𑁨𑁩. 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁫𑁧. 𑀏𑀯𑀁 𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀦𑀺𑀲𑁆𑀲𑀬𑁄𑀢𑀺 𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀲𑁆𑀲𑀬𑀦𑀁 𑀦𑀺𑀲𑁆𑀲𑀬𑁄, 𑀲𑁂𑀯𑀦𑀁 𑀪𑀚𑀦𑀦𑁆𑀢𑁆𑀬𑀢𑁆𑀣𑁄. 𑀦𑀺𑀧𑀼𑀩𑁆𑀩𑀲𑀺 𑀲𑁂𑀯𑀸𑀬𑀦𑁆𑀢𑀺 𑀥𑀸𑀢𑀼 𑀪𑀸𑀯𑀲𑀸𑀥𑀦𑁄, 𑀦 ‘‘𑀦𑀺𑀲𑁆𑀲𑀸𑀬 𑀦𑀁 𑀯𑀲𑀢𑀻𑀢𑀺 𑀦𑀺𑀲𑁆𑀲𑀬𑁄’’𑀢𑀺 𑀇𑀥 𑀯𑀺𑀬 𑀅𑀯𑀼𑀢𑁆𑀢𑀓𑀫𑁆𑀫𑀲𑀸𑀥𑀦𑁄. 𑀢𑀢𑁆𑀣 𑀳𑀺 𑀲𑁂𑀯𑀺𑀢𑀩𑁆𑀩𑁄 𑀧𑀼𑀕𑁆𑀕𑀮𑁄 𑀮𑀩𑁆𑀪𑀢𑀺, 𑀇𑀥 𑀧𑀦 𑀲𑁂𑀯𑀦𑀓𑀺𑀭𑀺𑀬𑀸𑀢𑀺. 𑀇𑀤𑀸𑀦𑀺 𑀢𑀁 𑀦𑀺𑀲𑁆𑀲𑀬𑀁 𑀧𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀲𑁆𑀲𑀚𑁆𑀚𑀦𑀸𑀬 𑀯𑀺𑀢𑁆𑀣𑀸𑀭𑀢𑁄 𑀞𑀧𑁂𑀢𑀼𑀁 ‘‘𑀓𑁂𑀦 𑀤𑀸𑀢𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁂𑀦 𑀤𑀸𑀢𑀩𑁆𑀩𑁄, 𑀓𑁂𑀦 𑀦 𑀤𑀸𑀢𑀩𑁆𑀩𑁄𑀢𑀺 𑀦𑀺𑀲𑁆𑀲𑀬𑀤𑀸𑀬𑀓𑀁 𑀓𑀢𑁆𑀢𑀸𑀭𑀁 𑀧𑀼𑀘𑁆𑀙𑀢𑀺, 𑀓𑀲𑁆𑀲 𑀤𑀸𑀢𑀩𑁆𑀩𑁄, 𑀓𑀲𑁆𑀲 𑀦 𑀤𑀸𑀢𑀩𑁆𑀩𑁄𑀢𑀺 𑀦𑀺𑀲𑁆𑀲𑀬𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀧𑀤𑀸𑀦𑀁, 𑀓𑀣𑀁 𑀕𑀳𑀺𑀢𑁄 𑀳𑁄𑀢𑀺, 𑀓𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀓𑀸𑀭𑀡𑀁, 𑀦𑀺𑀲𑁆𑀲𑀸𑀬 𑀓𑁂𑀦 𑀯𑀲𑀺𑀢𑀩𑁆𑀩𑀁, 𑀓𑁂𑀦 𑀦 𑀯𑀲𑀺𑀢𑀩𑁆𑀩𑀦𑁆𑀢𑀺 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀓𑀁. 𑀢𑀢𑁄 𑀧𑀼𑀘𑁆𑀙𑀸𑀦𑀼𑀓𑁆𑀓𑀫𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀢𑀢𑁆𑀣’’𑀢𑁆𑀬𑀸𑀤𑀺𑀫𑀸𑀳. 𑀦 𑀓𑁂𑀯𑀮𑀁 𑀏𑀢𑁆𑀣𑁂𑀯, 𑀅𑀣 𑀔𑁄 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀗𑁆𑀕𑁂𑀧𑀺 ‘‘𑀩𑁆𑀬𑀢𑁆𑀢𑁂𑀦𑀸’’𑀢𑀺 𑀆𑀕𑀢𑁄.

𑀢𑀢𑁆𑀣 𑀏𑀢𑁆𑀣 𑀘 𑀓𑁄 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀏𑀢𑁆𑀣 𑀘 ‘𑀩𑁆𑀬𑀢𑁆𑀢𑁄’𑀢𑀺 𑀇𑀫𑀺𑀦𑀸 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁄 𑀩𑀳𑀼𑀲𑁆𑀲𑀼𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀇𑀤𑀸𑀦𑀺 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀯𑀺𑀦𑀬𑁂𑀢𑀺 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂. 𑀯𑀺𑀦𑁂𑀢𑀼𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀢𑀼𑀁. 𑀤𑁆𑀯𑁂 𑀯𑀺𑀪𑀗𑁆𑀕𑀸 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸 𑀓𑀸𑀢𑀩𑁆𑀩𑀸𑀢𑀺 𑀇𑀤𑀁 𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀉𑀕𑁆𑀕𑀡𑁆𑀳𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀓𑀲𑁆𑀲 𑀧𑀫𑀼𑀝𑁆𑀞𑀁, 𑀇𑀢𑀭𑁂𑀲𑀁 𑀧𑀕𑀼𑀡𑀁 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀢𑀻𑀳𑀺 𑀚𑀦𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀢𑁆𑀢𑀦𑀓𑁆𑀔𑀫𑀸 𑀓𑀸𑀢𑀩𑁆𑀩𑀸’’𑀢𑀺. 𑀅𑀪𑀺𑀥𑀫𑁆𑀫𑁂𑀢𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂. 𑀳𑁂𑀝𑁆𑀞𑀺𑀫𑀸 𑀯𑀸 𑀢𑀬𑁄 𑀯𑀕𑁆𑀕𑀸𑀢𑀺 𑀫𑀳𑀸𑀯𑀕𑁆𑀕𑀢𑁄 𑀳𑁂𑀝𑁆𑀞𑀸 𑀲𑀕𑀸𑀣𑀸𑀯𑀕𑁆𑀕𑁄 𑀦𑀺𑀤𑀸𑀦𑀯𑀕𑁆𑀕𑁄 𑀔𑀦𑁆𑀥𑀯𑀕𑁆𑀕𑁄𑀢𑀺 𑀇𑀫𑁂 𑀢𑀬𑁄 𑀯𑀕𑁆𑀕𑀸. ‘‘𑀥𑀫𑁆𑀫𑀧𑀤𑀫𑁆𑀧𑀺 𑀲𑀳 𑀯𑀢𑁆𑀣𑀼𑀦𑀸 𑀉𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀚𑀸𑀢𑀓𑀪𑀸𑀡𑀓𑁂𑀦 𑀲𑀸𑀝𑁆𑀞𑀓𑀣𑀁 𑀚𑀸𑀢𑀓𑀁 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀥𑀫𑁆𑀫𑀧𑀤𑀁 𑀲𑀳 𑀯𑀢𑁆𑀣𑀼𑀦𑀸 𑀉𑀕𑁆𑀕𑀳𑁂𑀢𑀩𑁆𑀩𑀫𑁂𑀯.

𑀧𑀜𑁆𑀘𑀳𑀺 𑀪𑀺𑀓𑁆𑀔𑀯𑁂 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦𑀸𑀢𑀺𑀆𑀤𑀻𑀲𑀼 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦𑀸𑀢𑀺 𑀅𑀲𑁂𑀓𑁆𑀔𑀲𑁆𑀲 𑀲𑀻𑀮𑀓𑁆𑀔𑀦𑁆𑀥𑁄𑀧𑀺 𑀅𑀲𑁂𑀓𑁆𑀔𑁄 𑀲𑀻𑀮𑀓𑁆𑀔𑀦𑁆𑀥𑁄 𑀦𑀸𑀫. 𑀅𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀳𑀺 𑀅𑀲𑁂𑀓𑁆𑀔𑁄, 𑀲𑀻𑀮𑀓𑁆𑀔𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲𑀧𑀺 𑀯𑀲𑁂𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀅𑀬𑀁 𑀓𑀣𑀸. 𑀅𑀲𑁂𑀓𑁆𑀔𑀲𑀻𑀮𑀦𑁆𑀢𑀺 𑀘 𑀦 𑀅𑀕𑁆𑀕𑀨𑀮𑀲𑀻𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀬𑀁 𑀓𑀺𑀜𑁆𑀘𑀺 𑀅𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀲𑀻𑀮𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀲𑁆𑀲 𑀲𑀻𑀮𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀬𑀫𑁂𑀯 𑀦𑀬𑁄, 𑀢𑀲𑁆𑀫𑀸 𑀬𑀣𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀮𑁄𑀓𑀺𑀬𑀫𑀺𑀲𑁆𑀲𑀓𑀸 𑀓𑀣𑀺𑀢𑀸, 𑀏𑀯𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁄𑀧𑀻𑀢𑀺 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀆𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀏𑀯. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀦 𑀮𑁄𑀓𑀺𑀬𑀫𑁂𑀯. 𑀢𑁂𑀦𑁂𑀯 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀲𑀁.𑀦𑀺. 𑀅𑀝𑁆𑀞. 𑁧.𑁧.𑁧𑁩𑁫) 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑁄 𑀓𑀣𑀺𑀢𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁄𑀢𑀺, 𑀢𑀁 𑀮𑁄𑀓𑀺𑀬𑀫𑁂𑀯𑀸’’𑀢𑀺.

𑀅𑀲𑁆𑀲𑀤𑁆𑀥𑁄𑀢𑀺𑀆𑀤𑀻𑀲𑀼 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀲𑀤𑁆𑀥𑀸 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀲𑁆𑀲𑀤𑁆𑀥𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀳𑀺𑀭𑀻𑀢𑀺 𑀅𑀳𑀺𑀭𑀺𑀓𑁄, 𑀅𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀑𑀢𑁆𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀻, 𑀅𑀓𑀼𑀲𑀮𑀲𑀫𑀸𑀧𑀢𑁆𑀢𑀺𑀬𑀸 𑀦 𑀪𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀘𑁆𑀙𑀺𑀢𑀁 𑀲𑀻𑀤𑀢𑀻𑀢𑀺 𑀓𑀼𑀲𑀻𑀢𑁄, 𑀳𑀻𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁 𑀏𑀢𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑀫𑁆𑀫𑀧𑁆𑀧𑀥𑀸𑀦𑀬𑀼𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀼𑀝𑁆𑀞𑀸 𑀲𑀢𑀺 𑀏𑀢𑀲𑁆𑀲𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀻, 𑀦𑀝𑁆𑀞𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀏𑀢𑀲𑁆𑀲𑀸𑀢𑀺 𑀉𑀧𑀝𑁆𑀞𑀺𑀢𑀲𑁆𑀲𑀢𑀻, 𑀦𑀺𑀘𑁆𑀘𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀧𑀯𑀢𑁆𑀢𑀲𑀢𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀘 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀘 𑀆𑀧𑀚𑁆𑀚𑀺𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀕𑀡𑁆𑀳𑀸𑀢𑀺, 𑀕𑀸𑀳𑀬𑀢𑀻𑀢𑀺 𑀯𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀻𑀢𑀺 ‘‘𑀦 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸’’𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺.

𑀅𑀪𑀺 𑀯𑀺𑀲𑀺𑀝𑁆𑀞𑁄 𑀉𑀢𑁆𑀢𑀫𑁄 𑀲𑀫𑀸𑀘𑀸𑀭𑁄 𑀅𑀪𑀺𑀲𑀫𑀸𑀘𑀸𑀭𑁄, 𑀅𑀪𑀺𑀲𑀫𑀸𑀘𑀸𑀭𑁄𑀯 𑀆𑀪𑀺𑀲𑀫𑀸𑀘𑀸𑀭𑀺𑀓𑁄𑀢𑀺 𑀘 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸𑀢𑀺 𑀘 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀺𑀓𑁆𑀔𑀸. 𑀅𑀪𑀺𑀲𑀫𑀸𑀘𑀸𑀭𑀁 𑀯𑀸 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀲𑀺𑀓𑁆𑀔𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀺𑀓𑁆𑀔𑀸, 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸, 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀯 ‘‘𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀯𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀆𑀪𑀺𑀲𑀫𑀸𑀘𑀸𑀭𑀺𑀓’’𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁧) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑁂𑀓𑁆𑀔𑀸, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀡𑁆𑀡𑀢𑁆𑀢𑀺, 𑀲𑀩𑁆𑀩𑀸𑀧𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀓𑁆𑀔𑀸𑀧𑀤𑀧𑀡𑁆𑀡𑀢𑁆𑀢𑀺 ‘‘𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀕𑀡𑁆𑀞𑀺𑀧𑀤𑁂𑀧𑀺 𑀯𑀼𑀢𑁆𑀢𑀁 ‘‘𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬𑀦𑁆𑀢𑀺 𑀧𑀸𑀭𑀸𑀚𑀺𑀓𑀫𑀸𑀤𑀺𑀁 𑀓𑀢𑁆𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬’’𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁮𑁪).

𑀉𑀧𑀚𑁆𑀛𑀸𑀬𑀸𑀘𑀭𑀺𑀬𑀓𑀣𑀸𑀬𑀁 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀅𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀅𑀲𑁂𑀓𑁆𑀔𑁄, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑀺𑀓𑀸𑀬. 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂𑀢𑀺 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀻𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀧𑀘𑁆𑀙𑀺𑀫𑀸𑀦𑀺 𑀢𑀻𑀡𑀻𑀢𑀺 𑀦 𑀧𑀝𑀺𑀩𑀮𑁄 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁, 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺. 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀳𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀬𑀲𑀗𑁆𑀔𑀸𑀢𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁 𑀅𑀧𑁆𑀧𑀝𑀺𑀩𑀮𑀢𑀸 𑀦𑀸𑀫 𑀅𑀩𑁆𑀬𑀢𑁆𑀢𑀢𑁆𑀢𑀸 𑀏𑀯 𑀳𑁄𑀢𑀻𑀢𑀺 𑀲𑀸𑀧𑀺 𑀆𑀧𑀢𑁆𑀢𑀺𑀅𑀗𑁆𑀕𑀫𑁂𑀯 𑀯𑀼𑀢𑁆𑀢𑀸.

𑀅𑀪𑀺 𑀯𑀺𑀲𑀺𑀝𑁆𑀞𑁄 𑀉𑀢𑁆𑀢𑀫𑁄 𑀲𑀫𑀸𑀘𑀸𑀭𑁄 𑀅𑀪𑀺𑀲𑀫𑀸𑀘𑀸𑀭𑁄, 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀻𑀮𑀁, 𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑀸 𑀔𑀦𑁆𑀥𑀓𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀸. 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀳𑀺 𑀢𑀤𑀢𑁆𑀣𑀧𑀭𑀺𑀧𑀽𑀭𑀡𑀢𑁆𑀣𑀺𑀓𑁂𑀳𑀺 𑀉𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸 𑀓𑀸𑀭𑀡𑀪𑀽𑀢𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸, 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀲𑀺𑀓𑁆𑀔𑀸𑀧𑀤𑀁. 𑀢𑁂𑀦𑁂𑀯𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀧𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁧) ‘‘𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀔𑀦𑁆𑀥𑀓𑀯𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀆𑀪𑀺𑀲𑀫𑀸𑀘𑀸𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑁂𑀓𑁆𑀔𑀸, 𑀪𑀕𑀯𑀢𑀸𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀺. 𑀲𑀩𑁆𑀩𑀸𑀧𑀺 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀲𑀺𑀓𑁆𑀔𑀸𑀧𑀤𑀧𑀡𑁆𑀡𑀢𑁆𑀢𑀺 ‘‘𑀲𑁂𑀓𑁆𑀔𑀧𑀡𑁆𑀡𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀢𑀺 𑀏𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀳𑀺 𑀯𑀼𑀢𑁆𑀢𑀁 𑀚𑀸𑀢𑀺𑀪𑀽𑀫𑀺𑀧𑀼𑀕𑁆𑀕𑀮𑀲𑀫𑁆𑀧𑀬𑁄𑀕𑀯𑀢𑁆𑀣𑀸𑀭𑀫𑁆𑀫𑀡𑀓𑀫𑁆𑀫𑀤𑁆𑀯𑀸𑀭𑀮𑀓𑁆𑀔𑀡𑀭𑀲𑀸𑀤𑀺𑀪𑁂𑀤𑁂𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀲𑀦𑀺𑀩𑁆𑀩𑀸𑀦𑀁 𑀦𑀸𑀫𑀁, 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀁 𑀭𑀽𑀧𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀦𑀧𑀜𑁆𑀜𑀸, 𑀢𑀧𑁆𑀧𑀓𑀸𑀲𑀓𑁄 𑀘 𑀕𑀦𑁆𑀣𑁄 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀦𑀸𑀫. 𑀇𑀫𑀺𑀦𑀸 𑀅𑀪𑀺𑀥𑀫𑁆𑀫𑀢𑁆𑀣𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀺𑀓𑁆𑀔𑀸𑀧𑁂𑀢𑀼𑀦𑁆𑀢𑀺 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁮𑁪) 𑀯𑀼𑀢𑁆𑀢𑀁.

𑁧𑁫𑁩. 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻𑀢𑀺 𑀏𑀢𑁆𑀣 𑀆𑀬𑀲𑁆𑀫𑀢𑁄𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀆𑀬𑀲𑁆𑀫𑀦𑁆𑀢𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀁 𑀧𑀦 𑀯𑀼𑀢𑁆𑀢𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁭𑁬) ‘‘𑀩𑁆𑀬𑀢𑁆𑀢𑁄…𑀧𑁂… 𑀯𑀼𑀢𑁆𑀢𑀮𑀓𑁆𑀔𑀡𑁄𑀬𑁂𑀯𑀸’’𑀢𑀺, 𑀢𑀁 𑀧𑀭𑀺𑀲𑀽𑀧𑀝𑁆𑀞𑀸𑀓𑀩𑀳𑀼𑀲𑁆𑀲𑀼𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀦…𑀧𑁂… 𑀢𑀸𑀯 𑀯𑀢𑁆𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀥𑀫𑁆𑀫𑀸𑀘𑀭𑀺𑀬𑀸𑀦𑀁 𑀏𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀬𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀅𑀬𑀁 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄. 𑀬𑁂𑀦 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸 𑀯𑀼𑀢𑁆𑀢𑀸, 𑀅𑀬𑀁 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄. 𑀬𑁄 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀤𑁂𑀢𑀺, 𑀅𑀬𑀁 𑀥𑀫𑁆𑀫𑀸𑀘𑀭𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁫𑁪. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀬𑀁 𑀤𑀺𑀲𑀁 𑀕𑀢𑁄𑀢𑀺 𑀧𑀼𑀦 𑀆𑀕𑀦𑁆𑀢𑀼𑀓𑀸𑀫𑁄, 𑀅𑀦𑀸𑀕𑀦𑁆𑀢𑀼𑀓𑀸𑀫𑁄 𑀯𑀸 𑀳𑀼𑀢𑁆𑀯𑀸 𑀯𑀸𑀲𑀢𑁆𑀣𑀸𑀬 𑀓𑀜𑁆𑀘𑀺 𑀤𑀺𑀲𑀁 𑀕𑀢𑁄. 𑀪𑀺𑀓𑁆𑀔𑀼𑀲𑁆𑀲 𑀲𑀪𑀸𑀕𑀢𑀦𑁆𑀢𑀺 𑀧𑁂𑀲𑀮𑀪𑀸𑀯𑀁. 𑀑𑀮𑁄𑀓𑁂𑀢𑁆𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀯𑀺𑀩𑁆𑀪𑀦𑁆𑀢𑁂…𑀧𑁂… 𑀢𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 ‘‘𑀲𑀘𑁂 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀢𑀤𑀳𑁂𑀯 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘𑀓𑀢𑀺𑀧𑀸𑀳𑁂𑀦 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀕𑀫𑀦𑁂 𑀲𑀉𑀲𑁆𑀲𑀸𑀳𑁄 𑀳𑁄𑀢𑀺, 𑀭𑀓𑁆𑀔𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀸 𑀇𑀥 𑀧𑀝𑀺𑀓𑁆𑀓𑀫𑀻𑀢𑀺 𑀫𑀸 𑀇𑀥 𑀧𑀯𑀺𑀲𑀺. 𑀢𑀢𑁆𑀭𑁂𑀯 𑀯𑀲𑀺𑀢𑀩𑁆𑀩𑀦𑁆𑀢𑀺 𑀢𑀢𑁆𑀣𑁂𑀯 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀢𑀁𑀬𑁂𑀯 𑀯𑀺𑀳𑀸𑀭𑀁…𑀧𑁂… 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀉𑀧𑀚𑁆𑀛𑀸𑀬𑁂𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑀧𑀭𑀺𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑀕𑀢𑀲𑁆𑀲𑀧𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀺𑀢𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺.

𑀆𑀘𑀭𑀺𑀬𑀫𑁆𑀳𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀲𑀼 𑀆𑀘𑀭𑀺𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀻𑀢𑀺 𑀏𑀢𑁆𑀣 ‘‘𑀧𑀓𑁆𑀓𑀦𑁆𑀢𑁄𑀢𑀺 𑀤𑀺𑀲𑀁 𑀕𑀢𑁄’’𑀢𑀺𑀆𑀤𑀺𑀦𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀓𑁆𑀓𑀫𑀦𑁂 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀲𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀥𑀸𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀢𑀁 𑀅𑀯𑀢𑁆𑀯𑀸 ‘‘𑀓𑁄𑀘𑀺 𑀆𑀘𑀭𑀺𑀬𑁄 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑁄𑀬𑁂𑀯 𑀦𑀬𑁄 𑀆𑀭𑀤𑁆𑀥𑁄. 𑀅𑀬𑀜𑁆𑀘 𑀦𑀬𑁄 𑀉𑀧𑀚𑁆𑀛𑀸𑀬𑀧𑀓𑁆𑀓𑀫𑀦𑁂𑀧𑀺 𑀯𑁂𑀤𑀺𑀢𑀩𑁆𑀩𑁄𑀬𑁂𑀯. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀏𑀓𑀢𑁆𑀣𑀯𑀼𑀢𑁆𑀢𑀮𑀓𑁆𑀔𑀡𑀁 𑀅𑀜𑁆𑀜𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀏𑀢𑁆𑀢𑀸𑀯𑀢𑀸 𑀤𑀺𑀲𑀸𑀧𑀓𑁆𑀓𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁂𑀧𑀺 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀻𑀢𑀺 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀺, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀧𑀦 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. ‘‘𑀲𑀘𑁂𑀧𑀺 𑀆𑀘𑀭𑀺𑀬𑁄 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀬 𑀧𑀡𑀸𑀫𑁂𑀢𑀻’’𑀢𑀺𑀆𑀤𑀺 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀲𑁆𑀲 𑀆𑀡𑀢𑁆𑀢𑀺𑀬𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁮𑁩) 𑀯𑀼𑀢𑁆𑀢𑀁.

𑁧𑁫𑁩. 𑀲𑀸𑀳𑀽𑀢𑀺 𑀲𑀸𑀥𑀼 𑀲𑀼𑀦𑁆𑀤𑀭𑀁. 𑀮𑀳𑀽𑀢𑀺 𑀅𑀕𑀭𑀼, 𑀲𑀼𑀪𑀭𑀢𑀸𑀢𑀺 𑀅𑀢𑁆𑀣𑁄. 𑀑𑀧𑀸𑀬𑀺𑀓𑀦𑁆𑀢𑀺 𑀉𑀧𑀸𑀬𑀧𑀝𑀺𑀲𑀁𑀬𑀼𑀢𑁆𑀢𑀁, 𑀏𑀯𑀁 𑀧𑀝𑀺𑀧𑀚𑁆𑀚𑀦𑀁 𑀦𑀺𑀢𑁆𑀣𑀭𑀡𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑀦𑁆𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀫𑀺𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀸𑀯𑀳𑁂𑀦, 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀲𑀫𑁆𑀧𑀸𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦𑀸𑀢𑀺 𑀏𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀓𑀁 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺. ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁 𑀲𑀦𑁆𑀥𑀸𑀬𑀸𑀢𑀺 𑀉𑀧𑀚𑁆𑀛𑀸𑀬𑁂𑀦 ‘‘𑀲𑀸𑀳𑀽’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑁂𑀲𑀼 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀬𑀸𑀘𑀦𑀤𑀸𑀦𑀫𑀢𑁆𑀢𑁂𑀦𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀞𑀫𑀁 𑀆𑀬𑀸𑀘𑀦𑀫𑀢𑁆𑀢𑁂𑀦, 𑀢𑀢𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘 ‘‘𑀲𑀸𑀳𑀽’’𑀢𑀺𑀆𑀤𑀺𑀦𑀸 𑀯𑀘𑀦𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀕𑁆𑀕𑀳𑀡𑁂 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻𑀢𑀺 𑀆𑀬𑀲𑁆𑀫𑀦𑁆𑀢𑀁 𑀦𑀺𑀲𑁆𑀲𑀸𑀬 𑀯𑀲𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁫𑁪. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸𑀬𑀁 𑀬𑁄 𑀯𑀸 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀮𑀚𑁆𑀚𑀻𑀲𑀼 𑀏𑀯 𑀦𑀺𑀲𑁆𑀲𑀬𑀕𑁆𑀕𑀳𑀡𑀁 𑀦𑀺𑀬𑁄𑀚𑁂𑀢𑀺 𑀅𑀮𑀚𑁆𑀚𑀻𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀘 𑀧𑀭𑀺𑀪𑁄𑀕𑀲𑀤𑁆𑀤𑁂𑀦 𑀏𑀓𑀓𑀫𑁆𑀫𑀸𑀤𑀺𑀓𑁄 𑀲𑀁𑀯𑀸𑀲𑁄 𑀕𑀳𑀺𑀢𑁄 𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑁆𑀲 𑀲𑀫𑁆𑀪𑁄𑀕𑀲𑀤𑁆𑀤𑁂𑀦 𑀕𑀳𑀺𑀢𑀢𑁆𑀢𑀸. 𑀏𑀢𑁂𑀦 𑀘 𑀲𑀫𑁆𑀪𑁄𑀕𑀲𑀁𑀯𑀸𑀲𑀸𑀦𑀁 𑀅𑀮𑀚𑁆𑀚𑀻𑀳𑀺 𑀲𑀤𑁆𑀥𑀺𑀁 𑀦 𑀓𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑁄 𑀦𑀢𑁆𑀣𑀺. 𑀢𑀸𑀤𑀺𑀲𑁄𑀢𑀺 𑀬𑀢𑁆𑀣 𑀦𑀺𑀲𑁆𑀲𑀬𑁄 𑀕𑀳𑀺𑀢𑀧𑀼𑀩𑁆𑀩𑁄, 𑀬𑁄 𑀘 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄, 𑀢𑀸𑀤𑀺𑀲𑁄. 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 ‘‘𑀮𑀳𑀼𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀜𑁆𑀘𑁂𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀤𑀺𑀯𑀲𑀸𑀦𑀻𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀬𑀤𑀺 𑀏𑀓𑀸𑀳𑀤𑁆𑀯𑀻𑀳𑁂𑀦 𑀲𑀪𑀸𑀕𑀢𑀸 𑀧𑀜𑁆𑀜𑀸𑀬𑀢𑀺, 𑀜𑀸𑀢𑀤𑀺𑀯𑀲𑁂 𑀕𑀳𑁂𑀢𑀩𑁆𑀩𑁄𑀯. 𑀅𑀣𑀸𑀧𑀺 𑀘𑀢𑀼𑀧𑀜𑁆𑀘𑀸𑀳𑁂𑀦𑀧𑀺 𑀦 𑀧𑀜𑁆𑀜𑀸𑀬𑀢𑀺, 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀢𑀓𑀸𑀦𑀺 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸𑀦𑀺. 𑀲𑀪𑀸𑀕𑀢𑀁 𑀑𑀮𑁄𑀓𑁂𑀫𑀻𑀢𑀺 𑀧𑀦 𑀮𑁂𑀲𑁄 𑀦 𑀓𑀸𑀢𑀩𑁆𑀩𑁄. 𑀤𑀳𑀭𑀸 𑀲𑀼𑀡𑀦𑁆𑀢𑀻𑀢𑀺 𑀏𑀢𑁆𑀣 𑀅𑀲𑀼𑀢𑁆𑀯𑀸𑀧𑀺 ‘‘𑀆𑀕𑀫𑀺𑀲𑁆𑀲𑀢𑀺, 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀘𑀺𑀭𑀸𑀬𑀦𑁆𑀢𑀻’’𑀢𑀺 𑀲𑀜𑁆𑀜𑀸𑀬 𑀲𑀢𑀺𑀧𑀺 𑀮𑀩𑁆𑀪𑀢𑁂𑀯 𑀧𑀭𑀺𑀳𑀸𑀭𑁄. 𑀢𑁂𑀦𑀸𑀳 ‘‘𑀇𑀥𑁂𑀯𑀸𑀳𑀁 𑀯𑀲𑀺𑀲𑁆𑀲𑀸𑀫𑀻𑀢𑀺 𑀧𑀳𑀺𑀡𑀢𑀺, 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻’’𑀢𑀺. 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀕𑀫𑀦𑁂 𑀦𑀺𑀭𑀼𑀲𑁆𑀲𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀉𑀲𑁆𑀲𑀸𑀳𑀲𑁆𑀲 𑀧𑀦 𑀲𑁂𑀦𑀸𑀲𑀦𑀧𑀝𑀺𑀲𑀸𑀫𑀦𑀸𑀤𑀺𑀯𑀲𑁂𑀦 𑀓𑀢𑀺𑀧𑀸𑀳𑁂 𑀕𑀢𑁂𑀧𑀺 𑀦 𑀤𑁄𑀲𑁄.

𑀢𑀢𑁆𑀭𑁂𑀯 𑀯𑀲𑀺𑀢𑀩𑁆𑀩𑀦𑁆𑀢𑀺 𑀢𑀢𑁆𑀭 𑀲𑀪𑀸𑀕𑀝𑁆𑀞𑀸𑀦𑁂 𑀏𑀯 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀢𑀁𑀬𑁂𑀯 𑀯𑀺𑀳𑀸𑀭𑀁…𑀧𑁂… 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀉𑀧𑀚𑁆𑀛𑀸𑀬𑁂 𑀲𑀗𑁆𑀕𑀡𑁆𑀳𑀦𑁆𑀢𑁂𑀬𑁂𑀯 𑀢𑀁𑀲𑀫𑁄𑀥𑀸𑀦𑁂 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀺𑀁 𑀧𑀦 𑀓𑁄𑀥𑁂𑀦 𑀯𑀸 𑀕𑀡𑀦𑀺𑀭𑀧𑁂𑀓𑁆𑀔𑀢𑀸𑀬 𑀯𑀸 𑀅𑀲𑀗𑁆𑀕𑀡𑁆𑀳𑀦𑁆𑀢𑁂 𑀅𑀜𑁆𑀜𑁂𑀲𑀼 𑀕𑀳𑀺𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀆𑀘𑀭𑀺𑀬𑀫𑁆𑀳𑀸 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀁 𑀯𑀼𑀢𑁆𑀢𑁄 ‘‘𑀓𑁄𑀘𑀺 𑀆𑀘𑀭𑀺𑀬𑁄’’𑀢𑀺𑀆𑀤𑀺𑀓𑁄 𑀦𑀬𑁄 𑀉𑀧𑀚𑁆𑀛𑀸𑀬𑀧𑀓𑁆𑀓𑀫𑀦𑀸𑀤𑀻𑀲𑀼𑀧𑀺 𑀦𑁂𑀢𑁆𑀯𑀸 𑀢𑀢𑁆𑀣 𑀘 𑀯𑀼𑀢𑁆𑀢𑁄 𑀇𑀥𑀸𑀧𑀺 𑀦𑁂𑀢𑁆𑀯𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑁄. 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑀻𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀲𑀦𑁆𑀢𑀺. 𑀢𑁂𑀦 𑀩𑀳𑀺𑀉𑀧𑀘𑀸𑀭𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑀭𑁂 𑀆𑀲𑀦𑁆𑀦𑁂 𑀧𑀤𑁂𑀲𑁂 𑀯𑀲𑀢𑀺, 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀧𑀦 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀲𑀢𑁄 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑁂𑀯𑀸𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁮𑁩) 𑀯𑀼𑀢𑁆𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀢𑁂𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.