𑁨𑁬. 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁭𑁯. 𑀏𑀯𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀏𑀢𑁆𑀣’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀯𑀲𑀦𑀁 𑀯𑀲𑁆𑀲𑀁. 𑀓𑀺𑀁 𑀢𑀁? 𑀯𑀲𑀦𑀓𑀺𑀭𑀺𑀬𑀸 𑀪𑀸𑀯𑀢𑁆𑀣𑁂 𑀡𑁆𑀬-𑀧𑀘𑁆𑀘𑀬𑀯𑀲𑁂𑀦. 𑀉𑀧𑀦𑀬𑀦𑀁 𑀉𑀧𑀦𑀬𑁄. 𑀓𑁄 𑀲𑁄? 𑀉𑀧𑀕𑀫𑀦𑀓𑀺𑀭𑀺𑀬𑀸, 𑀯𑀲𑁆𑀲𑀲𑁆𑀲 𑀉𑀧𑀦𑀬𑁄 𑀯𑀲𑁆𑀲𑀽𑀧𑀦𑀬𑁄, 𑀲𑁄 𑀏𑀢𑀺𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸. 𑀓𑀸 𑀲𑀸? 𑀯𑀲𑁆𑀲𑀽𑀧𑀦𑀸𑀬𑀺𑀓𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀉𑀧𑀦𑀬𑀢𑀺 𑀏𑀢𑀸𑀬𑀸𑀢𑀺 𑀉𑀧𑀦𑀸𑀬𑀺𑀓𑀸 𑀫𑀚𑁆𑀛𑁂 𑀤𑀻𑀖𑀯𑀲𑁂𑀦. 𑀯𑀲𑁆𑀲𑀲𑁆𑀲 𑀉𑀧𑀦𑀸𑀬𑀺𑀓𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸, 𑀲𑀸 𑀏𑀯 𑀧𑀼𑀭𑁂 𑀪𑀯𑀸 𑀧𑀼𑀭𑀺𑀫𑀸 𑀪𑀯𑀢𑁆𑀣𑁂 𑀇𑀫-𑀧𑀘𑁆𑀘𑀬𑀯𑀲𑁂𑀦, 𑀲𑀸 𑀏𑀯 𑀧𑀼𑀭𑀺𑀫𑀺𑀓𑀸 𑀲𑀓𑀢𑁆𑀣𑁂 𑀓-𑀧𑀘𑁆𑀘𑀬𑀯𑀲𑁂𑀦, 𑀢𑀲𑁆𑀫𑀺𑀁 𑀧𑀭𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀅-𑀓𑀸𑀭𑀲𑁆𑀲 𑀇-𑀓𑀸𑀭𑀸𑀤𑁂𑀲𑁄. 𑀧𑀘𑁆𑀙𑀸 𑀪𑀯𑀸 𑀧𑀘𑁆𑀙𑀺𑀫𑀸, 𑀲𑀸𑀯 𑀧𑀘𑁆𑀙𑀺𑀫𑀺𑀓𑀸.

𑀅𑀲𑁆𑀲𑀢𑀺𑀬𑀸 𑀧𑀦 𑀯𑀲𑁆𑀲𑀁 𑀦 𑀉𑀧𑁂𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀦 𑀉𑀧𑁂𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀲𑁆𑀲𑀽𑀧𑀕𑀫𑀦𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑁂𑀧𑁄, 𑀦 𑀆𑀮𑀬𑀓𑀭𑀡𑀯𑀲𑁂𑀦 𑀉𑀧𑀕𑀫𑀦𑀁 𑀲𑀦𑁆𑀥𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀧𑀸𑀴𑀺𑀬𑀁 𑀧𑀦 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀜𑁆𑀘 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁧.𑁮𑁪) ‘‘𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀳𑀺 𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀧𑀺 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀦𑁆𑀦𑁂𑀬𑁂𑀯 𑀲𑀤𑁆𑀯𑀸𑀭𑀩𑀦𑁆𑀥𑁂 𑀲𑁂𑀦𑀸𑀲𑀦𑁂 𑀉𑀧𑀕𑀦𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀯𑀲𑁆𑀲𑀓𑀸𑀮𑁂 𑀲𑀘𑁂 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑀢𑀺, 𑀳𑀢𑁆𑀣𑀓𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑁂𑀦 𑀲𑀸𑀫𑀫𑁆𑀧𑀺 𑀓𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀅𑀲𑁂𑀦𑀸𑀲𑀦𑀺𑀓𑀲𑁆𑀲 𑀦𑀸𑀯𑀸𑀤𑀺𑀁 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀆𑀮𑀬𑀫𑀢𑁆𑀢𑁂𑀦 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀦𑀸𑀯𑀸𑀲𑀢𑁆𑀣𑀯𑀚𑁂𑀲𑀼𑀬𑁂𑀯 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁩) 𑀲𑀢𑀺, 𑀅𑀲𑀢𑀺 𑀯𑀸 𑀲𑁂𑀦𑀸𑀲𑀦𑁂 𑀯𑀲𑁆𑀲𑀽𑀧𑀕𑀫𑀦𑀲𑁆𑀲 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀅𑀬𑀁 𑀧𑀝𑀺𑀓𑁆𑀔𑁂𑀧𑁄. 𑀢𑀢𑁆𑀣 𑀦 𑀮𑀪𑀢𑀻𑀢𑀺 𑀅𑀲𑀢𑀺 𑀲𑁂𑀦𑀸𑀲𑀦𑁂 𑀆𑀮𑀬𑀯𑀲𑁂𑀦𑀧𑀺 𑀦𑀸𑀯𑀸𑀤𑀻𑀲𑀼 𑀉𑀧𑀕𑀫𑀦𑀁 𑀯𑀼𑀢𑁆𑀢𑀁. 𑀘𑀢𑀽𑀲𑀼 𑀳𑀺 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀇𑀢𑀭𑀢𑁆𑀢𑀬𑀁.

𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀺𑀪𑁂𑀤𑀸 𑀓𑀼𑀝𑀻𑀢𑀺 𑀏𑀢𑁆𑀣 𑀝𑀗𑁆𑀓𑀺𑀢𑀫𑀜𑁆𑀘𑁄 𑀦𑀸𑀫 𑀤𑀻𑀖𑁂 𑀫𑀜𑁆𑀘𑀧𑀸𑀤𑁂 𑀫𑀚𑁆𑀛𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀓𑀢𑁄 𑀫𑀜𑁆𑀘𑁄, 𑀢𑀲𑁆𑀲 𑀇𑀤𑀁 𑀉𑀧𑀭𑀺, 𑀇𑀤𑀁 𑀳𑁂𑀝𑁆𑀞𑀸𑀢𑀺 𑀦𑀢𑁆𑀣𑀺. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀣𑀢𑁄𑀧𑀺 𑀢𑀸𑀤𑀺𑀲𑁄𑀯 𑀳𑁄𑀢𑀺, 𑀢𑀁 𑀲𑀼𑀲𑀸𑀦𑁂 𑀤𑁂𑀯𑀝𑁆𑀞𑀸𑀦𑁂 𑀘 𑀞𑀧𑁂𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀧𑀸𑀲𑀸𑀡𑀁 𑀅𑀢𑁆𑀣𑀭𑀺𑀢𑁆𑀯𑀸 𑀓𑀢𑀁 𑀕𑁂𑀳𑀫𑁆𑀧𑀺 ‘‘𑀝𑀗𑁆𑀓𑀺𑀢𑀫𑀜𑁆𑀘𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀢𑁆𑀣𑀲𑁆𑀲 𑀅𑀯𑀺𑀳𑀸𑀭𑀢𑁆𑀢𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺 𑀅𑀯𑀢𑁆𑀯𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀲𑀢𑁆𑀣𑁂 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀼𑀝𑀺𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀮𑀬𑀓𑀭𑀡𑀫𑀢𑁆𑀢𑁂𑀦𑁂𑀯 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀘𑁆𑀙𑀢𑀺. 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀦𑀢𑁆𑀣𑀺 𑀆𑀧𑀢𑁆𑀢𑀺, 𑀢𑁂𑀳𑀺 𑀯𑀺𑀬𑀼𑀚𑁆𑀚𑀺𑀢𑁆𑀯𑀸 𑀕𑀫𑀦𑁂 𑀧𑀦 𑀆𑀧𑀢𑁆𑀢𑀺𑀬𑁂𑀯, 𑀧𑀯𑀸𑀭𑁂𑀢𑀼𑀜𑁆𑀘 𑀦 𑀮𑀪𑀢𑀺.

𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸𑀢𑀺 𑀲𑀓𑀯𑀸𑀝𑀩𑀤𑁆𑀥𑀫𑁂𑀯 𑀬𑁄𑀚𑁂𑀢𑁆𑀯𑀸. 𑀧𑀼𑀭𑀺𑀫𑀺𑀓𑀸𑀬…𑀧𑁂… 𑀦 𑀧𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀼𑀭𑀺𑀫𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑁆𑀲𑀸𑀦𑀉𑀢𑀼𑀦𑁄 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑀫𑀸𑀲𑀁 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑀁 𑀢𑁂𑀫𑀸𑀲𑀁 𑀯𑀲𑀺𑀢𑀩𑁆𑀩𑀁. 𑀲𑀸𑀯𑀡𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀘𑁆𑀙𑀺𑀫𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀲𑀩𑁆𑀩𑀧𑀞𑀫𑀫𑀸𑀲𑀁 𑀞𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀁 𑀢𑁂𑀫𑀸𑀲𑀁 𑀯𑀲𑀺𑀢𑀩𑁆𑀩𑀁. 𑀏𑀯𑀁 𑀅𑀯𑀲𑀺𑀢𑁆𑀯𑀸 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀫𑀳𑀸𑀧𑀯𑀸𑀭𑀡𑀸𑀬 𑀅𑀦𑁆𑀢𑁄 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑁂𑀦 𑀘𑀸𑀢𑀼𑀫𑀸𑀲𑀺𑀦𑀺𑀧𑀯𑀸𑀭𑀡𑀸𑀬 𑀅𑀦𑁆𑀢𑁄 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑁆𑀢𑀭𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬, 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀬𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀦 𑀪𑀺𑀓𑁆𑀔𑀯𑁂…𑀧𑁂… 𑀯𑀘𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀲𑀢𑀺 𑀓𑀭𑀡𑀻𑀬𑁂 𑀧𑀓𑁆𑀓𑀫𑀦𑁆𑀢𑀲𑁆𑀲 𑀲𑀩𑁆𑀩𑀣𑀸𑀧𑀺 𑀆𑀧𑀢𑁆𑀢𑀺𑀬𑁂𑀯 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸, 𑀦 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀲𑁆𑀲𑀸𑀢𑀺 𑀆𑀳 ‘‘𑀓𑁄 𑀧𑀦 𑀯𑀸𑀤𑁄’’𑀢𑀺𑀆𑀤𑀺.

𑁧𑁮𑁦. 𑀇𑀤𑀸𑀦𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀮𑀓𑁆𑀔𑀡𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂 𑀕𑀦𑁆𑀢𑀼𑀁, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂, 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀉𑀧𑀸𑀲𑀓𑀲𑁆𑀲 𑀉𑀧𑀸𑀲𑀺𑀓𑀸𑀬𑀸’’𑀢𑀺 (𑀫𑀳𑀸𑀯. 𑁧𑁮𑁭) 𑀏𑀓𑀁, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂, 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀫𑀸𑀢𑀼𑀬𑀸 𑀘 𑀧𑀺𑀢𑀼𑀲𑁆𑀲 𑀘𑀸’’𑀢𑀺 (𑀫𑀳𑀸𑀯. 𑁧𑁯𑁮) 𑀏𑀓𑀁, ‘‘𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑁄 𑀪𑀸𑀢𑀸 𑀯𑀸 𑀅𑀜𑁆𑀜𑁄 𑀯𑀸 𑀜𑀸𑀢𑀓𑁄 𑀕𑀺𑀮𑀸𑀦𑁄 𑀳𑁄𑀢𑀻’’𑀢𑀺 𑀏𑀓𑀁, ‘‘𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼𑀪𑀢𑁆𑀢𑀺𑀓𑁄’’𑀢𑀺 𑀏𑀓𑀁, ‘‘𑀲𑀘𑁂 𑀪𑀺𑀓𑁆𑀔𑀼𑀲𑁆𑀲…𑀧𑁂… 𑀅𑀦𑀪𑀺𑀭𑀢𑀺 𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀏𑀓𑀁, ‘‘𑀓𑁄𑀘𑀺 𑀪𑀺𑀓𑁆𑀔𑀼 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄’’𑀢𑀺 𑀏𑀓𑀁, ‘‘𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀫𑀸𑀦𑀢𑁆𑀢𑀸𑀭𑀳𑀸𑀬𑀸’’𑀢𑀺 𑀏𑀓𑀁, ‘‘𑀲𑀸𑀫𑀡𑁂𑀭𑁄 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑁄…𑀧𑁂… 𑀲𑀺𑀓𑁆𑀔𑀫𑀸𑀦𑀸 𑀯𑀸…𑀧𑁂… 𑀲𑀸𑀫𑀡𑁂𑀭𑀻 𑀯𑀸’’𑀢𑀺 𑀏𑀓𑀁, ‘‘𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀢𑀚𑁆𑀚𑀦𑀻𑀬𑀁 𑀯𑀸’’𑀢𑀺 𑀏𑀓𑀁, ‘‘𑀲𑀘𑁂𑀧𑀺 𑀓𑀢𑀁𑀬𑁂𑀯 𑀳𑁄𑀢𑀺 𑀓𑀫𑁆𑀫’’𑀦𑁆𑀢𑀺 𑀏𑀓𑀁, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀓𑀭𑀡𑀻𑀬𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁯𑁯) 𑀏𑀓𑀦𑁆𑀢𑀺 𑀏𑀓𑀸𑀤𑀲 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀯𑀲𑁂𑀦 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀳𑀺𑀢𑁂 𑀏𑀯 𑀕𑀦𑁆𑀢𑀩𑁆𑀩𑀁, 𑀦𑁄 𑀅𑀧𑁆𑀧𑀳𑀺𑀢𑁂. 𑀲𑁂𑀲𑁂𑀲𑀼 𑀅𑀝𑁆𑀞𑀲𑀼 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁, 𑀧𑀕𑁂𑀯 𑀧𑀳𑀺𑀢𑁂. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁯𑁯) ‘‘𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀗𑁆𑀖𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀏𑀢𑁆𑀣 𑀘 𑀅𑀦𑀼𑀧𑀸𑀲𑀓𑁂𑀳𑀺𑀧𑀺 𑀲𑀸𑀲𑀦𑀪𑀸𑀯𑀁 𑀜𑀸𑀢𑀼𑀓𑀸𑀫𑁂𑀳𑀺 𑀧𑀳𑀺𑀢𑁂 𑀢𑁂𑀲𑀁 𑀧𑀲𑀸𑀤𑀯𑀟𑁆𑀠𑀺𑀲𑀫𑁆𑀧𑀢𑁆𑀢𑁂𑀳𑀺𑀧𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀼𑀪𑀢𑁆𑀢𑀺𑀓𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀓𑁄. 𑀲𑁄 𑀧𑀦 𑀬𑀲𑁆𑀫𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀦𑁆𑀢𑁄’’𑀢𑀺.

𑁧𑁮𑁧. 𑀅𑀧𑀺𑀘𑁂𑀢𑁆𑀣𑀸𑀢𑀺 𑀅𑀧𑀺𑀘 𑀏𑀢𑁆𑀣𑀸𑀢𑀺 𑀙𑁂𑀤𑁄, 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑀯𑀺𑀦𑀺𑀘𑁆𑀙𑀬𑁂 𑀅𑀧𑀺𑀘 𑀅𑀧𑀭𑁄 𑀅𑀬𑀁 𑀈𑀤𑀺𑀲𑁄 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀧𑀸𑀴𑀺𑀢𑁄 𑀫𑀼𑀢𑁆𑀢𑁄 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯) 𑀧𑀦 ‘‘𑀧𑀸𑀴𑀺𑀫𑀼𑀢𑁆𑀢𑀓𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁯𑁯) ‘‘𑀭𑀢𑁆𑀢𑀺𑀘𑁆𑀙𑁂𑀤𑀯𑀺𑀦𑀺𑀘𑁆𑀙𑀬𑁄𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺𑀤𑁆𑀥𑀸 𑀅𑀭𑀼𑀡𑀼𑀝𑁆𑀞𑀸𑀧𑀦𑀲𑀗𑁆𑀔𑀸𑀢𑀲𑁆𑀲 𑀭𑀢𑁆𑀢𑀺𑀘𑁆𑀙𑁂𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁯𑁯) ‘‘𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺𑀤𑁆𑀥𑀸 𑀅𑀭𑀼𑀡𑀼𑀝𑁆𑀞𑀸𑀧𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄’’𑀢𑀺. 𑀅𑀦𑀺𑀫𑀦𑁆𑀢𑀺𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀅𑀦𑀺𑀫𑀦𑁆𑀢𑀺𑀢𑀢𑁆𑀢𑀸 𑀲𑀢𑁆𑀢𑀸𑀳𑀓𑀺𑀘𑁆𑀘𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲𑀧𑀺 𑀯𑀲𑁆𑀲𑀘𑁆𑀙𑁂𑀤𑁄 𑀘𑁂𑀯 𑀤𑀼𑀓𑁆𑀓𑀝𑀜𑁆𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀜𑁆𑀳𑀺 𑀭𑀢𑁆𑀢𑀺𑀘𑁆𑀙𑁂𑀤𑀓𑀸𑀭𑀡𑀁 𑀯𑀺𑀦𑀸 𑀢𑀺𑀭𑁄𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀢𑁄 𑀯𑀲𑁆𑀲𑀘𑁆𑀙𑁂𑀤𑀁 𑀯𑀤𑀦𑁆𑀢𑀺. 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀕𑀦𑁆𑀢𑁆𑀯𑀸 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀫𑀓𑁆𑀔𑀡𑁂 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀫𑀦𑀓𑁆𑀔𑀡𑁂 𑀯𑀺𑀲𑀭𑀺𑀢𑁆𑀯𑀸 𑀕𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺, ‘‘𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 (𑀫𑀳𑀸𑀯. 𑁨𑁦𑁭) 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀣𑀸 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀕𑀢𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑁄𑀢𑀺 𑀯𑀤𑀦𑁆𑀢𑀺. 𑀬𑁄 𑀧𑀦 𑀲𑀢𑁆𑀢𑀸𑀳𑀓𑀭𑀡𑀻𑀬𑀦𑀺𑀫𑀺𑀢𑁆𑀢𑀸𑀪𑀸𑀯𑁂𑀧𑀺 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯, 𑀯𑀲𑁆𑀲𑀘𑁆𑀙𑁂𑀤𑁄 𑀦𑀢𑁆𑀣𑀺 𑀲𑀢𑁆𑀢𑀸𑀳𑀲𑁆𑀲 𑀲𑀦𑁆𑀦𑀺𑀯𑀢𑁆𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀪𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀪𑀡𑁆𑀟𑀁. 𑀧𑀳𑀺𑀡𑀦𑁆𑀢𑀻𑀢𑀺 𑀘𑀻𑀯𑀭𑀥𑁄𑀯𑀦𑀸𑀤𑀺𑀓𑀫𑁆𑀫𑁂𑀦 𑀧𑀳𑀺𑀡𑀦𑁆𑀢𑀺. 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀘𑁂 𑀅𑀭𑀼𑀡𑀼𑀕𑁆𑀕𑀫𑀦𑀁 𑀳𑁄𑀢𑀺, 𑀯𑀲𑁆𑀲𑀘𑁆𑀙𑁂𑀤𑁄𑀧𑀺 𑀦 𑀳𑁄𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑀤𑀼𑀓𑁆𑀓𑀝𑀜𑁆𑀘 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺, 𑀢𑀤𑀳𑁂𑀯 𑀆𑀕𑀫𑀦𑁂 𑀲𑀉𑀲𑁆𑀲𑀸𑀳𑀢𑁆𑀢𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀆𑀧𑀢𑁆𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀘𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀧𑀦 𑀕𑀦𑁆𑀢𑀼𑀁 𑀮𑀪𑀢𑀻𑀢𑀺 ‘‘𑀅𑀕𑀺𑀮𑀸𑀦𑀫𑁆𑀧𑀺 𑀆𑀘𑀭𑀺𑀬𑀁, 𑀉𑀧𑀚𑁆𑀛𑀸𑀬𑀁 𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀁 𑀮𑀪𑀢𑀺, 𑀦𑀺𑀲𑁆𑀲𑀬𑀸𑀘𑀭𑀺𑀬𑀁 𑀥𑀫𑁆𑀫𑀸𑀘𑀭𑀺𑀬𑀜𑁆𑀘, 𑀧𑀕𑁂𑀯 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀉𑀧𑀚𑁆𑀛𑀸𑀬𑁂. 𑀲𑀘𑁂 𑀦𑀁 𑀆𑀘𑀭𑀺𑀬𑁄 ‘‘𑀅𑀚𑁆𑀚 𑀫𑀸 𑀕𑀘𑁆𑀙𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀯𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀆𑀕𑀢𑀸𑀦𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯 𑀧𑀼𑀦 𑀆𑀕𑀘𑁆𑀙𑀦𑁆𑀢𑀁 𑀲𑀘𑁂 𑀆𑀘𑀭𑀺𑀬𑁄, 𑀉𑀧𑀚𑁆𑀛𑀸𑀬𑁄 𑀯𑀸 ‘‘𑀅𑀚𑁆𑀚 𑀫𑀸 𑀕𑀘𑁆𑀙𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀲𑁆𑀲𑀘𑁆𑀙𑁂𑀤𑁄 𑀧𑀦 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀲𑀢𑁆𑀢𑀸𑀳𑀲𑁆𑀲 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑀺𑀢𑀢𑁆𑀢𑀸.

𑀲𑀘𑁂 𑀤𑀽𑀭𑀁 𑀕𑀢𑁄 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀯𑀲𑁆𑀲𑀘𑁆𑀙𑁂𑀤𑀓𑀸𑀭𑀡𑁂 𑀲𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀣 𑀙 𑀤𑀺𑀯𑀲𑀸𑀦𑀺 𑀩𑀳𑀺𑀤𑁆𑀥𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀼𑀭𑀸𑀭𑀼𑀡𑀸 𑀏𑀯 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀢𑀸𑀳𑀁 𑀅𑀥𑀺𑀝𑁆𑀞𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀤𑀺𑀯𑀲𑀪𑀸𑀕𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀢𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁯𑁯) ‘‘𑀲𑀢𑁆𑀢𑀸𑀳𑀁 𑀲𑀦𑁆𑀦𑀺𑀯𑀢𑁆𑀢𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘 𑀅𑀦𑁆𑀢𑁄 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀘 𑀲𑀫𑀼𑀘𑁆𑀙𑀺𑀦𑁆𑀦𑀯𑀲𑁆𑀲𑁄 𑀏𑀯 𑀪𑀯𑀺𑀲𑁆𑀲𑀢𑀺 𑀅𑀭𑀼𑀡𑀲𑁆𑀲 𑀩𑀳𑀺 𑀏𑀯 𑀉𑀝𑁆𑀞𑀸𑀧𑀺𑀢𑀢𑁆𑀢𑀸. 𑀇𑀢𑀭𑀣𑀸 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. ‘‘𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀦𑁆𑀢𑁄𑀯𑀺𑀳𑀸𑀭𑁂 𑀧𑀯𑀺𑀲𑀺𑀢𑁆𑀯𑀸 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀅𑀜𑁆𑀜𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁂𑀯 𑀯𑀼𑀘𑁆𑀘𑀢𑀺. 𑀯𑀓𑁆𑀔𑀢𑀺 𑀳𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑀅𑀝𑁆𑀞. 𑁩𑁬𑁪) ‘‘𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀇𑀢𑀭𑀲𑁆𑀫𑀺𑀁 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀻’’𑀢𑀺.

𑀅𑀣𑀸𑀧𑀺 𑀬𑀁 𑀢𑁂 𑀯𑀤𑁂𑀬𑁆𑀬𑀼𑀁 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀬𑀤𑀸 𑀓𑀤𑀸𑀘𑀺 𑀧𑀯𑀺𑀝𑁆𑀞𑁂𑀦 𑀢𑀁𑀤𑀺𑀯𑀲𑀦𑀺𑀲𑁆𑀲𑀺𑀢𑁄 𑀅𑀢𑀻𑀢𑀸𑀭𑀼𑀡𑁄 𑀉𑀝𑁆𑀞𑀸𑀧𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀲𑀤𑁆𑀤𑀕𑀢𑀺𑀬𑀸𑀧𑀺 𑀦 𑀲𑀫𑁂𑀢𑀺. 𑀦 𑀳𑀺 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀧𑀘𑁆𑀙𑀸 𑀧𑀯𑀺𑀝𑁆𑀞𑁄 𑀢𑀲𑁆𑀲 𑀧𑀬𑁄𑀚𑀓𑁄 𑀉𑀝𑁆𑀞𑀸𑀧𑀓𑁄 𑀪𑀯𑀺𑀢𑀼𑀫𑀭𑀳𑀢𑀺. 𑀬𑀤𑀺 𑀪𑀯𑁂𑀬𑁆𑀬, ‘‘𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲𑀸’’𑀧𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁦𑁭) 𑀏𑀢𑁆𑀣 ‘‘𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀢𑁂𑀦𑀧𑀺 𑀢𑀁𑀤𑀺𑀯𑀲𑀦𑀺𑀲𑁆𑀲𑀺𑀢𑀲𑁆𑀲 𑀅𑀭𑀼𑀡𑀲𑁆𑀲 𑀉𑀝𑁆𑀞𑀸𑀧𑀺𑀢𑀢𑁆𑀢𑀸 𑀆𑀭𑀜𑁆𑀜𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀲𑀸𑀬𑀦𑁆𑀳𑀲𑀫𑀬𑁂 𑀅𑀗𑁆𑀕𑀬𑀼𑀢𑁆𑀢𑀁 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀢𑀤𑀸 𑀏𑀯 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀅𑀭𑀼𑀡𑁄 𑀉𑀝𑁆𑀞𑀸𑀧𑀺𑀢𑁄 𑀥𑀼𑀢𑀗𑁆𑀕𑀜𑁆𑀘 𑀯𑀺𑀲𑁄𑀥𑀺𑀢𑀁 𑀲𑀺𑀬𑀸, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀏𑀯 𑀅𑀭𑀼𑀡𑀼𑀝𑁆𑀞𑀸𑀧𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀸𑀮𑀲𑁆𑀲𑁂𑀯 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀗𑁆𑀕𑀬𑀼𑀢𑁆𑀢𑁂 𑀞𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀅𑀭𑀼𑀡𑀼𑀝𑁆𑀞𑀸𑀦𑀯𑁂𑀮𑀸𑀬𑀁 𑀢𑁂𑀲𑀁 𑀆𑀩𑀸𑀥𑁄 𑀯𑀟𑁆𑀠𑀢𑀺, 𑀢𑁂𑀲𑀁 𑀏𑀯 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁, 𑀦 𑀥𑀼𑀢𑀗𑁆𑀕𑀯𑀺𑀲𑀼𑀤𑁆𑀥𑀺𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁩𑁧). 𑀢𑀣𑀸 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀦𑀫𑁆𑀧𑀺 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑀸𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. ‘‘𑀉𑀕𑁆𑀕𑀢𑁂 𑀅𑀭𑀼𑀡𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑀅𑀝𑁆𑀞. 𑁯𑁭) 𑀳𑀺 𑀯𑀼𑀢𑁆𑀢𑀁. 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀲𑀳 𑀦𑀺𑀯𑀼𑀢𑁆𑀣𑀪𑀸𑀯𑀧𑀭𑀺𑀫𑁄𑀘𑀦𑀢𑁆𑀣𑀁 ‘‘𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀺 (𑀧𑀸𑀘𑀺. 𑁫𑁪) 𑀯𑀼𑀢𑁆𑀢𑀁. 𑀏𑀯𑀁 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀸𑀤𑀻𑀲𑀼 𑀘 𑀲𑀩𑁆𑀩𑀢𑁆𑀣 𑀭𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑁂 𑀆𑀕𑀸𑀫𑀺𑀅𑀭𑀼𑀡𑀯𑀲𑁂𑀦𑁂𑀯 𑀅𑀭𑀼𑀡𑀼𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁, 𑀦 𑀅𑀢𑀻𑀢𑀸𑀭𑀼𑀡𑀯𑀲𑁂𑀦, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁 𑀅𑀜𑁆𑀜𑀣𑀸 𑀯𑀲𑁆𑀲𑀘𑁆𑀙𑁂𑀤𑀢𑁆𑀢𑀸.

𑀬𑀁 𑀧𑀦 𑀯𑀲𑁆𑀲𑀁 𑀉𑀧𑀕𑀢𑀲𑁆𑀲 𑀢𑀤𑀳𑁂𑀯 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑀭𑀡𑀻𑀬𑀲𑁆𑀲 𑀧𑀓𑁆𑀓𑀫𑀦𑀯𑀘𑀦𑀁, 𑀢𑀁 𑀯𑀲𑁆𑀲𑀁 𑀉𑀧𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀤𑀸 𑀓𑀤𑀸𑀘𑀺 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀕𑀫𑀦𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀬𑀼𑀢𑁆𑀢𑀁, 𑀦 𑀧𑀦 𑀲𑀢𑁆𑀢𑀸𑀳𑀯𑀸𑀭𑁂𑀦 𑀕𑀢𑀲𑁆𑀲 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀳𑁂𑀯𑀕𑀫𑀦𑀁 ‘‘𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀯𑀸 ‘‘𑀲𑀢𑁆𑀢𑀸𑀳𑀸𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁦𑁭) 𑀧𑀘𑁆𑀙𑀺𑀫𑀲𑀢𑁆𑀢𑀸𑀳𑁂 𑀅𑀦𑀸𑀕𑀫𑀦𑁂 𑀅𑀦𑀼𑀜𑁆𑀜𑀸𑀢𑁂𑀧𑀺 𑀅𑀜𑁆𑀜𑀲𑀢𑁆𑀢𑀸𑀳𑁂𑀲𑀼 𑀢𑀁 𑀦 𑀯𑀝𑁆𑀝𑀢𑀺. 𑀏𑀯𑀁 𑀧𑀞𑀫𑀲𑀢𑁆𑀢𑀸𑀳𑁂 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀫𑀦𑁂 𑀅𑀦𑀼𑀜𑁆𑀜𑀸𑀢𑁂𑀧𑀺 𑀢𑀢𑁄 𑀧𑀭𑁂𑀲𑀼 𑀲𑀢𑁆𑀢𑀸𑀳𑁂𑀲𑀼 𑀆𑀕𑀢𑀲𑁆𑀲 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸 𑀕𑀫𑀦𑀁 𑀦 𑀯𑀝𑁆𑀝𑀢𑀺 𑀏𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀲𑀘𑁂 𑀧𑀯𑀸𑀭𑀺𑀢𑀓𑀸𑀮𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀫𑁆𑀧𑀺 𑀓𑀣𑀺𑀦𑀘𑀻𑀯𑀭𑀁 𑀯𑀺𑀬 𑀯𑀲𑁆𑀲𑀁𑀯𑀼𑀢𑁆𑀣𑀯𑀺𑀳𑀸𑀭𑀧𑀝𑀺𑀩𑀤𑁆𑀥𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀬𑀤𑀺 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀁 𑀉𑀝𑁆𑀞𑀸𑀧𑀬𑀺𑀁𑀲𑀼, 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀆𑀕𑀢𑀸 𑀮𑀪𑀦𑁆𑀢𑀺. 𑀓𑀣𑀺𑀦𑀸𑀦𑀺𑀲𑀁𑀲𑀘𑀻𑀯𑀭𑀁 𑀧𑀦 𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀸 𑀢𑁂 𑀦 𑀮𑀪𑀦𑁆𑀢𑀺. 𑀯𑀓𑁆𑀔𑀢𑀺 𑀳𑀺 ‘‘𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀧𑀺 𑀪𑀸𑀚𑀦𑀻𑀬𑀪𑀡𑁆𑀟𑀁 𑀮𑀪𑀦𑁆𑀢𑀽𑀢𑀺 𑀯𑀸 𑀏𑀯𑀭𑀽𑀧𑀁 𑀅𑀥𑀫𑁆𑀫𑀺𑀓𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁮𑁨). 𑀇𑀥 𑀆𑀳𑀝𑀦𑁆𑀢𑀺 𑀯𑀺𑀳𑀸𑀭𑀢𑁄 𑀩𑀳𑀺 𑀆𑀕𑀢𑀝𑁆𑀞𑀸𑀦𑁂 𑀆𑀦𑀻𑀢𑀁.

𑀯𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀕𑀡𑁆𑀳𑀦𑁆𑀢𑀺𑀧𑀺 𑀧𑀭𑀺𑀧𑀸𑀢𑁂𑀦𑁆𑀢𑀺𑀧𑀻𑀢𑀺 𑀏𑀢𑁆𑀣 𑀕𑀡𑁆𑀳𑀦𑁆𑀢𑀻𑀢𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀺. 𑀧𑀭𑀺𑀧𑀸𑀢𑁂𑀦𑁆𑀢𑀻𑀢𑀺 𑀧𑀮𑀸𑀧𑁂𑀦𑁆𑀢𑀺, 𑀅𑀦𑀼𑀩𑀦𑁆𑀥𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀼 ‘‘𑀕𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀗𑁆𑀖𑀪𑁂𑀤𑀧𑀭𑀺𑀬𑀦𑁆𑀢𑁂𑀲𑀼 𑀯𑀢𑁆𑀣𑀽𑀲𑀼 𑀓𑁂𑀯𑀮𑀁 𑀅𑀦𑀸𑀧𑀢𑁆𑀢𑀺 𑀳𑁄𑀢𑀺, 𑀧𑀯𑀸𑀭𑁂𑀢𑀼𑀁 𑀧𑀦 𑀦 𑀮𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀧𑀦𑀸𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀦𑀸𑀦𑀸𑀲𑀻𑀫𑀸𑀬𑀁 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 ‘‘𑀤𑀼𑀢𑀺𑀬𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀘𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀞𑀫𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 (𑀫𑀳𑀸𑀯. 𑁨𑁦𑁭) ‘‘𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀞𑀫𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀧𑀦 𑀧𑀼𑀭𑀺𑀫𑀺𑀓𑀸 𑀧𑀜𑁆𑀜𑀸𑀬𑀢𑁂𑀯, 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀯𑀲𑀦𑁆𑀢𑁄 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑁄 𑀏𑀯 𑀳𑁄𑀢𑀺. 𑀢𑀢𑁄 𑀯𑀸 𑀧𑀦 𑀤𑀼𑀢𑀺𑀬𑀤𑀺𑀯𑀲𑀸𑀤𑀻𑀲𑀼 ‘‘𑀧𑀞𑀫𑀲𑁂𑀦𑀸𑀲𑀦𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀧𑀼𑀭𑀺𑀫𑀺𑀓𑀸𑀧𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑀦𑀧𑀘𑁆𑀘𑀬𑀸 𑀳𑁄𑀦𑁆𑀢𑀫𑁆𑀧𑀺 𑀤𑀼𑀓𑁆𑀓𑀝𑀁 𑀲𑀢𑀺𑀬𑁂𑀯 𑀧𑀝𑀺𑀲𑁆𑀲𑀯𑁂 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀢𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝’’𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀜𑁆𑀘 𑀔𑁄…𑀧𑁂… 𑀯𑀺𑀲𑀁𑀯𑀸𑀤𑀦𑀧𑀘𑁆𑀘𑀬𑀸’’𑀢𑀺. 𑀧𑀸𑀴𑀺𑀬𑀁 (𑀫𑀳𑀸𑀯. 𑁨𑁦𑁭) ‘‘𑀲𑁄 𑀲𑀢𑁆𑀢𑀸𑀳𑀸𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀸𑀤𑀺𑀯𑀲𑁂𑀧𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀁 𑀯𑀺𑀦𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀦𑀯𑀫𑀺𑀢𑁄 𑀧𑀝𑁆𑀞𑀸𑀬 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀓𑀘𑁆𑀘𑀺 𑀉𑀧𑁄𑀲𑀣𑀤𑀺𑀯𑀲𑀢𑁄 𑀉𑀧𑀦𑀺𑀥𑀸𑀬 𑀦𑀯𑀫𑀻 𑀇𑀘𑁆𑀙𑀺𑀢𑀩𑁆𑀩𑀸, 𑀉𑀤𑀸𑀳𑀼 𑀮𑁄𑀓𑀺𑀬𑀢𑀺𑀣𑀺𑀯𑀲𑁂𑀦𑀸𑀢𑀺 𑀆𑀲𑀗𑁆𑀓𑀦𑁆𑀢𑀺. 𑀢𑀢𑁆𑀭𑁂𑀯𑀁 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁 𑁋 𑀧𑀼𑀭𑀺𑀫𑀪𑀤𑁆𑀤𑀧𑀤𑀫𑀸𑀲𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑀁 𑀉𑀧𑀦𑀺𑀥𑀸𑀬 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀮𑁄𑀓𑀺𑀬𑀢𑀺𑀣𑀺𑀯𑀲𑁂𑀦. 𑀪𑀤𑁆𑀤𑀧𑀤𑀫𑀸𑀲𑀲𑁆𑀲 𑀳𑀺 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑀁 𑀫𑀭𑀺𑀬𑀸𑀤𑀁 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀕𑀡𑀺𑀬𑀫𑀸𑀦𑁂 𑀲𑀢𑀺 𑀬𑁄 𑀤𑀺𑀯𑀲𑁄 𑀦𑀯𑀫𑁄 𑀳𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀣𑀺𑀧𑁂𑀓𑁆𑀔𑀸𑀬 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀯𑁄𑀳𑀸𑀭𑁄, 𑀢𑀢𑁄 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬 𑀅𑀦𑀸𑀕𑀢𑀲𑀢𑁆𑀢𑀸𑀳𑁂 𑀧𑀯𑀸𑀭𑀡𑀸 𑀳𑁄𑀢𑀺.

𑀲𑀢𑁆𑀢𑀸𑀳𑀁 𑀅𑀦𑀸𑀕𑀢𑀸𑀬 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀸𑀦𑀸𑀕𑀢𑀸. 𑀓𑀸 𑀲𑀸? 𑀧𑀯𑀸𑀭𑀡𑀸. 𑀅𑀲𑁆𑀲𑀬𑀼𑀚𑀫𑀸𑀲𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀦𑀯𑀫𑀺𑀬𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑀁 𑀅𑀥𑀺𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀼 𑀅𑀦𑁆𑀢𑁄𑀯𑀲𑁆𑀲𑀲𑁆𑀲 𑀲𑀢𑁆𑀢𑀸𑀳𑀫𑀢𑁆𑀢𑀸𑀯𑀲𑀺𑀝𑁆𑀞𑀢𑁆𑀢𑀸 𑀲𑀢𑁆𑀢𑀫𑀅𑀭𑀼𑀡𑁂 𑀉𑀕𑁆𑀕𑀢𑀫𑀢𑁆𑀢𑁂 𑀯𑀼𑀢𑁆𑀣𑀯𑀲𑁆𑀲𑁄 𑀳𑁄𑀢𑀺, 𑀤𑀲𑀫𑀺𑀬𑀁 𑀙𑀸𑀳𑀫𑀢𑁆𑀢𑀁, 𑀏𑀓𑀸𑀤𑀲𑀫𑀺𑀬𑀁 𑀧𑀜𑁆𑀘𑀸𑀳𑀫𑀢𑁆𑀢𑀁, 𑀤𑁆𑀯𑀸𑀤𑀲𑀺𑀬𑀁 𑀘𑀢𑀼𑀭𑀸𑀳𑀫𑀢𑁆𑀢𑀁, 𑀢𑁂𑀭𑀲𑀺𑀬𑀁 𑀢𑀻𑀳𑀫𑀢𑁆𑀢𑀁, 𑀘𑀼𑀤𑁆𑀤𑀲𑀺𑀬𑀁 𑀤𑁆𑀯𑀻𑀳𑀫𑀢𑁆𑀢𑀁, 𑀧𑀦𑁆𑀦𑀭𑀲𑀺𑀬𑀁 𑀏𑀓𑀸𑀳𑀫𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀯𑀸𑀭𑀡𑀸𑀤𑀺𑀯𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀅𑀭𑀼𑀡𑀲𑁆𑀫𑀺𑀁 𑀉𑀕𑁆𑀕𑀢𑁂 𑀯𑀼𑀢𑁆𑀣𑀯𑀲𑁆𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 ‘‘𑀲𑁄 𑀲𑀢𑁆𑀢𑀸𑀳𑀸𑀦𑀸𑀕𑀢𑀸𑀬 𑀧𑀯𑀸𑀭𑀡𑀸𑀬 𑀲𑀓𑀭𑀡𑀻𑀬𑁄 𑀧𑀓𑁆𑀓𑀫𑀢𑀺, 𑀆𑀕𑀘𑁆𑀙𑁂𑀬𑁆𑀬 𑀯𑀸 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀆𑀯𑀸𑀲𑀁 𑀦 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀅𑀦𑀸𑀧𑀢𑁆𑀢𑀻’’𑀢𑀺 (𑀫𑀳𑀸𑀯. 𑁨𑁦𑁭) 𑀆𑀳. 𑀲𑀢𑁆𑀢𑀸𑀳𑀸𑀦𑀸𑀕𑀢𑀸𑀬 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁. 𑀲𑀸 𑀳𑀺 𑀓𑀼𑀫𑀼𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑁄𑀫𑀼𑀤𑀻, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀫𑀸𑀲𑀸𑀦𑀁 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀸 𑀳𑀺 𑀓𑀼𑀫𑀼𑀤𑀸𑀦𑀺 𑀲𑀼𑀧𑀼𑀧𑁆𑀨𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀫𑀼𑀤𑀸 𑀏𑀢𑁆𑀣 𑀧𑀼𑀧𑁆𑀨𑀦𑁆𑀢𑀻𑀢𑀺 𑀓𑁄𑀫𑀼𑀤𑀻𑀢𑀺 𑀯𑀼𑀘𑁆𑀘𑀢𑀺, 𑀓𑀼𑀫𑀼𑀤𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁮𑁨. 𑀅𑀦𑁆𑀢𑁄𑀯𑀲𑁆𑀲𑀯𑀢𑁆𑀢𑀓𑀣𑀸𑀬𑀁 𑀦𑀺𑀩𑀤𑁆𑀥𑀯𑀢𑁆𑀢𑀁 𑀞𑀧𑁂𑀢𑁆𑀯𑀸𑀢𑀺 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀻𑀲𑀼 𑀦𑀺𑀭𑀦𑁆𑀢𑀭𑀓𑀭𑀡𑀻𑀬𑁂𑀲𑀼 𑀓𑀢𑁆𑀢𑀩𑁆𑀩𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸. 𑀓𑀲𑀸𑀯𑀧𑀭𑀺𑀪𑀡𑁆𑀟𑀦𑁆𑀢𑀺 𑀓𑀲𑀸𑀯𑁂𑀳𑀺 𑀪𑀽𑀫𑀺𑀧𑀭𑀺𑀓𑀫𑁆𑀫𑀁. 𑀯𑀢𑁆𑀢𑀦𑁆𑀢𑀺 𑀓𑀢𑀺𑀓𑀯𑀢𑁆𑀢𑀁.

𑀏𑀯𑀭𑀽𑀧𑀁 𑀅𑀥𑀫𑁆𑀫𑀺𑀓𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀳𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀢𑁆𑀣 𑀓𑁂𑀘𑀺 𑀤𑀼𑀩𑁆𑀩𑀮𑀸 𑀅𑀧𑁆𑀧𑀣𑀸𑀫𑀸 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀅𑀦𑀼𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀇𑀥 𑀆𑀕𑀢𑀜𑁆𑀘 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁨𑁭) 𑀆𑀕𑀢𑀁 𑀆𑀯𑀸𑀲𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀲𑀻𑀫𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀬𑁄 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀧𑀞𑀫𑀁 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀢𑀁 ‘𑀅𑀭𑀳𑀸’𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀓𑀢𑀸𑀬 𑀓𑀢𑀺𑀓𑀸𑀬 𑀬𑁄 ‘‘𑀫𑀁 ‘𑀅𑀭𑀳𑀸’𑀢𑀺 𑀚𑀸𑀦𑀦𑁆𑀢𑀽’’𑀢𑀺 𑀢𑀫𑁆𑀳𑀸 𑀞𑀸𑀦𑀸 𑀧𑀞𑀫𑀁 𑀧𑀓𑁆𑀓𑀫𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. 𑀬𑁄 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀺𑀘𑁆𑀘𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀜𑁆𑀜𑁂𑀦 𑀯𑀸 𑀢𑀸𑀤𑀺𑀲𑁂𑀦 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀦𑀸𑀧𑀢𑁆𑀢𑀺. 𑀲𑀘𑁂𑀧𑀺𑀲𑁆𑀲 𑀏𑀯𑀁 𑀕𑀢𑀲𑁆𑀲 𑀧𑀘𑁆𑀙𑀸 𑀇𑀘𑁆𑀙𑀸𑀘𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 ‘‘𑀦 𑀤𑀸𑀦𑀸𑀳𑀁 𑀢𑀢𑁆𑀣 𑀕𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀁 𑀅𑀭𑀳𑀸𑀢𑀺 𑀲𑀫𑁆𑀪𑀸𑀯𑁂𑀲𑁆𑀲𑀦𑁆𑀢𑀻’’𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯.

𑀬𑁄𑀧𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀅𑀜𑁆𑀜𑀯𑀺𑀳𑀺𑀢𑁄 𑀯𑀸 𑀳𑀼𑀢𑁆𑀯𑀸 𑀘𑁄𑀭𑀸𑀤𑀻𑀳𑀺 𑀯𑀸 𑀅𑀦𑀼𑀩𑀤𑁆𑀥𑁄 𑀫𑁂𑀖𑀁 𑀯𑀸 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀅𑀦𑁄𑀯𑀲𑁆𑀲𑀓𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀦𑀸𑀧𑀢𑁆𑀢𑀺, 𑀬𑀸𑀦𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀺, 𑀧𑀤𑀕𑀫𑀦𑁂𑀦𑁂𑀯 𑀆𑀧𑀚𑁆𑀚𑀢𑀺. 𑀢𑀫𑁆𑀧𑀺 𑀬𑁂𑀳𑀺 𑀲𑀳 𑀓𑀢𑀺𑀓𑀸 𑀓𑀢𑀸, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀕𑀘𑁆𑀙𑀦𑁆𑀢𑁄 𑀦𑀸𑀧𑀚𑁆𑀚𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑀸 𑀳𑀺 𑀲𑀩𑁆𑀩𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀭𑀓𑁆𑀔𑀦𑁆𑀢𑀺. 𑀲𑀘𑁂𑀧𑀺 𑀫𑀡𑁆𑀟𑀧𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀓𑀺𑀜𑁆𑀘𑀺 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀺 ‘‘𑀬𑁄 𑀏𑀢𑁆𑀣 𑀦𑀺𑀲𑀻𑀤𑀢𑀺 𑀯𑀸 𑀘𑀗𑁆𑀓𑀫𑀢𑀺 𑀯𑀸, 𑀢𑀁 ‘𑀅𑀭𑀳𑀸’𑀢𑀺 𑀚𑀸𑀦𑀺𑀲𑁆𑀲𑀸𑀫’’, 𑀧𑀼𑀧𑁆𑀨𑀸𑀦𑀺 𑀯𑀸 𑀞𑀧𑁂𑀢𑁆𑀯𑀸, ‘‘𑀬𑁄 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀧𑀽𑀚𑀁 𑀓𑀭𑀺𑀲𑁆𑀲𑀢𑀺, 𑀢𑀁 ‘𑀅𑀭𑀳𑀸’𑀢𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺, 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀘𑁂𑀧𑀺 𑀉𑀧𑀸𑀲𑀓𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀺𑀳𑀸𑀭𑁄 𑀯𑀸 𑀓𑀢𑁄 𑀳𑁄𑀢𑀺, 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀞𑀧𑀺𑀢𑀸𑀦𑀺 𑀳𑁄𑀦𑁆𑀢𑀺 ‘‘𑀬𑁂 𑀅𑀭𑀳𑀦𑁆𑀢𑁄, 𑀢𑁂 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀼, 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺, 𑀢𑀢𑁆𑀭𑀸𑀧𑀺 𑀇𑀘𑁆𑀙𑀸𑀘𑀸𑀭𑀯𑀲𑁂𑀦 𑀯𑀲𑀦𑁆𑀢𑀲𑁆𑀲 𑀯𑀸 𑀢𑀸𑀦𑀺 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯, 𑀏𑀢𑀁 𑀧𑀦 𑀅𑀥𑀫𑁆𑀫𑀺𑀓𑀓𑀢𑀺𑀓𑀯𑀢𑁆𑀢𑀁, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀯𑀸 𑀏𑀯𑀭𑀽𑀧𑀁 ‘‘𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑁂𑀯 𑀆𑀭𑀜𑁆𑀜𑀓𑀸 𑀳𑁄𑀦𑁆𑀢𑀼 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀸𑀤𑀺𑀅𑀯𑀲𑁂𑀲𑀥𑀼𑀢𑀗𑁆𑀕𑀥𑀭𑀸 𑀯𑀸, 𑀅𑀣 𑀯𑀸 𑀲𑀩𑁆𑀩𑁂𑀯 𑀔𑀻𑀡𑀸𑀲𑀯𑀸 𑀳𑁄𑀦𑁆𑀢𑀽’’𑀢𑀺 𑀏𑀯𑀫𑀸𑀤𑀺. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸 𑀳𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀢𑀢𑁆𑀣 𑀓𑁂𑀘𑀺 𑀤𑀼𑀩𑁆𑀩𑀮𑀸 𑀅𑀧𑁆𑀧𑀣𑀸𑀫𑀸 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀅𑀦𑀼𑀧𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀫𑁆𑀧𑀺 𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. ‘‘𑀇𑀫𑀁 𑀢𑁂𑀫𑀸𑀲𑀁 𑀲𑀩𑁆𑀩𑁂𑀳𑁂𑀯 𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀁, 𑀫𑀽𑀕𑀩𑁆𑀩𑀢𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀩𑀳𑀺𑀲𑀻𑀫𑀝𑁆𑀞𑀲𑁆𑀲𑀧𑀺 𑀲𑀗𑁆𑀖𑀮𑀸𑀪𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀯𑀫𑀸𑀤𑀺𑀓𑀫𑁆𑀧𑀺 𑀦 𑀓𑀢𑁆𑀢𑀩𑁆𑀩𑀫𑁂𑀯.

𑀢𑀺𑀯𑀺𑀥𑀫𑁆𑀧𑀻𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺. 𑀲𑁄𑀥𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀣𑀸𑀢𑀺 𑀪𑀩𑁆𑀩𑁂 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀣. 𑀪𑀲𑁆𑀲𑁂 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸𑀢𑀺 𑀯𑀘𑀦𑁂 𑀧𑀫𑀸𑀡𑀁 𑀜𑀢𑁆𑀯𑀸. 𑀤𑀲𑀓𑀣𑀸𑀯𑀢𑁆𑀣𑀼 𑀦𑀸𑀫 𑀅𑀧𑁆𑀧𑀺𑀘𑁆𑀙𑀸𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸𑀢𑀺.

𑀯𑀺𑀕𑁆𑀕𑀳𑀲𑀁𑀯𑀢𑁆𑀢𑀦𑀺𑀓𑀁 𑀯𑀘𑀦𑀁 𑀯𑀺𑀕𑁆𑀕𑀸𑀳𑀺𑀓𑀁. 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀫𑁂𑀢𑁆𑀢𑀸 𑀅𑀲𑀼𑀪𑀁 𑀫𑀭𑀡𑀸𑀦𑀼𑀲𑁆𑀲𑀢𑀻𑀢𑀺 𑀇𑀫𑀁 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸. 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀇𑀤𑀁 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑁋 𑀬𑁄 𑀤𑁂𑀯𑀲𑀺𑀓𑀁 𑀲𑀗𑁆𑀖𑀫𑀚𑁆𑀛𑁂 𑀑𑀲𑀭𑀢𑀺, 𑀢𑁂𑀦 𑀲𑀸𑀫𑀡𑁂𑀭𑀸𑀤𑀻𑀳𑀺 𑀆𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀬𑀣𑀸𑀲𑀼𑀔𑀁 𑀪𑀼𑀜𑁆𑀚𑀦𑀢𑁆𑀣𑀸𑀬 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀦𑀺𑀓𑁆𑀔𑀺𑀢𑁆𑀢𑁂𑀲𑀼 𑀤𑀦𑁆𑀢𑀓𑀝𑁆𑀞𑁂𑀲𑀼 𑀤𑀺𑀯𑀲𑁂 𑀤𑀺𑀯𑀲𑁂 𑀏𑀓𑀫𑁂𑀯 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀤𑁂𑀯𑀲𑀺𑀓𑀁 𑀦 𑀑𑀲𑀭𑀢𑀺, 𑀧𑀥𑀸𑀦𑀖𑀭𑁂 𑀯𑀲𑀺𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑁂 𑀯𑀸 𑀉𑀧𑁄𑀲𑀣𑀕𑁆𑀕𑁂 𑀯𑀸 𑀤𑀺𑀲𑁆𑀲𑀢𑀺, 𑀢𑁂𑀦 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀦𑁆𑀢𑀓𑀝𑁆𑀞𑀸𑀦𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀔𑀻𑀡𑁂𑀲𑀼 𑀲𑀘𑁂 𑀧𑀼𑀦𑀧𑀺 𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂 𑀩𑀳𑀽𑀦𑀺 𑀳𑁄𑀦𑁆𑀢𑀺𑀬𑁂𑀯, 𑀧𑀼𑀦𑀧𑀺 𑀆𑀳𑀭𑀺𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀦𑀺. 𑀬𑀤𑀺 𑀧𑀦 𑀧𑀫𑀸𑀡𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀆𑀳𑀭𑀢𑀺, 𑀢𑁂𑀲𑀼 𑀅𑀔𑀻𑀡𑁂𑀲𑀼𑀬𑁂𑀯 𑀫𑀸𑀴𑀓𑁂 𑀔𑀻𑀬𑀢𑀺, 𑀢𑀢𑁄 𑀓𑁂𑀘𑀺 𑀣𑁂𑀭𑀸 ‘‘𑀬𑁂𑀳𑀺 𑀕𑀳𑀺𑀢𑀸𑀦𑀺, 𑀢𑁂 𑀧𑀝𑀺𑀳𑀭𑀦𑁆𑀢𑀽’’𑀢𑀺 𑀯𑀤𑁂𑀬𑁆𑀬𑀼𑀁, 𑀓𑁂𑀘𑀺 ‘‘𑀔𑀸𑀤𑀦𑁆𑀢𑀼, 𑀧𑀼𑀦 𑀲𑀸𑀫𑀡𑁂𑀭𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀲𑁆𑀫𑀸 𑀯𑀺𑀯𑀸𑀤𑀧𑀭𑀺𑀳𑀸𑀭𑀢𑁆𑀣𑀁 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁, 𑀕𑀳𑀡𑁂 𑀧𑀦 𑀤𑁄𑀲𑁄 𑀦𑀢𑁆𑀣𑀺. 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦𑀧𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀺𑀓𑀯𑀢𑁆𑀢𑁂 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀅𑀦𑁆𑀢𑁄𑀕𑀸𑀫𑁂…𑀧𑁂… 𑀦 𑀓𑀣𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀘𑀻𑀯𑀭𑁂 𑀘 𑀧𑀺𑀡𑁆𑀟𑀧𑀸𑀢𑁂 𑀘 𑀯𑀺𑀜𑁆𑀜𑀢𑁆𑀢𑀺𑀧𑀺 𑀦 𑀯𑀝𑁆𑀝𑀢𑀺 𑀦𑀺𑀫𑀺𑀢𑁆𑀢𑁄𑀪𑀸𑀲𑀧𑀭𑀺𑀓𑀣𑀸𑀧𑀺. 𑀲𑁂𑀦𑀸𑀲𑀦𑁂 𑀯𑀺𑀜𑁆𑀜𑀢𑁆𑀢𑀺𑀫𑁂𑀯 𑀦 𑀯𑀝𑁆𑀝𑀢𑀺, 𑀲𑁂𑀲𑀸𑀦𑀺 𑀢𑀻𑀡𑀺 𑀯𑀝𑁆𑀝𑀦𑁆𑀢𑀺. 𑀕𑀺𑀮𑀸𑀦𑀧𑀘𑁆𑀘𑀬𑁂 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀆𑀚𑀻𑀯𑀁 𑀲𑁄𑀥𑁂𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀼𑀝𑁆𑀞𑀼 𑀭𑀓𑁆𑀔𑀺𑀢𑀩𑁆𑀩𑀸𑀢𑀺. 𑀇𑀫𑀺𑀦𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀤𑀲𑁆𑀲𑀺𑀢𑀁. 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀧𑀽𑀭𑁂𑀢𑀩𑁆𑀩𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁. 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁 𑀧𑀦 𑀢𑀻𑀳𑀺𑀧𑀺 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀁. 𑀇𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀧𑀝𑀺𑀲𑀁𑀬𑀼𑀢𑁆𑀢𑀸 𑀏𑀯𑀭𑀽𑀧𑀸 𑀦𑀺𑀬𑁆𑀬𑀸𑀦𑀺𑀓𑀓𑀣𑀸 𑀩𑀳𑀼𑀓𑀸𑀧𑀺 𑀯𑀢𑁆𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑀲𑁆𑀫𑀺𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀲𑀬𑁂 𑀢𑁂𑀲𑀼 𑀢𑁂𑀲𑀼 𑀦𑀕𑀭𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀭𑀸𑀚𑀓𑀸𑀮𑁂 𑀅𑀧𑀭𑀺𑀬𑀦𑁆𑀢𑀸 𑀯𑀺𑀯𑀸𑀤𑀓𑀣𑀸 𑀳𑁄𑀢𑀺. 𑀓𑀣𑀁? 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁮𑁬) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 ‘𑀬𑀤𑀺 𑀧𑀦𑀸𑀬𑁆𑀬𑀸 𑀆𑀕𑀫𑁂 𑀚𑀼𑀡𑁆𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼’’’𑀦𑁆𑀢𑀺 𑀯𑀘𑀦𑀁 𑀦𑀺𑀲𑁆𑀲𑀸𑀬 𑀪𑀕𑀯𑀢𑀸 𑀅𑀥𑀺𑀫𑀸𑀲𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀯𑁂𑀤𑀲𑀫𑀬𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀅𑀦𑁂𑀓𑀯𑀺𑀳𑀺𑀢𑀁 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺. 𑀯𑁂𑀤𑀲𑀫𑀬𑁂 𑀓𑀺𑀭 𑀤𑁆𑀯𑁂 𑀅𑀥𑀺𑀫𑀸𑀲𑀸𑀦𑀺 𑀬𑀸𑀘𑀸𑀥𑀺𑀫𑀸𑀲𑀜𑁆𑀘 𑀧𑀢𑁆𑀢𑀸𑀥𑀺𑀫𑀸𑀲𑀜𑁆𑀘. 𑀢𑀢𑁆𑀣 𑀓𑀮𑀺𑀬𑀼𑀕𑀕𑀡𑀦𑁂 𑀏𑀓𑀽𑀦𑀯𑀻𑀲𑀢𑀺𑀕𑀡𑀦𑁂𑀦 𑀪𑀸𑀚𑀺𑀢𑁂 𑀤𑁆𑀯𑁂𑀧𑀜𑁆𑀘𑀝𑁆𑀞𑀤𑀲𑀢𑁂𑀭𑀲𑀲𑁄𑀴𑀲𑀝𑁆𑀞𑀸𑀭𑀲𑀯𑀲𑁂𑀦 𑀲𑀢𑁆𑀢𑀥𑀸 𑀲𑁂𑀲𑁄 𑀳𑁄𑀢𑀺, 𑀢𑁂𑀲𑀁 𑀯𑀲𑁂𑀦 𑀘𑀫𑁆𑀫𑀸𑀥𑀺𑀫𑀸𑀲 𑀧𑀜𑁆𑀘𑀸𑀥𑀺𑀫𑀸𑀲 𑀧𑀲𑁆𑀯𑀸𑀥𑀺𑀫𑀸𑀲 𑀤𑀲𑀸𑀥𑀺𑀫𑀸𑀲 𑀢𑁂𑀭𑀲𑀸𑀥𑀺𑀫𑀸𑀲 𑀲𑁄𑀴𑀲𑀸𑀥𑀺𑀫𑀸𑀲 𑀅𑀝𑁆𑀞𑀸𑀭𑀲𑀸𑀥𑀺𑀫𑀸𑀲𑀸𑀢𑀺 𑀯𑁄𑀳𑀭𑀦𑁆𑀢𑀺. 𑀅𑀝𑁆𑀞𑀸𑀭𑀲𑀸𑀥𑀺𑀫𑀸𑀲𑀁 𑀧𑀦 𑀅𑀯𑀲𑀸𑀦𑀸𑀥𑀺𑀫𑀸𑀲𑀦𑁆𑀢𑀺𑀧𑀺 𑀯𑁄𑀳𑀭𑀦𑁆𑀢𑀺. 𑀢𑁂𑀲𑀼 𑀧𑀲𑀼𑀲𑁄𑀴𑀲𑀸𑀦𑀺 𑀅𑀧𑀢𑁆𑀢𑁂𑀬𑁂𑀯 𑀅𑀥𑀺𑀫𑀸𑀲𑀧𑀢𑀦𑀓𑀮𑀺𑀬𑀼𑀕𑁂 𑀲𑀁𑀯𑀘𑁆𑀙𑀭𑀫𑀸𑀲𑀸𑀤𑀺𑀯𑀺𑀲𑀫𑀪𑀬𑁂𑀦 𑀬𑀸𑀘𑀺𑀢𑁆𑀯𑀸 𑀫𑀸𑀲𑀲𑁆𑀲 𑀆𑀓𑀟𑁆𑀠𑀺𑀢𑀩𑁆𑀩𑀢𑁄 𑀬𑀸𑀘𑀸𑀥𑀺𑀫𑀸𑀲𑀦𑁆𑀢𑀺 𑀯𑁄𑀳𑀭𑀦𑁆𑀢𑀺, 𑀲𑁂𑀲𑀸𑀦𑀺 𑀧𑀦 𑀧𑀜𑁆𑀘𑀫𑀢𑁆𑀢𑁂𑀬𑁂𑀯 𑀅𑀥𑀺𑀫𑀸𑀲𑀧𑀢𑀦𑀓𑀮𑀺𑀬𑀼𑀕𑁂 𑀫𑀸𑀲𑀲𑁆𑀲 𑀆𑀓𑀟𑁆𑀠𑀺𑀢𑀩𑁆𑀩𑀢𑁄 𑀧𑀢𑁆𑀢𑀸𑀥𑀺𑀫𑀸𑀲𑀦𑁆𑀢𑀺. 𑀢𑀢𑁆𑀭𑁂𑀢𑀁 𑀬𑀸𑀘𑀸𑀥𑀺𑀫𑀸𑀲𑀮𑀓𑁆𑀔𑀡𑀁 𑁋 𑀢𑀣𑀢𑁄 𑀅𑀚𑀸𑀦𑀦𑁆𑀢𑀸 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑀸 𑀪𑀕𑀯𑀢𑁄 𑀬𑀸𑀘𑀺𑀢𑀸𑀥𑀺𑀫𑀸𑀲𑀢𑁆𑀢𑀸 𑀬𑀸𑀘𑀸𑀥𑀺𑀫𑀸𑀲𑀁 𑀦𑀸𑀫 𑀪𑀯𑀢𑀺, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀏𑀯 𑀬𑀸𑀘𑀸𑀥𑀺𑀫𑀸𑀲𑁂𑀲𑀼 𑀤𑀺𑀯𑀲𑁂𑀦 𑀲𑀳 𑀫𑀸𑀲𑁄 𑀆𑀓𑀟𑁆𑀠𑀺𑀢𑀩𑁆𑀩𑁄, 𑀦 𑀇𑀢𑀭𑁂𑀲𑀽𑀢𑀺 𑀯𑀤𑀦𑁆𑀢𑀺, 𑀅𑀜𑁆𑀜𑁂 𑀧𑀦 𑀧𑀜𑁆𑀘𑀲𑀼 𑀧𑀢𑁆𑀢𑀸𑀥𑀺𑀫𑀸𑀲𑁂𑀲𑀼 𑀏𑀯 𑀲𑀳 𑀤𑀺𑀯𑀲𑁂𑀦 𑀫𑀸𑀲𑁄 𑀆𑀓𑀟𑁆𑀠𑀺𑀢𑀩𑁆𑀩𑁄, 𑀦 𑀬𑀸𑀘𑀸𑀥𑀺𑀫𑀸𑀲𑁂𑀲𑀽𑀢𑀺.

𑀅𑀧𑀭𑁂 𑀧𑀦 𑁋 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸𑀢𑀺, 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸’’𑀢𑀺 𑀢𑀲𑁆𑀫𑀺𑀁𑀬𑁂𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁮𑁪) 𑀆𑀕𑀢𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀅𑀬𑁄𑀦𑀺𑀲𑁄 𑀕𑀳𑁂𑀢𑁆𑀯𑀸 𑀢𑀺𑀣𑀺𑀦𑀓𑁆𑀔𑀢𑁆𑀢𑀬𑁄𑀕𑁂 𑀏𑀯 𑀯𑀲𑁆𑀲𑀽𑀧𑀕𑀫𑀦𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑀪𑀽𑀢𑁄 𑀧𑀸𑀝𑀺𑀧𑀤𑀤𑀺𑀯𑀲𑁄 𑀧𑀼𑀡𑁆𑀡𑀸𑀢𑀺𑀣𑀺𑀬𑀸 𑀘 𑀬𑀼𑀢𑁆𑀢𑁄 𑀳𑁄𑀢𑀼, 𑀧𑀼𑀩𑁆𑀩𑀸𑀲𑀸𑀴𑁆𑀳𑀉𑀢𑁆𑀢𑀭𑀸𑀲𑀸𑀴𑁆𑀳𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀦𑀓𑁆𑀔𑀢𑁆𑀢𑁂𑀲𑀼 𑀏𑀓𑁂𑀓𑁂𑀦 𑀬𑀼𑀢𑁆𑀢𑁄 𑀘, 𑀏𑀯𑀁𑀪𑀽𑀢𑁄 𑀓𑀸𑀮𑁄 𑀬𑀤𑀺 𑀯𑀺𑀦𑀸 𑀤𑀺𑀯𑀲𑁂𑀦 𑀫𑀸𑀲𑀓𑀟𑁆𑀠𑀦𑁂 𑀲𑀫𑁆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 𑀫𑀸𑀲𑀫𑀢𑁆𑀢𑀸𑀓𑀟𑁆𑀠𑀦𑀫𑁂𑀯 𑀓𑀸𑀢𑀩𑁆𑀩𑀁, 𑀬𑀤𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀳 𑀤𑀺𑀯𑀲𑁂𑀦 𑀫𑀸𑀲𑀸𑀓𑀟𑁆𑀠𑀦𑀁, 𑀅𑀬𑀁 𑀧𑀺𑀝𑀓𑁂𑀦 𑀘 𑀯𑁂𑀤𑁂𑀦 𑀘 𑀅𑀦𑀼𑀮𑁄𑀫𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀭𑀸𑀧𑁆𑀬𑁂𑀓𑁂 𑀯𑀤𑀦𑁆𑀢𑀺 𑁋 ‘‘𑀫𑀸 𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 𑀫𑀺𑀦𑀺𑀢𑀩𑁆𑀩𑀢𑁄, 𑀲𑁄 𑀏𑀢𑁆𑀣 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄𑀢𑀺 𑀧𑀼𑀡𑁆𑀡𑀫𑀸’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀢𑁆𑀣𑀫𑀜𑁆𑀚𑀽𑀲𑀸𑀤𑀻𑀲𑀼 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀆𑀕𑀫𑀦𑀢𑁄 𑀧𑀼𑀡𑁆𑀡𑀸𑀢𑀺𑀣𑀺𑀬𑁄𑀕𑁄𑀧𑀺 𑀧𑀼𑀡𑁆𑀡𑀫𑀺𑀬𑀸 𑀏𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀧𑀸𑀝𑀺𑀧𑀤𑁂, 𑀢𑀣𑀸 𑀦𑀓𑁆𑀔𑀢𑁆𑀢𑀬𑁄𑀕𑁄𑀧𑀺 𑀆𑀲𑀸𑀴𑁆𑀳𑀺𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀧𑀦𑁆𑀦𑀭𑀲𑁂 𑀉𑀧𑁄𑀲𑀣𑁂 ‘‘𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂, 𑀏𑀯𑀁 𑀥𑀸𑀢𑀼 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀫𑀳𑀸𑀯𑀁𑀲𑁂 𑀯𑀘𑀦𑀢𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀯𑀤𑀦𑁆𑀢𑀺 𑁋 𑀏𑀯𑀁 𑀲𑀦𑁆𑀢𑁂 𑀉𑀧𑁄𑀲𑀣𑀤𑀺𑀯𑀲𑁂𑀬𑁂𑀯 𑀘𑀦𑁆𑀤𑀕𑁆𑀕𑀸𑀳𑁄 𑀘 𑀲𑀽𑀭𑀺𑀬𑀕𑁆𑀕𑀸𑀳𑁄 𑀘 𑀪𑀯𑁂𑀬𑁆𑀬, 𑀇𑀤𑀸𑀦𑀺 𑀧𑀦 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀸𑀤𑀻𑀲𑀼𑀬𑁂𑀯 𑀘𑀦𑁆𑀤𑀕𑁆𑀕𑀸𑀳𑁄, 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀸𑀤𑀻𑀲𑀼𑀬𑁂𑀯 𑀲𑀽𑀭𑀺𑀬𑀕𑁆𑀕𑀸𑀳𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀧𑀸𑀝𑀺𑀧𑀤𑁂𑀬𑁂𑀯 𑀢𑀺𑀣𑀺𑀦𑀓𑁆𑀔𑀢𑁆𑀢𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺. 𑀧𑀘𑁆𑀙𑀺𑀫𑀸𑀧𑀺 𑀯𑀤𑀦𑁆𑀢𑀺 𑁋 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀯𑀸𑀤𑀻𑀦𑀁 𑀯𑀘𑀦𑁂𑀦 𑀧𑀼𑀩𑁆𑀩𑁂 𑀆𑀓𑀟𑁆𑀠𑀺𑀢𑀩𑁆𑀩𑀤𑀺𑀯𑀲𑀸𑀦𑀁 𑀅𑀦𑀸𑀓𑀟𑁆𑀠𑀺𑀢𑀢𑁆𑀢𑀸 𑀤𑀺𑀯𑀲𑀧𑀼𑀜𑁆𑀚𑀪𑀸𑀯𑁂𑀦 𑀏𑀯𑀁 𑀳𑁄𑀢𑀺, 𑀲𑀘𑁆𑀘𑀢𑁄 𑀧𑀦 𑀉𑀧𑁄𑀲𑀣𑀤𑀺𑀯𑀲𑁂𑀬𑁂𑀯 𑀘𑀦𑁆𑀤𑀕𑁆𑀕𑀸𑀳𑁄 𑀲𑀽𑀭𑀺𑀬𑀕𑁆𑀕𑀸𑀳𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄𑀢𑀺. 𑀳𑁄𑀢𑀼, 𑀬𑀣𑀸 𑀇𑀘𑁆𑀙𑀣, 𑀢𑀣𑀸 𑀯𑀤𑀣, 𑀏𑀯𑀁 𑀪𑀽𑀢𑀧𑀼𑀩𑁆𑀩𑁄 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀕𑀦𑁆𑀥𑀸𑀭𑀚𑀸𑀢𑀓𑁂 (𑀚𑀸. 𑀅𑀝𑁆𑀞. 𑁩.𑁭.𑁭𑁫 𑀕𑀦𑁆𑀥𑀸𑀭𑀚𑀸𑀢𑀓𑀯𑀡𑁆𑀡𑀦𑀸) 𑀳𑀺 𑀉𑀧𑁄𑀲𑀣𑀤𑀺𑀯𑀲𑁂 𑀘𑀦𑁆𑀤𑀕𑁆𑀕𑀸𑀳𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑁄. 𑀢𑀜𑁆𑀳𑀺 𑀚𑀸𑀢𑀓𑀁 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁, 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁, 𑀦𑀯𑀲𑀼 𑀲𑀸𑀲𑀦𑀗𑁆𑀕𑁂𑀲𑀼 𑀚𑀸𑀢𑀓𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀼𑀭𑀺𑀫𑀓𑀸 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀦𑁆𑀢𑀺.

𑀅𑀣𑁂𑀓𑀘𑁆𑀘𑁂 ‘‘𑀧𑀺𑀝𑀓𑀢𑁆𑀢𑀬𑁂 𑀅𑀥𑀺𑀓𑀫𑀸𑀲𑀸𑀬𑁂𑀯 𑀲𑀦𑁆𑀢𑀺, 𑀦 𑀅𑀥𑀺𑀓𑀤𑀺𑀯𑀲𑀸 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁦𑁪) ‘𑀬𑀁 𑀧𑀦 𑀯𑀼𑀢𑁆𑀢𑀁 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀅𑀝𑁆𑀞𑀸𑀭𑀲𑀦𑁆𑀦𑀁𑀬𑁂𑀯 𑀯𑀲𑁆𑀲𑀸𑀦𑀁 𑀅𑀥𑀺𑀓𑀫𑀸𑀲𑁂 𑀕𑀳𑁂𑀢𑁆𑀯𑀸 𑀕𑀡𑀺𑀢𑀢𑁆𑀢𑀸 𑀲𑁂𑀲𑀯𑀲𑁆𑀲𑀤𑁆𑀯𑀬𑀲𑁆𑀲𑀧𑀺 𑀅𑀥𑀺𑀓𑀸𑀦𑀺 𑀤𑀺𑀯𑀲𑀸𑀦𑀺 𑀳𑁄𑀦𑁆𑀢𑁂𑀯, 𑀢𑀸𑀦𑀺 𑀅𑀥𑀺𑀓𑀤𑀺𑀯𑀲𑀸𑀦𑀺 𑀲𑀦𑁆𑀥𑀸𑀬 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀅𑀥𑀺𑀓𑀤𑀺𑀯𑀲𑀸 𑀦𑀸𑀫 𑀯𑀺𑀲𑀼𑀁 𑀉𑀧𑀮𑀩𑁆𑀪𑀦𑁆𑀢𑀺 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀼𑀓𑁆𑀓𑀟𑁆𑀠𑀦𑀯𑀲𑁂𑀦 𑀅𑀥𑀺𑀓𑀫𑀸𑀲𑁂 𑀧𑀭𑀺𑀘𑁆𑀘𑀢𑁆𑀢𑁂𑀬𑁂𑀯 𑀅𑀥𑀺𑀓𑀫𑀸𑀲𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀅𑀢𑀺𑀭𑁂𑀓𑀤𑀺𑀯𑀲𑀸 𑀦𑀸𑀫 𑀯𑀺𑀲𑀼𑀁 𑀦 𑀲𑀫𑁆𑀪𑀯𑀦𑁆𑀢𑀻’𑀢𑀺 𑀯𑀘𑀦𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀣𑀜𑁆𑀜𑁂 𑀯𑀤𑀦𑁆𑀢𑀺 𑁋 𑀧𑀺𑀝𑀓𑀢𑁆𑀢𑀬𑁂 𑀅𑀥𑀺𑀓𑀤𑀺𑀯𑀲𑀸𑀢𑀺 𑀆𑀕𑀢𑀸 𑀅𑀢𑁆𑀣𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁪𑁦𑁪) ‘‘𑀅𑀯𑀲𑁂𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀥𑀺𑀓𑀤𑀺𑀯𑀲𑀸𑀦𑀺 𑀳𑁄𑀦𑁆𑀢𑁂𑀯, 𑀢𑀲𑁆𑀫𑀸 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺 𑀯𑀘𑀦𑀢𑁄𑀢𑀺. 𑀇𑀢𑁄 𑀧𑀭𑀫𑁆𑀧𑀺 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀓𑀣𑁂𑀦𑁆𑀢𑀺. 𑀲𑀼𑀤𑁆𑀥𑀯𑁂𑀤𑀺𑀓𑀸𑀧𑀺 𑀏𑀯𑀁 𑀯𑀤𑀦𑁆𑀢𑀺, 𑀯𑀺𑀦𑀬𑀥𑀭𑀸 𑀪𑀺𑀓𑁆𑀔𑀽 𑀯𑀺𑀦𑀬𑀲𑀫𑀬𑀯𑀲𑁂𑀦 𑀯𑀤𑀦𑁆𑀢𑀺. 𑀅𑀫𑁆𑀳𑀸𑀓𑀁 𑀧𑀦 𑀯𑁂𑀤𑀲𑀫𑀬𑁂 𑀳𑀢𑁆𑀣𑀕𑀢𑀕𑀡𑀦𑀯𑀲𑁂𑀦𑁂𑀯 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀅𑀢𑁆𑀣𑀺𑀓𑁂𑀳𑀺 𑀢𑀺𑀯𑀲𑁆𑀲𑀸𑀥𑀺𑀓𑀲𑀳𑀲𑁆𑀲𑀓𑀮𑀺𑀬𑀼𑀕𑁂 𑀥𑀫𑁆𑀫𑀭𑀸𑀚𑁂𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀓𑀢𑀁 𑀅𑀥𑀺𑀫𑀸𑀲𑀧𑀓𑀭𑀡𑀁 𑀑𑀮𑁄𑀓𑁂𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀁.

𑀇𑀥 𑀧𑀦 𑀅𑀥𑀺𑀧𑁆𑀧𑁂𑀢𑀯𑀺𑀦𑀺𑀘𑁆𑀙𑀬𑀫𑁂𑀯 𑀓𑀣𑀬𑀸𑀫. 𑀧𑀞𑀫𑀤𑀼𑀢𑀺𑀬𑀯𑀸𑀤𑁂𑀲𑀼 𑀦 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀸 𑀪𑀕𑀯𑀦𑁆𑀢𑀁 𑀅𑀥𑀺𑀫𑀸𑀲𑀧𑀜𑁆𑀜𑀸𑀧𑀦𑀁 𑀬𑀸𑀘𑀢𑀺, 𑀦 𑀘 𑀪𑀕𑀯𑀸 𑀧𑀜𑁆𑀜𑀧𑁂𑀢𑀺, 𑀦 ‘‘𑀢𑀲𑁆𑀫𑀺𑀁 𑀯𑀲𑁆𑀲𑁂 𑀇𑀤𑀁 𑀦𑀸𑀫 𑀅𑀥𑀺𑀫𑀸𑀲𑀁 𑀳𑁄𑀢𑀻’’𑀢𑀺 𑀯𑀸 ‘‘𑀫𑀸𑀲𑀫𑀢𑁆𑀢𑀁 𑀯𑀸 𑀲𑀳𑀤𑀺𑀯𑀲𑀁 𑀯𑀸 𑀆𑀓𑀟𑁆𑀠𑀺𑀢𑀩𑁆𑀩’’𑀦𑁆𑀢𑀺 𑀯𑀸 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀅𑀢𑁆𑀣𑀺, 𑀭𑀸𑀚𑀸 𑀧𑀦 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑁂𑀤𑀲𑀫𑀬𑁂 𑀯𑀲𑁆𑀲𑀼𑀓𑁆𑀓𑀟𑁆𑀠𑀦𑀲𑀫𑁆𑀪𑀯𑀢𑁄 𑀪𑀺𑀓𑁆𑀔𑀽𑀦𑀁 𑀧𑀞𑀫𑀆𑀲𑀸𑀴𑁆𑀳𑀫𑀸𑀲𑁂 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀤𑀼𑀢𑀺𑀬𑀆𑀲𑀸𑀴𑁆𑀳𑀫𑀸𑀲𑁂 𑀉𑀧𑀕𑀫𑀦𑀢𑁆𑀣𑀁 ‘‘𑀬𑀤𑀺 𑀧𑀦𑀸𑀬𑁆𑀬𑀸 𑀆𑀕𑀫𑁂 𑀚𑀼𑀡𑁆𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺 𑀤𑀽𑀢𑀁 𑀧𑀸𑀳𑁂𑀲𑀺. 𑀬𑀤𑀺 𑀧𑀦 𑀉𑀧𑀕𑀘𑁆𑀙𑁂𑀬𑁆𑀬𑀼𑀁, 𑀲𑀸𑀥𑀼 𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀪𑀺𑀓𑁆𑀔𑀽 𑀧𑀦 𑀭𑀜𑁆𑀜𑁄 𑀧𑀳𑀺𑀢𑀲𑀸𑀲𑀦𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀧𑀦 𑀯𑀲𑁆𑀲𑀼𑀓𑁆𑀓𑀟𑁆𑀠𑀦𑁂 𑀪𑀺𑀓𑁆𑀔𑀽𑀦𑀁 𑀕𑀼𑀡𑀧𑀭𑀺𑀳𑀸𑀦𑀺𑀬𑀸 𑀅𑀪𑀸𑀯𑀢𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁮𑁬) 𑀅𑀯𑁄𑀘. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁮𑁫) ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼𑀦𑁆𑀢𑀺 𑀏𑀢𑁆𑀣 𑀯𑀲𑁆𑀲𑀼𑀓𑁆𑀓𑀟𑁆𑀠𑀦𑀪𑀺𑀓𑁆𑀔𑀽𑀦𑀁 𑀓𑀸𑀘𑀺 𑀧𑀭𑀺𑀳𑀸𑀦𑀺 𑀦𑀸𑀫 𑀦𑀢𑁆𑀣𑀻𑀢𑀺𑀅𑀦𑀼𑀯𑀢𑁆𑀢𑀺𑀢𑀼𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁮𑁫) 𑀯𑀼𑀢𑁆𑀢𑀁 ‘‘𑀧𑀭𑀺𑀳𑀸𑀦𑀻𑀢𑀺 𑀕𑀼𑀡𑀧𑀭𑀺𑀳𑀸𑀦𑀻’’𑀢𑀺, 𑀢𑀲𑁆𑀫𑀸 𑀬𑀸𑀘𑀸𑀥𑀺𑀫𑀸𑀲𑁄 𑀯𑀸 𑀳𑁄𑀢𑀼 𑀧𑀢𑁆𑀢𑀸𑀥𑀺𑀫𑀸𑀲𑁄 𑀯𑀸, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀦𑀼𑀯𑀢𑁆𑀢𑀦𑁂𑀦 𑀪𑀺𑀓𑁆𑀔𑀽𑀦𑀁 𑀲𑀻𑀮𑀸𑀤𑀺𑀕𑀼𑀡𑀫𑁆𑀧𑀺 𑀧𑀭𑀺𑀳𑀸𑀦𑀺 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

𑀓𑀣𑀁 𑀧𑀦 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀓𑀣𑀁 𑀦 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁? 𑀬𑀤𑀺 𑀅𑀦𑀼𑀯𑀢𑁆𑀢𑀦𑁆𑀢𑁂 𑀧𑀼𑀩𑁆𑀩𑁂 𑀉𑀧𑀯𑀼𑀢𑁆𑀣𑀤𑀺𑀯𑀲𑀢𑁄 𑀇𑀤𑀸𑀦𑀺 𑀉𑀧𑀯𑀲𑀺𑀢𑀩𑁆𑀩𑀉𑀧𑁄𑀲𑀣𑀤𑀺𑀯𑀲𑁄 𑀘𑀸𑀢𑀼𑀤𑁆𑀤𑀲𑁄 𑀯𑀸 𑀧𑀦𑁆𑀦𑀭𑀲𑁄 𑀯𑀸 𑀳𑁄𑀢𑀺, 𑀢𑀣𑀸 𑀲𑀢𑀺 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀢𑁂𑀭𑀲𑀫𑁄 𑀯𑀸 𑀲𑁄𑀴𑀲𑀫𑁄 𑀯𑀸 𑀳𑁄𑀢𑀺, 𑀦 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀅𑀦𑀼𑀯𑀢𑁆𑀢𑀦𑁆𑀢𑁄 𑀳𑀺 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀓𑀢𑁄 𑀳𑁄𑀢𑀺, 𑀢𑀢𑁄 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁩) 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀻𑀮𑀕𑀼𑀡𑀧𑀭𑀺𑀳𑀸𑀦𑀺𑀲𑀫𑁆𑀪𑀯𑀢𑁄 𑀦 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁪𑁦) ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼𑀦𑁆𑀢𑀺 𑀯𑀘𑀦𑀢𑁄 𑀧𑀦𑁂𑀢𑁆𑀣 𑀮𑁄𑀓𑀺𑀬𑀸𑀦𑀁 𑀢𑀺𑀣𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺𑀧𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑁆𑀓𑀫𑁂𑀦 𑀘𑀸𑀢𑀼𑀤𑁆𑀤𑀲𑀺𑀁 𑀧𑀦𑁆𑀦𑀭𑀲𑀺𑀁 𑀯𑀸, 𑀧𑀦𑁆𑀦𑀭𑀲𑀺𑀁 𑀘𑀸𑀢𑀼𑀤𑁆𑀤𑀲𑀺𑀁 𑀯𑀸 𑀓𑀭𑁄𑀦𑁆𑀢𑁂𑀳𑁂𑀯 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀦 𑀲𑁄𑀴𑀲𑀫𑀤𑀺𑀯𑀲𑀁 𑀯𑀸 𑀢𑁂𑀭𑀲𑀫𑀤𑀺𑀯𑀲𑀁 𑀯𑀸 𑀉𑀧𑁄𑀲𑀣𑀤𑀺𑀯𑀲𑀁 𑀓𑀭𑁄𑀦𑁆𑀢𑁂𑀳𑀻’’𑀢𑀺.

𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀤𑁂𑀧𑀺 ‘‘𑀓𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸’’𑀢𑀺 𑀲𑀁𑀲𑀬𑀦𑁆𑀢𑀸𑀦𑀁 𑀲𑀁𑀲𑀬𑀯𑀺𑀦𑁄𑀤𑀦𑀢𑁆𑀣𑀁 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸’’𑀢𑀺 (𑀫𑀳𑀸𑀯. 𑁧𑁮𑁪) 𑀪𑀕𑀯𑀸 𑀅𑀯𑁄𑀘. 𑀢𑀢𑁄 𑀢𑀸𑀲𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀦𑀁 𑀉𑀧𑀕𑀫𑀦𑀓𑀸𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀲𑀸𑀯𑀡𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪) ‘‘𑀢𑀲𑁆𑀫𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂, 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀢𑁄 𑀯𑀸 𑀅𑀧𑀭𑀸𑀬 𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂𑀬𑁂𑀯 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’𑀢𑀺 𑀲𑀓𑀺𑀁 𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁮𑁪) ‘‘𑀅𑀧𑀭𑀚𑁆𑀚𑀽𑀢𑀺 𑀆𑀲𑀸𑀴𑁆𑀳𑀺𑀢𑁄 𑀅𑀧𑀭𑀁 𑀤𑀺𑀦𑀁, 𑀧𑀸𑀝𑀺𑀧𑀤𑀦𑁆𑀢𑀺 𑀅𑀢𑁆𑀣𑁄’’𑀢𑀺, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁮𑁪) ‘‘𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀤𑀼𑀢𑀺𑀬𑁂 𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀏𑀯𑀁 𑀧𑀸𑀴𑀺𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀧𑀸𑀝𑀺𑀧𑀤𑀤𑀺𑀯𑀲𑁂𑀬𑁂𑀯 𑀯𑀲𑁆𑀲𑀽𑀧𑀕𑀫𑀦𑀁 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀅𑀫𑀼𑀓𑀢𑀺𑀣𑀺𑀬𑁄𑀕𑁂’’𑀢𑀺 𑀯𑀸 ‘‘𑀅𑀫𑀼𑀓𑀦𑀓𑁆𑀔𑀢𑁆𑀢𑀬𑁄𑀕𑁂’’𑀢𑀺 𑀯𑀸, 𑀢𑀲𑁆𑀫𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀸𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀓𑀮𑀤𑀺𑀯𑀲𑀁 𑀲𑀓𑀮𑀭𑀢𑁆𑀢𑀺 𑀬𑀸𑀯 𑀤𑀼𑀢𑀺𑀬𑀅𑀭𑀼𑀡𑀼𑀕𑁆𑀕𑀫𑀦𑀸 𑀬𑀣𑀸𑀭𑀼𑀘𑀺𑀢𑁂 𑀓𑀸𑀮𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄 𑀏𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁂 𑀧𑀼𑀡𑁆𑀡𑀸𑀢𑀺𑀣𑀺𑀬𑀸 𑀬𑁄𑀕𑁄, 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀬𑁄𑀕𑁄 𑀳𑁄𑀢𑀽𑀢𑀺 𑀯𑀤𑀦𑁆𑀢𑀸𑀦𑀁 𑀯𑀘𑀦𑀁 𑀯𑀺𑀦𑀬𑀯𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀢𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀼𑀡𑁆𑀡𑀸𑀢𑀺𑀣𑀺𑀬𑁄𑀕𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑀬𑁄𑀕𑀜𑁆𑀘 𑀆𑀕𑀫𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸𑀧𑀺 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀺 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀧𑀸𑀴𑀺𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀘 𑀧𑀼𑀡𑁆𑀡𑀸𑀢𑀺𑀣𑀺𑀬𑁄𑀕𑁂 𑀏𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀦 𑀏𑀓𑀸𑀬 𑀢𑀺𑀣𑀺𑀬𑀸 𑀬𑀼𑀢𑁆𑀢𑁂𑀢𑀺 𑀯𑀸 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑀬𑁄𑀕𑁂𑀬𑁂𑀯, 𑀦 𑀲𑀸𑀯𑀡𑀦𑀓𑁆𑀔𑀢𑁆𑀢𑀬𑁄𑀕𑁂𑀢𑀺 𑀯𑀸 𑀅𑀦𑀸𑀕𑀢𑀫𑁂𑀯 𑀙𑀸𑀬𑀁 𑀕𑀳𑁂𑀢𑁆𑀯𑀸 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀯𑀺𑀬 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀺𑀢𑁆𑀯𑀸 𑀓𑁂𑀳𑀺𑀘𑀺 𑀞𑀧𑀺𑀢𑀢𑁆𑀢𑀸 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀅𑀧𑀲𑁆𑀲𑀦𑁆𑀢𑀸 𑀯𑁂𑀤𑀲𑀸𑀫𑀬𑀺𑀓𑀸 𑀢𑀁 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀯𑀲𑁆𑀲𑀽𑀧𑀕𑀫𑀦𑀓𑀸𑀮𑁂 𑀧𑀼𑀡𑁆𑀡𑀸𑀢𑀺𑀣𑀺𑀉𑀢𑁆𑀢𑀭𑀸𑀲𑀸𑀴𑁆𑀳𑀬𑁄𑀕𑀫𑁂𑀯 𑀕𑀯𑁂𑀲𑀦𑁆𑀢𑀸 𑀫𑀸𑀲𑀤𑀺𑀯𑀲𑁂𑀦 𑀲𑀳 𑀆𑀓𑀟𑁆𑀠𑀺𑀢𑀩𑁆𑀩𑀓𑀸𑀮𑁂𑀧𑀺 𑀫𑀸𑀲𑀫𑀢𑁆𑀢𑀫𑁂𑀯 𑀆𑀓𑀟𑁆𑀠𑀦𑁆𑀢𑀺, 𑀫𑀸𑀲𑀫𑀢𑁆𑀢𑀫𑁂𑀯 𑀆𑀓𑀟𑁆𑀠𑀺𑀢𑀩𑁆𑀩𑀓𑀸𑀮𑁂𑀧𑀺 𑀲𑀳 𑀤𑀺𑀯𑀲𑁂𑀦 𑀆𑀓𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁𑀯𑀸𑀤𑀺𑀦𑁄 𑀪𑀺𑀓𑁆𑀔𑀽 ‘‘𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀢𑀺 𑀕𑀸𑀭𑀯𑀲𑀳𑀺𑀢𑀸 𑀮𑀚𑁆𑀚𑀺𑀦𑁄 𑀧𑀡𑁆𑀟𑀺𑀢𑀸 𑀏𑀯𑀁 𑀦 𑀕𑀡𑁆𑀳𑀦𑁆𑀢𑀻𑀢𑀺. 𑀢𑀺𑀣𑀺𑀦𑀓𑁆𑀔𑀢𑁆𑀢𑀬𑁄𑀕𑁄 𑀧𑀦 𑀉𑀧𑁄𑀲𑀣𑀤𑀺𑀯𑀲𑁂𑀬𑁂𑀯 𑀩𑀳𑀼𑀥𑀸 𑀧𑀺𑀝𑀓𑀢𑁆𑀢𑀬𑁂 𑀆𑀕𑀢𑁄, 𑀧𑁄𑀭𑀸𑀡𑀯𑁂𑀤𑀕𑀦𑁆𑀣𑁂𑀲𑀼 𑀘 𑀧𑀲𑀁𑀲𑀺𑀢𑁄, 𑀓𑀤𑀸𑀘𑀺 𑀧𑀦 𑀯𑁄𑀳𑀸𑀭𑀓𑀸𑀮𑁄 𑀢𑀺𑀣𑀺𑀬𑀸 𑀦𑀓𑁆𑀔𑀢𑁆𑀢𑁂𑀦 𑀘 𑀯𑀺𑀲𑀫𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀫𑁂𑀢𑀼𑀁 𑀅𑀥𑀺𑀫𑀸𑀲𑀧𑀢𑀦𑀓𑀸𑀮𑁂 𑀫𑀸𑀲𑀫𑁆𑀧𑀺 𑀤𑀺𑀯𑀲𑀫𑁆𑀧𑀺 𑀆𑀓𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀯𑀺𑀲𑀫𑁂𑀧𑀺 𑀆𑀓𑀟𑁆𑀠𑀦𑀓𑀸𑀮𑁂 𑀲𑀫𑀸𑀧𑁂𑀢𑀩𑁆𑀩𑀁. 𑀏𑀯𑀁 𑀲𑀢𑀺 𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀁 𑀲𑀫𑀪𑀸𑀯𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀜𑁆𑀘𑀫𑀙𑀝𑁆𑀞𑀯𑀸𑀤𑁂𑀲𑀼 𑀅𑀥𑀺𑀫𑀸𑀲𑁄𑀢𑀺 𑀅𑀝𑁆𑀞𑀸𑀭𑀲𑀯𑀲𑁆𑀲𑀢𑁄 𑀅𑀥𑀺𑀓𑀫𑀸𑀲𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀅𑀥𑀺𑀓𑁄 𑀫𑀸𑀲𑁄 𑀅𑀥𑀺𑀫𑀸𑀲𑁄’’𑀢𑀺 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀢𑁆𑀢𑀸 𑀧𑀼𑀮𑁆𑀮𑀺𑀗𑁆𑀕𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀧𑀼𑀩𑁆𑀩𑁂 𑀧𑀦 𑀫𑀸𑀲𑀧𑀼𑀜𑁆𑀚𑀢𑁄 𑀅𑀥𑀺𑀓𑀖𑀝𑀺𑀬𑁄 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀫𑀸𑀲𑀢𑁄 𑀅𑀥𑀺𑀓𑀁 𑀅𑀥𑀺𑀫𑀸𑀲’’𑀦𑁆𑀢𑀺 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀢𑁆𑀢𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀥 𑀧𑀦 ‘‘𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁 𑀲𑀸𑀫𑀡𑁂𑀭𑀁 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑀁 𑀓𑀲𑁆𑀫𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀓𑀲𑁆𑀫𑀺𑀁 𑀯𑀲𑁆𑀲𑁂 𑀙 𑀘𑀸𑀢𑀼𑀤𑁆𑀤𑀲𑀺𑀓𑀉𑀧𑁄𑀲𑀣𑀤𑀺𑀯𑀲𑀸 𑀳𑁄𑀦𑁆𑀢𑀺, 𑀇𑀢𑀺 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀭𑀸𑀚𑀸𑀦𑁄 𑀢𑀢𑀺𑀬𑁂 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀁 𑀉𑀧𑀓𑀟𑁆𑀠𑀦𑁆𑀢𑀺, 𑀇𑀢𑀺 𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀺, 𑀢𑀢𑁄 𑀉𑀧𑁄𑀲𑀣𑀯𑀲𑁂𑀦 𑀧𑀭𑀺𑀳𑀻𑀦𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀧𑀦𑁂𑀢𑁆𑀯𑀸 𑀤𑁆𑀯𑁂 𑀫𑀸𑀲𑀸 𑀅𑀯𑀲𑁂𑀲𑀸 𑀳𑁄𑀦𑁆𑀢𑀺, 𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂 (𑀧𑀸𑀘𑀺. 𑀅𑀝𑁆𑀞. 𑁪𑁦𑁪) ‘‘𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸𑀢𑀺 𑀅𑀥𑀺𑀓𑀫𑀸𑀲𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑁆𑀢𑀸 𑀦𑀺𑀩𑁆𑀩𑁂𑀫𑀢𑀺𑀓𑀸 𑀳𑀼𑀢𑁆𑀯𑀸’’𑀢𑀺 𑀅𑀢𑁆𑀣𑁄 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁦𑁪) 𑀯𑀼𑀢𑁆𑀢𑁄.

𑀢𑀢𑁆𑀭 𑀦𑀦𑀼 𑀘 ‘‘𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀅𑀝𑁆𑀞𑀸𑀭𑀲𑀦𑁆𑀦𑀁…𑀧𑁂… 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀬𑀁 𑀧𑀦 𑀯𑀼𑀢𑁆𑀢𑀁…𑀧𑁂… 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑀁 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀓𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀺 𑀬𑀲𑁆𑀫𑀸 𑀦 𑀉𑀧𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀢𑀺𑀬𑁂’’𑀢𑀺𑀆𑀤𑀺. 𑀧𑀭𑀺𑀘𑁆𑀘𑀢𑁆𑀢𑁂𑀬𑁂𑀯 𑀲𑀫𑁆𑀪𑀯𑀢𑁄, 𑀅𑀧𑀭𑀺𑀘𑁆𑀘𑀢𑁆𑀢𑁂 𑀅𑀲𑀫𑁆𑀪𑀯𑀢𑁄 𑀦 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀳𑁂𑀢𑀼𑀨𑀮𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀁.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 𑀧𑀦 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀏𑀢𑀸𑀦𑀺 𑀯𑀘𑀦𑀸𑀦𑀺 𑀲𑀸𑀫𑀡𑁂𑀭𑀸𑀦𑀁 𑀯𑀻𑀲𑀢𑀺𑀯𑀲𑁆𑀲𑀧𑀭𑀺𑀧𑀼𑀡𑁆𑀡𑀪𑀸𑀯𑀲𑀸𑀥𑀓𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀦 𑀅𑀥𑀺𑀫𑀸𑀲𑀧𑀢𑀦𑀯𑀸𑀭𑁂𑀲𑀼 𑀲𑀤𑀺𑀯𑀲𑀫𑀸𑀲𑀸𑀓𑀟𑁆𑀠𑀦𑀪𑀸𑀯𑀲𑀸𑀥𑀓𑀸𑀦𑀺, 𑀢𑀲𑁆𑀫𑀸 𑀇𑀫𑀸𑀦𑀺 𑀆𑀳𑀭𑀺𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀦 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑁂 𑀓𑀺𑀜𑁆𑀘𑀺 𑀧𑀸𑀞𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀲𑁄𑀪𑀢𑀻𑀢𑀺 𑀓𑀢𑁆𑀯𑀸 𑀈𑀤𑀺𑀲𑀁 𑀧𑀸𑀞𑀁 𑀆𑀳𑀭𑀦𑁆𑀢𑀺. 𑀲𑀼𑀢𑀲𑀦𑁆𑀦𑀺𑀘𑀬𑀧𑀡𑁆𑀟𑀺𑀢𑀸 𑀧𑀦 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀅𑀲𑀸𑀥𑀓𑀢𑁆𑀢𑀸 𑀏𑀯𑀭𑀽𑀧𑀁 𑀦 𑀆𑀳𑀭𑀦𑁆𑀢𑀺. 𑀲𑀼𑀤𑁆𑀥𑀯𑁂𑀤𑀺𑀓𑀸𑀦𑀫𑁆𑀧𑀺 𑀯𑀘𑀦𑁂 𑀯𑀺𑀦𑀬𑀥𑀭𑀸 𑀯𑀺𑀦𑀬𑀫𑁂𑀯 𑀚𑀸𑀦𑀦𑁆𑀢𑀺, 𑀦 𑀩𑀸𑀳𑀺𑀭𑀲𑀫𑀬𑀁. 𑀅𑀬𑀁 𑀧𑀦 𑀓𑀣𑀸 𑀩𑀸𑀳𑀺𑀭𑀲𑀫𑀬𑁂 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀦𑀬𑀥𑀭𑀸𑀦𑀁 𑀅𑀯𑀺𑀲𑀬𑁄𑀢𑀺 𑀫𑀜𑁆𑀜𑀦𑁆𑀢𑀸 𑀯𑀤𑀦𑁆𑀢𑀺.

𑀯𑀺𑀦𑀬𑀥𑀭𑀸 𑀧𑀦 𑀏𑀓𑀘𑁆𑀘𑁂 𑀯𑀺𑀦𑀬𑀫𑁂𑀯 𑀚𑀸𑀦𑀦𑁆𑀢𑀺, 𑀏𑀓𑀘𑁆𑀘𑁂 𑀲𑀓𑀮𑀁 𑀧𑀺𑀝𑀓𑀢𑁆𑀢𑀬𑀁 𑀚𑀸𑀦𑀦𑁆𑀢𑀺, 𑀏𑀓𑀘𑁆𑀘𑁂 𑀲𑀩𑀸𑀳𑀺𑀭𑀲𑀫𑀬𑀁 𑀧𑀺𑀝𑀓𑀢𑁆𑀢𑀬𑀁 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀓𑀣𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑁄𑀬𑁂𑀯 𑀧𑀫𑀸𑀡𑀁. 𑀯𑁂𑀤𑀺𑀓𑀸𑀦𑀫𑁆𑀧𑀺 𑀯𑀘𑀦𑀁 𑀯𑁂𑀤𑀧𑁆𑀧𑀓𑀭𑀡𑀸𑀕𑀢𑀫𑁂𑀯 𑀧𑀫𑀸𑀡𑀁. 𑀦 𑀬𑀁 𑀓𑀺𑀜𑁆𑀘𑀺 𑀳𑀢𑁆𑀣𑀕𑀢𑀕𑀡𑀦𑀫𑀢𑁆𑀢𑀁, 𑀢𑀲𑁆𑀫𑀸 𑀬𑀤𑀸 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀲𑀤𑀺𑀯𑀲𑀁 𑀫𑀸𑀲𑀁 𑀆𑀓𑀟𑁆𑀠𑀺𑀢𑀼𑀓𑀸𑀫𑁄 ‘‘𑀚𑁂𑀝𑁆𑀞𑀫𑀸𑀲𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀁 𑀧𑀦𑁆𑀦𑀭𑀲𑀺𑀬𑀁 𑀓𑀭𑁄𑀦𑁆𑀢𑀽’’𑀢𑀺 𑀬𑀸𑀘𑀺𑀲𑁆𑀲𑀢𑀺, 𑀢𑀤𑀸 ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸’’𑀢𑀺 𑀯𑀘𑀦𑀢𑁄 𑀧𑀦𑁆𑀦𑀭𑀲𑀺𑀬𑀁 𑀉𑀧𑁄𑀲𑀣𑀓𑀭𑀡𑁂 𑀤𑁄𑀲𑁄 𑀦𑀢𑁆𑀣𑀺, 𑀬𑀤𑀸 𑀲𑀼𑀤𑁆𑀥𑀫𑀸𑀲𑀫𑁂𑀯 𑀆𑀓𑀟𑁆𑀠𑀺𑀢𑀼𑀓𑀸𑀫𑁄 ‘‘𑀘𑀸𑀢𑀼𑀤𑁆𑀤𑀲𑀺𑀬𑀁 𑀓𑀭𑁄𑀦𑁆𑀢𑀽’’𑀢𑀺 𑀬𑀸𑀘𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀧𑀓𑀢𑀺𑀬𑀸𑀧𑀺 𑀚𑁂𑀝𑁆𑀞𑀫𑀸𑀲𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀤𑁄𑀲𑁄 𑀦𑀢𑁆𑀣𑀺, 𑀉𑀪𑀬𑀣𑀸𑀧𑀺 𑀉𑀧𑁄𑀲𑀣𑁄 𑀲𑀼𑀓𑀢𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑁄. 𑀢𑀢𑁄 𑀧𑀭𑀁 𑀧𑀞𑀫𑀸𑀲𑀸𑀴𑁆𑀳𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑁂𑀧𑀺 𑀓𑀸𑀴𑀧𑀓𑁆𑀔𑁂𑀧𑀺 𑀤𑀼𑀢𑀺𑀬𑀸𑀲𑀸𑀴𑁆𑀳𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑁂𑀧𑀺 𑀧𑀦𑁆𑀦𑀭𑀲𑀻𑀉𑀧𑁄𑀲𑀣𑀁 𑀓𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀢𑀺𑀣𑀺𑀬𑁄𑀕𑀁 𑀯𑀸 𑀦𑀓𑁆𑀔𑀢𑁆𑀢𑀬𑁄𑀕𑀁 𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀸𑀢𑁄 𑀅𑀭𑀼𑀡𑀼𑀕𑁆𑀕𑀫𑀦𑀸𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀼𑀦 𑀅𑀭𑀼𑀡𑀼𑀕𑁆𑀕𑀫𑀦𑀸 𑀲𑀓𑀮𑀤𑀺𑀯𑀲𑀭𑀢𑁆𑀢𑀺𑀬𑀁 𑀬𑀣𑀸𑀚𑁆𑀛𑀸𑀲𑀬𑀁 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁄 𑀲𑀽𑀧𑀕𑀢𑁄𑀯 𑀳𑁄𑀢𑀺, 𑀦𑀢𑁆𑀣𑀺 𑀓𑁄𑀘𑀺 𑀤𑁄𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀪𑀯𑀢𑁆𑀯𑁂𑀯𑀁, 𑀧𑀸𑀢𑁄𑀯 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁄 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) ‘‘𑀲𑀘𑁂 𑀧𑀸𑀢𑁄𑀯 𑀕𑀸𑀳𑀺𑀢𑁂 𑀲𑁂𑀦𑀸𑀲𑀦𑁂 𑀅𑀜𑁆𑀜𑁄 𑀯𑀺𑀢𑀓𑁆𑀓𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀬𑀸𑀘𑀢𑀺, ‘𑀕𑀳𑀺𑀢𑀁, 𑀪𑀦𑁆𑀢𑁂, 𑀲𑁂𑀦𑀸𑀲𑀦𑀁, 𑀯𑀲𑁆𑀲𑀽𑀧𑀕𑀢𑁄 𑀲𑀗𑁆𑀖𑁄, 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄, 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀯𑀲𑀣𑀸’𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀙𑀩𑁆𑀩𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀸𑀮𑀗𑁆𑀓𑀸𑀭-𑀝𑀻𑀓𑀸 (𑀤𑀼𑀢𑀺𑀬𑁄 𑀪𑀸𑀕𑁄)