𑁨𑁭. 𑀉𑀧𑀚𑁆𑀛𑀸𑀬𑀸𑀤𑀺𑀯𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀣𑀸

𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑀦𑀸

𑁧𑁮𑁩. 𑀏𑀯𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀯𑀢𑁆𑀢𑀓𑀣𑀁 𑀓𑀣𑁂𑀢𑀼𑀁 ‘‘𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀢𑁆𑀢𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀢𑁆𑀢𑀁, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀳𑀺 𑀉𑀧𑀚𑁆𑀛𑀸𑀬𑀸𑀤𑀻𑀲𑀼 𑀧𑀯𑀢𑁆𑀢𑁂𑀢𑀩𑁆𑀩𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁. 𑀢𑀁 𑀓𑀢𑀺𑀯𑀺𑀥𑀦𑁆𑀢𑀺 𑀆𑀳 ‘‘𑀯𑀢𑁆𑀢𑀁 𑀦𑀸𑀫𑁂𑀢𑀁…𑀧𑁂… 𑀩𑀳𑀼𑀯𑀺𑀥’’𑀦𑁆𑀢𑀺. 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀅𑀦𑀼𑀫𑁄𑀤𑀦𑀯𑀢𑁆𑀢𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 ‘‘𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁫𑁬) 𑀘 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯, 𑀢𑀢𑁆𑀣 𑀧𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀢𑁄 𑀧𑀝𑁆𑀞𑀸𑀬 𑀆𑀕𑀢𑀁, 𑀇𑀥 𑀉𑀧𑀚𑁆𑀛𑀸𑀬𑀯𑀢𑁆𑀢𑀢𑁄. 𑀇𑀢𑁄 𑀅𑀜𑁆𑀜𑀸𑀦𑀺𑀧𑀺 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀯𑀢𑁆𑀢𑀸𑀦𑀺 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺 𑀘 𑀯𑀢𑁆𑀢𑀫𑁂𑀯. 𑀢𑁂𑀲𑀼 𑀧𑀦 𑀲𑁂𑀔𑀺𑀬𑀯𑀢𑁆𑀢𑀸𑀦𑀺 𑀫𑀳𑀸𑀯𑀺𑀪𑀗𑁆𑀕𑁂 𑀆𑀕𑀢𑀸𑀦𑀺, 𑀫𑀳𑀸𑀯𑀢𑁆𑀢𑀸𑀦𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂𑀲𑀼 (𑀘𑀽𑀴𑀯. 𑁭𑁫 𑀆𑀤𑀬𑁄), 𑀢𑀲𑁆𑀫𑀸 𑀇𑀥 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺𑀬𑁂𑀯 𑀤𑀲𑁆𑀲𑀺𑀢𑀸𑀦𑀺. 𑀢𑁂𑀲𑀼 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀧𑀞𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑁆𑀬𑀸𑀤𑀺𑀫𑀸𑀳.

𑀢𑀢𑁆𑀣 𑀓𑁄 𑀉𑀧𑀚𑁆𑀛𑀸𑀬𑁄, 𑀓𑁂𑀦𑀝𑁆𑀞𑁂𑀦 𑀉𑀧𑀚𑁆𑀛𑀸𑀬𑁄, 𑀓𑀣𑀁 𑀕𑀳𑀺𑀢𑁄 𑀉𑀧𑀚𑁆𑀛𑀸𑀬𑁄, 𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁, 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺? 𑀢𑀢𑁆𑀣 𑀓𑁄 𑀉𑀧𑀚𑁆𑀛𑀸𑀬𑁄𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁭𑁬) 𑀩𑁆𑀬𑀢𑁆𑀢𑀺𑀩𑀮𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀤𑀢𑁄 𑀧𑀝𑁆𑀞𑀸𑀬 𑀤𑀲𑀯𑀲𑁆𑀲𑁄 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑀪𑀺𑀓𑁆𑀔𑀼 𑀉𑀧𑀚𑁆𑀛𑀸𑀬𑁄. 𑀓𑁂𑀦𑀝𑁆𑀞𑁂𑀦 𑀉𑀧𑀚𑁆𑀛𑀸𑀬𑁄𑀢𑀺 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀔𑀼𑀤𑁆𑀤𑀓𑀁 𑀯𑀚𑁆𑀚𑀁 𑀯𑀸 𑀫𑀳𑀦𑁆𑀢𑀁 𑀯𑀚𑁆𑀚𑀁 𑀯𑀸 𑀪𑀼𑀲𑁄 𑀘𑀺𑀦𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀲𑀘𑁂 𑀉𑀧𑀚𑁆𑀛𑀸𑀬𑁄 ‘‘𑀲𑀸𑀳𑀽’’𑀢𑀺 𑀯𑀸 ‘‘𑀮𑀳𑀽’’𑀢𑀺 𑀯𑀸 ‘‘𑀑𑀧𑀸𑀬𑀺𑀓’’𑀦𑁆𑀢𑀺 𑀯𑀸 ‘‘𑀧𑀢𑀺𑀭𑀽𑀧’’𑀦𑁆𑀢𑀺 𑀯𑀸 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀯𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀧𑀤𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀤𑀲𑁆𑀲 𑀯𑀲𑁂𑀦 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀓𑀸𑀬𑀯𑀸𑀘𑀸𑀳𑀺 𑀯𑀸 ‘‘𑀕𑀳𑀺𑀢𑁄 𑀢𑀬𑀸 𑀉𑀧𑀚𑁆𑀛𑀸𑀬𑁄’’𑀢𑀺 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄. 𑀢𑀢𑁆𑀣 𑀲𑀸𑀳𑀽𑀢𑀺 𑀲𑀸𑀥𑀼. 𑀮𑀳𑀽𑀢𑀺 𑀅𑀕𑀭𑀼, 𑀲𑀼𑀪𑀭𑀢𑀸𑀢𑀺 𑀅𑀢𑁆𑀣𑁄. 𑀑𑀧𑀸𑀬𑀺𑀓𑀦𑁆𑀢𑀺 𑀉𑀧𑀸𑀬𑀧𑀝𑀺𑀲𑀁𑀬𑀼𑀢𑁆𑀢𑀁, 𑀏𑀯𑀁 𑀧𑀝𑀺𑀧𑀚𑁆𑀚𑀦𑀁 𑀦𑀺𑀢𑁆𑀣𑀭𑀡𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀲𑀫𑁆𑀧𑀸𑀤𑁂𑀳𑀻𑀢𑀺 𑀅𑀢𑁆𑀣𑁄.

𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀦𑁆𑀢𑀺 𑀕𑀳𑀺𑀢𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁. 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺 𑀇𑀤𑀁 𑀆𑀕𑀢𑀫𑁂𑀯, 𑀢𑀢𑁆𑀣 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀲𑀘𑀲𑁆𑀲 𑀧𑀘𑁆𑀘𑀽𑀲𑀓𑀸𑀮𑁂 𑀘𑀗𑁆𑀓𑀫𑀦𑀢𑁆𑀣𑀸𑀬 𑀯𑀸 𑀥𑁄𑀢𑀧𑀸𑀤𑀧𑀭𑀺𑀳𑀭𑀡𑀢𑁆𑀣𑀸𑀬 𑀯𑀸 𑀧𑀝𑀺𑀫𑀼𑀓𑁆𑀓𑀸 𑀉𑀧𑀸𑀳𑀦𑀸 𑀧𑀸𑀤𑀕𑀢𑀸 𑀳𑁄𑀦𑁆𑀢𑀺, 𑀢𑀸 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀅𑀧𑀦𑁂𑀢𑁆𑀯𑀸. 𑀢𑀸𑀤𑀺𑀲𑀫𑁂𑀯 𑀫𑀼𑀔𑀥𑁄𑀯𑀦𑁄𑀤𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀉𑀢𑀼𑀫𑁆𑀧𑀺 𑀲𑀭𑀻𑀭𑀲𑀪𑀸𑀯𑁂 𑀘 𑀏𑀓𑀸𑀓𑀸𑀭𑁂 𑀢𑀸𑀤𑀺𑀲𑀫𑁂𑀯 𑀤𑀸𑀢𑀩𑁆𑀩𑀁.

𑀲𑀕𑀼𑀡𑀁 𑀓𑀢𑁆𑀯𑀸𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀲𑀗𑁆𑀖𑀸𑀝𑀺𑀜𑁆𑀘𑀸𑀢𑀺 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀢𑀸 𑀤𑁆𑀯𑁂𑀧𑀺 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸. 𑀲𑀩𑁆𑀩𑀜𑁆𑀳𑀺 𑀘𑀻𑀯𑀭𑀁 𑀲𑀗𑁆𑀖𑀝𑀺𑀢𑀢𑁆𑀢𑀸 𑀲𑀗𑁆𑀖𑀸𑀝𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸’’𑀢𑀺. 𑀧𑀤𑀯𑀻𑀢𑀺𑀳𑀸𑀭𑁂𑀳𑀻𑀢𑀺 𑀏𑀢𑁆𑀣 𑀧𑀤𑀁 𑀯𑀻𑀢𑀺𑀳𑀭𑀢𑀺 𑀏𑀢𑁆𑀣𑀸𑀢𑀺 𑀧𑀤𑀯𑀻𑀢𑀺𑀳𑀸𑀭𑁄, 𑀧𑀤𑀯𑀻𑀢𑀺𑀳𑀸𑀭𑀝𑁆𑀞𑀸𑀦𑀁. 𑀤𑀼𑀢𑀯𑀺𑀮𑀫𑁆𑀩𑀺𑀢𑀁 𑀅𑀓𑀢𑁆𑀯𑀸 𑀲𑀫𑀕𑀫𑀦𑁂𑀦 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀦𑁆𑀢𑀭𑁂 𑀫𑀼𑀝𑁆𑀞𑀺𑀭𑀢𑀦𑀫𑀢𑁆𑀢𑀁. 𑀧𑀤𑀸𑀦𑀁 𑀯𑀸 𑀯𑀻𑀢𑀺𑀳𑀭𑀡𑀁 𑀅𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑁂𑀧𑁄 𑀧𑀤𑀯𑀻𑀢𑀺𑀳𑀸𑀭𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸𑀢𑀺 𑀅𑀦𑁆𑀢𑀭𑀖𑀭𑁂 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀪𑀡𑀫𑀸𑀦𑀲𑁆𑀲 𑀅𑀦𑀺𑀝𑁆𑀞𑀺𑀢𑁂 𑀢𑀲𑁆𑀲 𑀯𑀘𑀦𑁂 𑀅𑀜𑁆𑀜𑀸 𑀓𑀣𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀩𑁆𑀩𑀸. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀦-𑀓𑀸𑀭𑀢𑁄 𑀧𑀝𑁆𑀞𑀸𑀬. 𑀢𑁂𑀦 𑀦𑀸𑀢𑀺𑀤𑀽𑀭𑁂𑀢𑀺𑀆𑀤𑀻𑀲𑀼 𑀦-𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀸𑀧𑀢𑁆𑀢𑀻𑀢𑀺 𑀆𑀧𑀤𑀸𑀉𑀫𑁆𑀫𑀢𑁆𑀢𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀢𑀸𑀤𑀻𑀳𑀺 𑀯𑀺𑀦𑀸 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸𑀧𑀺 𑀯𑀤𑀦𑁆𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀘 𑀤𑀼𑀓𑁆𑀓𑀝𑀫𑁂𑀯. 𑀆𑀧𑀤𑀸𑀲𑀼 𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑀜𑁆𑀜𑁂𑀲𑀼 𑀦-𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀈𑀤𑀺𑀲𑁂𑀲𑀼, 𑀇𑀢𑀭𑁂𑀲𑀼 𑀧𑀦 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 ‘‘𑀈𑀤𑀺𑀲𑁂𑀲𑀼 𑀕𑀺𑀮𑀸𑀦𑁄𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀫𑁆𑀧𑀺 𑀳𑀺 𑀬𑀣𑀸𑀯𑀼𑀢𑁆𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀅𑀦𑀸𑀤𑀭𑀺𑀬𑁂𑀦 𑀅𑀓𑀭𑁄𑀦𑁆𑀢𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀯𑀢𑁆𑀢𑀪𑁂𑀤𑁂 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀕𑀺𑀮𑀸𑀦𑁂𑀦 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀲𑀝𑁆𑀞𑀺𑀯𑀲𑁆𑀲𑁂𑀦𑀧𑀺 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀸𑀢𑀩𑁆𑀩𑀁, 𑀅𑀦𑀸𑀤𑀭𑀺𑀬𑁂𑀦 𑀅𑀓𑀭𑁄𑀦𑁆𑀢𑀲𑁆𑀲 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁. 𑀦-𑀓𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀧𑀦 𑀧𑀤𑁂𑀲𑀼 𑀕𑀺𑀮𑀸𑀦𑀲𑁆𑀲𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺. 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑁄𑀢𑀺 𑀧𑀤𑀲𑁄𑀥𑀫𑁆𑀫(𑀧𑀸𑀘𑀺. 𑁪𑁪 𑀆𑀤𑀬𑁄)-𑀤𑀼𑀝𑁆𑀞𑀼𑀮𑁆𑀮𑀸𑀤𑀺𑀯𑀲𑁂𑀦 (𑀧𑀸𑀭𑀸. 𑁨𑁮𑁩) 𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀯𑀸𑀘𑀁 𑀪𑀡𑀫𑀸𑀦𑁄. 𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀯𑀸𑀘𑀦𑁆𑀢𑀺 𑀘 𑀆𑀧𑀢𑁆𑀢𑀺𑀚𑀦𑀓𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀸𑀬 𑀳𑀺 𑀯𑀸𑀘𑀸𑀬 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀸 𑀯𑀸𑀘𑀸 𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀸𑀢𑀺 𑀯𑀼𑀘𑁆𑀘𑀢𑀺.

𑀘𑀻𑀯𑀭𑁂𑀦 𑀧𑀢𑁆𑀢𑀁 𑀯𑁂𑀞𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀏𑀓𑁂𑀦 𑀓𑀡𑁆𑀡𑁂𑀦 𑀯𑁂𑀞𑁂𑀢𑁆𑀯𑀸’’𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂 𑀢𑀢𑁆𑀣 𑀞𑀧𑀺𑀢𑀧𑀢𑁆𑀢𑀸𑀤𑀺𑀦𑀸 𑀅𑀲𑀗𑁆𑀖𑀝𑁆𑀝𑀦𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀧𑀺 𑀅𑀜𑁆𑀜𑁂𑀲𑀁 𑀅𑀪𑀸𑀯𑀁 𑀜𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸𑀢𑀺 𑀓𑀡𑁆𑀡𑀁 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀅𑀢𑀺𑀭𑁂𑀓𑀁 𑀓𑀢𑁆𑀯𑀸 𑀏𑀯𑀁 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀓𑀸𑀬𑀩𑀦𑁆𑀥𑀦𑀁 𑀲𑀗𑁆𑀖𑀭𑀺𑀢𑁆𑀯𑀸 𑀘𑀻𑀯𑀭𑀪𑁄𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀬𑁄 𑀕𑀸𑀫𑁂𑀬𑁂𑀯 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀧𑀝𑀺𑀓𑁆𑀓𑀫𑀦𑁂 𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀧𑀺𑀡𑁆𑀟𑀁 𑀯𑀸 𑀦 𑀮𑀪𑀢𑀺, 𑀢𑀲𑁆𑀲 𑀧𑀺𑀡𑁆𑀟𑀧𑀸𑀢𑁄 𑀦 𑀳𑁄𑀢𑀺, 𑀕𑀸𑀫𑁂 𑀅𑀪𑀼𑀢𑁆𑀢𑀲𑁆𑀲 𑀧𑀦 𑀮𑀤𑁆𑀥𑀪𑀺𑀓𑁆𑀔𑀲𑁆𑀲 𑀯𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀸𑀫𑁂𑀢𑀺 𑀕𑀸𑀫𑀧𑀭𑀺𑀬𑀸𑀧𑀦𑁆𑀦𑁂 𑀢𑀸𑀤𑀺𑀲𑁂 𑀓𑀺𑀲𑁆𑀫𑀺𑀜𑁆𑀘𑀺 𑀧𑀤𑁂𑀲𑁂. 𑀅𑀦𑁆𑀢𑀭𑀖𑀭𑁂𑀢𑀺 𑀅𑀦𑁆𑀢𑁄𑀕𑁂𑀳𑁂. 𑀧𑀝𑀺𑀓𑁆𑀓𑀫𑀦𑁂𑀢𑀺 𑀆𑀲𑀦𑀲𑀸𑀮𑀸𑀬𑀁. 𑀲𑀘𑁂𑀧𑀺 𑀢𑀲𑁆𑀲 𑀦 𑀳𑁄𑀢𑀺, 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀘 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀢𑁄𑀧𑀺 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑁂𑀢𑀩𑁆𑀩𑁄. 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀆𑀤𑀺𑀫𑁆𑀳𑀺 𑀫𑀚𑁆𑀛𑁂 𑀅𑀦𑁆𑀢𑁂𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀉𑀧𑀓𑀝𑁆𑀞𑁄𑀢𑀺 𑀆𑀲𑀦𑁆𑀦𑁄. 𑀥𑁄𑀢𑀯𑀸𑀮𑀺𑀓𑀸𑀬𑀸𑀢𑀺 𑀉𑀤𑀓𑁂𑀦 𑀕𑀢𑀝𑁆𑀞𑀸𑀦𑁂 𑀦𑀺𑀭𑀚𑀸𑀬 𑀧𑀭𑀺𑀲𑀼𑀤𑁆𑀥𑀯𑀸𑀮𑀺𑀓𑀸𑀬.

𑀦𑀺𑀤𑁆𑀥𑀽𑀫𑁂𑀢𑀺 𑀚𑀦𑁆𑀢𑀸𑀖𑀭𑁂 𑀚𑀮𑀫𑀸𑀦𑀅𑀕𑁆𑀕𑀺𑀥𑀽𑀫𑀭𑀳𑀺𑀢𑁂. 𑀚𑀦𑁆𑀢𑀸𑀖𑀭𑀜𑁆𑀳𑀺 𑀦𑀸𑀫 𑀳𑀺𑀫𑀧𑀸𑀢𑀩𑀳𑀼𑀓𑁂𑀲𑀼 𑀤𑁂𑀲𑁂𑀲𑀼 𑀢𑀧𑁆𑀧𑀘𑁆𑀘𑀬𑀭𑁄𑀕𑀧𑀻𑀴𑀸𑀤𑀺𑀦𑀺𑀯𑀸𑀭𑀡𑀢𑁆𑀣𑀁 𑀲𑀭𑀻𑀭𑀲𑁂𑀤𑀢𑀸𑀧𑀦𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀺𑀭 𑀅𑀦𑁆𑀥𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀢𑀸𑀬 𑀩𑀳𑀽𑀧𑀺 𑀏𑀓𑀢𑁄 𑀧𑀯𑀺𑀲𑀺𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀢𑀸𑀧𑀧𑀭𑀺𑀳𑀸𑀭𑀸𑀬 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀮𑀺𑀫𑁆𑀧𑀺𑀢𑁆𑀯𑀸 𑀲𑀭𑀻𑀭𑀁 𑀬𑀸𑀯𑀤𑀢𑁆𑀣𑀁 𑀲𑁂𑀤𑁂𑀢𑁆𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀦𑀳𑀸𑀬𑀦𑁆𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 (𑀫𑀳𑀸𑀯. 𑁬𑁬) ‘‘𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀘𑁂 𑀉𑀲𑁆𑀲𑀳𑀢𑀻𑀢𑀺 𑀲𑀘𑁂 𑀧𑀳𑁄𑀢𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀓𑁂𑀦𑀘𑀺 𑀕𑁂𑀮𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀳𑁄𑀢𑀻’’𑀢𑀺. 𑀅𑀧𑀝𑀺𑀖𑀁𑀲𑀦𑁆𑀢𑁂𑀦𑀸𑀢𑀺 𑀪𑀽𑀫𑀺𑀬𑀁 𑀅𑀧𑀝𑀺𑀖𑀁𑀲𑀦𑁆𑀢𑁂𑀦. 𑀓𑀯𑀸𑀝𑀧𑀻𑀞𑀦𑁆𑀢𑀺 𑀓𑀯𑀸𑀝𑀧𑀻𑀞𑀜𑁆𑀘 𑀧𑀺𑀝𑁆𑀞𑀲𑀗𑁆𑀖𑀸𑀢𑀜𑁆𑀘 𑀅𑀘𑁆𑀙𑀼𑀧𑀦𑁆𑀢𑁂𑀦. 𑀲𑀦𑁆𑀢𑀸𑀦𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀻𑀝𑀓𑀼𑀮𑀸𑀯𑀓𑀫𑀓𑁆𑀓𑀝𑀓𑀲𑀼𑀢𑁆𑀢𑀸𑀤𑀺. 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀦𑁆𑀢𑀺 𑀉𑀮𑁆𑀮𑁄𑀓𑀢𑁄 𑀧𑀞𑀫𑀁 𑀉𑀮𑁆𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀯𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀉𑀮𑁆𑀮𑁄𑀓𑀦𑁆𑀢𑀺 𑀘 𑀉𑀤𑁆𑀥𑀁 𑀑𑀮𑁄𑀓𑀦𑀝𑁆𑀞𑀸𑀦𑀁, 𑀉𑀧𑀭𑀺𑀪𑀸𑀕𑀦𑁆𑀢𑀺 𑀅𑀢𑁆𑀣𑁄. 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸𑀢𑀺 𑀆𑀮𑁄𑀓𑀲𑀦𑁆𑀥𑀺𑀪𑀸𑀕𑀸 𑀘 𑀓𑀡𑁆𑀡𑀪𑀸𑀕𑀸 𑀘, 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀺 𑀘 𑀕𑀩𑁆𑀪𑀲𑁆𑀲 𑀘 𑀘𑀢𑁆𑀢𑀸𑀭𑁄 𑀓𑁄𑀡𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀢𑁆𑀣 𑀦𑁂𑀢𑀩𑁆𑀩𑁄𑀢𑀺 𑀬𑀢𑁆𑀣 𑀯𑀺𑀳𑀸𑀭𑀢𑁄 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀝𑁆𑀞𑀸𑀦𑁂 𑀦𑁂𑀢𑀩𑁆𑀩𑁄. 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀭𑀚𑀺𑀢𑀘𑀻𑀯𑀭𑀢𑁄 𑀬𑀸𑀯 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀭𑀚𑀦𑀁 𑀕𑀴𑀢𑀺, 𑀦 𑀢𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄𑀢𑀺𑀆𑀤𑀺 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀲𑁆𑀲 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀓𑀣𑀺𑀢𑀁. 𑀏𑀢𑁆𑀣 𑀘 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀮𑀚𑁆𑀚𑀺𑀦𑁄 𑀯𑀸 𑀅𑀮𑀚𑁆𑀚𑀺𑀦𑁄 𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀅𑀯𑀟𑁆𑀠𑀺𑀓𑀸𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀅𑀮𑀚𑁆𑀚𑀻 𑀑𑀯𑀸𑀤𑀫𑁆𑀧𑀺 𑀦 𑀕𑀡𑁆𑀳𑀸𑀢𑀺, 𑀮𑀚𑁆𑀚𑀺𑀦𑁄 𑀘 𑀏𑀢𑀲𑁆𑀲 𑀯𑀺𑀲𑀪𑀸𑀕𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀉𑀧𑀚𑁆𑀛𑀸𑀬𑀁 𑀯𑀺𑀳𑀸𑀬 𑀮𑀚𑁆𑀚𑀻𑀳𑁂𑀯 𑀲𑀤𑁆𑀥𑀺𑀁 𑀆𑀫𑀺𑀲𑀸𑀤𑀺𑀧𑀭𑀺𑀪𑁄𑀕𑁄 𑀓𑀸𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑀸𑀤𑀺𑀪𑀸𑀯𑁄 𑀳𑁂𑀢𑁆𑀣 𑀦𑀧𑁆𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸. 𑀲𑀼𑀲𑀸𑀦𑀦𑁆𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀁. 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀕𑀦𑁆𑀢𑀼𑀓𑀸𑀫𑁂𑀦 𑀅𑀦𑀸𑀧𑀼𑀘𑁆𑀙𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀦𑁆𑀢𑀺 𑀕𑁂𑀮𑀜𑁆𑀜𑀢𑁄 𑀯𑀼𑀝𑁆𑀞𑀸𑀦𑀁 𑀅𑀲𑁆𑀲 𑀆𑀕𑀫𑁂𑀢𑀩𑁆𑀩𑀁.

𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁪. 𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀬𑀁 𑀓𑁄 𑀆𑀘𑀭𑀺𑀬𑁄, 𑀓𑁂𑀦𑀝𑁆𑀞𑁂𑀦 𑀆𑀘𑀭𑀺𑀬𑁄, 𑀓𑀢𑀺𑀯𑀺𑀥𑁄 𑀆𑀘𑀭𑀺𑀬𑁄, 𑀓𑀣𑀁 𑀕𑀳𑀺𑀢𑁄 𑀆𑀘𑀭𑀺𑀬𑁄, 𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀆𑀘𑀭𑀺𑀬𑀯𑀢𑁆𑀢𑀁, 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺? 𑀢𑀢𑁆𑀣 𑀓𑁄 𑀆𑀘𑀭𑀺𑀬𑁄𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁 𑀤𑀲𑀯𑀲𑁆𑀲𑁂𑀦 𑀦𑀺𑀲𑁆𑀲𑀬𑀁 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁭𑁭) 𑀩𑁆𑀬𑀢𑁆𑀢𑀺𑀩𑀮𑀲𑀫𑁆𑀧𑀦𑁆𑀦𑁄 𑀤𑀲𑀯𑀲𑁆𑀲𑁄 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸 𑀪𑀺𑀓𑁆𑀔𑀼 𑀆𑀘𑀭𑀺𑀬𑁄. 𑀓𑁂𑀦𑀝𑁆𑀞𑁂𑀦 𑀆𑀘𑀭𑀺𑀬𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀆𑀪𑀼𑀲𑁄 𑀘𑀭𑀺𑀢𑀩𑁆𑀩𑁄𑀢𑀺 𑀆𑀘𑀭𑀺𑀬𑁄, 𑀉𑀧𑀝𑁆𑀞𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀢𑀺𑀯𑀺𑀥𑁄 𑀆𑀘𑀭𑀺𑀬𑁄𑀢𑀺 𑀦𑀺𑀲𑁆𑀲𑀬𑀸𑀘𑀭𑀺𑀬𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀥𑀫𑁆𑀫𑀸𑀘𑀭𑀺𑀬𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀢𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩𑁄 𑀦𑀺𑀲𑁆𑀲𑀬𑀸𑀘𑀭𑀺𑀬𑁄. 𑀧𑀩𑁆𑀩𑀚𑀺𑀢𑀓𑀸𑀮𑁂 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸𑀧𑀓𑁄 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄. 𑀉𑀧𑀲𑀫𑁆𑀧𑀤𑀓𑀸𑀮𑁂 𑀓𑀫𑁆𑀫𑀯𑀸𑀘𑀸𑀦𑀼𑀲𑁆𑀲𑀸𑀯𑀓𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄. 𑀩𑀼𑀤𑁆𑀥𑀯𑀘𑀦𑀲𑀺𑀓𑁆𑀔𑀸𑀧𑀓𑁄 𑀥𑀫𑁆𑀫𑀸𑀘𑀭𑀺𑀬𑁄 𑀦𑀸𑀫. 𑀓𑀣𑀁 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑁂 𑀆𑀘𑀭𑀺𑀬𑁄 ‘‘𑀲𑀸𑀳𑀽’’𑀢𑀺 𑀯𑀸 ‘‘𑀮𑀳𑀽’’𑀢𑀺 𑀯𑀸 ‘‘𑀑𑀧𑀸𑀬𑀺𑀓’’𑀦𑁆𑀢𑀺 𑀯𑀸 ‘‘𑀧𑀢𑀺𑀭𑀽𑀧’’𑀦𑁆𑀢𑀺 𑀯𑀸 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’’𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑀯𑀸𑀘𑀸𑀳𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄.

𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀆𑀘𑀭𑀺𑀬𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀆𑀘𑀭𑀺𑀬𑀯𑀢𑁆𑀢𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀸𑀬 𑀯𑀢𑁆𑀣𑀩𑁆𑀩𑀁, 𑀅𑀩𑁆𑀬𑀢𑁆𑀢𑁂𑀦 𑀬𑀸𑀯𑀚𑀻𑀯𑀁. 𑀏𑀢𑁆𑀣 𑀲𑀘𑀸𑀬𑀁 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑀁 𑀆𑀘𑀭𑀺𑀬𑀁 𑀦 𑀮𑀪𑀢𑀺, 𑀉𑀧𑀲𑀫𑁆𑀧𑀤𑀸𑀬 𑀲𑀝𑁆𑀞𑀺𑀯𑀲𑁆𑀲𑁄 𑀯𑀸 𑀲𑀢𑁆𑀢𑀢𑀺𑀯𑀲𑁆𑀲𑁄 𑀯𑀸 𑀳𑁄𑀢𑀺, 𑀦𑀯𑀓𑀢𑀭𑀲𑁆𑀲𑀧𑀺 𑀩𑁆𑀬𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀆𑀘𑀭𑀺𑀬𑁄 𑀫𑁂, 𑀆𑀯𑀼𑀲𑁄, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄. 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀦𑁆𑀢𑁂𑀦𑀧𑀺 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀸𑀫𑀺 𑀆𑀘𑀭𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑀩𑁆𑀩𑀆𑀧𑀼𑀘𑁆𑀙𑀦𑁂𑀲𑀼. 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀉𑀧𑀚𑁆𑀛𑀸𑀬𑀯𑀢𑁆𑀢𑀢𑁄 𑀅𑀜𑁆𑀜𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀇𑀤𑀫𑁂𑀯 𑀘…𑀧𑁂… 𑀆𑀘𑀭𑀺𑀬𑀯𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀦𑀦𑀼 𑀉𑀧𑀚𑁆𑀛𑀸𑀘𑀭𑀺𑀬𑀸 𑀪𑀺𑀦𑁆𑀦𑀧𑀤𑀢𑁆𑀣𑀸, 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 ‘‘𑀆𑀘𑀭𑀺𑀬𑀯𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀆𑀘𑀭𑀺𑀬𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸’’𑀢𑀺. 𑀬𑀣𑀸 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀫𑀸𑀢𑀼𑀪𑀸𑀢𑀸𑀪𑀽𑀢𑀢𑁆𑀢𑀸 ‘‘𑀫𑀸𑀢𑀼𑀮𑁄’’𑀢𑀺 𑀘 𑀥𑀫𑁆𑀫𑁂 𑀲𑀺𑀓𑁆𑀔𑀸𑀧𑀓𑀢𑁆𑀢𑀸 ‘‘𑀆𑀘𑀭𑀺𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀏𑀯𑀁 𑀏𑀓𑀫𑁂𑀯 𑀯𑀢𑁆𑀢𑀁 𑀉𑀧𑀚𑁆𑀛𑀸𑀬𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀉𑀧𑀚𑁆𑀛𑀸𑀬𑀯𑀢𑁆𑀢’’𑀦𑁆𑀢𑀺 𑀘 𑀆𑀘𑀭𑀺𑀬𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀆𑀘𑀭𑀺𑀬𑀯𑀢𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀸𑀫𑁂 𑀪𑀺𑀦𑁆𑀦𑁂 𑀅𑀢𑁆𑀣𑁄 𑀪𑀺𑀦𑁆𑀦𑁄 𑀲𑀺𑀬𑀸𑀢𑀺 𑀆𑀳 ‘‘𑀦𑀸𑀫𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀦𑀸𑀦’’𑀦𑁆𑀢𑀺. 𑀬𑀣𑀸 ‘‘𑀇𑀦𑁆𑀤𑁄 𑀲𑀓𑁆𑀓𑁄’’𑀢𑀺𑀆𑀤𑀻𑀲𑀼 𑀦𑀸𑀫𑀫𑀢𑁆𑀢𑀫𑁂𑀯 𑀪𑀺𑀦𑁆𑀦𑀁, 𑀦 𑀅𑀢𑁆𑀣𑁄, 𑀏𑀯𑀫𑁂𑀢𑁆𑀣𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑁄𑀢𑀺.

𑀇𑀤𑀸𑀦𑀺 𑀢𑀲𑁆𑀫𑀺𑀁 𑀯𑀢𑁆𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀸𑀯 𑀘𑀻𑀯𑀭𑀭𑀚𑀦’’𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁄 𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀸𑀦𑀁 𑀯𑀲𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀚𑁆𑀛𑀸𑀬𑁂’’𑀢𑁆𑀬𑀸𑀤𑀺𑀫𑀸𑀳. 𑀢𑁂𑀲𑀼 𑀯𑀢𑁆𑀢𑀁 𑀲𑀸𑀤𑀺𑀬𑀦𑁆𑀢𑁂𑀲𑀼 𑀆𑀧𑀢𑁆𑀢𑀺, 𑀅𑀲𑀸𑀤𑀺𑀬𑀦𑁆𑀢𑁂𑀲𑀼 𑀅𑀦𑀸𑀧𑀢𑁆𑀢𑀺, 𑀢𑁂𑀲𑀼 𑀅𑀚𑀸𑀦𑀦𑁆𑀢𑁂𑀲𑀼, 𑀏𑀓𑀲𑁆𑀲 𑀪𑀸𑀭𑀓𑀭𑀡𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄. 𑀇𑀤𑀸𑀦𑀺 𑀅𑀦𑁆𑀢𑁂𑀯𑀸𑀲𑀺𑀓𑀯𑀺𑀲𑁂𑀲𑀯𑀲𑁂𑀦 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺.

𑀆𑀘𑀭𑀺𑀬𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑁂 𑀓𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀓𑁂𑀦𑀝𑁆𑀞𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀁, 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺? 𑀢𑀢𑁆𑀣 𑀓𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀯𑀸 𑀳𑁄𑀢𑀼 𑀲𑀸𑀫𑀡𑁂𑀭𑁄 𑀯𑀸, 𑀬𑁄 𑀉𑀧𑀚𑁆𑀛𑀁 𑀕𑀡𑁆𑀳𑀸𑀢𑀺, 𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀦𑀸𑀫. 𑀓𑁂𑀦𑀝𑁆𑀞𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄𑀢𑀺 𑀅𑀢𑁆𑀣𑁂𑀦. 𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑁂𑀦 𑀯𑀢𑁆𑀢𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁭𑁮) ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀬𑀣𑀸 𑀉𑀧𑀚𑁆𑀛𑀸𑀬𑁂𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺. 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺 𑀇𑀤𑀸𑀦𑀺 𑀧𑀓𑀭𑀡𑀸𑀕𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀧𑀓𑀭𑀡𑁂 𑀲𑀗𑁆𑀔𑁂𑀧𑀭𑀼𑀘𑀺𑀢𑁆𑀢𑀸, 𑀆𑀘𑀭𑀺𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀜𑁆𑀘 𑀲𑀫𑀸𑀦𑀢𑁆𑀢𑀸 𑀤𑁆𑀯𑁂𑀧𑀺 𑀏𑀓𑀢𑁄 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀕𑀢𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀓𑀣𑀬𑀸𑀫.

𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀉𑀤𑁆𑀤𑁂𑀲𑀸𑀤𑀻𑀳𑀺𑀲𑁆𑀲 𑀲𑀗𑁆𑀕𑀳𑁄 𑀘 𑀅𑀦𑀼𑀕𑁆𑀕𑀳𑁄 𑀘 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀉𑀤𑁆𑀤𑁂𑀲𑁄𑀢𑀺 𑀧𑀸𑀴𑀺𑀯𑀘𑀦𑀁. 𑀧𑀭𑀺𑀧𑀼𑀘𑁆𑀙𑀸𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸. 𑀑𑀯𑀸𑀤𑁄𑀢𑀺 𑀅𑀦𑁄𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀯𑀘𑀦𑀁. 𑀅𑀦𑀼𑀲𑀸𑀲𑀦𑀻𑀢𑀺 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁. 𑀅𑀧𑀺𑀘 𑀑𑀢𑀺𑀡𑁆𑀡𑁂 𑀯𑀸 𑀅𑀦𑁄𑀢𑀺𑀡𑁆𑀡𑁂 𑀯𑀸 𑀧𑀞𑀫𑀁 𑀯𑀘𑀦𑀁 𑀑𑀯𑀸𑀤𑁄, 𑀧𑀼𑀦𑀧𑁆𑀧𑀼𑀦𑀁 𑀯𑀘𑀦𑀁 𑀅𑀦𑀼𑀲𑀸𑀲𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀻𑀢𑀺 𑀲𑀘𑁂 𑀅𑀢𑀺𑀭𑁂𑀓𑀧𑀢𑁆𑀢𑁄 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀭𑀺𑀓𑁆𑀔𑀸𑀭𑁄𑀢𑀺 𑀅𑀜𑁆𑀜𑁄𑀧𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑁄. 𑀇𑀥 𑀉𑀲𑁆𑀲𑀼𑀓𑁆𑀓𑀁 𑀦𑀸𑀫 𑀥𑀫𑁆𑀫𑀺𑀬𑁂𑀦 𑀦𑀬𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀉𑀧𑀸𑀬𑀧𑀭𑀺𑀬𑁂𑀲𑀦𑀁. 𑀇𑀢𑁄 𑀧𑀭𑀁 𑀤𑀦𑁆𑀢𑀓𑀝𑁆𑀞𑀤𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀲𑀺𑀜𑁆𑀘𑀦𑀧𑀭𑀺𑀬𑁄𑀲𑀸𑀦𑀁 𑀯𑀢𑁆𑀢𑀁 𑀕𑀺𑀮𑀸𑀦𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀓𑀸𑀢𑀩𑁆𑀩𑀁. 𑀅𑀦𑀪𑀺𑀭𑀢𑀺𑀯𑀽𑀧𑀓𑀸𑀲𑀦𑀸𑀤𑀺 𑀧𑀦 𑀅𑀕𑀺𑀮𑀸𑀦𑀲𑁆𑀲𑀧𑀺 𑀓𑀢𑁆𑀢𑀩𑁆𑀩𑀫𑁂𑀯. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦𑀸𑀢𑀺 ‘‘𑀏𑀯𑀁 𑀭𑀚𑁂𑀬𑁆𑀬𑀸𑀲𑀻’’𑀢𑀺 𑀉𑀧𑀚𑁆𑀛𑀸𑀬𑀢𑁄 𑀉𑀧𑀸𑀬𑀁 𑀲𑀼𑀢𑁆𑀯𑀸 𑀭𑀚𑀦𑁆𑀢𑁂𑀦. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄𑀢𑀺𑀆𑀤𑀻𑀲𑀼 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀥𑀫𑁆𑀫𑀸𑀫𑀺𑀲𑁂𑀳𑀺 𑀅𑀲𑀗𑁆𑀕𑀡𑁆𑀳𑀦𑁆𑀢𑀸𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀤𑀼𑀓𑁆𑀓𑀝𑀁 𑀯𑀢𑁆𑀢𑀪𑁂𑀤𑀢𑁆𑀢𑀸. 𑀢𑁂𑀦𑁂𑀯 𑀧𑀭𑀺𑀯𑀸𑀭𑁂𑀧𑀺 (𑀧𑀭𑀺. 𑁩𑁨𑁨) ‘‘𑀦 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑁂 𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀓𑁂𑀦𑀝𑁆𑀞𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀓𑀢𑀺𑀯𑀺𑀥𑀸 𑀅𑀦𑁆𑀢𑁂𑀯𑀸𑀲𑀺𑀓𑀸, 𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁, 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺? 𑀢𑀢𑁆𑀣 𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀯𑀸 𑀳𑁄𑀢𑀼 𑀲𑀸𑀫𑀡𑁂𑀭𑁄 𑀯𑀸, 𑀬𑁄 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀡𑁆𑀳𑀸𑀢𑀺, 𑀬𑁄 𑀯𑀸 𑀆𑀘𑀭𑀺𑀬𑀲𑁆𑀲 𑀑𑀯𑀸𑀤𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀢𑀺, 𑀬𑁄 𑀯𑀸 𑀢𑁂𑀦𑀸𑀦𑀼𑀲𑁆𑀲𑀸𑀯𑀺𑀢𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀬𑁄 𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀲𑁄 𑀲𑀩𑁆𑀩𑁄 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀞𑀫𑁄 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫, 𑀤𑀼𑀢𑀺𑀬𑁄 𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫, 𑀢𑀢𑀺𑀬𑁄 𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫, 𑀘𑀢𑀼𑀢𑁆𑀣𑁄 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫. 𑀅𑀜𑁆𑀜𑀢𑁆𑀣 𑀧𑀦 𑀲𑀺𑀧𑁆𑀧𑀦𑁆𑀢𑁂𑀯𑀸𑀲𑀺𑀓𑁄𑀧𑀺 𑀆𑀕𑀢𑁄, 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀓𑁂𑀦𑀝𑁆𑀞𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀅𑀦𑁆𑀢𑁂 𑀯𑀲𑀢𑀻𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀮𑀼𑀢𑁆𑀢𑀲𑀫𑀸𑀲𑀯𑀲𑁂𑀦. 𑀓𑀢𑀺𑀯𑀺𑀥𑀸 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀘𑀢𑀼𑀩𑁆𑀩𑀺𑀥𑀸 𑀅𑀦𑁆𑀢𑁂𑀯𑀸𑀲𑀺𑀓𑀸.

𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑁂𑀳𑀺 𑀆𑀘𑀭𑀺𑀬𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀺𑀢𑀩𑁆𑀩𑀁. 𑀬𑀣𑀸𑀳 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁮𑁨) ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀬𑀣𑀸 𑀆𑀘𑀭𑀺𑀬𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺. 𑀓𑀢𑀫𑀁 𑀢𑀁 𑀯𑀢𑁆𑀢𑀦𑁆𑀢𑀺 𑀬𑀁 𑀪𑀕𑀯𑀢𑀸 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁, 𑀇𑀥 𑀘 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑀁, 𑀢𑀁 𑀯𑀢𑁆𑀢𑀦𑁆𑀢𑀺. 𑀇𑀥 𑀧𑀦 𑀅𑀢𑁆𑀣𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀏𑀢𑁂𑀲𑀼 𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑁄 𑀘 𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑁄 𑀘 𑀆𑀘𑀭𑀺𑀬𑀲𑁆𑀲 𑀬𑀸𑀯𑀚𑀻𑀯𑀁 𑀪𑀸𑀭𑁄, 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁄 𑀘 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁄 𑀘 𑀬𑀸𑀯 𑀲𑀫𑀻𑀧𑁂 𑀯𑀲𑀦𑁆𑀢𑀺, 𑀢𑀸𑀯𑀤𑁂𑀯, 𑀢𑀲𑁆𑀫𑀸 𑀆𑀘𑀭𑀺𑀬𑁂𑀳𑀺𑀧𑀺 𑀢𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀳𑀺 𑀬𑁄 𑀬𑁄 𑀦 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀢𑀲𑁆𑀲 𑀢𑀲𑁆𑀲 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁫. 𑀆𑀕𑀦𑁆𑀢𑀼𑀓𑀯𑀢𑁆𑀢𑁂 𑀆𑀕𑀘𑁆𑀙𑀢𑀻𑀢𑀺 𑀆𑀕𑀦𑁆𑀢𑀼𑀓𑁄, 𑀢𑁂𑀦 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁. ‘‘𑀇𑀤𑀸𑀦𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀲𑀻𑀫𑀸𑀲𑀫𑀻𑀧𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀲𑀫𑀻𑀧𑀁 𑀧𑀢𑁆𑀯𑀸 𑀉𑀧𑀸𑀳𑀦𑀸𑀑𑀫𑀼𑀜𑁆𑀘𑀦𑀸𑀤𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁. 𑀕𑀳𑁂𑀢𑁆𑀯𑀸𑀢𑀺 𑀉𑀧𑀸𑀳𑀦𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸. 𑀉𑀧𑀸𑀳𑀦𑀧𑀼𑀜𑁆𑀙𑀦𑀘𑁄𑀴𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑀸𑀳𑀦𑀸 𑀧𑀼𑀜𑁆𑀙𑀺𑀢𑀩𑁆𑀩𑀸𑀢𑀺 ‘‘𑀓𑀢𑀭𑀲𑁆𑀫𑀺𑀁 𑀞𑀸𑀦𑁂 𑀉𑀧𑀸𑀳𑀦𑀧𑀼𑀜𑁆𑀙𑀦𑀘𑁄𑀴𑀓’’𑀦𑁆𑀢𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀢𑁆𑀯𑀸. 𑀧𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀲𑀼𑀓𑁆𑀔𑀸𑀧𑀦𑀢𑁆𑀣𑀸𑀬 𑀆𑀢𑀧𑁂 𑀧𑀢𑁆𑀣𑀭𑀺𑀢𑀩𑁆𑀩𑀁. 𑀲𑀘𑁂 𑀦𑀯𑀓𑁄 𑀳𑁄𑀢𑀺, 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄𑀢𑀺 𑀢𑀲𑁆𑀲 𑀯𑀲𑁆𑀲𑁂 𑀧𑀼𑀘𑁆𑀙𑀺𑀢𑁂 𑀬𑀤𑀺 𑀤𑀳𑀭𑁄 𑀳𑁄𑀢𑀺, 𑀲𑀬𑀫𑁂𑀯 𑀯𑀦𑁆𑀤𑀺𑀲𑁆𑀲𑀢𑀺, 𑀢𑀤𑀸 𑀇𑀫𑀺𑀦𑀸 𑀯𑀦𑁆𑀤𑀸𑀧𑀺𑀢𑁄 𑀳𑁄𑀢𑀺. 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄𑀢𑀺 𑀑𑀮𑁄𑀓𑁂𑀢𑀩𑁆𑀩𑁄. 𑀩𑀳𑀺 𑀞𑀺𑀢𑁂𑀦𑀸𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀅𑀳𑀺𑀦𑁄 𑀯𑀸 𑀅𑀫𑀦𑀼𑀲𑁆𑀲𑀲𑁆𑀲 𑀯𑀸 𑀫𑀕𑁆𑀕𑀁 𑀞𑀢𑁆𑀯𑀸 𑀞𑀺𑀢𑁂𑀦 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁬. 𑀆𑀯𑀸𑀲𑀺𑀓𑀯𑀢𑁆𑀢𑁂 𑀆𑀯𑀲𑀢𑀻𑀢𑀺 𑀆𑀯𑀸𑀲𑀺𑀓𑁄, 𑀢𑁂𑀦 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀯𑀸𑀲𑀺𑀓𑀯𑀢𑁆𑀢𑀁. 𑀢𑀢𑁆𑀣 𑀆𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑀁 𑀪𑀺𑀓𑁆𑀔𑀼𑀁 𑀯𑀼𑀟𑁆𑀠𑀢𑀭𑀁 𑀤𑀺𑀲𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺𑀆𑀤𑀺 𑀧𑀸𑀴𑀺𑀬𑀁 (𑀘𑀽𑀴𑀯. 𑁩𑁫𑁯) 𑀆𑀕𑀢𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀜𑁆𑀘 (𑀘𑀽𑀴𑀯. 𑀅𑀝𑁆𑀞. 𑁩𑁫𑁯) 𑀕𑀳𑁂𑀢𑀩𑁆𑀩𑀁, 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀧𑀸𑀓𑀝𑀫𑁂𑀯, 𑀉𑀧𑀸𑀳𑀦𑀧𑀼𑀜𑁆𑀙𑀦𑀁 𑀧𑀦 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀢𑁂𑀦𑁂𑀯 𑀳𑁂𑀢𑁆𑀣 ‘‘𑀲𑀘𑁂 𑀉𑀲𑁆𑀲𑀳𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑀸𑀳𑀦𑀸 𑀅𑀧𑀼𑀜𑁆𑀙𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺. 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀓𑀢𑁆𑀣 𑀫𑀬𑁆𑀳𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁂𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, ‘‘𑀏𑀢𑀁 𑀲𑁂𑀦𑀸𑀲𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀧𑁆𑀨𑁄𑀝𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺𑀬𑁂𑀯. 𑀏𑀢𑁂𑀦 𑀫𑀜𑁆𑀘𑀧𑀻𑀞𑀸𑀤𑀺𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸 𑀤𑀸𑀦𑀫𑁆𑀧𑀺 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀆𑀯𑀸𑀲𑁂𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀁 𑀅𑀓𑀸𑀢𑀼𑀁 𑀦 𑀮𑀩𑁆𑀪𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀫𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁭. 𑀕𑀫𑀺𑀓𑀯𑀢𑁆𑀢𑁂 𑀕𑀦𑁆𑀢𑀼𑀁 𑀪𑀩𑁆𑀩𑁄𑀢𑀺 𑀕𑀫𑀺𑀓𑁄, 𑀢𑁂𑀦 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀕𑀫𑀺𑀓𑀯𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀤𑀸𑀭𑀼𑀪𑀡𑁆𑀟𑀦𑁆𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁨𑁨) 𑀯𑀼𑀢𑁆𑀢𑀁 𑀫𑀜𑁆𑀘𑀧𑀻𑀞𑀸𑀤𑀺. 𑀫𑀢𑁆𑀢𑀺𑀓𑀸𑀪𑀡𑁆𑀟𑀫𑁆𑀧𑀺 𑀭𑀚𑀦𑀪𑀸𑀚𑀦𑀸𑀤𑀺 𑀲𑀩𑁆𑀩𑀁 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀪𑁂𑀤𑀫𑁂𑀯. 𑀢𑀁 𑀲𑀩𑁆𑀩𑀁 𑀅𑀕𑁆𑀕𑀺𑀲𑀸𑀮𑀸𑀬𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑁂 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁, 𑀅𑀦𑁄𑀯𑀲𑁆𑀲𑀓𑁂 𑀧𑀩𑁆𑀪𑀸𑀭𑁂𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀬𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀁, 𑀬𑀢𑁆𑀣 𑀉𑀧𑀘𑀺𑀓𑀸 𑀦𑀸𑀭𑁄𑀳𑀦𑁆𑀢𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀧𑀺 𑀅𑀦𑀸𑀧𑀢𑁆𑀢𑀺. 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀽𑀢𑀺𑀆𑀤𑀺 𑀉𑀧𑀘𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀧𑀡𑁆𑀡𑀲𑀸𑀮𑀸𑀤𑀺𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀧𑁆𑀧𑁂𑀯 𑀦𑀸𑀫 𑀅𑀗𑁆𑀕𑀸𑀦𑀺𑀧𑀺 𑀲𑁂𑀲𑁂𑀬𑁆𑀬𑀼𑀦𑁆𑀢𑀺 𑀅𑀬𑀁 𑀅𑀚𑁆𑀛𑁄𑀓𑀸𑀲𑁂 𑀞𑀧𑀺𑀢𑀫𑁆𑀳𑀺 𑀆𑀦𑀺𑀲𑀁𑀲𑁄. 𑀑𑀯𑀲𑁆𑀲𑀓𑀕𑁂𑀳𑁂 𑀧𑀦 𑀢𑀺𑀡𑁂𑀲𑀼 𑀘 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂𑀲𑀼 𑀘 𑀉𑀧𑀭𑀺 𑀧𑀢𑀦𑁆𑀢𑁂𑀲𑀼 𑀫𑀜𑁆𑀘𑀧𑀻𑀞𑀸𑀦𑀁 𑀅𑀗𑁆𑀕𑀸𑀦𑀺𑀧𑀺 𑀯𑀺𑀦𑀲𑁆𑀲𑀦𑁆𑀢𑀺.

𑀕𑀫𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀦𑀼𑀫𑁄𑀤𑀦𑀯𑀢𑁆𑀢𑀁 𑀆𑀕𑀢𑀁, 𑀢𑀢𑁄 𑀪𑀢𑁆𑀢𑀕𑁆𑀕𑀯𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁭𑁩-𑁩𑁭𑁪) ‘‘𑀇𑀫𑀲𑁆𑀫𑀺𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁫𑁬) 𑀆𑀕𑀢𑀸𑀦𑀺 𑀆𑀕𑀦𑁆𑀢𑀼𑀓𑀸𑀯𑀸𑀲𑀺𑀓𑀕𑀫𑀺𑀬𑀸𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀸𑀭𑀜𑁆𑀜𑀺𑀓𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀦𑀸𑀫𑀸’’𑀢𑀺 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀯𑀺𑀦𑀬𑀲𑀗𑁆𑀕𑀳𑀧𑁆𑀧𑀓𑀭𑀡𑁂 𑀕𑀫𑀺𑀓𑀯𑀢𑁆𑀢𑀢𑁄 𑀪𑀢𑁆𑀢𑀕𑁆𑀕𑀯𑀢𑁆𑀢𑀁 𑀆𑀕𑀢𑀁, 𑀅𑀦𑀼𑀫𑁄𑀤𑀦𑀯𑀢𑁆𑀢𑀁 𑀧𑀦 𑀯𑀺𑀲𑀼𑀁 𑀅𑀯𑀢𑁆𑀯𑀸 𑀪𑀢𑁆𑀢𑀕𑁆𑀕𑀯𑀢𑁆𑀢𑁂𑀬𑁂𑀯 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀯𑀼𑀢𑁆𑀢𑀁 𑀪𑀢𑁆𑀢𑀕𑁆𑀕𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑁂 𑀪𑀼𑀢𑁆𑀢𑁂𑀬𑁂𑀯 𑀅𑀦𑀼𑀫𑁄𑀤𑀦𑀸𑀓𑀭𑀡𑀢𑁄, 𑀧𑀸𑀴𑀺𑀬𑀜𑁆𑀘 𑀅𑀜𑁆𑀜𑁂𑀲𑀼 𑀯𑀢𑁆𑀢𑁂𑀲𑀼 𑀯𑀺𑀬 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀅𑀦𑀼𑀫𑁄𑀤𑀦𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀲𑀼𑀁 𑀯𑀢𑁆𑀢𑀪𑀸𑀯𑁂𑀦 𑀅𑀦𑀸𑀕𑀢𑀢𑁆𑀢𑀸 𑀪𑀢𑁆𑀢𑀕𑁆𑀕𑀯𑀢𑁆𑀢𑁂𑀬𑁂𑀯 𑀅𑀦𑁆𑀢𑁄𑀕𑀥𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸. 𑀇𑀫𑀲𑁆𑀲 𑀘 𑀯𑀺𑀦𑀬𑀸𑀮𑀗𑁆𑀓𑀸𑀭𑀧𑀓𑀭𑀡𑀲𑁆𑀲 𑀢𑀲𑁆𑀲𑀸 𑀯𑀡𑁆𑀡𑀦𑀸𑀪𑀽𑀢𑀢𑁆𑀢𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀓𑁆𑀓𑀫𑁂𑀦𑁂𑀯 𑀲𑀁𑀯𑀡𑁆𑀡𑀦𑀁 𑀓𑀣𑀬𑀺𑀲𑁆𑀲𑀸𑀫.

𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀪𑀢𑁆𑀢𑀁. 𑀅𑀚𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀅𑀕𑁆𑀕𑀁. ‘‘𑀆𑀤𑀺𑀓𑁄𑀝𑁆𑀞𑀸𑀲𑀓𑁄𑀝𑀻𑀲𑀼, 𑀧𑀼𑀭𑀢𑁄𑀕𑁆𑀕𑀁 𑀯𑀭𑁂 𑀢𑀻𑀲𑀽’’𑀢𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑀆𑀕𑀢𑁂𑀧𑀺 ‘‘𑀭𑀸𑀚𑀕𑁆𑀕𑀦𑁆𑀢𑀺 𑀭𑀸𑀚𑀸𑀭𑀳𑀁, 𑀲𑀮𑀸𑀓𑀕𑁆𑀕𑀦𑁆𑀢𑀺 𑀲𑀮𑀸𑀓𑀕𑁆𑀕𑀳𑀡𑀝𑁆𑀞𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑁆𑀣𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 𑀪𑀢𑁆𑀢𑀲𑁆𑀲 𑀅𑀕𑁆𑀕𑀁 𑀪𑀢𑁆𑀢𑀕𑁆𑀕𑀁, 𑀪𑀢𑁆𑀢𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀁, 𑀪𑀢𑁆𑀢𑀕𑁆𑀕𑁂 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀆𑀭𑀸𑀫𑁂 𑀓𑀸𑀮𑁄 𑀆𑀭𑁄𑀘𑀺𑀢𑁄 𑀳𑁄𑀢𑀻𑀢𑀺 ‘‘𑀓𑀸𑀮𑁄 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺 𑀆𑀭𑁄𑀘𑀺𑀢𑁄 𑀳𑁄𑀢𑀺. 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦𑀸𑀢𑀺 𑀤𑁆𑀯𑁂 𑀚𑀸𑀡𑀼𑀫𑀡𑁆𑀟𑀮𑀸𑀦𑀺 𑀦𑀸𑀪𑀺𑀫𑀡𑁆𑀟𑀮𑀜𑁆𑀘 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦. 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀉𑀤𑁆𑀥𑀁 𑀦𑀸𑀪𑀺𑀫𑀡𑁆𑀟𑀮𑀁, 𑀅𑀥𑁄 𑀚𑀸𑀡𑀼𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀳𑁂𑀝𑁆𑀞𑀸 𑀚𑀗𑁆𑀖𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀦𑀺𑀯𑀸𑀲𑀦𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀢𑀢𑁄 𑀧𑀭𑀁 𑀑𑀢𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀣𑀸𑀦𑀺𑀲𑀺𑀦𑁆𑀦𑀲𑁆𑀲 𑀚𑀸𑀡𑀼𑀫𑀡𑁆𑀟𑀮𑀢𑁄 𑀳𑁂𑀝𑁆𑀞𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀢𑀲𑁆𑀲 𑀦𑀺𑀯𑀸𑀲𑀦𑀲𑁆𑀲 𑀉𑀧𑀭𑀺 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀓𑀸𑀬𑀩𑀦𑁆𑀥𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁨𑁭𑁮) 𑀯𑀼𑀢𑁆𑀢𑀢𑁆𑀢𑀸. 𑀲𑀕𑀼𑀡𑀁 𑀓𑀢𑁆𑀯𑀸𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑁂 𑀯𑀼𑀢𑁆𑀢𑀫𑁂𑀯. ‘‘𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀧𑀸𑀲𑀓𑁂 𑀕𑀡𑁆𑀞𑀺𑀓𑀁 𑀧𑀯𑁂𑀲𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁄 𑀯𑀸 𑀳𑁄𑀢𑀼 𑀯𑀺𑀳𑀸𑀭𑁄 𑀯𑀸, 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁂𑀦 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀫𑀦𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀫𑀦𑀼𑀲𑁆𑀲𑀸 𑀲𑀧𑀼𑀢𑁆𑀢𑀤𑀸𑀭𑀸 𑀆𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽 𑀦𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺.

𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦𑀸𑀢𑀺 𑀦 𑀲𑀲𑀻𑀲𑀁 𑀧𑀸𑀭𑀼𑀢𑁂𑀦, 𑀅𑀣 𑀔𑁄 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀯𑀸𑀢𑀦𑁆𑀢𑁂𑀦 𑀕𑀻𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀉𑀪𑁄 𑀓𑀡𑁆𑀡𑁂 𑀲𑀫𑀁 𑀓𑀢𑁆𑀯𑀸 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀬𑀸𑀯 𑀫𑀡𑀺𑀩𑀦𑁆𑀥𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦. 𑀲𑀼𑀲𑀁𑀯𑀼𑀢𑁂𑀦𑀸𑀢𑀺 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀅𑀓𑀻𑀴𑀸𑀧𑁂𑀦𑁆𑀢𑁂𑀦, 𑀲𑀼𑀯𑀺𑀦𑀻𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀘𑀓𑁆𑀔𑀼𑀦𑀸. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀢𑀳𑀁 𑀢𑀳𑀁 𑀑𑀮𑁄𑀓𑁂𑀦𑁆𑀢𑁄 𑀪𑀺𑀬𑁆𑀬𑁄 𑀢𑀁 𑀢𑀁 𑀤𑀺𑀲𑀸𑀪𑀸𑀕𑀁 𑀧𑀸𑀲𑀸𑀤𑀁 𑀓𑀽𑀝𑀸𑀕𑀸𑀭𑀁 𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀧𑁆𑀧𑀲𑀤𑁆𑀤𑁂𑀦𑀸𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺? 𑀤𑁆𑀯𑀸𑀤𑀲𑀳𑀢𑁆𑀣𑁂 𑀕𑁂𑀳𑁂 𑀆𑀤𑀺𑀫𑁆𑀳𑀺 𑀲𑀗𑁆𑀖𑀢𑁆𑀣𑁂𑀭𑁄 𑀫𑀚𑁆𑀛𑁂 𑀤𑀼𑀢𑀺𑀬𑀢𑁆𑀣𑁂𑀭𑁄 𑀅𑀦𑁆𑀢𑁂 𑀢𑀢𑀺𑀬𑀢𑁆𑀣𑁂𑀭𑁄𑀢𑀺 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀤𑀼𑀢𑀺𑀬𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀺, 𑀤𑀼𑀢𑀺𑀬𑀢𑁆𑀣𑁂𑀭𑁄 𑀢𑀲𑁆𑀲 𑀲𑀤𑁆𑀤𑀜𑁆𑀘𑁂𑀯 𑀲𑀼𑀡𑀸𑀢𑀺, 𑀓𑀣𑀜𑁆𑀘 𑀯𑀯𑀢𑁆𑀣𑀧𑁂𑀢𑀺, 𑀢𑀢𑀺𑀬𑀢𑁆𑀣𑁂𑀭𑁄 𑀧𑀦 𑀲𑀤𑁆𑀤𑀫𑁂𑀯 𑀲𑀼𑀡𑀸𑀢𑀺, 𑀓𑀣𑀁 𑀦 𑀯𑀯𑀢𑁆𑀣𑀧𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀅𑀧𑁆𑀧𑀲𑀤𑁆𑀤𑁄 𑀳𑁄𑀢𑀺. 𑀲𑀘𑁂 𑀧𑀦 𑀢𑀢𑀺𑀬𑀢𑁆𑀣𑁂𑀭𑁄 𑀓𑀣𑀁 𑀯𑀯𑀢𑁆𑀣𑀧𑁂𑀢𑀺, 𑀫𑀳𑀸𑀲𑀤𑁆𑀤𑁄 𑀦𑀸𑀫 𑀳𑁄𑀢𑀺.

𑀦 𑀉𑀓𑁆𑀔𑀺𑀢𑁆𑀢𑀓𑀸𑀬𑀸𑀢𑀺 𑀦 𑀉𑀓𑁆𑀔𑁂𑀧𑁂𑀦, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁, 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀉𑀓𑁆𑀔𑀺𑀢𑁆𑀢𑀘𑀻𑀯𑀭𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀦 𑀏𑀯𑀁 𑀕𑀦𑁆𑀢𑀩𑁆𑀩𑀁. 𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀦 𑀥𑀫𑀓𑀭𑀡𑀁 𑀦𑀻𑀳𑀭𑀦𑁆𑀢𑁂𑀦𑀧𑀺 𑀘𑀻𑀯𑀭𑀁 𑀅𑀦𑀼𑀓𑁆𑀔𑀺𑀧𑀺𑀢𑁆𑀯𑀸𑀯 𑀦𑀻𑀳𑀭𑀺𑀢𑀩𑁆𑀩𑀁. 𑀦 𑀉𑀚𑁆𑀚𑀕𑁆𑀖𑀺𑀓𑀸𑀬𑀸𑀢𑀺 𑀦 𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀓𑀭𑀡𑀯𑀘𑀦𑀁. 𑀦 𑀓𑀸𑀬𑀧𑁆𑀧𑀘𑀸𑀮𑀓𑀦𑁆𑀢𑀺 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸 𑀓𑀸𑀬𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀉𑀚𑀼𑀓𑁂𑀦 𑀓𑀸𑀬𑁂𑀦 𑀲𑀫𑁂𑀦 𑀇𑀭𑀺𑀬𑀸𑀧𑀣𑁂𑀦. 𑀦 𑀩𑀸𑀳𑀼𑀧𑁆𑀧𑀘𑀸𑀮𑀓𑀦𑁆𑀢𑀺 𑀩𑀸𑀳𑀼𑀁 𑀅𑀘𑀸𑀮𑁂𑀢𑁆𑀯𑀸 𑀩𑀸𑀳𑀼𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸. 𑀦 𑀲𑀻𑀲𑀧𑁆𑀧𑀘𑀸𑀮𑀓𑀦𑁆𑀢𑀺 𑀲𑀻𑀲𑀁 𑀅𑀘𑀸𑀮𑁂𑀢𑁆𑀯𑀸 𑀲𑀻𑀲𑀁 𑀧𑀕𑁆𑀕𑀳𑁂𑀢𑁆𑀯𑀸 𑀦𑀺𑀘𑁆𑀘𑀮𑀁 𑀉𑀚𑀼𑀁 𑀞𑀧𑁂𑀢𑁆𑀯𑀸. 𑀦 𑀔𑀫𑁆𑀪𑀓𑀢𑁄𑀢𑀺 𑀔𑀫𑁆𑀪𑀓𑀢𑁄 𑀦𑀸𑀫 𑀓𑀝𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀓𑀢𑀔𑀫𑁆𑀪𑁄. 𑀦 𑀉𑀓𑁆𑀓𑀼𑀝𑀺𑀓𑀸𑀬𑀸𑀢𑀺 𑀏𑀢𑁆𑀣 𑀉𑀓𑁆𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀺 𑀧𑀡𑁆𑀳𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀧𑀸𑀤𑁂𑀳𑀺 𑀯𑀸 𑀅𑀕𑁆𑀕𑀧𑀸𑀤𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀡𑁆𑀳𑁂𑀳𑀺𑀬𑁂𑀯 𑀯𑀸 𑀪𑀽𑀫𑀺𑀁 𑀨𑀼𑀲𑀦𑁆𑀢𑀲𑁆𑀲 𑀕𑀫𑀦𑀁. 𑀓𑀭𑀡𑀯𑀘𑀦𑀁 𑀧𑀦𑁂𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯. 𑀦 𑀑𑀕𑀼𑀡𑁆𑀞𑀺𑀢𑁂𑀦𑀸𑀢𑀺 𑀲𑀲𑀻𑀲𑀁 𑀧𑀸𑀭𑀼𑀢𑁂𑀦. 𑀦 𑀧𑀮𑁆𑀮𑀢𑁆𑀣𑀺𑀓𑀸𑀬𑀸𑀢𑀺 𑀦 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀬. 𑀏𑀢𑁆𑀣 𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀧𑀺 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸 𑀏𑀯. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀸𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀢𑀺𑀅𑀮𑁆𑀮𑀻𑀬𑀺𑀢𑁆𑀯𑀸 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀲𑀗𑁆𑀖𑀸𑀝𑀺𑀁 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀦 𑀲𑀗𑁆𑀖𑀸𑀝𑀺𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸. 𑀧𑀢𑁆𑀢𑀲𑀜𑁆𑀜𑀻𑀢𑀺 𑀧𑀢𑁆𑀢𑁂 𑀲𑀜𑁆𑀜𑀁 𑀓𑀢𑁆𑀯𑀸. 𑀲𑀫𑀲𑀽𑀧𑀓𑁄 𑀦𑀸𑀫 𑀬𑀢𑁆𑀣 𑀪𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀲𑀽𑀧𑁄 𑀳𑁄𑀢𑀺. 𑀲𑀫𑀢𑀺𑀢𑁆𑀣𑀺𑀓𑀦𑁆𑀢𑀺 𑀲𑀫𑀧𑀼𑀡𑁆𑀡𑀁 𑀲𑀫𑀪𑀭𑀺𑀢𑀁. 𑀣𑀽𑀧𑀻𑀓𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀣𑀽𑀧𑀻𑀓𑀢𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀢𑁄, 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀪𑀭𑀺𑀢𑁄 𑀧𑀽𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀫𑀼𑀔𑀯𑀝𑁆𑀝𑀺𑀮𑁂𑀔𑀸𑀲𑀫𑀧𑁆𑀧𑀫𑀸𑀡𑁄 𑀕𑀳𑁂𑀢𑀩𑁆𑀩𑁄. ‘‘𑀬𑀁 𑀓𑀜𑁆𑀘𑀺 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀨𑀮𑀸𑀨𑀮𑀁 𑀯𑀸 𑀆𑀫𑀺𑀲𑀚𑀸𑀢𑀺𑀓𑀁 𑀲𑀫𑀢𑀺𑀢𑁆𑀣𑀺𑀓𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑁂𑀦 𑀧𑀢𑁆𑀢𑁂𑀦, 𑀇𑀢𑀭𑁂𑀦 𑀧𑀦 𑀣𑀽𑀧𑀻𑀓𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀸𑀫𑀓𑀸𑀮𑀺𑀓𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀸𑀦𑀺 𑀧𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑁂 𑀣𑀽𑀧𑀻𑀓𑀢𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺. 𑀬𑀁 𑀧𑀦 𑀤𑁆𑀯𑀻𑀲𑀼 𑀧𑀢𑁆𑀢𑁂𑀲𑀼 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀬𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀬𑀫𑀸𑀦𑀁 𑀧𑀽𑀯𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀨𑀮𑀸𑀤𑀺 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺, 𑀢𑀁 𑀣𑀽𑀧𑀻𑀓𑀢𑀁 𑀦𑀸𑀫 𑀦 𑀳𑁄𑀢𑀺. 𑀧𑀽𑀯𑀯𑀝𑀁𑀲𑀓𑀁 𑀞𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺, 𑀣𑀽𑀧𑀻𑀓𑀢𑀫𑁂𑀯 𑀳𑁄𑀢𑀺. 𑀧𑀼𑀧𑁆𑀨𑀯𑀝𑀁𑀲𑀓𑀢𑀓𑁆𑀓𑁄𑀮𑀓𑀝𑀼𑀓𑀨𑀮𑀸𑀤𑀺𑀯𑀝𑀁𑀲𑀓𑁂 𑀧𑀦 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀁 𑀣𑀽𑀧𑀻𑀓𑀢𑀁 𑀦 𑀳𑁄𑀢𑀺. 𑀪𑀢𑁆𑀢𑀲𑁆𑀲 𑀉𑀧𑀭𑀺 𑀣𑀸𑀮𑀓𑀁 𑀯𑀸 𑀧𑀢𑁆𑀢𑀁 𑀯𑀸 𑀞𑀧𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀣𑀽𑀧𑀻𑀓𑀢𑀁 𑀦𑀸𑀫 𑀦 𑀳𑁄𑀢𑀺. 𑀓𑀼𑀭𑀼𑀦𑁆𑀤𑀺𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀣𑀸𑀮𑀓𑁂 𑀯𑀸 𑀧𑀢𑁆𑀢𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀧𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀧𑀸𑀝𑁂𑀓𑁆𑀓𑀪𑀸𑀚𑀦𑀁 𑀯𑀝𑁆𑀝𑀢𑀺. 𑀇𑀥 𑀅𑀦𑀸𑀧𑀢𑁆𑀢𑀺𑀬𑀁 𑀕𑀺𑀮𑀸𑀦𑁄 𑀦 𑀆𑀕𑀢𑁄, 𑀢𑀲𑁆𑀫𑀸 𑀕𑀺𑀮𑀸𑀦𑀲𑁆𑀲𑀧𑀺 𑀣𑀽𑀧𑀻𑀓𑀢𑀁 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑀢𑁆𑀣 𑀧𑀦 𑀧𑀝𑀺𑀕𑁆𑀕𑀳𑁂𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺, 𑀧𑀝𑀺𑀕𑁆𑀕𑀳𑀺𑀢𑀁 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺.

‘‘𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀘 ‘‘𑀧𑀢𑁆𑀢𑀲𑀜𑁆𑀜𑀻’’𑀢𑀺 𑀘 𑀉𑀪𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀧𑀤𑀸𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀑𑀥𑀺𑀁 𑀅𑀓𑀢𑁆𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀲𑀫𑀲𑀽𑀧𑀓𑁂 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀫𑁂𑀯. 𑀣𑀽𑀧𑀓𑀢𑁄𑀢𑀺 𑀫𑀢𑁆𑀣𑀓𑀢𑁄, 𑀯𑁂𑀫𑀚𑁆𑀛𑀢𑁄𑀢𑀺 𑀅𑀢𑁆𑀣𑁄. 𑀦 𑀲𑀽𑀧𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸𑀢𑀺𑀆𑀤𑀺 𑀧𑀸𑀓𑀝𑀫𑁂𑀯. 𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀉𑀚𑁆𑀛𑀸𑀦𑀲𑀜𑁆𑀜𑀻𑀲𑀺𑀓𑁆𑀔𑀸𑀧𑀤𑁂𑀧𑀺 𑀕𑀺𑀮𑀸𑀦𑁄 𑀦 𑀫𑀼𑀜𑁆𑀘𑀢𑀺. 𑀦𑀸𑀢𑀺𑀫𑀳𑀦𑁆𑀢𑁄 𑀓𑀩𑀴𑁄𑀢𑀺 𑀫𑀬𑀽𑀭𑀡𑁆𑀟𑀁 𑀅𑀢𑀺𑀫𑀳𑀦𑁆𑀢𑀁, 𑀓𑀼𑀓𑁆𑀓𑀼𑀝𑀡𑁆𑀟𑀁 𑀅𑀢𑀺𑀔𑀼𑀤𑁆𑀤𑀓𑀁, 𑀢𑁂𑀲𑀁 𑀯𑁂𑀫𑀚𑁆𑀛𑀧𑁆𑀧𑀫𑀸𑀡𑁄. 𑀧𑀭𑀺𑀫𑀡𑁆𑀟𑀮𑀁 𑀆𑀮𑁄𑀧𑁄𑀢𑀺 𑀦𑀸𑀢𑀺𑀤𑀻𑀖𑁄 𑀆𑀮𑁄𑀧𑁄. 𑀅𑀦𑀸𑀳𑀝𑁂𑀢𑀺 𑀅𑀦𑀸𑀳𑀭𑀺𑀢𑁂, 𑀫𑀼𑀔𑀤𑁆𑀯𑀸𑀭𑀁 𑀅𑀲𑀫𑁆𑀧𑀸𑀧𑀺𑀢𑁂𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁄 𑀳𑀢𑁆𑀣𑁄𑀢𑀺 𑀏𑀢𑁆𑀣 𑀳𑀢𑁆𑀣𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀳𑀢𑁆𑀣𑀫𑀼𑀤𑁆𑀤𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀯𑁄𑀳𑀸𑀭𑀲𑁆𑀲 𑀅𑀯𑀬𑀯𑁂 𑀧𑀯𑀢𑁆𑀢𑀦𑀢𑁄. 𑀏𑀓𑀗𑁆𑀕𑀼𑀮𑀺𑀫𑁆𑀧𑀺 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀦 𑀲𑀓𑀩𑀴𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀳𑀭𑀻𑀢𑀓𑀁 𑀯𑀸 𑀮𑀝𑁆𑀞𑀺𑀫𑀥𑀼𑀓𑀁 𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀢𑀺, 𑀬𑀢𑁆𑀢𑀓𑁂𑀦 𑀯𑀘𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀢𑁆𑀢𑀓𑁂 𑀫𑀼𑀔𑀫𑁆𑀳𑀺 𑀲𑀦𑁆𑀢𑁂 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀦𑁆𑀢𑀺 𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀓𑀩𑀴𑀸𑀯𑀘𑁆𑀙𑁂𑀤𑀓𑀦𑁆𑀢𑀺 𑀓𑀩𑀴𑀁 𑀅𑀯𑀙𑀺𑀦𑁆𑀤𑀺𑀢𑁆𑀯𑀸 𑀅𑀯𑀙𑀺𑀦𑁆𑀤𑀺𑀢𑁆𑀯𑀸. 𑀅𑀯𑀕𑀡𑁆𑀟𑀓𑀸𑀭𑀓𑀦𑁆𑀢𑀺 𑀫𑀓𑁆𑀓𑀝𑁄 𑀯𑀺𑀬 𑀕𑀡𑁆𑀟𑁂 𑀓𑀢𑁆𑀯𑀸 𑀓𑀢𑁆𑀯𑀸. 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀤𑁆𑀥𑀼𑀦𑀺𑀢𑁆𑀯𑀸 𑀦𑀺𑀤𑁆𑀥𑀼𑀦𑀺𑀢𑁆𑀯𑀸. 𑀲𑀺𑀢𑁆𑀣𑀸𑀯𑀓𑀸𑀭𑀓𑀦𑁆𑀢𑀺 𑀲𑀺𑀢𑁆𑀣𑀸𑀦𑀺 𑀅𑀯𑀓𑀺𑀭𑀺𑀢𑁆𑀯𑀸 𑀅𑀯𑀓𑀺𑀭𑀺𑀢𑁆𑀯𑀸. 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀦𑁆𑀢𑀺 𑀚𑀺𑀯𑁆𑀳𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀦𑀺𑀘𑁆𑀙𑀸𑀭𑁂𑀢𑁆𑀯𑀸. 𑀘𑀧𑀼𑀘𑀧𑀼𑀓𑀸𑀭𑀓𑀦𑁆𑀢𑀺 ‘‘𑀘𑀧𑀼𑀘𑀧𑀽’’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀓𑀢𑁆𑀯𑀸. 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀦𑁆𑀢𑀺 ‘‘𑀲𑀼𑀭𑀼𑀲𑀼𑀭𑀽’’𑀢𑀺 𑀏𑀯𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀓𑀢𑁆𑀯𑀸. 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀦𑁆𑀢𑀺 𑀳𑀢𑁆𑀣𑀁 𑀦𑀺𑀮𑁆𑀮𑁂𑀳𑀺𑀢𑁆𑀯𑀸 𑀦𑀺𑀮𑁆𑀮𑁂𑀳𑀺𑀢𑁆𑀯𑀸. 𑀪𑀼𑀜𑁆𑀚𑀦𑁆𑀢𑁂𑀦 𑀳𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀦𑀺𑀮𑁆𑀮𑁂𑀳𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀖𑀦𑀬𑀸𑀕𑀼𑀨𑀸𑀡𑀺𑀢𑀧𑀸𑀬𑀸𑀲𑀸𑀤𑀺𑀓𑁂 𑀧𑀦 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀧𑀯𑁂𑀲𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀢𑀲𑁆𑀫𑀸 𑀅𑀗𑁆𑀕𑀼𑀮𑀺𑀬𑀸𑀧𑀺 𑀧𑀢𑁆𑀢𑁄 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀏𑀓𑀑𑀝𑁆𑀞𑁄𑀧𑀺 𑀚𑀺𑀯𑁆𑀳𑀸𑀬 𑀦 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑁄, 𑀑𑀝𑁆𑀞𑀫𑀁𑀲𑁂𑀳𑀺 𑀏𑀯 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑁄𑀢𑀺 𑀏𑀢𑀁 𑀧𑀝𑀺𑀓𑀽𑀮𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀲𑀗𑁆𑀖𑀺𑀓𑀫𑁆𑀧𑀺 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀕𑀺𑀳𑀺𑀲𑀦𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀲𑀗𑁆𑀔𑀫𑁆𑀧𑀺 𑀲𑀭𑀸𑀯𑀫𑁆𑀧𑀺 𑀆𑀫𑀺𑀲𑀫𑀓𑁆𑀔𑀺𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯, 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀳𑀢𑁆𑀣𑀲𑁆𑀲 𑀏𑀓𑀤𑁂𑀲𑁄 𑀆𑀫𑀺𑀲𑀫𑀓𑁆𑀔𑀺𑀢𑁄 𑀦 𑀳𑁄𑀢𑀺, 𑀢𑁂𑀦 𑀧𑀤𑁂𑀲𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸𑀢𑀺 𑀲𑀺𑀢𑁆𑀣𑀸𑀦𑀺 𑀏𑀓𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀉𑀤𑀓𑀁 𑀙𑀟𑁆𑀟𑁂𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀉𑀤𑀓𑀕𑀢𑀺𑀓𑀸𑀦𑀺 𑀓𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀧𑀝𑀺𑀕𑁆𑀕𑀳𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦𑀁 𑀧𑀝𑀺𑀕𑁆𑀕𑀳𑁂 𑀙𑀟𑁆𑀟𑁂𑀢𑀺, 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀯𑀸 𑀙𑀟𑁆𑀟𑁂𑀢𑀺, 𑀏𑀯𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀦 𑀢𑀸𑀯 𑀣𑁂𑀭𑁂𑀦 𑀉𑀤𑀓𑀦𑁆𑀢𑀺 𑀇𑀤𑀁 𑀳𑀢𑁆𑀣𑀥𑁄𑀯𑀦𑀉𑀤𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸 𑀧𑀺𑀧𑀸𑀲𑀺𑀢𑁂𑀦, 𑀧𑀦 𑀕𑀮𑁂 𑀯𑀺𑀮𑀕𑁆𑀕𑀸𑀫𑀺𑀲𑁂𑀦 𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀦 𑀥𑁄𑀯𑀺𑀢𑀩𑁆𑀩𑀸𑀢𑀺.

𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀅𑀦𑀼𑀫𑁄𑀤𑀦𑀯𑀢𑁆𑀢𑁂 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀫𑁄𑀤𑀺𑀬𑀢𑁂 𑀧𑀫𑁄𑀤𑀺𑀬𑀢𑁂𑀢𑀺 𑀅𑀦𑀼𑀫𑁄𑀤𑀦𑀸. 𑀓𑀸 𑀲𑀸? 𑀥𑀫𑁆𑀫𑀓𑀣𑀸. 𑀅𑀦𑀼𑀫𑁄𑀤𑀦𑀸𑀬 𑀓𑀢𑁆𑀢𑀩𑁆𑀩𑀁 𑀯𑀢𑁆𑀢𑀁 𑀅𑀦𑀼𑀫𑁄𑀤𑀦𑀯𑀢𑁆𑀢𑀁. 𑀧𑀜𑁆𑀘𑀫𑁂 𑀦𑀺𑀲𑀺𑀦𑁆𑀦𑁂𑀢𑀺 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂. 𑀉𑀧𑀦𑀺𑀲𑀺𑀦𑁆𑀦𑀓𑀣𑀸 𑀦𑀸𑀫 𑀩𑀳𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀭𑀺𑀓𑀣𑀸𑀓𑀣𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁮𑁯. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂 𑀧𑀺𑀡𑁆𑀟𑀺𑀢𑀩𑁆𑀩𑁄 𑀲𑀗𑁆𑀖𑀭𑀺𑀢𑀩𑁆𑀩𑁄𑀢𑀺 𑀧𑀺𑀡𑁆𑀟𑁄, 𑀧𑀺𑀡𑁆𑀟𑀧𑀸𑀢𑁄. 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀺𑀡𑁆𑀟𑀘𑀸𑀭𑀻, 𑀲𑁄 𑀏𑀯 𑀧𑀺𑀡𑁆𑀟𑀘𑀸𑀭𑀺𑀓𑁄 𑀲𑀓𑀢𑁆𑀣𑁂 𑀓𑀧𑀘𑁆𑀘𑀬𑀯𑀲𑁂𑀦. 𑀧𑀺𑀡𑁆𑀟𑀘𑀸𑀭𑀺𑀓𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀦𑀺𑀯𑁂𑀲𑀦𑀁 𑀦𑀸𑀫 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀳𑀲𑀸 𑀧𑀯𑀺𑀲𑀦𑁆𑀢𑁄 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀯𑀸 𑀧𑀲𑁆𑀲𑁂𑀬𑁆𑀬, 𑀧𑀭𑀺𑀲𑁆𑀲𑀬𑁄 𑀯𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀸 ‘‘𑀦𑀺𑀯𑁂𑀲𑀦𑀁…𑀧𑁂… 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀤𑀽𑀭𑁂 𑀢𑀺𑀝𑁆𑀞𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑁄 𑀯𑀸 𑀪𑀯𑁂𑀬𑁆𑀬, ‘‘𑀅𑀜𑁆𑀜𑀲𑁆𑀲 𑀕𑁂𑀳𑁂 𑀢𑀺𑀝𑁆𑀞𑀢𑀻’’𑀢𑀺 𑀯𑀸 𑀫𑀜𑁆𑀜𑁂𑀬𑁆𑀬. 𑀅𑀘𑁆𑀘𑀸𑀲𑀦𑁆𑀦𑁂 𑀢𑀺𑀝𑁆𑀞𑀦𑁆𑀢𑁄 𑀅𑀧𑀲𑁆𑀲𑀺𑀢𑀩𑁆𑀩𑀁 𑀯𑀸 𑀧𑀲𑁆𑀲𑁂𑀬𑁆𑀬, 𑀅𑀲𑀼𑀡𑀺𑀢𑀩𑁆𑀩𑀁 𑀯𑀸 𑀲𑀼𑀡𑁂𑀬𑁆𑀬, 𑀢𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀕𑀸𑀭𑀯𑁄 𑀯𑀸 𑀅𑀧𑁆𑀧𑀲𑀸𑀤𑁄 𑀯𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀸 ‘‘𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑁄 𑀅𑀤𑀸𑀢𑀼𑀓𑀸𑀫𑀸𑀦𑀁 𑀫𑀦𑁄𑀧𑀤𑁄𑀲𑁄 𑀪𑀯𑁂𑀬𑁆𑀬, 𑀅𑀜𑁆𑀜𑀢𑁆𑀣 𑀪𑀺𑀓𑁆𑀔𑀸 𑀘 𑀧𑀭𑀺𑀓𑁆𑀔𑀬𑁂𑀬𑁆𑀬, 𑀅𑀢𑀺𑀮𑀳𑀼𑀓𑀁 𑀦𑀺𑀯𑀢𑁆𑀢𑀦𑁆𑀢𑁄 𑀤𑀸𑀢𑀼𑀓𑀸𑀫𑀸𑀦𑀁 𑀧𑀼𑀜𑁆𑀜𑀳𑀸𑀦𑀺 𑀘 𑀪𑀯𑁂𑀬𑁆𑀬, 𑀪𑀺𑀓𑁆𑀔𑀼𑀦𑁄 𑀘 𑀪𑀺𑀓𑁆𑀔𑀸𑀬 𑀅𑀲𑀫𑁆𑀧𑀚𑁆𑀚𑀦𑀁, 𑀢𑀲𑁆𑀫𑀸 ‘‘𑀦𑀸𑀢𑀺𑀘𑀺𑀭𑀁 𑀞𑀸𑀢𑀩𑁆𑀩𑀁, 𑀦𑀸𑀢𑀺𑀮𑀳𑀼𑀓𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀁, 𑀞𑀺𑀢𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀮𑁆𑀮𑀓𑁆𑀔𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀲𑀘𑁂 𑀓𑀫𑁆𑀫𑀁 𑀯𑀸 𑀦𑀺𑀓𑁆𑀔𑀺𑀧𑀢𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀓𑀫𑁆𑀫𑀁 𑀯𑀸 𑀦𑀺𑀓𑁆𑀔𑀺𑀧𑀢𑀻𑀢𑀺 𑀓𑀧𑁆𑀧𑀸𑀲𑀁 𑀯𑀸 𑀲𑀼𑀧𑁆𑀧𑀁 𑀯𑀸 𑀫𑀼𑀲𑀮𑀁 𑀯𑀸 𑀬𑀜𑁆𑀘 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀳𑁄𑀦𑁆𑀢𑀺, 𑀢𑀁 𑀦𑀺𑀓𑁆𑀔𑀺𑀧𑀢𑀺. 𑀧𑀭𑀸𑀫𑀲𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀞𑀧𑁂𑀢𑀺 𑀯𑀸𑀢𑀺 ‘‘𑀢𑀺𑀝𑁆𑀞𑀣 𑀪𑀦𑁆𑀢𑁂’’𑀢𑀺 𑀯𑀤𑀦𑁆𑀢𑀻 𑀞𑀧𑁂𑀢𑀺 𑀦𑀸𑀫. 𑀅𑀯𑀓𑁆𑀓𑀸𑀭𑀧𑀸𑀢𑀻𑀢𑀺 𑀅𑀢𑀺𑀭𑁂𑀓𑀧𑀺𑀡𑁆𑀟𑀧𑀸𑀢𑀁 𑀅𑀧𑀦𑁂𑀢𑁆𑀯𑀸 𑀞𑀧𑀦𑀢𑁆𑀣𑀸𑀬 𑀏𑀓𑀸 𑀲𑀫𑀼𑀕𑁆𑀕𑀧𑀸𑀢𑀺. 𑀏𑀢𑁆𑀣 𑀘 𑀲𑀫𑀼𑀕𑁆𑀕𑀧𑀸𑀢𑀺 𑀦𑀸𑀫 𑀲𑀫𑀼𑀕𑁆𑀕𑀧𑀼𑀝𑀲𑀤𑀺𑀲𑀸 𑀧𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁯𑁦. 𑀆𑀭𑀜𑁆𑀜𑀺𑀓𑀯𑀢𑁆𑀢𑁂 𑀦 𑀭𑀫𑀦𑁆𑀢𑀺 𑀚𑀦𑀸 𑀏𑀢𑁆𑀣𑀸𑀢𑀺 𑀅𑀭𑀜𑁆𑀜𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀭𑀫𑀡𑀻𑀬𑀸𑀦𑀺 𑀅𑀭𑀜𑁆𑀜𑀸𑀦𑀺, 𑀬𑀢𑁆𑀣 𑀦 𑀭𑀫𑀢𑀻 𑀚𑀦𑁄;

𑀯𑀻𑀢𑀭𑀸𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄’’𑀢𑀺. (𑀥. 𑀧. 𑁯𑁯);

𑀅𑀭𑀜𑁆𑀜𑁂 𑀯𑀲𑀢𑀻𑀢𑀺 𑀆𑀭𑀜𑁆𑀜𑀺𑀓𑁄, 𑀢𑁂𑀦 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁 𑀆𑀭𑀜𑁆𑀜𑀺𑀓𑀯𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀲𑁂𑀲𑀧𑀤𑀸𑀦𑀫𑀢𑁆𑀣𑁄 𑁋 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬𑀸𑀢𑀺 𑀅𑀭𑀜𑁆𑀜𑀲𑁂𑀦𑀸𑀲𑀦𑀲𑁆𑀲 𑀕𑀸𑀫𑀢𑁄 𑀤𑀽𑀭𑀢𑁆𑀢𑀸 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀓𑀸𑀭𑀡𑁂𑀦 ‘‘𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀧𑀭𑀺𑀲𑁆𑀲𑀫𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀘𑀻𑀯𑀭𑀁 𑀔𑀦𑁆𑀥𑁂 𑀓𑀭𑀺𑀢𑁆𑀯𑀸 𑀅𑀭𑀜𑁆𑀜𑀫𑀕𑁆𑀕𑁄 𑀦 𑀤𑀼𑀲𑁆𑀲𑁄𑀥𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑀡𑁆𑀝𑀓𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀯𑀺𑀫𑁄𑀘𑀦𑀢𑁆𑀣𑀁 𑀉𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸. 𑀅𑀭𑀜𑁆𑀜𑀁 𑀦𑀸𑀫 𑀬𑀲𑁆𑀫𑀸 𑀘𑁄𑀭𑀸𑀤𑀻𑀦𑀁 𑀯𑀺𑀘𑀭𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀁 𑀣𑀓𑁂𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑁄 𑀧𑀭𑀸𑀦𑀺 𑀪𑀢𑁆𑀢𑀕𑁆𑀕𑀯𑀢𑁆𑀢𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀘𑁂 𑀩𑀳𑀺𑀕𑀸𑀫𑁂 𑀉𑀤𑀓𑀁 𑀦𑀢𑁆𑀣𑀺, 𑀅𑀦𑁆𑀢𑁄𑀕𑀸𑀫𑁂𑀬𑁂𑀯 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸, 𑀅𑀣 𑀩𑀳𑀺𑀕𑀸𑀫𑁂 𑀅𑀢𑁆𑀣𑀺, 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑁆𑀯𑀸 𑀅𑀁𑀲𑁂 𑀓𑀭𑀺𑀢𑁆𑀯𑀸 𑀉𑀧𑀸𑀳𑀦𑀸 𑀆𑀭𑁄𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀪𑀸𑀚𑀦𑀁 𑀅𑀮𑀪𑀦𑁆𑀢𑁂𑀦𑀸𑀢𑀺𑀆𑀤𑀺 𑀅𑀭𑀜𑁆𑀜𑀲𑁂𑀦𑀸𑀲𑀦𑀲𑁆𑀲 𑀤𑀼𑀮𑁆𑀮𑀪𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀕𑁆𑀕𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺𑀆𑀤𑀺 𑀯𑀸𑀴𑀫𑀺𑀕𑀲𑀭𑀻𑀲𑀧𑀸𑀤𑀺𑀩𑀸𑀳𑀺𑀭𑀧𑀭𑀺𑀲𑁆𑀲𑀬𑀓𑀸𑀮𑁂 𑀘 𑀯𑀸𑀢𑀧𑀺𑀢𑁆𑀢𑀸𑀤𑀺𑀅𑀚𑁆𑀛𑀢𑁆𑀢𑀧𑀅𑀲𑁆𑀲𑀬𑀓𑀸𑀮𑁂 𑀘 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀩𑀳𑀽𑀦𑀁 𑀧𑀦 𑀯𑀲𑀦𑀝𑁆𑀞𑀸𑀦𑁂 𑀢𑀸𑀤𑀺𑀲𑀸𑀦𑀺 𑀲𑀼𑀮𑀪𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀕𑀡𑀯𑀸𑀲𑀺𑀦𑁄 𑀧𑀦 𑀢𑁂𑀦 𑀯𑀺𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺. 𑀓𑀢𑁆𑀢𑀭𑀤𑀡𑁆𑀟𑁄 𑀦𑀸𑀫 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁂𑀦 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀭𑀤𑀡𑁆𑀟𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺. 𑀦𑀓𑁆𑀔𑀢𑁆𑀢𑀸𑀦𑁂𑀯 𑀦𑀓𑁆𑀔𑀢𑁆𑀢𑀧𑀤𑀸𑀦𑀺. 𑀘𑁄𑀭𑀸𑀤𑀻𑀲𑀼 𑀆𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚, 𑀪𑀦𑁆𑀢𑁂, 𑀓𑁂𑀦 𑀦𑀓𑁆𑀔𑀢𑁆𑀢𑁂𑀦 𑀘𑀦𑁆𑀤𑁄 𑀬𑀼𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁂𑀲𑀼 ‘‘𑀦 𑀚𑀸𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀓𑁆𑀔𑀢𑁆𑀢𑀧𑀤𑀸𑀦𑀺 𑀉𑀕𑁆𑀕𑀳𑁂𑀢𑀩𑁆𑀩𑀸𑀦𑀺 𑀲𑀓𑀮𑀸𑀦𑀺 𑀯𑀸 𑀏𑀓𑀤𑁂𑀲𑀸𑀦𑀺 𑀯𑀸’’𑀢𑀺, 𑀢𑀣𑀸 𑀤𑀺𑀲𑀸𑀫𑀽𑀴𑁆𑀳𑁂𑀲𑀼 ‘‘𑀓𑀢𑀫𑀸𑀬𑀁, 𑀪𑀦𑁆𑀢𑁂, 𑀤𑀺𑀲𑀸’’𑀢𑀺 𑀧𑀼𑀘𑁆𑀙𑀺𑀢𑁂𑀲𑀼, 𑀢𑀲𑁆𑀫𑀸 ‘‘𑀤𑀺𑀲𑀸𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁯𑁧. 𑀲𑁂𑀦𑀸𑀲𑀦𑀯𑀢𑁆𑀢𑁂 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀦𑀁, 𑀲𑀬𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁. 𑀲𑁂𑀦𑀜𑁆𑀘 𑀆𑀲𑀦𑀜𑁆𑀘 𑀲𑁂𑀦𑀸𑀲𑀦𑀁. 𑀲𑁂𑀦𑀸𑀲𑀦𑁂𑀲𑀼 𑀓𑀢𑁆𑀢𑀩𑁆𑀩𑀁 𑀯𑀢𑁆𑀢𑀁 𑀲𑁂𑀦𑀸𑀲𑀦𑀯𑀢𑁆𑀢𑀁. 𑀇𑀥 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸𑀬𑀁 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁮𑁩 ) 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀦 𑀉𑀧𑀚𑁆𑀛𑀸𑀬𑁂𑀦 𑀯𑀼𑀢𑁆𑀣𑀯𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀅𑀢𑁆𑀢𑀦𑀸 𑀯𑀼𑀢𑁆𑀣𑀯𑀺𑀳𑀸𑀭𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀦 𑀯𑀼𑀟𑁆𑀠𑀁 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀑𑀯𑀭𑀓𑁂 𑀢𑀤𑀼𑀧𑀘𑀸𑀭𑁂 𑀘 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀪𑁄𑀚𑀦𑀲𑀸𑀮𑀸𑀤𑀻𑀲𑀼𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀤𑀻𑀲𑀼𑀧𑀺 𑀉𑀤𑁆𑀤𑁂𑀲𑀤𑀸𑀦𑀸𑀤𑀺 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀦𑁆𑀢𑀸𑀖𑀭𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁯𑁨. 𑀚𑀦𑁆𑀢𑀸𑀖𑀭𑀯𑀢𑁆𑀢𑁂 𑀚𑀸𑀬𑀢𑀻𑀢𑀺 𑀚𑀁, 𑀓𑀺𑀁 𑀢𑀁? 𑀲𑀭𑀻𑀭𑀁. 𑀚𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀚𑀦𑁆𑀢𑀸, 𑀓𑀸 𑀲𑀸? 𑀢𑀺𑀓𑀺𑀘𑁆𑀙𑀸. 𑀕𑀬𑁆𑀳𑀢𑁂𑀢𑀺 𑀖𑀭𑀁, 𑀓𑀺𑀁 𑀢𑀁? 𑀦𑀺𑀯𑁂𑀲𑀦𑀁, 𑀚𑀦𑁆𑀢𑀸𑀬 𑀲𑀭𑀻𑀭𑀢𑀺𑀓𑀺𑀘𑁆𑀙𑀸𑀬 𑀓𑀢𑀁 𑀖𑀭𑀁 𑀚𑀦𑁆𑀢𑀸𑀖𑀭𑀁, 𑀚𑀦𑁆𑀢𑀸𑀖𑀭𑁂 𑀓𑀢𑁆𑀢𑀩𑁆𑀩𑀁 𑀯𑀢𑁆𑀢𑀁 𑀚𑀦𑁆𑀢𑀸𑀖𑀭𑀯𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀪𑀡𑁆𑀟𑀦𑁆𑀢𑀺 𑀩𑀳𑀺𑀚𑀕𑀢𑀺. 𑀲𑁂𑀲𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀦𑁆𑀢𑀸𑀖𑀭𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁧𑁯𑁩. 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑁂 𑀯𑀘𑁆𑀘𑀬𑀢𑁂 𑀊𑀳𑀤𑀬𑀢𑁂𑀢𑀺 𑀯𑀘𑁆𑀘𑀁, 𑀓𑀭𑀻𑀲𑀁. 𑀓𑀼𑀝𑀻𑀬𑀢𑀺 𑀙𑀺𑀦𑁆𑀤𑀻𑀬𑀢𑀺 𑀆𑀢𑀧𑁄 𑀏𑀢𑀸𑀬𑀸𑀢𑀺 𑀓𑀼𑀝𑀺, 𑀯𑀘𑁆𑀘𑀢𑁆𑀣𑀸𑀬 𑀓𑀢𑀸 𑀓𑀼𑀝𑀺 𑀯𑀘𑁆𑀘𑀓𑀼𑀝𑀺, 𑀯𑀘𑁆𑀘𑀓𑀼𑀝𑀺𑀬𑀸 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁, 𑀇𑀥 𑀘 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀆𑀘𑀫𑀦𑀯𑀢𑁆𑀢𑀁 𑀧𑀞𑀫𑀁 𑀆𑀕𑀢𑀁, 𑀧𑀘𑁆𑀙𑀸 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀧𑀓𑀭𑀡𑁂 𑀧𑀞𑀫𑀁 𑀯𑀘𑁆𑀘𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀆𑀘𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁 𑀧𑀞𑀫𑀁 𑀆𑀕𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀓𑁆𑀓𑀫𑁂𑀦 𑀓𑀣𑀬𑀺𑀲𑁆𑀲𑀸𑀫. 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑁂𑀦𑀸𑀢𑀺 𑀅𑀬𑀁 𑀯𑀘𑁆𑀘𑀓𑀼𑀝𑀺𑀬𑀸𑀧𑀺 𑀲𑀩𑁆𑀩𑀢𑁆𑀣𑁂𑀯 𑀧𑀝𑀺𑀓𑁆𑀔𑁂𑀧𑁄. 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑀸 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬. 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀯𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀲𑀢𑁆𑀢𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.