𑁨𑁮. 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑀘𑀻𑀯𑀭𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸

𑁧𑁯𑁪. 𑀏𑀯𑀁 𑀉𑀧𑀚𑁆𑀛𑀸𑀬𑀸𑀤𑀺𑀯𑀢𑁆𑀢𑀲𑀗𑁆𑀔𑀸𑀢𑀸𑀦𑀺 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀪𑀸𑀚𑀦𑀁 𑀓𑀣𑁂𑀦𑁆𑀢𑁄 ‘‘𑀘𑀢𑀼𑀧𑀘𑁆𑀘𑀬𑀪𑀸𑀚𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀽𑀢𑀺 𑀲𑀗𑁆𑀔𑁆𑀬𑀸𑀲𑀩𑁆𑀩𑀦𑀸𑀫𑀧𑀤𑀁. 𑀧𑀝𑀺𑀘𑁆𑀘 𑀏𑀢𑀺 𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀓𑀁 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀧𑀘𑁆𑀘𑀬𑁄, 𑀘𑀻𑀯𑀭𑀸𑀤𑀺, 𑀧𑀘𑁆𑀘𑀬𑁄 𑀘 𑀧𑀘𑁆𑀘𑀬𑁄 𑀘 𑀧𑀘𑁆𑀘𑀬𑀸, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀘𑀢𑀼𑀧𑀘𑁆𑀘𑀬𑀁, 𑀪𑀸𑀚𑀻𑀬𑀢𑁂 𑀯𑀺𑀪𑀸𑀚𑀻𑀬𑀢𑁂 𑀪𑀸𑀚𑀦𑀁. 𑀘𑀢𑀼𑀧𑀘𑁆𑀘𑀬𑀲𑁆𑀲 𑀪𑀸𑀚𑀦𑀁 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀁. 𑀢𑁂𑀦𑀸𑀳 ‘‘𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀪𑀸𑀚𑀦’’𑀦𑁆𑀢𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑁂 𑀲𑀫𑀪𑀺𑀦𑀺𑀯𑀺𑀝𑁆𑀞𑁂 𑀘𑀻𑀯𑀭𑀪𑀸𑀚𑀦𑁂 𑀢𑀸𑀯 𑀧𑀞𑀫𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄…𑀧𑁂… 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀲𑀗𑁆𑀖𑀺𑀓𑀘𑀻𑀯𑀭𑀲𑁆𑀲 𑀤𑀼𑀓𑁆𑀓𑀭𑀪𑀸𑀚𑀦𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀆𑀕𑀢𑀸𑀕𑀢𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀫𑁂𑀯𑀲𑁆𑀲 𑀪𑀸𑀭𑁄𑀢𑀺 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀘𑀻𑀯𑀭𑀁 𑀦𑀺𑀤𑀳𑀢𑀺, 𑀦𑀺𑀤𑀳𑀦𑀫𑀢𑁆𑀢𑀫𑁂𑀯𑀲𑁆𑀲 𑀪𑀸𑀭𑁄𑀢𑀺 𑀘𑀻𑀯𑀭𑀦𑀺𑀤𑀳𑀓𑁄. 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄. 𑀘𑀻𑀯𑀭𑀸𑀤𑀺𑀓𑀲𑁆𑀲 𑀪𑀡𑁆𑀟𑀲𑁆𑀲 𑀞𑀧𑀦𑀝𑁆𑀞𑀸𑀦𑀪𑀽𑀢𑀁 𑀅𑀕𑀸𑀭𑀁 𑀪𑀡𑁆𑀟𑀸𑀕𑀸𑀭𑀁. 𑀘𑀻𑀯𑀭𑀁 𑀪𑀸𑀚𑁂𑀢𑀺 𑀪𑀸𑀕𑀁 𑀓𑀭𑁄𑀢𑀻𑀢𑀺 𑀘𑀻𑀯𑀭𑀪𑀸𑀚𑀓𑁄. 𑀘𑀻𑀯𑀭𑀲𑁆𑀲 𑀪𑀸𑀚𑀦𑀁 𑀯𑀺𑀪𑀸𑀕𑀓𑀭𑀡𑀁 𑀘𑀻𑀯𑀭𑀪𑀸𑀚𑀦𑀁, 𑀯𑀺𑀪𑀚𑀦𑀓𑀺𑀭𑀺𑀬𑀸.

𑀢𑀢𑁆𑀣 ‘‘𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀼𑀢𑁄 𑀮𑀩𑁆𑀪𑀢𑁂𑀢𑀺 𑀆𑀳 ‘‘𑀧𑀜𑁆𑀘𑀳𑀗𑁆𑀕𑁂𑀳𑀺…𑀧𑁂… 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄’’𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀯𑀘𑀦𑀢𑁄’’𑀢𑀺. 𑀙𑀦𑁆𑀤𑀦𑀁 𑀙𑀦𑁆𑀤𑁄, 𑀇𑀘𑁆𑀙𑀦𑀁 𑀧𑀺𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀕𑀫𑀦𑀁 𑀓𑀭𑀡𑀁 𑀕𑀢𑀺, 𑀓𑀺𑀭𑀺𑀬𑀸. 𑀕𑀸𑀭𑁂𑀬𑁆𑀳𑀸 𑀕𑀢𑀺 𑀅𑀕𑀢𑀺, 𑀙𑀦𑁆𑀤𑁂𑀦 𑀅𑀕𑀢𑀺 𑀙𑀦𑁆𑀤𑀸𑀕𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀣𑀁 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀢𑀢𑁆𑀣 𑀧𑀘𑁆𑀙𑀸 𑀆𑀕𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺. 𑀏𑀯𑀫𑀺𑀢𑀭𑁂𑀲𑀼𑀧𑀺. 𑀧𑀜𑁆𑀘𑀫𑀗𑁆𑀕𑀁 𑀧𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑀼𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀇𑀢𑁄 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀇𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸𑀢𑀺 𑀇𑀤𑀁 𑀇𑀫𑀲𑁆𑀲 𑀲𑀫𑁆𑀫𑀼𑀢𑀺𑀓𑀫𑁆𑀫𑀲𑁆𑀲 𑀮𑀳𑀼𑀓𑀓𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁪𑁮𑁨) ‘‘𑀅𑀯𑀲𑁂𑀲𑀸 𑀢𑁂𑀭𑀲 𑀲𑀫𑁆𑀫𑀼𑀢𑀺𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀫𑀢𑀓𑀘𑀻𑀯𑀭𑀤𑀸𑀦𑀸𑀤𑀺𑀲𑀫𑁆𑀫𑀼𑀢𑀺𑀬𑁄 𑀘𑀸𑀢𑀺 𑀏𑀢𑀸𑀦𑀺 𑀮𑀳𑀼𑀓𑀓𑀫𑁆𑀫𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀦𑁆𑀢𑀻’’𑀢𑀺. 𑀅𑀦𑁆𑀢𑁄𑀯𑀺𑀳𑀸𑀭𑁂 𑀲𑀩𑁆𑀩𑀲𑀗𑁆𑀖𑀫𑀚𑁆𑀛𑁂𑀧𑀺 𑀔𑀡𑁆𑀟𑀲𑀻𑀫𑀸𑀬𑀫𑁆𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀦𑁆𑀢𑁄𑀯𑀺𑀳𑀸𑀭𑁂𑀢𑀺 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀤𑀼𑀩𑁆𑀩𑀺𑀲𑁄𑀥𑀦𑀢𑁆𑀢𑀸. 𑀥𑀼𑀭𑀯𑀺𑀳𑀸𑀭𑀝𑁆𑀞𑀸𑀦𑁂𑀢𑀺 𑀯𑀺𑀳𑀸𑀭𑀤𑁆𑀯𑀸𑀭𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂.

𑁧𑁯𑁭. 𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀬𑀁 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀗𑁆𑀔𑀸𑀢𑀫𑀳𑀸𑀲𑀻𑀫𑀸 𑀯𑀺𑀳𑀸𑀭𑀲𑁆𑀲 𑀫𑀚𑁆𑀛𑁂𑀬𑁂𑀯 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀇𑀫𑀁 𑀧𑀦 𑀪𑀡𑁆𑀟𑀸𑀕𑀸𑀭𑀁 𑀔𑀡𑁆𑀟𑀲𑀻𑀫𑀁 𑀕𑀦𑁆𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 ‘‘𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑁆𑀯𑀸 𑀓𑀣𑀺𑀦𑀤𑀸𑀦𑀓𑀫𑁆𑀫𑀫𑁆𑀧𑀺 𑀅𑀩𑀤𑁆𑀥𑀲𑀻𑀫𑀸𑀪𑀽𑀢𑁂 𑀯𑀺𑀳𑀸𑀭𑁂 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀢𑀣𑁂𑀯 𑀕𑀳𑁂𑀢𑁆𑀯𑀸 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀉𑀧𑀘𑀸𑀭𑀲𑀻𑀫𑀸𑀫𑀢𑁆𑀢𑁂𑀬𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁, 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀓𑀣𑀺𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁨𑁬) 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁧𑁯𑁮. 𑀢𑀼𑀮𑀸𑀪𑀽𑀢𑁄𑀢𑀺 𑀢𑀼𑀮𑀸𑀲𑀤𑀺𑀲𑁄. 𑀇𑀤𑀦𑁆𑀢𑀺 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀤𑀸𑀦𑀁. 𑀇𑀫𑀁 𑀓𑀺𑀭 𑀧𑀸𑀞𑀁 𑀅𑀫𑀦𑀲𑀺𑀓𑀭𑁄𑀦𑁆𑀢𑀸 𑀇𑀤𑀸𑀦𑀺 𑀓𑀸𑀮𑀘𑀻𑀯𑀭𑀫𑁆𑀧𑀺 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀤𑁂𑀦𑁆𑀢𑀺. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀧𑀳𑁄𑀦𑀓𑀓𑀫𑁆𑀫𑀁, 𑀬𑀢𑁆𑀢𑀓𑁂𑀦 𑀯𑀺𑀦𑀬𑀸𑀕𑀢𑁂𑀦 𑀲𑀫𑁆𑀫𑀼𑀜𑁆𑀚𑀦𑀻𑀩𑀦𑁆𑀥𑀦𑀸𑀤𑀺𑀳𑀢𑁆𑀣𑀓𑀫𑁆𑀫𑁂𑀦 𑀯𑀺𑀳𑀸𑀭𑀲𑁆𑀲 𑀊𑀦𑀢𑀸 𑀦 𑀳𑁄𑀢𑀺, 𑀢𑀢𑁆𑀢𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀸𑀫𑀡𑁂𑀭𑀸𑀦𑀜𑁆𑀘. 𑀪𑀡𑁆𑀟𑀸𑀕𑀸𑀭𑀘𑀻𑀯𑀭𑁂𑀧𑀻𑀢𑀺 𑀅𑀓𑀸𑀮𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀏𑀢𑀦𑁆𑀢𑀺 𑀉𑀓𑁆𑀓𑀼𑀝𑁆𑀞𑀺𑀬𑀸 𑀓𑀢𑀸𑀬 𑀲𑀫𑀪𑀸𑀕𑀤𑀸𑀦𑀁. 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀓𑀢𑁆𑀢𑀩𑁆𑀩𑀓𑀸𑀮𑁂𑀲𑀼 𑀅𑀓𑀢𑁆𑀯𑀸 𑀬𑀣𑀸𑀭𑀼𑀘𑀺𑀢𑀓𑁆𑀔𑀡𑁂 𑀓𑀭𑁄𑀦𑁆𑀢𑀺. 𑀲𑀫𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄𑀢𑀺 𑀓𑀭𑀺𑀲𑁆𑀲𑀸𑀫𑀸𑀢𑀺 𑀬𑀸𑀘𑀦𑁆𑀢𑀸𑀦𑀁 𑀧𑀝𑀺𑀜𑁆𑀜𑀸𑀫𑀢𑁆𑀢𑁂𑀦𑀧𑀺 𑀲𑀫𑀓𑁄 𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄.

𑀅𑀢𑀺𑀭𑁂𑀓𑀪𑀸𑀕𑁂𑀦𑀸𑀢𑀺 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀲𑀸𑀝𑀓𑀸𑀧𑀺 𑀤𑀲𑁂𑀯, 𑀢𑁂𑀲𑀼 𑀏𑀓𑁄 𑀤𑁆𑀯𑀸𑀤𑀲 𑀅𑀕𑁆𑀖𑀢𑀺, 𑀲𑁂𑀲𑀸 𑀤𑀲𑀕𑁆𑀖𑀦𑀓𑀸. 𑀲𑀩𑁆𑀩𑁂𑀲𑀼 𑀤𑀲𑀕𑁆𑀖𑀦𑀓𑀯𑀲𑁂𑀦 𑀓𑀼𑀲𑁂 𑀧𑀸𑀢𑀺𑀢𑁂 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀸𑀤𑀲𑀕𑁆𑀖𑀦𑀓𑁄 𑀓𑀼𑀲𑁄 𑀧𑀸𑀢𑀺𑀢𑁄, 𑀲𑁄 ‘‘𑀏𑀢𑁆𑀢𑀓𑁂𑀦 𑀫𑀫 𑀘𑀻𑀯𑀭𑀁 𑀧𑀳𑁄𑀢𑀻’’𑀢𑀺 𑀢𑁂𑀦 𑀅𑀢𑀺𑀭𑁂𑀓𑀪𑀸𑀕𑁂𑀦 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀏𑀢𑁆𑀣 𑀘 𑀏𑀢𑁆𑀢𑀓𑁂𑀦 𑀫𑀫 𑀘𑀻𑀯𑀭𑀁 𑀧𑀳𑁄𑀢𑀻𑀢𑀺 𑀤𑁆𑀯𑀸𑀤𑀲𑀕𑁆𑀖𑀦𑀓𑁂𑀦 𑀫𑀫 𑀘𑀻𑀯𑀭𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀢𑀢𑁄 𑀊𑀦𑁂𑀦𑀸𑀢𑀺 𑀲𑀩𑁆𑀩𑀁 𑀕𑀳𑁂𑀢𑀼𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀽 ‘‘𑀅𑀢𑀺𑀭𑁂𑀓𑀁 𑀆𑀯𑀼𑀲𑁄 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀸 ‘‘𑀲𑀗𑁆𑀖𑀺𑀓𑁂 𑀘 𑀕𑀡𑀲𑀦𑁆𑀢𑀓𑁂 𑀘 𑀅𑀧𑁆𑀧𑀓𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀲𑀁𑀬𑀫𑁄 𑀓𑀸𑀢𑀩𑁆𑀩𑁄, 𑀕𑀡𑁆𑀳𑀦𑁆𑀢𑁂𑀦𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀓𑁆𑀔𑁂𑀧𑁂 𑀤𑀺𑀦𑁆𑀦𑁂’’𑀢𑀺 𑀆𑀳. 𑀢𑀢𑁆𑀣 𑀅𑀦𑀼𑀓𑁆𑀔𑁂𑀧𑁄 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀓𑁆𑀔𑀺𑀧𑀺𑀢𑀩𑁆𑀩𑀁 𑀅𑀦𑀼𑀧𑁆𑀧𑀤𑀸𑀢𑀩𑁆𑀩𑀁 𑀓𑀧𑁆𑀧𑀺𑀬𑀪𑀡𑁆𑀟𑀁, 𑀬𑀢𑁆𑀢𑀓𑀁 𑀢𑀲𑁆𑀲 𑀧𑀝𑀺𑀯𑀻𑀲𑁂 𑀅𑀥𑀺𑀓𑀁, 𑀢𑀢𑁆𑀢𑀓𑁂 𑀅𑀕𑁆𑀖𑀦𑀓𑁂 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑁂 𑀤𑀺𑀦𑁆𑀦𑁂𑀢𑀺 𑀅𑀢𑁆𑀣𑁄𑀢𑀺 𑀇𑀫𑀫𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺’’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀯𑀺𑀓𑀮𑀓𑁂 𑀢𑁄𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀘𑀻𑀯𑀭𑀯𑀺𑀓𑀮𑀓𑀁 𑀧𑀼𑀕𑁆𑀕𑀮𑀯𑀺𑀓𑀮𑀓𑀦𑁆𑀢𑀺 𑀤𑁆𑀯𑁂 𑀯𑀺𑀓𑀮𑀓𑀸. 𑀢𑀢𑁆𑀣 𑀘𑀻𑀯𑀭𑀯𑀺𑀓𑀮𑀓𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀧𑀜𑁆𑀘 𑀧𑀜𑁆𑀘 𑀯𑀢𑁆𑀣𑀸𑀦𑀺 𑀧𑀢𑁆𑀢𑀸𑀦𑀺, 𑀲𑁂𑀲𑀸𑀦𑀺𑀧𑀺 𑀅𑀢𑁆𑀣𑀺, 𑀏𑀓𑁂𑀓𑀁 𑀧𑀦 𑀦 𑀧𑀸𑀧𑀼𑀡𑀸𑀢𑀺, 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺. 𑀙𑀺𑀦𑁆𑀤𑀦𑁆𑀢𑁂𑀳𑀺 𑀘 𑀅𑀟𑁆𑀠𑀫𑀡𑁆𑀟𑀮𑀸𑀤𑀻𑀦𑀁 𑀯𑀸 𑀉𑀧𑀸𑀳𑀦𑀣𑀯𑀺𑀓𑀸𑀤𑀻𑀦𑀁 𑀯𑀸 𑀧𑀳𑁄𑀦𑀓𑀸𑀦𑀺 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺, 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑀫𑁆𑀧𑀺 𑀅𑀦𑀼𑀯𑀸𑀢𑀧𑁆𑀧𑀳𑁄𑀦𑀓𑀸𑀬𑀸𑀫𑀁 𑀔𑀡𑁆𑀟𑀁 𑀓𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀭𑀺𑀪𑁄𑀕𑀁 𑀧𑀦 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀘𑀻𑀯𑀭𑀲𑁆𑀲 𑀅𑀧𑁆𑀧𑀳𑁄𑀦𑀓𑀪𑀸𑀯𑁄 𑀘𑀻𑀯𑀭𑀯𑀺𑀓𑀮𑀓𑀁. 𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑁂 𑀧𑀦𑁂𑀢𑀁 𑀢𑁄𑀲𑀺𑀢𑀁 𑀳𑁄𑀢𑀺. 𑀅𑀣 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄, 𑀲𑀘𑁂𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀝𑁆𑀞𑀸𑀲𑁂 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀢𑁆𑀣𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑀁 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀢𑁆𑀯𑀸 𑀬𑁄 𑀢𑁂𑀦 𑀢𑀼𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀪𑀸𑀕𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄. 𑀇𑀤𑀫𑁆𑀧𑀺 𑀘𑀻𑀯𑀭𑀯𑀺𑀓𑀮𑀓𑀦𑁆𑀢𑀺 𑀅𑀦𑁆𑀥𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀧𑀼𑀕𑁆𑀕𑀮𑀯𑀺𑀓𑀮𑀓𑀁 𑀦𑀸𑀫 𑀤𑀲 𑀤𑀲 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀓𑀭𑁄𑀦𑁆𑀢𑀸𑀦𑀁 𑀏𑀓𑁄 𑀯𑀕𑁆𑀕𑁄 𑀦 𑀧𑀽𑀭𑀢𑀺, 𑀅𑀝𑁆𑀞 𑀯𑀸 𑀦𑀯 𑀯𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞 𑀯𑀸 𑀦𑀯 𑀯𑀸 𑀓𑁄𑀝𑁆𑀞𑀸𑀲𑀸 ‘‘𑀢𑀼𑀫𑁆𑀳𑁂 𑀇𑀫𑁂 𑀕𑀳𑁂𑀢𑁆𑀯𑀸 𑀯𑀺𑀲𑀼𑀁 𑀪𑀸𑀚𑁂𑀣𑀸’’𑀢𑀺 𑀤𑀸𑀢𑀩𑁆𑀩𑀸. 𑀏𑀯𑀫𑀬𑀁 𑀧𑀼𑀕𑁆𑀕𑀮𑀸𑀦𑀁 𑀅𑀧𑁆𑀧𑀳𑁄𑀦𑀓𑀪𑀸𑀯𑁄 𑀧𑀼𑀕𑁆𑀕𑀮𑀯𑀺𑀓𑀮𑀓𑀁 𑀦𑀸𑀫. 𑀯𑀺𑀲𑀼𑀁 𑀤𑀺𑀦𑁆𑀦𑁂 𑀧𑀦 𑀢𑀁 𑀢𑁄𑀲𑀺𑀢𑀁 𑀳𑁄𑀢𑀺, 𑀏𑀯𑀁 𑀢𑁄𑀲𑁂𑀢𑁆𑀯𑀸 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄𑀢𑀺. 𑀅𑀣 𑀯𑀸 𑀯𑀺𑀓𑀮𑀓𑁂 𑀢𑁄𑀲𑁂𑀢𑁆𑀯𑀸𑀢𑀺 𑀬𑁄 𑀘𑀻𑀯𑀭𑀯𑀺𑀪𑀸𑀕𑁄 𑀊𑀦𑀓𑁄, 𑀢𑀁 𑀅𑀜𑁆𑀜𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀲𑀫𑀁 𑀓𑀢𑁆𑀯𑀸 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀘𑁂 𑀲𑀩𑁆𑀩𑁂𑀲𑀁 𑀧𑀜𑁆𑀘 𑀧𑀜𑁆𑀘 𑀯𑀢𑁆𑀣𑀸𑀦𑀻’’𑀢𑀺𑀆𑀤𑀺𑀦𑀸.

𑁧𑁯𑁯. 𑀇𑀢𑁄 𑀧𑀭𑀁 𑀢𑁂𑀲𑀼 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀆𑀕𑀢𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼 𑀲𑀦𑁆𑀢𑁂𑀲𑀼𑀧𑀺 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑀸𑀦𑀁 𑀅𑀝𑁆𑀞𑀫𑀸𑀢𑀺𑀓𑀸𑀯𑀺𑀦𑀺𑀘𑁆𑀙𑀬𑀢𑁄 𑀅𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀫𑀸𑀢𑀺𑀓𑀸𑀯𑀺𑀦𑀺𑀘𑁆𑀙𑀬𑁂𑀲𑁆𑀯𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀬𑀸 𑀢𑀸 𑀅𑀝𑁆𑀞 𑀫𑀸𑀢𑀺𑀓𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀇𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀇𑀫𑀺𑀦𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀸𑀤𑀺𑀢𑁄 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀤𑀼𑀢𑀺𑀬𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀦𑁆𑀢𑁄𑀧𑀺 𑀉𑀧𑀘𑀸𑀭𑀲𑀻𑀫𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀫𑁆𑀧𑀺 𑀧𑀭𑀺𑀬𑀦𑁆𑀢𑀕𑀢𑀫𑁂𑀯 𑀕𑀳𑁂𑀢𑀩𑁆𑀩𑀁. ‘‘𑀏𑀯𑀁 𑀲𑀦𑁆𑀢𑁂 𑀢𑀺𑀬𑁄𑀚𑀦𑁂 𑀞𑀺𑀢𑀸 𑀮𑀸𑀪𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀇𑀫𑁂 𑀮𑀸𑀪𑀕𑁆𑀕𑀳𑀡𑀸𑀤𑀬𑁄 𑀉𑀧𑀘𑀸𑀭𑀲𑀻𑀫𑀸𑀯𑀲𑁂𑀦𑁂𑀯 𑀳𑁄𑀢𑀺, 𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀇𑀫𑀸𑀦𑀺 𑀮𑀸𑀪𑀕𑁆𑀕𑀳𑀡𑀸𑀤𑀻𑀦𑀺𑀬𑁂𑀯 𑀉𑀧𑀘𑀸𑀭𑀲𑀻𑀫𑀸𑀬𑀁 𑀓𑀢𑁆𑀢𑀩𑁆𑀩𑀸𑀦𑀺, 𑀦 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺, 𑀢𑀸𑀦𑀺 𑀧𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀤𑀻𑀲𑀼𑀬𑁂𑀯 𑀓𑀢𑁆𑀢𑀩𑁆𑀩𑀸𑀦𑀻𑀢𑀺 𑀧𑀓𑀸𑀲𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁭𑁯) ‘‘𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀸𑀫𑀧𑁆𑀧𑀯𑁂𑀲𑀦𑀲𑁂𑀦𑀸𑀲𑀦𑀧𑀼𑀘𑁆𑀙𑀦𑀸𑀤𑀺 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀸𑀭𑁄𑀘𑀦𑀯𑀲𑁆𑀲𑀘𑁆𑀙𑁂𑀤𑀦𑀺𑀲𑁆𑀲𑀬𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀤𑀺 𑀯𑀺𑀥𑀸𑀦𑀦𑁆𑀢𑀺 𑀇𑀤𑀁 𑀲𑀩𑁆𑀩𑀁 𑀇𑀫𑀺𑀲𑁆𑀲𑀸𑀬𑁂𑀯 𑀉𑀧𑀘𑀸𑀭𑀲𑀻𑀫𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀮𑀸𑀪𑀢𑁆𑀣𑀸𑀬 𑀞𑀧𑀺𑀢𑀸 𑀲𑀻𑀫𑀸 𑀮𑀸𑀪𑀲𑀻𑀫𑀸. 𑀮𑁄𑀓𑁂 𑀕𑀸𑀫𑀲𑀻𑀫𑀸𑀤𑀬𑁄 𑀯𑀺𑀬 𑀮𑀸𑀪𑀲𑀻𑀫𑀸 𑀦𑀸𑀫 𑀯𑀺𑀲𑀼𑀁 𑀧𑀲𑀺𑀤𑁆𑀥𑀸 𑀦𑀢𑁆𑀣𑀺, 𑀓𑁂𑀦𑀸𑀬𑀁 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀳 ‘‘𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀏𑀢𑁂𑀦 𑀦𑀸𑀬𑀁 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑀸, 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀚𑀦𑀧𑀤𑀧𑀭𑀺𑀘𑁆𑀙𑁂𑀤𑁄𑀢𑀺 𑀇𑀤𑀁 𑀮𑁄𑀓𑀧𑀲𑀺𑀤𑁆𑀥𑀲𑀻𑀫𑀸𑀲𑀤𑁆𑀤𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑀫𑁆𑀧𑀺 𑀲𑀩𑁆𑀩𑀁 𑀚𑀦𑀧𑀤𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀚𑀦𑀧𑀤𑁄 𑀏𑀯 𑀚𑀦𑀧𑀤𑀲𑀻𑀫𑀸, 𑀏𑀯𑀁 𑀭𑀝𑁆𑀞𑀲𑀻𑀫𑀸𑀤𑀻𑀲𑀼𑀧𑀺. 𑀢𑁂𑀦𑀸𑀳 ‘‘𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀧𑀣𑀯𑀻𑀯𑁂𑀫𑀚𑁆𑀛𑀕𑀢𑀲𑁆𑀲𑀸𑀢𑀺 𑀬𑀸𑀯 𑀉𑀤𑀓𑀧𑀭𑀺𑀬𑀦𑁆𑀢𑀸 𑀔𑀡𑁆𑀟𑀲𑀻𑀫𑀢𑁆𑀢𑀸 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀲𑀻𑀫𑀸𑀤𑀻𑀲𑀼 𑀧𑀦 𑀅𑀩𑀤𑁆𑀥𑀲𑀻𑀫𑀸𑀲𑀼 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀲𑀩𑁆𑀩𑀢𑁆𑀣 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀓𑀽𑀧𑀸𑀤𑀺𑀧𑀯𑁂𑀲𑀸𑀭𑀳𑀝𑁆𑀞𑀸𑀦𑁂 𑀞𑀺𑀢𑀸𑀦𑀜𑁆𑀜𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀳𑁂𑀝𑁆𑀞𑀸 𑀲𑀻𑀫𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀁𑀢𑀁𑀲𑀻𑀫𑀝𑁆𑀞𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀓𑁆𑀓𑀯𑀸𑀴𑀲𑀻𑀫𑀸𑀬 𑀤𑀺𑀦𑁆𑀦𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀝𑁆𑀞𑀸𑀦𑁂𑀧𑀺 𑀞𑀺𑀢𑀸𑀦𑀁 𑀧𑀸𑀧𑀼𑀡𑀸𑀢𑀺 𑀲𑀩𑁆𑀩𑀢𑁆𑀣 𑀘𑀓𑁆𑀓𑀯𑀸𑀴𑀯𑁄𑀳𑀸𑀭𑀢𑁆𑀢𑀸𑀢𑀺. 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀼 𑀤𑀺𑀦𑁆𑀦𑀲𑁆𑀲 𑀇𑀤𑀁 𑀦𑀸𑀦𑀢𑁆𑀢𑀁 𑁋 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀕𑀸𑀫𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀕𑀸𑀫𑁂 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻𑀢𑀺.

𑁨𑁦𑁦-𑁧. 𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄𑀢𑀺 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀅𑀥𑀺𑀯𑀼𑀢𑁆𑀣𑁄. 𑀏𑀓𑀲𑁆𑀫𑀺𑀦𑁆𑀢𑀺 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀧𑀸𑀓𑀯𑀢𑁆𑀢𑀦𑁆𑀢𑀺 𑀦𑀺𑀩𑀤𑁆𑀥𑀤𑀸𑀦𑀁. 𑀯𑀢𑁆𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀢𑁂𑀳𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁂𑀲𑀁 𑀲𑀫𑁆𑀫𑀼𑀔𑁂 𑀏𑀲 𑀤𑁂𑀢𑀺, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀩𑁆𑀩𑀁.

𑁨𑁦𑁨. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂𑀢𑀺 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀏𑀓𑀯𑀸𑀭𑀁 𑀲𑀩𑁆𑀩𑁂𑀲𑀁 𑀪𑀸𑀕𑀁 𑀤𑀢𑁆𑀯𑀸 𑀘𑀻𑀯𑀭𑁂 𑀅𑀧𑀭𑀺𑀓𑁆𑀔𑀻𑀡𑁂 𑀧𑀼𑀦 𑀲𑀩𑁆𑀩𑁂𑀲𑀁 𑀤𑀸𑀢𑀼𑀁 𑀤𑀼𑀢𑀺𑀬𑀪𑀸𑀕𑁂 𑀣𑁂𑀭𑀲𑁆𑀲 𑀤𑀺𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀼𑀬𑁆𑀳𑁂𑀯 𑀪𑀺𑀓𑁆𑀔𑀼 𑀢𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺 (𑀫𑀳𑀸𑀯. 𑁩𑁬𑁩) 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦. 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 ‘‘𑀢𑀼𑀬𑁆𑀳𑀁 𑀤𑁂𑀫𑀸’’𑀢𑀺 𑀅𑀯𑀢𑁆𑀯𑀸, ‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁭𑁯) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁭𑁯) 𑀧𑀦 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀢𑀼𑀬𑁆𑀳𑀁 𑀤𑁂𑀫𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀝𑁆𑀝𑁂𑀬𑁆𑀬, ‘‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫, 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀘𑀦𑀢𑁄 𑀪𑁂𑀤𑁄 𑀦 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀫𑁂𑀢𑁆𑀣 𑀓𑀸𑀭𑀡𑀦𑁆𑀢𑀺. 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀲𑀸𑀫𑀺𑀓𑁂𑀳𑀺 𑀯𑀺𑀘𑀸𑀭𑀺𑀢𑀫𑁂𑀯𑀸𑀢𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀻𑀦𑀫𑀢𑁆𑀣𑀸𑀬 𑀯𑀺𑀘𑀸𑀭𑀺𑀢𑀫𑁂𑀯.

𑁨𑁦𑁩. 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀦𑁆𑀢𑀺 𑀬𑀁 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁, 𑀢𑀢𑁄 𑀉𑀧𑀟𑁆𑀠𑀁 𑀪𑀺𑀓𑁆𑀔𑀽𑀦𑀁 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀏𑀓𑀸 𑀯𑀸 𑀪𑀺𑀓𑁆𑀔𑀼𑀦𑀻, 𑀅𑀦𑁆𑀢𑀫𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀧𑀺 𑀉𑀧𑀟𑁆𑀠𑀫𑁂𑀯 𑀤𑀸𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀧𑀓𑁆𑀔𑁂 𑀲𑀗𑁆𑀖𑀲𑁆𑀲 𑀧𑀘𑁆𑀘𑁂𑀓𑀁 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀕𑀡𑀦𑀸𑀬 𑀪𑀸𑀕𑁄 𑀤𑀸𑀢𑀩𑁆𑀩𑁄𑀢𑀺 𑀤𑀸𑀬𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄𑀢𑀺 𑀲𑀺𑀚𑁆𑀛𑀢𑀺, 𑀢𑀣𑀸 𑀤𑀸𑀦𑀜𑁆𑀘 𑀪𑀺𑀓𑁆𑀔𑀽𑀧𑀺 𑀕𑀡𑁂𑀢𑁆𑀯𑀸 𑀤𑀺𑀦𑁆𑀦𑁂 𑀏𑀯 𑀬𑀼𑀚𑁆𑀚𑀢𑀺. 𑀇𑀢𑀭𑀣𑀸 𑀳𑀺 ‘‘𑀓𑀺𑀢𑁆𑀢𑀓𑀁 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀁, 𑀓𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀫𑁆𑀧𑀺 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑀤𑀺𑀲𑀫𑁂𑀯𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀕𑁆𑀕𑀮𑁄…𑀧𑁂… 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀦 𑀮𑀪𑀢𑀻𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀧𑀫𑀸𑀡𑁂𑀦𑁂𑀯 𑀕𑀳𑁂𑀢𑀩𑁆𑀩𑀁, 𑀦 𑀳𑁂𑀢𑁆𑀣 𑀯𑀺𑀲𑁂𑀲𑀓𑀸𑀭𑀡𑀁 𑀉𑀧𑀮𑀩𑁆𑀪𑀢𑀺. 𑀢𑀣𑀸 𑀳𑀺 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀘𑀦𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀬𑀣𑀸 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀮𑀪𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀘𑀦𑀲𑀩𑁆𑀪𑀸𑀯𑀢𑁄 𑀪𑀯𑀺𑀢𑀩𑁆𑀩𑀫𑁂𑀯 𑀯𑀺𑀲𑀼𑀁 𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁂𑀦𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯𑁂𑀢𑁆𑀣 𑀧𑀫𑀸𑀡𑀁. 𑀧𑀸𑀧𑀼𑀡𑀦𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀮𑀪𑀢𑀻𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀓𑁄𑀝𑁆𑀞𑀸𑀲𑀁 𑀮𑀪𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦𑁂𑀯 𑀧𑀼𑀕𑁆𑀕𑀮𑀲𑁆𑀲𑀧𑀺 𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁭𑁯) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁭𑁯) 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑀤𑁆𑀤𑁂𑀦 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀕𑀳𑀺𑀢𑀢𑁆𑀢𑀸, 𑀧𑀼𑀕𑁆𑀕𑀮𑀲𑁆𑀲 𑀧𑀦 ‘‘𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀘 𑀢𑀢𑁆𑀣𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀤𑀝𑁆𑀞𑀩𑁆𑀩𑀸, ‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀲𑀤𑀺𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑀧𑁆𑀧𑀥𑀸𑀦𑁄 𑀳𑁂𑀢𑁆𑀣 𑀲𑀗𑁆𑀖-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺 𑀧𑀸𑀞𑀁 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀢𑀲𑁆𑀲 𑀯𑀺𑀲𑀼𑀁 𑀮𑀸𑀪𑀕𑁆𑀕𑀳𑀡𑁂 𑀓𑀸𑀭𑀡𑀯𑀘𑀦𑀢𑁆𑀢𑀸. 𑀢𑀣𑀸 𑀳𑀺 ‘‘𑀯𑀺𑀲𑀼𑀁 𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸’’𑀢𑀺 𑀯𑀺𑀲𑀼𑀁 𑀧𑀼𑀕𑁆𑀕𑀮𑀲𑁆𑀲𑀧𑀺 𑀪𑀸𑀕𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣 𑀧𑀼𑀕𑁆𑀕𑀮𑀲𑁆𑀲 𑀅𑀕𑁆𑀕𑀳𑀡𑀁, 𑀏𑀯𑀁 𑀉𑀧𑀭𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺𑀆𑀤𑀻𑀲𑀼𑀧𑀺 𑀯𑀺𑀲𑀼𑀁 𑀲𑀗𑁆𑀖𑀸𑀤𑀺𑀲𑀤𑁆𑀤𑁂𑀳𑀺 𑀧𑀼𑀕𑁆𑀕𑀮𑀲𑁆𑀲 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀕𑀳𑀡𑀁 𑀲𑀺𑀬𑀸, 𑀲𑀗𑁆𑀖𑀢𑁄𑀧𑀺 𑀯𑀺𑀲𑀼𑀫𑁆𑀧𑀻𑀢𑀺 𑀪𑀸𑀕𑀤𑁆𑀯𑀬𑀁 𑀮𑀪𑁂𑀬𑁆𑀬 𑀉𑀪𑀬𑀢𑁆𑀣 𑀕𑀳𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀧𑀽𑀚𑁂𑀢𑀩𑁆𑀩𑀦𑁆𑀢𑀺𑀆𑀤𑀺 𑀕𑀺𑀳𑀺𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸𑀢𑀺 𑀇𑀤𑀁 𑀧𑀺𑀡𑁆𑀟𑀧𑀸𑀢𑀳𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑀭𑀺𑀢𑀩𑁆𑀩𑀦𑁆𑀢𑀺 𑀈𑀤𑀺𑀲𑀁 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁨𑁦𑁪. 𑀅𑀦𑁆𑀢𑁄𑀳𑁂𑀫𑀦𑁆𑀢𑁂𑀢𑀺 𑀇𑀫𑀺𑀦𑀸 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀤𑀺𑀦𑁆𑀦𑀁 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀜𑁆𑀜𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀧𑀭𑀁 𑀳𑁂𑀫𑀦𑁆𑀢𑁂 𑀤𑀺𑀦𑁆𑀦𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀫𑁆𑀧𑀺 𑀯𑀼𑀢𑁆𑀣𑀯𑀲𑁆𑀲𑀢𑁆𑀢𑀸 𑀧𑀸𑀧𑀼𑀡𑀸𑀢𑀺, 𑀳𑁂𑀫𑀦𑁆𑀢𑀢𑁄 𑀧𑀦 𑀧𑀭𑀁 𑀧𑀺𑀝𑁆𑀞𑀺𑀲𑀫𑀬𑁂 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑀁 𑀅𑀦𑀦𑁆𑀢𑀭𑁂 𑀯𑀲𑁆𑀲𑁂 𑀯𑀸 𑀢𑀢𑁄 𑀧𑀭𑁂𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀪𑀸𑀯𑁂 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂 𑀧𑀦 𑀲𑀩𑁆𑀩𑀣𑀸 𑀅𑀯𑀼𑀢𑁆𑀣𑀯𑀲𑁆𑀲𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀻𑀢𑀺 𑀯𑀺𑀦𑀬𑀮𑀓𑁆𑀔𑀡𑀜𑁆𑀜𑀼𑀦𑁄 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀻𑀢𑀺 𑀇𑀤𑀁 𑀲𑀦𑁆𑀦𑀺𑀝𑁆𑀞𑀸𑀦𑀯𑀘𑀦𑀁, 𑀅𑀝𑁆𑀞𑀓𑀣𑀸𑀲𑀼 𑀅𑀦𑀸𑀕𑀢𑀢𑁆𑀢𑀸 𑀧𑀦 𑀏𑀯𑀁 𑀯𑀼𑀢𑁆𑀢𑀁. 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁…𑀧𑁂… 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔. 𑀅𑀝𑁆𑀞. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑀘𑁂 𑀧𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁄 ‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀤𑀢𑀺, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀲𑀫𑁆𑀧𑀢𑁆𑀢𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀯𑀲𑁆𑀲𑀸𑀯𑀸𑀲𑀲𑁆𑀲 𑀅𑀦𑀦𑀼𑀭𑀽𑀧𑁂 𑀧𑀤𑁂𑀲𑁂 𑀞𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀜𑁆𑀘 𑀅𑀯𑀼𑀢𑁆𑀣𑀸𑀦𑀜𑁆𑀘 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀪𑀸𑀯𑁂 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀯𑀤𑀢𑀻𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺 𑀯𑀤𑀢𑀺. 𑀅𑀢𑀻𑀢𑀯𑀲𑁆𑀲𑀦𑁆𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀯𑀲𑁆𑀲𑀁.

𑁨𑁦𑁫. 𑀇𑀤𑀸𑀦𑀺 ‘‘𑀆𑀤𑀺𑀲𑁆𑀲 𑀤𑁂𑀢𑀻’’𑀢𑀺 𑀧𑀤𑀁 𑀯𑀺𑀪𑀚𑀦𑁆𑀢𑁄 ‘‘𑀆𑀤𑀺𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀕𑀼𑀬𑀸 𑀯𑀸…𑀧𑁂… 𑀪𑁂𑀲𑀚𑁆𑀚𑁂 𑀯𑀸 𑀆𑀤𑀺𑀲𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑁄 𑀤𑀸𑀬𑀓𑁄 𑀆𑀤𑀺𑀲𑁆𑀲 𑀤𑁂𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀧𑀸𑀓𑀝𑀫𑁂𑀯.

𑁨𑁦𑁬. 𑀇𑀤𑀸𑀦𑀺 ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻’’𑀢𑀺 𑀧𑀤𑀁 𑀯𑀺𑀪𑀚𑀦𑁆𑀢𑁄 𑀆𑀳 ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺. 𑀲𑀗𑁆𑀖𑀢𑁄 𑀘 𑀕𑀡𑀢𑁄 𑀘 𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀸𑀤𑀺𑀧𑀼𑀕𑁆𑀕𑀮𑀲𑁆𑀲 𑀤𑁂𑀦𑁆𑀢𑁄 𑀤𑀸𑀬𑀓𑁄 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀦𑀸𑀫. 𑀢𑀁 𑀧𑀦 𑀧𑀼𑀕𑁆𑀕𑀮𑀺𑀓𑀤𑀸𑀦𑀁 𑀧𑀭𑀫𑁆𑀫𑀼𑀔𑀸 𑀯𑀸 𑀳𑁄𑀢𑀺 𑀲𑀫𑁆𑀫𑀼𑀔𑀸 𑀯𑀸. 𑀢𑀢𑁆𑀣 𑀧𑀭𑀫𑁆𑀫𑀼𑀔𑀸 𑀤𑁂𑀦𑁆𑀢𑁄 ‘‘𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀦𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑁂𑀢𑀺, 𑀲𑀫𑁆𑀫𑀼𑀔𑀸 𑀤𑁂𑀦𑁆𑀢𑁄 𑀘 𑀪𑀺𑀓𑁆𑀔𑀼𑀦𑁄 𑀧𑀸𑀤𑀫𑀽𑀮𑁂 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 ‘‘𑀇𑀤𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀤𑁂𑀢𑀺, 𑀢𑀤𑀼𑀪𑀬𑀣𑀸𑀧𑀺 𑀤𑁂𑀦𑁆𑀢𑁄 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀁 𑀏𑀓𑀲𑁆𑀲𑁂𑀯 𑀤𑁂𑀦𑁆𑀢𑁄 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀦𑀸𑀫, 𑀅𑀣 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁂𑀦𑁆𑀢𑁄𑀧𑀺 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀤𑁆𑀤𑁂𑀲𑀁 𑀅𑀕𑁆𑀕𑀳𑀺𑀢𑀧𑀼𑀩𑁆𑀩𑀲𑁆𑀲𑀧𑀺 𑀉𑀤𑁆𑀤𑁂𑀲𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀽𑀧𑀕𑀫𑀦𑀢𑁄 𑀯𑀼𑀢𑁆𑀢𑀁. 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀉𑀤𑁆𑀤𑁂𑀲𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄. 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀦𑁆𑀢𑀺 𑀇𑀤𑀁 ‘‘𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦’’𑀦𑁆𑀢𑀺 𑀇𑀫𑀲𑁆𑀲𑁂𑀯 𑀯𑀺𑀲𑁂𑀲𑀦𑀁. 𑀢𑁂𑀦 𑀉𑀤𑁆𑀤𑁂𑀲𑀓𑀸𑀮𑁂 𑀆𑀕𑀦𑁆𑀢𑁆𑀯𑀸 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦𑀺𑀯𑀲𑀦𑁆𑀢𑁂 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑁂 𑀦𑀺𑀯𑀢𑁆𑀢𑁂𑀢𑀺.

𑀏𑀯𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁭𑁯) 𑀆𑀕𑀢𑀅𑀝𑁆𑀞𑀫𑀸𑀢𑀺𑀓𑀸𑀯𑀲𑁂𑀦 𑀘𑀻𑀯𑀭𑀯𑀺𑀪𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀫𑀺𑀁𑀬𑁂𑀯 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀫𑀚𑁆𑀛𑁂 𑀆𑀕𑀢𑁂𑀲𑀼 𑀯𑀢𑁆𑀣𑀽𑀲𑀼 𑀆𑀕𑀢𑀦𑀬𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸𑀬 𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀻𑀢𑀺 𑀯𑀺𑀲𑁆𑀲𑀚𑁆𑀚𑀦𑀸, 𑀲𑁂𑀲𑀸𑀦𑀺 𑀜𑀸𑀧𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀧𑀜𑁆𑀘 𑀫𑀸𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀢𑁆𑀣𑀸𑀬 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄. 𑀢𑀢𑁆𑀭𑀼𑀧𑁆𑀧𑀸𑀤𑀢𑁄𑀢𑀺 𑀦𑀸𑀴𑀺𑀓𑁂𑀭𑀸𑀭𑀸𑀫𑀸𑀤𑀺𑀢𑀢𑁆𑀭𑀼𑀧𑁆𑀧𑀸𑀤𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀁 𑀇𑀥 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸𑀢𑀺 𑀯𑀸 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀢𑀁 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀧𑀺 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑁂 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥𑀸𑀢𑀺 𑀅𑀪𑀺𑀮𑀸𑀧𑀫𑀢𑁆𑀢𑀫𑁂𑀯𑁂𑀢𑀁, 𑀇𑀥-𑀲𑀤𑁆𑀤𑀁 𑀯𑀺𑀦𑀸 ‘‘𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑁄 𑀏𑀯 𑀦𑀬𑁄. 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀧𑀺 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀻𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀧𑀺 𑀯𑀼𑀢𑁆𑀣𑀯𑀲𑁆𑀲𑀲𑁆𑀲 𑀧𑀜𑁆𑀘 𑀫𑀸𑀲𑁂 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀧𑀭𑀁 𑀧𑀦 𑀉𑀧𑁆𑀧𑀦𑁆𑀦𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 ‘‘𑀓𑀺𑀁 𑀅𑀢𑀻𑀢𑀯𑀲𑁆𑀲𑁂 𑀇𑀤𑀁 𑀯𑀲𑁆𑀲𑀸𑀯𑀸𑀲𑀺𑀓𑀁, 𑀉𑀤𑀸𑀳𑀼 𑀅𑀦𑀸𑀕𑀢𑀯𑀲𑁆𑀲𑁂’’𑀢𑀺. 𑀢𑀢𑁆𑀣 𑀢𑀢𑁄 𑀧𑀭𑀦𑁆𑀢𑀺 𑀧𑀜𑁆𑀘𑀫𑀸𑀲𑀢𑁄 𑀧𑀭𑀁, 𑀕𑀺𑀫𑁆𑀳𑀸𑀦𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄.

𑀞𑀺𑀢𑀺𑀓𑀸 𑀧𑀦 𑀦 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 𑀅𑀝𑁆𑀞𑀺𑀢𑀸𑀬 𑀞𑀺𑀢𑀺𑀓𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀞𑀺𑀢𑀸𑀬 𑀧𑀦 𑀞𑀺𑀢𑀺𑀓𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀦𑀯𑀓𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀳𑁂𑀝𑁆𑀞𑀸 𑀕𑀘𑁆𑀙𑀢𑀺. 𑀲𑀘𑁂 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀉𑀤𑁆𑀥𑀁 𑀆𑀭𑁄𑀳𑀢𑀺. 𑀅𑀣 𑀅𑀜𑁆𑀜𑁄 𑀦𑀢𑁆𑀣𑀺, 𑀧𑀼𑀦 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀤𑀼𑀕𑁆𑀕𑀳𑀺𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀸𑀦𑀺, 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀸𑀢𑀺𑀢𑁂 𑀓𑀼𑀲𑁂’’𑀢𑀺 𑀏𑀓𑀓𑁄𑀝𑁆𑀞𑀸𑀲𑁂 𑀓𑀼𑀲𑀤𑀡𑁆𑀟𑀓𑁂 𑀧𑀸𑀢𑀺𑀢𑀫𑀢𑁆𑀢𑁂 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀳𑁄𑀢𑀺, 𑀕𑀳𑀺𑀢𑀫𑁂𑀯 𑀦𑀸𑀫 𑀘𑀻𑀯𑀭𑀁. ‘‘𑀦𑀸𑀓𑀸𑀫𑀸 𑀪𑀸𑀕𑁄 𑀤𑀸𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁩), 𑀢𑀢𑁆𑀣 𑀕𑀳𑀺𑀢𑀫𑁂𑀯 𑀦𑀸𑀫𑀸𑀢𑀺 ‘‘𑀇𑀫𑀲𑁆𑀲 𑀇𑀤𑀁 𑀧𑀢𑁆𑀢’’𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀦 𑀯𑀺𑀤𑀺𑀢𑀁, 𑀢𑁂 𑀧𑀦 𑀪𑀸𑀕𑀸 𑀅𑀢𑁆𑀣𑀢𑁄 𑀢𑁂𑀲𑀁 𑀧𑀢𑁆𑀢𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀻𑀢𑀺 𑀇𑀤𑀁 𑀦𑀸𑀦𑀸𑀲𑀻𑀫𑀯𑀺𑀳𑀸𑀭𑁂𑀲𑀼 𑀓𑀢𑁆𑀢𑀩𑁆𑀩𑀦𑀬𑁂𑀦 𑀏𑀓𑀲𑁆𑀫𑀺𑀫𑁆𑀧𑀺 𑀯𑀺𑀳𑀸𑀭𑁂 𑀤𑁆𑀯𑀻𑀲𑀼 𑀲𑁂𑀦𑀸𑀲𑀦𑁂𑀲𑀼 𑀦𑀺𑀯𑀼𑀢𑁆𑀣𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀭𑀼𑀡𑀼𑀝𑁆𑀞𑀸𑀧𑀦𑁂𑀦𑁂𑀯 𑀢𑀢𑁆𑀣 𑀯𑀼𑀢𑁆𑀣𑁄 𑀳𑁄𑀢𑀺, 𑀦 𑀧𑀦 𑀯𑀲𑁆𑀲𑀘𑁆𑀙𑁂𑀤𑀧𑀭𑀺𑀳𑀸𑀭𑀸𑀬. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀲𑁂𑀦𑀸𑀲𑀦𑀁 𑀅𑀧𑁆𑀧𑀯𑀺𑀝𑁆𑀞𑁄𑀧𑀺 𑀯𑀼𑀢𑁆𑀣𑀯𑀲𑁆𑀲𑁄 𑀏𑀯 𑀳𑁄𑀢𑀺. 𑀕𑀳𑀺𑀢𑀲𑁂𑀦𑀸𑀲𑀦𑁂 𑀧𑀦 𑀦𑀺𑀯𑀼𑀢𑁆𑀣𑁄 𑀦𑀸𑀫 𑀦 𑀳𑁄𑀢𑀺, 𑀢𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑁂 𑀲𑀢𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀲𑁆𑀫𑀺𑀁 𑀩𑀳𑀼𑀢𑀭𑀁 𑀦𑀺𑀯𑀲𑀢𑀺 𑀦𑀸𑀫𑀸’’𑀢𑀺. 𑀏𑀢𑁂𑀦 𑀘 𑀇𑀢𑀭𑀲𑁆𑀫𑀺𑀁 𑀲𑀢𑁆𑀢𑀸𑀳𑀯𑀸𑀭𑁂𑀦𑀧𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑁂 𑀲𑀢𑀺 𑀏𑀯 𑀅𑀧𑁆𑀧𑀢𑀭𑀁 𑀦𑀺𑀯𑀲𑀢𑀺 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀇𑀤𑀦𑁆𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑀤𑀸𑀦𑀁. 𑀦𑀸𑀦𑀸𑀮𑀸𑀪𑁂𑀳𑀻𑀢𑀺𑀆𑀤𑀻𑀲𑀼 𑀦𑀸𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀮𑀸𑀪𑁄 𑀏𑀢𑁂𑀲𑀽𑀢𑀺 𑀦𑀸𑀦𑀸𑀮𑀸𑀪𑀸, 𑀤𑁆𑀯𑁂 𑀯𑀺𑀳𑀸𑀭𑀸, 𑀢𑁂𑀳𑀺 𑀦𑀸𑀦𑀸𑀮𑀸𑀪𑁂𑀳𑀺. 𑀦𑀸𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀸𑀓𑀸𑀭𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁄 𑀉𑀧𑀘𑀸𑀭𑁄 𑀏𑀢𑁂𑀲𑀦𑁆𑀢𑀺 𑀦𑀸𑀦𑀽𑀧𑀘𑀸𑀭𑀸, 𑀢𑁂𑀳𑀺 𑀦𑀸𑀦𑀽𑀧𑀘𑀸𑀭𑁂𑀳𑀺. 𑀏𑀓𑀲𑀻𑀫𑀯𑀺𑀳𑀸𑀭𑁂𑀳𑀻𑀢𑀺 𑀏𑀓𑀲𑀻𑀫𑀸𑀬𑀁 𑀤𑁆𑀯𑀻𑀳𑀺 𑀯𑀺𑀳𑀸𑀭𑁂𑀳𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁬𑁪) 𑀯𑀼𑀢𑁆𑀢𑀁. 𑀦𑀸𑀦𑀸𑀮𑀸𑀪𑁂𑀳𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀩𑀤𑁆𑀥𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑁂𑀳𑀺. 𑀦𑀸𑀦𑀽𑀧𑀘𑀸𑀭𑁂𑀳𑀻𑀢𑀺 𑀦𑀸𑀦𑀸𑀧𑀭𑀺𑀓𑁆𑀔𑁂𑀧𑀦𑀸𑀦𑀸𑀤𑁆𑀯𑀸𑀭𑁂𑀳𑀺. 𑀏𑀓𑀲𑀻𑀫𑀯𑀺𑀳𑀸𑀭𑁂𑀳𑀻𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀳𑀸𑀭𑀸𑀦𑀁 𑀏𑀓𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀏𑀓𑀸𑀬 𑀉𑀧𑀘𑀸𑀭𑀲𑀻𑀫𑀸𑀬 𑀅𑀦𑁆𑀢𑁄𑀕𑀢𑁂𑀳𑀺 𑀤𑁆𑀯𑀻𑀳𑀺 𑀯𑀺𑀳𑀸𑀭𑁂𑀳𑀻𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁬𑁪). 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀧𑀞𑀫𑀁 𑀕𑀳𑀺𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀢𑀢𑁆𑀣.

𑁨𑁦𑁭. 𑀪𑀺𑀓𑁆𑀔𑀼𑀲𑁆𑀲 𑀓𑀸𑀮𑀓𑀢𑁂𑀢𑀺 𑀏𑀢𑁆𑀣 𑀓𑀸𑀮𑀓𑀢-𑀲𑀤𑁆𑀤𑁄 𑀪𑀸𑀯𑀲𑀸𑀥𑀦𑁄𑀢𑀺 𑀆𑀳 ‘‘𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺. 𑀧𑀸𑀴𑀺𑀬𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀘𑀻𑀯𑀭𑀤𑀸𑀦𑁂 𑀲𑀸𑀫𑀡𑁂𑀭𑀸𑀦𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀸𑀪𑀸𑀯𑀸 ‘‘𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀁.

𑁨𑁦𑁮. 𑀲𑀘𑁂𑀧𑀺 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀜𑁆𑀜𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀦𑁆𑀢𑀺 𑀢𑀺𑀘𑀻𑀯𑀭𑀧𑀢𑁆𑀢𑀢𑁄 𑀅𑀜𑁆𑀜𑀁. 𑀅𑀧𑁆𑀧𑀕𑁆𑀖𑀦𑁆𑀢𑀺 𑀅𑀢𑀺𑀚𑀺𑀡𑁆𑀡𑀸𑀤𑀺𑀪𑀸𑀯𑁂𑀦 𑀦𑀺𑀳𑀻𑀦𑀁. 𑀢𑀢𑁄𑀢𑀺 𑀅𑀯𑀲𑁂𑀲𑀧𑀭𑀺𑀓𑁆𑀔𑀸𑀭𑀢𑁄. 𑀲𑀩𑁆𑀩𑀦𑁆𑀢𑀺 𑀧𑀢𑁆𑀢𑀁 𑀘𑀻𑀯𑀭𑀜𑁆𑀘. 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲𑁂𑀯. 𑀪𑀺𑀓𑁆𑀔𑀼𑀦𑁄 𑀓𑀸𑀮𑀓𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀇𑀥𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑁆𑀙𑀸𑀯𑀘𑀦𑀢𑁆𑀢𑀸 𑀘 𑀧𑀭𑀺𑀓𑁆𑀔𑀸𑀭𑀲𑁆𑀲 𑀞𑀧𑀺𑀢𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀸𑀴𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓𑀦𑁆𑀢𑀺 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲𑁂𑀯 𑀲𑀦𑁆𑀢𑀓𑀁 𑀳𑀼𑀢𑁆𑀯𑀸 𑀓𑀲𑁆𑀲𑀘𑀺 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓𑀜𑁆𑀘 𑀪𑀯𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀸𑀳𑀓𑁂 𑀅𑀲𑀢𑀺 𑀅𑀤𑀢𑁆𑀯𑀸 𑀪𑀸𑀚𑀺𑀢𑁂𑀧𑀺 𑀲𑀼𑀪𑀸𑀚𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁭𑁬) 𑀢𑀸𑀯 ‘‘𑀬𑀢𑁆𑀣 𑀧𑀦 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 𑀪𑀺𑀓𑁆𑀔𑀽 𑀬𑀲𑁆𑀫𑀺𑀁 𑀭𑀝𑁆𑀞𑁂 𑀤𑀓𑁆𑀔𑀺𑀡𑁄𑀤𑀓𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑁂𑀦𑀧𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀸𑀫𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁭𑁬) 𑀧𑀦 ‘‘𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 𑀏𑀢𑁆𑀢𑀓𑀸𑀦𑀺 𑀘𑀻𑀯𑀭𑀸𑀦𑀺 𑀤𑀲𑁆𑀲𑀸𑀫𑀻𑀢𑀺 𑀧𑀞𑀫𑀁 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀧𑀘𑁆𑀙𑀸 𑀤𑁂𑀦𑁆𑀢𑀺, 𑀢𑀁 𑀬𑁂𑀳𑀺 𑀕𑀳𑀺𑀢𑀁, 𑀢𑁂 𑀪𑀸𑀕𑀺𑀦𑁄𑀯 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀧𑀭𑀲𑀫𑀼𑀤𑁆𑀤𑁂𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀜𑁆𑀳𑀺 𑀉𑀧𑀸𑀤𑀸𑀬𑁂𑀲 𑀏𑀯𑀁 𑀯𑀼𑀢𑁆𑀢𑁄.

‘‘𑀫𑀢𑀓𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀻’’𑀢𑀺 𑀏𑀢𑁆𑀣 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁄 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀅𑀯𑀺𑀳𑀸𑀭𑀝𑁆𑀞𑀸𑀦𑁂 𑀘𑁂 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀤𑀁 𑀘𑀻𑀯𑀭𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀩𑀳𑀼𑀪𑀡𑁆𑀟𑁄 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀓𑀸𑀮𑀓𑀢𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂. 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀼𑀧𑀓𑀸𑀭𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁. 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁯) 𑀇𑀫𑀺𑀦𑀸 𑀧𑀸𑀞𑁂𑀦 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀪𑀺𑀓𑁆𑀔𑀽𑀦𑀁 𑀆𑀫𑀺𑀲𑀤𑀸𑀬𑀚𑁆𑀚𑀁 𑀯𑀺𑀘𑀸𑀭𑁂𑀲𑀺.

𑀢𑀢𑁆𑀣 𑀢𑀺𑀘𑀻𑀯𑀭𑀧𑀢𑁆𑀢𑀅𑀯𑀲𑁂𑀲𑀮𑀳𑀼𑀪𑀡𑁆𑀟𑀕𑀭𑀼𑀪𑀡𑁆𑀟𑀯𑀲𑁂𑀦 𑀆𑀫𑀺𑀲𑀤𑀸𑀬𑀚𑁆𑀚𑀁 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑁂𑀲𑀼 𑀢𑀺𑀘𑀻𑀯𑀭𑀧𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀪𑀸𑀕𑁄 𑀳𑁄𑀢𑀺, 𑀅𑀯𑀲𑁂𑀲𑀮𑀳𑀼𑀪𑀡𑁆𑀟𑀁 𑀲𑀫𑁆𑀫𑀼𑀔𑀻𑀪𑀽𑀢𑀲𑀗𑁆𑀖𑀲𑁆𑀲, 𑀧𑀜𑁆𑀘𑀯𑀻𑀲𑀢𑀺𑀯𑀺𑀥 𑀕𑀭𑀼𑀪𑀡𑁆𑀟𑀁 𑀘𑀸𑀢𑀼𑀤𑁆𑀤𑀺𑀲𑀲𑀗𑁆𑀖𑀲𑁆𑀲. 𑀇𑀫𑀺𑀦𑀸 𑀇𑀢𑁄 𑀢𑀺𑀯𑀺𑀥𑀪𑀡𑁆𑀟𑀢𑁄 𑀅𑀜𑁆𑀜𑀁 𑀪𑀺𑀓𑁆𑀔𑀼𑀪𑀡𑁆𑀟𑀁 𑀦𑀸𑀫 𑀦𑀢𑁆𑀣𑀺, 𑀇𑀫𑁂𑀳𑀺 𑀢𑀺𑀯𑀺𑀥𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀅𑀜𑁆𑀜𑁄 𑀤𑀸𑀬𑀸𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀧𑀦 𑀯𑀺𑀦𑀬𑀥𑀭𑀸 ‘‘𑀪𑀺𑀓𑁆𑀔𑀽𑀦𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀺𑀳𑀺𑀪𑀽𑀢𑀸 𑀜𑀸𑀢𑀓𑀸 𑀮𑀪𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀲𑁆𑀫𑀸𑀢𑀺 𑀘𑁂? ‘‘𑀬𑁂 𑀢𑀲𑁆𑀲 𑀥𑀦𑁂 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀢𑁆𑀢𑀸𑀢𑀺. 𑀲𑀘𑁆𑀘𑀁 𑀆𑀕𑀢𑁄, 𑀲𑁄 𑀧𑀦 𑀧𑀸𑀞𑁄 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀯𑀺𑀲𑀬𑁂 𑀆𑀕𑀢𑁄, 𑀦 𑀤𑀸𑀬𑀚𑁆𑀚𑀕𑀳𑀡𑀝𑁆𑀞𑀸𑀦𑁂. ‘‘𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸’’𑀇𑀘𑁆𑀘𑁂𑀯 𑀆𑀕𑀢𑁄, 𑀦 ‘‘𑀜𑀸𑀢𑀓𑀸 𑀅𑀜𑁆𑀜𑀸𑀢𑀓𑀸 𑀯𑀸’’𑀢𑀺, 𑀢𑀲𑁆𑀫𑀸 𑀜𑀸𑀢𑀓𑀸 𑀯𑀸 𑀳𑁄𑀦𑁆𑀢𑀼 𑀅𑀜𑁆𑀜𑀸𑀢𑀓𑀸 𑀯𑀸, 𑀬𑁂 𑀢𑀁 𑀕𑀺𑀮𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀸𑀕𑀪𑀽𑀢𑀲𑁆𑀲 𑀥𑀦𑀲𑁆𑀲 𑀇𑀲𑁆𑀲𑀭𑀸 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸, 𑀅𑀦𑁆𑀢𑀫𑀲𑁄 𑀫𑀸𑀢𑀼𑀕𑀸𑀫𑀸𑀧𑀺. 𑀢𑁂 𑀲𑀦𑁆𑀥𑀸𑀬 ‘‘𑀢𑁂𑀲𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀬𑁂 𑀕𑀺𑀮𑀸𑀦𑀁 𑀦𑀼𑀧𑀝𑁆𑀞𑀳𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁯) ‘‘𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀫 𑀕𑀺𑀳𑀻 𑀯𑀸 𑀳𑁄𑀢𑀼 𑀧𑀩𑁆𑀩𑀚𑀺𑀢𑁄 𑀯𑀸, 𑀅𑀦𑁆𑀢𑀫𑀲𑁄 𑀫𑀸𑀢𑀼𑀕𑀸𑀫𑁄𑀧𑀺, 𑀲𑀩𑁆𑀩𑁂 𑀪𑀸𑀕𑀁 𑀮𑀪𑀦𑁆𑀢𑀻’’𑀢𑀺.

𑀅𑀣 𑀯𑀸 𑀬𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀜𑀸𑀢𑀓𑀲𑁆𑀲 𑀯𑀸 𑀅𑀜𑁆𑀜𑀸𑀢𑀓𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀅𑀤𑀸𑀲𑀺, 𑀓𑁄𑀘𑀺 𑀘 𑀜𑀸𑀢𑀓𑁄 𑀯𑀸 𑀅𑀜𑁆𑀜𑀸𑀢𑀓𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀯𑀺𑀲𑁆𑀲𑀸𑀲𑀁 𑀅𑀕𑁆𑀕𑀳𑁂𑀲𑀺, 𑀢𑀸𑀤𑀺𑀲𑁂 𑀲𑀦𑁆𑀥𑀸𑀬 ‘‘𑀬𑁂 𑀢𑀲𑁆𑀲 𑀥𑀦𑀲𑁆𑀲 𑀇𑀲𑁆𑀲𑀭𑀸 𑀕𑀳𑀝𑁆𑀞𑀸 𑀯𑀸 𑀧𑀩𑁆𑀩𑀚𑀺𑀢𑀸 𑀯𑀸, 𑀢𑁂𑀲𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀅𑀢𑀸𑀤𑀺𑀲𑁂 𑀜𑀸𑀢𑀓𑁂. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁯) ‘‘𑀲𑀘𑁂 𑀧𑀦 𑀲𑁄 𑀚𑀻𑀯𑀫𑀸𑀦𑁄𑀬𑁂𑀯 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀤𑀸𑀲𑀺, 𑀓𑁄𑀘𑀺 𑀯𑀸 𑀯𑀺𑀲𑁆𑀲𑀸𑀲𑀁 𑀅𑀕𑁆𑀕𑀳𑁂𑀲𑀺, 𑀬𑀲𑁆𑀲 𑀤𑀺𑀦𑁆𑀦𑀁, 𑀬𑁂𑀦 𑀘 𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀲 𑀭𑀼𑀘𑀺𑀬𑀸 𑀏𑀯 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀮𑀪𑀦𑁆𑀢𑀻’’𑀢𑀺. 𑀏𑀯𑀁 𑀳𑁄𑀢𑀼, 𑀓𑀧𑁆𑀧𑀺𑀬𑀪𑀡𑁆𑀟𑁂 𑀧𑀦 𑀓𑀣𑀦𑁆𑀢𑀺? 𑀢𑀫𑁆𑀧𑀺 ‘‘𑀕𑀺𑀳𑀺𑀜𑀸𑀢𑀓𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀝𑀻𑀓𑀸𑀲𑀼 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁.

𑀘𑀻𑀯𑀭𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸

𑁨𑁦𑁯. 𑀇𑀤𑀸𑀦𑀺 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀲𑁂𑀦𑀸𑀲𑀦𑀪𑀸𑀚𑀦𑁂𑀬𑁂𑀯 𑀧𑀞𑀫𑀁 𑀆𑀕𑀢𑁂𑀧𑀺 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀯𑀺𑀦𑀺𑀘𑁆𑀙𑀬𑀢𑁆𑀢𑀸 𑀧𑀘𑁆𑀘𑀬𑀸𑀦𑀼𑀓𑁆𑀓𑀫𑁂𑀦 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀁 𑀧𑀞𑀫𑀁 𑀤𑀲𑁆𑀲𑁂𑀢𑀺. 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑁂 𑀧𑀦 𑀲𑀗𑁆𑀖𑀪𑀢𑁆𑀢𑀸𑀤𑀻𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀏𑀢𑀸𑀦𑀺 𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸𑀦𑀻𑀢𑀺 𑀆𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀅𑀦𑀼𑀜𑁆𑀜𑀸𑀢𑁂𑀲𑀽’’𑀢𑀺. 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀆𑀪𑀢𑀁 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁 𑀬𑀣𑀸 ‘‘𑀆𑀕𑀦𑁆𑀢𑀼𑀓𑀲𑁆𑀲 𑀆𑀪𑀢𑀁 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢’’𑀦𑁆𑀢𑀺. 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑁆𑀲 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁. 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀪𑀢𑁆𑀢𑀁. 𑀲𑀮𑀸𑀓𑀁 𑀧𑀸𑀢𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁 𑀪𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁. 𑀧𑀓𑁆𑀔𑁂 𑀧𑀓𑁆𑀔𑀤𑀺𑀯𑀲𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀓𑁆𑀔𑀪𑀢𑁆𑀢𑀁. 𑀉𑀧𑁄𑀲𑀣𑁂 𑀉𑀧𑁄𑀲𑀣𑀤𑀺𑀯𑀲𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀧𑁄𑀲𑀣𑀪𑀢𑁆𑀢𑀁. 𑀧𑀸𑀝𑀺𑀧𑀤𑁂 𑀉𑀧𑁄𑀲𑀣𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀸𑀝𑀺𑀧𑀤𑀪𑀢𑁆𑀢𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀞𑀺𑀢𑀺𑀓𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀗𑁆𑀖𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑀡𑀁 𑀞𑀺𑀢𑀺𑀓𑀸 𑀦𑀸𑀫.

𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂𑀢𑀺 𑀯𑀺𑀳𑀸𑀭𑀲𑁆𑀲 𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀫𑀻𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑁄𑀚𑀦𑀲𑀸𑀮𑀸𑀬𑀸𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀪𑀽𑀢𑀸𑀬 𑀪𑁄𑀚𑀦𑀲𑀸𑀮𑀸𑀬𑀁. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀓𑁄𑀝𑁆𑀞𑀸𑀲𑁂𑀦. 𑀤𑀺𑀦𑁆𑀦𑀁 𑀧𑀦𑀸𑀢𑀺 𑀯𑀢𑁆𑀯𑀸 𑀬𑀣𑀸 𑀲𑁄 𑀤𑀸𑀬𑀓𑁄 𑀯𑀤𑀢𑀺, 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀖𑀢𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀖𑀭𑁂𑀢𑀺 𑀅𑀦𑁆𑀢𑁄𑀕𑁂𑀳𑁂. 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀦𑁆𑀢𑀺 𑀏𑀢𑁆𑀣 𑀕𑀸𑀫𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑁂𑀲𑀼 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑀁 𑀉𑀧𑀘𑀸𑀭𑁄 𑀦𑀸𑀫.

𑀅𑀦𑁆𑀢𑀭𑀖𑀭𑀲𑁆𑀲 𑀉𑀧𑀘𑀸𑀭𑁂 𑀧𑀦 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀖𑀭𑀽𑀧𑀘𑀸𑀭𑁄 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀯𑀴𑀜𑁆𑀚𑀦𑁆𑀢𑀺 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀁. 𑀦𑀸𑀦𑀸𑀦𑀺𑀯𑁂𑀲𑀦𑁂𑀲𑀽𑀢𑀺 𑀦𑀸𑀦𑀸𑀓𑀼𑀮𑀲𑁆𑀲 𑀦𑀸𑀦𑀽𑀧𑀘𑀸𑀭𑁂𑀲𑀼 𑀦𑀺𑀯𑁂𑀲𑀦𑁂𑀲𑀼. 𑀮𑀚𑁆𑀚𑀻 𑀧𑁂𑀲𑀮𑁄 𑀅𑀕𑀢𑀺𑀕𑀫𑀦𑀁 𑀯𑀚𑁆𑀚𑁂𑀢𑁆𑀯𑀸 𑀫𑁂𑀥𑀸𑀯𑀻 𑀘 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀉𑀤𑁆𑀤𑀺𑀲𑀢𑀻𑀢𑀺 𑀆𑀳 ‘‘𑀧𑁂𑀲𑀮𑁄 𑀮𑀚𑁆𑀚𑀻 𑀫𑁂𑀥𑀸𑀯𑀻 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀻𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀯𑀼𑀟𑁆𑀠𑀢𑀭𑁂 𑀦𑀺𑀤𑁆𑀤𑀸𑀬𑀦𑁆𑀢𑁂 𑀦𑀯𑀓𑀲𑁆𑀲 𑀕𑀸𑀳𑀺𑀢𑀁 𑀲𑀼𑀕𑁆𑀕𑀸𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀁 𑀯𑀸𑀢𑀺 𑀏𑀢𑁆𑀣 ‘‘𑀉𑀤𑀓𑀫𑀢𑁆𑀢𑀮𑀸𑀪𑀻 𑀯𑀺𑀬 𑀅𑀜𑁆𑀜𑁄𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀯𑀢𑁆𑀣𑀸𑀤𑀺𑀅𑀦𑁂𑀓𑀧𑁆𑀧𑀓𑀸𑀭𑀓𑀁 𑀮𑀪𑀢𑀺 𑀘𑁂, 𑀢𑀲𑁆𑀲𑁂𑀯 𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀆𑀳𑀭𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀦𑀸𑀫. 𑀬𑀁 𑀇𑀘𑁆𑀙𑀢𑀻𑀢𑀺 ‘‘𑀉𑀤𑁆𑀤𑁂𑀲𑀪𑀢𑁆𑀢𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀬𑀁 𑀇𑀘𑁆𑀙𑀢𑀺. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦𑀸𑀢𑀺 𑀧𑀼𑀘𑁆𑀙𑀸𑀲𑀤𑀺𑀲𑁂𑀦.

‘‘𑀏𑀓𑀸 𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀞𑀺𑀢𑀺𑀓𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀭𑀜𑁆𑀜𑁄 𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀜𑁆𑀜𑁂𑀳𑀺 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀳𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀯𑀺𑀲𑀼𑀁𑀬𑁂𑀯 𑀞𑀺𑀢𑀺𑀓𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀻𑀢𑀺 𑀧𑀢𑁆𑀢𑀳𑀸𑀭𑀓𑀸 𑀳𑀭𑀦𑁆𑀢𑀺. 𑀕𑀻𑀯𑀸 𑀳𑁄𑀢𑀻𑀢𑀺 𑀆𑀡𑀸𑀧𑀓𑀲𑁆𑀲 𑀕𑀻𑀯𑀸 𑀳𑁄𑀢𑀺. 𑀲𑀩𑁆𑀩𑀁 𑀧𑀢𑁆𑀢𑀲𑁆𑀲𑀸𑀫𑀺𑀓𑀲𑁆𑀲 𑀳𑁄𑀢𑀻𑀢𑀺 𑀘𑀻𑀯𑀭𑀸𑀤𑀺𑀓𑀫𑁆𑀧𑀺 𑀲𑀩𑁆𑀩𑀁 𑀧𑀢𑁆𑀢𑀲𑁆𑀲𑀸𑀫𑀺𑀓𑀲𑁆𑀲𑁂𑀯 𑀳𑁄𑀢𑀺, ‘‘𑀫𑀬𑀸 𑀪𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀘𑀻𑀯𑀭𑀸𑀤𑀺’’𑀦𑁆𑀢𑀺 𑀯𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀅𑀓𑀢𑀪𑀸𑀕𑁄 𑀦𑀸𑀫𑀸𑀢𑀺 𑀆𑀕𑀦𑁆𑀢𑀼𑀓𑀪𑀸𑀕𑁄 𑀦𑀸𑀫, 𑀅𑀤𑀺𑀦𑁆𑀦𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀽𑀜𑁆𑀚𑀢𑀽𑀢𑀺 𑀯𑀼𑀢𑁆𑀢𑁂𑀢𑀺 𑀏𑀢𑁆𑀣 ‘‘𑀧𑀞𑀫𑀫𑁂𑀯 ‘𑀲𑀩𑁆𑀩𑀲𑀗𑁆𑀖𑀺𑀓𑀪𑀢𑁆𑀢𑀁 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀧𑀘𑁆𑀙𑀸 ‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑀺𑀁 𑀆𑀳𑀭𑀻𑀬𑀢𑀻𑀢𑀺 𑀅𑀯𑀢𑁆𑀯𑀸𑀢𑀺 ‘‘𑀓𑀢𑀭𑀪𑀢𑁆𑀢𑀁 𑀢𑀬𑀸 𑀆𑀳𑀭𑀻𑀬𑀢𑀻’’𑀢𑀺 𑀤𑀸𑀬𑀓𑀁 𑀅𑀧𑀼𑀘𑁆𑀙𑀺𑀢𑁆𑀯𑀸. 𑀧𑀓𑀢𑀺𑀞𑀺𑀢𑀺𑀓𑀸𑀬𑀸𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀞𑀺𑀢𑀺𑀓𑀸𑀬.

𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁨𑁧𑁦. ‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀁 𑀦𑀺𑀫𑀦𑁆𑀢𑀦𑀁 𑀦𑀸𑀫. 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀪𑀺𑀓𑁆𑀔𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀮𑀤𑁆𑀥𑀧𑀝𑀺𑀧𑀸𑀝𑀺𑀬𑀸. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀤𑀁 𑀅𑀯𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀪𑀢𑁆𑀢𑀦𑁆𑀢𑀺 𑀅𑀯𑀤𑀦𑁆𑀢𑁂𑀦𑀸’’𑀢𑀺. 𑀆𑀮𑁄𑀧𑀲𑀗𑁆𑀔𑁂𑀧𑁂𑀦𑀸𑀢𑀺 𑀏𑀓𑁂𑀓𑀧𑀺𑀡𑁆𑀟𑀯𑀲𑁂𑀦. 𑀅𑀬𑀜𑁆𑀘 𑀦𑀬𑁄 𑀦𑀺𑀫𑀦𑁆𑀢𑀦𑁂𑀬𑁂𑀯, 𑀦 𑀉𑀤𑁆𑀤𑁂𑀲𑀪𑀢𑁆𑀢𑁂. 𑀢𑀲𑁆𑀲 𑀳𑀺 𑀏𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑀁𑀬𑁂𑀯 𑀪𑀸𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀉𑀤𑁆𑀤𑁂𑀲𑀪𑀢𑁆𑀢𑁂 𑀆𑀮𑁄𑀧𑀝𑁆𑀞𑀺𑀢𑀺𑀓𑀸 𑀦𑀸𑀫 𑀦𑀢𑁆𑀣𑀺.

𑀆𑀭𑀼𑀴𑁆𑀳𑀸𑀬𑁂𑀯 𑀫𑀸𑀢𑀺𑀓𑀁. 𑀲𑀗𑁆𑀖𑀢𑁄 𑀅𑀝𑁆𑀞 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀬𑁂 𑀫𑀸𑀢𑀺𑀓𑀁 𑀆𑀭𑀼𑀴𑁆𑀳𑀸, 𑀢𑁂 𑀅𑀝𑁆𑀞 𑀪𑀺𑀓𑁆𑀔𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀤𑁆𑀤𑁂𑀲𑀪𑀢𑁆𑀢𑀦𑀺𑀫𑀦𑁆𑀢𑀦𑀪𑀢𑁆𑀢𑀸𑀤𑀺𑀲𑀗𑁆𑀖𑀺𑀓𑀪𑀢𑁆𑀢𑀫𑀸𑀢𑀺𑀓𑀸𑀲𑀼 𑀦𑀺𑀫𑀦𑁆𑀢𑀦𑀪𑀢𑁆𑀢𑀫𑀸𑀢𑀺𑀓𑀸𑀬 𑀞𑀺𑀢𑀺𑀓𑀸𑀯𑀲𑁂𑀦 𑀆𑀭𑀼𑀴𑁆𑀳𑁂 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀯𑀸 𑀲𑀬𑀁 𑀯𑀸 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀦 𑀅𑀢𑁆𑀢𑀦𑀸 𑀭𑀼𑀘𑀺𑀢𑁂 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 ‘‘𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀸𑀢𑀺𑀓𑀸𑀪𑁂𑀤𑀁 𑀤𑀸𑀬𑀓𑀲𑁆𑀲 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀏𑀓𑀯𑀸𑀭𑀦𑁆𑀢𑀺 𑀬𑀸𑀯 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺 𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀮𑀪𑀦𑁆𑀢𑀻’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀏𑀓𑀯𑀸𑀭𑀦𑁆𑀢𑀺 𑀦 𑀏𑀓𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀢𑁆𑀢𑀓𑀸 𑀧𑀦 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺, 𑀢𑁂 𑀲𑀩𑁆𑀩𑁂. 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀕𑀳𑀺𑀢𑀪𑀺𑀓𑁆𑀔𑀽 𑀅𑀜𑁆𑀜𑀤𑀸 𑀅𑀕𑁆𑀕𑀳𑁂𑀢𑁆𑀯𑀸 𑀬𑀸𑀯 𑀏𑀓𑀯𑀸𑀭𑀁 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀪𑁄𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀚𑀸𑀦𑀸𑀢𑀺 𑀘𑁂, 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀧𑀝𑀺𑀩𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀢𑀢𑁆𑀣𑁂𑀯 𑀯𑀸𑀲𑀲𑁆𑀲 𑀦𑀺𑀩𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁨𑁧𑁧. 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀮𑀺𑀔𑀺𑀢𑁆𑀯𑀸. 𑀕𑀸𑀫𑀯𑀲𑁂𑀦𑀧𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀲𑀫𑀮𑀸𑀪𑀕𑀸𑀫𑀯𑀲𑁂𑀦𑀧𑀺. 𑀩𑀳𑀽𑀦𑀺 𑀲𑀮𑀸𑀓𑀪𑀢𑁆𑀢𑀸𑀦𑀻𑀢𑀺 𑀢𑀺𑀁𑀲𑀁 𑀯𑀸 𑀘𑀢𑁆𑀢𑀸𑀭𑀻𑀲𑀁 𑀯𑀸 𑀪𑀢𑁆𑀢𑀸𑀦𑀺. 𑀲𑀘𑁂 𑀳𑁄𑀦𑁆𑀢𑀻𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀢𑀸𑀦𑀺 𑀪𑀢𑁆𑀢𑀸𑀦𑀺 𑀧𑀫𑀸𑀡𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀦𑀺𑀕𑁆𑀕𑀳𑁂𑀦 𑀤𑀢𑁆𑀯𑀸𑀢𑀺 𑀤𑀽𑀭𑀁 𑀕𑀦𑁆𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀦𑀺𑀕𑁆𑀕𑀳𑁂𑀦 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸. 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸𑀢𑀺 𑀏𑀢𑁆𑀣 𑀯𑀺𑀳𑀸𑀭𑀁 𑀅𑀦𑀸𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀯𑀺𑀳𑀸𑀭𑁂 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀏𑀓𑀕𑁂𑀳𑀯𑀲𑁂𑀦𑀸𑀢𑀺 𑀯𑀻𑀣𑀺𑀬𑀫𑁆𑀧𑀺 𑀏𑀓𑀧𑀲𑁆𑀲𑁂 𑀖𑀭𑀧𑀸𑀴𑀺𑀬𑀸 𑀯𑀲𑁂𑀦. 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀻𑀢𑀺 ‘‘𑀅𑀲𑀼𑀓𑀓𑀼𑀮𑁂 𑀲𑀮𑀸𑀓𑀪𑀢𑁆𑀢𑀸𑀦𑀺 𑀢𑀼𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀯𑀢𑁆𑀯𑀸.

𑁨𑁧𑁨. 𑀯𑀸𑀭𑀕𑀸𑀫𑁂𑀢𑀺 𑀅𑀢𑀺𑀤𑀽𑀭𑀢𑁆𑀢𑀸 𑀯𑀸𑀭𑁂𑀦 𑀕𑀦𑁆𑀢𑀩𑁆𑀩𑀕𑀸𑀫𑁂. 𑀲𑀝𑁆𑀞𑀺𑀢𑁄 𑀯𑀸 𑀧𑀡𑁆𑀡𑀸𑀲𑀢𑁄 𑀯𑀸𑀢𑀺 𑀤𑀡𑁆𑀟𑀓𑀫𑁆𑀫𑀢𑁆𑀣𑀸𑀬 𑀉𑀤𑀓𑀖𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀯𑀸𑀭𑁄𑀢𑀺 𑀲𑀩𑁆𑀩𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀸𑀬 𑀕𑀢𑁂𑀲𑀼 𑀯𑀺𑀳𑀸𑀭𑀭𑀓𑁆𑀔𑀡𑀯𑀸𑀭𑁄. 𑀦𑁂𑀲𑀦𑁆𑀢𑀺 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁. 𑀨𑀸𑀢𑀺𑀓𑀫𑁆𑀫𑀫𑁂𑀯𑀸𑀢𑀺 𑀯𑀺𑀳𑀸𑀭𑀭𑀓𑁆𑀔𑀡𑀓𑀺𑀘𑁆𑀘𑀲𑁆𑀲 𑀧𑀳𑁄𑀦𑀓𑀧𑀝𑀺𑀧𑀸𑀤𑀦𑀫𑁂𑀯. 𑀤𑀽𑀭𑀢𑁆𑀢𑀸 𑀦𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀯𑀸𑀭𑁂𑀦 𑀕𑀳𑁂𑀢𑀩𑁆𑀩𑁄 𑀕𑀸𑀫𑁄 𑀯𑀸𑀭𑀕𑀸𑀫𑁄. 𑀯𑀺𑀳𑀸𑀭𑀯𑀸𑀭𑁂 𑀦𑀺𑀬𑀼𑀢𑁆𑀢𑀸 𑀯𑀺𑀳𑀸𑀭𑀯𑀸𑀭𑀺𑀓𑀸, 𑀯𑀸𑀭𑁂𑀦 𑀯𑀺𑀳𑀸𑀭𑀭𑀓𑁆𑀔𑀡𑀓𑀸. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀁. 𑀨𑀸𑀢𑀺𑀓𑀫𑁆𑀫𑀫𑁂𑀯 𑀪𑀯𑀦𑁆𑀢𑀻𑀢𑀺 𑀯𑀺𑀳𑀸𑀭𑀭𑀓𑁆𑀔𑀡𑀢𑁆𑀣𑀸𑀬 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑀸 𑀅𑀢𑀺𑀭𑁂𑀓𑀮𑀸𑀪𑀸 𑀳𑁄𑀦𑁆𑀢𑀺. 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀻𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑁂𑀓𑀲𑁆𑀲𑁂𑀯 𑀧𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑁂𑀓𑀲𑁆𑀲 𑀧𑀸𑀧𑀺𑀢𑀸𑀦𑀺 𑀤𑁆𑀯𑁂 𑀢𑀻𑀡𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀝𑁆𑀞𑀸𑀦𑁂 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂.

𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀧𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦 𑀘𑁂 𑀪𑀺𑀓𑁆𑀔𑀽 𑀩𑀳𑀺𑀲𑀻𑀫𑀕𑀢𑀸 𑀳𑁄𑀦𑁆𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀸𑀧𑁂𑀢𑀩𑁆𑀩𑀁 𑀲𑀪𑀸𑀕𑀢𑁆𑀢𑀸 𑀏𑀓𑁂𑀦 𑀮𑀤𑁆𑀥𑀁 𑀲𑀩𑁆𑀩𑁂𑀲𑀁 𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀭𑀲𑀲𑀮𑀸𑀓𑀦𑁆𑀢𑀺 𑀉𑀘𑁆𑀙𑀼𑀭𑀲𑀲𑀮𑀸𑀓𑀁. 𑀲𑀮𑀸𑀓𑀯𑀲𑁂𑀦 𑀧𑀦 𑀕𑀸𑀳𑀺𑀢𑀢𑁆𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸𑀢𑀺 𑀇𑀤𑀁 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀥𑀼𑀢𑀗𑁆𑀕𑀪𑁂𑀤𑀯𑀲𑁂𑀦. ‘‘𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸…𑀧𑁂… 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁬) 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁫) 𑁋 𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸𑀧𑀺 𑀯𑀺𑀳𑀸𑀭𑁂 𑀧𑀓𑁆𑀓𑀪𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁬) 𑀯𑀼𑀢𑁆𑀢𑀢𑁆𑀢𑀸, ‘‘𑀏𑀯𑀁 𑀕𑀸𑀳𑀺𑀢𑁂 𑀲𑀸𑀤𑀺𑀢𑀩𑁆𑀩𑀁, 𑀏𑀯𑀁 𑀦 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸𑀬𑁄 𑀘𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀦𑁆𑀢𑀺, 𑀲𑀮𑀸𑀓𑀯𑀲𑁂𑀦 𑀧𑀦 𑀕𑀸𑀳𑀺𑀢𑀢𑁆𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸’’𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀬𑀤𑀺 𑀳𑀺 𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸 𑀲𑀮𑀸𑀓𑀯𑀲𑁂𑀦 𑀕𑀸𑀳𑀺𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸 𑀲𑀺𑀬𑀸, ‘‘𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀦 𑀯𑀤𑁂𑀬𑁆𑀬, ‘‘𑀅𑀢𑀺𑀭𑁂𑀓𑀮𑀸𑀪𑁄 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁨𑁮) 𑀘 ‘‘𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀲𑀮𑀸𑀓𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁 𑀪𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀦 𑀪𑁂𑀲𑀚𑁆𑀚𑀁. 𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀺 𑀳𑀺 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺𑀬𑁂𑀯 𑀢𑁂𑀦 𑀦 𑀲𑀸𑀤𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺. 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀯𑀸 𑀫𑀢𑁂𑀦 𑀇𑀥 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀢𑁄 𑀤𑀸𑀢𑀩𑁆𑀩𑀸 𑀪𑀺𑀓𑁆𑀔𑀸 𑀅𑀕𑁆𑀕𑀪𑀺𑀓𑁆𑀔𑀸. 𑀅𑀕𑁆𑀕𑀪𑀺𑀓𑁆𑀔𑀸𑀫𑀢𑁆𑀢𑀦𑁆𑀢𑀺 𑀏𑀓𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀁. 𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀲𑁆𑀯𑁂𑀧𑀺 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀮𑀤𑁆𑀥𑁂𑀧𑀺 𑀅𑀧𑁆𑀧𑀫𑀢𑁆𑀢𑀢𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀸𑀯𑀤𑀢𑁆𑀣𑀁 𑀮𑀪𑀢𑀺…𑀧𑁂… 𑀅𑀮𑀪𑀺𑀢𑁆𑀯𑀸 𑀲𑁆𑀯𑁂 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺. 𑀅𑀕𑁆𑀕𑀪𑀺𑀓𑁆𑀔𑀫𑀢𑁆𑀢𑀦𑁆𑀢𑀺 𑀳𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀩𑀳𑀼𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀺.

𑀲𑀮𑀸𑀓𑀪𑀢𑁆𑀢𑀁 𑀦𑀸𑀫 𑀯𑀺𑀳𑀸𑀭𑁂𑀬𑁂𑀯 𑀉𑀤𑁆𑀤𑀺𑀲𑀻𑀬𑀢𑀺 𑀯𑀺𑀳𑀸𑀭𑀫𑁂𑀯 𑀲𑀦𑁆𑀥𑀸𑀬 𑀤𑀻𑀬𑀫𑀸𑀦𑀢𑁆𑀢𑀸𑀢𑀺 𑀆𑀳 ‘‘𑀯𑀺𑀳𑀸𑀭𑁂 𑀅𑀧𑀸𑀧𑀺𑀢𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀭 𑀆𑀲𑀦𑀲𑀸𑀮𑀸𑀬𑀸𑀢𑀺 𑀢𑀲𑁆𑀫𑀺𑀁 𑀕𑀸𑀫𑁂 𑀆𑀲𑀦𑀲𑀸𑀮𑀸𑀬. 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀢𑀣𑀸 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀤𑀺𑀦𑁆𑀦𑀪𑀢𑁆𑀢𑀁 𑀯𑀺𑀳𑀸𑀭𑀫𑁂𑀯 𑀆𑀦𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂. 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀢𑀁 𑀯𑀸𑀭𑀕𑀸𑀫𑀲𑀮𑀸𑀓𑀁 𑀅𑀢𑁆𑀢𑀦𑀸 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑁄 𑀧𑀢𑁆𑀢𑀯𑀸𑀭𑀕𑀸𑀫𑁂 𑀲𑀮𑀸𑀓𑀁 𑀤𑀺𑀲𑀸𑀕𑀫𑀺𑀓𑀲𑁆𑀲 𑀅𑀤𑀸𑀲𑀺, 𑀢𑁂𑀦. 𑀅𑀦𑀢𑀺𑀓𑁆𑀓𑀫𑀦𑁆𑀢𑁂𑀬𑁂𑀯 𑀢𑀲𑁆𑀫𑀺𑀁 𑀢𑀲𑁆𑀲 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸𑀢𑀺 𑀬𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀝𑁆𑀞𑀲𑁆𑀲𑁂𑀯 𑀲𑀮𑀸𑀓𑀸 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀤𑀺𑀲𑀁𑀕𑀫𑀺𑀓𑁂 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀲𑁆𑀲 𑀤𑀺𑀲𑀁𑀕𑀫𑀺𑀓𑀲𑁆𑀲 𑀧𑀢𑁆𑀢𑀲𑀮𑀸𑀓𑀸 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀸.

𑀤𑁂𑀯𑀲𑀺𑀓𑀁 𑀧𑀸𑀧𑁂𑀢𑀩𑁆𑀩𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑁂𑀢𑀩𑁆𑀩𑀸. 𑀏𑀯𑀁 𑀏𑀢𑁂𑀲𑀼 𑀅𑀦𑀸𑀕𑀢𑁂𑀲𑀼 𑀆𑀲𑀦𑁆𑀦𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀢𑀭𑀣𑀸 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀅𑀦𑀸𑀕𑀢𑀤𑀺𑀯𑀲𑁂𑀢𑀺 𑀏𑀢𑁆𑀣 𑀓𑀣𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀬𑀲𑁆𑀫𑀸 𑀢𑀢𑁄 𑀢𑀢𑁄 𑀆𑀕𑀢𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀕𑀸𑀫𑁂 𑀆𑀲𑀦𑀲𑀸𑀮𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀅𑀫𑁆𑀳𑀸𑀓𑀁 𑀕𑁄𑀘𑀭𑀕𑀸𑀫𑁂𑀢𑀺 𑀲𑀮𑀸𑀓𑀪𑀢𑁆𑀢𑀤𑀸𑀬𑀓𑀸𑀦𑀁 𑀕𑀸𑀫𑁂. 𑀪𑀼𑀜𑁆𑀚𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 ‘‘𑀫𑀳𑀸𑀣𑁂𑀭𑁄 𑀏𑀓𑀓𑁄𑀯 𑀯𑀺𑀳𑀸𑀭𑁂 𑀑𑀳𑀻𑀦𑁄 𑀅𑀯𑀲𑁆𑀲𑀁 𑀲𑀩𑁆𑀩𑀲𑀮𑀸𑀓𑀸 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀆𑀕𑀘𑁆𑀙𑀦𑁆𑀢𑀺.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁧𑁩. 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀘𑀢𑀽𑀲𑀼 𑀧𑀓𑁆𑀔𑀤𑀺𑀯𑀲𑁂𑀲𑀼 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀓𑁆𑀔𑀺𑀓𑀁. 𑀅𑀪𑀺𑀮𑀓𑁆𑀔𑀺𑀢𑁂𑀲𑀽𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀸𑀭𑀫𑀢𑁆𑀢𑀁, 𑀮𑀓𑁆𑀔𑀡𑀺𑀬𑁂𑀲𑀼𑀇𑀘𑁆𑀘𑁂𑀯𑀢𑁆𑀣𑁄, 𑀉𑀧𑁄𑀲𑀣𑀲𑀫𑀸𑀤𑀸𑀦𑀥𑀫𑁆𑀫𑀲𑁆𑀲𑀯𑀦𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀺𑀓𑀭𑀡𑀢𑁆𑀣𑀁 𑀮𑀓𑁆𑀔𑀺𑀢𑀩𑁆𑀩𑁂𑀲𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁂𑀲𑀼 𑀉𑀧𑀮𑀓𑁆𑀔𑁂𑀢𑀩𑁆𑀩𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑁂 𑀧𑀓𑁆𑀔𑁄𑀢𑀺 𑀅𑀚𑁆𑀚𑀧𑀓𑁆𑀔𑀺𑀓𑀁 𑀦 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀅𑀝𑁆𑀞𑀫𑀺𑀬𑀸 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀲𑀢𑁆𑀢𑀫𑀺𑀬𑀸 𑀪𑀼𑀜𑁆𑀚𑀦𑀢𑁆𑀣𑀸𑀬 𑀦 𑀕𑀸𑀳𑁂𑀢𑀩𑁆𑀩𑀁, 𑀤𑀸𑀬𑀓𑁂𑀳𑀺 𑀦𑀺𑀬𑀫𑀺𑀢𑀤𑀺𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀲𑁆𑀯𑁂 𑀮𑀽𑀔𑀦𑁆𑀢𑀺 𑀅𑀚𑁆𑀚 𑀆𑀯𑀸𑀳𑀫𑀗𑁆𑀕𑀮𑀸𑀤𑀺𑀓𑀭𑀡𑀢𑁄 𑀅𑀢𑀺𑀧𑀡𑀻𑀢𑀁 𑀪𑁄𑀚𑀦𑀁 𑀓𑀭𑀻𑀬𑀢𑀺, 𑀲𑁆𑀯𑁂 𑀢𑀣𑀸 𑀦 𑀪𑀯𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀪𑀺𑀓𑁆𑀔𑀽 𑀪𑁄𑀚𑁂𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁨𑁫) 𑀧𑀦 𑀅𑀜𑁆𑀜𑀣𑀸 𑀯𑀼𑀢𑁆𑀢𑀁. 𑀧𑀓𑁆𑀔𑀺𑀓𑀪𑀢𑁆𑀢𑀢𑁄 𑀉𑀧𑁄𑀲𑀣𑀺𑀓𑀪𑀢𑁆𑀢𑀲𑁆𑀲 𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸’’𑀢𑀺𑀆𑀤𑀺. 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀁.

𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁧𑁪. 𑀦𑀺𑀩𑀦𑁆𑀥𑀸𑀧𑀺𑀢𑀦𑁆𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀆𑀕𑀦𑁆𑀢𑀼𑀓𑀸 𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀦𑀺𑀬𑀫𑀺𑀢𑀁. 𑀕𑀫𑀺𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁆𑀧𑀻𑀢𑀺 𑀕𑀸𑀫𑀦𑁆𑀢𑀭𑀢𑁄 𑀆𑀕𑀦𑁆𑀢𑁆𑀯𑀸 𑀅𑀯𑀽𑀧𑀲𑀦𑁆𑀢𑁂𑀦 𑀕𑀫𑀺𑀓𑀘𑀺𑀢𑁆𑀢𑁂𑀦 𑀯𑀲𑀺𑀢𑁆𑀯𑀸 𑀧𑀼𑀦 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀆𑀯𑀸𑀲𑀺𑀓𑀲𑁆𑀲 𑀧𑀦 𑀕𑀦𑁆𑀢𑀼𑀓𑀸𑀫𑀲𑁆𑀲 𑀕𑀫𑀺𑀓𑀪𑀢𑁆𑀢𑀫𑁂𑀯 𑀮𑀩𑁆𑀪𑀢𑀺. ‘‘𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀮𑁂𑀲𑀸𑀪𑀸𑀯𑁂𑀦 𑀬𑀸𑀯 𑀕𑀫𑀦𑀧𑀭𑀺𑀩𑀦𑁆𑀥𑁄 𑀯𑀺𑀕𑀘𑁆𑀙𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀜𑀸𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀥𑀼𑀭𑀪𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑁂𑀲𑁂𑀦𑁆𑀢𑀺…𑀧𑁂… 𑀯𑀝𑁆𑀝𑀢𑀻𑀢𑀺 𑀅𑀪𑀺𑀳𑀝𑀪𑀺𑀓𑁆𑀔𑀢𑁆𑀢𑀸 𑀯𑀝𑁆𑀝𑀢𑀺.

𑁨𑁧𑁬. 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀪𑀺𑀓𑁆𑀔𑀸𑀦𑀸𑀫𑁂𑀦 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀣𑀓𑁂𑀢𑁆𑀯𑀸 𑀤𑀺𑀦𑁆𑀦𑀦𑁆𑀢𑀺 ‘‘𑀕𑀼𑀴𑀓𑀪𑀢𑁆𑀢𑀁 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸

𑁨𑁧𑁭. 𑀇𑀢𑁄 𑀧𑀭𑀁 𑀧𑀘𑁆𑀘𑀬𑀸𑀦𑀼𑀓𑁆𑀓𑀫𑁂𑀦 𑀲𑁂𑀦𑀸𑀲𑀦𑀪𑀸𑀚𑀦𑀓𑀣𑀸𑀬 𑀯𑀢𑁆𑀢𑀩𑁆𑀩𑀸𑀬𑀧𑀺 𑀢𑀲𑁆𑀲𑀸 𑀫𑀳𑀸𑀯𑀺𑀲𑀬𑀢𑁆𑀢𑀸, 𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀻𑀬𑀓𑀣𑀸𑀬 𑀧𑀦 𑀅𑀧𑁆𑀧𑀯𑀺𑀲𑀬𑀢𑁆𑀢𑀸, 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀻𑀬𑀓𑀣𑀸𑀬 𑀅𑀦𑀼𑀮𑁄𑀫𑀢𑁆𑀢𑀸 𑀘 𑀢𑀤𑀦𑀦𑁆𑀢𑀭𑀁 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀻𑀬𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀢𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀫𑁂𑀯𑁂𑀢𑀁. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀕𑀳𑀧𑀢𑀺𑀫𑀳𑀸𑀲𑀸𑀮𑀸𑀤𑀬𑁄𑀧𑀺 𑀏𑀯𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀘 𑀧𑀸𑀓𑀝𑀢𑁆𑀢𑀸 𑀘 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀉𑀧𑀘𑀸𑀭𑀲𑀻𑀫𑀁…𑀧𑁂… 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀇𑀤𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀓𑀼𑀫𑁆𑀪𑀁 𑀧𑀦 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀓𑀼𑀫𑁆𑀪𑀁 𑀤𑀺𑀲𑀸𑀫𑀼𑀔𑀁 𑀓𑀢𑁆𑀯𑀸. 𑀲𑀘𑁂 𑀣𑀺𑀦𑀁 𑀲𑀧𑁆𑀧𑀺 𑀳𑁄𑀢𑀻𑀢𑀺 𑀓𑀓𑁆𑀔𑀴𑀁 𑀲𑀧𑁆𑀧𑀺 𑀳𑁄𑀢𑀺. 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀓𑀢𑁂 𑀞𑀺𑀢𑀺𑀓𑀸𑀧𑀺 𑀢𑀺𑀝𑁆𑀞𑀢𑀺. 𑀲𑀺𑀗𑁆𑀕𑀺𑀯𑁂𑀭𑀫𑀭𑀺𑀘𑀸𑀤𑀺𑀪𑁂𑀲𑀚𑁆𑀚𑀫𑁆𑀧𑀺 𑀅𑀯𑀲𑁂𑀲𑀧𑀢𑁆𑀢𑀣𑀸𑀮𑀓𑀸𑀤𑀺𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀧𑀻𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀪𑁂𑀲𑀚𑁆𑀚𑀫𑁂𑀯 𑀕𑀺𑀮𑀸𑀦𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀔𑁄 𑀅𑀯𑀲𑁂𑀲𑀧𑀭𑀺𑀓𑁆𑀔𑀸𑀭𑁄𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑁂 𑀅𑀦𑁆𑀢𑁄𑀕𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸𑀯𑀡𑁆𑀡𑀦𑀸

𑁨𑁧𑁮. 𑀲𑁂𑀦𑀸𑀲𑀦𑀪𑀸𑀚𑀦𑀓𑀣𑀸𑀬𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑁂𑀦𑀸𑀲𑀦𑀪𑀸𑀚𑀦𑀫𑁂𑀯𑀸𑀳. 𑀢𑀢𑁆𑀣 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘𑀸𑀢𑀺 𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀉𑀢𑀼𑀓𑀸𑀮𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀸𑀦𑀉𑀢𑀼𑀓𑀸𑀮𑁂. 𑀯𑀲𑁆𑀲𑀸𑀯𑀸𑀲𑁂𑀢𑀺 𑀯𑀲𑁆𑀲𑀸𑀦𑀓𑀸𑀮𑁂. 𑀪𑀺𑀓𑁆𑀔𑀼𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺 𑀤𑀸𑀬𑀓𑁂𑀳𑀺 ‘‘𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀢𑁆𑀢𑀸. 𑀏𑀓𑁂𑀓𑀁 𑀧𑀭𑀺𑀯𑁂𑀡𑀦𑁆𑀢𑀺 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀏𑀓𑁂𑀓𑀁 𑀧𑀭𑀺𑀯𑁂𑀡𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀮𑀤𑁆𑀥𑀧𑀭𑀺𑀯𑁂𑀡𑁂. 𑀤𑀻𑀖𑀲𑀸𑀮𑀸𑀢𑀺 𑀘𑀗𑁆𑀓𑀫𑀦𑀲𑀸𑀮𑀸. 𑀫𑀡𑁆𑀟𑀮𑀫𑀸𑀴𑁄𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀸. 𑀅𑀦𑀼𑀤𑀳𑀢𑀻𑀢𑀺 𑀧𑀻𑀴𑁂𑀢𑀺. 𑀅𑀤𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀇𑀫𑀺𑀦𑀸 𑀲𑀜𑁆𑀘𑀺𑀘𑁆𑀘 𑀅𑀤𑁂𑀦𑁆𑀢𑀲𑁆𑀲 𑀧𑀝𑀺𑀩𑀸𑀳𑀦𑁂 𑀧𑀯𑀺𑀲𑀦𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀺. 𑀚𑀫𑁆𑀩𑀼𑀤𑀻𑀧𑁂 𑀧𑀦𑀸𑀢𑀺 𑀅𑀭𑀺𑀬𑀤𑁂𑀲𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀓𑀺𑀭 𑀢𑀣𑀸 𑀧𑀜𑁆𑀜𑀸𑀧𑁂𑀦𑁆𑀢𑀺.

𑁨𑁧𑁯. 𑀦 𑀕𑁄𑀘𑀭𑀕𑀸𑀫𑁄 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸. 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑁂𑀢𑁆𑀯𑀸 𑀧𑀘𑁆𑀘𑀬𑁂 𑀤𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀢𑁂𑀲𑀼 𑀘𑁂 𑀏𑀓𑁄𑀢𑀺 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄. 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀪𑀡𑁆𑀟𑀁, 𑀲𑀭𑀻𑀭𑀧𑀝𑀺𑀘𑁆𑀙𑀸𑀤𑀦𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸𑀯 𑀅𑀦𑀯𑀚𑁆𑀚𑀦𑁆𑀢𑀺 𑀇𑀤𑀁 𑀧𑀼𑀘𑁆𑀙𑀺𑀢𑀓𑁆𑀔𑀡𑁂 𑀓𑀸𑀭𑀡𑀸𑀘𑀺𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦 𑀳𑁄𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲𑀧𑀺 𑀧𑀼𑀘𑁆𑀙𑀺𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀤𑁄𑀲𑀸𑀪𑀸𑀯𑀸. 𑀏𑀯𑀁 𑀧𑀦 𑀕𑀢𑁂 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀲𑀜𑁆𑀜𑀸𑀬 𑀅𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀻𑀢𑀺 𑀔𑀡𑁆𑀟𑀨𑀼𑀮𑁆𑀮𑀸𑀪𑀺𑀲𑀗𑁆𑀔𑀭𑀡𑀲𑀫𑁆𑀫𑀚𑁆𑀚𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀺. 𑀫𑀼𑀡𑁆𑀟𑀯𑁂𑀤𑀺𑀓𑀸𑀬𑀸𑀢𑀺 𑀘𑁂𑀢𑀺𑀬𑀲𑁆𑀲 𑀳𑀫𑁆𑀫𑀺𑀬𑀯𑁂𑀤𑀺𑀓𑀸𑀬 𑀖𑀝𑀸𑀓𑀸𑀭𑀲𑁆𑀲 𑀉𑀧𑀭𑀺 𑀘𑀢𑀼𑀭𑀲𑁆𑀲𑀯𑁂𑀤𑀺𑀓𑀸𑀬. 𑀓𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀸𑀬 𑀬𑀢𑁄 𑀧𑀓𑀢𑀺𑀬𑀸 𑀮𑀩𑁆𑀪𑀢𑀺, 𑀢𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀸. 𑀓𑀲𑁆𑀫𑀸 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺𑀆𑀤𑀺 𑀬𑀢𑁄 𑀧𑀓𑀢𑀺𑀬𑀸 𑀮𑀩𑁆𑀪𑀢𑀺, 𑀢𑀢𑁆𑀣𑀸𑀧𑀺 𑀧𑀼𑀘𑁆𑀙𑀦𑀲𑁆𑀲 𑀓𑀸𑀭𑀡𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀯𑀺𑀳𑀸𑀭𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀦𑁆𑀢𑀭𑁂 𑀳𑁄𑀢𑀻’’𑀢𑀺 𑀆𑀳. 𑀉𑀧𑀦𑀺𑀓𑁆𑀔𑁂𑀧𑀦𑁆𑀢𑀺 𑀔𑁂𑀢𑁆𑀢𑀁 𑀯𑀸 𑀦𑀸𑀴𑀺𑀓𑁂𑀭𑀸𑀤𑀺𑀆𑀭𑀸𑀫𑀁 𑀯𑀸 𑀓𑀳𑀸𑀧𑀡𑀸𑀤𑀻𑀦𑀺 𑀯𑀸 𑀆𑀭𑀸𑀫𑀺𑀓𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 ‘‘𑀇𑀢𑁄 𑀉𑀧𑁆𑀧𑀦𑁆𑀦𑀸 𑀯𑀟𑁆𑀠𑀺 𑀯𑀲𑁆𑀲𑀸𑀯𑀸𑀲𑀺𑀓𑀢𑁆𑀣𑀸𑀬 𑀳𑁄𑀢𑀽’’𑀢𑀺 𑀤𑀺𑀦𑁆𑀦𑀁. 𑀯𑀢𑁆𑀢𑀁 𑀓𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀓𑀢𑁆𑀯𑀸. 𑀇𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑁂𑀢𑀺 𑀏𑀯𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀤𑁆𑀥𑀸𑀬 𑀤𑀸𑀢𑀩𑁆𑀩𑁂 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀺𑀲𑀬𑁂𑀢𑀺 𑀅𑀢𑁆𑀣𑁄.

𑀯𑀢𑁆𑀣𑀼 𑀧𑀦𑀸𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑁂 𑀉𑀧𑁆𑀧𑀦𑁆𑀦𑀭𑀽𑀧𑀺𑀬𑀁, 𑀢𑀜𑁆𑀘 ‘‘𑀢𑀢𑁄 𑀘𑀢𑀼𑀧𑀘𑁆𑀘𑀬𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀺𑀦𑁆𑀦𑀔𑁂𑀢𑁆𑀢𑀸𑀤𑀺𑀢𑁄 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀯𑀢𑁆𑀣𑀼𑀲𑀤𑀺𑀲𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀳𑀺𑀢𑀸𑀬. 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀧𑀭𑀢𑁄 𑀯𑀓𑁆𑀔𑀫𑀸𑀦𑀦𑀬𑁂𑀦 𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀧𑀭𑀸𑀫𑀸𑀲𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀁, ‘‘𑀲𑀗𑁆𑀖𑁄 𑀘𑀻𑀯𑀭𑁂𑀦 𑀓𑀺𑀮𑀫𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀲𑀗𑁆𑀖𑀧𑀭𑀸𑀫𑀸𑀲𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦𑀸𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀘𑀻𑀯𑀭𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦𑁂𑀯 𑀘𑀸’’𑀢𑀺 𑀯𑀼𑀢𑁆𑀢𑀁. 𑀘-𑀓𑀸𑀭𑁄 𑀘𑁂𑀢𑁆𑀣 𑀧𑀦𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀢𑀺, 𑀦 𑀲𑀫𑀼𑀘𑁆𑀘𑀬𑀢𑁆𑀣𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦 𑀘 𑀅𑀧𑀮𑁄𑀓𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦 𑀏𑀯𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀘𑀻𑀯𑀭𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁂𑀦 𑀢𑀲𑁆𑀫𑀺𑀁 𑀯𑀲𑁆𑀲𑀸𑀯𑀸𑀲𑁂 𑀮𑀩𑁆𑀪𑀫𑀸𑀦𑀘𑀻𑀯𑀭𑀲𑀗𑁆𑀔𑀸𑀢𑀁 𑀧𑀘𑁆𑀘𑀬𑀁 ‘‘𑀏𑀢𑁆𑀢𑀓’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀲𑁂𑀦𑀸𑀲𑀦𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀡𑀲𑁆𑀲. 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺, 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀕𑀳𑀡𑀁 𑀅𑀲𑀸𑀭𑀼𑀧𑁆𑀧𑀁, 𑀢𑀲𑁆𑀫𑀸 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀕𑀸𑀳𑁂𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀫𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑁂𑀦 𑀕𑀳𑀺𑀢𑁄𑀧𑀺 𑀕𑀸𑀳𑁄 𑀭𑀼𑀳𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺, 𑀉𑀤𑀸𑀳𑀼 𑀏𑀓𑀢𑁄𑀢𑀺? 𑀏𑀓𑀢𑁄𑀧𑀺 𑀯𑀝𑁆𑀝𑀢𑀺. 𑀏𑀓𑀓𑀫𑁆𑀫𑀯𑀸𑀘𑀸𑀬 𑀲𑀩𑁆𑀩𑁂𑀧𑀺 𑀏𑀓𑀢𑁄 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀦 𑀓𑀭𑁄𑀢𑀺. 𑀲𑀫𑁆𑀫𑀼𑀢𑀺𑀤𑀸𑀦𑀁 𑀧𑀦 𑀩𑀳𑀽𑀦𑀫𑁆𑀧𑀺 𑀏𑀓𑀢𑁄 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀉𑀩𑁆𑀩𑀸𑀳𑀺𑀓𑀲𑀫𑁆𑀫𑀼𑀢𑀺𑀬𑀁 𑀅𑀝𑁆𑀞𑀧𑀺 𑀚𑀦𑀸 𑀏𑀓𑀢𑁄 𑀲𑀫𑁆𑀫𑀢𑀸𑀢𑀺. 𑀆𑀲𑀦𑀖𑀭𑀦𑁆𑀢𑀺 𑀧𑀝𑀺𑀫𑀸𑀖𑀭𑀁. 𑀫𑀕𑁆𑀕𑁄𑀢𑀺 𑀉𑀧𑀘𑀸𑀭𑀲𑀻𑀫𑀩𑁆𑀪𑀦𑁆𑀢𑀭𑀕𑀢𑁂 𑀕𑀸𑀫𑀸𑀪𑀺𑀫𑀼𑀔𑀫𑀕𑁆𑀕𑁂 𑀓𑀢𑀲𑀸𑀮𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑁄𑀓𑁆𑀔𑀭𑀡𑀺𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼𑀧𑀺. 𑀭𑀼𑀓𑁆𑀔𑀫𑀽𑀮𑀸𑀤𑀬𑁄 𑀙𑀦𑁆𑀦𑀸 𑀓𑀯𑀸𑀝𑀩𑀤𑁆𑀥𑀸𑀯 𑀲𑁂𑀦𑀸𑀲𑀦𑀁. 𑀇𑀢𑁄 𑀧𑀭𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺.

𑁨𑁨𑁦. 𑀫𑀳𑀸𑀮𑀸𑀪𑀧𑀭𑀺𑀯𑁂𑀡𑀓𑀣𑀸𑀬𑀁 𑀮𑀪𑀦𑁆𑀢𑀻𑀢𑀺 𑀢𑀢𑁆𑀭 𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀏𑀓𑁂𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑁂𑀦 𑀯𑀺𑀬𑁄𑀚𑁂𑀢𑁆𑀯𑀸. 𑀆𑀯𑀸𑀲𑁂𑀲𑀽𑀢𑀺 𑀲𑁂𑀦𑀸𑀲𑀦𑁂𑀲𑀼. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀓𑁆𑀔𑀺𑀧𑀦𑀁 𑀦𑀸𑀫 𑀢𑁂𑀲𑀼 𑀯𑀲𑀦𑁆𑀢𑀸𑀦𑀁 𑀇𑀢𑁄 𑀉𑀧𑁆𑀧𑀦𑁆𑀦𑀯𑀲𑁆𑀲𑀸𑀯𑀸𑀲𑀺𑀓𑀤𑀸𑀦𑀁. 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀫𑀳𑀸𑀮𑀸𑀪𑁂 𑀧𑀭𑀺𑀯𑁂𑀡𑁂 𑀯𑀲𑀺𑀢𑁆𑀯𑀸 𑀘𑁂𑀢𑀺𑀬𑁂 𑀯𑀢𑁆𑀢𑀁 𑀓𑀢𑁆𑀯𑀸𑀯 𑀮𑀸𑀪𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁨𑁧. 𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀘𑀻𑀯𑀭𑀧𑀘𑁆𑀘𑀬𑀁 𑀦𑀸𑀥𑀺𑀯𑀸𑀲𑁂𑀢𑀺. 𑀅𑀬𑀫𑁆𑀧𑀻𑀢𑀺 𑀢𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀧𑀘𑁆𑀘𑀬𑁄𑀧𑀺. 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀸𑀝𑀓𑀁 𑀤𑁂𑀦𑁆𑀢𑀻𑀢𑀺 𑀧𑀘𑁆𑀘𑀬𑀤𑀸𑀬𑀓𑀸 𑀤𑁂𑀦𑁆𑀢𑀺. 𑀏𑀢𑁂𑀦 𑀕𑀳𑀝𑁆𑀞𑁂𑀳𑀺 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀲𑁆𑀲𑀁 𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀦𑁆𑀢𑀺 𑀧𑀁𑀲𑀼𑀓𑀽𑀮𑀺𑀓𑀢𑁄 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀯𑀸 𑀫𑀡𑁆𑀟𑀧𑁂 𑀯𑀸 𑀯𑀲𑀺𑀢𑁆𑀯𑀸 𑀘𑁂𑀢𑀺𑀬𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁.

𑀧𑀸𑀝𑀺𑀧𑀤𑀅𑀭𑀼𑀡𑀢𑁄𑀢𑀺𑀆𑀤𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀧𑀦 𑀧𑀸𑀝𑀺𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀓𑀢𑁆𑀣 𑀦𑀼 𑀔𑁄 𑀯𑀲𑀺𑀲𑁆𑀲𑀸𑀫𑀺, 𑀓𑀢𑁆𑀣 𑀯𑀲𑀦𑁆𑀢𑀲𑁆𑀲 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀓𑀢𑁆𑀣 𑀯𑀸 𑀧𑀘𑁆𑀘𑀬𑁂 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑁂𑀦 𑀯𑀺𑀢𑀓𑁆𑀓𑁂𑀦 𑀘𑀭𑀢𑀻𑀢𑀺 𑀯𑀺𑀢𑀓𑁆𑀓𑀘𑀸𑀭𑀺𑀓𑁄. 𑀇𑀤𑀸𑀦𑀺 𑀬𑀁 𑀤𑀸𑀬𑀓𑀸 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀢𑀢𑁆𑀣 𑀧𑀝𑀺𑀧𑀚𑁆𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀆𑀕𑀦𑁆𑀢𑀼𑀓𑁄 𑀘𑁂 𑀪𑀺𑀓𑁆𑀔𑀽𑀢𑀺 𑀘𑀻𑀯𑀭𑁂 𑀕𑀸𑀳𑀺𑀢𑁂 𑀧𑀘𑁆𑀙𑀸 𑀆𑀕𑀢𑁄 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀧𑀢𑁆𑀢𑀝𑁆𑀞𑀸𑀦𑁂𑀢𑀺 𑀯𑀲𑁆𑀲𑀕𑁆𑀕𑁂𑀦 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀝𑁆𑀞𑀸𑀦𑁂. 𑀧𑀞𑀫𑀯𑀲𑁆𑀲𑀽𑀧𑀕𑀢𑀸𑀢𑀺 𑀆𑀕𑀦𑁆𑀢𑀼𑀓𑀲𑁆𑀲 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸. 𑀮𑀤𑁆𑀥𑀁 𑀮𑀤𑁆𑀥𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀤𑀸𑀬𑀓𑀸𑀦𑀁 𑀲𑀦𑁆𑀢𑀺𑀓𑀸 𑀆𑀕𑀢𑀸𑀕𑀢𑀲𑀸𑀝𑀓𑀁.

𑀲𑀸𑀤𑀺𑀬𑀦𑁆𑀢𑀸𑀧𑀺 𑀳𑀺 𑀢𑁂𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄𑀢𑀺 𑀙𑀺𑀦𑁆𑀦𑀯𑀲𑁆𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀞𑀫𑀫𑁂𑀯 𑀓𑀢𑀺𑀓𑀸𑀬 𑀓𑀢𑀢𑁆𑀢𑀸 ‘‘𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀤𑀸𑀢𑀩𑁆𑀩𑀁 𑀯𑀸𑀭𑁂𑀦𑁆𑀢𑀸𑀦𑀁 𑀕𑀻𑀯𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀫𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀯𑀲𑁆𑀲𑀽𑀧𑀕𑀢𑁂𑀲𑀼 𑀅𑀮𑀤𑁆𑀥𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀁 𑀏𑀓𑀘𑁆𑀘𑀸𑀦𑀫𑁂𑀯 𑀤𑀸𑀢𑀩𑁆𑀩𑀁. 𑀪𑀢𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀪𑀢𑀺𑀁 𑀓𑀢𑁆𑀯𑀸 𑀯𑀺𑀬 𑀦𑀺𑀯𑀺𑀝𑁆𑀞𑀁 𑀧𑀭𑀺𑀬𑀺𑀝𑁆𑀞𑀁. 𑀪𑀢𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀯𑀸 𑀧𑀸𑀦𑀻𑀬𑀼𑀧𑀝𑁆𑀞𑀸𑀦𑀸𑀤𑀺𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀁. 𑀲𑀗𑁆𑀖𑀺𑀓𑀁 𑀧𑀦𑀸𑀢𑀺𑀆𑀤𑀺 𑀓𑁂𑀲𑀜𑁆𑀘𑀺 𑀯𑀸𑀤𑀤𑀲𑁆𑀲𑀦𑀁. 𑀢𑀢𑁆𑀣 𑀲𑀗𑁆𑀖𑀺𑀓𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀦𑁆𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀦𑁆𑀢𑀺 ‘‘𑀙𑀺𑀦𑁆𑀦𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀫𑁂𑀲𑀁 𑀤𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀧𑀮𑁄𑀓𑀦𑀁 𑀓𑀢𑁆𑀯𑀸 𑀕𑀸𑀳𑀺𑀢𑀁 𑀲𑀗𑁆𑀖𑁂𑀦 𑀤𑀺𑀦𑁆𑀦𑀢𑁆𑀢𑀸 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑁂𑀯, 𑀧𑀕𑁂𑀯 𑀙𑀺𑀦𑁆𑀦𑀯𑀲𑁆𑀲𑁄. 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀢𑁆𑀢𑀦𑀸 𑀤𑀸𑀬𑀓𑁂𑀳𑀺 𑀘 𑀅𑀦𑀼𑀫𑀢𑀢𑁆𑀢𑀸 𑀪𑀢𑀺𑀦𑀺𑀯𑀺𑀝𑁆𑀞𑀫𑁆𑀧𑀺 𑀙𑀺𑀦𑁆𑀦𑀯𑀲𑁆𑀲𑁄𑀧𑀺 𑀯𑀺𑀩𑁆𑀪𑀦𑁆𑀢𑁄𑀧𑀺 𑀦 𑀮𑀪𑀢𑀻𑀢𑀺 𑀓𑁂𑀘𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀇𑀤𑀜𑁆𑀘 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀧𑀫𑀸𑀡𑀁, 𑀢𑁂𑀦𑁂𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀯𑀁 𑀤𑀸𑀬𑀓𑁂𑀳𑀺 𑀤𑀺𑀦𑁆𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀳𑀺𑀢𑀪𑀺𑀓𑁆𑀔𑀼𑀦𑁄 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀸𑀲𑁄𑀯 𑀳𑁂𑀝𑁆𑀞𑀸 𑀯𑀺𑀳𑀺𑀢𑁄, 𑀦 𑀧𑀸𑀦𑀻𑀬𑀼𑀧𑀝𑁆𑀞𑀸𑀦𑀸𑀤𑀺𑀪𑀢𑀺𑀓𑀭𑀡𑀫𑀢𑁆𑀢𑀁. 𑀬𑀤𑀺 𑀳𑀺 𑀢𑀁 𑀪𑀢𑀺𑀦𑀺𑀯𑀺𑀝𑁆𑀞𑀫𑁂𑀯 𑀲𑀺𑀬𑀸, 𑀪𑀢𑀺𑀓𑀭𑀡𑀫𑁂𑀯 𑀯𑀺𑀥𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑀺𑀢𑀁 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀦 𑀮𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀇𑀥, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀢𑁆𑀣𑁄 𑀪𑀺𑀓𑁆𑀔𑀼 𑀯𑀺𑀩𑁆𑀪𑀫𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀢’’𑀦𑁆𑀢𑀺 (𑀫𑀳𑀸𑀯. 𑁩𑁭𑁪-𑁩𑁭𑁫) 𑀯𑀘𑀦𑀢𑁄 ‘‘𑀯𑀢𑀝𑁆𑀞𑀸𑀦𑁂…𑀧𑁂… 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀺𑀓𑀁 𑀳𑁄𑀢𑀻𑀢𑀺 𑀏𑀢𑁂𑀦 𑀯𑀼𑀢𑁆𑀣𑀯𑀲𑁆𑀲𑀸𑀦𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀕𑁄 𑀲𑀗𑁆𑀖𑀺𑀓𑀢𑁄 𑀅𑀫𑁄𑀘𑀺𑀢𑁄 𑀢𑁂𑀲𑀁 𑀯𑀺𑀩𑁆𑀪𑀫𑁂𑀦 𑀲𑀗𑁆𑀖𑀺𑀓𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑀼𑀲𑁆𑀲𑁂𑀢𑀺 𑀤𑀸𑀬𑀓𑀫𑀦𑀼𑀲𑁆𑀲𑁂. 𑀮𑀪𑀢𑀻𑀢𑀺 ‘‘𑀫𑀫 𑀧𑀢𑁆𑀢𑀪𑀸𑀯𑀁 𑀏𑀢𑀲𑁆𑀲 𑀤𑁂𑀣𑀸’’𑀢𑀺 𑀤𑀸𑀬𑀓𑁂 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑁂𑀦𑁂𑀯 𑀲𑀗𑁆𑀖𑀺𑀓𑀢𑁄 𑀯𑀺𑀬𑁄𑀚𑀺𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀢𑀲𑁆𑀲 𑀧𑀞𑀫𑀕𑀸𑀳𑀢𑁆𑀢𑀸, 𑀣𑁂𑀭𑁂𑀦 𑀧𑀼𑀩𑁆𑀩𑁂 𑀧𑀞𑀫𑀪𑀸𑀕𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀇𑀤𑀸𑀦𑀺 𑀕𑀬𑁆𑀳𑀫𑀸𑀦𑀲𑁆𑀲 𑀤𑀼𑀢𑀺𑀬𑀪𑀸𑀕𑀢𑁆𑀢𑀸 𑀘 𑀯𑀼𑀢𑁆𑀢𑀁.

𑁨𑁨𑁨. 𑀇𑀤𑀸𑀦𑀺 𑀅𑀦𑁆𑀢𑀭𑀸𑀫𑀼𑀢𑁆𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀫𑀧𑀭𑁄𑀧𑀻’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀭𑁄𑀧𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀤𑁆𑀯𑀬𑀢𑁄 𑀅𑀜𑁆𑀜𑁄𑀧𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ‘‘𑀅𑀬𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘𑀸’’𑀢𑀺 𑀯𑀼𑀢𑁆𑀢𑁄, 𑀅𑀣 𑀓𑀲𑁆𑀫𑀸 ‘‘𑀅𑀬𑀫𑀧𑀭𑁄𑀧𑀻’’𑀢𑁆𑀬𑀸𑀤𑀺 𑀯𑀼𑀢𑁆𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀤𑀺𑀯𑀲𑀯𑀲𑁂𑀦 𑀳𑀻’’𑀢𑀺𑀆𑀤𑀺. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸𑀢𑀺 𑀧𑀞𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀪𑀽𑀢𑀁 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀸 𑀧𑀸𑀝𑀺𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸𑀢𑀺 𑀤𑀼𑀢𑀺𑀬𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀪𑀽𑀢𑀲𑀸𑀯𑀡𑀧𑀼𑀡𑁆𑀡𑀫𑀺𑀬𑀸 𑀧𑀸𑀝𑀺𑀧𑀤𑀁. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀢𑀺 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀺𑀬𑀸 𑀧𑀸𑀝𑀺𑀧𑀤𑀁.

𑁨𑁨𑁩. 𑀉𑀢𑀼𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼 𑀅𑀜𑁆𑀜𑁂 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀺. 𑀦𑀯𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀲𑀫𑁆𑀫𑀼𑀢𑀺. 𑀅𑀓𑀢𑀦𑁆𑀢𑀺 𑀅𑀧𑀭𑀺𑀲𑀗𑁆𑀔𑀢𑀁. 𑀯𑀺𑀧𑁆𑀧𑀓𑀢𑀦𑁆𑀢𑀺 𑀅𑀦𑀺𑀝𑁆𑀞𑀺𑀢𑀁. 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀤𑀢𑁆𑀯𑀸𑀢𑀺 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀧𑀼𑀕𑁆𑀕𑀮𑀺𑀓𑀁 𑀤𑀢𑁆𑀯𑀸. 𑀢𑀺𑀪𑀸𑀕𑀦𑁆𑀢𑀺 𑀢𑀢𑀺𑀬𑀪𑀸𑀕𑀁. 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀣𑀸𑀯𑀭𑁂𑀦 𑀣𑀸𑀯𑀭𑀁 𑀧𑀭𑀺𑀯𑀢𑁆𑀢𑀦𑀝𑁆𑀞𑀸𑀦𑁂𑀬𑁂𑀯 𑀧𑀯𑀺𑀲𑀢𑀺, 𑀦 𑀇𑀢𑀭𑀣𑀸 𑀲𑀩𑁆𑀩𑀲𑁂𑀦𑀸𑀲𑀦𑀯𑀺𑀲𑁆𑀲𑀚𑁆𑀚𑀦𑀢𑁄. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀘𑁂 𑀲𑁄 𑀲𑀗𑁆𑀖𑀲𑁆𑀲 𑀪𑀡𑁆𑀟𑀞𑀧𑀦𑀝𑁆𑀞𑀸𑀦𑀁 𑀯𑀸 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀤𑀸𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀜𑁆𑀜𑁂𑀯 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀸𑀤𑀺𑀲𑀲𑁆𑀲 ‘‘𑀢𑀼𑀬𑁆𑀳𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀓𑀢𑁆𑀯𑀸 𑀚𑀕𑁆𑀕𑀸𑀳𑀻’’𑀢𑀺 𑀦 𑀲𑀩𑁆𑀩𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀲𑁆𑀲 𑀓𑀢𑁆𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀏𑀯𑀜𑁆𑀳𑀻𑀢𑀺𑀆𑀤𑀺𑀫𑁆𑀳𑀺 𑀘𑀬𑀸𑀦𑀼𑀭𑀽𑀧𑀁 𑀢𑀢𑀺𑀬𑀪𑀸𑀕𑁂 𑀯𑀸 𑀉𑀧𑀟𑁆𑀠𑀪𑀸𑀕𑁂 𑀯𑀸 𑀕𑀳𑀺𑀢𑁂 𑀢𑀁 𑀪𑀸𑀕𑀁 𑀤𑀸𑀢𑀼𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀢𑀻𑀲𑀼 𑀪𑀺𑀓𑁆𑀔𑀽𑀲𑀼 𑀬𑁂𑀦. 𑀲𑁄 𑀲𑀸𑀫𑀻𑀢𑀺 𑀢𑀲𑁆𑀲𑀸 𑀪𑀽𑀫𑀺𑀬𑀸 𑀯𑀺𑀳𑀸𑀭𑀓𑀭𑀡𑁂 𑀲𑁄𑀯 𑀲𑀸𑀫𑀻, 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀇𑀢𑀭𑁂𑀦 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁨𑁪. 𑀅𑀓𑀢𑀝𑁆𑀞𑀸𑀦𑁂𑀢𑀺 𑀲𑁂𑀦𑀸𑀲𑀦𑀢𑁄 𑀩𑀳𑀺 𑀘𑀬𑀸𑀤𑀻𑀦𑀁 𑀅𑀓𑀢𑀝𑁆𑀞𑀸𑀦𑁂. 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸𑀢𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀢𑀢𑁄 𑀩𑀳𑀺 𑀩𑀦𑁆𑀥𑀺𑀢𑁆𑀯𑀸 𑀏𑀓𑀁 𑀲𑁂𑀦𑀸𑀲𑀦𑀁 𑀯𑀸. 𑀩𑀳𑀺𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀢𑁄 𑀩𑀳𑀺, 𑀅𑀢𑁆𑀢𑀦𑁄 𑀓𑀢𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀧𑀘𑁆𑀘𑀬𑀲𑀸𑀥𑀸𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁨𑁫. 𑀘𑀢𑀼𑀧𑀘𑁆𑀘𑀬𑀲𑀸𑀥𑀸𑀭𑀡𑀓𑀣𑀸𑀬𑀁 𑀲𑀫𑁆𑀫𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀯𑀸 𑀲𑀫𑁆𑀫𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀫𑁆𑀫𑀼𑀢𑀺𑀮𑀤𑁆𑀥𑁂𑀦. 𑀅𑀯𑀺𑀪𑀢𑁆𑀢𑀁 𑀲𑀗𑁆𑀖𑀺𑀓𑀪𑀡𑁆𑀟𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀅𑀯𑀺𑀪𑀢𑁆𑀢𑀁 𑀲𑀗𑁆𑀖𑀺𑀓𑀪𑀡𑁆𑀟𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁, 𑀏𑀯𑀁 𑀓𑀼𑀓𑁆𑀓𑀼𑀘𑁆𑀘𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸𑀢𑀺 𑀘𑁂? 𑀏𑀢𑁆𑀢𑀓𑀲𑁆𑀲 𑀲𑀗𑁆𑀖𑀺𑀓𑀪𑀡𑁆𑀟𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀓𑀢𑀲𑀫𑁆𑀫𑀼𑀢𑀺𑀓𑀫𑁆𑀫𑀢𑁆𑀢𑀸. 𑀕𑀼𑀴𑀧𑀺𑀡𑁆𑀟𑁂…𑀧𑁂… 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀕𑀼𑀴𑀧𑀺𑀡𑁆𑀟𑀁 𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲𑀧𑀻𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀩𑀳𑀺𑀲𑀻𑀫𑀕𑀢𑀲𑁆𑀲𑀧𑀺 𑀏𑀲𑁂𑀯 𑀦𑀬𑁄. 𑀑𑀤𑀦𑀧𑀝𑀺𑀯𑀻𑀲𑁄𑀢𑀺 𑀲𑀗𑁆𑀖𑀪𑀢𑁆𑀢𑀸𑀤𑀺𑀲𑀗𑁆𑀖𑀺𑀓𑀑𑀤𑀦𑀧𑀝𑀺𑀯𑀻𑀲𑁄. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑁂𑀯 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀁 𑀧𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫) ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀕𑀸𑀳𑁂𑀣𑀸𑀢𑀺 𑀯𑀤𑀦𑁆𑀢𑀺, 𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺. 𑀅𑀦𑁆𑀢𑁄𑀕𑀸𑀫𑀝𑁆𑀞𑀸𑀦𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀅𑀦𑁆𑀢𑁄𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀩𑀳𑀺𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀸𑀯𑀦𑀢𑁆𑀣𑁄 𑀯𑀸, 𑀢𑁂𑀦 𑀅𑀦𑁆𑀢𑁄𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀕𑁂𑀯 𑀩𑀳𑀺𑀕𑀸𑀫𑀝𑁆𑀞𑀸𑀦𑀦𑁆𑀢𑀺.

𑀘𑀢𑀼𑀧𑀘𑁆𑀘𑀬𑀲𑀸𑀥𑀸𑀭𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀅𑀝𑁆𑀞𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀯𑀺𑀳𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀘𑀢𑀼𑀧𑀘𑁆𑀘𑀬𑀦𑁆𑀢𑁄𑀕𑀥𑀢𑁆𑀢𑀸 𑀯𑀺𑀳𑀸𑀭𑀲𑁆𑀲 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀓𑀣𑀸𑀦𑀦𑁆𑀢𑀭𑀁 𑀯𑀺𑀳𑀸𑀭𑀯𑀺𑀦𑀺𑀘𑁆𑀙𑀬𑀓𑀣𑀸 𑀆𑀭𑀪𑀻𑀬𑀢𑁂. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀓𑁄 𑀯𑀺𑀳𑀸𑀭𑁄 𑀓𑁂𑀦𑀝𑁆𑀞𑁂𑀦;

𑀯𑀺𑀳𑀸𑀭𑁄 𑀲𑁄 𑀓𑀢𑀺𑀯𑀺𑀥𑁄;

𑀓𑁂𑀦 𑀲𑁄 𑀓𑀲𑁆𑀲 𑀤𑀸𑀢𑀩𑁆𑀩𑁄;

𑀓𑀣𑀁 𑀓𑁄 𑀢𑀲𑁆𑀲 𑀇𑀲𑁆𑀲𑀭𑁄.

‘‘𑀓𑁂𑀦 𑀲𑁄 𑀕𑀸𑀳𑀺𑀢𑁄 𑀓𑀲𑁆𑀲;

𑀅𑀦𑀼𑀝𑁆𑀞𑀸𑀧𑀦𑀺𑀬𑀸 𑀓𑀢𑀺;

𑀓𑀢𑀺𑀳𑀗𑁆𑀕𑁂𑀳𑀺 𑀬𑀼𑀢𑁆𑀢𑀲𑁆𑀲;

𑀥𑀼𑀯𑀯𑀸𑀲𑀸𑀬 𑀤𑀻𑀬𑀢𑁂’’𑀢𑀺.

𑀢𑀢𑁆𑀣 𑀓𑁄 𑀯𑀺𑀳𑀸𑀭𑁄𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑁄 𑀘𑀢𑀽𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀸𑀭𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑁄 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀪𑀽𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀓𑁂𑀦𑀝𑁆𑀞𑁂𑀦 𑀯𑀺𑀳𑀸𑀭𑁄𑀢𑀺 𑀯𑀺𑀳𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄, 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀯𑀺𑀳𑀸𑀭𑁂𑀳𑀺 𑀅𑀭𑀺𑀬𑀸 𑀏𑀢𑁆𑀣 𑀯𑀺𑀳𑀭𑀦𑁆𑀢𑀻𑀢𑁆𑀬𑀢𑁆𑀣𑁄. 𑀲𑁄 𑀓𑀢𑀺𑀯𑀺𑀥𑁄𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀕𑀡𑀲𑀦𑁆𑀢𑀓𑀯𑀺𑀳𑀸𑀭𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀯𑀲𑁂𑀦 𑀢𑀺𑀩𑁆𑀩𑀺𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀁 𑀯𑀺𑀳𑀸𑀭𑀁 𑀯𑀸 𑀧𑀭𑀺𑀯𑁂𑀡𑀁 𑀯𑀸 𑀆𑀯𑀸𑀲𑀁 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀔𑀼𑀤𑁆𑀤𑀓𑀫𑁆𑀧𑀺 𑀅𑀪𑀺𑀬𑀼𑀜𑁆𑀚𑀢𑁄 𑀅𑀪𑀺𑀬𑁄𑀕𑁄 𑀦 𑀭𑀼𑀳𑀢𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀦 𑀳𑁂𑀢𑁆𑀣 𑀲𑀩𑁆𑀩𑁂 𑀘𑀸𑀢𑀼𑀤𑁆𑀤𑀺𑀲𑀸 𑀪𑀺𑀓𑁆𑀔𑀽 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀻𑀢𑀺. 𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀓𑁆𑀓𑁄𑀢𑀺 𑀢𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑀼𑀁, 𑀢𑀲𑁆𑀫𑀸 𑀢𑀢𑁆𑀣 𑀆𑀭𑀸𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀇𑀫𑀺𑀦𑀸 𑀤𑀸𑀬𑀓𑀲𑀦𑁆𑀢𑀓𑁄 𑀯𑀺𑀳𑀸𑀭𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑀓𑁂𑀦 𑀲𑁄 𑀤𑀸𑀢𑀩𑁆𑀩𑁄𑀢𑀺 𑀔𑀢𑁆𑀢𑀺𑀬𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑁄 𑀯𑀺𑀳𑀸𑀭𑁄 𑀤𑀸𑀢𑀩𑁆𑀩𑁄. 𑀓𑀲𑁆𑀲 𑀤𑀸𑀢𑀩𑁆𑀩𑁄𑀢𑀺 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀸𑀢𑀩𑁆𑀩𑁄. 𑀓𑀣𑀁 𑀤𑀸𑀢𑀩𑁆𑀩𑁄𑀢𑀺 𑀬𑀤𑀺 𑀲𑀗𑁆𑀖𑀲𑁆𑀲 𑀤𑁂𑀢𑀺, ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺, 𑀬𑀤𑀺 𑀕𑀡𑀲𑁆𑀲, ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺, 𑀬𑀤𑀺 𑀧𑀼𑀕𑁆𑀕𑀮𑀲𑁆𑀲, ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀤𑀸𑀢𑀩𑁆𑀩𑁄. 𑀓𑁄 𑀢𑀲𑁆𑀲 𑀇𑀲𑁆𑀲𑀭𑁄𑀢𑀺 𑀬𑀤𑀺 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀲𑀗𑁆𑀖𑁄 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑁄. 𑀬𑀤𑀺 𑀕𑀡𑀲𑁆𑀲 𑀤𑁂𑀢𑀺, 𑀕𑀡𑁄 𑀢𑀲𑁆𑀲 𑀇𑀲𑁆𑀲𑀭𑁄. 𑀬𑀤𑀺 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺, 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀇𑀲𑁆𑀲𑀭𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀻𑀖𑀪𑀸𑀡𑀓𑀸𑀤𑀺𑀓𑀲𑁆𑀲 𑀧𑀦 𑀕𑀡𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀓’’𑀦𑁆𑀢𑀺.

𑀓𑁂𑀦 𑀲𑁄 𑀕𑀸𑀳𑀺𑀢𑁄𑀢𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀲𑁄 𑀯𑀺𑀳𑀸𑀭𑁄 𑀕𑀸𑀳𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀏𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄, 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁄, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀘𑀽𑀴𑀯. 𑁩𑁧𑁭).

𑀓𑀲𑁆𑀲 𑀲𑁄 𑀕𑀸𑀳𑀺𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑁄 𑀯𑀺𑀳𑀸𑀭𑁄 𑀕𑀸𑀳𑀺𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼𑀁, 𑀲𑁂𑀬𑁆𑀬𑀸 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁮). 𑀅𑀦𑀼𑀝𑁆𑀞𑀸𑀧𑀦𑀺𑀬𑀸 𑀓𑀢𑀻𑀢𑀺 𑀘𑀢𑁆𑀢𑀸𑀭𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀸 𑀯𑀼𑀟𑁆𑀠𑀢𑀭𑁄 𑀕𑀺𑀮𑀸𑀦𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀗𑁆𑀖𑀢𑁄 𑀮𑀤𑁆𑀥𑀲𑁂𑀦𑀸𑀲𑀦𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀯𑀼𑀟𑁆𑀠𑁄 𑀳𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬 𑀅𑀦𑀼𑀝𑁆𑀞𑀸𑀧𑀦𑀻𑀬𑁄, 𑀕𑀺𑀮𑀸𑀦𑁄 𑀕𑀺𑀮𑀸𑀦𑀢𑀸𑀬, 𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀕𑀡𑀯𑀸𑀘𑀓𑀸𑀘𑀭𑀺𑀬𑀸𑀦𑀁 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀲𑀗𑁆𑀖𑁂𑀦 𑀤𑀺𑀦𑁆𑀦𑁄, 𑀲𑁄𑀧𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄’’𑀢𑀺.

𑀓𑀢𑀺𑀳𑀗𑁆𑀕𑁂𑀳𑀺 𑀬𑀼𑀢𑁆𑀢𑀲𑁆𑀲 𑀥𑀼𑀯𑀯𑀸𑀲𑀸𑀬 𑀤𑀻𑀬𑀢𑁂𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀬𑀼𑀢𑁆𑀢𑀲𑁆𑀲 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑁄 𑀤𑀻𑀬𑀢𑁂. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺? 𑀩𑀳𑀽𑀧𑀓𑀸𑀭𑀢𑀸𑀬 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀘𑁂𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀩𑀳𑀽𑀧𑀓𑀸𑀭𑀢𑀦𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀢𑀸𑀤𑀺𑀩𑀳𑀼𑀉𑀧𑀓𑀸𑀭𑀪𑀸𑀯𑀁, 𑀦 𑀓𑁂𑀯𑀮𑀁 𑀇𑀤𑀫𑁂𑀯𑀸𑀢𑀺 𑀆𑀳 ‘𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘𑀸’𑀢𑀺. 𑀢𑁂𑀦 𑀩𑀳𑀽𑀧𑀓𑀸𑀭𑀢𑁆𑀢𑁂𑀧𑀺 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑀸𑀪𑀸𑀯𑁂 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑁂𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸𑀪𑀸𑀯𑁂 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑀔𑀸. 𑀅𑀪𑀺. 𑀝𑀻. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀘𑀦𑀢𑁄. 𑀑𑀫𑀓𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑁂𑀦 𑀅𑀗𑁆𑀕𑁂𑀦 𑀬𑀼𑀢𑁆𑀢𑀲𑁆𑀲𑀧𑀺. 𑀓𑀢𑀫𑁂𑀦 𑀏𑀓𑁂𑀦 𑀅𑀗𑁆𑀕𑁂𑀦? 𑀩𑀳𑀽𑀧𑀓𑀸𑀭𑀢𑀸𑀬 𑀯𑀸 𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀯𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀦𑁆𑀢𑁄𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀩𑀳𑀽𑀧𑀓𑀸𑀭𑀢𑀁, 𑀥𑀫𑁆𑀫𑀓𑀣𑀺𑀓𑀸𑀤𑀻𑀦𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀦𑁆𑀢𑁄’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁧𑁧𑁯-𑁧𑁨𑁧) 𑀯𑀘𑀦𑀢𑁄.

𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀦 𑀤𑀼𑀯𑀺𑀥𑁄 𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘𑀸𑀢𑀺 𑀓𑀸𑀮𑀯𑀲𑁂𑀦. 𑀅𑀣 𑀯𑀸 𑀢𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄𑀢𑀺. 𑀢𑁂𑀲𑀁 𑀯𑀺𑀲𑁂𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. ‘‘𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀘 𑀢𑀗𑁆𑀔𑀡𑀧𑀝𑀺𑀲𑀮𑁆𑀮𑀸𑀦𑁄 𑀘𑀸𑀢𑀺 𑀤𑀼𑀩𑁆𑀩𑀺𑀥𑁄. 𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀼𑀭𑀺𑀫𑀓𑁄 𑀘 𑀧𑀘𑁆𑀙𑀺𑀫𑀓𑁄 𑀘𑀸𑀢𑀺 𑀤𑀼𑀩𑁆𑀩𑀺𑀥𑁄𑀢𑀺 𑀘𑀢𑁆𑀢𑀸𑀭𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀢𑀁 𑀯𑀘𑀦𑀁 𑀧𑀸𑀴𑀺𑀬𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀆𑀕𑀢𑀁. 𑀧𑀸𑀴𑀺𑀬𑀁 (𑀘𑀽𑀴𑀯. 𑁩𑁧𑁮) 𑀧𑀦 ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀕𑁆𑀕𑀸𑀳𑀸 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄’’𑀇𑀘𑁆𑀘𑁂𑀯 𑀆𑀕𑀢𑁄, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀢𑀻𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼 𑀧𑀼𑀭𑀺𑀫𑀓𑁄 𑀘 𑀧𑀘𑁆𑀙𑀺𑀫𑀓𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀸𑀳𑀸 𑀣𑀸𑀯𑀭𑀸, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁂 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀆𑀕𑀢𑁄.

𑀇𑀤𑀸𑀦𑀺 𑀧𑀦 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑁂 𑀯𑀺𑀳𑀸𑀭𑀸 𑀲𑀗𑁆𑀖𑀺𑀓𑀸𑀯, 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁄 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸? 𑀯𑀺𑀳𑀸𑀭𑀤𑀸𑀬𑀓𑀸𑀦𑀁 𑀯𑀺𑀳𑀸𑀭𑀤𑀸𑀦𑀓𑀸𑀮𑁂 𑀓𑀼𑀮𑀽𑀧𑀓𑀸 ‘𑀇𑀫𑀁 𑀯𑀺𑀳𑀸𑀭𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑁂𑀫𑀸’𑀢𑀺 𑀯𑀘𑀻𑀪𑁂𑀤𑀁 𑀓𑀸𑀭𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀦𑀯𑀯𑀺𑀳𑀸𑀭𑀸𑀧𑀺 𑀲𑀗𑁆𑀖𑀺𑀓𑀸 𑀏𑀯. 𑀏𑀓𑀘𑁆𑀘𑁂𑀲𑀼 𑀯𑀺𑀳𑀸𑀭𑁂𑀲𑀼 𑀏𑀯𑀁 𑀅𑀯𑀢𑁆𑀯𑀸 𑀤𑁂𑀦𑁆𑀢𑁂𑀲𑀼𑀧𑀺 ‘𑀢𑀲𑁆𑀫𑀺𑀁 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀢𑁂 𑀲𑀗𑁆𑀖𑀺𑀓𑁄𑀬𑁂𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑁄𑀭𑀸𑀡𑀓𑀯𑀺𑀳𑀸𑀭𑀸𑀧𑀺 𑀲𑀗𑁆𑀖𑀺𑀓𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭𑁂𑀯𑀁 𑀯𑀺𑀘𑀸𑀭𑁂𑀢𑀩𑁆𑀩𑁄 𑁋 𑀯𑀘𑀻𑀪𑁂𑀤𑀁 𑀓𑀸𑀭𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀯𑀺𑀳𑀸𑀭𑁂𑀲𑀼𑀧𑀺 𑀤𑀸𑀬𑀓𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀭𑁄𑀦𑁆𑀢𑀸 𑀦𑀸𑀫 𑀅𑀧𑁆𑀧𑀓𑀸, ‘‘𑀇𑀫𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀇𑀫𑀁 𑀦𑀸𑀫 𑀣𑁂𑀭𑀁 𑀯𑀲𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀫𑀺𑀢𑁆𑀢𑀸𑀫𑀘𑁆𑀘𑀸𑀤𑀻𑀳𑀺 𑀲𑀫𑁆𑀫𑀦𑁆𑀢𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺, 𑀧𑀢𑀺𑀝𑁆𑀞𑀸𑀦𑀓𑀸𑀮𑁂 𑀅𑀯𑀤𑀦𑁆𑀢𑀸𑀧𑀺 𑀤𑀸𑀦𑀓𑀸𑀮𑁂 𑀬𑁂𑀪𑀼𑀬𑁆𑀬𑁂𑀦 𑀯𑀤𑀦𑁆𑀢𑀺. 𑀅𑀣 𑀧𑀦 𑀓𑀼𑀮𑀽𑀧𑀓𑀸 𑀤𑀸𑀦𑀓𑀸𑀮𑁂 𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀯𑀤𑀸𑀧𑁂𑀦𑁆𑀢𑀺, 𑀏𑀯𑀁 𑀯𑀤𑀦𑁆𑀢𑀸𑀧𑀺 𑀤𑀸𑀬𑀓𑀸 𑀅𑀧𑁆𑀧𑀓𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑁂𑀦𑁆𑀢𑀺, 𑀩𑀳𑀼𑀢𑀭𑀸 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀫𑁂𑀯 𑀉𑀤𑁆𑀤𑀺𑀲𑁆𑀲 𑀤𑁂𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀼𑀮𑀽𑀧𑀓𑀸𑀦𑀁 𑀯𑀘𑀦𑀁 𑀦𑀯𑀲𑀼 𑀅𑀥𑀫𑁆𑀫𑀺𑀓𑀤𑀸𑀦𑁂𑀲𑀼 ‘‘𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑁂𑀢𑀻’’𑀢𑀺 (𑀧𑀸𑀭𑀸. 𑁬𑁬𑁦; 𑀧𑀸𑀘𑀺. 𑁪𑁯𑁨) 𑀯𑀼𑀢𑁆𑀢𑀁 𑀏𑀓𑀁 𑀅𑀥𑀫𑁆𑀫𑀺𑀓𑀤𑀸𑀦𑀁 𑀆𑀧𑀚𑁆𑀚𑀢𑀺. ‘‘𑀢𑀲𑁆𑀫𑀺𑀁 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄, 𑀫𑀢𑁂 𑀲𑀗𑁆𑀖𑀺𑀓𑁄’’𑀢𑀺 𑀅𑀬𑀁 𑀧𑀸𑀞𑁄 𑀫𑀽𑀮𑀧𑀼𑀕𑁆𑀕𑀮𑀺𑀓𑀯𑀺𑀲𑀬𑁂 𑀦 𑀆𑀕𑀢𑁄, 𑀫𑀽𑀮𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀚𑀕𑁆𑀕𑀸𑀧𑁂𑀢𑀼𑀁 𑀧𑀼𑀕𑁆𑀕𑀮𑀺𑀓𑀓𑀸𑀭𑀸𑀧𑀦𑀝𑁆𑀞𑀸𑀦𑁂 𑀆𑀕𑀢𑁄, 𑀢𑀲𑁆𑀫𑀸 𑀦𑀯𑀯𑀺𑀳𑀸𑀭𑀸𑀧𑀺 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀸 𑀲𑀦𑁆𑀢𑀺𑀬𑁂𑀯. 𑀧𑁄𑀭𑀸𑀡𑀓𑀯𑀺𑀳𑀸𑀭𑀸𑀧𑀺 𑀫𑀽𑀮𑁂 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀤𑀺𑀦𑁆𑀦𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀧𑀼𑀕𑁆𑀕𑀮𑀺𑀓𑀯𑀲𑁂𑀦𑁂𑀯 𑀤𑀻𑀬𑀫𑀸𑀦𑀸𑀧𑀺 𑀢𑀲𑁆𑀫𑀺𑀁 𑀚𑀻𑀯𑀦𑁆𑀢𑁂𑀬𑁂𑀯 𑀯𑀺𑀲𑁆𑀲𑀸𑀲𑀯𑀲𑁂𑀦 𑀕𑀬𑁆𑀳𑀫𑀸𑀦𑀸𑀧𑀺 𑀧𑀼𑀕𑁆𑀕𑀮𑀺𑀓𑀸 𑀳𑁄𑀦𑁆𑀢𑀺𑀬𑁂𑀯, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀲𑁆𑀲 𑀅𑀪𑀸𑀯𑀯𑀸𑀤𑁄 𑀯𑀺𑀘𑀸𑀭𑁂𑀢𑀩𑁆𑀩𑁄𑀯.

𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀲𑀗𑁆𑀖𑀺𑀓𑀯𑀺𑀳𑀸𑀭𑀸 𑀦𑀸𑀫 𑀦 𑀲𑀦𑁆𑀢𑀺, 𑀲𑀩𑁆𑀩𑁂 𑀧𑀼𑀕𑁆𑀕𑀮𑀺𑀓𑀸𑀯. 𑀓𑀲𑁆𑀫𑀸? 𑀦𑀯𑀯𑀺𑀳𑀸𑀭𑀸𑀧𑀺 𑀧𑀢𑀺𑀝𑁆𑀞𑀸𑀧𑀦𑀓𑀸𑀮𑁂 𑀤𑀸𑀦𑀓𑀸𑀮𑁂 𑀘 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀁𑀬𑁂𑀯 𑀉𑀤𑁆𑀤𑀺𑀲𑁆𑀲 𑀓𑀢𑀢𑁆𑀢𑀸 𑀧𑀼𑀕𑁆𑀕𑀮𑀺𑀓𑀸𑀯, 𑀧𑁄𑀭𑀸𑀡𑀓𑀯𑀺𑀳𑀸𑀭𑀸𑀧𑀺 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀧𑀼𑀕𑁆𑀕𑀮𑁂𑀳𑀺 𑀏𑀯 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸, 𑀦 𑀓𑀤𑀸𑀘𑀺 𑀲𑀗𑁆𑀖𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀧𑀼𑀕𑁆𑀕𑀮𑀺𑀓𑀸𑀯 𑀳𑁄𑀦𑁆𑀢𑀺, 𑀦 𑀲𑀗𑁆𑀖𑀺𑀓𑀸’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭𑀸𑀧𑁆𑀬𑁂𑀯𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀦𑀯𑀯𑀺𑀳𑀸𑀭𑁂𑀧𑀺 𑀧𑀢𑀺𑀝𑁆𑀞𑀸𑀦𑀓𑀸𑀮𑁂𑀧𑀺 𑀤𑀸𑀦𑀓𑀸𑀮𑁂𑀧𑀺 𑀏𑀓𑀘𑁆𑀘𑁂 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀓𑀭𑁄𑀦𑁆𑀢𑀺, 𑀏𑀓𑀘𑁆𑀘𑁂 𑀧𑀼𑀕𑁆𑀕𑀮𑀁. 𑀧𑀼𑀩𑁆𑀩𑁂𑀯 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀓𑀢𑁂𑀧𑀺 𑀅𑀢𑁆𑀣𑀓𑀸𑀫𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀤𑀸𑀦𑀢𑁄 𑀲𑀗𑁆𑀖𑀺𑀓𑀤𑀸𑀦𑀫𑁂𑀯 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀲𑀗𑁆𑀖𑀺𑀓𑁂 𑀓𑀭𑁄𑀦𑁆𑀢𑀸𑀧𑀺 𑀤𑀸𑀬𑀓𑀸 𑀲𑀦𑁆𑀢𑀺, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀧𑀝𑀺𑀕𑁆𑀕𑀳𑀺𑀢𑁂 𑀧𑁄𑀭𑀸𑀡𑀓𑀯𑀺𑀳𑀸𑀭𑁂𑀧𑀺 𑀓𑁂𑀘𑀺 𑀪𑀺𑀓𑁆𑀔𑀽 𑀫𑀭𑀡𑀓𑀸𑀮𑁂 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀓𑁂𑀘𑀺 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀫𑀭𑀦𑁆𑀢𑀺, 𑀢𑀤𑀸 𑀲𑁄 𑀯𑀺𑀳𑀸𑀭𑁄 𑀲𑀗𑁆𑀖𑀺𑀓𑁄 𑀳𑁄𑀢𑀺. 𑀲𑀯𑀢𑁆𑀣𑀼𑀓𑀫𑀳𑀸𑀯𑀺𑀳𑀸𑀭𑁂 𑀧𑀦 𑀓𑀭𑁄𑀦𑁆𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 ‘‘𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀲𑀸𑀲𑀦𑀁 𑀬𑀸𑀯 𑀢𑀺𑀝𑁆𑀞𑀢𑀺, 𑀢𑀸𑀯 𑀫𑀫 𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀧𑀡𑀺𑀥𑀸𑀬 𑀘𑀺𑀭𑀓𑀸𑀮𑀁 𑀲𑀗𑁆𑀖𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀸𑀤𑀓𑀭𑀁 𑀕𑀸𑀫𑀔𑁂𑀢𑁆𑀢𑀸𑀤𑀺𑀓𑀁 ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀯𑀺𑀳𑀸𑀭𑀲𑁆𑀲𑀸𑀢𑀺 𑀘 𑀯𑀺𑀳𑀸𑀭𑁂 𑀯𑀲𑀦𑀓𑀲𑀗𑁆𑀖𑀲𑁆𑀲 𑀉𑀤𑁆𑀤𑀺𑀲𑁆𑀲 𑀤𑁂𑀦𑁆𑀢𑀺, 𑀦 𑀓𑀼𑀮𑀽𑀧𑀓𑀪𑀽𑀢𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲 𑀏𑀯, 𑀢𑀲𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀖𑀺𑀓𑀸 𑀤𑀺𑀲𑁆𑀲𑀦𑁆𑀢𑀺, 𑀧𑀸𑀲𑀸𑀡𑁂𑀲𑀼 𑀅𑀓𑁆𑀔𑀭𑀁 𑀮𑀺𑀔𑀺𑀢𑁆𑀯𑀸𑀧𑀺 𑀞𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀲𑀗𑁆𑀖𑀺𑀓𑀯𑀺𑀳𑀸𑀭𑀸𑀪𑀸𑀯𑀯𑀸𑀤𑁄𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑁄𑀯.

𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀺𑀳𑀸𑀭𑀤𑀸𑀬𑀓𑀲𑀦𑁆𑀢𑀓𑀸𑀯, 𑀢𑀲𑁆𑀫𑀸 𑀤𑀸𑀬𑀓𑀸𑀬𑁂𑀯 𑀯𑀺𑀘𑀸𑀭𑁂𑀢𑀼𑀁 𑀇𑀲𑁆𑀲𑀭𑀸, 𑀦 𑀲𑀗𑁆𑀖𑁄, 𑀦 𑀧𑀼𑀕𑁆𑀕𑀮𑁄. 𑀯𑀺𑀳𑀸𑀭𑀤𑀸𑀬𑀓𑁂 𑀅𑀲𑀦𑁆𑀢𑁂𑀧𑀺 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀼𑀦𑀢𑁆𑀢𑀧𑀦𑀢𑁆𑀢𑀸𑀤𑀬𑁄 𑀬𑀸𑀯 𑀓𑀼𑀮𑀧𑀭𑀫𑁆𑀧𑀭𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀸𑀯 𑀳𑁄𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑀸𑀫𑀺𑀓𑁄’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀆𑀕𑀢𑀢𑁆𑀢𑀸 𑀘 ‘𑀢𑀲𑁆𑀲 𑀯𑀸 𑀓𑀼𑀮𑁂 𑀬𑁄 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀘 𑀯𑀘𑀦𑀢𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀪𑀽𑀢𑁄 𑀤𑀸𑀬𑀓𑁄 𑀯𑀸 𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄 𑀯𑀸 𑀯𑀺𑀘𑀸𑀭𑁂𑀢𑀼𑀁 𑀇𑀲𑁆𑀲𑀭𑁄. ‘𑀧𑀘𑁆𑀙𑀺𑀦𑁆𑀦𑁂 𑀓𑀼𑀮𑀯𑀁𑀲𑁂 𑀬𑁄 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀲𑀸𑀫𑀺𑀓𑁄, 𑀲𑁄 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀤𑁂𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀪𑀺𑀓𑁆𑀔𑀼𑀦𑀸 𑀦𑀻𑀳𑀝𑀁 𑀉𑀤𑀓𑀯𑀸𑀳𑀓𑀁 𑀅𑀴𑀦𑀸𑀕𑀭𑀸𑀚𑀫𑀳𑁂𑀲𑀻 𑀯𑀺𑀬, 𑀏𑀯𑀫𑁆𑀧𑀺 𑀯𑀝𑁆𑀝𑀢𑀻’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀯𑀘𑀦𑀢𑁄 𑀯𑀺𑀳𑀸𑀭𑀤𑀸𑀬𑀓𑀲𑁆𑀲 𑀓𑀼𑀮𑀯𑀁𑀲𑁂 𑀧𑀘𑁆𑀙𑀺𑀦𑁆𑀦𑁂𑀧𑀺 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀇𑀲𑁆𑀲𑀭𑁄 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀬𑁄 𑀓𑁄𑀘𑀺 𑀇𑀲𑁆𑀲𑀭𑁄 𑀯𑀸 𑀯𑀺𑀳𑀸𑀭𑀁 𑀯𑀺𑀘𑀸𑀭𑁂𑀢𑀼𑀁 𑀬𑀣𑀸𑀚𑁆𑀛𑀸𑀲𑀬𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀅𑀜𑁆𑀜𑁂 𑀧𑀡𑁆𑀟𑀺𑀢𑀸 𑀦𑀸𑀦𑀼𑀚𑀸𑀦𑀦𑁆𑀢𑀺.

𑀓𑀣𑀁? ‘‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑀸𑀫𑀺𑀓𑁄’’𑀢𑀺 𑀯𑀘𑀦𑀁 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀇𑀤𑀸𑀦𑀺 𑀇𑀲𑁆𑀲𑀭𑀯𑀲𑁂𑀦 𑀬𑀣𑀸 𑀚𑁂𑀢𑀯𑀦𑀁, 𑀧𑀢𑁆𑀢𑀲𑁆𑀲𑀸𑀫𑀺𑀓𑁄𑀢𑁆𑀬𑀸𑀤𑀺. 𑀬𑀣𑀸 𑀳𑀺 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀯𑀦𑀁 𑀉𑀬𑁆𑀬𑀸𑀦𑀁 𑀚𑁂𑀢𑀯𑀦𑀦𑁆𑀢𑀺 𑀯𑀺𑀕𑁆𑀕𑀳𑁂 𑀓𑀢𑁂 𑀬𑀤𑀺𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀺𑀡𑀺𑀢𑁆𑀯𑀸 𑀯𑀺𑀳𑀸𑀭𑀧𑀢𑀺𑀝𑁆𑀞𑀸𑀧𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀭𑀸𑀚𑀓𑀼𑀫𑀸𑀭𑁄 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀇𑀲𑁆𑀲𑀭𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀺𑀡𑀺𑀢𑀓𑀸𑀮𑀢𑁄 𑀧𑀼𑀩𑁆𑀩𑁂 𑀇𑀲𑁆𑀲𑀭𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀲𑀩𑁆𑀩𑀤𑀸𑀧𑀺 𑀚𑁂𑀢𑀯𑀦𑀦𑁆𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀺. 𑀬𑀣𑀸 𑀘 𑀧𑀢𑁆𑀢𑀲𑁆𑀲 𑀲𑀸𑀫𑀺𑀓𑁄 𑀧𑀢𑁆𑀢𑀲𑁆𑀲𑀸𑀫𑀺𑀓𑁄𑀢𑀺 𑀯𑀺𑀕𑁆𑀕𑀳𑁂 𑀓𑀢𑁂 𑀬𑀤𑀺𑀧𑀺 𑀤𑀸𑀬𑀓𑁂𑀳𑀺 𑀓𑀺𑀡𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀸𑀭𑁄 𑀧𑀢𑁆𑀢𑀲𑁆𑀲 𑀇𑀲𑁆𑀲𑀭𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀤𑀸𑀬𑀓𑁂𑀦 𑀓𑀺𑀡𑀺𑀢𑀓𑀸𑀮𑀢𑁄 𑀧𑀼𑀩𑁆𑀩𑁂 𑀇𑀲𑁆𑀲𑀭𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀧𑀢𑁆𑀢𑀲𑁆𑀲𑀸𑀫𑀺𑀓𑁄𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀺, 𑀏𑀯𑀁 𑀬𑀤𑀺𑀧𑀺 𑀪𑀺𑀓𑁆𑀔𑀼𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀸𑀬𑀓𑁄 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑁄 𑀦 𑀳𑁄𑀢𑀺 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲, 𑀢𑀣𑀸𑀧𑀺 𑀤𑀸𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀇𑀲𑁆𑀲𑀭𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄𑀢𑁆𑀯𑁂𑀯 𑀯𑁄𑀳𑀭𑀻𑀬𑀢𑀺, 𑀦 𑀫𑀼𑀔𑁆𑀬𑀢𑁄 𑀇𑀲𑁆𑀲𑀭𑀪𑀸𑀯𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀸𑀤𑀬𑁄 𑀧𑀝𑀺𑀕𑁆𑀕𑀸𑀳𑀓𑀸 𑀏𑀯 𑀯𑀺𑀘𑀸𑀭𑁂𑀢𑀼𑀁 𑀇𑀲𑁆𑀲𑀭𑀸, 𑀦 𑀤𑀸𑀬𑀓𑁄.

𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀲𑀦𑁆𑀢𑁂𑀲𑀼𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀲𑀼 𑀯𑀺𑀳𑀸𑀭𑀤𑀸𑀬𑀓𑁂𑀲𑀼 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁧𑁭) 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀅𑀦𑀼𑀚𑀸𑀦𑀺𑀢𑁆𑀯𑀸, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂…𑀧𑁂… 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁩𑁧𑁮) 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲𑁂𑀯 𑀯𑀺𑀘𑀸𑀭𑁂𑀢𑀼𑀁 𑀇𑀲𑁆𑀲𑀭𑀪𑀸𑀯𑀲𑁆𑀲 𑀯𑀘𑀦𑀢𑁄 𑀘 ‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀁 𑀪𑀽𑀫𑀺𑀁 𑀕𑀳𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀬𑁂𑀦 𑀲𑀸 𑀪𑀽𑀫𑀺 𑀧𑀞𑀫𑀁 𑀕𑀳𑀺𑀢𑀸, 𑀲𑁄 𑀲𑀸𑀫𑀻’’𑀢𑀺 𑀘 ‘‘𑀉𑀪𑁄𑀧𑀺 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀦𑁆𑀢𑀺, 𑀲𑁄𑀬𑁂𑀯 𑀲𑀸𑀫𑀻’’𑀢𑀺 𑀘 ‘‘𑀬𑁄 𑀧𑀦 𑀲𑀗𑁆𑀖𑀺𑀓𑀁 𑀯𑀮𑁆𑀮𑀺𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀆𑀳𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀁 𑀓𑀸𑀭𑁂𑀢𑀺, 𑀉𑀧𑀟𑁆𑀠𑀁 𑀲𑀗𑁆𑀖𑀺𑀓𑀁 𑀉𑀧𑀟𑁆𑀠𑀁 𑀧𑀼𑀕𑁆𑀕𑀮𑀺𑀓’’𑀦𑁆𑀢𑀺 𑀘 𑀲𑀗𑁆𑀖𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀲𑀸𑀫𑀺𑀪𑀸𑀯𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺.

‘‘𑀢𑀲𑁆𑀲 𑀯𑀸 𑀓𑀼𑀮𑁂 𑀬𑁄 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀢𑁂𑀲𑀁 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀺, 𑀅𑀣 𑀔𑁄 𑀕𑀫𑀺𑀓𑁄 𑀪𑀺𑀓𑁆𑀔𑀼 𑀤𑀺𑀲𑀁 𑀕𑀦𑁆𑀢𑀼𑀓𑀸𑀫𑁄 𑀯𑀺𑀳𑀸𑀭𑁂 𑀆𑀧𑀼𑀘𑁆𑀙𑀺𑀢𑀩𑁆𑀩𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑀆𑀭𑀸𑀫𑀺𑀓𑁂𑀲𑀼 𑀅𑀲𑀦𑁆𑀢𑁂𑀲𑀼 𑀢𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀫𑀁 𑀧𑀦 𑀤𑀲𑀯𑀺𑀥𑀫𑁆𑀧𑀺 𑀲𑁂𑀬𑁆𑀬𑀁 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀧𑀓𑁆𑀓𑀫𑀦𑁆𑀢𑁂𑀦 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀆𑀧𑀼𑀘𑁆𑀙𑀦𑁆𑀢𑁂𑀦 𑀘 𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑁄…𑀧𑁂… 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀭𑀸𑀫𑀺𑀓𑁄, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄, 𑀢𑀲𑁆𑀲 𑀯𑀸 𑀓𑀼𑀮𑁂 𑀬𑁄 𑀓𑁄𑀘𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀏𑀯𑀁 𑀆𑀭𑀸𑀫𑀺𑀓𑀲𑁆𑀲𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀢𑁄 𑀑𑀮𑁄𑀓𑀦𑀢𑁆𑀣𑀸𑀬 𑀯𑀢𑁆𑀢𑀲𑀻𑀲𑁂𑀦𑁂𑀯 𑀆𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀢𑁂𑀲𑀁 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀲𑁆𑀲 𑀇𑀲𑁆𑀲𑀭𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀧𑀘𑁆𑀙𑀺𑀦𑁆𑀦𑁂 𑀓𑀼𑀮𑀯𑀁𑀲𑁂’’𑀢𑁆𑀬𑀸𑀤𑀺𑀯𑀘𑀦𑀜𑁆𑀘 𑀅𑀓𑀧𑁆𑀧𑀺𑀬𑀯𑀲𑁂𑀦 𑀓𑀢𑀸𑀦𑀁 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀧𑀝𑀺𑀕𑁆𑀕𑀳𑀺𑀢𑀸𑀦𑀁 𑀔𑁂𑀢𑁆𑀢𑀯𑀢𑁆𑀣𑀼𑀢𑀴𑀸𑀓𑀸𑀤𑀻𑀦𑀁 𑀅𑀓𑀧𑁆𑀧𑀺𑀬𑀢𑁆𑀢𑀸 𑀪𑀺𑀓𑁆𑀔𑀽𑀳𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀁 𑀓𑀧𑁆𑀧𑀺𑀬𑀓𑀭𑀡𑀢𑁆𑀣𑀸𑀬 𑀭𑀸𑀚𑀸𑀤𑀻𑀳𑀺 𑀕𑀳𑁂𑀢𑁆𑀯𑀸 𑀧𑀼𑀦 𑀢𑁂𑀲𑀁𑀬𑁂𑀯 𑀪𑀺𑀓𑁆𑀔𑀽𑀦𑀁 𑀤𑀸𑀦𑀫𑁂𑀯 𑀤𑀻𑀧𑁂𑀢𑀺, 𑀦 𑀢𑁂𑀲𑀁 𑀭𑀸𑀚𑀸𑀤𑀻𑀦𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑁂𑀲𑀁 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀘𑁂𑀢𑀺𑀬𑀸𑀦𑀁 𑀤𑀸𑀦𑀁. 𑀬𑀤𑀺 𑀤𑀤𑁂𑀬𑁆𑀬𑀼𑀁, 𑀅𑀥𑀫𑁆𑀫𑀺𑀓𑀤𑀸𑀦𑀅𑀥𑀫𑁆𑀫𑀺𑀓𑀧𑀅𑀕𑁆𑀕𑀳𑀅𑀥𑀫𑁆𑀫𑀺𑀓𑀧𑀭𑀺𑀪𑁄𑀕𑀸 𑀲𑀺𑀬𑀼𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑀅𑀝𑁆𑀞. 𑁩𑁨𑁯) ‘‘𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀧𑀭𑀺. 𑀅𑀝𑁆𑀞. 𑁩𑁨𑁯) ‘‘𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺…𑀧𑁂… 𑀏𑀯𑀁 𑀯𑀼𑀢𑁆𑀢𑀸𑀦𑀺. 𑀦𑀯 𑀧𑀝𑀺𑀕𑁆𑀕𑀳𑀧𑀭𑀺𑀪𑁄𑀕𑀸𑀢𑀺 𑀏𑀢𑁂𑀲𑀁𑀬𑁂𑀯 𑀤𑀸𑀦𑀸𑀦𑀁 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀤𑀺 𑀭𑀸𑀚𑀸𑀤𑀬𑁄 𑀇𑀲𑁆𑀲𑀭𑀸𑀢𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑁂𑀬𑁆𑀬𑀼𑀁, 𑀢𑀫𑁆𑀧𑀺 𑀤𑀸𑀦𑀁 𑀅𑀥𑀫𑁆𑀫𑀺𑀓𑀤𑀸𑀦𑀁 𑀳𑁄𑀢𑀺, 𑀢𑀁 𑀤𑀸𑀦𑀁 𑀧𑀝𑀺𑀕𑁆𑀕𑀳𑀸 𑀘 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀸 𑀳𑁄𑀦𑁆𑀢𑀺, 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀘 𑀅𑀥𑀫𑁆𑀫𑀺𑀓𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁨𑁯𑁫, 𑁩𑁧𑁫) ‘𑀲𑀗𑁆𑀖𑀲𑁆𑀲𑀸’𑀢𑀺 𑀅𑀬𑀁 𑀲𑀤𑁆𑀤𑁄 ‘𑀤𑀸𑀦’𑀦𑁆𑀢𑀺 𑀏𑀢𑁆𑀣 𑀲𑀸𑀫𑀺𑀲𑀫𑁆𑀩𑀦𑁆𑀥𑁄 𑀦 𑀳𑁄𑀢𑀺, 𑀅𑀣 𑀔𑁄 𑀲𑀫𑁆𑀧𑀤𑀸𑀦𑀫𑁂𑀯, ‘𑀤𑀸𑀬𑀓𑀲𑁆𑀲𑀸’𑀢𑀺 𑀧𑀦 𑀲𑀸𑀫𑀺𑀲𑀫𑁆𑀩𑀦𑁆𑀥𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀲𑀸𑀫𑀺𑀪𑀽𑀢𑁄 𑀤𑀸𑀬𑀓𑁄𑀯 𑀇𑀲𑁆𑀲𑀭𑁄, 𑀦 𑀲𑀫𑁆𑀧𑀤𑀸𑀦𑀪𑀽𑀢𑁄 𑀲𑀗𑁆𑀖𑁄’’𑀢𑀺. 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 𑁋 ‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲𑀸’’𑀢𑀺 𑀇𑀤𑀁 𑀤𑀸𑀦𑀲𑀫𑀬𑁂 𑀧𑀯𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀤𑀺𑀦𑁆𑀦𑀲𑀫𑀬𑁂 𑀧𑀯𑀢𑁆𑀢𑀯𑀲𑁂𑀦. 𑀤𑀸𑀦𑀓𑀸𑀮𑁂 𑀳𑀺 𑀤𑀸𑀬𑀓𑁄 𑀅𑀢𑁆𑀢𑀦𑁄 𑀯𑀢𑁆𑀣𑀼𑀪𑀽𑀢𑀁 𑀯𑀺𑀳𑀸𑀭𑀁 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀸𑀬𑀓𑁄 𑀲𑀸𑀫𑀻 𑀳𑁄𑀢𑀺, 𑀲𑀗𑁆𑀖𑁄 𑀲𑀫𑁆𑀧𑀤𑀸𑀦𑀁, 𑀤𑀺𑀦𑁆𑀦𑀓𑀸𑀮𑁂 𑀧𑀦 𑀲𑀗𑁆𑀖𑁄𑀯 𑀲𑀸𑀫𑀻 𑀳𑁄𑀢𑀺 𑀯𑀺𑀳𑀸𑀭𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀦 𑀤𑀸𑀬𑀓𑁄 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀖𑁄 𑀯𑀺𑀘𑀸𑀭𑁂𑀢𑀼𑀁 𑀇𑀲𑁆𑀲𑀭𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀁, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁂𑀳𑀻’’𑀢𑀺 (𑀘𑀽𑀴𑀯. 𑁨𑁭𑁩). 𑀇𑀤𑀁 𑀧𑀦 𑀲𑀤𑁆𑀤𑀮𑀓𑁆𑀔𑀡𑀕𑀭𑀼𑀓𑀸 𑀲𑀤𑁆𑀤𑀳𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀤𑀸𑀦𑀓𑀸𑀮𑁂𑀬𑁂𑀯 𑀤𑀸𑀬𑀓𑀲𑀦𑁆𑀢𑀓𑀪𑀸𑀯𑁄 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀝𑀺𑀕𑁆𑀕𑀸𑀳𑀓𑀲𑀦𑁆𑀢𑀓𑀪𑀸𑀯𑁄 𑀲𑀩𑁆𑀩𑁂𑀲𑀁 𑀧𑀸𑀓𑀝𑁄, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀯𑀘𑀦𑀁 𑀤𑀸𑀬𑀓𑀲𑀦𑁆𑀢𑀓𑀪𑀸𑀯𑀲𑀸𑀥𑀓𑀁 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀳𑁄𑀢𑀼, 𑀢𑀣𑀸𑀧𑀺 ‘‘𑀲𑀘𑁂 𑀪𑀺𑀓𑁆𑀔𑀽𑀳𑀺 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀲𑀸𑀫𑀺𑀓𑁄 𑀯𑀸 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄 𑀧𑀼𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁩𑁮-𑁫𑁩𑁯) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑀪𑀽𑀢𑀤𑀸𑀬𑀓𑀲𑁆𑀲 𑀯𑀸 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀸𑀤𑀻𑀦𑀁 𑀯𑀁𑀲𑁂 𑀉𑀧𑁆𑀧𑀦𑁆𑀦𑀸𑀦𑀁 𑀯𑀸 𑀤𑀸𑀢𑀼𑀁 𑀇𑀲𑁆𑀲𑀭𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺. 𑀦 𑀲𑀺𑀤𑁆𑀥𑁄. 𑀓𑀲𑁆𑀫𑀸𑀢𑀺 𑀘𑁂? 𑀦𑀦𑀼 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀽𑀳𑀺 𑀧𑀭𑀺𑀘𑁆𑀘𑀢𑁆𑀢𑀪𑀸𑀯𑀁 𑀜𑀢𑁆𑀯𑀸’’𑀢𑀺, 𑀢𑀲𑁆𑀫𑀸 𑀅𑀓𑀧𑁆𑀧𑀺𑀬𑀢𑁆𑀢𑀸 𑀪𑀺𑀓𑁆𑀔𑀽𑀳𑀺 𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀓𑀧𑁆𑀧𑀺𑀬𑀓𑀭𑀡𑀢𑁆𑀣𑀸𑀬 𑀤𑀸𑀬𑀓𑀸𑀤𑀻𑀳𑀺 𑀧𑀼𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀤𑁂𑀢𑀺, 𑀯𑀝𑁆𑀝𑀢𑀺. 𑀬𑀣𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀳𑀺 𑀅𑀧𑀭𑀺𑀪𑀼𑀢𑁆𑀢𑀫𑁂𑀯 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀪𑀺𑀓𑁆𑀔𑀼𑀲𑀦𑁆𑀢𑀓𑀁𑀬𑁂𑀯 𑀆𑀧𑀢𑁆𑀢𑀺𑀫𑁄𑀘𑀦𑀢𑁆𑀣𑀁 𑀤𑀸𑀬𑀓𑀸𑀤𑀬𑁄 𑀧𑀝𑀺𑀕𑁆𑀕𑀳𑀸𑀧𑁂𑀢𑀺, 𑀦 𑀧𑀭𑀺𑀪𑀼𑀢𑁆𑀢𑀁, 𑀬𑀣𑀸 𑀘 𑀩𑀻𑀚𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑀁𑀬𑁂𑀯 𑀪𑀺𑀓𑁆𑀔𑀼𑀲𑀦𑁆𑀢𑀓𑀁 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀪𑀸𑀯𑀢𑁄 𑀧𑀭𑀺𑀫𑁄𑀘𑀦𑀢𑁆𑀣𑀁 𑀓𑀧𑁆𑀧𑀺𑀬𑀓𑀸𑀭𑀓𑀸𑀤𑀬𑁄 𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑀺, 𑀦 𑀅𑀧𑀭𑀺𑀬𑀸𑀧𑀦𑁆𑀦𑀁, 𑀏𑀯𑀁 𑀅𑀓𑀧𑁆𑀧𑀺𑀬𑀁 𑀪𑀺𑀓𑁆𑀔𑀽𑀳𑀺 𑀧𑀭𑀺𑀘𑁆𑀘𑀢𑁆𑀢𑀁𑀬𑁂𑀯 𑀢𑀴𑀸𑀓𑀸𑀤𑀺𑀓𑀁 𑀓𑀧𑁆𑀧𑀺𑀬𑀓𑀭𑀡𑀢𑁆𑀣𑀁 𑀤𑀸𑀬𑀓𑀸𑀤𑀬𑁄 𑀧𑀼𑀦 𑀤𑁂𑀦𑁆𑀢𑀺, 𑀦 𑀅𑀧𑀭𑀺𑀘𑁆𑀘𑀢𑁆𑀢𑀁, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀯𑀘𑀦𑀁 𑀓𑀧𑁆𑀧𑀺𑀬𑀓𑀭𑀡𑀢𑁆𑀢𑀁𑀬𑁂𑀯 𑀲𑀸𑀥𑁂𑀢𑀺, 𑀦 𑀇𑀲𑁆𑀲𑀭𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀢𑀣𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀚𑀸𑀢𑀺𑀪𑀽𑀫𑀺𑀬𑀁 𑀚𑀸𑀢𑀺𑀪𑀽𑀫𑀺𑀓𑀸 𑀉𑀧𑀸𑀲𑀓𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀢𑁆𑀣𑁂𑀭𑀁 𑀲𑀢𑁆𑀢𑀳𑀺 𑀚𑀸𑀢𑀺𑀪𑀽𑀫𑀺𑀓𑀯𑀺𑀳𑀸𑀭𑁂𑀳𑀺 𑀧𑀩𑁆𑀩𑀸𑀚𑀬𑀺𑀁𑀲𑀽𑀢𑀺 𑀯𑀘𑀦𑀢𑁄 𑀤𑀸𑀬𑀓𑁄 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀇𑀲𑁆𑀲𑀭𑀢𑁆𑀢𑀸𑀬𑁂𑀯 𑀳𑀺 𑀢𑁂 𑀣𑁂𑀭𑀁 𑀧𑀩𑁆𑀩𑀸𑀚𑁂𑀢𑀼𑀁 𑀲𑀓𑁆𑀓𑀸, 𑀦𑁄 𑀅𑀦𑀺𑀲𑁆𑀲𑀭𑀸’’𑀢𑀺, 𑀦 𑀔𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸? ‘‘𑀚𑀸𑀢𑀺𑀪𑀽𑀫𑀺𑀓𑀸 𑀉𑀧𑀸𑀲𑀓𑀸’’𑀇𑀘𑁆𑀘𑁂𑀯 𑀳𑀺 𑀯𑀼𑀢𑁆𑀢𑀁, 𑀦 ‘‘𑀯𑀺𑀳𑀸𑀭𑀤𑀸𑀬𑀓𑀸’’𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀤𑁂𑀲𑁂 𑀯𑀲𑀦𑁆𑀢𑀸 𑀩𑀳𑀯𑁄 𑀉𑀧𑀸𑀲𑀓𑀸 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀺𑀓𑀢𑁆𑀣𑁂𑀭𑀁 𑀅𑀬𑀼𑀢𑁆𑀢𑀘𑀸𑀭𑀺𑀢𑁆𑀢𑀸 𑀲𑀓𑀮𑀲𑀢𑁆𑀢𑀯𑀺𑀳𑀸𑀭𑀢𑁄 𑀧𑀩𑁆𑀩𑀸𑀚𑀬𑀺𑀁𑀲𑀼, 𑀦 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑀸𑀬𑀓𑀪𑀸𑀯𑁂𑀦 𑀇𑀲𑁆𑀲𑀭𑀢𑁆𑀢𑀸, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀉𑀤𑀸𑀳𑀭𑀡𑀁 𑀦 𑀇𑀲𑁆𑀲𑀭𑀪𑀸𑀯𑀤𑀻𑀧𑀓𑀁, 𑀅𑀣 𑀔𑁄 𑀅𑀧𑀭𑀸𑀥𑀸𑀦𑀼𑀭𑀽𑀧𑀓𑀭𑀡𑀪𑀸𑀯𑀤𑀻𑀧𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀬𑀤𑀸 𑀤𑀸𑀬𑀓𑁄 𑀯𑀺𑀳𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀲 𑀫𑀼𑀜𑁆𑀘𑀘𑁂𑀢𑀦𑀁 𑀧𑀢𑁆𑀯𑀸 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑁄 𑀯𑀸 𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄 𑀯𑀸 𑀚𑀦𑀧𑀤𑀲𑁆𑀲𑀸𑀫𑀺𑀓𑀭𑀸𑀚𑀸𑀤𑀬𑁄 𑀯𑀸 𑀇𑀲𑁆𑀲𑀭𑀸 𑀪𑀯𑀺𑀢𑀼𑀁 𑀯𑀸 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀦 𑀮𑀪𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀪𑀽𑀢𑁄 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀲𑁄𑀬𑁂𑀯 𑀇𑀲𑁆𑀲𑀭𑁄 𑀪𑀯𑀺𑀢𑀼𑀁 𑀯𑀸 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀮𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀤𑀸𑀬𑀓𑀸𑀤𑀻𑀦𑀁 𑀇𑀲𑁆𑀲𑀭𑁄 𑀪𑀯𑀺𑀢𑀼𑀁 𑀅𑀮𑀪𑀦𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀢𑁆𑀢𑀸 𑀤𑀸𑀦𑀲𑁆𑀲, 𑀧𑀣𑀯𑀸𑀤𑀺𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀦 𑀘 𑀧𑀼𑀦 𑀕𑀳𑀡𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀘𑀦𑀢𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀤𑀻𑀬𑀫𑀸𑀦𑀁 𑀧𑀢𑀢𑀺, 𑀢𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀧𑀭𑀺𑀘𑁆𑀘𑀢𑁆𑀢𑀁 𑀢𑀁, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁂𑀳𑀻’’𑀢𑀺 (𑀘𑀽𑀴𑀯. 𑁨𑁭𑁩) 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀁, 𑀪𑀺𑀓𑁆𑀔𑀯𑁂, 𑀤𑀸𑀬𑀓𑁂𑀳𑀻𑀢𑀺 𑀯𑀘𑀦𑁂𑀦 𑀧𑀦𑁂𑀢𑁆𑀣 𑀧𑀭𑀲𑀦𑁆𑀢𑀓𑀸𑀪𑀸𑀯𑁄 𑀤𑀻𑀧𑀺𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺. 𑀲𑀗𑁆𑀖𑀸𑀤𑀻𑀦𑀁 𑀇𑀲𑁆𑀲𑀭𑁄 𑀪𑀯𑀺𑀢𑀼𑀁 𑀮𑀪𑀦𑀪𑀸𑀯𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺 𑀘𑁂? 𑀲𑀗𑁆𑀖𑀺𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑁄, ‘‘𑀧𑀼𑀕𑁆𑀕𑀮𑀺𑀓𑁂 𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀸𑀘𑀺𑀢𑁆𑀢𑀺𑀬𑀧𑀸𑀴𑀺𑀬𑀁 (𑀧𑀸𑀘𑀺. 𑁧𑁧𑁭, 𑁧𑁨𑁭) 𑀆𑀕𑀫𑀦𑀢𑁄 𑀘 ‘‘𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀘𑀦𑀢𑁄 𑀘 ‘‘𑀅𑀪𑀺𑀬𑁄𑀕𑁂𑀧𑀺 𑀘𑁂𑀢𑁆𑀣 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀁 𑀯𑀺𑀳𑀸𑀭𑀁 𑀯𑀸 𑀧𑀭𑀺𑀯𑁂𑀡𑀁 𑀯𑀸 𑀆𑀯𑀸𑀲𑀁 𑀯𑀸 𑀫𑀳𑀦𑁆𑀢𑀫𑁆𑀧𑀺 𑀔𑀼𑀤𑁆𑀤𑀓𑀫𑁆𑀧𑀺 𑀅𑀪𑀺𑀬𑀼𑀜𑁆𑀚𑀢𑁄 𑀅𑀪𑀺𑀬𑁄𑀕𑁄 𑀦 𑀭𑀼𑀳𑀢𑀺, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀦 𑀳𑁂𑀢𑁆𑀣 𑀲𑀩𑁆𑀩𑁂 𑀘𑀸𑀢𑀼𑀤𑁆𑀤𑀺𑀲𑀸 𑀪𑀺𑀓𑁆𑀔𑀽 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀻𑀢𑀺. 𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀅𑀪𑀺𑀬𑀼𑀜𑁆𑀚𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀲𑀓𑁆𑀓𑁄𑀢𑀺 𑀢𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀢𑀼’’𑀦𑁆𑀢𑀺 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁨) 𑀯𑀘𑀦𑀢𑁄 𑀘 𑀯𑀺𑀜𑁆𑀜𑀸𑀬𑀢𑀺.

𑀓𑀣𑀁 𑀤𑀸𑀬𑀓𑀸𑀤𑀻𑀦𑀁 𑀯𑀺𑀘𑀸𑀭𑁂𑀢𑀼𑀁 𑀅𑀮𑀪𑀦𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀲𑀦𑁆𑀢𑁂𑀲𑀼𑀧𑀺 𑀯𑁂𑀴𑀼𑀯𑀦𑀯𑀺𑀳𑀸𑀭𑀸𑀤𑀺𑀤𑀸𑀬𑀓𑁂𑀲𑀼 𑀢𑁂𑀲𑀁 𑀯𑀺𑀘𑀸𑀭𑀡𑀁 𑀅𑀦𑀦𑀼𑀚𑀸𑀦𑀺𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 𑀪𑀺𑀓𑁆𑀔𑀼𑀲𑁆𑀲𑁂𑀯 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺𑀅𑀦𑀼𑀚𑀸𑀦𑀢𑁄 𑀘 𑀪𑀡𑁆𑀟𑀦𑀓𑀸𑀭𑀓𑁂𑀲𑀼 𑀓𑁄𑀲𑀫𑁆𑀩𑀓𑀪𑀺𑀓𑁆𑀔𑀽𑀲𑀼 𑀲𑀸𑀯𑀢𑁆𑀣𑀺𑀁 𑀆𑀕𑀢𑁂𑀲𑀼 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀘 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀘 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺 (𑀫𑀳𑀸𑀯. 𑁪𑁬𑁮) 𑀏𑀯𑀁 𑀚𑁂𑀢𑀯𑀦𑀯𑀺𑀳𑀸𑀭𑀤𑀸𑀬𑀓𑀧𑀼𑀩𑁆𑀩𑀸𑀭𑀸𑀫𑀯𑀺𑀳𑀸𑀭𑀤𑀸𑀬𑀓𑀪𑀽𑀢𑁂𑀲𑀼 𑀆𑀭𑁄𑀘𑀺𑀢𑁂𑀲𑀼𑀧𑀺 𑀢𑁂𑀲𑀁 𑀲𑁂𑀦𑀸𑀲𑀦𑀯𑀺𑀘𑀸𑀭𑀡𑀁 𑀅𑀯𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 ‘‘𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑁂𑀦𑀸𑀲𑀦𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀆𑀭𑁄𑀘𑀺𑀢𑁂 ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀘𑁂 𑀧𑀦, 𑀪𑀦𑁆𑀢𑁂, 𑀯𑀺𑀯𑀺𑀢𑁆𑀢𑀁 𑀦 𑀳𑁄𑀢𑀺, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁪𑁭𑁩) 𑀣𑁂𑀭𑀲𑁆𑀲𑁂𑀯 𑀲𑁂𑀦𑀸𑀲𑀦𑀲𑁆𑀲 𑀯𑀺𑀘𑀸𑀭𑀡𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺.

𑀓𑀣𑀁 𑀧𑀦 𑀲𑀗𑁆𑀖𑀸𑀤𑀻𑀦𑀁 𑀲𑁂𑀦𑀸𑀲𑀦𑀁 𑀯𑀺𑀘𑀸𑀭𑁂𑀢𑀼𑀁 𑀮𑀪𑀦𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀏𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁄, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺 (𑀘𑀽𑀴𑀯. 𑁩𑁧𑁭).

𑀏𑀯𑀁 𑀲𑀗𑁆𑀖𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀸𑀧𑁂𑀢𑁆𑀯𑀸 𑀧𑀼𑀦 𑀢𑁂𑀦 𑀲𑀗𑁆𑀖𑀲𑀫𑁆𑀫𑀢𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀯𑀺𑀥𑀸𑀦𑀁 𑀅𑀦𑀼𑀚𑀸𑀦𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼𑀁, 𑀲𑁂𑀬𑁆𑀬𑀸 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀲𑁆𑀲 𑀲𑀗𑁆𑀖𑁂𑀦 𑀯𑀺𑀘𑀸𑀭𑁂𑀢𑀼𑀁 𑀮𑀪𑀦𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺.

‘‘𑀤𑀻𑀖𑀪𑀸𑀡𑀓𑀸𑀤𑀺𑀪𑁂𑀤𑀲𑁆𑀲 𑀧𑀦 𑀕𑀡𑀲𑁆𑀲 𑀏𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀺𑀦𑁆𑀦𑀯𑀺𑀳𑀸𑀭𑀸𑀤𑀺𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁂 𑀥𑀼𑀭𑀦𑀺𑀓𑁆𑀔𑁂𑀧𑀲𑀫𑁆𑀪𑀯𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁦𑁨) 𑀆𑀕𑀫𑀦𑀢𑁄 𑀘 ‘‘𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀸𑀴𑀺𑀬𑀁 (𑀧𑀸𑀘𑀺. 𑁧𑁧𑁭) 𑀆𑀕𑀫𑀦𑀢𑁄 𑀘 ‘‘𑀬𑀲𑁆𑀫𑀺𑀁 𑀧𑀦 𑀯𑀺𑀲𑁆𑀲𑀸𑀲𑁄 𑀭𑀼𑀳𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀁 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀫𑀺𑀯 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁧𑁧𑁨) 𑀯𑀘𑀦𑀢𑁄 𑀘 𑀕𑀡𑀲𑁆𑀲 𑀤𑀺𑀦𑁆𑀦𑁄 𑀕𑀡𑀲𑀦𑁆𑀢𑀓𑀯𑀺𑀳𑀸𑀭𑁄 𑀕𑀡𑁂𑀦𑁂𑀯 𑀯𑀺𑀘𑀸𑀭𑀻𑀬𑀢𑁂, 𑀦𑁄 𑀤𑀸𑀬𑀓𑀸𑀤𑀻𑀳𑀺. 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑁄 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁄𑀧𑀺 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁂𑀦𑁂𑀯 𑀯𑀺𑀘𑀸𑀭𑀻𑀬𑀢𑁂, 𑀦𑁄 𑀤𑀸𑀬𑀓𑀸𑀤𑀻𑀳𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀯𑀺𑀦𑀬𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀯𑀺𑀳𑀸𑀭𑀲𑁆𑀲 𑀲𑀗𑁆𑀖𑀺𑀓𑀕𑀡𑀲𑀦𑁆𑀢𑀓𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀢𑀺𑀯𑀺𑀥𑀲𑁆𑀲𑁂𑀯 𑀯𑀘𑀦𑀢𑁄 𑀘 𑀢𑁂𑀲𑀁𑀬𑁂𑀯 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀺𑀳𑀸𑀭𑀯𑀺𑀘𑀸𑀭𑀡𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘 𑀤𑀸𑀬𑀓𑀲𑀦𑁆𑀢𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀯𑀺𑀲𑀼𑀁 𑀅𑀯𑀼𑀢𑁆𑀢𑀢𑁆𑀢𑀸 𑀘 𑀤𑀸𑀬𑀓𑀸𑀦𑀁 𑀯𑀺𑀳𑀸𑀭𑀯𑀺𑀘𑀸𑀭𑀡𑀲𑁆𑀲 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀘 𑀲𑀗𑁆𑀖𑀸𑀤𑀬𑁄 𑀏𑀯 𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺, 𑀢𑁂𑀬𑁂𑀯 𑀘 𑀯𑀺𑀘𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀳𑁄𑀢𑀼, 𑀢𑁂𑀲𑀼 𑀧𑀝𑀺𑀕𑁆𑀕𑀸𑀳𑀓𑀪𑀽𑀢𑁂𑀲𑀼 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂𑀲𑀼 𑀲𑁄 𑀯𑀺𑀳𑀸𑀭𑁄 𑀓𑀲𑁆𑀲 𑀲𑀦𑁆𑀢𑀓𑁄 𑀳𑁄𑀢𑀺, 𑀓𑁂𑀦 𑀘 𑀯𑀺𑀘𑀸𑀭𑁂𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀢𑀸𑀯 ‘‘𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀢𑁆𑀢𑀸 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀓𑀸𑀮𑀓𑀢𑁂𑀲𑀼𑀧𑀺 𑀢𑀤𑀜𑁆𑀜𑁄 𑀘𑀸𑀢𑀼𑀤𑁆𑀤𑀺𑀲𑀲𑀗𑁆𑀖𑁄 𑀘 𑀅𑀦𑀸𑀕𑀢𑀲𑀗𑁆𑀖𑁄 𑀘 𑀇𑀲𑁆𑀲𑀭𑁄, 𑀢𑀲𑁆𑀲 𑀲𑀦𑁆𑀢𑀓𑁄, 𑀢𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀕𑀡𑀲𑀦𑁆𑀢𑀓𑁂 𑀧𑀦 𑀢𑀲𑁆𑀫𑀺𑀁 𑀕𑀡𑁂 𑀬𑀸𑀯 𑀏𑀓𑁄𑀧𑀺 𑀅𑀢𑁆𑀣𑀺, 𑀢𑀸𑀯 𑀕𑀡𑀲𑀦𑁆𑀢𑀓𑁄𑀯, 𑀢𑁂𑀦 𑀅𑀯𑀲𑀺𑀝𑁆𑀞𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀲𑀩𑁆𑀩𑁂𑀲𑀼 𑀓𑀸𑀮𑀓𑀢𑁂𑀲𑀼 𑀬𑀤𑀺 𑀲𑀓𑀮𑀕𑀡𑁄 𑀯𑀸 𑀢𑀁𑀕𑀡𑀧𑀭𑀺𑀬𑀸𑀧𑀦𑁆𑀦𑀅𑀯𑀲𑀺𑀝𑁆𑀞𑀧𑀼𑀕𑁆𑀕𑀮𑁄 𑀯𑀸 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀺𑀦𑁆𑀦𑁄, 𑀬𑁂𑀦 𑀘 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀯𑀲𑁂𑀦 𑀕𑀳𑀺𑀢𑁄, 𑀲𑁄 𑀇𑀲𑁆𑀲𑀭𑁄. 𑀲𑀘𑁂𑀧𑀺 𑀲𑀓𑀮𑀕𑀡𑁄 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀅𑀜𑁆𑀜𑀕𑀡𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑁂𑀢𑀺, 𑀢𑁂 𑀅𑀜𑁆𑀜𑀕𑀡𑀲𑀗𑁆𑀖𑀧𑀼𑀕𑁆𑀕𑀮𑀸 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺. 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀧𑀦 𑀲𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀅𑀢𑁆𑀢𑀦𑁄 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑁂𑀢𑀺, 𑀢𑁂 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺. 𑀬𑁄 𑀯𑀸 𑀧𑀦 𑀢𑀲𑁆𑀲 𑀚𑀻𑀯𑀫𑀸𑀦𑀲𑁆𑀲𑁂𑀯 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀲𑁄𑀯 𑀇𑀲𑁆𑀲𑀭𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀲𑀗𑁆𑀖𑀺𑀓𑁂 𑀯𑀺𑀳𑀸𑀭𑀲𑁆𑀲 𑀕𑀭𑀼𑀪𑀡𑁆𑀟𑀢𑁆𑀢𑀸 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀓𑀁 𑀳𑁄𑀢𑀺, 𑀦 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀁. 𑀕𑀡𑀲𑀦𑁆𑀢𑀓𑀧𑀼𑀕𑁆𑀕𑀮𑀺𑀓𑁂𑀲𑀼 𑀧𑀦 𑀢𑁂𑀲𑀁 𑀲𑀸𑀫𑀺𑀓𑀢𑁆𑀢𑀸 𑀤𑀸𑀦𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀸 𑀭𑀼𑀳𑀦𑁆𑀢𑀺, ‘‘𑀢𑀲𑁆𑀫𑀸 𑀲𑁄 𑀚𑀻𑀯𑀫𑀸𑀦𑁄𑀬𑁂𑀯 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀤𑀸𑀲𑀺, 𑀓𑁄𑀘𑀺 𑀯𑀸 𑀯𑀺𑀲𑁆𑀲𑀸𑀲𑀁 𑀅𑀕𑁆𑀕𑀳𑁂𑀲𑀺. 𑀬𑀲𑁆𑀲 𑀤𑀺𑀦𑁆𑀦𑀁, 𑀬𑁂𑀦 𑀘 𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀳𑁄𑀢𑀻’’𑀢𑀺 𑀘 ‘‘𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺 𑀅𑀯𑀺𑀪𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀓𑀸𑀮𑀓𑀢𑁂 𑀇𑀢𑀭𑁄 𑀲𑀸𑀫𑀻, 𑀩𑀳𑀽𑀦𑀫𑁆𑀧𑀺 𑀲𑀦𑁆𑀢𑀓𑁂 𑀏𑀲𑁂𑀯 𑀦𑀬𑁄’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁯) 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺.

𑀏𑀯𑀁 𑀧𑀦 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀤𑀺𑀦𑁆𑀦𑀁 ‘‘𑀫𑀫𑀘𑁆𑀘𑀬𑁂𑀦 𑀅𑀲𑀼𑀓𑀲𑁆𑀲 𑀳𑁄𑀢𑀽’’𑀢𑀺 𑀤𑀸𑀦𑀁 𑀅𑀘𑁆𑀘𑀬𑀤𑀸𑀦𑀢𑁆𑀢𑀸 𑀦 𑀭𑀼𑀳𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁪𑁧𑁯) ‘‘𑀲𑀘𑁂 𑀳𑀺 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑁄 𑀓𑁄𑀘𑀺 𑀓𑀸𑀮𑀁 𑀓𑀭𑁄𑀦𑁆𑀢𑁄 ‘𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀧𑀭𑀺𑀓𑁆𑀔𑀸𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀳𑁄𑀢𑀼, 𑀆𑀘𑀭𑀺𑀬𑀲𑁆𑀲 𑀳𑁄𑀢𑀼, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀳𑁄𑀢𑀼, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀳𑁄𑀢𑀼, 𑀫𑀸𑀢𑀼 𑀳𑁄𑀢𑀼, 𑀧𑀺𑀢𑀼 𑀳𑁄𑀢𑀼, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑁄𑀢𑀽’𑀢𑀺 𑀯𑀤𑀢𑀺, 𑀢𑁂𑀲𑀁 𑀦 𑀳𑁄𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺. 𑀦 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀘𑁆𑀘𑀬𑀤𑀸𑀦𑀁 𑀭𑀼𑀳𑀢𑀺, 𑀕𑀺𑀳𑀻𑀦𑀁 𑀧𑀦 𑀭𑀼𑀳𑀢𑀻’’𑀢𑀺. 𑀏𑀢𑁆𑀣 𑀘 𑀏𑀓𑀘𑁆𑀘𑁂 𑀧𑀦 𑀯𑀺𑀦𑀬𑀥𑀭𑀸 ‘‘𑀕𑀺𑀳𑀻𑀦𑀦𑁆𑀢𑀺 𑀧𑀤𑀁 𑀲𑀫𑁆𑀧𑀤𑀸𑀦𑀦𑁆𑀢𑀺 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀓𑀁 𑀅𑀘𑁆𑀘𑀬𑀤𑀸𑀦𑀯𑀲𑁂𑀦 𑀕𑀺𑀳𑀻𑀦𑀁 𑀤𑀤𑀦𑁆𑀢𑁂 𑀭𑀼𑀳𑀢𑀺, 𑀧𑀜𑁆𑀘𑀦𑁆𑀦𑀁 𑀧𑀦 𑀲𑀳𑀥𑀫𑁆𑀫𑀺𑀓𑀸𑀦𑀁 𑀤𑁂𑀦𑁆𑀢𑁄 𑀦 𑀭𑀼𑀳𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀫𑀸𑀢𑀸𑀧𑀺𑀢𑀽𑀦𑀁 𑀤𑀤𑀦𑁆𑀢𑁄𑀧𑀺 𑀭𑀼𑀳𑁂𑀬𑁆𑀬 𑀢𑁂𑀲𑀁 𑀕𑀺𑀳𑀺𑀪𑀽𑀢𑀢𑁆𑀢𑀸. ‘‘𑀅𑀣 𑀘 𑀧𑀦 ‘𑀫𑀸𑀢𑀼 𑀳𑁄𑀢𑀼, 𑀧𑀺𑀢𑀼 𑀳𑁄𑀢𑀼, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑁄𑀢𑀽’𑀢𑀺 𑀯𑀤𑀢𑀺, 𑀢𑁂𑀲𑀁 𑀦 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀦 𑀭𑀼𑀳𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀕𑀺𑀳𑀻𑀦𑀁 𑀧𑀦𑀸’’𑀢𑀺 𑀇𑀤𑀁 𑀦 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀅𑀣 𑀔𑁄 𑀲𑀸𑀫𑀺𑀯𑀘𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀕𑀺𑀳𑀻𑀦𑀁 𑀧𑀦 𑀲𑀦𑁆𑀢𑀓𑀁 𑀅𑀘𑁆𑀘𑀬𑀤𑀸𑀦𑀁 𑀭𑀼𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀲𑀘𑁂 𑀳𑀺 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑁄 𑀓𑁄𑀘𑀺 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀫𑀫𑀘𑁆𑀘𑀬𑁂𑀦 𑀫𑀬𑁆𑀳𑀁 𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀦 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀘𑁆𑀘𑀬𑀤𑀸𑀦𑀁 𑀭𑀼𑀳𑀢𑀺, 𑀕𑀺𑀳𑀻𑀦𑀁 𑀧𑀦 𑀭𑀼𑀳𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀸𑀫𑁆𑀬𑀢𑁆𑀣𑁂 𑀙𑀝𑁆𑀞𑀻𑀩𑀳𑀼𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺. 𑀬𑀤𑀺 𑀏𑀯𑀁 ‘‘𑀕𑀺𑀳𑀻𑀦’’𑀦𑁆𑀢𑀺 𑀧𑀤𑀲𑁆𑀲 𑀅𑀲𑀫𑁆𑀧𑀤𑀸𑀦𑀢𑁆𑀢𑁂 𑀲𑀢𑀺 𑀓𑀢𑀫𑀁 𑀲𑀫𑁆𑀧𑀤𑀸𑀦𑀁 𑀳𑁄𑀢𑀻𑀢𑀺? ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺 𑀧𑀤𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁪𑁧𑁯) ‘‘𑀫𑀸𑀢𑀼 𑀳𑁄𑀢𑀼, 𑀧𑀺𑀢𑀼 𑀳𑁄𑀢𑀼, 𑀅𑀜𑁆𑀜𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀳𑁄𑀢𑀽’’𑀢𑀺. 𑀅𑀬𑀫𑀢𑁆𑀣𑁄 𑀅𑀚𑁆𑀚𑀼𑀓𑀯𑀢𑁆𑀣𑀼𑀦𑀸 (𑀧𑀸𑀭𑀸. 𑁧𑁫𑁮) 𑀤𑀻𑀧𑁂𑀢𑀩𑁆𑀩𑁄. 𑀏𑀯𑀁 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀤𑀢𑁆𑀯𑀸 𑀫𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀅𑀫𑁆𑀳𑁂𑀳𑀺 𑀜𑀸𑀢𑁄, 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀫𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺? 𑀢𑀢𑁆𑀣𑀸𑀧𑀺 𑀲𑀗𑁆𑀖𑀺𑀓𑁂 𑀢𑀸𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑁄𑀯 𑀇𑀲𑁆𑀲𑀭𑁄, 𑀕𑀡𑀲𑀦𑁆𑀢𑀓𑁂 𑀧𑀦 𑀏𑀓𑀘𑁆𑀘𑁂𑀲𑀼 𑀅𑀯𑀲𑁂𑀲𑀸 𑀇𑀲𑁆𑀲𑀭𑀸, 𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑁄𑀯 𑀇𑀲𑁆𑀲𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁯) ‘‘𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺. 𑀧𑀼𑀕𑁆𑀕𑀮𑀺𑀓𑁂 𑀧𑀦 𑀯𑀺𑀳𑀸𑀭𑀲𑁆𑀲 𑀕𑀭𑀼𑀪𑀡𑁆𑀟𑀢𑁆𑀢𑀸 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀓𑀁 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀺.

𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁. 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁯) 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑁆𑀧𑀺 ‘‘𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁’’𑀇𑀘𑁆𑀘𑁂𑀯 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀦 ‘‘𑀯𑀺𑀳𑀸𑀭’’𑀦𑁆𑀢𑀺, 𑀢𑀲𑁆𑀫𑀸 𑀓𑀣𑀁 𑀯𑀺𑀳𑀸𑀭𑀲𑁆𑀲 𑀕𑀭𑀼𑀪𑀡𑁆𑀟𑀪𑀸𑀯𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀯𑀺𑀳𑀸𑀭𑁄 𑀯𑀺𑀳𑀸𑀭𑀯𑀢𑁆𑀣𑀼, 𑀇𑀤𑀁 𑀤𑀼𑀢𑀺𑀬𑀁 𑀅𑀯𑁂𑀪𑀗𑁆𑀕𑀺𑀓’’𑀦𑁆𑀢𑀺 𑀧𑀸𑀴𑀺𑀬𑀁,

‘‘𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀘𑀢𑀼𑀲𑀗𑁆𑀕𑀳𑀁;

𑀘𑀢𑀼𑀢𑁆𑀣𑀁 𑀦𑀯𑀓𑁄𑀝𑁆𑀞𑀸𑀲𑀁, 𑀧𑀜𑁆𑀘𑀫𑀁 𑀅𑀝𑁆𑀞𑀪𑁂𑀤𑀦𑀁.

‘‘𑀇𑀢𑀺 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄;

𑀧𑀜𑁆𑀘𑀯𑀻𑀲𑀯𑀺𑀥𑀁 𑀦𑀸𑀣𑁄, 𑀕𑀭𑀼𑀪𑀡𑁆𑀟𑀁 𑀧𑀓𑀸𑀲𑀬𑀻’’𑀢𑀺. (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑁋

𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺.

𑀇𑀢𑀺 𑀤𑀸𑀬𑀓𑁄 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀺, 𑀢𑀲𑁆𑀲 𑀫𑀼𑀜𑁆𑀘𑀘𑁂𑀢𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑀓𑀸𑀮𑁂 𑀤𑀸𑀬𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑁄 𑀳𑁄𑀢𑀺, 𑀤𑀸𑀢𑀼𑀁 𑀯𑀸 𑀯𑀺𑀘𑀸𑀭𑁂𑀢𑀼𑀁 𑀯𑀸 𑀇𑀲𑁆𑀲𑀭𑁄, 𑀫𑀼𑀜𑁆𑀘𑀘𑁂𑀢𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀕𑁆𑀕𑀸𑀳𑀓𑀪𑀺𑀓𑁆𑀔𑀼 𑀲𑀸𑀫𑀺𑀓𑁄 𑀳𑁄𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸 𑀅𑀜𑁆𑀜𑁂𑀲𑀁 𑀤𑀸𑀢𑀼𑀁 𑀯𑀸 𑀇𑀲𑁆𑀲𑀭𑁄. 𑀲𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀚𑀻𑀯𑀫𑀸𑀦𑀓𑁆𑀔𑀡𑁂𑀬𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑁂𑀢𑀺, 𑀢𑀤𑀸 𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀲𑀸𑀫𑀺𑀓𑀸 𑀳𑁄𑀦𑁆𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀸 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀼𑀁 𑀇𑀲𑁆𑀲𑀭𑀸. 𑀬𑀤𑀺 𑀧𑀦 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸𑀯 𑀓𑀸𑀮𑀁 𑀓𑀭𑁄𑀢𑀺, 𑀢𑀤𑀸 𑀲𑀗𑁆𑀖𑁄𑀯 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀸𑀫𑀺𑀓𑁄 𑀳𑁄𑀢𑀺, 𑀦 𑀤𑀸𑀬𑀓𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸, 𑀲𑀗𑁆𑀖𑀸𑀦𑀼𑀫𑀢𑀺𑀬𑀸 𑀏𑀯 𑀧𑀼𑀕𑁆𑀕𑀮𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺, 𑀦 𑀅𑀢𑁆𑀢𑀦𑁄 𑀇𑀲𑁆𑀲𑀭𑀯𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀫𑀽𑀮𑀢𑁄𑀬𑁂𑀯 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀲𑀗𑁆𑀖𑀺𑀓𑀪𑀽𑀢𑀯𑀺𑀳𑀸𑀭𑁄 𑀯𑀸 𑀫𑀽𑀮𑁂 𑀕𑀡𑀧𑀼𑀕𑁆𑀕𑀮𑀸𑀦𑀁 𑀤𑀺𑀦𑁆𑀦𑀢𑁆𑀢𑀸 𑀕𑀡𑀲𑀦𑁆𑀢𑀓𑀧𑀼𑀕𑁆𑀕𑀮𑀺𑀓𑀪𑀽𑀢𑁄𑀧𑀺 𑀢𑁂𑀲𑀁 𑀕𑀡𑀧𑀼𑀕𑁆𑀕𑀮𑀸𑀦𑀁 𑀅𑀜𑁆𑀜𑀲𑁆𑀲 𑀦𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀅𑀤𑀢𑁆𑀯𑀸 𑀓𑀸𑀮𑀓𑀢𑀢𑁆𑀢𑀸 𑀧𑀘𑁆𑀙𑀸 𑀲𑀗𑁆𑀖𑀺𑀓𑀪𑀸𑀯𑀁 𑀧𑀢𑁆𑀢𑀯𑀺𑀳𑀸𑀭𑁄 𑀯𑀸 𑀲𑀗𑁆𑀖𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑁄 𑀳𑁄𑀢𑀺. 𑀲𑀗𑁆𑀖𑁂𑀦𑀧𑀺 𑀪𑀕𑀯𑀢𑁄 𑀅𑀦𑀼𑀫𑀢𑀺𑀬𑀸 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁧𑁭) ‘‘𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘𑀓𑁂𑀦 𑀦𑀼 𑀔𑁄 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀩𑁆𑀩’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼’𑀦𑁆𑀢𑀺’’𑀆𑀤𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀯𑀲𑁆𑀲𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄, 𑀉𑀢𑀼𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄, 𑀥𑀼𑀯𑀯𑀸𑀲𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑁂𑀲𑀼 𑀯𑀲𑁆𑀲𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀼𑀭𑀺𑀫𑀯𑀲𑁆𑀲𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄, 𑀧𑀘𑁆𑀙𑀺𑀫𑀯𑀲𑁆𑀲𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀤𑀼𑀯𑀺𑀥𑁄. 𑀉𑀢𑀼𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀧𑀺 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄, 𑀢𑀗𑁆𑀔𑀡𑀧𑀝𑀺𑀲𑀮𑁆𑀮𑀸𑀦𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀤𑀼𑀯𑀺𑀥𑁄’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀏𑀢𑀁 𑀧𑀸𑀴𑀺𑀬𑀸 𑀘 𑀅𑀝𑁆𑀞𑀓𑀣𑀸𑀬 𑀘 𑀅𑀲𑀫𑁂𑀦𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀜𑁆𑀳𑀺 (𑀘𑀽𑀴𑀯. 𑁩𑁧𑁮) ‘‘𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘𑀓𑀢𑀺 𑀦𑀼 𑀔𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀕𑁆𑀕𑀸𑀳𑀸 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀼𑀭𑀺𑀫𑀓𑁄 𑀕𑀸𑀳𑁂𑀢𑀩𑁆𑀩𑁄, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀓𑁄 𑀕𑀸𑀳𑁂𑀢𑀩𑁆𑀩𑁄, 𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸’’𑀢𑀺 𑀏𑀯𑀁 𑀆𑀕𑀢𑁄, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀢𑀻𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼 𑀧𑀼𑀭𑀺𑀫𑀓𑁄 𑀘 𑀧𑀘𑁆𑀙𑀺𑀫𑀓𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀸𑀳𑀸 𑀣𑀸𑀯𑀭𑀸. 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁂 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄…𑀧𑁂… 𑀅𑀬𑀁 𑀢𑀸𑀯 𑀅𑀦𑁆𑀢𑁄𑀯𑀲𑁆𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀤𑀺𑀯𑀲𑁂𑀦 𑀧𑀸𑀴𑀺𑀬𑀁 𑀆𑀕𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸, 𑀅𑀬𑀁 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘𑀸’’𑀢𑀺 𑀏𑀯𑀁 𑀆𑀕𑀢𑁄, 𑀢𑀲𑁆𑀫𑀸 𑀲𑀗𑁆𑀖𑁂𑀦 𑀲𑀫𑁆𑀫𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑀸.

𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄, 𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀉𑀢𑀼𑀓𑀸𑀮𑁄 𑀦𑀸𑀫 𑀳𑁂𑀫𑀦𑁆𑀢𑀉𑀢𑀼𑀕𑀺𑀫𑁆𑀳𑀉𑀢𑀼𑀯𑀲𑁂𑀦 𑀅𑀝𑁆𑀞 𑀫𑀸𑀲𑀸, 𑀢𑀲𑁆𑀫𑀺𑀁 𑀓𑀸𑀮𑁂 𑀪𑀺𑀓𑁆𑀔𑀽 𑀅𑀦𑀺𑀬𑀢𑀸𑀯𑀸𑀲𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀬𑁂 𑀬𑀤𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀤𑀸 𑀪𑀺𑀓𑁆𑀔𑀽 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫. 𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀦 ‘‘𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀢𑀺𑀯𑀺𑀥𑁄 𑀳𑁄𑀢𑀺. 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄𑀧𑀺 𑀳𑀺 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀕𑀸𑀳𑀺𑀢𑀢𑁆𑀢𑀸 𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀫𑁂𑀯 𑀧𑀯𑀺𑀲𑀢𑀺, 𑀦 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄’’𑀢𑀺. 𑀢𑀗𑁆𑀔𑀡𑀧𑀝𑀺𑀲𑀮𑁆𑀮𑀸𑀦𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀘 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀁 𑀆𑀕𑀢𑁄, 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀬𑁂𑀯 𑀢𑀤𑀗𑁆𑀕𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺𑀧𑀺 𑀢𑀗𑁆𑀔𑀡𑀧𑀝𑀺𑀲𑀮𑁆𑀮𑀸𑀦𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀉𑀢𑀼𑀓𑀸𑀮𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀧𑀺 ‘‘𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀢𑀗𑁆𑀔𑀡𑀧𑀝𑀺𑀲𑀮𑁆𑀮𑀸𑀦𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀤𑀼𑀩𑁆𑀩𑀺𑀥𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀅𑀣𑀸𑀧𑀺 𑀯𑀤𑀦𑁆𑀢𑀺 ‘‘𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼 𑀘𑀢𑁆𑀢𑀸𑀭𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺𑀮𑀤𑁆𑀥𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀝𑁆𑀞𑁂𑀦 𑀳𑀼𑀢𑁆𑀯𑀸 𑀅𑀦𑁆𑀢𑁄𑀲𑀻𑀫𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀣𑀸𑀯𑀺𑀦𑀬𑀁 𑀯𑀺𑀘𑀸𑀭𑁂𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀢𑁂 𑀧𑀦 𑀯𑀺𑀘𑀸𑀭𑀡𑀸 𑀬𑀸𑀯𑀚𑁆𑀚𑀓𑀸𑀮𑀸 𑀣𑀸𑀯𑀭𑀸 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀦𑁆𑀢𑀺, 𑀥𑀼𑀯𑀯𑀸𑀲𑀯𑀲𑁂𑀦 𑀯𑀺𑀘𑀸𑀭𑀡𑀫𑁂𑀯 𑀬𑀸𑀯𑀚𑁆𑀚𑀓𑀸𑀮𑀸 𑀣𑀸𑀯𑀭𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺, 𑀢𑀫𑁆𑀧𑀺 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸? 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀪𑁂𑀤𑁂 ‘‘𑀥𑀼𑀯𑀯𑀸𑀲𑀯𑀲𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄’’𑀢𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀬𑀜𑁆𑀘 𑀦𑀢𑁆𑀣𑀺. 𑀥𑀼𑀯𑀯𑀸𑀲𑀯𑀲𑁂𑀦 𑀯𑀺𑀘𑀸𑀭𑀡𑀜𑁆𑀘 𑀲𑀫𑁆𑀫𑀼𑀢𑀺𑀮𑀤𑁆𑀥𑁂𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑀁 𑀦 𑀳𑁄𑀢𑀺, 𑀅𑀣 𑀔𑁄 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑀸𑀦𑀫𑁂𑀯, 𑀢𑀲𑁆𑀫𑀸 𑀲𑀫𑀕𑁆𑀕𑁄 𑀲𑀗𑁆𑀖𑁄 𑀩𑀳𑀽𑀧𑀓𑀸𑀭𑀢𑀸𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑀲𑁆𑀲 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀥𑀼𑀯𑀯𑀸𑀲𑀯𑀲𑁂𑀦 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑁂𑀢𑀺, 𑀢𑀁 𑀬𑀸𑀯𑀚𑁆𑀚𑀓𑀸𑀮𑀸 𑀣𑀸𑀯𑀭𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀫𑀕𑁆𑀕𑁄 𑀲𑀗𑁆𑀖𑁄𑀯 𑀥𑀼𑀯𑀯𑀸𑀲𑀯𑀲𑁂𑀦 𑀤𑁂𑀢𑀺, 𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁄𑀢𑀺 𑀅𑀬𑀫𑀢𑁆𑀣𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺 𑀘𑁂? ‘‘𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸 𑀕𑀡𑀯𑀸𑀘𑀓𑀆𑀘𑀭𑀺𑀬𑀲𑁆𑀲 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁨𑁦; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑀗𑁆𑀖𑁄 𑀧𑀦 𑀩𑀳𑀼𑀲𑁆𑀲𑀼𑀢𑀲𑁆𑀲 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀩𑀳𑀽𑀧𑀓𑀸𑀭𑀲𑁆𑀲 𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑁂𑀢𑀻’’𑀢𑀺 𑀘 ‘‘𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀕𑀡𑀯𑀸𑀘𑀓𑀸𑀘𑀭𑀺𑀬𑀸𑀦𑀁 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀻’’𑀢𑀺 𑀘 ‘‘𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁂𑀦𑀸𑀲𑀦𑀫𑁆𑀧𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀘 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀁 𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀘 𑀅𑀝𑁆𑀞𑀓𑀣𑀸𑀲𑀼 (𑀧𑀭𑀺. 𑀅𑀝𑁆𑀞. 𑁪𑁮𑁨) 𑀯𑀘𑀦𑀢𑁄 𑀲𑀸𑀥𑀼𑀓𑀁 𑀦𑀺𑀲𑁆𑀲𑀁𑀲𑀬𑁂𑀦 𑀜𑀸𑀢𑀩𑁆𑀩𑁄𑀢𑀺.

𑀓𑀣𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀤𑀸𑀢𑀩𑁆𑀩𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁂𑀦𑀸𑀲𑀦𑀫𑁆𑀧𑀺 𑀲𑀗𑁆𑀖𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀓𑀧𑁆𑀧𑀺𑀬𑀓𑀸𑀭𑀓𑀸𑀤𑀻𑀦𑀁 𑀪𑀢𑁆𑀢𑀯𑁂𑀢𑀦𑀫𑁆𑀧𑀺 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀓𑀫𑁆𑀫𑀯𑀕𑁆𑀕𑁂 𑀆𑀕𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀓𑀣𑀁 𑀧𑀦 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀬𑁂𑀯 𑀤𑀸𑀢𑀩𑁆𑀩𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀩𑀳𑀽𑀧𑀓𑀸𑀭𑀢𑀦𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀢𑀸𑀤𑀺𑀩𑀳𑀼𑀉𑀧𑀓𑀸𑀭𑀪𑀸𑀯𑀁. 𑀦 𑀓𑁂𑀯𑀮𑀁 𑀇𑀤𑀫𑁂𑀯𑀸𑀢𑀺 𑀆𑀳 ‘𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘𑀸’𑀢𑀺𑀆𑀤𑀺. 𑀢𑁂𑀦 𑀩𑀳𑀽𑀧𑀓𑀸𑀭𑀢𑁆𑀢𑁂𑀧𑀺 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑀸𑀪𑀸𑀯𑁂, 𑀕𑀼𑀡𑀯𑀺𑀲𑀺𑀝𑁆𑀞𑀢𑁆𑀢𑁂𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸𑀪𑀸𑀯𑁂 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀝𑀻. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺.

𑀓𑀲𑁆𑀫𑀸 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀬𑀸𑀯𑀚𑁆𑀚𑀓𑀸𑀮𑀸 𑀦 𑀢𑀺𑀝𑁆𑀞𑀢𑀻𑀢𑀺? 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀮𑁆𑀮𑀪𑀢𑁆𑀢𑀸, 𑀦𑀸𑀦𑀸𑀤𑁂𑀲𑀯𑀸𑀲𑀻𑀦𑀁 𑀦𑀸𑀦𑀸𑀘𑀭𑀺𑀬𑀓𑀼𑀮𑀲𑀫𑁆𑀪𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀘 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦 𑀢𑀺𑀝𑁆𑀞𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁧𑁭). 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀧𑀸𑀘𑀺. 𑀅𑀝𑁆𑀞. 𑁧𑁨𑁨) ‘‘𑀏𑀯𑀭𑀽𑀧𑁂𑀦 𑀳𑀺 𑀲𑀪𑀸𑀕𑀧𑀼𑀕𑁆𑀕𑀮𑁂𑀦 𑀏𑀓𑀯𑀺𑀳𑀸𑀭𑁂 𑀯𑀸 𑀏𑀓𑀧𑀭𑀺𑀯𑁂𑀡𑁂 𑀯𑀸 𑀯𑀲𑀦𑁆𑀢𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦 𑀥𑀼𑀯𑀯𑀸𑀲𑀢𑁆𑀣𑀸𑀬 𑀤𑀸𑀦𑀯𑀺𑀘𑀸𑀭𑁄 𑀬𑀸𑀯𑀚𑁆𑀚𑀓𑀸𑀮𑀸 𑀢𑀺𑀝𑁆𑀞𑀢𑀻𑀢𑀺? 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀪𑀸𑀯𑁂𑀧𑀺 𑀲𑀻𑀫𑀝𑁆𑀞𑀓𑀲𑁆𑀲 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀓𑀢𑁆𑀢𑀩𑁆𑀩𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀁 𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁨).

𑀉𑀢𑀼𑀓𑀸𑀮𑁂 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁂𑀦 𑀆𑀕𑀢𑁄 𑀪𑀺𑀓𑁆𑀔𑀼 𑀦 𑀧𑀝𑀺𑀩𑀸𑀳𑁂𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀅𑀦𑀼𑀝𑁆𑀞𑀸𑀧𑀦𑀻𑀬𑀸. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀸𑀦𑀁 𑀢𑁂𑀫𑀸𑀲𑀁 𑀧𑀝𑀺𑀩𑀸𑀳𑀺𑀢𑀼𑀁, 𑀉𑀢𑀼𑀓𑀸𑀮𑀁 𑀧𑀦 𑀦 𑀧𑀝𑀺𑀩𑀸𑀳𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁮). ‘‘𑀅𑀜𑁆𑀜𑀢𑁆𑀭 𑀅𑀦𑀼𑀝𑁆𑀞𑀸𑀧𑀦𑀻𑀬𑀸’’𑀢𑀺 𑀯𑀼𑀢𑁆𑀢𑀁, 𑀓𑀢𑀫𑁂 𑀅𑀦𑀼𑀝𑁆𑀞𑀸𑀧𑀦𑀻𑀬𑀸𑀢𑀺? 𑀘𑀢𑁆𑀢𑀸𑀭𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀸 𑀯𑀼𑀟𑁆𑀠𑀢𑀭𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀕𑀺𑀮𑀸𑀦𑁄, 𑀲𑀗𑁆𑀖𑀢𑁄 𑀮𑀤𑁆𑀥𑀲𑁂𑀦𑀸𑀲𑀦𑁄 𑀘. 𑀢𑀢𑁆𑀣 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁄𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀽𑀲𑀼 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸 𑀬𑀣𑀸𑀯𑀼𑀟𑁆𑀠𑀁 𑀓𑁂𑀦𑀘𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄. 𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀗𑁆𑀖𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀲𑁆𑀲 𑀤𑀺𑀦𑁆𑀦𑀢𑀸𑀬 𑀲𑀗𑁆𑀖𑀲𑁆𑀲 𑀪𑀡𑁆𑀟𑀁 𑀭𑀓𑁆𑀔𑀦𑁆𑀢𑁄 𑀕𑁄𑀧𑁂𑀦𑁆𑀢𑁄 𑀯𑀲𑀢𑀺, 𑀢𑀲𑁆𑀫𑀸 𑀲𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀓𑁂𑀦𑀘𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄. 𑀕𑀺𑀮𑀸𑀦𑁄 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑁄 𑀅𑀢𑁆𑀢𑀦𑁄 𑀮𑀤𑁆𑀥𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄 𑀓𑁂𑀦𑀘𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄. 𑀲𑀗𑁆𑀖𑀢𑁄 𑀮𑀤𑁆𑀥𑀲𑁂𑀦𑀸𑀲𑀦𑁄 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀤𑀺𑀦𑁆𑀦𑀲𑁂𑀦𑀸𑀲𑀦𑀢𑁆𑀢𑀸 𑀓𑁂𑀦𑀘𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) ‘‘𑀘𑀢𑁆𑀢𑀸𑀭𑁄 𑀳𑀺 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑀸 𑀯𑀼𑀟𑁆𑀠𑀢𑀭𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀕𑀺𑀮𑀸𑀦𑁄, 𑀲𑀗𑁆𑀖𑀢𑁄 𑀮𑀤𑁆𑀥𑀲𑁂𑀦𑀸𑀲𑀦𑁄𑀢𑀺. 𑀢𑀢𑁆𑀣 𑀯𑀼𑀟𑁆𑀠𑀢𑀭𑁄 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬 𑀦𑀯𑀓𑀢𑀭𑁂𑀦 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀲𑀗𑁆𑀖𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀲𑁆𑀲 𑀤𑀺𑀦𑁆𑀦𑀢𑀸𑀬, 𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀕𑀺𑀮𑀸𑀦𑀢𑀸𑀬, 𑀲𑀗𑁆𑀖𑁄 𑀧𑀦 𑀩𑀳𑀼𑀲𑁆𑀲𑀼𑀢𑀲𑁆𑀲 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀩𑀳𑀽𑀧𑀓𑀸𑀭𑀲𑁆𑀲 𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀲𑁄 𑀉𑀧𑀓𑀸𑀭𑀓𑀢𑀸𑀬 𑀘 𑀲𑀗𑁆𑀖𑀢𑁄 𑀮𑀤𑁆𑀥𑀢𑀸𑀬 𑀘 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺. 𑀞𑀧𑁂𑀢𑁆𑀯𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀯𑀲𑁂𑀲𑀸 𑀯𑀼𑀝𑁆𑀞𑀸𑀧𑀦𑀻𑀬𑀸𑀯 𑀳𑁄𑀦𑁆𑀢𑀺.

𑀅𑀧𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀫𑁆𑀳𑀺 𑀆𑀕𑀢𑁂 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀧𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀉𑀢𑀼𑀓𑀸𑀮𑁂 𑀢𑀸𑀯 𑀓𑁂𑀘𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀼𑀭𑁂𑀪𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀞𑀫𑀬𑀸𑀫𑀁 𑀯𑀸 𑀫𑀚𑁆𑀛𑀺𑀫𑀬𑀸𑀫𑀁 𑀯𑀸 𑀧𑀘𑁆𑀙𑀺𑀫𑀬𑀸𑀫𑀁 𑀯𑀸, 𑀬𑁂 𑀬𑀤𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀤𑀸𑀯 𑀪𑀺𑀓𑁆𑀔𑀽 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀢𑀭𑀳𑀺 𑀧𑀦 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀅𑀧𑁆𑀧𑁂𑀓𑀘𑁆𑀘𑁂 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀜𑀢𑁆𑀯𑀸 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀆𑀭𑀩𑁆𑀪 ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀢𑁆𑀯𑀸 𑀤𑁂𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀢𑁆𑀢𑀦𑀸 𑀧𑀲𑀦𑁆𑀦𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀯𑀺𑀳𑀸𑀭𑀁 𑀓𑀢𑁆𑀯𑀸𑀧𑀺 𑀤𑀸𑀦𑀓𑀸𑀮𑁂 𑀢𑁂𑀦 𑀉𑀬𑁆𑀬𑁄𑀚𑀺𑀢𑀸 𑀳𑀼𑀢𑁆𑀯𑀸 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀆𑀭𑀩𑁆𑀪 𑀯𑀼𑀢𑁆𑀢𑀦𑀬𑁂𑀦 𑀤𑁂𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀓𑀭𑀡𑀓𑀸𑀮𑁂𑀧𑀺 𑀤𑀸𑀦𑀓𑀸𑀮𑁂𑀧𑀺 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀪𑀺𑀓𑁆𑀔𑀼𑀫𑁂𑀯 𑀆𑀭𑀩𑁆𑀪 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀣𑀸𑀧𑀺 𑀤𑀓𑁆𑀔𑀺𑀡𑁄𑀤𑀓𑀧𑀸𑀢𑀦𑀓𑀸𑀮𑁂 𑀢𑁂𑀦 𑀲𑀺𑀓𑁆𑀔𑀸𑀧𑀺𑀢𑀸 𑀬𑀣𑀸𑀯𑀼𑀢𑁆𑀢𑀧𑀸𑀞𑀁 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑀺, 𑀘𑀺𑀢𑁆𑀢𑁂𑀦 𑀧𑀦 𑀓𑀼𑀮𑀽𑀧𑀓𑀲𑁆𑀲𑁂𑀯 𑀤𑁂𑀦𑁆𑀢𑀺, 𑀦 𑀲𑀩𑁆𑀩𑀲𑀗𑁆𑀖𑀲𑀸𑀥𑀸𑀭𑀡𑀢𑁆𑀣𑀁 𑀇𑀘𑁆𑀙𑀦𑁆𑀢𑀺.

𑀇𑀫𑁂𑀲𑀼 𑀢𑀻𑀲𑀼 𑀤𑀸𑀦𑁂𑀲𑀼 𑀧𑀞𑀫𑀁 𑀧𑀼𑀩𑁆𑀩𑀓𑀸𑀮𑁂𑀧𑀺 𑀤𑀸𑀦𑀓𑀸𑀮𑁂𑀧𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀤𑀼𑀢𑀺𑀬𑀁 𑀧𑀼𑀩𑁆𑀩𑀓𑀸𑀮𑁂 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀤𑀸𑀦𑀓𑀸𑀮𑁂 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀫𑁂𑀯. 𑀢𑀢𑀺𑀬𑀁 𑀧𑀦 𑀧𑀼𑀩𑁆𑀩𑀓𑀸𑀮𑁂𑀧𑀺 𑀤𑀸𑀦𑀓𑀸𑀮𑁂𑀧𑀺 𑀓𑀼𑀮𑀽𑀧𑀓𑀧𑀼𑀕𑁆𑀕𑀮𑀫𑁂𑀯 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑀺, 𑀦 𑀲𑀗𑁆𑀖𑀁, 𑀓𑁂𑀯𑀮𑀁 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 ‘‘𑀓𑀺𑀁 𑀅𑀬𑀁 𑀯𑀺𑀳𑀸𑀭𑁄 𑀘𑀺𑀢𑁆𑀢𑀯𑀲𑁂𑀦 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀺, 𑀯𑀘𑀻𑀪𑁂𑀤𑀯𑀲𑁂𑀦 𑀲𑀗𑁆𑀖𑀺𑀓𑁄’’𑀢𑀺 𑀘𑀺𑀦𑁆𑀢𑀸𑀬𑀁 𑀏𑀓𑀘𑁆𑀘𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀲𑀼𑀔𑀫𑀦𑁆𑀯𑁂𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻𑀢𑀺. (𑀥. 𑀧. 𑁨) 𑁋

𑀯𑀘𑀦𑀢𑁄 𑀘𑀺𑀢𑁆𑀢𑀯𑀲𑁂𑀦 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀻’’𑀢𑀺. 𑀅𑀜𑁆𑀜𑁂 ‘‘𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫) 𑀯𑀘𑀦𑀢𑁄 𑀯𑀘𑀻𑀪𑁂𑀤𑀯𑀲𑁂𑀦 𑀲𑀗𑁆𑀖𑀺𑀓𑁄 𑀳𑁄𑀢𑀻’’𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀇𑀤𑀁 𑀤𑀸𑀦𑀁 𑀧𑀼𑀩𑁆𑀩𑁂 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀧𑀘𑁆𑀙𑀸 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑀺𑀢𑀁, 𑀢𑀲𑁆𑀫𑀸 ‘‘𑀲𑀗𑁆𑀖𑀺𑀓𑁄’’𑀢𑀺 𑀯𑀼𑀢𑁆𑀢𑁂 𑀦𑀯𑀲𑀼 𑀅𑀥𑀫𑁆𑀫𑀺𑀓𑀤𑀸𑀦𑁂𑀲𑀼 ‘‘𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀫𑁂𑀢𑀻’’𑀢𑀺 (𑀧𑀸𑀭𑀸. 𑁬𑁬𑁦) 𑀯𑀼𑀢𑁆𑀢𑀁 𑀅𑀝𑁆𑀞𑀫𑀁 𑀅𑀥𑀫𑁆𑀫𑀺𑀓𑀤𑀸𑀦𑀁 𑀳𑁄𑀢𑀺, 𑀢𑀲𑁆𑀲 𑀤𑀸𑀦𑀲𑁆𑀲 𑀧𑀝𑀺𑀕𑁆𑀕𑀳𑀸𑀧𑀺 𑀧𑀭𑀺𑀪𑁄𑀕𑀸𑀧𑀺 𑀅𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀸 𑀅𑀥𑀫𑁆𑀫𑀺𑀓𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀺. ‘‘𑀧𑀼𑀕𑁆𑀕𑀮𑀺𑀓𑁄’’𑀢𑀺 𑀯𑀼𑀢𑁆𑀢𑁂 𑀢𑀻𑀲𑀼 𑀥𑀫𑁆𑀫𑀺𑀓𑀤𑀸𑀦𑁂𑀲𑀼 ‘‘𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀁 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀢𑀺𑀬𑀥𑀫𑁆𑀫𑀺𑀓𑀤𑀸𑀦𑀁 𑀳𑁄𑀢𑀺, 𑀢𑀲𑁆𑀲 𑀧𑀝𑀺𑀕𑁆𑀕𑀳𑀸𑀧𑀺 𑀧𑀭𑀺𑀪𑁄𑀕𑀸𑀧𑀺 𑀥𑀫𑁆𑀫𑀺𑀓𑀧𑀝𑀺𑀕𑁆𑀕𑀳𑀸 𑀥𑀫𑁆𑀫𑀺𑀓𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀺𑀓𑀧𑀓𑁆𑀔𑀁 𑀪𑀚𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀺𑀕𑀡𑁂 𑀧𑀲𑀻𑀤𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀕𑀡𑀲𑁆𑀲 𑀤𑁂𑀦𑁆𑀢𑀺 ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑁂 𑀧𑀲𑀻𑀤𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲 𑀤𑁂𑀦𑁆𑀢𑀺 ‘‘𑀇𑀫𑀁 𑀯𑀺𑀳𑀸𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺. 𑀏𑀢𑁂 𑀧𑀦 𑀕𑀡𑀲𑀦𑁆𑀢𑀓𑀧𑀼𑀕𑁆𑀕𑀮𑀺𑀓𑀸 𑀯𑀺𑀳𑀸𑀭𑀸 𑀤𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀝𑀺𑀕𑁆𑀕𑀸𑀳𑀓𑀲𑀦𑁆𑀢𑀓𑀸𑀯 𑀳𑁄𑀦𑁆𑀢𑀺, 𑀦 𑀤𑀸𑀬𑀓𑀲𑀦𑁆𑀢𑀓𑀸. 𑀢𑁂𑀲𑀼 𑀕𑀡𑀲𑀦𑁆𑀢𑀓𑁄 𑀢𑀸𑀯 𑀏𑀓𑀘𑁆𑀘𑁂𑀲𑀼 𑀫𑀢𑁂𑀲𑀼 𑀅𑀯𑀲𑁂𑀲𑀸𑀦𑀁 𑀲𑀦𑁆𑀢𑀓𑁄, 𑀢𑁂𑀲𑀼 𑀥𑀭𑀫𑀸𑀦𑁂𑀲𑀼𑀬𑁂𑀯 𑀓𑀲𑁆𑀲𑀘𑀺 𑀤𑁂𑀦𑁆𑀢𑀺, 𑀢𑀲𑁆𑀲 𑀲𑀦𑁆𑀢𑀓𑁄. 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑀺𑀓𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁬𑁯) ‘‘𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺 𑀅𑀯𑀺𑀪𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀓𑀸𑀮𑀓𑀢𑁂 𑀇𑀢𑀭𑁄 𑀲𑀸𑀫𑀻, 𑀩𑀳𑀽𑀦𑀁 𑀲𑀦𑁆𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑀺𑀓𑀁𑀯 𑀳𑁄𑀢𑀻’’𑀢𑀺.

𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁄𑀧𑀺 𑀬𑀤𑀺 𑀲𑁄 𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀚𑀻𑀯𑀫𑀸𑀦𑀓𑀸𑀮𑁂𑀬𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑁂𑀢𑀺, 𑀓𑁄𑀘𑀺 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀢𑀁 𑀯𑀺𑀳𑀸𑀭𑀁 𑀅𑀕𑁆𑀕𑀳𑁂𑀲𑀺, 𑀢𑀲𑁆𑀲 𑀲𑀦𑁆𑀢𑀓𑁄 𑀳𑁄𑀢𑀺. 𑀓𑀲𑁆𑀲𑀘𑀺 𑀅𑀤𑀢𑁆𑀯𑀸 𑀓𑀸𑀮𑀓𑀢𑁂 𑀲𑀗𑁆𑀖𑀺𑀓𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁄 𑀚𑀻𑀯𑀫𑀸𑀦𑁄𑀬𑁂𑀯 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀤𑀸𑀲𑀺, 𑀓𑁄𑀘𑀺 𑀯𑀸 𑀯𑀺𑀲𑁆𑀲𑀸𑀲𑀁 𑀅𑀕𑁆𑀕𑀳𑁂𑀲𑀺. 𑀬𑀲𑁆𑀲 𑀤𑀺𑀦𑁆𑀦𑁄, 𑀬𑁂𑀦 𑀘 𑀕𑀳𑀺𑀢𑁄, 𑀢𑀲𑁆𑀲𑁂𑀯 𑀳𑁄𑀢𑀻’’𑀢𑀺. 𑀧𑀸𑀴𑀺𑀬𑀜𑁆𑀘 (𑀫𑀳𑀸𑀯. 𑁩𑁬𑁯) ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁, 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁, 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁯) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄.

𑀲𑀗𑁆𑀖𑀺𑀓𑁂 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 ‘‘𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀘𑀸’’𑀢𑀺 (𑀘𑀽𑀴𑀯. 𑁩𑁧𑁮) 𑀯𑀼𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀦𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑀆𑀕𑀢𑀸𑀦𑀁 ‘‘𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀦𑀜𑁆𑀘 𑀏𑀢𑀭𑀳𑀺 𑀅𑀲𑀫𑁆𑀧𑀚𑁆𑀚𑀦𑀢𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀧𑀸𑀴𑀺𑀬𑀁 𑀆𑀕𑀢𑀲𑁆𑀲 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁆𑀲 𑀥𑀼𑀯𑀯𑀸𑀲𑀢𑁆𑀣𑀸𑀬 𑀲𑀗𑁆𑀖𑁂𑀦 𑀤𑀺𑀦𑁆𑀦𑀢𑀸𑀬 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁆𑀲 𑀯𑀲𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺. 𑀯𑀼𑀟𑁆𑀠𑀢𑀭𑀕𑀺𑀮𑀸𑀦𑀸 𑀳𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀦𑀼𑀝𑁆𑀞𑀸𑀧𑀦𑀻𑀬𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) ‘‘𑀯𑀼𑀟𑁆𑀠𑀢𑀭𑁄 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬 𑀦𑀯𑀓𑀢𑀭𑁂𑀦 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄, 𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀕𑀺𑀮𑀸𑀦𑀢𑀸𑀬𑀸’’𑀢𑀺. 𑀪𑀡𑁆𑀟𑀸𑀕𑀸𑀭𑀺𑀓𑀥𑀫𑁆𑀫𑀓𑀣𑀺𑀓𑀸𑀤𑀬𑁄 𑀥𑀼𑀯𑀯𑀸𑀲𑀢𑁆𑀣𑀸𑀬 𑀲𑀗𑁆𑀖𑁂𑀦 𑀤𑀺𑀦𑁆𑀦𑀢𑀸𑀬 𑀅𑀦𑀼𑀝𑁆𑀞𑀸𑀧𑀦𑀻𑀬𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸…𑀧𑁂… 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀫𑀸 𑀬𑀲𑁆𑀲 𑀲𑀗𑁆𑀖𑁂𑀦 𑀤𑀺𑀦𑁆𑀦𑁄, 𑀲𑁄𑀧𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁨𑁦; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸). 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀏𑀢𑀭𑀳𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁂𑀲𑀼 𑀬𑀣𑀸𑀓𑀫𑁆𑀫𑀗𑁆𑀕𑀢𑁂𑀲𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀬𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁄, 𑀲𑁄𑀧𑀺 ‘‘𑀅𑀬𑀁 𑀯𑀺𑀳𑀸𑀭𑁄 𑀫𑀬𑀸 𑀯𑀲𑀺𑀢𑀩𑁆𑀩𑁄’’𑀢𑀺 𑀯𑀤𑀢𑀺. 𑀬𑁄 𑀢𑀢𑁆𑀣 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄, 𑀲𑁄𑀧𑀺 𑀢𑀣𑁂𑀯 𑀯𑀤𑀢𑀺. 𑀬𑁂𑀦 𑀲𑁄 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄𑀧𑀺 ‘‘𑀫𑀬𑀸 𑀧𑀲𑀻𑀤𑀺𑀢𑀧𑀼𑀕𑁆𑀕𑀮𑁄 𑀆𑀭𑁄𑀧𑁂𑀢𑀩𑁆𑀩𑁄’’𑀢𑀺 𑀯𑀤𑀢𑀺. 𑀲𑀗𑁆𑀖𑁄𑀧𑀺 ‘‘𑀫𑀬𑀫𑁂𑀯 𑀇𑀲𑁆𑀲𑀭𑀸, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀇𑀘𑁆𑀙𑀺𑀢𑀧𑀼𑀕𑁆𑀕𑀮𑁄 𑀆𑀭𑁄𑀧𑁂𑀢𑀩𑁆𑀩𑁄’’𑀢𑀺 𑀯𑀤𑀢𑀺. 𑀏𑀯𑀁𑀤𑁆𑀯𑀺𑀥𑀸 𑀯𑀸 𑀢𑀺𑀥𑀸 𑀯𑀸 𑀘𑀢𑀼𑀥𑀸 𑀯𑀸 𑀪𑀺𑀦𑁆𑀦𑁂𑀲𑀼 𑀫𑀳𑀦𑁆𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺.

𑀢𑁂𑀲𑀼 𑀯𑀼𑀟𑁆𑀠𑀢𑀭𑁄 ‘‘𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀆𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀧𑀸𑀴𑀺𑀧𑀸𑀞𑀜𑁆𑀘 (𑀫𑀳𑀸𑀯. 𑁪𑁭𑁩; 𑀘𑀽𑀴𑀯. 𑁩𑁧𑁬), ‘‘𑀯𑀼𑀟𑁆𑀠𑀢𑀭𑁄 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬 𑀦𑀯𑀓𑀢𑀭𑁂𑀦 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 (𑀧𑀸𑀘𑀺. 𑀅𑀝𑁆𑀞. 𑁧𑁧𑁯 𑀆𑀤𑀬𑁄; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀕𑀳𑁂𑀢𑁆𑀯𑀸 ‘‘𑀅𑀳𑀫𑁂𑀯 𑀏𑀢𑁆𑀣 𑀯𑀼𑀟𑁆𑀠𑀢𑀭𑁄, 𑀫𑀬𑀸 𑀯𑀼𑀟𑁆𑀠𑀢𑀭𑁄 𑀅𑀜𑁆𑀜𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀳𑀫𑁂𑀯 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀢𑀼𑀫𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀩𑁆𑀬𑀢𑁆𑀢𑁄𑀧𑀺 ‘‘𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁂𑀦𑀸𑀲𑀦𑀫𑁆𑀧𑀻’’𑀢𑀺 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀯𑀘𑀦𑀜𑁆𑀘 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬), ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼𑀁, 𑀦𑀺𑀲𑁆𑀲𑀬𑀁 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀧𑀸𑀴𑀺𑀯𑀘𑀦𑀜𑁆𑀘 (𑀫𑀳𑀸𑀯. 𑁭𑁬, 𑁮𑁨) 𑀕𑀳𑁂𑀢𑁆𑀯𑀸 ‘‘𑀅𑀳𑀫𑁂𑀯 𑀏𑀢𑁆𑀣 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄, 𑀦 𑀫𑀬𑀸 𑀅𑀜𑁆𑀜𑁄 𑀩𑁆𑀬𑀢𑁆𑀢𑀢𑀭𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀳𑀫𑁂𑀯 𑀇𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀲𑀜𑁆𑀜𑀻. 𑀯𑀺𑀳𑀸𑀭𑀓𑀸𑀭𑀓𑁄𑀧𑀺 ‘‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀲𑁄 𑀯𑀺𑀳𑀸𑀭𑀲𑀸𑀫𑀺𑀓𑁄𑀢𑀺 𑀯𑀺𑀦𑀬𑀧𑀸𑀞𑁄 (𑀧𑀸𑀘𑀺. 𑀅𑀝𑁆𑀞. 𑁧𑁧𑁬) 𑀅𑀢𑁆𑀣𑀺, 𑀫𑀬𑀸 𑀘 𑀩𑀳𑀼𑀁 𑀥𑀦𑀁 𑀘𑀚𑀺𑀢𑁆𑀯𑀸 𑀅𑀬𑀁 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄, 𑀢𑀲𑁆𑀫𑀸 𑀫𑀬𑀸 𑀧𑀲𑀦𑁆𑀦𑀧𑀼𑀕𑁆𑀕𑀮𑁄 𑀆𑀭𑁄𑀧𑁂𑀢𑀩𑁆𑀩𑁄, 𑀦 𑀅𑀜𑁆𑀜𑁄’’𑀢𑀺 𑀲𑀜𑁆𑀜𑀻. 𑀲𑀗𑁆𑀖𑁄𑀧𑀺 ‘‘𑀲𑀗𑁆𑀖𑀺𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑁄’’𑀢𑀺𑀆𑀤𑀺𑀧𑀸𑀴𑀺𑀯𑀘𑀦𑀜𑁆𑀘 (𑀧𑀸𑀘𑀺. 𑁧𑁧𑁬, 𑁧𑁨𑁧, 𑁧𑁨𑁬, 𑁧𑁩𑁧), 𑀅𑀦𑁆𑀢𑀫𑀲𑁄 𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑀁 𑀕𑀸𑀫𑀤𑀸𑀭𑀓𑁂𑀳𑀺 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀳𑀺 𑀓𑀢𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻’’𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 (𑀘𑀽𑀴𑀯. 𑀅𑀝𑁆𑀞. 𑁩𑁨𑁧) 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀯𑀺𑀳𑀸𑀭𑁄 𑀲𑀗𑁆𑀖𑀺𑀓𑁄 𑀲𑀗𑁆𑀖𑀲𑀦𑁆𑀢𑀓𑁄, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀅𑀪𑀺𑀭𑀼𑀘𑀺𑀢𑀧𑀼𑀕𑁆𑀕𑀮𑁄𑀯 𑀆𑀭𑁄𑀧𑁂𑀢𑀩𑁆𑀩𑁄, 𑀦 𑀅𑀜𑁆𑀜𑁄’’𑀢𑀺 𑀲𑀜𑁆𑀜𑀻.

𑀢𑀢𑁆𑀣 𑀯𑀼𑀟𑁆𑀠𑀢𑀭𑀲𑁆𑀲 𑀯𑀘𑀦𑁂𑀧𑀺 ‘‘𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂’’𑀢𑁆𑀬𑀸𑀤𑀺𑀯𑀘𑀦𑀁 (𑀘𑀽𑀴𑀯. 𑁩𑁧𑁬) 𑀢𑁂𑀲𑀼 𑀢𑁂𑀲𑀼 𑀆𑀲𑀦𑀲𑀸𑀮𑀸𑀤𑀻𑀲𑀼 𑀅𑀕𑁆𑀕𑀸𑀲𑀦𑀲𑁆𑀲 𑀯𑀼𑀟𑁆𑀠𑀢𑀭𑀸𑀭𑀳𑀢𑁆𑀢𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁂 𑀆𑀕𑀢𑁂 𑀯𑀼𑀝𑁆𑀞𑀸𑀬 𑀆𑀲𑀦𑀁 𑀤𑀸𑀢𑀩𑁆𑀩𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀦 𑀥𑀼𑀯𑀯𑀸𑀲𑀁 𑀲𑀦𑁆𑀥𑀸𑀬. ‘‘𑀯𑀼𑀟𑁆𑀠𑀢𑀭𑁄 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀸𑀬’’𑀢𑁆𑀬𑀸𑀤𑀺𑀯𑀘𑀦𑀜𑁆𑀘 (𑀧𑀸𑀘𑀺. 𑀅𑀝𑁆𑀞. 𑁧𑁨𑁦; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀬𑀣𑀸𑀯𑀼𑀟𑁆𑀠𑀁 𑀲𑁂𑀦𑀸𑀲𑀦𑁂 𑀤𑀻𑀬𑀫𑀸𑀦𑁂 𑀯𑀼𑀟𑁆𑀠𑀢𑀭𑁂 𑀆𑀕𑀢𑁂 𑀦𑀯𑀓𑀢𑀭𑁄 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄, 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀼𑀟𑁆𑀠𑀢𑀭𑀲𑁆𑀲 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀯𑀼𑀟𑁆𑀠𑀢𑀭𑁄 𑀧𑀦 𑀦𑀯𑀓𑀢𑀭𑁂𑀦 𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀓𑀲𑁆𑀫𑀸? ‘‘𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀭𑀢𑀸𑀬𑀸’’𑀢𑀺 𑀉𑀢𑀼𑀓𑀸𑀮𑁂 𑀬𑀣𑀸𑀯𑀼𑀟𑁆𑀠𑀁 𑀲𑁂𑀦𑀸𑀲𑀦𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀥𑀼𑀯𑀯𑀸𑀲𑀢𑁆𑀣𑀸𑀬 𑀤𑀸𑀦𑀁 𑀲𑀦𑁆𑀥𑀸𑀬, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀯𑀘𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀦 𑀲𑀻𑀖𑀁 𑀅𑀦𑀼𑀚𑀸𑀦𑀺𑀢𑀩𑁆𑀩𑀁.

𑀩𑁆𑀬𑀢𑁆𑀢𑀯𑀘𑀦𑁂𑀧𑀺 ‘‘𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲’’𑀢𑁆𑀬𑀸𑀤𑀺𑀯𑀘𑀦𑀜𑁆𑀘 (𑀧𑀭𑀺. 𑀅𑀝𑁆𑀞. 𑁪𑁪𑁫-𑁪𑁯𑁬) 𑀦 𑀩𑀳𑀼𑀲𑁆𑀲𑀼𑀢𑀫𑀢𑁆𑀢𑁂𑀦 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀗𑁆𑀖𑁂𑀦 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑀺𑀦𑁆𑀦𑁂 𑀲𑁄 𑀪𑀺𑀓𑁆𑀔𑀼 𑀓𑁂𑀦𑀘𑀺 𑀢𑀫𑁆𑀳𑀸 𑀯𑀺𑀳𑀸𑀭𑀸 𑀅𑀦𑀼𑀝𑁆𑀞𑀸𑀧𑀦𑀻𑀬𑁄 𑀳𑁄𑀢𑀺, 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂’’𑀢𑁆𑀬𑀸𑀤𑀺𑀯𑀘𑀦𑀜𑁆𑀘 (𑀫𑀳𑀸𑀯. 𑁮𑁨) 𑀦𑀺𑀲𑁆𑀲𑀬𑀸𑀘𑀭𑀺𑀬𑀸𑀦𑀁 𑀮𑀓𑁆𑀔𑀡𑀁 𑀧𑀓𑀸𑀲𑁂𑀢𑀼𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁, 𑀦 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀇𑀲𑁆𑀲𑀭𑀢𑁆𑀢𑀁, 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀯𑀘𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀦 𑀲𑀻𑀖𑀁 𑀅𑀦𑀼𑀚𑀸𑀦𑀺𑀢𑀩𑁆𑀩𑀁.

𑀤𑀸𑀬𑀓𑀯𑀘𑀦𑀁 𑀧𑀦 𑀦𑀸𑀦𑀼𑀚𑀸𑀦𑀺𑀢𑀩𑁆𑀩𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀓𑀲𑁆𑀫𑀸? ‘‘𑀬𑁂𑀦 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄’’𑀢𑁆𑀬𑀸𑀤𑀺𑀧𑀸𑀞𑀲𑁆𑀲 𑀅𑀫𑀼𑀔𑁆𑀬𑀯𑁄𑀳𑀸𑀭𑀢𑁆𑀢𑀸. 𑀬𑀣𑀸 𑀳𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀭𑀽𑀧𑀸𑀤𑀻𑀲𑀼 𑀲𑀜𑁆𑀚𑀦𑀲𑁆𑀲 𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀅𑀭𑀳𑀸𑀧𑀺 ‘‘𑀲𑀢𑁆𑀢𑁄’’𑀢𑀺, 𑀏𑀯𑀁 𑀤𑀸𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀸𑀫𑀺𑀪𑀽𑀢𑀧𑀼𑀩𑁆𑀩𑀢𑁆𑀢𑀸 𑀤𑀸𑀬𑀓𑁄 ‘‘𑀯𑀺𑀳𑀸𑀭𑀲𑀸𑀫𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀦 𑀇𑀲𑁆𑀲𑀭𑀢𑁆𑀢𑀸. 𑀦 𑀳𑀺 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 ‘‘𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀺𑀦𑁆𑀦𑀲𑁆𑀲 𑀯𑀺𑀳𑀸𑀭𑀲𑁆𑀲 𑀤𑀸𑀬𑀓𑁄 𑀇𑀲𑁆𑀲𑀭𑁄’’𑀢𑀺 𑀯𑀸 ‘‘𑀤𑀸𑀬𑀓𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑁄’’𑀢𑀺 𑀯𑀸 ‘‘𑀤𑀸𑀬𑀓𑀲𑀦𑁆𑀢𑀓𑀯𑀺𑀳𑀸𑀭𑁄’’𑀢𑀺 𑀯𑀸 𑀧𑀸𑀞𑁄 𑀅𑀢𑁆𑀣𑀺, ‘‘𑀲𑀗𑁆𑀖𑀺𑀓𑁄, 𑀕𑀡𑀲𑀦𑁆𑀢𑀓𑁄, 𑀧𑀼𑀕𑁆𑀕𑀮𑀺𑀓𑁄’’𑀇𑀘𑁆𑀘𑁂𑀯 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀲𑁆𑀲 𑀯𑀘𑀦𑀁 𑀦𑀸𑀦𑀼𑀚𑀸𑀦𑀺𑀢𑀩𑁆𑀩𑀁.

𑀲𑀗𑁆𑀖𑀲𑁆𑀲 𑀯𑀘𑀦𑁂𑀧𑀺 ‘‘𑀲𑀗𑁆𑀖𑀺𑀓𑁄 𑀦𑀸𑀫 𑀯𑀺𑀳𑀸𑀭𑁄’’𑀢𑁆𑀬𑀸𑀤𑀺𑀯𑀘𑀦𑀁 (𑀧𑀸𑀘𑀺. 𑁧𑁧𑁬, 𑁧𑁨𑁧, 𑁧𑁨𑁬, 𑁧𑁩𑁧) 𑀲𑀗𑁆𑀖𑀲𑀦𑁆𑀢𑀓𑀪𑀸𑀯𑀁 𑀲𑀗𑁆𑀖𑁂𑀦 𑀯𑀺𑀘𑀸𑀭𑁂𑀢𑀩𑁆𑀩𑀪𑀸𑀯𑀁 𑀤𑀻𑀧𑁂𑀢𑀺, 𑀲𑀗𑁆𑀖𑁄 𑀧𑀦 𑀯𑀺𑀘𑀸𑀭𑁂𑀦𑁆𑀢𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑁂𑀦 𑀬𑀣𑀸𑀯𑀼𑀟𑁆𑀠𑀁 𑀯𑀺𑀘𑀸𑀭𑁂𑀢𑀩𑁆𑀩𑁄 𑀯𑀸 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀥𑀼𑀯𑀯𑀸𑀲𑀢𑁆𑀣𑀸𑀬 𑀤𑀸𑀢𑀩𑁆𑀩𑁄 𑀯𑀸. 𑀢𑁂𑀲𑀼 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀮𑁆𑀮𑀪𑀢𑁆𑀢𑀸 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺𑀬𑀸 𑀅𑀪𑀸𑀯𑁂 𑀲𑀢𑀺 𑀤𑀼𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀏𑀯𑀁 𑀧𑀦 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀢𑀸𑀤𑀺𑀩𑀳𑀊𑀧𑀓𑀸𑀭𑀢𑀸𑀬𑀼𑀢𑁆𑀢𑀲𑁆𑀲 𑀩𑀳𑀼𑀲𑁆𑀲𑀼𑀢𑀢𑀸𑀤𑀺𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀯𑀺𑀭𑀳𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀫𑀺𑀲𑀕𑀭𑀼𑀓𑀢𑀸𑀤𑀺𑀯𑀲𑁂𑀦 𑀲𑀗𑁆𑀖𑁂𑀦 𑀯𑀺𑀳𑀸𑀭𑁄 𑀤𑀸𑀢𑀩𑁆𑀩𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀯𑀘𑀦𑀫𑁆𑀧𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀦 𑀢𑀸𑀯 𑀅𑀦𑀼𑀚𑀸𑀦𑀺𑀢𑀩𑁆𑀩𑀁.

𑀅𑀣 𑀢𑀻𑀡𑀺𑀧𑀺 𑀯𑀘𑀦𑀸𑀦𑀺 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀲𑀗𑁆𑀖𑀲𑁆𑀲 𑀇𑀲𑁆𑀲𑀭𑀢𑁆𑀢𑀸 𑀲𑀗𑁆𑀖𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀓𑁄 𑀧𑀼𑀕𑁆𑀕𑀮𑁄 𑀢𑀼𑀫𑁆𑀳𑁂𑀳𑀺 𑀅𑀪𑀺𑀭𑀼𑀘𑀺𑀢𑁄’’𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀅𑀪𑀺𑀭𑀼𑀘𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀲𑁄 𑀧𑀼𑀕𑁆𑀕𑀮𑁄 𑀅𑀫𑁆𑀳𑁂 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀳𑀺 𑀅𑀦𑀼𑀕𑁆𑀕𑀳𑁂𑀢𑀸, 𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑁄, 𑀉𑀧𑀚𑁆𑀛𑀸𑀬𑁄, 𑀆𑀘𑀭𑀺𑀬𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄, 𑀲𑀫𑀸𑀦𑀸𑀘𑀭𑀺𑀬𑀓𑁄, 𑀧𑀺𑀬𑀲𑀳𑀸𑀬𑁄, 𑀮𑀸𑀪𑀻, 𑀬𑀲𑀲𑁆𑀲𑀻, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀅𑀪𑀺𑀭𑀼𑀘𑀺𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀦 𑀏𑀢𑁆𑀢𑀸𑀯𑀢𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑁄 𑀤𑀸𑀢𑀩𑁆𑀩𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀣 ‘‘𑀏𑀲𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑁂𑀳𑀺 𑀅𑀫𑁆𑀳𑁂𑀳𑀺 𑀯𑀼𑀟𑁆𑀠𑀢𑀭𑁄 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁 𑀅𑀭𑀳𑀢𑀺, 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑁄 𑀧𑀦 𑀢𑀲𑁆𑀲 𑀤𑀸𑀢𑀩𑁆𑀩𑁄𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀦 𑀯𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀣 ‘‘𑀥𑀫𑁆𑀫𑀓𑀣𑀺𑀓𑁄, 𑀯𑀺𑀦𑀬𑀥𑀭𑁄, 𑀕𑀡𑀯𑀸𑀘𑀓𑀆𑀘𑀭𑀺𑀬𑁄’’𑀢𑀺 𑀯𑀼𑀢𑁆𑀢𑁂 ‘‘𑀏𑀲𑁄 𑀥𑀼𑀯𑀯𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀯𑀺𑀳𑀸𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄, 𑀏𑀢𑀲𑁆𑀲 𑀤𑀸𑀢𑀩𑁆𑀩𑁄’’𑀢𑀺 𑀅𑀦𑀼𑀫𑁄𑀤𑀺𑀢𑀩𑁆𑀩𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸 𑀕𑀡𑀯𑀸𑀘𑀓𑀆𑀘𑀭𑀺𑀬𑀲𑁆𑀲 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀻’’𑀢𑀺 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁨𑁯; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸).

𑀇𑀥 𑀧𑀦 𑀲𑀸𑀥𑀓𑀧𑀸𑀞𑁂 ‘‘𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸’’𑀢𑀺 𑀯𑀺𑀚𑁆𑀚𑀫𑀸𑀦𑁂 𑀓𑀲𑁆𑀫𑀸 𑀲𑀸𑀥𑁆𑀬𑀯𑀘𑀦𑁂 𑀪𑀡𑁆𑀟𑀸𑀕𑀸𑀭𑀺𑀓𑁄 𑀦 𑀯𑀼𑀢𑁆𑀢𑁄𑀢𑀺? 𑀏𑀢𑀭𑀳𑀺 𑀪𑀡𑁆𑀟𑀸𑀕𑀸𑀭𑀲𑁆𑀲 𑀅𑀪𑀸𑀯𑀸. 𑀬𑀤𑀺 𑀓𑁂𑀲𑀼𑀘𑀺 𑀯𑀺𑀳𑀸𑀭𑁂𑀲𑀼 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀲𑁄 𑀪𑀡𑁆𑀟𑀸𑀕𑀸𑀭𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀲𑁆𑀲 𑀧𑀢𑁆𑀢𑀘𑀻𑀯𑀭𑀭𑀓𑁆𑀔𑀡𑀸𑀤𑀺𑀓𑀁 𑀉𑀧𑀓𑀸𑀭𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀲𑀗𑁆𑀖𑁄 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀏𑀢𑀭𑀳𑀺𑀧𑀺 𑀥𑀼𑀯𑀯𑀸𑀲𑀢𑁆𑀣𑀸𑀬 𑀤𑀤𑁂𑀬𑁆𑀬, 𑀲𑁄 𑀢𑀲𑁆𑀲 𑀯𑀺𑀲𑀼𑀁 𑀥𑀼𑀯𑀯𑀸𑀲𑀯𑀺𑀳𑀸𑀭𑁄𑀢𑀺. 𑀏𑀢𑁆𑀣 𑀲𑀸𑀥𑀓𑀧𑀸𑀞𑁂 ‘‘𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄𑀢𑀺 𑀯𑀼𑀢𑁆𑀢𑀕𑀼𑀡𑀯𑀦𑁆𑀢𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀣𑀸𑀧𑀺 ‘‘𑀏𑀲𑁄 𑀧𑀼𑀕𑁆𑀕𑀮𑁄 𑀩𑀳𑀼𑀲𑁆𑀲𑀼𑀢𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑁄 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑁄’’𑀢𑀺 𑀯𑀤𑀢𑀺, ‘‘𑀲𑀸𑀥𑀼 𑀏𑀲𑁄𑀧𑀺 𑀨𑀸𑀲𑀼𑀓𑀸𑀯𑀸𑀲𑀲𑁆𑀲 𑀅𑀭𑀳𑁄, 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑁄 𑀏𑀢𑀲𑁆𑀲𑀧𑀺 𑀤𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑀩𑁆𑀩𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀗𑁆𑀖𑁄 𑀧𑀦 𑀩𑀳𑀼𑀲𑁆𑀲𑀼𑀢𑀲𑁆𑀲 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀩𑀳𑀽𑀧𑀓𑀸𑀭𑀲𑁆𑀲 𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀨𑀸𑀲𑀼𑀓𑀁 𑀆𑀯𑀸𑀲𑀁 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑁂𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺.

𑀅𑀣𑀸𑀧𑀺 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀦𑀬𑀥𑀭𑁄 𑀕𑀡𑀯𑀸𑀘𑀓𑀸𑀘𑀭𑀺𑀬𑁄 𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑁄 𑀯𑀺𑀲𑀺𑀝𑁆𑀞𑀕𑀼𑀡𑀬𑀼𑀢𑁆𑀢𑁄’’𑀢𑀺 𑀯𑀤𑀢𑀺, ‘‘𑀲𑀸𑀥𑀼 𑀏𑀢𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑀩𑁆𑀩𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀗𑁆𑀖𑁄 𑀧𑀦 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀯𑀸 𑀥𑀫𑁆𑀫𑀓𑀣𑀺𑀓𑀯𑀺𑀦𑀬𑀥𑀭𑀸𑀤𑀻𑀦𑀁 𑀯𑀸 𑀕𑀡𑀯𑀸𑀘𑀓𑀸𑀘𑀭𑀺𑀬𑀲𑁆𑀲 𑀯𑀸 𑀩𑀳𑀽𑀧𑀓𑀸𑀭𑀢𑀁 𑀕𑀼𑀡𑀯𑀺𑀲𑀺𑀝𑁆𑀞𑀢𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀼𑀯𑀯𑀸𑀲𑀢𑁆𑀣𑀸𑀬 𑀯𑀺𑀳𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀤𑁂𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁧𑁨𑁦; 𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺.

𑀅𑀣𑀸𑀧𑀺 ‘‘𑀏𑀲𑁄 𑀧𑀼𑀕𑁆𑀕𑀮𑁄 𑀩𑀳𑀼𑀲𑁆𑀲𑀼𑀢𑁄 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑁄’’𑀢𑀺 𑀯𑀤𑀢𑀺, ‘‘𑀲𑀸𑀥𑀼 𑀏𑀢𑀲𑁆𑀲𑀧𑀺 𑀅𑀦𑀼𑀝𑁆𑀞𑀸𑀧𑀦𑀻𑀬𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑀩𑁆𑀩𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀩𑀳𑀼𑀲𑁆𑀲𑀼𑀢𑀲𑁆𑀲 𑀲𑀗𑁆𑀖𑀪𑀸𑀭𑀦𑀺𑀢𑁆𑀣𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀝𑁆𑀞𑀸𑀧𑀦𑀻𑀬𑀲𑁂𑀦𑀸𑀲𑀦𑀫𑁆𑀧𑀻’’𑀢𑀺 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁄 ‘‘𑀏𑀯𑀁 𑀤𑀼𑀯𑀗𑁆𑀕𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀦𑁆𑀢𑁄𑀲𑀻𑀫𑀝𑁆𑀞𑁄 𑀯𑀸 𑀩𑀳𑀺𑀲𑀻𑀫𑀝𑁆𑀞𑁄 𑀯𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀦𑁆𑀢𑁄𑀲𑀻𑀫𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀤𑀸𑀢𑀩𑁆𑀩𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. ‘‘𑀩𑀳𑀺𑀲𑀻𑀫𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁂 ‘‘𑀦 𑀤𑀸𑀢𑀩𑁆𑀩𑁄’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀓𑀲𑁆𑀫𑀸𑀢𑀺 𑀘𑁂? ‘‘𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀻𑀫𑁂 𑀞𑀺𑀢𑀲𑁆𑀲 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀩𑁆𑀩𑀁, 𑀬𑁄 𑀕𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁮) 𑀯𑀘𑀦𑀢𑁄𑀢𑀺.