𑁨𑁪. 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁫𑁬. 𑀏𑀯𑀁 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀲𑀻𑀫𑀸𑀢𑀺 𑀏𑀢𑁆𑀣’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀫𑀸𑀢𑀺 𑀲𑀺𑀦𑀻𑀬𑀢𑁂 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀩𑀦𑁆𑀥𑀻𑀬𑀢𑁂𑀢𑀺 𑀲𑀻𑀫𑀸. 𑀲𑀺 𑀩𑀦𑁆𑀥𑀦𑁂𑀢𑀺 𑀥𑀸𑀢𑀼, 𑀫-𑀧𑀘𑁆𑀘𑀬𑁄, 𑀓𑀺𑀬𑀸𑀤𑀺𑀕𑀡𑁄𑀬𑀁. 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑁂𑀦 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀻𑀫𑀸 𑀦𑀸𑀫𑁂𑀲𑀸…𑀧𑁂… 𑀳𑁄𑀢𑀻’’𑀢𑀺. 𑀢𑀢𑁆𑀣 𑀩𑀤𑁆𑀥𑀲𑀻𑀫𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀏𑀓𑀸𑀤𑀲’’𑀢𑁆𑀬𑀸𑀤𑀺𑀫𑀸𑀳.

𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀧𑀭𑀫𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀬𑀢𑁆𑀣 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀢𑀓𑁂 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀢𑀢𑁄 𑀑𑀭𑀦𑁆𑀢𑀺 𑀆𑀳 ‘‘𑀅𑀢𑀺𑀔𑀼𑀤𑁆𑀤𑀓𑀸 𑀦𑀸𑀫 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀲𑁆𑀲𑀁 𑀧𑀦 𑀤𑀺𑀲𑀸𑀬𑀁 𑀦𑀺𑀫𑀺𑀢𑁆𑀢𑁂 𑀅𑀲𑀢𑀺 𑀬𑀢𑁆𑀣 𑀅𑀢𑁆𑀣𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀞𑀫𑀁 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀫𑀦𑁆𑀢𑀸 𑀯𑀺𑀚𑁆𑀚𑀫𑀸𑀦𑀝𑁆𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬𑀸’’𑀢𑀺 𑀧𑀞𑀫𑀓𑀺𑀢𑁆𑀢𑀺𑀢𑀁 𑀧𑀝𑀺𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺 𑀢𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀬𑀧𑀺 𑀲𑀻𑀫𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀢𑁄. 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀫𑀫𑀡𑁆𑀟𑀮𑀁 𑀲𑀫𑁆𑀩𑀦𑁆𑀥𑀦𑁆𑀢𑁂𑀦𑀸𑀢𑀺 𑀯𑀺𑀦𑀬𑀥𑀭𑁂𑀦 𑀲𑀬𑀁 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀞𑀢𑁆𑀯𑀸 𑀓𑁂𑀯𑀮𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀯𑀘𑀦𑁂𑀦𑁂𑀯 𑀲𑀻𑀫𑀫𑀡𑁆𑀟𑀮𑀁 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀩𑀦𑁆𑀥𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀁 𑀅𑀕𑀦𑁆𑀢𑁆𑀯𑀸𑀧𑀺 𑀳𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀺𑀬𑁄𑀚𑀦𑀧𑀭𑀫𑀸𑀬𑀧𑀺 𑀲𑀻𑀫𑀸𑀬 𑀲𑀫𑀦𑁆𑀢𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀕𑀫𑀦𑀲𑁆𑀲 𑀏𑀓𑀤𑀺𑀯𑀲𑁂𑀦 𑀤𑀼𑀓𑁆𑀓𑀭𑀢𑁆𑀢𑀸 𑀯𑀺𑀦𑀬𑀥𑀭𑁂𑀦 𑀲𑀬𑀁 𑀅𑀤𑀺𑀝𑁆𑀞𑀫𑁆𑀧𑀺 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽𑀳𑀺 𑀬𑀣𑀸𑀯𑀯𑀢𑁆𑀣𑀺𑀢𑀁 𑀦𑀺𑀫𑀺𑀢𑁆𑀢𑀁 ‘‘𑀧𑀸𑀲𑀸𑀡𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀓𑁂𑀦𑀘𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯.

𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀇𑀫𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀲𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀩𑀤𑁆𑀥𑀸 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀭𑀢𑀦𑀫𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀳𑀢𑁆𑀣𑀫𑀢𑁆𑀢𑀸 𑀲𑀻𑀫𑀦𑁆𑀢𑀭𑀺𑀓𑀸 𑀞𑀧𑁂𑀢𑀩𑁆𑀩𑀸’’𑀢𑀺. 𑀏𑀓𑀗𑁆𑀕𑀼𑀮𑀺𑀫𑀢𑁆𑀢𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀢𑀓𑁂𑀦𑀧𑀺 𑀳𑀺 𑀲𑀻𑀫𑀸 𑀅𑀲𑀫𑁆𑀪𑀺𑀦𑁆𑀦𑀸𑀯 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀲𑀻𑀫𑀢𑁄 𑀩𑀸𑀳𑀺𑀭𑀢𑁆𑀢𑀸 𑀲𑀻𑀫𑀲𑀫𑁆𑀪𑁂𑀤𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀲𑀻𑀫𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀟𑁆𑀠𑀺𑀢𑁆𑀯𑀸 𑀲𑀻𑀫𑀧𑁆𑀧𑀤𑁂𑀲𑀁 𑀧𑀯𑀺𑀝𑁆𑀞𑁂 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀦, 𑀧𑀦 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀲𑀻𑀫𑀸 𑀢𑀢𑁆𑀢𑀓𑁂𑀦 𑀅𑀲𑀻𑀫𑀸 𑀳𑁄𑀢𑀺, 𑀤𑁆𑀯𑁂 𑀧𑀦 𑀲𑀻𑀫𑀸 𑀧𑀘𑁆𑀙𑀸 𑀯𑀟𑁆𑀠𑀺𑀢𑀭𑀼𑀓𑁆𑀔𑁂𑀦 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀏𑀓𑀸𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀢𑁆𑀣 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀇𑀢𑀭𑀁 𑀲𑁄𑀥𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀢𑀲𑁆𑀲𑀸 𑀧𑀤𑁂𑀲𑀦𑁆𑀢𑀺 𑀬𑀢𑁆𑀣 𑀞𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀧𑀤𑁂𑀲𑀁, 𑀬𑀢𑁆𑀣 𑀧𑀦 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀧𑀤𑁂𑀲𑀁 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀩𑀦𑁆𑀥𑀦𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀁𑀪𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀦 𑀓𑀫𑁆𑀫𑀯𑀸𑀘𑀁 𑀯𑀕𑁆𑀕𑀁 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀯𑀸𑀘𑀁 𑀦 𑀪𑀺𑀦𑁆𑀤𑀦𑁆𑀢𑀺, 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫𑁮. 𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑁄𑀢𑀺 𑀦 𑀓𑁂𑀦𑀘𑀺 𑀓𑀢𑁄 𑀲𑀬𑀁𑀚𑀸𑀢𑁄𑀯 𑀯𑀼𑀢𑁆𑀢𑁄. 𑀢𑀣𑀸 𑀲𑁂𑀲𑀸𑀧𑀺. 𑀇𑀢𑀭𑁄𑀧𑀻𑀢𑀺 𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑀸𑀤𑀺𑀓𑁄 𑀧𑀩𑁆𑀩𑀢𑁄𑀧𑀺. 𑀳𑀢𑁆𑀣𑀺𑀧𑁆𑀧𑀫𑀸𑀡𑁄𑀢𑀺 𑀏𑀢𑁆𑀣 𑀪𑀽𑀫𑀺𑀢𑁄 𑀉𑀕𑁆𑀕𑀢𑀧𑀤𑁂𑀲𑁂𑀦 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀕𑀳𑁂𑀢𑀩𑁆𑀩𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀧𑀦 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀜𑁆𑀘 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) ‘‘𑀳𑀢𑁆𑀣𑀺𑀧𑁆𑀧𑀫𑀸𑀡𑁄 𑀦𑀸𑀫 𑀧𑀩𑁆𑀩𑀢𑁄 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀅𑀟𑁆𑀠𑀝𑁆𑀞𑀫𑀭𑀢𑀦𑀼𑀩𑁆𑀩𑁂𑀥𑁄’’𑀢𑀺 𑀯𑀼𑀢𑁆𑀢𑀁. 𑀘𑀢𑀽𑀳𑀺 𑀯𑀸 𑀢𑀻𑀳𑀺 𑀯𑀸𑀢𑀺 𑀲𑀻𑀫𑀪𑀽𑀫𑀺𑀬𑀁 𑀘𑀢𑀽𑀲𑀼, 𑀢𑀻𑀲𑀼 𑀯𑀸 𑀤𑀺𑀲𑀸𑀲𑀼 𑀞𑀺𑀢𑁂𑀳𑀺, 𑀏𑀓𑀺𑀲𑁆𑀲𑀸 𑀏𑀯 𑀧𑀦 𑀤𑀺𑀲𑀸𑀬 𑀞𑀺𑀢𑁂𑀳𑀺 𑀢𑀢𑁄 𑀩𑀳𑀽𑀳𑀺𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑁆𑀯𑀻𑀳𑀺 𑀧𑀦 𑀤𑁆𑀯𑀻𑀲𑀼 𑀤𑀺𑀲𑀸𑀲𑀼 𑀞𑀺𑀢𑁂𑀳𑀺𑀧𑀺 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑁂𑀦 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸. 𑀢𑀁 𑀩𑀳𑀺𑀤𑁆𑀥𑀸 𑀓𑀢𑁆𑀯𑀸𑀢𑀺 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀅𑀲𑀻𑀫𑀢𑁆𑀢𑀸 𑀅𑀦𑁆𑀢𑁄𑀲𑀻𑀫𑀸𑀬 𑀓𑀭𑀡𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀘𑁂’’𑀢𑀺𑀆𑀤𑀺.

𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑀢𑀸 𑀲𑀡𑁆𑀞𑀸𑀦𑀢𑁄 𑀕𑀳𑁂𑀢𑀩𑁆𑀩𑀸, 𑀦 𑀢𑀼𑀮𑀕𑀡𑀦𑀸𑀯𑀲𑁂𑀦, 𑀪𑀸𑀭𑀢𑁄 𑀧𑀮𑀧𑀭𑀺𑀫𑀸𑀡𑀜𑁆𑀘 𑀫𑀕𑀥𑀢𑀼𑀮𑀸𑀬 𑀕𑀳𑁂𑀢𑀩𑁆𑀩𑀁, 𑀲𑀸 𑀘 𑀮𑁄𑀓𑀺𑀬𑀢𑀼𑀮𑀸𑀬 𑀤𑁆𑀯𑀺𑀕𑀼𑀡𑀸𑀢𑀺 𑀯𑀤𑀦𑁆𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀧𑀦 ‘‘𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑀢𑀸 𑀢𑀼𑀮𑀢𑀸𑀬 𑀕𑀳𑁂𑀢𑀩𑁆𑀩𑀸, 𑀦 𑀢𑀼𑀮𑀕𑀡𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀫𑀳𑀦𑁆𑀢𑁄𑀧𑀻𑀢𑀺 𑀪𑀽𑀫𑀺𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀅𑀦𑀼𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀑𑀢𑀺𑀡𑁆𑀡𑀖𑀦𑀢𑁄 𑀅𑀦𑁂𑀓𑀬𑁄𑀚𑀦𑀧𑁆𑀧𑀫𑀸𑀡𑁄𑀧𑀺. 𑀲𑀘𑁂 𑀳𑀺 𑀢𑀢𑁄 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀓𑀽𑀝𑀁 𑀉𑀕𑁆𑀕𑀘𑁆𑀙𑀢𑀺, 𑀧𑀩𑁆𑀩𑀢𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑁋 𑀲𑀘𑁂 𑀏𑀓𑀸𑀩𑀤𑁆𑀥𑁄 𑀳𑁄𑀢𑀺, 𑀦 𑀓𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀼𑀦𑁆𑀦𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀳𑁂𑀝𑁆𑀞𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑀤𑀺𑀲𑁂 𑀧𑀸𑀲𑀸𑀡𑁂 𑀞𑀺𑀢𑀢𑁆𑀢𑀸 𑀏𑀓𑀸𑀩𑀤𑁆𑀥𑀪𑀸𑀯𑁂 𑀲𑀢𑀺𑀧𑀺 𑀧𑀣𑀯𑀺𑀢𑁄 𑀉𑀤𑁆𑀥𑀁 𑀢𑁂𑀲𑀁 𑀲𑀫𑁆𑀩𑀦𑁆𑀥𑁂 𑀅𑀲𑀢𑀺 𑀳𑁂𑀝𑁆𑀞𑀸 𑀧𑀣𑀯𑀻𑀕𑀢𑀲𑀫𑁆𑀩𑀦𑁆𑀥𑀫𑀢𑁆𑀢𑁂 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 ‘‘𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀅𑀢𑀺𑀫𑀳𑀦𑁆𑀢𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀣𑀯𑀺𑀢𑁄 𑀳𑁂𑀝𑁆𑀞𑀸 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑁂 𑀕𑀬𑁆𑀳𑀫𑀸𑀦𑁂 𑀧𑀩𑁆𑀩𑀢𑀫𑁂𑀯 𑀳𑁄𑀢𑀻𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀘𑀺𑀦𑀺𑀢𑁆𑀯𑀸 𑀓𑀢𑀧𑀁𑀲𑀼𑀧𑀼𑀜𑁆𑀚𑁂 𑀢𑀺𑀡𑀕𑀼𑀫𑁆𑀩𑀭𑀼𑀓𑁆𑀔𑀸 𑀘𑁂 𑀚𑀸𑀬𑀦𑁆𑀢𑀺, 𑀧𑀩𑁆𑀩𑀢𑁄 𑀳𑁄𑀢𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄, 𑀦𑁂𑀯𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀯𑀼𑀢𑁆𑀢𑀁. 𑀧𑀸𑀲𑀸𑀡𑁄𑀢𑀺 𑀲𑀼𑀥𑀸𑀫𑀬𑀧𑀸𑀲𑀸𑀡𑁄𑀧𑀺 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁 𑀇𑀝𑁆𑀞𑀓𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀲𑁄𑀧𑀻𑀢𑀺 𑀔𑀸𑀡𑀼𑀓𑁄 𑀯𑀺𑀬 𑀉𑀝𑁆𑀞𑀺𑀢𑀧𑀸𑀲𑀸𑀡𑁄𑀧𑀺. 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀫𑀢𑁆𑀢𑀫𑁆𑀧𑀻𑀢𑀺 𑀏𑀓𑀘𑁆𑀘𑁂𑀲𑀼 𑀦𑀺𑀫𑀺𑀢𑁆𑀢𑀲𑀤𑁆𑀤𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁.

𑀅𑀦𑁆𑀢𑁄𑀲𑀸𑀭𑀸𑀦𑀦𑁆𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀢𑀭𑀼𑀡𑀢𑀸𑀬 𑀲𑀸𑀭𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑀺𑀡𑀸𑀫𑁂𑀦 𑀪𑀯𑀺𑀲𑁆𑀲𑀫𑀸𑀦𑀲𑀸𑀭𑁂𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑀧𑀭𑀺𑀡𑀸𑀳𑀸𑀦𑀁 𑀘𑀢𑀼𑀧𑀜𑁆𑀘𑀫𑀢𑁆𑀢𑀸𑀦𑀫𑁆𑀧𑀺 𑀯𑀦𑀁 𑀯𑀝𑁆𑀝𑀢𑀺. 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑀸𑀦𑀦𑁆𑀢𑀺 𑀅𑀦𑁆𑀢𑁄𑀲𑀸𑀭𑁂𑀳𑀺 𑀭𑀼𑀓𑁆𑀔𑁂𑀳𑀺 𑀲𑀫𑁆𑀫𑀺𑀲𑁆𑀲𑀸𑀦𑀁. 𑀏𑀢𑁂𑀦 𑀢𑀘𑀲𑀸𑀭𑀭𑀼𑀓𑁆𑀔𑀫𑀺𑀲𑁆𑀲𑀓𑀸𑀦𑀫𑁆𑀧𑀺 𑀯𑀦𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀫𑁆𑀧𑀻𑀢𑀺 𑀲𑀸𑀭𑀭𑀼𑀓𑁆𑀔𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀧𑀦 ‘‘𑀏𑀢𑁆𑀣 𑀢𑀬𑁄 𑀘𑁂 𑀲𑀸𑀭𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, 𑀤𑁆𑀯𑁂 𑀅𑀲𑀸𑀭𑀸, 𑀲𑀸𑀭𑀭𑀼𑀓𑁆𑀔𑀸𑀦𑀁 𑀩𑀳𑀼𑀢𑁆𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀲𑀼𑀲𑀸𑀦𑀫𑁆𑀧𑀺 𑀇𑀥 𑀯𑀦𑀫𑁂𑀯𑀸𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺 𑀲𑀬𑀁𑀚𑀸𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘𑀘𑀢𑀽𑀲𑀼 𑀤𑁆𑀯𑁂 𑀅𑀦𑁆𑀢𑁄𑀲𑀸𑀭𑀸 𑀘𑁂, 𑀯𑀝𑁆𑀝𑀢𑀺, 𑀅𑀦𑁆𑀢𑁄𑀲𑀸𑀭𑀸 𑀅𑀥𑀺𑀓𑀸, 𑀲𑀫𑀸 𑀯𑀸, 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀩𑀳𑀽𑀲𑀼𑀧𑀺 𑀤𑁆𑀯𑁂 𑀘𑁂 𑀅𑀦𑁆𑀢𑁄𑀲𑀸𑀭𑀸 𑀅𑀢𑁆𑀣𑀺, 𑀯𑀝𑁆𑀝𑀢𑀻’𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀭𑀼𑀓𑁆𑀔𑀖𑀝𑀸𑀬 𑀅𑀦𑁆𑀢𑀭𑁂 𑀭𑀼𑀓𑁆𑀔𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑀺𑀆𑀤𑀻𑀳𑀺 𑀯𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀯 𑀅𑀦𑁆𑀢𑁄𑀭𑀼𑀓𑁆𑀔𑀦𑁆𑀢𑀭𑁂𑀲𑀼 𑀏𑀯 𑀧𑀭𑀺𑀯𑁂𑀡𑀧𑀡𑁆𑀡𑀲𑀸𑀮𑀸𑀤𑀻𑀦𑀁 𑀓𑀭𑀡𑀯𑀲𑁂𑀦 𑀬𑀣𑀸 𑀅𑀦𑁆𑀢𑁄𑀯𑀺𑀳𑀸𑀭𑀫𑁆𑀧𑀺 𑀯𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀲𑀩𑁆𑀩𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀁, 𑀯𑀺𑀳𑀸𑀭𑀲𑁆𑀲 𑀅𑀯𑀦𑀢𑁆𑀢𑀸 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀯𑀦𑀁 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑀩𑁆𑀩𑀁 𑀲𑀺𑀬𑀸, 𑀇𑀥 𑀧𑀦 𑀅𑀦𑁆𑀢𑁄𑀧𑀺 𑀯𑀦𑀢𑁆𑀢𑀸 ‘‘𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀳𑀺 𑀢𑀁 𑀓𑀺𑀢𑁆𑀢𑁂𑀦𑁆𑀢𑀺, ‘‘𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀭𑀺 𑀯𑀺𑀳𑀸𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀤𑁄𑀲𑁄 𑀆𑀧𑀚𑁆𑀚𑀢𑀺. 𑀏𑀓𑀤𑁂𑀲𑀦𑁆𑀢𑀺 𑀯𑀦𑁂𑀓𑀤𑁂𑀲𑀁, 𑀭𑀼𑀓𑁆𑀔𑀯𑀺𑀭𑀳𑀺𑀢𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑀲𑁆𑀲 𑀏𑀓𑀧𑀲𑁆𑀲𑁂 𑀞𑀺𑀢𑀯𑀦𑀲𑁆𑀲 𑀏𑀓𑀤𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄𑀢𑀺 𑀯𑀁𑀲𑀤𑀡𑁆𑀟𑀧𑁆𑀧𑀫𑀸𑀡𑁄. ‘‘𑀮𑁂𑀔𑀦𑀺𑀤𑀡𑁆𑀟𑀧𑁆𑀧𑀫𑀸𑀡𑁄’’𑀢𑀺 𑀓𑁂𑀘𑀺. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀧𑀦 𑀅𑀯𑁂𑀪𑀗𑁆𑀕𑀺𑀬𑀯𑀺𑀦𑀺𑀘𑁆𑀙𑀬𑁂 ‘‘𑀬𑁄 𑀓𑁄𑀘𑀺 𑀅𑀝𑁆𑀞𑀗𑁆𑀕𑀼𑀮𑀲𑀽𑀘𑀺𑀤𑀡𑁆𑀟𑀫𑀢𑁆𑀢𑁄𑀧𑀺 𑀯𑁂𑀴𑀼…𑀧𑁂… 𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀦𑀼𑀢𑀭𑁄 𑀯𑁂𑀴𑀼𑀤𑀡𑁆𑀟𑁄𑀢𑀺 𑀘 𑀲𑀽𑀘𑀺𑀤𑀡𑁆𑀟𑁄𑀢𑀺 𑀘 𑀕𑀳𑁂𑀢𑀩𑁆𑀩𑀁. 𑀯𑀁𑀲𑀦𑀴𑀓𑀲𑀭𑀸𑀯𑀸𑀤𑀻𑀲𑀽𑀢𑀺 𑀯𑁂𑀴𑀼𑀧𑀩𑁆𑀩𑁂 𑀯𑀸 𑀦𑀴𑀧𑀩𑁆𑀩𑁂 𑀯𑀸 𑀓𑀧𑀮𑁆𑀮𑀓𑀸𑀤𑀺𑀫𑀢𑁆𑀢𑀺𑀓𑀪𑀸𑀚𑀦𑁂𑀲𑀼 𑀯𑀸𑀢𑀺 𑀅𑀢𑁆𑀣𑁄. 𑀢𑀗𑁆𑀔𑀡𑀫𑁆𑀧𑀻𑀢𑀺 𑀢𑀭𑀼𑀡𑀧𑁄𑀢𑀓𑁂 𑀅𑀫𑀺𑀮𑀸𑀬𑀺𑀢𑁆𑀯𑀸 𑀯𑀺𑀭𑀼𑀳𑀦𑀚𑀸𑀢𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁂 𑀧𑀦 𑀧𑀭𑀺𑀡𑀢𑀸 𑀲𑀫𑀽𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑁄𑀧𑀺𑀢𑀸𑀧𑀺 𑀙𑀺𑀦𑁆𑀦𑀲𑀸𑀔𑀸 𑀯𑀺𑀬 𑀫𑀺𑀮𑀸𑀬𑀺𑀢𑁆𑀯𑀸 𑀘𑀺𑀭𑁂𑀦 𑀦𑀯𑀫𑀽𑀮𑀗𑁆𑀓𑀼𑀭𑀼𑀧𑁆𑀧𑀢𑁆𑀢𑀺𑀬𑀸 𑀚𑀻𑀯𑀦𑁆𑀢𑀺, 𑀫𑀺𑀬𑀦𑁆𑀢𑀺𑀬𑁂𑀯 𑀯𑀸, 𑀢𑀸𑀤𑀺𑀲𑁂 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀢𑀦𑁆𑀢𑀺 𑀦𑀯𑀫𑀽𑀮𑀲𑀸𑀔𑀸𑀦𑀺𑀕𑁆𑀕𑀫𑀦𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀧𑀦 ‘‘𑀲𑀽𑀘𑀺𑀤𑀡𑁆𑀟𑀓𑀧𑁆𑀧𑀫𑀸𑀡𑁄𑀢𑀺 𑀲𑀻𑀳𑀴𑀤𑀻𑀧𑁂 𑀮𑁂𑀔𑀦𑀺𑀤𑀡𑁆𑀟𑀧𑁆𑀧𑀫𑀸𑀡𑁄𑀢𑀺 𑀯𑀤𑀦𑁆𑀢𑀺, 𑀲𑁄 𑀘 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀧𑀭𑀺𑀫𑀸𑀡𑁄𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀫𑀚𑁆𑀛𑁂𑀢𑀺 𑀲𑀻𑀫𑀸𑀬 𑀫𑀳𑀸𑀤𑀺𑀲𑀸𑀦𑀁 𑀅𑀦𑁆𑀢𑁄. 𑀓𑁄𑀡𑀦𑁆𑀢𑀺 𑀲𑀻𑀫𑀸𑀬 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀫𑀕𑁆𑀕𑀸𑀦𑀁 𑀲𑀫𑁆𑀩𑀦𑁆𑀥𑀝𑁆𑀞𑀸𑀦𑀁. 𑀧𑀭𑀪𑀸𑀕𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀓𑁄𑀡𑀸𑀦𑀁 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁂𑀲𑀼 𑀅𑀝𑁆𑀞𑀲𑀼 𑀫𑀕𑁆𑀕𑁂𑀲𑀼 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀏𑀓𑀁, 𑀅𑀜𑁆𑀜𑀺𑀲𑁆𑀲𑀸 𑀤𑀺𑀲𑀸𑀬 𑀘𑀸𑀧𑀭𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀧𑀦 𑀓𑀺𑀢𑁆𑀢𑀺𑀢𑀫𑀢𑁆𑀢𑁂𑀦 𑀓𑀣𑀁 𑀏𑀓𑀸𑀩𑀤𑁆𑀥𑀢𑀸 𑀯𑀺𑀕𑀘𑁆𑀙𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀭𑀢𑁄 𑀕𑀢𑀝𑁆𑀞𑀸𑀦𑁂𑀧𑀺 𑀏𑀢𑁂 𑀏𑀯 𑀢𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸. ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀢𑁆𑀣 𑀓𑀸𑀭𑀡𑀁 𑀯𑀺𑀘𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) 𑀯𑀼𑀢𑁆𑀢𑀁. 𑀯𑀺𑀘𑀺𑀦𑀦𑁆𑀢𑁄 𑀧𑀦 𑀏𑀯𑀁 𑀓𑀸𑀭𑀡𑀁 𑀧𑀜𑁆𑀜𑀸𑀬𑀢𑀺 𑁋 𑀧𑀼𑀩𑁆𑀩𑀯𑀸𑀓𑁆𑀬𑁂𑀧𑀺 ‘‘𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸’’𑀢𑀺, 𑀧𑀭𑀯𑀸𑀓𑁆𑀬𑁂𑀧𑀺 ‘‘𑀯𑀺𑀳𑀸𑀭𑀫𑀚𑁆𑀛𑁂𑀦 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑀫𑀕𑁆𑀕𑁄𑀧𑀻’’𑀢𑀺 𑀯𑀺𑀳𑀸𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀓𑁄𑀡𑀁 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀕𑀢𑀁 𑀧𑀦𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀏𑀢𑁂 𑀫𑀕𑁆𑀕𑀸 𑀯𑀺𑀳𑀸𑀭𑀲𑁆𑀲 𑀓𑁄𑀡𑀫𑁂𑀯 𑀦𑀺𑀩𑁆𑀩𑀺𑀚𑁆𑀛𑀺𑀁𑀲𑀼, 𑀦 𑀅𑀜𑁆𑀜𑀫𑀜𑁆𑀜𑀁 𑀫𑀺𑀲𑁆𑀲𑀺𑀁𑀲𑀼, 𑀢𑀲𑁆𑀫𑀸 𑀏𑀓𑀸𑀩𑀤𑁆𑀥𑀪𑀸𑀯𑀸𑀪𑀸𑀯𑀸 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 ‘‘𑀧𑀭𑀪𑀸𑀕𑁂 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀞𑀺𑀢𑁂𑀲𑀼 𑀅𑀝𑁆𑀞𑀲𑀼 𑀫𑀕𑁆𑀕𑁂𑀲𑀼 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀏𑀓𑀁, 𑀅𑀧𑀭𑀸𑀬 𑀏𑀓𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀧𑀦 ‘‘𑀧𑀭𑀪𑀸𑀕𑁂𑀢𑀺 𑀏𑀢𑁆𑀣 𑀏𑀢𑁂𑀳𑀺 𑀩𑀤𑁆𑀥𑀝𑁆𑀞𑀸𑀦𑀢𑁄 𑀕𑀢𑀢𑁆𑀢𑀸 𑀯𑀝𑁆𑀝𑀢𑀺, 𑀢𑀣𑀸 𑀤𑀻𑀖𑀫𑀕𑁆𑀕𑁂𑀧𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀕𑀢𑀝𑁆𑀞𑀸𑀦𑀲𑁆𑀲 𑀅𑀜𑁆𑀜𑀢𑁆𑀢𑀸𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀏𑀓𑀸𑀩𑀤𑁆𑀥𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀇𑀤𑀜𑁆𑀘 𑀧𑀸𑀴𑀺𑀬𑀁 𑀪𑀺𑀓𑁆𑀔𑀼𑀦𑀻𑀦𑀁 𑀦𑀤𑀻𑀧𑀸𑀭𑀕𑀫𑀦𑁂 𑀦𑀤𑀻𑀮𑀓𑁆𑀔𑀡𑀲𑁆𑀲 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀯𑀸𑀲𑀓𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) ‘‘𑀪𑀺𑀓𑁆𑀔𑀼𑀦𑀺𑀬𑀸 𑀏𑀯 𑀕𑀳𑀡𑀜𑁆𑀘𑁂𑀢𑁆𑀣 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀪𑀺𑀓𑁆𑀔𑀼𑀦𑀻𑀯𑀲𑁂𑀦 𑀦𑀤𑀻𑀮𑀓𑁆𑀔𑀡𑀲𑁆𑀲 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀢𑁂𑀦𑁂𑀯 𑀦𑀬𑁂𑀦 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀅𑀬𑀁 𑀯𑀼𑀢𑁆𑀢𑀮𑀓𑁆𑀔𑀡𑀸 𑀦𑀤𑀻 𑀲𑀫𑀼𑀤𑁆𑀤𑀁 𑀯𑀸 𑀧𑀯𑀺𑀲𑀢𑀼 𑀢𑀴𑀸𑀓𑀁 𑀯𑀸, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀧𑀦 ‘‘𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀢𑀓𑀧𑁆𑀧𑀫𑀸𑀡𑀉𑀤𑀓𑁂𑀬𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺. ‘𑀢𑁂𑀫𑀺𑀬𑀢𑀻’𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀦𑀤𑀻𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀏𑀯𑀭𑀽𑀧𑀸𑀬 𑀦𑀤𑀺𑀬𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀉𑀤𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀧𑁆𑀧𑁄𑀤𑀓𑁂𑀧𑀺 𑀞𑀢𑁆𑀯𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂’’𑀢𑀺 𑀯𑀼𑀢𑁆𑀢𑀁.

𑀦𑀤𑀻𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀏𑀓𑀢𑁆𑀣 𑀓𑀺𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀭𑀢𑁄 𑀕𑀢𑀝𑁆𑀞𑀸𑀦𑁂𑀧𑀺 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀘 ‘‘𑀅𑀲𑀫𑁆𑀫𑀺𑀲𑁆𑀲𑀸 𑀦𑀤𑀺𑀬𑁄 𑀧𑀦 𑀘𑀢𑀲𑁆𑀲𑁄𑀧𑀺 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀲𑀫𑁆𑀫𑀺𑀲𑁆𑀲𑀕𑁆𑀕𑀳𑀡𑀁 𑀓𑀢𑀁. 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀯𑀭𑀡𑀁 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀆𑀯𑀭𑀡𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀦𑁆𑀤𑀢𑀺𑀬𑁂𑀯. 𑀅𑀧𑀯𑀢𑁆𑀢𑀫𑀸𑀦𑀸𑀢𑀺 𑀅𑀲𑀦𑁆𑀤𑀫𑀸𑀦𑀼𑀤𑀓𑀸. 𑀆𑀯𑀭𑀡𑀜𑁆𑀳𑀺 𑀧𑀢𑁆𑀯𑀸 𑀦𑀤𑀺𑀬𑀸 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀉𑀤𑀓𑀁 𑀅𑀲𑀦𑁆𑀤𑀫𑀸𑀦𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀦𑀤𑀻𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀉𑀧𑀭𑀺 𑀲𑀦𑁆𑀤𑀫𑀸𑀦𑀝𑁆𑀞𑀸𑀦𑁂𑀬𑁂𑀯 𑀯𑀝𑁆𑀝𑀢𑀺. 𑀅𑀲𑀦𑁆𑀤𑀫𑀸𑀦𑀝𑁆𑀞𑀸𑀦𑁂 𑀧𑀦 𑀉𑀤𑀓𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀞𑀺𑀢𑀫𑁂𑀯 𑀳𑀺 𑀉𑀤𑀓𑀁 𑀉𑀤𑀓𑀦𑀺𑀫𑀺𑀢𑁆𑀢𑁂 𑀯𑀝𑁆𑀝𑀢𑀺, 𑀦 𑀲𑀦𑁆𑀤𑀫𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦𑀤𑀻𑀦𑀺𑀫𑀺𑀢𑁆𑀢𑀁, 𑀅𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀉𑀤𑀓𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦𑀤𑀻𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀢𑀼𑀢𑁄 𑀧𑀭𑀢𑁄 𑀢𑀢𑁆𑀢𑀓𑀁 𑀉𑀤𑀓𑀁 𑀬𑀤𑀺 𑀧𑀯𑀢𑁆𑀢𑀢𑀺, 𑀦𑀤𑀻 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀚𑀸𑀢𑀲𑁆𑀲𑀭𑀸𑀤𑀻𑀲𑀼 𑀞𑀺𑀢𑁄𑀤𑀓𑀁 𑀚𑀸𑀢𑀲𑁆𑀲𑀭𑀸𑀤𑀺𑀧𑀤𑁂𑀲𑁂𑀦 𑀅𑀦𑁆𑀢𑀭𑀺𑀓𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀦𑀤𑀻𑀧𑀸𑀭𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀁 𑀯𑀺𑀬. 𑀲𑀘𑁂 𑀲𑁄 𑀧𑀤𑁂𑀲𑁄 𑀓𑀸𑀮𑀦𑁆𑀢𑀭𑁂𑀦 𑀕𑀸𑀫𑀔𑁂𑀢𑁆𑀢𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀅𑀜𑁆𑀜𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀯𑀼𑀢𑁆𑀢𑀁. 𑀫𑀽𑀮𑁂𑀢𑀺 𑀆𑀤𑀺𑀓𑀸𑀮𑁂. 𑀦𑀤𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀣𑀸 𑀉𑀤𑀓𑀁 𑀅𑀦𑀺𑀘𑁆𑀙𑀦𑁆𑀢𑁂𑀳𑀺 𑀓𑀲𑁆𑀲𑀓𑁂𑀳𑀺 𑀫𑀳𑁄𑀖𑁂 𑀦𑀺𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀦𑀤𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀸 𑀫𑀸𑀢𑀺𑀓𑀸𑀫𑀼𑀔𑀤𑁆𑀯𑀸𑀭𑁂𑀦 𑀦𑀤𑀻𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸.

𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀤𑀻𑀖𑀭𑀚𑁆𑀚𑀼𑀦𑀸 𑀓𑀽𑀝𑁂𑀳𑀺 𑀉𑀲𑁆𑀲𑀺𑀜𑁆𑀘𑀦𑀻𑀬𑀁. 𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀯𑀸 𑀓𑀽𑀧𑀢𑁄 𑀯𑀺𑀬 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀓𑀁.

𑀅𑀲𑀫𑁆𑀫𑀺𑀲𑁆𑀲𑁂𑀳𑀻𑀢𑀺 𑀲𑀩𑁆𑀩𑀤𑀺𑀲𑀸𑀲𑀼 𑀞𑀺𑀢𑀧𑀩𑁆𑀩𑀢𑁂𑀳𑀺 𑀏𑀯 𑀯𑀸 𑀧𑀸𑀲𑀸𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀳𑀺 𑀯𑀸 𑀦𑀺𑀫𑀺𑀢𑁆𑀢𑀦𑁆𑀢𑀭𑀸𑀩𑁆𑀬𑀯𑀳𑀺𑀢𑁂𑀳𑀺. 𑀲𑀫𑁆𑀫𑀺𑀲𑁆𑀲𑁂𑀳𑀻𑀢𑀺 𑀏𑀓𑀢𑁆𑀣 𑀧𑀩𑁆𑀩𑀢𑁄, 𑀅𑀜𑁆𑀜𑀢𑁆𑀣 𑀧𑀸𑀲𑀸𑀡𑁄𑀢𑀺 𑀏𑀯𑀁 𑀞𑀺𑀢𑁂𑀳𑀺 𑀅𑀝𑁆𑀞𑀳𑀺. 𑀦𑀺𑀫𑀺𑀢𑁆𑀢𑀸𑀦𑀁 𑀲𑀢𑁂𑀦𑀸𑀧𑀻𑀢𑀺 𑀇𑀫𑀺𑀦𑀸 𑀏𑀓𑀺𑀲𑁆𑀲𑀸𑀬𑁂𑀯 𑀤𑀺𑀲𑀸𑀬 𑀩𑀳𑀽𑀦𑀺𑀧𑀺 𑀦𑀺𑀫𑀺𑀢𑁆𑀢𑀸𑀦𑀺 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁, 𑀧𑀩𑁆𑀩𑀢𑁄, 𑀪𑀦𑁆𑀢𑁂. 𑀧𑀼𑀦 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁, 𑀧𑀸𑀲𑀸𑀡𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀢𑀺 𑀢𑀺𑀓𑁄𑀡𑀸. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀢𑀺 𑀯𑀸 𑀢𑀺𑀓𑁄𑀡𑀭𑀘𑁆𑀙𑀸𑀲𑀡𑁆𑀞𑀸𑀦𑀸. 𑀘𑀢𑀼𑀭𑀲𑁆𑀲𑀸𑀢𑀺 𑀲𑀫𑀘𑀢𑀼𑀭𑀲𑁆𑀲𑀸. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀸 𑀧𑀦 𑀆𑀬𑀢𑀘𑀢𑀼𑀭𑀲𑁆𑀲𑀸, 𑀏𑀓𑀓𑁄𑀝𑀺𑀬𑀁 𑀲𑀗𑁆𑀓𑁄𑀘𑀺𑀢𑀸, 𑀢𑀤𑀜𑁆𑀜𑀸𑀬 𑀯𑀺𑀢𑁆𑀣𑀺𑀡𑁆𑀡𑀸 𑀯𑀸 𑀳𑁄𑀢𑀺. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀸𑀢𑀺 𑀯𑀸 𑀫𑀼𑀤𑀺𑀗𑁆𑀕𑀪𑁂𑀭𑀻 𑀯𑀺𑀬 𑀫𑀚𑁆𑀛𑁂 𑀯𑀺𑀢𑁆𑀣𑀢𑀸 𑀉𑀪𑁄𑀲𑀼 𑀓𑁄𑀝𑀻𑀲𑀼 𑀲𑀗𑁆𑀓𑁄𑀘𑀺𑀢𑀸 𑀳𑁄𑀢𑀺.

𑁧𑁫𑁯. 𑀏𑀯𑀁 𑀩𑀤𑁆𑀥𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀲𑀩𑁆𑀩𑀳𑁂𑀝𑁆𑀞𑀺𑀫𑁂𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑁂𑀦, 𑀅𑀧𑁆𑀧𑀢𑀭𑁄 𑀘𑁂 𑀕𑀡𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀲 𑀧𑀦 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 ‘‘𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸. 𑀇𑀫𑀺𑀦𑀸 ‘‘𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁 𑀧𑀞𑀫𑀲𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀬𑀸𑀯𑀢𑀺𑀓𑀸 𑀢𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀢𑀲𑁆𑀫𑀺𑀁 𑀏𑀓𑀲𑁆𑀲 𑀕𑀸𑀫𑀪𑁄𑀚𑀓𑀲𑁆𑀲 𑀆𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀕𑀸𑀫𑀓𑁆𑀔𑁂𑀢𑁆𑀢𑁂 𑀞𑀺𑀢𑀸 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀤𑁆𑀥𑀲𑀻𑀫𑀁 𑀯𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀯𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀢𑀺 𑀏𑀢𑁂𑀦 𑀏𑀢𑀸 𑀩𑀤𑁆𑀥𑀲𑀻𑀫𑀸𑀤𑀬𑁄 𑀕𑀸𑀫𑀲𑀻𑀫𑀢𑁄 𑀲𑀻𑀫𑀦𑁆𑀢𑀭𑀪𑀽𑀢𑀸, 𑀦 𑀢𑀸𑀲𑀼 𑀞𑀺𑀢𑀸 𑀕𑀸𑀫𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀯𑀕𑁆𑀕𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀢𑁆𑀯𑀸𑀢𑀺 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀭𑀡𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀼𑀁 𑀲𑀫𑀢𑁆𑀣𑁂 𑀢𑁂 𑀕𑀸𑀫𑀓𑁆𑀔𑁂𑀢𑁆𑀢𑀝𑁆𑀞𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀁 𑀯𑀸 𑀆𑀳𑀭𑀺𑀢𑁆𑀯𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑀼𑀁 𑀅𑀲𑀫𑀢𑁆𑀣𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸. 𑀢𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀬𑀤𑀺𑀧𑀺 𑀲𑀳𑀲𑁆𑀲𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀢𑁂𑀲𑀼 𑀘𑀢𑁆𑀢𑀸𑀭𑁄𑀬𑁂𑀯 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀙𑀦𑁆𑀤𑀸𑀭𑀳𑀸, 𑀢𑀲𑁆𑀫𑀸 𑀅𑀦𑀸𑀕𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 ‘‘𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀤𑀼𑀢𑀺𑀬𑀲𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀫𑀸𑀳. ‘‘𑀲𑀫𑁆𑀫𑀼𑀔𑀻𑀪𑀽𑀢𑀸 𑀦 𑀧𑀝𑀺𑀓𑁆𑀓𑁄𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀢𑀺𑀬𑀲𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀁 𑀧𑀦 𑀇𑀫𑁂𑀲𑀁 𑀲𑀸𑀫𑀢𑁆𑀣𑀺𑀬𑁂𑀦 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁬𑁦. 𑀏𑀯𑀁 𑀩𑀤𑁆𑀥𑀲𑀻𑀫𑀸𑀬 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀯. 𑀏𑀯𑀁 𑀯𑀼𑀢𑁆𑀢𑀸𑀬𑀸𑀢𑀺 𑀏𑀯𑀁 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁮-𑁧𑁩𑁯) 𑀪𑀕𑀯𑀢𑀸 𑀯𑀼𑀢𑁆𑀢𑀸𑀬. 𑀧𑀭𑀺𑀲𑀼𑀤𑁆𑀥𑀸𑀬𑀸𑀢𑀺 𑀜𑀢𑁆𑀢𑀺𑀤𑁄𑀲𑀅𑀦𑀉𑀲𑁆𑀲𑀸𑀯𑀦𑀤𑁄𑀲𑁂𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀲𑀼𑀤𑁆𑀥𑀸𑀬. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀏𑀓𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀭𑀺𑀬𑀫𑀸𑀦𑀢𑁆𑀢𑀸 𑀜𑀢𑁆𑀢𑀺 𑀏𑀯 𑀤𑀼𑀢𑀺𑀬𑀸 𑀇𑀫𑀺𑀲𑁆𑀲𑀸 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸, 𑀢𑀸𑀬. 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀲𑀻𑀫𑀸 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀸𑀦𑀺 𑀲𑀻𑀫𑀢𑁄 𑀩𑀳𑀺 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 𑀩𑀳𑀺 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀧𑀣𑀯𑀻𑀲𑀦𑁆𑀥𑀸𑀭𑀉𑀤𑀓𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀻𑀫𑀸𑀬 𑀕𑀢𑀢𑁆𑀢𑀸.

𑁧𑁬𑁧. 𑀏𑀯𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑁆𑀫𑀼𑀢𑀺𑀬𑀸 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀩𑀤𑁆𑀥𑀸𑀬 𑀘’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀢𑀺 𑀬𑀣𑀸 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀅𑀦𑁆𑀢𑁄𑀲𑀻𑀫𑀸𑀬𑀁 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀦𑁆𑀢𑁄𑀧𑀺 𑀅𑀯𑀺𑀧𑁆𑀧𑀯𑀸𑀲𑁄𑀬𑁂𑀯 𑀳𑁄𑀢𑀺, 𑀤𑀼𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂𑀦 (𑀧𑀸𑀭𑀸. 𑁪𑁭𑁧 𑀆𑀤𑀬𑁄) 𑀆𑀧𑀢𑁆𑀢𑀺 𑀦 𑀳𑁄𑀢𑀺, 𑀏𑀯𑀁 𑀢𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸𑀢𑀺 𑀬𑀤𑀺 𑀢𑀺𑀲𑁆𑀲𑀸 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬 𑀅𑀦𑁆𑀢𑁄 𑀕𑀸𑀫𑁄 𑀅𑀢𑁆𑀣𑀺, 𑀢𑀁 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀢𑀢𑁄 𑀯𑀺𑀦𑀺𑀫𑀼𑀢𑁆𑀢𑀁 𑀢𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀲𑀻𑀫𑀲𑀗𑁆𑀔𑁆𑀬𑀁𑀬𑁂𑀯 𑀕𑀘𑁆𑀙𑀢𑀻𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀲𑀗𑁆𑀔𑁆𑀬𑀁𑀬𑁂𑀯 𑀕𑀘𑁆𑀙𑀢𑀺. 𑀏𑀓𑀫𑁆𑀧𑀺 𑀓𑀼𑀮𑀁 𑀧𑀯𑀺𑀝𑁆𑀞𑀁 𑀯𑀸𑀢𑀺 𑀅𑀪𑀺𑀦𑀯𑀓𑀢𑀕𑁂𑀳𑁂𑀲𑀼 𑀲𑀩𑁆𑀩𑀧𑀞𑀫𑀁 𑀏𑀓𑀫𑁆𑀧𑀺 𑀓𑀼𑀮𑀁 𑀧𑀯𑀺𑀝𑁆𑀞𑀁 𑀅𑀢𑁆𑀣𑀺. 𑀅𑀕𑀢𑀁 𑀯𑀸𑀢𑀺 𑀧𑁄𑀭𑀸𑀡𑀓𑀕𑀸𑀫𑁂 𑀅𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀕𑁂𑀳𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀕𑀢𑁂𑀲𑀼𑀧𑀺 𑀏𑀓𑀫𑁆𑀧𑀺 𑀓𑀼𑀮𑀁 𑀅𑀕𑀢𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁧𑁬𑁨. 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀻𑀫𑀸𑀲𑀫𑁆𑀫𑀼𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄’’𑀢𑀺𑀆𑀤𑀺𑀫𑀸𑀳. 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀆𑀬𑀢𑀺𑀁 𑀩𑀦𑁆𑀥𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀦𑁂𑀲𑀁 𑀯𑀺𑀳𑀸𑀭𑀸𑀦𑀁 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑁆𑀧𑀳𑁄𑀦𑀓𑀁 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸. 𑀩𑀤𑁆𑀥𑀸 𑀲𑀻𑀫𑀸𑀬𑁂𑀲𑀼 𑀯𑀺𑀳𑀸𑀭𑁂𑀲𑀼, 𑀢𑁂 𑀩𑀤𑁆𑀥𑀲𑀻𑀫𑀸. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀧𑀘𑁆𑀘𑁂𑀓𑀁. 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀦𑀻𑀢𑀺 𑀬𑀣𑀸 𑀩𑀤𑁆𑀥𑀲𑀻𑀫𑀸𑀲𑀼 𑀞𑀺𑀢𑀸 𑀅𑀜𑁆𑀜𑀫𑀜𑁆𑀜𑀁 𑀙𑀦𑁆𑀤𑀸𑀤𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀮𑀪𑀦𑁆𑀢𑀺, 𑀏𑀯𑀁 𑀕𑀸𑀫𑀲𑀻𑀫𑀸𑀲𑀼 𑀞𑀺𑀢𑀸𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀧𑀦𑀸𑀢𑀺 𑀏𑀓𑀲𑁆𑀲 𑀕𑀸𑀫𑀲𑁆𑀲 𑀉𑀧𑀟𑁆𑀠𑀁 𑀅𑀦𑁆𑀢𑁄𑀓𑀢𑁆𑀢𑀼𑀓𑀸𑀫𑀢𑀸𑀬 𑀲𑀢𑀺 𑀲𑀩𑁆𑀩𑁂𑀲𑀁 𑀆𑀕𑀫𑀦𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀕𑀦𑁆𑀢𑀩𑁆𑀩𑀦𑁆𑀢𑀺 𑀘 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀸𑀬𑀁 𑀦𑀺𑀬𑀫𑁄 ‘‘𑀆𑀕𑀦𑁆𑀢𑀩𑁆𑀩𑀫𑁂𑀯𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀆𑀕𑀫𑀦𑀫𑁆𑀧𑀺 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀅𑀩𑀤𑁆𑀥𑀸𑀬 𑀳𑀺 𑀲𑀻𑀫𑀸𑀬 𑀦𑀸𑀦𑀸𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀁 𑀦𑀸𑀦𑀸𑀲𑀻𑀫𑀲𑀪𑀸𑀯𑀢𑁆𑀢𑀸 𑀢𑁂𑀲𑀁 𑀅𑀦𑀸𑀕𑀫𑀦𑁂𑀧𑀺 𑀯𑀕𑁆𑀕𑀓𑀫𑁆𑀫𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀩𑀤𑁆𑀥𑀸𑀬 𑀧𑀦 𑀲𑀻𑀫𑀸𑀬 𑀏𑀓𑀲𑀻𑀫𑀪𑀸𑀯𑀢𑁄 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀅𑀦𑁆𑀢𑁄𑀲𑀻𑀫𑀕𑀢𑁂𑀳𑀺 𑀆𑀕𑀦𑁆𑀢𑀩𑁆𑀩𑀫𑁂𑀯𑀸𑀢𑀺 𑀆𑀳 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸…𑀧𑁂… 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀓𑀸𑀮𑁂 𑀅𑀲𑁄𑀥𑀺𑀢𑀸𑀬𑀧𑀺 𑀲𑀻𑀫𑀸𑀬 𑀦𑁂𑀯𑀢𑁆𑀣𑀺 𑀤𑁄𑀲𑁄 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀲𑁆𑀲 𑀅𑀧𑀮𑁄𑀓𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀸𑀪𑀸𑀯𑀢𑁄.

𑀪𑁂𑀭𑀺𑀲𑀜𑁆𑀜𑀁 𑀯𑀸𑀢𑀺 𑀲𑀫𑁆𑀫𑀦𑁆𑀦𑀦𑀧𑀭𑀺𑀬𑁄𑀲𑀸𑀦𑀁 𑀓𑀭𑁄𑀫𑀸𑀢𑀺 𑀯𑀢𑁆𑀯𑀸𑀢𑀺 𑀮𑀺𑀔𑀺𑀢𑀁. 𑀢𑁂𑀦 𑀢𑀸𑀤𑀺𑀲𑁂 𑀓𑀸𑀮𑁂 𑀢𑀁 𑀓𑀧𑁆𑀧𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀪𑁂𑀭𑀺𑀲𑀜𑁆𑀜𑀁 𑀯𑀸 𑀲𑀗𑁆𑀔𑀲𑀜𑁆𑀜𑀁 𑀯𑀸𑀢𑀺 𑀧𑀦 𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀇𑀤𑀸𑀦𑀺 𑀲𑀗𑁆𑀖𑁄 𑀲𑀻𑀫𑀁 𑀩𑀦𑁆𑀥𑀢𑀻𑀢𑀺 𑀜𑀢𑁆𑀯𑀸 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀢𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀅𑀧𑁆𑀧𑀯𑁂𑀲𑀦𑀢𑁆𑀣𑀁, 𑀆𑀭𑀸𑀫𑀺𑀓𑀸𑀤𑀻𑀦𑀜𑁆𑀘 𑀢𑁂𑀲𑀁 𑀦𑀺𑀯𑀸𑀭𑀡𑀢𑁆𑀣𑀁 𑀓𑀫𑁆𑀫𑀯𑀸𑀘𑀸𑀭𑀤𑁆𑀥𑀓𑀸𑀮𑁂𑀬𑁂𑀯 𑀲𑀜𑁆𑀜𑀸 𑀓𑀭𑀻𑀬𑀢𑀺, 𑀏𑀯𑀁 𑀲𑀢𑀺 𑀢𑀁 𑀓𑀭𑀡𑀁 𑀲𑀧𑁆𑀧𑀬𑁄𑀚𑀦𑀁 𑀳𑁄𑀢𑀺. 𑀢𑁂𑀦𑁂𑀯 ‘‘𑀪𑁂𑀭𑀺𑀲𑀗𑁆𑀔𑀲𑀤𑁆𑀤𑀁 𑀓𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑁂𑀭𑀺𑀲𑀗𑁆𑀔𑀲𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀲𑀜𑁆𑀜𑀸𑀕𑁆𑀕𑀳𑀡𑀁 𑀓𑀢𑀁. ‘‘𑀲𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀁 𑀯𑀢𑁆𑀯𑀸 ‘‘𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸’’𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀁 𑀯𑀤𑀢𑀺, 𑀧𑀭𑀺𑀬𑁄𑀲𑀸𑀦𑀓𑀸𑀮𑁂 𑀧𑀦 𑀲𑀩𑁆𑀩𑀢𑀽𑀭𑀺𑀬𑀸𑀢𑀸𑀮𑀺𑀓𑀲𑀗𑁆𑀖𑀼𑀝𑁆𑀞𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀫𑁄𑀤𑀦𑀁 𑀓𑀸𑀭𑁂𑀢𑀩𑁆𑀩𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁬𑁩. 𑀪𑀡𑁆𑀟𑀼𑀓𑀫𑁆𑀫𑀸𑀧𑀼𑀘𑁆𑀙𑀦𑀁 𑀲𑀦𑁆𑀥𑀸𑀬 𑀧𑀩𑁆𑀩𑀚𑁆𑀚𑀸𑀕𑁆𑀕𑀳𑀡𑀁. 𑀲𑀼𑀔𑀓𑀭𑀡𑀢𑁆𑀣𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀸𑀢𑀦𑀧𑀭𑀺𑀲𑁆𑀲𑀫𑀁 𑀧𑀳𑀸𑀬 𑀅𑀧𑁆𑀧𑀢𑀭𑁂𑀳𑀺 𑀲𑀼𑀔𑀓𑀭𑀡𑀢𑁆𑀣𑀁. 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀕𑀡𑁆𑀳𑀸𑀢𑀻𑀢𑀺 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑀻𑀬𑀧𑀭𑀫𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀲𑁆𑀲 𑀓𑀫𑁆𑀫𑀸𑀭𑀳𑁂𑀦 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀕𑀡𑁆𑀳𑀸𑀢𑀺. 𑀇𑀤𑀜𑁆𑀘 𑀦𑀺𑀲𑀺𑀦𑁆𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀳𑀺 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀢𑀓𑁂 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀜𑁆𑀘 𑀓𑀫𑁆𑀫𑀸𑀭𑀳𑁂𑀦 𑀲𑀳 𑀅𑀩𑁆𑀪𑀸𑀦𑀓𑀸𑀭𑀓𑀸𑀦𑀫𑁆𑀧𑀺 𑀧𑀳𑁄𑀦𑀓𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀼𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸𑀢𑀺 𑀇𑀤𑀁 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀤𑀼𑀮𑁆𑀮𑀪𑀢𑀸𑀬 𑀯𑀟𑁆𑀠𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀗𑁆𑀓𑀭𑀓𑀭𑀡𑀢𑁄 𑀘 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀦𑁂𑀢𑁆𑀯𑀸 𑀞𑀧𑁂𑀢𑀼𑀁 𑀲𑀼𑀓𑀭𑀢𑀸𑀬 𑀘 𑀯𑀼𑀢𑁆𑀢𑀁. 𑀢𑀣𑀸 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸𑀢𑀺 𑀏𑀢𑁆𑀣𑀸𑀧𑀺. 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀧𑀻𑀢𑀺 𑀬𑀣𑀸 𑀔𑀡𑁆𑀟𑀲𑀻𑀫𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀁 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀞𑀸𑀦𑀁 𑀲𑀫𑀦𑁆𑀢𑀸 𑀦𑀺𑀕𑀘𑁆𑀙𑀢𑀺, 𑀅𑀯𑀲𑁂𑀲𑀁 𑀞𑀸𑀦𑀁 𑀅𑀦𑁆𑀢𑁄𑀔𑀡𑁆𑀟𑀲𑀻𑀫𑀸𑀬𑀁 𑀳𑁄𑀢𑀺𑀬𑁂𑀯, 𑀏𑀯𑀁 𑀢𑁂𑀲𑀼 𑀞𑀧𑀺𑀢𑁂𑀲𑀼 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸 𑀲𑀻𑀫𑀦𑁆𑀢𑀭𑀺𑀓𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸𑀢𑀺 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀧𑀺𑀢𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸. 𑀢𑁂 𑀧𑀦 𑀓𑀺𑀢𑁆𑀢𑁂𑀦𑁆𑀢𑁂𑀦 𑀤𑀓𑁆𑀔𑀺𑀡𑀢𑁄 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦𑁂𑀯 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀓𑀣𑀁? 𑀔𑀡𑁆𑀟𑀲𑀻𑀫𑀢𑁄 𑀳𑀺 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸, 𑀢𑀣𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸, 𑀢𑀣𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸, 𑀢𑀣𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 𑀧𑀼𑀭𑀺𑀫𑀓𑀺𑀢𑁆𑀢𑀺𑀢𑀁 𑀯𑀼𑀢𑁆𑀢𑀦𑀬𑁂𑀦 𑀧𑀼𑀦 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀯𑀁 𑀩𑀳𑀽𑀦𑀫𑁆𑀧𑀺 𑀔𑀡𑁆𑀟𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀧𑀘𑁆𑀘𑁂𑀓𑀁 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀢𑀢𑁄𑀢𑀺 𑀧𑀘𑁆𑀙𑀸. 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀫𑀳𑀸𑀲𑀻𑀫𑀸𑀬 𑀩𑀸𑀳𑀺𑀭𑀦𑁆𑀢𑀭𑁂𑀲𑀼 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀺. 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀩𑀤𑁆𑀥𑀪𑀸𑀯𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀫𑁂𑀯 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀯𑀸𑀬𑀫𑀦𑁆𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀩𑀤𑁆𑀥𑀸𑀬 𑀳𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀢𑀁 𑀲𑀫𑀽𑀳𑀦𑀺𑀢𑁆𑀯𑀸 ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀓𑀢𑀸𑀬𑀧𑀺 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑀽𑀳𑀢𑀸𑀯 𑀳𑁄𑀢𑀺 𑀲𑀻𑀫𑀸. 𑀧𑀞𑀫𑀜𑁆𑀳𑀺 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑀽𑀳𑀦𑀺𑀢𑁆𑀯𑀸 𑀧𑀘𑁆𑀙𑀸 𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀔𑀡𑁆𑀟𑀲𑀻𑀫𑀢𑁄 𑀧𑀝𑁆𑀞𑀸𑀬 𑀩𑀦𑁆𑀥𑀦𑀁 𑀆𑀘𑀺𑀡𑁆𑀡𑀁, 𑀆𑀘𑀺𑀡𑁆𑀡𑀓𑀭𑀡𑁂𑀦𑁂𑀯 𑀘 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀔𑀡𑁆𑀟𑀲𑀻𑀫𑀢𑁄𑀯 𑀧𑀝𑁆𑀞𑀸𑀬 𑀩𑀦𑁆𑀥𑀺𑀢𑀩𑁆𑀩𑀸’’𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑁂𑀦𑁆𑀢𑀻𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺. 𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦…𑀧𑁂… 𑀲𑀻𑀫𑀦𑁆𑀢𑀭𑀺𑀓𑀸 𑀳𑀺 𑀕𑀸𑀫𑀓𑁆𑀔𑁂𑀢𑁆𑀢𑀁 𑀪𑀚𑀢𑀻𑀢𑀺 𑀦 𑀆𑀯𑀸𑀲𑀯𑀲𑁂𑀦 𑀲𑀸𑀫𑀕𑁆𑀕𑀺𑀧𑀭𑀺𑀘𑁆𑀙𑁂𑀤𑁄, 𑀓𑀺𑀦𑁆𑀢𑀼 𑀲𑀻𑀫𑀸𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀓𑀼𑀝𑀺𑀕𑁂𑀳𑁂𑀢𑀺 𑀪𑀽𑀫𑀺𑀬𑀁 𑀓𑀢𑀢𑀺𑀡𑀓𑀼𑀝𑀺𑀬𑀁. 𑀉𑀤𑀼𑀓𑁆𑀔𑀮𑀦𑁆𑀢𑀺 𑀉𑀤𑀼𑀓𑁆𑀔𑀮𑀸𑀯𑀸𑀝𑀲𑀤𑀺𑀲𑀔𑀼𑀤𑁆𑀤𑀓𑀸𑀯𑀸𑀝𑀁. 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀭𑀸𑀚𑀺 𑀯𑀸 𑀉𑀤𑀼𑀓𑁆𑀔𑀮𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. 𑀇𑀤𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀅𑀦𑀸𑀕𑀢𑀢𑁆𑀢𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀫𑁆𑀧𑀺 ‘‘𑀅𑀯𑀺𑀦𑀲𑁆𑀲𑀓𑀲𑀜𑁆𑀜𑀸𑀡𑀫𑀺𑀤’’𑀦𑁆𑀢𑀺 𑀲𑀜𑁆𑀜𑀸𑀬 𑀓𑁄𑀘𑀺 𑀫𑁄𑀳𑁂𑀦 𑀦𑀺𑀫𑀺𑀢𑁆𑀢𑀁 𑀓𑀭𑁂𑀬𑁆𑀬𑀸𑀢𑀺 𑀤𑀽𑀭𑀢𑁄 𑀯𑀺𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸𑀢𑀺 𑀲𑀜𑁆𑀘𑀸𑀭𑀺𑀫𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀧𑀦𑀢𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀉𑀧𑀭𑀺 ‘‘𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀓𑀣𑀦𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀫𑀸𑀯𑀺𑀧𑀢𑁆𑀢𑀺 𑀳𑀺 𑀉𑀧𑀲𑀫𑁆𑀧𑀤𑀸𑀤𑀺𑀲𑀩𑁆𑀩𑀓𑀫𑁆𑀫𑀯𑀺𑀧𑀢𑁆𑀢𑀺𑀫𑀽𑀮𑀦𑁆𑀢𑀺 𑀢𑀲𑁆𑀲 𑀤𑁆𑀯𑀸𑀭𑀁 𑀲𑀩𑁆𑀩𑀣𑀸𑀧𑀺 𑀧𑀺𑀤𑀳𑀦𑀯𑀲𑁂𑀦 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀁 𑀯𑀢𑁆𑀯𑀸𑀯 𑀇𑀥 𑀆𑀘𑀭𑀺𑀬𑀸 𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀲𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀺𑀢𑁆𑀢𑀺𑀦𑁆𑀢𑀺 𑀇𑀝𑁆𑀞𑀓𑀤𑀸𑀭𑀼𑀫𑀢𑁆𑀢𑀺𑀓𑀸𑀫𑀬𑀁. 𑀲𑀺𑀮𑀸𑀫𑀬𑀸𑀬 𑀧𑀦 𑀪𑀺𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀼𑀧𑀕𑀁 𑀏𑀓𑀁 𑀧𑀸𑀲𑀸𑀡𑀁 𑀢𑀁𑀢𑀁𑀤𑀺𑀲𑀸𑀬 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁂𑀓𑀲𑀺𑀮𑀸𑀳𑀺 𑀘𑀺𑀦𑀺𑀢𑀁 𑀲𑀓𑀮𑀁 𑀪𑀺𑀢𑁆𑀢𑀺𑀁 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀓𑀯𑀘𑀦𑁂𑀦 𑀯𑀢𑁆𑀢𑀩𑁆𑀩𑀢𑁄. 𑀅𑀦𑁆𑀢𑁄𑀓𑀼𑀝𑁆𑀝𑀫𑁂𑀯𑀸𑀢𑀺 𑀏𑀢𑁆𑀣 𑀅𑀦𑁆𑀢𑁄𑀓𑀼𑀝𑁆𑀝𑁂𑀧𑀺 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑁄𑀓𑀸𑀲𑀢𑁄 𑀅𑀦𑁆𑀢𑁄 𑀏𑀯 𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀫𑀼𑀔𑁂 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸𑀢𑀺 𑀕𑀩𑁆𑀪𑀸𑀪𑀺𑀫𑀼𑀔𑁂𑀧𑀺 𑀩𑀳𑀺𑀧𑀫𑀼𑀔𑁂 𑀕𑀩𑁆𑀪𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑁂 𑀞𑀸𑀦𑁂 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀕𑀩𑁆𑀪𑀧𑀫𑀼𑀔𑀸𑀦𑀁 𑀅𑀦𑁆𑀢𑀭𑁂 𑀞𑀺𑀢𑀓𑀼𑀝𑁆𑀝𑀫𑁆𑀧𑀺 𑀉𑀧𑀸𑀤𑀸𑀬 𑀅𑀦𑁆𑀢𑁄 𑀘 𑀩𑀳𑀺 𑀘 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑀸𑀯 𑀲𑀻𑀫𑀸 𑀳𑁄𑀢𑀺. 𑀩𑀳𑀻𑀢𑀺 𑀲𑀓𑀮𑀲𑁆𑀲 𑀓𑀼𑀝𑀺𑀮𑁂𑀡𑀲𑁆𑀲 𑀲𑀫𑀦𑁆𑀢𑀢𑁄 𑀩𑀳𑀺.

𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀻𑀫𑀸 𑀳𑁄𑀢𑀻𑀢𑀺 𑀫𑀚𑁆𑀛𑁂 𑀞𑀺𑀢𑀪𑀺𑀢𑁆𑀢𑀺𑀬𑀸 𑀲𑀳 𑀘𑀢𑀼𑀭𑀲𑁆𑀲𑀲𑀻𑀫𑀸 𑀳𑁄𑀢𑀺. 𑀉𑀧𑀭𑀺𑀧𑀸𑀲𑀸𑀤𑁂𑀬𑁂𑀯 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀕𑀩𑁆𑀪𑀲𑁆𑀲 𑀘 𑀧𑀫𑀼𑀔𑀲𑁆𑀲 𑀘 𑀅𑀦𑁆𑀢𑀭𑀸 𑀞𑀺𑀢𑀪𑀺𑀢𑁆𑀢𑀺𑀬𑀸 𑀏𑀓𑀢𑁆𑀢𑀸 𑀢𑀢𑁆𑀣 𑀘 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀸𑀪𑀸𑀯𑁂𑀦 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺, 𑀉𑀧𑀭𑀺𑀪𑀺𑀢𑁆𑀢𑀺 𑀧𑀦 𑀲𑀻𑀫𑀝𑁆𑀞𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀻𑀢𑀺 𑀪𑀺𑀢𑁆𑀢𑀺𑀢𑁄 𑀑𑀭𑀁 𑀦𑀺𑀫𑀺𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀓𑀺𑀢𑁆𑀢𑀺𑀢𑀢𑁆𑀢𑀸 𑀳𑁂𑀝𑁆𑀞𑀸 𑀆𑀓𑀸𑀲𑀧𑁆𑀧𑀤𑁂𑀲𑀁 𑀦 𑀑𑀢𑀭𑀢𑀺, 𑀉𑀧𑀭𑀺 𑀓𑀢𑁂 𑀧𑀸𑀲𑀸𑀤𑁂𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀺𑀫𑀢𑀮𑁂 𑀓𑀼𑀝𑁆𑀝𑁄𑀢𑀺 𑀳𑁂𑀝𑁆𑀞𑀺𑀫𑀢𑀮𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀺𑀢𑀓𑀼𑀝𑁆𑀝𑁄. 𑀲𑀘𑁂 𑀳𑀺 𑀤𑁆𑀯𑀻𑀲𑀼, 𑀢𑀻𑀲𑀼 𑀏𑀯 𑀯𑀸 𑀤𑀺𑀲𑀸𑀲𑀼 𑀓𑀼𑀝𑁆𑀝𑁄 𑀢𑀺𑀝𑁆𑀞𑁂𑀬𑁆𑀬, 𑀳𑁂𑀝𑁆𑀞𑀸 𑀦 𑀑𑀢𑀭𑀢𑀺. 𑀳𑁂𑀝𑁆𑀞𑀸𑀧𑀺 𑀑𑀢𑀭𑀢𑀻𑀢𑀺 𑀲𑀘𑁂 𑀳𑁂𑀝𑁆𑀞𑀸 𑀅𑀦𑁆𑀢𑁄𑀪𑀺𑀢𑁆𑀢𑀺𑀬𑀁 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁄 𑀳𑁄𑀢𑀺, 𑀑𑀢𑀭𑀢𑀺. 𑀑𑀢𑀭𑀫𑀸𑀦𑀸 𑀘 𑀦 𑀉𑀧𑀭𑀺𑀲𑀻𑀫𑀧𑁆𑀧𑀫𑀸𑀡𑁂𑀦 𑀑𑀢𑀭𑀢𑀺, 𑀲𑀫𑀦𑁆𑀢𑀸 𑀪𑀺𑀢𑁆𑀢𑀺𑀧𑁆𑀧𑀫𑀸𑀡𑁂𑀦 𑀑𑀢𑀭𑀢𑀺. 𑀘𑀢𑀼𑀦𑁆𑀦𑀁 𑀧𑀦 𑀪𑀺𑀢𑁆𑀢𑀻𑀦𑀁 𑀩𑀸𑀳𑀺𑀭𑀦𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀳𑁂𑀝𑁆𑀞𑀸𑀪𑀽𑀫𑀺𑀪𑀸𑀕𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀑𑀢𑀭𑀢𑀺, 𑀦 𑀧𑀦 𑀪𑀺𑀢𑁆𑀢𑀻𑀦𑀁 𑀩𑀳𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁. 𑀧𑀸𑀲𑀸𑀤𑀪𑀺𑀢𑁆𑀢𑀺𑀢𑁄𑀢𑀺 𑀉𑀧𑀭𑀺𑀫𑀢𑀮𑁂 𑀪𑀺𑀢𑁆𑀢𑀺𑀢𑁄. 𑀑𑀢𑀭𑀡𑀸𑀦𑁄𑀢𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀘𑁂 𑀳𑁂𑀝𑁆𑀞𑀸 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁄 𑀳𑁄𑀢𑀺, 𑀑𑀢𑀭𑀢𑀺, 𑀦𑁄 𑀘𑁂, 𑀦 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) 𑀧𑀦 ‘‘𑀉𑀧𑀭𑀺𑀲𑀻𑀫𑀧𑁆𑀧𑀫𑀸𑀡𑀲𑁆𑀲 𑀅𑀦𑁆𑀢𑁄𑀕𑀥𑀸𑀦𑀁 𑀳𑁂𑀝𑁆𑀞𑀺𑀫𑀢𑀮𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀓𑀼𑀝𑁆𑀝𑀸𑀦𑀁 𑀢𑀼𑀮𑀸𑀭𑀼𑀓𑁆𑀔𑁂𑀳𑀺 𑀏𑀓𑀲𑀫𑁆𑀩𑀦𑁆𑀥𑀢𑀁, 𑀢𑀤𑀦𑁆𑀢𑁄 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑀢𑀸𑀤𑀺𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀦𑀺𑀬𑁆𑀬𑀽𑀳𑀓𑀸𑀤𑀬𑁄 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑁄𑀓𑀸𑀲𑀢𑀸𑀬 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀲𑀻𑀫𑀸 𑀦 𑀳𑁄𑀦𑁆𑀢𑀺, 𑀩𑀤𑁆𑀥𑀸𑀬 𑀧𑀦 𑀲𑀻𑀫𑀸𑀬 𑀲𑀻𑀫𑀝𑁆𑀞𑀸𑀯 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀭𑀺𑀬𑀦𑁆𑀢𑀣𑀫𑁆𑀪𑀸𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀕𑀢𑀧𑀸𑀲𑀸𑀡𑀢𑁆𑀣𑀫𑁆𑀪𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀭𑀺𑀫𑀢𑀮𑁂𑀦 𑀲𑀫𑁆𑀩𑀤𑁆𑀥𑁄 𑀳𑁄𑀢𑀻𑀢𑀺 𑀇𑀤𑀁 𑀓𑀼𑀝𑁆𑀝𑀸𑀦𑀁 𑀅𑀦𑁆𑀢𑀭𑀸 𑀲𑀻𑀫𑀝𑁆𑀞𑀸𑀦𑀁 𑀣𑀫𑁆𑀪𑀸𑀦𑀁 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀪𑀯𑁂𑀬𑁆𑀬𑀼𑀁, 𑀓𑀼𑀝𑁆𑀝𑁂 𑀉𑀧𑀭𑀺𑀫𑀢𑀮𑁂𑀦 𑀅𑀲𑀫𑁆𑀩𑀦𑁆𑀥𑁂𑀧𑀺 𑀲𑀻𑀫𑀝𑁆𑀞𑀣𑀫𑁆𑀪𑀸𑀦𑀁 𑀉𑀧𑀭𑀺 𑀞𑀺𑀢𑁄 𑀧𑀸𑀲𑀸𑀤𑁄 𑀲𑀻𑀫𑀝𑁆𑀞𑁄𑀯 𑀳𑁄𑀢𑀺. 𑀲𑀘𑁂 𑀧𑀦 𑀩𑀳𑀽𑀦𑀁 𑀣𑀫𑁆𑀪𑀧𑀦𑁆𑀢𑀻𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸𑀧𑀣𑀯𑀺𑀬𑀁 𑀲𑀩𑁆𑀩𑀩𑀸𑀳𑀺𑀭𑀸𑀬 𑀣𑀫𑁆𑀪𑀧𑀦𑁆𑀢𑀺𑀬𑀸 𑀅𑀦𑁆𑀢𑁄 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀲𑀻𑀫𑀸 𑀩𑀤𑁆𑀥𑀸 𑀳𑁄𑀢𑀺, 𑀏𑀢𑁆𑀣 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 ‘‘𑀬𑀁 𑀢𑀸𑀯 𑀲𑀻𑀫𑀝𑁆𑀞𑀣𑀫𑁆𑀪𑁂𑀳𑁂𑀯 𑀥𑀸𑀭𑀺𑀬𑀫𑀸𑀦𑀸𑀦𑀁 𑀢𑀼𑀮𑀸𑀦𑀁 𑀉𑀧𑀭𑀺𑀫𑀢𑀮𑀁, 𑀲𑀩𑁆𑀩𑀁 𑀢𑀁 𑀲𑀻𑀫𑀝𑁆𑀞𑀫𑁂𑀯, 𑀏𑀢𑁆𑀣 𑀯𑀺𑀯𑀸𑀤𑁄 𑀦𑀢𑁆𑀣𑀺, 𑀬𑀁 𑀧𑀦 𑀲𑀻𑀫𑀝𑁆𑀞𑀣𑀫𑁆𑀪𑀧𑀦𑁆𑀢𑀺𑀬𑀸, 𑀅𑀲𑀻𑀫𑀝𑁆𑀞𑀸𑀬 𑀩𑀸𑀳𑀺𑀭𑀣𑀫𑁆𑀪𑀧𑀦𑁆𑀢𑀺𑀬𑀸 𑀘 𑀲𑀫𑀥𑀼𑀭𑀁 𑀥𑀸𑀭𑀬𑀫𑀸𑀦𑀸𑀦𑀁 𑀢𑀼𑀮𑀸𑀦𑀁 𑀉𑀧𑀭𑀺𑀫𑀢𑀮𑀁, 𑀢𑀢𑁆𑀣 𑀉𑀧𑀟𑁆𑀠𑀁 𑀲𑀻𑀫𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. ‘‘𑀲𑀓𑀮𑀫𑁆𑀧𑀺 𑀕𑀸𑀫𑀲𑀻𑀫𑀸’’𑀢𑀺 𑀅𑀧𑀭𑁂. ‘‘𑀩𑀤𑁆𑀥𑀲𑀻𑀫𑀸 𑀏𑀯𑀸’’𑀢𑀺 𑀅𑀜𑁆𑀜𑁂. 𑀢𑀲𑁆𑀫𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀕𑀭𑀽𑀳𑀺 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀆𑀲𑀗𑁆𑀓𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀲𑀦𑁆𑀦𑀺𑀝𑁆𑀞𑀸𑀦𑀓𑀸𑀭𑀡𑀁 𑀯𑀸 𑀕𑀯𑁂𑀲𑀺𑀢𑁆𑀯𑀸 𑀢𑀤𑀦𑀼𑀕𑀼𑀡𑀁 𑀓𑀸𑀢𑀩𑁆𑀩𑀁.

𑀢𑀸𑀮𑀫𑀽𑀮𑀓𑀧𑀩𑁆𑀩𑀢𑁂𑀢𑀺 𑀢𑀸𑀮𑀓𑁆𑀔𑀦𑁆𑀥𑀫𑀽𑀮𑀲𑀤𑀺𑀲𑁂 𑀳𑁂𑀝𑁆𑀞𑀸 𑀣𑀽𑀮𑁄 𑀳𑀼𑀢𑁆𑀯𑀸 𑀓𑀫𑁂𑀦 𑀓𑀺𑀲𑁄 𑀳𑀼𑀢𑁆𑀯𑀸 𑀉𑀕𑁆𑀕𑀢𑁄 𑀳𑀺𑀦𑁆𑀢𑀸𑀮𑀫𑀽𑀮𑀲𑀤𑀺𑀲𑁄 𑀦𑀸𑀫 𑀳𑁄𑀢𑀺. 𑀯𑀺𑀢𑀸𑀦𑀲𑀡𑁆𑀞𑀸𑀦𑁄𑀢𑀺 𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑁄. 𑀧𑀡𑀯𑀲𑀡𑁆𑀞𑀸𑀦𑁄𑀢𑀺 𑀫𑀚𑁆𑀛𑁂 𑀢𑀦𑀼𑀓𑁄, 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀯𑀺𑀢𑁆𑀣𑀺𑀡𑁆𑀡𑁄. 𑀳𑁂𑀝𑁆𑀞𑀸 𑀯𑀸 𑀫𑀚𑁆𑀛𑁂 𑀯𑀸𑀢𑀺 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀲𑁆𑀲 𑀳𑁂𑀝𑁆𑀞𑀸, 𑀧𑀡𑀯𑀲𑀡𑁆𑀞𑀸𑀦𑀲𑁆𑀲 𑀫𑀚𑁆𑀛𑁂. 𑀲𑀧𑁆𑀧𑀨𑀡𑀲𑀤𑀺𑀲𑁄 𑀧𑀩𑁆𑀩𑀢𑁄𑀢𑀺 𑀲𑀧𑁆𑀧𑀨𑀡𑁄 𑀯𑀺𑀬 𑀔𑀼𑀚𑁆𑀚𑁄, 𑀫𑀽𑀮𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀅𑀯𑀦𑀢𑀲𑀻𑀲𑁄. 𑀆𑀓𑀸𑀲𑀧𑀩𑁆𑀪𑀸𑀭𑀦𑁆𑀢𑀺 𑀪𑀺𑀢𑁆𑀢𑀺𑀬𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀧𑀩𑁆𑀪𑀸𑀭𑀁. 𑀲𑀻𑀫𑀧𑁆𑀧𑀫𑀸𑀡𑁄𑀢𑀺 𑀅𑀦𑁆𑀢𑁄 𑀆𑀓𑀸𑀲𑁂𑀦 𑀲𑀤𑁆𑀥𑀺𑀁 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑁄. 𑀲𑁄 𑀘 𑀧𑀸𑀲𑀸𑀡𑁄 𑀲𑀻𑀫𑀝𑁆𑀞𑁄𑀢𑀺 𑀇𑀫𑀺𑀦𑀸 𑀈𑀤𑀺𑀲𑁂𑀳𑀺 𑀲𑀼𑀲𑀺𑀭𑀧𑀸𑀲𑀸𑀡𑀮𑁂𑀡𑀓𑀼𑀝𑁆𑀝𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂 𑀪𑀽𑀫𑀺𑀪𑀸𑀕𑁂 𑀏𑀯 𑀲𑀻𑀫𑀸 𑀧𑀢𑀺𑀝𑁆𑀞𑀸𑀢𑀺, 𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑁂. 𑀢𑁂 𑀧𑀦 𑀲𑀻𑀫𑀝𑁆𑀞𑀢𑁆𑀢𑀸 𑀲𑀻𑀫𑀸 𑀳𑁄𑀦𑁆𑀢𑀺, 𑀦 𑀲𑀭𑀽𑀧𑁂𑀦 𑀲𑀻𑀫𑀝𑁆𑀞𑀫𑀜𑁆𑀘𑀸𑀤𑀺 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀘𑁂 𑀧𑀦 𑀲𑁄 𑀲𑀼𑀲𑀺𑀭𑀧𑀸𑀲𑀸𑀡𑁄 𑀪𑀽𑀫𑀺𑀁 𑀅𑀦𑀸𑀳𑀘𑁆𑀘 𑀆𑀓𑀸𑀲𑀕𑀢𑁄 𑀑𑀮𑀫𑁆𑀩𑀢𑀺, 𑀲𑀻𑀫𑀸 𑀦 𑀑𑀢𑀭𑀢𑀺. 𑀲𑀼𑀲𑀺𑀭𑀧𑀸𑀲𑀸𑀡𑁄 𑀧𑀦 𑀲𑀬𑀁 𑀲𑀻𑀫𑀸𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀻𑀫𑀸 𑀳𑁄𑀢𑀺, 𑀓𑀣𑀁 𑀧𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀭𑀳𑀺𑀢𑁂𑀳𑀺 𑀏𑀢𑁂𑀳𑀺 𑀲𑀼𑀲𑀺𑀭𑀧𑀸𑀲𑀸𑀡𑀸𑀤𑀻𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀇𑀤𑀁 𑀲𑀤𑁆𑀥𑀸𑀢𑀩𑁆𑀩𑀦𑁆𑀢𑀺? 𑀅𑀝𑁆𑀞𑀓𑀣𑀸𑀧𑀫𑀸𑀡𑀢𑁄.

𑀅𑀧𑀺𑀘𑁂𑀢𑁆𑀣 𑀲𑀼𑀲𑀺𑀭𑀧𑀸𑀲𑀸𑀡𑀪𑀺𑀢𑁆𑀢𑀺𑀅𑀦𑀼𑀲𑀸𑀭𑁂𑀦 𑀫𑀽𑀲𑀺𑀓𑀸𑀤𑀻𑀦𑀁 𑀯𑀺𑀬 𑀲𑀻𑀫𑀸𑀬 𑀳𑁂𑀝𑁆𑀞𑀺𑀫𑀢𑀮𑁂 𑀑𑀢𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀧𑀦 𑀧𑀘𑁆𑀙𑀺𑀫𑀲𑀻𑀫𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀩𑀳𑀮𑁂𑀳𑀺 𑀧𑀸𑀲𑀸𑀡𑀪𑀺𑀢𑁆𑀢𑀺𑀆𑀤𑀻𑀳𑀺𑀧𑀺 𑀉𑀧𑀭𑀺𑀫𑀢𑀮𑀁 𑀆𑀳𑀘𑁆𑀘 𑀞𑀺𑀢𑁂𑀳𑀺 𑀲𑀩𑁆𑀩𑀲𑁄, 𑀬𑁂𑀪𑀼𑀬𑁆𑀬𑁂𑀦 𑀯𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀲𑀢𑀺 𑀉𑀧𑀭𑀺 𑀩𑀚𑁆𑀛𑀫𑀸𑀦𑀸 𑀲𑀻𑀫𑀸 𑀢𑁂𑀳𑀺 𑀧𑀸𑀲𑀸𑀡𑀸𑀤𑀻𑀳𑀺 𑀅𑀦𑁆𑀢𑀭𑀺𑀢𑀸𑀬 𑀢𑀧𑁆𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀳𑁂𑀝𑁆𑀞𑀸𑀪𑀽𑀫𑀺𑀬𑀸𑀧𑀺 𑀉𑀧𑀭𑀺𑀫𑀢𑀮𑁂𑀦 𑀲𑀤𑁆𑀥𑀺𑀁 𑀏𑀓𑀓𑁆𑀔𑀡𑁂 𑀧𑀢𑀺𑀝𑁆𑀞𑀸𑀢𑀺, 𑀦𑀤𑀻𑀧𑀸𑀭𑀲𑀻𑀫𑀸 𑀯𑀺𑀬 𑀦𑀤𑀻𑀅𑀦𑁆𑀢𑀭𑀺𑀢𑁂𑀲𑀼 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀮𑁂𑀡𑀸𑀤𑀻𑀲𑀼 𑀅𑀧𑀦𑀻𑀢𑁂𑀲𑀼𑀧𑀺 𑀳𑁂𑀝𑁆𑀞𑀸 𑀑𑀢𑀺𑀡𑁆𑀡𑀲𑀻𑀫𑀸 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀦 𑀯𑀺𑀕𑀘𑁆𑀙𑀢𑀺, 𑀧𑀞𑀫𑀁 𑀧𑀦 𑀉𑀧𑀭𑀺 𑀲𑀻𑀫𑀸𑀬 𑀩𑀤𑁆𑀥𑀸𑀬 𑀧𑀘𑁆𑀙𑀸 𑀮𑁂𑀡𑀸𑀤𑀺𑀓𑀢𑁂𑀲𑀼𑀧𑀺 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀲𑀻𑀫𑀸 𑀑𑀢𑀭𑀢𑀺 𑀏𑀯, 𑀓𑁂𑀘𑀺 𑀢𑀁 𑀦 𑀇𑀘𑁆𑀙𑀦𑁆𑀢𑀺, 𑀏𑀯𑀁 𑀉𑀪𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀸 𑀘 𑀲𑀸 𑀲𑀻𑀫𑀸 𑀏𑀓𑀸𑀯 𑀳𑁄𑀢𑀺 𑀕𑁄𑀢𑁆𑀢𑀸𑀤𑀺𑀚𑀸𑀢𑀺 𑀯𑀺𑀬 𑀩𑁆𑀬𑀢𑁆𑀢𑀺𑀪𑁂𑀤𑁂𑀲𑀽𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀸 𑀏𑀯 𑀳𑀺 𑀩𑀤𑁆𑀥𑀲𑀻𑀫𑀸 𑀅𑀩𑀤𑁆𑀥𑀲𑀻𑀫𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀓𑀢𑀺𑀦𑀺𑀲𑁆𑀲𑀬𑀓𑁂 𑀕𑀸𑀫𑀸𑀭𑀜𑁆𑀜𑀸𑀤𑀺𑀓𑁂 𑀔𑁂𑀢𑁆𑀢𑁂 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀲𑀩𑁆𑀩𑀢𑁆𑀣 𑀲𑀸𑀓𑀮𑁆𑀬𑁂𑀦 𑀏𑀓𑀲𑁆𑀫𑀺𑀁 𑀔𑀡𑁂 𑀩𑁆𑀬𑀸𑀧𑀺𑀦𑀻 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑁂 𑀢𑁂 𑀦𑀺𑀲𑁆𑀲𑀬𑀪𑀽𑀢𑁂 𑀧𑀭𑀫𑀢𑁆𑀣𑀥𑀫𑁆𑀫𑁂, 𑀢𑀁 𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀫𑁆𑀧𑀺 𑀯𑀸 𑀉𑀧𑀸𑀤𑀸𑀬 𑀮𑁄𑀓𑀺𑀬𑁂𑀳𑀺 𑀲𑀸𑀲𑀦𑀺𑀓𑁂𑀳𑀺 𑀘 𑀬𑀣𑀸𑀭𑀳𑀁 𑀏𑀓𑀢𑁆𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸 𑀲𑀦𑀺𑀲𑁆𑀲𑀬𑁂𑀓𑀭𑀽𑀧𑀸 𑀏𑀯. 𑀢𑀣𑀸 𑀳𑀺 𑀏𑀓𑁄 𑀕𑀸𑀫𑁄 𑀅𑀭𑀜𑁆𑀜𑀁 𑀦𑀤𑀻 𑀚𑀸𑀢𑀲𑁆𑀲𑀭𑁄 𑀲𑀫𑀼𑀤𑁆𑀤𑁄𑀢𑀺 𑀏𑀯𑀁 𑀮𑁄𑀓𑁂, ‘‘𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦, 𑀅𑀕𑀸𑀫𑀓𑁂 𑀘𑁂, 𑀪𑀺𑀓𑁆𑀔𑀯𑁂, 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺𑀆𑀤𑀺𑀦𑀸 𑀲𑀸𑀲𑀦𑁂 𑀘 𑀏𑀓𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺, 𑀦 𑀧𑀭𑀫𑀢𑁆𑀣𑀢𑁄. 𑀏𑀓𑀲𑁆𑀲 𑀅𑀦𑁂𑀓𑀥𑀫𑁆𑀫𑁂𑀲𑀼 𑀩𑁆𑀬𑀸𑀧𑀦𑀫𑀢𑁆𑀣𑀺 𑀓𑀲𑀺𑀡𑁂𑀓𑀤𑁂𑀲𑀸𑀤𑀺𑀯𑀺𑀓𑀧𑁆𑀧𑀸𑀲𑀫𑀸𑀦𑀢𑀸𑀬 𑀏𑀓𑀢𑁆𑀢𑀳𑀸𑀦𑀺𑀢𑁄𑀢𑀺 𑀅𑀬𑀁 𑀦𑁄 𑀫𑀢𑀺.

𑀅𑀲𑁆𑀲 𑀳𑁂𑀝𑁆𑀞𑀸𑀢𑀺 𑀲𑀧𑁆𑀧𑀨𑀡𑀧𑀩𑁆𑀩𑀢𑀲𑁆𑀲 𑀳𑁂𑀝𑁆𑀞𑀸 𑀆𑀓𑀸𑀲𑀧𑀩𑁆𑀪𑀸𑀭𑁂. 𑀮𑁂𑀡𑀲𑁆𑀲𑀸𑀢𑀺 𑀮𑁂𑀡𑀁 𑀘𑁂 𑀓𑀢𑀁, 𑀢𑀲𑁆𑀲 𑀮𑁂𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀧𑀼𑀦 𑀮𑁂𑀡𑀁 𑀧𑀜𑁆𑀘𑀳𑀺 𑀧𑀓𑀸𑀭𑁂𑀳𑀺 𑀯𑀺𑀓𑀧𑁆𑀧𑁂𑀢𑁆𑀯𑀸 𑀑𑀢𑀭𑀡𑀸𑀦𑁄𑀢𑀭𑀡𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀘𑁂 𑀧𑀦 𑀳𑁂𑀝𑁆𑀞𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀳𑁂𑀝𑁆𑀞𑀸’’𑀢𑀺 𑀇𑀫𑀲𑁆𑀲 ‘‘𑀮𑁂𑀡𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀳𑁂𑀝𑁆𑀞𑀸 𑀮𑁂𑀡𑀜𑁆𑀘 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀆𑀳 ‘‘𑀅𑀦𑁆𑀢𑁄’’𑀢𑀺, 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄, 𑀧𑀩𑁆𑀩𑀢𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀅𑀦𑁆𑀢𑁄𑀲𑀤𑁆𑀤𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀲𑁂𑀲𑁂𑀢𑀼𑀁 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀩𑁆𑀩𑀢𑀧𑀸𑀤𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀑𑀭𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀲𑀻𑀫𑀸𑀦𑀺𑀲𑁆𑀲𑀬𑀁 𑀧𑀩𑁆𑀩𑀢𑀕𑁆𑀕𑀁 𑀲𑀦𑁆𑀥𑀸𑀬 ‘‘𑀧𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀩𑀳𑀺 𑀮𑁂𑀡’’𑀦𑁆𑀢𑀺 𑀏𑀢𑁆𑀣 𑀩𑀳𑀺𑀲𑀤𑁆𑀤𑀁 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀢𑁄’’𑀢𑀺 𑀆𑀳. 𑀩𑀳𑀺𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀏𑀢𑁆𑀣 𑀩𑀳𑀻𑀢𑀺 𑀧𑀩𑁆𑀩𑀢𑀧𑀸𑀤𑁂 𑀮𑁂𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀮𑁂𑀡𑀲𑁆𑀲 𑀘 𑀩𑀳𑀺𑀪𑀽𑀢𑁂 𑀉𑀧𑀭𑀺𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄 𑀲𑀻𑀫𑀸𑀢𑀺 𑀮𑁂𑀡𑀲𑁆𑀲 𑀘 𑀧𑀩𑁆𑀩𑀢𑀧𑀸𑀤𑀲𑁆𑀲 𑀘 𑀅𑀦𑁆𑀢𑁄 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. ‘‘𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺, 𑀅𑀦𑁆𑀢𑁄 𑀲𑀻𑀫𑀸 𑀦 𑀑𑀢𑀭𑀢𑀻’’𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀮𑁂𑀡𑀸𑀪𑀸𑀯𑁂𑀦 𑀲𑀻𑀫𑀸𑀬 𑀲𑀩𑁆𑀩𑀣𑀸 𑀅𑀦𑁄𑀢𑀭𑀡𑀫𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀅𑀦𑁄𑀢𑀭𑀦𑁆𑀢𑀻 𑀉𑀧𑀭𑀺 𑀏𑀯 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) 𑀆𑀕𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) 𑀧𑀦 ‘‘𑀅𑀦𑁆𑀢𑁄𑀮𑁂𑀡𑀁 𑀳𑁄𑀢𑀻𑀢𑀺 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄𑀮𑁂𑀡𑀁 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀆𑀕𑀢𑁄. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀦 ‘‘𑀅𑀦𑁆𑀢𑁄𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄𑀮𑁂𑀡𑀁. 𑀤𑁆𑀯𑀸𑀭𑀁 𑀧𑀦 𑀲𑀦𑁆𑀥𑀸𑀬 ‘𑀧𑀸𑀭𑀢𑁄 𑀑𑀭𑀢𑁄’𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀣𑀸𑀧𑀺 𑀲𑀻𑀫𑀢𑁄 𑀩𑀳𑀺𑀮𑁂𑀡𑁂𑀦 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀕𑀢𑁄. 𑀅𑀬𑀁 𑀧𑀦 𑀅𑀦𑁆𑀢𑁄𑀮𑁂𑀡𑀩𑀳𑀺𑀮𑁂𑀡𑀯𑀺𑀦𑀺𑀘𑁆𑀙𑀬𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀢𑀣𑀸𑀧𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) 𑀆𑀕𑀢𑀁 𑀦𑀬𑀁 𑀦𑀺𑀲𑁆𑀲𑀸𑀬 𑀲𑀼𑀝𑁆𑀞𑀼 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀩𑀳𑀺 𑀧𑀢𑀺𑀢𑀁 𑀅𑀲𑀻𑀫𑀸𑀢𑀺𑀆𑀤𑀺𑀦𑀸 𑀉𑀧𑀭𑀺𑀧𑀸𑀲𑀸𑀤𑀸𑀤𑀻𑀲𑀼 𑀅𑀣𑀺𑀭𑀦𑀺𑀲𑁆𑀲𑀬𑁂𑀲𑀼 𑀞𑀺𑀢𑀸 𑀲𑀻𑀫𑀸𑀧𑀺 𑀢𑁂𑀲𑀁 𑀯𑀺𑀦𑀸𑀲𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑁄𑀓𑁆𑀔𑀭𑀡𑀺𑀁 𑀔𑀡𑀦𑁆𑀢𑀺, 𑀲𑀻𑀫𑀸𑀬𑁂𑀯𑀸𑀢𑀺 𑀏𑀢𑁆𑀣 𑀲𑀘𑁂 𑀳𑁂𑀝𑁆𑀞𑀸 𑀉𑀫𑀗𑁆𑀕𑀦𑀤𑀻 𑀲𑀻𑀫𑀧𑁆𑀧𑀫𑀸𑀡𑀢𑁄 𑀅𑀦𑀽𑀦𑀸 𑀧𑀞𑀫𑀫𑁂𑀯 𑀧𑀯𑀢𑁆𑀢𑀸 𑀳𑁄𑀢𑀺, 𑀲𑀻𑀫𑀸 𑀘 𑀧𑀘𑁆𑀙𑀸 𑀩𑀤𑁆𑀥𑀸 𑀦𑀤𑀺𑀢𑁄 𑀉𑀧𑀭𑀺 𑀏𑀯 𑀳𑁄𑀢𑀺, 𑀦𑀤𑀺𑀁 𑀆𑀳𑀘𑁆𑀘 𑀧𑁄𑀓𑁆𑀔𑀭𑀡𑀺𑀬𑀸 𑀘 𑀔𑀢𑀸𑀬 𑀲𑀻𑀫𑀸 𑀯𑀺𑀦𑀲𑁆𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀸𑀧𑀣𑀯𑀻𑀢𑀮𑁂𑀢𑀺 𑀅𑀦𑀦𑁆𑀢𑀭𑀸 𑀪𑀽𑀫𑀺𑀯𑀺𑀯𑀭𑁂.

𑀲𑀻𑀫𑀫𑀸𑀴𑀓𑁂𑀢𑀺 𑀔𑀡𑁆𑀟𑀲𑀻𑀫𑀗𑁆𑀕𑀡𑁂. 𑀯𑀝𑀭𑀼𑀓𑁆𑀔𑁄𑀢𑀺 𑀇𑀤𑀁 𑀧𑀸𑀭𑁄𑀳𑁄𑀧𑀢𑁆𑀣𑀫𑁆𑀪𑁂𑀦 𑀅𑀢𑀺𑀤𑀽𑀭𑀫𑁆𑀧𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑀲𑀸𑀔𑀸𑀲𑀫𑀗𑁆𑀕𑀺𑀢𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀭𑀼𑀓𑁆𑀔𑀮𑀢𑀸𑀤𑀻𑀦𑀫𑁆𑀧𑀺 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺 𑀏𑀯. 𑀢𑁂𑀦𑁂𑀯 𑀦𑀸𑀯𑀸𑀭𑀚𑁆𑀚𑀼𑀲𑁂𑀢𑀼𑀲𑀫𑁆𑀩𑀦𑁆𑀥𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀢𑁄𑀢𑀺 𑀢𑀢𑁄 𑀲𑀸𑀔𑀢𑁄. 𑀫𑀳𑀸𑀲𑀻𑀫𑀸𑀬 𑀧𑀣𑀯𑀻𑀢𑀮𑀦𑁆𑀢𑀺 𑀏𑀢𑁆𑀣 𑀆𑀲𑀦𑁆𑀦𑀢𑀭𑀫𑁆𑀧𑀺 𑀕𑀸𑀫𑀲𑀻𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀩𑀤𑁆𑀥𑀲𑀻𑀫𑀸𑀬 𑀏𑀯 𑀕𑀳𑀺𑀢𑀢𑁆𑀢𑀸 𑀕𑀸𑀫𑀲𑀻𑀫𑀩𑀤𑁆𑀥𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀢𑀸𑀲𑀫𑁆𑀧𑀺 𑀲𑀫𑁆𑀩𑀦𑁆𑀥𑀤𑁄𑀲𑁄 𑀪𑀯𑁂𑀬𑁆𑀬, 𑀓𑀣𑀁 𑀕𑀸𑀫𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸 𑀪𑀯𑁂𑀬𑁆𑀬? 𑀬𑀲𑁆𑀲𑀸 𑀳𑀺 𑀲𑀻𑀫𑀸𑀬 𑀬𑀸𑀬 𑀲𑀻𑀫𑀸𑀬 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁂 𑀤𑁄𑀲𑁄 𑀪𑀯𑁂𑀬𑁆𑀬, 𑀲𑀸 𑀢𑀢𑁆𑀣 𑀩𑀦𑁆𑀥𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺 𑀩𑀤𑁆𑀥𑀲𑀻𑀫𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀩𑀤𑁆𑀥𑀲𑀻𑀫𑀸 𑀯𑀺𑀬, 𑀅𑀢𑁆𑀢𑀦𑁄 𑀅𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀲𑀻𑀫𑀸𑀤𑀻𑀲𑀼 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀯𑀺𑀬 𑀘, 𑀢𑁂𑀦𑁂𑀯 ‘‘𑀲𑀘𑁂 𑀧𑀦 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸𑀢𑀢𑁄 𑀦𑀺𑀓𑁆𑀔𑀦𑁆𑀢𑀧𑀸𑀭𑁄𑀳𑁄 𑀯𑀸 𑀩𑀳𑀺𑀦𑀤𑀻𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺𑀆𑀤𑀺𑀦𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀢𑁆𑀢𑀦𑁄 𑀅𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀲𑀻𑀫𑀸𑀤𑀻𑀳𑀺 𑀏𑀯 𑀲𑀫𑁆𑀩𑀦𑁆𑀥𑀤𑁄𑀲𑁄 𑀤𑀲𑁆𑀲𑀺𑀢𑁄, 𑀦 𑀦𑀤𑀻𑀲𑀻𑀫𑀸𑀬, 𑀏𑀯𑀫𑀺𑀥𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘𑀢𑁆𑀣𑁄 𑀉𑀧𑀭𑀺 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀆𑀳𑀘𑁆𑀘𑀸𑀢𑀺 𑀨𑀼𑀲𑀺𑀢𑁆𑀯𑀸.

𑀫𑀳𑀸𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀫𑀳𑀸𑀲𑀻𑀫𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀙𑀦𑁆𑀤𑀸𑀳𑀭𑀡𑀸𑀤𑀺𑀯𑀲𑁂𑀦 𑀲𑀓𑀮𑀁 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸. 𑀏𑀢𑁂𑀦 𑀲𑀩𑁆𑀩𑀯𑀺𑀧𑀢𑁆𑀢𑀺𑀬𑁄 𑀫𑁄𑀘𑁂𑀢𑁆𑀯𑀸 𑀧𑀼𑀩𑁆𑀩𑁂 𑀲𑀼𑀝𑁆𑀞𑀼 𑀩𑀤𑁆𑀥𑀸𑀦𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀧𑀘𑁆𑀙𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀈𑀤𑀺𑀲𑁄 𑀧𑀸𑀴𑀺𑀫𑀼𑀢𑁆𑀢𑀓𑁄 𑀲𑀫𑁆𑀩𑀦𑁆𑀥𑀤𑁄𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺, 𑀲𑁄 𑀘 ‘‘𑀦, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀲𑀻𑀫𑀸 𑀲𑀫𑁆𑀪𑀺𑀦𑁆𑀤𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀩𑀤𑁆𑀥𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁪𑁮) 𑀉𑀪𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀅𑀦𑁆𑀢𑀭𑀸 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸 𑀩𑀦𑁆𑀥𑀺𑀢𑀼𑀁 𑀅𑀦𑀼𑀚𑀸𑀦𑀦𑁂𑀦 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑁂 𑀯𑀺𑀬 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀦𑀯𑀲𑁂𑀦 𑀩𑀦𑁆𑀥𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 𑀩𑀤𑁆𑀥𑀸𑀦𑀫𑁆𑀧𑀺 𑀢𑀸𑀲𑀁 𑀧𑀘𑁆𑀙𑀸 𑀅𑀜𑁆𑀜𑀫𑀜𑁆𑀜𑀁 𑀏𑀓𑀭𑀼𑀓𑁆𑀔𑀸𑀤𑀻𑀳𑀺 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀳𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀦𑀺𑀤𑁆𑀥𑀸𑀭𑀺𑀢𑁄 𑀩𑀦𑁆𑀥𑀦𑀓𑀸𑀮𑁂 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀫𑁆𑀩𑀦𑁆𑀥𑀤𑁄𑀲𑀲𑁆𑀲 𑀅𑀦𑀼𑀮𑁄𑀫𑁂𑀦 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸. 𑀅𑀬𑀁 𑀧𑀦 𑀲𑀫𑁆𑀩𑀦𑁆𑀥𑀤𑁄𑀲𑁄 𑀧𑀼𑀩𑁆𑀩𑁂 𑀲𑀼𑀝𑁆𑀞𑀼 𑀩𑀤𑁆𑀥𑀸𑀦𑀁 𑀧𑀘𑁆𑀙𑀸 𑀲𑀜𑁆𑀚𑀸𑀢𑀢𑁆𑀢𑀸 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀯𑀺𑀬 𑀅𑀲𑀻𑀫𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀅𑀧𑀦𑀻𑀢𑀫𑀢𑁆𑀢𑁂 𑀢𑀸 𑀲𑀻𑀫𑀸 𑀧𑀸𑀓𑀢𑀺𑀓𑀸 𑀳𑁄𑀦𑁆𑀢𑀺. 𑀬𑀣𑀸 𑀘𑀸𑀬𑀁 𑀧𑀘𑁆𑀙𑀸 𑀦 𑀯𑀝𑁆𑀝𑀢𑀺, 𑀏𑀯𑀁 𑀩𑀚𑁆𑀛𑀫𑀸𑀦𑀓𑁆𑀔𑀡𑁂𑀧𑀺 𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀢𑀸 𑀩𑀦𑁆𑀥𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 𑀫𑀳𑀸𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀫𑀳𑀸𑀲𑀻𑀫𑀕𑀢𑀸 𑀪𑀺𑀓𑁆𑀔𑀽 𑀬𑀣𑀸 𑀢𑀁 𑀲𑀸𑀔𑀁 𑀯𑀸 𑀧𑀸𑀭𑁄𑀳𑀁 𑀯𑀸 𑀓𑀸𑀬𑀓𑀸𑀬𑀧𑀝𑀺𑀩𑀤𑁆𑀥𑁂𑀳𑀺 𑀦 𑀨𑀼𑀲𑀦𑁆𑀢𑀺, 𑀏𑀯𑀁 𑀲𑁄𑀥𑀦𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀲𑀓𑀮𑀲𑀻𑀫𑀸𑀲𑁄𑀥𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀦𑀢𑁄. 𑀢𑀣𑀸 𑀳𑀺 ‘‘𑀫𑀳𑀸𑀲𑀻𑀫𑀸𑀬 𑀧𑀣𑀯𑀻𑀢𑀮𑀁 𑀯𑀸 𑀢𑀢𑁆𑀣𑀚𑀸𑀢𑀓𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀏𑀯𑀁 𑀲𑀸𑀔𑀸𑀧𑀸𑀭𑁄𑀳𑀸𑀦𑀁 𑀫𑀳𑀸𑀲𑀻𑀫𑀁 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁂𑀯 𑀲𑀫𑁆𑀩𑀦𑁆𑀥𑀤𑁄𑀲𑁂 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀢𑀢𑁆𑀣 𑀞𑀺𑀢𑀪𑀺𑀓𑁆𑀔𑀽𑀳𑀺 𑀲𑀸𑀔𑀸𑀤𑀻𑀦𑀁 𑀨𑀼𑀲𑀦𑀁. 𑀬𑀤𑀺 𑀳𑀺 𑀪𑀺𑀓𑁆𑀔𑀽𑀦𑀁 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀸𑀦𑀫𑁂𑀯 𑀓𑀸𑀭𑀡𑀁 𑀲𑀺𑀬𑀸, ‘‘𑀢𑀲𑁆𑀲 𑀲𑀸𑀔𑀁 𑀯𑀸 𑀢𑀢𑁄 𑀦𑀺𑀕𑁆𑀕𑀢𑀧𑀸𑀭𑁄𑀳𑀁 𑀯𑀸 𑀫𑀳𑀸𑀲𑀻𑀫𑀸𑀬 𑀧𑀯𑀺𑀝𑁆𑀞𑀁 𑀢𑀢𑁆𑀭𑀝𑁆𑀞𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻’’𑀢𑀺 𑀪𑀺𑀓𑁆𑀔𑀼𑀨𑀼𑀲𑀦𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀜𑁆𑀳𑀺 𑀢𑀢𑁆𑀣 𑀫𑀳𑀸𑀲𑀻𑀫𑀸𑀲𑁄𑀥𑀦𑁂 𑀓𑀸𑀭𑀡𑀁, 𑀢𑀤𑁂𑀯 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀧𑀥𑀸𑀦𑀢𑁄 𑀤𑀲𑁆𑀲𑁂𑀢𑀩𑁆𑀩𑀁. 𑀦 𑀳𑀺 𑀆𑀳𑀘𑁆𑀘𑀝𑁆𑀞𑀺𑀢𑀫𑁂𑀯 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀥𑁂𑀢𑀩𑁆𑀩𑁄 𑀆𑀓𑀸𑀲𑀝𑁆𑀞𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀼𑀲𑁆𑀲𑀧𑀺 𑀲𑁄𑀥𑁂𑀢𑀩𑁆𑀩𑀢𑁄, 𑀓𑀺𑀁 𑀦𑀺𑀭𑀢𑁆𑀣𑀓𑁂𑀦 𑀆𑀳𑀘𑁆𑀘𑀝𑁆𑀞𑀸𑀦𑀯𑀘𑀦𑁂𑀦, 𑀆𑀓𑀸𑀲𑀝𑁆𑀞𑀲𑀸𑀔𑀸𑀲𑀼 𑀘 𑀪𑀺𑀓𑁆𑀔𑀼𑀨𑀼𑀲𑀦𑀫𑁂𑀯 𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀲𑁄𑀥𑀦𑀜𑁆𑀘 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀳𑀢𑁆𑀣𑀧𑀸𑀲𑀸𑀦𑀬𑀦𑀸𑀤𑀺𑀯𑀲𑁂𑀦 𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀇𑀥 𑀧𑀦 ‘‘𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸’’𑀢𑀺 𑀲𑀓𑀮𑀲𑀻𑀫𑀸𑀲𑀸𑀥𑀸𑀭𑀡𑀯𑀘𑀦𑁂𑀦 𑀲𑁄𑀥𑀦𑀁 𑀯𑀼𑀢𑁆𑀢𑀁, 𑀅𑀧𑀺 𑀘 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀼𑀫𑀢𑁆𑀢𑀲𑁄𑀥𑀦𑁂 𑀅𑀪𑀺𑀫𑀢𑁂 ‘‘𑀫𑀳𑀸𑀲𑀻𑀫𑀸𑀬 𑀧𑀣𑀯𑀻𑀢𑀮’’𑀦𑁆𑀢𑀺 𑀯𑀺𑀲𑁂𑀲𑀲𑀻𑀫𑁄𑀧𑀸𑀤𑀸𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀦𑁆𑀢𑀫𑀲𑁄 𑀆𑀓𑀸𑀲𑁂𑀧𑀺 𑀞𑀢𑁆𑀯𑀸 𑀲𑀸𑀔𑀸𑀤𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀲𑁄𑀥𑁂𑀢𑀩𑁆𑀩𑀢𑁄.

𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀺𑀝𑁆𑀞𑀓𑀸 𑀓𑀸𑀢𑀩𑁆𑀩𑀸𑀢𑀺 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀪𑀸𑀯𑀯𑀺𑀬𑁄𑀚𑀦𑀯𑀘𑀦𑀢𑁄 𑀘 𑀯𑀺𑀲𑀪𑀸𑀕𑀲𑀻𑀫𑀸𑀦𑀁 𑀨𑀼𑀲𑀦𑁂𑀦𑁂𑀯 𑀲𑀓𑀮𑀲𑀻𑀫𑀸𑀲𑁄𑀥𑀦𑀳𑁂𑀢𑀼𑀓𑁄 𑀅𑀝𑁆𑀞𑀓𑀣𑀸𑀲𑀺𑀤𑁆𑀥𑁄𑀬𑀁 𑀏𑀓𑁄 𑀲𑀫𑁆𑀩𑀦𑁆𑀥𑀤𑁄𑀲𑁄 𑀅𑀢𑁆𑀣𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀣𑀸𑀬𑀫𑁆𑀧𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) ‘‘𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀕𑀸𑀫𑀲𑀻𑀫𑀸𑀬 𑀯𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀘 ‘‘𑀦𑀤𑀻𑀢𑀻𑀭𑁂 𑀧𑀦 𑀔𑀸𑀡𑀼𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀢𑀢𑁆𑀣 𑀩𑀤𑁆𑀥𑀦𑀸𑀯𑀸𑀬 𑀯𑀸 𑀦 𑀯𑀝𑁆𑀝𑀢𑀻’’𑀢𑀺 𑀘 ‘‘𑀲𑀘𑁂 𑀧𑀦 𑀲𑁂𑀢𑀼 𑀯𑀸 𑀲𑁂𑀢𑀼𑀧𑀸𑀤𑀸 𑀯𑀸 𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸, 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀘 𑀏𑀯𑀁 𑀯𑀺𑀲𑀪𑀸𑀕𑀸𑀲𑀼 𑀕𑀸𑀫𑀲𑀻𑀫𑀸𑀲𑀼 𑀲𑀸𑀔𑀸𑀤𑀻𑀦𑀁 𑀨𑀼𑀲𑀦𑀫𑁂𑀯 𑀲𑀗𑁆𑀓𑀭𑀤𑁄𑀲𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀪𑀺𑀓𑁆𑀔𑀼𑀨𑀼𑀲𑀦𑀁. 𑀢𑀣𑀸 𑀳𑀺 ‘‘𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀩𑀦𑁆𑀥𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀦𑀤𑀺𑀬𑀁 𑀦𑀸𑀯𑀸𑀩𑀦𑁆𑀥𑀦𑀁 𑀅𑀦𑀼𑀜𑁆𑀜𑀸𑀢𑀁 𑀉𑀤𑀓𑀼𑀓𑁆𑀔𑁂𑀧𑀦𑀺𑀲𑁆𑀲𑀬𑀢𑁆𑀢𑁂𑀦 𑀦𑀤𑀻𑀲𑀻𑀫𑀸𑀬 𑀲𑀪𑀸𑀕𑀢𑁆𑀢𑀸. 𑀬𑀤𑀺 𑀳𑀺 𑀪𑀺𑀓𑁆𑀔𑀽𑀦𑀁 𑀨𑀼𑀲𑀦𑀫𑁂𑀯 𑀧𑀝𑀺𑀘𑁆𑀘 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀤𑁄𑀲𑁄 𑀯𑀼𑀢𑁆𑀢𑁄 𑀲𑀺𑀬𑀸, 𑀦𑀤𑀺𑀬𑀫𑁆𑀧𑀺 𑀩𑀦𑁆𑀥𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀪𑀯𑁂𑀬𑁆𑀬. 𑀢𑀢𑁆𑀣𑀸𑀧𑀺 𑀳𑀺 𑀪𑀺𑀓𑁆𑀔𑀼𑀨𑀼𑀲𑀦𑀁 𑀓𑀫𑁆𑀫𑀓𑁄𑀧𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀪𑀸𑀕𑀲𑀻𑀫𑀸𑀲𑀼 𑀧𑀯𑀺𑀲𑀺𑀢𑁆𑀯𑀸 𑀪𑀽𑀫𑀺𑀆𑀤𑀺𑀁 𑀨𑀼𑀲𑀺𑀢𑁆𑀯𑀸, 𑀅𑀨𑀼𑀲𑀺𑀢𑁆𑀯𑀸 𑀯𑀸 𑀲𑀸𑀔𑀸𑀤𑀺𑀫𑁆𑀳𑀺 𑀞𑀺𑀢𑁂 𑀢𑀁 𑀲𑀸𑀔𑀸𑀤𑀺𑀁 𑀨𑀼𑀲𑀦𑁆𑀢𑁄𑀯 𑀪𑀺𑀓𑁆𑀔𑀼 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀲𑀪𑀸𑀕𑀲𑀻𑀫𑀸𑀲𑀼 𑀧𑀦 𑀲𑀸𑀔𑀸𑀤𑀺𑀫𑁆𑀳𑀺 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂 𑀢𑀁 𑀲𑀸𑀔𑀸𑀤𑀺𑀁 𑀅𑀨𑀼𑀲𑀦𑁆𑀢𑀸𑀧𑀺 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀲𑁄𑀥𑁂𑀢𑀩𑁆𑀩𑀸, 𑀅𑀨𑀼𑀲𑀺𑀢𑁆𑀯𑀸 𑀞𑀺𑀢𑁂 𑀧𑀦 𑀢𑀁 𑀲𑀸𑀔𑀸𑀤𑀺𑀁 𑀨𑀼𑀲𑀦𑁆𑀢𑀸𑀯 𑀪𑀺𑀓𑁆𑀔𑀽 𑀲𑁄𑀥𑁂𑀢𑀩𑁆𑀩𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀬𑀁 𑀧𑀦𑁂𑀢𑁆𑀣 𑀓𑁂𑀘𑀺 ‘‘𑀩𑀤𑁆𑀥𑀲𑀻𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀬 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀦𑀫𑁆𑀧𑀺 𑀢𑀤𑀜𑁆𑀜𑀸𑀲𑀫𑁆𑀧𑀺 𑀲𑀩𑁆𑀩𑀸𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀢𑀤𑀼𑀪𑀬𑀫𑁆𑀧𑀺 𑀏𑀓𑀲𑀻𑀫𑀁 𑀯𑀺𑀬 𑀲𑁄𑀥𑁂𑀢𑁆𑀯𑀸 𑀏𑀓𑀢𑁆𑀣𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀓𑀢𑀁 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀦𑀢𑁆𑀣𑁂𑀢𑁆𑀣 𑀲𑀪𑀸𑀕𑀯𑀺𑀲𑀪𑀸𑀕𑀪𑁂𑀤𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀲𑀪𑀸𑀕𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀤𑁄𑀲𑀸𑀪𑀸𑀯𑀲𑁆𑀲 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀢𑀩𑁆𑀪𑀸𑀯𑀲𑁆𑀲 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀸𑀤𑀺𑀯𑀺𑀦𑀬𑀦𑀬𑁂𑀳𑀺 𑀲𑀺𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁩𑁮) 𑀕𑀸𑀫𑀲𑀻𑀫𑀸𑀬𑀫𑁂𑀯 𑀩𑀤𑁆𑀥𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀢𑀸𑀲𑀁 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀤𑁄𑀲𑀸𑀪𑀸𑀯𑁄 𑀘 𑀲𑀼𑀢𑁆𑀢𑀢𑁄𑀯 𑀲𑀺𑀤𑁆𑀥𑁄. 𑀩𑀦𑁆𑀥𑀦𑀓𑀸𑀮𑁂 𑀧𑀦 𑀅𑀦𑀼𑀜𑁆𑀜𑀸𑀢𑀲𑁆𑀲 𑀲𑀫𑁆𑀩𑀦𑁆𑀥𑀲𑁆𑀲 𑀅𑀦𑀼𑀮𑁄𑀫𑀢𑁄 𑀧𑀘𑁆𑀙𑀸 𑀲𑀜𑁆𑀚𑀸𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀢𑀸𑀲𑀁 𑀯𑀝𑁆𑀝𑀢𑀺 𑀏𑀯. ‘‘𑀬𑀁, 𑀪𑀺𑀓𑁆𑀔𑀯𑁂…𑀧𑁂… 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀢𑁆𑀢𑀸 𑀏𑀯𑀁 𑀢𑀸𑀯 𑀕𑀸𑀫𑀩𑀤𑁆𑀥𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀸𑀪𑀸𑀯𑁄 𑀘 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑁄, 𑀇𑀫𑀺𑀦𑀸 𑀏𑀯 𑀦𑀬𑁂𑀦 𑀅𑀭𑀜𑁆𑀜𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀁 𑀦𑀤𑀻𑀆𑀤𑀺𑀲𑀻𑀫𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀜𑁆𑀘 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑀸, 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀸𑀪𑀸𑀯𑁄 𑀘 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀩𑀤𑁆𑀥𑀲𑀻𑀫𑀸𑀬 𑀧𑀦 𑀅𑀜𑁆𑀜𑀸𑀬 𑀩𑀤𑁆𑀥𑀲𑀻𑀫𑀸𑀬 𑀦𑀤𑀻𑀆𑀤𑀺𑀲𑀻𑀫𑀸𑀲𑀼 𑀘 𑀩𑀦𑁆𑀥𑀺𑀢𑀼𑀁 𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑀺𑀢𑁄 𑀘𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀁 𑀦𑀤𑀻𑀆𑀤𑀻𑀲𑀼 𑀏𑀯 𑀓𑀸𑀢𑀼𑀁 𑀦𑀺𑀬𑀫𑀦𑀲𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑁂𑀦 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀲𑀼 𑀓𑀭𑀡𑀧𑀝𑀺𑀓𑁆𑀔𑁂𑀧𑀲𑀺𑀤𑁆𑀥𑁄 𑀘 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀲𑀪𑀸𑀕𑀢𑀸 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀧𑀘𑁆𑀙𑀸 𑀘 𑀭𑀼𑀓𑁆𑀔𑀸𑀤𑀻𑀳𑀺 𑀲𑀫𑁆𑀪𑁂𑀤𑀸𑀤𑀺𑀤𑁄𑀲𑀲𑀫𑁆𑀪𑀯𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄𑀯 𑀲𑀺𑀚𑁆𑀛𑀦𑁆𑀢𑀺. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀯𑀝𑀭𑀼𑀓𑁆𑀔𑀸𑀤𑀺𑀯𑀘𑀦𑁂𑀳𑀺 𑀲𑀫𑁆𑀩𑀦𑁆𑀥𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀪𑀸𑀕𑀸𑀦𑀁 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀤𑀻𑀦𑀁 𑀲𑀫𑁆𑀩𑀦𑁆𑀥𑀤𑁄𑀲𑁄 𑀦 𑀤𑀲𑁆𑀲𑀺𑀢𑁄. 𑀦 𑀓𑁂𑀯𑀮𑀜𑁆𑀘 𑀦 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀢𑀸𑀲𑀁 𑀲𑀪𑀸𑀕𑀲𑀻𑀫𑀸𑀦𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀤𑁄𑀲𑀸𑀪𑀸𑀯𑁄𑀧𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀜𑀸𑀧𑀺𑀢𑁄 𑀏𑀯. 𑀢𑀣𑀸 𑀳𑀺 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁩𑁮) ‘‘𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁 𑀯𑀦𑀦𑀺𑀫𑀺𑀢𑁆𑀢𑀁 𑀭𑀼𑀓𑁆𑀔𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀟𑁆𑀠𑀦𑀓𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀢𑁂𑀦 𑀦𑁂𑀲𑀁 𑀭𑀼𑀓𑁆𑀔𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀁 𑀯𑀟𑁆𑀠𑀦𑁂 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀦𑀁 𑀲𑀗𑁆𑀓𑀭𑀤𑁄𑀲𑀸𑀪𑀸𑀯𑁄 𑀜𑀸𑀧𑀺𑀢𑁄𑀯 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀁 𑀧𑀦 𑀩𑀤𑁆𑀥𑀲𑀻𑀫𑀸𑀦𑀁 𑀈𑀤𑀺𑀲𑁄 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀏𑀓𑀭𑀼𑀓𑁆𑀔𑁄𑀧𑀺 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺, 𑀲𑁄 𑀧𑀦 𑀯𑀟𑁆𑀠𑀦𑁆𑀢𑁄 𑀲𑀻𑀫𑀲𑀗𑁆𑀓𑀭𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀓𑀸𑀢𑀩𑁆𑀩𑁄’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀻𑀫𑀁 𑀩𑀦𑁆𑀥𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁪𑁦) 𑀯𑀘𑀦𑀢𑁄𑀧𑀺 𑀘𑀸𑀬𑀁 𑀜𑀸𑀧𑀺𑀢𑁄. 𑀢𑀺𑀬𑁄𑀚𑀦𑀧𑀭𑀫𑀸𑀬 𑀳𑀺 𑀲𑀻𑀫𑀸𑀬 𑀲𑀫𑀦𑁆𑀢𑀸 𑀧𑀭𑀺𑀬𑀦𑁆𑀢𑁂𑀲𑀼 𑀭𑀼𑀓𑁆𑀔𑀮𑀢𑀸𑀕𑀼𑀫𑁆𑀩𑀸𑀤𑀻𑀳𑀺 𑀩𑀤𑁆𑀥𑀕𑀸𑀫𑀲𑀻𑀫𑀸𑀦𑀁 𑀦𑀺𑀬𑀫𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀈𑀤𑀺𑀲𑀁 𑀲𑀫𑁆𑀩𑀦𑁆𑀥𑀁 𑀯𑀺𑀦𑀸𑀲𑁂𑀢𑁆𑀯𑀸𑀯 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁.

𑀬𑀤𑀺 𑀘𑁂𑀢𑁆𑀣 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀦 𑀓𑀫𑁆𑀫𑀯𑀺𑀧𑀢𑁆𑀢𑀺 𑀪𑀯𑁂𑀬𑁆𑀬, 𑀅𑀯𑀲𑁆𑀲𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀯𑀺𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀜𑁆𑀳𑀺 𑀆𑀘𑀭𑀺𑀬𑀸 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼𑀧𑀺 ‘‘𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀺𑀤𑁆𑀥𑀫𑁂𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀅𑀯𑁄𑀘𑀼𑀁, 𑀇𑀥 𑀧𑀦 ‘‘𑀯𑀦𑀫𑀚𑁆𑀛𑁂 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺, 𑀯𑀦𑀁 𑀦 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀭𑀼𑀓𑁆𑀔𑀮𑀢𑀸𑀤𑀻𑀳𑀺 𑀦𑀺𑀭𑀦𑁆𑀢𑀭𑁂 𑀯𑀦𑀫𑀚𑁆𑀛𑁂𑀧𑀺 𑀲𑀻𑀫𑀸𑀩𑀦𑁆𑀥𑀦𑀫𑀯𑁄𑀘𑀼𑀁. 𑀢𑀣𑀸 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀢𑀧𑀸𑀲𑀸𑀤𑀸𑀤𑀻𑀲𑀼 𑀳𑁂𑀝𑁆𑀞𑀸 𑀣𑀫𑁆𑀪𑀸𑀤𑀻𑀳𑀺 𑀏𑀓𑀸𑀩𑀤𑁆𑀥𑁂𑀲𑀼 𑀉𑀧𑀭𑀺𑀫𑀢𑀮𑀸𑀤𑀻𑀲𑀼 𑀲𑀻𑀫𑀸𑀩𑀦𑁆𑀥𑀦𑀁 𑀩𑀳𑀼𑀥𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀦𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀢𑁂𑀳𑀺 𑀫𑀼𑀔𑀢𑁄𑀯 𑀯𑀺𑀳𑀺𑀢𑁄, 𑀅𑀧𑀺𑀘 𑀕𑀸𑀫𑀲𑀻𑀫𑀸𑀦𑀫𑁆𑀧𑀺 𑀧𑀸𑀝𑁂𑀓𑁆𑀓𑀁 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀢𑀸𑀬 𑀏𑀓𑀸𑀬 𑀕𑀸𑀫𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀤𑀩𑁆𑀩𑀢𑀺𑀡𑀫𑀢𑁆𑀢𑁂𑀦𑀧𑀺 𑀲𑀫𑁆𑀩𑀦𑁆𑀥𑀸 𑀕𑀸𑀫𑀦𑁆𑀢𑀭𑀧𑀭𑀫𑁆𑀧𑀭𑀸 𑀅𑀭𑀜𑁆𑀜𑀦𑀤𑀻𑀲𑀫𑀼𑀤𑁆𑀤𑀸 𑀘 𑀲𑁄𑀥𑁂𑀢𑀩𑁆𑀩𑀸𑀢𑀺 𑀲𑀓𑀮𑀁 𑀤𑀻𑀧𑀁 𑀲𑁄𑀥𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀁 𑀧𑀦 𑀅𑀲𑁄𑀥𑁂𑀢𑁆𑀯𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀧𑀪𑀼𑀢𑀺 𑀓𑀢𑀸𑀦𑀁 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀸𑀦𑀁 𑀲𑀻𑀫𑀸𑀲𑀫𑁆𑀫𑀼𑀢𑀻𑀦𑀜𑁆𑀘 𑀯𑀺𑀧𑀚𑁆𑀚𑀦𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀗𑁆𑀓𑀸𑀧𑀲𑀗𑁆𑀕𑁄 𑀘 𑀤𑀼𑀦𑁆𑀦𑀺𑀯𑀸𑀭𑁄 𑀳𑁄𑀢𑀺, 𑀦 𑀘𑁂𑀢𑀁 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁂𑀯 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀤𑁄𑀲𑁄, 𑀦 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀤𑀻𑀦𑀁 𑀲𑀪𑀸𑀕𑀲𑀻𑀫𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀫𑀳𑀸𑀲𑀻𑀫𑀸𑀲𑁄𑀥𑀦𑀲𑁆𑀲 𑀤𑀼𑀓𑁆𑀓𑀭𑀢𑀸𑀬 𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀖𑀓𑀫𑁆𑀫𑀓𑀭𑀡𑀦𑁆𑀢𑀺 𑀆𑀳 ‘‘𑀲𑀻𑀫𑀫𑀸𑀴𑀓𑁂’’𑀢𑀺𑀆𑀤𑀺. 𑀫𑀳𑀸𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂𑀲𑀼 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀅𑀧𑁆𑀧𑀳𑁄𑀦𑀓𑀢𑀸𑀬 𑀫𑀳𑀸𑀲𑀻𑀫𑀸𑀬 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂𑀧𑀺 𑀅𑀬𑀁 𑀦𑀬𑁄 𑀕𑀳𑁂𑀢𑀩𑁆𑀩𑁄𑀯. 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀲𑀻𑀫𑀁 𑀨𑀼𑀲𑀦𑁆𑀢𑁄𑀧𑀺 𑀲𑀻𑀫𑀝𑁆𑀞𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀧𑀻𑀢𑀺 𑀔𑀡𑁆𑀟𑀲𑀻𑀫𑀢𑁄 𑀫𑀳𑀸𑀲𑀻𑀫𑀁 𑀧𑀯𑀺𑀝𑁆𑀞𑀲𑀸𑀔𑀸𑀦𑀬𑁂𑀧𑀺. 𑀲𑀻𑀫𑀝𑁆𑀞𑀭𑀼𑀓𑁆𑀔𑀲𑀸𑀔𑀸𑀬 𑀦𑀺𑀲𑀺𑀦𑁆𑀦𑁄 𑀲𑀻𑀫𑀝𑁆𑀞𑁄𑀯 𑀳𑁄𑀢𑀻𑀢𑀺 𑀆𑀳 ‘𑀳𑀢𑁆𑀣𑀧𑀸𑀲𑀫𑁂𑀯 𑀆𑀦𑁂𑀢𑀩𑁆𑀩𑁄’’𑀢𑀺. 𑀏𑀢𑁆𑀣 𑀘 ‘‘𑀭𑀼𑀓𑁆𑀔𑀲𑀸𑀔𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀲𑀼 𑀏𑀢𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀢𑀬𑁄 𑀪𑀺𑀓𑁆𑀔𑀽, 𑀫𑀳𑀸𑀲𑀻𑀫𑀸𑀬 𑀤𑁆𑀯𑁂𑀢𑀺 𑀏𑀯𑀁 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼 𑀲𑀻𑀫𑀦𑁆𑀢𑀭𑀺𑀓𑀁 𑀅𑀨𑀼𑀲𑀺𑀢𑁆𑀯𑀸, 𑀳𑀢𑁆𑀣𑀧𑀸𑀲𑀜𑁆𑀘 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀳𑀺 𑀉𑀧𑀲𑀫𑁆𑀧𑀤𑀸𑀤𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 ‘‘𑀦𑀸𑀦𑀸𑀲𑀻𑀫𑀸𑀬𑀁 𑀞𑀺𑀢𑀘𑀢𑀼𑀢𑁆𑀣𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑁩𑁮𑁯). 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸 𑀫𑀸𑀴𑀓𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀓𑀭𑀡𑀁 𑀯𑀺𑀳𑀺𑀢𑀁. 𑀅𑀜𑁆𑀜𑀣𑀸 𑀪𑀺𑀦𑁆𑀦𑀲𑀻𑀫𑀝𑁆𑀞𑀢𑀸𑀬 𑀢𑀢𑁆𑀭𑀝𑁆𑀞𑀲𑁆𑀲 𑀕𑀡𑀧𑀽𑀭𑀓𑀢𑁆𑀢𑀸𑀪𑀸𑀯𑀸 𑀓𑀫𑁆𑀫𑀓𑁄𑀧𑁄𑀯 𑀳𑁄𑀢𑀻𑀢𑀺.

𑀬𑀤𑀺 𑀏𑀯𑀁 𑀓𑀣𑀁 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀆𑀳𑀭𑀡𑀯𑀲𑁂𑀦 𑀫𑀳𑀸𑀲𑀻𑀫𑀸𑀲𑁄𑀥𑀦𑀦𑁆𑀢𑀺? 𑀢𑀫𑁆𑀧𑀺 𑀯𑀺𑀦𑀬𑀜𑁆𑀜𑀽 𑀦 𑀇𑀘𑁆𑀙𑀦𑁆𑀢𑀺, 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀲𑀻𑀫𑀓𑀭𑀡𑀯𑀲𑁂𑀦 𑀧𑀦𑁂𑀢𑁆𑀣 𑀲𑁄𑀥𑀦𑀁 𑀇𑀘𑁆𑀙𑀦𑁆𑀢𑀺, 𑀤𑀺𑀦𑁆𑀦𑀲𑁆𑀲𑀧𑀺 𑀙𑀦𑁆𑀤𑀲𑁆𑀲 𑀅𑀦𑀸𑀕𑀫𑀦𑁂𑀦 𑀫𑀳𑀸𑀲𑀻𑀫𑀝𑁆𑀞𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺. 𑀬𑀤𑀺 𑀘𑀲𑁆𑀲 𑀙𑀦𑁆𑀤𑀸𑀤𑀺 𑀦𑀸𑀕𑀘𑁆𑀙𑀢𑀺, 𑀓𑀣𑀁 𑀲𑁄 𑀓𑀫𑁆𑀫𑀁 𑀓𑁄𑀧𑁂𑀲𑁆𑀲𑀢𑀻𑀢𑀺? 𑀤𑁆𑀯𑀺𑀦𑁆𑀦𑀁 𑀯𑀺𑀲𑀪𑀸𑀕𑀲𑀻𑀫𑀸𑀦𑀁 𑀲𑀫𑁆𑀩𑀦𑁆𑀥𑀤𑁄𑀲𑀢𑁄, 𑀲𑁄 𑀘 𑀲𑀫𑁆𑀩𑀦𑁆𑀥𑀤𑁄𑀲𑁄 𑀅𑀝𑁆𑀞𑀓𑀣𑀸𑀯𑀘𑀦𑀧𑁆𑀧𑀫𑀸𑀡𑀢𑁄. 𑀦 𑀳𑀺 𑀯𑀺𑀦𑀬𑁂 𑀲𑀩𑁆𑀩𑀢𑁆𑀣 𑀬𑀼𑀢𑁆𑀢𑀺 𑀲𑀓𑁆𑀓𑀸 𑀜𑀸𑀢𑀼𑀁 𑀩𑀼𑀤𑁆𑀥𑀕𑁄𑀘𑀭𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀲𑀘𑁂 𑀤𑁆𑀯𑁂𑀧𑀺 𑀲𑀻𑀫𑀸𑀬𑁄 𑀧𑀽𑀭𑁂𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀞𑀺𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀲𑀼 𑀏𑀓𑀸𑀬 𑀏𑀯 𑀲𑀻𑀫𑀸𑀬 𑀕𑀡𑁄 𑀘 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀘 𑀅𑀦𑀼𑀲𑁆𑀲𑀸𑀯𑀓𑁄 𑀘 𑀏𑀓𑀢𑁄 𑀢𑀺𑀝𑁆𑀞𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀓𑀫𑁆𑀫𑀸𑀭𑀳𑁄 𑀯𑀸 𑀅𑀦𑀼𑀲𑁆𑀲𑀸𑀯𑀓𑁄 𑀯𑀸 𑀲𑀻𑀫𑀦𑁆𑀢𑀭𑀝𑁆𑀞𑁄 𑀳𑁄𑀢𑀺, 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀜𑁆𑀘 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀤𑀺𑀲𑀪𑀸𑀕𑀲𑀻𑀫𑀸𑀲𑀼 𑀏𑀯 𑀬𑀼𑀚𑁆𑀚𑀢𑀺. 𑀬𑀸𑀲𑀼 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀲𑀼𑀧𑀺 𑀤𑁄𑀲𑁄 𑀦𑀢𑁆𑀣𑀺, 𑀬𑀸𑀲𑀼 𑀧𑀦 𑀅𑀢𑁆𑀣𑀺, 𑀦 𑀢𑀸𑀲𑀼, 𑀯𑀺𑀲𑀪𑀸𑀕𑀲𑀻𑀫𑀸𑀲𑀼 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀏𑀓𑀢𑁆𑀣 𑀞𑀺𑀢𑁄 𑀇𑀢𑀭𑀝𑁆𑀞𑀸𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺 𑀏𑀯 𑀅𑀝𑁆𑀞𑀓𑀣𑀸𑀬 𑀲𑀸𑀫𑀜𑁆𑀜𑀢𑁄 𑀲𑁄𑀥𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁩𑁮) ‘‘𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀔𑀡𑁆𑀟𑀲𑀻𑀫𑀸𑀬 𑀅𑀦𑁆𑀢𑁄 𑀞𑀺𑀢𑀢𑁆𑀢𑀸 𑀭𑀼𑀓𑁆𑀔𑀲𑁆𑀲 𑀢𑀢𑁆𑀣 𑀞𑀺𑀢𑁄 𑀳𑀢𑁆𑀣𑀧𑀸𑀲𑀫𑁂𑀯 𑀆𑀦𑁂𑀢𑀩𑁆𑀩𑁄𑀢𑀺 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁩𑁮) 𑀧𑀦 ‘‘𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀲𑁆𑀫𑀸? 𑀅𑀦𑁆𑀢𑁄 𑀞𑀺𑀢𑀢𑁆𑀢𑀸. 𑀭𑀼𑀓𑁆𑀔𑀲𑁆𑀲 𑀳𑀺 𑀳𑁂𑀝𑁆𑀞𑀸 𑀧𑀣𑀯𑀻𑀕𑀢𑀁 𑀫𑀽𑀮𑀁 𑀔𑀡𑁆𑀟𑀲𑀻𑀫𑀸𑀬𑁂𑀯 𑀳𑁄𑀢𑀺. 𑀅𑀩𑁆𑀩𑁄𑀳𑀸𑀭𑀺𑀓𑀁 𑀯𑀸𑀢𑀺 𑀅𑀧𑀭𑁂. ‘𑀫𑀚𑁆𑀛𑁂 𑀧𑀦 𑀙𑀺𑀦𑁆𑀦𑁂 𑀫𑀳𑀸𑀲𑀻𑀫𑀸𑀬 𑀞𑀺𑀢𑀁 𑀫𑀽𑀮𑀁 𑀫𑀳𑀸𑀲𑀻𑀫𑀫𑁂𑀯 𑀪𑀚𑀢𑀺, 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀁 𑀔𑀡𑁆𑀟𑀲𑀻𑀫𑀫𑁂𑀯 𑀪𑀚𑀢𑀺 𑀢𑀤𑀸𑀬𑀢𑁆𑀢𑀧𑀣𑀯𑀻𑀆𑀤𑀻𑀳𑀺 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸’𑀢𑀺 𑀘 𑀯𑀼𑀢𑁆𑀢𑀁. ‘𑀲𑀻𑀫𑀸𑀬 𑀧𑀘𑁆𑀙𑀸 𑀉𑀝𑁆𑀞𑀺𑀢𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀧𑀘𑁆𑀙𑀸 𑀲𑀻𑀫𑀸𑀬𑀁 𑀓𑀢𑀕𑁂𑀳𑁂 𑀯𑀺𑀬𑀸’𑀢𑀺 𑀯𑀢𑁆𑀯𑀸 ‘𑀩𑀦𑁆𑀥𑀦𑀓𑀸𑀮𑁂 𑀞𑀺𑀢𑁂 𑀭𑀼𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺 𑀉𑀧𑀭𑀺𑀲𑀻𑀫𑀸𑀬 𑀅𑀕𑀫𑀦𑀢𑁄’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀩𑀦𑁆𑀥𑀦𑀓𑀸𑀮𑁂 𑀧𑀼𑀦 𑀆𑀭𑁄𑀳𑀡𑀁 𑀦𑀸𑀫 𑀦𑀢𑁆𑀣𑀺, 𑀩𑀦𑁆𑀥𑀺𑀢𑀓𑀸𑀮𑁂 𑀏𑀯 𑀆𑀭𑁄𑀳𑀢𑀻𑀢𑀺 𑀆𑀧𑀚𑁆𑀚𑀢𑀺 𑀧𑀘𑁆𑀙𑀸 𑀉𑀝𑁆𑀞𑀺𑀢𑀭𑀼𑀓𑁆𑀔𑁄 𑀧𑀦 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀢𑁄. 𑀏𑀯𑀁 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀭𑀼𑀓𑁆𑀔𑁄𑀧𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀯𑀘𑀦𑀢𑁄 𑀢𑀺𑀡𑀸𑀤𑀺𑀧𑀺 𑀲𑀗𑁆𑀕𑀳𑀺𑀢𑀁, 𑀫𑀳𑀸𑀣𑁂𑀭𑀸𑀧𑀺 𑀢𑀺𑀡𑀁 𑀲𑁄𑀥𑁂𑀢𑁆𑀯𑀸𑀯 𑀓𑀭𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀦 𑀑𑀢𑀭𑀢𑀻𑀢𑀺 𑀧𑀡𑀯𑀲𑀡𑁆𑀞𑀸𑀦𑀧𑀩𑁆𑀩𑀢𑀸𑀤𑀻𑀲𑀼 𑀳𑁂𑀝𑁆𑀞𑀸 𑀧𑀫𑀸𑀡𑀭𑀳𑀺𑀢𑀁 𑀞𑀸𑀦𑀁 𑀦 𑀑𑀢𑀭𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀦𑁂𑀢𑁆𑀣 𑀩𑀚𑁆𑀛𑀫𑀸𑀦𑀓𑁆𑀔𑀡𑁂 𑀉𑀤𑁆𑀥𑀫𑁆𑀧𑀺 𑀧𑀫𑀸𑀡𑀭𑀳𑀺𑀢𑀧𑀩𑁆𑀩𑀢𑀸𑀤𑀺 𑀦𑀸𑀭𑁄𑀳𑀢𑀺, 𑀢𑀣𑀸𑀧𑀺 𑀢𑀁 𑀧𑀘𑁆𑀙𑀸 𑀲𑀻𑀫𑀝𑁆𑀞𑀢𑀸𑀬 𑀲𑀻𑀫𑀸 𑀳𑁄𑀢𑀺. 𑀳𑁂𑀝𑁆𑀞𑀸 𑀧𑀡𑀯𑀲𑀡𑁆𑀞𑀸𑀦𑀸𑀤𑀺 𑀧𑀦 𑀉𑀧𑀭𑀺 𑀩𑀤𑁆𑀥𑀸𑀬𑀧𑀺 𑀲𑀻𑀫𑀸𑀬 𑀲𑀻𑀫𑀲𑀗𑁆𑀔𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀲𑁂𑀯 𑀯𑀲𑁂𑀦 ‘‘𑀦 𑀑𑀢𑀭𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀣𑀸 𑀑𑀭𑁄𑀳𑀡𑀸𑀭𑁄𑀳𑀡𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 ‘‘𑀦 𑀑𑀢𑀭𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀢𑁄. 𑀚𑀸𑀢𑀁 𑀬𑀁 𑀓𑀺𑀜𑁆𑀘𑀻𑀢𑀺 𑀦𑀺𑀝𑁆𑀞𑀺𑀢𑀲𑀻𑀫𑀸𑀬 𑀉𑀧𑀭𑀺 𑀚𑀸𑀢𑀁 𑀯𑀺𑀚𑁆𑀚𑀫𑀸𑀦𑀁 𑀧𑀼𑀩𑁆𑀩𑁂 𑀞𑀺𑀢𑀁 𑀧𑀘𑁆𑀙𑀸 𑀲𑀜𑁆𑀚𑀸𑀢𑀁 𑀧𑀯𑀺𑀝𑁆𑀞𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀁 𑀲𑀩𑁆𑀩𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀻𑀫𑀸𑀬 𑀳𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀸𑀤𑀺𑀲𑀯𑀺𑀜𑁆𑀜𑀸𑀡𑀓𑁂𑀲𑀼 𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀲𑀻𑀫𑀝𑁆𑀞𑁄𑀯 𑀳𑁄𑀢𑀺. 𑀩𑀤𑁆𑀥𑀸𑀬 𑀲𑀻𑀫𑀸𑀬𑀸𑀢𑀺 𑀇𑀤𑀜𑁆𑀘 𑀧𑀓𑀭𑀡𑀯𑀲𑁂𑀦 𑀉𑀧𑀮𑀓𑁆𑀔𑀡𑀢𑁄 𑀯𑀼𑀢𑁆𑀢𑀁. 𑀅𑀩𑀤𑁆𑀥𑀲𑀻𑀫𑀸𑀲𑀼𑀧𑀺 𑀲𑀩𑁆𑀩𑀸𑀲𑀼 𑀞𑀺𑀢𑀁 𑀢𑀁 𑀲𑀻𑀫𑀸𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀏𑀓𑀲𑀫𑁆𑀩𑀦𑁆𑀥𑁂𑀦 𑀕𑀢𑀦𑁆𑀢𑀺 𑀭𑀼𑀓𑁆𑀔𑀮𑀢𑀸𑀤𑀺𑀢𑀢𑁆𑀭𑀚𑀸𑀢𑀫𑁂𑀯𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀜𑁆𑀳𑀺 ‘‘𑀇𑀢𑁄 𑀕𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺.

𑀬𑀁 𑀧𑀦 ‘‘𑀇𑀢𑁄 𑀕𑀢’’𑀦𑁆𑀢𑀺 𑀯𑀸 ‘‘𑀢𑀢𑁄 𑀆𑀕𑀢’’𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀉𑀪𑁄𑀲𑀼 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀲𑀼 𑀉𑀤𑀓𑀼𑀓𑁆𑀔𑁂𑀧𑀦𑀤𑀻𑀆𑀤𑀻𑀲𑀼 𑀘 𑀢𑀺𑀭𑀺𑀬𑀁 𑀧𑀢𑀺𑀢𑀭𑀚𑁆𑀚𑀼𑀤𑀡𑁆𑀟𑀸𑀤𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀏𑀢𑁆𑀣 𑀧𑀦 ‘‘𑀩𑀤𑁆𑀥𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀕𑁄 𑀩𑀤𑁆𑀥𑀲𑀻𑀫𑀸, 𑀕𑀸𑀫𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑀪𑀸𑀕𑁄 𑀕𑀸𑀫𑀲𑀻𑀫𑀸 𑀢𑀤𑀼𑀪𑀬𑀲𑀻𑀫𑀝𑁆𑀞𑀧𑀩𑁆𑀩𑀢𑀸𑀤𑀺 𑀯𑀺𑀬, 𑀩𑀤𑁆𑀥𑀲𑀻𑀫𑀢𑁄 𑀉𑀝𑁆𑀞𑀺𑀢𑀯𑀝𑀭𑀼𑀓𑁆𑀔𑀲𑁆𑀲 𑀧𑀸𑀭𑁄𑀳𑁂, 𑀕𑀸𑀫𑀲𑀻𑀫𑀸𑀬 𑀕𑀸𑀫𑀲𑀻𑀫𑀢𑁄 𑀉𑀝𑁆𑀞𑀺𑀢𑀯𑀝𑀭𑀼𑀓𑁆𑀔𑀲𑁆𑀲 𑀧𑀸𑀭𑁄𑀳𑁂 𑀘 𑀩𑀤𑁆𑀥𑀲𑀻𑀫𑀸𑀬 𑀧𑀢𑀺𑀝𑁆𑀞𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀫𑀽𑀮𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 ‘𑀇𑀢𑁄 𑀕𑀢𑀁, 𑀢𑀢𑁄 𑀆𑀕𑀢’𑀦𑁆𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀲𑁄 𑀪𑀸𑀕𑁄 𑀬𑀣𑀸𑀧𑀯𑀺𑀝𑁆𑀞𑀲𑀻𑀫𑀝𑁆𑀞𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺. 𑀢𑁂𑀲𑀁 𑀭𑀼𑀓𑁆𑀔𑀧𑀸𑀭𑁄𑀳𑀸𑀦𑀁 𑀅𑀦𑁆𑀢𑀭𑀸 𑀧𑀦 𑀆𑀓𑀸𑀲𑀝𑁆𑀞𑀲𑀸𑀔𑀸 𑀪𑀽𑀫𑀺𑀬𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀧𑁆𑀧𑀫𑀸𑀡𑁂𑀦 𑀢𑀤𑀼𑀪𑀬𑀲𑀻𑀫𑀸 𑀳𑁄𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲𑀸 𑀲𑀸𑀔𑀸𑀬 𑀧𑀸𑀭𑁄𑀳𑁄 𑀧𑀯𑀺𑀝𑁆𑀞𑀲𑀻𑀫𑀸𑀬 𑀧𑀣𑀯𑀺𑀬𑀁 𑀫𑀽𑀮𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀬𑀸𑀯 𑀲𑀸𑀔𑀁 𑀯𑀺𑀦𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀯 𑀫𑀽𑀮𑀲𑀻𑀫𑀝𑁆𑀞𑀢𑀁 𑀦 𑀯𑀺𑀚𑀳𑀢𑀺. 𑀬𑀤𑀸 𑀧𑀦 𑀲𑀡𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀤𑀸𑀧𑀺 𑀧𑀸𑀭𑁄𑀳𑀫𑀢𑁆𑀢𑀫𑁂𑀯 𑀧𑀯𑀺𑀝𑁆𑀞𑀲𑀻𑀫𑀢𑀁 𑀲𑀫𑀼𑀧𑁂𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁄𑀧𑀺 𑀆𑀓𑀸𑀲𑀝𑁆𑀞𑀲𑀸𑀔𑀸𑀪𑀸𑀕𑁄 𑀧𑀼𑀭𑀺𑀫𑀲𑀻𑀫𑀝𑁆𑀞𑀢𑀁 𑀦 𑀯𑀺𑀚𑀳𑀢𑀺 𑀢𑀢𑁄 𑀆𑀕𑀢𑀪𑀸𑀕𑀲𑁆𑀲 𑀅𑀯𑀺𑀚𑀳𑀺𑀢𑀢𑁆𑀢𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀉𑀤𑀓𑀼𑀓𑁆𑀔𑁂𑀧𑀦𑀤𑀻𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀘 𑀯𑀺𑀲𑀪𑀸𑀕𑀲𑀻𑀫𑀸𑀬 𑀏𑀯 𑀧𑀯𑀺𑀝𑁆𑀞𑁂 𑀲𑀓𑀮𑀲𑀻𑀫𑀸𑀲𑁄𑀥𑀦𑀁, 𑀲𑀪𑀸𑀕𑀸𑀬 𑀧𑀯𑀺𑀝𑁆𑀞𑁂 𑀨𑀼𑀲𑀺𑀢𑁆𑀯𑀸 𑀞𑀺𑀢𑀫𑀢𑁆𑀢𑀪𑀺𑀓𑁆𑀔𑀼𑀲𑁄𑀥𑀦𑀜𑁆𑀘 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁬𑁪. 𑀏𑀢𑁆𑀣 𑀘 𑀦𑀤𑀻𑀧𑀸𑀭𑀲𑀻𑀫𑀸𑀓𑀣𑀸𑀬 𑀧𑀸𑀭𑀬𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀦𑀤𑀺𑀬𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀧𑀢𑀺𑀝𑁆𑀞𑀳𑀫𑀸𑀦𑀸 𑀲𑀻𑀫𑀸 𑀦𑀤𑀻𑀅𑀚𑁆𑀛𑁄𑀢𑁆𑀣𑀭𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀤𑀺𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦’’𑀦𑁆𑀢𑀺. 𑀅𑀦𑁆𑀢𑁄𑀦𑀤𑀺𑀬𑀜𑁆𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺. 𑀦𑀤𑀻𑀮𑀓𑁆𑀔𑀡𑁂 𑀧𑀦 𑀅𑀲𑀢𑀺 𑀑𑀢𑀭𑀢𑀺. 𑀲𑀸 𑀘 𑀢𑀤𑀸 𑀦𑀤𑀻𑀧𑀸𑀭𑀲𑀻𑀫𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀤𑀺𑀬𑀸 𑀮𑀓𑁆𑀔𑀡𑀁 𑀦𑀤𑀻𑀦𑀺𑀫𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀅𑀯𑀲𑁆𑀲𑀁 𑀮𑀩𑁆𑀪𑀦𑁂𑀬𑁆𑀬𑀸 𑀧𑀦 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀦𑀸𑀯𑀸𑀬𑀸𑀢𑀺 𑀇𑀫𑀺𑀦𑀸 𑀦𑀸𑀯𑀁 𑀯𑀺𑀦𑀸𑀧𑀺 𑀲𑀻𑀫𑀸 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸 𑀏𑀯 𑀳𑁄𑀢𑀺, 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑀢𑁆𑀣𑀸 𑀦𑀸𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀭𑀼𑀓𑁆𑀔𑀲𑀗𑁆𑀖𑀸𑀝𑀫𑀬𑁄𑀢𑀺 𑀅𑀦𑁂𑀓𑀭𑀼𑀓𑁆𑀔𑁂 𑀏𑀓𑀢𑁄 𑀖𑀝𑁂𑀢𑁆𑀯𑀸 𑀓𑀢𑀲𑁂𑀢𑀼. 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁄𑀢𑀺 𑀧𑀸𑀞𑀲𑁂𑀲𑁄. ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑁂 𑀓𑀢𑁆𑀯𑀸𑀢𑀺 𑀇𑀤𑀁 𑀉𑀪𑀺𑀦𑁆𑀦𑀁 𑀢𑀻𑀭𑀸𑀦𑀁 𑀏𑀓𑀕𑀸𑀫𑀔𑁂𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀩𑁆𑀩𑀢𑀲𑀡𑁆𑀞𑀸𑀦𑀸𑀢𑀺 𑀏𑀓𑀢𑁄 𑀉𑀕𑁆𑀕𑀢𑀤𑀻𑀧𑀲𑀺𑀔𑀭𑀢𑁆𑀢𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀁.

𑁧𑁬𑁫. 𑀲𑀻𑀫𑀸𑀲𑀫𑀽𑀳𑀦𑀓𑀣𑀸𑀬𑀁 𑀲𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄. 𑀤𑁆𑀯𑁂𑀧𑀻𑀢𑀺 𑀤𑁆𑀯𑁂 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑁄. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀫𑀳𑀸𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣𑁂𑀯 𑀬𑁂𑀪𑀼𑀬𑁆𑀬𑁂𑀦 𑀅𑀯𑀺𑀧𑁆𑀧𑀯𑀸𑀲𑀸𑀢𑀺. 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀻𑀢𑀺 𑀇𑀤𑀁 𑀫𑀳𑀸𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀢𑀲𑁆𑀲𑀸 𑀩𑀸𑀳𑀺𑀭𑀧𑀭𑀺𑀘𑁆𑀙𑁂𑀤𑀜𑁆𑀘 𑀅𑀚𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀅𑀚𑀸𑀦𑀦𑁆𑀢𑁂𑀳𑀺𑀧𑀺 𑀅𑀦𑁆𑀢𑁄𑀲𑀻𑀫𑀸𑀬 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬 𑀲𑀸 𑀲𑀻𑀫𑀸 𑀲𑀫𑀽𑀳𑀢𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀢𑀺 𑀔𑀡𑁆𑀟𑀲𑀻𑀫𑀸𑀭𑀳𑀺𑀢𑀝𑁆𑀞𑀸𑀦𑁂. 𑀇𑀤𑀜𑁆𑀘 𑀫𑀳𑀸𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀓𑀫𑁆𑀫𑀓𑀭𑀡𑀲𑀼𑀔𑀢𑁆𑀣𑀁 𑀔𑀡𑁆𑀟𑀲𑀻𑀫𑀸 𑀇𑀘𑁆𑀙𑀺𑀢𑀸𑀢𑀺 𑀢𑀁 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀩𑀳𑀼𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀦 𑀩𑀦𑁆𑀥𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀲𑀸 𑀩𑀤𑁆𑀥𑀸 𑀲𑀼𑀩𑀤𑁆𑀥𑀸 𑀏𑀯 𑀫𑀳𑀸𑀲𑀻𑀫𑀸 𑀯𑀺𑀬. 𑀧𑀝𑀺𑀩𑀦𑁆𑀥𑀺𑀢𑀼𑀁 𑀧𑀦 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯𑀸𑀢𑀺 𑀇𑀤𑀁 𑀔𑀡𑁆𑀟𑀲𑀻𑀫𑀸𑀬 𑀅𑀲𑀫𑀽𑀳𑀢𑀢𑁆𑀢𑀸, 𑀢𑀲𑁆𑀲𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀲𑁆𑀲 𑀅𑀚𑀸𑀦𑀦𑀢𑁄 𑀘 𑀫𑀳𑀸𑀲𑀻𑀫𑀸𑀩𑀦𑁆𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀸 𑀧𑀦 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯. 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸𑀢𑀺 𑀔𑀡𑁆𑀟𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑁂 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀡𑀲𑀫𑁆𑀪𑁂𑀤𑀁 𑀓𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀧𑀓𑁆𑀔𑁂𑀧𑀺 𑀲𑀫𑁆𑀪𑁂𑀤𑀲𑀗𑁆𑀓𑀸𑀬 𑀅𑀦𑀺𑀯𑀢𑁆𑀢𑀦𑁂𑀦 𑀲𑀫𑁆𑀪𑁂𑀤𑀲𑀗𑁆𑀓𑀁 𑀓𑀢𑁆𑀯𑀸. 𑀅𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀲𑀗𑁆𑀖𑀓𑀫𑁆𑀫𑀸𑀦𑀸𑀭𑀳𑀁 𑀓𑀭𑁂𑀬𑁆𑀬𑀼𑀁. 𑀧𑀼𑀩𑁆𑀩𑁂 𑀳𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸, 𑀇𑀤𑀸𑀦𑀺 𑀢𑀫𑁆𑀧𑀺 𑀯𑀺𑀦𑀸𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺 𑀔𑀡𑁆𑀟𑀲𑀻𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀉𑀪𑁄𑀧𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀉𑀪𑀺𑀦𑁆𑀦𑀁 𑀧𑀤𑁂𑀲𑀦𑀺𑀬𑀫𑀁 𑀯𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀅𑀜𑁆𑀜𑀢𑀭𑀸𑀬 𑀯𑀸 𑀯𑀺𑀚𑁆𑀚𑀫𑀸𑀦𑀢𑀁 𑀯𑀸 𑀅𑀯𑀺𑀚𑁆𑀚𑀫𑀸𑀦𑀢𑀁 𑀯𑀸 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀲𑀗𑁆𑀓𑀸 𑀏𑀯 𑀳𑁄𑀢𑀺. 𑀦𑁂𑀯 𑀲𑀫𑀽𑀳𑀦𑀺𑀢𑀼𑀁, 𑀦 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀇𑀤𑀁 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀢𑁆𑀯𑀸 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀧𑀺 𑀫𑀳𑀸𑀲𑀻𑀫𑀁 𑀧𑀝𑀺𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀘 𑀲𑀓𑁆𑀓𑀸…𑀧𑁂… 𑀓𑀫𑁆𑀫𑀯𑀸𑀘𑀸 𑀓𑀸𑀢𑀼𑀦𑁆𑀢𑀺 𑀇𑀤𑀁 𑀲𑀻𑀫𑀸𑀩𑀦𑁆𑀥𑀦𑀓𑀫𑁆𑀫𑀯𑀸𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀓𑁂𑀘𑀺 𑀧𑀦 ‘‘𑀈𑀤𑀺𑀲𑁂𑀲𑀼𑀧𑀺 𑀯𑀺𑀳𑀸𑀭𑁂𑀲𑀼 𑀙𑀧𑀜𑁆𑀘𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁂 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀦𑀺𑀭𑀦𑁆𑀢𑀭𑀁 𑀞𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀜𑁆𑀘 𑀲𑀫𑀽𑀳𑀦𑀦𑀯𑀲𑁂𑀦 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀓𑀢𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀔𑀡𑁆𑀟𑀲𑀻𑀫𑀸𑀬, 𑀫𑀳𑀸𑀲𑀻𑀫𑀸𑀬 𑀯𑀸 𑀞𑀺𑀢𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺 𑀅𑀯𑀲𑁆𑀲𑀁 𑀏𑀓𑀲𑁆𑀫𑀺𑀁 𑀫𑀜𑁆𑀘𑀝𑁆𑀞𑀸𑀦𑁂 𑀢𑀸𑀲𑀁 𑀫𑀚𑁆𑀛𑀕𑀢𑀸 𑀢𑁂 𑀪𑀺𑀓𑁆𑀔𑀽 𑀢𑀸 𑀲𑀫𑀽𑀳𑀦𑁂𑀬𑁆𑀬𑀼𑀁, 𑀢𑀢𑁄 𑀕𑀸𑀫𑀲𑀻𑀫𑀸 𑀏𑀯 𑀅𑀯𑀲𑀺𑀲𑁆𑀲𑁂𑀬𑁆𑀬. 𑀦 𑀳𑁂𑀢𑁆𑀣 𑀲𑀻𑀫𑀸𑀬, 𑀢𑀧𑁆𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀸 𑀚𑀸𑀦𑀦𑀁 𑀅𑀗𑁆𑀕𑀁. 𑀲𑀻𑀫𑀸𑀬 𑀧𑀦 𑀅𑀦𑁆𑀢𑁄𑀞𑀸𑀦𑀁 ‘𑀲𑀫𑀽𑀳𑀦𑀺𑀲𑁆𑀲𑀸𑀫𑀸’𑀢𑀺 𑀓𑀫𑁆𑀫𑀯𑀸𑀘𑀸𑀓𑀭𑀡𑀜𑁆𑀘𑁂𑀢𑁆𑀣 𑀅𑀗𑁆𑀕𑀁. 𑀅𑀝𑁆𑀞𑀓𑀣𑀸𑀬𑀁 ‘𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’𑀢𑀺 𑀏𑀯𑀁 𑀫𑀳𑀸𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀚𑀸𑀦𑀦𑁂𑀧𑀺 𑀲𑀫𑀽𑀳𑀦𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀕𑀸𑀫𑀲𑀻𑀫𑀸𑀬 𑀏𑀯 𑀘 𑀅𑀯𑀲𑀺𑀝𑁆𑀞𑀸𑀬 𑀢𑀢𑁆𑀣 𑀬𑀣𑀸𑀭𑀼𑀘𑀺 𑀤𑀼𑀯𑀺𑀥𑀫𑁆𑀧𑀺 𑀲𑀻𑀫𑀁 𑀩𑀦𑁆𑀥𑀺𑀢𑀼𑀜𑁆𑀘𑁂𑀯 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑀆𑀕𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁪) 𑀧𑀦 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦 𑀲𑀫𑀽𑀳𑀦𑁆𑀢𑀩𑁆𑀩𑀸𑀢𑀺 𑀫𑀳𑀸𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼 𑀞𑀢𑁆𑀯𑀸𑀢𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀦𑀁 𑀔𑀡𑁆𑀟𑀲𑀻𑀫𑀸𑀬 𑀅𑀦𑁄𑀓𑀸𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀜𑁆𑀳𑀺 𑀩𑀦𑁆𑀥𑀦𑁆𑀢𑀸 𑀢𑀸𑀤𑀺𑀲𑀁 𑀞𑀸𑀦𑀁 𑀧𑀳𑀸𑀬 𑀅𑀜𑁆𑀜𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀩𑀦𑁆𑀥𑀦𑁆𑀢𑀺. 𑀅𑀧𑁆𑀧𑁂𑀯 𑀦𑀸𑀫 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁𑀬𑁂𑀯 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀦 𑀔𑀡𑁆𑀟𑀲𑀻𑀫𑀁. 𑀧𑀝𑀺𑀩𑀦𑁆𑀥𑀺𑀢𑀼𑀁 𑀧𑀦 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯𑀸𑀢𑀺 𑀔𑀡𑁆𑀟𑀲𑀻𑀫𑀸𑀬𑀁 𑀅𑀜𑁆𑀜𑀸𑀢𑀢𑁆𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺 𑀔𑀡𑁆𑀟𑀲𑀻𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑁧𑁬𑁬. 𑀏𑀯𑀁 𑀩𑀤𑁆𑀥𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀩𑀤𑁆𑀥𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀩𑀤𑁆𑀥𑀲𑀻𑀫𑀸 𑀧𑀦𑀸’’𑀢𑀺 𑀆𑀳. 𑀲𑀸 𑀓𑀢𑀺𑀯𑀺𑀥𑀸𑀢𑀺 𑀆𑀳 ‘‘𑀕𑀸𑀫𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺 𑀢𑀺𑀯𑀺𑀥𑀸’’𑀢𑀺. 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁪𑁭) ‘‘𑀅𑀲𑀫𑁆𑀫𑀢𑀸𑀬, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬𑀸’’𑀢𑀺𑀆𑀤𑀺𑀦𑀸 𑀕𑀸𑀫𑀲𑀻𑀫𑀸 𑀏𑀯 𑀩𑀤𑁆𑀥𑀲𑀻𑀫𑀸𑀬 𑀔𑁂𑀢𑁆𑀢𑀁 𑀅𑀭𑀜𑁆𑀜𑀦𑀤𑀻𑀆𑀤𑀬𑁄 𑀯𑀺𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀸𑀤𑀻𑀦𑀁, 𑀲𑀸 𑀘 𑀕𑀸𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀬 𑀭𑀳𑀺𑀢𑀝𑁆𑀞𑀸𑀦𑁂 𑀲𑀬𑀫𑁂𑀯 𑀲𑀫𑀸𑀦𑀲𑀁𑀯𑀸𑀲𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸’’𑀢𑀺 𑀏𑀢𑁆𑀣 𑀕𑀸𑀫𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀔𑁂𑀢𑁆𑀢𑀯𑀢𑁆𑀣𑀼𑀅𑀭𑀜𑁆𑀜𑀧𑀩𑁆𑀩𑀢𑀸𑀤𑀺𑀓𑀁 𑀲𑀩𑁆𑀩𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀕𑀸𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀦𑁆𑀢𑀭𑀖𑀭𑀫𑁂𑀯, 𑀢𑀲𑁆𑀫𑀸 𑀢𑀲𑁆𑀲 𑀲𑀓𑀮𑀲𑁆𑀲 𑀕𑀸𑀫𑀓𑁆𑀔𑁂𑀢𑁆𑀢𑀲𑁆𑀲 𑀲𑀫𑁆𑀩𑀦𑁆𑀥𑀦𑀻𑀬𑀸 𑀕𑀸𑀫𑀲𑀻𑀫𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀬𑁄 𑀳𑀺 𑀲𑁄 𑀅𑀦𑁆𑀢𑀭𑀖𑀭𑀔𑁂𑀢𑁆𑀢𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀪𑀽𑀫𑀺𑀪𑀸𑀕𑁂𑀲𑀼 ‘‘𑀕𑀸𑀫𑁄’’𑀢𑀺 𑀏𑀓𑀢𑁆𑀢𑁂𑀦 𑀮𑁄𑀓𑀚𑀦𑁂𑀳𑀺 𑀧𑀜𑁆𑀜𑀢𑁆𑀢𑁄 𑀕𑀸𑀫𑀯𑁄𑀳𑀸𑀭𑁄, 𑀲𑁄𑀯 𑀇𑀥 ‘‘𑀕𑀸𑀫𑀲𑀻𑀫𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀸𑀫𑁄 𑀏𑀯 𑀳𑀺 𑀕𑀸𑀫𑀲𑀻𑀫𑀸. 𑀇𑀫𑀺𑀦𑀸𑀯 𑀦𑀬𑁂𑀦 𑀉𑀧𑀭𑀺 𑀅𑀭𑀜𑁆𑀜𑀁 𑀦𑀤𑀻 𑀲𑀫𑀼𑀤𑁆𑀤𑁄 𑀚𑀸𑀢𑀲𑁆𑀲𑀭𑁄𑀢𑀺, 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀪𑀽𑀫𑀺𑀧𑁆𑀧𑀤𑁂𑀲𑁂𑀲𑀼 𑀏𑀓𑀢𑁆𑀢𑁂𑀦 𑀮𑁄𑀓𑀚𑀦𑀧𑀜𑁆𑀜𑀢𑁆𑀢𑀸𑀦𑀫𑁂𑀯 𑀅𑀭𑀜𑁆𑀜𑀸𑀤𑀻𑀦𑀁 𑀅𑀭𑀜𑁆𑀜𑀲𑀻𑀫𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀮𑁄𑀓𑁂 𑀧𑀦 𑀕𑀸𑀫𑀲𑀻𑀫𑀸𑀤𑀺𑀯𑁄𑀳𑀸𑀭𑁄 𑀕𑀸𑀫𑀸𑀤𑀻𑀦𑀁 𑀫𑀭𑀺𑀬𑀸𑀤𑀸𑀬𑀫𑁂𑀯 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀕𑀸𑀫𑀓𑁆𑀔𑁂𑀢𑁆𑀢𑀸𑀤𑀻𑀲𑀼 𑀲𑀩𑁆𑀩𑀢𑁆𑀣. 𑀲𑀸𑀲𑀦𑁂 𑀧𑀦 𑀢𑁂 𑀕𑀸𑀫𑀸𑀤𑀬𑁄 𑀇𑀢𑀭𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀫𑀭𑀺𑀬𑀸𑀤𑀸𑀢𑀺 𑀓𑀢𑁆𑀯𑀸 𑀕𑀸𑀫𑁄 𑀏𑀯 𑀕𑀸𑀫𑀲𑀻𑀫𑀸, 𑀅𑀭𑀜𑁆𑀜𑀫𑁂𑀯 𑀅𑀭𑀜𑁆𑀜𑀲𑀻𑀫𑀸, 𑀲𑀫𑀼𑀤𑁆𑀤𑁄 𑀏𑀯 𑀲𑀫𑀼𑀤𑁆𑀤𑀲𑀻𑀫𑀸𑀢𑀺 𑀲𑀻𑀫𑀸𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀴𑀺𑀬𑀁 𑀦𑀺𑀕𑀫𑀲𑁆𑀲 𑀯𑀸𑀢𑀺 𑀇𑀤𑀁 𑀕𑀸𑀫𑀲𑀻𑀫𑀧𑁆𑀧𑀪𑁂𑀤𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑀕𑀭𑀫𑁆𑀧𑀺 𑀕𑀳𑀺𑀢𑀫𑁂𑀯𑀸’’𑀢𑀺.

𑀩𑀮𑀺𑀁 𑀮𑀪𑀦𑁆𑀢𑀻𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀬𑀁 𑀕𑀸𑀫𑁄 𑀏𑀢𑁆𑀢𑀓𑁄 𑀓𑀭𑀻𑀲𑀪𑀸𑀕𑁄’’𑀢𑀺𑀆𑀤𑀺𑀦𑀸 𑀧𑀦 𑀭𑀸𑀚𑀧𑀡𑁆𑀡𑁂𑀲𑀼 𑀆𑀭𑁄𑀧𑀺𑀢𑁂𑀲𑀼 𑀪𑀽𑀫𑀺𑀪𑀸𑀕𑁂𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀢𑀴𑀸𑀓𑀫𑀸𑀢𑀺𑀓𑀸𑀲𑀼𑀲𑀸𑀦𑀧𑀩𑁆𑀩𑀢𑀸𑀤𑀺𑀓𑁂 𑀧𑀤𑁂𑀲𑁂 𑀩𑀮𑀺𑀁 𑀦 𑀕𑀡𑁆𑀳𑀦𑁆𑀢𑀺, 𑀲𑁄𑀧𑀺 𑀕𑀸𑀫𑀲𑀻𑀫𑀸 𑀏𑀯. 𑀭𑀸𑀚𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀪𑀽𑀫𑀺𑀪𑀸𑀕𑁄 𑀳𑀺 𑀲𑀩𑁆𑀩𑁄𑀯 𑀞𑀧𑁂𑀢𑁆𑀯𑀸 𑀦𑀤𑀻𑀮𑁄𑀡𑀺𑀚𑀸𑀢𑀲𑁆𑀲𑀭𑁂 𑀕𑀸𑀫𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀻’’𑀢𑀺. 𑀲𑀘𑁂 𑀧𑀦 𑀢𑀢𑁆𑀣 𑀭𑀸𑀚𑀸 𑀓𑀜𑁆𑀘𑀺 𑀧𑀤𑁂𑀲𑀁 𑀕𑀸𑀫𑀦𑁆𑀢𑀭𑁂𑀦 𑀬𑁄𑀚𑁂𑀢𑀺, 𑀲𑁄 𑀧𑀯𑀺𑀝𑁆𑀞𑀕𑀸𑀫𑀲𑀻𑀫𑀢𑀁 𑀏𑀯 𑀪𑀚𑀢𑀺. 𑀦𑀤𑀻𑀚𑀸𑀢𑀲𑁆𑀲𑀭𑁂 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀸𑀤𑀺𑀪𑀸𑀯𑀁 𑀯𑀸 𑀧𑀽𑀭𑁂𑀢𑁆𑀯𑀸 𑀔𑁂𑀢𑁆𑀢𑀸𑀤𑀺𑀪𑀸𑀯𑀁 𑀯𑀸 𑀧𑀸𑀧𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑁂 𑀧𑀦 𑀕𑀸𑀫𑀸 𑀭𑀸𑀚𑀘𑁄𑀭𑀸𑀤𑀺𑀪𑀬𑀧𑀻𑀴𑀺𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀙𑀟𑁆𑀟𑀺𑀢𑀸 𑀘𑀺𑀭𑀫𑁆𑀧𑀺 𑀦𑀺𑀫𑁆𑀫𑀦𑀼𑀲𑁆𑀲𑀸 𑀢𑀺𑀝𑁆𑀞𑀦𑁆𑀢𑀺, 𑀲𑀫𑀦𑁆𑀢𑀸 𑀧𑀦 𑀕𑀸𑀫𑀸 𑀲𑀦𑁆𑀢𑀺, 𑀢𑁂𑀧𑀺 𑀧𑀸𑀝𑁂𑀓𑁆𑀓𑀁 𑀕𑀸𑀫𑀲𑀻𑀫𑀸𑀯. 𑀢𑁂𑀲𑀼 𑀳𑀺 𑀭𑀸𑀚𑀸𑀦𑁄 𑀲𑀫𑀦𑁆𑀢𑀕𑀸𑀫𑀯𑀸𑀲𑀻𑀳𑀺 𑀓𑀲𑀸𑀧𑁂𑀢𑁆𑀯𑀸 𑀯𑀸 𑀬𑁂𑀳𑀺 𑀓𑁂𑀳𑀺𑀘𑀺 𑀓𑀲𑀺𑀢𑀝𑁆𑀞𑀸𑀦𑀁 𑀮𑀺𑀔𑀺𑀢𑁆𑀯𑀸 𑀯𑀸 𑀩𑀮𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀜𑁆𑀜𑁂𑀦 𑀯𑀸 𑀕𑀸𑀫𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀦𑁆𑀢𑀺, 𑀬𑁂 𑀧𑀦 𑀕𑀸𑀫𑀸 𑀭𑀸𑀚𑀽𑀳𑀺𑀧𑀺 𑀧𑀭𑀺𑀘𑁆𑀘𑀢𑁆𑀢𑀸 𑀕𑀸𑀫𑀔𑁂𑀢𑁆𑀢𑀸𑀦𑀦𑁆𑀢𑀭𑀺𑀓𑀸 𑀫𑀳𑀸𑀅𑀭𑀜𑁆𑀜𑁂𑀦 𑀏𑀓𑀻𑀪𑀽𑀢𑀸, 𑀢𑁂 𑀅𑀕𑀸𑀫𑀓𑀸𑀭𑀜𑁆𑀜𑀲𑀻𑀫𑀢𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀼𑀭𑀺𑀫𑀸 𑀕𑀸𑀫𑀲𑀻𑀫𑀸 𑀯𑀺𑀦𑀲𑁆𑀲𑀢𑀺, 𑀭𑀸𑀚𑀸𑀦𑁄 𑀧𑀦 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀤𑀺𑀧𑀤𑁂𑀲𑁂 𑀫𑀳𑀦𑁆𑀢𑀁 𑀕𑀸𑀫𑀁 𑀓𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀸𑀦𑀺 𑀓𑀼𑀮𑀸𑀦𑀺 𑀯𑀸𑀲𑀸𑀧𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑀻𑀦𑀁 𑀪𑁄𑀕𑀕𑀸𑀫𑀸𑀢𑀺 𑀲𑀫𑀦𑁆𑀢𑀸 𑀪𑀽𑀢𑀕𑀸𑀫𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀧𑀼𑀭𑀸𑀡𑀦𑀸𑀫𑀁 𑀧𑀦 𑀧𑀭𑀺𑀘𑁆𑀙𑁂𑀤𑀜𑁆𑀘 𑀦 𑀯𑀺𑀦𑀸𑀲𑁂𑀦𑁆𑀢𑀺, 𑀢𑁂𑀧𑀺 𑀧𑀘𑁆𑀘𑁂𑀓𑀁 𑀕𑀸𑀫𑀲𑀻𑀫𑀸 𑀏𑀯, 𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀫𑀕𑀸𑀫𑀲𑀻𑀫𑀢𑀁 𑀦 𑀯𑀺𑀚𑀳𑀦𑁆𑀢𑀺. 𑀲𑀸 𑀘 𑀇𑀢𑀭𑀸 𑀘𑀸𑀢𑀺𑀆𑀤𑀺 ‘‘𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 𑀧𑀸𑀴𑀺𑀧𑀤𑀲𑁆𑀲 (𑀫𑀳𑀸𑀯. 𑁧𑁪𑁩) 𑀅𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀢𑀢𑁆𑀣 𑀳𑀺 𑀲𑀸 𑀘 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀸 𑀅𑀪𑀺𑀦𑀯𑀸, 𑀇𑀢𑀭𑀸 𑀘 𑀅𑀧𑀭𑀺𑀯𑀢𑁆𑀢𑀸 𑀧𑀓𑀢𑀺𑀕𑀸𑀫𑀲𑀻𑀫𑀸 𑀬𑀣𑀸 𑀩𑀤𑁆𑀥𑀲𑀻𑀫𑀸𑀬 𑀲𑀩𑁆𑀩𑀁 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑁂𑀢𑀸𑀧𑀺 𑀲𑀩𑁆𑀩𑀓𑀫𑁆𑀫𑀸𑀭𑀳𑀢𑀸𑀲𑀤𑀺𑀲𑁂𑀦 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀫𑀜𑁆𑀜𑀢𑁄 ‘‘𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑁂 𑀢𑀺𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑀲𑀻𑀫𑀁 𑀩𑀤𑁆𑀥𑀲𑀻𑀫𑀁 𑀏𑀯 𑀫𑀜𑁆𑀜𑀦𑁆𑀢𑀻𑀢𑀺 𑀢𑀁𑀲𑀤𑀺𑀲𑀢𑀸𑀦𑀺𑀯𑀢𑁆𑀢𑀦𑀫𑀼𑀔𑁂𑀦 𑀉𑀧𑀭𑀺𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀢𑀁𑀲𑀤𑀺𑀲𑀢𑀸𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀦𑀬𑀲𑁆𑀲 𑀇𑀥𑁂𑀯 𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂𑀢𑀺 𑀬𑀢𑁆𑀣 ‘‘𑀅𑀲𑀼𑀓𑀕𑀸𑀫𑀲𑁆𑀲 𑀇𑀤𑀁 𑀔𑁂𑀢𑁆𑀢’’𑀦𑁆𑀢𑀺 𑀕𑀸𑀫𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀬𑀢𑁆𑀣 𑀘 𑀦𑁂𑀯 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺, 𑀢𑀸𑀤𑀺𑀲𑁂 𑀅𑀭𑀜𑁆𑀜𑁂. 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑀸 𑀦𑀺𑀫𑁆𑀫𑀦𑀼𑀲𑁆𑀲𑀸𑀯𑀸𑀲𑀸 𑀲𑀫𑀼𑀤𑁆𑀤𑀦𑁆𑀢𑀭𑀤𑀻𑀧𑀓𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀁 𑀬𑀜𑁆𑀳𑀺 𑀅𑀕𑀸𑀫𑀓𑁆𑀔𑁂𑀢𑁆𑀢𑀪𑀽𑀢𑀁 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀯𑀺𑀭𑀳𑀺𑀢𑀧𑀤𑁂𑀲𑀁, 𑀢𑀁 𑀲𑀩𑁆𑀩𑀁 𑀅𑀭𑀜𑁆𑀜𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸 𑀘 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀯𑀺𑀦𑀸 𑀲𑀬𑀫𑁂𑀯 𑀲𑀫𑀸𑀦𑀲𑀁𑀯𑀸𑀲𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸, 𑀦𑀤𑀻𑀆𑀤𑀺𑀲𑀻𑀫𑀸𑀲𑀼 𑀯𑀺𑀬 𑀲𑀩𑁆𑀩𑀫𑁂𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀲𑀻𑀫𑀢𑀸 𑀲𑀺𑀤𑁆𑀥𑀸. 𑀅𑀭𑀜𑁆𑀜𑀲𑁆𑀲 𑀧𑀦 𑀲𑀻𑀫𑀢𑀸 𑀓𑀣𑀦𑁆𑀢𑀺? 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀼𑀚𑀸𑀦𑀦𑀲𑀼𑀢𑁆𑀢𑀸𑀤𑀺𑀲𑀸𑀫𑀢𑁆𑀣𑀺𑀬𑀢𑁄. 𑀬𑀣𑀸 𑀳𑀺 𑀕𑀸𑀫𑀲𑀻𑀫𑀸𑀬 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀩𑀳𑀽 𑀩𑀤𑁆𑀥𑀲𑀻𑀫𑀸𑀬𑁄 𑀅𑀦𑀼𑀜𑁆𑀜𑀸𑀢𑀸, 𑀢𑀸𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀪𑁂𑀤𑀢𑁆𑀣𑀁 𑀲𑀻𑀫𑀦𑁆𑀢𑀭𑀺𑀓𑀸 𑀅𑀦𑀼𑀜𑁆𑀜𑀸𑀢𑀸, 𑀏𑀯𑀫𑀺𑀥 𑀅𑀭𑀜𑁆𑀜𑁂𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸. 𑀢𑀸𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼 𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀢𑁄 𑀅𑀭𑀜𑁆𑀜𑀲𑁆𑀲𑀧𑀺 𑀲𑀪𑀸𑀯𑁂𑀦𑁂𑀯 𑀦𑀤𑀻𑀆𑀤𑀻𑀦𑀁 𑀯𑀺𑀬 𑀲𑀻𑀫𑀪𑀸𑀯𑁄 𑀢𑀢𑁆𑀣 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀫𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀯 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀻𑀫𑀸𑀬𑀫𑁂𑀯 𑀳𑀺 𑀞𑀺𑀢𑀸 𑀲𑀻𑀫𑀝𑁆𑀞𑀸𑀦𑀁 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀦 𑀅𑀲𑀻𑀫𑀸𑀬𑀁 𑀆𑀓𑀸𑀲𑁂 𑀞𑀺𑀢𑀸 𑀯𑀺𑀬 𑀆𑀓𑀸𑀲𑀝𑁆𑀞𑀸𑀦𑀁. 𑀏𑀯𑀫𑁂𑀯 𑀳𑀺 𑀲𑀸𑀫𑀢𑁆𑀣𑀺𑀬𑀁 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪𑁭) 𑀧𑀝𑀺𑀓𑁆𑀔𑀺𑀢𑁆𑀢𑀩𑀤𑁆𑀥𑀲𑀻𑀫𑀸𑀦𑀫𑁆𑀧𑀺 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀻𑀫𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀅𑀣𑀲𑁆𑀲 𑀞𑀺𑀢𑁄𑀓𑀸𑀲𑀢𑁄𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑁄𑀓𑀸𑀲𑀢𑁄. 𑀲𑀘𑁂𑀧𑀺 𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀞𑀺𑀢𑁄𑀓𑀸𑀲𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 𑀢𑀸𑀬 𑀲𑀳 𑀲𑀬𑀫𑁂𑀯 𑀉𑀧𑁆𑀧𑀦𑁆𑀦𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁆𑀣 𑀧𑀦 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂 𑀫𑀳𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺. 𑀓𑁂𑀯𑀮𑀸𑀭𑀜𑁆𑀜𑀲𑀻𑀫𑀸𑀬𑀫𑁂𑀯, 𑀢𑀢𑁆𑀣 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀤𑀻𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀓𑁆𑀔𑀢𑀺 𑀳𑀺 ‘‘𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺𑀆𑀤𑀺 (𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁬𑁭), 𑀇𑀫𑀺𑀦𑀸 𑀏𑀯 𑀘 𑀯𑀘𑀦𑁂𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀲𑀫𑀦𑁆𑀢𑀸 𑀅𑀩𑁆𑀪𑀦𑁆𑀢𑀭𑀁 𑀫𑀺𑀦𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀭𑀡𑁂𑀦𑁂𑀯 𑀲𑀻𑀫𑀸 𑀲𑀜𑁆𑀚𑀸𑀬𑀢𑀺, 𑀦 𑀲𑀬𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺 𑀅𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀓𑀭𑀡𑀧𑁆𑀧𑀓𑀸𑀭𑁂𑀦 𑀲𑀻𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀅𑀩𑀤𑁆𑀥𑀲𑀻𑀫𑀸𑀯 𑀦 𑀲𑀺𑀬𑀸 𑀪𑀺𑀓𑁆𑀔𑀽𑀦𑀁 𑀓𑀺𑀭𑀺𑀬𑀸𑀧𑀓𑀸𑀭𑀲𑀺𑀤𑁆𑀥𑀺𑀢𑁄. 𑀅𑀧𑀺𑀘 𑀯𑀟𑁆𑀠𑀓𑀺𑀳𑀢𑁆𑀣𑀸𑀦𑀁 𑀧𑀓𑀢𑀺𑀳𑀢𑁆𑀣𑀸𑀦𑀜𑁆𑀘 𑀮𑁄𑀓𑁂 𑀅𑀦𑁂𑀓𑀯𑀺𑀥𑀢𑁆𑀢𑀸, 𑀯𑀺𑀦𑀬𑁂 ‘‘𑀈𑀤𑀺𑀲𑀁 𑀳𑀢𑁆𑀣𑀧𑀫𑀸𑀡’’𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀬𑁂𑀦 𑀓𑁂𑀦𑀘𑀺 𑀫𑀺𑀦𑀺𑀢𑁂 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁂𑀦 𑀦𑀼 𑀔𑁄 𑀳𑀢𑁆𑀣𑁂𑀦 𑀫𑀺𑀦𑀺𑀢𑀁, 𑀦 𑀦𑀼 𑀔𑁄’’𑀢𑀺 𑀲𑀻𑀫𑀸𑀬 𑀯𑀺𑀧𑀢𑁆𑀢𑀺𑀲𑀗𑁆𑀓𑀸 𑀪𑀯𑁂𑀬𑁆𑀬, 𑀫𑀺𑀦𑀦𑁆𑀢𑁂𑀳𑀺 𑀘 𑀅𑀦𑀼𑀫𑀢𑁆𑀢𑀫𑁆𑀧𑀺 𑀊𑀦𑀫𑀥𑀺𑀓𑀫𑀓𑀢𑁆𑀯𑀸 𑀫𑀺𑀦𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸, 𑀧𑀭𑀺𑀲𑀯𑀲𑁂𑀦 𑀘𑀸𑀬𑀁 𑀯𑀟𑁆𑀠𑀫𑀸𑀦𑀸 𑀢𑁂𑀲𑀁 𑀫𑀺𑀦𑀦𑁂𑀦 𑀯𑀟𑁆𑀠𑀢𑀺, 𑀳𑀸𑀬𑀢𑀺 𑀯𑀸. 𑀲𑀗𑁆𑀖𑁂 𑀘 𑀓𑀫𑁆𑀫𑀁 𑀓𑀢𑁆𑀯𑀸 𑀕𑀢𑁂 𑀅𑀬𑀁 𑀪𑀺𑀓𑁆𑀔𑀽𑀦𑀁 𑀧𑀬𑁄𑀕𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 𑀲𑀻𑀫𑀸 𑀢𑁂𑀲𑀁 𑀧𑀬𑁄𑀕𑁂𑀦 𑀯𑀺𑀕𑀘𑁆𑀙𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀘, 𑀓𑀣𑀁 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀦 𑀢𑀺𑀝𑁆𑀞𑁂𑀬𑁆𑀬, 𑀞𑀺𑀢𑀺𑀬𑀸 𑀘 𑀧𑀼𑀭𑀸𑀡𑀯𑀺𑀳𑀸𑀭𑁂𑀲𑀼 𑀯𑀺𑀬 𑀲𑀓𑀮𑁂𑀧𑀺 𑀯𑀺𑀲𑀼𑀁 𑀅𑀭𑀜𑁆𑀜𑁂 𑀓𑀢𑀲𑀻𑀫𑀸 𑀲𑀫𑁆𑀪𑁂𑀤𑀲𑀗𑁆𑀓𑀸 𑀦 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀲𑀻𑀫𑀸𑀧𑁂𑀓𑁆𑀔𑀸𑀬 𑀏𑀯 𑀲𑀫𑀼𑀧𑁆𑀧𑀚𑁆𑀚𑀢𑀺, 𑀢𑀩𑁆𑀩𑀺𑀕𑀫𑁂𑀦 𑀯𑀺𑀕𑀘𑁆𑀙𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁆𑀧𑀺 𑀦𑀤𑀻𑀆𑀤𑀻𑀲𑀼𑀧𑀺.

𑀢𑀢𑁆𑀣𑀸𑀧𑀺 𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀦𑀁, 𑀉𑀪𑀬𑀢𑁆𑀣𑀧𑀺 𑀘 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑁆𑀲, 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀯𑀸 𑀑𑀓𑀸𑀲𑁄 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀓𑀣𑀁 𑀫𑀺𑀦𑀦𑀁, 𑀔𑀺𑀧𑀦𑀁 𑀯𑀸 𑀪𑀯𑁂𑀬𑁆𑀬, 𑀕𑀸𑀫𑀓𑁆𑀔𑁂𑀢𑁆𑀢𑀸𑀤𑀻𑀲𑀼 𑀧𑀯𑀺𑀲𑀦𑀢𑁄 𑀅𑀔𑁂𑀢𑁆𑀢𑁂 𑀲𑀻𑀫𑀸 𑀧𑀯𑀺𑀝𑁆𑀞𑀸 𑀓𑀺𑀦𑁆𑀦𑀸𑀫 𑀲𑀻𑀫𑀸 𑀦 𑀯𑀺𑀧𑀚𑁆𑀚𑁂𑀬𑁆𑀬. 𑀅𑀧𑁂𑀓𑁆𑀔𑀸𑀬 𑀲𑀻𑀫𑀼𑀧𑁆𑀧𑀢𑁆𑀢𑀺𑀬𑀁 𑀧𑀦 𑀬𑀢𑁄 𑀧𑀳𑁄𑀢𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀭𑀺𑀧𑀼𑀡𑁆𑀡𑀸 𑀚𑀸𑀬𑀦𑁆𑀢𑀺. 𑀬𑀢𑁄 𑀧𑀦 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀅𑀢𑁆𑀢𑀦𑁄 𑀔𑁂𑀢𑁆𑀢𑀧𑁆𑀧𑀫𑀸𑀡𑁂𑀦𑁂𑀯 𑀚𑀸𑀬𑀦𑁆𑀢𑀺, 𑀦 𑀩𑀳𑀺. 𑀬𑀁 𑀧𑀦𑁂𑀢𑁆𑀣 𑀅𑀩𑁆𑀪𑀦𑁆𑀢𑀭𑀫𑀺𑀦𑀦𑀧𑁆𑀧𑀫𑀸𑀡𑀲𑁆𑀲 𑀯𑀸𑀮𑀼𑀓𑀸𑀤𑀺𑀔𑀺𑀧𑀦𑀓𑀫𑁆𑀫𑀲𑁆𑀲 𑀘 𑀤𑀲𑁆𑀲𑀦𑀁, 𑀢𑀁 𑀲𑀬𑀁𑀚𑀸𑀢𑀲𑀻𑀫𑀸𑀦𑀁 𑀞𑀺𑀢𑀝𑁆𑀞𑀸𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀁 𑀓𑀢𑀁 𑀕𑀸𑀫𑀽𑀧𑀘𑀸𑀭𑀖𑀭𑀽𑀧𑀘𑀸𑀭𑀚𑀸𑀦𑀦𑀢𑁆𑀣𑀁 𑀮𑁂𑀟𑁆𑀟𑀼𑀲𑀼𑀧𑁆𑀧𑀸𑀤𑀺𑀔𑀺𑀧𑀦𑀯𑀺𑀥𑀸𑀦𑀤𑀲𑁆𑀲𑀦𑀁 𑀯𑀺𑀬. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑀢𑁂𑀧𑀺 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲 𑀬𑀸𑀣𑀸𑀯𑀢𑁄 𑀜𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑁂𑀦 𑀧𑀼𑀣𑀼𑀮𑀢𑁄 𑀜𑀢𑁆𑀯𑀸 𑀅𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑁂𑀳𑀺 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀸𑀢𑀩𑁆𑀩𑀁, 𑀅𑀜𑁆𑀜𑀁 𑀩𑀳𑀺 𑀓𑀭𑁄𑀦𑁆𑀢𑁂𑀳𑀺 𑀅𑀢𑀺𑀤𑀽𑀭𑁂 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀧𑁂𑀲𑁂𑀢𑀩𑁆𑀩𑀁.

𑀅𑀧𑀭𑁂 𑀧𑀦 ‘‘𑀲𑀻𑀫𑀸𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀕𑁆𑀕𑀕𑀫𑀦𑀦𑀳𑀸𑀦𑀸𑀤𑀺𑀅𑀢𑁆𑀣𑁂𑀳𑀺 𑀏𑀓𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀅𑀭𑀜𑁆𑀜𑁂 𑀯𑀸 𑀦𑀤𑀻𑀆𑀤𑀻𑀲𑀼 𑀯𑀸 𑀧𑀯𑀺𑀝𑁆𑀞𑁂 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀪𑀸 𑀯𑀺𑀬 𑀧𑀤𑀻𑀧𑀲𑁆𑀲 𑀲𑀫𑀼𑀧𑁆𑀧𑀚𑁆𑀚𑀢𑀺. 𑀕𑀸𑀫𑀓𑁆𑀔𑁂𑀢𑁆𑀢𑀸𑀤𑀻𑀲𑀼 𑀢𑀲𑁆𑀫𑀺𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀯𑀺𑀕𑀘𑁆𑀙𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑀻𑀫𑀸𑀤𑁆𑀯𑀬𑀲𑁆𑀲 𑀅𑀦𑁆𑀢𑀭𑀸 𑀲𑀻𑀫𑀦𑁆𑀢𑀭𑀺𑀓𑀁 𑀅𑀜𑁆𑀜𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀉𑀤𑀓𑀼𑀓𑁆𑀔𑁂𑀧𑀜𑁆𑀘 𑀞𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀁. 𑀲𑀻𑀫𑀸𑀧𑀭𑀺𑀬𑀦𑁆𑀢𑁂 𑀳𑀺 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀧𑁂𑀲𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑀦𑁆𑀢𑀸 𑀲𑀜𑁆𑀚𑀸𑀢𑀸 𑀲𑀻𑀫𑀸 𑀇𑀢𑀭𑁂𑀲𑀁 𑀲𑀻𑀫𑀸𑀬 𑀨𑀼𑀲𑀺𑀢𑁆𑀯𑀸 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀭𑁂𑀬𑁆𑀬, 𑀲𑁄 𑀫𑀸 𑀳𑁄𑀢𑀽𑀢𑀺 𑀯𑀸, 𑀇𑀢𑀭𑀣𑀸 𑀳𑀢𑁆𑀣𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸𑀬𑀧𑁂𑀢𑁆𑀣 𑀲𑀻𑀫𑀦𑁆𑀢𑀭𑀺𑀓𑀸𑀬 𑀅𑀦𑀼𑀚𑀸𑀦𑀺𑀢𑀩𑁆𑀩𑀢𑁄. 𑀅𑀧𑀺𑀘 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀲𑁆𑀲 𑀉𑀪𑀬𑀢𑁆𑀣 𑀓𑀫𑁆𑀫𑀓𑁄𑀧𑀯𑀘𑀦𑀢𑁄𑀧𑀺 𑀘𑁂𑀢𑀁 𑀲𑀺𑀚𑁆𑀛𑀢𑀺 𑀢𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁂𑀯 𑀲𑀜𑁆𑀚𑀸𑀢𑀸𑀬 𑀲𑀻𑀫𑀸𑀬 𑀉𑀪𑀺𑀦𑁆𑀦𑀫𑁆𑀧𑀺 𑀲𑀻𑀫𑀸𑀦𑀁, 𑀏𑀓𑀸𑀬 𑀏𑀯 𑀯𑀸 𑀲𑀗𑁆𑀓𑀭𑀢𑁄. 𑀇𑀢𑀭𑀣𑀸 𑀢𑀲𑁆𑀲 𑀓𑀫𑁆𑀫𑀓𑁄𑀧𑀯𑀘𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀻’𑀢𑀺. 𑀓𑀺𑀜𑁆𑀘 𑀅𑀕𑀸𑀫𑀓𑀸𑀭𑀜𑁆𑀜𑁂 𑀞𑀺𑀢𑀲𑁆𑀲 𑀓𑀫𑁆𑀫𑀓𑀭𑀡𑀺𑀘𑁆𑀙𑀸𑀯𑀺𑀭𑀳𑀺𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀩𑁆𑀪𑁄𑀓𑀸𑀲𑁂 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄, 𑀲𑁄 𑀘 𑀧𑀭𑀺𑀘𑁆𑀙𑁂𑀤𑁄 𑀲𑀻𑀫𑀸, 𑀏𑀯𑀁 𑀅𑀧𑁂𑀓𑁆𑀔𑀁 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑀸. 𑀢𑁂𑀦𑁂𑀯𑁂𑀢𑁆𑀣 ‘𑀅𑀬𑀁 𑀲𑀻𑀫𑀸 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀫𑁆𑀧𑀺 𑀮𑀪𑀢𑀻’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀫𑁆𑀫𑀓𑀭𑀡𑀺𑀘𑁆𑀙𑀁 𑀯𑀺𑀦𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑀼𑀧𑁆𑀧𑀢𑁆𑀢𑀺 𑀕𑀳𑁂𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀢𑁆𑀢𑀁 𑀧𑀤𑀻𑀧𑀧𑀪𑀸 𑀯𑀺𑀬 𑀲𑀩𑁆𑀩𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀁 𑀲𑀻𑀫𑀸𑀲𑀫𑁆𑀪𑀯𑁂𑀦 𑀲𑀗𑁆𑀖𑁂, 𑀕𑀡𑁂 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀢𑀢𑁆𑀣 𑀞𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑀦𑁆𑀢𑀸 𑀧𑀘𑁆𑀘𑁂𑀓𑀁 𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑁂𑀓𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀓𑀭𑀤𑁄𑀲𑀧𑁆𑀧𑀲𑀗𑁆𑀕𑀢𑁄. 𑀧𑀭𑀺𑀲𑀯𑀲𑁂𑀦 𑀘𑀲𑁆𑀲𑀸 𑀯𑀟𑁆𑀠𑀺 𑀳𑀸𑀦𑀺 𑀘 𑀲𑀫𑁆𑀪𑀯𑀢𑀺, 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀅𑀪𑀺𑀦𑀯𑀲𑀻𑀫𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀏𑀯, 𑀕𑀢𑀸𑀦𑀁 𑀲𑀫𑀦𑁆𑀢𑀸 𑀞𑀺𑀢𑀲𑀻𑀫𑀸𑀯𑀺𑀦𑀸𑀲𑁄 𑀘 𑀪𑀯𑁂𑀬𑁆𑀬.

𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁪𑁭) 𑀧𑀦 ‘‘𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸’’𑀢𑀺𑀆𑀤𑀺𑀦𑀸 𑀏𑀓𑀸 𑀏𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀉𑀤𑀓𑀼𑀓𑁆𑀔𑁂𑀧𑀸 𑀘 𑀅𑀦𑀼𑀜𑁆𑀜𑀸𑀢𑀸, 𑀦 𑀘𑁂𑀲𑀸 𑀲𑀻𑀫𑀸 𑀲𑀪𑀸𑀯𑁂𑀦, 𑀓𑀸𑀭𑀡𑀲𑀸𑀫𑀢𑁆𑀣𑀺𑀬𑁂𑀦 𑀯𑀸 𑀧𑀪𑀸 𑀯𑀺𑀬 𑀧𑀤𑀻𑀧𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀦𑁆𑀢𑀼 𑀪𑀕𑀯𑀢𑁄 𑀅𑀦𑀼𑀚𑀸𑀦𑀦𑁂𑀦𑁂𑀯. 𑀪𑀕𑀯𑀸 𑀘 𑀇𑀫𑀸 𑀅𑀦𑀼𑀚𑀸𑀦𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑁂𑀦 𑀓𑀫𑁆𑀫𑀓𑀭𑀡𑀲𑀼𑀔𑀢𑁆𑀣𑀫𑁂𑀯 𑀅𑀦𑀼𑀜𑁆𑀜𑀸𑀲𑀻𑀢𑀺 𑀓𑀣𑀁 𑀦𑀳𑀸𑀦𑀸𑀤𑀺𑀓𑀺𑀘𑁆𑀘𑁂𑀦 𑀧𑀯𑀺𑀝𑁆𑀞𑀸𑀦𑀫𑁆𑀧𑀺 𑀲𑀫𑀦𑁆𑀢𑀸 𑀢𑀸𑀲𑀁 𑀲𑀻𑀫𑀸𑀦𑀁 𑀲𑀫𑀼𑀧𑁆𑀧𑀢𑁆𑀢𑀺 𑀧𑀬𑁄𑀚𑀦𑀸𑀪𑀸𑀯𑀸, 𑀧𑀬𑁄𑀚𑀦𑁂 𑀘 𑀏𑀓𑀁 𑀏𑀯 𑀧𑀬𑁄𑀚𑀦𑀦𑁆𑀢𑀺 𑀓𑀣𑀁 𑀧𑀘𑁆𑀘𑁂𑀓𑀁 𑀪𑀺𑀓𑁆𑀔𑀼𑀕𑀡𑀦𑀸𑀬 𑀅𑀦𑁂𑀓𑀲𑀻𑀫𑀸𑀲𑀫𑀼𑀧𑁆𑀧𑀢𑁆𑀢𑀺. ‘‘𑀏𑀓𑀲𑀻𑀫𑀸𑀬 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀳𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀅𑀦𑁆𑀢𑀭𑀸 𑀢𑀢𑁆𑀢𑀓𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀲𑀻𑀫𑀦𑁆𑀢𑀭𑀺𑀓𑀸𑀞𑀧𑀦𑀯𑀘𑀦𑀁, 𑀢𑀢𑁆𑀣 𑀞𑀺𑀢𑀸𑀦𑀁 𑀓𑀫𑁆𑀫𑀓𑁄𑀧𑀯𑀘𑀦𑀜𑁆𑀘, 𑀢𑀫𑁆𑀧𑀺 𑀇𑀫𑀸𑀲𑀁 𑀲𑀻𑀫𑀸𑀦𑀁 𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑁄𑀥𑀢𑀸𑀬 𑀲𑀻𑀫𑀸𑀬 𑀲𑀫𑁆𑀪𑁂𑀤𑀲𑀗𑁆𑀓𑀁 𑀓𑀫𑁆𑀫𑀓𑁄𑀧𑀲𑀗𑁆𑀓𑀜𑁆𑀘 𑀤𑀽𑀭𑀢𑁄 𑀧𑀭𑀺𑀳𑀭𑀺𑀢𑀼𑀁 𑀯𑀼𑀢𑁆𑀢𑀁.

𑀬𑁄 𑀘 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀢𑁆𑀣𑀁 𑀪𑀕𑀯𑀢𑀸 𑀅𑀩𑁆𑀪𑁄𑀓𑀸𑀲𑁂 𑀤𑀲𑁆𑀲𑀺𑀢𑁄 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁄, 𑀲𑁄 𑀲𑀻𑀫𑀸 𑀏𑀯 𑀦 𑀳𑁄𑀢𑀺, 𑀔𑁂𑀢𑁆𑀢𑀢𑀴𑀸𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀯𑀺𑀬 𑀅𑀬𑀫𑁂𑀢𑁆𑀣 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄𑀯. 𑀢𑀢𑁆𑀣 𑀘 𑀩𑀳𑀽𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀢𑁄 𑀞𑀺𑀢𑁂𑀲𑀼 𑀢𑁂𑀲𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀏𑀯 𑀘𑀻𑀯𑀭𑀁 𑀞𑀧𑁂𑀢𑀩𑁆𑀩𑀁, 𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄. 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀩𑁆𑀪𑀦𑁆𑀢𑀭𑁂 𑀕𑀬𑁆𑀳𑀫𑀸𑀦𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀬𑁄𑀲𑀸𑀦𑁂 𑀞𑀧𑀺𑀢𑀘𑀻𑀯𑀭𑀁 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀩𑀳𑀺 𑀳𑁄𑀢𑀻𑀢𑀺 𑀢𑀁 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸. 𑀲𑀻𑀫𑀸 𑀧𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄𑀯 𑀕𑀳𑁂𑀢𑀩𑁆𑀩𑀸. 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑁄𑀧𑁂𑀢𑁆𑀣 𑀅𑀚𑁆𑀛𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑁄, 𑀦 𑀧𑀦 𑀬𑀸𑀯 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀫𑀳𑀸𑀲𑀻𑀫𑀸𑀬 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀯𑁄𑀳𑀸𑀭𑁄 𑀯𑀺𑀬. 𑀫𑀳𑀸𑀲𑀻𑀫𑀸𑀬𑀫𑁆𑀧𑀺 𑀳𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀇𑀥𑀸𑀧𑀺 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀻𑀫𑀸𑀧𑀭𑀺𑀬𑀦𑁆𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑀻𑀫𑀸𑀧𑁂𑀓𑁆𑀔𑀸𑀯𑀲𑁂𑀦𑁂𑀯 𑀢𑀸𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀢𑀩𑁆𑀩𑀺𑀕𑀫𑁂𑀦 𑀯𑀺𑀦𑀸𑀲𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑁄 𑀯𑀸 𑀧𑀓𑀸𑀭𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀕𑀯𑁂𑀲𑀺𑀢𑀩𑁆𑀩𑁄.

𑀇𑀥 𑀧𑀦 ‘‘𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’’𑀢𑀺 𑀏𑀯𑀁 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁪𑁭), ‘‘𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀜𑁆𑀘 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀭𑀼𑀓𑁆𑀔𑀸𑀤𑀺𑀦𑀺𑀭𑀦𑁆𑀢𑀭𑁂𑀧𑀺 𑀅𑀭𑀜𑁆𑀜𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀯𑀺𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀬 𑀅𑀭𑀜𑁆𑀜𑀲𑀻𑀫𑀸𑀬 𑀲𑀳 𑀏𑀢𑀺𑀲𑁆𑀲𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀤𑁄𑀲𑀸𑀪𑀸𑀯𑁄, 𑀧𑀕𑁂𑀯 𑀅𑀕𑀸𑀫𑀓𑁂 𑀭𑀼𑀓𑁆𑀔𑁂𑀢𑀺 𑀦𑀺𑀲𑁆𑀲𑀺𑀢𑁂𑀧𑀺 𑀧𑀤𑁂𑀲𑁂 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑁆𑀲 𑀭𑀼𑀓𑁆𑀔𑀧𑀭𑀺𑀳𑀸𑀭𑀁 𑀯𑀺𑀦𑀸𑀯 𑀅𑀚𑁆𑀛𑁄𑀓𑀸𑀲𑀧𑀭𑀺𑀳𑀸𑀭𑁄 𑀘 𑀅𑀦𑀼𑀫𑀢𑁄𑀢𑀺 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀘𑀸𑀭𑀢𑁆𑀣𑀸𑀬𑀸𑀢𑀺 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬. 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺, 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀺 𑀏𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁆𑀢𑀸. 𑀢𑀲𑁆𑀫𑀸 𑀲𑀗𑁆𑀖𑀁 𑀯𑀺𑀦𑀸 𑀏𑀓𑁂𑀦𑀧𑀺 𑀪𑀺𑀓𑁆𑀔𑀼𑀦𑀸 𑀩𑀳𑀺 𑀢𑀺𑀝𑁆𑀞𑀦𑁆𑀢𑁂𑀦 𑀅𑀜𑁆𑀜𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀽𑀭𑁂 𑀏𑀯 𑀞𑀸𑀢𑀩𑁆𑀩𑀁. 𑀇𑀢𑀭𑀣𑀸 𑀓𑀫𑁆𑀫𑀓𑁄𑀧𑀲𑀗𑁆𑀓𑀭𑀢𑁄. 𑀉𑀤𑀓𑀼𑀓𑁆𑀔𑁂𑀧𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 (𑀯𑀺. 𑀲𑀗𑁆𑀕.𑀅𑀝𑁆𑀞. 𑁧𑁬𑁭). 𑀇𑀤𑀜𑁆𑀘𑁂𑀢𑁆𑀣 𑀲𑀻𑀫𑀦𑁆𑀢𑀭𑀺𑀓𑀸𑀯𑀺𑀥𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸𑀦𑀼𑀚𑀸𑀦𑀦𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀪𑀕𑀯𑀢𑀸 𑀦𑀺𑀤𑀸𑀦𑀯𑀲𑁂𑀦 𑀏𑀓𑀕𑀸𑀫𑀦𑀺𑀲𑁆𑀲𑀺𑀢𑀸𑀦𑀁 𑀏𑀓𑀲𑀪𑀸𑀕𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀅𑀚𑁆𑀛𑁄𑀢𑁆𑀣𑀭𑀡𑀤𑁄𑀲𑀧𑀭𑀺𑀳𑀸𑀭𑀸𑀬 𑀲𑀻𑀫𑀦𑁆𑀢𑀭𑀺𑀓𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀣𑀸𑀧𑀺 𑀢𑀤𑀦𑀼𑀮𑁄𑀫𑀢𑁄 𑀏𑀓𑀁 𑀅𑀭𑀜𑁆𑀜𑀲𑀻𑀫𑀁 𑀦𑀤𑀻𑀆𑀤𑀺𑀲𑀻𑀫𑀜𑁆𑀘 𑀦𑀺𑀲𑁆𑀲𑀺𑀢𑀸𑀦𑀁 𑀏𑀓𑀲𑀪𑀸𑀕𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀫𑁆𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁, 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀅𑀩𑁆𑀬𑀯𑀥𑀸𑀦𑁂𑀦 𑀞𑀸𑀦𑀜𑁆𑀘 𑀪𑀕𑀯𑀢𑀸 𑀅𑀦𑀪𑀺𑀫𑀢𑀫𑁂𑀯𑀸𑀢𑀺 𑀜𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀇𑀥𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸𑀯𑀺𑀥𑀸𑀦𑀫𑀓𑀁𑀲𑀼. 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁆𑀧𑀺 𑀳𑀺 𑀏𑀓𑀲𑀻𑀫𑀸𑀦𑀺𑀲𑁆𑀲𑀺𑀢𑀢𑁆𑀢𑀁 𑀏𑀓𑀲𑀪𑀸𑀕𑀢𑁆𑀢𑀜𑁆𑀘𑀸𑀢𑀺 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀫𑁂 𑀲𑀢𑀺 𑀏𑀯 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀞𑀸𑀦𑀁 𑀲𑀫𑁆𑀪𑁂𑀤𑀸𑀬 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀘𑁂𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀬𑀫𑁆𑀧𑀺 𑀦𑀬𑀢𑁄 𑀤𑀲𑁆𑀲𑀺𑀢𑁄𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑁧𑁬𑁭. 𑀲𑀪𑀸𑀯𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀕𑀸𑀫𑀲𑀻𑀫𑀸 𑀯𑀺𑀬 𑀅𑀩𑀤𑁆𑀥𑀲𑀻𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀫𑁂𑀢𑁆𑀣 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦 𑀓𑁂𑀦𑀘𑀻𑀢𑀺 𑀅𑀦𑁆𑀢𑀫𑀲𑁄 𑀲𑀽𑀓𑀭𑀸𑀤𑀺𑀦𑀸 𑀲𑀢𑁆𑀢𑁂𑀦. 𑀫𑀳𑁄𑀖𑁂𑀦 𑀧𑀦 𑀉𑀡𑁆𑀡𑀢𑀝𑁆𑀞𑀸𑀦𑀢𑁄 𑀦𑀺𑀦𑁆𑀦𑀝𑁆𑀞𑀸𑀦𑁂 𑀧𑀢𑀦𑁆𑀢𑁂𑀦 𑀔𑀢𑁄 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀮𑀓𑁆𑀔𑀡𑀬𑀼𑀢𑁆𑀢𑁄 ‘‘𑀚𑀸𑀢𑀲𑁆𑀲𑀭𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀢𑁆𑀣𑀧𑀺 𑀔𑀼𑀤𑁆𑀤𑀓𑁂 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸. 𑀧𑀼𑀦 𑀢𑀢𑁆𑀣𑀸𑀢𑀺 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀻𑀲𑀼 𑀏𑀯 𑀢𑀸𑀲𑀼 𑀦𑀤𑀻𑀆𑀤𑀻𑀲𑀼 𑀢𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀼 𑀧𑀼𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑀸𑀬 𑀅𑀩𑀤𑁆𑀥𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁪𑁭) ‘‘𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀻𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁄, 𑀉𑀤𑀓𑀲𑁆𑀲 𑀧𑀢𑀦𑁄𑀓𑀸𑀲𑁄, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀸, 𑀅𑀬𑀜𑁆𑀳𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀢𑁆𑀣𑁄 𑁋 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀬𑀸𑀯 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑁄 𑀉𑀤𑀓𑀲𑁆𑀲 𑀧𑀢𑀦𑀝𑁆𑀞𑀸𑀦𑀁, 𑀢𑀸𑀯 𑀬𑀁 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀝𑁆𑀞𑀸𑀦𑀁, 𑀅𑀬𑀁 𑀢𑀢𑁆𑀣 𑀦𑀤𑀻𑀆𑀤𑀻𑀲𑀼 𑀅𑀧𑀭𑀸 𑀲𑀫𑀸𑀦𑀲𑀁𑀯𑀸𑀲𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺.

𑀢𑀲𑁆𑀲 𑀅𑀦𑁆𑀢𑁄𑀢𑀺 𑀢𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀞𑀸𑀦𑀲𑁆𑀲 𑀅𑀦𑁆𑀢𑁄. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯 𑀅𑀦𑁆𑀢𑁄, 𑀢𑀢𑁄 𑀩𑀳𑀺𑀧𑀺, ‘‘𑀏𑀓𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀞𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁄 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁭) ‘‘𑀢𑀲𑁆𑀲 𑀅𑀦𑁆𑀢𑁄𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻’’𑀢𑀺 𑀯𑀢𑁆𑀯𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺 𑀩𑀳𑀼 𑀧𑀧𑀜𑁆𑀘𑀺𑀢𑀁, 𑀢𑀁 𑀦 𑀲𑀼𑀦𑁆𑀤𑀭𑀁 𑀇𑀥 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀲𑁆𑀲 𑀦𑀬𑀢𑁄 𑀲𑀁𑀲𑀦𑁆𑀤𑀦𑀢𑁄 𑀲𑀗𑁆𑀖𑀝𑀦𑀢𑁄. 𑀢𑀣𑀸 𑀳𑀺 𑀤𑁆𑀯𑀺𑀦𑁆𑀦𑀁 𑀉𑀤𑀓𑀼𑀓𑁆𑀔𑁂𑀧𑀧𑀅𑀘𑁆𑀙𑁂𑀤𑀸𑀦𑀫𑀦𑁆𑀢𑀭𑀸 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀲𑀻𑀫𑀦𑁆𑀢𑀭𑀺𑀓𑀁 𑀅𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀧𑁂𑀢𑀩𑁆𑀩𑁄, ‘‘𑀢𑀢𑁄 𑀅𑀥𑀺𑀓𑀁 𑀯𑀝𑁆𑀝𑀢𑀺 𑀏𑀯, 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀏𑀯𑀁 𑀇𑀥𑁂𑀯 𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀻𑀫𑀦𑁆𑀢𑀭𑀺𑀓𑁄𑀧𑀘𑀸𑀭𑁂 𑀉𑀤𑀓𑀼𑀓𑁆𑀔𑁂𑀧𑀢𑁄 𑀊𑀦𑀓𑁂 𑀞𑀧𑀺𑀢𑁂 𑀲𑀻𑀫𑀸𑀬 𑀲𑀻𑀫𑀸𑀲𑀫𑁆𑀪𑁂𑀤𑀢𑁄 𑀓𑀫𑁆𑀫𑀓𑁄𑀧𑁄𑀧𑀺 𑀯𑀼𑀢𑁆𑀢𑁄 𑀏𑀯. 𑀬𑀤𑀕𑁆𑀕𑁂𑀦 𑀘 𑀏𑀯𑀁 𑀯𑀼𑀢𑁆𑀢𑁄, 𑀢𑀤𑀕𑁆𑀕𑁂𑀦 𑀘 𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀦𑁄 𑀧𑀯𑁂𑀲𑁂𑀧𑀺 𑀲𑀢𑀺 𑀢𑀲𑁆𑀲 𑀲𑀻𑀫𑀝𑁆𑀞𑀪𑀸𑀯𑀢𑁄 𑀓𑀫𑁆𑀫𑀓𑁄𑀧𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 ‘‘𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀓𑀣𑀦𑀜𑁆𑀘𑁂𑀢𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀦𑁆𑀢𑁂𑀦𑀧𑀺 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀸𑀧𑀭𑀺𑀳𑀸𑀭𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀦𑀫𑀦𑁆𑀢𑀭𑀸 𑀢𑀢𑁆𑀢𑀓𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀲𑀻𑀫𑀦𑁆𑀢𑀭𑀺𑀓𑀯𑀺𑀥𑀸𑀦𑀯𑀘𑀦𑀢𑁄𑀧𑀺 𑀏𑀢𑀸𑀲𑀁 𑀤𑀼𑀩𑁆𑀩𑀺𑀚𑀸𑀦𑀧𑀭𑀺𑀘𑁆𑀙𑁂𑀤𑀢𑀸, 𑀢𑀢𑁆𑀣 𑀘 𑀞𑀺𑀢𑀸𑀦𑀁 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀲𑀺𑀚𑁆𑀛𑀢𑀺. 𑀓𑀫𑁆𑀫𑀓𑁄𑀧𑀲𑀗𑁆𑀓𑀝𑁆𑀞𑀸𑀦𑀫𑁆𑀧𑀺 𑀆𑀘𑀭𑀺𑀬𑀸 𑀤𑀽𑀭𑀢𑁄 𑀧𑀭𑀺𑀳𑀸𑀭𑀢𑁆𑀣𑀁 ‘‘𑀓𑀫𑁆𑀫𑀓𑁄𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸𑀯 𑀞𑀧𑁂𑀲𑀼𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁭) 𑀧𑀦 𑁋 𑀅𑀧𑀭𑀺𑀘𑁆𑀙𑀺𑀦𑁆𑀦𑀸𑀬𑀸𑀢𑀺 𑀩𑀤𑁆𑀥𑀲𑀻𑀫𑀸𑀯𑀲𑁂𑀦 𑀅𑀓𑀢𑀧𑀭𑀺𑀘𑁆𑀙𑁂𑀤𑀸𑀬. 𑀬𑁂𑀦 𑀓𑁂𑀦𑀘𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄𑀢𑀺 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑁂𑀦𑀧𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄. 𑀢𑀲𑁆𑀲 𑀅𑀦𑁆𑀢𑁄𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀁 𑀧𑀦 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺. 𑀢𑀢𑁆𑀣 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀤𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀉𑀧𑀮𑀩𑁆𑀪𑀢𑀺, 𑀬𑀤𑀺 𑀘𑁂𑀢𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀓𑀭𑀡𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀅𑀜𑁆𑀜𑀁 𑀉𑀤𑀓𑀼𑀓𑁆𑀔𑁂𑀧𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑁄𑀲𑀣𑀸𑀤𑀺𑀓𑀭𑀡𑀢𑁆𑀣𑀁 𑀞𑀺𑀢𑁄 𑀲𑀗𑁆𑀖𑁄 𑀲𑀻𑀫𑀸𑀲𑀫𑁆𑀪𑁂𑀤𑀲𑀫𑁆𑀪𑀯𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸, 𑀏𑀯𑀫𑁆𑀧𑀺 𑀬𑀼𑀚𑁆𑀚𑁂𑀬𑁆𑀬. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁 (𑀓𑀗𑁆𑀔𑀸. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀤𑀼𑀢𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀁 𑀅𑀦𑀢𑀺𑀓𑁆𑀓𑀦𑁆𑀢𑁄𑀧𑀺 𑀓𑁄𑀧𑁂𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀦𑁄 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀧𑀭𑁂𑀲𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀚𑁆𑀛𑁄𑀢𑁆𑀣𑀝𑀢𑁆𑀢𑀸 𑀲𑀻𑀫𑀸𑀲𑀫𑁆𑀪𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑁄𑀧𑁂𑀢𑀻’’𑀢𑀺. ‘‘𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀘 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁 𑀲𑀩𑁆𑀩𑀸𑀲𑀼𑀧𑀺 𑀅𑀝𑁆𑀞𑀓𑀣𑀸𑀲𑀼 𑀲𑀻𑀫𑀸𑀲𑀫𑁆𑀪𑁂𑀤𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯 𑀳𑀺 ‘‘𑀅𑀢𑁆𑀢𑀦𑁄 𑀘 𑀅𑀜𑁆𑀜𑁂𑀲𑀜𑁆𑀘 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦𑁂𑀢𑁆𑀣 𑀅𑀜𑁆𑀜𑀣𑀸𑀧𑀺 𑀧𑀧𑀜𑁆𑀘𑁂𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀻𑀢𑀺 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀬𑀲𑁆𑀫𑀸 𑀲𑀩𑁆𑀩𑁄𑀧𑀺 𑀦𑀤𑀻𑀧𑀤𑁂𑀲𑁄 𑀪𑀺𑀓𑁆𑀔𑀽𑀳𑀺 𑀅𑀚𑁆𑀛𑁄𑀢𑁆𑀣𑀝𑁄, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄 𑀦𑀤𑀺𑀬𑀸 𑀅𑀪𑀸𑀯𑀸 𑀉𑀤𑀓𑀼𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀉𑀤𑀓𑀼𑀓𑁆𑀔𑁂𑀧𑀧𑁆𑀧𑀫𑀸𑀡𑀸 𑀲𑀻𑀫𑀦𑁆𑀢𑀭𑀺𑀓𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑀸 𑀳𑁄𑀢𑀺, 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀸 𑀘 𑀦 𑀲𑀺𑀬𑀸𑀢𑀺 𑀲𑀸𑀫𑀻𑀘𑀺𑀤𑀲𑁆𑀲𑀦𑀢𑁆𑀣𑀁 ‘‘𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀢𑀓𑁂𑀦 𑀧𑀦 𑀲𑀻𑀫𑀸𑀲𑀫𑁆𑀪𑁂𑀤𑁄 𑀦 𑀳𑁄𑀢𑀺, 𑀢𑀢𑁆𑀢𑀓𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀢𑁂𑀦𑁂𑀯𑀸𑀳𑀼 𑀧𑁄𑀭𑀸𑀡𑀸 ‘‘𑀬𑀢𑁆𑀢𑀓𑁂𑀦 𑀲𑀻𑀫𑀸𑀲𑀫𑁆𑀪𑁂𑀤𑁄 𑀦 𑀳𑁄𑀢𑀺, 𑀢𑀢𑁆𑀢𑀓𑀫𑁆𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀫𑁆𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀦𑀢𑁄 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀸 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀫𑁆𑀧𑀺 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁪𑁭) 𑁋 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀧𑀦 𑀏𑀢𑀺𑀲𑁆𑀲𑀸 𑀦𑀤𑀺𑀬𑀸 𑀘𑀢𑀼𑀯𑀕𑁆𑀕𑀸𑀤𑀻𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀸𑀯𑀺𑀧𑁆𑀧𑀯𑀸𑀲𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀆𑀘𑀭𑀺𑀬𑀸, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀦𑀸𑀯𑀸𑀕𑀢𑁄 𑀘𑁂, 𑀦𑀸𑀯𑀸𑀬𑀁 𑀯𑀼𑀢𑁆𑀢𑀦𑀬𑁂𑀦, 𑀲𑀢𑁆𑀣𑀕𑀢𑁄 𑀘𑁂, 𑀲𑀢𑁆𑀣𑁂 𑀯𑀼𑀢𑁆𑀢𑀦𑀬𑁂𑀦. 𑀲𑁄 𑀘𑁂 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀦𑀺𑀯𑀼𑀢𑁆𑀣𑁄 𑀘𑁂, 𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦 𑀢𑀺𑀘𑀻𑀯𑀭𑀸𑀯𑀺𑀧𑁆𑀧𑀯𑀸𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀸𑀧𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀲𑀘𑁂 𑀲𑀢𑁆𑀣𑁄 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀳𑁄𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀧𑀫𑀸𑀡𑀦𑁆𑀢𑀺 𑀏𑀓𑁂. 𑀲𑀢𑁆𑀣𑁄𑀯 𑀧𑀫𑀸𑀡𑀦𑁆𑀢𑀺 𑀆𑀘𑀭𑀺𑀬𑀸. 𑀲𑀘𑁂 𑀧𑀦𑁂𑀢𑁆𑀣 𑀩𑀳𑀽 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑁆𑀳𑀺 𑀓𑁂𑀘𑀺 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁, 𑀓𑁂𑀘𑀺 𑀕𑀡𑀼𑀧𑁄𑀲𑀣𑀁, 𑀓𑁂𑀘𑀺 𑀲𑀗𑁆𑀖𑀼𑀧𑁄𑀲𑀣𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑀢𑀸𑀬 ‘‘𑀩𑀳𑀽 𑀲𑀗𑁆𑀖𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀊𑀦𑀓𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀲𑀻𑀫𑀸𑀲𑀫𑁆𑀪𑁂𑀤𑀲𑀫𑁆𑀪𑀯𑀢𑁄𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀞𑀧𑁂𑀦𑁆𑀢𑁂 𑀳𑀺 𑀊𑀦𑀓𑀁 𑀦 𑀞𑀧𑁂𑀢𑀩𑁆𑀩𑀁, ‘‘𑀅𑀝𑁆𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀦𑁆𑀢𑀺 𑀲𑀻𑀫𑀁. 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀫𑀢𑀻𑀢𑀺 𑀇𑀫𑀺𑀦𑀸 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑁄 𑀏𑀯 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀯𑀸𑀮𑀺𑀓𑀸𑀤𑀻𑀳𑀺 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀤𑀦𑀁, 𑀇𑀢𑀭𑀣𑀸 𑀩𑀳𑀺 𑀧𑀭𑀺𑀯𑀢𑁆𑀢𑀸 𑀦𑀼 𑀔𑁄, 𑀦𑁄 𑀯𑀸𑀢𑀺 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺. 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑁆𑀲𑀸𑀯𑀦𑀸𑀢𑀺 𑀓𑁂𑀯𑀮𑀸𑀬 𑀦𑀤𑀻𑀲𑀻𑀫𑀸𑀬 𑀅𑀦𑀼𑀲𑁆𑀲𑀸𑀯𑀦𑀸. 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀭𑀼𑀓𑁆𑀔𑁂 𑀯𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀩𑀳𑀺 𑀞𑀺𑀢𑁂 𑀭𑀼𑀓𑁆𑀔𑁂 𑀯𑀸. 𑀩𑀳𑀺𑀦𑀤𑀻𑀢𑀻𑀭𑀫𑁂𑀯 𑀳𑀺 𑀯𑀺𑀲𑀪𑀸𑀕𑀲𑀻𑀫𑀢𑁆𑀢𑀸 𑀅𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑀸𑀦𑀁, 𑀦 𑀅𑀦𑁆𑀢𑁄𑀦𑀤𑀻 𑀦𑀺𑀲𑁆𑀲𑀬𑀢𑁆𑀢𑁂𑀦 𑀲𑀪𑀸𑀕𑀢𑁆𑀢𑀸. 𑀢𑁂𑀦𑁂𑀯 ‘‘𑀩𑀳𑀺𑀦𑀤𑀻𑀢𑀻𑀭𑁂 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸’’𑀢𑀺𑀆𑀤𑀺𑀦𑀸 𑀢𑀻𑀭𑀫𑁂𑀯 𑀅𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑀸𑀦𑀢𑁆𑀢𑁂𑀦 𑀤𑀲𑁆𑀲𑀺𑀢𑀁, 𑀦 𑀧𑀦 𑀦𑀤𑀻. 𑀚𑀸𑀢𑀭𑀼𑀓𑁆𑀔𑁂𑀧𑀺 𑀞𑀺𑀢𑁂𑀳𑀻𑀢𑀺 𑀇𑀤𑀁 𑀅𑀦𑁆𑀢𑁄𑀉𑀤𑀓𑀼𑀓𑁆𑀔𑁂𑀧𑀝𑁆𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀩𑀳𑀺𑀉𑀤𑀓𑀼𑀓𑁆𑀔𑁂𑀧𑁂 𑀪𑀺𑀓𑁆𑀔𑀽𑀦𑀁 𑀞𑀸𑀢𑀼𑀁 𑀯𑀝𑁆𑀝𑀢𑀺.

𑀭𑀼𑀓𑁆𑀔𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀅𑀦𑁆𑀢𑁄𑀉𑀤𑀓𑀼𑀓𑁆𑀔𑁂𑀧𑀝𑁆𑀞𑀲𑁆𑀲 𑀭𑀼𑀓𑁆𑀔𑀲𑁆𑀲. 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀳𑀸𑀭𑁂 𑀩𑀤𑁆𑀥𑀲𑀻𑀫𑀁 𑀕𑀸𑀫𑀲𑀻𑀫𑀜𑁆𑀘 𑀢𑀢𑁆𑀣 𑀞𑀺𑀢𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀲𑀻𑀫𑀓𑀭𑀡𑀯𑀲𑁂𑀦𑁂𑀯 𑀲𑁄𑀥𑁂𑀢𑁆𑀯𑀸. 𑀬𑀣𑀸 𑀘 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺, 𑀏𑀯𑀁 𑀩𑀤𑁆𑀥𑀲𑀻𑀫𑀸𑀬𑀁 𑀯𑀸 𑀕𑀸𑀫𑀲𑀻𑀫𑀸𑀬𑀁 𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀝𑁆𑀞𑁂 𑀲𑁄𑀥𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀅𑀭𑀜𑁆𑀜𑀲𑀻𑀫𑀸𑀳𑀺𑀧𑀺 𑀲𑀤𑁆𑀥𑀺𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬, 𑀇𑀫𑀸𑀬 𑀘 𑀲𑀤𑁆𑀥𑀺𑀁 𑀢𑀸𑀲𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀤𑁄𑀲𑁄𑀧𑀺 𑀦𑀬𑀢𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀩𑀤𑁆𑀥𑀲𑀻𑀫𑀕𑀸𑀫𑀲𑀻𑀫𑀸𑀳𑀺𑀧𑀺 𑀲𑀤𑁆𑀥𑀺𑀁, 𑀏𑀢𑀸𑀲𑀜𑁆𑀘 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀤𑁄𑀲𑁄 𑀜𑀸𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦𑁂𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀢𑁄𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀸𑀲𑀦𑁆𑀦𑀸𑀦𑀫𑁂𑀯𑁂𑀢𑁆𑀣 𑀤𑀲𑁆𑀲𑀺𑀢𑀁.

𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀦𑀬𑀕𑁆𑀕𑀳𑀡𑀫𑀼𑀔𑀁 𑁋 𑀬𑀣𑀸 𑀳𑀺 𑀩𑀤𑁆𑀥𑀲𑀻𑀫𑀸𑀬𑀁 𑀲𑀫𑁆𑀫𑀢𑀸 𑀩𑀤𑁆𑀥𑀲𑀻𑀫𑀸 𑀯𑀺𑀧𑀢𑁆𑀢𑀺𑀲𑀻𑀫𑀸 𑀳𑁄𑀢𑀻𑀢𑀺 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀺, 𑀏𑀯𑀁 𑀦𑀤𑀻𑀆𑀤𑀻𑀲𑀼 𑀲𑀫𑁆𑀫𑀢𑀸𑀧𑀺 𑀩𑀤𑁆𑀥𑀲𑀻𑀫𑀸 𑀯𑀺𑀧𑀢𑁆𑀢𑀺𑀲𑀻𑀫𑀸𑀯 𑀳𑁄𑀢𑀻𑀢𑀺 𑀢𑀸𑀳𑀺𑀧𑀺 𑀲𑀤𑁆𑀥𑀺𑀁 𑀢𑀲𑁆𑀲𑀸 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀚𑁆𑀛𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀕𑀸𑀫𑀦𑀤𑀻𑀆𑀤𑀻𑀳𑀺 𑀲𑀤𑁆𑀥𑀺𑀁, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀘 𑀅𑀭𑀜𑁆𑀜𑀸𑀤𑀻𑀳𑀺 𑀲𑀤𑁆𑀥𑀺𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀲𑁆𑀲𑀦𑀯𑀝𑁆𑀝𑀦𑀓𑀪𑀸𑀯𑁄 𑀜𑀸𑀢𑀩𑁆𑀩𑁄, 𑀏𑀯𑀫𑁂𑀢𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸 𑀩𑀤𑁆𑀥𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀅𑀜𑁆𑀜𑀫𑀜𑁆𑀜𑀜𑁆𑀘𑁂𑀯 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀸𑀳𑀺 𑀇𑀢𑀭𑀻𑀢𑀭𑀸𑀲𑀁 𑀦𑀺𑀲𑁆𑀲𑀬𑀲𑀻𑀫𑀸𑀳𑀺 𑀘 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂 𑀲𑀢𑀺 𑀲𑀫𑁆𑀪𑁂𑀤𑀤𑁄𑀲𑀫𑀸𑀧𑀚𑁆𑀚𑀢𑀻𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑀬𑁄 𑀜𑀸𑀢𑀩𑁆𑀩𑁄𑀯.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀦 𑀦𑀺𑀲𑁆𑀲𑀬𑀪𑀽𑀢𑀕𑀸𑀫𑀸𑀤𑀻𑀳𑀺 𑀲𑀤𑁆𑀥𑀺𑀁 𑀩𑀤𑁆𑀥𑀲𑀻𑀫𑀸𑀤𑀻𑀦𑀁 𑀢𑀺𑀲𑁆𑀲𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀲𑁆𑀲 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀲𑁆𑀲 𑀅𑀦𑀼𑀮𑁄𑀫𑀦𑀢𑁄 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁄𑀧𑀺 𑀅𑀦𑀼𑀜𑁆𑀜𑀸𑀢𑁄𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 𑀉𑀤𑀓𑀼𑀓𑁆𑀔𑁂𑀧𑀩𑀤𑁆𑀥𑀲𑀻𑀫𑀸𑀤𑀻𑀦𑀁 𑀅𑀦𑁆𑀢𑀭𑀸 𑀓𑀲𑁆𑀫𑀸 𑀲𑀻𑀫𑀦𑁆𑀢𑀭𑀺𑀓𑀸 𑀦 𑀯𑀺𑀳𑀺𑀢𑀸𑀢𑀺? 𑀦𑀺𑀲𑁆𑀲𑀬𑀪𑁂𑀤𑀲𑀪𑀸𑀯𑀪𑁂𑀤𑁂𑀳𑀺 𑀲𑀬𑀫𑁂𑀯 𑀪𑀺𑀦𑁆𑀦𑀢𑁆𑀢𑀸. 𑀏𑀓𑀦𑀺𑀲𑁆𑀲𑀬𑀏𑀓𑀲𑀪𑀸𑀯𑀸𑀦𑀫𑁂𑀯 𑀳𑀺 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀺𑀦𑀸𑀲𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀏𑀢𑁂𑀦𑁂𑀯 𑀦𑀤𑀻𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀩𑀤𑁆𑀥𑀸𑀬 𑀲𑀻𑀫𑀸𑀬 𑀲𑀗𑁆𑀖𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀦𑀤𑀺𑀬𑀫𑁆𑀧𑀺 𑀬𑀸𑀯 𑀕𑀸𑀫𑀓𑁆𑀔𑁂𑀢𑁆𑀢𑀁 𑀆𑀳𑀘𑁆𑀘 𑀞𑀺𑀢𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀜𑁆𑀜𑁂𑀲𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀬𑀸 𑀧𑀦𑁂𑀢𑀸 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸 𑀕𑀸𑀫𑀸𑀭𑀜𑁆𑀜𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀲𑀻𑀫𑀸 𑀧𑀜𑁆𑀘, 𑀢𑀸 𑀅𑀜𑁆𑀜𑀫𑀜𑁆𑀜𑀁 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑁂𑀧𑀺 𑀲𑀫𑁆𑀪𑁂𑀤𑀤𑁄𑀲𑀁 𑀦𑀸𑀧𑀚𑁆𑀚𑀢𑀺 𑀢𑀣𑀸 𑀮𑁄𑀓𑀯𑁄𑀳𑀸𑀭𑀸𑀪𑀸𑀯𑀢𑁄. 𑀦 𑀳𑀺 𑀕𑀸𑀫𑀸𑀤𑀬𑁄 𑀕𑀸𑀫𑀦𑁆𑀢𑀭𑀸𑀤𑀻𑀳𑀺 𑀦𑀤𑀻𑀆𑀤𑀻𑀳𑀺 𑀘 𑀭𑀼𑀓𑁆𑀔𑀸𑀤𑀺𑀲𑀫𑁆𑀩𑀦𑁆𑀥𑀫𑀢𑁆𑀢𑁂𑀦 𑀲𑀫𑁆𑀪𑀺𑀦𑁆𑀦𑀸𑀢𑀺 𑀮𑁄𑀓𑁂 𑀯𑁄𑀳𑀭𑀦𑁆𑀢𑀺. 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸𑀦𑀜𑁆𑀘 𑀮𑁄𑀓𑀯𑁄𑀳𑀸𑀭𑀢𑁄𑀯 𑀲𑀫𑁆𑀪𑁂𑀤𑁄 𑀯𑀸 𑀅𑀲𑀫𑁆𑀪𑁂𑀤𑁄 𑀯𑀸 𑀕𑀳𑁂𑀢𑀩𑁆𑀩𑁄, 𑀦 𑀅𑀜𑁆𑀜𑀣𑀸. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 𑀢𑀸𑀲𑀁 𑀅𑀜𑁆𑀜𑀫𑀜𑁆𑀜𑀁 𑀓𑀢𑁆𑀣𑀘𑀺𑀧𑀺 𑀲𑀫𑁆𑀪𑁂𑀤𑀦𑀬𑁄 𑀦 𑀤𑀲𑁆𑀲𑀺𑀢𑁄, 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑁄 𑀏𑀯 𑀤𑀲𑁆𑀲𑀺𑀢𑁄𑀢𑀺.

𑀏𑀢𑁆𑀣 𑀧𑀦 𑀩𑀤𑁆𑀥𑀲𑀻𑀫𑀸𑀬 𑀢𑀸𑀯 ‘‘𑀳𑁂𑀝𑁆𑀞𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀻𑀫𑀸 𑀕𑀢𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀥𑁄𑀪𑀸𑀕𑀧𑀭𑀺𑀘𑁆𑀙𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 𑀲𑀩𑁆𑀩𑀣𑀸 𑀤𑀲𑁆𑀲𑀺𑀢𑁄, 𑀕𑀸𑀫𑀲𑀻𑀫𑀸𑀤𑀻𑀦𑀁 𑀧𑀦 𑀦 𑀤𑀲𑁆𑀲𑀺𑀢𑁄. 𑀓𑀣𑀫𑀬𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀓𑁂𑀘𑀺 𑀢𑀸𑀯𑁂𑀢𑁆𑀣 ‘‘𑀕𑀸𑀫𑀲𑀻𑀫𑀸𑀤𑀬𑁄𑀧𑀺 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀉𑀤𑀓𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀯𑀤𑀦𑁆𑀢𑀺.

𑀓𑁂𑀘𑀺 𑀧𑀦 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀲𑀻𑀫𑀸, 𑀢𑀸𑀯 𑀢𑀦𑁆𑀦𑀺𑀲𑁆𑀲𑀺𑀢𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀘 𑀧𑀣𑀯𑀺𑀬𑀸 𑀉𑀧𑀭𑀺𑀢𑀮𑁂 𑀳𑁂𑀝𑁆𑀞𑀸 𑀘 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀡𑀧𑁆𑀧𑀤𑁂𑀲𑁂 𑀏𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀢𑀢𑁄 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀚𑁆𑀛𑁄𑀢𑁆𑀣𑀭𑀡𑀸𑀪𑀸𑀯𑀸. 𑀲𑀘𑁂 𑀧𑀦 𑀉𑀤𑀓𑁄𑀖𑀸𑀤𑀺𑀦𑀸 𑀬𑁄𑀚𑀦𑀧𑁆𑀧𑀫𑀸𑀡𑀫𑁆𑀧𑀺 𑀦𑀺𑀦𑁆𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀦𑀤𑀻𑀲𑀻𑀫𑀸𑀤𑀬𑁄𑀯 𑀳𑁄𑀦𑁆𑀢𑀺, 𑀦 𑀢𑀢𑁄 𑀳𑁂𑀝𑁆𑀞𑀸. 𑀢𑀲𑁆𑀫𑀸 𑀦𑀤𑀻𑀆𑀤𑀻𑀦𑀁 𑀳𑁂𑀝𑁆𑀞𑀸 𑀩𑀳𑀺𑀢𑀻𑀭𑀫𑀼𑀔𑁂𑀦 𑀉𑀫𑀗𑁆𑀕𑁂𑀦, 𑀇𑀤𑁆𑀥𑀺𑀬𑀸 𑀯𑀸 𑀧𑀯𑀺𑀝𑁆𑀞𑁄 𑀪𑀺𑀓𑁆𑀔𑀼 𑀦𑀤𑀺𑀬𑀁 𑀞𑀺𑀢𑀸𑀦𑀁 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺, 𑀲𑁄 𑀧𑀦 𑀆𑀲𑀦𑁆𑀦𑀕𑀸𑀫𑁂 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀧𑀦 𑀲𑁄 𑀉𑀪𑀺𑀦𑁆𑀦𑀁 𑀢𑀻𑀭𑀕𑀸𑀫𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀉𑀪𑀬𑀕𑀸𑀫𑀝𑁆𑀞𑀸𑀦𑀁 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀧𑀦 𑀢𑀻𑀭𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀦 𑀳𑁄𑀢𑀺, 𑀅𑀕𑀸𑀫𑀓𑀸𑀭𑀜𑁆𑀜𑀫𑁂𑀯. 𑀢𑀢𑁆𑀣 𑀧𑀦 𑀢𑀻𑀭𑀤𑁆𑀯𑀬𑁂𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀯𑀺𑀦𑀸 𑀓𑁂𑀯𑀮𑀸𑀬 𑀔𑀼𑀤𑁆𑀤𑀓𑀸𑀭𑀜𑁆𑀜𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀲𑀘𑁂 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀓𑀭𑁄𑀦𑁆𑀢𑀺, 𑀢𑀤𑀸 𑀬𑀤𑀺 𑀢𑁂𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑁄 𑀏𑀢𑀲𑁆𑀲 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀧𑀭𑀢𑁄 𑀏𑀓𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀦 𑀓𑀫𑁆𑀫𑀓𑁄𑀧𑁄. 𑀦𑁄 𑀘𑁂, 𑀓𑀫𑁆𑀫𑀓𑁄𑀧𑁄. 𑀕𑀸𑀫𑀲𑀻𑀫𑀸𑀬𑀁 𑀧𑀦 𑀅𑀦𑁆𑀢𑁄𑀉𑀫𑀗𑁆𑀕𑁂 𑀯𑀸 𑀩𑀺𑀮𑁂 𑀯𑀸 𑀔𑀡𑀺𑀢𑁆𑀯𑀸 𑀯𑀸 𑀬𑀢𑁆𑀣 𑀧𑀯𑀺𑀲𑀺𑀢𑀼𑀁 𑀲𑀓𑁆𑀓𑀸, 𑀬𑀢𑁆𑀣 𑀯𑀸 𑀲𑀼𑀯𑀡𑁆𑀡𑀫𑀡𑀺𑀆𑀤𑀺𑀁 𑀔𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀕𑀳𑁂𑀢𑀼𑀁 𑀲𑀓𑁆𑀓𑀸𑀢𑀺 𑀯𑀸 𑀲𑀫𑁆𑀪𑀸𑀯𑀦𑀸 𑀳𑁄𑀢𑀺, 𑀢𑀢𑁆𑀢𑀓𑀁 𑀳𑁂𑀝𑁆𑀞𑀸𑀧𑀺 𑀕𑀸𑀫𑀲𑀻𑀫𑀸, 𑀢𑀢𑁆𑀣 𑀇𑀤𑁆𑀥𑀺𑀬𑀸 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀬𑀢𑁆𑀣 𑀧𑀦 𑀧𑀓𑀢𑀺𑀫𑀦𑀼𑀲𑁆𑀲𑀸𑀦𑀁 𑀧𑀯𑁂𑀲𑀲𑀫𑁆𑀪𑀸𑀯𑀦𑀸𑀧𑀺 𑀦𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀬𑀸𑀯 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀸 𑀅𑀭𑀜𑁆𑀜𑀲𑀻𑀫𑀸𑀯, 𑀦 𑀕𑀸𑀫𑀲𑀻𑀫𑀸. 𑀅𑀭𑀜𑁆𑀜𑀲𑀻𑀫𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀧𑀺 𑀳𑀺 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀧𑀯𑁂𑀲𑀲𑀫𑁆𑀪𑀸𑀯𑀦𑀸, 𑀢𑀢𑁆𑀢𑀓𑀫𑁂𑀯 𑀉𑀧𑀭𑀺𑀢𑀮𑁂 𑀅𑀭𑀜𑁆𑀜𑀲𑀻𑀫𑀸 𑀧𑀯𑀢𑁆𑀢𑀢𑀺. 𑀢𑀢𑁄 𑀧𑀦 𑀳𑁂𑀝𑁆𑀞𑀸 𑀦 𑀅𑀭𑀜𑁆𑀜𑀲𑀻𑀫𑀸 𑀢𑀢𑁆𑀣 𑀉𑀧𑀭𑀺𑀢𑀮𑁂𑀦 𑀲𑀳 𑀏𑀓𑀸𑀭𑀜𑁆𑀜𑀯𑁄𑀳𑀸𑀭𑀸𑀪𑀸𑀯𑀢𑁄. 𑀦 𑀳𑀺 𑀢𑀢𑁆𑀣 𑀧𑀯𑀺𑀝𑁆𑀞𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄𑀢𑀺 𑀯𑁄𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀭𑀝𑁆𑀞𑁄 𑀉𑀧𑀭𑀺 𑀅𑀭𑀜𑁆𑀜𑀝𑁆𑀞𑀸𑀦𑀁 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺 𑀉𑀫𑀗𑁆𑀕𑀦𑀤𑀺𑀬𑀁 𑀞𑀺𑀢𑁄 𑀯𑀺𑀬 𑀉𑀧𑀭𑀺𑀦𑀤𑀺𑀬𑀁 𑀞𑀺𑀢𑀸𑀦𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀘𑀓𑁆𑀓𑀯𑀸𑀴𑁂 𑀕𑀸𑀫𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀫𑀼𑀜𑁆𑀘𑀺𑀢𑁆𑀯𑀸 𑀢𑀤𑀯𑀲𑁂𑀲𑀁 𑀅𑀫𑀦𑀼𑀲𑁆𑀲𑀸𑀯𑀸𑀲𑀁 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀅𑀭𑀜𑁆𑀜𑀫𑁂𑀯. ‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑀺 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀤𑀺𑀧𑀺 𑀅𑀭𑀜𑁆𑀜𑀫𑁂𑀯. 𑀇𑀥 𑀧𑀦 𑀦𑀤𑀻𑀆𑀤𑀻𑀦𑀁 𑀯𑀺𑀲𑀼𑀁 𑀲𑀻𑀫𑀸𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀢𑀤𑀯𑀲𑁂𑀲𑀫𑁂𑀯 𑀅𑀭𑀜𑁆𑀜𑀁 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀘 𑀬𑀢𑁆𑀢𑀓𑁂 𑀧𑀤𑁂𑀲𑁂 𑀏𑀓𑀁 𑀅𑀭𑀜𑁆𑀜𑀦𑁆𑀢𑀺 𑀯𑁄𑀳𑀭𑀦𑁆𑀢𑀺, 𑀅𑀬𑀫𑁂𑀓𑀸 𑀅𑀭𑀜𑁆𑀜𑀲𑀻𑀫𑀸. 𑀇𑀦𑁆𑀤𑀧𑀼𑀭𑀜𑁆𑀳𑀺 𑀲𑀩𑁆𑀩𑀁 𑀏𑀓𑀸𑀭𑀜𑁆𑀜𑀲𑀻𑀫𑀸, 𑀢𑀣𑀸 𑀅𑀲𑀼𑀭𑀬𑀓𑁆𑀔𑀧𑀼𑀭𑀸𑀤𑀺. 𑀆𑀓𑀸𑀲𑀝𑁆𑀞𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀸𑀦𑀺 𑀧𑀦 𑀲𑀫𑀦𑁆𑀢𑀸 𑀆𑀓𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀧𑀘𑁆𑀘𑁂𑀓𑀁 𑀅𑀭𑀜𑁆𑀜𑀲𑀻𑀫𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀧𑀩𑁆𑀩𑀢𑀤𑀻𑀧𑀓𑀸 𑀯𑀺𑀬. 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀁, 𑀅𑀭𑀜𑁆𑀜𑀲𑀻𑀫𑀸𑀬𑀫𑁂𑀯 𑀯𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀇𑀥𑀸𑀧𑀺 𑀉𑀧𑀭𑀺𑀅𑀭𑀜𑁆𑀜𑀢𑀮𑁂𑀦 𑀲𑀤𑁆𑀥𑀺𑀁 𑀳𑁂𑀝𑁆𑀞𑀸𑀧𑀣𑀯𑀺𑀬𑀸 𑀏𑀓𑀸𑀭𑀜𑁆𑀜𑀯𑁄𑀳𑀸𑀭𑀸𑀪𑀸𑀯𑀸 𑀯𑀺𑀲𑀼𑀁 𑀅𑀭𑀜𑁆𑀜𑀲𑀻𑀫𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯𑁂𑀢𑁆𑀣 𑀕𑀸𑀫𑀦𑀤𑀻𑀆𑀤𑀺𑀲𑀻𑀫𑀸𑀓𑀣𑀸𑀬 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘𑀇𑀤𑁆𑀥𑀺𑀫𑀸 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸𑀧𑀣𑀯𑀺𑀢𑀮𑁂 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻’𑀢𑀺 𑀩𑀤𑁆𑀥𑀲𑀻𑀫𑀸𑀬𑀁 𑀤𑀲𑁆𑀲𑀺𑀢𑀦𑀬𑁄 𑀦 𑀤𑀲𑁆𑀲𑀺𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀜𑁆𑀘𑁂𑀢𑀸𑀲𑀁 𑀕𑀸𑀫𑀲𑀻𑀫𑀸𑀤𑀻𑀦𑀁 𑀳𑁂𑀝𑁆𑀞𑀸𑀧𑀫𑀸𑀡𑀤𑀲𑁆𑀲𑀦𑀁 𑀲𑀼𑀢𑁆𑀢𑀸𑀤𑀺𑀯𑀺𑀭𑁄𑀥𑀸𑀪𑀸𑀯𑀸 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀕𑀳𑀡𑁂 𑀘 𑀕𑀸𑀫𑀲𑀻𑀫𑀸𑀬𑀁 𑀲𑀫𑁆𑀫𑀢𑀸 𑀩𑀤𑁆𑀥𑀲𑀻𑀫𑀸 𑀉𑀧𑀭𑀺𑀕𑀸𑀫𑀲𑀻𑀫𑀁, 𑀳𑁂𑀝𑁆𑀞𑀸 𑀉𑀤𑀓𑀧𑀭𑀺𑀬𑀦𑁆𑀢𑀁 𑀅𑀭𑀜𑁆𑀜𑀲𑀻𑀫𑀜𑁆𑀘 𑀅𑀯𑀢𑁆𑀣𑀭𑀢𑀻𑀢𑀺 𑀢𑀲𑁆𑀲𑀸 𑀅𑀭𑀜𑁆𑀜𑀲𑀻𑀫𑀸𑀧𑀺 𑀔𑁂𑀢𑁆𑀢𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀪𑀕𑀯𑀢𑀸 𑀘 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁪𑁭) 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸 𑀩𑀤𑁆𑀥𑀲𑀻𑀫𑀸𑀬 𑀅𑀔𑁂𑀢𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀧𑀦 𑀅𑀭𑀜𑁆𑀜𑀁, 𑀢𑀲𑁆𑀫𑀸 𑀅𑀭𑀜𑁆𑀜𑀫𑁆𑀧𑀺 𑀩𑀤𑁆𑀥𑀲𑀻𑀫𑀸𑀬 𑀔𑁂𑀢𑁆𑀢𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀢𑁆𑀣 𑀲𑀸 𑀦 𑀩𑀚𑁆𑀛𑀢𑀻𑀢𑀺? 𑀧𑀬𑁄𑀚𑀦𑀸𑀪𑀸𑀯𑀸. 𑀲𑀻𑀫𑀸𑀧𑁂𑀓𑁆𑀔𑀸𑀦𑀦𑁆𑀢𑀭𑀫𑁂𑀯 𑀳𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀲𑀫𑁆𑀪𑀯𑀢𑁄, 𑀢𑀲𑁆𑀲𑀸 𑀘 𑀉𑀧𑀭𑀺 𑀲𑀫𑁆𑀫𑀢𑀸𑀬 𑀩𑀤𑁆𑀥𑀲𑀻𑀫𑀸𑀬 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀸𑀦𑀼𑀮𑁄𑀫𑀢𑁄 𑀯𑀺𑀧𑀢𑁆𑀢𑀺𑀲𑀻𑀫𑀸 𑀏𑀯 𑀲𑀺𑀬𑀸. 𑀕𑀸𑀫𑀓𑁆𑀔𑁂𑀢𑁆𑀢𑁂 𑀧𑀦 𑀞𑀢𑁆𑀯𑀸 𑀅𑀕𑀸𑀫𑀓𑀸𑀭𑀜𑁆𑀜𑁂𑀓𑀤𑁂𑀲𑀫𑁆𑀧𑀺 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀲𑀫𑁆𑀫𑀢𑀸 𑀓𑀺𑀜𑁆𑀘𑀸𑀧𑀺 𑀲𑀼𑀲𑀫𑁆𑀫𑀢𑀸 𑀅𑀕𑀸𑀫𑀓𑀸𑀭𑀜𑁆𑀜𑁂 𑀪𑀕𑀯𑀢𑀸 𑀯𑀺𑀳𑀺𑀢𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀧𑀺 𑀅𑀦𑀺𑀯𑀢𑁆𑀢𑀦𑀢𑁄, 𑀢𑀢𑁆𑀣 𑀧𑀦 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀯𑀺𑀝𑁆𑀞𑀸𑀦𑀫𑁆𑀧𑀺 𑀢𑀢𑁄 𑀩𑀳𑀺 𑀓𑁂𑀯𑀮𑀸𑀭𑀜𑁆𑀜𑁂 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀅𑀦𑁆𑀢𑀭𑀸 𑀢𑀻𑀡𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺. 𑀅𑀜𑁆𑀜𑀣𑀸 𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸𑀢𑀺 𑀲𑀩𑁆𑀩𑀣𑀸 𑀦𑀺𑀭𑀢𑁆𑀣𑀓𑀫𑁂𑀯 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀩𑀤𑁆𑀥𑀲𑀻𑀫𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑁆𑀢𑁄𑀦𑀤𑀺𑀬𑀁 𑀧𑀯𑀺𑀝𑁆𑀞𑀲𑀸𑀔𑀸𑀬𑀸𑀢𑀺 𑀦𑀤𑀺𑀬𑀸 𑀧𑀣𑀯𑀻𑀢𑀮𑀁 𑀆𑀳𑀘𑁆𑀘 𑀞𑀺𑀢𑀸𑀬 𑀲𑀸𑀔𑀸𑀬𑀧𑀺, 𑀧𑀕𑁂𑀯 𑀅𑀦𑀸𑀳𑀘𑁆𑀘 𑀞𑀺𑀢𑀸𑀬. 𑀧𑀸𑀭𑁄𑀳𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦 𑀲𑀪𑀸𑀕𑀦𑀤𑀻𑀲𑀻𑀫𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦 𑀯𑀺𑀲𑀪𑀸𑀕𑀲𑀻𑀫𑀸𑀲𑀫𑁆𑀩𑀦𑁆𑀥𑀲𑀸𑀔𑀸𑀤𑀺𑀦𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦𑁂𑀯 𑀫𑀳𑀸𑀲𑀻𑀫𑀁 𑀕𑀸𑀫𑀲𑀻𑀫𑀜𑁆𑀘 𑀨𑀼𑀲𑀺𑀢𑁆𑀯𑀸 𑀞𑀺𑀢𑁂𑀦 𑀲𑀸𑀔𑀸𑀤𑀺𑀦𑀸 𑀫𑀸𑀴𑀓𑀲𑀻𑀫𑀸𑀬 𑀲𑀫𑁆𑀩𑀦𑁆𑀥𑁄 𑀦 𑀯𑀝𑁆𑀝𑀢𑀻𑀢𑀺 𑀜𑀸𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀢𑁄𑀦𑀤𑀺𑀬𑀁𑀬𑁂𑀯𑀸𑀢𑀺 𑀲𑁂𑀢𑀼𑀧𑀸𑀤𑀸𑀦𑀁 𑀢𑀻𑀭𑀝𑁆𑀞𑀺𑀢𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺𑀦𑀤𑀺𑀬𑀁 𑀧𑀢𑀺𑀝𑁆𑀞𑀺𑀢𑀢𑁆𑀢𑁂𑀧𑀺 𑀲𑀫𑁆𑀪𑁂𑀤𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀩𑀳𑀺𑀢𑀻𑀭𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺𑀆𑀤𑀺. 𑀬𑀤𑀺 𑀳𑀺 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀅𑀦𑁆𑀢𑁄𑀦𑀤𑀺𑀬𑀫𑁆𑀧𑀺 𑀧𑀢𑀺𑀝𑁆𑀞𑀺𑀢𑀢𑁆𑀢𑁂 𑀲𑀫𑁆𑀪𑁂𑀤𑁄 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁 𑀪𑀯𑁂𑀬𑁆𑀬 𑀓𑀫𑁆𑀫𑀓𑁄𑀧𑀲𑁆𑀲 𑀲𑀫𑀸𑀦𑀢𑁆𑀢𑀸, 𑀦 𑀘 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑀻𑀫𑀸𑀬 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀆𑀯𑀭𑀡𑁂𑀦 𑀯𑀸𑀢𑀺 𑀤𑀸𑀭𑀼𑀆𑀤𑀻𑀦𑀺 𑀔𑀡𑀺𑀢𑁆𑀯𑀸 𑀉𑀤𑀓𑀦𑀺𑀯𑀸𑀭𑀡𑁂𑀦. 𑀓𑁄𑀝𑁆𑀝𑀓𑀩𑀦𑁆𑀥𑀦𑁂𑀦 𑀯𑀸𑀢𑀺 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀓𑀢𑀲𑁂𑀢𑀼𑀩𑀦𑁆𑀥𑀦𑁂𑀦 𑀯𑀸, 𑀉𑀪𑀬𑁂𑀦𑀸𑀧𑀺 𑀆𑀯𑀭𑀡𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀦𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀳𑁂𑀝𑁆𑀞𑀸 𑀧𑀸𑀴𑀺 𑀩𑀤𑁆𑀥𑀸’’𑀢𑀺, 𑀳𑁂𑀝𑁆𑀞𑀸 𑀦𑀤𑀺𑀁 𑀆𑀯𑀭𑀺𑀢𑁆𑀯𑀸 𑀧𑀸𑀴𑀺 𑀩𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀙𑀟𑁆𑀟𑀺𑀢𑁄𑀤𑀓𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑁄𑀤𑀓𑀁. 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀲𑀦𑁆𑀤𑀦𑀝𑁆𑀞𑀸𑀦𑀢𑁄𑀢𑀺 𑀇𑀫𑀺𑀦𑀸 𑀢𑀴𑀸𑀓𑀦𑀤𑀻𑀦𑀁 𑀅𑀦𑁆𑀢𑀭𑀸 𑀧𑀯𑀢𑁆𑀢𑀦𑀝𑁆𑀞𑀸𑀦𑁂 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀢𑀻𑀭𑀸𑀤𑀺𑀪𑀺𑀦𑁆𑀤𑀦𑀯𑀲𑁂𑀦 𑀯𑀺𑀧𑀼𑀮𑀸 𑀳𑀼𑀢𑁆𑀯𑀸. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀩𑀤𑁆𑀥𑀲𑀻𑀫𑀁.

𑀅𑀕𑀫𑀦𑀧𑀣𑁂𑀢𑀺 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂. 𑀅𑀭𑀜𑁆𑀜𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀁 𑀅𑀕𑀸𑀫𑀓𑀸𑀭𑀜𑁆𑀜𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣𑀸𑀢𑀺 𑀧𑀓𑀢𑀺𑀬𑀸 𑀫𑀘𑁆𑀙𑀩𑀦𑁆𑀥𑀸𑀦𑀁 𑀕𑀫𑀦𑀧𑀣𑁂𑀲𑀼 𑀤𑀻𑀧𑀓𑁂𑀲𑀼.

𑀢𑀁 𑀞𑀸𑀦𑀦𑁆𑀢𑀺 𑀢𑁂𑀲𑀁 𑀆𑀯𑀸𑀝𑀸𑀤𑀻𑀦𑀁 𑀓𑀢𑀝𑁆𑀞𑀸𑀦𑀫𑁂𑀯, 𑀦 𑀅𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀡𑀻𑀢𑀺 𑀲𑀫𑀼𑀤𑁆𑀤𑁄𑀤𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑁂𑀕𑀦𑀺𑀦𑁆𑀦𑁄 𑀫𑀸𑀢𑀺𑀓𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀓𑁄.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁭) 𑀧𑀦 𑁋 𑀕𑀘𑁆𑀙𑀦𑁆𑀢𑀺𑀬𑀸 𑀧𑀦 𑀦𑀸𑀯𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀏𑀢𑁆𑀣 𑀲𑀻𑀫𑀸𑀲𑁄𑀥𑀦𑀁 𑀦𑀸𑀫 𑀕𑀸𑀫𑀲𑀻𑀫𑀸𑀤𑀻𑀲𑀼 𑀞𑀺𑀢𑀸𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀸𑀤𑀺. ‘‘𑀦𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀁 𑀓𑀭𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀳𑁂𑀝𑁆𑀞𑀸 𑀧𑀸𑀴𑀺 𑀩𑀤𑁆𑀥𑀸’’𑀢𑀺, 𑀳𑁂𑀝𑁆𑀞𑀸 𑀦𑀤𑀺𑀁 𑀆𑀯𑀭𑀺𑀢𑁆𑀯𑀸 𑀧𑀸𑀴𑀺 𑀩𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀙𑀟𑁆𑀟𑀺𑀢𑁄𑀤𑀓𑀦𑁆𑀢𑀺 𑀢𑀴𑀸𑀓𑀭𑀓𑁆𑀔𑀡𑀢𑁆𑀣𑀁 𑀏𑀓𑀫𑀦𑁆𑀢𑁂𑀦 𑀙𑀟𑁆𑀟𑀺𑀢𑀫𑀼𑀤𑀓𑀁. 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂𑀢𑀺 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂 𑀯𑀲𑁆𑀲𑀸𑀦𑁂𑀧𑀺 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀉𑀢𑁆𑀢𑀭𑀺𑀢𑁆𑀯𑀸. 𑀕𑀸𑀫𑀦𑀺𑀕𑀫𑀲𑀻𑀫𑀁 𑀑𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀸 𑀧𑀯𑀢𑁆𑀢𑀢𑀺. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀩𑀤𑁆𑀥𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀕𑀫𑀦𑀧𑀣𑁂𑀢𑀺 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑁂 𑀧𑀤𑁂𑀲𑁂. 𑀅𑀭𑀜𑁆𑀜𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀲𑀦𑁆𑀢𑀺 𑀫𑀘𑁆𑀙𑀩𑀦𑁆𑀥𑀸𑀦𑀁. 𑀕𑀫𑀦𑀧𑀭𑀺𑀬𑀦𑁆𑀢𑀲𑁆𑀲 𑀑𑀭𑀢𑁄𑀢𑀺 𑀕𑀫𑀦𑀧𑀭𑀺𑀬𑀦𑁆𑀢𑀲𑁆𑀲 𑀑𑀭𑀺𑀫𑀪𑀸𑀕𑁂 𑀤𑀻𑀧𑀓𑀁 𑀧𑀩𑁆𑀩𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀫𑀼𑀤𑁆𑀤𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀫𑁆𑀪𑀺𑀦𑁆𑀤𑀦𑁆𑀢𑀻𑀢𑀺 𑀬𑀢𑁆𑀣 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀢𑁆𑀣 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀓𑀭𑁄𑀦𑁆𑀢𑀸 𑀲𑀫𑁆𑀪𑀺𑀦𑁆𑀤𑀦𑁆𑀢𑀺, 𑀘𑀢𑀼𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀧𑀳𑁄𑀦𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀓𑀮𑀫𑁆𑀧𑀺 𑀅𑀦𑁆𑀢𑁄𑀓𑀭𑁄𑀦𑁆𑀢𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀫𑀳𑀸𑀲𑀸𑀔𑀫𑀽𑀮𑀸, 𑀏𑀢𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀢𑀺𑀆𑀲𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀲𑀸𑀔𑀸𑀬 𑀲𑀸𑀔𑀁 𑀨𑀼𑀲𑀦𑁆𑀢𑀸𑀧𑀺 𑀳𑀺 𑀤𑀽𑀭𑀝𑁆𑀞𑀸𑀧𑀺 𑀲𑀺𑀬𑀼𑀁, 𑀢𑀢𑁄 𑀏𑀓𑀁𑀲𑀢𑁄 𑀲𑀫𑁆𑀪𑁂𑀤𑀮𑀓𑁆𑀔𑀡𑀁 𑀦 𑀤𑀲𑁆𑀲𑀺𑀢𑀁 𑀲𑀺𑀬𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀺𑀝𑀧𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀺𑀢𑀼𑀁 𑀅𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄𑀲𑀻𑀫𑀝𑁆𑀞𑀁 𑀓𑀭𑀺𑀢𑁆𑀯𑀸 𑀧𑀼𑀭𑀸𑀡𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺 𑀦𑀸𑀫, 𑀦 𑀢𑀢𑁄 𑀧𑀭𑀦𑁆𑀢𑀺 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. 𑀩𑀤𑁆𑀥𑀸 𑀳𑁄𑀢𑀻𑀢𑀺 𑀧𑁄𑀭𑀸𑀡𑀓𑀯𑀺𑀳𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁 𑀅𑀫𑁆𑀩𑀦𑁆𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀼𑀭𑀸𑀡𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀸𑀤𑀻𑀦𑀁 𑀯𑀺𑀦𑀝𑁆𑀞𑀢𑁆𑀢𑀸 𑀅𑀚𑀸𑀦𑀦𑁆𑀢𑀸𑀦𑀁 𑀢𑀁 𑀧𑀼𑀭𑀸𑀡𑀯𑀺𑀳𑀸𑀭𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀁 𑀅𑀫𑁆𑀩𑀁. 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄𑀲𑀻𑀫𑀝𑁆𑀞𑀁 𑀓𑀭𑀺𑀢𑁆𑀯𑀸 𑀧𑀼𑀭𑀸𑀡𑀯𑀺𑀳𑀸𑀭𑀲𑀻𑀫𑀝𑁆𑀞𑀁 𑀚𑀫𑁆𑀩𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀫𑁆𑀩𑀚𑀫𑁆𑀩𑀽𑀦𑀁 𑀅𑀦𑁆𑀢𑀭𑁂 𑀬𑀁 𑀞𑀸𑀦𑀁, 𑀢𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀯𑁂𑀲𑁂𑀢𑁆𑀯𑀸 𑀩𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀼𑀭𑀸𑀡𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲 𑀕𑀸𑀫𑀝𑁆𑀞𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀅𑀦𑁆𑀢𑁄𑀲𑀻𑀫𑀝𑁆𑀞𑀸𑀬 𑀚𑀫𑁆𑀩𑀼𑀬𑀸 𑀲𑀳 𑀲𑀁𑀲𑀝𑁆𑀞𑀯𑀺𑀝𑀧𑀢𑁆𑀢𑁂𑀧𑀺 𑀲𑀻𑀫𑀸𑀬 𑀩𑀦𑁆𑀥𑀦𑀓𑀸𑀮𑁂 𑀯𑀺𑀧𑀢𑁆𑀢𑀺 𑀯𑀸 𑀧𑀘𑁆𑀙𑀸 𑀕𑀸𑀫𑀲𑀻𑀫𑀸𑀬 𑀲𑀳 𑀲𑀫𑁆𑀪𑁂𑀤𑁄 𑀯𑀸 𑀓𑀫𑁆𑀫𑀯𑀺𑀧𑀢𑁆𑀢𑀺 𑀯𑀸 𑀦𑀸𑀳𑁄𑀲𑀻𑀢𑀺 𑀫𑀼𑀔𑀢𑁄𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀤𑁂𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀧𑁆𑀧𑀳𑁄𑀦𑀓𑀁 𑀧𑀤𑁂𑀲𑀁. 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸𑀢𑀺𑀆𑀤𑀺𑀦𑀸 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀓𑀢𑁆𑀯𑀸 𑀩𑀤𑁆𑀥𑀲𑀻𑀫𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀨𑀼𑀲𑀸𑀧𑁂𑀢𑁆𑀯𑀸 𑀅𑀩𑁆𑀬𑀯𑀥𑀸𑀦𑁂𑀦 𑀩𑀤𑁆𑀥𑀲𑀻𑀫𑀸𑀧𑀺 𑀅𑀲𑀻𑀫𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸 𑀯𑀝𑁆𑀝𑀢𑀺 𑀏𑀯. 𑀲𑀸 𑀧𑀦 𑀤𑀼𑀩𑁆𑀩𑁄𑀥𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀘𑀢𑀼𑀭𑀗𑁆𑀕𑀼𑀮𑀸𑀤𑀺𑀓𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁. 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀲𑀻𑀫𑀢𑁄 𑀩𑀸𑀳𑀺𑀭𑀢𑁆𑀢𑀸 𑀩𑀦𑁆𑀥𑀦𑀓𑀸𑀮𑁂 𑀢𑀸𑀯 𑀲𑀫𑁆𑀪𑁂𑀤𑀤𑁄𑀲𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀓𑁂𑀯𑀮𑀜𑁆𑀘 𑀦𑀺𑀫𑀺𑀢𑁆𑀢𑀓𑀢𑁄 𑀏𑀯 𑀲𑀗𑁆𑀓𑀭𑀁 𑀓𑀭𑁄𑀢𑀺, 𑀅𑀣 𑀔𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑁄 𑀅𑀜𑁆𑀜𑁄𑀧𑀺 𑀭𑀼𑀓𑁆𑀔𑁄 𑀓𑀭𑁄𑀢𑀺 𑀏𑀯, 𑀢𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀟𑁆𑀠𑀦𑀓𑀭𑀼𑀓𑁆𑀔𑀸𑀤𑀬𑁄 𑀦 𑀯𑀝𑁆𑀝𑀦𑁆𑀢𑀺 𑀏𑀯. 𑀏𑀢𑁆𑀣 𑀘 𑀉𑀧𑀭𑀺 𑀤𑀺𑀲𑁆𑀲𑀫𑀸𑀦𑀔𑀦𑁆𑀥𑀲𑀸𑀔𑀸𑀤𑀺𑀧𑀯𑁂𑀲𑁂𑀲𑀼 𑀏𑀯 𑀲𑀗𑁆𑀓𑀭𑀤𑁄𑀲𑀲𑁆𑀲 𑀲𑀩𑁆𑀩𑀢𑁆𑀣 𑀤𑀲𑁆𑀲𑀺𑀢𑀢𑁆𑀢𑀸 𑀅𑀤𑀺𑀲𑁆𑀲𑀫𑀸𑀦𑀸𑀦𑀁 𑀫𑀽𑀮𑀸𑀦𑀁 𑀧𑀯𑁂𑀲𑁂𑀧𑀺 𑀪𑀽𑀫𑀺𑀕𑀢𑀺𑀓𑀢𑁆𑀢𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀲𑀺𑀚𑁆𑀛𑀢𑀺. 𑀲𑀘𑁂 𑀧𑀦 𑀫𑀽𑀮𑀸𑀦𑀺𑀧𑀺 𑀤𑀺𑀲𑁆𑀲𑀫𑀸𑀦𑀸𑀦𑀺 𑀦𑁂𑀯 𑀧𑀯𑀺𑀲𑀦𑁆𑀢𑀺, 𑀲𑀗𑁆𑀓𑀭𑁄𑀯, 𑀧𑀩𑁆𑀩𑀢𑀧𑀸𑀲𑀸𑀡𑀸 𑀧𑀦 𑀤𑀺𑀲𑁆𑀲𑀫𑀸𑀦𑀸𑀧𑀺 𑀪𑀽𑀫𑀺𑀕𑀢𑀺𑀓𑀸𑀬𑁂𑀯. 𑀬𑀤𑀺 𑀧𑀦 𑀩𑀦𑁆𑀥𑀦𑀓𑀸𑀮𑁂 𑀏𑀯 𑀏𑀓𑁄 𑀣𑀽𑀮𑀭𑀼𑀓𑁆𑀔𑁄 𑀉𑀪𑀬𑀫𑁆𑀧𑀺 𑀲𑀻𑀫𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀧𑀘𑁆𑀙𑀸 𑀩𑀤𑁆𑀥𑀸 𑀅𑀲𑀻𑀫𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀫𑀲𑀗𑁆𑀓𑀭𑀦𑁆𑀢𑀺 𑀲𑀻𑀫𑀲𑀫𑁆𑀪𑁂𑀤𑀁. 𑀬𑀁 𑀧𑀦𑁂𑀢𑁆𑀣 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁮) 𑀯𑀼𑀢𑁆𑀢𑀁 ‘‘𑀲𑀻𑀫𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀟𑁆𑀠𑀺𑀢𑁆𑀯𑀸 𑀲𑀻𑀫𑀧𑁆𑀧𑀤𑁂𑀲𑀁 𑀧𑀯𑀺𑀝𑁆𑀞𑁂 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀲𑁆𑀲 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀕𑀸𑀫𑀲𑀻𑀫𑀸𑀬𑀧𑀺 𑀲𑀳 𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀢𑀢𑁆𑀣𑀸𑀧𑀺 𑀳𑀺 𑀦𑀺𑀫𑀺𑀢𑁆𑀢𑁂 𑀯𑀟𑁆𑀠𑀺𑀢𑁂 𑀕𑀸𑀫𑀲𑀻𑀫𑀩𑀤𑁆𑀥𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀧𑀦 𑀅𑀯𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑁂𑀯 𑀲𑀗𑁆𑀓𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀤𑁄𑀲𑁄𑀯 𑀲𑀗𑁆𑀓𑀭𑀲𑀤𑁆𑀤𑁂𑀦 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁪𑁮) 𑀧𑀦 𑀦𑀺𑀤𑀸𑀦𑀯𑀲𑁂𑀦 ‘‘𑀬𑁂𑀲𑀁, 𑀪𑀺𑀓𑁆𑀔𑀯𑁂, 𑀲𑀻𑀫𑀸 𑀧𑀘𑁆𑀙𑀸 𑀲𑀫𑁆𑀫𑀢𑀸, 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀅𑀥𑀫𑁆𑀫𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀙𑀸 𑀲𑀫𑁆𑀫𑀢𑀸𑀬 𑀅𑀲𑀻𑀫𑀢𑁆𑀢𑁂 𑀯𑀼𑀢𑁆𑀢𑁂𑀧𑀺 𑀤𑁆𑀯𑀻𑀲𑀼 𑀕𑀸𑀫𑀲𑀻𑀫𑀸𑀲𑀼 𑀞𑀢𑁆𑀯𑀸 𑀤𑁆𑀯𑀻𑀳𑀺 𑀲𑀗𑁆𑀖𑁂𑀳𑀺 𑀲𑀫𑁆𑀪𑁂𑀤𑀁 𑀯𑀸 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀸 𑀓𑀢𑁆𑀯𑀸 𑀲𑀻𑀫𑀦𑁆𑀢𑀭𑀺𑀓𑀁 𑀅𑀝𑁆𑀞𑀧𑁂𑀢𑁆𑀯𑀸 𑀯𑀸 𑀭𑀼𑀓𑁆𑀔𑀧𑀸𑀭𑁄𑀳𑀸𑀤𑀺𑀲𑀫𑁆𑀩𑀦𑁆𑀥𑀁 𑀅𑀯𑀺𑀬𑁄𑀚𑁂𑀢𑁆𑀯𑀸 𑀯𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀓𑀫𑁆𑀫𑀯𑀸𑀘𑀸𑀦𑀺𑀝𑁆𑀞𑀸𑀧𑀦𑀯𑀲𑁂𑀦 𑀏𑀓𑀢𑁄 𑀲𑀫𑁆𑀫𑀢𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀫𑀸𑀦𑀁 𑀅𑀲𑀻𑀫𑀢𑀸 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁪𑁮) ‘‘𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀇𑀫𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀲𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀩𑀤𑁆𑀥𑀸 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀲𑀸 𑀧𑀤𑁂𑀲𑀦𑁆𑀢𑀺 𑀬𑀢𑁆𑀣 𑀞𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀧𑀤𑁂𑀲𑀁. 𑀬𑀢𑁆𑀣 𑀧𑀦 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀧𑀤𑁂𑀲𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀩𑀦𑁆𑀥𑀦𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀲𑀻𑀫𑀢𑁄 𑀩𑀸𑀳𑀺𑀭𑀢𑁆𑀢𑀸 𑀲𑀻𑀫𑀲𑀫𑁆𑀪𑁂𑀤𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀲𑀻𑀫𑀲𑀗𑁆𑀓𑀭𑀁 𑀓𑀭𑁄𑀢𑀻𑀢𑀺 𑀯𑀟𑁆𑀠𑀺𑀢𑁆𑀯𑀸 𑀲𑀻𑀫𑀧𑁆𑀧𑀤𑁂𑀲𑀁 𑀧𑀯𑀺𑀝𑁆𑀞𑁂 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀕𑀢𑀝𑁆𑀞𑀸𑀦𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀘 𑀧𑀦 𑀢𑀢𑁆𑀣 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀲𑀻𑀫𑀸 𑀢𑀢𑁆𑀢𑀓𑁂𑀦 𑀅𑀲𑀻𑀫𑀸 𑀳𑁄𑀢𑀺, 𑀤𑁆𑀯𑁂 𑀧𑀦 𑀲𑀻𑀫𑀸 𑀧𑀘𑁆𑀙𑀸 𑀯𑀟𑁆𑀠𑀺𑀢𑁂𑀦 𑀭𑀼𑀓𑁆𑀔𑁂𑀦 𑀅𑀚𑁆𑀛𑁄𑀢𑁆𑀣𑀝𑀸 𑀏𑀓𑀸𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀢𑁆𑀣 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀇𑀢𑀭𑀁 𑀲𑁄𑀥𑁂𑀢𑁆𑀯𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀘𑀢𑀼𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀲𑀻𑀫𑀸𑀩𑀦𑁆𑀥𑀦𑀯𑀺𑀦𑀺𑀘𑁆𑀙𑀬𑀓𑀣𑀸

𑀏𑀯𑀁 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀧𑀸𑀴𑀺𑀬𑀁 𑀲𑀻𑀫𑀓𑀣𑀸𑀬 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀸𑀦𑀦𑁆𑀢𑀭𑀜𑁆𑀘 𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀲𑁆𑀲 𑀆𑀕𑀢𑀢𑁆𑀢𑀸 𑀢𑀤𑀦𑀼𑀓𑁆𑀓𑀫𑁂𑀦 𑀲𑀻𑀫𑀸𑀯𑀺𑀦𑀺𑀘𑁆𑀙𑀬𑀢𑁄 𑀉𑀧𑁄𑀲𑀣𑀧𑀯𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑁂𑀧𑀺 𑀲𑀸𑀲𑀦𑀯𑀼𑀤𑁆𑀥𑀺𑀓𑀭𑀡𑀢𑁆𑀣𑀁 𑀉𑀧𑀲𑀫𑁆𑀧𑀤𑀸𑀤𑀺𑀯𑀺𑀦𑀬𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀪𑀽𑀢𑀁 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸𑀦𑀁 𑀮𑀚𑁆𑀚𑀺𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀸𑀲𑀢𑀺𑀯𑀻𑀭𑀺𑀬𑀚𑀦𑀦𑀢𑁆𑀣𑀁 𑀲𑀻𑀫𑀸𑀩𑀦𑁆𑀥𑀦𑀓𑀣𑀸 𑀅𑀫𑁆𑀳𑁂𑀳𑀺 𑀆𑀭𑀪𑀻𑀬𑀢𑁂. 𑀢𑀢𑁆𑀣 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀪𑀽𑀢𑀸 𑀲𑀻𑀫𑀸 𑀦𑀸𑀫 𑀩𑀤𑁆𑀥𑀅𑀩𑀤𑁆𑀥𑀯𑀲𑁂𑀦 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣𑀸𑀧𑀺 𑀩𑀤𑁆𑀥𑀲𑀻𑀫𑀸 𑀔𑀡𑁆𑀟𑀲𑀻𑀫𑀸, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀢𑀺𑀩𑁆𑀩𑀺𑀥𑀸 𑀳𑁄𑀢𑀺, 𑀢𑀣𑀸 𑀅𑀩𑀤𑁆𑀥𑀲𑀻𑀫𑀸𑀧𑀺 𑀕𑀸𑀫𑀲𑀻𑀫𑀸, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸, 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑁋

‘‘𑀔𑀡𑁆𑀟𑀲𑀫𑀸𑀦𑀲𑀁𑀯𑀸𑀲𑀸-𑀯𑀺𑀧𑁆𑀧𑀯𑀸𑀲𑀸𑀢𑀺 𑀪𑁂𑀤𑀢𑁄;

𑀇𑀢𑀺 𑀩𑀤𑁆𑀥𑀸 𑀢𑀺𑀥𑀸 𑀯𑀼𑀢𑁆𑀢𑀸, 𑀅𑀩𑀤𑁆𑀥𑀸𑀧𑀺 𑀢𑀺𑀥𑀸 𑀫𑀢𑀸.

‘‘𑀕𑀸𑀫𑀢𑁄 𑀉𑀤𑀓𑀼𑀓𑁆𑀔𑁂𑀧𑀸, 𑀲𑀢𑁆𑀢𑀩𑁆𑀪𑀦𑁆𑀢𑀭𑀢𑁄𑀧𑀺 𑀘;

𑀢𑀢𑁆𑀣 𑀕𑀸𑀫𑀧𑀭𑀺𑀘𑁆𑀙𑁂𑀤𑁄, 𑀕𑀸𑀫𑀲𑀻𑀫𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀩𑀤𑁆𑀥𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀦 𑀅𑀢𑀺𑀔𑀼𑀤𑁆𑀤𑀺𑀓𑀸, 𑀅𑀢𑀺𑀫𑀳𑀢𑀻, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸, 𑀙𑀸𑀬𑀸𑀦𑀺𑀫𑀺𑀢𑁆𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸, 𑀦𑀤𑀺𑀬𑀸 𑀲𑀫𑁆𑀫𑀢𑀸, 𑀲𑀫𑀼𑀤𑁆𑀤𑁂 𑀲𑀫𑁆𑀫𑀢𑀸, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸𑀢𑀺 𑀯𑀼𑀢𑁆𑀢𑀸 𑀇𑀫𑀸 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺, 𑀧𑀭𑀺𑀲𑀲𑀫𑁆𑀧𑀢𑁆𑀢𑀺, 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀸𑀬 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀁 𑀓𑀢𑁆𑀯𑀸 𑀧𑀞𑀫𑀁 𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑁂𑀦 𑀲𑀩𑁆𑀩𑀧𑀘𑁆𑀙𑀺𑀫𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀢𑀢𑁆𑀣 𑀏𑀓𑀸𑀤𑀲 𑀯𑀺𑀧𑀢𑁆𑀢𑀺𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀫𑁆𑀫𑀢𑀸 𑀲𑀻𑀫𑀸 𑀩𑀤𑁆𑀥𑀲𑀻𑀫𑀸 𑀦𑀸𑀫𑀸’’𑀢𑀺. 𑀏𑀢𑁂𑀦 𑀏𑀢𑁂𑀲𑀼 𑀏𑀓𑀸𑀤𑀲𑀲𑀼 𑀯𑀺𑀧𑀢𑁆𑀢𑀻𑀲𑀼 𑀏𑀓𑀸𑀬𑀧𑀺 𑀬𑀼𑀢𑁆𑀢𑀸𑀬, 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀻𑀲𑀼 𑀏𑀓𑀸𑀬𑀧𑀺 𑀅𑀬𑀼𑀢𑁆𑀢𑀸𑀬, 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀅𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸𑀬 𑀘 𑀲𑀢𑀺 𑀲𑀻𑀫𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀦 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀮𑀓𑁆𑀔𑀡𑀧𑀭𑀺𑀧𑀽𑀭𑀢𑁆𑀣𑀁 𑀫𑀳𑀦𑁆𑀢𑁄 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀻𑀫𑀸𑀩𑀦𑁆𑀥𑀦𑀓𑀸𑀮𑁂 𑀢𑀻𑀲𑀼 𑀲𑀫𑁆𑀧𑀢𑁆𑀢𑀻𑀲𑀼 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀧𑀞𑀫𑀁 𑀢𑀸𑀯 𑀕𑀸𑀫𑀲𑀻𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀏𑀢𑁆𑀣𑀸𑀳 ‘‘𑀦𑀦𑀼 𑀩𑀤𑁆𑀥𑀲𑀻𑀫𑀸 𑀯𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀅𑀣 𑀓𑀲𑁆𑀫𑀸 𑀕𑀸𑀫𑀲𑀻𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸’’𑀢𑀺? 𑀕𑀸𑀫𑀲𑀻𑀫𑀸𑀬𑀁 𑀞𑀢𑁆𑀯𑀸 𑀩𑀤𑁆𑀥𑀲𑀻𑀫𑀸𑀬 𑀩𑀦𑁆𑀥𑀺𑀢𑀩𑁆𑀩𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀲𑀫𑁆𑀫𑀢𑀸𑀬, 𑀪𑀺𑀓𑁆𑀔𑀯𑁂, 𑀲𑀻𑀫𑀸𑀬 𑀅𑀝𑁆𑀞𑀧𑀺𑀢𑀸𑀬 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀬𑀸 𑀢𑀲𑁆𑀲 𑀯𑀸 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸, 𑀦𑀺𑀕𑀫𑀲𑁆𑀲 𑀯𑀸 𑀦𑀺𑀕𑀫𑀲𑀻𑀫𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 (𑀫𑀳𑀸𑀯. 𑁧𑁪𑁭). 𑀇𑀥 𑀧𑀸𑀴𑀺𑀬𑀁 𑀲𑀭𑀽𑀧𑁂𑀦 𑀅𑀦𑀸𑀕𑀢𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) ‘‘𑀕𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀕𑀭𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀕𑀭𑀲𑀻𑀫𑀸𑀧𑀺 𑀕𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀬𑀁 𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀕𑀸𑀫𑀲𑀻𑀫𑀸 𑀦𑀸𑀫. 𑀬𑀁 𑀦𑀺𑀕𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀺𑀕𑀫𑀲𑀻𑀫𑀸 𑀦𑀸𑀫. 𑀬𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑀲𑁆𑀲 𑀦𑀕𑀭𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀕𑀭𑀲𑀻𑀫𑀸 𑀦𑀸𑀫. 𑀢𑀸 𑀲𑀩𑁆𑀩𑀸𑀧𑀺 𑀕𑀸𑀫𑀲𑀻𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀩𑀤𑁆𑀥𑀲𑀻𑀫𑀸 𑀯𑀺𑀬 𑀏𑀓𑀢𑁄 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀓𑀭𑀡𑀸𑀭𑀳𑀸 𑀳𑁄𑀦𑁆𑀢𑀺, 𑀈𑀤𑀺𑀲𑁂𑀬𑁂𑀯 𑀘 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀫𑀭𑀳𑀢𑀺, 𑀦 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀸𑀦𑀭𑀳𑁂 𑀧𑀤𑁂𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 ‘‘𑀬𑀢𑁆𑀢𑀓𑁂 𑀧𑀤𑁂𑀲𑁂 𑀢𑀲𑁆𑀲 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀪𑁄𑀚𑀓𑀸 𑀩𑀮𑀺𑀁 𑀮𑀪𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀅𑀧𑁆𑀧𑁄 𑀯𑀸 𑀳𑁄𑀢𑀼 𑀫𑀳𑀦𑁆𑀢𑁄 𑀯𑀸, 𑀕𑀸𑀫𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀘𑀦𑀢𑁄 𑀕𑀸𑀫𑀸𑀤𑀺𑀪𑁄𑀚𑀓𑀸𑀦𑀁 𑀩𑀮𑀺𑀮𑀪𑀦𑀝𑁆𑀞𑀸𑀦𑀁 𑀕𑀸𑀫𑀲𑀻𑀫𑀸 𑀳𑁄𑀢𑀺, 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀩𑀮𑀺𑀁 𑀅𑀮𑀪𑀦𑁆𑀢𑁄𑀧𑀺 𑀭𑀸𑀚𑀧𑀡𑁆𑀡𑁂 𑀆𑀭𑁄𑀧𑀺𑀢𑀧𑀤𑁂𑀲𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀲𑀻𑀫𑀸𑀬𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁭) ‘‘𑀩𑀮𑀺𑀁 𑀮𑀪𑀦𑁆𑀢𑀻𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. ‘𑀅𑀬𑀁 𑀕𑀸𑀫𑁄 𑀏𑀢𑁆𑀢𑀓𑁄 𑀓𑀭𑀻𑀲𑀪𑀸𑀕𑁄’𑀢𑀺𑀆𑀤𑀺𑀦𑀸 𑀧𑀦 𑀭𑀸𑀚𑀧𑀡𑁆𑀡𑁂𑀲𑀼 𑀆𑀭𑁄𑀧𑀺𑀢𑁂𑀲𑀼 𑀪𑀽𑀫𑀺𑀪𑀸𑀕𑁂𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀢𑀴𑀸𑀓𑀫𑀸𑀢𑀺𑀓𑀸𑀲𑀼𑀲𑀸𑀦𑀧𑀩𑁆𑀩𑀢𑀸𑀤𑀺𑀓𑁂 𑀧𑀤𑁂𑀲𑁂 𑀩𑀮𑀺𑀁 𑀦 𑀕𑀡𑁆𑀳𑀦𑁆𑀢𑀺, 𑀲𑁄𑀧𑀺 𑀕𑀸𑀫𑀲𑀻𑀫𑀸 𑀏𑀯. 𑀭𑀸𑀚𑀸𑀤𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀪𑀽𑀫𑀺𑀪𑀸𑀕𑁄 𑀳𑀺 𑀲𑀩𑁆𑀩𑁄𑀯 𑀞𑀧𑁂𑀢𑁆𑀯𑀸 𑀦𑀤𑀻𑀮𑁄𑀡𑀺𑀚𑀸𑀢𑀲𑁆𑀲𑀭𑁂 𑀕𑀸𑀫𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀅𑀬𑀁 𑀧𑀓𑀢𑀺𑀕𑀸𑀫𑀲𑀻𑀫𑀸 𑀦𑀸𑀫. ‘‘𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀓𑁆𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁, ‘𑀅𑀬𑀁 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁭) 𑀯𑀘𑀦𑀢𑁄 𑀭𑀸𑀚𑀸 ‘‘𑀧𑀓𑀢𑀺𑀕𑀸𑀫𑀓𑁆𑀔𑁂𑀢𑁆𑀢𑁂𑀬𑁂𑀯 𑀧𑀓𑀢𑀺𑀕𑀸𑀫𑀢𑁄 𑀯𑀺𑀲𑀼𑀁 𑀧𑀓𑀢𑀺𑀕𑀸𑀫𑁂𑀦 𑀅𑀲𑀫𑁆𑀫𑀺𑀲𑁆𑀲𑁄 𑀕𑀸𑀫𑁄 𑀳𑁄𑀢𑀽’’𑀢𑀺 𑀬𑀁 𑀧𑀤𑁂𑀲𑀁 𑀤𑁂𑀢𑀺, 𑀲𑁄 𑀧𑀤𑁂𑀲𑁄 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀦𑀸𑀫. 𑀇𑀢𑀺 𑀧𑀓𑀢𑀺𑀕𑀸𑀫𑀲𑀻𑀫𑀸 𑀘 𑀭𑀸𑀚𑀽𑀦𑀁 𑀇𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀘 𑀩𑀤𑁆𑀥𑀲𑀻𑀫𑀸 𑀯𑀺𑀬 𑀲𑀩𑁆𑀩𑀓𑀫𑁆𑀫𑀸𑀭𑀳𑀸, 𑀢𑀲𑁆𑀫𑀸 𑀅𑀪𑀺𑀦𑀯𑀩𑀤𑁆𑀥𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀳𑀺 𑀧𑀓𑀢𑀺𑀕𑀸𑀫𑀲𑀻𑀫𑀁 𑀯𑀸 𑀯𑀺𑀲𑀼𑀁𑀕𑀸𑀫𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀲𑁆𑀫𑀸 𑀲𑀸 𑀘 𑀇𑀢𑀭𑀸 𑀘 𑀧𑀓𑀢𑀺𑀕𑀸𑀫𑀦𑀕𑀭𑀦𑀺𑀕𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀬𑁂𑀯 𑀳𑁄𑀦𑁆𑀢𑀻’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁭) ‘‘𑀢𑀢𑁆𑀣 𑀳𑀺 𑀲𑀸 𑀘 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀸 𑀅𑀪𑀺𑀦𑀯𑀸 𑀘 𑀇𑀢𑀭𑀸 𑀘 𑀅𑀧𑀭𑀺𑀯𑀢𑁆𑀢𑀸 𑀧𑀓𑀢𑀺𑀕𑀸𑀫𑀲𑀻𑀫𑀸, 𑀬𑀣𑀸 𑀩𑀤𑁆𑀥𑀲𑀻𑀫𑀸𑀬𑀁 𑀲𑀩𑁆𑀩𑀁 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑁂𑀢𑀸𑀧𑀺 𑀲𑀩𑁆𑀩𑀓𑀫𑁆𑀫𑀸𑀭𑀳𑀢𑀸𑀲𑀤𑀺𑀲𑁂𑀦 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸, 𑀲𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁.

𑀓𑁂𑀘𑀺 𑀧𑀦 𑀆𑀘𑀭𑀺𑀬𑀸 ‘‘𑀫𑀬𑀁 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀢𑀲𑁆𑀫𑀸 𑀏𑀢𑁆𑀢𑀓𑁄 𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀯𑀺𑀲𑀼𑀁 𑀔𑁂𑀢𑁆𑀢𑀁 𑀳𑁄𑀢𑀽’’𑀢𑀺 𑀭𑀸𑀚𑀸𑀦𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀑𑀓𑀸𑀲𑁂 𑀓𑀢𑁂 ‘‘𑀇𑀤𑀁 𑀞𑀸𑀦𑀁 𑀯𑀺𑀲𑀼𑀁𑀕𑀸𑀫𑀓𑁆𑀔𑁂𑀢𑁆𑀢𑀁 𑀳𑁄𑀢𑀻’’𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀢𑀢𑁆𑀭𑀝𑁆𑀞𑁂𑀬𑁂𑀯 𑀪𑀺𑀓𑁆𑀔𑀽 𑀘 𑀳𑀢𑁆𑀣𑀧𑀸𑀲𑀸𑀦𑀬𑀦𑀸𑀤𑀺𑀦𑀸 𑀲𑁄𑀥𑁂𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀲𑀻𑀫𑀸𑀩𑀦𑁆𑀥𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀁 𑀓𑀭𑀡𑀁 ‘‘𑀅𑀬𑀁 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦, ‘‘𑀲𑀸 𑀘 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀸 𑀅𑀪𑀺𑀦𑀯𑀸 𑀘𑀸’’𑀢𑀺 𑀆𑀕𑀢𑁂𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸𑀯𑀘𑀦𑁂𑀦 𑀘 𑀲𑀫𑁂𑀦𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀓𑀣𑀁? 𑀅𑀝𑁆𑀞𑀓𑀣𑀸𑀯𑀘𑀦𑁂 𑀢𑀸𑀯 ‘‘𑀅𑀬𑀁 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀧𑀼𑀭𑀺𑀫𑀕𑀸𑀫𑁄𑀬𑁂𑀯 𑀕𑀸𑀫𑁄 𑀳𑁄𑀢𑀼, 𑀅𑀣 𑀔𑁄 𑀇𑀤𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀦𑀧𑀤𑁂𑀲𑁄𑀧𑀺 𑀯𑀺𑀲𑀼𑀁𑀬𑁂𑀯 𑀕𑀸𑀫𑁄 𑀳𑁄𑀢𑀽𑀢𑀺 𑀏𑀓𑀁𑀬𑁂𑀯 𑀕𑀸𑀫𑀓𑁆𑀔𑁂𑀢𑁆𑀢𑀁 𑀤𑁆𑀯𑁂 𑀕𑀸𑀫𑁂 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀻’’𑀢𑀺 𑀇𑀫𑀺𑀦𑀸 𑀕𑀸𑀫𑀪𑁄𑀚𑀓𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀧𑀓𑀸𑀲𑁂𑀢𑀺, 𑀇𑀥 𑀧𑀦 𑀦𑁂𑀯 𑀤𑁆𑀯𑁂 𑀕𑀸𑀫𑁂 𑀓𑀭𑁄𑀢𑀺, 𑀦 𑀘 𑀕𑀸𑀫𑀪𑁄𑀚𑀓𑀲𑁆𑀲 𑀤𑁂𑀢𑀺, 𑀓𑁂𑀯𑀮𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀬𑀸𑀯𑀓𑀸𑀮𑀺𑀓𑀯𑀲𑁂𑀦𑁂𑀯 𑀑𑀓𑀸𑀲𑀁 𑀓𑀭𑁄𑀢𑀺, 𑀏𑀯𑀁 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑀧𑀺 𑀲𑀫𑁂𑀦𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸𑀯𑀘𑀦𑁂𑀦𑀧𑀺 ‘‘𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀕𑀸𑀫𑀪𑀽𑀢𑀁 𑀔𑁂𑀢𑁆𑀢𑀁 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀕𑀸𑀫𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀪𑀺𑀦𑀯𑀸 𑀘𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀸𑀡𑀕𑀸𑀫𑀲𑀻𑀫𑀸 𑀘 𑀅𑀪𑀺𑀦𑀯𑀕𑀸𑀫𑀲𑀻𑀫𑀸 𑀘𑀸𑀢𑀺 𑀧𑀼𑀭𑀺𑀫𑀕𑀸𑀫𑁂𑀦 𑀅𑀫𑀺𑀲𑁆𑀲𑀁 𑀯𑀺𑀲𑀼𑀁𑀕𑀸𑀫𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀭𑀸𑀚𑀺𑀘𑁆𑀙𑀸𑀯𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀔𑁂𑀢𑁆𑀢𑀲𑁆𑀲 𑀯𑀺𑀲𑀼𑀁𑀕𑀸𑀫𑀪𑀽𑀢𑀪𑀸𑀯𑁄 𑀘 𑀅𑀪𑀺𑀦𑀯𑀪𑀸𑀯𑁂𑀦 𑀯𑀺𑀲𑀼𑀁𑀕𑀸𑀫𑀮𑀓𑁆𑀔𑀡𑀜𑁆𑀘 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀝𑀻𑀓𑀸𑀯𑀘𑀦𑁂𑀦𑀧𑀺 𑀲𑀫𑁂𑀦𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺.

𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀬𑀜𑁆𑀘 ‘‘𑀕𑀸𑀫𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀩𑁆𑀩𑀤𑀺𑀲𑀸𑀲𑀼 𑀲𑀫𑁆𑀫𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘𑀇𑀫𑀲𑁆𑀲 𑀧𑀤𑁂𑀲𑀲𑁆𑀲 𑀏𑀢𑁆𑀢𑀓𑁄 𑀓𑀭𑁄’𑀢𑀺 𑀏𑀯𑀁 𑀓𑀭𑁂𑀦 𑀦𑀺𑀬𑀫𑀺𑀢𑁄 𑀕𑀸𑀫𑀧𑁆𑀧𑀤𑁂𑀲𑁄’’𑀢𑀺 𑀏𑀯𑀁 𑀆𑀬𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀯𑀼𑀢𑁆𑀢𑀁, 𑀦 𑀅𑀦𑀼𑀫𑀢𑀺𑀓𑀭𑀡𑀫𑀢𑁆𑀢𑁂𑀦, 𑀢𑀲𑁆𑀫𑀸 𑀯𑀺𑀲𑀼𑀁𑀕𑀸𑀫𑀮𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀢𑀸𑀬 𑀧𑀓𑀢𑀺𑀕𑀸𑀫𑁂𑀦 𑀲𑀗𑁆𑀓𑀭𑁄 𑀳𑁄𑀢𑀺, 𑀦 𑀢𑀢𑁆𑀣 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀫𑀭𑀳𑀢𑀺, 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀓𑀭𑀡𑀸𑀭𑀳𑀧𑀤𑁂𑀲𑁂𑀬𑁂𑀯 𑀲𑀻𑀫𑀸𑀲𑀫𑀽𑀳𑀦𑀦𑀲𑀻𑀫𑀸𑀩𑀦𑁆𑀥𑀦𑀓𑀫𑁆𑀫𑀫𑁆𑀧𑀺 𑀓𑀭𑀡𑀸𑀭𑀳𑀁 𑀳𑁄𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀢𑁆𑀢𑀸 𑀢𑁂𑀲𑀁 𑀓𑀫𑁆𑀫𑀸𑀦𑀁, 𑀢𑀲𑁆𑀫𑀸 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀢𑀁 𑀓𑀭𑀡𑀁 𑀅𑀜𑁆𑀜𑁂 𑀆𑀘𑀭𑀺𑀬𑀸 𑀦 𑀇𑀘𑁆𑀙𑀦𑁆𑀢𑀺. 𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸 ‘‘𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀤𑁂𑀲𑀁 ‘𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’𑀢𑀺 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺, 𑀕𑀸𑀫𑀪𑁄𑀚𑀓𑁄 𑀘 𑀢𑀢𑁄 𑀩𑀮𑀺𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀤𑀸 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀺, 𑀦 𑀢𑀢𑁄 𑀧𑀼𑀩𑁆𑀩𑁂’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀢𑀁 𑀯𑀘𑀦𑀁 ‘‘𑀏𑀯𑀁 𑀓𑀭𑁂𑀦 𑀦𑀺𑀬𑀫𑀺𑀢𑁄 𑀧𑀤𑁂𑀲𑁄’’𑀢𑀺 𑀯𑀺𑀦𑀺𑀘𑁆𑀙𑀬𑀝𑀻𑀓𑀸𑀯𑀘𑀦𑀜𑁆𑀘 ‘‘𑀕𑀸𑀫𑀸𑀤𑀻𑀦𑀁 𑀓𑀭𑀕𑁆𑀕𑀸𑀳𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀫𑀦𑁆𑀢𑀢𑁄 𑀧𑀤𑁂𑀲𑁄 𑀕𑀸𑀫𑀲𑀻𑀫𑀸’’𑀢𑀺 𑀲𑀻𑀫𑀸𑀮𑀗𑁆𑀓𑀸𑀭𑀕𑀡𑁆𑀞𑀺𑀯𑀘𑀦𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸, 𑀢𑁂𑀲𑀼 𑀧𑀦 ‘‘𑀇𑀫𑀲𑁆𑀲 𑀧𑀤𑁂𑀲𑀲𑁆𑀲 𑀏𑀢𑁆𑀢𑀓𑁄 𑀓𑀭𑁄’’𑀢𑀺 𑀏𑀯𑀁 𑀓𑀭𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀯𑀼𑀢𑁆𑀢𑀁, 𑀦 𑀕𑀸𑀫𑀪𑁄𑀚𑀓𑀲𑁆𑀲 𑀩𑀮𑀺𑀕𑁆𑀕𑀳𑀡𑀁. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀻’’𑀢𑀺 𑀤𑀸𑀦𑀫𑁂𑀯 𑀯𑀤𑀢𑀺, 𑀦 ‘‘𑀕𑀸𑀫𑀪𑁄𑀚𑀓𑁄 𑀘 𑀩𑀮𑀺𑀁 𑀕𑀡𑁆𑀳𑀸𑀢𑀻’’𑀢𑀺 𑀧𑀝𑀺𑀕𑁆𑀕𑀳𑀡𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀯𑀘𑀦𑀁 𑀅𑀜𑁆𑀜𑁂 𑀧𑀡𑁆𑀟𑀺𑀢𑀸 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 ‘‘𑀇𑀫𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀏𑀢𑁆𑀢𑀓𑀓𑀭𑀻𑀲𑀫𑀢𑁆𑀢𑁄 𑀧𑀤𑁂𑀲𑁄 𑀧𑀼𑀭𑀺𑀫𑀕𑀸𑀫𑀢𑁄 𑀯𑀺𑀲𑀼𑀁𑀕𑀸𑀫𑁄 𑀳𑁄𑀢𑀽’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀲𑁄 𑀧𑀤𑁂𑀲𑁄 𑀩𑀮𑀺𑀁 𑀧𑀝𑀺𑀕𑁆𑀕𑀳𑀺𑀢𑁄 𑀯𑀸 𑀳𑁄𑀢𑀼 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑁄 𑀯𑀸, 𑀯𑀺𑀲𑀼𑀁𑀕𑀸𑀫𑁄 𑀦𑀸𑀫 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀧𑀓𑀢𑀺𑀕𑀸𑀫𑀮𑀓𑁆𑀔𑀡𑀜𑁆𑀘 𑀯𑀺𑀲𑀼𑀁𑀕𑀸𑀫𑀮𑀓𑁆𑀔𑀡𑀜𑁆𑀘 𑀢𑀣𑀢𑁄 𑀜𑀢𑁆𑀯𑀸 𑀩𑀤𑁆𑀥𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁄 𑀬𑀤𑀺 𑀧𑀓𑀢𑀺𑀕𑀸𑀫𑀲𑀻𑀫𑀸 𑀦𑀸𑀢𑀺𑀯𑀺𑀢𑁆𑀣𑀸𑀭𑀸 𑀳𑁄𑀢𑀺 𑀲𑀼𑀔𑀭𑀓𑁆𑀔𑀺𑀢𑀸, 𑀢𑀫𑁂𑀯 𑀧𑀓𑀢𑀺𑀕𑀸𑀫𑀲𑀻𑀫𑀁 𑀲𑀼𑀝𑁆𑀞𑀼 𑀭𑀓𑁆𑀔𑀸𑀧𑁂𑀢𑁆𑀯𑀸 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀬𑀤𑀺 𑀧𑀦 𑀧𑀓𑀢𑀺𑀕𑀸𑀫𑀲𑀻𑀫𑀸 𑀅𑀢𑀺𑀯𑀺𑀢𑁆𑀣𑀸𑀭𑀸 𑀳𑁄𑀢𑀺, 𑀦𑀺𑀕𑀫𑀲𑀻𑀫𑀸, 𑀦𑀕𑀭𑀲𑀻𑀫𑀸 𑀯𑀸 𑀳𑁄𑀦𑁆𑀢𑀺, 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀲𑀜𑁆𑀘𑀭𑀡𑀝𑁆𑀞𑀸𑀦𑀢𑁆𑀢𑀸 𑀲𑁄𑀥𑁂𑀢𑀼𑀁 𑀯𑀸 𑀭𑀓𑁆𑀔𑀺𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀧𑀣𑀯𑀺𑀲𑁆𑀲𑀭𑀭𑀸𑀚𑀽𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀯𑀺𑀲𑀼𑀁𑀕𑀸𑀫𑀲𑀻𑀫𑀸𑀬 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀲𑀼𑀭𑀓𑁆𑀔𑀺𑀢𑀁 𑀓𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀓𑀣𑀁 𑀧𑀦 𑀲𑀼𑀝𑁆𑀞𑀼 𑀲𑁄𑀥𑀦𑀜𑁆𑀘 𑀲𑀼𑀝𑁆𑀞𑀼 𑀭𑀓𑁆𑀔𑀡𑀜𑁆𑀘 𑀓𑀸𑀢𑀩𑁆𑀩𑀁? 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀦 𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽 𑀢𑀲𑁆𑀲 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀢𑁆𑀯𑀸 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀁, 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀁 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸 𑀤𑀺𑀲𑀸𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀦𑀺𑀲𑁆𑀲𑀜𑁆𑀘𑀸𑀭𑀲𑀫𑀬𑁂 𑀲𑀘𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀬𑁂 𑀢𑀢𑁆𑀣 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽𑀦𑀁 ‘‘𑀫𑀬𑀁 𑀅𑀚𑁆𑀚 𑀲𑀻𑀫𑀁 𑀩𑀦𑁆𑀥𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀲𑀓𑀲𑀓𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀢𑁄 𑀫𑀸 𑀦𑀺𑀓𑁆𑀔𑀫𑀣𑀸’’𑀢𑀺 𑀧𑁂𑀲𑁂𑀢𑀩𑁆𑀩𑀁. 𑀬𑁂 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀼 𑀪𑀺𑀓𑁆𑀔𑀽 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀸𑀢𑁂𑀢𑀩𑁆𑀩𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀭𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀦 𑀪𑀺𑀓𑁆𑀔𑀽𑀲𑀼 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁂 𑀆𑀳𑀝𑁂 𑀢𑁂𑀲𑀼 𑀢𑁂𑀲𑀼 𑀫𑀕𑁆𑀕𑁂𑀲𑀼 𑀘 𑀦𑀤𑀻𑀢𑀺𑀢𑁆𑀣𑀕𑀸𑀫𑀤𑁆𑀯𑀸𑀭𑀸𑀤𑀻𑀲𑀼 𑀘 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀲𑀻𑀖𑀁 𑀲𑀻𑀖𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀢𑁆𑀣𑀜𑁆𑀘 𑀩𑀳𑀺𑀲𑀻𑀫𑀓𑀭𑀡𑀢𑁆𑀣𑀜𑁆𑀘 𑀆𑀭𑀸𑀫𑀺𑀓𑁂 𑀘𑁂𑀯 𑀲𑀫𑀡𑀼𑀤𑁆𑀤𑁂𑀲𑁂 𑀘 𑀞𑀧𑁂𑀢𑁆𑀯𑀸 𑀪𑁂𑀭𑀺𑀲𑀜𑁆𑀜𑀁 𑀯𑀸 𑀲𑀗𑁆𑀔𑀲𑀜𑁆𑀜𑀁 𑀯𑀸 𑀓𑀢𑁆𑀯𑀸 𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸𑀢𑀺.

𑀦𑀦𑀼 𑀘 𑀇𑀤𑀁 𑀲𑁄𑀥𑀦𑀁 𑀭𑀓𑁆𑀔𑀡𑀜𑁆𑀘 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂𑀬𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 𑀇𑀥 𑀲𑀻𑀫𑀸𑀲𑀫𑀽𑀳𑀦𑀦𑁂 𑀯𑀼𑀢𑁆𑀢𑀦𑁆𑀢𑀺? 𑀇𑀫𑀲𑁆𑀲𑀧𑀺 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀲𑁆𑀲 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀢𑁆𑀢𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀚𑀦𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀤𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀁 𑀦𑀸𑀫 𑀬𑀤𑀺 𑀧𑁄𑀭𑀸𑀡𑀸 𑀩𑀤𑁆𑀥𑀲𑀻𑀫𑀸 𑀅𑀢𑁆𑀣𑀺, 𑀢𑀤𑀝𑁆𑀞𑀓𑀲𑀗𑁆𑀖𑁂 𑀳𑀢𑁆𑀣𑀧𑀸𑀲𑀕𑀢𑁂 𑀅𑀜𑁆𑀜𑁂𑀲𑀼 𑀪𑀺𑀓𑁆𑀔𑀽𑀲𑀼 𑀕𑀸𑀫𑀲𑀻𑀫𑀁 𑀧𑀯𑀺𑀝𑁆𑀞𑁂𑀲𑀼𑀧𑀺 𑀓𑀫𑁆𑀫𑀪𑁂𑀤𑁄 𑀦𑀢𑁆𑀣𑀺. 𑀬𑀤𑀺 𑀧𑁄𑀭𑀸𑀡𑀸 𑀩𑀤𑁆𑀥𑀲𑀻𑀫𑀸 𑀦𑀢𑁆𑀣𑀺, 𑀏𑀯𑀫𑁆𑀧𑀺 𑀲𑀢𑀺 𑀓𑁂𑀯𑀮𑀁 𑀕𑀸𑀫𑀲𑀻𑀫𑀸𑀪𑀽𑀢𑀢𑁆𑀢𑀸 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑁂 𑀅𑀲𑀫𑁆𑀧𑀚𑁆𑀚𑀦𑁆𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀲𑁄𑀥𑀦𑀸 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀲𑀫𑀽𑀳𑀦𑀺𑀢𑀩𑁆𑀩𑀸 𑀧𑁄𑀭𑀸𑀡𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀲𑀘𑁂 𑀳𑀺 𑀫𑀳𑀢𑀺𑀬𑀸 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀸𑀬 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸𑀢𑀺 𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀢𑀲𑁆𑀲𑀸𑀬𑁂𑀯 𑀲𑀻𑀫𑀸𑀬 𑀅𑀜𑁆𑀜𑀲𑁆𑀫𑀺𑀁 𑀧𑀤𑁂𑀲𑁂 𑀪𑀺𑀓𑁆𑀔𑀼𑀫𑁆𑀳𑀺 𑀧𑀯𑀺𑀝𑁆𑀞𑁂 𑀅𑀚𑀸𑀦𑀦𑁆𑀢𑀲𑁆𑀲𑀧𑀺 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀳𑀼𑀲𑁆𑀲𑀸𑀳𑁂𑀦 𑀲𑁄𑀥𑁂𑀢𑀩𑁆𑀩𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀕𑀸𑀫𑀲𑀻𑀫𑀲𑁄𑀥𑀦𑀁 ‘‘𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀸 𑀬𑀼𑀢𑁆𑀢𑀸 𑀦𑀸𑀫 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀬𑀸𑀯𑀢𑀺𑀓𑀸 𑀢𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀩𑀤𑁆𑀥𑀲𑀻𑀫𑀁 𑀯𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀯𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽, 𑀢𑁂 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀢𑁆𑀯𑀸 𑀙𑀦𑁆𑀤𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀲𑀫𑁆𑀫𑀢𑀸’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀆𑀕𑀢𑀢𑁆𑀢𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁄 ‘‘𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀫𑀼𑀘𑁆𑀘𑀦𑀢𑁆𑀣𑀁 𑀲𑀻𑀫𑀲𑀫𑀽𑀳𑀦𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀲𑀻𑀫𑀸𑀬 𑀅𑀲𑀫𑀽𑀳𑀢𑀸𑀬 𑀲𑀢𑀺 𑀓𑀣𑀁 𑀯𑀺𑀧𑀢𑁆𑀢𑀺𑀤𑁆𑀯𑀬𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺, 𑀢𑀣𑀸 𑀲𑁄𑀥𑀺𑀢𑀸𑀬𑀧𑀺 𑀕𑀸𑀫𑀲𑀻𑀫𑀸𑀬. 𑀬𑀤𑀺 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀸 𑀯𑀺𑀚𑁆𑀚𑀫𑀸𑀦𑀸 𑀪𑀯𑁂𑀬𑁆𑀬, 𑀢𑀲𑁆𑀲𑀸 𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑀸 𑀦𑀯𑀁 𑀩𑀤𑁆𑀥𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀼𑀁. 𑀧𑁄𑀭𑀸𑀡𑀲𑀻𑀫𑀸𑀬 𑀳𑀺 𑀦𑀺𑀫𑀺𑀢𑁆𑀢𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑁂 𑀧𑁄𑀭𑀸𑀡𑀲𑀻𑀫𑀸𑀬 𑀅𑀦𑁆𑀢𑁄 𑀞𑀺𑀢𑀁 𑀅𑀜𑁆𑀜𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀦𑀯𑀁 𑀩𑀤𑁆𑀥𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀼𑀁, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑁄𑀭𑀸𑀡𑀓𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀅𑀫𑁆𑀩𑁄 𑀘𑁂𑀯 𑀚𑀫𑁆𑀩𑀽 𑀘𑀸𑀢𑀺 𑀤𑁆𑀯𑁂 𑀭𑀼𑀓𑁆𑀔𑀸 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀯𑀺𑀝𑀧𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀅𑀫𑁆𑀩𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀚𑀫𑁆𑀩𑀽. 𑀯𑀺𑀳𑀸𑀭𑀲𑀻𑀫𑀸 𑀘 𑀚𑀫𑁆𑀩𑀼𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀅𑀫𑁆𑀩𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀤𑁆𑀥𑀸 𑀳𑁄𑀢𑀺, 𑀅𑀣 𑀧𑀘𑁆𑀙𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁 𑀯𑀺𑀳𑀸𑀭𑁂 𑀓𑀢𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸 𑀪𑀺𑀓𑁆𑀔𑀽 𑀅𑀫𑁆𑀩𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀚𑀫𑁆𑀩𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀩𑀦𑁆𑀥𑀦𑁆𑀢𑀺, 𑀲𑀻𑀫𑀸𑀬 𑀲𑀻𑀫𑀸 𑀲𑀫𑁆𑀪𑀺𑀦𑁆𑀦𑀸 𑀦𑀸𑀫 𑀳𑁄𑀢𑀻’’𑀢𑀺. 𑀧𑁄𑀭𑀸𑀡𑀲𑀻𑀫𑀸𑀬 𑀘 𑀏𑀓𑀤𑁂𑀲𑀁 𑀯𑀸 𑀲𑀓𑀮𑀧𑁄𑀭𑀸𑀡𑀲𑀻𑀫𑀁 𑀯𑀸 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀦𑀯𑀁 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀼𑀁, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸 𑀦𑀸𑀫 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀧𑀭𑁂𑀲𑀁 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸. 𑀲𑀘𑁂 𑀳𑀺 𑀧𑀭𑁂𑀲𑀁 𑀩𑀤𑁆𑀥𑀲𑀻𑀫𑀁 𑀲𑀓𑀮𑀁 𑀯𑀸 𑀢𑀲𑁆𑀲𑀸 𑀧𑀤𑁂𑀲𑀁 𑀯𑀸 𑀅𑀦𑁆𑀢𑁄 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑀸 𑀦𑀸𑀫 𑀳𑁄𑀢𑀻’’𑀢𑀺.

𑀬𑀲𑁆𑀫𑀺𑀁 𑀧𑀤𑁂𑀲𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀣 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀜𑁆𑀜𑁂𑀲𑀁 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀧𑁆𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄 𑀓𑀭𑁄𑀦𑁆𑀢𑁄 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀺 𑀦𑀸𑀫. 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀦𑀓𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀓𑀮𑀫𑁆𑀧𑀺 𑀅𑀜𑁆𑀜𑁂𑀲𑀁 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀸𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀅𑀦𑁆𑀢𑁄 𑀓𑀭𑁄𑀦𑁆𑀢𑁄 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀢𑀺 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀁 (𑀓𑀗𑁆𑀔𑀸. 𑀅𑀪𑀺. 𑀝𑀻. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀢𑀲𑁆𑀲𑀸 𑀧𑀤𑁂𑀲𑀦𑁆𑀢𑀺 𑀢𑀲𑁆𑀲𑀸 𑀏𑀓𑀤𑁂𑀲𑀁, 𑀬𑀢𑁆𑀣 𑀞𑀢𑁆𑀯𑀸 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀢𑀸𑀤𑀺𑀲𑀁 𑀏𑀓𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁆𑀣 𑀧𑀦 𑀞𑀺𑀢𑁂𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀸𑀤𑀺𑀲𑀁 𑀧𑀤𑁂𑀲𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺 𑀦𑀸𑀫, 𑀦 𑀢𑀼 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁮) ‘‘𑀬𑀢𑁆𑀣 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀢𑁆𑀢𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀲𑀻𑀫𑀸𑀬 𑀓𑀭𑁄𑀦𑁆𑀢𑀸 𑀲𑀫𑁆𑀪𑀺𑀦𑁆𑀤𑀦𑁆𑀢𑀺, 𑀘𑀢𑀼𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀧𑀳𑁄𑀦𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀓𑀮𑀫𑁆𑀧𑀺 𑀅𑀦𑁆𑀢𑁄 𑀓𑀭𑁄𑀦𑁆𑀢𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀳𑁄𑀢𑀼, 𑀢𑀲𑁆𑀫𑀺𑀁 𑀕𑀸𑀫𑀲𑀻𑀫𑀧𑀭𑀺𑀘𑁆𑀙𑁂𑀤𑁂 𑀧𑁄𑀭𑀸𑀡𑀓𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀯𑀺𑀧𑀢𑁆𑀢𑀺𑀤𑁆𑀯𑀬𑀫𑁄𑀘𑀦𑀢𑁆𑀣𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀁 𑀲𑀸𑀢𑁆𑀣𑀓𑀁, 𑀅𑀯𑀺𑀚𑁆𑀚𑀫𑀸𑀦𑀸𑀬 𑀓𑀣𑀁 𑀲𑀸𑀢𑁆𑀣𑀓𑀁 𑀪𑀯𑁂𑀬𑁆𑀬𑀸𑀢𑀺 𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀁 𑀅𑀓𑀢𑁆𑀯𑀸 𑀅𑀪𑀺𑀦𑀯𑀲𑀻𑀫𑀸𑀬 𑀩𑀚𑁆𑀛𑀫𑀸𑀦𑀸𑀬 𑀲𑀗𑁆𑀓𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑁆𑀚𑀢𑀦𑀸 𑀕𑀡𑀦𑀧𑀣𑀁 𑀯𑀻𑀢𑀺𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀓𑀭𑀡𑀢𑁆𑀣𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑀺. 𑀲𑀸 𑀲𑀻𑀫𑀸 𑀏𑀢𑁆𑀣 𑀅𑀢𑁆𑀣𑀺, 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 ‘‘𑀅𑀫𑁆𑀳𑀸𑀓𑀁 𑀲𑀻𑀫𑀸𑀩𑀦𑁆𑀥𑀦𑀝𑁆𑀞𑀸𑀦𑁂 𑀧𑁄𑀭𑀸𑀡𑀓𑀲𑀻𑀫𑀸 𑀪𑀯𑁂𑀬𑁆𑀬 𑀦𑀼 𑀔𑁄’’𑀢𑀺 𑀲𑀗𑁆𑀓𑀸 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀲𑀸 𑀅𑀪𑀺𑀦𑀯𑀲𑀻𑀫𑀸 𑀘 𑀆𑀲𑀗𑁆𑀓𑀦𑀻𑀬𑀸 𑀳𑁄𑀢𑀻𑀢𑀺 𑀲𑀻𑀫𑀸𑀬𑀁 𑀓𑀢𑀁 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀫𑁆𑀧𑀺 𑀆𑀲𑀗𑁆𑀓𑀦𑀻𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀪𑀺𑀦𑀯𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀳𑀺 𑀬𑀢𑀺𑀧𑀼𑀗𑁆𑀕𑀯𑁂𑀳𑀺 𑀅𑀯𑀲𑁆𑀲𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺. 𑀲𑀫𑀽𑀳𑀦𑀦𑁆𑀢𑁂𑀳𑀺 𑀧𑀦 ‘‘𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑀽𑀳𑀦𑀦𑁆𑀢𑁂𑀦 𑀧𑀞𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑀽𑀳𑀦𑁆𑀢𑀩𑁆𑀩𑁄, 𑀧𑀘𑁆𑀙𑀸 𑀲𑀻𑀫𑀸 𑀲𑀫𑀽𑀳𑀦𑁆𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀘𑀦𑀢𑁄 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀢𑀲𑁆𑀫𑀺𑀁 𑀲𑀫𑀽𑀳𑀦𑀦𑀓𑀸𑀮𑁂 𑀘 ‘‘𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦 𑀲𑀫𑀽𑀳𑀦𑁆𑀢𑀩𑁆𑀩𑀸, 𑀢𑀣𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀞𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀧𑀺. 𑀔𑀡𑁆𑀟𑀲𑀻𑀫𑀸𑀬 𑀧𑀦 𑀞𑀺𑀢𑁂𑀦 𑀔𑀡𑁆𑀟𑀲𑀻𑀫𑀸𑀯 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀢𑀣𑀸 𑀇𑀢𑀭𑀸𑀬 𑀞𑀺𑀢𑁂𑀦 𑀇𑀢𑀭𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑀯𑀘𑀦𑀢𑁄 𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸𑀯 𑀔𑀡𑁆𑀟𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀫𑀳𑀸𑀲𑀻𑀫𑀸𑀬𑀫𑁂𑀯 𑀞𑀢𑁆𑀯𑀸 𑀫𑀳𑀸𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀞𑀢𑁆𑀯𑀸 𑀅𑀜𑁆𑀜𑀸 𑀲𑀻𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀬𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀫𑀳𑀸𑀲𑀻𑀫𑀁 𑀯𑀤𑀢𑀺 𑀢𑀢𑁆𑀣𑁂𑀯 𑀬𑁂𑀪𑀼𑀬𑁆𑀬𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀦𑀢𑁄.

‘‘𑀢𑀢𑁆𑀣 𑀲𑀘𑁂 𑀔𑀡𑁆𑀟𑀲𑀻𑀫𑀜𑁆𑀘 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀜𑁆𑀘 𑀚𑀸𑀦𑀦𑁆𑀢𑀺, 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀔𑀡𑁆𑀟𑀲𑀻𑀫𑀁 𑀧𑀦 𑀅𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁𑀬𑁂𑀯 𑀚𑀸𑀦𑀦𑁆𑀢𑀸 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼 𑀞𑀢𑁆𑀯𑀸 𑀅𑀧𑁆𑀧𑁂𑀯 𑀦𑀸𑀫 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀧𑀝𑀺𑀩𑀦𑁆𑀥𑀺𑀢𑀼𑀁 𑀧𑀦 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯. 𑀲𑀘𑁂 𑀩𑀦𑁆𑀥𑁂𑀬𑁆𑀬𑀼𑀁, 𑀲𑀻𑀫𑀸𑀲𑀫𑁆𑀪𑁂𑀤𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀅𑀯𑀺𑀳𑀸𑀭𑀁 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀬𑁂 𑀧𑀦 𑀉𑀪𑁄𑀧𑀺 𑀦 𑀚𑀸𑀦𑀦𑁆𑀢𑀺, 𑀢𑁂𑀦𑁂𑀯 𑀲𑀫𑀽𑀳𑀦𑀺𑀢𑀼𑀁 𑀦 𑀩𑀦𑁆𑀥𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀅𑀬𑀜𑁆𑀳𑀺 𑀲𑀻𑀫𑀸 𑀦𑀸𑀫 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀲𑀻𑀫𑀸 𑀳𑁄𑀢𑀺 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀯𑀸, 𑀦 𑀘 𑀲𑀓𑁆𑀓𑀸 𑀲𑀻𑀫𑀁 𑀅𑀚𑀸𑀦𑀦𑁆𑀢𑁂𑀳𑀺 𑀓𑀫𑁆𑀫𑀯𑀸𑀘𑀸 𑀓𑀸𑀢𑀼𑀁, 𑀢𑀲𑁆𑀫𑀸 𑀦 𑀲𑀫𑀽𑀳𑀦𑀺𑀢𑀩𑁆𑀩𑀸, 𑀲𑀸𑀥𑀼𑀓𑀁 𑀧𑀦 𑀜𑀢𑁆𑀯𑀸𑀬𑁂𑀯 𑀲𑀫𑀽𑀳𑀦𑀺𑀢𑀩𑁆𑀩𑀸 𑀘 𑀩𑀦𑁆𑀥𑀺𑀢𑀩𑁆𑀩𑀸 𑀘𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑀯𑀘𑀦𑀢𑁄 ‘‘𑀇𑀤𑀸𑀦𑀺 𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀕𑀸𑀫𑀲𑀻𑀫𑀸𑀬 𑀅𑀦𑁆𑀢𑁄 𑀔𑀡𑁆𑀟𑀲𑀻𑀫𑀫𑀳𑀸𑀲𑀻𑀫𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀢𑀸𑀲𑀁 𑀲𑀻𑀫𑀸𑀦𑀁 𑀧𑀭𑀺𑀘𑁆𑀙𑁂𑀤𑀜𑁆𑀘 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀚𑀸𑀦𑀦𑁆𑀢𑀸 𑀪𑀺𑀓𑁆𑀔𑀽 𑀢𑀸 𑀧𑁄𑀭𑀸𑀡𑀲𑀻𑀫𑀸𑀬𑁄 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀧𑁄𑀭𑀸𑀡𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀘 𑀓𑀣𑀁 𑀅𑀪𑀺𑀦𑀯𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀲𑀓𑁆𑀓𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀫𑁆𑀧𑀭𑁂𑀳𑀺 𑀆𑀘𑀭𑀺𑀬𑁂𑀳𑀺 𑀲𑀫𑁆𑀫𑀸 𑀯𑀺𑀦𑀺𑀘𑁆𑀙𑀺𑀢𑀁 𑀅𑀦𑀼𑀮𑁄𑀫𑀦𑀬𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀉𑀲𑁆𑀲𑀸𑀳𑀁 𑀓𑀭𑀺𑀢𑁆𑀯𑀸 𑀅𑀗𑁆𑀕𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑁆𑀫𑀸 𑀯𑀺𑀳𑀺𑀢𑀦𑀬𑁂𑀦 𑀧𑁄𑀭𑀸𑀡𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺.

𑀓𑀣𑀁? 𑀢𑀲𑁆𑀫𑀺𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀸𑀮𑁂 𑀬𑀤𑀺 𑀧𑀓𑀢𑀺𑀕𑀸𑀫𑀲𑀻𑀫𑀸𑀬𑀁 𑀆𑀭𑀤𑁆𑀥𑀁, 𑀢𑀁 𑀧𑀓𑀢𑀺𑀕𑀸𑀫𑀧𑀭𑀺𑀘𑁆𑀙𑁂𑀤𑀁, 𑀬𑀤𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸𑀬𑀁 𑀆𑀭𑀤𑁆𑀥𑀁, 𑀢𑀁 𑀯𑀺𑀲𑀼𑀁𑀕𑀸𑀫𑀧𑀭𑀺𑀘𑁆𑀙𑁂𑀤𑀁 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀧𑁆𑀧𑀯𑀺𑀲𑀦𑀢𑁆𑀣𑀸𑀬 𑀲𑀫𑀦𑁆𑀢𑀢𑁄 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀼𑀁 𑀲𑀫𑀢𑁆𑀣𑁂𑀦 𑀩𑁆𑀬𑀢𑁆𑀢𑀺𑀩𑀮𑀲𑀫𑁆𑀧𑀦𑁆𑀦𑁂𑀦 𑀯𑀺𑀦𑀬𑀥𑀭𑁂𑀦 𑀲𑀳 𑀲𑀫𑀸𑀦𑀲𑀁𑀯𑀸𑀲𑀓𑁂 𑀮𑀚𑁆𑀚𑀺𑀧𑁂𑀲𑀮𑁂 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑁂 𑀪𑀺𑀓𑁆𑀔𑀽𑀦𑀁 𑀧𑀓𑀢𑀢𑁆𑀢𑀪𑀸𑀯𑀲𑁆𑀲 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀸 𑀢𑀢𑁄 𑀅𑀥𑀺𑀓𑀧𑁆𑀧𑀫𑀸𑀡𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀩𑀦𑁆𑀥𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀁 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀘 𑀅𑀦𑁆𑀢𑁄 𑀘 𑀲𑀩𑁆𑀩𑀢𑁆𑀣 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑀫𑀢𑁆𑀢𑁂 𑀧𑀤𑁂𑀲𑁂 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑁆𑀧𑀫𑀸𑀡𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀞𑀸𑀦𑁂 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀸, 𑀦𑀺𑀲𑀻𑀤𑀦𑁆𑀢𑀸 𑀯𑀸 𑀳𑀼𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀁, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀓𑀢𑁂 𑀧𑁄𑀭𑀸𑀡𑀲𑀻𑀫𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀧𑀘𑁆𑀙𑀺𑀫𑀦𑁆𑀢𑁂𑀦 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀦𑀸𑀭𑀳𑀢𑁆𑀢𑀸 𑀲𑀻𑀫𑀸𑀬 𑀫𑀜𑁆𑀘𑀧𑁆𑀧𑀫𑀸𑀡𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀸 𑀪𑀺𑀓𑁆𑀔𑀽 𑀅𑀯𑀲𑁆𑀲𑀁 𑀢𑀸𑀲𑀼 𑀲𑀻𑀫𑀸𑀲𑀼 𑀢𑀺𑀝𑁆𑀞𑀦𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀲𑀻𑀫𑀝𑁆𑀞𑀸 𑀳𑀼𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀁 𑀯𑀢𑁆𑀯𑀸 𑀢𑀸 𑀲𑀻𑀫𑀸 𑀲𑀫𑀽𑀳𑀦𑁂𑀬𑁆𑀬𑀼𑀁. 𑀢𑀢𑁄 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀸𑀦𑀁 𑀲𑀫𑀽𑀳𑀢𑀢𑁆𑀢𑀸 𑀕𑀸𑀫𑀲𑀻𑀫𑀸𑀬𑁂𑀯 𑀅𑀯𑀲𑀺𑀝𑁆𑀞𑀸 𑀪𑀯𑁂𑀬𑁆𑀬𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) ‘‘𑀓𑁂𑀘𑀺 𑀧𑀦 𑀈𑀤𑀺𑀲𑁂𑀲𑀼 𑀯𑀺𑀳𑀸𑀭𑁂𑀲𑀼 𑀙𑀧𑀜𑁆𑀘𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁂 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑁆𑀧𑀫𑀸𑀡𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀦𑀺𑀭𑀦𑁆𑀢𑀭𑀁 𑀞𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀜𑁆𑀘 𑀲𑀫𑀽𑀳𑀦𑀦𑀯𑀲𑁂𑀦 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀓𑀢𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀔𑀡𑁆𑀟𑀲𑀻𑀫𑀸𑀬 𑀫𑀳𑀸𑀲𑀻𑀫𑀸𑀬 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺𑀧𑀺 𑀅𑀯𑀲𑁆𑀲𑀁 𑀏𑀓𑀲𑁆𑀫𑀺𑀁 𑀫𑀜𑁆𑀘𑀝𑁆𑀞𑀸𑀦𑁂 𑀢𑀸𑀲𑀁 𑀫𑀚𑁆𑀛𑀕𑀢𑀸 𑀢𑁂 𑀪𑀺𑀓𑁆𑀔𑀽 𑀢𑀸 𑀲𑀫𑀽𑀳𑀦𑁂𑀬𑁆𑀬𑀼𑀁, 𑀢𑀢𑁄 𑀕𑀸𑀫𑀲𑀻𑀫𑀸 𑀏𑀯 𑀅𑀯𑀲𑀺𑀲𑁆𑀲𑁂𑀬𑁆𑀬𑀸’’𑀢𑀺.

‘‘𑀲𑀸𑀥𑀼𑀓𑀁 𑀧𑀦 𑀜𑀢𑁆𑀯𑀸𑀬𑁂𑀯 𑀲𑀫𑀽𑀳𑀦𑀺𑀢𑀩𑁆𑀩𑀸 𑀘𑁂𑀯 𑀩𑀦𑁆𑀥𑀺𑀢𑀩𑁆𑀩𑀸 𑀘𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑀯𑀘𑀦𑀢𑁄 𑀲𑀻𑀫𑀁 𑀚𑀸𑀦𑀦𑁆𑀢𑀸𑀬𑁂𑀯 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀓𑀣𑀁 𑀅𑀚𑀸𑀦𑀦𑁆𑀢𑀸𑀢𑀺. 𑀇𑀫𑀲𑁆𑀫𑀺𑀁 𑀲𑀻𑀫𑀸𑀲𑀫𑀽𑀳𑀦𑀦𑀸𑀥𑀺𑀓𑀸𑀭𑁂 𑀲𑀻𑀫𑀁 𑀯𑀸 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀯𑀸 𑀚𑀸𑀦𑀦𑀪𑀸𑀯𑁄 𑀅𑀗𑁆𑀕𑀁 𑀦 𑀳𑁄𑀢𑀺, 𑀅𑀦𑁆𑀢𑁄𑀲𑀻𑀫𑀸𑀬𑀁 𑀞𑀺𑀢𑀪𑀸𑀯𑁄, ‘‘𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀓𑀫𑁆𑀫𑀯𑀸𑀘𑀸𑀓𑀭𑀡𑀦𑁆𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀅𑀗𑁆𑀕𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀅𑀗𑁆𑀕𑀤𑁆𑀯𑀬𑁂𑀦 𑀲𑀫𑁆𑀧𑀦𑁆𑀦𑁂 𑀲𑀢𑀺 𑀇𑀫𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀇𑀫𑀺𑀦𑀸 𑀅𑀗𑁆𑀕𑀤𑁆𑀯𑀬𑁂𑀦 𑀲𑀫𑁆𑀧𑀦𑁆𑀦𑁂 𑀲𑀢𑀺 𑀲𑀻𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀫𑀽𑀳𑀦𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀢𑀩𑁆𑀩𑁄𑀢𑀺? 𑀅𑀝𑁆𑀞𑀓𑀣𑀸𑀬𑀁 ‘‘𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀫𑀳𑀸𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀁 𑀅𑀚𑀸𑀦𑀦𑀝𑁆𑀞𑀸𑀦𑁂𑀧𑀺 𑀲𑀫𑀽𑀳𑀦𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) ‘‘𑀦 𑀳𑁂𑀢𑁆𑀣 𑀲𑀻𑀫𑀸𑀬, 𑀢𑀧𑁆𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀸 𑀚𑀸𑀦𑀦𑀁 𑀅𑀗𑁆𑀕𑀁, 𑀲𑀻𑀫𑀸𑀬 𑀧𑀦 𑀅𑀦𑁆𑀢𑁄𑀞𑀸𑀦𑀁, ‘𑀲𑀫𑀽𑀳𑀦𑀺𑀲𑁆𑀲𑀸𑀫𑀸’𑀢𑀺 𑀓𑀫𑁆𑀫𑀯𑀸𑀘𑀸𑀓𑀭𑀡𑀜𑁆𑀘 𑀅𑀗𑁆𑀕𑀁. 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) ‘𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’𑀢𑀺 𑀏𑀯𑀁 𑀫𑀳𑀸𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀚𑀸𑀦𑀦𑁂𑀧𑀺 𑀲𑀫𑀽𑀳𑀦𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑁄𑀭𑀸𑀡𑀩𑀤𑁆𑀥𑀲𑀻𑀫𑀸𑀦𑀁 𑀲𑀫𑀽𑀳𑀢𑀢𑁆𑀢𑀸 𑀕𑀸𑀫𑀲𑀻𑀫𑀸𑀬𑁂𑀯 𑀅𑀯𑀲𑀺𑀝𑁆𑀞𑀸 𑀪𑀯𑁂𑀬𑁆𑀬𑀸𑀢𑀺 𑀢𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑀸𑀬 𑀢𑀢𑁄 𑀧𑀭𑀁 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀕𑀸𑀫𑀲𑀻𑀫𑀸𑀬 𑀅𑀯𑀲𑀺𑀝𑁆𑀞𑀸𑀬 𑀲𑀢𑀺 𑀢𑀁 𑀕𑀸𑀫𑀲𑀻𑀫𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑁄𑀥𑀦𑀁 𑀭𑀓𑁆𑀔𑀡𑀜𑁆𑀘 𑀓𑀢𑁆𑀯𑀸 𑀢𑀺𑀲𑁆𑀲𑀁 𑀕𑀸𑀫𑀲𑀻𑀫𑀸𑀬𑀁 𑀔𑀡𑁆𑀟𑀲𑀻𑀫𑀁 𑀫𑀳𑀸𑀲𑀻𑀫𑀜𑁆𑀘 𑀬𑀣𑀸𑀭𑀼𑀘𑀺 𑀩𑀦𑁆𑀥𑀺𑀢𑀼𑀁 𑀮𑀪𑀢𑀺, 𑀲𑀻𑀫𑀁 𑀅𑀩𑀦𑁆𑀥𑀺𑀢𑁆𑀯𑀸𑀯 𑀓𑁂𑀯𑀮𑀸𑀬 𑀕𑀸𑀫𑀲𑀻𑀫𑀸𑀬 𑀉𑀧𑀲𑀫𑁆𑀧𑀤𑀸𑀤𑀺𑀲𑀗𑁆𑀖𑀓𑀫𑁆𑀫𑀜𑁆𑀘 𑀓𑀸𑀢𑀼𑀫𑁆𑀧𑀺 𑀮𑀪𑀢𑀺.

𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑁋 ‘‘𑀕𑀸𑀫𑀲𑀻𑀫𑀸𑀬 𑀏𑀯 𑀘 𑀅𑀯𑀲𑀺𑀝𑁆𑀞𑀸𑀬 𑀢𑀢𑁆𑀣 𑀬𑀣𑀸𑀭𑀼𑀘𑀺 𑀤𑀼𑀯𑀺𑀥𑀫𑁆𑀧𑀺 𑀲𑀻𑀫𑀁 𑀩𑀦𑁆𑀥𑀺𑀢𑀼𑀜𑁆𑀘𑁂𑀯 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀢𑀲𑁆𑀫𑀸 𑀬𑀤𑀺 𑀲𑀝𑁆𑀞𑀺𑀳𑀢𑁆𑀣𑀸𑀬𑀸𑀫𑀁 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀸𑀭𑀁 𑀔𑀡𑁆𑀟𑀲𑀻𑀫𑀫𑁂𑀯 𑀓𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀏𑀢𑁆𑀢𑀓𑁂 𑀧𑀤𑁂𑀲𑁂 𑀫𑀜𑁆𑀘𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑁄 𑀧𑀫𑀸𑀡𑀬𑀼𑀢𑁆𑀢𑀓𑁄 𑀫𑀜𑁆𑀘𑁄𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄. 𑀲𑁄 𑀳𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀓𑁄, 𑀅𑀝𑁆𑀞𑀯𑀺𑀤𑀢𑁆𑀣𑀺𑀓𑁄 𑀯𑀸 𑀳𑁄𑀢𑀺. 𑀢𑀢𑁄 𑀔𑀼𑀤𑁆𑀤𑀓𑁄 𑀫𑀜𑁆𑀘𑁄 𑀲𑀻𑀲𑀼𑀧𑀥𑀸𑀦𑀁 𑀞𑀧𑁂𑀢𑁆𑀯𑀸 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦𑀧𑁆𑀧𑀳𑁄𑀢𑀻𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀫𑀜𑁆𑀘𑀲𑁆𑀲 𑀆𑀬𑀸𑀫𑀧𑁆𑀧𑀫𑀸𑀡𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀅𑀥𑀺𑀓𑀸𑀬𑀸𑀫𑁄𑀧𑀺 𑀳𑁄𑀢𑀺𑀬𑁂𑀯. 𑀫𑀜𑁆𑀘𑀲𑁆𑀲 𑀯𑀺𑀢𑁆𑀣𑀸𑀭𑁄 𑀧𑀦 𑀆𑀬𑀸𑀫𑀲𑁆𑀲 𑀉𑀧𑀟𑁆𑀠𑁄 𑀳𑁄𑀢𑀺, 𑀢𑀲𑁆𑀫𑀸 𑀫𑀜𑁆𑀘𑀧𑁆𑀧𑀫𑀸𑀡𑀝𑁆𑀞𑀸𑀦𑀁 𑀆𑀬𑀸𑀫𑀢𑁄 𑀧𑀜𑁆𑀘𑀳𑀢𑁆𑀣𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀜𑁆𑀘𑀯𑀺𑀤𑀢𑁆𑀣𑀺𑀓𑀦𑁆𑀢𑀺 𑀕𑀳𑁂𑀢𑁆𑀯𑀸 𑀢𑁂𑀦 𑀧𑀫𑀸𑀡𑁂𑀦 𑀕𑀡𑁆𑀳𑀦𑁆𑀢𑁄 𑀲𑀝𑁆𑀞𑀺𑀳𑀢𑁆𑀣𑀸𑀬𑀸𑀫𑀁 𑀲𑀻𑀫𑀝𑁆𑀞𑀸𑀦𑀁 𑀘𑀢𑀼𑀯𑀻𑀲𑀢𑀺𑀫𑀜𑁆𑀘𑀓𑀁 𑀳𑁄𑀢𑀺, 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀸𑀭𑀁 𑀅𑀝𑁆𑀞𑀫𑀜𑁆𑀘𑀓𑀁 𑀳𑁄𑀢𑀺. 𑀏𑀯𑀁 𑀕𑀡𑁆𑀳𑀦𑁆𑀢𑁄 𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸𑀫𑁄 𑀫𑀜𑁆𑀘𑁄 𑀳𑁄𑀢𑀺, 𑀲𑀝𑁆𑀞𑀺𑀳𑀢𑁆𑀣𑀸𑀬𑀸𑀫𑀁 𑀲𑀻𑀫𑀝𑁆𑀞𑀸𑀦𑀁 𑀤𑁆𑀯𑀸𑀤𑀲𑀫𑀜𑁆𑀘𑀓𑀁 𑀳𑁄𑀢𑀺, 𑀘𑀢𑁆𑀢𑀸𑀮𑀻𑀲𑀳𑀢𑁆𑀣𑀯𑀺𑀢𑁆𑀣𑀸𑀭𑀁 𑀲𑁄𑀴𑀲𑀫𑀜𑁆𑀘𑀓𑀁 𑀳𑁄𑀢𑀺. 𑀏𑀯𑀁 𑀕𑀡𑁆𑀳𑀦𑁆𑀢𑁄 𑀧𑀸𑀘𑀻𑀦𑀧𑀘𑁆𑀙𑀺𑀫𑀸𑀬𑀸𑀫𑁄 𑀫𑀜𑁆𑀘𑁄 𑀳𑁄𑀢𑀺. 𑀤𑀼𑀯𑀺𑀥𑁂𑀧𑀺 𑀆𑀬𑀸𑀫𑀁 𑀯𑀺𑀢𑁆𑀣𑀸𑀭𑁂𑀦 𑀕𑀼𑀡𑀺𑀢𑀁 𑀓𑀭𑁄𑀦𑁆𑀢𑁄 𑀲𑀓𑀮𑀁 𑀅𑀦𑁆𑀢𑁄𑀲𑀻𑀫𑀝𑁆𑀞𑀸𑀦𑀁 𑀤𑁆𑀯𑀸𑀦𑀳𑀼𑀢𑁆𑀢𑀭𑀲𑀢𑀫𑀜𑁆𑀘𑀓𑀁 𑀳𑁄𑀢𑀺, 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀲𑀫𑀦𑁆𑀢𑀢𑁄 𑀏𑀓𑀫𑀜𑁆𑀘𑀓𑀁 𑀯𑀸 𑀤𑁆𑀯𑀺𑀢𑀺𑀫𑀜𑁆𑀘𑀓𑀁 𑀯𑀸 𑀕𑀳𑁂𑀢𑀩𑁆𑀩𑀁. 𑀢𑁂𑀦 𑀲𑀳 𑀕𑀡𑀦𑀁 𑀯𑀟𑁆𑀠𑁂𑀢𑀩𑁆𑀩𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑀧𑀦 ‘‘𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀫𑀳𑀸𑀲𑀻𑀫𑀸𑀩𑀦𑁆𑀥𑀦𑀓𑀸𑀮𑁂 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀩𑀳𑀺𑀉𑀧𑀘𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀔𑀡𑁆𑀟𑀲𑀻𑀫𑀸𑀬𑀧𑀺 𑀤𑀽𑀭𑀢𑁄 𑀲𑀫𑀽𑀳𑀦𑀦𑁂 𑀤𑁄𑀲𑁄 𑀦𑀢𑁆𑀣𑀺, 𑀤𑀼𑀓𑁆𑀓𑀭𑀢𑁆𑀢𑀸 𑀧𑀦 𑀓𑀸𑀭𑀓𑀸𑀦𑀁 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀓𑀮𑁆𑀬𑀸𑀡𑀺𑀬𑀁 𑀦𑀸𑀫 𑀲𑀻𑀫𑀸𑀬𑀁 𑀧𑀦 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀜𑁆𑀘𑀳𑀢𑁆𑀣𑀧𑁆𑀧𑀫𑀸𑀡𑀁 𑀞𑀸𑀦𑀁 𑀏𑀓𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀲𑀫𑀽𑀳𑀦𑀢𑀺. 𑀢𑀫𑁆𑀧𑀺 𑀧𑀘𑁆𑀙𑀺𑀫𑀫𑀜𑁆𑀘𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀫𑁂𑀯𑀸𑀢𑀺 𑀓𑀢𑁆𑀯𑀸 𑀓𑀢𑀁. 𑀇𑀤𑀸𑀦𑀺 𑀅𑀫𑁆𑀳𑁂𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀧𑀦 𑀧𑀓𑀭𑀡𑀦𑀬𑁂𑀦 𑀲𑀁𑀲𑀦𑁆𑀤𑀦𑀢𑁆𑀢𑀸 𑀬𑀼𑀢𑁆𑀢𑀢𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀫𑀽𑀳𑀦𑀦𑀸𑀓𑀸𑀭𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀇𑀤𑀸𑀦𑀺 𑀩𑀦𑁆𑀥𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀘 𑀩𑀳𑀺 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀫𑀽𑀳𑀦𑀺𑀢𑀩𑁆𑀩𑀲𑀻𑀫𑀝𑁆𑀞𑀸𑀦𑀁 𑀆𑀤𑀸𑀲𑀢𑀮𑀁 𑀯𑀺𑀬 𑀲𑀫𑀁 𑀲𑀼𑀤𑁆𑀥𑀁 𑀯𑀺𑀫𑀮𑀁 𑀓𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀫𑀜𑁆𑀘𑀧𑁆𑀧𑀫𑀸𑀡𑀁 𑀫𑀜𑁆𑀘𑀧𑁆𑀧𑀫𑀸𑀡𑀁 𑀞𑀸𑀦𑀁 𑀅𑀝𑁆𑀞𑀧𑀤𑀓𑀮𑁂𑀔𑀁 𑀯𑀺𑀬 𑀭𑀚𑁆𑀚𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀮𑁂𑀔𑀁 𑀓𑀸𑀭𑀸𑀧𑁂𑀢𑁆𑀯𑀸 𑀮𑁂𑀔𑀸𑀦𑀼𑀲𑀸𑀭𑁂𑀦 𑀢𑀫𑁆𑀩𑀫𑀢𑁆𑀢𑀺𑀓𑀘𑀼𑀡𑁆𑀡𑁂𑀦 𑀯𑀸 𑀲𑁂𑀢𑀫𑀢𑁆𑀢𑀺𑀓𑀘𑀼𑀡𑁆𑀡𑁂𑀦 𑀯𑀸 𑀯𑀡𑁆𑀡𑀯𑀺𑀲𑁂𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀦𑁆𑀢𑀺 𑀧𑀦𑁆𑀢𑀺 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀆𑀭𑀓𑁆𑀔𑀁 𑀲𑁄𑀥𑀦𑀜𑁆𑀘 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀻𑀫𑀁 𑀲𑀫𑀽𑀳𑀦𑀺𑀲𑁆𑀲𑀸𑀫𑀸’’𑀢𑀺 𑀘𑀢𑁆𑀢𑀸𑀭𑁄 𑀯𑀸 𑀢𑀤𑀼𑀢𑁆𑀢𑀭𑀺 𑀯𑀸 𑀲𑀫𑀸𑀦𑀲𑀁𑀯𑀸𑀲𑀓𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀧𑀞𑀫𑀧𑀦𑁆𑀢𑀺𑀬𑀁 𑀧𑀞𑀫𑀓𑁄𑀝𑁆𑀞𑀸𑀲𑁂 𑀫𑀜𑁆𑀘𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀁, 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀢𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂𑀬𑁂𑀯 𑀅𑀜𑁆𑀜𑀫𑀜𑁆𑀜𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀯𑀸 𑀲𑀫𑀽𑀳𑀦𑀺𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀞𑀫𑀧𑀦𑁆𑀢𑀺𑀬𑀁𑀬𑁂𑀯 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀞𑀢𑁆𑀯𑀸 𑀢𑀣𑁂𑀯 𑀓𑀢𑁆𑀯𑀸 𑀢𑀢𑁄 𑀧𑀞𑀫𑀧𑀦𑁆𑀢𑀺𑀬𑀁𑀬𑁂𑀯 𑀅𑀦𑀼𑀮𑁄𑀫𑀦𑀬𑁂𑀦 𑀬𑀸𑀯 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑀸 𑀏𑀓𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀢𑀣𑁂𑀯 𑀓𑀢𑁆𑀯𑀸 𑀧𑀞𑀫𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀻𑀡𑀸𑀬 𑀤𑀼𑀢𑀺𑀬𑀧𑀦𑁆𑀢𑀺𑀬𑀸 𑀅𑀦𑁆𑀢𑀺𑀫𑀓𑁄𑀝𑁆𑀞𑀸𑀲𑁂 𑀞𑀢𑁆𑀯𑀸 𑀢𑀣𑁂𑀯 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀧𑀦𑁆𑀢𑀺𑀬𑀁𑀬𑁂𑀯 𑀧𑀝𑀺𑀮𑁄𑀫𑀦𑀬𑁂𑀦 𑀬𑀸𑀯 𑀆𑀤𑀺𑀓𑁄𑀝𑁆𑀞𑀸𑀲𑀸 𑀢𑀣𑁂𑀯 𑀓𑀢𑁆𑀯𑀸 𑀏𑀯𑀁 𑀢𑀢𑀺𑀬𑀧𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀓𑀤𑀸 𑀅𑀦𑀼𑀮𑁄𑀫𑀢𑁄 𑀏𑀓𑀤𑀸 𑀧𑀝𑀺𑀮𑁄𑀫𑀢𑁄 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸𑀲𑀼 𑀧𑀦𑁆𑀢𑀻𑀲𑀼 𑀲𑀩𑁆𑀩𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀭𑀺𑀓𑁆𑀔𑀻𑀡𑁂 𑀇𑀤𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺. ‘‘𑀘𑀢𑁆𑀢𑀸𑀭𑁄 𑀢𑀤𑀼𑀢𑁆𑀢𑀭𑀺 𑀯𑀸’’𑀢𑀺 𑀇𑀤𑀁 𑀧𑀦 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑀧𑀦 𑀪𑀺𑀓𑁆𑀔𑀽𑀦𑀁 𑀧𑀓𑀢𑀢𑁆𑀢𑀪𑀸𑀯𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀮𑀚𑁆𑀚𑀻𑀧𑁂𑀲𑀮𑀪𑀺𑀓𑁆𑀔𑀽𑀦𑀜𑁆𑀘 𑀤𑀼𑀮𑁆𑀮𑀪𑀢𑁆𑀢𑀸 ‘‘𑀙𑀧𑀜𑁆𑀘𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁.

𑀓𑀮𑁆𑀬𑀸𑀡𑀻𑀲𑀻𑀫𑀸𑀬𑀁 𑀧𑀦 𑀲𑀻𑀳𑀴𑀤𑀻𑀧𑀢𑁄 𑀅𑀪𑀺𑀦𑀯𑀲𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁂𑀳𑀺 𑀕𑀭𑀳𑀯𑀺𑀯𑀸𑀤𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀳𑀺 𑀥𑀫𑁆𑀫𑀘𑁂𑀢𑀺𑀬𑀭𑀜𑁆𑀜𑀸 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀳𑀺 𑀘𑀼𑀤𑁆𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀦𑁆𑀢𑀺 𑀧𑀸𑀲𑀸𑀡𑀮𑁂𑀔𑀸𑀬𑀁 𑀆𑀕𑀢𑀁. 𑀭𑀢𑀦𑀧𑀽𑀭𑀦𑀕𑀭𑁂 𑀧𑀦 𑀲𑀺𑀭𑀻𑀲𑀼𑀥𑀫𑁆𑀫𑀭𑀸𑀚𑀸𑀥𑀺𑀧𑀢𑀺𑀦𑀸𑀫𑀓𑀲𑁆𑀲 𑀘𑀽𑀴𑀅𑀕𑁆𑀕𑀭𑀸𑀚𑀺𑀦𑁄 𑀓𑀸𑀮𑁂 𑀫𑀳𑀸𑀲𑀻𑀳𑀴𑀧𑁆𑀧𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄 𑀲𑀺𑀭𑀻𑀲𑀤𑁆𑀥𑀫𑁆𑀫𑀓𑀺𑀢𑁆𑀢𑀺𑀦𑀸𑀫𑀓𑁄 𑀫𑀳𑀸𑀣𑁂𑀭𑀯𑀭𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑁂 𑀅𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂 𑀮𑀚𑁆𑀚𑀺𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀽𑀢𑁂 𑀅𑀜𑁆𑀜𑁂 𑀫𑀳𑀸𑀣𑁂𑀭𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀘𑀢𑀼𑀢𑁆𑀣𑁄𑀯 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀢𑁆𑀢𑀸 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀧𑀓𑀢𑀢𑁆𑀢𑀪𑀸𑀯𑁂 𑀦𑀺𑀭𑀸𑀲𑀗𑁆𑀓𑀢𑁆𑀢𑀸 𑀓𑀢𑀁 𑀪𑀯𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀺𑀓𑁆𑀔𑀽𑀦𑀁 𑀧𑀓𑀢𑀢𑁆𑀢𑀪𑀸𑀯𑀲𑁆𑀲 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀓𑀫𑁆𑀫𑀲𑁆𑀲 𑀅𑀢𑀺𑀭𑁂𑀓𑀘𑀢𑀼𑀯𑀕𑁆𑀕𑁂𑀦 𑀓𑀭𑀡𑁂 𑀤𑁄𑀲𑀸𑀪𑀸𑀯𑀢𑁄 𑀅𑀢𑀺𑀭𑁂𑀓𑀪𑀺𑀓𑁆𑀔𑀽𑀳𑀺 𑀓𑀢𑀪𑀸𑀯𑁄 𑀧𑀲𑀢𑁆𑀣𑀢𑀭𑁄 𑀳𑁄𑀢𑀺. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀦𑀸𑀫𑀺𑀓𑀸𑀬𑀁 𑀯𑀺𑀦𑀬𑀝𑀻𑀓𑀸𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) ‘‘𑀙𑀧𑀜𑁆𑀘𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀓𑀮𑁆𑀬𑀸𑀡𑀻𑀲𑀻𑀫𑀸𑀬𑀜𑁆𑀘 𑀘𑀼𑀤𑁆𑀤𑀲𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀦𑀺𑀝𑁆𑀞𑀺𑀢𑁂𑀧𑀺 𑀧𑀦 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑁂 𑀦𑀸𑀦𑀸𑀯𑀸𑀤𑀸𑀦𑀁 𑀦𑀸𑀦𑀸𑀘𑀭𑀺𑀬𑀸𑀦𑀁 𑀦𑀸𑀦𑀸𑀦𑀺𑀓𑀸𑀬𑀸𑀦𑀁 𑀦𑀸𑀦𑀸𑀤𑁂𑀲𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁 𑀕𑀭𑀳𑀯𑀺𑀯𑀸𑀤𑀫𑁄𑀘𑀦𑀢𑁆𑀣𑀜𑁆𑀘 𑀧𑀼𑀦𑀧𑁆𑀧𑀼𑀦𑀁 𑀢𑁂𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀢𑀣𑁂𑀯 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀭𑀺. 𑀅𑀝𑁆𑀞. 𑁪𑁮𑁨-𑁪𑁮𑁩; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁨𑁫𑁧) ‘‘𑀧𑀼𑀦𑀧𑁆𑀧𑀼𑀦𑀁 𑀧𑀦 𑀓𑀸𑀢𑀩𑁆𑀩𑀁. 𑀢𑀜𑁆𑀳𑀺 𑀓𑀼𑀧𑁆𑀧𑀲𑁆𑀲 𑀓𑀫𑁆𑀫𑀲𑁆𑀲 𑀓𑀫𑁆𑀫𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀓𑀼𑀧𑁆𑀧𑀲𑁆𑀲 𑀣𑀺𑀭𑀓𑀫𑁆𑀫𑀪𑀸𑀯𑀸𑀬 𑀳𑁄𑀢𑀻’’𑀢𑀺. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦 𑀳𑀁𑀲𑀸𑀯𑀢𑀻𑀦𑀕𑀭𑁂 𑀅𑀦𑁂𑀓𑀧𑀡𑁆𑀟𑀭𑀳𑀢𑁆𑀣𑀺𑀲𑀸𑀫𑀺𑀫𑀳𑀸𑀥𑀫𑁆𑀫𑀭𑀸𑀚𑀸 𑀲𑀳𑀧𑀼𑀜𑁆𑀜𑀓𑀫𑁆𑀫𑀪𑀽𑀢𑀢𑁄 𑀫𑀳𑀸𑀘𑁂𑀢𑀺𑀬𑀢𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀻𑀫𑀸𑀲𑀫𑀽𑀳𑀦𑀦𑀓𑀸𑀮𑁂 𑀭𑀸𑀫𑀜𑁆𑀜𑀤𑁂𑀲𑀯𑀸𑀲𑀻𑀳𑀺 𑀫𑀳𑀸𑀣𑁂𑀭𑁂𑀳𑀺 𑀘 𑀫𑀭𑀫𑁆𑀫𑀤𑁂𑀲𑀯𑀸𑀲𑀻𑀳𑀺 𑀫𑀳𑀸𑀣𑁂𑀭𑁂𑀳𑀺 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀸𑀭𑀸𑀧𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀬𑀤𑀺 𑀧𑀦 𑀫𑀳𑀸𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀉𑀲𑀪𑀫𑀢𑁆𑀢𑀁 𑀯𑀸 𑀤𑁆𑀯𑀺𑀉𑀲𑀪𑀫𑀢𑁆𑀢𑀁 𑀯𑀸 𑀢𑀤𑀼𑀢𑁆𑀢𑀭𑀺 𑀯𑀸 𑀧𑀤𑁂𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑁆𑀢𑀓𑁂 𑀞𑀸𑀦𑁂 𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀲𑀩𑁆𑀩𑀢𑁆𑀣 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑀝𑁆𑀞𑀸𑀦𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀑𑀓𑀸𑀲𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀦𑁆𑀢𑀺𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀓𑀫𑁆𑀫𑀧𑁆𑀧𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦𑀺𑀭𑀦𑁆𑀢𑀭𑀁 𑀞𑀢𑁆𑀯𑀸 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀢𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀘 𑀲𑀫𑀽𑀳𑀦𑀺𑀢𑀩𑁆𑀩𑀸. 𑀏𑀯𑀁 𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀓𑀢𑁂 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀔𑀡𑁆𑀟𑀲𑀻𑀫𑀸𑀬 𑀫𑀳𑀸𑀲𑀻𑀫𑀸𑀬 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺 𑀅𑀯𑀲𑁆𑀲𑀁 𑀏𑀓𑀲𑁆𑀫𑀺𑀁 𑀫𑀜𑁆𑀘𑀝𑁆𑀞𑀸𑀦𑁂 𑀢𑀸𑀲𑀁 𑀫𑀚𑁆𑀛𑀕𑀢𑀸 𑀢𑁂 𑀪𑀺𑀓𑁆𑀔𑀽 𑀢𑀸 𑀲𑀫𑀽𑀳𑀦𑁂𑀬𑁆𑀬𑀼𑀁, 𑀢𑀢𑁄 𑀕𑀸𑀫𑀲𑀻𑀫𑀸 𑀏𑀯 𑀅𑀯𑀲𑀺𑀲𑁆𑀲𑁂𑀬𑁆𑀬, 𑀢𑀲𑁆𑀲𑀁 𑀕𑀸𑀫𑀲𑀻𑀫𑀸𑀬𑀁 𑀔𑀡𑁆𑀟𑀲𑀻𑀫𑀸𑀫𑀳𑀸𑀲𑀻𑀫𑀸𑀯𑀲𑁂𑀦 𑀤𑀼𑀯𑀺𑀥𑀸 𑀲𑀻𑀫𑀸 𑀬𑀣𑀸𑀭𑀼𑀘𑀺 𑀩𑀦𑁆𑀥𑀺𑀢𑀩𑁆𑀩𑀸. 𑀩𑀦𑁆𑀥𑀦𑀸𑀓𑀸𑀭𑀁 𑀧𑀦 𑀉𑀧𑀭𑀺 𑀯𑀓𑁆𑀔𑀸𑀫.

𑀓𑀲𑁆𑀫𑀸 𑀧𑀦 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺𑀧𑀺 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀢𑀁, 𑀦𑀦𑀼 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀬𑁂𑀯 𑀅𑀪𑀺𑀦𑀯𑀲𑀻𑀫𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀢𑀢𑁆𑀣𑁂𑀯 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀯𑀺𑀫𑁄𑀘𑀦𑀢𑁆𑀣𑀁 𑀧𑁄𑀭𑀸𑀡𑀓𑀲𑀻𑀫𑀸𑀬 𑀲𑀫𑀽𑀳𑀦𑀦𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀲𑀘𑁆𑀘𑀁, 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀦 𑀏𑀯𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀯𑀺𑀜𑁆𑀜𑁂𑀬𑁆𑀬𑁄 𑀳𑀺 𑀧𑁄𑀭𑀸𑀡𑀓𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀯𑀺𑀚𑁆𑀚𑀫𑀸𑀦𑀪𑀸𑀯𑁄, 𑀢𑀲𑁆𑀫𑀸 𑀬𑀤𑀺 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀬𑁂𑀯 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀭𑁂𑀬𑁆𑀬, 𑀢𑀢𑁄 𑀩𑀳𑀺 𑀧𑁄𑀭𑀸𑀡𑀓𑀲𑀻𑀫𑀸 𑀢𑀺𑀝𑁆𑀞𑁂𑀬𑁆𑀬, 𑀢𑀢𑁄 𑀅𑀧𑁆𑀧𑀫𑀢𑁆𑀢𑀓𑀁 𑀞𑀸𑀦𑀁 𑀅𑀦𑁆𑀢𑁄 𑀧𑀯𑀺𑀲𑁂𑀬𑁆𑀬, 𑀢𑀁 𑀞𑀸𑀦𑀁 𑀓𑀫𑁆𑀫𑀯𑀸𑀘𑀸𑀧𑀸𑀞𑀓𑁂𑀦 𑀲𑀳 𑀲𑀻𑀫𑀸𑀲𑀫𑀽𑀳𑀦𑀦𑀓𑀸𑀭𑀓𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀳𑀦𑀧𑁆𑀧𑀳𑁄𑀦𑀓𑀁 𑀦 𑀪𑀯𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀲𑀸 𑀧𑁄𑀭𑀸𑀡𑀓𑀲𑀻𑀫𑀸 𑀅𑀲𑀫𑀽𑀳𑀢𑀸𑀯 𑀪𑀯𑁂𑀬𑁆𑀬. 𑀢𑀁 𑀲𑀫𑀽𑀳𑀢𑀲𑀜𑁆𑀜𑀸𑀬 𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀼𑀁, 𑀢𑀁 𑀅𑀲𑀫𑀽𑀳𑀢𑀧𑁄𑀭𑀸𑀡𑀲𑀻𑀫𑀸𑀓𑁄𑀝𑀺𑀧𑀯𑀺𑀝𑁆𑀞𑀢𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑁂𑀤𑀤𑁄𑀲𑁄, 𑀬𑀤𑀺 𑀧𑀦 𑀢𑀁 𑀞𑀸𑀦𑀁 𑀘𑀢𑀼𑀦𑁆𑀦𑀁 𑀦𑀺𑀲𑀺𑀦𑁆𑀦𑀧𑁆𑀧𑀳𑁄𑀦𑀓𑀁 𑀪𑀯𑁂𑀬𑁆𑀬, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀡𑀤𑁄𑀲𑁄, 𑀬𑀤𑀺𑀧𑀺 𑀅𑀦𑁆𑀢𑁄 𑀦 𑀧𑀯𑀺𑀲𑀢𑀺, 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀫𑀢𑁆𑀢𑀁 𑀳𑁄𑀢𑀺, 𑀏𑀯𑀫𑁆𑀧𑀺 𑀲𑀻𑀫𑀸𑀲𑀗𑁆𑀓𑀭𑀤𑁄𑀲𑁄𑀢𑀺 𑀇𑀫𑀲𑁆𑀫𑀸 𑀤𑁄𑀲𑀢𑁆𑀢𑀬𑀸 𑀯𑀺𑀫𑁄𑀘𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺𑀧𑀺 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀢𑀁. 𑀢𑁂𑀦𑁂𑀯 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) ‘‘𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 𑀆𑀘𑀭𑀺𑀬𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀭𑀚𑁆𑀚𑀼𑀧𑀲𑀸𑀭𑀡𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀞𑀢𑁆𑀯𑀸 𑀭𑀚𑁆𑀚𑀼𑀬𑀸 𑀳𑁂𑀝𑁆𑀞𑀸 𑀧𑀸𑀤𑁂 𑀧𑀯𑁂𑀲𑁂𑀢𑁆𑀯𑀸 𑀭𑀚𑁆𑀚𑀼𑀢𑁄 𑀩𑀳𑀺 𑀓𑀺𑀜𑁆𑀘𑀺𑀫𑀢𑁆𑀢𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀭𑁄𑀦𑁆𑀢𑀺, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀧𑀸𑀤𑀕𑁆𑀕𑀝𑁆𑀞𑀧𑀦𑀫𑀢𑁆𑀢𑁂𑀦 𑀧𑁄𑀭𑀸𑀡𑀲𑀻𑀫𑀸𑀲𑀫𑀼𑀕𑁆𑀖𑀸𑀢𑁄 𑀦 𑀳𑁄𑀢𑀺, 𑀅𑀣 𑀔𑁄 𑀓𑀫𑁆𑀫𑀯𑀸𑀘𑀸𑀧𑀸𑀞𑀓𑁂𑀦 𑀲𑀳 𑀓𑀫𑁆𑀫𑀧𑀢𑁆𑀢𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀦𑁂𑀦 𑀓𑀫𑁆𑀫𑀯𑀸𑀘𑀸𑀬 𑀧𑀸𑀞𑀦𑁂𑀦 𑀘 𑀲𑀫𑀼𑀕𑁆𑀖𑀸𑀢𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀧𑁆𑀧𑀓𑀭𑀡𑁂 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) ‘‘𑀲𑀻𑀫𑀸𑀬 𑀧𑀦 𑀅𑀦𑁆𑀢𑁄𑀞𑀸𑀦𑀁, ‘𑀲𑀫𑀽𑀳𑀦𑀺𑀲𑁆𑀲𑀸𑀫𑀸’𑀢𑀺 𑀓𑀫𑁆𑀫𑀯𑀸𑀘𑀸𑀬 𑀓𑀭𑀡𑀜𑁆𑀘𑁂𑀢𑁆𑀣 𑀅𑀗𑁆𑀕’’𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀤𑁂𑀲𑁂𑀦 𑀅𑀦𑁆𑀢𑁄𑀧𑀯𑀺𑀝𑁆𑀞𑀸𑀬 𑀘 𑀏𑀓𑀲𑀫𑁆𑀩𑀦𑁆𑀥𑁂𑀦 𑀞𑀺𑀢𑀸𑀬 𑀧𑁄𑀭𑀸𑀡𑀓𑀩𑀤𑁆𑀥𑀲𑀻𑀫𑀸𑀬 𑀲𑀫𑀼𑀕𑁆𑀖𑀸𑀢𑁂 𑀅𑀓𑀢𑁂 𑀯𑀼𑀢𑁆𑀢𑀦𑀬𑁂𑀦 𑀤𑁄𑀲𑀢𑁆𑀢𑀬𑀢𑁄 𑀦 𑀫𑀼𑀘𑁆𑀘𑁂𑀬𑁆𑀬, 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀢𑁄 𑀩𑀳𑀺𑀧𑀺 𑀞𑀢𑁆𑀯𑀸 𑀲𑀫𑀽𑀳𑀦𑀦𑀓𑀭𑀡𑀪𑀸𑀯𑁄𑀯 𑀧𑀸𑀲𑀁𑀲𑀢𑀭𑁄 𑀳𑁄𑀢𑀺. 𑀅𑀜𑁆𑀜𑁂 𑀧𑀦 𑀆𑀘𑀭𑀺𑀬𑀸 𑀓𑀫𑁆𑀫𑀓𑀸𑀭𑀓𑀪𑀺𑀓𑁆𑀔𑀽𑀦𑀁 𑀧𑀤𑀯𑀮𑀜𑁆𑀚𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀲𑀫𑀽𑀳𑀦𑀦𑁆𑀢𑀺, 𑀢𑀁 𑀕𑀭𑀼𑀓𑀭𑀡𑀯𑀲𑁂𑀦 𑀓𑀢𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀤𑁄𑀲𑁄 𑀦𑀢𑁆𑀣𑀺. 𑀏𑀓𑀘𑁆𑀘𑁂 𑀧𑀦 𑀣𑁂𑀭𑀸 ‘‘𑀓𑀸𑀭𑀓𑀲𑀗𑁆𑀖𑀲𑁆𑀲 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀬𑁂𑀯 𑀲𑀻𑀫𑀸 𑀲𑀫𑀽𑀳𑀢𑀸, 𑀦 𑀅𑀦𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀢𑀺 𑀲𑀜𑁆𑀜𑀸𑀬 𑀧𑀞𑀫𑀢𑀭𑀁 𑀲𑀸𑀮𑀁 𑀓𑀭𑀺𑀢𑁆𑀯𑀸 𑀧𑀘𑁆𑀙𑀸 𑀲𑀻𑀫𑀸𑀬 𑀲𑀫𑀽𑀳𑀢𑀸𑀬 𑀣𑀫𑁆𑀪𑀝𑁆𑀞𑀸𑀦𑁂 𑀅𑀓𑁆𑀓𑀫𑀺𑀢𑀼𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀅𑀲𑀫𑀽𑀳𑀢𑀸 𑀲𑀻𑀫𑀸’’𑀢𑀺 𑀯𑀤𑀦𑁆𑀢𑀺.

𑀧𑀼𑀩𑁆𑀩𑁂𑀧𑀺 𑀲𑀺𑀭𑀻𑀔𑁂𑀢𑁆𑀢𑀦𑀕𑀭𑁂 𑀫𑀳𑀸𑀲𑀢𑁆𑀢𑀥𑀫𑁆𑀫𑀭𑀸𑀚𑀲𑁆𑀲 𑀓𑀸𑀮𑁂 𑀢𑁂𑀦 𑀭𑀜𑁆𑀜𑀸 𑀓𑀢𑀲𑁆𑀲 𑀦𑀦𑁆𑀤𑀦𑀯𑀺𑀳𑀸𑀭𑀲𑁆𑀲 𑀧𑀼𑀭𑀢𑁄 𑀢𑀲𑁆𑀲 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀲𑀻𑀫𑀸𑀬 𑀧𑀢𑀺𑀝𑁆𑀞𑀸𑀧𑀺𑀢𑀸𑀬 𑀧𑀞𑀫𑀁 𑀚𑁂𑀢𑀯𑀦𑀲𑀸𑀮𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀲𑀻𑀫𑀁 𑀲𑀫𑀽𑀳𑀦𑀺𑀁𑀲𑀼, 𑀢𑀤𑀸 𑀢𑀲𑁆𑀫𑀺𑀁 𑀦𑀕𑀭𑁂 𑀫𑀳𑀸𑀭𑀼𑀓𑁆𑀔𑀫𑀽𑀮𑀺𑀓𑁄 𑀦𑀸𑀫 𑀏𑀓𑁄 𑀕𑀡𑀧𑀸𑀫𑁄𑀓𑁆𑀔𑀢𑁆𑀣𑁂𑀭𑁄 ‘‘𑀲𑀘𑁂 𑀣𑀫𑁆𑀪𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀤𑁂 𑀞𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀅𑀳𑀁 𑀆𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀸𑀕𑀘𑁆𑀙𑀢𑀺. 𑀲𑀩𑁆𑀩𑁂 𑀣𑁂𑀭𑀸 ‘‘𑀦 𑀣𑀫𑁆𑀪𑀫𑀢𑁆𑀢𑁂𑀦 𑀧𑁄𑀭𑀸𑀡𑀲𑀻𑀫𑀸 𑀢𑀺𑀝𑁆𑀞𑀢𑀺, 𑀣𑀫𑁆𑀪𑀲𑁆𑀲 𑀲𑀫𑀦𑁆𑀢𑀢𑁄 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬 𑀲𑀻𑀫𑀸 𑀲𑀫𑀽𑀳𑀢𑀸 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀽𑀳𑀦𑀺𑀁𑀲𑀼 𑀘𑁂𑀯 𑀩𑀦𑁆𑀥𑀺𑀁𑀲𑀼 𑀘. 𑀳𑀁𑀲𑀸𑀯𑀢𑀻𑀦𑀕𑀭𑁂 𑀥𑀫𑁆𑀫𑀘𑁂𑀢𑀺𑀬𑀭𑀜𑁆𑀜𑁄 𑀓𑀮𑁆𑀬𑀸𑀡𑀺𑀬𑀲𑀻𑀫𑀸𑀩𑀦𑁆𑀥𑀦𑀓𑀸𑀮𑁂𑀧𑀺 𑀧𑀞𑀫𑀁 𑀲𑀸𑀮𑀁 𑀓𑀭𑀺𑀢𑁆𑀯𑀸𑀯 𑀧𑀘𑁆𑀙𑀸 𑀲𑀫𑀽𑀳𑀦𑀺𑀁𑀲𑀼, 𑀦 𑀘 𑀧𑀸𑀴𑀺𑀅𑀝𑁆𑀞𑀓𑀣𑀸𑀝𑀻𑀓𑀸𑀤𑀻𑀲𑀼 ‘‘𑀧𑀤𑀯𑀮𑀜𑁆𑀚𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀲𑀻𑀫𑀸 𑀲𑀫𑀽𑀳𑀦𑀺𑀢𑀩𑁆𑀩𑀸’’𑀢𑀺 𑀧𑀸𑀞𑁄 𑀅𑀢𑁆𑀣𑀺, ‘‘𑀫𑀜𑁆𑀘𑀧𑁆𑀧𑀫𑀸𑀡𑁂 𑀫𑀜𑁆𑀘𑀧𑁆𑀧𑀫𑀸𑀡𑁂 𑀞𑀸𑀦𑁂’’𑀢𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑀧𑀦 𑀅𑀢𑁆𑀣𑀺. 𑀧𑁄𑀭𑀸𑀡𑀲𑀻𑀫𑀸𑀬 𑀅𑀦𑁆𑀢𑁄 𑀞𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀸𑀬 𑀓𑀢𑀸𑀬 𑀲𑀓𑀮𑀸𑀧𑀺 𑀲𑀻𑀫𑀸 𑀲𑀫𑀽𑀳𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀤𑀯𑀮𑀜𑁆𑀚𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀲𑀫𑀽𑀳𑀦𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀁 𑀧𑀡𑁆𑀟𑀺𑀢𑀸 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺. 𑀈𑀤𑀺𑀲𑀁 𑀧𑀦 𑀯𑀘𑀦𑀁 𑀕𑀭𑀼𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀓𑀺𑀜𑁆𑀘𑀸𑀧𑀺 𑀤𑁄𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀸𑀦𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀓𑀸𑀭𑀡𑀁 𑀳𑁄𑀢𑀺. 𑀢𑁂 𑀳𑀺 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸 𑀏𑀯𑀁 𑀓𑀣𑁂𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻’’𑀢𑀺 𑀤𑀴𑁆𑀳𑀻𑀓𑀫𑁆𑀫𑀯𑀲𑁂𑀦 𑀕𑀳𑁂𑀢𑁆𑀯𑀸 𑀢𑀣𑀸 𑀅𑀓𑀢𑁂 𑀲𑀻𑀫𑀸 𑀲𑀫𑀽𑀳𑀢𑀸 𑀦 𑀳𑁄𑀢𑀻𑀢𑀺 𑀫𑀜𑁆𑀜𑀦𑁆𑀢𑀺, 𑀢𑀲𑁆𑀫𑀸 𑀧𑀓𑀭𑀡𑀸𑀕𑀢𑀦𑀬𑀯𑀲𑁂𑀦𑁂𑀯 𑀓𑀭𑀡𑀁 𑀯𑀭𑀁 𑀧𑀲𑀢𑁆𑀣𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀭𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀻𑀫𑀸𑀲𑀫𑀽𑀳𑀦𑀦𑀸𑀥𑀺𑀓𑀸𑀭𑁂 𑀥𑀫𑁆𑀫𑀕𑀸𑀭𑀯𑁂𑀳𑀺 𑀯𑀺𑀦𑀬𑀥𑀭𑁂𑀳𑀺 𑀘𑀺𑀦𑁆𑀢𑁂𑀢𑀩𑁆𑀩𑀁 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀞𑀸𑀦𑀁 𑀅𑀢𑁆𑀣𑀺, 𑀢𑀁 𑀓𑀢𑀫𑀦𑁆𑀢𑀺 𑀘𑁂? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁪𑁦) 𑀯𑀘𑀦𑀢𑁄 𑀦𑀸𑀦𑀸𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀫𑁆𑀫𑀢𑀸 𑀢𑀺𑀬𑁄𑀚𑀦𑀺𑀓𑀸𑀤𑀺𑀓𑀸𑀬𑁄 𑀫𑀳𑀸𑀲𑀻𑀫𑀸𑀬𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸 𑀅𑀢𑁆𑀣𑀺, 𑀅𑀣 𑀏𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑀁 𑀲𑁄𑀥𑁂𑀢𑁆𑀯𑀸 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀲𑀻𑀫𑀸𑀬 𑀲𑀫𑀽𑀳𑀢𑀸𑀬 𑀬𑀤𑀺 𑀢𑀢𑁄 𑀅𑀜𑁆𑀜𑁂𑀲𑀼 𑀕𑀸𑀫𑀓𑁆𑀔𑁂𑀢𑁆𑀢𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀢𑀺, 𑀦 𑀕𑀸𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀯𑀕𑁆𑀕𑀁 𑀓𑀭𑁂𑀬𑁆𑀬𑀼𑀁, 𑀏𑀯𑀁 𑀲𑀢𑀺 𑀲𑀻𑀫𑀸 𑀲𑀫𑀽𑀳𑀢𑀸 𑀦 𑀪𑀯𑁂𑀬𑁆𑀬, 𑀢𑀸𑀬 𑀅𑀲𑀫𑀽𑀳𑀢𑀸𑀬 𑀲𑀢𑀺 𑀅𑀪𑀺𑀦𑀯𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸 𑀦 𑀪𑀯𑁂𑀬𑁆𑀬, 𑀇𑀢𑀺 𑀇𑀤𑀁 𑀞𑀸𑀦𑀁 𑀤𑀼𑀚𑁆𑀚𑀸𑀦𑀁 𑀤𑀼𑀤𑁆𑀤𑀲𑀁, 𑀢𑀲𑁆𑀫𑀸 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀪𑀕𑀯𑀢𑁄 𑀆𑀡𑀁 𑀕𑀭𑀼𑀁 𑀓𑀭𑁄𑀦𑁆𑀢𑁂𑀳𑀺 𑀮𑀚𑁆𑀚𑀺𑀧𑁂𑀲𑀮𑀩𑀳𑀼𑀲𑁆𑀲𑀼𑀢𑀲𑀺𑀓𑁆𑀔𑀸𑀓𑀸𑀫𑀪𑀽𑀢𑁂𑀳𑀺 𑀯𑀺𑀦𑀬𑀯𑀺𑀤𑀽𑀳𑀺 𑀲𑀼𑀝𑁆𑀞𑀼 𑀘𑀺𑀦𑁆𑀢𑁂𑀢𑀩𑁆𑀩𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀘𑀺𑀦𑁆𑀢𑁂𑀦𑁆𑀢𑁄 𑀕𑀯𑁂𑀲𑀦𑁆𑀢𑁄 𑀯𑀺𑀘𑀺𑀦𑀦𑁆𑀢𑁄 𑀇𑀤𑀁 𑀓𑀸𑀭𑀡𑀁 𑀤𑀺𑀲𑁆𑀲𑀢𑀺 𑁋 𑀢𑀺𑀬𑁄𑀚𑀦𑀺𑀓𑀸𑀤𑀺𑀫𑀳𑀸𑀲𑀻𑀫𑀸𑀬𑁄 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀭𑀫𑀸𑀦𑀓𑀸𑀮𑁂 𑀲𑀦𑁆𑀦𑀺𑀧𑀢𑀺𑀢𑀼𑀁 𑀯𑀸 𑀯𑀺𑀲𑁄𑀥𑁂𑀢𑀼𑀁 𑀯𑀸 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄 𑀢𑀫𑀸𑀭𑀩𑁆𑀪 𑀪𑀕𑀯𑀢𑀸 𑀅𑀦𑀼𑀚𑀸𑀦𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀲𑀩𑁆𑀩𑀲𑁆𑀫𑀺𑀁 𑀧𑀤𑁂𑀲𑁂 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀢𑀸𑀤𑀺𑀲𑀁 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑀼𑀁 𑀯𑀸 𑀲𑀦𑁆𑀦𑀺𑀧𑀢𑀺𑀢𑀼𑀁 𑀯𑀸 𑀦 𑀲𑀓𑁆𑀓𑀸, 𑀦 𑀘 𑀪𑀕𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀮𑀩𑁆𑀪𑀦𑁂𑀬𑁆𑀬𑀁 𑀓𑀸𑀭𑀡𑀁 𑀯𑀤𑁂𑀬𑁆𑀬. 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀭𑀸𑀚𑀕𑀳𑀦𑀕𑀭𑁂 𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀸 𑀏𑀓𑀲𑀻𑀫𑀸𑀯 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀲𑀫𑁆𑀫𑀢𑀸𑀢𑀺. 𑀲𑀻𑀳𑀴𑀤𑀻𑀧𑁂 𑀫𑀳𑀸𑀯𑀺𑀳𑀸𑀭𑀲𑀻𑀫𑀸 𑀅𑀦𑀼𑀭𑀸𑀥𑀧𑀼𑀭𑀁 𑀅𑀦𑁆𑀢𑁄𑀓𑀢𑁆𑀯𑀸 𑀧𑀯𑀢𑁆𑀢𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀲𑀫𑁆𑀫𑀢𑀸𑀢𑀺 𑀘 𑀧𑀓𑀭𑀡𑁂𑀲𑀼 𑀤𑀺𑀲𑁆𑀲𑀢𑀺, 𑀦 𑀢𑀣𑀸 𑀇𑀫𑀲𑁆𑀫𑀺𑀁 𑀦𑀸𑀫 𑀤𑁂𑀲𑁂 𑀤𑁆𑀯𑀺𑀬𑁄𑀚𑀦𑀺𑀓𑀸 𑀯𑀸 𑀢𑀺𑀬𑁄𑀚𑀦𑀺𑀓𑀸 𑀯𑀸 𑀲𑀻𑀫𑀸 𑀅𑀲𑀼𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀢𑀸𑀢𑀺 𑀤𑀺𑀲𑁆𑀲𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀫𑀭𑀫𑁆𑀫𑀤𑁂𑀲𑁂 𑀢𑀸𑀤𑀺𑀲𑀸𑀦𑀁 𑀲𑀻𑀫𑀸𑀦𑀁 𑀦𑀢𑁆𑀣𑀺𑀪𑀸𑀯𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀯𑀲𑁆𑀲𑀓𑀸𑀮𑀢𑁄 𑀉𑀧𑁆𑀧𑀦𑁆𑀦𑀸 𑀩𑀤𑁆𑀥𑀲𑀻𑀫𑀸 𑀧𑀸𑀲𑀸𑀡𑀣𑀫𑁆𑀪𑀦𑀺𑀫𑀺𑀢𑁆𑀢𑁂𑀦 𑀲𑀳 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀤𑀺𑀲𑁆𑀲𑀦𑁆𑀢𑀺. 𑀅𑀭𑀺𑀫𑀤𑁆𑀤𑀦𑀧𑀼𑀭𑁂 𑀘 𑀅𑀦𑀼𑀭𑀼𑀤𑁆𑀥𑀫𑀳𑀸𑀭𑀸𑀚𑁂𑀦 𑀲𑀫𑁆𑀫𑀦𑁆𑀦𑀸𑀧𑀺𑀢𑀸 𑀤𑁆𑀯𑀸𑀲𑀝𑁆𑀞𑀬𑀸𑀥𑀺𑀓𑀲𑀢𑀳𑀢𑁆𑀣𑀸𑀬𑀸𑀫𑀸 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀲𑀢𑀳𑀢𑁆𑀣𑀯𑀺𑀢𑁆𑀣𑀸𑀭𑀸 𑀫𑀳𑀸𑀲𑀻𑀫𑀸 𑀦𑀺𑀫𑀺𑀢𑁆𑀢𑁂𑀦 𑀲𑀳 𑀤𑀺𑀲𑁆𑀲𑀢𑀺. 𑀭𑀢𑀦𑀧𑀽𑀭𑀦𑀕𑀭𑁂 𑀘 𑀦𑀭𑀧𑀢𑀺𑀚𑁂𑀬𑁆𑀬𑀲𑀽𑀭𑀫𑀳𑀸𑀭𑀸𑀚𑀓𑀸𑀮𑁂 𑀅𑀝𑁆𑀞𑀲𑀢𑁆𑀢𑀢𑀸𑀥𑀺𑀓𑀘𑀢𑀼𑀲𑀢𑀓𑀮𑀺𑀬𑀼𑀕𑁂 𑀲𑀫𑁆𑀫𑀦𑁆𑀦𑀺𑀢𑀸 𑀲𑀻𑀫𑀸 𑀧𑀸𑀲𑀸𑀡𑀮𑁂𑀔𑀸𑀬 𑀲𑀤𑁆𑀥𑀺𑀁 𑀤𑀺𑀲𑁆𑀲𑀢𑀺. 𑀬𑀤𑀺 𑀢𑀺𑀬𑁄𑀚𑀦𑀧𑀭𑀫𑀸𑀤𑀺𑀫𑀳𑀸𑀲𑀻𑀫𑀸𑀬𑁄 𑀅𑀢𑁆𑀣𑀺, 𑀧𑁄𑀭𑀸𑀡𑀸𑀘𑀭𑀺𑀬𑀸 𑀦𑀯𑀁 𑀦𑀯𑀁 𑀩𑀤𑁆𑀥𑀲𑀻𑀫𑀁 𑀦 𑀩𑀦𑁆𑀥𑁂𑀬𑁆𑀬𑀼𑀁, 𑀅𑀣 𑀘 𑀧𑀦 𑀩𑀦𑁆𑀥𑀦𑁆𑀢𑀺, 𑀢𑀸𑀲𑀼 𑀘 𑀦𑀯𑀲𑀻𑀫𑀸𑀲𑀼 𑀉𑀧𑀲𑀫𑁆𑀧𑀤𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀢𑁄 𑀏𑀯 𑀘 𑀕𑀡𑀦𑀧𑀣𑀫𑀢𑀺𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽 𑀧𑀭𑀫𑁆𑀧𑀭𑀢𑁄 𑀯𑀟𑁆𑀠𑁂𑀦𑁆𑀢𑀸 𑀬𑀸𑀯𑀚𑁆𑀚𑀢𑀦𑀸 𑀲𑀸𑀲𑀦𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀺. 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀢𑀺𑀬𑁄𑀚𑀦𑀸 𑀲𑀻𑀫𑀸𑀬𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀅𑀣 𑀯𑀸 ‘‘𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑁂’’𑀢𑀺 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀘 𑀯𑀺𑀳𑀸𑀭𑀽𑀧𑀘𑀸𑀭𑀪𑀽𑀢𑁂 𑀩𑀳𑀺 𑀮𑁂𑀟𑁆𑀟𑀼𑀧𑀸𑀢𑁂 𑀘 𑀞𑀸𑀦𑁂𑀬𑁂𑀯 𑀲𑀻𑀫𑀸𑀲𑀫𑀽𑀳𑀦𑀦𑀲𑁆𑀲 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁪𑁪) 𑀯𑀼𑀢𑁆𑀢𑀢𑁆𑀢𑀸𑀧𑀺 𑀢𑀸𑀤𑀺𑀲𑀸 𑀫𑀳𑀸𑀲𑀻𑀫𑀸𑀬𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀅𑀢𑁆𑀣𑀺, 𑀲𑀻𑀫𑀸𑀲𑀫𑀽𑀳𑀦𑀦𑀁 𑀧𑀓𑀭𑀡𑀸𑀘𑀭𑀺𑀬𑀸 𑀦 𑀓𑀣𑁂𑀬𑁆𑀬𑀼𑀁. 𑀓𑀣𑁂𑀦𑁆𑀢𑀸𑀧𑀺 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀁 𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀭𑁂𑀬𑁆𑀬𑀼𑀁, 𑀢𑀣𑀸 𑀧𑀦 𑀅𑀓𑀣𑁂𑀢𑁆𑀯𑀸 𑀯𑀺𑀳𑀸𑀭𑀯𑀺𑀳𑀸𑀭𑀽𑀧𑀘𑀸𑀭𑁂𑀲𑀼𑀬𑁂𑀯 𑀲𑀻𑀫𑀸𑀲𑀫𑀽𑀳𑀦𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀢𑀺𑀬𑁄𑀚𑀦𑀺𑀓𑀸𑀤𑀬𑁄 𑀫𑀳𑀸𑀲𑀻𑀫𑀸𑀬𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀅𑀣 𑀯𑀸 ‘‘𑀔𑀡𑁆𑀟𑀲𑀻𑀫𑀁 𑀧𑀦 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀫𑀽𑀳𑀦𑀺𑀢𑀼𑀜𑁆𑀘𑁂𑀯 𑀩𑀦𑁆𑀥𑀺𑀢𑀼𑀜𑁆𑀘 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁪𑁪) 𑀯𑀘𑀦𑀢𑁄𑀧𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀢𑀺𑀬𑁄𑀚𑀦𑀺𑀓𑀸𑀤𑀺𑀓𑀸𑀬𑁄 𑀫𑀳𑀸𑀲𑀻𑀫𑀸𑀬𑁄 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀣𑀁? 𑀬𑀤𑀺 𑀢𑀸𑀤𑀺𑀲𑀸 𑀲𑀻𑀫𑀸𑀬𑁄 𑀅𑀢𑁆𑀣𑀺, 𑀲𑀓𑀮𑀫𑁆𑀧𑀺 𑀢𑀁 𑀲𑀻𑀫𑀁 𑀅𑀲𑁄𑀥𑁂𑀢𑁆𑀯𑀸 𑀲𑀻𑀫𑀸𑀲𑀫𑀽𑀳𑀦𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦 𑀓𑀣𑁂𑀬𑁆𑀬𑀼𑀁, 𑀅𑀣 𑀘 𑀧𑀦 𑀔𑀡𑁆𑀟𑀲𑀻𑀫𑀁 𑀚𑀸𑀦𑀦𑁆𑀢𑀸 𑀅𑀯𑀺𑀧𑁆𑀧𑀯𑀸𑀲𑀁 𑀅𑀚𑀸𑀦𑀦𑁆𑀢𑀸𑀧𑀺 𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀁 𑀩𑀦𑁆𑀥𑀺𑀢𑀼𑀜𑁆𑀘 𑀲𑀫𑀢𑁆𑀣𑀪𑀸𑀯𑀁 𑀓𑀣𑁂𑀦𑁆𑀢𑀺, 𑀲𑀸 𑀓𑀣𑀸 𑀔𑀦𑁆𑀥𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀦𑁆𑀢𑀭𑀺𑀢𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀲𑀫𑀽𑀳𑀦𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀓𑀣𑀻𑀬𑀢𑀺, 𑀦 𑀦𑀸𑀦𑀸𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀫𑁆𑀫𑀢𑀸𑀬 𑀢𑀺𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀸𑀬 𑀲𑀻𑀫𑀸𑀬 𑀅𑀜𑁆𑀜𑁂𑀲𑀼 𑀕𑀸𑀫𑀓𑁆𑀔𑁂𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀦𑁆𑀢𑁂𑀲𑀼𑀧𑀺 𑀲𑀫𑀽𑀳𑀦𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦, 𑀢𑁂𑀦 𑀜𑀸𑀬𑀢𑀺 ‘‘𑀦 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀢𑀺𑀬𑁄𑀚𑀦𑀺𑀓𑀸𑀤𑀺𑀪𑁂𑀤𑀸𑀬𑁄 𑀫𑀳𑀸𑀲𑀻𑀫𑀸𑀬𑁄 𑀦 𑀲𑀦𑁆𑀢𑀻’’𑀢𑀺. 𑀈𑀤𑀺𑀲𑀸𑀦𑀺 𑀓𑀸𑀭𑀡𑀸𑀦𑀺 𑀪𑀕𑀯𑀢𑁄 𑀆𑀡𑀁 𑀕𑀭𑀼𑀁 𑀓𑀭𑁄𑀦𑁆𑀢𑁂𑀳𑀺 𑀯𑀺𑀦𑀬𑀢𑁆𑀣𑀯𑀺𑀤𑀽𑀳𑀺 𑀯𑀺𑀦𑀬𑀥𑀭𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸𑀦𑀺, 𑀇𑀢𑁄 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀕𑀯𑁂𑀲𑀺𑀢𑀩𑁆𑀩𑀸𑀦𑀻𑀢𑀺.

𑀇𑀢𑁄 𑀧𑀭𑀫𑁆𑀧𑀺 ‘‘𑀲𑀘𑁂 𑀅𑀜𑁆𑀜𑀸𑀦𑀺𑀧𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀅𑀦𑁆𑀢𑁄𑀓𑀸𑀢𑀼𑀓𑀸𑀫𑀸, 𑀢𑁂𑀲𑀼 𑀕𑀸𑀫𑁂𑀲𑀼 𑀬𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀳𑀺𑀧𑀺 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀓𑁆𑀔𑁂𑀢𑁆𑀢𑁂 𑀲𑀻𑀫𑀁 𑀦 𑀩𑀦𑁆𑀥𑀦𑁆𑀢𑀺, 𑀅𑀣 𑀔𑁄 𑀅𑀜𑁆𑀜𑀸𑀦𑀺𑀧𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀅𑀦𑁆𑀢𑁄𑀓𑀭𑀺𑀢𑁆𑀯𑀸𑀧𑀺 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀇𑀤𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀦𑀺𑀲𑁆𑀲𑀬𑀪𑀽𑀢𑀁 𑀧𑀓𑀢𑀺𑀕𑀸𑀫𑀓𑁆𑀔𑁂𑀢𑁆𑀢𑀁 𑀯𑀸 𑀯𑀺𑀲𑀼𑀁𑀕𑀸𑀫𑀓𑁆𑀔𑁂𑀢𑁆𑀢𑀁 𑀯𑀸 𑀲𑁄𑀥𑀺𑀢𑀦𑁆𑀢𑀺 𑀫𑀦𑀲𑀺 𑀦 𑀓𑀸𑀢𑀩𑁆𑀩𑀁. 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀁 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀸𑀪𑀡𑀦𑀲𑀫𑀬𑁂 𑀢𑁂𑀦 𑀕𑀸𑀫𑀓𑁆𑀔𑁂𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑁂𑀲𑀼 𑀅𑀜𑁆𑀜𑁂𑀲𑀼 𑀕𑀸𑀫𑀓𑁆𑀔𑁂𑀢𑁆𑀢𑁂𑀲𑀼 𑀯𑀲𑀦𑁆𑀢𑁂 𑀪𑀺𑀓𑁆𑀔𑀽𑀧𑀺 𑀬𑀸𑀘𑀺𑀢𑁆𑀯𑀸 𑀢𑀢𑁄 𑀕𑀸𑀫𑀓𑁆𑀔𑁂𑀢𑁆𑀢𑀢𑁄 𑀩𑀳𑀺 𑀤𑀽𑀭𑁂 𑀯𑀸𑀲𑀸𑀧𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀓𑀭𑁄𑀦𑁆𑀢𑁂 𑀅𑀜𑁆𑀜𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀧𑁄𑀭𑀸𑀡𑀲𑀻𑀫𑀸𑀬 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀢𑁂 𑀯𑀕𑁆𑀕𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁄 𑀲𑀻𑀫𑀸𑀲𑀫𑀽𑀳𑀦𑀦𑀓𑀫𑁆𑀫𑀯𑀸𑀘𑀸 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑁄 𑀲𑀼𑀔𑀼𑀫𑁄 𑀦𑀺𑀧𑀼𑀡𑁄 𑀅𑀢𑁆𑀣𑁄 𑀯𑀺𑀦𑀬𑀥𑀭𑁂𑀳𑀺 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀏𑀯𑀁 𑀲𑀻𑀫𑀸𑀲𑀫𑀽𑀳𑀦𑀦𑀯𑀺𑀥𑀸𑀦𑁂𑀦 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸𑀢𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀫𑀼𑀢𑁆𑀢𑀸 𑀳𑁄𑀢𑀺.

𑀢𑀢𑁄 ‘‘𑀅𑀢𑀺𑀔𑀼𑀤𑁆𑀤𑀺𑀓𑀸 𑀅𑀢𑀺𑀫𑀳𑀦𑁆𑀢𑀻’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑁂𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁆𑀣𑀁 𑀲𑀻𑀫𑀸𑀬 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀓𑀣𑀁? 𑀲𑀻𑀫𑀸 𑀦𑀸𑀫 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑁂 𑀲𑀢𑀺 𑀅𑀢𑀺𑀔𑀼𑀤𑁆𑀤𑀺𑀓𑀸 𑀦𑀸𑀫 𑀳𑁄𑀢𑀺, 𑀲𑀫𑁆𑀫𑀢𑀸𑀧𑀺 𑀲𑀻𑀫𑀸 𑀦 𑀳𑁄𑀢𑀺. 𑀢𑀺𑀬𑁄𑀚𑀦𑀢𑁄 𑀧𑀭𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀅𑀦𑁆𑀢𑁄 𑀓𑀭𑁄𑀦𑁆𑀢𑁂 𑀲𑀢𑀺 𑀅𑀢𑀺𑀫𑀳𑀢𑀻 𑀦𑀸𑀫 𑀳𑁄𑀢𑀺, 𑀲𑀫𑁆𑀫𑀢𑀸𑀧𑀺 𑀲𑀻𑀫𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀦𑀺𑀲𑀻𑀤𑀦𑀧𑁆𑀧𑀳𑁄𑀦𑀓𑀢𑁄 𑀧𑀝𑁆𑀞𑀸𑀬 𑀢𑀺𑀬𑁄𑀚𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀢𑁆𑀣 𑀬𑀁 𑀧𑀫𑀸𑀡𑀁 𑀲𑀗𑁆𑀖𑁄 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀁 𑀧𑀫𑀸𑀡𑀁 𑀓𑀢𑁆𑀯𑀸 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀢𑀢𑁆𑀣 𑀅𑀢𑀺𑀔𑀼𑀤𑁆𑀤𑀺𑀓𑀸 𑀦𑀸𑀫 𑀬𑀢𑁆𑀣 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀢𑀺𑀫𑀳𑀦𑁆𑀢𑀻 𑀦𑀸𑀫 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑁂𑀦𑀧𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑁆𑀫𑀢𑀸’’𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀲𑀻𑀫𑀸𑀬 𑀧𑀫𑀸𑀡𑀕𑁆𑀕𑀳𑀡𑁂𑀦 ‘‘𑀅𑀢𑀺𑀔𑀼𑀤𑁆𑀤𑀺𑀓𑀸 𑀅𑀢𑀺𑀫𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀤𑁄𑀲𑁂𑀳𑀺 𑀫𑀼𑀢𑁆𑀢𑀸 𑀳𑁄𑀢𑀺.

𑀢𑀢𑁄 ‘‘𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀸’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀓𑀸𑀢𑀩𑁆𑀩𑀁, 𑀢𑀢𑁆𑀣 𑀅𑀲𑀫𑁆𑀩𑀦𑁆𑀥𑀓𑀺𑀢𑁆𑀢𑀦𑁂𑀦 𑀦𑀺𑀫𑀺𑀢𑁆𑀢𑀸 𑀲𑀻𑀫𑀸 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀓𑀣𑀁? 𑀲𑀻𑀫𑀸𑀬 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀧𑀺𑀢𑀦𑀺𑀫𑀺𑀢𑁆𑀢𑁂𑀲𑀼 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀺𑀲𑀸𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑀩𑁆𑀩𑀁, 𑀏𑀯𑀁 𑀓𑀢𑁂 𑀅𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀬𑀤𑀺 𑀧𑀦 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀺𑀲𑀸𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀞𑀧𑁂𑀢𑀺, 𑀧𑀼𑀦 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀦 𑀓𑀺𑀢𑁆𑀢𑁂𑀢𑀺, 𑀏𑀯𑀁 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀅𑀧𑀭𑀸𑀧𑀺 𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀬𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀧𑀸𑀲𑀸𑀡𑀁 𑀯𑀸 𑀩𑀳𑀺𑀲𑀸𑀭𑀭𑀼𑀓𑁆𑀔𑀁 𑀯𑀸 𑀔𑀸𑀡𑀼𑀓𑀁 𑀯𑀸 𑀧𑀁𑀲𑀼𑀧𑀼𑀜𑁆𑀚𑀁 𑀯𑀸 𑀅𑀦𑁆𑀢𑀭𑀸 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸. 𑀧𑀩𑁆𑀩𑀢𑀘𑁆𑀙𑀸𑀬𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀙𑀸𑀬𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀫𑁆𑀫𑀢𑀸 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀲𑀩𑁆𑀩𑀲𑁄 𑀦𑀺𑀫𑀺𑀢𑁆𑀢𑀁 𑀅𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀇𑀫𑁂𑀳𑀺 𑀢𑀻𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁆𑀣𑀸𑀬 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀓𑀸𑀢𑀩𑁆𑀩𑀁.

𑀓𑀣𑀁? 𑀓𑀫𑁆𑀫𑀯𑀸𑀘𑀸𑀬 𑀧𑁄𑀭𑀸𑀡𑀲𑀻𑀫𑀸𑀲𑀫𑀽𑀳𑀦𑀦𑀁 𑀓𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀸𑀬 𑀓𑁂𑀯𑀮𑀸𑀬 𑀕𑀸𑀫𑀲𑀻𑀫𑀸𑀬 𑀲𑀗𑁆𑀖𑁂𑀦 𑀬𑀣𑀸𑀚𑁆𑀛𑀸𑀲𑀬𑀁 𑀕𑀳𑀺𑀢𑀧𑁆𑀧𑀫𑀸𑀡𑀲𑁆𑀲 𑀲𑀻𑀫𑀫𑀡𑁆𑀟𑀮𑀲𑁆𑀲 𑀘𑀢𑀽𑀲𑀼 𑀯𑀸 𑀤𑀺𑀲𑀸𑀲𑀼 𑀅𑀝𑁆𑀞𑀲𑀼 𑀯𑀸 𑀤𑀺𑀲𑀸𑀲𑀼 𑀦𑀺𑀫𑀺𑀢𑁆𑀢𑀼𑀧𑀕𑁂 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑁆𑀧𑀫𑀸𑀡𑁂, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀊𑀦𑀧𑁆𑀧𑀫𑀸𑀡𑁂 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂𑀦 𑀓𑀫𑁆𑀫𑀯𑀸𑀘𑀸𑀧𑀸𑀞𑀓𑁂𑀦 𑀯𑀺𑀦𑀬𑀥𑀭𑁂𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑁂𑀦 ‘‘𑀧𑀸𑀲𑀸𑀡𑁄, 𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀦 𑀯𑀺𑀦𑀬𑀥𑀭𑁂𑀦 ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀻𑀫𑀫𑀡𑁆𑀟𑀮𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁂𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬, 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬, 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬, 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄, 𑀪𑀦𑁆𑀢𑁂. 𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄, 𑀪𑀦𑁆𑀢𑁂. 𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀓𑀺𑀢𑁆𑀢𑁂𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀦𑀸𑀫 𑀅𑀖𑀝𑀺𑀢𑀦𑀺𑀫𑀺𑀢𑁆𑀢𑀸 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀏𑀯𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑁂𑀦 ‘‘𑀔𑀡𑁆𑀟𑀦𑀺𑀫𑀺𑀢𑁆𑀢𑀸 𑀙𑀸𑀬𑀸𑀦𑀺𑀫𑀺𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺.

𑀢𑀢𑁄 𑀧𑀭𑀁 ‘‘𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑀯𑀺𑀧𑀢𑁆𑀢𑀺𑀤𑁄𑀲𑀢𑁄 𑀯𑀺𑀫𑀼𑀘𑁆𑀘𑀦𑀢𑁆𑀣𑀁 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀫𑁆𑀫𑀯𑀸𑀘𑀸𑀧𑀸𑀞𑀓𑀸𑀮𑁂 𑀲𑀗𑁆𑀖𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀚𑀸𑀦𑀺𑀢𑀩𑁆𑀩𑀁. 𑀓𑀣𑀁? 𑀬𑀤𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀲𑀗𑁆𑀖𑁄 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸 𑀦𑀸𑀫 𑀳𑁄𑀢𑀺, 𑀲𑀻𑀫𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀲𑀗𑁆𑀖𑁂𑀦 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 ‘‘𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸 𑀦𑀸𑀫 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀩𑀳𑀺 𑀞𑀺𑀢𑁂𑀦 𑀲𑀫𑁆𑀫𑀢𑀸’’𑀢𑀺. 𑀏𑀯𑀁 𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀝𑁆𑀞𑀸𑀦𑀦𑀺𑀬𑀫𑁂𑀦 ‘‘𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑀯𑀺𑀧𑀢𑁆𑀢𑀺𑀤𑁄𑀲𑀢𑁄 𑀫𑀼𑀢𑁆𑀢𑀸 𑀳𑁄𑀢𑀺.

𑀢𑀢𑁄 𑀧𑀭𑀁 ‘‘𑀦𑀤𑀺𑀬𑀁 𑀲𑀫𑁆𑀫𑀢𑀸, 𑀲𑀫𑀼𑀤𑁆𑀤𑁂 𑀲𑀫𑁆𑀫𑀢𑀸, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀯𑀺𑀧𑀢𑁆𑀢𑀺𑀤𑁄𑀲𑁂𑀳𑀺 𑀘 𑀯𑀺𑀫𑀼𑀘𑁆𑀘𑀦𑀢𑁆𑀣𑀁 𑀏𑀯𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑁋 ‘‘𑀲𑀩𑁆𑀩𑀸, 𑀪𑀺𑀓𑁆𑀔𑀯𑁂, 𑀦𑀤𑀻 𑀅𑀲𑀻𑀫𑀸, 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄, 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄’’𑀢𑀺 (𑀫𑀳𑀸𑀯. 𑁧𑁪𑁭) 𑀪𑀕𑀯𑀢𑀸 𑀯𑀘𑀦𑀢𑁄 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼 𑀲𑀫𑁆𑀫𑀢𑀸 𑀲𑀻𑀫𑀸 𑀦 𑀳𑁄𑀢𑀺, 𑀧𑁄𑀭𑀸𑀡𑀲𑀻𑀫𑀯𑀺𑀕𑀢𑀸𑀬 𑀲𑀼𑀤𑁆𑀥𑀸𑀬 𑀕𑀸𑀫𑀲𑀻𑀫𑀸𑀬 𑀲𑀫𑁆𑀫𑀢𑀸 𑀏𑀯 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀕𑀸𑀫𑀲𑀻𑀫𑀸𑀬𑀫𑁂𑀯 𑀩𑀤𑁆𑀥𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀦 𑀦𑀤𑀻𑀆𑀤𑀻𑀲𑀽𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀦𑀤𑀺𑀬𑀸 𑀲𑀫𑀼𑀤𑁆𑀤𑁂 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸 𑀦𑀸𑀫 𑀏𑀢𑁂𑀲𑀼 𑀦𑀤𑀻𑀆𑀤𑀻𑀲𑀼 𑀲𑀫𑁆𑀫𑀢𑀸’’𑀢𑀺𑀆𑀤𑀺. 𑀏𑀢𑁆𑀢𑀸𑀯𑀢𑀸 ‘‘𑀅𑀬𑀁 𑀲𑀻𑀫𑀸 𑀅𑀢𑀺𑀔𑀼𑀤𑁆𑀤𑀺𑀓𑀸, 𑀅𑀢𑀺𑀫𑀳𑀦𑁆𑀢𑀻, 𑀔𑀡𑁆𑀟𑀦𑀺𑀫𑀺𑀢𑁆𑀢𑀸, 𑀙𑀸𑀬𑀸𑀦𑀺𑀫𑀺𑀢𑁆𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀩𑀳𑀺𑀲𑀻𑀫𑁂 𑀞𑀺𑀢𑀲𑀫𑁆𑀫𑀢𑀸, 𑀦𑀤𑀺𑀬𑀁 𑀲𑀫𑁆𑀫𑀢𑀸, 𑀲𑀫𑀼𑀤𑁆𑀤𑁂 𑀲𑀫𑁆𑀫𑀢𑀸, 𑀚𑀸𑀢𑀲𑁆𑀲𑀭𑁂 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑁂𑀦 𑀲𑀫𑁆𑀫𑀢𑀸, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀦 𑀲𑀫𑁆𑀫𑀢𑀸’’𑀢𑀺 (𑀧𑀭𑀺. 𑁪𑁮𑁬) 𑀯𑀼𑀢𑁆𑀢𑁂𑀳𑀺 𑀏𑀓𑀸𑀤𑀲𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀭𑀸𑀳𑀽’’𑀢𑀺 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀫𑀼𑀢𑁆𑀢𑀁 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬, 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀘 𑀲𑀼𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺.

𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀬𑁄. 𑀢𑀸𑀲𑀼 ‘‘𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀁 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀁 𑀯𑀦𑀦𑀺𑀫𑀺𑀢𑁆𑀢𑀁 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀫𑀕𑁆𑀕𑀦𑀺𑀫𑀺𑀢𑁆𑀢𑀁 𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑀁 𑀦𑀤𑀻𑀦𑀺𑀫𑀺𑀢𑁆𑀢𑀁 𑀉𑀤𑀓𑀦𑀺𑀫𑀺𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁮) 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀢𑀲𑁆𑀲𑀁 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀬𑀣𑀸𑀮𑀤𑁆𑀥𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄, 𑀪𑀦𑁆𑀢𑁂. 𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸’’𑀢𑀺. 𑀢𑁂𑀲𑀼 𑀘 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀬𑀣𑀸𑀚𑁆𑀛𑀸𑀲𑀬𑀝𑁆𑀞𑀸𑀦𑁂𑀲𑀼 𑀤𑀼𑀮𑁆𑀮𑀪𑀪𑀸𑀯𑀢𑁄 𑀯𑀟𑁆𑀠𑀺𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀗𑁆𑀓𑀭𑀓𑀭𑀡𑀢𑁄 𑀘 𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑀲𑁆𑀲 𑀧𑀦 𑀢𑀣𑀸 𑀲𑀗𑁆𑀓𑀭𑀓𑀭𑀡𑀸𑀪𑀸𑀯𑀢𑁄 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀆𑀳𑀭𑀺𑀢𑁆𑀯𑀸 𑀞𑀧𑁂𑀢𑀼𑀁 𑀲𑀼𑀓𑀭𑀪𑀸𑀯𑀢𑁄 𑀘 𑀲𑀻𑀫𑀁 𑀩𑀦𑁆𑀥𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀻𑀫𑀫𑀡𑁆𑀟𑀮𑀲𑁆𑀲 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀽𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀯𑀕𑁆𑀕𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀢𑀁 𑀩𑀦𑁆𑀥𑀦𑁆𑀢𑁂𑀳𑀺 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀽𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸’’𑀢𑀺. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀜𑁆𑀘 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) ‘‘𑀦𑀺𑀫𑀺𑀢𑁆𑀢𑀽𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸𑀢𑀺 𑀇𑀤𑀁 𑀬𑀣𑀸𑀭𑀼𑀘𑀺𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀤𑀼𑀮𑁆𑀮𑀪𑀢𑀸𑀬𑀸’’𑀢𑀺𑀆𑀤𑀺. 𑀏𑀢𑁆𑀢𑀸𑀯𑀢𑀸 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀞𑀫𑀗𑁆𑀕𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺.

𑀢𑀢𑁄 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀭𑀡𑀢𑁆𑀣𑀁 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀬𑀸𑀯𑀢𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀩𑀤𑁆𑀥𑀲𑀻𑀫𑀁 𑀯𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂 𑀯𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀓𑀢𑁆𑀯𑀸 𑀙𑀦𑁆𑀤𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀬𑀸 𑀲𑀻𑀫𑀸 𑀲𑀫𑁆𑀫𑀢𑀸, 𑀲𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) ‘‘𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀦𑀸𑀫 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸’’𑀢𑀺𑀆𑀤𑀺. 𑀅𑀣 𑀢𑀁 𑀲𑀻𑀫𑀁 𑀩𑀦𑁆𑀥𑀦𑁆𑀢𑀸 𑀪𑀺𑀓𑁆𑀔𑀽 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼 𑀯𑀲𑀦𑁆𑀢𑁂 𑀪𑀺𑀓𑁆𑀔𑀽 𑀢𑀲𑁆𑀲 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑁂 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀁 𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀁 𑀞𑀧𑁂𑀢𑁆𑀯𑀸, 𑀬𑁂 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀁 𑀲𑀻𑀫𑀸𑀬 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸 𑀤𑀺𑀲𑀸𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀦𑀺𑀲𑁆𑀲𑀜𑁆𑀘𑀸𑀭𑀲𑀫𑀬𑁂 𑀬𑀤𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀓𑁆𑀔𑁂𑀢𑁆𑀢𑁂 𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀢𑀲𑁆𑀫𑀺𑀁 𑀬𑁂 𑀪𑀺𑀓𑁆𑀔𑀽 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀁 𑀧𑁂𑀲𑁂𑀢𑀩𑁆𑀩𑀁 ‘‘𑀅𑀚𑁆𑀚 𑀫𑀬𑀁 𑀲𑀻𑀫𑀁 𑀩𑀦𑁆𑀥𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀲𑀓𑀲𑀓𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀢𑁄 𑀫𑀸 𑀦𑀺𑀓𑁆𑀔𑀫𑀣𑀸’’𑀢𑀺. 𑀬𑁂 𑀅𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂 𑀲𑀩𑁆𑀩𑁂 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑀩𑁆𑀩𑀸, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄.

𑀬𑀤𑀺 𑀅𑀜𑁆𑀜𑀁 𑀕𑀸𑀫𑀓𑁆𑀔𑁂𑀢𑁆𑀢𑀫𑁆𑀧𑀺 𑀅𑀦𑁆𑀢𑁄𑀓𑀢𑁆𑀢𑀼𑀓𑀸𑀫𑀸, 𑀢𑀢𑁆𑀣 𑀦𑀺𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀆𑀕𑀦𑁆𑀢𑀼𑀫𑁆𑀧𑀺 𑀅𑀦𑀸𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀦𑁆𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀧𑀦 𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀕𑀦𑁆𑀢𑀩𑁆𑀩𑀁, 𑀅𑀦𑀸𑀕𑀘𑁆𑀙𑀦𑁆𑀢𑀸𑀦𑀁 𑀙𑀦𑁆𑀤𑁄 𑀆𑀳𑀭𑀺𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀢𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀳𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀲𑀼 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀏𑀯𑀁 𑀪𑀺𑀓𑁆𑀔𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁂 𑀆𑀳𑀝𑁂 𑀢𑁂𑀲𑀼 𑀢𑁂𑀲𑀼 𑀫𑀕𑁆𑀕𑁂𑀲𑀼 𑀦𑀤𑀻𑀢𑀺𑀢𑁆𑀣𑀕𑀸𑀫𑀤𑁆𑀯𑀸𑀭𑀸𑀤𑀻𑀲𑀼 𑀘 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀲𑀻𑀖𑀁 𑀲𑀻𑀖𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀢𑁆𑀣𑀜𑁆𑀘 𑀩𑀳𑀺𑀲𑀻𑀫𑀓𑀭𑀡𑀢𑁆𑀣𑀜𑁆𑀘 𑀆𑀭𑀸𑀫𑀺𑀓𑀲𑀸𑀫𑀡𑁂𑀭𑁂 𑀞𑀧𑁂𑀢𑁆𑀯𑀸 𑀪𑁂𑀭𑀺𑀲𑀜𑁆𑀜𑀁 𑀯𑀸 𑀲𑀗𑁆𑀔𑀲𑀜𑁆𑀜𑀁 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀸𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀬 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺𑀆𑀤𑀺𑀓𑀸𑀬 (𑀫𑀳𑀸𑀯. 𑁧𑁩𑁯) 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀦 𑀪𑀺𑀓𑁆𑀔𑀽𑀲𑀽’’𑀢𑀺𑀆𑀤𑀺. 𑀏𑀢𑁆𑀢𑀸𑀯𑀢𑀸 𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀤𑀼𑀢𑀺𑀬𑀗𑁆𑀕𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺.

𑀢𑀢𑁄 𑀧𑀭𑀁 𑀓𑀫𑁆𑀫𑀯𑀸𑀘𑀸𑀧𑀸𑀞𑀲𑀫𑀬𑁂 ‘‘𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀧𑀞𑀫𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀘𑀦𑀢𑁄 𑀧𑀞𑀫𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀲𑀫𑀸𑀦𑀲𑀁𑀯𑀸𑀲𑀓𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀦𑀺𑀫𑀺𑀢𑁆𑀢𑀸𑀦𑀺 𑀩𑀳𑀺 𑀓𑀢𑁆𑀯𑀸 𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀧𑀫𑀸𑀡𑁂𑀦𑁂𑀯 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀘𑀢𑀼𑀦𑀳𑀼𑀢𑀸𑀥𑀺𑀓𑀤𑁆𑀯𑀺𑀮𑀓𑁆𑀔𑀬𑁄𑀚𑀦𑀧𑀼𑀣𑀼𑀮𑀁 𑀫𑀳𑀸𑀧𑀣𑀯𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀕𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂𑀬𑁂𑀯…𑀧𑁂… 𑀕𑀢𑀸 𑀳𑁄𑀢𑀻’’𑀢𑀺. 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀬𑀤𑀺 𑀅𑀦𑁆𑀢𑁄𑀲𑀻𑀫𑀸𑀬 𑀕𑀸𑀫𑁄 𑀅𑀢𑁆𑀣𑀺, 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀫𑀼𑀜𑁆𑀘𑀺𑀢𑁆𑀯𑀸 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬 𑀕𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀕𑀢𑀸. 𑀇𑀢𑀺 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀦 𑀅𑀯𑀢𑁆𑀣𑀭𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀯 𑀅𑀯𑀢𑁆𑀣𑀭𑀢𑀺, 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀕𑀘𑁆𑀙𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀧𑀦 𑀬𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸, 𑀢𑀢𑁆𑀣𑁂𑀯 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀇𑀢𑀺 𑀪𑀺𑀓𑁆𑀔𑀽𑀦𑀁 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸…𑀧𑁂… 𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀸 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸𑀯𑀢𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑀺𑀢𑀸, 𑀲𑀗𑁆𑀖𑁄 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺 𑀲𑀫𑀸𑀦𑀲𑀁𑀯𑀸𑀲𑀁 𑀏𑀓𑀽𑀧𑁄𑀲𑀣𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀫𑀸𑀬 𑀲𑀫𑁆𑀫𑀼𑀢𑀺 𑀲𑀫𑀸𑀦𑀲𑀁𑀯𑀸𑀲𑀸𑀬 𑀏𑀓𑀽𑀧𑁄𑀲𑀣𑀸𑀬, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀏𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻. 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁩𑁯).

𑀏𑀲𑀸 𑀲𑀫𑀸𑀦𑀲𑀁𑀯𑀸𑀲𑀓𑀓𑀫𑁆𑀫𑀯𑀸𑀘𑀸,

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑁂𑀬𑁆𑀬 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀬𑀸 𑀲𑀸 𑀲𑀗𑁆𑀖𑁂𑀦 𑀲𑀻𑀫𑀸 𑀲𑀫𑁆𑀫𑀢𑀸 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸. 𑀲𑀗𑁆𑀖𑁄 𑀢𑀁 𑀲𑀻𑀫𑀁 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀁 𑀲𑀫𑁆𑀫𑀦𑁆𑀦𑀢𑀺 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀏𑀢𑀺𑀲𑁆𑀲𑀸 𑀲𑀻𑀫𑀸𑀬 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬. 𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻. 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁧𑁪𑁪).

𑀏𑀲𑀸 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸 𑀜𑀢𑁆𑀢𑀺𑀤𑁄𑀲𑀅𑀦𑀼𑀲𑁆𑀲𑀸𑀯𑀦𑀸𑀤𑁄𑀲𑁂 𑀅𑀦𑀼𑀝𑁆𑀞𑀧𑁂𑀢𑁆𑀯𑀸 𑀲𑀼𑀝𑁆𑀞𑀼 𑀪𑀡𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀢𑀢𑀺𑀬𑀗𑁆𑀕𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺.

𑀏𑀯𑀫𑀬𑀁 𑀲𑀻𑀫𑀸 𑀅𑀦𑁆𑀢𑁄 𑀫𑀡𑀺𑀯𑀺𑀫𑀸𑀦𑀁 𑀩𑀳𑀺 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀺𑀫𑀸𑀦𑀲𑀸𑀫𑀺𑀓𑀤𑁂𑀯𑀧𑀼𑀢𑁆𑀢𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬, 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀩𑀳𑀺 𑀨𑀮𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀺𑀫𑀸𑀦𑀲𑀸𑀫𑀺𑀓𑀤𑁂𑀯𑀧𑀼𑀢𑁆𑀢𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀬 𑀘 𑀦𑀺𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀸 𑀳𑀼𑀢𑁆𑀯𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺 𑀯𑀺𑀭𑁄𑀘𑀢𑀺, 𑀚𑀺𑀦𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡𑀪𑀽𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀧𑀸𑀴𑀺𑀬𑀁 ‘‘𑀲𑀻𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀧𑀞𑀫𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸’’𑀢𑀺𑀆𑀤𑀺.

‘‘𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀧𑀝𑁆𑀞𑀸𑀬 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀉𑀢𑁆𑀢𑀭𑀸𑀦𑀼𑀤𑀺𑀲𑀁 𑀧𑀢𑁆𑀯𑀸 𑀢𑀢𑁆𑀣𑁂𑀯 𑀅𑀝𑁆𑀞𑀧𑁂𑀢𑁆𑀯𑀸 𑀧𑀼𑀩𑁆𑀩𑁂 𑀓𑀺𑀢𑁆𑀢𑀺𑀢𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀦𑀺𑀫𑀺𑀢𑁆𑀢𑀁 𑀧𑀼𑀦 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀫𑁆𑀫𑀢𑀸 𑀅𑀬𑀁 𑀲𑀻𑀫𑀸 𑀏𑀓𑀸𑀤𑀲𑀳𑀺 𑀯𑀺𑀧𑀢𑁆𑀢𑀻𑀳𑀺 𑀫𑀼𑀢𑁆𑀢𑀸, 𑀢𑀻𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀁 𑀅𑀧𑀭𑀺𑀫𑀸𑀡𑀁 𑀪𑀺𑀓𑁆𑀔𑀽𑀦𑀁 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀪𑀽𑀢𑀸 𑀩𑀤𑁆𑀥𑀲𑀻𑀫𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀬𑀤𑀺 𑀧𑀦 𑀲𑀔𑀡𑁆𑀟𑀲𑀻𑀫𑀁 𑀫𑀳𑀸𑀲𑀻𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑀸, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀲𑀫𑀽𑀳𑀦𑀺𑀢𑀧𑁄𑀭𑀸𑀡𑀲𑀻𑀫𑀸𑀬 𑀓𑁂𑀯𑀮𑀸𑀬 𑀧𑀓𑀢𑀺𑀕𑀸𑀫𑀲𑀻𑀫𑀸𑀬 𑀯𑀸 𑀯𑀺𑀲𑀼𑀁𑀕𑀸𑀫𑀲𑀻𑀫𑀸𑀬 𑀯𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀢𑀸𑀲𑀼 𑀘 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀤𑀻𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀲𑀼𑀔𑀓𑀭𑀡𑀢𑁆𑀣𑀁 𑀲𑀻𑀫𑀸 𑀧𑀞𑀫𑀁 𑀩𑀦𑁆𑀥𑀺𑀢𑀩𑁆𑀩𑀸, 𑀢𑀁 𑀧𑀦 𑀩𑀦𑁆𑀥𑀦𑁆𑀢𑁂𑀳𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀘𑁂 𑀳𑀺 𑀩𑁄𑀥𑀺𑀘𑁂𑀢𑀺𑀬𑀪𑀢𑁆𑀢𑀲𑀸𑀮𑀸𑀤𑀻𑀦𑀺 𑀲𑀩𑁆𑀩𑀯𑀢𑁆𑀣𑀽𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑀺, 𑀯𑀺𑀳𑀸𑀭𑀫𑀚𑁆𑀛𑁂 𑀩𑀳𑀽𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀅𑀩𑀦𑁆𑀥𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀩𑀦𑁆𑀥𑀺𑀢𑀩𑁆𑀩𑀸. 𑀅𑀓𑀢𑀯𑀺𑀳𑀸𑀭𑁂 𑀩𑀦𑁆𑀥𑀦𑁆𑀢𑁂𑀳𑀺 𑀩𑁄𑀥𑀺𑀘𑁂𑀢𑀺𑀬𑀸𑀤𑀻𑀦𑀁 𑀲𑀩𑁆𑀩𑀯𑀢𑁆𑀣𑀽𑀦𑀁 𑀧𑀢𑀺𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀣𑀸 𑀧𑀢𑀺𑀝𑁆𑀞𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀳𑁄𑀢𑀺, 𑀏𑀯𑀁 𑀩𑀦𑁆𑀥𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀇𑀫𑀁 𑀧𑀦 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑁂𑀳𑀻’’𑀢𑀺𑀆𑀤𑀺.

𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑀸 𑀧𑀦 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸𑀢𑀺? 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀘𑁂 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺, 𑀢𑀢𑁄 𑀑𑀭𑀁 𑀦 𑀯𑀝𑁆𑀝𑀢𑀺. 𑀧𑀭𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀕𑀡𑁆𑀳𑀦𑁆𑀢𑀻𑀧𑀺 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑁧𑁩𑁮) ‘‘𑀲𑀸 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦𑀸’’𑀢𑀺𑀆𑀤𑀺. 𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽𑀢𑀺 𑀘 𑀦𑀺𑀲𑀺𑀦𑁆𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀅𑀩𑁆𑀪𑀸𑀦𑀓𑀭𑀡𑀓𑀸𑀮𑁂 𑀓𑀫𑁆𑀫𑀸𑀭𑀳𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀻𑀲𑀢𑀺𑀕𑀡𑀲𑁆𑀲 𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀧𑁆𑀧𑀳𑁄𑀦𑀓𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) ‘‘𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀢𑀁 𑀔𑀡𑁆𑀟𑀲𑀻𑀫𑀁 𑀩𑀦𑁆𑀥𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀻𑀫𑀫𑀸𑀴𑀓𑀲𑁆𑀲 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀽𑀧𑀕𑀸 𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸. 𑀅𑀦𑁆𑀢𑁄𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀞𑀢𑁆𑀯𑀸 𑀔𑀡𑁆𑀟𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸. ‘‘𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸, 𑀢𑀲𑁆𑀲𑀸𑀬𑁂𑀯 𑀲𑀻𑀫𑀸𑀬 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀢𑀁 𑀩𑀦𑁆𑀥𑀦𑁆𑀢𑁂𑀳𑀻’’𑀢𑀺𑀆𑀤𑀺. 𑀏𑀯𑀁 𑀔𑀡𑁆𑀟𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀩𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀞𑀧𑁂𑀢𑀩𑁆𑀩𑀸. 𑀲𑀻𑀫𑀦𑁆𑀢𑀭𑀺𑀓𑀸 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀏𑀓𑀭𑀢𑀦𑀧𑁆𑀧𑀫𑀸𑀡𑀸 𑀯𑀝𑁆𑀝𑀢𑀺, 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀸𑀧𑀺 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀸𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀤𑁆𑀯𑁂𑀧𑀺 𑀢𑀺𑀲𑁆𑀲𑁄𑀧𑀺 𑀢𑀢𑀼𑀢𑁆𑀢𑀭𑀺𑀧𑀺 𑀔𑀡𑁆𑀟𑀲𑀻𑀫𑀸𑀬𑁄 𑀩𑀦𑁆𑀥𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸’’𑀢𑀺𑀆𑀤𑀺.

𑀏𑀯𑀁 𑀔𑀡𑁆𑀟𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀔𑀡𑁆𑀟𑀲𑀻𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀲𑀻𑀫𑀸𑀬 𑀞𑀢𑁆𑀯𑀸 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀢𑀢𑁄 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀦𑁆𑀢𑁂𑀳𑀺 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑀁 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀧𑀺 𑀓𑀸𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀏𑀯𑀁 𑀔𑀡𑁆𑀟𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸’’𑀢𑀺𑀆𑀤𑀺.

‘‘𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀓𑀺𑀢𑁆𑀢𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀓𑀺𑀢𑁆𑀢𑁂𑀢𑀩𑁆𑀩𑀸𑀢𑀺? 𑀤𑀓𑁆𑀔𑀺𑀡𑀢𑁄 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦𑁂𑀯 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀢𑀣𑀸 𑀳𑀺 𑀔𑀡𑁆𑀟𑀲𑀻𑀫𑀢𑁄 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀢𑀣𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 ‘‘𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀢𑁆𑀣 𑀲𑀩𑁆𑀩𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀓𑀺𑀢𑁆𑀢𑁂𑀢𑁆𑀯𑀸 𑀧𑀼𑀦 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀞𑀢𑁆𑀯𑀸 𑀧𑀼𑀭𑀺𑀫𑀁 𑀓𑀺𑀢𑁆𑀢𑀺𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀦 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀏𑀯𑀁 𑀩𑀳𑀽𑀦𑀫𑁆𑀧𑀺 𑀔𑀡𑁆𑀟𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀧𑀘𑁆𑀘𑁂𑀓𑀁 𑀓𑀺𑀢𑁆𑀢𑁂𑀢𑀩𑁆𑀩𑀸, 𑀢𑀢𑁄 𑀧𑀘𑁆𑀙𑀸 𑀅𑀯𑀲𑁂𑀲𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀫𑀳𑀸𑀲𑀻𑀫𑀸𑀬 𑀩𑀸𑀳𑀺𑀭𑀩𑀦𑁆𑀥𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺. 𑀏𑀯𑀁 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀫𑀳𑀸𑀲𑀻𑀫𑀸𑀬 𑀅𑀦𑁆𑀢𑁄 𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀲𑀗𑁆𑀓𑀭𑀤𑁄𑀲𑀸𑀧𑀕𑀫𑀦𑀢𑁆𑀣𑀁 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸𑀦𑀁 𑀞𑀧𑁂𑀢𑀩𑁆𑀩𑀢𑁆𑀢𑀸. 𑀏𑀯𑀁 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀢𑀣𑀸𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁩𑁮) ‘‘𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸𑀢𑀺 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀧𑀺𑀢𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸, 𑀢𑁂 𑀧𑀦 𑀓𑀺𑀢𑁆𑀢𑁂𑀦𑁆𑀢𑁂𑀦 𑀧𑀤𑀓𑁆𑀔𑀺𑀡𑀢𑁄 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦𑁂𑀯 𑀓𑀺𑀢𑁆𑀢𑁂𑀢𑀩𑁆𑀩𑀸’’𑀢𑀺𑀆𑀤𑀺.

𑀓𑀺𑀁 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀲𑀻𑀫𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀉𑀤𑀸𑀳𑀼 𑀅𑀜𑁆𑀜𑁂𑀦𑀧𑀺 𑀅𑀦𑀼𑀓𑁆𑀓𑀫𑁂𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺? 𑀲𑀘𑁂 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀢𑀢𑁄 𑀲𑀻𑀫𑀦𑁆𑀢𑀭𑀺𑀓𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀫𑀳𑀸𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸 𑀬𑀁 𑀲𑀻𑀫𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀧𑀞𑀫𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀔𑀡𑁆𑀟𑀲𑀻𑀫𑀢𑁄𑀯 𑀧𑀝𑁆𑀞𑀸𑀬 𑀩𑀦𑁆𑀥𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) ‘‘𑀲𑀘𑁂 𑀧𑀦 𑀔𑀡𑁆𑀟𑀲𑀻𑀫𑀸𑀬 𑀦𑀺𑀫𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺. 𑀏𑀯𑀁 𑀔𑀡𑁆𑀟𑀲𑀻𑀫𑀫𑀳𑀸𑀲𑀻𑀫𑀩𑀦𑁆𑀥𑀦𑁂𑀦 𑀪𑀺𑀓𑁆𑀔𑀽𑀦𑀁 𑀓𑁄 𑀕𑀼𑀡𑁄𑀢𑀺 𑀘𑁂? 𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀻𑀫𑀸𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺, 𑀫𑀳𑀸𑀲𑀻𑀫𑀸𑀬 𑀯𑀸 𑀞𑀺𑀢𑀸 𑀔𑀡𑁆𑀟𑀲𑀻𑀫𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁, 𑀲𑀻𑀫𑀦𑁆𑀢𑀭𑀺𑀓𑀸𑀬 𑀧𑀦 𑀞𑀺𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀦 𑀓𑁄𑀧𑁂𑀦𑁆𑀢𑀺. 𑀕𑀸𑀫𑀓𑁆𑀔𑁂𑀢𑁆𑀢𑁂 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀧𑀦 𑀲𑀻𑀫𑀦𑁆𑀢𑀭𑀺𑀓𑀸𑀬 𑀞𑀺𑀢𑀸 𑀓𑁄𑀧𑁂𑀦𑁆𑀢𑀺. 𑀲𑀻𑀫𑀦𑁆𑀢𑀭𑀺𑀓𑀸 𑀳𑀺 𑀕𑀸𑀫𑀓𑁆𑀔𑁂𑀢𑁆𑀢𑀁 𑀪𑀚𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀁 𑀩𑀤𑁆𑀥𑀸𑀲𑀼 𑀧𑀦 𑀲𑀻𑀫𑀸𑀲𑀽’’𑀢𑀺𑀆𑀤𑀺, 𑀏𑀯𑀁 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑁂𑀲𑀼 𑀯𑀲𑀦𑁆𑀢𑀸 𑀪𑀺𑀓𑁆𑀔𑀽 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑁂𑀳𑀺 𑀢𑀺𑀘𑀻𑀯𑀭𑁂𑀳𑀺 𑀯𑀺𑀦𑀸 𑀬𑀣𑀸𑀭𑀼𑀘𑀺 𑀯𑀲𑀺𑀢𑀼𑀁 𑀮𑀪𑀦𑁆𑀢𑀺. 𑀲𑀘𑁂 𑀧𑀦 𑀕𑀸𑀫𑁄 𑀅𑀢𑁆𑀣𑀺, 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼 𑀦 𑀮𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀲𑀻𑀫𑀸𑀩𑀦𑁆𑀥𑀦𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄.