𑁨𑁨. 𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁨𑁩. 𑀏𑀯𑀁 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑀼𑀁 ‘‘𑀧𑀩𑁆𑀩𑀚𑁆𑀚𑀸𑀢𑀺 𑀏𑀢𑁆𑀣 𑀧𑀦𑀸’’𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀁 𑀯𑀚𑀺𑀢𑀩𑁆𑀩𑀸𑀢𑀺 𑀧𑀩𑁆𑀩𑀚𑁆𑀚𑀸, 𑀉𑀧𑀲𑀫𑁆𑀧𑀤𑀸𑀢𑁄 𑀧𑀞𑀫𑀁 𑀉𑀧𑀕𑀘𑁆𑀙𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧-𑀧𑀼𑀩𑁆𑀩 𑀯𑀚 𑀕𑀢𑀺𑀫𑁆𑀳𑀻𑀢𑀺 𑀥𑀸𑀢𑀼. 𑀓𑀼𑀮𑀧𑀼𑀢𑁆𑀢𑀦𑁆𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑁂 𑀧𑀼𑀕𑁆𑀕𑀮𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀢𑁂 𑀯𑀚𑁆𑀚𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀩𑁆𑀩𑀚𑁆𑀚𑀸𑀤𑁄𑀲𑀯𑀺𑀭𑀳𑀺𑀢𑁄𑀢𑀺 𑀧𑀩𑁆𑀩𑀚𑁆𑀚𑀸𑀬 𑀅𑀦𑁆𑀢𑀭𑀸𑀬𑀓𑀭𑁂𑀳𑀺 𑀧𑀜𑁆𑀘𑀸𑀩𑀸𑀥𑀸𑀤𑀺𑀤𑁄𑀲𑁂𑀳𑀺 𑀯𑀺𑀭𑀳𑀺𑀢𑁄. 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺 𑀅𑀥𑀺𑀧𑁆𑀧𑁂𑀢𑀸. ‘‘𑀢𑀜𑁆𑀘𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀺 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂𑀲𑀼 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀘𑁂, 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀏𑀯𑀜𑁆𑀘 𑀲𑀢𑀺 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀺 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀘𑁂, 𑀲𑀩𑁆𑀩𑀢𑁆𑀣 𑀯𑀝𑁆𑀝𑀢𑀻𑀢𑀺 𑀆𑀧𑀦𑁆𑀦𑀁, 𑀢𑀜𑁆𑀘 𑀦 𑀲𑀸𑀫𑀜𑁆𑀜𑀢𑁄 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀧𑀤𑁂𑀲𑀯𑀺𑀲𑁂𑀲𑁂𑀬𑁂𑀯 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘𑀲𑀘𑁂 𑀧𑀦𑀸’𑀢𑀺𑀆𑀤𑀺𑀫𑀸𑀳. 𑀲𑀘𑁂 𑀳𑀺 𑀅𑀯𑀺𑀲𑁂𑀲𑁂𑀦 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀯𑀝𑁆𑀝𑁂𑀬𑁆𑀬, ‘𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀳𑀺 𑀧𑀓𑀢𑀺𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂’𑀢𑀺 𑀧𑀤𑁂𑀲𑀦𑀺𑀬𑀫𑀁 𑀦 𑀓𑀭𑁂𑀬𑁆𑀬, 𑀢𑀲𑁆𑀫𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀳𑀺 𑀧𑀓𑀢𑀺𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀔𑀼𑀤𑁆𑀤𑀓𑀢𑀭𑀁 𑀧𑀦 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀯𑀸 𑀯𑀟𑁆𑀠𑀦𑀓𑀧𑀓𑁆𑀔𑁂 𑀯𑀸 𑀞𑀺𑀢𑀁 𑀳𑁄𑀢𑀼, 𑀯𑀝𑁆𑀝𑀢𑀺 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀔𑀼𑀤𑁆𑀤𑀓𑀢𑀭𑀲𑁆𑀲 𑀯𑀟𑁆𑀠𑀦𑀓𑀧𑀓𑁆𑀔𑁂 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀯𑀸 𑀞𑀺𑀢𑀲𑁆𑀲 𑀫𑀼𑀔𑀸𑀤𑀻𑀲𑀼𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁮𑁮) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁮𑁮-𑁮𑁯) 𑀧𑀦 ‘‘𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀁 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀢𑀸𑀤𑀺𑀲𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂𑀧𑀺 𑀘 𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀧𑀸𑀓𑀝𑀝𑁆𑀞𑀸𑀦𑁂𑀧𑀺 𑀧𑀦 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀊𑀦𑀢𑀭𑀁 𑀅𑀯𑀟𑁆𑀠𑀦𑀓𑀁 𑀯𑀝𑁆𑀝𑀢𑀻𑀢𑀺 𑀬𑁂 𑀕𑀡𑁆𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀕𑀳𑀡𑀁 𑀧𑀝𑀺𑀲𑁂𑀥𑁂𑀢𑀼𑀁 ‘𑀫𑀼𑀔𑁂 𑀧𑀦𑀸’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑁄𑀥𑀸…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀢𑀸𑀤𑀺𑀲𑁄𑀧𑀺 𑀭𑁄𑀕𑁄 𑀓𑀼𑀝𑁆𑀞𑁂𑀬𑁂𑀯 𑀅𑀦𑁆𑀢𑁄𑀕𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀡𑁆𑀟𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀦 𑀫𑀼𑀔𑀸𑀤𑀻𑀲𑀼 𑀓𑁄𑀮𑀝𑁆𑀞𑀺𑀫𑀢𑁆𑀢𑀢𑁄 𑀔𑀼𑀤𑁆𑀤𑀓𑀢𑀭𑁄𑀧𑀺 𑀕𑀡𑁆𑀟𑁄 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀲𑀼𑀁 𑀦 𑀤𑀲𑁆𑀲𑀺𑀢𑁄. ‘‘𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁂𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀓𑀼𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦 𑀫𑀼𑀔𑀸𑀤𑀻𑀲𑀼 𑀓𑁄𑀮𑀝𑁆𑀞𑀺𑀧𑁆𑀧𑀫𑀸𑀡𑀢𑁄 𑀔𑀼𑀤𑁆𑀤𑀓𑀢𑀭𑁄𑀧𑀺 𑀕𑀡𑁆𑀟𑁄 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀅𑀯𑀟𑁆𑀠𑀦𑀓𑀧𑀓𑁆𑀔𑁂 𑀞𑀺𑀢𑁂𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀓𑁄𑀮𑀝𑁆𑀞𑀺𑀫𑀢𑁆𑀢𑀢𑁄 𑀔𑀼𑀤𑁆𑀤𑀓𑀢𑀭𑁄𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀧𑀓𑀢𑀺𑀯𑀡𑁆𑀡𑁂 𑀚𑀸𑀢𑁂𑀢𑀺 𑀭𑁄𑀕𑀳𑁂𑀢𑀼𑀓𑀲𑁆𑀲 𑀯𑀺𑀓𑀸𑀭𑀯𑀡𑁆𑀡𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀓𑁄𑀮𑀝𑁆𑀞𑀺𑀫𑀢𑁆𑀢𑀓𑁄𑀢𑀺 𑀩𑀤𑀭𑀝𑁆𑀞𑀺𑀧𑁆𑀧𑀫𑀸𑀡𑁄. ‘‘𑀲𑀜𑁆𑀚𑀸𑀢𑀙𑀯𑀺𑀁 𑀓𑀸𑀭𑁂𑀢𑁆𑀯𑀸’’𑀢𑀺 𑀧𑀸𑀞𑁄, 𑀯𑀺𑀚𑁆𑀚𑀫𑀸𑀦𑀙𑀯𑀺𑀁 𑀓𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁮𑁮-𑁮𑁯) 𑀧𑀦 ‘‘𑀲𑀘𑁆𑀙𑀯𑀺𑀁 𑀓𑀸𑀭𑁂𑀢𑁆𑀯𑀸𑀢𑀺 𑀯𑀺𑀚𑁆𑀚𑀫𑀸𑀦𑀙𑀯𑀺𑀁 𑀓𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀲𑀜𑁆𑀙𑀯𑀺𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑀜𑁆𑀚𑀸𑀢𑀙𑀅𑀦𑁆𑀢𑀺 𑀅𑀢𑁆𑀣𑁄. 𑀕𑀡𑁆𑀟𑀸𑀤𑀻𑀲𑀼 𑀯𑀽𑀧𑀲𑀦𑁆𑀢𑁂𑀲𑀼𑀧𑀺 𑀢𑀁 𑀞𑀸𑀦𑀁 𑀯𑀺𑀯𑀡𑁆𑀡𑀫𑁆𑀧𑀺 𑀳𑁄𑀢𑀺, 𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀧𑀢𑁆𑀢𑀯𑀡𑁆𑀡𑀦𑁆𑀢𑀺 𑀭𑀢𑁆𑀢𑀧𑀤𑀼𑀫𑀲𑁂𑀢𑀧𑀤𑀼𑀫𑀧𑀼𑀧𑁆𑀨𑀤𑀮𑀯𑀡𑁆𑀡𑀁. 𑀓𑀼𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀅𑀯𑀟𑁆𑀠𑀦𑀓𑀁 𑀯𑀝𑁆𑀝𑀢𑀺, 𑀅𑀜𑁆𑀜𑀢𑁆𑀣 𑀦 𑀓𑀺𑀜𑁆𑀘𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑀺. 𑀲𑁄𑀲𑀩𑁆𑀬𑀸𑀥𑀻𑀢𑀺 𑀔𑀬𑀭𑁄𑀕𑁄. 𑀬𑀓𑁆𑀔𑀼𑀫𑁆𑀫𑀸𑀤𑁄𑀢𑀺 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀳𑀢𑁆𑀣𑀫𑀼𑀔𑀸𑀤𑀺𑀓𑀁 𑀅𑀯𑀬𑀯𑀁 𑀪𑀽𑀫𑀺𑀬𑀁 𑀖𑀁𑀲𑀦𑀓𑁄 𑀬𑀓𑁆𑀔𑁄𑀯 𑀭𑁄𑀕𑁄.

𑁧𑁨𑁪. 𑀫𑀳𑀸𑀫𑀢𑁆𑀢𑁄𑀢𑀺 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁄. ‘‘𑀦 𑀤𑀸𑀦𑀸𑀳𑀁 𑀤𑁂𑀯𑀲𑁆𑀲 𑀪𑀝𑁄’’𑀢𑀺 𑀆𑀧𑀼𑀘𑁆𑀙𑀢𑀻𑀢𑀺 𑀭𑀜𑁆𑀜𑀸 𑀏𑀯 𑀤𑀺𑀦𑁆𑀦𑀁 𑀞𑀸𑀦𑀦𑁆𑀢𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑁄 𑀧𑀦 𑀭𑀸𑀚𑀓𑀫𑁆𑀫𑀺𑀓𑁂𑀳𑀺 𑀅𑀫𑀘𑁆𑀘𑀸𑀤𑀻𑀳𑀺 𑀞𑀧𑀺𑀢𑁄, 𑀅𑀫𑀘𑁆𑀘𑀸𑀤𑀻𑀦𑀁 𑀏𑀯 𑀯𑀸 𑀪𑀝𑁄 𑀳𑁄𑀢𑀺, 𑀢𑁂𑀦 𑀢𑀁 𑀢𑀁 𑀅𑀫𑀘𑁆𑀘𑀸𑀤𑀺𑀫𑁆𑀧𑀺 𑀆𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺.

𑁧𑁨𑁫. ‘‘𑀥𑀚𑀩𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑀸𑀓𑀝𑀘𑁄𑀭𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦 𑀯𑀓𑁆𑀔𑀢𑀺 ‘‘𑀬𑁂 𑀧𑀦 𑀅𑀫𑁆𑀩𑀮𑀩𑀼𑀚𑀸𑀤𑀺𑀘𑁄𑀭𑀓𑀸’’𑀢𑀺𑀆𑀤𑀺. 𑀏𑀯𑀁 𑀚𑀸𑀦𑀦𑁆𑀢𑀻𑀢𑀺 ‘‘𑀲𑀻𑀮𑀯𑀸 𑀚𑀸𑀢𑁄’’𑀢𑀺 𑀚𑀸𑀦𑀦𑁆𑀢𑀺.

𑁧𑁨𑁬. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀦𑁆𑀤𑀼𑀩𑀦𑁆𑀥𑀦𑀁 𑀪𑀺𑀦𑁆𑀤𑀺𑀢𑁆𑀯𑀸. 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀁 𑀫𑀼𑀜𑁆𑀘𑀺𑀢𑁆𑀯𑀸. 𑀯𑀺𑀯𑀭𑀺𑀢𑁆𑀯𑀸𑀢𑀺 𑀕𑀸𑀫𑀩𑀦𑁆𑀥𑀦𑀸𑀤𑀻𑀲𑀼 𑀕𑀸𑀫𑀤𑁆𑀯𑀸𑀭𑀸𑀤𑀻𑀦𑀺 𑀯𑀺𑀯𑀭𑀺𑀢𑁆𑀯𑀸. 𑀅𑀧𑀲𑁆𑀲𑀫𑀸𑀦𑀸𑀦𑀁 𑀯𑀸 𑀧𑀮𑀸𑀬𑀢𑀻𑀢𑀺 𑀧𑀼𑀭𑀺𑀲𑀕𑀼𑀢𑁆𑀢𑀺𑀬𑀁 𑀧𑀼𑀭𑀺𑀲𑀸𑀦𑀁 𑀕𑁄𑀧𑀓𑀸𑀦𑀁 𑀅𑀧𑀲𑁆𑀲𑀫𑀸𑀦𑀸𑀦𑀁 𑀧𑀮𑀸𑀬𑀢𑀺.

𑁧𑁨𑁯. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀓𑀲𑀸𑀳𑀢𑁄 𑀓𑀢𑀤𑀡𑁆𑀟𑀓𑀫𑁆𑀫𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯.

𑁧𑁩𑁦. 𑀧𑀮𑀸𑀢𑁄𑀧𑀻𑀢𑀺 𑀇𑀡𑀲𑁆𑀲𑀸𑀫𑀺𑀓𑀸𑀦𑀁 𑀆𑀕𑀫𑀦𑀁 𑀜𑀢𑁆𑀯𑀸 𑀪𑀬𑁂𑀦 𑀧𑀮𑀸𑀢𑁄𑀧𑀺 𑀇𑀡𑀸𑀬𑀺𑀓𑁄. 𑀕𑀻𑀯𑀸 𑀳𑁄𑀢𑀺 𑀇𑀡𑀸𑀬𑀺𑀓𑀪𑀸𑀯𑀁 𑀜𑀢𑁆𑀯𑀸 𑀅𑀦𑀸𑀤𑀭𑁂𑀦 𑀇𑀡𑀫𑀼𑀢𑁆𑀢𑀓𑁂 𑀪𑀺𑀓𑁆𑀔𑀼𑀪𑀸𑀯𑁂 𑀧𑀯𑁂𑀲𑀺𑀢𑀢𑁆𑀢𑀸.

𑀉𑀧𑀟𑁆𑀠𑀼𑀧𑀟𑁆𑀠𑀦𑁆𑀢𑀺 𑀣𑁄𑀓𑀁 𑀣𑁄𑀓𑀁. 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀇𑀡𑀸𑀬𑀺𑀓𑁂𑀦 𑀥𑀦𑀁 𑀲𑀫𑁆𑀧𑀚𑁆𑀚𑀢𑀼 𑀯𑀸, 𑀫𑀸 𑀯𑀸, 𑀤𑀸𑀦𑁂 𑀲𑀉𑀲𑁆𑀲𑀸𑀳𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑁂𑀳𑀺 𑀘 𑀪𑀺𑀓𑁆𑀔𑀽𑀳𑀺 ‘‘𑀫𑀸 𑀥𑀼𑀭𑀁 𑀦𑀺𑀓𑁆𑀔𑀺𑀧𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀳𑀸𑀬𑀓𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀳𑀺𑀲𑁆𑀲 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑀢𑀸 𑀲𑀺𑀬𑀸𑀢𑀺.

𑁧𑁩𑁧. 𑀤𑀸𑀲𑀘𑀸𑀭𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀓𑀻𑀢𑁄𑀢𑀺 𑀇𑀫𑀺𑀦𑀸 𑀤𑀸𑀲𑀪𑀸𑀯𑀧𑀭𑀺𑀫𑁄𑀘𑀦𑀢𑁆𑀣𑀸𑀬 𑀓𑀻𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀸𑀤𑀺𑀲𑁄 𑀳𑀺 𑀥𑀦𑀓𑁆𑀓𑀻𑀢𑁄𑀧𑀺 𑀅𑀤𑀸𑀲𑁄 𑀏𑀯. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁯𑁭) 𑀧𑀦 ‘‘𑀤𑁂𑀲𑀘𑀸𑀭𑀺𑀢𑁆𑀢𑀦𑁆𑀢𑀺 𑀲𑀸𑀯𑀦𑀧𑀡𑁆𑀡𑀸𑀭𑁄𑀧𑀦𑀸𑀤𑀺𑀓𑀁 𑀢𑀁 𑀢𑀁 𑀤𑁂𑀲𑀘𑀸𑀭𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀘𑀸𑀭𑀺𑀢𑁆𑀢𑀯𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀤𑀸𑀲𑀧𑀡𑁆𑀡𑀚𑁆𑀛𑀸𑀧𑀦𑀸𑀤𑀺𑀦𑀸 𑀅𑀤𑀸𑀲𑀓𑀭𑀡𑀦𑀺𑀬𑀸𑀫𑁂𑀦. 𑀅𑀪𑀺𑀲𑁂𑀓𑀸𑀤𑀻𑀲𑀼 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀫𑁄𑀘𑀸𑀧𑁂𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀲𑀸𑀥𑀸𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀲𑀬𑀫𑁂𑀯 𑀧𑀡𑁆𑀡𑀁 𑀆𑀭𑁄𑀧𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀻𑀢𑀺 𑀢𑀸 𑀪𑀼𑀚𑀺𑀲𑁆𑀲𑀺𑀢𑁆𑀣𑀺𑀬𑁄 ‘‘𑀫𑀬𑀫𑁆𑀧𑀺 𑀯𑀡𑁆𑀡𑀤𑀸𑀲𑀺𑀬𑁄 𑀳𑁄𑀫𑀸’’𑀢𑀺 𑀅𑀢𑁆𑀢𑀦𑁄 𑀭𑀓𑁆𑀔𑀡𑀢𑁆𑀣𑀸𑀬 𑀲𑀬𑀫𑁂𑀯 𑀭𑀸𑀚𑀽𑀦𑀁 𑀤𑀸𑀲𑀺𑀧𑀡𑁆𑀡𑁂 𑀅𑀢𑁆𑀢𑀦𑁄 𑀦𑀸𑀫𑀁 𑀮𑀺𑀔𑀸𑀧𑁂𑀦𑁆𑀢𑀺, 𑀢𑀸𑀲𑀁 𑀧𑀼𑀢𑁆𑀢𑀸𑀧𑀺 𑀭𑀸𑀚𑀤𑀸𑀲𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑁂𑀳𑀺 𑀅𑀤𑀺𑀦𑁆𑀦𑀸 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸𑀢𑀺 𑀬𑀢𑁆𑀢𑀓𑀸 𑀢𑁂𑀲𑀁 𑀲𑀸𑀫𑀺𑀦𑁄, 𑀢𑁂𑀲𑀼 𑀏𑀓𑁂𑀦 𑀅𑀤𑀺𑀦𑁆𑀦𑁂𑀧𑀺 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀸. 𑀪𑀼𑀚𑀺𑀲𑁆𑀲𑁂 𑀓𑀢𑁆𑀯𑀸 𑀧𑀦 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑀲𑁆𑀲 𑀯𑀺𑀳𑀸𑀭𑀲𑁆𑀲 𑀢𑁂 𑀆𑀭𑀸𑀫𑀺𑀓𑀸 𑀤𑀺𑀦𑁆𑀦𑀸, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀁 𑀜𑀸𑀧𑁂𑀢𑁆𑀯𑀸 𑀨𑀸𑀢𑀺𑀓𑀫𑁆𑀫𑁂𑀦 𑀥𑀦𑀸𑀤𑀺𑀁 𑀓𑀢𑁆𑀯𑀸 𑀪𑀼𑀚𑀺𑀲𑁆𑀲𑁂 𑀓𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁯𑁭) 𑀧𑀦 ‘‘𑀤𑁂𑀯𑀤𑀸𑀲𑀺𑀧𑀼𑀢𑁆𑀢𑁂 𑀯𑀝𑁆𑀝𑀢𑀻𑀢𑀺 𑀮𑀺𑀔𑀺𑀢𑀁. ‘𑀆𑀭𑀸𑀫𑀺𑀓𑀜𑁆𑀘𑁂 𑀧𑀩𑁆𑀩𑀸𑀚𑁂𑀢𑀼𑀓𑀸𑀫𑁄, 𑀅𑀜𑁆𑀜𑀫𑁂𑀓𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀲𑁆𑀲 𑀅𑀬𑀫𑀺𑀥 𑀅𑀥𑀺𑀧𑁆𑀧𑀸𑀬𑁄, ‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑀺𑀓𑁂 𑀤𑁂𑀫𑀸’𑀢𑀺 𑀤𑀺𑀦𑁆𑀦𑀢𑁆𑀢𑀸 𑀦 𑀢𑁂 𑀢𑁂𑀲𑀁 𑀤𑀸𑀲𑀸, ‘𑀆𑀭𑀸𑀫𑀺𑀓𑁄 𑀘 𑀦𑁂𑀯 𑀤𑀸𑀲𑁄 𑀦 𑀪𑀼𑀚𑀺𑀲𑁆𑀲𑁄’𑀢𑀺 𑀯𑀢𑁆𑀢𑀩𑁆𑀩𑀢𑁄 𑀦 𑀤𑀸𑀲𑁄𑀢𑀺 𑀮𑀺𑀔𑀺𑀢𑀁. 𑀢𑀓𑁆𑀓𑀸𑀲𑀺𑀜𑁆𑀘𑀦𑀁 𑀲𑀻𑀳𑀴𑀤𑀻𑀧𑁂 𑀘𑀸𑀭𑀺𑀢𑁆𑀢𑀁, 𑀢𑁂 𑀘 𑀧𑀩𑁆𑀩𑀸𑀚𑁂𑀢𑀩𑁆𑀩𑀸 𑀲𑀗𑁆𑀖𑀲𑁆𑀲𑀸𑀭𑀸𑀫𑀺𑀓𑀢𑁆𑀢𑀸. 𑀦𑀺𑀲𑁆𑀲𑀸𑀫𑀺𑀓𑀁 𑀤𑀸𑀲𑀁 𑀅𑀢𑁆𑀢𑀦𑀸𑀧𑀺 𑀪𑀼𑀚𑀺𑀲𑁆𑀲𑀁 𑀓𑀸𑀢𑀼𑀁 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁯𑁭) 𑀧𑀦 ‘‘𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀢𑁆𑀢𑀓𑀲𑀤𑀺𑀲𑀸𑀯 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀅𑀤𑀸𑀲𑁂 𑀓𑀭𑁄𑀦𑁆𑀢𑀸 𑀢𑀓𑁆𑀓𑁂𑀦 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀅𑀤𑀸𑀲𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀆𑀭𑀸𑀫𑀺𑀓𑀯𑀘𑀦𑁂𑀦 𑀤𑀺𑀦𑁆𑀦𑀢𑁆𑀢𑀸 𑀅𑀤𑀸𑀲𑀸𑀯 𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘𑀢𑀓𑁆𑀓𑀸𑀲𑀺𑀜𑁆𑀘𑀦𑀁 𑀧𑀦 𑀲𑀻𑀳𑀴𑀤𑀻𑀧𑁂 𑀘𑀸𑀭𑀺𑀢𑁆𑀢’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑀧𑁆𑀧𑀺𑀬𑀯𑀘𑀦𑁂𑀦 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀲𑁆𑀲 𑀆𑀭𑀸𑀫𑀺𑀓𑀤𑀸𑀲𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁯𑁭) ‘‘𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀢𑁆𑀢𑀓𑀲𑀤𑀺𑀲𑀸𑀯 𑀳𑁄𑀦𑁆𑀢𑀻𑀢𑀺 𑀓𑁂𑀲𑀼𑀘𑀺 𑀚𑀦𑀧𑀤𑁂𑀲𑀼 𑀅𑀤𑀸𑀲𑁂 𑀓𑀭𑁄𑀦𑁆𑀢𑀸 𑀢𑀓𑁆𑀓𑀁 𑀲𑀻𑀲𑁂 𑀆𑀲𑀺𑀜𑁆𑀘𑀦𑁆𑀢𑀺, 𑀢𑁂𑀦 𑀓𑀺𑀭 𑀢𑁂 𑀅𑀤𑀸𑀲𑀸 𑀳𑁄𑀦𑁆𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀆𑀭𑀸𑀫𑀺𑀓𑀯𑀘𑀦𑁂𑀦 𑀤𑀺𑀦𑁆𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀤𑀺𑀦𑁆𑀦𑁂𑀧𑀺 𑀲𑀗𑁆𑀖𑀲𑁆𑀲 𑀆𑀭𑀸𑀫𑀺𑀓𑀤𑀸𑀲𑁄 𑀏𑀯𑀸𑀢𑀺 ‘𑀦𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁. ‘𑀢𑀸𑀯𑀓𑀸𑀮𑀺𑀓𑁄 𑀦𑀸𑀫’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀸 𑀧𑀘𑁆𑀙𑀸𑀧𑀺 𑀕𑀳𑁂𑀢𑀼𑀓𑀸𑀫𑀢𑀸𑀬 𑀯𑀸 𑀤𑀺𑀦𑁆𑀦𑀁 𑀲𑀩𑁆𑀩𑀁 𑀢𑀸𑀯𑀓𑀸𑀮𑀺𑀓𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀺𑀲𑁆𑀲𑀸𑀫𑀺𑀓𑀤𑀸𑀲𑁄 𑀦𑀸𑀫 𑀬𑀲𑁆𑀲 𑀲𑀸𑀫𑀺𑀓𑀼𑀮𑀁 𑀅𑀜𑁆𑀜𑀸𑀢𑀺𑀓𑀁 𑀫𑀭𑀡𑁂𑀦 𑀧𑀭𑀺𑀓𑁆𑀔𑀻𑀡𑀁, 𑀦 𑀓𑁄𑀘𑀺 𑀢𑀲𑁆𑀲 𑀤𑀸𑀬𑀸𑀤𑁄, 𑀲𑁄 𑀧𑀦 𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀯𑀸 𑀦𑀺𑀯𑀸𑀲𑀕𑀸𑀫𑀯𑀸𑀲𑀻𑀳𑀺 𑀯𑀸 𑀇𑀲𑁆𑀲𑀭𑁂𑀳𑀺 𑀯𑀸 𑀪𑀼𑀚𑀺𑀲𑁆𑀲𑁄 𑀓𑀢𑁄𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀤𑁂𑀯𑀤𑀸𑀲𑀸𑀧𑀺 𑀤𑀸𑀲𑀸 𑀏𑀯. 𑀢𑁂 𑀳𑀺 𑀓𑀢𑁆𑀣𑀘𑀺 𑀤𑁂𑀲𑁂 𑀭𑀸𑀚𑀤𑀸𑀲𑀸 𑀳𑁄𑀦𑁆𑀢𑀺, 𑀓𑀢𑁆𑀣𑀘𑀺 𑀯𑀺𑀳𑀸𑀭𑀤𑀸𑀲𑀸 𑀯𑀸, 𑀢𑀲𑁆𑀫𑀸 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁯𑁭) 𑀧𑀦 ‘‘𑀦𑀺𑀲𑁆𑀲𑀸𑀫𑀺𑀓𑀤𑀸𑀲𑁄 𑀦𑀸𑀫 𑀬𑀲𑁆𑀲 𑀲𑀸𑀫𑀺𑀓𑀸 𑀲𑀧𑀼𑀢𑁆𑀢𑀤𑀸𑀭𑀸 𑀫𑀢𑀸 𑀳𑁄𑀦𑁆𑀢𑀺, 𑀦 𑀓𑁄𑀘𑀺 𑀢𑀲𑁆𑀲 𑀧𑀭𑀺𑀕𑁆𑀕𑀸𑀳𑀓𑁄, 𑀲𑁄𑀧𑀺 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀁 𑀧𑀦 𑀅𑀢𑁆𑀢𑀦𑀸𑀧𑀺 𑀪𑀼𑀚𑀺𑀲𑁆𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀬𑁂 𑀯𑀸 𑀧𑀦 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀲𑀸𑀫𑀺𑀦𑁄, 𑀢𑁂𑀳𑀺𑀧𑀺 𑀓𑀸𑀭𑀸𑀧𑁂𑀢𑀼𑀁 𑀯𑀝𑁆𑀝𑀢𑀺, ‘𑀤𑁂𑀯𑀤𑀸𑀲𑀺𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘𑀤𑀸𑀲𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀦𑀢𑁆𑀣𑀻’𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀤𑀸𑀲𑀫𑁆𑀧𑀺 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀅𑀧𑀦𑁂𑀦𑁆𑀢𑁄 𑀧𑀤𑀯𑀸𑀭𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄, 𑀤𑀸𑀲𑀲𑁆𑀲 𑀧𑀦 𑀧𑀮𑀸𑀬𑀢𑁄 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁩𑁨. 𑀳𑀢𑁆𑀣𑀘𑁆𑀙𑀺𑀦𑁆𑀦𑀓𑀸𑀤𑀺𑀯𑀢𑁆𑀣𑀽𑀲𑀼 𑀓𑀡𑁆𑀡𑀫𑀽𑀮𑁂𑀢𑀺 𑀲𑀓𑀮𑀲𑁆𑀲 𑀓𑀡𑁆𑀡𑀲𑁆𑀲 𑀙𑁂𑀤𑀁 𑀲𑀦𑁆𑀥𑀸𑀬𑀸𑀳. 𑀓𑀡𑁆𑀡𑀲𑀓𑁆𑀔𑀮𑀺𑀓𑀸𑀬𑀸𑀢𑀺 𑀓𑀡𑁆𑀡𑀘𑀽𑀴𑀺𑀓𑀸𑀬. 𑀬𑀲𑁆𑀲 𑀧𑀦 𑀓𑀡𑁆𑀡𑀸𑀯𑀝𑁆𑀝𑁂𑀢𑀺 𑀳𑁂𑀝𑁆𑀞𑀸 𑀓𑀼𑀡𑁆𑀟𑀮𑀸𑀤𑀺𑀞𑀧𑀦𑀙𑀺𑀤𑁆𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀢𑀜𑁆𑀳𑀺 𑀲𑀗𑁆𑀖𑀝𑁆𑀝𑀦𑀓𑁆𑀔𑀫𑀁. 𑀅𑀚𑀧𑀤𑀓𑁂𑀢𑀺 𑀅𑀚𑀧𑀤𑀦𑀸𑀲𑀺𑀓𑀝𑁆𑀞𑀺𑀓𑁄𑀝𑀺𑀬𑀁. 𑀢𑀢𑁄 𑀳𑀺 𑀉𑀤𑁆𑀥𑀁 𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀲𑀦𑁆𑀥𑁂𑀢𑀼𑀦𑁆𑀢𑀺 𑀅𑀯𑀺𑀭𑀽𑀧𑀲𑀡𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀭𑀽𑀧𑀁 𑀧𑀦 𑀧𑀭𑀺𑀲𑀤𑀽𑀲𑀓𑀁 𑀆𑀧𑀸𑀤𑁂𑀢𑀺.

𑀔𑀼𑀚𑁆𑀚𑀲𑀭𑀻𑀭𑁄𑀢𑀺 𑀯𑀗𑁆𑀓𑀲𑀭𑀻𑀭𑁄. 𑀩𑁆𑀭𑀳𑁆𑀫𑀼𑀦𑁄 𑀯𑀺𑀬 𑀉𑀚𑀼𑀓𑀁 𑀕𑀢𑁆𑀢𑀁 𑀲𑀭𑀻𑀭𑀁 𑀬𑀲𑁆𑀲 𑀲𑁄 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀪𑀕𑀯𑀸. 𑀅𑀯𑀲𑁂𑀲𑁄 𑀲𑀢𑁆𑀢𑁄𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀭𑀳𑀺𑀢𑀲𑀢𑁆𑀢𑁄. 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀘𑀓𑁆𑀓𑀯𑀢𑁆𑀢𑀺𑀜𑁆𑀘 𑀇𑀢𑀭𑁂 𑀲𑀢𑁆𑀢𑀸 𑀔𑀼𑀚𑁆𑀚𑀧𑀓𑁆𑀔𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀔𑀦𑁆𑀥𑁂 𑀓𑀝𑀺𑀬𑀁 𑀚𑀸𑀡𑀽𑀲𑀽𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀺, 𑀢𑁂 𑀓𑀝𑀺𑀬𑀁 𑀦𑀫𑀦𑁆𑀢𑀸 𑀧𑀘𑁆𑀙𑀢𑁄 𑀦𑀫𑀦𑁆𑀢𑀺, 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀸 𑀧𑀼𑀭𑀢𑁄 𑀦𑀫𑀦𑁆𑀢𑀺, 𑀤𑀻𑀖𑀲𑀭𑀻𑀭𑀸 𑀧𑀦 𑀏𑀓𑁂𑀦 𑀧𑀲𑁆𑀲𑁂𑀦 𑀯𑀗𑁆𑀓𑀸 𑀳𑁄𑀦𑁆𑀢𑀺, 𑀏𑀓𑁂 𑀫𑀼𑀔𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀕𑀡𑀬𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺, 𑀏𑀓𑁂 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀲𑀽𑀮𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀓𑁂 𑀧𑀼𑀭𑀢𑁄 𑀧𑀩𑁆𑀪𑀸𑀭𑀸 𑀳𑁄𑀦𑁆𑀢𑀺, 𑀧𑀯𑁂𑀥𑀫𑀸𑀦𑀸 𑀕𑀘𑁆𑀙𑀦𑁆𑀢𑀺. 𑀧𑀭𑀺𑀯𑀝𑀼𑀫𑁄𑀢𑀺 𑀲𑀫𑀦𑁆𑀢𑀢𑁄 𑀯𑀝𑁆𑀝𑀓𑀸𑀬𑁄. 𑀏𑀢𑁂𑀦 𑀏𑀯𑀭𑀽𑀧𑀸 𑀏𑀯 𑀯𑀸𑀫𑀦𑀓𑀸 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁩. 𑀅𑀝𑁆𑀞𑀺𑀲𑀺𑀭𑀸𑀘𑀫𑁆𑀫𑀲𑀭𑀻𑀭𑁄𑀢𑀺 𑀅𑀝𑁆𑀞𑀺𑀲𑀺𑀭𑀸𑀘𑀫𑁆𑀫𑀫𑀢𑁆𑀢𑀲𑀭𑀻𑀭𑁄. 𑀓𑀽𑀝𑀓𑀽𑀝𑀲𑀻𑀲𑁄𑀢𑀺 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀧𑀺𑀡𑁆𑀟𑀺𑀢𑀫𑀁𑀲𑀢𑀁 𑀤𑀲𑁆𑀲𑁂𑀢𑀼𑀁 𑀆𑀫𑁂𑀟𑀺𑀢𑀁 𑀓𑀢𑀁. 𑀢𑁂𑀦𑀸𑀳 ‘‘𑀢𑀸𑀮𑀨𑀮𑀧𑀺𑀡𑁆𑀟𑀺𑀲𑀤𑀺𑀲𑁂𑀦𑀸’’𑀢𑀺. 𑀢𑀸𑀮𑀨𑀮𑀸𑀦𑀁 𑀫𑀜𑁆𑀚𑀭𑀻 𑀧𑀺𑀡𑁆𑀟𑀺 𑀦𑀸𑀫. 𑀅𑀦𑀼𑀧𑀼𑀩𑁆𑀩𑀢𑀦𑀼𑀓𑁂𑀦 𑀲𑀻𑀲𑁂𑀦𑀸𑀢𑀺 𑀘𑁂𑀢𑀺𑀬𑀣𑀽𑀧𑀺𑀓𑀸 𑀯𑀺𑀬 𑀓𑀫𑁂𑀦 𑀓𑀺𑀲𑁂𑀦 𑀲𑀻𑀲𑁂𑀦. 𑀫𑀳𑀸𑀯𑁂𑀴𑀼𑀧𑀩𑁆𑀩𑀁 𑀯𑀺𑀬 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀅𑀯𑀺𑀲𑀫𑀣𑀽𑀮𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀴𑀺𑀲𑀻𑀲𑁄 𑀦𑀸𑀫. 𑀓𑀧𑁆𑀧𑀲𑀻𑀲𑁄𑀢𑀺 𑀕𑀚𑀫𑀢𑁆𑀣𑀓𑀁 𑀯𑀺𑀬 𑀤𑁆𑀯𑀺𑀥𑀸 𑀪𑀺𑀦𑁆𑀦𑀲𑀻𑀲𑁄. ‘‘𑀓𑀡𑁆𑀡𑀺𑀓𑀓𑁂𑀲𑁄 𑀯𑀸’’𑀢𑀺 𑀇𑀫𑀲𑁆𑀲 𑀯𑀺𑀯𑀭𑀡𑀁 ‘‘𑀧𑀸𑀡𑀓𑁂𑀳𑀻’’𑀢𑀺𑀆𑀤𑀺. 𑀫𑀓𑁆𑀓𑀝𑀲𑁆𑀲𑁂𑀯 𑀦𑀮𑀸𑀝𑁂𑀧𑀺 𑀓𑁂𑀲𑀸𑀦𑀁 𑀉𑀝𑁆𑀞𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀻𑀲𑀮𑁄𑀫𑁂𑀳𑀻’’𑀢𑀺𑀆𑀤𑀺.

𑀫𑀓𑁆𑀓𑀝𑀪𑀫𑀼𑀓𑁄𑀢𑀺 𑀦𑀮𑀸𑀝𑀮𑁄𑀫𑁂𑀳𑀺 𑀅𑀯𑀺𑀪𑀢𑁆𑀢𑀮𑁄𑀫𑀪𑀫𑀼𑀓𑁄. 𑀅𑀓𑁆𑀔𑀺𑀘𑀓𑁆𑀓𑁂𑀳𑀻𑀢𑀺 𑀅𑀓𑁆𑀔𑀺𑀫𑀡𑁆𑀟𑀮𑁂𑀳𑀺. 𑀓𑁂𑀓𑀭𑁄𑀢𑀺 𑀢𑀺𑀭𑀺𑀬𑀁 𑀧𑀲𑁆𑀲𑀦𑀓𑁄. 𑀉𑀤𑀓𑀢𑀸𑀭𑀓𑀸𑀢𑀺 𑀑𑀮𑁄𑀓𑁂𑀦𑁆𑀢𑀸𑀦𑀁 𑀉𑀤𑀓𑁂 𑀧𑀝𑀺𑀩𑀺𑀫𑁆𑀩𑀺𑀓𑀘𑁆𑀙𑀸𑀬𑀸. 𑀉𑀤𑀓𑀩𑀼𑀩𑁆𑀩𑀼𑀴𑀦𑁆𑀢𑀺 𑀓𑁂𑀘𑀺. 𑀅𑀓𑁆𑀔𑀺𑀢𑀸𑀭𑀓𑀸𑀢𑀺 𑀅𑀪𑀺𑀫𑀼𑀔𑁂 𑀞𑀺𑀢𑀸𑀦𑀁 𑀙𑀸𑀬𑀸. 𑀅𑀓𑁆𑀔𑀺𑀪𑀡𑁆𑀟𑀓𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀢𑀺𑀧𑀺𑀗𑁆𑀕𑀮𑀓𑁆𑀔𑀺 𑀫𑀚𑁆𑀚𑀸𑀭𑀓𑁆𑀔𑀺. 𑀫𑀥𑀼𑀧𑀺𑀗𑁆𑀕𑀮𑀦𑁆𑀢𑀺 𑀫𑀥𑀼𑀯𑀡𑁆𑀡𑀧𑀺𑀗𑁆𑀕𑀮𑀁. 𑀦𑀺𑀧𑁆𑀧𑀔𑀼𑀫𑀓𑁆𑀔𑀻𑀢𑀺 𑀏𑀢𑁆𑀣 𑀧𑀔𑀼𑀫-𑀲𑀤𑁆𑀤𑁄 𑀅𑀓𑁆𑀔𑀺𑀤𑀮𑀮𑁄𑀫𑁂𑀲𑀼 𑀦𑀺𑀭𑀼𑀴𑁆𑀳𑁄, 𑀢𑀤𑀪𑀸𑀯𑀸 𑀦𑀺𑀧𑁆𑀧𑀔𑀼𑀫𑀓𑁆𑀔𑀺. 𑀅𑀓𑁆𑀔𑀺𑀧𑀸𑀓𑁂𑀦𑀸𑀢𑀺 𑀅𑀓𑁆𑀔𑀺𑀤𑀮𑀧𑀭𑀺𑀬𑀦𑁆𑀢𑁂𑀲𑀼 𑀧𑀽𑀢𑀺𑀢𑀸𑀧𑀚𑁆𑀚𑀦𑀭𑁄𑀕𑁂𑀦.

𑀘𑀺𑀧𑀺𑀝𑀦𑀸𑀲𑀺𑀓𑁄𑀢𑀺 𑀅𑀦𑀼𑀦𑁆𑀦𑀢𑀦𑀸𑀲𑀺𑀓𑁄. 𑀧𑀝𑀗𑁆𑀕𑀫𑀡𑁆𑀟𑀽𑀓𑁄 𑀦𑀸𑀫 𑀫𑀳𑀸𑀫𑀼𑀔𑀫𑀡𑁆𑀟𑀽𑀓𑁄. 𑀪𑀺𑀦𑁆𑀦𑀫𑀼𑀔𑁄𑀢𑀺 𑀉𑀧𑀓𑁆𑀓𑀫𑀼𑀔𑀧𑀭𑀺𑀬𑁄𑀲𑀸𑀦𑁄, 𑀲𑀩𑁆𑀩𑀤𑀸 𑀯𑀺𑀯𑀝𑀫𑀼𑀔𑁄 𑀯𑀸. 𑀯𑀗𑁆𑀓𑀫𑀼𑀔𑁄𑀢𑀺 𑀏𑀓𑀧𑀲𑁆𑀲𑁂 𑀅𑀧𑀓𑁆𑀓𑀫𑁆𑀫 𑀞𑀺𑀢𑀳𑁂𑀝𑁆𑀞𑀺𑀫𑀳𑀦𑀼𑀓𑀝𑁆𑀞𑀺𑀓𑁄. 𑀑𑀝𑁆𑀞𑀘𑁆𑀙𑀺𑀦𑁆𑀦𑀓𑁄𑀢𑀺 𑀉𑀪𑁄𑀲𑀼 𑀑𑀝𑁆𑀞𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀸𑀢𑀺𑀬𑀸 𑀯𑀸 𑀧𑀘𑁆𑀙𑀸 𑀯𑀸 𑀲𑀢𑁆𑀣𑀸𑀤𑀺𑀦𑀸 𑀅𑀧𑀦𑀻𑀢𑀫𑀁𑀲𑁂𑀦 𑀑𑀝𑁆𑀞𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀴𑀫𑀼𑀔𑁄𑀢𑀺 𑀦𑀺𑀘𑁆𑀘𑀧𑀕𑁆𑀖𑀭𑀺𑀢𑀮𑀸𑀮𑀸𑀫𑀼𑀔𑁄.

𑀪𑀺𑀦𑁆𑀦𑀕𑀮𑁄𑀢𑀺 𑀅𑀯𑀦𑀢𑀕𑀮𑁄. 𑀪𑀺𑀦𑁆𑀦𑀉𑀭𑁄𑀢𑀺 𑀅𑀢𑀺𑀦𑀺𑀦𑁆𑀦𑀉𑀭𑀫𑀚𑁆𑀛𑁄. 𑀏𑀯𑀁 𑀪𑀺𑀦𑁆𑀦𑀧𑀺𑀝𑁆𑀞𑀻𑀢𑀺. 𑀲𑀩𑁆𑀩𑀜𑁆𑀘𑁂𑀢𑀦𑁆𑀢𑀺 ‘‘𑀓𑀘𑁆𑀙𑀼𑀕𑀢𑁆𑀢𑁄’’𑀢𑀺𑀆𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀯𑀺𑀦𑀺𑀘𑁆𑀙𑀬𑁄 𑀓𑀼𑀝𑁆𑀞𑀸𑀤𑀻𑀲𑀼 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀆𑀳 ‘‘𑀯𑀺𑀦𑀺𑀘𑁆𑀙𑀬𑁄’’𑀢𑀺𑀆𑀤𑀺.

𑀯𑀸𑀢𑀡𑁆𑀟𑀺𑀓𑁄𑀢𑀺 𑀅𑀡𑁆𑀟𑀓𑁂𑀲𑀼 𑀯𑀼𑀤𑁆𑀥𑀺𑀭𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀡𑁆𑀟𑀯𑀸𑀢𑀭𑁄𑀕𑁂𑀦 𑀉𑀤𑁆𑀥𑀼𑀢𑀩𑀻𑀚𑀡𑁆𑀟𑀓𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀸. 𑀬𑀲𑁆𑀲 𑀦𑀺𑀯𑀸𑀲𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀉𑀡𑁆𑀡𑀢𑀁 𑀧𑀓𑀸𑀲𑀢𑀺, 𑀲𑁄𑀯 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀯𑀺𑀓𑀝𑁄𑀢𑀺 𑀢𑀺𑀭𑀺𑀬𑀁 𑀕𑀫𑀦𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀩𑀳𑀺 𑀦𑀺𑀕𑀘𑁆𑀙𑀦𑁆𑀢𑀺. 𑀲𑀗𑁆𑀖𑀝𑁆𑀝𑁄𑀢𑀺 𑀕𑀘𑁆𑀙𑀢𑁄 𑀧𑀭𑀺𑀯𑀢𑁆𑀢𑀦𑀧𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑀲𑁆𑀲 𑀘𑀗𑁆𑀓𑀫𑀢𑁄 𑀚𑀸𑀡𑀼𑀓𑀸 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀺. 𑀫𑀳𑀸𑀚𑀗𑁆𑀖𑁄𑀢𑀺 𑀣𑀽𑀮𑀚𑀗𑁆𑀖𑁄. 𑀫𑀳𑀸𑀧𑀸𑀤𑁄𑀢𑀺 𑀫𑀳𑀦𑁆𑀢𑁂𑀦 𑀧𑀸𑀤𑀢𑀮𑁂𑀦 𑀬𑀼𑀢𑁆𑀢𑁄. 𑀧𑀸𑀤𑀯𑁂𑀫𑀚𑁆𑀛𑁂𑀢𑀺 𑀧𑀺𑀝𑁆𑀞𑀺𑀧𑀸𑀤𑀯𑁂𑀫𑀚𑁆𑀛𑁂. 𑀏𑀢𑁂𑀦 𑀅𑀕𑁆𑀕𑀧𑀸𑀤𑁄 𑀘 𑀧𑀡𑁆𑀳𑀺 𑀘 𑀲𑀤𑀺𑀲𑀸𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁪. 𑀫𑀚𑁆𑀛𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸𑀢𑀺 𑀓𑀼𑀡𑁆𑀞𑀧𑀸𑀤𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀅𑀕𑁆𑀕𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸𑀢𑀺 𑀓𑀼𑀡𑁆𑀞𑀧𑀸𑀤𑀢𑀸𑀬. 𑀓𑀼𑀡𑁆𑀞𑀧𑀸𑀤𑀲𑁆𑀲𑁂𑀯 𑀘𑀗𑁆𑀓𑀫𑀦𑀯𑀺𑀪𑀸𑀯𑀦𑀁 ‘‘𑀧𑀺𑀝𑁆𑀞𑀺𑀧𑀸𑀤𑀕𑁆𑀕𑁂𑀦 𑀘𑀗𑁆𑀓𑀫𑀦𑁆𑀢𑁄’’𑀢𑀺. ‘‘𑀧𑀸𑀤𑀲𑁆𑀲 𑀩𑀸𑀳𑀺𑀭𑀦𑁆𑀢𑁂𑀦𑀸’’𑀢𑀺 𑀘 ‘‘𑀅𑀩𑁆𑀪𑀦𑁆𑀢𑀭𑀦𑁆𑀢𑁂𑀦𑀸’’𑀢𑀺 𑀘 𑀇𑀤𑀁 𑀧𑀸𑀤𑀢𑀮𑀲𑁆𑀲 𑀉𑀪𑁄𑀳𑀺 𑀧𑀭𑀺𑀬𑀦𑁆𑀢𑁂𑀳𑀺 𑀘𑀗𑁆𑀓𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀫𑀫𑁆𑀫𑀦𑀦𑁆𑀢𑀺 𑀔𑀮𑀺𑀢𑀯𑀘𑀦𑀁, 𑀬𑁄 𑀏𑀓𑀫𑁂𑀯𑀓𑁆𑀔𑀭𑀁 𑀘𑀢𑀼𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀤𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀞𑀸𑀦𑀓𑀭𑀡𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀅𑀨𑀼𑀝𑁆𑀞𑀓𑁆𑀔𑀭𑀯𑀘𑀦𑀁. 𑀯𑀘𑀦𑀸𑀦𑀼𑀓𑀭𑀡𑁂𑀦 𑀳𑀺 𑀲𑁄 ‘‘𑀫𑀫𑁆𑀫𑀦𑁄’’𑀢𑀺 𑀯𑀼𑀢𑁆𑀢𑁄. 𑀬𑁄 𑀘 𑀓𑀭𑀡𑀲𑀫𑁆𑀧𑀦𑁆𑀦𑁄𑀧𑀺 𑀏𑀓𑀫𑁂𑀯𑀓𑁆𑀔𑀭𑀁 𑀳𑀺𑀓𑁆𑀓𑀸𑀭𑀩𑀳𑀼𑀲𑁄 𑀯𑀤𑀢𑀺, 𑀲𑁄𑀧𑀺 𑀇𑀥𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀬𑁄 𑀯𑀸 𑀧𑀦 𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸𑀧𑀺 𑀅𑀦𑀸𑀫𑁂𑀟𑀺𑀢𑀓𑁆𑀔𑀭𑀫𑁂𑀯 𑀲𑀺𑀣𑀺𑀮𑀁 𑀲𑀺𑀮𑀺𑀝𑁆𑀞𑀯𑀘𑀦𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄, 𑀲𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑀦𑁆𑀢𑀻𑀢𑀺 𑀜𑀢𑁆𑀯𑀸 𑀓𑀭𑁄𑀦𑁆𑀢𑀸𑀯 𑀦 𑀫𑀼𑀘𑁆𑀘𑀦𑁆𑀢𑀺. 𑀚𑀻𑀯𑀺𑀢𑀦𑁆𑀢𑀭𑀸𑀬𑀸𑀤𑀺𑀆𑀧𑀤𑀸𑀲𑀼 𑀅𑀭𑀼𑀘𑀺𑀬𑀸 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺.

𑁧𑁩𑁫. 𑀅𑀪𑀩𑁆𑀩𑀧𑀼𑀕𑁆𑀕𑀮𑀓𑀣𑀸𑀲𑀼 ‘‘𑀬𑁄 𑀓𑀸𑀴𑀧𑀓𑁆𑀔𑁂 𑀇𑀢𑁆𑀣𑀻 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀼𑀭𑀺𑀲𑁄, 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀸𑀴𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀦𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀻’’𑀢𑀺 𑀅𑀧𑀡𑁆𑀟𑀓𑀧𑀓𑁆𑀔𑁂 𑀧𑀭𑀺𑀴𑀸𑀳𑀯𑀽𑀧𑀲𑀫𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀟𑀓𑀧𑀓𑁆𑀔𑁂 𑀉𑀲𑁆𑀲𑀦𑁆𑀦𑀧𑀭𑀺𑀴𑀸𑀳𑀢𑀸 𑀧𑀡𑁆𑀟𑀓𑀪𑀸𑀯𑀸𑀧𑀢𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. 𑀇𑀢𑁆𑀣𑀺𑀪𑀸𑀯𑁄 𑀧𑀼𑀫𑁆𑀪𑀸𑀯𑁄 𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲𑀸𑀢𑀺 𑀅𑀪𑀸𑀯𑀓𑁄. ‘‘𑀢𑀲𑁆𑀫𑀺𑀁𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀅𑀧𑀡𑁆𑀟𑀓𑀧𑀓𑁆𑀔𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀡𑁆𑀟𑀓𑀧𑀓𑁆𑀔𑁂 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀅𑀧𑀡𑁆𑀟𑀓𑀧𑀓𑁆𑀔𑁂 𑀧𑀩𑁆𑀩𑀚𑀺𑀢𑁄 𑀲𑀘𑁂 𑀓𑀺𑀮𑁂𑀲𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀦 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀧𑀡𑁆𑀟𑀓𑀲𑁆𑀲 𑀳𑀺 𑀓𑀺𑀮𑁂𑀲𑀓𑁆𑀔𑀬𑀸𑀲𑀫𑁆𑀪𑀯𑀢𑁄, 𑀔𑀻𑀡𑀓𑀺𑀮𑁂𑀲𑀲𑁆𑀲 𑀘 𑀧𑀡𑁆𑀟𑀓𑀪𑀸𑀯𑀸𑀦𑀸𑀧𑀢𑁆𑀢𑀺𑀢𑁄. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀣𑀸𑀬𑀜𑁆𑀳𑀺 𑀅𑀯𑀺𑀲𑁂𑀲𑁂𑀦 𑀧𑀡𑁆𑀟𑀓𑀲𑁆𑀲 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀢𑀸 𑀯𑀼𑀢𑁆𑀢𑀸, 𑀆𑀲𑀺𑀢𑁆𑀢𑀉𑀲𑀽𑀬𑀧𑀓𑁆𑀔𑀧𑀡𑁆𑀟𑀓𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬𑁂𑀯 𑀧𑀡𑁆𑀟𑀓𑀪𑀸𑀯𑁄, 𑀦 𑀧𑀯𑀢𑁆𑀢𑀺𑀬𑀁𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑁂 𑀚𑀘𑁆𑀘𑀦𑁆𑀥𑀩𑀥𑀺𑀭𑀸𑀤𑀬𑁄 𑀯𑀺𑀬 𑀧𑀡𑁆𑀟𑀓𑁄 𑀚𑀸𑀢𑀺𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁩𑁩) 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀦𑁆𑀢𑁂𑀦 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄, 𑀫𑀕𑁆𑀕𑁄 𑀧𑀦 𑀯𑀸𑀭𑀺𑀢𑁄𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁦𑁯) 𑀆𑀕𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁦𑁯) 𑀧𑀦 𑀧𑀡𑁆𑀟𑀓𑀯𑀢𑁆𑀣𑀼𑀲𑁆𑀫𑀺𑀁 𑀆𑀲𑀺𑀢𑁆𑀢𑀉𑀲𑀽𑀬𑀧𑀓𑁆𑀔𑀧𑀡𑁆𑀟𑀓𑀸 𑀢𑀬𑁄𑀧𑀺 𑀧𑀼𑀭𑀺𑀲𑀪𑀸𑀯𑀮𑀺𑀗𑁆𑀕𑀸𑀤𑀺𑀬𑀼𑀢𑁆𑀢𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂 𑀘 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀩𑀮𑀯𑀢𑀸𑀬 𑀦𑀧𑀼𑀁𑀲𑀓𑀧𑀡𑁆𑀟𑀓𑀲𑀤𑀺𑀲𑀢𑁆𑀢𑀸 ‘‘𑀧𑀡𑁆𑀟𑀓𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀼 𑀆𑀲𑀺𑀢𑁆𑀢𑀉𑀲𑀽𑀬𑀧𑀡𑁆𑀟𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀺𑀮𑁂𑀲𑀧𑀭𑀺𑀬𑀼𑀝𑁆𑀞𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀻𑀳𑀺 𑀯𑀻𑀢𑀺𑀓𑁆𑀓𑀫𑀢𑁄 𑀦𑀺𑀯𑀸𑀭𑁂𑀢𑀼𑀫𑁆𑀧𑀺 𑀲𑀓𑁆𑀓𑀸, 𑀢𑁂𑀦 𑀢𑁂 𑀧𑀩𑁆𑀩𑀸𑀚𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀧𑀦 𑀓𑀸𑀴𑀧𑀓𑁆𑀔𑁂 𑀉𑀫𑁆𑀫𑀸𑀤𑁄 𑀯𑀺𑀬 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀅𑀯𑀢𑁆𑀣𑀭𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀧𑀢𑁆𑀯𑀸 𑀏𑀯 𑀘 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀲𑁄 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑁄, 𑀢𑀤𑁂𑀢𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀧𑀭𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀲𑀺𑀢𑁆𑀢𑀲𑁆𑀲𑀸𑀢𑀺 𑀫𑀼𑀔𑁂 𑀆𑀲𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑁄𑀧𑀺 𑀅𑀲𑀼𑀘𑀺𑀫𑀼𑀘𑁆𑀘𑀦𑁂𑀦 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺. 𑀉𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬𑀸𑀢𑀺 𑀉𑀲𑀽𑀬𑀸𑀬 𑀯𑀲𑁂𑀦 𑀅𑀢𑁆𑀢𑀦𑁄 𑀲𑁂𑀯𑁂𑀢𑀼𑀓𑀸𑀫𑀢𑀸𑀭𑀸𑀕𑁂 𑀉𑀧𑁆𑀧𑀦𑁆𑀦𑁂 𑀅𑀲𑀼𑀘𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑁆𑀫𑀢𑀺.

‘‘𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀻𑀚𑁂𑀲𑀼 𑀞𑀺𑀢𑁂𑀲𑀼 𑀦𑀺𑀫𑀺𑀢𑁆𑀢𑀫𑀢𑁆𑀢𑁂 𑀅𑀧𑀦𑀻𑀢𑁂 𑀧𑀡𑁆𑀟𑀓𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀼𑀦𑁄𑀧𑀺 𑀅𑀦𑀸𑀩𑀸𑀥𑀧𑀘𑁆𑀘𑀬𑀸 𑀢𑀤𑀧𑀦𑀬𑀦𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯, 𑀦 𑀧𑀡𑁆𑀟𑀓𑀢𑁆𑀢𑀁. 𑀩𑀻𑀚𑁂𑀲𑀼 𑀧𑀦 𑀅𑀧𑀦𑀻𑀢𑁂𑀲𑀼 𑀅𑀗𑁆𑀕𑀚𑀸𑀢𑀫𑁆𑀧𑀺 𑀭𑀸𑀕𑁂𑀦 𑀓𑀫𑁆𑀫𑀦𑀺𑀬𑀁 𑀦 𑀳𑁄𑀢𑀺, 𑀧𑀼𑀫𑀪𑀸𑀯𑁄 𑀯𑀺𑀕𑀘𑁆𑀙𑀢𑀺, 𑀫𑀲𑁆𑀲𑀼𑀆𑀤𑀺𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀉𑀧𑀲𑀫𑁆𑀧𑀤𑀸𑀧𑀺 𑀯𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀧𑀭𑀺𑀴𑀸𑀳𑁄𑀧𑀺 𑀤𑀼𑀦𑁆𑀦𑀺𑀯𑀸𑀭𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺 𑀦𑀧𑀼𑀁𑀲𑀓𑀧𑀡𑁆𑀟𑀓𑀲𑁆𑀲 𑀯𑀺𑀬, 𑀢𑀲𑁆𑀫𑀸 𑀈𑀤𑀺𑀲𑁄 𑀉𑀧𑀲𑀫𑁆𑀧𑀦𑁆𑀦𑁄𑀧𑀺 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀩𑀻𑀚𑀼𑀤𑁆𑀥𑀭𑀡𑁂 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀢𑁆𑀢𑀦𑁆𑀢𑀺? 𑀏𑀢𑁆𑀣 𑀢𑀸𑀯 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀧𑀜𑁆𑀜𑀢𑁆𑀢𑀫𑁂𑀯𑁂𑀢𑀁 𑀪𑀕𑀯𑀢𑀸 ‘𑀧𑀡𑁆𑀟𑀓𑁄 𑀪𑀺𑀓𑁆𑀔𑀯𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀬𑀲𑁆𑀫𑀸 𑀩𑀻𑀚𑀼𑀤𑁆𑀥𑀭𑀡𑀓𑁆𑀔𑀡𑁂 𑀧𑀡𑁆𑀟𑀓𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑁂 𑀧𑀸𑀭𑀸𑀚𑀺𑀓𑀁 𑀦 𑀧𑀜𑁆𑀜𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑁄 𑀉𑀤𑁆𑀥𑀝𑀩𑀻𑀚𑁄 𑀪𑀺𑀓𑁆𑀔𑀼 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀼𑀢𑁆𑀢𑀦𑀬𑁂𑀦 𑀧𑀡𑁆𑀟𑀓𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀪𑀸𑀯𑀓𑁄 𑀳𑁄𑀢𑀺, 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼, 𑀢𑀢𑁄 𑀏𑀯 𑀘𑀲𑁆𑀲 𑀉𑀧𑀲𑀫𑁆𑀧𑀤𑀸 𑀯𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀏𑀲 𑀧𑀡𑁆𑀟𑀓𑀢𑁆𑀢𑀼𑀧𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀺𑀬𑀸 𑀦𑀧𑀼𑀁𑀲𑀓𑀧𑀡𑁆𑀟𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 ‘𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀅𑀪𑀩𑁆𑀩𑁄𑀢𑀺 𑀯𑀼𑀢𑁆𑀢𑁄, 𑀦 𑀢𑀢𑁄 𑀧𑀼𑀩𑁆𑀩𑁂. 𑀅𑀬𑀜𑁆𑀘 𑀓𑀺𑀜𑁆𑀘𑀸𑀧𑀺 𑀲𑀳𑁂𑀢𑀼𑀓𑁄, 𑀪𑀸𑀯𑀓𑁆𑀔𑀬𑁂𑀦 𑀧𑀦𑀲𑁆𑀲 𑀅𑀳𑁂𑀢𑀼𑀓𑀲𑀤𑀺𑀲𑀢𑀸𑀬 𑀫𑀕𑁆𑀕𑁄𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 ‘‘𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀉𑀧𑀓𑁆𑀓𑀫𑁂𑀦 𑀧𑀡𑁆𑀟𑀓𑀪𑀸𑀯𑀫𑀸𑀧𑀦𑁆𑀦𑀁 𑀲𑀦𑁆𑀥𑀸𑀬 ‘𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀦 𑀧𑀘𑁆𑀙𑀸 𑀉𑀧𑀓𑁆𑀓𑀫𑁂𑀦 𑀉𑀧𑀲𑀫𑁆𑀧𑀤𑀸𑀧𑀺 𑀦 𑀯𑀺𑀕𑀘𑁆𑀙𑀢𑀻’’𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀬𑀤𑀕𑁆𑀕𑁂𑀦 𑀳𑀺 𑀧𑀩𑁆𑀩𑀚𑁆𑀚𑀢𑁄 𑀧𑀼𑀩𑁆𑀩𑁂 𑀉𑀧𑀓𑁆𑀓𑀫𑁂𑀦 𑀅𑀪𑀩𑁆𑀩𑁄 𑀳𑁄𑀢𑀺, 𑀢𑀤𑀕𑁆𑀕𑁂𑀦 𑀧𑀘𑁆𑀙𑀸𑀧𑀺 𑀳𑁄𑀢𑀻𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀇𑀢𑁆𑀣𑀢𑁆𑀢𑀸𑀤𑀺 𑀪𑀸𑀯𑁄 𑀦𑀢𑁆𑀣𑀺 𑀏𑀢𑀲𑁆𑀲𑀸𑀢𑀺 𑀅𑀪𑀸𑀯𑀓𑁄. 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸𑀕𑁆𑀕𑀳𑀡𑁂𑀦𑁂𑀯 𑀉𑀧𑀲𑀫𑁆𑀧𑀤𑀸𑀧𑀺 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀬𑀲𑁆𑀲 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸’’𑀢𑀺𑀆𑀤𑀺. 𑀢𑀲𑁆𑀫𑀺𑀁 𑀬𑁂𑀯𑀲𑁆𑀲 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀧𑀦 𑀅𑀧𑀡𑁆𑀟𑀓𑀧𑀓𑁆𑀔𑁂𑀧𑀺 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀫𑁂𑀯 𑀮𑀪𑀢𑀺, 𑀉𑀧𑀲𑀫𑁆𑀧𑀤𑀸 𑀧𑀦 𑀢𑀤𑀸𑀧𑀺 𑀦 𑀯𑀝𑁆𑀝𑀢𑀺, 𑀧𑀡𑁆𑀟𑀓𑀧𑀓𑁆𑀔𑁂 𑀧𑀦 𑀆𑀕𑀢𑁄 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁩𑁬. 𑀉𑀪𑀢𑁄𑀩𑁆𑀬𑀜𑁆𑀚𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀫𑀺𑀦𑀸 𑀅𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑀬𑁄 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀬𑀁, 𑀧𑀼𑀭𑀺𑀫𑀧𑀤𑁂 𑀘 𑀯𑀺𑀪𑀢𑁆𑀢𑀺𑀅𑀮𑁄𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀘𑁂𑀢𑁆𑀣 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀜𑁆𑀘 𑀅𑀥𑀺𑀧𑁆𑀧𑁂𑀢𑀁. 𑀅𑀣 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀉𑀤𑀸𑀳𑀼 𑀤𑁆𑀯𑁂𑀢𑀺? 𑀏𑀓𑀫𑁂𑀯 𑀳𑁄𑀢𑀺, 𑀦 𑀤𑁆𑀯𑁂. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀦𑁄. 𑀬𑀲𑁆𑀲 𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺, 𑀦𑁄’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀇𑀦𑁆𑀤𑁆𑀭𑀺𑀬𑀪𑀽𑀢𑀪𑀸𑀯𑀤𑁆𑀯𑀬𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀥𑀫𑁆𑀫𑁂 𑀧𑀝𑀺𑀲𑁂𑀥𑀺𑀢𑀢𑁆𑀢𑀸, 𑀢𑀜𑁆𑀘 𑀔𑁄 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀬𑀤𑀺 𑀏𑀯𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀲𑁆𑀲 𑀅𑀪𑀸𑀯𑁄 𑀆𑀧𑀚𑁆𑀚𑀢𑀺 𑀇𑀦𑁆𑀤𑁆𑀭𑀺𑀬𑀜𑁆𑀳𑀺 𑀩𑁆𑀬𑀜𑁆𑀚𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀢𑀲𑁆𑀲 𑀦𑀢𑁆𑀣𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀸𑀭𑀡𑀁. 𑀓𑀲𑁆𑀫𑀸? 𑀲𑀤𑀸 𑀅𑀪𑀸𑀯𑀢𑁄. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀳𑀺 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀸𑀕𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀕𑀼𑀴𑁆𑀳𑀁 𑀳𑁄𑀢𑀺, 𑀢𑀣𑀸 𑀇𑀢𑀭𑀲𑁆𑀲 𑀇𑀢𑀭𑀁. 𑀬𑀤𑀺 𑀘 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀁 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀪𑀯𑁂𑀬𑁆𑀬, 𑀲𑀤𑀸𑀧𑀺 𑀩𑁆𑀬𑀜𑁆𑀚𑀦𑀤𑁆𑀯𑀬𑀁 𑀢𑀺𑀝𑁆𑀞𑁂𑀬𑁆𑀬, 𑀦 𑀧𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀦 𑀢𑀲𑁆𑀲 𑀢𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀁, 𑀓𑀫𑁆𑀫𑀲𑀳𑀸𑀬𑀁 𑀧𑀦 𑀭𑀸𑀕𑀘𑀺𑀢𑁆𑀢𑀫𑁂𑀯𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀫𑁆𑀧𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀫𑁆𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀭𑀁 𑀕𑀡𑁆𑀳𑀸𑀧𑁂𑀢𑀺, 𑀲𑀬𑀁 𑀧𑀦 𑀦 𑀕𑀡𑁆𑀳𑀸𑀢𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁧𑁬) 𑀆𑀕𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁧𑁬) 𑀧𑀦 𑁋 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑁄, 𑀇𑀢𑀭𑁄 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑁄. 𑀏𑀓𑀲𑁆𑀲 𑀳𑀺 𑀪𑀸𑀯𑀤𑁆𑀯𑀬𑀁 𑀲𑀳 𑀦 𑀉𑀧𑁆𑀧𑀚𑁆𑀚𑀢𑀺 𑀬𑀫𑀓𑁂 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑀩𑁆𑀬𑀜𑁆𑀚𑀦𑀁 𑀧𑀦 𑀓𑀫𑁆𑀫𑀲𑀳𑀸𑀬𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑁂𑀦𑁂𑀯 𑀪𑀸𑀯𑀭𑀳𑀺𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀓𑀢𑀺𑀢𑁆𑀣𑀺𑀧𑀼𑀭𑀺𑀲𑀸𑀦𑀫𑁆𑀧𑀺 𑀓𑀫𑁆𑀫𑀫𑁂𑀯 𑀩𑁆𑀬𑀜𑁆𑀚𑀦𑀮𑀺𑀗𑁆𑀕𑀸𑀦𑀁 𑀓𑀸𑀭𑀡𑀁, 𑀦 𑀪𑀸𑀯𑁄 𑀢𑀲𑁆𑀲 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀢𑁆𑀢𑀲𑁆𑀲 𑀧𑀝𑁆𑀞𑀸𑀦𑁂 𑀅𑀯𑀼𑀢𑁆𑀢𑀢𑁆𑀢𑀸. 𑀓𑁂𑀯𑀮𑀁 𑀪𑀸𑀯𑀲𑀳𑀺𑀢𑀸𑀦𑀁𑀬𑁂𑀯 𑀩𑁆𑀬𑀜𑁆𑀚𑀦𑀮𑀺𑀗𑁆𑀕𑀸𑀦𑀁 𑀧𑀯𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀲𑀼 (𑀥. 𑀲. 𑀅𑀝𑁆𑀞. 𑁬𑁩𑁨-𑁬𑁩𑁩) ‘‘𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀻’’𑀢𑀺𑀆𑀤𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑁆𑀲 𑀩𑁆𑀬𑀜𑁆𑀚𑀦𑀓𑀸𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁. 𑀇𑀥 𑀧𑀦 𑀅𑀓𑀼𑀲𑀮𑀩𑀮𑁂𑀦 𑀇𑀦𑁆𑀤𑁆𑀭𑀺𑀬𑀁 𑀯𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀘𑁂 𑀢𑁂𑀲𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁. 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑀭𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀬𑀤𑀸 𑀧𑀼𑀭𑀺𑀲𑁂 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑀭𑀁 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀆𑀕𑀢𑀁.

𑁧𑁩𑁭. 𑀣𑁂𑀬𑁆𑀬𑀸𑀬 𑀲𑀁𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄. 𑀲𑁄 𑀘 𑀦 𑀲𑀁𑀯𑀸𑀲𑀫𑀢𑁆𑀢𑀲𑁆𑀲𑁂𑀯 𑀣𑁂𑀦𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀮𑀺𑀗𑁆𑀕𑀲𑁆𑀲 𑀢𑀤𑀼𑀪𑀬𑀲𑁆𑀲 𑀘 𑀣𑁂𑀦𑀓𑁄𑀧𑀻𑀢𑀺 𑀆𑀳 ‘‘𑀢𑀬𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀸’’𑀢𑀺𑀆𑀤𑀺. 𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀻𑀢𑀺 𑀬𑀣𑀸𑀯𑀼𑀟𑁆𑀠𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀲𑀸𑀫𑀡𑁂𑀭𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀦 𑀲𑀸𑀤𑀺𑀬𑀢𑀺. 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀢𑀦𑀸 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀯𑀲𑁆𑀲𑀸𑀦𑀼𑀭𑀽𑀧𑀁 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺. 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄𑀢𑀺 𑀇𑀫𑀺𑀦𑀸 𑀦 𑀏𑀓𑀓𑀫𑁆𑀫𑀸𑀤𑀺𑀓𑁄𑀯 𑀇𑀥 𑀲𑀁𑀯𑀸𑀲𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁮. 𑀭𑀸𑀚…𑀧𑁂… 𑀪𑀬𑁂𑀦𑀸𑀢𑀺 𑀏𑀢𑁆𑀣 𑀪𑀬-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀭𑀸𑀚𑀪𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦𑀸’’𑀢𑀺𑀆𑀤𑀺𑀦𑀸. 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀢𑀸𑀬 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀭𑀸𑀚𑀪𑀬𑀸𑀤𑀺𑀁 𑀯𑀺𑀦𑀸 𑀓𑁂𑀯𑀮𑀁 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀼𑀓𑀸𑀫𑀢𑀸𑀬 𑀮𑀺𑀗𑁆𑀕𑀁 𑀕𑀡𑁆𑀳𑀸𑀢𑀺, 𑀲𑁄 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀮𑀺𑀗𑁆𑀕𑀕𑁆𑀕𑀳𑀡𑁂𑀦𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀢𑀸𑀤𑀺𑀲𑁂𑀦 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀢𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀳𑁄𑀢𑀺. 𑀢𑁂𑀦𑁂𑀯 ‘‘𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀸𑀦𑀁 ‘𑀕𑀺𑀳𑀻 𑀫𑀁 𑀲𑀫𑀡𑁄𑀢𑀺 𑀚𑀸𑀦𑀦𑁆𑀢𑀽’𑀢𑀺 𑀯𑀜𑁆𑀘𑀦𑀘𑀺𑀢𑁆𑀢𑁂 𑀲𑀢𑀺𑀧𑀺 𑀪𑀺𑀓𑁆𑀔𑀽𑀦𑀁 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀅𑀪𑀸𑀯𑀸 𑀤𑁄𑀲𑁄 𑀦 𑀚𑀸𑀢𑁄’’𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀯𑀽𑀧𑀲𑀦𑁆𑀢𑀪𑀬𑀢𑀸 𑀇𑀥 𑀲𑀼𑀤𑁆𑀥𑀘𑀺𑀢𑁆𑀢𑀢𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑁄 𑀯𑀽𑀧𑀲𑀦𑁆𑀢𑀪𑀬𑁄 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀯𑀺𑀜𑁆𑀜𑀸𑀬𑀫𑀸𑀦𑁂 𑀅𑀯𑀽𑀧𑀲𑀦𑁆𑀢𑀪𑀬𑀲𑁆𑀲 𑀲𑀁𑀯𑀸𑀲𑀲𑀸𑀤𑀺𑀬𑀦𑁂𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘 𑀅𑀝𑁆𑀞𑀓𑀣𑀸𑀬𑀁 𑀅𑀯𑀽𑀧𑀲𑀦𑁆𑀢𑀪𑀬𑀲𑁆𑀲 𑀲𑀁𑀯𑀸𑀲𑀲𑀸𑀤𑀺𑀬𑀦𑁂𑀧𑀺 𑀅𑀣𑁂𑀬𑁆𑀬𑀲𑀁𑀯𑀸𑀲𑀓𑀢𑀸 𑀤𑀲𑁆𑀲𑀺𑀢𑀸. 𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄𑀢𑀺 𑀘 𑀇𑀫𑀺𑀦𑀸 𑀅𑀯𑀽𑀧𑀲𑀦𑁆𑀢𑀪𑀬𑁂𑀦𑀧𑀺 𑀲𑀁𑀯𑀸𑀲𑀁 𑀅𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀢𑁂𑀦𑁂𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀺𑀓𑀁 𑀕𑀡𑁆𑀳𑀦𑁆𑀢𑀲𑁆𑀲 𑀲𑀁𑀯𑀸𑀲𑀁 𑀧𑀭𑀺𑀳𑀭𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 ‘𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀺 𑀪𑀼𑀜𑁆𑀚𑀦𑁆𑀢𑁄’𑀢𑀺 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀫𑀸 𑀭𑀸𑀚𑀪𑀬𑀸𑀤𑀻𑀳𑀺 𑀕𑀳𑀺𑀢𑀮𑀺𑀗𑁆𑀕𑀢𑀸𑀬𑁂𑀯𑁂𑀢𑁆𑀣 𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀲𑀸𑀫𑀬𑀺𑀓𑀸𑀦𑀁 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀻𑀲𑀼 𑀞𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑀸𑀦𑀺. 𑀓𑀸𑀬𑀧𑀭𑀺𑀳𑀸𑀭𑀺𑀬𑀸𑀦𑀻𑀢𑀺 𑀓𑀸𑀬𑁂𑀦 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺. 𑀅𑀩𑁆𑀪𑀼𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺. 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦𑁂𑀦𑀸𑀢𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀸𑀓𑀭𑀡𑁂𑀦. 𑀢𑀤𑁂𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀢𑀻𑀢𑀺 𑀘𑀻𑀯𑀭𑀸𑀦𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦 𑀆𑀤𑀸𑀬, 𑀧𑀢𑁆𑀢𑀜𑁆𑀘 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺.

𑀦𑀸𑀧𑀺 𑀲𑀬𑀁 𑀚𑀸𑀦𑀸𑀢𑀻𑀢𑀺 ‘‘𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀸 ‘‘𑀏𑀯𑀁 𑀓𑀸𑀢𑀼𑀁 𑀦 𑀮𑀪𑀢𑀻’’𑀢𑀺 𑀯𑀸 ‘‘𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀡𑁄 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺. 𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀤𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯𑀸𑀢𑀺 𑀇𑀫𑀺𑀦𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀲𑀼𑀢𑁆𑀯𑀸 𑀲𑀘𑁂𑀧𑀺 𑀦𑀸𑀭𑁄𑀘𑁂𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

𑀲𑀺𑀓𑁆𑀔𑀁 𑀅𑀧𑁆𑀧𑀘𑁆𑀘𑀓𑁆𑀔𑀸𑀬…𑀧𑁂… 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀇𑀤𑀁 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺, 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀦𑀸𑀧𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀓𑁄 𑀪𑀺𑀓𑁆𑀔𑀼 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑁄𑀯 𑀑𑀤𑀸𑀢𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀢𑁄 ‘‘𑀲𑀸𑀫𑀡𑁂𑀭𑁄 𑀲𑀮𑀺𑀗𑁆𑀕𑁂 𑀞𑀺𑀢𑁄’’𑀢𑀺𑀆𑀤𑀺𑀦𑀸 𑀲𑀸𑀫𑀡𑁂𑀭𑀲𑁆𑀲 𑀯𑀼𑀢𑁆𑀢𑀯𑀺𑀥𑀸𑀦𑁂𑀲𑀼𑀧𑀺 𑀅𑀣𑁂𑀬𑁆𑀬𑀲𑀁𑀯𑀸𑀲𑀧𑀓𑁆𑀔𑁂 𑀅𑀬𑀫𑁂𑀯 𑀦𑀬𑁄. ‘‘𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀲𑀸𑀧𑀺 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺.

𑀲𑀘𑁂 𑀓𑁄𑀘𑀺 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 𑀲𑀸𑀫𑀡𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀳𑀸𑀧𑁂𑀴𑀸𑀤𑀻𑀲𑀽𑀢𑀺 𑀏𑀢𑁂𑀦 𑀕𑀺𑀳𑀺𑀲𑀦𑁆𑀢𑀓𑀁 𑀤𑀲𑁆𑀲𑀺𑀢𑀁. 𑀲𑀸𑀫𑀡𑁂𑀭𑀧𑀝𑀺𑀧𑀸𑀝𑀺𑀬𑀸…𑀧𑁂… 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀁 𑀧𑀦 𑀆𑀧𑀚𑁆𑀚𑀢𑀺𑀬𑁂𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁧𑁦) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁧𑁦) 𑀧𑀦 𑁋 𑀣𑁂𑀬𑁆𑀬𑀸𑀬 𑀮𑀺𑀗𑁆𑀕𑀕𑁆𑀕𑀳𑀡𑀫𑀢𑁆𑀢𑀫𑁆𑀧𑀺 𑀇𑀥 𑀲𑀁𑀯𑀸𑀲𑁄 𑀏𑀯𑀸𑀢𑀺 𑀆𑀳 ‘‘𑀢𑀬𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀸’’𑀢𑀺. 𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀲𑀸𑀫𑀡𑁂𑀭𑀸𑀦𑀁 𑀯𑀸 𑀯𑀦𑁆𑀤𑀦𑀁 𑀦 𑀲𑀸𑀤𑀺𑀬𑀢𑀺. 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀦𑁆𑀢𑀺 𑀅𑀢𑁆𑀢𑀦𑀸 𑀫𑀼𑀲𑀸𑀯𑀸𑀤𑁂𑀦 𑀤𑀲𑁆𑀲𑀺𑀢𑀯𑀲𑁆𑀲𑀓𑁆𑀓𑀫𑁂𑀦 𑀪𑀺𑀓𑁆𑀔𑀽𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺. 𑀤𑀳𑀭𑀲𑀸𑀫𑀡𑁂𑀭𑁄 𑀧𑀦 𑀯𑀼𑀟𑁆𑀠𑀲𑀸𑀫𑀡𑁂𑀭𑀸𑀦𑀁, 𑀤𑀳𑀭𑀪𑀺𑀓𑁆𑀔𑀽 𑀘 𑀯𑀼𑀟𑁆𑀠𑀸𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑀢𑁆𑀣𑁂. 𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀻𑀢𑀺 𑀇𑀤𑀁 𑀲𑀁𑀯𑀸𑀲𑀢𑁆𑀣𑁂𑀦𑀓𑁂 𑀯𑀼𑀢𑁆𑀢𑀧𑀸𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀬𑀫𑁂𑀯 𑀧𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑀯𑀲𑁆𑀲𑀸𑀦𑀺 𑀕𑀡𑁂𑀦𑁆𑀢𑁄𑀧𑀺 𑀉𑀪𑀬𑀢𑁆𑀣𑁂𑀦𑀓𑁄 𑀏𑀯. 𑀦 𑀓𑁂𑀯𑀮𑀜𑁆𑀘 𑀧𑀼𑀭𑀺𑀲𑁄𑀯, 𑀇𑀢𑁆𑀣𑀻𑀧𑀺 𑀪𑀺𑀓𑁆𑀔𑀽𑀦𑀻𑀲𑀼 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀺𑀓𑀸𑀯. 𑀆𑀤𑀺𑀓𑀫𑁆𑀫𑀺𑀓𑀸𑀧𑀺 𑀘𑁂𑀢𑁆𑀣 𑀦 𑀫𑀼𑀘𑁆𑀘𑀦𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑁂𑀲𑀼 𑀏𑀯 𑀧𑀜𑁆𑀜𑀢𑁆𑀢𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀘 𑀆𑀤𑀺𑀓𑀫𑁆𑀫𑀺𑀓𑀸 𑀯𑀼𑀢𑁆𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑁄𑀧𑀺 𑀦 𑀫𑀼𑀢𑁆𑀢𑁄.

𑀭𑀸𑀚…𑀧𑁂… 𑀪𑀬𑁂𑀦𑀸𑀢𑀺 𑀏𑀢𑁆𑀣 𑀪𑀬-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀬𑀸𑀯 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄𑀢𑀺 ‘‘𑀇𑀫𑀺𑀦𑀸 𑀮𑀺𑀗𑁆𑀕𑁂𑀦 𑀪𑀺𑀓𑁆𑀔𑀽 𑀯𑀜𑁆𑀘𑁂𑀢𑁆𑀯𑀸 𑀢𑁂𑀳𑀺 𑀲𑀁𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀸𑀪𑀸𑀯𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁄. 𑀢𑁂𑀦 𑀳𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀺𑀗𑁆𑀕𑁂 𑀕𑀳𑀺𑀢𑀫𑀢𑁆𑀢𑁂 𑀧𑀘𑁆𑀙𑀸 𑀪𑀺𑀓𑁆𑀔𑀽𑀳𑀺 𑀲𑀳 𑀲𑀁𑀯𑀲𑀢𑀼 𑀯𑀸 𑀫𑀸 𑀯𑀸, 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺. 𑀧𑀘𑁆𑀙𑀸 𑀲𑀁𑀯𑀲𑀦𑁆𑀢𑁄𑀧𑀺 𑀅𑀪𑀩𑁆𑀩𑁄 𑀳𑀼𑀢𑁆𑀯𑀸 𑀲𑀁𑀯𑀲𑀢𑀺, 𑀢𑀲𑁆𑀫𑀸 𑀉𑀪𑀬𑀢𑁆𑀣𑁂𑀦𑀓𑁄𑀧𑀺 𑀮𑀺𑀗𑁆𑀕𑀢𑁆𑀣𑁂𑀦𑀓𑁂 𑀏𑀯 𑀧𑀯𑀺𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀧𑀦 𑀭𑀸𑀚𑀸𑀤𑀺𑀪𑀬𑁂𑀦 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀧𑀘𑁆𑀙𑀸 ‘‘𑀪𑀺𑀓𑁆𑀔𑀼𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀚𑀻𑀯𑀲𑁆𑀲𑀸𑀫𑀻’’𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀮𑀺𑀗𑁆𑀕𑀢𑁆𑀢𑀸. 𑀲𑀘𑁂 𑀧𑀦 𑀲𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑀯𑀲𑁆𑀲𑀕𑀡𑀦𑀸𑀤𑀺𑀁 𑀓𑀭𑁄𑀢𑀺, 𑀢𑀤𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄, 𑀉𑀪𑀬𑀢𑁆𑀣𑁂𑀦𑀓𑁄 𑀯𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦 𑀧𑀭𑀢𑁄 ‘‘𑀲𑀳 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀅𑀬𑀫𑁆𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀪𑀺𑀓𑁆𑀔𑀽𑀳𑀺 𑀲𑀗𑁆𑀕𑀫𑁆𑀫 𑀲𑀁𑀯𑀸𑀲𑀸𑀥𑀺𑀯𑀸𑀲𑀦𑀯𑀲𑁂𑀦 𑀥𑀼𑀭𑀦𑀺𑀓𑁆𑀔𑁂𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀬𑀸𑀯𑀸’’𑀢𑀺, 𑀢𑀲𑁆𑀲 𑀢𑀸𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀦 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀘𑁄𑀭𑀸𑀤𑀺𑀪𑀬𑀁 𑀯𑀺𑀦𑀸𑀧𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀮𑀬𑀁 𑀤𑀲𑁆𑀲𑁂𑀢𑁆𑀯𑀸 𑀯𑀦𑁆𑀤𑀦𑀸𑀤𑀺𑀁 𑀅𑀲𑀸𑀤𑀺𑀬𑀦𑁆𑀢𑁄𑀧𑀺 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀧𑀩𑁆𑀩𑀚𑀺𑀢𑀮𑀺𑀗𑁆𑀕’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀲𑀸𑀫𑀬𑀺𑀓𑀸𑀦𑀁 𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀦𑀺 𑀪𑀢𑁆𑀢𑀸𑀦𑀺. 𑀇𑀤𑀜𑁆𑀘 𑀪𑀺𑀓𑁆𑀔𑀽𑀦𑀜𑁆𑀜𑁂𑀯 𑀦𑀺𑀬𑀫𑀺𑀢𑀪𑀢𑁆𑀢𑀕𑁆𑀕𑀳𑀡𑁂 𑀲𑀁𑀯𑀸𑀲𑁄𑀧𑀺 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀪𑀢𑁆𑀢𑀁 𑀯𑀼𑀢𑁆𑀢𑀁. 𑀲𑀁𑀯𑀸𑀲𑀁 𑀧𑀦 𑀅𑀲𑀸𑀤𑀺𑀬𑀺𑀢𑁆𑀯𑀸 𑀅𑀪𑀺𑀓𑁆𑀔𑀼𑀓𑀯𑀺𑀳𑀸𑀭𑀸𑀤𑀻𑀲𑀼 𑀯𑀺𑀳𑀸𑀭𑀪𑀢𑁆𑀢𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀏𑀯. 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦𑁂𑀦𑀸𑀢𑀺 𑀓𑀲𑀺𑀆𑀤𑀺𑀓𑀫𑁆𑀫𑀸𑀓𑀭𑀡𑁂𑀦. 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬𑀸𑀢𑀺 𑀪𑀺𑀓𑁆𑀔𑀼𑀮𑀺𑀗𑁆𑀕𑀯𑀲𑁂𑀦 𑀲𑀭𑀻𑀭𑁂𑀦 𑀥𑀸𑀭𑁂𑀢𑁆𑀯𑀸.

𑀬𑁄 𑀏𑀯𑀁 𑀧𑀩𑁆𑀩𑀚𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. ‘‘𑀣𑁂𑀬𑁆𑀬𑀲𑀁𑀯𑀸𑀲𑀓𑁄’’𑀢𑀺 𑀧𑀦 𑀦𑀸𑀫𑀁 𑀅𑀚𑀸𑀦𑀦𑁆𑀢𑁄𑀧𑀺 ‘‘𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀸 ‘‘𑀓𑀭𑁄𑀦𑁆𑀢𑁄 𑀲𑀫𑀡𑁄 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀸 ‘‘𑀬𑀤𑀺 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀙𑀟𑁆𑀟𑀬𑀺𑀲𑁆𑀲𑀦𑁆𑀢𑀺 𑀫’’𑀦𑁆𑀢𑀺 𑀯𑀸 ‘‘𑀬𑁂𑀦 𑀓𑁂𑀦𑀘𑀺 𑀧𑀩𑁆𑀩𑀚𑁆𑀚𑀸 𑀫𑁂 𑀦 𑀭𑀼𑀳𑀢𑀻’’𑀢𑀺 𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺. 𑀬𑁄 𑀧𑀦 𑀧𑀞𑀫𑀁 ‘‘𑀧𑀩𑁆𑀩𑀚𑁆𑀚𑀸 𑀏𑀯𑀁 𑀫𑁂 𑀕𑀳𑀺𑀢𑀸’’𑀢𑀺 𑀲𑀜𑁆𑀜𑀻 𑀓𑁂𑀯𑀮𑀁 𑀅𑀦𑁆𑀢𑀭𑀸 𑀅𑀢𑁆𑀢𑀦𑁄 𑀲𑁂𑀢𑀯𑀢𑁆𑀣𑀦𑀺𑀯𑀸𑀲𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀓𑀸𑀲𑁂𑀢𑀼𑀁 𑀮𑀚𑁆𑀚𑀦𑁆𑀢𑁄 𑀦 𑀓𑀣𑁂𑀢𑀺, 𑀲𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯𑀸𑀢𑀺 𑀏𑀢𑁆𑀣 𑀅𑀯𑀥𑀸𑀭𑀡𑁂𑀦 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀣𑁂𑀬𑁆𑀬𑀲𑀁𑀯𑀸𑀲𑀓𑀮𑀓𑁆𑀔𑀡𑀁 𑀜𑀢𑁆𑀯𑀸 𑀯𑀜𑁆𑀘𑀦𑀸𑀬𑀧𑀺 𑀦𑀸𑀭𑁄𑀘𑁂𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀲𑁄 𑀳𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀮𑀺𑀗𑁆𑀕𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺, 𑀮𑀤𑁆𑀥𑀽𑀧𑀲𑀫𑁆𑀧𑀤𑀢𑁆𑀢𑀸 𑀢𑀤𑀦𑀼𑀕𑀼𑀡𑀲𑁆𑀲𑁂𑀯 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄𑀧𑀺 𑀦 𑀳𑁄𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀧𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀳𑁄𑀢𑀺, 𑀲𑀁𑀯𑀸𑀲𑀸𑀭𑀳𑀲𑁆𑀲 𑀮𑀺𑀗𑁆𑀕𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀁𑀯𑀸𑀲𑀲𑀸𑀤𑀺𑀬𑀦𑀫𑀢𑁆𑀢𑁂𑀦 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀳𑁄𑀢𑀺.

𑀲𑀮𑀺𑀗𑁆𑀕𑁂 𑀞𑀺𑀢𑁄𑀢𑀺 𑀲𑀮𑀺𑀗𑁆𑀕𑀪𑀸𑀯𑁂 𑀞𑀺𑀢𑁄. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺. 𑀬𑀁 𑀧𑀦 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) ‘‘𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑁆𑀲 𑀲𑀁𑀯𑀸𑀲𑀲𑁆𑀲 𑀲𑀸𑀤𑀺𑀢𑀢𑁆𑀢𑀸 𑀦𑀸𑀧𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀲𑀸𑀫𑀡𑁂𑀭𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀻𑀲𑀼 𑀮𑀺𑀗𑁆𑀕𑀸𑀦𑀼𑀭𑀽𑀧𑀲𑀁𑀯𑀸𑀲𑁄 𑀏𑀯 𑀲𑀸𑀤𑀺𑀢𑁄𑀢𑀺 𑀲𑀁𑀯𑀸𑀲𑀢𑁆𑀣𑁂𑀦𑀓𑀢𑀸 𑀦 𑀲𑀺𑀬𑀸 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀲𑁆𑀲 𑀉𑀪𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀪𑀺𑀓𑁆𑀔𑀼, 𑀏𑀯𑀁 𑀲𑀸𑀫𑀡𑁂𑀭𑁄𑀧𑀺 𑀧𑀸𑀭𑀸𑀚𑀺𑀓𑀁 𑀲𑀫𑀸𑀧𑀦𑁆𑀦𑁄 𑀲𑀸𑀫𑀡𑁂𑀭𑀧𑀝𑀺𑀜𑁆𑀜𑀸𑀬 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄𑀪𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀢𑀺 𑀓𑀸𑀲𑀸𑀯𑀥𑀸𑀭𑀡𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸.

𑀲𑀘𑁂 𑀓𑁄𑀘𑀺 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 𑀲𑀸𑀫𑀡𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀳𑀸𑀧𑁂𑀴𑀸𑀤𑀻𑀲𑀽𑀢𑀺 𑀯𑀺𑀮𑀻𑀯𑀸𑀤𑀺𑀫𑀬𑁂𑀲𑀼 𑀖𑀭𑀤𑁆𑀯𑀸𑀭𑁂𑀲𑀼 𑀞𑀧𑀺𑀢𑁂𑀲𑀼 𑀪𑀢𑁆𑀢𑀪𑀸𑀚𑀦𑀯𑀺𑀲𑁂𑀲𑁂𑀲𑀼. 𑀏𑀢𑁂𑀦 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑁆𑀲𑀕𑀡𑀦𑀸𑀤𑀻𑀦𑀁 𑀅𑀓𑀭𑀡𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁.

𑁧𑁩𑁯. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸𑀬𑀁 𑀢𑁂𑀲𑀁 𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀻𑀢𑀺 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀢𑀲𑁆𑀲 𑀮𑀺𑀗𑁆𑀕𑀕𑁆𑀕𑀳𑀡𑁂𑀦𑁂𑀯 𑀢𑁂𑀲𑀁 𑀮𑀤𑁆𑀥𑀺𑀧𑀺 𑀕𑀳𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀢𑁂𑀲𑀁 𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂 𑀮𑀤𑁆𑀥𑀺𑀬𑀸 𑀕𑀳𑀺𑀢𑀸𑀬𑀧𑀺 𑀅𑀕𑁆𑀕𑀳𑀺𑀢𑀸𑀬𑀧𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀢𑀲𑁆𑀲 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑀢𑁄 𑀅𑀜𑁆𑀜𑀁 𑀮𑀤𑁆𑀥𑀺𑀕𑁆𑀕𑀳𑀡𑀁 𑀦𑀸𑀫 𑀅𑀢𑁆𑀣𑀺. 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀳𑀺 𑀲𑁄 𑀕𑀳𑀺𑀢𑀮𑀤𑁆𑀥𑀺𑀓𑁄 𑀳𑁄𑀢𑀺. 𑀢𑁂𑀦𑁂𑀯 ‘‘𑀯𑀻𑀫𑀁𑀲𑀦𑀢𑁆𑀣𑀁 𑀓𑀼𑀲𑀘𑀻𑀭𑀸𑀤𑀻𑀦𑀺…𑀧𑁂… 𑀬𑀸𑀯 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀸𑀯 𑀢𑀁 𑀮𑀤𑁆𑀥𑀺 𑀭𑀓𑁆𑀔𑀢𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀕𑁆𑀕𑁄𑀯 𑀆𑀚𑀻𑀯𑀓𑀸𑀦𑀁 𑀉𑀧𑀲𑁆𑀲𑀬𑀁 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀆𑀚𑀻𑀯𑀓𑁄 𑀪𑀯𑀺𑀲𑁆𑀲’’𑀦𑁆𑀢𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀫𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀦𑀕𑁆𑀕𑁂𑀦 𑀳𑀼𑀢𑁆𑀯𑀸 𑀕𑀫𑀦𑀧𑀘𑁆𑀘𑀬𑀸𑀧𑀺 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁧𑁦) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁧𑁦) 𑀧𑀦 𑁋 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀤𑀺𑀓𑀣𑀸𑀲𑀼 𑀢𑁂𑀲𑀁 𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂𑀢𑀺 𑀯𑀻𑀫𑀁𑀲𑀸𑀤𑀺𑀅𑀥𑀺𑀧𑁆𑀧𑀸𑀬𑀁 𑀯𑀺𑀦𑀸 ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑁂 𑀓𑀸𑀬𑁂𑀦 𑀥𑀸𑀭𑀺𑀢𑀫𑀢𑁆𑀢𑁂. 𑀲𑀬𑀫𑁂𑀯𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀲𑀗𑁆𑀖𑀸𑀭𑀸𑀫𑁂𑀧𑀺 𑀓𑀼𑀲𑀘𑀻𑀭𑀸𑀤𑀻𑀦𑀺 𑀦𑀺𑀯𑀸𑀲𑁂𑀢𑀺. 𑀆𑀚𑀻𑀯𑀓𑁄 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀕𑀘𑁆𑀙𑀢𑀻𑀢𑀺 𑀆𑀚𑀻𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀢𑁂𑀲𑀁 𑀧𑀩𑁆𑀩𑀚𑀦𑀯𑀺𑀥𑀺𑀦𑀸 ‘‘𑀆𑀚𑀻𑀯𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑀺. 𑀢𑀲𑁆𑀲 𑀳𑀺 𑀢𑀺𑀢𑁆𑀣𑀺𑀬𑀪𑀸𑀯𑀽𑀧𑀕𑀫𑀦𑀁 𑀧𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 ‘‘𑀕𑀦𑁆𑀢𑁆𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀦𑁆𑀢𑀺 𑀧𑀸𑀴𑀺𑀬𑀸 𑀅𑀯𑀼𑀢𑁆𑀢𑁂𑀧𑀺 𑀫𑁂𑀣𑀼𑀦𑀸𑀤𑀻𑀲𑀼 𑀯𑀼𑀢𑁆𑀢𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀸𑀦𑀼𑀮𑁄𑀫𑀢𑁄 𑀯𑀼𑀢𑁆𑀢𑀁. 𑀏𑀢𑁂𑀦 𑀘 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀧𑀸𑀭𑀸𑀚𑀺𑀓𑀁, 𑀢𑀢𑁄 𑀧𑀼𑀭𑀺𑀫𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀜𑁆𑀘 𑀯𑀢𑁆𑀢𑀩𑁆𑀩𑀫𑁂𑀯. 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑀡𑁂 𑀦𑀺𑀯𑀢𑁆𑀢𑀦𑁆𑀢𑁄𑀧𑀺 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑁆𑀯𑀸 𑀫𑀼𑀘𑁆𑀘𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀗𑁆𑀖𑀪𑁂𑀤𑁂𑀧𑀺 𑀮𑁄𑀳𑀺𑀢𑀼𑀧𑁆𑀧𑀸𑀤𑁂𑀧𑀺 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑀧𑀬𑁄𑀕𑀸𑀤𑀻𑀲𑀼 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀧𑀸𑀭𑀸𑀚𑀺𑀓𑀸𑀳𑀺 𑀫𑀼𑀘𑁆𑀘𑀦𑀲𑀻𑀫𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀲𑀦𑀯𑀺𑀭𑀼𑀤𑁆𑀥𑀢𑀸𑀬𑁂𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑀸𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸. 𑀧𑀩𑁆𑀩𑀚𑁆𑀚𑀸𑀬𑀧𑀺 𑀅𑀪𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀦𑁂𑀢𑁂 𑀅𑀜𑁆𑀜𑁂 𑀘 𑀧𑀸𑀭𑀸𑀚𑀺𑀓𑀓𑀡𑁆𑀟𑁂 𑀯𑀺𑀲𑀼𑀁 𑀲𑀺𑀓𑁆𑀔𑀸𑀧𑀤𑁂𑀦 𑀧𑀸𑀭𑀸𑀚𑀺𑀓𑀸𑀤𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀇𑀥 𑀅𑀪𑀩𑁆𑀩𑁂𑀲𑀼 𑀏𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀁 𑀮𑀤𑁆𑀥𑀻𑀢𑀺 𑀢𑀺𑀢𑁆𑀣𑀺𑀬𑀯𑁂𑀲𑁂 𑀲𑁂𑀝𑁆𑀞𑀪𑀸𑀯𑀕𑁆𑀕𑀳𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀲𑁆𑀲𑀢𑀸𑀤𑀺𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑁄𑀧𑀺 𑀮𑀺𑀗𑁆𑀕𑁂 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦 𑀳𑁄𑀢𑀺, 𑀢𑀁 𑀮𑀤𑁆𑀥𑀺𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 ‘‘𑀏𑀢𑁂𑀲𑀁 𑀯𑀢𑀘𑀭𑀺𑀬𑀸 𑀲𑀼𑀦𑁆𑀤𑀭𑀸’’𑀢𑀺 𑀮𑀺𑀗𑁆𑀕𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀳𑁄𑀢𑀺 𑀏𑀯. 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦𑀸𑀢𑀺 𑀪𑀺𑀓𑁆𑀔𑀼𑀪𑀸𑀯𑁂 𑀲𑀸𑀮𑀬𑀢𑀸𑀬 𑀢𑀺𑀢𑁆𑀣𑀺𑀬𑀪𑀸𑀯𑀽𑀧𑀕𑀫𑀦𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦. 𑀏𑀢𑁂𑀦 𑀘 𑀆𑀧𑀤𑀸𑀲𑀼 𑀓𑀼𑀲𑀘𑀻𑀭𑀸𑀤𑀺𑀁 𑀧𑀸𑀭𑀼𑀧𑀦𑁆𑀢𑀲𑁆𑀲𑀧𑀺 𑀦𑀕𑁆𑀕𑀲𑁆𑀲 𑀯𑀺𑀬 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸 𑀓𑀣𑀺𑀢𑁄𑀢𑀺 𑀏𑀢𑁆𑀣 𑀲𑀗𑁆𑀖𑀪𑁂𑀤𑀓𑁄𑀧𑀺 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑀸𑀯 𑀓𑀣𑀺𑀢𑁄, 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀢𑀺𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀕𑀢𑀁.

𑁧𑁪𑁦. 𑀢𑀺𑀭𑀘𑁆𑀙𑀸𑀦𑀓𑀣𑀸𑀬𑀁 ‘‘𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀬𑁄, 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀏𑀢𑁂𑀦 𑀏𑀲𑁄 𑀫𑀦𑀼𑀲𑁆𑀲𑀚𑀸𑀢𑀺𑀬𑁄 𑀏𑀯 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀼𑀁 𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀁 𑀯𑀸 𑀮𑀪𑀢𑀺, 𑀦 𑀢𑀢𑁄 𑀅𑀜𑁆𑀜𑁂𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀼𑀫𑁆𑀳𑁂 𑀔𑁄𑀢𑁆𑀣 𑀦𑀸𑀕𑀸 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂’’𑀢𑀺 (𑀫𑀳𑀸𑀯. 𑁧𑁧𑁧).

𑁧𑁪𑁧. 𑀆𑀦𑀦𑁆𑀢𑀭𑀺𑀬𑀓𑀣𑀸𑀬𑀁 𑀢𑀺𑀭𑀘𑁆𑀙𑀸𑀦𑀸𑀤𑀺𑀅𑀫𑀦𑀼𑀲𑁆𑀲𑀚𑀸𑀢𑀺𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀜𑁆𑀜𑁂𑀯 𑀧𑀼𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀤𑀬𑁄𑀧𑀺 𑀢𑀺𑀓𑁆𑀔𑀯𑀺𑀲𑀤𑀸 𑀳𑁄𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀸 𑀯𑀺𑀬𑀸𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀚𑀦𑀺𑀓𑀸 𑀫𑀸𑀢𑀸’’𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸𑀦𑀜𑁆𑀜𑁂𑀯 𑀓𑀼𑀲𑀮𑀧𑀯𑀢𑁆𑀢𑀺 𑀢𑀺𑀓𑁆𑀔𑀯𑀺𑀲𑀤𑀸, 𑀏𑀯𑀁 𑀅𑀓𑀼𑀲𑀮𑀧𑀯𑀢𑁆𑀢𑀺𑀧𑀻𑀢𑀺 𑀆𑀳 ‘‘𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯𑀸’’𑀢𑀺𑀆𑀤𑀺. 𑀅𑀣 𑀯𑀸 𑀬𑀣𑀸 𑀲𑀫𑀸𑀦𑀚𑀸𑀢𑀺𑀬𑀲𑁆𑀲 𑀯𑀺𑀓𑁄𑀧𑀦𑁂 𑀓𑀫𑁆𑀫𑀁 𑀕𑀭𑀼𑀢𑀭𑀁, 𑀦 𑀢𑀣𑀸 𑀯𑀺𑀚𑀸𑀢𑀺𑀬𑀲𑁆𑀲𑀸𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸’’𑀢𑀺. 𑀧𑀼𑀢𑁆𑀢𑀲𑀫𑁆𑀩𑀦𑁆𑀥𑁂𑀦 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸, 𑀤𑀢𑁆𑀢𑀓𑀺𑀢𑁆𑀢𑀺𑀫𑀸𑀤𑀺𑀯𑀲𑁂𑀦𑀧𑀺 𑀧𑀼𑀢𑁆𑀢𑀯𑁄𑀳𑀸𑀭𑁄 𑀮𑁄𑀓𑁂 𑀤𑀺𑀲𑁆𑀲𑀢𑀺, 𑀲𑁄 𑀘 𑀔𑁄 𑀧𑀭𑀺𑀬𑀸𑀬𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀦𑀺𑀓𑀸 𑀫𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀓𑀼𑀲𑀮𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀺 𑀬𑀣𑀸 𑀢𑀁 𑀢𑀺𑀡𑁆𑀡𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑀦𑀺𑀩𑁆𑀩𑀢𑁆𑀢𑀺𑀬𑀁, 𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯𑀸’’𑀢𑀺. 𑀆𑀦𑀦𑁆𑀢𑀭𑀺𑀬𑁂𑀦𑀸𑀢𑀺 𑀏𑀢𑁆𑀣 𑀘𑀼𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑀬𑁂 𑀧𑀝𑀺𑀲𑀦𑁆𑀥𑀺𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀚𑀦𑀓𑀢𑁆𑀢𑁂𑀦 𑀦𑀺𑀬𑀼𑀢𑁆𑀢𑀁 𑀆𑀦𑀦𑁆𑀢𑀭𑀺𑀬𑀁, 𑀢𑁂𑀦. 𑀅𑀣 𑀯𑀸 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀁, 𑀅𑀦𑀦𑁆𑀢𑀭𑀧𑁆𑀧𑀬𑁄𑀚𑀦𑀁 𑀯𑀸 𑀆𑀦𑀦𑁆𑀢𑀭𑀺𑀬𑀁, 𑀢𑁂𑀦 𑀆𑀦𑀦𑁆𑀢𑀭𑀺𑀬𑁂𑀦 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑁂𑀦. 𑀧𑀺𑀢𑀼𑀖𑀸𑀢𑀓𑁂𑀧𑀺 ‘‘𑀬𑁂𑀦 𑀫𑀦𑀼𑀲𑁆𑀲𑀪𑀽𑀢𑁄 𑀚𑀦𑀓𑁄 𑀧𑀺𑀢𑀸 𑀲𑀬𑀫𑁆𑀧𑀺 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯 𑀲𑀢𑀸 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄, 𑀅𑀬𑀁 𑀆𑀦𑀦𑁆𑀢𑀭𑀺𑀬𑁂𑀦 𑀧𑀺𑀢𑀼𑀖𑀸𑀢𑀓𑀓𑀫𑁆𑀫𑁂𑀦 𑀧𑀺𑀢𑀼𑀖𑀸𑀢𑀓𑁄’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑀧𑀭𑀺𑀯𑀢𑁆𑀢𑀺𑀢𑀮𑀺𑀗𑁆𑀕𑀫𑁆𑀧𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺𑀬𑁂𑀯. 𑀲𑀢𑀺𑀧𑀺 𑀳𑀺 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀲𑁄 𑀏𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀪𑀯𑀗𑁆𑀕𑀧𑁆𑀧𑀩𑀦𑁆𑀥𑁄 𑀚𑀻𑀯𑀺𑀢𑀧𑁆𑀧𑀩𑀦𑁆𑀥𑁄, 𑀦 𑀅𑀜𑁆𑀜𑁄𑀢𑀺. 𑀬𑁄 𑀧𑀦 𑀲𑀬𑀁 𑀫𑀦𑀼𑀲𑁆𑀲𑁄 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀧𑀺𑀢𑀭𑀁 𑀯𑀸 𑀫𑀸𑀢𑀭𑀁 𑀯𑀸, 𑀲𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁, 𑀢𑀺𑀭𑀘𑁆𑀙𑀸𑀦𑁄𑀬𑁂𑀯 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀪𑀸𑀭𑀺𑀬𑀁 𑀧𑀦 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀏𑀴𑀓𑀘𑀢𑀼𑀓𑁆𑀓𑀁 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁 𑀘𑁄𑀭𑀘𑀢𑀼𑀓𑁆𑀓𑀜𑁆𑀘𑁂𑀢𑁆𑀣 𑀓𑀣𑁂𑀢𑀩𑁆𑀩𑀁. ‘‘𑀏𑀴𑀓𑀁 𑀫𑀸𑀭𑁂𑀫𑀻’’𑀢𑀺 𑀅𑀪𑀺𑀲𑀦𑁆𑀥𑀺𑀦𑀸𑀧𑀺 𑀳𑀺 𑀏𑀴𑀓𑀝𑁆𑀞𑀸𑀦𑁂 𑀞𑀺𑀢𑀁 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀦𑁄 𑀯𑀺𑀓𑁄𑀧𑀺𑀢𑀢𑁆𑀢𑀸. 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸, 𑀧𑀦 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀦𑁄 𑀅𑀪𑀸𑀯𑀢𑁄. 𑀫𑀸𑀢𑀸𑀧𑀺𑀢𑀺𑀅𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀦𑁆𑀢𑁄 𑀨𑀼𑀲𑁆𑀲𑀢𑁂𑀯. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀘𑀢𑀼𑀓𑁆𑀓𑀤𑁆𑀯𑀬𑁂. 𑀬𑀣𑀸 𑀘 𑀫𑀸𑀢𑀸𑀧𑀺𑀢𑀽𑀲𑀼, 𑀏𑀯𑀁 𑀅𑀭𑀳𑀦𑁆𑀢𑁂𑀲𑀼 𑀏𑀢𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀢𑁆𑀣 𑀳𑀺 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁, 𑀯𑀥𑀓𑀘𑀺𑀢𑁆𑀢𑀁, 𑀧𑀦 𑀢𑀤𑀸𑀭𑀫𑁆𑀫𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀫𑀸𑀡𑀁. 𑀓𑀢𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑁄 𑀘 ‘‘𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀫𑀳𑀸𑀘𑁂𑀢𑀺𑀬𑀧𑁆𑀧𑀫𑀸𑀡𑁂𑀳𑀺 𑀓𑀜𑁆𑀘𑀦𑀣𑀽𑀧𑁂𑀳𑀺 𑀧𑀽𑀭𑁂𑀢𑁆𑀯𑀸𑀧𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀁 𑀅𑀫𑀼𑀜𑁆𑀘𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁂𑀯 𑀉𑀧𑀧𑀚𑁆𑀚𑀢𑀺, 𑀧𑀩𑁆𑀩𑀚𑁆𑀚𑀜𑁆𑀘 𑀦 𑀮𑀪𑀢𑀺. 𑀧𑀺𑀢𑀼𑀖𑀸𑀢𑀓𑁂 𑀯𑁂𑀲𑀺𑀬𑀸 𑀧𑀼𑀢𑁆𑀢𑁄𑀢𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀓𑀼𑀮𑀺𑀢𑁆𑀣𑀺𑀬𑀸 𑀅𑀢𑀺𑀘𑀸𑀭𑀺𑀦𑀺𑀬𑀸 𑀧𑀼𑀢𑁆𑀢𑁄𑀧𑀺 𑀅𑀢𑁆𑀢𑀦𑁄 𑀧𑀺𑀢𑀭𑀁 𑀅𑀚𑀸𑀦𑀺𑀢𑁆𑀯𑀸 𑀖𑀸𑀦𑁆𑀢𑁂𑀦𑁆𑀢𑁄𑀧𑀺 𑀧𑀺𑀢𑀼𑀖𑀸𑀢𑀓𑁄𑀯 𑀳𑁄𑀢𑀺.

𑀅𑀭𑀳𑀦𑁆𑀢𑀖𑀸𑀢𑀓𑀓𑀫𑁆𑀫𑁂 𑀅𑀯𑀲𑁂𑀲𑀦𑁆𑀢𑀺 𑀅𑀦𑀸𑀕𑀸𑀫𑀺𑀆𑀤𑀺𑀓𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀢𑁄 𑀕𑀳𑁂𑀢𑀩𑁆𑀩𑁄.

‘‘𑀤𑀼𑀝𑁆𑀞𑀘𑀺𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀯𑀥𑀓𑀘𑀺𑀢𑁆𑀢𑁂𑀦𑀸’’𑀢𑀺. 𑀯𑀥𑀓𑀘𑁂𑀢𑀦𑀸𑀬 𑀳𑀺 𑀤𑀽𑀲𑀺𑀢𑀁 𑀘𑀺𑀢𑁆𑀢𑀁 𑀇𑀥 𑀤𑀼𑀝𑁆𑀞𑀘𑀺𑀢𑁆𑀢𑀁 𑀦𑀸𑀫. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀏𑀢𑁆𑀣 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀮𑁄𑀳𑀺𑀢𑀧𑀕𑁆𑀖𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺, 𑀆𑀖𑀸𑀢𑁂𑀦 𑀧𑀓𑀼𑀧𑁆𑀧𑀫𑀸𑀦𑀁 𑀲𑀜𑁆𑀘𑀺𑀢𑀁 𑀳𑁄𑀢𑀺. 𑀤𑁂𑀯𑀤𑀢𑁆𑀢𑁂𑀦 𑀧𑀯𑀺𑀤𑁆𑀥𑀲𑀺𑀮𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀲𑀓𑁆𑀔𑀮𑀺𑀓𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑀦𑁆𑀢𑀁 𑀧𑀳𑀭𑀺, 𑀨𑀭𑀲𑀼𑀦𑀸 𑀧𑀳𑀝𑁄 𑀯𑀺𑀬 𑀧𑀸𑀤𑁄 𑀅𑀦𑁆𑀢𑁄𑀮𑁄𑀳𑀺𑀢𑁄𑀬𑁂𑀯 𑀅𑀳𑁄𑀲𑀺. 𑀚𑀻𑀯𑀓𑁄 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀼𑀘𑀺𑀬𑀸 𑀲𑀢𑁆𑀣𑀓𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁆𑀳𑀸 𑀞𑀸𑀦𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀫𑀓𑀸𑀲𑀺, 𑀢𑁂𑀦𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀚𑀻𑀯𑀓𑁄 𑀯𑀺𑀬𑀸’’𑀢𑀺𑀆𑀤𑀺.

𑀅𑀣 𑀬𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀦𑁆𑀢𑀺, 𑀩𑁄𑀥𑀺𑀁 𑀙𑀺𑀦𑁆𑀤𑀦𑁆𑀢𑀺, 𑀥𑀸𑀢𑀼𑀫𑁆𑀳𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀓𑀺𑀁 𑀳𑁄𑀢𑀻𑀢𑀺? 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁. 𑀲𑀥𑀸𑀢𑀼𑀓𑀁 𑀧𑀦 𑀣𑀽𑀧𑀁 𑀯𑀸 𑀧𑀝𑀺𑀫𑀁 𑀯𑀸 𑀩𑀸𑀥𑀫𑀸𑀦𑀁 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀦𑀺𑀮𑀻𑀦𑀸 𑀲𑀓𑀼𑀡𑀸 𑀘𑁂𑀢𑀺𑀬𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀺, 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀳𑀺 𑀲𑀭𑀻𑀭𑀘𑁂𑀢𑀺𑀬𑀁 𑀕𑀭𑀼𑀢𑀭𑀁. 𑀘𑁂𑀢𑀺𑀬𑀯𑀢𑁆𑀣𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀩𑁄𑀥𑀺𑀫𑀽𑀮𑁂𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦 𑀩𑁄𑀥𑀺𑀲𑀸𑀔𑀸 𑀩𑁄𑀥𑀺𑀖𑀭𑀁 𑀩𑀸𑀥𑀢𑀺, 𑀢𑀁 𑀕𑁂𑀳𑀭𑀓𑁆𑀔𑀡𑀢𑁆𑀣𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀮𑀪𑀢𑀺. 𑀩𑁄𑀥𑀺𑀅𑀢𑁆𑀣𑀸𑀬 𑀳𑀺 𑀕𑁂𑀳𑀁, 𑀦 𑀕𑁂𑀳𑀢𑁆𑀣𑀸𑀬 𑀩𑁄𑀥𑀺. 𑀆𑀲𑀦𑀖𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀧𑀦 𑀆𑀲𑀦𑀖𑀭𑁂 𑀥𑀸𑀢𑀼 𑀦𑀺𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀸𑀬 𑀢𑀁 𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀩𑁄𑀥𑀺𑀚𑀕𑁆𑀕𑀦𑀢𑁆𑀣𑀁 𑀑𑀚𑁄𑀳𑀭𑀡𑀲𑀸𑀔𑀁 𑀯𑀸 𑀧𑀽𑀢𑀺𑀝𑁆𑀞𑀸𑀦𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀲𑀢𑁆𑀣𑀼 𑀭𑀽𑀧𑀓𑀸𑀬𑀧𑀝𑀺𑀚𑀕𑁆𑀕𑀦𑁂 𑀯𑀺𑀬 𑀧𑀼𑀜𑁆𑀜𑀫𑁆𑀧𑀺 𑀳𑁄𑀢𑀺.

𑀲𑀗𑁆𑀖𑀪𑁂𑀤𑁂 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁. 𑀅𑀬𑀁 𑀲𑀗𑁆𑀖𑀪𑁂𑀤𑀓𑁄𑀢𑀺 𑀧𑀓𑀢𑀢𑁆𑀢𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂 𑀏𑀯 𑀧𑀸𑀭𑀸𑀚𑀺𑀓𑀁 𑀲𑀫𑀸𑀧𑀦𑁆𑀦𑁄 𑀯𑀸 𑀯𑀢𑁆𑀣𑀸𑀤𑀺𑀤𑁄𑀲𑁂𑀦 𑀯𑀺𑀧𑀦𑁆𑀦𑀼𑀧𑀲𑀫𑁆𑀧𑀤𑁄 𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀦𑁆𑀢𑁄𑀧𑀺 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺, 𑀲𑀗𑁆𑀖𑁄 𑀧𑀦 𑀪𑀺𑀦𑁆𑀦𑁄𑀯 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸 𑀘𑀲𑁆𑀲 𑀦 𑀯𑀸𑀭𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀪𑀺𑀓𑁆𑀔𑀼𑀦𑀻𑀤𑀽𑀲𑀦𑁂 𑀇𑀘𑁆𑀙𑀫𑀸𑀦𑀦𑁆𑀢𑀺 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀇𑀘𑁆𑀙𑀫𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀕𑀺𑀳𑀺𑀪𑀸𑀯𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯𑀸’’𑀢𑀺. 𑀦𑁂𑀯 𑀧𑀩𑁆𑀩𑀚𑁆𑀚𑀸 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀬𑁄 𑀘 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀪𑀩𑁆𑀩𑁂 𑀘 𑀧𑀼𑀕𑁆𑀕𑀮𑁂 𑀜𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀺 𑀯𑀸, 𑀤𑀼𑀓𑁆𑀓𑀝𑀁. 𑀅𑀚𑀸𑀦𑀦𑁆𑀢𑀲𑁆𑀲 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪𑁨. 𑀕𑀩𑁆𑀪𑀫𑀸𑀲𑁂𑀳𑀺 𑀲𑀤𑁆𑀥𑀺𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀲𑁆𑀲𑀸𑀢𑀺 𑀕𑀩𑁆𑀪𑀯𑀻𑀲𑁄. 𑀳𑀸𑀬𑀦𑀯𑀟𑁆𑀠𑀦𑀦𑁆𑀢𑀺 𑀕𑀩𑁆𑀪𑀫𑀸𑀲𑁂𑀲𑀼 𑀅𑀥𑀺𑀓𑁂𑀲𑀼 𑀉𑀢𑁆𑀢𑀭𑀺 𑀳𑀸𑀬𑀦𑀁, 𑀊𑀦𑁂𑀲𑀼 𑀯𑀟𑁆𑀠𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀺 𑀤𑁆𑀯𑀸𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀫𑀦𑀤𑀺𑀯𑀲𑁂. ‘‘𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑁄 𑀫𑀸𑀲𑁄’’𑀢𑀺 (𑀅. 𑀦𑀺. 𑁩.𑁭𑁧; 𑁮.𑁪𑁩; 𑀯𑀺𑀪. 𑁧𑁦𑁨𑁩) 𑀯𑀘𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀯𑀲𑁆𑀲𑀁 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀺, 𑀢𑀢𑀺𑀬𑀲𑀁𑀯𑀘𑁆𑀙𑀭𑁂 𑀏𑀓𑀫𑀸𑀲𑀲𑁆𑀲 𑀅𑀥𑀺𑀓𑀢𑁆𑀢𑀸 𑀫𑀸𑀲𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀯𑀲𑁆𑀲𑀁 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀢𑀢𑀺𑀬𑁄 𑀲𑀁𑀯𑀘𑁆𑀙𑀭𑁄 𑀢𑁂𑀭𑀲𑀫𑀸𑀲𑀺𑀓𑁄 𑀳𑁄𑀢𑀺. 𑀲𑀁𑀯𑀘𑁆𑀙𑀭𑀲𑁆𑀲 𑀧𑀦 𑀤𑁆𑀯𑀸𑀤𑀲𑀫𑀸𑀲𑀺𑀓𑀢𑁆𑀢𑀸 𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀅𑀥𑀺𑀓𑀫𑀸𑀲𑁂 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 ‘‘𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀙𑀫𑀸𑀲𑀢𑁄. 𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸𑀢𑀺 𑀅𑀥𑀺𑀓𑀫𑀸𑀲𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑁆𑀢𑀸 𑀦𑀺𑀩𑁆𑀩𑁂𑀫𑀢𑀺𑀓𑀸 𑀳𑀼𑀢𑁆𑀯𑀸. 𑀬𑀁 𑀧𑀦 𑀯𑀼𑀢𑁆𑀢𑀁 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 ‘‘𑀅𑀝𑁆𑀞𑀸𑀭𑀲𑀦𑁆𑀦𑀁𑀬𑁂𑀯 𑀯𑀲𑁆𑀲𑀸𑀦𑀁 𑀅𑀥𑀺𑀓𑀫𑀸𑀲𑁂 𑀕𑀳𑁂𑀢𑁆𑀯𑀸 𑀕𑀡𑀺𑀢𑀢𑁆𑀢𑀸 𑀲𑁂𑀲𑀯𑀲𑁆𑀲𑀤𑁆𑀯𑀬𑀲𑁆𑀲𑀧𑀺 𑀅𑀥𑀺𑀓𑀤𑀺𑀯𑀲𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀥𑀺𑀓𑀤𑀺𑀯𑀲𑀸𑀦𑀺 𑀲𑀦𑁆𑀥𑀸𑀬 ‘𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀅𑀥𑀺𑀓𑀤𑀺𑀯𑀲𑀸𑀦𑀺 𑀦𑀸𑀫 𑀯𑀺𑀲𑀼𑀁 𑀉𑀧𑀮𑀩𑁆𑀪𑀦𑁆𑀢𑀺 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀼𑀓𑁆𑀓𑀟𑁆𑀠𑀦𑀯𑀲𑁂𑀦 𑀅𑀥𑀺𑀓𑀫𑀸𑀲𑁂 𑀧𑀭𑀺𑀘𑁆𑀘𑀢𑁆𑀢𑁂𑀬𑁂𑀯 𑀅𑀢𑀺𑀭𑁂𑀓𑀫𑀸𑀲𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀅𑀢𑀺𑀭𑁂𑀓𑀤𑀺𑀯𑀲𑀸𑀦𑀺 𑀯𑀺𑀲𑀼𑀁 𑀦 𑀲𑀫𑁆𑀪𑀯𑀦𑁆𑀢𑀺.

‘‘𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀫𑁆𑀳𑀺 𑀘 𑀧𑀼𑀦 𑀅𑀧𑀭𑀲𑁆𑀫𑀺𑀁 𑀯𑀲𑁆𑀲𑁂 𑀧𑀓𑁆𑀔𑀺𑀢𑁆𑀢𑁂 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀏𑀢𑁆𑀣 𑀧𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀧𑀦-𑀲𑀤𑁆𑀤𑁄 𑀳𑀺𑀲𑀤𑁆𑀤𑀢𑁆𑀣𑁄, 𑀏𑀢𑁆𑀣 𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀇𑀫𑀁 𑀤𑀻𑀧𑁂𑀢𑀺 𑁋 𑀬𑀁 𑀯𑀼𑀢𑁆𑀢𑀁 ‘‘𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁 𑀲𑀸𑀫𑀡𑁂𑀭𑀁 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀸𑀝𑀺𑀧𑀤𑀤𑀺𑀯𑀲𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺, 𑀢𑀢𑁆𑀣 𑀕𑀩𑁆𑀪𑀫𑀸𑀲𑁂𑀧𑀺 𑀕𑀳𑁂𑀢𑁆𑀯𑀸 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀲𑀦𑁆𑀥𑀸𑀬 ‘‘𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀥𑀺𑀓𑀫𑀸𑀲𑁂𑀲𑀼 𑀤𑁆𑀯𑀻𑀲𑀼 𑀕𑀳𑀺𑀢𑁂𑀲𑀼 𑀏𑀯 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀩𑁆𑀪𑀫𑀸𑀲𑀸𑀧𑀺 𑀕𑀡𑀦𑀽𑀧𑀕𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸. 𑀏𑀓𑀯𑀻𑀲𑀢𑀺𑀯𑀲𑁆𑀲𑁄 𑀳𑁄𑀢𑀻𑀢𑀺 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀻𑀲𑀢𑀺𑀯𑀲𑁆𑀲𑁄 𑀲𑀫𑀸𑀦𑁄 𑀕𑀩𑁆𑀪𑀫𑀸𑀲𑁂𑀳𑀺 𑀲𑀤𑁆𑀥𑀺𑀁 𑀏𑀓𑀯𑀻𑀲𑀢𑀺𑀯𑀲𑁆𑀲𑁄 𑀳𑁄𑀢𑀺. 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁦𑁬) 𑀆𑀕𑀢𑀁.

𑀕𑀩𑁆𑀪𑁂 𑀲𑀬𑀺𑀢𑀓𑀸𑀮𑁂𑀦 𑀲𑀤𑁆𑀥𑀺𑀁 𑀯𑀻𑀲𑀢𑀺𑀫𑀁 𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀕𑀩𑁆𑀪𑀯𑀻𑀲𑁄. 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀻𑀢𑀺 𑀲𑀸𑀯𑀡𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀺𑀬𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸 𑀅𑀦𑀦𑁆𑀢𑀭𑀧𑀼𑀡𑁆𑀡𑀫𑀻. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬, 𑀤𑁆𑀯𑀸𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀚𑀸𑀢𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑁄 𑀫𑀸𑀲𑁄, 𑀤𑁆𑀯𑀸𑀤𑀲𑀫𑀸𑀲𑀺𑀓𑁄 𑀲𑀁𑀯𑀘𑁆𑀙𑀭𑁄’’𑀢𑀺 𑀯𑀘𑀦𑀢𑁄 ‘‘𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀯𑀲𑁆𑀲𑀁 𑀉𑀤𑁆𑀥𑀁 𑀓𑀟𑁆𑀠𑀦𑁆𑀢𑀺, ‘‘𑀏𑀓𑀫𑀸𑀲𑀁 𑀅𑀥𑀺𑀓𑀫𑀸𑀲𑁄’’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀢𑀢𑀺𑀬𑁄 𑀢𑀢𑀺𑀬𑁄 𑀲𑀁𑀯𑀘𑁆𑀙𑀭𑁄 𑀢𑁂𑀭𑀲𑀫𑀸𑀲𑀺𑀓𑁄 𑀳𑁄𑀢𑀺. 𑀢𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸𑀢𑀺 𑀦𑀺𑀓𑁆𑀔𑀫𑀦𑀻𑀬𑀧𑀼𑀡𑁆𑀡𑀫𑀸𑀲𑀢𑁄 𑀬𑀸𑀯 𑀚𑀸𑀢𑀤𑀺𑀯𑀲𑀪𑀽𑀢𑀸 𑀫𑀳𑀸𑀧𑀯𑀸𑀭𑀡𑀸, 𑀢𑀸𑀯 𑀬𑁂 𑀤𑁆𑀯𑁂 𑀫𑀸𑀲𑀸 𑀅𑀦𑀸𑀕𑀢𑀸, 𑀢𑁂𑀲𑀁 𑀅𑀢𑁆𑀣𑀸𑀬 𑀅𑀥𑀺𑀓𑀫𑀸𑀲𑀢𑁄 𑀮𑀤𑁆𑀥𑁂 𑀤𑁆𑀯𑁂 𑀫𑀸𑀲𑁂 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑁄 𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺. ‘‘𑀦𑀺𑀓𑁆𑀓𑀗𑁆𑀔𑀸 𑀳𑀼𑀢𑁆𑀯𑀸’’𑀢𑀺 𑀇𑀤𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀏𑀯 𑀅𑀥𑀺𑀓𑀫𑀸𑀲𑁂 𑀕𑀳𑁂𑀢𑁆𑀯𑀸 𑀢𑀢𑁄 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼𑀧𑀺 𑀘𑀸𑀢𑀼𑀤𑁆𑀤𑀲𑀻𑀦𑀁 𑀅𑀢𑁆𑀣𑀸𑀬 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀭𑀺𑀳𑀸𑀧𑀦𑁂𑀦 𑀲𑀩𑁆𑀩𑀣𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀧𑀯𑀸𑀭𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀕𑀩𑁆𑀪𑀯𑀲𑁆𑀲𑁂𑀦 𑀲𑀳 𑀯𑀻𑀲𑀢𑀺𑀯𑀲𑁆𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀩𑁆𑀪𑀫𑀸𑀲𑀸𑀧𑀺 𑀕𑀡𑀦𑀽𑀧𑀕𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸. 𑀏𑀓𑀯𑀻𑀲𑀢𑀺𑀯𑀲𑁆𑀲𑁄𑀢𑀺 𑀚𑀸𑀢𑀺𑀬𑀸 𑀯𑀻𑀲𑀢𑀺𑀯𑀲𑁆𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀆𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀲𑁄𑀧𑀻𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁪𑁦𑁬) 𑀆𑀕𑀢𑀁.

𑀏𑀢𑁆𑀣 𑀲𑀺𑀬𑀸 𑁋 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 ‘‘𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀦 ‘‘𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼 𑀲𑀢𑁆𑀢 𑀫𑀸𑀲𑀸 𑀅𑀥𑀺𑀓𑀸’’𑀢𑀺 𑀯𑀤𑀦𑁆𑀢𑀺, 𑀓𑀣𑀫𑁂𑀢𑁆𑀣 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀲𑀸𑀲𑀦𑀯𑁄𑀳𑀸𑀭𑁂𑀦 𑀮𑁄𑀓𑀺𑀬𑀕𑀢𑀺𑀁 𑀅𑀦𑀼𑀧𑀕𑀫𑁆𑀫 𑀢𑀻𑀲𑀼 𑀢𑀻𑀲𑀼 𑀲𑀁𑀯𑀘𑁆𑀙𑀭𑁂𑀲𑀼 𑀫𑀸𑀲𑀙𑀟𑁆𑀟𑀦𑀁 𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲𑀲𑀼 𑀯𑀲𑁆𑀲𑁂𑀲𑀼 𑀙 𑀫𑀸𑀲𑀸 𑀯𑀟𑁆𑀠𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀦 𑀯𑁂𑀤𑀯𑁄𑀳𑀸𑀭𑁂𑀦 𑀘𑀦𑁆𑀤𑀲𑀽𑀭𑀺𑀬𑀕𑀢𑀺𑀲𑀗𑁆𑀔𑀸𑀢𑀁 𑀢𑀺𑀣𑀺𑀁 𑀕𑀳𑁂𑀢𑁆𑀯𑀸 𑀕𑀡𑁂𑀦𑁆𑀢𑁄 ‘‘𑀏𑀓𑀽𑀦𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼 𑀲𑀢𑁆𑀢 𑀫𑀸𑀲𑀸 𑀅𑀥𑀺𑀓𑀸’’𑀢𑀺 𑀯𑀤𑀦𑁆𑀢𑀻𑀢𑀺, 𑀢𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁧𑁪𑁩. 𑀫𑀸𑀢𑀸 𑀯𑀸 𑀫𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀬𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀏𑀯.

𑁧𑁪𑁪. ‘‘𑀏𑀓𑀲𑀻𑀫𑀸𑀬𑀜𑁆𑀘 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀏𑀓𑀲𑀻𑀫𑀸𑀬𑀁 𑀪𑀺𑀓𑁆𑀔𑀼𑀫𑁆𑀳𑀺 𑀅𑀲𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀔𑀡𑁆𑀟𑀲𑀻𑀫𑀸𑀬 𑀯𑀸 𑀞𑀢𑁆𑀯𑀸 𑀦𑀤𑀻𑀲𑀫𑀼𑀤𑁆𑀤𑀸𑀤𑀻𑀦𑀺 𑀯𑀸 𑀕𑀦𑁆𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀏𑀢𑁂𑀦 𑀲𑀩𑁆𑀩𑁂 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀽 𑀆𑀧𑀼𑀘𑁆𑀙𑀺𑀢𑀩𑁆𑀩𑀸, 𑀅𑀦𑀸𑀧𑀼𑀘𑁆𑀙𑀸 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺.

𑁧𑁪𑁫. 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀅𑀕𑁆𑀕𑀳𑀺𑀢𑀅𑀕𑁆𑀕𑀁 𑀧𑀺𑀡𑁆𑀟𑀧𑀸𑀢𑀁. 𑀲𑀸𑀫𑀡𑁂𑀭𑀪𑀸𑀕𑀲𑀫𑀓𑁄 𑀆𑀫𑀺𑀲𑀪𑀸𑀕𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀸𑀫𑀡𑁂𑀭𑀸𑀦𑀁 𑀆𑀫𑀺𑀲𑀪𑀸𑀕𑀲𑁆𑀲 𑀲𑀫𑀓𑀫𑁂𑀯 𑀤𑀻𑀬𑀫𑀸𑀦𑀢𑁆𑀢𑀸 𑀯𑀺𑀲𑀼𑀁 𑀲𑀸𑀫𑀡𑁂𑀭𑀪𑀸𑀕𑁄 𑀦𑀸𑀫 𑀦𑀢𑁆𑀣𑀺, 𑀳𑁂𑀝𑁆𑀞𑀸 𑀕𑀘𑁆𑀙𑀦𑁆𑀢𑀁 𑀧𑀦 𑀪𑀢𑁆𑀢𑀁 𑀓𑀤𑀸𑀘𑀺 𑀫𑀦𑁆𑀤𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀉𑀧𑀭𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀫𑀡𑁂𑀭𑀧𑀸𑀴𑀺𑀬𑀸𑀯 𑀕𑀳𑁂𑀢𑁆𑀯𑀸 𑀤𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀬𑀢𑀧𑀩𑁆𑀩𑀚𑁆𑀚𑀲𑁆𑀲𑁂𑀯 𑀘𑀸𑀬𑀁 𑀪𑀸𑀕𑁄 𑀤𑀻𑀬𑀢𑀺. 𑀢𑁂𑀦𑁂𑀯 ‘‘𑀅𑀧𑀓𑁆𑀓𑀁 𑀧𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀯𑀸 𑀪𑀺𑀓𑁆𑀔𑀽 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁪𑁬. 𑀲𑀬𑀁 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀺 𑀲𑀬𑀁 𑀓𑀭𑁄𑀦𑁆𑀢𑁂𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄. 𑀓𑁂𑀲𑀘𑁆𑀙𑁂𑀤𑀦𑀁 𑀓𑀸𑀲𑀸𑀬𑀘𑁆𑀙𑀸𑀤𑀦𑀁 𑀲𑀭𑀡𑀤𑀸𑀦𑀦𑁆𑀢𑀺 𑀳𑀺 𑀇𑀫𑀸𑀦𑀺 𑀢𑀻𑀡𑀺 𑀓𑀭𑁄𑀦𑁆𑀢𑁄 ‘‘𑀧𑀩𑁆𑀩𑀸𑀚𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀲𑀼 𑀏𑀓𑀁 𑀤𑁆𑀯𑁂 𑀯𑀸𑀧𑀺 𑀓𑀭𑁄𑀦𑁆𑀢𑁄 𑀢𑀣𑀸 𑀯𑁄𑀳𑀭𑀻𑀬𑀢𑀺𑀬𑁂𑀯, 𑀢𑀲𑁆𑀫𑀸 𑀏𑀢𑀁 𑀧𑀩𑁆𑀩𑀸𑀚𑁂𑀳𑀻𑀢𑀺 𑀓𑁂𑀲𑀘𑁆𑀙𑁂𑀤𑀦𑀁 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀲𑀪𑀺𑀓𑁆𑀔𑀼𑀓𑁂 𑀯𑀺𑀳𑀸𑀭𑁂 𑀅𑀜𑁆𑀜𑀫𑁆𑀧𑀺 ‘‘𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀘𑁆𑀙𑁂𑀤𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁄 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀲𑀭𑀡𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀸𑀫𑀡𑁂𑀭𑁄 𑀧𑀦𑀸’’𑀢𑀺𑀆𑀤𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁪) 𑀆𑀕𑀢𑀁. 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁪) 𑀧𑀦 𑁋 𑀲𑀬𑀁 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀓𑁂𑀲𑀘𑁆𑀙𑁂𑀤𑀦𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑀭𑀡𑀤𑀸𑀦𑀸𑀦𑀺 𑀧𑀩𑁆𑀩𑀚𑀦𑀁 𑀦𑀸𑀫, 𑀢𑁂𑀲𑀼 𑀧𑀘𑁆𑀙𑀺𑀫𑀤𑁆𑀯𑀬𑀁 𑀪𑀺𑀓𑁆𑀔𑀽𑀳𑀺 𑀏𑀯 𑀓𑀸𑀢𑀩𑁆𑀩𑀁, 𑀓𑀸𑀭𑁂𑀢𑀩𑁆𑀩𑀁 𑀯𑀸. 𑀧𑀩𑁆𑀩𑀸𑀚𑁂𑀳𑀻𑀢𑀺 𑀇𑀤𑀁 𑀢𑀺𑀯𑀺𑀥𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀭𑀺𑀳𑀭𑀡𑀢𑁆𑀣𑀁. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀏𑀓𑀲𑀻𑀫𑀸𑀬 ‘‘𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀸𑀤𑀺𑀘𑁆𑀙𑁂𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀧𑀩𑁆𑀩𑀸𑀚𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀲𑀭𑀡𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀪𑀺𑀓𑁆𑀔𑀼𑀆𑀡𑀢𑁆𑀢𑀺𑀬𑀸 𑀤𑀺𑀦𑁆𑀦𑀫𑁆𑀧𑀺 𑀲𑀭𑀡𑀁 𑀦 𑀭𑀼𑀳𑀢𑀻𑀢𑀺 𑀯𑀼𑀢𑁆𑀢𑀁.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀫𑁆𑀧𑀺 (𑀯𑀚𑀺𑀭 𑀝𑀻. 𑀫𑀳𑀸𑀯𑀕𑁆𑀕 𑁩𑁪) 𑁋 𑀔𑀡𑁆𑀟𑀲𑀻𑀫𑀁 𑀦𑁂𑀢𑁆𑀯𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀸𑀭𑁄𑀘𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀼𑀢𑁆𑀢𑀁, 𑀢𑁂𑀦 𑀲𑀪𑀺𑀓𑁆𑀔𑀼𑀓𑁂 𑀯𑀺𑀳𑀸𑀭𑁂 𑀅𑀜𑁆𑀜𑀫𑁆𑀧𑀺 ‘‘𑀏𑀢𑀲𑁆𑀲 𑀓𑁂𑀲𑁂 𑀙𑀺𑀦𑁆𑀤𑀸’’𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀧𑀩𑁆𑀩𑀸𑀚𑁂𑀢𑁆𑀯𑀸’’𑀢𑀺 𑀇𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀧𑀓𑀸𑀲𑀦𑀢𑁆𑀣𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀏𑀳𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑀚𑁆𑀛𑀸𑀬𑁄 𑀘𑁂 𑀓𑁂𑀲𑀫𑀲𑁆𑀲𑀼𑀑𑀭𑁄𑀧𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀧𑀩𑁆𑀩𑀚𑁆𑀚𑀢𑁆𑀣𑀁 𑀲𑀭𑀡𑀸𑀦𑀺 𑀤𑁂𑀢𑀺, 𑀦 𑀭𑀼𑀳𑀢𑀺 𑀧𑀩𑁆𑀩𑀚𑁆𑀚𑀸. 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀭𑀼𑀳𑀢𑀺 𑀉𑀧𑀲𑀫𑁆𑀧𑀤𑀸. 𑀅𑀧𑀢𑁆𑀢𑀘𑀻𑀯𑀭𑀸𑀦𑀁 𑀉𑀧𑀲𑀫𑁆𑀧𑀤𑀸𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄, 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘𑁂𑀢𑀁 𑀬𑀼𑀚𑁆𑀚𑀢𑁂𑀯𑀸𑀢𑀺 𑀏𑀓𑁂. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀲𑀮𑀺𑀗𑁆𑀕𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀸, 𑀯𑀺𑀮𑀺𑀗𑁆𑀕𑀲𑁆𑀲𑀸𑀧𑀺 𑀘𑁂𑀢𑀭𑀸;

𑀅𑀧𑁂𑀢𑀧𑀼𑀩𑁆𑀩𑀯𑁂𑀲𑀲𑁆𑀲, 𑀢𑀁𑀤𑁆𑀯𑀬𑀸 𑀇𑀢𑀺 𑀘𑀸𑀧𑀭𑁂’’𑀢𑀺.

𑀪𑀺𑀓𑁆𑀔𑀼𑀦𑀸 𑀳𑀺 𑀲𑀳𑀢𑁆𑀣𑁂𑀦 𑀯𑀸 𑀆𑀡𑀢𑁆𑀢𑀺𑀬𑀸 𑀯𑀸 𑀤𑀺𑀦𑁆𑀦𑀫𑁂𑀯 𑀓𑀸𑀲𑀸𑀯𑀁 𑀯𑀝𑁆𑀝𑀢𑀺, 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀦 𑀲𑀦𑁆𑀢𑁂𑀲𑁆𑀯𑁂𑀯 𑀓𑀸𑀲𑀸𑀯𑁂𑀲𑀼, 𑀦𑀸𑀲𑀦𑁆𑀢𑁂𑀲𑀼 𑀅𑀲𑀫𑁆𑀪𑀯𑀢𑁄𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀆𑀕𑀢𑁄.

𑀪𑀩𑁆𑀩𑀭𑀽𑀧𑁄𑀢𑀺 𑀪𑀩𑁆𑀩𑀲𑀪𑀸𑀯𑁄. 𑀢𑀫𑁂𑀯𑀢𑁆𑀣𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀺 ‘‘𑀲𑀳𑁂𑀢𑀼𑀓𑁄’’𑀢𑀺. 𑀜𑀸𑀢𑁄𑀢𑀺 𑀧𑀸𑀓𑀝𑁄. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄.

𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀸𑀲𑀬𑁄𑀓𑀸𑀲𑀯𑀲𑁂𑀦 𑀅𑀲𑀼𑀘𑀺𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀪𑀸𑀯𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑁂𑀲𑀸 𑀦𑀸𑀫𑁂𑀢𑁂 𑀯𑀡𑁆𑀡𑀢𑁄𑀧𑀺 𑀧𑀝𑀺𑀓𑀽𑀮𑀸, 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀝𑀺𑀓𑀽𑀮𑀸. 𑀫𑀦𑀼𑀜𑁆𑀜𑁂𑀧𑀺 𑀳𑀺 𑀬𑀸𑀕𑀼𑀧𑀢𑁆𑀢𑁂 𑀯𑀸 𑀪𑀢𑁆𑀢𑀧𑀢𑁆𑀢𑁂 𑀯𑀸 𑀓𑁂𑀲𑀯𑀡𑁆𑀡𑀁 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 ‘‘𑀓𑁂𑀲𑀫𑀺𑀲𑁆𑀲𑀓𑀫𑀺𑀤𑀁, 𑀳𑀭𑀣 𑀦’’𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀓𑁂𑀲𑀸 𑀯𑀡𑁆𑀡𑀢𑁄 𑀧𑀝𑀺𑀓𑀽𑀮𑀸. 𑀭𑀢𑁆𑀢𑀺𑀁 𑀪𑀼𑀜𑁆𑀚𑀦𑁆𑀢𑀸𑀧𑀺 𑀓𑁂𑀲𑀲𑀡𑁆𑀞𑀸𑀦𑀁 𑀅𑀓𑁆𑀓𑀯𑀸𑀓𑀁 𑀯𑀸 𑀫𑀓𑀘𑀺𑀯𑀸𑀓𑀁 𑀯𑀸 𑀙𑀼𑀧𑀺𑀢𑁆𑀯𑀸 𑀢𑀣𑁂𑀯 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀡𑁆𑀞𑀸𑀦𑀢𑁄𑀧𑀺 𑀧𑀝𑀺𑀓𑀽𑀮𑀸. 𑀢𑁂𑀮𑀫𑀓𑁆𑀔𑀦𑀧𑀼𑀧𑁆𑀨𑀥𑀽𑀫𑀸𑀤𑀺𑀲𑀗𑁆𑀔𑀸𑀭𑀯𑀺𑀭𑀳𑀺𑀢𑀸𑀦𑀜𑁆𑀘 𑀓𑁂𑀲𑀸𑀦𑀁 𑀕𑀦𑁆𑀥𑁄 𑀧𑀭𑀫𑀚𑁂𑀕𑀼𑀘𑁆𑀙𑁄 𑀳𑁄𑀢𑀺. 𑀢𑀢𑁄 𑀚𑁂𑀕𑀼𑀘𑁆𑀙𑀢𑀭𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀸𑀦𑀁. 𑀓𑁂𑀲𑀸 𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑀽𑀮𑀸𑀧𑀺 𑀲𑀺𑀬𑀼𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀸𑀬𑁂𑀯. 𑀬𑀣𑀸 𑀳𑀺 𑀤𑀳𑀭𑀲𑁆𑀲 𑀓𑀼𑀫𑀸𑀭𑀓𑀲𑁆𑀲 𑀯𑀘𑁆𑀘𑀁 𑀯𑀡𑁆𑀡𑀢𑁄 𑀳𑀮𑀺𑀤𑁆𑀤𑀺𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄 𑀳𑀮𑀺𑀤𑁆𑀤𑀺𑀧𑀺𑀡𑁆𑀟𑀺𑀲𑀡𑁆𑀞𑀸𑀦𑀁. 𑀲𑀗𑁆𑀓𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀜𑁆𑀘 𑀉𑀤𑁆𑀥𑀼𑀫𑀸𑀢𑀓𑀓𑀸𑀴𑀲𑀼𑀦𑀔𑀲𑀭𑀻𑀭𑀁 𑀯𑀡𑁆𑀡𑀢𑁄 𑀢𑀸𑀮𑀧𑀓𑁆𑀓𑀯𑀡𑁆𑀡𑀁, 𑀲𑀡𑁆𑀞𑀸𑀦𑀢𑁄 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀁, 𑀤𑀸𑀞𑀸𑀧𑀺𑀲𑁆𑀲 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸, 𑀢𑀁 𑀉𑀪𑀬𑀫𑁆𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀲𑀺𑀬𑀸 𑀅𑀧𑁆𑀧𑀝𑀺𑀓𑀽𑀮𑀁, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀫𑁂𑀯, 𑀏𑀯𑀁 𑀓𑁂𑀲𑀸𑀧𑀺 𑀲𑀺𑀬𑀼𑀁 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀅𑀧𑁆𑀧𑀝𑀺𑀓𑀽𑀮𑀸, 𑀕𑀦𑁆𑀥𑁂𑀦 𑀧𑀦 𑀧𑀝𑀺𑀓𑀽𑀮𑀸𑀬𑁂𑀯𑀸𑀢𑀺.

𑀬𑀣𑀸 𑀧𑀦 𑀅𑀲𑀼𑀘𑀺𑀝𑁆𑀞𑀸𑀦𑁂 𑀕𑀸𑀫𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀸𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀦𑀺 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸𑀦𑀁 𑀚𑁂𑀕𑀼𑀘𑁆𑀙𑀸𑀦𑀺 𑀳𑁄𑀦𑁆𑀢𑀺 𑀅𑀧𑀭𑀺𑀪𑁄𑀕𑀸𑀦𑀺, 𑀏𑀯𑀁 𑀓𑁂𑀲𑀸𑀧𑀺 𑀧𑀼𑀩𑁆𑀩𑀮𑁄𑀳𑀺𑀢𑀫𑀼𑀢𑁆𑀢𑀓𑀭𑀻𑀲𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀦𑀺𑀲𑁆𑀲𑀦𑁆𑀤𑁂𑀦 𑀚𑀸𑀢𑀢𑁆𑀢𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀢𑀺. 𑀏𑀯𑀁 𑀆𑀲𑀬𑀢𑁄𑀧𑀺 𑀧𑀝𑀺𑀓𑀽𑀮𑀸. 𑀇𑀫𑁂 𑀘 𑀓𑁂𑀲𑀸 𑀦𑀸𑀫 𑀕𑀽𑀣𑀭𑀸𑀲𑀺𑀫𑁆𑀳𑀺 𑀉𑀝𑁆𑀞𑀺𑀢𑀓𑀡𑁆𑀡𑀓𑀸 𑀯𑀺𑀬 𑀏𑀓𑀢𑀺𑀁𑀲𑀓𑁄𑀝𑁆𑀞𑀸𑀲𑀭𑀸𑀲𑀺𑀫𑁆𑀳𑀺 𑀚𑀸𑀢𑀸, 𑀢𑁂 𑀲𑀼𑀲𑀸𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀤𑀻𑀲𑀼 𑀚𑀸𑀢𑀲𑀸𑀓𑀁 𑀯𑀺𑀬, 𑀧𑀭𑀺𑀔𑀸𑀤𑀻𑀲𑀼 𑀚𑀸𑀢𑀓𑀫𑀮𑀓𑀼𑀯𑀮𑀬𑀸𑀤𑀺𑀧𑀼𑀧𑁆𑀨𑀁 𑀯𑀺𑀬 𑀘 𑀅𑀲𑀼𑀘𑀺𑀝𑁆𑀞𑀸𑀦𑁂 𑀚𑀸𑀢𑀢𑁆𑀢𑀸 𑀧𑀭𑀫𑀚𑁂𑀕𑀼𑀘𑁆𑀙𑀸𑀢𑀺 𑀏𑀯𑀁 𑀑𑀓𑀸𑀲𑀢𑁄 𑀧𑀝𑀺𑀓𑀽𑀮𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀘𑀧𑀜𑁆𑀘𑀓𑀲𑁆𑀲 𑀯𑀡𑁆𑀡𑀸𑀤𑀺𑀯𑀲𑁂𑀦 𑀧𑀝𑀺𑀓𑀽𑀮𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀁 𑀯𑀸 𑀧𑀸𑀓𑀝𑀁 𑀓𑀭𑁄𑀦𑁆𑀢𑁂𑀦𑀸𑀢𑀺 𑀇𑀫𑁂 𑀓𑁂𑀲𑀸 𑀦𑀸𑀫 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸, 𑀢𑀢𑁆𑀣 𑀬𑀣𑀸 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑁂𑀲𑀼 𑀓𑀼𑀡𑁆𑀞𑀢𑀺𑀡𑁂𑀲𑀼 𑀦 𑀯𑀫𑁆𑀫𑀺𑀓𑀫𑀢𑁆𑀣𑀓𑁄 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀢𑀸𑀦𑀻’’𑀢𑀺, 𑀦𑀸𑀧𑀺 𑀓𑀼𑀡𑁆𑀞𑀢𑀺𑀡𑀸𑀦𑀺 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀸𑀦𑀻’’𑀢𑀺. 𑀏𑀯𑀫𑁂𑀯 𑀦 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑀁 𑀚𑀸𑀦𑀸𑀢𑀺 ‘‘𑀫𑀬𑀺 𑀓𑁂𑀲𑀸 𑀚𑀸𑀢𑀸’’𑀢𑀺, 𑀦𑀸𑀧𑀺 𑀓𑁂𑀲𑀸 𑀚𑀸𑀦𑀦𑁆𑀢𑀺 ‘‘𑀫𑀬𑀁 𑀲𑀻𑀲𑀓𑀝𑀸𑀳𑀧𑀮𑀺𑀯𑁂𑀞𑀦𑀘𑀫𑁆𑀫𑁂 𑀚𑀸𑀢𑀸’’𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀆𑀪𑁄𑀕𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑀸 𑀏𑀢𑁂 𑀥𑀫𑁆𑀫𑀸. 𑀇𑀢𑀺 ‘‘𑀓𑁂𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁂𑀦. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂. 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄𑀢𑀺 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀘𑁂𑀯 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀲𑁂𑀦 𑀘 𑀜𑀸𑀡𑁂𑀦 𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄. 𑀪𑀸𑀯𑀺𑀢𑀪𑀸𑀯𑀦𑁄𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀦𑀸 𑀲𑀩𑁆𑀩𑀲𑁄 𑀓𑀼𑀲𑀮𑀪𑀸𑀯𑀦𑀸𑀬 𑀧𑀽𑀭𑀡𑁂𑀦 𑀪𑀸𑀯𑀺𑀢𑀪𑀸𑀯𑀦𑁄. 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 ‘‘𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁪) 𑀯𑀼𑀢𑁆𑀢𑀁.

𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁪) 𑀧𑀦 𑁋 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄. 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀪𑀸𑀯𑀦𑁆𑀢𑀺 ‘‘𑀓𑁂𑀲𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀝𑁆𑀞𑀸𑀲𑁄 𑀅𑀘𑁂𑀢𑀦𑁄 𑀅𑀩𑁆𑀬𑀸𑀓𑀢𑁄 𑀲𑀼𑀜𑁆𑀜𑁄 𑀦𑀺𑀲𑁆𑀲𑀢𑁆𑀢𑁄 𑀣𑀤𑁆𑀥𑁄 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀬𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧𑁧) 𑀆𑀕𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂𑀢𑀺 𑀧𑀼𑀩𑁆𑀩𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼. 𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁄𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀸𑀯𑀺𑀢𑀪𑀸𑀯𑀦𑁄𑀢𑀺 𑀲𑀫𑀣𑀯𑀲𑁂𑀦𑀧𑀺.

𑀓𑀸𑀲𑀸𑀬𑀸𑀦𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸…𑀧𑁂… 𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 ‘‘𑀲𑀩𑁆𑀩𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀇𑀫𑀁 𑀓𑀸𑀲𑀸𑀯𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀸 ‘‘𑀢𑀁 𑀓𑀸𑀲𑀸𑀯𑀁 𑀤𑀢𑁆𑀯𑀸’’𑀢𑀺 𑀯𑀸 𑀯𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂, 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀁 𑀬𑀸𑀘𑀦𑀧𑀼𑀩𑁆𑀩𑀓𑀁 𑀘𑀻𑀯𑀭𑀁 𑀧𑀝𑀺𑀘𑁆𑀙𑀸𑀧𑁂𑀢𑀺. 𑀅𑀣𑀸𑀧𑀻𑀢𑀺𑀆𑀤𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀕𑁆𑀕𑀸𑀳𑀸𑀧𑀦𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀁, 𑀅𑀣𑀸𑀧𑀻𑀢𑀺 𑀢𑀢𑁄 𑀧𑀭𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀘𑀻𑀯𑀭𑀁 𑀅𑀧𑁆𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑀦𑀧𑁆𑀧𑀓𑀸𑀭𑀪𑁂𑀤𑀤𑀲𑁆𑀲𑀦𑀢𑁆𑀣𑀁 ‘𑀅𑀣𑀸𑀧𑀻’𑀢𑀺 𑀯𑀼𑀢𑁆𑀢𑀁. 𑀅𑀣𑀸𑀧𑀻𑀢𑀺 𑀅𑀣 𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀅𑀤𑀺𑀦𑁆𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸 𑀦 𑀭𑀼𑀳𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁪𑁭. 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸𑀢𑀺 𑀧𑀸𑀤𑀸𑀪𑀺𑀫𑀼𑀔𑀁 𑀦𑀫𑀸𑀧𑁂𑀢𑁆𑀯𑀸. 𑀤𑀽𑀭𑁂 𑀯𑀦𑁆𑀤𑀦𑁆𑀢𑁄𑀧𑀺 𑀳𑀺 𑀧𑀸𑀤𑁂 𑀯𑀦𑁆𑀤𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀉𑀧𑀚𑁆𑀛𑀸𑀬𑁂𑀦 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀸𑀢𑀺, 𑀅𑀬𑀁 𑀉𑀧𑀚𑁆𑀛𑀸𑀬𑁄. 𑀬𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑀬𑀦𑀢𑁆𑀣𑀸𑀬 𑀆𑀘𑀭𑀺𑀬𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀅𑀬𑀁 𑀆𑀘𑀭𑀺𑀬𑁄. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀲𑀬𑀫𑁂𑀯 𑀲𑀩𑁆𑀩𑀁 𑀲𑀺𑀓𑁆𑀔𑀸𑀧𑁂𑀢𑀺, 𑀅𑀜𑁆𑀜𑀫𑁆𑀧𑀺 𑀦 𑀦𑀺𑀬𑁆𑀬𑀸𑀢𑁂𑀢𑀺, 𑀉𑀧𑀚𑁆𑀛𑀸𑀬𑁄𑀯𑀲𑁆𑀲 𑀆𑀘𑀭𑀺𑀬𑁄𑀧𑀺 𑀳𑁄𑀢𑀺. 𑀬𑀣𑀸 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀲𑀬𑀫𑁂𑀯 𑀓𑀫𑁆𑀫𑀯𑀸𑀘𑀁 𑀯𑀸𑀘𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑁄𑀯 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀦 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸. 𑀞𑀸𑀦𑀓𑀭𑀡𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣 𑀉𑀭𑀆𑀤𑀻𑀦𑀺 𑀞𑀸𑀦𑀸𑀦𑀺, 𑀲𑀁𑀯𑀼𑀢𑀸𑀤𑀻𑀦𑀺 𑀓𑀭𑀡𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸𑀯𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀲𑀫𑁆𑀩𑀦𑁆𑀥𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀫-𑀓𑀸𑀭𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀲𑀫𑀬𑁂 𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸.

𑁧𑁪𑁮. 𑀲𑀩𑁆𑀩𑀫𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀤𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀫𑀼𑀢𑁆𑀢𑀁 𑀧𑀭𑀸𑀫𑀸𑀲𑀸𑀧𑀭𑀸𑀫𑀸𑀲𑀸𑀤𑀺𑀪𑁂𑀤𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 ‘‘𑀲𑁂𑀔𑀺𑀬𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀫𑀦𑁂𑀦 𑀧𑀽𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀘 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑁂, 𑀅𑀓𑀢𑁆𑀢𑀩𑁆𑀩𑀲𑁆𑀲 𑀘 𑀓𑀭𑀡𑁂 𑀤𑀡𑁆𑀟𑀓𑀫𑁆𑀫𑀸𑀭𑀳𑁄 𑀳𑁄𑀢𑀻𑀢𑀺 𑀤𑀻𑀧𑁂𑀢𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁩𑁪) 𑀯𑀼𑀢𑁆𑀢𑀁. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸𑀯𑀺𑀘𑁆𑀙𑁂𑀤𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀲𑀫𑁆𑀩𑀦𑁆𑀥𑀸𑀦𑀻’’𑀢𑀺. 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀲𑁂𑀔𑀺𑀬𑀯𑀢𑁆𑀢𑀸𑀓𑁆𑀔𑀦𑁆𑀥𑀓𑀯𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀼 𑀘 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀮𑁄𑀓𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂𑀲𑀼 𑀘 𑀲𑀸𑀫𑀡𑁂𑀭𑁂𑀳𑀺 𑀯𑀢𑁆𑀢𑀺𑀢𑀩𑁆𑀩𑀁, 𑀢𑀢𑁆𑀣 𑀅𑀯𑀢𑁆𑀢𑀫𑀸𑀦𑁄 𑀅𑀮𑀚𑁆𑀚𑀻 𑀤𑀡𑁆𑀟𑀓𑀫𑁆𑀫𑀸𑀭𑀳𑁄 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁩𑁪).

𑀉𑀭𑀸𑀤𑀻𑀦𑀺 𑀞𑀸𑀦𑀸𑀦𑀺 𑀦𑀸𑀫, 𑀲𑀁𑀯𑀼𑀢𑀸𑀤𑀻𑀦𑀺 𑀓𑀭𑀡𑀸𑀦𑀺 𑀦𑀸𑀫. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀏𑀓𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀦𑀓𑀸𑀮𑁂𑀧𑀺 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀏𑀯 𑀯𑀺𑀘𑁆𑀙𑁂𑀤𑁄, 𑀅𑀜𑁆𑀜𑀢𑁆𑀭 𑀦 𑀯𑀝𑁆𑀝𑀢𑀻𑀢𑀺 𑀮𑀺𑀔𑀺𑀢𑀁, 𑀅𑀦𑀼𑀦𑀸𑀲𑀺𑀓𑀦𑁆𑀢𑁂 𑀤𑀻𑀬𑀫𑀸𑀦𑁂 𑀔𑀮𑀺𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀫-𑀓𑀸𑀭𑁂𑀦 𑀫𑀺𑀲𑁆𑀲𑀻𑀪𑀽𑀢𑁂 𑀔𑁂𑀢𑁆𑀢𑁂 𑀑𑀢𑀺𑀡𑁆𑀡𑀢𑁆𑀢𑀸 𑀯𑀝𑁆𑀝𑀢𑀻𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀯𑀘𑀦𑀓𑀸𑀮𑁂 𑀧𑀦 𑀅𑀦𑀼𑀦𑀸𑀲𑀺𑀓𑀝𑁆𑀞𑀸𑀦𑁂 𑀯𑀺𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. ‘‘𑀏𑀯𑀁 𑀓𑀫𑁆𑀫𑀯𑀸𑀘𑀸𑀬𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀉𑀪𑀢𑁄𑀲𑀼𑀤𑁆𑀥𑀺𑀬𑀸𑀯 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀫𑀳𑀸𑀣𑁂𑀭𑁄 𑀧𑀢𑀺𑀢𑀤𑀦𑁆𑀢𑀸𑀤𑀺𑀓𑀸𑀭𑀡𑀢𑀸𑀬 𑀅𑀘𑀢𑀼𑀭𑀲𑁆𑀲𑀁 𑀓𑀢𑁆𑀯𑀸 𑀯𑀤𑀢𑀺, 𑀩𑁆𑀬𑀢𑁆𑀢𑀲𑀸𑀫𑀡𑁂𑀭𑁄 𑀲𑀫𑀻𑀧𑁂 𑀞𑀺𑀢𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀩𑁆𑀬𑀢𑁆𑀢𑀁 𑀯𑀤𑀸𑀧𑁂𑀢𑀺, 𑀫𑀳𑀸𑀣𑁂𑀭𑁂𑀦 𑀅𑀯𑀼𑀢𑁆𑀢𑀁 𑀯𑀤𑀸𑀧𑁂𑀢𑀻𑀢𑀺 𑀦 𑀯𑀝𑁆𑀝𑀢𑀺. 𑀓𑀫𑁆𑀫𑀯𑀸𑀘𑀸𑀬 𑀇𑀢𑀭𑁄 𑀪𑀺𑀓𑁆𑀔𑀼 𑀘𑁂 𑀯𑀤𑀢𑀺, 𑀯𑀝𑁆𑀝𑀢𑀻𑀢𑀺. 𑀲𑀗𑁆𑀖𑁄 𑀳𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀼𑀕𑁆𑀕𑀮𑁄𑀢𑀺. 𑀦, 𑀦𑀸𑀦𑀸𑀲𑀻𑀫𑀧𑀯𑀢𑁆𑀢𑀓𑀫𑁆𑀫𑀯𑀸𑀘𑀸𑀲𑀸𑀫𑀜𑁆𑀜𑀦𑀬𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁆𑀢𑀸. 𑀅𑀣 𑀣𑁂𑀭𑁂𑀦 𑀘𑀢𑀼𑀭𑀲𑁆𑀲𑀁 𑀯𑀼𑀢𑁆𑀢𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀲𑀸𑀫𑀡𑁂𑀭𑁄 𑀲𑀬𑀁 𑀯𑀢𑁆𑀯𑀸 𑀯𑀤𑀸𑀧𑁂𑀢𑀺, 𑀉𑀪𑀢𑁄𑀲𑀼𑀤𑁆𑀥𑀺 𑀏𑀯 𑀳𑁄𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀅𑀲𑀸𑀥𑀸𑀭𑀡𑁂 𑀩𑀼𑀤𑁆𑀥𑀕𑀼𑀡𑀁, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀦𑀺𑀩𑁆𑀩𑀸𑀦𑀁, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁄 𑀲𑁂𑀓𑁆𑀔𑀥𑀫𑁆𑀫𑀁 𑀅𑀲𑁂𑀓𑁆𑀔𑀥𑀫𑁆𑀫𑀜𑁆𑀘 𑀲𑀭𑀡𑀁 𑀕𑀘𑁆𑀙𑀢𑀻’’𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀲𑀭𑀡𑀢𑁆𑀢𑀬𑀲𑀗𑁆𑀓𑀭𑀤𑁄𑀲𑁄. 𑀲𑀩𑁆𑀩𑀫𑀲𑁆𑀲 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀫𑀼𑀢𑁆𑀢𑀁 𑀧𑀭𑀸𑀫𑀸𑀲𑀸𑀧𑀭𑀸𑀫𑀸𑀲𑀸𑀤𑀺𑀪𑁂𑀤𑀁. ‘‘𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀲𑁂𑀔𑀺𑀬𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀺𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀫𑀦𑁂𑀦 𑀧𑀽𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀘𑀸𑀭𑀺𑀢𑁆𑀢𑀲𑁆𑀲 𑀅𑀓𑀭𑀡𑁂, 𑀯𑀸𑀭𑀺𑀢𑁆𑀢𑀲𑁆𑀲 𑀓𑀭𑀡𑁂 𑀤𑀡𑁆𑀟𑀓𑀫𑁆𑀫𑀸𑀭𑀳𑁄 𑀳𑁄𑀢𑀻’’𑀢𑀺 𑀤𑀻𑀧𑁂𑀢𑀻𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁩𑁪) 𑀆𑀕𑀢𑁄.

𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀸𑀫𑀡𑁂𑀭𑀸𑀦𑀁 𑀤𑀲 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺𑀆𑀤𑀻𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺 𑀧𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸𑀬 𑀯𑀸 𑀧𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀦𑀁 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀭𑀢𑀺𑀬𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀧𑀦𑁂𑀢𑁆𑀣 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑁂𑀢𑀩𑁆𑀩𑀸. 𑀧𑀸𑀡𑁄𑀢𑀺 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀢𑀲𑁆𑀲 𑀅𑀢𑀺𑀧𑀸𑀢𑀦𑀁 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸𑀯, 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀲𑀗𑁆𑀔𑀸𑀢𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑀁 𑀫𑀡𑀢𑀺 𑀦𑀻𑀳𑀭𑀢𑀻𑀢𑀺 𑀯𑀺𑀭𑀢𑀺 ‘‘𑀯𑁂𑀭𑀫𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 𑀯𑀸 ‘‘𑀯𑀺𑀭𑀫𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀯𑁂𑀭𑀫𑀡𑀻’’𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺 𑀯𑀼𑀢𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀣𑁂𑀬𑁆𑀬𑀘𑁂𑀢𑀦𑀸. 𑀅𑀩𑁆𑀭𑀫𑁆𑀳𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀁, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀫𑁂𑀣𑀼𑀦𑀘𑁂𑀢𑀦𑀸. 𑀫𑀼𑀲𑀸𑀢𑀺 𑀅𑀪𑀽𑀢𑀯𑀢𑁆𑀣𑀼, 𑀢𑀲𑁆𑀲 𑀯𑀸𑀤𑁄 𑀅𑀪𑀽𑀢𑀁 𑀜𑀢𑁆𑀯𑀸𑀯 𑀪𑀽𑀢𑀢𑁄 𑀯𑀺𑀜𑁆𑀜𑀸𑀧𑀦𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀧𑀺𑀝𑁆𑀞𑀧𑀽𑀯𑀸𑀤𑀺𑀦𑀺𑀩𑁆𑀩𑀢𑁆𑀢𑀸 𑀲𑀼𑀭𑀸 𑀘𑁂𑀯 𑀧𑀼𑀧𑁆𑀨𑀸𑀲𑀯𑀸𑀤𑀺𑀪𑁂𑀤𑀁 𑀫𑁂𑀭𑀬𑀜𑁆𑀘 𑀲𑀼𑀭𑀸𑀫𑁂𑀭𑀬𑀁. 𑀢𑀤𑁂𑀯 𑀫𑀤𑀦𑀻𑀬𑀝𑁆𑀞𑁂𑀦 𑀫𑀚𑁆𑀚𑀜𑁆𑀘𑁂𑀯 𑀧𑀫𑀸𑀤𑀓𑀸𑀭𑀡𑀝𑁆𑀞𑁂𑀦 𑀧𑀫𑀸𑀤𑀝𑁆𑀞𑀸𑀦𑀜𑁆𑀘, 𑀢𑀁 𑀬𑀸𑀬 𑀘𑁂𑀢𑀦𑀸𑀬 𑀧𑀺𑀯𑀢𑀺, 𑀢𑀲𑁆𑀲𑀸 𑀏𑀯𑀁 𑀅𑀥𑀺𑀯𑀘𑀦𑀁.

𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸, 𑀅𑀬𑀁 𑀅𑀭𑀺𑀬𑀸𑀦𑀁 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀪𑁄𑀚𑀦𑀦𑁆𑀢𑀺 𑀇𑀥 𑀲𑀩𑁆𑀩𑀁 𑀬𑀸𑀯𑀓𑀸𑀮𑀺𑀓𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀚𑁆𑀛𑁄𑀳𑀭𑀡𑀁 𑀇𑀥 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀪𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀅𑀚𑁆𑀛𑁄𑀳𑀭𑀡𑀁 𑀯𑀺𑀓𑀸𑀮𑀪𑁄𑀚𑀦𑀁, 𑀯𑀺𑀓𑀸𑀮𑁂 𑀯𑀸𑀬𑀸𑀯𑀓𑀸𑀮𑀺𑀓𑀲𑁆𑀲 𑀪𑁄𑀚𑀦𑀁 𑀅𑀚𑁆𑀛𑁄𑀳𑀭𑀡𑀁 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀢𑀁 𑀅𑀢𑁆𑀣𑀢𑁄 𑀯𑀺𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀅𑀚𑁆𑀛𑁄𑀳𑀭𑀡𑀘𑁂𑀢𑀦𑀸𑀯.

𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀻𑀪𑀽𑀢𑀁 𑀤𑀲𑁆𑀲𑀦𑀁 ‘‘𑀯𑀺𑀲𑀽𑀓𑀤𑀲𑁆𑀲𑀦𑀁, 𑀦𑀘𑁆𑀘𑀕𑀻𑀢𑀸𑀤𑀺𑀤𑀲𑁆𑀲𑀦𑀲𑀯𑀦𑀸𑀦𑀜𑁆𑀘𑁂𑀯 𑀯𑀝𑁆𑀝𑀓𑀬𑀼𑀤𑁆𑀥𑀚𑀽𑀢𑀓𑀻𑀴𑀸𑀤𑀺𑀲𑀩𑁆𑀩𑀓𑀻𑀴𑀸𑀦𑀜𑁆𑀘 𑀦𑀸𑀫𑀁. 𑀤𑀲𑁆𑀲𑀦𑀦𑁆𑀢𑀺 𑀘𑁂𑀢𑁆𑀣 𑀧𑀜𑁆𑀘𑀦𑁆𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀸𑀦𑀁 𑀬𑀣𑀸𑀲𑀓𑀁 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀤𑀲𑁆𑀲𑀦𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀳𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀦𑀘𑁆𑀘𑀦𑀕𑀸𑀬𑀦𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀸𑀮𑀸𑀢𑀺 𑀩𑀤𑁆𑀥𑀫𑀩𑀤𑁆𑀥𑀁 𑀯𑀸 𑀧𑀼𑀧𑁆𑀨𑀁, 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀸𑀤𑀺𑀫𑀬𑀫𑁆𑀧𑀺 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀧𑀺𑀴𑀦𑁆𑀥𑀺𑀬𑀫𑀸𑀦𑀁 𑀫𑀸𑀮𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀕𑀦𑁆𑀥𑀦𑁆𑀢𑀺 𑀯𑀸𑀲𑀘𑀼𑀡𑁆𑀡𑀸𑀤𑀺𑀯𑀺𑀮𑁂𑀧𑀦𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀧𑀺𑀲𑀺𑀢𑁆𑀯𑀸 𑀕𑀳𑀺𑀢𑀁 𑀙𑀯𑀺𑀭𑀸𑀕𑀓𑀭𑀡𑀜𑁆𑀘𑁂𑀯 𑀕𑀦𑁆𑀥𑀚𑀸𑀢𑀜𑁆𑀘. 𑀥𑀸𑀭𑀡𑀁 𑀦𑀸𑀫 𑀧𑀺𑀴𑀦𑁆𑀥𑀦𑀁. 𑀫𑀡𑁆𑀟𑀦𑀁 𑀦𑀸𑀫 𑀊𑀦𑀝𑁆𑀞𑀸𑀦𑀧𑀽𑀭𑀡𑀁. 𑀕𑀦𑁆𑀥𑀯𑀲𑁂𑀦, 𑀙𑀯𑀺𑀭𑀸𑀕𑀯𑀲𑁂𑀦 𑀯𑀸 𑀲𑀸𑀤𑀺𑀬𑀦𑀁 𑀯𑀺𑀪𑀽𑀲𑀦𑀁 𑀦𑀸𑀫, 𑀫𑀸𑀮𑀸𑀤𑀻𑀲𑀼 𑀯𑀸 𑀥𑀸𑀭𑀡𑀸𑀤𑀻𑀦𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀥𑀸𑀭𑀡𑀸𑀤𑀻𑀦𑀁 𑀞𑀸𑀦𑀁 𑀓𑀸𑀭𑀡𑀁 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸.

𑀉𑀘𑁆𑀘𑀸𑀢𑀺 𑀉𑀘𑁆𑀘-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄. 𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀆𑀲𑀦𑁆𑀤𑀸𑀤𑀺. 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑁂𑀳𑀺 𑀅𑀢𑁆𑀣𑀢𑀁 𑀲𑀮𑁄𑀳𑀺𑀢𑀯𑀺𑀢𑀸𑀦𑀜𑁆𑀘. 𑀏𑀢𑁂𑀲𑀼 𑀳𑀺 𑀆𑀲𑀦𑀁 𑀲𑀬𑀦𑀜𑁆𑀘 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀲𑀤𑁆𑀤𑁂𑀳𑀺 𑀕𑀳𑀺𑀢𑀸𑀦𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀭𑀚𑀢𑀲𑀤𑁆𑀤𑁂𑀦 𑀤𑀸𑀭𑀼𑀫𑀸𑀲𑀓𑀸𑀤𑀺 𑀲𑀩𑁆𑀩𑀁 𑀭𑀽𑀧𑀺𑀬𑀁 𑀲𑀗𑁆𑀕𑀳𑀺𑀢𑀁. 𑀫𑀼𑀢𑁆𑀢𑀸𑀫𑀡𑀺𑀆𑀤𑀬𑁄𑀧𑁂𑀢𑁆𑀣 𑀥𑀜𑁆𑀜𑀓𑁆𑀔𑁂𑀢𑁆𑀢𑀯𑀢𑁆𑀣𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀝𑀺𑀕𑁆𑀕𑀳𑀡-𑀲𑀤𑁆𑀤𑁂𑀦 𑀧𑀦 𑀧𑀝𑀺𑀕𑁆𑀕𑀸𑀳𑀸𑀧𑀦𑀲𑀸𑀤𑀺𑀬𑀦𑀸𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑀺.

𑁧𑁪𑁯. 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀲𑁆𑀲𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀉𑀧𑀲𑀫𑁆𑀧𑀦𑁆𑀦𑀸𑀦𑀫𑁆𑀧𑀺 𑀧𑀸𑀭𑀸𑀚𑀺𑀓𑀲𑀫𑀸𑀧𑀢𑁆𑀢𑀺𑀬𑀸 𑀲𑀭𑀡𑀕𑀫𑀦𑀸𑀤𑀺𑀲𑀸𑀫𑀡𑁂𑀭𑀪𑀸𑀯𑀲𑁆𑀲𑀧𑀺 𑀯𑀺𑀦𑀲𑁆𑀲𑀦𑀢𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑀗𑁆𑀖𑀮𑀸𑀪𑀫𑁆𑀧𑀺 𑀢𑁂 𑀦 𑀮𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀺𑀓𑀸𑀬 𑀧𑀼𑀦 𑀲𑀭𑀡𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀲𑀭𑀡𑀕𑀳𑀡𑁂𑀦 𑀲𑀳 𑀢𑀤𑀳𑁂𑀯𑀲𑁆𑀲 𑀯𑀲𑁆𑀲𑀽𑀧𑀕𑀫𑀦𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀕𑁆𑀕𑀳𑀡𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑁂𑀢𑀁, 𑀢𑀢𑁄 𑀧𑀼𑀭𑁂𑀧𑀺 𑀯𑀸 𑀧𑀘𑁆𑀙𑀸𑀧𑀺 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀘𑀻𑀯𑀭𑀫𑀸𑀲𑁂𑀲𑀼 𑀲𑀗𑁆𑀖𑁂 𑀉𑀧𑁆𑀧𑀦𑁆𑀦𑀓𑀸𑀮𑀘𑀻𑀯𑀭𑀜𑁆𑀘 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀅𑀯𑀺𑀧𑀦𑁆𑀦𑀲𑀻𑀮𑁄 𑀲𑀸𑀫𑀡𑁂𑀭𑁄 𑀮𑀪𑀢𑀺 𑀏𑀯. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀸𑀬 𑀕𑀳𑀺𑀢𑀸𑀦𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀫𑀦𑀜𑁆𑀘 𑀙𑀺𑀦𑁆𑀦𑀯𑀲𑁆𑀲𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀓𑀸𑀮𑀘𑀻𑀯𑀭𑀮𑀸𑀪𑁄 𑀦 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 ‘‘𑀅𑀧𑀮𑁄𑀓𑁂𑀢𑁆𑀯𑀸 𑀮𑀸𑀪𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑁄 𑀧𑀦 𑀬𑀤𑀺 𑀲𑁂𑀦𑀸𑀲𑀦𑀲𑁆𑀲𑀸𑀫𑀺𑀓𑀸 𑀤𑀸𑀬𑀓𑀸 𑀲𑁂𑀦𑀸𑀲𑀦𑀕𑀼𑀢𑁆𑀢𑀢𑁆𑀣𑀸𑀬 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀲𑁆𑀲𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀦𑀧𑀮𑁄𑀓𑁂𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑁄𑀯. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁦𑁮) ‘‘𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀘𑁆𑀙𑀢𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀧𑀼𑀦 𑀯𑀲𑁆𑀲𑀁 𑀉𑀧𑀕𑀢𑀢𑁆𑀢𑀸 𑀮𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑁂 𑀤𑀸𑀬𑀓𑀸𑀦𑀁 𑀇𑀫𑀁 𑀅𑀥𑀺𑀧𑁆𑀧𑀸𑀬𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀜𑁆𑀘𑁂, 𑀲𑀼𑀦𑁆𑀤𑀭𑀁, 𑀲𑀗𑁆𑀖𑀺𑀓𑀁, 𑀓𑀸𑀮𑀘𑀻𑀯𑀭𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀜𑁆𑀘𑁂, 𑀦 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦 𑀅𑀚𑀸𑀦𑀺𑀢𑁆𑀯𑀸𑀢𑀺 ‘‘𑀲𑀼𑀭𑀸’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀧𑀺𑀯𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀲𑀩𑁆𑀩𑀲𑀻𑀮𑀪𑁂𑀤𑀁 𑀲𑀭𑀡𑀪𑁂𑀤𑀜𑁆𑀘 𑀦 𑀆𑀧𑀚𑁆𑀚𑀢𑀺. 𑀅𑀓𑀼𑀲𑀮𑀁 𑀧𑀦 𑀲𑀼𑀭𑀸𑀧𑀸𑀦𑀸𑀯𑁂𑀭𑀫𑀡𑀺𑀲𑀻𑀮𑀪𑁂𑀤𑁄 𑀘 𑀳𑁄𑀢𑀺 𑀫𑀸𑀮𑀸𑀤𑀺𑀥𑀸𑀭𑀡𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀸𑀦𑀻𑀢𑀺 𑀯𑀺𑀓𑀸𑀮𑀪𑁄𑀚𑀦𑀸𑀯𑁂𑀭𑀫𑀡𑀺𑀆𑀤𑀻𑀦𑀺. 𑀢𑀸𑀦𑀺𑀧𑀺 𑀳𑀺 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀢𑀁 𑀢𑀁 𑀪𑀺𑀚𑁆𑀚𑀢𑀺 𑀏𑀯, 𑀇𑀢𑀭𑀻𑀢𑀭𑁂𑀲𑀁 𑀧𑀦 𑀅𑀪𑀺𑀚𑁆𑀚𑀦𑁂𑀦 𑀦𑀸𑀲𑀦𑀗𑁆𑀕𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑁂𑀦𑁂𑀯 ‘‘𑀏𑀢𑁂𑀲𑀼 𑀪𑀺𑀦𑁆𑀦𑁂𑀲𑀽’’𑀢𑀺 𑀪𑁂𑀤𑀯𑀘𑀦𑀁 𑀯𑀼𑀢𑁆𑀢𑀁.

𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 ‘‘𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂 𑀅𑀘𑁆𑀘𑀸𑀕𑀫𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀫𑀚𑁆𑀛𑁂 𑀤𑁂𑀲𑀸𑀧𑁂𑀢𑁆𑀯𑀸 𑀲𑀭𑀡𑀲𑀻𑀮𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀧𑀸𑀭𑀸𑀚𑀺𑀓𑀢𑁆𑀢𑀸 𑀢𑁂𑀲𑀁. 𑀢𑁂𑀦𑀸𑀳 ‘‘𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺. 𑀅𑀬𑀫𑁂𑀯 𑀳𑀺 𑀦𑀸𑀲𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀮𑀺𑀗𑁆𑀕𑀦𑀸𑀲𑀦𑀸𑀓𑀸𑀭𑀡𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀅𑀯𑀡𑁆𑀡𑀪𑀸𑀲𑀦𑀸𑀤𑀻𑀦𑀁 𑀲𑀳 𑀧𑀢𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀦𑀦𑀼 𑀘 𑀓𑀡𑁆𑀝𑀓𑀲𑀸𑀫𑀡𑁂𑀭𑁄𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀏𑀯, 𑀢𑀲𑁆𑀲 𑀘 𑀳𑁂𑀝𑁆𑀞𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀯 𑀯𑀼𑀢𑁆𑀢𑀸, 𑀇𑀥 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀮𑀺𑀗𑁆𑀕𑀦𑀸𑀲𑀦𑀸 𑀯𑀼𑀘𑁆𑀘𑀢𑀺, 𑀓𑁄 𑀇𑀫𑁂𑀲𑀁 𑀪𑁂𑀤𑁄𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀓𑁄’’𑀢𑀺. 𑀏𑀢𑁆𑀣 𑀘𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑁄 𑀳𑀺 ‘‘𑀅𑀢𑁆𑀢𑀸 𑀇𑀲𑁆𑀲𑀭𑁄’’𑀢𑀺 𑀯𑀸 ‘‘𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺𑀆𑀤𑀺𑀦𑀸 𑀯𑀸 ‘‘𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀸 𑀢𑀺𑀢𑁆𑀣𑀺𑀬𑀧𑀭𑀺𑀓𑀧𑁆𑀧𑀺𑀢𑀁 𑀬𑀁 𑀓𑀺𑀜𑁆𑀘𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺, 𑀢𑀲𑁆𑀲 𑀲𑀸 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄 𑀘 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄. 𑀬𑁄 𑀧𑀦 𑀈𑀤𑀺𑀲𑀁 𑀤𑀺𑀝𑁆𑀞𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀲𑀦𑀺𑀓𑁄𑀯 𑀳𑀼𑀢𑁆𑀯𑀸 𑀓𑁂𑀯𑀮𑀁 𑀩𑀼𑀤𑁆𑀥𑀯𑀘𑀦𑀸𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀻𑀢𑀢𑁄 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀑𑀯𑀤𑀺𑀬𑀫𑀸𑀦𑁄𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀯𑁄𑀳𑀭𑀢𑀺, 𑀢𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺, 𑀲𑁄 𑀧𑀦 𑀓𑀡𑁆𑀝𑀓𑀦𑀸𑀲𑀦𑀸𑀬 𑀏𑀯 𑀦𑀸𑀲𑁂𑀢𑀩𑁆𑀩𑁄𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀤𑀲𑀲𑀺𑀓𑁆𑀔𑀸𑀧𑀤𑀢𑁄 𑀧𑀝𑁆𑀞𑀸𑀬 𑀯𑀺𑀢𑁆𑀣𑀸𑀭𑀢𑁄 𑀯𑀡𑁆𑀡𑀦𑀸 𑀆𑀕𑀢𑀸, 𑀲𑀸 𑀧𑁄𑀭𑀸𑀡𑀝𑀻𑀓𑀸𑀬𑀁 𑀲𑀩𑁆𑀩𑀲𑁄 𑀧𑁄𑀢𑁆𑀣𑀓𑀁 𑀆𑀭𑀼𑀴𑁆𑀳𑀸, 𑀢𑀲𑁆𑀫𑀸 𑀇𑀥 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑁧𑁫𑁦. ‘‘𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀦𑁆𑀢𑀺 𑀇𑀤𑀁 𑀧𑀼𑀕𑁆𑀕𑀮𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀕𑀡𑁆𑀞𑀺𑀧𑀤𑀓𑀸𑀭𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀁 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀦𑁆𑀢𑀺 𑀇𑀫𑀺𑀦𑀸𑀧𑀺 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀬𑀢𑁆𑀣 𑀯𑀸 𑀯𑀲𑀢𑀻𑀢𑀺 𑀇𑀫𑀺𑀦𑀸 𑀲𑀗𑁆𑀖𑀺𑀓𑀁 𑀯𑀸 𑀳𑁄𑀢𑀼 𑀧𑀼𑀕𑁆𑀕𑀮𑀺𑀓𑀁 𑀯𑀸, 𑀢𑀲𑁆𑀲 𑀦𑀺𑀩𑀤𑁆𑀥𑀯𑀲𑀦𑀓𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁. 𑀬𑀢𑁆𑀣 𑀯𑀸 𑀧𑀝𑀺𑀓𑁆𑀓𑀫𑀢𑀻𑀢𑀺 𑀇𑀫𑀺𑀦𑀸 𑀧𑀦 𑀬𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀦𑀺𑀩𑀤𑁆𑀥𑀁 𑀧𑀯𑀺𑀲𑀢𑀺, 𑀢𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀧𑀯𑀺𑀲𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀬𑁂𑀦𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀜𑁆𑀘 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀜𑁆𑀘 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑀦𑁆𑀢𑀺 𑀇𑀫𑀺𑀦𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁, 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀲𑁂𑀦𑀸𑀲𑀦𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀲𑀗𑁆𑀖𑀺𑀓𑀁 𑀯𑀸 𑀳𑁄𑀢𑀼 𑀧𑀼𑀕𑁆𑀕𑀮𑀺𑀓𑀁 𑀯𑀸, 𑀆𑀯𑀭𑀡𑀁 𑀓𑀸𑀢𑀩𑁆𑀩𑀫𑁂𑀯𑀸𑀢𑀺. 𑀫𑀼𑀔𑀤𑁆𑀯𑀸𑀭𑀺𑀓𑀦𑁆𑀢𑀺 𑀫𑀼𑀔𑀤𑁆𑀯𑀸𑀭𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀤𑀡𑁆𑀟𑀓𑀫𑁆𑀫𑀁 𑀬𑁄𑀚𑁂𑀢𑁆𑀯𑀸. 𑀤𑀡𑁆𑀟𑁂𑀦𑁆𑀢𑀺 𑀯𑀺𑀦𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀡𑁆𑀟𑁄, 𑀲𑁄𑀬𑁂𑀯 𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀦𑁆𑀢𑀺 𑀤𑀡𑁆𑀟𑀓𑀫𑁆𑀫𑀁, 𑀆𑀯𑀭𑀡𑀸𑀤𑀺. 𑀤𑀡𑁆𑀟𑀓𑀫𑁆𑀫𑀫𑀲𑁆𑀲 𑀓𑀭𑁄𑀣𑀸𑀢𑀺 𑀅𑀲𑁆𑀲 𑀤𑀡𑁆𑀟𑀓𑀫𑁆𑀫𑀁 𑀬𑁄𑀚𑁂𑀣 𑀆𑀡𑀸𑀧𑁂𑀣. 𑀤𑀡𑁆𑀟𑀓𑀫𑁆𑀫𑀦𑁆𑀢𑀺 𑀯𑀸 𑀦𑀺𑀕𑁆𑀕𑀳𑀓𑀫𑁆𑀫𑀁, 𑀢𑀲𑁆𑀫𑀸 𑀦𑀺𑀕𑁆𑀕𑀳𑀫𑀲𑁆𑀲 𑀓𑀭𑁄𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼.

𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀇𑀫𑀺𑀦𑀸 𑀙𑀺𑀦𑁆𑀦𑀯𑀲𑁆𑀲𑁄 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀘𑁂 𑀆𑀓𑀺𑀡𑁆𑀡𑀤𑁄𑀲𑁄𑀯 𑀳𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑁂 𑀦 𑀢𑀺𑀝𑁆𑀞𑀢𑀺, 𑀦𑀺𑀓𑁆𑀓𑀟𑁆𑀠𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀲𑀘𑁂 𑀬𑀸𑀯𑀢𑀢𑀺𑀬𑀁 𑀯𑀼𑀘𑁆𑀘𑀫𑀸𑀦𑁄 𑀦 𑀑𑀭𑀫𑀢𑀺, 𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸 𑀦𑀸𑀲𑁂𑀢𑀩𑁆𑀩𑁄, 𑀧𑀼𑀦 𑀧𑀩𑁆𑀩𑀚𑁆𑀚𑀁 𑀬𑀸𑀘𑀫𑀸𑀦𑁄𑀧𑀺 𑀅𑀧𑀮𑁄𑀓𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀯𑀤𑀦𑁆𑀢𑀺. 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀘𑁆𑀙𑀢𑀻𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀧𑀼𑀦 𑀯𑀲𑁆𑀲𑀁 𑀉𑀧𑀕𑀢𑀢𑁆𑀢𑀸 𑀮𑀘𑁆𑀙𑀢𑀺. 𑀅𑀧𑀮𑁄𑀓𑁂𑀢𑁆𑀯𑀸 𑀮𑀸𑀪𑁄 𑀤𑀸𑀢𑀩𑁆𑀩𑁄𑀢𑀺 𑀙𑀺𑀦𑁆𑀦𑀯𑀲𑁆𑀲𑀢𑀸𑀬 𑀯𑀼𑀢𑁆𑀢𑀁. 𑀇𑀢𑀭𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀯𑀺𑀓𑀸𑀮𑀪𑁄𑀚𑀦𑀸𑀤𑀻𑀦𑀺 𑀧𑀜𑁆𑀘. 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 ‘‘𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂 𑀅𑀘𑁆𑀘𑀸𑀕𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁦𑁮) 𑀯𑀼𑀢𑁆𑀢𑀁.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄 𑀦𑀸𑀫

𑀤𑁆𑀯𑀸𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑀓𑀣𑀸

𑀏𑀯𑀁 𑀧𑀩𑁆𑀩𑀚𑁆𑀚𑀸𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑁄 𑀓𑀣𑁂𑀢𑀩𑁆𑀩𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀬𑀁 𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀸𑀴𑀺𑀯𑀡𑁆𑀡𑀦𑀸𑀯𑀲𑁂𑀦𑁂𑀯 𑀆𑀕𑀢𑀸, 𑀦𑁄 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀯𑀲𑁂𑀦, 𑀇𑀫𑀲𑁆𑀲 𑀧𑀦 𑀧𑀓𑀭𑀡𑀲𑁆𑀲 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀓𑀣𑀸𑀪𑀽𑀢𑀢𑁆𑀢𑀸 𑀢𑀫𑀓𑀣𑁂𑀢𑁆𑀯𑀸 𑀦𑀺𑀲𑁆𑀲𑀬𑀯𑀺𑀦𑀺𑀘𑁆𑀙𑀬𑁄 𑀏𑀯 𑀆𑀘𑀭𑀺𑀬𑁂𑀦 𑀓𑀣𑀺𑀢𑁄, 𑀫𑀬𑀁 𑀧𑀦 𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀢𑀺𑀲𑀼𑀔𑀼𑀫𑀢𑁆𑀢𑀸 𑀅𑀢𑀺𑀕𑀫𑁆𑀪𑀻𑀭𑀢𑁆𑀢𑀸 𑀲𑀼𑀤𑀼𑀮𑁆𑀮𑀪𑀢𑁆𑀢𑀸 𑀲𑀸𑀲𑀦𑀸𑀦𑀼𑀕𑁆𑀕𑀳𑀢𑁆𑀣𑀁 𑀆𑀘𑀭𑀺𑀬𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀆𑀤𑀺𑀧𑁆𑀧𑀓𑀭𑀡𑁂𑀲𑀼 𑀆𑀕𑀢𑀯𑀺𑀦𑀺𑀘𑁆𑀙𑀬𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀁 𑀯𑀺𑀦𑀺𑀘𑁆𑀙𑀬𑀁 𑀓𑀣𑀬𑀺𑀲𑁆𑀲𑀸𑀫.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀢𑀸 ‘‘𑀦 𑀪𑀺𑀓𑁆𑀔𑀯𑁂 𑀅𑀦𑀼𑀧𑀚𑁆𑀛𑀸𑀬𑀓𑁄’’𑀢𑀺𑀆𑀤𑀺𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀢𑁂𑀦 𑀲𑀫𑀬𑁂𑀦. 𑀅𑀦𑀼𑀧𑀚𑁆𑀛𑀸𑀬𑀓𑀦𑁆𑀢𑀺 𑀉𑀧𑀚𑁆𑀛𑀁 𑀅𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀺𑀭𑀳𑀺𑀢𑀁, 𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸 𑀦𑁂𑀯 𑀥𑀫𑁆𑀫𑀢𑁄 𑀦 𑀆𑀫𑀺𑀲𑀢𑁄 𑀲𑀗𑁆𑀕𑀳𑀁 𑀮𑀪𑀦𑁆𑀢𑀺, 𑀢𑁂 𑀧𑀭𑀺𑀳𑀸𑀬𑀦𑁆𑀢𑀺𑀬𑁂𑀯, 𑀦 𑀯𑀟𑁆𑀠𑀦𑁆𑀢𑀺. 𑀦 𑀪𑀺𑀓𑁆𑀔𑀯𑁂 𑀅𑀦𑀼𑀧𑀚𑁆𑀛𑀸𑀬𑀓𑁄𑀢𑀺 𑀉𑀧𑀚𑁆𑀛𑀁 𑀅𑀕𑀸𑀳𑀸𑀧𑁂𑀢𑁆𑀯𑀸 𑀦𑀺𑀭𑀼𑀧𑀚𑁆𑀛𑀸𑀬𑀓𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀺. 𑀓𑁂𑀘𑀺 ‘‘𑀓𑀼𑀧𑁆𑀧𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. ‘‘𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀼𑀧𑀚𑁆𑀛𑀸𑀬𑀧𑀭𑀺𑀬𑁄𑀲𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄.

𑀅𑀧𑀢𑁆𑀢𑀓𑀸 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀻𑀢𑀺 𑀬𑁄 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑁄 𑀮𑀩𑁆𑀪𑀢𑀺, 𑀢𑀤𑀢𑁆𑀣𑀸𑀬 𑀘𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺 𑀬𑀣𑀸 𑀆𑀚𑀻𑀯𑀓𑀦𑀸𑀫𑀓𑀸 𑀢𑀺𑀢𑁆𑀣𑀺𑀬𑀸. 𑀲𑀽𑀧𑀩𑁆𑀬𑀜𑁆𑀚𑀦𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀳𑀢𑁆𑀣𑁂𑀲𑀼 𑀞𑀧𑀺𑀢𑀧𑀺𑀡𑁆𑀟𑀫𑁂𑀯 𑀳𑀺 𑀢𑁂 𑀪𑀼𑀜𑁆𑀚𑀦𑁆𑀢𑀺. 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀺, 𑀅𑀘𑀻𑀯𑀭𑀓𑀸𑀤𑀺𑀯𑀢𑁆𑀣𑀽𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀸𑀘𑀺𑀢𑀓𑁂𑀦𑀸𑀢𑀺 ‘‘𑀬𑀸𑀯 𑀉𑀧𑀲𑀫𑁆𑀧𑀤𑀁 𑀓𑀭𑁄𑀫, 𑀢𑀸𑀯 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑁂𑀦, 𑀢𑀸𑀯𑀓𑀸𑀮𑀺𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀈𑀤𑀺𑀲𑁂𑀦 𑀳𑀺 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀧𑀢𑁆𑀢𑀘𑀻𑀯𑀭𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀺, 𑀢𑀲𑁆𑀫𑀸 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄𑀯 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀲𑀘𑁂 𑀢𑀲𑁆𑀲 𑀦𑀢𑁆𑀣𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘𑀲𑁆𑀲 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀅𑀜𑁆𑀜𑁂 𑀯𑀸 𑀪𑀺𑀓𑁆𑀔𑀽, 𑀦𑀺𑀭𑀧𑁂𑀓𑁆𑀔𑁂𑀳𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀽𑀧𑀕𑀁 𑀧𑀢𑁆𑀢𑀘𑀻𑀯𑀭𑀁 𑀤𑀸𑀢𑀩𑁆𑀩𑀁.

𑀕𑁄𑀢𑁆𑀢𑁂𑀦𑀧𑀺 𑀅𑀦𑀼𑀲𑁆𑀲𑀸𑀯𑁂𑀢𑀼𑀦𑁆𑀢𑀺 ‘‘𑀫𑀳𑀸𑀓𑀲𑁆𑀲𑀧𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀁 𑀕𑁄𑀢𑁆𑀢𑀁 𑀯𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀏𑀓𑀸𑀦𑀼𑀲𑁆𑀲𑀸𑀯𑀦𑁂𑀢𑀺 𑀤𑁆𑀯𑁂 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂, 𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀇𑀢𑀭𑀲𑁆𑀲𑀸𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀏𑀓𑁂𑀦 𑀯𑀸 𑀏𑀓𑀓𑁆𑀔𑀡𑁂 𑀓𑀫𑁆𑀫𑀯𑀸𑀘𑀁 𑀅𑀦𑀼𑀲𑁆𑀲𑀸𑀯𑁂𑀦𑁆𑀢𑁂𑀳𑀺 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁, 𑀢𑀜𑁆𑀘 𑀔𑁄 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀚𑀦𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀢𑀜𑁆𑀘 𑀔𑁄 𑀅𑀦𑀼𑀲𑁆𑀲𑀸𑀯𑀦𑀓𑀺𑀭𑀺𑀬𑀁 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀅𑀦𑀼𑀲𑁆𑀲𑀸𑀯𑁂𑀢𑀩𑁆𑀩𑀸. 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀏𑀓𑁂𑀦 𑀏𑀓𑀲𑁆𑀲𑀸𑀢𑀺 𑀏𑀯𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑁆𑀯𑁂 𑀢𑀺𑀲𑁆𑀲𑁄 𑀯𑀸 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀦𑀸𑀦𑀼𑀧𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀦𑀸𑀦𑀼𑀧𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀏𑀓𑁄 𑀆𑀘𑀭𑀺𑀬𑁄 𑀳𑁄𑀢𑀺, ‘‘𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀦 𑀯𑀝𑁆𑀝𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀳𑀺 𑀏𑀲 𑀧𑀝𑀺𑀓𑁆𑀔𑁂𑀧𑁄.

𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸, 𑀢𑀁 𑀉𑀧𑀚𑁆𑀛𑀁 ‘‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’’𑀢𑀺 𑀏𑀯𑀁 𑀯𑀤𑀸𑀧𑁂𑀢𑁆𑀯𑀸 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀯𑀺𑀢𑁆𑀣𑀸𑀬𑀦𑁆𑀢𑀻𑀢𑀺 𑀯𑀺𑀢𑁆𑀣𑀤𑁆𑀥𑀕𑀢𑁆𑀢𑀸 𑀳𑁄𑀦𑁆𑀢𑀺. 𑀬𑀁 𑀚𑀸𑀢𑀦𑁆𑀢𑀺 𑀬𑀁 𑀢𑀯 𑀲𑀭𑀻𑀭𑁂 𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 𑀯𑀺𑀚𑁆𑀚𑀫𑀸𑀦𑀁, 𑀢𑀁 𑀲𑀗𑁆𑀖𑀫𑀚𑁆𑀛𑁂 𑀧𑀼𑀘𑁆𑀙𑀦𑁆𑀢𑁂 𑀲𑀦𑁆𑀢𑀁 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺𑀆𑀤𑀺. 𑀉𑀮𑁆𑀮𑀼𑀫𑁆𑀧𑀢𑀼 𑀫𑀦𑁆𑀢𑀺 𑀉𑀤𑁆𑀥𑀭𑀢𑀼 𑀫𑀁.

𑀢𑀸𑀯𑀤𑁂𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯. 𑀙𑀸𑀬𑀸 𑀫𑁂𑀢𑀩𑁆𑀩𑀸𑀢𑀺 𑀏𑀓𑀧𑁄𑀭𑀺𑀲𑀸 𑀯𑀸 𑀤𑁆𑀯𑀺𑀧𑁄𑀭𑀺𑀲𑀸 𑀯𑀸𑀢𑀺 𑀙𑀸𑀬𑀸 𑀫𑁂𑀢𑀩𑁆𑀩𑀸. 𑀉𑀢𑀼𑀧𑁆𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 ‘‘𑀯𑀲𑁆𑀲𑀸𑀦𑁄 𑀳𑁂𑀫𑀦𑁆𑀢𑁄 𑀕𑀺𑀫𑁆𑀳𑁄’’𑀢𑀺 𑀉𑀢𑀼𑀧𑁆𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀉𑀢𑀼𑀬𑁂𑀯 𑀉𑀢𑀼𑀧𑁆𑀧𑀫𑀸𑀡𑀁. 𑀲𑀘𑁂 𑀯𑀲𑁆𑀲𑀸𑀦𑀸𑀤𑀬𑁄 𑀅𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺, 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀬𑀲𑁆𑀲 𑀬𑁄 𑀉𑀢𑀼 𑀅𑀧𑀭𑀺𑀧𑀼𑀡𑁆𑀡𑁄, 𑀢𑁂 𑀤𑀺𑀯𑀲𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁄 𑀤𑀺𑀯𑀲𑀪𑀸𑀕𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀅𑀣 𑀯𑀸 ‘‘𑀅𑀬𑀁 𑀦𑀸𑀫 𑀉𑀢𑀼, 𑀲𑁄 𑀘 𑀔𑁄 𑀧𑀭𑀺𑀧𑀼𑀡𑁆𑀡𑁄 𑀅𑀧𑀭𑀺𑀧𑀼𑀡𑁆𑀡𑁄 𑀯𑀸’’𑀢𑀺 𑀏𑀯𑀁 𑀉𑀢𑀼𑀧𑁆𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, ‘‘𑀧𑀼𑀩𑁆𑀩𑀡𑁆𑀳𑁄 𑀯𑀸 𑀲𑀸𑀬𑀦𑁆𑀳𑁄 𑀯𑀸’’𑀢𑀺 𑀏𑀯𑀁 𑀤𑀺𑀯𑀲𑀪𑀸𑀕𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑀗𑁆𑀕𑀻𑀢𑀻𑀢𑀺 𑀇𑀤𑀫𑁂𑀯 𑀲𑀩𑁆𑀩𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀁 𑀮𑀪𑀲𑀺, 𑀓𑀸 𑀢𑁂 𑀙𑀸𑀬𑀸, 𑀓𑀺𑀁 𑀉𑀢𑀼𑀧𑁆𑀧𑀫𑀸𑀡𑀁, 𑀓𑁄 𑀤𑀺𑀯𑀲𑀪𑀸𑀕𑁄’’𑀢𑀺 𑀧𑀼𑀝𑁆𑀞𑁄 ‘‘𑀇𑀤𑀁 𑀦𑀸𑀫 𑀮𑀪𑀸𑀫𑀺 𑀯𑀲𑁆𑀲𑀁 𑀯𑀸 𑀳𑁂𑀫𑀦𑁆𑀢𑀁 𑀯𑀸 𑀕𑀺𑀫𑁆𑀳𑀁 𑀯𑀸, 𑀅𑀬𑀁 𑀫𑁂 𑀙𑀸𑀬𑀸, 𑀇𑀤𑀁 𑀉𑀢𑀼𑀧𑁆𑀧𑀫𑀸𑀡𑀁, 𑀅𑀬𑀁 𑀤𑀺𑀯𑀲𑀪𑀸𑀕𑁄𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁.

𑀑𑀳𑀸𑀬𑀸𑀢𑀺 𑀙𑀟𑁆𑀟𑁂𑀢𑁆𑀯𑀸. 𑀤𑀼𑀢𑀺𑀬𑀁 𑀤𑀸𑀢𑀼𑀦𑁆𑀢𑀺 𑀉𑀧𑀲𑀫𑁆𑀧𑀤𑀫𑀸𑀴𑀓𑀢𑁄 𑀧𑀭𑀺𑀯𑁂𑀡𑀁 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀢𑀺𑀬𑀓𑀁 𑀤𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀘𑀢𑁆𑀢𑀸𑀭𑀺 𑀘 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀼𑀧𑀮𑀸𑀲𑁄𑀢𑀺 𑀧𑀡𑁆𑀟𑀼𑀯𑀡𑁆𑀡𑁄 𑀧𑀢𑁆𑀢𑁄. 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄𑀢𑀺 𑀯𑀡𑁆𑀝𑀢𑁄 𑀧𑀢𑀺𑀢𑁄. 𑀅𑀪𑀩𑁆𑀩𑁄 𑀳𑀭𑀺𑀢𑀢𑁆𑀣𑀸𑀬𑀸𑀢𑀺 𑀧𑀼𑀦 𑀳𑀭𑀺𑀢𑁄 𑀪𑀯𑀺𑀢𑀼𑀁 𑀅𑀪𑀩𑁆𑀩𑁄. 𑀧𑀼𑀣𑀼𑀲𑀺𑀮𑀸𑀢𑀺 𑀫𑀳𑀸𑀲𑀺𑀮𑀸. 𑀅𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁄 𑀦𑀻𑀳𑀭𑀺𑀢𑁆𑀯𑀸 𑀆𑀪𑀢𑁄 𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑁄.

𑀅𑀦𑀼𑀧𑀚𑁆𑀛𑀸𑀬𑀸𑀤𑀺𑀯𑀢𑁆𑀣𑀽𑀲𑀼 𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀢𑁆𑀢𑀦𑁆𑀢𑀺 ‘‘𑀦 𑀅𑀦𑀼𑀧𑀚𑁆𑀛𑀸𑀬𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁭) 𑀇𑀥𑁂𑀯 𑀧𑀜𑁆𑀜𑀸𑀧𑀺𑀬𑀫𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀻𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑀸𑀪𑀸𑀯𑁂𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀫𑀢𑀲𑁆𑀲 𑀯𑀸 𑀯𑀺𑀩𑁆𑀪𑀦𑁆𑀢𑀲𑁆𑀲 𑀯𑀸 𑀧𑀼𑀭𑀸𑀡𑀉𑀧𑀚𑁆𑀛𑀸𑀬𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀦𑀸𑀫𑁂𑀦 𑀲𑀩𑁆𑀩𑀢𑁆𑀣 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀁 𑀦 𑀓𑀭𑁂𑀬𑁆𑀬, ‘‘𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀓𑀫𑁆𑀫𑀯𑀺𑀧𑀢𑁆𑀢𑀺 𑀏𑀯 𑀲𑀺𑀬𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁧𑁭) ‘‘𑀅𑀦𑀼𑀧𑀚𑁆𑀛𑀸𑀬𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 (𑀫𑀳𑀸𑀯. 𑀅𑀝𑁆𑀞. 𑁧𑁧𑁭) 𑀅𑀲𑁆𑀲 ‘‘𑀉𑀧𑀚𑁆𑀛𑀸𑀬𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑀁 𑀅𑀕𑀸𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀧𑀚𑁆𑀛𑀸𑀬𑀯𑀺𑀭𑀳𑀺𑀢𑀁’’ 𑀇𑀘𑁆𑀘𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀸𑀴𑀺𑀬𑀁 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀯𑀁 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑀫𑁂𑀯 𑀉𑀧𑀚𑁆𑀛𑀸𑀬𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀕𑀡𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺 𑀏𑀯 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀅𑀜𑁆𑀜𑀣𑀸 ‘‘𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀤𑁂𑀬𑁆𑀬. 𑀢𑁂𑀦𑀸𑀳 ‘‘𑀲𑀗𑁆𑀖𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀡𑁆𑀟𑀓𑀸𑀤𑀺𑀉𑀧𑀚𑁆𑀛𑀸𑀬𑁂𑀳𑀺 𑀓𑀭𑀺𑀬𑀫𑀸𑀦𑁂𑀲𑀼 𑀓𑀫𑁆𑀫𑁂𑀲𑀼 𑀧𑀡𑁆𑀟𑀓𑀸𑀤𑀺𑀓𑁂 𑀯𑀺𑀦𑀸𑀯 𑀬𑀤𑀺 𑀧𑀜𑁆𑀘𑀯𑀕𑁆𑀕𑀸𑀤𑀺𑀕𑀡𑁄 𑀧𑀽𑀭𑀢𑀺, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺, 𑀇𑀢𑀭𑀣𑀸 𑀓𑀼𑀧𑁆𑀧𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀢𑁆𑀢𑀘𑀻𑀯𑀭𑀯𑀢𑁆𑀣𑀽𑀲𑀼𑀧𑀺 𑀧𑀢𑁆𑀢𑀘𑀻𑀯𑀭𑀸𑀦𑀁 𑀅𑀪𑀸𑀯𑁂𑀧𑀺 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑀁 𑀅𑀯𑀢𑁆𑀯𑀸 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀲𑀸𑀯𑀦𑀸𑀬 𑀳𑀸𑀧𑀦𑀢𑁄 𑀓𑀫𑁆𑀫𑀓𑁄𑀧𑁄 𑀏𑀯 𑀲𑀺𑀬𑀸. 𑀓𑁂𑀘𑀺 𑀧𑀦 ‘‘𑀧𑀞𑀫𑀁 𑀅𑀦𑀼𑀜𑁆𑀜𑀸𑀢𑀓𑀫𑁆𑀫𑀯𑀸𑀘𑀸𑀬𑀁 𑀉𑀧𑀲𑀫𑁆𑀧𑀦𑁆𑀦𑀸 𑀯𑀺𑀬 𑀇𑀤𑀸𑀦𑀺𑀧𑀺 ‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’𑀦𑁆𑀢𑀺 𑀅𑀯𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀉𑀧𑀲𑀫𑁆𑀧𑀦𑁆𑀦𑀸𑀧𑀺 𑀲𑀽𑀧𑀲𑀫𑁆𑀧𑀦𑁆𑀦𑀸 𑀏𑀯𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀅𑀦𑀼𑀜𑁆𑀜𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀧𑀭𑀸𑀫𑀲𑀦𑀁 𑀲𑀸𑀯𑀦𑀸𑀬 𑀳𑀸𑀧𑀦𑀯𑀺𑀧𑀢𑁆𑀢𑀺 𑀏𑀯 𑀳𑁄𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀧𑀤𑀲𑁆𑀲 𑀳𑀸𑀧𑀦𑁂 𑀯𑀺𑀬. 𑀢𑀫𑁆𑀧𑀺 𑀳𑀺 𑀧𑀘𑁆𑀙𑀸 𑀅𑀦𑀼𑀜𑁆𑀜𑀸𑀢𑀁, ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀯𑀸𑀓𑁆𑀬𑁂𑀦 𑀅𑀬𑀸𑀘𑁂𑀢𑁆𑀯𑀸 𑀢𑀫𑁆𑀧𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀯𑀢𑁆𑀯𑀸𑀯 𑀬𑀤𑀺 𑀓𑀫𑁆𑀫𑀯𑀸𑀘𑀁 𑀓𑀭𑁄𑀢𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺. 𑀦𑁄 𑀘𑁂, 𑀯𑀺𑀧𑀦𑁆𑀦𑀁. 𑀲𑀩𑁆𑀩𑀧𑀘𑁆𑀙𑀸 𑀳𑀺 𑀅𑀦𑀼𑀜𑁆𑀜𑀸𑀢𑀓𑀫𑁆𑀫𑀯𑀸𑀘𑀢𑁄 𑀓𑀺𑀜𑁆𑀘𑀺𑀧𑀺 𑀧𑀭𑀺𑀳𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀯𑀦𑀸𑀬 𑀳𑀸𑀧𑀦𑀫𑁂𑀯 𑀳𑁄𑀢𑀺, 𑀅𑀜𑁆𑀜𑁂 𑀯𑀸 𑀪𑀺𑀓𑁆𑀔𑀽 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀬𑀫𑁂𑀢𑁆𑀣 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀸 (𑀯𑀺. 𑀯𑀺. 𑀝𑀻. 𑀫𑀳𑀸𑀯𑀕𑁆𑀕 𑁨.𑁧𑁧𑁭) 𑀆𑀪𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀲𑀸𑀭𑀢𑁆𑀣𑀤𑀻𑀧𑀦𑀻𑀯𑀺𑀦𑀺𑀘𑁆𑀙𑀬𑁄 𑀧𑀦 𑀇𑀥𑁂𑀯 𑀅𑀦𑁆𑀢𑁄𑀕𑀥𑀸 𑀳𑁄𑀢𑀺 𑀅𑀧𑁆𑀧𑀢𑀭𑀢𑁆𑀢𑀸 𑀅𑀯𑀺𑀲𑁂𑀲𑀢𑁆𑀢𑀸 𑀘.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁 (𑀯𑀚𑀺𑀭. 𑀝𑀻. 𑀫𑀳𑀸𑀯𑀕𑁆𑀕 𑁧𑁧𑁭) 𑀧𑀦 ‘‘𑀓𑁂𑀘𑀺 𑀓𑀼𑀧𑁆𑀧𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 ‘‘𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁, 𑀪𑀺𑀓𑁆𑀔𑀼𑀦𑀺𑀧𑀜𑁆𑀘𑀫𑁄 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁯𑁦) 𑀦𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀟𑀓𑀸𑀦𑀁 𑀕𑀡𑀧𑀽𑀭𑀡𑀪𑀸𑀯𑁂 𑀏𑀯 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀦 𑀲𑀩𑁆𑀩𑀦𑁆𑀢𑀺 𑀓𑀢𑁆𑀯𑀸 𑀲𑀼𑀯𑀼𑀢𑁆𑀢𑀁, 𑀇𑀢𑀭𑀣𑀸 ‘‘𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑁂𑀦 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺𑀆𑀤𑀺𑀓𑀸𑀬 𑀧𑀸𑀴𑀺𑀬𑀸 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸. 𑀬𑀣𑀸 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀲𑁆𑀲 𑀉𑀧𑀲𑀫𑁆𑀧𑀸𑀤𑀦𑀓𑀸𑀮𑁂 𑀓𑀫𑁆𑀫𑀯𑀸𑀘𑀸𑀬𑀁 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀅𑀲𑀦𑁆𑀢𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬 𑀓𑀢𑀸𑀬 𑀢𑀲𑁆𑀫𑀺𑀁 𑀅𑀲𑀦𑁆𑀢𑁂𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀏𑀯𑀁 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀅𑀯𑀢𑁆𑀣𑀼𑀁 𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑀸𑀤𑀺𑀁, 𑀅𑀲𑀦𑁆𑀢𑀁 𑀯𑀸 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀢𑀸𑀬𑀧𑀺 𑀕𑀡𑀧𑀽𑀭𑀓𑀸𑀦𑀫𑀢𑁆𑀣𑀺𑀢𑀸𑀬 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑁂𑀯. ‘‘𑀦, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀪𑀸𑀯𑀸 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀯 𑀳𑁄𑀢𑀺. 𑀦 𑀳𑀺 𑀩𑀼𑀤𑁆𑀥𑀸 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀁 𑀦 𑀯𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 …𑀧𑁂… 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 (𑀧𑀸𑀘𑀺. 𑁪𑁦𑁩). 𑀢𑀣𑀸 ‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁭𑁧) 𑀯𑀘𑀦𑀢𑁄 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀺𑀆𑀘𑀭𑀺𑀬𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀢𑀸𑀬 𑀉𑀧𑀲𑀫𑁆𑀧𑀤𑀸 𑀦 𑀭𑀼𑀳𑀢𑀺 𑀢𑁂𑀲𑀁 𑀅𑀪𑀺𑀓𑁆𑀔𑀼𑀢𑁆𑀢𑀸𑀢𑀺 𑀯𑀘𑀦𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀁.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁪𑁮𑁨) 𑀦𑀬𑁂𑀦 𑀓𑀫𑁆𑀫𑀸𑀦𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑀸 𑀓𑀣𑀺𑀬𑀫𑀸𑀦𑀸𑀬 ‘‘𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑀯𑀢𑁆𑀣𑀼𑀢𑁄 𑀯𑀸 𑀜𑀢𑁆𑀢𑀺𑀢𑁄 𑀯𑀸 𑀅𑀦𑀼𑀲𑁆𑀲𑀸𑀯𑀦𑀢𑁄 𑀯𑀸 𑀲𑀻𑀫𑀢𑁄 𑀯𑀸 𑀧𑀭𑀺𑀲𑀢𑁄 𑀯𑀸 𑀉𑀧𑀚𑁆𑀛𑀸𑀬𑀢𑁄 𑀯𑀸 𑀆𑀘𑀭𑀺𑀬𑀢𑁄 𑀯𑀸’’𑀢𑀺 𑀅𑀓𑀣𑀺𑀢𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀁. ‘‘𑀧𑀭𑀺𑀲𑀢𑁄 𑀯𑀸’’𑀢𑀺 𑀯𑀘𑀦𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀘𑁂? 𑀦, ‘‘𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀪𑀗𑁆𑀕𑁂 𑀢𑁂𑀲𑀫𑀦𑀸𑀫𑀝𑁆𑀞𑀢𑁆𑀢𑀸, 𑀅𑀬𑀫𑀢𑁆𑀣𑁄 𑀬𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀲𑀭𑀽𑀧𑁂𑀦 𑀯𑀼𑀢𑁆𑀢𑀧𑀸𑀴𑀺𑀯𑀲𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀦𑀬𑀫𑀼𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑁄𑀢𑀺 𑀅𑀬𑀫𑀲𑁆𑀲 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀺𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀅𑀦𑀼𑀧𑀚𑁆𑀛𑀸𑀬𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀸 𑀢𑁂 𑀪𑀺𑀓𑁆𑀔𑀽 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀪𑀽𑀢𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑀬𑀺𑀁𑀲𑀼, 𑀉𑀤𑀸𑀳𑀼 𑀫𑀼𑀲𑀸𑀯𑀸𑀤𑀪𑀬𑀸 𑀢𑀸𑀦𑁂𑀯 𑀧𑀤𑀸𑀦𑀺 𑀦 𑀲𑀸𑀯𑁂𑀲𑀼𑀦𑁆𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀉𑀧𑀚𑁆𑀛𑀸𑀬𑀸𑀪𑀸𑀯𑀢𑁄 𑀦 𑀲𑀸𑀯𑁂𑀲𑀼𑀁, ‘‘𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀯𑀺𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀳𑁄𑀢𑀺, 𑀅𑀣 𑀲𑀸𑀯𑁂𑀲𑀼𑀁, 𑀫𑀼𑀲𑀸𑀯𑀸𑀤𑁄 𑀦𑁂𑀲𑀁 𑀪𑀯𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀸𑀯𑁂𑀲𑀼𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀯𑀺𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀪𑀬𑀸, ‘‘𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀘. 𑀦, 𑀫𑀼𑀲𑀸𑀯𑀸𑀤𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀫𑀼𑀲𑀸𑀯𑀸𑀤𑁂𑀦𑀧𑀺 𑀓𑀫𑁆𑀫𑀲𑀫𑁆𑀪𑀯𑀢𑁄 𑀘. 𑀦 𑀳𑀺 𑀲𑀓𑁆𑀓𑀸 𑀫𑀼𑀲𑀸𑀯𑀸𑀤𑁂𑀦 𑀓𑀫𑁆𑀫𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀓𑀸𑀢𑀼𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀼𑀧𑀚𑁆𑀛𑀸𑀬𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺 𑀯𑀘𑀦𑀲𑁆𑀲 𑀘 𑀉𑀪𑀬𑀤𑁄𑀲𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀣𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄.

𑀅𑀬𑀜𑁆𑀘𑁂𑀢𑁆𑀣 𑀬𑀼𑀢𑁆𑀢𑀺 𑁋 𑀬𑀣𑀸 𑀧𑀼𑀩𑁆𑀩𑁂 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀼𑀧𑀚𑁆𑀛𑀸𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀉𑀧𑀚𑁆𑀛𑀸𑀬𑀕𑁆𑀕𑀳𑀡𑀓𑁆𑀓𑀫𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀚𑁆𑀛𑀸𑀬𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀣𑀸 𑀇𑀥𑀸𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀲𑀢𑁄 𑀅𑀕𑁆𑀕𑀳𑀺𑀢𑀢𑁆𑀢𑀸 ‘‘𑀅𑀦𑀼𑀧𑀚𑁆𑀛𑀸𑀬𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁂𑀦 𑀧𑀦 ‘‘𑀕𑀳𑀺𑀢𑁄 𑀢𑁂𑀦 𑀉𑀧𑀚𑁆𑀛𑀸𑀬𑁄’’𑀢𑀺 𑀲𑀜𑁆𑀜𑀸𑀬 𑀉𑀧𑀚𑁆𑀛𑀸𑀬𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀩𑁆𑀩𑀁. 𑀓𑁂𑀦𑀘𑀺 𑀯𑀸 𑀓𑀸𑀭𑀡𑁂𑀦 𑀓𑀸𑀬𑀲𑀸𑀫𑀕𑁆𑀕𑀺𑀁 𑀅𑀤𑁂𑀦𑁆𑀢𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀙𑀦𑁆𑀤𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀉𑀧𑀚𑁆𑀛𑀸𑀬𑁄 𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀉𑀧𑀚𑁆𑀛𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁂 𑀢𑀲𑁆𑀫𑀺𑀁 𑀢𑀸𑀤𑀺𑀲𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀯𑀸 𑀉𑀧𑀚𑁆𑀛𑀸𑀬𑀤𑀸𑀦𑀢𑁄 𑀧𑀼𑀩𑁆𑀩𑁂 𑀏𑀯 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀯𑀸 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑁄 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀙𑀦𑁆𑀤𑀳𑀸𑀭𑀓𑀸𑀤𑀬𑁄 𑀯𑀺𑀬 𑀉𑀧𑀚𑁆𑀛𑀸𑀬𑁄 𑀯𑀸 𑀅𑀜𑁆𑀜𑀲𑀻𑀫𑀸𑀕𑀢𑁄 𑀳𑁄𑀢𑀺. 𑀓𑀫𑁆𑀫𑀯𑀸𑀘𑀸 𑀭𑀼𑀳𑀢𑀻𑀢𑀺 𑀯𑀢𑁆𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀓𑁂𑀘𑀺 ‘‘𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀉𑀧𑀚𑁆𑀛𑀸𑀬𑁂𑀦 𑀲𑀦𑁆𑀦𑀺𑀳𑀺𑀢𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀲𑁄 𑀘 𑀧𑀸𑀞𑁄 𑀅𑀧𑁆𑀧𑀫𑀸𑀡𑁄 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀢𑀲𑁆𑀲 𑀯𑀘𑀦𑀲𑁆𑀲𑀸𑀪𑀸𑀯𑀢𑁄. 𑀅𑀲𑀦𑁆𑀦𑀺𑀳𑀺𑀢𑁂𑀧𑀺 𑀉𑀧𑀚𑁆𑀛𑀸𑀬𑁂 𑀓𑀫𑁆𑀫𑀯𑀸𑀘𑀸 𑀭𑀼𑀳𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦. 𑀓𑀲𑁆𑀫𑀸? 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀁 ‘‘𑀧𑀼𑀕𑁆𑀕𑀮𑀁 𑀧𑀭𑀸𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀧𑀸𑀞𑁄𑀯 𑀦𑁄 𑀧𑀫𑀸𑀡𑀁. 𑀦 𑀳𑀺 𑀢𑀢𑁆𑀣 𑀅𑀲𑀦𑁆𑀦𑀺𑀳𑀺𑀢𑁄 𑀉𑀧𑀚𑁆𑀛𑀸𑀬𑀲𑀗𑁆𑀔𑀸𑀢𑁄 𑀧𑀼𑀕𑁆𑀕𑀮𑁄 𑀧𑀭𑀸𑀫𑀲𑀦𑀁 𑀅𑀭𑀳𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀲𑀗𑁆𑀖𑀧𑀭𑀸𑀫𑀲𑀦𑀁 𑀯𑀺𑀬 𑀧𑀼𑀕𑁆𑀕𑀮𑀧𑀭𑀸𑀫𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀧𑀼𑀕𑁆𑀕𑀮𑀢𑁆𑀢𑀸, 𑀧𑀡𑁆𑀟𑀓𑀸𑀤𑀺𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑀦𑀓𑀸𑀮𑁂 𑀅𑀯𑀺𑀤𑀺𑀢𑀢𑁆𑀢𑀸𑀢𑀺 𑀧𑁄𑀭𑀸𑀡𑀸.

𑀅𑀧𑀢𑁆𑀢𑀘𑀻𑀯𑀭𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀲𑀜𑁆𑀜𑀸𑀬, 𑀓𑁂𑀯𑀮𑀁 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀦𑁆𑀢𑀧𑀤𑀦𑀻𑀳𑀸𑀭𑁂𑀦 𑀯𑀸 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺. 𑀬𑀣𑀸 𑀏𑀢𑀭𑀳𑀺 𑀫𑀢𑀯𑀺𑀧𑁆𑀧𑀯𑀼𑀢𑁆𑀢𑀫𑀸𑀢𑀸𑀧𑀺𑀢𑀺𑀓𑁄𑀧𑀺 ‘‘𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀻’’𑀢𑀺 𑀧𑀼𑀝𑁆𑀞𑁄 ‘‘𑀆𑀫 𑀪𑀦𑁆𑀢𑁂’’𑀢𑀺 𑀯𑀤𑀢𑀺, 𑀓𑀺𑀁 𑀩𑀳𑀼𑀦𑀸? 𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀻’’𑀢𑀺 𑀮𑀓𑁆𑀔𑀡𑀲𑁆𑀲 𑀦 𑀢𑀸𑀯 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀸𑀦𑀁 𑀅𑀯𑀼𑀢𑁆𑀢𑀢𑁆𑀢𑀸 𑀧𑀡𑁆𑀟𑀓𑀼𑀧𑀚𑁆𑀛𑀸𑀬𑀸𑀤𑀺𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑁂𑀭𑀲𑀦𑁆𑀢𑀭𑀸𑀬𑀧𑀼𑀘𑁆𑀙𑀸𑀬 𑀅𑀤𑀲𑁆𑀲𑀦𑀢𑁆𑀢𑀸 𑀅𑀧𑀢𑁆𑀢𑀘𑀻𑀯𑀭𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁬𑁯) 𑀏𑀯𑀁 𑀲𑀩𑁆𑀩𑀧𑀞𑀫𑀁 𑀅𑀦𑀼𑀜𑁆𑀜𑀸𑀢𑀸𑀬 𑀓𑀫𑁆𑀫𑀯𑀸𑀘𑀸𑀬 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀅𑀯𑀘𑀦𑀫𑁂𑀢𑁆𑀣 𑀲𑀸𑀥𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀯𑀘𑀦𑀁 𑀅𑀦𑀼𑀓𑁆𑀓𑀫𑁂𑀦𑀸𑀦𑀼𑀜𑁆𑀜𑀸𑀢𑀦𑁆𑀢𑀺.

𑀇𑀤𑀁 𑀢𑀸𑀯 𑀲𑀩𑁆𑀩𑀣𑀸 𑀳𑁄𑀢𑀼, ‘‘𑀫𑀽𑀕𑀁 𑀧𑀩𑁆𑀩𑀸𑀚𑁂𑀦𑁆𑀢𑀺 𑀩𑀥𑀺𑀭𑀁 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺 𑀇𑀤𑀁 𑀓𑀣𑀁 𑀲𑀫𑁆𑀪𑀯𑀺𑀢𑀼𑀫𑀭𑀳𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺, 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀏𑀢𑁆𑀣 ‘‘𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀫𑀺𑀘𑁆𑀙𑀸 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀫𑀽𑀕𑀁 𑀧𑀩𑁆𑀩𑀸𑀚𑁂𑀲𑀼𑀁. ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀢𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀆𑀡𑀸𑀧𑁂𑀢𑁆𑀯𑀸 𑀲𑀬𑀁 𑀉𑀧𑀚𑁆𑀛𑀸𑀬𑁂𑀦 𑀯𑀢𑁆𑀢𑀩𑁆𑀩𑁄 ‘‘𑀢𑀢𑀺𑀬𑀫𑁆𑀧𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺, 𑀲𑁄 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸 𑀢𑀣𑀸 𑀆𑀡𑀢𑁆𑀢𑁄 𑀉𑀧𑀚𑁆𑀛𑀸𑀬𑀯𑀘𑀦𑀲𑁆𑀲 𑀅𑀦𑀼 𑀅𑀦𑀼 𑀯𑀤𑀢𑀼 𑀯𑀸 𑀫𑀸 𑀯𑀸, 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀸 ‘‘𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄. 𑀤𑀺𑀦𑁆𑀦𑁄 𑀳𑁄𑀢𑀺 𑀙𑀦𑁆𑀤𑁄, 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺, 𑀤𑀺𑀦𑁆𑀦𑀸 𑀳𑁄𑀢𑀺 𑀧𑀯𑀸𑀭𑀡𑀸’’𑀢𑀺 𑀯𑀤𑀢𑀺. 𑀢𑀤𑀦𑀼𑀫𑀸𑀦𑁂𑀦 𑀯𑀸 𑀓𑀸𑀬𑁂𑀦 𑀢𑁂𑀦 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁂𑀦 𑀯𑀺𑀜𑁆𑀜𑀢𑁆𑀢𑀁 𑀳𑁄𑀢𑀺 𑀲𑀭𑀡𑀕𑀫𑀦𑀦𑁆𑀢𑀺 𑀯𑀸 𑀮𑁄𑀓𑁂𑀧𑀺 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀏𑀯𑀁 𑀯𑀤𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀭𑀺𑀬𑀸𑀬𑀁 𑀕𑀳𑁂𑀢𑁆𑀯𑀸 𑀫𑀽𑀕𑀁 𑀧𑀩𑁆𑀩𑀸𑀚𑁂𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 ‘‘𑀫𑀽𑀕𑀁 𑀓𑀣𑀁 𑀧𑀩𑁆𑀩𑀸𑀚𑁂𑀦𑁆𑀢𑀻𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀢𑀲𑁆𑀲 𑀓𑀸𑀬𑀧𑀲𑀸𑀤𑀲𑀫𑁆𑀪𑀯𑀢𑁄 𑀓𑀸𑀬𑁂𑀦 𑀧𑀳𑀸𑀭𑀁 𑀤𑀢𑁆𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀩𑀳𑀼𑀦𑀸?

𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 𑀬𑀣𑀸 𑀧𑀼𑀩𑁆𑀩𑁂 𑀧𑀩𑁆𑀩𑀚𑁆𑀚𑀸𑀥𑀺𑀓𑀸𑀭𑁂 𑀯𑀢𑁆𑀢𑀫𑀸𑀦𑁂 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀧𑀡𑁆𑀟𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁦𑁯) 𑀦𑀬𑁂𑀦 𑀉𑀧𑀲𑀫𑁆𑀧𑀤𑀯𑀲𑁂𑀦𑁂𑀯 𑀅𑀪𑀺𑀮𑀸𑀧𑁄 𑀓𑀢𑁄. 𑀣𑁂𑀬𑁆𑀬𑀲𑀁𑀯𑀸𑀲𑀓𑀧𑀤𑁂 𑀅𑀲𑀫𑁆𑀪𑀯𑀢𑁄 𑀓𑀺𑀜𑁆𑀘𑀸𑀧𑀺 𑀲𑁄 𑀦 𑀓𑀢𑁄, 𑀧𑀩𑁆𑀩𑀚𑁆𑀚𑀸𑀯 𑀢𑀢𑁆𑀣 𑀓𑀢𑀸, 𑀲𑀩𑁆𑀩𑀢𑁆𑀣 𑀧𑀦 𑀉𑀧𑀲𑀫𑁆𑀧𑀤𑀸𑀪𑀺𑀮𑀸𑀧𑁂𑀦 𑀅𑀥𑀺𑀧𑁆𑀧𑁂𑀢𑀸 𑀢𑀤𑀦𑀼𑀪𑀸𑀯𑀢𑁄 𑀉𑀧𑀲𑀫𑁆𑀧𑀤𑀸𑀬, 𑀧𑀩𑁆𑀩𑀚𑁆𑀚𑀸𑀬 𑀯𑀸𑀭𑀺𑀢𑀸𑀬 𑀉𑀧𑀲𑀫𑁆𑀧𑀤𑀸 𑀯𑀸𑀭𑀺𑀢𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸, 𑀢𑀣𑀸 𑀇𑀥 𑀉𑀧𑀲𑀫𑁆𑀧𑀤𑀸𑀥𑀺𑀓𑀸𑀭𑁂 𑀯𑀢𑁆𑀢𑀫𑀸𑀦𑁂 𑀉𑀧𑀲𑀫𑁆𑀧𑀤𑀸𑀪𑀺𑀮𑀸𑀧𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀫𑁂𑀯 𑀲𑀦𑁆𑀥𑀸𑀬 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀁 𑀲𑁄 𑀦 𑀓𑀢𑁆𑀢𑀩𑁆𑀩𑁄, 𑀫𑀽𑀕𑀧𑀤𑁂 𑀅𑀲𑀫𑁆𑀪𑀯𑀢𑁄 𑀢𑀲𑁆𑀲 𑀯𑀲𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀉𑀧𑀲𑀫𑁆𑀧𑀤𑀸𑀪𑀺𑀮𑀸𑀧𑁄𑀯 𑀓𑀢𑁆𑀢𑀩𑁆𑀩𑁄 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀲𑁆𑀲𑁂𑀯 𑀫𑀽𑀕𑀧𑀤𑀲𑁆𑀲 𑀯𑀲𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑁄𑀯 𑀓𑀢𑁄 𑀫𑀺𑀘𑁆𑀙𑀸𑀕𑀳𑀡𑀦𑀺𑀯𑀸𑀭𑀡𑀢𑁆𑀣𑀁. 𑀓𑀣𑀁? ‘‘𑀫𑀽𑀕𑁄, 𑀪𑀺𑀓𑁆𑀔𑀯𑁂, 𑀅𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀲𑁄𑀲𑀸𑀭𑀺𑀢𑁄’’𑀢𑀺 (𑀫𑀳𑀸𑀯. 𑁩𑁯𑁬) 𑀯𑀘𑀦𑀢𑁄 𑀳𑀺 𑀫𑀽𑀕𑁄 𑀉𑀧𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁, 𑀲𑁄 𑀓𑁂𑀯𑀮𑀁 𑀉𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺, 𑀦 𑀧𑀦 𑀧𑀩𑁆𑀩𑀚𑀺𑀢𑁄 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀅𑀲𑀫𑁆𑀪𑀯𑀢𑁄𑀢𑀺 𑀫𑀺𑀘𑁆𑀙𑀸𑀕𑀸𑀳𑁄 𑀳𑁄𑀢𑀺, 𑀢𑀁 𑀧𑀭𑀺𑀯𑀚𑁆𑀚𑀸𑀧𑁂𑀢𑁆𑀯𑀸 𑀬𑁄 𑀉𑀧𑀲𑀫𑁆𑀧𑀦𑁆𑀦𑁄, 𑀲𑁄 𑀧𑀩𑁆𑀩𑀚𑀺𑀢𑁄𑀯 𑀳𑁄𑀢𑀺. 𑀧𑀩𑁆𑀩𑀚𑀺𑀢𑁄 𑀧𑀦 𑀅𑀢𑁆𑀣𑀺 𑀓𑁄𑀘𑀺 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀢𑁆𑀣𑀺 𑀓𑁄𑀘𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀇𑀫𑀁 𑀲𑀫𑁆𑀫𑀸𑀕𑀸𑀳𑀁 𑀉𑀧𑁆𑀧𑀸𑀤𑁂𑀢𑀺 𑀪𑀕𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀢𑁂𑀲𑀁 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀻𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀲𑀼𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁, 𑀧𑀩𑁆𑀩𑀚𑁆𑀚𑀸𑀪𑀸𑀯𑀲𑀗𑁆𑀓𑀸𑀦𑀺𑀯𑀸𑀭𑀡𑀢𑁆𑀣𑀜𑁆𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑁄 𑀓𑀢𑁄. 𑀓𑀣𑀁? ‘‘𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁧𑁯) 𑀧𑀝𑀺𑀓𑁆𑀔𑁂𑀧𑁂𑀦, ‘‘𑀧𑀩𑁆𑀩𑀚𑀺𑀢𑀸 𑀲𑀼𑀧𑀩𑁆𑀩𑀚𑀺𑀢𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀸𑀪𑀸𑀯𑁂𑀦 𑀘 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀪𑀸𑀯𑀲𑀗𑁆𑀓𑀸 𑀪𑀯𑁂𑀬𑁆𑀬, 𑀬𑀣𑀸 𑀧𑀲𑀗𑁆𑀓𑀸 𑀪𑀯𑁂, 𑀢𑀣𑀸 𑀧𑀲𑀗𑁆𑀓𑀁 𑀞𑀧𑁂𑀬𑁆𑀬. 𑀔𑀦𑁆𑀥𑀓𑁂 𑀉𑀧𑀲𑀫𑁆𑀧𑀤𑀁 𑀲𑀦𑁆𑀥𑀸𑀬 ‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀅𑀧𑀢𑁆𑀢𑁄 𑀑𑀲𑀸𑀭𑀡𑀁, 𑀢𑀜𑁆𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺, 𑀲𑁄𑀲𑀸𑀭𑀺𑀢𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁯𑁬) 𑀦𑀬𑁂𑀦 𑀪𑀕𑀯𑀸 𑀦𑀺𑀯𑀸𑀭𑁂𑀢𑀺. 𑀢𑁂𑀦𑁂𑀯 𑀦𑀬𑁂𑀦 𑀧𑀩𑁆𑀩𑀚𑀺𑀢𑀸 𑀧𑀦𑁂𑀢𑁂 𑀲𑀩𑁆𑀩𑁂𑀧𑀺 𑀲𑀼𑀧𑀩𑁆𑀩𑀚𑀺𑀢𑀸 𑀏𑀯𑀸𑀢𑀺 𑀤𑀻𑀧𑁂𑀢𑀺. 𑀅𑀜𑁆𑀜𑀣𑀸 𑀲𑀩𑁆𑀩𑁂𑀧𑁂𑀢𑁂 𑀉𑀧𑀲𑀫𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀦 𑀧𑀩𑁆𑀩𑀚𑀺𑀢𑀸𑀢𑀺 𑀅𑀬𑀫𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀆𑀧𑀚𑁆𑀚𑀢𑀺. 𑀓𑀣𑀁? ‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑁄, 𑀪𑀺𑀓𑁆𑀔𑀯𑁂, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀧𑀩𑁆𑀩𑀚𑀺𑀢𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲, 𑀲𑁄 𑀘 𑀅𑀧𑀩𑁆𑀩𑀚𑀺𑀢𑁄’’𑀢𑀺 (𑀫𑀳𑀸𑀯. 𑁧𑁧𑁯) 𑀯𑀸 𑀢𑀦𑁆𑀢𑀺𑀬𑀸 𑀞𑀧𑀺𑀢𑀸𑀬 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 ‘‘𑀲𑁄𑀲𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑁂𑀯𑀮𑀁 ‘‘𑀇𑀫𑁂 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀉𑀧𑀲𑀫𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺, 𑀦 𑀧𑀩𑁆𑀩𑀚𑀺𑀢𑀸’’𑀢𑀺 𑀯𑀸 ‘‘𑀉𑀧𑀲𑀫𑁆𑀧𑀦𑁆𑀦𑀸𑀧𑀺 𑀘𑁂 𑀧𑀩𑁆𑀩𑀚𑀺𑀢𑀸, 𑀦𑀸𑀲𑁂𑀢𑀩𑁆𑀩𑀸’’𑀢𑀺 𑀯𑀸 𑀅𑀦𑀺𑀝𑁆𑀞𑀓𑁄𑀝𑁆𑀞𑀸𑀲𑁄 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀁 𑀧𑀦𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 ‘‘𑀲𑁄 𑀘 𑀅𑀧𑀩𑁆𑀩𑀚𑀺𑀢𑁄’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀫𑀽𑀕𑀲𑁆𑀲 𑀧𑀩𑁆𑀩𑀚𑁆𑀚𑀸𑀲𑀺𑀤𑁆𑀥𑀺𑀧𑀲𑀗𑁆𑀕𑀢𑁄 𑀧𑀩𑁆𑀩𑀚𑁆𑀚𑀸𑀧𑀺 𑀏𑀓𑀢𑁄𑀲𑀼𑀤𑁆𑀥𑀺𑀬𑀸 𑀳𑁄𑀢𑀻𑀢𑀺 𑀅𑀬𑀫𑀦𑀺𑀝𑁆𑀞𑀓𑁄𑀝𑁆𑀞𑀸𑀲𑁄 𑀓𑀣𑀁 𑀦𑀸𑀧𑀚𑁆𑀚𑀢𑀻𑀢𑀺? 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑁂𑀦 𑀉𑀧𑀲𑀫𑁆𑀧𑀤𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀲𑀫𑁆𑀫𑀸𑀕𑀸𑀳𑁂𑀦 𑀦𑀸𑀧𑀚𑁆𑀚𑀢𑀻𑀢𑀺, 𑀅𑀜𑁆𑀜𑀣𑀸 𑀬𑀣𑀸𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑁂 𑀕𑀳𑀺𑀢𑁂 𑀬𑀣𑀸𑀧𑀜𑁆𑀜𑀢𑁆𑀢𑀤𑀼𑀓𑁆𑀓𑀝𑀸𑀪𑀸𑀯𑀲𑀗𑁆𑀔𑀸𑀢𑁄 𑀅𑀧𑀭𑁄 𑀅𑀦𑀺𑀝𑁆𑀞𑀓𑁄𑀝𑁆𑀞𑀸𑀲𑁄 𑀆𑀧𑀚𑁆𑀚𑀢𑀺. 𑀓𑀣𑀁? ‘‘𑀦, 𑀪𑀺𑀓𑁆𑀔𑀯𑁂, 𑀫𑀽𑀕𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀧𑀩𑁆𑀩𑀚𑁆𑀚𑀸𑀧𑀭𑀺𑀬𑁄𑀲𑀸𑀦𑁂 𑀳𑁄𑀢𑀺, 𑀦 𑀢𑀲𑁆𑀲𑀸𑀯𑀺𑀧𑁆𑀧𑀓𑀢𑀸𑀬. 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀫𑁂𑀯 𑀳𑀺 𑀧𑀞𑀫𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀽𑀕𑀲𑁆𑀲 𑀧𑀩𑁆𑀩𑀚𑁆𑀚𑀸𑀧𑀭𑀺𑀬𑁄𑀲𑀸𑀦𑀲𑁆𑀲𑁂𑀯 𑀅𑀪𑀸𑀯𑀢𑁄 𑀇𑀫𑀲𑁆𑀲 𑀤𑀼𑀓𑁆𑀓𑀝𑀲𑁆𑀲 𑀑𑀓𑀸𑀲𑁄 𑀘 𑀦 𑀲𑀩𑁆𑀩𑀓𑀸𑀮𑀁 𑀲𑀫𑁆𑀪𑀯𑁂𑀬𑁆𑀬, 𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀧𑀦 𑀅𑀢𑁆𑀣𑁂 𑀕𑀳𑀺𑀢𑁂 𑀲𑀫𑁆𑀪𑀯𑀢𑀺 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀢𑁄. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀦, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀤𑀼𑀓𑁆𑀓𑀝𑀁 𑀦 𑀧𑀜𑁆𑀜𑀢𑁆𑀢𑀁. 𑀅𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀫𑁂𑀯 𑀘𑁂𑀢𑁆𑀣 𑀲𑀫𑁆𑀪𑀯𑀢𑀺, 𑀦𑁂𑀢𑀭𑀁. 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑀫𑁂𑀢𑀁 𑀧𑀩𑁆𑀩𑀚𑁆𑀚𑀸𑀪𑀺𑀮𑀸𑀧𑁂𑀦 𑀉𑀧𑀲𑀫𑁆𑀧𑀤𑀸𑀯 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀩𑁆𑀩𑀚𑁆𑀚𑀸𑀢𑀺. 𑀏𑀢𑁆𑀣𑀸𑀳 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀦 𑀓𑀸𑀬𑀧𑀬𑁄𑀕𑀢𑁄 𑀳𑁄𑀢𑀻𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀻𑀢𑀺𑀆𑀤𑀺𑀢𑁆𑀢𑀺𑀓𑀸 𑀤𑀲𑁆𑀲𑀦𑀢𑁄𑀢𑀺 𑀆𑀕𑀢𑁄.

‘‘𑀕𑁄𑀢𑁆𑀢𑁂𑀦𑀧𑀺 𑀅𑀦𑀼𑀲𑁆𑀲𑀸𑀯𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁨𑁨) 𑀯𑀘𑀦𑀢𑁄 𑀬𑁂𑀦 𑀯𑁄𑀳𑀸𑀭𑁂𑀦 𑀯𑁄𑀳𑀭𑀢𑀺, 𑀢𑁂𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀸 ‘‘𑀓𑁄 𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺 𑀧𑀼𑀝𑁆𑀞𑁂𑀦𑀧𑀺 𑀕𑁄𑀢𑁆𑀢𑀫𑁂𑀯 𑀦𑀸𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀘𑀢𑀼𑀩𑁆𑀩𑀺𑀥𑁂𑀲𑀼 𑀦𑀸𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑀦𑀸 𑀓𑀸𑀢𑀩𑁆𑀩𑀸𑀢𑀺 𑀯𑀤𑀦𑁆𑀢𑀺. 𑀏𑀓𑀲𑁆𑀲 𑀩𑀳𑀽𑀦𑀺 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑀁 𑀦𑀸𑀫𑀁 𑀜𑀢𑁆𑀢𑀺𑀬𑀸, 𑀏𑀓𑀁 𑀅𑀦𑀼𑀲𑁆𑀲𑀸𑀯𑀦𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀪𑀺𑀦𑁆𑀦𑀸𑀳𑀺 𑀅𑀦𑀼𑀲𑁆𑀲𑀸𑀯𑀦𑀸𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀧𑀸𑀴𑀺𑀬𑀁 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀧𑀘𑁆𑀙𑀸 𑀯𑀼𑀢𑁆𑀢𑀁, 𑀓𑀫𑁆𑀫𑀯𑀸𑀘𑀸𑀧𑀸𑀴𑀺𑀬𑀁 𑀧𑀦 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀧𑀞𑀫𑀁 𑀮𑀺𑀔𑀦𑁆𑀢𑀺, 𑀢𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀦𑁆𑀢𑀺 𑀦 𑀧𑀘𑁆𑀘𑁂𑀢𑀩𑁆𑀩𑀁. 𑀧𑀸𑀴𑀺𑀬𑀜𑁆𑀳𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲𑀸’’𑀢𑀺 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁄𑀧𑀺 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀓𑀫𑁆𑀫𑀯𑀸𑀘𑀸𑀧𑀸𑀴𑀺𑀬𑀁 𑀧𑀬𑁄𑀕𑁄 𑀤𑀲𑁆𑀲𑀺𑀢𑁄. ‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂 𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 𑀘 ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀓𑀼𑀲𑀮𑁄’’𑀢𑀺 𑀘 𑀧𑀞𑀫𑀁 ‘‘𑀆𑀬𑀲𑁆𑀫𑀸’’𑀢𑀺 𑀧𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄𑀢𑀺 𑀯𑀤𑀦𑁆𑀢𑀺. 𑀓𑀢𑁆𑀣𑀘𑀺 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀓𑀢𑁆𑀣𑀘𑀺 𑀓𑁂𑀯𑀮𑀁 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀲𑀸𑀯𑁂𑀢𑀺, 𑀲𑀸𑀯𑀦𑀁 𑀳𑀸𑀧𑁂𑀢𑀻𑀢𑀺 𑀦 𑀯𑀼𑀘𑁆𑀘𑀢𑀺 𑀦𑀸𑀫𑀲𑁆𑀲 𑀅𑀳𑀸𑀧𑀺𑀢𑀢𑁆𑀢𑀸𑀢𑀺 𑀏𑀓𑁂. 𑀲𑀘𑁂 𑀓𑀢𑁆𑀣𑀘𑀺 ‘‘𑀆𑀬𑀲𑁆𑀫𑀢𑁄 𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀓𑀢𑁆𑀣𑀘𑀺 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑀲𑁆𑀲𑀸𑀬𑀲𑁆𑀫𑀢𑁄’’𑀢𑀺 𑀲𑀸𑀯𑁂𑀢𑀺, 𑀧𑀸𑀞𑀸𑀦𑀼𑀭𑀽𑀧𑀢𑁆𑀢𑀸 𑀔𑁂𑀢𑁆𑀢𑀫𑁂𑀯 𑀑𑀢𑀺𑀡𑁆𑀡𑀦𑁆𑀢𑀺𑀧𑀺 𑀏𑀓𑁂. 𑀩𑁆𑀬𑀜𑁆𑀚𑀦𑀪𑁂𑀤𑀧𑁆𑀧𑀲𑀗𑁆𑀕𑀢𑁄 𑀅𑀦𑀼𑀲𑁆𑀲𑀸𑀯𑀦𑀸𑀦𑀁 𑀢𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀲𑀘𑁂 𑀧𑀦 𑀲𑀩𑁆𑀩𑀝𑁆𑀞𑀸𑀦𑁂𑀧𑀺 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀯𑀤𑀢𑀺, 𑀯𑀝𑁆𑀝𑀢𑀺.

𑀏𑀓𑀸𑀦𑀼𑀲𑁆𑀲𑀸𑀯𑀦𑁂𑀢𑀺 𑀏𑀢𑁆𑀣 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑀁 𑀏𑀢𑁂𑀲𑀦𑁆𑀢𑀺 𑀏𑀓𑀸𑀦𑀼𑀲𑁆𑀲𑀸𑀯𑀦𑀸𑀢𑀺 𑀅𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑀬𑁄 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑁂 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂’’𑀢𑀺. 𑀢𑀢𑁆𑀣 𑀏𑀓𑀢𑁄𑀢𑀺 𑀏𑀓𑀓𑁆𑀔𑀡𑁂𑀢𑀺 𑀅𑀢𑁆𑀣𑁄, 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀘𑀸𑀬𑀁 𑀦𑀺𑀤𑁆𑀤𑁂𑀲𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 ‘‘𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀇𑀢𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀏𑀓𑁂𑀦 𑀯𑀸 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁. 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀢𑀺 𑀇𑀫𑀺𑀦𑀸 𑀉𑀧𑀚𑁆𑀛𑀸𑀬𑀲𑀤𑁆𑀤𑀲𑀫𑀸𑀦𑀢𑁆𑀣𑁄 𑀉𑀧𑀚𑁆𑀛𑀸𑀲𑀤𑁆𑀤𑁄𑀧𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁧𑁨𑁩).

𑀕𑁄𑀢𑁆𑀢𑁂𑀦𑀸𑀧𑀻𑀢𑀺 ‘‘𑀆𑀬𑀲𑁆𑀫𑀢𑁄 𑀧𑀺𑀧𑁆𑀧𑀮𑀺𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀁 𑀦𑀸𑀫𑀁 𑀅𑀯𑀢𑁆𑀯𑀸 𑀕𑁄𑀢𑁆𑀢𑀦𑀸𑀫𑁂𑀦𑀧𑀻𑀢𑀺 𑀅𑀢𑁆𑀣𑁄, 𑀢𑁂𑀦 ‘‘𑀓𑁄 𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄’’𑀢𑀺 𑀧𑀼𑀝𑁆𑀞𑁂𑀦 𑀕𑁄𑀢𑁆𑀢𑀦𑀸𑀫𑁂𑀦 ‘‘𑀆𑀬𑀲𑁆𑀫𑀸 𑀓𑀲𑁆𑀲𑀧𑁄’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀢𑀲𑁆𑀲 𑀦𑀸𑀫𑀁 𑀧𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀯𑀸 𑀔𑀡𑁂 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀦𑀸𑀫𑀁 𑀧𑀜𑁆𑀜𑀸𑀧𑀺𑀢𑀁, 𑀢𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸𑀧𑀺 𑀅𑀦𑀼𑀲𑁆𑀲𑀸𑀯𑀦𑀸 𑀓𑀸𑀢𑀩𑁆𑀩𑀸. 𑀬𑀣𑀸 𑀉𑀧𑀚𑁆𑀛𑀸𑀬𑀲𑁆𑀲, 𑀏𑀯𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲𑀸𑀧𑀺 𑀕𑁄𑀢𑁆𑀢𑀸𑀤𑀺𑀦𑀸𑀫𑁂𑀦 𑀢𑀗𑁆𑀔𑀡𑀺𑀓𑀦𑀸𑀫𑁂𑀦 𑀘 𑀅𑀦𑀼𑀲𑁆𑀲𑀸𑀯𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀔𑀡𑁂 ‘‘𑀅𑀬𑀁 𑀢𑀺𑀲𑁆𑀲𑁄’’𑀢𑀺 𑀯𑀸 ‘‘𑀦𑀸𑀕𑁄’’𑀢𑀺 𑀯𑀸 𑀦𑀸𑀫𑀁 𑀓𑀭𑁄𑀦𑁆𑀢𑁂𑀳𑀺 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀢𑁄 𑀧𑀞𑀫𑀫𑁂𑀯 𑀓𑀸𑀢𑀩𑁆𑀩𑀁. 𑀏𑀯𑀁 𑀅𑀓𑀢𑁆𑀯𑀸𑀧𑀺 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀸𑀦𑀼𑀲𑀸𑀲𑀦𑀧𑀼𑀘𑁆𑀙𑀦𑀓𑀸𑀮𑁂𑀲𑀼 ‘‘𑀓𑀺𑀦𑁆𑀦𑀸𑀫𑁄𑀲𑀺, 𑀅𑀳𑀁 𑀪𑀦𑁆𑀢𑁂 𑀦𑀸𑀕𑁄 𑀦𑀸𑀫, 𑀓𑁄 𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄, 𑀉𑀧𑀚𑁆𑀛𑀸𑀬𑁄 𑀫𑁂 𑀪𑀦𑁆𑀢𑁂 𑀢𑀺𑀲𑁆𑀲𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑁂𑀦 𑀉𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑁂 ‘‘𑀫𑀫𑁂𑀢𑀁 𑀦𑀸𑀫’’𑀦𑁆𑀢𑀺 𑀬𑀣𑀸 𑀲𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀧𑀓𑀢𑀺𑀦𑀸𑀫𑁂𑀦 𑀯𑀢𑁆𑀯𑀸 𑀧𑀘𑁆𑀙𑀸 ‘‘𑀢𑀺𑀲𑁆𑀲𑁄 𑀦𑀸𑀫𑀸’’𑀢𑀺 𑀅𑀧𑀼𑀩𑁆𑀩𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀦 𑀯𑀝𑁆𑀝𑀢𑀺.

𑀢𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀦𑀸𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 ‘‘𑀢𑀺𑀲𑁆𑀲𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸𑀧𑀺 𑀧𑀼𑀕𑁆𑀕𑀮𑁂 𑀧𑀭𑀸𑀫𑀝𑁆𑀞𑁂 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺 𑀅𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀯𑀺𑀬 𑀉𑀧𑀚𑁆𑀛𑀸𑀬𑀲𑁆𑀲 𑀅𑀪𑀸𑀯𑁂𑀧𑀺 𑀅𑀪𑀩𑁆𑀩𑀢𑁆𑀢𑁂𑀧𑀺 𑀓𑀫𑁆𑀫𑀯𑀸𑀘𑀸𑀬 𑀧𑀼𑀕𑁆𑀕𑀮𑁂 𑀧𑀭𑀸𑀫𑀝𑁆𑀞𑁂 𑀓𑀫𑁆𑀫𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀦 𑀬𑀣𑀸𑀲𑀓𑀁 𑀦𑀸𑀫𑀁 𑀯𑀺𑀦𑀸 𑀅𑀜𑁆𑀜𑁂𑀦 𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑀺𑀢𑁂 𑀓𑀫𑁆𑀫𑀁 𑀓𑀼𑀧𑁆𑀧𑀢𑀺, 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀢𑀢𑁆𑀣 𑀞𑀺𑀢𑁄 𑀅𑀜𑁆𑀜𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀯𑀺𑀬 𑀕𑀳𑀺𑀢𑀦𑀸𑀫𑀲𑁆𑀲 𑀯𑀢𑁆𑀣𑀼𑀧𑀼𑀕𑁆𑀕𑀮𑀲𑁆𑀲 𑀢𑀢𑁆𑀣 𑀅𑀪𑀸𑀯𑀸, 𑀏𑀢𑀲𑁆𑀲 𑀘 𑀦𑀸𑀫𑀲𑁆𑀲 𑀅𑀦𑀼𑀲𑁆𑀲𑀸𑀯𑀦𑀸𑀬 𑀅𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀓𑀢𑀺𑀦𑀸𑀫𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀧𑀼𑀩𑁆𑀩𑁂𑀦 𑀦𑀸𑀕𑀸𑀤𑀺𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑀺𑀢𑀼𑀓𑀸𑀫𑁂𑀦 𑀧𑀝𑀺𑀓𑀘𑁆𑀘𑁂𑀯 ‘‘𑀢𑁆𑀯𑀁 𑀦𑀸𑀕𑁄’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀦𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀸𑀧𑀼𑀘𑁆𑀙𑀦𑀓𑁆𑀔𑀡𑁂𑀲𑀼𑀧𑀺 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀘 𑀬𑀣𑀸 𑀧𑀸𑀓𑀝𑀁 𑀳𑁄𑀢𑀺, 𑀢𑀣𑀸 𑀧𑀓𑀸𑀲𑁂𑀢𑁆𑀯𑀸𑀯 𑀦𑀸𑀕𑀸𑀤𑀺𑀦𑀸𑀫𑁂𑀦 𑀅𑀦𑀼𑀲𑁆𑀲𑀸𑀯𑁂𑀢𑀩𑁆𑀩𑀁. 𑀏𑀓𑀲𑁆𑀲 𑀩𑀳𑀽𑀦𑀺 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀼 𑀏𑀓𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀬𑀁 𑀧𑀦 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀉𑀧𑀚𑁆𑀛𑀸𑀬𑀸𑀦𑀁 𑀏𑀓𑀢𑁆𑀣 𑀕𑀳𑀺𑀢𑀁 𑀦𑀸𑀫𑀁 𑀢𑀤𑁂𑀯 𑀜𑀢𑁆𑀢𑀺𑀬𑀸, 𑀲𑀩𑁆𑀩𑀢𑁆𑀣 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 𑀘 𑀕𑀳𑁂𑀢𑀩𑁆𑀩𑀁. 𑀕𑀳𑀺𑀢𑀢𑁄 𑀳𑀺 𑀅𑀜𑁆𑀜𑀲𑁆𑀫𑀺𑀁 𑀕𑀳𑀺𑀢𑁂 𑀩𑁆𑀬𑀜𑁆𑀚𑀦𑀁 𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺, 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺. 𑀅𑀢𑁆𑀣𑀢𑁄 𑀳𑀺 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀪𑀺𑀦𑁆𑀦𑀸 𑀏𑀯 𑀜𑀢𑁆𑀢𑀺 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀯𑀝𑁆𑀝𑀦𑁆𑀢𑀺. 𑀉𑀧𑀚𑁆𑀛𑀸𑀬𑀦𑀸𑀫𑀲𑁆𑀲 𑀧𑀦 𑀧𑀼𑀭𑀢𑁄 ‘‘𑀆𑀬𑀲𑁆𑀫𑀢𑁄 𑀢𑀺𑀲𑁆𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀆𑀬𑀲𑁆𑀫𑀦𑁆𑀢𑀧𑀤𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑁆𑀯𑀸𑀧𑀺 𑀅𑀦𑀼𑀲𑁆𑀲𑀸𑀯𑁂𑀢𑀺. 𑀢𑀣𑀸 𑀅𑀬𑁄𑀚𑀺𑀢𑁂𑀧𑀺 𑀤𑁄𑀲𑁄 𑀦𑀢𑁆𑀣𑀺.

𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁨𑁬) 𑀧𑀦 𑀓𑀺𑀜𑁆𑀘𑀸𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀧𑀘𑁆𑀙𑀢𑁄 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀓𑀼𑀲𑀮𑁄’’𑀢𑀺𑀆𑀤𑀺𑀦𑀸 𑀦𑀸𑀫𑀲𑁆𑀲 𑀧𑀼𑀭𑀢𑁄 ‘𑀆𑀬𑀲𑁆𑀫𑀦𑁆𑀢𑀧𑀤’𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄 𑀧𑀼𑀭𑀢𑁄𑀯 𑀧𑀬𑁄𑀕𑁄 𑀬𑀼𑀢𑁆𑀢𑀢𑀭𑁄, 𑀢𑀜𑁆𑀘 𑀏𑀓𑀢𑁆𑀣 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀬𑁄𑀚𑀺𑀢𑁂𑀧𑀺 𑀏𑀓𑀢𑁆𑀣 𑀧𑀼𑀭𑀢𑁄 𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀘𑁆𑀙𑀢𑁄 𑀬𑁄𑀚𑀦𑁂𑀧𑀺 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀦𑀸𑀫 𑀦 𑀳𑁄𑀢𑀺 𑀦𑀸𑀫𑀲𑁆𑀲 𑀅𑀳𑀸𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀫𑁆𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀏𑀓𑀢𑁆𑀣 𑀬𑁄𑀚𑁂𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 ‘‘𑀆𑀬𑀲𑁆𑀫𑀢𑁄’’𑀢𑀺 𑀦 𑀬𑁄𑀚𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀜𑁆𑀘 𑀓𑀺𑀜𑁆𑀘𑀸𑀧𑀺 𑀏𑀯𑀁, 𑀢𑀣𑀸𑀧𑀺 𑀲𑀩𑁆𑀩𑀝𑁆𑀞𑀸𑀦𑁂𑀧𑀺 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀬𑁄𑀚𑁂𑀢𑁆𑀯𑀸 𑀏𑀯 𑀯𑀸 𑀅𑀬𑁄𑀚𑁂𑀢𑁆𑀯𑀸 𑀯𑀸 𑀅𑀦𑀼𑀲𑁆𑀲𑀸𑀯𑀦𑀁 𑀧𑀲𑀢𑁆𑀣𑀢𑀭𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀏𑀓𑀢𑁄 𑀲𑀳𑁂𑀯 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀁 𑀏𑀢𑁂𑀲𑀦𑁆𑀢𑀺 𑀏𑀓𑀸𑀦𑀼𑀲𑁆𑀲𑀸𑀯𑀦𑀸, 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸, 𑀏𑀢𑁂 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁. 𑀢𑁂𑀦𑀸𑀳 ‘‘𑀏𑀓𑀢𑁄𑀅𑀦𑀼𑀲𑀸𑀯𑀦𑁂’’𑀢𑀺. 𑀇𑀤𑀜𑁆𑀘 𑀏𑀓𑀁 𑀧𑀤𑀁 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀤𑀝𑁆𑀞𑀩𑁆𑀩𑀁. 𑀏𑀓𑁂𑀦 𑀯𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀸𑀬 𑀏𑀯 𑀓𑀫𑁆𑀫𑀯𑀸𑀘𑀸𑀬 𑀅𑀦𑀼𑀲𑁆𑀲𑀸𑀯𑀦𑁂 𑀏𑀓𑁂𑀦 𑀆𑀘𑀭𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀘 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀆𑀬𑀲𑁆𑀫𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀤𑁆𑀯𑀺𑀦𑁆𑀦𑀫𑁂𑀓𑀲𑁆𑀫𑀺𑀁 𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀦𑀬𑁄 𑀤𑀝𑁆𑀞𑀩𑁆𑀩𑁄, 𑀇𑀫𑀺𑀦𑀸𑀯 𑀦𑀬𑁂𑀦 𑀢𑀺𑀡𑁆𑀡𑀫𑁆𑀧𑀺 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀏𑀓𑀓𑁆𑀔𑀡𑁂 𑀅𑀦𑀼𑀲𑁆𑀲𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀭𑀺𑀫𑀦𑀬𑁂𑀦𑁂𑀯 𑀏𑀓𑀢𑁄 𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 ‘‘𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀇𑀢𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀺𑀦𑁆𑀦𑀁 𑀤𑁆𑀯𑀻𑀳𑀺 𑀯𑀸 𑀢𑀺𑀡𑁆𑀡𑀁 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺, 𑀏𑀓𑁂𑀦 𑀯𑀸 𑀆𑀘𑀭𑀺𑀬𑁂𑀦 𑀢𑀬𑁄𑀧𑀺 𑀏𑀓𑀢𑁄𑀅𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀜𑁆𑀘 𑀔𑁄 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦, 𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀇𑀤𑀁 𑀏𑀓𑁂𑀦 𑀆𑀘𑀭𑀺𑀬𑁂𑀦 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀉𑀧𑀚𑁆𑀛𑀸𑀬𑁂𑀳𑀺 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁂 𑀏𑀓𑀓𑁆𑀔𑀡𑁂 𑀏𑀓𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀬 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀝𑀺𑀓𑁆𑀔𑁂𑀧𑀧𑀤𑀁, 𑀦 𑀧𑀦 𑀦𑀸𑀦𑀸𑀘𑀭𑀺𑀬𑁂𑀳𑀺 𑀦𑀸𑀦𑀼𑀧𑀚𑁆𑀛𑀸𑀬𑁂𑀳𑀺 𑀢𑀬𑁄 𑀏𑀓𑀸𑀦𑀼𑀲𑁆𑀲𑀸𑀯𑀦𑁂 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀲𑀘𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀦𑀸𑀦𑀼𑀧𑀚𑁆𑀛𑀸𑀬𑀸…𑀧𑁂… 𑀯𑀝𑁆𑀝𑀢𑀻’’𑀢𑀺. 𑀬𑀜𑁆𑀘𑁂𑀢𑁆𑀣 ‘‘𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓’’𑀦𑁆𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀅𑀦𑀼𑀲𑁆𑀲𑀸𑀯𑀦𑀓𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁. 𑀢𑀲𑁆𑀫𑀸 𑀲𑀘𑁂 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺, 𑀯𑀝𑁆𑀝𑀢𑀺 𑀏𑀯. 𑀲𑀘𑁂 𑀧𑀦 𑀉𑀧𑀚𑁆𑀛𑀸𑀬𑁄 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺, 𑀅𑀦𑀼𑀧𑀚𑁆𑀛𑀸𑀬𑀓𑀲𑁆𑀲𑀧𑀺 𑀬𑁂𑀦 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀯𑀺𑀢𑁂 𑀉𑀧𑀲𑀫𑁆𑀧𑀤𑀸 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀲𑀉𑀧𑀚𑁆𑀛𑀸𑀬𑀓𑀲𑁆𑀲 𑀉𑀧𑀚𑁆𑀛𑀸𑀬𑁂𑀦𑁂𑀯 𑀅𑀦𑀼𑀲𑁆𑀲𑀸𑀯𑀦𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀦𑀯𑀝𑁆𑀝𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀉𑀧𑀚𑁆𑀛𑀸𑀢𑀺 𑀉𑀧𑀚𑁆𑀛𑀸𑀬𑀲𑀤𑁆𑀤𑀲𑀫𑀸𑀦𑀢𑁆𑀣𑁄 𑀆𑀓𑀸𑀭𑀦𑁆𑀢𑁄 𑀉𑀧𑀚𑁆𑀛𑀸𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬-𑀲𑀤𑁆𑀤𑁄 𑀏𑀯 𑀯𑀸 𑀉𑀧𑀚𑁆𑀛𑀸, 𑀉𑀧𑀬𑁄𑀕𑀧𑀘𑁆𑀘𑀢𑁆𑀢𑀯𑀘𑀦𑁂𑀲𑀼 𑀬-𑀓𑀸𑀭 𑀮𑁄𑀧𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑁄 𑀓𑀭𑀡𑀯𑀘𑀦𑀸𑀤𑀻𑀲𑀼 𑀉𑀧𑀚𑁆𑀛𑀸𑀲𑀤𑁆𑀤𑀲𑁆𑀲 𑀧𑀬𑁄𑀕𑀸𑀪𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀸𑀴𑀺𑀬𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑀸𑀯 𑀓𑀢𑁆𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀅𑀢𑁆𑀢𑀸𑀦𑀫𑁂𑀯 𑀓𑀫𑁆𑀫𑀪𑀽𑀢𑀁 𑀧𑀢𑀺 𑀲𑀫𑁆𑀫𑀦𑁆𑀦𑀦𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁, 𑀅𑀢𑁆𑀢𑀸𑀦𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀣𑁂𑀯, 𑀅𑀜𑁆𑀜𑀢𑁆𑀭𑀸𑀧𑀺 𑀢𑁂𑀭𑀲𑀲𑀫𑁆𑀫𑀼𑀢𑀺𑀆𑀤𑀻𑀲𑀼 𑀇𑀫𑀺𑀦𑀸𑀯 𑀮𑀓𑁆𑀔𑀡𑁂𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀯. 𑀅𑀧𑀺𑀘 𑀲𑀬𑀁 𑀓𑀫𑁆𑀫𑀸𑀭𑀳𑀢𑁆𑀢𑀸 𑀅𑀢𑁆𑀢𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑀢𑀼𑀯𑀕𑁆𑀕𑀸𑀤𑀺𑀓𑁄 𑀕𑀡𑁄 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄.

𑀲𑀘𑁆𑀘𑀓𑀸𑀮𑁄𑀢𑀺 ‘‘𑀦𑀺𑀕𑀽𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀜𑁆𑀘𑀦𑀁 𑀧𑀳𑀸𑀬 𑀲𑀘𑁆𑀘𑀲𑁆𑀲𑁂𑀯 𑀢𑁂 𑀇𑀘𑁆𑀙𑀺𑀢𑀩𑁆𑀩𑀓𑀸𑀮𑁄. 𑀪𑀽𑀢𑀓𑀸𑀮𑁄𑀢𑀺 𑀯𑀜𑁆𑀘𑀦𑀸𑀬 𑀅𑀪𑀸𑀯𑁂𑀧𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀯𑀢𑁆𑀣𑀼𑀦𑁄 𑀪𑀽𑀢𑀢𑀸𑀬 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀓𑀸𑀮𑁄, 𑀇𑀢𑀭𑀣𑀸 𑀓𑀫𑁆𑀫𑀓𑁄𑀧𑀸𑀤𑀺𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀗𑁆𑀓𑀽𑀢𑀺 𑀅𑀥𑁄𑀫𑀼𑀔𑁄. 𑀉𑀤𑁆𑀥𑀭𑀢𑀽𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑀢𑁄 𑀉𑀧𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀧𑁂𑀢𑀽𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀓𑀫𑁆𑀫𑀯𑀸𑀘𑀸𑀲𑀼 𑀅𑀢𑁆𑀣𑀓𑁄𑀲𑀮𑁆𑀮𑀢𑁆𑀣𑀁 𑀧𑀦𑁂𑀢𑁆𑀣 𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀬 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀲𑀼𑀡𑀸𑀢𑀽𑀢𑀺 𑀲𑀯𑀦𑀸𑀡𑀢𑁆𑀢𑀺𑀬𑀁 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁. 𑀢𑀜𑁆𑀘 𑀓𑀺𑀜𑁆𑀘𑀸𑀧𑀺 𑀬𑁄 𑀲𑁄 𑀲𑀗𑁆𑀖𑁄 𑀲𑀯𑀦𑀓𑀺𑀭𑀺𑀬𑀸𑀬𑀁 𑀦𑀺𑀬𑁄𑀚𑀻𑀬𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀢𑁆𑀢𑀸 ‘‘𑀲𑀼𑀡𑀸𑀳𑀻’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀘𑀦𑁂𑀦 𑀯𑀢𑁆𑀢𑀩𑁆𑀩𑀁, 𑀢𑀣𑀸𑀧𑀺 𑀬𑀲𑁆𑀫𑀸 𑀲𑀗𑁆𑀖𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄𑀯 𑀲𑀤𑁆𑀤𑀯𑀺𑀤𑀽𑀳𑀺 𑀲𑀫𑀸𑀘𑀺𑀡𑁆𑀡𑁄 𑀪𑀯𑀦𑁆𑀢𑀪𑀕𑀯𑀦𑁆𑀢𑀆𑀬𑀲𑁆𑀫𑀸𑀤𑀺𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀲𑀼 𑀯𑀺𑀬 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 (𑀧𑀸𑀭𑀸. 𑁨𑁨), 𑀏𑀢𑀲𑁆𑀲 𑀲𑀼𑀕𑀢 𑀓𑀸𑀮𑁄, 𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬 (𑀧𑀸𑀭𑀸. 𑁨𑁧), 𑀧𑀓𑁆𑀓𑀫𑀢𑀸𑀬𑀲𑁆𑀫𑀸 (𑀧𑀸𑀭𑀸. 𑁪𑁩𑁬), 𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁬𑁮). 𑀢𑀲𑁆𑀫𑀸 𑀇𑀥 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀓𑀢𑁄. 𑀅𑀣 𑀯𑀸 𑀕𑀸𑀭𑀯𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼 𑀳𑀺 𑀕𑀸𑀭𑀯𑀯𑀲𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑀬𑁄𑀕𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀺 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀁 𑀧𑀬𑀼𑀚𑁆𑀚𑀦𑁆𑀢𑀺 ‘‘𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁬; 𑀫. 𑀦𑀺. 𑁨.𑁩𑁩𑁮; 𑀫𑀳𑀸𑀯. 𑁮) 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀪𑀦𑁆𑀢𑁂 𑀆𑀯𑀼𑀲𑁄𑀢𑀺 𑀧𑀤𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀥 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 ‘‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺 (𑀫𑀳𑀸𑀯. 𑁭𑁭), 𑀇𑀗𑁆𑀖𑀸𑀯𑀼𑀲𑁄 𑀉𑀧𑀸𑀮𑀺, 𑀇𑀫𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀬𑀼𑀜𑁆𑀚𑀸𑀳𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁫𑁧𑁭) 𑀢𑀧𑁆𑀧𑀬𑁄𑀕𑁂𑀧𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀲𑁆𑀲𑁂𑀯 𑀤𑀲𑁆𑀲𑀦𑀢𑁄.

𑀫𑁂𑀢𑀺 𑀬𑁄 𑀲𑀸𑀯𑁂𑀢𑀺, 𑀢𑀲𑁆𑀲 𑀅𑀢𑁆𑀢𑀦𑀺𑀤𑁆𑀤𑁂𑀲𑁂 𑀲𑀸𑀫𑀺𑀯𑀘𑀦𑀁. 𑀪𑀦𑁆𑀢𑁂𑀢𑀺 𑀆𑀮𑀧𑀦𑀢𑁆𑀣𑁂 𑀯𑀼𑀟𑁆𑀠𑁂𑀲𑀼 𑀲𑀕𑀸𑀭𑀯𑀯𑀘𑀦𑀁, ‘‘𑀆𑀯𑀼𑀲𑁄’’𑀢𑀺 𑀧𑀤𑀁 𑀧𑀦 𑀦𑀯𑀓𑁂𑀲𑀼. 𑀢𑀤𑀼𑀪𑀬𑀫𑁆𑀧𑀺 𑀦𑀺𑀧𑀸𑀢𑁄 ‘‘𑀢𑀼𑀫𑁆𑀳𑁂 𑀪𑀦𑁆𑀢𑁂 𑀢𑀼𑀫𑁆𑀳𑁂 𑀆𑀯𑀼𑀲𑁄’’𑀢𑀺 𑀩𑀳𑀽𑀲𑀼𑀧𑀺 𑀲𑀫𑀸𑀦𑀭𑀽𑀧𑀢𑁆𑀢𑀸. 𑀲𑀗𑁆𑀖𑁄𑀢𑀺 𑀅𑀯𑀺𑀲𑁂𑀲𑀢𑁄 𑀘𑀢𑀼𑀯𑀕𑁆𑀕𑀸𑀤𑀺𑀓𑁂 𑀧𑀓𑀢𑀢𑁆𑀢𑀧𑀼𑀕𑁆𑀕𑀮𑀲𑀫𑀽𑀳𑁂 𑀯𑀢𑁆𑀢𑀢𑀺. 𑀇𑀥 𑀧𑀦 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀜𑁆𑀘𑀯𑀕𑁆𑀕𑀢𑁄 𑀧𑀝𑁆𑀞𑀸𑀬, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀤𑀲𑀯𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀧𑀺𑀡𑁆𑀟𑀢𑁆𑀣𑁄 𑁋 𑀪𑀦𑁆𑀢𑁂, 𑀲𑀗𑁆𑀖𑁄 𑀫𑀫 𑀯𑀘𑀦𑀁 𑀲𑀼𑀡𑀸𑀢𑀽𑀢𑀺. 𑀇𑀤𑀜𑁆𑀘 𑀦𑀯𑀓𑀢𑀭𑁂𑀦 𑀯𑀢𑁆𑀢𑀩𑁆𑀩𑀯𑀘𑀦𑀁. 𑀲𑀘𑁂 𑀧𑀦 𑀅𑀦𑀼𑀲𑁆𑀲𑀸𑀯𑀓𑁄 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, ‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄 𑀲𑀗𑁆𑀖𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁄𑀧𑀺 𑀘𑁂 ‘‘𑀪𑀦𑁆𑀢𑁂’’𑀢𑀺 𑀯𑀤𑁂𑀬𑁆𑀬, 𑀦𑀯𑀓𑀢𑀭𑁄 𑀯𑀸 ‘‘𑀆𑀯𑀼𑀲𑁄’’𑀢𑀺, 𑀓𑀫𑁆𑀫𑀓𑁄𑀧𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 ‘‘𑀏𑀓𑀢𑁆𑀣 ‘𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑁆𑀣 ‘𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂𑀧𑀺 𑀦𑀢𑁆𑀣𑀺 𑀤𑁄𑀲𑁄 𑀉𑀪𑀬𑁂𑀦𑀧𑀺 𑀆𑀮𑀧𑀦𑀲𑁆𑀲 𑀲𑀺𑀚𑁆𑀛𑀦𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑁄 ‘‘𑀲𑀼𑀡𑀸𑀢𑀽’’𑀢𑀺 𑀲𑀗𑁆𑀖𑀁 𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀢𑀁 𑀜𑀸𑀧𑁂𑀦𑁆𑀢𑁄 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀬𑀦𑁆𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀳𑀢𑁆𑀣𑀧𑀸𑀲𑁂 𑀲𑀦𑁆𑀦𑀺𑀳𑀺𑀢𑀪𑀸𑀯𑀤𑀲𑁆𑀲𑀦𑀁, 𑀢𑁂𑀦 𑀘 𑀳𑀢𑁆𑀣𑀧𑀸𑀲𑁂 𑀞𑀺𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀻𑀢𑀺 𑀲𑀺𑀚𑁆𑀛𑀢𑀺 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀲𑁆𑀲 ‘‘𑀅𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀢𑁄. 𑀢𑁂𑀦𑁂𑀯 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀬𑀁 𑀲𑁄 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑀢𑁆𑀢𑀸 ‘‘𑀅𑀬’’𑀦𑁆𑀢𑀺 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀳𑀢𑁆𑀣𑀧𑀸𑀲𑁂 𑀞𑀧𑁂𑀢𑀩𑁆𑀩𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄𑀢𑀺 𑀅𑀬𑀁-𑀲𑀤𑁆𑀤𑁄 𑀘 𑀅𑀯𑀲𑁆𑀲𑀁 𑀧𑀬𑀼𑀚𑁆𑀚𑀺𑀢𑀩𑁆𑀩𑁄, 𑀲𑁄 𑀘 𑀇𑀫𑀲𑁆𑀫𑀺𑀁 𑀧𑀞𑀫𑀦𑀸𑀫𑀧𑀬𑁄𑀕𑁂 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀇𑀤𑀁 𑀅𑀦𑀺𑀬𑀫𑀢𑁄 𑀢𑀲𑁆𑀲 𑀦𑀸𑀫𑀤𑀲𑁆𑀲𑀦𑀁, 𑀉𑀪𑀬𑁂𑀦𑀧𑀺 𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄𑀢𑀺𑀆𑀤𑀺𑀦𑀸𑀫𑀁 𑀤𑀲𑁆𑀲𑁂𑀢𑀺. ‘‘𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀯𑀺𑀲𑀬𑁂 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄, 𑀉𑀧𑀲𑀫𑁆𑀧𑀤𑀁 𑀫𑁂 𑀲𑀗𑁆𑀖𑁄 𑀅𑀧𑁂𑀓𑁆𑀔𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀘 𑀉𑀧𑀚𑁆𑀛𑀸𑀬𑀢𑀁 𑀲𑀫𑀗𑁆𑀕𑀺𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀆𑀬𑀲𑁆𑀫𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀪𑀽𑀢𑁄 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀦𑀸𑀫𑀬𑁄𑀚𑀦𑀸𑀬 𑀲𑀳 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀏𑀢𑁆𑀣 𑀘 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀅𑀯𑀢𑁆𑀯𑀸𑀧𑀺 ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀢𑁆𑀣 ‘‘𑀆𑀬𑀲𑁆𑀫𑀢𑁄’’𑀢𑀺 𑀧𑀤𑀁 𑀦 𑀯𑀼𑀢𑁆𑀢𑀁. 𑀬𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀦𑀦𑀼 𑀘𑁂𑀢𑁆𑀣 𑀉𑀧𑀚𑁆𑀛𑀸𑀬𑁄𑀧𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀯𑀺𑀬 𑀳𑀢𑁆𑀣𑀧𑀸𑀲𑁂 𑀞𑀺𑀢𑁄 𑀏𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀣 𑀓𑀲𑁆𑀫𑀸 ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀇𑀫𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’’𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑀲𑁆𑀲 𑀦𑀸𑀫𑀧𑀭𑀸𑀫𑀲𑀦𑁂𑀧𑀺 𑀇𑀤𑀁-𑀲𑀤𑁆𑀤𑀧𑁆𑀧𑀬𑁄𑀕𑁄 𑀦 𑀓𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄 𑀉𑀧𑀚𑁆𑀛𑀸𑀬𑀲𑁆𑀲 𑀅𑀪𑀸𑀯𑁂𑀧𑀺 𑀓𑀫𑁆𑀫𑀓𑁄𑀧𑀸𑀪𑀸𑀯𑀢𑁄. 𑀓𑁂𑀯𑀮𑀜𑁆𑀳𑀺 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀦𑁆𑀢𑀧𑀤𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀦𑀸𑀫𑀓𑀺𑀢𑁆𑀢𑀦𑀁 𑀅𑀦𑀼𑀧𑀚𑁆𑀛𑀸𑀬𑀲𑁆𑀲 𑀉𑀧𑀲𑀫𑁆𑀧𑀤𑀸𑀤𑀻𑀲𑀼𑀧𑀺 𑀓𑀭𑀻𑀬𑀢𑀺, 𑀢𑀲𑁆𑀫𑀸 𑀉𑀧𑀚𑁆𑀛𑀸𑀬𑀲𑁆𑀲 𑀅𑀲𑀦𑁆𑀦𑀺𑀳𑀺𑀢𑀸𑀬𑀧𑀺 𑀢𑀧𑁆𑀧𑀭𑀸𑀫𑀲𑀦𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀲𑀺𑀤𑁆𑀥𑀺𑀢𑁄 ‘‘𑀇𑀫𑀲𑁆𑀲𑀸’’𑀢𑀺 𑀦𑀺𑀤𑁆𑀤𑀺𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺.

𑀧𑀭𑀺𑀲𑀼𑀤𑁆𑀥𑁄 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀅𑀪𑀩𑁆𑀩𑀢𑁆𑀢𑀸𑀤𑀺𑀓𑁂𑀳𑀺 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀓𑀭𑁂𑀳𑀺 𑀘𑁂𑀯 𑀧𑀜𑁆𑀘𑀸𑀩𑀸𑀥𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀻𑀳𑀺 𑀆𑀧𑀢𑁆𑀢𑀺𑀓𑀭𑁂𑀳𑀺 𑀘 𑀅𑀦𑁆𑀢𑀭𑀸𑀬𑀺𑀓𑀲𑀪𑀸𑀯𑁂𑀳𑀺 𑀧𑀭𑀺𑀫𑀼𑀢𑁆𑀢𑁄. 𑀏𑀯𑀁 𑀯𑀼𑀢𑁆𑀢𑁂 𑀏𑀯 𑀆𑀧𑀢𑁆𑀢𑀺𑀫𑀢𑁆𑀢𑀓𑀭𑁂𑀳𑀺 𑀧𑀜𑁆𑀘𑀸𑀩𑀸𑀥𑀸𑀤𑀻𑀳𑀺 𑀅𑀧𑀭𑀺𑀫𑀼𑀢𑁆𑀢𑀲𑁆𑀲𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀦𑀸𑀜𑁆𑀜𑀣𑀸. 𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀏𑀯𑀁 𑀯𑀼𑀢𑁆𑀢𑁂 𑀏𑀯 𑀅𑀧𑀢𑁆𑀢𑀘𑀻𑀯𑀭𑀲𑁆𑀲𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀺, 𑀦𑀸𑀜𑁆𑀜𑀣𑀸. 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻𑀢𑀺 ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀉𑀧𑀲𑀫𑁆𑀧𑀤𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁨𑁬) 𑀬𑀸𑀘𑀸𑀧𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀢𑁂𑀦 𑀲𑀗𑁆𑀖𑁂 𑀅𑀬𑀸𑀘𑀺𑀢𑁂𑀧𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 𑀯𑀼𑀢𑁆𑀢𑁂 𑀏𑀯 𑀓𑀫𑁆𑀫𑀁 𑀅𑀯𑀺𑀧𑀦𑁆𑀦𑀁 𑀳𑁄𑀢𑀺, 𑀦𑀸𑀜𑁆𑀜𑀣𑀸. 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀉𑀧𑀚𑁆𑀛𑀸𑀬𑁂𑀦 𑀓𑀭𑀡𑀪𑀽𑀢𑁂𑀦, 𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀚𑁆𑀛𑀸𑀬𑀁 𑀓𑀢𑁆𑀯𑀸 𑀓𑀫𑁆𑀫𑀪𑀽𑀢𑀁 𑀉𑀧𑀲𑀫𑁆𑀧𑀤𑀁 𑀤𑀸𑀢𑀼𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀓𑀢𑁆𑀢𑀼𑀪𑀽𑀢𑀁 𑀲𑀗𑁆𑀖𑀁 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀘𑀥𑀸𑀢𑀼𑀦𑁄 𑀧𑀦 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 ‘‘𑀲𑀗𑁆𑀖𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀤𑁆𑀯𑁂 𑀓𑀫𑁆𑀫𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀏𑀢𑁆𑀣 𑀧𑀢𑁆𑀢𑁄 𑀓𑀸𑀮𑁄 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀧𑀢𑁆𑀢𑀓𑀸𑀮𑀁, 𑀅𑀧𑀮𑁄𑀓𑀦𑀸𑀤𑀺𑀘𑀢𑀼𑀩𑁆𑀩𑀺𑀥𑀁 𑀲𑀗𑁆𑀖𑀕𑀡𑀓𑀫𑁆𑀫𑀁, 𑀢𑀤𑁂𑀯 𑀲𑀓𑀢𑁆𑀣𑁂 𑀬-𑀧𑀘𑁆𑀘𑀬𑁂𑀦 ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀚𑀸𑀢𑀁. 𑀬𑀤𑀻𑀢𑀺 𑀅𑀦𑀼𑀫𑀢𑀺𑀕𑀳𑀡𑀯𑀲𑁂𑀦 𑀓𑀫𑁆𑀫𑀲𑁆𑀲 𑀧𑀢𑁆𑀢𑀓𑀮𑁆𑀮𑀢𑀁 𑀜𑀸𑀧𑁂𑀢𑀺, 𑀬𑁄 𑀳𑀺 𑀓𑁄𑀘𑀺 𑀢𑀢𑁆𑀣 𑀅𑀧𑀢𑁆𑀢𑀓𑀮𑁆𑀮𑀢𑀁 𑀫𑀜𑁆𑀜𑀺𑀲𑁆𑀲𑀢𑀺, 𑀲𑁄 𑀯𑀓𑁆𑀔𑀢𑀺. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀅𑀦𑀼𑀲𑁆𑀲𑀸𑀯𑀦𑀸𑀲𑀼 ‘‘𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺…𑀧𑁂… 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁧𑁨𑁭) 𑀯𑀼𑀢𑁆𑀢𑀁. 𑀢𑀤𑁂𑀢𑀁 𑀧𑀢𑁆𑀢𑀓𑀮𑁆𑀮𑀁 𑀯𑀢𑁆𑀣𑀼𑀲𑀫𑁆𑀧𑀤𑀸, 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀘𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀸, 𑀲𑀻𑀫𑀸𑀲𑀫𑁆𑀧𑀤𑀸, 𑀧𑀭𑀺𑀲𑀸𑀲𑀫𑁆𑀧𑀤𑀸, 𑀧𑀼𑀩𑁆𑀩𑀓𑀺𑀘𑁆𑀘𑀦𑀺𑀝𑁆𑀞𑀸𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀁.

𑀢𑀢𑁆𑀣 𑀯𑀢𑁆𑀣𑀼𑀲𑀫𑁆𑀧𑀤𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑁂𑀳𑀺 𑀏𑀓𑀸𑀤𑀲𑀅𑀪𑀩𑁆𑀩𑀧𑀼𑀕𑁆𑀕𑀮𑁂𑀳𑀺 𑀘𑁂𑀯 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑁂𑀳𑀺 𑀘 𑀅𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀽𑀢𑁄 𑀫𑀦𑀼𑀲𑁆𑀲𑀧𑀼𑀭𑀺𑀲𑁄. 𑀏𑀢𑀲𑁆𑀫𑀺𑀜𑁆𑀳𑀺 𑀧𑀼𑀕𑁆𑀕𑀮𑁂 𑀲𑀢𑀺 𑀏𑀯 𑀇𑀤𑀁 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺, 𑀓𑀢𑀜𑁆𑀘 𑀓𑀼𑀧𑁆𑀧𑀫𑁂𑀯 𑀳𑁄𑀢𑀺.

𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀥𑀫𑁆𑀫𑁂𑀳𑀺 𑀘𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯 𑀉𑀧𑀲𑀫𑁆𑀧𑀤𑀸𑀯𑀢𑁆𑀣𑀼𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀬𑁂 𑀇𑀫𑁂 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀜𑁆𑀘𑀸𑀩𑀸𑀥𑀨𑀼𑀝𑁆𑀞𑀢𑀸𑀤𑀬𑁄 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀢𑀸𑀧𑀅𑀬𑁄𑀲𑀸𑀦𑀸 𑀘𑁂𑀯 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀘 𑀤𑁄𑀲𑀥𑀫𑁆𑀫𑀸 𑀓𑀸𑀭𑀓𑀲𑀗𑁆𑀖𑀲𑁆𑀲 𑀆𑀧𑀢𑁆𑀢𑀸𑀤𑀺𑀅𑀦𑁆𑀢𑀭𑀸𑀬𑀳𑁂𑀢𑀼𑀢𑀸𑀬 ‘‘𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀳𑀺 𑀅𑀦𑁆𑀢𑀭𑀸𑀬𑀺𑀓𑁂𑀳𑀺 𑀤𑁄𑀲𑀥𑀫𑁆𑀫𑁂𑀳𑀺 𑀧𑀭𑀺𑀫𑀼𑀢𑁆𑀢𑀢𑀸, 𑀇𑀫𑀺𑀲𑁆𑀲𑀸 𑀘 𑀲𑀢𑀺 𑀏𑀯 𑀇𑀤𑀁 𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺, 𑀓𑀢𑀁 𑀧𑀦 𑀓𑀫𑁆𑀫𑀁 𑀲𑀼𑀓𑀢𑀫𑁂𑀯 𑀳𑁄𑀢𑀺 𑀞𑀧𑁂𑀢𑁆𑀯𑀸 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁.

𑀲𑀻𑀫𑀸𑀲𑀫𑁆𑀧𑀤𑀸 𑀧𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁩𑁮 𑀆𑀤𑀬𑁄) 𑀯𑀓𑁆𑀔𑀫𑀸𑀦𑀦𑀬𑁂𑀦 𑀲𑀩𑁆𑀩𑀤𑁄𑀲𑀭𑀳𑀺𑀢𑀸𑀬 𑀩𑀤𑁆𑀥𑀸𑀩𑀤𑁆𑀥𑀯𑀲𑁂𑀦𑁂𑀯 𑀤𑀼𑀯𑀺𑀥𑀸𑀬 𑀲𑀻𑀫𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀤𑀺𑀲𑀸𑀬 𑀳𑀺 𑀲𑀻𑀫𑀸𑀬 𑀲𑀢𑀺 𑀏𑀯 𑀇𑀤𑀁 𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺, 𑀓𑀢𑀜𑁆𑀘 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺.

𑀧𑀭𑀺𑀲𑀸𑀲𑀫𑁆𑀧𑀤𑀸 𑀧𑀦 𑀬𑁂 𑀇𑀫𑁂 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀲𑁆𑀲 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀓𑀫𑁆𑀫𑀧𑁆𑀧𑀢𑁆𑀢𑀸 𑀤𑀲𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀅𑀦𑀽𑀦𑀸𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸 𑀅𑀦𑀼𑀓𑁆𑀔𑀺𑀢𑁆𑀢𑀸 𑀘 𑀲𑀫𑀸𑀦𑀲𑀁𑀯𑀸𑀲𑀓𑀸 𑀪𑀺𑀓𑁆𑀔𑀽, 𑀢𑁂𑀲𑀁 𑀏𑀓𑀲𑀻𑀫𑀸𑀬 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀸𑀦𑀁, 𑀙𑀦𑁆𑀤𑀸𑀭𑀳𑀸𑀦𑀜𑁆𑀘 𑀙𑀦𑁆𑀤𑀲𑁆𑀲 𑀆𑀦𑀬𑀦𑀁, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁄𑀲𑀦𑀁, 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀭𑀳𑀺𑀢𑀸𑀦𑀁 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀁 𑀕𑀳𑀝𑁆𑀞𑀸𑀤𑀺𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀜𑁆𑀘𑁂𑀯 𑀧𑀸𑀭𑀸𑀚𑀺𑀓𑀼𑀓𑁆𑀔𑀺𑀢𑁆𑀢𑀓𑀦𑀸𑀦𑀸𑀲𑀁𑀯𑀸𑀲𑀓𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑁂 𑀅𑀪𑀸𑀯𑁄 𑀘𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀸. 𑀏𑀯𑀭𑀽𑀧𑀸𑀬 𑀘 𑀧𑀭𑀺𑀲𑀸𑀲𑀫𑁆𑀧𑀤𑀸𑀬 𑀲𑀢𑀺 𑀏𑀯 𑀇𑀤𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀢𑀭𑀲𑁆𑀲𑀧𑀺 𑀅𑀪𑀸𑀯𑁂 𑀓𑀢𑀁 𑀓𑀫𑁆𑀫𑀁 𑀯𑀺𑀧𑀚𑁆𑀚𑀢𑀺, 𑀦 𑀧𑀘𑁆𑀙𑀺𑀫𑀲𑁆𑀲.

𑀧𑀼𑀩𑁆𑀩𑀓𑀺𑀘𑁆𑀘𑀦𑀺𑀝𑁆𑀞𑀸𑀦𑀁 𑀦𑀸𑀫 𑀬𑀸𑀦𑀺𑀫𑀸𑀦𑀺 ‘‘𑀧𑀞𑀫𑀁 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 (𑀫𑀳𑀸𑀯. 𑁧𑁨𑁬) 𑀯𑀼𑀢𑁆𑀢𑀸𑀦𑀺 ‘‘𑀉𑀧𑀚𑁆𑀛𑀸𑀕𑀸𑀳𑀸𑀧𑀦𑀁, 𑀧𑀢𑁆𑀢𑀘𑀻𑀯𑀭𑀸𑀘𑀺𑀓𑁆𑀔𑀡𑀁, 𑀢𑀢𑁄 𑀢𑀁 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀧𑁂𑀲𑁂𑀢𑁆𑀯𑀸 𑀅𑀦𑀼𑀲𑀸𑀲𑀓𑀲𑀫𑁆𑀫𑀼𑀢𑀺𑀓𑀫𑁆𑀫𑀓𑀭𑀡𑀁, 𑀲𑀫𑁆𑀫𑀢𑁂𑀦 𑀘 𑀕𑀦𑁆𑀢𑁆𑀯𑀸 𑀅𑀦𑀼𑀲𑀸𑀲𑀦𑀁, 𑀢𑁂𑀦 𑀘 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀜𑀢𑁆𑀢𑀺𑀁 𑀜𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀁 ‘𑀆𑀕𑀘𑁆𑀙𑀸𑀳𑀻’𑀢𑀺 𑀳𑀢𑁆𑀣𑀧𑀸𑀲𑁂 𑀏𑀯 𑀅𑀩𑁆𑀪𑀸𑀦𑀁, 𑀢𑁂𑀦 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀬𑀸𑀘𑀸𑀧𑀦𑀁, 𑀢𑀢𑁄 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀧𑀼𑀘𑁆𑀙𑀓𑀲𑀫𑁆𑀫𑀼𑀢𑀺𑀓𑀫𑁆𑀫𑀓𑀭𑀡𑀁, 𑀲𑀫𑁆𑀫𑀢𑁂𑀦 𑀘 𑀧𑀼𑀘𑁆𑀙𑀦’’𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀬𑀸𑀣𑀸𑀯𑀢𑁄 𑀓𑀭𑀡𑁂𑀦 𑀦𑀺𑀝𑁆𑀞𑀸𑀦𑀁. 𑀏𑀢𑀲𑁆𑀫𑀺𑀜𑁆𑀘 𑀧𑀼𑀩𑁆𑀩𑀓𑀺𑀘𑁆𑀘𑀦𑀺𑀝𑁆𑀞𑀸𑀧𑀦𑁂 𑀲𑀢𑀺 𑀏𑀯 𑀇𑀤𑀁 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀧𑀢𑁆𑀢𑀓𑀮𑁆𑀮𑀁 𑀦𑀸𑀫 𑀳𑁄𑀢𑀺, 𑀦𑀸𑀲𑀢𑀺. 𑀏𑀢𑁂𑀲𑀼 𑀧𑀦 𑀧𑀼𑀩𑁆𑀩𑀓𑀫𑁆𑀫𑁂𑀲𑀼 𑀅𑀓𑀢𑁂𑀲𑀼𑀧𑀺 𑀓𑀢𑀁 𑀓𑀫𑁆𑀫𑀁 𑀬𑀣𑀸𑀯𑀼𑀢𑁆𑀢𑁂𑀲𑀼 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀆𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀓𑀼𑀧𑁆𑀧𑀫𑁂𑀯 𑀳𑁄𑀢𑀺. 𑀢𑀤𑁂𑀯𑀫𑁂𑀢𑁆𑀣 𑀧𑀢𑁆𑀢𑀓𑀮𑁆𑀮𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸𑀯 𑀦𑀬𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼, 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼 𑀓𑀫𑁆𑀫𑁂𑀲𑀼 𑀧𑀢𑁆𑀢𑀓𑀮𑁆𑀮𑀢𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑁆𑀯𑀸 𑀜𑀸𑀢𑀩𑁆𑀩𑀸.

𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀤𑀸𑀦𑀺𑀧𑁆𑀨𑀸𑀤𑀦𑁂𑀦 𑀢𑀁𑀲𑀫𑀗𑁆𑀕𑀺𑀁 𑀓𑀭𑁂𑀬𑁆𑀬 𑀓𑀭𑁄𑀢𑀽𑀢𑀺 𑀧𑀢𑁆𑀣𑀦𑀸𑀬𑀁, 𑀯𑀺𑀥𑀺𑀫𑁆𑀳𑀺 𑀯𑀸 𑀇𑀤𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀳𑀺 ‘‘𑀤𑁂𑀯𑀤𑀢𑁆𑀢𑀁 𑀲𑀼𑀔𑀸𑀧𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀼𑀔𑀫𑀲𑁆𑀲 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀁 𑀲𑀼𑀔𑀲𑀫𑀗𑁆𑀕𑀺𑀦𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 𑀉𑀧𑀲𑀫𑁆𑀧𑀤𑀫𑀲𑁆𑀲 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀢𑀁 𑀉𑀧𑀲𑀫𑁆𑀧𑀤𑀸𑀲𑀫𑀗𑁆𑀕𑀺𑀦𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀘𑁂𑀢𑀁. 𑀬𑀣𑀸 𑀲𑀼𑀔𑀬𑀦𑁆𑀢𑀁 𑀓𑀺𑀜𑁆𑀘𑀺 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀓𑁄𑀘𑀺 𑀳𑁂𑀢𑀼𑀓𑀢𑁆𑀢𑀸 𑀲𑀼𑀔𑀳𑁂𑀢𑀼𑀦𑀺𑀧𑁆𑀨𑀸𑀤𑀦𑁂𑀦 𑀲𑀼𑀔𑀸𑀧𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀁 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀧𑀼𑀕𑁆𑀕𑀮𑀁 𑀳𑁂𑀢𑀼𑀓𑀢𑁆𑀢𑀼𑀪𑀽𑀢𑁄 𑀲𑀗𑁆𑀖𑁄 𑀉𑀧𑀲𑀫𑁆𑀧𑀤𑀸𑀳𑁂𑀢𑀼𑀦𑀺𑀧𑁆𑀨𑀸𑀤𑀦𑁂𑀦 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑁄. 𑀏𑀢𑁂𑀦 𑀘 𑀲𑀼𑀔𑀁 𑀯𑀺𑀬 𑀲𑀼𑀔𑀤𑀸𑀬𑀓𑁂𑀦 𑀲𑀗𑁆𑀖𑁂𑀦 𑀧𑀼𑀕𑁆𑀕𑀮𑀲𑁆𑀲 𑀤𑀻𑀬𑀫𑀸𑀦𑀸 𑀢𑀣𑀸𑀧𑀯𑀢𑁆𑀢𑀧𑀭𑀫𑀢𑁆𑀣𑀥𑀫𑁆𑀫𑁂 𑀉𑀧𑀸𑀤𑀸𑀬 𑀅𑀭𑀺𑀬𑀚𑀦𑀧𑀜𑁆𑀜𑀢𑁆𑀢𑀸 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀲𑀫𑁆𑀫𑀼𑀢𑀺𑀲𑀘𑁆𑀘𑀢𑀸 𑀅𑀢𑁆𑀣𑀻𑀢𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀻’’𑀢𑀺 (𑀫𑀳𑀸𑀯. 𑁧𑁨𑁭) 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀯𑀸𑀲𑀸𑀤𑀻𑀲𑀼 𑀯𑀺𑀬 𑀬𑀸𑀘𑀦𑀸𑀦𑀼𑀕𑀼𑀡𑀁 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀁 𑀤𑀤𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀤𑀸𑀦𑁂 𑀅𑀲𑀗𑁆𑀕𑀳𑁂𑀢𑁆𑀯𑀸 𑀓𑀫𑁆𑀫𑀮𑀓𑁆𑀔𑀡𑁂 𑀏𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀉𑀧𑀲𑀫𑁆𑀧𑀦𑁆𑀦𑁄 𑀲𑀗𑁆𑀖𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀯𑀢𑁆𑀢𑀫𑀸𑀦𑀓𑀸𑀮𑀅𑀢𑀻𑀢𑀓𑀸𑀮𑀯𑀲𑁂𑀦, 𑀇𑀥 𑀧𑀦 𑀅𑀦𑀸𑀫𑀝𑁆𑀞𑀓𑀸𑀮𑀯𑀲𑁂𑀦𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀺𑀲𑁂𑀲𑁄.

𑀏𑀲𑀸 𑀜𑀢𑁆𑀢𑀻𑀢𑀺 ‘‘𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀜𑀸𑀧𑀦𑀸 𑀏𑀲𑀸. 𑀇𑀤𑀜𑁆𑀘 𑀅𑀦𑀼𑀲𑁆𑀲𑀸𑀯𑀦𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀲𑀽𑀘𑀦𑀢𑁆𑀣𑀁 𑀯𑀼𑀘𑁆𑀘𑀢𑀺. 𑀅𑀯𑀲𑁆𑀲𑀜𑁆𑀘𑁂𑀢𑀁 𑀯𑀢𑁆𑀢𑀩𑁆𑀩𑀫𑁂𑀯. 𑀜𑀢𑁆𑀢𑀺𑀓𑀫𑁆𑀫𑁂 𑀏𑀯 𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀧𑀦 𑀬𑁆𑀬-𑀓𑀸𑀭𑁂 𑀯𑀼𑀢𑁆𑀢𑀫𑀢𑁆𑀢𑁂 𑀏𑀯 𑀜𑀢𑁆𑀢𑀺𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀺. 𑀉𑀧𑀲𑀫𑁆𑀧𑀤𑀸𑀢𑀺 𑀲𑀗𑁆𑀖𑁂𑀦 𑀤𑀻𑀬𑀫𑀸𑀦𑀸 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀸 𑀉𑀧𑀲𑀫𑁆𑀧𑀤𑀸, 𑀬𑀲𑁆𑀲 𑀔𑀫𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀼𑀡𑁆𑀳𑀻𑀢𑀺 𑀘 𑀅𑀓𑀣𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀓𑀣𑀦𑀓𑁄 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀢𑀺 𑀧𑀓𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑀲𑁆𑀫𑀸 𑀢𑀼𑀡𑁆𑀳𑀻’’𑀢𑀺. 𑀢𑀢𑁆𑀣 ‘‘𑀆𑀲𑀻’’𑀢𑀺 𑀲𑁂𑀲𑁄. 𑀬𑀲𑁆𑀫𑀸 ‘‘𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀲𑀗𑁆𑀖𑁄 𑀢𑀼𑀡𑁆𑀳𑀻 𑀦𑀺𑀭𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀔𑀫𑀢𑀺 𑀲𑀗𑁆𑀖𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦. 𑀢𑀼𑀡𑁆𑀳𑀻𑀪𑀸𑀯𑁂𑀦𑁂𑀯𑁂𑀢𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀦𑀪𑀸𑀯𑀁 𑀥𑀸𑀭𑀬𑀸𑀫𑀺, 𑀩𑀼𑀚𑁆𑀛𑀸𑀫𑀺 𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁂 𑀓𑀢𑁄, 𑀲𑁄 𑀘 𑀓𑀫𑁆𑀫𑀯𑀸𑀘𑀸𑀬 𑀅𑀦𑀗𑁆𑀕𑀁, 𑀢𑀲𑁆𑀫𑀸 𑀅𑀦𑀼𑀲𑁆𑀲𑀸𑀯𑀓𑁂𑀦 ‘‘𑀥𑀸𑀭𑀬𑀸𑀫𑀻’’𑀢𑀺 𑀏𑀢𑁆𑀣 𑀫𑀺-𑀓𑀸𑀭𑀧𑀭𑀺𑀬𑁄𑀲𑀸𑀦𑀫𑁂𑀯 𑀯𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑀩𑁆𑀩𑀁, 𑀇𑀢𑀺-𑀲𑀤𑁆𑀤𑁄 𑀦 𑀧𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀓𑀫𑁆𑀫𑀯𑀸𑀘𑀸𑀦𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀧𑁄𑀭𑀺𑀲𑀸 𑀯𑀸𑀢𑀺𑀆𑀤𑀺 𑀲𑀢𑁆𑀢𑀸𑀦𑀁 𑀲𑀭𑀻𑀭𑀙𑀸𑀬𑀁 𑀧𑀸𑀤𑁂𑀳𑀺 𑀫𑀺𑀦𑀺𑀢𑁆𑀯𑀸 𑀚𑀸𑀦𑀦𑀧𑁆𑀧𑀓𑀸𑀭𑀤𑀲𑁆𑀲𑀦𑀁. 𑀙𑀲𑀢𑁆𑀢𑀧𑀤𑀧𑀭𑀺𑀫𑀺𑀢𑀸 𑀳𑀺 𑀙𑀸𑀬𑀸 ‘‘𑀧𑁄𑀭𑀺𑀲𑀸’’𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀜𑁆𑀘 𑀉𑀢𑀼𑀧𑁆𑀧𑀫𑀸𑀡𑀸𑀘𑀺𑀓𑁆𑀔𑀡𑀸𑀤𑀺 𑀘 𑀆𑀕𑀦𑁆𑀢𑀼𑀓𑁂𑀳𑀺 𑀲𑀤𑁆𑀥𑀺𑀁 𑀯𑀻𑀫𑀁𑀲𑀺𑀢𑁆𑀯𑀸 𑀯𑀼𑀟𑁆𑀠𑀦𑀯𑀪𑀸𑀯𑀁 𑀜𑀢𑁆𑀯𑀸 𑀯𑀦𑁆𑀤𑀦𑀯𑀦𑁆𑀤𑀸𑀧𑀦𑀸𑀤𑀺𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑀺 𑀆𑀕𑀘𑁆𑀙𑀢𑀺, 𑀕𑀘𑁆𑀙𑀢𑀺 𑀘𑀸𑀢𑀺 𑀉𑀢𑀼, 𑀲𑁄𑀯 𑀧𑀫𑀻𑀬𑀢𑁂 𑀅𑀦𑁂𑀦 𑀲𑀁𑀯𑀘𑁆𑀙𑀭𑀦𑁆𑀢𑀺 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀉𑀢𑀼𑀬𑁂𑀯 𑀉𑀢𑀼𑀧𑁆𑀧𑀫𑀸𑀡’’𑀦𑁆𑀢𑀺. 𑀅𑀧𑀭𑀺𑀧𑀼𑀡𑁆𑀡𑀸𑀢𑀺 𑀉𑀧𑀲𑀫𑁆𑀧𑀤𑀸𑀤𑀺𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀸. 𑀬𑀤𑀺 𑀉𑀢𑀼𑀯𑁂𑀫𑀚𑁆𑀛𑁂 𑀉𑀧𑀲𑀫𑁆𑀧𑀸𑀤𑀺𑀢𑁄, 𑀢𑀤𑀸 𑀢𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀅𑀯𑀲𑀺𑀝𑁆𑀞𑀤𑀺𑀯𑀲𑀸𑀘𑀺𑀓𑁆𑀔𑀡𑀁 𑀤𑀺𑀯𑀲𑀪𑀸𑀕𑀸𑀘𑀺𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀬𑀲𑁆𑀲 𑀬𑁄 𑀉𑀢𑀼 𑀅𑀧𑀭𑀺𑀧𑀼𑀡𑁆𑀡𑁄, 𑀢𑁂 𑀤𑀺𑀯𑀲𑁂’’𑀢𑀺. 𑀢𑀢𑁆𑀣 𑀬𑀲𑁆𑀲 𑀢𑀗𑁆𑀔𑀡𑀁 𑀮𑀤𑁆𑀥𑀽𑀧𑀲𑀫𑁆𑀧𑀤𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀩𑀦𑁆𑀥𑀻 𑀬𑁄 𑀉𑀢𑀼 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀅𑀧𑀭𑀺𑀧𑀼𑀡𑁆𑀡𑁄, 𑀢𑁂 𑀤𑀺𑀯𑀲𑁂𑀢𑀺 𑀬𑁄𑀚𑀦𑀸.

𑀙𑀸𑀬𑀸𑀤𑀺𑀓𑀫𑁂𑀯 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀺𑀢𑀩𑁆𑀩𑀢𑁄 𑀓𑀣𑁂𑀢𑀩𑁆𑀩𑀢𑁄 𑀲𑀗𑁆𑀕𑀻𑀢𑀻𑀢𑀺 𑀆𑀳 ‘‘𑀇𑀤𑀫𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀢𑁄 𑀓𑀢𑁆𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀢𑁆𑀯𑀁 𑀓𑀺𑀁 𑀮𑀪𑀲𑀻𑀢𑀺 𑀢𑁆𑀯𑀁 𑀉𑀧𑀲𑀫𑁆𑀧𑀸𑀤𑀦𑀓𑀸𑀮𑁂 𑀓𑀢𑀭𑀯𑀲𑁆𑀲𑀁, 𑀓𑀢𑀭𑀉𑀢𑀼𑀜𑁆𑀘 𑀮𑀪𑀲𑀺, 𑀓𑀢𑀭𑀲𑁆𑀫𑀺𑀁 𑀢𑁂 𑀉𑀧𑀲𑀫𑁆𑀧𑀤𑀸 𑀮𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀦𑁆𑀢𑀺 𑀯𑀲𑁆𑀲𑀸𑀦𑀉𑀢𑀼, 𑀇𑀤𑀜𑁆𑀘 𑀲𑀁𑀯𑀘𑁆𑀙𑀭𑀸𑀘𑀺𑀓𑁆𑀔𑀡𑀁 𑀯𑀺𑀦𑀸 𑀯𑀼𑀢𑁆𑀢𑀫𑁆𑀧𑀺 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀇𑀫𑀺𑀦𑀸 𑀉𑀢𑀼𑀆𑀘𑀺𑀓𑁆𑀔𑀡𑁂𑀦𑁂𑀯 𑀲𑀸𑀲𑀦𑀯𑀲𑁆𑀲𑁂𑀲𑀼 𑀯𑀸 𑀓𑀮𑀺𑀬𑀼𑀕𑀯𑀲𑁆𑀲𑀸𑀤𑀻𑀲𑀼 𑀯𑀸 𑀲𑀳𑀲𑁆𑀲𑀺𑀫𑁂 𑀯𑀸 𑀲𑀢𑀺𑀫𑁂 𑀯𑀸 𑀅𑀲𑀼𑀓𑀉𑀢𑀼𑀁 𑀮𑀪𑀸𑀫𑀻𑀢𑀺 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀸𑀬𑀸𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀆𑀕𑀢𑀧𑀝𑀺𑀧𑀸𑀝𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀢𑁆𑀢𑀩𑁆𑀩𑀓𑀫𑁆𑀫𑀢𑁄 𑀧𑀦 𑀓𑀮𑀺𑀬𑀼𑀕𑀯𑀲𑁆𑀲𑀸𑀤𑀻𑀲𑀼 𑀲𑀩𑁆𑀩𑀤𑁂𑀲𑀧𑀲𑀺𑀤𑁆𑀥𑁂𑀲𑀼 𑀅𑀲𑀼𑀓𑀯𑀲𑁆𑀲𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀓𑀡𑁆𑀳𑁂 𑀯𑀸 𑀲𑀼𑀓𑁆𑀓𑁂 𑀯𑀸 𑀧𑀓𑁆𑀔𑁂 𑀅𑀲𑀼𑀓𑁂 𑀢𑀺𑀣𑀺𑀯𑀸𑀭𑀯𑀺𑀲𑁂𑀲𑀬𑀼𑀢𑁆𑀢𑁂 𑀧𑀼𑀩𑁆𑀩𑀡𑁆𑀳𑀸𑀤𑀺𑀤𑀺𑀯𑀲𑀪𑀸𑀕𑁂 𑀏𑀢𑁆𑀢𑀓𑁂 𑀙𑀸𑀬𑀸𑀧𑀫𑀸𑀡𑁂, 𑀦𑀸𑀟𑀺𑀓𑀸𑀧𑀫𑀸𑀡𑁂 𑀯𑀸 𑀫𑀬𑀸 𑀉𑀧𑀲𑀫𑁆𑀧𑀤𑀸 𑀮𑀤𑁆𑀥𑀸𑀢𑀺 𑀯𑀤𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀇𑀤𑀁 𑀲𑀼𑀝𑁆𑀞𑀼 𑀉𑀕𑁆𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑁂𑀳𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀁 𑀜𑀢𑁆𑀯𑀸 𑀧𑀝𑀺𑀧𑀚𑁆𑀚𑀸𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀏𑀢𑁆𑀢𑀓𑁄 𑀓𑀣𑀸𑀫𑀕𑁆𑀕𑁄 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀆𑀕𑀢𑁄. 𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀦𑀬𑁄 𑀧𑀦 𑀏𑀓𑀘𑁆𑀘𑁄 𑀇𑀥𑁂𑀯 𑀲𑀗𑁆𑀕𑀳𑀁 𑀕𑀢𑁄, 𑀏𑀓𑀘𑁆𑀘𑁄 𑀅𑀲𑀦𑁆𑀦𑀺𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑀢𑁆𑀢𑀸 𑀲𑀁𑀲𑀬𑀳𑁂𑀢𑀼𑀓𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀥 𑀦 𑀕𑀳𑀺𑀢𑁄𑀢𑀺.

𑀇𑀢𑀺 𑀯𑀺𑀦𑀬𑀲𑀗𑁆𑀕𑀳𑀲𑀁𑀯𑀡𑁆𑀡𑀦𑀸𑀪𑀽𑀢𑁂 𑀯𑀺𑀦𑀬𑀸𑀮𑀗𑁆𑀓𑀸𑀭𑁂

𑀉𑀧𑀲𑀫𑁆𑀧𑀤𑀸𑀯𑀺𑀦𑀺𑀘𑁆𑀙𑀬𑀓𑀣𑀸𑀮𑀗𑁆𑀓𑀸𑀭𑁄.