑀺𑀲𑁂𑀲𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀦 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸 𑀳𑀺 𑀩𑀤𑁆𑀥𑀲𑀻𑀫𑀸𑀪𑀽𑀢𑀸, 𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸 𑀧𑀦 𑀉𑀧𑀘𑀸𑀭𑀲𑀻𑀫𑀸𑀪𑀽𑀢𑀸, 𑀉𑀧𑀘𑀸𑀭𑀲𑀻𑀫𑀸 𑀘 𑀦𑀸𑀫 𑀩𑀤𑁆𑀥𑀲𑀻𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀲𑀻𑀫𑀸 𑀩𑀤𑁆𑀥𑀲𑀻𑀫𑀸 𑀘 𑀳𑁄𑀢𑀺 𑀉𑀧𑀘𑀸𑀭𑀲𑀻𑀫𑀸 𑀘𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀁 𑀪𑀡𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩𑀁, 𑀦 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀲𑀻𑀫𑀫𑀡𑁆𑀟𑀮𑁂 𑀓𑀫𑁆𑀫𑀯𑀸𑀘𑀁 𑀪𑀡𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀢𑁆𑀣𑀭𑀡𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑁆𑀧𑀺 ‘‘𑀉𑀧𑀘𑀸𑀭𑀲𑀻𑀫𑀸𑀬’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, 𑀦 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀉𑀧𑀘𑀸𑀭𑀲𑀻𑀫𑀸𑀬𑀸’’𑀢𑀺, 𑀢𑀫𑁆𑀧𑀺 𑀯𑀢𑁆𑀢𑀩𑁆𑀩𑀫𑁂𑀯. 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀸𑀬 𑀏𑀯 𑀉𑀧𑀘𑀸𑀭𑀲𑀻𑀫𑀸𑀬 𑀓𑀣𑀺𑀦𑀢𑁆𑀣𑀸𑀭𑀁 𑀓𑀸𑀢𑀼𑀁 𑀮𑀪𑀢𑀺, 𑀦 𑀅𑀜𑁆𑀜𑀉𑀧𑀘𑀸𑀭𑀲𑀻𑀫𑀸𑀬. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) ‘‘𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺.

𑀬𑀣𑀺𑀘𑁆𑀙𑀲𑀺, 𑀢𑀣𑀸 𑀪𑀯𑀢𑀼, 𑀅𑀧𑀺 𑀢𑀼 𑀔𑀮𑀼 ‘‘𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀪𑀽𑀢𑀸, 𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸𑀪𑀽𑀢𑀸’’𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀣𑀸𑀪𑀽𑀢𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸𑀬𑀁 𑀢𑀸𑀯 𑀉𑀧𑀘𑀸𑀭𑀲𑀻𑀫𑀸𑀪𑀽𑀢𑀪𑀸𑀯𑁄 ‘‘𑀲𑀘𑁂 𑀧𑀦 𑀏𑀓𑀲𑀻𑀫𑀸𑀬 𑀩𑀳𑀽 𑀯𑀺𑀳𑀸𑀭𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀏𑀓𑀢𑁆𑀣 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀏𑀓𑀲𑀻𑀫𑀸𑀬𑀸𑀢𑀺 𑀏𑀓𑀉𑀧𑀘𑀸𑀭𑀲𑀻𑀫𑀸𑀬𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) 𑀆𑀕𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀸𑀪𑀽𑀢𑀪𑀸𑀯𑁄 𑀧𑀦 ‘‘𑀢𑁂 𑀘 𑀔𑁄 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀓𑀲𑀻𑀫𑀸𑀬𑀁 𑀞𑀺𑀢𑀸. 𑀲𑀻𑀫𑀸 𑀘 𑀦𑀸𑀫𑁂𑀲𑀸 𑀩𑀤𑁆𑀥𑀲𑀻𑀫𑀸 𑀅𑀩𑀤𑁆𑀥𑀲𑀻𑀫𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀻’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀘 ‘‘𑀲𑀻𑀫𑀸 𑀘 𑀦𑀸𑀫𑁂𑀲𑀸 𑀓𑀢𑀫𑀸, 𑀬𑀢𑁆𑀣 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀲𑀻𑀫𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 ‘𑀲𑀻𑀫𑀸 𑀘 𑀦𑀸𑀫𑁂𑀲𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺.

𑀢𑀢𑁆𑀣 𑀓𑀢𑀺𑀯𑀺𑀥𑀸 𑀩𑀤𑁆𑀥𑀲𑀻𑀫𑀸, 𑀓𑀢𑀺𑀯𑀺𑀥𑀸 𑀅𑀩𑀤𑁆𑀥𑀲𑀻𑀫𑀸𑀢𑀺? 𑀢𑀺𑀯𑀺𑀥𑀸 𑀩𑀤𑁆𑀥𑀲𑀻𑀫𑀸 𑀔𑀡𑁆𑀟𑀲𑀻𑀫𑀸𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀯𑀲𑁂𑀦. 𑀢𑀺𑀯𑀺𑀥𑀸 𑀅𑀩𑀤𑁆𑀥𑀲𑀻𑀫𑀸 𑀕𑀸𑀫𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀏𑀯𑀁 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀔𑀡𑁆𑀟𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀢𑀲𑁆𑀲𑀸𑀬𑁂𑀯 𑀪𑁂𑀤𑁄. 𑀅𑀩𑀤𑁆𑀥𑀲𑀻𑀫𑀸 𑀧𑀦 𑀕𑀸𑀫𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺 𑀢𑀺𑀯𑀺𑀥𑀸’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀢𑀻𑀲𑀼 𑀩𑀤𑁆𑀥𑀲𑀻𑀫𑀸𑀲𑀼, 𑀢𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀽𑀢𑀺 𑀙𑀲𑀼𑀬𑁂𑀯 𑀲𑀻𑀫𑀸𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑀲𑀗𑁆𑀖𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑀲𑁆𑀲 𑀓𑀢𑁆𑀢𑀩𑁆𑀩𑀪𑀸𑀯𑀯𑀘𑀦𑀢𑁄 𑀲𑀼𑀤𑁆𑀥𑀸𑀬 𑀉𑀧𑀘𑀸𑀭𑀲𑀻𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀅𑀪𑀡𑀺𑀢𑀩𑁆𑀩𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀸𑀬 𑀲𑀢𑀺 𑀢𑀁 𑀩𑀤𑁆𑀥𑀲𑀻𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸𑀧𑀺 𑀉𑀧𑀘𑀸𑀭𑀲𑀻𑀫𑀸𑀬 𑀕𑀫𑀦𑀢𑁄 𑀲𑀸 𑀩𑀤𑁆𑀥𑀲𑀻𑀫𑀸 𑀓𑀫𑁆𑀫𑀯𑀸𑀘𑀸𑀪𑀡𑀦𑀸𑀭𑀳𑀸 𑀘 𑀳𑁄𑀢𑀺 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀘 𑀧𑀦𑁆𑀦𑀭𑀲𑀯𑀺𑀥𑀸 𑀲𑀻𑀫𑀸 𑀅𑀝𑁆𑀞𑀓𑀣𑀸𑀲𑀼 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯; 𑀓𑀗𑁆𑀔𑀸. 𑀅𑀝𑁆𑀞. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀆𑀕𑀢𑀸, 𑀅𑀣 𑀓𑀲𑁆𑀫𑀸 𑀙𑀴𑁂𑀯 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀁, 𑀢𑀸𑀲𑀼 𑀧𑀦 𑀧𑀦𑁆𑀦𑀭𑀲𑀲𑀼 𑀲𑀻𑀫𑀸𑀲𑀼 𑀉𑀧𑀘𑀸𑀭𑀲𑀻𑀫𑀸 𑀲𑀗𑁆𑀖𑀮𑀸𑀪𑀯𑀺𑀪𑀚𑀦𑀸𑀤𑀺𑀝𑁆𑀞𑀸𑀦𑀫𑁂𑀯 𑀳𑁄𑀢𑀺, 𑀮𑀸𑀪𑀲𑀻𑀫𑀸 𑀢𑀢𑁆𑀭𑀼𑀧𑁆𑀧𑀸𑀤𑀕𑀳𑀡𑀝𑁆𑀞𑀸𑀦𑀫𑁂𑀯 𑀳𑁄𑀢𑀻𑀢𑀺 𑀇𑀫𑀸 𑀤𑁆𑀯𑁂 𑀲𑀻𑀫𑀸𑀬𑁄 𑀲𑀗𑁆𑀖𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀦 𑀳𑁄𑀦𑁆𑀢𑀺, 𑀦𑀺𑀕𑀫𑀲𑀻𑀫𑀸 𑀦𑀕𑀭𑀲𑀻𑀫𑀸 𑀚𑀦𑀧𑀤𑀲𑀻𑀫𑀸 𑀭𑀝𑁆𑀞𑀲𑀻𑀫𑀸 𑀭𑀚𑁆𑀚𑀲𑀻𑀫𑀸 𑀤𑀻𑀧𑀲𑀻𑀫𑀸 𑀘𑀓𑁆𑀓𑀯𑀸𑀴𑀲𑀻𑀫𑀸𑀢𑀺 𑀇𑀫𑀸 𑀧𑀦 𑀲𑀻𑀫𑀸𑀬𑁄 𑀕𑀸𑀫𑀲𑀻𑀫𑀸𑀬 𑀲𑀫𑀸𑀦𑀕𑀢𑀺𑀓𑀸 𑀕𑀸𑀫𑀲𑀻𑀫𑀸𑀬𑀫𑁂𑀯 𑀅𑀦𑁆𑀢𑁄𑀕𑀥𑀸𑀢𑀺 𑀦 𑀯𑀺𑀲𑀼𑀁 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀉𑀧𑀘𑀸𑀭𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀢𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? ‘‘𑀉𑀧𑀘𑀸𑀭𑀲𑀻𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀓𑁆𑀔𑁂𑀧𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸𑀦𑀁 𑀅𑀦𑁆𑀢𑁄 𑀩𑀤𑁆𑀥𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀢𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀸 𑀕𑀢𑀸. 𑀢𑀣𑀸 𑀳𑀺 ‘‘𑀇𑀫𑀺𑀲𑁆𑀲𑀸 𑀉𑀧𑀘𑀸𑀭𑀲𑀻𑀫𑀸𑀬 ‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’𑀢𑀺 𑀤𑀺𑀦𑁆𑀦𑀁 𑀧𑀦 𑀔𑀡𑁆𑀟𑀲𑀻𑀫𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀁. 𑀢𑁂𑀦 𑀜𑀸𑀬𑀢𑀺 ‘‘𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑁆𑀢𑁄 𑀞𑀺𑀢𑀸 𑀩𑀤𑁆𑀥𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸𑀧𑀺 𑀦𑀸𑀫 𑀳𑁄𑀢𑀻’’𑀢𑀺. 𑀳𑁄𑀢𑀼, 𑀏𑀯𑀁 𑀲𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸𑀬 𑀲𑀢𑀺 𑀢𑀢𑁆𑀣𑁂𑀯 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸𑀬 𑀅𑀯𑀺𑀚𑁆𑀚𑀫𑀸𑀦𑀸𑀬 𑀓𑀣𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺? 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸𑀬 𑀅𑀯𑀺𑀚𑁆𑀚𑀫𑀸𑀦𑀸𑀬 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀯𑀺𑀚𑁆𑀚𑀫𑀸𑀦𑀩𑀤𑁆𑀥𑀲𑀻𑀫𑀁 𑀯𑀸 𑀉𑀤𑀓𑀼𑀓𑁆𑀔𑁂𑀧𑀮𑀪𑀦𑀝𑁆𑀞𑀸𑀦𑀁 𑀯𑀸 𑀕𑀦𑁆𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀸𑀬 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀢𑁆𑀣𑀸𑀭𑁄 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 ‘‘𑀧𑀭𑀺𑀦𑀺𑀝𑁆𑀞𑀺𑀢𑀧𑀼𑀩𑁆𑀩𑀓𑀭𑀡𑀫𑁂𑀯 𑀘𑁂 𑀤𑀸𑀬𑀓𑁄 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀤𑀸𑀢𑀩𑁆𑀩𑀁. 𑀢𑁂𑀦 𑀘 𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸 𑀲𑀗𑁆𑀖𑁄 𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂𑀦 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀯𑀘𑀦𑁂𑀦 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁮) 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀪𑀽𑀢𑀸, 𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸𑀪𑀽𑀢𑀸’’𑀢𑀺. 𑀢𑀲𑁆𑀫𑀸 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀯𑀘𑀦𑁂𑀦 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀬𑁂𑀪𑀼𑀬𑁆𑀬𑁂𑀦 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀢𑁆𑀢𑀸 𑀲𑀫𑀕𑁆𑀕𑀁 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑁆𑀯𑀸 𑀉𑀧𑀘𑀸𑀭𑀲𑀻𑀫𑀩𑀤𑁆𑀥𑀲𑀻𑀫𑀪𑀽𑀢𑁂 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀅𑀢𑁆𑀣𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀅𑀳𑁄𑀦𑁆𑀢𑁂𑀧𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀢𑀢𑁆𑀣𑁂𑀯 𑀲𑀻𑀫𑀫𑀡𑁆𑀟𑀮𑁂 𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀢𑁆𑀣𑀭𑀺𑀢𑀩𑁆𑀩𑀪𑀸𑀯𑁄 𑀅𑀫𑁆𑀳𑁂𑀳𑀺𑀧𑀺 𑀯𑀼𑀢𑁆𑀢𑁄𑀬𑁂𑀯. 𑀬𑀤𑀺 𑀧𑀦 𑀦 𑀘𑁂𑀯 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁄 𑀳𑁄𑀢𑀺, 𑀦 𑀘 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸 𑀅𑀢𑁆𑀣𑀺, 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑀼𑀁 𑀦 𑀮𑀪𑀢𑀺, 𑀅𑀜𑁆𑀜𑀁 𑀩𑀤𑁆𑀥𑀲𑀻𑀫𑀁 𑀯𑀸 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀕𑀦𑁆𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀯𑀸𑀘𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀸𑀬 𑀉𑀧𑀘𑀸𑀭𑀲𑀻𑀫𑀸𑀬 𑀞𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀏𑀯𑀫𑁂𑀯 𑀧𑀭𑀫𑁆𑀧𑀭𑀪𑀽𑀢𑀸 𑀩𑀳𑀯𑁄 𑀆𑀘𑀭𑀺𑀬𑀯𑀭𑀸 𑀓𑀭𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀩𑀤𑁆𑀥𑀲𑀻𑀫𑀯𑀺𑀭𑀳𑀸𑀬 𑀲𑀼𑀤𑁆𑀥𑀉𑀧𑀘𑀸𑀭𑀲𑀻𑀫𑀸𑀬 𑀲𑀢𑀺 𑀢𑀲𑁆𑀲𑀁𑀬𑁂𑀯 𑀉𑀧𑀘𑀸𑀭𑀲𑀻𑀫𑀸𑀬𑀁 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀧𑀺 𑀯𑀸𑀘𑁂𑀢𑀩𑁆𑀩𑀸, 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀢𑁆𑀣𑀭𑀡𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦 𑀦𑁂𑀲𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) 𑀓𑀣𑀺𑀦𑀢𑁆𑀣𑀸𑀭𑀝𑁆𑀞𑀸𑀦𑀪𑀽𑀢𑀸𑀬 𑀲𑀻𑀫𑀸𑀬 𑀉𑀧𑀘𑀸𑀭𑀲𑀻𑀫𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀲𑁆𑀲𑀁𑀬𑁂𑀯 𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁮) 𑀧𑀼𑀩𑁆𑀩𑁂 𑀦𑀺𑀤𑁆𑀤𑀺𑀝𑁆𑀞𑀧𑀸𑀞𑁂 ‘‘𑀢𑀲𑁆𑀫𑀺𑀁𑀬𑁂𑀯 𑀲𑀻𑀫𑀫𑀡𑁆𑀟𑀮𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸 𑀲𑀗𑁆𑀖𑁄 𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩𑁄’’𑀢𑀺 𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀻𑀫𑀸𑀬𑀫𑁂𑀯 𑀅𑀢𑁆𑀣𑀭𑀺𑀢𑀩𑁆𑀩𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀢𑁆𑀣𑀭𑀡𑀁 𑀦 𑀓𑀸𑀢𑀩𑁆𑀩𑀁, 𑀢𑀲𑁆𑀲𑀁𑀬𑁂𑀯 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑀸𑀭𑁄 𑀓𑀸𑀢𑀩𑁆𑀩𑁄, 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀞𑀺𑀢𑀁 𑀩𑀤𑁆𑀥𑀲𑀻𑀫𑀁 𑀕𑀦𑁆𑀢𑁆𑀯𑀸 𑀅𑀢𑁆𑀣𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺.

𑀢𑀢𑁆𑀭𑁂𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 𑀇𑀤𑀁 𑀪𑀸𑀲𑀦𑁆𑀢𑀭𑁂𑀲𑀼 ‘‘𑀜𑀢𑁆𑀢𑀻’’𑀢𑀺 𑀓𑀣𑀺𑀢𑀁 𑀓𑀣𑀺𑀦𑀤𑀸𑀦𑀓𑀫𑁆𑀫𑀁 𑀘𑀢𑀽𑀲𑀼 𑀲𑀗𑁆𑀖𑀓𑀫𑁆𑀫𑁂𑀲𑀼 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀳𑁄𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀦𑀯𑀲𑀼 𑀞𑀸𑀦𑁂𑀲𑀼 𑀓𑀣𑀺𑀦𑀤𑀸𑀦𑀁, 𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑀁, 𑀬𑀤𑀺 ‘‘𑀉𑀧𑀘𑀸𑀭𑀲𑀻𑀫𑀸𑀬𑀁 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀓𑀸𑀢𑀩𑁆𑀩𑀸𑀦𑀻’’𑀢𑀺 𑀧𑀓𑀭𑀡𑁂𑀲𑀼 𑀆𑀕𑀢𑀁 𑀅𑀪𑀯𑀺𑀲𑁆𑀲𑀸, 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀯𑀘𑀦𑀸𑀦𑀼𑀭𑀽𑀧𑀢𑁄 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀣𑀺𑀦𑀤𑀸𑀦𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀁 𑀯𑀸𑀘𑁂𑀢𑀩𑁆𑀩𑀁 𑀅𑀪𑀯𑀺𑀲𑁆𑀲𑀸, 𑀦 𑀧𑀦 𑀧𑀓𑀭𑀡𑁂𑀲𑀼 ‘‘𑀉𑀧𑀘𑀸𑀭𑀲𑀻𑀫𑀸𑀬𑀁 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀓𑀸𑀢𑀩𑁆𑀩𑀸𑀦𑀻’’𑀢𑀺 𑀆𑀕𑀢𑀁, 𑀅𑀣 𑀔𑁄 ‘‘𑀲𑀗𑁆𑀖𑀮𑀸𑀪𑀯𑀺𑀪𑀚𑀦𑀁, 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀢𑁆𑀯𑀸 𑀆𑀭𑀸𑀫𑀧𑁆𑀧𑀯𑀺𑀲𑀦𑀁, 𑀕𑀫𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀆𑀧𑀼𑀘𑁆𑀙𑀦𑀁, 𑀦𑀺𑀲𑁆𑀲𑀬𑀧𑀅𑀧𑁆𑀧𑀲𑁆𑀲𑀫𑁆𑀪𑀦𑀁, 𑀧𑀸𑀭𑀺𑀯𑀸𑀲𑀺𑀓𑀫𑀸𑀦𑀢𑁆𑀢𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀅𑀭𑀼𑀡𑀼𑀝𑁆𑀞𑀸𑀧𑀦𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀸𑀫𑀧𑁆𑀧𑀯𑀺𑀲𑀦𑀆𑀧𑀼𑀘𑁆𑀙𑀦𑀁 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀏𑀯 𑀉𑀧𑀘𑀸𑀭𑀲𑀻𑀫𑀸𑀬 𑀓𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀆𑀕𑀢𑀁, 𑀢𑀲𑁆𑀫𑀸 𑀓𑀣𑀺𑀦𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀓𑁂𑀯𑀮𑀸𑀬𑀁 𑀉𑀧𑀘𑀸𑀭𑀲𑀻𑀫𑀸𑀬𑀁 𑀦 𑀯𑀸𑀘𑁂𑀢𑀩𑁆𑀩𑀸𑀢𑀺 𑀲𑀺𑀤𑁆𑀥𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀢𑀺𑀬𑁄𑀚𑀦𑀸𑀧𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀺𑀬𑁄𑀚𑀦𑁂 𑀞𑀺𑀢𑀸 𑀮𑀸𑀪𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀕𑀫𑀺𑀓𑁄 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀭𑀸𑀫𑀧𑁆𑀧𑀯𑀺𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀅𑀝𑁆𑀞𑀓𑀣𑀸𑀧𑀸𑀞𑀢𑁄 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀅𑀣𑁂𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀉𑀧𑀘𑀸𑀭𑀲𑀻𑀫𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀞𑀸𑀦𑀁 𑀦 𑀳𑁄𑀢𑀻’’𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀅𑀣 𑀘 𑀧𑀦 𑀓𑀢𑀧𑀼𑀩𑁆𑀩𑀁 𑀅𑀢𑁆𑀣𑀺. 𑀢𑀣𑀸 𑀳𑀺 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀘𑀻𑀯𑀭𑀦𑀺𑀤𑀳𑀓𑀲𑀫𑁆𑀫𑀼𑀢𑀺𑀘𑀻𑀯𑀭𑀪𑀸𑀚𑀓𑀲𑀫𑁆𑀫𑀼𑀢𑀻𑀦𑀁 ‘‘𑀲𑀼𑀡𑀸𑀢𑀼 𑀫𑁂…𑀧𑁂… 𑀥𑀸𑀭𑀬𑀸𑀫𑀻𑀢𑀺 𑀇𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀲𑀩𑁆𑀩𑀲𑀗𑁆𑀖𑀫𑀚𑁆𑀛𑁂𑀧𑀺 𑀔𑀡𑁆𑀟𑀲𑀻𑀫𑀸𑀬𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁯𑁪) 𑀆𑀕𑀢𑁄. 𑀪𑀡𑁆𑀟𑀸𑀕𑀸𑀭𑀲𑁆𑀲 𑀧𑀦 ‘‘𑀇𑀫𑀁 𑀧𑀦 𑀪𑀡𑁆𑀟𑀸𑀕𑀸𑀭𑀁 𑀔𑀡𑁆𑀟𑀲𑀻𑀫𑀁 𑀕𑀦𑁆𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀬 𑀦𑀺𑀲𑀺𑀦𑁆𑀦𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 ‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁯𑁭) 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀪𑀸𑀯𑁄 𑀆𑀕𑀢𑁄𑀢𑀺.

𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 𑁋 𑀲𑀘𑁂𑀧𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁 ‘‘𑀅𑀦𑁆𑀢𑁄𑀯𑀺𑀳𑀸𑀭𑁂’’𑀢𑀺 𑀧𑀸𑀞𑁄 ‘‘𑀯𑀺𑀳𑀸𑀭𑀫𑀚𑁆𑀛𑁂’’𑀢𑀺 𑀧𑀸𑀞𑁄 𑀘 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀫𑀜𑁆𑀜𑀫𑀸𑀦𑀸 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣, 𑀢𑁂 𑀧𑀦 𑀧𑀸𑀞𑀸 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑀸, 𑀅𑀣 𑀔𑁄 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀗𑁆𑀔𑀸𑀢𑀁 𑀫𑀳𑀸𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀔𑀡𑁆𑀟𑀲𑀻𑀫𑀸𑀬 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀔𑀡𑁆𑀟𑀲𑀻𑀫𑀸𑀬 𑀳𑀺 𑀫𑀳𑀸𑀲𑀻𑀫𑀸 𑀏𑀯 𑀧𑀝𑀺𑀬𑁄𑀕𑀻 𑀳𑁄𑀢𑀺. 𑀉𑀧𑀘𑀸𑀭𑀲𑀻𑀫𑀸𑀢𑀺 𑀅𑀬𑀫𑀢𑁆𑀣𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺 𑀘𑁂? ‘‘𑀇𑀫𑀁 𑀧𑀦 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀳𑀺 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀻𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀲𑀼𑀔𑀓𑀭𑀡𑀢𑁆𑀣𑀁 𑀧𑀞𑀫𑀁 𑀔𑀡𑁆𑀟𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸…𑀧𑁂… 𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀦 𑀓𑁄𑀧𑁂𑀦𑁆𑀢𑀺, 𑀫𑀳𑀸𑀲𑀻𑀫𑀸𑀬 𑀯𑀸 𑀞𑀺𑀢𑀸 𑀔𑀡𑁆𑀟𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁. 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀦 𑀞𑀺𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀅𑀝𑁆𑀞𑀓𑀣𑀸𑀧𑀸𑀞𑀯𑀲𑁂𑀦 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀚𑀸𑀦𑀺𑀢𑀩𑁆𑀩𑁄𑀢𑀺. 𑀅𑀣 𑀯𑀸 𑀢𑁂𑀳𑀺 𑀆𑀬𑀲𑁆𑀫𑀦𑁆𑀢𑁂𑀳𑀺 𑀆𑀪𑀢𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀧𑀸𑀞𑀯𑀲𑁂𑀦𑀧𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀓𑀣𑀁? 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀸𑀤𑀺𑀧𑀼𑀕𑁆𑀕𑀮𑀲𑀫𑁆𑀫𑀼𑀢𑀺𑀬𑁄 𑀧𑀦 𑀅𑀦𑁆𑀢𑁄𑀯𑀺𑀳𑀸𑀭𑁂 𑀲𑀩𑁆𑀩𑀲𑀗𑁆𑀖𑀫𑀚𑁆𑀛𑁂𑀧𑀺 𑀔𑀡𑁆𑀟𑀲𑀻𑀫𑀸𑀬𑀫𑁆𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺, 𑀪𑀡𑁆𑀟𑀸𑀕𑀸𑀭𑀲𑀗𑁆𑀔𑀸𑀢𑀯𑀺𑀳𑀸𑀭𑀲𑀫𑁆𑀫𑀼𑀢𑀺 𑀧𑀦 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀯𑀺𑀲𑁂𑀲𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑀢𑀢𑁆𑀭𑁂𑀯𑀁 𑀯𑀺𑀲𑁂𑀲𑀓𑀸𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 ‘‘𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀯𑀢𑁆𑀣𑀼 𑀅𑀜𑁆𑀜𑀺𑀲𑁆𑀲𑀸 𑀓𑀫𑁆𑀫𑀯𑀸𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀤𑁄𑀲𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑀲𑀫𑁆𑀫𑀼𑀢𑀺𑀬𑁄 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀯𑀢𑁆𑀣𑀼𑀢𑁆𑀢𑀸 𑀬𑀤𑀺 𑀫𑀳𑀸𑀲𑀻𑀫𑀪𑀽𑀢𑁂 𑀅𑀦𑁆𑀢𑁄𑀯𑀺𑀳𑀸𑀭𑁂 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀲𑀗𑁆𑀖𑀫𑀚𑁆𑀛𑁂 𑀢𑀁 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸 𑀓𑀭𑁂𑀬𑁆𑀬𑀼𑀁. 𑀬𑀤𑀺 𑀔𑀡𑁆𑀟𑀲𑀻𑀫𑀸𑀬 𑀓𑀢𑁆𑀢𑀼𑀓𑀸𑀫𑀸, 𑀢𑀁 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 𑀔𑀡𑁆𑀟𑀲𑀻𑀫𑀁 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀓𑀫𑁆𑀫𑀧𑁆𑀧𑀢𑁆𑀢𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸 𑀓𑀭𑁂𑀬𑁆𑀬𑀼𑀁. 𑀉𑀪𑀬𑀣𑀸𑀧𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑁄 𑀦𑀢𑁆𑀣𑀺, 𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺 𑀧𑀦 𑀪𑀡𑁆𑀟𑀸𑀕𑀸𑀭𑀲𑁆𑀲 𑀯𑀺𑀳𑀸𑀭𑀢𑁆𑀢𑀸 𑀔𑀡𑁆𑀟𑀲𑀻𑀫𑀁 𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀬𑀤𑀺 𑀢𑀁 𑀲𑀫𑁆𑀫𑀼𑀢𑀺𑀁 𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 𑀓𑀭𑁂𑀬𑁆𑀬𑀼𑀁, 𑀯𑀢𑁆𑀣𑀼 𑀫𑀳𑀸𑀲𑀻𑀫𑀸𑀬𑀁 𑀳𑁄𑀢𑀺, 𑀓𑀫𑁆𑀫𑀯𑀸𑀘𑀸 𑀔𑀡𑁆𑀟𑀲𑀻𑀫𑀸𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑁄 𑀳𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀤𑁄𑀲𑁂 𑀲𑀢𑀺 𑀯𑀢𑁆𑀣𑀼𑀯𑀺𑀧𑀦𑁆𑀦𑀢𑁆𑀢𑀸 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀳𑀸𑀲𑀻𑀫𑀪𑀽𑀢𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀲𑀸 𑀲𑀫𑁆𑀫𑀼𑀢𑀺 𑀓𑀸𑀢𑀩𑁆𑀩𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑀺, 𑀦 𑀉𑀧𑀘𑀸𑀭𑀲𑀻𑀫𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀅𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀯𑀺𑀳𑀸𑀭𑀲𑀤𑁆𑀤𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀪𑀽𑀢𑀸 𑀫𑀳𑀸𑀲𑀻𑀫𑀸𑀯 𑀯𑀼𑀢𑁆𑀢𑀸, 𑀦 𑀉𑀧𑀘𑀸𑀭𑀲𑀻𑀫𑀸’’𑀢𑀺 𑀇𑀤𑀁 𑀯𑀘𑀦𑀁 𑀓𑀣𑀁 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺? 𑀇𑀫𑀺𑀦𑀸𑀬𑁂𑀯 𑀅𑀝𑁆𑀞𑀓𑀣𑀸𑀯𑀘𑀦𑁂𑀦. 𑀬𑀤𑀺 𑀳𑀺 𑀉𑀧𑀘𑀸𑀭𑀲𑀻𑀫𑀸 𑀯𑀼𑀢𑁆𑀢𑀸 𑀪𑀯𑁂𑀬𑁆𑀬, 𑀉𑀧𑀘𑀸𑀭𑀲𑀻𑀫𑀸 𑀦𑀸𑀫 𑀩𑀤𑁆𑀥𑀲𑀻𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸𑀧𑀺 𑀧𑀯𑀢𑁆𑀢𑀸 𑀆𑀯𑀸𑀲𑁂𑀲𑀼 𑀯𑀸 𑀪𑀺𑀓𑁆𑀔𑀽𑀲𑀼 𑀯𑀸 𑀯𑀟𑁆𑀠𑀦𑁆𑀢𑁂𑀲𑀼 𑀅𑀦𑀺𑀬𑀫𑀯𑀲𑁂𑀦 𑀯𑀟𑁆𑀠𑀢𑀺, 𑀢𑀲𑁆𑀫𑀸 𑀔𑀡𑁆𑀟𑀲𑀻𑀫𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀯𑀺𑀳𑀸𑀭𑁂𑀦 𑀲𑀳 𑀔𑀡𑁆𑀟𑀲𑀻𑀫𑀸 𑀏𑀓𑀲𑀻𑀫𑀸𑀬𑁂𑀯 𑀳𑁄𑀢𑀺, 𑀏𑀯𑀁 𑀲𑀢𑀺 𑀯𑀺𑀳𑀸𑀭𑁂 𑀞𑀺𑀢𑀁 𑀪𑀡𑁆𑀟𑀸𑀕𑀸𑀭𑀁 𑀔𑀡𑁆𑀟𑀲𑀻𑀫𑀸𑀬 𑀞𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀦 𑀧𑀦 𑀲𑀓𑁆𑀓𑀸 ‘‘𑀔𑀡𑁆𑀟𑀲𑀻𑀫𑀸𑀬 𑀦𑀺𑀲𑀺𑀦𑁆𑀦𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) 𑀧𑀝𑀺𑀲𑀺𑀤𑁆𑀥𑀢𑁆𑀢𑀸. 𑀢𑁂𑀦 𑀜𑀸𑀬𑀢𑀺 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀳𑀸𑀭𑀲𑀤𑁆𑀤𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀪𑀽𑀢𑀸 𑀫𑀳𑀸𑀲𑀻𑀫𑀸 𑀯𑀼𑀢𑁆𑀢𑀸, 𑀦 𑀉𑀧𑀘𑀸𑀭𑀲𑀻𑀫𑀸’’𑀢𑀺. 𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑀺𑀬𑀫𑀯𑀲𑁂𑀦 𑀯𑀟𑁆𑀠𑀦𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? ‘‘𑀉𑀧𑀘𑀸𑀭𑀲𑀻𑀫𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁄𑀢𑀺. 𑀅𑀧𑀺𑀘 𑀪𑀺𑀓𑁆𑀔𑀽𑀦𑀁 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄 𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑁄𑀚𑀦𑀲𑀸𑀮𑀢𑁄 𑀯𑀸 𑀦𑀺𑀩𑀤𑁆𑀥𑀯𑀲𑀦𑀓𑀆𑀯𑀸𑀲𑀢𑁄 𑀯𑀸 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀧𑀦 𑀆𑀯𑀸𑀲𑁂𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀺, 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 𑀧𑀭𑀺𑀳𑀸𑀬𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘𑀪𑀺𑀓𑁆𑀔𑀽𑀲𑀼𑀧𑀺 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀯 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀮𑀸𑀪𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀘𑀦𑀢𑁄𑀢𑀺.

𑀬𑀤𑀺 𑀏𑀯𑀁 𑀉𑀧𑀘𑀸𑀭𑀲𑀻𑀫𑀸𑀬 𑀓𑀣𑀺𑀦𑀢𑁆𑀣𑀢𑀪𑀸𑀯𑁄 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀓𑀣𑀺𑀦𑀢𑁆𑀣𑀭𑀡𑀁 𑀦𑀸𑀫 𑀦 𑀲𑀗𑁆𑀖𑀓𑀫𑁆𑀫𑀁, 𑀧𑀼𑀕𑁆𑀕𑀮𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀸𑀬 𑀉𑀧𑀘𑀸𑀭𑀲𑀻𑀫𑀸𑀬 𑀓𑀸𑀢𑀩𑁆𑀩𑀸 𑀳𑁄𑀢𑀺. 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸 𑀧𑀦 𑀲𑀗𑁆𑀖𑀓𑀫𑁆𑀫𑀪𑀽𑀢𑀸, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑀸𑀬 𑀩𑀤𑁆𑀥𑀸𑀩𑀤𑁆𑀥𑀲𑀻𑀫𑀸𑀬𑀫𑁂𑀯 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀪𑁄 ‘‘𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀓𑁂 𑀮𑀪𑀦𑁆𑀢𑀺, 𑀓𑁂 𑀦 𑀮𑀪𑀦𑁆𑀢𑀺? 𑀕𑀡𑀦𑀯𑀲𑁂𑀦 𑀢𑀸𑀯 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘 𑀚𑀦𑀸 𑀮𑀪𑀦𑁆𑀢𑀺, 𑀉𑀤𑁆𑀥𑀁 𑀲𑀢𑀲𑀳𑀲𑁆𑀲𑀫𑁆𑀧𑀺, 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀮𑀪𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 ‘‘𑀓𑀣𑀺𑀦𑀢𑁆𑀣𑀭𑀡𑀁 𑀦𑀸𑀫 𑀦 𑀲𑀗𑁆𑀖𑀓𑀫𑁆𑀫𑀁, 𑀧𑀼𑀕𑁆𑀕𑀮𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? ‘‘𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀻’’𑀢𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁧𑁪) 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀞𑀸𑀦𑁂𑀲𑀼 𑀅𑀧𑀯𑀺𑀝𑁆𑀞𑀢𑁆𑀢𑀸 𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀣𑀺𑀦𑀢𑁆𑀣𑀸𑀭𑀲𑁆𑀲 𑀉𑀧𑀘𑀸𑀭𑀪𑀽𑀢𑀁 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀪𑀡𑀦𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀓𑀣𑀺𑀦𑀤𑀸𑀬𑀓𑀸 𑀘𑀢𑁆𑀢𑀸𑀭𑁄, 𑀧𑀝𑀺𑀕𑁆𑀕𑀸𑀳𑀓𑁄 𑀏𑀓𑁄𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘 𑀳𑁄𑀦𑁆𑀢𑀺, 𑀢𑀢𑁄 𑀳𑁂𑀝𑁆𑀞𑀸 𑀦 𑀮𑀪𑀢𑀻𑀢𑀺. 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑀓𑀫𑁆𑀫𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? ‘‘𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀦𑀯𑀲𑀼 𑀞𑀸𑀦𑁂𑀲𑀼 𑀓𑀣𑀺𑀦𑀤𑀸𑀦’’𑀦𑁆𑀢𑀺 𑀆𑀕𑀢𑀢𑁆𑀢𑀸, ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀘𑀸𑀢𑀺.

𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀪𑀸𑀲𑀦𑁆𑀢𑀭𑁂𑀲𑀼 𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬 𑀧𑀯𑀺𑀲𑀢𑀺, 𑀅𑀢𑁆𑀣𑀸𑀭𑀓𑀺𑀭𑀺𑀬𑀸 𑀘 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀧𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀸𑀢𑀩𑁆𑀩𑀸𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀫𑀳𑀸𑀯𑀕𑁆𑀕𑀧𑀸𑀴𑀺𑀬𑀁 (𑀫𑀳𑀸𑀯. 𑁩𑁦𑁬) ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 𑀓𑀣𑀺𑀦𑀤𑀸𑀦𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀦𑀼𑀫𑁄𑀤𑀦𑀸 𑀧𑀸𑀞𑁄 𑀆𑀕𑀢𑁄, 𑀧𑀭𑀺𑀯𑀸𑀭𑀧𑀸𑀴𑀺𑀬𑀜𑁆𑀘 (𑀧𑀭𑀺. 𑁪𑁧𑁨) ‘‘𑀓𑀣𑀺𑀦𑀢𑁆𑀣𑀸𑀭𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀉𑀤𑁆𑀤𑁂𑀲𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀲𑀘𑁂 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀢𑁆𑀣𑀸𑀭𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀅𑀦𑀼𑀫𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀲𑀗𑁆𑀖𑁂𑀦 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀩𑁆𑀩𑀁…𑀧𑁂… 𑀅𑀦𑀼𑀫𑁄𑀤𑀸𑀫𑀸’’𑀢𑀺 𑀜𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀦𑀼𑀫𑁄𑀤𑀦𑀸 𑀧𑀸𑀞𑁄 𑀆𑀕𑀢𑁄, 𑀢𑀲𑁆𑀫𑀸 𑀜𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀦𑀼𑀫𑁄𑀤𑀦𑀸 𑀲𑀩𑁆𑀩𑁄 𑀯𑀺𑀥𑀺 𑀓𑀣𑀺𑀦𑀢𑁆𑀣𑀸𑀭𑀓𑀺𑀭𑀺𑀬𑀸𑀬𑀁 𑀧𑀯𑀺𑀲𑀢𑀺, 𑀢𑀢𑁄 𑀓𑀣𑀺𑀦𑀢𑁆𑀣𑀸𑀭𑀓𑀺𑀭𑀺𑀬𑀸𑀬 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀢𑁆𑀢𑀩𑁆𑀩𑀸𑀬 𑀲𑀢𑀺 𑀜𑀢𑁆𑀢𑀺𑀲𑀗𑁆𑀔𑀸𑀢𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸𑀧𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀢𑁆𑀢𑀩𑁆𑀩𑀸𑀬𑁂𑀯𑀸𑀢𑀺.

𑀢𑀢𑁆𑀭𑁂𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬 𑀯𑀺𑀲𑀼𑀁 𑀅𑀦𑀸𑀕𑀢𑀸𑀬 𑀲𑀢𑀺 ‘‘𑀲𑀩𑁆𑀩𑁄 𑀯𑀺𑀥𑀺 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬𑀁 𑀧𑀯𑀺𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀅𑀣 𑀘 𑀧𑀦 𑀫𑀳𑀸𑀯𑀕𑁆𑀕𑀧𑀸𑀴𑀺𑀬𑀜𑁆𑀘 𑀧𑀭𑀺𑀯𑀸𑀭𑀧𑀸𑀴𑀺𑀬𑀜𑁆𑀘 𑀅𑀢𑁆𑀣𑀸𑀭𑀓𑀺𑀭𑀺𑀬𑀸 𑀯𑀺𑀲𑀼𑀁 𑀆𑀕𑀢𑀸𑀬𑁂𑀯, 𑀢𑀲𑁆𑀫𑀸 𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬𑀁 𑀦 𑀧𑀯𑀺𑀲𑀢𑀺, 𑀓𑁂𑀯𑀮𑀁 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬 𑀉𑀧𑀘𑀸𑀭𑀪𑀽𑀢𑀢𑁆𑀢𑀸 𑀧𑀦 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀯𑀼𑀢𑁆𑀢𑀁. 𑀬𑀣𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸’’𑀢𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀁 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑁂𑀦 𑀲𑀳 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀯𑀸𑀘𑀸 𑀤𑁂𑀲𑀺𑀢𑀸, 𑀢𑀢𑁆𑀣 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀦 𑀳𑁄𑀢𑀺, 𑀓𑀫𑁆𑀫𑀯𑀸𑀘𑀸𑀬𑁂𑀯 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀳𑁄𑀢𑀺, 𑀢𑀣𑀸𑀧𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀯𑀸𑀘𑀸𑀬 𑀉𑀧𑀘𑀸𑀭𑀪𑀸𑀯𑀢𑁄 𑀲𑀳 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑁂𑀦 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀯𑀸𑀘𑀸 𑀤𑁂𑀲𑀺𑀢𑀸. 𑀬𑀣𑀸 𑀘 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀯𑀺𑀥𑀺𑀁 𑀤𑁂𑀲𑁂𑀦𑁆𑀢𑁄 ‘‘𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀕𑀸𑀳𑀸𑀧𑀦𑀸𑀤𑀺𑀦𑀸 𑀲𑀳 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀤𑁂𑀲𑀺𑀢𑀁, 𑀢𑀢𑁆𑀣 𑀉𑀧𑀚𑁆𑀛𑀸𑀬𑀕𑀸𑀳𑀸𑀧𑀦𑀸𑀤𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀦 𑀳𑁄𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸𑀬𑁂𑀯 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀳𑁄𑀢𑀺, 𑀢𑀣𑀸𑀧𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀲𑀫𑀻𑀧𑁂 𑀪𑀽𑀢𑀢𑁆𑀢𑀸 𑀉𑀧𑀚𑁆𑀛𑀸𑀬𑀕𑀸𑀳𑀸𑀧𑀦𑀸𑀤𑀺𑀦𑀸 𑀲𑀳 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀸𑀘𑀸 𑀤𑁂𑀲𑀺𑀢𑀸, 𑀏𑀯𑀫𑁂𑀢𑁆𑀣 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸 𑀦 𑀳𑁄𑀢𑀺, 𑀢𑀣𑀸𑀧𑀺 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬 𑀉𑀧𑀘𑀸𑀭𑀪𑀽𑀢𑀢𑁆𑀢𑀸 𑀓𑀣𑀺𑀦𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀳 𑀓𑀣𑀺𑀦𑀢𑁆𑀣𑀸𑀭𑀓𑀺𑀭𑀺𑀬𑀸 𑀤𑁂𑀲𑀺𑀢𑀸, 𑀢𑀲𑁆𑀫𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬𑀁 𑀦 𑀧𑀯𑀺𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀘 𑀅𑀢𑁆𑀣𑀸𑀭𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀅𑀢𑀼𑀮𑁆𑀬𑀓𑀺𑀭𑀺𑀬𑀸 𑀅𑀢𑀼𑀮𑁆𑀬𑀓𑀢𑁆𑀢𑀸𑀭𑁄 𑀅𑀢𑀼𑀮𑁆𑀬𑀓𑀫𑁆𑀫𑀸 𑀅𑀢𑀼𑀮𑁆𑀬𑀓𑀸𑀮𑀸 𑀘 𑀳𑁄𑀦𑁆𑀢𑀺, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀪𑀸𑀲𑀦𑁆𑀢𑀭𑁂𑀲𑀼 𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸𑀬𑀁 𑀦 𑀧𑀯𑀺𑀲𑀢𑀻’’𑀢𑀺. 𑀢𑀢𑁆𑀣 𑀓𑀣𑀁 𑀅𑀢𑀼𑀮𑁆𑀬𑀓𑀺𑀭𑀺𑀬𑀸 𑀳𑁄𑀦𑁆𑀢𑀺? 𑀓𑀫𑁆𑀫𑀯𑀸𑀘𑀸 𑀤𑀸𑀦𑀓𑀺𑀭𑀺𑀬𑀸 𑀳𑁄𑀢𑀺, 𑀅𑀢𑁆𑀣𑀸𑀭𑁄 𑀧𑀦𑁆𑀦𑀭𑀲𑀥𑀫𑁆𑀫𑀸𑀦𑀁 𑀓𑀸𑀭𑀡𑀪𑀽𑀢𑀸 𑀅𑀢𑁆𑀣𑀸𑀭𑀓𑀺𑀭𑀺𑀬𑀸, 𑀏𑀯𑀁 𑀅𑀢𑀼𑀮𑁆𑀬𑀓𑀺𑀭𑀺𑀬𑀸. 𑀓𑀣𑀁 𑀅𑀢𑀼𑀮𑁆𑀬𑀓𑀢𑁆𑀢𑀸𑀭𑁄𑀢𑀺? 𑀓𑀫𑁆𑀫𑀯𑀸𑀘𑀸𑀬 𑀓𑀢𑁆𑀢𑀸 𑀲𑀗𑁆𑀖𑁄 𑀳𑁄𑀢𑀺, 𑀅𑀢𑁆𑀣𑀸𑀭𑀲𑁆𑀲 𑀓𑀢𑁆𑀢𑀸 𑀧𑀼𑀕𑁆𑀕𑀮𑁄, 𑀏𑀯𑀁 𑀅𑀢𑀼𑀮𑁆𑀬𑀓𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀓𑀣𑀁 𑀅𑀢𑀼𑀮𑁆𑀬𑀓𑀫𑁆𑀫𑀸 𑀳𑁄𑀦𑁆𑀢𑀺? 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀳𑁄𑀢𑀺, 𑀅𑀢𑁆𑀣𑀸𑀭𑀲𑁆𑀲 𑀓𑀫𑁆𑀫𑀁 𑀓𑀣𑀺𑀦𑀲𑀗𑁆𑀔𑀸𑀢𑀸 𑀲𑀫𑀽𑀳𑀧𑀜𑁆𑀜𑀢𑁆𑀢𑀺, 𑀏𑀯𑀁 𑀅𑀢𑀼𑀮𑁆𑀬𑀓𑀫𑁆𑀫𑀸 𑀳𑁄𑀦𑁆𑀢𑀺. 𑀓𑀣𑀁 𑀅𑀢𑀼𑀮𑁆𑀬𑀓𑀸𑀮𑀸 𑀳𑁄𑀦𑁆𑀢𑀺? 𑀓𑀣𑀺𑀦𑀤𑀸𑀦𑀓𑀫𑁆𑀫𑀯𑀸𑀘𑀸 𑀧𑀼𑀩𑁆𑀩𑀓𑀭𑀡𑀧𑀘𑁆𑀘𑀼𑀤𑁆𑀥𑀸𑀭𑀅𑀥𑀺𑀝𑁆𑀞𑀸𑀦𑀸𑀦𑀁 𑀧𑀼𑀩𑁆𑀩𑁂 𑀳𑁄𑀢𑀺, 𑀅𑀢𑁆𑀣𑀸𑀭𑁄 𑀢𑁂𑀲𑀁 𑀧𑀘𑁆𑀙𑀸, 𑀏𑀯𑀁 𑀅𑀢𑀼𑀮𑁆𑀬𑀓𑀸𑀮𑀸 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀅𑀢𑁆𑀣𑀸𑀭𑁄 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀘𑀻𑀪𑁂𑀤𑀲𑀗𑁆𑀔𑀸𑀢𑁂𑀦 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑁄, 𑀦 𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀸𑀤𑀺𑀦𑀸 𑀅𑀦𑁂𑀓𑁂𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁮) ‘‘𑀅𑀢𑁆𑀣𑀸𑀭𑁄 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑁄 𑀯𑀘𑀻𑀪𑁂𑀤𑁂𑀦𑀸’’𑀢𑀺. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 ‘‘𑀦 𑀜𑀢𑁆𑀢𑀺 𑀅𑀢𑁆𑀣𑀸𑀭𑁂 𑀧𑀯𑀺𑀝𑁆𑀞𑀸’’𑀢𑀺.

𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀺, 𑀓𑁂 𑀦 𑀮𑀪𑀦𑁆𑀢𑀻𑀢𑀺? 𑀕𑀡𑀦𑀯𑀲𑁂𑀦 𑀢𑀸𑀯 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘 𑀚𑀦𑀸 𑀮𑀪𑀦𑁆𑀢𑀺, 𑀉𑀤𑁆𑀥𑀁 𑀲𑀢𑀲𑀳𑀲𑁆𑀲𑀫𑁆𑀧𑀺, 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀮𑀪𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀆𑀕𑀢𑀢𑁆𑀢𑀸 ‘‘𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀧𑀜𑁆𑀘 𑀪𑀺𑀓𑁆𑀔𑀽 𑀓𑀣𑀺𑀦𑀢𑁆𑀣𑀸𑀭𑀁 𑀮𑀪𑀦𑁆𑀢𑀺, 𑀢𑀢𑁄 𑀅𑀧𑁆𑀧𑀓𑀢𑀭𑀸 𑀦 𑀮𑀪𑀦𑁆𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀻𑀝𑀻𑀓𑀸𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 ‘‘𑀯𑀝𑁆𑀝𑀢𑀻’’𑀢𑀺 𑀓𑀺𑀭𑀺𑀬𑀸𑀬 𑀓𑀢𑁆𑀢𑀸 ‘‘𑀲𑁄 𑀓𑀣𑀺𑀦𑀢𑁆𑀣𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀸𑀭𑁄𑀢𑀺 𑀇𑀫𑀺𑀦𑀸 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀼𑀢𑁆𑀢𑀅𑀢𑁆𑀣𑀭𑀡𑀓𑀺𑀭𑀺𑀬𑀸 𑀦 𑀅𑀥𑀺𑀧𑁆𑀧𑁂𑀢𑀸, 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀢𑁆𑀢𑀺𑀬𑀸 𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀺…𑀧𑁂… 𑀉𑀤𑁆𑀥𑀁 𑀲𑀢𑀲𑀳𑀲𑁆𑀲𑀦𑁆𑀢𑀺 𑀇𑀤𑀁 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀫𑁆𑀧𑀺 𑀧𑀸𑀞𑁂 𑀜𑀢𑁆𑀢𑀺𑀬𑀸 𑀤𑀺𑀦𑁆𑀦𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀧𑀜𑁆𑀘 𑀚𑀦𑀸 𑀅𑀢𑁆𑀣𑀸𑀭𑀁 𑀮𑀪𑀦𑁆𑀢𑀻’’𑀢𑀺 𑀇𑀤𑀁 𑀯𑀘𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁, ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀭𑀡𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀦𑁆𑀢𑀺 𑀝𑀻𑀓𑀸𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀓𑀗𑁆𑀔𑀸𑀯𑀺𑀢𑀭𑀡𑀻𑀝𑀻𑀓𑀸-𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀓𑀸𑀭𑀓𑁂𑀳𑀺 𑀆𑀘𑀭𑀺𑀬𑁂𑀳𑀺 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀅𑀢𑁆𑀣𑀸𑀭𑁄 𑀦𑀸𑀫𑀸’’𑀢𑀺 𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀣𑀺𑀦𑀤𑀸𑀦𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀓𑀭𑀡𑀁 𑀬𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀭𑁂𑀯𑀁 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑁋 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁𑀬𑁂𑀯 𑀅𑀢𑁆𑀣𑀸𑀭𑁄 𑀦𑀸𑀫𑀸’’𑀢𑀺 𑀝𑀻𑀓𑀸𑀘𑀭𑀺𑀬𑀸 𑀦 𑀯𑀤𑁂𑀬𑁆𑀬𑀼𑀁. 𑀯𑀤𑁂𑀬𑁆𑀬𑀼𑀁 𑀘𑁂, 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀤𑁆𑀥𑁄 𑀲𑀺𑀬𑀸. 𑀓𑀣𑀁 𑀯𑀺𑀭𑀼𑀤𑁆𑀥𑁄𑀢𑀺 𑀘𑁂? ‘‘𑀙𑀺𑀦𑁆𑀦𑀯𑀲𑁆𑀲𑀸 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀯𑀸 𑀦 𑀮𑀪𑀦𑁆𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀦 𑀮𑀪𑀦𑁆𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀆𑀕𑀢𑀢𑁆𑀢𑀸 ‘‘𑀢𑁂 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀓𑀣𑀺𑀦𑀢𑁆𑀣𑀸𑀭𑀁 𑀦 𑀮𑀪𑀦𑁆𑀢𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀅𑀢𑁆𑀣𑀸𑀭𑁄 𑀦𑀸𑀫 𑀲𑀺𑀬𑀸, 𑀏𑀯𑀁 𑀲𑀢𑀺 𑀢𑁂 𑀪𑀺𑀓𑁆𑀔𑀽 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀧𑀺 𑀕𑀡𑀧𑀽𑀭𑀓𑀪𑀸𑀯𑁂𑀦 𑀅𑀧𑁆𑀧𑀯𑀺𑀝𑁆𑀞𑀸 𑀲𑀺𑀬𑀼𑀁. 𑀅𑀣 𑀘 𑀧𑀦 ‘‘𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸𑀦𑀁 𑀧𑀦 𑀲𑀩𑁆𑀩𑁂 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀯𑀼𑀢𑁆𑀢𑀢𑁆𑀢𑀸 𑀢𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀧𑀯𑀺𑀝𑁆𑀞𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀧𑀜𑁆𑀘𑀸𑀦𑀺𑀲𑀁𑀲𑀳𑁂𑀢𑀼𑀪𑀽𑀢𑀁 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀓𑀁 𑀯𑀘𑀻𑀪𑁂𑀤𑀁𑀬𑁂𑀯 ‘‘𑀅𑀢𑁆𑀣𑀸𑀭𑁄’’𑀢𑀺 𑀯𑀤𑀢𑀺, 𑀦 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀢𑀲𑁆𑀫𑀸 𑀢𑁂 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀧𑀜𑁆𑀘𑀸𑀦𑀺𑀲𑀁𑀲𑀳𑁂𑀢𑀼𑀪𑀽𑀢𑀁 𑀓𑀣𑀺𑀦𑀢𑁆𑀣𑀸𑀭𑀁 𑀦 𑀮𑀪𑀦𑁆𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂 𑀧𑀦 𑀘𑀢𑀼𑀯𑀕𑁆𑀕𑀲𑀗𑁆𑀖𑀧𑀽𑀭𑀓𑀪𑀸𑀯𑀁 𑀮𑀪𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀼𑀦𑀧𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀘𑀢𑁆𑀢𑀸𑀭𑁄 𑀯𑀸 𑀳𑁄𑀦𑁆𑀢𑀺 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀏𑀓𑁄 𑀯𑀸, 𑀇𑀢𑀭𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀅𑀮𑀩𑁆𑀪𑀫𑀸𑀦𑀓𑀣𑀺𑀦𑀢𑁆𑀣𑀸𑀭𑁂𑀬𑁂𑀯 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀤𑀼𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑁂𑀳𑀺 𑀓𑀣𑀺𑀦𑀲𑁆𑀲 𑀅𑀢𑁆𑀣𑀭𑀺𑀢𑀩𑁆𑀩𑀪𑀸𑀯𑀢𑁄 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁𑀬𑁂𑀯 𑀅𑀢𑁆𑀣𑀸𑀭𑁄 𑀦𑀸𑀫𑀸𑀢𑀺 𑀝𑀻𑀓𑀸𑀘𑀭𑀺𑀬𑀸 𑀦 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀅𑀯𑀘𑀺𑀫𑁆𑀳𑀸𑀢𑀺.

𑀦𑀦𑀼 𑀘 𑀪𑁄 𑀇𑀫𑀲𑁆𑀫𑀺𑀫𑁆𑀧𑀺 𑀅𑀝𑁆𑀞𑀓𑀣𑀸𑀯𑀘𑀦𑁂 ‘‘𑀇𑀢𑀭𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂𑀦 𑀘𑀢𑀼𑀯𑀕𑁆𑀕𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁𑀬𑁂𑀯 ‘‘𑀅𑀢𑁆𑀣𑀸𑀭𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦, 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀢𑁄. 𑀧𑀼𑀩𑁆𑀩𑁂 𑀳𑀺 𑀙𑀺𑀦𑁆𑀦𑀯𑀲𑁆𑀲𑀸𑀤𑀻𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑀅𑀮𑀩𑁆𑀪𑀫𑀸𑀦𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀥 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀅𑀢𑁆𑀣𑀸𑀭𑁄’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀫𑁆𑀧𑀺 𑀮𑀩𑁆𑀪𑀫𑀸𑀦𑀪𑀸𑀯𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀓𑀣𑁂𑀬𑁆𑀬𑀼𑀁, 𑀢𑀲𑁆𑀫𑀸 ‘‘𑀓𑀢𑁆𑀯𑀸’’𑀢𑀺 𑀧𑀤𑀁 ‘‘𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀚𑁆𑀛𑀦𑁆𑀢𑁂𑀦 𑀲𑀫𑀸𑀦𑀓𑀸𑀮𑀯𑀺𑀲𑁂𑀲𑀦𑀁 𑀅𑀓𑀢𑁆𑀯𑀸 𑀧𑀼𑀩𑁆𑀩𑀓𑀸𑀮𑀯𑀺𑀲𑁂𑀲𑀦𑀫𑁂𑀯 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀏𑀯𑀁 𑀲𑀢𑀺 𑀧𑀼𑀩𑁆𑀩𑀯𑀘𑀦𑁂𑀦𑀸𑀧𑀭𑀯𑀘𑀦𑀁 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀲𑀁𑀲𑀦𑁆𑀤𑀢𑀺, 𑀧𑀘𑁆𑀙𑀸𑀧𑀺 𑀘 ‘‘𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀤𑀸𑀦𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀺𑀲𑀼𑀁 𑀓𑀫𑁆𑀫𑀯𑀸𑀘𑀸𑀲𑀸𑀯𑀦𑀁 𑀯𑀺𑀲𑀼𑀁 𑀓𑀣𑀺𑀦𑀢𑁆𑀣𑀭𑀡𑀁 𑀧𑀼𑀩𑁆𑀩𑀸𑀧𑀭𑀸𑀦𑀼𑀓𑁆𑀓𑀫𑀢𑁄 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀅𑀢𑁆𑀣𑀸𑀭𑁄 𑀦𑀸𑀫 𑀦 𑀳𑁄𑀢𑀺, 𑀓𑁂𑀯𑀮𑀁 𑀅𑀢𑁆𑀣𑀸𑀭𑀲𑁆𑀲 𑀓𑀸𑀭𑀡𑀫𑁂𑀯 𑀉𑀧𑀘𑀸𑀭𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀻’’𑀢𑀺 𑀧𑀭𑀺𑀯𑀸𑀭𑀯𑀘𑀦𑁂𑀦 (𑀧𑀭𑀺. 𑁪𑁧𑁪) 𑀅𑀬𑀫𑀢𑁆𑀣𑁄 𑀚𑀸𑀦𑀺𑀢𑀩𑁆𑀩𑁄𑀢𑀺.

𑀬𑀤𑀺 𑀏𑀯𑀁 𑀓𑀗𑁆𑀔𑀸𑀯𑀺𑀢𑀭𑀡𑀻𑀝𑀻𑀓𑀸-𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀲𑀼 𑀆𑀕𑀢𑀧𑀸𑀞𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀓𑀣𑀁 𑀪𑀸𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀦𑀦𑀼 𑀓𑀗𑁆𑀔𑀸𑀯𑀺𑀢𑀭𑀡𑀻𑀝𑀻𑀓𑀸𑀬𑀁 ‘‘𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀓𑀺𑀭𑀺𑀬𑀸𑀬 𑀓𑀢𑁆𑀢𑀸 ‘‘𑀲𑁄 𑀓𑀣𑀺𑀦𑀢𑁆𑀣𑀸𑀭𑁄’’𑀢𑀺 𑀯𑀼𑀢𑁆𑀢𑁄, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀬𑀜𑁆𑀘 ‘‘𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫’’𑀦𑁆𑀢𑀺 𑀧𑀤𑀁 ‘‘𑀲𑀦𑁆𑀥𑀸𑀬𑀸’’𑀢𑀺 𑀓𑀺𑀭𑀺𑀬𑀸𑀬 𑀓𑀫𑁆𑀫𑀁, 𑀓𑀣𑀺𑀦𑀢𑁆𑀣𑀸𑀭𑁄…𑀧𑁂… 𑀇𑀤𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀓𑀺𑀭𑀺𑀬𑀸𑀬 𑀓𑀫𑁆𑀫𑀁 𑀳𑁄𑀢𑀺. 𑀏𑀯𑀁 𑀝𑀻𑀓𑀸𑀲𑀼 𑀦𑀻𑀢𑀢𑁆𑀣𑀢𑁄 𑀆𑀕𑀢𑀧𑀸𑀞𑁂𑀲𑀼 𑀲𑀦𑁆𑀢𑁂𑀲𑀼 ‘‘𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁𑀬𑁂𑀯 𑀅𑀢𑁆𑀣𑀸𑀭𑁄 𑀦𑀸𑀫𑀸𑀢𑀺 𑀝𑀻𑀓𑀸𑀘𑀭𑀺𑀬𑀸 𑀦 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀬𑁂𑀦𑀸𑀓𑀸𑀭𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀝𑀻𑀓𑀸𑀯𑀘𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀅𑀯𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬, 𑀢𑁂𑀦𑀸𑀓𑀸𑀭𑁂𑀦 𑀝𑀻𑀓𑀸𑀧𑀸𑀞𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄. 𑀓𑀣𑀁? 𑀓𑀗𑁆𑀔𑀸𑀯𑀺𑀢𑀭𑀡𑀻𑀅𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑁄 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀆𑀕𑀢𑁄, 𑀢𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀯𑀘𑀦𑁂 𑀘𑁄𑀤𑀓𑁂𑀦 𑀘𑁄𑀤𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀬 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀝𑀻𑀓𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, 𑀓𑀣𑀁 𑀘𑁄𑀤𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺? 𑀪𑁄 𑀅𑀝𑁆𑀞𑀓𑀣𑀸𑀘𑀭𑀺𑀬 ‘‘𑀲𑁄 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 𑀧𑀜𑁆𑀘𑀦𑁆𑀦𑀁 𑀓𑀣𑀺𑀦𑀢𑁆𑀣𑀸𑀭𑀓𑀸𑀦𑀁 𑀏𑀯 𑀲𑁄 𑀓𑀣𑀺𑀦𑀢𑁆𑀣𑀸𑀭𑁄 𑀯𑀝𑁆𑀝𑀢𑀺, 𑀦 𑀏𑀓𑀤𑁆𑀯𑀺𑀢𑀺𑀘𑀢𑀼𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀏𑀯𑀁 𑀲𑀢𑀺 ‘‘𑀦 𑀲𑀗𑁆𑀖𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀦 𑀕𑀡𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀺, 𑀧𑀼𑀕𑁆𑀕𑀮𑁄 𑀓𑀣𑀺𑀦𑀁 𑀅𑀢𑁆𑀣𑀭𑀢𑀻’’𑀢𑀺 𑀆𑀕𑀢𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀦𑀢𑁄 𑀆𑀕𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀢𑀁 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀝𑀻𑀓𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑁄 𑀘𑁄𑀤𑀓𑀸𑀘𑀭𑀺𑀬 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑀸𑀮𑁂 𑀧𑀜𑁆𑀘𑀦𑁆𑀦𑀁 𑀅𑀢𑁆𑀣𑀸𑀭𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 ‘‘𑀲𑁄 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀦 𑀯𑀼𑀢𑁆𑀢𑁄, 𑀅𑀣 𑀔𑁄 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀓𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀸𑀮𑁂 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀦𑁆𑀦𑀁 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀺𑀢𑀸𑀬 𑀲𑁄 𑀧𑀘𑁆𑀙𑀸 𑀓𑀢𑁆𑀢𑀩𑁆𑀩𑁄 𑀅𑀢𑁆𑀣𑀸𑀭𑁄 𑀯𑀝𑁆𑀝𑀢𑀺, 𑀓𑀸𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀨𑀮𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀯𑀘𑀦𑁂 𑀆𑀕𑀫𑀯𑀺𑀭𑁄𑀥𑁄 𑀦𑀸𑀧𑀚𑁆𑀚𑀢𑀻𑀢𑀺.

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀬𑀫𑁆𑀧𑀺 ‘‘𑀓𑀣𑀺𑀦𑀢𑁆𑀣𑀸𑀭𑀁 𑀓𑁂 𑀮𑀪𑀦𑁆𑀢𑀺, 𑀓𑁂 𑀦 𑀮𑀪𑀦𑁆𑀢𑀻𑀢𑀺? 𑀕𑀡𑀦𑀯𑀲𑁂𑀦 𑀢𑀸𑀯 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘 𑀚𑀦𑀸 𑀮𑀪𑀦𑁆𑀢𑀺, 𑀉𑀤𑁆𑀥𑀁 𑀲𑀢𑀲𑀳𑀲𑁆𑀲𑀫𑁆𑀧𑀺, 𑀧𑀜𑁆𑀘𑀦𑁆𑀦𑀁 𑀳𑁂𑀝𑁆𑀞𑀸 𑀦 𑀮𑀪𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂 𑀧𑀭𑁂𑀳𑀺 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀺𑀢𑀸𑀬 𑀢𑀁 𑀧𑀼𑀘𑁆𑀙𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀇𑀤𑀁 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀧𑀸𑀞𑁄 𑀝𑀻𑀓𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑁄. 𑀓𑀣𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀪𑁄 𑀅𑀝𑁆𑀞𑀓𑀣𑀸𑀘𑀭𑀺𑀬 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀯𑀘𑀦𑀁 𑀓𑀺𑀁 𑀧𑀜𑁆𑀘𑀸𑀦𑀺𑀲𑀁𑀲𑀲𑁆𑀲 𑀓𑀸𑀭𑀡𑀪𑀽𑀢𑀁 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀅𑀢𑁆𑀣𑀸𑀭𑀓𑀺𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀤𑀸𑀳𑀼 𑀅𑀢𑁆𑀣𑀸𑀭𑀲𑁆𑀲 𑀓𑀸𑀭𑀡𑀪𑀽𑀢𑀁 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀦𑁆𑀢𑀺. 𑀓𑀣𑀁 𑀯𑀺𑀲𑁆𑀲𑀚𑁆𑀚𑀦𑀸𑀢𑀺? 𑀪𑁄 𑀪𑀤𑁆𑀭𑀫𑀼𑀔 ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀧𑀜𑁆𑀘𑀸𑀦𑀺𑀲𑀁𑀲𑀲𑁆𑀲 𑀓𑀸𑀭𑀡𑀪𑀽𑀢𑀁 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀓𑀁 𑀅𑀢𑁆𑀣𑀸𑀭𑀓𑀺𑀭𑀺𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀣𑀸𑀭𑀲𑁆𑀲 𑀓𑀸𑀭𑀡𑀪𑀽𑀢𑀁 𑀓𑀣𑀺𑀦𑀤𑀸𑀦𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑀗𑁆𑀖𑁂𑀦 𑀅𑀢𑁆𑀣𑀸𑀭𑀓𑀲𑁆𑀲 𑀤𑀺𑀦𑁆𑀦𑀤𑀼𑀲𑁆𑀲𑁂𑀦 𑀏𑀯 𑀓𑀣𑀺𑀦𑀢𑁆𑀣𑀸𑀭𑁄 𑀲𑀫𑁆𑀪𑀯𑀢𑀺, 𑀦 𑀞𑀺𑀢𑀺𑀓𑀸𑀬 𑀮𑀤𑁆𑀥𑀘𑀻𑀯𑀭𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀘𑀻𑀯𑀭𑁂𑀦 𑀯𑀸 𑀲𑀫𑁆𑀪𑀯𑀢𑀺, 𑀢𑀜𑁆𑀘 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀁 𑀘𑀢𑁆𑀢𑀸𑀭𑁄 𑀓𑀣𑀺𑀦𑀤𑀼𑀲𑁆𑀲𑀤𑀸𑀬𑀓𑀸, 𑀏𑀓𑁄 𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀧𑀜𑁆𑀘𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀬𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀦 𑀢𑀢𑁄 𑀊𑀦𑁂𑀲𑀽𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀜𑁆𑀘𑀦𑁆𑀦𑀁 𑀯𑀝𑁆𑀝𑀢𑀺, 𑀓𑀸𑀭𑀡𑀲𑀺𑀤𑁆𑀥𑀺𑀬𑀸 𑀨𑀮𑀲𑀺𑀤𑁆𑀥𑀺 𑀳𑁄𑀢𑀺, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 ‘‘𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀓𑀫𑁆𑀫𑀁 𑀯𑀼𑀢𑁆𑀢’’𑀦𑁆𑀢𑀺 𑀫𑀼𑀔𑁆𑀬𑀯𑀲𑁂𑀦 𑀅𑀯𑀢𑁆𑀯𑀸 ‘‘𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀉𑀧𑀘𑀸𑀭𑀯𑀲𑁂𑀦𑀸𑀳. 𑀏𑀯𑀁 𑀯𑀼𑀢𑁆𑀢𑁂𑀬𑁂𑀯 𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄 𑀦𑀢𑁆𑀣𑀺, 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀘 𑀝𑀻𑀓𑀸𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, ‘‘𑀅𑀧𑀮𑁄𑀓𑀦𑀸𑀤𑀺𑀲𑀗𑁆𑀖𑀓𑀫𑁆𑀫𑀓𑀭𑀡𑀢𑁆𑀣𑀁 𑀩𑀤𑁆𑀥𑀲𑀻𑀫𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀇𑀫𑀺𑀦𑀸 𑀯𑀺𑀦𑀬𑀮𑀓𑁆𑀔𑀡𑁂𑀦 𑀘 𑀲𑀫𑁂𑀢𑀺.

‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀓𑀸 𑀧𑀦 𑀅𑀢𑁆𑀣𑀸𑀭𑀓𑀺𑀭𑀺𑀬𑀸 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀲𑀗𑁆𑀖𑀓𑀫𑁆𑀫𑁂𑀲𑀼 𑀅𑀧𑁆𑀧𑀯𑀺𑀝𑁆𑀞𑀸, 𑀅𑀥𑀺𑀝𑁆𑀞𑀸𑀦𑀸𑀤𑀬𑁄 𑀯𑀺𑀬 𑀧𑀜𑁆𑀘𑀸𑀦𑀺𑀲𑀁𑀲𑀮𑀸𑀪𑀓𑀸𑀭𑀡𑀪𑀽𑀢𑀸 𑀧𑀼𑀕𑁆𑀕𑀮𑀓𑀺𑀭𑀺𑀬𑀸𑀯 𑀳𑁄𑀢𑀻𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀔𑁂𑀢𑁆𑀢𑀪𑀽𑀢𑀸𑀬 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀸𑀬 𑀅𑀯𑀺𑀚𑁆𑀚𑀫𑀸𑀦𑀸𑀬 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀩𑀤𑁆𑀥𑀲𑀻𑀫𑀁 𑀯𑀸 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀮𑀪𑀫𑀸𑀦𑀝𑁆𑀞𑀸𑀦𑀁 𑀯𑀸 𑀕𑀦𑁆𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀓𑀣𑀺𑀦𑀤𑀼𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀓𑀣𑀺𑀦𑀢𑁆𑀣𑀭𑀡𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀓𑀢𑀁, 𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀤𑁆𑀥𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀲𑀢𑀺 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑀸 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀤𑀸𑀦𑀸𑀤𑀺𑀅𑀧𑀮𑁄𑀓𑀦𑀓𑀫𑁆𑀫𑀁 𑀯𑀸 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀜𑀢𑁆𑀢𑀺𑀓𑀫𑁆𑀫𑀁 𑀯𑀸 𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀸𑀤𑀺𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀯𑀸 𑀉𑀧𑀲𑀫𑁆𑀧𑀤𑀸𑀤𑀺𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀯𑀸 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀓𑀭𑁂𑀬𑁆𑀬𑀼𑀁, 𑀏𑀯𑀁 𑀓𑀭𑁄𑀦𑁆𑀢𑀸 𑀪𑀕𑀯𑀢𑁄 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀚𑀝𑀁 𑀫𑀳𑀦𑁆𑀢𑀁 𑀕𑀼𑀫𑁆𑀩𑀁 𑀫𑀳𑀦𑁆𑀢𑀁 𑀯𑀺𑀲𑀫𑀁 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀢𑀫𑀓𑀭𑀡𑀢𑁆𑀣𑀁 𑀬𑀼𑀢𑁆𑀢𑀺𑀢𑁄 𑀘 𑀆𑀕𑀫𑀢𑁄 𑀘 𑀅𑀦𑁂𑀓𑀸𑀦𑀺 𑀓𑀸𑀭𑀡𑀸𑀦𑀺 𑀆𑀳𑀭𑀺𑀢𑁆𑀯𑀸 𑀓𑀣𑀬𑀺𑀫𑁆𑀳𑀸𑀢𑀺.

𑀲𑀸𑀲𑀦𑁂 𑀕𑀸𑀭𑀯𑀁 𑀓𑀢𑁆𑀯𑀸, 𑀲𑀤𑁆𑀥𑀫𑁆𑀫𑀲𑁆𑀲𑀸𑀦𑀼𑀮𑁄𑀫𑀢𑁄;

𑀫𑀬𑀸 𑀓𑀢𑀁 𑀯𑀺𑀦𑀺𑀘𑁆𑀙𑀬𑀁, 𑀲𑀫𑁆𑀫𑀸 𑀘𑀺𑀦𑁆𑀢𑁂𑀦𑁆𑀢𑀼 𑀲𑀸𑀥𑀯𑁄.

𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀦𑁆𑀢𑁂𑀢𑁆𑀯𑀸, 𑀬𑀼𑀢𑁆𑀢𑀁 𑀘𑁂 𑀳𑁄𑀢𑀺 𑀕𑀡𑁆𑀳𑀦𑁆𑀢𑀼;

𑀦𑁄 𑀘𑁂 𑀬𑀼𑀢𑁆𑀢𑀁 𑀫𑀸 𑀕𑀡𑁆𑀳𑀦𑁆𑀢𑀼, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸𑀢𑀺.

𑀇𑀢𑁄 𑀧𑀭𑀸𑀦𑀺𑀧𑀺 𑀓𑀸𑀭𑀡𑀲𑀸𑀥𑀓𑀸𑀦𑀺 𑀆𑀳𑀭𑀦𑁆𑀢𑀺 𑀆𑀘𑀭𑀺𑀬𑀸, 𑀢𑁂𑀲𑀁 𑀧𑀝𑀺𑀯𑀘𑀦𑁂𑀦 𑀅𑀢𑀺𑀯𑀺𑀢𑁆𑀣𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀉𑀧𑀘𑀸𑀭𑀲𑀻𑀫𑀸𑀬 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀓𑀢𑀝𑁆𑀞𑀸𑀦𑀪𑀸𑀯𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀯, 𑀢𑀲𑁆𑀫𑀸 𑀢𑀁 𑀯𑀘𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀲𑀁𑀲𑀬𑀁 𑀅𑀓𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑁄𑀢𑀺.

‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀓𑀺𑀁 𑀏𑀢𑁆𑀢𑀓𑁂𑀦 𑀯𑀘𑀻𑀪𑁂𑀤𑁂𑀦 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁄 𑀓𑁄𑀘𑀺 𑀓𑀸𑀬𑀯𑀺𑀓𑀸𑀭𑁄 𑀓𑀸𑀢𑀩𑁆𑀩𑁄? 𑀦 𑀓𑀸𑀢𑀩𑁆𑀩𑁄. 𑀏𑀢𑁆𑀢𑀓𑁂𑀦𑁂𑀯 𑀳𑀺 𑀯𑀘𑀻𑀪𑁂𑀤𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺, 𑀓𑀣𑀺𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁮) ‘‘𑀅𑀢𑁆𑀣𑀸𑀭𑁄 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑁄 𑀯𑀘𑀻𑀪𑁂𑀤𑁂𑀦𑀸’’𑀢𑀺.

𑀏𑀯𑀁 𑀓𑀣𑀺𑀦𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀅𑀦𑀼𑀫𑁄𑀤𑀸𑀧𑀦𑀅𑀦𑀼𑀫𑁄𑀤𑀦𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀘𑀻𑀪𑁂𑀤𑁂𑀦 𑀓𑀣𑀺𑀦𑀁 𑀅𑀢𑁆𑀣𑀢𑀁, 𑀢𑁂𑀦 ‘‘𑀓𑀣𑀺𑀦𑀲𑁆𑀲 𑀅𑀢𑁆𑀣𑀸𑀭𑀸 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀚𑀸𑀬𑀦𑁆𑀢𑀻’’𑀢𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁩) 𑀆𑀕𑀢𑀢𑁆𑀢𑀸 𑀓𑀣𑀺𑀦𑀢𑁆𑀣𑀸𑀭𑁂𑀦 𑀲𑀳𑁂𑀯 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀆𑀕𑀢𑀸, 𑀅𑀣 𑀓𑀲𑁆𑀫𑀸 𑀲𑀗𑁆𑀖𑀁 𑀅𑀦𑀼𑀫𑁄𑀤𑀸𑀧𑁂𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀆𑀕𑀢𑀸, 𑀲𑀗𑁆𑀖𑀲𑁆𑀲 𑀧𑀦 𑀅𑀦𑀸𑀕𑀢𑀸, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀘 𑀆𑀕𑀫𑀦𑀢𑁆𑀣𑀁 𑀲𑀗𑁆𑀖𑀁 𑀅𑀦𑀼𑀫𑁄𑀤𑀸𑀧𑁂𑀢𑀺, 𑀲𑀗𑁆𑀖𑁄 𑀘 𑀅𑀦𑀼𑀫𑁄𑀤𑀦𑀁 𑀓𑀭𑁄𑀢𑀺, 𑀏𑀯𑀁 𑀓𑀢𑁂 𑀉𑀪𑀺𑀦𑁆𑀦𑀫𑁆𑀧𑀺 𑀆𑀦𑀺𑀲𑀁𑀲𑀸 𑀆𑀕𑀢𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁦𑁩) ‘‘𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁 𑀅𑀢𑁆𑀣𑀸𑀭𑀓𑀲𑁆𑀲 𑀘 𑀅𑀦𑀼𑀫𑁄𑀤𑀓𑀲𑁆𑀲 𑀘𑀸’’𑀢𑀺. 𑀏𑀢𑁆𑀣 𑀘 𑀓𑀣𑀺𑀦𑀢𑁆𑀣𑀸𑀭𑀓𑀪𑀺𑀓𑁆𑀔𑀼𑀢𑁄 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀲𑀗𑁆𑀖𑁂 𑀅𑀢𑁆𑀣𑀺, 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀸𑀭𑀓𑁂𑀦 ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀦𑀼𑀫𑁄𑀤𑀓𑁂𑀦 ‘‘𑀆𑀯𑀼𑀲𑁄’’𑀢𑀺. 𑀬𑀤𑀺 𑀧𑀦 𑀓𑀣𑀺𑀦𑀢𑁆𑀣𑀸𑀭𑀓𑁄 𑀪𑀺𑀓𑁆𑀔𑀼 𑀲𑀩𑁆𑀩𑁂𑀲𑀁 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀢𑁂𑀦 ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀢𑀭𑁂𑀳𑀺 ‘‘𑀪𑀦𑁆𑀢𑁂’’𑀢𑀺, 𑀏𑀯𑀁 𑀲𑁂𑀲𑀦𑀬𑀤𑁆𑀯𑀬𑁂𑀧𑀺. 𑀏𑀯𑀁 𑀲𑀩𑁆𑀩𑁂𑀲𑀁 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀦𑁆𑀢𑀺. 𑀇𑀫𑁂𑀲𑀼 𑀧𑀦 𑀲𑀗𑁆𑀖𑀧𑀼𑀕𑁆𑀕𑀮𑁂𑀲𑀼 𑀬𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸, 𑀢𑁂𑀬𑁂𑀯 𑀅𑀦𑀼𑀫𑁄𑀤𑀺𑀢𑀼𑀁 𑀮𑀪𑀦𑁆𑀢𑀺, 𑀙𑀺𑀦𑁆𑀦𑀯𑀲𑁆𑀲𑀸 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸 𑀯𑀸 𑀦 𑀮𑀪𑀦𑁆𑀢𑀺, 𑀅𑀦𑀦𑀼𑀫𑁄𑀤𑀦𑁆𑀢𑀸𑀧𑀺 𑀆𑀦𑀺𑀲𑀁𑀲𑀁 𑀦 𑀮𑀪𑀦𑁆𑀢𑀺.

𑀏𑀯𑀁 𑀓𑀣𑀺𑀦𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑀻𑀯𑀭𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀅𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁂 𑀓𑀣𑀺𑀦𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀆𑀪𑀢𑀁 𑀆𑀦𑀺𑀲𑀁𑀲𑀦𑁆𑀢𑀺 𑀇𑀫𑀺𑀦𑀸 𑀏𑀓𑀁 𑀅𑀢𑁆𑀣𑀢𑀘𑀻𑀯𑀭𑀫𑁂𑀯 𑀓𑀣𑀺𑀦𑀘𑀻𑀯𑀭𑀁 𑀦𑀸𑀫, 𑀢𑀢𑁄 𑀅𑀜𑁆𑀜𑀁 𑀢𑁂𑀦 𑀲𑀤𑁆𑀥𑀺𑀁 𑀆𑀪𑀢𑀁 𑀲𑀩𑁆𑀩𑀁 𑀘𑀻𑀯𑀭𑀁 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀻’’𑀢𑀺𑀆𑀤𑀺. 𑀢𑁂𑀦 𑀜𑀸𑀬𑀢𑀺 ‘‘𑀯𑀢𑁆𑀣𑀫𑁂𑀯 𑀇𑀥 𑀆𑀦𑀺𑀲𑀁𑀲𑁄 𑀦𑀸𑀫, 𑀦 𑀅𑀕𑁆𑀖𑁄, 𑀓𑀣𑀺𑀦𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀆𑀪𑀢𑀸𑀦𑀁 𑀅𑀜𑁆𑀜𑀲𑀸𑀝𑀓𑀸𑀦𑀁 𑀩𑀳𑀼𑀮𑀯𑀲𑁂𑀦 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀦 𑀓𑀣𑀺𑀦𑀲𑀸𑀝𑀓𑀲𑁆𑀲 𑀫𑀳𑀕𑁆𑀖𑀯𑀲𑁂𑀦𑀸’’𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀺𑀲𑁆𑀲𑀭𑁄, 𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼𑀬𑁂𑀯 𑀇𑀲𑁆𑀲𑀭𑁄. 𑀓𑀲𑁆𑀫𑀸? 𑀤𑀸𑀬𑀓𑁂𑀳𑀺 𑀯𑀺𑀘𑀸𑀭𑀺𑀢𑀢𑁆𑀢𑀸. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀇𑀲𑁆𑀲𑀭𑁄, 𑀓𑀲𑁆𑀫𑀸? 𑀤𑀸𑀬𑀓𑁂𑀳𑀺 𑀅𑀯𑀺𑀘𑀸𑀭𑀺𑀢𑀢𑁆𑀢𑀸, 𑀫𑀽𑀮𑀓𑀣𑀺𑀦𑀲𑁆𑀲 𑀘 𑀲𑀗𑁆𑀖𑁂 𑀤𑀺𑀦𑁆𑀦𑀢𑁆𑀢𑀸. 𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂𑀢𑀺 𑀢𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑁂𑀳𑀺 𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑁂. 𑀩𑀮𑀯𑀯𑀢𑁆𑀣𑀸𑀦𑀻𑀢𑀺 𑀅𑀢𑁆𑀣𑀭𑀺𑀢𑀩𑁆𑀩𑀓𑀣𑀺𑀦𑀲𑀸𑀝𑀓𑀁𑀬𑁂𑀯 𑀅𑀳𑀢𑀁 𑀯𑀸 𑀅𑀳𑀢𑀓𑀧𑁆𑀧𑀁 𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀦𑀺𑀲𑀁𑀲𑀘𑀻𑀯𑀭𑀁 𑀧𑀦 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀼𑀭𑀸𑀡𑀁 𑀯𑀸 𑀅𑀪𑀺𑀦𑀯𑀁 𑀯𑀸 𑀤𑀼𑀩𑁆𑀩𑀮𑀁 𑀯𑀸 𑀩𑀮𑀯𑀁 𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑁂𑀲𑀼 𑀤𑀼𑀩𑁆𑀩𑀮𑀯𑀢𑁆𑀣𑁂 𑀞𑀺𑀢𑀺𑀓𑀸𑀬 𑀤𑀺𑀦𑁆𑀦𑁂 𑀮𑀤𑁆𑀥𑀪𑀺𑀓𑁆𑀔𑀼𑀲𑁆𑀲 𑀉𑀧𑀓𑀸𑀭𑀓𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀓𑀸𑀭𑀡𑀬𑁄𑀕𑁆𑀕𑀸𑀦𑀺 𑀩𑀮𑀯𑀯𑀢𑁆𑀣𑀸𑀦𑀺 𑀤𑀸𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀻𑀢𑀺 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁 𑀮𑀪𑀺𑀁𑀲𑀼, 𑀢𑁂 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀳𑁂𑀝𑁆𑀞𑀢𑁄 𑀧𑀝𑁆𑀞𑀸𑀬 𑀬𑀣𑀸𑀓𑁆𑀓𑀫𑀁 𑀤𑀸𑀢𑀩𑁆𑀩𑀸𑀦𑀺. 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀺𑀲𑁆𑀲𑀁 𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀁 𑀲𑀦𑁆𑀢𑀺, 𑀢𑁂𑀲𑀼 𑀚𑁂𑀝𑁆𑀞𑀓𑀪𑀺𑀓𑁆𑀔𑀼𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀸𑀦𑀺. 𑀆𑀲𑀦𑀕𑁆𑀕𑀳𑀡𑀁 𑀧𑀦 𑀬𑀣𑀸𑀯𑀼𑀟𑁆𑀠𑀁 𑀦𑀺𑀲𑀺𑀦𑁆𑀦𑁂 𑀲𑀦𑁆𑀥𑀸𑀬 𑀓𑀢𑀁. 𑀏𑀢𑁂𑀦 𑀯𑀲𑁆𑀲𑀸𑀯𑀸𑀲𑀺𑀓𑀓𑀣𑀺𑀦𑀸𑀦𑀺𑀲𑀁𑀲𑀸𑀦𑀁 𑀲𑀫𑀸𑀦𑀕𑀢𑀺𑀓𑀢𑀁 𑀤𑀻𑀧𑁂𑀢𑀺. 𑀕𑀭𑀼𑀪𑀡𑁆𑀟𑀁 𑀦 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀓𑀣𑀺𑀦𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀆𑀪𑀢𑁂𑀲𑀼 𑀫𑀜𑁆𑀘𑀧𑀻𑀞𑀸𑀤𑀺𑀓𑀁 𑀕𑀭𑀼𑀪𑀡𑁆𑀟𑀁 𑀦 𑀪𑀸𑀚𑁂𑀢𑀩𑁆𑀩𑀁, 𑀲𑀗𑁆𑀖𑀺𑀓𑀯𑀲𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁄 𑀅𑀦𑀦𑁆𑀢𑀭𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺. 𑀓𑀣𑀁? 𑀇𑀤𑀸𑀦𑀺 𑀪𑀺𑀓𑁆𑀔𑀽 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀁 𑀓𑀼𑀲𑀧𑀸𑀢𑀁 𑀓𑀢𑁆𑀯𑀸 𑀯𑀺𑀪𑀚𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀻𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘‘𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀺, 𑀞𑀺𑀢𑀺𑀓𑀸𑀬 𑀅𑀪𑀸𑀯𑁂 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀘𑀦𑀢𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀢𑁆𑀣 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄𑀢𑀺? 𑀪𑀡𑁆𑀟𑀸𑀕𑀸𑀭𑁂 𑀞𑀧𑀺𑀢𑀘𑀻𑀯𑀭𑁂𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀉𑀲𑁆𑀲𑀦𑁆𑀦𑀁 𑀳𑁄𑀢𑀻𑀢𑀺 𑀩𑀳𑀼 𑀭𑀸𑀲𑀺𑀓𑀢𑀁 𑀳𑁄𑀢𑀺, 𑀪𑀡𑁆𑀟𑀸𑀕𑀸𑀭𑀁 𑀦 𑀕𑀡𑁆𑀳𑀸𑀢𑀺. 𑀲𑀫𑁆𑀫𑀼𑀔𑀻𑀪𑀽𑀢𑁂𑀦𑀸𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦. 𑀪𑀸𑀚𑁂𑀢𑀼𑀦𑁆𑀢𑀺 𑀓𑀸𑀮𑀁 𑀖𑁄𑀲𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀪𑀸𑀚𑁂𑀢𑀼𑀁…𑀧𑁂… 𑀏𑀯𑀁 𑀞𑀧𑀺𑀢𑁂𑀲𑀼 𑀘𑀻𑀯𑀭𑀧𑀝𑀺𑀯𑀻𑀲𑁂𑀲𑀼 𑀓𑀼𑀲𑁄 𑀧𑀸𑀢𑁂𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀏𑀓𑀘𑁆𑀘𑁂 𑀧𑀦 𑀪𑀺𑀓𑁆𑀔𑀽 𑀏𑀓𑁂𑀓𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀘𑀻𑀯𑀭𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀕𑀳𑁂𑀢𑁆𑀯𑀸 𑀪𑀸𑀚𑁂𑀦𑁆𑀢𑀺, 𑀢𑀁 𑀅𑀢𑀺𑀑𑀴𑀸𑀭𑀺𑀓𑀫𑁂𑀯. 𑀅𑀜𑁆𑀜𑁂𑀧𑀺 𑀏𑀓𑀘𑁆𑀘𑀸𑀦𑀁 𑀘𑀻𑀯𑀭𑀸𑀦𑀁 𑀫𑀳𑀕𑁆𑀖𑀢𑀸𑀬 𑀏𑀓𑀘𑁆𑀘𑀸𑀦𑀁 𑀅𑀧𑁆𑀧𑀕𑁆𑀖𑀢𑀸𑀬 𑀲𑀫𑀕𑁆𑀖𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀢𑀣𑁂𑀯 𑀓𑀭𑁄𑀦𑁆𑀢𑀺, 𑀢𑀫𑁆𑀧𑀺 𑀑𑀴𑀸𑀭𑀺𑀓𑀫𑁂𑀯. 𑀢𑀢𑁆𑀣 𑀳𑀺 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀧𑀭𑀺𑀯𑀢𑁆𑀢𑀦𑁂𑀧𑀺 𑀢𑀲𑁆𑀲 𑀯𑀺𑀘𑀸𑀭𑀡𑁂𑀧𑀺 𑀪𑀸𑀕𑀕𑁆𑀕𑀳𑀡𑁂𑀧𑀺 𑀆𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀏𑀓𑁂 ‘‘𑀓𑀣𑀺𑀦𑀁 𑀦𑀸𑀫 𑀤𑀼𑀩𑁆𑀩𑀺𑀘𑀸𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀯𑀸 𑀅𑀢𑁆𑀣𑀭𑀡𑀁 𑀦 𑀓𑀭𑁄𑀦𑁆𑀢𑀺, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦𑁂𑀯 𑀬𑀣𑀸𑀚𑁆𑀛𑀸𑀲𑀬𑀁 𑀯𑀺𑀘𑀸𑀭𑁂𑀦𑁆𑀢𑀺, 𑀢𑀁 𑀧𑀦 𑀬𑀤𑀺 𑀤𑀸𑀬𑀓𑁂𑀳𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑀺𑀦𑁆𑀦𑀁, 𑀧𑀼𑀕𑁆𑀕𑀮𑁂𑀦 𑀘 𑀲𑀗𑁆𑀖𑀲𑁆𑀲 𑀅𑀧𑀭𑀺𑀘𑁆𑀘𑀚𑀺𑀢𑀁, 𑀏𑀯𑀁 𑀲𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀸 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀤𑀺 𑀧𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀤𑀺𑀦𑁆𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀭𑀺𑀘𑁆𑀘𑀚𑀺𑀢𑀁, 𑀏𑀯𑀁 𑀲𑀦𑁆𑀢𑁂 𑀲𑀗𑁆𑀖𑀕𑀡𑀸𑀦𑀁 𑀲𑀦𑁆𑀢𑀓𑀢𑁆𑀢𑀸 𑀅𑀬𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀅𑀧𑀭𑁂 𑀧𑀦 𑀓𑀣𑀺𑀦𑀯𑀲𑁂𑀦 𑀧𑀝𑀺𑀕𑁆𑀕𑀳𑀺𑀢𑁂 𑀯𑀺𑀘𑀸𑀭𑁂𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀦 𑀫𑀬𑀁 𑀓𑀣𑀺𑀦𑀯𑀲𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀯𑁂𑀦𑁂𑀯 𑀧𑀝𑀺𑀕𑁆𑀕𑀡𑁆𑀳𑀸𑀫𑀸’’𑀢𑀺 𑀯𑀢𑁆𑀯𑀸 𑀬𑀣𑀸𑀭𑀼𑀘𑀺 𑀯𑀺𑀘𑀸𑀭𑁂𑀦𑁆𑀢𑀺, 𑀢𑀫𑁆𑀧𑀺 𑀅𑀬𑀼𑀢𑁆𑀢𑀁. 𑀯𑀲𑁆𑀲𑀸𑀯𑀸𑀲𑀺𑀓𑀫𑁆𑀧𑀺 𑀳𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺𑀬𑁂𑀯, 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀁 𑀧𑀼𑀕𑁆𑀕𑀮𑀺𑀓𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀘𑁂 𑀧𑀦 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀧𑀁𑀲𑀼𑀓𑀽𑀮𑀺𑀓𑁄 𑀯𑀲𑀢𑀺, 𑀆𑀕𑀢𑀜𑁆𑀘 𑀢𑀁 𑀤𑀺𑀲𑁆𑀯𑀸 ‘𑀢𑀼𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’𑀢𑀺 𑀯𑀤𑀦𑁆𑀢𑀺, 𑀢𑁂𑀦 𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, ‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫𑀸’𑀢𑀺 𑀯𑀤𑀦𑁆𑀢𑀺, 𑀲𑀪𑀸𑀕𑁄 𑀪𑀺𑀓𑁆𑀔𑀼 ‘𑀯𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄, 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀧𑀦𑁂𑀢𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁧𑁯) 𑀯𑀼𑀢𑁆𑀢𑀢𑁆𑀢𑀸.

𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀼𑀯𑀺𑀥𑀁 𑀲𑀤𑁆𑀥𑀸𑀤𑁂𑀬𑁆𑀬𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀇𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑁂 𑀤𑀸𑀬𑀓𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀢𑀢𑁆𑀭𑀼𑀧𑁆𑀧𑀸𑀤𑁂 𑀧𑀦 𑀓𑀧𑁆𑀧𑀺𑀬𑀓𑀸𑀭𑀓𑀸 𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺. 𑀲𑀤𑁆𑀥𑀸𑀤𑁂𑀬𑁆𑀬𑀯𑀲𑁆𑀲𑀸𑀯𑀸𑀲𑀺𑀓𑀫𑁆𑀧𑀺 𑀲𑀯𑀺𑀳𑀸𑀭𑀸𑀯𑀺𑀳𑀸𑀭𑀯𑀲𑁂𑀦 𑀤𑀼𑀯𑀺𑀥𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 𑀦 𑀏𑀯𑀁 𑀓𑀸𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀳𑀺 𑀅𑀢𑁆𑀢𑀦𑁄 𑀆𑀯𑀸𑀲𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬 𑀧𑀘𑁆𑀘𑀬𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺, ‘‘𑀬𑁂𑀲𑀁 𑀧𑀦 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀘𑁆𑀘𑀬𑀫𑁂𑀯 𑀤𑁂𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀁 𑀅𑀯𑀲𑁆𑀲𑀸𑀯𑀸𑀲𑀺𑀓𑁂 𑀲𑁂𑀦𑀸𑀲𑀦𑁂 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘. 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀁 𑀦𑀸𑀫 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀓𑀧𑁆𑀧𑀺𑀬𑀯𑀢𑁆𑀣𑀼𑀧𑀅𑀪𑀼𑀜𑁆𑀚𑀦𑀢𑁆𑀣𑀸𑀬 𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀦𑀺𑀩𑁆𑀩𑀢𑁆𑀢𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀜𑁆𑀳𑀺 𑀳𑀢𑁆𑀣𑁂 ‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀣𑀸’𑀢𑀺 𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀬𑀁 𑀬𑀁 𑀓𑀧𑁆𑀧𑀺𑀬𑀁, 𑀢𑀁 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀏𑀯𑀁 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀫𑁆𑀧𑀺 𑀧𑀼𑀩𑁆𑀩𑁂 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀖𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀓𑀣𑀺𑀦𑀘𑀻𑀯𑀭𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀘𑀻𑀯𑀭𑀪𑀸𑀯𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀪𑀸𑀯𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀓𑀲𑁆𑀫𑀸? ‘‘𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫) 𑀯𑀘𑀦𑀢𑁄.

𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑁆𑀯𑀸 𑀕𑀢𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀢𑀢𑁆𑀣 𑀲𑀘𑁂 ‘‘𑀇𑀤𑀁 𑀯𑀢𑁆𑀣𑀼 𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀭𑀧𑀼𑀕𑁆𑀕𑀮𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀧𑀭𑀺𑀡𑀢’’𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀢𑁂𑀲𑀁 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀅𑀣 ‘‘𑀫𑀫𑀢𑁆𑀣𑀸𑀬 𑀧𑀭𑀺𑀡𑀢’’𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁨𑁯) ‘‘𑀦𑀯 𑀅𑀥𑀫𑁆𑀫𑀺𑀓𑀤𑀸𑀦𑀸𑀦𑀻’’𑀢𑀺𑀆𑀤𑀺. 𑀅𑀣 𑀦 𑀓𑀺𑀜𑁆𑀘𑀺 𑀚𑀸𑀦𑁂𑀬𑁆𑀬, 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀞𑀧𑀺𑀢𑀁 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀺𑀓𑀁 𑀳𑁄𑀢𑀺. 𑀦 𑀳𑀺 𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀭𑀺𑀡𑀢𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑁂 𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻𑀢𑀺 ‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘𑀇𑀫𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀻’’𑀢𑀺𑀆𑀤𑀺.

‘‘𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺? ‘‘𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁂 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀯𑀲𑁆𑀲𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀦 𑀮𑀪𑀺𑀁𑀲𑀼, 𑀢𑁂𑀲𑀁 𑀳𑁂𑀝𑁆𑀞𑀢𑁄 𑀧𑀝𑁆𑀞𑀸𑀬 𑀏𑀓𑁂𑀓𑀁 𑀘𑀻𑀯𑀭𑀁 𑀯𑀸 𑀲𑀸𑀝𑀓𑀁 𑀯𑀸 𑀤𑀸𑀢𑀩𑁆𑀩𑀁. 𑀅𑀣 𑀘𑀻𑀯𑀭𑀸𑀦𑀁 𑀯𑀸 𑀲𑀸𑀝𑀓𑀸𑀦𑀁 𑀯𑀸 𑀅𑀯𑀲𑀺𑀝𑁆𑀞𑁂𑀲𑀼 𑀲𑀦𑁆𑀢𑁂𑀲𑀼 𑀧𑀼𑀦 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀢𑀢𑁄 𑀘𑀻𑀯𑀭𑁂𑀲𑀼 𑀯𑀸 𑀲𑀸𑀝𑀓𑁂𑀲𑀼 𑀯𑀸 𑀔𑀻𑀡𑁂𑀲𑀼 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀼 𑀧𑀘𑁆𑀙𑀺𑀫𑀲𑁆𑀲 𑀯𑀲𑁆𑀲𑀸𑀤𑀻𑀦𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺. 𑀦 𑀓𑁂𑀯𑀮𑀁 𑀢𑀲𑁆𑀫𑀺𑀁 𑀓𑀣𑀺𑀦𑀢𑁆𑀣𑀢𑀤𑀺𑀯𑀲𑁂 𑀤𑀺𑀦𑁆𑀦𑀤𑀼𑀲𑁆𑀲𑀸𑀦𑀺 𑀏𑀯 𑀓𑀣𑀺𑀦𑀸𑀦𑀺𑀲𑀁𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀅𑀣 𑀔𑁄 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀘𑀻𑀯𑀭𑀸𑀦𑀺𑀧𑀺 𑀲𑀗𑁆𑀖𑀺𑀓𑁂𑀦 𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀆𑀭𑀸𑀫𑀺𑀓𑁂𑀳𑀺 𑀆𑀪𑀢𑀘𑀻𑀯𑀭𑀸𑀦𑀺𑀧𑀺 𑀓𑀣𑀺𑀦𑀸𑀦𑀺𑀲𑀁𑀲𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑀼 𑀘𑀻𑀯𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀬𑀣𑀸𑀯𑀼𑀢𑁆𑀢𑀲𑀮𑁆𑀮𑀓𑁆𑀔𑀺𑀢𑀯𑀲𑁆𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑁂𑀝𑁆𑀞𑀢𑁄 𑀧𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀕𑀸𑀳𑁂𑀢𑀩𑁆𑀩𑀁. ‘‘𑀞𑀺𑀢𑀺𑀓𑀸𑀬 𑀅𑀪𑀸𑀯𑁂 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀸𑀦𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀯𑀘𑀦𑀢𑁄 𑀢𑀲𑁆𑀫𑀺𑀁 𑀯𑀲𑁆𑀲𑁂 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀞𑀺𑀢𑀺𑀓𑀸𑀬 𑀅𑀕𑀸𑀳𑀸𑀧𑀦𑀢𑁄 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀅𑀪𑀸𑀯𑁂 𑀲𑀢𑀺 𑀮𑀤𑁆𑀥𑀩𑁆𑀩𑀓𑀣𑀺𑀦𑀸𑀦𑀺𑀲𑀁𑀲𑁂 𑀢𑀲𑁆𑀲𑀁 𑀉𑀧𑀘𑀸𑀭𑀲𑀻𑀫𑀸𑀬𑀁 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁂𑀓𑀁 𑀘𑀻𑀯𑀭𑀁 𑀯𑀸 𑀲𑀸𑀝𑀓𑀁 𑀯𑀸 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀸𑀦𑀓𑀸𑀮𑁂𑀧𑀺 𑀫𑀳𑀸𑀣𑁂𑀭𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀻𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀁. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑁄. 𑀅𑀬𑀁 𑀞𑀺𑀢𑀺𑀓𑀸𑀯𑀺𑀘𑀸𑀭𑁄 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀓𑀣𑀸𑀢𑁄 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁦𑁨) 𑀕𑀳𑁂𑀢𑀩𑁆𑀩𑁄𑀢𑀺.

𑀦𑀦𑀼 𑀘 𑀪𑁄 𑀏𑀓𑀘𑁆𑀘𑀸𑀦𑀺 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀸𑀦𑀺 𑀫𑀳𑀕𑁆𑀖𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀅𑀧𑁆𑀧𑀕𑁆𑀖𑀸𑀦𑀺 𑀳𑁄𑀦𑁆𑀢𑀺, 𑀓𑀣𑀁 𑀏𑀓𑁂𑀓𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀤𑀺𑀦𑁆𑀦𑁂 𑀅𑀕𑁆𑀖𑀲𑀫𑀢𑁆𑀢𑀁 𑀪𑀯𑁂𑀬𑁆𑀬𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀪𑀡𑁆𑀟𑀸𑀕𑀸𑀭𑀘𑀻𑀯𑀭𑀪𑀸𑀚𑀦𑁂 𑀅𑀕𑁆𑀖𑀲𑀫𑀢𑁆𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁪𑁩) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀘𑀻𑀯𑀭𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁…𑀧𑁂… 𑀅𑀣 𑀔𑁄 𑀘𑀻𑀯𑀭𑀪𑀸𑀚𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀪𑀸𑀚𑁂𑀢𑀩𑁆𑀩’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀧𑀝𑀺𑀯𑀻𑀲𑀁 𑀞𑀧𑁂𑀢𑀼’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) ‘‘𑀉𑀘𑁆𑀘𑀺𑀦𑀺𑀢𑁆𑀯𑀸𑀢𑀺 ‘𑀇𑀤𑀁 𑀣𑀽𑀮𑀁, 𑀇𑀤𑀁 𑀲𑀡𑁆𑀳𑀁, 𑀇𑀤𑀁 𑀖𑀦𑀁, 𑀇𑀤𑀁 𑀢𑀦𑀼𑀓𑀁, 𑀇𑀤𑀁 𑀧𑀭𑀺𑀪𑀼𑀢𑁆𑀢𑀁, 𑀇𑀤𑀁 𑀅𑀧𑀭𑀺𑀪𑀼𑀢𑁆𑀢𑀁, 𑀇𑀤𑀁 𑀤𑀻𑀖𑀢𑁄 𑀏𑀢𑁆𑀢𑀓𑀁, 𑀧𑀼𑀣𑀼𑀮𑀢𑁄 𑀏𑀢𑁆𑀢𑀓’𑀦𑁆𑀢𑀺 𑀏𑀯𑀁 𑀯𑀢𑁆𑀣𑀸𑀦𑀺 𑀯𑀺𑀘𑀺𑀦𑀺𑀢𑁆𑀯𑀸. 𑀢𑀼𑀮𑀬𑀺𑀢𑁆𑀯𑀸𑀢𑀺 ‘𑀇𑀤𑀁 𑀏𑀢𑁆𑀢𑀓𑀁 𑀅𑀕𑁆𑀖𑀢𑀺, 𑀇𑀤𑀁 𑀏𑀢𑁆𑀢𑀓’𑀦𑁆𑀢𑀺 𑀏𑀯𑀁 𑀅𑀕𑁆𑀖𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸𑀢𑀺 𑀲𑀘𑁂 𑀲𑀩𑁆𑀩𑁂𑀲𑀁 𑀏𑀓𑁂𑀓𑀫𑁂𑀯 𑀤𑀲𑀤𑀲𑀅𑀕𑁆𑀖𑀦𑀓𑀁 𑀧𑀸𑀧𑀼𑀡𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀸𑀧𑀼𑀡𑀸𑀢𑀺, 𑀬𑀁 𑀦𑀯 𑀯𑀸 𑀅𑀝𑁆𑀞 𑀯𑀸 𑀅𑀕𑁆𑀖𑀢𑀺, 𑀢𑀁 𑀅𑀜𑁆𑀜𑁂𑀦 𑀏𑀓𑀅𑀕𑁆𑀖𑀦𑀓𑁂𑀦 𑀘 𑀤𑁆𑀯𑀺𑀅𑀕𑁆𑀖𑀦𑀓𑁂𑀦 𑀘 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀫𑁂 𑀧𑀝𑀺𑀯𑀻𑀲𑁂 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀲𑀘𑁂 𑀏𑀓𑁂𑀓𑀲𑁆𑀲 𑀤𑀻𑀬𑀫𑀸𑀦𑁂 𑀤𑀺𑀯𑀲𑁄 𑀦 𑀧𑀳𑁄𑀢𑀺, 𑀤𑀲 𑀤𑀲 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀤𑀲 𑀤𑀲 𑀘𑀻𑀯𑀭𑀧𑀝𑀺𑀯𑀻𑀲𑁂 𑀏𑀓𑀯𑀕𑁆𑀕𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀏𑀯𑀁 𑀘𑀻𑀯𑀭𑀧𑀝𑀺𑀯𑀻𑀲𑀁 𑀞𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀞𑀧𑀺𑀢𑁂𑀲𑀼 𑀘𑀻𑀯𑀭𑀧𑀝𑀺𑀯𑀻𑀲𑁂𑀲𑀼 𑀓𑀼𑀲𑁄 𑀧𑀸𑀢𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀜𑀸𑀬𑀢𑀺 ‘‘𑀪𑀡𑁆𑀟𑀸𑀕𑀸𑀭𑀘𑀻𑀯𑀭𑀪𑀸𑀚𑀦𑁂 𑀅𑀕𑁆𑀖𑀲𑀫𑀢𑁆𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀓𑀼𑀲𑀧𑀸𑀢𑁄 𑀘 𑀓𑀸𑀢𑀩𑁆𑀩𑁄’’𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀪𑀸𑀚𑀦𑁂 𑀅𑀕𑁆𑀖𑀲𑀫𑀢𑁆𑀢𑀁 𑀦 𑀇𑀘𑁆𑀙𑀺𑀢𑀩𑁆𑀩𑀁, 𑀓𑀼𑀲𑀧𑀸𑀢𑁄 𑀘 𑀦 𑀓𑀸𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) ‘‘𑀏𑀯𑀁 𑀅𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀲𑀘𑁂 𑀓𑀣𑀺𑀦𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀆𑀪𑀢𑀁 𑀆𑀦𑀺𑀲𑀁𑀲𑀁 𑀤𑀸𑀬𑀓𑀸 ‘𑀬𑁂𑀦 𑀅𑀫𑁆𑀳𑀸𑀓𑀁 𑀓𑀣𑀺𑀦𑀁 𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀤𑁂𑀫𑀸’𑀢𑀺 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀦𑀺𑀲𑁆𑀲𑀭𑁄. 𑀅𑀣 𑀅𑀯𑀺𑀘𑀸𑀭𑁂𑀢𑁆𑀯𑀸𑀯 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀇𑀲𑁆𑀲𑀭𑁄, 𑀢𑀲𑁆𑀫𑀸 𑀲𑀘𑁂 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀲𑁂𑀲𑀘𑀻𑀯𑀭𑀸𑀦𑀺𑀧𑀺 𑀤𑀼𑀩𑁆𑀩𑀮𑀸𑀦𑀺 𑀳𑁄𑀦𑁆𑀢𑀺, 𑀲𑀗𑁆𑀖𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀢𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀯𑀢𑁆𑀣𑀸𑀦𑀺 𑀤𑀸𑀢𑀩𑁆𑀩𑀸𑀦𑀺, 𑀓𑀫𑁆𑀫𑀯𑀸𑀘𑀸 𑀧𑀦 𑀏𑀓𑀸𑀬𑁂𑀯 𑀯𑀝𑁆𑀝𑀢𑀺. 𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀸𑀦𑀺. 𑀞𑀺𑀢𑀺𑀓𑀸𑀬 𑀅𑀪𑀸𑀯𑁂 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀸𑀦𑀺’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀕𑁆𑀖𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸’’𑀢𑀺 𑀯𑀸 ‘‘𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀸. 𑀢𑁂𑀦 𑀜𑀸𑀬𑀢𑀺 ‘‘𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀸𑀦𑀺 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀯𑀸 𑀯𑀼𑀟𑁆𑀠𑀢𑀭𑀢𑁄 𑀯𑀸 𑀧𑀝𑁆𑀞𑀸𑀬𑁂𑀯 𑀤𑀸𑀢𑀩𑁆𑀩𑀸𑀦𑀺, 𑀦𑁂𑀯 𑀅𑀕𑁆𑀖𑀲𑀫𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀦 𑀓𑀼𑀲𑁄 𑀧𑀸𑀢𑁂𑀢𑀩𑁆𑀩𑁄’’𑀢𑀺.

𑀇𑀤𑀸𑀦𑀺 𑀧𑀦 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀯𑁂𑀦 𑀅𑀤𑀺𑀦𑁆𑀦𑀢𑁆𑀢𑀸 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀅𑀓𑀢𑀢𑁆𑀢𑀸 𑀘 𑀓𑀣𑀺𑀦𑀢𑁆𑀣𑀢𑀘𑀻𑀯𑀭𑀢𑁄 𑀘 𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀅𑀯𑀲𑁂𑀲𑀘𑀻𑀯𑀭𑀢𑁆𑀣𑀸𑀬 𑀤𑀺𑀦𑁆𑀦𑀯𑀢𑁆𑀣𑀢𑁄 𑀘 𑀅𑀯𑀲𑁂𑀲𑀓𑀣𑀺𑀦𑀸𑀦𑀺𑀲𑀁𑀲𑁂 𑀩𑀮𑀯𑀯𑀢𑁆𑀣𑀸𑀦𑀺 𑀯𑀼𑀟𑁆𑀠𑀢𑀭𑀢𑁄 𑀧𑀝𑁆𑀞𑀸𑀬 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀏𑀓𑀁 𑀯𑀢𑁆𑀣𑀁 𑀤𑀸𑀢𑀩𑁆𑀩𑀁, 𑀢𑁂𑀲𑀼 𑀧𑀦 𑀯𑀭𑀁 𑀯𑀭𑀁 𑀯𑀼𑀟𑁆𑀠𑀲𑁆𑀲 𑀤𑀸𑀢𑀩𑁆𑀩𑀁. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦 𑀲𑀘𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀓𑁄𑀘𑀺 𑀤𑀲𑀳𑀢𑁆𑀣𑀁 𑀯𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀆𑀕𑀦𑁆𑀢𑀼𑀓𑁄 𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑁂𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀦𑀯𑀓𑁄 𑀘𑁂 𑀳𑁄𑀢𑀺, 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀢𑁆𑀣𑁂𑀭𑁄 𑀯𑀢𑁆𑀢𑀩𑁆𑀩𑁄 ‘𑀲𑀘𑁂, 𑀪𑀦𑁆𑀢𑁂, 𑀇𑀘𑁆𑀙𑀣, 𑀧𑀞𑀫𑀪𑀸𑀕𑀁 𑀫𑀼𑀜𑁆𑀘𑀺𑀢𑁆𑀯𑀸 𑀇𑀤𑀁 𑀯𑀢𑁆𑀣𑀁 𑀕𑀡𑁆𑀳𑀣𑀸’𑀢𑀺. 𑀅𑀫𑀼𑀜𑁆𑀘𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀼𑀩𑁆𑀩𑁂 𑀕𑀸𑀳𑀺𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀼𑀢𑀺𑀬𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀢𑁆𑀢𑀝𑁆𑀞𑀸𑀦𑁂 𑀆𑀕𑀦𑁆𑀢𑀼𑀓𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀯𑀢𑁆𑀣𑀸𑀦𑀺 𑀅𑀮𑀢𑁆𑀣𑀼𑀁, 𑀮𑀤𑁆𑀥𑀁 𑀮𑀤𑁆𑀥𑀁 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀬𑀸𑀯 𑀆𑀕𑀦𑁆𑀢𑀼𑀓𑀲𑁆𑀲 𑀲𑀫𑀓𑀁 𑀳𑁄𑀢𑀺, 𑀢𑀸𑀯 𑀤𑀸𑀢𑀩𑁆𑀩𑀁. 𑀢𑁂𑀦 𑀧𑀦 𑀲𑀫𑀓𑁂 𑀮𑀤𑁆𑀥𑁂 𑀅𑀯𑀲𑀺𑀝𑁆𑀞𑁄 𑀅𑀦𑀼𑀪𑀸𑀕𑁄 𑀣𑁂𑀭𑀸𑀲𑀦𑁂 𑀤𑀸𑀢𑀩𑁆𑀩𑁄’’𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑀯𑀘𑀦𑀢𑁄 𑀢𑀁𑀲𑀁𑀯𑀡𑁆𑀡𑀦𑀸𑀪𑀽𑀢𑀸𑀬𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁧𑁮) ‘‘𑀆𑀕𑀦𑁆𑀢𑀼𑀓𑁄 𑀲𑀘𑁂 𑀪𑀺𑀓𑁆𑀔𑀽𑀢𑀺 𑀘𑀻𑀯𑀭𑁂 𑀕𑀸𑀳𑀺𑀢𑁂 𑀧𑀘𑁆𑀙𑀸 𑀆𑀕𑀢𑁄 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀧𑀢𑁆𑀢𑀝𑁆𑀞𑀸𑀦𑁂𑀢𑀺 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂. 𑀧𑀞𑀫𑀯𑀲𑁆𑀲𑀽𑀧𑀕𑀢𑀸𑀢𑀺 𑀆𑀕𑀦𑁆𑀢𑀼𑀓𑀲𑁆𑀲 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸. 𑀮𑀤𑁆𑀥𑀁 𑀮𑀤𑁆𑀥𑀦𑁆𑀢𑀺 𑀤𑀸𑀬𑀓𑀸𑀦𑀁 𑀲𑀦𑁆𑀢𑀺𑀓𑀸 𑀆𑀕𑀢𑀸𑀕𑀢𑀲𑀸𑀝𑀓’’𑀦𑁆𑀢𑀺 𑀯𑀘𑀦𑀢𑁄, 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀜𑁆𑀘 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁩𑁧𑁮) ‘‘𑀧𑀞𑀫𑀪𑀸𑀕𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀇𑀤𑀁 𑀘𑁂 𑀧𑀞𑀫𑀕𑀸𑀳𑀺𑀢𑀯𑀢𑁆𑀣𑀼𑀢𑁄 𑀫𑀳𑀕𑁆𑀖𑀁 𑀳𑁄𑀢𑀻𑀢𑀺 𑀮𑀺𑀔𑀺𑀢’’𑀦𑁆𑀢𑀺 𑀯𑀘𑀦𑀢𑁄 𑀘 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀝𑀻𑀓𑀸𑀲𑀼 𑀘 𑀯𑀲𑁆𑀲𑀸𑀯𑀸𑀲𑀺𑀓𑀤𑀸𑀦𑁂 𑀧𑀘𑁆𑀙𑀸 𑀆𑀪𑀢𑀁 𑀫𑀳𑀕𑁆𑀖𑀯𑀢𑁆𑀣𑀁 𑀫𑀳𑀸𑀣𑁂𑀭𑀢𑁄 𑀧𑀝𑁆𑀞𑀸𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑁂𑀳𑀺 𑀅𑀦𑀺𑀘𑁆𑀙𑀺𑀢𑀁𑀬𑁂𑀯 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁆𑀲 𑀧𑀘𑁆𑀙𑀸 𑀆𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀩𑁆𑀩𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀭𑀁 𑀯𑀭𑀁 𑀯𑀼𑀟𑁆𑀠𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

‘‘𑀲𑀘𑁂 𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀯𑀢𑁆𑀣𑀸𑀦𑀺 𑀅𑀮𑀢𑁆𑀣𑀼’’𑀦𑁆𑀢𑀺 𑀯𑀢𑁆𑀣𑀕𑀡𑀦𑀸𑀬 𑀏𑀯 𑀯𑀼𑀢𑁆𑀢𑀢𑁆𑀢𑀸, 𑀅𑀕𑁆𑀖𑀕𑀡𑀦𑀸𑀬 𑀅𑀯𑀼𑀢𑁆𑀢𑀢𑁆𑀢𑀸 𑀘 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀲𑁆𑀲 𑀘 𑀯𑀲𑁆𑀲𑀸𑀯𑀸𑀲𑀺𑀓𑀕𑀢𑀺𑀓𑀪𑀸𑀯𑀲𑁆𑀲 𑀯𑀘𑀦𑀢𑁄 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀯𑀢𑁆𑀣𑀕𑀡𑀦𑀸𑀯𑀲𑁂𑀦𑁂𑀯 𑀪𑀸𑀚𑁂𑀢𑀩𑁆𑀩𑀸𑀦𑀺, 𑀦 𑀅𑀕𑁆𑀖𑀲𑀫𑀪𑀸𑀯𑁂𑀦𑀸𑀢𑀺 𑀘 𑀤𑀝𑁆𑀞𑀩𑁆𑀩𑀸𑀦𑀺, 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 ‘‘𑀬𑁄 𑀩𑀳𑀽𑀦𑀺 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀤𑁂𑀢𑀺, 𑀢𑀲𑁆𑀲 𑀲𑀦𑁆𑀢𑀓𑁂𑀦𑁂𑀯 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀯𑀼𑀢𑁆𑀢𑀁. 𑀩𑀳𑀽𑀦𑀺 𑀳𑀺 𑀓𑀣𑀺𑀦𑀸𑀦𑀺𑀲𑀁𑀲𑀯𑀢𑁆𑀣𑀸𑀦𑀺 𑀯𑀺𑀪𑀚𑀦𑀓𑀸𑀮𑁂 𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀓𑀸𑀦𑀺 𑀳𑁄𑀦𑁆𑀢𑀻𑀢𑀺.

𑀧𑀸𑀴𑀺𑀅𑀝𑁆𑀞𑀓𑀣𑀸𑀤𑀻𑀳𑀺, 𑀦𑁂𑀢𑁆𑀯𑀸 𑀯𑀼𑀢𑁆𑀢𑀁 𑀯𑀺𑀦𑀺𑀘𑁆𑀙𑀬𑀁;

𑀓𑀣𑀺𑀦𑁂 𑀘𑀻𑀯𑀭𑁂 𑀫𑀬𑁆𑀳𑀁, 𑀘𑀺𑀦𑁆𑀢𑀬𑀦𑁆𑀢𑀼 𑀯𑀺𑀘𑀓𑁆𑀔𑀡𑀸.

𑀘𑀺𑀦𑁆𑀢𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁, 𑀬𑀼𑀢𑁆𑀢𑀁 𑀘𑁂 𑀥𑀸𑀭𑀬𑀦𑁆𑀢𑀼 𑀢𑀁;

𑀅𑀬𑀼𑀢𑁆𑀢𑀜𑁆𑀘𑁂 𑀇𑀢𑁄 𑀅𑀜𑁆𑀜𑀁, 𑀧𑀭𑀺𑀬𑁂𑀲𑀦𑁆𑀢𑀼 𑀓𑀸𑀭𑀡𑀦𑁆𑀢𑀺.

‘‘𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄, 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀻𑀯𑀭𑀲𑁆𑀲𑁂𑀯 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀓𑀪𑀸𑀯𑀲𑁆𑀲 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀘𑀻𑀯𑀭𑀢𑁄 𑀅𑀜𑁆𑀜𑀸𑀦𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀸𑀦𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀺 𑀯𑀢𑁆𑀣𑀽𑀦𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀲𑁆𑀲 𑀆𑀕𑀢𑀸𑀕𑀢𑀲𑁆𑀲 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) ‘‘𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀤𑀸𑀦𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀆𑀦𑀺𑀲𑀁𑀲𑁄 𑀧𑀦 𑀇𑀢𑀭𑁂𑀲𑀁𑀬𑁂𑀯 𑀳𑁄𑀢𑀻’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁩) 𑀧𑀸𑀞𑀁 𑀉𑀧𑀦𑀺𑀲𑁆𑀲𑀸𑀬 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀫𑁆𑀧𑀺 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁𑀬𑁂𑀯 𑀤𑁂𑀦𑁆𑀢𑀺, 𑀦 𑀧𑀦𑁂𑀯𑀁 𑀓𑀸𑀢𑀩𑁆𑀩𑀁. 𑀪𑀡𑁆𑀟𑀸𑀕𑀸𑀭𑁂 𑀞𑀧𑀺𑀢𑀜𑁆𑀳𑀺 𑀅𑀓𑀸𑀮𑀘𑀻𑀯𑀭𑀫𑁂𑀯 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀯𑀲𑁆𑀲𑀸𑀯𑀸𑀲𑀺𑀓𑀓𑀣𑀺𑀦𑀸𑀦𑀺𑀲𑀁𑀲𑀸𑀤𑀺𑀓𑀸𑀮𑀘𑀻𑀯𑀭𑀁 𑀧𑀦 𑀲𑀫𑀓𑀫𑁂𑀯 𑀤𑀸𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) ‘‘𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀦𑁆𑀢𑀺 𑀏𑀢𑁆𑀣 𑀬𑁂 𑀲𑀸𑀫𑀡𑁂𑀭𑀸 𑀅𑀢𑁆𑀢𑀺𑀲𑁆𑀲𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺, 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀼 𑀬𑀼𑀢𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁𑀬𑁂𑀯 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀦 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁𑀬𑁂𑀯 𑀉𑀧𑀟𑁆𑀠𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀬𑁂 𑀧𑀦 𑀧𑀼𑀭𑁂𑀪𑀢𑁆𑀢𑀜𑁆𑀘 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀲𑀫𑀓𑁄 𑀤𑀸𑀢𑀩𑁆𑀩𑁄. 𑀇𑀤𑀜𑁆𑀘 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑁂𑀦 𑀪𑀡𑁆𑀟𑀸𑀕𑀸𑀭𑁂 𑀞𑀧𑀺𑀢𑁂𑀦 𑀅𑀓𑀸𑀮𑀘𑀻𑀯𑀭𑁂𑀦𑁂𑀯 𑀓𑀣𑀺𑀢𑀁, 𑀓𑀸𑀮𑀘𑀻𑀯𑀭𑀁 𑀧𑀦 𑀲𑀫𑀓𑀫𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺.

𑀓𑀘𑁆𑀘𑀺 𑀦𑀼 𑀔𑁄 𑀲𑀸𑀫𑀡𑁂𑀭𑀸 𑀯𑀲𑁆𑀲𑀁 𑀉𑀧𑀕𑀢𑀸, 𑀬𑁂𑀦 𑀆𑀦𑀺𑀲𑀁𑀲𑀁 𑀮𑀪𑁂𑀬𑁆𑀬𑀼𑀦𑁆𑀢𑀺? 𑀆𑀫 𑀉𑀧𑀕𑀢𑀸𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀅𑀣 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀉𑀧𑀕𑀢𑀸, 𑀏𑀓𑁄 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀲𑀸𑀫𑀡𑁂𑀭𑁄, 𑀲𑁄 𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀕𑀡𑀧𑀽𑀭𑀓𑁄 𑀘𑁂𑀯 𑀳𑁄𑀢𑀺, 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁦𑁬) 𑀯𑀘𑀦𑀢𑁄 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀜𑁆𑀘 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) ‘‘𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀲𑀫𑁆𑀧𑀦𑁆𑀦𑁄 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀼𑀫𑁆𑀧𑀺 𑀮𑀪𑀢𑀺, 𑀯𑀲𑁆𑀲𑀺𑀓𑁄 𑀘 𑀳𑁄𑀢𑀺, 𑀆𑀦𑀺𑀲𑀁𑀲𑀜𑁆𑀘 𑀮𑀪𑀢𑀻𑀢𑀺 𑀲𑀸𑀫𑀡𑁂𑀭𑀸𑀦𑀁 𑀯𑀲𑁆𑀲𑀽𑀧𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀲𑀸𑀫𑀡𑁂𑀭𑀸 𑀓𑀣𑀺𑀦𑀸𑀦𑀺𑀲𑀁𑀲𑀁 𑀮𑀪𑀦𑁆𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀘𑀦𑀢𑁄𑀢𑀺.

𑀢𑀢𑁆𑀭𑀼𑀧𑁆𑀧𑀸𑀤𑁂𑀲𑀼 𑀓𑀣𑀺𑀦𑀸𑀦𑀺𑀲𑀁𑀲𑁂𑀲𑀼 𑀬𑀤𑀺 𑀆𑀭𑀸𑀫𑀺𑀓𑀸 𑀢𑀡𑁆𑀟𑀼𑀮𑀸𑀤𑀻𑀳𑀺 𑀯𑀢𑁆𑀣𑀸𑀦𑀺 𑀘𑁂𑀢𑀸𑀧𑁂𑀦𑁆𑀢𑀺, 𑀯𑀢𑁆𑀣𑁂𑀳𑀺𑀧𑀺 𑀢𑀡𑁆𑀟𑀼𑀮𑀸𑀤𑀻𑀦𑀺 𑀘𑁂𑀢𑀸𑀧𑁂𑀦𑁆𑀢𑀺, 𑀢𑀢𑁆𑀣 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀯𑀺𑀪𑀚𑀦𑀓𑀸𑀮𑁂 𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) ‘‘𑀢𑀢𑁆𑀭𑀼𑀧𑁆𑀧𑀸𑀤𑁂𑀦 𑀢𑀡𑁆𑀟𑀼𑀮𑀸𑀤𑀺𑀦𑀸 𑀯𑀢𑁆𑀣𑀽𑀲𑀼 𑀘𑁂𑀢𑀸𑀧𑀺𑀢𑁂𑀲𑀼 𑀅𑀢𑁆𑀣𑀢𑀓𑀣𑀺𑀦𑀸𑀦𑀫𑁂𑀯 𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀯𑀢𑁆𑀣𑁂𑀳𑀺 𑀧𑀦 𑀢𑀡𑁆𑀟𑀼𑀮𑀸𑀤𑀻𑀲𑀼 𑀘𑁂𑀢𑀸𑀧𑀺𑀢𑁂𑀲𑀼 𑀲𑀩𑁆𑀩𑁂𑀲𑀁 𑀢𑀸𑀦𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺. ‘‘𑀲𑀘𑁂 𑀧𑀦 𑀏𑀓𑀲𑀻𑀫𑀸𑀬𑀁 𑀩𑀳𑀽 𑀯𑀺𑀳𑀸𑀭𑀸 𑀳𑁄𑀦𑁆𑀢𑀻’’𑀢𑀺 𑀏𑀢𑁆𑀣 𑀓𑀢𑀭𑀲𑀻𑀫𑀸 𑀅𑀥𑀺𑀧𑁆𑀧𑁂𑀢𑀸𑀢𑀺? 𑀉𑀧𑀘𑀸𑀭𑀲𑀻𑀫𑀸. 𑀉𑀧𑀘𑀸𑀭𑀲𑀻𑀫𑀸𑀬𑀁𑀬𑁂𑀯 𑀳𑀺 𑀲𑀗𑁆𑀖𑀮𑀸𑀪𑀯𑀺𑀪𑀚𑀦𑀸𑀤𑀺𑀓𑀁 𑀲𑀺𑀚𑁆𑀛𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁦𑁬) ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀉𑀧𑀘𑀸𑀭𑀲𑀻𑀫𑀝𑁆𑀞𑀲𑁆𑀲 𑀫𑀢𑀓𑀘𑀻𑀯𑀭𑀸𑀤𑀺𑀪𑀸𑀕𑀺𑀬𑀢𑀸𑀬 𑀩𑀤𑁆𑀥𑀲𑀻𑀫𑀸𑀬 𑀢𑀢𑁆𑀭𑀼𑀧𑁆𑀧𑀸𑀤𑀸𑀪𑀸𑀯𑀢𑁄 𑀯𑀺𑀜𑁆𑀜𑁂𑀬𑁆𑀬𑀫𑁂𑀢𑀁 ‘𑀉𑀧𑀘𑀸𑀭𑀲𑀻𑀫𑀸𑀯 𑀅𑀥𑀺𑀧𑁆𑀧𑁂𑀢𑀸’𑀢𑀺’’.

𑀏𑀯𑀁 𑀓𑀣𑀺𑀦𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑁂 𑀭𑀼𑀘𑀺𑀢𑀸𑀬 𑀫𑀸𑀢𑀺𑀓𑀸𑀧𑀮𑀺𑀩𑁄𑀥𑀉𑀩𑁆𑀪𑀸𑀭𑁂 𑀅𑀤𑀲𑁆𑀲𑁂𑀢𑁆𑀯𑀸𑀯 𑀅𑀦𑁆𑀢𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀝𑁆𑀞𑀯𑀺𑀥𑀸 𑀫𑀸𑀢𑀺𑀓𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑀸, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀦𑀸𑀲𑀦𑀦𑁆𑀢𑀺𑀓𑀸, 𑀲𑀯𑀦𑀦𑁆𑀢𑀺𑀓𑀸, 𑀆𑀲𑀸𑀯𑀘𑁆𑀙𑁂𑀤𑀺𑀓𑀸, 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸, 𑀲𑀳𑀼𑀩𑁆𑀪𑀸𑀭𑀸𑀢𑀺. 𑀢𑀢𑁆𑀣 𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀓𑀢𑀧𑀭𑀺𑀬𑁄𑀲𑀺𑀢𑀁 𑀘𑀻𑀯𑀭𑀁 𑀆𑀤𑀸𑀬 ‘‘𑀇𑀫𑀁 𑀯𑀺𑀳𑀸𑀭𑀁 𑀦 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑀫𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀦𑁂𑀯 𑀓𑀣𑀺𑀦𑀼𑀩𑁆𑀪𑀸𑀭𑁄 𑀪𑀯𑀢𑀺, 𑀧𑀜𑁆𑀘𑀸𑀦𑀺𑀲𑀁𑀲𑀸𑀦𑀺 𑀅𑀮𑀪𑀦𑁂𑀬𑁆𑀬𑁄 𑀳𑁄𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀧𑀓𑁆𑀓𑀫𑀦𑀫𑁂𑀯𑀲𑁆𑀲 𑀅𑀦𑁆𑀢𑀪𑀽𑀢𑀢𑁆𑀢𑀸 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀦𑀸𑀫 𑀳𑁄𑀢𑀺.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀅𑀦𑀺𑀝𑁆𑀞𑀺𑀢𑀫𑁂𑀯 𑀅𑀢𑁆𑀢𑀦𑁄 𑀪𑀸𑀕𑀪𑀽𑀢𑀁 𑀘𑀻𑀯𑀭𑀁 𑀆𑀤𑀸𑀬 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀢𑁄, 𑀢𑀲𑁆𑀲 𑀩𑀳𑀺𑀉𑀧𑀘𑀸𑀭𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀇𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀸𑀫𑀺, 𑀦 𑀧𑀼𑀭𑀸𑀡𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺, 𑀲𑁄 𑀩𑀳𑀺𑀲𑀻𑀫𑀸𑀬𑀫𑁂𑀯 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀦𑀺𑀝𑁆𑀞𑀺𑀢𑁂 𑀓𑀣𑀺𑀦𑀼𑀩𑁆𑀪𑀸𑀭𑁄 𑀳𑁄𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀘𑀻𑀯𑀭𑀦𑀺𑀝𑁆𑀞𑀸𑀦𑀫𑁂𑀯𑀲𑁆𑀲 𑀅𑀦𑁆𑀢𑁄𑀢𑀺 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀦𑀸𑀫.

𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀅𑀓𑀢𑀘𑀻𑀯𑀭𑀫𑀸𑀤𑀸𑀬 𑀧𑀓𑁆𑀓𑀫𑀢𑀺, 𑀢𑀲𑁆𑀲 𑀩𑀳𑀺𑀉𑀧𑀘𑀸𑀭𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀫𑀁 𑀘𑀻𑀯𑀭𑀁 𑀦𑁂𑀯 𑀓𑀸𑀭𑁂𑀲𑁆𑀲𑀸𑀫𑀺, 𑀧𑁄𑀭𑀸𑀡𑀯𑀺𑀳𑀸𑀭𑀜𑁆𑀘 𑀦 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀓𑀣𑀺𑀦𑀼𑀩𑁆𑀪𑀸𑀭𑁄 𑀳𑁄𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀯𑀲𑁆𑀲 𑀅𑀦𑁆𑀢𑁄𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀦𑀸𑀫.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀅𑀓𑀢𑀫𑁂𑀯 𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺, 𑀩𑀳𑀺𑀲𑀻𑀫𑀕𑀢𑀲𑁆𑀲 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀸𑀫𑀺, 𑀦 𑀘 𑀧𑁄𑀭𑀸𑀡𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀲 𑀘𑀻𑀯𑀭𑀁 𑀓𑀼𑀭𑀼𑀫𑀸𑀦𑀁 𑀘𑁄𑀭𑀸𑀤𑀻𑀳𑀺 𑀦𑀲𑁆𑀲𑀢𑀺, 𑀅𑀕𑁆𑀬𑀸𑀤𑀻𑀳𑀺 𑀯𑀺𑀦𑀲𑁆𑀲𑀢𑀺, 𑀓𑀣𑀺𑀦𑀼𑀩𑁆𑀪𑀸𑀭𑁄 𑀳𑁄𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀦𑀸𑀲𑀦𑀫𑁂𑀯𑀲𑁆𑀲 𑀅𑀦𑁆𑀢𑁄𑀢𑀺 𑀦𑀸𑀲𑀦𑀦𑁆𑀢𑀺𑀓𑁄 𑀦𑀸𑀫.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀅𑀓𑀢𑀘𑀻𑀯𑀭𑀫𑀸𑀤𑀸𑀬 ‘‘𑀇𑀫𑀁 𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀥𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺, 𑀲𑁄 𑀓𑀢𑀘𑀻𑀯𑀭𑁄 𑀲𑀼𑀡𑀸𑀢𑀺 ‘‘𑀯𑀺𑀳𑀸𑀭𑁂 𑀓𑀺𑀭 𑀲𑀗𑁆𑀖𑁂𑀦 𑀓𑀣𑀺𑀦𑀁 𑀉𑀩𑁆𑀪𑀢’’𑀦𑁆𑀢𑀺, 𑀢𑁂𑀦 𑀲𑀯𑀦𑀫𑀢𑁆𑀢𑁂𑀦𑀲𑁆𑀲 𑀓𑀣𑀺𑀦𑀁 𑀉𑀩𑁆𑀪𑀢𑀁 𑀳𑁄𑀢𑀺. 𑀅𑀬𑀁 𑀓𑀣𑀺𑀦𑀩𑁆𑀪𑀸𑀭𑁄 𑀲𑀯𑀦𑀫𑁂𑀯𑀲𑁆𑀲 𑀅𑀦𑁆𑀢𑁄𑀢𑀺 𑀲𑀯𑀦𑀦𑁆𑀢𑀺𑀓𑁄 𑀦𑀸𑀫.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑁆𑀣 𑀧𑀘𑁆𑀘𑀸𑀲𑀸𑀘𑀻𑀯𑀭𑀓𑀸𑀭𑀡𑀸 𑀧𑀓𑁆𑀓𑀫𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀥 𑀩𑀳𑀺𑀲𑀻𑀫𑀸𑀬𑀫𑁂𑀯 𑀘𑀻𑀯𑀭𑀧𑀘𑁆𑀘𑀸𑀲𑀁 𑀧𑀬𑀺𑀭𑀼𑀧𑀸𑀲𑀸𑀫𑀺, 𑀦 𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺, 𑀲𑁄 𑀢𑀢𑁆𑀣𑁂𑀯 𑀢𑀁 𑀘𑀻𑀯𑀭𑀧𑀘𑁆𑀘𑀸𑀲𑀁 𑀧𑀬𑀺𑀭𑀼𑀧𑀸𑀲𑀢𑀺, 𑀲𑁄 𑀢𑀁 𑀘𑀻𑀯𑀭𑀧𑀘𑁆𑀘𑀸𑀲𑀁 𑀅𑀮𑀪𑀫𑀸𑀦𑁄 𑀘𑀻𑀯𑀭𑀸𑀲𑀸 𑀧𑀘𑁆𑀙𑀺𑀚𑁆𑀚𑀢𑀺, 𑀢𑁂𑀦𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀪𑀯𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀆𑀲𑀸𑀯𑀘𑁆𑀙𑁂𑀤𑀲𑀳𑀺𑀢𑀢𑁆𑀢𑀸 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀦𑀸𑀫.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀅𑀓𑀢𑀘𑀻𑀯𑀭𑀁 𑀆𑀤𑀸𑀬 ‘‘𑀇𑀫𑀁 𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀲𑁄 𑀩𑀳𑀺𑀲𑀻𑀫𑀕𑀢𑁄 𑀢𑀁 𑀘𑀻𑀯𑀭𑀁 𑀓𑀸𑀭𑁂𑀢𑀺, 𑀲𑁄 𑀓𑀢𑀘𑀻𑀯𑀭𑁄 ‘‘𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀓𑀣𑀺𑀦𑀼𑀩𑁆𑀪𑀸𑀭𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺, 𑀢𑀲𑁆𑀲 𑀓𑀣𑀺𑀦𑀼𑀩𑁆𑀪𑀸𑀭𑁄 𑀪𑀯𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀘𑀻𑀯𑀭𑀓𑀸𑀮𑀲𑁆𑀲 𑀅𑀦𑁆𑀢𑀺𑀫𑀤𑀺𑀯𑀲𑀲𑀗𑁆𑀔𑀸𑀢𑀸𑀬 𑀲𑀻𑀫𑀸𑀬 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄 𑀦𑀸𑀫.

𑀅𑀢𑁆𑀣𑀢𑀓𑀣𑀺𑀦𑁄 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀆𑀤𑀸𑀬 ‘‘𑀇𑀫𑀁 𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀓𑁆𑀓𑀫𑀢𑀺, 𑀲𑁄 𑀓𑀢𑀘𑀻𑀯𑀭𑁄 ‘‘𑀯𑀺𑀳𑀸𑀭𑀁 𑀧𑀘𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂 𑀓𑀣𑀺𑀦𑀼𑀩𑁆𑀪𑀸𑀭𑀁 𑀧𑀧𑁆𑀧𑁄𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀳 𑀓𑀣𑀺𑀦𑀼𑀩𑁆𑀪𑀸𑀭𑁄 𑀪𑀯𑀢𑀺. 𑀅𑀬𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀳 𑀓𑀢𑀢𑁆𑀢𑀸 𑀲𑀳𑀼𑀩𑁆𑀪𑀸𑀭𑁄 𑀦𑀸𑀫. 𑀅𑀬𑀁 𑀅𑀝𑁆𑀞𑀯𑀺𑀥𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀅𑀝𑁆𑀞 𑀫𑀸𑀢𑀺𑀓𑀸 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑀧𑀸𑀴𑀺𑀬𑀁 (𑀫𑀳𑀸𑀯. 𑁩𑁧𑁦) ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬 𑀧𑀓𑁆𑀓𑀫𑀦𑀦𑁆𑀢𑀺𑀓𑀸 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸 𑀦𑀸𑀲𑀦𑀦𑁆𑀢𑀺𑀓𑀸 𑀲𑀯𑀦𑀦𑁆𑀢𑀺𑀓𑀸 𑀆𑀲𑀸𑀯𑀘𑁆𑀙𑁂𑀤𑀺𑀓𑀸 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸 𑀲𑀳𑀼𑀩𑁆𑀪𑀸𑀭𑀸𑀢𑀺. 𑀪𑀺𑀓𑁆𑀔𑀼 𑀅𑀢𑁆𑀣𑀢𑀓𑀣𑀺𑀦𑁄 𑀓𑀢𑀘𑀻𑀯𑀭𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘𑀦 𑀧𑀘𑁆𑀘𑁂𑀲𑁆𑀲’𑀦𑁆𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀩𑁆𑀪𑀸𑀭𑁄’’𑀢𑀺𑀆𑀤𑀺, 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑁆𑀧𑀓𑀭𑀡𑁂 𑀘 𑁋

‘‘𑀧𑀓𑁆𑀓𑀫𑀦𑀜𑁆𑀘 𑀦𑀺𑀝𑁆𑀞𑀸𑀦𑀁, 𑀲𑀦𑁆𑀦𑀺𑀝𑁆𑀞𑀸𑀦𑀜𑁆𑀘 𑀦𑀸𑀲𑀦𑀁;

𑀲𑀯𑀦𑀫𑀸𑀲𑀸 𑀘 𑀲𑀻𑀫𑀸 𑀘, 𑀲𑀳𑀼𑀩𑁆𑀪𑀸𑀭𑁄𑀢𑀺 𑀅𑀝𑁆𑀞𑀺𑀫𑀸’’𑀢𑀺. (𑀯𑀺. 𑀯𑀺. 𑁨𑁭𑁦𑁯);

𑀧𑀮𑀺𑀩𑁄𑀥𑁄 𑀤𑀼𑀯𑀺𑀥𑁄 𑀆𑀯𑀸𑀲𑀧𑀮𑀺𑀩𑁄𑀥𑁄, 𑀘𑀻𑀯𑀭𑀧𑀮𑀺𑀩𑁄𑀥𑁄𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄𑀧𑀺 ‘‘𑀧𑀼𑀦 𑀢𑀁 𑀯𑀺𑀳𑀸𑀭𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀧𑁂𑀓𑁆𑀔𑁄 𑀳𑁄𑀢𑀺. 𑀅𑀬𑀁 𑀆𑀯𑀸𑀲𑀧𑀮𑀺𑀩𑁄𑀥𑁄 𑀦𑀸𑀫. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀅𑀓𑀢𑀁 𑀯𑀸 𑀳𑁄𑀢𑀺 𑀅𑀧𑀭𑀺𑀬𑁄𑀲𑀺𑀢𑀁 𑀯𑀸, ‘‘𑀅𑀜𑁆𑀜𑀢𑁄 𑀘𑀻𑀯𑀭𑀁 𑀮𑀘𑁆𑀙𑀸𑀫𑀻’’𑀢𑀺 𑀆𑀲𑀸 𑀯𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸 𑀳𑁄𑀢𑀺. 𑀅𑀬𑀁 𑀘𑀻𑀯𑀭𑀧𑀮𑀺𑀩𑁄𑀥𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁨𑁫) ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸? 𑀆𑀯𑀸𑀲𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑀧𑀮𑀺𑀩𑁄𑀥𑁄 𑀘. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀲𑀢𑀺 𑀯𑀸 𑀢𑀲𑁆𑀫𑀺𑀁 𑀆𑀯𑀸𑀲𑁂, 𑀲𑀸𑀧𑁂𑀓𑁆𑀔𑁄 𑀯𑀸 𑀧𑀓𑁆𑀓𑀫𑀢𑀺 ‘𑀧𑀘𑁆𑀘𑁂𑀲𑁆𑀲’𑀦𑁆𑀢𑀺, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀅𑀓𑀢𑀁 𑀯𑀸 𑀳𑁄𑀢𑀺 𑀯𑀺𑀧𑁆𑀧𑀓𑀢𑀁 𑀯𑀸, 𑀘𑀻𑀯𑀭𑀸𑀲𑀸 𑀯𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀧𑀮𑀺𑀩𑁄𑀥𑁄 𑀳𑁄𑀢𑀻’’𑀢𑀺.

𑀉𑀩𑁆𑀪𑀸𑀭𑁄 𑀤𑀼𑀯𑀺𑀥𑁄 𑀅𑀝𑁆𑀞𑀫𑀸𑀢𑀺𑀓𑀸𑀉𑀩𑁆𑀪𑀸𑀭𑀅𑀦𑁆𑀢𑀭𑀼𑀩𑁆𑀪𑀸𑀭𑀯𑀲𑁂𑀦. 𑀢𑀢𑁆𑀣 𑀩𑀳𑀺𑀉𑀧𑀘𑀸𑀭𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸 𑀲𑀢𑁆𑀢 𑀓𑀣𑀺𑀦𑀼𑀩𑁆𑀪𑀸𑀭𑀸 𑀘 𑀩𑀳𑀺𑀉𑀧𑀘𑀸𑀭𑀲𑀻𑀫𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀣𑀺𑀦𑀢𑁆𑀣𑀢𑀯𑀺𑀳𑀸𑀭𑁂 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀧𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀳 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑁆𑀲 𑀓𑀢𑀢𑁆𑀢𑀸 𑀲𑀳𑀼𑀩𑁆𑀪𑀸𑀭𑀲𑀗𑁆𑀔𑀸𑀢𑁄 𑀏𑀓𑁄 𑀓𑀣𑀺𑀦𑀼𑀩𑁆𑀪𑀸𑀭𑁄 𑀘𑀸𑀢𑀺 𑀇𑀫𑁂 𑀅𑀝𑁆𑀞 𑀓𑀣𑀺𑀦𑀼𑀩𑁆𑀪𑀸𑀭𑀸 𑀅𑀝𑁆𑀞𑀫𑀸𑀢𑀺𑀓𑀸𑀬 𑀧𑀯𑀺𑀝𑁆𑀞𑀢𑁆𑀢𑀸 𑀅𑀝𑁆𑀞𑀫𑀸𑀢𑀺𑀓𑀸𑀉𑀩𑁆𑀪𑀸𑀭𑁄 𑀦𑀸𑀫. 𑀩𑀳𑀺𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀦𑀼𑀩𑁆𑀪𑀸𑀭𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀼𑀩𑁆𑀪𑀸𑀭𑁄 𑀅𑀝𑁆𑀞𑀫𑀸𑀢𑀺𑀓𑀸𑀬 𑀅𑀧𑁆𑀧𑀯𑀺𑀝𑁆𑀞𑁄 𑀳𑀼𑀢𑁆𑀯𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯 𑀓𑀢𑀢𑁆𑀢𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑁄 𑀦𑀸𑀫.

𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬𑁂𑀯 𑀓𑀢𑀸, 𑀏𑀯𑀁 𑀲𑀦𑁆𑀢𑁂 𑀓𑁄 𑀢𑁂𑀲𑀁 𑀯𑀺𑀲𑁂𑀲𑁄𑀢𑀺? 𑀅𑀦𑁆𑀢𑀭𑀼𑀩𑁆𑀪𑀸𑀭𑁄 𑀩𑀳𑀺𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀻𑀫𑀸𑀬𑀫𑁂𑀯 𑀞𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑁄. 𑀲𑀳𑀼𑀩𑁆𑀪𑀸𑀭𑁄 𑀩𑀳𑀺𑀲𑀻𑀫𑀁 𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀁 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀧𑀢𑁆𑀯𑀸 𑀢𑁂𑀳𑀺 𑀅𑀦𑁆𑀢𑁄𑀲𑀻𑀫𑀝𑁆𑀞𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀳 𑀓𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄 𑀲𑀢𑁆𑀢 𑀓𑀣𑀺𑀦𑀼𑀩𑁆𑀪𑀸𑀭𑀸 𑀦 𑀓𑀫𑁆𑀫𑀯𑀸𑀘𑀸𑀬 𑀓𑀢𑀸, 𑀓𑁂𑀯𑀮𑀁 𑀤𑁆𑀯𑀺𑀦𑁆𑀦𑀁 𑀧𑀮𑀺𑀩𑁄𑀥𑀸𑀦𑀁 𑀉𑀧𑀘𑁆𑀙𑁂𑀤𑁂𑀦 𑀧𑀜𑁆𑀘𑀳𑀺 𑀆𑀦𑀺𑀲𑀁𑀲𑁂𑀳𑀺 𑀯𑀺𑀕𑀢𑀢𑁆𑀢𑀸 𑀓𑀣𑀺𑀦𑀼𑀩𑁆𑀪𑀸𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑁋

‘‘𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀯𑀸, 𑀅𑀦𑁆𑀢𑀭𑀼𑀩𑁆𑀪𑀸𑀭𑀢𑁄𑀧𑀺 𑀯𑀸;

𑀉𑀩𑁆𑀪𑀸𑀭𑀸𑀧𑀺 𑀤𑀼𑀯𑁂 𑀯𑀼𑀢𑁆𑀢𑀸, 𑀓𑀣𑀺𑀦𑀲𑁆𑀲 𑀫𑀳𑁂𑀲𑀺𑀦𑀸’’𑀢𑀺.

𑀢𑀝𑁆𑀝𑀻𑀓𑀸𑀬𑀫𑁆𑀧𑀺 ‘‘𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀦𑁆𑀢𑀺 𑀩𑀳𑀺𑀲𑀻𑀫𑀕𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸. 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄 𑀲𑀢𑁆𑀢 𑀫𑀸𑀢𑀺𑀓𑀸 𑀩𑀳𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀸, 𑀲𑀳𑀼𑀩𑁆𑀪𑀸𑀭𑁄 𑀇𑀫𑀸𑀲𑀁 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦 𑀘. 𑀅𑀦𑁆𑀢𑀭𑀼𑀩𑁆𑀪𑀸𑀭𑀢𑁄𑀧𑀺 𑀯𑀸𑀢𑀺 𑀩𑀳𑀺𑀲𑀻𑀫𑀁 𑀅𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑁂𑀦 𑀉𑀩𑁆𑀪𑀢𑀓𑀣𑀺𑀦𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑀢𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑁄𑀢𑀺 𑀫𑀳𑁂𑀲𑀺𑀦𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸 𑀤𑀼𑀯𑁂 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀩𑀳𑀺𑀲𑀻𑀫𑀁 𑀕𑀦𑁆𑀢𑁆𑀯𑀸 𑀆𑀕𑀢𑀲𑁆𑀲 𑀯𑀲𑁂𑀦 𑀲𑀉𑀩𑁆𑀪𑀸𑀭𑁄, 𑀩𑀳𑀺𑀲𑀻𑀫𑀁 𑀅𑀕𑀢𑀸𑀦𑀁 𑀯𑀲𑁂𑀦 𑀅𑀦𑁆𑀢𑀭𑀼𑀩𑁆𑀪𑀸𑀭𑁄𑀢𑀺 𑀏𑀓𑁄𑀬𑁂𑀯 𑀉𑀩𑁆𑀪𑀸𑀭𑁄 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀓𑀲𑁆𑀫𑀸 𑀧𑀦 𑀅𑀦𑁆𑀢𑀭𑀼𑀩𑁆𑀪𑀸𑀭𑀯𑀲𑁂𑀦 𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀁 𑀉𑀩𑁆𑀪𑀢𑀦𑁆𑀢𑀺? 𑀫𑀳𑀸𑀤𑀸𑀦𑀁 𑀤𑀸𑀢𑀼𑀓𑀸𑀫𑁂𑀳𑀺 𑀉𑀧𑀸𑀲𑀓𑁂𑀳𑀺 𑀆𑀕𑀢𑀲𑁆𑀲 𑀲𑀗𑁆𑀖𑀲𑁆𑀲 𑀅𑀓𑀸𑀮𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑁂𑀳𑀺 𑀬𑀸𑀘𑀺𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀧𑀸𑀘𑀺. 𑁯𑁨𑁫) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀸𑀧𑀺𑀢𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀫𑀳𑁂 𑀉𑀪𑀢𑁄𑀲𑀗𑁆𑀖𑀲𑁆𑀲 𑀅𑀓𑀸𑀮𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀪𑀢𑁄𑀲𑀗𑁆𑀖𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀬𑀸𑀘𑀻’’𑀢𑀺𑀆𑀤𑀺. 𑀓𑀣𑀁 𑀧𑀦 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸𑀢𑀺? ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀓𑀣𑀺𑀦𑀁 𑀉𑀤𑁆𑀥𑀭𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀲𑀗𑁆𑀖𑁄 𑀓𑀣𑀺𑀦𑀁 𑀉𑀤𑁆𑀥𑀭𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀓𑀣𑀺𑀦𑀲𑁆𑀲 𑀉𑀤𑁆𑀥𑀸𑀭𑁄, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀉𑀩𑁆𑀪𑀢𑀁 𑀲𑀗𑁆𑀖𑁂𑀦 𑀓𑀣𑀺𑀦𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀏𑀯𑀁 𑀓𑀸𑀢𑀩𑁆𑀩𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀁 𑀉𑀤𑁆𑀥𑀭𑀺𑀢𑀼𑀁, 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋 𑀲𑀼𑀡𑀸𑀢𑀼 𑀫𑁂…𑀧𑁂… 𑀥𑀸𑀭𑀬𑀸𑀫𑀻’’𑀢𑀺.

𑀏𑀢𑁂𑀦 𑀘 𑀓𑀣𑀺𑀦𑀼𑀩𑁆𑀪𑀸𑀭𑁂𑀦 𑀧𑀼𑀩𑁆𑀩𑁂 𑀓𑀢𑀁 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀉𑀩𑁆𑀪𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀦 𑀧𑀦 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀉𑀩𑁆𑀪𑀢𑀁, 𑀅𑀣 𑀔𑁄 𑀅𑀢𑁆𑀣𑀸𑀭𑀓𑀫𑁆𑀫𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀉𑀩𑁆𑀪𑀢𑀁 𑀪𑀯𑁂𑀬𑁆𑀬, 𑀢𑀸𑀬 𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀇𑀫𑀸𑀬 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑀯𑀸𑀘𑀸𑀬 𑀢𑀁 𑀧𑀼𑀩𑁆𑀩𑁂 𑀤𑀺𑀦𑁆𑀦𑀤𑀼𑀲𑁆𑀲𑀁 𑀧𑀼𑀦 𑀆𑀳𑀭𑀸𑀧𑁂𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀜𑁆𑀘𑀸𑀦𑀺𑀲𑀁𑀲𑀯𑀺𑀕𑀫𑀦𑀁. 𑀬𑀲𑁆𑀫𑀸 𑀧𑀦 𑀇𑀫𑀸𑀬 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑀯𑀸𑀘𑀸𑀬 𑀧𑀜𑁆𑀘𑀸𑀦𑀺𑀲𑀁𑀲𑀯𑀺𑀕𑀫𑀦𑀫𑁂𑀯 𑀳𑁄𑀢𑀺, 𑀦 𑀧𑀼𑀩𑁆𑀩𑁂 𑀤𑀺𑀦𑁆𑀦𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀧𑀼𑀦 𑀆𑀳𑀭𑀸𑀧𑀦𑀁. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀧𑀜𑁆𑀘𑀸𑀦𑀺𑀲𑀁𑀲𑀮𑀸𑀪𑀓𑀸𑀭𑀡𑀁 𑀅𑀢𑁆𑀣𑀭𑀡𑀓𑀫𑁆𑀫𑀫𑁂𑀯 𑀇𑀫𑀸𑀬 𑀓𑀣𑀺𑀦𑀩𑁆𑀪𑀸𑀭𑀓𑀫𑁆𑀫𑀯𑀸𑀘𑀸𑀬 𑀉𑀤𑁆𑀥𑀭𑀻𑀬𑀢𑀺, 𑀦 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀢𑀺, 𑀢𑀲𑁆𑀫𑀸 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑀯𑀸𑀘𑀸𑀓𑀭𑀡𑀢𑁄 𑀧𑀘𑁆𑀙𑀸 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀁 𑀅𑀓𑀸𑀮𑀘𑀻𑀯𑀭𑀁 𑀳𑁄𑀢𑀺, 𑀲𑀗𑁆𑀖𑁄 𑀧𑀜𑁆𑀘𑀸𑀦𑀺𑀲𑀁𑀲𑁂 𑀦 𑀮𑀪𑀢𑀺, 𑀘𑀻𑀯𑀭𑀁 𑀲𑀩𑁆𑀩𑀲𑀗𑁆𑀖𑀺𑀓𑀁 𑀳𑀼𑀢𑁆𑀯𑀸 𑀆𑀕𑀢𑀸𑀕𑀢𑀲𑁆𑀲 𑀲𑀗𑁆𑀖𑀲𑁆𑀲 𑀪𑀸𑀚𑀦𑀻𑀬𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀫𑀢𑁆𑀣𑁄 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀘 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑀯𑀸𑀘𑀸𑀬 𑀘 𑀅𑀢𑁆𑀣𑀜𑁆𑀘 𑀅𑀥𑀺𑀧𑁆𑀧𑀸𑀬𑀜𑁆𑀘 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀧𑀼𑀩𑁆𑀩𑀸𑀧𑀭𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑁂𑀢𑀩𑁆𑀩𑁄𑀢𑀺.

𑀏𑀢𑁆𑀣 𑀲𑀺𑀬𑀸 𑁋 𑀓𑀣𑀺𑀦𑀼𑀩𑁆𑀪𑀸𑀭𑀁 𑀬𑀸𑀘𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀤𑀸𑀢𑀩𑁆𑀩𑁄, 𑀉𑀤𑀸𑀳𑀼 𑀏𑀓𑀘𑁆𑀘𑀸𑀦𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑁄, 𑀓𑀣𑀺𑀦𑀼𑀩𑁆𑀪𑀸𑀭𑀓𑀫𑁆𑀫𑁂𑀦 𑀧𑀜𑁆𑀘𑀸𑀦𑀺𑀲𑀁𑀲𑀯𑀺𑀕𑀫𑀦𑀢𑁄 𑀲𑀗𑁆𑀖𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬, 𑀅𑀣 𑀏𑀓𑀘𑁆𑀘𑀸𑀦𑀁 𑀫𑀼𑀔𑁄𑀮𑁄𑀓𑀦𑀁 𑀯𑀺𑀬 𑀲𑀺𑀬𑀸𑀢𑀺? 𑀬𑀤𑀺 𑀓𑀣𑀺𑀦𑀢𑁆𑀣𑀸𑀭𑀫𑀽𑀮𑀓𑀮𑀸𑀪𑀢𑁄 𑀓𑀣𑀺𑀦𑀼𑀩𑁆𑀪𑀸𑀭𑀫𑀽𑀮𑀓𑀮𑀸𑀪𑁄 𑀫𑀳𑀦𑁆𑀢𑁄 𑀪𑀯𑁂𑀬𑁆𑀬, 𑀢𑁂𑀲𑀁 𑀬𑀸𑀘𑀦𑁆𑀢𑀸𑀦𑀁 𑀓𑀣𑀺𑀦𑀼𑀩𑁆𑀪𑀸𑀭𑁄 𑀤𑀸𑀢𑀩𑁆𑀩𑁄. 𑀬𑀤𑀺 𑀅𑀧𑁆𑀧𑀓𑁄, 𑀦 𑀤𑀸𑀢𑀩𑁆𑀩𑁄. 𑀬𑀤𑀺 𑀲𑀫𑁄, 𑀓𑀼𑀮𑀧𑁆𑀧𑀲𑀸𑀤𑀢𑁆𑀣𑀸𑀬 𑀤𑀸𑀢𑀩𑁆𑀩𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁯𑁨𑁭) ‘‘𑀓𑀻𑀤𑀺𑀲𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀤𑀸𑀢𑀩𑁆𑀩𑁄, 𑀓𑀻𑀤𑀺𑀲𑁄 𑀦 𑀤𑀸𑀢𑀩𑁆𑀩𑁄𑀢𑀺? 𑀬𑀲𑁆𑀲 𑀅𑀢𑁆𑀣𑀸𑀭𑀫𑀽𑀮𑀓𑁄 𑀆𑀦𑀺𑀲𑀁𑀲𑁄 𑀫𑀳𑀸, 𑀉𑀩𑁆𑀪𑀸𑀭𑀫𑀽𑀮𑀓𑁄 𑀅𑀧𑁆𑀧𑁄, 𑀏𑀯𑀭𑀽𑀧𑁄 𑀦 𑀤𑀸𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀅𑀢𑁆𑀣𑀸𑀭𑀫𑀽𑀮𑀓𑁄 𑀆𑀦𑀺𑀲𑀁𑀲𑁄 𑀅𑀧𑁆𑀧𑁄, 𑀉𑀩𑁆𑀪𑀸𑀭𑀫𑀽𑀮𑀓𑁄 𑀫𑀳𑀸, 𑀏𑀯𑀭𑀽𑀧𑁄 𑀤𑀸𑀢𑀩𑁆𑀩𑁄. 𑀲𑀫𑀸𑀦𑀺𑀲𑀁𑀲𑁄𑀧𑀺 𑀲𑀤𑁆𑀥𑀸𑀧𑀭𑀺𑀧𑀸𑀮𑀦𑀢𑁆𑀣𑀁 𑀤𑀸𑀢𑀩𑁆𑀩𑁄𑀯𑀸’’𑀢𑀺. 𑀇𑀫𑀺𑀦𑀸𑀧𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀧𑀜𑁆𑀘𑀸𑀦𑀺𑀲𑀁𑀲𑀸𑀦𑀁 𑀓𑀸𑀭𑀡𑀪𑀽𑀢𑀁 𑀅𑀢𑁆𑀣𑀸𑀭𑀓𑀫𑁆𑀫𑀫𑁂𑀯 𑀉𑀤𑁆𑀥𑀭𑀻𑀬𑀢𑀺, 𑀦 𑀓𑀣𑀺𑀦𑀤𑀼𑀲𑁆𑀲𑀤𑀸𑀦𑀪𑀽𑀢𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫’’𑀦𑁆𑀢𑀺.

𑀆𑀦𑀺𑀲𑀁𑀲𑀓𑀣𑀸𑀬𑀁 𑀧𑀜𑁆𑀘𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀬𑁄 𑀧𑀜𑁆𑀘 𑀓𑀺𑀭𑀺𑀬𑀸. 𑀓𑀧𑁆𑀧𑀺𑀲𑁆𑀲𑀦𑁆𑀢𑀻𑀢𑀺 𑀓𑀧𑁆𑀧𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀓𑀸𑀭𑀡𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀸𑀫𑀦𑁆𑀢𑀘𑀸𑀭𑁄𑀢𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀘𑀭𑀡𑀁. 𑀬𑁄 𑀳𑀺 𑀤𑀸𑀬𑀓𑁂𑀳𑀺 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑀺𑀢𑁄 𑀳𑀼𑀢𑁆𑀯𑀸 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀯𑀺𑀳𑀸𑀭𑁂 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀺, 𑀲𑀸 𑀆𑀧𑀢𑁆𑀢𑀺 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄 𑀘𑀻𑀯𑀭𑀤𑀸𑀦𑀲𑀫𑀬𑁄 𑀘𑀻𑀯𑀭𑀓𑀸𑀭𑀲𑀫𑀬𑁄, 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺 𑀅𑀘𑁂𑀮𑀓𑀯𑀕𑁆𑀕𑁂 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁨𑁯𑁯-𑁩𑁦𑁦). 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀸 𑀲𑀩𑁆𑀩𑁂𑀦 𑀯𑀸 𑀯𑀺𑀦𑀸 𑀳𑀢𑁆𑀣𑀧𑀸𑀲𑁂 𑀅𑀓𑀢𑁆𑀯𑀸 𑀅𑀭𑀼𑀡𑀼𑀝𑁆𑀞𑀸𑀧𑀦𑀁, 𑀏𑀯𑀁 𑀓𑀭𑁄𑀢𑁄𑀧𑀺 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀘 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀕𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 (𑀧𑀸𑀭𑀸. 𑁪𑁭𑁨).

𑀕𑀡𑀪𑁄𑀚𑀦𑀦𑁆𑀢𑀺 𑀏𑀢𑁂𑀦 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀕𑀡𑀪𑁄𑀚𑀦𑀁 𑀦𑀸𑀫 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀤𑁂𑀣𑀸’’𑀢𑀺 𑀪𑀺𑀓𑁆𑀔𑀽𑀦𑀁 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀤𑀸𑀬𑀓𑀸𑀦𑀁 𑀦𑀺𑀫𑀦𑁆𑀢𑀦𑁂𑀦 𑀯𑀸 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀪𑀺𑀓𑁆𑀔𑀽 𑀏𑀓𑀢𑁄 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀏𑀓𑀢𑁄 𑀪𑀼𑀜𑁆𑀚𑀦𑀁. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 ‘‘𑀕𑀡𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄 𑀕𑀺𑀮𑀸𑀦𑀲𑀫𑀬𑁄 𑀘𑀻𑀯𑀭𑀤𑀸𑀦𑀲𑀫𑀬𑁄 𑀘𑀻𑀯𑀭𑀓𑀸𑀭𑀲𑀫𑀬𑁄 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁄 𑀦𑀸𑀯𑀸𑀪𑀺𑀭𑀼𑀳𑀦𑀲𑀫𑀬𑁄 𑀫𑀳𑀸𑀲𑀫𑀬𑁄 𑀲𑀫𑀡𑀪𑀢𑁆𑀢𑀲𑀫𑀬𑁄, 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺 𑀆𑀕𑀢𑀁 𑀪𑁄𑀚𑀦𑀯𑀕𑁆𑀕𑁂 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 (𑀧𑀸𑀘𑀺. 𑁨𑁧𑁫). 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀁 𑀯𑀝𑁆𑀝𑀢𑀻𑀢𑀺 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀁, 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀕𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 (𑀧𑀸𑀭𑀸. 𑁪𑁭𑁨). 𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀸𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀢𑀓𑀘𑀻𑀯𑀭𑀦𑁆𑀢𑀺 𑀫𑀢𑀲𑁆𑀲 𑀘𑀻𑀯𑀭𑀁. 𑀢𑀢𑁆𑀭𑀼𑀧𑁆𑀧𑀸𑀤𑁂𑀦𑀸𑀢𑀺 𑀲𑀗𑁆𑀖𑀲𑀦𑁆𑀢𑀓𑁂𑀦 𑀆𑀭𑀸𑀫𑀼𑀬𑁆𑀬𑀸𑀦𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸. 𑀬𑀁 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀘𑀻𑀯𑀭𑀫𑁂𑀯 𑀓𑀣𑀺𑀦𑀢𑁆𑀣𑀸𑀭𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀺𑀡𑁆𑀟𑀧𑀸𑀢𑀪𑁂𑀲𑀚𑁆𑀚𑀸𑀤𑀺𑀓𑀁 𑀆𑀕𑀢𑀸𑀕𑀢𑀲𑁆𑀲 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑁆𑀧𑀦𑁆𑀦𑁄, 𑀮𑀚𑁆𑀚𑀻 𑀪𑀺𑀓𑁆𑀔𑀼 𑀲𑀼𑀧𑁂𑀲𑀮𑁄;

𑀓𑀭𑁂𑀬𑁆𑀬 𑀓𑀣𑀺𑀦𑀢𑁆𑀣𑀸𑀭𑀁, 𑀉𑀩𑁆𑀪𑀸𑀭𑀜𑁆𑀘𑀸𑀧𑀺 𑀲𑀸𑀥𑀼𑀓𑀦𑁆𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀓𑀣𑀺𑀦𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀏𑀓𑀽𑀦𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.