𑁩𑁦. 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁨𑁭. 𑀏𑀯𑀁 𑀓𑀣𑀺𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀕𑀭𑀼𑀪𑀡𑁆𑀟𑀸𑀤𑀺𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀭𑀼𑀪𑀡𑁆𑀟𑀸𑀦𑀻𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀭𑀽𑀢𑀺 𑁋

‘‘𑀧𑀼𑀫𑁂 𑀆𑀘𑀭𑀺𑀬𑀸𑀤𑀺𑀫𑁆𑀳𑀺, 𑀕𑀭𑀼 𑀫𑀸𑀢𑀸𑀧𑀺𑀢𑀽𑀲𑀼𑀧𑀺;

𑀕𑀭𑀼 𑀢𑀻𑀲𑀼 𑀫𑀳𑀦𑁆𑀢𑁂 𑀘, 𑀤𑀼𑀚𑁆𑀚𑀭𑀸𑀮𑀳𑀼𑀓𑁂𑀲𑀼 𑀘𑀸’’𑀢𑀺. 𑁋

𑀯𑀼𑀢𑁆𑀢𑁂𑀲𑀼 𑀅𑀦𑁂𑀓𑀢𑁆𑀣𑁂𑀲𑀼 𑀅𑀮𑀳𑀼𑀓𑀯𑀸𑀘𑀓𑁄. 𑀪𑀡𑁆𑀟-𑀲𑀤𑁆𑀤𑁄 ‘‘𑀪𑀸𑀚𑀦𑀸𑀤𑀺𑀧𑀭𑀺𑀓𑁆𑀔𑀸𑀭𑁂, 𑀪𑀡𑁆𑀟𑀁 𑀫𑀽𑀮𑀥𑀦𑁂𑀧𑀺 𑀘𑀸’’𑀢𑀺 𑀏𑀢𑁆𑀣 𑀪𑀸𑀚𑀦𑀸𑀤𑀺𑀧𑀭𑀺𑀓𑁆𑀔𑀸𑀭𑀢𑁆𑀣𑁄 𑀳𑁄𑀢𑀺. 𑀯𑀘𑀦𑀢𑁆𑀣𑁄 𑀧𑀦 𑀕𑀭𑀦𑁆𑀢𑀺 𑀉𑀕𑁆𑀕𑀘𑁆𑀙𑀦𑁆𑀢𑀺 𑀉𑀕𑁆𑀕𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀕𑀭𑀽𑀦𑀺, 𑀪𑀟𑀺𑀢𑀩𑁆𑀩𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀻𑀢𑀺 𑀪𑀡𑁆𑀟𑀸𑀦𑀺, 𑀕𑀭𑀽𑀦𑀺 𑀘 𑀢𑀸𑀦𑀺 𑀪𑀡𑁆𑀟𑀸𑀦𑀺 𑀘𑀸𑀢𑀺 𑀕𑀭𑀼𑀪𑀡𑁆𑀟𑀸𑀦𑀺, 𑀆𑀭𑀸𑀫𑀸𑀤𑀻𑀦𑀺 𑀯𑀢𑁆𑀣𑀽𑀦𑀺. 𑀇𑀢𑀺 𑀆𑀤𑀺𑀦𑀸 𑀦𑀬𑁂𑀦 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀪𑀕𑀯𑀢𑀸 𑀤𑀲𑁆𑀲𑀺𑀢𑀸𑀦𑀺 𑀇𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀕𑀭𑀼𑀪𑀡𑁆𑀟𑀸𑀦𑀺 𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀫𑀜𑁆𑀘𑁂𑀲𑀼 𑀫𑀲𑀸𑀭𑀓𑁄𑀢𑀺 𑀫𑀜𑁆𑀘𑀧𑀸𑀤𑁂 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀢𑁄. 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄𑀢𑀺 𑀅𑀝𑀦𑀻𑀳𑀺 𑀫𑀜𑁆𑀘𑀧𑀸𑀤𑁂 𑀟𑀁𑀲𑀸𑀧𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀲𑀗𑁆𑀔𑁂𑀧𑁂𑀦 𑀓𑀢𑁄. 𑀓𑀼𑀴𑀻𑀭𑀧𑀸𑀤𑀓𑁄𑀢𑀺 𑀅𑀲𑁆𑀲𑀫𑁂𑀡𑁆𑀟𑀓𑀸𑀤𑀻𑀦𑀁 𑀧𑀸𑀤𑀲𑀤𑀺𑀲𑁂𑀳𑀺 𑀧𑀸𑀤𑁂𑀳𑀺 𑀓𑀢𑁄. 𑀬𑁄 𑀯𑀸 𑀧𑀦 𑀓𑁄𑀘𑀺 𑀯𑀗𑁆𑀓𑀧𑀸𑀤𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀼𑀴𑀻𑀭𑀧𑀸𑀤𑀓𑁄’’𑀢𑀺. 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀅𑀬𑀁 𑀧𑀦 ‘‘𑀆𑀳𑀘𑁆𑀘𑀧𑀸𑀤𑀓𑁄 𑀦𑀸𑀫 𑀫𑀜𑁆𑀘𑁄 𑀅𑀗𑁆𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀓𑀢𑁄 𑀳𑁄𑀢𑀻’’𑀢𑀺 𑀏𑀯𑀁 𑀧𑀭𑀢𑁄 𑀧𑀸𑀴𑀺𑀬𑀁𑀬𑁂𑀯 (𑀧𑀸𑀘𑀺. 𑁧𑁩𑁧) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀅𑀝𑀦𑀺𑀬𑁄 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀧𑀸𑀤𑀲𑀺𑀔𑀁 𑀧𑀯𑁂𑀲𑁂𑀢𑁆𑀯𑀸 𑀉𑀧𑀭𑀺 𑀆𑀡𑀺𑀁 𑀤𑀢𑁆𑀯𑀸 𑀓𑀢𑀫𑀜𑁆𑀘𑁄 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀻𑀞𑁂𑀧𑀺 𑀏𑀲𑁂𑀯 𑀦𑀬𑁄.

𑀉𑀡𑁆𑀡𑀪𑀺𑀲𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀜𑁆𑀜𑀢𑀭𑀸𑀢𑀺 𑀉𑀡𑁆𑀡𑀪𑀺𑀲𑀺 𑀘𑁄𑀴𑀪𑀺𑀲𑀺 𑀯𑀸𑀓𑀪𑀺𑀲𑀺 𑀢𑀺𑀡𑀪𑀺𑀲𑀺 𑀧𑀡𑁆𑀡𑀪𑀺𑀲𑀻𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀲𑀻𑀦𑀁 𑀅𑀜𑁆𑀜𑀢𑀭𑀸. 𑀧𑀜𑁆𑀘 𑀪𑀺𑀲𑀺𑀬𑁄𑀢𑀺 𑀧𑀜𑁆𑀘𑀳𑀺 𑀉𑀡𑁆𑀡𑀸𑀤𑀻𑀳𑀺 𑀧𑀽𑀭𑀺𑀢𑀪𑀺𑀲𑀺𑀬𑁄. 𑀢𑀽𑀮𑀕𑀡𑀦𑀸𑀬 𑀳𑀺 𑀏𑀢𑀸𑀲𑀁 𑀕𑀡𑀦𑀸. 𑀢𑀢𑁆𑀣 𑀉𑀡𑁆𑀡𑀕𑁆𑀕𑀳𑀡𑁂𑀦 𑀦 𑀓𑁂𑀯𑀮𑀁 𑀏𑀴𑀓𑀮𑁄𑀫𑀫𑁂𑀯 𑀕𑀳𑀺𑀢𑀁, 𑀞𑀧𑁂𑀢𑁆𑀯𑀸 𑀧𑀦 𑀫𑀦𑀼𑀲𑁆𑀲𑀮𑁄𑀫𑀁 𑀬𑀁 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀫𑀁𑀲𑀚𑀸𑀢𑀻𑀦𑀁 𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁 𑀮𑁄𑀫𑀁, 𑀲𑀩𑁆𑀩𑀁 𑀇𑀥 𑀉𑀡𑁆𑀡𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁, 𑀢𑀲𑁆𑀫𑀸 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁, 𑀙𑀦𑁆𑀦𑀁 𑀅𑀦𑀼𑀮𑁄𑀫𑀘𑀻𑀯𑀭𑀸𑀦𑀜𑁆𑀘 𑀅𑀜𑁆𑀜𑀢𑀭𑁂𑀦 𑀪𑀺𑀲𑀺𑀘𑁆𑀙𑀯𑀺𑀁 𑀓𑀢𑁆𑀯𑀸 𑀢𑀁 𑀲𑀩𑁆𑀩𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀲𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀴𑀓𑀮𑁄𑀫𑀸𑀦𑀺 𑀧𑀦 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀫𑁆𑀩𑀮𑀫𑁂𑀯 𑀘𑀢𑀼𑀕𑁆𑀕𑀼𑀡𑀁 𑀯𑀸 𑀧𑀜𑁆𑀘𑀕𑀼𑀡𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸𑀧𑀺 𑀉𑀡𑁆𑀡𑀪𑀺𑀲𑀺𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀘𑁄𑀴𑀪𑀺𑀲𑀺𑀆𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀦𑀯𑀘𑁄𑀴𑀁 𑀯𑀸 𑀧𑀼𑀭𑀸𑀡𑀘𑁄𑀴𑀁 𑀯𑀸 𑀲𑀁𑀳𑀭𑀺𑀢𑁆𑀯𑀸 𑀯𑀸 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀓𑀢𑀸 𑀘𑁄𑀴𑀪𑀺𑀲𑀺, 𑀬𑀁 𑀓𑀺𑀜𑁆𑀘𑀺 𑀯𑀸𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀯𑀸𑀓𑀪𑀺𑀲𑀺, 𑀬𑀁 𑀓𑀺𑀜𑁆𑀘𑀺 𑀢𑀺𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀢𑀺𑀡𑀪𑀺𑀲𑀺, 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀢𑀫𑀸𑀮𑀧𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀧𑀡𑁆𑀡𑀪𑀺𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀫𑀸𑀮𑀧𑀢𑁆𑀢𑀁 𑀧𑀦 𑀅𑀜𑁆𑀜𑁂𑀦 𑀫𑀺𑀲𑁆𑀲𑀫𑁂𑀯 𑀯𑀝𑁆𑀝𑀢𑀺, 𑀲𑀼𑀤𑁆𑀥𑀁 𑀦 𑀯𑀝𑁆𑀝𑀢𑀺. 𑀪𑀺𑀲𑀺𑀬𑀸 𑀧𑀫𑀸𑀡𑀦𑀺𑀬𑀫𑁄 𑀦𑀢𑁆𑀣𑀺, 𑀫𑀜𑁆𑀘𑀪𑀺𑀲𑀺 𑀧𑀻𑀞𑀪𑀺𑀲𑀺 𑀪𑀽𑀫𑀢𑁆𑀣𑀭𑀡𑀪𑀺𑀲𑀺 𑀘𑀗𑁆𑀓𑀫𑀦𑀪𑀺𑀲𑀺 𑀧𑀸𑀤𑀧𑀼𑀜𑁆𑀙𑀦𑀪𑀺𑀲𑀻𑀢𑀺 𑀏𑀢𑀸𑀲𑀁 𑀅𑀦𑀼𑀭𑀽𑀧𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀧𑀫𑀸𑀡𑀁 𑀓𑀸𑀢𑀩𑁆𑀩𑀁. 𑀬𑀁 𑀧𑀦𑁂𑀢𑀁 𑀉𑀡𑁆𑀡𑀸𑀤𑀺𑀧𑀜𑁆𑀘𑀯𑀺𑀥𑀢𑀽𑀮𑀫𑁆𑀧𑀺 𑀪𑀺𑀲𑀺𑀬𑀁 𑀯𑀝𑁆𑀝𑀢𑀺, 𑀢𑀁 𑀫𑀲𑀽𑀭𑀓𑁂𑀧𑀺 𑀯𑀝𑁆𑀝𑀢𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀲𑀽𑀭𑀓𑁂𑀢𑀺 𑀘𑀫𑁆𑀫𑀫𑀬𑀪𑀺𑀲𑀺𑀬𑀁. 𑀏𑀢𑁂𑀦 𑀫𑀲𑀽𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀩𑀺𑀫𑁆𑀩𑁄𑀳𑀦𑁂 𑀢𑀻𑀡𑀺 𑀢𑀽𑀮𑀸𑀦𑀺 𑀭𑀼𑀓𑁆𑀔𑀢𑀽𑀮𑀁 𑀮𑀢𑀸𑀢𑀽𑀮𑀁 𑀧𑁄𑀝𑀓𑀻𑀢𑀽𑀮𑀦𑁆𑀢𑀺. 𑀢𑀢𑁆𑀣 𑀭𑀼𑀓𑁆𑀔𑀢𑀽𑀮𑀦𑁆𑀢𑀺 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀭𑀼𑀓𑁆𑀔𑀸𑀦𑀁 𑀢𑀽𑀮𑀁. 𑀮𑀢𑀸𑀢𑀽𑀮𑀦𑁆𑀢𑀺 𑀔𑀻𑀭𑀯𑀮𑁆𑀮𑀺𑀆𑀤𑀻𑀦𑀁 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀮𑀢𑀸𑀦𑀁 𑀢𑀽𑀮𑀁. 𑀧𑁄𑀝𑀓𑀻𑀢𑀽𑀮𑀦𑁆𑀢𑀺 𑀧𑁄𑀝𑀓𑀻𑀢𑀺𑀡𑀸𑀤𑀻𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀚𑀸𑀢𑀺𑀓𑀸𑀦𑀁 𑀅𑀦𑁆𑀢𑀫𑀲𑁄 𑀉𑀘𑁆𑀙𑀼𑀦𑀴𑀸𑀤𑀻𑀦𑀫𑁆𑀧𑀺 𑀢𑀽𑀮𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁭) 𑀧𑀦 ‘‘𑀧𑁄𑀝𑀓𑀻𑀢𑀽𑀮𑀦𑁆𑀢𑀺 𑀏𑀭𑀓𑀢𑀺𑀡𑀢𑀽𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀢𑁂𑀳𑀺 𑀢𑀻𑀳𑀺 𑀲𑀩𑁆𑀩𑀪𑀽𑀢𑀕𑀸𑀫𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀭𑀼𑀓𑁆𑀔𑀯𑀮𑁆𑀮𑀺𑀢𑀺𑀡𑀚𑀸𑀢𑀺𑀬𑁄 𑀳𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀪𑀽𑀢𑀕𑀸𑀫𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀽𑀢𑀕𑀸𑀫𑀲𑁆𑀲 𑀢𑀽𑀮𑀁 𑀩𑀺𑀫𑁆𑀩𑁄𑀳𑀦𑁂 𑀯𑀝𑁆𑀝𑀢𑀺, 𑀪𑀺𑀲𑀺𑀁 𑀧𑀦 𑀧𑀸𑀧𑀼𑀡𑀺𑀢𑁆𑀯𑀸 𑀲𑀩𑁆𑀩𑀫𑁆𑀧𑁂𑀢𑀁 ‘‘𑀅𑀓𑀧𑁆𑀧𑀺𑀬𑀢𑀽𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀦 𑀓𑁂𑀯𑀮𑀜𑁆𑀘 𑀩𑀺𑀫𑁆𑀩𑁄𑀳𑀦𑁂 𑀏𑀢𑀁 𑀢𑀽𑀮𑀫𑁂𑀯, 𑀳𑀁𑀲𑀫𑁄𑀭𑀸𑀤𑀻𑀦𑀁 𑀲𑀩𑁆𑀩𑀲𑀓𑀼𑀡𑀸𑀦𑀁, 𑀲𑀻𑀳𑀸𑀤𑀻𑀦𑀁 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀜𑁆𑀘 𑀮𑁄𑀫𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀺𑀬𑀗𑁆𑀕𑀼𑀧𑀼𑀧𑁆𑀨𑀩𑀓𑀼𑀴𑀧𑀼𑀧𑁆𑀨𑀸𑀤𑀺 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀦 𑀯𑀝𑁆𑀝𑀢𑀺. 𑀢𑀫𑀸𑀮𑀧𑀢𑁆𑀢𑀁 𑀲𑀼𑀤𑁆𑀥𑀫𑁂𑀯 𑀦 𑀯𑀝𑁆𑀝𑀢𑀺, 𑀫𑀺𑀲𑁆𑀲𑀓𑀁 𑀧𑀦 𑀯𑀝𑁆𑀝𑀢𑀺, 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀁 𑀧𑀜𑁆𑀘𑀯𑀺𑀥𑀁 𑀉𑀡𑁆𑀡𑀸𑀤𑀺𑀢𑀽𑀮𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀤𑁆𑀥𑀓𑀸𑀬𑀺𑀓𑀸𑀦𑀺 𑀧𑀦 𑀩𑀺𑀫𑁆𑀩𑁄𑀳𑀦𑀸𑀦𑀺 𑀦 𑀯𑀝𑁆𑀝𑀦𑁆𑀢𑀺. 𑀅𑀤𑁆𑀥𑀓𑀸𑀬𑀺𑀓𑀸𑀦𑀻𑀢𑀺 𑀉𑀧𑀟𑁆𑀠𑀓𑀸𑀬𑀧𑁆𑀧𑀫𑀸𑀡𑀸𑀦𑀺, 𑀬𑁂𑀲𑀼 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀧𑀤𑀳𑀦𑁆𑀢𑀺 𑀞𑀧𑁂𑀦𑁆𑀢𑀺. 𑀲𑀻𑀲𑀧𑁆𑀧𑀫𑀸𑀡𑀁 𑀧𑀦 𑀯𑀝𑁆𑀝𑀢𑀺, 𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀺𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀤𑀻𑀖𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀯𑀸 𑀤𑁆𑀯𑀺𑀭𑀢𑀦𑀁 𑀯𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁, 𑀅𑀬𑀁 𑀲𑀻𑀲𑀧𑁆𑀧𑀫𑀸𑀡𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄, 𑀇𑀢𑁄 𑀉𑀤𑁆𑀥𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀧𑀦 𑀯𑀝𑁆𑀝𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭) 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦’’𑀦𑁆𑀢𑀺 𑀧𑀸𑀞𑀁 𑀉𑀧𑀦𑀺𑀥𑀸𑀬 𑀩𑀺𑀫𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑁂𑀢𑀩𑁆𑀩𑀘𑁄𑀴𑀓𑀁 𑀢𑀺𑀓𑁄𑀡𑀫𑁂𑀯 𑀓𑀭𑁄𑀦𑁆𑀢𑀺 𑀏𑀓𑀘𑁆𑀘𑁂. ‘‘𑀇𑀤𑀜𑁆𑀘 𑀞𑀸𑀦𑀁 𑀕𑀡𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁯𑁭) 𑀧𑀦 ‘‘𑀲𑀻𑀲𑀧𑁆𑀧𑀫𑀸𑀡𑀁 𑀦𑀸𑀫 𑀬𑀢𑁆𑀣 𑀕𑀻𑀯𑀸𑀬 𑀲𑀳 𑀲𑀓𑀮𑀁 𑀲𑀻𑀲𑀁 𑀞𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀘 𑀫𑀼𑀝𑁆𑀞𑀺𑀭𑀢𑀦𑀁 𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘𑀯𑀺𑀢𑁆𑀣𑀸𑀭𑀢𑁄’𑀢𑀺𑀆𑀤𑀺𑀫𑀸𑀳. 𑀇𑀤𑀜𑁆𑀘 𑀩𑀺𑀫𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑁂𑀢𑀩𑁆𑀩𑀘𑁄𑀴𑀧𑁆𑀧𑀫𑀸𑀡𑀤𑀲𑁆𑀲𑀦𑀁, 𑀢𑀲𑁆𑀲 𑀯𑀲𑁂𑀦 𑀩𑀺𑀫𑁆𑀩𑁄𑀳𑀦𑀲𑁆𑀲 𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀢𑀁 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀬𑀣𑀸 𑀓𑁄𑀝𑀺𑀢𑁄 𑀓𑁄𑀝𑀺 𑀯𑀺𑀢𑁆𑀣𑀸𑀭𑀢𑁄 𑀧𑀼𑀣𑀼𑀮𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀏𑀯𑀁 𑀲𑀺𑀩𑁆𑀩𑀺𑀢𑀩𑁆𑀩𑀁, 𑀇𑀢𑁄 𑀅𑀥𑀺𑀓𑀁 𑀦 𑀯𑀝𑁆𑀝𑀢𑀺. 𑀢𑀁 𑀧𑀦 𑀅𑀦𑁆𑀢𑁂𑀲𑀼 𑀞𑀧𑀺𑀢𑀘𑁄𑀴𑀁 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀤𑀺𑀕𑀼𑀡𑀁 𑀓𑀢𑀁 𑀢𑀺𑀓𑀡𑁆𑀡𑀁 𑀳𑁄𑀢𑀺, 𑀢𑁂𑀲𑀼 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀓𑁄𑀝𑀺𑀢𑁄 𑀓𑁄𑀝𑀺𑀁 𑀆𑀳𑀘𑁆𑀘 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀇𑀤𑀫𑀲𑁆𑀲 𑀉𑀓𑁆𑀓𑀝𑁆𑀞𑀧𑁆𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀺𑀫𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑁂𑀢𑀩𑁆𑀩𑀘𑁄𑀴𑀓𑀁 𑀧𑀓𑀢𑀺𑀬𑀸𑀬𑁂𑀯 𑀢𑀺𑀓𑀡𑁆𑀡𑀁 𑀦 𑀳𑁄𑀢𑀺, 𑀅𑀣 𑀔𑁄 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀤𑀺𑀕𑀼𑀡𑀓𑀢𑀓𑀸𑀮𑁂𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀘𑁄𑀴𑀓𑀁 𑀯𑀝𑁆𑀝𑀁 𑀯𑀸 𑀳𑁄𑀢𑀼 𑀘𑀢𑀼𑀭𑀲𑁆𑀲𑀁 𑀯𑀸, 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀫𑀺𑀦𑀺𑀬𑀫𑀸𑀦𑀁 𑀢𑀺𑀓𑀡𑁆𑀡𑀫𑁂𑀯 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀜𑁆𑀘 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀘 𑀘𑁄𑀴𑀓𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀢𑀲𑁆𑀲𑁂𑀯 𑀘𑁄𑀴𑀓𑀲𑁆𑀲 𑀧𑀫𑀸𑀡𑁂𑀦 𑀩𑀺𑀫𑁆𑀩𑁄𑀳𑀦𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀫𑁆𑀧𑀺 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

‘‘𑀓𑀫𑁆𑀩𑀮𑀫𑁂𑀯…𑀧𑁂… 𑀉𑀡𑁆𑀡𑀪𑀺𑀲𑀺𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀻𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀕𑁄𑀦𑀓𑀸𑀤𑀺𑀅𑀓𑀧𑁆𑀧𑀺𑀬𑀫𑁆𑀧𑀺 𑀉𑀡𑁆𑀡𑀫𑀬𑀢𑁆𑀣𑀭𑀡𑀁 𑀪𑀺𑀲𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀲𑀽𑀭𑀓𑁂𑀢𑀺 𑀘𑀫𑁆𑀫𑀫𑀬𑀪𑀺𑀲𑀺𑀬𑀁, 𑀘𑀫𑁆𑀫𑀫𑀬𑀁 𑀧𑀦 𑀩𑀺𑀫𑁆𑀩𑁄𑀳𑀦𑀁 𑀢𑀽𑀮𑀧𑀼𑀡𑁆𑀡𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀘 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁯𑁭) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁭) 𑀧𑀦 ‘‘𑀲𑀻𑀲𑀧𑁆𑀧𑀫𑀸𑀡𑀦𑁆𑀢𑀺 𑀬𑀢𑁆𑀣 𑀕𑀮𑀯𑀸𑀝𑀓𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀻𑀲𑀁 𑀉𑀧𑀤𑀳𑀦𑁆𑀢𑀺, 𑀢𑀁 𑀲𑀻𑀲𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀜𑁆𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀬𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀽’𑀢𑀺𑀆𑀤𑀺𑀫𑀸𑀳. 𑀫𑀚𑁆𑀛𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀩𑀺𑀫𑁆𑀩𑁄𑀳𑀦𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀁 𑀢𑀺𑀭𑀺𑀬𑀢𑁄 𑀫𑀼𑀝𑁆𑀞𑀺𑀭𑀢𑀦𑀧𑁆𑀧𑀫𑀸𑀡𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀜𑁆𑀚𑀭𑁄𑀢𑀺 𑀩𑀳𑀼𑀉𑀤𑀓𑀕𑀡𑁆𑀳𑀦𑀓𑀸 𑀫𑀳𑀸𑀘𑀸𑀝𑀺. 𑀚𑀮𑀁 𑀕𑀡𑁆𑀳𑀺𑀢𑀼𑀁 𑀅𑀮𑀦𑁆𑀢𑀺 𑀅𑀭𑀜𑁆𑀚𑀭𑁄, 𑀯𑀝𑁆𑀝𑀘𑀸𑀝𑀺 𑀯𑀺𑀬 𑀳𑀼𑀢𑁆𑀯𑀸 𑀣𑁄𑀓𑀁 𑀤𑀻𑀖𑀫𑀼𑀔𑁄 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀅𑀚𑁆𑀛𑀸𑀳𑀸𑀭𑀲𑀫𑁆𑀩𑀦𑁆𑀥𑁄.

𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀤𑁆𑀯𑁂 𑀧𑀞𑀫𑀤𑀼𑀢𑀺𑀬𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺 ‘‘𑀆𑀭𑀸𑀫𑁄 𑀆𑀭𑀸𑀫𑀯𑀢𑁆𑀣𑀽’’𑀢𑀺 𑀘 ‘‘𑀯𑀺𑀳𑀸𑀭𑁄 𑀯𑀺𑀳𑀸𑀭𑀯𑀢𑁆𑀣𑀽’’𑀢𑀺 𑀘 𑀯𑀼𑀢𑁆𑀢𑀤𑁆𑀯𑁂𑀤𑁆𑀯𑁂𑀯𑀢𑁆𑀣𑀼𑀲𑀗𑁆𑀕𑀳𑀸𑀦𑀺 𑀳𑁄𑀦𑁆𑀢𑀺. 𑀢𑀢𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 ‘‘𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦’’𑀦𑁆𑀢𑀺 𑀯𑀼𑀢𑁆𑀢𑀘𑀢𑀼𑀯𑀢𑁆𑀣𑀼𑀲𑀗𑁆𑀕𑀳𑀁 𑀳𑁄𑀢𑀺. 𑀘𑀢𑀼𑀢𑁆𑀣𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 ‘‘𑀮𑁄𑀳𑀓𑀼𑀫𑁆𑀪𑀻 𑀮𑁄𑀳𑀪𑀸𑀡𑀓𑀁 𑀮𑁄𑀳𑀯𑀸𑀭𑀓𑁄 𑀮𑁄𑀳𑀓𑀝𑀸𑀳𑀁 𑀯𑀸𑀲𑀺 𑀨𑀭𑀲𑀼 𑀓𑀼𑀞𑀸𑀭𑀻 𑀓𑀼𑀤𑀸𑀮𑁄 𑀦𑀺𑀔𑀸𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀦𑀯𑀓𑁄𑀝𑁆𑀞𑀸𑀲𑀯𑀦𑁆𑀢𑀁 𑀳𑁄𑀢𑀺. 𑀧𑀜𑁆𑀘𑀫𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 ‘‘𑀯𑀮𑁆𑀮𑀺 𑀯𑁂𑀴𑀼 𑀫𑀼𑀜𑁆𑀚𑀁 𑀧𑀩𑁆𑀩𑀚𑀁 𑀢𑀺𑀡𑀁 𑀫𑀢𑁆𑀢𑀺𑀓𑀸 𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀸𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀅𑀝𑁆𑀞𑀪𑁂𑀤𑀦𑀁 𑀅𑀝𑁆𑀞𑀧𑀪𑁂𑀤𑀯𑀦𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄𑀢𑀺 𑀫𑀁𑀲𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀼𑀩𑀼𑀤𑁆𑀥𑀘𑀓𑁆𑀔𑀼𑀲𑀫𑀦𑁆𑀢𑀘𑀓𑁆𑀔𑀽𑀦𑀁 𑀯𑀲𑁂𑀦 𑀦𑀺𑀫𑁆𑀫𑀮𑀧𑀜𑁆𑀘𑀮𑁄𑀘𑀦𑁄.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀓𑀻𑀝𑀸𑀕𑀺𑀭𑀺𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑁂𑀪𑀗𑁆𑀕𑀺𑀬𑀦𑁆𑀢𑀺 𑀏𑀢𑁆𑀣 ‘‘𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀕𑀸𑀫𑀓𑀸𑀯𑀸𑀲𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀓𑀻𑀝𑀸𑀕𑀺𑀭𑀺𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑁂𑀪𑀗𑁆𑀕𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀢𑁆𑀣𑀽𑀦𑀁 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀆𑀕𑀢𑀢𑁆𑀢𑀸. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂𑀢𑀺 𑀅𑀬𑀁 𑀲𑀸𑀫𑀜𑁆𑀜𑀸𑀥𑀸𑀭𑁄. 𑀕𑀸𑀫𑀓𑀸𑀯𑀸𑀲𑀯𑀢𑁆𑀣𑀼𑀲𑁆𑀫𑀺𑀁 𑀓𑀻𑀝𑀸𑀕𑀺𑀭𑀺𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀯𑀺𑀲𑁂𑀲𑀸𑀥𑀸𑀭𑁄. 𑀅𑀬𑀫𑀢𑁆𑀣𑁄 𑀧𑀸𑀴𑀺𑀁 𑀑𑀮𑁄𑀓𑁂𑀢𑁆𑀯𑀸 𑀧𑀘𑁆𑀘𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) ‘‘𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂’’𑀢𑀺 𑀅𑀯𑀢𑁆𑀯𑀸 ‘‘𑀇𑀥’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀇𑀥𑀸𑀢𑀺 𑀇𑀫𑀺𑀦𑀸 𑀕𑀸𑀫𑀓𑀸𑀯𑀸𑀲𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀺, 𑀓𑀻𑀝𑀸𑀕𑀺𑀭𑀺𑀯𑀢𑁆𑀣𑀼 𑀧𑀦 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀫𑁂𑀯. 𑀲𑀸𑀫𑀜𑁆𑀜𑀸𑀥𑀸𑀭𑁄 𑀧𑀦 𑀢𑀁𑀲𑀁𑀯𑀡𑁆𑀡𑀦𑀸𑀪𑀸𑀯𑀢𑁄 𑀅𑀯𑀼𑀢𑁆𑀢𑁄𑀧𑀺 𑀲𑀺𑀚𑁆𑀛𑀢𑀻𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺.

𑁨𑁨𑁮. 𑀣𑀸𑀯𑀭𑁂𑀦 𑀘 𑀣𑀸𑀯𑀭𑀁, 𑀕𑀭𑀼𑀪𑀡𑁆𑀟𑁂𑀦 𑀘 𑀕𑀭𑀼𑀪𑀡𑁆𑀟𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀼𑀭𑀺𑀫𑀤𑁆𑀯𑀬𑀁 𑀣𑀸𑀯𑀭𑀁, 𑀧𑀘𑁆𑀙𑀺𑀫𑀢𑁆𑀢𑀬𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀓𑀫𑁂𑀯 𑀤𑁂𑀢𑀻𑀢𑀺 𑀏𑀢𑁆𑀣 𑀊𑀦𑀓𑀁 𑀤𑁂𑀦𑁆𑀢𑀫𑁆𑀧𑀺 𑀯𑀺𑀳𑀸𑀭𑀯𑀢𑁆𑀣𑀼𑀲𑀸𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 𑀤𑀽𑀭𑀢𑀭𑀁 𑀤𑀼𑀓𑁆𑀔𑀕𑁄𑀧𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 ‘‘𑀪𑀺𑀓𑁆𑀔𑀽𑀦𑀜𑁆𑀘𑁂 𑀫𑀳𑀕𑁆𑀖𑀢𑀭𑀁…𑀧𑁂… 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀚𑀸𑀦𑀸𑀧𑁂𑀢𑁆𑀯𑀸, 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀢𑀼𑀫𑁆𑀳𑀸𑀓𑀁 𑀩𑀳𑀼𑀢𑀭𑀁 𑀭𑀼𑀓𑁆𑀔𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀤𑀁 𑀲𑀸𑀫𑀺𑀓𑁂𑀲𑀼 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀫𑀳𑀕𑁆𑀖𑀢𑀁 𑀅𑀚𑀸𑀦𑀺𑀢𑁆𑀯𑀸 𑀤𑁂𑀦𑁆𑀢𑁂𑀲𑀼 𑀢𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑁄 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄𑀢𑀺 𑀲𑀯𑀢𑁆𑀣𑀼𑀓𑁂𑀦 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀓𑀢𑀧𑀸𑀲𑀸𑀤𑀸𑀤𑀺𑀦𑀸, 𑀅𑀯𑀢𑁆𑀣𑀼𑀓𑁂𑀦 𑀯𑀸 𑀲𑀯𑀢𑁆𑀣𑀼𑀓𑀁 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁, 𑀅𑀯𑀢𑁆𑀣𑀼𑀓𑀁 𑀧𑀦 𑀅𑀯𑀢𑁆𑀣𑀼𑀓𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁 𑀓𑁂𑀯𑀮𑀁 𑀧𑀸𑀲𑀸𑀤𑀲𑁆𑀲 𑀪𑀽𑀫𑀺𑀢𑁄 𑀅𑀣𑀸𑀯𑀭𑀢𑁆𑀢𑀸. 𑀏𑀯𑀁 𑀣𑀸𑀯𑀭𑁂𑀲𑀼𑀧𑀺 𑀣𑀸𑀯𑀭𑀯𑀺𑀪𑀸𑀕𑀁 𑀜𑀢𑁆𑀯𑀸𑀯 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

‘‘𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀅𑀓𑀧𑁆𑀧𑀺𑀬𑀫𑀜𑁆𑀘𑀁 ‘𑀲𑀗𑁆𑀖𑀲𑁆𑀲𑀸’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. ‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀔𑁂𑀢𑁆𑀢𑀸𑀤𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑁆𑀯𑀕𑁆𑀕 𑁩.𑁩𑁨𑁧) 𑀧𑀦 ‘‘𑀓𑀧𑁆𑀧𑀺𑀬𑀫𑀜𑁆𑀘𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸𑀢𑀺 ‘𑀲𑀗𑁆𑀖𑀲𑁆𑀲 𑀤𑁂𑀫𑀸’𑀢𑀺 𑀤𑀺𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 ‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀤𑀦𑁆𑀢𑀺, 𑀲𑀼𑀯𑀡𑁆𑀡𑀭𑀚𑀢𑀫𑀬𑀸𑀤𑀺𑀅𑀓𑀧𑁆𑀧𑀺𑀬𑀫𑀜𑁆𑀘𑁂𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁…𑀧𑁂… 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀣𑀸𑀯𑀭𑁂𑀦 𑀣𑀸𑀯𑀭𑀫𑁆𑀧𑀺 𑀅𑀣𑀸𑀯𑀭𑀫𑁆𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀣𑀸𑀯𑀭𑁂𑀦 𑀅𑀣𑀸𑀯𑀭𑀫𑁂𑀯 𑀳𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀅𑀓𑀧𑁆𑀧𑀺𑀬𑀁 𑀯𑀸 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸𑀢𑀺 𑀏𑀢𑁆𑀣 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀲𑀼𑀯𑀡𑁆𑀡𑀫𑀬𑀫𑀜𑁆𑀘𑀸𑀤𑀺 𑀅𑀓𑀧𑁆𑀧𑀺𑀬𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺 𑀘. 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀦𑀸𑀫 𑀤𑀦𑁆𑀢𑀫𑀬𑀫𑀜𑁆𑀘𑀸𑀤𑀺, 𑀧𑀸𑀯𑀸𑀭𑀸𑀤𑀺𑀓𑀧𑁆𑀧𑀺𑀬𑀅𑀢𑁆𑀣𑀭𑀡𑀸𑀤𑀻𑀦𑀺 𑀘𑀸’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀅𑀓𑀧𑁆𑀧𑀺𑀬𑀁 𑀯𑀸𑀢𑀺 𑀆𑀲𑀦𑁆𑀤𑀺𑀆𑀤𑀺, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀩𑀺𑀫𑁆𑀩𑁄𑀳𑀦𑀸𑀤𑀺 𑀘. 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸𑀢𑀺 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁨𑁯. ‘‘𑀓𑀸𑀴𑀮𑁄𑀳 …𑀧𑁂… 𑀪𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀓𑀁𑀲𑀮𑁄𑀳𑀫𑀬𑀫𑁆𑀧𑀺 𑀪𑀸𑀚𑀦𑀁 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀧𑀭𑀺𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀧𑀼𑀕𑁆𑀕𑀮𑀸𑀦𑀁 𑀧𑀭𑀺𑀳𑀭𑀺𑀢𑀩𑁆𑀩𑀲𑁆𑀲𑁂𑀯 𑀪𑀸𑀚𑁂𑀢𑀩𑁆𑀩𑀢𑁆𑀢𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀉𑀧𑀭𑀺 ‘‘𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀪𑀸𑀚𑀦𑀯𑀺𑀓𑀢𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀕𑀺𑀳𑀺𑀯𑀺𑀓𑀝𑀸 𑀯𑀸 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀓𑁂𑀦 𑀫𑀳𑀸𑀧𑀘𑁆𑀘𑀭𑀺𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀇𑀫𑀲𑁆𑀲 𑀳𑀺 ‘‘𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀓𑀢𑁄 𑀲𑀻𑀳𑀴𑀤𑀻𑀧𑁂 𑀧𑀸𑀤𑀕𑁆𑀕𑀡𑁆𑀳𑀦𑀓𑁄 𑀪𑀸𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀸𑀬 𑀢𑀁 𑀫𑀳𑀸𑀧𑀘𑁆𑀘𑀭𑀺𑀯𑀘𑀦𑀁 𑀧𑀘𑁆𑀙𑀸 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀯𑀝𑁆𑀝𑀮𑁄𑀳𑀓𑀁𑀲𑀮𑁄𑀳𑀫𑀬𑀁 𑀬𑀁 𑀓𑀺𑀜𑁆𑀘𑀺 𑀧𑀸𑀤𑀕𑁆𑀕𑀡𑁆𑀳𑀦𑀓𑀯𑀸𑀭𑀓𑀫𑁆𑀧𑀺 𑀉𑀧𑀸𑀤𑀸𑀬 𑀅𑀪𑀸𑀚𑀦𑀻𑀬𑀫𑁂𑀯, 𑀕𑀺𑀳𑀻𑀳𑀺 𑀤𑀻𑀬𑀫𑀸𑀦𑀫𑁆𑀧𑀺 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀢𑁆𑀢𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀯𑀺𑀬 𑀲𑀬𑀫𑁂𑀯 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀺𑀳𑀺𑀲𑀦𑁆𑀢𑀓𑀁 𑀯𑀺𑀬 𑀆𑀭𑀸𑀫𑀺𑀓𑀸𑀤𑀬𑁄 𑀘𑁂 𑀲𑀬𑀫𑁂𑀯 𑀕𑁄𑀧𑁂𑀢𑁆𑀯𑀸 𑀯𑀺𑀦𑀺𑀬𑁄𑀕𑀓𑀸𑀮𑁂 𑀆𑀦𑁂𑀢𑁆𑀯𑀸 𑀧𑀝𑀺𑀤𑁂𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀧𑀝𑀺𑀲𑀸𑀫𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺.

𑀧𑀡𑁆𑀡𑀲𑀽𑀘𑀺 𑀦𑀸𑀫 𑀮𑁂𑀔𑀦𑀻𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀦𑀸 𑀮𑀤𑁆𑀥𑀸𑀦𑀺𑀧𑀻𑀢𑀺𑀆𑀤𑀺𑀦𑀸 𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀺, 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑁄𑀕𑁄𑀯 𑀆𑀧𑀢𑁆𑀢𑀺𑀓𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺 𑀪𑀸𑀚𑀦𑀻𑀬𑀯𑀸𑀲𑀺𑀆𑀤𑀻𑀲𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀲𑀼𑀧𑀺.

𑀅𑀦𑀸𑀫𑀸𑀲𑀫𑁆𑀧𑀻𑀢𑀺 𑀲𑀼𑀯𑀡𑁆𑀡𑀸𑀤𑀺𑀫𑀬𑀫𑁆𑀧𑀺, 𑀲𑀩𑁆𑀩𑀁 𑀢𑀁 𑀆𑀫𑀲𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑀉𑀧𑀓𑁆𑀔𑀭𑁂𑀢𑀺 𑀉𑀧𑀓𑀭𑀡𑁂. 𑀲𑀺𑀔𑀭𑀁 𑀦𑀸𑀫 𑀬𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀸 𑀙𑀺𑀦𑁆𑀤𑀦𑁆𑀢𑀺. 𑀧𑀢𑁆𑀢𑀩𑀦𑁆𑀥𑀓𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀕𑀡𑁆𑀞𑀺𑀆𑀤𑀺𑀓𑀸𑀭𑀓𑁄. ‘‘𑀧𑀝𑀺𑀫𑀸𑀦𑀁 𑀲𑀼𑀯𑀡𑁆𑀡𑀸𑀤𑀺𑀧𑀢𑁆𑀢𑀓𑀸𑀭𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺.

‘‘𑀅𑀟𑁆𑀠𑀩𑀸𑀳𑀽𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀅𑀟𑁆𑀠𑀩𑀸𑀳𑀼 𑀦𑀸𑀫 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀦𑁆𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀫𑁆𑀧𑀺 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁩𑁨𑁧) ‘‘𑀅𑀟𑁆𑀠𑀩𑀸𑀳𑀽𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝𑀦𑁆𑀢𑀺 𑀮𑀺𑀔𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) 𑀧𑀦 ‘‘𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀦𑀸𑀫 𑀅𑀟𑁆𑀠𑀩𑀸𑀳𑀼𑀫𑀢𑁆𑀢𑀸, 𑀅𑀟𑁆𑀠𑀩𑁆𑀬𑀸𑀫𑀫𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑁄𑀢𑁆𑀢𑀸𑀦𑀻𑀢𑀺 𑀘𑀫𑁆𑀫𑀭𑀚𑁆𑀚𑀼𑀓𑀸. 𑀢𑀢𑁆𑀣𑀚𑀸𑀢𑀓𑀸𑀢𑀺 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀚𑀸𑀢𑀸.

‘‘𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀢𑀺 𑀤𑀻𑀖𑀲𑁄 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄 𑀧𑀭𑀺𑀡𑀸𑀳𑀢𑁄 𑀧𑀡𑁆𑀡𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻.. 𑀘𑀽𑀴𑀯𑀕𑁆𑀕 𑁩.𑁩𑁨𑁧) 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) ‘‘𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀢𑀺 𑀲𑀭𑀤𑀡𑁆𑀟𑀸𑀤𑀺𑀲𑀽𑀘𑀺𑀆𑀓𑀸𑀭𑀢𑀦𑀼𑀤𑀡𑁆𑀟𑀓𑀫𑀢𑁆𑀢𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀢𑀺 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄. 𑀭𑀺𑀢𑁆𑀢𑀧𑁄𑀢𑁆𑀣𑀓𑁄𑀧𑀻𑀢𑀺 𑀅𑀮𑀺𑀔𑀺𑀢𑀧𑁄𑀢𑁆𑀣𑀓𑁄𑀧𑀺, 𑀇𑀤𑀜𑁆𑀘 𑀧𑀡𑁆𑀡𑀧𑁆𑀧𑀲𑀗𑁆𑀕𑁂𑀦 𑀯𑀼𑀢𑁆𑀢𑀁.

𑀆𑀲𑀦𑁆𑀤𑀺𑀓𑁄𑀢𑀺 𑀘𑀢𑀼𑀭𑀲𑁆𑀲𑀧𑀻𑀞𑀁 𑀯𑀼𑀘𑁆𑀘𑀢𑀺 ‘‘𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀯𑀘𑀦𑀢𑁄. 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀫𑁂𑀯 𑀳𑀺 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀯𑀝𑁆𑀝𑀢𑀺, 𑀘𑀢𑀼𑀭𑀲𑁆𑀲𑀸𑀲𑀦𑁆𑀤𑀺𑀓𑁄 𑀧𑀦 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀗𑁆𑀕𑁄 𑀦𑀸𑀫 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀓𑀢𑀫𑀜𑁆𑀘𑁄, 𑀅𑀬𑀫𑁆𑀧𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀺 𑀯𑀝𑁆𑀝𑀢𑀺. 𑀪𑀤𑁆𑀤𑀧𑀻𑀞𑀦𑁆𑀢𑀺 𑀯𑁂𑀢𑁆𑀢𑀫𑀬𑀁 𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀧𑀻𑀞𑀺𑀓𑀸𑀢𑀺 𑀧𑀺𑀮𑁄𑀢𑀺𑀓𑀩𑀦𑁆𑀥𑀁 𑀧𑀻𑀞𑀫𑁂𑀯. 𑀏𑀴𑀓𑀧𑀸𑀤𑀧𑀻𑀞𑀁 𑀦𑀸𑀫 𑀤𑀸𑀭𑀼𑀧𑀝𑀺𑀓𑀸𑀬 𑀉𑀧𑀭𑀺𑀧𑀸𑀤𑁂 𑀞𑀧𑁂𑀢𑁆𑀯𑀸 𑀪𑁄𑀚𑀦𑀨𑀮𑀓𑀁 𑀯𑀺𑀬 𑀓𑀢𑀧𑀻𑀞𑀁 𑀯𑀼𑀘𑁆𑀘𑀢𑀺. 𑀆𑀫𑀡𑁆𑀟𑀓𑀯𑀡𑁆𑀝𑀓𑀧𑀻𑀞𑀁 𑀦𑀸𑀫 𑀆𑀫𑀮𑀓𑀸𑀓𑀸𑀭𑁂𑀦 𑀬𑁄𑀚𑀺𑀢𑀩𑀳𑀉𑀧𑀸𑀤𑀧𑀻𑀞𑀁. 𑀇𑀫𑀸𑀦𑀺 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀧𑀻𑀞𑀸𑀦𑀺. 𑀤𑀸𑀭𑀼𑀫𑀬𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀧𑀻𑀞𑀁 𑀯𑀝𑁆𑀝𑀢𑀺.

‘‘𑀖𑀝𑁆𑀝𑀦𑀨𑀮𑀓𑀁 𑀦𑀸𑀫 𑀬𑀢𑁆𑀣 𑀞𑀧𑁂𑀢𑁆𑀯𑀸 𑀭𑀚𑀺𑀢𑀘𑀻𑀯𑀭𑀁 𑀳𑀢𑁆𑀣𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀖𑀝𑁆𑀝𑀦𑀫𑀼𑀕𑁆𑀕𑀭𑁄 𑀦𑀸𑀫 𑀅𑀦𑀼𑀯𑀸𑀢𑀸𑀤𑀺𑀖𑀝𑁆𑀝𑀦𑀢𑁆𑀣𑀁 𑀓𑀢𑁄𑀢𑀺 𑀯𑀤𑀦𑁆𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁧) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) ‘‘𑀖𑀝𑁆𑀝𑀦𑀨𑀮𑀓𑀁 𑀖𑀝𑁆𑀝𑀦𑀫𑀼𑀕𑁆𑀕𑀭𑁄𑀢𑀺 𑀇𑀤𑀁 𑀭𑀚𑀺𑀢𑀘𑀻𑀯𑀭𑀁 𑀏𑀓𑀲𑁆𑀫𑀺𑀁 𑀫𑀝𑁆𑀞𑁂 𑀤𑀡𑁆𑀟𑀫𑀼𑀕𑁆𑀕𑀭𑁂 𑀯𑁂𑀞𑁂𑀢𑁆𑀯𑀸 𑀏𑀓𑀲𑁆𑀲 𑀫𑀝𑁆𑀞𑀨𑀮𑀓𑀲𑁆𑀲 𑀉𑀧𑀭𑀺 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀅𑀧𑀭𑁂𑀦 𑀫𑀝𑁆𑀞𑀨𑀮𑀓𑁂𑀦 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀏𑀓𑁄 𑀉𑀧𑀭𑀺 𑀅𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀤𑁆𑀯𑁂 𑀚𑀦𑀸 𑀉𑀧𑀭𑀺𑀨𑀮𑀓𑀁 𑀤𑁆𑀯𑀻𑀲𑀼 𑀓𑁄𑀝𑀻𑀲𑀼 𑀕𑀳𑁂𑀢𑁆𑀯𑀸 𑀅𑀧𑀭𑀸𑀧𑀭𑀁 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀁 𑀓𑀭𑁄𑀦𑁆𑀢𑀺, 𑀏𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑁂 𑀞𑀧𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀦 𑀧𑀳𑀭𑀡𑀁 𑀧𑀦 𑀦𑀺𑀝𑁆𑀞𑀺𑀢𑀭𑀚𑀦𑀲𑁆𑀲 𑀘𑀻𑀯𑀭𑀲𑁆𑀲 𑀅𑀮𑁆𑀮𑀓𑀸𑀮𑁂 𑀓𑀸𑀢𑀩𑁆𑀩𑀁, 𑀇𑀤𑀁 𑀧𑀦 𑀨𑀮𑀓𑀫𑀼𑀕𑁆𑀕𑀭𑁂𑀳𑀺 𑀖𑀝𑁆𑀝𑀦𑀁 𑀲𑀼𑀓𑁆𑀔𑀓𑀸𑀮𑁂 𑀣𑀤𑁆𑀥𑀪𑀸𑀯𑀯𑀺𑀫𑁄𑀘𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀫𑁆𑀩𑀡𑀦𑁆𑀢𑀺 𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀻𑀲𑀤𑀺𑀲𑀓𑀢𑀧𑀸𑀦𑀻𑀬𑀪𑀸𑀚𑀦𑀁. 𑀭𑀚𑀦𑀤𑁄𑀡𑀻𑀢𑀺 𑀬𑀢𑁆𑀣 𑀧𑀓𑁆𑀓𑀭𑀚𑀦𑀁 𑀆𑀓𑀺𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀅𑀫𑁆𑀩𑀡𑀦𑁆𑀢𑀺 𑀏𑀓𑀤𑁄𑀡𑀺𑀓𑀦𑀸𑀯𑀸𑀨𑀮𑀓𑁂𑀳𑀺 𑀧𑁄𑀓𑁆𑀔𑀭𑀡𑀻𑀲𑀤𑀺𑀲𑀁 𑀓𑀢𑀁. 𑀧𑀸𑀦𑀻𑀬𑀪𑀸𑀚𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀭𑀚𑀦𑀤𑁄𑀡𑀻𑀢𑀺 𑀏𑀓𑀤𑀸𑀭𑀼𑀦𑀸𑀯 𑀓𑀢𑀁 𑀭𑀚𑀦𑀪𑀸𑀚𑀦𑀁. 𑀉𑀤𑀓𑀤𑁄𑀡𑀻𑀢𑀺 𑀏𑀓𑀤𑀸𑀭𑀼𑀦𑀸𑀯 𑀓𑀢𑀁 𑀉𑀤𑀓𑀪𑀸𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀫𑀜𑁆𑀘𑀧𑀻𑀞𑁂𑀧𑀺 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀕𑀭𑀼𑀪𑀡𑁆𑀟𑀦𑁆𑀢𑀺 𑀏𑀓𑁂. 𑀦𑁄𑀢𑀺 𑀅𑀧𑀭𑁂, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁧) 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁩𑁨𑁧) 𑀧𑀦 ‘‘𑀤𑀡𑁆𑀟𑀫𑀼𑀕𑁆𑀕𑀭𑁄 𑀦𑀸𑀫 ‘𑀬𑁂𑀦 𑀭𑀚𑀺𑀢𑀘𑀻𑀯𑀭𑀁 𑀧𑁄𑀣𑁂𑀦𑁆𑀢𑀺, 𑀢𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸, ‘𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀧𑀺-𑀲𑀤𑁆𑀤𑁂𑀦 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀁 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀏𑀢𑁂𑀦𑁂𑀯 𑀲𑀼𑀢𑁆𑀢𑁂𑀦 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀯𑀢𑁆𑀯𑀸 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀁 𑀦 𑀕𑀭𑀼𑀪𑀡𑁆𑀟𑀁, 𑀪𑀸𑀚𑀦𑀻𑀬𑀫𑁂𑀯, 𑀲𑁂𑀦𑀸𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑀫𑁂𑀯 𑀕𑀭𑀼𑀪𑀡𑁆𑀟𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁩𑁨𑁧) 𑀧𑀦 ‘‘𑀪𑀽𑀫𑀢𑁆𑀣𑀭𑀡𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀽𑀫𑀢𑁆𑀣𑀭𑀡𑀲𑀗𑁆𑀔𑁂𑀧𑁂𑀦 𑀲𑀬𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓𑀦𑁆𑀢𑀺 𑀇𑀫𑀺𑀦𑀸 𑀫𑀜𑁆𑀘𑀸𑀤𑀻𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀁 𑀫𑀳𑀸𑀘𑀫𑁆𑀫𑀁 𑀏𑀴𑀓𑀘𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀙𑀢𑁆𑀢𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀢𑀸𑀮𑀧𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀢𑁆𑀢𑀓𑀝𑀸𑀳𑀦𑁆𑀢𑀺 𑀧𑀢𑁆𑀢𑀧𑀘𑀦𑀓𑀝𑀸𑀳𑀁. 𑀕𑀡𑁆𑀞𑀺𑀓𑀸𑀢𑀺 𑀘𑀻𑀯𑀭𑀕𑀡𑁆𑀞𑀺𑀓𑀸. 𑀯𑀺𑀥𑁄𑀢𑀺 𑀓𑀸𑀬𑀩𑀦𑁆𑀥𑀦𑀯𑀺𑀥𑁄.

𑀇𑀤𑀸𑀦𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀆𑀕𑀢𑀦𑀬𑁄 𑀯𑀼𑀘𑁆𑀘𑀢𑁂 𑁋 𑀆𑀭𑀸𑀫𑁄 𑀦𑀸𑀫 𑀧𑀼𑀧𑁆𑀨𑀸𑀭𑀸𑀫𑁄 𑀯𑀸 𑀨𑀮𑀸𑀭𑀸𑀫𑁄 𑀯𑀸. 𑀆𑀭𑀸𑀫𑀯𑀢𑁆𑀣𑀼 𑀦𑀸𑀫 𑀢𑁂𑀲𑀁𑀬𑁂𑀯 𑀆𑀭𑀸𑀫𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑁄𑀓𑀸𑀲𑁄. 𑀢𑁂𑀲𑀼 𑀯𑀸 𑀆𑀭𑀸𑀫𑁂𑀲𑀼 𑀯𑀺𑀦𑀝𑁆𑀞𑁂𑀲𑀼 𑀢𑁂𑀲𑀁 𑀧𑁄𑀭𑀸𑀡𑀓𑀪𑀽𑀫𑀺𑀪𑀸𑀕𑁄. 𑀯𑀺𑀳𑀸𑀭𑁄 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀸𑀲𑀸𑀤𑀸𑀤𑀺𑀲𑁂𑀦𑀸𑀲𑀦𑀁. 𑀯𑀺𑀳𑀸𑀭𑀯𑀢𑁆𑀣𑀼 𑀦𑀸𑀫 𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄. 𑀫𑀜𑁆𑀘𑁄 𑀦𑀸𑀫 𑀫𑀲𑀸𑀭𑀓𑁄 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄 𑀓𑀼𑀴𑀻𑀭𑀧𑀸𑀤𑀓𑁄 𑀆𑀳𑀘𑁆𑀘𑀧𑀸𑀤𑀓𑁄𑀢𑀺 𑀇𑀫𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀜𑁆𑀘𑀸𑀦𑀁 𑀅𑀜𑁆𑀜𑀢𑀭𑁄. 𑀧𑀻𑀞𑀁 𑀦𑀸𑀫 𑀫𑀲𑀸𑀭𑀓𑀸𑀤𑀻𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀧𑀻𑀞𑀸𑀦𑀁 𑀅𑀜𑁆𑀜𑀢𑀭𑀁. 𑀪𑀺𑀲𑀺 𑀦𑀸𑀫 𑀉𑀡𑁆𑀡𑀪𑀺𑀲𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀲𑀻𑀦𑀁 𑀅𑀜𑁆𑀜𑀢𑀭𑀁. 𑀩𑀺𑀫𑁆𑀩𑁄𑀳𑀦𑀁 𑀦𑀸𑀫 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀻𑀢𑀽𑀮𑀸𑀦𑀁 𑀅𑀜𑁆𑀜𑀢𑀭𑁂𑀦 𑀧𑀼𑀡𑁆𑀡𑀁. 𑀮𑁄𑀳𑀓𑀼𑀫𑁆𑀪𑀻 𑀦𑀸𑀫 𑀓𑀸𑀴𑀮𑁄𑀳𑁂𑀦 𑀯𑀸 𑀢𑀫𑁆𑀩𑀮𑁄𑀳𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀓𑀢𑀓𑀼𑀫𑁆𑀪𑀻. 𑀮𑁄𑀳𑀪𑀸𑀡𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀪𑀸𑀡𑀓𑀦𑁆𑀢𑀺 𑀅𑀭𑀜𑁆𑀚𑀭𑁄 𑀯𑀼𑀘𑁆𑀘𑀢𑀺. 𑀯𑀸𑀭𑀓𑁄𑀢𑀺 𑀖𑀝𑁄. 𑀓𑀝𑀸𑀳𑀁 𑀓𑀝𑀸𑀳𑀫𑁂𑀯. 𑀯𑀸𑀲𑀺𑀆𑀤𑀻𑀲𑀼 𑀯𑀮𑁆𑀮𑀺𑀆𑀤𑀻𑀲𑀼 𑀘 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀦𑀸𑀫 𑀦𑀢𑁆𑀣𑀺…𑀧𑁂….

𑀢𑀢𑁆𑀣 𑀣𑀸𑀯𑀭𑁂𑀦 𑀣𑀸𑀯𑀭𑀦𑁆𑀢𑀺 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀁 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀁. 𑀇𑀢𑀭𑁂𑀦𑀸𑀢𑀺 𑀅𑀣𑀸𑀯𑀭𑁂𑀦, 𑀧𑀘𑁆𑀙𑀺𑀫𑀭𑀸𑀲𑀺𑀢𑁆𑀢𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀧𑁆𑀧𑀺𑀬𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑀫𑀜𑁆𑀘𑀸𑀤𑀺𑀦𑀸 𑀘𑁂𑀯 𑀅𑀓𑀧𑁆𑀧𑀺𑀬𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂𑀳𑀺 𑀘. 𑀫𑀳𑀕𑁆𑀖𑀓𑀧𑁆𑀧𑀺𑀬𑁂𑀦𑀸𑀢𑀺 𑀤𑀦𑁆𑀢𑀫𑀬𑀫𑀜𑁆𑀘𑀸𑀤𑀺𑀦𑀸 𑀘𑁂𑀯 𑀧𑀸𑀯𑀸𑀭𑀸𑀤𑀺𑀦𑀸 𑀘. 𑀇𑀢𑀭𑀦𑁆𑀢𑀺 𑀅𑀣𑀸𑀯𑀭𑀁. 𑀓𑀧𑁆𑀧𑀺𑀬𑀧𑀭𑀺𑀯𑀢𑁆𑀢𑀦𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀬𑀣𑀸 𑀅𑀓𑀧𑁆𑀧𑀺𑀬𑀁 𑀦 𑀳𑁄𑀢𑀺, 𑀏𑀯𑀁 𑀧𑀭𑀺𑀯𑀢𑁆𑀢𑁂𑀢𑀼𑀁…𑀧𑁂… 𑀏𑀯𑀁 𑀢𑀸𑀯 𑀣𑀸𑀯𑀭𑁂𑀦 𑀣𑀸𑀯𑀭𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁂𑀦 𑀇𑀢𑀭𑀧𑀭𑀺𑀯𑀢𑁆𑀢𑀦𑁂 𑀧𑀦 𑀫𑀜𑁆𑀘𑀧𑀻𑀞𑀁 𑀫𑀳𑀦𑁆𑀢𑀁 𑀯𑀸 𑀳𑁄𑀢𑀼, 𑀔𑀼𑀤𑁆𑀤𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺…𑀧𑁂… 𑀲𑀢𑀕𑁆𑀖𑀦𑀓𑁂𑀦 𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸 𑀫𑀜𑁆𑀘𑁂𑀦 𑀅𑀜𑁆𑀜𑀁 𑀫𑀜𑁆𑀘𑀲𑀢𑀫𑁆𑀧𑀺 𑀮𑀪𑀢𑀺, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀦 𑀓𑁂𑀯𑀮𑀁 𑀫𑀜𑁆𑀘𑁂𑀦 𑀫𑀜𑁆𑀘𑁄𑀬𑁂𑀯, 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀦𑀺𑀧𑀺 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀏𑀲 𑀦𑀬𑁄 𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂𑀲𑀼𑀧𑀺.

𑀓𑀸𑀴𑀮𑁄𑀳𑀢𑀫𑁆𑀩𑀮𑁄𑀳𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀸𑀦𑀦𑁆𑀢𑀺 𑀏𑀢𑁆𑀣 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀜𑁆𑀘 𑀓𑀺𑀢𑁆𑀢𑀺𑀫𑀮𑁄𑀳𑀁. 𑀢𑀻𑀡𑀺 𑀳𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀳𑀸𑀭𑀓𑀽𑀝𑀦𑁆𑀢𑀺. 𑀢𑀢𑁆𑀣 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁. 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁. 𑀭𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀳𑀸𑀭𑀓𑀽𑀝𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀜𑁆𑀘 𑀓𑀺𑀢𑁆𑀢𑀺𑀫𑀮𑁄𑀳’’𑀦𑁆𑀢𑀺. 𑀢𑀢𑁄 𑀅𑀢𑀺𑀭𑁂𑀓𑀦𑁆𑀢𑀺 𑀢𑀢𑁄 𑀅𑀢𑀺𑀭𑁂𑀓𑀕𑀡𑁆𑀳𑀦𑀓𑁄. 𑀲𑀸𑀭𑀓𑁄𑀢𑀺 𑀫𑀚𑁆𑀛𑁂 𑀫𑀓𑀼𑀴𑀁 𑀤𑀲𑁆𑀲𑁂𑀢𑁆𑀯𑀸 𑀫𑀼𑀔𑀯𑀝𑁆𑀝𑀺𑀯𑀺𑀢𑁆𑀣𑀢𑀁 𑀓𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀦𑀸𑀫𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀏𑀓𑀁 𑀪𑀸𑀚𑀦𑀁. 𑀲𑀭𑀸𑀯𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀓𑀜𑁆𑀘𑀦𑀓𑀸𑀤𑀻𑀦𑀁 𑀕𑀺𑀳𑀺𑀉𑀧𑀓𑀭𑀡𑀸𑀦𑀁 𑀕𑀳𑀡𑀁. 𑀢𑀸𑀦𑀺 𑀳𑀺 𑀔𑀼𑀤𑁆𑀤𑀓𑀸𑀦𑀺𑀧𑀺 𑀕𑀭𑀼𑀪𑀡𑁆𑀟𑀸𑀦𑁂𑀯 𑀕𑀺𑀳𑀺𑀉𑀧𑀓𑀭𑀡𑀢𑁆𑀢𑀸. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀫𑀳𑀦𑁆𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺, 𑀇𑀫𑀸𑀦𑀺 𑀧𑀦 𑀪𑀸𑀚𑀦𑀻𑀬𑀸𑀦𑀺 𑀪𑀺𑀓𑁆𑀔𑀼𑀧𑀓𑀭𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀏𑀢𑀸𑀦𑀺, 𑀏𑀯𑀁 𑀓𑀼𑀡𑁆𑀟𑀺𑀓𑀸𑀧𑀺 𑀪𑀸𑀚𑀦𑀻𑀬𑀸. 𑀯𑀓𑁆𑀔𑀢𑀺 𑀳𑀺 ‘‘𑀬𑀣𑀸 𑀘 𑀫𑀢𑁆𑀢𑀺𑀓𑀸𑀪𑀡𑁆𑀟𑁂, 𑀏𑀯𑀁 𑀮𑁄𑀳𑀪𑀡𑁆𑀟𑁂𑀧𑀺 𑀓𑀼𑀡𑁆𑀟𑀺𑀓𑀸 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻’’𑀢𑀺. 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀯𑀼𑀟𑁆𑀠𑀢𑀭𑀸𑀦𑀁 𑀤𑀢𑁆𑀯𑀸 𑀧𑀭𑀺𑀪𑁄𑀕𑁂𑀦. 𑀕𑀺𑀳𑀺𑀯𑀺𑀓𑀝𑀸𑀢𑀺 𑀕𑀺𑀳𑀻𑀳𑀺 𑀯𑀺𑀓𑀢𑀸 𑀧𑀜𑁆𑀜𑀢𑁆𑀢𑀸, 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀓𑀓𑀭𑀡𑁂𑀦 𑀯𑀺𑀭𑀽𑀧𑀁 𑀓𑀢𑀸. 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀺𑀧𑁆𑀨𑀮𑀺𑀓𑁄𑀢𑀺 𑀓𑀢𑁆𑀢𑀭𑀺. 𑀆𑀭𑀓𑀡𑁆𑀝𑀓𑀁 𑀲𑀽𑀘𑀺𑀯𑁂𑀥𑀓𑀁. 𑀢𑀸𑀴𑀁 𑀬𑀦𑁆𑀢𑀁. 𑀓𑀢𑁆𑀢𑀭𑀬𑀝𑁆𑀞𑀺𑀯𑁂𑀥𑀓𑁄 𑀓𑀢𑁆𑀢𑀭𑀬𑀝𑁆𑀞𑀺𑀯𑀮𑀬𑀁. 𑀬𑀣𑀸 𑀢𑀣𑀸 𑀖𑀦𑀓𑀢𑀁 𑀮𑁄𑀳𑀦𑁆𑀢𑀺 𑀮𑁄𑀳𑀯𑀝𑁆𑀝𑀺 𑀮𑁄𑀳𑀕𑀼𑀴𑁄 𑀮𑁄𑀳𑀧𑀺𑀡𑁆𑀟𑀺 𑀮𑁄𑀳𑀘𑀓𑁆𑀓𑀮𑀺𑀓𑀦𑁆𑀢𑀺 𑀏𑀯𑀁 𑀖𑀦𑀓𑀢𑀁 𑀮𑁄𑀳𑀁. 𑀔𑀻𑀭𑀧𑀸𑀲𑀸𑀡𑀫𑀬𑀸𑀦𑀻𑀢𑀺 𑀫𑀼𑀤𑀼𑀓𑀔𑀻𑀭𑀯𑀡𑁆𑀡𑀧𑀸𑀲𑀸𑀡𑀫𑀬𑀸𑀦𑀺.

𑀕𑀺𑀳𑀺𑀯𑀺𑀓𑀝𑀸𑀦𑀺𑀧𑀺 𑀦 𑀯𑀝𑁆𑀝𑀦𑁆𑀢𑀺 𑀅𑀦𑀸𑀫𑀸𑀲𑀢𑁆𑀢𑀸. 𑀧𑀺-𑀲𑀤𑁆𑀤𑁂𑀦 𑀧𑀕𑁂𑀯 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁄 𑀧𑀦 𑀲𑀩𑁆𑀩𑀓𑀧𑁆𑀧𑀺𑀬𑁄, 𑀢𑀲𑁆𑀫𑀸 𑀚𑀸𑀢𑀭𑀽𑀧𑀸𑀤𑀺𑀫𑀬𑀸 𑀲𑀩𑁆𑀩𑀸𑀧𑀺 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀆𑀫𑀸𑀲𑀸. 𑀢𑁂𑀦𑀸𑀳 ‘‘𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀦𑀸’’𑀢𑀺𑀆𑀤𑀺.

𑀲𑁂𑀲𑀸𑀢𑀺 𑀢𑀢𑁄 𑀫𑀳𑀢𑁆𑀢𑀭𑀻 𑀯𑀸𑀲𑀺. 𑀬𑀸 𑀧𑀦𑀸𑀢𑀺 𑀬𑀸 𑀓𑀼𑀞𑀸𑀭𑀻 𑀧𑀦. 𑀓𑀼𑀤𑀸𑀮𑁄 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀺 𑀕𑀭𑀼𑀪𑀡𑁆𑀟𑀫𑁂𑀯. 𑀦𑀺𑀔𑀸𑀤𑀦𑀁 𑀘𑀢𑀼𑀭𑀲𑁆𑀲𑀫𑀼𑀔𑀁 𑀯𑀸 𑀳𑁄𑀢𑀼 𑀤𑁄𑀡𑀺𑀫𑀼𑀔𑀁 𑀯𑀸 𑀯𑀗𑁆𑀓𑀁 𑀯𑀸 𑀉𑀚𑀼𑀓𑀁 𑀯𑀸, 𑀅𑀦𑁆𑀢𑀫𑀲𑁄 𑀲𑀫𑁆𑀫𑀼𑀜𑁆𑀚𑀦𑀻𑀤𑀡𑁆𑀟𑀯𑁂𑀥𑀦𑀫𑁆𑀧𑀺, 𑀤𑀡𑁆𑀟𑀩𑀦𑁆𑀥𑀜𑁆𑀘𑁂, 𑀕𑀭𑀼𑀪𑀡𑁆𑀟𑀫𑁂𑀯. 𑀢𑁂𑀦𑀸𑀳 ‘‘𑀓𑀼𑀤𑀸𑀮𑁄 𑀤𑀡𑁆𑀟𑀩𑀦𑁆𑀥𑀦𑀺𑀔𑀸𑀤𑀦𑀁 𑀯𑀸 𑀅𑀕𑀭𑀼𑀪𑀡𑁆𑀟𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀺𑀧𑀸𑀝𑀺𑀓𑀸 𑀦𑀸𑀫 𑀔𑀼𑀭𑀓𑁄𑀲𑁄, 𑀲𑀺𑀔𑀭𑀁 𑀧𑀦 𑀤𑀡𑁆𑀟𑀩𑀦𑁆𑀥𑀦𑀺𑀔𑀸𑀤𑀦𑀁 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀺𑀔𑀭𑀫𑁆𑀧𑀺 𑀦𑀺𑀔𑀸𑀤𑀦𑁂𑀦𑁂𑀯 𑀲𑀗𑁆𑀕𑀳𑀺𑀢’’𑀦𑁆𑀢𑀺. 𑀲𑀘𑁂 𑀧𑀦 𑀯𑀸𑀲𑀺 𑀅𑀤𑀡𑁆𑀟𑀓𑀁 𑀨𑀮𑀫𑀢𑁆𑀢𑀁, 𑀪𑀸𑀚𑀦𑀻𑀬𑀁. 𑀉𑀧𑀓𑁆𑀔𑀭𑁂𑀢𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑁂.

𑀧𑀢𑁆𑀢𑀩𑀦𑁆𑀥𑀓𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀕𑀡𑁆𑀞𑀺𑀓𑀸𑀤𑀺𑀓𑀸𑀭𑀓𑁄. ‘‘𑀧𑀝𑀺𑀫𑀸𑀦𑀁 𑀲𑀼𑀯𑀡𑁆𑀡𑀸𑀤𑀺𑀧𑀢𑁆𑀢𑀓𑀸𑀭𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀺𑀧𑀼𑀘𑁆𑀙𑁂𑀤𑀦𑀓𑀲𑀢𑁆𑀣𑀁 𑀲𑀼𑀯𑀡𑁆𑀡𑀘𑁆𑀙𑁂𑀤𑀦𑀓𑀲𑀢𑁆𑀣𑀁 𑀓𑀢𑀧𑀭𑀺𑀓𑀫𑁆𑀫𑀘𑀫𑁆𑀫𑀘𑁆𑀙𑀺𑀦𑁆𑀤𑀦𑀓𑀔𑀼𑀤𑁆𑀤𑀓𑀲𑀢𑁆𑀣𑀦𑁆𑀢𑀺 𑀇𑀫𑀸𑀦𑀺 𑀘𑁂𑀢𑁆𑀣 𑀢𑀻𑀡𑀺 𑀧𑀺𑀧𑁆𑀨𑀮𑀺𑀓𑀁 𑀅𑀦𑀼𑀮𑁄𑀫𑀦𑁆𑀢𑀻𑀢𑀺 𑀆𑀳 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺𑀆𑀤𑀺. 𑀇𑀢𑀭𑀸𑀦𑀻𑀢𑀺 𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺.

𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝𑀧𑁆𑀧𑀫𑀸𑀡𑀸, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀚𑀸𑀢𑀓𑀸𑀢𑀺 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀚𑀸𑀢𑀸, 𑀆𑀭𑀓𑁆𑀔𑀲𑀁𑀯𑀺𑀥𑀸𑀦𑁂𑀦 𑀭𑀓𑁆𑀔𑀺𑀢𑀢𑁆𑀢𑀸 𑀭𑀓𑁆𑀔𑀺𑀢𑀸 𑀘 𑀲𑀸 𑀫𑀜𑁆𑀚𑀽𑀲𑀸𑀤𑀻𑀲𑀼 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀬𑀣𑀸 𑀢𑀁 𑀦 𑀦𑀲𑁆𑀲𑀢𑀺, 𑀏𑀯𑀁 𑀕𑁄𑀧𑀦𑀢𑁄 𑀕𑁄𑀧𑀺𑀢𑀸 𑀘𑀸𑀢𑀺 𑀭𑀓𑁆𑀔𑀺𑀢𑀕𑁄𑀧𑀺𑀢𑀸. 𑀢𑀢𑁆𑀣𑀚𑀸𑀢𑀓𑀸𑀧𑀺 𑀧𑀦 𑀅𑀭𑀓𑁆𑀔𑀺𑀢𑀸 𑀕𑀭𑀼𑀪𑀡𑁆𑀟𑀫𑁂𑀯 𑀦 𑀳𑁄𑀢𑀺. 𑀲𑀗𑁆𑀖𑀓𑀫𑁆𑀫𑁂 𑀘 𑀘𑁂𑀢𑀺𑀬𑀓𑀫𑁆𑀫𑁂 𑀘 𑀓𑀢𑁂𑀢𑀺 𑀇𑀫𑀺𑀦𑀸 𑀲𑀗𑁆𑀖𑀲𑀦𑁆𑀢𑀓𑁂𑀦 𑀘𑁂𑀢𑀺𑀬𑀲𑀦𑁆𑀢𑀓𑀁 𑀭𑀓𑁆𑀔𑀺𑀢𑀼𑀁 𑀧𑀭𑀺𑀯𑀢𑁆𑀢𑀺𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀼𑀢𑁆𑀢𑀁 𑀧𑀦𑀸𑀢𑀺 𑀯𑀝𑁆𑀝𑀺𑀢𑀜𑁆𑀘𑁂𑀯 𑀅𑀯𑀝𑁆𑀝𑀺𑀢𑀜𑁆𑀘 𑀲𑀼𑀢𑁆𑀢𑀁.

𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀢𑀺 𑀅𑀦𑁆𑀢𑀫𑀲𑁄 𑀤𑀻𑀖𑀲𑁄 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑁄 𑀧𑀭𑀺𑀡𑀸𑀳𑀢𑁄 𑀲𑀻𑀳𑀴-𑀧𑀡𑁆𑀡𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄. 𑀏𑀢𑁆𑀣𑀸𑀢𑀺 𑀯𑁂𑀴𑀼𑀪𑀡𑁆𑀟𑁂. 𑀤𑀟𑁆𑀠𑀁 𑀕𑁂𑀳𑀁 𑀬𑁂𑀲𑀁 𑀢𑁂𑀢𑀺 𑀤𑀟𑁆𑀠𑀕𑁂𑀳𑀸. 𑀦 𑀯𑀸𑀭𑁂𑀢𑀩𑁆𑀩𑀸𑀢𑀺 ‘‘𑀫𑀸 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀦 𑀦𑀺𑀲𑁂𑀥𑁂𑀢𑀩𑁆𑀩𑀸. 𑀤𑁂𑀲𑀦𑁆𑀢𑀭𑀕𑀢𑁂𑀦 𑀲𑀫𑁆𑀧𑀢𑁆𑀢𑀯𑀺𑀳𑀸𑀭𑁂 𑀲𑀗𑁆𑀖𑀺𑀓𑀸𑀯𑀸𑀲𑁂 𑀞𑀧𑁂𑀢𑀩𑁆𑀩𑀸.

𑀅𑀯𑀲𑁂𑀲𑀜𑁆𑀘 𑀙𑀤𑀦𑀢𑀺𑀡𑀦𑁆𑀢𑀺 𑀫𑀼𑀜𑁆𑀚𑀧𑀩𑁆𑀩𑀚𑁂𑀳𑀺 𑀅𑀯𑀲𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀙𑀤𑀦𑀢𑀺𑀡𑀁. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄. 𑀮𑀺𑀔𑀺𑀢𑀧𑁄𑀢𑁆𑀣𑀓𑁄 𑀧𑀦 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀺. 𑀓𑀧𑁆𑀧𑀺𑀬𑀘𑀫𑁆𑀫𑀸𑀦𑀻𑀢𑀺 𑀫𑀺𑀕𑀸𑀤𑀻𑀦𑀁 𑀘𑀫𑁆𑀫𑀸𑀦𑀺. 𑀲𑀩𑁆𑀩𑀁 𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑀦𑁆𑀢𑀺 𑀭𑀣𑀲𑀓𑀝𑀸𑀤𑀺𑀓𑀁 𑀲𑀩𑁆𑀩𑀁 𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑀁. 𑀯𑀺𑀲𑀗𑁆𑀔𑀢𑀘𑀓𑁆𑀓𑀁 𑀧𑀦 𑀬𑀸𑀦𑀁 𑀪𑀸𑀚𑀦𑀻𑀬𑀁. 𑀅𑀦𑀼𑀜𑁆𑀜𑀸𑀢𑀯𑀸𑀲𑀺 𑀦𑀸𑀫 𑀬𑀸 𑀲𑀺𑀧𑀸𑀝𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀸. 𑀫𑀼𑀝𑁆𑀞𑀺𑀧𑀡𑁆𑀡𑀁 𑀢𑀸𑀮𑀧𑀢𑁆𑀢𑀁. 𑀢𑀜𑁆𑀳𑀺 𑀫𑀼𑀝𑁆𑀞𑀺𑀦𑀸 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 ‘‘𑀫𑀼𑀝𑁆𑀞𑀺𑀧𑀡𑁆𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀫𑀼𑀝𑁆𑀞𑀺𑀧𑀡𑁆𑀡𑀦𑁆𑀢𑀺 𑀙𑀢𑁆𑀢𑀘𑁆𑀙𑀤𑀧𑀡𑁆𑀡𑀫𑁂𑀯𑀸’’𑀢𑀺 𑀓𑁂𑀘𑀺. 𑀅𑀭𑀡𑀻𑀲𑀳𑀺𑀢𑀦𑁆𑀢𑀺 𑀅𑀭𑀡𑀻𑀬𑀼𑀕𑀴𑀁, 𑀉𑀢𑁆𑀢𑀭𑀸𑀭𑀡𑀻 𑀅𑀥𑀭𑀸𑀭𑀡𑀻𑀢𑀺 𑀅𑀭𑀡𑀻𑀤𑁆𑀯𑀬𑀦𑁆𑀢𑀺 𑀅𑀢𑁆𑀣𑁄. 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀅𑀦𑁆𑀢𑀫𑀲𑁄 𑀢𑀁𑀅𑀕𑁆𑀖𑀦𑀓𑀯𑀸𑀮𑀺𑀓𑀸𑀬𑀧𑀺 𑀣𑀸𑀯𑀭𑀁 𑀯𑀟𑁆𑀠𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀓𑀼𑀡𑁆𑀟𑀺𑀓𑀸𑀢𑀺 𑀅𑀬𑀓𑀼𑀡𑁆𑀟𑀺𑀓𑀸 𑀘𑁂𑀯 𑀢𑀫𑁆𑀩𑀮𑁄𑀳𑀓𑀼𑀡𑁆𑀟𑀺𑀓𑀸 𑀘. 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀫𑁂𑀯 𑀪𑀚𑀢𑀻𑀢𑀺 𑀪𑀸𑀚𑀦𑀻𑀬𑀧𑀓𑁆𑀔𑀫𑁂𑀯 𑀲𑁂𑀯𑀢𑀺, 𑀦 𑀢𑀼 𑀕𑀭𑀼𑀪𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀓𑁄 𑀧𑀦 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀢𑀺𑀁𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.