𑁨𑁫. 𑀉𑀧𑁄𑀲𑀣𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁬𑁮. 𑀏𑀯𑀁 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀉𑀧𑁄𑀲𑀣𑀧𑀯𑀸𑀭𑀡𑀸𑀢𑀺 𑀏𑀢𑁆𑀣’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁄𑀲𑀣𑀲𑀤𑁆𑀤𑁄 𑀢𑀸𑀯 𑁋

‘‘𑀉𑀤𑁆𑀤𑁂𑀲𑁂 𑀧𑀸𑀢𑀺𑀫𑁄𑀓𑁆𑀔𑀲𑁆𑀲, 𑀧𑀡𑁆𑀡𑀢𑁆𑀢𑀺𑀬𑀫𑀼𑀧𑁄𑀲𑀣𑁄;

𑀉𑀧𑀯𑀸𑀲𑁂 𑀘 𑀅𑀝𑁆𑀞𑀗𑁆𑀕𑁂, 𑀉𑀧𑁄𑀲𑀣𑀤𑀺𑀦𑁂 𑀲𑀺𑀬𑀸’’𑀢𑀺. 𑁋

𑀯𑀘𑀦𑀢𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀧𑀡𑁆𑀡𑀢𑁆𑀢𑀺𑀬𑀁 𑀉𑀧𑀯𑀸𑀲𑁂 𑀅𑀝𑁆𑀞𑀗𑁆𑀕𑀲𑀻𑀮𑁂 𑀉𑀧𑁄𑀲𑀣𑀤𑀺𑀦𑁂 𑀘 𑀯𑀢𑁆𑀢𑀢𑀺. 𑀢𑀣𑀸 𑀳𑁂𑀲 ‘‘𑀆𑀬𑀸𑀫𑀸𑀯𑀼𑀲𑁄 𑀓𑀧𑁆𑀧𑀺𑀦 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫𑁦; 𑀫. 𑀦𑀺. 𑀅𑀝𑁆𑀞. 𑁩.𑁮𑁫) 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀆𑀕𑀢𑁄, ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬) 𑀧𑀡𑁆𑀡𑀢𑁆𑀢𑀺𑀬𑀁, ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑁂𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲 𑀉𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁯) 𑀉𑀧𑀯𑀸𑀲𑁂, ‘‘𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄, 𑀯𑀺𑀲𑀸𑀔𑁂, 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁪𑁩) 𑀅𑀝𑁆𑀞𑀗𑁆𑀕𑀲𑀻𑀮𑁂. ‘‘𑀦, 𑀪𑀺𑀓𑁆𑀔𑀯𑁂, 𑀉𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸𑀆𑀯𑀸𑀲𑀸 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁦𑁪𑁮) 𑀉𑀧𑁄𑀲𑀣𑀤𑀺𑀦𑁂 𑀯𑀢𑁆𑀢𑀢𑀺. ‘‘𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄’’𑀢𑀺𑀆𑀤𑀻𑀲𑀼 𑀧𑀸𑀭𑀺𑀲𑀼𑀤𑁆𑀥𑀺𑀅𑀥𑀺𑀝𑁆𑀞𑀸𑀦𑁂𑀲𑀼𑀧𑀺 𑀯𑀢𑁆𑀢𑀢𑀺. 𑀢𑁂 𑀧𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀅𑀦𑁆𑀢𑁄𑀕𑀥𑀸𑀢𑀺 𑀓𑀢𑁆𑀯𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸. 𑀇𑀥 𑀧𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀉𑀧𑁄𑀲𑀣𑀤𑀺𑀦𑁂 𑀘 𑀯𑀢𑁆𑀢𑀢𑀺. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀉𑀧𑀯𑀲𑀦𑀁 𑀉𑀧𑁄𑀲𑀣𑁄, 𑀲𑀻𑀮𑁂𑀦 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑀦𑁆𑀢𑁆𑀬𑀢𑁆𑀣𑁄. 𑀉𑀧𑁄𑀲𑀣𑀤𑀺𑀦𑁂 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀏𑀢𑀲𑁆𑀫𑀺𑀁 𑀤𑀺𑀯𑀲𑁂 𑀲𑀻𑀮𑁂𑀦 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑁆𑀬𑀢𑁆𑀣𑁄.

𑀧𑀯𑀸𑀭𑀡𑀸-𑀲𑀤𑁆𑀤𑁄 𑀧𑀦 ‘‘𑀧𑀯𑀸𑀭𑀡𑀸 𑀧𑀝𑀺𑀓𑁆𑀔𑁂𑀧𑁂, 𑀓𑀣𑀺𑀢𑀸𑀚𑁆𑀛𑁂𑀲𑀦𑀸𑀬 𑀘𑀸’’𑀢𑀺 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑀯𑀘𑀦𑀢𑁄 𑀧𑀝𑀺𑀓𑁆𑀔𑁂𑀧𑁂 𑀅𑀚𑁆𑀛𑁂𑀲𑀦𑁂 𑀘 𑀯𑀢𑁆𑀢𑀢𑀺. 𑀢𑀢𑁆𑀣 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀅𑀦𑀢𑀺𑀭𑀺𑀢𑁆𑀢𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁨𑁩𑁮) 𑀧𑀝𑀺𑀓𑁆𑀔𑁂𑀧𑁂, ‘‘𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁨𑁧𑁦) 𑀅𑀚𑁆𑀛𑁂𑀲𑀦𑁂, ‘‘𑀅𑀚𑁆𑀚𑀧𑀯𑀸𑀭𑀡𑀸 𑀘𑀸𑀢𑀼𑀤𑁆𑀤𑀲𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑀅𑀝𑁆𑀞. 𑁨𑁧𑁨) 𑀧𑀯𑀸𑀭𑀡𑀸𑀤𑀺𑀯𑀲𑁂. 𑀲𑁄 𑀧𑀦 𑀅𑀚𑁆𑀛𑁂𑀲𑀦𑀤𑀺𑀯𑀲𑁄𑀬𑁂𑀯𑀸𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄. 𑀇𑀥 𑀧𑀦 𑀅𑀚𑁆𑀛𑁂𑀲𑀦𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀯𑀸𑀭𑀻𑀬𑀢𑁂 𑀧𑀯𑀸𑀭𑀡𑀸, 𑀧𑀓𑀸𑀭𑁂𑀦 𑀇𑀘𑁆𑀙𑀻𑀬𑀢𑁂𑀢𑁆𑀬𑀢𑁆𑀣𑁄. 𑀧-𑀧𑀼𑀩𑁆𑀩 𑀯𑀭𑀥𑀸𑀢𑀼 𑀘𑀼𑀭𑀸𑀤𑀺𑀕𑀡𑀺𑀓𑀸𑀬𑀁.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀸𑀦𑀦𑁆𑀢𑀭𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁄, 𑀢𑀤𑀦𑀦𑁆𑀢𑀭𑀁 𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑁄 𑀲𑀗𑁆𑀕𑀻𑀢𑁄, 𑀢𑀣𑀸𑀧𑀺 𑀉𑀧𑁄𑀲𑀣𑀧𑀯𑀸𑀭𑀡𑀓𑀫𑁆𑀫𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀲𑀫𑀸𑀦𑀢𑁆𑀢𑀸 𑀬𑀫𑀓𑀫𑀺𑀯 𑀪𑀽𑀢𑀢𑁆𑀢𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀣𑁂𑀦𑁆𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺 𑀲𑀮𑁆𑀮𑀳𑀼𑀓𑀕𑀦𑁆𑀣𑁄 𑀘𑀸𑀢𑀺 𑀫𑀦𑁆𑀢𑁆𑀯𑀸 𑀔𑀦𑁆𑀥𑀓𑀤𑁆𑀯𑀬𑀲𑀗𑁆𑀕𑀳𑀺𑀢𑀁 𑀅𑀢𑁆𑀣𑀁 𑀏𑀓𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁂𑀦 𑀤𑀲𑁆𑀲𑁂𑀢𑀺 𑀆𑀘𑀭𑀺𑀬𑁄. 𑀢𑀢𑁆𑀣 𑀘𑀸𑀢𑀼𑀤𑁆𑀤𑀲𑀺𑀓𑁄 𑀧𑀦𑁆𑀦𑀭𑀲𑀺𑀓𑁄 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄𑀢𑀺 𑀤𑀺𑀯𑀲𑀯𑀲𑁂𑀦 𑀢𑀬𑁄 𑀉𑀧𑁄𑀲𑀣𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀤𑁆𑀤𑀲𑀺𑀬𑀁 𑀦𑀺𑀬𑀼𑀢𑁆𑀢𑁄 𑀘𑀸𑀢𑀼𑀤𑁆𑀤𑀲𑀺𑀓𑁄, 𑀏𑀯𑀁 𑀧𑀦𑁆𑀦𑀭𑀲𑀺𑀓𑁄. 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄 𑀦𑀸𑀫 𑀲𑀗𑁆𑀖𑀲𑀸𑀫𑀕𑁆𑀕𑀺𑀓𑀤𑀺𑀯𑀲𑁂 𑀓𑀸𑀢𑀩𑁆𑀩𑀉𑀧𑁄𑀲𑀣𑁄. 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑀁 𑀢𑀺𑀡𑁆𑀡𑀁 𑀉𑀢𑀽𑀦𑀦𑁆𑀢𑀺 𑀏𑀢𑁆𑀣 𑀳𑁂𑀫𑀦𑁆𑀢𑀉𑀢𑀼 𑀦𑀸𑀫 𑀅𑀧𑀭𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀲𑁆𑀲 𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀨𑀕𑁆𑀕𑀼𑀦𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀕𑀺𑀫𑁆𑀳𑀉𑀢𑀼 𑀦𑀸𑀫 𑀨𑀕𑁆𑀕𑀼𑀦𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀯𑀲𑁆𑀲𑀸𑀦𑀉𑀢𑀼 𑀦𑀸𑀫 𑀆𑀲𑀸𑀴𑁆𑀳𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸. 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀘𑀸𑀢𑀼𑀤𑁆𑀤𑀲𑀺𑀓𑀸𑀢𑀺 𑀳𑁂𑀫𑀦𑁆𑀢𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑁂 𑀘 𑀲𑀢𑁆𑀢𑀫𑁂 𑀘 𑀧𑀓𑁆𑀔𑁂 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸, 𑀫𑀺𑀕𑀲𑀺𑀭𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂, 𑀫𑀸𑀖𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀕𑀺𑀫𑁆𑀳𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑁂 𑀘𑀺𑀢𑁆𑀢𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀲𑀢𑁆𑀢𑀫𑁂 𑀚𑁂𑀝𑁆𑀞𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀘, 𑀯𑀲𑁆𑀲𑀸𑀦𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑁂 𑀲𑀸𑀯𑀡𑀲𑁆𑀲 𑀓𑀸𑀴𑀧𑀓𑁆𑀔𑁂 𑀘 𑀲𑀢𑁆𑀢𑀫𑁂 𑀅𑀲𑁆𑀲𑀬𑀼𑀚𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀘𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀸 𑀧𑀦𑁆𑀦𑀭𑀲𑀺𑀓𑀸𑀢𑀺 𑀲𑁂𑀲𑀸 𑀅𑀝𑁆𑀞𑀸𑀭𑀲 𑀧𑀦𑁆𑀦𑀭𑀲𑀺𑀓𑀸.

𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀓𑀢𑁆𑀢𑀺𑀓𑀲𑁆𑀲 𑀘 𑀓𑀸𑀴𑀫𑁆𑀳𑀸;

𑀬𑀸𑀯 𑀨𑀕𑁆𑀕𑀼𑀦𑀧𑀼𑀡𑁆𑀡𑀫𑀸;

𑀳𑁂𑀫𑀦𑁆𑀢𑀓𑀸𑀮𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄;

𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀨𑀕𑁆𑀕𑀼𑀦𑀲𑁆𑀲 𑀘 𑀓𑀸𑀴𑀫𑁆𑀳𑀸;

𑀬𑀸𑀯 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸;

𑀕𑀺𑀫𑁆𑀳𑀓𑀸𑀮𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄;

𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀆𑀲𑀸𑀴𑁆𑀳𑀲𑁆𑀲 𑀘 𑀓𑀸𑀴𑀫𑁆𑀳𑀸;

𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸;

𑀯𑀲𑁆𑀲𑀓𑀸𑀮𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄;

𑀅𑀝𑁆𑀞 𑀳𑁄𑀦𑁆𑀢𑀺 𑀉𑀧𑁄𑀲𑀣𑀸.

‘‘𑀉𑀢𑀽𑀦𑀁 𑀧𑀦 𑀢𑀺𑀡𑁆𑀡𑀦𑁆𑀦𑀁, 𑀧𑀓𑁆𑀔𑁂 𑀢𑀢𑀺𑀬𑀲𑀢𑁆𑀢𑀫𑁂;

𑀘𑀢𑀼𑀤𑁆𑀤𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀤𑁆𑀤𑀺𑀲𑀦𑁆𑀢𑀺 𑀦𑀬𑀜𑁆𑀜𑀼𑀦𑁄’’𑀢𑀺. (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸);

𑀏𑀯𑀁 𑀏𑀓𑀲𑀁𑀯𑀘𑁆𑀙𑀭𑁂 𑀘𑀢𑀼𑀯𑀻𑀲𑀢𑀺 𑀉𑀧𑁄𑀲𑀣𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀳𑁂𑀫𑀦𑁆𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀏𑀓𑁂𑀓𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀧𑀘𑁆𑀘𑁂𑀓𑀁 𑀅𑀝𑁆𑀞𑀅𑀝𑁆𑀞𑀉𑀧𑁄𑀲𑀣𑀢𑁆𑀢𑀸 𑀉𑀢𑀼𑀢𑁆𑀢𑀬𑀲𑀫𑁄𑀥𑀸𑀦𑀪𑀽𑀢𑁂 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀘𑀢𑀼𑀯𑀻𑀲𑀢𑀺 𑀉𑀧𑁄𑀲𑀣𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀸𑀯 𑀧𑀓𑀢𑀺𑀘𑀸𑀭𑀺𑀢𑁆𑀢𑀦𑁆𑀢𑀺 𑀇𑀤𑀁 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀙𑀘𑀸𑀢𑀼𑀤𑁆𑀤𑀲𑀺𑀓𑀅𑀝𑁆𑀞𑀸𑀭𑀲𑀧𑀦𑁆𑀦𑀭𑀲𑀺𑀓𑀉𑀧𑁄𑀲𑀣𑀓𑀭𑀡𑀁 𑀢𑀸𑀯 𑀧𑀞𑀫𑀁 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦 𑀘𑀸𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀳𑁄𑀢𑀺, 𑀦 𑀩𑀳𑀼𑀢𑀭𑀸𑀯𑀸𑀲𑀺𑀓𑀸𑀤𑀺𑀦𑀸 𑀓𑀸𑀭𑀡𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁩𑁬) 𑀯𑀘𑀦𑀢𑁄 ‘‘𑀬𑁄 𑀧𑀦 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁭𑁮) 𑀘 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀓𑀺𑀦𑁆𑀢𑀺 𑀏𑀓𑀯𑀸𑀭𑀁. 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀯𑀸𑀲𑀺𑀓𑁂𑀳𑀺 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑁂 𑀓𑀭𑀺𑀬𑀫𑀸𑀦𑁂 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀁, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼𑀁, 𑀓𑀣𑀁 𑀫𑀬𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁪𑁦) 𑀯𑀘𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑀲𑀼𑀢𑁆𑀢𑀲𑁆𑀲 𑀏𑀓𑁂𑀓𑀲𑁆𑀲 𑀉𑀢𑀼𑀦𑁄 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀅𑀯𑀲𑁂𑀲𑀲𑁆𑀲 𑀧𑀦𑁆𑀦𑀭𑀲𑁂 𑀯𑀸 𑀲𑀓𑀺𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺. 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦𑀧𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 ‘‘𑀆𑀕𑀦𑁆𑀢𑀼𑀓𑁂𑀳𑀻’’𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀲𑀢𑀻𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀼𑀭𑀽𑀧𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺. 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀘𑀸𑀢𑀼𑀤𑁆𑀤𑀲𑁂𑀢𑀺 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀢𑀢𑀺𑀬𑀲𑀢𑁆𑀢𑀫𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀢𑁄 𑀅𑀜𑁆𑀜𑀲𑁆𑀫𑀺𑀁 𑀘𑀸𑀢𑀼𑀤𑁆𑀤𑀲𑁂.

𑀢𑀢𑁆𑀭𑀸𑀬𑀁 𑀧𑀸𑀴𑀺 (𑀫𑀳𑀸𑀯. 𑁧𑁭𑁮) 𑁋

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀧𑀤𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻, 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻, 𑀆𑀕𑀦𑁆𑀢𑀼𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀯𑀸𑀲𑀺𑀓𑁂𑀳𑀺 𑀆𑀕𑀦𑁆𑀢𑀼𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀦𑁆𑀦𑀭𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀸𑀝𑀺𑀧𑀤𑁄. 𑀲𑀘𑁂 𑀆𑀯𑀸𑀲𑀺𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀲𑀫𑀲𑀫𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀲𑀸𑀫𑀕𑁆𑀕𑀻 𑀯𑀸 𑀤𑀸𑀢𑀩𑁆𑀩𑀸, 𑀦𑀺𑀲𑁆𑀲𑀻𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀆𑀕𑀦𑁆𑀢𑀼𑀓𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀆𑀕𑀦𑁆𑀢𑀼𑀓𑁂𑀳𑀺 𑀆𑀯𑀸𑀲𑀺𑀓𑀸𑀦𑀁 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸 𑀲𑀸𑀫𑀕𑁆𑀕𑀻, 𑀆𑀯𑀸𑀲𑀺𑀓𑁂𑀳𑀺 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺.

𑀢𑀢𑁆𑀭𑀸𑀬𑀁 𑀅𑀝𑁆𑀞𑀓𑀣𑀸 (𑀫𑀳𑀸𑀯. 𑀅𑀝𑁆𑀞. 𑁧𑁭𑁮) 𑁋

𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑁄 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄𑀢𑀺 𑀏𑀢𑁆𑀣 𑀬𑁂𑀲𑀁 𑀧𑀦𑁆𑀦𑀭𑀲𑁄, 𑀢𑁂 𑀢𑀺𑀭𑁄𑀭𑀝𑁆𑀞𑀢𑁄 𑀯𑀸 𑀆𑀕𑀢𑀸, 𑀅𑀢𑀻𑀢𑀁 𑀯𑀸 𑀉𑀧𑁄𑀲𑀣𑀁 𑀘𑀸𑀢𑀼𑀤𑁆𑀤𑀲𑀺𑀓𑀁 𑀅𑀓𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀯𑀸𑀲𑀺𑀓𑀸𑀦𑀁 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀯𑀸𑀲𑀺𑀓𑁂𑀳𑀺 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑁂 𑀓𑀭𑀺𑀬𑀫𑀸𑀦𑁂 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀦𑀸𑀓𑀸𑀫𑀸 𑀤𑀸𑀢𑀩𑁆𑀩𑀸𑀢𑀺 𑀦 𑀅𑀦𑀺𑀘𑁆𑀙𑀸𑀬 𑀤𑀸𑀢𑀩𑁆𑀩𑀸𑀢𑀺.

‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀸𑀕𑀢𑀸 𑀧𑀸𑀴𑀺 (𑀫𑀳𑀸𑀯. 𑁨𑁪𑁦) 𑁋 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀲𑀸𑀫𑀦𑁆𑀢𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺 ‘‘𑀫𑀬𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀞𑀧𑁂𑀲𑁆𑀲𑀸𑀫𑀸’’𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼𑀁, 𑀓𑀣𑀁 𑀫𑀬𑀁 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀧𑀯𑀸𑀭𑁂𑀬𑁆𑀬𑀸𑀫𑀸𑀢𑀺.

𑀢𑀢𑁆𑀭𑀸𑀬𑀁 𑀅𑀝𑁆𑀞𑀓𑀣𑀸 (𑀫𑀳𑀸𑀯. 𑀅𑀝𑁆𑀞. 𑁨𑁪𑁦) 𑁋 𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑀧𑀜𑁆𑀘𑀫𑀸 𑀤𑁆𑀯𑁂, 𑀢𑀢𑀺𑀬𑁄 𑀧𑀦 𑀧𑀓𑀢𑀺𑀬𑀸𑀧𑀺 𑀘𑀸𑀢𑀼𑀤𑁆𑀤𑀲𑀺𑀓𑁄𑀬𑁂𑀯𑀸𑀢𑀺, 𑀢𑀲𑁆𑀫𑀸 𑀢𑀢𑀺𑀬𑀘𑀢𑀼𑀢𑁆𑀣𑀸 𑀯𑀸 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸 𑀯𑀸 𑀤𑁆𑀯𑁂 𑀢𑀬𑁄 𑀘𑀸𑀢𑀼𑀤𑁆𑀤𑀲𑀺𑀓𑀸 𑀓𑀸𑀢𑀩𑁆𑀩𑀸. 𑀅𑀣 𑀘𑀢𑀼𑀢𑁆𑀣𑁂 𑀓𑀢𑁂 𑀲𑀼𑀡𑀦𑁆𑀢𑀺, 𑀧𑀜𑁆𑀘𑀫𑁄 𑀘𑀸𑀢𑀼𑀤𑁆𑀤𑀲𑀺𑀓𑁄 𑀓𑀸𑀢𑀩𑁆𑀩𑁄, 𑀏𑀯𑀫𑁆𑀧𑀺 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀸 𑀪𑀡𑁆𑀟𑀦𑀓𑀸𑀭𑀓𑀸𑀦𑀁 𑀢𑁂𑀭𑀲𑁂 𑀯𑀸 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀇𑀫𑁂 𑀧𑀦𑁆𑀦𑀭𑀲𑀻𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀦𑁆𑀢𑀻𑀢𑀺.

𑀢𑀢𑁆𑀣 𑀅𑀬𑀁 𑀲𑀸𑀭𑀢𑁆𑀣𑀤𑀻𑀧𑀦𑀻𑀧𑀸𑀞𑁄 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁨𑁪𑁦) 𑁋 𑀘𑀢𑀼𑀢𑁆𑀣𑁂 𑀓𑀢𑁂 𑀲𑀼𑀡𑀦𑁆𑀢𑀻𑀢𑀺 𑀘𑀢𑀼𑀢𑁆𑀣𑁂 𑀧𑀦𑁆𑀦𑀭𑀲𑀺𑀓𑀼𑀧𑁄𑀲𑀣𑁂 𑀓𑀢𑁂 𑀅𑀫𑁆𑀳𑀸𑀓𑀁 𑀧𑀯𑀸𑀭𑀡𑀁 𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀲𑀼𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀻𑀢𑀺 𑀢𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀻𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀧𑀸𑀞𑁄 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁨𑁪𑁦) 𑁋 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀻𑀢𑀺 𑀢𑀢𑀺𑀬𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀺𑀬𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸 𑀳𑁄𑀦𑁆𑀢𑀺. 𑀪𑀡𑁆𑀟𑀦𑀓𑀸𑀭𑀓𑀸𑀦𑀁 𑀢𑁂𑀭𑀲𑁂 𑀯𑀸 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀇𑀫𑁂 𑀧𑀦𑁆𑀦𑀭𑀲𑀻𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀬𑀣𑀸𑀲𑀓𑀁 𑀉𑀧𑁄𑀲𑀣𑀓𑀭𑀡𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀯𑁄𑀳𑀸𑀭𑁄, 𑀦 𑀘𑀦𑁆𑀤𑀕𑀢𑀺𑀲𑀺𑀤𑁆𑀥𑀺𑀬𑀸 𑀢𑀺𑀣𑀺𑀬𑀸 𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀏𑀯𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀅𑀦𑀼𑀯𑀢𑁆𑀢𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁮𑁬) 𑀯𑀘𑀦𑀢𑁄 𑀧𑀦𑁂𑀢𑁆𑀣 𑀮𑁄𑀓𑀺𑀬𑀸𑀦𑀁 𑀢𑀺𑀣𑀺𑀁 𑀅𑀦𑀼𑀯𑀢𑁆𑀢𑀦𑁆𑀢𑁂𑀳𑀺𑀧𑀺 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑁆𑀓𑀫𑁂𑀦 𑀘𑀸𑀢𑀼𑀤𑁆𑀤𑀲𑀺𑀁 𑀧𑀦𑁆𑀦𑀭𑀲𑀺𑀁 𑀯𑀸 𑀧𑀦𑁆𑀦𑀭𑀲𑀺𑀁 𑀘𑀸𑀢𑀼𑀤𑁆𑀤𑀲𑀺𑀁 𑀯𑀸 𑀓𑀭𑁄𑀦𑁆𑀢𑁂𑀳𑁂𑀯 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀁, 𑀦 𑀧𑀦 𑀲𑁄𑀴𑀲𑀫𑀤𑀺𑀯𑀲𑀁 𑀯𑀸 𑀢𑁂𑀭𑀲𑀫𑀤𑀺𑀯𑀲𑀁 𑀯𑀸 𑀉𑀧𑁄𑀲𑀣𑀤𑀺𑀯𑀲𑀁 𑀓𑀭𑁄𑀦𑁆𑀢𑁂𑀳𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀫𑁆𑀧𑀺 (𑀫𑀳𑀸𑀯. 𑁨𑁪𑁦) ‘‘𑀤𑁆𑀯𑁂 𑀢𑀬𑁄 𑀉𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑀺𑀓𑁂 𑀓𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 ‘‘𑀤𑁆𑀯𑀸𑀤𑀲𑀺𑀬𑀁, 𑀢𑁂𑀭𑀲𑀺𑀬𑀁 𑀯𑀸 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁄. ‘‘𑀲𑀓𑀺𑀁 𑀧𑀓𑁆𑀔𑀲𑁆𑀲 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 (𑀫𑀳𑀸𑀯. 𑁧𑁩𑁬) 𑀉𑀧𑀯𑀼𑀢𑁆𑀢𑀓𑁆𑀓𑀫𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀢𑀺𑀣𑀺𑀓𑁆𑀓𑀫𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺.

𑀦 𑀓𑁂𑀯𑀮𑀁 𑀉𑀧𑁄𑀲𑀣𑀤𑀺𑀯𑀲𑀸𑀬𑁂𑀯 𑀢𑀬𑁄 𑀳𑁄𑀦𑁆𑀢𑀺, 𑀅𑀣 𑀔𑁄 𑀧𑀯𑀸𑀭𑀡𑀸𑀤𑀺𑀯𑀲𑀸𑀧𑀻𑀢𑀺 𑀆𑀳 ‘‘𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀫𑀸𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 𑀫𑀺𑀦𑀺𑀢𑀩𑁆𑀩𑀢𑁄, 𑀲𑁄 𑀏𑀢𑁆𑀣 𑀲𑀩𑁆𑀩𑀓𑀮𑀸𑀧𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄𑀢𑀺 𑀧𑀼𑀡𑁆𑀡𑀫𑀸. 𑀧𑀼𑀩𑁆𑀩𑀓𑀢𑁆𑀢𑀺𑀓𑀸𑀬 𑀧𑀼𑀡𑁆𑀡𑀫𑀸 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀸. 𑀲𑀸 𑀳𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀁 𑀦𑀺𑀯𑀢𑁆𑀢𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀁𑀬𑁂𑀯. 𑀪𑀡𑁆𑀟𑀦𑀓𑀸𑀭𑀓𑁂𑀳𑀻𑀢𑀺 𑀓𑀮𑀳𑀓𑀸𑀭𑀓𑁂𑀳𑀺. 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀉𑀓𑁆𑀓𑀟𑁆𑀠𑀦𑁆𑀢𑀺, 𑀪𑀡𑁆𑀟𑀦𑀓𑀸𑀭𑀓𑁂 𑀅𑀦𑀼𑀯𑀸𑀤𑀯𑀲𑁂𑀦 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀸𑀤𑀺𑀁 𑀧𑀭𑀺𑀘𑁆𑀘𑀚𑀦𑁆𑀢𑀸 𑀧𑀯𑀸𑀭𑀡𑀁 𑀓𑀸𑀴𑀧𑀓𑁆𑀔𑀁 𑀚𑀼𑀡𑁆𑀳𑀧𑀓𑁆𑀔𑀦𑁆𑀢𑀺 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄, ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑁄 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺, ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑁄 𑀆𑀯𑀸𑀲𑀺𑀓𑀸, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀫, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀫, 𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 (𑀫𑀳𑀸𑀯. 𑁨𑁪𑁦) 𑀘 𑀏𑀯𑀁 𑀜𑀢𑁆𑀢𑀺𑀬𑀸 𑀧𑀯𑀸𑀭𑀡𑀁 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑁄 𑀘𑀸𑀢𑀼𑀤𑁆𑀤𑀲𑁄, 𑀤𑀺𑀯𑀲𑁄. 𑀬𑀁 𑀲𑀦𑁆𑀥𑀸𑀬 ‘‘𑀆𑀕𑀫𑁂 𑀓𑀸𑀴𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑀬𑀺𑀁𑀲𑀼. 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀯𑀸𑀢𑀺 𑀓𑁄𑀫𑀼𑀤𑀺𑀘𑀸𑀢𑀼𑀫𑀸𑀲𑀺𑀦𑀺𑀧𑀼𑀡𑁆𑀡𑀫𑀤𑀺𑀯𑀲𑁄 𑀯𑀸. 𑀬𑀁 𑀲𑀦𑁆𑀥𑀸𑀬 ‘‘𑀆𑀕𑀫𑁂 𑀚𑀼𑀡𑁆𑀳𑁂 𑀧𑀯𑀸𑀭𑁂𑀬𑁆𑀬𑀸𑀫𑀸’’𑀢𑀺 𑀜𑀢𑁆𑀢𑀺𑀁 𑀞𑀧𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀦 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀯𑀲𑁆𑀲𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀮𑀩𑁆𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀢𑀫𑁆𑀧𑀺 𑀚𑀼𑀡𑁆𑀳𑀁 𑀅𑀦𑀼𑀯𑀲𑁂𑀬𑁆𑀬𑀼𑀁. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀲𑀩𑁆𑀩𑁂𑀳𑁂𑀯 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀓𑀸𑀫𑀸 𑀧𑀯𑀸𑀭𑁂𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁪𑁦). 𑀢𑁂𑀦𑁂𑀯𑀸𑀳 ‘‘𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀜𑁆𑀘 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀏𑀯 𑀯𑀸’’𑀢𑀺. 𑀬𑀤𑀺 𑀳𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀸𑀭𑁂𑀬𑁆𑀬, 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀼𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀩𑁆𑀩𑀁 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁨𑁩𑁩). 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀸𑀬𑁄𑀕𑀢𑁄 𑀧𑀯𑀸𑀭𑀡𑀸𑀤𑀺𑀯𑀲𑀸. 𑀧𑀺-𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀯𑀸𑀭𑀡𑀸𑀤𑀺𑀯𑀲𑀸𑀯, 𑀅𑀣 𑀔𑁄 𑀢𑀤𑀜𑁆𑀜𑁂 𑀉𑀧𑁄𑀲𑀣𑀤𑀺𑀯𑀲𑀸𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀫𑁆𑀧𑀻𑀢𑀺 𑀧𑀯𑀸𑀭𑀡𑀢𑁆𑀢𑀬𑀫𑁆𑀧𑀺. 𑀢𑀣𑀸𑀭𑀽𑀧𑀧𑀘𑁆𑀘𑀬𑁂𑀢𑀺 𑀩𑀳𑀼𑀢𑀭𑀸𑀯𑀸𑀲𑀺𑀓𑀸𑀤𑀺𑀧𑀘𑁆𑀘𑀬𑁂. 𑀤𑁆𑀯𑀺𑀦𑁆𑀦𑀁 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀦𑀦𑁆𑀢𑀺 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀲𑁆𑀲𑀬𑀼𑀚𑀓𑁄𑀫𑀼𑀤𑀺𑀧𑀼𑀡𑁆𑀡𑀫𑀸𑀦𑀁.

𑀇𑀤𑀸𑀦𑀺 𑀬𑁄 𑀲𑁄 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑀤𑀺𑀯𑀲𑁄 𑀯𑀼𑀢𑁆𑀢𑁄, 𑀢𑀜𑁆𑀘 𑀢𑀧𑁆𑀧𑀲𑀗𑁆𑀕𑁂𑀦 𑀲𑀸𑀫𑀕𑁆𑀕𑀺𑀧𑀯𑀸𑀭𑀡𑀸𑀤𑀺𑀯𑀲𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀑𑀲𑀸𑀭𑀺𑀢𑁂 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀓𑁂 𑀪𑀺𑀓𑁆𑀔𑀼𑀲𑁆𑀫𑀺𑀁 𑀑𑀲𑀸𑀭𑀺𑀢𑁂, 𑀢𑀁 𑀕𑀳𑁂𑀢𑁆𑀯𑀸 𑀲𑀻𑀫𑀁 𑀕𑀦𑁆𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀧𑀯𑁂𑀲𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲𑀸𑀢𑀺 𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲. 𑀢𑀤𑀸 𑀞𑀧𑁂𑀢𑁆𑀯𑀸 𑀘𑀼𑀤𑁆𑀤𑀲𑀧𑀦𑁆𑀦𑀭𑀲𑁂 𑀅𑀜𑁆𑀜𑁄 𑀬𑁄 𑀓𑁄𑀘𑀺 𑀤𑀺𑀯𑀲𑁄 𑀉𑀧𑁄𑀲𑀣𑀤𑀺𑀯𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑀸𑀯𑀤𑁂𑀯 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. ‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’𑀦𑁆𑀢𑀺 𑀯𑀘𑀦𑀢𑁄’’𑀢𑀺. 𑀢𑀢𑁆𑀣 𑀢𑀸𑀯𑀤𑁂𑀯𑀸𑀢𑀺 𑀢𑀁 𑀤𑀺𑀯𑀲𑀫𑁂𑀯. 𑀯𑀘𑀦𑀢𑁄𑀢𑀺 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁭𑁫) 𑀯𑀼𑀢𑁆𑀢𑀢𑁆𑀢𑀸. 𑀬𑀢𑁆𑀭 𑀧𑀦 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀯𑀺𑀯𑀤𑀦𑁆𑀢𑀸 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀞𑀧𑁂𑀦𑁆𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀫𑀕𑁆𑀕𑀸 𑀚𑀸𑀢𑀫𑁆𑀳𑀸’’𑀢𑀺 𑀅𑀦𑁆𑀢𑀭𑀸 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀮𑀪𑀦𑁆𑀢𑀺, 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀢𑁄 𑀦𑀸𑀫 𑀳𑁄𑀢𑀺.

𑀓𑀢𑁆𑀢𑀺𑀓𑀫𑀸𑀲𑀩𑁆𑀪𑀦𑁆𑀢𑀭𑁂𑀢𑀺 𑀏𑀢𑁆𑀣 𑀓𑀢𑁆𑀢𑀺𑀓𑀫𑀸𑀲𑁄 𑀦𑀸𑀫 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸, 𑀢𑀸𑀯 𑀏𑀓𑀽𑀦𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑀸, 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀢𑀢𑁄 𑀧𑀼𑀭𑁂 𑀯𑀸 𑀧𑀦 𑀧𑀘𑁆𑀙𑀸 𑀯𑀸 𑀯𑀝𑁆𑀝𑀢𑀺. 𑀅𑀬𑀫𑁂𑀯𑀸𑀢𑀺 𑀬𑁄 𑀓𑁄𑀘𑀺 𑀤𑀺𑀯𑀲𑁄𑀬𑁂𑀯. 𑀇𑀥𑀸𑀧𑀺 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀲𑀸𑀫𑀕𑁆𑀕𑀺𑀬𑀸 𑀲𑀤𑀺𑀲𑀸𑀯 𑀲𑀸𑀫𑀕𑁆𑀕𑀻 𑀯𑁂𑀤𑀺𑀢𑀩𑁆𑀩𑀸. 𑀬𑁂 𑀧𑀦 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀫𑀢𑁆𑀢𑀓𑁂 𑀧𑀯𑀸𑀭𑀡𑀁 𑀞𑀧𑁂𑀢𑁆𑀯𑀸 𑀲𑀫𑀕𑁆𑀕𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀧𑀯𑀸𑀭𑀡𑀸𑀬𑀫𑁂𑀯 𑀧𑀯𑀸𑀭𑀡𑀸 𑀓𑀸𑀢𑀩𑁆𑀩𑀸, 𑀢𑀸𑀯𑀤𑁂𑀯 𑀦 𑀓𑀸𑀢𑀩𑁆𑀩𑀸, 𑀓𑀭𑁄𑀦𑁆𑀢𑁂𑀳𑀺 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀓𑀢𑀸 𑀦𑀸𑀫 𑀳𑁄𑀢𑀺, ‘‘𑀦 𑀓𑀸𑀢𑀩𑁆𑀩𑀸𑀬𑁂𑀯𑀸’’𑀢𑀺 𑀦𑀺𑀬𑀫𑁂𑀦 𑀬𑀤𑀺 𑀓𑀭𑁄𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀉𑀧𑁄𑀲𑀣𑀓𑀭𑀡𑁂 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸’’𑀢𑀺 (𑀫𑀳𑀸𑀯. 𑁧𑁮𑁩).

𑁧𑁬𑁯. 𑀲𑀗𑁆𑀖𑁂 𑀉𑀧𑁄𑀲𑀣𑁄 𑀦𑀸𑀫 𑀏𑀓𑀲𑀻𑀫𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁂𑀦 𑀘𑀢𑀼𑀯𑀕𑁆𑀕𑀸𑀤𑀺𑀲𑀗𑁆𑀖𑁂𑀦 𑀓𑀢𑁆𑀢𑀩𑁆𑀩𑁄 𑀉𑀧𑁄𑀲𑀣𑁄, 𑀲𑁄 𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀬𑁂𑀯. 𑀕𑀡𑁂 𑀉𑀧𑁄𑀲𑀣𑁄 𑀦𑀸𑀫 𑀏𑀓𑀲𑀻𑀫𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀤𑁆𑀯𑀻𑀳𑀺, 𑀢𑀻𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑁄 𑀉𑀧𑁄𑀲𑀣𑁄, 𑀲𑁄 𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄𑀬𑁂𑀯. 𑀧𑀼𑀕𑁆𑀕𑀮𑁂 𑀉𑀧𑁄𑀲𑀣𑁄 𑀦𑀸𑀫 𑀏𑀓𑀲𑀻𑀫𑀸𑀬𑀁 𑀦𑀺𑀲𑀺𑀦𑁆𑀦𑁂𑀦 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀢𑁆𑀢𑀩𑁆𑀩𑁄 𑀉𑀧𑁄𑀲𑀣𑁄, 𑀲𑁄 𑀘 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄𑀬𑁂𑀯. 𑀢𑁂𑀦𑀸𑀳 ‘‘𑀓𑀸𑀭𑀓𑀯𑀲𑁂𑀦 𑀅𑀧𑀭𑁂𑀧𑀺 𑀢𑀬𑁄 𑀉𑀧𑁄𑀲𑀣𑀸’’𑀢𑀺. 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀉𑀧𑁄𑀲𑀣𑁂𑀲𑀼 𑀲𑀼𑀢𑁆𑀢𑀼𑀤𑁆𑀤𑁂𑀲𑁄 𑀦𑀸𑀫 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀲𑁄 𑀤𑀼𑀯𑀺𑀥𑁄 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀘 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀘. 𑀢𑀢𑁆𑀭 𑀑𑀯𑀸𑀤𑁄𑀯 𑀧𑀸𑀢𑀺𑀫𑁄𑀓𑁆𑀔𑀁, 𑀢𑀲𑁆𑀲 𑀉𑀤𑁆𑀤𑁂𑀲𑁄 𑀲𑀭𑀽𑀧𑁂𑀦 𑀓𑀣𑀦𑀁 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. ‘‘𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀅𑀬𑀁 𑀦𑀸𑀫 𑀆𑀧𑀢𑁆𑀢𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺𑀯𑀲𑁂𑀦 𑀆𑀡𑀸𑀧𑀦𑀁 𑀧𑀜𑁆𑀜𑀸𑀧𑀦𑀁 𑀆𑀡𑀸. 𑀲𑁂𑀲𑀁 𑀅𑀦𑀦𑁆𑀢𑀭𑀲𑀤𑀺𑀲𑀫𑁂𑀯.

𑀢𑀢𑁆𑀣 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀦𑀸𑀫 𑁋

‘‘𑀔𑀦𑁆𑀢𑀺 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸;

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻;

𑀦 𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

‘‘𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩-𑁧𑁮𑁫) 𑁋

𑀇𑀫𑀸 𑀢𑀺𑀲𑁆𑀲𑁄 𑀕𑀸𑀣𑀸.

𑀢𑀢𑁆𑀣 𑀔𑀦𑁆𑀢𑀺 𑀧𑀭𑀫𑀁 𑀢𑀧𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀦𑀸𑀫 𑀧𑀭𑀫𑀁 𑀢𑀧𑁄. 𑀢𑀺𑀢𑀺𑀓𑁆𑀔𑀸𑀢𑀺 𑀔𑀦𑁆𑀢𑀺𑀬𑀸 𑀏𑀯 𑀯𑁂𑀯𑀘𑀦𑀁, 𑀢𑀺𑀢𑀺𑀓𑁆𑀔𑀸𑀲𑀗𑁆𑀔𑀸𑀢𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀉𑀢𑁆𑀢𑀫𑀁 𑀢𑀧𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀧𑀭𑀫𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸. 𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻𑀢𑀺 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀯𑀺𑀭𑀳𑀺𑀢𑀢𑁆𑀢𑀸 𑀧𑀭𑀁 𑀉𑀧𑀖𑀸𑀢𑁂𑀢𑀺 𑀩𑀸𑀥𑀢𑀺 𑀯𑀺𑀳𑀺𑀁𑀲𑀢𑀺, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀘𑀢𑀼𑀢𑁆𑀣𑀧𑀸𑀤𑁄 𑀧𑀦 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀦 𑀳𑀺 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀢𑀲𑁆𑀲 𑀳𑀺 𑀦 𑀲𑀫𑀡𑁄 𑀳𑁄𑀢𑀻𑀢𑀺 𑀯𑁂𑀯𑀘𑀦𑀁. ‘‘𑀧𑀭𑀽𑀧𑀖𑀸𑀢𑀻’’𑀢𑀺 𑀏𑀢𑀲𑁆𑀲 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄𑀢𑀺 𑀯𑁂𑀯𑀘𑀦𑀁. 𑀅𑀣 𑀯𑀸 𑀧𑀭𑀽𑀧𑀖𑀸𑀢𑀻𑀢𑀺 𑀲𑀻𑀮𑀽𑀧𑀖𑀸𑀢𑀻. 𑀲𑀻𑀮𑀜𑁆𑀳𑀺 𑀉𑀢𑁆𑀢𑀫𑀝𑁆𑀞𑁂𑀦 𑀧𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀘 𑀲𑀫𑀡𑁄 𑀧𑀭𑀁 𑀬𑀁 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀺𑀳𑁂𑀞𑀬𑀦𑁆𑀢𑁄 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺 𑀅𑀢𑁆𑀢𑀦𑁄 𑀲𑀻𑀮𑀯𑀺𑀦𑀸𑀲𑀓𑁄, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀅𑀪𑀸𑀯𑀸 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀧𑀭𑀁 𑀅𑀦𑁆𑀢𑀫𑀲𑁄 𑀟𑀁𑀲𑀫𑀓𑀲𑀫𑁆𑀧𑀺 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑁄 𑀦 𑀳𑀺 𑀧𑀩𑁆𑀩𑀚𑀺𑀢𑁄. 𑀓𑀺𑀁 𑀓𑀸𑀭𑀡𑀸? 𑀫𑀮𑀲𑁆𑀲 𑀅𑀧𑀩𑁆𑀩𑀚𑀺𑀢𑀢𑁆𑀢𑀸. ‘‘𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁩𑁮𑁮) 𑀇𑀤𑀜𑁆𑀳𑀺 𑀧𑀩𑁆𑀩𑀚𑀺𑀢𑀮𑀓𑁆𑀔𑀡𑀁. 𑀬𑁄𑀧𑀺 𑀦 𑀳𑁂𑀯 𑀔𑁄 𑀉𑀧𑀖𑀸𑀢𑁂𑀢𑀺 𑀦 𑀫𑀸𑀭𑁂𑀢𑀺, 𑀅𑀧𑀺𑀘 𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺, 𑀲𑁄𑀧𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄 𑀦 𑀲𑀫𑀡𑁄 𑀳𑁄𑀢𑀺. 𑀓𑀺𑀁𑀓𑀸𑀭𑀡𑀸? 𑀯𑀺𑀳𑁂𑀲𑀸𑀬 𑀅𑀲𑀫𑀺𑀢𑀢𑁆𑀢𑀸. ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫) 𑀇𑀤𑀜𑁆𑀳𑀺 𑀲𑀫𑀡𑀮𑀓𑁆𑀔𑀡𑀁.

𑀤𑀼𑀢𑀺𑀬𑀕𑀸𑀣𑀸𑀬 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀲𑁆𑀲. 𑀉𑀧𑀲𑀫𑁆𑀧𑀤𑀸𑀢𑀺 𑀉𑀧𑀲𑀫𑁆𑀧𑀸𑀤𑀦𑀁 𑀧𑀝𑀺𑀮𑀸𑀪𑁄. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀧𑀦𑀁 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀁 𑀲𑀩𑁆𑀩𑀲𑁄 𑀧𑀭𑀺𑀲𑁄𑀥𑀦𑀁, 𑀢𑀁 𑀧𑀦 𑀅𑀭𑀳𑀢𑁆𑀢𑁂𑀦 𑀳𑁄𑀢𑀺, 𑀇𑀢𑀺 𑀲𑀻𑀮𑀲𑀁𑀯𑀭𑁂𑀦 𑀲𑀩𑁆𑀩𑀧𑀸𑀧𑀁 𑀧𑀳𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀓𑀼𑀲𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀺.

𑀢𑀢𑀺𑀬𑀕𑀸𑀣𑀸𑀬 𑀅𑀦𑀼𑀧𑀯𑀸𑀤𑁄𑀢𑀺 𑀯𑀸𑀘𑀸𑀬 𑀓𑀲𑁆𑀲𑀘𑀺 𑀅𑀦𑀼𑀧𑀯𑀤𑀦𑀁. 𑀅𑀦𑀼𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀓𑀲𑁆𑀲𑀘𑀺 𑀉𑀧𑀖𑀸𑀢𑀸𑀓𑀭𑀡𑀁. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀬𑀁 𑀢𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀅𑀢𑀺𑀫𑁄𑀓𑁆𑀔𑀁 𑀅𑀢𑀺𑀧𑀫𑁄𑀓𑁆𑀔𑀁 𑀉𑀢𑁆𑀢𑀫𑀲𑀻𑀮𑀁. 𑀧𑀸𑀢𑀺 𑀯𑀸 𑀅𑀕𑀢𑀺𑀯𑀺𑀲𑁂𑀲𑁂𑀳𑀺 𑀫𑁄𑀓𑁆𑀔𑁂𑀢𑀺 𑀤𑀼𑀕𑁆𑀕𑀢𑀺𑀪𑀬𑁂𑀳𑀺, 𑀬𑁄 𑀯𑀸 𑀦𑀁 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂 𑀘. 𑀲𑀁𑀯𑀭𑁄𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑁄 𑀲𑀁𑀯𑀭𑁄. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀚𑀦𑀲𑀗𑁆𑀖𑀝𑁆𑀝𑀦𑀯𑀺𑀭𑀳𑀺𑀢𑀁 𑀦𑀺𑀚𑁆𑀚𑀦𑀲𑀫𑁆𑀩𑀸𑀥𑀁 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀜𑁆𑀘. 𑀏𑀢𑁆𑀣 𑀘 𑀤𑁆𑀯𑀻𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 𑀧𑀘𑁆𑀘𑀬𑀲𑀦𑁆𑀢𑁄𑀲𑀲𑀸𑀫𑀜𑁆𑀜𑁂𑀦 𑀇𑀢𑀭𑀤𑁆𑀯𑀬𑀲𑁆𑀲𑀧𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀚𑁄𑀢𑀺𑀢𑀢𑁆𑀢𑀸. 𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀁, 𑀢𑀢𑁄𑀧𑀺 𑀫𑀕𑁆𑀕𑀨𑀮𑀘𑀺𑀢𑁆𑀢𑀫𑁂𑀯 𑀅𑀥𑀺𑀘𑀺𑀢𑁆𑀢𑀁, 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀅𑀥𑀺𑀘𑀺𑀢𑁆𑀢𑁂 𑀆𑀬𑁄𑀕𑁄 𑀘 𑀅𑀦𑀼𑀬𑁄𑀕𑁄 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀏𑀢𑀁 𑀧𑀭𑀲𑁆𑀲 𑀅𑀦𑀼𑀧𑀯𑀤𑀦𑀁, 𑀅𑀦𑀼𑀧𑀖𑀸𑀢𑀦𑀁, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀫𑀢𑁆𑀢𑀜𑁆𑀜𑀼𑀢𑀸, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑀺𑀪𑀸𑀯𑀸𑀬 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁂𑀯𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻𑀢𑀺. 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀕𑀸𑀣𑀸𑀬𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀩𑀼𑀤𑁆𑀥𑀸 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀲𑀸𑀯𑀓𑀸. ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁪) 𑀦𑀬𑁂𑀦 𑀯𑀼𑀢𑁆𑀢𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫, 𑀢𑀁 𑀲𑀸𑀯𑀓𑀸 𑀏𑀯 𑀉𑀤𑁆𑀤𑀺𑀲𑀦𑁆𑀢𑀺, 𑀦 𑀩𑀼𑀤𑁆𑀥𑀸. 𑀇𑀤𑀫𑁂𑀯 𑀘 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀅𑀦𑀼𑀧𑀕𑀢𑁄 𑀦𑀸𑀫 𑀢𑀢𑁆𑀣𑁂𑀯 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀲𑀢𑀺𑀬𑀸 𑀧𑀼𑀭𑀺𑀫𑀺𑀓𑀸𑀬 𑀅𑀦𑀼𑀧𑀕𑀢𑁄 𑀯𑀸. 𑀘𑀸𑀢𑀼𑀫𑀸𑀲𑀺𑀦𑀺𑀬𑀦𑁆𑀢𑀺 𑀘𑀢𑀼𑀫𑀸𑀲𑀺𑀬𑀁. 𑀲𑀸 𑀳𑀺 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀸𑀭𑀺𑀧𑀽𑀭𑀺𑀪𑀽𑀢𑀸𑀢𑀺 𑀘𑀸𑀢𑀼𑀫𑀸𑀲𑀻, 𑀲𑀸 𑀏𑀯 ‘‘𑀘𑀸𑀢𑀼𑀫𑀸𑀲𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀁 𑀘𑀸𑀢𑀼𑀫𑀸𑀲𑀺𑀦𑀺𑀬𑀁, 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀲𑀸𑀫𑀕𑁆𑀕𑀺𑀦𑁆𑀢𑀺 𑀓𑀸𑀬𑁂𑀦 𑀲𑀫𑀕𑁆𑀕𑀪𑀸𑀯𑀁, 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀧𑀜𑁆𑀘 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀧𑀜𑁆𑀘, 𑀧𑀼𑀭𑀺𑀫𑁂𑀳𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑀺𑀢𑁂 𑀧𑀘𑁆𑀙𑀺𑀫𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀦 𑀏𑀓𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂 𑀤𑁆𑀯𑁂 𑀜𑀢𑁆𑀢𑀺𑀬𑁄 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀘𑀢𑁆𑀢𑀸𑀭𑁄 𑀢𑀬𑁄 𑀤𑁆𑀯𑁂 𑀏𑀓𑁄 𑀯𑀸 𑀳𑁄𑀢𑀺, 𑀏𑀲𑁂𑀯 𑀦𑀬𑁄. 𑀅𑀣 𑀧𑀼𑀭𑀺𑀫𑀺𑀓𑀸𑀬 𑀘𑀢𑁆𑀢𑀸𑀭𑁄, 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀘𑀢𑁆𑀢𑀸𑀭𑁄 𑀢𑀬𑁄 𑀤𑁆𑀯𑁂 𑀏𑀓𑁄 𑀯𑀸, 𑀏𑀲𑁂𑀯 𑀦𑀬𑁄. 𑀅𑀣 𑀧𑀼𑀭𑀺𑀫𑀺𑀓𑀸𑀬 𑀢𑀬𑁄, 𑀧𑀘𑁆𑀙𑀺𑀫𑀺𑀓𑀸𑀬 𑀢𑀬𑁄 𑀤𑁆𑀯𑁂 𑀏𑀓𑁄 𑀯𑀸, 𑀏𑀲𑁂𑀯 𑀦𑀬𑁄. 𑀇𑀤𑀜𑁆𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑁂𑀳𑀺 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀣𑁄𑀓𑀢𑀭𑀸 𑀘𑁂𑀯 𑀳𑁄𑀦𑁆𑀢𑀺 𑀲𑀫𑀲𑀫𑀸 𑀘, 𑀲𑀗𑁆𑀖𑀧𑀯𑀸𑀭𑀡𑀸𑀬 𑀘 𑀕𑀡𑀁 𑀧𑀽𑀭𑁂𑀦𑁆𑀢𑀺, 𑀲𑀗𑁆𑀖𑀧𑀯𑀸𑀭𑀡𑀸𑀯𑀲𑁂𑀦 𑀜𑀢𑁆𑀢𑀺 𑀞𑀧𑁂𑀢𑀩𑁆𑀩𑀸. 𑀲𑀘𑁂 𑀧𑀦 𑀧𑀘𑁆𑀙𑀺𑀫𑀺𑀓𑀸𑀬 𑀏𑀓𑁄 𑀳𑁄𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑁂 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀲𑀗𑁆𑀖𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀕𑀡𑀜𑀢𑁆𑀢𑀺𑀬𑀸 𑀧𑀦 𑀲𑁄 𑀕𑀡𑀧𑀽𑀭𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀡𑀯𑀲𑁂𑀦 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁. 𑀇𑀢𑀭𑁂𑀦 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬 𑀤𑁆𑀯𑁂, 𑀧𑀘𑁆𑀙𑀺𑀫𑀺𑀓𑀸𑀬 𑀤𑁆𑀯𑁂 𑀯𑀸 𑀏𑀓𑁄 𑀯𑀸, 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀼𑀭𑀺𑀫𑀺𑀓𑀸𑀬𑀧𑀺 𑀏𑀓𑁄, 𑀧𑀘𑁆𑀙𑀺𑀫𑀺𑀓𑀸𑀬𑀧𑀺 𑀏𑀓𑁄, 𑀏𑀓𑁂𑀦 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁, 𑀏𑀓𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀧𑀼𑀭𑀺𑀫𑁂𑀳𑀺 𑀯𑀲𑁆𑀲𑀽𑀧𑀕𑀢𑁂𑀳𑀺 𑀧𑀘𑁆𑀙𑀸 𑀯𑀲𑁆𑀲𑀽𑀧𑀕𑀢𑀸 𑀏𑀓𑁂𑀦𑀧𑀺 𑀅𑀥𑀺𑀓𑀢𑀭𑀸 𑀳𑁄𑀦𑁆𑀢𑀺, 𑀧𑀞𑀫𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀘𑁆𑀙𑀸 𑀣𑁄𑀓𑀢𑀭𑁂𑀳𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀢𑀩𑁆𑀩𑀁. 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀦𑀺𑀧𑀯𑀸𑀭𑀡𑀸𑀬 𑀧𑀦 𑀲𑀘𑁂 𑀧𑀞𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁂𑀳𑀺 𑀧𑀘𑁆𑀙𑀸 𑀉𑀧𑀕𑀢𑀸 𑀅𑀥𑀺𑀓𑀢𑀭𑀸 𑀯𑀸 𑀲𑀫𑀲𑀫𑀸 𑀯𑀸 𑀳𑁄𑀦𑁆𑀢𑀺, 𑀧𑀯𑀸𑀭𑀡𑀸𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀢𑁂𑀳𑀺 𑀧𑀯𑀸𑀭𑀺𑀢𑁂 𑀧𑀘𑁆𑀙𑀸 𑀇𑀢𑀭𑁂𑀳𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀅𑀣 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀩𑀳𑀽 𑀳𑁄𑀦𑁆𑀢𑀺, 𑀧𑀘𑁆𑀙𑀸 𑀯𑀲𑁆𑀲𑀽𑀧𑀕𑀢𑀸 𑀣𑁄𑀓𑀸 𑀯𑀸 𑀏𑀓𑁄 𑀯𑀸, 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀝𑁆𑀞𑁂 𑀧𑀘𑁆𑀙𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀢𑁂𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺.

𑀞𑀧𑁂𑀢𑁆𑀯𑀸 𑀧𑀦 𑀧𑀯𑀸𑀭𑀡𑀸𑀤𑀺𑀯𑀲𑀁 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀜𑁆𑀜𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂. 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 ‘‘𑀧𑀭𑀺𑀬𑁄𑀲𑀺𑀢𑀫𑀢𑁆𑀢𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂’’𑀢𑀺 𑀅𑀧𑀭𑀺𑀬𑁄𑀲𑀺𑀢𑁂 𑀆𑀕𑀢𑁂 𑀲𑀢𑀺 𑀅𑀯𑀲𑁂𑀲𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀲𑁄𑀢𑀩𑁆𑀩𑀢𑁆𑀢𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀯𑀼𑀝𑁆𑀞𑀺𑀢𑀸𑀬𑀸𑀢𑀺𑀆𑀤𑀻𑀦𑀺𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀦𑀺𑀝𑁆𑀞𑀺𑀢𑀓𑀸𑀮𑀫𑁂𑀯 𑀧𑀭𑀺𑀲𑀸𑀬 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀢𑀺. 𑀲𑀫𑀲𑀫𑀸 𑀯𑀸𑀢𑀺 𑀧𑀼𑀭𑀺𑀫𑁂𑀳𑀺 𑀲𑀫𑀧𑀭𑀺𑀫𑀸𑀡𑀸. 𑀣𑁄𑀓𑀢𑀭𑀸 𑀯𑀸𑀢𑀺 𑀧𑀼𑀭𑀺𑀫𑁂𑀳𑀺 𑀣𑁄𑀓𑀢𑀭𑀧𑀭𑀺𑀫𑀸𑀡𑀸. 𑀏𑀢𑁂𑀦 𑀩𑀳𑀼𑀢𑀭𑁂𑀲𑀼 𑀆𑀕𑀢𑁂𑀲𑀼 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀦 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑁂 𑀲𑀸𑀥𑀼𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨.𑁩𑁪𑁫) 𑀧𑀦 ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀧𑀼𑀦 𑀲𑀡𑁆𑀞𑀸𑀧𑀦𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀓𑀁𑀲𑀦𑁆𑀢𑀺 𑀘 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁄 𑀬𑀣𑀸 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀣𑀸 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀢𑀺 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀲𑀘𑁂 𑀧𑀦 𑀢𑀢𑁆𑀣 𑀧𑀸𑀭𑀺𑀯𑀸𑀲𑀺𑀓𑁄𑀧𑀺 𑀅𑀢𑁆𑀣𑀺, 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀧𑀸𑀢𑀺𑀫𑁄𑀓𑁆𑀔𑁂 𑀧𑀦 𑀉𑀤𑁆𑀤𑀺𑀲𑀺𑀬𑀫𑀸𑀦𑁂 𑀧𑀸𑀴𑀺𑀬𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀴𑀺𑀁 𑀯𑀺𑀳𑀸𑀬 𑀳𑀢𑁆𑀣𑀧𑀸𑀲𑀁 𑀅𑀫𑀼𑀜𑁆𑀘𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀻𑀬𑀦𑁆𑀢𑀺 𑀲𑀫𑁆𑀫𑀚𑁆𑀚𑀦𑀸𑀤𑀺𑀦𑀯𑀯𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁. 𑀇𑀫𑀺𑀦𑀸 𑀩𑀳𑀽𑀦𑀁 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀉𑀧𑁄𑀲𑀣𑀤𑀺𑀯𑀲𑁂 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁 𑀦 𑀳𑁄𑀢𑀺, 𑀅𑀣 𑀔𑁄 𑀏𑀓𑀲𑁆𑀲 𑀯𑀲𑀦𑀝𑁆𑀞𑀸𑀦𑁂𑀧𑀺 𑀓𑀸𑀢𑀩𑁆𑀩𑀁𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀲𑀩𑁆𑀩𑁄 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀢𑀻’’𑀢𑀺 (𑀫𑀳𑀸𑀯. 𑁧𑁭𑁧) 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀺, 𑀏𑀯𑀫𑁂𑀢𑁆𑀣𑀸𑀧𑀺 𑀢𑀻𑀳𑀺 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸, 𑀇𑀫𑁂 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸, 𑀬𑀤𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀼𑀤𑁆𑀥𑀁 𑀅𑀦𑀸𑀧𑀢𑁆𑀢𑀺𑀓𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸, 𑀤𑁆𑀯𑀻𑀳𑀺𑀧𑀺 ‘‘𑀅𑀜𑁆𑀜𑀁 𑀲𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁂𑀦𑀧𑀺 ‘‘𑀧𑀭𑀺𑀲𑀼𑀤𑁆𑀥𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀼, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀻𑀢𑀺 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺. 𑀅𑀦𑀸𑀯𑀸𑀲𑁄 𑀦𑀸𑀫 𑀦𑀯𑀓𑀫𑁆𑀫𑀲𑀸𑀮𑀸𑀤𑀺𑀓𑁄 𑀬𑁄 𑀓𑁄𑀘𑀺 𑀧𑀤𑁂𑀲𑁄. 𑀅𑀜𑁆𑀜𑀢𑁆𑀭 𑀲𑀗𑁆𑀖𑁂𑀦𑀸𑀢𑀺 𑀲𑀗𑁆𑀖𑀧𑁆𑀧𑀳𑁄𑀦𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀺𑀦𑀸. 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀸𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀤𑀲𑀯𑀺𑀥𑀫𑀦𑁆𑀢𑀭𑀸𑀬𑀁 𑀯𑀺𑀦𑀸. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀦 𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑁆𑀢𑀘𑀢𑀼𑀢𑁆𑀣𑁂 𑀯𑀸 𑀅𑀦𑁆𑀢𑀭𑀸𑀬𑁂 𑀯𑀸 𑀲𑀢𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀘 𑀆𑀯𑀸𑀲𑀸𑀤𑀬𑁄 𑀦 𑀕𑀦𑁆𑀢𑀩𑁆𑀩𑀸, 𑀏𑀯𑀁 𑀲𑀘𑁂 𑀯𑀺𑀳𑀸𑀭𑁂 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀉𑀧𑁄𑀲𑀣𑀸𑀥𑀺𑀝𑁆𑀞𑀸𑀦𑀢𑁆𑀣𑀁 𑀲𑀻𑀫𑀸𑀧𑀺 𑀦𑀤𑀻𑀧𑀺 𑀦 𑀕𑀦𑁆𑀢𑀩𑁆𑀩𑀸. 𑀲𑀘𑁂 𑀧𑀦𑁂𑀢𑁆𑀣 𑀓𑁄𑀘𑀺 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸𑀧𑀺 𑀆𑀯𑀸𑀲𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀕𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀮𑀪𑀢𑀺. 𑀆𑀭𑀜𑁆𑀜𑀓𑁂𑀦𑀧𑀺 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀤𑀺𑀯𑀲𑁂 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀑𑀓𑁆𑀓𑀫𑀢𑀺, 𑀢𑀢𑁆𑀣 𑀉𑀧𑁄𑀲𑀣𑀁 𑀓𑀢𑁆𑀯𑀸𑀯 𑀆𑀕𑀦𑁆𑀢𑀩𑁆𑀩𑀁, 𑀅𑀓𑀢𑁆𑀯𑀸 𑀆𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀬𑀁 𑀚𑀜𑁆𑀜𑀸 ‘‘𑀅𑀚𑁆𑀚𑁂𑀯 𑀢𑀢𑁆𑀣 𑀕𑀦𑁆𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀏𑀯𑀭𑀽𑀧𑁄 𑀧𑀦 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄. 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁂𑀦𑀧𑀺 𑀳𑀺 𑀇𑀫𑀺𑀦𑀸 𑀦𑁂𑀯 𑀉𑀧𑁄𑀲𑀣𑀦𑁆𑀢𑀭𑀸𑀬𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻𑀢𑀺.

𑁧𑁭𑁦. 𑀩𑀳𑀺 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀆𑀕𑀢𑁂𑀦𑀸𑀢𑀺 𑀦𑀤𑀺𑀬𑀸 𑀯𑀸 𑀲𑀻𑀫𑀸𑀬 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀆𑀕𑀢𑁂𑀦 𑀙𑀦𑁆𑀤𑁄 𑀤𑀸𑀢𑀩𑁆𑀩𑁄, ‘‘𑀓𑀢𑁄 𑀫𑀬𑀸 𑀉𑀧𑁄𑀲𑀣𑁄’’𑀢𑀺 𑀅𑀘𑁆𑀙𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀘𑁆𑀘𑀧𑀲𑀼𑀢𑁄 𑀯𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀧𑀲𑀼𑀢𑁄 𑀯𑀸. 𑀲𑀗𑁆𑀖𑁄 𑀦𑀧𑁆𑀧𑀳𑁄𑀢𑀻𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀸𑀢𑀼𑀁 𑀦𑀧𑁆𑀧𑀳𑁄𑀢𑀺.

‘‘𑀅𑀥𑀫𑁆𑀫𑁂𑀦 𑀯𑀕𑁆𑀕’’𑀦𑁆𑀢𑀺 𑀏𑀢𑁆𑀣 𑀏𑀓𑀲𑀻𑀫𑀸𑀬 𑀘𑀢𑀽𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀯 𑀅𑀦𑀼𑀜𑁆𑀜𑀸𑀢𑁄, 𑀢𑀻𑀲𑀼 𑀤𑁆𑀯𑀻𑀲𑀼 𑀘 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄𑀯, 𑀇𑀥 𑀧𑀦 𑀢𑀣𑀸 𑀅𑀓𑀢𑀢𑁆𑀢𑀸 ‘‘𑀅𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀲𑀗𑁆𑀖𑁂 𑀏𑀯 𑀆𑀕𑀘𑁆𑀙𑀢𑀺, 𑀦 𑀕𑀡𑁂 𑀦 𑀧𑀼𑀕𑁆𑀕𑀮𑁂, 𑀢𑀲𑁆𑀫𑀸 ‘‘𑀯𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀤𑁆𑀯𑁂 𑀲𑀗𑁆𑀖𑀸 𑀏𑀓𑀲𑀻𑀫𑀸𑀬𑀁 𑀅𑀜𑁆𑀜𑀫𑀜𑁆𑀜𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀯𑀺𑀲𑀼𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁆𑀣 𑀓𑀣𑀦𑁆𑀢𑀺? 𑀓𑁂𑀘𑀺 𑀧𑀦 ‘‘𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀯𑀕𑁆𑀕𑀓𑀫𑁆𑀫𑀢𑁆𑀢𑀸. 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀜𑁆𑀳𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺 𑀢𑀣𑀸 𑀯𑀘𑀦𑀸𑀪𑀸𑀯𑀸, 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀫𑁆𑀫𑀓𑀭𑀡𑀢𑁆𑀣𑀫𑁂𑀯 𑀲𑀻𑀫𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀺𑀳𑀸𑀭𑀲𑀻𑀫𑀸𑀬 𑀧𑀦 𑀲𑀗𑁆𑀖𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀔𑀡𑁆𑀟𑀲𑀻𑀫𑀸𑀬 𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁂𑀲𑀼 𑀓𑀫𑁆𑀫𑀁 𑀥𑀫𑁆𑀫𑁂𑀦 𑀲𑀫𑀕𑁆𑀕𑀫𑁂𑀯 𑀪𑀺𑀦𑁆𑀦𑀲𑀻𑀫𑀝𑁆𑀞𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼𑀁, 𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺 (𑀫𑀳𑀸𑀯. 𑁧𑁬𑁫) 𑀯𑀼𑀢𑁆𑀢𑀢𑁆𑀢𑀸 𑀪𑀕𑀯𑀢𑁄 𑀆𑀡𑀁 𑀓𑀭𑁄𑀦𑁆𑀢𑁂𑀦 ‘‘𑀙𑀦𑁆𑀤𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀺, 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑁄 𑀙𑀦𑁆𑀤𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁧𑁬𑁫) 𑀧𑀼𑀦 𑀅𑀢𑁆𑀢𑀦𑁄 𑀙𑀦𑁆𑀤𑀤𑀸𑀦𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 ‘‘𑀙𑀦𑁆𑀤𑀁 𑀫𑁂 𑀳𑀭𑀸’’𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀤𑀳𑀸𑀭𑀓𑁄 𑀘𑁂, 𑀪𑀺𑀓𑁆𑀔𑀯𑁂, 𑀤𑀺𑀦𑁆𑀦𑁂 𑀙𑀦𑁆𑀤𑁂 𑀲𑀗𑁆𑀖𑀧𑁆𑀧𑀢𑁆𑀢𑁄 𑀲𑀜𑁆𑀘𑀺𑀘𑁆𑀘 𑀦𑀸𑀭𑁄𑀘𑁂𑀢𑀺, 𑀆𑀳𑀝𑁄 𑀳𑁄𑀢𑀺 𑀙𑀦𑁆𑀤𑁄, 𑀙𑀦𑁆𑀤𑀳𑀸𑀭𑀓𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀢𑁄 𑀢𑀁 𑀫𑁄𑀘𑁂𑀢𑀼𑀁 ‘‘𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀉𑀪𑀬𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄𑀢𑀺 𑀫𑀦𑀲𑀸𑀯 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀬𑀧𑁆𑀧𑀬𑁄𑀕𑀁 𑀓𑀭𑁄𑀦𑁆𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀯𑀸, 𑀯𑀸𑀘𑀁 𑀧𑀦 𑀦𑀺𑀘𑁆𑀙𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁂𑀦 𑀢𑀣𑁂𑀯 𑀯𑀸𑀘𑀸𑀬 𑀯𑀸, 𑀉𑀪𑀬𑀣𑀸𑀧𑀺 𑀲𑀓𑁆𑀓𑁄𑀦𑁆𑀢𑁂𑀦 𑀓𑀸𑀬𑀯𑀸𑀘𑀸𑀳𑀺 𑀯𑀸 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄, 𑀚𑀸𑀦𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. ‘‘𑀅𑀬𑀫𑀢𑁆𑀣𑁄’’𑀢𑀺𑀯𑀘𑀦𑀢𑁄 𑀧𑀦 𑀬𑀸𑀬 𑀓𑀸𑀬𑀘𑀺𑀧𑀺 𑀪𑀸𑀲𑀸𑀬 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺.

𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑁂𑀧𑀺 𑀙𑀦𑁆𑀤𑀤𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀧𑀦 𑀤𑁂𑀦𑁆𑀢𑁂𑀦 𑀧𑀞𑀫𑀁 𑀲𑀦𑁆𑀢𑀻 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀦 𑀳𑀺 𑀲𑀸𑀧𑀢𑁆𑀢𑀺𑀓𑁄 𑀲𑀫𑀸𑀦𑁄 ‘‘𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑀫𑁆𑀫𑀺, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀳𑀭, 𑀧𑀸𑀭𑀺𑀲𑀼𑀤𑁆𑀥𑀺𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺 𑀯𑀢𑁆𑀢𑀼𑀫𑀭𑀳𑀢𑀺. ‘‘𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 ‘‘𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀘 𑀅𑀢𑁆𑀢𑀦𑁄 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀢𑀻𑀢𑀺 𑀏𑀢𑁆𑀣 𑀙𑀦𑁆𑀤𑁄 𑀘 𑀧𑀸𑀭𑀺𑀲𑀼𑀤𑁆𑀥𑀺 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀘 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺, 𑀢𑀁 𑀤𑁂𑀢𑀻𑀢𑀺 𑀲𑀭𑀽𑀧𑁂𑀓𑀲𑁂𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀸𑀢𑀺 𑀅𑀜𑁆𑀜𑁂𑀲𑀁 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀏𑀢𑁆𑀣 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀦𑀸𑀫 𑀩𑀺𑀴𑀸𑀮𑀩𑀦𑁆𑀥𑀦𑀁. 𑀢𑀢𑁆𑀣 𑀳𑀺 𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀯𑀮𑀬𑀁 𑀤𑀼𑀢𑀺𑀬𑀯𑀮𑀬𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀁, 𑀏𑀯𑀫𑀬𑀫𑁆𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀤𑀸𑀬𑀓𑁂𑀦 𑀬𑀲𑁆𑀲 𑀤𑀺𑀦𑁆𑀦𑀸, 𑀢𑀢𑁄 𑀅𑀜𑁆𑀜𑀢𑁆𑀣 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀲𑀤𑀺𑀲𑀢𑁆𑀢𑀸 ‘‘𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀸𑀲𑀁 𑀓𑀸𑀲𑀜𑁆𑀘𑀺 𑀲𑀗𑁆𑀔𑀮𑀺𑀓𑀸𑀦𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁭𑁩. 𑀧𑀯𑀸𑀭𑀡𑀸𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 ‘‘𑀙𑀦𑁆𑀤𑀁 𑀫𑁂 𑀆𑀭𑁄𑀘𑁂𑀳𑀻’’𑀢𑀺, 𑀇𑀥 𑀧𑀦 ‘‘𑀫𑀫𑀢𑁆𑀣𑀸𑀬 𑀧𑀯𑀸𑀭𑁂𑀳𑀻’’𑀢𑀺. 𑀢𑀢𑁆𑀣 𑀙𑀦𑁆𑀤𑀳𑀸𑀭𑀓𑁂 𑀲𑀗𑁆𑀖𑀲𑁆𑀲 𑀳𑀢𑁆𑀣𑀁 𑀉𑀧𑀕𑀢𑀫𑀢𑁆𑀢𑁂𑀬𑁂𑀯 𑀆𑀕𑀢𑀸 𑀳𑁄𑀢𑀺. 𑀇𑀥 𑀧𑀦 𑀏𑀯𑀁 𑀤𑀺𑀦𑁆𑀦𑀸𑀬 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸𑀳𑀸𑀭𑀓𑁂𑀦 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀧𑀯𑀸𑀭𑁂𑀢𑀩𑁆𑀩𑀁 ‘‘𑀢𑀺𑀲𑁆𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼…𑀧𑁂… 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀺, 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀻𑀢𑀺 𑀏𑀢𑁆𑀣 ‘𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’𑀢𑀺 𑀯𑀢𑁆𑀯𑀸 𑀉𑀤𑁆𑀤𑀺𑀝𑁆𑀞𑀁 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀦𑀺𑀤𑀸𑀦𑀁, 𑀲𑀼𑀢𑀸 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁂𑀳𑀺 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀜𑁆𑀳𑀺 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀲𑀼𑀢𑁂𑀦𑀸𑀢𑀺 𑀲𑀼𑀢𑀧𑀤𑁂𑀦.

𑁧𑁭𑁪. 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀅𑀦𑀺𑀝𑁆𑀞𑀺𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀦𑀺𑀤𑁆𑀤𑀺𑀝𑁆𑀞𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀢𑀺𑀬𑀸𑀤𑀻𑀲𑀼 𑀉𑀤𑁆𑀤𑁂𑀲𑁂𑀲𑀽’’𑀢𑀺𑀆𑀤𑀺.

𑁧𑁭𑁫. 𑀢𑀻𑀳𑀺𑀧𑀺 𑀯𑀺𑀥𑀻𑀳𑀻𑀢𑀺 𑀑𑀲𑀸𑀭𑀡𑀓𑀣𑀦𑀲𑀭𑀪𑀜𑁆𑀜𑁂𑀳𑀺. 𑀏𑀢𑁆𑀣 𑀘 𑀅𑀢𑁆𑀣𑀁 𑀪𑀡𑀺𑀢𑀼𑀓𑀸𑀫𑀢𑀸𑀬 𑀯𑀸 𑀪𑀡𑀸𑀧𑁂𑀢𑀼𑀓𑀸𑀫𑀢𑀸𑀬 𑀯𑀸 𑀲𑀼𑀢𑁆𑀢𑀲𑁆𑀲 𑀑𑀢𑀸𑀭𑀡𑀁 𑀑𑀲𑀸𑀭𑀡𑀁 𑀦𑀸𑀫. 𑀢𑀲𑁆𑀲𑁂𑀯 𑀅𑀢𑁆𑀣𑀧𑁆𑀧𑀓𑀸𑀲𑀦𑀸 𑀓𑀣𑀦𑀁 𑀦𑀸𑀫. 𑀓𑁂𑀯𑀮𑀁 𑀧𑀸𑀞𑀲𑁆𑀲𑁂𑀯 𑀲𑀭𑁂𑀦 𑀪𑀡𑀦𑀁 𑀲𑀭𑀪𑀜𑁆𑀜𑀁 𑀦𑀸𑀫. 𑀲𑀚𑁆𑀛𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀲𑀚𑁆𑀛𑀸𑀬𑀁 𑀓𑀭𑁄𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀑𑀲𑀸𑀭𑁂𑀢𑁆𑀯𑀸 𑀧𑀦 𑀓𑀣𑁂𑀦𑁆𑀢𑁂𑀦𑀸𑀢𑀺 𑀲𑀬𑀫𑁂𑀯 𑀧𑀸𑀞𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑁂𑀦. 𑀦𑀯𑀯𑀺𑀥𑀦𑁆𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂𑀲𑀼 𑀢𑀬𑁄, 𑀲𑀼𑀢𑁆𑀢𑀼𑀤𑁆𑀤𑁂𑀲𑀧𑀸𑀭𑀺𑀲𑀼𑀤𑁆𑀥𑀺𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀬𑁄, 𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀲𑀸𑀫𑀕𑁆𑀕𑀺𑀯𑀲𑁂𑀦 𑀢𑀬𑁄𑀢𑀺 𑀦𑀯𑀯𑀺𑀥𑀁. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀺 𑀘𑀢𑀼𑀩𑁆𑀩𑀺𑀥𑀁. 𑀤𑀼𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦 𑀤𑀼𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀁. 𑀦𑀯𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄𑀢𑀺 𑀦𑀯𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁. 𑀓𑀢𑀺𑀫𑀻𑀢𑀺 𑀓𑀢𑀺𑀲𑀤𑁆𑀤𑀸𑀧𑁂𑀓𑁆𑀔𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀤𑀝𑁆𑀞𑀩𑁆𑀩𑀁.

𑀉𑀢𑀼𑀯𑀲𑁆𑀲𑁂𑀬𑁂𑀯𑀸𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼𑀬𑁂𑀯. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀓𑀭𑀡𑀫𑁂𑀯 𑀯𑀺𑀜𑁆𑀜𑀸𑀧𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀬𑀓𑁂𑀦 𑀧𑀼𑀦 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀤𑀸𑀢𑀩𑁆𑀩𑀸. ‘‘𑀪𑀽𑀢𑀁 𑀏𑀯 𑀲𑀸𑀫𑀡𑁂𑀭𑀪𑀸𑀯𑀁 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀦𑁆𑀦𑀲𑁆𑀲, 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀸𑀤𑀻𑀦𑀁 𑀯𑀸 𑀬𑀸𑀯 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸 𑀯𑀝𑁆𑀝𑀢𑀺, 𑀢𑀸𑀯 𑀢𑁂𑀳𑀺 𑀆𑀳𑀝𑀸𑀧𑀺 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀕𑀘𑁆𑀙𑀢𑀺. 𑀬𑀤𑀸 𑀧𑀦 𑀢𑁂 𑀅𑀢𑁆𑀢𑀦𑁄 𑀲𑀸𑀫𑀡𑁂𑀭𑀸𑀤𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀦𑀸𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀫𑁆𑀧𑀺 (𑀫𑀳𑀸𑀯. 𑁧𑁬𑁪) 𑀳𑀺 ‘‘𑀤𑀺𑀦𑁆𑀦𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀺…𑀧𑁂… 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀳𑀝𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀟𑀓𑀸𑀤𑀻𑀦𑀁 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀯𑀢𑁆𑀢𑀫𑀸𑀦𑀓𑀸𑀮𑁂𑀲𑀼 𑀧𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀬𑀸𑀯 𑀆𑀕𑀫𑀦𑀁 𑀲𑀺𑀤𑁆𑀥𑀫𑁂𑀯. 𑀢𑁂𑀦𑀸𑀳 ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺. 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀸𑀝𑁆𑀝𑀸𑀦𑀁 𑀧𑀦 𑀧𑀓𑀢𑀢𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀫𑁆𑀫𑀢𑁆𑀢𑀓𑀸𑀤𑀺𑀪𑀸𑀯𑁂 𑀧𑀝𑀺𑀜𑁆𑀜𑀸𑀢𑁂𑀧𑀺 𑀢𑁂𑀲𑀁 𑀲𑀗𑁆𑀖𑀧𑁆𑀧𑀢𑁆𑀢𑀫𑀢𑁆𑀢𑁂𑀦𑁂𑀯 𑀙𑀦𑁆𑀤𑀸𑀤𑀺 𑀆𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀦𑁆𑀢𑀺 𑀇𑀫𑀺𑀦𑀸 𑀕𑀡𑀧𑀼𑀕𑁆𑀕𑀮𑁂𑀲𑀼 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀅𑀦𑀸𑀕𑀫𑀦𑀁 𑀤𑀲𑁆𑀲𑁂𑀢𑀺. ‘‘𑀲𑀗𑁆𑀖𑀧𑁆𑀧𑀢𑁆𑀢𑁄’’𑀢𑀺 𑀳𑀺 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁬𑁫) 𑀯𑀼𑀢𑁆𑀢𑀁. 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀢𑁄 𑀧𑀞𑀫𑀁 𑀓𑀸𑀢𑀩𑁆𑀩𑀁 𑀧𑀼𑀩𑁆𑀩𑀓𑀭𑀡𑀁 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀓𑀸𑀢𑀩𑁆𑀩𑀁 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 ‘‘𑀦𑁄 𑀘𑁂 𑀅𑀥𑀺𑀝𑁆𑀞𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀲𑀜𑁆𑀘𑀺𑀘𑁆𑀘 𑀅𑀲𑁆𑀲𑀢𑀺𑀬𑀸 𑀅𑀦𑀸𑀧𑀢𑁆𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀭𑀺𑀧𑀺, 𑀬𑀢𑁆𑀣 𑀧𑀦 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺 𑀅𑀢𑁆𑀣𑀺, 𑀢𑀢𑁆𑀣 𑀯𑀓𑁆𑀔𑀸𑀫. 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀦 𑀲𑀸𑀧𑀢𑁆𑀢𑀺𑀓𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀯𑀺𑀲𑀼𑀁 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑀢𑁄 𑀧𑀜𑁆𑀜𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀏𑀯 𑀦𑀬𑁂𑀦 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺𑀆𑀤𑀺𑀲𑀼𑀢𑁆𑀢𑀦𑀬𑀢𑁄𑀯 (𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁬) 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀉𑀧𑁄𑀲𑀣𑀓𑀭𑀡𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀅𑀮𑀚𑁆𑀚𑀻𑀦𑀺𑀕𑁆𑀕𑀳𑀢𑁆𑀣𑀢𑁆𑀢𑀸 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀧𑀜𑁆𑀜𑀸𑀧𑀦𑁂𑀦𑀸𑀢𑀺 𑀇𑀫𑀺𑀦𑀸 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀭𑀺𑀲𑀼𑀤𑁆𑀥𑀺𑀧𑀺 𑀦 𑀤𑀸𑀢𑀩𑁆𑀩𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁧𑁭𑁬. 𑀉𑀪𑁄𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀏𑀢𑁆𑀣 𑀲𑀪𑀸𑀕𑀸𑀧𑀢𑁆𑀢𑀺𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸 𑀓𑁂𑀯𑀮𑀁 𑀆𑀧𑀢𑁆𑀢𑀺𑀦𑀸𑀫𑁂𑀦𑁂𑀯 𑀤𑁂𑀲𑁂𑀦𑁆𑀢𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀘 𑀅𑀘𑀺𑀢𑁆𑀢𑀓𑀫𑁂𑀯 𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀲𑀗𑁆𑀖𑁄 𑀲𑀪𑀸𑀕𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀢𑀺 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀮𑀪𑀢𑀺, 𑀏𑀯𑀁 𑀢𑀬𑁄𑀧𑀺 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸, 𑀇𑀫𑁂 𑀪𑀺𑀓𑁆𑀔𑀽 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀕𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀤𑁆𑀯𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀆𑀭𑁄𑀘𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀏𑀓𑁂𑀦 𑀧𑀦 𑀲𑀸𑀧𑀢𑁆𑀢𑀺𑀓𑁂𑀦 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺 𑀧𑀝𑀺𑀓𑀸𑀢𑀼𑀫𑁂𑀯 𑀯𑀝𑁆𑀝𑀢𑀺, 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁂𑀦 ‘‘𑀪𑀺𑀓𑁆𑀔𑀽 𑀮𑀪𑀺𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀝𑀺𑀓𑀭𑀺𑀢𑁆𑀯𑀸 𑀘 𑀧𑀼𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄. 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸𑀢𑀺 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺𑀪𑀽𑀢𑀁 𑀕𑀸𑀫𑀁 𑀯𑀸 𑀅𑀭𑀜𑁆𑀜𑀁 𑀯𑀸 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦𑁂𑀯 𑀉𑀧𑁄𑀲𑀣𑀜𑀢𑁆𑀢𑀺𑀬𑀸 𑀞𑀧𑀦𑀓𑀸𑀮𑁂 𑀲𑀫𑀕𑁆𑀕𑀸 𑀏𑀯 𑀢𑁂 𑀜𑀢𑁆𑀢𑀺𑀁 𑀞𑀧𑁂𑀲𑀼𑀦𑁆𑀢𑀺 𑀲𑀺𑀤𑁆𑀥𑀁. 𑀢𑁂𑀦𑁂𑀯 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁭𑁨) ‘‘𑀉𑀤𑁆𑀤𑀺𑀝𑁆𑀞𑀁 𑀲𑀼𑀉𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀲𑀩𑁆𑀩𑀧𑀦𑁆𑀦𑀭𑀲𑀓𑁂𑀲𑀼𑀧𑀺 𑀯𑀼𑀢𑁆𑀢𑀁.

𑀲𑀘𑁂 𑀧𑀦 𑀯𑀼𑀟𑁆𑀠𑀢𑀭𑁄 𑀳𑁄𑀢𑀻𑀢𑀺 𑀧𑀯𑀸𑀭𑀡𑀤𑀸𑀬𑀓𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺. 𑀏𑀯𑀜𑁆𑀳𑀺 𑀢𑁂𑀦 𑀢𑀲𑁆𑀲𑀢𑁆𑀣𑀸𑀬 𑀧𑀯𑀸𑀭𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀏𑀯𑀁 𑀢𑁂𑀦 𑀅𑀧𑁆𑀧𑀯𑀸𑀭𑀺𑀢𑁂𑀧𑀺 𑀢𑀲𑁆𑀲 𑀲𑀗𑁆𑀖𑀧𑁆𑀧𑀢𑁆𑀢𑀫𑀢𑁆𑀢𑁂𑀦 𑀲𑀗𑁆𑀖𑀲𑁆𑀲 𑀧𑀯𑀸𑀭𑀡𑀸𑀓𑀫𑁆𑀫𑀁 𑀲𑀫𑀕𑁆𑀕𑀓𑀫𑁆𑀫𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀘 𑀪𑀺𑀓𑁆𑀔𑀼𑀦𑀸𑀢𑀺 𑀧𑀯𑀸𑀭𑀡𑀤𑀸𑀬𑀓𑁂𑀦 𑀪𑀺𑀓𑁆𑀔𑀼𑀦𑀸. 𑀩𑀳𑀽𑀧𑀺 𑀲𑀫𑀸𑀦𑀯𑀲𑁆𑀲𑀺𑀓𑀸 𑀏𑀓𑀢𑁄 𑀧𑀯𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀮𑀤𑁆𑀥𑀼𑀧𑀲𑀫𑁆𑀧𑀤𑀢𑀸𑀬 𑀲𑀫𑀸𑀦𑀼𑀧𑀲𑀫𑁆𑀧𑀤𑀯𑀲𑁆𑀲𑀸 𑀲𑀩𑁆𑀩𑁂 𑀏𑀓𑀢𑁄 𑀧𑀯𑀸𑀭𑁂𑀢𑀼𑀁 𑀮𑀪𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀧𑀦 𑀧𑀡𑁆𑀟𑀺𑀢𑁂𑀳𑀺 𑀘𑀺𑀦𑁆𑀢𑁂𑀢𑀩𑁆𑀩𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀓𑀺𑀁 𑀧𑀦 𑀢𑀦𑁆𑀢𑀺? 𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀸𑀮𑁂 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸;

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺;

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮) 𑁋

𑀇𑀫𑀸 𑀕𑀸𑀣𑀸𑀬𑁄 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀧𑀸𑀞𑀁𑀬𑁂𑀯 𑀪𑀡𑀸𑀧𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀅𑀢𑁆𑀣𑀁 𑀓𑀣𑁂𑀢𑀺. 𑀢𑀢𑁄 𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀲𑁆𑀲 𑀲𑀫𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀆𑀭𑀸𑀥𑀦𑀁 𑀓𑀭𑁄𑀫𑀸’’𑀢𑀺 𑀇𑀫𑀁 𑀯𑀸𑀓𑁆𑀬𑀁 𑀧𑀸𑀞𑀫𑁂𑀯 𑀅𑀚𑁆𑀛𑁂𑀲𑀓𑁂𑀦 𑀪𑀡𑀸𑀧𑁂𑀢𑁆𑀯𑀸 𑀅𑀢𑁆𑀣𑀁 𑀅𑀯𑀢𑁆𑀯𑀸𑀯 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀯𑀸𑀭𑀡𑀸𑀬 𑀏𑀢𑀸𑀦𑀻’’𑀢𑀺 𑀘 ‘‘𑀧𑀯𑀸𑀭𑀡𑀁 𑀓𑀸𑀢𑀼’’𑀦𑁆𑀢𑀺 𑀘 𑀇𑀫𑀸𑀦𑀺 𑀧𑀤𑀸𑀦𑀺𑀬𑁂𑀯 𑀯𑀺𑀲𑀺𑀝𑁆𑀞𑀸𑀦𑀺.

𑀓𑀺𑀁 𑀇𑀫𑀸𑀦𑀺 𑀥𑀫𑁆𑀫𑀚𑁆𑀛𑁂𑀲𑀓𑀲𑁆𑀲 𑀯𑀘𑀦𑀸𑀦𑀺, 𑀉𑀤𑀸𑀳𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀥𑀫𑁆𑀫𑀚𑁆𑀛𑁂𑀲𑀓𑀲𑁆𑀲 𑀯𑀘𑀦𑀸𑀦𑀺, 𑀏𑀯𑀁 𑀲𑀢𑀺 𑀕𑀸𑀣𑀸𑀢𑁆𑀢𑀬𑀁 𑀯𑀢𑁆𑀯𑀸 𑀢𑀸𑀲𑀁 𑀅𑀢𑁆𑀣𑀫𑁆𑀧𑀺 𑀲𑁄 𑀏𑀯 𑀓𑀣𑁂𑀢𑁆𑀯𑀸 𑀏𑀢𑀸𑀦𑀺 𑀧𑀼𑀩𑁆𑀩𑀓𑀭𑀡𑀸𑀦𑀺 𑀘 𑀏𑀢𑀸𑀦𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀘 𑀲𑀗𑁆𑀖𑁂𑀦 𑀓𑀢𑀸𑀦𑀺, 𑀇𑀤𑀜𑁆𑀘 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀫𑀸𑀦𑀻𑀢𑀁, 𑀢𑀲𑁆𑀫𑀸 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀢𑁂𑀦𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀣 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀯𑀘𑀦𑀸𑀦𑀺, 𑀏𑀯𑀜𑁆𑀘 𑀲𑀢𑀺 ‘‘𑀲𑀗𑁆𑀖𑁄, 𑀪𑀦𑁆𑀢𑁂, 𑀣𑁂𑀭𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀚𑁆𑀛𑁂𑀲𑀢𑀺, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀬𑀸𑀯𑀢𑀢𑀺𑀬𑀁 𑀅𑀚𑁆𑀛𑁄𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫𑀚𑁆𑀚𑀦𑀻…𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀇𑀢𑀺 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺 𑀧𑀼𑀩𑁆𑀩𑀓𑀭𑀡𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 …𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀇𑀢𑀺 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀏𑀢𑀸𑀦𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀉𑀧𑁄𑀲𑀣𑁄…𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀕𑀸𑀣𑀁 𑀯𑀢𑁆𑀯𑀸 𑀇𑀢𑀺 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁 𑀇𑀤𑀁 𑀧𑀢𑁆𑀢𑀓𑀮𑁆𑀮𑀁 𑀲𑀫𑀸𑀦𑀻𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀻𑀢𑁂 𑀲𑀫𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀆𑀭𑀸𑀥𑀦𑀁 𑀫𑀬𑀁 𑀓𑀭𑁄𑀫𑀸’’𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀅𑀚𑁆𑀛𑁂𑀲𑀓𑀅𑀚𑁆𑀛𑁂𑀲𑀺𑀢𑀩𑁆𑀩𑀸𑀦𑀁 𑀯𑀘𑀦𑀁 𑀅𑀲𑀗𑁆𑀓𑀭𑀢𑁄 𑀚𑀸𑀦𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺.

𑀏𑀢𑁆𑀣 𑀘 𑀕𑀸𑀣𑀸𑀢𑁆𑀢𑀬𑀲𑁆𑀲 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀫𑁂𑀯 𑀆𑀕𑀢𑁄. 𑀧𑀘𑁆𑀙𑀺𑀫𑀯𑀸𑀓𑁆𑀬𑀁 𑀧𑀦 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁, 𑀦 𑀝𑀻𑀓𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀔𑀼𑀤𑁆𑀤𑀲𑀺𑀓𑁆𑀔𑀸𑀧𑀓𑀭𑀡𑁂𑀧𑀺 𑁋

‘‘𑀧𑀼𑀩𑁆𑀩𑀓𑀺𑀘𑁆𑀘𑁂 𑀘 𑀓𑀭𑀡𑁂;

𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀺𑀢𑁂;

𑀲𑀼𑀢𑁆𑀢𑀁 𑀉𑀤𑁆𑀤𑀺𑀲𑀢𑀺 𑀲𑀗𑁆𑀖𑁄;

𑀧𑀜𑁆𑀘𑀥𑀸 𑀲𑁄 𑀯𑀺𑀪𑀸𑀯𑀺𑀢𑁄’’𑀢𑀺 𑀘.

‘‘𑀧𑀼𑀩𑁆𑀩𑀓𑀺𑀘𑁆𑀘𑁂 𑀘 𑀓𑀭𑀡𑁂;

𑀧𑀢𑁆𑀢𑀓𑀮𑁆𑀮𑁂 𑀲𑀫𑀸𑀦𑀺𑀢𑁂;

𑀜𑀢𑁆𑀢𑀺𑀁 𑀯𑀢𑁆𑀯𑀸𑀦 𑀲𑀗𑁆𑀖𑁂𑀦;

𑀓𑀢𑁆𑀢𑀩𑁆𑀩𑁂𑀯𑀁 𑀧𑀯𑀸𑀭𑀡𑀸’’𑀢𑀺 𑀘. 𑁋

𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 𑀢𑀣𑀸. 𑀫𑀽𑀮𑀲𑀺𑀓𑁆𑀔𑀸𑀧𑀓𑀭𑀡𑁂𑀬𑁂𑀯 𑀢𑀣𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀘𑀭𑀺𑀬𑀸𑀦𑀁 𑀅𑀢𑁆𑀢𑀦𑁄𑀫𑀢𑀺 𑀪𑀯𑁂𑀬𑁆𑀬.

𑀢𑀢𑁆𑀣 ‘‘𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀕𑀸𑀣𑀸𑀤𑁆𑀯𑀬𑀲𑁆𑀲 𑀅𑀢𑁆𑀣𑀫𑁂𑀯 𑀓𑀣𑁂𑀢𑁆𑀯𑀸 𑀢𑀢𑀺𑀬𑀕𑀸𑀣𑀸𑀬 𑀅𑀢𑁆𑀣𑁄 𑀦 𑀓𑀣𑀺𑀢𑁄. ‘‘𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀘 𑀆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀪𑀸𑀯𑁄𑀬𑁂𑀯 𑀓𑀣𑀺𑀢𑁄, 𑀦 𑀲𑀩𑁆𑀩𑀁 𑀧𑀢𑁆𑀢𑀓𑀮𑁆𑀮𑀁. 𑀆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀪𑀸𑀯𑁂 𑀘 𑀲𑀪𑀸𑀕𑀸𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀪𑀸𑀯𑁄𑀬𑁂𑀯 𑀧𑀢𑁆𑀢𑀓𑀮𑁆𑀮𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑁄, 𑀦 𑀇𑀢𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀏𑀢𑀸𑀲𑀼 𑀳𑀺 𑀲𑀪𑀸𑀕𑀸𑀧𑀢𑁆𑀢𑀻𑀲𑀼 𑀅𑀯𑀺𑀚𑁆𑀚𑀫𑀸𑀦𑀸𑀲𑀼, 𑀯𑀺𑀲𑀪𑀸𑀕𑀸𑀧𑀢𑁆𑀢𑀻𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺𑀬𑁂𑀯𑀸’’𑀢𑀺. ‘‘𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑁂𑀲𑀺𑀢𑀸𑀧𑀢𑁆𑀢𑀺𑀓𑀲𑁆𑀲 𑀲𑀫𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀆𑀭𑀸𑀥𑀦𑀁 𑀓𑀭𑁄𑀫𑀸’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀅𑀯𑀲𑁂𑀲𑀸𑀦𑀺 𑀢𑀻𑀡𑀺 𑀧𑀢𑁆𑀢𑀓𑀮𑁆𑀮𑀗𑁆𑀕𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀧𑁄𑀲𑀣𑁄, 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀻𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁬𑁮). 𑀢𑁂𑀲𑀼 𑀅𑀲𑀦𑁆𑀢𑁂𑀲𑀼𑀧𑀺 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄𑀢𑀺 𑀆𑀧𑀚𑁆𑀚𑀢𑀺, 𑀦 𑀧𑀦 𑀓𑀸𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁩) 𑀘, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁬𑁮) 𑀘, ‘‘𑀦, 𑀪𑀺𑀓𑁆𑀔𑀯𑁂, 𑀲𑀕𑀳𑀝𑁆𑀞𑀸𑀬 𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁪) 𑀘, 𑀢𑀲𑁆𑀫𑀸 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀲𑀘𑁂 𑀧𑀼𑀩𑁆𑀩𑁂𑀯 𑀲𑀫𑁆𑀫𑀢𑁄 𑀥𑀫𑁆𑀫𑀚𑁆𑀛𑁂𑀲𑀓𑁄 𑀅𑀢𑁆𑀣𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀏𑀓𑀁 𑀩𑁆𑀬𑀢𑁆𑀢𑀁 𑀧𑀝𑀺𑀩𑀮𑀁 𑀪𑀺𑀓𑁆𑀔𑀼𑀁 𑀲𑀗𑁆𑀖𑁂𑀦 𑀲𑀫𑁆𑀫𑀦𑁆𑀦𑀸𑀧𑁂𑀢𑁆𑀯𑀸 𑀢𑁂𑀦 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀲𑀗𑁆𑀖𑁄, 𑀪𑀦𑁆𑀢𑁂, 𑀣𑁂𑀭𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀚𑁆𑀛𑁂𑀲𑀢𑀺, 𑀉𑀤𑁆𑀤𑀺𑀲𑀢𑀼 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔𑀁. 𑀤𑀼𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀢𑀢𑀺𑀬𑀫𑁆𑀧𑀺, 𑀪𑀦𑁆𑀢𑁂, 𑀲𑀗𑁆𑀖𑁄…𑀧𑁂… 𑀉𑀤𑁆𑀤𑀺𑀲𑀢𑀼 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀸𑀧𑁂𑀢𑁆𑀯𑀸 𑀢𑀢𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑁋

‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘, 𑀉𑀤𑀓𑀁 𑀆𑀲𑀦𑁂𑀦 𑀘;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑁋

𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀼𑀩𑁆𑀩𑀓𑀭𑀡𑀸𑀦𑀺, 𑀓𑀺𑀁 𑀢𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑁋

‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁, 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄;

𑀉𑀧𑁄𑀲𑀣𑀲𑁆𑀲 𑀏𑀢𑀸𑀦𑀺, 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮; 𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑁋

𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺, 𑀓𑀺𑀁 𑀢𑀸𑀦𑀺 𑀓𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 ‘‘𑀆𑀫 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑁋

‘‘𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸;

𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀘 𑀦 𑀯𑀺𑀚𑁆𑀚𑀦𑁆𑀢𑀺;

𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺;

𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. (𑀫𑀳𑀸𑀯. 𑀅𑀝𑁆𑀞. 𑁧𑁬𑁮; 𑀓𑀗𑁆𑀔𑀸 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑁋

𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀢𑁆𑀢𑀓𑀮𑁆𑀮𑀗𑁆𑀕𑀸𑀦𑀺, 𑀓𑀺𑀁 𑀢𑀸𑀦𑀺 𑀲𑀫𑀸𑀦𑀻𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 ‘‘𑀧𑀼𑀩𑁆𑀩𑀓𑀭𑀡𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀢𑁆𑀢𑀓𑀮𑁆𑀮𑀗𑁆𑀕𑁂 𑀲𑀫𑀸𑀦𑀻𑀢𑁂 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀻𑀢𑀺 𑀅𑀬𑀫𑀫𑁆𑀳𑀸𑀓𑀁 𑀔𑀦𑁆𑀢𑀺.

𑀏𑀢𑁆𑀣 𑀘 ‘‘𑀥𑀫𑁆𑀫𑀚𑁆𑀛𑁂𑀲𑀓𑁂𑀦…𑀧𑁂… 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄’’𑀢𑀺 𑀯𑀼𑀢𑁆𑀢𑀁, 𑀲𑁄 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀯𑀘𑀦𑀻𑀬𑀪𑀸𑀯𑁄 𑀓𑀣𑀁 𑀯𑁂𑀤𑀺𑀢𑀩𑁆𑀩𑁄𑀢𑀺? ‘‘𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁, 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁫𑁪) 𑀯𑀘𑀦𑀢𑁄𑀢𑀺. ‘‘𑀲𑀗𑁆𑀖𑁂𑀦 𑀲𑀫𑁆𑀫𑀦𑁆𑀦𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺? ‘‘𑀅𑀚𑁆𑀛𑁂𑀲𑀦𑀸 𑀘𑁂𑀢𑁆𑀣 𑀲𑀗𑁆𑀖𑁂𑀦 𑀲𑀫𑁆𑀫𑀢𑀥𑀫𑁆𑀫𑀚𑁆𑀛𑁂𑀲𑀓𑀸𑀬𑀢𑁆𑀢𑀸 𑀯𑀸 𑀲𑀗𑁆𑀖𑀢𑁆𑀣𑁂𑀭𑀸𑀬𑀢𑁆𑀢𑀸 𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀗𑁆𑀖𑁄, 𑀪𑀦𑁆𑀢𑁂, 𑀣𑁂𑀭𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀚𑁆𑀛𑁂𑀲𑀢𑀺, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀅𑀬𑀁 𑀅𑀚𑁆𑀛𑁂𑀲𑀦𑀸𑀓𑀸𑀭𑁄 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? 𑀧𑀸𑀴𑀺𑀢𑁄. 𑀧𑀸𑀴𑀺𑀬𑀜𑁆𑀳𑀺 (𑀫𑀳𑀸𑀯. 𑁧𑁫𑁫) ‘‘𑀢𑁂 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀆𑀕𑀢𑁄.

𑀲𑀘𑁂 𑀧𑀦 𑀥𑀫𑁆𑀫𑀚𑁆𑀛𑁂𑀲𑀓𑁄 𑀯𑀼𑀟𑁆𑀠𑀢𑀭𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀦𑀯𑀓𑁄, ‘‘𑀲𑀗𑁆𑀖𑁄, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀚𑁆𑀛𑁂𑀲𑀢𑀺, 𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀁 𑀓𑀼𑀢𑁄 𑀮𑀩𑁆𑀪𑀢𑀺? 𑀧𑀸𑀴𑀺𑀢𑁄𑀬𑁂𑀯. 𑀧𑀸𑀴𑀺𑀬𑀜𑁆𑀳𑀺 (𑀫𑀳𑀸𑀯. 𑁧𑁫𑁫) ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀅𑀚𑁆𑀛𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀆𑀕𑀢𑁄. 𑀢𑀢𑁄 ‘‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀲𑀫𑁆𑀫𑀚𑁆𑀚𑀦𑀻…𑀧𑁂… 𑀧𑀼𑀘𑁆𑀙𑀺𑀢𑁂 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 ‘𑀆𑀫, 𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂’’𑀢𑀺 𑀇𑀤𑀁 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺? 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀢𑁄 𑀘. 𑀦𑀺𑀤𑀸𑀦𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀆𑀕𑀢𑀁, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀢𑀺…𑀧𑁂… 𑀏𑀯𑀁 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀦𑀯𑀯𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀤𑀲𑁆𑀲𑀺𑀢𑀁, 𑀓𑀺𑀁 𑀢𑀁 𑀓𑀢𑀦𑁆𑀢𑀺 𑀧𑀼𑀘𑁆𑀙𑀢𑀻’’𑀢𑀺 𑀆𑀕𑀢𑀦𑁆𑀢𑀺.

𑀦𑀦𑀼 𑀘𑁂𑀢𑀁 𑀅𑀦𑁆𑀢𑁄𑀦𑀺𑀤𑀸𑀦𑁂𑀬𑁂𑀯 𑀆𑀕𑀢𑀁, 𑀅𑀣 𑀓𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀧𑀼𑀩𑁆𑀩𑀪𑀸𑀕𑁂 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀢𑀤𑀦𑀼𑀮𑁄𑀫𑀢𑁄 𑀚𑀸𑀦𑀺𑀢𑀩𑁆𑀩𑀢𑁄 𑀯𑀢𑁆𑀢𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀇𑀫𑀸 𑀕𑀸𑀣𑀸𑀬𑁄 𑀲𑀫𑁆𑀫𑀚𑁆𑀚𑀦𑀸𑀤𑀻𑀦𑀁 𑀧𑀼𑀩𑁆𑀩𑀓𑀭𑀡𑀸𑀤𑀺𑀪𑀸𑀯𑀜𑀸𑀧𑀓𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀧𑀸𑀢𑀺𑀫𑁄𑀓𑁆𑀔𑀸𑀭𑀫𑁆𑀪𑀓𑀸𑀮𑁂 𑀪𑀡𑀺𑀢𑀩𑁆𑀩𑀪𑀸𑀯𑁂𑀦. 𑀅𑀣 𑀘 𑀧𑀦 𑀇𑀤𑀸𑀦𑀺 𑀪𑀡𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀺𑀫𑀢𑁆𑀣𑀁 𑀪𑀡𑀦𑁆𑀢𑀻𑀢𑀺 𑀘𑀺𑀦𑁆𑀢𑀸𑀬𑀁 𑀅𑀦𑁆𑀢𑁄𑀦𑀺𑀤𑀸𑀦𑁂 ‘‘𑀓𑀺𑀁 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀧𑀼𑀘𑁆𑀙𑀸𑀦𑀼𑀮𑁄𑀫𑁂𑀦 𑀧𑀼𑀩𑁆𑀩𑀓𑀭𑀡𑀸𑀤𑀻𑀦𑀁 𑀦𑀺𑀝𑁆𑀞𑀪𑀸𑀯𑀧𑀼𑀘𑁆𑀙𑀦𑀢𑁆𑀣𑀁 𑀪𑀡𑀦𑁆𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀏𑀯𑀁 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀭𑀡𑀁 𑀓𑀢𑁆𑀯𑀸𑀯 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁭𑁭), 𑀢𑀲𑁆𑀫𑀸 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀼𑀮𑁄𑀫𑀢𑁄 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀓𑀢𑁂 𑀲𑀢𑀺 𑀥𑀫𑁆𑀫𑀚𑁆𑀛𑁂𑀲𑀓𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀅𑀚𑁆𑀛𑁂𑀲𑀦𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀧𑀼𑀩𑁆𑀩𑀓𑀭𑀡𑀸𑀤𑀻𑀦𑀁 𑀦𑀺𑀝𑁆𑀞𑀪𑀸𑀯𑀧𑀼𑀘𑁆𑀙𑀦𑀁 𑀧𑀜𑁆𑀜𑀸𑀬𑀢𑀺, 𑀥𑀫𑁆𑀫𑀚𑁆𑀛𑁂𑀲𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀧𑀜𑁆𑀜𑀸𑀬𑀢𑀺, 𑀢𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁 𑀧𑀝𑀺𑀜𑁆𑀜𑀸 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀇𑀫𑁂𑀲𑀁 𑀕𑀸𑀣𑀸𑀯𑀸𑀓𑁆𑀬𑀸𑀦𑀁 𑀯𑀘𑀦𑁂 𑀧𑀬𑁄𑀚𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀓𑀢𑁆𑀯𑀸 𑀧𑀡𑁆𑀟𑀺𑀢𑁂𑀳𑀺 𑀯𑀺𑀦𑀬𑀜𑁆𑀜𑀽𑀳𑀺 𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑁄 𑀅𑀬𑀁 𑀓𑀣𑀸𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄𑀢𑀺. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀧𑀸𑀴𑀺𑀬𑀝𑁆𑀞𑀓𑀣𑀸𑀤𑀻𑀦𑀜𑁆𑀳𑀺, 𑀅𑀦𑀼𑀭𑀽𑀧𑀁 𑀇𑀫𑀁 𑀦𑀬𑀁;

𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑀬𑀦𑁆𑀢𑀼, 𑀧𑀡𑁆𑀟𑀺𑀢𑀸 𑀯𑀺𑀦𑀬𑀜𑁆𑀜𑀼𑀦𑁄.

𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑀬𑀺𑀢𑁆𑀯𑀸, 𑀬𑀼𑀢𑁆𑀢𑀁 𑀘𑁂 𑀥𑀸𑀭𑀬𑀦𑁆𑀢𑀼 𑀢𑀁;

𑀦𑁄 𑀘𑁂 𑀬𑀼𑀢𑁆𑀢𑀁 𑀙𑀟𑁆𑀟𑀬𑀦𑁆𑀢𑀼, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑀸𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀉𑀧𑁄𑀲𑀣𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀧𑀜𑁆𑀘𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.